𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌕𑌿𑌷𑍍𑌕𑌿𑌨𑍍𑌧𑌾𑌕𑌾𑌣𑍍𑌡𑌮𑍍 ।
𑌅𑌥 𑌅𑌷𑍍𑌟𑌪𑌞𑍍𑌚𑌾𑌶𑌸𑍍𑌸𑌰𑍍𑌗𑌃 ।
𑌇𑌤𑍍𑌯𑍁𑌕𑍍𑌤𑌃 𑌕𑌰𑍁𑌣𑌂 𑌵𑌾𑌕𑍍𑌯𑌂 𑌵𑌾𑌨𑌰𑍈𑌸𑍍𑌤𑍍𑌯𑌕𑍍𑌤𑌜𑍀𑌵𑌿𑌤𑍈𑌃 ।
𑌸𑌬𑌾𑌷𑍍𑌪𑍋 𑌵𑌾𑌨𑌰𑌾𑌨𑍍𑌗𑍃𑌧𑍍𑌰𑌃 𑌪𑍍𑌰𑌤𑍍𑌯𑍁𑌵𑌾𑌚 𑌮𑌹𑌾𑌸𑍍𑌵𑌨𑌃 ॥ 1 ॥
𑌯𑌵𑍀𑌯𑌾𑌨𑍍𑌮𑌮 𑌭𑍍𑌰𑌾𑌤𑌾 𑌜𑌟𑌾𑌯𑍁𑌰𑍍𑌨𑌾𑌮 𑌵𑌾𑌨𑌰𑌾𑌃 ।
𑌯𑌮𑌾𑌖𑍍𑌯𑌾𑌤 𑌹𑌤𑌂 𑌯𑍁𑌦𑍍𑌧𑍇 𑌰𑌾𑌵𑌣𑍇𑌨 𑌬𑌲𑍀𑌯𑌸𑌾 ॥ 2 ॥
𑌵𑍃𑌦𑍍𑌧𑌭𑌾𑌵𑌾𑌦𑌪𑌕𑍍𑌷𑌤𑍍𑌵𑌾𑌚𑍍𑌛𑍃𑌣𑍍𑌵𑌂𑌸𑍍𑌤𑌦𑌪𑌿 𑌮𑌰𑍍𑌷𑌯𑍇 ।
𑌨 𑌹𑌿 𑌮𑍇 𑌶𑌕𑍍𑌤𑌿𑌰𑌸𑍍𑌤𑍍𑌯𑌦𑍍𑌯 𑌭𑍍𑌰𑌾𑌤𑍁𑌰𑍍𑌵𑍈𑌰𑌵𑌿𑌮𑍋𑌕𑍍𑌷𑌣𑍇 ॥ 3 ॥
𑌪𑍁𑌰𑌾 𑌵𑍃𑌤𑍍𑌰𑌵𑌧𑍇 𑌵𑍃𑌤𑍍𑌤𑍇 𑌪𑌰𑌸𑍍𑌪𑌰𑌜𑌯𑍈𑌷𑌿𑌣𑍗 ।
𑌆𑌦𑌿𑌤𑍍𑌯𑌮𑍁𑌪𑌯𑌾𑌤𑍗 𑌸𑍍𑌵𑍋 𑌜𑍍𑌵𑌲𑌨𑍍𑌤𑌂 𑌰𑌶𑍍𑌮𑌿𑌮𑌾𑌲𑌿𑌨𑌮𑍍 ॥ 4 ॥
𑌆𑌵𑍃𑌤𑍍𑌤𑍍𑌯𑌾𑌽𑌕𑌾𑌶𑌮𑌾𑌰𑍍𑌗𑍇 𑌤𑍁 𑌜𑌵𑍇𑌨 𑌸𑍍𑌮 𑌗𑌤𑍗 𑌭𑍃𑌶𑌮𑍍 ।
𑌮𑌧𑍍𑌯𑌂 𑌪𑍍𑌰𑌾𑌪𑍍𑌤𑍇 𑌦𑌿𑌨𑌕𑌰𑍇 𑌜𑌟𑌾𑌯𑍁𑌰𑌵𑌸𑍀𑌦𑌤𑌿 ॥ 5 ॥
𑌤𑌮𑌹𑌂 𑌭𑍍𑌰𑌾𑌤𑌰𑌂 𑌦𑍃𑌷𑍍𑌟𑍍𑌵𑌾 𑌸𑍂𑌰𑍍𑌯𑌰𑌶𑍍𑌮𑌿𑌭𑌿𑌰𑌰𑍍𑌦𑌿𑌤𑌮𑍍 ।
𑌪𑌕𑍍𑌷𑌾𑌭𑍍𑌯𑌾𑌂 𑌛𑌾𑌦𑌯𑌾𑌮𑌾𑌸 𑌸𑍍𑌨𑍇𑌹𑌾𑌤𑍍𑌪𑌰𑌮𑌵𑌿𑌹𑍍𑌵𑌲𑌃 ॥ 6 ॥
𑌨𑌿𑌰𑍍𑌦𑌗𑍍𑌧𑌪𑌕𑍍𑌷𑌃 𑌪𑌤𑌿𑌤𑍋 𑌵𑌿𑌨𑍍𑌧𑍍𑌯𑍇𑌽𑌹𑌂 𑌵𑌾𑌨𑌰𑌰𑍍𑌷𑌭𑌾𑌃 ।
𑌅𑌹𑌮𑌸𑍍𑌮𑌿𑌨𑍍𑌵𑌸𑌨𑍍𑌭𑍍𑌰𑌾𑌤𑍁𑌃 𑌪𑍍𑌰𑌵𑍃𑌤𑍍𑌤𑌿𑌂 𑌨𑍋𑌪𑌲𑌕𑍍𑌷𑌯𑍇 ॥ 7 ॥
𑌜𑌟𑌾𑌯𑍁𑌷𑌸𑍍𑌤𑍍𑌵𑍇𑌵𑌮𑍁𑌕𑍍𑌤𑍋 𑌭𑍍𑌰𑌾𑌤𑍍𑌰𑌾 𑌸𑌮𑍍𑌪𑌾𑌤𑌿𑌨𑌾 𑌤𑌦𑌾 ।
𑌯𑍁𑌵𑌰𑌾𑌜𑍋 𑌮𑌹𑌾𑌪𑍍𑌰𑌾𑌜𑍍𑌞𑌃 𑌪𑍍𑌰𑌤𑍍𑌯𑍁𑌵𑌾𑌚𑌾𑌙𑍍𑌗𑌦𑌸𑍍𑌤𑌤𑌃 ॥ 8 ॥
𑌜𑌟𑌾𑌯𑍁𑌷𑍋 𑌯𑌦𑌿 𑌭𑍍𑌰𑌾𑌤𑌾 𑌶𑍍𑌰𑍁𑌤𑌂 𑌤𑍇 𑌗𑌦𑌿𑌤𑌂 𑌮𑌯𑌾 ।
𑌆𑌖𑍍𑌯𑌾 𑌹𑌿 𑌯𑌦𑌿 𑌜𑌾𑌨𑌾𑌸𑌿 𑌨𑌿𑌲𑌯𑌂 𑌤𑌸𑍍𑌯 𑌰𑌕𑍍𑌷𑌸𑌃 ॥ 9 ॥
𑌅𑌦𑍀𑌰𑍍𑌘𑌦𑌰𑍍𑌶𑌿𑌨𑌂 𑌤𑌂 𑌵𑍈 𑌰𑌾𑌵𑌣𑌂 𑌰𑌾𑌕𑍍𑌷𑌸𑌾𑌧𑌿𑌪𑌮𑍍 ।
𑌅𑌨𑍍𑌤𑌿𑌕𑍇 𑌯𑌦𑌿 𑌵𑌾 𑌦𑍂𑌰𑍇 𑌯𑌦𑌿 𑌜𑌾𑌨𑌾𑌸𑌿 𑌶𑌂𑌸 𑌨𑌃 ॥ 10 ॥
𑌤𑌤𑍋𑌽𑌬𑍍𑌰𑌵𑍀𑌨𑍍𑌮𑌹𑌾𑌤𑍇𑌜𑌾 𑌜𑍍𑌯𑍇𑌷𑍍𑌠𑍋 𑌭𑍍𑌰𑌾𑌤𑌾 𑌜𑌟𑌾𑌯𑍁𑌷𑌃 ।
𑌆𑌤𑍍𑌮𑌾𑌨𑍁𑌰𑍂𑌪𑌂 𑌵𑌚𑌨𑌂 𑌵𑌾𑌨𑌰𑌾𑌨𑍍𑌸𑌮𑍍𑌪𑍍𑌰𑌹𑌰𑍍𑌷𑌯𑌨𑍍 ॥ 11 ॥
𑌨𑌿𑌰𑍍𑌦𑌗𑍍𑌧𑌪𑌕𑍍𑌷𑍋 𑌗𑍃𑌧𑍍𑌰𑍋𑌽𑌹𑌂 𑌹𑍀𑌨𑌵𑍀𑌰𑍍𑌯𑌃 𑌪𑍍𑌲𑌵𑌙𑍍𑌗𑌮𑌾𑌃 ।
𑌵𑌾𑌙𑍍𑌮𑌾𑌤𑍍𑌰𑍇𑌣 𑌤𑍁 𑌰𑌾𑌮𑌸𑍍𑌯 𑌕𑌰𑌿𑌷𑍍𑌯𑍇 𑌸𑌾𑌹𑍍𑌯𑌮𑍁𑌤𑍍𑌤𑌮𑌮𑍍 ॥ 12 ॥
𑌜𑌾𑌨𑌾𑌮𑌿 𑌵𑌾𑌰𑍁𑌣𑌾𑌨𑍍𑌲𑍋𑌕𑌾𑌨𑍍𑌵𑌿𑌷𑍍𑌣𑍋𑌸𑍍𑌤𑍍𑌰𑍈 𑌵𑌿𑌕𑍍𑌰𑌮𑌾𑌨𑌪𑌿 ।
𑌮𑌹𑌾𑌸𑍁𑌰𑌵𑌿𑌮𑌰𑍍𑌦𑌨𑍍𑌵𑌾 𑌶𑍍𑌚 𑌹𑍍𑌯𑌮𑍃𑌤𑌸𑍍𑌯 𑌚 𑌮𑌨𑍍𑌥𑌨𑌮𑍍 ॥ 13 ॥
𑌰𑌾𑌮𑌸𑍍𑌯 𑌯𑌦𑌿𑌦𑌂 𑌕𑌾𑌰𑍍𑌯𑌂 𑌕𑌰𑍍𑌤𑌵𑍍𑌯𑌂 𑌪𑍍𑌰𑌥𑌮𑌂 𑌮𑌯𑌾 ।
𑌜𑌰𑌯𑌾 𑌚 𑌹𑍃𑌤𑌂 𑌤𑍇𑌜𑌃 𑌪𑍍𑌰𑌾𑌣𑌾𑌶𑍍𑌚 𑌶𑌿𑌥𑌿𑌲𑌾 𑌮𑌮 ॥ 14 ॥
𑌤𑌰𑍁𑌣𑍀 𑌰𑍂𑌪𑌸𑌮𑍍𑌪𑌨𑍍𑌨𑌾 𑌸𑌰𑍍𑌵𑌾𑌭𑌰𑌣𑌭𑍂𑌷𑌿𑌤𑌾 ।
𑌹𑍍𑌰𑌿𑌯𑌮𑌾𑌣𑌾 𑌮𑌯𑌾 𑌦𑍃𑌷𑍍𑌟𑌾 𑌰𑌾𑌵𑌣𑍇𑌨 𑌦𑍁𑌰𑌾𑌤𑍍𑌮𑌨𑌾 ॥ 15 ॥
𑌕𑍍𑌰𑍋𑌶𑌨𑍍𑌤𑍀 𑌰𑌾𑌮 𑌰𑌾𑌮𑍇𑌤𑌿 𑌲𑌕𑍍𑌷𑍍𑌮𑌣𑍇𑌤𑌿 𑌚 𑌭𑌾𑌮𑌿𑌨𑍀 ।
𑌭𑍂𑌷𑌣𑌾𑌨𑍍𑌯𑌪𑌵𑌿𑌧𑍍𑌯𑌨𑍍𑌤𑍀 𑌗𑌾𑌤𑍍𑌰𑌾𑌣𑌿 𑌚 𑌵𑌿𑌧𑍁𑌨𑍍𑌵𑌤𑍀 ॥ 16 ॥
𑌸𑍂𑌰𑍍𑌯𑌪𑍍𑌰𑌭𑍇𑌵 𑌶𑍈𑌲𑌾𑌗𑍍𑌰𑍇 𑌤𑌸𑍍𑌯𑌾𑌃 𑌕𑍗𑌶𑍇𑌯𑌮𑍁𑌤𑍍𑌤𑌮𑌮𑍍 ।
𑌅𑌸𑌿𑌤𑍇 𑌰𑌾𑌕𑍍𑌷𑌸𑍇 𑌭𑌾𑌤𑌿 𑌯𑌥𑌾 𑌵𑌾 𑌤𑌟𑌿𑌦𑌮𑍍𑌬𑍁𑌦𑍇 ॥ 17 ॥
𑌤𑌾𑌂 𑌤𑍁 𑌸𑍀𑌤𑌾𑌮𑌹𑌂 𑌮𑌨𑍍𑌯𑍇 𑌰𑌾𑌮𑌸𑍍𑌯 𑌪𑌰𑌿𑌕𑍀𑌰𑍍𑌤𑌨𑌾𑌤𑍍 ।
𑌶𑍍𑌰𑍂𑌯𑌤𑌾𑌂 𑌮𑍇 𑌕𑌥𑌯𑌤𑍋 𑌨𑌿𑌲𑌯𑌂 𑌤𑌸𑍍𑌯 𑌰𑌕𑍍𑌷𑌸𑌃 ॥ 18 ॥
𑌪𑍁𑌤𑍍𑌰𑍋 𑌵𑌿𑌶𑍍𑌰𑌵𑌸 𑌸𑍍𑌸𑌾𑌕𑍍𑌷𑌾𑌦𑍍𑌭𑍍𑌰𑌾𑌤𑌾 𑌵𑍈𑌶𑍍𑌰𑌵𑌣𑌸𑍍𑌯 𑌚 ।
𑌅𑌧𑍍𑌯𑌾𑌸𑍍𑌤𑍇 𑌨𑌗𑌰𑍀𑌂 𑌲𑌙𑍍𑌕𑌾𑌂 𑌰𑌾𑌵𑌣𑍋 𑌨𑌾𑌮 𑌰𑌾𑌕𑍍𑌷𑌸𑌃 ॥ 19 ॥
𑌇𑌤𑍋 𑌦𑍍𑌵𑍀𑌪𑌸𑍍𑌸𑌮𑍁𑌦𑍍𑌰𑌸𑍍𑌯 𑌸𑌮𑍍𑌪𑍂𑌰𑍍𑌣𑍇 𑌶𑌤𑌯𑍋𑌜𑌨𑍇 ।
