1.2 - Apa Undantu Jivase - Krishna Yajurveda Taittiriya Samhita Pathah — Sinhala Script

කෘෂ්ණ යජුර්වේදීය තෛත්තිරීය සංහිතායා-ම්ප්රථමකාණ්ඩේ ද්විතීයඃ ප්රශ්නඃ - අග්නිෂ්ටෝමේ ක්රයඃ

ඕ-න්නමඃ පරමාත්මනේ, ශ්රී මහාගණපතයේ නමඃ,

ශ්රී ගුරුභ්යෝ නමඃ . හ॒රිඃ॒ ඕම් ..

ආප॑ උන්දන්තු ජී॒වසේ॑ දීර්ඝායු॒ත්වාය॒ වර්ච॑ස॒ ඕෂ॑ධේ॒ ත්රාය॑ස්වෛන॒ග්ග්॒ ස්වධි॑තේ॒ මෛනග්ං॑ හිග්ංසී-ර්දේව॒ශ්රූරේ॒තානි॒ ප්ර ව॑පේ ස්ව॒ස්ත්යුත්ත॑රාණ්යශී॒යාපෝ॑ අ॒ස්මා-න්මා॒තරඃ॑ ශුන්ධන්තු ඝෘ॒තේන॑ නෝ ඝෘත॒පුවඃ॑ පුනන්තු॒ විශ්ව॑ම॒ස්ම-ත්ප්ර ව॑හන්තු රි॒ප්රමුදා᳚භ්ය॒-ශ්ශුචි॒රා පූ॒ත ඒ॑මි॒ සෝම॑ස්ය ත॒නූර॑සි ත॒නුව॑-ම්මේ පාහි මහී॒නා-ම්පයෝ॑-(අ)සි වර්චෝ॒ධා අ॑සි॒ වර්චෝ॒- [වර්චඃ॑, මයි॑ ධේහි වෘ॒ත්රස්ය॑] 1

මයි॑ ධේහි වෘ॒ත්රස්ය॑ ක॒නීනි॑කා-(අ)සි චක්ෂු॒ෂ්පා අ॑සි॒ චක්ෂු॑ර්මේ පාහි චි॒ත්පති॑ස්ත්වා පුනාතු වා॒ක්පති॑ස්ත්වා පුනාතු දේ॒වස්ත්වා॑ සවි॒තා පු॑නා॒ත්වච්ඡි॑ද්රේණ ප॒විත්රේ॑ණ॒ වසෝ॒-ස්සූර්ය॑ස්ය ර॒ශ්මිභි॒ස්තස්ය॑ තේ පවිත්රපතේ ප॒විත්රේ॑ණ॒ යස්මෛ॒ ක-ම්පු॒නේ තච්ඡ॑කේය॒මා වෝ॑ දේවාස ඊමහේ॒ සත්ය॑ධර්මාණෝ අද්ධ්ව॒රේ යද්වෝ॑ දේවාස ආගු॒රේ යජ්ඤි॑යාසෝ॒ හවා॑මහ॒ ඉන්ද්රා᳚ග්නී॒ ද්යාවා॑පෘථිවී॒ ආප॑ ඕෂධී॒ ස්ත්ව-න්දී॒ක්ෂාණා॒-මධි॑පතිරසී॒හ මා॒ සන්ත॑-ම්පාහි .. 2 ..

(වර්ච॑ - ඕෂධී- ර॒ෂ්ටෞ ච॑ ) (අ. 1)

ආකූ᳚ත්යෛ ප්ර॒යුජේ॒-(අ)ග්නයේ॒ ස්වාහා॑ මේ॒ධායෛ॒ මන॑සේ॒ (අ)ග්නයේ॒ ස්වාහා॑ දී॒ක්ෂායෛ॒ තප॑සේ॒-(අ)ග්නයේ॒ ස්වාහා॒ සර॑ස්වත්යෛ පූ॒ෂ්ණේ᳚-(අ)ග්නයේ॒ ස්වාහා-(අ)(අ)පෝ॑ දේවී-ර්බෘහතී-ර්විශ්වශම්භුවෝ॒ ද්යාවා॑පෘථි॒වී උ॒ර්ව॑න්තරි॑ක්ෂ॒-ම්බෘහ॒ස්පති॑ර්නෝ හ॒විෂා॑ වෘධාතු॒ ස්වාහා॒ විශ්වේ॑ දේ॒වස්ය॑ නේ॒තුර්මර්තෝ॑ වෘණීත ස॒ඛ්යං-විँශ්වේ॑ රා॒ය ඉ॑ෂුද්ධ්යසි ද්යු॒ම්නං-වෘँ॑ණීත පු॒ෂ්යසේ॒ ස්වාහ॑ර්ඛ්සා॒මයෝ॒-ශ්ශිල්පේ᳚ ස්ථ॒ස්තේ වා॒මා ර॑භේ॒ තේ මා॑- [තේ මා᳚, පා॒ත॒මා-(අ)ස්ය] 3

පාත॒මා-(අ)ස්ය ය॒ජ්ඤස්යෝ॒දෘච॑ ඉ॒මා-න්ධිය॒ග්ං॒ ශික්ෂ॑මාණස්ය දේව॒ ක්රතු॒-න්දක්ෂං॑-වँරුණ॒ සග්ං ශි॑ශාධි॒ යයා-(අ)ති॒ විශ්වා॑ දුරි॒තා තරේ॑ම සු॒තර්මා॑ණ॒මධි॒ නාවග්ං॑ රුහේ॒මෝර්ග॑ස්යාඞ්ගිර॒ස්යූර්ණ॑ම්රදා॒ ඌර්ජ॑-ම්මේ යච්ඡ පා॒හි මා॒ මා මා॑ හිග්ංසී॒-ර්විෂ්ණෝ॒-ශ්ශර්මා॑සි॒ ශර්ම॒ යජ॑මානස්ය॒ ශර්ම॑ මේ යච්ඡ॒ නක්ෂ॑ත්රාණා-ම්මා-(අ)තීකා॒ශා-ත්පා॒හීන්ද්ර॑ස්ය॒ යෝනි॑රසි॒- [යෝනි॑රසි, මා මා॑ හිග්ංසීඃ] 4

මා මා॑ හිග්ංසීඃ කෘ॒ෂ්යෛ ත්වා॑ සුස॒ස්යායෛ॑ සුපිප්ප॒ලාභ්ය॒-ස්ත්වෞෂ॑ධීභ්ය-ස්සූප॒ස්ථා දේ॒වෝ වන॒ස්පති॑රූ॒ර්ධ්වෝ මා॑ පා॒හ්යෝදෘච॒-ස්ස්වාහා॑ ය॒ජ්ඤ-ම්මන॑සා॒ ස්වාහා॒ ද්යාවා॑පෘථි॒වීභ්යා॒ග්॒ ස්වාහෝ॒රෝ-ර॒න්තරි॑ක්ෂා॒-ථ්ස්වාහා॑ ය॒ජ්ඤං-වාँතා॒දා ර॑භේ .. 5 ..

( මා॒ - යෝනි॑රසි - ත්රි॒ග්ං॒ශච්ච॑ ) (අ. 2)

දෛවී॒-න්ධිය॑-ම්මනාමහේ සුමෘඩී॒කා-ම॒භිෂ්ට॑යේ වර්චෝ॒ධාං-යँ॒ජ්ඤවා॑හසග්ං සුපා॒රා නෝ॑ අස॒-ද්වශේ᳚ . යේ දේ॒වා මනෝ॑ජාතා මනෝ॒යුජඃ॑ සු॒දක්ෂා॒ දක්ෂ॑පිතාර॒ස්තේ නඃ॑ පාන්තු॒ තේ නෝ॑-(අ)වන්තු॒ තේභ්යෝ॒ නම॒ස්තේභ්ය॒-ස්ස්වාහා-(අ)ග්නේ॒ ත්වග්ං සු ජා॑ගෘහි ව॒යග්ං සු ම॑න්දිෂීමහි ගෝපා॒ය නඃ॑ ස්ව॒ස්තයේ᳚ ප්ර॒බුධේ॑ නඃ॒ පුන॑ර්දදඃ . ත්වම॑ග්නේ ව්රත॒පා අ॑සි දේ॒ව ආ මර්ත්යේ॒ෂ්වා . ත්වං- [ත්වම්, ය॒ජ්ඤේෂ්වීඩ්යඃ॑ .] 6

ය॒ජ්ඤේෂ්වීඩ්යඃ॑ .. විශ්වේ॑ දේ॒වා අ॒භි මාමා-(අ)ව॑වෘත්ර-න්පූ॒ෂා ස॒න්යා සෝමෝ॒ රාධ॑සා දේ॒ව-ස්ස॑වි॒තා වසෝ᳚ර්වසු॒දාවා॒ රාස්වේය॑-ථ්සෝ॒මා (අ)(අ)භූයෝ॑ භර॒ මා පෘ॒ණ-න්පූ॒ර්ත්යා වි රා॑ධි॒ මා-(අ)හමායු॑ෂා ච॒න්ද්රම॑සි॒ මම॒ භෝගා॑ය භව॒ වස්ත්ර॑මසි॒ මම॒ භෝගා॑ය භවෝ॒ස්රා-(අ)සි॒ මම॒ භෝගා॑ය භව॒ හයෝ॑-(අ)සි॒ මම॒ භෝගා॑ය භව॒- [භෝගා॑ය භව, ඡාගෝ॑-(අ)සි॒ මම॒] 7

ඡාගෝ॑-(අ)සි॒ මම॒ භෝගා॑ය භව මේ॒ෂෝ॑-(අ)සි॒ මම॒ භෝගා॑ය භව වා॒යවේ᳚ ත්වා॒ වරු॑ණාය ත්වා॒ නිර්-ඍ॑ත්යෛ ත්වා රු॒ද්රාය॑ ත්වා॒ දේවී॑රාපෝ අපා-න්නපා॒ද්ය ඌ॒ර්මිර්-හ॑වි॒ෂ්ය॑ ඉන්ද්රි॒යාවා᳚-න්ම॒දින්ත॑ම॒ස්තං-වෝँ॒ මා-(අ)ව॑ ක්රමිෂ॒මච්ඡි॑න්න॒-න්තන්තු॑-ම්පෘථි॒ව්යා අනු॑ ගේෂ-ම්භ॒ද්රාද॒භි ශ්රේයඃ॒ ප්රේහි॒ බෘහ॒ස්පතිඃ॑ පුරඒ॒තා තේ॑ අ॒ස්ත්වථේ॒මව॑ ස්ය॒ වර॒ ආ පෘ॑ථි॒ව්යා ආ॒රේ ශත්රූ᳚න් කෘණුහි॒ සර්ව॑වීර॒ ඒදම॑ගන්ම දේව॒යජ॑න-ම්පෘථි॒ව්යා විශ්වේ॑ දේ॒වා යදජු॑ෂන්ත॒ පූර්ව॑ ඍඛ්සා॒මාභ්යාං॒-යँජු॑ෂා ස॒න්තර॑න්තෝ රා॒යස්පෝෂේ॑ණ॒ සමි॒ෂා ම॑දේම .. 8 ..

( ආ ත්වග්ං-හයෝ॑-(අ)සි॒ මම॒ භෝගා॑ය භව-ස්ය॒-පඤ්ච॑විග්ංශතිශ්ච ) (අ. 3)

ඉ॒ය-න්තේ॑ ශුක්ර ත॒නූරි॒දං-වँර්ච॒ස්තයා॒ ස-ම්භ॑ව॒ භ්රාජ॑-ඞ්ගච්ඡ॒ ජූර॑සි ධෘ॒තා මන॑සා॒ ජුෂ්ටා॒ විෂ්ණ॑වේ॒ තස්යා᳚ස්තේ ස॒ත්යස॑වසඃ ප්රස॒වේ වා॒චෝ ය॒න්ත්රම॑ශීය॒ ස්වාහා॑ ශු॒ක්රම॑ස්ය॒මෘත॑මසි වෛශ්වදේ॒වග්ං හ॒වි-ස්සූර්ය॑ස්ය॒ චක්ෂු॒රා -(අ)රු॑හම॒ග්නේ ර॒ක්ෂ්ණඃ ක॒නීනි॑කාං॒-යँදේත॑ශේභි॒රීය॑සේ॒ භ්රාජ॑මානෝ විප॒ශ්චිතා॒ චිද॑සි ම॒නා-(අ)සි॒ ධීර॑සි॒ දක්ෂි॑ණා- [දක්ෂි॑ණා, අ॒සි॒ ය॒ජ්ඤියා॑-(අ)සි] 9

-(අ)සි ය॒ජ්ඤියා॑-(අ)සි ක්ෂ॒ත්රියා॒ (අ)ස්යදි॑ති-රස්යුභ॒යත॑॑ශ්ශීර්ෂ්ණී॒ සා න॒-ස්සුප්රා॑චී॒ සුප්ර॑තීචී॒ ස-ම්භ॑ව මි॒ත්රස්ත්වා॑ ප॒දි බ॑ද්ධ්නාතු පූ॒ෂා-(අ)ද්ධ්ව॑නඃ පා॒ත්වින්ද්රා॒යා-ද්ධ්ය॑ක්ෂා॒යානු॑ ත්වා මා॒තා ම॑න්යතා॒මනු॑ පි॒තා-(අ)නු॒ භ්රාතා॒ සග॒ර්භ්යෝ-(අ)නු॒ සඛා॒ සයූ᳚ථ්ය॒-ස්සා දේ॑වි දේ॒වමච්ඡේ॒හීන්ද්රා॑ය॒ සෝමග්ං॑ රු॒ද්රස්ත්වා (අ)(අ)ව॑ර්තයතු මි॒ත්රස්ය॑ ප॒ථා ස්ව॒ස්ති සෝම॑සඛා॒ පුන॒රේහි॑ ස॒හ ර॒ය්යා .. 10 ..

