𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌸𑍁𑌨𑍍𑌦𑌰𑌕𑌾𑌣𑍍𑌡𑌮𑍍 ।
𑌅𑌥 𑌅𑌷𑍍𑌟𑌾𑌦𑌶𑌸𑍍𑌸𑌰𑍍𑌗𑌃 ।
𑌤𑌥𑌾 𑌵𑌿𑌪𑍍𑌰𑍇𑌕𑍍𑌷𑍍𑌯𑌮𑌾𑌣𑌸𑍍𑌯 𑌵𑌨𑌂 𑌪𑍁𑌷𑍍𑌪𑌿𑌤𑌪𑌾𑌦𑌪𑌮𑍍 ।
𑌵𑌿𑌚𑌿𑌨𑍍𑌵𑌤𑌶𑍍𑌚 𑌵𑍈𑌦𑍇𑌹𑍀𑌂 𑌕𑌿𑌞𑍍𑌚𑌿𑌚𑍍𑌛𑍇𑌷𑌾 𑌨𑌿𑌶𑌾𑌽𑌭𑌵𑌤𑍍 ॥ 1 ॥
𑌷𑌡𑌙𑍍𑌗𑌵𑍇𑌦𑌵𑌿𑌦𑍁𑌷𑌾𑌂 𑌕𑍍𑌰𑌤𑍁𑌪𑍍𑌰𑌵𑌰𑌯𑌾𑌜𑌿𑌨𑌾𑌮𑍍 ।
𑌶𑍁𑌶𑍍𑌰𑌾𑌵 𑌬𑍍𑌰𑌹𑍍𑌮𑌘𑍋𑌷𑌾𑌂𑌶𑍍𑌚 𑌸 𑌵𑌿𑌰𑌾𑌤𑍍𑌰𑍇 𑌬𑍍𑌰𑌹𑍍𑌮𑌰𑌕𑍍𑌷𑌸𑌾𑌮𑍍 ॥ 2 ॥
𑌅𑌥 𑌮𑌙𑍍𑌗𑌲𑌵𑌾𑌦𑌿𑌤𑍍𑌰𑌶𑌬𑍍𑌦𑍈𑌃 𑌶𑍍𑌰𑍁𑌤𑌿𑌮𑌨𑍋𑌹𑌰𑍈𑌃 ।
𑌪𑍍𑌰𑌾𑌬𑍁𑌧𑍍𑌯𑌤 𑌮𑌹𑌾𑌬𑌾𑌹𑍁𑌰𑍍𑌦𑌶𑌗𑍍𑌰𑍀𑌵𑍋 𑌮𑌹𑌾𑌬𑌲𑌃 ॥ 3 ॥
𑌵𑌿𑌬𑍁𑌧𑍍𑌯𑌤𑍁 𑌯𑌥𑌾𑌕𑌾𑌲𑌂 𑌰𑌾𑌕𑍍𑌷𑌸𑍇𑌨𑍍𑌦𑍍𑌰𑌃 𑌪𑍍𑌰𑌤𑌾𑌪𑌵𑌾𑌨𑍍 ।
𑌸𑍍𑌰𑌸𑍍𑌤𑌮𑌾𑌲𑍍𑌯𑌾𑌮𑍍𑌬𑌰𑌧𑌰𑍋 𑌵𑍈𑌦𑍇𑌹𑍀𑌮𑌨𑍍𑌵𑌚𑌿𑌨𑍍𑌤𑌯𑌤𑍍 ॥ 4 ॥
𑌭𑍃𑌶𑌂 𑌨𑌿𑌯𑍁𑌕𑍍𑌤𑌸𑍍𑌤𑌸𑍍𑌯𑌾𑌂 𑌚 𑌮𑌦𑌨𑍇𑌨 𑌮𑌦𑍋𑌤𑍍𑌕𑌟𑌃 ।
𑌨 𑌸 𑌤𑌂 𑌰𑌾𑌕𑍍𑌷𑌸𑌃 𑌕𑌾𑌮𑌂 𑌶𑌶𑌾𑌕𑌾𑌤𑍍𑌮𑌨𑌿 𑌗𑍂𑌹𑌿𑌤𑍁𑌮𑍍 ॥ 5 ॥
𑌸 𑌸𑌰𑍍𑌵𑌾𑌭𑌰𑌣𑍈𑌰𑍍𑌯𑍁𑌕𑍍𑌤𑍋 𑌬𑌿𑌭𑍍𑌰𑌚𑍍𑌛𑍍𑌰𑌿𑌯𑌮𑌨𑍁𑌤𑍍𑌤𑌮𑌾𑌮𑍍 ।
𑌤𑌾𑌂 𑌨𑌗𑍈𑌰𑍍𑌬𑌹𑍁𑌭𑌿𑌰𑍍𑌜𑍁𑌷𑍍𑌟𑌾𑌂 𑌸𑌰𑍍𑌵𑌪𑍁𑌷𑍍𑌪𑌫𑌲𑍋𑌪𑌗𑍈𑌃 ॥ 6 ॥
𑌵𑍃𑌤𑌾𑌂 𑌪𑍁𑌷𑍍𑌕𑌰𑌿𑌣𑍀𑌭𑌿𑌶𑍍𑌚 𑌨𑌾𑌨𑌾𑌪𑍁𑌷𑍍𑌪𑍋𑌪𑌶𑍋𑌭𑌿𑌤𑌾𑌮𑍍 ।
𑌸𑌦𑌾 𑌮𑌦𑍈𑌶𑍍𑌚 𑌵𑌿𑌹𑌗𑍈𑌰𑍍𑌵𑌿𑌚𑌿𑌤𑍍𑌰𑌾𑌂 𑌪𑌰𑌮𑌾𑌦𑍍𑌭𑍁𑌤𑌾𑌮𑍍 ॥ 7 ॥
𑌈𑌹𑌾𑌮𑍃𑌗𑍈𑌶𑍍𑌚 𑌵𑌿𑌵𑌿𑌧𑍈𑌰𑍍𑌜𑍁𑌷𑍍𑌟𑌾𑌂 𑌦𑍃𑌷𑍍𑌟𑌿𑌮𑌨𑍋𑌹𑌰𑍈𑌃 ।
𑌵𑍀𑌧𑍀𑌃 𑌸𑌮𑍍𑌪𑍍𑌰𑍇𑌕𑍍𑌷𑌮𑌾𑌣𑌶𑍍𑌚 𑌮𑌣𑌿𑌕𑌾𑌞𑍍𑌚𑌨𑌤𑍋𑌰𑌣𑌾𑌃 ॥ 8 ॥
𑌨𑌾𑌨𑌾𑌮𑍃𑌗𑌗𑌣𑌾𑌕𑍀𑌰𑍍𑌣𑌾𑌂 𑌫𑌲𑍈𑌃 𑌪𑍍𑌰𑌪𑌤𑌿𑌤𑍈𑌰𑍍𑌵𑍃𑌤𑌾𑌮𑍍 ।
𑌅𑌶𑍋𑌕𑌵𑌨𑌿𑌕𑌾𑌮𑍇𑌵 𑌪𑍍𑌰𑌾𑌵𑌿𑌶𑌤𑍍𑌸𑌨𑍍𑌤𑌤𑌦𑍍𑌰𑍁𑌮𑌾𑌮𑍍 ॥ 9 ॥
𑌅𑌙𑍍𑌗𑌨𑌾𑌶𑌤𑌮𑌾𑌤𑍍𑌰𑌂 𑌤𑍁 𑌤𑌂 𑌵𑍍𑌰𑌜𑌨𑍍𑌤𑌮𑌨𑍁𑌵𑍍𑌰𑌜𑌤𑍍 ।
𑌮𑌹𑍇𑌨𑍍𑌦𑍍𑌰𑌮𑌿𑌵 𑌪𑍗𑌲𑌸𑍍𑌤𑍍𑌯𑌂 𑌦𑍇𑌵𑌗𑌨𑍍𑌧𑌰𑍍𑌵𑌯𑍋𑌷𑌿𑌤𑌃 ॥ 10 ॥
𑌦𑍀𑌪𑌿𑌕𑌾𑌃 𑌕𑌾𑌞𑍍𑌚𑌨𑍀𑌃 𑌕𑌾𑌶𑍍𑌚𑌿𑌜𑍍𑌜𑌗𑍃𑌹𑍁𑌸𑍍𑌤𑌤𑍍𑌰 𑌯𑍋𑌷𑌿𑌤𑌃 ।
𑌵𑌾𑌲𑌵𑍍𑌯𑌜𑌨𑌹𑌸𑍍𑌤𑌾𑌶𑍍𑌚 𑌤𑌾𑌲𑌵𑍃𑌨𑍍𑌤𑌾𑌨𑌿 𑌚𑌾𑌪𑌰𑌾𑌃 ॥ 11 ॥
𑌕𑌾𑌞𑍍𑌚𑌨𑍈𑌰𑌪𑌿 𑌭𑍃𑌙𑍍𑌗𑌾𑌰𑍈𑌰𑍍𑌜𑌹𑍍𑌰𑍁𑌃 𑌸𑌲𑌿𑌲𑌮𑌗𑍍𑌰𑌤𑌃 ।
𑌮𑌣𑍍𑌡𑌲𑌾𑌗𑍍𑌰𑌾𑌨𑍍 𑌬𑍃𑌸𑍀𑌶𑍍𑌚𑌾𑌪𑌿 𑌗𑍃𑌹𑍍𑌯𑌾𑌨𑍍𑌯𑌾𑌃 𑌪𑍃𑌷𑍍𑌠𑌤𑍋 𑌯𑌯𑍁𑌃 ॥ 12 ॥
𑌕𑌾𑌚𑌿𑌦𑍍𑌰𑌤𑍍𑌨𑌮𑌯𑍀𑌂 𑌸𑍍𑌥𑌾𑌲𑍀𑌂 𑌪𑍂𑌰𑍍𑌣𑌾𑌂 𑌪𑌾𑌨𑌸𑍍𑌯 𑌭𑌾𑌮𑌿𑌨𑍀 ।
𑌦𑌕𑍍𑌷𑌿𑌣𑌾 𑌦𑌕𑍍𑌷𑌿𑌣𑍇𑌨𑍈𑌵 𑌤𑌦𑌾 𑌜𑌗𑍍𑌰𑌾𑌹 𑌪𑌾𑌣𑌿𑌨𑌾 ॥ 13 ॥
𑌰𑌾𑌜𑌹𑌂𑌸𑌪𑍍𑌰𑌤𑍀𑌕𑌾𑌶𑌂 𑌛𑌤𑍍𑌰𑌂 𑌪𑍂𑌰𑍍𑌣𑌶𑌶𑌿𑌪𑍍𑌰𑌭𑌮𑍍 ।
𑌸𑍗𑌵𑌰𑍍𑌣𑌦𑌣𑍍𑌡𑌮𑌪𑌰𑌾 𑌗𑍃𑌹𑍀𑌤𑍍𑌵𑌾 𑌪𑍃𑌷𑍍𑌠𑌤𑍋 𑌯𑌯𑍗 ॥ 14 ॥
𑌨𑌿𑌦𑍍𑌰𑌾𑌮𑌦𑌪𑌰𑍀𑌤𑌾𑌕𑍍𑌷𑍍𑌯𑍋 𑌰𑌾𑌵𑌣𑌸𑍍𑌯𑍋𑌤𑍍𑌤𑌮𑌾𑌃 𑌸𑍍𑌤𑍍𑌰𑌿𑌯𑌃 ।
𑌅𑌨𑍁𑌜𑌗𑍍𑌮𑍁𑌃 𑌪𑌤𑌿𑌂 𑌵𑍀𑌰𑌂 𑌘𑌨𑌂 𑌵𑌿𑌦𑍍𑌯𑍁𑌲𑍍𑌲𑌤𑌾 𑌇𑌵 ॥ 15 ॥
𑌵𑍍𑌯𑌾𑌵𑌿𑌦𑍍𑌧𑌹𑌾𑌰𑌕𑍇𑌯𑍂𑌰𑌾𑌃 𑌸𑌮𑌾𑌮𑍃𑌦𑌿𑌤𑌵𑌰𑍍𑌣𑌕𑌾𑌃 ।
𑌸𑌮𑌾𑌗𑌲𑌿𑌤𑌕𑍇𑌶𑌾𑌨𑍍𑌤𑌾𑌃 𑌸𑌸𑍍𑌵𑍇𑌦𑌵𑌦𑌨𑌾𑌸𑍍𑌤𑌥𑌾 ॥ 16 ॥
𑌘𑍂𑌰𑍍𑌣𑌨𑍍𑌤𑍍𑌯𑍋 𑌮𑌦𑌶𑍇𑌷𑍇𑌣 𑌨𑌿𑌦𑍍𑌰𑌯𑌾 𑌚 𑌶𑍁𑌭𑌾𑌨𑌨𑌾𑌃 ।
