1.2 - Apa Undantu Jivase - Krishna Yajurveda Taittiriya Samhita Pathah — Telugu Script

కృష్ణ యజుర్వేదీయ తైత్తిరీయ సంహితాయా-మ్ప్రథమకాణ్డే ద్వితీయః ప్రశ్నః - అగ్నిష్టోమే క్రయః

ఓ-న్నమః పరమాత్మనే, శ్రీ మహాగణపతయే నమః,

శ్రీ గురుభ్యో నమః । హ॒రిః॒ ఓమ్ ॥

ఆప॑ ఉన్దన్తు జీ॒వసే॑ దీర్ఘాయు॒త్వాయ॒ వర్చ॑స॒ ఓష॑ధే॒ త్రాయ॑స్వైన॒గ్గ్॒ స్వధి॑తే॒ మైనగ్ం॑ హిగ్ంసీ-ర్దేవ॒శ్రూరే॒తాని॒ ప్ర వ॑పే స్వ॒స్త్యుత్త॑రాణ్యశీ॒యాపో॑ అ॒స్మా-న్మా॒తరః॑ శున్ధన్తు ఘృ॒తేన॑ నో ఘృత॒పువః॑ పునన్తు॒ విశ్వ॑మ॒స్మ-త్ప్ర వ॑హన్తు రి॒ప్రముదా᳚భ్య॒-శ్శుచి॒రా పూ॒త ఏ॑మి॒ సోమ॑స్య త॒నూర॑సి త॒నువ॑-మ్మే పాహి మహీ॒నా-మ్పయో॑-ఽసి వర్చో॒ధా అ॑సి॒ వర్చో॒- [వర్చః॑, మయి॑ ధేహి వృ॒త్రస్య॑] 1

మయి॑ ధేహి వృ॒త్రస్య॑ క॒నీని॑కా-ఽసి చక్షు॒ష్పా అ॑సి॒ చక్షు॑ర్మే పాహి చి॒త్పతి॑స్త్వా పునాతు వా॒క్పతి॑స్త్వా పునాతు దే॒వస్త్వా॑ సవి॒తా పు॑నా॒త్వచ్ఛి॑ద్రేణ ప॒విత్రే॑ణ॒ వసో॒-స్సూర్య॑స్య ర॒శ్మిభి॒స్తస్య॑ తే పవిత్రపతే ప॒విత్రే॑ణ॒ యస్మై॒ క-మ్పు॒నే తచ్ఛ॑కేయ॒మా వో॑ దేవాస ఈమహే॒ సత్య॑ధర్మాణో అద్ధ్వ॒రే యద్వో॑ దేవాస ఆగు॒రే యజ్ఞి॑యాసో॒ హవా॑మహ॒ ఇన్ద్రా᳚గ్నీ॒ ద్యావా॑పృథివీ॒ ఆప॑ ఓషధీ॒ స్త్వ-న్దీ॒క్షాణా॒-మధి॑పతిరసీ॒హ మా॒ సన్త॑-మ్పాహి ॥ 2 ॥

(వర్చ॑ - ఓషధీ- ర॒ష్టౌ చ॑ ) (అ. 1)

ఆకూ᳚త్యై ప్ర॒యుజే॒-ఽగ్నయే॒ స్వాహా॑ మే॒ధాయై॒ మన॑సే॒ ఽగ్నయే॒ స్వాహా॑ దీ॒క్షాయై॒ తప॑సే॒-ఽగ్నయే॒ స్వాహా॒ సర॑స్వత్యై పూ॒ష్ణే᳚-ఽగ్నయే॒ స్వాహా-ఽఽపో॑ దేవీ-ర్బృహతీ-ర్విశ్వశమ్భువో॒ ద్యావా॑పృథి॒వీ ఉ॒ర్వ॑న్తరి॑క్ష॒-మ్బృహ॒స్పతి॑ర్నో హ॒విషా॑ వృధాతు॒ స్వాహా॒ విశ్వే॑ దే॒వస్య॑ నే॒తుర్మర్తో॑ వృణీత స॒ఖ్యం-విఁశ్వే॑ రా॒య ఇ॑షుద్ధ్యసి ద్యు॒మ్నం-వృఁ॑ణీత పు॒ష్యసే॒ స్వాహ॑ర్ఖ్సా॒మయో॒-శ్శిల్పే᳚ స్థ॒స్తే వా॒మా ర॑భే॒ తే మా॑- [తే మా᳚, పా॒త॒మా-ఽస్య] 3

పాత॒మా-ఽస్య య॒జ్ఞస్యో॒దృచ॑ ఇ॒మా-న్ధియ॒గ్ం॒ శిక్ష॑మాణస్య దేవ॒ క్రతు॒-న్దక్షం॑-వఁరుణ॒ సగ్ం శి॑శాధి॒ యయా-ఽతి॒ విశ్వా॑ దురి॒తా తరే॑మ సు॒తర్మా॑ణ॒మధి॒ నావగ్ం॑ రుహే॒మోర్గ॑స్యాఙ్గిర॒స్యూర్ణ॑మ్రదా॒ ఊర్జ॑-మ్మే యచ్ఛ పా॒హి మా॒ మా మా॑ హిగ్ంసీ॒-ర్విష్ణో॒-శ్శర్మా॑సి॒ శర్మ॒ యజ॑మానస్య॒ శర్మ॑ మే యచ్ఛ॒ నక్ష॑త్రాణా-మ్మా-ఽతీకా॒శా-త్పా॒హీన్ద్ర॑స్య॒ యోని॑రసి॒- [యోని॑రసి, మా మా॑ హిగ్ంసీః] 4

మా మా॑ హిగ్ంసీః కృ॒ష్యై త్వా॑ సుస॒స్యాయై॑ సుపిప్ప॒లాభ్య॒-స్త్వౌష॑ధీభ్య-స్సూప॒స్థా దే॒వో వన॒స్పతి॑రూ॒ర్ధ్వో మా॑ పా॒హ్యోదృచ॒-స్స్వాహా॑ య॒జ్ఞ-మ్మన॑సా॒ స్వాహా॒ ద్యావా॑పృథి॒వీభ్యా॒గ్॒ స్వాహో॒రో-ర॒న్తరి॑క్షా॒-థ్స్వాహా॑ య॒జ్ఞం-వాఁతా॒దా ర॑భే ॥ 5 ॥

( మా॒ - యోని॑రసి - త్రి॒గ్ం॒శచ్చ॑ ) (అ. 2)

దైవీ॒-న్ధియ॑-మ్మనామహే సుమృడీ॒కా-మ॒భిష్ట॑యే వర్చో॒ధాం-యఁ॒జ్ఞవా॑హసగ్ం సుపా॒రా నో॑ అస॒-ద్వశే᳚ । యే దే॒వా మనో॑జాతా మనో॒యుజః॑ సు॒దక్షా॒ దక్ష॑పితార॒స్తే నః॑ పాన్తు॒ తే నో॑-ఽవన్తు॒ తేభ్యో॒ నమ॒స్తేభ్య॒-స్స్వాహా-ఽగ్నే॒ త్వగ్ం సు జా॑గృహి వ॒యగ్ం సు మ॑న్దిషీమహి గోపా॒య నః॑ స్వ॒స్తయే᳚ ప్ర॒బుధే॑ నః॒ పున॑ర్దదః । త్వమ॑గ్నే వ్రత॒పా అ॑సి దే॒వ ఆ మర్త్యే॒ష్వా । త్వం- [త్వమ్, య॒జ్ఞేష్వీడ్యః॑ ।] 6

య॒జ్ఞేష్వీడ్యః॑ ॥ విశ్వే॑ దే॒వా అ॒భి మామా-ఽవ॑వృత్ర-న్పూ॒షా స॒న్యా సోమో॒ రాధ॑సా దే॒వ-స్స॑వి॒తా వసో᳚ర్వసు॒దావా॒ రాస్వేయ॑-థ్సో॒మా ఽఽభూయో॑ భర॒ మా పృ॒ణ-న్పూ॒ర్త్యా వి రా॑ధి॒ మా-ఽహమాయు॑షా చ॒న్ద్రమ॑సి॒ మమ॒ భోగా॑య భవ॒ వస్త్ర॑మసి॒ మమ॒ భోగా॑య భవో॒స్రా-ఽసి॒ మమ॒ భోగా॑య భవ॒ హయో॑-ఽసి॒ మమ॒ భోగా॑య భవ॒- [భోగా॑య భవ, ఛాగో॑-ఽసి॒ మమ॒] 7

ఛాగో॑-ఽసి॒ మమ॒ భోగా॑య భవ మే॒షో॑-ఽసి॒ మమ॒ భోగా॑య భవ వా॒యవే᳚ త్వా॒ వరు॑ణాయ త్వా॒ నిర్-ఋ॑త్యై త్వా రు॒ద్రాయ॑ త్వా॒ దేవీ॑రాపో అపా-న్నపా॒ద్య ఊ॒ర్మిర్-హ॑వి॒ష్య॑ ఇన్ద్రి॒యావా᳚-న్మ॒దిన్త॑మ॒స్తం-వోఁ॒ మా-ఽవ॑ క్రమిష॒మచ్ఛి॑న్న॒-న్తన్తు॑-మ్పృథి॒వ్యా అను॑ గేష-మ్భ॒ద్రాద॒భి శ్రేయః॒ ప్రేహి॒ బృహ॒స్పతిః॑ పురఏ॒తా తే॑ అ॒స్త్వథే॒మవ॑ స్య॒ వర॒ ఆ పృ॑థి॒వ్యా ఆ॒రే శత్రూ᳚న్ కృణుహి॒ సర్వ॑వీర॒ ఏదమ॑గన్మ దేవ॒యజ॑న-మ్పృథి॒వ్యా విశ్వే॑ దే॒వా యదజు॑షన్త॒ పూర్వ॑ ఋఖ్సా॒మాభ్యాం॒-యఁజు॑షా స॒న్తర॑న్తో రా॒యస్పోషే॑ణ॒ సమి॒షా మ॑దేమ ॥ 8 ॥

( ఆ త్వగ్ం-హయో॑-ఽసి॒ మమ॒ భోగా॑య భవ-స్య॒-పఞ్చ॑విగ్ంశతిశ్చ ) (అ. 3)

ఇ॒య-న్తే॑ శుక్ర త॒నూరి॒దం-వఁర్చ॒స్తయా॒ స-మ్భ॑వ॒ భ్రాజ॑-ఙ్గచ్ఛ॒ జూర॑సి ధృ॒తా మన॑సా॒ జుష్టా॒ విష్ణ॑వే॒ తస్యా᳚స్తే స॒త్యస॑వసః ప్రస॒వే వా॒చో య॒న్త్రమ॑శీయ॒ స్వాహా॑ శు॒క్రమ॑స్య॒మృత॑మసి వైశ్వదే॒వగ్ం హ॒వి-స్సూర్య॑స్య॒ చక్షు॒రా -ఽరు॑హమ॒గ్నే ర॒క్ష్ణః క॒నీని॑కాం॒-యఁదేత॑శేభి॒రీయ॑సే॒ భ్రాజ॑మానో విప॒శ్చితా॒ చిద॑సి మ॒నా-ఽసి॒ ధీర॑సి॒ దక్షి॑ణా- [దక్షి॑ణా, అ॒సి॒ య॒జ్ఞియా॑-ఽసి] 9

-ఽసి య॒జ్ఞియా॑-ఽసి క్ష॒త్రియా॒ ఽస్యది॑తి-రస్యుభ॒యత॑॑శ్శీర్ష్ణీ॒ సా న॒-స్సుప్రా॑చీ॒ సుప్ర॑తీచీ॒ స-మ్భ॑వ మి॒త్రస్త్వా॑ ప॒ది బ॑ద్ధ్నాతు పూ॒షా-ఽద్ధ్వ॑నః పా॒త్విన్ద్రా॒యా-ద్ధ్య॑క్షా॒యాను॑ త్వా మా॒తా మ॑న్యతా॒మను॑ పి॒తా-ఽను॒ భ్రాతా॒ సగ॒ర్భ్యో-ఽను॒ సఖా॒ సయూ᳚థ్య॒-స్సా దే॑వి దే॒వమచ్ఛే॒హీన్ద్రా॑య॒ సోమగ్ం॑ రు॒ద్రస్త్వా ఽఽవ॑ర్తయతు మి॒త్రస్య॑ ప॒థా స్వ॒స్తి సోమ॑సఖా॒ పున॒రేహి॑ స॒హ ర॒య్యా ॥ 10 ॥

( దక్షి॑ణా॒-సోమ॑సఖా॒, పఞ్చ॑ చ ) (అ. 4)

వస్వ్య॑సి రు॒ద్రా-ఽస్యది॑తి-రస్యాది॒త్యా-ఽసి॑ శు॒క్రా-ఽసి॑ చ॒న్ద్రా-ఽసి॒ బృహ॒స్పతి॑స్త్వా సు॒మ్నే ర॑ణ్వతు రు॒ద్రో వసు॑భి॒రా చి॑కేతు పృథి॒వ్యాస్త్వా॑ మూ॒ర్ధన్నా జి॑ఘర్మి దేవ॒యజ॑న॒ ఇడా॑యాః ప॒దే ఘృ॒తవ॑తి॒ స్వాహా॒ పరి॑లిఖిత॒గ్ం॒ రక్షః॒ పరి॑లిఖితా॒ అరా॑తయ ఇ॒దమ॒హగ్ం రక్ష॑సో గ్రీ॒వా అపి॑ కృన్తామి॒ యో᳚-ఽస్మా-న్ద్వేష్టి॒ య-ఞ్చ॑ వ॒య-న్ద్వి॒ష్మ ఇ॒దమ॑స్య గ్రీ॒వా [గ్రీ॒వాః, అపి॑ కృన్తామ్య॒స్మే] 11

అపి॑ కృన్తామ్య॒స్మే రాయ॒స్త్వే రాయ॒స్తోతే॒ రాయ॒-స్స-న్దే॑వి దే॒వ్యోర్వశ్యా॑ పశ్యస్వ॒ త్వష్టీ॑మతీ తే సపేయ సు॒రేతా॒ రేతో॒ దధా॑నా వీ॒రం-విఁ॑దేయ॒ తవ॑ స॒న్దృశి॒ మా-ఽహగ్ంరా॒యస్పోషే॑ణ॒ వి యో॑షమ్ ॥ 12 ॥

