1.2 - Apa Undantu Jivase - Krishna Yajurveda Taittiriya Samhita Pathah — Kannada Script

ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾ-ಮ್ಪ್ರಥಮಕಾಣ್ಡೇ ದ್ವಿತೀಯಃ ಪ್ರಶ್ನಃ - ಅಗ್ನಿಷ್ಟೋಮೇ ಕ್ರಯಃ

ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,

ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥

ಆಪ॑ ಉನ್ದನ್ತು ಜೀ॒ವಸೇ॑ ದೀರ್ಘಾಯು॒ತ್ವಾಯ॒ ವರ್ಚ॑ಸ॒ ಓಷ॑ಧೇ॒ ತ್ರಾಯ॑ಸ್ವೈನ॒ಗ್ಗ್॒ ಸ್ವಧಿ॑ತೇ॒ ಮೈನಗ್ಂ॑ ಹಿಗ್ಂಸೀ-ರ್ದೇವ॒ಶ್ರೂರೇ॒ತಾನಿ॒ ಪ್ರ ವ॑ಪೇ ಸ್ವ॒ಸ್ತ್ಯುತ್ತ॑ರಾಣ್ಯಶೀ॒ಯಾಪೋ॑ ಅ॒ಸ್ಮಾ-ನ್ಮಾ॒ತರಃ॑ ಶುನ್ಧನ್ತು ಘೃ॒ತೇನ॑ ನೋ ಘೃತ॒ಪುವಃ॑ ಪುನನ್ತು॒ ವಿಶ್ವ॑ಮ॒ಸ್ಮ-ತ್ಪ್ರ ವ॑ಹನ್ತು ರಿ॒ಪ್ರಮುದಾ᳚ಭ್ಯ॒-ಶ್ಶುಚಿ॒ರಾ ಪೂ॒ತ ಏ॑ಮಿ॒ ಸೋಮ॑ಸ್ಯ ತ॒ನೂರ॑ಸಿ ತ॒ನುವ॑-ಮ್ಮೇ ಪಾಹಿ ಮಹೀ॒ನಾ-ಮ್ಪಯೋ॑-ಽಸಿ ವರ್ಚೋ॒ಧಾ ಅ॑ಸಿ॒ ವರ್ಚೋ॒- [ವರ್ಚಃ॑, ಮಯಿ॑ ಧೇಹಿ ವೃ॒ತ್ರಸ್ಯ॑] 1

ಮಯಿ॑ ಧೇಹಿ ವೃ॒ತ್ರಸ್ಯ॑ ಕ॒ನೀನಿ॑ಕಾ-ಽಸಿ ಚಕ್ಷು॒ಷ್ಪಾ ಅ॑ಸಿ॒ ಚಕ್ಷು॑ರ್ಮೇ ಪಾಹಿ ಚಿ॒ತ್ಪತಿ॑ಸ್ತ್ವಾ ಪುನಾತು ವಾ॒ಕ್ಪತಿ॑ಸ್ತ್ವಾ ಪುನಾತು ದೇ॒ವಸ್ತ್ವಾ॑ ಸವಿ॒ತಾ ಪು॑ನಾ॒ತ್ವಚ್ಛಿ॑ದ್ರೇಣ ಪ॒ವಿತ್ರೇ॑ಣ॒ ವಸೋ॒-ಸ್ಸೂರ್ಯ॑ಸ್ಯ ರ॒ಶ್ಮಿಭಿ॒ಸ್ತಸ್ಯ॑ ತೇ ಪವಿತ್ರಪತೇ ಪ॒ವಿತ್ರೇ॑ಣ॒ ಯಸ್ಮೈ॒ ಕ-ಮ್ಪು॒ನೇ ತಚ್ಛ॑ಕೇಯ॒ಮಾ ವೋ॑ ದೇವಾಸ ಈಮಹೇ॒ ಸತ್ಯ॑ಧರ್ಮಾಣೋ ಅದ್ಧ್ವ॒ರೇ ಯದ್ವೋ॑ ದೇವಾಸ ಆಗು॒ರೇ ಯಜ್ಞಿ॑ಯಾಸೋ॒ ಹವಾ॑ಮಹ॒ ಇನ್ದ್ರಾ᳚ಗ್ನೀ॒ ದ್ಯಾವಾ॑ಪೃಥಿವೀ॒ ಆಪ॑ ಓಷಧೀ॒ ಸ್ತ್ವ-ನ್ದೀ॒ಕ್ಷಾಣಾ॒-ಮಧಿ॑ಪತಿರಸೀ॒ಹ ಮಾ॒ ಸನ್ತ॑-ಮ್ಪಾಹಿ ॥ 2 ॥

(ವರ್ಚ॑ - ಓಷಧೀ- ರ॒ಷ್ಟೌ ಚ॑ ) (ಅ. 1)

ಆಕೂ᳚ತ್ಯೈ ಪ್ರ॒ಯುಜೇ॒-ಽಗ್ನಯೇ॒ ಸ್ವಾಹಾ॑ ಮೇ॒ಧಾಯೈ॒ ಮನ॑ಸೇ॒ ಽಗ್ನಯೇ॒ ಸ್ವಾಹಾ॑ ದೀ॒ಕ್ಷಾಯೈ॒ ತಪ॑ಸೇ॒-ಽಗ್ನಯೇ॒ ಸ್ವಾಹಾ॒ ಸರ॑ಸ್ವತ್ಯೈ ಪೂ॒ಷ್ಣೇ᳚-ಽಗ್ನಯೇ॒ ಸ್ವಾಹಾ-ಽಽಪೋ॑ ದೇವೀ-ರ್ಬೃಹತೀ-ರ್ವಿಶ್ವಶಮ್ಭುವೋ॒ ದ್ಯಾವಾ॑ಪೃಥಿ॒ವೀ ಉ॒ರ್ವ॑ನ್ತರಿ॑ಕ್ಷ॒-ಮ್ಬೃಹ॒ಸ್ಪತಿ॑ರ್ನೋ ಹ॒ವಿಷಾ॑ ವೃಧಾತು॒ ಸ್ವಾಹಾ॒ ವಿಶ್ವೇ॑ ದೇ॒ವಸ್ಯ॑ ನೇ॒ತುರ್ಮರ್ತೋ॑ ವೃಣೀತ ಸ॒ಖ್ಯಂ-ವಿಁಶ್ವೇ॑ ರಾ॒ಯ ಇ॑ಷುದ್ಧ್ಯಸಿ ದ್ಯು॒ಮ್ನಂ-ವೃಁ॑ಣೀತ ಪು॒ಷ್ಯಸೇ॒ ಸ್ವಾಹ॑ರ್ಖ್ಸಾ॒ಮಯೋ॒-ಶ್ಶಿಲ್ಪೇ᳚ ಸ್ಥ॒ಸ್ತೇ ವಾ॒ಮಾ ರ॑ಭೇ॒ ತೇ ಮಾ॑- [ತೇ ಮಾ᳚, ಪಾ॒ತ॒ಮಾ-ಽಸ್ಯ] 3

ಪಾತ॒ಮಾ-ಽಸ್ಯ ಯ॒ಜ್ಞಸ್ಯೋ॒ದೃಚ॑ ಇ॒ಮಾ-ನ್ಧಿಯ॒ಗ್ಂ॒ ಶಿಕ್ಷ॑ಮಾಣಸ್ಯ ದೇವ॒ ಕ್ರತು॒-ನ್ದಕ್ಷಂ॑-ವಁರುಣ॒ ಸಗ್ಂ ಶಿ॑ಶಾಧಿ॒ ಯಯಾ-ಽತಿ॒ ವಿಶ್ವಾ॑ ದುರಿ॒ತಾ ತರೇ॑ಮ ಸು॒ತರ್ಮಾ॑ಣ॒ಮಧಿ॒ ನಾವಗ್ಂ॑ ರುಹೇ॒ಮೋರ್ಗ॑ಸ್ಯಾಙ್ಗಿರ॒ಸ್ಯೂರ್ಣ॑ಮ್ರದಾ॒ ಊರ್ಜ॑-ಮ್ಮೇ ಯಚ್ಛ ಪಾ॒ಹಿ ಮಾ॒ ಮಾ ಮಾ॑ ಹಿಗ್ಂಸೀ॒-ರ್ವಿಷ್ಣೋ॒-ಶ್ಶರ್ಮಾ॑ಸಿ॒ ಶರ್ಮ॒ ಯಜ॑ಮಾನಸ್ಯ॒ ಶರ್ಮ॑ ಮೇ ಯಚ್ಛ॒ ನಕ್ಷ॑ತ್ರಾಣಾ-ಮ್ಮಾ-ಽತೀಕಾ॒ಶಾ-ತ್ಪಾ॒ಹೀನ್ದ್ರ॑ಸ್ಯ॒ ಯೋನಿ॑ರಸಿ॒- [ಯೋನಿ॑ರಸಿ, ಮಾ ಮಾ॑ ಹಿಗ್ಂಸೀಃ] 4

ಮಾ ಮಾ॑ ಹಿಗ್ಂಸೀಃ ಕೃ॒ಷ್ಯೈ ತ್ವಾ॑ ಸುಸ॒ಸ್ಯಾಯೈ॑ ಸುಪಿಪ್ಪ॒ಲಾಭ್ಯ॒-ಸ್ತ್ವೌಷ॑ಧೀಭ್ಯ-ಸ್ಸೂಪ॒ಸ್ಥಾ ದೇ॒ವೋ ವನ॒ಸ್ಪತಿ॑ರೂ॒ರ್ಧ್ವೋ ಮಾ॑ ಪಾ॒ಹ್ಯೋದೃಚ॒-ಸ್ಸ್ವಾಹಾ॑ ಯ॒ಜ್ಞ-ಮ್ಮನ॑ಸಾ॒ ಸ್ವಾಹಾ॒ ದ್ಯಾವಾ॑ಪೃಥಿ॒ವೀಭ್ಯಾ॒ಗ್॒ ಸ್ವಾಹೋ॒ರೋ-ರ॒ನ್ತರಿ॑ಕ್ಷಾ॒-ಥ್ಸ್ವಾಹಾ॑ ಯ॒ಜ್ಞಂ-ವಾಁತಾ॒ದಾ ರ॑ಭೇ ॥ 5 ॥

( ಮಾ॒ - ಯೋನಿ॑ರಸಿ - ತ್ರಿ॒ಗ್ಂ॒ಶಚ್ಚ॑ ) (ಅ. 2)

ದೈವೀ॒-ನ್ಧಿಯ॑-ಮ್ಮನಾಮಹೇ ಸುಮೃಡೀ॒ಕಾ-ಮ॒ಭಿಷ್ಟ॑ಯೇ ವರ್ಚೋ॒ಧಾಂ-ಯಁ॒ಜ್ಞವಾ॑ಹಸಗ್ಂ ಸುಪಾ॒ರಾ ನೋ॑ ಅಸ॒-ದ್ವಶೇ᳚ । ಯೇ ದೇ॒ವಾ ಮನೋ॑ಜಾತಾ ಮನೋ॒ಯುಜಃ॑ ಸು॒ದಕ್ಷಾ॒ ದಕ್ಷ॑ಪಿತಾರ॒ಸ್ತೇ ನಃ॑ ಪಾನ್ತು॒ ತೇ ನೋ॑-ಽವನ್ತು॒ ತೇಭ್ಯೋ॒ ನಮ॒ಸ್ತೇಭ್ಯ॒-ಸ್ಸ್ವಾಹಾ-ಽಗ್ನೇ॒ ತ್ವಗ್ಂ ಸು ಜಾ॑ಗೃಹಿ ವ॒ಯಗ್ಂ ಸು ಮ॑ನ್ದಿಷೀಮಹಿ ಗೋಪಾ॒ಯ ನಃ॑ ಸ್ವ॒ಸ್ತಯೇ᳚ ಪ್ರ॒ಬುಧೇ॑ ನಃ॒ ಪುನ॑ರ್ದದಃ । ತ್ವಮ॑ಗ್ನೇ ವ್ರತ॒ಪಾ ಅ॑ಸಿ ದೇ॒ವ ಆ ಮರ್ತ್ಯೇ॒ಷ್ವಾ । ತ್ವಂ- [ತ್ವಮ್, ಯ॒ಜ್ಞೇಷ್ವೀಡ್ಯಃ॑ ।] 6

ಯ॒ಜ್ಞೇಷ್ವೀಡ್ಯಃ॑ ॥ ವಿಶ್ವೇ॑ ದೇ॒ವಾ ಅ॒ಭಿ ಮಾಮಾ-ಽವ॑ವೃತ್ರ-ನ್ಪೂ॒ಷಾ ಸ॒ನ್ಯಾ ಸೋಮೋ॒ ರಾಧ॑ಸಾ ದೇ॒ವ-ಸ್ಸ॑ವಿ॒ತಾ ವಸೋ᳚ರ್ವಸು॒ದಾವಾ॒ ರಾಸ್ವೇಯ॑-ಥ್ಸೋ॒ಮಾ ಽಽಭೂಯೋ॑ ಭರ॒ ಮಾ ಪೃ॒ಣ-ನ್ಪೂ॒ರ್ತ್ಯಾ ವಿ ರಾ॑ಧಿ॒ ಮಾ-ಽಹಮಾಯು॑ಷಾ ಚ॒ನ್ದ್ರಮ॑ಸಿ॒ ಮಮ॒ ಭೋಗಾ॑ಯ ಭವ॒ ವಸ್ತ್ರ॑ಮಸಿ॒ ಮಮ॒ ಭೋಗಾ॑ಯ ಭವೋ॒ಸ್ರಾ-ಽಸಿ॒ ಮಮ॒ ಭೋಗಾ॑ಯ ಭವ॒ ಹಯೋ॑-ಽಸಿ॒ ಮಮ॒ ಭೋಗಾ॑ಯ ಭವ॒- [ಭೋಗಾ॑ಯ ಭವ, ಛಾಗೋ॑-ಽಸಿ॒ ಮಮ॒] 7

ಛಾಗೋ॑-ಽಸಿ॒ ಮಮ॒ ಭೋಗಾ॑ಯ ಭವ ಮೇ॒ಷೋ॑-ಽಸಿ॒ ಮಮ॒ ಭೋಗಾ॑ಯ ಭವ ವಾ॒ಯವೇ᳚ ತ್ವಾ॒ ವರು॑ಣಾಯ ತ್ವಾ॒ ನಿರ್-ಋ॑ತ್ಯೈ ತ್ವಾ ರು॒ದ್ರಾಯ॑ ತ್ವಾ॒ ದೇವೀ॑ರಾಪೋ ಅಪಾ-ನ್ನಪಾ॒ದ್ಯ ಊ॒ರ್ಮಿರ್-ಹ॑ವಿ॒ಷ್ಯ॑ ಇನ್ದ್ರಿ॒ಯಾವಾ᳚-ನ್ಮ॒ದಿನ್ತ॑ಮ॒ಸ್ತಂ-ವೋಁ॒ ಮಾ-ಽವ॑ ಕ್ರಮಿಷ॒ಮಚ್ಛಿ॑ನ್ನ॒-ನ್ತನ್ತು॑-ಮ್ಪೃಥಿ॒ವ್ಯಾ ಅನು॑ ಗೇಷ-ಮ್ಭ॒ದ್ರಾದ॒ಭಿ ಶ್ರೇಯಃ॒ ಪ್ರೇಹಿ॒ ಬೃಹ॒ಸ್ಪತಿಃ॑ ಪುರಏ॒ತಾ ತೇ॑ ಅ॒ಸ್ತ್ವಥೇ॒ಮವ॑ ಸ್ಯ॒ ವರ॒ ಆ ಪೃ॑ಥಿ॒ವ್ಯಾ ಆ॒ರೇ ಶತ್ರೂ᳚ನ್ ಕೃಣುಹಿ॒ ಸರ್ವ॑ವೀರ॒ ಏದಮ॑ಗನ್ಮ ದೇವ॒ಯಜ॑ನ-ಮ್ಪೃಥಿ॒ವ್ಯಾ ವಿಶ್ವೇ॑ ದೇ॒ವಾ ಯದಜು॑ಷನ್ತ॒ ಪೂರ್ವ॑ ಋಖ್ಸಾ॒ಮಾಭ್ಯಾಂ॒-ಯಁಜು॑ಷಾ ಸ॒ನ್ತರ॑ನ್ತೋ ರಾ॒ಯಸ್ಪೋಷೇ॑ಣ॒ ಸಮಿ॒ಷಾ ಮ॑ದೇಮ ॥ 8 ॥

( ಆ ತ್ವಗ್ಂ-ಹಯೋ॑-ಽಸಿ॒ ಮಮ॒ ಭೋಗಾ॑ಯ ಭವ-ಸ್ಯ॒-ಪಞ್ಚ॑ವಿಗ್ಂಶತಿಶ್ಚ ) (ಅ. 3)

ಇ॒ಯ-ನ್ತೇ॑ ಶುಕ್ರ ತ॒ನೂರಿ॒ದಂ-ವಁರ್ಚ॒ಸ್ತಯಾ॒ ಸ-ಮ್ಭ॑ವ॒ ಭ್ರಾಜ॑-ಙ್ಗಚ್ಛ॒ ಜೂರ॑ಸಿ ಧೃ॒ತಾ ಮನ॑ಸಾ॒ ಜುಷ್ಟಾ॒ ವಿಷ್ಣ॑ವೇ॒ ತಸ್ಯಾ᳚ಸ್ತೇ ಸ॒ತ್ಯಸ॑ವಸಃ ಪ್ರಸ॒ವೇ ವಾ॒ಚೋ ಯ॒ನ್ತ್ರಮ॑ಶೀಯ॒ ಸ್ವಾಹಾ॑ ಶು॒ಕ್ರಮ॑ಸ್ಯ॒ಮೃತ॑ಮಸಿ ವೈಶ್ವದೇ॒ವಗ್ಂ ಹ॒ವಿ-ಸ್ಸೂರ್ಯ॑ಸ್ಯ॒ ಚಕ್ಷು॒ರಾ -ಽರು॑ಹಮ॒ಗ್ನೇ ರ॒ಕ್ಷ್ಣಃ ಕ॒ನೀನಿ॑ಕಾಂ॒-ಯಁದೇತ॑ಶೇಭಿ॒ರೀಯ॑ಸೇ॒ ಭ್ರಾಜ॑ಮಾನೋ ವಿಪ॒ಶ್ಚಿತಾ॒ ಚಿದ॑ಸಿ ಮ॒ನಾ-ಽಸಿ॒ ಧೀರ॑ಸಿ॒ ದಕ್ಷಿ॑ಣಾ- [ದಕ್ಷಿ॑ಣಾ, ಅ॒ಸಿ॒ ಯ॒ಜ್ಞಿಯಾ॑-ಽಸಿ] 9