𑌸𑍍𑌵𑍇𑌦𑌕𑍍𑌲𑌿𑌷𑍍𑌟𑌾𑌙𑍍𑌗𑌕𑍁𑌸𑍁𑌮𑌾𑌸𑍍𑌸𑍁𑌮𑌾𑌲𑍍𑌯𑌾𑌕𑍁𑌲𑌮𑍂𑌰𑍍𑌧𑌜𑌾𑌃 ॥ 17 ॥
𑌪𑍍𑌰𑌯𑌾𑌨𑍍𑌤𑌂 𑌨𑍈𑌋𑌤𑌪𑌤𑌿𑌂 𑌨𑌾𑌰𑍍𑌯𑍋 𑌮𑌦𑌿𑌰𑌲𑍋𑌚𑌨𑌾𑌃 ।
𑌬𑌹𑍁𑌮𑌾𑌨𑌾𑌚𑍍𑌚 𑌕𑌾𑌮𑌾𑌚𑍍𑌚 𑌪𑍍𑌰𑌿𑌯𑌾 𑌭𑌾𑌰𑍍𑌯𑌾𑌸𑍍𑌤𑌮𑌨𑍍𑌵𑌯𑍁𑌃 ॥ 18 ॥
𑌸 𑌚 𑌕𑌾𑌮𑌪𑌰𑌾𑌧𑍀𑌨𑌃 𑌪𑌤𑌿𑌸𑍍𑌤𑌾𑌸𑌾𑌂 𑌮𑌹𑌾𑌬𑌲𑌃 ।
𑌸𑍀𑌤𑌾𑌸𑌕𑍍𑌤𑌮𑌨𑌾 𑌮𑌨𑍍𑌦𑍋 𑌮𑌨𑍍𑌦𑌾𑌞𑍍𑌚𑌿𑌤𑌗𑌤𑌿𑌰𑍍𑌬𑌭𑍗 ॥ 19 ॥
𑌤𑌤𑌃 𑌕𑌾𑌞𑍍𑌚𑍀𑌨𑌿𑌨𑌾𑌦𑌂 𑌚 𑌨𑍂𑌪𑍁𑌰𑌾𑌣𑌾𑌂 𑌚 𑌨𑌿𑌸𑍍𑌵𑌨𑌮𑍍 ।
𑌶𑍁𑌶𑍍𑌰𑌾𑌵 𑌪𑌰𑌮𑌸𑍍𑌤𑍍𑌰𑍀𑌣𑌾𑌂 𑌸 𑌕𑌪𑌿𑌰𑍍𑌮𑌾𑌰𑍁𑌤𑌾𑌤𑍍𑌮𑌜𑌃 ॥ 20 ॥
𑌤𑌂 𑌚𑌾𑌪𑍍𑌰𑌤𑌿𑌮𑌕𑌰𑍍𑌮𑌾𑌣𑌮𑌚𑌿𑌨𑍍𑌤𑍍𑌯𑌬𑌲𑌪𑍗𑌰𑍁𑌷𑌮𑍍 ।
𑌦𑍍𑌵𑌾𑌰𑌦𑍇𑌶𑌮𑌨𑍁𑌪𑍍𑌰𑌾𑌪𑍍𑌤𑌂 𑌦𑌦𑌰𑍍𑌶 𑌹𑌨𑍁𑌮𑌾𑌨𑍍 𑌕𑌪𑌿𑌃 ॥ 21 ॥
𑌦𑍀𑌪𑌿𑌕𑌾𑌭𑌿𑌰𑌨𑍇𑌕𑌾𑌭𑌿𑌃 𑌸𑌮𑌨𑍍𑌤𑌾𑌦𑌵𑌭𑌾𑌸𑌿𑌤𑌮𑍍 ।
𑌗𑌨𑍍𑌧𑌤𑍈𑌲𑌾𑌵𑌸𑌿𑌕𑍍𑌤𑌾𑌭𑌿𑌰𑍍𑌧𑍍𑌰𑌿𑌯𑌮𑌾𑌣𑌾𑌭𑌿𑌰𑌗𑍍𑌰𑌤𑌃 ॥ 22 ॥
𑌕𑌾𑌮𑌦𑌰𑍍𑌪𑌮𑌦𑍈𑌰𑍍𑌯𑍁𑌕𑍍𑌤𑌂 𑌜𑌿𑌹𑍍𑌮𑌤𑌾𑌮𑍍𑌰𑌾𑌯𑌤𑍇𑌕𑍍𑌷𑌣𑌮𑍍 ।
𑌸𑌮𑌕𑍍𑌷𑌮𑌿𑌵 𑌕𑌨𑍍𑌦𑌰𑍍𑌪𑌮𑌪𑌵𑌿𑌦𑍍𑌧𑌶𑌰𑌾𑌸𑌨𑌮𑍍 ॥ 23 ॥
𑌮𑌥𑌿𑌤𑌾𑌮𑍃𑌤𑌫𑍇𑌨𑌾𑌭𑌮𑌰𑌜𑍋𑌵𑌸𑍍𑌤𑍍𑌰𑌮𑍁𑌤𑍍𑌤𑌮𑌮𑍍 ।
𑌸𑌲𑍀𑌲𑌮𑌨𑍁𑌕𑌰𑍍𑌷𑌨𑍍𑌤𑌂 𑌵𑌿𑌮𑍁𑌕𑍍𑌤𑌂 𑌸𑌕𑍍𑌤𑌮𑌙𑍍𑌗𑌦𑍇 ॥ 24 ॥
𑌤𑌂 𑌪𑌤𑍍𑌰𑌵𑌿𑌟𑌪𑍇 𑌲𑍀𑌨𑌃 𑌪𑌤𑍍𑌰𑌪𑍁𑌷𑍍𑌪𑌘𑌨𑌾𑌵𑍃𑌤𑌃 ।
𑌸𑌮𑍀𑌪𑌮𑌿𑌵 𑌸𑌙𑍍𑌕𑍍𑌰𑌾𑌨𑍍𑌤𑌂 𑌨𑌿𑌧𑍍𑌯𑌾𑌤𑍁𑌮𑍁𑌪𑌚𑌕𑍍𑌰𑌮𑍇 ॥ 25 ॥
𑌅𑌵𑍇𑌕𑍍𑌷𑌮𑌾𑌣𑌸𑍍𑌤𑍁 𑌤𑌤𑍋 𑌦𑌦𑌰𑍍𑌶 𑌕𑌪𑌿𑌕𑍁𑌞𑍍𑌜𑌰𑌃 ।
𑌰𑍂𑌪𑌯𑍗𑌵𑌨𑌸𑌮𑍍𑌪𑌨𑍍𑌨𑌾 𑌰𑌾𑌵𑌣𑌸𑍍𑌯 𑌵𑌰𑌸𑍍𑌤𑍍𑌰𑌿𑌯𑌃 ॥ 26 ॥
𑌤𑌾𑌭𑌿𑌃 𑌪𑌰𑌿𑌵𑍃𑌤𑍋 𑌰𑌾𑌜𑌾 𑌸𑍁𑌰𑍂𑌪𑌾𑌭𑌿𑌰𑍍𑌮𑌹𑌾𑌯𑌶𑌾𑌃 ।
𑌤𑌨𑍍𑌮𑍃𑌗𑌦𑍍𑌵𑌿𑌜𑌸𑌙𑍍𑌘𑍁𑌷𑍍𑌟𑌂 𑌪𑍍𑌰𑌵𑌿𑌷𑍍𑌟𑌃 𑌪𑍍𑌰𑌮𑌦𑌾𑌵𑌨𑌮𑍍 ॥ 27 ॥
𑌕𑍍𑌷𑍀𑌬𑍋 𑌵𑌿𑌚𑌿𑌤𑍍𑌰𑌾𑌭𑌰𑌣𑌃 𑌶𑌙𑍍𑌕𑍁𑌕𑌰𑍍𑌣𑍋 𑌮𑌹𑌾𑌬𑌲𑌃 ।
𑌤𑍇𑌨 𑌵𑌿𑌶𑍍𑌰𑌵𑌸𑌃 𑌪𑍁𑌤𑍍𑌰𑌃 𑌸 𑌦𑍃𑌷𑍍𑌟𑍋 𑌰𑌾𑌕𑍍𑌷𑌸𑌾𑌧𑌿𑌪𑌃 ॥ 28 ॥
𑌵𑍃𑌤𑌃 𑌪𑌰𑌮𑌨𑌾𑌰𑍀𑌭𑌿𑌸𑍍𑌤𑌾𑌰𑌾𑌭𑌿𑌰𑌿𑌵 𑌚𑌨𑍍𑌦𑍍𑌰𑌮𑌾𑌃 ।
𑌤𑌂 𑌦𑌦𑌰𑍍𑌶 𑌮𑌹𑌾𑌤𑍇𑌜𑌾𑌸𑍍𑌤𑍇𑌜𑍋𑌵𑌨𑍍𑌤𑌂 𑌮𑌹𑌾𑌕𑌪𑌿𑌃 ॥ 29 ॥
𑌰𑌾𑌵𑌣𑍋𑌽𑌯𑌂 𑌮𑌹𑌾𑌬𑌾𑌹𑍁𑌰𑌿𑌤𑌿 𑌸𑌞𑍍𑌚𑌿𑌨𑍍𑌤𑍍𑌯 𑌵𑌾𑌨𑌰𑌃 ।
𑌅𑌵𑌪𑍍𑌲𑍁𑌤𑍋 𑌮𑌹𑌾𑌤𑍇𑌜𑌾 𑌹𑌨𑍁𑌮𑌾𑌨𑍍𑌮𑌾𑌰𑍁𑌤𑌾𑌤𑍍𑌮𑌜𑌃 ॥ 30 ॥
𑌸 𑌤𑌥𑌾𑌪𑍍𑌯𑍁𑌗𑍍𑌰𑌤𑍇𑌜𑌾𑌃 𑌸𑌨𑍍𑌨𑌿𑌰𑍍𑌧𑍂𑌤𑌸𑍍𑌤𑌸𑍍𑌯 𑌤𑍇𑌜𑌸𑌾 ।
𑌪𑌤𑍍𑌰𑌗𑍁𑌹𑍍𑌯𑌾𑌨𑍍𑌤𑌰𑍇 𑌸𑌕𑍍𑌤𑍋 𑌹𑌨𑍁𑌮𑌾𑌨𑍍 𑌸𑌂𑌵𑍃𑌤𑍋𑌽𑌭𑌵𑌤𑍍 ॥ 31 ॥
𑌸 𑌤𑌾𑌮𑌸𑌿𑌤𑌕𑍇𑌶𑌾𑌨𑍍𑌤𑌾𑌂 𑌸𑍁𑌶𑍍𑌰𑍋𑌣𑍀𑌂 𑌸𑌂𑌹𑌤𑌸𑍍𑌤𑍍𑌨𑍀𑌮𑍍 ।
𑌦𑌿𑌦𑍃𑌕𑍍𑌷𑍁𑌰𑌸𑌿𑌤𑌾𑌪𑌾𑌙𑍍𑌗𑌾𑌮𑍁𑌪𑌾𑌵𑌰𑍍𑌤𑌤 𑌰𑌾𑌵𑌣𑌃 ॥ 32 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌸𑍁𑌨𑍍𑌦𑌰𑌕𑌾𑌣𑍍𑌡𑍇 𑌅𑌷𑍍𑌟𑌾𑌦𑌶𑌸𑍍𑌸𑌰𑍍𑌗𑌃 ॥
Roman (IAST) Transliteration
śrīmadvālmīkīya rāmāyaṇe sundarakāṇḍam |
atha aṣṭādaśassargaḥ |
tathā viprekṣyamāṇasya vanaṃ puṣpitapādapam |
vicinvataśca vaidehīṃ kiñciccheṣā niśā'bhavat || 1 ||
