ଶ୍ରୀମଦ୍ଵାଲ୍ମୀକୀଯ ରାମାଯଣେ ବାଲକାଣ୍ଡମ୍ ।
ଅଥ ଏକପଞ୍ଚାଶସ୍ସର୍ଗଃ ।
ତସ୍ଯ ତଦ୍ଵଚନଂ ଶ୍ରୁତ୍ଵା ଵିଶ୍ଵାମିତ୍ରସ୍ଯ ଧୀମତଃ ।
ହୃଷ୍ଟରୋମା ମହାତେଜାଶ୍ଶତାନନ୍ଦୋ ମହାତପାଃ ॥ 1 ॥
ଗୌତମସ୍ଯ ସୁତୋ ଜ୍ଯେଷ୍ଠସ୍ତପସା ଦ୍ଯୋତିତପ୍ରଭଃ ।
ରାମସନ୍ଦର୍ଶନାଦେଵ ପରଂ ଵିସ୍ମଯମାଗତଃ ॥ 2 ॥
ସ ତୌ ନିଷଣ୍ଣୌ ସମ୍ପ୍ରେକ୍ଷ୍ଯ ସୁଖାସୀନୌ ନୃପାତ୍ମଜୌ ।
ଶତାନନ୍ଦୋ ମୁନିଶ୍ରେଷ୍ଠଂ ଵିଶ୍ଵାମିତ୍ରମଥାମବ୍ରଵୀତ୍ ॥ 3 ॥
ଅପି ତେ ମୁନିଶାର୍ଦୂଲ ମମ ମାତା ଯଶସ୍ଵିନୀ ।
ଦର୍ଶିତା ରାଜପୁତ୍ରାଯ ତପୋ ଦୀର୍ଘମୁପାଗତା ॥ 4 ॥
ଅପି ରାମେ ମହାତେଜା ମମ ମାତା ଯଶସ୍ଵିନୀ ।
ଵନ୍ଯୈରୁପାହରତ୍ପୂଜାଂ ପୂଜାର୍ହେ ସର୍ଵଦେହିନାମ୍ ॥ 5 ॥
ଅପି ରାମାଯ କଥିତଂ ଯଥାଵୃତ୍ତଂ ପୁରାତନମ୍ ।
ମମ ମାତୁର୍ମହାତେଜୋ ଦୈଵେନ ଦୁରନୁଷ୍ଠିତମ୍ ॥ 6 ॥
ଅପି କୌଶିକ ଭଦ୍ରଂ ତେ ଗୁରୁଣା ମମ ସଙ୍ଗତା ।
ମମ ମାତା ମୁନିଶ୍ରେଷ୍ଠ ରାମସନ୍ଦର୍ଶନାଦିତଃ ॥ 7 ॥
ଅପି ମେ ଗୁରୁଣା ରାମଃ ପୂଜିତଃ କୁଶିକାତ୍ମଜ ।
ଇହାଗତୋ ମହାତେଜାଃ ପୂଜାଂ ପ୍ରାପ୍ତୋ ମହାତ୍ମନଃ ॥ 8 ॥
ଅପି ଶାନ୍ତେନ ମନସା ଗୁରୁର୍ମେ କୁଶିକାତ୍ମଜ ।
ଇହାଽଗତେନ ରାମେଣ ପ୍ରଯତେନାଭିଵାଦିତଃ ॥ 9 ॥
ତଚ୍ଛ୍ରୁତ୍ଵା ଵଚନଂ ତସ୍ଯ ଵିଶ୍ଵାମିତ୍ରୋ ମହାମୁନିଃ ।
ପ୍ରତ୍ଯୁଵାଚ ଶତାନନ୍ଦଂ ଵାକ୍ଯଜ୍ଞୋ ଵାକ୍ଯକୋଵିଦମ୍ ॥ 10 ॥
ନାତିକ୍ରାନ୍ତଂ ମୁନିଶ୍ରେଷ୍ଠ ଯତ୍କର୍ତଵ୍ଯଂ କୃତଂ ମଯା ।
ସଙ୍ଗତା ମୁନିନା ପତ୍ନୀ ଭାର୍ଗଵେଣେଵ ରେଣୁକା ॥ 11 ॥
ତଚ୍ଛ୍ରୁତ୍ଵା ଵଚନଂ ତସ୍ଯ ଵିଶ୍ଵାମିତ୍ରସ୍ଯ ଭାଷିତମ୍ ।
ଶତାନନ୍ଦୋ ମହାତେଜା ରାମଂ ଵଚନମବ୍ରଵୀତ୍ ॥ 12 ॥
ସ୍ଵାଗତଂ ତେ ନରଶ୍ରେଷ୍ଠ ଦିଷ୍ଟ୍ଯା ପ୍ରାପ୍ତୋଽସି ରାଘଵ ।
ଵିଶ୍ଵାମିତ୍ରଂ ପୁରସ୍କୃତ୍ଯ ମହର୍ଷିମପରାଜିତମ୍ ॥ 13 ॥
ଅଚିନ୍ତ୍ଯକର୍ମା ତପସା ବ୍ରହ୍ମର୍ଷିରତୁଲପ୍ରଭଃ ।
ଵିଶ୍ଵାମିତ୍ରୋ ମହାତେଜା ଵେତ୍ସ୍ଯେନଂ ପରମାଂ ଗତିମ୍ ॥ 14 ॥
ନାସ୍ତି ଧନ୍ଯତରୋ ରାମ ତ୍ଵତ୍ତୋଽନ୍ଯୋ ଭୁଵି କଶ୍ଚନ ।
ଗୋପ୍ତା କୁଶିକପୁତ୍ରସ୍ତେ ଯେନ ତପ୍ତଂ ମହତ୍ତପଃ ॥ 15 ॥
ଶ୍ରୂଯତାଂ ଚାଭିଧାସ୍ଯାମି କୌଶିକସ୍ଯ ମହାତ୍ମନଃ ।
ଯଥା ବଲଂ ଯଥା ଵୃତ୍ତଂ ତନ୍ମେ ନିଗଦତଃ ଶ୍ରୁଣୁ ॥ 16 ॥
ରାଜାଽଭୂଦେଷ ଧର୍ମାତ୍ମା ଦୀର୍ଘକାଲମରିନ୍ଦମଃ ।
ଧର୍ମଜ୍ଞଃ କୃତଵିଦ୍ଯଶ୍ଚ ପ୍ରଜାନାଂ ଚ ହିତେ ରତଃ ॥ 17 ॥
ପ୍ରଜାପତିସୁତଶ୍ଚାସୀତ୍କୁଶୋ ନାମ ମହୀପତିଃ ।
କୁଶସ୍ଯ ପୁତ୍ରୋ ବଲଵାନ୍ କୁଶନାଭସ୍ସୁଧାର୍ମିକଃ ॥ 18 ॥
କୁଶନାଭସୁତସ୍ତ୍ଵାସୀଦ୍ଗାଧିରିତ୍ଯେଵ ଵିଶ୍ରୃତଃ ।
ଗାଧେଃ ପୁତ୍ରୋ ମହାତେଜା ଵିଶ୍ଵାମିତ୍ରୋ ମହାମୁନିଃ ॥ 19 ॥
ଵିଶ୍ଵାମିତ୍ରୋ ମହାତେଜାଃ ପାଲଯାମାସ ମେଦିନୀମ୍ ।
ବହୁଵର୍ଷସହସ୍ରାଣି ରାଜା ରାଜ୍ଯମକାରଯତ୍ ॥ 20 ॥
କଦାଚିତ୍ତୁ ମହାତେଜା ଯୋଜଯିତ୍ଵା ଵରୂଥିନୀମ୍ ।
