Narayaniyam Dashakam 99 — Tamil Script

Meaning —

விஷ்ணோர்வீர்யாணி கோ வா கதயது தரணேஃ கஶ்ச ரேணூந்மிமீதே
யஸ்யைவாங்க்ரித்ரயேண த்ரிஜகதபிமிதம் மோததே பூர்ணஸம்பத்
யோஸௌ விஶ்வாநி தத்தே ப்ரியமிஹ பரமம் தாம தஸ்யாபியாயாம்
த்வத்பக்தா யத்ர மாத்யந்த்யம்ரு'தரஸமரந்தஸ்ய யத்ர ப்ரவாஹஃ ॥1॥

viṣṇorvīryāṇi ko vā kathayatu dharaṇeḥ kaśca reṇūnmimīte
yasyaivāṅghritrayeṇa trijagadabhimitaṃ modate pūrṇasampat
yosau viśvāni dhatte priyamiha paramaṃ dhāma tasyābhiyāyāṃ
tvadbhaktā yatra mādyantyamṛtarasamarandasya yatra pravāhaḥ ||1||

Verse 2

ஆத்யாயாஶேஷகர்த்ரே ப்ரதிநிமிஷநவீநாய பர்த்ரே விபூதே-
ர்பக்தாத்மா விஷ்ணவே யஃ ப்ரதிஶதி ஹவிராதீநி யஜ்ஞார்சநாதௌ ।
க்ரு'ஷ்ணாத்யம் ஜந்ம யோ வா மஹதிஹ மஹதோ வர்ணயேத்ஸோऽயமேவ
ப்ரீதஃ பூர்ணோ யஶோபிஸ்த்வரிதமபிஸரேத் ப்ராப்யமந்தே பதம் தே ॥2॥

ādyāyāśeṣakartre pratinimiṣanavīnāya bhartre vibhūte-
rbhaktātmā viṣṇave yaḥ pradiśati havirādīni yajñārcanādau |
kṛṣṇādyaṃ janma yo vā mahadiha mahato varṇayetso'yameva
prītaḥ pūrṇo yaśobhistvaritamabhisaret prāpyamante padaṃ te ||2||

Verse 3

ஹே ஸ்தோதாரஃ கவீந்த்ராஸ்தமிஹ கலு யதா சேதயத்வே ததைவ
வ்யக்தம் வேதஸ்ய ஸாரம் ப்ரணுவத ஜநநோபாத்தலீலாகதாபிஃ ।
ஜாநந்தஶ்சாஸ்ய நாமாந்யகிலஸுககராணீதி ஸங்கீர்தயத்வம்
ஹே விஷ்ணோ கீர்தநாத்யைஸ்தவ கலு மஹதஸ்தத்த்வபோதம் பஜேயம் ॥3॥

he stotāraḥ kavīndrāstamiha khalu yathā cetayadhve tathaiva
vyaktaṃ vedasya sāraṃ praṇuvata jananopāttalīlākathābhiḥ |
jānantaścāsya nāmānyakhilasukhakarāṇīti saṅkīrtayadhvaṃ
he viṣṇo kīrtanādyaistava khalu mahatastattvabodhaṃ bhajeyam ||3||

Verse 4

விஷ்ணோஃ கர்மாணி ஸம்பஶ்யத மநஸி ஸதா யைஃ ஸ தர்மாநபத்நாத்
யாநீந்த்ரஸ்யைஷ ப்ரு'த்யஃ ப்ரியஸக இவ ச வ்யாதநோத் க்ஷேமகாரீ ।
வீக்ஷந்தே யோகஸித்தாஃ பரபதமநிஶம் யஸ்ய ஸம்யக்ப்ரகாஶம்
விப்ரேந்த்ரா ஜாகரூகாஃ க்ரு'தபஹுநுதயோ யச்ச நிர்பாஸயந்தே ॥4॥

viṣṇoḥ karmāṇi sampaśyata manasi sadā yaiḥ sa dharmānabadhnād
yānīndrasyaiṣa bhṛtyaḥ priyasakha iva ca vyātanot kṣemakārī |
vīkṣante yogasiddhāḥ parapadamaniśaṃ yasya samyakprakāśaṃ
viprendrā jāgarūkāḥ kṛtabahunutayo yacca nirbhāsayante ||4||

