ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಆರಣ್ಯಕೇ ಚತುರ್ಥಃ ಪ್ರಪಾಠಕಃ - ಪ್ರವರ್ಗ್ಯ ಮನ್ತ್ರಾಃ
ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥
ಅನುವಾಕಂ 1
ನಮೋ॑ ವಾ॒ಚೇ ಯಾ ಚೋ॑ದಿ॒ತಾ ಯಾ ಚಾನು॑ದಿತಾ॒ ತಸ್ಯೈ॑ ವಾ॒ಚೇ ನಮೋ॒ ನಮೋ॑ ವಾ॒ಚೇ ನಮೋ॑ ವಾ॒ಚಸ್ಪತ॑ಯೇ॒ ನಮ॒ ಋಷಿ॑ಭ್ಯೋ ಮನ್ತ್ರ॒ಕೃದ್ಭ್ಯೋ॒ ಮನ್ತ್ರ॑ಪತಿಭ್ಯೋ॒ ಮಾ ಮಾಮೃಷ॑ಯೋ ಮನ್ತ್ರ॒ಕೃತೋ॑ ಮನ್ತ್ರ॒ಪತ॑ಯಃ॒ ಪರಾ॑ದು॒ರ್ಮಾ-ಽಹಮೃಷೀ᳚-ನ್ಮನ್ತ್ರ॒ಕೃತೋ॑ ಮನ್ತ್ರ॒ಪತೀ॒-ನ್ಪರಾ॑ದಾಂ-ವೈಁಶ್ವದೇ॒ವೀಂ-ವಾಁಚ॑ಮುದ್ಯಾಸಗ್ಂ ಶಿ॒ವಾಮದ॑ಸ್ತಾ॒-ಞ್ಜುಷ್ಟಾ᳚-ನ್ದೇ॒ವೇಭ್ಯ॒-ಶ್ಶರ್ಮ॑ ಮೇ॒ ದ್ಯೌ-ಶ್ಶರ್ಮ॑ ಪೃಥಿ॒ವೀ ಶರ್ಮ॒ ವಿಶ್ವ॑ಮಿ॒ದ-ಞ್ಜಗ॑ತ್ ।
ಶರ್ಮ॑ ಚ॒ನ್ದ್ರಶ್ಚ॒ ಸೂರ್ಯ॑ಶ್ಚ॒ ಶರ್ಮ॑ ಬ್ರಹ್ಮಪ್ರಜಾಪ॒ತೀ ॥
ಭೂ॒ತಂ-ವಁ॑ದಿಷ್ಯೇ॒ ಭುವ॑ನಂ-ವಁದಿಷ್ಯೇ॒ ತೇಜೋ॑ ವದಿಷ್ಯೇ॒ ಯಶೋ॑ ವದಿಷ್ಯೇ॒ ತಪೋ॑ ವದಿಷ್ಯೇ॒ ಬ್ರಹ್ಮ॑ ವದಿಷ್ಯೇ ಸ॒ತ್ಯಂ-ವಁ॑ದಿಷ್ಯೇ॒ ತಸ್ಮಾ॑ ಅ॒ಹಮಿ॒ದ-ಮು॑ಪ॒ಸ್ತರ॑ಣ॒-ಮುಪ॑ಸ್ತೃಣ ಉಪ॒ಸ್ತರ॑ಣ-ಮ್ಮೇ ಪ್ರ॒ಜಾಯೈ॑ ಪಶೂ॒ನಾ-ಮ್ಭೂ॑ಯಾ-ದುಪ॒ಸ್ತರ॑ಣಮ॒ಹ-ಮ್ಪ್ರ॒ಜಾಯೈ॑ ಪಶೂ॒ನಾ-ಮ್ಭೂ॑ಯಾಸ॒-ಮ್ಪ್ರಾಣಾ॑ಪಾನೌ ಮೃ॒ತ್ಯೋರ್ಮಾ॑ ಪಾತ॒-ಮ್ಪ್ರಾಣಾ॑ಪಾನೌ॒ ಮಾ ಮಾ॑ ಹಾಸಿಷ್ಟ॒-ಮ್ಮಧು॑ ಮನಿಷ್ಯೇ॒ ಮಧು॑ ಜನಿಷ್ಯೇ॒ ಮಧು॑ ವಕ್ಷ್ಯಾಮಿ॒ ಮಧು॑ ವದಿಷ್ಯಾಮಿ॒ ಮಧು॑ಮತೀ-ನ್ದೇ॒ವೇಭ್ಯೋ॒ ವಾಚ॑ಮುದ್ಯಾಸಗ್ಂ ಶುಶ್ರೂ॒ಷೇಣ್ಯಾ᳚-ಮ್ಮನು॒ಷ್ಯೇ᳚ಭ್ಯ॒ಸ್ತ-ಮ್ಮಾ॑ ದೇ॒ವಾ ಅ॑ವನ್ತು ಶೋ॒ಭಾಯೈ॑ ಪಿ॒ತರೋ-ಽನು॑ಮದನ್ತು ॥
ಓಂ ಶಾನ್ತಿ॒-ಶ್ಶಾನ್ತಿ॒-ಶ್ಶಾನ್ತಿಃ॑ ॥ 1 ॥ (ಅ. 1)
ಅನುವಾಕಂ 2
ಯು॒ಞ್ಜತೇ॒ ಮನ॑ ಉ॒ತ ಯು॑ಞ್ಜತೇ॒ ಧಿಯಃ॑ । ವಿಪ್ರಾ॒ ವಿಪ್ರ॑ಸ್ಯ ಬೃಹ॒ತೋ ವಿ॑ಪ॒ಶ್ಚಿತಃ॑ । ವಿ ಹೋತ್ರಾ॑ ದಧೇ ವಯುನಾ॒ವಿದೇಕ॒ ಇತ್ । ಮ॒ಹೀ ದೇ॒ವಸ್ಯ॑ ಸವಿ॒ತುಃ ಪರಿ॑ಷ್ಟುತಿಃ ॥ ದೇ॒ವಸ್ಯ॑ ತ್ವಾ ಸವಿ॒ತುಃ ಪ್ರ॑ಸ॒ವೇ । ಅ॒ಶ್ವಿನೋ᳚-ರ್ಬಾ॒ಹುಭ್ಯಾ᳚ಮ್ ।
ಪೂ॒ಷ್ಣೋ ಹಸ್ತಾ᳚ಭ್ಯಾ॒ಮಾದ॑ದೇ ॥ ಅಭ್ರಿ॑ರಸಿ॒ ನಾರಿ॑ರಸಿ ।
ಅ॒ದ್ಧ್ವ॒ರ॒ಕೃ-ದ್ದೇ॒ವೇಭ್ಯಃ॑ । ಉತ್ತಿ॑ಷ್ಠ ಬ್ರಹ್ಮಣಸ್ಪತೇ ॥ 2 ॥
ದೇ॒ವ॒ಯನ್ತ॑ಸ್ತ್ವೇಮಹೇ । ಉಪ॒ ಪ್ರಯ॑ನ್ತು ಮ॒ರುತಃ॑ ಸು॒ದಾನ॑ವಃ । ಇನ್ದ್ರ॑ ಪ್ರಾ॒ಶೂರ್ಭ॑ವಾ॒ ಸಚಾ᳚ ॥ ಪ್ರೈತು॒ ಬ್ರಹ್ಮ॑ಣ॒ಸ್ಪತಿಃ॑ । ಪ್ರ ದೇ॒ವ್ಯೇ॑ತು ಸೂ॒ನೃತಾ᳚ ।
ಅಚ್ಛಾ॑ ವೀ॒ರನ್ನರ್ಯ॑-ಮ್ಪ॒ಙ್ಕ್ತಿರಾ॑ಧಸಮ್ । ದೇ॒ವಾ ಯ॒ಜ್ಞನ್ನ॑ಯನ್ತು ನಃ ॥ ದೇವೀ᳚ ದ್ಯಾವಾಪೃಥಿವೀ॒ ಅನು॑ ಮೇ ಮಗ್ಂಸಾಥಾಮ್ । ಋ॒ದ್ಧ್ಯಾಸ॑ಮ॒ದ್ಯ । ಮ॒ಖಸ್ಯ॒ ಶಿರಃ॑ ॥ 3 ॥
ಮ॒ಖಾಯ॑ ತ್ವಾ । ಮ॒ಖಸ್ಯ॑ ತ್ವಾ ಶೀ॒ರ್ಷ್ಣೇ ॥ ಇಯ॒ತ್ಯಗ್ರ॑ ಆಸೀಃ ।
ಋ॒ದ್ಧ್ಯಾಸ॑ಮ॒ದ್ಯ । ಮ॒ಖಸ್ಯ॒ ಶಿರಃ॑ । ಮ॒ಖಾಯ॑ ತ್ವಾ । ಮ॒ಖಸ್ಯ॑ ತ್ವಾ ಶೀ॒ರ್ಷ್ಣೇ ॥ ದೇವೀ᳚-ರ್ವಮ್ರೀರ॒ಸ್ಯ ಭೂ॒ತಸ್ಯ॑ ಪ್ರಥಮಜಾ ಋತಾವರೀಃ ॥ ಋ॒ದ್ಧ್ಯಾಸ॑ಮ॒ದ್ಯ । ಮ॒ಖಸ್ಯ॒ ಶಿರಃ॑ ॥ 4 ॥
ಮ॒ಖಾಯ॑ ತ್ವಾ । ಮ॒ಖಸ್ಯ॑ ತ್ವಾ ಶೀ॒ರ್ಷ್ಣೇ ॥ ಇನ್ದ್ರ॒ಸ್ಯೌಜೋ॑-ಽಸಿ ।
ಋ॒ದ್ಧ್ಯಾಸ॑ಮ॒ದ್ಯ । ಮ॒ಖಸ್ಯ॒ ಶಿರಃ॑ । ಮ॒ಖಾಯ॑ ತ್ವಾ । ಮ॒ಖಸ್ಯ॑ ತ್ವಾ ಶೀ॒ರ್ಷ್ಣೇ ॥ ಅ॒ಗ್ನಿ॒ಜಾ ಅ॑ಸಿ ಪ್ರ॒ಜಾಪ॑ತೇ॒ ರೇತಃ॑ । ಋ॒ದ್ಧ್ಯಾಸ॑ಮ॒ದ್ಯ । ಮ॒ಖಸ್ಯ॒ ಶಿರಃ॑ ॥ 5 ॥
ಮ॒ಖಾಯ॑ ತ್ವಾ । ಮ॒ಖಸ್ಯ॑ ತ್ವಾ ಶೀ॒ರ್ಷ್ಣೇ ॥ ಆಯು॑-ರ್ಧೇಹಿ ಪ್ರಾ॒ಣ-ನ್ಧೇ॑ಹಿ । ಅ॒ಪಾ॒ನ-ನ್ಧೇ॑ಹಿ ವ್ಯಾ॒ನ-ನ್ಧೇ॑ಹಿ । ಚಕ್ಷು॑-ರ್ಧೇಹಿ॒ ಶ್ರೋತ್ರ॑-ನ್ಧೇಹಿ । ಮನೋ॑ ಧೇಹಿ॒ ವಾಚ॑-ನ್ಧೇಹಿ । ಆ॒ತ್ಮಾನ॑-ನ್ಧೇಹಿ ಪ್ರತಿ॒ಷ್ಠಾ-ನ್ಧೇ॑ಹಿ ।
ಮಾ-ನ್ಧೇ॑ಹಿ॒ ಮಯಿ॑ ಧೇಹಿ ॥ ಮಧು॑ ತ್ವಾ ಮಧು॒ಲಾ ಕ॑ರೋತು ।
ಮ॒ಖಸ್ಯ॒ ಶಿರೋ॑-ಽಸಿ ॥ 6 ॥
ಯ॒ಜ್ಞಸ್ಯ॑ ಪ॒ದೇ ಸ್ಥಃ॑ । ಗಾ॒ಯ॒ತ್ರೇಣ॑ ತ್ವಾ॒ ಛನ್ದ॑ಸಾ ಕರೋಮಿ । ತ್ರೈಷ್ಟು॑ಭೇನ ತ್ವಾ॒ ಛನ್ದ॑ಸಾ ಕರೋಮಿ । ಜಾಗ॑ತೇನ ತ್ವಾ॒ ಛನ್ದ॑ಸಾ ಕರೋಮಿ ॥ ಮ॒ಖಸ್ಯ॒ ರಾಸ್ನಾ॑-ಽಸಿ । ಅದಿ॑ತಿಸ್ತೇ॒ ಬಿಲ॑ಙ್ಗೃಹ್ಣಾತು । ಪಾಙ್ಕ್ತೇ॑ನ॒ ಛನ್ದ॑ಸಾ ।
ಸೂರ್ಯ॑ಸ್ಯ॒ ಹರ॑ಸಾ ಶ್ರಾಯ । ಮ॒ಖೋ॑-ಽಸಿ ॥ 7 ॥
(ಪ॒ತೇ॒ - ಶಿರ॑ - ಋತಾವರೀರ್-ಋದ್ಧ್ಯಾಸ॑ಮ॒ದ್ಯ ಮ॒ಖಸ್ಯ॒ ಶಿರಃ॒ - ಶಿರಃ॒ - ಶಿರೋ॑-ಽಸಿ॒ - +ನವ॑ ಚ) (ಅ. 2)
(ಇಯ॑ತಿ॒ ದೇವೀ॒ರಿನ್ದ್ರ॒ಸ್ಯೌಜೋ᳚-ಽಸ್ಯಗ್ನಿ॒ಜಾ ಅ॒ಸ್ಯಾಯು॑ರ್ಧೇಹಿ ಪ್ರಾ॒ಣ-ಮ್ಪಞ್ಚ॑)
ಅನುವಾಕಂ 3
ವೃಷ್ಣೋ॒ ಅಶ್ವ॑ಸ್ಯ ನಿ॒ಷ್ಪದ॑ಸಿ । ವರು॑ಣಸ್ತ್ವಾ ಧೃ॒ತವ್ರ॑ತ॒ ಆಧೂ॑ಪಯತು । ಮಿ॒ತ್ರಾವರು॑ಣಯೋರ್
ಧ್ರು॒ವೇಣ॒ ಧರ್ಮ॑ಣಾ ॥ ಅ॒ರ್ಚಿಷೇ᳚ ತ್ವಾ । ಶೋ॒ಚಿಷೇ᳚ ತ್ವಾ ।
ಜ್ಯೋತಿ॑ಷೇ ತ್ವಾ । ತಪ॑ಸೇ ತ್ವಾ ॥ ಅ॒ಭೀಮ-ಮ್ಮ॑ಹಿ॒ನಾ ದಿವ᳚ಮ್ ।
ಮಿ॒ತ್ರೋ ಬ॑ಭೂವ ಸ॒ಪ್ರಥಾಃ᳚ । ಉ॒ತ ಶ್ರವ॑ಸಾ ಪೃಥಿ॒ವೀಮ್ ॥ 8 ॥
ಮಿ॒ತ್ರಸ್ಯ॑ ಚರ್ಷಣೀ॒ಧೃತಃ॑ ।
ಶ್ರವೋ॑ ದೇ॒ವಸ್ಯ॑ ಸಾನ॒ಸಿಮ್ । ದ್ಯು॒ಮ್ನಞ್ಚಿ॒ತ್ರಶ್ರ॑ವಸ್ತಮಮ್ ॥ ಸಿದ್ಧ್ಯೈ᳚ ತ್ವಾ । ದೇ॒ವಸ್ತ್ವಾ॑ ಸವಿ॒ತೋದ್ವ॑ಪತು ।
ಸು॒ಪಾ॒ಣಿ-ಸ್ಸ್ವ॑ಙ್ಗು॒ರಿಃ । ಸು॒ಬಾ॒ಹುರು॒ತ ಶಕ್ತ್ಯಾ᳚ ॥ ಅಪ॑ದ್ಯಮಾನಃ ಪೃಥಿ॒ವ್ಯಾಮ್ । ಆಶಾ॒ ದಿಶ॒ ಆ ಪೃ॑ಣ । ಉತ್ತಿ॑ಷ್ಠ ಬೃ॒ಹ-ನ್ಭ॑ವ ॥ 9 ॥
ಊ॒ರ್ಧ್ವಸ್ತಿ॑ಷ್ಠ ಧ್ರು॒ವಸ್ತ್ವಮ್ ॥ ಸೂರ್ಯ॑ಸ್ಯ ತ್ವಾ॒ ಚಕ್ಷು॒ಷಾ-ಽನ್ವೀ᳚ಕ್ಷೇ । ಋ॒ಜವೇ᳚ ತ್ವಾ । ಸಾ॒ಧವೇ᳚ ತ್ವಾ । ಸು॒ಕ್ಷಿ॒ತ್ಯೈ ತ್ವಾ॒ ಭೂತ್ಯೈ᳚ ತ್ವಾ ॥
ಇ॒ದಮ॒ಹಮ॒ಮುಮಾ॑ಮುಷ್ಯಾಯ॒ಣಂ-ವಿಁ॒ಶಾ ಪ॒ಶುಭಿ॑-ರ್ಬ್ರಹ್ಮವರ್ಚ॒ಸೇನ॒ ಪರ್ಯೂ॑ಹಾಮಿ ।
ಗಾ॒ಯ॒ತ್ರೇಣ॑ ತ್ವಾ॒ ಛನ್ದ॒ಸಾ ಽಽಚ್ಛೃ॑ಣದ್ಮಿ । ತ್ರೈಷ್ಟು॑ಭೇನ ತ್ವಾ॒ ಛನ್ದ॒ಸಾ ಽಽಚ್ಛೃ॑ಣದ್ಮಿ ।
ಜಾಗ॑ತೇನ ತ್ವಾ॒ ಛನ್ದ॒ಸಾ ಽಽಚ್ಛೃ॑ಣದ್ಮಿ । ಛೃ॒ಣತ್ತು॑ ತ್ವಾ॒ ವಾಕ್ । ಛೃ॒ಣತ್ತು॒ ತ್ವೋರ್ಕ್ । ಛೃ॒ಣತ್ತು॑ ತ್ವಾ ಹ॒ವಿಃ ।
ಛೃ॒ನ್ಧಿ ವಾಚ᳚ಮ್ । ಛೃ॒ನ್ಧ್ಯೂರ್ಜ᳚ಮ್ । ಛೃ॒ನ್ಧಿ ಹ॒ವಿಃ ॥
ದೇವ॑ ಪುರಶ್ಚರ ಸ॒ಘ್ಯಾಸ॑ನ್ತ್ವಾ ॥ 10 ॥
(ಪೃ॒ಥಿ॒ವೀಮ್ - ಭ॑ವ॒ - ವಾ-ಖ್ಷಟ್ಚ॑) (ಅ. 3)
ಅನುವಾಕಂ 4
ಬ್ರಹ್ಮ॑-ನ್ಪ್ರವ॒ರ್ಗ್ಯೇ॑ಣ॒ ಪ್ರಚ॑ರಿಷ್ಯಾಮಃ ।
ಹೋತ॑-ರ್ಘ॒ರ್ಮಮ॒ಭಿಷ್ಟು॑ಹಿ । ಅಗ್ನೀ॒ದ್ರೌಹಿ॑ಣೌ ಪುರೋ॒ಡಾಶಾ॒ವಧಿ॑ಶ್ರಯ । ಪ್ರತಿ॑ಪ್ರಸ್ಥಾತ॒ರ್ವಿಹ॑ರ ।
ಪ್ರಸ್ತೋ॑ತ॒-ಸ್ಸಾಮಾ॑ನಿ ಗಾಯ ॥ ಯಜು॑ರ್ಯುಕ್ತ॒ಗ್ಂ॒ ಸಾಮ॑ಭಿ॒ರಾಕ್ತ॑ಖನ್ತ್ವಾ । ವಿಶ್ವೈ᳚-ರ್ದೇ॒ವೈರನು॑ಮತ-ಮ್ಮ॒ರುದ್ಭಿಃ॑ । ದಕ್ಷಿ॑ಣಾಭಿಃ॒ ಪ್ರತ॑ತ-ಮ್ಪಾರಯಿ॒ಷ್ಣುಮ್ ।
ಸ್ತುಭೋ॑ ವಹನ್ತು ಸುಮನ॒ಸ್ಯಮಾ॑ನಮ್ । ಸ ನೋ॒ ರುಚ॑ನ್ಧೇ॒ಹ್ಯಹೃ॑ಣೀಯಮಾನಃ । ಭೂರ್ಭುವ॒ಸ್ಸುವಃ॑ ।
ಓಮಿನ್ದ್ರ॑ವನ್ತಃ॒ ಪ್ರಚ॑ರತ ॥ 11 ॥
(ಅಹೃ॑ಣೀಯಮಾನೋ॒ ದ್ವೇ ಚ॑) (ಅ. 4)
ಅನುವಾಕಂ 5
ಬ್ರಹ್ಮ॒-ನ್ಪ್ರಚ॑ರಿಷ್ಯಾಮಃ । ಹೋತ॑-ರ್ಘ॒ರ್ಮಮ॒ಭಿಷ್ಟು॑ಹಿ ॥ ಯ॒ಮಾಯ॑ ತ್ವಾ ಮ॒ಖಾಯ॑ ತ್ವಾ । ಸೂರ್ಯ॑ಸ್ಯ॒ ಹರ॑ಸೇ ತ್ವಾ ॥ ಪ್ರಾ॒ಣಾಯ॒ ಸ್ವಾಹಾ᳚ ವ್ಯಾ॒ನಾಯ॒ ಸ್ವಾಹಾ॑ ಽಪಾ॒ನಾಯ॒ ಸ್ವಾಹಾ᳚ ।
ಚಕ್ಷು॑ಷೇ॒ ಸ್ವಾಹಾ॒ ಶ್ರೋತ್ರಾ॑ಯ॒ ಸ್ವಾಹಾ᳚ । ಮನ॑ಸೇ॒ ಸ್ವಾಹಾ॑ ವಾ॒ಚೇ ಸರ॑ಸ್ವತ್ಯೈ॒ ಸ್ವಾಹಾ᳚ । ದಕ್ಷಾ॑ಯ॒ ಸ್ವಾಹಾ॒ ಕ್ರತ॑ವೇ॒ ಸ್ವಾಹಾ᳚ । ಓಜ॑ಸೇ॒ ಸ್ವಾಹಾ॒ ಬಲಾ॑ಯ॒ ಸ್ವಾಹಾ᳚ ॥
ದೇ॒ವಸ್ತ್ವಾ॑ ಸವಿ॒ತಾ ಮದ್ಧ್ವಾ॑-ಽನಕ್ತು ॥ 12 ॥
ಪೃ॒ಥಿ॒ವೀ-ನ್ತಪ॑ಸಸ್ತ್ರಾಯಸ್ವ । ಅ॒ರ್ಚಿರ॑ಸಿ ಶೋ॒ಚಿರ॑ಸಿ॒ ಜ್ಯೋತಿ॑ರಸಿ॒ ತಪೋ॑-ಽಸಿ । ಸಗ್ಂಸೀ॑ದಸ್ವ ಮ॒ಹಾಗ್ಂ ಅ॑ಸಿ । ಶೋಚ॑ಸ್ವ ದೇವ॒ವೀತ॑ಮಃ । ವಿ ಧೂ॒ಮಮ॑ಗ್ನೇ ಅರು॒ಷ-ಮ್ಮಿ॑ಯೇದ್ಧ್ಯ । ಸೃ॒ಜ ಪ್ರ॑ಶಸ್ತ ದರ್ಶ॒ತಮ್ ॥
ಅ॒ಞ್ಜನ್ತಿ॒ ಯ-ಮ್ಪ್ರ॒ಥಯ॑ನ್ತೋ॒ ನ ವಿಪ್ರಾಃ᳚ । ವ॒ಪಾವ॑ನ್ತ॒ನ್ನಾಗ್ನಿನಾ॒ ತಪ॑ನ್ತಃ ।
ಪಿ॒ತುರ್ನ ಪು॒ತ್ರ ಉಪ॑ಸಿ॒ ಪ್ರೇಷ್ಠಃ॑ । ಆ ಘ॒ರ್ಮೋ ಅ॒ಗ್ನಿಮೃ॒ತಯ॑ನ್ನಸಾದೀತ್ ॥ 13 ॥
ಅ॒ನಾ॒ಧೃ॒ಷ್ಯಾ ಪು॒ರಸ್ತಾ᳚ತ್ । ಅ॒ಗ್ನೇರಾಧಿ॑ಪತ್ಯೇ ।
ಆಯು॑ರ್ಮೇ ದಾಃ । ಪು॒ತ್ರವ॑ತೀ ದಕ್ಷಿಣ॒ತಃ । ಇನ್ದ್ರ॒ಸ್ಯಾಧಿ॑ಪತ್ಯೇ । ಪ್ರ॒ಜಾ-ಮ್ಮೇ॑ ದಾಃ । ಸು॒ಷದಾ॑ ಪ॒ಶ್ಚಾತ್ । ದೇ॒ವಸ್ಯ॑ ಸವಿ॒ತುರಾಧಿ॑ಪತ್ಯೇ । ಪ್ರಾ॒ಣ-ಮ್ಮೇ॑ ದಾಃ । ಆಶ್ರು॑ತಿರುತ್ತರ॒ತಃ ॥ 14 ॥
ಮಿ॒ತ್ರಾವರು॑ಣಯೋ॒ರಾಧಿ॑ಪತ್ಯೇ । ಶ್ರೋತ್ರ॑-ಮ್ಮೇ ದಾಃ । ವಿಧೃ॑ತಿರು॒ಪರಿ॑ಷ್ಟಾತ್ । ಬೃಹ॒ಸ್ಪತೇ॒ರಾಧಿ॑ಪತ್ಯೇ ।
ಬ್ರಹ್ಮ॑ ಮೇ ದಾಃ, ಕ್ಷ॒ತ್ರ-ಮ್ಮೇ॑ ದಾಃ । ತೇಜೋ॑ ಮೇ ಧಾ॒ ವರ್ಚೋ॑ ಮೇ ಧಾಃ । ಯಶೋ॑ ಮೇ ಧಾ॒ ಸ್ತಪೋ॑ ಮೇ ಧಾಃ ।
ಮನೋ॑ ಮೇ ಧಾಃ ॥ ಮನೋ॒ರಶ್ವಾ॑-ಽಸಿ॒ ಭೂರಿ॑ಪುತ್ರಾ ।
ವಿಶ್ವಾ᳚ಭ್ಯೋ ಮಾ ನಾ॒ಷ್ಟ್ರಾಭ್ಯಃ॑ ಪಾಹಿ ॥ 15 ॥
ಸೂ॒ಪ॒ಸದಾ॑ ಮೇ ಭೂಯಾ॒ ಮಾ ಮಾ॑ ಹಿಗ್ಂಸೀಃ ॥ ತಪೋ॒ ಷ್ವ॑ಗ್ನೇ॒ ಅನ್ತ॑ರಾಗ್ಂ ಅ॒ಮಿತ್ರಾನ್॑ ।
ತಪಾ॒ಶಗ್ಂಸ॑ಮರ॒ರುಷಃ॒ ಪರ॑ಸ್ಯ । ತಪಾ॑ ವಸೋ ಚಿಕಿತಾ॒ನೋ ಅ॒ಚಿತ್ತಾನ್॑ । ವಿ ತೇ॑ ತಿಷ್ಠನ್ತಾಮ॒ಜರಾ॑ ಅ॒ಯಾಸಃ॑ ॥ ಚಿತಃ॑ ಸ್ಥ ಪರಿ॒ಚಿತಃ॑ । ಸ್ವಾಹಾ॑ ಮ॒ರುದ್ಭಿಃ॒ ಪರಿ॑ಶ್ರಯಸ್ವ । ಮಾ ಅ॑ಸಿ । ಪ್ರ॒ಮಾ ಅ॑ಸಿ । ಪ್ರ॒ತಿ॒ಮಾ ಅ॑ಸಿ ॥ 16 ॥
ಸ॒ಮ್ಮಾ ಅ॑ಸಿ । ವಿ॒ಮಾ ಅ॑ಸಿ । ಉ॒ನ್ಮಾ ಅ॑ಸಿ । ಅ॒ನ್ತರಿ॑ಕ್ಷಸ್ಯಾನ್ತ॒ರ್ಧಿರ॑ಸಿ ॥
ದಿವ॒ನ್ತಪ॑ಸಸ್ತ್ರಾಯಸ್ವ । ಆ॒ಭಿ-ರ್ಗೀ॒ರ್ಭಿ-ರ್ಯದತೋ॑ ನ ಊ॒ನಮ್ ।
ಆಪ್ಯಾ॑ಯಯ ಹರಿವೋ॒ ವರ್ಧ॑ಮಾನಃ । ಯ॒ದಾ ಸ್ತೋ॒ತೃಭ್ಯೋ॒ ಮಹಿ॑ ಗೋ॒ತ್ರಾ ರು॒ಜಾಸಿ॑ । ಭೂ॒ಯಿ॒ಷ್ಠ॒ಭಾಜೋ॒ ಅಧ॑ ತೇ ಸ್ಯಾಮ ॥ ಶು॒ಕ್ರನ್ತೇ॑ ಅ॒ನ್ಯ-ದ್ಯ॑ಜ॒ತನ್ತೇ॑ ಅ॒ನ್ಯತ್ ॥ 17 ॥
ವಿಷು॑ರೂಪೇ॒ ಅಹ॑ನೀ॒ ದ್ಯೌರಿ॑ವಾಸಿ । ವಿಶ್ವಾ॒ ಹಿ ಮಾ॒ಯಾ ಅವ॑ಸಿ ಸ್ವಧಾವಃ । ಭ॒ದ್ರಾ ತೇ॑ ಪೂಷನ್ನಿ॒ಹ ರಾ॒ತಿರ॑ಸ್ತು ॥ ಅರ್ಹ॑-ನ್ಬಿಭರ್ಷಿ॒ ಸಾಯ॑ಕಾನಿ॒ ಧನ್ವ॑ । ಅರ್ಹ॑ನ್ನಿ॒ಷ್ಕಂ-ಯಁ॑ಜ॒ತಂ-ವಿಁ॒ಶ್ವರೂ॑ಪಮ್ । ಅರ್ಹ॑ನ್ನಿ॒ದ-ನ್ದ॑ಯಸೇ॒ ವಿಶ್ವ॒-ಮಬ್ಭು॑ವಮ್ । ನ ವಾ ಓಜೀ॑ಯೋ ರುದ್ರ॒ ತ್ವದ॑ಸ್ತಿ ॥ ಗಾ॒ಯ॒ತ್ರಮ॑ಸಿ । ತ್ರೈಷ್ಟು॑ಭಮಸಿ । ಜಾಗ॑ತಮಸಿ । ಮಧು॒ ಮಧು॒ ಮಧು॑ ॥ 18 ॥
(ಅ॒ನ॒ - ಕ್ತ್ವ॒ಸಾ॒ದೀ॒ - ದು॒ತ್ತ॒ರ॒ತಃ - ಪಾ॑ಹಿ - ಪ್ರತಿ॒ಮಾ ಅ॑ಸಿ - ಯಜ॒ತನ್ತೇ॑ ಅ॒ನ್ಯಜ್ - ಜಾಗ॑ತಮ॒ಸ್ಯೇಕ॑-ಞ್ಚ) (ಅ. 5)
ಅನುವಾಕಂ 6
ದಶ॒ ಪ್ರಾಚೀ॒ರ್ದಶ॑ ಭಾಸಿ ದಕ್ಷಿ॒ಣಾ । ದಶ॑ ಪ್ರ॒ತೀಚೀ॒ರ್ದಶ॑ ಭಾ॒ಸ್ಯುದೀ॑ಚೀಃ । ದಶೋ॒ರ್ಧ್ವಾ ಭಾ॑ಸಿ ಸುಮನ॒ಸ್ಯಮಾ॑ನಃ । ಸ ನೋ॒ ರುಚ॑ನ್ಧೇ॒ಹ್ಯಹೃ॑ಣೀಯಮಾನಃ ॥
ಅ॒ಗ್ನಿಷ್ಟ್ವಾ॒ ವಸು॑ಭಿಃ ಪು॒ರಸ್ತಾ᳚-ದ್ರೋಚಯತು ಗಾಯ॒ತ್ರೇಣ॒ ಛನ್ದ॑ಸಾ । ಸ ಮಾ॑ ರುಚಿ॒ತೋ ರೋ॑ಚಯ ॥ ಇನ್ದ್ರ॑ಸ್ತ್ವಾ ರು॒ದ್ರೈ-ರ್ದ॑ಕ್ಷಿಣ॒ತೋ ರೋ॑ಚಯತು॒ ತ್ರೈಷ್ಟು॑ಭೇನ॒ ಛನ್ದ॑ಸಾ ।
ಸ ಮಾ॑ ರುಚಿ॒ತೋ ರೋ॑ಚಯ । ವರು॑ಣಸ್ತ್ವಾ-ಽಽದಿ॒ತ್ಯೈಃ ಪ॒ಶ್ಚಾ-ದ್ರೋ॑ಚಯತು॒ ಜಾಗ॑ತೇನ॒ ಛನ್ದ॑ಸಾ ।
ಸ ಮಾ॑ ರುಚಿ॒ತೋ ರೋ॑ಚಯ ॥ 19 ॥
ದ್ಯು॒ತಾ॒ನಸ್ತ್ವಾ॑ ಮಾರು॒ತೋ ಮ॒ರುದ್ಭಿ॑ರುತ್ತರ॒ತೋ ರೋ॑ಚಯ॒ತ್ವಾನು॑ಷ್ಟುಭೇನ॒ ಛನ್ದ॑ಸಾ । ಸ ಮಾ॑ ರುಚಿ॒ತೋ ರೋ॑ಚಯ । ಬೃಹ॒ಸ್ಪತಿ॑ಸ್ತ್ವಾ॒ ವಿಶ್ವೈ᳚-ರ್ದೇ॒ವೈರು॒ಪರಿ॑ಷ್ಟಾ-ದ್ರೋಚಯತು॒ ಪಾಙ್ಕ್ತೇ॑ನ॒ ಛನ್ದ॑ಸಾ । ಸ ಮಾ॑ ರುಚಿ॒ತೋ ರೋ॑ಚಯ ॥ ರೋ॒ಚಿ॒ತಸ್ತ್ವ-ನ್ದೇ॑ವ ಘರ್ಮ ದೇ॒ವೇಷ್ವಸಿ॑ ।
ರೋ॒ಚಿ॒ಷೀ॒ಯಾಹ-ಮ್ಮ॑ನು॒ಷ್ಯೇ॑ಷು ॥
ಸಮ್ರಾ᳚ಡ್ ಘರ್ಮ ರುಚಿ॒ತಸ್ತ್ವಂ ಏ॒ವೇಷ್ವಾಯು॑ಷ್ಮಾಗ್ಸ್ತೇಜ॒ಸ್ವೀ ಬ್ರ॑ಹ್ಮವರ್ಚ॒ಸ್ಯ॑ಸಿ । ರು॒ಚಿ॒ತೋ॑-ಽಹ-ಮ್ಮ॑ನು॒ಷ್ಯೇ᳚ಷ್ವಾಯು॑ಷ್ಮಾಗ್-ಸ್ತೇಜ॒ಸ್ವೀ ಬ್ರ॑ಹ್ಮವರ್ಚ॒ಸೀ ಭೂ॑ಯಾಸಮ್ ॥ ರುಗ॑ಸಿ । ರುಚ॒-ಮ್ಮಯಿ॑ ಧೇಹಿ ॥ 20 ॥
ಮಯಿ॒ ರುಕ್ ॥ ದಶ॑ ಪು॒ರಸ್ತಾ᳚-ದ್ರೋಚಸೇ । ದಶ॑ ದಕ್ಷಿ॒ಣಾ । ದಶ॑ ಪ್ರ॒ತ್ಯಮ್ಮ್ । ದಶೋದಙ್ಙ್॑ । ದಶೋ॒ರ್ಧ್ವೋ ಭಾ॑ಸಿ ಸುಮನ॒ಸ್ಯಮಾ॑ನಃ । ಸ ನಃ॑ ಸಮ್ರಾ॒ಡಿಷ॒ಮೂರ್ಜ॑-ನ್ಧೇಹಿ । ವಾ॒ಜೀ ವಾ॒ಜಿನೇ॑ ಪವಸ್ವ । ರೋ॒ಚಿ॒ತೋ ಘ॒ರ್ಮೋ ರು॑ಚೀ॒ಯ ॥ 21 ॥
(ರೋ॒ಚ॒ಯ॒ - ಧೇ॒ಹಿ॒ - +ನವ॑ ಚ) (ಅ. 6)
ಅನುವಾಕಂ 7
ಅಪ॑ಶ್ಯಙ್ಗೋ॒ಪಾಮನಿ॑ಪದ್ಯಮಾನಮ್ । ಆ ಚ॒ ಪರಾ॑ ಚ ಪ॒ಥಿಭಿ॒ಶ್ಚರ॑ನ್ತಮ್ । ಸ ಸ॒ದ್ಧ್ರೀಚೀ॒-ಸ್ಸ ವಿಷೂ॑ಚೀ॒ರ್ವಸಾ॑ನಃ । ಆ ವ॑ರೀವರ್ತಿ॒ ಭುವ॑ನೇಷ್ವ॒ನ್ತಃ ॥ ಅತ್ರ॑ ಪ್ರಾ॒ವೀಃ । ಮಧು॒ ಮಾದ್ಧ್ವೀ᳚ಭ್ಯಾ॒-ಮ್ಮಧು॒ ಮಾಧೂ॑ಚೀಭ್ಯಾಮ್ । ಅನು॑ ವಾ-ನ್ದೇ॒ವವೀ॑ತಯೇ ॥ ಸಮ॒ಗ್ನಿರ॒ಗ್ನಿನಾ॑ ಗತ । ಸ-ನ್ದೇ॒ವೇನ॑ ಸವಿ॒ತ್ರಾ । ಸಗ್ಂ ಸೂರ್ಯೇ॑ಣ ರೋಚತೇ ॥ 22 ॥
ಸ್ವಾಹಾ॒ ಸಮ॒ಗ್ನಿಸ್ತಪ॑ಸಾ ಗತ । ಸ-ನ್ದೇ॒ವೇನ॑ ಸವಿ॒ತ್ರಾ ।
ಸಗ್ಂ ಸೂರ್ಯೇ॑ಣಾರೋಚಿಷ್ಟ ॥ ಧ॒ರ್ತಾ ದಿ॒ವೋ ವಿಭಾ॑ಸಿ॒ ರಜ॑ಸಃ । ಪೃ॒ಥಿ॒ವ್ಯಾ ಧ॒ರ್ತಾ । ಉ॒ರೋರ॒ನ್ತರಿ॑ಕ್ಷಸ್ಯ ಧ॒ರ್ತಾ । ಧ॒ರ್ತಾ ದೇ॒ವೋ ದೇ॒ವಾನಾ᳚ಮ್ । ಅಮ॑ರ್ತ್ಯಸ್ತಪೋ॒ಜಾಃ ॥ ಹೃ॒ದೇ ತ್ವಾ॒ ಮನ॑ಸೇ ತ್ವಾ । ದಿ॒ವೇ ತ್ವಾ॒ ಸೂರ್ಯಾ॑ಯ ತ್ವಾ ॥ 23 ॥
ಊ॒ರ್ಧ್ವಮಿ॒ಮ-ಮ॑ದ್ಧ್ವ॒ರಙ್ಕೃ॑ಧಿ । ದಿ॒ವಿ ದೇ॒ವೇಷು॒ ಹೋತ್ರಾ॑ ಯಚ್ಛ ॥ ವಿಶ್ವಾ॑ಸಾ-ಮ್ಭುವಾ-ಮ್ಪತೇ । ವಿಶ್ವ॑ಸ್ಯ ಭುವನಸ್ಪತೇ । ವಿಶ್ವ॑ಸ್ಯ ಮನಸಸ್ಪತೇ । ವಿಶ್ವ॑ಸ್ಯ ವಚಸಸ್ಪತೇ । ವಿಶ್ವ॑ಸ್ಯ ತಪಸಸ್ಪತೇ । ವಿಶ್ವ॑ಸ್ಯ ಬ್ರಹ್ಮಣಸ್ಪತೇ । ದೇ॒ವ॒ಶ್ರೂಸ್ತ್ವನ್ದೇ॑ವ ಘರ್ಮ ದೇ॒ವಾ-ನ್ಪಾ॑ಹಿ ॥ ತ॒ಪೋ॒ಜಾಂ-ವಾಁಚ॑ಮ॒ಸ್ಮೇ ನಿಯ॑ಚ್ಛ ದೇವಾ॒ಯುವ᳚ಮ್ ॥ 24 ॥
ಗರ್ಭೋ॑ ದೇ॒ವಾನಾ᳚ಮ್ ॥ ಪಿ॒ತಾ ಮ॑ತೀ॒ನಾಮ್ ॥
ಪತಿಃ॑ ಪ್ರ॒ಜಾನಾ᳚ಮ್ ॥ ಮತಿಃ॑ ಕವೀ॒ನಾಮ್ ॥
ಸನ್ದೇ॒ವೋ ದೇ॒ವೇನ॑ ಸವಿ॒ತ್ರಾ-ಽಯ॑ತಿಷ್ಟ । ಸಗ್ಂ ಸೂರ್ಯೇ॑ಣಾರುಕ್ತ ॥ ಆ॒ಯು॒ರ್ದಾಸ್ತ್ವಮ॒ಸ್ಮಭ್ಯ॑-ಙ್ಘರ್ಮ ವರ್ಚೋ॒ದಾ ಅ॑ಸಿ ॥ ಪಿ॒ತಾ ನೋ॑-ಽಸಿ ಪಿ॒ತಾ ನೋ॑ ಬೋಧ ॥ ಆ॒ಯು॒ರ್ಧಾಸ್ತ॑ನೂ॒ಧಾಃ ಪ॑ಯೋ॒ಧಾಃ ।
ವ॒ರ್ಚೋ॒ದಾ ವ॑ರಿವೋ॒ದಾ ದ್ರ॑ವಿಣೋ॒ದಾಃ ॥ 25 ॥
ಅ॒ನ್ತ॒ರಿ॒ಕ್ಷ॒ಪ್ರ॒ ಉ॒ರೋರ್ವರೀ॑ಯಾನ್ । ಅ॒ಶೀ॒ಮಹಿ॑ ತ್ವಾ॒ ಮಾ ಮಾ॑ ಹಿಗ್ಂಸೀಃ ॥ ತ್ವಮ॑ಗ್ನೇ ಗೃ॒ಹಪ॑ತಿ-ರ್ವಿ॒ಶಾಮ॑ಸಿ । ವಿಶ್ವಾ॑ಸಾ॒-ಮ್ಮಾನು॑ಷೀಣಾಮ್ । ಶ॒ತ-ಮ್ಪೂ॒ರ್ಭಿರ್ಯ॑ವಿಷ್ಠ ಪಾ॒ಹ್ಯಗ್ಂಹ॑ಸಃ । ಸ॒ಮೇ॒ದ್ಧಾರಗ್ಂ॑ ಶ॒ತಗ್ಂ ಹಿಮಾಃ᳚ ।
ತ॒-ನ್ದ್ರಾ॒ವಿಣಗ್ಂ॑ ಹಾರ್ದಿವಾ॒ನಮ್ । ಇ॒ಹೈವ ರಾ॒ತಯಃ॑ ಸನ್ತು ॥ ತ್ವಷ್ಟೀ॑ಮತೀ ತೇ ಸಪೇಯ । ಸು॒ರೇತಾ॒ ರೇತೋ॒ ದಧಾ॑ನಾ ।
ವೀ॒ರಂ-ವಿಁ॑ದೇಯ॒ ತವ॑ ಸ॒ನ್ದೃಶಿ॑ ।
ಮಾ-ಽಹಗ್ಂ ರಾ॒ಯಸ್ಪೋಷೇ॑ಣ॒ ವಿ ಯೋ॑ಷಮ್ ॥ 26 ॥
(ರೋ॒ಚ॒ತೇ॒-ಸೂರ್ಯ॑ಯ ತ್ವಾ - ದೇವಾ॒ಯುವಂ॑ - ದ್ರವಿಣೋ॒ದಾ - ದಧಾ॑ನಾ॒ ದ್ವೇ ಚ॑) (ಅ. 7)
ಅನುವಾಕಂ 8
ದೇ॒ವಸ್ಯ॑ ತ್ವಾ ಸವಿ॒ತುಃ ಪ್ರ॑ಸ॒ವೇ । ಅ॒ಶ್ವಿನೋ᳚-ರ್ಬಾ॒ಹುಭ್ಯಾ᳚ಮ್ ।
ಪೂ॒ಷ್ಣೋ ಹಸ್ತಾ᳚ಭ್ಯಾ॒ಮಾ ದ॑ದೇ ॥ ಅದಿ॑ತ್ಯೈ॒ ರಾಸ್ನಾ॑-ಽಸಿ । ಇಡ॒ ಏಹಿ॑ । ಅದಿ॑ತ॒ ಏಹಿ॑ । ಸರ॑ಸ್ವ॒ತ್ಯೇಹಿ॑ । ಅಸಾ॒ವೇಹಿ॑ ।
ಅಸಾ॒ವೇಹಿ॑ । ಅಸಾ॒ವೇಹಿ॑ ॥ 27 ॥
ಅದಿ॑ತ್ಯಾ ಉ॒ಷ್ಣೀಷ॑ಮಸಿ । ವಾ॒ಯುರ॑ಸ್ಯೈ॒ಡಃ । ಪೂ॒ಷಾ ತ್ವೋ॒ಪಾವ॑ಸೃಜತು । ಅ॒ಶ್ವಿಭ್ಯಾ॒-ಮ್ಪ್ರ ದಾ॑ಪಯ । ಯಸ್ತೇ॒ ಸ್ತನಃ॑ ಶಶ॒ಯೋ ಯೋ ಮ॑ಯೋ॒ಭೂಃ । ಯೇನ॒ ವಿಶ್ವಾ॒ ಪುಷ್ಯ॑ಸಿ॒ ವಾರ್ಯಾ॑ಣಿ । ಯೋ ರ॑ತ್ನ॒ಧಾ ವ॑ಸು॒ವಿದ್ಯ-ಸ್ಸು॒ದತ್ರಃ॑ ।
ಸರ॑ಸ್ವತಿ॒ ತಮಿ॒ಹ ಧಾತ॑ವೇ-ಽಕಃ ॥ ಉಸ್ರ॑ ಘ॒ರ್ಮಗ್ಂ ಶಿಗ್ಂ॑ಷ । ಉಸ್ರ॑ ಘ॒ರ್ಮ-ಮ್ಪಾ॑ಹಿ ॥ 28 ॥
ಘ॒ರ್ಮಾಯ॑ ಶಿಗ್ಂಷ । ಬೃಹ॒ಸ್ಪತಿ॒ಸ್ತ್ವೋಪ॑ಸೀದತು । ದಾನ॑ವ-ಸ್ಸ್ಥ॒ ಪೇರ॑ವಃ । ವಿ॒ಷ್ವ॒ಗ್ವೃತೋ॒ ಲೋಹಿ॑ತೇನ । ಅ॒ಶ್ವಿಭ್ಯಾ᳚-ಮ್ಪಿನ್ವಸ್ವ । ಸರ॑ಸ್ವತ್ಯೈ ಪಿನ್ವಸ್ವ ।
ಪೂ॒ಷ್ಣೇ ಪಿ॑ನ್ವಸ್ವ । ಬೃಹ॒ಸ್ಪತ॑ಯೇ ಪಿನ್ವಸ್ವ । ಇನ್ದ್ರಾ॑ಯ ಪಿನ್ವಸ್ವ । ಇನ್ದ್ರಾ॑ಯ ಪಿನ್ವಸ್ವ ॥ 29 ॥
ಗಾ॒ಯ॒ತ್ರೋ॑-ಽಸಿ । ತ್ರೈಷ್ಟು॑ಭೋ-ಽಸಿ । ಜಾಗ॑ತಮಸಿ । ಸ॒ಹೋರ್ಜೋ ಭಾ॒ಗೇನೋಪ॒ ಮೇಹಿ॑ । ಇನ್ದ್ರಾ᳚ಶ್ವಿನಾ॒ ಮಧು॑ನ-ಸ್ಸಾರ॒ಘಸ್ಯ॑ । ಘ॒ರ್ಮ-ಮ್ಪಾ॑ತ ವಸವೋ॒ ಯಜ॑ತಾ॒ ವಟ್ । ಸ್ವಾಹಾ᳚ ತ್ವಾ॒ ಸೂರ್ಯ॑ಸ್ಯ ರ॒ಶ್ಮಯೇ॑ ವೃಷ್ಟಿ॒ವನ॑ಯೇ ಜುಹೋಮಿ । ಮಧು॑ ಹ॒ವಿರ॑ಸಿ । ಸೂರ್ಯ॑ಸ್ಯ॒ ತಪ॑ಸ್ತಪ । ದ್ಯಾವಾ॑ಪೃಥಿ॒ವೀಭ್ಯಾ᳚-ನ್ತ್ವಾ॒ ಪರಿ॑ಗೃಹ್ಣಾಮಿ ॥ 30 ॥
ಅ॒ನ್ತರಿ॑ಕ್ಷೇಣ॒ ತ್ವೋಪ॑ಯಚ್ಛಾಮಿ । ದೇ॒ವಾನಾ᳚-ನ್ತ್ವಾ ಪಿತೃ॒ಣಾಮನು॑ಮತೋ॒ ಭರ್ತುಗ್ಂ॑ ಶಕೇಯಮ್ । ತೇಜೋ॑-ಽಸಿ ।
ತೇಜೋ-ಽನು॒ಪ್ರೇಹಿ॑ । ದಿ॒ವಿ॒ಸ್ಪೃಮ್ಮಾ ಮಾ॑ ಹಿಗ್ಂಸೀಃ ।
ಅ॒ನ್ತ॒ರಿ॒ಕ್ಷ॒ಸ್ಪೃಮ್ಮಾ ಮಾ॑ ಹಿಗ್ಂಸೀಃ । ಪೃ॒ಥಿ॒ವಿ॒ಸ್ಪೃಮ್ಮಾ ಮಾ॑ ಹಿಗ್ಂಸೀಃ ।
ಸುವ॑ರಸಿ॒ ಸುವ॑ರ್ಮೇ ಯಚ್ಛ ।
ದಿವಂ॑-ಯಁಚ್ಛ ದಿ॒ವೋ ಮಾ॑ ಪಾಹಿ ॥ 31 ॥
(ಏಹಿ॑ - ಪಾಹಿ - ಪಿನ್ವಸ್ವ - ಗೃಹ್ಣಾಮಿ॒ - +ನವ॑ ಚ) (ಅ. 8)
ಅನುವಾಕಂ 9
ಸ॒ಮು॒ದ್ರಾಯ॑ ತ್ವಾ॒ ವಾತಾ॑ಯ॒ ಸ್ವಾಹಾ᳚ । ಸ॒ಲಿ॒ಲಾಯ॑ ತ್ವಾ॒ ವಾತಾ॑ಯ॒ ಸ್ವಾಹಾ᳚ । ಅ॒ನಾ॒ಧೃ॒ಷ್ಯಾಯ॑ ತ್ವಾ॒ ವಾತಾ॑ಯ॒ ಸ್ವಾಹಾ᳚ । ಅ॒ಪ್ರ॒ತಿ॒ಧೃ॒ಷ್ಯಾಯ॑ ತ್ವಾ॒ ವಾತಾ॑ಯ॒ ಸ್ವಾಹಾ᳚ ।
ಅ॒ವ॒ಸ್ಯವೇ᳚ ತ್ವಾ॒ ವಾತಾ॑ಯ॒ ಸ್ವಾಹಾ᳚ । ದುವ॑ಸ್ವತೇ ತ್ವಾ॒ ವಾತಾ॑ಯ॒ ಸ್ವಾಹಾ᳚ । ಶಿಮಿ॑ದ್ವತೇ ತ್ವಾ॒ ವಾತಾ॑ಯ॒ ಸ್ವಾಹಾ᳚ । ಅ॒ಗ್ನಯೇ᳚ ತ್ವಾ॒ ವಸು॑ಮತೇ॒ ಸ್ವಾಹಾ᳚ ।
ಸೋಮಾ॑ಯ ತ್ವಾ ರು॒ದ್ರವ॑ತೇ॒ ಸ್ವಾಹಾ᳚ ।
ವರು॑ಣಾಯ ತ್ವಾ-ಽಽದಿ॒ತ್ಯವ॑ತೇ॒ ಸ್ವಾಹಾ᳚ ॥ 32 ॥
ಬೃಹ॒ಸ್ಪತ॑ಯೇ ತ್ವಾ ವಿ॒ಶ್ವದೇ᳚ವ್ಯಾವತೇ॒ ಸ್ವಾಹಾ᳚ ।
ಸ॒ವಿ॒ತ್ರೇ ತ್ವ॑ರ್ಭು॒ಮತೇ॑ ವಿಭು॒ಮತೇ᳚ ಪ್ರಭು॒ಮತೇ॒ ವಾಜ॑ವತೇ॒ ಸ್ವಾಹಾ᳚ । ಯ॒ಮಾಯ॒ ತ್ವಾ-ಽಙ್ಗಿ॑ರಸ್ವತೇ ಪಿತೃ॒ಮತೇ॒ ಸ್ವಾಹಾ᳚ ॥ ವಿಶ್ವಾ॒ ಆಶಾ॑ ದಕ್ಷಿಣ॒ಸತ್ । ವಿಶ್ವಾ᳚-ನ್ದೇ॒ವಾನ॑ಯಾಡಿ॒ಹ । ಸ್ವಾಹಾ॑ಕೃತಸ್ಯ ಘ॒ರ್ಮಸ್ಯ॑ । ಮಧೋಃ᳚ ಪಿಬತಮಶ್ವಿನಾ ।
ಸ್ವಾಹಾ॒-ಽಗ್ನಯೇ॑ ಯ॒ಜ್ಞಿಯಾ॑ಯ । ಶಂ-ಯಁಜು॑ರ್ಭಿಃ ॥
ಅಶ್ವಿ॑ನಾ ಘ॒ರ್ಮ-ಮ್ಪಾ॑ತಗ್ಂ ಹಾರ್ದಿವಾ॒ನಮ್ ॥ 33 ॥
ಅಹ॑-ರ್ದಿ॒ವಾಭಿ॑-ರೂ॒ತಿಭಿಃ॑ । ಅನು॑ ವಾ॒-ನ್ದ್ಯಾವಾ॑ಪೃಥಿ॒ವೀ ಮಗ್ಂ॑ಸಾತಾಮ್ । ಸ್ವಾಹೇನ್ದ್ರಾ॑ಯ ॥ ಸ್ವಾಹೇನ್ದ್ರಾ॒ವಟ್ । ಘ॒ರ್ಮಮ॑ಪಾತಮಶ್ವಿನಾ ಹಾರ್ದಿವಾ॒ನಮ್ ।
ಅಹ॑-ರ್ದಿ॒ವಾಭಿ॑ರೂ॒ತಿಭಿಃ॑ । ಅನು॑ ವಾ॒-ನ್ದ್ಯಾವಾ॑ಪೃಥಿ॒ವೀ ಅ॑ಮಗ್ಂಸಾತಾಮ್ । ತ-ಮ್ಪ್ರಾ॒ವ್ಯಂ॑-ಯಁಥಾ॒ ವಟ್ । ನಮೋ॑ ದಿ॒ವೇ । ನಮಃ॑ ಪೃಥಿ॒ವ್ಯೈ ॥ 34 ॥
ದಿ॒ವಿ ಧಾ॑ ಇ॒ಮಂ-ಯಁ॒ಜ್ಞಮ್ । ಯ॒ಜ್ಞಮಿ॒ಮ-ನ್ದಿ॒ವಿ ಧಾಃ᳚ । ದಿವ॑ಙ್ಗಚ್ಛ । ಅ॒ನ್ತರಿ॑ಕ್ಷಙ್ಗಚ್ಛ । ಪೃ॒ಥಿ॒ವೀಙ್ಗ॑ಚ್ಛ । ಪಞ್ಚ॑ ಪ್ರ॒ದಿಶೋ॑ ಗಚ್ಛ । ದೇ॒ವಾ-ನ್ಘ॑ರ್ಮ॒ಪಾ-ನ್ಗ॑ಚ್ಛ । ಪಿ॒ತೄ-ನ್ಘ॑ರ್ಮ॒ಪಾ-ನ್ಗ॑ಚ್ಛ ॥ 35 ॥
(ಆ॒ದಿ॒ತ್ಯವ॑ತೇ॒ ಸ್ವಾಹಾ॑-ಹಾರ್ದಿವಾ॒ನಮ್-ಪೃ॑ಥಿ॒ವ್ಯಾ-+ಅ॒ಷ್ಟೌ ಚ॑) (ಅ. 9)
ಅನುವಾಕಂ 10
ಇ॒ಷೇ ಪೀ॑ಪಿಹಿ । ಊ॒ರ್ಜೇ ಪೀ॑ಪಿಹಿ । ಬ್ರಹ್ಮ॑ಣೇ ಪೀಪಿಹಿ । ಕ್ಷ॒ತ್ರಾಯ॑ ಪೀಪಿಹಿ । ಅ॒ದ್ಭ್ಯಃ ಪೀ॑ಪಿಹಿ । ಓಷ॑ಧೀಭ್ಯಃ ಪೀಪಿಹಿ । ವನ॒ಸ್ಪತಿ॑ಭ್ಯಃ ಪೀಪಿಹಿ । ದ್ಯಾವಾ॑ಪೃಥಿ॒ವೀಭ್ಯಾ᳚-ಮ್ಪೀಪಿಹಿ । ಸು॒ಭೂ॒ತಾಯ॑ ಪೀಪಿಹಿ । ಬ್ರ॒ಹ್ಮ॒ವ॒ರ್ಚ॒ಸಾಯ॑ ಪೀಪಿಹಿ ॥ 36 ॥
ಯಜ॑ಮಾನಾಯ ಪೀಪಿಹಿ । ಮಹ್ಯ॒ಞ್ಜ್ಯೈಷ್ಠ್ಯಾ॑ಯ ಪೀಪಿಹಿ ॥ ತ್ವಿಷ್ಯೈ᳚ ತ್ವಾ । ದ್ಯು॒ಮ್ನಾಯ॑ ತ್ವಾ । ಇ॒ನ್ದ್ರಿ॒ಯಾಯ॑ ತ್ವಾ॒ ಭೂತ್ಯೈ᳚ ತ್ವಾ । ಧರ್ಮಾ॑-ಽಸಿ ಸು॒ಧರ್ಮಾ ಮೇ᳚ ನ್ಯ॒ಸ್ಮೇ । ಬ್ರಹ್ಮಾ॑ಣಿ ಧಾರಯ । ಕ್ಷ॒ತ್ರಾಣಿ॑ ಧಾರಯ । ವಿಶ॑ನ್ಧಾರಯ ।
ನೇತ್ತ್ವಾ॒ ವಾತಃ॑ ಸ್ಕ॒ನ್ದಯಾ᳚ತ್ ॥ 37 ॥
ಅ॒ಮುಷ್ಯ॑ ತ್ವಾ ಪ್ರಾ॒ಣೇ ಸಾ॑ದಯಾಮಿ । ಅ॒ಮುನಾ॑ ಸ॒ಹ ನಿ॑ರ॒ರ್ಥಙ್ಗ॑ಚ್ಛ । ಯೋ᳚-ಽಸ್ಮಾ-ನ್ದ್ವೇಷ್ಟಿ॑ ।
ಯಞ್ಚ॑ ವ॒ಯ-ನ್ದ್ವಿ॒ಷ್ಮಃ ॥ ಪೂ॒ಷ್ಣೇ ಶರ॑ಸೇ॒ ಸ್ವಾಹಾ᳚ ।
ಗ್ರಾವ॑ಭ್ಯ॒-ಸ್ಸ್ವಾಹಾ᳚ । ಪ್ರ॒ತಿ॒ರೇಭ್ಯ॒-ಸ್ಸ್ವಾಹಾ᳚ । ದ್ಯಾವಾ॑ಪೃಥಿ॒ವೀಭ್ಯಾ॒ಗ್॒ ಸ್ವಾಹಾ᳚ ।
ಪಿ॒ತೃಭ್ಯೋ॑ ಘರ್ಮ॒ಪೇಭ್ಯ॒-ಸ್ಸ್ವಾಹಾ᳚ ॥
ರು॒ದ್ರಾಯ॑ ರು॒ದ್ರಹೋ᳚ತ್ರೇ॒ ಸ್ವಾಹಾ᳚ ॥ 38 ॥
ಅಹ॒-ರ್ಜ್ಯೋತಿಃ॑ ಕೇ॒ತುನಾ॑ ಜುಷತಾಮ್ । ಸು॒ಜ್ಯೋ॒ತಿ-ರ್ಜ್ಯೋತಿ॑ಷಾ॒ಗ್॒ ಸ್ವಾಹಾ᳚ । ರಾತ್ರಿ॒ರ್ಜ್ಯೋತಿಃ॑ ಕೇ॒ತುನಾ॑ ಜುಷತಾಮ್ । ಸು॒ಜ್ಯೋ॒ತಿ-ರ್ಜ್ಯೋತಿ॑ಷಾ॒ಗ್॒ ಸ್ವಾಹಾ᳚ । ಅಪೀ॑ಪರೋ॒ ಮಾ-ಽಹ್ನೋ॒ ರಾತ್ರಿ॑ಯೈ ಮಾ ಪಾಹಿ । ಏ॒ಷಾ ತೇ॑ ಅಗ್ನೇ ಸ॒ಮಿತ್ । ತಯಾ॒ ಸಮಿ॑ದ್ಧ್ಯಸ್ವ । ಆಯು॑ರ್ಮೇ ದಾಃ । ವರ್ಚ॑ಸಾ ಮಾ-ಽಞ್ಜೀಃ । ಅಪೀ॑ಪರೋ ಮಾ॒ ರಾತ್ರಿ॑ಯಾ॒ ಅಹ್ನೋ॑ ಮಾ ಪಾಹಿ ॥ 39 ॥
ಏ॒ಷಾ ತೇ॑ ಅಗ್ನೇ ಸ॒ಮಿತ್ । ತಯಾ॒ ಸಮಿ॑ದ್ಧ್ಯಸ್ವ । ಆಯು॑ರ್ಮೇ ದಾಃ । ವರ್ಚ॑ಸಾ ಮಾ-ಽಞ್ಜೀಃ । ಅ॒ಗ್ನಿ-ರ್ಜ್ಯೋತಿ॒-ರ್ಜ್ಯೋತಿ॑ರ॒ಗ್ನಿ-ಸ್ಸ್ವಾಹಾ᳚ ।
ಸೂರ್ಯೋ॒ ಜ್ಯೋತಿ॒-ರ್ಜ್ಯೋತಿ॒-ಸ್ಸೂರ್ಯ॒-ಸ್ಸ್ವಾಹಾ᳚ । ಭೂ-ಸ್ಸ್ವಾಹಾ᳚ । ಹು॒ತಗ್ಂ ಹ॒ವಿಃ । ಮಧು॑ ಹ॒ವಿಃ । ಇನ್ದ್ರ॑ತಮೇ॒-ಽಗ್ನೌ ॥ 40 ॥
ಪಿ॒ತಾ ನೋ॑-ಽಸಿ॒ ಮಾ ಮಾ॑ ಹಿಗ್ಂಸೀಃ । ಅ॒ಶ್ಯಾಮ॑ ತೇ ದೇವಘರ್ಮ ।
ಮಧು॑ಮತೋ॒ ವಾಜ॑ವತಃ ಪಿತು॒ಮತಃ॑ । ಅಙ್ಗಿ॑ರಸ್ವತ-ಸ್ಸ್ವಧಾ॒ವಿನಃ॑ । ಅ॒ಶೀ॒ಮಹಿ॑ ತ್ವಾ॒ ಮಾ ಮಾ॑ ಹಿಗ್ಂಸೀಃ ॥ ಸ್ವಾಹಾ᳚ ತ್ವಾ॒ ಸೂರ್ಯ॑ಸ್ಯ ರ॒ಶ್ಮಿಭ್ಯಃ॑ । ಸ್ವಾಹಾ᳚ ತ್ವಾ॒ ನಕ್ಷ॑ತ್ರೇಭ್ಯಃ ॥ 41 ॥
(ಬ್ರ॒ಹ್ಮ॒ವ॒ರ್ಚ॒ಸಾಯ॑ ಪೀಪಿಹಿ - ಸ್ಕ॒ನ್ದಯಾ᳚-ದ್- ರು॒ದ್ರಾಯ॑ ರು॒ದ್ರಹೋ᳚ತ್ರೇ॒ ಸ್ವಾಹಾ - ಽಹ್ನೋ॑ ಮಾ ಪಾಹ್ - ಯ॒ಗ್ನೌ - +ಸ॒ಪ್ತ ಚ॑) (ಅ. 10)
ಅನುವಾಕಂ 11
ಘರ್ಮ॒ ಯಾ ತೇ॑ ದಿ॒ವಿ ಶುಕ್ । ಯಾ ಗಾ॑ಯ॒ತ್ರೇ ಛನ್ದ॑ಸಿ । ಯಾ ಬ್ರಾ᳚ಹ್ಮ॒ಣೇ । ಯಾ ಹ॑ವಿ॒ರ್ಧಾನೇ᳚ । ತಾನ್ತ॑ ಏ॒ತೇನಾವ॑ಯಜೇ॒ ಸ್ವಾಹಾ᳚ ॥ ಘರ್ಮ॒ ಯಾ ತೇ॒-ಽನ್ತರಿ॑ಕ್ಷೇ॒ ಶುಕ್ ।
ಯಾ ತ್ರೈಷ್ಟು॑ಭೇ॒ ಛನ್ದ॑ಸಿ । ಯಾ ರಾ॑ಜ॒ನ್ಯೇ᳚ । ಯಾ-ಽಽಗ್ನೀ᳚ದ್ಧ್ರೇ ।
ತಾನ್ತ॑ ಏ॒ತೇನಾವ॑ಯಜೇ॒ ಸ್ವಾಹಾ᳚ ॥ 42 ॥
ಘರ್ಮ॒ ಯಾ ತೇ॑ ಪೃಥಿ॒ವ್ಯಾಗ್ಂ ಶುಕ್ । ಯಾ ಜಾಗ॑ತೇ॒ ಛನ್ದ॑ಸಿ । ಯಾ ವೈಶ್ಯೇ᳚ । ಯಾ ಸದ॑ಸಿ । ತಾನ್ತ॑ ಏ॒ತೇನಾವ॑ಯಜೇ॒ ಸ್ವಾಹಾ᳚ ॥ ಅ॒ಗ್ನಿಶ್ಚ॑ ಹವ್ಯ॒ವಾಹ॑ನೋ॒ ಭವ॑ತಾ-ನ್ದಾ॒ಶುಷೇ॒ ಮಯಃ॑ ॥ ಅನ್ವಿದ॑ನುಮತೇ॒ ತ್ವ-ಮ್ಮನ್ಯಾ॑ಸೈ॒ ಶಞ್ಚ॑ನಃ ಕೃಧಿ । ಕ್ರತ್ವೇ॒ ದಕ್ಷಾ॑ಯ ನೋ ಹಿನು॒ ಪ್ರಣ॒ ಆಯೂಗ್ಂ॑ಷಿ ತಾರಿಷಃ ॥ ದಿ॒ವಸ್ತ್ವಾ॑ ಪರ॒ಸ್ಪಾಯಾಃ᳚ । ಅ॒ನ್ತರಿ॑ಕ್ಷಸ್ಯ ತ॒ನುವಃ॑ ಪಾಹಿ । ಪೃ॒ಥಿ॒ವ್ಯಾಸ್ತ್ವಾ॒ ಧರ್ಮ॑ಣಾ ॥ 43 ॥
ವ॒ಯಮನು॑ಕ್ರಾಮಾಮ ಸುವಿ॒ತಾಯ॒ ನವ್ಯ॑ಸೇ ॥ ಬ್ರಹ್ಮ॑ಣಸ್ತ್ವಾ ಪರ॒ಸ್ಪಾಯಾಃ᳚ । ಕ್ಷ॒ತ್ರಸ್ಯ॑ ತ॒ನುವಃ॑ ಪಾಹಿ । ವಿ॒ಶಸ್ತ್ವಾ॒ ಧರ್ಮ॑ಣಾ । ವ॒ಯಮನು॑ಕ್ರಾಮಾಮ ಸುವಿ॒ತಾಯ॒ ನವ್ಯ॑ಸೇ ॥ ಪ್ರಾ॒ಣಸ್ಯ॑ ತ್ವಾ ಪರ॒ಸ್ಪಾಯೈ᳚ । ಚಕ್ಷು॑ಷಸ್ತ॒ನುವಃ॑ ಪಾಹಿ । ಶ್ರೋತ್ರ॑ಸ್ಯ ತ್ವಾ॒ ಧರ್ಮ॑ಣಾ । ವ॒ಯಮನು॑ಕ್ರಾಮಾಮ ಸುವಿ॒ತಾಯ॒ ನವ್ಯ॑ಸೇ ॥ ವ॒ಲ್ಗುರ॑ಸಿ ಶಂ॒-ಯುಁಧಾ॑ಯಾಃ ॥ 44 ॥
ಶಿಶು॒-ರ್ಜನ॑ಧಾಯಾಃ ॥ ಶಞ್ಚ॒ ವಕ್ಷಿ॒ ಪರಿ॑ ಚ॒ ವಕ್ಷಿ॑ ।
ಚತುಃ॑ ಸ್ರಕ್ತಿ॒ರ್ನಾಭಿ॑ರ್-ಋ॒ತಸ್ಯ॑ । ಸದೋ॑ ವಿ॒ಶ್ವಾಯು॒-ಶ್ಶರ್ಮ॑ ಸ॒ಪ್ರಥಾಃ᳚ । ಅಪ॒ ದ್ವೇಷೋ॒ ಅಪ॒ ಹ್ವರಃ॑ । ಅ॒ನ್ಯದ್ವ್ರ॑ತಸ್ಯ ಸಶ್ಚಿಮ । ಘರ್ಮೈ॒ತ-ತ್ತೇ-ಽನ್ನ॑ಮೇ॒ತ-ತ್ಪುರೀ॑ಷಮ್ । ತೇನ॒ ವರ್ಧ॑ಸ್ವ॒ ಚಾ ಚ॑ ಪ್ಯಾಯಸ್ವ । ವ॒ರ್ಧಿ॒ಷೀ॒ಮಹಿ॑ ಚ ವ॒ಯಮ್ । ಆ ಚ॑ ಪ್ಯಾಸಿಷೀ॒ಮಹಿ॑ ॥ 45 ॥
ರನ್ತಿ॒-ರ್ನಾಮಾ॑ಸಿ ದಿ॒ವ್ಯೋ ಗ॑ನ್ಧ॒ರ್ವಃ । ತಸ್ಯ॑ ತೇ ಪ॒ದ್ವದ್ಧ॑ವಿ॒ರ್ಧಾನ᳚ಮ್ । ಅ॒ಗ್ನಿರದ್ಧ್ಯ॑ಕ್ಷಾಃ । ರು॒ದ್ರೋ-ಽಧಿ॑ಪತಿಃ ॥ ಸಮ॒ಹಮಾಯು॑ಷಾ । ಸ-ಮ್ಪ್ರಾ॒ಣೇನ॑ ।
ಸಂ-ವಁರ್ಚ॑ಸಾ । ಸ-ಮ್ಪಯ॑ಸಾ । ಸಙ್ಗೌ॑ಪ॒ತ್ಯೇನ॑ । ಸಗ್ಂ ರಾ॒ಯಸ್ಪೋಷೇ॑ಣ ॥ 46 ॥
ವ್ಯ॑ಸೌ । ಯೋ᳚-ಽಸ್ಮಾ-ನ್ದ್ವೇಷ್ಟಿ॑ । ಯಞ್ಚ॑ ವ॒ಯ-ನ್ದ್ವಿ॒ಷ್ಮಃ ॥
ಅಚಿ॑ಕ್ರದ॒ದ್ವೃಷಾ॒ ಹರಿಃ॑ । ಮ॒ಹಾ-ನ್ಮಿ॒ತ್ರೋ ನ ದ॑ರ್ಶ॒ತಃ । ಸಗ್ಂ ಸೂರ್ಯೇ॑ಣ ರೋಚತೇ ॥ ಚಿದ॑ಸಿ ಸಮು॒ದ್ರಯೋ॑ನಿಃ । ಇನ್ದು॒-ರ್ದಕ್ಷಃ॑ ಶ್ಯೇ॒ನ ಋ॒ತಾವಾ᳚ । ಹಿರ॑ಣ್ಯಪಕ್ಷ-ಶ್ಶಕು॒ನೋ ಭು॑ರ॒ಣ್ಯುಃ । ಮ॒ಹಾನ್-ಥ್ಸ॒ಧಸ್ಥೇ᳚ ಧ್ರು॒ವ ಆನಿಷ॑ತ್ತಃ ॥ 47 ॥
ನಮ॑ಸ್ತೇ ಅಸ್ತು॒ ಮಾ ಮಾ॑ ಹಿಗ್ಂಸೀಃ ॥ ವಿ॒ಶ್ವಾವ॑ಸುಗ್ಂ ಸೋಮ ಗನ್ಧ॒ರ್ವಮ್ । ಆಪೋ॑ ದದೃ॒ಶುಷೀಃ᳚ । ತದೃ॒ತೇನಾ॒ ವ್ಯಾ॑ಯನ್ನ್ । ತದ॒ನ್ವವೈ᳚ತ್ । ಇನ್ದ್ರೋ॑ ರಾರಹಾ॒ಣ ಆ॑ಸಾಮ್ । ಪರಿ॒ ಸೂರ್ಯ॑ಸ್ಯ ಪರಿ॒ಧೀಗ್ಂ ರ॑ಪಶ್ಯತ್ ॥ ವಿ॒ಶ್ವಾವ॑ಸುರ॒ಭಿ ತನ್ನೋ॑ ಗೃಣಾತು । ದಿ॒ವ್ಯೋ ಗ॑ನ್ಧ॒ರ್ವೋ ರಜ॑ಸೋ ವಿ॒ಮಾನಃ॑ ।
ಯದ್ವಾ॑ ಘಾ ಸ॒ತ್ಯಮು॒ತ ಯನ್ನ ವಿ॒ದ್ಮ ॥ 48 ॥
ಧಿಯೋ॑ ಹಿನ್ವಾ॒ನೋ ಧಿಯ॒ ಇನ್ನೋ॑ ಅವ್ಯಾತ್ ॥ ಸಸ್ನಿ॑ಮವಿನ್ದ॒ಚ್ಚರ॑ಣೇ ನ॒ದೀನಾ᳚ಮ್ ।
ಅಪಾ॑ವೃಣೋ॒-ದ್ದುರೋ॒ ಅಶ್ಮ॑ವ್ರಜಾನಾಮ್ । ಪ್ರಾಸಾ᳚-ನ್ಗನ್ಧ॒ರ್ವೋ ಅ॒ಮೃತಾ॑ನಿ ವೋಚತ್ । ಇನ್ದ್ರೋ॒ ದಕ್ಷ॒-ಮ್ಪರಿ॑ಜಾನಾದ॒ಹೀನ᳚ಮ್ ॥ ಏ॒ತತ್ತ್ವ-ನ್ದೇ॑ವ ಘರ್ಮ ದೇ॒ವೋ ದೇ॒ವಾನುಪಾ॑ಗಾಃ ।
ಇ॒ದಮ॒ಹ-ಮ್ಮ॑ನು॒ಷ್ಯೋ॑ ಮನು॒ಷ್ಯಾನ್॑ । ಸೋಮ॑ಪೀ॒ಥಾನು॒ ಮೇಹಿ॑ । ಸ॒ಹ ಪ್ರ॒ಜಯಾ॑ ಸ॒ಹ ರಾ॒ಯಸ್ಪೋಷೇ॑ಣ ॥
ಸು॒ಮಿ॒ತ್ರಾ ನ॒ ಆಪ॒ ಓಷ॑ಧಯ-ಸ್ಸನ್ತು ॥ 49 ॥
ದು॒ರ್ಮಿ॒ತ್ರಾಸ್ತಸ್ಮೈ॑ ಭೂಯಾಸುಃ । ಯೋ᳚-ಽಸ್ಮಾ-ನ್ದ್ವೇಷ್ಟಿ॑ ।
ಯಞ್ಚ॑ ವ॒ಯ-ನ್ದ್ವಿ॒ಷ್ಮಃ ॥ ಉದ್ವ॒ಯ-ನ್ತಮ॑ಸ॒ಸ್ಪರಿ॒ ಪಶ್ಯ॑ನ್ತೋ॒ ಜ್ಯೋತಿ॒ರುತ್ತ॑ರಮ್ । ದೇ॒ವ-ನ್ದೇ॑ವ॒ತ್ರಾ ಸೂರ್ಯ॒ಮಗ॑ನ್ಮ॒ ಜ್ಯೋತಿ॑ರುತ್ತ॒ಮಮ್ ॥ ಉದು॒ ತ್ಯ-ಞ್ಜಾ॒ತವೇ॑ದಸ-ನ್ದೇ॒ವಂ-ವಁ॑ಹನ್ತಿ ಕೇ॒ತವಃ॑ । ದೃ॒ಶೇ ವಿಶ್ವಾ॑ಯ॒ ಸೂರ್ಯ᳚ಮ್ । ಚಿ॒ತ್ರ-ನ್ದೇ॒ವಾನಾ॒-ಮುದ॑ಗಾ॒ದನೀ॑ಕ॒-ಞ್ಚಕ್ಷು॑ ರ್ಮಿ॒ತ್ರಸ್ಯ॒ ವರು॑ಣಸ್ಯಾ॒-ಽಗ್ನೇಃ ॥ ಇ॒ಮಮೂ॒ ಷು ತ್ಯಮ॒ಸ್ಮಭ್ಯಗ್ಂ॑ ಸ॒ನಿಮ್ । ಗಾ॒ಯ॒ತ್ರನ್ನವೀ॑ಯಾಗ್ಂಸಮ್ ।
ಅಗ್ನೇ॑ ದೇ॒ವೇಷು॒ ಪ್ರವೋ॑ಚಃ ॥ 50 ॥
(ಯಾ-ಽಽಗ್ನೀ᳚ದ್ಧ್ರೇ॒ ತಾನ್ತಾ॑ ಏ॒ತೇನಾವ॑ಯಜೇ॒ ಸ್ವಾಹಾ॒ - ಧರ್ಮ॑ಣಾ - ಶಂ॒-ಯುಁಧಾ॑ಯಾಃ - ಪ್ಯಾಸಿಷೀ॒ಮಹಿ॒-ಪೋಷೇ॑ಣ॒-ನಿಷ॑ತ್ತೋ-ವಿ॒ದ್ಮ-ಸ॑ನ್-+ತ್ವ॒ಷ್ಟೌ ಚ॑) (ಅ. 11)
ಅನುವಾಕಂ 12
ಮ॒ಹೀ॒ನಾ-ಮ್ಪಯೋ॑-ಽಸಿ॒ ವಿಹಿ॑ತ-ನ್ದೇವ॒ತ್ರಾ ।
ಜ್ಯೋ॒ತಿ॒ರ್ಭಾ ಅ॑ಸಿ॒ ವನ॒ಸ್ಪತೀ॑ನಾ॒ಮೋಷ॑ಧೀನಾ॒ಗ್ಂ॒ ರಸಃ॑ ।
ವಾ॒ಜಿನ॑-ನ್ತ್ವಾ ವಾ॒ಜಿನೋ-ಽವ॑ ನಯಾಮಃ ।
ಊ॒ರ್ಧ್ವ-ಮ್ಮನಃ॑ ಸುವ॒ರ್ಗಮ್ ॥ 51 ॥ (ಅ. 12)
ಅನುವಾಕಂ 13
ಅಸ್ಕಾ॒-ನ್ದ್ಯೌಃ ಪೃ॑ಥಿ॒ವೀಮ್ । ಅಸ್ಕಾ॑ನೃಷ॒ಭೋ ಯುವಾ॒ ಗಾಃ ।
