కృష్ణ యజుర్వేదీయ తైత్తిరీయ బ్రాహ్మణే తృతీయాష్టకే ప్రథమః ప్రపాఠకః - నక్షత్రేష్టీనాం-యాఁజ్యా-ఽనువాక్యా బ్రాహ్మణాని
ఓ-న్నమః పరమాత్మనే, శ్రీ మహాగణపతయే నమః,
శ్రీ గురుభ్యో నమః । హ॒రిః॒ ఓమ్ ॥
అనువాకం 1 - దేవనక్షత్రాణాం-యాఁజ్యానువాక్యాః
అ॒గ్నిర్నః॑ పాతు॒ కృత్తి॑కాః । నక్ష॑త్ర-న్దే॒వమి॑న్ద్రి॒యమ్ । ఇ॒దమా॑సాం-విఁచక్ష॒ణమ్ । హ॒విరా॒స-ఞ్జు॑హోతన ॥ యస్య॒ భాన్తి॑ ర॒శ్మయో॒ యస్య॑ కే॒తవః॑ । యస్యే॒మా విశ్వా॒ భువ॑నాని॒ సర్వా᳚ ।
స కృత్తి॑కాభిర॒భి సం॒వఁసా॑నః । అ॒గ్నిర్నో॑ దే॒వ-స్సు॑వి॒తే ద॑ధాతు ॥ ప్ర॒జాప॑తే రోహి॒ణీ వే॑తు॒ పత్నీ᳚ ।
వి॒శ్వరూ॑పా బృహ॒తీ చి॒త్రభా॑నుః ॥ 1 ॥
సా నో॑ య॒జ్ఞస్య॑ సువి॒తే ద॑ధాతు । యథా॒ జీవే॑మ శ॒రద॒-స్సవీ॑రాః ॥ రో॒హి॒ణీ దే॒వ్యుద॑గా-త్పు॒రస్తా᳚త్ । విశ్వా॑ రూ॒పాణి॑ ప్రతి॒మోద॑మానా । ప్ర॒జాప॑తిగ్ం హ॒విషా॑ వ॒ర్ధయ॑న్తీ । ప్రి॒యా దే॒వానా॒-ముప॑యాతు య॒జ్ఞమ్ ॥ సోమో॒ రాజా॑ మృగశీ॒ర॒.షేణ॒ ఆగన్న్॑ । శి॒వ-న్నక్ష॑త్ర-మ్ప్రి॒యమ॑స్య॒ ధామ॑ ।
ఆ॒ప్యాయ॑మానో బహు॒ధా జనే॑షు ।
రేతః॑ ప్ర॒జాం-యఁజ॑మానే దధాతు ॥ 2 ॥
య-త్తే॒ నక్ష॑త్ర-మ్మృగశీ॒ర॒.షమస్తి॑ ।
ప్రి॒యగ్ం రా॑జ-న్ప్రి॒యత॑మ-మ్ప్రి॒యాణా᳚మ్ ।
తస్మై॑ తే సోమ హ॒విషా॑ విధేమ ।
శన్న॑ ఏధి ద్వి॒పదే॒ శ-ఞ్చతు॑ష్పదే ॥
ఆ॒ర్ద్రయా॑ రు॒ద్రః ప్రథ॑మాన ఏతి । శ్రేష్ఠో॑ దే॒వానా॒-మ్పతి॑రఘ్ని॒యానా᳚మ్ । నక్ష॑త్రమస్య హ॒విషా॑ విధేమ । మా నః॑ ప్ర॒జాగ్ం రీ॑రిష॒-న్మోత వీ॒రాన్ ॥
హే॒తీ రు॒ద్రస్య॒ పరి॑ణో వృణక్తు । ఆ॒ర్ద్రా నక్ష॑త్ర-ఞ్జుషతాగ్ం హ॒విర్నః॑ ॥ 3 ॥
ప్ర॒ము॒ఞ్చమా॑నౌ దురి॒తాని॒ విశ్వా᳚ । అపా॒ఘశగ్ం॑ స-న్నుదతా॒మరా॑తిమ్ ॥ పున॑ర్నో దే॒వ్యది॑తి-స్స్పృణోతు । పున॑ర్వసూ నః॒ పున॒రేతాం᳚-యఁ॒జ్ఞమ్ ।
పున॑ర్నో దే॒వా అ॒భియ॑న్తు॒ సర్వే᳚ । పునః॑ పునర్వో హ॒విషా॑ యజామః ॥ ఏ॒వా న దే॒వ్యది॑తిరన॒ర్వా । విశ్వ॑స్య భ॒ర్త్రీ జగ॑తః ప్రతి॒ష్ఠా । పున॑ర్వసూ హ॒విషా॑ వ॒ర్ధయ॑న్తీ । ప్రి॒య-న్దే॒వానా॒-మప్యే॑తు॒ పాథః॑ ॥ 4 ॥
బృహ॒స్పతిః॑ ప్రథ॒మ-ఞ్జాయ॑మానః । తి॒ష్య॑-న్నక్ష॑త్రమ॒భి సమ్బ॑భూవ । శ్రేష్ఠో॑ దే॒వానా॒-మ్పృత॑నాసు జి॒ష్ణుః । దిశో-ఽను॒ సర్వా॒ అభ॑యన్నో అస్తు ॥
తి॒ష్యః॑ పు॒రస్తా॑దు॒త మ॑ద్ధ్య॒తో నః॑ । బృహ॒స్పతి॑ ర్నః॒ పరి॑పాతు ప॒శ్చాత్ । బాధే॑తా॒-న్ద్వేషో॒ అభ॑య-ఙ్కృణుతామ్ । సు॒వీర్య॑స్య॒ పత॑య-స్స్యామ ॥
ఇ॒దగ్ం స॒ర్పేభ్యో॑ హ॒విర॑స్తు॒ జుష్ట᳚మ్ ।
ఆ॒శ్రే॒షా యేషా॑-మను॒యన్తి॒ చేతః॑ ॥ 5 ॥
యే అ॒న్తరి॑క్ష-మ్పృథి॒వీ-ఙ్క్షి॒యన్తి॑ । తేనః॑ స॒ర్పాసో॒ హవ॒మాగ॑మిష్ఠాః ॥ యే రో॑చ॒నే సూర్య॒స్యాపి॑
స॒ర్పాః । యే దివ॑-న్దే॒వీమను॑ స॒ఞ్చర॑న్తి ।
యేషా॑మాశ్రే॒షా అ॑ను॒యన్తి॒ కామ᳚మ్ ।
తేభ్యః॑ స॒ర్పేభ్యో॒ మధు॑మజ్జుహోమి ॥
ఉప॑హూతాః పి॒తరో॒ యే మ॒ఘాసు॑ । మనో॑జవస-స్సు॒కృతః॑ సుకృ॒త్యాః । తే నో॒ నక్ష॑త్రే॒ హవ॒మాగ॑మిష్ఠాః । స్వ॒ధాభి॑ ర్య॒జ్ఞ-మ్ప్రయ॑త-ఞ్జుషన్తామ్ ॥ 6 ॥
యే అ॑గ్నిద॒గ్ధా యే-ఽన॑గ్ని-దగ్ధాః । యే॑-ఽముం-లోఁ॒క-మ్పి॒తరః॑ క్షి॒యన్తి॑ । యాగ్శ్చ॑ వి॒ద్మయాగ్ం ఉ॑ చ॒ న ప్ర॑వి॒ద్మ । మ॒ఘాసు॑ య॒జ్ఞగ్ం సుకృ॑త-ఞ్జుషన్తామ్ ॥
గవా॒-మ్పతిః॒ ఫల్గు॑నీనామసి॒ త్వమ్ । తద॑ర్యమన్ వరుణ మిత్ర॒ చారు॑ । త-న్త్వా॑ వ॒యగ్ం స॑ని॒తారగ్ం॑ సనీ॒నామ్ । జీ॒వా జీవ॑న్త॒ముప॒ సంవిఁ॑శేమ ॥
యేనే॒మా విశ్వా॒ భువ॑నాని॒ సఞ్జి॑తా ।
యస్య॑ దే॒వా అ॑ను సం॒యఁన్తి॒ చేతః॑ ॥ 7 ॥
అ॒ర్య॒మా రాజా॒-ఽజర॒స్తువి॑ష్మాన్ । ఫల్గు॑నీనా-మృష॒భో రో॑రవీతి ॥ శ్రేష్ఠో॑ దే॒వానా᳚-మ్భగవో భగాసి । తత్త్వా॑ విదుః॒ ఫల్గు॑నీ॒స్తస్య॑ విత్తాత్ । అ॒స్మభ్య॑-ఙ్క్ష॒త్రమ॒జరగ్ం॑ సు॒వీర్య᳚మ్ । గోమ॒దశ్వ॑-వ॒దుప॒-సన్ను॑దే॒హ ॥ భగో॑ హ దా॒తా భగ॒ ఇ-త్ప్ర॑దా॒తా । భగో॑ దే॒వీః ఫల్గు॑నీ॒రావి॑వేశ । భగ॒స్యేత్త-మ్ప్ర॑స॒వ-ఙ్గ॑మేమ । యత్ర॑ దే॒వై-స్స॑ధ॒మాద॑-మ్మదేమ ॥ 8 ॥
ఆయా॑తు దే॒వ-స్స॑వి॒తోప॑యాతు । హి॒ర॒ణ్యయే॑న సు॒వృతా॒ రథే॑న । వహ॒న్॒. హస్తగ్ం॑ సు॒భగం॑-విఁద్మ॒నాప॑సమ్ । ప్ర॒యచ్ఛ॑న్త॒-మ్పపు॑రి॒-మ్పుణ్య॒మచ్ఛ॑ ॥
హస్తః॒ ప్రయ॑చ్ఛ త్వ॒మృతం॒-వఁసీ॑యః ।
దక్షి॑ణేన॒ ప్రతి॑గృభ్ణీమ ఏనత్ ।
దా॒తార॑మ॒ద్య స॑వి॒తా వి॑దేయ ।
యో నో॒ హస్తా॑య ప్రసు॒వాతి॑ య॒జ్ఞమ్ ॥
త్వష్టా॒ నక్ష॑త్రమ॒భ్యే॑తి చి॒త్రామ్ ।
సు॒భగ్ం స॑సం-యుఁవ॒తిగ్ం రోచ॑మానామ్ ॥ 9 ॥
ని॒వే॒శయ॑-న్న॒మృతా॒-న్మర్త్యాగ్॑శ్చ ।
రూ॒పాణి॑ పి॒గ్ం॒శ-న్భువ॑నాని॒ విశ్వా᳚ ॥
తన్న॒స్త్వష్టా॒ తదు॑ చి॒త్రా విచ॑ష్టామ్ ।
తన్నక్ష॑త్ర-మ్భూరి॒దా అ॑స్తు॒ మహ్య᳚మ్ ।
తన్నః॑ ప్ర॒జాం-వీఁ॒రవ॑తీగ్ం సనోతు ।
గోభి॑ర్నో॒ అశ్వై॒-స్సమ॑నక్తు య॒జ్ఞమ్ ॥
వా॒యుర్నక్ష॑త్ర-మ॒భ్యే॑తి॒ నిష్ట్యా᳚మ్ ।
తి॒గ్మశృ॑ఙ్గో వృష॒భో రోరు॑వాణః ।
స॒మీ॒రయ॒-న్భువ॑నా మాత॒రిశ్వా᳚ ।
అప॒ ద్వేషాగ్ం॑సి నుదతా॒మరా॑తీః ॥ 10 ॥
తన్నో॑ వా॒యస్తదు॒ నిష్ట్యా॑ శృణోతు ।
తన్నక్ష॑త్ర-మ్భూరి॒దా అ॑స్తు॒ మహ్య᳚మ్ ।
తన్నో॑ దే॒వాసో॒ అను॑ జానన్తు॒ కామ᳚మ్ । యథా॒ తరే॑మ దురి॒తాని॒ విశ్వా᳚ ॥ దూ॒రమ॒స్మచ్ఛత్ర॑వో యన్తు భీ॒తాః । తది॑న్ద్రా॒గ్నీ కృ॑ణుతా॒-న్త-ద్విశా॑ఖే ।
తన్నో॑ దే॒వా అను॑మదన్తు య॒జ్ఞమ్ । ప॒శ్చా-త్పు॒రస్తా॒-దభ॑యన్నో అస్తు ॥ నక్ష॑త్రాణా॒-మధి॑పత్నీ॒ విశా॑ఖే ।
శ్రేష్ఠా॑విన్ద్రా॒గ్నీ భువ॑నస్య గో॒పౌ ॥ 11 ॥
విషూ॑చ॒-శ్శత్రూ॑-నప॒బాధ॑మానౌ । అప॒ క్షుధ॑-న్నుదతా॒మరా॑తిమ్ ॥ పూ॒ర్ణా ప॒శ్చాదు॒త పూ॒ర్ణా పు॒రస్తా᳚త్ । ఉన్మ॑ద్ధ్య॒తః పౌ᳚ర్ణమా॒సీ జి॑గాయ ।
తస్యా᳚-న్దే॒వా అధి॑ సం॒వఁస॑న్తః ।
ఉ॒త్త॒మే నాక॑ ఇ॒హ మా॑దయన్తామ్ ॥
పృ॒థ్వీ సు॒వర్చా॑ యువ॒తి-స్స॒జోషాః᳚ । పౌ॒ర్ణ॒మా॒స్యుద॑గా॒-చ్ఛోభ॑మానా ।
ఆ॒ప్యా॒యయ॑న్తీ దురి॒తాని॒ విశ్వా᳚ ।
ఉ॒రు-న్దుహాం॒-యఁజ॑మానాయ య॒జ్ఞమ్ ॥ 12 ॥