( දක්ෂි॑ණා॒-සෝම॑සඛා॒, පඤ්ච॑ ච ) (අ. 4)

වස්ව්ය॑සි රු॒ද්රා-(අ)ස්යදි॑ති-රස්යාදි॒ත්යා-(අ)සි॑ ශු॒ක්රා-(අ)සි॑ ච॒න්ද්රා-(අ)සි॒ බෘහ॒ස්පති॑ස්ත්වා සු॒ම්නේ ර॑ණ්වතු රු॒ද්රෝ වසු॑භි॒රා චි॑කේතු පෘථි॒ව්යාස්ත්වා॑ මූ॒ර්ධන්නා ජි॑ඝර්මි දේව॒යජ॑න॒ ඉඩා॑යාඃ ප॒දේ ඝෘ॒තව॑ති॒ ස්වාහා॒ පරි॑ලිඛිත॒ග්ං॒ රක්ෂඃ॒ පරි॑ලිඛිතා॒ අරා॑තය ඉ॒දම॒හග්ං රක්ෂ॑සෝ ග්රී॒වා අපි॑ කෘන්තාමි॒ යෝ᳚-(අ)ස්මා-න්ද්වේෂ්ටි॒ ය-ඤ්ච॑ ව॒ය-න්ද්වි॒ෂ්ම ඉ॒දම॑ස්ය ග්රී॒වා [ග්රී॒වාඃ, අපි॑ කෘන්තාම්ය॒ස්මේ] 11

අපි॑ කෘන්තාම්ය॒ස්මේ රාය॒ස්ත්වේ රාය॒ස්තෝතේ॒ රාය॒-ස්ස-න්දේ॑වි දේ॒ව්යෝර්වශ්යා॑ පශ්යස්ව॒ ත්වෂ්ටී॑මතී තේ සපේය සු॒රේතා॒ රේතෝ॒ දධා॑නා වී॒රං-විँ॑දේය॒ තව॑ ස॒න්දෘශි॒ මා-(අ)හග්ංරා॒යස්පෝෂේ॑ණ॒ වි යෝ॑ෂම් .. 12 ..

( අ॒ස්ය॒ ග්රී॒වා-ඒකා॒න්න ත්රි॒ග්ං॒ශච්ච॑ ) (අ. 5)

අ॒ග්ං॒ශුනා॑ තේ අ॒ග්ං॒ශුඃ පෘ॑ච්යතා॒-ම්පරු॑ෂා॒ පරු॑-ර්ග॒න්ධස්තේ॒ කාම॑මවතු॒ මදා॑ය॒ රසෝ॒ අච්යු॑තෝ॒ (අ)මාත්යෝ॑-(අ)සි ශු॒ක්රස්තේ॒ ග්රහෝ॒-(අ)භි ත්ය-න්දේ॒වග්ං ස॑වි॒තාර॑මූ॒ණ්යෝඃ᳚ ක॒වික්ර॑තු॒මර්චා॑මි ස॒ත්යස॑වසග්ං රත්න॒ධාම॒භි ප්රි॒ය-ම්ම॒තිමූ॒ර්ධ්වා යස්යා॒මති॒ර්භා අදි॑ද්යුත॒-ථ්සවී॑මනි॒ හිර॑ණ්යපාණිරමිමීත සු॒ක්රතුඃ॑ කෘ॒පා සුවඃ॑ . ප්ර॒ජාභ්ය॑ස්ත්වා ප්රා॒ණාය॑ ත්වා ව්යා॒නාය॑ ත්වා ප්ර॒ජාස්ත්වමනු॒ ප්රාණි॑හි ප්ර॒ජාස්ත්වාමනු॒ ප්රාණ॑න්තු .. 13 ..

(අනු॑-ස॒ප්ත ච॑) (අ. 6)

සෝම॑-න්තේ ක්රීණා॒ම්යූර්ජ॑ස්වන්ත॒-ම්පය॑ස්වන්තං-වීँ॒ර්යා॑වන්තමභි-මාති॒ෂාහග්ං॑ ශු॒ක්ර-න්තේ॑ ශු॒ක්රේණ॑ ක්රීණාමි ච॒න්ද්ර-ඤ්ච॒න්ද්රේණා॒මෘත॑ම॒මෘතේ॑න ස॒ම්යත්තේ॒ ගෝර॒ස්මේ ච॒න්ද්රාණි॒ තප॑සස්ත॒නූර॑සි ප්ර॒ජාප॑තේ॒-ර්වර්ණ॒ස්තස්යා᳚ස්තේ සහස්රපෝ॒ෂ-ම්පුෂ්ය॑න්ත්යාශ්චර॒මේණ॑ ප॒ශුනා᳚ ක්රීණාම්ය॒ස්මේ තේ॒ බන්ධු॒ර්මයි॑ තේ॒ රායඃ॑ ශ්රයන්තාම॒ස්මේ ජ්යෝතිඃ॑ සෝමවික්ර॒යිණි॒ තමෝ॑ මි॒ත්රෝ න॒ ඒහි॒ සුමි॑ත්රධා॒ ඉන්ද්ර॑ස්යෝ॒රු මා වි॑ශ॒ දක්ෂි॑ණ-මු॒ශන්නු॒ශන්තග්ග්॑ ස්යෝ॒න-ස්ස්යෝ॒නග්ග් ස්වාන॒ භ්රාජාඞ්ඝා॑රේ॒ බම්භා॑රේ॒ හස්ත॒ සුහ॑ස්ත॒ කෘශා॑නවේ॒තේ වඃ॑ සෝම॒ ක්රය॑ණා॒ස්තා-න්ර॑ක්ෂද්ධ්ව॒-ම්මා වෝ॑ දභන්න් .. 14 ..

(උ॒රුං-ද්වාවිග්ං॑ශතිශ්ච) (අ. 7)

උදායු॑ෂා ස්වා॒යුෂෝදෝෂ॑ධීනා॒ග්ං॒ රසේ॒නෝ-ත්ප॒ර්ජන්ය॑ස්ය॒ ශුෂ්මේ॒ණෝද॑ස්ථාම॒මෘතා॒ග්ං॒ අනු॑ . උ॒ර්ව॑න්තරි॑ක්ෂ॒මන්වි॒හ්යදි॑ත්යා॒-ස්සදෝ॒-(අ)ස්යදි॑ත්යා॒-ස්සද॒ ආ සී॒දාස්ත॑භ්නා॒-ද්ද්යාමෘ॑ෂ॒භෝ අ॒න්තරි॑ක්ෂ॒මමි॑මීත වරි॒මාණ॑-ම්පෘථි॒ව්යා ආ-(අ)සී॑ද॒-ද්විශ්වා॒ භුව॑නානි ස॒ම්රා-ඩ්විශ්වේත්තානි॒ වරු॑ණස්ය ව්ර॒තානි॒ වනේ॑ෂු॒ ව්ය॑න්තරි॑ක්ෂ-න්තතාන॒ වාජ॒මර්ව॑ථ්සු॒ පයෝ॑ අඝ්නි॒යාසු॑ හෘ॒ථ්සු- [ ] .. 15 ..

ක්රතුං॒-වँරු॑ණෝ වි॒ක්ෂ්ව॑ග්නි-න්දි॒වි සූර්ය॑මදධා॒-ථ්සෝම॒මද්රා॒වුදු॒ත්ය-ඤ්ජා॒තවේ॑දස-න්දේ॒වං-වँ॑හන්ති කේ॒තවඃ॑ . දෘ॒ශේ විශ්වා॑ය॒ සූර්ය᳚ම් .. උස්රා॒වේත॑-න්ධූර්ෂාහාවන॒ශ්රූ අවී॑රහණෞ බ්රහ්ම॒චෝද॑නෞ॒ වරු॑ණස්ය॒ ස්කම්භ॑නමසි॒ වරු॑ණස්ය ස්කම්භ॒සර්ජ॑නමසි॒ ප්රත්ය॑ස්තෝ॒ වරු॑ණස්ය॒ පාශඃ॑ .. 16 ..

( හෘ॒ථ්සු-පඤ්ච॑ත්රිග්ංශච්ච ) (අ. 8)

ප්ර ච්ය॑වස්ව භුවස්පතේ॒ විශ්වා᳚න්ය॒භි ධාමා॑නි॒ මා ත්වා॑ පරිප॒රී වි॑ද॒න්මා ත්වා॑ පරිප॒න්ථිනෝ॑ විද॒න්මා ත්වා॒ වෘකා॑ අඝා॒යවෝ॒ මා ග॑න්ධ॒ර්වෝ වි॒ශ්වාව॑සු॒රා ද॑ඝච්ඡ්යේ॒නෝ භූ॒ත්වා පරා॑ පත॒ යජ॑මානස්ය නෝ ගෘ॒හේ දේ॒වෛ-ස්සග්ග්॑ස්කෘ॒තං-යँජ॑මානස්ය ස්ව॒ස්ත්යය॑න්ය॒ස්යපි॒ පන්ථා॑මගස්මහි ස්වස්ති॒ගා-ම॑නේ॒හසං॒-යේँන॒ විශ්වාඃ॒ පරි॒ ද්විෂෝ॑ වෘ॒ණක්ති॑ වි॒න්දතේ॒ වසු॒ නමෝ॑ මි॒ත්රස්ය॒ වරු॑ණස්ය॒ චක්ෂ॑සේ ම॒හෝ දේ॒වාය॒ තදෘ॒තග්ං ස॑පර්යත දූරේ॒දෘශේ॑ දේ॒වජා॑තාය කේ॒තවේ॑ දි॒වස්පු॒ත්රාය॒ සූර්යා॑ය ශග්ංසත॒ වරු॑ණස්ය॒ ස්කම්භ॑නමසි॒ වරු॑ණස්ය ස්කම්භ॒සර්ජ॑න-ම॒ස්යුන්මු॑ක්තෝ॒ වරු॑ණස්ය॒ පාශඃ॑ .. 17 ..

( මි॒ත්රස්ය॒-ත්රයෝ॑විග්ංශතිශ්ච ) (අ. 9)

අ॒ග්නේ-රා॑ති॒ථ්යම॑සි॒ විෂ්ණ॑වේ ත්වා॒ සෝම॑ස්යා-(අ)(අ)ති॒ථ්යම॑සි॒ විෂ්ණ॑වේ॒ ත්වා-(අ)ති॑ථේරාති॒ථ්යම॑සි॒ විෂ්ණ॑වේ ත්වා॒-(අ)ග්නයේ᳚ ත්වා රායස්පෝෂ॒දාව්න්නේ॒ විෂ්ණ॑වේ ත්වා ශ්යේ॒නාය॑ ත්වා සෝම॒භෘතේ॒ විෂ්ණ॑වේ ත්වා॒ යා තේ॒ ධාමා॑නි හ॒විෂා॒ යජ॑න්ති॒ තා තේ॒ විශ්වා॑ පරි॒භූර॑ස්තු ය॒ජ්ඤ-ඞ්ග॑ය॒ස්ඵානඃ॑ ප්ර॒තර॑ණ-ස්සු॒වීරෝ-(අ)වී॑රහා॒ ප්රච॑රා සෝම॒ දුර්යා॒නදි॑ත්යා॒-ස්සදෝ॒-(අ)ස්යදි॑ත්යා॒-ස්සද॒ ආ- [සද॒ ආ, සී॒ද॒ වරු॑ණෝ-(අ)සි] .. 18 ..

සී॑ද॒ වරු॑ණෝ-(අ)සි ධෘ॒තව්ර॑තෝ වාරු॒ණම॑සි ශං॒යෝँ-ර්දේ॒වානාග්ං॑ ස॒ඛ්යාන්මා දේ॒වානා॑-ම॒පස॑-ශ්ඡිථ්ස්ම॒හ්යාප॑තයේ ත්වා ගෘහ්ණාමි॒ පරි॑පතයේ ත්වා ගෘහ්ණාමි॒ තනූ॒නප්ත්රේ᳚ ත්වා ගෘහ්ණාමි ශාක්ව॒රාය॑ ත්වා ගෘහ්ණාමි॒ ශක්ම॒න්නෝජි॑ෂ්ඨාය ත්වා ගෘහ්ණා॒ම්ය-නා॑ධෘෂ්ටමස්ය-නාධෘ॒ෂ්ය-න්දේ॒වානා॒මෝජෝ॑- (අ)භිෂස්ති॒පා අ॑නභිශස්තේ॒-(අ)න්යමනු॑ මේ දී॒ක්ෂා-න්දී॒ක්ෂාප॑ති-ර්මන්යතා॒මනු॒ තප॒ස්තප॑ස්පති॒රඤ්ජ॑සා ස॒ත්යමුප॑ ගේෂග්ං සුවි॒තේ මා॑ ධාඃ .. 19 ..

( ආ-මෛ-ක॑-ඤ්ච ) (අ. 10)

අ॒ග්ං॒ශුරග්ං॑ශුස්තේ දේව සෝ॒මා-(අ)(අ)ප්යා॑යතා॒-මින්ද්රා॑යෛකධන॒විද॒ ආ තුභ්ය॒මින්ද්රඃ॑ ප්යායතා॒මා ත්වමින්ද්රා॑ය ප්යාය॒ස්වා-(අ)(අ)ප්යා॑යය॒ සඛී᳚න්-ථ්ස॒න්යා මේ॒ධයා᳚ ස්ව॒ස්ති තේ॑ දේව සෝම සු॒ත්යාම॑ශී॒යේෂ්ටා॒ රායඃ॒ ප්රේෂේ භගා॑ය॒ර්තමෘ॑තවා॒දිභ්යෝ॒ නමෝ॑ දි॒වේ නමඃ॑ පෘථි॒ව්යා අග්නේ᳚ ව්රතපතේ॒ ත්වං-ව්රँ॒තානාං᳚-ව්රँ॒තප॑තිරසි॒ යා මම॑ ත॒නූරේ॒ෂා සා ත්වයි॒ [ත්වයි॑, යා තව॑] .. 20 ..

යා තව॑ ත॒නූරි॒යග්ං සා මයි॑ ස॒හ නෞ᳚ ව්රතපතේ ව්ර॒තිනෝ᳚-ර්ව්ර॒තානි॒ යා තේ॑ අග්නේ॒ රුද්රි॑යා ත॒නූස්තයා॑ නඃ පාහි॒ තස්යා᳚ස්තේ॒ ස්වාහා॒ යා තේ॑ අග්නේ-(අ)යාශ॒යා ර॑ජාශ॒යා හ॑රාශ॒යා ත॒නූර්වර්ෂි॑ෂ්ඨා ගහ්වරේ॒ෂ්ඨෝ-(අ)ග්රං-වँචෝ॒ අපා॑වධී-න්ත්වේ॒ෂං-වँචෝ॒ අපා॑වධී॒ග්॒ ස්වාහා᳚ .. 21 ..