-ಽಸಿ ಯ॒ಜ್ಞಿಯಾ॑-ಽಸಿ ಕ್ಷ॒ತ್ರಿಯಾ॒ ಽಸ್ಯದಿ॑ತಿ-ರಸ್ಯುಭ॒ಯತ॑॑ಶ್ಶೀರ್ಷ್ಣೀ॒ ಸಾ ನ॒-ಸ್ಸುಪ್ರಾ॑ಚೀ॒ ಸುಪ್ರ॑ತೀಚೀ॒ ಸ-ಮ್ಭ॑ವ ಮಿ॒ತ್ರಸ್ತ್ವಾ॑ ಪ॒ದಿ ಬ॑ದ್ಧ್ನಾತು ಪೂ॒ಷಾ-ಽದ್ಧ್ವ॑ನಃ ಪಾ॒ತ್ವಿನ್ದ್ರಾ॒ಯಾ-ದ್ಧ್ಯ॑ಕ್ಷಾ॒ಯಾನು॑ ತ್ವಾ ಮಾ॒ತಾ ಮ॑ನ್ಯತಾ॒ಮನು॑ ಪಿ॒ತಾ-ಽನು॒ ಭ್ರಾತಾ॒ ಸಗ॒ರ್ಭ್ಯೋ-ಽನು॒ ಸಖಾ॒ ಸಯೂ᳚ಥ್ಯ॒-ಸ್ಸಾ ದೇ॑ವಿ ದೇ॒ವಮಚ್ಛೇ॒ಹೀನ್ದ್ರಾ॑ಯ॒ ಸೋಮಗ್ಂ॑ ರು॒ದ್ರಸ್ತ್ವಾ ಽಽವ॑ರ್ತಯತು ಮಿ॒ತ್ರಸ್ಯ॑ ಪ॒ಥಾ ಸ್ವ॒ಸ್ತಿ ಸೋಮ॑ಸಖಾ॒ ಪುನ॒ರೇಹಿ॑ ಸ॒ಹ ರ॒ಯ್ಯಾ ॥ 10 ॥

( ದಕ್ಷಿ॑ಣಾ॒-ಸೋಮ॑ಸಖಾ॒, ಪಞ್ಚ॑ ಚ ) (ಅ. 4)

ವಸ್ವ್ಯ॑ಸಿ ರು॒ದ್ರಾ-ಽಸ್ಯದಿ॑ತಿ-ರಸ್ಯಾದಿ॒ತ್ಯಾ-ಽಸಿ॑ ಶು॒ಕ್ರಾ-ಽಸಿ॑ ಚ॒ನ್ದ್ರಾ-ಽಸಿ॒ ಬೃಹ॒ಸ್ಪತಿ॑ಸ್ತ್ವಾ ಸು॒ಮ್ನೇ ರ॑ಣ್ವತು ರು॒ದ್ರೋ ವಸು॑ಭಿ॒ರಾ ಚಿ॑ಕೇತು ಪೃಥಿ॒ವ್ಯಾಸ್ತ್ವಾ॑ ಮೂ॒ರ್ಧನ್ನಾ ಜಿ॑ಘರ್ಮಿ ದೇವ॒ಯಜ॑ನ॒ ಇಡಾ॑ಯಾಃ ಪ॒ದೇ ಘೃ॒ತವ॑ತಿ॒ ಸ್ವಾಹಾ॒ ಪರಿ॑ಲಿಖಿತ॒ಗ್ಂ॒ ರಕ್ಷಃ॒ ಪರಿ॑ಲಿಖಿತಾ॒ ಅರಾ॑ತಯ ಇ॒ದಮ॒ಹಗ್ಂ ರಕ್ಷ॑ಸೋ ಗ್ರೀ॒ವಾ ಅಪಿ॑ ಕೃನ್ತಾಮಿ॒ ಯೋ᳚-ಽಸ್ಮಾ-ನ್ದ್ವೇಷ್ಟಿ॒ ಯ-ಞ್ಚ॑ ವ॒ಯ-ನ್ದ್ವಿ॒ಷ್ಮ ಇ॒ದಮ॑ಸ್ಯ ಗ್ರೀ॒ವಾ [ಗ್ರೀ॒ವಾಃ, ಅಪಿ॑ ಕೃನ್ತಾಮ್ಯ॒ಸ್ಮೇ] 11

ಅಪಿ॑ ಕೃನ್ತಾಮ್ಯ॒ಸ್ಮೇ ರಾಯ॒ಸ್ತ್ವೇ ರಾಯ॒ಸ್ತೋತೇ॒ ರಾಯ॒-ಸ್ಸ-ನ್ದೇ॑ವಿ ದೇ॒ವ್ಯೋರ್ವಶ್ಯಾ॑ ಪಶ್ಯಸ್ವ॒ ತ್ವಷ್ಟೀ॑ಮತೀ ತೇ ಸಪೇಯ ಸು॒ರೇತಾ॒ ರೇತೋ॒ ದಧಾ॑ನಾ ವೀ॒ರಂ-ವಿಁ॑ದೇಯ॒ ತವ॑ ಸ॒ನ್ದೃಶಿ॒ ಮಾ-ಽಹಗ್ಂರಾ॒ಯಸ್ಪೋಷೇ॑ಣ॒ ವಿ ಯೋ॑ಷಮ್ ॥ 12 ॥

( ಅ॒ಸ್ಯ॒ ಗ್ರೀ॒ವಾ-ಏಕಾ॒ನ್ನ ತ್ರಿ॒ಗ್ಂ॒ಶಚ್ಚ॑ ) (ಅ. 5)

ಅ॒ಗ್ಂ॒ಶುನಾ॑ ತೇ ಅ॒ಗ್ಂ॒ಶುಃ ಪೃ॑ಚ್ಯತಾ॒-ಮ್ಪರು॑ಷಾ॒ ಪರು॑-ರ್ಗ॒ನ್ಧಸ್ತೇ॒ ಕಾಮ॑ಮವತು॒ ಮದಾ॑ಯ॒ ರಸೋ॒ ಅಚ್ಯು॑ತೋ॒ ಽಮಾತ್ಯೋ॑-ಽಸಿ ಶು॒ಕ್ರಸ್ತೇ॒ ಗ್ರಹೋ॒-ಽಭಿ ತ್ಯ-ನ್ದೇ॒ವಗ್ಂ ಸ॑ವಿ॒ತಾರ॑ಮೂ॒ಣ್ಯೋಃ᳚ ಕ॒ವಿಕ್ರ॑ತು॒ಮರ್ಚಾ॑ಮಿ ಸ॒ತ್ಯಸ॑ವಸಗ್ಂ ರತ್ನ॒ಧಾಮ॒ಭಿ ಪ್ರಿ॒ಯ-ಮ್ಮ॒ತಿಮೂ॒ರ್ಧ್ವಾ ಯಸ್ಯಾ॒ಮತಿ॒ರ್ಭಾ ಅದಿ॑ದ್ಯುತ॒-ಥ್ಸವೀ॑ಮನಿ॒ ಹಿರ॑ಣ್ಯಪಾಣಿರಮಿಮೀತ ಸು॒ಕ್ರತುಃ॑ ಕೃ॒ಪಾ ಸುವಃ॑ । ಪ್ರ॒ಜಾಭ್ಯ॑ಸ್ತ್ವಾ ಪ್ರಾ॒ಣಾಯ॑ ತ್ವಾ ವ್ಯಾ॒ನಾಯ॑ ತ್ವಾ ಪ್ರ॒ಜಾಸ್ತ್ವಮನು॒ ಪ್ರಾಣಿ॑ಹಿ ಪ್ರ॒ಜಾಸ್ತ್ವಾಮನು॒ ಪ್ರಾಣ॑ನ್ತು ॥ 13 ॥

(ಅನು॑-ಸ॒ಪ್ತ ಚ॑) (ಅ. 6)

ಸೋಮ॑-ನ್ತೇ ಕ್ರೀಣಾ॒ಮ್ಯೂರ್ಜ॑ಸ್ವನ್ತ॒-ಮ್ಪಯ॑ಸ್ವನ್ತಂ-ವೀಁ॒ರ್ಯಾ॑ವನ್ತಮಭಿ-ಮಾತಿ॒ಷಾಹಗ್ಂ॑ ಶು॒ಕ್ರ-ನ್ತೇ॑ ಶು॒ಕ್ರೇಣ॑ ಕ್ರೀಣಾಮಿ ಚ॒ನ್ದ್ರ-ಞ್ಚ॒ನ್ದ್ರೇಣಾ॒ಮೃತ॑ಮ॒ಮೃತೇ॑ನ ಸ॒ಮ್ಯತ್ತೇ॒ ಗೋರ॒ಸ್ಮೇ ಚ॒ನ್ದ್ರಾಣಿ॒ ತಪ॑ಸಸ್ತ॒ನೂರ॑ಸಿ ಪ್ರ॒ಜಾಪ॑ತೇ॒-ರ್ವರ್ಣ॒ಸ್ತಸ್ಯಾ᳚ಸ್ತೇ ಸಹಸ್ರಪೋ॒ಷ-ಮ್ಪುಷ್ಯ॑ನ್ತ್ಯಾಶ್ಚರ॒ಮೇಣ॑ ಪ॒ಶುನಾ᳚ ಕ್ರೀಣಾಮ್ಯ॒ಸ್ಮೇ ತೇ॒ ಬನ್ಧು॒ರ್ಮಯಿ॑ ತೇ॒ ರಾಯಃ॑ ಶ್ರಯನ್ತಾಮ॒ಸ್ಮೇ ಜ್ಯೋತಿಃ॑ ಸೋಮವಿಕ್ರ॒ಯಿಣಿ॒ ತಮೋ॑ ಮಿ॒ತ್ರೋ ನ॒ ಏಹಿ॒ ಸುಮಿ॑ತ್ರಧಾ॒ ಇನ್ದ್ರ॑ಸ್ಯೋ॒ರು ಮಾ ವಿ॑ಶ॒ ದಕ್ಷಿ॑ಣ-ಮು॒ಶನ್ನು॒ಶನ್ತಗ್ಗ್॑ ಸ್ಯೋ॒ನ-ಸ್ಸ್ಯೋ॒ನಗ್ಗ್ ಸ್ವಾನ॒ ಭ್ರಾಜಾಙ್ಘಾ॑ರೇ॒ ಬಮ್ಭಾ॑ರೇ॒ ಹಸ್ತ॒ ಸುಹ॑ಸ್ತ॒ ಕೃಶಾ॑ನವೇ॒ತೇ ವಃ॑ ಸೋಮ॒ ಕ್ರಯ॑ಣಾ॒ಸ್ತಾ-ನ್ರ॑ಕ್ಷದ್ಧ್ವ॒-ಮ್ಮಾ ವೋ॑ ದಭನ್ನ್ ॥ 14 ॥

(ಉ॒ರುಂ-ದ್ವಾವಿಗ್ಂ॑ಶತಿಶ್ಚ) (ಅ. 7)

ಉದಾಯು॑ಷಾ ಸ್ವಾ॒ಯುಷೋದೋಷ॑ಧೀನಾ॒ಗ್ಂ॒ ರಸೇ॒ನೋ-ತ್ಪ॒ರ್ಜನ್ಯ॑ಸ್ಯ॒ ಶುಷ್ಮೇ॒ಣೋದ॑ಸ್ಥಾಮ॒ಮೃತಾ॒ಗ್ಂ॒ ಅನು॑ । ಉ॒ರ್ವ॑ನ್ತರಿ॑ಕ್ಷ॒ಮನ್ವಿ॒ಹ್ಯದಿ॑ತ್ಯಾ॒-ಸ್ಸದೋ॒-ಽಸ್ಯದಿ॑ತ್ಯಾ॒-ಸ್ಸದ॒ ಆ ಸೀ॒ದಾಸ್ತ॑ಭ್ನಾ॒-ದ್ದ್ಯಾಮೃ॑ಷ॒ಭೋ ಅ॒ನ್ತರಿ॑ಕ್ಷ॒ಮಮಿ॑ಮೀತ ವರಿ॒ಮಾಣ॑-ಮ್ಪೃಥಿ॒ವ್ಯಾ ಆ-ಽಸೀ॑ದ॒-ದ್ವಿಶ್ವಾ॒ ಭುವ॑ನಾನಿ ಸ॒ಮ್ರಾ-ಡ್ವಿಶ್ವೇತ್ತಾನಿ॒ ವರು॑ಣಸ್ಯ ವ್ರ॒ತಾನಿ॒ ವನೇ॑ಷು॒ ವ್ಯ॑ನ್ತರಿ॑ಕ್ಷ-ನ್ತತಾನ॒ ವಾಜ॒ಮರ್ವ॑ಥ್ಸು॒ ಪಯೋ॑ ಅಘ್ನಿ॒ಯಾಸು॑ ಹೃ॒ಥ್ಸು- [ ] ॥ 15 ॥

ಕ್ರತುಂ॒-ವಁರು॑ಣೋ ವಿ॒ಕ್ಷ್ವ॑ಗ್ನಿ-ನ್ದಿ॒ವಿ ಸೂರ್ಯ॑ಮದಧಾ॒-ಥ್ಸೋಮ॒ಮದ್ರಾ॒ವುದು॒ತ್ಯ-ಞ್ಜಾ॒ತವೇ॑ದಸ-ನ್ದೇ॒ವಂ-ವಁ॑ಹನ್ತಿ ಕೇ॒ತವಃ॑ । ದೃ॒ಶೇ ವಿಶ್ವಾ॑ಯ॒ ಸೂರ್ಯ᳚ಮ್ ॥ ಉಸ್ರಾ॒ವೇತ॑-ನ್ಧೂರ್ಷಾಹಾವನ॒ಶ್ರೂ ಅವೀ॑ರಹಣೌ ಬ್ರಹ್ಮ॒ಚೋದ॑ನೌ॒ ವರು॑ಣಸ್ಯ॒ ಸ್ಕಮ್ಭ॑ನಮಸಿ॒ ವರು॑ಣಸ್ಯ ಸ್ಕಮ್ಭ॒ಸರ್ಜ॑ನಮಸಿ॒ ಪ್ರತ್ಯ॑ಸ್ತೋ॒ ವರು॑ಣಸ್ಯ॒ ಪಾಶಃ॑ ॥ 16 ॥

( ಹೃ॒ಥ್ಸು-ಪಞ್ಚ॑ತ್ರಿಗ್ಂಶಚ್ಚ ) (ಅ. 8)

ಪ್ರ ಚ್ಯ॑ವಸ್ವ ಭುವಸ್ಪತೇ॒ ವಿಶ್ವಾ᳚ನ್ಯ॒ಭಿ ಧಾಮಾ॑ನಿ॒ ಮಾ ತ್ವಾ॑ ಪರಿಪ॒ರೀ ವಿ॑ದ॒ನ್ಮಾ ತ್ವಾ॑ ಪರಿಪ॒ನ್ಥಿನೋ॑ ವಿದ॒ನ್ಮಾ ತ್ವಾ॒ ವೃಕಾ॑ ಅಘಾ॒ಯವೋ॒ ಮಾ ಗ॑ನ್ಧ॒ರ್ವೋ ವಿ॒ಶ್ವಾವ॑ಸು॒ರಾ ದ॑ಘಚ್ಛ್ಯೇ॒ನೋ ಭೂ॒ತ್ವಾ ಪರಾ॑ ಪತ॒ ಯಜ॑ಮಾನಸ್ಯ ನೋ ಗೃ॒ಹೇ ದೇ॒ವೈ-ಸ್ಸಗ್ಗ್॑ಸ್ಕೃ॒ತಂ-ಯಁಜ॑ಮಾನಸ್ಯ ಸ್ವ॒ಸ್ತ್ಯಯ॑ನ್ಯ॒ಸ್ಯಪಿ॒ ಪನ್ಥಾ॑ಮಗಸ್ಮಹಿ ಸ್ವಸ್ತಿ॒ಗಾ-ಮ॑ನೇ॒ಹಸಂ॒-ಯೇಁನ॒ ವಿಶ್ವಾಃ॒ ಪರಿ॒ ದ್ವಿಷೋ॑ ವೃ॒ಣಕ್ತಿ॑ ವಿ॒ನ್ದತೇ॒ ವಸು॒ ನಮೋ॑ ಮಿ॒ತ್ರಸ್ಯ॒ ವರು॑ಣಸ್ಯ॒ ಚಕ್ಷ॑ಸೇ ಮ॒ಹೋ ದೇ॒ವಾಯ॒ ತದೃ॒ತಗ್ಂ ಸ॑ಪರ್ಯತ ದೂರೇ॒ದೃಶೇ॑ ದೇ॒ವಜಾ॑ತಾಯ ಕೇ॒ತವೇ॑ ದಿ॒ವಸ್ಪು॒ತ್ರಾಯ॒ ಸೂರ್ಯಾ॑ಯ ಶಗ್ಂಸತ॒ ವರು॑ಣಸ್ಯ॒ ಸ್ಕಮ್ಭ॑ನಮಸಿ॒ ವರು॑ಣಸ್ಯ ಸ್ಕಮ್ಭ॒ಸರ್ಜ॑ನ-ಮ॒ಸ್ಯುನ್ಮು॑ಕ್ತೋ॒ ವರು॑ಣಸ್ಯ॒ ಪಾಶಃ॑ ॥ 17 ॥