(చి॒త్రభా॑ను॒-ర్ యజ॑మానే దధాతు - హ॒విర్నః॒ - పాథ॒ - శ్చేతో॑ - జుషన్తాం॒ - చేతో॑ - మదేమ॒ - రోచ॑మానా॒ - మరా॑తీ--ర్ గో॒పౌ - య॒జ్ఞం) (అ. 1)
అనువాకం 2 - యమనక్షత్రాణాం-యాఁజ్యానువాక్యాః
ఋ॒ద్ధ్యాస్మ॑ హ॒వ్యై-ర్నమ॑సోప॒ సద్య॑ ।
మి॒త్ర-న్దే॒వ-మ్మి॑త్ర॒ధేయ॑న్నో అస్తు । అ॒నూ॒రా॒ధాన్. హ॒విషా॑ వ॒ర్ధయ॑న్తః । శ॒త-ఞ్జీ॑వేమ శ॒రద॒-స్సవీ॑రాః ॥ చి॒త్ర-న్నక్ష॑త్ర॒-ముద॑గా-త్పు॒రస్తా᳚త్ । అ॒నూ॒రా॒ధాస॒ ఇతి॒ య-ద్వద॑న్తి । తన్మి॒త్ర ఏ॑తి ప॒థిభి॑ ర్దేవ॒యానైః᳚ । హి॒ర॒ణ్యయై॒ ర్విత॑తై-ర॒న్తరి॑క్షే ॥
ఇన్ద్రో᳚ జ్యే॒ష్ఠామను॒ నక్ష॑త్రమేతి । యస్మి॑న్ వృ॒త్రం-వృఁ॑త్ర॒ తూర్యే॑ త॒తార॑ ॥ 13 ॥
తస్మి॑న్ వ॒యమ॒మృత॒-న్దుహా॑నాః । క్షుధ॑-న్తరేమ॒ దురి॑తి॒-న్దురి॑ష్టిమ్ ॥ పు॒ర॒న్ద॒రాయ॑ వృష॒భాయ॑ ధృ॒ష్ణవే᳚ । అషా॑ఢాయ॒ సహ॑మానాయ మీ॒ఢుషే᳚ ।
ఇన్ద్రా॑య జ్యే॒ష్ఠా మధు॑మ॒-ద్దుహా॑నా ।
ఉ॒రు-ఙ్కృ॑ణోతు॒ యజ॑మానాయ లో॒కమ్ ॥
మూల॑-మ్ప్ర॒జాం-వీఁ॒రవ॑తీం-విఁదేయ । పరా᳚చ్యేతు॒ నిర్-ఋ॑తిః పరా॒చా । గోభి॒ ర్నక్ష॑త్ర-మ్ప॒శుభి॒-స్సమ॑క్తమ్ । అహ॑ర్భూయా॒-ద్యజ॑మానాయ॒ మహ్య᳚మ్ ॥ 14 ॥
అహ॑ర్నో అ॒ద్య సు॑వి॒తే ద॑ధాతు । మూల॒-న్నక్ష॑త్ర॒మితి॒ య-ద్వద॑న్తి । పరా॑చీం-వాఁ॒చా నిర్-ఋ॑తి-న్నుదామి ।
శి॒వ-మ్ప్ర॒జాయై॑ శి॒వమ॑స్తు॒ మహ్య᳚మ్ ॥
యా ది॒వ్యా ఆపః॒ పయ॑సా స-మ్బభూ॒వుః । యా అ॒న్తరి॑క్ష ఉ॒త పార్థి॑వీ॒ర్యాః । యాసా॑మషా॒ఢా అ॑ను॒యన్తి॒
కామ᳚మ్ । తా న॒ ఆప॒-శ్శగ్గ్ స్యో॒నా భ॑వన్తు ॥
యాశ్చ॒ కూప్యా॒ యాశ్చ॑ నా॒ద్యా᳚-స్సము॒ద్రియాః᳚ ।
యాశ్చ॑ వైశ॒న్తీరు॒త ప్రా॑స॒చీర్యాః ॥ 15 ॥
యాసా॑మషా॒ఢా మధు॑ భ॒క్షయ॑న్తి । తా న॒ ఆప॒-శ్శగ్గ్ స్యో॒నా భ॑వన్తు ॥ తన్నో॒ విశ్వే॒ ఉప॑ శృణ్వన్తు దే॒వాః । తద॑షా॒ఢా అ॒భి సంయఁ॑న్తు య॒జ్ఞమ్ ।
తన్నక్ష॑త్ర-మ్ప్రథతా-మ్ప॒శుభ్యః॑ ।
కృ॒షి-ర్వృ॒ష్టి-ర్యజ॑మానాయ కల్పతామ్ ॥
శు॒భ్రాః క॒న్యా॑ యువ॒తయః॑ సు॒పేశ॑సః । క॒ర్మ॒కృతః॑ సు॒కృతో॑ వీ॒ర్యా॑వతీః ।
విశ్వా᳚-న్దే॒వాన్. హ॒విషా॑ వ॒ర్ధయ॑న్తీః ।
అ॒షా॒ఢాః కామ॒ముప॑యాన్తు య॒జ్ఞమ్ ॥ 16 ॥
యస్మి॒-న్బ్రహ్మా॒-ఽభ్యజ॑య॒-థ్సర్వ॑మే॒తత్ ।
అ॒ముఞ్చ॑ లో॒క మి॒దమూ॑చ॒ సర్వ᳚మ్ ।
తన్నో॒ నక్ష॑త్రమభి॒జి-ద్వి॒జిత్య॑ । శ్రియ॑-న్దధా॒-త్వహృ॑ణీయమానమ్ ॥ ఉ॒భౌ లో॒కౌ బ్రహ్మ॑ణా॒ సఞ్జి॑తే॒మౌ । తన్నో॒ నక్ష॑త్రమభి॒జి-ద్విచ॑ష్టామ్ ।
తస్మి॑న్ వ॒య-మ్పృత॑నా॒-స్స-ఞ్జ॑యేమ ।
తన్నో॑ దే॒వాసో॒ అను॑జానన్తు॒ కామ᳚మ్ ॥
శృ॒ణ్వన్తి॑ శ్రో॒ణా-మ॒మృత॑స్య గో॒పామ్ ।
పుణ్యా॑మస్యా॒ ఉప॑శృణోమి॒ వాచ᳚మ్ ॥ 17 ॥
మ॒హీ-న్దే॒వీం-విఁష్ణు॑పత్నీ-మజూ॒ర్యామ్ । ప్ర॒తీచీ॑మేనాగ్ం హ॒విషా॑ యజామః ॥
త్రే॒ధా విష్ణు॑-రురుగా॒యో విచ॑క్రమే ।
మ॒హీ-న్దివ॑-మ్పృథి॒వీ-మ॒న్తరి॑క్షమ్ ।
తచ్ఛ్రో॒ణైతి॒ శ్రవ॑ ఇ॒చ్ఛమా॑నా ।
పుణ్య॒గ్గ్॒ శ్లోకం॒-యఁజ॑మానాయ కృణ్వ॒తీ ॥
అ॒ష్టౌ దే॒వా వస॑వ-స్సో॒మ్యాసః॑ ।
చత॑స్రో దే॒వీ ర॒జరా॒-శ్శ్రవి॑ష్ఠాః ।
తే య॒జ్ఞ-మ్పా᳚న్తు॒ రజ॑సః ప॒రస్తా᳚త్ ।
సం॒వఁ॒థ్స॒రీణ॑-మ॒మృతగ్గ్॑ స్వ॒స్తి ॥ 18 ॥
య॒జ్ఞ-న్నః॑ పాన్తు॒ వస॑వః పు॒రస్తా᳚త్ । ద॒క్షి॒ణ॒తో॑-ఽభియ॑న్తు॒ శ్రవి॑ష్ఠాః । పుణ్య॒-న్నక్ష॑త్రమ॒భి సంవిఁ॑శామ । మా నో॒ అరా॑తి-ర॒ఘశ॒గ్ం॒సా గన్న్॑ ॥
క్ష॒త్రస్య॒ రాజా॒ వరు॑ణో-ఽధిరా॒జః । నక్ష॑త్రాణాగ్ం శ॒తభి॑ష॒గ్ వసి॑ష్ఠః । తౌ దే॒వేభ్యః॑ కృణుతో దీ॒ర్ఘమాయుః॑ । శ॒తగ్ం స॒హస్రా॑ భేష॒జాని॑ ధత్తః ॥
య॒జ్ఞన్నో॒ రాజా॒ వరు॑ణ॒ ఉప॑యాతు । తన్నో॒ విశ్వే॑ అ॒భి సంయఁ॑న్తు దే॒వాః ॥ 19 ॥
తన్నో॒ నక్ష॑త్రగ్ం శ॒తభి॑షగ్ జుషా॒ణమ్ । దీ॒ర్ఘమాయుః॒ ప్రతి॑ర-ద్భేష॒జాని॑ ॥ అ॒జ ఏక॑పా॒దుద॑గా-త్పు॒రస్తా᳚త్ । విశ్వా॑ భూ॒తాని॑ ప్రతి॒మోద॑మానః । తస్య॑ దే॒వాః ప్ర॑స॒వం-యఁ॑న్తి॒ సర్వే᳚ । ప్రో॒ష్ఠ॒ప॒దాసో॑ అ॒మృత॑స్య గో॒పాః ॥
వి॒భ్రాజ॑మాన-స్సమిధా॒న ఉ॒గ్రః । ఆ-ఽన్తరి॑క్ష-మరుహ॒ద-గ॒న్ద్యామ్ । తగ్ం సూర్య॑-న్దే॒వ-మ॒జమేక॑పాదమ్ । ప్రో॒ష్ఠ॒ప॒దాసో॒ అను॑యన్తి॒ సర్వే᳚ ॥ 20 ॥
అహి॑-ర్బు॒ద్ధ్నియః॒ ప్రథ॑మాన ఏతి । శ్రేష్ఠో॑ దే॒వానా॑ము॒త మాను॑షాణామ్ । త-మ్బ్రా᳚హ్మ॒ణా-స్సో॑మ॒పా-స్సో॒మ్యాసః॑ ।
ప్రో॒ష్ఠ॒ప॒దాసో॑ అ॒భి ర॑క్షన్తి॒ సర్వే᳚ ॥
చ॒త్వార॒ ఏక॑మ॒భి కర్మ॑ దే॒వాః ।
ప్రో॒ష్ఠ॒ప॒దాస॒ ఇతి॒ యాన్. వద॑న్తి ।
తే బు॒ద్ధనియ॑-మ్పరి॒షద్యగ్గ్॑ స్తు॒వన్తః॑ ।
అహిగ్ం॑ రక్షన్తి॒ నమ॑సోప॒సద్య॑ ॥
పూ॒షా రే॒వత్యన్వే॑తి॒ పన్థా᳚మ్ । పు॒ష్టి॒పతీ॑ పశు॒పా వాజ॑బస్త్యౌ ॥ 21 ॥
ఇ॒మాని॑ హ॒వ్యా ప్రయ॑తా జుషా॒ణా ।
సు॒గైర్నో॒ యానై॒రుప॑యాతాం-యఁ॒జ్ఞమ్ ॥
క్షు॒ద్రా-న్ప॒శూ-న్ర॑క్షతు రే॒వతీ॑ నః ।
గావో॑ నో॒ అశ్వా॒గ్ం॒ అన్వే॑తు పూ॒షా ।
అన్న॒గ్ం॒ రక్ష॑న్తౌ బహు॒ధా విరూ॑పమ్ ।
వాజగ్ం॑ సనుతాం॒-యఁజ॑మానాయ య॒జ్ఞమ్ ॥
తద॒శ్వినా॑-వశ్వ॒యుజోప॑యాతామ్ ।
శుభ॒-ఙ్గమి॑ష్ఠౌ సు॒యమే॑భి॒రశ్వైః᳚ ।
స్వ-న్నక్ష॑త్రగ్ం హ॒విషా॒ యజ॑న్తౌ ।
మద్ధ్వా॒ సమ్పృ॑క్తౌ॒ యజు॑షా॒ సమ॑క్తౌ ॥ 22 ॥
యౌ దే॒వానా᳚-మ్భి॒షజౌ॑ హవ్యవా॒హౌ । విశ్వ॑స్య దూ॒తా-వ॒మృత॑స్య గో॒పౌ । తౌ నక్ష॑త్ర-ఞ్జుజుషా॒ణో-ప॑యాతామ్ । నమో॒-ఽశ్విభ్యా᳚-ఙ్కృణుమో-ఽశ్వ॒యుగ్భ్యా᳚మ్ ॥
అప॑ పా॒ప్మాన॒-మ్భర॑ణీర్భరన్తు । త-ద్య॒మో రాజా॒ భగ॑వా॒న్॒. విచ॑ష్టామ్ । లో॒కస్య॒ రాజా॑ మహ॒తో మ॒హాన్. హి । సు॒గ-న్నః॒ పన్థా॒మభ॑య-ఙ్కృణోతు ॥
యస్మి॒-న్నక్ష॑త్రే య॒మ ఏతి॒ రాజా᳚ ।
యస్మి॑-న్నేనమ॒భ్యషి॑చన్న్త దే॒వాః ।
తద॑స్య చి॒త్రగ్ం హ॒విషా॑ యజామ ।
అప॑ పా॒ప్మాన॒-మ్భర॑ణీ-ర్భరన్తు ॥
ని॒వేశ॑నీ స॒ఙ్గమ॑నీ॒ వసూ॑నాం॒-విఁశ్వా॑ రూ॒పాణి॒ వసూ᳚న్యావే॒శయ॑న్తీ । స॒హ॒స్ర॒పో॒షగ్ం సు॒భగా॒ రరా॑ణా॒ సా న॒ ఆగ॒న్ వర్చ॑సా సంవిఁదా॒నా ॥ యత్తే॑ దే॒వా అద॑ధు-ర్భాగ॒ధేయ॒మమా॑వాస్యే సం॒వఁస॑న్తో మహి॒త్వా । సానో॑ య॒జ్ఞ-మ్పి॑పృహి విశ్వవారే ర॒యి-న్నో॑ ధేహి సుభగే సు॒వీర᳚మ్ ॥ ॥ 23 ॥