( ත්වයි॑-චත්වාරි॒ග්ං॒ශච්ච॑ ) (අ. 11)

වි॒ත්තාය॑නී මේ-(අ)සි ති॒ක්තාය॑නී මේ॒-(අ)ස්යව॑තාන්මා නාථි॒තමව॑තාන්මා ව්යථි॒තං-විँ॒දේර॒ග්නිර්නභෝ॒ නාමාග්නේ॑ අඞ්ගිරෝ॒ යෝ᳚-(අ)ස්යා-ම්පෘ॑ථි॒ව්යාමස්යායු॑ෂා॒ නාම්නේහි॒ යත්තේ-(අ)නා॑ධෘෂ්ට॒-න්නාම॑ ය॒ජ්ඤිය॒-න්තේන॒ ත්වා-(අ)(අ)ද॒ධේ-(අ)ග්නේ॑ අඞ්ගිරෝ॒ යෝ ද්වි॒තීය॑ස්යා-න්තෘ॒තීය॑ස්යා-ම්පෘථි॒ව්යා-මස්යායු॑ෂා॒ නාම්නේහි॒ යත්තේ-(අ)නා॑ධෘෂ්ට॒-න්නාම॑- [ ] 22

ය॒ජ්ඤිය॒-න්තේන॒ ත්වා-(අ)(අ)ද॑ධේ සි॒ග්ං॒හීර॑සි මහි॒ෂීර॑ස්යු॒රු ප්ර॑ථස්වෝ॒රු තේ॑ ය॒ජ්ඤප॑තිඃ ප්රථතා-න්ධ්රු॒වා-(අ)සි॑ දේ॒වේභ්යඃ॑ ශුන්ධස්ව දේ॒වේභ්යඃ॑ ශුම්භස්වේන්ද්රඝෝ॒ෂස්ත්වා॒ වසු॑භිඃ පු॒රස්තා᳚-ත්පාතු॒ මනෝ॑ජවාස්ත්වා පි॒තෘභි॑-ර්දක්ෂිණ॒තඃ පා॑තු॒ ප්රචේ॑තාස්ත්වා රු॒ද්රෛඃ ප॒ශ්චා-ත්පා॑තු වි॒ශ්වක॑ර්මා ත්වා-(අ)(අ)දි॒ත්යෛරු॑ත්තර॒තඃ පා॑තු සි॒ග්ං॒හීර॑සි සපත්නසා॒හී ස්වාහා॑ සි॒ග්ං॒හීර॑සි සුප්රජා॒වනි॒-ස්ස්වාහා॑ සි॒ග්ං॒හී- [සි॒ග්ං॒හීඃ, අ॒සි॒ රා॒ය॒ස්පෝ॒ෂ॒වනි॒-ස්ස්වාහා॑] 23

ර॑සි රායස්පෝෂ॒වනි॒-ස්ස්වාහා॑ සි॒ග්ං॒හීර॑ස්යාදිත්ය॒වනි॒-ස්ස්වාහා॑ සි॒ග්ං॒හීර॒ස්යා ව॑හ දේ॒වාන්දේ॑වය॒තේ යජ॑මානාය॒ ස්වාහා॑ භූ॒තේභ්ය॑ස්ත්වා වි॒ශ්වායු॑රසි පෘථි॒වී-න්දෘග්ං॑හ ධ්රුව॒ක්ෂිද॑ස්ය॒න්තරි॑ක්ෂ-න්දෘග්ංහාච්යුත॒ක්ෂිද॑සි॒ දිව॑-න්දෘග්ංහා॒ග්නේ-ර්භස්මා᳚ස්ය॒ග්නේඃ පුරී॑ෂමසි .. 24 ..

(නාම॑-සුප්රජා॒වනි॒-ස්ස්වාහා॑ සි॒ග්ං॒සීඃ; පඤ්ච॑ත්රිග්ංශච්ච ) (අ. 12)

යු॒ඤ්ජතේ॒ මන॑ උ॒ත යු॑ඤ්ජතේ॒ ධියෝ॒ විප්රා॒ විප්ර॑ස්ය බෘහ॒තෝ වි॑ප॒ශ්චිතඃ॑ . වි හෝත්රා॑ දධේ වයුනා॒විදේක॒ ඉන්ම॒හී දේ॒වස්ය॑ සවි॒තුඃ පරි॑ෂ්ටුතිඃ .. සු॒වාග්දේ॑ව॒ දුර්යා॒ග්ං॒ ආ ව॑ද දේව॒ශ්රුතෞ॑ දේ॒වේෂ්වා ඝෝ॑ෂේථා॒මා නෝ॑ වී॒රෝ ජා॑යතා-ඞ්කර්ම॒ණ්යෝ॑ යග්ං සර්වේ॑-(අ)නු॒ ජීවා॑ම॒ යෝ බ॑හූ॒නාමස॑ද්ව॒ශී .. ඉ॒දං-විँෂ්ණු॒-ර්විච॑ක්රමේ ත්රේ॒ධා නි ද॑ධේ ප॒දම් .. සමූ॑ඪමස්ය [සමූ॑ඪමස්ය, පා॒ග්ං॒සු॒ර] 25

පාග්ංසු॒ර ඉරා॑වතී ධේනු॒මතී॒ හි භූ॒තග්ං සූ॑යව॒සිනී॒ මන॑වේ යශ॒ස්යේ᳚ . ව්ය॑ස්කභ්නා॒-ද්රෝද॑සී॒ විෂ්ණු॑රේ॒තේ දා॒ධාර॑ පෘථි॒වීම॒භිතෝ॑ ම॒යූඛෛඃ᳚ .. ප්රාචී॒ ප්රේත॑මද්ධ්ව॒ර-ඞ්ක॒ල්පය॑න්තී ඌ॒ර්ධ්වං-යँ॒ජ්ඤ-න්න॑යත॒-ම්මා ජී᳚හ්වරත॒මත්ර॑ රමේථාං॒-වँර්ෂ්ම॑-න්පෘථි॒ව්යා දි॒වෝ වා॑ විෂ්ණවු॒ත වා॑ පෘථි॒ව්යා ම॒හෝ වා॑ විෂ්ණවු॒ත වා॒-(අ)න්තරි॑ක්ෂා॒ද්ධස්තෞ॑ පෘණස්ව බ॒හුභි॑-ර්වස॒ව්යෛ॑රා ප්ර ය॑ච්ඡ॒ [ප්ර ය॑ච්ඡ, දක්ෂි॑ණා॒දෝත] 26

දක්ෂි॑ණා॒දෝත ස॒ව්යාත් . විෂ්ණෝ॒ර්නුකං॑-වීँ॒ර්යා॑ණි॒ ප්ර වෝ॑චං॒-යඃ ँපාර්ථි॑වානි විම॒මේ රජාග්ං॑සි॒ යෝ අස්ක॑භාය॒දුත්ත॑රග්ං ස॒ධස්ථං॑-විँචක්රමා॒ණ ස්ත්රේ॒ධෝරු॑ගා॒යෝ විෂ්ණෝ॑ ර॒රාට॑මසි॒ විෂ්ණෝඃ᳚ පෘ॒ෂ්ඨම॑සි॒ විෂ්ණෝ॒-ශ්ශ්ඤප්ත්රේ᳚ ස්ථෝ॒ විෂ්ණෝ॒-ස්ස්යූර॑සි॒ විෂ්ණෝ᳚-ර්ධ්රු॒වම॑සි වෛෂ්ණ॒වම॑සි॒ විෂ්ණ॑වේ ත්වා .. 27 ..

( අ॒ස්ය॒-ය॒ච්ඡෛකා॒න්න ච॑ත්වාරි॒ග්ං॒ශච්ච॑ ) (අ. 13)

කෘ॒ණු॒ෂ්ව පාජඃ॒ ප්රසි॑ති॒න්න පෘ॒ථ්වීං-යාँ॒හි රාජේ॒වාම॑වා॒ග්ං॒ ඉභේ॑න . තෘ॒ෂ්වීමනු॒ ප්රසි॑තිං-ද්රූණා॒නෝ-(අ)ස්තා॑-(අ)සි॒ විද්ධ්ය॑ ර॒ක්ෂස॒ ස්තපි॑ෂ්ඨෛඃ .. තව॑ භ්ර॒මාස॑ ආශු॒යා ප॑න්ත॒ත්යනු॑ ස්පෘශ-ධෘෂ॒තා ශෝශු॑චානඃ . තපූග්॑ෂ්යග්නේ ජු॒හ්වා॑ පත॒ඞ්ගානස॑න්දිතෝ॒ විසෘ॑ජ॒ විෂ්ව॑ගු॒ල්කාඃ .. ප්රති॒ස්පශෝ॒ විසෘ॑ජ॒-තූර්ණි॑තමෝ॒ භවා॑ පා॒යුර්වි॒ශෝ අ॒ස්යා අද॑බ්ධඃ . යෝ නෝ॑ දූ॒රේ අ॒ඝශග්ං॑සෝ॒ [අ॒ඝශග්ං॑සඃ, යෝ අන්ත්යග්නේ॒] 28

යෝ අන්ත්යග්නේ॒ මාකි॑ෂ්ටේ॒ ව්යථි॒රා ද॑ධර්ෂීත් .. උද॑ග්නේ තිෂ්ඨ॒ ප්රත්යා (අ)(අ)ත॑නුෂ්ව॒ න්ය॑මිත්රාග්ං॑ ඕෂතා-ත්තිග්මහේතේ . යෝ නෝ॒ අරා॑තිග්ං සමිධාන ච॒ක්රේ නී॒චා ත-න්ධ॑ක්ෂ්යත॒ස-න්න ශුෂ්ක᳚ම් .. ඌ॒ර්ධ්වෝ භ॑ව॒ ප්රති॑වි॒ද්ධ්යා-(අ)ද්ධ්ය॒ස්මදා॒විෂ්කෘ॑ණුෂ්ව॒ දෛව්යා᳚න්යග්නේ . අව॑ස්ථි॒රා ත॑නුහි යාතු॒ජූනා᳚-ඤ්ජා॒මිමජා॑මිං॒ ප්රමෘ॑ණීහි॒ ශත්රූන්॑ .. ස තේ॑ [ස තේ᳚, ජා॒නා॒ති॒ සු॒ම॒තිං] 29

ජානාති සුම॒තිං-යँ॑විෂ්ඨ॒ය ඊව॑තේ॒ බ්රහ්ම॑ණේ ගා॒තුමෛර॑ත් . විශ්වා᳚න්යස්මෛ සු॒දිනා॑නි රා॒යෝ ද්යු॒ම්නාන්ය॒ර්යෝ විදුරෝ॑ අ॒භි ද්යෞ᳚ත් .. සේද॑ග්නේ අස්තු සු॒භගඃ॑ සු॒දානු॒-ර්යස්ත්වා॒ නිත්යේ॑න හ॒විෂා॒ය උ॒ක්ථෛඃ . පිප්රී॑ෂති॒ ස්ව ආයු॑ෂි දුරෝ॒ණේ විශ්වේද॑ස්මෛ සු॒දිනා॒ සා-(අ)ස॑දි॒ෂ්ටිඃ .. අර්චා॑මි තේ සුම॒ති-ඞ්ඝෝෂ්ය॒ර්වාඛ්-සන්තේ॑ වා॒ වා තා॑ ජරතා- [වා॒ වා තා॑ ජරතාම්, ඉ॒යඞ්ගීඃ] 30

මි॒යඞ්ගීඃ . ස්වශ්වා᳚ස්ත්වා සු॒රථා॑ මර්ජයේමා॒ස්මේ ක්ෂ॒ත්රාණි॑ ධාරයේ॒රනු॒ ද්යූන් .. ඉ॒හ ත්වා॒ භූර්යා ච॑රේ॒ දුප॒ත්ම-න්දෝෂා॑වස්ත-ර්දීදි॒වාග්ංස॒මනු॒ ද්යූන් . ක්රීඩ॑න්තස්ත්වා සු॒මන॑ස-ස්සපේමා॒භි ද්යු॒ම්නා ත॑ස්ථි॒වාග්ංසෝ॒ ජනා॑නාම් .. යස්ත්වා॒-ස්වශ්වඃ॑ සුහිර॒ණ්යෝ අ॑ග්න උප॒යාති॒ වසු॑මතා॒ රථේ॑න . තස්ය॑ ත්රා॒තා-භ॑වසි॒ තස්ය॒ සඛා॒ යස්ත॑ ආති॒ථ්යමා॑නු॒ෂග් ජුජෝ॑ෂත් .. ම॒හෝ රු॑ජාමි - [ ] 31

බ॒න්ධුතා॒ වචෝ॑භි॒ස්තන්මා॑ පි॒තුර්ගෝත॑මා॒ද-න්වි॑යාය . ත්වන්නෝ॑ අ॒ස්ය වච॑ස-ශ්චිකිද්ධි॒ හෝත॑ර්යවිෂ්ඨ සුක්රතෝ॒ දමූ॑නාඃ .. අස්ව॑ප්නජ ස්ත॒රණ॑ය-ස්සු॒ශේවා॒ අත॑න්ද්රාසෝ-(අ)වෘ॒කා අශ්ර॑මිෂ්ඨාඃ . තේ පා॒යවඃ॑ ස॒ද්ධ්රිය॑ඤ්චෝ නි॒ෂද්යා-(අ)ග්නේ॒ තව॑නඃ පාන්ත්වමූර .. යේ පා॒යවෝ॑ මාමතේ॒ය-න්තේ॑ අග්නේ॒ පශ්ය॑න්තෝ අ॒න්ධ-න්දු॑රි॒තාදර॑ක්ෂන්න් . ර॒රක්ෂ॒තාන්-ථ්සු॒කෘතෝ॑ වි॒ශ්වවේ॑දා॒ දිඵ්ස॑න්ත॒ ඉද්රි॒පවෝ॒ නා හ॑ [නා හ॑, දේ॒භුඃ॒] 32

දේභුඃ .. ත්වයා॑ ව॒යග්ං ස॑ධ॒න්ය॑-ස්ත්වෝතා॒-ස්තව॒ ප්රණී᳚ත්යශ්යාම॒ වාජාන්॑ . උ॒භා ශග්ංසා॑ සූදය සත්යතාතේ-(අ)නුෂ්ඨු॒යා කෘ॑ණුහ්යහ්රයාණ .. අ॒යා තේ॑ අග්නේ ස॒මිධා॑ විධේම॒ ප්රති॒ස්තෝමග්ං॑ ශ॒ස්යමා॑න-ඞ්ගෘභාය . දහා॒ශසෝ॑ ර॒ක්ෂසඃ॑ පා॒හ්ය॑ස්මා-න්ද්රු॒හෝ නි॒දෝ මි॑ත්රමහෝ අව॒ද්යාත් .. ර॒ක්ෂෝ॒හණං॑ ँවා॒ජින॒මාජි॑ඝර්මි මි॒ත්ර-ම්ප්රථි॑ෂ්ඨ॒-මුප॑යාමි॒ ශර්ම॑ . ශිශා॑නෝ අ॒ග්නිඃ ක්රතු॑භි॒-ස්සමි॑ද්ධ॒ස්සනෝ॒ දිවා॒ [දිවා᳚, සරි॒ෂඃ පා॑තු॒ නක්තං᳚] 33

සරි॒ෂඃ පා॑තු॒ නක්ත᳚ම් .. විජ්යෝති॑ෂා බෘහ॒තා භා᳚ත්ය॒ග්නි-රා॒වි-ර්විශ්වා॑නි කෘණුතේ මහි॒ත්වා . ප්රාදේ॑වී-ර්මා॒යා-ස්ස॑හතේ-දු॒රේවා॒-ශ්ශිශී॑තේ॒ ශෘඞ්ගේ॒ රක්ෂ॑සේ වි॒නික්ෂේ᳚ .. උ॒ත ස්වා॒නාසෝ॑ දි॒විෂ॑න්ත්ව॒ග්නේ ස්ති॒ග්මායු॑ධා॒ රක්ෂ॑සේ॒ හන්ත॒වා උ॑ . මදේ॑ චිදස්ය॒ ප්රරු॑ජන්ති॒ භාමා॒ න ව॑රන්තේ පරි॒බාධෝ॒ අදේ॑වීඃ .. 34 ..