ଅକ୍ଷୌହୀଣୀପରିଵୃତଃ ପରିଚକ୍ରାମ ମେଦିନୀମ୍ ॥ 21 ॥
ନଗରାଣି ସରାଷ୍ଟ୍ରାଣି ସରିତଶ୍ଚ ତଥା ଗିରୀନ୍ ।
ଆଶ୍ରମାନ୍କ୍ରମଶୋ ରାମ ଵିଚରନ୍ନାଜଗାମ ହ ॥ 22 ॥
ଵସିଷ୍ଠସ୍ଯାଶ୍ରମପଦଂ ନାନାଵୃକ୍ଷସମାକୁଲମ୍ ।
ନାନାମୃଗଗଣାକୀର୍ଣଂ ସିଦ୍ଧଚାରଣସେଵିତମ୍ ॥ 23 ॥
ଦେଵଦାନଵଗନ୍ଧର୍ଵୈଃ କିନ୍ନରୈରୁପଶୋଭିତମ୍ ।
ପ୍ରଶାନ୍ତହରିଣାକୀର୍ଣଂ ଦ୍ଵିଜସଙ୍ଘନିଷେଵିତମ୍ ॥ 24 ॥
ବ୍ରହ୍ମର୍ଷିଗଣସଙ୍କୀର୍ଣଂ ଦେଵର୍ଷିଗଣସେଵିତମ୍ ।
ତପଶ୍ଚରଣସଂସିଦ୍ଧୈରଗ୍ନିକଲ୍ପୈର୍ମହାତ୍ମଭିଃ ॥ 25 ॥
ଅବ୍ଭକ୍ଷୈର୍ଵାଯୁଭକ୍ଷୈଶ୍ଚ ଶୀର୍ଣପର୍ଣାଶନୈସ୍ତଥା ।
ଫଲମୂଲାଶନୈର୍ଦାନ୍ତୈର୍ଜିତରୋଷୈର୍ଜିତେନ୍ଦ୍ରିଯୈଃ ॥ 26 ॥
ଋଷିଭିର୍ଵାଲଖିଲ୍ଯୈଶ୍ଚ ଜପହୋମପରାଯଣୈଃ ।
ଅନ୍ଯୈର୍ଵୈଖାନସୈଶ୍ଚୈଵ ସମନ୍ତାଦୁପଶୋଭିତମ୍ ॥ 27 ॥
ଵସିଷ୍ଠସ୍ଯାଶ୍ରମପଦଂ ବ୍ରହ୍ମଲୋକମିଵାପରମ୍ ।
ଦଦର୍ଶ ଜଯତାଂ ଶ୍ରେଷ୍ଠୋ ଵିଶ୍ଵାମିତ୍ରୋ ମହାବଲଃ ॥ 28 ॥
ଇତ୍ଯାର୍ଷେ ଶ୍ରୀମଦ୍ରାମାଯଣେ ଵାଲ୍ମୀକୀଯ ଆଦିକାଵ୍ଯେ ବାଲକାଣ୍ଡେ ଏକପଞ୍ଚାଶସ୍ସର୍ଗଃ ॥
Roman (IAST) Transliteration
śrīmadvālmīkīya rāmāyaṇe bālakāṇḍam |
atha ekapañcāśassargaḥ |
tasya tadvacanaṃ śrutvā viśvāmitrasya dhīmataḥ |
hṛṣṭaromā mahātejāśśatānando mahātapāḥ || 1 ||
gautamasya suto jyeṣṭhastapasā dyotitaprabhaḥ |
rāmasandarśanādeva paraṃ vismayamāgataḥ || 2 ||
sa tau niṣaṇṇau samprekṣya sukhāsīnau nṛpātmajau |
śatānando muniśreṣṭhaṃ viśvāmitramathāmabravīt || 3 ||
api te muniśārdūla mama mātā yaśasvinī |
darśitā rājaputrāya tapo dīrghamupāgatā || 4 ||
api rāme mahātejā mama mātā yaśasvinī |
vanyairupāharatpūjāṃ pūjārhe sarvadehinām || 5 ||
api rāmāya kathitaṃ yathāvṛttaṃ purātanam |
mama māturmahātejo daivena duranuṣṭhitam || 6 ||
api kauśika bhadraṃ te guruṇā mama saṅgatā |
mama mātā muniśreṣṭha rāmasandarśanāditaḥ || 7 ||
api me guruṇā rāmaḥ pūjitaḥ kuśikātmaja |
ihāgato mahātejāḥ pūjāṃ prāpto mahātmanaḥ || 8 ||
api śāntena manasā gururme kuśikātmaja |
ihā'gatena rāmeṇa prayatenābhivāditaḥ || 9 ||
tacchrutvā vacanaṃ tasya viśvāmitro mahāmuniḥ |
pratyuvāca śatānandaṃ vākyajño vākyakovidam || 10 ||
nātikrāntaṃ muniśreṣṭha yatkartavyaṃ kṛtaṃ mayā |