( ಮಿ॒ತ್ರಸ್ಯ॒-ತ್ರಯೋ॑ವಿಗ್ಂಶತಿಶ್ಚ ) (ಅ. 9)

ಅ॒ಗ್ನೇ-ರಾ॑ತಿ॒ಥ್ಯಮ॑ಸಿ॒ ವಿಷ್ಣ॑ವೇ ತ್ವಾ॒ ಸೋಮ॑ಸ್ಯಾ-ಽಽತಿ॒ಥ್ಯಮ॑ಸಿ॒ ವಿಷ್ಣ॑ವೇ॒ ತ್ವಾ-ಽತಿ॑ಥೇರಾತಿ॒ಥ್ಯಮ॑ಸಿ॒ ವಿಷ್ಣ॑ವೇ ತ್ವಾ॒-ಽಗ್ನಯೇ᳚ ತ್ವಾ ರಾಯಸ್ಪೋಷ॒ದಾವ್ನ್ನೇ॒ ವಿಷ್ಣ॑ವೇ ತ್ವಾ ಶ್ಯೇ॒ನಾಯ॑ ತ್ವಾ ಸೋಮ॒ಭೃತೇ॒ ವಿಷ್ಣ॑ವೇ ತ್ವಾ॒ ಯಾ ತೇ॒ ಧಾಮಾ॑ನಿ ಹ॒ವಿಷಾ॒ ಯಜ॑ನ್ತಿ॒ ತಾ ತೇ॒ ವಿಶ್ವಾ॑ ಪರಿ॒ಭೂರ॑ಸ್ತು ಯ॒ಜ್ಞ-ಙ್ಗ॑ಯ॒ಸ್ಫಾನಃ॑ ಪ್ರ॒ತರ॑ಣ-ಸ್ಸು॒ವೀರೋ-ಽವೀ॑ರಹಾ॒ ಪ್ರಚ॑ರಾ ಸೋಮ॒ ದುರ್ಯಾ॒ನದಿ॑ತ್ಯಾ॒-ಸ್ಸದೋ॒-ಽಸ್ಯದಿ॑ತ್ಯಾ॒-ಸ್ಸದ॒ ಆ- [ಸದ॒ ಆ, ಸೀ॒ದ॒ ವರು॑ಣೋ-ಽಸಿ] ॥ 18 ॥

ಸೀ॑ದ॒ ವರು॑ಣೋ-ಽಸಿ ಧೃ॒ತವ್ರ॑ತೋ ವಾರು॒ಣಮ॑ಸಿ ಶಂ॒ಯೋಁ-ರ್ದೇ॒ವಾನಾಗ್ಂ॑ ಸ॒ಖ್ಯಾನ್ಮಾ ದೇ॒ವಾನಾ॑-ಮ॒ಪಸ॑-ಶ್ಛಿಥ್ಸ್ಮ॒ಹ್ಯಾಪ॑ತಯೇ ತ್ವಾ ಗೃಹ್ಣಾಮಿ॒ ಪರಿ॑ಪತಯೇ ತ್ವಾ ಗೃಹ್ಣಾಮಿ॒ ತನೂ॒ನಪ್ತ್ರೇ᳚ ತ್ವಾ ಗೃಹ್ಣಾಮಿ ಶಾಕ್ವ॒ರಾಯ॑ ತ್ವಾ ಗೃಹ್ಣಾಮಿ॒ ಶಕ್ಮ॒ನ್ನೋಜಿ॑ಷ್ಠಾಯ ತ್ವಾ ಗೃಹ್ಣಾ॒ಮ್ಯ-ನಾ॑ಧೃಷ್ಟಮಸ್ಯ-ನಾಧೃ॒ಷ್ಯ-ನ್ದೇ॒ವಾನಾ॒ಮೋಜೋ॑- ಽಭಿಷಸ್ತಿ॒ಪಾ ಅ॑ನಭಿಶಸ್ತೇ॒-ಽನ್ಯಮನು॑ ಮೇ ದೀ॒ಕ್ಷಾ-ನ್ದೀ॒ಕ್ಷಾಪ॑ತಿ-ರ್ಮನ್ಯತಾ॒ಮನು॒ ತಪ॒ಸ್ತಪ॑ಸ್ಪತಿ॒ರಞ್ಜ॑ಸಾ ಸ॒ತ್ಯಮುಪ॑ ಗೇಷಗ್ಂ ಸುವಿ॒ತೇ ಮಾ॑ ಧಾಃ ॥ 19 ॥

( ಆ-ಮೈ-ಕ॑-ಞ್ಚ ) (ಅ. 10)

ಅ॒ಗ್ಂ॒ಶುರಗ್ಂ॑ಶುಸ್ತೇ ದೇವ ಸೋ॒ಮಾ-ಽಽಪ್ಯಾ॑ಯತಾ॒-ಮಿನ್ದ್ರಾ॑ಯೈಕಧನ॒ವಿದ॒ ಆ ತುಭ್ಯ॒ಮಿನ್ದ್ರಃ॑ ಪ್ಯಾಯತಾ॒ಮಾ ತ್ವಮಿನ್ದ್ರಾ॑ಯ ಪ್ಯಾಯ॒ಸ್ವಾ-ಽಽಪ್ಯಾ॑ಯಯ॒ ಸಖೀ᳚ನ್-ಥ್ಸ॒ನ್ಯಾ ಮೇ॒ಧಯಾ᳚ ಸ್ವ॒ಸ್ತಿ ತೇ॑ ದೇವ ಸೋಮ ಸು॒ತ್ಯಾಮ॑ಶೀ॒ಯೇಷ್ಟಾ॒ ರಾಯಃ॒ ಪ್ರೇಷೇ ಭಗಾ॑ಯ॒ರ್ತಮೃ॑ತವಾ॒ದಿಭ್ಯೋ॒ ನಮೋ॑ ದಿ॒ವೇ ನಮಃ॑ ಪೃಥಿ॒ವ್ಯಾ ಅಗ್ನೇ᳚ ವ್ರತಪತೇ॒ ತ್ವಂ-ವ್ರಁ॒ತಾನಾಂ᳚-ವ್ರಁ॒ತಪ॑ತಿರಸಿ॒ ಯಾ ಮಮ॑ ತ॒ನೂರೇ॒ಷಾ ಸಾ ತ್ವಯಿ॒ [ತ್ವಯಿ॑, ಯಾ ತವ॑] ॥ 20 ॥

ಯಾ ತವ॑ ತ॒ನೂರಿ॒ಯಗ್ಂ ಸಾ ಮಯಿ॑ ಸ॒ಹ ನೌ᳚ ವ್ರತಪತೇ ವ್ರ॒ತಿನೋ᳚-ರ್ವ್ರ॒ತಾನಿ॒ ಯಾ ತೇ॑ ಅಗ್ನೇ॒ ರುದ್ರಿ॑ಯಾ ತ॒ನೂಸ್ತಯಾ॑ ನಃ ಪಾಹಿ॒ ತಸ್ಯಾ᳚ಸ್ತೇ॒ ಸ್ವಾಹಾ॒ ಯಾ ತೇ॑ ಅಗ್ನೇ-ಽಯಾಶ॒ಯಾ ರ॑ಜಾಶ॒ಯಾ ಹ॑ರಾಶ॒ಯಾ ತ॒ನೂರ್ವರ್ಷಿ॑ಷ್ಠಾ ಗಹ್ವರೇ॒ಷ್ಠೋ-ಽಗ್ರಂ-ವಁಚೋ॒ ಅಪಾ॑ವಧೀ-ನ್ತ್ವೇ॒ಷಂ-ವಁಚೋ॒ ಅಪಾ॑ವಧೀ॒ಗ್॒ ಸ್ವಾಹಾ᳚ ॥ 21 ॥

( ತ್ವಯಿ॑-ಚತ್ವಾರಿ॒ಗ್ಂ॒ಶಚ್ಚ॑ ) (ಅ. 11)

ವಿ॒ತ್ತಾಯ॑ನೀ ಮೇ-ಽಸಿ ತಿ॒ಕ್ತಾಯ॑ನೀ ಮೇ॒-ಽಸ್ಯವ॑ತಾನ್ಮಾ ನಾಥಿ॒ತಮವ॑ತಾನ್ಮಾ ವ್ಯಥಿ॒ತಂ-ವಿಁ॒ದೇರ॒ಗ್ನಿರ್ನಭೋ॒ ನಾಮಾಗ್ನೇ॑ ಅಙ್ಗಿರೋ॒ ಯೋ᳚-ಽಸ್ಯಾ-ಮ್ಪೃ॑ಥಿ॒ವ್ಯಾಮಸ್ಯಾಯು॑ಷಾ॒ ನಾಮ್ನೇಹಿ॒ ಯತ್ತೇ-ಽನಾ॑ಧೃಷ್ಟ॒-ನ್ನಾಮ॑ ಯ॒ಜ್ಞಿಯ॒-ನ್ತೇನ॒ ತ್ವಾ-ಽಽದ॒ಧೇ-ಽಗ್ನೇ॑ ಅಙ್ಗಿರೋ॒ ಯೋ ದ್ವಿ॒ತೀಯ॑ಸ್ಯಾ-ನ್ತೃ॒ತೀಯ॑ಸ್ಯಾ-ಮ್ಪೃಥಿ॒ವ್ಯಾ-ಮಸ್ಯಾಯು॑ಷಾ॒ ನಾಮ್ನೇಹಿ॒ ಯತ್ತೇ-ಽನಾ॑ಧೃಷ್ಟ॒-ನ್ನಾಮ॑- [ ] 22

ಯ॒ಜ್ಞಿಯ॒-ನ್ತೇನ॒ ತ್ವಾ-ಽಽದ॑ಧೇ ಸಿ॒ಗ್ಂ॒ಹೀರ॑ಸಿ ಮಹಿ॒ಷೀರ॑ಸ್ಯು॒ರು ಪ್ರ॑ಥಸ್ವೋ॒ರು ತೇ॑ ಯ॒ಜ್ಞಪ॑ತಿಃ ಪ್ರಥತಾ-ನ್ಧ್ರು॒ವಾ-ಽಸಿ॑ ದೇ॒ವೇಭ್ಯಃ॑ ಶುನ್ಧಸ್ವ ದೇ॒ವೇಭ್ಯಃ॑ ಶುಮ್ಭಸ್ವೇನ್ದ್ರಘೋ॒ಷಸ್ತ್ವಾ॒ ವಸು॑ಭಿಃ ಪು॒ರಸ್ತಾ᳚-ತ್ಪಾತು॒ ಮನೋ॑ಜವಾಸ್ತ್ವಾ ಪಿ॒ತೃಭಿ॑-ರ್ದಕ್ಷಿಣ॒ತಃ ಪಾ॑ತು॒ ಪ್ರಚೇ॑ತಾಸ್ತ್ವಾ ರು॒ದ್ರೈಃ ಪ॒ಶ್ಚಾ-ತ್ಪಾ॑ತು ವಿ॒ಶ್ವಕ॑ರ್ಮಾ ತ್ವಾ-ಽಽದಿ॒ತ್ಯೈರು॑ತ್ತರ॒ತಃ ಪಾ॑ತು ಸಿ॒ಗ್ಂ॒ಹೀರ॑ಸಿ ಸಪತ್ನಸಾ॒ಹೀ ಸ್ವಾಹಾ॑ ಸಿ॒ಗ್ಂ॒ಹೀರ॑ಸಿ ಸುಪ್ರಜಾ॒ವನಿ॒-ಸ್ಸ್ವಾಹಾ॑ ಸಿ॒ಗ್ಂ॒ಹೀ- [ಸಿ॒ಗ್ಂ॒ಹೀಃ, ಅ॒ಸಿ॒ ರಾ॒ಯ॒ಸ್ಪೋ॒ಷ॒ವನಿ॒-ಸ್ಸ್ವಾಹಾ॑] 23

ರ॑ಸಿ ರಾಯಸ್ಪೋಷ॒ವನಿ॒-ಸ್ಸ್ವಾಹಾ॑ ಸಿ॒ಗ್ಂ॒ಹೀರ॑ಸ್ಯಾದಿತ್ಯ॒ವನಿ॒-ಸ್ಸ್ವಾಹಾ॑ ಸಿ॒ಗ್ಂ॒ಹೀರ॒ಸ್ಯಾ ವ॑ಹ ದೇ॒ವಾನ್ದೇ॑ವಯ॒ತೇ ಯಜ॑ಮಾನಾಯ॒ ಸ್ವಾಹಾ॑ ಭೂ॒ತೇಭ್ಯ॑ಸ್ತ್ವಾ ವಿ॒ಶ್ವಾಯು॑ರಸಿ ಪೃಥಿ॒ವೀ-ನ್ದೃಗ್ಂ॑ಹ ಧ್ರುವ॒ಕ್ಷಿದ॑ಸ್ಯ॒ನ್ತರಿ॑ಕ್ಷ-ನ್ದೃಗ್ಂಹಾಚ್ಯುತ॒ಕ್ಷಿದ॑ಸಿ॒ ದಿವ॑-ನ್ದೃಗ್ಂಹಾ॒ಗ್ನೇ-ರ್ಭಸ್ಮಾ᳚ಸ್ಯ॒ಗ್ನೇಃ ಪುರೀ॑ಷಮಸಿ ॥ 24 ॥

(ನಾಮ॑-ಸುಪ್ರಜಾ॒ವನಿ॒-ಸ್ಸ್ವಾಹಾ॑ ಸಿ॒ಗ್ಂ॒ಸೀಃ; ಪಞ್ಚ॑ತ್ರಿಗ್ಂಶಚ್ಚ ) (ಅ. 12)

ಯು॒ಞ್ಜತೇ॒ ಮನ॑ ಉ॒ತ ಯು॑ಞ್ಜತೇ॒ ಧಿಯೋ॒ ವಿಪ್ರಾ॒ ವಿಪ್ರ॑ಸ್ಯ ಬೃಹ॒ತೋ ವಿ॑ಪ॒ಶ್ಚಿತಃ॑ । ವಿ ಹೋತ್ರಾ॑ ದಧೇ ವಯುನಾ॒ವಿದೇಕ॒ ಇನ್ಮ॒ಹೀ ದೇ॒ವಸ್ಯ॑ ಸವಿ॒ತುಃ ಪರಿ॑ಷ್ಟುತಿಃ ॥ ಸು॒ವಾಗ್ದೇ॑ವ॒ ದುರ್ಯಾ॒ಗ್ಂ॒ ಆ ವ॑ದ ದೇವ॒ಶ್ರುತೌ॑ ದೇ॒ವೇಷ್ವಾ ಘೋ॑ಷೇಥಾ॒ಮಾ ನೋ॑ ವೀ॒ರೋ ಜಾ॑ಯತಾ-ಙ್ಕರ್ಮ॒ಣ್ಯೋ॑ ಯಗ್ಂ ಸರ್ವೇ॑-ಽನು॒ ಜೀವಾ॑ಮ॒ ಯೋ ಬ॑ಹೂ॒ನಾಮಸ॑ದ್ವ॒ಶೀ ॥ ಇ॒ದಂ-ವಿಁಷ್ಣು॒-ರ್ವಿಚ॑ಕ್ರಮೇ ತ್ರೇ॒ಧಾ ನಿ ದ॑ಧೇ ಪ॒ದಮ್ ॥ ಸಮೂ॑ಢಮಸ್ಯ [ಸಮೂ॑ಢಮಸ್ಯ, ಪಾ॒ಗ್ಂ॒ಸು॒ರ] 25

ಪಾಗ್ಂಸು॒ರ ಇರಾ॑ವತೀ ಧೇನು॒ಮತೀ॒ ಹಿ ಭೂ॒ತಗ್ಂ ಸೂ॑ಯವ॒ಸಿನೀ॒ ಮನ॑ವೇ ಯಶ॒ಸ್ಯೇ᳚ । ವ್ಯ॑ಸ್ಕಭ್ನಾ॒-ದ್ರೋದ॑ಸೀ॒ ವಿಷ್ಣು॑ರೇ॒ತೇ ದಾ॒ಧಾರ॑ ಪೃಥಿ॒ವೀಮ॒ಭಿತೋ॑ ಮ॒ಯೂಖೈಃ᳚ ॥ ಪ್ರಾಚೀ॒ ಪ್ರೇತ॑ಮದ್ಧ್ವ॒ರ-ಙ್ಕ॒ಲ್ಪಯ॑ನ್ತೀ ಊ॒ರ್ಧ್ವಂ-ಯಁ॒ಜ್ಞ-ನ್ನ॑ಯತ॒-ಮ್ಮಾ ಜೀ᳚ಹ್ವರತ॒ಮತ್ರ॑ ರಮೇಥಾಂ॒-ವಁರ್ಷ್ಮ॑-ನ್ಪೃಥಿ॒ವ್ಯಾ ದಿ॒ವೋ ವಾ॑ ವಿಷ್ಣವು॒ತ ವಾ॑ ಪೃಥಿ॒ವ್ಯಾ ಮ॒ಹೋ ವಾ॑ ವಿಷ್ಣವು॒ತ ವಾ॒-ಽನ್ತರಿ॑ಕ್ಷಾ॒ದ್ಧಸ್ತೌ॑ ಪೃಣಸ್ವ ಬ॒ಹುಭಿ॑-ರ್ವಸ॒ವ್ಯೈ॑ರಾ ಪ್ರ ಯ॑ಚ್ಛ॒ [ಪ್ರ ಯ॑ಚ್ಛ, ದಕ್ಷಿ॑ಣಾ॒ದೋತ] 26