( అ॒స్య॒ గ్రీ॒వా-ఏకా॒న్న త్రి॒గ్ం॒శచ్చ॑ ) (అ. 5)

అ॒గ్ం॒శునా॑ తే అ॒గ్ం॒శుః పృ॑చ్యతా॒-మ్పరు॑షా॒ పరు॑-ర్గ॒న్ధస్తే॒ కామ॑మవతు॒ మదా॑య॒ రసో॒ అచ్యు॑తో॒ ఽమాత్యో॑-ఽసి శు॒క్రస్తే॒ గ్రహో॒-ఽభి త్య-న్దే॒వగ్ం స॑వి॒తార॑మూ॒ణ్యోః᳚ క॒విక్ర॑తు॒మర్చా॑మి స॒త్యస॑వసగ్ం రత్న॒ధామ॒భి ప్రి॒య-మ్మ॒తిమూ॒ర్ధ్వా యస్యా॒మతి॒ర్భా అది॑ద్యుత॒-థ్సవీ॑మని॒ హిర॑ణ్యపాణిరమిమీత సు॒క్రతుః॑ కృ॒పా సువః॑ । ప్ర॒జాభ్య॑స్త్వా ప్రా॒ణాయ॑ త్వా వ్యా॒నాయ॑ త్వా ప్ర॒జాస్త్వమను॒ ప్రాణి॑హి ప్ర॒జాస్త్వామను॒ ప్రాణ॑న్తు ॥ 13 ॥

(అను॑-స॒ప్త చ॑) (అ. 6)

సోమ॑-న్తే క్రీణా॒మ్యూర్జ॑స్వన్త॒-మ్పయ॑స్వన్తం-వీఁ॒ర్యా॑వన్తమభి-మాతి॒షాహగ్ం॑ శు॒క్ర-న్తే॑ శు॒క్రేణ॑ క్రీణామి చ॒న్ద్ర-ఞ్చ॒న్ద్రేణా॒మృత॑మ॒మృతే॑న స॒మ్యత్తే॒ గోర॒స్మే చ॒న్ద్రాణి॒ తప॑సస్త॒నూర॑సి ప్ర॒జాప॑తే॒-ర్వర్ణ॒స్తస్యా᳚స్తే సహస్రపో॒ష-మ్పుష్య॑న్త్యాశ్చర॒మేణ॑ ప॒శునా᳚ క్రీణామ్య॒స్మే తే॒ బన్ధు॒ర్మయి॑ తే॒ రాయః॑ శ్రయన్తామ॒స్మే జ్యోతిః॑ సోమవిక్ర॒యిణి॒ తమో॑ మి॒త్రో న॒ ఏహి॒ సుమి॑త్రధా॒ ఇన్ద్ర॑స్యో॒రు మా వి॑శ॒ దక్షి॑ణ-ము॒శన్ను॒శన్తగ్గ్॑ స్యో॒న-స్స్యో॒నగ్గ్ స్వాన॒ భ్రాజాఙ్ఘా॑రే॒ బమ్భా॑రే॒ హస్త॒ సుహ॑స్త॒ కృశా॑నవే॒తే వః॑ సోమ॒ క్రయ॑ణా॒స్తా-న్ర॑క్షద్ధ్వ॒-మ్మా వో॑ దభన్న్ ॥ 14 ॥

(ఉ॒రుం-ద్వావిగ్ం॑శతిశ్చ) (అ. 7)

ఉదాయు॑షా స్వా॒యుషోదోష॑ధీనా॒గ్ం॒ రసే॒నో-త్ప॒ర్జన్య॑స్య॒ శుష్మే॒ణోద॑స్థామ॒మృతా॒గ్ం॒ అను॑ । ఉ॒ర్వ॑న్తరి॑క్ష॒మన్వి॒హ్యది॑త్యా॒-స్సదో॒-ఽస్యది॑త్యా॒-స్సద॒ ఆ సీ॒దాస్త॑భ్నా॒-ద్ద్యామృ॑ష॒భో అ॒న్తరి॑క్ష॒మమి॑మీత వరి॒మాణ॑-మ్పృథి॒వ్యా ఆ-ఽసీ॑ద॒-ద్విశ్వా॒ భువ॑నాని స॒మ్రా-డ్విశ్వేత్తాని॒ వరు॑ణస్య వ్ర॒తాని॒ వనే॑షు॒ వ్య॑న్తరి॑క్ష-న్తతాన॒ వాజ॒మర్వ॑థ్సు॒ పయో॑ అఘ్ని॒యాసు॑ హృ॒థ్సు- [ ] ॥ 15 ॥

క్రతుం॒-వఁరు॑ణో వి॒క్ష్వ॑గ్ని-న్ది॒వి సూర్య॑మదధా॒-థ్సోమ॒మద్రా॒వుదు॒త్య-ఞ్జా॒తవే॑దస-న్దే॒వం-వఁ॑హన్తి కే॒తవః॑ । దృ॒శే విశ్వా॑య॒ సూర్య᳚మ్ ॥ ఉస్రా॒వేత॑-న్ధూర్షాహావన॒శ్రూ అవీ॑రహణౌ బ్రహ్మ॒చోద॑నౌ॒ వరు॑ణస్య॒ స్కమ్భ॑నమసి॒ వరు॑ణస్య స్కమ్భ॒సర్జ॑నమసి॒ ప్రత్య॑స్తో॒ వరు॑ణస్య॒ పాశః॑ ॥ 16 ॥

( హృ॒థ్సు-పఞ్చ॑త్రిగ్ంశచ్చ ) (అ. 8)

ప్ర చ్య॑వస్వ భువస్పతే॒ విశ్వా᳚న్య॒భి ధామా॑ని॒ మా త్వా॑ పరిప॒రీ వి॑ద॒న్మా త్వా॑ పరిప॒న్థినో॑ విద॒న్మా త్వా॒ వృకా॑ అఘా॒యవో॒ మా గ॑న్ధ॒ర్వో వి॒శ్వావ॑సు॒రా ద॑ఘచ్ఛ్యే॒నో భూ॒త్వా పరా॑ పత॒ యజ॑మానస్య నో గృ॒హే దే॒వై-స్సగ్గ్॑స్కృ॒తం-యఁజ॑మానస్య స్వ॒స్త్యయ॑న్య॒స్యపి॒ పన్థా॑మగస్మహి స్వస్తి॒గా-మ॑నే॒హసం॒-యేఁన॒ విశ్వాః॒ పరి॒ ద్విషో॑ వృ॒ణక్తి॑ వి॒న్దతే॒ వసు॒ నమో॑ మి॒త్రస్య॒ వరు॑ణస్య॒ చక్ష॑సే మ॒హో దే॒వాయ॒ తదృ॒తగ్ం స॑పర్యత దూరే॒దృశే॑ దే॒వజా॑తాయ కే॒తవే॑ ది॒వస్పు॒త్రాయ॒ సూర్యా॑య శగ్ంసత॒ వరు॑ణస్య॒ స్కమ్భ॑నమసి॒ వరు॑ణస్య స్కమ్భ॒సర్జ॑న-మ॒స్యున్ము॑క్తో॒ వరు॑ణస్య॒ పాశః॑ ॥ 17 ॥

( మి॒త్రస్య॒-త్రయో॑విగ్ంశతిశ్చ ) (అ. 9)

అ॒గ్నే-రా॑తి॒థ్యమ॑సి॒ విష్ణ॑వే త్వా॒ సోమ॑స్యా-ఽఽతి॒థ్యమ॑సి॒ విష్ణ॑వే॒ త్వా-ఽతి॑థేరాతి॒థ్యమ॑సి॒ విష్ణ॑వే త్వా॒-ఽగ్నయే᳚ త్వా రాయస్పోష॒దావ్న్నే॒ విష్ణ॑వే త్వా శ్యే॒నాయ॑ త్వా సోమ॒భృతే॒ విష్ణ॑వే త్వా॒ యా తే॒ ధామా॑ని హ॒విషా॒ యజ॑న్తి॒ తా తే॒ విశ్వా॑ పరి॒భూర॑స్తు య॒జ్ఞ-ఙ్గ॑య॒స్ఫానః॑ ప్ర॒తర॑ణ-స్సు॒వీరో-ఽవీ॑రహా॒ ప్రచ॑రా సోమ॒ దుర్యా॒నది॑త్యా॒-స్సదో॒-ఽస్యది॑త్యా॒-స్సద॒ ఆ- [సద॒ ఆ, సీ॒ద॒ వరు॑ణో-ఽసి] ॥ 18 ॥

సీ॑ద॒ వరు॑ణో-ఽసి ధృ॒తవ్ర॑తో వారు॒ణమ॑సి శం॒యోఁ-ర్దే॒వానాగ్ం॑ స॒ఖ్యాన్మా దే॒వానా॑-మ॒పస॑-శ్ఛిథ్స్మ॒హ్యాప॑తయే త్వా గృహ్ణామి॒ పరి॑పతయే త్వా గృహ్ణామి॒ తనూ॒నప్త్రే᳚ త్వా గృహ్ణామి శాక్వ॒రాయ॑ త్వా గృహ్ణామి॒ శక్మ॒న్నోజి॑ష్ఠాయ త్వా గృహ్ణా॒మ్య-నా॑ధృష్టమస్య-నాధృ॒ష్య-న్దే॒వానా॒మోజో॑- ఽభిషస్తి॒పా అ॑నభిశస్తే॒-ఽన్యమను॑ మే దీ॒క్షా-న్దీ॒క్షాప॑తి-ర్మన్యతా॒మను॒ తప॒స్తప॑స్పతి॒రఞ్జ॑సా స॒త్యముప॑ గేషగ్ం సువి॒తే మా॑ ధాః ॥ 19 ॥

( ఆ-మై-క॑-ఞ్చ ) (అ. 10)

అ॒గ్ం॒శురగ్ం॑శుస్తే దేవ సో॒మా-ఽఽప్యా॑యతా॒-మిన్ద్రా॑యైకధన॒విద॒ ఆ తుభ్య॒మిన్ద్రః॑ ప్యాయతా॒మా త్వమిన్ద్రా॑య ప్యాయ॒స్వా-ఽఽప్యా॑యయ॒ సఖీ᳚న్-థ్స॒న్యా మే॒ధయా᳚ స్వ॒స్తి తే॑ దేవ సోమ సు॒త్యామ॑శీ॒యేష్టా॒ రాయః॒ ప్రేషే భగా॑య॒ర్తమృ॑తవా॒దిభ్యో॒ నమో॑ ది॒వే నమః॑ పృథి॒వ్యా అగ్నే᳚ వ్రతపతే॒ త్వం-వ్రఁ॒తానాం᳚-వ్రఁ॒తప॑తిరసి॒ యా మమ॑ త॒నూరే॒షా సా త్వయి॒ [త్వయి॑, యా తవ॑] ॥ 20 ॥

యా తవ॑ త॒నూరి॒యగ్ం సా మయి॑ స॒హ నౌ᳚ వ్రతపతే వ్ర॒తినో᳚-ర్వ్ర॒తాని॒ యా తే॑ అగ్నే॒ రుద్రి॑యా త॒నూస్తయా॑ నః పాహి॒ తస్యా᳚స్తే॒ స్వాహా॒ యా తే॑ అగ్నే-ఽయాశ॒యా ర॑జాశ॒యా హ॑రాశ॒యా త॒నూర్వర్షి॑ష్ఠా గహ్వరే॒ష్ఠో-ఽగ్రం-వఁచో॒ అపా॑వధీ-న్త్వే॒షం-వఁచో॒ అపా॑వధీ॒గ్॒ స్వాహా᳚ ॥ 21 ॥

( త్వయి॑-చత్వారి॒గ్ం॒శచ్చ॑ ) (అ. 11)

వి॒త్తాయ॑నీ మే-ఽసి తి॒క్తాయ॑నీ మే॒-ఽస్యవ॑తాన్మా నాథి॒తమవ॑తాన్మా వ్యథి॒తం-విఁ॒దేర॒గ్నిర్నభో॒ నామాగ్నే॑ అఙ్గిరో॒ యో᳚-ఽస్యా-మ్పృ॑థి॒వ్యామస్యాయు॑షా॒ నామ్నేహి॒ యత్తే-ఽనా॑ధృష్ట॒-న్నామ॑ య॒జ్ఞియ॒-న్తేన॒ త్వా-ఽఽద॒ధే-ఽగ్నే॑ అఙ్గిరో॒ యో ద్వి॒తీయ॑స్యా-న్తృ॒తీయ॑స్యా-మ్పృథి॒వ్యా-మస్యాయు॑షా॒ నామ్నేహి॒ యత్తే-ఽనా॑ధృష్ట॒-న్నామ॑- [ ] 22

య॒జ్ఞియ॒-న్తేన॒ త్వా-ఽఽద॑ధే సి॒గ్ం॒హీర॑సి మహి॒షీర॑స్యు॒రు ప్ర॑థస్వో॒రు తే॑ య॒జ్ఞప॑తిః ప్రథతా-న్ధ్రు॒వా-ఽసి॑ దే॒వేభ్యః॑ శున్ధస్వ దే॒వేభ్యః॑ శుమ్భస్వేన్ద్రఘో॒షస్త్వా॒ వసు॑భిః పు॒రస్తా᳚-త్పాతు॒ మనో॑జవాస్త్వా పి॒తృభి॑-ర్దక్షిణ॒తః పా॑తు॒ ప్రచే॑తాస్త్వా రు॒ద్రైః ప॒శ్చా-త్పా॑తు వి॒శ్వక॑ర్మా త్వా-ఽఽది॒త్యైరు॑త్తర॒తః పా॑తు సి॒గ్ం॒హీర॑సి సపత్నసా॒హీ స్వాహా॑ సి॒గ్ం॒హీర॑సి సుప్రజా॒వని॒-స్స్వాహా॑ సి॒గ్ం॒హీ- [సి॒గ్ం॒హీః, అ॒సి॒ రా॒య॒స్పో॒ష॒వని॒-స్స్వాహా॑] 23