𑌤𑌸𑍍𑌮𑌿𑌨𑍍𑌲𑌙𑍍𑌕𑌾𑌪𑍁𑌰𑍀 𑌰𑌮𑍍𑌯𑌾 𑌨𑌿𑌰𑍍𑌮𑌿𑌤𑌾 𑌵𑌿𑌶𑍍𑌵𑌕𑌰𑍍𑌮𑌣𑌾 ॥ 20 ॥
𑌜𑌾𑌮𑍍𑌬𑍂𑌨𑌦𑌮𑌯𑍈𑌰𑍍𑌦𑍍𑌵𑌾𑌰𑍈𑌶𑍍𑌚𑌿𑌤𑍍𑌰𑍈𑌃 𑌕𑌾𑌞𑍍𑌚𑌨𑌵𑍇𑌦𑌿𑌕𑍈𑌃 ।
𑌪𑍍𑌰𑌾𑌸𑌾𑌦𑍈𑌰𑍍𑌹𑍇𑌮𑌵𑌰𑍍𑌣𑍈𑌶𑍍𑌚 𑌮𑌹𑌦𑍍𑌭𑌿𑌃 𑌸𑍁𑌸𑌮𑌾 𑌕𑍃𑌤𑌾 ॥ 21 ॥
𑌪𑍍𑌰𑌾𑌕𑌾𑌰𑍇𑌣𑌾𑌰𑍍𑌕𑌵𑌰𑍍𑌣𑍇𑌨 𑌮𑌹𑌤𑌾 𑌚 𑌸𑌮𑌾𑌨𑍍𑌵𑌿𑌤𑌾 ।
𑌤𑌸𑍍𑌯𑌾𑌂 𑌵𑌸𑌤𑌿 𑌵𑍈𑌦𑍇𑌹𑍀 𑌦𑍀𑌨𑌾 𑌕𑍗𑌶𑍇𑌯𑌵𑌾𑌸𑌿𑌨𑍀 ॥ 22 ॥
𑌰𑌾𑌵𑌣𑌾𑌨𑍍𑌤𑌃𑌪𑍁𑌰𑍇 𑌰𑍁𑌦𑍍𑌧𑌾 𑌰𑌾𑌕𑍍𑌷𑌸𑍀𑌭𑌿𑌸𑍍𑌸𑍁𑌰𑌕𑍍𑌷𑌿𑌤𑌾 ।
𑌜𑌨𑌕𑌸𑍍𑌯𑌾𑌤𑍍𑌮𑌜𑌾𑌂 𑌰𑌾𑌜𑍍𑌞𑌸𑍍𑌤𑌤𑍍𑌰 𑌦𑍍𑌰𑌕𑍍𑌷𑍍𑌯𑌥 𑌮𑍈𑌥𑌿𑌲𑍀𑌮𑍍 ॥ 23 ॥
𑌲𑌙𑍍𑌕𑌾𑌯𑌾𑌮𑌥 𑌗𑍁𑌪𑍍𑌤𑌾𑌯𑌾𑌂 𑌸𑌾𑌗𑌰𑍇𑌣 𑌸𑌮𑌨𑍍𑌤𑌤𑌃 ।
𑌸𑌮𑍍𑌪𑍍𑌰𑌾𑌪𑍍𑌯 𑌸𑌾𑌗𑌰𑌸𑍍𑌯𑌾𑌨𑍍𑌤𑌂 𑌸𑌮𑍍𑌪𑍂𑌰𑍍𑌣𑌂 𑌶𑌤𑌯𑍋𑌜𑌨𑌮𑍍 ॥ 24 ॥
𑌆𑌸𑌾𑌦𑍍𑌯 𑌦𑌕𑍍𑌷𑌿𑌣𑌂 𑌤𑍀𑌰𑌂 𑌤𑌤𑍋 𑌦𑍍𑌰𑌕𑍍𑌷𑍍𑌯𑌥 𑌰𑌾𑌵𑌣𑌮𑍍 ।
𑌤𑌤𑍍𑌰𑍈𑌵 𑌤𑍍𑌵𑌰𑌿𑌤𑌾𑌃 𑌕𑍍𑌷𑌿𑌪𑍍𑌰𑌂 𑌵𑌿𑌕𑍍𑌰𑌮𑌧𑍍𑌵𑌂 𑌪𑍍𑌲𑌵𑌙𑍍𑌗𑌮𑌾𑌃 ॥ 25 ॥
𑌜𑍍𑌞𑌾𑌨𑍇𑌨 𑌖𑌲𑍁 𑌪𑌶𑍍𑌯𑌾𑌮𑌿 𑌦𑍃𑌷𑍍𑌟𑍍𑌵𑌾 𑌪𑍍𑌰𑌤𑍍𑌯𑌾𑌗𑌮𑌿𑌷𑍍𑌯𑌥 ।
𑌆𑌦𑍍𑌯𑌃 𑌪𑌨𑍍𑌥𑌾𑌃 𑌕𑍁𑌲𑌿𑌙𑍍𑌗𑌾𑌨𑌾𑌂 𑌯𑍇 𑌚𑌾𑌨𑍍𑌯𑍇 𑌧𑌾𑌨𑍍𑌯𑌜𑍀𑌵𑌿𑌨𑌃 ॥ 26 ॥
𑌦𑍍𑌵𑌿𑌤𑍀𑌯𑍋 𑌬𑌲𑌿𑌭𑍋𑌜𑌾𑌨𑌾𑌂 𑌯𑍇 𑌚 𑌵𑍃𑌕𑍍𑌷𑌫𑌲𑌾𑌶𑌿𑌨𑌃 ।
𑌭𑌾𑌸𑌾𑌸𑍍𑌤𑍃𑌤𑍀𑌯𑌂 𑌗𑌚𑍍𑌛𑌨𑍍𑌤𑌿 𑌕𑍍𑌰𑍗𑌞𑍍𑌚𑌾𑌶𑍍𑌚 𑌕𑍁𑌰𑌰𑍈𑌸𑍍𑌸𑌹 ॥ 27 ॥
𑌶𑍍𑌯𑍇𑌨𑌾𑌶𑍍𑌚𑌤𑍁𑌰𑍍𑌥𑌂 𑌗𑌚𑍍𑌛𑌨𑍍𑌤𑌿 𑌗𑍃𑌧𑍍𑌰𑌾 𑌗𑌚𑍍𑌛𑌨𑍍𑌤𑌿 𑌪𑌞𑍍𑌚𑌮𑌮𑍍 ।
𑌬𑌲𑌵𑍀𑌰𑍍𑌯𑍋𑌪𑌪𑌨𑍍𑌨𑌾𑌨𑌾𑌂 𑌰𑍂𑌪𑌯𑍗𑌵𑌨𑌶𑌾𑌲𑌿𑌨𑌾𑌮𑍍 ॥ 28 ॥
𑌷𑌷𑍍𑌠𑌸𑍍𑌤𑍁 𑌪𑌨𑍍𑌥𑌾 𑌹𑌂𑌸𑌾𑌨𑌾𑌂 𑌵𑍈𑌨𑌤𑍇𑌯𑌗𑌤𑌿𑌃 𑌪𑌰𑌾 ।
𑌵𑍈𑌨𑌤𑍇𑌯𑌾𑌚𑍍𑌚 𑌨𑍋 𑌜𑌨𑍍𑌮 𑌸𑌰𑍍𑌵𑍇𑌷𑌾𑌂 𑌵𑌾𑌨𑌰𑌰𑍍𑌷𑌭𑌾𑌃 ॥ 29 ॥
𑌇𑌹𑌸𑍍𑌥𑍋𑌽𑌹𑌂 𑌪𑍍𑌰𑌪𑌶𑍍𑌯𑌾𑌮𑌿 𑌰𑌾𑌵𑌣𑌂 𑌜𑌾𑌨𑌕𑍀𑌂 𑌤𑌥𑌾 ।
𑌅𑌸𑍍𑌮𑌾𑌕𑌮𑌪𑌿 𑌸𑍗𑌵𑌰𑍍𑌣𑌂 𑌦𑌿𑌵𑍍𑌯𑌂 𑌚𑌕𑍍𑌷𑍁𑌰𑍍𑌬𑌲𑌂 𑌤𑌥𑌾 ॥ 30 ॥
𑌤𑌸𑍍𑌮𑌾𑌦𑌾𑌹𑌾𑌰𑌵𑍀𑌰𑍍𑌯𑍇𑌣 𑌨𑌿𑌸𑌰𑍍𑌗𑍇𑌣 𑌚 𑌵𑌾𑌨𑌰𑌾𑌃 ।
𑌆𑌯𑍋𑌜𑌨𑌶𑌤𑌾𑌤𑍍𑌸𑌾𑌗𑍍𑌰𑌾𑌦𑍍𑌵𑌯𑌂 𑌪𑌶𑍍𑌯𑌾𑌮 𑌨𑌿𑌤𑍍𑌯𑌶𑌃 ॥ 31 ॥
𑌅𑌸𑍍𑌮𑌾𑌕𑌂 𑌵𑌿𑌹𑌿𑌤𑌾 𑌵𑍃𑌤𑍍𑌤𑌿𑌰𑍍𑌨𑌿𑌸𑌰𑍍𑌗𑍇𑌣 𑌚 𑌦𑍂𑌰𑌤𑌃 ।
𑌵𑌿𑌹𑌿𑌤𑌾 𑌪𑌾𑌦𑌮𑍂𑌲𑍇 𑌤𑍁 𑌵𑍃𑌤𑍍𑌤𑌿𑌶𑍍𑌚𑌰𑌣𑌯𑍋𑌧𑌿𑌨𑌾𑌮𑍍 ॥ 32 ॥
𑌗𑌰𑍍𑌹𑌿𑌤𑌂 𑌤𑍁 𑌕𑍃𑌤𑌂 𑌕𑌰𑍍𑌮 𑌯𑍇𑌨 𑌸𑍍𑌮 𑌪𑌶𑌿𑌤𑌾𑌶𑌿𑌨𑌾 ।
𑌪𑍍𑌰𑌤𑍀𑌕𑌾𑌰𑍍𑌯𑌂 𑌚 𑌮𑍇 𑌤𑌸𑍍𑌯 𑌵𑍈𑌰𑌂 𑌭𑍍𑌰𑌾𑌤𑍃𑌕𑍃𑌤𑌂 𑌭𑌵𑍇𑌤𑍍 ॥ 33 ॥
𑌉𑌪𑌾𑌯𑍋 𑌦𑍃𑌶𑍍𑌯𑌤𑌾𑌂 𑌕𑌶𑍍𑌚𑌿𑌲𑍍𑌲𑌙𑍍𑌘𑌨𑍇 𑌲𑌵𑌣𑌾𑌮𑍍𑌭𑌸𑌃 ।
𑌅𑌭𑌿𑌗𑌮𑍍𑌯 𑌤𑍁 𑌵𑍈𑌦𑍇𑌹𑍀𑌂 𑌸𑌮𑍃𑌦𑍍𑌧𑌾𑌰𑍍𑌥𑌾 𑌗𑌮𑌿𑌷𑍍𑌯𑌥 ॥ 34 ॥
𑌸𑌮𑍁𑌦𑍍𑌰𑌂 𑌨𑍇𑌤𑍁𑌮𑌿𑌚𑍍𑌛𑌾𑌮𑌿 𑌭𑌵𑌦𑍍𑌭𑌿𑌰𑍍𑌵𑌰𑍁𑌣𑌾𑌲𑌯𑌮𑍍 ।
𑌪𑍍𑌰𑌦𑌾𑌸𑍍𑌯𑌾𑌮𑍍𑌯𑍁𑌦𑌕𑌂 𑌭𑍍𑌰𑌾𑌤𑍁𑌸𑍍𑌸𑍍𑌵𑌰𑍍𑌗𑌤𑌸𑍍𑌯 𑌮𑌹𑌾𑌤𑍍𑌮𑌨𑌃 ॥ 35 ॥
𑌤𑌤𑍋 𑌨𑍀𑌤𑍍𑌵𑌾 𑌤𑍁 𑌤𑌂 𑌦𑍇𑌶𑌂 𑌤𑍀𑌰𑌂 𑌨𑌦𑌨𑌦𑍀𑌪𑌤𑍇𑌃 ।
𑌨𑌿𑌰𑍍𑌦𑌗𑍍𑌧𑌪𑌕𑍍𑌷𑌂 𑌸𑌮𑍍𑌪𑌾𑌤𑌿𑌂 𑌵𑌾𑌨𑌰𑌾𑌸𑍍𑌸𑍁𑌮𑌹𑍗𑌜𑌸𑌃 ॥ 36 ॥
𑌪𑍁𑌨𑌃 𑌪𑍍𑌰𑌤𑍍𑌯𑌾𑌨𑌯𑌿𑌤𑍍𑌵𑌾 𑌚 𑌤𑌂 𑌦𑍇𑌶𑌂 𑌪𑌤𑌗𑍇𑌶𑍍𑌵𑌰𑌮𑍍 ।
𑌬𑌭𑍂𑌵𑍁𑌰𑍍𑌵𑌾𑌨𑌰𑌾 𑌹𑍃𑌷𑍍𑌟𑌾𑌃 𑌪𑍍𑌰𑌵𑍃𑌤𑍍𑌤𑌿𑌮𑍁𑌪𑌲𑌭𑍍𑌯 𑌤𑍇 ॥ 37 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌕𑌿𑌷𑍍𑌕𑌿𑌨𑍍𑌧𑌾𑌕𑌾𑌣𑍍𑌡𑍇 𑌅𑌷𑍍𑌟𑌪𑌞𑍍𑌚𑌾𑌶𑌸𑍍𑌸𑌰𑍍𑌗𑌃 ॥
Roman (IAST) Transliteration
śrīmadvālmīkīya rāmāyaṇe kiṣkindhākāṇḍam |
atha aṣṭapañcāśassargaḥ |
ityuktaḥ karuṇaṃ vākyaṃ vānaraistyaktajīvitaiḥ |
sabāṣpo vānarāngṛdhraḥ pratyuvāca mahāsvanaḥ || 1 ||
