ଶ୍ରୀମଦ୍ଵାଲ୍ମୀକୀଯ ରାମାଯଣେ ଅରଣ୍ଯକାଣ୍ଡମ୍ ।
ଅଥ ଚତୁସ୍ତ୍ରିଂଶସ୍ସର୍ଗଃ ।
ତତଶ୍ଶୂର୍ପଣଖାଂ ଦୃଷ୍ଟ୍ଵା ବ୍ରୁଵନ୍ତୀଂ ପରୁଷଂ ଵଚଃ ।
ଅମାତ୍ଯମଧ୍ଯେ ସଙ୍କ୍ରୁଦ୍ଧଃ ପରିପପ୍ରଚ୍ଛ ରାଵଣଃ ॥ 1 ॥
କଶ୍ଚ ରାମଃ କଥଂଵୀର୍ଯଃ କିଂରୂପଃ କିମ୍ପରାକ୍ରମଃ ।
କିମର୍ଥଂ ଦଣ୍ଡକାରଣ୍ଯଂ ପ୍ରଵିଷ୍ଟସ୍ସୁଦୁରାସଦମ୍ ॥ 2 ॥
ଆଯୁଧଂ କିଞ୍ଚ ରାମସ୍ଯ ନିହତା ଯେନ ରାକ୍ଷସାଃ ।
ଖରଶ୍ଚ ନିହତସ୍ସଙ୍ଖ୍ଯେ ଦୂଷଣସ୍ତ୍ରିଶିରାସ୍ତଥା ॥ 3 ॥
ଇତ୍ଯୁକ୍ତା ରାକ୍ଷସେନ୍ଦ୍ରେଣ ରାକ୍ଷସୀ କ୍ରୋଧମୂର୍ଛିତା ।
ତତୋ ରାମଂ ଯଥାତତ୍ଵମାଖ୍ଯାତୁମୁପଚକ୍ରମେ ॥ 4 ॥
ଦୀର୍ଘବାହୁର୍ଵିଶାଲାକ୍ଷ ଶ୍ଚୀରକୃଷ୍ଣାଜିନାମ୍ବରଃ ।
କନ୍ଦର୍ପସମରୂପଶ୍ଚ ରାମୋ ଦଶରଥାତ୍ମଜଃ ॥ 5 ॥
ଶକ୍ରଚାପନିଭଂ ଚାପଂ ଵିକୃଷ୍ଯ କନକାଙ୍ଗଦମ୍ ।
ଦୀପ୍ତାନ୍ କ୍ଷିପତି ନାରାଚାନ୍ସର୍ପାନିଵ ମହାଵିଷାନ୍ ॥ 6 ॥
ନାଦଦାନଂ ଶରାନ୍ଘୋରାନ୍ନମୁଞ୍ଚନ୍ତଂ ଶିଲୀମୁଖାନ୍ ।
ନ କାର୍ମୁକଂ ଵିକର୍ଷନ୍ତଂ ରାମଂ ପଶ୍ଯାମି ସଂଯୁଗେ ॥ 7 ॥
ହନ୍ଯମାନଂ ତୁ ତତ୍ସୈନ୍ଯଂ ପଶ୍ଯାମି ଶରଵୃଷ୍ଟିଭିଃ ।
ଇନ୍ଦ୍ରେଣେଵୋତ୍ତମଂ ସସ୍ଯମାହତନ୍ତ୍ଵଶ୍ମଵୃଷ୍ଟିଭିଃ ॥ 8 ॥
ରକ୍ଷସାଂ ଭୀମରୂପାଣାଂ ସହସ୍ରାଣି ଚତୁର୍ଦଶ ।
ନିହତାନି ଶରୈ ସ୍ତୀକ୍ଷ୍ଣୈସ୍ତେନୈକେନ ପଦାତିନା ॥ 9 ॥
ଅର୍ଧାଧିକମୁହୂର୍ତେନ ଖରଶ୍ଚ ସହଦୂଷଣଃ ।
ଋଷୀଣାମଭଯଂ ଦତ୍ତଂ କୃତକ୍ଷେମାଶ୍ଚ ଦଣ୍ଡକାଃ ॥ 10 ॥
ଏକା କଥଞ୍ଚିନ୍ମୁକ୍ତାହଂ ପରିଭୂଯ ମହାତ୍ମନା ।
ସ୍ତ୍ରୀଵଧଂ ଶଙ୍କମାନେନ ରାମେଣ ଵିଦିତାତ୍ମନା ॥ 11 ॥
ଭ୍ରାତା ଚାସ୍ଯ ମହାତେଜା ଗୁଣତସ୍ତୁଲ୍ଯଵିକ୍ରମଃ ।
ଅନୁରକ୍ତଶ୍ଚ ଭକ୍ତଶ୍ଚ ଲକ୍ଷ୍ମଣୋ ନାମ ଵୀର୍ଯଵାନ୍ ॥ 12 ॥
ଅମର୍ଷୀ ଦୁର୍ଜଯୋ ଜେତା ଵିକ୍ରାନ୍ତୋ ବୁଦ୍ଧିମାନ୍ବଲୀ ।
ରାମସ୍ଯ ଦକ୍ଷିଣୋ ବାହୁର୍ନିତ୍ଯଂ ପ୍ରାଣୋ ବହିଶ୍ଚରଃ ॥ 13 ॥
ରାମସ୍ଯ ତୁ ଵିଶାଲାକ୍ଷୀ ପୂର୍ଣେନ୍ଦୁସଦୃଶାନନା ।
ଧର୍ମପତ୍ନୀ ପ୍ରିଯା ଭର୍ତୁର୍ନିତ୍ଯଂ ପ୍ରିଯହିତେ ରତା ॥ 14 ॥
ସା ସୁକେଶୀ ସୁନାସୋରୁସ୍ସୁରୂପା ଚ ଯଶସ୍ଵିନୀ ।
ଦେଵତେଵ ଵନସ୍ଯାସ୍ଯ ରାଜତେ ଶ୍ରୀରିଵାପରା ॥ 15 ॥
ତପ୍ତକାଞ୍ଚନଵର୍ଣାଭା ରକ୍ତତୁଙ୍ଗନଖୀ ଶୁଭା ।
ସୀତା ନାମ ଵରାରୋହା ଵୈଦେହୀ ତନୁମଧ୍ଯମା ॥ 16 ॥
ନୈଵ ଦେଵୀ ନ ଗନ୍ଧର୍ଵୀ ନ ଯକ୍ଷୀ ନ ଚ କିନ୍ନରୀ ।
ନୈଵଂରୂପା ମଯା ନାରୀ ଦୃଷ୍ଟପୂର୍ଵା ମହୀତଲେ ॥ 17 ॥
ଯସ୍ଯ ସୀତା ଭଵେଦ୍ଭାର୍ଯା ଯଂ ଚ ହୃଷ୍ଟା ପରିଷ୍ଵଜେତ୍ ।
ଅତିଜୀଵେତ୍ସ ସର୍ଵେଷୁ ଲୋକେଷ୍ଵପି ପୁରନ୍ଦରାତ୍ ॥ 18 ॥
ସା ସୁଶୀଲା ଵପୁଶ୍ଶ୍ଲାଘ୍ଯା ରୂପେଣାପ୍ରତିମା ଭୁଵି ।
ତଵାନୁରୂପା ଭାର୍ଯା ସ୍ଯାତ୍ତ୍ଵଂ ଚ ତସ୍ଯାସ୍ତଥା ପତିଃ ॥ 19 ॥
ତାଂ ତୁ ଵିସ୍ତୀର୍ଣଜଘନାଂ ପୀନଶ୍ରୋଣିପଯୋଧରାମ୍ ।
ଭାର୍ଯାର୍ଥେ ଚ ତଵାନେତୁମୁଦ୍ଯତାହଂ ଵରାନନାମ୍ ॥ 20 ॥
ଵିରୂପିତାସ୍ମି କ୍ରୂରେଣ ଲକ୍ଷ୍ମଣେନ ମହାଭୁଜ ।
ତାଂ ତୁ ଦୃଷ୍ଟ୍ଵାଦ୍ଯ ଵୈଦେହୀଂ ପୂର୍ଣଚନ୍ଦ୍ରନିଭାନନାମ୍ ।
ମନ୍ମଥସ୍ଯ ଶରାଣାଂ ଵୈ ତ୍ଵଂ ଵିଧେଯୋ ଭଵିଷ୍ଯସି ॥ 21 ॥
ଯଦି ତସ୍ଯାମଭିପ୍ରାଯୋ ଭାର୍ଯାର୍ଥେ ତଵ ଜାଯତେ ।
ଶୀଘ୍ରମୁଦ୍ଧ୍ରିଯତାଂ ପାଦୋ ଜଯାର୍ଥମିହ ଦକ୍ଷିଣଃ ॥ 22 ॥
କୁରୁ ପ୍ରିଯଂ ତଥା ତେଷାଂ ରକ୍ଷସାଂ ରାକ୍ଷସେଶ୍ଵର ।
ଵଧାତ୍ତସ୍ଯ ନୃଶଂସସ୍ଯ ରାମସ୍ଯାଶ୍ରମଵାସିନଃ ॥ 23 ॥
ତଂ ଶରୈର୍ନିଶିତୈର୍ହତ୍ଵା ଲକ୍ଷ୍ମଣଂ ଚ ମହାରଥମ୍ ।
ହତନାଥାଂ ସୁଖଂ ସୀତାଂ ଯଥାଵଦୁପଭୋକ୍ଷ୍ଯସି ॥ 24 ॥
ରୋଚତେ ଯତି ତେ ଵାକ୍ଯଂ ମମୈତଦ୍ରାକ୍ଷସେଶ୍ଵର ।
କ୍ରିଯତାଂ ନିର୍ଵିଶଙ୍କେନ ଵଚନଂ ମମ ରାଵଣ ॥ 25 ॥
ଵିଜ୍ଞାଯେହାତ୍ମଶକ୍ତିଂ ଚ ହ୍ରିଯତାମବଲା ବଲାତ୍ ।
ସୀତା ସର୍ଵାନଵଦ୍ଯାଙ୍ଗୀ ଭାର୍ଯାର୍ଥେ ରାକ୍ଷସେଶ୍ଵର ॥ 26 ॥
ନିଶମ୍ଯ ରାମେଣ ଶରୈରଜିହ୍ମଗୈ ର୍ହତାନ୍ ଜନସ୍ଥାନଗତାନ୍ନିଶାଚରାନ୍ ।
ଖରଂ ଚ ବୁଦ୍ଧ୍ଵା ନିହତଂ ଚ ଦୂଷଣଂ ତ୍ଵମତ୍ର କୃତ୍ଯଂ ପ୍ରତିପତ୍ତୁମର୍ହସି ॥ 27 ॥
ଇତ୍ଯାର୍ଷେ ଶ୍ରୀମଦ୍ରାମାଯଣେ ଵାଲ୍ମୀକୀଯ ଆଦିକାଵ୍ଯେ ଅରଣ୍ଯକାଣ୍ଡେ ଚତୁସ୍ତ୍ରିଂଶସ୍ସର୍ଗଃ ॥
Roman (IAST) Transliteration
śrīmadvālmīkīya rāmāyaṇe araṇyakāṇḍam |
atha catustriṃśassargaḥ |
tataśśūrpaṇakhāṃ dṛṣṭvā bruvantīṃ paruṣaṃ vacaḥ |
amātyamadhye saṅkruddhaḥ paripapraccha rāvaṇaḥ || 1 ||
kaśca rāmaḥ kathaṃvīryaḥ kiṃrūpaḥ kimparākramaḥ |
kimarthaṃ daṇḍakāraṇyaṃ praviṣṭassudurāsadam || 2 ||
āyudhaṃ kiñca rāmasya nihatā yena rākṣasāḥ |
kharaśca nihatassaṅkhye dūṣaṇastriśirāstathā || 3 ||
ityuktā rākṣasendreṇa rākṣasī krodhamūrchitā |
tato rāmaṃ yathātatvamākhyātumupacakrame || 4 ||
dīrghabāhurviśālākṣa ścīrakṛṣṇājināmbaraḥ |
kandarpasamarūpaśca rāmo daśarathātmajaḥ || 5 ||
śakracāpanibhaṃ cāpaṃ vikṛṣya kanakāṅgadam |
dīptān kṣipati nārācānsarpāniva mahāviṣān || 6 ||
nādadānaṃ śarānghorānnamuñcantaṃ śilīmukhān |
na kārmukaṃ vikarṣantaṃ rāmaṃ paśyāmi saṃyuge || 7 ||
hanyamānaṃ tu tatsainyaṃ paśyāmi śaravṛṣṭibhiḥ |
indreṇevottamaṃ sasyamāhatantvaśmavṛṣṭibhiḥ || 8 ||
rakṣasāṃ bhīmarūpāṇāṃ sahasrāṇi caturdaśa |
nihatāni śarai stīkṣṇaistenaikena padātinā || 9 ||
ardhādhikamuhūrtena kharaśca sahadūṣaṇaḥ |
ṛṣīṇāmabhayaṃ dattaṃ kṛtakṣemāśca daṇḍakāḥ || 10 ||
ekā kathañcinmuktāhaṃ paribhūya mahātmanā |
strīvadhaṃ śaṅkamānena rāmeṇa viditātmanā || 11 ||
bhrātā cāsya mahātejā guṇatastulyavikramaḥ |
anuraktaśca bhaktaśca lakṣmaṇo nāma vīryavān || 12 ||
amarṣī durjayo jetā vikrānto buddhimānbalī |
rāmasya dakṣiṇo bāhurnityaṃ prāṇo bahiścaraḥ || 13 ||
rāmasya tu viśālākṣī pūrṇendusadṛśānanā |
dharmapatnī priyā bharturnityaṃ priyahite ratā || 14 ||
sā sukeśī sunāsorussurūpā ca yaśasvinī |
devateva vanasyāsya rājate śrīrivāparā || 15 ||
taptakāñcanavarṇābhā raktatuṅganakhī śubhā |
sītā nāma varārohā vaidehī tanumadhyamā || 16 ||
naiva devī na gandharvī na yakṣī na ca kinnarī |
naivaṃrūpā mayā nārī dṛṣṭapūrvā mahītale || 17 ||
yasya sītā bhavedbhāryā yaṃ ca hṛṣṭā pariṣvajet |
atijīvetsa sarveṣu lokeṣvapi purandarāt || 18 ||
sā suśīlā vapuśślāghyā rūpeṇāpratimā bhuvi |
tavānurūpā bhāryā syāttvaṃ ca tasyāstathā patiḥ || 19 ||
tāṃ tu vistīrṇajaghanāṃ pīnaśroṇipayodharām |
bhāryārthe ca tavānetumudyatāhaṃ varānanām || 20 ||
virūpitāsmi krūreṇa lakṣmaṇena mahābhuja |
tāṃ tu dṛṣṭvādya vaidehīṃ pūrṇacandranibhānanām |
manmathasya śarāṇāṃ vai tvaṃ vidheyo bhaviṣyasi || 21 ||
yadi tasyāmabhiprāyo bhāryārthe tava jāyate |
śīghramuddhriyatāṃ pādo jayārthamiha dakṣiṇaḥ || 22 ||
kuru priyaṃ tathā teṣāṃ rakṣasāṃ rākṣaseśvara |
vadhāttasya nṛśaṃsasya rāmasyāśramavāsinaḥ || 23 ||
taṃ śarairniśitairhatvā lakṣmaṇaṃ ca mahāratham |
hatanāthāṃ sukhaṃ sītāṃ yathāvadupabhokṣyasi || 24 ||
rocate yati te vākyaṃ mamaitadrākṣaseśvara |
kriyatāṃ nirviśaṅkena vacanaṃ mama rāvaṇa || 25 ||
vijñāyehātmaśaktiṃ ca hriyatāmabalā balāt |
sītā sarvānavadyāṅgī bhāryārthe rākṣaseśvara || 26 ||
niśamya rāmeṇa śarairajihmagai rhatān janasthānagatānniśācarān |
kharaṃ ca buddhvā nihataṃ ca dūṣaṇaṃ tvamatra kṛtyaṃ pratipattumarhasi || 27 ||
ityārṣe śrīmadrāmāyaṇe vālmīkīya ādikāvye araṇyakāṇḍe catustriṃśassargaḥ ||
Sanskrit — Devanagari (original)
श्रीमद्वाल्मीकीय रामायणे अरण्यकाण्डम् ।
अथ चतुस्त्रिंशस्सर्गः ।
ततश्शूर्पणखां दृष्ट्वा ब्रुवन्तीं परुषं वचः ।
अमात्यमध्ये सङ्क्रुद्धः परिपप्रच्छ रावणः ॥ 1 ॥
कश्च रामः कथंवीर्यः किंरूपः किम्पराक्रमः ।
किमर्थं दण्डकारण्यं प्रविष्टस्सुदुरासदम् ॥ 2 ॥
आयुधं किञ्च रामस्य निहता येन राक्षसाः ।
खरश्च निहतस्सङ्ख्ये दूषणस्त्रिशिरास्तथा ॥ 3 ॥
इत्युक्ता राक्षसेन्द्रेण राक्षसी क्रोधमूर्छिता ।
ततो रामं यथातत्वमाख्यातुमुपचक्रमे ॥ 4 ॥
दीर्घबाहुर्विशालाक्ष श्चीरकृष्णाजिनाम्बरः ।
कन्दर्पसमरूपश्च रामो दशरथात्मजः ॥ 5 ॥
शक्रचापनिभं चापं विकृष्य कनकाङ्गदम् ।
दीप्तान् क्षिपति नाराचान्सर्पानिव महाविषान् ॥ 6 ॥
नाददानं शरान्घोरान्नमुञ्चन्तं शिलीमुखान् ।
न कार्मुकं विकर्षन्तं रामं पश्यामि संयुगे ॥ 7 ॥
हन्यमानं तु तत्सैन्यं पश्यामि शरवृष्टिभिः ।
इन्द्रेणेवोत्तमं सस्यमाहतन्त्वश्मवृष्टिभिः ॥ 8 ॥
रक्षसां भीमरूपाणां सहस्राणि चतुर्दश ।
निहतानि शरै स्तीक्ष्णैस्तेनैकेन पदातिना ॥ 9 ॥
अर्धाधिकमुहूर्तेन खरश्च सहदूषणः ।
ऋषीणामभयं दत्तं कृतक्षेमाश्च दण्डकाः ॥ 10 ॥
एका कथञ्चिन्मुक्ताहं परिभूय महात्मना ।
स्त्रीवधं शङ्कमानेन रामेण विदितात्मना ॥ 11 ॥
भ्राता चास्य महातेजा गुणतस्तुल्यविक्रमः ।
अनुरक्तश्च भक्तश्च लक्ष्मणो नाम वीर्यवान् ॥ 12 ॥
अमर्षी दुर्जयो जेता विक्रान्तो बुद्धिमान्बली ।
रामस्य दक्षिणो बाहुर्नित्यं प्राणो बहिश्चरः ॥ 13 ॥
रामस्य तु विशालाक्षी पूर्णेन्दुसदृशानना ।
धर्मपत्नी प्रिया भर्तुर्नित्यं प्रियहिते रता ॥ 14 ॥
सा सुकेशी सुनासोरुस्सुरूपा च यशस्विनी ।
देवतेव वनस्यास्य राजते श्रीरिवापरा ॥ 15 ॥
तप्तकाञ्चनवर्णाभा रक्ततुङ्गनखी शुभा ।
सीता नाम वरारोहा वैदेही तनुमध्यमा ॥ 16 ॥
नैव देवी न गन्धर्वी न यक्षी न च किन्नरी ।
नैवंरूपा मया नारी दृष्टपूर्वा महीतले ॥ 17 ॥
यस्य सीता भवेद्भार्या यं च हृष्टा परिष्वजेत् ।
अतिजीवेत्स सर्वेषु लोकेष्वपि पुरन्दरात् ॥ 18 ॥
सा सुशीला वपुश्श्लाघ्या रूपेणाप्रतिमा भुवि ।
तवानुरूपा भार्या स्यात्त्वं च तस्यास्तथा पतिः ॥ 19 ॥
तां तु विस्तीर्णजघनां पीनश्रोणिपयोधराम् ।
भार्यार्थे च तवानेतुमुद्यताहं वराननाम् ॥ 20 ॥
विरूपितास्मि क्रूरेण लक्ष्मणेन महाभुज ।
तां तु दृष्ट्वाद्य वैदेहीं पूर्णचन्द्रनिभाननाम् ।
मन्मथस्य शराणां वै त्वं विधेयो भविष्यसि ॥ 21 ॥
यदि तस्यामभिप्रायो भार्यार्थे तव जायते ।
शीघ्रमुद्ध्रियतां पादो जयार्थमिह दक्षिणः ॥ 22 ॥
कुरु प्रियं तथा तेषां रक्षसां राक्षसेश्वर ।
वधात्तस्य नृशंसस्य रामस्याश्रमवासिनः ॥ 23 ॥
तं शरैर्निशितैर्हत्वा लक्ष्मणं च महारथम् ।
हतनाथां सुखं सीतां यथावदुपभोक्ष्यसि ॥ 24 ॥
रोचते यति ते वाक्यं ममैतद्राक्षसेश्वर ।
क्रियतां निर्विशङ्केन वचनं मम रावण ॥ 25 ॥
विज्ञायेहात्मशक्तिं च ह्रियतामबला बलात् ।
सीता सर्वानवद्याङ्गी भार्यार्थे राक्षसेश्वर ॥ 26 ॥
निशम्य रामेण शरैरजिह्मगै र्हतान् जनस्थानगतान्निशाचरान् ।
खरं च बुद्ध्वा निहतं च दूषणं त्वमत्र कृत्यं प्रतिपत्तुमर्हसि ॥ 27 ॥
इत्यार्षे श्रीमद्रामायणे वाल्मीकीय आदिकाव्ये अरण्यकाण्डे चतुस्त्रिंशस्सर्गः ॥
śrīmadvālmīkīya rāmāyaṇe araṇyakāṇḍam |
atha catustriṃśassargaḥ |
tataśśūrpaṇakhāṃ dṛṣṭvā bruvantīṃ paruṣaṃ vacaḥ |
amātyamadhye saṅkruddhaḥ paripapraccha rāvaṇaḥ || 1 ||
kaśca rāmaḥ kathaṃvīryaḥ kiṃrūpaḥ kimparākramaḥ |
kimarthaṃ daṇḍakāraṇyaṃ praviṣṭassudurāsadam || 2 ||
āyudhaṃ kiñca rāmasya nihatā yena rākṣasāḥ |
kharaśca nihatassaṅkhye dūṣaṇastriśirāstathā || 3 ||
ityuktā rākṣasendreṇa rākṣasī krodhamūrchitā |
tato rāmaṃ yathātatvamākhyātumupacakrame || 4 ||
dīrghabāhurviśālākṣa ścīrakṛṣṇājināmbaraḥ |
kandarpasamarūpaśca rāmo daśarathātmajaḥ || 5 ||
śakracāpanibhaṃ cāpaṃ vikṛṣya kanakāṅgadam |
dīptān kṣipati nārācānsarpāniva mahāviṣān || 6 ||
nādadānaṃ śarānghorānnamuñcantaṃ śilīmukhān |
na kārmukaṃ vikarṣantaṃ rāmaṃ paśyāmi saṃyuge || 7 ||
hanyamānaṃ tu tatsainyaṃ paśyāmi śaravṛṣṭibhiḥ |
indreṇevottamaṃ sasyamāhatantvaśmavṛṣṭibhiḥ || 8 ||
rakṣasāṃ bhīmarūpāṇāṃ sahasrāṇi caturdaśa |
nihatāni śarai stīkṣṇaistenaikena padātinā || 9 ||
ardhādhikamuhūrtena kharaśca sahadūṣaṇaḥ |
ṛṣīṇāmabhayaṃ dattaṃ kṛtakṣemāśca daṇḍakāḥ || 10 ||
ekā kathañcinmuktāhaṃ paribhūya mahātmanā |
strīvadhaṃ śaṅkamānena rāmeṇa viditātmanā || 11 ||
bhrātā cāsya mahātejā guṇatastulyavikramaḥ |
anuraktaśca bhaktaśca lakṣmaṇo nāma vīryavān || 12 ||
amarṣī durjayo jetā vikrānto buddhimānbalī |
rāmasya dakṣiṇo bāhurnityaṃ prāṇo bahiścaraḥ || 13 ||
rāmasya tu viśālākṣī pūrṇendusadṛśānanā |
dharmapatnī priyā bharturnityaṃ priyahite ratā || 14 ||
sā sukeśī sunāsorussurūpā ca yaśasvinī |
devateva vanasyāsya rājate śrīrivāparā || 15 ||
taptakāñcanavarṇābhā raktatuṅganakhī śubhā |
sītā nāma varārohā vaidehī tanumadhyamā || 16 ||
naiva devī na gandharvī na yakṣī na ca kinnarī |
naivaṃrūpā mayā nārī dṛṣṭapūrvā mahītale || 17 ||
yasya sītā bhavedbhāryā yaṃ ca hṛṣṭā pariṣvajet |
atijīvetsa sarveṣu lokeṣvapi purandarāt || 18 ||
sā suśīlā vapuśślāghyā rūpeṇāpratimā bhuvi |
tavānurūpā bhāryā syāttvaṃ ca tasyāstathā patiḥ || 19 ||
tāṃ tu vistīrṇajaghanāṃ pīnaśroṇipayodharām |
bhāryārthe ca tavānetumudyatāhaṃ varānanām || 20 ||
virūpitāsmi krūreṇa lakṣmaṇena mahābhuja |
tāṃ tu dṛṣṭvādya vaidehīṃ pūrṇacandranibhānanām |
manmathasya śarāṇāṃ vai tvaṃ vidheyo bhaviṣyasi || 21 ||
yadi tasyāmabhiprāyo bhāryārthe tava jāyate |
śīghramuddhriyatāṃ pādo jayārthamiha dakṣiṇaḥ || 22 ||
kuru priyaṃ tathā teṣāṃ rakṣasāṃ rākṣaseśvara |
vadhāttasya nṛśaṃsasya rāmasyāśramavāsinaḥ || 23 ||
taṃ śarairniśitairhatvā lakṣmaṇaṃ ca mahāratham |
hatanāthāṃ sukhaṃ sītāṃ yathāvadupabhokṣyasi || 24 ||
rocate yati te vākyaṃ mamaitadrākṣaseśvara |
kriyatāṃ nirviśaṅkena vacanaṃ mama rāvaṇa || 25 ||
vijñāyehātmaśaktiṃ ca hriyatāmabalā balāt |
sītā sarvānavadyāṅgī bhāryārthe rākṣaseśvara || 26 ||
niśamya rāmeṇa śarairajihmagai rhatān janasthānagatānniśācarān |
kharaṃ ca buddhvā nihataṃ ca dūṣaṇaṃ tvamatra kṛtyaṃ pratipattumarhasi || 27 ||
ityārṣe śrīmadrāmāyaṇe vālmīkīya ādikāvye araṇyakāṇḍe catustriṃśassargaḥ ||
🕉️ This is the original Sanskrit rendered in Oriya script.
Pronunciation is identical to the Sanskrit Devanagari version.