ṣaḍaṅgavedaviduṣāṃ kratupravarayājinām |
śuśrāva brahmaghoṣāṃśca sa virātre brahmarakṣasām || 2 ||
atha maṅgalavāditraśabdaiḥ śrutimanoharaiḥ |
prābudhyata mahābāhurdaśagrīvo mahābalaḥ || 3 ||
vibudhyatu yathākālaṃ rākṣasendraḥ pratāpavān |
srastamālyāmbaradharo vaidehīmanvacintayat || 4 ||
bhṛśaṃ niyuktastasyāṃ ca madanena madotkaṭaḥ |
na sa taṃ rākṣasaḥ kāmaṃ śaśākātmani gūhitum || 5 ||
sa sarvābharaṇairyukto bibhracchriyamanuttamām |
tāṃ nagairbahubhirjuṣṭāṃ sarvapuṣpaphalopagaiḥ || 6 ||
vṛtāṃ puṣkariṇībhiśca nānāpuṣpopaśobhitām |
sadā madaiśca vihagairvicitrāṃ paramādbhutām || 7 ||
īhāmṛgaiśca vividhairjuṣṭāṃ dṛṣṭimanoharaiḥ |
vīdhīḥ samprekṣamāṇaśca maṇikāñcanatoraṇāḥ || 8 ||
nānāmṛgagaṇākīrṇāṃ phalaiḥ prapatitairvṛtām |
aśokavanikāmeva prāviśatsantatadrumām || 9 ||
aṅganāśatamātraṃ tu taṃ vrajantamanuvrajat |
mahendramiva paulastyaṃ devagandharvayoṣitaḥ || 10 ||
dīpikāḥ kāñcanīḥ kāścijjagṛhustatra yoṣitaḥ |
vālavyajanahastāśca tālavṛntāni cāparāḥ || 11 ||
kāñcanairapi bhṛṅgārairjahruḥ salilamagrataḥ |
maṇḍalāgrān bṛsīścāpi gṛhyānyāḥ pṛṣṭhato yayuḥ || 12 ||
kācidratnamayīṃ sthālīṃ pūrṇāṃ pānasya bhāminī |
dakṣiṇā dakṣiṇenaiva tadā jagrāha pāṇinā || 13 ||
rājahaṃsapratīkāśaṃ chatraṃ pūrṇaśaśiprabham |
sauvarṇadaṇḍamaparā gṛhītvā pṛṣṭhato yayau || 14 ||
nidrāmadaparītākṣyo rāvaṇasyottamāḥ striyaḥ |
anujagmuḥ patiṃ vīraṃ ghanaṃ vidyullatā iva || 15 ||
vyāviddhahārakeyūrāḥ samāmṛditavarṇakāḥ |
samāgalitakeśāntāḥ sasvedavadanāstathā || 16 ||
ghūrṇantyo madaśeṣeṇa nidrayā ca śubhānanāḥ |
svedakliṣṭāṅgakusumāssumālyākulamūrdhajāḥ || 17 ||