yavīyānmama bhrātā jaṭāyurnāma vānarāḥ |
yamākhyāta hataṃ yuddhe rāvaṇena balīyasā || 2 ||
vṛddhabhāvādapakṣatvācchṛṇvaṃstadapi marṣaye |
na hi me śaktirastyadya bhrāturvairavimokṣaṇe || 3 ||
purā vṛtravadhe vṛtte parasparajayaiṣiṇau |
ādityamupayātau svo jvalantaṃ raśmimālinam || 4 ||
āvṛttyā'kāśamārge tu javena sma gatau bhṛśam |
madhyaṃ prāpte dinakare jaṭāyuravasīdati || 5 ||
tamahaṃ bhrātaraṃ dṛṣṭvā sūryaraśmibhirarditam |
pakṣābhyāṃ chādayāmāsa snehātparamavihvalaḥ || 6 ||
nirdagdhapakṣaḥ patito vindhye'haṃ vānararṣabhāḥ |
ahamasminvasanbhrātuḥ pravṛttiṃ nopalakṣaye || 7 ||
jaṭāyuṣastvevamukto bhrātrā sampātinā tadā |
yuvarājo mahāprājñaḥ pratyuvācāṅgadastataḥ || 8 ||
jaṭāyuṣo yadi bhrātā śrutaṃ te gaditaṃ mayā |
ākhyā hi yadi jānāsi nilayaṃ tasya rakṣasaḥ || 9 ||
adīrghadarśinaṃ taṃ vai rāvaṇaṃ rākṣasādhipam |
antike yadi vā dūre yadi jānāsi śaṃsa naḥ || 10 ||
tato'bravīnmahātejā jyeṣṭho bhrātā jaṭāyuṣaḥ |
ātmānurūpaṃ vacanaṃ vānarānsampraharṣayan || 11 ||
nirdagdhapakṣo gṛdhro'haṃ hīnavīryaḥ plavaṅgamāḥ |
vāṅmātreṇa tu rāmasya kariṣye sāhyamuttamam || 12 ||
jānāmi vāruṇānlokānviṣṇostrai vikramānapi |
mahāsuravimardanvā śca hyamṛtasya ca manthanam || 13 ||
rāmasya yadidaṃ kāryaṃ kartavyaṃ prathamaṃ mayā |
jarayā ca hṛtaṃ tejaḥ prāṇāśca śithilā mama || 14 ||
taruṇī rūpasampannā sarvābharaṇabhūṣitā |
hriyamāṇā mayā dṛṣṭā rāvaṇena durātmanā || 15 ||
krośantī rāma rāmeti lakṣmaṇeti ca bhāminī |
bhūṣaṇānyapavidhyantī gātrāṇi ca vidhunvatī || 16 ||
sūryaprabheva śailāgre tasyāḥ kauśeyamuttamam |
asite rākṣase bhāti yathā vā taṭidambude || 17 ||
tāṃ tu sītāmahaṃ manye rāmasya parikīrtanāt |
śrūyatāṃ me kathayato nilayaṃ tasya rakṣasaḥ || 18 ||
putro viśravasa ssākṣādbhrātā vaiśravaṇasya ca |
adhyāste nagarīṃ laṅkāṃ rāvaṇo nāma rākṣasaḥ || 19 ||
ito dvīpassamudrasya sampūrṇe śatayojane |
tasminlaṅkāpurī ramyā nirmitā viśvakarmaṇā || 20 ||