ಸ್ಕ॒ನ್ನೇಮಾ ವಿಶ್ವಾ॒ ಭುವ॑ನಾ । ಸ್ಕ॒ನ್ನೋ ಯ॒ಜ್ಞಃ ಪ್ರಜ॑ನಯತು ॥ ಅಸ್ಕಾ॒ನಜ॑ನಿ॒ ಪ್ರಾಜ॑ನಿ । ಆ ಸ್ಕ॒ನ್ನಾಜ್ಜಾ॑ಯತೇ॒ ವೃಷಾ᳚ ।
ಸ್ಕ॒ನ್ನಾ-ತ್ಪ್ರಜ॑ನಿಷೀಮಹಿ ॥ 52 ॥ (ಅ. 13)
ಅನುವಾಕಂ 14
ಯಾ ಪು॒ರಸ್ತಾ᳚-ದ್ವಿ॒ದ್ಯುದಾಪ॑ತತ್ । ತಾನ್ತ॑ ಏ॒ತೇನಾವ॑ ಯಜೇ॒ ಸ್ವಾಹಾ᳚ । ಯಾ ದ॑ಕ್ಷಿಣ॒ತಃ । ಯಾ ಪ॒ಶ್ಚಾತ್ । ಯೋತ್ತ॑ರ॒ತಃ । ಯೋಪರಿ॑ಷ್ಟಾ-ದ್ವಿ॒ದ್ಯುದಾಪ॑ತತ್ । ತಾನ್ತ॑ ಏ॒ತೇನಾವ॑ ಯಜೇ॒ ಸ್ವಾಹಾ᳚ ॥ 53 ॥ (ಅ. 14)
ಅನುವಾಕಂ 15
ಪ್ರಾ॒ಣಾಯ॒ ಸ್ವಾಹಾ᳚ ವ್ಯಾ॒ನಾಯ॒ ಸ್ವಾಹಾ॑ ಽಪಾ॒ನಾಯ॒ ಸ್ವಾಹಾ᳚ ।
ಚಕ್ಷು॑ಷೇ॒ ಸ್ವಾಹಾ॒ ಶ್ರೋತ್ರಾ॑ಯ॒ ಸ್ವಾಹಾ᳚ ।
ಮನ॑ಸೇ॒ ಸ್ವಾಹಾ॑ ವಾ॒ಚೇ ಸರ॑ಸ್ವತ್ಯೈ॒ ಸ್ವಾಹಾ᳚ ॥ 54 ॥ (ಅ. 15)
ಅನುವಾಕಂ 16
ಪೂ॒ಷ್ಣೇ ಸ್ವಾಹಾ॑ ಪೂ॒ಷ್ಣೇ ಶರ॑ಸೇ॒ ಸ್ವಾಹಾ᳚ ।
ಪೂ॒ಷ್ಣೇ ಪ್ರ॑ಪ॒ತ್ಥ್ಯಾ॑ಯ॒ ಸ್ವಾಹಾ॑ ಪೂ॒ಷ್ಣೇ ನ॒ರನ್ಧಿ॑ಷಾಯ॒ ಸ್ವಾಹಾ᳚ । ಪೂ॒ಷ್ಣೇ-ಽಙ್ಘೃ॑ಣಯೇ॒ ಸ್ವಾಹಾ॑ ಪೂ॒ಷ್ಣೇ ನ॒ರುಣಾ॑ಯ॒ ಸ್ವಾಹಾ᳚ ।
ಪೂ॒ಷ್ಣೇ ಸಾ॑ಕೇ॒ತಾಯ॒ ಸ್ವಾಹಾ᳚ ॥ 55 ॥ (ಅ. 16)
ಅನುವಾಕಂ 17
ಉದ॑ಸ್ಯ॒ ಶುಷ್ಮಾ᳚-ದ್ಭಾ॒ನುರ್ನಾರ್ತ॒ ಬಿಭ॑ರ್ತಿ । ಭಾ॒ರ-ಮ್ಪೃ॑ಥಿ॒ವೀ ನ ಭೂಮ॑ । ಪ್ರ ಶು॒ಕ್ರೈತು॑ ದೇ॒ವೀ ಮ॑ನೀ॒ಷಾ । ಅ॒ಸ್ಮ-ಥ್ಸುತ॑ಷ್ಟೋ॒ ರಥೋ॒ ನ ವಾ॒ಜೀ । ಅರ್ಚ॑ನ್ತ॒ ಏಕೇ॒ ಮಹಿ॒ ಸಾಮ॑ ಮನ್ವತ । ತೇನ॒ ಸೂರ್ಯ॑ಮಧಾರಯನ್ನ್ ।
ತೇನ॒ ಸೂರ್ಯ॑ಮರೋಚಯನ್ನ್ । ಘ॒ರ್ಮ-ಶ್ಶಿರ॒ಸ್ತದ॒ಯಮ॒ಗ್ನಿಃ ।
ಪುರೀ॑ಷಮಸಿ॒ ಸಮ್ಪ್ರಿ॑ಯ-ಮ್ಪ್ರ॒ಜಯಾ॑ ಪ॒ಶುಭಿ॑ರ್ಭುವತ್ । ಪ್ರ॒ಜಾಪತಿ॑ಸ್ತ್ವಾ ಸಾದಯತು । ತಯಾ॑ ದೇ॒ವತ॑ಯಾ ಽಙ್ಗಿರ॒ಸ್ವ-ದ್ಧ್ರು॒ವಾ ಸೀ॑ದ ॥ 56 ॥ (ಅ. 17)
ಅನುವಾಕಂ 18
ಯಾಸ್ತೇ॑ ಅಗ್ನ ಆ॒ರ್ದ್ರಾ ಯೋನ॑ಯೋ॒ ಯಾಃ ಕು॑ಲಾ॒ಯಿನೀಃ᳚ ।
ಯೇ ತೇ॑ ಅಗ್ನ॒ ಇನ್ದ॑ವೋ॒ ಯಾ ಉ॒ ನಾಭ॑ಯಃ । ಯಾಸ್ತೇ॑ ಅಗ್ನೇ ತ॒ನುವ॒ ಊರ್ಜೋ॒ ನಾಮ॑ । ತಾಭಿ॒ಸ್ತ್ವಮು॒ಭಯೀ॑ಭಿ-ಸ್ಸಂವಿಁದಾ॒ನಃ । ಪ್ರ॒ಜಾಭಿ॑ರಗ್ನೇ॒ ದ್ರವಿ॑ಣೇ॒ಹ ಸೀ॑ದ ।
ಪ್ರ॒ಜಾಪ॑ತಿಸ್ತ್ವಾ ಸಾದಯತು । ತಯಾ॑ ದೇ॒ವತ॑ಯಾ-ಽಙ್ಗಿರ॒ಸ್ವ-ದ್ಧ್ರು॒ವಾ ಸೀ॑ದ ॥ 57 ॥ (ಅ. 18)
ಅನುವಾಕಂ 19
ಅ॒ಗ್ನಿರ॑ಸಿ ವೈಶ್ವಾನ॒ರೋ॑-ಽಸಿ । ಸಂ॒ವಁ॒ಥ್ಸ॒ರೋ॑-ಽಸಿ ಪರಿವಥ್ಸ॒ರೋ॑-ಽಸಿ । ಇ॒ದಾ॒ವ॒ಥ್ಸ॒ರೋ॑-ಽಸೀದುವಥ್ಸ॒ರೋ॑-ಽಸಿ । ಇ॒ದ್ವ॒ಥ್ಸ॒ರೋ॑-ಽಸಿ ವಥ್ಸ॒ರೋ॑-ಽಸಿ । ತಸ್ಯ॑ ತೇ ವಸ॒ನ್ತ-ಶ್ಶಿರಃ॑ । ಗ್ರೀ॒ಷ್ಮೋ ದಕ್ಷಿ॑ಣಃ ಪ॒ಕ್ಷಃ । ವ॒ರ್॒ಷಾಃ ಪುಚ್ಛ᳚ಮ್ ।
ಶ॒ರದುತ್ತ॑ರಃ ಪ॒ಕ್ಷಃ । ಹೇ॒ಮ॒ನ್ತೋ ಮದ್ಧ್ಯ᳚ಮ್ । ಪೂ॒ರ್ವ॒ಪ॒ಕ್ಷಾಶ್ಚಿತ॑ಯಃ । ಅ॒ಪ॒ರ॒ಪ॒ಕ್ಷಾಃ ಪುರೀ॑ಷಮ್ । ಅ॒ಹೋ॒ರಾ॒ತ್ರಾಣೀಷ್ಟ॑ಕಾಃ । ತಸ್ಯ॑ ತೇ॒ ಮಾಸಾ᳚ಶ್ಚಾರ್ಧಮಾ॒ಸಾಶ್ಚ॑ ಕಲ್ಪನ್ತಾಮ್ ।
ಋ॒ತವ॑ಸ್ತೇ ಕಲ್ಪನ್ತಾಮ್ । ಸಂ॒ವಁ॒ಥ್ಸ॒ರಸ್ತೇ॑ ಕಲ್ಪತಾಮ್ ।
ಅ॒ಹೋ॒ರಾ॒ತ್ರಾಣಿ॑ ತೇ ಕಲ್ಪನ್ತಾಮ್ । ಏತಿ॒ ಪ್ರೇತಿ॒ ವೀತಿ॒ ಸಮಿತ್ಯುದಿತಿ॑ ।
ಪ್ರ॒ಜಾಪ॑ತಿಸ್ತ್ವಾ ಸಾದಯತು । ತಯಾ॑ ದೇ॒ವತ॑ಯಾ-ಽಙ್ಗಿರ॒ಸ್ವ-ದ್ಧ್ರು॒ವಾ ಸೀ॑ದ ॥ 58 ॥
(ಚಿತ॑ಯೋ॒ ನವ॑ ಚ) (ಅ. 19)
ಅನುವಾಕಂ 20
ಭೂರ್ಭುವ॒ಸ್ಸುವಃ॑ । ಊ॒ರ್ಧ್ವ ಊ॒ ಷುಣ॑ ಊ॒ತಯೇ᳚ । ಊ॒ರ್ಧ್ವೋ ನಃ॑ ಪಾ॒ಹ್ಯಗ್ಂಹ॑ಸಃ ॥
ವಿ॒ಧುನ್ದ॑ದ್ರಾ॒ಣಗ್ಂ ಸಮ॑ನೇ ಬಹೂ॒ನಾಮ್ । ಯುವಾ॑ನ॒ಗ್ಂ॒ ಸನ್ತ॑-ಮ್ಪಲಿ॒ತೋ ಜ॑ಗಾರ । ದೇ॒ವಸ್ಯ॑ ಪಶ್ಯ॒ ಕಾವ್ಯ॑-ಮ್ಮಹಿ॒ತ್ವಾ-ಽದ್ಯಾ ಮ॒ಮಾರ॑ । ಸ ಹ್ಯ॒-ಸ್ಸಮಾ॑ನ ॥
ಯದೃ॒ತೇ ಚಿ॑ದಭಿ॒ಶ್ರಿಷಃ॑ । ಪು॒ರಾ ಜ॒ರ್ತೃಭ್ಯ॑ ಆ॒ತೃದಃ॑ ।
ಸನ್ಧಾ॑ತಾ ಸ॒ನ್ಧಿ-ಮ್ಮ॒ಘವಾ॑ ಪುರೋ॒ವಸುಃ॑ ॥ 59 ॥
ನಿಷ್ಕ॑ರ್ತಾ॒ ವಿಹ್ರು॑ತ॒-ಮ್ಪುನಃ॑ ॥ ಪುನ॑ರೂ॒ರ್ಜಾ ನಿ ವ॑ರ್ತಸ್ವ॒ ಪುನ॑ರಗ್ನ ಇ॒ಷಾ-ಽಽಯು॑ಷಾ । ಪುನ॑ರ್ನಃ ಪಾಹಿ ವಿ॒ಶ್ವತಃ॑ ॥ ಸ॒ಹ ರ॒ಯ್ಯಾ ನಿ ವ॑ರ್ತ॒ಸ್ವಾಗ್ನೇ॒ ಪಿನ್ವ॑ಸ್ವ॒ ಧಾರ॑ಯಾ । ವಿ॒ಶ್ವಫ್ಸ್ನಿ॑ಯಾ ವಿ॒ಶ್ವತ॒ಸ್ಪರಿ॑ ॥ ಮಾ ನೋ॑ ಘರ್ಮ ವ್ಯಥಿ॒ತೋ ವಿ॑ವ್ಯಥೋ ನಃ । ಮಾ ನಃ॒ ಪರ॒ಮಧ॑ರ॒ಮ್ಮಾ ರಜೋ॑-ಽನೈಃ । ಮೋಷ್ವ॑ಸ್ಮಾಗ್ ಸ್ತಮ॑ಸ್ಯನ್ತ॒ರಾ ಧಾಃ᳚ । ಮಾ ರು॒ದ್ರಿಯಾ॑ಸೋ ಅ॒ಭಿಗು॑ರ್ವೃ॒ಧಾನಃ॑ ॥ ಮಾ ನಃ॒ ಕ್ರತು॑ಭಿರ್-ಹೀಡಿ॒ತೇಭಿ॑ರ॒ಸ್ಮಾನ್ । ದ್ವಿಷಾ॑ ಸುನೀತೇ॒ ಮಾ ಪರಾ॑ದಾಃ ।
ಮಾ ನೋ॑ ರು॒ದ್ರೋ ನಿರ್-ಋ॑ತಿ॒ರ್ಮಾ ನೋ॒ ಅಸ್ತಾ᳚ ।
ಮಾ ದ್ಯಾವಾ॑ಪೃಥಿ॒ವೀ ಹೀ॑ಡಿಷಾತಾಮ್ ॥ 60 ॥
ಉಪ॑ ನೋ ಮಿತ್ರಾವರುಣಾವಿ॒ಹಾವ॑ತಮ್ । ಅ॒ನ್ವಾದೀ᳚ದ್ಧ್ಯಾಥಾಮಿ॒ಹ ನಃ॑ ಸಖಾಯಾ । ಆ॒ದಿ॒ತ್ಯಾನಾ॒-ಮ್ಪ್ರಸಿ॑ತಿರ್ಹೇ॒ತಿಃ । ಉ॒ಗ್ರಾ ಶ॒ತಾಪಾ᳚ಷ್ಠಾ ಘ॒ ವಿಷಾ॒ ಪರಿ॑ಣೋ ವೃಣಕ್ತು ॥
ಇ॒ಮ-ಮ್ಮೇ॑ ವರುಣ ಶ್ರುಧೀ॒ ಹವ॑ಮ॒ದ್ಯಾ ಚ॑ ಮೃಡಯ । ತ್ವಾಮ॑ವ॒ಸ್ಯುರಾ ಚ॑ಕೇ ॥ ತತ್ತ್ವಾ॑ ಯಾಮಿ॒ ಬ್ರಹ್ಮ॑ಣಾ॒ ವನ್ದ॑ಮಾನ॒-ಸ್ತದಾ ಶಾ᳚ಸ್ತೇ॒ ಯಜ॑ಮಾನೋ ಹ॒ವಿರ್ಭಿಃ॑ । ಅಹೇ॑ಡಮಾನೋ ವರುಣೇ॒ಹ ಬೋ॒ದ್ಧ್ಯುರು॑ಶಗ್ಂಸ॒ ಮಾ ನ॒ ಆಯುಃ॒ ಪ್ರಮೋ॑ಷೀಃ ॥ ತ್ವ-ನ್ನೋ॑ ಅಗ್ನೇ॒ ವರು॑ಣಸ್ಯ ವಿ॒ದ್ವಾ-ನ್ದೇ॒ವಸ್ಯ॒ ಹೇಡೋ-ಽವ॑ ಯಾಸಿ ಸೀಷ್ಠಾಃ । ಯಜಿ॑ಷ್ಠೋ॒ ವಹ್ನಿ॑ ತಮ॒-ಶ್ಶೋಶು॑ಚಾನೋ॒ ವಿಶ್ವಾ॒ ದ್ವೇಷಾಗ್ಂ॑ಸಿ॒ ಪ್ರಮು॑ಮುಗ್ಧ್ಯ॒ಸ್ಮತ್ ॥
ಸ ತ್ವನ್ನೋ॑ ಅನ್ಗೇ-ಽವ॒ಮೋ ಭ॑ವೋ॒ತೀ ನೇದಿ॑ಷ್ಠೋ ಅ॒ಸ್ಯಾ ಉ॒ಷಸೋ॒ ವ್ಯು॑ಷ್ಟೌ । ಅವ॑ ಯಕ್ಷ್ವ ನೋ॒ ವರು॑ಣ॒ಗ್ಂ॒ ರರಾ॑ಣೋ ವೀ॒ಹಿ ಮೃ॑ಡೀ॒ಕಗ್ಂ ಸು॒ಹವೋ॑ ನ ಏಧಿ ॥ ತ್ವಮ॑ಗ್ನೇ ಅ॒ಯಾ-ಽಸಿ॑ । ಅ॒ಯಾ ಸನ್ಮನ॑ಸಾ ಹಿ॒ತಃ । ಅ॒ಯಾ ಸನಃಅ॒ವ್ಯಮೂ॑ಹಿಷೇ । ಅ॒ಯಾ ನೋ॑ ಧೇಹಿ ಭೇಷ॒ಜಮ್ । ಇ॒ಷ್ಟೋ ಅ॒ಗ್ನಿರಾಹು॑ತಃ । ಸ್ವಾಹಾ॑ಕೃತಃ ಪಿಪರ್ತು ನಃ । ಸ್ವ॒ಗಾ ದೇ॒ವೇಭ್ಯ॑ ಇ॒ದ-ನ್ನಮಃ॑ ॥
ಉದ್ವ॒ಯ-ನ್ತಮ॑ಸ॒ಸ್ಪರಿ॒ ಪಶ್ಯ॑ನ್ತೋ॒ ಜ್ಯೋತಿ॒ರುತ್ತ॑ರಮ್ । ದೇ॒ವ-ನ್ದೇ॑ವ॒ತ್ರಾ ಸೂರ್ಯ॒ಮಗ॑ನ್ಮ॒ ಜ್ಯೋತಿ॑ರುತ್ತ॒ಮಮ್ ॥ ಉದು॒ ತ್ಯ-ಞ್ಜಾ॒ತವೇ॑ದಸ-ನ್ದೇ॒ವಂ-ವಁ॑ಹನ್ತಿ ಕೇ॒ತವಃ॑ । ದೃ॒ಶೇ ವಿಶ್ವಾ॑ಯ॒ ಸೂರ್ಯ᳚ಮ್ । ಚಿ॒ತ್ರ-ನ್ದೇ॒ವಾನಾ॒-ಮುದ॑ಗಾ॒ದನೀ॑ಕ॒-ಞ್ಚಕ್ಷು॑ ರ್ಮಿ॒ತ್ರಸ್ಯ॒ ವರು॑ಣಸ್ಯಾ॒-ಽಗ್ನೇಃ ॥
ವಯಃ॑ ಸುಪ॒ರ್ಣಾ ಉಪ॑ಸೇದು॒ರಿನ್ದ್ರ᳚ಮ್ । ಪ್ರಿ॒ಯಮೇ॑ಧಾ॒ ಋಷ॑ಯೋ॒ ನಾಧ॑ಮಾನಾಃ । ಅಪ॑ ಧ್ವಾ॒ನ್ತಮೂ᳚ರ್ಣು॒ಹಿ ಪೂ॒ರ್ಧಿ ಚಕ್ಷುಃ॑ । ಮು॒ಮು॒ಗ್ಧ್ಯ॑ಸ್ಮಾ-ನ್ನಿ॒ಧಯೇ॑ವ ಬ॒ದ್ಧಾನ್ ॥ 61 ॥
(ಪು॒ರೋ॒ವಸು॑ರ್ಹೀಡಿಷಾತಾಗ್ಂ ಸುಪ॒ರ್ಣಾಃ) (ಅ. 20)
ಅನುವಾಕಂ 21
ಭೂರ್ಭುವ॒ಸ್ಸುವಃ॑ । ಮಯಿ॒ ತ್ಯದಿ॑ನ್ದ್ರಿ॒ಯ-ಮ್ಮ॒ಹತ್ । ಮಯಿ॒ ದಕ್ಷೋ॒ ಮಯಿ॒ ಕ್ರತುಃ॑ । ಮಯಿ॑ ಧಾಯಿ ಸು॒ವೀರ್ಯ᳚ಮ್ । ತ್ರಿಶು॑ಗ್ಘ॒ರ್ಮೋ ವಿಭಾ॑ತು ಮೇ । ಆಕೂ᳚ತ್ಯಾ॒ ಮನ॑ಸಾ ಸ॒ಹ ।
ವಿ॒ರಾಜಾ॒ ಜ್ಯೋತಿ॑ಷಾ ಸ॒ಹ । ಯ॒ಜ್ಞೇನ॒ ಪಯ॑ಸಾ ಸ॒ಹ । ಬ್ರಹ್ಮ॑ಣಾ॒ ತೇಜ॑ಸಾ ಸ॒ಹ । ಕ್ಷ॒ತ್ರೇಣ॒ ಯಶ॑ಸಾ ಸ॒ಹ । ಸ॒ತ್ಯೇನ॒ ತಪ॑ಸಾ ಸ॒ಹ । ತಸ್ಯ॒ ದೋಹ॑ಮಶೀಮಹಿ ।
ತಸ್ಯ॑ ಸು॒ಮ್ನಮ॑ಶೀಮಹಿ । ತಸ್ಯ॑ ಭ॒ಕ್ಷಮ॑ಶೀಮಹಿ ।
ತಸ್ಯ॑ ತ॒ ಇನ್ದ್ರೇ॑ಣ ಪೀ॒ತಸ್ಯ॒ ಮಧು॑ಮತಃ ।
ಉಪ॑ಹೂತ॒ಸ್ಯೋಪ॑ಹೂತೋ ಭಕ್ಷಯಾಮಿ ॥ 62 ॥
(ಯಶ॑ಸಾ ಸ॒ಹ ಷಟ್ಚ॑) (ಅ. 21)
ಅನುವಾಕಂ 22
ಯಾಸ್ತೇ॑ ಅಗ್ನೇ ಘೋ॒ರಾಸ್ತ॒ನುವಃ॑ । ಕ್ಷುಚ್ಚ॒ ತೃಷ್ಣಾ॑ ಚ । ಅಸ್ನು॒ಕ್ಚಾನಾ॑ಹುತಿಶ್ಚ । ಅ॒ಶ॒ನ॒ಯಾ ಚ॑ ಪಿಪಾ॒ಸಾ ಚ॑ । ಸೇ॒ದಿಶ್ಚಾಮ॑ತಿಶ್ಚ । ಏ॒ತಾಸ್ತೇ॑ ಅಗ್ನೇ ಘೋ॒ರಾಸ್ತ॒ನುವಃ॑ ।
ತಾಭಿ॑ರ॒ಮುಙ್ಗ॑ಚ್ಛ । ಯೋ᳚-ಽಸ್ಮಾ-ನ್ದ್ವೇಷ್ಟಿ॑ ।
ಯಞ್ಚ॑ ವ॒ಯ-ನ್ದ್ವಿ॒ಷ್ಮಃ ॥ 63 ॥ (ಅ. 22)
ಅನುವಾಕಂ 23
ಸ್ನಿಕ್ಚ॒ ಸ್ನೀಹಿ॑ತಿಶ್ಚ॒ ಸ್ನಿಹಿ॑ತಿಶ್ಚ । ಉ॒ಷ್ಣಾ ಚ॑ ಶೀ॒ತಾ ಚ॑ ।
ಉ॒ಗ್ರಾ ಚ॑ ಭೀ॒ಮಾ ಚ॑ । ಸ॒ದಾಮ್ನೀ॑ ಸೇ॒ದಿರನಿ॑ರಾ । ಏ॒ತಾಸ್ತೇ॑ ಅಗ್ನೇ ಘೋ॒ರಾಸ್ತ॒ನುವಃ॑ । ತಾಭಿ॑ರ॒ಮುಙ್ಗ॑ಚ್ಛ । ಯೋ᳚-ಽಸ್ಮಾ-ನ್ದ್ವೇಷ್ಟಿ॑ । ಯಞ್ಚ॑ ವ॒ಯ-ನ್ದ್ವಿ॒ಷ್ಮಃ ॥ 64 ॥ (ಅ. 23)
ಅನುವಾಕಂ 24
ಧುನಿ॑ಶ್ಚ ಧ್ವಾ॒ನ್ತಶ್ಚ॑ ಧ್ವ॒ನಶ್ಚ॑ ಧ್ವ॒ನಯಗ್ಗ್॑ಶ್ಚ ।
ನಿ॒ಲಿ॒ಮ್ಪಶ್ಚ॑ ವಿಲಿ॒ಮ್ಪಶ್ಚ॑ ವಿಕ್ಷಿ॒ಪಃ ॥ 65 ॥ (ಅ. 24)
ಅನುವಾಕಂ 25
ಉ॒ಗ್ರಶ್ಚ॒ ಧುನಿ॑ಶ್ಚ ಧ್ವಾ॒ನ್ತಶ್ಚ॑ ಧ್ವ॒ನಶ್ಚ॑ ಧ್ವ॒ನಯಗ್ಗ್॑ಶ್ಚ । ಸ॒ಹ॒ಸ॒ಹ್ವಾಗ್ಶ್ಚ॒ ಸಹ॑ಮಾನಶ್ಚ॒ ಸಹ॑ಸ್ವಾಗ್ಶ್ಚ॒ ಸಹೀ॑ಯಾಗ್ಶ್ಚ ।
ಏತ್ಯ॒ ಪ್ರೇತ್ಯ॑ ವಿಕ್ಷಿ॒ಪಃ ॥ 66 ॥ (ಅ. 25)
ಅನುವಾಕಂ 26
ಅ॒ಹೋ॒ರಾ॒ತ್ರೇ ತ್ವೋದೀ॑ರಯತಾಮ್ । ಅ॒ರ್ಧ॒ಮಾ॒ಸಾಸ್ತ್ವೋದೀ᳚-ಞ್ಜಯನ್ತು । ಮಾಸಾ᳚ಸ್ತ್ವಾ ಶ್ರಪಯನ್ತು । ಋ॒ತವ॑ಸ್ತ್ವಾ ಪಚನ್ತು ।
ಸಂ॒ವಁ॒ಥ್ಸ॒ರಸ್ತ್ವಾ॑ ಹನ್ತ್ವಸೌ ॥ 67 ॥ (ಅ. 26)
ಅನುವಾಕಂ 27
ಖಟ್ ಫ-ಡ್ಜ॒ಹಿ । ಛಿ॒ನ್ಧೀ ಭಿ॒ನ್ಧೀ ಹ॒ನ್ಧೀ ಕಟ್ ।
ಇತಿ॒ ವಾಚಃ॑ ಕ್ರೂರಾ॒ಣಿ ॥ 68 ॥ (ಅ. 27)
ಅನುವಾಕಂ 28
ವಿಗಾ ಇ॑ನ್ದ್ರ ವಿ॒ಚರ᳚ನ್-ಥ್ಸ್ಪಾಶಯಸ್ವ । ಸ್ವ॒ಪನ್ತ॑ಮಿನ್ದ್ರ ಪಶು॒ಮನ್ತ॑ಮಿಚ್ಛ । ವಜ್ರೇ॑ಣಾ॒ಮು-ಮ್ಬೋ॑ಧಯ ದುರ್ವಿ॒ದತ್ರ᳚ಮ್ । ಸ್ವ॒ಪ॒ತೋ᳚-ಽಸ್ಯ॒ ಪ್ರಹ॑ರ॒ ಭೋಜ॑ನೇಭ್ಯಃ ॥
ಅಗ್ನೇ॑ ಅ॒ಗ್ನಿನಾ॒ ಸಂವಁ॑ದಸ್ವ । ಮೃತ್ಯೋ॑ ಮೃ॒ತ್ಯುನಾ॒ ಸಂವಁ॑ದಸ್ವ । ನಮ॑ಸ್ತೇ ಅಸ್ತು ಭಗವಃ ॥ ಸ॒ಕೃತ್ತೇ॑ ಅಗ್ನೇ॒ ನಮಃ॑ । ದ್ವಿಸ್ತೇ॒ ನಮಃ॑ । ತ್ರಿಸ್ತೇ॒ ನಮಃ॑ । ಚ॒ತುಸ್ತೇ॒ ನಮಃ॑ । ಪ॒ಞ್ಚ॒ಕೃತ್ವ॑ಸ್ತೇ॒ ನಮಃ॑ ।
ದ॒ಶ॒ಕೃತ್ವ॑ಸ್ತೇ॒ ನಮಃ॑ । ಶ॒ತ॒ಕೃತ್ವ॑ಸ್ತೇ॒ ನಮಃ॑ । ಆ॒ಸ॒ಹ॒ಸ್ರ॒ಕೃತ್ವ॑ಸ್ತೇ॒ ನಮಃ॑ । ಅ॒ಪ॒ರಿ॒ಮಿ॒ತ॒ಕೃತ್ವ॑ಸ್ತೇ॒ ನಮಃ॑ । ನಮ॑ಸ್ತೇ ಅಸ್ತು॒ ಮಾ ಮಾ॑ ಹಿಗ್ಂಸೀಃ ॥ 69 ॥
(ತ್ರಿಸ್ತೇ॒ ನಮಃ॑ ಸ॒ಪ್ತ ಚ॑) (ಅ. 28)
ಅನುವಾಕಂ 29
ಅಸೃ॑-ನ್ಮುಖೋ ರುಧಿ॒ರೇಣಾ॒ವ್ಯ॑ಕ್ತಃ । ಯ॒ಮಸ್ಯ॑ ದೂ॒ತ-ಶ್ಶ್ವಪಾ॒-ದ್ವಿಧಾ॑ವಸಿ । ಗೃದ್ಧ್ರಃ॑ ಸುಪ॒ರ್ಣಃ ಕು॒ಣಪ॒ನ್ನಿಷೇ॑ವಸೇ ।
ಯ॒ಮಸ್ಯ॑ ದೂ॒ತಃ ಪ್ರಹಿ॑ತೋ ಭ॒ವಸ್ಯ॑ ಚೋ॒ಭಯೋಃ᳚ ॥ 70 ॥ (ಅ. 29)
ಅನುವಾಕಂ 30
ಯದೇ॒ತ-ದ್ವೃ॑ಕ॒ಸೋ ಭೂ॒ತ್ವಾ । ವಾಗ್ ದೇ᳚ವ್ಯಭಿ॒ರಾಯ॑ಸಿ । ದ್ವಿ॒ಷನ್ತ॑-ಮ್ಮೇ॒-ಽಭಿರಾ॑ಯ । ತ-ಮ್ಮೃ॑ತ್ಯೋ ಮೃ॒ತ್ಯವೇ॑ ನಯ । ಸ ಆರ್ತ್ಯಾ-ಽಽರ್ತಿ॒ಮಾರ್ಚ್ಛ॑ತು ॥ 71 ॥ (ಅ. 30)
ಅನುವಾಕಂ 31
ಯದೀ॑ಷಿ॒ತೋ ಯದಿ॑ ವಾ ಸ್ವಕಾ॒ಮೀ । ಭ॒ಯೇಡ॑ಕೋ॒ ವದ॑ತಿ॒ ವಾಚ॑ಮೇ॒ತಾಮ್ । ತಾಮಿ॑ನ್ದ್ರಾ॒ಗ್ನೀ ಬ್ರಹ್ಮ॑ಣಾ ಸಂವಿಁದಾ॒ನೌ ।
ಶಿ॒ವಾಮ॒ಸ್ಮಭ್ಯ॑-ಙ್ಕೃಣುತಙ್ಗೃ॒ಹೇಷು॑ ॥ 72 ॥ (ಅ. 31)
ಅನುವಾಕಂ 32
ದೀರ್ಘ॑ಮುಖಿ॒ ದುರ್ಹ॑ಣು । ಮಾ ಸ್ಮ॑ ದಕ್ಷಿಣ॒ತೋ ವ॑ದಃ ।
ಯದಿ॑ ದಕ್ಷಿಣ॒ತೋ ವದಾ᳚-ದ್ದ್ವಿ॒ಷನ್ತ॒-ಮ್ಮೇ-ಽವ॑ ಬಾಧಾಸೈ ॥ 73 ॥ (ಅ. 32)
ಅನುವಾಕಂ 33
ಇ॒ತ್ಥಾದುಲೂ॑ಕ॒ ಆಪ॑ಪ್ತತ್ । ಹಿ॒ರ॒ಣ್ಯಾ॒ಕ್ಷೋ ಅಯೋ॑ಮುಖಃ ।
ರಕ್ಷ॑ಸಾನ್ದೂ॒ತ ಆಗ॑ತಃ । ತಮಿ॒ತೋ ನಾ॑ಶಯಾಗ್ನೇ ॥ 74 ॥ (ಅ. 33)
ಅನುವಾಕಂ 34
ಯದೇ॒ತ-ದ್ಭೂ॒ತಾನ್ಯ॑ನ್ವಾ॒ವಿಶ್ಯ॑ । ದೈವೀಂ॒-ವಾಁಚಂ॑-ವಁ॒ದಸಿ॑ । ದ್ವಿ॒ಷತೋ॑ ನಃ॒ ಪರಾ॑ವದ । ತಾ-ನ್ಮೃ॑ತ್ಯೋ ಮೃ॒ತ್ಯವೇ॑ ನಯ । ತ ಆರ್ತ್ಯಾ-ಽಽರ್ತಿ॒ಮಾರ್ಚ್ಛ॑ನ್ತು ।
ಅ॒ಗ್ನಿನಾ॒-ಽಗ್ನಿ-ಸ್ಸಂವಁ॑ದತಾಮ್ ॥ 75 ॥ (ಅ. 34)
ಅನುವಾಕಂ 35
ಪ್ರ॒ಸಾರ್ಯ॑ ಸ॒ಕ್ಥ್ಯೌ॑ ಪತ॑ಸಿ । ಸ॒ವ್ಯಮಕ್ಷಿ॑ ನಿ॒ಪೇಪಿ॑ ಚ ।
ಮೇಹ ಕ॑ಸ್ಯಚ॒ನಾಮ॑ಮತ್ ॥ 76 ॥ (ಅ. 35)
ಅನುವಾಕಂ 36
ಅತ್ರಿ॑ಣಾ ತ್ವಾ ಕ್ರಿಮೇ ಹನ್ಮಿ । ಕಣ್ವೇ॑ನ ಜ॒ಮದ॑ಗ್ನಿನಾ ।
ವಿ॒ಶ್ವಾವ॑ಸೋ॒-ರ್ಬ್ರಹ್ಮ॑ಣಾ ಹ॒ತಃ । ಕ್ರಿಮೀ॑ಣಾ॒ಗ್ಂ॒ ರಾಜಾ᳚ ।
ಅಪ್ಯೇ॑ಷಾಗ್ ಸ್ಥ॒ಪತಿ॑ರ್ಹ॒ತಃ । ಅಥೋ॑ ಮಾ॒ತಾ-ಽಥೋ॑ ಪಿ॒ತಾ ।
ಅಥೋ᳚ ಸ್ಥೂ॒ರಾ ಅಥೋ᳚ ಕ್ಷು॒ದ್ರಾಃ । ಅಥೋ॑ ಕೃ॒ಷ್ಣಾ ಅಥೋ᳚ ಶ್ವೇ॒ತಾಃ । ಅಥೋ॑ ಆ॒ಶಾತಿ॑ಕಾ ಹ॒ತಾಃ ।
ಶ್ವೇ॒ತಾಭಿಃ॑ ಸ॒ಹ ಸರ್ವೇ॑ ಹ॒ತಾಃ ॥ 77 ॥ (ಅ. 36)
ಅನುವಾಕಂ 37
ಆಹ॒ರಾವ॑ದ್ಯ । ಶೃ॒ತಸ್ಯ॑ ಹ॒ವಿಷೋ॒ ಯಥಾ᳚ । ತ-ಥ್ಸ॒ತ್ಯಮ್ ।
ಯದ॒ಮುಂ-ಯಁ॒ಮಸ್ಯ॒ ಜಮ್ಭ॑ಯೋಃ । ಆದ॑ಧಾಮಿ॒ ತಥಾ॒ ಹಿ ತತ್ । ಖಣ್ಫಣ್ಮ್ರಸಿ॑ ॥ 78 ॥ (ಅ. 37)
ಅನುವಾಕಂ 38
ಬ್ರಹ್ಮ॑ಣಾ ತ್ವಾ ಶಪಾಮಿ । ಬ್ರಹ್ಮ॑ಣಸ್ತ್ವಾ ಶ॒ಪಥೇ॑ನ ಶಪಾಮಿ । ಘೋ॒ರೇಣ॑ ತ್ವಾ॒ ಭೃಗೂ॑ಣಾ॒ಞ್ಚಕ್ಷು॑ಷಾ॒ ಪ್ರೇಕ್ಷೇ᳚ । ರೌ॒ದ್ರೇಣ॒ ತ್ವಾಙ್ಗಿ॑ರಸಾ॒-ಮ್ಮನ॑ಸಾ ಧ್ಯಾಯಾಮಿ ।
ಅ॒ಘಸ್ಯ॑ ತ್ವಾ॒ ಧಾರ॑ಯಾ ವಿದ್ಧ್ಯಾಮಿ ।
ಅಧ॑ರೋ॒ ಮ-ತ್ಪ॑ದ್ಯಸ್ವಾಸೌ ॥ 79 ॥ (ಅ. 38)
ಅನುವಾಕಂ 39
ಉತ್ತು॑ದ ಶಿಮಿಜಾವರಿ । ತಲ್ಪೇ॑ಜೇ॒ ತಲ್ಪ॒ ಉತ್ತು॑ದ । ಗಿ॒ರೀಗ್ಂ ರನು॒ ಪ್ರವೇ॑ಶಯ । ಮರೀ॑ಚೀ॒ರುಪ॒ ಸನ್ನು॑ದ ।
ಯಾವ॑ದಿ॒ತಃ ಪು॒ರಸ್ತಾ॑ದು॒ದಯಾ॑ತಿ॒ ಸೂರ್ಯಃ॑ ।
ತಾವ॑ದಿ॒ತೋ॑-ಽಮುನ್ನಾ॑ಶಯ । ಯೋ᳚-ಽಸ್ಮಾ-ನ್ದ್ವೇಷ್ಟಿ॑ ।
ಯಞ್ಚ॑ ವ॒ಯ-ನ್ದ್ವಿ॒ಷ್ಮಃ ॥ 80 ॥ (ಅ. 39)
ಅನುವಾಕಂ 40
ಭೂರ್ಭುವ॒ಸ್ಸುವೋ॒ ಭೂರ್ಭುವ॒ಸ್ಸುವೋ॒ ಭೂರ್ಭುವ॒ಸ್ಸುವಃ॑ ।
ಭುವೋ᳚-ಽದ್ಧಾಯಿ॒ ಭುವೋ᳚-ಽದ್ಧಾಯಿ॒ ಭುವೋ᳚-ಽದ್ಧಾಯಿ ।
ನೃ॒ಮ್ಣಾಯಿ ನೃ॒ಮ್ಣ-ನ್ನೃ॒ಮ್ಣಾಯಿ ನೃ॒ಮ್ಣ-ನ್ನೃ॒ಮ್ಣಾಯಿ ನೃ॒ಮ್ಣಮ್ । ನಿ॒ಧಾ ಯ್ಯೋ॑-ಽವಾಯಿ ನಿ॒ಧಾ ಯ್ಯೋ॑-ಽವಾಯಿ ನಿ॒ಧಾ ಯ್ಯೋ॑-ಽವಾಯಿ । ಏ ಅ॒ಸ್ಮೇ ಅ॒ಸ್ಮೇ । ಸುವ॒ರ್ನ ಜ್ಯೋತೀಃ᳚ ॥ 81 ॥ (ಅ. 40)
ಅನುವಾಕಂ 41
ಪೃ॒ಥಿ॒ವೀ ಸ॒ಮಿತ್ । ತಾಮ॒ಗ್ನಿ-ಸ್ಸಮಿ॑ನ್ಧೇ । ಸಾ-ಽಗ್ನಿಗ್ಂ ಸಮಿ॑ನ್ಧೇ । ತಾಮ॒ಹಗ್ಂ ಸಮಿ॑ನ್ಧೇ । ಸಾ ಮಾ॒ ಸಮಿ॑ದ್ಧಾ । ಆಯು॑ಷಾ॒ ತೇಜ॑ಸಾ । ವರ್ಚ॑ಸಾ ಶ್ರಿ॒ಯಾ । ಯಶ॑ಸಾ ಬ್ರಹ್ಮವರ್ಚ॒ಸೇನ॑ । ಅ॒ನ್ನಾದ್ಯೇ॑ನ॒ ಸಮಿ॑ನ್ತಾ॒ಗ್॒ ಸ್ವಾಹಾ᳚ ॥
ಅ॒ನ್ತರಿ॑ಕ್ಷಗ್ಂ ಸ॒ಮಿತ್ ॥ 82 ॥
ತಾಂ-ವಾಁ॒ಯು-ಸ್ಸಮಿ॑ನ್ಧೇ । ಸಾ ವಾ॒ಯುಗ್ಂ ಸಮಿ॑ನ್ಧೇ । ತಾಮ॒ಹಗ್ಂ ಸಮಿ॑ನ್ಧೇ । ಸಾ ಮಾ॒ ಸಮಿ॑ದ್ಧಾ । ಆಯು॑ಷಾ॒ ತೇಜ॑ಸಾ । ವರ್ಚ॑ಸಾ ಶ್ರಿ॒ಯಾ । ಯಶ॑ಸಾ ಬ್ರಹ್ಮವರ್ಚ॒ಸೇನ॑ । ಅ॒ನ್ನಾದ್ಯೇ॑ನ॒ ಸಮಿ॑ನ್ತಾ॒ಗ್॒ ಸ್ವಾಹಾ᳚ ।
ದ್ಯೌ-ಸ್ಸ॒ಮಿತ್ । ತಾಮಾ॑ದಿ॒ತ್ಯ-ಸ್ಸಮಿ॑ನ್ಧೇ ॥ 83 ॥
ಸಾ-ಽಽದಿ॒ತ್ಯಗ್ಂ ಸಮಿ॑ನ್ಧೇ । ತಾಮ॒ಹಗ್ಂ ಸಮಿ॑ನ್ಧೇ । ಸಾ ಮಾ॒ ಸಮಿ॑ದ್ಧಾ । ಆಯು॑ಷಾ॒ ತೇಜ॑ಸಾ । ವರ್ಚ॑ಸಾ ಶ್ರಿ॒ಯಾ । ಯಶ॑ಸಾ ಬ್ರಹ್ಮವರ್ಚ॒ಸೇನ॑ । ಅ॒ನ್ನಾದ್ಯೇ॑ನ॒ ಸಮಿ॑ನ್ತಾ॒ಗ್॒ ಸ್ವಾಹಾ᳚ ॥ ಪ್ರಾ॒ಜಾ॒ಪ॒ತ್ಯಾ ಮೇ॑ ಸ॒ಮಿದ॑ಸಿ ಸಪತ್ನ॒ಕ್ಷಯ॑ಣೀ ।
ಭ್ರಾ॒ತೃ॒ವ್ಯ॒ಹಾ ಮೇ॑-ಽಸಿ॒ ಸ್ವಾಹಾ᳚ ॥ ಅಗ್ನೇ᳚ ವ್ರತಪತೇ ವ್ರ॒ತಞ್ಚ॑ರಿಷ್ಯಾಮಿ ॥ 84 ॥
ತಚ್ಛ॑ಕೇಯ॒-ನ್ತನ್ಮೇ॑ ರಾದ್ಧ್ಯತಾಮ್ । ವಾಯೋ᳚ ವ್ರತಪತ॒ ಆದಿ॑ತ್ಯ ವ್ರತಪತೇ । ವ್ರ॒ತಾನಾಂ᳚-ವ್ರಁತಪತೇ ವ್ರ॒ತಞ್ಚ॑ರಿಷ್ಯಾಮಿ । ತಚ್ಛ॑ಕೇಯ॒-ನ್ತನ್ಮೇ॑ ರಾದ್ಧ್ಯತಾಮ್ ॥ ದ್ಯೌ-ಸ್ಸ॒ಮಿತ್ । ತಾಮಾ॑ದಿ॒ತ್ಯ-ಸ್ಸಮಿ॑ನ್ಧೇ । ಸಾ-ಽಽದಿ॒ತ್ಯಗ್ಂ ಸಮಿ॑ನ್ಧೇ ।
ತಾಮ॒ಹಗ್ಂ ಸಮಿ॑ನ್ಧೇ । ಸಾ ಮಾ॒ ಸಮಿ॑ದ್ಧಾ । ಆಯು॑ಷಾ॒ ತೇಜ॑ಸಾ ॥ 85 ॥
ವರ್ಚ॑ಸಾ ಶ್ರಿ॒ಯಾ । ಯಶ॑ಸಾ ಬ್ರಹ್ಮವರ್ಚ॒ಸೇನ॑ । ಅ॒ನ್ನಾದ್ಯೇ॑ನ॒ ಸಮಿ॑ನ್ತಾ॒ಗ್॒ ಸ್ವಾಹಾ᳚ ।
ಅ॒ನ್ತರಿ॑ಕ್ಷಗ್ಂ ಸ॒ಮಿತ್ । ತಾಂ-ವಾಁ॒ಯು-ಸ್ಸಮಿ॑ನ್ಧೇ । ಸಾ ವಾ॒ಯುಗ್ಂ ಸಮಿ॑ನ್ಧೇ । ತಾಮ॒ಹಗ್ಂ ಸಮಿ॑ನ್ಧೇ । ಸಾ ಮಾ॒ ಸಮಿ॑ದ್ಧಾ । ಆಯು॑ಷಾ॒ ತೇಜ॑ಸಾ । ವರ್ಚ॑ಸಾ ಶ್ರಿ॒ಯಾ ॥ 86 ॥
ಯಶ॑ಸಾ ಬ್ರಹ್ಮವರ್ಚ॒ಸೇನ॑ । ಅ॒ನ್ನಾದ್ಯೇ॑ನ॒ ಸಮಿ॑ನ್ತಾ॒ಗ್॒ ಸ್ವಾಹಾ᳚ । ಪೃ॒ಥಿ॒ವೀ ಸ॒ಮಿತ್ । ತಾಮ॒ಗ್ನಿ-ಸ್ಸಮಿ॑ನ್ಧೇ । ಸಾ-ಽಗ್ನಿಗ್ಂ ಸಮಿ॑ನ್ಧೇ । ತಾಮ॒ಹಗ್ಂ ಸಮಿ॑ನ್ಧೇ ।
ಸಾ ಮಾ॒ ಸಮಿ॑ದ್ಧಾ । ಆಯು॑ಷಾ॒ ತೇಜ॑ಸಾ । ವರ್ಚ॑ಸಾ ಶ್ರಿ॒ಯಾ ।
ಯಶ॑ಸಾ ಬ್ರಹ್ಮವರ್ಚ॒ಸೇನ॑ ॥ 87 ॥
ಅ॒ನ್ನಾದ್ಯೇ॑ನ॒ ಸಮಿ॑ನ್ತಾ॒ಗ್॒ ಸ್ವಾಹಾ᳚ । ಪ್ರಾ॒ಜಾ॒ಪ॒ತ್ಯಾ ಮೇ॑ ಸ॒ಮಿದ॑ಸಿ ಸಪತ್ನ॒ಕ್ಷಯ॑ಣೀ । ಭ್ರಾ॒ತೃ॒ವ್ಯ॒ಹಾ ಮೇ॑-ಽಸಿ॒ ಸ್ವಾಹಾ᳚ । ಆದಿ॑ತ್ಯ ವ್ರತಪತೇ ವ್ರ॒ತಮ॑ಚಾರಿಷಮ್ ।
ತದ॑ಶಕ॒-ನ್ತನ್ಮೇ॑-ಽರಾಧಿ । ವಾಯೋ᳚ ವ್ರತಪ॒ತೇ-ಽಗ್ನೇ᳚ ವ್ರತಪತೇ । ವ್ರ॒ತಾನಾಂ᳚-ವ್ರಁತಪತೇ ವ್ರ॒ತಮ॑ಚಾರಿಷಮ್ । ತದ॑ಶಕ॒-ನ್ತನ್ಮೇ॑-ಽರಾಧಿ ॥ 88 ॥
(ಸ॒ಮಿಥ್ - ಸಮಿ॑ನ್ಧೇ - ವ್ರ॒ತಞ್ಚ॑ರಿಷ್ಯಾ॒ - ಮ್ಯಾಯು॑ಷಾ॒ ತೇಜ॑ಸಾ॒ - ವರ್ಚ॑ಸಾ ಶ್ರಿ॒ಯಾ - ಯಶ॑ಸಾ ಬ್ರಹ್ಮವರ್ಚ॒ಸೇನಾ॒ - +ಷ್ಟೌ ಚ॑) (ಅ. 41)
ಅನುವಾಕಂ 42
ಶನ್ನೋ॒ ವಾತಃ॑ ಪವತಾ-ಮ್ಮಾತ॒ರಿಶ್ವಾ॒ ಶನ್ನ॑ಸ್ತಪತು॒ ಸೂರ್ಯಃ॑ । ಅಹಾ॑ನಿ॒ ಶ-ಮ್ಭ॑ವನ್ತು ನ॒-ಶ್ಶಗ್ಂ ರಾತ್ರಿಃ॒ ಪ್ರತಿ॑ಧೀಯತಾಮ್ ॥ ಶಮು॒ಷಾ ನೋ॒ ವ್ಯು॑ಚ್ಛತು॒ ಶಮಾ॑ದಿ॒ತ್ಯ ಉದೇ॑ತು ನಃ । ಶಿ॒ವಾ ನ॒-ಶ್ಶನ್ತ॑ಮಾ ಭವ ಸುಮೃಡೀ॒ಕಾ ಸರ॑ಸ್ವತಿ । ಮಾ ತೇ॒ ವ್ಯೋ॑ಮ ಸ॒ನ್ದೃಶಿ॑ ॥
ಇಡಾ॑ಯೈ॒ ವಾಸ್ತ್ವ॑ಸಿ ವಾಸ್ತು॒ಮ-ದ್ವಾ᳚ಸ್ತು॒ಮನ್ತೋ॑ ಭೂಯಾಸ್ಮ॒ ಮಾ ವಾಸ್ತೋ᳚-ಶ್ಛಿಥ್ಸ್ಮಹ್ಯ ವಾ॒ಸ್ತು-ಸ್ಸ ಭೂ॑ಯಾ॒-ದ್ಯೋ᳚-ಽಸ್ಮಾ-ನ್ದ್ವೇಷ್ಟಿ॒ ಯಞ್ಚ॑ ವ॒ಯ-ನ್ದ್ವಿ॒ಷ್ಮಃ ॥
ಪ್ರ॒ತಿ॒ಷ್ಠಾ-ಽಸಿ॑ ಪ್ರತಿ॒ಷ್ಠಾವ॑ನ್ತೋ ಭೂಯಾಸ್ಮ॒ ಮಾ ಪ್ರ॑ತಿ॒ಷ್ಠಾಯಾ᳚- ಶ್ಛಿಥ್ಸ್ಮಹ್ಯ ಪ್ರತಿ॒ಷ್ಠಃ
ಸ ಭೂ॑ಯಾ॒-ದ್ಯೋ᳚-ಽಸ್ಮಾ-ನ್ದ್ವೇಷ್ಟಿ॒ ಯಞ್ಚ॑ ವ॒ಯ-ನ್ದ್ವಿ॒ಷ್ಮಃ ॥ ಆ ವಾ॑ತ ವಾಹಿ ಭೇಷ॒ಜಮ್ ಁವಿ ವಾ॑ತ ವಾಹಿ॒ ಯದ್ರಪಃ॑ ।
ತ್ವಗ್ಂ ಹಿ ವಿ॒ಶ್ವಭೇ॑ಷಜೋ ದೇ॒ವಾನಾ᳚-ನ್ದೂ॒ತ ಈಯ॑ಸೇ ॥
ದ್ವಾವಿ॒ಮೌ ವಾತೌ॑ ವಾತ॒ ಆ ಸಿನ್ಧಾ॒ರಾ ಪ॑ರಾ॒ವತಃ॑ ॥ 89 ॥
ದಕ್ಷ॑-ಮ್ಮೇ ಅ॒ನ್ಯ ಆ॒ವಾತು॒ ಪರಾ॒-ಽನ್ಯೋ ವಾ॑ತು॒ ಯ-ದ್ರಪಃ॑ ॥
ಯದ॒ದೋ ವಾ॑ತ ತೇ ಗೃ॒ಹೇ॑-ಽಮೃತ॑ಸ್ಯ ನಿ॒ಧಿರ್ಹಿ॒ತಃ ।
ತತೋ॑ ನೋ ದೇಹಿ ಜೀ॒ವಸೇ॒ ತತೋ॑ ನೋ ಧೇಹಿ ಭೇಷ॒ಜಮ್ ॥
ತತೋ॑ ನೋ॒ ಮಹ॒ ಆವ॑ಹ॒ ವಾತ॒ ಆವಾ॑ತು ಭೇಷ॒ಜಮ್ ।
ಶ॒ಮ್ಭೂ-ರ್ಮ॑ಯೋ॒ಭೂರ್ನೋ॑ ಹೃ॒ದೇ ಪ್ರ ಣ॒ ಆಯೂಗ್ಂ॑ಷಿ ತಾರಿಷತ್ ॥ ಇನ್ದ್ರ॑ಸ್ಯ ಗೃ॒ಹೋ॑-ಽಸಿ॒ ತ-ನ್ತ್ವಾ॒ ಪ್ರಪ॑ದ್ಯೇ॒ ಸಗು॒ಸ್ಸಾಶ್ವಃ॑ । ಸ॒ಹ ಯನ್ಮೇ॒ ಅಸ್ತಿ॒ ತೇನ॑ ॥
ಭೂಃ ಪ್ರಪ॑ದ್ಯೇ॒ ಭುವಃ॒ ಪ್ರಪ॑ದ್ಯೇ॒ ಸುವಃ॒ ಪ್ರಪ॑ದ್ಯೇ॒ ಭೂರ್ಭುವ॒ಸ್ಸುವಃ॒ ಪ್ರಪ॑ದ್ಯೇ ವಾ॒ಯುಮ್
ಪ್ರಪ॒ದ್ಯೇ-ಽನಾ᳚ರ್ತಾ-ನ್ದೇ॒ವತಾ॒-ಮ್ಪ್ರಪ॒ದ್ಯೇ ಽಶ್ಮಾ॑ನಮಾಖ॒ಣ-ಮ್ಪ್ರಪ॑ದ್ಯೇ ಪ್ರ॒ಜಾಪ॑ತೇರ್
ಬ್ರಹ್ಮಕೋ॒ಶ-ಮ್ಬ್ರಹ್ಮ॒ ಪ್ರಪ॑ದ್ಯ॒ ಓ-ಮ್ಪ್ರಪ॑ದ್ಯೇ ॥
ಅ॒ನ್ತರಿ॑ಕ್ಷ-ಮ್ಮ ಉ॒ರ್ವ॑ನ್ತರ॑-ಮ್ಬೃ॒ಹದ॒ಗ್ನಯಃ॒ ಪರ್ವ॑ತಾಶ್ಚ॒ ಯಯಾ॒ ವಾತಃ॑ ಸ್ವ॒ಸ್ತ್ಯಾ ಸ್ವ॑ಸ್ತಿ॒ಮಾನ್ತಯಾ᳚ ಸ್ವ॒ಸ್ತ್ಯಾ ಸ್ವ॑ಸ್ತಿ॒ ಮಾನ॑ಸಾನಿ ॥
ಪ್ರಾಣಾ॑ಪಾನೌ ಮೃ॒ತ್ಯೋರ್ಮಾ॑ ಪಾತ॒-ಮ್ಪ್ರಾಣಾ॑ಪಾನೌ॒ ಮಾ ಮಾ॑ ಹಾಸಿಷ್ಟ॒-ಮ್ಮಯಿ॑ ಮೇ॒ಧಾ-ಮ್ಮಯಿ॑ ಪ್ರ॒ಜಾ-ಮ್ಮಯ್ಯ॒ಗ್ನಿ ಸ್ತೇಜೋ॑ ದಧಾತು॒ ಮಯಿ॑ ಮೇ॒ಧಾ-ಮ್ಮಯಿ॑ ಪ್ರ॒ಜಾ-ಮ್ಮಯೀನ್ದ್ರ॑ ಇನ್ದ್ರಿ॒ಯ-ನ್ದ॑ಧಾತು॒ ಮಯಿ॑ ಮೇ॒ಧಾ-ಮ್ಮಯಿ॑ ಪ್ರ॒ಜಾ-ಮ್ಮಯಿ॒ ಸೂರ್ಯೋ॒
ಭ್ರಾಜೋ॑ ದಧಾತು ॥ 90 ॥
ದ್ಯು॒ಭಿರ॒ಕ್ತುಭಿಃ॒ ಪರಿ॑ಪಾತ-ಮ॒ಸ್ಮಾನರಿ॑ಷ್ಟೇಭಿ-ರಶ್ವಿನಾ॒ ಸೌಭ॑ಗೇಭಿಃ । ತನ್ನೋ॑ ಮಿ॒ತ್ರೋ ವರು॑ಣೋ ಮಾಮಹನ್ತಾ॒ ಮದಿ॑ತಿ॒-ಸ್ಸಿನ್ಧುಃ॑ ಪೃಥಿ॒ವೀ ಉ॒ತ ದ್ಯೌಃ ॥
ಕಯಾ॑ ನಶ್ಚಿ॒ತ್ರ ಆಭು॑ವದೂ॒ತೀ ಸ॒ದಾವೃ॑ಧ॒-ಸ್ಸಖಾ᳚ । ಕಯಾ॒ ಶಚಿ॑ಷ್ಠಯಾ ವೃ॒ತಾ ॥ ಕಸ್ತ್ವಾ॑ ಸ॒ತ್ಯೋ ಮದಾ॑ನಾ॒-ಮ್ಮಗ್ಂಹಿ॑ಷ್ಠೋ ಮಥ್ಸ॒ದನ್ಧ॑ಸಃ ।
ದೃ॒ಢಾ ಚಿ॑ದಾ॒ರುಜೇ॒ ವಸು॑ ॥ ಅ॒ಭೀ ಷು ಣ॒-ಸ್ಸಖೀ॑ನಾಮವಿ॒ತಾ ಜ॑ರಿತೄ॒ಣಾಮ್ । ಶ॒ತ-ಮ್ಭ॑ವಾಸ್ಯೂ॒ತಿಭಿಃ॑ ॥
ವಯಃ॑ ಸುಪ॒ರ್ಣಾ ಉಪ॑ಸೇದು॒ರಿನ್ದ್ರ॑-ಮ್ಪ್ರಿ॒ಯಮೇ॑ಧಾ॒ ಋಷ॑ಯೋ॒ ನಾಧ॑ಮಾನಾಃ ।
ಅಪ॑ ಧ್ವಾ॒ನ್ತಮೂ᳚ರ್ಣು॒ಹಿ ಪೂ॒ರ್ಧಿ ಚಕ್ಷು॑-ರ್ಮುಮು॒ಗ್ಧ್ಯ॑ಸ್ಮಾ-ನ್ನಿ॒ಧಯೇ॑ವ ಬ॒ದ್ಧಾನ್ ॥ 91 ॥
ಶನ್ನೋ॑ ದೇ॒ವೀರ॒ಭಿಷ್ಟ॑ಯ॒ ಆಪೋ॑ ಭವನ್ತು ಪೀ॒ತಯೇ᳚ । ಶಂ-ಯೋಁರ॒ಭಿಸ್ರ॑ವನ್ತು ನಃ ॥ ಈಶಾ॑ನಾ॒ ವಾರ್ಯಾ॑ಣಾ॒-ಙ್ಕ್ಷಯ॑ನ್ತೀಶ್ಚರ್ಷಣೀ॒ನಾಮ್ । ಅ॒ಪೋ ಯಾ॑ಚಾಮಿ ಭೇಷ॒ಜಮ್ ॥
ಸು॒ಮಿ॒ತ್ರಾ ನ॒ ಆಪ॒ ಓಷ॑ಧಯ-ಸ್ಸನ್ತು ದುರ್ಮಿ॒ತ್ರಾಸ್ತಸ್ಮೈ॑ ಭೂಯಾಸು॒-ರ್ಯೋ᳚-ಽಸ್ಮಾನ್-ದ್ವೇಷ್ಟಿ॒ ಯಞ್ಚ॑ ವ॒ಯ-ನ್ದ್ವಿ॒ಷ್ಮಃ ॥
ಆಪೋ॒ ಹಿ ಷ್ಠಾ ಮ॑ಯೋ॒ಭುವ॒ಸ್ತಾ ನ॑ ಊ॒ರ್ಜೇ ದ॑ಧಾತನ । ಮ॒ಹೇ ರಣಾ॑ಯ॒ ಚಕ್ಷ॑ಸೇ ॥ ಯೋ ವಃ॑ ಶಿ॒ವತ॑ಮೋ॒ ರಸ॒ಸ್ತಸ್ಯ॑ ಭಾಜಯತೇ॒ಹ ನಃ॑ । ಉ॒ಶ॒ತೀರಿ॑ವ ಮಾ॒ತರಃ॑ ॥
ತಸ್ಮಾ॒ ಅರ॑-ಙ್ಗಮಾಮ ವೋ॒ ಯಸ್ಯ॒ ಕ್ಷಯಾ॑ಯ॒ ಜಿನ್ವ॑ಥ ॥ 92 ॥
ಆಪೋ॑ ಜ॒ನಯ॑ಥಾ ಚ ನಃ ॥
ಪೃ॒ಥಿ॒ವೀ ಶಾ॒ನ್ತಾ ಸಾ-ಽಗ್ನಿನಾ॑ ಶಾ॒ನ್ತಾ ಸಾ ಮೇ॑ ಶಾ॒ನ್ತಾ ಶುಚಗ್ಂ॑ ಶಮಯತು ॥ ಅ॒ನ್ತರಿ॑ಕ್ಷಗ್ಂ ಶಾ॒ನ್ತ-ನ್ತ-ದ್ವಾ॒ಯುನಾ॑ ಶಾ॒ನ್ತ-ನ್ತನ್ಮೇ॑ ಶಾ॒ನ್ತಗ್ಂ ಶುಚಗ್ಂ॑ ಶಮಯತು ।
ದ್ಯೌ-ಶ್ಶಾ॒ನ್ತಾ ಸಾ-ಽಽದಿ॒ತ್ಯೇನ॑ ಶಾ॒ನ್ತಾ ಸಾ ಮೇ॑ ಶಾ॒ನ್ತಾ ಶುಚಗ್ಂ॑ ಶಮಯತು ॥ ಪೃ॒ಥಿ॒ವೀ ಶಾನ್ತಿ॑ರ॒ನ್ತರಿ॑ಕ್ಷ॒ಗ್ಂ॒ ಶಾನ್ತಿ॒-ರ್ದ್ಯೌ-ಶ್ಶಾನ್ತಿ॒-ರ್ದಿಶ॒-ಶ್ಶಾನ್ತಿ॑ ರವಾನ್ತರದಿ॒ಶಾ-ಶ್ಶಾನ್ತಿ॑ ರ॒ಗ್ನಿ-ಶ್ಶಾನ್ತಿ॑-ರ್ವಾ॒ಯು-ಶ್ಶಾನ್ತಿ॑ ರಾದಿ॒ತ್ಯ-ಶ್ಶಾನ್ತಿ॑
ಶ್ಚ॒ನ್ದ್ರಮಾ॒-ಶ್ಶಾನ್ತಿ॒-ರ್ನಕ್ಷ॑ತ್ರಾಣಿ॒ ಶಾನ್ತಿ॒ ರಾಪ॒-ಶ್ಶಾನ್ತಿ॒ ರೋಷ॑ಧಯ॒-ಶ್ಶಾನ್ತಿ॒-ರ್ವನ॒ಸ್ಪತ॑ಯ॒-ಶ್ಶಾನ್ತಿ॒-ರ್ಗೌ-ಶ್ಶಾನ್ತಿ॑ ರ॒ಜಾ ಶಾನ್ತಿ॒ ರಶ್ವ॒-ಶ್ಶಾನ್ತಿಃ॒ ಪುರು॑ಷ॒-ಶ್ಶಾನ್ತಿ॒-ರ್ಬ್ರಹ್ಮ॒ ಶಾನ್ತಿ॑-ರ್ಬ್ರಾಹ್ಮ॒ಣ-ಶ್ಶಾನ್ತಿ॒-ಶ್ಶಾನ್ತಿ॑ರೇ॒ವ ಶಾನ್ತಿ॒-ಶ್ಶಾನ್ತಿ॑ರ್ಮೇ ಅಸ್ತು॒ ಶಾನ್ತಿಃ॑ ॥
ತಯಾ॒-ಽಹಗ್ಂ ಶಾ॒ನ್ತ್ಯಾ ಸ॑ರ್ವಶಾ॒ನ್ತ್ಯಾ ಮಹ್ಯ॑-ನ್ದ್ವಿ॒ಪದೇ॒ ಚತು॑ಷ್ಪದೇ ಚ॒ ಶಾನ್ತಿ॑-ಙ್ಕರೋಮಿ॒ ಶಾನ್ತಿ॑ರ್ಮೇ ಅಸ್ತು॒ ಶಾನ್ತಿಃ॑ ॥
ಏಹ॒ ಶ್ರೀಶ್ಚ॒ ಹ್ರೀಶ್ಚ॒ ಧೃತಿ॑ಶ್ಚ॒ ತಪೋ॑ ಮೇ॒ಧಾ ಪ್ರ॑ತಿ॒ಷ್ಠಾ ಶ್ರ॒ದ್ಧಾ ಸ॒ತ್ಯ-ನ್ಧರ್ಮ॑ಶ್ಚೈ॒ತಾನಿ॒ ಮೋತ್ತಿ॑ಷ್ಠನ್ತ॒-ಮನೂತ್ತಿ॑ಷ್ಠನ್ತು॒ ಮಾ ಮಾ॒ಗ್॒ ಶ್ರೀಶ್ಚ॒ ಹ್ರೀಶ್ಚ॒ ಧೃತಿ॑ಶ್ಚ॒ ತಪೋ॑ ಮೇ॒ಧಾ ಪ್ರ॑ತಿ॒ಷ್ಠಾ ಶ್ರ॒ದ್ಧಾ ಸ॒ತ್ಯ-ನ್ಧರ್ಮ॑ಶ್ಚೈ॒ತಾನಿ॑ ಮಾ॒ ಮಾ ಹಾ॑ಸಿಷುಃ ॥
ಉದಾಯು॑ಷಾ ಸ್ವಾ॒ಯುಷೋದೋಷ॑ಧೀನಾ॒ಗ್ಂ॒ ರಸೇ॒ನೋ-ತ್ಪ॒ರ್ಜನ್ಯ॑ಸ್ಯ॒ ಶುಷ್ಮೇ॒ಣೋದ॑ಸ್ಥಾ-ಮ॒ಮೃತಾ॒ಗ್ಂ॒ ಅನು॑ ॥ ತಚ್ಚಕ್ಷು॑-ರ್ದೇ॒ವಹಿ॑ತ-ಮ್ಪು॒ರಸ್ತಾ᳚ ಚ್ಛು॒ಕ್ರಮು॒ಚ್ಚರ॑ತ್ ।
ಪಶ್ಯೇ॑ಮ ಶ॒ರದಃ॑ ಶ॒ತ-ಞ್ಜೀವೇ॑ಮ ಶ॒ರದಃ॑ ಶ॒ತ-ನ್ನನ್ದಾ॑ಮ ಶ॒ರದಃ॑ ಶ॒ತ-ಮ್ಮೋದಾ॑ಮ ಶ॒ರದಃ॑ ಶ॒ತ-ಮ್ಭವಾ॑ಮ ಶ॒ರದಃ॑ ಶ॒ತಗ್ಂ ಶೃ॒ಣವಾ॑ಮ ಶ॒ರದಃ॑ ಶ॒ತ-ಮ್ಪ್ರಬ್ರ॑ವಾಮ ಶ॒ರದಃ॑ ಶ॒ತ ಮಜೀ॑ತಾ-ಸ್ಸ್ಯಾಮ ಶ॒ರದಃ॑ ಶ॒ತ-ಞ್ಜ್ಯೋಕ್ಚ॒ ಸೂರ್ಯ॑-ನ್ದೃ॒ಶೇ ॥ 93 ॥
ಯ ಉದ॑ಗಾ-ನ್ಮಹ॒ತೋ-ಽರ್ಣವಾ᳚-ದ್ವಿ॒ಭ್ರಾಜ॑ಮಾನ-ಸ್ಸರಿ॒ರಸ್ಯ॒ ಮದ್ಧ್ಯಾ॒ಥ್ಸ ಮಾ॑ ವೃಷ॒ಭೋ ಲೋ॑ಹಿತಾ॒ಕ್ಷ-ಸ್ಸೂರ್ಯೋ॑ ವಿಪ॒ಶ್ಚಿ-ನ್ಮನ॑ಸಾ ಪುನಾತು ॥ ಬ್ರಹ್ಮ॑ಣ॒-ಶ್ಶ್ಚೋತ॑ನ್ಯಸಿ॒ ಬ್ರಹ್ಮ॑ಣ ಆ॒ಣೀ ಸ್ಥೋ॒ ಬ್ರಹ್ಮ॑ಣ ಆ॒ವಪ॑ನಮಸಿ ಧಾರಿ॒ತೇಯ-ಮ್ಪೃ॑ಥಿ॒ವೀ ಬ್ರಹ್ಮ॑ಣಾ ಮ॒ಹೀ ಧಾ॑ರಿ॒ತಮೇ॑ನೇನ ಮ॒ಹದ॒ನ್ತರಿ॑ಕ್ಷ॒-ನ್ದಿವ॑-ನ್ದಾಧಾರ ಪೃಥಿ॒ವೀಗ್ಂ ಸದೇ॑ವಾಂ॒-ಯಁದ॒ಹಂ-ವೇಁದ॒ ತದ॒ಹ-ನ್ಧಾ॑ರಯಾಣಿ॒ ಮಾ ಮದ್ವೇದೋ-ಽಧಿ॒ ವಿಸ್ರ॑ಸತ್ ॥ ಮೇ॒ಧಾ॒ಮ॒ನೀ॒ಷೇ ಮಾ-ಽಽವಿ॑ಶತಾಗ್ಂ ಸ॒ಮೀಚೀ॑ ಭೂ॒ತಸ್ಯ॒ ಭವ್ಯ॒ಸ್ಯಾವ॑ರುದ್ಧ್ಯೈ॒ ಸರ್ವ॒ಮಾಯು॑ರಯಾಣಿ॒
ಸರ್ವ॒ಮಾಯು॑ರಯಾಣಿ ॥ ಆ॒ಭಿ-ರ್ಗೀ॒ರ್ಭಿ-ರ್ಯದತೋ॑ ನ ಊ॒ನಮಾಪ್ಯಾ॑ಯಯ ಹರಿವೋ॒ ವರ್ಧ॑ಮಾನಃ ।
ಯ॒ದಾ ಸ್ತೋ॒ತೃಭ್ಯೋ॒ ಮಹಿ॑ ಗೋ॒ತ್ರಾ ರು॒ಜಾಸಿ॑ ಭೂಯಿಷ್ಠ॒ಭಾಜೋ॒ ಅಧ॑ ತೇ ಸ್ಯಾಮ ॥ ಬ್ರಹ್ಮ॒ ಪ್ರಾವಾ॑ದಿಷ್ಮ॒ ತನ್ನೋ॒ ಮಾ ಹಾ॑ಸೀತ್ ॥ ಓಂ ಶಾನ್ತಿ॒-ಶ್ಶಾನ್ತಿ॒-ಶ್ಶಾನ್ತಿಃ॑ ॥ 94 ॥
(ಪ॒ರಾ॒ವತೋ॑-ದಧಾತು-ಬ॒ದ್ಧಾನ್-ಜಿನ್ವ॑ಥ-ದೃ॒ಶೇ-+ಸ॒ಪ್ತ ಚ॑) (ಅ. 42)
(ನಮೋ॑ - ಯು॒ಞ್ಜತೇ॒ - ವೃಷ್ಣೋ॒ ಅಶ್ವ॑ಸ್ಯ॒ - ಬ್ರಹ್ಮ॑-ನ್ಪ್ರವ॒ರ್ಗ್ಯೇ॑ಣ॒ - ಬ್ರಹ್ಮ॒-ನ್ಪ್ರಚ॑ರಿಷ್ಯಾಮೋ॒ - ದಶ॒ ಪ್ರಾಚೀ॒ - ರಪ॑ಶ್ಯಙ್ಗೋ॒ಪಾಮ್ - ದೇ॒ವಸ್ಯ॑ - ಸಮು॒ದ್ರಾ - ಯೇ॒ಷೇ ಪೀ॑ಪಿಹಿ॒ - ಘರ್ಮ॒ ಯಾ ತೇ॑ - ಮಹೀ॒ನಾ-ಞ್ಚ॒ತ್ವಾ - ರ್ಯಸ್ಕಾ॒ನ್॒. - ಯಾ ಪು॒ರಸ್ತಾ᳚-ಥ್ಸ॒ಪ್ತ ಸ॑ಪ್ತ - ಪ್ರಾ॒ಣಾಯ॒ ತ್ರೀಣಿ॑ - ಪೂ॒ಷ್ಣೇ ಚ॒ತ್ವಾ-ರ್ಯು - ದ॒ಸ್ಯೈಕಾ॑ದಶ॒ - ಯಾಸ್ತೇ॑ ಸ॒ಪ್ತಾ - ಗ್ನಿ-ರ್ಧ್ರು॒ವಸೀಃ॒ ದೈಕಾ॒ನ್ನ ವಿಗ್ಂ॑ಶತಿ॒--ರ್ ಭೂರೂ॒ರ್ಧ್ವ ಸ್ತ್ರಿ॒ಗ್ಂ॒ಶತ-ದ್- ಭೂ-ರ್ಮಯಿ॒ ಷೋಡ॑ಶ॒ - ಯಾಸ್ತೇ॑ ಘೋ॒ರಾ ನವ॒ - ಸ್ನಿಕ್ಚಾ॒ಷ್ಟೌ - ಧುನಿ॑ಶ್ಚ॒ ದ್ವೇ - ಉ॒ಗ್ರಶ್ಚ॒ ತ್ರೀಣ್ಯ॑ - ಹೋರಾ॒ತ್ರೇ ಪಞ್ಚ॒ - ಖ-ಟ್ತ್ರೀಣಿ॒ - ವಿಗಾ-ಸ್ಸ॒ಪ್ತದ॒ಶಾ - ಸೃ॑-ನ್ಮುಖ-ಶ್ಚ॒ತ್ವಾರಿ॒ - ಯದೇ॒ತ-ದ್ವೃ॑ಕ॒ಸಃ ಪಞ್ಚ॒ - ಯದೀ॑ಷಿ॒ತ ಶ್ಚ॒ತ್ವಾರಿ॒ - ದೀರ್ಘ॑ಮುಖಿ॒ ತ್ರೀಣೀ॒ - ತ್ಥಾ ಚ್ಚ॒ತ್ವಾರಿ॒ - ಯದೇ॒ತ-ದ್ಭೂ॒ತಾನಿ॒ ಷಟ್ - ಪ್ರ॒ಸಾರ್ಯ॒ ತ್ರೀಣ್ಯ - ತ್ರಿ॑ಣಾ॒ ದಶಾ- ಹ॒ರಾವ॑ದ್ಯ॒ - ಬ್ರಹ್ಮ॑ಣಾ॒ ಷಟ್-ಥ್ಷಡ್ - ಉತ್ತು॑ದಾ॒ಷ್ಟೌ - ಭೂ-ಷ್ಷಟ್ - ಪೃ॑ಥಿ॒ವ್ಯ॑ಷ್ಟ ಷ॑ಷ್ಟಿಃ॒ - ಶನ್ನಃ॑ ಸ॒ಪ್ತಪ॑ಞ್ಚಾ॒ಶ-ದ್ದ್ವಿಚ॑ತ್ವಾರಿಗ್ಂಶತ್ )
(ನಮೋ॑ ವಾ॒ಚೇ - ಬ್ರಹ್ಮ॑-ನ್ಪ್ರವ॒ರ್ಗ್ಯೇ॑ಣ॒ - ಮಯಿ॒ ರು - ಗ॒ನ್ತರಿ॑ಕ್ಷೇಣ - ಪಿ॒ತಾ ನೋ॑-ಽಸಿ - ಮಹೀ॒ನಾ - ಮುಪ॑ ನೋ॒ - ಯದೇ॒ತ-ದ್- ಭೂ--ರ್ ದ್ಯೂ॒ಭಿ ಶ್ಚತು॑-ರ್ನವತಿಃ)
॥ ಹರಿಃ॑ ಓಮ್ ॥
॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಆರಣ್ಯಕೇ ಚತುರ್ಥಃ ಪ್ರಪಾಠಕ-ಸ್ಸಮಾಪ್ತಃ ॥
Roman (IAST) Transliteration
kṛṣṇa yajurvedīya taittirīya āraṇyake caturthaḥ prapāṭhakaḥ - pravargya mantrāḥ
o-nnamaḥ paramātmane, śrī mahāgaṇapataye namaḥ,
śrī gurubhyo namaḥ | ha॒riḥ॒ om ||
anuvākaṃ 1
namo̭ vā॒ce yā co̭di॒tā yā cānṷditā॒ tasyai̭ vā॒ce namo॒ namo̭ vā॒ce namo̭ vā॒caspata̭ye॒ nama॒ ṛṣi̭bhyo mantra॒kṛdbhyo॒ mantra̭patibhyo॒ mā māmṛṣa̭yo mantra॒kṛto̭ mantra॒pata̭yaḥ॒ parā̭du॒rmā-'hamṛṣī᳚-nmantra॒kṛto̭ mantra॒patī॒-nparā̭dāṃ-vai~śvade॒vīṃ-vā~ca̭mudyāsagṃ śi॒vāmada̭stā॒-ñjuṣṭā᳚-nde॒vebhya॒-śśarma̭ me॒ dyau-śśarma̭ pṛthi॒vī śarma॒ viśva̭mi॒da-ñjaga̭t |
śarma̭ ca॒ndraśca॒ sūrya̭śca॒ śarma̭ brahmaprajāpa॒tī ||