saṅgatā muninā patnī bhārgaveṇeva reṇukā || 11 ||
tacchrutvā vacanaṃ tasya viśvāmitrasya bhāṣitam |
śatānando mahātejā rāmaṃ vacanamabravīt || 12 ||
svāgataṃ te naraśreṣṭha diṣṭyā prāpto'si rāghava |
viśvāmitraṃ puraskṛtya maharṣimaparājitam || 13 ||
acintyakarmā tapasā brahmarṣiratulaprabhaḥ |
viśvāmitro mahātejā vetsyenaṃ paramāṃ gatim || 14 ||
nāsti dhanyataro rāma tvatto'nyo bhuvi kaścana |
goptā kuśikaputraste yena taptaṃ mahattapaḥ || 15 ||
śrūyatāṃ cābhidhāsyāmi kauśikasya mahātmanaḥ |
yathā balaṃ yathā vṛttaṃ tanme nigadataḥ śruṇu || 16 ||
rājā'bhūdeṣa dharmātmā dīrghakālamarindamaḥ |
dharmajñaḥ kṛtavidyaśca prajānāṃ ca hite rataḥ || 17 ||
prajāpatisutaścāsītkuśo nāma mahīpatiḥ |
kuśasya putro balavān kuśanābhassudhārmikaḥ || 18 ||
kuśanābhasutastvāsīdgādhirityeva viśrṛtaḥ |
gādheḥ putro mahātejā viśvāmitro mahāmuniḥ || 19 ||
viśvāmitro mahātejāḥ pālayāmāsa medinīm |
bahuvarṣasahasrāṇi rājā rājyamakārayat || 20 ||
kadācittu mahātejā yojayitvā varūthinīm |
akṣauhīṇīparivṛtaḥ paricakrāma medinīm || 21 ||
nagarāṇi sarāṣṭrāṇi saritaśca tathā girīn |
āśramānkramaśo rāma vicarannājagāma ha || 22 ||
vasiṣṭhasyāśramapadaṃ nānāvṛkṣasamākulam |
nānāmṛgagaṇākīrṇaṃ siddhacāraṇasevitam || 23 ||
devadānavagandharvaiḥ kinnarairupaśobhitam |
praśāntahariṇākīrṇaṃ dvijasaṅghaniṣevitam || 24 ||
brahmarṣigaṇasaṅkīrṇaṃ devarṣigaṇasevitam |
tapaścaraṇasaṃsiddhairagnikalpairmahātmabhiḥ || 25 ||
abbhakṣairvāyubhakṣaiśca śīrṇaparṇāśanaistathā |
phalamūlāśanairdāntairjitaroṣairjitendriyaiḥ || 26 ||
ṛṣibhirvālakhilyaiśca japahomaparāyaṇaiḥ |
anyairvaikhānasaiścaiva samantādupaśobhitam || 27 ||
vasiṣṭhasyāśramapadaṃ brahmalokamivāparam |
dadarśa jayatāṃ śreṣṭho viśvāmitro mahābalaḥ || 28 ||
ityārṣe śrīmadrāmāyaṇe vālmīkīya ādikāvye bālakāṇḍe ekapañcāśassargaḥ ||
Sanskrit — Devanagari (original)
श्रीमद्वाल्मीकीय रामायणे बालकाण्डम् ।