prayāntaṃ naiṛtapatiṃ nāryo madiralocanāḥ |
bahumānācca kāmācca priyā bhāryāstamanvayuḥ || 18 ||
sa ca kāmaparādhīnaḥ patistāsāṃ mahābalaḥ |
sītāsaktamanā mando mandāñcitagatirbabhau || 19 ||
tataḥ kāñcīninādaṃ ca nūpurāṇāṃ ca nisvanam |
śuśrāva paramastrīṇāṃ sa kapirmārutātmajaḥ || 20 ||
taṃ cāpratimakarmāṇamacintyabalapauruṣam |
dvāradeśamanuprāptaṃ dadarśa hanumān kapiḥ || 21 ||
dīpikābhiranekābhiḥ samantādavabhāsitam |
gandhatailāvasiktābhirdhriyamāṇābhiragrataḥ || 22 ||
kāmadarpamadairyuktaṃ jihmatāmrāyatekṣaṇam |
samakṣamiva kandarpamapaviddhaśarāsanam || 23 ||
mathitāmṛtaphenābhamarajovastramuttamam |
salīlamanukarṣantaṃ vimuktaṃ saktamaṅgade || 24 ||
taṃ patraviṭape līnaḥ patrapuṣpaghanāvṛtaḥ |
samīpamiva saṅkrāntaṃ nidhyātumupacakrame || 25 ||
avekṣamāṇastu tato dadarśa kapikuñjaraḥ |
rūpayauvanasampannā rāvaṇasya varastriyaḥ || 26 ||
tābhiḥ parivṛto rājā surūpābhirmahāyaśāḥ |
tanmṛgadvijasaṅghuṣṭaṃ praviṣṭaḥ pramadāvanam || 27 ||
kṣībo vicitrābharaṇaḥ śaṅkukarṇo mahābalaḥ |
tena viśravasaḥ putraḥ sa dṛṣṭo rākṣasādhipaḥ || 28 ||
vṛtaḥ paramanārībhistārābhiriva candramāḥ |
taṃ dadarśa mahātejāstejovantaṃ mahākapiḥ || 29 ||
rāvaṇo'yaṃ mahābāhuriti sañcintya vānaraḥ |
avapluto mahātejā hanumānmārutātmajaḥ || 30 ||
sa tathāpyugratejāḥ sannirdhūtastasya tejasā |
patraguhyāntare sakto hanumān saṃvṛto'bhavat || 31 ||
sa tāmasitakeśāntāṃ suśroṇīṃ saṃhatastnīm |
didṛkṣurasitāpāṅgāmupāvartata rāvaṇaḥ || 32 ||
ityārṣe śrīmadrāmāyaṇe vālmīkīya ādikāvye sundarakāṇḍe aṣṭādaśassargaḥ ||
Sanskrit — Devanagari (original)