ದಕ್ಷಿ॑ಣಾ॒ದೋತ ಸ॒ವ್ಯಾತ್ । ವಿಷ್ಣೋ॒ರ್ನುಕಂ॑-ವೀಁ॒ರ್ಯಾ॑ಣಿ॒ ಪ್ರ ವೋ॑ಚಂ॒-ಯಃ ಁಪಾರ್ಥಿ॑ವಾನಿ ವಿಮ॒ಮೇ ರಜಾಗ್ಂ॑ಸಿ॒ ಯೋ ಅಸ್ಕ॑ಭಾಯ॒ದುತ್ತ॑ರಗ್ಂ ಸ॒ಧಸ್ಥಂ॑-ವಿಁಚಕ್ರಮಾ॒ಣ ಸ್ತ್ರೇ॒ಧೋರು॑ಗಾ॒ಯೋ ವಿಷ್ಣೋ॑ ರ॒ರಾಟ॑ಮಸಿ॒ ವಿಷ್ಣೋಃ᳚ ಪೃ॒ಷ್ಠಮ॑ಸಿ॒ ವಿಷ್ಣೋ॒-ಶ್ಶ್ಞಪ್ತ್ರೇ᳚ ಸ್ಥೋ॒ ವಿಷ್ಣೋ॒-ಸ್ಸ್ಯೂರ॑ಸಿ॒ ವಿಷ್ಣೋ᳚-ರ್ಧ್ರು॒ವಮ॑ಸಿ ವೈಷ್ಣ॒ವಮ॑ಸಿ॒ ವಿಷ್ಣ॑ವೇ ತ್ವಾ ॥ 27 ॥

( ಅ॒ಸ್ಯ॒-ಯ॒ಚ್ಛೈಕಾ॒ನ್ನ ಚ॑ತ್ವಾರಿ॒ಗ್ಂ॒ಶಚ್ಚ॑ ) (ಅ. 13)

ಕೃ॒ಣು॒ಷ್ವ ಪಾಜಃ॒ ಪ್ರಸಿ॑ತಿ॒ನ್ನ ಪೃ॒ಥ್ವೀಂ-ಯಾಁ॒ಹಿ ರಾಜೇ॒ವಾಮ॑ವಾ॒ಗ್ಂ॒ ಇಭೇ॑ನ । ತೃ॒ಷ್ವೀಮನು॒ ಪ್ರಸಿ॑ತಿಂ-ದ್ರೂಣಾ॒ನೋ-ಽಸ್ತಾ॑-ಽಸಿ॒ ವಿದ್ಧ್ಯ॑ ರ॒ಕ್ಷಸ॒ ಸ್ತಪಿ॑ಷ್ಠೈಃ ॥ ತವ॑ ಭ್ರ॒ಮಾಸ॑ ಆಶು॒ಯಾ ಪ॑ನ್ತ॒ತ್ಯನು॑ ಸ್ಪೃಶ-ಧೃಷ॒ತಾ ಶೋಶು॑ಚಾನಃ । ತಪೂಗ್॑ಷ್ಯಗ್ನೇ ಜು॒ಹ್ವಾ॑ ಪತ॒ಙ್ಗಾನಸ॑ನ್ದಿತೋ॒ ವಿಸೃ॑ಜ॒ ವಿಷ್ವ॑ಗು॒ಲ್ಕಾಃ ॥ ಪ್ರತಿ॒ಸ್ಪಶೋ॒ ವಿಸೃ॑ಜ॒-ತೂರ್ಣಿ॑ತಮೋ॒ ಭವಾ॑ ಪಾ॒ಯುರ್ವಿ॒ಶೋ ಅ॒ಸ್ಯಾ ಅದ॑ಬ್ಧಃ । ಯೋ ನೋ॑ ದೂ॒ರೇ ಅ॒ಘಶಗ್ಂ॑ಸೋ॒ [ಅ॒ಘಶಗ್ಂ॑ಸಃ, ಯೋ ಅನ್ತ್ಯಗ್ನೇ॒] 28

ಯೋ ಅನ್ತ್ಯಗ್ನೇ॒ ಮಾಕಿ॑ಷ್ಟೇ॒ ವ್ಯಥಿ॒ರಾ ದ॑ಧರ್ಷೀತ್ ॥ ಉದ॑ಗ್ನೇ ತಿಷ್ಠ॒ ಪ್ರತ್ಯಾ ಽಽತ॑ನುಷ್ವ॒ ನ್ಯ॑ಮಿತ್ರಾಗ್ಂ॑ ಓಷತಾ-ತ್ತಿಗ್ಮಹೇತೇ । ಯೋ ನೋ॒ ಅರಾ॑ತಿಗ್ಂ ಸಮಿಧಾನ ಚ॒ಕ್ರೇ ನೀ॒ಚಾ ತ-ನ್ಧ॑ಕ್ಷ್ಯತ॒ಸ-ನ್ನ ಶುಷ್ಕ᳚ಮ್ ॥ ಊ॒ರ್ಧ್ವೋ ಭ॑ವ॒ ಪ್ರತಿ॑ವಿ॒ದ್ಧ್ಯಾ-ಽದ್ಧ್ಯ॒ಸ್ಮದಾ॒ವಿಷ್ಕೃ॑ಣುಷ್ವ॒ ದೈವ್ಯಾ᳚ನ್ಯಗ್ನೇ । ಅವ॑ಸ್ಥಿ॒ರಾ ತ॑ನುಹಿ ಯಾತು॒ಜೂನಾ᳚-ಞ್ಜಾ॒ಮಿಮಜಾ॑ಮಿಂ॒ ಪ್ರಮೃ॑ಣೀಹಿ॒ ಶತ್ರೂನ್॑ ॥ ಸ ತೇ॑ [ಸ ತೇ᳚, ಜಾ॒ನಾ॒ತಿ॒ ಸು॒ಮ॒ತಿಂ] 29

ಜಾನಾತಿ ಸುಮ॒ತಿಂ-ಯಁ॑ವಿಷ್ಠ॒ಯ ಈವ॑ತೇ॒ ಬ್ರಹ್ಮ॑ಣೇ ಗಾ॒ತುಮೈರ॑ತ್ । ವಿಶ್ವಾ᳚ನ್ಯಸ್ಮೈ ಸು॒ದಿನಾ॑ನಿ ರಾ॒ಯೋ ದ್ಯು॒ಮ್ನಾನ್ಯ॒ರ್ಯೋ ವಿದುರೋ॑ ಅ॒ಭಿ ದ್ಯೌ᳚ತ್ ॥ ಸೇದ॑ಗ್ನೇ ಅಸ್ತು ಸು॒ಭಗಃ॑ ಸು॒ದಾನು॒-ರ್ಯಸ್ತ್ವಾ॒ ನಿತ್ಯೇ॑ನ ಹ॒ವಿಷಾ॒ಯ ಉ॒ಕ್ಥೈಃ । ಪಿಪ್ರೀ॑ಷತಿ॒ ಸ್ವ ಆಯು॑ಷಿ ದುರೋ॒ಣೇ ವಿಶ್ವೇದ॑ಸ್ಮೈ ಸು॒ದಿನಾ॒ ಸಾ-ಽಸ॑ದಿ॒ಷ್ಟಿಃ ॥ ಅರ್ಚಾ॑ಮಿ ತೇ ಸುಮ॒ತಿ-ಙ್ಘೋಷ್ಯ॒ರ್ವಾಖ್-ಸನ್ತೇ॑ ವಾ॒ ವಾ ತಾ॑ ಜರತಾ- [ವಾ॒ ವಾ ತಾ॑ ಜರತಾಮ್, ಇ॒ಯಙ್ಗೀಃ] 30

ಮಿ॒ಯಙ್ಗೀಃ । ಸ್ವಶ್ವಾ᳚ಸ್ತ್ವಾ ಸು॒ರಥಾ॑ ಮರ್ಜಯೇಮಾ॒ಸ್ಮೇ ಕ್ಷ॒ತ್ರಾಣಿ॑ ಧಾರಯೇ॒ರನು॒ ದ್ಯೂನ್ ॥ ಇ॒ಹ ತ್ವಾ॒ ಭೂರ್ಯಾ ಚ॑ರೇ॒ ದುಪ॒ತ್ಮ-ನ್ದೋಷಾ॑ವಸ್ತ-ರ್ದೀದಿ॒ವಾಗ್ಂಸ॒ಮನು॒ ದ್ಯೂನ್ । ಕ್ರೀಡ॑ನ್ತಸ್ತ್ವಾ ಸು॒ಮನ॑ಸ-ಸ್ಸಪೇಮಾ॒ಭಿ ದ್ಯು॒ಮ್ನಾ ತ॑ಸ್ಥಿ॒ವಾಗ್ಂಸೋ॒ ಜನಾ॑ನಾಮ್ ॥ ಯಸ್ತ್ವಾ॒-ಸ್ವಶ್ವಃ॑ ಸುಹಿರ॒ಣ್ಯೋ ಅ॑ಗ್ನ ಉಪ॒ಯಾತಿ॒ ವಸು॑ಮತಾ॒ ರಥೇ॑ನ । ತಸ್ಯ॑ ತ್ರಾ॒ತಾ-ಭ॑ವಸಿ॒ ತಸ್ಯ॒ ಸಖಾ॒ ಯಸ್ತ॑ ಆತಿ॒ಥ್ಯಮಾ॑ನು॒ಷಗ್ ಜುಜೋ॑ಷತ್ ॥ ಮ॒ಹೋ ರು॑ಜಾಮಿ - [ ] 31

ಬ॒ನ್ಧುತಾ॒ ವಚೋ॑ಭಿ॒ಸ್ತನ್ಮಾ॑ ಪಿ॒ತುರ್ಗೋತ॑ಮಾ॒ದ-ನ್ವಿ॑ಯಾಯ । ತ್ವನ್ನೋ॑ ಅ॒ಸ್ಯ ವಚ॑ಸ-ಶ್ಚಿಕಿದ್ಧಿ॒ ಹೋತ॑ರ್ಯವಿಷ್ಠ ಸುಕ್ರತೋ॒ ದಮೂ॑ನಾಃ ॥ ಅಸ್ವ॑ಪ್ನಜ ಸ್ತ॒ರಣ॑ಯ-ಸ್ಸು॒ಶೇವಾ॒ ಅತ॑ನ್ದ್ರಾಸೋ-ಽವೃ॒ಕಾ ಅಶ್ರ॑ಮಿಷ್ಠಾಃ । ತೇ ಪಾ॒ಯವಃ॑ ಸ॒ದ್ಧ್ರಿಯ॑ಞ್ಚೋ ನಿ॒ಷದ್ಯಾ-ಽಗ್ನೇ॒ ತವ॑ನಃ ಪಾನ್ತ್ವಮೂರ ॥ ಯೇ ಪಾ॒ಯವೋ॑ ಮಾಮತೇ॒ಯ-ನ್ತೇ॑ ಅಗ್ನೇ॒ ಪಶ್ಯ॑ನ್ತೋ ಅ॒ನ್ಧ-ನ್ದು॑ರಿ॒ತಾದರ॑ಕ್ಷನ್ನ್ । ರ॒ರಕ್ಷ॒ತಾನ್-ಥ್ಸು॒ಕೃತೋ॑ ವಿ॒ಶ್ವವೇ॑ದಾ॒ ದಿಫ್ಸ॑ನ್ತ॒ ಇದ್ರಿ॒ಪವೋ॒ ನಾ ಹ॑ [ನಾ ಹ॑, ದೇ॒ಭುಃ॒] 32

ದೇಭುಃ ॥ ತ್ವಯಾ॑ ವ॒ಯಗ್ಂ ಸ॑ಧ॒ನ್ಯ॑-ಸ್ತ್ವೋತಾ॒-ಸ್ತವ॒ ಪ್ರಣೀ᳚ತ್ಯಶ್ಯಾಮ॒ ವಾಜಾನ್॑ । ಉ॒ಭಾ ಶಗ್ಂಸಾ॑ ಸೂದಯ ಸತ್ಯತಾತೇ-ಽನುಷ್ಠು॒ಯಾ ಕೃ॑ಣುಹ್ಯಹ್ರಯಾಣ ॥ ಅ॒ಯಾ ತೇ॑ ಅಗ್ನೇ ಸ॒ಮಿಧಾ॑ ವಿಧೇಮ॒ ಪ್ರತಿ॒ಸ್ತೋಮಗ್ಂ॑ ಶ॒ಸ್ಯಮಾ॑ನ-ಙ್ಗೃಭಾಯ । ದಹಾ॒ಶಸೋ॑ ರ॒ಕ್ಷಸಃ॑ ಪಾ॒ಹ್ಯ॑ಸ್ಮಾ-ನ್ದ್ರು॒ಹೋ ನಿ॒ದೋ ಮಿ॑ತ್ರಮಹೋ ಅವ॒ದ್ಯಾತ್ ॥ ರ॒ಕ್ಷೋ॒ಹಣಂ॑ ಁವಾ॒ಜಿನ॒ಮಾಜಿ॑ಘರ್ಮಿ ಮಿ॒ತ್ರ-ಮ್ಪ್ರಥಿ॑ಷ್ಠ॒-ಮುಪ॑ಯಾಮಿ॒ ಶರ್ಮ॑ । ಶಿಶಾ॑ನೋ ಅ॒ಗ್ನಿಃ ಕ್ರತು॑ಭಿ॒-ಸ್ಸಮಿ॑ದ್ಧ॒ಸ್ಸನೋ॒ ದಿವಾ॒ [ದಿವಾ᳚, ಸರಿ॒ಷಃ ಪಾ॑ತು॒ ನಕ್ತಂ᳚] 33

ಸರಿ॒ಷಃ ಪಾ॑ತು॒ ನಕ್ತ᳚ಮ್ ॥ ವಿಜ್ಯೋತಿ॑ಷಾ ಬೃಹ॒ತಾ ಭಾ᳚ತ್ಯ॒ಗ್ನಿ-ರಾ॒ವಿ-ರ್ವಿಶ್ವಾ॑ನಿ ಕೃಣುತೇ ಮಹಿ॒ತ್ವಾ । ಪ್ರಾದೇ॑ವೀ-ರ್ಮಾ॒ಯಾ-ಸ್ಸ॑ಹತೇ-ದು॒ರೇವಾ॒-ಶ್ಶಿಶೀ॑ತೇ॒ ಶೃಙ್ಗೇ॒ ರಕ್ಷ॑ಸೇ ವಿ॒ನಿಕ್ಷೇ᳚ ॥ ಉ॒ತ ಸ್ವಾ॒ನಾಸೋ॑ ದಿ॒ವಿಷ॑ನ್ತ್ವ॒ಗ್ನೇ ಸ್ತಿ॒ಗ್ಮಾಯು॑ಧಾ॒ ರಕ್ಷ॑ಸೇ॒ ಹನ್ತ॒ವಾ ಉ॑ । ಮದೇ॑ ಚಿದಸ್ಯ॒ ಪ್ರರು॑ಜನ್ತಿ॒ ಭಾಮಾ॒ ನ ವ॑ರನ್ತೇ ಪರಿ॒ಬಾಧೋ॒ ಅದೇ॑ವೀಃ ॥ 34 ॥

(ಅ॒ಘಶಗ್ಂ॑ಸಃ॒-ಸ ತೇ॑-ಜರತಾಗ್ಂ-ರುಜಾಮಿ-ಹ॒ -ದಿವೈ - ಕ॑ಚತ್ವಾರಿಗ್ಂಶಚ್ಚ) (ಅ. 14)

(ಆಪ॑ ಉನ್ದ॒, ನ್ತ್ವಾಕೂ᳚ತ್ಯೈ॒, ದೈವೀ॑, ಮಿ॒ಯನ್ತೇ॒, ವಸ್ವ್ಯ॑ಸ್ಯ॒ಗ್ಂ॒ ಶುನಾ॑ ತೇ॒, ಸೋಮ॑ನ್ತ॒, ಉದಾಯು॑ಷಾ॒, ಪ್ರ ಚ್ಯ॑ವಸ್ವಾ॒, ಽಗ್ನೇ ರಾ॑ತಿ॒ಥ್ಯ, -ಮ॒ಗ್ಂ॒ಶುರಗ್ಂ॑ ಶು, ರ್ವಿ॒ತ್ತಾಯ॑ನೀ ಮೇ-ಽಸಿ, ಯು॒ಞ್ಚತೇ॑, ಕೃಣು॒ಷ್ವ ಪಾಜ॒, ಶ್ಚತು॑ರ್ದಶ ।)

(ಆಪೋ॒-ವಸ್ವ್ಯ॑ಸಿ॒ ಯಾ ತವೇ॒-ಯಙ್ಗೀ-ಶ್ಚತು॑ಸ್ತ್ರಿಗ್ಂಶತ್ ।)

(ಆಪ॑ ಉನ್ದ॒ನ್, ತ್ವದೇ॑ವೀಃ)

॥ ಹರಿಃ॑ ಓಮ್ ॥

॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾ-ಮ್ಪ್ರಥಮಕಾಣ್ಡೇ ದ್ವಿತೀಯಃ ಪ್ರಶ್ನ-ಸ್ಸಮಾಪ್ತಃ ॥