ర॑సి రాయస్పోష॒వని॒-స్స్వాహా॑ సి॒గ్ం॒హీర॑స్యాదిత్య॒వని॒-స్స్వాహా॑ సి॒గ్ం॒హీర॒స్యా వ॑హ దే॒వాన్దే॑వయ॒తే యజ॑మానాయ॒ స్వాహా॑ భూ॒తేభ్య॑స్త్వా వి॒శ్వాయు॑రసి పృథి॒వీ-న్దృగ్ం॑హ ధ్రువ॒క్షిద॑స్య॒న్తరి॑క్ష-న్దృగ్ంహాచ్యుత॒క్షిద॑సి॒ దివ॑-న్దృగ్ంహా॒గ్నే-ర్భస్మా᳚స్య॒గ్నేః పురీ॑షమసి ॥ 24 ॥

(నామ॑-సుప్రజా॒వని॒-స్స్వాహా॑ సి॒గ్ం॒సీః; పఞ్చ॑త్రిగ్ంశచ్చ ) (అ. 12)

యు॒ఞ్జతే॒ మన॑ ఉ॒త యు॑ఞ్జతే॒ ధియో॒ విప్రా॒ విప్ర॑స్య బృహ॒తో వి॑ప॒శ్చితః॑ । వి హోత్రా॑ దధే వయునా॒విదేక॒ ఇన్మ॒హీ దే॒వస్య॑ సవి॒తుః పరి॑ష్టుతిః ॥ సు॒వాగ్దే॑వ॒ దుర్యా॒గ్ం॒ ఆ వ॑ద దేవ॒శ్రుతౌ॑ దే॒వేష్వా ఘో॑షేథా॒మా నో॑ వీ॒రో జా॑యతా-ఙ్కర్మ॒ణ్యో॑ యగ్ం సర్వే॑-ఽను॒ జీవా॑మ॒ యో బ॑హూ॒నామస॑ద్వ॒శీ ॥ ఇ॒దం-విఁష్ణు॒-ర్విచ॑క్రమే త్రే॒ధా ని ద॑ధే ప॒దమ్ ॥ సమూ॑ఢమస్య [సమూ॑ఢమస్య, పా॒గ్ం॒సు॒ర] 25

పాగ్ంసు॒ర ఇరా॑వతీ ధేను॒మతీ॒ హి భూ॒తగ్ం సూ॑యవ॒సినీ॒ మన॑వే యశ॒స్యే᳚ । వ్య॑స్కభ్నా॒-ద్రోద॑సీ॒ విష్ణు॑రే॒తే దా॒ధార॑ పృథి॒వీమ॒భితో॑ మ॒యూఖైః᳚ ॥ ప్రాచీ॒ ప్రేత॑మద్ధ్వ॒ర-ఙ్క॒ల్పయ॑న్తీ ఊ॒ర్ధ్వం-యఁ॒జ్ఞ-న్న॑యత॒-మ్మా జీ᳚హ్వరత॒మత్ర॑ రమేథాం॒-వఁర్ష్మ॑-న్పృథి॒వ్యా ది॒వో వా॑ విష్ణవు॒త వా॑ పృథి॒వ్యా మ॒హో వా॑ విష్ణవు॒త వా॒-ఽన్తరి॑క్షా॒ద్ధస్తౌ॑ పృణస్వ బ॒హుభి॑-ర్వస॒వ్యై॑రా ప్ర య॑చ్ఛ॒ [ప్ర య॑చ్ఛ, దక్షి॑ణా॒దోత] 26

దక్షి॑ణా॒దోత స॒వ్యాత్ । విష్ణో॒ర్నుకం॑-వీఁ॒ర్యా॑ణి॒ ప్ర వో॑చం॒-యః ఁపార్థి॑వాని విమ॒మే రజాగ్ం॑సి॒ యో అస్క॑భాయ॒దుత్త॑రగ్ం స॒ధస్థం॑-విఁచక్రమా॒ణ స్త్రే॒ధోరు॑గా॒యో విష్ణో॑ ర॒రాట॑మసి॒ విష్ణోః᳚ పృ॒ష్ఠమ॑సి॒ విష్ణో॒-శ్శ్ఞప్త్రే᳚ స్థో॒ విష్ణో॒-స్స్యూర॑సి॒ విష్ణో᳚-ర్ధ్రు॒వమ॑సి వైష్ణ॒వమ॑సి॒ విష్ణ॑వే త్వా ॥ 27 ॥

( అ॒స్య॒-య॒చ్ఛైకా॒న్న చ॑త్వారి॒గ్ం॒శచ్చ॑ ) (అ. 13)

కృ॒ణు॒ష్వ పాజః॒ ప్రసి॑తి॒న్న పృ॒థ్వీం-యాఁ॒హి రాజే॒వామ॑వా॒గ్ం॒ ఇభే॑న । తృ॒ష్వీమను॒ ప్రసి॑తిం-ద్రూణా॒నో-ఽస్తా॑-ఽసి॒ విద్ధ్య॑ ర॒క్షస॒ స్తపి॑ష్ఠైః ॥ తవ॑ భ్ర॒మాస॑ ఆశు॒యా ప॑న్త॒త్యను॑ స్పృశ-ధృష॒తా శోశు॑చానః । తపూగ్॑ష్యగ్నే జు॒హ్వా॑ పత॒ఙ్గానస॑న్దితో॒ విసృ॑జ॒ విష్వ॑గు॒ల్కాః ॥ ప్రతి॒స్పశో॒ విసృ॑జ॒-తూర్ణి॑తమో॒ భవా॑ పా॒యుర్వి॒శో అ॒స్యా అద॑బ్ధః । యో నో॑ దూ॒రే అ॒ఘశగ్ం॑సో॒ [అ॒ఘశగ్ం॑సః, యో అన్త్యగ్నే॒] 28

యో అన్త్యగ్నే॒ మాకి॑ష్టే॒ వ్యథి॒రా ద॑ధర్షీత్ ॥ ఉద॑గ్నే తిష్ఠ॒ ప్రత్యా ఽఽత॑నుష్వ॒ న్య॑మిత్రాగ్ం॑ ఓషతా-త్తిగ్మహేతే । యో నో॒ అరా॑తిగ్ం సమిధాన చ॒క్రే నీ॒చా త-న్ధ॑క్ష్యత॒స-న్న శుష్క᳚మ్ ॥ ఊ॒ర్ధ్వో భ॑వ॒ ప్రతి॑వి॒ద్ధ్యా-ఽద్ధ్య॒స్మదా॒విష్కృ॑ణుష్వ॒ దైవ్యా᳚న్యగ్నే । అవ॑స్థి॒రా త॑నుహి యాతు॒జూనా᳚-ఞ్జా॒మిమజా॑మిం॒ ప్రమృ॑ణీహి॒ శత్రూన్॑ ॥ స తే॑ [స తే᳚, జా॒నా॒తి॒ సు॒మ॒తిం] 29

జానాతి సుమ॒తిం-యఁ॑విష్ఠ॒య ఈవ॑తే॒ బ్రహ్మ॑ణే గా॒తుమైర॑త్ । విశ్వా᳚న్యస్మై సు॒దినా॑ని రా॒యో ద్యు॒మ్నాన్య॒ర్యో విదురో॑ అ॒భి ద్యౌ᳚త్ ॥ సేద॑గ్నే అస్తు సు॒భగః॑ సు॒దాను॒-ర్యస్త్వా॒ నిత్యే॑న హ॒విషా॒య ఉ॒క్థైః । పిప్రీ॑షతి॒ స్వ ఆయు॑షి దురో॒ణే విశ్వేద॑స్మై సు॒దినా॒ సా-ఽస॑ది॒ష్టిః ॥ అర్చా॑మి తే సుమ॒తి-ఙ్ఘోష్య॒ర్వాఖ్-సన్తే॑ వా॒ వా తా॑ జరతా- [వా॒ వా తా॑ జరతామ్, ఇ॒యఙ్గీః] 30

మి॒యఙ్గీః । స్వశ్వా᳚స్త్వా సు॒రథా॑ మర్జయేమా॒స్మే క్ష॒త్రాణి॑ ధారయే॒రను॒ ద్యూన్ ॥ ఇ॒హ త్వా॒ భూర్యా చ॑రే॒ దుప॒త్మ-న్దోషా॑వస్త-ర్దీది॒వాగ్ంస॒మను॒ ద్యూన్ । క్రీడ॑న్తస్త్వా సు॒మన॑స-స్సపేమా॒భి ద్యు॒మ్నా త॑స్థి॒వాగ్ంసో॒ జనా॑నామ్ ॥ యస్త్వా॒-స్వశ్వః॑ సుహిర॒ణ్యో అ॑గ్న ఉప॒యాతి॒ వసు॑మతా॒ రథే॑న । తస్య॑ త్రా॒తా-భ॑వసి॒ తస్య॒ సఖా॒ యస్త॑ ఆతి॒థ్యమా॑ను॒షగ్ జుజో॑షత్ ॥ మ॒హో రు॑జామి - [ ] 31

బ॒న్ధుతా॒ వచో॑భి॒స్తన్మా॑ పి॒తుర్గోత॑మా॒ద-న్వి॑యాయ । త్వన్నో॑ అ॒స్య వచ॑స-శ్చికిద్ధి॒ హోత॑ర్యవిష్ఠ సుక్రతో॒ దమూ॑నాః ॥ అస్వ॑ప్నజ స్త॒రణ॑య-స్సు॒శేవా॒ అత॑న్ద్రాసో-ఽవృ॒కా అశ్ర॑మిష్ఠాః । తే పా॒యవః॑ స॒ద్ధ్రియ॑ఞ్చో ని॒షద్యా-ఽగ్నే॒ తవ॑నః పాన్త్వమూర ॥ యే పా॒యవో॑ మామతే॒య-న్తే॑ అగ్నే॒ పశ్య॑న్తో అ॒న్ధ-న్దు॑రి॒తాదర॑క్షన్న్ । ర॒రక్ష॒తాన్-థ్సు॒కృతో॑ వి॒శ్వవే॑దా॒ దిఫ్స॑న్త॒ ఇద్రి॒పవో॒ నా హ॑ [నా హ॑, దే॒భుః॒] 32

దేభుః ॥ త్వయా॑ వ॒యగ్ం స॑ధ॒న్య॑-స్త్వోతా॒-స్తవ॒ ప్రణీ᳚త్యశ్యామ॒ వాజాన్॑ । ఉ॒భా శగ్ంసా॑ సూదయ సత్యతాతే-ఽనుష్ఠు॒యా కృ॑ణుహ్యహ్రయాణ ॥ అ॒యా తే॑ అగ్నే స॒మిధా॑ విధేమ॒ ప్రతి॒స్తోమగ్ం॑ శ॒స్యమా॑న-ఙ్గృభాయ । దహా॒శసో॑ ర॒క్షసః॑ పా॒హ్య॑స్మా-న్ద్రు॒హో ని॒దో మి॑త్రమహో అవ॒ద్యాత్ ॥ ర॒క్షో॒హణం॑ ఁవా॒జిన॒మాజి॑ఘర్మి మి॒త్ర-మ్ప్రథి॑ష్ఠ॒-ముప॑యామి॒ శర్మ॑ । శిశా॑నో అ॒గ్నిః క్రతు॑భి॒-స్సమి॑ద్ధ॒స్సనో॒ దివా॒ [దివా᳚, సరి॒షః పా॑తు॒ నక్తం᳚] 33

సరి॒షః పా॑తు॒ నక్త᳚మ్ ॥ విజ్యోతి॑షా బృహ॒తా భా᳚త్య॒గ్ని-రా॒వి-ర్విశ్వా॑ని కృణుతే మహి॒త్వా । ప్రాదే॑వీ-ర్మా॒యా-స్స॑హతే-దు॒రేవా॒-శ్శిశీ॑తే॒ శృఙ్గే॒ రక్ష॑సే వి॒నిక్షే᳚ ॥ ఉ॒త స్వా॒నాసో॑ ది॒విష॑న్త్వ॒గ్నే స్తి॒గ్మాయు॑ధా॒ రక్ష॑సే॒ హన్త॒వా ఉ॑ । మదే॑ చిదస్య॒ ప్రరు॑జన్తి॒ భామా॒ న వ॑రన్తే పరి॒బాధో॒ అదే॑వీః ॥ 34 ॥

(అ॒ఘశగ్ం॑సః॒-స తే॑-జరతాగ్ం-రుజామి-హ॒ -దివై - క॑చత్వారిగ్ంశచ్చ) (అ. 14)

(ఆప॑ ఉన్ద॒, న్త్వాకూ᳚త్యై॒, దైవీ॑, మి॒యన్తే॒, వస్వ్య॑స్య॒గ్ం॒ శునా॑ తే॒, సోమ॑న్త॒, ఉదాయు॑షా॒, ప్ర చ్య॑వస్వా॒, ఽగ్నే రా॑తి॒థ్య, -మ॒గ్ం॒శురగ్ం॑ శు, ర్వి॒త్తాయ॑నీ మే-ఽసి, యు॒ఞ్చతే॑, కృణు॒ష్వ పాజ॒, శ్చతు॑ర్దశ ।)

(ఆపో॒-వస్వ్య॑సి॒ యా తవే॒-యఙ్గీ-శ్చతు॑స్త్రిగ్ంశత్ ।)

(ఆప॑ ఉన్ద॒న్, త్వదే॑వీః)