Verse 5

நோ ஜாதோ ஜாயமாநோऽபி ச ஸமதிகதஸ்த்வந்மஹிம்நோऽவஸாநம்
தேவ ஶ்ரேயாம்ஸி வித்வாந் ப்ரதிமுஹுரபி தே நாம ஶம்ஸாமி விஷ்ணோ ।
தம் த்வாம் ஸம்ஸ்தௌமி நாநாவிதநுதிவசநைரஸ்ய லோகத்ரயஸ்யா-
ப்யூர்த்வம் விப்ராஜமாநே விரசிதவஸதிம் தத்ர வைகுண்டலோகே ॥5॥

no jāto jāyamāno'pi ca samadhigatastvanmahimno'vasānaṃ
deva śreyāṃsi vidvān pratimuhurapi te nāma śaṃsāmi viṣṇo |
taṃ tvāṃ saṃstaumi nānāvidhanutivacanairasya lokatrayasyā-
pyūrdhvaṃ vibhrājamāne viracitavasatiṃ tatra vaikuṇṭhaloke ||5||

Verse 6

ஆபஃ ஸ்ரு'ஷ்ட்யாதிஜந்யாஃ ப்ரதமமயி விபோ கர்பதேஶே ததுஸ்த்வாம்
யத்ர த்வய்யேவ ஜீவா ஜலஶயந ஹரே ஸங்கதா ஐக்யமாபந் ।
தஸ்யாஜஸ்ய ப்ரபோ தே விநிஹிதமபவத் பத்மமேகம் ஹி நாபௌ
திக்பத்ரம் யத் கிலாஹுஃ கநகதரணிப்ரு'த் கர்ணிகம் லோகரூபம் ॥6॥

āpaḥ sṛṣṭyādijanyāḥ prathamamayi vibho garbhadeśe dadhustvāṃ
yatra tvayyeva jīvā jalaśayana hare saṅgatā aikyamāpan |
tasyājasya prabho te vinihitamabhavat padmamekaṃ hi nābhau
dikpatraṃ yat kilāhuḥ kanakadharaṇibhṛt karṇikaṃ lokarūpam ||6||

Verse 7

ஹே லோகா விஷ்ணுரேதத்புவநமஜநயத்தந்ந ஜாநீத யூயம்
யுஷ்மாகம் ஹ்யந்தரஸ்தம் கிமபி ததபரம் வித்யதே விஷ்ணுரூபம் ।
நீஹாரப்ரக்யமாயாபரிவ்ரு'தமநஸோ மோஹிதா நாமரூபைஃ
ப்ராணப்ரீத்யேகத்ரு'ப்தாஶ்சரத மகபரா ஹந்த நேச்சா முகுந்தே ॥7॥

he lokā viṣṇuretadbhuvanamajanayattanna jānītha yūyaṃ
yuṣmākaṃ hyantarasthaṃ kimapi tadaparaṃ vidyate viṣṇurūpam |
nīhāraprakhyamāyāparivṛtamanaso mohitā nāmarūpaiḥ
prāṇaprītyekatṛptāścaratha makhaparā hanta necchā mukunde ||7||

