ஶ்ரீமத்வால்மீகீய ராமாயணே பாலகாண்டம் ।
அத தஶமஸ்ஸர்கஃ ।
ஸுமந்த்ரஶ்சோதிதோ ராஜ்ஞா ப்ரோவாசேதம் வசஸ்ததா ।
யதர்ஶ்யஶ்ரு'ங்கஸ்த்வாநீத ஶ்ஶ்ருணு மே மந்த்ரிபிஸ்ஸஹ ॥ 1 ॥
ரோமபாதமுவாசேதம் ஸஹாமாத்யஃ புரோஹிதஃ ।
உபாயோ நிரபாயோऽயமஸ்மாபிரபிசிந்திதஃ ॥ 2 ॥
ரு'ஶ்யஶ்ரு'ங்கோ வநசரஸ்தபஸ்ஸ்வாத்யயநே ரதஃ ।
அநபிஜ்ஞஸ்ஸ நாரீணாம் விஷயாணாம் ஸுகஸ்ய ச ॥ 3 ॥
இந்த்ரியார்தைரபிமதைர்நரசித்தப்ரமாதிபிஃ ।
புரமாநாயயிஷ்யாமஃ க்ஷிப்ரம் சாத்யவஸீயதாம் ॥ 4 ॥
கணிகாஸ்தத்ர கச்சந்து ரூபவத்யஸ்ஸ்வலங்க்ரு'தாஃ ।
ப்ரலோப்ய விவிதோபாயைராநேஷ்யந்தீஹ ஸத்க்ரு'தாஃ ॥ 5 ॥
ஶ்ருத்வா ததேதி ராஜா ச ப்ரத்யுவாச புரோஹிதம் ।
புரோஹிதோ மந்த்ரிணஶ்ச ததா சக்ருஶ்ச தே ததா ॥ 6 ॥
வாரமுக்யாஶ்ச தச்ச்ருத்வா வநம் ப்ரவிவிஶுர்மஹத் ।
ஆஶ்ரமஸ்யாவிதூரேऽஸ்மிந் யத்நம் குர்வந்தி தர்ஶநே ॥ 7 ॥
ரு'ஷிபுத்ரஸ்ய தீரஸ்ய நித்யமாஶ்ரமவாஸிநஃ ।
பிதுஸ்ஸநித்யஸந்துஷ்டோ நாதிசக்ராம சாஶ்ரமாத் ॥ 8 ॥
ந தேந ஜந்மப்ரப்ரு'தி த்ரு'ஷ்டபூர்வம் தபஸ்விநா ।
ஸ்த்ரீ வா புமாந்வா யச்சாந்யத்ஸர்வம் நகரராஷ்ட்ரஜம் ॥ 9 ॥
ததஃ கதாசித்தம் தேஶமாஜகாம யத்ரு'ச்சயா ।
விபண்டகஸுதஸ்தத்ர தாஶ்சாபஶ்யத்வராங்கநாஃ ॥ 10 ॥
தாஶ்சித்ரவேஷாஃ ப்ரமதா காயந்த்யோ மதுரஸ்வராஃ ।
ரு'ஷிபுத்ரமுபாகம்ய ஸர்வா வசநமப்ருவந் ॥ 11 ॥
கஸ்த்வம் கிம் வர்தஸே ப்ரஹ்மந் ஜ்ஞாதுமிச்சாமஹே வயம் ।
ஏகஸ்த்வம் விஜநே கோரே வநே சரஸி ஶம்ஸ நஃ ॥ 12 ॥
அத்ரு'ஷ்டரூபாஸ்தாஸ்தேந காம்யரூபா வநே ஸ்த்ரியஃ ।
ஹார்தாத்தஸ்ய மதிர்ஜாதா வ்யாக்யாதும் பிதரம் ஸ்வகம் ॥ 13 ॥
பிதா விபண்டகோऽஸ்மாகம் தஸ்யாஹம் ஸுத ஔரஸஃ ।
ரு'ஶ்யஶ்ரு'ங்க இதி க்யாதம் நாம கர்ம ச மே புவி ॥ 14 ॥
இஹாஶ்ரமபதோऽஸ்மாகம் ஸமீபே ஶுபதர்ஶநாஃ ।
கரிஷ்யே வோऽத்ர பூஜாம் வை ஸர்வேஷாம் விதிபூர்வகம் ॥ 15 ॥
ரு'ஷிபுத்ரவசஶ்ஶ்ருத்வா ஸர்வாஸாம் மதிராஸ வை ।
ததாஶ்ரமபதம் த்ரஷ்டும் ஜக்முஸ்ஸர்வாஶ்ச தேந தாஃ ॥ 16 ॥
ஆகதாநாம் ததஃ பூஜாம்ரு'ஷிபுத்ரஶ்சகார ஹ ।
இதமர்க்யமிதம் பாத்யமிதம் மூலமிதம் பலம் ச நஃ ॥ 17 ॥
ப்ரதிக்ரு'ஹ்ய ச தாம் பூஜாம் ஸர்வா ஏவ ஸமுத்ஸுகாஃ ।
ரு'ஷேர்பீதாஶ்ச ஶீக்ரம் தா கமநாய மதிம் ததுஃ ॥ 18 ॥
அஸ்மாகமபி முக்யாநி பலாநீமாநி வை த்விஜ ।