Roman (IAST) Transliteration

kṛṣṇa yajurvedīya taittirīya saṃhitāyā-mprathamakāṇḍe dvitīyaḥ praśnaḥ - agniṣṭome krayaḥ

o-nnamaḥ paramātmane, śrī mahāgaṇapataye namaḥ,

śrī gurubhyo namaḥ | ha॒riḥ॒ om ||

āpa̭ undantu jī॒vasḙ dīrghāyu॒tvāya॒ varca̭sa॒ oṣa̭dhe॒ trāya̭svaina॒gg॒ svadhi̭te॒ mainagṃ̭ higṃsī-rdeva॒śrūre॒tāni॒ pra va̭pe sva॒styutta̭rāṇyaśī॒yāpo̭ a॒smā-nmā॒taraḥ̭ śundhantu ghṛ॒tena̭ no ghṛta॒puvaḥ̭ punantu॒ viśva̭ma॒sma-tpra va̭hantu ri॒pramudā᳚bhya॒-śśuci॒rā pū॒ta ḙmi॒ soma̭sya ta॒nūra̭si ta॒nuva̭-mme pāhi mahī॒nā-mpayo̭-'si varco॒dhā a̭si॒ varco॒- [varcaḥ̭, mayi̭ dhehi vṛ॒trasya̭] 1

mayi̭ dhehi vṛ॒trasya̭ ka॒nīni̭kā-'si cakṣu॒ṣpā a̭si॒ cakṣṷrme pāhi ci॒tpati̭stvā punātu vā॒kpati̭stvā punātu de॒vastvā̭ savi॒tā pṷnā॒tvacchi̭dreṇa pa॒vitrḙṇa॒ vaso॒-ssūrya̭sya ra॒śmibhi॒stasya̭ te pavitrapate pa॒vitrḙṇa॒ yasmai॒ ka-mpu॒ne taccha̭keya॒mā vo̭ devāsa īmahe॒ satya̭dharmāṇo addhva॒re yadvo̭ devāsa āgu॒re yajñi̭yāso॒ havā̭maha॒ indrā᳚gnī॒ dyāvā̭pṛthivī॒ āpa̭ oṣadhī॒ stva-ndī॒kṣāṇā॒-madhi̭patirasī॒ha mā॒ santa̭-mpāhi || 2 ||

(varca̭ - oṣadhī- ra॒ṣṭau ca̭ ) (a. 1)

ākū᳚tyai pra॒yuje॒-'gnaye॒ svāhā̭ me॒dhāyai॒ mana̭se॒ 'gnaye॒ svāhā̭ dī॒kṣāyai॒ tapa̭se॒-'gnaye॒ svāhā॒ sara̭svatyai pū॒ṣṇe᳚-'gnaye॒ svāhā-''po̭ devī-rbṛhatī-rviśvaśambhuvo॒ dyāvā̭pṛthi॒vī u॒rva̭ntari̭kṣa॒-mbṛha॒spati̭rno ha॒viṣā̭ vṛdhātu॒ svāhā॒ viśvḙ de॒vasya̭ ne॒turmarto̭ vṛṇīta sa॒khyaṃ-vi~śvḙ rā॒ya i̭ṣuddhyasi dyu॒mnaṃ-vṛ~̭ṇīta pu॒ṣyase॒ svāha̭rkhsā॒mayo॒-śśilpe᳚ stha॒ste vā॒mā ra̭bhe॒ te mā̭- [te mā᳚, pā॒ta॒mā-'sya] 3

pāta॒mā-'sya ya॒jñasyo॒dṛca̭ i॒mā-ndhiya॒gṃ॒ śikṣa̭māṇasya deva॒ kratu॒-ndakṣaṃ̭-va~ruṇa॒ sagṃ śi̭śādhi॒ yayā-'ti॒ viśvā̭ duri॒tā tarḙma su॒tarmā̭ṇa॒madhi॒ nāvagṃ̭ ruhe॒morga̭syāṅgira॒syūrṇa̭mradā॒ ūrja̭-mme yaccha pā॒hi mā॒ mā mā̭ higṃsī॒-rviṣṇo॒-śśarmā̭si॒ śarma॒ yaja̭mānasya॒ śarma̭ me yaccha॒ nakṣa̭trāṇā-mmā-'tīkā॒śā-tpā॒hīndra̭sya॒ yoni̭rasi॒- [yoni̭rasi, mā mā̭ higṃsīḥ] 4

mā mā̭ higṃsīḥ kṛ॒ṣyai tvā̭ susa॒syāyai̭ supippa॒lābhya॒-stvauṣa̭dhībhya-ssūpa॒sthā de॒vo vana॒spati̭rū॒rdhvo mā̭ pā॒hyodṛca॒-ssvāhā̭ ya॒jña-mmana̭sā॒ svāhā॒ dyāvā̭pṛthi॒vībhyā॒g॒ svāho॒ro-ra॒ntari̭kṣā॒-thsvāhā̭ ya॒jñaṃ-vā~tā॒dā ra̭bhe || 5 ||

( mā॒ - yoni̭rasi - tri॒gṃ॒śacca̭ ) (a. 2)

daivī॒-ndhiya̭-mmanāmahe sumṛḍī॒kā-ma॒bhiṣṭa̭ye varco॒dhāṃ-ya~॒jñavā̭hasagṃ supā॒rā no̭ asa॒-dvaśe᳚ | ye de॒vā mano̭jātā mano॒yujaḥ̭ su॒dakṣā॒ dakṣa̭pitāra॒ste naḥ̭ pāntu॒ te no̭-'vantu॒ tebhyo॒ nama॒stebhya॒-ssvāhā-'gne॒ tvagṃ su jā̭gṛhi va॒yagṃ su ma̭ndiṣīmahi gopā॒ya naḥ̭ sva॒staye᳚ pra॒budhḙ naḥ॒ puna̭rdadaḥ | tvama̭gne vrata॒pā a̭si de॒va ā martye॒ṣvā | tvaṃ- [tvam, ya॒jñeṣvīḍyaḥ̭ |] 6

ya॒jñeṣvīḍyaḥ̭ || viśvḙ de॒vā a॒bhi māmā-'va̭vṛtra-npū॒ṣā sa॒nyā somo॒ rādha̭sā de॒va-ssa̭vi॒tā vaso᳚rvasu॒dāvā॒ rāsveya̭-thso॒mā ''bhūyo̭ bhara॒ mā pṛ॒ṇa-npū॒rtyā vi rā̭dhi॒ mā-'hamāyṷṣā ca॒ndrama̭si॒ mama॒ bhogā̭ya bhava॒ vastra̭masi॒ mama॒ bhogā̭ya bhavo॒srā-'si॒ mama॒ bhogā̭ya bhava॒ hayo̭-'si॒ mama॒ bhogā̭ya bhava॒- [bhogā̭ya bhava, chāgo̭-'si॒ mama॒] 7

chāgo̭-'si॒ mama॒ bhogā̭ya bhava me॒ṣo̭-'si॒ mama॒ bhogā̭ya bhava vā॒yave᳚ tvā॒ varṷṇāya tvā॒ nir-ṛ̭tyai tvā ru॒drāya̭ tvā॒ devī̭rāpo apā-nnapā॒dya ū॒rmir-ha̭vi॒ṣya̭ indri॒yāvā᳚-nma॒dinta̭ma॒staṃ-vo~॒ mā-'va̭ kramiṣa॒macchi̭nna॒-ntantṷ-mpṛthi॒vyā anṷ geṣa-mbha॒drāda॒bhi śreyaḥ॒ prehi॒ bṛha॒spatiḥ̭ purae॒tā tḙ a॒stvathe॒mava̭ sya॒ vara॒ ā pṛ̭thi॒vyā ā॒re śatrū᳚n kṛṇuhi॒ sarva̭vīra॒ edama̭ganma deva॒yaja̭na-mpṛthi॒vyā viśvḙ de॒vā yadajṷṣanta॒ pūrva̭ ṛkhsā॒mābhyāṃ॒-ya~jṷṣā sa॒ntara̭nto rā॒yaspoṣḙṇa॒ sami॒ṣā ma̭dema || 8 ||

( ā tvagṃ-hayo̭-'si॒ mama॒ bhogā̭ya bhava-sya॒-pañca̭vigṃśatiśca ) (a. 3)

i॒ya-ntḙ śukra ta॒nūri॒daṃ-va~rca॒stayā॒ sa-mbha̭va॒ bhrāja̭-ṅgaccha॒ jūra̭si dhṛ॒tā mana̭sā॒ juṣṭā॒ viṣṇa̭ve॒ tasyā᳚ste sa॒tyasa̭vasaḥ prasa॒ve vā॒co ya॒ntrama̭śīya॒ svāhā̭ śu॒krama̭sya॒mṛta̭masi vaiśvade॒vagṃ ha॒vi-ssūrya̭sya॒ cakṣu॒rā -'rṷhama॒gne ra॒kṣṇaḥ ka॒nīni̭kāṃ॒-ya~deta̭śebhi॒rīya̭se॒ bhrāja̭māno vipa॒ścitā॒ cida̭si ma॒nā-'si॒ dhīra̭si॒ dakṣi̭ṇā- [dakṣi̭ṇā, a॒si॒ ya॒jñiyā̭-'si] 9

-'si ya॒jñiyā̭-'si kṣa॒triyā॒ 'syadi̭ti-rasyubha॒yata̭̭śśīrṣṇī॒ sā na॒-ssuprā̭cī॒ supra̭tīcī॒ sa-mbha̭va mi॒trastvā̭ pa॒di ba̭ddhnātu pū॒ṣā-'ddhva̭naḥ pā॒tvindrā॒yā-ddhya̭kṣā॒yānṷ tvā mā॒tā ma̭nyatā॒manṷ pi॒tā-'nu॒ bhrātā॒ saga॒rbhyo-'nu॒ sakhā॒ sayū᳚thya॒-ssā dḙvi de॒vamacche॒hīndrā̭ya॒ somagṃ̭ ru॒drastvā ''va̭rtayatu mi॒trasya̭ pa॒thā sva॒sti soma̭sakhā॒ puna॒rehi̭ sa॒ha ra॒yyā || 10 ||

( dakṣi̭ṇā॒-soma̭sakhā॒, pañca̭ ca ) (a. 4)

vasvya̭si ru॒drā-'syadi̭ti-rasyādi॒tyā-'si̭ śu॒krā-'si̭ ca॒ndrā-'si॒ bṛha॒spati̭stvā su॒mne ra̭ṇvatu ru॒dro vasṷbhi॒rā ci̭ketu pṛthi॒vyāstvā̭ mū॒rdhannā ji̭gharmi deva॒yaja̭na॒ iḍā̭yāḥ pa॒de ghṛ॒tava̭ti॒ svāhā॒ pari̭likhita॒gṃ॒ rakṣaḥ॒ pari̭likhitā॒ arā̭taya i॒dama॒hagṃ rakṣa̭so grī॒vā api̭ kṛntāmi॒ yo᳚-'smā-ndveṣṭi॒ ya-ñca̭ va॒ya-ndvi॒ṣma i॒dama̭sya grī॒vā [grī॒vāḥ, api̭ kṛntāmya॒sme] 11

api̭ kṛntāmya॒sme rāya॒stve rāya॒stote॒ rāya॒-ssa-ndḙvi de॒vyorvaśyā̭ paśyasva॒ tvaṣṭī̭matī te sapeya su॒retā॒ reto॒ dadhā̭nā vī॒raṃ-vi~̭deya॒ tava̭ sa॒ndṛśi॒ mā-'hagṃrā॒yaspoṣḙṇa॒ vi yo̭ṣam || 12 ||

( a॒sya॒ grī॒vā-ekā॒nna tri॒gṃ॒śacca̭ ) (a. 5)

a॒gṃ॒śunā̭ te a॒gṃ॒śuḥ pṛ̭cyatā॒-mparṷṣā॒ parṷ-rga॒ndhaste॒ kāma̭mavatu॒ madā̭ya॒ raso॒ acyṷto॒ 'mātyo̭-'si śu॒kraste॒ graho॒-'bhi tya-nde॒vagṃ sa̭vi॒tāra̭mū॒ṇyoḥ᳚ ka॒vikra̭tu॒marcā̭mi sa॒tyasa̭vasagṃ ratna॒dhāma॒bhi pri॒ya-mma॒timū॒rdhvā yasyā॒mati॒rbhā adi̭dyuta॒-thsavī̭mani॒ hira̭ṇyapāṇiramimīta su॒kratuḥ̭ kṛ॒pā suvaḥ̭ | pra॒jābhya̭stvā prā॒ṇāya̭ tvā vyā॒nāya̭ tvā pra॒jāstvamanu॒ prāṇi̭hi pra॒jāstvāmanu॒ prāṇa̭ntu || 13 ||

(anṷ-sa॒pta ca̭) (a. 6)

soma̭-nte krīṇā॒myūrja̭svanta॒-mpaya̭svantaṃ-vī~॒ryā̭vantamabhi-māti॒ṣāhagṃ̭ śu॒kra-ntḙ śu॒kreṇa̭ krīṇāmi ca॒ndra-ñca॒ndreṇā॒mṛta̭ma॒mṛtḙna sa॒myatte॒ gora॒sme ca॒ndrāṇi॒ tapa̭sasta॒nūra̭si pra॒jāpa̭te॒-rvarṇa॒stasyā᳚ste sahasrapo॒ṣa-mpuṣya̭ntyāścara॒meṇa̭ pa॒śunā᳚ krīṇāmya॒sme te॒ bandhu॒rmayi̭ te॒ rāyaḥ̭ śrayantāma॒sme jyotiḥ̭ somavikra॒yiṇi॒ tamo̭ mi॒tro na॒ ehi॒ sumi̭tradhā॒ indra̭syo॒ru mā vi̭śa॒ dakṣi̭ṇa-mu॒śannu॒śantagg̭ syo॒na-ssyo॒nagg svāna॒ bhrājāṅghā̭re॒ bambhā̭re॒ hasta॒ suha̭sta॒ kṛśā̭nave॒te vaḥ̭ soma॒ kraya̭ṇā॒stā-nra̭kṣaddhva॒-mmā vo̭ dabhann || 14 ||

(u॒ruṃ-dvāvigṃ̭śatiśca) (a. 7)

udāyṷṣā svā॒yuṣodoṣa̭dhīnā॒gṃ॒ rase॒no-tpa॒rjanya̭sya॒ śuṣme॒ṇoda̭sthāma॒mṛtā॒gṃ॒ anṷ | u॒rva̭ntari̭kṣa॒manvi॒hyadi̭tyā॒-ssado॒-'syadi̭tyā॒-ssada॒ ā sī॒dāsta̭bhnā॒-ddyāmṛ̭ṣa॒bho a॒ntari̭kṣa॒mami̭mīta vari॒māṇa̭-mpṛthi॒vyā ā-'sī̭da॒-dviśvā॒ bhuva̭nāni sa॒mrā-ḍviśvettāni॒ varṷṇasya vra॒tāni॒ vanḙṣu॒ vya̭ntari̭kṣa-ntatāna॒ vāja॒marva̭thsu॒ payo̭ aghni॒yāsṷ hṛ॒thsu- [ ] || 15 ||

kratuṃ॒-va~rṷṇo vi॒kṣva̭gni-ndi॒vi sūrya̭madadhā॒-thsoma॒madrā॒vudu॒tya-ñjā॒tavḙdasa-nde॒vaṃ-va~̭hanti ke॒tavaḥ̭ | dṛ॒śe viśvā̭ya॒ sūrya᳚m || usrā॒veta̭-ndhūrṣāhāvana॒śrū avī̭rahaṇau brahma॒coda̭nau॒ varṷṇasya॒ skambha̭namasi॒ varṷṇasya skambha॒sarja̭namasi॒ pratya̭sto॒ varṷṇasya॒ pāśaḥ̭ || 16 ||

( hṛ॒thsu-pañca̭trigṃśacca ) (a. 8)

pra cya̭vasva bhuvaspate॒ viśvā᳚nya॒bhi dhāmā̭ni॒ mā tvā̭ paripa॒rī vi̭da॒nmā tvā̭ paripa॒nthino̭ vida॒nmā tvā॒ vṛkā̭ aghā॒yavo॒ mā ga̭ndha॒rvo vi॒śvāva̭su॒rā da̭ghacchye॒no bhū॒tvā parā̭ pata॒ yaja̭mānasya no gṛ॒he de॒vai-ssagg̭skṛ॒taṃ-ya~ja̭mānasya sva॒styaya̭nya॒syapi॒ panthā̭magasmahi svasti॒gā-ma̭ne॒hasaṃ॒-ye~na॒ viśvāḥ॒ pari॒ dviṣo̭ vṛ॒ṇakti̭ vi॒ndate॒ vasu॒ namo̭ mi॒trasya॒ varṷṇasya॒ cakṣa̭se ma॒ho de॒vāya॒ tadṛ॒tagṃ sa̭paryata dūre॒dṛśḙ de॒vajā̭tāya ke॒tavḙ di॒vaspu॒trāya॒ sūryā̭ya śagṃsata॒ varṷṇasya॒ skambha̭namasi॒ varṷṇasya skambha॒sarja̭na-ma॒syunmṷkto॒ varṷṇasya॒ pāśaḥ̭ || 17 ||

( mi॒trasya॒-trayo̭vigṃśatiśca ) (a. 9)

a॒gne-rā̭ti॒thyama̭si॒ viṣṇa̭ve tvā॒ soma̭syā-''ti॒thyama̭si॒ viṣṇa̭ve॒ tvā-'ti̭therāti॒thyama̭si॒ viṣṇa̭ve tvā॒-'gnaye᳚ tvā rāyaspoṣa॒dāvnne॒ viṣṇa̭ve tvā śye॒nāya̭ tvā soma॒bhṛte॒ viṣṇa̭ve tvā॒ yā te॒ dhāmā̭ni ha॒viṣā॒ yaja̭nti॒ tā te॒ viśvā̭ pari॒bhūra̭stu ya॒jña-ṅga̭ya॒sphānaḥ̭ pra॒tara̭ṇa-ssu॒vīro-'vī̭rahā॒ praca̭rā soma॒ duryā॒nadi̭tyā॒-ssado॒-'syadi̭tyā॒-ssada॒ ā- [sada॒ ā, sī॒da॒ varṷṇo-'si] || 18 ||

sī̭da॒ varṷṇo-'si dhṛ॒tavra̭to vāru॒ṇama̭si śaṃ॒yo~-rde॒vānāgṃ̭ sa॒khyānmā de॒vānā̭-ma॒pasa̭-śchithsma॒hyāpa̭taye tvā gṛhṇāmi॒ pari̭pataye tvā gṛhṇāmi॒ tanū॒naptre᳚ tvā gṛhṇāmi śākva॒rāya̭ tvā gṛhṇāmi॒ śakma॒nnoji̭ṣṭhāya tvā gṛhṇā॒mya-nā̭dhṛṣṭamasya-nādhṛ॒ṣya-nde॒vānā॒mojo̭- 'bhiṣasti॒pā a̭nabhiśaste॒-'nyamanṷ me dī॒kṣā-ndī॒kṣāpa̭ti-rmanyatā॒manu॒ tapa॒stapa̭spati॒rañja̭sā sa॒tyamupa̭ geṣagṃ suvi॒te mā̭ dhāḥ || 19 ||

( ā-mai-ka̭-ñca ) (a. 10)

a॒gṃ॒śuragṃ̭śuste deva so॒mā-''pyā̭yatā॒-mindrā̭yaikadhana॒vida॒ ā tubhya॒mindraḥ̭ pyāyatā॒mā tvamindrā̭ya pyāya॒svā-''pyā̭yaya॒ sakhī᳚n-thsa॒nyā me॒dhayā᳚ sva॒sti tḙ deva soma su॒tyāma̭śī॒yeṣṭā॒ rāyaḥ॒ preṣe bhagā̭ya॒rtamṛ̭tavā॒dibhyo॒ namo̭ di॒ve namaḥ̭ pṛthi॒vyā agne᳚ vratapate॒ tvaṃ-vra~॒tānāṃ᳚-vra~॒tapa̭tirasi॒ yā mama̭ ta॒nūre॒ṣā sā tvayi॒ [tvayi̭, yā tava̭] || 20 ||

yā tava̭ ta॒nūri॒yagṃ sā mayi̭ sa॒ha nau᳚ vratapate vra॒tino᳚-rvra॒tāni॒ yā tḙ agne॒ rudri̭yā ta॒nūstayā̭ naḥ pāhi॒ tasyā᳚ste॒ svāhā॒ yā tḙ agne-'yāśa॒yā ra̭jāśa॒yā ha̭rāśa॒yā ta॒nūrvarṣi̭ṣṭhā gahvare॒ṣṭho-'graṃ-va~co॒ apā̭vadhī-ntve॒ṣaṃ-va~co॒ apā̭vadhī॒g॒ svāhā᳚ || 21 ||

( tvayi̭-catvāri॒gṃ॒śacca̭ ) (a. 11)

vi॒ttāya̭nī me-'si ti॒ktāya̭nī me॒-'syava̭tānmā nāthi॒tamava̭tānmā vyathi॒taṃ-vi~॒dera॒gnirnabho॒ nāmāgnḙ aṅgiro॒ yo᳚-'syā-mpṛ̭thi॒vyāmasyāyṷṣā॒ nāmnehi॒ yatte-'nā̭dhṛṣṭa॒-nnāma̭ ya॒jñiya॒-ntena॒ tvā-''da॒dhe-'gnḙ aṅgiro॒ yo dvi॒tīya̭syā-ntṛ॒tīya̭syā-mpṛthi॒vyā-masyāyṷṣā॒ nāmnehi॒ yatte-'nā̭dhṛṣṭa॒-nnāma̭- [ ] 22

ya॒jñiya॒-ntena॒ tvā-''da̭dhe si॒gṃ॒hīra̭si mahi॒ṣīra̭syu॒ru pra̭thasvo॒ru tḙ ya॒jñapa̭tiḥ prathatā-ndhru॒vā-'si̭ de॒vebhyaḥ̭ śundhasva de॒vebhyaḥ̭ śumbhasvendragho॒ṣastvā॒ vasṷbhiḥ pu॒rastā᳚-tpātu॒ mano̭javāstvā pi॒tṛbhi̭-rdakṣiṇa॒taḥ pā̭tu॒ pracḙtāstvā ru॒draiḥ pa॒ścā-tpā̭tu vi॒śvaka̭rmā tvā-''di॒tyairṷttara॒taḥ pā̭tu si॒gṃ॒hīra̭si sapatnasā॒hī svāhā̭ si॒gṃ॒hīra̭si suprajā॒vani॒-ssvāhā̭ si॒gṃ॒hī- [si॒gṃ॒hīḥ, a॒si॒ rā॒ya॒spo॒ṣa॒vani॒-ssvāhā̭] 23

ra̭si rāyaspoṣa॒vani॒-ssvāhā̭ si॒gṃ॒hīra̭syāditya॒vani॒-ssvāhā̭ si॒gṃ॒hīra॒syā va̭ha de॒vāndḙvaya॒te yaja̭mānāya॒ svāhā̭ bhū॒tebhya̭stvā vi॒śvāyṷrasi pṛthi॒vī-ndṛgṃ̭ha dhruva॒kṣida̭sya॒ntari̭kṣa-ndṛgṃhācyuta॒kṣida̭si॒ diva̭-ndṛgṃhā॒gne-rbhasmā᳚sya॒gneḥ purī̭ṣamasi || 24 ||

(nāma̭-suprajā॒vani॒-ssvāhā̭ si॒gṃ॒sīḥ; pañca̭trigṃśacca ) (a. 12)

yu॒ñjate॒ mana̭ u॒ta yṷñjate॒ dhiyo॒ viprā॒ vipra̭sya bṛha॒to vi̭pa॒ścitaḥ̭ | vi hotrā̭ dadhe vayunā॒videka॒ inma॒hī de॒vasya̭ savi॒tuḥ pari̭ṣṭutiḥ || su॒vāgdḙva॒ duryā॒gṃ॒ ā va̭da deva॒śrutaṷ de॒veṣvā gho̭ṣethā॒mā no̭ vī॒ro jā̭yatā-ṅkarma॒ṇyo̭ yagṃ sarvḙ-'nu॒ jīvā̭ma॒ yo ba̭hū॒nāmasa̭dva॒śī || i॒daṃ-vi~ṣṇu॒-rvica̭krame tre॒dhā ni da̭dhe pa॒dam || samṷ̄ḍhamasya [samṷ̄ḍhamasya, pā॒gṃ॒su॒ra] 25

pāgṃsu॒ra irā̭vatī dhenu॒matī॒ hi bhū॒tagṃ sṷ̄yava॒sinī॒ mana̭ve yaśa॒sye᳚ | vya̭skabhnā॒-droda̭sī॒ viṣṇṷre॒te dā॒dhāra̭ pṛthi॒vīma॒bhito̭ ma॒yūkhaiḥ᳚ || prācī॒ preta̭maddhva॒ra-ṅka॒lpaya̭ntī ū॒rdhvaṃ-ya~॒jña-nna̭yata॒-mmā jī᳚hvarata॒matra̭ ramethāṃ॒-va~rṣma̭-npṛthi॒vyā di॒vo vā̭ viṣṇavu॒ta vā̭ pṛthi॒vyā ma॒ho vā̭ viṣṇavu॒ta vā॒-'ntari̭kṣā॒ddhastaṷ pṛṇasva ba॒hubhi̭-rvasa॒vyai̭rā pra ya̭ccha॒ [pra ya̭ccha, dakṣi̭ṇā॒dota] 26

dakṣi̭ṇā॒dota sa॒vyāt | viṣṇo॒rnukaṃ̭-vī~॒ryā̭ṇi॒ pra vo̭caṃ॒-yaḥ ~pārthi̭vāni vima॒me rajāgṃ̭si॒ yo aska̭bhāya॒dutta̭ragṃ sa॒dhasthaṃ̭-vi~cakramā॒ṇa stre॒dhorṷgā॒yo viṣṇo̭ ra॒rāṭa̭masi॒ viṣṇoḥ᳚ pṛ॒ṣṭhama̭si॒ viṣṇo॒-śśñaptre᳚ stho॒ viṣṇo॒-ssyūra̭si॒ viṣṇo᳚-rdhru॒vama̭si vaiṣṇa॒vama̭si॒ viṣṇa̭ve tvā || 27 ||

( a॒sya॒-ya॒cchaikā॒nna ca̭tvāri॒gṃ॒śacca̭ ) (a. 13)

kṛ॒ṇu॒ṣva pājaḥ॒ prasi̭ti॒nna pṛ॒thvīṃ-yā~॒hi rāje॒vāma̭vā॒gṃ॒ ibhḙna | tṛ॒ṣvīmanu॒ prasi̭tiṃ-drūṇā॒no-'stā̭-'si॒ viddhya̭ ra॒kṣasa॒ stapi̭ṣṭhaiḥ || tava̭ bhra॒māsa̭ āśu॒yā pa̭nta॒tyanṷ spṛśa-dhṛṣa॒tā śośṷcānaḥ | tapūg̭ṣyagne ju॒hvā̭ pata॒ṅgānasa̭ndito॒ visṛ̭ja॒ viṣva̭gu॒lkāḥ || prati॒spaśo॒ visṛ̭ja॒-tūrṇi̭tamo॒ bhavā̭ pā॒yurvi॒śo a॒syā ada̭bdhaḥ | yo no̭ dū॒re a॒ghaśagṃ̭so॒ [a॒ghaśagṃ̭saḥ, yo antyagne॒] 28

yo antyagne॒ māki̭ṣṭe॒ vyathi॒rā da̭dharṣīt || uda̭gne tiṣṭha॒ pratyā ''ta̭nuṣva॒ nya̭mitrāgṃ̭ oṣatā-ttigmahete | yo no॒ arā̭tigṃ samidhāna ca॒kre nī॒cā ta-ndha̭kṣyata॒sa-nna śuṣka᳚m || ū॒rdhvo bha̭va॒ prati̭vi॒ddhyā-'ddhya॒smadā॒viṣkṛ̭ṇuṣva॒ daivyā᳚nyagne | ava̭sthi॒rā ta̭nuhi yātu॒jūnā᳚-ñjā॒mimajā̭miṃ॒ pramṛ̭ṇīhi॒ śatrūṋ || sa tḙ [sa te᳚, jā॒nā॒ti॒ su॒ma॒tiṃ] 29

jānāti suma॒tiṃ-ya~̭viṣṭha॒ya īva̭te॒ brahma̭ṇe gā॒tumaira̭t | viśvā᳚nyasmai su॒dinā̭ni rā॒yo dyu॒mnānya॒ryo viduro̭ a॒bhi dyau᳚t || seda̭gne astu su॒bhagaḥ̭ su॒dānu॒-ryastvā॒ nityḙna ha॒viṣā॒ya u॒kthaiḥ | piprī̭ṣati॒ sva āyṷṣi duro॒ṇe viśveda̭smai su॒dinā॒ sā-'sa̭di॒ṣṭiḥ || arcā̭mi te suma॒ti-ṅghoṣya॒rvākh-santḙ vā॒ vā tā̭ jaratā- [vā॒ vā tā̭ jaratām, i॒yaṅgīḥ] 30

mi॒yaṅgīḥ | svaśvā᳚stvā su॒rathā̭ marjayemā॒sme kṣa॒trāṇi̭ dhāraye॒ranu॒ dyūn || i॒ha tvā॒ bhūryā ca̭re॒ dupa॒tma-ndoṣā̭vasta-rdīdi॒vāgṃsa॒manu॒ dyūn | krīḍa̭ntastvā su॒mana̭sa-ssapemā॒bhi dyu॒mnā ta̭sthi॒vāgṃso॒ janā̭nām || yastvā॒-svaśvaḥ̭ suhira॒ṇyo a̭gna upa॒yāti॒ vasṷmatā॒ rathḙna | tasya̭ trā॒tā-bha̭vasi॒ tasya॒ sakhā॒ yasta̭ āti॒thyamā̭nu॒ṣag jujo̭ṣat || ma॒ho rṷjāmi - [ ] 31

ba॒ndhutā॒ vaco̭bhi॒stanmā̭ pi॒turgota̭mā॒da-nvi̭yāya | tvanno̭ a॒sya vaca̭sa-ścikiddhi॒ hota̭ryaviṣṭha sukrato॒ damṷ̄nāḥ || asva̭pnaja sta॒raṇa̭ya-ssu॒śevā॒ ata̭ndrāso-'vṛ॒kā aśra̭miṣṭhāḥ | te pā॒yavaḥ̭ sa॒ddhriya̭ñco ni॒ṣadyā-'gne॒ tava̭naḥ pāntvamūra || ye pā॒yavo̭ māmate॒ya-ntḙ agne॒ paśya̭nto a॒ndha-ndṷri॒tādara̭kṣann | ra॒rakṣa॒tān-thsu॒kṛto̭ vi॒śvavḙdā॒ diphsa̭nta॒ idri॒pavo॒ nā ha̭ [nā ha̭, de॒bhuḥ॒] 32

debhuḥ || tvayā̭ va॒yagṃ sa̭dha॒nya̭-stvotā॒-stava॒ praṇī᳚tyaśyāma॒ vājāṋ | u॒bhā śagṃsā̭ sūdaya satyatāte-'nuṣṭhu॒yā kṛ̭ṇuhyahrayāṇa || a॒yā tḙ agne sa॒midhā̭ vidhema॒ prati॒stomagṃ̭ śa॒syamā̭na-ṅgṛbhāya | dahā॒śaso̭ ra॒kṣasaḥ̭ pā॒hya̭smā-ndru॒ho ni॒do mi̭tramaho ava॒dyāt || ra॒kṣo॒haṇaṃ̭ ~vā॒jina॒māji̭gharmi mi॒tra-mprathi̭ṣṭha॒-mupa̭yāmi॒ śarma̭ | śiśā̭no a॒gniḥ kratṷbhi॒-ssami̭ddha॒ssano॒ divā॒ [divā᳚, sari॒ṣaḥ pā̭tu॒ naktaṃ᳚] 33

sari॒ṣaḥ pā̭tu॒ nakta᳚m || vijyoti̭ṣā bṛha॒tā bhā᳚tya॒gni-rā॒vi-rviśvā̭ni kṛṇute mahi॒tvā | prādḙvī-rmā॒yā-ssa̭hate-du॒revā॒-śśiśī̭te॒ śṛṅge॒ rakṣa̭se vi॒nikṣe᳚ || u॒ta svā॒nāso̭ di॒viṣa̭ntva॒gne sti॒gmāyṷdhā॒ rakṣa̭se॒ hanta॒vā ṷ | madḙ cidasya॒ prarṷjanti॒ bhāmā॒ na va̭rante pari॒bādho॒ adḙvīḥ || 34 ||

(a॒ghaśagṃ̭saḥ॒-sa tḙ-jaratāgṃ-rujāmi-ha॒ -divai - ka̭catvārigṃśacca) (a. 14)

(āpa̭ unda॒, ntvākū᳚tyai॒, daivī̭, mi॒yante॒, vasvya̭sya॒gṃ॒ śunā̭ te॒, soma̭nta॒, udāyṷṣā॒, pra cya̭vasvā॒, 'gne rā̭ti॒thya, -ma॒gṃ॒śuragṃ̭ śu, rvi॒ttāya̭nī me-'si, yu॒ñcatḙ, kṛṇu॒ṣva pāja॒, ścatṷrdaśa |)

(āpo॒-vasvya̭si॒ yā tave॒-yaṅgī-ścatṷstrigṃśat |)

(āpa̭ unda॒n, tvadḙvīḥ)

|| hariḥ̭ om ||

|| kṛṣṇa yajurvedīya taittirīya saṃhitāyā-mprathamakāṇḍe dvitīyaḥ praśna-ssamāptaḥ ||

Sanskrit — Devanagari (original)

कृष्ण यजुर्वेदीय तैत्तिरीय संहिताया-म्प्रथमकाण्डे द्वितीयः प्रश्नः - अग्निष्टोमे क्रयः

ओ-न्नमः परमात्मने, श्री महागणपतये नमः,

श्री गुरुभ्यो नमः । ह॒रिः॒ ओम् ॥

आप॑ उन्दन्तु जी॒वसे॑ दीर्घायु॒त्वाय॒ वर्च॑स॒ ओष॑धे॒ त्राय॑स्वैन॒ग्ग्॒ स्वधि॑ते॒ मैनग्ं॑ हिग्ंसी-र्देव॒श्रूरे॒तानि॒ प्र व॑पे स्व॒स्त्युत्त॑राण्यशी॒यापो॑ अ॒स्मा-न्मा॒तरः॑ शुन्धन्तु घृ॒तेन॑ नो घृत॒पुवः॑ पुनन्तु॒ विश्व॑म॒स्म-त्प्र व॑हन्तु रि॒प्रमुदा᳚भ्य॒-श्शुचि॒रा पू॒त ए॑मि॒ सोम॑स्य त॒नूर॑सि त॒नुव॑-म्मे पाहि मही॒ना-म्पयो॑-ऽसि वर्चो॒धा अ॑सि॒ वर्चो॒- [वर्चः॑, मयि॑ धेहि वृ॒त्रस्य॑] 1

मयि॑ धेहि वृ॒त्रस्य॑ क॒नीनि॑का-ऽसि चक्षु॒ष्पा अ॑सि॒ चक्षु॑र्मे पाहि चि॒त्पति॑स्त्वा पुनातु वा॒क्पति॑स्त्वा पुनातु दे॒वस्त्वा॑ सवि॒ता पु॑ना॒त्वच्छि॑द्रेण प॒वित्रे॑ण॒ वसो॒-स्सूर्य॑स्य र॒श्मिभि॒स्तस्य॑ ते पवित्रपते प॒वित्रे॑ण॒ यस्मै॒ क-म्पु॒ने तच्छ॑केय॒मा वो॑ देवास ईमहे॒ सत्य॑धर्माणो अद्ध्व॒रे यद्वो॑ देवास आगु॒रे यज्ञि॑यासो॒ हवा॑मह॒ इन्द्रा᳚ग्नी॒ द्यावा॑पृथिवी॒ आप॑ ओषधी॒ स्त्व-न्दी॒क्षाणा॒-मधि॑पतिरसी॒ह मा॒ सन्त॑-म्पाहि ॥ 2 ॥

(वर्च॑ - ओषधी- र॒ष्टौ च॑ ) (अ. 1)

आकू᳚त्यै प्र॒युजे॒-ऽग्नये॒ स्वाहा॑ मे॒धायै॒ मन॑से॒ ऽग्नये॒ स्वाहा॑ दी॒क्षायै॒ तप॑से॒-ऽग्नये॒ स्वाहा॒ सर॑स्वत्यै पू॒ष्णे᳚-ऽग्नये॒ स्वाहा-ऽऽपो॑ देवी-र्बृहती-र्विश्वशम्भुवो॒ द्यावा॑पृथि॒वी उ॒र्व॑न्तरि॑क्ष॒-म्बृह॒स्पति॑र्नो ह॒विषा॑ वृधातु॒ स्वाहा॒ विश्वे॑ दे॒वस्य॑ ने॒तुर्मर्तो॑ वृणीत स॒ख्यं-विँश्वे॑ रा॒य इ॑षुद्ध्यसि द्यु॒म्नं-वृँ॑णीत पु॒ष्यसे॒ स्वाह॑र्ख्सा॒मयो॒-श्शिल्पे᳚ स्थ॒स्ते वा॒मा र॑भे॒ ते मा॑- [ते मा᳚, पा॒त॒मा-ऽस्य] 3

पात॒मा-ऽस्य य॒ज्ञस्यो॒दृच॑ इ॒मा-न्धिय॒ग्ं॒ शिक्ष॑माणस्य देव॒ क्रतु॒-न्दक्षं॑-वँरुण॒ सग्ं शि॑शाधि॒ यया-ऽति॒ विश्वा॑ दुरि॒ता तरे॑म सु॒तर्मा॑ण॒मधि॒ नावग्ं॑ रुहे॒मोर्ग॑स्याङ्गिर॒स्यूर्ण॑म्रदा॒ ऊर्ज॑-म्मे यच्छ पा॒हि मा॒ मा मा॑ हिग्ंसी॒-र्विष्णो॒-श्शर्मा॑सि॒ शर्म॒ यज॑मानस्य॒ शर्म॑ मे यच्छ॒ नक्ष॑त्राणा-म्मा-ऽतीका॒शा-त्पा॒हीन्द्र॑स्य॒ योनि॑रसि॒- [योनि॑रसि, मा मा॑ हिग्ंसीः] 4

मा मा॑ हिग्ंसीः कृ॒ष्यै त्वा॑ सुस॒स्यायै॑ सुपिप्प॒लाभ्य॒-स्त्वौष॑धीभ्य-स्सूप॒स्था दे॒वो वन॒स्पति॑रू॒र्ध्वो मा॑ पा॒ह्योदृच॒-स्स्वाहा॑ य॒ज्ञ-म्मन॑सा॒ स्वाहा॒ द्यावा॑पृथि॒वीभ्या॒ग्॒ स्वाहो॒रो-र॒न्तरि॑क्षा॒-थ्स्वाहा॑ य॒ज्ञं-वाँता॒दा र॑भे ॥ 5 ॥

( मा॒ - योनि॑रसि - त्रि॒ग्ं॒शच्च॑ ) (अ. 2)

दैवी॒-न्धिय॑-म्मनामहे सुमृडी॒का-म॒भिष्ट॑ये वर्चो॒धां-यँ॒ज्ञवा॑हसग्ं सुपा॒रा नो॑ अस॒-द्वशे᳚ । ये दे॒वा मनो॑जाता मनो॒युजः॑ सु॒दक्षा॒ दक्ष॑पितार॒स्ते नः॑ पान्तु॒ ते नो॑-ऽवन्तु॒ तेभ्यो॒ नम॒स्तेभ्य॒-स्स्वाहा-ऽग्ने॒ त्वग्ं सु जा॑गृहि व॒यग्ं सु म॑न्दिषीमहि गोपा॒य नः॑ स्व॒स्तये᳚ प्र॒बुधे॑ नः॒ पुन॑र्ददः । त्वम॑ग्ने व्रत॒पा अ॑सि दे॒व आ मर्त्ये॒ष्वा । त्वं- [त्वम्, य॒ज्ञेष्वीड्यः॑ ।] 6

य॒ज्ञेष्वीड्यः॑ ॥ विश्वे॑ दे॒वा अ॒भि मामा-ऽव॑वृत्र-न्पू॒षा स॒न्या सोमो॒ राध॑सा दे॒व-स्स॑वि॒ता वसो᳚र्वसु॒दावा॒ रास्वेय॑-थ्सो॒मा ऽऽभूयो॑ भर॒ मा पृ॒ण-न्पू॒र्त्या वि रा॑धि॒ मा-ऽहमायु॑षा च॒न्द्रम॑सि॒ मम॒ भोगा॑य भव॒ वस्त्र॑मसि॒ मम॒ भोगा॑य भवो॒स्रा-ऽसि॒ मम॒ भोगा॑य भव॒ हयो॑-ऽसि॒ मम॒ भोगा॑य भव॒- [भोगा॑य भव, छागो॑-ऽसि॒ मम॒] 7

छागो॑-ऽसि॒ मम॒ भोगा॑य भव मे॒षो॑-ऽसि॒ मम॒ भोगा॑य भव वा॒यवे᳚ त्वा॒ वरु॑णाय त्वा॒ निर्-ऋ॑त्यै त्वा रु॒द्राय॑ त्वा॒ देवी॑रापो अपा-न्नपा॒द्य ऊ॒र्मिर्-ह॑वि॒ष्य॑ इन्द्रि॒यावा᳚-न्म॒दिन्त॑म॒स्तं-वोँ॒ मा-ऽव॑ क्रमिष॒मच्छि॑न्न॒-न्तन्तु॑-म्पृथि॒व्या अनु॑ गेष-म्भ॒द्राद॒भि श्रेयः॒ प्रेहि॒ बृह॒स्पतिः॑ पुरए॒ता ते॑ अ॒स्त्वथे॒मव॑ स्य॒ वर॒ आ पृ॑थि॒व्या आ॒रे शत्रू᳚न् कृणुहि॒ सर्व॑वीर॒ एदम॑गन्म देव॒यज॑न-म्पृथि॒व्या विश्वे॑ दे॒वा यदजु॑षन्त॒ पूर्व॑ ऋख्सा॒माभ्यां॒-यँजु॑षा स॒न्तर॑न्तो रा॒यस्पोषे॑ण॒ समि॒षा म॑देम ॥ 8 ॥

( आ त्वग्ं-हयो॑-ऽसि॒ मम॒ भोगा॑य भव-स्य॒-पञ्च॑विग्ंशतिश्च ) (अ. 3)

इ॒य-न्ते॑ शुक्र त॒नूरि॒दं-वँर्च॒स्तया॒ स-म्भ॑व॒ भ्राज॑-ङ्गच्छ॒ जूर॑सि धृ॒ता मन॑सा॒ जुष्टा॒ विष्ण॑वे॒ तस्या᳚स्ते स॒त्यस॑वसः प्रस॒वे वा॒चो य॒न्त्रम॑शीय॒ स्वाहा॑ शु॒क्रम॑स्य॒मृत॑मसि वैश्वदे॒वग्ं ह॒वि-स्सूर्य॑स्य॒ चक्षु॒रा -ऽरु॑हम॒ग्ने र॒क्ष्णः क॒नीनि॑कां॒-यँदेत॑शेभि॒रीय॑से॒ भ्राज॑मानो विप॒श्चिता॒ चिद॑सि म॒ना-ऽसि॒ धीर॑सि॒ दक्षि॑णा- [दक्षि॑णा, अ॒सि॒ य॒ज्ञिया॑-ऽसि] 9

-ऽसि य॒ज्ञिया॑-ऽसि क्ष॒त्रिया॒ ऽस्यदि॑ति-रस्युभ॒यत॑॑श्शीर्ष्णी॒ सा न॒-स्सुप्रा॑ची॒ सुप्र॑तीची॒ स-म्भ॑व मि॒त्रस्त्वा॑ प॒दि ब॑द्ध्नातु पू॒षा-ऽद्ध्व॑नः पा॒त्विन्द्रा॒या-द्ध्य॑क्षा॒यानु॑ त्वा मा॒ता म॑न्यता॒मनु॑ पि॒ता-ऽनु॒ भ्राता॒ सग॒र्भ्यो-ऽनु॒ सखा॒ सयू᳚थ्य॒-स्सा दे॑वि दे॒वमच्छे॒हीन्द्रा॑य॒ सोमग्ं॑ रु॒द्रस्त्वा ऽऽव॑र्तयतु मि॒त्रस्य॑ प॒था स्व॒स्ति सोम॑सखा॒ पुन॒रेहि॑ स॒ह र॒य्या ॥ 10 ॥

( दक्षि॑णा॒-सोम॑सखा॒, पञ्च॑ च ) (अ. 4)

वस्व्य॑सि रु॒द्रा-ऽस्यदि॑ति-रस्यादि॒त्या-ऽसि॑ शु॒क्रा-ऽसि॑ च॒न्द्रा-ऽसि॒ बृह॒स्पति॑स्त्वा सु॒म्ने र॑ण्वतु रु॒द्रो वसु॑भि॒रा चि॑केतु पृथि॒व्यास्त्वा॑ मू॒र्धन्ना जि॑घर्मि देव॒यज॑न॒ इडा॑याः प॒दे घृ॒तव॑ति॒ स्वाहा॒ परि॑लिखित॒ग्ं॒ रक्षः॒ परि॑लिखिता॒ अरा॑तय इ॒दम॒हग्ं रक्ष॑सो ग्री॒वा अपि॑ कृन्तामि॒ यो᳚-ऽस्मा-न्द्वेष्टि॒ य-ञ्च॑ व॒य-न्द्वि॒ष्म इ॒दम॑स्य ग्री॒वा [ग्री॒वाः, अपि॑ कृन्ताम्य॒स्मे] 11

अपि॑ कृन्ताम्य॒स्मे राय॒स्त्वे राय॒स्तोते॒ राय॒-स्स-न्दे॑वि दे॒व्योर्वश्या॑ पश्यस्व॒ त्वष्टी॑मती ते सपेय सु॒रेता॒ रेतो॒ दधा॑ना वी॒रं-विँ॑देय॒ तव॑ स॒न्दृशि॒ मा-ऽहग्ंरा॒यस्पोषे॑ण॒ वि यो॑षम् ॥ 12 ॥

( अ॒स्य॒ ग्री॒वा-एका॒न्न त्रि॒ग्ं॒शच्च॑ ) (अ. 5)

अ॒ग्ं॒शुना॑ ते अ॒ग्ं॒शुः पृ॑च्यता॒-म्परु॑षा॒ परु॑-र्ग॒न्धस्ते॒ काम॑मवतु॒ मदा॑य॒ रसो॒ अच्यु॑तो॒ ऽमात्यो॑-ऽसि शु॒क्रस्ते॒ ग्रहो॒-ऽभि त्य-न्दे॒वग्ं स॑वि॒तार॑मू॒ण्योः᳚ क॒विक्र॑तु॒मर्चा॑मि स॒त्यस॑वसग्ं रत्न॒धाम॒भि प्रि॒य-म्म॒तिमू॒र्ध्वा यस्या॒मति॒र्भा अदि॑द्युत॒-थ्सवी॑मनि॒ हिर॑ण्यपाणिरमिमीत सु॒क्रतुः॑ कृ॒पा सुवः॑ । प्र॒जाभ्य॑स्त्वा प्रा॒णाय॑ त्वा व्या॒नाय॑ त्वा प्र॒जास्त्वमनु॒ प्राणि॑हि प्र॒जास्त्वामनु॒ प्राण॑न्तु ॥ 13 ॥

(अनु॑-स॒प्त च॑) (अ. 6)

सोम॑-न्ते क्रीणा॒म्यूर्ज॑स्वन्त॒-म्पय॑स्वन्तं-वीँ॒र्या॑वन्तमभि-माति॒षाहग्ं॑ शु॒क्र-न्ते॑ शु॒क्रेण॑ क्रीणामि च॒न्द्र-ञ्च॒न्द्रेणा॒मृत॑म॒मृते॑न स॒म्यत्ते॒ गोर॒स्मे च॒न्द्राणि॒ तप॑सस्त॒नूर॑सि प्र॒जाप॑ते॒-र्वर्ण॒स्तस्या᳚स्ते सहस्रपो॒ष-म्पुष्य॑न्त्याश्चर॒मेण॑ प॒शुना᳚ क्रीणाम्य॒स्मे ते॒ बन्धु॒र्मयि॑ ते॒ रायः॑ श्रयन्ताम॒स्मे ज्योतिः॑ सोमविक्र॒यिणि॒ तमो॑ मि॒त्रो न॒ एहि॒ सुमि॑त्रधा॒ इन्द्र॑स्यो॒रु मा वि॑श॒ दक्षि॑ण-मु॒शन्नु॒शन्तग्ग्॑ स्यो॒न-स्स्यो॒नग्ग् स्वान॒ भ्राजाङ्घा॑रे॒ बम्भा॑रे॒ हस्त॒ सुह॑स्त॒ कृशा॑नवे॒ते वः॑ सोम॒ क्रय॑णा॒स्ता-न्र॑क्षद्ध्व॒-म्मा वो॑ दभन्न् ॥ 14 ॥

(उ॒रुं-द्वाविग्ं॑शतिश्च) (अ. 7)

उदायु॑षा स्वा॒युषोदोष॑धीना॒ग्ं॒ रसे॒नो-त्प॒र्जन्य॑स्य॒ शुष्मे॒णोद॑स्थाम॒मृता॒ग्ं॒ अनु॑ । उ॒र्व॑न्तरि॑क्ष॒मन्वि॒ह्यदि॑त्या॒-स्सदो॒-ऽस्यदि॑त्या॒-स्सद॒ आ सी॒दास्त॑भ्ना॒-द्द्यामृ॑ष॒भो अ॒न्तरि॑क्ष॒ममि॑मीत वरि॒माण॑-म्पृथि॒व्या आ-ऽसी॑द॒-द्विश्वा॒ भुव॑नानि स॒म्रा-ड्विश्वेत्तानि॒ वरु॑णस्य व्र॒तानि॒ वने॑षु॒ व्य॑न्तरि॑क्ष-न्ततान॒ वाज॒मर्व॑थ्सु॒ पयो॑ अघ्नि॒यासु॑ हृ॒थ्सु- [ ] ॥ 15 ॥

क्रतुं॒-वँरु॑णो वि॒क्ष्व॑ग्नि-न्दि॒वि सूर्य॑मदधा॒-थ्सोम॒मद्रा॒वुदु॒त्य-ञ्जा॒तवे॑दस-न्दे॒वं-वँ॑हन्ति के॒तवः॑ । दृ॒शे विश्वा॑य॒ सूर्य᳚म् ॥ उस्रा॒वेत॑-न्धूर्षाहावन॒श्रू अवी॑रहणौ ब्रह्म॒चोद॑नौ॒ वरु॑णस्य॒ स्कम्भ॑नमसि॒ वरु॑णस्य स्कम्भ॒सर्ज॑नमसि॒ प्रत्य॑स्तो॒ वरु॑णस्य॒ पाशः॑ ॥ 16 ॥

( हृ॒थ्सु-पञ्च॑त्रिग्ंशच्च ) (अ. 8)

प्र च्य॑वस्व भुवस्पते॒ विश्वा᳚न्य॒भि धामा॑नि॒ मा त्वा॑ परिप॒री वि॑द॒न्मा त्वा॑ परिप॒न्थिनो॑ विद॒न्मा त्वा॒ वृका॑ अघा॒यवो॒ मा ग॑न्ध॒र्वो वि॒श्वाव॑सु॒रा द॑घच्छ्ये॒नो भू॒त्वा परा॑ पत॒ यज॑मानस्य नो गृ॒हे दे॒वै-स्सग्ग्॑स्कृ॒तं-यँज॑मानस्य स्व॒स्त्यय॑न्य॒स्यपि॒ पन्था॑मगस्महि स्वस्ति॒गा-म॑ने॒हसं॒-येँन॒ विश्वाः॒ परि॒ द्विषो॑ वृ॒णक्ति॑ वि॒न्दते॒ वसु॒ नमो॑ मि॒त्रस्य॒ वरु॑णस्य॒ चक्ष॑से म॒हो दे॒वाय॒ तदृ॒तग्ं स॑पर्यत दूरे॒दृशे॑ दे॒वजा॑ताय के॒तवे॑ दि॒वस्पु॒त्राय॒ सूर्या॑य शग्ंसत॒ वरु॑णस्य॒ स्कम्भ॑नमसि॒ वरु॑णस्य स्कम्भ॒सर्ज॑न-म॒स्युन्मु॑क्तो॒ वरु॑णस्य॒ पाशः॑ ॥ 17 ॥

( मि॒त्रस्य॒-त्रयो॑विग्ंशतिश्च ) (अ. 9)

अ॒ग्ने-रा॑ति॒थ्यम॑सि॒ विष्ण॑वे त्वा॒ सोम॑स्या-ऽऽति॒थ्यम॑सि॒ विष्ण॑वे॒ त्वा-ऽति॑थेराति॒थ्यम॑सि॒ विष्ण॑वे त्वा॒-ऽग्नये᳚ त्वा रायस्पोष॒दाव्न्ने॒ विष्ण॑वे त्वा श्ये॒नाय॑ त्वा सोम॒भृते॒ विष्ण॑वे त्वा॒ या ते॒ धामा॑नि ह॒विषा॒ यज॑न्ति॒ ता ते॒ विश्वा॑ परि॒भूर॑स्तु य॒ज्ञ-ङ्ग॑य॒स्फानः॑ प्र॒तर॑ण-स्सु॒वीरो-ऽवी॑रहा॒ प्रच॑रा सोम॒ दुर्या॒नदि॑त्या॒-स्सदो॒-ऽस्यदि॑त्या॒-स्सद॒ आ- [सद॒ आ, सी॒द॒ वरु॑णो-ऽसि] ॥ 18 ॥

सी॑द॒ वरु॑णो-ऽसि धृ॒तव्र॑तो वारु॒णम॑सि शं॒योँ-र्दे॒वानाग्ं॑ स॒ख्यान्मा दे॒वाना॑-म॒पस॑-श्छिथ्स्म॒ह्याप॑तये त्वा गृह्णामि॒ परि॑पतये त्वा गृह्णामि॒ तनू॒नप्त्रे᳚ त्वा गृह्णामि शाक्व॒राय॑ त्वा गृह्णामि॒ शक्म॒न्नोजि॑ष्ठाय त्वा गृह्णा॒म्य-ना॑धृष्टमस्य-नाधृ॒ष्य-न्दे॒वाना॒मोजो॑- ऽभिषस्ति॒पा अ॑नभिशस्ते॒-ऽन्यमनु॑ मे दी॒क्षा-न्दी॒क्षाप॑ति-र्मन्यता॒मनु॒ तप॒स्तप॑स्पति॒रञ्ज॑सा स॒त्यमुप॑ गेषग्ं सुवि॒ते मा॑ धाः ॥ 19 ॥

( आ-मै-क॑-ञ्च ) (अ. 10)

अ॒ग्ं॒शुरग्ं॑शुस्ते देव सो॒मा-ऽऽप्या॑यता॒-मिन्द्रा॑यैकधन॒विद॒ आ तुभ्य॒मिन्द्रः॑ प्यायता॒मा त्वमिन्द्रा॑य प्याय॒स्वा-ऽऽप्या॑यय॒ सखी᳚न्-थ्स॒न्या मे॒धया᳚ स्व॒स्ति ते॑ देव सोम सु॒त्याम॑शी॒येष्टा॒ रायः॒ प्रेषे भगा॑य॒र्तमृ॑तवा॒दिभ्यो॒ नमो॑ दि॒वे नमः॑ पृथि॒व्या अग्ने᳚ व्रतपते॒ त्वं-व्रँ॒तानां᳚-व्रँ॒तप॑तिरसि॒ या मम॑ त॒नूरे॒षा सा त्वयि॒ [त्वयि॑, या तव॑] ॥ 20 ॥

या तव॑ त॒नूरि॒यग्ं सा मयि॑ स॒ह नौ᳚ व्रतपते व्र॒तिनो᳚-र्व्र॒तानि॒ या ते॑ अग्ने॒ रुद्रि॑या त॒नूस्तया॑ नः पाहि॒ तस्या᳚स्ते॒ स्वाहा॒ या ते॑ अग्ने-ऽयाश॒या र॑जाश॒या ह॑राश॒या त॒नूर्वर्षि॑ष्ठा गह्वरे॒ष्ठो-ऽग्रं-वँचो॒ अपा॑वधी-न्त्वे॒षं-वँचो॒ अपा॑वधी॒ग्॒ स्वाहा᳚ ॥ 21 ॥

( त्वयि॑-चत्वारि॒ग्ं॒शच्च॑ ) (अ. 11)

वि॒त्ताय॑नी मे-ऽसि ति॒क्ताय॑नी मे॒-ऽस्यव॑तान्मा नाथि॒तमव॑तान्मा व्यथि॒तं-विँ॒देर॒ग्निर्नभो॒ नामाग्ने॑ अङ्गिरो॒ यो᳚-ऽस्या-म्पृ॑थि॒व्यामस्यायु॑षा॒ नाम्नेहि॒ यत्ते-ऽना॑धृष्ट॒-न्नाम॑ य॒ज्ञिय॒-न्तेन॒ त्वा-ऽऽद॒धे-ऽग्ने॑ अङ्गिरो॒ यो द्वि॒तीय॑स्या-न्तृ॒तीय॑स्या-म्पृथि॒व्या-मस्यायु॑षा॒ नाम्नेहि॒ यत्ते-ऽना॑धृष्ट॒-न्नाम॑- [ ] 22

य॒ज्ञिय॒-न्तेन॒ त्वा-ऽऽद॑धे सि॒ग्ं॒हीर॑सि महि॒षीर॑स्यु॒रु प्र॑थस्वो॒रु ते॑ य॒ज्ञप॑तिः प्रथता-न्ध्रु॒वा-ऽसि॑ दे॒वेभ्यः॑ शुन्धस्व दे॒वेभ्यः॑ शुम्भस्वेन्द्रघो॒षस्त्वा॒ वसु॑भिः पु॒रस्ता᳚-त्पातु॒ मनो॑जवास्त्वा पि॒तृभि॑-र्दक्षिण॒तः पा॑तु॒ प्रचे॑तास्त्वा रु॒द्रैः प॒श्चा-त्पा॑तु वि॒श्वक॑र्मा त्वा-ऽऽदि॒त्यैरु॑त्तर॒तः पा॑तु सि॒ग्ं॒हीर॑सि सपत्नसा॒ही स्वाहा॑ सि॒ग्ं॒हीर॑सि सुप्रजा॒वनि॒-स्स्वाहा॑ सि॒ग्ं॒ही- [सि॒ग्ं॒हीः, अ॒सि॒ रा॒य॒स्पो॒ष॒वनि॒-स्स्वाहा॑] 23

र॑सि रायस्पोष॒वनि॒-स्स्वाहा॑ सि॒ग्ं॒हीर॑स्यादित्य॒वनि॒-स्स्वाहा॑ सि॒ग्ं॒हीर॒स्या व॑ह दे॒वान्दे॑वय॒ते यज॑मानाय॒ स्वाहा॑ भू॒तेभ्य॑स्त्वा वि॒श्वायु॑रसि पृथि॒वी-न्दृग्ं॑ह ध्रुव॒क्षिद॑स्य॒न्तरि॑क्ष-न्दृग्ंहाच्युत॒क्षिद॑सि॒ दिव॑-न्दृग्ंहा॒ग्ने-र्भस्मा᳚स्य॒ग्नेः पुरी॑षमसि ॥ 24 ॥

(नाम॑-सुप्रजा॒वनि॒-स्स्वाहा॑ सि॒ग्ं॒सीः; पञ्च॑त्रिग्ंशच्च ) (अ. 12)

यु॒ञ्जते॒ मन॑ उ॒त यु॑ञ्जते॒ धियो॒ विप्रा॒ विप्र॑स्य बृह॒तो वि॑प॒श्चितः॑ । वि होत्रा॑ दधे वयुना॒विदेक॒ इन्म॒ही दे॒वस्य॑ सवि॒तुः परि॑ष्टुतिः ॥ सु॒वाग्दे॑व॒ दुर्या॒ग्ं॒ आ व॑द देव॒श्रुतौ॑ दे॒वेष्वा घो॑षेथा॒मा नो॑ वी॒रो जा॑यता-ङ्कर्म॒ण्यो॑ यग्ं सर्वे॑-ऽनु॒ जीवा॑म॒ यो ब॑हू॒नामस॑द्व॒शी ॥ इ॒दं-विँष्णु॒-र्विच॑क्रमे त्रे॒धा नि द॑धे प॒दम् ॥ समू॑ढमस्य [समू॑ढमस्य, पा॒ग्ं॒सु॒र] 25

पाग्ंसु॒र इरा॑वती धेनु॒मती॒ हि भू॒तग्ं सू॑यव॒सिनी॒ मन॑वे यश॒स्ये᳚ । व्य॑स्कभ्ना॒-द्रोद॑सी॒ विष्णु॑रे॒ते दा॒धार॑ पृथि॒वीम॒भितो॑ म॒यूखैः᳚ ॥ प्राची॒ प्रेत॑मद्ध्व॒र-ङ्क॒ल्पय॑न्ती ऊ॒र्ध्वं-यँ॒ज्ञ-न्न॑यत॒-म्मा जी᳚ह्वरत॒मत्र॑ रमेथां॒-वँर्ष्म॑-न्पृथि॒व्या दि॒वो वा॑ विष्णवु॒त वा॑ पृथि॒व्या म॒हो वा॑ विष्णवु॒त वा॒-ऽन्तरि॑क्षा॒द्धस्तौ॑ पृणस्व ब॒हुभि॑-र्वस॒व्यै॑रा प्र य॑च्छ॒ [प्र य॑च्छ, दक्षि॑णा॒दोत] 26

दक्षि॑णा॒दोत स॒व्यात् । विष्णो॒र्नुकं॑-वीँ॒र्या॑णि॒ प्र वो॑चं॒-यः ँपार्थि॑वानि विम॒मे रजाग्ं॑सि॒ यो अस्क॑भाय॒दुत्त॑रग्ं स॒धस्थं॑-विँचक्रमा॒ण स्त्रे॒धोरु॑गा॒यो विष्णो॑ र॒राट॑मसि॒ विष्णोः᳚ पृ॒ष्ठम॑सि॒ विष्णो॒-श्श्ञप्त्रे᳚ स्थो॒ विष्णो॒-स्स्यूर॑सि॒ विष्णो᳚-र्ध्रु॒वम॑सि वैष्ण॒वम॑सि॒ विष्ण॑वे त्वा ॥ 27 ॥

( अ॒स्य॒-य॒च्छैका॒न्न च॑त्वारि॒ग्ं॒शच्च॑ ) (अ. 13)

कृ॒णु॒ष्व पाजः॒ प्रसि॑ति॒न्न पृ॒थ्वीं-याँ॒हि राजे॒वाम॑वा॒ग्ं॒ इभे॑न । तृ॒ष्वीमनु॒ प्रसि॑तिं-द्रूणा॒नो-ऽस्ता॑-ऽसि॒ विद्ध्य॑ र॒क्षस॒ स्तपि॑ष्ठैः ॥ तव॑ भ्र॒मास॑ आशु॒या प॑न्त॒त्यनु॑ स्पृश-धृष॒ता शोशु॑चानः । तपूग्॑ष्यग्ने जु॒ह्वा॑ पत॒ङ्गानस॑न्दितो॒ विसृ॑ज॒ विष्व॑गु॒ल्काः ॥ प्रति॒स्पशो॒ विसृ॑ज॒-तूर्णि॑तमो॒ भवा॑ पा॒युर्वि॒शो अ॒स्या अद॑ब्धः । यो नो॑ दू॒रे अ॒घशग्ं॑सो॒ [अ॒घशग्ं॑सः, यो अन्त्यग्ने॒] 28

यो अन्त्यग्ने॒ माकि॑ष्टे॒ व्यथि॒रा द॑धर्षीत् ॥ उद॑ग्ने तिष्ठ॒ प्रत्या ऽऽत॑नुष्व॒ न्य॑मित्राग्ं॑ ओषता-त्तिग्महेते । यो नो॒ अरा॑तिग्ं समिधान च॒क्रे नी॒चा त-न्ध॑क्ष्यत॒स-न्न शुष्क᳚म् ॥ ऊ॒र्ध्वो भ॑व॒ प्रति॑वि॒द्ध्या-ऽद्ध्य॒स्मदा॒विष्कृ॑णुष्व॒ दैव्या᳚न्यग्ने । अव॑स्थि॒रा त॑नुहि यातु॒जूना᳚-ञ्जा॒मिमजा॑मिं॒ प्रमृ॑णीहि॒ शत्रून्॑ ॥ स ते॑ [स ते᳚, जा॒ना॒ति॒ सु॒म॒तिं] 29

जानाति सुम॒तिं-यँ॑विष्ठ॒य ईव॑ते॒ ब्रह्म॑णे गा॒तुमैर॑त् । विश्वा᳚न्यस्मै सु॒दिना॑नि रा॒यो द्यु॒म्नान्य॒र्यो विदुरो॑ अ॒भि द्यौ᳚त् ॥ सेद॑ग्ने अस्तु सु॒भगः॑ सु॒दानु॒-र्यस्त्वा॒ नित्ये॑न ह॒विषा॒य उ॒क्थैः । पिप्री॑षति॒ स्व आयु॑षि दुरो॒णे विश्वेद॑स्मै सु॒दिना॒ सा-ऽस॑दि॒ष्टिः ॥ अर्चा॑मि ते सुम॒ति-ङ्घोष्य॒र्वाख्-सन्ते॑ वा॒ वा ता॑ जरता- [वा॒ वा ता॑ जरताम्, इ॒यङ्गीः] 30

मि॒यङ्गीः । स्वश्वा᳚स्त्वा सु॒रथा॑ मर्जयेमा॒स्मे क्ष॒त्राणि॑ धारये॒रनु॒ द्यून् ॥ इ॒ह त्वा॒ भूर्या च॑रे॒ दुप॒त्म-न्दोषा॑वस्त-र्दीदि॒वाग्ंस॒मनु॒ द्यून् । क्रीड॑न्तस्त्वा सु॒मन॑स-स्सपेमा॒भि द्यु॒म्ना त॑स्थि॒वाग्ंसो॒ जना॑नाम् ॥ यस्त्वा॒-स्वश्वः॑ सुहिर॒ण्यो अ॑ग्न उप॒याति॒ वसु॑मता॒ रथे॑न । तस्य॑ त्रा॒ता-भ॑वसि॒ तस्य॒ सखा॒ यस्त॑ आति॒थ्यमा॑नु॒षग् जुजो॑षत् ॥ म॒हो रु॑जामि - [ ] 31

ब॒न्धुता॒ वचो॑भि॒स्तन्मा॑ पि॒तुर्गोत॑मा॒द-न्वि॑याय । त्वन्नो॑ अ॒स्य वच॑स-श्चिकिद्धि॒ होत॑र्यविष्ठ सुक्रतो॒ दमू॑नाः ॥ अस्व॑प्नज स्त॒रण॑य-स्सु॒शेवा॒ अत॑न्द्रासो-ऽवृ॒का अश्र॑मिष्ठाः । ते पा॒यवः॑ स॒द्ध्रिय॑ञ्चो नि॒षद्या-ऽग्ने॒ तव॑नः पान्त्वमूर ॥ ये पा॒यवो॑ मामते॒य-न्ते॑ अग्ने॒ पश्य॑न्तो अ॒न्ध-न्दु॑रि॒तादर॑क्षन्न् । र॒रक्ष॒तान्-थ्सु॒कृतो॑ वि॒श्ववे॑दा॒ दिफ्स॑न्त॒ इद्रि॒पवो॒ ना ह॑ [ना ह॑, दे॒भुः॒] 32

देभुः ॥ त्वया॑ व॒यग्ं स॑ध॒न्य॑-स्त्वोता॒-स्तव॒ प्रणी᳚त्यश्याम॒ वाजान्॑ । उ॒भा शग्ंसा॑ सूदय सत्यताते-ऽनुष्ठु॒या कृ॑णुह्यह्रयाण ॥ अ॒या ते॑ अग्ने स॒मिधा॑ विधेम॒ प्रति॒स्तोमग्ं॑ श॒स्यमा॑न-ङ्गृभाय । दहा॒शसो॑ र॒क्षसः॑ पा॒ह्य॑स्मा-न्द्रु॒हो नि॒दो मि॑त्रमहो अव॒द्यात् ॥ र॒क्षो॒हणं॑ ँवा॒जिन॒माजि॑घर्मि मि॒त्र-म्प्रथि॑ष्ठ॒-मुप॑यामि॒ शर्म॑ । शिशा॑नो अ॒ग्निः क्रतु॑भि॒-स्समि॑द्ध॒स्सनो॒ दिवा॒ [दिवा᳚, सरि॒षः पा॑तु॒ नक्तं᳚] 33

सरि॒षः पा॑तु॒ नक्त᳚म् ॥ विज्योति॑षा बृह॒ता भा᳚त्य॒ग्नि-रा॒वि-र्विश्वा॑नि कृणुते महि॒त्वा । प्रादे॑वी-र्मा॒या-स्स॑हते-दु॒रेवा॒-श्शिशी॑ते॒ शृङ्गे॒ रक्ष॑से वि॒निक्षे᳚ ॥ उ॒त स्वा॒नासो॑ दि॒विष॑न्त्व॒ग्ने स्ति॒ग्मायु॑धा॒ रक्ष॑से॒ हन्त॒वा उ॑ । मदे॑ चिदस्य॒ प्ररु॑जन्ति॒ भामा॒ न व॑रन्ते परि॒बाधो॒ अदे॑वीः ॥ 34 ॥

(अ॒घशग्ं॑सः॒-स ते॑-जरताग्ं-रुजामि-ह॒ -दिवै - क॑चत्वारिग्ंशच्च) (अ. 14)

(आप॑ उन्द॒, न्त्वाकू᳚त्यै॒, दैवी॑, मि॒यन्ते॒, वस्व्य॑स्य॒ग्ं॒ शुना॑ ते॒, सोम॑न्त॒, उदायु॑षा॒, प्र च्य॑वस्वा॒, ऽग्ने रा॑ति॒थ्य, -म॒ग्ं॒शुरग्ं॑ शु, र्वि॒त्ताय॑नी मे-ऽसि, यु॒ञ्चते॑, कृणु॒ष्व पाज॒, श्चतु॑र्दश ।)

(आपो॒-वस्व्य॑सि॒ या तवे॒-यङ्गी-श्चतु॑स्त्रिग्ंशत् ।)

(आप॑ उन्द॒न्, त्वदे॑वीः)

॥ हरिः॑ ओम् ॥

॥ कृष्ण यजुर्वेदीय तैत्तिरीय संहिताया-म्प्रथमकाण्डे द्वितीयः प्रश्न-स्समाप्तः ॥