Verse 8

மூர்த்நாமக்ஷ்ணாம் பதாநாம் வஹஸி கலு ஸஹஸ்ராணி ஸம்பூர்ய விஶ்வம்
தத்ப்ரோத்க்ரம்யாபி திஷ்டந் பரிமிதவிவரே பாஸி சித்தாந்தரேऽபி ।
பூதம் பவ்யம் ச ஸர்வம் பரபுருஷ பவாந் கிஞ்ச தேஹேந்த்ரியாதி-
ஷ்வாவிஷ்டோऽப்யுத்கதத்வாதம்ரு'தஸுகரஸம் சாநுபுங்க்ஷே த்வமேவ ॥8॥

mūrdhnāmakṣṇāṃ padānāṃ vahasi khalu sahasrāṇi sampūrya viśvaṃ
tatprotkramyāpi tiṣṭhan parimitavivare bhāsi cittāntare'pi |
bhūtaṃ bhavyaṃ ca sarvaṃ parapuruṣa bhavān kiñca dehendriyādi-
ṣvāviṣṭo'pyudgatatvādamṛtasukharasaṃ cānubhuṅkṣe tvameva ||8||

Verse 9

யத்து த்ரைலோக்யரூபம் தததபி ச ததோ நிர்கதோऽநந்தஶுத்த-
ஜ்ஞாநாத்மா வர்தஸே த்வம் தவ கலு மஹிமா ஸோऽபி தாவாந் கிமந்யத் ।
ஸ்தோகஸ்தே பாக ஏவாகிலபுவநதயா த்ரு'ஶ்யதே த்ர்யம்ஶகல்பம்
பூயிஷ்டம் ஸாந்த்ரமோதாத்மகமுபரி ததோ பாதி தஸ்மை நமஸ்தே ॥9॥

yattu trailokyarūpaṃ dadhadapi ca tato nirgato'nantaśuddha-
jñānātmā vartase tvaṃ tava khalu mahimā so'pi tāvān kimanyat |
stokaste bhāga evākhilabhuvanatayā dṛśyate tryaṃśakalpaṃ
bhūyiṣṭhaṃ sāndramodātmakamupari tato bhāti tasmai namaste ||9||

Verse 10

அவ்யக்தம் தே ஸ்வரூபம் துரதிகமதமம் தத்து ஶுத்தைகஸத்த்வம்
வ்யக்தம் சாப்யேததேவ ஸ்புடமம்ரு'தரஸாம்போதிகல்லோலதுல்யம் ।
ஸர்வோத்க்ரு'ஷ்டாமபீஷ்டாம் ததிஹ குணரஸேநைவ சித்தம் ஹரந்தீம்
மூர்திம் தே ஸம்ஶ்ரயேऽஹம் பவநபுரபதே பாஹி மாம் க்ரு'ஷ்ண ரோகாத் ॥10॥

avyaktaṃ te svarūpaṃ duradhigamatamaṃ tattu śuddhaikasattvaṃ
vyaktaṃ cāpyetadeva sphuṭamamṛtarasāmbhodhikallolatulyam |
sarvotkṛṣṭāmabhīṣṭāṃ tadiha guṇarasenaiva cittaṃ harantīṃ
mūrtiṃ te saṃśraye'haṃ pavanapurapate pāhi māṃ kṛṣṇa rogāt ||10||

Sanskrit — Devanagari (original)