श्रीमद्वाल्मीकीय रामायणे सुन्दरकाण्डम् ।
अथ अष्टादशस्सर्गः ।
तथा विप्रेक्ष्यमाणस्य वनं पुष्पितपादपम् ।
विचिन्वतश्च वैदेहीं किञ्चिच्छेषा निशाऽभवत् ॥ 1 ॥
षडङ्गवेदविदुषां क्रतुप्रवरयाजिनाम् ।
शुश्राव ब्रह्मघोषांश्च स विरात्रे ब्रह्मरक्षसाम् ॥ 2 ॥
अथ मङ्गलवादित्रशब्दैः श्रुतिमनोहरैः ।
प्राबुध्यत महाबाहुर्दशग्रीवो महाबलः ॥ 3 ॥
विबुध्यतु यथाकालं राक्षसेन्द्रः प्रतापवान् ।
स्रस्तमाल्याम्बरधरो वैदेहीमन्वचिन्तयत् ॥ 4 ॥
भृशं नियुक्तस्तस्यां च मदनेन मदोत्कटः ।
न स तं राक्षसः कामं शशाकात्मनि गूहितुम् ॥ 5 ॥
स सर्वाभरणैर्युक्तो बिभ्रच्छ्रियमनुत्तमाम् ।
तां नगैर्बहुभिर्जुष्टां सर्वपुष्पफलोपगैः ॥ 6 ॥
वृतां पुष्करिणीभिश्च नानापुष्पोपशोभिताम् ।
सदा मदैश्च विहगैर्विचित्रां परमाद्भुताम् ॥ 7 ॥
ईहामृगैश्च विविधैर्जुष्टां दृष्टिमनोहरैः ।
वीधीः सम्प्रेक्षमाणश्च मणिकाञ्चनतोरणाः ॥ 8 ॥
नानामृगगणाकीर्णां फलैः प्रपतितैर्वृताम् ।
अशोकवनिकामेव प्राविशत्सन्ततद्रुमाम् ॥ 9 ॥
अङ्गनाशतमात्रं तु तं व्रजन्तमनुव्रजत् ।
महेन्द्रमिव पौलस्त्यं देवगन्धर्वयोषितः ॥ 10 ॥
दीपिकाः काञ्चनीः काश्चिज्जगृहुस्तत्र योषितः ।
वालव्यजनहस्ताश्च तालवृन्तानि चापराः ॥ 11 ॥
काञ्चनैरपि भृङ्गारैर्जह्रुः सलिलमग्रतः ।
मण्डलाग्रान् बृसीश्चापि गृह्यान्याः पृष्ठतो ययुः ॥ 12 ॥
काचिद्रत्नमयीं स्थालीं पूर्णां पानस्य भामिनी ।
दक्षिणा दक्षिणेनैव तदा जग्राह पाणिना ॥ 13 ॥
राजहंसप्रतीकाशं छत्रं पूर्णशशिप्रभम् ।
सौवर्णदण्डमपरा गृहीत्वा पृष्ठतो ययौ ॥ 14 ॥
निद्रामदपरीताक्ष्यो रावणस्योत्तमाः स्त्रियः ।
अनुजग्मुः पतिं वीरं घनं विद्युल्लता इव ॥ 15 ॥
व्याविद्धहारकेयूराः समामृदितवर्णकाः ।
समागलितकेशान्ताः सस्वेदवदनास्तथा ॥ 16 ॥
घूर्णन्त्यो मदशेषेण निद्रया च शुभाननाः ।
स्वेदक्लिष्टाङ्गकुसुमास्सुमाल्याकुलमूर्धजाः ॥ 17 ॥