॥ హరిః॑ ఓమ్ ॥

॥ కృష్ణ యజుర్వేదీయ తైత్తిరీయ సంహితాయా-మ్ప్రథమకాణ్డే ద్వితీయః ప్రశ్న-స్సమాప్తః ॥

Roman (IAST) Transliteration

kṛṣṇa yajurvedīya taittirīya saṃhitāyā-mprathamakāṇḍe dvitīyaḥ praśnaḥ - agniṣṭome krayaḥ

o-nnamaḥ paramātmane, śrī mahāgaṇapataye namaḥ,

śrī gurubhyo namaḥ | ha॒riḥ॒ om ||

āpa̭ undantu jī॒vasḙ dīrghāyu॒tvāya॒ varca̭sa॒ oṣa̭dhe॒ trāya̭svaina॒gg॒ svadhi̭te॒ mainagṃ̭ higṃsī-rdeva॒śrūre॒tāni॒ pra va̭pe sva॒styutta̭rāṇyaśī॒yāpo̭ a॒smā-nmā॒taraḥ̭ śundhantu ghṛ॒tena̭ no ghṛta॒puvaḥ̭ punantu॒ viśva̭ma॒sma-tpra va̭hantu ri॒pramudā᳚bhya॒-śśuci॒rā pū॒ta ḙmi॒ soma̭sya ta॒nūra̭si ta॒nuva̭-mme pāhi mahī॒nā-mpayo̭-'si varco॒dhā a̭si॒ varco॒- [varcaḥ̭, mayi̭ dhehi vṛ॒trasya̭] 1

mayi̭ dhehi vṛ॒trasya̭ ka॒nīni̭kā-'si cakṣu॒ṣpā a̭si॒ cakṣṷrme pāhi ci॒tpati̭stvā punātu vā॒kpati̭stvā punātu de॒vastvā̭ savi॒tā pṷnā॒tvacchi̭dreṇa pa॒vitrḙṇa॒ vaso॒-ssūrya̭sya ra॒śmibhi॒stasya̭ te pavitrapate pa॒vitrḙṇa॒ yasmai॒ ka-mpu॒ne taccha̭keya॒mā vo̭ devāsa īmahe॒ satya̭dharmāṇo addhva॒re yadvo̭ devāsa āgu॒re yajñi̭yāso॒ havā̭maha॒ indrā᳚gnī॒ dyāvā̭pṛthivī॒ āpa̭ oṣadhī॒ stva-ndī॒kṣāṇā॒-madhi̭patirasī॒ha mā॒ santa̭-mpāhi || 2 ||

(varca̭ - oṣadhī- ra॒ṣṭau ca̭ ) (a. 1)

ākū᳚tyai pra॒yuje॒-'gnaye॒ svāhā̭ me॒dhāyai॒ mana̭se॒ 'gnaye॒ svāhā̭ dī॒kṣāyai॒ tapa̭se॒-'gnaye॒ svāhā॒ sara̭svatyai pū॒ṣṇe᳚-'gnaye॒ svāhā-''po̭ devī-rbṛhatī-rviśvaśambhuvo॒ dyāvā̭pṛthi॒vī u॒rva̭ntari̭kṣa॒-mbṛha॒spati̭rno ha॒viṣā̭ vṛdhātu॒ svāhā॒ viśvḙ de॒vasya̭ ne॒turmarto̭ vṛṇīta sa॒khyaṃ-vi~śvḙ rā॒ya i̭ṣuddhyasi dyu॒mnaṃ-vṛ~̭ṇīta pu॒ṣyase॒ svāha̭rkhsā॒mayo॒-śśilpe᳚ stha॒ste vā॒mā ra̭bhe॒ te mā̭- [te mā᳚, pā॒ta॒mā-'sya] 3

pāta॒mā-'sya ya॒jñasyo॒dṛca̭ i॒mā-ndhiya॒gṃ॒ śikṣa̭māṇasya deva॒ kratu॒-ndakṣaṃ̭-va~ruṇa॒ sagṃ śi̭śādhi॒ yayā-'ti॒ viśvā̭ duri॒tā tarḙma su॒tarmā̭ṇa॒madhi॒ nāvagṃ̭ ruhe॒morga̭syāṅgira॒syūrṇa̭mradā॒ ūrja̭-mme yaccha pā॒hi mā॒ mā mā̭ higṃsī॒-rviṣṇo॒-śśarmā̭si॒ śarma॒ yaja̭mānasya॒ śarma̭ me yaccha॒ nakṣa̭trāṇā-mmā-'tīkā॒śā-tpā॒hīndra̭sya॒ yoni̭rasi॒- [yoni̭rasi, mā mā̭ higṃsīḥ] 4

mā mā̭ higṃsīḥ kṛ॒ṣyai tvā̭ susa॒syāyai̭ supippa॒lābhya॒-stvauṣa̭dhībhya-ssūpa॒sthā de॒vo vana॒spati̭rū॒rdhvo mā̭ pā॒hyodṛca॒-ssvāhā̭ ya॒jña-mmana̭sā॒ svāhā॒ dyāvā̭pṛthi॒vībhyā॒g॒ svāho॒ro-ra॒ntari̭kṣā॒-thsvāhā̭ ya॒jñaṃ-vā~tā॒dā ra̭bhe || 5 ||

( mā॒ - yoni̭rasi - tri॒gṃ॒śacca̭ ) (a. 2)

daivī॒-ndhiya̭-mmanāmahe sumṛḍī॒kā-ma॒bhiṣṭa̭ye varco॒dhāṃ-ya~॒jñavā̭hasagṃ supā॒rā no̭ asa॒-dvaśe᳚ | ye de॒vā mano̭jātā mano॒yujaḥ̭ su॒dakṣā॒ dakṣa̭pitāra॒ste naḥ̭ pāntu॒ te no̭-'vantu॒ tebhyo॒ nama॒stebhya॒-ssvāhā-'gne॒ tvagṃ su jā̭gṛhi va॒yagṃ su ma̭ndiṣīmahi gopā॒ya naḥ̭ sva॒staye᳚ pra॒budhḙ naḥ॒ puna̭rdadaḥ | tvama̭gne vrata॒pā a̭si de॒va ā martye॒ṣvā | tvaṃ- [tvam, ya॒jñeṣvīḍyaḥ̭ |] 6

ya॒jñeṣvīḍyaḥ̭ || viśvḙ de॒vā a॒bhi māmā-'va̭vṛtra-npū॒ṣā sa॒nyā somo॒ rādha̭sā de॒va-ssa̭vi॒tā vaso᳚rvasu॒dāvā॒ rāsveya̭-thso॒mā ''bhūyo̭ bhara॒ mā pṛ॒ṇa-npū॒rtyā vi rā̭dhi॒ mā-'hamāyṷṣā ca॒ndrama̭si॒ mama॒ bhogā̭ya bhava॒ vastra̭masi॒ mama॒ bhogā̭ya bhavo॒srā-'si॒ mama॒ bhogā̭ya bhava॒ hayo̭-'si॒ mama॒ bhogā̭ya bhava॒- [bhogā̭ya bhava, chāgo̭-'si॒ mama॒] 7

chāgo̭-'si॒ mama॒ bhogā̭ya bhava me॒ṣo̭-'si॒ mama॒ bhogā̭ya bhava vā॒yave᳚ tvā॒ varṷṇāya tvā॒ nir-ṛ̭tyai tvā ru॒drāya̭ tvā॒ devī̭rāpo apā-nnapā॒dya ū॒rmir-ha̭vi॒ṣya̭ indri॒yāvā᳚-nma॒dinta̭ma॒staṃ-vo~॒ mā-'va̭ kramiṣa॒macchi̭nna॒-ntantṷ-mpṛthi॒vyā anṷ geṣa-mbha॒drāda॒bhi śreyaḥ॒ prehi॒ bṛha॒spatiḥ̭ purae॒tā tḙ a॒stvathe॒mava̭ sya॒ vara॒ ā pṛ̭thi॒vyā ā॒re śatrū᳚n kṛṇuhi॒ sarva̭vīra॒ edama̭ganma deva॒yaja̭na-mpṛthi॒vyā viśvḙ de॒vā yadajṷṣanta॒ pūrva̭ ṛkhsā॒mābhyāṃ॒-ya~jṷṣā sa॒ntara̭nto rā॒yaspoṣḙṇa॒ sami॒ṣā ma̭dema || 8 ||

( ā tvagṃ-hayo̭-'si॒ mama॒ bhogā̭ya bhava-sya॒-pañca̭vigṃśatiśca ) (a. 3)

i॒ya-ntḙ śukra ta॒nūri॒daṃ-va~rca॒stayā॒ sa-mbha̭va॒ bhrāja̭-ṅgaccha॒ jūra̭si dhṛ॒tā mana̭sā॒ juṣṭā॒ viṣṇa̭ve॒ tasyā᳚ste sa॒tyasa̭vasaḥ prasa॒ve vā॒co ya॒ntrama̭śīya॒ svāhā̭ śu॒krama̭sya॒mṛta̭masi vaiśvade॒vagṃ ha॒vi-ssūrya̭sya॒ cakṣu॒rā -'rṷhama॒gne ra॒kṣṇaḥ ka॒nīni̭kāṃ॒-ya~deta̭śebhi॒rīya̭se॒ bhrāja̭māno vipa॒ścitā॒ cida̭si ma॒nā-'si॒ dhīra̭si॒ dakṣi̭ṇā- [dakṣi̭ṇā, a॒si॒ ya॒jñiyā̭-'si] 9

-'si ya॒jñiyā̭-'si kṣa॒triyā॒ 'syadi̭ti-rasyubha॒yata̭̭śśīrṣṇī॒ sā na॒-ssuprā̭cī॒ supra̭tīcī॒ sa-mbha̭va mi॒trastvā̭ pa॒di ba̭ddhnātu pū॒ṣā-'ddhva̭naḥ pā॒tvindrā॒yā-ddhya̭kṣā॒yānṷ tvā mā॒tā ma̭nyatā॒manṷ pi॒tā-'nu॒ bhrātā॒ saga॒rbhyo-'nu॒ sakhā॒ sayū᳚thya॒-ssā dḙvi de॒vamacche॒hīndrā̭ya॒ somagṃ̭ ru॒drastvā ''va̭rtayatu mi॒trasya̭ pa॒thā sva॒sti soma̭sakhā॒ puna॒rehi̭ sa॒ha ra॒yyā || 10 ||

( dakṣi̭ṇā॒-soma̭sakhā॒, pañca̭ ca ) (a. 4)

vasvya̭si ru॒drā-'syadi̭ti-rasyādi॒tyā-'si̭ śu॒krā-'si̭ ca॒ndrā-'si॒ bṛha॒spati̭stvā su॒mne ra̭ṇvatu ru॒dro vasṷbhi॒rā ci̭ketu pṛthi॒vyāstvā̭ mū॒rdhannā ji̭gharmi deva॒yaja̭na॒ iḍā̭yāḥ pa॒de ghṛ॒tava̭ti॒ svāhā॒ pari̭likhita॒gṃ॒ rakṣaḥ॒ pari̭likhitā॒ arā̭taya i॒dama॒hagṃ rakṣa̭so grī॒vā api̭ kṛntāmi॒ yo᳚-'smā-ndveṣṭi॒ ya-ñca̭ va॒ya-ndvi॒ṣma i॒dama̭sya grī॒vā [grī॒vāḥ, api̭ kṛntāmya॒sme] 11

api̭ kṛntāmya॒sme rāya॒stve rāya॒stote॒ rāya॒-ssa-ndḙvi de॒vyorvaśyā̭ paśyasva॒ tvaṣṭī̭matī te sapeya su॒retā॒ reto॒ dadhā̭nā vī॒raṃ-vi~̭deya॒ tava̭ sa॒ndṛśi॒ mā-'hagṃrā॒yaspoṣḙṇa॒ vi yo̭ṣam || 12 ||

( a॒sya॒ grī॒vā-ekā॒nna tri॒gṃ॒śacca̭ ) (a. 5)

a॒gṃ॒śunā̭ te a॒gṃ॒śuḥ pṛ̭cyatā॒-mparṷṣā॒ parṷ-rga॒ndhaste॒ kāma̭mavatu॒ madā̭ya॒ raso॒ acyṷto॒ 'mātyo̭-'si śu॒kraste॒ graho॒-'bhi tya-nde॒vagṃ sa̭vi॒tāra̭mū॒ṇyoḥ᳚ ka॒vikra̭tu॒marcā̭mi sa॒tyasa̭vasagṃ ratna॒dhāma॒bhi pri॒ya-mma॒timū॒rdhvā yasyā॒mati॒rbhā adi̭dyuta॒-thsavī̭mani॒ hira̭ṇyapāṇiramimīta su॒kratuḥ̭ kṛ॒pā suvaḥ̭ | pra॒jābhya̭stvā prā॒ṇāya̭ tvā vyā॒nāya̭ tvā pra॒jāstvamanu॒ prāṇi̭hi pra॒jāstvāmanu॒ prāṇa̭ntu || 13 ||

(anṷ-sa॒pta ca̭) (a. 6)

soma̭-nte krīṇā॒myūrja̭svanta॒-mpaya̭svantaṃ-vī~॒ryā̭vantamabhi-māti॒ṣāhagṃ̭ śu॒kra-ntḙ śu॒kreṇa̭ krīṇāmi ca॒ndra-ñca॒ndreṇā॒mṛta̭ma॒mṛtḙna sa॒myatte॒ gora॒sme ca॒ndrāṇi॒ tapa̭sasta॒nūra̭si pra॒jāpa̭te॒-rvarṇa॒stasyā᳚ste sahasrapo॒ṣa-mpuṣya̭ntyāścara॒meṇa̭ pa॒śunā᳚ krīṇāmya॒sme te॒ bandhu॒rmayi̭ te॒ rāyaḥ̭ śrayantāma॒sme jyotiḥ̭ somavikra॒yiṇi॒ tamo̭ mi॒tro na॒ ehi॒ sumi̭tradhā॒ indra̭syo॒ru mā vi̭śa॒ dakṣi̭ṇa-mu॒śannu॒śantagg̭ syo॒na-ssyo॒nagg svāna॒ bhrājāṅghā̭re॒ bambhā̭re॒ hasta॒ suha̭sta॒ kṛśā̭nave॒te vaḥ̭ soma॒ kraya̭ṇā॒stā-nra̭kṣaddhva॒-mmā vo̭ dabhann || 14 ||

(u॒ruṃ-dvāvigṃ̭śatiśca) (a. 7)

udāyṷṣā svā॒yuṣodoṣa̭dhīnā॒gṃ॒ rase॒no-tpa॒rjanya̭sya॒ śuṣme॒ṇoda̭sthāma॒mṛtā॒gṃ॒ anṷ | u॒rva̭ntari̭kṣa॒manvi॒hyadi̭tyā॒-ssado॒-'syadi̭tyā॒-ssada॒ ā sī॒dāsta̭bhnā॒-ddyāmṛ̭ṣa॒bho a॒ntari̭kṣa॒mami̭mīta vari॒māṇa̭-mpṛthi॒vyā ā-'sī̭da॒-dviśvā॒ bhuva̭nāni sa॒mrā-ḍviśvettāni॒ varṷṇasya vra॒tāni॒ vanḙṣu॒ vya̭ntari̭kṣa-ntatāna॒ vāja॒marva̭thsu॒ payo̭ aghni॒yāsṷ hṛ॒thsu- [ ] || 15 ||

kratuṃ॒-va~rṷṇo vi॒kṣva̭gni-ndi॒vi sūrya̭madadhā॒-thsoma॒madrā॒vudu॒tya-ñjā॒tavḙdasa-nde॒vaṃ-va~̭hanti ke॒tavaḥ̭ | dṛ॒śe viśvā̭ya॒ sūrya᳚m || usrā॒veta̭-ndhūrṣāhāvana॒śrū avī̭rahaṇau brahma॒coda̭nau॒ varṷṇasya॒ skambha̭namasi॒ varṷṇasya skambha॒sarja̭namasi॒ pratya̭sto॒ varṷṇasya॒ pāśaḥ̭ || 16 ||