विष्णोर्वीर्याणि को वा कथयतु धरणेः कश्च रेणून्मिमीते

यस्यैवाङ्घ्रित्रयेण त्रिजगदभिमितं मोदते पूर्णसम्पत्

योसौ विश्वानि धत्ते प्रियमिह परमं धाम तस्याभियायां

त्वद्भक्ता यत्र माद्यन्त्यमृतरसमरन्दस्य यत्र प्रवाहः ॥1॥

आद्यायाशेषकर्त्रे प्रतिनिमिषनवीनाय भर्त्रे विभूते-

र्भक्तात्मा विष्णवे यः प्रदिशति हविरादीनि यज्ञार्चनादौ ।

कृष्णाद्यं जन्म यो वा महदिह महतो वर्णयेत्सोऽयमेव

प्रीतः पूर्णो यशोभिस्त्वरितमभिसरेत् प्राप्यमन्ते पदं ते ॥2॥

हे स्तोतारः कवीन्द्रास्तमिह खलु यथा चेतयध्वे तथैव

व्यक्तं वेदस्य सारं प्रणुवत जननोपात्तलीलाकथाभिः ।

जानन्तश्चास्य नामान्यखिलसुखकराणीति सङ्कीर्तयध्वं

हे विष्णो कीर्तनाद्यैस्तव खलु महतस्तत्त्वबोधं भजेयम् ॥3॥

विष्णोः कर्माणि सम्पश्यत मनसि सदा यैः स धर्मानबध्नाद्

यानीन्द्रस्यैष भृत्यः प्रियसख इव च व्यातनोत् क्षेमकारी ।

वीक्षन्ते योगसिद्धाः परपदमनिशं यस्य सम्यक्प्रकाशं

विप्रेन्द्रा जागरूकाः कृतबहुनुतयो यच्च निर्भासयन्ते ॥4॥

नो जातो जायमानोऽपि च समधिगतस्त्वन्महिम्नोऽवसानं

देव श्रेयांसि विद्वान् प्रतिमुहुरपि ते नाम शंसामि विष्णो ।

तं त्वां संस्तौमि नानाविधनुतिवचनैरस्य लोकत्रयस्या-

प्यूर्ध्वं विभ्राजमाने विरचितवसतिं तत्र वैकुण्ठलोके ॥5॥

आपः सृष्ट्यादिजन्याः प्रथममयि विभो गर्भदेशे दधुस्त्वां

यत्र त्वय्येव जीवा जलशयन हरे सङ्गता ऐक्यमापन् ।

तस्याजस्य प्रभो ते विनिहितमभवत् पद्ममेकं हि नाभौ

दिक्पत्रं यत् किलाहुः कनकधरणिभृत् कर्णिकं लोकरूपम् ॥6॥

हे लोका विष्णुरेतद्भुवनमजनयत्तन्न जानीथ यूयं

युष्माकं ह्यन्तरस्थं किमपि तदपरं विद्यते विष्णुरूपम् ।

नीहारप्रख्यमायापरिवृतमनसो मोहिता नामरूपैः

प्राणप्रीत्येकतृप्ताश्चरथ मखपरा हन्त नेच्छा मुकुन्दे ॥7॥

मूर्ध्नामक्ष्णां पदानां वहसि खलु सहस्राणि सम्पूर्य विश्वं

तत्प्रोत्क्रम्यापि तिष्ठन् परिमितविवरे भासि चित्तान्तरेऽपि ।

भूतं भव्यं च सर्वं परपुरुष भवान् किञ्च देहेन्द्रियादि-

ष्वाविष्टोऽप्युद्गतत्वादमृतसुखरसं चानुभुङ्क्षे त्वमेव ॥8॥

यत्तु त्रैलोक्यरूपं दधदपि च ततो निर्गतोऽनन्तशुद्ध-

ज्ञानात्मा वर्तसे त्वं तव खलु महिमा सोऽपि तावान् किमन्यत् ।

स्तोकस्ते भाग एवाखिलभुवनतया दृश्यते त्र्यंशकल्पं

भूयिष्ठं सान्द्रमोदात्मकमुपरि ततो भाति तस्मै नमस्ते ॥9॥

अव्यक्तं ते स्वरूपं दुरधिगमतमं तत्तु शुद्धैकसत्त्वं

व्यक्तं चाप्येतदेव स्फुटममृतरसाम्भोधिकल्लोलतुल्यम् ।

सर्वोत्कृष्टामभीष्टां तदिह गुणरसेनैव चित्तं हरन्तीं

मूर्तिं ते संश्रयेऽहं पवनपुरपते पाहि मां कृष्ण रोगात् ॥10॥

🕉️ This is the original Sanskrit rendered in Tamil script. Pronunciation is identical to the Sanskrit Devanagari version. It is a transliteration, not a translation — see “Meaning” for translations where available.

நாராயணீயம் தஶக 99 - வேதமந்த்ரமூலாத்மகா விஷ்ணுஸ்துதிஃ