(අ॒ඝශග්ං॑සඃ॒-ස තේ॑-ජරතාග්ං-රුජාමි-හ॒ -දිවෛ - ක॑චත්වාරිග්ංශච්ච) (අ. 14)

(ආප॑ උන්ද॒, න්ත්වාකූ᳚ත්යෛ॒, දෛවී॑, මි॒යන්තේ॒, වස්ව්ය॑ස්ය॒ග්ං॒ ශුනා॑ තේ॒, සෝම॑න්ත॒, උදායු॑ෂා॒, ප්ර ච්ය॑වස්වා॒, (අ)ග්නේ රා॑ති॒ථ්ය, -ම॒ග්ං॒ශුරග්ං॑ ශු, ර්වි॒ත්තාය॑නී මේ-(අ)සි, යු॒ඤ්චතේ॑, කෘණු॒ෂ්ව පාජ॒, ශ්චතු॑ර්දශ .)

(ආපෝ॒-වස්ව්ය॑සි॒ යා තවේ॒-යඞ්ගී-ශ්චතු॑ස්ත්රිග්ංශත් .)

(ආප॑ උන්ද॒න්, ත්වදේ॑වීඃ)

.. හරිඃ॑ ඕම් ..

.. කෘෂ්ණ යජුර්වේදීය තෛත්තිරීය සංහිතායා-ම්ප්රථමකාණ්ඩේ ද්විතීයඃ ප්රශ්න-ස්සමාප්තඃ ..

Roman (IAST) Transliteration

kṛṣṇa yajurvedīya taittirīya saṃhitāyā-mprathamakāṇḍe dvitīyaḥ praśnaḥ - agniṣṭome krayaḥ

o-nnamaḥ paramātmane, śrī mahāgaṇapataye namaḥ,

śrī gurubhyo namaḥ | ha॒riḥ॒ om ||

āpa̭ undantu jī॒vasḙ dīrghāyu॒tvāya॒ varca̭sa॒ oṣa̭dhe॒ trāya̭svaina॒gg॒ svadhi̭te॒ mainagṃ̭ higṃsī-rdeva॒śrūre॒tāni॒ pra va̭pe sva॒styutta̭rāṇyaśī॒yāpo̭ a॒smā-nmā॒taraḥ̭ śundhantu ghṛ॒tena̭ no ghṛta॒puvaḥ̭ punantu॒ viśva̭ma॒sma-tpra va̭hantu ri॒pramudā᳚bhya॒-śśuci॒rā pū॒ta ḙmi॒ soma̭sya ta॒nūra̭si ta॒nuva̭-mme pāhi mahī॒nā-mpayo̭-'si varco॒dhā a̭si॒ varco॒- [varcaḥ̭, mayi̭ dhehi vṛ॒trasya̭] 1

mayi̭ dhehi vṛ॒trasya̭ ka॒nīni̭kā-'si cakṣu॒ṣpā a̭si॒ cakṣṷrme pāhi ci॒tpati̭stvā punātu vā॒kpati̭stvā punātu de॒vastvā̭ savi॒tā pṷnā॒tvacchi̭dreṇa pa॒vitrḙṇa॒ vaso॒-ssūrya̭sya ra॒śmibhi॒stasya̭ te pavitrapate pa॒vitrḙṇa॒ yasmai॒ ka-mpu॒ne taccha̭keya॒mā vo̭ devāsa īmahe॒ satya̭dharmāṇo addhva॒re yadvo̭ devāsa āgu॒re yajñi̭yāso॒ havā̭maha॒ indrā᳚gnī॒ dyāvā̭pṛthivī॒ āpa̭ oṣadhī॒ stva-ndī॒kṣāṇā॒-madhi̭patirasī॒ha mā॒ santa̭-mpāhi || 2 ||

(varca̭ - oṣadhī- ra॒ṣṭau ca̭ ) (a. 1)

ākū᳚tyai pra॒yuje॒-'gnaye॒ svāhā̭ me॒dhāyai॒ mana̭se॒ 'gnaye॒ svāhā̭ dī॒kṣāyai॒ tapa̭se॒-'gnaye॒ svāhā॒ sara̭svatyai pū॒ṣṇe᳚-'gnaye॒ svāhā-''po̭ devī-rbṛhatī-rviśvaśambhuvo॒ dyāvā̭pṛthi॒vī u॒rva̭ntari̭kṣa॒-mbṛha॒spati̭rno ha॒viṣā̭ vṛdhātu॒ svāhā॒ viśvḙ de॒vasya̭ ne॒turmarto̭ vṛṇīta sa॒khyaṃ-vi~śvḙ rā॒ya i̭ṣuddhyasi dyu॒mnaṃ-vṛ~̭ṇīta pu॒ṣyase॒ svāha̭rkhsā॒mayo॒-śśilpe᳚ stha॒ste vā॒mā ra̭bhe॒ te mā̭- [te mā᳚, pā॒ta॒mā-'sya] 3

pāta॒mā-'sya ya॒jñasyo॒dṛca̭ i॒mā-ndhiya॒gṃ॒ śikṣa̭māṇasya deva॒ kratu॒-ndakṣaṃ̭-va~ruṇa॒ sagṃ śi̭śādhi॒ yayā-'ti॒ viśvā̭ duri॒tā tarḙma su॒tarmā̭ṇa॒madhi॒ nāvagṃ̭ ruhe॒morga̭syāṅgira॒syūrṇa̭mradā॒ ūrja̭-mme yaccha pā॒hi mā॒ mā mā̭ higṃsī॒-rviṣṇo॒-śśarmā̭si॒ śarma॒ yaja̭mānasya॒ śarma̭ me yaccha॒ nakṣa̭trāṇā-mmā-'tīkā॒śā-tpā॒hīndra̭sya॒ yoni̭rasi॒- [yoni̭rasi, mā mā̭ higṃsīḥ] 4

mā mā̭ higṃsīḥ kṛ॒ṣyai tvā̭ susa॒syāyai̭ supippa॒lābhya॒-stvauṣa̭dhībhya-ssūpa॒sthā de॒vo vana॒spati̭rū॒rdhvo mā̭ pā॒hyodṛca॒-ssvāhā̭ ya॒jña-mmana̭sā॒ svāhā॒ dyāvā̭pṛthi॒vībhyā॒g॒ svāho॒ro-ra॒ntari̭kṣā॒-thsvāhā̭ ya॒jñaṃ-vā~tā॒dā ra̭bhe || 5 ||

( mā॒ - yoni̭rasi - tri॒gṃ॒śacca̭ ) (a. 2)

daivī॒-ndhiya̭-mmanāmahe sumṛḍī॒kā-ma॒bhiṣṭa̭ye varco॒dhāṃ-ya~॒jñavā̭hasagṃ supā॒rā no̭ asa॒-dvaśe᳚ | ye de॒vā mano̭jātā mano॒yujaḥ̭ su॒dakṣā॒ dakṣa̭pitāra॒ste naḥ̭ pāntu॒ te no̭-'vantu॒ tebhyo॒ nama॒stebhya॒-ssvāhā-'gne॒ tvagṃ su jā̭gṛhi va॒yagṃ su ma̭ndiṣīmahi gopā॒ya naḥ̭ sva॒staye᳚ pra॒budhḙ naḥ॒ puna̭rdadaḥ | tvama̭gne vrata॒pā a̭si de॒va ā martye॒ṣvā | tvaṃ- [tvam, ya॒jñeṣvīḍyaḥ̭ |] 6

ya॒jñeṣvīḍyaḥ̭ || viśvḙ de॒vā a॒bhi māmā-'va̭vṛtra-npū॒ṣā sa॒nyā somo॒ rādha̭sā de॒va-ssa̭vi॒tā vaso᳚rvasu॒dāvā॒ rāsveya̭-thso॒mā ''bhūyo̭ bhara॒ mā pṛ॒ṇa-npū॒rtyā vi rā̭dhi॒ mā-'hamāyṷṣā ca॒ndrama̭si॒ mama॒ bhogā̭ya bhava॒ vastra̭masi॒ mama॒ bhogā̭ya bhavo॒srā-'si॒ mama॒ bhogā̭ya bhava॒ hayo̭-'si॒ mama॒ bhogā̭ya bhava॒- [bhogā̭ya bhava, chāgo̭-'si॒ mama॒] 7

chāgo̭-'si॒ mama॒ bhogā̭ya bhava me॒ṣo̭-'si॒ mama॒ bhogā̭ya bhava vā॒yave᳚ tvā॒ varṷṇāya tvā॒ nir-ṛ̭tyai tvā ru॒drāya̭ tvā॒ devī̭rāpo apā-nnapā॒dya ū॒rmir-ha̭vi॒ṣya̭ indri॒yāvā᳚-nma॒dinta̭ma॒staṃ-vo~॒ mā-'va̭ kramiṣa॒macchi̭nna॒-ntantṷ-mpṛthi॒vyā anṷ geṣa-mbha॒drāda॒bhi śreyaḥ॒ prehi॒ bṛha॒spatiḥ̭ purae॒tā tḙ a॒stvathe॒mava̭ sya॒ vara॒ ā pṛ̭thi॒vyā ā॒re śatrū᳚n kṛṇuhi॒ sarva̭vīra॒ edama̭ganma deva॒yaja̭na-mpṛthi॒vyā viśvḙ de॒vā yadajṷṣanta॒ pūrva̭ ṛkhsā॒mābhyāṃ॒-ya~jṷṣā sa॒ntara̭nto rā॒yaspoṣḙṇa॒ sami॒ṣā ma̭dema || 8 ||

( ā tvagṃ-hayo̭-'si॒ mama॒ bhogā̭ya bhava-sya॒-pañca̭vigṃśatiśca ) (a. 3)

i॒ya-ntḙ śukra ta॒nūri॒daṃ-va~rca॒stayā॒ sa-mbha̭va॒ bhrāja̭-ṅgaccha॒ jūra̭si dhṛ॒tā mana̭sā॒ juṣṭā॒ viṣṇa̭ve॒ tasyā᳚ste sa॒tyasa̭vasaḥ prasa॒ve vā॒co ya॒ntrama̭śīya॒ svāhā̭ śu॒krama̭sya॒mṛta̭masi vaiśvade॒vagṃ ha॒vi-ssūrya̭sya॒ cakṣu॒rā -'rṷhama॒gne ra॒kṣṇaḥ ka॒nīni̭kāṃ॒-ya~deta̭śebhi॒rīya̭se॒ bhrāja̭māno vipa॒ścitā॒ cida̭si ma॒nā-'si॒ dhīra̭si॒ dakṣi̭ṇā- [dakṣi̭ṇā, a॒si॒ ya॒jñiyā̭-'si] 9

-'si ya॒jñiyā̭-'si kṣa॒triyā॒ 'syadi̭ti-rasyubha॒yata̭̭śśīrṣṇī॒ sā na॒-ssuprā̭cī॒ supra̭tīcī॒ sa-mbha̭va mi॒trastvā̭ pa॒di ba̭ddhnātu pū॒ṣā-'ddhva̭naḥ pā॒tvindrā॒yā-ddhya̭kṣā॒yānṷ tvā mā॒tā ma̭nyatā॒manṷ pi॒tā-'nu॒ bhrātā॒ saga॒rbhyo-'nu॒ sakhā॒ sayū᳚thya॒-ssā dḙvi de॒vamacche॒hīndrā̭ya॒ somagṃ̭ ru॒drastvā ''va̭rtayatu mi॒trasya̭ pa॒thā sva॒sti soma̭sakhā॒ puna॒rehi̭ sa॒ha ra॒yyā || 10 ||

( dakṣi̭ṇā॒-soma̭sakhā॒, pañca̭ ca ) (a. 4)

vasvya̭si ru॒drā-'syadi̭ti-rasyādi॒tyā-'si̭ śu॒krā-'si̭ ca॒ndrā-'si॒ bṛha॒spati̭stvā su॒mne ra̭ṇvatu ru॒dro vasṷbhi॒rā ci̭ketu pṛthi॒vyāstvā̭ mū॒rdhannā ji̭gharmi deva॒yaja̭na॒ iḍā̭yāḥ pa॒de ghṛ॒tava̭ti॒ svāhā॒ pari̭likhita॒gṃ॒ rakṣaḥ॒ pari̭likhitā॒ arā̭taya i॒dama॒hagṃ rakṣa̭so grī॒vā api̭ kṛntāmi॒ yo᳚-'smā-ndveṣṭi॒ ya-ñca̭ va॒ya-ndvi॒ṣma i॒dama̭sya grī॒vā [grī॒vāḥ, api̭ kṛntāmya॒sme] 11

api̭ kṛntāmya॒sme rāya॒stve rāya॒stote॒ rāya॒-ssa-ndḙvi de॒vyorvaśyā̭ paśyasva॒ tvaṣṭī̭matī te sapeya su॒retā॒ reto॒ dadhā̭nā vī॒raṃ-vi~̭deya॒ tava̭ sa॒ndṛśi॒ mā-'hagṃrā॒yaspoṣḙṇa॒ vi yo̭ṣam || 12 ||

( a॒sya॒ grī॒vā-ekā॒nna tri॒gṃ॒śacca̭ ) (a. 5)

a॒gṃ॒śunā̭ te a॒gṃ॒śuḥ pṛ̭cyatā॒-mparṷṣā॒ parṷ-rga॒ndhaste॒ kāma̭mavatu॒ madā̭ya॒ raso॒ acyṷto॒ 'mātyo̭-'si śu॒kraste॒ graho॒-'bhi tya-nde॒vagṃ sa̭vi॒tāra̭mū॒ṇyoḥ᳚ ka॒vikra̭tu॒marcā̭mi sa॒tyasa̭vasagṃ ratna॒dhāma॒bhi pri॒ya-mma॒timū॒rdhvā yasyā॒mati॒rbhā adi̭dyuta॒-thsavī̭mani॒ hira̭ṇyapāṇiramimīta su॒kratuḥ̭ kṛ॒pā suvaḥ̭ | pra॒jābhya̭stvā prā॒ṇāya̭ tvā vyā॒nāya̭ tvā pra॒jāstvamanu॒ prāṇi̭hi pra॒jāstvāmanu॒ prāṇa̭ntu || 13 ||