bhū॒taṃ-va~̭diṣye॒ bhuva̭naṃ-va~diṣye॒ tejo̭ vadiṣye॒ yaśo̭ vadiṣye॒ tapo̭ vadiṣye॒ brahma̭ vadiṣye sa॒tyaṃ-va~̭diṣye॒ tasmā̭ a॒hami॒da-mṷpa॒stara̭ṇa॒-mupa̭stṛṇa upa॒stara̭ṇa-mme pra॒jāyai̭ paśū॒nā-mbhṷ̄yā-dupa॒stara̭ṇama॒ha-mpra॒jāyai̭ paśū॒nā-mbhṷ̄yāsa॒-mprāṇā̭pānau mṛ॒tyormā̭ pāta॒-mprāṇā̭pānau॒ mā mā̭ hāsiṣṭa॒-mmadhṷ maniṣye॒ madhṷ janiṣye॒ madhṷ vakṣyāmi॒ madhṷ vadiṣyāmi॒ madhṷmatī-nde॒vebhyo॒ vāca̭mudyāsagṃ śuśrū॒ṣeṇyā᳚-mmanu॒ṣye᳚bhya॒sta-mmā̭ de॒vā a̭vantu śo॒bhāyai̭ pi॒taro-'nṷmadantu ||
oṃ śānti॒-śśānti॒-śśāntiḥ̭ || 1 || (a. 1)
anuvākaṃ 2
yu॒ñjate॒ mana̭ u॒ta yṷñjate॒ dhiyaḥ̭ | viprā॒ vipra̭sya bṛha॒to vi̭pa॒ścitaḥ̭ | vi hotrā̭ dadhe vayunā॒videka॒ it | ma॒hī de॒vasya̭ savi॒tuḥ pari̭ṣṭutiḥ || de॒vasya̭ tvā savi॒tuḥ pra̭sa॒ve | a॒śvino᳚-rbā॒hubhyā᳚m |
pū॒ṣṇo hastā᳚bhyā॒māda̭de || abhri̭rasi॒ nāri̭rasi |
a॒ddhva॒ra॒kṛ-dde॒vebhyaḥ̭ | utti̭ṣṭha brahmaṇaspate || 2 ||
de॒va॒yanta̭stvemahe | upa॒ praya̭ntu ma॒rutaḥ̭ su॒dāna̭vaḥ | indra̭ prā॒śūrbha̭vā॒ sacā᳚ || praitu॒ brahma̭ṇa॒spatiḥ̭ | pra de॒vyḙtu sū॒nṛtā᳚ |
acchā̭ vī॒rannarya̭-mpa॒ṅktirā̭dhasam | de॒vā ya॒jñanna̭yantu naḥ || devī᳚ dyāvāpṛthivī॒ anṷ me magṃsāthām | ṛ॒ddhyāsa̭ma॒dya | ma॒khasya॒ śiraḥ̭ || 3 ||
ma॒khāya̭ tvā | ma॒khasya̭ tvā śī॒rṣṇe || iya॒tyagra̭ āsīḥ |
ṛ॒ddhyāsa̭ma॒dya | ma॒khasya॒ śiraḥ̭ | ma॒khāya̭ tvā | ma॒khasya̭ tvā śī॒rṣṇe || devī᳚-rvamrīra॒sya bhū॒tasya̭ prathamajā ṛtāvarīḥ || ṛ॒ddhyāsa̭ma॒dya | ma॒khasya॒ śiraḥ̭ || 4 ||
ma॒khāya̭ tvā | ma॒khasya̭ tvā śī॒rṣṇe || indra॒syaujo̭-'si |
ṛ॒ddhyāsa̭ma॒dya | ma॒khasya॒ śiraḥ̭ | ma॒khāya̭ tvā | ma॒khasya̭ tvā śī॒rṣṇe || a॒gni॒jā a̭si pra॒jāpa̭te॒ retaḥ̭ | ṛ॒ddhyāsa̭ma॒dya | ma॒khasya॒ śiraḥ̭ || 5 ||
ma॒khāya̭ tvā | ma॒khasya̭ tvā śī॒rṣṇe || āyṷ-rdhehi prā॒ṇa-ndhḙhi | a॒pā॒na-ndhḙhi vyā॒na-ndhḙhi | cakṣṷ-rdhehi॒ śrotra̭-ndhehi | mano̭ dhehi॒ vāca̭-ndhehi | ā॒tmāna̭-ndhehi prati॒ṣṭhā-ndhḙhi |
mā-ndhḙhi॒ mayi̭ dhehi || madhṷ tvā madhu॒lā ka̭rotu |
ma॒khasya॒ śiro̭-'si || 6 ||
ya॒jñasya̭ pa॒de sthaḥ̭ | gā॒ya॒treṇa̭ tvā॒ chanda̭sā karomi | traiṣṭṷbhena tvā॒ chanda̭sā karomi | jāga̭tena tvā॒ chanda̭sā karomi || ma॒khasya॒ rāsnā̭-'si | adi̭tiste॒ bila̭ṅgṛhṇātu | pāṅktḙna॒ chanda̭sā |
sūrya̭sya॒ hara̭sā śrāya | ma॒kho̭-'si || 7 ||
(pa॒te॒ - śira̭ - ṛtāvarīr-ṛddhyāsa̭ma॒dya ma॒khasya॒ śiraḥ॒ - śiraḥ॒ - śiro̭-'si॒ - +nava̭ ca) (a. 2)
(iya̭ti॒ devī॒rindra॒syaujo᳚-'syagni॒jā a॒syāyṷrdhehi prā॒ṇa-mpañca̭)
anuvākaṃ 3
vṛṣṇo॒ aśva̭sya ni॒ṣpada̭si | varṷṇastvā dhṛ॒tavra̭ta॒ ādhṷ̄payatu | mi॒trāvarṷṇayor
dhru॒veṇa॒ dharma̭ṇā || a॒rciṣe᳚ tvā | śo॒ciṣe᳚ tvā |
jyoti̭ṣe tvā | tapa̭se tvā || a॒bhīma-mma̭hi॒nā diva᳚m |
mi॒tro ba̭bhūva sa॒prathāḥ᳚ | u॒ta śrava̭sā pṛthi॒vīm || 8 ||
mi॒trasya̭ carṣaṇī॒dhṛtaḥ̭ |
śravo̭ de॒vasya̭ sāna॒sim | dyu॒mnañci॒traśra̭vastamam || siddhyai᳚ tvā | de॒vastvā̭ savi॒todva̭patu |
su॒pā॒ṇi-ssva̭ṅgu॒riḥ | su॒bā॒huru॒ta śaktyā᳚ || apa̭dyamānaḥ pṛthi॒vyām | āśā॒ diśa॒ ā pṛ̭ṇa | utti̭ṣṭha bṛ॒ha-nbha̭va || 9 ||
ū॒rdhvasti̭ṣṭha dhru॒vastvam || sūrya̭sya tvā॒ cakṣu॒ṣā-'nvī᳚kṣe | ṛ॒jave᳚ tvā | sā॒dhave᳚ tvā | su॒kṣi॒tyai tvā॒ bhūtyai᳚ tvā ||
i॒dama॒hama॒mumā̭muṣyāya॒ṇaṃ-vi~॒śā pa॒śubhi̭-rbrahmavarca॒sena॒ paryṷ̄hāmi |
gā॒ya॒treṇa̭ tvā॒ chanda॒sā ''cchṛ̭ṇadmi | traiṣṭṷbhena tvā॒ chanda॒sā ''cchṛ̭ṇadmi |
jāga̭tena tvā॒ chanda॒sā ''cchṛ̭ṇadmi | chṛ॒ṇattṷ tvā॒ vāk | chṛ॒ṇattu॒ tvork | chṛ॒ṇattṷ tvā ha॒viḥ |
chṛ॒ndhi vāca᳚m | chṛ॒ndhyūrja᳚m | chṛ॒ndhi ha॒viḥ ||
deva̭ puraścara sa॒ghyāsa̭ntvā || 10 ||
(pṛ॒thi॒vīm - bha̭va॒ - vā-khṣaṭca̭) (a. 3)
anuvākaṃ 4
brahma̭-nprava॒rgyḙṇa॒ praca̭riṣyāmaḥ |
hota̭-rgha॒rmama॒bhiṣṭṷhi | agnī॒drauhi̭ṇau puro॒ḍāśā॒vadhi̭śraya | prati̭prasthāta॒rviha̭ra |
prasto̭ta॒-ssāmā̭ni gāya || yajṷryukta॒gṃ॒ sāma̭bhi॒rākta̭khantvā | viśvai᳚-rde॒vairanṷmata-mma॒rudbhiḥ̭ | dakṣi̭ṇābhiḥ॒ prata̭ta-mpārayi॒ṣṇum |
stubho̭ vahantu sumana॒syamā̭nam | sa no॒ ruca̭ndhe॒hyahṛ̭ṇīyamānaḥ | bhūrbhuva॒ssuvaḥ̭ |
omindra̭vantaḥ॒ praca̭rata || 11 ||
(ahṛ̭ṇīyamāno॒ dve ca̭) (a. 4)
anuvākaṃ 5
brahma॒-npraca̭riṣyāmaḥ | hota̭-rgha॒rmama॒bhiṣṭṷhi || ya॒māya̭ tvā ma॒khāya̭ tvā | sūrya̭sya॒ hara̭se tvā || prā॒ṇāya॒ svāhā᳚ vyā॒nāya॒ svāhā̭ 'pā॒nāya॒ svāhā᳚ |
cakṣṷṣe॒ svāhā॒ śrotrā̭ya॒ svāhā᳚ | mana̭se॒ svāhā̭ vā॒ce sara̭svatyai॒ svāhā᳚ | dakṣā̭ya॒ svāhā॒ krata̭ve॒ svāhā᳚ | oja̭se॒ svāhā॒ balā̭ya॒ svāhā᳚ ||
de॒vastvā̭ savi॒tā maddhvā̭-'naktu || 12 ||
pṛ॒thi॒vī-ntapa̭sastrāyasva | a॒rcira̭si śo॒cira̭si॒ jyoti̭rasi॒ tapo̭-'si | sagṃsī̭dasva ma॒hāgṃ a̭si | śoca̭sva deva॒vīta̭maḥ | vi dhū॒mama̭gne aru॒ṣa-mmi̭yeddhya | sṛ॒ja pra̭śasta darśa॒tam ||
a॒ñjanti॒ ya-mpra॒thaya̭nto॒ na viprāḥ᳚ | va॒pāva̭nta॒nnāgninā॒ tapa̭ntaḥ |
pi॒turna pu॒tra upa̭si॒ preṣṭhaḥ̭ | ā gha॒rmo a॒gnimṛ॒taya̭nnasādīt || 13 ||
a॒nā॒dhṛ॒ṣyā pu॒rastā᳚t | a॒gnerādhi̭patye |
āyṷrme dāḥ | pu॒trava̭tī dakṣiṇa॒taḥ | indra॒syādhi̭patye | pra॒jā-mmḙ dāḥ | su॒ṣadā̭ pa॒ścāt | de॒vasya̭ savi॒turādhi̭patye | prā॒ṇa-mmḙ dāḥ | āśrṷtiruttara॒taḥ || 14 ||
mi॒trāvarṷṇayo॒rādhi̭patye | śrotra̭-mme dāḥ | vidhṛ̭tiru॒pari̭ṣṭāt | bṛha॒spate॒rādhi̭patye |
brahma̭ me dāḥ, kṣa॒tra-mmḙ dāḥ | tejo̭ me dhā॒ varco̭ me dhāḥ | yaśo̭ me dhā॒ stapo̭ me dhāḥ |
mano̭ me dhāḥ || mano॒raśvā̭-'si॒ bhūri̭putrā |
viśvā᳚bhyo mā nā॒ṣṭrābhyaḥ̭ pāhi || 15 ||
sū॒pa॒sadā̭ me bhūyā॒ mā mā̭ higṃsīḥ || tapo॒ ṣva̭gne॒ anta̭rāgṃ a॒mitrāṋ |
tapā॒śagṃsa̭mara॒ruṣaḥ॒ para̭sya | tapā̭ vaso cikitā॒no a॒cittāṋ | vi tḙ tiṣṭhantāma॒jarā̭ a॒yāsaḥ̭ || citaḥ̭ stha pari॒citaḥ̭ | svāhā̭ ma॒rudbhiḥ॒ pari̭śrayasva | mā a̭si | pra॒mā a̭si | pra॒ti॒mā a̭si || 16 ||
sa॒mmā a̭si | vi॒mā a̭si | u॒nmā a̭si | a॒ntari̭kṣasyānta॒rdhira̭si ||
diva॒ntapa̭sastrāyasva | ā॒bhi-rgī॒rbhi-ryadato̭ na ū॒nam |
āpyā̭yaya harivo॒ vardha̭mānaḥ | ya॒dā sto॒tṛbhyo॒ mahi̭ go॒trā ru॒jāsi̭ | bhū॒yi॒ṣṭha॒bhājo॒ adha̭ te syāma || śu॒krantḙ a॒nya-dya̭ja॒tantḙ a॒nyat || 17 ||
viṣṷrūpe॒ aha̭nī॒ dyauri̭vāsi | viśvā॒ hi mā॒yā ava̭si svadhāvaḥ | bha॒drā tḙ pūṣanni॒ha rā॒tira̭stu || arha̭-nbibharṣi॒ sāya̭kāni॒ dhanva̭ | arha̭nni॒ṣkaṃ-ya~̭ja॒taṃ-vi~॒śvarṷ̄pam | arha̭nni॒da-nda̭yase॒ viśva॒-mabbhṷvam | na vā ojī̭yo rudra॒ tvada̭sti || gā॒ya॒trama̭si | traiṣṭṷbhamasi | jāga̭tamasi | madhu॒ madhu॒ madhṷ || 18 ||
(a॒na॒ - ktva॒sā॒dī॒ - du॒tta॒ra॒taḥ - pā̭hi - prati॒mā a̭si - yaja॒tantḙ a॒nyaj - jāga̭tama॒syeka̭-ñca) (a. 5)
anuvākaṃ 6
daśa॒ prācī॒rdaśa̭ bhāsi dakṣi॒ṇā | daśa̭ pra॒tīcī॒rdaśa̭ bhā॒syudī̭cīḥ | daśo॒rdhvā bhā̭si sumana॒syamā̭naḥ | sa no॒ ruca̭ndhe॒hyahṛ̭ṇīyamānaḥ ||
a॒gniṣṭvā॒ vasṷbhiḥ pu॒rastā᳚-drocayatu gāya॒treṇa॒ chanda̭sā | sa mā̭ ruci॒to ro̭caya || indra̭stvā ru॒drai-rda̭kṣiṇa॒to ro̭cayatu॒ traiṣṭṷbhena॒ chanda̭sā |
sa mā̭ ruci॒to ro̭caya | varṷṇastvā-''di॒tyaiḥ pa॒ścā-dro̭cayatu॒ jāga̭tena॒ chanda̭sā |
sa mā̭ ruci॒to ro̭caya || 19 ||
dyu॒tā॒nastvā̭ māru॒to ma॒rudbhi̭ruttara॒to ro̭caya॒tvānṷṣṭubhena॒ chanda̭sā | sa mā̭ ruci॒to ro̭caya | bṛha॒spati̭stvā॒ viśvai᳚-rde॒vairu॒pari̭ṣṭā-drocayatu॒ pāṅktḙna॒ chanda̭sā | sa mā̭ ruci॒to ro̭caya || ro॒ci॒tastva-ndḙva gharma de॒veṣvasi̭ |
ro॒ci॒ṣī॒yāha-mma̭nu॒ṣyḙṣu ||
samrā᳚ḍ gharma ruci॒tastvaṃ e॒veṣvāyṷṣmāgsteja॒svī bra̭hmavarca॒sya̭si | ru॒ci॒to̭-'ha-mma̭nu॒ṣye᳚ṣvāyṷṣmāg-steja॒svī bra̭hmavarca॒sī bhṷ̄yāsam || ruga̭si | ruca॒-mmayi̭ dhehi || 20 ||
mayi॒ ruk || daśa̭ pu॒rastā᳚-drocase | daśa̭ dakṣi॒ṇā | daśa̭ pra॒tyamm | daśodaṅṋ̇ | daśo॒rdhvo bhā̭si sumana॒syamā̭naḥ | sa naḥ̭ samrā॒ḍiṣa॒mūrja̭-ndhehi | vā॒jī vā॒jinḙ pavasva | ro॒ci॒to gha॒rmo rṷcī॒ya || 21 ||
(ro॒ca॒ya॒ - dhe॒hi॒ - +nava̭ ca) (a. 6)
anuvākaṃ 7
apa̭śyaṅgo॒pāmani̭padyamānam | ā ca॒ parā̭ ca pa॒thibhi॒ścara̭ntam | sa sa॒ddhrīcī॒-ssa viṣṷ̄cī॒rvasā̭naḥ | ā va̭rīvarti॒ bhuva̭neṣva॒ntaḥ || atra̭ prā॒vīḥ | madhu॒ māddhvī᳚bhyā॒-mmadhu॒ mādhṷ̄cībhyām | anṷ vā-nde॒vavī̭taye || sama॒gnira॒gninā̭ gata | sa-nde॒vena̭ savi॒trā | sagṃ sūryḙṇa rocate || 22 ||
svāhā॒ sama॒gnistapa̭sā gata | sa-nde॒vena̭ savi॒trā |
sagṃ sūryḙṇārociṣṭa || dha॒rtā di॒vo vibhā̭si॒ raja̭saḥ | pṛ॒thi॒vyā dha॒rtā | u॒rora॒ntari̭kṣasya dha॒rtā | dha॒rtā de॒vo de॒vānā᳚m | ama̭rtyastapo॒jāḥ || hṛ॒de tvā॒ mana̭se tvā | di॒ve tvā॒ sūryā̭ya tvā || 23 ||
ū॒rdhvami॒ma-ma̭ddhva॒raṅkṛ̭dhi | di॒vi de॒veṣu॒ hotrā̭ yaccha || viśvā̭sā-mbhuvā-mpate | viśva̭sya bhuvanaspate | viśva̭sya manasaspate | viśva̭sya vacasaspate | viśva̭sya tapasaspate | viśva̭sya brahmaṇaspate | de॒va॒śrūstvandḙva gharma de॒vā-npā̭hi || ta॒po॒jāṃ-vā~ca̭ma॒sme niya̭ccha devā॒yuva᳚m || 24 ||
garbho̭ de॒vānā᳚m || pi॒tā ma̭tī॒nām ||
patiḥ̭ pra॒jānā᳚m || matiḥ̭ kavī॒nām ||
sande॒vo de॒vena̭ savi॒trā-'ya̭tiṣṭa | sagṃ sūryḙṇārukta || ā॒yu॒rdāstvama॒smabhya̭-ṅgharma varco॒dā a̭si || pi॒tā no̭-'si pi॒tā no̭ bodha || ā॒yu॒rdhāsta̭nū॒dhāḥ pa̭yo॒dhāḥ |
va॒rco॒dā va̭rivo॒dā dra̭viṇo॒dāḥ || 25 ||
a॒nta॒ri॒kṣa॒pra॒ u॒rorvarī̭yān | a॒śī॒mahi̭ tvā॒ mā mā̭ higṃsīḥ || tvama̭gne gṛ॒hapa̭ti-rvi॒śāma̭si | viśvā̭sā॒-mmānṷṣīṇām | śa॒ta-mpū॒rbhirya̭viṣṭha pā॒hyagṃha̭saḥ | sa॒me॒ddhāragṃ̭ śa॒tagṃ himāḥ᳚ |
ta॒-ndrā॒viṇagṃ̭ hārdivā॒nam | i॒haiva rā॒tayaḥ̭ santu || tvaṣṭī̭matī te sapeya | su॒retā॒ reto॒ dadhā̭nā |
vī॒raṃ-vi~̭deya॒ tava̭ sa॒ndṛśi̭ |
mā-'hagṃ rā॒yaspoṣḙṇa॒ vi yo̭ṣam || 26 ||
(ro॒ca॒te॒-sūrya̭ya tvā - devā॒yuvaṃ̭ - draviṇo॒dā - dadhā̭nā॒ dve ca̭) (a. 7)
anuvākaṃ 8
de॒vasya̭ tvā savi॒tuḥ pra̭sa॒ve | a॒śvino᳚-rbā॒hubhyā᳚m |
pū॒ṣṇo hastā᳚bhyā॒mā da̭de || adi̭tyai॒ rāsnā̭-'si | iḍa॒ ehi̭ | adi̭ta॒ ehi̭ | sara̭sva॒tyehi̭ | asā॒vehi̭ |
asā॒vehi̭ | asā॒vehi̭ || 27 ||
adi̭tyā u॒ṣṇīṣa̭masi | vā॒yura̭syai॒ḍaḥ | pū॒ṣā tvo॒pāva̭sṛjatu | a॒śvibhyā॒-mpra dā̭paya | yaste॒ stanaḥ̭ śaśa॒yo yo ma̭yo॒bhūḥ | yena॒ viśvā॒ puṣya̭si॒ vāryā̭ṇi | yo ra̭tna॒dhā va̭su॒vidya-ssu॒datraḥ̭ |
sara̭svati॒ tami॒ha dhāta̭ve-'kaḥ || usra̭ gha॒rmagṃ śigṃ̭ṣa | usra̭ gha॒rma-mpā̭hi || 28 ||
gha॒rmāya̭ śigṃṣa | bṛha॒spati॒stvopa̭sīdatu | dāna̭va-sstha॒ pera̭vaḥ | vi॒ṣva॒gvṛto॒ lohi̭tena | a॒śvibhyā᳚-mpinvasva | sara̭svatyai pinvasva |
pū॒ṣṇe pi̭nvasva | bṛha॒spata̭ye pinvasva | indrā̭ya pinvasva | indrā̭ya pinvasva || 29 ||
gā॒ya॒tro̭-'si | traiṣṭṷbho-'si | jāga̭tamasi | sa॒horjo bhā॒genopa॒ mehi̭ | indrā᳚śvinā॒ madhṷna-ssāra॒ghasya̭ | gha॒rma-mpā̭ta vasavo॒ yaja̭tā॒ vaṭ | svāhā᳚ tvā॒ sūrya̭sya ra॒śmayḙ vṛṣṭi॒vana̭ye juhomi | madhṷ ha॒vira̭si | sūrya̭sya॒ tapa̭stapa | dyāvā̭pṛthi॒vībhyā᳚-ntvā॒ pari̭gṛhṇāmi || 30 ||
a॒ntari̭kṣeṇa॒ tvopa̭yacchāmi | de॒vānā᳚-ntvā pitṛ॒ṇāmanṷmato॒ bhartugṃ̭ śakeyam | tejo̭-'si |
tejo-'nu॒prehi̭ | di॒vi॒spṛmmā mā̭ higṃsīḥ |
a॒nta॒ri॒kṣa॒spṛmmā mā̭ higṃsīḥ | pṛ॒thi॒vi॒spṛmmā mā̭ higṃsīḥ |
suva̭rasi॒ suva̭rme yaccha |
divaṃ̭-ya~ccha di॒vo mā̭ pāhi || 31 ||
(ehi̭ - pāhi - pinvasva - gṛhṇāmi॒ - +nava̭ ca) (a. 8)
anuvākaṃ 9
sa॒mu॒drāya̭ tvā॒ vātā̭ya॒ svāhā᳚ | sa॒li॒lāya̭ tvā॒ vātā̭ya॒ svāhā᳚ | a॒nā॒dhṛ॒ṣyāya̭ tvā॒ vātā̭ya॒ svāhā᳚ | a॒pra॒ti॒dhṛ॒ṣyāya̭ tvā॒ vātā̭ya॒ svāhā᳚ |
a॒va॒syave᳚ tvā॒ vātā̭ya॒ svāhā᳚ | duva̭svate tvā॒ vātā̭ya॒ svāhā᳚ | śimi̭dvate tvā॒ vātā̭ya॒ svāhā᳚ | a॒gnaye᳚ tvā॒ vasṷmate॒ svāhā᳚ |
somā̭ya tvā ru॒drava̭te॒ svāhā᳚ |
varṷṇāya tvā-''di॒tyava̭te॒ svāhā᳚ || 32 ||
bṛha॒spata̭ye tvā vi॒śvade᳚vyāvate॒ svāhā᳚ |
sa॒vi॒tre tva̭rbhu॒matḙ vibhu॒mate᳚ prabhu॒mate॒ vāja̭vate॒ svāhā᳚ | ya॒māya॒ tvā-'ṅgi̭rasvate pitṛ॒mate॒ svāhā᳚ || viśvā॒ āśā̭ dakṣiṇa॒sat | viśvā᳚-nde॒vāna̭yāḍi॒ha | svāhā̭kṛtasya gha॒rmasya̭ | madhoḥ᳚ pibatamaśvinā |
svāhā॒-'gnayḙ ya॒jñiyā̭ya | śaṃ-ya~jṷrbhiḥ ||
aśvi̭nā gha॒rma-mpā̭tagṃ hārdivā॒nam || 33 ||
aha̭-rdi॒vābhi̭-rū॒tibhiḥ̭ | anṷ vā॒-ndyāvā̭pṛthi॒vī magṃ̭sātām | svāhendrā̭ya || svāhendrā॒vaṭ | gha॒rmama̭pātamaśvinā hārdivā॒nam |
aha̭-rdi॒vābhi̭rū॒tibhiḥ̭ | anṷ vā॒-ndyāvā̭pṛthi॒vī a̭magṃsātām | ta-mprā॒vyaṃ̭-ya~thā॒ vaṭ | namo̭ di॒ve | namaḥ̭ pṛthi॒vyai || 34 ||
di॒vi dhā̭ i॒maṃ-ya~॒jñam | ya॒jñami॒ma-ndi॒vi dhāḥ᳚ | diva̭ṅgaccha | a॒ntari̭kṣaṅgaccha | pṛ॒thi॒vīṅga̭ccha | pañca̭ pra॒diśo̭ gaccha | de॒vā-ngha̭rma॒pā-nga̭ccha | pi॒tṝ-ngha̭rma॒pā-nga̭ccha || 35 ||
(ā॒di॒tyava̭te॒ svāhā̭-hārdivā॒nam-pṛ̭thi॒vyā-+a॒ṣṭau ca̭) (a. 9)
anuvākaṃ 10
i॒ṣe pī̭pihi | ū॒rje pī̭pihi | brahma̭ṇe pīpihi | kṣa॒trāya̭ pīpihi | a॒dbhyaḥ pī̭pihi | oṣa̭dhībhyaḥ pīpihi | vana॒spati̭bhyaḥ pīpihi | dyāvā̭pṛthi॒vībhyā᳚-mpīpihi | su॒bhū॒tāya̭ pīpihi | bra॒hma॒va॒rca॒sāya̭ pīpihi || 36 ||
yaja̭mānāya pīpihi | mahya॒ñjyaiṣṭhyā̭ya pīpihi || tviṣyai᳚ tvā | dyu॒mnāya̭ tvā | i॒ndri॒yāya̭ tvā॒ bhūtyai᳚ tvā | dharmā̭-'si su॒dharmā me᳚ nya॒sme | brahmā̭ṇi dhāraya | kṣa॒trāṇi̭ dhāraya | viśa̭ndhāraya |
nettvā॒ vātaḥ̭ ska॒ndayā᳚t || 37 ||
a॒muṣya̭ tvā prā॒ṇe sā̭dayāmi | a॒munā̭ sa॒ha ni̭ra॒rthaṅga̭ccha | yo᳚-'smā-ndveṣṭi̭ |
yañca̭ va॒ya-ndvi॒ṣmaḥ || pū॒ṣṇe śara̭se॒ svāhā᳚ |
grāva̭bhya॒-ssvāhā᳚ | pra॒ti॒rebhya॒-ssvāhā᳚ | dyāvā̭pṛthi॒vībhyā॒g॒ svāhā᳚ |
pi॒tṛbhyo̭ gharma॒pebhya॒-ssvāhā᳚ ||
ru॒drāya̭ ru॒draho᳚tre॒ svāhā᳚ || 38 ||
aha॒-rjyotiḥ̭ ke॒tunā̭ juṣatām | su॒jyo॒ti-rjyoti̭ṣā॒g॒ svāhā᳚ | rātri॒rjyotiḥ̭ ke॒tunā̭ juṣatām | su॒jyo॒ti-rjyoti̭ṣā॒g॒ svāhā᳚ | apī̭paro॒ mā-'hno॒ rātri̭yai mā pāhi | e॒ṣā tḙ agne sa॒mit | tayā॒ sami̭ddhyasva | āyṷrme dāḥ | varca̭sā mā-'ñjīḥ | apī̭paro mā॒ rātri̭yā॒ ahno̭ mā pāhi || 39 ||
e॒ṣā tḙ agne sa॒mit | tayā॒ sami̭ddhyasva | āyṷrme dāḥ | varca̭sā mā-'ñjīḥ | a॒gni-rjyoti॒-rjyoti̭ra॒gni-ssvāhā᳚ |
sūryo॒ jyoti॒-rjyoti॒-ssūrya॒-ssvāhā᳚ | bhū-ssvāhā᳚ | hu॒tagṃ ha॒viḥ | madhṷ ha॒viḥ | indra̭tame॒-'gnau || 40 ||
pi॒tā no̭-'si॒ mā mā̭ higṃsīḥ | a॒śyāma̭ te devagharma |
madhṷmato॒ vāja̭vataḥ pitu॒mataḥ̭ | aṅgi̭rasvata-ssvadhā॒vinaḥ̭ | a॒śī॒mahi̭ tvā॒ mā mā̭ higṃsīḥ || svāhā᳚ tvā॒ sūrya̭sya ra॒śmibhyaḥ̭ | svāhā᳚ tvā॒ nakṣa̭trebhyaḥ || 41 ||
(bra॒hma॒va॒rca॒sāya̭ pīpihi - ska॒ndayā᳚-d- ru॒drāya̭ ru॒draho᳚tre॒ svāhā - 'hno̭ mā pāh - ya॒gnau - +sa॒pta ca̭) (a. 10)
anuvākaṃ 11
gharma॒ yā tḙ di॒vi śuk | yā gā̭ya॒tre chanda̭si | yā brā᳚hma॒ṇe | yā ha̭vi॒rdhāne᳚ | tānta̭ e॒tenāva̭yaje॒ svāhā᳚ || gharma॒ yā te॒-'ntari̭kṣe॒ śuk |
yā traiṣṭṷbhe॒ chanda̭si | yā rā̭ja॒nye᳚ | yā-''gnī᳚ddhre |
tānta̭ e॒tenāva̭yaje॒ svāhā᳚ || 42 ||
gharma॒ yā tḙ pṛthi॒vyāgṃ śuk | yā jāga̭te॒ chanda̭si | yā vaiśye᳚ | yā sada̭si | tānta̭ e॒tenāva̭yaje॒ svāhā᳚ || a॒gniśca̭ havya॒vāha̭no॒ bhava̭tā-ndā॒śuṣe॒ mayaḥ̭ || anvida̭numate॒ tva-mmanyā̭sai॒ śañca̭naḥ kṛdhi | kratve॒ dakṣā̭ya no hinu॒ praṇa॒ āyūgṃ̭ṣi tāriṣaḥ || di॒vastvā̭ para॒spāyāḥ᳚ | a॒ntari̭kṣasya ta॒nuvaḥ̭ pāhi | pṛ॒thi॒vyāstvā॒ dharma̭ṇā || 43 ||
va॒yamanṷkrāmāma suvi॒tāya॒ navya̭se || brahma̭ṇastvā para॒spāyāḥ᳚ | kṣa॒trasya̭ ta॒nuvaḥ̭ pāhi | vi॒śastvā॒ dharma̭ṇā | va॒yamanṷkrāmāma suvi॒tāya॒ navya̭se || prā॒ṇasya̭ tvā para॒spāyai᳚ | cakṣṷṣasta॒nuvaḥ̭ pāhi | śrotra̭sya tvā॒ dharma̭ṇā | va॒yamanṷkrāmāma suvi॒tāya॒ navya̭se || va॒lgura̭si śaṃ॒-yu~dhā̭yāḥ || 44 ||
śiśu॒-rjana̭dhāyāḥ || śañca॒ vakṣi॒ pari̭ ca॒ vakṣi̭ |
catuḥ̭ srakti॒rnābhi̭r-ṛ॒tasya̭ | sado̭ vi॒śvāyu॒-śśarma̭ sa॒prathāḥ᳚ | apa॒ dveṣo॒ apa॒ hvaraḥ̭ | a॒nyadvra̭tasya saścima | gharmai॒ta-tte-'nna̭me॒ta-tpurī̭ṣam | tena॒ vardha̭sva॒ cā ca̭ pyāyasva | va॒rdhi॒ṣī॒mahi̭ ca va॒yam | ā ca̭ pyāsiṣī॒mahi̭ || 45 ||
ranti॒-rnāmā̭si di॒vyo ga̭ndha॒rvaḥ | tasya̭ te pa॒dvaddha̭vi॒rdhāna᳚m | a॒gniraddhya̭kṣāḥ | ru॒dro-'dhi̭patiḥ || sama॒hamāyṷṣā | sa-mprā॒ṇena̭ |
saṃ-va~rca̭sā | sa-mpaya̭sā | saṅgaṷpa॒tyena̭ | sagṃ rā॒yaspoṣḙṇa || 46 ||
vya̭sau | yo᳚-'smā-ndveṣṭi̭ | yañca̭ va॒ya-ndvi॒ṣmaḥ ||
aci̭krada॒dvṛṣā॒ hariḥ̭ | ma॒hā-nmi॒tro na da̭rśa॒taḥ | sagṃ sūryḙṇa rocate || cida̭si samu॒drayo̭niḥ | indu॒-rdakṣaḥ̭ śye॒na ṛ॒tāvā᳚ | hira̭ṇyapakṣa-śśaku॒no bhṷra॒ṇyuḥ | ma॒hān-thsa॒dhasthe᳚ dhru॒va āniṣa̭ttaḥ || 47 ||
nama̭ste astu॒ mā mā̭ higṃsīḥ || vi॒śvāva̭sugṃ soma gandha॒rvam | āpo̭ dadṛ॒śuṣīḥ᳚ | tadṛ॒tenā॒ vyā̭yann | tada॒nvavai᳚t | indro̭ rārahā॒ṇa ā̭sām | pari॒ sūrya̭sya pari॒dhīgṃ ra̭paśyat || vi॒śvāva̭sura॒bhi tanno̭ gṛṇātu | di॒vyo ga̭ndha॒rvo raja̭so vi॒mānaḥ̭ |
yadvā̭ ghā sa॒tyamu॒ta yanna vi॒dma || 48 ||
dhiyo̭ hinvā॒no dhiya॒ inno̭ avyāt || sasni̭mavinda॒ccara̭ṇe na॒dīnā᳚m |
apā̭vṛṇo॒-dduro॒ aśma̭vrajānām | prāsā᳚-ngandha॒rvo a॒mṛtā̭ni vocat | indro॒ dakṣa॒-mpari̭jānāda॒hīna᳚m || e॒tattva-ndḙva gharma de॒vo de॒vānupā̭gāḥ |
i॒dama॒ha-mma̭nu॒ṣyo̭ manu॒ṣyāṋ | soma̭pī॒thānu॒ mehi̭ | sa॒ha pra॒jayā̭ sa॒ha rā॒yaspoṣḙṇa ||
su॒mi॒trā na॒ āpa॒ oṣa̭dhaya-ssantu || 49 ||
du॒rmi॒trāstasmai̭ bhūyāsuḥ | yo᳚-'smā-ndveṣṭi̭ |
yañca̭ va॒ya-ndvi॒ṣmaḥ || udva॒ya-ntama̭sa॒spari॒ paśya̭nto॒ jyoti॒rutta̭ram | de॒va-ndḙva॒trā sūrya॒maga̭nma॒ jyoti̭rutta॒mam || udu॒ tya-ñjā॒tavḙdasa-nde॒vaṃ-va~̭hanti ke॒tavaḥ̭ | dṛ॒śe viśvā̭ya॒ sūrya᳚m | ci॒tra-nde॒vānā॒-muda̭gā॒danī̭ka॒-ñcakṣṷ rmi॒trasya॒ varṷṇasyā॒-'gneḥ || i॒mamū॒ ṣu tyama॒smabhyagṃ̭ sa॒nim | gā॒ya॒trannavī̭yāgṃsam |
agnḙ de॒veṣu॒ pravo̭caḥ || 50 ||
(yā-''gnī᳚ddhre॒ tāntā̭ e॒tenāva̭yaje॒ svāhā॒ - dharma̭ṇā - śaṃ॒-yu~dhā̭yāḥ - pyāsiṣī॒mahi॒-poṣḙṇa॒-niṣa̭tto-vi॒dma-sa̭n-+tva॒ṣṭau ca̭) (a. 11)
anuvākaṃ 12
ma॒hī॒nā-mpayo̭-'si॒ vihi̭ta-ndeva॒trā |
jyo॒ti॒rbhā a̭si॒ vana॒spatī̭nā॒moṣa̭dhīnā॒gṃ॒ rasaḥ̭ |
vā॒jina̭-ntvā vā॒jino-'va̭ nayāmaḥ |
ū॒rdhva-mmanaḥ̭ suva॒rgam || 51 || (a. 12)
anuvākaṃ 13
askā॒-ndyauḥ pṛ̭thi॒vīm | askā̭nṛṣa॒bho yuvā॒ gāḥ |