( hṛ॒thsu-pañca̭trigṃśacca ) (a. 8)

pra cya̭vasva bhuvaspate॒ viśvā᳚nya॒bhi dhāmā̭ni॒ mā tvā̭ paripa॒rī vi̭da॒nmā tvā̭ paripa॒nthino̭ vida॒nmā tvā॒ vṛkā̭ aghā॒yavo॒ mā ga̭ndha॒rvo vi॒śvāva̭su॒rā da̭ghacchye॒no bhū॒tvā parā̭ pata॒ yaja̭mānasya no gṛ॒he de॒vai-ssagg̭skṛ॒taṃ-ya~ja̭mānasya sva॒styaya̭nya॒syapi॒ panthā̭magasmahi svasti॒gā-ma̭ne॒hasaṃ॒-ye~na॒ viśvāḥ॒ pari॒ dviṣo̭ vṛ॒ṇakti̭ vi॒ndate॒ vasu॒ namo̭ mi॒trasya॒ varṷṇasya॒ cakṣa̭se ma॒ho de॒vāya॒ tadṛ॒tagṃ sa̭paryata dūre॒dṛśḙ de॒vajā̭tāya ke॒tavḙ di॒vaspu॒trāya॒ sūryā̭ya śagṃsata॒ varṷṇasya॒ skambha̭namasi॒ varṷṇasya skambha॒sarja̭na-ma॒syunmṷkto॒ varṷṇasya॒ pāśaḥ̭ || 17 ||

( mi॒trasya॒-trayo̭vigṃśatiśca ) (a. 9)

a॒gne-rā̭ti॒thyama̭si॒ viṣṇa̭ve tvā॒ soma̭syā-''ti॒thyama̭si॒ viṣṇa̭ve॒ tvā-'ti̭therāti॒thyama̭si॒ viṣṇa̭ve tvā॒-'gnaye᳚ tvā rāyaspoṣa॒dāvnne॒ viṣṇa̭ve tvā śye॒nāya̭ tvā soma॒bhṛte॒ viṣṇa̭ve tvā॒ yā te॒ dhāmā̭ni ha॒viṣā॒ yaja̭nti॒ tā te॒ viśvā̭ pari॒bhūra̭stu ya॒jña-ṅga̭ya॒sphānaḥ̭ pra॒tara̭ṇa-ssu॒vīro-'vī̭rahā॒ praca̭rā soma॒ duryā॒nadi̭tyā॒-ssado॒-'syadi̭tyā॒-ssada॒ ā- [sada॒ ā, sī॒da॒ varṷṇo-'si] || 18 ||

sī̭da॒ varṷṇo-'si dhṛ॒tavra̭to vāru॒ṇama̭si śaṃ॒yo~-rde॒vānāgṃ̭ sa॒khyānmā de॒vānā̭-ma॒pasa̭-śchithsma॒hyāpa̭taye tvā gṛhṇāmi॒ pari̭pataye tvā gṛhṇāmi॒ tanū॒naptre᳚ tvā gṛhṇāmi śākva॒rāya̭ tvā gṛhṇāmi॒ śakma॒nnoji̭ṣṭhāya tvā gṛhṇā॒mya-nā̭dhṛṣṭamasya-nādhṛ॒ṣya-nde॒vānā॒mojo̭- 'bhiṣasti॒pā a̭nabhiśaste॒-'nyamanṷ me dī॒kṣā-ndī॒kṣāpa̭ti-rmanyatā॒manu॒ tapa॒stapa̭spati॒rañja̭sā sa॒tyamupa̭ geṣagṃ suvi॒te mā̭ dhāḥ || 19 ||

( ā-mai-ka̭-ñca ) (a. 10)

a॒gṃ॒śuragṃ̭śuste deva so॒mā-''pyā̭yatā॒-mindrā̭yaikadhana॒vida॒ ā tubhya॒mindraḥ̭ pyāyatā॒mā tvamindrā̭ya pyāya॒svā-''pyā̭yaya॒ sakhī᳚n-thsa॒nyā me॒dhayā᳚ sva॒sti tḙ deva soma su॒tyāma̭śī॒yeṣṭā॒ rāyaḥ॒ preṣe bhagā̭ya॒rtamṛ̭tavā॒dibhyo॒ namo̭ di॒ve namaḥ̭ pṛthi॒vyā agne᳚ vratapate॒ tvaṃ-vra~॒tānāṃ᳚-vra~॒tapa̭tirasi॒ yā mama̭ ta॒nūre॒ṣā sā tvayi॒ [tvayi̭, yā tava̭] || 20 ||

yā tava̭ ta॒nūri॒yagṃ sā mayi̭ sa॒ha nau᳚ vratapate vra॒tino᳚-rvra॒tāni॒ yā tḙ agne॒ rudri̭yā ta॒nūstayā̭ naḥ pāhi॒ tasyā᳚ste॒ svāhā॒ yā tḙ agne-'yāśa॒yā ra̭jāśa॒yā ha̭rāśa॒yā ta॒nūrvarṣi̭ṣṭhā gahvare॒ṣṭho-'graṃ-va~co॒ apā̭vadhī-ntve॒ṣaṃ-va~co॒ apā̭vadhī॒g॒ svāhā᳚ || 21 ||

( tvayi̭-catvāri॒gṃ॒śacca̭ ) (a. 11)

vi॒ttāya̭nī me-'si ti॒ktāya̭nī me॒-'syava̭tānmā nāthi॒tamava̭tānmā vyathi॒taṃ-vi~॒dera॒gnirnabho॒ nāmāgnḙ aṅgiro॒ yo᳚-'syā-mpṛ̭thi॒vyāmasyāyṷṣā॒ nāmnehi॒ yatte-'nā̭dhṛṣṭa॒-nnāma̭ ya॒jñiya॒-ntena॒ tvā-''da॒dhe-'gnḙ aṅgiro॒ yo dvi॒tīya̭syā-ntṛ॒tīya̭syā-mpṛthi॒vyā-masyāyṷṣā॒ nāmnehi॒ yatte-'nā̭dhṛṣṭa॒-nnāma̭- [ ] 22

ya॒jñiya॒-ntena॒ tvā-''da̭dhe si॒gṃ॒hīra̭si mahi॒ṣīra̭syu॒ru pra̭thasvo॒ru tḙ ya॒jñapa̭tiḥ prathatā-ndhru॒vā-'si̭ de॒vebhyaḥ̭ śundhasva de॒vebhyaḥ̭ śumbhasvendragho॒ṣastvā॒ vasṷbhiḥ pu॒rastā᳚-tpātu॒ mano̭javāstvā pi॒tṛbhi̭-rdakṣiṇa॒taḥ pā̭tu॒ pracḙtāstvā ru॒draiḥ pa॒ścā-tpā̭tu vi॒śvaka̭rmā tvā-''di॒tyairṷttara॒taḥ pā̭tu si॒gṃ॒hīra̭si sapatnasā॒hī svāhā̭ si॒gṃ॒hīra̭si suprajā॒vani॒-ssvāhā̭ si॒gṃ॒hī- [si॒gṃ॒hīḥ, a॒si॒ rā॒ya॒spo॒ṣa॒vani॒-ssvāhā̭] 23

ra̭si rāyaspoṣa॒vani॒-ssvāhā̭ si॒gṃ॒hīra̭syāditya॒vani॒-ssvāhā̭ si॒gṃ॒hīra॒syā va̭ha de॒vāndḙvaya॒te yaja̭mānāya॒ svāhā̭ bhū॒tebhya̭stvā vi॒śvāyṷrasi pṛthi॒vī-ndṛgṃ̭ha dhruva॒kṣida̭sya॒ntari̭kṣa-ndṛgṃhācyuta॒kṣida̭si॒ diva̭-ndṛgṃhā॒gne-rbhasmā᳚sya॒gneḥ purī̭ṣamasi || 24 ||

(nāma̭-suprajā॒vani॒-ssvāhā̭ si॒gṃ॒sīḥ; pañca̭trigṃśacca ) (a. 12)

yu॒ñjate॒ mana̭ u॒ta yṷñjate॒ dhiyo॒ viprā॒ vipra̭sya bṛha॒to vi̭pa॒ścitaḥ̭ | vi hotrā̭ dadhe vayunā॒videka॒ inma॒hī de॒vasya̭ savi॒tuḥ pari̭ṣṭutiḥ || su॒vāgdḙva॒ duryā॒gṃ॒ ā va̭da deva॒śrutaṷ de॒veṣvā gho̭ṣethā॒mā no̭ vī॒ro jā̭yatā-ṅkarma॒ṇyo̭ yagṃ sarvḙ-'nu॒ jīvā̭ma॒ yo ba̭hū॒nāmasa̭dva॒śī || i॒daṃ-vi~ṣṇu॒-rvica̭krame tre॒dhā ni da̭dhe pa॒dam || samṷ̄ḍhamasya [samṷ̄ḍhamasya, pā॒gṃ॒su॒ra] 25

pāgṃsu॒ra irā̭vatī dhenu॒matī॒ hi bhū॒tagṃ sṷ̄yava॒sinī॒ mana̭ve yaśa॒sye᳚ | vya̭skabhnā॒-droda̭sī॒ viṣṇṷre॒te dā॒dhāra̭ pṛthi॒vīma॒bhito̭ ma॒yūkhaiḥ᳚ || prācī॒ preta̭maddhva॒ra-ṅka॒lpaya̭ntī ū॒rdhvaṃ-ya~॒jña-nna̭yata॒-mmā jī᳚hvarata॒matra̭ ramethāṃ॒-va~rṣma̭-npṛthi॒vyā di॒vo vā̭ viṣṇavu॒ta vā̭ pṛthi॒vyā ma॒ho vā̭ viṣṇavu॒ta vā॒-'ntari̭kṣā॒ddhastaṷ pṛṇasva ba॒hubhi̭-rvasa॒vyai̭rā pra ya̭ccha॒ [pra ya̭ccha, dakṣi̭ṇā॒dota] 26

dakṣi̭ṇā॒dota sa॒vyāt | viṣṇo॒rnukaṃ̭-vī~॒ryā̭ṇi॒ pra vo̭caṃ॒-yaḥ ~pārthi̭vāni vima॒me rajāgṃ̭si॒ yo aska̭bhāya॒dutta̭ragṃ sa॒dhasthaṃ̭-vi~cakramā॒ṇa stre॒dhorṷgā॒yo viṣṇo̭ ra॒rāṭa̭masi॒ viṣṇoḥ᳚ pṛ॒ṣṭhama̭si॒ viṣṇo॒-śśñaptre᳚ stho॒ viṣṇo॒-ssyūra̭si॒ viṣṇo᳚-rdhru॒vama̭si vaiṣṇa॒vama̭si॒ viṣṇa̭ve tvā || 27 ||

( a॒sya॒-ya॒cchaikā॒nna ca̭tvāri॒gṃ॒śacca̭ ) (a. 13)

kṛ॒ṇu॒ṣva pājaḥ॒ prasi̭ti॒nna pṛ॒thvīṃ-yā~॒hi rāje॒vāma̭vā॒gṃ॒ ibhḙna | tṛ॒ṣvīmanu॒ prasi̭tiṃ-drūṇā॒no-'stā̭-'si॒ viddhya̭ ra॒kṣasa॒ stapi̭ṣṭhaiḥ || tava̭ bhra॒māsa̭ āśu॒yā pa̭nta॒tyanṷ spṛśa-dhṛṣa॒tā śośṷcānaḥ | tapūg̭ṣyagne ju॒hvā̭ pata॒ṅgānasa̭ndito॒ visṛ̭ja॒ viṣva̭gu॒lkāḥ || prati॒spaśo॒ visṛ̭ja॒-tūrṇi̭tamo॒ bhavā̭ pā॒yurvi॒śo a॒syā ada̭bdhaḥ | yo no̭ dū॒re a॒ghaśagṃ̭so॒ [a॒ghaśagṃ̭saḥ, yo antyagne॒] 28

yo antyagne॒ māki̭ṣṭe॒ vyathi॒rā da̭dharṣīt || uda̭gne tiṣṭha॒ pratyā ''ta̭nuṣva॒ nya̭mitrāgṃ̭ oṣatā-ttigmahete | yo no॒ arā̭tigṃ samidhāna ca॒kre nī॒cā ta-ndha̭kṣyata॒sa-nna śuṣka᳚m || ū॒rdhvo bha̭va॒ prati̭vi॒ddhyā-'ddhya॒smadā॒viṣkṛ̭ṇuṣva॒ daivyā᳚nyagne | ava̭sthi॒rā ta̭nuhi yātu॒jūnā᳚-ñjā॒mimajā̭miṃ॒ pramṛ̭ṇīhi॒ śatrūṋ || sa tḙ [sa te᳚, jā॒nā॒ti॒ su॒ma॒tiṃ] 29

jānāti suma॒tiṃ-ya~̭viṣṭha॒ya īva̭te॒ brahma̭ṇe gā॒tumaira̭t | viśvā᳚nyasmai su॒dinā̭ni rā॒yo dyu॒mnānya॒ryo viduro̭ a॒bhi dyau᳚t || seda̭gne astu su॒bhagaḥ̭ su॒dānu॒-ryastvā॒ nityḙna ha॒viṣā॒ya u॒kthaiḥ | piprī̭ṣati॒ sva āyṷṣi duro॒ṇe viśveda̭smai su॒dinā॒ sā-'sa̭di॒ṣṭiḥ || arcā̭mi te suma॒ti-ṅghoṣya॒rvākh-santḙ vā॒ vā tā̭ jaratā- [vā॒ vā tā̭ jaratām, i॒yaṅgīḥ] 30