प्रयान्तं नैऋतपतिं नार्यो मदिरलोचनाः ।
बहुमानाच्च कामाच्च प्रिया भार्यास्तमन्वयुः ॥ 18 ॥
स च कामपराधीनः पतिस्तासां महाबलः ।
सीतासक्तमना मन्दो मन्दाञ्चितगतिर्बभौ ॥ 19 ॥
ततः काञ्चीनिनादं च नूपुराणां च निस्वनम् ।
शुश्राव परमस्त्रीणां स कपिर्मारुतात्मजः ॥ 20 ॥
तं चाप्रतिमकर्माणमचिन्त्यबलपौरुषम् ।
द्वारदेशमनुप्राप्तं ददर्श हनुमान् कपिः ॥ 21 ॥
दीपिकाभिरनेकाभिः समन्तादवभासितम् ।
गन्धतैलावसिक्ताभिर्ध्रियमाणाभिरग्रतः ॥ 22 ॥
कामदर्पमदैर्युक्तं जिह्मताम्रायतेक्षणम् ।
समक्षमिव कन्दर्पमपविद्धशरासनम् ॥ 23 ॥
मथितामृतफेनाभमरजोवस्त्रमुत्तमम् ।
सलीलमनुकर्षन्तं विमुक्तं सक्तमङ्गदे ॥ 24 ॥
तं पत्रविटपे लीनः पत्रपुष्पघनावृतः ।
समीपमिव सङ्क्रान्तं निध्यातुमुपचक्रमे ॥ 25 ॥
अवेक्षमाणस्तु ततो ददर्श कपिकुञ्जरः ।
रूपयौवनसम्पन्ना रावणस्य वरस्त्रियः ॥ 26 ॥
ताभिः परिवृतो राजा सुरूपाभिर्महायशाः ।
तन्मृगद्विजसङ्घुष्टं प्रविष्टः प्रमदावनम् ॥ 27 ॥
क्षीबो विचित्राभरणः शङ्कुकर्णो महाबलः ।
तेन विश्रवसः पुत्रः स दृष्टो राक्षसाधिपः ॥ 28 ॥
वृतः परमनारीभिस्ताराभिरिव चन्द्रमाः ।
तं ददर्श महातेजास्तेजोवन्तं महाकपिः ॥ 29 ॥
रावणोऽयं महाबाहुरिति सञ्चिन्त्य वानरः ।
अवप्लुतो महातेजा हनुमान्मारुतात्मजः ॥ 30 ॥
स तथाप्युग्रतेजाः सन्निर्धूतस्तस्य तेजसा ।
पत्रगुह्यान्तरे सक्तो हनुमान् संवृतोऽभवत् ॥ 31 ॥
स तामसितकेशान्तां सुश्रोणीं संहतस्त्नीम् ।
दिदृक्षुरसितापाङ्गामुपावर्तत रावणः ॥ 32 ॥
इत्यार्षे श्रीमद्रामायणे वाल्मीकीय आदिकाव्ये सुन्दरकाण्डे अष्टादशस्सर्गः ॥
śrīmadvālmīkīya rāmāyaṇe sundarakāṇḍam |
atha aṣṭādaśassargaḥ |
tathā viprekṣyamāṇasya vanaṃ puṣpitapādapam |
vicinvataśca vaidehīṃ kiñciccheṣā niśā'bhavat || 1 ||
ṣaḍaṅgavedaviduṣāṃ kratupravarayājinām |
śuśrāva brahmaghoṣāṃśca sa virātre brahmarakṣasām || 2 ||
atha maṅgalavāditraśabdaiḥ śrutimanoharaiḥ |
prābudhyata mahābāhurdaśagrīvo mahābalaḥ || 3 ||
vibudhyatu yathākālaṃ rākṣasendraḥ pratāpavān |
srastamālyāmbaradharo vaidehīmanvacintayat || 4 ||
bhṛśaṃ niyuktastasyāṃ ca madanena madotkaṭaḥ |
na sa taṃ rākṣasaḥ kāmaṃ śaśākātmani gūhitum || 5 ||
sa sarvābharaṇairyukto bibhracchriyamanuttamām |
tāṃ nagairbahubhirjuṣṭāṃ sarvapuṣpaphalopagaiḥ || 6 ||
vṛtāṃ puṣkariṇībhiśca nānāpuṣpopaśobhitām |
sadā madaiśca vihagairvicitrāṃ paramādbhutām || 7 ||
īhāmṛgaiśca vividhairjuṣṭāṃ dṛṣṭimanoharaiḥ |
vīdhīḥ samprekṣamāṇaśca maṇikāñcanatoraṇāḥ || 8 ||
nānāmṛgagaṇākīrṇāṃ phalaiḥ prapatitairvṛtām |
aśokavanikāmeva prāviśatsantatadrumām || 9 ||
aṅganāśatamātraṃ tu taṃ vrajantamanuvrajat |
mahendramiva paulastyaṃ devagandharvayoṣitaḥ || 10 ||
dīpikāḥ kāñcanīḥ kāścijjagṛhustatra yoṣitaḥ |
vālavyajanahastāśca tālavṛntāni cāparāḥ || 11 ||
kāñcanairapi bhṛṅgārairjahruḥ salilamagrataḥ |
maṇḍalāgrān bṛsīścāpi gṛhyānyāḥ pṛṣṭhato yayuḥ || 12 ||
kācidratnamayīṃ sthālīṃ pūrṇāṃ pānasya bhāminī |
dakṣiṇā dakṣiṇenaiva tadā jagrāha pāṇinā || 13 ||
rājahaṃsapratīkāśaṃ chatraṃ pūrṇaśaśiprabham |
sauvarṇadaṇḍamaparā gṛhītvā pṛṣṭhato yayau || 14 ||
nidrāmadaparītākṣyo rāvaṇasyottamāḥ striyaḥ |
anujagmuḥ patiṃ vīraṃ ghanaṃ vidyullatā iva || 15 ||
vyāviddhahārakeyūrāḥ samāmṛditavarṇakāḥ |
samāgalitakeśāntāḥ sasvedavadanāstathā || 16 ||
ghūrṇantyo madaśeṣeṇa nidrayā ca śubhānanāḥ |
svedakliṣṭāṅgakusumāssumālyākulamūrdhajāḥ || 17 ||
prayāntaṃ naiṛtapatiṃ nāryo madiralocanāḥ |