ska॒nnemā viśvā॒ bhuva̭nā | ska॒nno ya॒jñaḥ praja̭nayatu || askā॒naja̭ni॒ prāja̭ni | ā ska॒nnājjā̭yate॒ vṛṣā᳚ |
ska॒nnā-tpraja̭niṣīmahi || 52 || (a. 13)
anuvākaṃ 14
yā pu॒rastā᳚-dvi॒dyudāpa̭tat | tānta̭ e॒tenāva̭ yaje॒ svāhā᳚ | yā da̭kṣiṇa॒taḥ | yā pa॒ścāt | yotta̭ra॒taḥ | yopari̭ṣṭā-dvi॒dyudāpa̭tat | tānta̭ e॒tenāva̭ yaje॒ svāhā᳚ || 53 || (a. 14)
anuvākaṃ 15
prā॒ṇāya॒ svāhā᳚ vyā॒nāya॒ svāhā̭ 'pā॒nāya॒ svāhā᳚ |
cakṣṷṣe॒ svāhā॒ śrotrā̭ya॒ svāhā᳚ |
mana̭se॒ svāhā̭ vā॒ce sara̭svatyai॒ svāhā᳚ || 54 || (a. 15)
anuvākaṃ 16
pū॒ṣṇe svāhā̭ pū॒ṣṇe śara̭se॒ svāhā᳚ |
pū॒ṣṇe pra̭pa॒tthyā̭ya॒ svāhā̭ pū॒ṣṇe na॒randhi̭ṣāya॒ svāhā᳚ | pū॒ṣṇe-'ṅghṛ̭ṇaye॒ svāhā̭ pū॒ṣṇe na॒ruṇā̭ya॒ svāhā᳚ |
pū॒ṣṇe sā̭ke॒tāya॒ svāhā᳚ || 55 || (a. 16)
anuvākaṃ 17
uda̭sya॒ śuṣmā᳚-dbhā॒nurnārta॒ bibha̭rti | bhā॒ra-mpṛ̭thi॒vī na bhūma̭ | pra śu॒kraitṷ de॒vī ma̭nī॒ṣā | a॒sma-thsuta̭ṣṭo॒ ratho॒ na vā॒jī | arca̭nta॒ eke॒ mahi॒ sāma̭ manvata | tena॒ sūrya̭madhārayann |
tena॒ sūrya̭marocayann | gha॒rma-śśira॒stada॒yama॒gniḥ |
purī̭ṣamasi॒ sampri̭ya-mpra॒jayā̭ pa॒śubhi̭rbhuvat | pra॒jāpati̭stvā sādayatu | tayā̭ de॒vata̭yā 'ṅgira॒sva-ddhru॒vā sī̭da || 56 || (a. 17)
anuvākaṃ 18
yāstḙ agna ā॒rdrā yona̭yo॒ yāḥ kṷlā॒yinīḥ᳚ |
ye tḙ agna॒ inda̭vo॒ yā u॒ nābha̭yaḥ | yāstḙ agne ta॒nuva॒ ūrjo॒ nāma̭ | tābhi॒stvamu॒bhayī̭bhi-ssaṃvi~dā॒naḥ | pra॒jābhi̭ragne॒ dravi̭ṇe॒ha sī̭da |
pra॒jāpa̭tistvā sādayatu | tayā̭ de॒vata̭yā-'ṅgira॒sva-ddhru॒vā sī̭da || 57 || (a. 18)
anuvākaṃ 19
a॒gnira̭si vaiśvāna॒ro̭-'si | saṃ॒va~॒thsa॒ro̭-'si parivathsa॒ro̭-'si | i॒dā॒va॒thsa॒ro̭-'sīduvathsa॒ro̭-'si | i॒dva॒thsa॒ro̭-'si vathsa॒ro̭-'si | tasya̭ te vasa॒nta-śśiraḥ̭ | grī॒ṣmo dakṣi̭ṇaḥ pa॒kṣaḥ | va॒r॒ṣāḥ puccha᳚m |
śa॒radutta̭raḥ pa॒kṣaḥ | he॒ma॒nto maddhya᳚m | pū॒rva॒pa॒kṣāścita̭yaḥ | a॒pa॒ra॒pa॒kṣāḥ purī̭ṣam | a॒ho॒rā॒trāṇīṣṭa̭kāḥ | tasya̭ te॒ māsā᳚ścārdhamā॒sāśca̭ kalpantām |
ṛ॒tava̭ste kalpantām | saṃ॒va~॒thsa॒rastḙ kalpatām |
a॒ho॒rā॒trāṇi̭ te kalpantām | eti॒ preti॒ vīti॒ samityuditi̭ |
pra॒jāpa̭tistvā sādayatu | tayā̭ de॒vata̭yā-'ṅgira॒sva-ddhru॒vā sī̭da || 58 ||
(cita̭yo॒ nava̭ ca) (a. 19)
anuvākaṃ 20
bhūrbhuva॒ssuvaḥ̭ | ū॒rdhva ū॒ ṣuṇa̭ ū॒taye᳚ | ū॒rdhvo naḥ̭ pā॒hyagṃha̭saḥ ||
vi॒dhunda̭drā॒ṇagṃ sama̭ne bahū॒nām | yuvā̭na॒gṃ॒ santa̭-mpali॒to ja̭gāra | de॒vasya̭ paśya॒ kāvya̭-mmahi॒tvā-'dyā ma॒māra̭ | sa hya॒-ssamā̭na ||
yadṛ॒te ci̭dabhi॒śriṣaḥ̭ | pu॒rā ja॒rtṛbhya̭ ā॒tṛdaḥ̭ |
sandhā̭tā sa॒ndhi-mma॒ghavā̭ puro॒vasuḥ̭ || 59 ||
niṣka̭rtā॒ vihrṷta॒-mpunaḥ̭ || puna̭rū॒rjā ni va̭rtasva॒ puna̭ragna i॒ṣā-''yṷṣā | puna̭rnaḥ pāhi vi॒śvataḥ̭ || sa॒ha ra॒yyā ni va̭rta॒svāgne॒ pinva̭sva॒ dhāra̭yā | vi॒śvaphsni̭yā vi॒śvata॒spari̭ || mā no̭ gharma vyathi॒to vi̭vyatho naḥ | mā naḥ॒ para॒madha̭ra॒mmā rajo̭-'naiḥ | moṣva̭smāg stama̭syanta॒rā dhāḥ᳚ | mā ru॒driyā̭so a॒bhigṷrvṛ॒dhānaḥ̭ || mā naḥ॒ kratṷbhir-hīḍi॒tebhi̭ra॒smān | dviṣā̭ sunīte॒ mā parā̭dāḥ |
mā no̭ ru॒dro nir-ṛ̭ti॒rmā no॒ astā᳚ |
mā dyāvā̭pṛthi॒vī hī̭ḍiṣātām || 60 ||
upa̭ no mitrāvaruṇāvi॒hāva̭tam | a॒nvādī᳚ddhyāthāmi॒ha naḥ̭ sakhāyā | ā॒di॒tyānā॒-mprasi̭tirhe॒tiḥ | u॒grā śa॒tāpā᳚ṣṭhā gha॒ viṣā॒ pari̭ṇo vṛṇaktu ||
i॒ma-mmḙ varuṇa śrudhī॒ hava̭ma॒dyā ca̭ mṛḍaya | tvāma̭va॒syurā ca̭ke || tattvā̭ yāmi॒ brahma̭ṇā॒ vanda̭māna॒-stadā śā᳚ste॒ yaja̭māno ha॒virbhiḥ̭ | ahḙḍamāno varuṇe॒ha bo॒ddhyurṷśagṃsa॒ mā na॒ āyuḥ॒ pramo̭ṣīḥ || tva-nno̭ agne॒ varṷṇasya vi॒dvā-nde॒vasya॒ heḍo-'va̭ yāsi sīṣṭhāḥ | yaji̭ṣṭho॒ vahni̭ tama॒-śśośṷcāno॒ viśvā॒ dveṣāgṃ̭si॒ pramṷmugdhya॒smat ||
sa tvanno̭ ange-'va॒mo bha̭vo॒tī nedi̭ṣṭho a॒syā u॒ṣaso॒ vyṷṣṭau | ava̭ yakṣva no॒ varṷṇa॒gṃ॒ rarā̭ṇo vī॒hi mṛ̭ḍī॒kagṃ su॒havo̭ na edhi || tvama̭gne a॒yā-'si̭ | a॒yā sanmana̭sā hi॒taḥ | a॒yā sanaḥa॒vyamṷ̄hiṣe | a॒yā no̭ dhehi bheṣa॒jam | i॒ṣṭo a॒gnirāhṷtaḥ | svāhā̭kṛtaḥ pipartu naḥ | sva॒gā de॒vebhya̭ i॒da-nnamaḥ̭ ||
udva॒ya-ntama̭sa॒spari॒ paśya̭nto॒ jyoti॒rutta̭ram | de॒va-ndḙva॒trā sūrya॒maga̭nma॒ jyoti̭rutta॒mam || udu॒ tya-ñjā॒tavḙdasa-nde॒vaṃ-va~̭hanti ke॒tavaḥ̭ | dṛ॒śe viśvā̭ya॒ sūrya᳚m | ci॒tra-nde॒vānā॒-muda̭gā॒danī̭ka॒-ñcakṣṷ rmi॒trasya॒ varṷṇasyā॒-'gneḥ ||
vayaḥ̭ supa॒rṇā upa̭sedu॒rindra᳚m | pri॒yamḙdhā॒ ṛṣa̭yo॒ nādha̭mānāḥ | apa̭ dhvā॒ntamū᳚rṇu॒hi pū॒rdhi cakṣuḥ̭ | mu॒mu॒gdhya̭smā-nni॒dhayḙva ba॒ddhān || 61 ||
(pu॒ro॒vasṷrhīḍiṣātāgṃ supa॒rṇāḥ) (a. 20)
anuvākaṃ 21
bhūrbhuva॒ssuvaḥ̭ | mayi॒ tyadi̭ndri॒ya-mma॒hat | mayi॒ dakṣo॒ mayi॒ kratuḥ̭ | mayi̭ dhāyi su॒vīrya᳚m | triśṷggha॒rmo vibhā̭tu me | ākū᳚tyā॒ mana̭sā sa॒ha |
vi॒rājā॒ jyoti̭ṣā sa॒ha | ya॒jñena॒ paya̭sā sa॒ha | brahma̭ṇā॒ teja̭sā sa॒ha | kṣa॒treṇa॒ yaśa̭sā sa॒ha | sa॒tyena॒ tapa̭sā sa॒ha | tasya॒ doha̭maśīmahi |
tasya̭ su॒mnama̭śīmahi | tasya̭ bha॒kṣama̭śīmahi |
tasya̭ ta॒ indrḙṇa pī॒tasya॒ madhṷmataḥ |
upa̭hūta॒syopa̭hūto bhakṣayāmi || 62 ||
(yaśa̭sā sa॒ha ṣaṭca̭) (a. 21)
anuvākaṃ 22
yāstḙ agne gho॒rāsta॒nuvaḥ̭ | kṣucca॒ tṛṣṇā̭ ca | asnu॒kcānā̭hutiśca | a॒śa॒na॒yā ca̭ pipā॒sā ca̭ | se॒diścāma̭tiśca | e॒tāstḙ agne gho॒rāsta॒nuvaḥ̭ |
tābhi̭ra॒muṅga̭ccha | yo᳚-'smā-ndveṣṭi̭ |
yañca̭ va॒ya-ndvi॒ṣmaḥ || 63 || (a. 22)
anuvākaṃ 23
snikca॒ snīhi̭tiśca॒ snihi̭tiśca | u॒ṣṇā ca̭ śī॒tā ca̭ |
u॒grā ca̭ bhī॒mā ca̭ | sa॒dāmnī̭ se॒dirani̭rā | e॒tāstḙ agne gho॒rāsta॒nuvaḥ̭ | tābhi̭ra॒muṅga̭ccha | yo᳚-'smā-ndveṣṭi̭ | yañca̭ va॒ya-ndvi॒ṣmaḥ || 64 || (a. 23)
anuvākaṃ 24
dhuni̭śca dhvā॒ntaśca̭ dhva॒naśca̭ dhva॒nayagg̭śca |
ni॒li॒mpaśca̭ vili॒mpaśca̭ vikṣi॒paḥ || 65 || (a. 24)
anuvākaṃ 25
u॒graśca॒ dhuni̭śca dhvā॒ntaśca̭ dhva॒naśca̭ dhva॒nayagg̭śca | sa॒ha॒sa॒hvāgśca॒ saha̭mānaśca॒ saha̭svāgśca॒ sahī̭yāgśca |
etya॒ pretya̭ vikṣi॒paḥ || 66 || (a. 25)
anuvākaṃ 26
a॒ho॒rā॒tre tvodī̭rayatām | a॒rdha॒mā॒sāstvodī᳚-ñjayantu | māsā᳚stvā śrapayantu | ṛ॒tava̭stvā pacantu |
saṃ॒va~॒thsa॒rastvā̭ hantvasau || 67 || (a. 26)
anuvākaṃ 27
khaṭ pha-ḍja॒hi | chi॒ndhī bhi॒ndhī ha॒ndhī kaṭ |
iti॒ vācaḥ̭ krūrā॒ṇi || 68 || (a. 27)
anuvākaṃ 28
vigā i̭ndra vi॒cara᳚n-thspāśayasva | sva॒panta̭mindra paśu॒manta̭miccha | vajrḙṇā॒mu-mbo̭dhaya durvi॒datra᳚m | sva॒pa॒to᳚-'sya॒ praha̭ra॒ bhoja̭nebhyaḥ ||
agnḙ a॒gninā॒ saṃva~̭dasva | mṛtyo̭ mṛ॒tyunā॒ saṃva~̭dasva | nama̭ste astu bhagavaḥ || sa॒kṛttḙ agne॒ namaḥ̭ | dviste॒ namaḥ̭ | triste॒ namaḥ̭ | ca॒tuste॒ namaḥ̭ | pa॒ñca॒kṛtva̭ste॒ namaḥ̭ |
da॒śa॒kṛtva̭ste॒ namaḥ̭ | śa॒ta॒kṛtva̭ste॒ namaḥ̭ | ā॒sa॒ha॒sra॒kṛtva̭ste॒ namaḥ̭ | a॒pa॒ri॒mi॒ta॒kṛtva̭ste॒ namaḥ̭ | nama̭ste astu॒ mā mā̭ higṃsīḥ || 69 ||
(triste॒ namaḥ̭ sa॒pta ca̭) (a. 28)
anuvākaṃ 29
asṛ̭-nmukho rudhi॒reṇā॒vya̭ktaḥ | ya॒masya̭ dū॒ta-śśvapā॒-dvidhā̭vasi | gṛddhraḥ̭ supa॒rṇaḥ ku॒ṇapa॒nniṣḙvase |
ya॒masya̭ dū॒taḥ prahi̭to bha॒vasya̭ co॒bhayoḥ᳚ || 70 || (a. 29)
anuvākaṃ 30
yade॒ta-dvṛ̭ka॒so bhū॒tvā | vāg de᳚vyabhi॒rāya̭si | dvi॒ṣanta̭-mme॒-'bhirā̭ya | ta-mmṛ̭tyo mṛ॒tyavḙ naya | sa ārtyā-''rti॒mārccha̭tu || 71 || (a. 30)
anuvākaṃ 31
yadī̭ṣi॒to yadi̭ vā svakā॒mī | bha॒yeḍa̭ko॒ vada̭ti॒ vāca̭me॒tām | tāmi̭ndrā॒gnī brahma̭ṇā saṃvi~dā॒nau |
śi॒vāma॒smabhya̭-ṅkṛṇutaṅgṛ॒heṣṷ || 72 || (a. 31)
anuvākaṃ 32
dīrgha̭mukhi॒ durha̭ṇu | mā sma̭ dakṣiṇa॒to va̭daḥ |
yadi̭ dakṣiṇa॒to vadā᳚-ddvi॒ṣanta॒-mme-'va̭ bādhāsai || 73 || (a. 32)
anuvākaṃ 33
i॒tthādulṷ̄ka॒ āpa̭ptat | hi॒ra॒ṇyā॒kṣo ayo̭mukhaḥ |
rakṣa̭sāndū॒ta āga̭taḥ | tami॒to nā̭śayāgne || 74 || (a. 33)
anuvākaṃ 34
yade॒ta-dbhū॒tānya̭nvā॒viśya̭ | daivīṃ॒-vā~caṃ̭-va~॒dasi̭ | dvi॒ṣato̭ naḥ॒ parā̭vada | tā-nmṛ̭tyo mṛ॒tyavḙ naya | ta ārtyā-''rti॒mārccha̭ntu |
a॒gninā॒-'gni-ssaṃva~̭datām || 75 || (a. 34)
anuvākaṃ 35
pra॒sārya̭ sa॒kthyaṷ pata̭si | sa॒vyamakṣi̭ ni॒pepi̭ ca |
meha ka̭syaca॒nāma̭mat || 76 || (a. 35)
anuvākaṃ 36
atri̭ṇā tvā krime hanmi | kaṇvḙna ja॒mada̭gninā |
vi॒śvāva̭so॒-rbrahma̭ṇā ha॒taḥ | krimī̭ṇā॒gṃ॒ rājā᳚ |
apyḙṣāg stha॒pati̭rha॒taḥ | atho̭ mā॒tā-'tho̭ pi॒tā |
atho᳚ sthū॒rā atho᳚ kṣu॒drāḥ | atho̭ kṛ॒ṣṇā atho᳚ śve॒tāḥ | atho̭ ā॒śāti̭kā ha॒tāḥ |
śve॒tābhiḥ̭ sa॒ha sarvḙ ha॒tāḥ || 77 || (a. 36)
anuvākaṃ 37
āha॒rāva̭dya | śṛ॒tasya̭ ha॒viṣo॒ yathā᳚ | ta-thsa॒tyam |
yada॒muṃ-ya~॒masya॒ jambha̭yoḥ | āda̭dhāmi॒ tathā॒ hi tat | khaṇphaṇmrasi̭ || 78 || (a. 37)
anuvākaṃ 38
brahma̭ṇā tvā śapāmi | brahma̭ṇastvā śa॒pathḙna śapāmi | gho॒reṇa̭ tvā॒ bhṛgṷ̄ṇā॒ñcakṣṷṣā॒ prekṣe᳚ | rau॒dreṇa॒ tvāṅgi̭rasā॒-mmana̭sā dhyāyāmi |
a॒ghasya̭ tvā॒ dhāra̭yā viddhyāmi |
adha̭ro॒ ma-tpa̭dyasvāsau || 79 || (a. 38)
anuvākaṃ 39
uttṷda śimijāvari | talpḙje॒ talpa॒ uttṷda | gi॒rīgṃ ranu॒ pravḙśaya | marī̭cī॒rupa॒ sannṷda |
yāva̭di॒taḥ pu॒rastā̭du॒dayā̭ti॒ sūryaḥ̭ |
tāva̭di॒to̭-'munnā̭śaya | yo᳚-'smā-ndveṣṭi̭ |
yañca̭ va॒ya-ndvi॒ṣmaḥ || 80 || (a. 39)
anuvākaṃ 40
bhūrbhuva॒ssuvo॒ bhūrbhuva॒ssuvo॒ bhūrbhuva॒ssuvaḥ̭ |
bhuvo᳚-'ddhāyi॒ bhuvo᳚-'ddhāyi॒ bhuvo᳚-'ddhāyi |
nṛ॒mṇāyi nṛ॒mṇa-nnṛ॒mṇāyi nṛ॒mṇa-nnṛ॒mṇāyi nṛ॒mṇam | ni॒dhā yyo̭-'vāyi ni॒dhā yyo̭-'vāyi ni॒dhā yyo̭-'vāyi | e a॒sme a॒sme | suva॒rna jyotīḥ᳚ || 81 || (a. 40)
anuvākaṃ 41
pṛ॒thi॒vī sa॒mit | tāma॒gni-ssami̭ndhe | sā-'gnigṃ sami̭ndhe | tāma॒hagṃ sami̭ndhe | sā mā॒ sami̭ddhā | āyṷṣā॒ teja̭sā | varca̭sā śri॒yā | yaśa̭sā brahmavarca॒sena̭ | a॒nnādyḙna॒ sami̭ntā॒g॒ svāhā᳚ ||
a॒ntari̭kṣagṃ sa॒mit || 82 ||
tāṃ-vā~॒yu-ssami̭ndhe | sā vā॒yugṃ sami̭ndhe | tāma॒hagṃ sami̭ndhe | sā mā॒ sami̭ddhā | āyṷṣā॒ teja̭sā | varca̭sā śri॒yā | yaśa̭sā brahmavarca॒sena̭ | a॒nnādyḙna॒ sami̭ntā॒g॒ svāhā᳚ |
dyau-ssa॒mit | tāmā̭di॒tya-ssami̭ndhe || 83 ||
sā-''di॒tyagṃ sami̭ndhe | tāma॒hagṃ sami̭ndhe | sā mā॒ sami̭ddhā | āyṷṣā॒ teja̭sā | varca̭sā śri॒yā | yaśa̭sā brahmavarca॒sena̭ | a॒nnādyḙna॒ sami̭ntā॒g॒ svāhā᳚ || prā॒jā॒pa॒tyā mḙ sa॒mida̭si sapatna॒kṣaya̭ṇī |
bhrā॒tṛ॒vya॒hā mḙ-'si॒ svāhā᳚ || agne᳚ vratapate vra॒tañca̭riṣyāmi || 84 ||
taccha̭keya॒-ntanmḙ rāddhyatām | vāyo᳚ vratapata॒ ādi̭tya vratapate | vra॒tānāṃ᳚-vra~tapate vra॒tañca̭riṣyāmi | taccha̭keya॒-ntanmḙ rāddhyatām || dyau-ssa॒mit | tāmā̭di॒tya-ssami̭ndhe | sā-''di॒tyagṃ sami̭ndhe |
tāma॒hagṃ sami̭ndhe | sā mā॒ sami̭ddhā | āyṷṣā॒ teja̭sā || 85 ||
varca̭sā śri॒yā | yaśa̭sā brahmavarca॒sena̭ | a॒nnādyḙna॒ sami̭ntā॒g॒ svāhā᳚ |
a॒ntari̭kṣagṃ sa॒mit | tāṃ-vā~॒yu-ssami̭ndhe | sā vā॒yugṃ sami̭ndhe | tāma॒hagṃ sami̭ndhe | sā mā॒ sami̭ddhā | āyṷṣā॒ teja̭sā | varca̭sā śri॒yā || 86 ||
yaśa̭sā brahmavarca॒sena̭ | a॒nnādyḙna॒ sami̭ntā॒g॒ svāhā᳚ | pṛ॒thi॒vī sa॒mit | tāma॒gni-ssami̭ndhe | sā-'gnigṃ sami̭ndhe | tāma॒hagṃ sami̭ndhe |
sā mā॒ sami̭ddhā | āyṷṣā॒ teja̭sā | varca̭sā śri॒yā |
yaśa̭sā brahmavarca॒sena̭ || 87 ||
a॒nnādyḙna॒ sami̭ntā॒g॒ svāhā᳚ | prā॒jā॒pa॒tyā mḙ sa॒mida̭si sapatna॒kṣaya̭ṇī | bhrā॒tṛ॒vya॒hā mḙ-'si॒ svāhā᳚ | ādi̭tya vratapate vra॒tama̭cāriṣam |
tada̭śaka॒-ntanmḙ-'rādhi | vāyo᳚ vratapa॒te-'gne᳚ vratapate | vra॒tānāṃ᳚-vra~tapate vra॒tama̭cāriṣam | tada̭śaka॒-ntanmḙ-'rādhi || 88 ||
(sa॒mith - sami̭ndhe - vra॒tañca̭riṣyā॒ - myāyṷṣā॒ teja̭sā॒ - varca̭sā śri॒yā - yaśa̭sā brahmavarca॒senā॒ - +ṣṭau ca̭) (a. 41)
anuvākaṃ 42
śanno॒ vātaḥ̭ pavatā-mmāta॒riśvā॒ śanna̭stapatu॒ sūryaḥ̭ | ahā̭ni॒ śa-mbha̭vantu na॒-śśagṃ rātriḥ॒ prati̭dhīyatām || śamu॒ṣā no॒ vyṷcchatu॒ śamā̭di॒tya udḙtu naḥ | śi॒vā na॒-śśanta̭mā bhava sumṛḍī॒kā sara̭svati | mā te॒ vyo̭ma sa॒ndṛśi̭ ||
iḍā̭yai॒ vāstva̭si vāstu॒ma-dvā᳚stu॒manto̭ bhūyāsma॒ mā vāsto᳚-śchithsmahya vā॒stu-ssa bhṷ̄yā॒-dyo᳚-'smā-ndveṣṭi॒ yañca̭ va॒ya-ndvi॒ṣmaḥ ||
pra॒ti॒ṣṭhā-'si̭ prati॒ṣṭhāva̭nto bhūyāsma॒ mā pra̭ti॒ṣṭhāyā᳚- śchithsmahya prati॒ṣṭhaḥ
sa bhṷ̄yā॒-dyo᳚-'smā-ndveṣṭi॒ yañca̭ va॒ya-ndvi॒ṣmaḥ || ā vā̭ta vāhi bheṣa॒jam ~vi vā̭ta vāhi॒ yadrapaḥ̭ |
tvagṃ hi vi॒śvabhḙṣajo de॒vānā᳚-ndū॒ta īya̭se ||
dvāvi॒mau vātaṷ vāta॒ ā sindhā॒rā pa̭rā॒vataḥ̭ || 89 ||
dakṣa̭-mme a॒nya ā॒vātu॒ parā॒-'nyo vā̭tu॒ ya-drapaḥ̭ ||
yada॒do vā̭ta te gṛ॒hḙ-'mṛta̭sya ni॒dhirhi॒taḥ |
tato̭ no dehi jī॒vase॒ tato̭ no dhehi bheṣa॒jam ||
tato̭ no॒ maha॒ āva̭ha॒ vāta॒ āvā̭tu bheṣa॒jam |
śa॒mbhū-rma̭yo॒bhūrno̭ hṛ॒de pra ṇa॒ āyūgṃ̭ṣi tāriṣat || indra̭sya gṛ॒ho̭-'si॒ ta-ntvā॒ prapa̭dye॒ sagu॒ssāśvaḥ̭ | sa॒ha yanme॒ asti॒ tena̭ ||
bhūḥ prapa̭dye॒ bhuvaḥ॒ prapa̭dye॒ suvaḥ॒ prapa̭dye॒ bhūrbhuva॒ssuvaḥ॒ prapa̭dye vā॒yum
prapa॒dye-'nā᳚rtā-nde॒vatā॒-mprapa॒dye 'śmā̭namākha॒ṇa-mprapa̭dye pra॒jāpa̭ter
brahmako॒śa-mbrahma॒ prapa̭dya॒ o-mprapa̭dye ||
a॒ntari̭kṣa-mma u॒rva̭ntara̭-mbṛ॒hada॒gnayaḥ॒ parva̭tāśca॒ yayā॒ vātaḥ̭ sva॒styā sva̭sti॒māntayā᳚ sva॒styā sva̭sti॒ māna̭sāni ||
prāṇā̭pānau mṛ॒tyormā̭ pāta॒-mprāṇā̭pānau॒ mā mā̭ hāsiṣṭa॒-mmayi̭ me॒dhā-mmayi̭ pra॒jā-mmayya॒gni stejo̭ dadhātu॒ mayi̭ me॒dhā-mmayi̭ pra॒jā-mmayīndra̭ indri॒ya-nda̭dhātu॒ mayi̭ me॒dhā-mmayi̭ pra॒jā-mmayi॒ sūryo॒
bhrājo̭ dadhātu || 90 ||
dyu॒bhira॒ktubhiḥ॒ pari̭pāta-ma॒smānari̭ṣṭebhi-raśvinā॒ saubha̭gebhiḥ | tanno̭ mi॒tro varṷṇo māmahantā॒ madi̭ti॒-ssindhuḥ̭ pṛthi॒vī u॒ta dyauḥ ||
kayā̭ naści॒tra ābhṷvadū॒tī sa॒dāvṛ̭dha॒-ssakhā᳚ | kayā॒ śaci̭ṣṭhayā vṛ॒tā || kastvā̭ sa॒tyo madā̭nā॒-mmagṃhi̭ṣṭho mathsa॒dandha̭saḥ |
dṛ॒ḍhā ci̭dā॒ruje॒ vasṷ || a॒bhī ṣu ṇa॒-ssakhī̭nāmavi॒tā ja̭ritṝ॒ṇām | śa॒ta-mbha̭vāsyū॒tibhiḥ̭ ||
vayaḥ̭ supa॒rṇā upa̭sedu॒rindra̭-mpri॒yamḙdhā॒ ṛṣa̭yo॒ nādha̭mānāḥ |
apa̭ dhvā॒ntamū᳚rṇu॒hi pū॒rdhi cakṣṷ-rmumu॒gdhya̭smā-nni॒dhayḙva ba॒ddhān || 91 ||
śanno̭ de॒vīra॒bhiṣṭa̭ya॒ āpo̭ bhavantu pī॒taye᳚ | śaṃ-yo~ra॒bhisra̭vantu naḥ || īśā̭nā॒ vāryā̭ṇā॒-ṅkṣaya̭ntīścarṣaṇī॒nām | a॒po yā̭cāmi bheṣa॒jam ||
su॒mi॒trā na॒ āpa॒ oṣa̭dhaya-ssantu durmi॒trāstasmai̭ bhūyāsu॒-ryo᳚-'smān-dveṣṭi॒ yañca̭ va॒ya-ndvi॒ṣmaḥ ||
āpo॒ hi ṣṭhā ma̭yo॒bhuva॒stā na̭ ū॒rje da̭dhātana | ma॒he raṇā̭ya॒ cakṣa̭se || yo vaḥ̭ śi॒vata̭mo॒ rasa॒stasya̭ bhājayate॒ha naḥ̭ | u॒śa॒tīri̭va mā॒taraḥ̭ ||
tasmā॒ ara̭-ṅgamāma vo॒ yasya॒ kṣayā̭ya॒ jinva̭tha || 92 ||
āpo̭ ja॒naya̭thā ca naḥ ||
pṛ॒thi॒vī śā॒ntā sā-'gninā̭ śā॒ntā sā mḙ śā॒ntā śucagṃ̭ śamayatu || a॒ntari̭kṣagṃ śā॒nta-nta-dvā॒yunā̭ śā॒nta-ntanmḙ śā॒ntagṃ śucagṃ̭ śamayatu |
dyau-śśā॒ntā sā-''di॒tyena̭ śā॒ntā sā mḙ śā॒ntā śucagṃ̭ śamayatu || pṛ॒thi॒vī śānti̭ra॒ntari̭kṣa॒gṃ॒ śānti॒-rdyau-śśānti॒-rdiśa॒-śśānti̭ ravāntaradi॒śā-śśānti̭ ra॒gni-śśānti̭-rvā॒yu-śśānti̭ rādi॒tya-śśānti̭
śca॒ndramā॒-śśānti॒-rnakṣa̭trāṇi॒ śānti॒ rāpa॒-śśānti॒ roṣa̭dhaya॒-śśānti॒-rvana॒spata̭ya॒-śśānti॒-rgau-śśānti̭ ra॒jā śānti॒ raśva॒-śśāntiḥ॒ purṷṣa॒-śśānti॒-rbrahma॒ śānti̭-rbrāhma॒ṇa-śśānti॒-śśānti̭re॒va śānti॒-śśānti̭rme astu॒ śāntiḥ̭ ||
tayā॒-'hagṃ śā॒ntyā sa̭rvaśā॒ntyā mahya̭-ndvi॒pade॒ catṷṣpade ca॒ śānti̭-ṅkaromi॒ śānti̭rme astu॒ śāntiḥ̭ ||
eha॒ śrīśca॒ hrīśca॒ dhṛti̭śca॒ tapo̭ me॒dhā pra̭ti॒ṣṭhā śra॒ddhā sa॒tya-ndharma̭ścai॒tāni॒ motti̭ṣṭhanta॒-manūtti̭ṣṭhantu॒ mā mā॒g॒ śrīśca॒ hrīśca॒ dhṛti̭śca॒ tapo̭ me॒dhā pra̭ti॒ṣṭhā śra॒ddhā sa॒tya-ndharma̭ścai॒tāni̭ mā॒ mā hā̭siṣuḥ ||
udāyṷṣā svā॒yuṣodoṣa̭dhīnā॒gṃ॒ rase॒no-tpa॒rjanya̭sya॒ śuṣme॒ṇoda̭sthā-ma॒mṛtā॒gṃ॒ anṷ || taccakṣṷ-rde॒vahi̭ta-mpu॒rastā᳚ cchu॒kramu॒ccara̭t |
paśyḙma śa॒radaḥ̭ śa॒ta-ñjīvḙma śa॒radaḥ̭ śa॒ta-nnandā̭ma śa॒radaḥ̭ śa॒ta-mmodā̭ma śa॒radaḥ̭ śa॒ta-mbhavā̭ma śa॒radaḥ̭ śa॒tagṃ śṛ॒ṇavā̭ma śa॒radaḥ̭ śa॒ta-mprabra̭vāma śa॒radaḥ̭ śa॒ta majī̭tā-ssyāma śa॒radaḥ̭ śa॒ta-ñjyokca॒ sūrya̭-ndṛ॒śe || 93 ||
ya uda̭gā-nmaha॒to-'rṇavā᳚-dvi॒bhrāja̭māna-ssari॒rasya॒ maddhyā॒thsa mā̭ vṛṣa॒bho lo̭hitā॒kṣa-ssūryo̭ vipa॒ści-nmana̭sā punātu || brahma̭ṇa॒-śścota̭nyasi॒ brahma̭ṇa ā॒ṇī stho॒ brahma̭ṇa ā॒vapa̭namasi dhāri॒teya-mpṛ̭thi॒vī brahma̭ṇā ma॒hī dhā̭ri॒tamḙnena ma॒hada॒ntari̭kṣa॒-ndiva̭-ndādhāra pṛthi॒vīgṃ sadḙvāṃ॒-ya~da॒haṃ-ve~da॒ tada॒ha-ndhā̭rayāṇi॒ mā madvedo-'dhi॒ visra̭sat || me॒dhā॒ma॒nī॒ṣe mā-''vi̭śatāgṃ sa॒mīcī̭ bhū॒tasya॒ bhavya॒syāva̭ruddhyai॒ sarva॒māyṷrayāṇi॒
sarva॒māyṷrayāṇi || ā॒bhi-rgī॒rbhi-ryadato̭ na ū॒namāpyā̭yaya harivo॒ vardha̭mānaḥ |
ya॒dā sto॒tṛbhyo॒ mahi̭ go॒trā ru॒jāsi̭ bhūyiṣṭha॒bhājo॒ adha̭ te syāma || brahma॒ prāvā̭diṣma॒ tanno॒ mā hā̭sīt || oṃ śānti॒-śśānti॒-śśāntiḥ̭ || 94 ||
(pa॒rā॒vato̭-dadhātu-ba॒ddhān-jinva̭tha-dṛ॒śe-+sa॒pta ca̭) (a. 42)
(namo̭ - yu॒ñjate॒ - vṛṣṇo॒ aśva̭sya॒ - brahma̭-nprava॒rgyḙṇa॒ - brahma॒-npraca̭riṣyāmo॒ - daśa॒ prācī॒ - rapa̭śyaṅgo॒pām - de॒vasya̭ - samu॒drā - ye॒ṣe pī̭pihi॒ - gharma॒ yā tḙ - mahī॒nā-ñca॒tvā - ryaskā॒n॒. - yā pu॒rastā᳚-thsa॒pta sa̭pta - prā॒ṇāya॒ trīṇi̭ - pū॒ṣṇe ca॒tvā-ryu - da॒syaikā̭daśa॒ - yāstḙ sa॒ptā - gni-rdhru॒vasīḥ॒ daikā॒nna vigṃ̭śati॒--r bhūrū॒rdhva stri॒gṃ॒śata-d- bhū-rmayi॒ ṣoḍa̭śa॒ - yāstḙ gho॒rā nava॒ - snikcā॒ṣṭau - dhuni̭śca॒ dve - u॒graśca॒ trīṇya̭ - horā॒tre pañca॒ - kha-ṭtrīṇi॒ - vigā-ssa॒ptada॒śā - sṛ̭-nmukha-śca॒tvāri॒ - yade॒ta-dvṛ̭ka॒saḥ pañca॒ - yadī̭ṣi॒ta śca॒tvāri॒ - dīrgha̭mukhi॒ trīṇī॒ - tthā cca॒tvāri॒ - yade॒ta-dbhū॒tāni॒ ṣaṭ - pra॒sārya॒ trīṇya - tri̭ṇā॒ daśā- ha॒rāva̭dya॒ - brahma̭ṇā॒ ṣaṭ-thṣaḍ - uttṷdā॒ṣṭau - bhū-ṣṣaṭ - pṛ̭thi॒vya̭ṣṭa ṣa̭ṣṭiḥ॒ - śannaḥ̭ sa॒ptapa̭ñcā॒śa-ddvica̭tvārigṃśat )
(namo̭ vā॒ce - brahma̭-nprava॒rgyḙṇa॒ - mayi॒ ru - ga॒ntari̭kṣeṇa - pi॒tā no̭-'si - mahī॒nā - mupa̭ no॒ - yade॒ta-d- bhū--r dyū॒bhi ścatṷ-rnavatiḥ)
|| hariḥ̭ om ||
|| kṛṣṇa yajurvedīya taittirīya āraṇyake caturthaḥ prapāṭhaka-ssamāptaḥ ||
Sanskrit — Devanagari (original)