mi॒yaṅgīḥ | svaśvā᳚stvā su॒rathā̭ marjayemā॒sme kṣa॒trāṇi̭ dhāraye॒ranu॒ dyūn || i॒ha tvā॒ bhūryā ca̭re॒ dupa॒tma-ndoṣā̭vasta-rdīdi॒vāgṃsa॒manu॒ dyūn | krīḍa̭ntastvā su॒mana̭sa-ssapemā॒bhi dyu॒mnā ta̭sthi॒vāgṃso॒ janā̭nām || yastvā॒-svaśvaḥ̭ suhira॒ṇyo a̭gna upa॒yāti॒ vasṷmatā॒ rathḙna | tasya̭ trā॒tā-bha̭vasi॒ tasya॒ sakhā॒ yasta̭ āti॒thyamā̭nu॒ṣag jujo̭ṣat || ma॒ho rṷjāmi - [ ] 31

ba॒ndhutā॒ vaco̭bhi॒stanmā̭ pi॒turgota̭mā॒da-nvi̭yāya | tvanno̭ a॒sya vaca̭sa-ścikiddhi॒ hota̭ryaviṣṭha sukrato॒ damṷ̄nāḥ || asva̭pnaja sta॒raṇa̭ya-ssu॒śevā॒ ata̭ndrāso-'vṛ॒kā aśra̭miṣṭhāḥ | te pā॒yavaḥ̭ sa॒ddhriya̭ñco ni॒ṣadyā-'gne॒ tava̭naḥ pāntvamūra || ye pā॒yavo̭ māmate॒ya-ntḙ agne॒ paśya̭nto a॒ndha-ndṷri॒tādara̭kṣann | ra॒rakṣa॒tān-thsu॒kṛto̭ vi॒śvavḙdā॒ diphsa̭nta॒ idri॒pavo॒ nā ha̭ [nā ha̭, de॒bhuḥ॒] 32

debhuḥ || tvayā̭ va॒yagṃ sa̭dha॒nya̭-stvotā॒-stava॒ praṇī᳚tyaśyāma॒ vājāṋ | u॒bhā śagṃsā̭ sūdaya satyatāte-'nuṣṭhu॒yā kṛ̭ṇuhyahrayāṇa || a॒yā tḙ agne sa॒midhā̭ vidhema॒ prati॒stomagṃ̭ śa॒syamā̭na-ṅgṛbhāya | dahā॒śaso̭ ra॒kṣasaḥ̭ pā॒hya̭smā-ndru॒ho ni॒do mi̭tramaho ava॒dyāt || ra॒kṣo॒haṇaṃ̭ ~vā॒jina॒māji̭gharmi mi॒tra-mprathi̭ṣṭha॒-mupa̭yāmi॒ śarma̭ | śiśā̭no a॒gniḥ kratṷbhi॒-ssami̭ddha॒ssano॒ divā॒ [divā᳚, sari॒ṣaḥ pā̭tu॒ naktaṃ᳚] 33

sari॒ṣaḥ pā̭tu॒ nakta᳚m || vijyoti̭ṣā bṛha॒tā bhā᳚tya॒gni-rā॒vi-rviśvā̭ni kṛṇute mahi॒tvā | prādḙvī-rmā॒yā-ssa̭hate-du॒revā॒-śśiśī̭te॒ śṛṅge॒ rakṣa̭se vi॒nikṣe᳚ || u॒ta svā॒nāso̭ di॒viṣa̭ntva॒gne sti॒gmāyṷdhā॒ rakṣa̭se॒ hanta॒vā ṷ | madḙ cidasya॒ prarṷjanti॒ bhāmā॒ na va̭rante pari॒bādho॒ adḙvīḥ || 34 ||

(a॒ghaśagṃ̭saḥ॒-sa tḙ-jaratāgṃ-rujāmi-ha॒ -divai - ka̭catvārigṃśacca) (a. 14)

(āpa̭ unda॒, ntvākū᳚tyai॒, daivī̭, mi॒yante॒, vasvya̭sya॒gṃ॒ śunā̭ te॒, soma̭nta॒, udāyṷṣā॒, pra cya̭vasvā॒, 'gne rā̭ti॒thya, -ma॒gṃ॒śuragṃ̭ śu, rvi॒ttāya̭nī me-'si, yu॒ñcatḙ, kṛṇu॒ṣva pāja॒, ścatṷrdaśa |)

(āpo॒-vasvya̭si॒ yā tave॒-yaṅgī-ścatṷstrigṃśat |)

(āpa̭ unda॒n, tvadḙvīḥ)

|| hariḥ̭ om ||

|| kṛṣṇa yajurvedīya taittirīya saṃhitāyā-mprathamakāṇḍe dvitīyaḥ praśna-ssamāptaḥ ||

Sanskrit — Devanagari (original)

कृष्ण यजुर्वेदीय तैत्तिरीय संहिताया-म्प्रथमकाण्डे द्वितीयः प्रश्नः - अग्निष्टोमे क्रयः

ओ-न्नमः परमात्मने, श्री महागणपतये नमः,

श्री गुरुभ्यो नमः । ह॒रिः॒ ओम् ॥

आप॑ उन्दन्तु जी॒वसे॑ दीर्घायु॒त्वाय॒ वर्च॑स॒ ओष॑धे॒ त्राय॑स्वैन॒ग्ग्॒ स्वधि॑ते॒ मैनग्ं॑ हिग्ंसी-र्देव॒श्रूरे॒तानि॒ प्र व॑पे स्व॒स्त्युत्त॑राण्यशी॒यापो॑ अ॒स्मा-न्मा॒तरः॑ शुन्धन्तु घृ॒तेन॑ नो घृत॒पुवः॑ पुनन्तु॒ विश्व॑म॒स्म-त्प्र व॑हन्तु रि॒प्रमुदा᳚भ्य॒-श्शुचि॒रा पू॒त ए॑मि॒ सोम॑स्य त॒नूर॑सि त॒नुव॑-म्मे पाहि मही॒ना-म्पयो॑-ऽसि वर्चो॒धा अ॑सि॒ वर्चो॒- [वर्चः॑, मयि॑ धेहि वृ॒त्रस्य॑] 1

मयि॑ धेहि वृ॒त्रस्य॑ क॒नीनि॑का-ऽसि चक्षु॒ष्पा अ॑सि॒ चक्षु॑र्मे पाहि चि॒त्पति॑स्त्वा पुनातु वा॒क्पति॑स्त्वा पुनातु दे॒वस्त्वा॑ सवि॒ता पु॑ना॒त्वच्छि॑द्रेण प॒वित्रे॑ण॒ वसो॒-स्सूर्य॑स्य र॒श्मिभि॒स्तस्य॑ ते पवित्रपते प॒वित्रे॑ण॒ यस्मै॒ क-म्पु॒ने तच्छ॑केय॒मा वो॑ देवास ईमहे॒ सत्य॑धर्माणो अद्ध्व॒रे यद्वो॑ देवास आगु॒रे यज्ञि॑यासो॒ हवा॑मह॒ इन्द्रा᳚ग्नी॒ द्यावा॑पृथिवी॒ आप॑ ओषधी॒ स्त्व-न्दी॒क्षाणा॒-मधि॑पतिरसी॒ह मा॒ सन्त॑-म्पाहि ॥ 2 ॥

(वर्च॑ - ओषधी- र॒ष्टौ च॑ ) (अ. 1)

आकू᳚त्यै प्र॒युजे॒-ऽग्नये॒ स्वाहा॑ मे॒धायै॒ मन॑से॒ ऽग्नये॒ स्वाहा॑ दी॒क्षायै॒ तप॑से॒-ऽग्नये॒ स्वाहा॒ सर॑स्वत्यै पू॒ष्णे᳚-ऽग्नये॒ स्वाहा-ऽऽपो॑ देवी-र्बृहती-र्विश्वशम्भुवो॒ द्यावा॑पृथि॒वी उ॒र्व॑न्तरि॑क्ष॒-म्बृह॒स्पति॑र्नो ह॒विषा॑ वृधातु॒ स्वाहा॒ विश्वे॑ दे॒वस्य॑ ने॒तुर्मर्तो॑ वृणीत स॒ख्यं-विँश्वे॑ रा॒य इ॑षुद्ध्यसि द्यु॒म्नं-वृँ॑णीत पु॒ष्यसे॒ स्वाह॑र्ख्सा॒मयो॒-श्शिल्पे᳚ स्थ॒स्ते वा॒मा र॑भे॒ ते मा॑- [ते मा᳚, पा॒त॒मा-ऽस्य] 3

पात॒मा-ऽस्य य॒ज्ञस्यो॒दृच॑ इ॒मा-न्धिय॒ग्ं॒ शिक्ष॑माणस्य देव॒ क्रतु॒-न्दक्षं॑-वँरुण॒ सग्ं शि॑शाधि॒ यया-ऽति॒ विश्वा॑ दुरि॒ता तरे॑म सु॒तर्मा॑ण॒मधि॒ नावग्ं॑ रुहे॒मोर्ग॑स्याङ्गिर॒स्यूर्ण॑म्रदा॒ ऊर्ज॑-म्मे यच्छ पा॒हि मा॒ मा मा॑ हिग्ंसी॒-र्विष्णो॒-श्शर्मा॑सि॒ शर्म॒ यज॑मानस्य॒ शर्म॑ मे यच्छ॒ नक्ष॑त्राणा-म्मा-ऽतीका॒शा-त्पा॒हीन्द्र॑स्य॒ योनि॑रसि॒- [योनि॑रसि, मा मा॑ हिग्ंसीः] 4

मा मा॑ हिग्ंसीः कृ॒ष्यै त्वा॑ सुस॒स्यायै॑ सुपिप्प॒लाभ्य॒-स्त्वौष॑धीभ्य-स्सूप॒स्था दे॒वो वन॒स्पति॑रू॒र्ध्वो मा॑ पा॒ह्योदृच॒-स्स्वाहा॑ य॒ज्ञ-म्मन॑सा॒ स्वाहा॒ द्यावा॑पृथि॒वीभ्या॒ग्॒ स्वाहो॒रो-र॒न्तरि॑क्षा॒-थ्स्वाहा॑ य॒ज्ञं-वाँता॒दा र॑भे ॥ 5 ॥

( मा॒ - योनि॑रसि - त्रि॒ग्ं॒शच्च॑ ) (अ. 2)

दैवी॒-न्धिय॑-म्मनामहे सुमृडी॒का-म॒भिष्ट॑ये वर्चो॒धां-यँ॒ज्ञवा॑हसग्ं सुपा॒रा नो॑ अस॒-द्वशे᳚ । ये दे॒वा मनो॑जाता मनो॒युजः॑ सु॒दक्षा॒ दक्ष॑पितार॒स्ते नः॑ पान्तु॒ ते नो॑-ऽवन्तु॒ तेभ्यो॒ नम॒स्तेभ्य॒-स्स्वाहा-ऽग्ने॒ त्वग्ं सु जा॑गृहि व॒यग्ं सु म॑न्दिषीमहि गोपा॒य नः॑ स्व॒स्तये᳚ प्र॒बुधे॑ नः॒ पुन॑र्ददः । त्वम॑ग्ने व्रत॒पा अ॑सि दे॒व आ मर्त्ये॒ष्वा । त्वं- [त्वम्, य॒ज्ञेष्वीड्यः॑ ।] 6

य॒ज्ञेष्वीड्यः॑ ॥ विश्वे॑ दे॒वा अ॒भि मामा-ऽव॑वृत्र-न्पू॒षा स॒न्या सोमो॒ राध॑सा दे॒व-स्स॑वि॒ता वसो᳚र्वसु॒दावा॒ रास्वेय॑-थ्सो॒मा ऽऽभूयो॑ भर॒ मा पृ॒ण-न्पू॒र्त्या वि रा॑धि॒ मा-ऽहमायु॑षा च॒न्द्रम॑सि॒ मम॒ भोगा॑य भव॒ वस्त्र॑मसि॒ मम॒ भोगा॑य भवो॒स्रा-ऽसि॒ मम॒ भोगा॑य भव॒ हयो॑-ऽसि॒ मम॒ भोगा॑य भव॒- [भोगा॑य भव, छागो॑-ऽसि॒ मम॒] 7

छागो॑-ऽसि॒ मम॒ भोगा॑य भव मे॒षो॑-ऽसि॒ मम॒ भोगा॑य भव वा॒यवे᳚ त्वा॒ वरु॑णाय त्वा॒ निर्-ऋ॑त्यै त्वा रु॒द्राय॑ त्वा॒ देवी॑रापो अपा-न्नपा॒द्य ऊ॒र्मिर्-ह॑वि॒ष्य॑ इन्द्रि॒यावा᳚-न्म॒दिन्त॑म॒स्तं-वोँ॒ मा-ऽव॑ क्रमिष॒मच्छि॑न्न॒-न्तन्तु॑-म्पृथि॒व्या अनु॑ गेष-म्भ॒द्राद॒भि श्रेयः॒ प्रेहि॒ बृह॒स्पतिः॑ पुरए॒ता ते॑ अ॒स्त्वथे॒मव॑ स्य॒ वर॒ आ पृ॑थि॒व्या आ॒रे शत्रू᳚न् कृणुहि॒ सर्व॑वीर॒ एदम॑गन्म देव॒यज॑न-म्पृथि॒व्या विश्वे॑ दे॒वा यदजु॑षन्त॒ पूर्व॑ ऋख्सा॒माभ्यां॒-यँजु॑षा स॒न्तर॑न्तो रा॒यस्पोषे॑ण॒ समि॒षा म॑देम ॥ 8 ॥

( आ त्वग्ं-हयो॑-ऽसि॒ मम॒ भोगा॑य भव-स्य॒-पञ्च॑विग्ंशतिश्च ) (अ. 3)