(త॒తార॒ - మహ్యం॑ - ప్రాస॒చీర్యా - యా᳚న్తు య॒జ్ఞం - ఁవాచగ్గ్॑ - స్వ॒స్తి - దే॒వా-అను॑ యన్తి॒ సర్వే॒-వాజ॑బస్త్యౌ॒-సమ॑క్తౌ-దే॒వా స్త్రీణి॑ చ) (అ. 2)
అనువాకం 3 - చాన్ద్రమసాదీనాం సప్తనామిష్టీనాం-యాఁజ్యానువాక్యాః
నవో॑నవో భవతి॒ జాయ॑మా॒నో-ఽహ్నా᳚-ఙ్కే॒తురు॒షసా॑ మే॒త్యగ్రే᳚ । భా॒గ-న్దే॒వేభ్యో॒ విద॑ధాత్యా॒య-న్ప్రచ॒న్ద్రమా᳚స్తిరతి దీ॒ర్ఘమాయుః॑ ॥ యమా॑ది॒త్యా
అ॒గ్ం॒శుమా᳚ప్యా॒యయ॑న్తి యమా॑ది॒త్యా అ॒గ్ం॒శుమా᳚ప్యా॒యయ॑న్తి॒ యమక్షి॑త॒-మక్షి॑తయః॒ పిబ॑న్తి । తేన॑ నో॒ రాజా॒ వరు॑ణో॒ బృహ॒స్పతి॒రా ప్యా॑యయన్తు॒ భువ॑నస్య గో॒పాః ॥॥ యే విరూ॑పే॒ సమ॑నసా సం॒వ్యఁయ॑న్తీ । స॒మా॒న-న్తన్తు॑-మ్పరి తాత॒నాతే᳚ । వి॒భూ ప్ర॒భూ అ॑ను॒భూ వి॒శ్వతో॑ హువే ।
తే నో॒ నక్ష॑త్రే॒ హవ॒మాగ॑మేతమ్ ॥
వ॒య-న్దే॒వీ బ్రహ్మ॑ణా సంవిఁదా॒నాః ।
సు॒రత్నా॑సో దే॒వవీ॑తి॒-న్దధా॑నాః ।
అ॒హో॒రా॒త్రే హ॒విషా॑ వ॒ర్ధయ॑న్తః ।
అతి॑ పా॒ప్మాన॒-మతి॑ముక్త్యా గమేమ ॥ ప్రత్యు॑వదృశ్యాయ॒తీ ॥ 24 ॥
వ్యు॒చ్ఛన్తీ॑ దుహి॒తా ది॒వః । అ॒పో మ॒హీ వృ॑ణుతే॒ చక్షు॑షా ॥ తమో॒ జ్యోతి॑ష్కృణోతి సూ॒నరీ᳚ । ఉదు॒స్త్రియా᳚-స్సచతే॒ సూర్యః॑ । స చా॑ ఉ॒ద్యన్నక్ష॑త్ర-మర్చి॒మత్ । తవేదు॑షో॒ వ్యుషి॒ సూర్య॑స్య చ ॥
స-మ్భ॒క్తేన॑ గమేమహి । తన్నో॒ నక్ష॑త్ర-మర్చి॒మత్ । భా॒ను॒మత్తేజ॑ ఉ॒చ్చర॑త్ । ఉప॑ య॒జ్ఞ-మి॒హాగ॑మత్ ॥ 25 ॥
ప్ర నక్ష॑త్రాయ దే॒వాయ॑ । ఇన్ద్రా॒యేన్దుగ్ం॑ హవామహే ।
స నః॑ సవి॒తా సు॑వ-థ్స॒నిమ్ । పు॒ష్టి॒దాం-వీఁ॒రవ॑త్తమమ్ ॥ ఉదు॒ త్య-ఞ్జా॒తవే॑దస-న్దే॒వం-వఁ॑హన్తి కే॒తవః॑ । దృ॒శే విశ్వా॑య॒ సూర్య᳚మ్ ॥ చి॒త్ర-న్దే॒వానా॒-ముద॑గా॒దనీ॑క॒-ఞ్చక్షు॑-ర్మి॒త్రస్య॒ వరు॑ణస్యా॒-ఽగ్నేః । ఆ-ఽ ప్రా॒ ద్యావా॑పృథి॒వీ అ॒న్తరి॑క్ష॒గ్ం॒ సూర్య॑ ఆ॒త్మా జగ॑తస్త॒స్థుష॑శ్చ ॥॥
అది॑తిర్న ఉరుష్య॒త్వది॑తి॒-శ్శర్మ॑ యచ్ఛతు । అది॑తిః పా॒త్వగ్ం హ॑సః ॥ మ॒హీమూ॒షు మా॒తరగ్ం॑ సువ్ర॒తానా॑మృ॒తస్య॒ పత్నీ॒మవ॑సే హువేమ । తు॒వి॒క్ష॒త్రామ॒జర॑న్తీమురూ॒చీగ్ం సు॒శర్మా॑ణ॒మది॑తిగ్ం సు॒ప్రణీ॑తిమ్ ॥ ॥
ఇ॒దం-విఁష్ణు॒-ర్విచ॑క్రమే త్రే॒ధా ని ద॑ధే ప॒దమ్ । స మూ॑ఢమస్య పాగ్ం సు॒రే ॥ ప్రత-ద్విష్ణుః॑ స్తవతే వీ॒ర్యా॑య । మృ॒గో న భీ॒మః కు॑చ॒రో గి॑రి॒ష్ఠాః । యస్యో॒రుషు॑ త్రి॒షు వి॒క్రమ॑ణేషు । అధి॑క్షి॒యన్తి॒ భువ॑నాని॒ విశ్వా᳚ ॥ ॥
అ॒గ్నిర్మూ॒ర్ధా ది॒వః క॒కు-త్పతిః॑ పృథి॒వ్యా అ॒యమ్ । అ॒పాగ్ం రేతాగ్ం॑సి జిన్వతి ॥ భువో॑ య॒జ్ఞస్య॒ రజ॑సశ్చ నే॒తా యత్రా॑ ని॒యుద్భి॒-స్సచ॑సే శి॒వాభిః॑ । ది॒వి మూ॒ర్ధాన॑-న్దధిషే సువ॒ర్॒షా-ఞ్జి॒హ్వామ॑గ్నే చకృషే హవ్య॒వాహ᳚మ్ ॥ ॥
అను॑ నో॒-ఽద్యా-ఽను॑మతి-ర్య॒జ్ఞ-న్దే॒వేషు॑ మన్యతామ్ । అ॒గ్నిశ్చ॑ హవ్య॒వాహ॑నో॒ భవ॑తా-న్దా॒శుషే॒ మయః॑ ॥ అన్విద॑నుమతే॒ త్వ-మ్మన్యా॑సై॒ శఞ్చ॑నః కృధి । క్రత్వే॒ దక్షా॑య నో హిను॒ ప్రణ॒ ఆయూగ్ం॑షి తారిషః ॥ ॥
హ॒వ్య॒వాహ॑-మభిమాతి॒షా-ఽహ᳚మ్ । ర॒క్షో॒హణ॒-మ్పృత॑నాసు జి॒ష్ణుమ్ । జ్యోతి॑ష్మన్త॒-న్దీద్య॑త॒-మ్పుర॑న్ధిమ్ । అ॒గ్నిగ్గ్ స్వి॑ష్ట॒కృత॒మా హు॑వేమ ॥ స్వి॑ష్టమగ్నే అ॒భి త-త్పృ॑ణాహి । విశ్వా॑ దేవ॒ పృత॑నా అ॒భిష్య । ఉ॒రు-న్నః॒ పన్థా᳚-మ్ప్రది॒శన్వి భా॑హి । జ్యోతి॑ష్మద్ధేహ్య॒జర॑-న్న॒ ఆయుః॑ ॥ ॥ 26 ॥
(ఆ॒య॒త్య॑ - గమ॒థ్ - స్వి॑ష్టమ్) (అ. 3)
అనువాకం 4 - దేవ నక్షత్రేష్టిబ్రాహ్మణమ్
అ॒గ్నిర్వా అ॑కామయత । అ॒న్నా॒దో దే॒వానాగ్॑ స్యా॒మితి॑ ।
స ఏ॒తమ॒గ్నయే॒ కృత్తి॑కాభ్యః పురో॒డాశ॑-మ॒ష్టాక॑పాల॒-న్నిర॑వపత్ । తతో॒ వై సో᳚-ఽన్నా॒దో దే॒వానా॑మభవత్ । అ॒గ్నిర్వై దే॒వానా॑మన్నా॒దః ॥
యథా॑ హ॒ వా అ॒గ్ని-ర్దే॒వనా॑-మన్నా॒దః ।
ఏ॒వగ్ం హ॒ వా ఏ॒ష మ॑ను॒ష్యా॑ణా-మ్భవతి ।
య ఏ॒తేన॑ హ॒విషా॒ యజ॑తే । య ఉ॑ చైనదే॒వం-వేఁద॑ ॥ సో-ఽత్ర॑ జుహోతి । అ॒గ్నయే॒ స్వాహా॒ కృత్తి॑కాభ్య॒-స్స్వాహా᳚ । అ॒మ్బాయై॒ స్వాహా॑ దు॒లాయై॒ స్వాహా᳚ । ని॒త॒త్న్యై స్వాహా॒ ఽభ్రయ॑న్త్యై॒ స్వాహా᳚ । మే॒ఘయ॑న్త్యై॒ స్వాహా॑ వ॒ర॒.షయ॑న్త్యై॒ స్వాహా᳚ । చు॒పు॒ణీకా॑యై॒ స్వాహేతి॑ ॥ 27 ॥
ప్ర॒జాప॑తిః ప్ర॒జా అ॑సృజత । తా అ॑స్మా-థ్సృ॒ష్టాః పరా॑చీరాయన్న్ । తాసాగ్ం॑ రోహి॒ణీ-మ॒భ్య॑ద్ధ్యాయత్ । సో॑-ఽకామయత । ఉప॒ మా-ఽఽవ॑ర్తేత । సమే॑నయా గచ్ఛే॒యేతి॑ । స ఏ॒త-మ్ప్ర॒జాప॑తయే రోహి॒ణ్యై చ॒రు-న్నిర॑వపత్ । తతో॒ వై సా తము॒పావ॑ర్తత । సమే॑నయా ఽగచ్ఛత ॥ ఉప॑ హ॒ వా ఏ॑న-మ్ప్రి॒యమావ॑ర్తతే ।
స-మ్ప్రి॒యేణ॑ గచ్ఛతే । య ఏ॒తేన॑ హ॒విషా॒ యజ॑తే ।
య ఉ॑ చైనదే॒వం-వేఁద॑ ॥ సో-ఽత్ర॑ జుహోతి ।
ప్ర॒జాప॑తయే॒ స్వాహా॑ రోహి॒ణ్యై స్వాహా᳚ ।
రోచ॑మానాయై॒ స్వాహా᳚ ప్ర॒జాభ్య॒-స్స్వాహేతి॑ ॥ 28 ॥
సోమో॒ వా అ॑కామయత । ఓష॑ధీనాగ్ం రా॒జ్య-మ॒భిజ॑యేయ॒మితి॑ । స ఏ॒తగ్ం సోమా॑య మృగశీ॒ర॒.షాయ॑ శ్యామా॒క-ఞ్చ॒రు-మ్పయ॑సి॒ నిర॑వపత్ । తతో॒ వై స ఓష॑ధీనాగ్ం
రా॒జ్యమ॒భ్య॑జయత్ । స॒మా॒నానాగ్ం॑ హ॒ వై రా॒జ్యమ॒భిజ॑యతి । య ఏ॒తేన॑ హ॒విషా॒ యజ॑తే ।
య ఉ॑ చైనదే॒వం-వేఁద॑ । సో-ఽత్ర॑ జుహోతి ।
సోమా॑య॒ స్వాహా॑ మృగశీ॒ర॒.షాయ॒ స్వాహా᳚ ।
ఇ॒న్వ॒కాభ్య॒-స్స్వాహౌష॑ధీభ్య॒-స్స్వాహా᳚ ।
రా॒జ్యాయ॒ స్వాహా॒ ఽభిజి॑త్యై॒ స్వాహేతి॑ ॥ 29 ॥
రు॒ద్రో వా అ॑కామయత । ప॒శు॒మాన్-థ్స్యా॒మితి॑ ।
స ఏ॒తగ్ం రు॒ద్రాయా॒ర్ద్రాయై॒ ప్రైయ॑ఙ్గవ-ఞ్చ॒రు-మ్పయ॑సి॒ నిర॑వపత్ । తతో॒ వై స ప॑శు॒మాన॑భవత్ । ప॒శు॒మాన్. హ॒ వై భ॑వతి । య ఏ॒తేన॑ హ॒విషా॒ యజ॑తే । య ఉ॑ చైనదే॒వం-వేఁద॑ । సో-ఽత్ర॑ జుహోతి । రు॒ద్రాయ॒ స్వాహా॒ ఽఽర్ద్రాయై॒ స్వాహా᳚ । పిన్వ॑మానాయై॒ స్వాహా॑ ప॒శుభ్య॒-స్స్వాహేతి॑ ॥ 30 ॥
ఋ॒క్షా వా ఇ॒యమ॑లో॒మకా॑-ఽఽసీత్ । సా-ఽకా॑మయత ।
ఓష॑ధీభి॒-ర్వన॒స్పతి॑భిః॒ ప్రజా॑యే॒యేతి॑ ।
సైతమది॑త్యై॒ పున॑ర్వసుభ్యా-ఞ్చ॒రు-న్నిర॑వపత్ ।
తతో॒ వా ఇ॒యమోష॑ధీభి॒-ర్వన॒స్పతి॑భిః॒ ప్రాజా॑యత ।