कृष्ण यजुर्वेदीय तैत्तिरीय आरण्यके चतुर्थः प्रपाठकः - प्रवर्ग्य मन्त्राः
ओ-न्नमः परमात्मने, श्री महागणपतये नमः,
श्री गुरुभ्यो नमः । ह॒रिः॒ ओम् ॥
अनुवाकं 1
नमो॑ वा॒चे या चो॑दि॒ता या चानु॑दिता॒ तस्यै॑ वा॒चे नमो॒ नमो॑ वा॒चे नमो॑ वा॒चस्पत॑ये॒ नम॒ ऋषि॑भ्यो मन्त्र॒कृद्भ्यो॒ मन्त्र॑पतिभ्यो॒ मा मामृष॑यो मन्त्र॒कृतो॑ मन्त्र॒पत॑यः॒ परा॑दु॒र्मा-ऽहमृषी᳚-न्मन्त्र॒कृतो॑ मन्त्र॒पती॒-न्परा॑दां-वैँश्वदे॒वीं-वाँच॑मुद्यासग्ं शि॒वामद॑स्ता॒-ञ्जुष्टा᳚-न्दे॒वेभ्य॒-श्शर्म॑ मे॒ द्यौ-श्शर्म॑ पृथि॒वी शर्म॒ विश्व॑मि॒द-ञ्जग॑त् ।
शर्म॑ च॒न्द्रश्च॒ सूर्य॑श्च॒ शर्म॑ ब्रह्मप्रजाप॒ती ॥
भू॒तं-वँ॑दिष्ये॒ भुव॑नं-वँदिष्ये॒ तेजो॑ वदिष्ये॒ यशो॑ वदिष्ये॒ तपो॑ वदिष्ये॒ ब्रह्म॑ वदिष्ये स॒त्यं-वँ॑दिष्ये॒ तस्मा॑ अ॒हमि॒द-मु॑प॒स्तर॑ण॒-मुप॑स्तृण उप॒स्तर॑ण-म्मे प्र॒जायै॑ पशू॒ना-म्भू॑या-दुप॒स्तर॑णम॒ह-म्प्र॒जायै॑ पशू॒ना-म्भू॑यास॒-म्प्राणा॑पानौ मृ॒त्योर्मा॑ पात॒-म्प्राणा॑पानौ॒ मा मा॑ हासिष्ट॒-म्मधु॑ मनिष्ये॒ मधु॑ जनिष्ये॒ मधु॑ वक्ष्यामि॒ मधु॑ वदिष्यामि॒ मधु॑मती-न्दे॒वेभ्यो॒ वाच॑मुद्यासग्ं शुश्रू॒षेण्या᳚-म्मनु॒ष्ये᳚भ्य॒स्त-म्मा॑ दे॒वा अ॑वन्तु शो॒भायै॑ पि॒तरो-ऽनु॑मदन्तु ॥
ॐ शान्ति॒-श्शान्ति॒-श्शान्तिः॑ ॥ 1 ॥ (अ. 1)
अनुवाकं 2
यु॒ञ्जते॒ मन॑ उ॒त यु॑ञ्जते॒ धियः॑ । विप्रा॒ विप्र॑स्य बृह॒तो वि॑प॒श्चितः॑ । वि होत्रा॑ दधे वयुना॒विदेक॒ इत् । म॒ही दे॒वस्य॑ सवि॒तुः परि॑ष्टुतिः ॥ दे॒वस्य॑ त्वा सवि॒तुः प्र॑स॒वे । अ॒श्विनो᳚-र्बा॒हुभ्या᳚म् ।
पू॒ष्णो हस्ता᳚भ्या॒माद॑दे ॥ अभ्रि॑रसि॒ नारि॑रसि ।
अ॒द्ध्व॒र॒कृ-द्दे॒वेभ्यः॑ । उत्ति॑ष्ठ ब्रह्मणस्पते ॥ 2 ॥
दे॒व॒यन्त॑स्त्वेमहे । उप॒ प्रय॑न्तु म॒रुतः॑ सु॒दान॑वः । इन्द्र॑ प्रा॒शूर्भ॑वा॒ सचा᳚ ॥ प्रैतु॒ ब्रह्म॑ण॒स्पतिः॑ । प्र दे॒व्ये॑तु सू॒नृता᳚ ।
अच्छा॑ वी॒रन्नर्य॑-म्प॒ङ्क्तिरा॑धसम् । दे॒वा य॒ज्ञन्न॑यन्तु नः ॥ देवी᳚ द्यावापृथिवी॒ अनु॑ मे मग्ंसाथाम् । ऋ॒द्ध्यास॑म॒द्य । म॒खस्य॒ शिरः॑ ॥ 3 ॥
म॒खाय॑ त्वा । म॒खस्य॑ त्वा शी॒र्ष्णे ॥ इय॒त्यग्र॑ आसीः ।
ऋ॒द्ध्यास॑म॒द्य । म॒खस्य॒ शिरः॑ । म॒खाय॑ त्वा । म॒खस्य॑ त्वा शी॒र्ष्णे ॥ देवी᳚-र्वम्रीर॒स्य भू॒तस्य॑ प्रथमजा ऋतावरीः ॥ ऋ॒द्ध्यास॑म॒द्य । म॒खस्य॒ शिरः॑ ॥ 4 ॥
म॒खाय॑ त्वा । म॒खस्य॑ त्वा शी॒र्ष्णे ॥ इन्द्र॒स्यौजो॑-ऽसि ।
ऋ॒द्ध्यास॑म॒द्य । म॒खस्य॒ शिरः॑ । म॒खाय॑ त्वा । म॒खस्य॑ त्वा शी॒र्ष्णे ॥ अ॒ग्नि॒जा अ॑सि प्र॒जाप॑ते॒ रेतः॑ । ऋ॒द्ध्यास॑म॒द्य । म॒खस्य॒ शिरः॑ ॥ 5 ॥
म॒खाय॑ त्वा । म॒खस्य॑ त्वा शी॒र्ष्णे ॥ आयु॑-र्धेहि प्रा॒ण-न्धे॑हि । अ॒पा॒न-न्धे॑हि व्या॒न-न्धे॑हि । चक्षु॑-र्धेहि॒ श्रोत्र॑-न्धेहि । मनो॑ धेहि॒ वाच॑-न्धेहि । आ॒त्मान॑-न्धेहि प्रति॒ष्ठा-न्धे॑हि ।
मा-न्धे॑हि॒ मयि॑ धेहि ॥ मधु॑ त्वा मधु॒ला क॑रोतु ।
म॒खस्य॒ शिरो॑-ऽसि ॥ 6 ॥
य॒ज्ञस्य॑ प॒दे स्थः॑ । गा॒य॒त्रेण॑ त्वा॒ छन्द॑सा करोमि । त्रैष्टु॑भेन त्वा॒ छन्द॑सा करोमि । जाग॑तेन त्वा॒ छन्द॑सा करोमि ॥ म॒खस्य॒ रास्ना॑-ऽसि । अदि॑तिस्ते॒ बिल॑ङ्गृह्णातु । पाङ्क्ते॑न॒ छन्द॑सा ।
सूर्य॑स्य॒ हर॑सा श्राय । म॒खो॑-ऽसि ॥ 7 ॥
(प॒ते॒ - शिर॑ - ऋतावरीर्-ऋद्ध्यास॑म॒द्य म॒खस्य॒ शिरः॒ - शिरः॒ - शिरो॑-ऽसि॒ - +नव॑ च) (अ. 2)
(इय॑ति॒ देवी॒रिन्द्र॒स्यौजो᳚-ऽस्यग्नि॒जा अ॒स्यायु॑र्धेहि प्रा॒ण-म्पञ्च॑)
अनुवाकं 3
वृष्णो॒ अश्व॑स्य नि॒ष्पद॑सि । वरु॑णस्त्वा धृ॒तव्र॑त॒ आधू॑पयतु । मि॒त्रावरु॑णयोर्
ध्रु॒वेण॒ धर्म॑णा ॥ अ॒र्चिषे᳚ त्वा । शो॒चिषे᳚ त्वा ।
ज्योति॑षे त्वा । तप॑से त्वा ॥ अ॒भीम-म्म॑हि॒ना दिव᳚म् ।
मि॒त्रो ब॑भूव स॒प्रथाः᳚ । उ॒त श्रव॑सा पृथि॒वीम् ॥ 8 ॥
मि॒त्रस्य॑ चर्षणी॒धृतः॑ ।
श्रवो॑ दे॒वस्य॑ सान॒सिम् । द्यु॒म्नञ्चि॒त्रश्र॑वस्तमम् ॥ सिद्ध्यै᳚ त्वा । दे॒वस्त्वा॑ सवि॒तोद्व॑पतु ।
सु॒पा॒णि-स्स्व॑ङ्गु॒रिः । सु॒बा॒हुरु॒त शक्त्या᳚ ॥ अप॑द्यमानः पृथि॒व्याम् । आशा॒ दिश॒ आ पृ॑ण । उत्ति॑ष्ठ बृ॒ह-न्भ॑व ॥ 9 ॥
ऊ॒र्ध्वस्ति॑ष्ठ ध्रु॒वस्त्वम् ॥ सूर्य॑स्य त्वा॒ चक्षु॒षा-ऽन्वी᳚क्षे । ऋ॒जवे᳚ त्वा । सा॒धवे᳚ त्वा । सु॒क्षि॒त्यै त्वा॒ भूत्यै᳚ त्वा ॥
इ॒दम॒हम॒मुमा॑मुष्याय॒णं-विँ॒शा प॒शुभि॑-र्ब्रह्मवर्च॒सेन॒ पर्यू॑हामि ।
गा॒य॒त्रेण॑ त्वा॒ छन्द॒सा ऽऽच्छृ॑णद्मि । त्रैष्टु॑भेन त्वा॒ छन्द॒सा ऽऽच्छृ॑णद्मि ।
जाग॑तेन त्वा॒ छन्द॒सा ऽऽच्छृ॑णद्मि । छृ॒णत्तु॑ त्वा॒ वाक् । छृ॒णत्तु॒ त्वोर्क् । छृ॒णत्तु॑ त्वा ह॒विः ।
छृ॒न्धि वाच᳚म् । छृ॒न्ध्यूर्ज᳚म् । छृ॒न्धि ह॒विः ॥
देव॑ पुरश्चर स॒घ्यास॑न्त्वा ॥ 10 ॥
(पृ॒थि॒वीम् - भ॑व॒ - वा-ख्षट्च॑) (अ. 3)
अनुवाकं 4
ब्रह्म॑-न्प्रव॒र्ग्ये॑ण॒ प्रच॑रिष्यामः ।
होत॑-र्घ॒र्मम॒भिष्टु॑हि । अग्नी॒द्रौहि॑णौ पुरो॒डाशा॒वधि॑श्रय । प्रति॑प्रस्थात॒र्विह॑र ।
प्रस्तो॑त॒-स्सामा॑नि गाय ॥ यजु॑र्युक्त॒ग्ं॒ साम॑भि॒राक्त॑खन्त्वा । विश्वै᳚-र्दे॒वैरनु॑मत-म्म॒रुद्भिः॑ । दक्षि॑णाभिः॒ प्रत॑त-म्पारयि॒ष्णुम् ।
स्तुभो॑ वहन्तु सुमन॒स्यमा॑नम् । स नो॒ रुच॑न्धे॒ह्यहृ॑णीयमानः । भूर्भुव॒स्सुवः॑ ।
ओमिन्द्र॑वन्तः॒ प्रच॑रत ॥ 11 ॥
(अहृ॑णीयमानो॒ द्वे च॑) (अ. 4)
अनुवाकं 5
ब्रह्म॒-न्प्रच॑रिष्यामः । होत॑-र्घ॒र्मम॒भिष्टु॑हि ॥ य॒माय॑ त्वा म॒खाय॑ त्वा । सूर्य॑स्य॒ हर॑से त्वा ॥ प्रा॒णाय॒ स्वाहा᳚ व्या॒नाय॒ स्वाहा॑ ऽपा॒नाय॒ स्वाहा᳚ ।
चक्षु॑षे॒ स्वाहा॒ श्रोत्रा॑य॒ स्वाहा᳚ । मन॑से॒ स्वाहा॑ वा॒चे सर॑स्वत्यै॒ स्वाहा᳚ । दक्षा॑य॒ स्वाहा॒ क्रत॑वे॒ स्वाहा᳚ । ओज॑से॒ स्वाहा॒ बला॑य॒ स्वाहा᳚ ॥
दे॒वस्त्वा॑ सवि॒ता मद्ध्वा॑-ऽनक्तु ॥ 12 ॥
पृ॒थि॒वी-न्तप॑सस्त्रायस्व । अ॒र्चिर॑सि शो॒चिर॑सि॒ ज्योति॑रसि॒ तपो॑-ऽसि । सग्ंसी॑दस्व म॒हाग्ं अ॑सि । शोच॑स्व देव॒वीत॑मः । वि धू॒मम॑ग्ने अरु॒ष-म्मि॑येद्ध्य । सृ॒ज प्र॑शस्त दर्श॒तम् ॥
अ॒ञ्जन्ति॒ य-म्प्र॒थय॑न्तो॒ न विप्राः᳚ । व॒पाव॑न्त॒न्नाग्निना॒ तप॑न्तः ।
पि॒तुर्न पु॒त्र उप॑सि॒ प्रेष्ठः॑ । आ घ॒र्मो अ॒ग्निमृ॒तय॑न्नसादीत् ॥ 13 ॥
अ॒ना॒धृ॒ष्या पु॒रस्ता᳚त् । अ॒ग्नेराधि॑पत्ये ।
आयु॑र्मे दाः । पु॒त्रव॑ती दक्षिण॒तः । इन्द्र॒स्याधि॑पत्ये । प्र॒जा-म्मे॑ दाः । सु॒षदा॑ प॒श्चात् । दे॒वस्य॑ सवि॒तुराधि॑पत्ये । प्रा॒ण-म्मे॑ दाः । आश्रु॑तिरुत्तर॒तः ॥ 14 ॥
मि॒त्रावरु॑णयो॒राधि॑पत्ये । श्रोत्र॑-म्मे दाः । विधृ॑तिरु॒परि॑ष्टात् । बृह॒स्पते॒राधि॑पत्ये ।
ब्रह्म॑ मे दाः, क्ष॒त्र-म्मे॑ दाः । तेजो॑ मे धा॒ वर्चो॑ मे धाः । यशो॑ मे धा॒ स्तपो॑ मे धाः ।
मनो॑ मे धाः ॥ मनो॒रश्वा॑-ऽसि॒ भूरि॑पुत्रा ।
विश्वा᳚भ्यो मा ना॒ष्ट्राभ्यः॑ पाहि ॥ 15 ॥
सू॒प॒सदा॑ मे भूया॒ मा मा॑ हिग्ंसीः ॥ तपो॒ ष्व॑ग्ने॒ अन्त॑राग्ं अ॒मित्रान्॑ ।
तपा॒शग्ंस॑मर॒रुषः॒ पर॑स्य । तपा॑ वसो चिकिता॒नो अ॒चित्तान्॑ । वि ते॑ तिष्ठन्ताम॒जरा॑ अ॒यासः॑ ॥ चितः॑ स्थ परि॒चितः॑ । स्वाहा॑ म॒रुद्भिः॒ परि॑श्रयस्व । मा अ॑सि । प्र॒मा अ॑सि । प्र॒ति॒मा अ॑सि ॥ 16 ॥
स॒म्मा अ॑सि । वि॒मा अ॑सि । उ॒न्मा अ॑सि । अ॒न्तरि॑क्षस्यान्त॒र्धिर॑सि ॥
दिव॒न्तप॑सस्त्रायस्व । आ॒भि-र्गी॒र्भि-र्यदतो॑ न ऊ॒नम् ।
आप्या॑यय हरिवो॒ वर्ध॑मानः । य॒दा स्तो॒तृभ्यो॒ महि॑ गो॒त्रा रु॒जासि॑ । भू॒यि॒ष्ठ॒भाजो॒ अध॑ ते स्याम ॥ शु॒क्रन्ते॑ अ॒न्य-द्य॑ज॒तन्ते॑ अ॒न्यत् ॥ 17 ॥
विषु॑रूपे॒ अह॑नी॒ द्यौरि॑वासि । विश्वा॒ हि मा॒या अव॑सि स्वधावः । भ॒द्रा ते॑ पूषन्नि॒ह रा॒तिर॑स्तु ॥ अर्ह॑-न्बिभर्षि॒ साय॑कानि॒ धन्व॑ । अर्ह॑न्नि॒ष्कं-यँ॑ज॒तं-विँ॒श्वरू॑पम् । अर्ह॑न्नि॒द-न्द॑यसे॒ विश्व॒-मब्भु॑वम् । न वा ओजी॑यो रुद्र॒ त्वद॑स्ति ॥ गा॒य॒त्रम॑सि । त्रैष्टु॑भमसि । जाग॑तमसि । मधु॒ मधु॒ मधु॑ ॥ 18 ॥
(अ॒न॒ - क्त्व॒सा॒दी॒ - दु॒त्त॒र॒तः - पा॑हि - प्रति॒मा अ॑सि - यज॒तन्ते॑ अ॒न्यज् - जाग॑तम॒स्येक॑-ञ्च) (अ. 5)
अनुवाकं 6
दश॒ प्राची॒र्दश॑ भासि दक्षि॒णा । दश॑ प्र॒तीची॒र्दश॑ भा॒स्युदी॑चीः । दशो॒र्ध्वा भा॑सि सुमन॒स्यमा॑नः । स नो॒ रुच॑न्धे॒ह्यहृ॑णीयमानः ॥
अ॒ग्निष्ट्वा॒ वसु॑भिः पु॒रस्ता᳚-द्रोचयतु गाय॒त्रेण॒ छन्द॑सा । स मा॑ रुचि॒तो रो॑चय ॥ इन्द्र॑स्त्वा रु॒द्रै-र्द॑क्षिण॒तो रो॑चयतु॒ त्रैष्टु॑भेन॒ छन्द॑सा ।
स मा॑ रुचि॒तो रो॑चय । वरु॑णस्त्वा-ऽऽदि॒त्यैः प॒श्चा-द्रो॑चयतु॒ जाग॑तेन॒ छन्द॑सा ।
स मा॑ रुचि॒तो रो॑चय ॥ 19 ॥
द्यु॒ता॒नस्त्वा॑ मारु॒तो म॒रुद्भि॑रुत्तर॒तो रो॑चय॒त्वानु॑ष्टुभेन॒ छन्द॑सा । स मा॑ रुचि॒तो रो॑चय । बृह॒स्पति॑स्त्वा॒ विश्वै᳚-र्दे॒वैरु॒परि॑ष्टा-द्रोचयतु॒ पाङ्क्ते॑न॒ छन्द॑सा । स मा॑ रुचि॒तो रो॑चय ॥ रो॒चि॒तस्त्व-न्दे॑व घर्म दे॒वेष्वसि॑ ।
रो॒चि॒षी॒याह-म्म॑नु॒ष्ये॑षु ॥
सम्रा᳚ड् घर्म रुचि॒तस्त्वं ए॒वेष्वायु॑ष्माग्स्तेज॒स्वी ब्र॑ह्मवर्च॒स्य॑सि । रु॒चि॒तो॑-ऽह-म्म॑नु॒ष्ये᳚ष्वायु॑ष्माग्-स्तेज॒स्वी ब्र॑ह्मवर्च॒सी भू॑यासम् ॥ रुग॑सि । रुच॒-म्मयि॑ धेहि ॥ 20 ॥
मयि॒ रुक् ॥ दश॑ पु॒रस्ता᳚-द्रोचसे । दश॑ दक्षि॒णा । दश॑ प्र॒त्यम्म् । दशोदङ्ङ्॑ । दशो॒र्ध्वो भा॑सि सुमन॒स्यमा॑नः । स नः॑ सम्रा॒डिष॒मूर्ज॑-न्धेहि । वा॒जी वा॒जिने॑ पवस्व । रो॒चि॒तो घ॒र्मो रु॑ची॒य ॥ 21 ॥
(रो॒च॒य॒ - धे॒हि॒ - +नव॑ च) (अ. 6)
अनुवाकं 7
अप॑श्यङ्गो॒पामनि॑पद्यमानम् । आ च॒ परा॑ च प॒थिभि॒श्चर॑न्तम् । स स॒द्ध्रीची॒-स्स विषू॑ची॒र्वसा॑नः । आ व॑रीवर्ति॒ भुव॑नेष्व॒न्तः ॥ अत्र॑ प्रा॒वीः । मधु॒ माद्ध्वी᳚भ्या॒-म्मधु॒ माधू॑चीभ्याम् । अनु॑ वा-न्दे॒ववी॑तये ॥ सम॒ग्निर॒ग्निना॑ गत । स-न्दे॒वेन॑ सवि॒त्रा । सग्ं सूर्ये॑ण रोचते ॥ 22 ॥
स्वाहा॒ सम॒ग्निस्तप॑सा गत । स-न्दे॒वेन॑ सवि॒त्रा ।
सग्ं सूर्ये॑णारोचिष्ट ॥ ध॒र्ता दि॒वो विभा॑सि॒ रज॑सः । पृ॒थि॒व्या ध॒र्ता । उ॒रोर॒न्तरि॑क्षस्य ध॒र्ता । ध॒र्ता दे॒वो दे॒वाना᳚म् । अम॑र्त्यस्तपो॒जाः ॥ हृ॒दे त्वा॒ मन॑से त्वा । दि॒वे त्वा॒ सूर्या॑य त्वा ॥ 23 ॥
ऊ॒र्ध्वमि॒म-म॑द्ध्व॒रङ्कृ॑धि । दि॒वि दे॒वेषु॒ होत्रा॑ यच्छ ॥ विश्वा॑सा-म्भुवा-म्पते । विश्व॑स्य भुवनस्पते । विश्व॑स्य मनसस्पते । विश्व॑स्य वचसस्पते । विश्व॑स्य तपसस्पते । विश्व॑स्य ब्रह्मणस्पते । दे॒व॒श्रूस्त्वन्दे॑व घर्म दे॒वा-न्पा॑हि ॥ त॒पो॒जां-वाँच॑म॒स्मे निय॑च्छ देवा॒युव᳚म् ॥ 24 ॥
गर्भो॑ दे॒वाना᳚म् ॥ पि॒ता म॑ती॒नाम् ॥
पतिः॑ प्र॒जाना᳚म् ॥ मतिः॑ कवी॒नाम् ॥
सन्दे॒वो दे॒वेन॑ सवि॒त्रा-ऽय॑तिष्ट । सग्ं सूर्ये॑णारुक्त ॥ आ॒यु॒र्दास्त्वम॒स्मभ्य॑-ङ्घर्म वर्चो॒दा अ॑सि ॥ पि॒ता नो॑-ऽसि पि॒ता नो॑ बोध ॥ आ॒यु॒र्धास्त॑नू॒धाः प॑यो॒धाः ।
व॒र्चो॒दा व॑रिवो॒दा द्र॑विणो॒दाः ॥ 25 ॥
अ॒न्त॒रि॒क्ष॒प्र॒ उ॒रोर्वरी॑यान् । अ॒शी॒महि॑ त्वा॒ मा मा॑ हिग्ंसीः ॥ त्वम॑ग्ने गृ॒हप॑ति-र्वि॒शाम॑सि । विश्वा॑सा॒-म्मानु॑षीणाम् । श॒त-म्पू॒र्भिर्य॑विष्ठ पा॒ह्यग्ंह॑सः । स॒मे॒द्धारग्ं॑ श॒तग्ं हिमाः᳚ ।
त॒-न्द्रा॒विणग्ं॑ हार्दिवा॒नम् । इ॒हैव रा॒तयः॑ सन्तु ॥ त्वष्टी॑मती ते सपेय । सु॒रेता॒ रेतो॒ दधा॑ना ।
वी॒रं-विँ॑देय॒ तव॑ स॒न्दृशि॑ ।
मा-ऽहग्ं रा॒यस्पोषे॑ण॒ वि यो॑षम् ॥ 26 ॥
(रो॒च॒ते॒-सूर्य॑य त्वा - देवा॒युवं॑ - द्रविणो॒दा - दधा॑ना॒ द्वे च॑) (अ. 7)
अनुवाकं 8
दे॒वस्य॑ त्वा सवि॒तुः प्र॑स॒वे । अ॒श्विनो᳚-र्बा॒हुभ्या᳚म् ।
पू॒ष्णो हस्ता᳚भ्या॒मा द॑दे ॥ अदि॑त्यै॒ रास्ना॑-ऽसि । इड॒ एहि॑ । अदि॑त॒ एहि॑ । सर॑स्व॒त्येहि॑ । असा॒वेहि॑ ।
असा॒वेहि॑ । असा॒वेहि॑ ॥ 27 ॥
अदि॑त्या उ॒ष्णीष॑मसि । वा॒युर॑स्यै॒डः । पू॒षा त्वो॒पाव॑सृजतु । अ॒श्विभ्या॒-म्प्र दा॑पय । यस्ते॒ स्तनः॑ शश॒यो यो म॑यो॒भूः । येन॒ विश्वा॒ पुष्य॑सि॒ वार्या॑णि । यो र॑त्न॒धा व॑सु॒विद्य-स्सु॒दत्रः॑ ।
सर॑स्वति॒ तमि॒ह धात॑वे-ऽकः ॥ उस्र॑ घ॒र्मग्ं शिग्ं॑ष । उस्र॑ घ॒र्म-म्पा॑हि ॥ 28 ॥
घ॒र्माय॑ शिग्ंष । बृह॒स्पति॒स्त्वोप॑सीदतु । दान॑व-स्स्थ॒ पेर॑वः । वि॒ष्व॒ग्वृतो॒ लोहि॑तेन । अ॒श्विभ्या᳚-म्पिन्वस्व । सर॑स्वत्यै पिन्वस्व ।
पू॒ष्णे पि॑न्वस्व । बृह॒स्पत॑ये पिन्वस्व । इन्द्रा॑य पिन्वस्व । इन्द्रा॑य पिन्वस्व ॥ 29 ॥
गा॒य॒त्रो॑-ऽसि । त्रैष्टु॑भो-ऽसि । जाग॑तमसि । स॒होर्जो भा॒गेनोप॒ मेहि॑ । इन्द्रा᳚श्विना॒ मधु॑न-स्सार॒घस्य॑ । घ॒र्म-म्पा॑त वसवो॒ यज॑ता॒ वट् । स्वाहा᳚ त्वा॒ सूर्य॑स्य र॒श्मये॑ वृष्टि॒वन॑ये जुहोमि । मधु॑ ह॒विर॑सि । सूर्य॑स्य॒ तप॑स्तप । द्यावा॑पृथि॒वीभ्या᳚-न्त्वा॒ परि॑गृह्णामि ॥ 30 ॥
अ॒न्तरि॑क्षेण॒ त्वोप॑यच्छामि । दे॒वाना᳚-न्त्वा पितृ॒णामनु॑मतो॒ भर्तुग्ं॑ शकेयम् । तेजो॑-ऽसि ।
तेजो-ऽनु॒प्रेहि॑ । दि॒वि॒स्पृम्मा मा॑ हिग्ंसीः ।
अ॒न्त॒रि॒क्ष॒स्पृम्मा मा॑ हिग्ंसीः । पृ॒थि॒वि॒स्पृम्मा मा॑ हिग्ंसीः ।
सुव॑रसि॒ सुव॑र्मे यच्छ ।
दिवं॑-यँच्छ दि॒वो मा॑ पाहि ॥ 31 ॥
(एहि॑ - पाहि - पिन्वस्व - गृह्णामि॒ - +नव॑ च) (अ. 8)
अनुवाकं 9
स॒मु॒द्राय॑ त्वा॒ वाता॑य॒ स्वाहा᳚ । स॒लि॒लाय॑ त्वा॒ वाता॑य॒ स्वाहा᳚ । अ॒ना॒धृ॒ष्याय॑ त्वा॒ वाता॑य॒ स्वाहा᳚ । अ॒प्र॒ति॒धृ॒ष्याय॑ त्वा॒ वाता॑य॒ स्वाहा᳚ ।
अ॒व॒स्यवे᳚ त्वा॒ वाता॑य॒ स्वाहा᳚ । दुव॑स्वते त्वा॒ वाता॑य॒ स्वाहा᳚ । शिमि॑द्वते त्वा॒ वाता॑य॒ स्वाहा᳚ । अ॒ग्नये᳚ त्वा॒ वसु॑मते॒ स्वाहा᳚ ।
सोमा॑य त्वा रु॒द्रव॑ते॒ स्वाहा᳚ ।
वरु॑णाय त्वा-ऽऽदि॒त्यव॑ते॒ स्वाहा᳚ ॥ 32 ॥
बृह॒स्पत॑ये त्वा वि॒श्वदे᳚व्यावते॒ स्वाहा᳚ ।
स॒वि॒त्रे त्व॑र्भु॒मते॑ विभु॒मते᳚ प्रभु॒मते॒ वाज॑वते॒ स्वाहा᳚ । य॒माय॒ त्वा-ऽङ्गि॑रस्वते पितृ॒मते॒ स्वाहा᳚ ॥ विश्वा॒ आशा॑ दक्षिण॒सत् । विश्वा᳚-न्दे॒वान॑याडि॒ह । स्वाहा॑कृतस्य घ॒र्मस्य॑ । मधोः᳚ पिबतमश्विना ।
स्वाहा॒-ऽग्नये॑ य॒ज्ञिया॑य । शं-यँजु॑र्भिः ॥
अश्वि॑ना घ॒र्म-म्पा॑तग्ं हार्दिवा॒नम् ॥ 33 ॥
अह॑-र्दि॒वाभि॑-रू॒तिभिः॑ । अनु॑ वा॒-न्द्यावा॑पृथि॒वी मग्ं॑साताम् । स्वाहेन्द्रा॑य ॥ स्वाहेन्द्रा॒वट् । घ॒र्मम॑पातमश्विना हार्दिवा॒नम् ।
अह॑-र्दि॒वाभि॑रू॒तिभिः॑ । अनु॑ वा॒-न्द्यावा॑पृथि॒वी अ॑मग्ंसाताम् । त-म्प्रा॒व्यं॑-यँथा॒ वट् । नमो॑ दि॒वे । नमः॑ पृथि॒व्यै ॥ 34 ॥
दि॒वि धा॑ इ॒मं-यँ॒ज्ञम् । य॒ज्ञमि॒म-न्दि॒वि धाः᳚ । दिव॑ङ्गच्छ । अ॒न्तरि॑क्षङ्गच्छ । पृ॒थि॒वीङ्ग॑च्छ । पञ्च॑ प्र॒दिशो॑ गच्छ । दे॒वा-न्घ॑र्म॒पा-न्ग॑च्छ । पि॒तॄ-न्घ॑र्म॒पा-न्ग॑च्छ ॥ 35 ॥
(आ॒दि॒त्यव॑ते॒ स्वाहा॑-हार्दिवा॒नम्-पृ॑थि॒व्या-+अ॒ष्टौ च॑) (अ. 9)
अनुवाकं 10
इ॒षे पी॑पिहि । ऊ॒र्जे पी॑पिहि । ब्रह्म॑णे पीपिहि । क्ष॒त्राय॑ पीपिहि । अ॒द्भ्यः पी॑पिहि । ओष॑धीभ्यः पीपिहि । वन॒स्पति॑भ्यः पीपिहि । द्यावा॑पृथि॒वीभ्या᳚-म्पीपिहि । सु॒भू॒ताय॑ पीपिहि । ब्र॒ह्म॒व॒र्च॒साय॑ पीपिहि ॥ 36 ॥
यज॑मानाय पीपिहि । मह्य॒ञ्ज्यैष्ठ्या॑य पीपिहि ॥ त्विष्यै᳚ त्वा । द्यु॒म्नाय॑ त्वा । इ॒न्द्रि॒याय॑ त्वा॒ भूत्यै᳚ त्वा । धर्मा॑-ऽसि सु॒धर्मा मे᳚ न्य॒स्मे । ब्रह्मा॑णि धारय । क्ष॒त्राणि॑ धारय । विश॑न्धारय ।
नेत्त्वा॒ वातः॑ स्क॒न्दया᳚त् ॥ 37 ॥
अ॒मुष्य॑ त्वा प्रा॒णे सा॑दयामि । अ॒मुना॑ स॒ह नि॑र॒र्थङ्ग॑च्छ । यो᳚-ऽस्मा-न्द्वेष्टि॑ ।
यञ्च॑ व॒य-न्द्वि॒ष्मः ॥ पू॒ष्णे शर॑से॒ स्वाहा᳚ ।
ग्राव॑भ्य॒-स्स्वाहा᳚ । प्र॒ति॒रेभ्य॒-स्स्वाहा᳚ । द्यावा॑पृथि॒वीभ्या॒ग्॒ स्वाहा᳚ ।
पि॒तृभ्यो॑ घर्म॒पेभ्य॒-स्स्वाहा᳚ ॥
रु॒द्राय॑ रु॒द्रहो᳚त्रे॒ स्वाहा᳚ ॥ 38 ॥
अह॒-र्ज्योतिः॑ के॒तुना॑ जुषताम् । सु॒ज्यो॒ति-र्ज्योति॑षा॒ग्॒ स्वाहा᳚ । रात्रि॒र्ज्योतिः॑ के॒तुना॑ जुषताम् । सु॒ज्यो॒ति-र्ज्योति॑षा॒ग्॒ स्वाहा᳚ । अपी॑परो॒ मा-ऽह्नो॒ रात्रि॑यै मा पाहि । ए॒षा ते॑ अग्ने स॒मित् । तया॒ समि॑द्ध्यस्व । आयु॑र्मे दाः । वर्च॑सा मा-ऽञ्जीः । अपी॑परो मा॒ रात्रि॑या॒ अह्नो॑ मा पाहि ॥ 39 ॥
ए॒षा ते॑ अग्ने स॒मित् । तया॒ समि॑द्ध्यस्व । आयु॑र्मे दाः । वर्च॑सा मा-ऽञ्जीः । अ॒ग्नि-र्ज्योति॒-र्ज्योति॑र॒ग्नि-स्स्वाहा᳚ ।
सूर्यो॒ ज्योति॒-र्ज्योति॒-स्सूर्य॒-स्स्वाहा᳚ । भू-स्स्वाहा᳚ । हु॒तग्ं ह॒विः । मधु॑ ह॒विः । इन्द्र॑तमे॒-ऽग्नौ ॥ 40 ॥
पि॒ता नो॑-ऽसि॒ मा मा॑ हिग्ंसीः । अ॒श्याम॑ ते देवघर्म ।
मधु॑मतो॒ वाज॑वतः पितु॒मतः॑ । अङ्गि॑रस्वत-स्स्वधा॒विनः॑ । अ॒शी॒महि॑ त्वा॒ मा मा॑ हिग्ंसीः ॥ स्वाहा᳚ त्वा॒ सूर्य॑स्य र॒श्मिभ्यः॑ । स्वाहा᳚ त्वा॒ नक्ष॑त्रेभ्यः ॥ 41 ॥
(ब्र॒ह्म॒व॒र्च॒साय॑ पीपिहि - स्क॒न्दया᳚-द्- रु॒द्राय॑ रु॒द्रहो᳚त्रे॒ स्वाहा - ऽह्नो॑ मा पाह् - य॒ग्नौ - +स॒प्त च॑) (अ. 10)
अनुवाकं 11
घर्म॒ या ते॑ दि॒वि शुक् । या गा॑य॒त्रे छन्द॑सि । या ब्रा᳚ह्म॒णे । या ह॑वि॒र्धाने᳚ । तान्त॑ ए॒तेनाव॑यजे॒ स्वाहा᳚ ॥ घर्म॒ या ते॒-ऽन्तरि॑क्षे॒ शुक् ।
या त्रैष्टु॑भे॒ छन्द॑सि । या रा॑ज॒न्ये᳚ । या-ऽऽग्नी᳚द्ध्रे ।
तान्त॑ ए॒तेनाव॑यजे॒ स्वाहा᳚ ॥ 42 ॥
घर्म॒ या ते॑ पृथि॒व्याग्ं शुक् । या जाग॑ते॒ छन्द॑सि । या वैश्ये᳚ । या सद॑सि । तान्त॑ ए॒तेनाव॑यजे॒ स्वाहा᳚ ॥ अ॒ग्निश्च॑ हव्य॒वाह॑नो॒ भव॑ता-न्दा॒शुषे॒ मयः॑ ॥ अन्विद॑नुमते॒ त्व-म्मन्या॑सै॒ शञ्च॑नः कृधि । क्रत्वे॒ दक्षा॑य नो हिनु॒ प्रण॒ आयूग्ं॑षि तारिषः ॥ दि॒वस्त्वा॑ पर॒स्पायाः᳚ । अ॒न्तरि॑क्षस्य त॒नुवः॑ पाहि । पृ॒थि॒व्यास्त्वा॒ धर्म॑णा ॥ 43 ॥
व॒यमनु॑क्रामाम सुवि॒ताय॒ नव्य॑से ॥ ब्रह्म॑णस्त्वा पर॒स्पायाः᳚ । क्ष॒त्रस्य॑ त॒नुवः॑ पाहि । वि॒शस्त्वा॒ धर्म॑णा । व॒यमनु॑क्रामाम सुवि॒ताय॒ नव्य॑से ॥ प्रा॒णस्य॑ त्वा पर॒स्पायै᳚ । चक्षु॑षस्त॒नुवः॑ पाहि । श्रोत्र॑स्य त्वा॒ धर्म॑णा । व॒यमनु॑क्रामाम सुवि॒ताय॒ नव्य॑से ॥ व॒ल्गुर॑सि शं॒-युँधा॑याः ॥ 44 ॥
शिशु॒-र्जन॑धायाः ॥ शञ्च॒ वक्षि॒ परि॑ च॒ वक्षि॑ ।
चतुः॑ स्रक्ति॒र्नाभि॑र्-ऋ॒तस्य॑ । सदो॑ वि॒श्वायु॒-श्शर्म॑ स॒प्रथाः᳚ । अप॒ द्वेषो॒ अप॒ ह्वरः॑ । अ॒न्यद्व्र॑तस्य सश्चिम । घर्मै॒त-त्ते-ऽन्न॑मे॒त-त्पुरी॑षम् । तेन॒ वर्ध॑स्व॒ चा च॑ प्यायस्व । व॒र्धि॒षी॒महि॑ च व॒यम् । आ च॑ प्यासिषी॒महि॑ ॥ 45 ॥
रन्ति॒-र्नामा॑सि दि॒व्यो ग॑न्ध॒र्वः । तस्य॑ ते प॒द्वद्ध॑वि॒र्धान᳚म् । अ॒ग्निरद्ध्य॑क्षाः । रु॒द्रो-ऽधि॑पतिः ॥ सम॒हमायु॑षा । स-म्प्रा॒णेन॑ ।
सं-वँर्च॑सा । स-म्पय॑सा । सङ्गौ॑प॒त्येन॑ । सग्ं रा॒यस्पोषे॑ण ॥ 46 ॥
व्य॑सौ । यो᳚-ऽस्मा-न्द्वेष्टि॑ । यञ्च॑ व॒य-न्द्वि॒ष्मः ॥
अचि॑क्रद॒द्वृषा॒ हरिः॑ । म॒हा-न्मि॒त्रो न द॑र्श॒तः । सग्ं सूर्ये॑ण रोचते ॥ चिद॑सि समु॒द्रयो॑निः । इन्दु॒-र्दक्षः॑ श्ये॒न ऋ॒तावा᳚ । हिर॑ण्यपक्ष-श्शकु॒नो भु॑र॒ण्युः । म॒हान्-थ्स॒धस्थे᳚ ध्रु॒व आनिष॑त्तः ॥ 47 ॥
नम॑स्ते अस्तु॒ मा मा॑ हिग्ंसीः ॥ वि॒श्वाव॑सुग्ं सोम गन्ध॒र्वम् । आपो॑ ददृ॒शुषीः᳚ । तदृ॒तेना॒ व्या॑यन्न् । तद॒न्ववै᳚त् । इन्द्रो॑ रारहा॒ण आ॑साम् । परि॒ सूर्य॑स्य परि॒धीग्ं र॑पश्यत् ॥ वि॒श्वाव॑सुर॒भि तन्नो॑ गृणातु । दि॒व्यो ग॑न्ध॒र्वो रज॑सो वि॒मानः॑ ।
यद्वा॑ घा स॒त्यमु॒त यन्न वि॒द्म ॥ 48 ॥
धियो॑ हिन्वा॒नो धिय॒ इन्नो॑ अव्यात् ॥ सस्नि॑मविन्द॒च्चर॑णे न॒दीना᳚म् ।
अपा॑वृणो॒-द्दुरो॒ अश्म॑व्रजानाम् । प्रासा᳚-न्गन्ध॒र्वो अ॒मृता॑नि वोचत् । इन्द्रो॒ दक्ष॒-म्परि॑जानाद॒हीन᳚म् ॥ ए॒तत्त्व-न्दे॑व घर्म दे॒वो दे॒वानुपा॑गाः ।
इ॒दम॒ह-म्म॑नु॒ष्यो॑ मनु॒ष्यान्॑ । सोम॑पी॒थानु॒ मेहि॑ । स॒ह प्र॒जया॑ स॒ह रा॒यस्पोषे॑ण ॥
सु॒मि॒त्रा न॒ आप॒ ओष॑धय-स्सन्तु ॥ 49 ॥
दु॒र्मि॒त्रास्तस्मै॑ भूयासुः । यो᳚-ऽस्मा-न्द्वेष्टि॑ ।
यञ्च॑ व॒य-न्द्वि॒ष्मः ॥ उद्व॒य-न्तम॑स॒स्परि॒ पश्य॑न्तो॒ ज्योति॒रुत्त॑रम् । दे॒व-न्दे॑व॒त्रा सूर्य॒मग॑न्म॒ ज्योति॑रुत्त॒मम् ॥ उदु॒ त्य-ञ्जा॒तवे॑दस-न्दे॒वं-वँ॑हन्ति के॒तवः॑ । दृ॒शे विश्वा॑य॒ सूर्य᳚म् । चि॒त्र-न्दे॒वाना॒-मुद॑गा॒दनी॑क॒-ञ्चक्षु॑ र्मि॒त्रस्य॒ वरु॑णस्या॒-ऽग्नेः ॥ इ॒ममू॒ षु त्यम॒स्मभ्यग्ं॑ स॒निम् । गा॒य॒त्रन्नवी॑याग्ंसम् ।
अग्ने॑ दे॒वेषु॒ प्रवो॑चः ॥ 50 ॥
(या-ऽऽग्नी᳚द्ध्रे॒ तान्ता॑ ए॒तेनाव॑यजे॒ स्वाहा॒ - धर्म॑णा - शं॒-युँधा॑याः - प्यासिषी॒महि॒-पोषे॑ण॒-निष॑त्तो-वि॒द्म-स॑न्-+त्व॒ष्टौ च॑) (अ. 11)
अनुवाकं 12
म॒ही॒ना-म्पयो॑-ऽसि॒ विहि॑त-न्देव॒त्रा ।
ज्यो॒ति॒र्भा अ॑सि॒ वन॒स्पती॑ना॒मोष॑धीना॒ग्ं॒ रसः॑ ।
वा॒जिन॑-न्त्वा वा॒जिनो-ऽव॑ नयामः ।
ऊ॒र्ध्व-म्मनः॑ सुव॒र्गम् ॥ 51 ॥ (अ. 12)
अनुवाकं 13
अस्का॒-न्द्यौः पृ॑थि॒वीम् । अस्का॑नृष॒भो युवा॒ गाः ।
स्क॒न्नेमा विश्वा॒ भुव॑ना । स्क॒न्नो य॒ज्ञः प्रज॑नयतु ॥ अस्का॒नज॑नि॒ प्राज॑नि । आ स्क॒न्नाज्जा॑यते॒ वृषा᳚ ।
स्क॒न्ना-त्प्रज॑निषीमहि ॥ 52 ॥ (अ. 13)
अनुवाकं 14
या पु॒रस्ता᳚-द्वि॒द्युदाप॑तत् । तान्त॑ ए॒तेनाव॑ यजे॒ स्वाहा᳚ । या द॑क्षिण॒तः । या प॒श्चात् । योत्त॑र॒तः । योपरि॑ष्टा-द्वि॒द्युदाप॑तत् । तान्त॑ ए॒तेनाव॑ यजे॒ स्वाहा᳚ ॥ 53 ॥ (अ. 14)
अनुवाकं 15
प्रा॒णाय॒ स्वाहा᳚ व्या॒नाय॒ स्वाहा॑ ऽपा॒नाय॒ स्वाहा᳚ ।
चक्षु॑षे॒ स्वाहा॒ श्रोत्रा॑य॒ स्वाहा᳚ ।
मन॑से॒ स्वाहा॑ वा॒चे सर॑स्वत्यै॒ स्वाहा᳚ ॥ 54 ॥ (अ. 15)
अनुवाकं 16
पू॒ष्णे स्वाहा॑ पू॒ष्णे शर॑से॒ स्वाहा᳚ ।
पू॒ष्णे प्र॑प॒त्थ्या॑य॒ स्वाहा॑ पू॒ष्णे न॒रन्धि॑षाय॒ स्वाहा᳚ । पू॒ष्णे-ऽङ्घृ॑णये॒ स्वाहा॑ पू॒ष्णे न॒रुणा॑य॒ स्वाहा᳚ ।
पू॒ष्णे सा॑के॒ताय॒ स्वाहा᳚ ॥ 55 ॥ (अ. 16)
अनुवाकं 17
उद॑स्य॒ शुष्मा᳚-द्भा॒नुर्नार्त॒ बिभ॑र्ति । भा॒र-म्पृ॑थि॒वी न भूम॑ । प्र शु॒क्रैतु॑ दे॒वी म॑नी॒षा । अ॒स्म-थ्सुत॑ष्टो॒ रथो॒ न वा॒जी । अर्च॑न्त॒ एके॒ महि॒ साम॑ मन्वत । तेन॒ सूर्य॑मधारयन्न् ।
तेन॒ सूर्य॑मरोचयन्न् । घ॒र्म-श्शिर॒स्तद॒यम॒ग्निः ।
पुरी॑षमसि॒ सम्प्रि॑य-म्प्र॒जया॑ प॒शुभि॑र्भुवत् । प्र॒जापति॑स्त्वा सादयतु । तया॑ दे॒वत॑या ऽङ्गिर॒स्व-द्ध्रु॒वा सी॑द ॥ 56 ॥ (अ. 17)
अनुवाकं 18
यास्ते॑ अग्न आ॒र्द्रा योन॑यो॒ याः कु॑ला॒यिनीः᳚ ।
ये ते॑ अग्न॒ इन्द॑वो॒ या उ॒ नाभ॑यः । यास्ते॑ अग्ने त॒नुव॒ ऊर्जो॒ नाम॑ । ताभि॒स्त्वमु॒भयी॑भि-स्संविँदा॒नः । प्र॒जाभि॑रग्ने॒ द्रवि॑णे॒ह सी॑द ।
प्र॒जाप॑तिस्त्वा सादयतु । तया॑ दे॒वत॑या-ऽङ्गिर॒स्व-द्ध्रु॒वा सी॑द ॥ 57 ॥ (अ. 18)
अनुवाकं 19
अ॒ग्निर॑सि वैश्वान॒रो॑-ऽसि । सं॒वँ॒थ्स॒रो॑-ऽसि परिवथ्स॒रो॑-ऽसि । इ॒दा॒व॒थ्स॒रो॑-ऽसीदुवथ्स॒रो॑-ऽसि । इ॒द्व॒थ्स॒रो॑-ऽसि वथ्स॒रो॑-ऽसि । तस्य॑ ते वस॒न्त-श्शिरः॑ । ग्री॒ष्मो दक्षि॑णः प॒क्षः । व॒र्॒षाः पुच्छ᳚म् ।
श॒रदुत्त॑रः प॒क्षः । हे॒म॒न्तो मद्ध्य᳚म् । पू॒र्व॒प॒क्षाश्चित॑यः । अ॒प॒र॒प॒क्षाः पुरी॑षम् । अ॒हो॒रा॒त्राणीष्ट॑काः । तस्य॑ ते॒ मासा᳚श्चार्धमा॒साश्च॑ कल्पन्ताम् ।
ऋ॒तव॑स्ते कल्पन्ताम् । सं॒वँ॒थ्स॒रस्ते॑ कल्पताम् ।
अ॒हो॒रा॒त्राणि॑ ते कल्पन्ताम् । एति॒ प्रेति॒ वीति॒ समित्युदिति॑ ।
प्र॒जाप॑तिस्त्वा सादयतु । तया॑ दे॒वत॑या-ऽङ्गिर॒स्व-द्ध्रु॒वा सी॑द ॥ 58 ॥
(चित॑यो॒ नव॑ च) (अ. 19)
अनुवाकं 20
भूर्भुव॒स्सुवः॑ । ऊ॒र्ध्व ऊ॒ षुण॑ ऊ॒तये᳚ । ऊ॒र्ध्वो नः॑ पा॒ह्यग्ंह॑सः ॥
वि॒धुन्द॑द्रा॒णग्ं सम॑ने बहू॒नाम् । युवा॑न॒ग्ं॒ सन्त॑-म्पलि॒तो ज॑गार । दे॒वस्य॑ पश्य॒ काव्य॑-म्महि॒त्वा-ऽद्या म॒मार॑ । स ह्य॒-स्समा॑न ॥
यदृ॒ते चि॑दभि॒श्रिषः॑ । पु॒रा ज॒र्तृभ्य॑ आ॒तृदः॑ ।
सन्धा॑ता स॒न्धि-म्म॒घवा॑ पुरो॒वसुः॑ ॥ 59 ॥
निष्क॑र्ता॒ विह्रु॑त॒-म्पुनः॑ ॥ पुन॑रू॒र्जा नि व॑र्तस्व॒ पुन॑रग्न इ॒षा-ऽऽयु॑षा । पुन॑र्नः पाहि वि॒श्वतः॑ ॥ स॒ह र॒य्या नि व॑र्त॒स्वाग्ने॒ पिन्व॑स्व॒ धार॑या । वि॒श्वफ्स्नि॑या वि॒श्वत॒स्परि॑ ॥ मा नो॑ घर्म व्यथि॒तो वि॑व्यथो नः । मा नः॒ पर॒मध॑र॒म्मा रजो॑-ऽनैः । मोष्व॑स्माग् स्तम॑स्यन्त॒रा धाः᳚ । मा रु॒द्रिया॑सो अ॒भिगु॑र्वृ॒धानः॑ ॥ मा नः॒ क्रतु॑भिर्-हीडि॒तेभि॑र॒स्मान् । द्विषा॑ सुनीते॒ मा परा॑दाः ।
मा नो॑ रु॒द्रो निर्-ऋ॑ति॒र्मा नो॒ अस्ता᳚ ।
मा द्यावा॑पृथि॒वी ही॑डिषाताम् ॥ 60 ॥
उप॑ नो मित्रावरुणावि॒हाव॑तम् । अ॒न्वादी᳚द्ध्याथामि॒ह नः॑ सखाया । आ॒दि॒त्याना॒-म्प्रसि॑तिर्हे॒तिः । उ॒ग्रा श॒तापा᳚ष्ठा घ॒ विषा॒ परि॑णो वृणक्तु ॥
इ॒म-म्मे॑ वरुण श्रुधी॒ हव॑म॒द्या च॑ मृडय । त्वाम॑व॒स्युरा च॑के ॥ तत्त्वा॑ यामि॒ ब्रह्म॑णा॒ वन्द॑मान॒-स्तदा शा᳚स्ते॒ यज॑मानो ह॒विर्भिः॑ । अहे॑डमानो वरुणे॒ह बो॒द्ध्युरु॑शग्ंस॒ मा न॒ आयुः॒ प्रमो॑षीः ॥ त्व-न्नो॑ अग्ने॒ वरु॑णस्य वि॒द्वा-न्दे॒वस्य॒ हेडो-ऽव॑ यासि सीष्ठाः । यजि॑ष्ठो॒ वह्नि॑ तम॒-श्शोशु॑चानो॒ विश्वा॒ द्वेषाग्ं॑सि॒ प्रमु॑मुग्ध्य॒स्मत् ॥
स त्वन्नो॑ अन्गे-ऽव॒मो भ॑वो॒ती नेदि॑ष्ठो अ॒स्या उ॒षसो॒ व्यु॑ष्टौ । अव॑ यक्ष्व नो॒ वरु॑ण॒ग्ं॒ ररा॑णो वी॒हि मृ॑डी॒कग्ं सु॒हवो॑ न एधि ॥ त्वम॑ग्ने अ॒या-ऽसि॑ । अ॒या सन्मन॑सा हि॒तः । अ॒या सनःअ॒व्यमू॑हिषे । अ॒या नो॑ धेहि भेष॒जम् । इ॒ष्टो अ॒ग्निराहु॑तः । स्वाहा॑कृतः पिपर्तु नः । स्व॒गा दे॒वेभ्य॑ इ॒द-न्नमः॑ ॥
उद्व॒य-न्तम॑स॒स्परि॒ पश्य॑न्तो॒ ज्योति॒रुत्त॑रम् । दे॒व-न्दे॑व॒त्रा सूर्य॒मग॑न्म॒ ज्योति॑रुत्त॒मम् ॥ उदु॒ त्य-ञ्जा॒तवे॑दस-न्दे॒वं-वँ॑हन्ति के॒तवः॑ । दृ॒शे विश्वा॑य॒ सूर्य᳚म् । चि॒त्र-न्दे॒वाना॒-मुद॑गा॒दनी॑क॒-ञ्चक्षु॑ र्मि॒त्रस्य॒ वरु॑णस्या॒-ऽग्नेः ॥
वयः॑ सुप॒र्णा उप॑सेदु॒रिन्द्र᳚म् । प्रि॒यमे॑धा॒ ऋष॑यो॒ नाध॑मानाः । अप॑ ध्वा॒न्तमू᳚र्णु॒हि पू॒र्धि चक्षुः॑ । मु॒मु॒ग्ध्य॑स्मा-न्नि॒धये॑व ब॒द्धान् ॥ 61 ॥
(पु॒रो॒वसु॑र्हीडिषाताग्ं सुप॒र्णाः) (अ. 20)
अनुवाकं 21
भूर्भुव॒स्सुवः॑ । मयि॒ त्यदि॑न्द्रि॒य-म्म॒हत् । मयि॒ दक्षो॒ मयि॒ क्रतुः॑ । मयि॑ धायि सु॒वीर्य᳚म् । त्रिशु॑ग्घ॒र्मो विभा॑तु मे । आकू᳚त्या॒ मन॑सा स॒ह ।
वि॒राजा॒ ज्योति॑षा स॒ह । य॒ज्ञेन॒ पय॑सा स॒ह । ब्रह्म॑णा॒ तेज॑सा स॒ह । क्ष॒त्रेण॒ यश॑सा स॒ह । स॒त्येन॒ तप॑सा स॒ह । तस्य॒ दोह॑मशीमहि ।
तस्य॑ सु॒म्नम॑शीमहि । तस्य॑ भ॒क्षम॑शीमहि ।
तस्य॑ त॒ इन्द्रे॑ण पी॒तस्य॒ मधु॑मतः ।
उप॑हूत॒स्योप॑हूतो भक्षयामि ॥ 62 ॥
(यश॑सा स॒ह षट्च॑) (अ. 21)
अनुवाकं 22
यास्ते॑ अग्ने घो॒रास्त॒नुवः॑ । क्षुच्च॒ तृष्णा॑ च । अस्नु॒क्चाना॑हुतिश्च । अ॒श॒न॒या च॑ पिपा॒सा च॑ । से॒दिश्चाम॑तिश्च । ए॒तास्ते॑ अग्ने घो॒रास्त॒नुवः॑ ।
ताभि॑र॒मुङ्ग॑च्छ । यो᳚-ऽस्मा-न्द्वेष्टि॑ ।
यञ्च॑ व॒य-न्द्वि॒ष्मः ॥ 63 ॥ (अ. 22)
अनुवाकं 23
स्निक्च॒ स्नीहि॑तिश्च॒ स्निहि॑तिश्च । उ॒ष्णा च॑ शी॒ता च॑ ।
उ॒ग्रा च॑ भी॒मा च॑ । स॒दाम्नी॑ से॒दिरनि॑रा । ए॒तास्ते॑ अग्ने घो॒रास्त॒नुवः॑ । ताभि॑र॒मुङ्ग॑च्छ । यो᳚-ऽस्मा-न्द्वेष्टि॑ । यञ्च॑ व॒य-न्द्वि॒ष्मः ॥ 64 ॥ (अ. 23)
अनुवाकं 24
धुनि॑श्च ध्वा॒न्तश्च॑ ध्व॒नश्च॑ ध्व॒नयग्ग्॑श्च ।
नि॒लि॒म्पश्च॑ विलि॒म्पश्च॑ विक्षि॒पः ॥ 65 ॥ (अ. 24)
अनुवाकं 25
उ॒ग्रश्च॒ धुनि॑श्च ध्वा॒न्तश्च॑ ध्व॒नश्च॑ ध्व॒नयग्ग्॑श्च । स॒ह॒स॒ह्वाग्श्च॒ सह॑मानश्च॒ सह॑स्वाग्श्च॒ सही॑याग्श्च ।
एत्य॒ प्रेत्य॑ विक्षि॒पः ॥ 66 ॥ (अ. 25)
अनुवाकं 26
अ॒हो॒रा॒त्रे त्वोदी॑रयताम् । अ॒र्ध॒मा॒सास्त्वोदी᳚-ञ्जयन्तु । मासा᳚स्त्वा श्रपयन्तु । ऋ॒तव॑स्त्वा पचन्तु ।
सं॒वँ॒थ्स॒रस्त्वा॑ हन्त्वसौ ॥ 67 ॥ (अ. 26)
अनुवाकं 27
खट् फ-ड्ज॒हि । छि॒न्धी भि॒न्धी ह॒न्धी कट् ।
इति॒ वाचः॑ क्रूरा॒णि ॥ 68 ॥ (अ. 27)
अनुवाकं 28
विगा इ॑न्द्र वि॒चर᳚न्-थ्स्पाशयस्व । स्व॒पन्त॑मिन्द्र पशु॒मन्त॑मिच्छ । वज्रे॑णा॒मु-म्बो॑धय दुर्वि॒दत्र᳚म् । स्व॒प॒तो᳚-ऽस्य॒ प्रह॑र॒ भोज॑नेभ्यः ॥
अग्ने॑ अ॒ग्निना॒ संवँ॑दस्व । मृत्यो॑ मृ॒त्युना॒ संवँ॑दस्व । नम॑स्ते अस्तु भगवः ॥ स॒कृत्ते॑ अग्ने॒ नमः॑ । द्विस्ते॒ नमः॑ । त्रिस्ते॒ नमः॑ । च॒तुस्ते॒ नमः॑ । प॒ञ्च॒कृत्व॑स्ते॒ नमः॑ ।
द॒श॒कृत्व॑स्ते॒ नमः॑ । श॒त॒कृत्व॑स्ते॒ नमः॑ । आ॒स॒ह॒स्र॒कृत्व॑स्ते॒ नमः॑ । अ॒प॒रि॒मि॒त॒कृत्व॑स्ते॒ नमः॑ । नम॑स्ते अस्तु॒ मा मा॑ हिग्ंसीः ॥ 69 ॥
(त्रिस्ते॒ नमः॑ स॒प्त च॑) (अ. 28)
अनुवाकं 29
असृ॑-न्मुखो रुधि॒रेणा॒व्य॑क्तः । य॒मस्य॑ दू॒त-श्श्वपा॒-द्विधा॑वसि । गृद्ध्रः॑ सुप॒र्णः कु॒णप॒न्निषे॑वसे ।
य॒मस्य॑ दू॒तः प्रहि॑तो भ॒वस्य॑ चो॒भयोः᳚ ॥ 70 ॥ (अ. 29)
अनुवाकं 30
यदे॒त-द्वृ॑क॒सो भू॒त्वा । वाग् दे᳚व्यभि॒राय॑सि । द्वि॒षन्त॑-म्मे॒-ऽभिरा॑य । त-म्मृ॑त्यो मृ॒त्यवे॑ नय । स आर्त्या-ऽऽर्ति॒मार्च्छ॑तु ॥ 71 ॥ (अ. 30)
अनुवाकं 31
यदी॑षि॒तो यदि॑ वा स्वका॒मी । भ॒येड॑को॒ वद॑ति॒ वाच॑मे॒ताम् । तामि॑न्द्रा॒ग्नी ब्रह्म॑णा संविँदा॒नौ ।
शि॒वाम॒स्मभ्य॑-ङ्कृणुतङ्गृ॒हेषु॑ ॥ 72 ॥ (अ. 31)
अनुवाकं 32
दीर्घ॑मुखि॒ दुर्ह॑णु । मा स्म॑ दक्षिण॒तो व॑दः ।
यदि॑ दक्षिण॒तो वदा᳚-द्द्वि॒षन्त॒-म्मे-ऽव॑ बाधासै ॥ 73 ॥ (अ. 32)
अनुवाकं 33
इ॒त्थादुलू॑क॒ आप॑प्तत् । हि॒र॒ण्या॒क्षो अयो॑मुखः ।
रक्ष॑सान्दू॒त आग॑तः । तमि॒तो ना॑शयाग्ने ॥ 74 ॥ (अ. 33)
अनुवाकं 34
यदे॒त-द्भू॒तान्य॑न्वा॒विश्य॑ । दैवीं॒-वाँचं॑-वँ॒दसि॑ । द्वि॒षतो॑ नः॒ परा॑वद । ता-न्मृ॑त्यो मृ॒त्यवे॑ नय । त आर्त्या-ऽऽर्ति॒मार्च्छ॑न्तु ।
अ॒ग्निना॒-ऽग्नि-स्संवँ॑दताम् ॥ 75 ॥ (अ. 34)
अनुवाकं 35
प्र॒सार्य॑ स॒क्थ्यौ॑ पत॑सि । स॒व्यमक्षि॑ नि॒पेपि॑ च ।
मेह क॑स्यच॒नाम॑मत् ॥ 76 ॥ (अ. 35)
अनुवाकं 36
अत्रि॑णा त्वा क्रिमे हन्मि । कण्वे॑न ज॒मद॑ग्निना ।
वि॒श्वाव॑सो॒-र्ब्रह्म॑णा ह॒तः । क्रिमी॑णा॒ग्ं॒ राजा᳚ ।
अप्ये॑षाग् स्थ॒पति॑र्ह॒तः । अथो॑ मा॒ता-ऽथो॑ पि॒ता ।
अथो᳚ स्थू॒रा अथो᳚ क्षु॒द्राः । अथो॑ कृ॒ष्णा अथो᳚ श्वे॒ताः । अथो॑ आ॒शाति॑का ह॒ताः ।
श्वे॒ताभिः॑ स॒ह सर्वे॑ ह॒ताः ॥ 77 ॥ (अ. 36)
अनुवाकं 37
आह॒राव॑द्य । शृ॒तस्य॑ ह॒विषो॒ यथा᳚ । त-थ्स॒त्यम् ।
यद॒मुं-यँ॒मस्य॒ जम्भ॑योः । आद॑धामि॒ तथा॒ हि तत् । खण्फण्म्रसि॑ ॥ 78 ॥ (अ. 37)
अनुवाकं 38
ब्रह्म॑णा त्वा शपामि । ब्रह्म॑णस्त्वा श॒पथे॑न शपामि । घो॒रेण॑ त्वा॒ भृगू॑णा॒ञ्चक्षु॑षा॒ प्रेक्षे᳚ । रौ॒द्रेण॒ त्वाङ्गि॑रसा॒-म्मन॑सा ध्यायामि ।
अ॒घस्य॑ त्वा॒ धार॑या विद्ध्यामि ।
अध॑रो॒ म-त्प॑द्यस्वासौ ॥ 79 ॥ (अ. 38)
अनुवाकं 39
उत्तु॑द शिमिजावरि । तल्पे॑जे॒ तल्प॒ उत्तु॑द । गि॒रीग्ं रनु॒ प्रवे॑शय । मरी॑ची॒रुप॒ सन्नु॑द ।
याव॑दि॒तः पु॒रस्ता॑दु॒दया॑ति॒ सूर्यः॑ ।
ताव॑दि॒तो॑-ऽमुन्ना॑शय । यो᳚-ऽस्मा-न्द्वेष्टि॑ ।
यञ्च॑ व॒य-न्द्वि॒ष्मः ॥ 80 ॥ (अ. 39)
अनुवाकं 40
भूर्भुव॒स्सुवो॒ भूर्भुव॒स्सुवो॒ भूर्भुव॒स्सुवः॑ ।
भुवो᳚-ऽद्धायि॒ भुवो᳚-ऽद्धायि॒ भुवो᳚-ऽद्धायि ।
नृ॒म्णायि नृ॒म्ण-न्नृ॒म्णायि नृ॒म्ण-न्नृ॒म्णायि नृ॒म्णम् । नि॒धा य्यो॑-ऽवायि नि॒धा य्यो॑-ऽवायि नि॒धा य्यो॑-ऽवायि । ए अ॒स्मे अ॒स्मे । सुव॒र्न ज्योतीः᳚ ॥ 81 ॥ (अ. 40)
अनुवाकं 41
पृ॒थि॒वी स॒मित् । ताम॒ग्नि-स्समि॑न्धे । सा-ऽग्निग्ं समि॑न्धे । ताम॒हग्ं समि॑न्धे । सा मा॒ समि॑द्धा । आयु॑षा॒ तेज॑सा । वर्च॑सा श्रि॒या । यश॑सा ब्रह्मवर्च॒सेन॑ । अ॒न्नाद्ये॑न॒ समि॑न्ता॒ग्॒ स्वाहा᳚ ॥
अ॒न्तरि॑क्षग्ं स॒मित् ॥ 82 ॥
तां-वाँ॒यु-स्समि॑न्धे । सा वा॒युग्ं समि॑न्धे । ताम॒हग्ं समि॑न्धे । सा मा॒ समि॑द्धा । आयु॑षा॒ तेज॑सा । वर्च॑सा श्रि॒या । यश॑सा ब्रह्मवर्च॒सेन॑ । अ॒न्नाद्ये॑न॒ समि॑न्ता॒ग्॒ स्वाहा᳚ ।
द्यौ-स्स॒मित् । तामा॑दि॒त्य-स्समि॑न्धे ॥ 83 ॥
सा-ऽऽदि॒त्यग्ं समि॑न्धे । ताम॒हग्ं समि॑न्धे । सा मा॒ समि॑द्धा । आयु॑षा॒ तेज॑सा । वर्च॑सा श्रि॒या । यश॑सा ब्रह्मवर्च॒सेन॑ । अ॒न्नाद्ये॑न॒ समि॑न्ता॒ग्॒ स्वाहा᳚ ॥ प्रा॒जा॒प॒त्या मे॑ स॒मिद॑सि सपत्न॒क्षय॑णी ।
भ्रा॒तृ॒व्य॒हा मे॑-ऽसि॒ स्वाहा᳚ ॥ अग्ने᳚ व्रतपते व्र॒तञ्च॑रिष्यामि ॥ 84 ॥
तच्छ॑केय॒-न्तन्मे॑ राद्ध्यताम् । वायो᳚ व्रतपत॒ आदि॑त्य व्रतपते । व्र॒तानां᳚-व्रँतपते व्र॒तञ्च॑रिष्यामि । तच्छ॑केय॒-न्तन्मे॑ राद्ध्यताम् ॥ द्यौ-स्स॒मित् । तामा॑दि॒त्य-स्समि॑न्धे । सा-ऽऽदि॒त्यग्ं समि॑न्धे ।
ताम॒हग्ं समि॑न्धे । सा मा॒ समि॑द्धा । आयु॑षा॒ तेज॑सा ॥ 85 ॥
वर्च॑सा श्रि॒या । यश॑सा ब्रह्मवर्च॒सेन॑ । अ॒न्नाद्ये॑न॒ समि॑न्ता॒ग्॒ स्वाहा᳚ ।
अ॒न्तरि॑क्षग्ं स॒मित् । तां-वाँ॒यु-स्समि॑न्धे । सा वा॒युग्ं समि॑न्धे । ताम॒हग्ं समि॑न्धे । सा मा॒ समि॑द्धा । आयु॑षा॒ तेज॑सा । वर्च॑सा श्रि॒या ॥ 86 ॥
यश॑सा ब्रह्मवर्च॒सेन॑ । अ॒न्नाद्ये॑न॒ समि॑न्ता॒ग्॒ स्वाहा᳚ । पृ॒थि॒वी स॒मित् । ताम॒ग्नि-स्समि॑न्धे । सा-ऽग्निग्ं समि॑न्धे । ताम॒हग्ं समि॑न्धे ।
सा मा॒ समि॑द्धा । आयु॑षा॒ तेज॑सा । वर्च॑सा श्रि॒या ।
यश॑सा ब्रह्मवर्च॒सेन॑ ॥ 87 ॥
अ॒न्नाद्ये॑न॒ समि॑न्ता॒ग्॒ स्वाहा᳚ । प्रा॒जा॒प॒त्या मे॑ स॒मिद॑सि सपत्न॒क्षय॑णी । भ्रा॒तृ॒व्य॒हा मे॑-ऽसि॒ स्वाहा᳚ । आदि॑त्य व्रतपते व्र॒तम॑चारिषम् ।
तद॑शक॒-न्तन्मे॑-ऽराधि । वायो᳚ व्रतप॒ते-ऽग्ने᳚ व्रतपते । व्र॒तानां᳚-व्रँतपते व्र॒तम॑चारिषम् । तद॑शक॒-न्तन्मे॑-ऽराधि ॥ 88 ॥
(स॒मिथ् - समि॑न्धे - व्र॒तञ्च॑रिष्या॒ - म्यायु॑षा॒ तेज॑सा॒ - वर्च॑सा श्रि॒या - यश॑सा ब्रह्मवर्च॒सेना॒ - +ष्टौ च॑) (अ. 41)
अनुवाकं 42
शन्नो॒ वातः॑ पवता-म्मात॒रिश्वा॒ शन्न॑स्तपतु॒ सूर्यः॑ । अहा॑नि॒ श-म्भ॑वन्तु न॒-श्शग्ं रात्रिः॒ प्रति॑धीयताम् ॥ शमु॒षा नो॒ व्यु॑च्छतु॒ शमा॑दि॒त्य उदे॑तु नः । शि॒वा न॒-श्शन्त॑मा भव सुमृडी॒का सर॑स्वति । मा ते॒ व्यो॑म स॒न्दृशि॑ ॥
इडा॑यै॒ वास्त्व॑सि वास्तु॒म-द्वा᳚स्तु॒मन्तो॑ भूयास्म॒ मा वास्तो᳚-श्छिथ्स्मह्य वा॒स्तु-स्स भू॑या॒-द्यो᳚-ऽस्मा-न्द्वेष्टि॒ यञ्च॑ व॒य-न्द्वि॒ष्मः ॥
प्र॒ति॒ष्ठा-ऽसि॑ प्रति॒ष्ठाव॑न्तो भूयास्म॒ मा प्र॑ति॒ष्ठाया᳚- श्छिथ्स्मह्य प्रति॒ष्ठः
स भू॑या॒-द्यो᳚-ऽस्मा-न्द्वेष्टि॒ यञ्च॑ व॒य-न्द्वि॒ष्मः ॥ आ वा॑त वाहि भेष॒जम् ँवि वा॑त वाहि॒ यद्रपः॑ ।
त्वग्ं हि वि॒श्वभे॑षजो दे॒वाना᳚-न्दू॒त ईय॑से ॥
द्वावि॒मौ वातौ॑ वात॒ आ सिन्धा॒रा प॑रा॒वतः॑ ॥ 89 ॥
दक्ष॑-म्मे अ॒न्य आ॒वातु॒ परा॒-ऽन्यो वा॑तु॒ य-द्रपः॑ ॥
यद॒दो वा॑त ते गृ॒हे॑-ऽमृत॑स्य नि॒धिर्हि॒तः ।
ततो॑ नो देहि जी॒वसे॒ ततो॑ नो धेहि भेष॒जम् ॥
ततो॑ नो॒ मह॒ आव॑ह॒ वात॒ आवा॑तु भेष॒जम् ।
श॒म्भू-र्म॑यो॒भूर्नो॑ हृ॒दे प्र ण॒ आयूग्ं॑षि तारिषत् ॥ इन्द्र॑स्य गृ॒हो॑-ऽसि॒ त-न्त्वा॒ प्रप॑द्ये॒ सगु॒स्साश्वः॑ । स॒ह यन्मे॒ अस्ति॒ तेन॑ ॥
भूः प्रप॑द्ये॒ भुवः॒ प्रप॑द्ये॒ सुवः॒ प्रप॑द्ये॒ भूर्भुव॒स्सुवः॒ प्रप॑द्ये वा॒युम्
प्रप॒द्ये-ऽना᳚र्ता-न्दे॒वता॒-म्प्रप॒द्ये ऽश्मा॑नमाख॒ण-म्प्रप॑द्ये प्र॒जाप॑तेर्
ब्रह्मको॒श-म्ब्रह्म॒ प्रप॑द्य॒ ओ-म्प्रप॑द्ये ॥
अ॒न्तरि॑क्ष-म्म उ॒र्व॑न्तर॑-म्बृ॒हद॒ग्नयः॒ पर्व॑ताश्च॒ यया॒ वातः॑ स्व॒स्त्या स्व॑स्ति॒मान्तया᳚ स्व॒स्त्या स्व॑स्ति॒ मान॑सानि ॥
प्राणा॑पानौ मृ॒त्योर्मा॑ पात॒-म्प्राणा॑पानौ॒ मा मा॑ हासिष्ट॒-म्मयि॑ मे॒धा-म्मयि॑ प्र॒जा-म्मय्य॒ग्नि स्तेजो॑ दधातु॒ मयि॑ मे॒धा-म्मयि॑ प्र॒जा-म्मयीन्द्र॑ इन्द्रि॒य-न्द॑धातु॒ मयि॑ मे॒धा-म्मयि॑ प्र॒जा-म्मयि॒ सूर्यो॒
भ्राजो॑ दधातु ॥ 90 ॥
द्यु॒भिर॒क्तुभिः॒ परि॑पात-म॒स्मानरि॑ष्टेभि-रश्विना॒ सौभ॑गेभिः । तन्नो॑ मि॒त्रो वरु॑णो मामहन्ता॒ मदि॑ति॒-स्सिन्धुः॑ पृथि॒वी उ॒त द्यौः ॥
कया॑ नश्चि॒त्र आभु॑वदू॒ती स॒दावृ॑ध॒-स्सखा᳚ । कया॒ शचि॑ष्ठया वृ॒ता ॥ कस्त्वा॑ स॒त्यो मदा॑ना॒-म्मग्ंहि॑ष्ठो मथ्स॒दन्ध॑सः ।
दृ॒ढा चि॑दा॒रुजे॒ वसु॑ ॥ अ॒भी षु ण॒-स्सखी॑नामवि॒ता ज॑रितॄ॒णाम् । श॒त-म्भ॑वास्यू॒तिभिः॑ ॥
वयः॑ सुप॒र्णा उप॑सेदु॒रिन्द्र॑-म्प्रि॒यमे॑धा॒ ऋष॑यो॒ नाध॑मानाः ।
अप॑ ध्वा॒न्तमू᳚र्णु॒हि पू॒र्धि चक्षु॑-र्मुमु॒ग्ध्य॑स्मा-न्नि॒धये॑व ब॒द्धान् ॥ 91 ॥
शन्नो॑ दे॒वीर॒भिष्ट॑य॒ आपो॑ भवन्तु पी॒तये᳚ । शं-योँर॒भिस्र॑वन्तु नः ॥ ईशा॑ना॒ वार्या॑णा॒-ङ्क्षय॑न्तीश्चर्षणी॒नाम् । अ॒पो या॑चामि भेष॒जम् ॥
सु॒मि॒त्रा न॒ आप॒ ओष॑धय-स्सन्तु दुर्मि॒त्रास्तस्मै॑ भूयासु॒-र्यो᳚-ऽस्मान्-द्वेष्टि॒ यञ्च॑ व॒य-न्द्वि॒ष्मः ॥
आपो॒ हि ष्ठा म॑यो॒भुव॒स्ता न॑ ऊ॒र्जे द॑धातन । म॒हे रणा॑य॒ चक्ष॑से ॥ यो वः॑ शि॒वत॑मो॒ रस॒स्तस्य॑ भाजयते॒ह नः॑ । उ॒श॒तीरि॑व मा॒तरः॑ ॥
तस्मा॒ अर॑-ङ्गमाम वो॒ यस्य॒ क्षया॑य॒ जिन्व॑थ ॥ 92 ॥
आपो॑ ज॒नय॑था च नः ॥
पृ॒थि॒वी शा॒न्ता सा-ऽग्निना॑ शा॒न्ता सा मे॑ शा॒न्ता शुचग्ं॑ शमयतु ॥ अ॒न्तरि॑क्षग्ं शा॒न्त-न्त-द्वा॒युना॑ शा॒न्त-न्तन्मे॑ शा॒न्तग्ं शुचग्ं॑ शमयतु ।
द्यौ-श्शा॒न्ता सा-ऽऽदि॒त्येन॑ शा॒न्ता सा मे॑ शा॒न्ता शुचग्ं॑ शमयतु ॥ पृ॒थि॒वी शान्ति॑र॒न्तरि॑क्ष॒ग्ं॒ शान्ति॒-र्द्यौ-श्शान्ति॒-र्दिश॒-श्शान्ति॑ रवान्तरदि॒शा-श्शान्ति॑ र॒ग्नि-श्शान्ति॑-र्वा॒यु-श्शान्ति॑ रादि॒त्य-श्शान्ति॑
श्च॒न्द्रमा॒-श्शान्ति॒-र्नक्ष॑त्राणि॒ शान्ति॒ राप॒-श्शान्ति॒ रोष॑धय॒-श्शान्ति॒-र्वन॒स्पत॑य॒-श्शान्ति॒-र्गौ-श्शान्ति॑ र॒जा शान्ति॒ रश्व॒-श्शान्तिः॒ पुरु॑ष॒-श्शान्ति॒-र्ब्रह्म॒ शान्ति॑-र्ब्राह्म॒ण-श्शान्ति॒-श्शान्ति॑रे॒व शान्ति॒-श्शान्ति॑र्मे अस्तु॒ शान्तिः॑ ॥
तया॒-ऽहग्ं शा॒न्त्या स॑र्वशा॒न्त्या मह्य॑-न्द्वि॒पदे॒ चतु॑ष्पदे च॒ शान्ति॑-ङ्करोमि॒ शान्ति॑र्मे अस्तु॒ शान्तिः॑ ॥
एह॒ श्रीश्च॒ ह्रीश्च॒ धृति॑श्च॒ तपो॑ मे॒धा प्र॑ति॒ष्ठा श्र॒द्धा स॒त्य-न्धर्म॑श्चै॒तानि॒ मोत्ति॑ष्ठन्त॒-मनूत्ति॑ष्ठन्तु॒ मा मा॒ग्॒ श्रीश्च॒ ह्रीश्च॒ धृति॑श्च॒ तपो॑ मे॒धा प्र॑ति॒ष्ठा श्र॒द्धा स॒त्य-न्धर्म॑श्चै॒तानि॑ मा॒ मा हा॑सिषुः ॥
उदायु॑षा स्वा॒युषोदोष॑धीना॒ग्ं॒ रसे॒नो-त्प॒र्जन्य॑स्य॒ शुष्मे॒णोद॑स्था-म॒मृता॒ग्ं॒ अनु॑ ॥ तच्चक्षु॑-र्दे॒वहि॑त-म्पु॒रस्ता᳚ च्छु॒क्रमु॒च्चर॑त् ।
पश्ये॑म श॒रदः॑ श॒त-ञ्जीवे॑म श॒रदः॑ श॒त-न्नन्दा॑म श॒रदः॑ श॒त-म्मोदा॑म श॒रदः॑ श॒त-म्भवा॑म श॒रदः॑ श॒तग्ं शृ॒णवा॑म श॒रदः॑ श॒त-म्प्रब्र॑वाम श॒रदः॑ श॒त मजी॑ता-स्स्याम श॒रदः॑ श॒त-ञ्ज्योक्च॒ सूर्य॑-न्दृ॒शे ॥ 93 ॥
य उद॑गा-न्मह॒तो-ऽर्णवा᳚-द्वि॒भ्राज॑मान-स्सरि॒रस्य॒ मद्ध्या॒थ्स मा॑ वृष॒भो लो॑हिता॒क्ष-स्सूर्यो॑ विप॒श्चि-न्मन॑सा पुनातु ॥ ब्रह्म॑ण॒-श्श्चोत॑न्यसि॒ ब्रह्म॑ण आ॒णी स्थो॒ ब्रह्म॑ण आ॒वप॑नमसि धारि॒तेय-म्पृ॑थि॒वी ब्रह्म॑णा म॒ही धा॑रि॒तमे॑नेन म॒हद॒न्तरि॑क्ष॒-न्दिव॑-न्दाधार पृथि॒वीग्ं सदे॑वां॒-यँद॒हं-वेँद॒ तद॒ह-न्धा॑रयाणि॒ मा मद्वेदो-ऽधि॒ विस्र॑सत् ॥ मे॒धा॒म॒नी॒षे मा-ऽऽवि॑शताग्ं स॒मीची॑ भू॒तस्य॒ भव्य॒स्याव॑रुद्ध्यै॒ सर्व॒मायु॑रयाणि॒
सर्व॒मायु॑रयाणि ॥ आ॒भि-र्गी॒र्भि-र्यदतो॑ न ऊ॒नमाप्या॑यय हरिवो॒ वर्ध॑मानः ।
य॒दा स्तो॒तृभ्यो॒ महि॑ गो॒त्रा रु॒जासि॑ भूयिष्ठ॒भाजो॒ अध॑ ते स्याम ॥ ब्रह्म॒ प्रावा॑दिष्म॒ तन्नो॒ मा हा॑सीत् ॥ ॐ शान्ति॒-श्शान्ति॒-श्शान्तिः॑ ॥ 94 ॥
(प॒रा॒वतो॑-दधातु-ब॒द्धान्-जिन्व॑थ-दृ॒शे-+स॒प्त च॑) (अ. 42)
(नमो॑ - यु॒ञ्जते॒ - वृष्णो॒ अश्व॑स्य॒ - ब्रह्म॑-न्प्रव॒र्ग्ये॑ण॒ - ब्रह्म॒-न्प्रच॑रिष्यामो॒ - दश॒ प्राची॒ - रप॑श्यङ्गो॒पाम् - दे॒वस्य॑ - समु॒द्रा - ये॒षे पी॑पिहि॒ - घर्म॒ या ते॑ - मही॒ना-ञ्च॒त्वा - र्यस्का॒न्॒. - या पु॒रस्ता᳚-थ्स॒प्त स॑प्त - प्रा॒णाय॒ त्रीणि॑ - पू॒ष्णे च॒त्वा-र्यु - द॒स्यैका॑दश॒ - यास्ते॑ स॒प्ता - ग्नि-र्ध्रु॒वसीः॒ दैका॒न्न विग्ं॑शति॒--र् भूरू॒र्ध्व स्त्रि॒ग्ं॒शत-द्- भू-र्मयि॒ षोड॑श॒ - यास्ते॑ घो॒रा नव॒ - स्निक्चा॒ष्टौ - धुनि॑श्च॒ द्वे - उ॒ग्रश्च॒ त्रीण्य॑ - होरा॒त्रे पञ्च॒ - ख-ट्त्रीणि॒ - विगा-स्स॒प्तद॒शा - सृ॑-न्मुख-श्च॒त्वारि॒ - यदे॒त-द्वृ॑क॒सः पञ्च॒ - यदी॑षि॒त श्च॒त्वारि॒ - दीर्घ॑मुखि॒ त्रीणी॒ - त्था च्च॒त्वारि॒ - यदे॒त-द्भू॒तानि॒ षट् - प्र॒सार्य॒ त्रीण्य - त्रि॑णा॒ दशा- ह॒राव॑द्य॒ - ब्रह्म॑णा॒ षट्-थ्षड् - उत्तु॑दा॒ष्टौ - भू-ष्षट् - पृ॑थि॒व्य॑ष्ट ष॑ष्टिः॒ - शन्नः॑ स॒प्तप॑ञ्चा॒श-द्द्विच॑त्वारिग्ंशत् )
(नमो॑ वा॒चे - ब्रह्म॑-न्प्रव॒र्ग्ये॑ण॒ - मयि॒ रु - ग॒न्तरि॑क्षेण - पि॒ता नो॑-ऽसि - मही॒ना - मुप॑ नो॒ - यदे॒त-द्- भू--र् द्यू॒भि श्चतु॑-र्नवतिः)
॥ हरिः॑ ओम् ॥
॥ कृष्ण यजुर्वेदीय तैत्तिरीय आरण्यके चतुर्थः प्रपाठक-स्समाप्तः ॥
kṛṣṇa yajurvedīya taittirīya āraṇyake caturthaḥ prapāṭhakaḥ - pravargya mantrāḥ
o-nnamaḥ paramātmane, śrī mahāgaṇapataye namaḥ,
śrī gurubhyo namaḥ | ha॒riḥ॒ om ||
anuvākaṃ 1
namo̭ vā॒ce yā co̭di॒tā yā cānṷditā॒ tasyai̭ vā॒ce namo॒ namo̭ vā॒ce namo̭ vā॒caspata̭ye॒ nama॒ ṛṣi̭bhyo mantra॒kṛdbhyo॒ mantra̭patibhyo॒ mā māmṛṣa̭yo mantra॒kṛto̭ mantra॒pata̭yaḥ॒ parā̭du॒rmā-'hamṛṣī᳚-nmantra॒kṛto̭ mantra॒patī॒-nparā̭dāṃ-vai~śvade॒vīṃ-vā~ca̭mudyāsagṃ śi॒vāmada̭stā॒-ñjuṣṭā᳚-nde॒vebhya॒-śśarma̭ me॒ dyau-śśarma̭ pṛthi॒vī śarma॒ viśva̭mi॒da-ñjaga̭t |
śarma̭ ca॒ndraśca॒ sūrya̭śca॒ śarma̭ brahmaprajāpa॒tī ||
bhū॒taṃ-va~̭diṣye॒ bhuva̭naṃ-va~diṣye॒ tejo̭ vadiṣye॒ yaśo̭ vadiṣye॒ tapo̭ vadiṣye॒ brahma̭ vadiṣye sa॒tyaṃ-va~̭diṣye॒ tasmā̭ a॒hami॒da-mṷpa॒stara̭ṇa॒-mupa̭stṛṇa upa॒stara̭ṇa-mme pra॒jāyai̭ paśū॒nā-mbhṷ̄yā-dupa॒stara̭ṇama॒ha-mpra॒jāyai̭ paśū॒nā-mbhṷ̄yāsa॒-mprāṇā̭pānau mṛ॒tyormā̭ pāta॒-mprāṇā̭pānau॒ mā mā̭ hāsiṣṭa॒-mmadhṷ maniṣye॒ madhṷ janiṣye॒ madhṷ vakṣyāmi॒ madhṷ vadiṣyāmi॒ madhṷmatī-nde॒vebhyo॒ vāca̭mudyāsagṃ śuśrū॒ṣeṇyā᳚-mmanu॒ṣye᳚bhya॒sta-mmā̭ de॒vā a̭vantu śo॒bhāyai̭ pi॒taro-'nṷmadantu ||
oṃ śānti॒-śśānti॒-śśāntiḥ̭ || 1 || (a. 1)
anuvākaṃ 2
yu॒ñjate॒ mana̭ u॒ta yṷñjate॒ dhiyaḥ̭ | viprā॒ vipra̭sya bṛha॒to vi̭pa॒ścitaḥ̭ | vi hotrā̭ dadhe vayunā॒videka॒ it | ma॒hī de॒vasya̭ savi॒tuḥ pari̭ṣṭutiḥ || de॒vasya̭ tvā savi॒tuḥ pra̭sa॒ve | a॒śvino᳚-rbā॒hubhyā᳚m |
pū॒ṣṇo hastā᳚bhyā॒māda̭de || abhri̭rasi॒ nāri̭rasi |
a॒ddhva॒ra॒kṛ-dde॒vebhyaḥ̭ | utti̭ṣṭha brahmaṇaspate || 2 ||
de॒va॒yanta̭stvemahe | upa॒ praya̭ntu ma॒rutaḥ̭ su॒dāna̭vaḥ | indra̭ prā॒śūrbha̭vā॒ sacā᳚ || praitu॒ brahma̭ṇa॒spatiḥ̭ | pra de॒vyḙtu sū॒nṛtā᳚ |
acchā̭ vī॒rannarya̭-mpa॒ṅktirā̭dhasam | de॒vā ya॒jñanna̭yantu naḥ || devī᳚ dyāvāpṛthivī॒ anṷ me magṃsāthām | ṛ॒ddhyāsa̭ma॒dya | ma॒khasya॒ śiraḥ̭ || 3 ||
ma॒khāya̭ tvā | ma॒khasya̭ tvā śī॒rṣṇe || iya॒tyagra̭ āsīḥ |
ṛ॒ddhyāsa̭ma॒dya | ma॒khasya॒ śiraḥ̭ | ma॒khāya̭ tvā | ma॒khasya̭ tvā śī॒rṣṇe || devī᳚-rvamrīra॒sya bhū॒tasya̭ prathamajā ṛtāvarīḥ || ṛ॒ddhyāsa̭ma॒dya | ma॒khasya॒ śiraḥ̭ || 4 ||
ma॒khāya̭ tvā | ma॒khasya̭ tvā śī॒rṣṇe || indra॒syaujo̭-'si |
ṛ॒ddhyāsa̭ma॒dya | ma॒khasya॒ śiraḥ̭ | ma॒khāya̭ tvā | ma॒khasya̭ tvā śī॒rṣṇe || a॒gni॒jā a̭si pra॒jāpa̭te॒ retaḥ̭ | ṛ॒ddhyāsa̭ma॒dya | ma॒khasya॒ śiraḥ̭ || 5 ||
ma॒khāya̭ tvā | ma॒khasya̭ tvā śī॒rṣṇe || āyṷ-rdhehi prā॒ṇa-ndhḙhi | a॒pā॒na-ndhḙhi vyā॒na-ndhḙhi | cakṣṷ-rdhehi॒ śrotra̭-ndhehi | mano̭ dhehi॒ vāca̭-ndhehi | ā॒tmāna̭-ndhehi prati॒ṣṭhā-ndhḙhi |
mā-ndhḙhi॒ mayi̭ dhehi || madhṷ tvā madhu॒lā ka̭rotu |
ma॒khasya॒ śiro̭-'si || 6 ||
ya॒jñasya̭ pa॒de sthaḥ̭ | gā॒ya॒treṇa̭ tvā॒ chanda̭sā karomi | traiṣṭṷbhena tvā॒ chanda̭sā karomi | jāga̭tena tvā॒ chanda̭sā karomi || ma॒khasya॒ rāsnā̭-'si | adi̭tiste॒ bila̭ṅgṛhṇātu | pāṅktḙna॒ chanda̭sā |
sūrya̭sya॒ hara̭sā śrāya | ma॒kho̭-'si || 7 ||
(pa॒te॒ - śira̭ - ṛtāvarīr-ṛddhyāsa̭ma॒dya ma॒khasya॒ śiraḥ॒ - śiraḥ॒ - śiro̭-'si॒ - +nava̭ ca) (a. 2)
(iya̭ti॒ devī॒rindra॒syaujo᳚-'syagni॒jā a॒syāyṷrdhehi prā॒ṇa-mpañca̭)
anuvākaṃ 3
vṛṣṇo॒ aśva̭sya ni॒ṣpada̭si | varṷṇastvā dhṛ॒tavra̭ta॒ ādhṷ̄payatu | mi॒trāvarṷṇayor
dhru॒veṇa॒ dharma̭ṇā || a॒rciṣe᳚ tvā | śo॒ciṣe᳚ tvā |
jyoti̭ṣe tvā | tapa̭se tvā || a॒bhīma-mma̭hi॒nā diva᳚m |
mi॒tro ba̭bhūva sa॒prathāḥ᳚ | u॒ta śrava̭sā pṛthi॒vīm || 8 ||
mi॒trasya̭ carṣaṇī॒dhṛtaḥ̭ |
śravo̭ de॒vasya̭ sāna॒sim | dyu॒mnañci॒traśra̭vastamam || siddhyai᳚ tvā | de॒vastvā̭ savi॒todva̭patu |
su॒pā॒ṇi-ssva̭ṅgu॒riḥ | su॒bā॒huru॒ta śaktyā᳚ || apa̭dyamānaḥ pṛthi॒vyām | āśā॒ diśa॒ ā pṛ̭ṇa | utti̭ṣṭha bṛ॒ha-nbha̭va || 9 ||
ū॒rdhvasti̭ṣṭha dhru॒vastvam || sūrya̭sya tvā॒ cakṣu॒ṣā-'nvī᳚kṣe | ṛ॒jave᳚ tvā | sā॒dhave᳚ tvā | su॒kṣi॒tyai tvā॒ bhūtyai᳚ tvā ||
i॒dama॒hama॒mumā̭muṣyāya॒ṇaṃ-vi~॒śā pa॒śubhi̭-rbrahmavarca॒sena॒ paryṷ̄hāmi |
gā॒ya॒treṇa̭ tvā॒ chanda॒sā ''cchṛ̭ṇadmi | traiṣṭṷbhena tvā॒ chanda॒sā ''cchṛ̭ṇadmi |
jāga̭tena tvā॒ chanda॒sā ''cchṛ̭ṇadmi | chṛ॒ṇattṷ tvā॒ vāk | chṛ॒ṇattu॒ tvork | chṛ॒ṇattṷ tvā ha॒viḥ |
chṛ॒ndhi vāca᳚m | chṛ॒ndhyūrja᳚m | chṛ॒ndhi ha॒viḥ ||
deva̭ puraścara sa॒ghyāsa̭ntvā || 10 ||
(pṛ॒thi॒vīm - bha̭va॒ - vā-khṣaṭca̭) (a. 3)
anuvākaṃ 4
brahma̭-nprava॒rgyḙṇa॒ praca̭riṣyāmaḥ |
hota̭-rgha॒rmama॒bhiṣṭṷhi | agnī॒drauhi̭ṇau puro॒ḍāśā॒vadhi̭śraya | prati̭prasthāta॒rviha̭ra |
prasto̭ta॒-ssāmā̭ni gāya || yajṷryukta॒gṃ॒ sāma̭bhi॒rākta̭khantvā | viśvai᳚-rde॒vairanṷmata-mma॒rudbhiḥ̭ | dakṣi̭ṇābhiḥ॒ prata̭ta-mpārayi॒ṣṇum |
stubho̭ vahantu sumana॒syamā̭nam | sa no॒ ruca̭ndhe॒hyahṛ̭ṇīyamānaḥ | bhūrbhuva॒ssuvaḥ̭ |
omindra̭vantaḥ॒ praca̭rata || 11 ||
(ahṛ̭ṇīyamāno॒ dve ca̭) (a. 4)
anuvākaṃ 5
brahma॒-npraca̭riṣyāmaḥ | hota̭-rgha॒rmama॒bhiṣṭṷhi || ya॒māya̭ tvā ma॒khāya̭ tvā | sūrya̭sya॒ hara̭se tvā || prā॒ṇāya॒ svāhā᳚ vyā॒nāya॒ svāhā̭ 'pā॒nāya॒ svāhā᳚ |
cakṣṷṣe॒ svāhā॒ śrotrā̭ya॒ svāhā᳚ | mana̭se॒ svāhā̭ vā॒ce sara̭svatyai॒ svāhā᳚ | dakṣā̭ya॒ svāhā॒ krata̭ve॒ svāhā᳚ | oja̭se॒ svāhā॒ balā̭ya॒ svāhā᳚ ||
de॒vastvā̭ savi॒tā maddhvā̭-'naktu || 12 ||
pṛ॒thi॒vī-ntapa̭sastrāyasva | a॒rcira̭si śo॒cira̭si॒ jyoti̭rasi॒ tapo̭-'si | sagṃsī̭dasva ma॒hāgṃ a̭si | śoca̭sva deva॒vīta̭maḥ | vi dhū॒mama̭gne aru॒ṣa-mmi̭yeddhya | sṛ॒ja pra̭śasta darśa॒tam ||
a॒ñjanti॒ ya-mpra॒thaya̭nto॒ na viprāḥ᳚ | va॒pāva̭nta॒nnāgninā॒ tapa̭ntaḥ |
pi॒turna pu॒tra upa̭si॒ preṣṭhaḥ̭ | ā gha॒rmo a॒gnimṛ॒taya̭nnasādīt || 13 ||
a॒nā॒dhṛ॒ṣyā pu॒rastā᳚t | a॒gnerādhi̭patye |
āyṷrme dāḥ | pu॒trava̭tī dakṣiṇa॒taḥ | indra॒syādhi̭patye | pra॒jā-mmḙ dāḥ | su॒ṣadā̭ pa॒ścāt | de॒vasya̭ savi॒turādhi̭patye | prā॒ṇa-mmḙ dāḥ | āśrṷtiruttara॒taḥ || 14 ||
mi॒trāvarṷṇayo॒rādhi̭patye | śrotra̭-mme dāḥ | vidhṛ̭tiru॒pari̭ṣṭāt | bṛha॒spate॒rādhi̭patye |
brahma̭ me dāḥ, kṣa॒tra-mmḙ dāḥ | tejo̭ me dhā॒ varco̭ me dhāḥ | yaśo̭ me dhā॒ stapo̭ me dhāḥ |
mano̭ me dhāḥ || mano॒raśvā̭-'si॒ bhūri̭putrā |
viśvā᳚bhyo mā nā॒ṣṭrābhyaḥ̭ pāhi || 15 ||
sū॒pa॒sadā̭ me bhūyā॒ mā mā̭ higṃsīḥ || tapo॒ ṣva̭gne॒ anta̭rāgṃ a॒mitrāṋ |
tapā॒śagṃsa̭mara॒ruṣaḥ॒ para̭sya | tapā̭ vaso cikitā॒no a॒cittāṋ | vi tḙ tiṣṭhantāma॒jarā̭ a॒yāsaḥ̭ || citaḥ̭ stha pari॒citaḥ̭ | svāhā̭ ma॒rudbhiḥ॒ pari̭śrayasva | mā a̭si | pra॒mā a̭si | pra॒ti॒mā a̭si || 16 ||
sa॒mmā a̭si | vi॒mā a̭si | u॒nmā a̭si | a॒ntari̭kṣasyānta॒rdhira̭si ||
diva॒ntapa̭sastrāyasva | ā॒bhi-rgī॒rbhi-ryadato̭ na ū॒nam |
āpyā̭yaya harivo॒ vardha̭mānaḥ | ya॒dā sto॒tṛbhyo॒ mahi̭ go॒trā ru॒jāsi̭ | bhū॒yi॒ṣṭha॒bhājo॒ adha̭ te syāma || śu॒krantḙ a॒nya-dya̭ja॒tantḙ a॒nyat || 17 ||
viṣṷrūpe॒ aha̭nī॒ dyauri̭vāsi | viśvā॒ hi mā॒yā ava̭si svadhāvaḥ | bha॒drā tḙ pūṣanni॒ha rā॒tira̭stu || arha̭-nbibharṣi॒ sāya̭kāni॒ dhanva̭ | arha̭nni॒ṣkaṃ-ya~̭ja॒taṃ-vi~॒śvarṷ̄pam | arha̭nni॒da-nda̭yase॒ viśva॒-mabbhṷvam | na vā ojī̭yo rudra॒ tvada̭sti || gā॒ya॒trama̭si | traiṣṭṷbhamasi | jāga̭tamasi | madhu॒ madhu॒ madhṷ || 18 ||
(a॒na॒ - ktva॒sā॒dī॒ - du॒tta॒ra॒taḥ - pā̭hi - prati॒mā a̭si - yaja॒tantḙ a॒nyaj - jāga̭tama॒syeka̭-ñca) (a. 5)
anuvākaṃ 6
daśa॒ prācī॒rdaśa̭ bhāsi dakṣi॒ṇā | daśa̭ pra॒tīcī॒rdaśa̭ bhā॒syudī̭cīḥ | daśo॒rdhvā bhā̭si sumana॒syamā̭naḥ | sa no॒ ruca̭ndhe॒hyahṛ̭ṇīyamānaḥ ||
a॒gniṣṭvā॒ vasṷbhiḥ pu॒rastā᳚-drocayatu gāya॒treṇa॒ chanda̭sā | sa mā̭ ruci॒to ro̭caya || indra̭stvā ru॒drai-rda̭kṣiṇa॒to ro̭cayatu॒ traiṣṭṷbhena॒ chanda̭sā |
sa mā̭ ruci॒to ro̭caya | varṷṇastvā-''di॒tyaiḥ pa॒ścā-dro̭cayatu॒ jāga̭tena॒ chanda̭sā |
sa mā̭ ruci॒to ro̭caya || 19 ||
dyu॒tā॒nastvā̭ māru॒to ma॒rudbhi̭ruttara॒to ro̭caya॒tvānṷṣṭubhena॒ chanda̭sā | sa mā̭ ruci॒to ro̭caya | bṛha॒spati̭stvā॒ viśvai᳚-rde॒vairu॒pari̭ṣṭā-drocayatu॒ pāṅktḙna॒ chanda̭sā | sa mā̭ ruci॒to ro̭caya || ro॒ci॒tastva-ndḙva gharma de॒veṣvasi̭ |
ro॒ci॒ṣī॒yāha-mma̭nu॒ṣyḙṣu ||
samrā᳚ḍ gharma ruci॒tastvaṃ e॒veṣvāyṷṣmāgsteja॒svī bra̭hmavarca॒sya̭si | ru॒ci॒to̭-'ha-mma̭nu॒ṣye᳚ṣvāyṷṣmāg-steja॒svī bra̭hmavarca॒sī bhṷ̄yāsam || ruga̭si | ruca॒-mmayi̭ dhehi || 20 ||
mayi॒ ruk || daśa̭ pu॒rastā᳚-drocase | daśa̭ dakṣi॒ṇā | daśa̭ pra॒tyamm | daśodaṅṋ̇ | daśo॒rdhvo bhā̭si sumana॒syamā̭naḥ | sa naḥ̭ samrā॒ḍiṣa॒mūrja̭-ndhehi | vā॒jī vā॒jinḙ pavasva | ro॒ci॒to gha॒rmo rṷcī॒ya || 21 ||
(ro॒ca॒ya॒ - dhe॒hi॒ - +nava̭ ca) (a. 6)
anuvākaṃ 7
apa̭śyaṅgo॒pāmani̭padyamānam | ā ca॒ parā̭ ca pa॒thibhi॒ścara̭ntam | sa sa॒ddhrīcī॒-ssa viṣṷ̄cī॒rvasā̭naḥ | ā va̭rīvarti॒ bhuva̭neṣva॒ntaḥ || atra̭ prā॒vīḥ | madhu॒ māddhvī᳚bhyā॒-mmadhu॒ mādhṷ̄cībhyām | anṷ vā-nde॒vavī̭taye || sama॒gnira॒gninā̭ gata | sa-nde॒vena̭ savi॒trā | sagṃ sūryḙṇa rocate || 22 ||
svāhā॒ sama॒gnistapa̭sā gata | sa-nde॒vena̭ savi॒trā |
sagṃ sūryḙṇārociṣṭa || dha॒rtā di॒vo vibhā̭si॒ raja̭saḥ | pṛ॒thi॒vyā dha॒rtā | u॒rora॒ntari̭kṣasya dha॒rtā | dha॒rtā de॒vo de॒vānā᳚m | ama̭rtyastapo॒jāḥ || hṛ॒de tvā॒ mana̭se tvā | di॒ve tvā॒ sūryā̭ya tvā || 23 ||
ū॒rdhvami॒ma-ma̭ddhva॒raṅkṛ̭dhi | di॒vi de॒veṣu॒ hotrā̭ yaccha || viśvā̭sā-mbhuvā-mpate | viśva̭sya bhuvanaspate | viśva̭sya manasaspate | viśva̭sya vacasaspate | viśva̭sya tapasaspate | viśva̭sya brahmaṇaspate | de॒va॒śrūstvandḙva gharma de॒vā-npā̭hi || ta॒po॒jāṃ-vā~ca̭ma॒sme niya̭ccha devā॒yuva᳚m || 24 ||
garbho̭ de॒vānā᳚m || pi॒tā ma̭tī॒nām ||
patiḥ̭ pra॒jānā᳚m || matiḥ̭ kavī॒nām ||
sande॒vo de॒vena̭ savi॒trā-'ya̭tiṣṭa | sagṃ sūryḙṇārukta || ā॒yu॒rdāstvama॒smabhya̭-ṅgharma varco॒dā a̭si || pi॒tā no̭-'si pi॒tā no̭ bodha || ā॒yu॒rdhāsta̭nū॒dhāḥ pa̭yo॒dhāḥ |
va॒rco॒dā va̭rivo॒dā dra̭viṇo॒dāḥ || 25 ||
a॒nta॒ri॒kṣa॒pra॒ u॒rorvarī̭yān | a॒śī॒mahi̭ tvā॒ mā mā̭ higṃsīḥ || tvama̭gne gṛ॒hapa̭ti-rvi॒śāma̭si | viśvā̭sā॒-mmānṷṣīṇām | śa॒ta-mpū॒rbhirya̭viṣṭha pā॒hyagṃha̭saḥ | sa॒me॒ddhāragṃ̭ śa॒tagṃ himāḥ᳚ |
ta॒-ndrā॒viṇagṃ̭ hārdivā॒nam | i॒haiva rā॒tayaḥ̭ santu || tvaṣṭī̭matī te sapeya | su॒retā॒ reto॒ dadhā̭nā |
vī॒raṃ-vi~̭deya॒ tava̭ sa॒ndṛśi̭ |
mā-'hagṃ rā॒yaspoṣḙṇa॒ vi yo̭ṣam || 26 ||
(ro॒ca॒te॒-sūrya̭ya tvā - devā॒yuvaṃ̭ - draviṇo॒dā - dadhā̭nā॒ dve ca̭) (a. 7)
anuvākaṃ 8
de॒vasya̭ tvā savi॒tuḥ pra̭sa॒ve | a॒śvino᳚-rbā॒hubhyā᳚m |
pū॒ṣṇo hastā᳚bhyā॒mā da̭de || adi̭tyai॒ rāsnā̭-'si | iḍa॒ ehi̭ | adi̭ta॒ ehi̭ | sara̭sva॒tyehi̭ | asā॒vehi̭ |
asā॒vehi̭ | asā॒vehi̭ || 27 ||
adi̭tyā u॒ṣṇīṣa̭masi | vā॒yura̭syai॒ḍaḥ | pū॒ṣā tvo॒pāva̭sṛjatu | a॒śvibhyā॒-mpra dā̭paya | yaste॒ stanaḥ̭ śaśa॒yo yo ma̭yo॒bhūḥ | yena॒ viśvā॒ puṣya̭si॒ vāryā̭ṇi | yo ra̭tna॒dhā va̭su॒vidya-ssu॒datraḥ̭ |
sara̭svati॒ tami॒ha dhāta̭ve-'kaḥ || usra̭ gha॒rmagṃ śigṃ̭ṣa | usra̭ gha॒rma-mpā̭hi || 28 ||
gha॒rmāya̭ śigṃṣa | bṛha॒spati॒stvopa̭sīdatu | dāna̭va-sstha॒ pera̭vaḥ | vi॒ṣva॒gvṛto॒ lohi̭tena | a॒śvibhyā᳚-mpinvasva | sara̭svatyai pinvasva |
pū॒ṣṇe pi̭nvasva | bṛha॒spata̭ye pinvasva | indrā̭ya pinvasva | indrā̭ya pinvasva || 29 ||
gā॒ya॒tro̭-'si | traiṣṭṷbho-'si | jāga̭tamasi | sa॒horjo bhā॒genopa॒ mehi̭ | indrā᳚śvinā॒ madhṷna-ssāra॒ghasya̭ | gha॒rma-mpā̭ta vasavo॒ yaja̭tā॒ vaṭ | svāhā᳚ tvā॒ sūrya̭sya ra॒śmayḙ vṛṣṭi॒vana̭ye juhomi | madhṷ ha॒vira̭si | sūrya̭sya॒ tapa̭stapa | dyāvā̭pṛthi॒vībhyā᳚-ntvā॒ pari̭gṛhṇāmi || 30 ||
a॒ntari̭kṣeṇa॒ tvopa̭yacchāmi | de॒vānā᳚-ntvā pitṛ॒ṇāmanṷmato॒ bhartugṃ̭ śakeyam | tejo̭-'si |
tejo-'nu॒prehi̭ | di॒vi॒spṛmmā mā̭ higṃsīḥ |
a॒nta॒ri॒kṣa॒spṛmmā mā̭ higṃsīḥ | pṛ॒thi॒vi॒spṛmmā mā̭ higṃsīḥ |
suva̭rasi॒ suva̭rme yaccha |
divaṃ̭-ya~ccha di॒vo mā̭ pāhi || 31 ||
(ehi̭ - pāhi - pinvasva - gṛhṇāmi॒ - +nava̭ ca) (a. 8)
anuvākaṃ 9
sa॒mu॒drāya̭ tvā॒ vātā̭ya॒ svāhā᳚ | sa॒li॒lāya̭ tvā॒ vātā̭ya॒ svāhā᳚ | a॒nā॒dhṛ॒ṣyāya̭ tvā॒ vātā̭ya॒ svāhā᳚ | a॒pra॒ti॒dhṛ॒ṣyāya̭ tvā॒ vātā̭ya॒ svāhā᳚ |
a॒va॒syave᳚ tvā॒ vātā̭ya॒ svāhā᳚ | duva̭svate tvā॒ vātā̭ya॒ svāhā᳚ | śimi̭dvate tvā॒ vātā̭ya॒ svāhā᳚ | a॒gnaye᳚ tvā॒ vasṷmate॒ svāhā᳚ |
somā̭ya tvā ru॒drava̭te॒ svāhā᳚ |
varṷṇāya tvā-''di॒tyava̭te॒ svāhā᳚ || 32 ||
bṛha॒spata̭ye tvā vi॒śvade᳚vyāvate॒ svāhā᳚ |
sa॒vi॒tre tva̭rbhu॒matḙ vibhu॒mate᳚ prabhu॒mate॒ vāja̭vate॒ svāhā᳚ | ya॒māya॒ tvā-'ṅgi̭rasvate pitṛ॒mate॒ svāhā᳚ || viśvā॒ āśā̭ dakṣiṇa॒sat | viśvā᳚-nde॒vāna̭yāḍi॒ha | svāhā̭kṛtasya gha॒rmasya̭ | madhoḥ᳚ pibatamaśvinā |
svāhā॒-'gnayḙ ya॒jñiyā̭ya | śaṃ-ya~jṷrbhiḥ ||
aśvi̭nā gha॒rma-mpā̭tagṃ hārdivā॒nam || 33 ||
aha̭-rdi॒vābhi̭-rū॒tibhiḥ̭ | anṷ vā॒-ndyāvā̭pṛthi॒vī magṃ̭sātām | svāhendrā̭ya || svāhendrā॒vaṭ | gha॒rmama̭pātamaśvinā hārdivā॒nam |
aha̭-rdi॒vābhi̭rū॒tibhiḥ̭ | anṷ vā॒-ndyāvā̭pṛthi॒vī a̭magṃsātām | ta-mprā॒vyaṃ̭-ya~thā॒ vaṭ | namo̭ di॒ve | namaḥ̭ pṛthi॒vyai || 34 ||
di॒vi dhā̭ i॒maṃ-ya~॒jñam | ya॒jñami॒ma-ndi॒vi dhāḥ᳚ | diva̭ṅgaccha | a॒ntari̭kṣaṅgaccha | pṛ॒thi॒vīṅga̭ccha | pañca̭ pra॒diśo̭ gaccha | de॒vā-ngha̭rma॒pā-nga̭ccha | pi॒tṝ-ngha̭rma॒pā-nga̭ccha || 35 ||
(ā॒di॒tyava̭te॒ svāhā̭-hārdivā॒nam-pṛ̭thi॒vyā-+a॒ṣṭau ca̭) (a. 9)
anuvākaṃ 10
i॒ṣe pī̭pihi | ū॒rje pī̭pihi | brahma̭ṇe pīpihi | kṣa॒trāya̭ pīpihi | a॒dbhyaḥ pī̭pihi | oṣa̭dhībhyaḥ pīpihi | vana॒spati̭bhyaḥ pīpihi | dyāvā̭pṛthi॒vībhyā᳚-mpīpihi | su॒bhū॒tāya̭ pīpihi | bra॒hma॒va॒rca॒sāya̭ pīpihi || 36 ||
yaja̭mānāya pīpihi | mahya॒ñjyaiṣṭhyā̭ya pīpihi || tviṣyai᳚ tvā | dyu॒mnāya̭ tvā | i॒ndri॒yāya̭ tvā॒ bhūtyai᳚ tvā | dharmā̭-'si su॒dharmā me᳚ nya॒sme | brahmā̭ṇi dhāraya | kṣa॒trāṇi̭ dhāraya | viśa̭ndhāraya |
nettvā॒ vātaḥ̭ ska॒ndayā᳚t || 37 ||
a॒muṣya̭ tvā prā॒ṇe sā̭dayāmi | a॒munā̭ sa॒ha ni̭ra॒rthaṅga̭ccha | yo᳚-'smā-ndveṣṭi̭ |
yañca̭ va॒ya-ndvi॒ṣmaḥ || pū॒ṣṇe śara̭se॒ svāhā᳚ |
grāva̭bhya॒-ssvāhā᳚ | pra॒ti॒rebhya॒-ssvāhā᳚ | dyāvā̭pṛthi॒vībhyā॒g॒ svāhā᳚ |
pi॒tṛbhyo̭ gharma॒pebhya॒-ssvāhā᳚ ||
ru॒drāya̭ ru॒draho᳚tre॒ svāhā᳚ || 38 ||
aha॒-rjyotiḥ̭ ke॒tunā̭ juṣatām | su॒jyo॒ti-rjyoti̭ṣā॒g॒ svāhā᳚ | rātri॒rjyotiḥ̭ ke॒tunā̭ juṣatām | su॒jyo॒ti-rjyoti̭ṣā॒g॒ svāhā᳚ | apī̭paro॒ mā-'hno॒ rātri̭yai mā pāhi | e॒ṣā tḙ agne sa॒mit | tayā॒ sami̭ddhyasva | āyṷrme dāḥ | varca̭sā mā-'ñjīḥ | apī̭paro mā॒ rātri̭yā॒ ahno̭ mā pāhi || 39 ||
e॒ṣā tḙ agne sa॒mit | tayā॒ sami̭ddhyasva | āyṷrme dāḥ | varca̭sā mā-'ñjīḥ | a॒gni-rjyoti॒-rjyoti̭ra॒gni-ssvāhā᳚ |
sūryo॒ jyoti॒-rjyoti॒-ssūrya॒-ssvāhā᳚ | bhū-ssvāhā᳚ | hu॒tagṃ ha॒viḥ | madhṷ ha॒viḥ | indra̭tame॒-'gnau || 40 ||
pi॒tā no̭-'si॒ mā mā̭ higṃsīḥ | a॒śyāma̭ te devagharma |
madhṷmato॒ vāja̭vataḥ pitu॒mataḥ̭ | aṅgi̭rasvata-ssvadhā॒vinaḥ̭ | a॒śī॒mahi̭ tvā॒ mā mā̭ higṃsīḥ || svāhā᳚ tvā॒ sūrya̭sya ra॒śmibhyaḥ̭ | svāhā᳚ tvā॒ nakṣa̭trebhyaḥ || 41 ||
(bra॒hma॒va॒rca॒sāya̭ pīpihi - ska॒ndayā᳚-d- ru॒drāya̭ ru॒draho᳚tre॒ svāhā - 'hno̭ mā pāh - ya॒gnau - +sa॒pta ca̭) (a. 10)
anuvākaṃ 11
gharma॒ yā tḙ di॒vi śuk | yā gā̭ya॒tre chanda̭si | yā brā᳚hma॒ṇe | yā ha̭vi॒rdhāne᳚ | tānta̭ e॒tenāva̭yaje॒ svāhā᳚ || gharma॒ yā te॒-'ntari̭kṣe॒ śuk |
yā traiṣṭṷbhe॒ chanda̭si | yā rā̭ja॒nye᳚ | yā-''gnī᳚ddhre |
tānta̭ e॒tenāva̭yaje॒ svāhā᳚ || 42 ||
gharma॒ yā tḙ pṛthi॒vyāgṃ śuk | yā jāga̭te॒ chanda̭si | yā vaiśye᳚ | yā sada̭si | tānta̭ e॒tenāva̭yaje॒ svāhā᳚ || a॒gniśca̭ havya॒vāha̭no॒ bhava̭tā-ndā॒śuṣe॒ mayaḥ̭ || anvida̭numate॒ tva-mmanyā̭sai॒ śañca̭naḥ kṛdhi | kratve॒ dakṣā̭ya no hinu॒ praṇa॒ āyūgṃ̭ṣi tāriṣaḥ || di॒vastvā̭ para॒spāyāḥ᳚ | a॒ntari̭kṣasya ta॒nuvaḥ̭ pāhi | pṛ॒thi॒vyāstvā॒ dharma̭ṇā || 43 ||
va॒yamanṷkrāmāma suvi॒tāya॒ navya̭se || brahma̭ṇastvā para॒spāyāḥ᳚ | kṣa॒trasya̭ ta॒nuvaḥ̭ pāhi | vi॒śastvā॒ dharma̭ṇā | va॒yamanṷkrāmāma suvi॒tāya॒ navya̭se || prā॒ṇasya̭ tvā para॒spāyai᳚ | cakṣṷṣasta॒nuvaḥ̭ pāhi | śrotra̭sya tvā॒ dharma̭ṇā | va॒yamanṷkrāmāma suvi॒tāya॒ navya̭se || va॒lgura̭si śaṃ॒-yu~dhā̭yāḥ || 44 ||
śiśu॒-rjana̭dhāyāḥ || śañca॒ vakṣi॒ pari̭ ca॒ vakṣi̭ |
catuḥ̭ srakti॒rnābhi̭r-ṛ॒tasya̭ | sado̭ vi॒śvāyu॒-śśarma̭ sa॒prathāḥ᳚ | apa॒ dveṣo॒ apa॒ hvaraḥ̭ | a॒nyadvra̭tasya saścima | gharmai॒ta-tte-'nna̭me॒ta-tpurī̭ṣam | tena॒ vardha̭sva॒ cā ca̭ pyāyasva | va॒rdhi॒ṣī॒mahi̭ ca va॒yam | ā ca̭ pyāsiṣī॒mahi̭ || 45 ||
ranti॒-rnāmā̭si di॒vyo ga̭ndha॒rvaḥ | tasya̭ te pa॒dvaddha̭vi॒rdhāna᳚m | a॒gniraddhya̭kṣāḥ | ru॒dro-'dhi̭patiḥ || sama॒hamāyṷṣā | sa-mprā॒ṇena̭ |
saṃ-va~rca̭sā | sa-mpaya̭sā | saṅgaṷpa॒tyena̭ | sagṃ rā॒yaspoṣḙṇa || 46 ||
vya̭sau | yo᳚-'smā-ndveṣṭi̭ | yañca̭ va॒ya-ndvi॒ṣmaḥ ||
aci̭krada॒dvṛṣā॒ hariḥ̭ | ma॒hā-nmi॒tro na da̭rśa॒taḥ | sagṃ sūryḙṇa rocate || cida̭si samu॒drayo̭niḥ | indu॒-rdakṣaḥ̭ śye॒na ṛ॒tāvā᳚ | hira̭ṇyapakṣa-śśaku॒no bhṷra॒ṇyuḥ | ma॒hān-thsa॒dhasthe᳚ dhru॒va āniṣa̭ttaḥ || 47 ||
nama̭ste astu॒ mā mā̭ higṃsīḥ || vi॒śvāva̭sugṃ soma gandha॒rvam | āpo̭ dadṛ॒śuṣīḥ᳚ | tadṛ॒tenā॒ vyā̭yann | tada॒nvavai᳚t | indro̭ rārahā॒ṇa ā̭sām | pari॒ sūrya̭sya pari॒dhīgṃ ra̭paśyat || vi॒śvāva̭sura॒bhi tanno̭ gṛṇātu | di॒vyo ga̭ndha॒rvo raja̭so vi॒mānaḥ̭ |
yadvā̭ ghā sa॒tyamu॒ta yanna vi॒dma || 48 ||
dhiyo̭ hinvā॒no dhiya॒ inno̭ avyāt || sasni̭mavinda॒ccara̭ṇe na॒dīnā᳚m |
apā̭vṛṇo॒-dduro॒ aśma̭vrajānām | prāsā᳚-ngandha॒rvo a॒mṛtā̭ni vocat | indro॒ dakṣa॒-mpari̭jānāda॒hīna᳚m || e॒tattva-ndḙva gharma de॒vo de॒vānupā̭gāḥ |
i॒dama॒ha-mma̭nu॒ṣyo̭ manu॒ṣyāṋ | soma̭pī॒thānu॒ mehi̭ | sa॒ha pra॒jayā̭ sa॒ha rā॒yaspoṣḙṇa ||
su॒mi॒trā na॒ āpa॒ oṣa̭dhaya-ssantu || 49 ||
du॒rmi॒trāstasmai̭ bhūyāsuḥ | yo᳚-'smā-ndveṣṭi̭ |
yañca̭ va॒ya-ndvi॒ṣmaḥ || udva॒ya-ntama̭sa॒spari॒ paśya̭nto॒ jyoti॒rutta̭ram | de॒va-ndḙva॒trā sūrya॒maga̭nma॒ jyoti̭rutta॒mam || udu॒ tya-ñjā॒tavḙdasa-nde॒vaṃ-va~̭hanti ke॒tavaḥ̭ | dṛ॒śe viśvā̭ya॒ sūrya᳚m | ci॒tra-nde॒vānā॒-muda̭gā॒danī̭ka॒-ñcakṣṷ rmi॒trasya॒ varṷṇasyā॒-'gneḥ || i॒mamū॒ ṣu tyama॒smabhyagṃ̭ sa॒nim | gā॒ya॒trannavī̭yāgṃsam |
agnḙ de॒veṣu॒ pravo̭caḥ || 50 ||
(yā-''gnī᳚ddhre॒ tāntā̭ e॒tenāva̭yaje॒ svāhā॒ - dharma̭ṇā - śaṃ॒-yu~dhā̭yāḥ - pyāsiṣī॒mahi॒-poṣḙṇa॒-niṣa̭tto-vi॒dma-sa̭n-+tva॒ṣṭau ca̭) (a. 11)
anuvākaṃ 12
ma॒hī॒nā-mpayo̭-'si॒ vihi̭ta-ndeva॒trā |
jyo॒ti॒rbhā a̭si॒ vana॒spatī̭nā॒moṣa̭dhīnā॒gṃ॒ rasaḥ̭ |
vā॒jina̭-ntvā vā॒jino-'va̭ nayāmaḥ |
ū॒rdhva-mmanaḥ̭ suva॒rgam || 51 || (a. 12)
anuvākaṃ 13
askā॒-ndyauḥ pṛ̭thi॒vīm | askā̭nṛṣa॒bho yuvā॒ gāḥ |
ska॒nnemā viśvā॒ bhuva̭nā | ska॒nno ya॒jñaḥ praja̭nayatu || askā॒naja̭ni॒ prāja̭ni | ā ska॒nnājjā̭yate॒ vṛṣā᳚ |
ska॒nnā-tpraja̭niṣīmahi || 52 || (a. 13)
anuvākaṃ 14
yā pu॒rastā᳚-dvi॒dyudāpa̭tat | tānta̭ e॒tenāva̭ yaje॒ svāhā᳚ | yā da̭kṣiṇa॒taḥ | yā pa॒ścāt | yotta̭ra॒taḥ | yopari̭ṣṭā-dvi॒dyudāpa̭tat | tānta̭ e॒tenāva̭ yaje॒ svāhā᳚ || 53 || (a. 14)
anuvākaṃ 15
prā॒ṇāya॒ svāhā᳚ vyā॒nāya॒ svāhā̭ 'pā॒nāya॒ svāhā᳚ |
cakṣṷṣe॒ svāhā॒ śrotrā̭ya॒ svāhā᳚ |
mana̭se॒ svāhā̭ vā॒ce sara̭svatyai॒ svāhā᳚ || 54 || (a. 15)
anuvākaṃ 16
pū॒ṣṇe svāhā̭ pū॒ṣṇe śara̭se॒ svāhā᳚ |
pū॒ṣṇe pra̭pa॒tthyā̭ya॒ svāhā̭ pū॒ṣṇe na॒randhi̭ṣāya॒ svāhā᳚ | pū॒ṣṇe-'ṅghṛ̭ṇaye॒ svāhā̭ pū॒ṣṇe na॒ruṇā̭ya॒ svāhā᳚ |
pū॒ṣṇe sā̭ke॒tāya॒ svāhā᳚ || 55 || (a. 16)
anuvākaṃ 17
uda̭sya॒ śuṣmā᳚-dbhā॒nurnārta॒ bibha̭rti | bhā॒ra-mpṛ̭thi॒vī na bhūma̭ | pra śu॒kraitṷ de॒vī ma̭nī॒ṣā | a॒sma-thsuta̭ṣṭo॒ ratho॒ na vā॒jī | arca̭nta॒ eke॒ mahi॒ sāma̭ manvata | tena॒ sūrya̭madhārayann |
tena॒ sūrya̭marocayann | gha॒rma-śśira॒stada॒yama॒gniḥ |
purī̭ṣamasi॒ sampri̭ya-mpra॒jayā̭ pa॒śubhi̭rbhuvat | pra॒jāpati̭stvā sādayatu | tayā̭ de॒vata̭yā 'ṅgira॒sva-ddhru॒vā sī̭da || 56 || (a. 17)
anuvākaṃ 18
yāstḙ agna ā॒rdrā yona̭yo॒ yāḥ kṷlā॒yinīḥ᳚ |
ye tḙ agna॒ inda̭vo॒ yā u॒ nābha̭yaḥ | yāstḙ agne ta॒nuva॒ ūrjo॒ nāma̭ | tābhi॒stvamu॒bhayī̭bhi-ssaṃvi~dā॒naḥ | pra॒jābhi̭ragne॒ dravi̭ṇe॒ha sī̭da |
pra॒jāpa̭tistvā sādayatu | tayā̭ de॒vata̭yā-'ṅgira॒sva-ddhru॒vā sī̭da || 57 || (a. 18)
anuvākaṃ 19
a॒gnira̭si vaiśvāna॒ro̭-'si | saṃ॒va~॒thsa॒ro̭-'si parivathsa॒ro̭-'si | i॒dā॒va॒thsa॒ro̭-'sīduvathsa॒ro̭-'si | i॒dva॒thsa॒ro̭-'si vathsa॒ro̭-'si | tasya̭ te vasa॒nta-śśiraḥ̭ | grī॒ṣmo dakṣi̭ṇaḥ pa॒kṣaḥ | va॒r॒ṣāḥ puccha᳚m |
śa॒radutta̭raḥ pa॒kṣaḥ | he॒ma॒nto maddhya᳚m | pū॒rva॒pa॒kṣāścita̭yaḥ | a॒pa॒ra॒pa॒kṣāḥ purī̭ṣam | a॒ho॒rā॒trāṇīṣṭa̭kāḥ | tasya̭ te॒ māsā᳚ścārdhamā॒sāśca̭ kalpantām |
ṛ॒tava̭ste kalpantām | saṃ॒va~॒thsa॒rastḙ kalpatām |
a॒ho॒rā॒trāṇi̭ te kalpantām | eti॒ preti॒ vīti॒ samityuditi̭ |
pra॒jāpa̭tistvā sādayatu | tayā̭ de॒vata̭yā-'ṅgira॒sva-ddhru॒vā sī̭da || 58 ||
(cita̭yo॒ nava̭ ca) (a. 19)
anuvākaṃ 20
bhūrbhuva॒ssuvaḥ̭ | ū॒rdhva ū॒ ṣuṇa̭ ū॒taye᳚ | ū॒rdhvo naḥ̭ pā॒hyagṃha̭saḥ ||
vi॒dhunda̭drā॒ṇagṃ sama̭ne bahū॒nām | yuvā̭na॒gṃ॒ santa̭-mpali॒to ja̭gāra | de॒vasya̭ paśya॒ kāvya̭-mmahi॒tvā-'dyā ma॒māra̭ | sa hya॒-ssamā̭na ||
yadṛ॒te ci̭dabhi॒śriṣaḥ̭ | pu॒rā ja॒rtṛbhya̭ ā॒tṛdaḥ̭ |
sandhā̭tā sa॒ndhi-mma॒ghavā̭ puro॒vasuḥ̭ || 59 ||
niṣka̭rtā॒ vihrṷta॒-mpunaḥ̭ || puna̭rū॒rjā ni va̭rtasva॒ puna̭ragna i॒ṣā-''yṷṣā | puna̭rnaḥ pāhi vi॒śvataḥ̭ || sa॒ha ra॒yyā ni va̭rta॒svāgne॒ pinva̭sva॒ dhāra̭yā | vi॒śvaphsni̭yā vi॒śvata॒spari̭ || mā no̭ gharma vyathi॒to vi̭vyatho naḥ | mā naḥ॒ para॒madha̭ra॒mmā rajo̭-'naiḥ | moṣva̭smāg stama̭syanta॒rā dhāḥ᳚ | mā ru॒driyā̭so a॒bhigṷrvṛ॒dhānaḥ̭ || mā naḥ॒ kratṷbhir-hīḍi॒tebhi̭ra॒smān | dviṣā̭ sunīte॒ mā parā̭dāḥ |
mā no̭ ru॒dro nir-ṛ̭ti॒rmā no॒ astā᳚ |
mā dyāvā̭pṛthi॒vī hī̭ḍiṣātām || 60 ||
upa̭ no mitrāvaruṇāvi॒hāva̭tam | a॒nvādī᳚ddhyāthāmi॒ha naḥ̭ sakhāyā | ā॒di॒tyānā॒-mprasi̭tirhe॒tiḥ | u॒grā śa॒tāpā᳚ṣṭhā gha॒ viṣā॒ pari̭ṇo vṛṇaktu ||
i॒ma-mmḙ varuṇa śrudhī॒ hava̭ma॒dyā ca̭ mṛḍaya | tvāma̭va॒syurā ca̭ke || tattvā̭ yāmi॒ brahma̭ṇā॒ vanda̭māna॒-stadā śā᳚ste॒ yaja̭māno ha॒virbhiḥ̭ | ahḙḍamāno varuṇe॒ha bo॒ddhyurṷśagṃsa॒ mā na॒ āyuḥ॒ pramo̭ṣīḥ || tva-nno̭ agne॒ varṷṇasya vi॒dvā-nde॒vasya॒ heḍo-'va̭ yāsi sīṣṭhāḥ | yaji̭ṣṭho॒ vahni̭ tama॒-śśośṷcāno॒ viśvā॒ dveṣāgṃ̭si॒ pramṷmugdhya॒smat ||
sa tvanno̭ ange-'va॒mo bha̭vo॒tī nedi̭ṣṭho a॒syā u॒ṣaso॒ vyṷṣṭau | ava̭ yakṣva no॒ varṷṇa॒gṃ॒ rarā̭ṇo vī॒hi mṛ̭ḍī॒kagṃ su॒havo̭ na edhi || tvama̭gne a॒yā-'si̭ | a॒yā sanmana̭sā hi॒taḥ | a॒yā sanaḥa॒vyamṷ̄hiṣe | a॒yā no̭ dhehi bheṣa॒jam | i॒ṣṭo a॒gnirāhṷtaḥ | svāhā̭kṛtaḥ pipartu naḥ | sva॒gā de॒vebhya̭ i॒da-nnamaḥ̭ ||
udva॒ya-ntama̭sa॒spari॒ paśya̭nto॒ jyoti॒rutta̭ram | de॒va-ndḙva॒trā sūrya॒maga̭nma॒ jyoti̭rutta॒mam || udu॒ tya-ñjā॒tavḙdasa-nde॒vaṃ-va~̭hanti ke॒tavaḥ̭ | dṛ॒śe viśvā̭ya॒ sūrya᳚m | ci॒tra-nde॒vānā॒-muda̭gā॒danī̭ka॒-ñcakṣṷ rmi॒trasya॒ varṷṇasyā॒-'gneḥ ||
vayaḥ̭ supa॒rṇā upa̭sedu॒rindra᳚m | pri॒yamḙdhā॒ ṛṣa̭yo॒ nādha̭mānāḥ | apa̭ dhvā॒ntamū᳚rṇu॒hi pū॒rdhi cakṣuḥ̭ | mu॒mu॒gdhya̭smā-nni॒dhayḙva ba॒ddhān || 61 ||
(pu॒ro॒vasṷrhīḍiṣātāgṃ supa॒rṇāḥ) (a. 20)
anuvākaṃ 21
bhūrbhuva॒ssuvaḥ̭ | mayi॒ tyadi̭ndri॒ya-mma॒hat | mayi॒ dakṣo॒ mayi॒ kratuḥ̭ | mayi̭ dhāyi su॒vīrya᳚m | triśṷggha॒rmo vibhā̭tu me | ākū᳚tyā॒ mana̭sā sa॒ha |
vi॒rājā॒ jyoti̭ṣā sa॒ha | ya॒jñena॒ paya̭sā sa॒ha | brahma̭ṇā॒ teja̭sā sa॒ha | kṣa॒treṇa॒ yaśa̭sā sa॒ha | sa॒tyena॒ tapa̭sā sa॒ha | tasya॒ doha̭maśīmahi |
tasya̭ su॒mnama̭śīmahi | tasya̭ bha॒kṣama̭śīmahi |
tasya̭ ta॒ indrḙṇa pī॒tasya॒ madhṷmataḥ |
upa̭hūta॒syopa̭hūto bhakṣayāmi || 62 ||
(yaśa̭sā sa॒ha ṣaṭca̭) (a. 21)
anuvākaṃ 22
yāstḙ agne gho॒rāsta॒nuvaḥ̭ | kṣucca॒ tṛṣṇā̭ ca | asnu॒kcānā̭hutiśca | a॒śa॒na॒yā ca̭ pipā॒sā ca̭ | se॒diścāma̭tiśca | e॒tāstḙ agne gho॒rāsta॒nuvaḥ̭ |
tābhi̭ra॒muṅga̭ccha | yo᳚-'smā-ndveṣṭi̭ |
yañca̭ va॒ya-ndvi॒ṣmaḥ || 63 || (a. 22)
anuvākaṃ 23
snikca॒ snīhi̭tiśca॒ snihi̭tiśca | u॒ṣṇā ca̭ śī॒tā ca̭ |
u॒grā ca̭ bhī॒mā ca̭ | sa॒dāmnī̭ se॒dirani̭rā | e॒tāstḙ agne gho॒rāsta॒nuvaḥ̭ | tābhi̭ra॒muṅga̭ccha | yo᳚-'smā-ndveṣṭi̭ | yañca̭ va॒ya-ndvi॒ṣmaḥ || 64 || (a. 23)
anuvākaṃ 24
dhuni̭śca dhvā॒ntaśca̭ dhva॒naśca̭ dhva॒nayagg̭śca |
ni॒li॒mpaśca̭ vili॒mpaśca̭ vikṣi॒paḥ || 65 || (a. 24)
anuvākaṃ 25
u॒graśca॒ dhuni̭śca dhvā॒ntaśca̭ dhva॒naśca̭ dhva॒nayagg̭śca | sa॒ha॒sa॒hvāgśca॒ saha̭mānaśca॒ saha̭svāgśca॒ sahī̭yāgśca |
etya॒ pretya̭ vikṣi॒paḥ || 66 || (a. 25)
anuvākaṃ 26
a॒ho॒rā॒tre tvodī̭rayatām | a॒rdha॒mā॒sāstvodī᳚-ñjayantu | māsā᳚stvā śrapayantu | ṛ॒tava̭stvā pacantu |
saṃ॒va~॒thsa॒rastvā̭ hantvasau || 67 || (a. 26)
anuvākaṃ 27
khaṭ pha-ḍja॒hi | chi॒ndhī bhi॒ndhī ha॒ndhī kaṭ |
iti॒ vācaḥ̭ krūrā॒ṇi || 68 || (a. 27)
anuvākaṃ 28
vigā i̭ndra vi॒cara᳚n-thspāśayasva | sva॒panta̭mindra paśu॒manta̭miccha | vajrḙṇā॒mu-mbo̭dhaya durvi॒datra᳚m | sva॒pa॒to᳚-'sya॒ praha̭ra॒ bhoja̭nebhyaḥ ||
agnḙ a॒gninā॒ saṃva~̭dasva | mṛtyo̭ mṛ॒tyunā॒ saṃva~̭dasva | nama̭ste astu bhagavaḥ || sa॒kṛttḙ agne॒ namaḥ̭ | dviste॒ namaḥ̭ | triste॒ namaḥ̭ | ca॒tuste॒ namaḥ̭ | pa॒ñca॒kṛtva̭ste॒ namaḥ̭ |
da॒śa॒kṛtva̭ste॒ namaḥ̭ | śa॒ta॒kṛtva̭ste॒ namaḥ̭ | ā॒sa॒ha॒sra॒kṛtva̭ste॒ namaḥ̭ | a॒pa॒ri॒mi॒ta॒kṛtva̭ste॒ namaḥ̭ | nama̭ste astu॒ mā mā̭ higṃsīḥ || 69 ||
(triste॒ namaḥ̭ sa॒pta ca̭) (a. 28)
anuvākaṃ 29
asṛ̭-nmukho rudhi॒reṇā॒vya̭ktaḥ | ya॒masya̭ dū॒ta-śśvapā॒-dvidhā̭vasi | gṛddhraḥ̭ supa॒rṇaḥ ku॒ṇapa॒nniṣḙvase |
ya॒masya̭ dū॒taḥ prahi̭to bha॒vasya̭ co॒bhayoḥ᳚ || 70 || (a. 29)
anuvākaṃ 30
yade॒ta-dvṛ̭ka॒so bhū॒tvā | vāg de᳚vyabhi॒rāya̭si | dvi॒ṣanta̭-mme॒-'bhirā̭ya | ta-mmṛ̭tyo mṛ॒tyavḙ naya | sa ārtyā-''rti॒mārccha̭tu || 71 || (a. 30)
anuvākaṃ 31
yadī̭ṣi॒to yadi̭ vā svakā॒mī | bha॒yeḍa̭ko॒ vada̭ti॒ vāca̭me॒tām | tāmi̭ndrā॒gnī brahma̭ṇā saṃvi~dā॒nau |
śi॒vāma॒smabhya̭-ṅkṛṇutaṅgṛ॒heṣṷ || 72 || (a. 31)
anuvākaṃ 32
dīrgha̭mukhi॒ durha̭ṇu | mā sma̭ dakṣiṇa॒to va̭daḥ |
yadi̭ dakṣiṇa॒to vadā᳚-ddvi॒ṣanta॒-mme-'va̭ bādhāsai || 73 || (a. 32)
anuvākaṃ 33
i॒tthādulṷ̄ka॒ āpa̭ptat | hi॒ra॒ṇyā॒kṣo ayo̭mukhaḥ |
rakṣa̭sāndū॒ta āga̭taḥ | tami॒to nā̭śayāgne || 74 || (a. 33)
anuvākaṃ 34
yade॒ta-dbhū॒tānya̭nvā॒viśya̭ | daivīṃ॒-vā~caṃ̭-va~॒dasi̭ | dvi॒ṣato̭ naḥ॒ parā̭vada | tā-nmṛ̭tyo mṛ॒tyavḙ naya | ta ārtyā-''rti॒mārccha̭ntu |
a॒gninā॒-'gni-ssaṃva~̭datām || 75 || (a. 34)
anuvākaṃ 35
pra॒sārya̭ sa॒kthyaṷ pata̭si | sa॒vyamakṣi̭ ni॒pepi̭ ca |
meha ka̭syaca॒nāma̭mat || 76 || (a. 35)
anuvākaṃ 36
atri̭ṇā tvā krime hanmi | kaṇvḙna ja॒mada̭gninā |
vi॒śvāva̭so॒-rbrahma̭ṇā ha॒taḥ | krimī̭ṇā॒gṃ॒ rājā᳚ |
apyḙṣāg stha॒pati̭rha॒taḥ | atho̭ mā॒tā-'tho̭ pi॒tā |
atho᳚ sthū॒rā atho᳚ kṣu॒drāḥ | atho̭ kṛ॒ṣṇā atho᳚ śve॒tāḥ | atho̭ ā॒śāti̭kā ha॒tāḥ |
śve॒tābhiḥ̭ sa॒ha sarvḙ ha॒tāḥ || 77 || (a. 36)
anuvākaṃ 37
āha॒rāva̭dya | śṛ॒tasya̭ ha॒viṣo॒ yathā᳚ | ta-thsa॒tyam |
yada॒muṃ-ya~॒masya॒ jambha̭yoḥ | āda̭dhāmi॒ tathā॒ hi tat | khaṇphaṇmrasi̭ || 78 || (a. 37)
anuvākaṃ 38
brahma̭ṇā tvā śapāmi | brahma̭ṇastvā śa॒pathḙna śapāmi | gho॒reṇa̭ tvā॒ bhṛgṷ̄ṇā॒ñcakṣṷṣā॒ prekṣe᳚ | rau॒dreṇa॒ tvāṅgi̭rasā॒-mmana̭sā dhyāyāmi |
a॒ghasya̭ tvā॒ dhāra̭yā viddhyāmi |
adha̭ro॒ ma-tpa̭dyasvāsau || 79 || (a. 38)
anuvākaṃ 39
uttṷda śimijāvari | talpḙje॒ talpa॒ uttṷda | gi॒rīgṃ ranu॒ pravḙśaya | marī̭cī॒rupa॒ sannṷda |
yāva̭di॒taḥ pu॒rastā̭du॒dayā̭ti॒ sūryaḥ̭ |
tāva̭di॒to̭-'munnā̭śaya | yo᳚-'smā-ndveṣṭi̭ |
yañca̭ va॒ya-ndvi॒ṣmaḥ || 80 || (a. 39)
anuvākaṃ 40
bhūrbhuva॒ssuvo॒ bhūrbhuva॒ssuvo॒ bhūrbhuva॒ssuvaḥ̭ |
bhuvo᳚-'ddhāyi॒ bhuvo᳚-'ddhāyi॒ bhuvo᳚-'ddhāyi |
nṛ॒mṇāyi nṛ॒mṇa-nnṛ॒mṇāyi nṛ॒mṇa-nnṛ॒mṇāyi nṛ॒mṇam | ni॒dhā yyo̭-'vāyi ni॒dhā yyo̭-'vāyi ni॒dhā yyo̭-'vāyi | e a॒sme a॒sme | suva॒rna jyotīḥ᳚ || 81 || (a. 40)
anuvākaṃ 41
pṛ॒thi॒vī sa॒mit | tāma॒gni-ssami̭ndhe | sā-'gnigṃ sami̭ndhe | tāma॒hagṃ sami̭ndhe | sā mā॒ sami̭ddhā | āyṷṣā॒ teja̭sā | varca̭sā śri॒yā | yaśa̭sā brahmavarca॒sena̭ | a॒nnādyḙna॒ sami̭ntā॒g॒ svāhā᳚ ||
a॒ntari̭kṣagṃ sa॒mit || 82 ||
tāṃ-vā~॒yu-ssami̭ndhe | sā vā॒yugṃ sami̭ndhe | tāma॒hagṃ sami̭ndhe | sā mā॒ sami̭ddhā | āyṷṣā॒ teja̭sā | varca̭sā śri॒yā | yaśa̭sā brahmavarca॒sena̭ | a॒nnādyḙna॒ sami̭ntā॒g॒ svāhā᳚ |
dyau-ssa॒mit | tāmā̭di॒tya-ssami̭ndhe || 83 ||
sā-''di॒tyagṃ sami̭ndhe | tāma॒hagṃ sami̭ndhe | sā mā॒ sami̭ddhā | āyṷṣā॒ teja̭sā | varca̭sā śri॒yā | yaśa̭sā brahmavarca॒sena̭ | a॒nnādyḙna॒ sami̭ntā॒g॒ svāhā᳚ || prā॒jā॒pa॒tyā mḙ sa॒mida̭si sapatna॒kṣaya̭ṇī |
bhrā॒tṛ॒vya॒hā mḙ-'si॒ svāhā᳚ || agne᳚ vratapate vra॒tañca̭riṣyāmi || 84 ||
taccha̭keya॒-ntanmḙ rāddhyatām | vāyo᳚ vratapata॒ ādi̭tya vratapate | vra॒tānāṃ᳚-vra~tapate vra॒tañca̭riṣyāmi | taccha̭keya॒-ntanmḙ rāddhyatām || dyau-ssa॒mit | tāmā̭di॒tya-ssami̭ndhe | sā-''di॒tyagṃ sami̭ndhe |
tāma॒hagṃ sami̭ndhe | sā mā॒ sami̭ddhā | āyṷṣā॒ teja̭sā || 85 ||
varca̭sā śri॒yā | yaśa̭sā brahmavarca॒sena̭ | a॒nnādyḙna॒ sami̭ntā॒g॒ svāhā᳚ |
a॒ntari̭kṣagṃ sa॒mit | tāṃ-vā~॒yu-ssami̭ndhe | sā vā॒yugṃ sami̭ndhe | tāma॒hagṃ sami̭ndhe | sā mā॒ sami̭ddhā | āyṷṣā॒ teja̭sā | varca̭sā śri॒yā || 86 ||
yaśa̭sā brahmavarca॒sena̭ | a॒nnādyḙna॒ sami̭ntā॒g॒ svāhā᳚ | pṛ॒thi॒vī sa॒mit | tāma॒gni-ssami̭ndhe | sā-'gnigṃ sami̭ndhe | tāma॒hagṃ sami̭ndhe |
sā mā॒ sami̭ddhā | āyṷṣā॒ teja̭sā | varca̭sā śri॒yā |
yaśa̭sā brahmavarca॒sena̭ || 87 ||
a॒nnādyḙna॒ sami̭ntā॒g॒ svāhā᳚ | prā॒jā॒pa॒tyā mḙ sa॒mida̭si sapatna॒kṣaya̭ṇī | bhrā॒tṛ॒vya॒hā mḙ-'si॒ svāhā᳚ | ādi̭tya vratapate vra॒tama̭cāriṣam |
tada̭śaka॒-ntanmḙ-'rādhi | vāyo᳚ vratapa॒te-'gne᳚ vratapate | vra॒tānāṃ᳚-vra~tapate vra॒tama̭cāriṣam | tada̭śaka॒-ntanmḙ-'rādhi || 88 ||
(sa॒mith - sami̭ndhe - vra॒tañca̭riṣyā॒ - myāyṷṣā॒ teja̭sā॒ - varca̭sā śri॒yā - yaśa̭sā brahmavarca॒senā॒ - +ṣṭau ca̭) (a. 41)
anuvākaṃ 42
śanno॒ vātaḥ̭ pavatā-mmāta॒riśvā॒ śanna̭stapatu॒ sūryaḥ̭ | ahā̭ni॒ śa-mbha̭vantu na॒-śśagṃ rātriḥ॒ prati̭dhīyatām || śamu॒ṣā no॒ vyṷcchatu॒ śamā̭di॒tya udḙtu naḥ | śi॒vā na॒-śśanta̭mā bhava sumṛḍī॒kā sara̭svati | mā te॒ vyo̭ma sa॒ndṛśi̭ ||
iḍā̭yai॒ vāstva̭si vāstu॒ma-dvā᳚stu॒manto̭ bhūyāsma॒ mā vāsto᳚-śchithsmahya vā॒stu-ssa bhṷ̄yā॒-dyo᳚-'smā-ndveṣṭi॒ yañca̭ va॒ya-ndvi॒ṣmaḥ ||
pra॒ti॒ṣṭhā-'si̭ prati॒ṣṭhāva̭nto bhūyāsma॒ mā pra̭ti॒ṣṭhāyā᳚- śchithsmahya prati॒ṣṭhaḥ
sa bhṷ̄yā॒-dyo᳚-'smā-ndveṣṭi॒ yañca̭ va॒ya-ndvi॒ṣmaḥ || ā vā̭ta vāhi bheṣa॒jam ~vi vā̭ta vāhi॒ yadrapaḥ̭ |
tvagṃ hi vi॒śvabhḙṣajo de॒vānā᳚-ndū॒ta īya̭se ||
dvāvi॒mau vātaṷ vāta॒ ā sindhā॒rā pa̭rā॒vataḥ̭ || 89 ||
dakṣa̭-mme a॒nya ā॒vātu॒ parā॒-'nyo vā̭tu॒ ya-drapaḥ̭ ||
yada॒do vā̭ta te gṛ॒hḙ-'mṛta̭sya ni॒dhirhi॒taḥ |
tato̭ no dehi jī॒vase॒ tato̭ no dhehi bheṣa॒jam ||
tato̭ no॒ maha॒ āva̭ha॒ vāta॒ āvā̭tu bheṣa॒jam |
śa॒mbhū-rma̭yo॒bhūrno̭ hṛ॒de pra ṇa॒ āyūgṃ̭ṣi tāriṣat || indra̭sya gṛ॒ho̭-'si॒ ta-ntvā॒ prapa̭dye॒ sagu॒ssāśvaḥ̭ | sa॒ha yanme॒ asti॒ tena̭ ||
bhūḥ prapa̭dye॒ bhuvaḥ॒ prapa̭dye॒ suvaḥ॒ prapa̭dye॒ bhūrbhuva॒ssuvaḥ॒ prapa̭dye vā॒yum
prapa॒dye-'nā᳚rtā-nde॒vatā॒-mprapa॒dye 'śmā̭namākha॒ṇa-mprapa̭dye pra॒jāpa̭ter
brahmako॒śa-mbrahma॒ prapa̭dya॒ o-mprapa̭dye ||
a॒ntari̭kṣa-mma u॒rva̭ntara̭-mbṛ॒hada॒gnayaḥ॒ parva̭tāśca॒ yayā॒ vātaḥ̭ sva॒styā sva̭sti॒māntayā᳚ sva॒styā sva̭sti॒ māna̭sāni ||
prāṇā̭pānau mṛ॒tyormā̭ pāta॒-mprāṇā̭pānau॒ mā mā̭ hāsiṣṭa॒-mmayi̭ me॒dhā-mmayi̭ pra॒jā-mmayya॒gni stejo̭ dadhātu॒ mayi̭ me॒dhā-mmayi̭ pra॒jā-mmayīndra̭ indri॒ya-nda̭dhātu॒ mayi̭ me॒dhā-mmayi̭ pra॒jā-mmayi॒ sūryo॒
bhrājo̭ dadhātu || 90 ||
dyu॒bhira॒ktubhiḥ॒ pari̭pāta-ma॒smānari̭ṣṭebhi-raśvinā॒ saubha̭gebhiḥ | tanno̭ mi॒tro varṷṇo māmahantā॒ madi̭ti॒-ssindhuḥ̭ pṛthi॒vī u॒ta dyauḥ ||
kayā̭ naści॒tra ābhṷvadū॒tī sa॒dāvṛ̭dha॒-ssakhā᳚ | kayā॒ śaci̭ṣṭhayā vṛ॒tā || kastvā̭ sa॒tyo madā̭nā॒-mmagṃhi̭ṣṭho mathsa॒dandha̭saḥ |
dṛ॒ḍhā ci̭dā॒ruje॒ vasṷ || a॒bhī ṣu ṇa॒-ssakhī̭nāmavi॒tā ja̭ritṝ॒ṇām | śa॒ta-mbha̭vāsyū॒tibhiḥ̭ ||
vayaḥ̭ supa॒rṇā upa̭sedu॒rindra̭-mpri॒yamḙdhā॒ ṛṣa̭yo॒ nādha̭mānāḥ |
apa̭ dhvā॒ntamū᳚rṇu॒hi pū॒rdhi cakṣṷ-rmumu॒gdhya̭smā-nni॒dhayḙva ba॒ddhān || 91 ||
śanno̭ de॒vīra॒bhiṣṭa̭ya॒ āpo̭ bhavantu pī॒taye᳚ | śaṃ-yo~ra॒bhisra̭vantu naḥ || īśā̭nā॒ vāryā̭ṇā॒-ṅkṣaya̭ntīścarṣaṇī॒nām | a॒po yā̭cāmi bheṣa॒jam ||
su॒mi॒trā na॒ āpa॒ oṣa̭dhaya-ssantu durmi॒trāstasmai̭ bhūyāsu॒-ryo᳚-'smān-dveṣṭi॒ yañca̭ va॒ya-ndvi॒ṣmaḥ ||
āpo॒ hi ṣṭhā ma̭yo॒bhuva॒stā na̭ ū॒rje da̭dhātana | ma॒he raṇā̭ya॒ cakṣa̭se || yo vaḥ̭ śi॒vata̭mo॒ rasa॒stasya̭ bhājayate॒ha naḥ̭ | u॒śa॒tīri̭va mā॒taraḥ̭ ||
tasmā॒ ara̭-ṅgamāma vo॒ yasya॒ kṣayā̭ya॒ jinva̭tha || 92 ||
āpo̭ ja॒naya̭thā ca naḥ ||
pṛ॒thi॒vī śā॒ntā sā-'gninā̭ śā॒ntā sā mḙ śā॒ntā śucagṃ̭ śamayatu || a॒ntari̭kṣagṃ śā॒nta-nta-dvā॒yunā̭ śā॒nta-ntanmḙ śā॒ntagṃ śucagṃ̭ śamayatu |
dyau-śśā॒ntā sā-''di॒tyena̭ śā॒ntā sā mḙ śā॒ntā śucagṃ̭ śamayatu || pṛ॒thi॒vī śānti̭ra॒ntari̭kṣa॒gṃ॒ śānti॒-rdyau-śśānti॒-rdiśa॒-śśānti̭ ravāntaradi॒śā-śśānti̭ ra॒gni-śśānti̭-rvā॒yu-śśānti̭ rādi॒tya-śśānti̭
śca॒ndramā॒-śśānti॒-rnakṣa̭trāṇi॒ śānti॒ rāpa॒-śśānti॒ roṣa̭dhaya॒-śśānti॒-rvana॒spata̭ya॒-śśānti॒-rgau-śśānti̭ ra॒jā śānti॒ raśva॒-śśāntiḥ॒ purṷṣa॒-śśānti॒-rbrahma॒ śānti̭-rbrāhma॒ṇa-śśānti॒-śśānti̭re॒va śānti॒-śśānti̭rme astu॒ śāntiḥ̭ ||
tayā॒-'hagṃ śā॒ntyā sa̭rvaśā॒ntyā mahya̭-ndvi॒pade॒ catṷṣpade ca॒ śānti̭-ṅkaromi॒ śānti̭rme astu॒ śāntiḥ̭ ||
eha॒ śrīśca॒ hrīśca॒ dhṛti̭śca॒ tapo̭ me॒dhā pra̭ti॒ṣṭhā śra॒ddhā sa॒tya-ndharma̭ścai॒tāni॒ motti̭ṣṭhanta॒-manūtti̭ṣṭhantu॒ mā mā॒g॒ śrīśca॒ hrīśca॒ dhṛti̭śca॒ tapo̭ me॒dhā pra̭ti॒ṣṭhā śra॒ddhā sa॒tya-ndharma̭ścai॒tāni̭ mā॒ mā hā̭siṣuḥ ||
udāyṷṣā svā॒yuṣodoṣa̭dhīnā॒gṃ॒ rase॒no-tpa॒rjanya̭sya॒ śuṣme॒ṇoda̭sthā-ma॒mṛtā॒gṃ॒ anṷ || taccakṣṷ-rde॒vahi̭ta-mpu॒rastā᳚ cchu॒kramu॒ccara̭t |
paśyḙma śa॒radaḥ̭ śa॒ta-ñjīvḙma śa॒radaḥ̭ śa॒ta-nnandā̭ma śa॒radaḥ̭ śa॒ta-mmodā̭ma śa॒radaḥ̭ śa॒ta-mbhavā̭ma śa॒radaḥ̭ śa॒tagṃ śṛ॒ṇavā̭ma śa॒radaḥ̭ śa॒ta-mprabra̭vāma śa॒radaḥ̭ śa॒ta majī̭tā-ssyāma śa॒radaḥ̭ śa॒ta-ñjyokca॒ sūrya̭-ndṛ॒śe || 93 ||
ya uda̭gā-nmaha॒to-'rṇavā᳚-dvi॒bhrāja̭māna-ssari॒rasya॒ maddhyā॒thsa mā̭ vṛṣa॒bho lo̭hitā॒kṣa-ssūryo̭ vipa॒ści-nmana̭sā punātu || brahma̭ṇa॒-śścota̭nyasi॒ brahma̭ṇa ā॒ṇī stho॒ brahma̭ṇa ā॒vapa̭namasi dhāri॒teya-mpṛ̭thi॒vī brahma̭ṇā ma॒hī dhā̭ri॒tamḙnena ma॒hada॒ntari̭kṣa॒-ndiva̭-ndādhāra pṛthi॒vīgṃ sadḙvāṃ॒-ya~da॒haṃ-ve~da॒ tada॒ha-ndhā̭rayāṇi॒ mā madvedo-'dhi॒ visra̭sat || me॒dhā॒ma॒nī॒ṣe mā-''vi̭śatāgṃ sa॒mīcī̭ bhū॒tasya॒ bhavya॒syāva̭ruddhyai॒ sarva॒māyṷrayāṇi॒
sarva॒māyṷrayāṇi || ā॒bhi-rgī॒rbhi-ryadato̭ na ū॒namāpyā̭yaya harivo॒ vardha̭mānaḥ |
ya॒dā sto॒tṛbhyo॒ mahi̭ go॒trā ru॒jāsi̭ bhūyiṣṭha॒bhājo॒ adha̭ te syāma || brahma॒ prāvā̭diṣma॒ tanno॒ mā hā̭sīt || oṃ śānti॒-śśānti॒-śśāntiḥ̭ || 94 ||
(pa॒rā॒vato̭-dadhātu-ba॒ddhān-jinva̭tha-dṛ॒śe-+sa॒pta ca̭) (a. 42)
(namo̭ - yu॒ñjate॒ - vṛṣṇo॒ aśva̭sya॒ - brahma̭-nprava॒rgyḙṇa॒ - brahma॒-npraca̭riṣyāmo॒ - daśa॒ prācī॒ - rapa̭śyaṅgo॒pām - de॒vasya̭ - samu॒drā - ye॒ṣe pī̭pihi॒ - gharma॒ yā tḙ - mahī॒nā-ñca॒tvā - ryaskā॒n॒. - yā pu॒rastā᳚-thsa॒pta sa̭pta - prā॒ṇāya॒ trīṇi̭ - pū॒ṣṇe ca॒tvā-ryu - da॒syaikā̭daśa॒ - yāstḙ sa॒ptā - gni-rdhru॒vasīḥ॒ daikā॒nna vigṃ̭śati॒--r bhūrū॒rdhva stri॒gṃ॒śata-d- bhū-rmayi॒ ṣoḍa̭śa॒ - yāstḙ gho॒rā nava॒ - snikcā॒ṣṭau - dhuni̭śca॒ dve - u॒graśca॒ trīṇya̭ - horā॒tre pañca॒ - kha-ṭtrīṇi॒ - vigā-ssa॒ptada॒śā - sṛ̭-nmukha-śca॒tvāri॒ - yade॒ta-dvṛ̭ka॒saḥ pañca॒ - yadī̭ṣi॒ta śca॒tvāri॒ - dīrgha̭mukhi॒ trīṇī॒ - tthā cca॒tvāri॒ - yade॒ta-dbhū॒tāni॒ ṣaṭ - pra॒sārya॒ trīṇya - tri̭ṇā॒ daśā- ha॒rāva̭dya॒ - brahma̭ṇā॒ ṣaṭ-thṣaḍ - uttṷdā॒ṣṭau - bhū-ṣṣaṭ - pṛ̭thi॒vya̭ṣṭa ṣa̭ṣṭiḥ॒ - śannaḥ̭ sa॒ptapa̭ñcā॒śa-ddvica̭tvārigṃśat )
(namo̭ vā॒ce - brahma̭-nprava॒rgyḙṇa॒ - mayi॒ ru - ga॒ntari̭kṣeṇa - pi॒tā no̭-'si - mahī॒nā - mupa̭ no॒ - yade॒ta-d- bhū--r dyū॒bhi ścatṷ-rnavatiḥ)
|| hariḥ̭ om ||
|| kṛṣṇa yajurvedīya taittirīya āraṇyake caturthaḥ prapāṭhaka-ssamāptaḥ ||
🕉️ This is the original Sanskrit rendered in Kannada script.
Pronunciation is identical to the Sanskrit Devanagari version.