க்ரு'ஹாண ப்ரதி பத்ரம் தே பக்ஷயஸ்வ ச மா சிரம் ॥ 19 ॥
ததஸ்தாஸ்தம் ஸமாலிங்க்ய ஸர்வா ஹர்ஷஸமந்விதாஃ ।
மோதகாந்ப்ரததுஸ்தஸ்மை பக்ஷ்யாம்ஶ்ச விவிதாந் பஹூந் ॥ 20 ॥
தாநி சாஸ்வாத்ய தேஜஸ்வீ பலாநீதி ஸ்ம மந்யதே ।
அநாஸ்வாதிதபூர்வாணி வநே நித்யநிவாஸிநாம் ॥ 21 ॥
ஆப்ரு'ச்ச்ய ச ததா விப்ரம் வ்ரதசர்யாம் நிவேத்ய ச ।
கச்சந்தி ஸ்மாபதேஶாத்தா பீதாஸ்தஸ்ய பிதுஸ்ஸ்த்ரியஃ ॥ 22 ॥
கதாஸு தாஸு ஸர்வாஸு காஶ்யபஸ்யாத்மஜோ த்விஜஃ ।
அஸ்வஸ்தஹ்ரு'தயஶ்சாஸீத்துஃகம் ஸ்ம பரிவர்ததே ॥ 23 ॥
ததோऽபரேத்யுஸ்தம் தேஶமாஜகாம ஸ வீர்யவாந் ।
மநோஜ்ஞா யத்ர தா த்ரு'ஷ்டா வாரமுக்யாஸ்ஸ்வலங்க்ரு'தாஃ ॥ 24 ॥
த்ரு'ஷ்ட்வைவ ச தாஸ்ததா விப்ரமாயாந்தம் ஹ்ரு'ஷ்டமாநஸாஃ ।
உபஸ்ரு'த்ய ததஸ்ஸர்வாஸ்தாஸ்தமூசுரிதம் வசஃ ॥ 25 ॥
ஏஹ்யாஶ்ரமபதம் ஸௌம்ய ஹ்யஸ்மாகமிதி சாப்ருவந் ।
தத்ராப்யேஷ விதிஶ்ஶ்ரீமாந் விஶேஷேண பவிஷ்யதி ॥ 26 ॥
ஶ்ருத்வா து வசநம் தாஸாம் ஸர்வாஸாம் ஹ்ரு'தயங்கமம் ।
கமநாய மதிம் சக்ரே தம் ச நிந்யுஸ்ததா ஸ்த்ரியஃ ॥ 27 ॥
தத்ர சாநீயமாநே து விப்ரே தஸ்மிந்மஹாத்மநி ।
வவர்ஷ ஸஹஸா தேவோ ஜகத்ப்ரஹ்லாதயம்ஸ்ததா ॥ 28 ॥
வர்ஷேணைவாகதம் விப்ரம் விஷயம் ஸ்வம் நராதிபஃ ।
ப்ரத்யுத்கம்ய முநிம் ப்ரஹ்வஶ்ஶிரஸா ச மஹீம் கதஃ ॥ 29 ॥
அர்க்யம் ச ப்ரததௌ தஸ்மை ந்யாயதஸ்ஸுஸமாஹிதஃ ।
வவ்ரே ப்ரஸாதம் விப்ரேந்த்ராந்மா விப்ரம் மந்யுராவிஶேத் ॥ 30 ॥
அந்தஃபுரம் ப்ரவிஶ்யாஸ்மை கந்யாம் தத்த்வா யதாவிதி ।
ஶாந்தாம் ஶாந்தேந மநஸா ராஜா ஹர்ஷமவாப ஸஃ ॥ 31 ॥
இத்யார்ஷே ஶ்ரீமத்ராமாயணே வால்மீகீய ஆதிகாவ்யே பாலகாண்டே தஶமஸ்ஸர்கஃ ॥
Roman (IAST) Transliteration
śrīmadvālmīkīya rāmāyaṇe bālakāṇḍam |
atha daśamassargaḥ |
sumantraścodito rājñā provācedaṃ vacastadā |
yatharśyaśṛṅgastvānīta śśruṇu me mantribhissaha || 1 ||
romapādamuvācedaṃ sahāmātyaḥ purohitaḥ |
upāyo nirapāyo'yamasmābhirabhicintitaḥ || 2 ||
ṛśyaśṛṅgo vanacarastapassvādhyayane rataḥ |
anabhijñassa nārīṇāṃ viṣayāṇāṃ sukhasya ca || 3 ||
indriyārthairabhimatairnaracittapramāthibhiḥ |
puramānāyayiṣyāmaḥ kṣipraṃ cādhyavasīyatām || 4 ||
gaṇikāstatra gacchantu rūpavatyassvalaṅkṛtāḥ |
pralobhya vividhopāyairāneṣyantīha satkṛtāḥ || 5 ||
śrutvā tatheti rājā ca pratyuvāca purohitam |
purohito mantriṇaśca tathā cakruśca te tadā || 6 ||
vāramukhyāśca tacchrutvā vanaṃ praviviśurmahat |
āśramasyāvidūre'smin yatnaṃ kurvanti darśane || 7 ||
ṛṣiputrasya dhīrasya nityamāśramavāsinaḥ |
pitussanityasantuṣṭo nāticakrāma cāśramāt || 8 ||
na tena janmaprabhṛti dṛṣṭapūrvaṃ tapasvinā |
strī vā pumānvā yaccānyatsarvaṃ nagararāṣṭrajam || 9 ||
tataḥ kadācittaṃ deśamājagāma yadṛcchayā |
vibhaṇḍakasutastatra tāścāpaśyadvarāṅganāḥ || 10 ||
tāścitraveṣāḥ pramadā gāyantyo madhurasvarāḥ |
ṛṣiputramupāgamya sarvā vacanamabruvan || 11 ||
kastvaṃ kiṃ vartase brahman jñātumicchāmahe vayam |
ekastvaṃ vijane ghore vane carasi śaṃsa naḥ || 12 ||
adṛṣṭarūpāstāstena kāmyarūpā vane striyaḥ |
hārdāttasya matirjātā vyākhyātuṃ pitaraṃ svakam || 13 ||
pitā vibhaṇḍako'smākaṃ tasyāhaṃ suta aurasaḥ |
ṛśyaśṛṅga iti khyātaṃ nāma karma ca me bhuvi || 14 ||
ihāśramapado'smākaṃ samīpe śubhadarśanāḥ |
kariṣye vo'tra pūjāṃ vai sarveṣāṃ vidhipūrvakam || 15 ||
ṛṣiputravacaśśrutvā sarvāsāṃ matirāsa vai |
tadāśramapadaṃ draṣṭuṃ jagmussarvāśca tena tāḥ || 16 ||
āgatānāṃ tataḥ pūjāmṛṣiputraścakāra ha |
idamarghyamidaṃ pādyamidaṃ mūlamidaṃ phalaṃ ca naḥ || 17 ||
pratigṛhya ca tāṃ pūjāṃ sarvā eva samutsukāḥ |
ṛṣerbhītāśca śīghraṃ tā gamanāya matiṃ dadhuḥ || 18 ||
asmākamapi mukhyāni phalānīmāni vai dvija |
gṛhāṇa prati bhadraṃ te bhakṣayasva ca mā ciram || 19 ||
tatastāstaṃ samāliṅgya sarvā harṣasamanvitāḥ |
modakānpradadustasmai bhakṣyāṃśca vividhān bahūn || 20 ||
tāni cāsvādya tejasvī phalānīti sma manyate |
anāsvāditapūrvāṇi vane nityanivāsinām || 21 ||
āpṛcchya ca tadā vipraṃ vratacaryāṃ nivedya ca |
gacchanti smāpadeśāttā bhītāstasya pitusstriyaḥ || 22 ||
gatāsu tāsu sarvāsu kāśyapasyātmajo dvijaḥ |