(anṷ-sa॒pta ca̭) (a. 6)

soma̭-nte krīṇā॒myūrja̭svanta॒-mpaya̭svantaṃ-vī~॒ryā̭vantamabhi-māti॒ṣāhagṃ̭ śu॒kra-ntḙ śu॒kreṇa̭ krīṇāmi ca॒ndra-ñca॒ndreṇā॒mṛta̭ma॒mṛtḙna sa॒myatte॒ gora॒sme ca॒ndrāṇi॒ tapa̭sasta॒nūra̭si pra॒jāpa̭te॒-rvarṇa॒stasyā᳚ste sahasrapo॒ṣa-mpuṣya̭ntyāścara॒meṇa̭ pa॒śunā᳚ krīṇāmya॒sme te॒ bandhu॒rmayi̭ te॒ rāyaḥ̭ śrayantāma॒sme jyotiḥ̭ somavikra॒yiṇi॒ tamo̭ mi॒tro na॒ ehi॒ sumi̭tradhā॒ indra̭syo॒ru mā vi̭śa॒ dakṣi̭ṇa-mu॒śannu॒śantagg̭ syo॒na-ssyo॒nagg svāna॒ bhrājāṅghā̭re॒ bambhā̭re॒ hasta॒ suha̭sta॒ kṛśā̭nave॒te vaḥ̭ soma॒ kraya̭ṇā॒stā-nra̭kṣaddhva॒-mmā vo̭ dabhann || 14 ||

(u॒ruṃ-dvāvigṃ̭śatiśca) (a. 7)

udāyṷṣā svā॒yuṣodoṣa̭dhīnā॒gṃ॒ rase॒no-tpa॒rjanya̭sya॒ śuṣme॒ṇoda̭sthāma॒mṛtā॒gṃ॒ anṷ | u॒rva̭ntari̭kṣa॒manvi॒hyadi̭tyā॒-ssado॒-'syadi̭tyā॒-ssada॒ ā sī॒dāsta̭bhnā॒-ddyāmṛ̭ṣa॒bho a॒ntari̭kṣa॒mami̭mīta vari॒māṇa̭-mpṛthi॒vyā ā-'sī̭da॒-dviśvā॒ bhuva̭nāni sa॒mrā-ḍviśvettāni॒ varṷṇasya vra॒tāni॒ vanḙṣu॒ vya̭ntari̭kṣa-ntatāna॒ vāja॒marva̭thsu॒ payo̭ aghni॒yāsṷ hṛ॒thsu- [ ] || 15 ||

kratuṃ॒-va~rṷṇo vi॒kṣva̭gni-ndi॒vi sūrya̭madadhā॒-thsoma॒madrā॒vudu॒tya-ñjā॒tavḙdasa-nde॒vaṃ-va~̭hanti ke॒tavaḥ̭ | dṛ॒śe viśvā̭ya॒ sūrya᳚m || usrā॒veta̭-ndhūrṣāhāvana॒śrū avī̭rahaṇau brahma॒coda̭nau॒ varṷṇasya॒ skambha̭namasi॒ varṷṇasya skambha॒sarja̭namasi॒ pratya̭sto॒ varṷṇasya॒ pāśaḥ̭ || 16 ||

( hṛ॒thsu-pañca̭trigṃśacca ) (a. 8)

pra cya̭vasva bhuvaspate॒ viśvā᳚nya॒bhi dhāmā̭ni॒ mā tvā̭ paripa॒rī vi̭da॒nmā tvā̭ paripa॒nthino̭ vida॒nmā tvā॒ vṛkā̭ aghā॒yavo॒ mā ga̭ndha॒rvo vi॒śvāva̭su॒rā da̭ghacchye॒no bhū॒tvā parā̭ pata॒ yaja̭mānasya no gṛ॒he de॒vai-ssagg̭skṛ॒taṃ-ya~ja̭mānasya sva॒styaya̭nya॒syapi॒ panthā̭magasmahi svasti॒gā-ma̭ne॒hasaṃ॒-ye~na॒ viśvāḥ॒ pari॒ dviṣo̭ vṛ॒ṇakti̭ vi॒ndate॒ vasu॒ namo̭ mi॒trasya॒ varṷṇasya॒ cakṣa̭se ma॒ho de॒vāya॒ tadṛ॒tagṃ sa̭paryata dūre॒dṛśḙ de॒vajā̭tāya ke॒tavḙ di॒vaspu॒trāya॒ sūryā̭ya śagṃsata॒ varṷṇasya॒ skambha̭namasi॒ varṷṇasya skambha॒sarja̭na-ma॒syunmṷkto॒ varṷṇasya॒ pāśaḥ̭ || 17 ||

( mi॒trasya॒-trayo̭vigṃśatiśca ) (a. 9)

a॒gne-rā̭ti॒thyama̭si॒ viṣṇa̭ve tvā॒ soma̭syā-''ti॒thyama̭si॒ viṣṇa̭ve॒ tvā-'ti̭therāti॒thyama̭si॒ viṣṇa̭ve tvā॒-'gnaye᳚ tvā rāyaspoṣa॒dāvnne॒ viṣṇa̭ve tvā śye॒nāya̭ tvā soma॒bhṛte॒ viṣṇa̭ve tvā॒ yā te॒ dhāmā̭ni ha॒viṣā॒ yaja̭nti॒ tā te॒ viśvā̭ pari॒bhūra̭stu ya॒jña-ṅga̭ya॒sphānaḥ̭ pra॒tara̭ṇa-ssu॒vīro-'vī̭rahā॒ praca̭rā soma॒ duryā॒nadi̭tyā॒-ssado॒-'syadi̭tyā॒-ssada॒ ā- [sada॒ ā, sī॒da॒ varṷṇo-'si] || 18 ||

sī̭da॒ varṷṇo-'si dhṛ॒tavra̭to vāru॒ṇama̭si śaṃ॒yo~-rde॒vānāgṃ̭ sa॒khyānmā de॒vānā̭-ma॒pasa̭-śchithsma॒hyāpa̭taye tvā gṛhṇāmi॒ pari̭pataye tvā gṛhṇāmi॒ tanū॒naptre᳚ tvā gṛhṇāmi śākva॒rāya̭ tvā gṛhṇāmi॒ śakma॒nnoji̭ṣṭhāya tvā gṛhṇā॒mya-nā̭dhṛṣṭamasya-nādhṛ॒ṣya-nde॒vānā॒mojo̭- 'bhiṣasti॒pā a̭nabhiśaste॒-'nyamanṷ me dī॒kṣā-ndī॒kṣāpa̭ti-rmanyatā॒manu॒ tapa॒stapa̭spati॒rañja̭sā sa॒tyamupa̭ geṣagṃ suvi॒te mā̭ dhāḥ || 19 ||

( ā-mai-ka̭-ñca ) (a. 10)

a॒gṃ॒śuragṃ̭śuste deva so॒mā-''pyā̭yatā॒-mindrā̭yaikadhana॒vida॒ ā tubhya॒mindraḥ̭ pyāyatā॒mā tvamindrā̭ya pyāya॒svā-''pyā̭yaya॒ sakhī᳚n-thsa॒nyā me॒dhayā᳚ sva॒sti tḙ deva soma su॒tyāma̭śī॒yeṣṭā॒ rāyaḥ॒ preṣe bhagā̭ya॒rtamṛ̭tavā॒dibhyo॒ namo̭ di॒ve namaḥ̭ pṛthi॒vyā agne᳚ vratapate॒ tvaṃ-vra~॒tānāṃ᳚-vra~॒tapa̭tirasi॒ yā mama̭ ta॒nūre॒ṣā sā tvayi॒ [tvayi̭, yā tava̭] || 20 ||

yā tava̭ ta॒nūri॒yagṃ sā mayi̭ sa॒ha nau᳚ vratapate vra॒tino᳚-rvra॒tāni॒ yā tḙ agne॒ rudri̭yā ta॒nūstayā̭ naḥ pāhi॒ tasyā᳚ste॒ svāhā॒ yā tḙ agne-'yāśa॒yā ra̭jāśa॒yā ha̭rāśa॒yā ta॒nūrvarṣi̭ṣṭhā gahvare॒ṣṭho-'graṃ-va~co॒ apā̭vadhī-ntve॒ṣaṃ-va~co॒ apā̭vadhī॒g॒ svāhā᳚ || 21 ||

( tvayi̭-catvāri॒gṃ॒śacca̭ ) (a. 11)

vi॒ttāya̭nī me-'si ti॒ktāya̭nī me॒-'syava̭tānmā nāthi॒tamava̭tānmā vyathi॒taṃ-vi~॒dera॒gnirnabho॒ nāmāgnḙ aṅgiro॒ yo᳚-'syā-mpṛ̭thi॒vyāmasyāyṷṣā॒ nāmnehi॒ yatte-'nā̭dhṛṣṭa॒-nnāma̭ ya॒jñiya॒-ntena॒ tvā-''da॒dhe-'gnḙ aṅgiro॒ yo dvi॒tīya̭syā-ntṛ॒tīya̭syā-mpṛthi॒vyā-masyāyṷṣā॒ nāmnehi॒ yatte-'nā̭dhṛṣṭa॒-nnāma̭- [ ] 22

ya॒jñiya॒-ntena॒ tvā-''da̭dhe si॒gṃ॒hīra̭si mahi॒ṣīra̭syu॒ru pra̭thasvo॒ru tḙ ya॒jñapa̭tiḥ prathatā-ndhru॒vā-'si̭ de॒vebhyaḥ̭ śundhasva de॒vebhyaḥ̭ śumbhasvendragho॒ṣastvā॒ vasṷbhiḥ pu॒rastā᳚-tpātu॒ mano̭javāstvā pi॒tṛbhi̭-rdakṣiṇa॒taḥ pā̭tu॒ pracḙtāstvā ru॒draiḥ pa॒ścā-tpā̭tu vi॒śvaka̭rmā tvā-''di॒tyairṷttara॒taḥ pā̭tu si॒gṃ॒hīra̭si sapatnasā॒hī svāhā̭ si॒gṃ॒hīra̭si suprajā॒vani॒-ssvāhā̭ si॒gṃ॒hī- [si॒gṃ॒hīḥ, a॒si॒ rā॒ya॒spo॒ṣa॒vani॒-ssvāhā̭] 23

ra̭si rāyaspoṣa॒vani॒-ssvāhā̭ si॒gṃ॒hīra̭syāditya॒vani॒-ssvāhā̭ si॒gṃ॒hīra॒syā va̭ha de॒vāndḙvaya॒te yaja̭mānāya॒ svāhā̭ bhū॒tebhya̭stvā vi॒śvāyṷrasi pṛthi॒vī-ndṛgṃ̭ha dhruva॒kṣida̭sya॒ntari̭kṣa-ndṛgṃhācyuta॒kṣida̭si॒ diva̭-ndṛgṃhā॒gne-rbhasmā᳚sya॒gneḥ purī̭ṣamasi || 24 ||

(nāma̭-suprajā॒vani॒-ssvāhā̭ si॒gṃ॒sīḥ; pañca̭trigṃśacca ) (a. 12)

yu॒ñjate॒ mana̭ u॒ta yṷñjate॒ dhiyo॒ viprā॒ vipra̭sya bṛha॒to vi̭pa॒ścitaḥ̭ | vi hotrā̭ dadhe vayunā॒videka॒ inma॒hī de॒vasya̭ savi॒tuḥ pari̭ṣṭutiḥ || su॒vāgdḙva॒ duryā॒gṃ॒ ā va̭da deva॒śrutaṷ de॒veṣvā gho̭ṣethā॒mā no̭ vī॒ro jā̭yatā-ṅkarma॒ṇyo̭ yagṃ sarvḙ-'nu॒ jīvā̭ma॒ yo ba̭hū॒nāmasa̭dva॒śī || i॒daṃ-vi~ṣṇu॒-rvica̭krame tre॒dhā ni da̭dhe pa॒dam || samṷ̄ḍhamasya [samṷ̄ḍhamasya, pā॒gṃ॒su॒ra] 25

pāgṃsu॒ra irā̭vatī dhenu॒matī॒ hi bhū॒tagṃ sṷ̄yava॒sinī॒ mana̭ve yaśa॒sye᳚ | vya̭skabhnā॒-droda̭sī॒ viṣṇṷre॒te dā॒dhāra̭ pṛthi॒vīma॒bhito̭ ma॒yūkhaiḥ᳚ || prācī॒ preta̭maddhva॒ra-ṅka॒lpaya̭ntī ū॒rdhvaṃ-ya~॒jña-nna̭yata॒-mmā jī᳚hvarata॒matra̭ ramethāṃ॒-va~rṣma̭-npṛthi॒vyā di॒vo vā̭ viṣṇavu॒ta vā̭ pṛthi॒vyā ma॒ho vā̭ viṣṇavu॒ta vā॒-'ntari̭kṣā॒ddhastaṷ pṛṇasva ba॒hubhi̭-rvasa॒vyai̭rā pra ya̭ccha॒ [pra ya̭ccha, dakṣi̭ṇā॒dota] 26

dakṣi̭ṇā॒dota sa॒vyāt | viṣṇo॒rnukaṃ̭-vī~॒ryā̭ṇi॒ pra vo̭caṃ॒-yaḥ ~pārthi̭vāni vima॒me rajāgṃ̭si॒ yo aska̭bhāya॒dutta̭ragṃ sa॒dhasthaṃ̭-vi~cakramā॒ṇa stre॒dhorṷgā॒yo viṣṇo̭ ra॒rāṭa̭masi॒ viṣṇoḥ᳚ pṛ॒ṣṭhama̭si॒ viṣṇo॒-śśñaptre᳚ stho॒ viṣṇo॒-ssyūra̭si॒ viṣṇo᳚-rdhru॒vama̭si vaiṣṇa॒vama̭si॒ viṣṇa̭ve tvā || 27 ||