bahumānācca kāmācca priyā bhāryāstamanvayuḥ || 18 ||
sa ca kāmaparādhīnaḥ patistāsāṃ mahābalaḥ |
sītāsaktamanā mando mandāñcitagatirbabhau || 19 ||
tataḥ kāñcīninādaṃ ca nūpurāṇāṃ ca nisvanam |
śuśrāva paramastrīṇāṃ sa kapirmārutātmajaḥ || 20 ||
taṃ cāpratimakarmāṇamacintyabalapauruṣam |
dvāradeśamanuprāptaṃ dadarśa hanumān kapiḥ || 21 ||
dīpikābhiranekābhiḥ samantādavabhāsitam |
gandhatailāvasiktābhirdhriyamāṇābhiragrataḥ || 22 ||
kāmadarpamadairyuktaṃ jihmatāmrāyatekṣaṇam |
samakṣamiva kandarpamapaviddhaśarāsanam || 23 ||
mathitāmṛtaphenābhamarajovastramuttamam |
salīlamanukarṣantaṃ vimuktaṃ saktamaṅgade || 24 ||
taṃ patraviṭape līnaḥ patrapuṣpaghanāvṛtaḥ |
samīpamiva saṅkrāntaṃ nidhyātumupacakrame || 25 ||
avekṣamāṇastu tato dadarśa kapikuñjaraḥ |
rūpayauvanasampannā rāvaṇasya varastriyaḥ || 26 ||
tābhiḥ parivṛto rājā surūpābhirmahāyaśāḥ |
tanmṛgadvijasaṅghuṣṭaṃ praviṣṭaḥ pramadāvanam || 27 ||
kṣībo vicitrābharaṇaḥ śaṅkukarṇo mahābalaḥ |
tena viśravasaḥ putraḥ sa dṛṣṭo rākṣasādhipaḥ || 28 ||
vṛtaḥ paramanārībhistārābhiriva candramāḥ |
taṃ dadarśa mahātejāstejovantaṃ mahākapiḥ || 29 ||
rāvaṇo'yaṃ mahābāhuriti sañcintya vānaraḥ |
avapluto mahātejā hanumānmārutātmajaḥ || 30 ||
sa tathāpyugratejāḥ sannirdhūtastasya tejasā |
patraguhyāntare sakto hanumān saṃvṛto'bhavat || 31 ||
sa tāmasitakeśāntāṃ suśroṇīṃ saṃhatastnīm |
didṛkṣurasitāpāṅgāmupāvartata rāvaṇaḥ || 32 ||
ityārṣe śrīmadrāmāyaṇe vālmīkīya ādikāvye sundarakāṇḍe aṣṭādaśassargaḥ ||
🕉️ This is the original Sanskrit rendered in Grantha script.
Pronunciation is identical to the Sanskrit Devanagari version.