asvasthahṛdayaścāsīdduḥkhaṃ sma parivartate || 23 ||
tato'paredyustaṃ deśamājagāma sa vīryavān |
manojñā yatra tā dṛṣṭā vāramukhyāssvalaṅkṛtāḥ || 24 ||
dṛṣṭvaiva ca tāstadā vipramāyāntaṃ hṛṣṭamānasāḥ |
upasṛtya tatassarvāstāstamūcuridaṃ vacaḥ || 25 ||
ehyāśramapadaṃ saumya hyasmākamiti cābruvan |
tatrāpyeṣa vidhiśśrīmān viśeṣeṇa bhaviṣyati || 26 ||
śrutvā tu vacanaṃ tāsāṃ sarvāsāṃ hṛdayaṅgamam |
gamanāya matiṃ cakre taṃ ca ninyustadā striyaḥ || 27 ||
tatra cānīyamāne tu vipre tasminmahātmani |
vavarṣa sahasā devo jagatprahlādayaṃstadā || 28 ||
varṣeṇaivāgataṃ vipraṃ viṣayaṃ svaṃ narādhipaḥ |
pratyudgamya muniṃ prahvaśśirasā ca mahīṃ gataḥ || 29 ||
arghyaṃ ca pradadau tasmai nyāyatassusamāhitaḥ |
vavre prasādaṃ viprendrānmā vipraṃ manyurāviśet || 30 ||
antaḥpuraṃ praviśyāsmai kanyāṃ dattvā yathāvidhi |
śāntāṃ śāntena manasā rājā harṣamavāpa saḥ || 31 ||
ityārṣe śrīmadrāmāyaṇe vālmīkīya ādikāvye bālakāṇḍe daśamassargaḥ ||
Sanskrit — Devanagari (original)
श्रीमद्वाल्मीकीय रामायणे बालकाण्डम् ।
अथ दशमस्सर्गः ।
सुमन्त्रश्चोदितो राज्ञा प्रोवाचेदं वचस्तदा ।
यथर्श्यशृङ्गस्त्वानीत श्श्रुणु मे मन्त्रिभिस्सह ॥ 1 ॥
रोमपादमुवाचेदं सहामात्यः पुरोहितः ।
उपायो निरपायोऽयमस्माभिरभिचिन्तितः ॥ 2 ॥
ऋश्यशृङ्गो वनचरस्तपस्स्वाध्ययने रतः ।
अनभिज्ञस्स नारीणां विषयाणां सुखस्य च ॥ 3 ॥
इन्द्रियार्थैरभिमतैर्नरचित्तप्रमाथिभिः ।
पुरमानाययिष्यामः क्षिप्रं चाध्यवसीयताम् ॥ 4 ॥
गणिकास्तत्र गच्छन्तु रूपवत्यस्स्वलङ्कृताः ।
प्रलोभ्य विविधोपायैरानेष्यन्तीह सत्कृताः ॥ 5 ॥
श्रुत्वा तथेति राजा च प्रत्युवाच पुरोहितम् ।
पुरोहितो मन्त्रिणश्च तथा चक्रुश्च ते तदा ॥ 6 ॥
वारमुख्याश्च तच्छ्रुत्वा वनं प्रविविशुर्महत् ।
आश्रमस्याविदूरेऽस्मिन् यत्नं कुर्वन्ति दर्शने ॥ 7 ॥
ऋषिपुत्रस्य धीरस्य नित्यमाश्रमवासिनः ।
पितुस्सनित्यसन्तुष्टो नातिचक्राम चाश्रमात् ॥ 8 ॥
न तेन जन्मप्रभृति दृष्टपूर्वं तपस्विना ।
स्त्री वा पुमान्वा यच्चान्यत्सर्वं नगरराष्ट्रजम् ॥ 9 ॥
ततः कदाचित्तं देशमाजगाम यदृच्छया ।
विभण्डकसुतस्तत्र ताश्चापश्यद्वराङ्गनाः ॥ 10 ॥
ताश्चित्रवेषाः प्रमदा गायन्त्यो मधुरस्वराः ।
ऋषिपुत्रमुपागम्य सर्वा वचनमब्रुवन् ॥ 11 ॥
कस्त्वं किं वर्तसे ब्रह्मन् ज्ञातुमिच्छामहे वयम् ।
एकस्त्वं विजने घोरे वने चरसि शंस नः ॥ 12 ॥
अदृष्टरूपास्तास्तेन काम्यरूपा वने स्त्रियः ।
हार्दात्तस्य मतिर्जाता व्याख्यातुं पितरं स्वकम् ॥ 13 ॥
पिता विभण्डकोऽस्माकं तस्याहं सुत औरसः ।
ऋश्यशृङ्ग इति ख्यातं नाम कर्म च मे भुवि ॥ 14 ॥
इहाश्रमपदोऽस्माकं समीपे शुभदर्शनाः ।
करिष्ये वोऽत्र पूजां वै सर्वेषां विधिपूर्वकम् ॥ 15 ॥
ऋषिपुत्रवचश्श्रुत्वा सर्वासां मतिरास वै ।
तदाश्रमपदं द्रष्टुं जग्मुस्सर्वाश्च तेन ताः ॥ 16 ॥
आगतानां ततः पूजामृषिपुत्रश्चकार ह ।
इदमर्घ्यमिदं पाद्यमिदं मूलमिदं फलं च नः ॥ 17 ॥
प्रतिगृह्य च तां पूजां सर्वा एव समुत्सुकाः ।
ऋषेर्भीताश्च शीघ्रं ता गमनाय मतिं दधुः ॥ 18 ॥
अस्माकमपि मुख्यानि फलानीमानि वै द्विज ।
गृहाण प्रति भद्रं ते भक्षयस्व च मा चिरम् ॥ 19 ॥
ततस्तास्तं समालिङ्ग्य सर्वा हर्षसमन्विताः ।
मोदकान्प्रददुस्तस्मै भक्ष्यांश्च विविधान् बहून् ॥ 20 ॥
तानि चास्वाद्य तेजस्वी फलानीति स्म मन्यते ।
अनास्वादितपूर्वाणि वने नित्यनिवासिनाम् ॥ 21 ॥
आपृच्छ्य च तदा विप्रं व्रतचर्यां निवेद्य च ।
गच्छन्ति स्मापदेशात्ता भीतास्तस्य पितुस्स्त्रियः ॥ 22 ॥
गतासु तासु सर्वासु काश्यपस्यात्मजो द्विजः ।
अस्वस्थहृदयश्चासीद्दुःखं स्म परिवर्तते ॥ 23 ॥
ततोऽपरेद्युस्तं देशमाजगाम स वीर्यवान् ।
मनोज्ञा यत्र ता दृष्टा वारमुख्यास्स्वलङ्कृताः ॥ 24 ॥
दृष्ट्वैव च तास्तदा विप्रमायान्तं हृष्टमानसाः ।
उपसृत्य ततस्सर्वास्तास्तमूचुरिदं वचः ॥ 25 ॥
एह्याश्रमपदं सौम्य ह्यस्माकमिति चाब्रुवन् ।
तत्राप्येष विधिश्श्रीमान् विशेषेण भविष्यति ॥ 26 ॥
श्रुत्वा तु वचनं तासां सर्वासां हृदयङ्गमम् ।
गमनाय मतिं चक्रे तं च निन्युस्तदा स्त्रियः ॥ 27 ॥
तत्र चानीयमाने तु विप्रे तस्मिन्महात्मनि ।
ववर्ष सहसा देवो जगत्प्रह्लादयंस्तदा ॥ 28 ॥
वर्षेणैवागतं विप्रं विषयं स्वं नराधिपः ।
प्रत्युद्गम्य मुनिं प्रह्वश्शिरसा च महीं गतः ॥ 29 ॥
अर्घ्यं च प्रददौ तस्मै न्यायतस्सुसमाहितः ।
वव्रे प्रसादं विप्रेन्द्रान्मा विप्रं मन्युराविशेत् ॥ 30 ॥
अन्तःपुरं प्रविश्यास्मै कन्यां दत्त्वा यथाविधि ।
शान्तां शान्तेन मनसा राजा हर्षमवाप सः ॥ 31 ॥
इत्यार्षे श्रीमद्रामायणे वाल्मीकीय आदिकाव्ये बालकाण्डे दशमस्सर्गः ॥
śrīmadvālmīkīya rāmāyaṇe bālakāṇḍam |
atha daśamassargaḥ |
sumantraścodito rājñā provācedaṃ vacastadā |
yatharśyaśṛṅgastvānīta śśruṇu me mantribhissaha || 1 ||
romapādamuvācedaṃ sahāmātyaḥ purohitaḥ |
upāyo nirapāyo'yamasmābhirabhicintitaḥ || 2 ||
ṛśyaśṛṅgo vanacarastapassvādhyayane rataḥ |
anabhijñassa nārīṇāṃ viṣayāṇāṃ sukhasya ca || 3 ||
indriyārthairabhimatairnaracittapramāthibhiḥ |
puramānāyayiṣyāmaḥ kṣipraṃ cādhyavasīyatām || 4 ||
gaṇikāstatra gacchantu rūpavatyassvalaṅkṛtāḥ |
pralobhya vividhopāyairāneṣyantīha satkṛtāḥ || 5 ||
śrutvā tatheti rājā ca pratyuvāca purohitam |
purohito mantriṇaśca tathā cakruśca te tadā || 6 ||
vāramukhyāśca tacchrutvā vanaṃ praviviśurmahat |
āśramasyāvidūre'smin yatnaṃ kurvanti darśane || 7 ||
ṛṣiputrasya dhīrasya nityamāśramavāsinaḥ |
pitussanityasantuṣṭo nāticakrāma cāśramāt || 8 ||
na tena janmaprabhṛti dṛṣṭapūrvaṃ tapasvinā |
strī vā pumānvā yaccānyatsarvaṃ nagararāṣṭrajam || 9 ||
tataḥ kadācittaṃ deśamājagāma yadṛcchayā |
vibhaṇḍakasutastatra tāścāpaśyadvarāṅganāḥ || 10 ||
tāścitraveṣāḥ pramadā gāyantyo madhurasvarāḥ |
ṛṣiputramupāgamya sarvā vacanamabruvan || 11 ||
kastvaṃ kiṃ vartase brahman jñātumicchāmahe vayam |
ekastvaṃ vijane ghore vane carasi śaṃsa naḥ || 12 ||
adṛṣṭarūpāstāstena kāmyarūpā vane striyaḥ |
hārdāttasya matirjātā vyākhyātuṃ pitaraṃ svakam || 13 ||
pitā vibhaṇḍako'smākaṃ tasyāhaṃ suta aurasaḥ |
ṛśyaśṛṅga iti khyātaṃ nāma karma ca me bhuvi || 14 ||
ihāśramapado'smākaṃ samīpe śubhadarśanāḥ |
kariṣye vo'tra pūjāṃ vai sarveṣāṃ vidhipūrvakam || 15 ||
ṛṣiputravacaśśrutvā sarvāsāṃ matirāsa vai |
tadāśramapadaṃ draṣṭuṃ jagmussarvāśca tena tāḥ || 16 ||
āgatānāṃ tataḥ pūjāmṛṣiputraścakāra ha |
idamarghyamidaṃ pādyamidaṃ mūlamidaṃ phalaṃ ca naḥ || 17 ||
pratigṛhya ca tāṃ pūjāṃ sarvā eva samutsukāḥ |
ṛṣerbhītāśca śīghraṃ tā gamanāya matiṃ dadhuḥ || 18 ||
asmākamapi mukhyāni phalānīmāni vai dvija |
gṛhāṇa prati bhadraṃ te bhakṣayasva ca mā ciram || 19 ||
tatastāstaṃ samāliṅgya sarvā harṣasamanvitāḥ |
modakānpradadustasmai bhakṣyāṃśca vividhān bahūn || 20 ||
tāni cāsvādya tejasvī phalānīti sma manyate |
anāsvāditapūrvāṇi vane nityanivāsinām || 21 ||
āpṛcchya ca tadā vipraṃ vratacaryāṃ nivedya ca |
gacchanti smāpadeśāttā bhītāstasya pitusstriyaḥ || 22 ||
gatāsu tāsu sarvāsu kāśyapasyātmajo dvijaḥ |
asvasthahṛdayaścāsīdduḥkhaṃ sma parivartate || 23 ||
tato'paredyustaṃ deśamājagāma sa vīryavān |
manojñā yatra tā dṛṣṭā vāramukhyāssvalaṅkṛtāḥ || 24 ||
dṛṣṭvaiva ca tāstadā vipramāyāntaṃ hṛṣṭamānasāḥ |
upasṛtya tatassarvāstāstamūcuridaṃ vacaḥ || 25 ||
ehyāśramapadaṃ saumya hyasmākamiti cābruvan |
tatrāpyeṣa vidhiśśrīmān viśeṣeṇa bhaviṣyati || 26 ||
śrutvā tu vacanaṃ tāsāṃ sarvāsāṃ hṛdayaṅgamam |
gamanāya matiṃ cakre taṃ ca ninyustadā striyaḥ || 27 ||
tatra cānīyamāne tu vipre tasminmahātmani |
vavarṣa sahasā devo jagatprahlādayaṃstadā || 28 ||
varṣeṇaivāgataṃ vipraṃ viṣayaṃ svaṃ narādhipaḥ |
pratyudgamya muniṃ prahvaśśirasā ca mahīṃ gataḥ || 29 ||
arghyaṃ ca pradadau tasmai nyāyatassusamāhitaḥ |
vavre prasādaṃ viprendrānmā vipraṃ manyurāviśet || 30 ||
antaḥpuraṃ praviśyāsmai kanyāṃ dattvā yathāvidhi |
śāntāṃ śāntena manasā rājā harṣamavāpa saḥ || 31 ||
ityārṣe śrīmadrāmāyaṇe vālmīkīya ādikāvye bālakāṇḍe daśamassargaḥ ||
🕉️ This is the original Sanskrit rendered in Tamil script.
Pronunciation is identical to the Sanskrit Devanagari version.