( a॒sya॒-ya॒cchaikā॒nna ca̭tvāri॒gṃ॒śacca̭ ) (a. 13)

kṛ॒ṇu॒ṣva pājaḥ॒ prasi̭ti॒nna pṛ॒thvīṃ-yā~॒hi rāje॒vāma̭vā॒gṃ॒ ibhḙna | tṛ॒ṣvīmanu॒ prasi̭tiṃ-drūṇā॒no-'stā̭-'si॒ viddhya̭ ra॒kṣasa॒ stapi̭ṣṭhaiḥ || tava̭ bhra॒māsa̭ āśu॒yā pa̭nta॒tyanṷ spṛśa-dhṛṣa॒tā śośṷcānaḥ | tapūg̭ṣyagne ju॒hvā̭ pata॒ṅgānasa̭ndito॒ visṛ̭ja॒ viṣva̭gu॒lkāḥ || prati॒spaśo॒ visṛ̭ja॒-tūrṇi̭tamo॒ bhavā̭ pā॒yurvi॒śo a॒syā ada̭bdhaḥ | yo no̭ dū॒re a॒ghaśagṃ̭so॒ [a॒ghaśagṃ̭saḥ, yo antyagne॒] 28

yo antyagne॒ māki̭ṣṭe॒ vyathi॒rā da̭dharṣīt || uda̭gne tiṣṭha॒ pratyā ''ta̭nuṣva॒ nya̭mitrāgṃ̭ oṣatā-ttigmahete | yo no॒ arā̭tigṃ samidhāna ca॒kre nī॒cā ta-ndha̭kṣyata॒sa-nna śuṣka᳚m || ū॒rdhvo bha̭va॒ prati̭vi॒ddhyā-'ddhya॒smadā॒viṣkṛ̭ṇuṣva॒ daivyā᳚nyagne | ava̭sthi॒rā ta̭nuhi yātu॒jūnā᳚-ñjā॒mimajā̭miṃ॒ pramṛ̭ṇīhi॒ śatrūṋ || sa tḙ [sa te᳚, jā॒nā॒ti॒ su॒ma॒tiṃ] 29

jānāti suma॒tiṃ-ya~̭viṣṭha॒ya īva̭te॒ brahma̭ṇe gā॒tumaira̭t | viśvā᳚nyasmai su॒dinā̭ni rā॒yo dyu॒mnānya॒ryo viduro̭ a॒bhi dyau᳚t || seda̭gne astu su॒bhagaḥ̭ su॒dānu॒-ryastvā॒ nityḙna ha॒viṣā॒ya u॒kthaiḥ | piprī̭ṣati॒ sva āyṷṣi duro॒ṇe viśveda̭smai su॒dinā॒ sā-'sa̭di॒ṣṭiḥ || arcā̭mi te suma॒ti-ṅghoṣya॒rvākh-santḙ vā॒ vā tā̭ jaratā- [vā॒ vā tā̭ jaratām, i॒yaṅgīḥ] 30

mi॒yaṅgīḥ | svaśvā᳚stvā su॒rathā̭ marjayemā॒sme kṣa॒trāṇi̭ dhāraye॒ranu॒ dyūn || i॒ha tvā॒ bhūryā ca̭re॒ dupa॒tma-ndoṣā̭vasta-rdīdi॒vāgṃsa॒manu॒ dyūn | krīḍa̭ntastvā su॒mana̭sa-ssapemā॒bhi dyu॒mnā ta̭sthi॒vāgṃso॒ janā̭nām || yastvā॒-svaśvaḥ̭ suhira॒ṇyo a̭gna upa॒yāti॒ vasṷmatā॒ rathḙna | tasya̭ trā॒tā-bha̭vasi॒ tasya॒ sakhā॒ yasta̭ āti॒thyamā̭nu॒ṣag jujo̭ṣat || ma॒ho rṷjāmi - [ ] 31

ba॒ndhutā॒ vaco̭bhi॒stanmā̭ pi॒turgota̭mā॒da-nvi̭yāya | tvanno̭ a॒sya vaca̭sa-ścikiddhi॒ hota̭ryaviṣṭha sukrato॒ damṷ̄nāḥ || asva̭pnaja sta॒raṇa̭ya-ssu॒śevā॒ ata̭ndrāso-'vṛ॒kā aśra̭miṣṭhāḥ | te pā॒yavaḥ̭ sa॒ddhriya̭ñco ni॒ṣadyā-'gne॒ tava̭naḥ pāntvamūra || ye pā॒yavo̭ māmate॒ya-ntḙ agne॒ paśya̭nto a॒ndha-ndṷri॒tādara̭kṣann | ra॒rakṣa॒tān-thsu॒kṛto̭ vi॒śvavḙdā॒ diphsa̭nta॒ idri॒pavo॒ nā ha̭ [nā ha̭, de॒bhuḥ॒] 32

debhuḥ || tvayā̭ va॒yagṃ sa̭dha॒nya̭-stvotā॒-stava॒ praṇī᳚tyaśyāma॒ vājāṋ | u॒bhā śagṃsā̭ sūdaya satyatāte-'nuṣṭhu॒yā kṛ̭ṇuhyahrayāṇa || a॒yā tḙ agne sa॒midhā̭ vidhema॒ prati॒stomagṃ̭ śa॒syamā̭na-ṅgṛbhāya | dahā॒śaso̭ ra॒kṣasaḥ̭ pā॒hya̭smā-ndru॒ho ni॒do mi̭tramaho ava॒dyāt || ra॒kṣo॒haṇaṃ̭ ~vā॒jina॒māji̭gharmi mi॒tra-mprathi̭ṣṭha॒-mupa̭yāmi॒ śarma̭ | śiśā̭no a॒gniḥ kratṷbhi॒-ssami̭ddha॒ssano॒ divā॒ [divā᳚, sari॒ṣaḥ pā̭tu॒ naktaṃ᳚] 33

sari॒ṣaḥ pā̭tu॒ nakta᳚m || vijyoti̭ṣā bṛha॒tā bhā᳚tya॒gni-rā॒vi-rviśvā̭ni kṛṇute mahi॒tvā | prādḙvī-rmā॒yā-ssa̭hate-du॒revā॒-śśiśī̭te॒ śṛṅge॒ rakṣa̭se vi॒nikṣe᳚ || u॒ta svā॒nāso̭ di॒viṣa̭ntva॒gne sti॒gmāyṷdhā॒ rakṣa̭se॒ hanta॒vā ṷ | madḙ cidasya॒ prarṷjanti॒ bhāmā॒ na va̭rante pari॒bādho॒ adḙvīḥ || 34 ||

(a॒ghaśagṃ̭saḥ॒-sa tḙ-jaratāgṃ-rujāmi-ha॒ -divai - ka̭catvārigṃśacca) (a. 14)

(āpa̭ unda॒, ntvākū᳚tyai॒, daivī̭, mi॒yante॒, vasvya̭sya॒gṃ॒ śunā̭ te॒, soma̭nta॒, udāyṷṣā॒, pra cya̭vasvā॒, 'gne rā̭ti॒thya, -ma॒gṃ॒śuragṃ̭ śu, rvi॒ttāya̭nī me-'si, yu॒ñcatḙ, kṛṇu॒ṣva pāja॒, ścatṷrdaśa |)

(āpo॒-vasvya̭si॒ yā tave॒-yaṅgī-ścatṷstrigṃśat |)

(āpa̭ unda॒n, tvadḙvīḥ)

|| hariḥ̭ om ||

|| kṛṣṇa yajurvedīya taittirīya saṃhitāyā-mprathamakāṇḍe dvitīyaḥ praśna-ssamāptaḥ ||

Sanskrit — Devanagari (original)

कृष्ण यजुर्वेदीय तैत्तिरीय संहिताया-म्प्रथमकाण्डे द्वितीयः प्रश्नः - अग्निष्टोमे क्रयः

ओ-न्नमः परमात्मने, श्री महागणपतये नमः,

श्री गुरुभ्यो नमः । ह॒रिः॒ ओम् ॥

आप॑ उन्दन्तु जी॒वसे॑ दीर्घायु॒त्वाय॒ वर्च॑स॒ ओष॑धे॒ त्राय॑स्वैन॒ग्ग्॒ स्वधि॑ते॒ मैनग्ं॑ हिग्ंसी-र्देव॒श्रूरे॒तानि॒ प्र व॑पे स्व॒स्त्युत्त॑राण्यशी॒यापो॑ अ॒स्मा-न्मा॒तरः॑ शुन्धन्तु घृ॒तेन॑ नो घृत॒पुवः॑ पुनन्तु॒ विश्व॑म॒स्म-त्प्र व॑हन्तु रि॒प्रमुदा᳚भ्य॒-श्शुचि॒रा पू॒त ए॑मि॒ सोम॑स्य त॒नूर॑सि त॒नुव॑-म्मे पाहि मही॒ना-म्पयो॑-ऽसि वर्चो॒धा अ॑सि॒ वर्चो॒- [वर्चः॑, मयि॑ धेहि वृ॒त्रस्य॑] 1

मयि॑ धेहि वृ॒त्रस्य॑ क॒नीनि॑का-ऽसि चक्षु॒ष्पा अ॑सि॒ चक्षु॑र्मे पाहि चि॒त्पति॑स्त्वा पुनातु वा॒क्पति॑स्त्वा पुनातु दे॒वस्त्वा॑ सवि॒ता पु॑ना॒त्वच्छि॑द्रेण प॒वित्रे॑ण॒ वसो॒-स्सूर्य॑स्य र॒श्मिभि॒स्तस्य॑ ते पवित्रपते प॒वित्रे॑ण॒ यस्मै॒ क-म्पु॒ने तच्छ॑केय॒मा वो॑ देवास ईमहे॒ सत्य॑धर्माणो अद्ध्व॒रे यद्वो॑ देवास आगु॒रे यज्ञि॑यासो॒ हवा॑मह॒ इन्द्रा᳚ग्नी॒ द्यावा॑पृथिवी॒ आप॑ ओषधी॒ स्त्व-न्दी॒क्षाणा॒-मधि॑पतिरसी॒ह मा॒ सन्त॑-म्पाहि ॥ 2 ॥

(वर्च॑ - ओषधी- र॒ष्टौ च॑ ) (अ. 1)

आकू᳚त्यै प्र॒युजे॒-ऽग्नये॒ स्वाहा॑ मे॒धायै॒ मन॑से॒ ऽग्नये॒ स्वाहा॑ दी॒क्षायै॒ तप॑से॒-ऽग्नये॒ स्वाहा॒ सर॑स्वत्यै पू॒ष्णे᳚-ऽग्नये॒ स्वाहा-ऽऽपो॑ देवी-र्बृहती-र्विश्वशम्भुवो॒ द्यावा॑पृथि॒वी उ॒र्व॑न्तरि॑क्ष॒-म्बृह॒स्पति॑र्नो ह॒विषा॑ वृधातु॒ स्वाहा॒ विश्वे॑ दे॒वस्य॑ ने॒तुर्मर्तो॑ वृणीत स॒ख्यं-विँश्वे॑ रा॒य इ॑षुद्ध्यसि द्यु॒म्नं-वृँ॑णीत पु॒ष्यसे॒ स्वाह॑र्ख्सा॒मयो॒-श्शिल्पे᳚ स्थ॒स्ते वा॒मा र॑भे॒ ते मा॑- [ते मा᳚, पा॒त॒मा-ऽस्य] 3

पात॒मा-ऽस्य य॒ज्ञस्यो॒दृच॑ इ॒मा-न्धिय॒ग्ं॒ शिक्ष॑माणस्य देव॒ क्रतु॒-न्दक्षं॑-वँरुण॒ सग्ं शि॑शाधि॒ यया-ऽति॒ विश्वा॑ दुरि॒ता तरे॑म सु॒तर्मा॑ण॒मधि॒ नावग्ं॑ रुहे॒मोर्ग॑स्याङ्गिर॒स्यूर्ण॑म्रदा॒ ऊर्ज॑-म्मे यच्छ पा॒हि मा॒ मा मा॑ हिग्ंसी॒-र्विष्णो॒-श्शर्मा॑सि॒ शर्म॒ यज॑मानस्य॒ शर्म॑ मे यच्छ॒ नक्ष॑त्राणा-म्मा-ऽतीका॒शा-त्पा॒हीन्द्र॑स्य॒ योनि॑रसि॒- [योनि॑रसि, मा मा॑ हिग्ंसीः] 4

मा मा॑ हिग्ंसीः कृ॒ष्यै त्वा॑ सुस॒स्यायै॑ सुपिप्प॒लाभ्य॒-स्त्वौष॑धीभ्य-स्सूप॒स्था दे॒वो वन॒स्पति॑रू॒र्ध्वो मा॑ पा॒ह्योदृच॒-स्स्वाहा॑ य॒ज्ञ-म्मन॑सा॒ स्वाहा॒ द्यावा॑पृथि॒वीभ्या॒ग्॒ स्वाहो॒रो-र॒न्तरि॑क्षा॒-थ्स्वाहा॑ य॒ज्ञं-वाँता॒दा र॑भे ॥ 5 ॥

( मा॒ - योनि॑रसि - त्रि॒ग्ं॒शच्च॑ ) (अ. 2)

दैवी॒-न्धिय॑-म्मनामहे सुमृडी॒का-म॒भिष्ट॑ये वर्चो॒धां-यँ॒ज्ञवा॑हसग्ं सुपा॒रा नो॑ अस॒-द्वशे᳚ । ये दे॒वा मनो॑जाता मनो॒युजः॑ सु॒दक्षा॒ दक्ष॑पितार॒स्ते नः॑ पान्तु॒ ते नो॑-ऽवन्तु॒ तेभ्यो॒ नम॒स्तेभ्य॒-स्स्वाहा-ऽग्ने॒ त्वग्ं सु जा॑गृहि व॒यग्ं सु म॑न्दिषीमहि गोपा॒य नः॑ स्व॒स्तये᳚ प्र॒बुधे॑ नः॒ पुन॑र्ददः । त्वम॑ग्ने व्रत॒पा अ॑सि दे॒व आ मर्त्ये॒ष्वा । त्वं- [त्वम्, य॒ज्ञेष्वीड्यः॑ ।] 6

य॒ज्ञेष्वीड्यः॑ ॥ विश्वे॑ दे॒वा अ॒भि मामा-ऽव॑वृत्र-न्पू॒षा स॒न्या सोमो॒ राध॑सा दे॒व-स्स॑वि॒ता वसो᳚र्वसु॒दावा॒ रास्वेय॑-थ्सो॒मा ऽऽभूयो॑ भर॒ मा पृ॒ण-न्पू॒र्त्या वि रा॑धि॒ मा-ऽहमायु॑षा च॒न्द्रम॑सि॒ मम॒ भोगा॑य भव॒ वस्त्र॑मसि॒ मम॒ भोगा॑य भवो॒स्रा-ऽसि॒ मम॒ भोगा॑य भव॒ हयो॑-ऽसि॒ मम॒ भोगा॑य भव॒- [भोगा॑य भव, छागो॑-ऽसि॒ मम॒] 7

छागो॑-ऽसि॒ मम॒ भोगा॑य भव मे॒षो॑-ऽसि॒ मम॒ भोगा॑य भव वा॒यवे᳚ त्वा॒ वरु॑णाय त्वा॒ निर्-ऋ॑त्यै त्वा रु॒द्राय॑ त्वा॒ देवी॑रापो अपा-न्नपा॒द्य ऊ॒र्मिर्-ह॑वि॒ष्य॑ इन्द्रि॒यावा᳚-न्म॒दिन्त॑म॒स्तं-वोँ॒ मा-ऽव॑ क्रमिष॒मच्छि॑न्न॒-न्तन्तु॑-म्पृथि॒व्या अनु॑ गेष-म्भ॒द्राद॒भि श्रेयः॒ प्रेहि॒ बृह॒स्पतिः॑ पुरए॒ता ते॑ अ॒स्त्वथे॒मव॑ स्य॒ वर॒ आ पृ॑थि॒व्या आ॒रे शत्रू᳚न् कृणुहि॒ सर्व॑वीर॒ एदम॑गन्म देव॒यज॑न-म्पृथि॒व्या विश्वे॑ दे॒वा यदजु॑षन्त॒ पूर्व॑ ऋख्सा॒माभ्यां॒-यँजु॑षा स॒न्तर॑न्तो रा॒यस्पोषे॑ण॒ समि॒षा म॑देम ॥ 8 ॥

( आ त्वग्ं-हयो॑-ऽसि॒ मम॒ भोगा॑य भव-स्य॒-पञ्च॑विग्ंशतिश्च ) (अ. 3)

इ॒य-न्ते॑ शुक्र त॒नूरि॒दं-वँर्च॒स्तया॒ स-म्भ॑व॒ भ्राज॑-ङ्गच्छ॒ जूर॑सि धृ॒ता मन॑सा॒ जुष्टा॒ विष्ण॑वे॒ तस्या᳚स्ते स॒त्यस॑वसः प्रस॒वे वा॒चो य॒न्त्रम॑शीय॒ स्वाहा॑ शु॒क्रम॑स्य॒मृत॑मसि वैश्वदे॒वग्ं ह॒वि-स्सूर्य॑स्य॒ चक्षु॒रा -ऽरु॑हम॒ग्ने र॒क्ष्णः क॒नीनि॑कां॒-यँदेत॑शेभि॒रीय॑से॒ भ्राज॑मानो विप॒श्चिता॒ चिद॑सि म॒ना-ऽसि॒ धीर॑सि॒ दक्षि॑णा- [दक्षि॑णा, अ॒सि॒ य॒ज्ञिया॑-ऽसि] 9

-ऽसि य॒ज्ञिया॑-ऽसि क्ष॒त्रिया॒ ऽस्यदि॑ति-रस्युभ॒यत॑॑श्शीर्ष्णी॒ सा न॒-स्सुप्रा॑ची॒ सुप्र॑तीची॒ स-म्भ॑व मि॒त्रस्त्वा॑ प॒दि ब॑द्ध्नातु पू॒षा-ऽद्ध्व॑नः पा॒त्विन्द्रा॒या-द्ध्य॑क्षा॒यानु॑ त्वा मा॒ता म॑न्यता॒मनु॑ पि॒ता-ऽनु॒ भ्राता॒ सग॒र्भ्यो-ऽनु॒ सखा॒ सयू᳚थ्य॒-स्सा दे॑वि दे॒वमच्छे॒हीन्द्रा॑य॒ सोमग्ं॑ रु॒द्रस्त्वा ऽऽव॑र्तयतु मि॒त्रस्य॑ प॒था स्व॒स्ति सोम॑सखा॒ पुन॒रेहि॑ स॒ह र॒य्या ॥ 10 ॥

( दक्षि॑णा॒-सोम॑सखा॒, पञ्च॑ च ) (अ. 4)

वस्व्य॑सि रु॒द्रा-ऽस्यदि॑ति-रस्यादि॒त्या-ऽसि॑ शु॒क्रा-ऽसि॑ च॒न्द्रा-ऽसि॒ बृह॒स्पति॑स्त्वा सु॒म्ने र॑ण्वतु रु॒द्रो वसु॑भि॒रा चि॑केतु पृथि॒व्यास्त्वा॑ मू॒र्धन्ना जि॑घर्मि देव॒यज॑न॒ इडा॑याः प॒दे घृ॒तव॑ति॒ स्वाहा॒ परि॑लिखित॒ग्ं॒ रक्षः॒ परि॑लिखिता॒ अरा॑तय इ॒दम॒हग्ं रक्ष॑सो ग्री॒वा अपि॑ कृन्तामि॒ यो᳚-ऽस्मा-न्द्वेष्टि॒ य-ञ्च॑ व॒य-न्द्वि॒ष्म इ॒दम॑स्य ग्री॒वा [ग्री॒वाः, अपि॑ कृन्ताम्य॒स्मे] 11

अपि॑ कृन्ताम्य॒स्मे राय॒स्त्वे राय॒स्तोते॒ राय॒-स्स-न्दे॑वि दे॒व्योर्वश्या॑ पश्यस्व॒ त्वष्टी॑मती ते सपेय सु॒रेता॒ रेतो॒ दधा॑ना वी॒रं-विँ॑देय॒ तव॑ स॒न्दृशि॒ मा-ऽहग्ंरा॒यस्पोषे॑ण॒ वि यो॑षम् ॥ 12 ॥

( अ॒स्य॒ ग्री॒वा-एका॒न्न त्रि॒ग्ं॒शच्च॑ ) (अ. 5)

अ॒ग्ं॒शुना॑ ते अ॒ग्ं॒शुः पृ॑च्यता॒-म्परु॑षा॒ परु॑-र्ग॒न्धस्ते॒ काम॑मवतु॒ मदा॑य॒ रसो॒ अच्यु॑तो॒ ऽमात्यो॑-ऽसि शु॒क्रस्ते॒ ग्रहो॒-ऽभि त्य-न्दे॒वग्ं स॑वि॒तार॑मू॒ण्योः᳚ क॒विक्र॑तु॒मर्चा॑मि स॒त्यस॑वसग्ं रत्न॒धाम॒भि प्रि॒य-म्म॒तिमू॒र्ध्वा यस्या॒मति॒र्भा अदि॑द्युत॒-थ्सवी॑मनि॒ हिर॑ण्यपाणिरमिमीत सु॒क्रतुः॑ कृ॒पा सुवः॑ । प्र॒जाभ्य॑स्त्वा प्रा॒णाय॑ त्वा व्या॒नाय॑ त्वा प्र॒जास्त्वमनु॒ प्राणि॑हि प्र॒जास्त्वामनु॒ प्राण॑न्तु ॥ 13 ॥

(अनु॑-स॒प्त च॑) (अ. 6)

सोम॑-न्ते क्रीणा॒म्यूर्ज॑स्वन्त॒-म्पय॑स्वन्तं-वीँ॒र्या॑वन्तमभि-माति॒षाहग्ं॑ शु॒क्र-न्ते॑ शु॒क्रेण॑ क्रीणामि च॒न्द्र-ञ्च॒न्द्रेणा॒मृत॑म॒मृते॑न स॒म्यत्ते॒ गोर॒स्मे च॒न्द्राणि॒ तप॑सस्त॒नूर॑सि प्र॒जाप॑ते॒-र्वर्ण॒स्तस्या᳚स्ते सहस्रपो॒ष-म्पुष्य॑न्त्याश्चर॒मेण॑ प॒शुना᳚ क्रीणाम्य॒स्मे ते॒ बन्धु॒र्मयि॑ ते॒ रायः॑ श्रयन्ताम॒स्मे ज्योतिः॑ सोमविक्र॒यिणि॒ तमो॑ मि॒त्रो न॒ एहि॒ सुमि॑त्रधा॒ इन्द्र॑स्यो॒रु मा वि॑श॒ दक्षि॑ण-मु॒शन्नु॒शन्तग्ग्॑ स्यो॒न-स्स्यो॒नग्ग् स्वान॒ भ्राजाङ्घा॑रे॒ बम्भा॑रे॒ हस्त॒ सुह॑स्त॒ कृशा॑नवे॒ते वः॑ सोम॒ क्रय॑णा॒स्ता-न्र॑क्षद्ध्व॒-म्मा वो॑ दभन्न् ॥ 14 ॥

(उ॒रुं-द्वाविग्ं॑शतिश्च) (अ. 7)

उदायु॑षा स्वा॒युषोदोष॑धीना॒ग्ं॒ रसे॒नो-त्प॒र्जन्य॑स्य॒ शुष्मे॒णोद॑स्थाम॒मृता॒ग्ं॒ अनु॑ । उ॒र्व॑न्तरि॑क्ष॒मन्वि॒ह्यदि॑त्या॒-स्सदो॒-ऽस्यदि॑त्या॒-स्सद॒ आ सी॒दास्त॑भ्ना॒-द्द्यामृ॑ष॒भो अ॒न्तरि॑क्ष॒ममि॑मीत वरि॒माण॑-म्पृथि॒व्या आ-ऽसी॑द॒-द्विश्वा॒ भुव॑नानि स॒म्रा-ड्विश्वेत्तानि॒ वरु॑णस्य व्र॒तानि॒ वने॑षु॒ व्य॑न्तरि॑क्ष-न्ततान॒ वाज॒मर्व॑थ्सु॒ पयो॑ अघ्नि॒यासु॑ हृ॒थ्सु- [ ] ॥ 15 ॥

क्रतुं॒-वँरु॑णो वि॒क्ष्व॑ग्नि-न्दि॒वि सूर्य॑मदधा॒-थ्सोम॒मद्रा॒वुदु॒त्य-ञ्जा॒तवे॑दस-न्दे॒वं-वँ॑हन्ति के॒तवः॑ । दृ॒शे विश्वा॑य॒ सूर्य᳚म् ॥ उस्रा॒वेत॑-न्धूर्षाहावन॒श्रू अवी॑रहणौ ब्रह्म॒चोद॑नौ॒ वरु॑णस्य॒ स्कम्भ॑नमसि॒ वरु॑णस्य स्कम्भ॒सर्ज॑नमसि॒ प्रत्य॑स्तो॒ वरु॑णस्य॒ पाशः॑ ॥ 16 ॥

( हृ॒थ्सु-पञ्च॑त्रिग्ंशच्च ) (अ. 8)

प्र च्य॑वस्व भुवस्पते॒ विश्वा᳚न्य॒भि धामा॑नि॒ मा त्वा॑ परिप॒री वि॑द॒न्मा त्वा॑ परिप॒न्थिनो॑ विद॒न्मा त्वा॒ वृका॑ अघा॒यवो॒ मा ग॑न्ध॒र्वो वि॒श्वाव॑सु॒रा द॑घच्छ्ये॒नो भू॒त्वा परा॑ पत॒ यज॑मानस्य नो गृ॒हे दे॒वै-स्सग्ग्॑स्कृ॒तं-यँज॑मानस्य स्व॒स्त्यय॑न्य॒स्यपि॒ पन्था॑मगस्महि स्वस्ति॒गा-म॑ने॒हसं॒-येँन॒ विश्वाः॒ परि॒ द्विषो॑ वृ॒णक्ति॑ वि॒न्दते॒ वसु॒ नमो॑ मि॒त्रस्य॒ वरु॑णस्य॒ चक्ष॑से म॒हो दे॒वाय॒ तदृ॒तग्ं स॑पर्यत दूरे॒दृशे॑ दे॒वजा॑ताय के॒तवे॑ दि॒वस्पु॒त्राय॒ सूर्या॑य शग्ंसत॒ वरु॑णस्य॒ स्कम्भ॑नमसि॒ वरु॑णस्य स्कम्भ॒सर्ज॑न-म॒स्युन्मु॑क्तो॒ वरु॑णस्य॒ पाशः॑ ॥ 17 ॥

( मि॒त्रस्य॒-त्रयो॑विग्ंशतिश्च ) (अ. 9)

अ॒ग्ने-रा॑ति॒थ्यम॑सि॒ विष्ण॑वे त्वा॒ सोम॑स्या-ऽऽति॒थ्यम॑सि॒ विष्ण॑वे॒ त्वा-ऽति॑थेराति॒थ्यम॑सि॒ विष्ण॑वे त्वा॒-ऽग्नये᳚ त्वा रायस्पोष॒दाव्न्ने॒ विष्ण॑वे त्वा श्ये॒नाय॑ त्वा सोम॒भृते॒ विष्ण॑वे त्वा॒ या ते॒ धामा॑नि ह॒विषा॒ यज॑न्ति॒ ता ते॒ विश्वा॑ परि॒भूर॑स्तु य॒ज्ञ-ङ्ग॑य॒स्फानः॑ प्र॒तर॑ण-स्सु॒वीरो-ऽवी॑रहा॒ प्रच॑रा सोम॒ दुर्या॒नदि॑त्या॒-स्सदो॒-ऽस्यदि॑त्या॒-स्सद॒ आ- [सद॒ आ, सी॒द॒ वरु॑णो-ऽसि] ॥ 18 ॥

सी॑द॒ वरु॑णो-ऽसि धृ॒तव्र॑तो वारु॒णम॑सि शं॒योँ-र्दे॒वानाग्ं॑ स॒ख्यान्मा दे॒वाना॑-म॒पस॑-श्छिथ्स्म॒ह्याप॑तये त्वा गृह्णामि॒ परि॑पतये त्वा गृह्णामि॒ तनू॒नप्त्रे᳚ त्वा गृह्णामि शाक्व॒राय॑ त्वा गृह्णामि॒ शक्म॒न्नोजि॑ष्ठाय त्वा गृह्णा॒म्य-ना॑धृष्टमस्य-नाधृ॒ष्य-न्दे॒वाना॒मोजो॑- ऽभिषस्ति॒पा अ॑नभिशस्ते॒-ऽन्यमनु॑ मे दी॒क्षा-न्दी॒क्षाप॑ति-र्मन्यता॒मनु॒ तप॒स्तप॑स्पति॒रञ्ज॑सा स॒त्यमुप॑ गेषग्ं सुवि॒ते मा॑ धाः ॥ 19 ॥

( आ-मै-क॑-ञ्च ) (अ. 10)

अ॒ग्ं॒शुरग्ं॑शुस्ते देव सो॒मा-ऽऽप्या॑यता॒-मिन्द्रा॑यैकधन॒विद॒ आ तुभ्य॒मिन्द्रः॑ प्यायता॒मा त्वमिन्द्रा॑य प्याय॒स्वा-ऽऽप्या॑यय॒ सखी᳚न्-थ्स॒न्या मे॒धया᳚ स्व॒स्ति ते॑ देव सोम सु॒त्याम॑शी॒येष्टा॒ रायः॒ प्रेषे भगा॑य॒र्तमृ॑तवा॒दिभ्यो॒ नमो॑ दि॒वे नमः॑ पृथि॒व्या अग्ने᳚ व्रतपते॒ त्वं-व्रँ॒तानां᳚-व्रँ॒तप॑तिरसि॒ या मम॑ त॒नूरे॒षा सा त्वयि॒ [त्वयि॑, या तव॑] ॥ 20 ॥

या तव॑ त॒नूरि॒यग्ं सा मयि॑ स॒ह नौ᳚ व्रतपते व्र॒तिनो᳚-र्व्र॒तानि॒ या ते॑ अग्ने॒ रुद्रि॑या त॒नूस्तया॑ नः पाहि॒ तस्या᳚स्ते॒ स्वाहा॒ या ते॑ अग्ने-ऽयाश॒या र॑जाश॒या ह॑राश॒या त॒नूर्वर्षि॑ष्ठा गह्वरे॒ष्ठो-ऽग्रं-वँचो॒ अपा॑वधी-न्त्वे॒षं-वँचो॒ अपा॑वधी॒ग्॒ स्वाहा᳚ ॥ 21 ॥

( त्वयि॑-चत्वारि॒ग्ं॒शच्च॑ ) (अ. 11)

वि॒त्ताय॑नी मे-ऽसि ति॒क्ताय॑नी मे॒-ऽस्यव॑तान्मा नाथि॒तमव॑तान्मा व्यथि॒तं-विँ॒देर॒ग्निर्नभो॒ नामाग्ने॑ अङ्गिरो॒ यो᳚-ऽस्या-म्पृ॑थि॒व्यामस्यायु॑षा॒ नाम्नेहि॒ यत्ते-ऽना॑धृष्ट॒-न्नाम॑ य॒ज्ञिय॒-न्तेन॒ त्वा-ऽऽद॒धे-ऽग्ने॑ अङ्गिरो॒ यो द्वि॒तीय॑स्या-न्तृ॒तीय॑स्या-म्पृथि॒व्या-मस्यायु॑षा॒ नाम्नेहि॒ यत्ते-ऽना॑धृष्ट॒-न्नाम॑- [ ] 22

य॒ज्ञिय॒-न्तेन॒ त्वा-ऽऽद॑धे सि॒ग्ं॒हीर॑सि महि॒षीर॑स्यु॒रु प्र॑थस्वो॒रु ते॑ य॒ज्ञप॑तिः प्रथता-न्ध्रु॒वा-ऽसि॑ दे॒वेभ्यः॑ शुन्धस्व दे॒वेभ्यः॑ शुम्भस्वेन्द्रघो॒षस्त्वा॒ वसु॑भिः पु॒रस्ता᳚-त्पातु॒ मनो॑जवास्त्वा पि॒तृभि॑-र्दक्षिण॒तः पा॑तु॒ प्रचे॑तास्त्वा रु॒द्रैः प॒श्चा-त्पा॑तु वि॒श्वक॑र्मा त्वा-ऽऽदि॒त्यैरु॑त्तर॒तः पा॑तु सि॒ग्ं॒हीर॑सि सपत्नसा॒ही स्वाहा॑ सि॒ग्ं॒हीर॑सि सुप्रजा॒वनि॒-स्स्वाहा॑ सि॒ग्ं॒ही- [सि॒ग्ं॒हीः, अ॒सि॒ रा॒य॒स्पो॒ष॒वनि॒-स्स्वाहा॑] 23

र॑सि रायस्पोष॒वनि॒-स्स्वाहा॑ सि॒ग्ं॒हीर॑स्यादित्य॒वनि॒-स्स्वाहा॑ सि॒ग्ं॒हीर॒स्या व॑ह दे॒वान्दे॑वय॒ते यज॑मानाय॒ स्वाहा॑ भू॒तेभ्य॑स्त्वा वि॒श्वायु॑रसि पृथि॒वी-न्दृग्ं॑ह ध्रुव॒क्षिद॑स्य॒न्तरि॑क्ष-न्दृग्ंहाच्युत॒क्षिद॑सि॒ दिव॑-न्दृग्ंहा॒ग्ने-र्भस्मा᳚स्य॒ग्नेः पुरी॑षमसि ॥ 24 ॥

(नाम॑-सुप्रजा॒वनि॒-स्स्वाहा॑ सि॒ग्ं॒सीः; पञ्च॑त्रिग्ंशच्च ) (अ. 12)

यु॒ञ्जते॒ मन॑ उ॒त यु॑ञ्जते॒ धियो॒ विप्रा॒ विप्र॑स्य बृह॒तो वि॑प॒श्चितः॑ । वि होत्रा॑ दधे वयुना॒विदेक॒ इन्म॒ही दे॒वस्य॑ सवि॒तुः परि॑ष्टुतिः ॥ सु॒वाग्दे॑व॒ दुर्या॒ग्ं॒ आ व॑द देव॒श्रुतौ॑ दे॒वेष्वा घो॑षेथा॒मा नो॑ वी॒रो जा॑यता-ङ्कर्म॒ण्यो॑ यग्ं सर्वे॑-ऽनु॒ जीवा॑म॒ यो ब॑हू॒नामस॑द्व॒शी ॥ इ॒दं-विँष्णु॒-र्विच॑क्रमे त्रे॒धा नि द॑धे प॒दम् ॥ समू॑ढमस्य [समू॑ढमस्य, पा॒ग्ं॒सु॒र] 25

पाग्ंसु॒र इरा॑वती धेनु॒मती॒ हि भू॒तग्ं सू॑यव॒सिनी॒ मन॑वे यश॒स्ये᳚ । व्य॑स्कभ्ना॒-द्रोद॑सी॒ विष्णु॑रे॒ते दा॒धार॑ पृथि॒वीम॒भितो॑ म॒यूखैः᳚ ॥ प्राची॒ प्रेत॑मद्ध्व॒र-ङ्क॒ल्पय॑न्ती ऊ॒र्ध्वं-यँ॒ज्ञ-न्न॑यत॒-म्मा जी᳚ह्वरत॒मत्र॑ रमेथां॒-वँर्ष्म॑-न्पृथि॒व्या दि॒वो वा॑ विष्णवु॒त वा॑ पृथि॒व्या म॒हो वा॑ विष्णवु॒त वा॒-ऽन्तरि॑क्षा॒द्धस्तौ॑ पृणस्व ब॒हुभि॑-र्वस॒व्यै॑रा प्र य॑च्छ॒ [प्र य॑च्छ, दक्षि॑णा॒दोत] 26

दक्षि॑णा॒दोत स॒व्यात् । विष्णो॒र्नुकं॑-वीँ॒र्या॑णि॒ प्र वो॑चं॒-यः ँपार्थि॑वानि विम॒मे रजाग्ं॑सि॒ यो अस्क॑भाय॒दुत्त॑रग्ं स॒धस्थं॑-विँचक्रमा॒ण स्त्रे॒धोरु॑गा॒यो विष्णो॑ र॒राट॑मसि॒ विष्णोः᳚ पृ॒ष्ठम॑सि॒ विष्णो॒-श्श्ञप्त्रे᳚ स्थो॒ विष्णो॒-स्स्यूर॑सि॒ विष्णो᳚-र्ध्रु॒वम॑सि वैष्ण॒वम॑सि॒ विष्ण॑वे त्वा ॥ 27 ॥

( अ॒स्य॒-य॒च्छैका॒न्न च॑त्वारि॒ग्ं॒शच्च॑ ) (अ. 13)

कृ॒णु॒ष्व पाजः॒ प्रसि॑ति॒न्न पृ॒थ्वीं-याँ॒हि राजे॒वाम॑वा॒ग्ं॒ इभे॑न । तृ॒ष्वीमनु॒ प्रसि॑तिं-द्रूणा॒नो-ऽस्ता॑-ऽसि॒ विद्ध्य॑ र॒क्षस॒ स्तपि॑ष्ठैः ॥ तव॑ भ्र॒मास॑ आशु॒या प॑न्त॒त्यनु॑ स्पृश-धृष॒ता शोशु॑चानः । तपूग्॑ष्यग्ने जु॒ह्वा॑ पत॒ङ्गानस॑न्दितो॒ विसृ॑ज॒ विष्व॑गु॒ल्काः ॥ प्रति॒स्पशो॒ विसृ॑ज॒-तूर्णि॑तमो॒ भवा॑ पा॒युर्वि॒शो अ॒स्या अद॑ब्धः । यो नो॑ दू॒रे अ॒घशग्ं॑सो॒ [अ॒घशग्ं॑सः, यो अन्त्यग्ने॒] 28

यो अन्त्यग्ने॒ माकि॑ष्टे॒ व्यथि॒रा द॑धर्षीत् ॥ उद॑ग्ने तिष्ठ॒ प्रत्या ऽऽत॑नुष्व॒ न्य॑मित्राग्ं॑ ओषता-त्तिग्महेते । यो नो॒ अरा॑तिग्ं समिधान च॒क्रे नी॒चा त-न्ध॑क्ष्यत॒स-न्न शुष्क᳚म् ॥ ऊ॒र्ध्वो भ॑व॒ प्रति॑वि॒द्ध्या-ऽद्ध्य॒स्मदा॒विष्कृ॑णुष्व॒ दैव्या᳚न्यग्ने । अव॑स्थि॒रा त॑नुहि यातु॒जूना᳚-ञ्जा॒मिमजा॑मिं॒ प्रमृ॑णीहि॒ शत्रून्॑ ॥ स ते॑ [स ते᳚, जा॒ना॒ति॒ सु॒म॒तिं] 29

जानाति सुम॒तिं-यँ॑विष्ठ॒य ईव॑ते॒ ब्रह्म॑णे गा॒तुमैर॑त् । विश्वा᳚न्यस्मै सु॒दिना॑नि रा॒यो द्यु॒म्नान्य॒र्यो विदुरो॑ अ॒भि द्यौ᳚त् ॥ सेद॑ग्ने अस्तु सु॒भगः॑ सु॒दानु॒-र्यस्त्वा॒ नित्ये॑न ह॒विषा॒य उ॒क्थैः । पिप्री॑षति॒ स्व आयु॑षि दुरो॒णे विश्वेद॑स्मै सु॒दिना॒ सा-ऽस॑दि॒ष्टिः ॥ अर्चा॑मि ते सुम॒ति-ङ्घोष्य॒र्वाख्-सन्ते॑ वा॒ वा ता॑ जरता- [वा॒ वा ता॑ जरताम्, इ॒यङ्गीः] 30

मि॒यङ्गीः । स्वश्वा᳚स्त्वा सु॒रथा॑ मर्जयेमा॒स्मे क्ष॒त्राणि॑ धारये॒रनु॒ द्यून् ॥ इ॒ह त्वा॒ भूर्या च॑रे॒ दुप॒त्म-न्दोषा॑वस्त-र्दीदि॒वाग्ंस॒मनु॒ द्यून् । क्रीड॑न्तस्त्वा सु॒मन॑स-स्सपेमा॒भि द्यु॒म्ना त॑स्थि॒वाग्ंसो॒ जना॑नाम् ॥ यस्त्वा॒-स्वश्वः॑ सुहिर॒ण्यो अ॑ग्न उप॒याति॒ वसु॑मता॒ रथे॑न । तस्य॑ त्रा॒ता-भ॑वसि॒ तस्य॒ सखा॒ यस्त॑ आति॒थ्यमा॑नु॒षग् जुजो॑षत् ॥ म॒हो रु॑जामि - [ ] 31

ब॒न्धुता॒ वचो॑भि॒स्तन्मा॑ पि॒तुर्गोत॑मा॒द-न्वि॑याय । त्वन्नो॑ अ॒स्य वच॑स-श्चिकिद्धि॒ होत॑र्यविष्ठ सुक्रतो॒ दमू॑नाः ॥ अस्व॑प्नज स्त॒रण॑य-स्सु॒शेवा॒ अत॑न्द्रासो-ऽवृ॒का अश्र॑मिष्ठाः । ते पा॒यवः॑ स॒द्ध्रिय॑ञ्चो नि॒षद्या-ऽग्ने॒ तव॑नः पान्त्वमूर ॥ ये पा॒यवो॑ मामते॒य-न्ते॑ अग्ने॒ पश्य॑न्तो अ॒न्ध-न्दु॑रि॒तादर॑क्षन्न् । र॒रक्ष॒तान्-थ्सु॒कृतो॑ वि॒श्ववे॑दा॒ दिफ्स॑न्त॒ इद्रि॒पवो॒ ना ह॑ [ना ह॑, दे॒भुः॒] 32

देभुः ॥ त्वया॑ व॒यग्ं स॑ध॒न्य॑-स्त्वोता॒-स्तव॒ प्रणी᳚त्यश्याम॒ वाजान्॑ । उ॒भा शग्ंसा॑ सूदय सत्यताते-ऽनुष्ठु॒या कृ॑णुह्यह्रयाण ॥ अ॒या ते॑ अग्ने स॒मिधा॑ विधेम॒ प्रति॒स्तोमग्ं॑ श॒स्यमा॑न-ङ्गृभाय । दहा॒शसो॑ र॒क्षसः॑ पा॒ह्य॑स्मा-न्द्रु॒हो नि॒दो मि॑त्रमहो अव॒द्यात् ॥ र॒क्षो॒हणं॑ ँवा॒जिन॒माजि॑घर्मि मि॒त्र-म्प्रथि॑ष्ठ॒-मुप॑यामि॒ शर्म॑ । शिशा॑नो अ॒ग्निः क्रतु॑भि॒-स्समि॑द्ध॒स्सनो॒ दिवा॒ [दिवा᳚, सरि॒षः पा॑तु॒ नक्तं᳚] 33

सरि॒षः पा॑तु॒ नक्त᳚म् ॥ विज्योति॑षा बृह॒ता भा᳚त्य॒ग्नि-रा॒वि-र्विश्वा॑नि कृणुते महि॒त्वा । प्रादे॑वी-र्मा॒या-स्स॑हते-दु॒रेवा॒-श्शिशी॑ते॒ शृङ्गे॒ रक्ष॑से वि॒निक्षे᳚ ॥ उ॒त स्वा॒नासो॑ दि॒विष॑न्त्व॒ग्ने स्ति॒ग्मायु॑धा॒ रक्ष॑से॒ हन्त॒वा उ॑ । मदे॑ चिदस्य॒ प्ररु॑जन्ति॒ भामा॒ न व॑रन्ते परि॒बाधो॒ अदे॑वीः ॥ 34 ॥

(अ॒घशग्ं॑सः॒-स ते॑-जरताग्ं-रुजामि-ह॒ -दिवै - क॑चत्वारिग्ंशच्च) (अ. 14)

(आप॑ उन्द॒, न्त्वाकू᳚त्यै॒, दैवी॑, मि॒यन्ते॒, वस्व्य॑स्य॒ग्ं॒ शुना॑ ते॒, सोम॑न्त॒, उदायु॑षा॒, प्र च्य॑वस्वा॒, ऽग्ने रा॑ति॒थ्य, -म॒ग्ं॒शुरग्ं॑ शु, र्वि॒त्ताय॑नी मे-ऽसि, यु॒ञ्चते॑, कृणु॒ष्व पाज॒, श्चतु॑र्दश ।)

(आपो॒-वस्व्य॑सि॒ या तवे॒-यङ्गी-श्चतु॑स्त्रिग्ंशत् ।)

(आप॑ उन्द॒न्, त्वदे॑वीः)

॥ हरिः॑ ओम् ॥

॥ कृष्ण यजुर्वेदीय तैत्तिरीय संहिताया-म्प्रथमकाण्डे द्वितीयः प्रश्न-स्समाप्तः ॥