ప్రజా॑యతే హ॒ వై ప్ర॒జయా॑ ప॒శుభిః॑ । య ఏ॒తేన॑ హ॒విషా॒ యజ॑తే । య ఉ॑ చైనదే॒వం-వేఁద॑ ।
సో-ఽత్ర॑ జుహోతి । అది॑త్యై॒ స్వాహా॒ పున॑ర్వసుభ్యామ్ ।
స్వాహా-ఽఽభూ᳚త్యై॒ స్వాహా॒ ప్రజా᳚త్యై॒ స్వాహేతి॑ ॥ 31 ॥
బృహ॒స్పతి॒ర్వా అ॑కామయత । బ్ర॒హ్మ॒వ॒ర్చ॒సీ స్యా॒మితి॑ ।
స ఏ॒త-మ్బృహ॒స్పత॑యే తి॒ష్యా॑య నైవా॒ర-ఞ్చ॒రు-మ్పయ॑సి॒ నిర॑వపత్ । తతో॒ వై స బ్ర॑హ్మవర్చ॒స్య॑భవత్ । బ్ర॒హ్మ॒వ॒ర్చ॒సీ హ॒ వై భ॑వతి । య ఏ॒తేన॑ హ॒విషా॒ యజ॑తే । య ఉ॑ చైనదే॒వం-వేఁద॑ । సో-ఽత్ర॑ జుహోతి ।
బృహ॒స్పత॑యే॒ స్వాహా॑ తి॒ష్యా॑య॒ స్వాహా᳚ । బ్ర॒హ్మ॒వ॒ర్చ॒సాయ॒ స్వాహేతి॑ ॥ 32 ॥
దే॒వా॒సు॒రా-స్సంయఁ॑త్తా ఆసన్న్ । తే దే॒వా-స్స॒ర్పేభ్య॑ ఆశ్రే॒షాభ్య॒ ఆజ్యే॑ కర॒మ్భ-న్నిర॑వపన్న్ ।
తానే॒తాభి॑రే॒వ దే॒వతా॑-భి॒రుపా॑నయన్న్ ।
ఏ॒తాభి॑ర్హ॒ వై దే॒వతా॑భి-ర్ద్వి॒షన్త॒-మ్భ్రాతృ॑వ్య॒-ముప॑నయతి । య ఏ॒తేన॑ హ॒విషా॒ యజ॑తే ।
య ఉ॑ చైనదే॒వం-వేఁద॑ । సో-ఽత్ర॑ జుహోతి ।
స॒ర్పేభ్య॒-స్స్వాహా᳚-ఽఽశ్రే॒షాభ్య॒-స్స్వాహా᳚ । ద॒న్ద॒శూకే᳚భ్య॒-స్స్వాహేతి॑ ॥ 33 ॥
పి॒తరో॒ వా అ॑కామయన్త । పి॒తృ॒లో॒క ఋ॑ద్ధ్నుయా॒మేతి॑ ।
త ఏ॒త-మ్పి॒తృభ్యో॑ మ॒ఘాభ్యః॑ పురో॒డాశ॒గ్ం॒ షట్క॑పాల॒-న్నిర॑వపన్న్ । తతో॒ వై తే పి॑తృలో॒క ఆ᳚ర్ధ్నువన్న్ । పి॒తృ॒లో॒కే హ॒ వా ఋ॑ధ్నోతి ।
య ఏ॒తేన॑ హ॒విషా॒ యజ॑తే । య ఉ॑ చైనదే॒వం-వేఁద॑ । సో-ఽత్ర॑ జుహోతి । పి॒తృభ్య॒-స్స్వాహా॑ మ॒ఘాభ్యః॑ ।
స్వాహా॑ ఽన॒ఘాభ్య॒-స్స్వాహా॑ ఽగ॒దాభ్యః॑ ।
స్వాహా॑ ఽరున్ధ॒తీభ్య॒-స్స్వాహేతి॑ ॥ 34 ॥
అ॒ర్య॒మా వా అ॑కామయత । ప॒శు॒మాన్-థ్స్యా॒మితి॑ ।
స ఏ॒తమ॑ర్య॒మ్ణే ఫల్గు॑నీభ్యా-ఞ్చ॒రు-న్నిర॑వపత్ ।
తతో॒ వై స ప॑శు॒మాన॑భవత్ ।
ప॒శు॒మాన్. హ॒ వై భ॑వతి । య ఏ॒తేన॑ హ॒విషా॒ యజ॑తే ।
య ఉ॑ చైనదే॒వం-వేఁద॑ । సో-ఽత్ర॑ జుహోతి । అ॒ర్య॒మ్ణే స్వాహా॒ ఫల్గు॑నీభ్యా॒గ్॒ స్వాహా᳚ ।
ప॒శుభ్య॒-స్స్వాహేతి॑ ॥ 35 ॥
భగో॒ వా అ॑కామయత । భ॒గీ శ్రే॒ష్ఠీ దే॒వానాగ్॑ స్యా॒మితి॑ । స ఏ॒త-మ్భగా॑య॒ ఫల్గు॑నీభ్యా-ఞ్చ॒రు-న్నిర॑వపత్ । తతో॒ వై స భ॒గీ శ్రే॒ష్ఠీ దే॒వానా॑మభవత్ ।
భ॒గీ హ॒ వై శ్రే॒ష్ఠీ స॑మా॒నానా᳚-మ్భవతి । య ఏ॒తేన॑ హ॒విషా॒ యజ॑తే । య ఉ॑ చైనదే॒వం-వేఁద॑ । సో-ఽత్ర॑ జుహోతి । భగా॑య॒ స్వాహా॒ ఫల్గు॑నీభ్యా॒గ్॒ స్వాహా᳚ । శ్రైష్ఠ్యా॑య॒ స్వాహేతి॑ ॥ 36 ॥
స॒వి॒తా వా అ॑కామయత । శ్రన్మే॑ దే॒వా దధీ॑రన్న్ । స॒వి॒తా స్యా॒మితి॑ । స ఏ॒తగ్ం స॑వి॒త్రే హస్తా॑య పురో॒డాశ॒-న్ద్వాద॑శకపాల॒-న్నిర॑వపదాశూ॒నాం
ఁవ్రీ॑హీ॒ణామ్ । తతో॒ వై తస్మై॒ శ్రద్దే॒వా అద॑ధత । స॒వి॒తా-ఽభ॑వత్ । శ్రద్ధ॒ వా అ॑స్మై మను॒ష్యా॑ దధతే । స॒వి॒తా స॑మా॒నానా᳚-మ్భవతి । య ఏ॒తేన॑ హ॒విషా॒ యజ॑తే । య ఉ॑ చైనదే॒వం-వేఁద॑ । సో-ఽత్ర॑ జుహోతి ।
స॒వి॒త్రే స్వాహా॒ హస్తా॑య । స్వాహా॑ దద॒తే స్వాహా॑ పృణ॒తే । స్వాహా᳚ ప్ర॒యచ్ఛ॑తే॒ స్వాహా᳚ ప్రతిగృభ్ణ॒తే స్వాహేతి॑ ॥ 37 ॥
త్వష్టా॒ వా అ॑కామయత । చి॒త్ర-మ్ప్ర॒జాం-విఁ॑న్దే॒యేతి॑ ।
స ఏ॒త-న్త్వష్ట్రే॑ చి॒త్రాయై॑ పురో॒డాశ॑మ॒ష్టా-క॑పాల॒-న్నిర॑వపత్ । తతో॒ వై స చి॒త్ర-మ్ప్ర॒జామ॑విన్దత । చి॒త్రగ్ం హ॒ వై ప్ర॒జాం-విఁ॑న్దతే ।
య ఏ॒తేన॑ హ॒విషా॒ యజ॑తే ।
య ఉ॑ చైనదే॒వం-వేఁద॑ । సో-ఽత్ర॑ జుహోతి ।
త్వష్ట్రే॒ స్వాహా॑ చి॒త్రాయై॒ స్వాహా᳚ ।
చైత్రా॑య॒ స్వాహా᳚ ప్ర॒జాయై॒ స్వాహేతి॑ ॥ 38 ॥
వా॒యుర్వా అ॑కామయత । కా॒మ॒చార॑మే॒షు లో॒కేష్వ॒భిజ॑యేయ॒మితి॑ । స ఏ॒త-ద్వా॒యవే॒ నిష్ట్యా॑యై గృ॒ష్ట్యై దు॒గ్ధ-మ్పయో॒ నిర॑వపత్ ।
తతో॒ వై స కా॑మ॒చార॑మే॒షు లో॒కేష్వ॒భ్య॑జయత్ ।
కా॒మ॒చారగ్ం॑ హ॒ వా ఏ॒షు లో॒కేష్వ॒భిజ॑యతి ।
య ఏ॒తేన॑ హ॒విషా॒ యజ॑తే । య ఉ॑ చైనదే॒వం-వేఁద॑ । సో-ఽత్ర॑ జుహోతి । వా॒యవే॒ స్వాహా॒ నిష్ట్యా॑యై॒ స్వాహా᳚ ।
కా॒మ॒చారా॑య॒ స్వాహా॒-ఽభిజి॑త్యై॒ స్వాహేతి॑ ॥ 39 ॥
ఇ॒న్ద్రా॒గ్నీ వా అ॑కామయేతామ్ । శ్రైష్ఠ్య॑-న్దే॒వానా॑-మ॒భిజ॑యే॒వేతి॑ । తావే॒తమి॑న్ద్రా॒గ్నిభ్యాం॒-విఁశా॑ఖాభ్యా-మ్పురో॒డాశ॒-మేకా॑దశకపాల॒-న్నిర॑వపతామ్ । తతో॒ వై తౌ శ్రైష్ఠ్య॑-న్దే॒వానా॑-మ॒భ్య॑జయతామ్ । శ్రైష్ఠ్యగ్ం॑ హ॒ వై స॑మా॒నానా॑మ॒భిజ॑యతి । య ఏ॒తేన॑ హ॒విషా॒ యజ॑తే ।
య ఉ॑ చైనదే॒వం-వేఁద॑ । సో-ఽత్ర॑ జుహోతి ।
ఇ॒న్ద్రా॒గ్నిభ్యా॒గ్॒ స్వాహా॒ విశా॑ఖాభ్యా॒గ్॒ స్వాహా᳚ ।
శ్రైష్ఠ్యా॑య॒ స్వాహా॒ ఽభిజి॑త్యై॒ స్వాహేతి॑ ॥ 40 ॥
అథై॒తత్-పౌ᳚ర్ణమా॒స్యా ఆజ్య॒-న్నిర్వ॑పతి । కామో॒ వై పౌ᳚ర్ణమా॒సీ । కామ॒ ఆజ్య᳚మ్ । కామే॑నై॒వ కామ॒గ్ం॒ సమ॑ర్ధయతి । క్షి॒ప్రమే॑న॒గ్ం॒ స కామ॒ ఉప॑నమతి । యేన॒ కామే॑న॒ యజ॑తే । సో-ఽత్ర॑ జుహోతి ।
పౌ॒ర్ణ॒మా॒స్యై స్వాహా॒ కామా॑య॒ స్వాహా-ఽఽగ॑త్యై॒ స్వాహేతి॑ ॥ 41 ॥
అనువాకం 5 - యమనక్షత్రేష్టిబ్రాహ్మణమ్
మి॒త్రో వా అ॑కామయత । మి॒త్ర॒ధేయ॑మే॒షు లో॒కేష్వ॒భి జ॑యేయ॒మితి॑ । స ఏ॒త-మ్మి॒త్రాయా॑నూరా॒ధేభ్య॑శ్చ॒రు-న్నిర॑వపత్ । తతో॒ వై స మి॑త్ర॒ధేయ॑మే॒షు లో॒కేష్వ॒భ్య॑జయత్ । మి॒త్ర॒ధేయగ్ం॑ హ॒ వా ఏ॒షు లో॒కేష్వ॒భిజ॑యతి । య ఏ॒తేన॑ హ॒విషా॒ యజ॑తే ।
య ఉ॑ చైనదే॒వం-వేఁద॑ । సో-ఽత్ర॑ జుహోతి ।
మి॒త్రాయ॒ స్వాహా॑ ఽనూరా॒ధేభ్య॒-స్స్వాహా᳚ ।
మి॒త్ర॒ధేయా॑య॒ స్వాహా॒ ఽభిజి॑త్యై॒ స్వాహేతి॑ ॥ 42 ॥
ఇన్ద్రో॒ వా అ॑కామయత । జ్యైష్ఠ్య॑-న్దే॒వానా॑-మ॒భిజ॑యేయ॒మితి॑ । స ఏ॒తమిన్ద్రా॑య జ్యే॒ష్ఠాయై॑ పురో॒డాశ॒-మేకా॑దశకపాల॒-న్నిర॑వప-న్మ॒హావ్రీ॑హీణామ్ । తతో॒ వై స జ్యైష్ఠ్య॑-న్దే॒వానా॑మ॒భ్య॑జయత్ । జ్యైష్ఠ్యగ్ం॑ హ॒ వై స॑మా॒నానా॑-మ॒భిజ॑యతి । య ఏ॒తేన॑ హ॒విషా॒ యజ॑తే ।
య ఉ॑ చైనదే॒వం-వేఁద॑ । సో-ఽత్ర॑ జుహోతి । ఇన్ద్రా॑య॒ స్వాహా᳚ జ్యే॒ష్ఠాయై॒ స్వాహా᳚ ।
జ్యైష్ఠ్యా॑య॒ స్వాహా॒ ఽభిజి॑త్యై॒ స్వాహేతి॑ ॥ 43 ॥
ప్ర॒జాప॑తి॒ర్వా అ॑కామయత । మూల॑-మ్ప్ర॒జాం-విఁ॑న్దే॒యేతి॑ । స ఏ॒త-మ్ప్ర॒జాప॑తయే॒ మూలా॑య చ॒రు-న్నిర॑వపత్ । తతో॒ వై స మూల॑-మ్ప్ర॒జామ॑విన్దత । మూలగ్ం॑ హ॒ వై ప్ర॒జాం-విఁ॑న్దతే । య ఏ॒తేన॑ హ॒విషా॒ యజ॑తే । య ఉ॑ చైనదే॒వం-వేఁద॑ । సో-ఽత్ర॑ జుహోతి । ప్ర॒జాప॑తయే॒ స్వాహా॒ మూలా॑య॒ స్వాహా᳚ । ప్ర॒జాయై॒ స్వాహేతి॑ ॥ 44 ॥
ఆపో॒ వా అ॑కామయన్త । స॒ము॒ద్ర-ఙ్కామ॑మ॒ భిజ॑యే॒మేతి॑ । తా ఏ॒తమ॒ద్భ్యో॑-ఽషా॒ఢాభ్య॑శ్చ॒రు-న్నిర॑వపన్న్ । తతో॒ వై తా-స్స॑ము॒ద్ర-ఙ్కామ॑మ॒భ్య॑జయన్న్ । స॒ము॒ద్రగ్ం హ॒ వై కామ॑మ॒భిజ॑యతి । య ఏ॒తేన॑ హ॒విషా॒ యజ॑తే ।
య ఉ॑ చైనదే॒వం-వేఁద॑ । సో-ఽత్ర॑ జుహోతి ।
అ॒ద్భ్య-స్స్వాహా॑ ఽషా॒ఢాభ్య॒-స్స్వాహా᳚ । స॒ము॒ద్రాయ॒ స్వాహా॒ కామా॑య॒ స్వాహా᳚ । అ॒భిజి॑త్యై॒ స్వాహేతి॑ ॥ 45 ॥
విశ్వే॒ వై దే॒వా అ॑కామయన్త । అ॒న॒ప॒జ॒య్య-ఞ్జ॑యే॒మేతి॑ । త ఏ॒తం-విఁశ్వే᳚భ్యో దే॒వేభ్యో॑-ఽషా॒ఢాభ్య॑శ్చ॒రు-న్నిర॑వపన్న్ ।
తతో॒ వై తే॑-ఽనపజ॒య్య-మ॑జయన్న్ । అ॒న॒ప॒జ॒య్యగ్ం హ॒ వై జ॑యతి । య ఏ॒తేన॑ హ॒విషా॒ యజ॑తే । య ఉ॑ చైనదే॒వం-వేఁద॑ । సో-ఽత్ర॑ జుహోతి ।
విశ్వే᳚భ్యో దే॒వేభ్య॒-స్స్వాహా॑ ఽషా॒ఢాభ్య॒-స్స్వాహా᳚ ।
అ॒న॒ప॒జ॒య్యాయ॒ స్వాహా॒ జిత్యై॒ స్వాహేతి॑ ॥ 46 ॥
బ్రహ్మ॒ వా అ॑కామయత । బ్ర॒హ్మ॒లో॒కమ॒భిజ॑యేయ॒మితి॑ ।
తదే॒త-మ్బ్రహ్మ॑ణే-ఽభి॒జితే॑ చ॒రు-న్నిర॑వపత్ ।
తతో॒ వై తద్బ్ర॑హ్మలో॒కమ॒భ్య॑జయత్ । బ్ర॒హ్మ॒లో॒కగ్ం హ॒ వా అ॒భిజ॑యతి । య ఏ॒తేన॑ హ॒విషా॒ యజ॑తే । య ఉ॑ చైనదే॒వం-వేఁద॑ । సో-ఽత్ర॑ జుహోతి । బ్రహ్మ॑ణే॒ స్వాహా॑ ఽభి॒జితే॒ స్వాహా᳚ । బ్ర॒హ్మ॒లో॒కాయ॒ స్వాహా॒ ఽభిజి॑త్యై॒ స్వాహేతి॑ ॥ 47 ॥
విష్ణు॒ర్వా అ॑కామయత । పుణ్య॒గ్గ్॒ శ్లోకగ్ం॑ శృణ్వీయ ।
న మా॑ పా॒పీ కీ॒ర్తిరాగ॑చ్ఛే॒దితి॑ । స ఏ॒తం-విఁష్ణ॑వే శ్రో॒ణాయై॑ పురో॒డాశ॑-న్త్రికపా॒ల-న్నిర॑వపత్ ।
తతో॒ వై స పుణ్య॒గ్గ్॒ శ్లోక॑మ శృణుత । నైన॑-మ్పా॒పీ కీ॒ర్తిరా- గ॑చ్ఛత్ । పుణ్యగ్ం॑ హ॒ వై శ్లోకగ్ం॑ శృణుతే । నైన॑-మ్పా॒పీ కీ॒ర్తిరాగ॑చ్ఛతి । య ఏ॒తేన॑ హ॒విషా॒ యజ॑తే । య ఉ॑ చైనదే॒వం-వేఁద॑ । సో-ఽత్ర॑ జుహోతి ।
విష్ణ॑వే॒ స్వాహా᳚ శ్రో॒ణాయై॒ స్వాహా᳚ ।
శ్లోకా॑య॒ స్వాహా᳚ శ్రు॒తాయ॒ స్వాహేతి॑ ॥ 48 ॥
వస॑వో॒ వా అ॑కామయన్త । అగ్ర॑-న్దే॒వతా॑నా॒-మ్పరీ॑యా॒మేతి॑ । త ఏ॒తం-వఁసు॑భ్య॒-శ్శ్రవి॑ష్ఠాభ్యః పురో॒డాశ॑మ॒ష్టాక॑పాల॒-న్నిర॑వపన్న్ ।
తతో॒ వై తే-ఽగ్ర॑-న్దే॒వతా॑నా॒-మ్పర్యా॑యన్న్ ।
అగ్రగ్ం॑ హ॒ వై స॑మా॒నానా॒-మ్పర్యే॑తి ।
య ఏ॒తేన॑ హ॒విషా॒ యజ॑తే । య ఉ॑ చైనదే॒వం-వేఁద॑ । సో-ఽత్ర॑ జుహోతి । వసు॑భ్య॒-స్స్వాహా॒ శ్రవి॑ష్ఠాభ్య॒-స్స్వాహా᳚ । అగ్రా॑య॒ స్వాహా॒ పరీ᳚త్యై॒ స్వాహేతి॑ ॥ 49 ॥
ఇన్ద్రో॒ వా అ॑కామయత । దృ॒ఢో ఽశి॑థిల-స్స్యా॒మితి॑ ।
స ఏ॒తం-వఁరు॑ణాయ శ॒తభి॑షజే భేష॒జేభ్యః॑ పురో॒డాశ॒-న్దశ॑కపాల॒-న్నిర॑వపత్-కృ॒ష్ణానాం᳚-వ్రీఁహీ॒ణామ్ । తతో॒ వై స దృ॒ఢో-ఽశి॑థిలో-ఽభవత్ ।
దృ॒ఢో హ॒ వా అశి॑థిలో భవతి । య ఏ॒తేన॑ హ॒విషా॒ యజ॑తే । య ఉ॑ చైనదే॒వం-వేఁద॑ । సో-ఽత్ర॑ జుహోతి ।
వరు॑ణాయ॒ స్వాహా॑ శ॒తభి॑షజే॒ స్వాహా᳚ ।
భే॒ష॒జేభ్య॒-స్స్వాహేతి॑ ॥ 50 ॥
అ॒జో వా ఏక॑పాదకామయత । తే॒జ॒స్వీ బ్ర॑హ్మవర్చ॒సీ స్యా॒మితి॑ । స ఏ॒తమ॒జాయైక॑పదే ప్రోష్ఠప॒దేభ్య॑-శ్చ॒రు-న్నిర॑వపత్ । తతో॒ వై స తే॑జ॒స్వీ బ్ర॑హ్మవర్చ॒స్య॑భవత్ । తే॒జ॒స్వీ హ॒ వై బ్ర॑హ్మవర్చ॒సీ భ॑వతి । య ఏ॒తేన॑ హ॒విషా॒ యజ॑తే ।
య ఉ॑ చైనదే॒వం-వేఁద॑ । సో-ఽత్ర॑ జుహోతి ।
అ॒జాయైక॑పదే॒ స్వాహా᳚ ప్రోష్ఠప॒దేభ్య॒-స్స్వాహా᳚ ।
తేజ॑సే॒ స్వాహా᳚ బ్రహ్మవర్చ॒సాయ॒ స్వాహేతి॑ ॥ 51 ॥
అహి॒ర్వై బు॒ద్ధ్నియో॑-ఽకామయత । ఇ॒మా-మ్ప్ర॑తి॒ష్ఠాం-విఁ॑న్దే॒యేతి॑ । స ఏ॒తమహ॑యే బు॒ద్ధ్నియా॑య ప్రోష్ఠప॒దేభ్యః॑ పురో॒డాశ॒-మ్భూమి॑కపాల॒-న్నిర॑వపత్ । తతో॒ వై స ఇ॒మా-మ్ప్ర॑తి॒ష్ఠా-మ॑విన్దత । ఇ॒మాగ్ం హ॒ వై ప్ర॑తి॒ష్ఠాం-విఁ॑న్దతే ।
య ఏ॒తేన॑ హ॒విషా॒ యజ॑తే । య ఉ॑ చైనదే॒వం-వేఁద॑ । సో-ఽత్ర॑ జుహోతి । అహ॑యే బు॒ద్ధ్నియా॑య॒ స్వాహా᳚ ప్రోష్ఠప॒దేభ్య॒-స్స్వాహా᳚ ।
ప్ర॒తి॒ష్ఠాయై॒ స్వాహేతి॑ ॥ 52 ॥
పూ॒షా వా అ॑కామయత । ప॒శు॒మాన్-థ్స్యా॒మితి॑ ।
స ఏ॒త-మ్పూ॒ష్ణే రే॒వత్యై॑ చ॒రు-న్నిర॑వపత్ ।
తతో॒ వై స ప॑శు॒మాన॑భవత్ ।
ప॒శు॒మాన్. హ॒ వై భ॑వతి । య ఏ॒తేన॑ హ॒విషా॒ యజ॑తే । య ఉ॑ చైనదే॒వం-వేఁద॑ ।
సో-ఽత్ర॑ జుహోతి । పూ॒ష్ణే స్వాహా॑ రే॒వత్యై॒ స్వాహా᳚ ।
ప॒శుభ్య॒-స్స్వాహేతి॑ ॥ 53 ॥
అ॒శ్వినౌ॒ వా అ॑కామయేతామ్ । శ్రో॒త్ర॒స్వినా॒వబ॑ధిరౌ స్యా॒వేతి॑ । తావే॒తమ॒శ్విభ్యా॑-మశ్వ॒యుగ్భ్యా᳚-మ్పురో॒డాశ॑-న్ద్వికపా॒ల-న్నిర॑వపతామ్ ।
తతో॒ వై తౌ శ్రో᳚త్ర॒స్వినా॒వబ॑ధిరా-వభవతామ్ ।
శ్రో॒త్ర॒స్వీ హ॒ వా అబ॑ధిరో భవతి । య ఏ॒తేన॑ హ॒విషా॒ యజ॑తే । య ఉ॑ చైనదే॒వం-వేఁద॑ । సో-ఽత్ర॑ జుహోతి ।
అ॒శ్విభ్యా॒గ్॒ స్వాహా᳚-ఽశ్వ॒యుగ్భ్యా॒గ్॒ స్వాహా᳚ ।
శ్రోత్రా॑య॒ స్వాహా॒ శ్రుత్యై॒ స్వాహేతి॑ ॥ 54 ॥
య॒మో వా అ॑కామయత ।
పి॒తృ॒ణాగ్ం రా॒జ్య-మ॒భిజ॑యేయ॒మితి॑ ।
స ఏ॒తం-యఁ॒మాయా॑ప॒భర॑ణీభ్యశ్చ॒రు-న్నిర॑వపత్ ।
తతో॒ వై స పి॑తృ॒ణాగ్ం రా॒జ్యమ॒భ్య॑జయత్ ।
స॒మా॒నానాగ్ం॑ హ॒ వై రా॒జ్యమ॒భిజ॑యతి ।
య ఏ॒తేన॑ హ॒విషా॒ యజ॑తే ।
య ఉ॑ చైనదే॒వం-వేఁద॑ । సో-ఽత్ర॑ జుహోతి ।
య॒మాయ॒ స్వాహా॑ ఽప॒భర॑ణీభ్య॒-స్స్వాహా᳚ ।
రా॒జ్యాయ॒ స్వాహా॒ ఽభిజి॑త్యై స్వాహేతి॑ ॥ 55 ॥
అథై॒తద॑-మా॒వాస్యా॑యా॒ ఆజ్య॒-న్నిర్వ॑పతి ।
కామో॒ వా అ॑మావా॒స్యా᳚ । కామ॒ ఆజ్య᳚మ్ । కామే॑నై॒వ కామ॒గ్ం॒ సమ॑ర్ధయతి । క్షి॒ప్రమే॑న॒గ్ం॒ స కామ॒ ఉప॑నమతి । యేన॒ కామే॑న॒ యజ॑తే । సో-ఽత్ర॑ జుహోతి । అ॒మా॒వా॒స్యా॑యై॒ స్వాహా॒ కామా॑య॒ స్వాహా ఽఽగ॑త్యై॒ స్వాహేతి॑ ॥ 56 ॥
బు॒ద్ధ్నియః॑ - పు॒షా - ఽశ్వినౌ॑ - య॒మో దశ॑ద॒శా - థై॒తద॑ - మావా॒స్యా॑యా అ॒ష్టౌ పఞ్చ॑దశ ) (అ. 5)
అనువాకం 6 - చాన్ద్రమసాదీష్టిబ్రాహ్మణమ్
చ॒న్ద్రమా॒ వా అ॑కామయత । అ॒హో॒రా॒త్రా-న॑ర్ధమా॒సా-న్మాసా॑-నృ॒తూన్థ్- సం॑వఁథ్స॒ర-మా॒ప్త్వా । చ॒న్ద్రమ॑స॒-స్సాయు॑జ్యగ్ం సలో॒కతా॑-మాప్నుయా॒మితి॑ । స ఏ॒త-ఞ్చ॒న్ద్రమ॑సే ప్రతీ॒దృశ్యా॑యై పురో॒డాశ॒-మ్పఞ్చ॑దశకపాల॒-న్నిర॑వపత్ ।
తతో॒ వై సో॑-ఽహోరా॒త్రా-న॑ర్ధమా॒సా-న్మాసా॑-నృ॒తూన్-థ్సం॑వఁథ్స॒ర-మా॒ప్త్వా ।
చ॒న్ద్రమ॑స॒-స్సాయు॑జ్యగ్ం సలో॒కతా॑మాప్నోత్ ।
అ॒హో॒రా॒త్రాన్. హ॒ వా అ॑ర్ధమా॒సా-న్మాసా॑న్-ఋ॒తూన్-థ్సం॑వఁథ్స॒ర-మా॒ప్త్వా । చ॒న్ద్రమ॑స॒-స్సాయు॑జ్యగ్ం సలో॒కతా॑మాప్నోతి । య ఏ॒తేన॑ హ॒విషా॒ యజ॑తే ।
య ఉ॑ చైనదే॒వం-వేఁద॑ । సో-ఽత్ర॑ జుహోతి ।
చ॒న్ద్రమ॑సే॒ స్వాహా᳚ ప్రతీ॒దృశ్యా॑యై॒ స్వాహా᳚ ।
అ॒హో॒రా॒త్రేభ్య॒-స్స్వాహా᳚ ఽర్ధమా॒సేభ్య॒-స్స్వాహా᳚ ।
మాసే᳚భ్య॒-స్స్వాహ॒ర్తుభ్య॒-స్స్వాహా᳚ । సం॒వఁ॒థ్స॒రాయ॒ స్వాహేతి॑ ॥ 57 ॥
అ॒హో॒రా॒త్రే వా అ॑కామయేతామ్ । అత్య॑హోరా॒త్రే ము॑చ్యేవహి ।
న నా॑వహోరా॒త్రే ఆ᳚ప్నుయాతా॒మితి॑ । తే ఏ॒తమ॑హో-రా॒త్రాభ్యా᳚-ఞ్చ॒రు-న్నిర॑వపతామ్ । ద్వ॒యానాం᳚-వ్రీఁహీ॒ణామ్ । శు॒క్లానా᳚-ఞ్చ కృ॒ష్ణానా᳚-ఞ్చ । స॒వా॒త్యోర్దు॒గ్ధే । శ్వే॒తాయై॑ చ కృ॒ష్ణాయై॑ చ ।
తతో॒ వై తే అత్య॑హోరా॒త్రే అ॑ముచ్యేతే ।
నైనే॑ అహోరా॒త్రే ఆ᳚ప్నుతామ్ । అతి॑ హ॒ వా అ॑హోరా॒త్రే ము॑చ్యతే । నైన॑మహోరా॒త్రే ఆ᳚ప్నుతః । య ఏ॒తేన॑ హ॒విషా॒ యజ॑తే । య ఉ॑ చైనదే॒వంవేఁద॑ ।
సో-ఽత్ర॑ జుహోతి । అహ్నే॒ స్వాహా॒ రాత్రి॑యై॒ స్వాహా᳚ ।
అతి॑ముక్త్యై॒ స్వాహేతి॑ ॥ 58 ॥
ఉ॒షా వా అ॑కామయత । ప్రి॒యా ఽఽది॒త్యస్య॑ సు॒భగా᳚ స్యా॒మితి॑ । సైతము॒షసే॑ చ॒రు-న్నిర॑వపత్ ।
తతో॒ వై సా ప్రి॒యా ఽఽది॒త్యస్య॑ సు॒భగా॑ ఽభవత్ ।
ప్రి॒యో హ॒ వై స॑మా॒నానాగ్ం॑ సు॒భగో॑ భవతి । య ఏ॒తేన॑ హ॒విషా॒ యజ॑తే । య ఉ॑ చైనదే॒వం-వేఁద॑ । సో-ఽత్ర॑ జుహోతి । ఉ॒షసే॒ స్వాహా॒ వ్యు॑ష్ట్యై॒ స్వాహా᳚ ।
వ్యూ॒షుష్యై॒ స్వాహా᳚ వ్యు॒చ్ఛన్త్యై॒ స్వాహా᳚ । వ్యు॑ష్టాయై॒ స్వాహేతి॑ ॥ 59 ॥
అథై॒తస్మై॒ నక్ష॑త్రాయ చ॒రు-న్నిర్వ॑పతి । యథా॒ త్వ-న్దే॒వానా॒మసి॑ । ఏ॒వమ॒హ-మ్మ॑ను॒ష్యా॑ణా-మ్భూయాస॒మితి॑ । యథా॑ హ॒ వా ఏ॒త-ద్దే॒వానా᳚మ్ ।
ఏ॒వగ్ం హ॒ వా ఏ॒ష మ॑ను॒ష్యా॑ణా-మ్భవతి । య ఏ॒తేన॑ హ॒విషా॒ యజ॑తే । య ఉ॑ చైనదే॒వం-వేఁద॑ । సో-ఽత్ర॑ జుహోతి । నక్ష॑త్రాయ॒ స్వాహో॑దేష్య॒తే స్వాహా᳚ ।
ఉ॒ద్య॒తే స్వాహోది॑తాయ॒ స్వాహా᳚ । హర॑సే॒ స్వాహా॒ భర॑సే॒ స్వాహా᳚ । భ్రాజ॑సే॒ స్వాహా॒ తేజ॑సే॒ స్వాహా᳚ ।
తప॑సే॒ స్వాహా᳚ బ్రహ్మవర్చ॒సాయ॒ స్వాహేతి॑ ॥ 60 ॥
సూర్యో॒ వా అ॑కామయత । నక్ష॑త్రాణా-మ్ప్రతి॒ష్ఠా స్యా॒మితి॑ । స ఏ॒తగ్ం సూర్యా॑య॒ నక్ష॑త్రేభ్యశ్చ॒రు-న్నిర॑వపత్ ।
తతో॒ వై స నక్ష॑త్రాణా-మ్ప్రతి॒ష్ఠా ఽభ॑వత్ ।
ప్ర॒తి॒ష్ఠా హ॒ వై స॑మా॒నానా᳚-మ్భవతి ।
య ఏ॒తేన॑ హ॒విషా॒ యజ॑తే ।
య ఉ॑ చైనదే॒వం-వేఁద॑ । సో-ఽత్ర॑ జుహోతి ।
సూర్యా॑య॒ స్వాహా॒ నక్ష॑త్రేభ్య॒-స్స్వాహా᳚ । ప్ర॒తి॒ష్ఠాయై॒ స్వాహేతి॑ ॥ 61 ॥
అథై॒తమది॑త్యై చ॒రు-న్నిర్వ॑పతి । ఇ॒యం-వాఁ అది॑తిః ।
అ॒స్యామే॒వ ప్రతి॑ తిష్ఠతి । సో-ఽత్ర॑ జుహోతి ।
అది॑త్యై॒ స్వాహా᳚ ప్రతి॒ష్ఠాయై॒ స్వాహేతి॑ ॥ 62 ॥
అథై॒తం-విఁష్ణ॑వే చ॒రు-న్నిర్వ॑పతి । య॒జ్ఞో వై విష్ణుః॑ । య॒జ్ఞ ఏ॒వాన్త॒తః ప్రతి॑ తిష్ఠతి । సో-ఽత్ర॑ జుహోతి । విష్ణ॑వే॒ స్వాహా॑ య॒జ్ఞాయ॒ స్వాహా᳚ । ప్ర॒తి॒ష్ఠాయై॒ స్వాహేతి॑ ॥ 63 ॥
(చ॒న్ద్రమాః॒ పఞ్చ॑దశా - హోరా॒త్రే స॒ప్తద॑ - శో॒షా ఏకా॑ద॒శా - థై॒తస్మై॒ నక్ష॑త్తాయ॒ త్రయో॑దశ॒ - సూర్యో॒ దశా - థై॒తమది॑త్యై॒ పఞ్చా - థై॒తం-విఁష్ణ॑వే॒ షట్-థ్స॒ప్త) (అ. 6)
[స॒వి॒తా-ఽఽశూ॒నాం-వ్రీఁ॑హీ॒ణామిన్ద్రో॑ మ॒హావ్రీ॑హీణా॒మిన్ద్రః॑ కృ॒ష్ణానోం᳚
ఁవ్రీహీ॒ణామ॑హోరా॒త్రే ద్వ॒యానాం᳚-వ్రీఁహీ॒ణామ్ । పి॒తర॒-ష్షట్క॑పాలగ్ం సవి॒తా ద్వాద॑శకపాలమిన్ద్రా॒గ్నీ ఏకా॑దశకపాల॒మిన్ద్ర॒ ఏకా॑దశకపాల॒మిన్ద్రో॒ దశ॑కపాలం॒-విఁష్ణు॑స్త్రికపా॒లమహి॒-ర్భూమి॑కపాలమ॒శ్వినౌ᳚ ద్వికపా॒ల-ఞ్చ॒న్ద్రమాః॒ పఞ్చ॑దశకపాల-మ॒గ్నిరత్వష్టా॒ వస॑వో॒-ఽష్టాక॑పాలమ॒న్యత్ర॑ చ॒రుమ్ । రు॒ద్రో᳚-ఽర్య॒మా పూ॒షా ప॑శు॒మాన్-థ్స్యా॒గ్ం॒ సోమో॑ రు॒ద్రో బృహ॒స్పతిః॒ పయ॑సి వా॒యుః పయ॒-స్సోమో॑ వా॒యురి॑న్ద్రా॒గ్నీ మి॒త్ర ఇన్ద్ర॒ ఆపో॒ బ్రహ్మ॑ య॒మో॑-ఽభిజి॑త్యై॒ త్వష్టా᳚ ప్ర॒జాప॑తిః ప్ర॒జాయై॑ పౌర్ణమా॒స్యా అ॑మావా॒స్యా॑యా॒ ఆగ॑త్యై॒ విశ్వే॒ జిత్యా॑
అ॒శ్వినౌ॒ శ్రుత్యై᳚ । బ్రహ్మ॒ తదే॒తం-విఁష్ణు॒-స్స ఏ॒తం-వాఁ॒యు-స్స ఏ॒తదాప॒స్తాః । పి॒తరో॒ విశ్వే॒ వస॑వో-ఽకామయన్త॒మేతి॒ త ఏ॒త-న్నిర॑వపన్న్ । ఆపో॑-ఽకామయన్త॒ మేతి॒ తా ఏ॒త-న్నిర॑వపన్న్ । ఇ॒న్ద్రా॒గ్నీ అ॒శ్వినా॑వకామయేతాం॒-వేఁతి॒ తావే॒త-న్నిర॑వపదామ్ । అ॒హో॒రా॒త్రే వా అ॑కామయేతా॒మితి॒ తే ఏ॒త-న్నిర॑వపతామ్ ।
అ॒న్యత్రా॑కామయత॒మితి॒ స ఏ॒త-న్నిర॑వపత్ । ఇ॒న్ద్రా॒గ్నీ శ్రైష్ఠ్య॒మిన్ద్రో॒ జ్యైష్ఠ్య॒మిన్ద్రో॑ దృ॒ఢః ।
ఆహి॒-స్సూర్యో-ఽది॑త్యై॒ విష్ణ॑వే ప్రతి॒ష్ఠాయై᳚ ।
సోమో॑ య॒మ-స్స॑మా॒నానా᳚మ్ । అ॒గ్నిర్నో॑ రీరిషద॒న్యత్ర॑ రీరిషః]
[వి॒దుషో॑ హ॒విషా॒ య ఉ॑ చైనదే॒వం-వేఁద॑ । ఇష్టి॑భి॒ర్య ఉ॑ చైనా ఏ॒వం-వేఁద॑ ।
అ॒న్యత్ర॑ బ్రాహ్మ॒ణే య ఉ॑ చైనమే॒వం-వేఁద॑ ]
ఫ్రపాతక ఖోర్వై వి-థ్స్తర్తిన్గ్ ఫదమ్స్ ఒf 1 తొ 6 ఆనువాకమ్స్ ః-
(అ॒గ్నిర్న॑-ఋ॒ద్ధ్యాస్మ॒-నవో॑నవో॒-ఽగ్ని-ర్మి॒త్ర - శ్చ॒న్ద్రమా॒-ష్షట్)
(అ॒గ్నిర్న॒ - స్తన్నో॑ వా॒యు - రహి॑ర్బూ॒ద్ధ్నియ॑ - ఋ॒క్షా వా ఇ॒య - మథై॒త-త్పౌ᳚ర్ణమా॒స్యా - అ॒జో వా ఏక॑పా॒థ్ - సూర్య॒ స్త్రిష॑ష్టిః)
(అ॒గ్నిర్నః॑ - పాతు ప్రతి॒ష్ఠాయై॒ స్వాహేతి॑ )
॥ హరిః॑ ఓమ్ ॥
॥ కృష్ణ యజుర్వేదీయ తైత్తిరీయ బ్రాహ్మణే తృతీయాష్టకే ప్రథమః ప్రపాఠక-స్సమాప్తః ॥
Roman (IAST) Transliteration
kṛṣṇa yajurvedīya taittirīya brāhmaṇe tṛtīyāṣṭake prathamaḥ prapāṭhakaḥ - nakṣatreṣṭīnāṃ-yā~jyā-'nuvākyā brāhmaṇāni
o-nnamaḥ paramātmane, śrī mahāgaṇapataye namaḥ,
śrī gurubhyo namaḥ | ha॒riḥ॒ om ||
anuvākaṃ 1 - devanakṣatrāṇāṃ-yā~jyānuvākyāḥ
a॒gnirnaḥ̭ pātu॒ kṛtti̭kāḥ | nakṣa̭tra-nde॒vami̭ndri॒yam | i॒damā̭sāṃ-vi~cakṣa॒ṇam | ha॒virā॒sa-ñjṷhotana || yasya॒ bhānti̭ ra॒śmayo॒ yasya̭ ke॒tavaḥ̭ | yasye॒mā viśvā॒ bhuva̭nāni॒ sarvā᳚ |
sa kṛtti̭kābhira॒bhi saṃ॒va~sā̭naḥ | a॒gnirno̭ de॒va-ssṷvi॒te da̭dhātu || pra॒jāpa̭te rohi॒ṇī vḙtu॒ patnī᳚ |
vi॒śvarṷ̄pā bṛha॒tī ci॒trabhā̭nuḥ || 1 ||
sā no̭ ya॒jñasya̭ suvi॒te da̭dhātu | yathā॒ jīvḙma śa॒rada॒-ssavī̭rāḥ || ro॒hi॒ṇī de॒vyuda̭gā-tpu॒rastā᳚t | viśvā̭ rū॒pāṇi̭ prati॒moda̭mānā | pra॒jāpa̭tigṃ ha॒viṣā̭ va॒rdhaya̭ntī | pri॒yā de॒vānā॒-mupa̭yātu ya॒jñam || somo॒ rājā̭ mṛgaśī॒ra॒.ṣeṇa॒ āganṋ | śi॒va-nnakṣa̭tra-mpri॒yama̭sya॒ dhāma̭ |
ā॒pyāya̭māno bahu॒dhā janḙṣu |
retaḥ̭ pra॒jāṃ-ya~ja̭māne dadhātu || 2 ||
ya-tte॒ nakṣa̭tra-mmṛgaśī॒ra॒.ṣamasti̭ |
pri॒yagṃ rā̭ja-npri॒yata̭ma-mpri॒yāṇā᳚m |
tasmai̭ te soma ha॒viṣā̭ vidhema |
śanna̭ edhi dvi॒pade॒ śa-ñcatṷṣpade ||
ā॒rdrayā̭ ru॒draḥ pratha̭māna eti | śreṣṭho̭ de॒vānā॒-mpati̭raghni॒yānā᳚m | nakṣa̭tramasya ha॒viṣā̭ vidhema | mā naḥ̭ pra॒jāgṃ rī̭riṣa॒-nmota vī॒rān ||
he॒tī ru॒drasya॒ pari̭ṇo vṛṇaktu | ā॒rdrā nakṣa̭tra-ñjuṣatāgṃ ha॒virnaḥ̭ || 3 ||
pra॒mu॒ñcamā̭nau duri॒tāni॒ viśvā᳚ | apā॒ghaśagṃ̭ sa-nnudatā॒marā̭tim || puna̭rno de॒vyadi̭ti-sspṛṇotu | puna̭rvasū naḥ॒ puna॒retāṃ᳚-ya~॒jñam |
puna̭rno de॒vā a॒bhiya̭ntu॒ sarve᳚ | punaḥ̭ punarvo ha॒viṣā̭ yajāmaḥ || e॒vā na de॒vyadi̭tirana॒rvā | viśva̭sya bha॒rtrī jaga̭taḥ prati॒ṣṭhā | puna̭rvasū ha॒viṣā̭ va॒rdhaya̭ntī | pri॒ya-nde॒vānā॒-mapyḙtu॒ pāthaḥ̭ || 4 ||
bṛha॒spatiḥ̭ pratha॒ma-ñjāya̭mānaḥ | ti॒ṣya̭-nnakṣa̭trama॒bhi samba̭bhūva | śreṣṭho̭ de॒vānā॒-mpṛta̭nāsu ji॒ṣṇuḥ | diśo-'nu॒ sarvā॒ abha̭yanno astu ||
ti॒ṣyaḥ̭ pu॒rastā̭du॒ta ma̭ddhya॒to naḥ̭ | bṛha॒spati̭ rnaḥ॒ pari̭pātu pa॒ścāt | bādhḙtā॒-ndveṣo॒ abha̭ya-ṅkṛṇutām | su॒vīrya̭sya॒ pata̭ya-ssyāma ||
i॒dagṃ sa॒rpebhyo̭ ha॒vira̭stu॒ juṣṭa᳚m |
ā॒śre॒ṣā yeṣā̭-manu॒yanti॒ cetaḥ̭ || 5 ||
ye a॒ntari̭kṣa-mpṛthi॒vī-ṅkṣi॒yanti̭ | tenaḥ̭ sa॒rpāso॒ hava॒māga̭miṣṭhāḥ || ye ro̭ca॒ne sūrya॒syāpi̭
sa॒rpāḥ | ye diva̭-nde॒vīmanṷ sa॒ñcara̭nti |
yeṣā̭māśre॒ṣā a̭nu॒yanti॒ kāma᳚m |
tebhyaḥ̭ sa॒rpebhyo॒ madhṷmajjuhomi ||
upa̭hūtāḥ pi॒taro॒ ye ma॒ghāsṷ | mano̭javasa-ssu॒kṛtaḥ̭ sukṛ॒tyāḥ | te no॒ nakṣa̭tre॒ hava॒māga̭miṣṭhāḥ | sva॒dhābhi̭ rya॒jña-mpraya̭ta-ñjuṣantām || 6 ||
ye a̭gnida॒gdhā ye-'na̭gni-dagdhāḥ | yḙ-'muṃ-lo~॒ka-mpi॒taraḥ̭ kṣi॒yanti̭ | yāgśca̭ vi॒dmayāgṃ ṷ ca॒ na pra̭vi॒dma | ma॒ghāsṷ ya॒jñagṃ sukṛ̭ta-ñjuṣantām ||
gavā॒-mpatiḥ॒ phalgṷnīnāmasi॒ tvam | tada̭ryaman varuṇa mitra॒ cārṷ | ta-ntvā̭ va॒yagṃ sa̭ni॒tāragṃ̭ sanī॒nām | jī॒vā jīva̭nta॒mupa॒ saṃvi~̭śema ||
yene॒mā viśvā॒ bhuva̭nāni॒ sañji̭tā |
yasya̭ de॒vā a̭nu saṃ॒ya~nti॒ cetaḥ̭ || 7 ||
a॒rya॒mā rājā॒-'jara॒stuvi̭ṣmān | phalgṷnīnā-mṛṣa॒bho ro̭ravīti || śreṣṭho̭ de॒vānā᳚-mbhagavo bhagāsi | tattvā̭ viduḥ॒ phalgṷnī॒stasya̭ vittāt | a॒smabhya̭-ṅkṣa॒trama॒jaragṃ̭ su॒vīrya᳚m | goma॒daśva̭-va॒dupa॒-sannṷde॒ha || bhago̭ ha dā॒tā bhaga॒ i-tpra̭dā॒tā | bhago̭ de॒vīḥ phalgṷnī॒rāvi̭veśa | bhaga॒syetta-mpra̭sa॒va-ṅga̭mema | yatra̭ de॒vai-ssa̭dha॒māda̭-mmadema || 8 ||
āyā̭tu de॒va-ssa̭vi॒topa̭yātu | hi॒ra॒ṇyayḙna su॒vṛtā॒ rathḙna | vaha॒n॒. hastagṃ̭ su॒bhagaṃ̭-vi~dma॒nāpa̭sam | pra॒yaccha̭nta॒-mpapṷri॒-mpuṇya॒maccha̭ ||
hastaḥ॒ praya̭ccha tva॒mṛtaṃ॒-va~sī̭yaḥ |
dakṣi̭ṇena॒ prati̭gṛbhṇīma enat |
dā॒tāra̭ma॒dya sa̭vi॒tā vi̭deya |
yo no॒ hastā̭ya prasu॒vāti̭ ya॒jñam ||
tvaṣṭā॒ nakṣa̭trama॒bhyḙti ci॒trām |
su॒bhagṃ sa̭saṃ-yu~va॒tigṃ roca̭mānām || 9 ||
ni॒ve॒śaya̭-nna॒mṛtā॒-nmartyāg̭śca |
rū॒pāṇi̭ pi॒gṃ॒śa-nbhuva̭nāni॒ viśvā᳚ ||
tanna॒stvaṣṭā॒ tadṷ ci॒trā vica̭ṣṭām |
tannakṣa̭tra-mbhūri॒dā a̭stu॒ mahya᳚m |
tannaḥ̭ pra॒jāṃ-vī~॒rava̭tīgṃ sanotu |
gobhi̭rno॒ aśvai॒-ssama̭naktu ya॒jñam ||
vā॒yurnakṣa̭tra-ma॒bhyḙti॒ niṣṭyā᳚m |
ti॒gmaśṛ̭ṅgo vṛṣa॒bho rorṷvāṇaḥ |
sa॒mī॒raya॒-nbhuva̭nā māta॒riśvā᳚ |
apa॒ dveṣāgṃ̭si nudatā॒marā̭tīḥ || 10 ||
tanno̭ vā॒yastadu॒ niṣṭyā̭ śṛṇotu |
tannakṣa̭tra-mbhūri॒dā a̭stu॒ mahya᳚m |
tanno̭ de॒vāso॒ anṷ jānantu॒ kāma᳚m | yathā॒ tarḙma duri॒tāni॒ viśvā᳚ || dū॒rama॒smacchatra̭vo yantu bhī॒tāḥ | tadi̭ndrā॒gnī kṛ̭ṇutā॒-nta-dviśā̭khe |
tanno̭ de॒vā anṷmadantu ya॒jñam | pa॒ścā-tpu॒rastā॒-dabha̭yanno astu || nakṣa̭trāṇā॒-madhi̭patnī॒ viśā̭khe |
śreṣṭhā̭vindrā॒gnī bhuva̭nasya go॒pau || 11 ||
viṣṷ̄ca॒-śśatrṷ̄-napa॒bādha̭mānau | apa॒ kṣudha̭-nnudatā॒marā̭tim || pū॒rṇā pa॒ścādu॒ta pū॒rṇā pu॒rastā᳚t | unma̭ddhya॒taḥ pau᳚rṇamā॒sī ji̭gāya |
tasyā᳚-nde॒vā adhi̭ saṃ॒va~sa̭ntaḥ |
u॒tta॒me nāka̭ i॒ha mā̭dayantām ||
pṛ॒thvī su॒varcā̭ yuva॒ti-ssa॒joṣāḥ᳚ | pau॒rṇa॒mā॒syuda̭gā॒-cchobha̭mānā |
ā॒pyā॒yaya̭ntī duri॒tāni॒ viśvā᳚ |
u॒ru-nduhāṃ॒-ya~ja̭mānāya ya॒jñam || 12 ||
(ci॒trabhā̭nu॒-r yaja̭māne dadhātu - ha॒virnaḥ॒ - pātha॒ - śceto̭ - juṣantāṃ॒ - ceto̭ - madema॒ - roca̭mānā॒ - marā̭tī--r go॒pau - ya॒jñaṃ) (a. 1)
anuvākaṃ 2 - yamanakṣatrāṇāṃ-yā~jyānuvākyāḥ
ṛ॒ddhyāsma̭ ha॒vyai-rnama̭sopa॒ sadya̭ |
mi॒tra-nde॒va-mmi̭tra॒dheya̭nno astu | a॒nū॒rā॒dhān. ha॒viṣā̭ va॒rdhaya̭ntaḥ | śa॒ta-ñjī̭vema śa॒rada॒-ssavī̭rāḥ || ci॒tra-nnakṣa̭tra॒-muda̭gā-tpu॒rastā᳚t | a॒nū॒rā॒dhāsa॒ iti॒ ya-dvada̭nti | tanmi॒tra ḙti pa॒thibhi̭ rdeva॒yānaiḥ᳚ | hi॒ra॒ṇyayai॒ rvita̭tai-ra॒ntari̭kṣe ||
indro᳚ jye॒ṣṭhāmanu॒ nakṣa̭trameti | yasmi̭n vṛ॒traṃ-vṛ~̭tra॒ tūryḙ ta॒tāra̭ || 13 ||
tasmi̭n va॒yama॒mṛta॒-nduhā̭nāḥ | kṣudha̭-ntarema॒ duri̭ti॒-nduri̭ṣṭim || pu॒ra॒nda॒rāya̭ vṛṣa॒bhāya̭ dhṛ॒ṣṇave᳚ | aṣā̭ḍhāya॒ saha̭mānāya mī॒ḍhuṣe᳚ |
indrā̭ya jye॒ṣṭhā madhṷma॒-dduhā̭nā |
u॒ru-ṅkṛ̭ṇotu॒ yaja̭mānāya lo॒kam ||
mūla̭-mpra॒jāṃ-vī~॒rava̭tīṃ-vi~deya | parā᳚cyetu॒ nir-ṛ̭tiḥ parā॒cā | gobhi॒ rnakṣa̭tra-mpa॒śubhi॒-ssama̭ktam | aha̭rbhūyā॒-dyaja̭mānāya॒ mahya᳚m || 14 ||
aha̭rno a॒dya sṷvi॒te da̭dhātu | mūla॒-nnakṣa̭tra॒miti॒ ya-dvada̭nti | parā̭cīṃ-vā~॒cā nir-ṛ̭ti-nnudāmi |
śi॒va-mpra॒jāyai̭ śi॒vama̭stu॒ mahya᳚m ||
yā di॒vyā āpaḥ॒ paya̭sā sa-mbabhū॒vuḥ | yā a॒ntari̭kṣa u॒ta pārthi̭vī॒ryāḥ | yāsā̭maṣā॒ḍhā a̭nu॒yanti॒
kāma᳚m | tā na॒ āpa॒-śśagg syo॒nā bha̭vantu ||
yāśca॒ kūpyā॒ yāśca̭ nā॒dyā᳚-ssamu॒driyāḥ᳚ |
yāśca̭ vaiśa॒ntīru॒ta prā̭sa॒cīryāḥ || 15 ||
yāsā̭maṣā॒ḍhā madhṷ bha॒kṣaya̭nti | tā na॒ āpa॒-śśagg syo॒nā bha̭vantu || tanno॒ viśve॒ upa̭ śṛṇvantu de॒vāḥ | tada̭ṣā॒ḍhā a॒bhi saṃya~̭ntu ya॒jñam |
tannakṣa̭tra-mprathatā-mpa॒śubhyaḥ̭ |
kṛ॒ṣi-rvṛ॒ṣṭi-ryaja̭mānāya kalpatām ||
śu॒bhrāḥ ka॒nyā̭ yuva॒tayaḥ̭ su॒peśa̭saḥ | ka॒rma॒kṛtaḥ̭ su॒kṛto̭ vī॒ryā̭vatīḥ |
viśvā᳚-nde॒vān. ha॒viṣā̭ va॒rdhaya̭ntīḥ |
a॒ṣā॒ḍhāḥ kāma॒mupa̭yāntu ya॒jñam || 16 ||
yasmi॒-nbrahmā॒-'bhyaja̭ya॒-thsarva̭me॒tat |
a॒muñca̭ lo॒ka mi॒damṷ̄ca॒ sarva᳚m |
tanno॒ nakṣa̭tramabhi॒ji-dvi॒jitya̭ | śriya̭-ndadhā॒-tvahṛ̭ṇīyamānam || u॒bhau lo॒kau brahma̭ṇā॒ sañji̭te॒mau | tanno॒ nakṣa̭tramabhi॒ji-dvica̭ṣṭām |
tasmi̭n va॒ya-mpṛta̭nā॒-ssa-ñja̭yema |
tanno̭ de॒vāso॒ anṷjānantu॒ kāma᳚m ||
śṛ॒ṇvanti̭ śro॒ṇā-ma॒mṛta̭sya go॒pām |
puṇyā̭masyā॒ upa̭śṛṇomi॒ vāca᳚m || 17 ||
ma॒hī-nde॒vīṃ-vi~ṣṇṷpatnī-majū॒ryām | pra॒tīcī̭menāgṃ ha॒viṣā̭ yajāmaḥ ||
tre॒dhā viṣṇṷ-rurugā॒yo vica̭krame |
ma॒hī-ndiva̭-mpṛthi॒vī-ma॒ntari̭kṣam |
tacchro॒ṇaiti॒ śrava̭ i॒cchamā̭nā |
puṇya॒gg॒ ślokaṃ॒-ya~ja̭mānāya kṛṇva॒tī ||
a॒ṣṭau de॒vā vasa̭va-sso॒myāsaḥ̭ |
cata̭sro de॒vī ra॒jarā॒-śśravi̭ṣṭhāḥ |
te ya॒jña-mpā᳚ntu॒ raja̭saḥ pa॒rastā᳚t |
saṃ॒va~॒thsa॒rīṇa̭-ma॒mṛtagg̭ sva॒sti || 18 ||
ya॒jña-nnaḥ̭ pāntu॒ vasa̭vaḥ pu॒rastā᳚t | da॒kṣi॒ṇa॒to̭-'bhiya̭ntu॒ śravi̭ṣṭhāḥ | puṇya॒-nnakṣa̭trama॒bhi saṃvi~̭śāma | mā no॒ arā̭ti-ra॒ghaśa॒gṃ॒sā ganṋ ||
kṣa॒trasya॒ rājā॒ varṷṇo-'dhirā॒jaḥ | nakṣa̭trāṇāgṃ śa॒tabhi̭ṣa॒g vasi̭ṣṭhaḥ | tau de॒vebhyaḥ̭ kṛṇuto dī॒rghamāyuḥ̭ | śa॒tagṃ sa॒hasrā̭ bheṣa॒jāni̭ dhattaḥ ||
ya॒jñanno॒ rājā॒ varṷṇa॒ upa̭yātu | tanno॒ viśvḙ a॒bhi saṃya~̭ntu de॒vāḥ || 19 ||
tanno॒ nakṣa̭tragṃ śa॒tabhi̭ṣag juṣā॒ṇam | dī॒rghamāyuḥ॒ prati̭ra-dbheṣa॒jāni̭ || a॒ja eka̭pā॒duda̭gā-tpu॒rastā᳚t | viśvā̭ bhū॒tāni̭ prati॒moda̭mānaḥ | tasya̭ de॒vāḥ pra̭sa॒vaṃ-ya~̭nti॒ sarve᳚ | pro॒ṣṭha॒pa॒dāso̭ a॒mṛta̭sya go॒pāḥ ||
vi॒bhrāja̭māna-ssamidhā॒na u॒graḥ | ā-'ntari̭kṣa-maruha॒da-ga॒ndyām | tagṃ sūrya̭-nde॒va-ma॒jameka̭pādam | pro॒ṣṭha॒pa॒dāso॒ anṷyanti॒ sarve᳚ || 20 ||
ahi̭-rbu॒ddhniyaḥ॒ pratha̭māna eti | śreṣṭho̭ de॒vānā̭mu॒ta mānṷṣāṇām | ta-mbrā᳚hma॒ṇā-sso̭ma॒pā-sso॒myāsaḥ̭ |
pro॒ṣṭha॒pa॒dāso̭ a॒bhi ra̭kṣanti॒ sarve᳚ ||
ca॒tvāra॒ eka̭ma॒bhi karma̭ de॒vāḥ |
pro॒ṣṭha॒pa॒dāsa॒ iti॒ yān. vada̭nti |
te bu॒ddhaniya̭-mpari॒ṣadyagg̭ stu॒vantaḥ̭ |
ahigṃ̭ rakṣanti॒ nama̭sopa॒sadya̭ ||
pū॒ṣā re॒vatyanvḙti॒ panthā᳚m | pu॒ṣṭi॒patī̭ paśu॒pā vāja̭bastyau || 21 ||
i॒māni̭ ha॒vyā praya̭tā juṣā॒ṇā |
su॒gairno॒ yānai॒rupa̭yātāṃ-ya~॒jñam ||
kṣu॒drā-npa॒śū-nra̭kṣatu re॒vatī̭ naḥ |
gāvo̭ no॒ aśvā॒gṃ॒ anvḙtu pū॒ṣā |
anna॒gṃ॒ rakṣa̭ntau bahu॒dhā virṷ̄pam |
vājagṃ̭ sanutāṃ॒-ya~ja̭mānāya ya॒jñam ||
tada॒śvinā̭-vaśva॒yujopa̭yātām |
śubha॒-ṅgami̭ṣṭhau su॒yamḙbhi॒raśvaiḥ᳚ |
sva-nnakṣa̭tragṃ ha॒viṣā॒ yaja̭ntau |
maddhvā॒ sampṛ̭ktau॒ yajṷṣā॒ sama̭ktau || 22 ||
yau de॒vānā᳚-mbhi॒ṣajaṷ havyavā॒hau | viśva̭sya dū॒tā-va॒mṛta̭sya go॒pau | tau nakṣa̭tra-ñjujuṣā॒ṇo-pa̭yātām | namo॒-'śvibhyā᳚-ṅkṛṇumo-'śva॒yugbhyā᳚m ||
apa̭ pā॒pmāna॒-mbhara̭ṇīrbharantu | ta-dya॒mo rājā॒ bhaga̭vā॒n॒. vica̭ṣṭām | lo॒kasya॒ rājā̭ maha॒to ma॒hān. hi | su॒ga-nnaḥ॒ panthā॒mabha̭ya-ṅkṛṇotu ||
yasmi॒-nnakṣa̭tre ya॒ma eti॒ rājā᳚ |
yasmi̭-nnenama॒bhyaṣi̭cannta de॒vāḥ |
tada̭sya ci॒tragṃ ha॒viