1.3 - Devasya Tva Savituh Prasave - Krishna Yajurveda Taittiriya Samhita Pathah — Kannada Script

ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾ-ಮ್ಪ್ರಥಮಕಾಣ್ಡೇ ತೃತೀಯಃ ಪ್ರಶ್ನಃ - ಅಗ್ನಿಷ್ಟೋಮೇ ಪಶುಃ

ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,

ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥

ದೇ॒ವಸ್ಯ॑ ತ್ವಾ ಸವಿ॒ತುಃ ಪ್ರ॑ಸ॒ವೇ᳚-ಽಶ್ವಿನೋ᳚-ರ್ಬಾ॒ಹುಭ್ಯಾ᳚-ಮ್ಪೂ॒ಷ್ಣೋ ಹಸ್ತಾ᳚ಭ್ಯಾ॒ಮಾ ದ॒ದೇ-ಽಭ್ರಿ॑ರಸಿ॒ ನಾರಿ॑ರಸಿ॒ ಪರಿ॑ಲಿಖಿತ॒ಗ್ಂ॒ ರಕ್ಷಃ॒ ಪರಿ॑ಲಿಖಿತಾ॒ ಅರಾ॑ತಯ ಇ॒ದಮ॒ಹಗ್ಂ ರಕ್ಷ॑ಸೋ ಗ್ರೀ॒ವಾ ಅಪಿ॑ ಕೃನ್ತಾಮಿ॒ ಯೋ᳚-ಽಸ್ಮಾ-ನ್ದ್ವೇಷ್ಟಿ॒ ಯ-ಞ್ಚ॑ ವ॒ಯ-ನ್ದ್ವಿ॒ಷ್ಮ ಇ॒ದಮ॑ಸ್ಯ ಗ್ರೀ॒ವಾ ಅಪಿ॑ ಕೃನ್ತಾಮಿ ದಿ॒ವೇ ತ್ವಾ॒-ಽನ್ತರಿ॑ಕ್ಷಾಯ ತ್ವಾ ಪೃಥಿ॒ವ್ಯೈ ತ್ವಾ॒ ಶುನ್ಧ॑ತಾಂ-ಲೋಁ॒ಕಃ ಪಿ॑ತೃ॒ಷದ॑ನೋ॒ ಯವೋ॑-ಽಸಿ ಯ॒ವಯಾ॒ಸ್ಮ-ದ್ದ್ವೇಷೋ॑ [ಯ॒ವಯಾ॒ಸ್ಮ-ದ್ದ್ವೇಷಃ॑, ಯ॒ವಯಾರಾ॑ತೀಃ] 1

ಯ॒ವಯಾರಾ॑ತೀಃ ಪಿತೃ॒ಣಾಗ್ಂ ಸದ॑ನಮ॒ಸ್ಯುದ್ದಿವಗ್ಗ್॑ ಸ್ತಭಾ॒ನಾ-ಽನ್ತರಿ॑ಕ್ಷ-ಮ್ಪೃಣ ಪೃಥಿ॒ವೀ-ನ್ದೃಗ್ಂ॑ಹ ದ್ಯುತಾ॒ನಸ್ತ್ವಾ॑ ಮಾರು॒ತೋ ಮಿ॑ನೋತು ಮಿ॒ತ್ರಾವರು॑ಣಯೋ-ರ್ಧ್ರು॒ವೇಣ॒ ಧರ್ಮ॑ಣಾ ಬ್ರಹ್ಮ॒ವನಿ॑-ನ್ತ್ವಾ ಕ್ಷತ್ರ॒ವನಿಗ್ಂ॑ ಸುಪ್ರಜಾ॒ವನಿಗ್ಂ॑ ರಾಯಸ್ಪೋಷ॒ವನಿ॒-ಮ್ಪರ್ಯೂ॑ಹಾಮಿ॒ ಬ್ರಹ್ಮ॑ ದೃಗ್ಂಹ ಕ್ಷ॒ತ್ರ-ನ್ದೃಗ್ಂ॑ಹ ಪ್ರ॒ಜಾ-ನ್ದೃಗ್ಂ॑ಹ ರಾ॒ಯಸ್ಪೋಷ॑-ನ್ದೃಗ್ಂಹ ಘೃ॒ತೇನ॑ ದ್ಯಾವಾಪೃಥಿವೀ॒ ಆ ಪೃ॑ಣೇಥಾ॒ಮಿನ್ದ್ರ॑ಸ್ಯ॒ ಸದೋ॑-ಽಸಿ ವಿಶ್ವಜ॒ನಸ್ಯ॑ ಛಾ॒ಯಾ ಪರಿ॑ ತ್ವಾ ಗಿರ್ವಣೋ॒ ಗಿರ॑ ಇ॒ಮಾ ಭ॑ವನ್ತು ವಿ॒ಶ್ವತೋ॑ ವೃ॒ದ್ಧಾಯು॒ಮನು॒ ವೃದ್ಧ॑ಯೋ॒ ಜುಷ್ಟಾ॑ ಭವನ್ತು॒ ಜುಷ್ಟ॑ಯ॒ ಇನ್ದ್ರ॑ಸ್ಯ॒ ಸ್ಯೂರ॒ಸೀನ್ದ್ರ॑ಸ್ಯ ಧ್ರು॒ವಮ॑ಸ್ಯೈ॒ನ್ದ್ರಮ॒ಸೀನ್ದ್ರಾ॑ಯ ತ್ವಾ ॥ 2 ॥

(ದ್ವೇಷ॑ - ಇ॒ಮಾ - ಅ॒ಷ್ಟಾದ॑ಶ ಚ ) (ಅ. 1)

ರ॒ಕ್ಷೋ॒ಹಣೋ॑ ವಲಗ॒ಹನೋ॑ ವೈಷ್ಣ॒ವಾ-ನ್ಖ॑ನಾಮೀ॒ದಮ॒ಹ-ನ್ತಂ-ವಁ॑ಲ॒ಗಮುದ್ವ॑ಪಾಮಿ॒ ಯ-ನ್ನಃ॑ ಸಮಾ॒ನೋ ಯಮಸ॑ಮಾನೋ ನಿಚ॒ಖಾನೇ॒ದಮೇ॑ನ॒ಮಧ॑ರ-ಙ್ಕರೋಮಿ॒ ಯೋ ನಃ॑ ಸಮಾ॒ನೋ ಯೋ-ಽಸ॑ಮಾನೋ-ಽರಾತೀ॒ಯತಿ॑ ಗಾಯ॒ತ್ರೇಣ॒ ಛನ್ದ॒ಸಾ-ಽವ॑ಬಾಢೋ ವಲ॒ಗಃ ಕಿಮತ್ರ॑ ಭ॒ದ್ರ-ನ್ತನ್ನೌ॑ ಸ॒ಹ ವಿ॒ರಾಡ॑ಸಿ ಸಪತ್ನ॒ಹಾ ಸ॒ಮ್ರಾಡ॑ಸಿ ಭ್ರಾತೃವ್ಯ॒ಹಾ ಸ್ವ॒ರಾಡ॑ಸ್ಯಭಿಮಾತಿ॒ಹಾ ವಿ॑ಶ್ವಾ॒ರಾಡ॑ಸಿ॒ ವಿಶ್ವಾ॑ಸಾ-ನ್ನಾ॒ಷ್ಟ್ರಾಣಾಗ್ಂ॑ ಹ॒ನ್ತಾ [ಹ॒ನ್ತಾ, ರ॒ಕ್ಷೋ॒ಹಣೋ॑] 3

ರ॑ಕ್ಷೋ॒ಹಣೋ॑ ವಲಗ॒ಹನಃ॒ ಪ್ರೋಕ್ಷಾ॑ಮಿ ವೈಷ್ಣ॒ವಾ-ನ್ರ॑ಕ್ಷೋ॒ಹಣೋ॑ ವಲಗ॒ಹನೋ-ಽವ॑ ನಯಾಮಿ ವೈಷ್ಣ॒ವಾನ್ ಯವೋ॑-ಽಸಿ ಯ॒ವಯಾ॒ಸ್ಮ-ದ್ದ್ವೇಷೋ॑ ಯ॒ವಯಾರಾ॑ತೀ ರಕ್ಷೋ॒ಹಣೋ॑ ವಲಗ॒ಹನೋ-ಽವ॑ ಸ್ತೃಣಾಮಿ ವೈಷ್ಣ॒ವಾ-ನ್ರ॑ಕ್ಷೋ॒ಹಣೋ॑ ವಲಗ॒ಹನೋ॒-ಽಭಿ ಜು॑ಹೋಮಿ ವೈಷ್ಣ॒ವಾ-ನ್ರ॑ಕ್ಷೋ॒ಹಣೌ॑ ವಲಗ॒ಹನಾ॒ವುಪ॑ ದಧಾಮಿ ವೈಷ್ಣ॒ವೀ ರ॑ಕ್ಷೋ॒ಹಣೌ॑ ವಲಗ॒ಹನೌ॒ ಪರ್ಯೂ॑ಹಾಮಿ ವೈಷ್ಣ॒ವೀ ರ॑ಕ್ಷೋ॒ಹಣೌ॑ ವಲಗ॒ಹನೌ॒ ಪರಿ॑ ಸ್ತೃಣಾಮಿ ವೈಷ್ಣ॒ವೀ ರ॑ಕ್ಷೋ॒ಹಣೌ॑ ವಲಗ॒ಹನೌ॑ ವೈಷ್ಣ॒ವೀ ಬೃ॒ಹನ್ನ॑ಸಿ ಬೃ॒ಹದ್ಗ್ರಾ॑ವಾ ಬೃಹ॒ತೀಮಿನ್ದ್ರಾ॑ಯ॒ ವಾಚಂ॑-ವಁದ ॥ 4 ॥

( ಹ॒ನ್ತೇ-ನ್ದ್ರಾ॑ಯ॒ ದ್ವೇ ಚ॑ ) (ಅ. 2)

ವಿ॒ಭೂರ॑ಸಿ ಪ್ರ॒ವಾಹ॑ಣೋ॒ ವಹ್ನಿ॑ರಸಿ ಹವ್ಯ॒ವಾಹ॑ನ-ಶ್ಶ್ವಾ॒ತ್ರೋ॑-ಽಸಿ॒ ಪ್ರಚೇ॑ತಾಸ್ತು॒ಥೋ॑-ಽಸಿ ವಿ॒ಶ್ವವೇ॑ದಾ ಉ॒ಶಿಗ॑ಸಿ ಕ॒ವಿರಙ್ಘಾ॑ರಿರಸಿ॒ ಬಮ್ಭಾ॑ರಿರವ॒ಸ್ಯುರ॑ಸಿ॒ ದುವ॑ಸ್ವಾಞ್ಛು॒ನ್ಧ್ಯೂರ॑ಸಿ ಮಾರ್ಜಾ॒ಲೀಯಃ॑ ಸ॒ಮ್ರಾಡ॑ಸಿ ಕೃ॒ಶಾನುಃ॑ ಪರಿ॒ಷದ್ಯೋ॑-ಽಸಿ॒ ಪವ॑ಮಾನಃ ಪ್ರ॒ತಕ್ವಾ॑-ಽಸಿ॒ ನಭ॑ಸ್ವಾ॒ನಸ॑ಮ್ಮೃಷ್ಟೋ-ಽಸಿ ಹವ್ಯ॒ಸೂದ॑ ಋ॒ತಧಾ॑ಮಾ-ಽಸಿ॒ ಸುವರ್ಜ್ಯೋತಿ॒-ರ್ಬ್ರಹ್ಮ॑ಜ್ಯೋತಿರಸಿ॒ ಸುವ॑ರ್ಧಾಮಾ॒-ಽಜೋ᳚ ಽಸ್ಯೇಕ॑ಪಾ॒ದಹಿ॑ರಸಿ ಬು॒ದ್ಧ್ನಿಯೋ॒ ರೌದ್ರೇ॒ಣಾನೀ॑ಕೇನ ಪಾ॒ಹಿ ಮಾ᳚-ಽಗ್ನೇ ಪಿಪೃ॒ಹಿ ಮಾ॒ ಮಾ ಮಾ॑ ಹಿಗ್ಂಸೀಃ ॥ 5 ॥

(ಅನೀ॑ಕೇನಾ॒-ಷ್ಟೌ ಚ॑) (ಅ. 3)

ತ್ವಗ್ಂ ಸೋ॑ಮ ತನೂ॒ಕೃದ್ಭ್ಯೋ॒ ದ್ವೇಷೋ᳚ಭ್ಯೋ॒-ಽನ್ಯಕೃ॑ತೇಭ್ಯ ಉ॒ರು ಯ॒ನ್ತಾ-ಽಸಿ॒ ವರೂ॑ಥ॒ಗ್ಗ್॒ ಸ್ವಾಹಾ॑ ಜುಷಾ॒ಣೋ ಅ॒ಪ್ತುರಾಜ್ಯ॑ಸ್ಯ ವೇತು॒ ಸ್ವಾಹಾ॒-ಽಯನ್ನೋ॑ ಅ॒ಗ್ನಿರ್ವರಿ॑ವಃ ಕೃಣೋತ್ವ॒ಯ-ಮ್ಮೃಧಃ॑ ಪು॒ರ ಏ॑ತು ಪ್ರಭಿ॒ನ್ದನ್ನ್ । ಅ॒ಯಗ್ಂ ಶತ್ರೂ᳚ಞ್ಜಯತು॒ ಜರ್ಹೃ॑ಷಾಣೋ॒-ಽಯಂ-ವಾಁಜ॑-ಞ್ಜಯತು॒ ವಾಜ॑ಸಾತೌ । ಉ॒ರು ವಿ॑ಷ್ಣೋ॒ ವಿ ಕ್ರ॑ಮಸ್ವೋ॒ರು ಕ್ಷಯಾ॑ಯ ನಃ ಕೃಧಿ । ಘೃ॒ತ-ಙ್ಘೃ॑ತಯೋನೇ ಪಿಬ॒ ಪ್ರಪ್ರ॑ ಯ॒ಜ್ಞಪ॑ತಿ-ನ್ತಿರ । ಸೋಮೋ॑ ಜಿಗಾತಿ ಗಾತು॒ವಿ- [ಗಾತು॒ವಿತ್, ದೇ॒ವಾನಾ॑ಮೇತಿ] 6

ದ್ದೇ॒ವಾನಾ॑ಮೇತಿ ನಿಷ್ಕೃ॒ತಮೃ॒ತಸ್ಯ॒ ಯೋನಿ॑ಮಾ॒ಸದ॒ಮದಿ॑ತ್ಯಾ॒-ಸ್ಸದೋ॒-ಽಸ್ಯದಿ॑ತ್ಯಾ॒-ಸ್ಸದ॒ ಆ ಸೀ॑ದೈ॒ಷ ವೋ॑ ದೇವ ಸವಿತ॒-ಸ್ಸೋಮ॒ಸ್ತಗ್ಂ ರ॑ಕ್ಷದ್ಧ್ವ॒-ಮ್ಮಾ ವೋ॑ ದಭದೇ॒ತತ್ತ್ವಗ್ಂ ಸೋ॑ಮ ದೇ॒ವೋ ದೇ॒ವಾನುಪಾ॑ಗಾ ಇ॒ದಮ॒ಹ-ಮ್ಮ॑ನು॒ಷ್ಯೋ॑ ಮನು॒ಷ್ಯಾ᳚ನ್-ಥ್ಸ॒ಹ ಪ್ರ॒ಜಯಾ॑ ಸ॒ಹ ರಾ॒ಯಸ್ಪೋಷೇ॑ಣ॒ ನಮೋ॑ ದೇ॒ವೇಭ್ಯಃ॑ ಸ್ವ॒ಧಾ ಪಿ॒ತೃಭ್ಯ॑ ಇ॒ದಮ॒ಹ-ನ್ನಿರ್ವರು॑ಣಸ್ಯ॒ ಪಾಶಾ॒-ಥ್ಸುವ॑ರ॒ಭಿ [ ] 7

ವಿ ಖ್ಯೇ॑ಷಂ-ವೈಁಶ್ವಾನ॒ರ-ಞ್ಜ್ಯೋತಿ॒ರಗ್ನೇ᳚ ವ್ರತಪತೇ॒ ತ್ವಂ-ವ್ರಁ॒ತಾನಾಂ᳚-ವ್ರಁ॒ತಪ॑ತಿರಸಿ॒ ಯಾ ಮಮ॑ ತ॒ನೂಸ್ತ್ವಯ್ಯಭೂ॑ದಿ॒ಯಗ್ಂ ಸಾ ಮಯಿ॒ ಯಾ ತವ॑ ತ॒ನೂ-ರ್ಮಯ್ಯಭೂ॑ದೇ॒ಷಾ ಸಾ ತ್ವಯಿ॑ ಯಥಾಯ॒ಥ-ನ್ನೌ᳚ ವ್ರತಪತೇ ವ್ರ॒ತಿನೋ᳚-ರ್ವ್ರ॒ತಾನಿ॑ ॥ 8 ॥

(ಗಾ॒ತು॒ವಿದ॒-ಭ್ಯೇ-ಕ॑ತ್ರಿಗ್ಂಶಚ್ಚ) (ಅ. 4)

ಅತ್ಯ॒ನ್ಯಾನಗಾ॒-ನ್ನಾನ್ಯಾನುಪಾ॑ಗಾಮ॒ರ್ವಾಕ್ತ್ವಾ॒ ಪರೈ॑ರವಿದ-ಮ್ಪ॒ರೋ-ಽವ॑ರೈ॒ಸ್ತ-ನ್ತ್ವಾ॑ ಜುಷೇ ವೈಷ್ಣ॒ವ-ನ್ದೇ॑ವಯ॒ಜ್ಯಾಯೈ॑ ದೇ॒ವಸ್ತ್ವಾ॑ ಸವಿ॒ತಾ ಮದ್ಧ್ವಾ॑-ಽನ॒ಕ್ತ್ವೋಷ॑ಧೇ॒ ತ್ರಾಯ॑ಸ್ವೈನ॒ಗ್ಗ್॒ ಸ್ವಧಿ॑ತೇ॒ ಮೈನಗ್ಂ॑ ಹಿಗ್ಂಸೀ॒-ರ್ದಿವ॒ಮಗ್ರೇ॑ಣ॒ ಮಾ ಲೇ॑ಖೀರ॒ನ್ತರಿ॑ಕ್ಷ॒-ಮ್ಮದ್ಧ್ಯೇ॑ನ॒ ಮಾ ಹಿಗ್ಂ॑ಸೀಃ ಪೃಥಿ॒ವ್ಯಾ ಸ-ಮ್ಭ॑ವ॒ ವನ॑ಸ್ಪತೇ ಶ॒ತವ॑ಲ್ಶೋ॒ ವಿ ರೋ॑ಹ ಸ॒ಹಸ್ರ॑ವಲ್ಶಾ॒ ವಿ ವ॒ಯಗ್ಂ ರು॑ಹೇಮ॒ ಯ-ನ್ತ್ವಾ॒-ಽಯಗ್ಗ್ ಸ್ವಧಿ॑ತಿ॒ಸ್ತೇತಿ॑ಜಾನಃ ಪ್ರಣಿ॒ನಾಯ॑ ಮಹ॒ತೇ ಸೌಭ॑ಗಾ॒ಯಾಚ್ಛಿ॑ನ್ನೋ॒ ರಾಯಃ॑ ಸು॒ವೀರಃ॑ ॥ 9 ॥

(ಯಂ-ದಶ॑ ಚ) (ಅ. 5)

ಪೃ॒ಥಿ॒ವ್ಯೈ ತ್ವಾ॒ನ್ತರಿ॑ಕ್ಷಾಯ ತ್ವಾ ದಿ॒ವೇ ತ್ವಾ॒ ಶುನ್ಧ॑ತಾಂ-ಲೋಁ॒ಕಃ ಪಿ॑ತೃ॒ಷದ॑ನೋ॒ ಯವೋ॑-ಽಸಿ ಯ॒ವಯಾ॒ಸ್ಮ-ದ್ದ್ವೇಷೋ॑ ಯ॒ವಯಾರಾ॑ತೀಃ ಪಿತೃ॒ಣಾಗ್ಂ ಸದ॑ನಮಸಿ ಸ್ವಾವೇ॒ಶೋ᳚-ಽಸ್ಯಗ್ರೇ॒ಗಾ ನೇ॑ತೃ॒ಣಾಂ-ವಁನ॒ಸ್ಪತಿ॒ರಧಿ॑ ತ್ವಾ ಸ್ಥಾಸ್ಯತಿ॒ ತಸ್ಯ॑ ವಿತ್ತಾ-ದ್ದೇ॒ವಸ್ತ್ವಾ॑ ಸವಿ॒ತಾ ಮದ್ಧ್ವಾ॑-ಽನಕ್ತು ಸುಪಿಪ್ಪ॒ಲಾಭ್ಯ॒-ಸ್ತ್ವೌಷ॑ಧೀಭ್ಯ॒ ಉದ್ದಿವಗ್ಗ್॑ ಸ್ತಭಾ॒ನಾ-ಽನ್ತರಿ॑ಕ್ಷ-ಮ್ಪೃಣ ಪೃಥಿ॒ವೀಮುಪ॑ರೇಣ ದೃಗ್ಂಹ॒ ತೇ ತೇ॒ ಧಾಮಾ᳚ನ್ಯುಶ್ಮಸೀ [ಧಾಮಾ᳚ನ್ಯುಶ್ಮಸಿ, ಗ॒ಮದ್ಧ್ಯೇ॒ ಗಾವೋ॒] 10

ಗ॒ಮದ್ಧ್ಯೇ॒ ಗಾವೋ॒ ಯತ್ರ॒ ಭೂರಿ॑ಶೃಙ್ಗಾ ಅ॒ಯಾಸಃ॑ । ಅತ್ರಾಹ॒ ತದು॑ರುಗಾ॒ಯಸ್ಯ॒ ವಿಷ್ಣೋಃ᳚ ಪ॒ರಮ-ಮ್ಪ॒ದಮವ॑ ಭಾತಿ॒ ಭೂರೇಃ᳚ ॥ ವಿಷ್ಣೋಃ॒ ಕರ್ಮಾ॑ಣಿ ಪಶ್ಯತ॒ ಯತೋ᳚ ವ್ರ॒ತಾನಿ॑ ಪಸ್ಪ॒ಶೇ । ಇನ್ದ್ರ॑ಸ್ಯ॒ ಯುಜ್ಯ॒-ಸ್ಸಖಾ᳚ ॥ ತ-ದ್ವಿಷ್ಣೋಃ᳚ ಪರ॒ಮ-ಮ್ಪ॒ದಗ್ಂ ಸದಾ॑ ಪಶ್ಯನ್ತಿ ಸೂ॒ರಯಃ॑ । ದಿ॒ವೀವ॒ ಚಕ್ಷು॒ರಾತ॑ತಮ್ ॥ ಬ್ರ॒ಹ್ಮ॒ವನಿ॑-ನ್ತ್ವಾ ಕ್ಷತ್ರ॒ವನಿಗ್ಂ॑ ಸುಪ್ರಜಾ॒ವನಿಗ್ಂ॑ ರಾಯಸ್ಪೋಷ॒ವನಿ॒-ಮ್ಪರ್ಯೂ॑ಹಾಮಿ॒ ಬ್ರಹ್ಮ॑ ದೃಗ್ಂಹ ಕ್ಷ॒ತ್ರ-ನ್ದೃಗ್ಂ॑ಹ ಪ್ರ॒ಜಾ-ನ್ದೃಗ್ಂ॑ಹ ರಾ॒ಯಸ್ಪೋಷ॑-ನ್ದೃಗ್ಂಹ ಪರಿ॒ವೀರ॑ಸಿ॒ ಪರಿ॑ ತ್ವಾ॒ ದೈವೀ॒ರ್ವಿಶೋ᳚ ವ್ಯಯನ್ತಾ॒-ಮ್ಪರೀ॒ಮಗ್ಂ ರಾ॒ಯಸ್ಪೋಷೋ॒ ಯಜ॑ಮಾನ-ಮ್ಮನು॒ಷ್ಯಾ॑ ಅ॒ನ್ತರಿ॑ಕ್ಷಸ್ಯ ತ್ವಾ॒ ಸಾನಾ॒ವವ॑ ಗೂಹಾಮಿ ॥ 11 ॥

(ಉ॒ಶ್ಮ॒ಸೀ॒-ಪೋಷ॒ಮೇ-ಕಾ॒ನ್ನವಿಗ್ಂ॑ಶ॒ತಿಶ್ಚ॑) (ಅ. 6)

ಇ॒ಷೇ ತ್ವೋ॑ಪ॒ವೀರ॒ಸ್ಯುಪೋ॑ ದೇ॒ವಾ-ನ್ದೈವೀ॒-ರ್ವಿಶಃ॒ ಪ್ರಾಗು॒-ರ್ವಹ್ನೀ॑ರು॒ಶಿಜೋ॒ ಬೃಹ॑ಸ್ಪತೇ ಧಾ॒ರಯಾ॒ ವಸೂ॑ನಿ ಹ॒ವ್ಯಾ ತೇ᳚ ಸ್ವದನ್ತಾ॒-ನ್ದೇವ॑ ತ್ವಷ್ಟ॒ರ್ವಸು॑ ರಣ್ವ॒ ರೇವ॑ತೀ॒ ರಮ॑ದ್ಧ್ವ-ಮ॒ಗ್ನೇ-ರ್ಜ॒ನಿತ್ರ॑ಮಸಿ॒ ವೃಷ॑ಣೌ ಸ್ಥ ಉ॒ರ್ವಶ್ಯ॑ಸ್ಯಾ॒ಯುರ॑ಸಿ ಪುರೂ॒ರವಾ॑ ಘೃ॒ತೇನಾ॒ಕ್ತೇ ವೃಷ॑ಣ-ನ್ದಧಾಥಾ-ಙ್ಗಾಯ॒ತ್ರ-ಞ್ಛನ್ದೋ-ಽನು॒ ಪ್ರ ಜಾ॑ಯಸ್ವ॒ ತ್ರೈಷ್ಟು॑ಭ॒-ಞ್ಜಾಗ॑ತ॒-ಞ್ಛನ್ದೋ-ಽನು॒ ಪ್ರ ಜಾ॑ಯಸ್ವ॒ ಭವ॑ತ- [ಭವ॑ತಮ್, ನ॒-ಸ್ಸಮ॑ನಸೌ॒] 12

ನ್ನ॒-ಸ್ಸಮ॑ನಸೌ॒ ಸಮೋ॑ಕಸಾವರೇ॒ಪಸೌ᳚ । ಮಾ ಯ॒ಜ್ಞಗ್ಂ ಹಿಗ್ಂ॑ಸಿಷ್ಟ॒-ಮ್ಮಾ ಯ॒ಜ್ಞಪ॑ತಿ-ಞ್ಜಾತವೇದಸೌ ಶಿ॒ವೌ ಭ॑ವತಮ॒ದ್ಯ ನಃ॑ ॥ ಅ॒ಗ್ನಾವ॒ಗ್ನಿಶ್ಚ॑ರತಿ॒ ಪ್ರವಿ॑ಷ್ಟ॒ ಋಷೀ॑ಣಾ-ಮ್ಪು॒ತ್ರೋ ಅ॑ಧಿರಾ॒ಜ ಏ॒ಷಃ । ಸ್ವಾ॒ಹಾ॒ಕೃತ್ಯ॒ ಬ್ರಹ್ಮ॑ಣಾ ತೇ ಜುಹೋಮಿ॒ ಮಾ ದೇ॒ವಾನಾ᳚-ಮ್ಮಿಥು॒ಯಾ ಕ॑ರ್ಭಾಗ॒ಧೇಯ᳚ಮ್ ॥ 13 ॥

(ಭವ॑ತ॒-ಮೇಕ॑ತ್ರಿಗ್ಂಶಚ್ಚ) (ಅ. 7)

ಆ ದ॑ದ ಋ॒ತಸ್ಯ॑ ತ್ವಾ ದೇವಹವಿಃ॒ ಪಾಶೇ॒ನಾ-ಽಽರ॑ಭೇ॒ ಧರ್ಷಾ॒ ಮಾನು॑ಷಾನ॒ದ್ಭ್ಯಸ್ತ್ವೌಷ॑ಧೀಭ್ಯಃ॒ ಪ್ರೋಕ್ಷಾ᳚ಮ್ಯ॒ಪಾ-ಮ್ಪೇ॒ರುರ॑ಸಿ ಸ್ವಾ॒ತ್ತ-ಞ್ಚಿ॒-ಥ್ಸದೇ॑ವಗ್ಂ ಹ॒ವ್ಯಮಾಪೋ॑ ದೇವೀ॒-ಸ್ಸ್ವದ॑ತೈನ॒ಗ್ಂ॒ ಸ-ನ್ತೇ᳚ ಪ್ರಾ॒ಣೋ ವಾ॒ಯುನಾ॑ ಗಚ್ಛತಾ॒ಗ್ಂ॒ ಸಂ-ಯಁಜ॑ತ್ರೈ॒ರಙ್ಗಾ॑ನಿ॒ ಸಂ-ಯಁ॒ಜ್ಞಪ॑ತಿರಾ॒ಶಿಷಾ॑ ಘೃ॒ತೇನಾ॒ಕ್ತೌ ಪ॒ಶು-ನ್ತ್ರಾ॑ಯೇಥಾ॒ಗ್ಂ॒ ರೇವ॑ತೀ-ರ್ಯ॒ಜ್ಞಪ॑ತಿ-ಮ್ಪ್ರಿಯ॒ಧಾ-ಽಽ ವಿ॑ಶ॒ತೋರೋ॑ ಅನ್ತರಿಕ್ಷ ಸ॒ಜೂ-ರ್ದೇ॒ವೇನ॒ [ಸ॒ಜೂ-ರ್ದೇ॒ವೇನ॑, ವಾತೇ॑ನಾ॒-ಽಸ್ಯ] 14

ವಾತೇ॑ನಾ॒-ಽಸ್ಯ ಹ॒ವಿಷ॒ಸ್ತ್ಮನಾ॑ ಯಜ॒ ಸಮ॑ಸ್ಯ ತ॒ನುವಾ॑ ಭವ॒ ವರ್ಷೀ॑ಯೋ॒ ವರ್ಷೀ॑ಯಸಿ ಯ॒ಜ್ಞೇ ಯ॒ಜ್ಞಪತಿ॑-ನ್ಧಾಃ ಪೃ॑ಥಿ॒ವ್ಯಾ-ಸ್ಸ॒ಮ್ಪೃಚಃ॑ ಪಾಹಿ॒ ನಮ॑ಸ್ತ ಆತಾನಾ-ಽನ॒ರ್ವಾ ಪ್ರೇಹಿ॑ ಘೃ॒ತಸ್ಯ॑ ಕು॒ಲ್ಯಾಮನು॑ ಸ॒ಹ ಪ್ರ॒ಜಯಾ॑ ಸ॒ಹ ರಾ॒ಯಸ್ಪೋಷೇ॒ಣಾ ಽಽಪೋ॑ ದೇವೀ-ಶ್ಶುದ್ಧಾಯುವ-ಶ್ಶು॒ದ್ಧಾ ಯೂ॒ಯ-ನ್ದೇ॒ವಾಗ್ಂ ಊ᳚ಢ್ವಗ್ಂ ಶು॒ದ್ಧಾ ವ॒ಯ-ಮ್ಪರಿ॑ವಿಷ್ಟಾಃ ಪರಿವೇ॒ಷ್ಟಾರೋ॑ ವೋ ಭೂಯಾಸ್ಮ ॥ 15 ॥

(ದೇ॒ವನ॒-ಚತು॑ಶ್ಚತ್ವಾರಿಗ್ಂಶಚ್ಚ) (ಅ. 8)

ವಾಕ್ತ॒ ಆ ಪ್ಯಾ॑ಯತಾ-ಮ್ಪ್ರಾ॒ಣಸ್ತ॒ ಆ ಪ್ಯಾ॑ಯತಾ॒-ಞ್ಚಕ್ಷು॑ಸ್ತ॒ ಆ ಪ್ಯಾ॑ಯತಾ॒ಗ್॒ ಶ್ರೋತ್ರ॑-ನ್ತ॒ ಆ ಪ್ಯಾ॑ಯತಾಂ॒-ಯಾಁ ತೇ᳚ ಪ್ರಾ॒ಣಾಞ್ಛುಗ್ಜ॒ಗಾಮ॒ ಯಾ ಚಕ್ಷು॒ರ್ಯಾ ಶ್ರೋತ್ರಂ॒-ಯಁತ್ತೇ᳚ ಕ್ರೂ॒ರಂ-ಯಁದಾಸ್ಥಿ॑ತ॒-ನ್ತತ್ತ॒ ಆ ಪ್ಯಾ॑ಯತಾ॒-ನ್ತತ್ತ॑ ಏ॒ತೇನ॑ ಶುನ್ಧತಾ॒-ನ್ನಾಭಿ॑ಸ್ತ॒ ಆ ಪ್ಯಾ॑ಯತಾ-ಮ್ಪಾ॒ಯುಸ್ತ॒ ಆ ಪ್ಯಾ॑ಯತಾಗ್ಂ ಶು॒ದ್ಧಾಶ್ಚ॒ರಿತ್ರಾ॒-ಶ್ಶಮ॒ದ್ಭ್ಯ- [ಮ॒ಧ್ಭ್ಯಃ, ಶಮೋಷ॑ಧೀಭ್ಯ॒-ಶ್ಶಂ] 16

ಶ್ಶಮೋಷ॑ಧೀಭ್ಯ॒-ಶ್ಶ-ಮ್ಪೃ॑ಥಿ॒ವ್ಯೈ ಶಮಹೋ᳚ಭ್ಯಾ॒-ಮೋಷ॑ಧೇ॒ ತ್ರಾಯ॑ಸ್ವೈನ॒ಗ್ಗ್॒ ಸ್ವಧಿ॑ತೇ॒ ಮೈನಗ್ಂ॑ ಹಿಗ್ಂಸೀ॒ ರಕ್ಷ॑ಸಾ-ಮ್ಭಾ॒ಗೋ॑-ಽಸೀ॒ದಮ॒ಹಗ್ಂ ರಕ್ಷೋ॑-ಽಧ॒ಮ-ನ್ತಮೋ॑ ನಯಾಮಿ॒ ಯೋ᳚-ಽಸ್ಮಾ-ನ್ದ್ವೇಷ್ಟಿ॒ ಯ-ಞ್ಚ॑ ವ॒ಯ-ನ್ದ್ವಿ॒ಷ್ಮ ಇ॒ದಮೇ॑ನಮಧ॒ಮ-ನ್ತಮೋ॑ ನಯಾಮೀ॒ಷೇ ತ್ವಾ॑ ಘೃ॒ತೇನ॑ ದ್ಯಾವಾಪೃಥಿವೀ॒ ಪ್ರೋರ್ಣ್ವಾ॑ಥಾ॒-ಮಚ್ಛಿ॑ನ್ನೋ॒ ರಾಯಃ॑ ಸು॒ವೀರ॑ ಉ॒ರ್ವ॑ನ್ತರಿ॑ಕ್ಷ॒ಮನ್ವಿ॑ಹಿ॒ ವಾಯೋ॒ ವೀಹಿ॑ ಸ್ತೋ॒ಕಾನಾ॒ಗ್॒ ಸ್ವಾಹೋ॒ರ್ಧ್ವನ॑ಭಸ-ಮ್ಮಾರು॒ತ-ಙ್ಗ॑ಚ್ಛತಮ್ ॥ 17 ॥

(ಅ॒ದ್ಭ್ಯೋ-ವೀಹಿ॒-ಪಞ್ಚ॑ ಚ) (ಅ. 9)

ಸ-ನ್ತೇ॒ ಮನ॑ಸಾ॒ ಮನಃ॒ ಸ-ಮ್ಪ್ರಾ॒ಣೇನ॑ ಪ್ರಾ॒ಣೋ ಜುಷ್ಟ॑-ನ್ದೇ॒ವೇಭ್ಯೋ॑ ಹ॒ವ್ಯ-ಙ್ಘೃ॒ತವ॒-ಥ್ಸ್ವಾಹೈ॒ನ್ದ್ರಃ ಪ್ರಾ॒ಣೋ ಅಙ್ಗೇ॑ಅಙ್ಗೇ॒ ನಿ ದೇ᳚ದ್ಧ್ಯದೈ॒ನ್ದ್ರೋ॑ ಽಪಾ॒ನೋ ಅಙ್ಗೇ॑ಅಙ್ಗೇ॒ ವಿ ಬೋ॑ಭುವ॒ದ್ದೇವ॑ ತ್ವಷ್ಟ॒ರ್ಭೂರಿ॑ ತೇ॒ ಸಗ್ಂಸ॑ಮೇತು॒ ವಿಷು॑ರೂಪಾ॒ ಯ-ಥ್ಸಲ॑ಕ್ಷ್ಮಾಣೋ॒ ಭವ॑ಥ ದೇವ॒ತ್ರಾ ಯನ್ತ॒ಮವ॑ಸೇ॒ ಸಖಾ॒ಯೋ-ಽನು॑ ತ್ವಾ ಮಾ॒ತಾ ಪಿ॒ತರೋ॑ ಮದನ್ತು॒ ಶ್ರೀರ॑ಸ್ಯ॒ಗ್ನಿಸ್ತ್ವಾ᳚ ಶ್ರೀಣಾ॒ತ್ವಾಪ॒-ಸ್ಸಮ॑ರಿಣ॒ನ್ ವಾತ॑ಸ್ಯ [ ] 18

ತ್ವಾ॒ ಧ್ರಜ್ಯೈ॑ ಪೂ॒ಷ್ಣೋ ರಗ್ಗ್ಹ್ಯಾ॑ ಅ॒ಪಾಮೋಷ॑ಧೀನಾ॒ಗ್ಂ॒ ರೋಹಿ॑ಷ್ಯೈ ಘೃ॒ತ-ಙ್ಘೃ॑ತಪಾವಾನಃ ಪಿಬತ॒ ವಸಾಂ᳚-ವಁಸಾಪಾವಾನಃ ಪಿಬತಾ॒-ಽನ್ತರಿ॑ಕ್ಷಸ್ಯ ಹ॒ವಿರ॑ಸಿ॒ ಸ್ವಾಹಾ᳚ ತ್ವಾ॒-ಽನ್ತರಿ॑ಕ್ಷಾಯ॒ ದಿಶಃ॑ ಪ್ರ॒ದಿಶ॑ ಆ॒ದಿಶೋ॑ ವಿ॒ದಿಶ॑ ಉ॒ದ್ದಿಶ॒-ಸ್ಸ್ವಾಹಾ॑ ದಿ॒ಗ್ಭ್ಯೋ ನಮೋ॑ ದಿ॒ಗ್ಭ್ಯಃ ॥ 19 ॥

(ವಾ॑ತಸ್ಯಾ॒-ಷ್ಟಾವಿಗ್ಂ॑ಶತಿಶ್ಚ) (ಅ. 10)

ಸ॒ಮು॒ದ್ರ-ಙ್ಗ॑ಚ್ಛ॒ ಸ್ವಾಹಾ॒-ಽನ್ತರಿ॑ಕ್ಷ-ಙ್ಗಚ್ಛ॒ ಸ್ವಾಹಾ॑ ದೇ॒ವಗ್ಂ ಸ॑ವಿ॒ತಾರ॑-ಙ್ಗಚ್ಛ॒ ಸ್ವಾಹಾ॑-ಽಹೋರಾ॒ತ್ರೇ ಗ॑ಚ್ಛ॒ ಸ್ವಾಹಾ॑ ಮಿ॒ತ್ರಾವರು॑ಣೌ ಗಚ್ಛ॒ ಸ್ವಾಹಾ॒ ಸೋಮ॑-ಙ್ಗಚ್ಛ॒ ಸ್ವಾಹಾ॑ ಯ॒ಜ್ಞ-ಙ್ಗ॑ಚ್ಛ॒ ಸ್ವಾಹಾ॒ ಛನ್ದಾಗ್ಂ॑ಸಿ ಗಚ್ಛ॒ ಸ್ವಾಹಾ॒ ದ್ಯಾವಾ॑ಪೃಥಿ॒ವೀ ಗ॑ಚ್ಛ॒ ಸ್ವಾಹಾ॒ ನಭೋ॑ ದಿ॒ವ್ಯ-ಙ್ಗ॑ಚ್ಛ॒ ಸ್ವಾಹಾ॒-ಽಗ್ನಿಂ-ವೈಁ᳚ಶ್ವಾನ॒ರ-ಙ್ಗ॑ಚ್ಛ॒ ಸ್ವಾಹಾ॒-ಽದ್ಭ್ಯಸ್ತ್ವೌಷ॑ಧೀಭ್ಯೋ॒ ಮನೋ॑ ಮೇ॒ ಹಾರ್ದಿ॑ ಯಚ್ಛ ತ॒ನೂ-ನ್ತ್ವಚ॑-ಮ್ಪು॒ತ್ರ-ನ್ನಪ್ತಾ॑ರಮಶೀಯ॒ ಶುಗ॑ಸಿ॒ ತಮ॒ಭಿ ಶೋ॑ಚ॒ ಯೋ᳚-ಽಸ್ಮಾ-ನ್ದ್ವೇಷ್ಟಿ॒ ಯ-ಞ್ಚ॑ ವ॒ಯ-ನ್ದ್ವಿ॒ಷ್ಮೋ ಧಾಮ್ನೋ॑ಧಾಮ್ನೋ ರಾಜನ್ನಿ॒ತೋ ವ॑ರುಣ ನೋ ಮುಞ್ಚ॒ ಯದಾಪೋ॒ ಅಘ್ನಿ॑ಯಾ॒ ವರು॒ಣೇತಿ॒ ಶಪಾ॑ಮಹೇ॒ ತತೋ॑ ವರುಣ ನೋ ಮುಞ್ಚ ॥ 20

(ಅ॒ಸಿ॒-ಷಡ್ವಿಗ್ಂ॑ಶತಿಶ್ಚ ) (ಅ. 11)

ಹ॒ವಿಷ್ಮ॑ತೀರಿ॒ಮಾ ಆಪೋ॑ ಹ॒ವಿಷ್ಮಾ᳚-ನ್ದೇ॒ವೋ ಅ॑ದ್ಧ್ವ॒ರೋ ಹ॒ವಿಷ್ಮಾ॒ಗ್ಂ॒ ಆ ವಿ॑ವಾಸತಿ ಹ॒ವಿಷ್ಮಾಗ್ಂ॑ ಅಸ್ತು॒ ಸೂರ್ಯಃ॑ ॥ ಅ॒ಗ್ನೇರ್ವೋ ಽಪ॑ನ್ನಗೃಹಸ್ಯ॒ ಸದ॑ಸಿ ಸಾದಯಾಮಿ ಸು॒ಮ್ನಾಯ॑ ಸುಮ್ನಿನೀ-ಸ್ಸು॒ಮ್ನೇ ಮಾ॑ ಧತ್ತೇನ್ದ್ರಾಗ್ನಿ॒ಯೋ-ರ್ಭಾ॑ಗ॒ಧೇಯೀ᳚-ಸ್ಸ್ಥ ಮಿ॒ತ್ರಾವರು॑ಣಯೋ-ರ್ಭಾಗ॒ಧೇಯೀ᳚-ಸ್ಸ್ಥ॒ ವಿಶ್ವೇ॑ಷಾ-ನ್ದೇ॒ವಾನಾ᳚-ಮ್ಭಾಗ॒ಧೇಯೀ᳚-ಸ್ಸ್ಥ ಯ॒ಜ್ಞೇ ಜಾ॑ಗೃತ ॥ 21 ॥

(ಹ॒ವಿಷ್ಮ॑ತೀ॒-ಶ್ಚತು॑ಸ್ತ್ರಿಗ್ಂಶತ್) (ಅ. 12)

ಹೃ॒ದೇ ತ್ವಾ॒ ಮನ॑ಸೇ ತ್ವಾ ದಿ॒ವೇ ತ್ವಾ॒ ಸೂರ್ಯಾ॑ಯ ತ್ವೋ॒ರ್ಧ್ವಮಿ॒ಮಮ॑ದ್ಧ್ವ॒ರ-ಙ್ಕೃ॑ಧಿ ದಿ॒ವಿ ದೇ॒ವೇಷು॒ ಹೋತ್ರಾ॑ ಯಚ್ಛ॒ ಸೋಮ॑ ರಾಜ॒ನ್ನೇಹ್ಯವ॑ ರೋಹ॒ ಮಾ ಭೇರ್ಮಾ ಸಂ-ವಿಁ॑ಕ್ಥಾ॒ ಮಾ ತ್ವಾ॑ ಹಿಗ್ಂಸಿಷ-ಮ್ಪ್ರ॒ಜಾಸ್ತ್ವಮು॒ಪಾವ॑ರೋಹ ಪ್ರ॒ಜಾಸ್ತ್ವಾಮು॒ಪಾವ॑ರೋಹನ್ತು ಶೃ॒ಣೋತ್ವ॒ಗ್ನಿ-ಸ್ಸ॒ಮಿಧಾ॒ ಹವ॑-ಮ್ಮೇ ಶೃ॒ಣ್ವನ್ತ್ವಾಪೋ॑ ಧಿ॒ಷಣಾ᳚ಶ್ಚ ದೇ॒ವೀಃ । ಶೃ॒ಣೋತ॑ ಗ್ರಾವಾಣೋ ವಿ॒ದುಷೋ॒ ನು [ ] 22

ಯ॒ಜ್ಞಗ್ಂ ಶೃ॒ಣೋತು॑ ದೇ॒ವ-ಸ್ಸ॑ವಿ॒ತಾ ಹವ॑-ಮ್ಮೇ । ದೇವೀ॑ರಾಪೋ ಅಪಾ-ನ್ನಪಾ॒ದ್ಯ ಊ॒ರ್ಮಿರ್ಹ॑ವಿ॒ಷ್ಯ॑ ಇನ್ದ್ರಿ॒ಯಾವಾ᳚-ನ್ಮ॒ದಿನ್ತ॑ಮ॒ಸ್ತ-ನ್ದೇ॒ವೇಭ್ಯೋ॑ ದೇವ॒ತ್ರಾ ಧ॑ತ್ತ ಶು॒ಕ್ರಗ್ಂ ಶು॑ಕ್ರ॒ಪೇಭ್ಯೋ॒ ಯೇಷಾ᳚-ಮ್ಭಾ॒ಗ-ಸ್ಸ್ಥ ಸ್ವಾಹಾ॒ ಕಾರ್ಷಿ॑ರ॒ಸ್ಯಪಾ॒-ಽಪಾ-ಮ್ಮೃ॒ದ್ಧ್ರಗ್ಂ ಸ॑ಮು॒ದ್ರಸ್ಯ॒ ವೋ-ಽಕ್ಷಿ॑ತ್ಯಾ॒ ಉನ್ನ॑ಯೇ । ಯಮ॑ಗ್ನೇ ಪೃ॒ಥ್ಸು ಮರ್ತ್ಯ॒ಮಾವೋ॒ ವಾಜೇ॑ಷು॒ ಯ-ಞ್ಜು॒ನಾಃ । ಸ ಯನ್ತಾ॒ ಶಶ್ವ॑ತೀ॒ರಿಷಃ॑ ॥ 23 ॥

( ನು-ಸ॒ಪ್ತಚ॑ತ್ವಾರಿಗ್ಂಶಚ್ಚ) (ಅ. 13)

ತ್ವಮ॑ಗ್ನೇ ರು॒ದ್ರೋ ಅಸು॑ರೋ ಮ॒ಹೋ ದಿ॒ವಸ್ತ್ವಗ್ಂ ಶರ್ಧೋ॒ ಮಾರು॑ತ-ಮ್ಪೃ॒ಕ್ಷ ಈ॑ಶಿಷೇ । ತ್ವಂ-ವಾಁತೈ॑ರರು॒ಣೈರ್ಯಾ॑ಸಿ ಶಙ್ಗ॒ಯಸ್ತ್ವ-ಮ್ಪೂ॒ಷಾ ವಿ॑ಧ॒ತಃ ಪಾ॑ಸಿ॒ ನುತ್ಮನಾ᳚ ॥ ಆ ವೋ॒ ರಾಜಾ॑ನಮದ್ಧ್ವ॒ರಸ್ಯ॑ ರು॒ದ್ರಗ್ಂ ಹೋತಾ॑ರಗ್ಂ ಸತ್ಯ॒ಯಜ॒ಗ್ಂ॒ ರೋದ॑ಸ್ಯೋಃ । ಅ॒ಗ್ನಿ-ಮ್ಪು॒ರಾ ತ॑ನಯಿ॒ತ್ನೋ ರ॒ಚಿತ್ತಾ॒ದ್ಧಿರ॑ಣ್ಯರೂಪ॒ಮವ॑ಸೇ ಕೃಣುದ್ಧ್ವಮ್ ॥ ಅ॒ಗ್ನಿರ್ಹೋತಾ॒ ನಿ ಷ॑ಸಾದಾ॒ ಯಜೀ॑ಯಾನು॒ಪಸ್ಥೇ॑ ಮಾ॒ತು-ಸ್ಸು॑ರ॒ಭಾವು॑ ಲೋ॒ಕೇ । ಯುವಾ॑ ಕ॒ವಿಃ ಪು॑ರುನಿ॒ಷ್ಠ [ಪು॑ರುನಿ॒ಷ್ಠಃ, ಋ॒ತಾವಾ॑ ಧ॒ರ್ತಾ] 24

ಋ॒ತಾವಾ॑ ಧ॒ರ್ತಾ ಕೃ॑ಷ್ಟೀ॒ನಾಮು॒ತ ಮದ್ಧ್ಯ॑ ಇ॒ದ್ಧಃ ॥ಸಾ॒ದ್ಧ್ವೀಮ॑ಕ-ರ್ದೇ॒ವವೀ॑ತಿ-ನ್ನೋ ಅ॒ದ್ಯ ಯ॒ಜ್ಞಸ್ಯ॑ ಜಿ॒ಹ್ವಾಮ॑ವಿದಾಮ॒ ಗುಹ್ಯಾ᳚ಮ್ । ಸ ಆಯು॒ರಾ-ಽಗಾ᳚-ಥ್ಸುರ॒ಭಿರ್ವಸಾ॑ನೋ ಭ॒ದ್ರಾಮ॑ಕ-ರ್ದೇ॒ವಹೂ॑ತಿ-ನ್ನೋ ಅ॒ದ್ಯ ॥ ಅಕ್ರ॑ನ್ದದ॒ಗ್ನಿ-ಸ್ಸ್ತ॒ನಯ॑ನ್ನಿವ॒ ದ್ಯೌಃ, ಕ್ಷಾಮಾ॒ ರೇರಿ॑ಹದ್ವೀ॒ರುಧಃ॑ ಸಮ॒ಞ್ಜನ್ನ್ । ಸ॒ದ್ಯೋ ಜ॑ಜ್ಞಾ॒ನೋ ವಿ ಹೀಮಿ॒ದ್ಧೋ ಅಖ್ಯ॒ದಾ ರೋದ॑ಸೀ ಭಾ॒ನುನಾ॑ ಭಾತ್ಯ॒ನ್ತಃ ॥ ತ್ವೇ ವಸೂ॑ನಿ ಪುರ್ವಣೀಕ [ಪುರ್ವಣೀಕ, ಹೋ॒ತ॒ರ್ದೋ॒ಷಾ] 25

ಹೋತರ್ದೋ॒ಷಾ ವಸ್ತೋ॒ರೇರಿ॑ರೇ ಯ॒ಜ್ಞಿಯಾ॑ಸಃ । ಕ್ಷಾಮೇ॑ವ॒ ವಿಶ್ವಾ॒ ಭುವ॑ನಾನಿ॒ ಯಸ್ಮಿ॒ನ್-ಥ್ಸಗ್ಂ ಸೌಭ॑ಗಾನಿ ದಧಿ॒ರೇ ಪಾ॑ವ॒ಕೇ ॥ ತುಭ್ಯ॒-ನ್ತಾ ಅ॑ಙ್ಗಿರಸ್ತಮ॒ ವಿಶ್ವಾ᳚-ಸ್ಸುಕ್ಷಿ॒ತಯಃ॒ ಪೃಥ॑ಕ್ । ಅಗ್ನೇ॒ ಕಾಮಾ॑ಯ ಯೇಮಿರೇ ॥ ಅ॒ಶ್ಯಾಮ॒ ತ-ಙ್ಕಾಮ॑ಮಗ್ನೇ॒ ತವೋ॒ತ್ಯ॑ಶ್ಯಾಮ॑ ರ॒ಯಿಗ್ಂ ರ॑ಯಿವ-ಸ್ಸು॒ವೀರ᳚ಮ್ । ಅ॒ಶ್ಯಾಮ॒ ವಾಜ॑ಮ॒ಭಿ ವಾ॒ಜಯ॑ನ್ತೋ॒ ಽಶ್ಯಾಮ॑ ದ್ಯು॒ಮ್ನಮ॑ಜರಾ॒ಜರ॑-ನ್ತೇ ॥ಶ್ರೇಷ್ಠಂ॑-ಯಁವಿಷ್ಠ ಭಾರ॒ತಾಗ್ನೇ᳚ ದ್ಯು॒ಮನ್ತ॒ಮಾ ಭ॑ರ ॥ 26 ॥

ವಸೋ॑ ಪುರು॒ಸ್ಪೃಹಗ್ಂ॑ ರ॒ಯಿಮ್ ॥ ಸ ಶ್ವಿ॑ತಾ॒ನಸ್ತ॑ನ್ಯ॒ತೂ ರೋ॑ಚನ॒ಸ್ಥಾ ಅ॒ಜರೇ॑ಭಿ॒-ರ್ನಾನ॑ದದ್ಭಿ॒ರ್ಯವಿ॑ಷ್ಠಃ । ಯಃ ಪಾ॑ವ॒ಕಃ ಪು॑ರು॒ತಮಃ॑ ಪು॒ರೂಣಿ॑ ಪೃ॒ಥೂನ್ಯ॒ಗ್ನಿರ॑ನು॒ಯಾತಿ॒ ಭರ್ವನ್ನ್॑ ॥ ಆಯು॑ಷ್ಟೇ ವಿ॒ಶ್ವತೋ॑ ದಧದ॒ಯಮ॒ಗ್ನಿ-ರ್ವರೇ᳚ಣ್ಯಃ । ಪುನ॑ಸ್ತೇ ಪ್ರಾ॒ಣ ಆ-ಽಯ॑ತಿ॒ ಪರಾ॒ ಯಕ್ಷ್ಮಗ್ಂ॑ ಸುವಾಮಿ ತೇ ॥ ಆ॒ಯು॒ರ್ದಾ ಅ॑ಗ್ನೇ ಹ॒ವಿಷೋ॑ ಜುಷಾ॒ಣೋ ಘೃ॒ತಪ್ರ॑ತೀಕೋ ಘೃ॒ತಯೋ॑ನಿರೇಧಿ । ಘೃ॒ತ-ಮ್ಪೀ॒ತ್ವಾ ಮಧು॒ ಚಾರು॒ ಗವ್ಯ॑-ಮ್ಪಿ॒ತೇವ॑ ಪು॒ತ್ರಮ॒ಭಿ [ಪು॒ತ್ರಮ॒ಭಿ, ರ॒ಕ್ಷ॒ತಾ॒ದಿ॒ಮಮ್] 27

ರ॑ಕ್ಷತಾದಿ॒ಮಮ್ । ತಸ್ಮೈ॑ ತೇ ಪ್ರತಿ॒ಹರ್ಯ॑ತೇ॒ ಜಾತ॑ವೇದೋ॒ ವಿಚ॑ರ್ಷಣೇ । ಅಗ್ನೇ॒ ಜನಾ॑ಮಿ ಸುಷ್ಟು॒ತಿಮ್ ॥ ದಿ॒ವಸ್ಪರಿ॑ ಪ್ರಥ॒ಮ-ಞ್ಜ॑ಜ್ಞೇ ಅ॒ಗ್ನಿರ॒ಸ್ಮ-ದ್ದ್ವಿ॒ತೀಯ॒-ಮ್ಪರಿ॑ ಜಾ॒ತವೇ॑ದಾಃ । ತೃ॒ತೀಯ॑ಮ॒ಫ್ಸು ನೃ॒ಮಣಾ॒ ಅಜ॑ಸ್ರ॒ಮಿನ್ಧಾ॑ನ ಏನ-ಞ್ಜರತೇ ಸ್ವಾ॒ಧೀಃ ॥ ಶುಚಿಃ॑ ಪಾವಕ॒ ವನ್ದ್ಯೋ-ಽಗ್ನೇ॑ ಬೃ॒ಹದ್ವಿ ರೋ॑ಚಸೇ । ತ್ವ-ಙ್ಘೃ॒ತೇಭಿ॒ರಾಹು॑ತಃ ॥ ದೃ॒ಶಾ॒ನೋ ರು॒ಕ್ಮ ಉ॒ರ್ವ್ಯಾ ವ್ಯ॑ದ್ಯೌ-ದ್ದು॒ರ್ಮರ್ಷ॒ಮಾಯುಃ॑ ಶ್ರಿ॒ಯೇ ರು॑ಚಾ॒ನಃ । ಅ॒ಗ್ನಿರ॒ಮೃತೋ॑ ಅಭವ॒ದ್ವಯೋ॑ಭಿ॒- [ಅಭವ॒ದ್ವಯೋ॑ಭಿಃ, ಯದೇ॑ನಂ॒] 28

-ರ್ಯದೇ॑ನ॒-ನ್ದ್ಯೌರಜ॑ನಯ-ಥ್ಸು॒ರೇತಾಃ᳚ ॥ ಆ ಯದಿ॒ಷೇ ನೃ॒ಪತಿ॒-ನ್ತೇಜ॒ ಆನ॒ಟ್ಛುಚಿ॒ ರೇತೋ॒ ನಿಷಿ॑ಕ್ತ॒-ನ್ದ್ಯೌರ॒ಭೀಕೇ᳚ । ಅ॒ಗ್ನಿ-ಶ್ಶರ್ಧ॑ಮನವ॒ದ್ಯಂ-ಯುಁವಾ॑ನಗ್ಗ್ ಸ್ವಾ॒ಧಿಯ॑-ಞ್ಜನಯ-ಥ್ಸೂ॒ದಯ॑ಚ್ಚ ॥ ಸ ತೇಜೀ॑ಯಸಾ॒ ಮನ॑ಸಾ॒ ತ್ವೋತ॑ ಉ॒ತ ಶಿ॑ಕ್ಷ ಸ್ವಪ॒ತ್ಯಸ್ಯ॑ ಶಿ॒ಕ್ಷೋಃ । ಅಗ್ನೇ॑ ರಾ॒ಯೋ ನೃತ॑ಮಸ್ಯ॒ ಪ್ರಭೂ॑ತೌ ಭೂ॒ಯಾಮ॑ ತೇ ಸುಷ್ಟು॒ತಯ॑ಶ್ಚ॒ ವಸ್ವಃ॑ ॥ ಅಗ್ನೇ॒ ಸಹ॑ನ್ತ॒ಮಾ ಭ॑ರ ದ್ಯು॒ಮ್ನಸ್ಯ॑ ಪ್ರಾ॒ಸಹಾ॑ ರ॒ಯಿಮ್ । ವಿಶ್ವಾ॒ ಯ- [ವಿಶ್ವಾ॒ ಯಃ, ಚ॒ರ್॒ಷ॒ಣೀರ॒ಭ್ಯಾ॑ಸಾ ವಾಜೇ॑ಷು] 29

ಶ್ಚ॑ರ್॒ಷ॒ಣೀರ॒ಭ್ಯಾ॑ಸಾ ವಾಜೇ॑ಷು ಸಾ॒ಸಹ॑ತ್ ॥ ತಮ॑ಗ್ನೇ ಪೃತನಾ॒ಸಹಗ್ಂ॑ ರ॒ಯಿಗ್ಂ ಸ॑ಹಸ್ವ॒ ಆ ಭ॑ರ । ತ್ವಗ್ಂ ಹಿ ಸ॒ತ್ಯೋ ಅದ್ಭು॑ತೋ ದಾ॒ತಾ ವಾಜ॑ಸ್ಯ॒ ಗೋಮ॑ತಃ ॥ ಉ॒ಕ್ಷಾನ್ನಾ॑ಯ ವ॒ಶಾನ್ನಾ॑ಯ॒ ಸೋಮ॑ಪೃಷ್ಠಾಯ ವೇ॒ಧಸೇ᳚ । ಸ್ತೋಮೈ᳚-ರ್ವಿಧೇಮಾ॒-ಽಗ್ನಯೇ᳚ ॥ ವ॒ದ್ಮಾ ಹಿ ಸೂ॑ನೋ॒ ಅಸ್ಯ॑ದ್ಮ॒ಸದ್ವಾ॑ ಚ॒ಕ್ರೇ ಅ॒ಗ್ನಿ-ರ್ಜ॒ನುಷಾ ಽಜ್ಮಾ-ಽನ್ನ᳚ಮ್ । ಸ ತ್ವ-ನ್ನ॑ ಊರ್ಜಸನ॒ ಊರ್ಜ॑-ನ್ಧಾ॒ ರಾಜೇ॑ವ ಜೇರವೃ॒ಕೇ ಕ್ಷೇ᳚ಷ್ಯ॒ನ್ತಃ ॥ ಅಗ್ನ॒ ಆಯೂಗ್ಂ॑ಷಿ [ಅಗ್ನ॒ ಆಯೂಗ್ಂ॑ಷಿ, ಪ॒ವ॒ಸ॒ ಆ] 30

ಪವಸ॒ ಆ ಸು॒ವೋರ್ಜ॒ಮಿಷ॑-ಞ್ಚ ನಃ । ಆ॒ರೇ ಬಾ॑ಧಸ್ವ ದು॒ಚ್ಛುನಾ᳚ಮ್ ॥ ಅಗ್ನೇ॒ ಪವ॑ಸ್ವ॒ ಸ್ವಪಾ॑ ಅ॒ಸ್ಮೇ ವರ್ಚಃ॑ ಸು॒ವೀರ್ಯ᳚ಮ್ । ದಧ॒ತ್ಪೋಷಗ್ಂ॑ ರ॒ಯಿ-ಮ್ಮಯಿ॑ ॥ ಅಗ್ನೇ॑ ಪಾವಕ ರೋ॒ಚಿಷಾ॑ ಮ॒ನ್ದ್ರಯಾ॑ ದೇವ ಜಿ॒ಹ್ವಯಾ᳚ । ಆ ದೇ॒ವಾನ್. ವ॑ಕ್ಷಿ॒ ಯಕ್ಷಿ॑ ಚ ॥ ಸ ನಃ॑ ಪಾವಕ ದೀದಿ॒ವೋ-ಽಗ್ನೇ॑ ದೇ॒ವಾಗ್ಂ ಇ॒ಹಾ ವ॑ಹ । ಉಪ॑ ಯ॒ಜ್ಞಗ್ಂ ಹ॒ವಿಶ್ಚ॑ ನಃ ॥ ಅ॒ಗ್ನಿ-ಶ್ಶುಚಿ॑ವ್ರತತಮ॒-ಶ್ಶುಚಿ॒-ರ್ವಿಪ್ರ॒-ಶ್ಶುಚಿಃ॑ ಕ॒ವಿಃ । ಶುಚೀ॑ ರೋಚತ॒ ಆಹು॑ತಃ ॥ ಉದ॑ಗ್ನೇ॒ ಶುಚ॑ಯ॒ಸ್ತವ॑ ಶು॒ಕ್ರಾ ಭ್ರಾಜ॑ನ್ತ ಈರತೇ । ತವ॒ ಜ್ಯೋತೀಗ್॑ಷ್ಯ॒ರ್ಚಯಃ॑ ॥ 31 ॥

(ಪು॒ರು॒ನಿ॒ಷ್ಠಃ-ಪು॑ರ್ವಣೀಕ-ಭರಾ॒-ಽಭಿ-ವಯೋ॑ಭಿ॒-ರ್ಯ-ಆಯೂಗ್ಂ॑ಷಿ॒ -ವಿಪ್ರ॒-ಶ್ಶುಚಿ॒-ಶ್ಚತು॑ರ್ದಶ ಚ) (ಅ. 14)

(ದೇ॒ವಸ್ಯ॑ - ರಕ್ಷೋ॒ಹಣೋ॑ - ವಿ॒ಭೂ-ಸ್ತ್ವಗ್ಂ ಸೋ॒ಮಾ - ಽತ್ಯ॒ನ್ಯಾನಗಾಂ᳚ - ಪೃಥಿ॒ವ್ಯಾ - ಇ॒ಷೇ ತ್ವಾ - ಽಽದ॑ದೇ॒ - ವಾಕ್ತ॒-ಸನ್ತೇ॑ - ಸಮು॒ದ್ರಗ್ಂ - ಹ॒ವಿಷ್ಮ॑ತೀರ್-ಹೃ॒ದೇ - ತ್ವಮ॑ಗ್ನೇ ರು॒ದ್ರ - ಶ್ಚತು॑ರ್ದಶ)

(ದೇ॒ವಸ್ಯ॑ - ಗ॒ಮಧ್ಯೇ॑ - ಹ॒ವಿಷ್ಮ॑ತೀಃ - ಪವಸ॒ - ಏಕ॑ತ್ರಿಗ್ಂಶತ್)

(ದೇ॒ವಸ್ಯಾ॒, ರ್ಚಯಃ॑)

॥ ಹರಿಃ॑ ಓಮ್ ॥

॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾ-ಮ್ಪ್ರಥಮಕಾಣ್ಡೇ ತೃತೀಯಃ ಪ್ರಶ್ನ-ಸ್ಸಮಾಪ್ತಃ ॥

Roman (IAST) Transliteration

kṛṣṇa yajurvedīya taittirīya saṃhitāyā-mprathamakāṇḍe tṛtīyaḥ praśnaḥ - agniṣṭome paśuḥ

o-nnamaḥ paramātmane, śrī mahāgaṇapataye namaḥ,

śrī gurubhyo namaḥ | ha॒riḥ॒ om ||

de॒vasya̭ tvā savi॒tuḥ pra̭sa॒ve᳚-'śvino᳚-rbā॒hubhyā᳚-mpū॒ṣṇo hastā᳚bhyā॒mā da॒de-'bhri̭rasi॒ nāri̭rasi॒ pari̭likhita॒gṃ॒ rakṣaḥ॒ pari̭likhitā॒ arā̭taya i॒dama॒hagṃ rakṣa̭so grī॒vā api̭ kṛntāmi॒ yo᳚-'smā-ndveṣṭi॒ ya-ñca̭ va॒ya-ndvi॒ṣma i॒dama̭sya grī॒vā api̭ kṛntāmi di॒ve tvā॒-'ntari̭kṣāya tvā pṛthi॒vyai tvā॒ śundha̭tāṃ-lo~॒kaḥ pi̭tṛ॒ṣada̭no॒ yavo̭-'si ya॒vayā॒sma-ddveṣo̭ [ya॒vayā॒sma-ddveṣaḥ̭, ya॒vayārā̭tīḥ] 1

ya॒vayārā̭tīḥ pitṛ॒ṇāgṃ sada̭nama॒syuddivagg̭ stabhā॒nā-'ntari̭kṣa-mpṛṇa pṛthi॒vī-ndṛgṃ̭ha dyutā॒nastvā̭ māru॒to mi̭notu mi॒trāvarṷṇayo-rdhru॒veṇa॒ dharma̭ṇā brahma॒vani̭-ntvā kṣatra॒vanigṃ̭ suprajā॒vanigṃ̭ rāyaspoṣa॒vani॒-mparyṷ̄hāmi॒ brahma̭ dṛgṃha kṣa॒tra-ndṛgṃ̭ha pra॒jā-ndṛgṃ̭ha rā॒yaspoṣa̭-ndṛgṃha ghṛ॒tena̭ dyāvāpṛthivī॒ ā pṛ̭ṇethā॒mindra̭sya॒ sado̭-'si viśvaja॒nasya̭ chā॒yā pari̭ tvā girvaṇo॒ gira̭ i॒mā bha̭vantu vi॒śvato̭ vṛ॒ddhāyu॒manu॒ vṛddha̭yo॒ juṣṭā̭ bhavantu॒ juṣṭa̭ya॒ indra̭sya॒ syūra॒sīndra̭sya dhru॒vama̭syai॒ndrama॒sīndrā̭ya tvā || 2 ||

(dveṣa̭ - i॒mā - a॒ṣṭāda̭śa ca ) (a. 1)

ra॒kṣo॒haṇo̭ valaga॒hano̭ vaiṣṇa॒vā-nkha̭nāmī॒dama॒ha-ntaṃ-va~̭la॒gamudva̭pāmi॒ ya-nnaḥ̭ samā॒no yamasa̭māno nica॒khāne॒damḙna॒madha̭ra-ṅkaromi॒ yo naḥ̭ samā॒no yo-'sa̭māno-'rātī॒yati̭ gāya॒treṇa॒ chanda॒sā-'va̭bāḍho vala॒gaḥ kimatra̭ bha॒dra-ntannaṷ sa॒ha vi॒rāḍa̭si sapatna॒hā sa॒mrāḍa̭si bhrātṛvya॒hā sva॒rāḍa̭syabhimāti॒hā vi̭śvā॒rāḍa̭si॒ viśvā̭sā-nnā॒ṣṭrāṇāgṃ̭ ha॒ntā [ha॒ntā, ra॒kṣo॒haṇo̭] 3

ra̭kṣo॒haṇo̭ valaga॒hanaḥ॒ prokṣā̭mi vaiṣṇa॒vā-nra̭kṣo॒haṇo̭ valaga॒hano-'va̭ nayāmi vaiṣṇa॒vān yavo̭-'si ya॒vayā॒sma-ddveṣo̭ ya॒vayārā̭tī rakṣo॒haṇo̭ valaga॒hano-'va̭ stṛṇāmi vaiṣṇa॒vā-nra̭kṣo॒haṇo̭ valaga॒hano॒-'bhi jṷhomi vaiṣṇa॒vā-nra̭kṣo॒haṇaṷ valaga॒hanā॒vupa̭ dadhāmi vaiṣṇa॒vī ra̭kṣo॒haṇaṷ valaga॒hanau॒ paryṷ̄hāmi vaiṣṇa॒vī ra̭kṣo॒haṇaṷ valaga॒hanau॒ pari̭ stṛṇāmi vaiṣṇa॒vī ra̭kṣo॒haṇaṷ valaga॒hanaṷ vaiṣṇa॒vī bṛ॒hanna̭si bṛ॒hadgrā̭vā bṛha॒tīmindrā̭ya॒ vācaṃ̭-va~da || 4 ||

( ha॒nte-ndrā̭ya॒ dve ca̭ ) (a. 2)

vi॒bhūra̭si pra॒vāha̭ṇo॒ vahni̭rasi havya॒vāha̭na-śśvā॒tro̭-'si॒ pracḙtāstu॒tho̭-'si vi॒śvavḙdā u॒śiga̭si ka॒viraṅghā̭rirasi॒ bambhā̭rirava॒syura̭si॒ duva̭svāñchu॒ndhyūra̭si mārjā॒līyaḥ̭ sa॒mrāḍa̭si kṛ॒śānuḥ̭ pari॒ṣadyo̭-'si॒ pava̭mānaḥ pra॒takvā̭-'si॒ nabha̭svā॒nasa̭mmṛṣṭo-'si havya॒sūda̭ ṛ॒tadhā̭mā-'si॒ suvarjyoti॒-rbrahma̭jyotirasi॒ suva̭rdhāmā॒-'jo᳚ 'syeka̭pā॒dahi̭rasi bu॒ddhniyo॒ raudre॒ṇānī̭kena pā॒hi mā᳚-'gne pipṛ॒hi mā॒ mā mā̭ higṃsīḥ || 5 ||

(anī̭kenā॒-ṣṭau ca̭) (a. 3)

tvagṃ so̭ma tanū॒kṛdbhyo॒ dveṣo᳚bhyo॒-'nyakṛ̭tebhya u॒ru ya॒ntā-'si॒ varṷ̄tha॒gg॒ svāhā̭ juṣā॒ṇo a॒pturājya̭sya vetu॒ svāhā॒-'yanno̭ a॒gnirvari̭vaḥ kṛṇotva॒ya-mmṛdhaḥ̭ pu॒ra ḙtu prabhi॒ndann | a॒yagṃ śatrū᳚ñjayatu॒ jarhṛ̭ṣāṇo॒-'yaṃ-vā~ja̭-ñjayatu॒ vāja̭sātau | u॒ru vi̭ṣṇo॒ vi kra̭masvo॒ru kṣayā̭ya naḥ kṛdhi | ghṛ॒ta-ṅghṛ̭tayone piba॒ prapra̭ ya॒jñapa̭ti-ntira | somo̭ jigāti gātu॒vi- [gātu॒vit, de॒vānā̭meti] 6

dde॒vānā̭meti niṣkṛ॒tamṛ॒tasya॒ yoni̭mā॒sada॒madi̭tyā॒-ssado॒-'syadi̭tyā॒-ssada॒ ā sī̭dai॒ṣa vo̭ deva savita॒-ssoma॒stagṃ ra̭kṣaddhva॒-mmā vo̭ dabhade॒tattvagṃ so̭ma de॒vo de॒vānupā̭gā i॒dama॒ha-mma̭nu॒ṣyo̭ manu॒ṣyā᳚n-thsa॒ha pra॒jayā̭ sa॒ha rā॒yaspoṣḙṇa॒ namo̭ de॒vebhyaḥ̭ sva॒dhā pi॒tṛbhya̭ i॒dama॒ha-nnirvarṷṇasya॒ pāśā॒-thsuva̭ra॒bhi [ ] 7

vi khyḙṣaṃ-vai~śvāna॒ra-ñjyoti॒ragne᳚ vratapate॒ tvaṃ-vra~॒tānāṃ᳚-vra~॒tapa̭tirasi॒ yā mama̭ ta॒nūstvayyabhṷ̄di॒yagṃ sā mayi॒ yā tava̭ ta॒nū-rmayyabhṷ̄de॒ṣā sā tvayi̭ yathāya॒tha-nnau᳚ vratapate vra॒tino᳚-rvra॒tāni̭ || 8 ||

(gā॒tu॒vida॒-bhye-ka̭trigṃśacca) (a. 4)

atya॒nyānagā॒-nnānyānupā̭gāma॒rvāktvā॒ parai̭ravida-mpa॒ro-'va̭rai॒sta-ntvā̭ juṣe vaiṣṇa॒va-ndḙvaya॒jyāyai̭ de॒vastvā̭ savi॒tā maddhvā̭-'na॒ktvoṣa̭dhe॒ trāya̭svaina॒gg॒ svadhi̭te॒ mainagṃ̭ higṃsī॒-rdiva॒magrḙṇa॒ mā lḙkhīra॒ntari̭kṣa॒-mmaddhyḙna॒ mā higṃ̭sīḥ pṛthi॒vyā sa-mbha̭va॒ vana̭spate śa॒tava̭lśo॒ vi ro̭ha sa॒hasra̭valśā॒ vi va॒yagṃ rṷhema॒ ya-ntvā॒-'yagg svadhi̭ti॒steti̭jānaḥ praṇi॒nāya̭ maha॒te saubha̭gā॒yācchi̭nno॒ rāyaḥ̭ su॒vīraḥ̭ || 9 ||

(yaṃ-daśa̭ ca) (a. 5)

pṛ॒thi॒vyai tvā॒ntari̭kṣāya tvā di॒ve tvā॒ śundha̭tāṃ-lo~॒kaḥ pi̭tṛ॒ṣada̭no॒ yavo̭-'si ya॒vayā॒sma-ddveṣo̭ ya॒vayārā̭tīḥ pitṛ॒ṇāgṃ sada̭namasi svāve॒śo᳚-'syagre॒gā nḙtṛ॒ṇāṃ-va~na॒spati॒radhi̭ tvā sthāsyati॒ tasya̭ vittā-dde॒vastvā̭ savi॒tā maddhvā̭-'naktu supippa॒lābhya॒-stvauṣa̭dhībhya॒ uddivagg̭ stabhā॒nā-'ntari̭kṣa-mpṛṇa pṛthi॒vīmupa̭reṇa dṛgṃha॒ te te॒ dhāmā᳚nyuśmasī [dhāmā᳚nyuśmasi, ga॒maddhye॒ gāvo॒] 10

ga॒maddhye॒ gāvo॒ yatra॒ bhūri̭śṛṅgā a॒yāsaḥ̭ | atrāha॒ tadṷrugā॒yasya॒ viṣṇoḥ᳚ pa॒rama-mpa॒damava̭ bhāti॒ bhūreḥ᳚ || viṣṇoḥ॒ karmā̭ṇi paśyata॒ yato᳚ vra॒tāni̭ paspa॒śe | indra̭sya॒ yujya॒-ssakhā᳚ || ta-dviṣṇoḥ᳚ para॒ma-mpa॒dagṃ sadā̭ paśyanti sū॒rayaḥ̭ | di॒vīva॒ cakṣu॒rāta̭tam || bra॒hma॒vani̭-ntvā kṣatra॒vanigṃ̭ suprajā॒vanigṃ̭ rāyaspoṣa॒vani॒-mparyṷ̄hāmi॒ brahma̭ dṛgṃha kṣa॒tra-ndṛgṃ̭ha pra॒jā-ndṛgṃ̭ha rā॒yaspoṣa̭-ndṛgṃha pari॒vīra̭si॒ pari̭ tvā॒ daivī॒rviśo᳚ vyayantā॒-mparī॒magṃ rā॒yaspoṣo॒ yaja̭māna-mmanu॒ṣyā̭ a॒ntari̭kṣasya tvā॒ sānā॒vava̭ gūhāmi || 11 ||

(u॒śma॒sī॒-poṣa॒me-kā॒nnavigṃ̭śa॒tiśca̭) (a. 6)

i॒ṣe tvo̭pa॒vīra॒syupo̭ de॒vā-ndaivī॒-rviśaḥ॒ prāgu॒-rvahnī̭ru॒śijo॒ bṛha̭spate dhā॒rayā॒ vasṷ̄ni ha॒vyā te᳚ svadantā॒-ndeva̭ tvaṣṭa॒rvasṷ raṇva॒ reva̭tī॒ rama̭ddhva-ma॒gne-rja॒nitra̭masi॒ vṛṣa̭ṇau stha u॒rvaśya̭syā॒yura̭si purū॒ravā̭ ghṛ॒tenā॒kte vṛṣa̭ṇa-ndadhāthā-ṅgāya॒tra-ñchando-'nu॒ pra jā̭yasva॒ traiṣṭṷbha॒-ñjāga̭ta॒-ñchando-'nu॒ pra jā̭yasva॒ bhava̭ta- [bhava̭tam, na॒-ssama̭nasau॒] 12

nna॒-ssama̭nasau॒ samo̭kasāvare॒pasau᳚ | mā ya॒jñagṃ higṃ̭siṣṭa॒-mmā ya॒jñapa̭ti-ñjātavedasau śi॒vau bha̭vatama॒dya naḥ̭ || a॒gnāva॒gniśca̭rati॒ pravi̭ṣṭa॒ ṛṣī̭ṇā-mpu॒tro a̭dhirā॒ja e॒ṣaḥ | svā॒hā॒kṛtya॒ brahma̭ṇā te juhomi॒ mā de॒vānā᳚-mmithu॒yā ka̭rbhāga॒dheya᳚m || 13 ||

(bhava̭ta॒-meka̭trigṃśacca) (a. 7)

ā da̭da ṛ॒tasya̭ tvā devahaviḥ॒ pāśe॒nā-''ra̭bhe॒ dharṣā॒ mānṷṣāna॒dbhyastvauṣa̭dhībhyaḥ॒ prokṣā᳚mya॒pā-mpe॒rura̭si svā॒tta-ñci॒-thsadḙvagṃ ha॒vyamāpo̭ devī॒-ssvada̭taina॒gṃ॒ sa-nte᳚ prā॒ṇo vā॒yunā̭ gacchatā॒gṃ॒ saṃ-ya~ja̭trai॒raṅgā̭ni॒ saṃ-ya~॒jñapa̭tirā॒śiṣā̭ ghṛ॒tenā॒ktau pa॒śu-ntrā̭yethā॒gṃ॒ reva̭tī-rya॒jñapa̭ti-mpriya॒dhā-'' vi̭śa॒toro̭ antarikṣa sa॒jū-rde॒vena॒ [sa॒jū-rde॒vena̭, vātḙnā॒-'sya] 14

vātḙnā॒-'sya ha॒viṣa॒stmanā̭ yaja॒ sama̭sya ta॒nuvā̭ bhava॒ varṣī̭yo॒ varṣī̭yasi ya॒jñe ya॒jñapati̭-ndhāḥ pṛ̭thi॒vyā-ssa॒mpṛcaḥ̭ pāhi॒ nama̭sta ātānā-'na॒rvā prehi̭ ghṛ॒tasya̭ ku॒lyāmanṷ sa॒ha pra॒jayā̭ sa॒ha rā॒yaspoṣe॒ṇā ''po̭ devī-śśuddhāyuva-śśu॒ddhā yū॒ya-nde॒vāgṃ ū᳚ḍhvagṃ śu॒ddhā va॒ya-mpari̭viṣṭāḥ parive॒ṣṭāro̭ vo bhūyāsma || 15 ||

(de॒vana॒-catṷścatvārigṃśacca) (a. 8)

vākta॒ ā pyā̭yatā-mprā॒ṇasta॒ ā pyā̭yatā॒-ñcakṣṷsta॒ ā pyā̭yatā॒g॒ śrotra̭-nta॒ ā pyā̭yatāṃ॒-yā~ te᳚ prā॒ṇāñchugja॒gāma॒ yā cakṣu॒ryā śrotraṃ॒-ya~tte᳚ krū॒raṃ-ya~dāsthi̭ta॒-ntatta॒ ā pyā̭yatā॒-ntatta̭ e॒tena̭ śundhatā॒-nnābhi̭sta॒ ā pyā̭yatā-mpā॒yusta॒ ā pyā̭yatāgṃ śu॒ddhāśca॒ritrā॒-śśama॒dbhya- [ma॒dhbhyaḥ, śamoṣa̭dhībhya॒-śśaṃ] 16

śśamoṣa̭dhībhya॒-śśa-mpṛ̭thi॒vyai śamaho᳚bhyā॒-moṣa̭dhe॒ trāya̭svaina॒gg॒ svadhi̭te॒ mainagṃ̭ higṃsī॒ rakṣa̭sā-mbhā॒go̭-'sī॒dama॒hagṃ rakṣo̭-'dha॒ma-ntamo̭ nayāmi॒ yo᳚-'smā-ndveṣṭi॒ ya-ñca̭ va॒ya-ndvi॒ṣma i॒damḙnamadha॒ma-ntamo̭ nayāmī॒ṣe tvā̭ ghṛ॒tena̭ dyāvāpṛthivī॒ prorṇvā̭thā॒-macchi̭nno॒ rāyaḥ̭ su॒vīra̭ u॒rva̭ntari̭kṣa॒manvi̭hi॒ vāyo॒ vīhi̭ sto॒kānā॒g॒ svāho॒rdhvana̭bhasa-mmāru॒ta-ṅga̭cchatam || 17 ||

(a॒dbhyo-vīhi॒-pañca̭ ca) (a. 9)

sa-nte॒ mana̭sā॒ manaḥ॒ sa-mprā॒ṇena̭ prā॒ṇo juṣṭa̭-nde॒vebhyo̭ ha॒vya-ṅghṛ॒tava॒-thsvāhai॒ndraḥ prā॒ṇo aṅgḙaṅge॒ ni de᳚ddhyadai॒ndro̭ 'pā॒no aṅgḙaṅge॒ vi bo̭bhuva॒ddeva̭ tvaṣṭa॒rbhūri̭ te॒ sagṃsa̭metu॒ viṣṷrūpā॒ ya-thsala̭kṣmāṇo॒ bhava̭tha deva॒trā yanta॒mava̭se॒ sakhā॒yo-'nṷ tvā mā॒tā pi॒taro̭ madantu॒ śrīra̭sya॒gnistvā᳚ śrīṇā॒tvāpa॒-ssama̭riṇa॒n vāta̭sya [ ] 18

tvā॒ dhrajyai̭ pū॒ṣṇo ragghyā̭ a॒pāmoṣa̭dhīnā॒gṃ॒ rohi̭ṣyai ghṛ॒ta-ṅghṛ̭tapāvānaḥ pibata॒ vasāṃ᳚-va~sāpāvānaḥ pibatā॒-'ntari̭kṣasya ha॒vira̭si॒ svāhā᳚ tvā॒-'ntari̭kṣāya॒ diśaḥ̭ pra॒diśa̭ ā॒diśo̭ vi॒diśa̭ u॒ddiśa॒-ssvāhā̭ di॒gbhyo namo̭ di॒gbhyaḥ || 19 ||

(vā̭tasyā॒-ṣṭāvigṃ̭śatiśca) (a. 10)

sa॒mu॒dra-ṅga̭ccha॒ svāhā॒-'ntari̭kṣa-ṅgaccha॒ svāhā̭ de॒vagṃ sa̭vi॒tāra̭-ṅgaccha॒ svāhā̭-'horā॒tre ga̭ccha॒ svāhā̭ mi॒trāvarṷṇau gaccha॒ svāhā॒ soma̭-ṅgaccha॒ svāhā̭ ya॒jña-ṅga̭ccha॒ svāhā॒ chandāgṃ̭si gaccha॒ svāhā॒ dyāvā̭pṛthi॒vī ga̭ccha॒ svāhā॒ nabho̭ di॒vya-ṅga̭ccha॒ svāhā॒-'gniṃ-vai~᳚śvāna॒ra-ṅga̭ccha॒ svāhā॒-'dbhyastvauṣa̭dhībhyo॒ mano̭ me॒ hārdi̭ yaccha ta॒nū-ntvaca̭-mpu॒tra-nnaptā̭ramaśīya॒ śuga̭si॒ tama॒bhi śo̭ca॒ yo᳚-'smā-ndveṣṭi॒ ya-ñca̭ va॒ya-ndvi॒ṣmo dhāmno̭dhāmno rājanni॒to va̭ruṇa no muñca॒ yadāpo॒ aghni̭yā॒ varu॒ṇeti॒ śapā̭mahe॒ tato̭ varuṇa no muñca || 20

(a॒si॒-ṣaḍvigṃ̭śatiśca ) (a. 11)

ha॒viṣma̭tīri॒mā āpo̭ ha॒viṣmā᳚-nde॒vo a̭ddhva॒ro ha॒viṣmā॒gṃ॒ ā vi̭vāsati ha॒viṣmāgṃ̭ astu॒ sūryaḥ̭ || a॒gnervo 'pa̭nnagṛhasya॒ sada̭si sādayāmi su॒mnāya̭ sumninī-ssu॒mne mā̭ dhattendrāgni॒yo-rbhā̭ga॒dheyī᳚-sstha mi॒trāvarṷṇayo-rbhāga॒dheyī᳚-sstha॒ viśvḙṣā-nde॒vānā᳚-mbhāga॒dheyī᳚-sstha ya॒jñe jā̭gṛta || 21 ||

(ha॒viṣma̭tī॒-ścatṷstrigṃśat) (a. 12)

hṛ॒de tvā॒ mana̭se tvā di॒ve tvā॒ sūryā̭ya tvo॒rdhvami॒mama̭ddhva॒ra-ṅkṛ̭dhi di॒vi de॒veṣu॒ hotrā̭ yaccha॒ soma̭ rāja॒nnehyava̭ roha॒ mā bhermā saṃ-vi~̭kthā॒ mā tvā̭ higṃsiṣa-mpra॒jāstvamu॒pāva̭roha pra॒jāstvāmu॒pāva̭rohantu śṛ॒ṇotva॒gni-ssa॒midhā॒ hava̭-mme śṛ॒ṇvantvāpo̭ dhi॒ṣaṇā᳚śca de॒vīḥ | śṛ॒ṇota̭ grāvāṇo vi॒duṣo॒ nu [ ] 22

ya॒jñagṃ śṛ॒ṇotṷ de॒va-ssa̭vi॒tā hava̭-mme | devī̭rāpo apā-nnapā॒dya ū॒rmirha̭vi॒ṣya̭ indri॒yāvā᳚-nma॒dinta̭ma॒sta-nde॒vebhyo̭ deva॒trā dha̭tta śu॒kragṃ śṷkra॒pebhyo॒ yeṣā᳚-mbhā॒ga-sstha svāhā॒ kārṣi̭ra॒syapā॒-'pā-mmṛ॒ddhragṃ sa̭mu॒drasya॒ vo-'kṣi̭tyā॒ unna̭ye | yama̭gne pṛ॒thsu martya॒māvo॒ vājḙṣu॒ ya-ñju॒nāḥ | sa yantā॒ śaśva̭tī॒riṣaḥ̭ || 23 ||

( nu-sa॒ptaca̭tvārigṃśacca) (a. 13)

tvama̭gne ru॒dro asṷro ma॒ho di॒vastvagṃ śardho॒ mārṷta-mpṛ॒kṣa ī̭śiṣe | tvaṃ-vā~tai̭raru॒ṇairyā̭si śaṅga॒yastva-mpū॒ṣā vi̭dha॒taḥ pā̭si॒ nutmanā᳚ || ā vo॒ rājā̭namaddhva॒rasya̭ ru॒dragṃ hotā̭ragṃ satya॒yaja॒gṃ॒ roda̭syoḥ | a॒gni-mpu॒rā ta̭nayi॒tno ra॒cittā॒ddhira̭ṇyarūpa॒mava̭se kṛṇuddhvam || a॒gnirhotā॒ ni ṣa̭sādā॒ yajī̭yānu॒pasthḙ mā॒tu-ssṷra॒bhāvṷ lo॒ke | yuvā̭ ka॒viḥ pṷruni॒ṣṭha [pṷruni॒ṣṭhaḥ, ṛ॒tāvā̭ dha॒rtā] 24

ṛ॒tāvā̭ dha॒rtā kṛ̭ṣṭī॒nāmu॒ta maddhya̭ i॒ddhaḥ ||sā॒ddhvīma̭ka-rde॒vavī̭ti-nno a॒dya ya॒jñasya̭ ji॒hvāma̭vidāma॒ guhyā᳚m | sa āyu॒rā-'gā᳚-thsura॒bhirvasā̭no bha॒drāma̭ka-rde॒vahṷ̄ti-nno a॒dya || akra̭ndada॒gni-ssta॒naya̭nniva॒ dyauḥ, kṣāmā॒ reri̭hadvī॒rudhaḥ̭ sama॒ñjann | sa॒dyo ja̭jñā॒no vi hīmi॒ddho akhya॒dā roda̭sī bhā॒nunā̭ bhātya॒ntaḥ || tve vasṷ̄ni purvaṇīka [purvaṇīka, ho॒ta॒rdo॒ṣā] 25

hotardo॒ṣā vasto॒reri̭re ya॒jñiyā̭saḥ | kṣāmḙva॒ viśvā॒ bhuva̭nāni॒ yasmi॒n-thsagṃ saubha̭gāni dadhi॒re pā̭va॒ke || tubhya॒-ntā a̭ṅgirastama॒ viśvā᳚-ssukṣi॒tayaḥ॒ pṛtha̭k | agne॒ kāmā̭ya yemire || a॒śyāma॒ ta-ṅkāma̭magne॒ tavo॒tya̭śyāma̭ ra॒yigṃ ra̭yiva-ssu॒vīra᳚m | a॒śyāma॒ vāja̭ma॒bhi vā॒jaya̭nto॒ 'śyāma̭ dyu॒mnama̭jarā॒jara̭-nte ||śreṣṭhaṃ̭-ya~viṣṭha bhāra॒tāgne᳚ dyu॒manta॒mā bha̭ra || 26 ||

vaso̭ puru॒spṛhagṃ̭ ra॒yim || sa śvi̭tā॒nasta̭nya॒tū ro̭cana॒sthā a॒jarḙbhi॒-rnāna̭dadbhi॒ryavi̭ṣṭhaḥ | yaḥ pā̭va॒kaḥ pṷru॒tamaḥ̭ pu॒rūṇi̭ pṛ॒thūnya॒gnira̭nu॒yāti॒ bharvanṋ || āyṷṣṭe vi॒śvato̭ dadhada॒yama॒gni-rvare᳚ṇyaḥ | puna̭ste prā॒ṇa ā-'ya̭ti॒ parā॒ yakṣmagṃ̭ suvāmi te || ā॒yu॒rdā a̭gne ha॒viṣo̭ juṣā॒ṇo ghṛ॒tapra̭tīko ghṛ॒tayo̭niredhi | ghṛ॒ta-mpī॒tvā madhu॒ cāru॒ gavya̭-mpi॒teva̭ pu॒trama॒bhi [pu॒trama॒bhi, ra॒kṣa॒tā॒di॒mam] 27

ra̭kṣatādi॒mam | tasmai̭ te prati॒harya̭te॒ jāta̭vedo॒ vica̭rṣaṇe | agne॒ janā̭mi suṣṭu॒tim || di॒vaspari̭ pratha॒ma-ñja̭jñe a॒gnira॒sma-ddvi॒tīya॒-mpari̭ jā॒tavḙdāḥ | tṛ॒tīya̭ma॒phsu nṛ॒maṇā॒ aja̭sra॒mindhā̭na ena-ñjarate svā॒dhīḥ || śuciḥ̭ pāvaka॒ vandyo-'gnḙ bṛ॒hadvi ro̭case | tva-ṅghṛ॒tebhi॒rāhṷtaḥ || dṛ॒śā॒no ru॒kma u॒rvyā vya̭dyau-ddu॒rmarṣa॒māyuḥ̭ śri॒ye rṷcā॒naḥ | a॒gnira॒mṛto̭ abhava॒dvayo̭bhi॒- [abhava॒dvayo̭bhiḥ, yadḙnaṃ॒] 28

-ryadḙna॒-ndyauraja̭naya-thsu॒retāḥ᳚ || ā yadi॒ṣe nṛ॒pati॒-nteja॒ āna॒ṭchuci॒ reto॒ niṣi̭kta॒-ndyaura॒bhīke᳚ | a॒gni-śśardha̭manava॒dyaṃ-yu~vā̭nagg svā॒dhiya̭-ñjanaya-thsū॒daya̭cca || sa tejī̭yasā॒ mana̭sā॒ tvota̭ u॒ta śi̭kṣa svapa॒tyasya̭ śi॒kṣoḥ | agnḙ rā॒yo nṛta̭masya॒ prabhṷ̄tau bhū॒yāma̭ te suṣṭu॒taya̭śca॒ vasvaḥ̭ || agne॒ saha̭nta॒mā bha̭ra dyu॒mnasya̭ prā॒sahā̭ ra॒yim | viśvā॒ ya- [viśvā॒ yaḥ, ca॒r॒ṣa॒ṇīra॒bhyā̭sā vājḙṣu] 29

śca̭r॒ṣa॒ṇīra॒bhyā̭sā vājḙṣu sā॒saha̭t || tama̭gne pṛtanā॒sahagṃ̭ ra॒yigṃ sa̭hasva॒ ā bha̭ra | tvagṃ hi sa॒tyo adbhṷto dā॒tā vāja̭sya॒ goma̭taḥ || u॒kṣānnā̭ya va॒śānnā̭ya॒ soma̭pṛṣṭhāya ve॒dhase᳚ | stomai᳚-rvidhemā॒-'gnaye᳚ || va॒dmā hi sṷ̄no॒ asya̭dma॒sadvā̭ ca॒kre a॒gni-rja॒nuṣā 'jmā-'nna᳚m | sa tva-nna̭ ūrjasana॒ ūrja̭-ndhā॒ rājḙva jeravṛ॒ke kṣe᳚ṣya॒ntaḥ || agna॒ āyūgṃ̭ṣi [agna॒ āyūgṃ̭ṣi, pa॒va॒sa॒ ā] 30

pavasa॒ ā su॒vorja॒miṣa̭-ñca naḥ | ā॒re bā̭dhasva du॒cchunā᳚m || agne॒ pava̭sva॒ svapā̭ a॒sme varcaḥ̭ su॒vīrya᳚m | dadha॒tpoṣagṃ̭ ra॒yi-mmayi̭ || agnḙ pāvaka ro॒ciṣā̭ ma॒ndrayā̭ deva ji॒hvayā᳚ | ā de॒vān. va̭kṣi॒ yakṣi̭ ca || sa naḥ̭ pāvaka dīdi॒vo-'gnḙ de॒vāgṃ i॒hā va̭ha | upa̭ ya॒jñagṃ ha॒viśca̭ naḥ || a॒gni-śśuci̭vratatama॒-śśuci॒-rvipra॒-śśuciḥ̭ ka॒viḥ | śucī̭ rocata॒ āhṷtaḥ || uda̭gne॒ śuca̭ya॒stava̭ śu॒krā bhrāja̭nta īrate | tava॒ jyotīg̭ṣya॒rcayaḥ̭ || 31 ||

(pu॒ru॒ni॒ṣṭhaḥ-pṷrvaṇīka-bharā॒-'bhi-vayo̭bhi॒-rya-āyūgṃ̭ṣi॒ -vipra॒-śśuci॒-ścatṷrdaśa ca) (a. 14)

(de॒vasya̭ - rakṣo॒haṇo̭ - vi॒bhū-stvagṃ so॒mā - 'tya॒nyānagāṃ᳚ - pṛthi॒vyā - i॒ṣe tvā - ''da̭de॒ - vākta॒-santḙ - samu॒dragṃ - ha॒viṣma̭tīr-hṛ॒de - tvama̭gne ru॒dra - ścatṷrdaśa)

(de॒vasya̭ - ga॒madhyḙ - ha॒viṣma̭tīḥ - pavasa॒ - eka̭trigṃśat)

(de॒vasyā॒, rcayaḥ̭)

|| hariḥ̭ om ||

|| kṛṣṇa yajurvedīya taittirīya saṃhitāyā-mprathamakāṇḍe tṛtīyaḥ praśna-ssamāptaḥ ||

Sanskrit — Devanagari (original)

कृष्ण यजुर्वेदीय तैत्तिरीय संहिताया-म्प्रथमकाण्डे तृतीयः प्रश्नः - अग्निष्टोमे पशुः

ओ-न्नमः परमात्मने, श्री महागणपतये नमः,

श्री गुरुभ्यो नमः । ह॒रिः॒ ओम् ॥

दे॒वस्य॑ त्वा सवि॒तुः प्र॑स॒वे᳚-ऽश्विनो᳚-र्बा॒हुभ्या᳚-म्पू॒ष्णो हस्ता᳚भ्या॒मा द॒दे-ऽभ्रि॑रसि॒ नारि॑रसि॒ परि॑लिखित॒ग्ं॒ रक्षः॒ परि॑लिखिता॒ अरा॑तय इ॒दम॒हग्ं रक्ष॑सो ग्री॒वा अपि॑ कृन्तामि॒ यो᳚-ऽस्मा-न्द्वेष्टि॒ य-ञ्च॑ व॒य-न्द्वि॒ष्म इ॒दम॑स्य ग्री॒वा अपि॑ कृन्तामि दि॒वे त्वा॒-ऽन्तरि॑क्षाय त्वा पृथि॒व्यै त्वा॒ शुन्ध॑तां-लोँ॒कः पि॑तृ॒षद॑नो॒ यवो॑-ऽसि य॒वया॒स्म-द्द्वेषो॑ [य॒वया॒स्म-द्द्वेषः॑, य॒वयारा॑तीः] 1

य॒वयारा॑तीः पितृ॒णाग्ं सद॑नम॒स्युद्दिवग्ग्॑ स्तभा॒ना-ऽन्तरि॑क्ष-म्पृण पृथि॒वी-न्दृग्ं॑ह द्युता॒नस्त्वा॑ मारु॒तो मि॑नोतु मि॒त्रावरु॑णयो-र्ध्रु॒वेण॒ धर्म॑णा ब्रह्म॒वनि॑-न्त्वा क्षत्र॒वनिग्ं॑ सुप्रजा॒वनिग्ं॑ रायस्पोष॒वनि॒-म्पर्यू॑हामि॒ ब्रह्म॑ दृग्ंह क्ष॒त्र-न्दृग्ं॑ह प्र॒जा-न्दृग्ं॑ह रा॒यस्पोष॑-न्दृग्ंह घृ॒तेन॑ द्यावापृथिवी॒ आ पृ॑णेथा॒मिन्द्र॑स्य॒ सदो॑-ऽसि विश्वज॒नस्य॑ छा॒या परि॑ त्वा गिर्वणो॒ गिर॑ इ॒मा भ॑वन्तु वि॒श्वतो॑ वृ॒द्धायु॒मनु॒ वृद्ध॑यो॒ जुष्टा॑ भवन्तु॒ जुष्ट॑य॒ इन्द्र॑स्य॒ स्यूर॒सीन्द्र॑स्य ध्रु॒वम॑स्यै॒न्द्रम॒सीन्द्रा॑य त्वा ॥ 2 ॥

(द्वेष॑ - इ॒मा - अ॒ष्टाद॑श च ) (अ. 1)

र॒क्षो॒हणो॑ वलग॒हनो॑ वैष्ण॒वा-न्ख॑नामी॒दम॒ह-न्तं-वँ॑ल॒गमुद्व॑पामि॒ य-न्नः॑ समा॒नो यमस॑मानो निच॒खाने॒दमे॑न॒मध॑र-ङ्करोमि॒ यो नः॑ समा॒नो यो-ऽस॑मानो-ऽराती॒यति॑ गाय॒त्रेण॒ छन्द॒सा-ऽव॑बाढो वल॒गः किमत्र॑ भ॒द्र-न्तन्नौ॑ स॒ह वि॒राड॑सि सपत्न॒हा स॒म्राड॑सि भ्रातृव्य॒हा स्व॒राड॑स्यभिमाति॒हा वि॑श्वा॒राड॑सि॒ विश्वा॑सा-न्ना॒ष्ट्राणाग्ं॑ ह॒न्ता [ह॒न्ता, र॒क्षो॒हणो॑] 3

र॑क्षो॒हणो॑ वलग॒हनः॒ प्रोक्षा॑मि वैष्ण॒वा-न्र॑क्षो॒हणो॑ वलग॒हनो-ऽव॑ नयामि वैष्ण॒वान् यवो॑-ऽसि य॒वया॒स्म-द्द्वेषो॑ य॒वयारा॑ती रक्षो॒हणो॑ वलग॒हनो-ऽव॑ स्तृणामि वैष्ण॒वा-न्र॑क्षो॒हणो॑ वलग॒हनो॒-ऽभि जु॑होमि वैष्ण॒वा-न्र॑क्षो॒हणौ॑ वलग॒हना॒वुप॑ दधामि वैष्ण॒वी र॑क्षो॒हणौ॑ वलग॒हनौ॒ पर्यू॑हामि वैष्ण॒वी र॑क्षो॒हणौ॑ वलग॒हनौ॒ परि॑ स्तृणामि वैष्ण॒वी र॑क्षो॒हणौ॑ वलग॒हनौ॑ वैष्ण॒वी बृ॒हन्न॑सि बृ॒हद्ग्रा॑वा बृह॒तीमिन्द्रा॑य॒ वाचं॑-वँद ॥ 4 ॥

( ह॒न्ते-न्द्रा॑य॒ द्वे च॑ ) (अ. 2)

वि॒भूर॑सि प्र॒वाह॑णो॒ वह्नि॑रसि हव्य॒वाह॑न-श्श्वा॒त्रो॑-ऽसि॒ प्रचे॑तास्तु॒थो॑-ऽसि वि॒श्ववे॑दा उ॒शिग॑सि क॒विरङ्घा॑रिरसि॒ बम्भा॑रिरव॒स्युर॑सि॒ दुव॑स्वाञ्छु॒न्ध्यूर॑सि मार्जा॒लीयः॑ स॒म्राड॑सि कृ॒शानुः॑ परि॒षद्यो॑-ऽसि॒ पव॑मानः प्र॒तक्वा॑-ऽसि॒ नभ॑स्वा॒नस॑म्मृष्टो-ऽसि हव्य॒सूद॑ ऋ॒तधा॑मा-ऽसि॒ सुवर्ज्योति॒-र्ब्रह्म॑ज्योतिरसि॒ सुव॑र्धामा॒-ऽजो᳚ ऽस्येक॑पा॒दहि॑रसि बु॒द्ध्नियो॒ रौद्रे॒णानी॑केन पा॒हि मा᳚-ऽग्ने पिपृ॒हि मा॒ मा मा॑ हिग्ंसीः ॥ 5 ॥

(अनी॑केना॒-ष्टौ च॑) (अ. 3)

त्वग्ं सो॑म तनू॒कृद्भ्यो॒ द्वेषो᳚भ्यो॒-ऽन्यकृ॑तेभ्य उ॒रु य॒न्ता-ऽसि॒ वरू॑थ॒ग्ग्॒ स्वाहा॑ जुषा॒णो अ॒प्तुराज्य॑स्य वेतु॒ स्वाहा॒-ऽयन्नो॑ अ॒ग्निर्वरि॑वः कृणोत्व॒य-म्मृधः॑ पु॒र ए॑तु प्रभि॒न्दन्न् । अ॒यग्ं शत्रू᳚ञ्जयतु॒ जर्हृ॑षाणो॒-ऽयं-वाँज॑-ञ्जयतु॒ वाज॑सातौ । उ॒रु वि॑ष्णो॒ वि क्र॑मस्वो॒रु क्षया॑य नः कृधि । घृ॒त-ङ्घृ॑तयोने पिब॒ प्रप्र॑ य॒ज्ञप॑ति-न्तिर । सोमो॑ जिगाति गातु॒वि- [गातु॒वित्, दे॒वाना॑मेति] 6

द्दे॒वाना॑मेति निष्कृ॒तमृ॒तस्य॒ योनि॑मा॒सद॒मदि॑त्या॒-स्सदो॒-ऽस्यदि॑त्या॒-स्सद॒ आ सी॑दै॒ष वो॑ देव सवित॒-स्सोम॒स्तग्ं र॑क्षद्ध्व॒-म्मा वो॑ दभदे॒तत्त्वग्ं सो॑म दे॒वो दे॒वानुपा॑गा इ॒दम॒ह-म्म॑नु॒ष्यो॑ मनु॒ष्या᳚न्-थ्स॒ह प्र॒जया॑ स॒ह रा॒यस्पोषे॑ण॒ नमो॑ दे॒वेभ्यः॑ स्व॒धा पि॒तृभ्य॑ इ॒दम॒ह-न्निर्वरु॑णस्य॒ पाशा॒-थ्सुव॑र॒भि [ ] 7

वि ख्ये॑षं-वैँश्वान॒र-ञ्ज्योति॒रग्ने᳚ व्रतपते॒ त्वं-व्रँ॒तानां᳚-व्रँ॒तप॑तिरसि॒ या मम॑ त॒नूस्त्वय्यभू॑दि॒यग्ं सा मयि॒ या तव॑ त॒नू-र्मय्यभू॑दे॒षा सा त्वयि॑ यथाय॒थ-न्नौ᳚ व्रतपते व्र॒तिनो᳚-र्व्र॒तानि॑ ॥ 8 ॥

(गा॒तु॒विद॒-भ्ये-क॑त्रिग्ंशच्च) (अ. 4)

अत्य॒न्यानगा॒-न्नान्यानुपा॑गाम॒र्वाक्त्वा॒ परै॑रविद-म्प॒रो-ऽव॑रै॒स्त-न्त्वा॑ जुषे वैष्ण॒व-न्दे॑वय॒ज्यायै॑ दे॒वस्त्वा॑ सवि॒ता मद्ध्वा॑-ऽन॒क्त्वोष॑धे॒ त्राय॑स्वैन॒ग्ग्॒ स्वधि॑ते॒ मैनग्ं॑ हिग्ंसी॒-र्दिव॒मग्रे॑ण॒ मा ले॑खीर॒न्तरि॑क्ष॒-म्मद्ध्ये॑न॒ मा हिग्ं॑सीः पृथि॒व्या स-म्भ॑व॒ वन॑स्पते श॒तव॑ल्शो॒ वि रो॑ह स॒हस्र॑वल्शा॒ वि व॒यग्ं रु॑हेम॒ य-न्त्वा॒-ऽयग्ग् स्वधि॑ति॒स्तेति॑जानः प्रणि॒नाय॑ मह॒ते सौभ॑गा॒याच्छि॑न्नो॒ रायः॑ सु॒वीरः॑ ॥ 9 ॥

(यं-दश॑ च) (अ. 5)

पृ॒थि॒व्यै त्वा॒न्तरि॑क्षाय त्वा दि॒वे त्वा॒ शुन्ध॑तां-लोँ॒कः पि॑तृ॒षद॑नो॒ यवो॑-ऽसि य॒वया॒स्म-द्द्वेषो॑ य॒वयारा॑तीः पितृ॒णाग्ं सद॑नमसि स्वावे॒शो᳚-ऽस्यग्रे॒गा ने॑तृ॒णां-वँन॒स्पति॒रधि॑ त्वा स्थास्यति॒ तस्य॑ वित्ता-द्दे॒वस्त्वा॑ सवि॒ता मद्ध्वा॑-ऽनक्तु सुपिप्प॒लाभ्य॒-स्त्वौष॑धीभ्य॒ उद्दिवग्ग्॑ स्तभा॒ना-ऽन्तरि॑क्ष-म्पृण पृथि॒वीमुप॑रेण दृग्ंह॒ ते ते॒ धामा᳚न्युश्मसी [धामा᳚न्युश्मसि, ग॒मद्ध्ये॒ गावो॒] 10

ग॒मद्ध्ये॒ गावो॒ यत्र॒ भूरि॑शृङ्गा अ॒यासः॑ । अत्राह॒ तदु॑रुगा॒यस्य॒ विष्णोः᳚ प॒रम-म्प॒दमव॑ भाति॒ भूरेः᳚ ॥ विष्णोः॒ कर्मा॑णि पश्यत॒ यतो᳚ व्र॒तानि॑ पस्प॒शे । इन्द्र॑स्य॒ युज्य॒-स्सखा᳚ ॥ त-द्विष्णोः᳚ पर॒म-म्प॒दग्ं सदा॑ पश्यन्ति सू॒रयः॑ । दि॒वीव॒ चक्षु॒रात॑तम् ॥ ब्र॒ह्म॒वनि॑-न्त्वा क्षत्र॒वनिग्ं॑ सुप्रजा॒वनिग्ं॑ रायस्पोष॒वनि॒-म्पर्यू॑हामि॒ ब्रह्म॑ दृग्ंह क्ष॒त्र-न्दृग्ं॑ह प्र॒जा-न्दृग्ं॑ह रा॒यस्पोष॑-न्दृग्ंह परि॒वीर॑सि॒ परि॑ त्वा॒ दैवी॒र्विशो᳚ व्ययन्ता॒-म्परी॒मग्ं रा॒यस्पोषो॒ यज॑मान-म्मनु॒ष्या॑ अ॒न्तरि॑क्षस्य त्वा॒ साना॒वव॑ गूहामि ॥ 11 ॥

(उ॒श्म॒सी॒-पोष॒मे-का॒न्नविग्ं॑श॒तिश्च॑) (अ. 6)

इ॒षे त्वो॑प॒वीर॒स्युपो॑ दे॒वा-न्दैवी॒-र्विशः॒ प्रागु॒-र्वह्नी॑रु॒शिजो॒ बृह॑स्पते धा॒रया॒ वसू॑नि ह॒व्या ते᳚ स्वदन्ता॒-न्देव॑ त्वष्ट॒र्वसु॑ रण्व॒ रेव॑ती॒ रम॑द्ध्व-म॒ग्ने-र्ज॒नित्र॑मसि॒ वृष॑णौ स्थ उ॒र्वश्य॑स्या॒युर॑सि पुरू॒रवा॑ घृ॒तेना॒क्ते वृष॑ण-न्दधाथा-ङ्गाय॒त्र-ञ्छन्दो-ऽनु॒ प्र जा॑यस्व॒ त्रैष्टु॑भ॒-ञ्जाग॑त॒-ञ्छन्दो-ऽनु॒ प्र जा॑यस्व॒ भव॑त- [भव॑तम्, न॒-स्सम॑नसौ॒] 12

न्न॒-स्सम॑नसौ॒ समो॑कसावरे॒पसौ᳚ । मा य॒ज्ञग्ं हिग्ं॑सिष्ट॒-म्मा य॒ज्ञप॑ति-ञ्जातवेदसौ शि॒वौ भ॑वतम॒द्य नः॑ ॥ अ॒ग्नाव॒ग्निश्च॑रति॒ प्रवि॑ष्ट॒ ऋषी॑णा-म्पु॒त्रो अ॑धिरा॒ज ए॒षः । स्वा॒हा॒कृत्य॒ ब्रह्म॑णा ते जुहोमि॒ मा दे॒वाना᳚-म्मिथु॒या क॑र्भाग॒धेय᳚म् ॥ 13 ॥

(भव॑त॒-मेक॑त्रिग्ंशच्च) (अ. 7)

आ द॑द ऋ॒तस्य॑ त्वा देवहविः॒ पाशे॒ना-ऽऽर॑भे॒ धर्षा॒ मानु॑षान॒द्भ्यस्त्वौष॑धीभ्यः॒ प्रोक्षा᳚म्य॒पा-म्पे॒रुर॑सि स्वा॒त्त-ञ्चि॒-थ्सदे॑वग्ं ह॒व्यमापो॑ देवी॒-स्स्वद॑तैन॒ग्ं॒ स-न्ते᳚ प्रा॒णो वा॒युना॑ गच्छता॒ग्ं॒ सं-यँज॑त्रै॒रङ्गा॑नि॒ सं-यँ॒ज्ञप॑तिरा॒शिषा॑ घृ॒तेना॒क्तौ प॒शु-न्त्रा॑येथा॒ग्ं॒ रेव॑ती-र्य॒ज्ञप॑ति-म्प्रिय॒धा-ऽऽ वि॑श॒तोरो॑ अन्तरिक्ष स॒जू-र्दे॒वेन॒ [स॒जू-र्दे॒वेन॑, वाते॑ना॒-ऽस्य] 14

वाते॑ना॒-ऽस्य ह॒विष॒स्त्मना॑ यज॒ सम॑स्य त॒नुवा॑ भव॒ वर्षी॑यो॒ वर्षी॑यसि य॒ज्ञे य॒ज्ञपति॑-न्धाः पृ॑थि॒व्या-स्स॒म्पृचः॑ पाहि॒ नम॑स्त आताना-ऽन॒र्वा प्रेहि॑ घृ॒तस्य॑ कु॒ल्यामनु॑ स॒ह प्र॒जया॑ स॒ह रा॒यस्पोषे॒णा ऽऽपो॑ देवी-श्शुद्धायुव-श्शु॒द्धा यू॒य-न्दे॒वाग्ं ऊ᳚ढ्वग्ं शु॒द्धा व॒य-म्परि॑विष्टाः परिवे॒ष्टारो॑ वो भूयास्म ॥ 15 ॥

(दे॒वन॒-चतु॑श्चत्वारिग्ंशच्च) (अ. 8)

वाक्त॒ आ प्या॑यता-म्प्रा॒णस्त॒ आ प्या॑यता॒-ञ्चक्षु॑स्त॒ आ प्या॑यता॒ग्॒ श्रोत्र॑-न्त॒ आ प्या॑यतां॒-याँ ते᳚ प्रा॒णाञ्छुग्ज॒गाम॒ या चक्षु॒र्या श्रोत्रं॒-यँत्ते᳚ क्रू॒रं-यँदास्थि॑त॒-न्तत्त॒ आ प्या॑यता॒-न्तत्त॑ ए॒तेन॑ शुन्धता॒-न्नाभि॑स्त॒ आ प्या॑यता-म्पा॒युस्त॒ आ प्या॑यताग्ं शु॒द्धाश्च॒रित्रा॒-श्शम॒द्भ्य- [म॒ध्भ्यः, शमोष॑धीभ्य॒-श्शं] 16

श्शमोष॑धीभ्य॒-श्श-म्पृ॑थि॒व्यै शमहो᳚भ्या॒-मोष॑धे॒ त्राय॑स्वैन॒ग्ग्॒ स्वधि॑ते॒ मैनग्ं॑ हिग्ंसी॒ रक्ष॑सा-म्भा॒गो॑-ऽसी॒दम॒हग्ं रक्षो॑-ऽध॒म-न्तमो॑ नयामि॒ यो᳚-ऽस्मा-न्द्वेष्टि॒ य-ञ्च॑ व॒य-न्द्वि॒ष्म इ॒दमे॑नमध॒म-न्तमो॑ नयामी॒षे त्वा॑ घृ॒तेन॑ द्यावापृथिवी॒ प्रोर्ण्वा॑था॒-मच्छि॑न्नो॒ रायः॑ सु॒वीर॑ उ॒र्व॑न्तरि॑क्ष॒मन्वि॑हि॒ वायो॒ वीहि॑ स्तो॒काना॒ग्॒ स्वाहो॒र्ध्वन॑भस-म्मारु॒त-ङ्ग॑च्छतम् ॥ 17 ॥

(अ॒द्भ्यो-वीहि॒-पञ्च॑ च) (अ. 9)

स-न्ते॒ मन॑सा॒ मनः॒ स-म्प्रा॒णेन॑ प्रा॒णो जुष्ट॑-न्दे॒वेभ्यो॑ ह॒व्य-ङ्घृ॒तव॒-थ्स्वाहै॒न्द्रः प्रा॒णो अङ्गे॑अङ्गे॒ नि दे᳚द्ध्यदै॒न्द्रो॑ ऽपा॒नो अङ्गे॑अङ्गे॒ वि बो॑भुव॒द्देव॑ त्वष्ट॒र्भूरि॑ ते॒ सग्ंस॑मेतु॒ विषु॑रूपा॒ य-थ्सल॑क्ष्माणो॒ भव॑थ देव॒त्रा यन्त॒मव॑से॒ सखा॒यो-ऽनु॑ त्वा मा॒ता पि॒तरो॑ मदन्तु॒ श्रीर॑स्य॒ग्निस्त्वा᳚ श्रीणा॒त्वाप॒-स्सम॑रिण॒न् वात॑स्य [ ] 18

त्वा॒ ध्रज्यै॑ पू॒ष्णो रग्ग्ह्या॑ अ॒पामोष॑धीना॒ग्ं॒ रोहि॑ष्यै घृ॒त-ङ्घृ॑तपावानः पिबत॒ वसां᳚-वँसापावानः पिबता॒-ऽन्तरि॑क्षस्य ह॒विर॑सि॒ स्वाहा᳚ त्वा॒-ऽन्तरि॑क्षाय॒ दिशः॑ प्र॒दिश॑ आ॒दिशो॑ वि॒दिश॑ उ॒द्दिश॒-स्स्वाहा॑ दि॒ग्भ्यो नमो॑ दि॒ग्भ्यः ॥ 19 ॥

(वा॑तस्या॒-ष्टाविग्ं॑शतिश्च) (अ. 10)

स॒मु॒द्र-ङ्ग॑च्छ॒ स्वाहा॒-ऽन्तरि॑क्ष-ङ्गच्छ॒ स्वाहा॑ दे॒वग्ं स॑वि॒तार॑-ङ्गच्छ॒ स्वाहा॑-ऽहोरा॒त्रे ग॑च्छ॒ स्वाहा॑ मि॒त्रावरु॑णौ गच्छ॒ स्वाहा॒ सोम॑-ङ्गच्छ॒ स्वाहा॑ य॒ज्ञ-ङ्ग॑च्छ॒ स्वाहा॒ छन्दाग्ं॑सि गच्छ॒ स्वाहा॒ द्यावा॑पृथि॒वी ग॑च्छ॒ स्वाहा॒ नभो॑ दि॒व्य-ङ्ग॑च्छ॒ स्वाहा॒-ऽग्निं-वैँ᳚श्वान॒र-ङ्ग॑च्छ॒ स्वाहा॒-ऽद्भ्यस्त्वौष॑धीभ्यो॒ मनो॑ मे॒ हार्दि॑ यच्छ त॒नू-न्त्वच॑-म्पु॒त्र-न्नप्ता॑रमशीय॒ शुग॑सि॒ तम॒भि शो॑च॒ यो᳚-ऽस्मा-न्द्वेष्टि॒ य-ञ्च॑ व॒य-न्द्वि॒ष्मो धाम्नो॑धाम्नो राजन्नि॒तो व॑रुण नो मुञ्च॒ यदापो॒ अघ्नि॑या॒ वरु॒णेति॒ शपा॑महे॒ ततो॑ वरुण नो मुञ्च ॥ 20

(अ॒सि॒-षड्विग्ं॑शतिश्च ) (अ. 11)

ह॒विष्म॑तीरि॒मा आपो॑ ह॒विष्मा᳚-न्दे॒वो अ॑द्ध्व॒रो ह॒विष्मा॒ग्ं॒ आ वि॑वासति ह॒विष्माग्ं॑ अस्तु॒ सूर्यः॑ ॥ अ॒ग्नेर्वो ऽप॑न्नगृहस्य॒ सद॑सि सादयामि सु॒म्नाय॑ सुम्निनी-स्सु॒म्ने मा॑ धत्तेन्द्राग्नि॒यो-र्भा॑ग॒धेयी᳚-स्स्थ मि॒त्रावरु॑णयो-र्भाग॒धेयी᳚-स्स्थ॒ विश्वे॑षा-न्दे॒वाना᳚-म्भाग॒धेयी᳚-स्स्थ य॒ज्ञे जा॑गृत ॥ 21 ॥

(ह॒विष्म॑ती॒-श्चतु॑स्त्रिग्ंशत्) (अ. 12)

हृ॒दे त्वा॒ मन॑से त्वा दि॒वे त्वा॒ सूर्या॑य त्वो॒र्ध्वमि॒मम॑द्ध्व॒र-ङ्कृ॑धि दि॒वि दे॒वेषु॒ होत्रा॑ यच्छ॒ सोम॑ राज॒न्नेह्यव॑ रोह॒ मा भेर्मा सं-विँ॑क्था॒ मा त्वा॑ हिग्ंसिष-म्प्र॒जास्त्वमु॒पाव॑रोह प्र॒जास्त्वामु॒पाव॑रोहन्तु शृ॒णोत्व॒ग्नि-स्स॒मिधा॒ हव॑-म्मे शृ॒ण्वन्त्वापो॑ धि॒षणा᳚श्च दे॒वीः । शृ॒णोत॑ ग्रावाणो वि॒दुषो॒ नु [ ] 22

य॒ज्ञग्ं शृ॒णोतु॑ दे॒व-स्स॑वि॒ता हव॑-म्मे । देवी॑रापो अपा-न्नपा॒द्य ऊ॒र्मिर्ह॑वि॒ष्य॑ इन्द्रि॒यावा᳚-न्म॒दिन्त॑म॒स्त-न्दे॒वेभ्यो॑ देव॒त्रा ध॑त्त शु॒क्रग्ं शु॑क्र॒पेभ्यो॒ येषा᳚-म्भा॒ग-स्स्थ स्वाहा॒ कार्षि॑र॒स्यपा॒-ऽपा-म्मृ॒द्ध्रग्ं स॑मु॒द्रस्य॒ वो-ऽक्षि॑त्या॒ उन्न॑ये । यम॑ग्ने पृ॒थ्सु मर्त्य॒मावो॒ वाजे॑षु॒ य-ञ्जु॒नाः । स यन्ता॒ शश्व॑ती॒रिषः॑ ॥ 23 ॥

( नु-स॒प्तच॑त्वारिग्ंशच्च) (अ. 13)

त्वम॑ग्ने रु॒द्रो असु॑रो म॒हो दि॒वस्त्वग्ं शर्धो॒ मारु॑त-म्पृ॒क्ष ई॑शिषे । त्वं-वाँतै॑ररु॒णैर्या॑सि शङ्ग॒यस्त्व-म्पू॒षा वि॑ध॒तः पा॑सि॒ नुत्मना᳚ ॥ आ वो॒ राजा॑नमद्ध्व॒रस्य॑ रु॒द्रग्ं होता॑रग्ं सत्य॒यज॒ग्ं॒ रोद॑स्योः । अ॒ग्नि-म्पु॒रा त॑नयि॒त्नो र॒चित्ता॒द्धिर॑ण्यरूप॒मव॑से कृणुद्ध्वम् ॥ अ॒ग्निर्होता॒ नि ष॑सादा॒ यजी॑यानु॒पस्थे॑ मा॒तु-स्सु॑र॒भावु॑ लो॒के । युवा॑ क॒विः पु॑रुनि॒ष्ठ [पु॑रुनि॒ष्ठः, ऋ॒तावा॑ ध॒र्ता] 24

ऋ॒तावा॑ ध॒र्ता कृ॑ष्टी॒नामु॒त मद्ध्य॑ इ॒द्धः ॥सा॒द्ध्वीम॑क-र्दे॒ववी॑ति-न्नो अ॒द्य य॒ज्ञस्य॑ जि॒ह्वाम॑विदाम॒ गुह्या᳚म् । स आयु॒रा-ऽगा᳚-थ्सुर॒भिर्वसा॑नो भ॒द्राम॑क-र्दे॒वहू॑ति-न्नो अ॒द्य ॥ अक्र॑न्दद॒ग्नि-स्स्त॒नय॑न्निव॒ द्यौः, क्षामा॒ रेरि॑हद्वी॒रुधः॑ सम॒ञ्जन्न् । स॒द्यो ज॑ज्ञा॒नो वि हीमि॒द्धो अख्य॒दा रोद॑सी भा॒नुना॑ भात्य॒न्तः ॥ त्वे वसू॑नि पुर्वणीक [पुर्वणीक, हो॒त॒र्दो॒षा] 25

होतर्दो॒षा वस्तो॒रेरि॑रे य॒ज्ञिया॑सः । क्षामे॑व॒ विश्वा॒ भुव॑नानि॒ यस्मि॒न्-थ्सग्ं सौभ॑गानि दधि॒रे पा॑व॒के ॥ तुभ्य॒-न्ता अ॑ङ्गिरस्तम॒ विश्वा᳚-स्सुक्षि॒तयः॒ पृथ॑क् । अग्ने॒ कामा॑य येमिरे ॥ अ॒श्याम॒ त-ङ्काम॑मग्ने॒ तवो॒त्य॑श्याम॑ र॒यिग्ं र॑यिव-स्सु॒वीर᳚म् । अ॒श्याम॒ वाज॑म॒भि वा॒जय॑न्तो॒ ऽश्याम॑ द्यु॒म्नम॑जरा॒जर॑-न्ते ॥श्रेष्ठं॑-यँविष्ठ भार॒ताग्ने᳚ द्यु॒मन्त॒मा भ॑र ॥ 26 ॥

वसो॑ पुरु॒स्पृहग्ं॑ र॒यिम् ॥ स श्वि॑ता॒नस्त॑न्य॒तू रो॑चन॒स्था अ॒जरे॑भि॒-र्नान॑दद्भि॒र्यवि॑ष्ठः । यः पा॑व॒कः पु॑रु॒तमः॑ पु॒रूणि॑ पृ॒थून्य॒ग्निर॑नु॒याति॒ भर्वन्न्॑ ॥ आयु॑ष्टे वि॒श्वतो॑ दधद॒यम॒ग्नि-र्वरे᳚ण्यः । पुन॑स्ते प्रा॒ण आ-ऽय॑ति॒ परा॒ यक्ष्मग्ं॑ सुवामि ते ॥ आ॒यु॒र्दा अ॑ग्ने ह॒विषो॑ जुषा॒णो घृ॒तप्र॑तीको घृ॒तयो॑निरेधि । घृ॒त-म्पी॒त्वा मधु॒ चारु॒ गव्य॑-म्पि॒तेव॑ पु॒त्रम॒भि [पु॒त्रम॒भि, र॒क्ष॒ता॒दि॒मम्] 27

र॑क्षतादि॒मम् । तस्मै॑ ते प्रति॒हर्य॑ते॒ जात॑वेदो॒ विच॑र्षणे । अग्ने॒ जना॑मि सुष्टु॒तिम् ॥ दि॒वस्परि॑ प्रथ॒म-ञ्ज॑ज्ञे अ॒ग्निर॒स्म-द्द्वि॒तीय॒-म्परि॑ जा॒तवे॑दाः । तृ॒तीय॑म॒फ्सु नृ॒मणा॒ अज॑स्र॒मिन्धा॑न एन-ञ्जरते स्वा॒धीः ॥ शुचिः॑ पावक॒ वन्द्यो-ऽग्ने॑ बृ॒हद्वि रो॑चसे । त्व-ङ्घृ॒तेभि॒राहु॑तः ॥ दृ॒शा॒नो रु॒क्म उ॒र्व्या व्य॑द्यौ-द्दु॒र्मर्ष॒मायुः॑ श्रि॒ये रु॑चा॒नः । अ॒ग्निर॒मृतो॑ अभव॒द्वयो॑भि॒- [अभव॒द्वयो॑भिः, यदे॑नं॒] 28

-र्यदे॑न॒-न्द्यौरज॑नय-थ्सु॒रेताः᳚ ॥ आ यदि॒षे नृ॒पति॒-न्तेज॒ आन॒ट्छुचि॒ रेतो॒ निषि॑क्त॒-न्द्यौर॒भीके᳚ । अ॒ग्नि-श्शर्ध॑मनव॒द्यं-युँवा॑नग्ग् स्वा॒धिय॑-ञ्जनय-थ्सू॒दय॑च्च ॥ स तेजी॑यसा॒ मन॑सा॒ त्वोत॑ उ॒त शि॑क्ष स्वप॒त्यस्य॑ शि॒क्षोः । अग्ने॑ रा॒यो नृत॑मस्य॒ प्रभू॑तौ भू॒याम॑ ते सुष्टु॒तय॑श्च॒ वस्वः॑ ॥ अग्ने॒ सह॑न्त॒मा भ॑र द्यु॒म्नस्य॑ प्रा॒सहा॑ र॒यिम् । विश्वा॒ य- [विश्वा॒ यः, च॒र्॒ष॒णीर॒भ्या॑सा वाजे॑षु] 29

श्च॑र्॒ष॒णीर॒भ्या॑सा वाजे॑षु सा॒सह॑त् ॥ तम॑ग्ने पृतना॒सहग्ं॑ र॒यिग्ं स॑हस्व॒ आ भ॑र । त्वग्ं हि स॒त्यो अद्भु॑तो दा॒ता वाज॑स्य॒ गोम॑तः ॥ उ॒क्षान्ना॑य व॒शान्ना॑य॒ सोम॑पृष्ठाय वे॒धसे᳚ । स्तोमै᳚-र्विधेमा॒-ऽग्नये᳚ ॥ व॒द्मा हि सू॑नो॒ अस्य॑द्म॒सद्वा॑ च॒क्रे अ॒ग्नि-र्ज॒नुषा ऽज्मा-ऽन्न᳚म् । स त्व-न्न॑ ऊर्जसन॒ ऊर्ज॑-न्धा॒ राजे॑व जेरवृ॒के क्षे᳚ष्य॒न्तः ॥ अग्न॒ आयूग्ं॑षि [अग्न॒ आयूग्ं॑षि, प॒व॒स॒ आ] 30

पवस॒ आ सु॒वोर्ज॒मिष॑-ञ्च नः । आ॒रे बा॑धस्व दु॒च्छुना᳚म् ॥ अग्ने॒ पव॑स्व॒ स्वपा॑ अ॒स्मे वर्चः॑ सु॒वीर्य᳚म् । दध॒त्पोषग्ं॑ र॒यि-म्मयि॑ ॥ अग्ने॑ पावक रो॒चिषा॑ म॒न्द्रया॑ देव जि॒ह्वया᳚ । आ दे॒वान्. व॑क्षि॒ यक्षि॑ च ॥ स नः॑ पावक दीदि॒वो-ऽग्ने॑ दे॒वाग्ं इ॒हा व॑ह । उप॑ य॒ज्ञग्ं ह॒विश्च॑ नः ॥ अ॒ग्नि-श्शुचि॑व्रततम॒-श्शुचि॒-र्विप्र॒-श्शुचिः॑ क॒विः । शुची॑ रोचत॒ आहु॑तः ॥ उद॑ग्ने॒ शुच॑य॒स्तव॑ शु॒क्रा भ्राज॑न्त ईरते । तव॒ ज्योतीग्॑ष्य॒र्चयः॑ ॥ 31 ॥

(पु॒रु॒नि॒ष्ठः-पु॑र्वणीक-भरा॒-ऽभि-वयो॑भि॒-र्य-आयूग्ं॑षि॒ -विप्र॒-श्शुचि॒-श्चतु॑र्दश च) (अ. 14)

(दे॒वस्य॑ - रक्षो॒हणो॑ - वि॒भू-स्त्वग्ं सो॒मा - ऽत्य॒न्यानगां᳚ - पृथि॒व्या - इ॒षे त्वा - ऽऽद॑दे॒ - वाक्त॒-सन्ते॑ - समु॒द्रग्ं - ह॒विष्म॑तीर्-हृ॒दे - त्वम॑ग्ने रु॒द्र - श्चतु॑र्दश)

(दे॒वस्य॑ - ग॒मध्ये॑ - ह॒विष्म॑तीः - पवस॒ - एक॑त्रिग्ंशत्)

(दे॒वस्या॒, र्चयः॑)

॥ हरिः॑ ओम् ॥

॥ कृष्ण यजुर्वेदीय तैत्तिरीय संहिताया-म्प्रथमकाण्डे तृतीयः प्रश्न-स्समाप्तः ॥