अथ एकपञ्चाशस्सर्गः ।
तस्य तद्वचनं श्रुत्वा विश्वामित्रस्य धीमतः ।
हृष्टरोमा महातेजाश्शतानन्दो महातपाः ॥ 1 ॥
गौतमस्य सुतो ज्येष्ठस्तपसा द्योतितप्रभः ।
रामसन्दर्शनादेव परं विस्मयमागतः ॥ 2 ॥
स तौ निषण्णौ सम्प्रेक्ष्य सुखासीनौ नृपात्मजौ ।
शतानन्दो मुनिश्रेष्ठं विश्वामित्रमथामब्रवीत् ॥ 3 ॥
अपि ते मुनिशार्दूल मम माता यशस्विनी ।
दर्शिता राजपुत्राय तपो दीर्घमुपागता ॥ 4 ॥
अपि रामे महातेजा मम माता यशस्विनी ।
वन्यैरुपाहरत्पूजां पूजार्हे सर्वदेहिनाम् ॥ 5 ॥
अपि रामाय कथितं यथावृत्तं पुरातनम् ।
मम मातुर्महातेजो दैवेन दुरनुष्ठितम् ॥ 6 ॥
अपि कौशिक भद्रं ते गुरुणा मम सङ्गता ।
मम माता मुनिश्रेष्ठ रामसन्दर्शनादितः ॥ 7 ॥
अपि मे गुरुणा रामः पूजितः कुशिकात्मज ।
इहागतो महातेजाः पूजां प्राप्तो महात्मनः ॥ 8 ॥
अपि शान्तेन मनसा गुरुर्मे कुशिकात्मज ।
इहाऽगतेन रामेण प्रयतेनाभिवादितः ॥ 9 ॥
तच्छ्रुत्वा वचनं तस्य विश्वामित्रो महामुनिः ।
प्रत्युवाच शतानन्दं वाक्यज्ञो वाक्यकोविदम् ॥ 10 ॥
नातिक्रान्तं मुनिश्रेष्ठ यत्कर्तव्यं कृतं मया ।
सङ्गता मुनिना पत्नी भार्गवेणेव रेणुका ॥ 11 ॥
तच्छ्रुत्वा वचनं तस्य विश्वामित्रस्य भाषितम् ।
शतानन्दो महातेजा रामं वचनमब्रवीत् ॥ 12 ॥
स्वागतं ते नरश्रेष्ठ दिष्ट्या प्राप्तोऽसि राघव ।
विश्वामित्रं पुरस्कृत्य महर्षिमपराजितम् ॥ 13 ॥
अचिन्त्यकर्मा तपसा ब्रह्मर्षिरतुलप्रभः ।
विश्वामित्रो महातेजा वेत्स्येनं परमां गतिम् ॥ 14 ॥
नास्ति धन्यतरो राम त्वत्तोऽन्यो भुवि कश्चन ।
गोप्ता कुशिकपुत्रस्ते येन तप्तं महत्तपः ॥ 15 ॥
श्रूयतां चाभिधास्यामि कौशिकस्य महात्मनः ।
यथा बलं यथा वृत्तं तन्मे निगदतः श्रुणु ॥ 16 ॥
राजाऽभूदेष धर्मात्मा दीर्घकालमरिन्दमः ।
धर्मज्ञः कृतविद्यश्च प्रजानां च हिते रतः ॥ 17 ॥
प्रजापतिसुतश्चासीत्कुशो नाम महीपतिः ।
कुशस्य पुत्रो बलवान् कुशनाभस्सुधार्मिकः ॥ 18 ॥
कुशनाभसुतस्त्वासीद्गाधिरित्येव विश्रृतः ।
गाधेः पुत्रो महातेजा विश्वामित्रो महामुनिः ॥ 19 ॥
विश्वामित्रो महातेजाः पालयामास मेदिनीम् ।
बहुवर्षसहस्राणि राजा राज्यमकारयत् ॥ 20 ॥
कदाचित्तु महातेजा योजयित्वा वरूथिनीम् ।