इ॒य-न्ते॑ शुक्र त॒नूरि॒दं-वँर्च॒स्तया॒ स-म्भ॑व॒ भ्राज॑-ङ्गच्छ॒ जूर॑सि धृ॒ता मन॑सा॒ जुष्टा॒ विष्ण॑वे॒ तस्या᳚स्ते स॒त्यस॑वसः प्रस॒वे वा॒चो य॒न्त्रम॑शीय॒ स्वाहा॑ शु॒क्रम॑स्य॒मृत॑मसि वैश्वदे॒वग्ं ह॒वि-स्सूर्य॑स्य॒ चक्षु॒रा -ऽरु॑हम॒ग्ने र॒क्ष्णः क॒नीनि॑कां॒-यँदेत॑शेभि॒रीय॑से॒ भ्राज॑मानो विप॒श्चिता॒ चिद॑सि म॒ना-ऽसि॒ धीर॑सि॒ दक्षि॑णा- [दक्षि॑णा, अ॒सि॒ य॒ज्ञिया॑-ऽसि] 9

-ऽसि य॒ज्ञिया॑-ऽसि क्ष॒त्रिया॒ ऽस्यदि॑ति-रस्युभ॒यत॑॑श्शीर्ष्णी॒ सा न॒-स्सुप्रा॑ची॒ सुप्र॑तीची॒ स-म्भ॑व मि॒त्रस्त्वा॑ प॒दि ब॑द्ध्नातु पू॒षा-ऽद्ध्व॑नः पा॒त्विन्द्रा॒या-द्ध्य॑क्षा॒यानु॑ त्वा मा॒ता म॑न्यता॒मनु॑ पि॒ता-ऽनु॒ भ्राता॒ सग॒र्भ्यो-ऽनु॒ सखा॒ सयू᳚थ्य॒-स्सा दे॑वि दे॒वमच्छे॒हीन्द्रा॑य॒ सोमग्ं॑ रु॒द्रस्त्वा ऽऽव॑र्तयतु मि॒त्रस्य॑ प॒था स्व॒स्ति सोम॑सखा॒ पुन॒रेहि॑ स॒ह र॒य्या ॥ 10 ॥

( दक्षि॑णा॒-सोम॑सखा॒, पञ्च॑ च ) (अ. 4)

वस्व्य॑सि रु॒द्रा-ऽस्यदि॑ति-रस्यादि॒त्या-ऽसि॑ शु॒क्रा-ऽसि॑ च॒न्द्रा-ऽसि॒ बृह॒स्पति॑स्त्वा सु॒म्ने र॑ण्वतु रु॒द्रो वसु॑भि॒रा चि॑केतु पृथि॒व्यास्त्वा॑ मू॒र्धन्ना जि॑घर्मि देव॒यज॑न॒ इडा॑याः प॒दे घृ॒तव॑ति॒ स्वाहा॒ परि॑लिखित॒ग्ं॒ रक्षः॒ परि॑लिखिता॒ अरा॑तय इ॒दम॒हग्ं रक्ष॑सो ग्री॒वा अपि॑ कृन्तामि॒ यो᳚-ऽस्मा-न्द्वेष्टि॒ य-ञ्च॑ व॒य-न्द्वि॒ष्म इ॒दम॑स्य ग्री॒वा [ग्री॒वाः, अपि॑ कृन्ताम्य॒स्मे] 11

अपि॑ कृन्ताम्य॒स्मे राय॒स्त्वे राय॒स्तोते॒ राय॒-स्स-न्दे॑वि दे॒व्योर्वश्या॑ पश्यस्व॒ त्वष्टी॑मती ते सपेय सु॒रेता॒ रेतो॒ दधा॑ना वी॒रं-विँ॑देय॒ तव॑ स॒न्दृशि॒ मा-ऽहग्ंरा॒यस्पोषे॑ण॒ वि यो॑षम् ॥ 12 ॥

( अ॒स्य॒ ग्री॒वा-एका॒न्न त्रि॒ग्ं॒शच्च॑ ) (अ. 5)

अ॒ग्ं॒शुना॑ ते अ॒ग्ं॒शुः पृ॑च्यता॒-म्परु॑षा॒ परु॑-र्ग॒न्धस्ते॒ काम॑मवतु॒ मदा॑य॒ रसो॒ अच्यु॑तो॒ ऽमात्यो॑-ऽसि शु॒क्रस्ते॒ ग्रहो॒-ऽभि त्य-न्दे॒वग्ं स॑वि॒तार॑मू॒ण्योः᳚ क॒विक्र॑तु॒मर्चा॑मि स॒त्यस॑वसग्ं रत्न॒धाम॒भि प्रि॒य-म्म॒तिमू॒र्ध्वा यस्या॒मति॒र्भा अदि॑द्युत॒-थ्सवी॑मनि॒ हिर॑ण्यपाणिरमिमीत सु॒क्रतुः॑ कृ॒पा सुवः॑ । प्र॒जाभ्य॑स्त्वा प्रा॒णाय॑ त्वा व्या॒नाय॑ त्वा प्र॒जास्त्वमनु॒ प्राणि॑हि प्र॒जास्त्वामनु॒ प्राण॑न्तु ॥ 13 ॥

(अनु॑-स॒प्त च॑) (अ. 6)

सोम॑-न्ते क्रीणा॒म्यूर्ज॑स्वन्त॒-म्पय॑स्वन्तं-वीँ॒र्या॑वन्तमभि-माति॒षाहग्ं॑ शु॒क्र-न्ते॑ शु॒क्रेण॑ क्रीणामि च॒न्द्र-ञ्च॒न्द्रेणा॒मृत॑म॒मृते॑न स॒म्यत्ते॒ गोर॒स्मे च॒न्द्राणि॒ तप॑सस्त॒नूर॑सि प्र॒जाप॑ते॒-र्वर्ण॒स्तस्या᳚स्ते सहस्रपो॒ष-म्पुष्य॑न्त्याश्चर॒मेण॑ प॒शुना᳚ क्रीणाम्य॒स्मे ते॒ बन्धु॒र्मयि॑ ते॒ रायः॑ श्रयन्ताम॒स्मे ज्योतिः॑ सोमविक्र॒यिणि॒ तमो॑ मि॒त्रो न॒ एहि॒ सुमि॑त्रधा॒ इन्द्र॑स्यो॒रु मा वि॑श॒ दक्षि॑ण-मु॒शन्नु॒शन्तग्ग्॑ स्यो॒न-स्स्यो॒नग्ग् स्वान॒ भ्राजाङ्घा॑रे॒ बम्भा॑रे॒ हस्त॒ सुह॑स्त॒ कृशा॑नवे॒ते वः॑ सोम॒ क्रय॑णा॒स्ता-न्र॑क्षद्ध्व॒-म्मा वो॑ दभन्न् ॥ 14 ॥

(उ॒रुं-द्वाविग्ं॑शतिश्च) (अ. 7)

उदायु॑षा स्वा॒युषोदोष॑धीना॒ग्ं॒ रसे॒नो-त्प॒र्जन्य॑स्य॒ शुष्मे॒णोद॑स्थाम॒मृता॒ग्ं॒ अनु॑ । उ॒र्व॑न्तरि॑क्ष॒मन्वि॒ह्यदि॑त्या॒-स्सदो॒-ऽस्यदि॑त्या॒-स्सद॒ आ सी॒दास्त॑भ्ना॒-द्द्यामृ॑ष॒भो अ॒न्तरि॑क्ष॒ममि॑मीत वरि॒माण॑-म्पृथि॒व्या आ-ऽसी॑द॒-द्विश्वा॒ भुव॑नानि स॒म्रा-ड्विश्वेत्तानि॒ वरु॑णस्य व्र॒तानि॒ वने॑षु॒ व्य॑न्तरि॑क्ष-न्ततान॒ वाज॒मर्व॑थ्सु॒ पयो॑ अघ्नि॒यासु॑ हृ॒थ्सु- [ ] ॥ 15 ॥

क्रतुं॒-वँरु॑णो वि॒क्ष्व॑ग्नि-न्दि॒वि सूर्य॑मदधा॒-थ्सोम॒मद्रा॒वुदु॒त्य-ञ्जा॒तवे॑दस-न्दे॒वं-वँ॑हन्ति के॒तवः॑ । दृ॒शे विश्वा॑य॒ सूर्य᳚म् ॥ उस्रा॒वेत॑-न्धूर्षाहावन॒श्रू अवी॑रहणौ ब्रह्म॒चोद॑नौ॒ वरु॑णस्य॒ स्कम्भ॑नमसि॒ वरु॑णस्य स्कम्भ॒सर्ज॑नमसि॒ प्रत्य॑स्तो॒ वरु॑णस्य॒ पाशः॑ ॥ 16 ॥

( हृ॒थ्सु-पञ्च॑त्रिग्ंशच्च ) (अ. 8)

प्र च्य॑वस्व भुवस्पते॒ विश्वा᳚न्य॒भि धामा॑नि॒ मा त्वा॑ परिप॒री वि॑द॒न्मा त्वा॑ परिप॒न्थिनो॑ विद॒न्मा त्वा॒ वृका॑ अघा॒यवो॒ मा ग॑न्ध॒र्वो वि॒श्वाव॑सु॒रा द॑घच्छ्ये॒नो भू॒त्वा परा॑ पत॒ यज॑मानस्य नो गृ॒हे दे॒वै-स्सग्ग्॑स्कृ॒तं-यँज॑मानस्य स्व॒स्त्यय॑न्य॒स्यपि॒ पन्था॑मगस्महि स्वस्ति॒गा-म॑ने॒हसं॒-येँन॒ विश्वाः॒ परि॒ द्विषो॑ वृ॒णक्ति॑ वि॒न्दते॒ वसु॒ नमो॑ मि॒त्रस्य॒ वरु॑णस्य॒ चक्ष॑से म॒हो दे॒वाय॒ तदृ॒तग्ं स॑पर्यत दूरे॒दृशे॑ दे॒वजा॑ताय के॒तवे॑ दि॒वस्पु॒त्राय॒ सूर्या॑य शग्ंसत॒ वरु॑णस्य॒ स्कम्भ॑नमसि॒ वरु॑णस्य स्कम्भ॒सर्ज॑न-म॒स्युन्मु॑क्तो॒ वरु॑णस्य॒ पाशः॑ ॥ 17 ॥

( मि॒त्रस्य॒-त्रयो॑विग्ंशतिश्च ) (अ. 9)

अ॒ग्ने-रा॑ति॒थ्यम॑सि॒ विष्ण॑वे त्वा॒ सोम॑स्या-ऽऽति॒थ्यम॑सि॒ विष्ण॑वे॒ त्वा-ऽति॑थेराति॒थ्यम॑सि॒ विष्ण॑वे त्वा॒-ऽग्नये᳚ त्वा रायस्पोष॒दाव्न्ने॒ विष्ण॑वे त्वा श्ये॒नाय॑ त्वा सोम॒भृते॒ विष्ण॑वे त्वा॒ या ते॒ धामा॑नि ह॒विषा॒ यज॑न्ति॒ ता ते॒ विश्वा॑ परि॒भूर॑स्तु य॒ज्ञ-ङ्ग॑य॒स्फानः॑ प्र॒तर॑ण-स्सु॒वीरो-ऽवी॑रहा॒ प्रच॑रा सोम॒ दुर्या॒नदि॑त्या॒-स्सदो॒-ऽस्यदि॑त्या॒-स्सद॒ आ- [सद॒ आ, सी॒द॒ वरु॑णो-ऽसि] ॥ 18 ॥

सी॑द॒ वरु॑णो-ऽसि धृ॒तव्र॑तो वारु॒णम॑सि शं॒योँ-र्दे॒वानाग्ं॑ स॒ख्यान्मा दे॒वाना॑-म॒पस॑-श्छिथ्स्म॒ह्याप॑तये त्वा गृह्णामि॒ परि॑पतये त्वा गृह्णामि॒ तनू॒नप्त्रे᳚ त्वा गृह्णामि शाक्व॒राय॑ त्वा गृह्णामि॒ शक्म॒न्नोजि॑ष्ठाय त्वा गृह्णा॒म्य-ना॑धृष्टमस्य-नाधृ॒ष्य-न्दे॒वाना॒मोजो॑- ऽभिषस्ति॒पा अ॑नभिशस्ते॒-ऽन्यमनु॑ मे दी॒क्षा-न्दी॒क्षाप॑ति-र्मन्यता॒मनु॒ तप॒स्तप॑स्पति॒रञ्ज॑सा स॒त्यमुप॑ गेषग्ं सुवि॒ते मा॑ धाः ॥ 19 ॥

( आ-मै-क॑-ञ्च ) (अ. 10)

अ॒ग्ं॒शुरग्ं॑शुस्ते देव सो॒मा-ऽऽप्या॑यता॒-मिन्द्रा॑यैकधन॒विद॒ आ तुभ्य॒मिन्द्रः॑ प्यायता॒मा त्वमिन्द्रा॑य प्याय॒स्वा-ऽऽप्या॑यय॒ सखी᳚न्-थ्स॒न्या मे॒धया᳚ स्व॒स्ति ते॑ देव सोम सु॒त्याम॑शी॒येष्टा॒ रायः॒ प्रेषे भगा॑य॒र्तमृ॑तवा॒दिभ्यो॒ नमो॑ दि॒वे नमः॑ पृथि॒व्या अग्ने᳚ व्रतपते॒ त्वं-व्रँ॒तानां᳚-व्रँ॒तप॑तिरसि॒ या मम॑ त॒नूरे॒षा सा त्वयि॒ [त्वयि॑, या तव॑] ॥ 20 ॥

या तव॑ त॒नूरि॒यग्ं सा मयि॑ स॒ह नौ᳚ व्रतपते व्र॒तिनो᳚-र्व्र॒तानि॒ या ते॑ अग्ने॒ रुद्रि॑या त॒नूस्तया॑ नः पाहि॒ तस्या᳚स्ते॒ स्वाहा॒ या ते॑ अग्ने-ऽयाश॒या र॑जाश॒या ह॑राश॒या त॒नूर्वर्षि॑ष्ठा गह्वरे॒ष्ठो-ऽग्रं-वँचो॒ अपा॑वधी-न्त्वे॒षं-वँचो॒ अपा॑वधी॒ग्॒ स्वाहा᳚ ॥ 21 ॥

( त्वयि॑-चत्वारि॒ग्ं॒शच्च॑ ) (अ. 11)

वि॒त्ताय॑नी मे-ऽसि ति॒क्ताय॑नी मे॒-ऽस्यव॑तान्मा नाथि॒तमव॑तान्मा व्यथि॒तं-विँ॒देर॒ग्निर्नभो॒ नामाग्ने॑ अङ्गिरो॒ यो᳚-ऽस्या-म्पृ॑थि॒व्यामस्यायु॑षा॒ नाम्नेहि॒ यत्ते-ऽना॑धृष्ट॒-न्नाम॑ य॒ज्ञिय॒-न्तेन॒ त्वा-ऽऽद॒धे-ऽग्ने॑ अङ्गिरो॒ यो द्वि॒तीय॑स्या-न्तृ॒तीय॑स्या-म्पृथि॒व्या-मस्यायु॑षा॒ नाम्नेहि॒ यत्ते-ऽना॑धृष्ट॒-न्नाम॑- [ ] 22

य॒ज्ञिय॒-न्तेन॒ त्वा-ऽऽद॑धे सि॒ग्ं॒हीर॑सि महि॒षीर॑स्यु॒रु प्र॑थस्वो॒रु ते॑ य॒ज्ञप॑तिः प्रथता-न्ध्रु॒वा-ऽसि॑ दे॒वेभ्यः॑ शुन्धस्व दे॒वेभ्यः॑ शुम्भस्वेन्द्रघो॒षस्त्वा॒ वसु॑भिः पु॒रस्ता᳚-त्पातु॒ मनो॑जवास्त्वा पि॒तृभि॑-र्दक्षिण॒तः पा॑तु॒ प्रचे॑तास्त्वा रु॒द्रैः प॒श्चा-त्पा॑तु वि॒श्वक॑र्मा त्वा-ऽऽदि॒त्यैरु॑त्तर॒तः पा॑तु सि॒ग्ं॒हीर॑सि सपत्नसा॒ही स्वाहा॑ सि॒ग्ं॒हीर॑सि सुप्रजा॒वनि॒-स्स्वाहा॑ सि॒ग्ं॒ही- [सि॒ग्ं॒हीः, अ॒सि॒ रा॒य॒स्पो॒ष॒वनि॒-स्स्वाहा॑] 23

र॑सि रायस्पोष॒वनि॒-स्स्वाहा॑ सि॒ग्ं॒हीर॑स्यादित्य॒वनि॒-स्स्वाहा॑ सि॒ग्ं॒हीर॒स्या व॑ह दे॒वान्दे॑वय॒ते यज॑मानाय॒ स्वाहा॑ भू॒तेभ्य॑स्त्वा वि॒श्वायु॑रसि पृथि॒वी-न्दृग्ं॑ह ध्रुव॒क्षिद॑स्य॒न्तरि॑क्ष-न्दृग्ंहाच्युत॒क्षिद॑सि॒ दिव॑-न्दृग्ंहा॒ग्ने-र्भस्मा᳚स्य॒ग्नेः पुरी॑षमसि ॥ 24 ॥

(नाम॑-सुप्रजा॒वनि॒-स्स्वाहा॑ सि॒ग्ं॒सीः; पञ्च॑त्रिग्ंशच्च ) (अ. 12)

यु॒ञ्जते॒ मन॑ उ॒त यु॑ञ्जते॒ धियो॒ विप्रा॒ विप्र॑स्य बृह॒तो वि॑प॒श्चितः॑ । वि होत्रा॑ दधे वयुना॒विदेक॒ इन्म॒ही दे॒वस्य॑ सवि॒तुः परि॑ष्टुतिः ॥ सु॒वाग्दे॑व॒ दुर्या॒ग्ं॒ आ व॑द देव॒श्रुतौ॑ दे॒वेष्वा घो॑षेथा॒मा नो॑ वी॒रो जा॑यता-ङ्कर्म॒ण्यो॑ यग्ं सर्वे॑-ऽनु॒ जीवा॑म॒ यो ब॑हू॒नामस॑द्व॒शी ॥ इ॒दं-विँष्णु॒-र्विच॑क्रमे त्रे॒धा नि द॑धे प॒दम् ॥ समू॑ढमस्य [समू॑ढमस्य, पा॒ग्ं॒सु॒र] 25

पाग्ंसु॒र इरा॑वती धेनु॒मती॒ हि भू॒तग्ं सू॑यव॒सिनी॒ मन॑वे यश॒स्ये᳚ । व्य॑स्कभ्ना॒-द्रोद॑सी॒ विष्णु॑रे॒ते दा॒धार॑ पृथि॒वीम॒भितो॑ म॒यूखैः᳚ ॥ प्राची॒ प्रेत॑मद्ध्व॒र-ङ्क॒ल्पय॑न्ती ऊ॒र्ध्वं-यँ॒ज्ञ-न्न॑यत॒-म्मा जी᳚ह्वरत॒मत्र॑ रमेथां॒-वँर्ष्म॑-न्पृथि॒व्या दि॒वो वा॑ विष्णवु॒त वा॑ पृथि॒व्या म॒हो वा॑ विष्णवु॒त वा॒-ऽन्तरि॑क्षा॒द्धस्तौ॑ पृणस्व ब॒हुभि॑-र्वस॒व्यै॑रा प्र य॑च्छ॒ [प्र य॑च्छ, दक्षि॑णा॒दोत] 26

दक्षि॑णा॒दोत स॒व्यात् । विष्णो॒र्नुकं॑-वीँ॒र्या॑णि॒ प्र वो॑चं॒-यः ँपार्थि॑वानि विम॒मे रजाग्ं॑सि॒ यो अस्क॑भाय॒दुत्त॑रग्ं स॒धस्थं॑-विँचक्रमा॒ण स्त्रे॒धोरु॑गा॒यो विष्णो॑ र॒राट॑मसि॒ विष्णोः᳚ पृ॒ष्ठम॑सि॒ विष्णो॒-श्श्ञप्त्रे᳚ स्थो॒ विष्णो॒-स्स्यूर॑सि॒ विष्णो᳚-र्ध्रु॒वम॑सि वैष्ण॒वम॑सि॒ विष्ण॑वे त्वा ॥ 27 ॥

( अ॒स्य॒-य॒च्छैका॒न्न च॑त्वारि॒ग्ं॒शच्च॑ ) (अ. 13)

कृ॒णु॒ष्व पाजः॒ प्रसि॑ति॒न्न पृ॒थ्वीं-याँ॒हि राजे॒वाम॑वा॒ग्ं॒ इभे॑न । तृ॒ष्वीमनु॒ प्रसि॑तिं-द्रूणा॒नो-ऽस्ता॑-ऽसि॒ विद्ध्य॑ र॒क्षस॒ स्तपि॑ष्ठैः ॥ तव॑ भ्र॒मास॑ आशु॒या प॑न्त॒त्यनु॑ स्पृश-धृष॒ता शोशु॑चानः । तपूग्॑ष्यग्ने जु॒ह्वा॑ पत॒ङ्गानस॑न्दितो॒ विसृ॑ज॒ विष्व॑गु॒ल्काः ॥ प्रति॒स्पशो॒ विसृ॑ज॒-तूर्णि॑तमो॒ भवा॑ पा॒युर्वि॒शो अ॒स्या अद॑ब्धः । यो नो॑ दू॒रे अ॒घशग्ं॑सो॒ [अ॒घशग्ं॑सः, यो अन्त्यग्ने॒] 28

यो अन्त्यग्ने॒ माकि॑ष्टे॒ व्यथि॒रा द॑धर्षीत् ॥ उद॑ग्ने तिष्ठ॒ प्रत्या ऽऽत॑नुष्व॒ न्य॑मित्राग्ं॑ ओषता-त्तिग्महेते । यो नो॒ अरा॑तिग्ं समिधान च॒क्रे नी॒चा त-न्ध॑क्ष्यत॒स-न्न शुष्क᳚म् ॥ ऊ॒र्ध्वो भ॑व॒ प्रति॑वि॒द्ध्या-ऽद्ध्य॒स्मदा॒विष्कृ॑णुष्व॒ दैव्या᳚न्यग्ने । अव॑स्थि॒रा त॑नुहि यातु॒जूना᳚-ञ्जा॒मिमजा॑मिं॒ प्रमृ॑णीहि॒ शत्रून्॑ ॥ स ते॑ [स ते᳚, जा॒ना॒ति॒ सु॒म॒तिं] 29

जानाति सुम॒तिं-यँ॑विष्ठ॒य ईव॑ते॒ ब्रह्म॑णे गा॒तुमैर॑त् । विश्वा᳚न्यस्मै सु॒दिना॑नि रा॒यो द्यु॒म्नान्य॒र्यो विदुरो॑ अ॒भि द्यौ᳚त् ॥ सेद॑ग्ने अस्तु सु॒भगः॑ सु॒दानु॒-र्यस्त्वा॒ नित्ये॑न ह॒विषा॒य उ॒क्थैः । पिप्री॑षति॒ स्व आयु॑षि दुरो॒णे विश्वेद॑स्मै सु॒दिना॒ सा-ऽस॑दि॒ष्टिः ॥ अर्चा॑मि ते सुम॒ति-ङ्घोष्य॒र्वाख्-सन्ते॑ वा॒ वा ता॑ जरता- [वा॒ वा ता॑ जरताम्, इ॒यङ्गीः] 30

मि॒यङ्गीः । स्वश्वा᳚स्त्वा सु॒रथा॑ मर्जयेमा॒स्मे क्ष॒त्राणि॑ धारये॒रनु॒ द्यून् ॥ इ॒ह त्वा॒ भूर्या च॑रे॒ दुप॒त्म-न्दोषा॑वस्त-र्दीदि॒वाग्ंस॒मनु॒ द्यून् । क्रीड॑न्तस्त्वा सु॒मन॑स-स्सपेमा॒भि द्यु॒म्ना त॑स्थि॒वाग्ंसो॒ जना॑नाम् ॥ यस्त्वा॒-स्वश्वः॑ सुहिर॒ण्यो अ॑ग्न उप॒याति॒ वसु॑मता॒ रथे॑न । तस्य॑ त्रा॒ता-भ॑वसि॒ तस्य॒ सखा॒ यस्त॑ आति॒थ्यमा॑नु॒षग् जुजो॑षत् ॥ म॒हो रु॑जामि - [ ] 31

ब॒न्धुता॒ वचो॑भि॒स्तन्मा॑ पि॒तुर्गोत॑मा॒द-न्वि॑याय । त्वन्नो॑ अ॒स्य वच॑स-श्चिकिद्धि॒ होत॑र्यविष्ठ सुक्रतो॒ दमू॑नाः ॥ अस्व॑प्नज स्त॒रण॑य-स्सु॒शेवा॒ अत॑न्द्रासो-ऽवृ॒का अश्र॑मिष्ठाः । ते पा॒यवः॑ स॒द्ध्रिय॑ञ्चो नि॒षद्या-ऽग्ने॒ तव॑नः पान्त्वमूर ॥ ये पा॒यवो॑ मामते॒य-न्ते॑ अग्ने॒ पश्य॑न्तो अ॒न्ध-न्दु॑रि॒तादर॑क्षन्न् । र॒रक्ष॒तान्-थ्सु॒कृतो॑ वि॒श्ववे॑दा॒ दिफ्स॑न्त॒ इद्रि॒पवो॒ ना ह॑ [ना ह॑, दे॒भुः॒] 32

देभुः ॥ त्वया॑ व॒यग्ं स॑ध॒न्य॑-स्त्वोता॒-स्तव॒ प्रणी᳚त्यश्याम॒ वाजान्॑ । उ॒भा शग्ंसा॑ सूदय सत्यताते-ऽनुष्ठु॒या कृ॑णुह्यह्रयाण ॥ अ॒या ते॑ अग्ने स॒मिधा॑ विधेम॒ प्रति॒स्तोमग्ं॑ श॒स्यमा॑न-ङ्गृभाय । दहा॒शसो॑ र॒क्षसः॑ पा॒ह्य॑स्मा-न्द्रु॒हो नि॒दो मि॑त्रमहो अव॒द्यात् ॥ र॒क्षो॒हणं॑ ँवा॒जिन॒माजि॑घर्मि मि॒त्र-म्प्रथि॑ष्ठ॒-मुप॑यामि॒ शर्म॑ । शिशा॑नो अ॒ग्निः क्रतु॑भि॒-स्समि॑द्ध॒स्सनो॒ दिवा॒ [दिवा᳚, सरि॒षः पा॑तु॒ नक्तं᳚] 33

सरि॒षः पा॑तु॒ नक्त᳚म् ॥ विज्योति॑षा बृह॒ता भा᳚त्य॒ग्नि-रा॒वि-र्विश्वा॑नि कृणुते महि॒त्वा । प्रादे॑वी-र्मा॒या-स्स॑हते-दु॒रेवा॒-श्शिशी॑ते॒ शृङ्गे॒ रक्ष॑से वि॒निक्षे᳚ ॥ उ॒त स्वा॒नासो॑ दि॒विष॑न्त्व॒ग्ने स्ति॒ग्मायु॑धा॒ रक्ष॑से॒ हन्त॒वा उ॑ । मदे॑ चिदस्य॒ प्ररु॑जन्ति॒ भामा॒ न व॑रन्ते परि॒बाधो॒ अदे॑वीः ॥ 34 ॥

(अ॒घशग्ं॑सः॒-स ते॑-जरताग्ं-रुजामि-ह॒ -दिवै - क॑चत्वारिग्ंशच्च) (अ. 14)

(आप॑ उन्द॒, न्त्वाकू᳚त्यै॒, दैवी॑, मि॒यन्ते॒, वस्व्य॑स्य॒ग्ं॒ शुना॑ ते॒, सोम॑न्त॒, उदायु॑षा॒, प्र च्य॑वस्वा॒, ऽग्ने रा॑ति॒थ्य, -म॒ग्ं॒शुरग्ं॑ शु, र्वि॒त्ताय॑नी मे-ऽसि, यु॒ञ्चते॑, कृणु॒ष्व पाज॒, श्चतु॑र्दश ।)

(आपो॒-वस्व्य॑सि॒ या तवे॒-यङ्गी-श्चतु॑स्त्रिग्ंशत् ।)

(आप॑ उन्द॒न्, त्वदे॑वीः)

॥ हरिः॑ ओम् ॥

॥ कृष्ण यजुर्वेदीय तैत्तिरीय संहिताया-म्प्रथमकाण्डे द्वितीयः प्रश्न-स्समाप्तः ॥