jāmbūnadamayairdvāraiścitraiḥ kāñcanavedikaiḥ |
prāsādairhemavarṇaiśca mahadbhiḥ susamā kṛtā || 21 ||
prākāreṇārkavarṇena mahatā ca samānvitā |
tasyāṃ vasati vaidehī dīnā kauśeyavāsinī || 22 ||
rāvaṇāntaḥpure ruddhā rākṣasībhissurakṣitā |
janakasyātmajāṃ rājñastatra drakṣyatha maithilīm || 23 ||
laṅkāyāmatha guptāyāṃ sāgareṇa samantataḥ |
samprāpya sāgarasyāntaṃ sampūrṇaṃ śatayojanam || 24 ||
āsādya dakṣiṇaṃ tīraṃ tato drakṣyatha rāvaṇam |
tatraiva tvaritāḥ kṣipraṃ vikramadhvaṃ plavaṅgamāḥ || 25 ||
jñānena khalu paśyāmi dṛṣṭvā pratyāgamiṣyatha |
ādyaḥ panthāḥ kuliṅgānāṃ ye cānye dhānyajīvinaḥ || 26 ||
dvitīyo balibhojānāṃ ye ca vṛkṣaphalāśinaḥ |
bhāsāstṛtīyaṃ gacchanti krauñcāśca kuraraissaha || 27 ||
śyenāścaturthaṃ gacchanti gṛdhrā gacchanti pañcamam |
balavīryopapannānāṃ rūpayauvanaśālinām || 28 ||
ṣaṣṭhastu panthā haṃsānāṃ vainateyagatiḥ parā |
vainateyācca no janma sarveṣāṃ vānararṣabhāḥ || 29 ||
ihastho'haṃ prapaśyāmi rāvaṇaṃ jānakīṃ tathā |
asmākamapi sauvarṇaṃ divyaṃ cakṣurbalaṃ tathā || 30 ||
tasmādāhāravīryeṇa nisargeṇa ca vānarāḥ |
āyojanaśatātsāgrādvayaṃ paśyāma nityaśaḥ || 31 ||
asmākaṃ vihitā vṛttirnisargeṇa ca dūrataḥ |
vihitā pādamūle tu vṛttiścaraṇayodhinām || 32 ||
garhitaṃ tu kṛtaṃ karma yena sma paśitāśinā |
pratīkāryaṃ ca me tasya vairaṃ bhrātṛkṛtaṃ bhavet || 33 ||
upāyo dṛśyatāṃ kaścillaṅghane lavaṇāmbhasaḥ |
abhigamya tu vaidehīṃ samṛddhārthā gamiṣyatha || 34 ||
samudraṃ netumicchāmi bhavadbhirvaruṇālayam |
pradāsyāmyudakaṃ bhrātussvargatasya mahātmanaḥ || 35 ||
tato nītvā tu taṃ deśaṃ tīraṃ nadanadīpateḥ |
nirdagdhapakṣaṃ sampātiṃ vānarāssumahaujasaḥ || 36 ||
punaḥ pratyānayitvā ca taṃ deśaṃ patageśvaram |
babhūvurvānarā hṛṣṭāḥ pravṛttimupalabhya te || 37 ||
ityārṣe śrīmadrāmāyaṇe vālmīkīya ādikāvye kiṣkindhākāṇḍe aṣṭapañcāśassargaḥ ||
Sanskrit — Devanagari (original)
श्रीमद्वाल्मीकीय रामायणे किष्किन्धाकाण्डम् ।
अथ अष्टपञ्चाशस्सर्गः ।
इत्युक्तः करुणं वाक्यं वानरैस्त्यक्तजीवितैः ।
सबाष्पो वानरान्गृध्रः प्रत्युवाच महास्वनः ॥ 1 ॥
यवीयान्मम भ्राता जटायुर्नाम वानराः ।
यमाख्यात हतं युद्धे रावणेन बलीयसा ॥ 2 ॥
वृद्धभावादपक्षत्वाच्छृण्वंस्तदपि मर्षये ।
न हि मे शक्तिरस्त्यद्य भ्रातुर्वैरविमोक्षणे ॥ 3 ॥
पुरा वृत्रवधे वृत्ते परस्परजयैषिणौ ।
आदित्यमुपयातौ स्वो ज्वलन्तं रश्मिमालिनम् ॥ 4 ॥
आवृत्त्याऽकाशमार्गे तु जवेन स्म गतौ भृशम् ।
मध्यं प्राप्ते दिनकरे जटायुरवसीदति ॥ 5 ॥
तमहं भ्रातरं दृष्ट्वा सूर्यरश्मिभिरर्दितम् ।
पक्षाभ्यां छादयामास स्नेहात्परमविह्वलः ॥ 6 ॥
निर्दग्धपक्षः पतितो विन्ध्येऽहं वानरर्षभाः ।
अहमस्मिन्वसन्भ्रातुः प्रवृत्तिं नोपलक्षये ॥ 7 ॥
जटायुषस्त्वेवमुक्तो भ्रात्रा सम्पातिना तदा ।
युवराजो महाप्राज्ञः प्रत्युवाचाङ्गदस्ततः ॥ 8 ॥
जटायुषो यदि भ्राता श्रुतं ते गदितं मया ।
आख्या हि यदि जानासि निलयं तस्य रक्षसः ॥ 9 ॥
अदीर्घदर्शिनं तं वै रावणं राक्षसाधिपम् ।
अन्तिके यदि वा दूरे यदि जानासि शंस नः ॥ 10 ॥
ततोऽब्रवीन्महातेजा ज्येष्ठो भ्राता जटायुषः ।
आत्मानुरूपं वचनं वानरान्सम्प्रहर्षयन् ॥ 11 ॥
निर्दग्धपक्षो गृध्रोऽहं हीनवीर्यः प्लवङ्गमाः ।
वाङ्मात्रेण तु रामस्य करिष्ये साह्यमुत्तमम् ॥ 12 ॥
जानामि वारुणान्लोकान्विष्णोस्त्रै विक्रमानपि ।
महासुरविमर्दन्वा श्च ह्यमृतस्य च मन्थनम् ॥ 13 ॥
रामस्य यदिदं कार्यं कर्तव्यं प्रथमं मया ।
जरया च हृतं तेजः प्राणाश्च शिथिला मम ॥ 14 ॥
तरुणी रूपसम्पन्ना सर्वाभरणभूषिता ।
ह्रियमाणा मया दृष्टा रावणेन दुरात्मना ॥ 15 ॥
क्रोशन्ती राम रामेति लक्ष्मणेति च भामिनी ।
भूषणान्यपविध्यन्ती गात्राणि च विधुन्वती ॥ 16 ॥
सूर्यप्रभेव शैलाग्रे तस्याः कौशेयमुत्तमम् ।
असिते राक्षसे भाति यथा वा तटिदम्बुदे ॥ 17 ॥
तां तु सीतामहं मन्ये रामस्य परिकीर्तनात् ।
श्रूयतां मे कथयतो निलयं तस्य रक्षसः ॥ 18 ॥
पुत्रो विश्रवस स्साक्षाद्भ्राता वैश्रवणस्य च ।
अध्यास्ते नगरीं लङ्कां रावणो नाम राक्षसः ॥ 19 ॥
इतो द्वीपस्समुद्रस्य सम्पूर्णे शतयोजने ।
तस्मिन्लङ्कापुरी रम्या निर्मिता विश्वकर्मणा ॥ 20 ॥
जाम्बूनदमयैर्द्वारैश्चित्रैः काञ्चनवेदिकैः ।
प्रासादैर्हेमवर्णैश्च महद्भिः सुसमा कृता ॥ 21 ॥
प्राकारेणार्कवर्णेन महता च समान्विता ।
तस्यां वसति वैदेही दीना कौशेयवासिनी ॥ 22 ॥
रावणान्तःपुरे रुद्धा राक्षसीभिस्सुरक्षिता ।
जनकस्यात्मजां राज्ञस्तत्र द्रक्ष्यथ मैथिलीम् ॥ 23 ॥
लङ्कायामथ गुप्तायां सागरेण समन्ततः ।
सम्प्राप्य सागरस्यान्तं सम्पूर्णं शतयोजनम् ॥ 24 ॥
आसाद्य दक्षिणं तीरं ततो द्रक्ष्यथ रावणम् ।
तत्रैव त्वरिताः क्षिप्रं विक्रमध्वं प्लवङ्गमाः ॥ 25 ॥
ज्ञानेन खलु पश्यामि दृष्ट्वा प्रत्यागमिष्यथ ।
आद्यः पन्थाः कुलिङ्गानां ये चान्ये धान्यजीविनः ॥ 26 ॥
द्वितीयो बलिभोजानां ये च वृक्षफलाशिनः ।
भासास्तृतीयं गच्छन्ति क्रौञ्चाश्च कुररैस्सह ॥ 27 ॥
श्येनाश्चतुर्थं गच्छन्ति गृध्रा गच्छन्ति पञ्चमम् ।
बलवीर्योपपन्नानां रूपयौवनशालिनाम् ॥ 28 ॥
षष्ठस्तु पन्था हंसानां वैनतेयगतिः परा ।
वैनतेयाच्च नो जन्म सर्वेषां वानरर्षभाः ॥ 29 ॥
इहस्थोऽहं प्रपश्यामि रावणं जानकीं तथा ।
अस्माकमपि सौवर्णं दिव्यं चक्षुर्बलं तथा ॥ 30 ॥
तस्मादाहारवीर्येण निसर्गेण च वानराः ।
आयोजनशतात्साग्राद्वयं पश्याम नित्यशः ॥ 31 ॥
अस्माकं विहिता वृत्तिर्निसर्गेण च दूरतः ।
विहिता पादमूले तु वृत्तिश्चरणयोधिनाम् ॥ 32 ॥
गर्हितं तु कृतं कर्म येन स्म पशिताशिना ।
प्रतीकार्यं च मे तस्य वैरं भ्रातृकृतं भवेत् ॥ 33 ॥
उपायो दृश्यतां कश्चिल्लङ्घने लवणाम्भसः ।
अभिगम्य तु वैदेहीं समृद्धार्था गमिष्यथ ॥ 34 ॥
समुद्रं नेतुमिच्छामि भवद्भिर्वरुणालयम् ।
प्रदास्याम्युदकं भ्रातुस्स्वर्गतस्य महात्मनः ॥ 35 ॥
ततो नीत्वा तु तं देशं तीरं नदनदीपतेः ।
निर्दग्धपक्षं सम्पातिं वानरास्सुमहौजसः ॥ 36 ॥
पुनः प्रत्यानयित्वा च तं देशं पतगेश्वरम् ।
बभूवुर्वानरा हृष्टाः प्रवृत्तिमुपलभ्य ते ॥ 37 ॥
इत्यार्षे श्रीमद्रामायणे वाल्मीकीय आदिकाव्ये किष्किन्धाकाण्डे अष्टपञ्चाशस्सर्गः ॥
śrīmadvālmīkīya rāmāyaṇe kiṣkindhākāṇḍam |
atha aṣṭapañcāśassargaḥ |
ityuktaḥ karuṇaṃ vākyaṃ vānaraistyaktajīvitaiḥ |
sabāṣpo vānarāngṛdhraḥ pratyuvāca mahāsvanaḥ || 1 ||
yavīyānmama bhrātā jaṭāyurnāma vānarāḥ |
yamākhyāta hataṃ yuddhe rāvaṇena balīyasā || 2 ||
vṛddhabhāvādapakṣatvācchṛṇvaṃstadapi marṣaye |
na hi me śaktirastyadya bhrāturvairavimokṣaṇe || 3 ||
purā vṛtravadhe vṛtte parasparajayaiṣiṇau |
ādityamupayātau svo jvalantaṃ raśmimālinam || 4 ||
āvṛttyā'kāśamārge tu javena sma gatau bhṛśam |
madhyaṃ prāpte dinakare jaṭāyuravasīdati || 5 ||
tamahaṃ bhrātaraṃ dṛṣṭvā sūryaraśmibhirarditam |
pakṣābhyāṃ chādayāmāsa snehātparamavihvalaḥ || 6 ||
nirdagdhapakṣaḥ patito vindhye'haṃ vānararṣabhāḥ |
ahamasminvasanbhrātuḥ pravṛttiṃ nopalakṣaye || 7 ||
jaṭāyuṣastvevamukto bhrātrā sampātinā tadā |
yuvarājo mahāprājñaḥ pratyuvācāṅgadastataḥ || 8 ||
jaṭāyuṣo yadi bhrātā śrutaṃ te gaditaṃ mayā |
ākhyā hi yadi jānāsi nilayaṃ tasya rakṣasaḥ || 9 ||
adīrghadarśinaṃ taṃ vai rāvaṇaṃ rākṣasādhipam |
antike yadi vā dūre yadi jānāsi śaṃsa naḥ || 10 ||
tato'bravīnmahātejā jyeṣṭho bhrātā jaṭāyuṣaḥ |
ātmānurūpaṃ vacanaṃ vānarānsampraharṣayan || 11 ||
nirdagdhapakṣo gṛdhro'haṃ hīnavīryaḥ plavaṅgamāḥ |
vāṅmātreṇa tu rāmasya kariṣye sāhyamuttamam || 12 ||
jānāmi vāruṇānlokānviṣṇostrai vikramānapi |
mahāsuravimardanvā śca hyamṛtasya ca manthanam || 13 ||
rāmasya yadidaṃ kāryaṃ kartavyaṃ prathamaṃ mayā |
jarayā ca hṛtaṃ tejaḥ prāṇāśca śithilā mama || 14 ||
taruṇī rūpasampannā sarvābharaṇabhūṣitā |
hriyamāṇā mayā dṛṣṭā rāvaṇena durātmanā || 15 ||
krośantī rāma rāmeti lakṣmaṇeti ca bhāminī |
bhūṣaṇānyapavidhyantī gātrāṇi ca vidhunvatī || 16 ||
sūryaprabheva śailāgre tasyāḥ kauśeyamuttamam |
asite rākṣase bhāti yathā vā taṭidambude || 17 ||
tāṃ tu sītāmahaṃ manye rāmasya parikīrtanāt |
śrūyatāṃ me kathayato nilayaṃ tasya rakṣasaḥ || 18 ||
putro viśravasa ssākṣādbhrātā vaiśravaṇasya ca |
adhyāste nagarīṃ laṅkāṃ rāvaṇo nāma rākṣasaḥ || 19 ||
ito dvīpassamudrasya sampūrṇe śatayojane |
tasminlaṅkāpurī ramyā nirmitā viśvakarmaṇā || 20 ||
jāmbūnadamayairdvāraiścitraiḥ kāñcanavedikaiḥ |
prāsādairhemavarṇaiśca mahadbhiḥ susamā kṛtā || 21 ||
prākāreṇārkavarṇena mahatā ca samānvitā |
tasyāṃ vasati vaidehī dīnā kauśeyavāsinī || 22 ||
rāvaṇāntaḥpure ruddhā rākṣasībhissurakṣitā |
janakasyātmajāṃ rājñastatra drakṣyatha maithilīm || 23 ||
laṅkāyāmatha guptāyāṃ sāgareṇa samantataḥ |
samprāpya sāgarasyāntaṃ sampūrṇaṃ śatayojanam || 24 ||
āsādya dakṣiṇaṃ tīraṃ tato drakṣyatha rāvaṇam |
tatraiva tvaritāḥ kṣipraṃ vikramadhvaṃ plavaṅgamāḥ || 25 ||
jñānena khalu paśyāmi dṛṣṭvā pratyāgamiṣyatha |
ādyaḥ panthāḥ kuliṅgānāṃ ye cānye dhānyajīvinaḥ || 26 ||
dvitīyo balibhojānāṃ ye ca vṛkṣaphalāśinaḥ |
bhāsāstṛtīyaṃ gacchanti krauñcāśca kuraraissaha || 27 ||
śyenāścaturthaṃ gacchanti gṛdhrā gacchanti pañcamam |
balavīryopapannānāṃ rūpayauvanaśālinām || 28 ||
ṣaṣṭhastu panthā haṃsānāṃ vainateyagatiḥ parā |
vainateyācca no janma sarveṣāṃ vānararṣabhāḥ || 29 ||
ihastho'haṃ prapaśyāmi rāvaṇaṃ jānakīṃ tathā |
asmākamapi sauvarṇaṃ divyaṃ cakṣurbalaṃ tathā || 30 ||
tasmādāhāravīryeṇa nisargeṇa ca vānarāḥ |
āyojanaśatātsāgrādvayaṃ paśyāma nityaśaḥ || 31 ||
asmākaṃ vihitā vṛttirnisargeṇa ca dūrataḥ |
vihitā pādamūle tu vṛttiścaraṇayodhinām || 32 ||
garhitaṃ tu kṛtaṃ karma yena sma paśitāśinā |
pratīkāryaṃ ca me tasya vairaṃ bhrātṛkṛtaṃ bhavet || 33 ||
upāyo dṛśyatāṃ kaścillaṅghane lavaṇāmbhasaḥ |
abhigamya tu vaidehīṃ samṛddhārthā gamiṣyatha || 34 ||
samudraṃ netumicchāmi bhavadbhirvaruṇālayam |
pradāsyāmyudakaṃ bhrātussvargatasya mahātmanaḥ || 35 ||
tato nītvā tu taṃ deśaṃ tīraṃ nadanadīpateḥ |
nirdagdhapakṣaṃ sampātiṃ vānarāssumahaujasaḥ || 36 ||
punaḥ pratyānayitvā ca taṃ deśaṃ patageśvaram |
babhūvurvānarā hṛṣṭāḥ pravṛttimupalabhya te || 37 ||
ityārṣe śrīmadrāmāyaṇe vālmīkīya ādikāvye kiṣkindhākāṇḍe aṣṭapañcāśassargaḥ ||
🕉️ This is the original Sanskrit rendered in Grantha script.
Pronunciation is identical to the Sanskrit Devanagari version.