अक्षौहीणीपरिवृतः परिचक्राम मेदिनीम् ॥ 21 ॥
नगराणि सराष्ट्राणि सरितश्च तथा गिरीन् ।
आश्रमान्क्रमशो राम विचरन्नाजगाम ह ॥ 22 ॥
वसिष्ठस्याश्रमपदं नानावृक्षसमाकुलम् ।
नानामृगगणाकीर्णं सिद्धचारणसेवितम् ॥ 23 ॥
देवदानवगन्धर्वैः किन्नरैरुपशोभितम् ।
प्रशान्तहरिणाकीर्णं द्विजसङ्घनिषेवितम् ॥ 24 ॥
ब्रह्मर्षिगणसङ्कीर्णं देवर्षिगणसेवितम् ।
तपश्चरणसंसिद्धैरग्निकल्पैर्महात्मभिः ॥ 25 ॥
अब्भक्षैर्वायुभक्षैश्च शीर्णपर्णाशनैस्तथा ।
फलमूलाशनैर्दान्तैर्जितरोषैर्जितेन्द्रियैः ॥ 26 ॥
ऋषिभिर्वालखिल्यैश्च जपहोमपरायणैः ।
अन्यैर्वैखानसैश्चैव समन्तादुपशोभितम् ॥ 27 ॥
वसिष्ठस्याश्रमपदं ब्रह्मलोकमिवापरम् ।
ददर्श जयतां श्रेष्ठो विश्वामित्रो महाबलः ॥ 28 ॥
इत्यार्षे श्रीमद्रामायणे वाल्मीकीय आदिकाव्ये बालकाण्डे एकपञ्चाशस्सर्गः ॥
śrīmadvālmīkīya rāmāyaṇe bālakāṇḍam |
atha ekapañcāśassargaḥ |
tasya tadvacanaṃ śrutvā viśvāmitrasya dhīmataḥ |
hṛṣṭaromā mahātejāśśatānando mahātapāḥ || 1 ||
gautamasya suto jyeṣṭhastapasā dyotitaprabhaḥ |
rāmasandarśanādeva paraṃ vismayamāgataḥ || 2 ||
sa tau niṣaṇṇau samprekṣya sukhāsīnau nṛpātmajau |
śatānando muniśreṣṭhaṃ viśvāmitramathāmabravīt || 3 ||
api te muniśārdūla mama mātā yaśasvinī |
darśitā rājaputrāya tapo dīrghamupāgatā || 4 ||
api rāme mahātejā mama mātā yaśasvinī |
vanyairupāharatpūjāṃ pūjārhe sarvadehinām || 5 ||
api rāmāya kathitaṃ yathāvṛttaṃ purātanam |
mama māturmahātejo daivena duranuṣṭhitam || 6 ||
api kauśika bhadraṃ te guruṇā mama saṅgatā |
mama mātā muniśreṣṭha rāmasandarśanāditaḥ || 7 ||
api me guruṇā rāmaḥ pūjitaḥ kuśikātmaja |
ihāgato mahātejāḥ pūjāṃ prāpto mahātmanaḥ || 8 ||
api śāntena manasā gururme kuśikātmaja |
ihā'gatena rāmeṇa prayatenābhivāditaḥ || 9 ||
tacchrutvā vacanaṃ tasya viśvāmitro mahāmuniḥ |
pratyuvāca śatānandaṃ vākyajño vākyakovidam || 10 ||
nātikrāntaṃ muniśreṣṭha yatkartavyaṃ kṛtaṃ mayā |
saṅgatā muninā patnī bhārgaveṇeva reṇukā || 11 ||
tacchrutvā vacanaṃ tasya viśvāmitrasya bhāṣitam |
śatānando mahātejā rāmaṃ vacanamabravīt || 12 ||
svāgataṃ te naraśreṣṭha diṣṭyā prāpto'si rāghava |
viśvāmitraṃ puraskṛtya maharṣimaparājitam || 13 ||
acintyakarmā tapasā brahmarṣiratulaprabhaḥ |
viśvāmitro mahātejā vetsyenaṃ paramāṃ gatim || 14 ||
nāsti dhanyataro rāma tvatto'nyo bhuvi kaścana |
goptā kuśikaputraste yena taptaṃ mahattapaḥ || 15 ||
śrūyatāṃ cābhidhāsyāmi kauśikasya mahātmanaḥ |
yathā balaṃ yathā vṛttaṃ tanme nigadataḥ śruṇu || 16 ||
rājā'bhūdeṣa dharmātmā dīrghakālamarindamaḥ |
dharmajñaḥ kṛtavidyaśca prajānāṃ ca hite rataḥ || 17 ||
prajāpatisutaścāsītkuśo nāma mahīpatiḥ |
kuśasya putro balavān kuśanābhassudhārmikaḥ || 18 ||
kuśanābhasutastvāsīdgādhirityeva viśrṛtaḥ |
gādheḥ putro mahātejā viśvāmitro mahāmuniḥ || 19 ||
viśvāmitro mahātejāḥ pālayāmāsa medinīm |
bahuvarṣasahasrāṇi rājā rājyamakārayat || 20 ||
kadācittu mahātejā yojayitvā varūthinīm |
akṣauhīṇīparivṛtaḥ paricakrāma medinīm || 21 ||
nagarāṇi sarāṣṭrāṇi saritaśca tathā girīn |
āśramānkramaśo rāma vicarannājagāma ha || 22 ||
vasiṣṭhasyāśramapadaṃ nānāvṛkṣasamākulam |
nānāmṛgagaṇākīrṇaṃ siddhacāraṇasevitam || 23 ||
devadānavagandharvaiḥ kinnarairupaśobhitam |
praśāntahariṇākīrṇaṃ dvijasaṅghaniṣevitam || 24 ||
brahmarṣigaṇasaṅkīrṇaṃ devarṣigaṇasevitam |
tapaścaraṇasaṃsiddhairagnikalpairmahātmabhiḥ || 25 ||
abbhakṣairvāyubhakṣaiśca śīrṇaparṇāśanaistathā |
phalamūlāśanairdāntairjitaroṣairjitendriyaiḥ || 26 ||
ṛṣibhirvālakhilyaiśca japahomaparāyaṇaiḥ |
anyairvaikhānasaiścaiva samantādupaśobhitam || 27 ||
vasiṣṭhasyāśramapadaṃ brahmalokamivāparam |
dadarśa jayatāṃ śreṣṭho viśvāmitro mahābalaḥ || 28 ||
ityārṣe śrīmadrāmāyaṇe vālmīkīya ādikāvye bālakāṇḍe ekapañcāśassargaḥ ||
🕉️ This is the original Sanskrit rendered in Oriya script.
Pronunciation is identical to the Sanskrit Devanagari version.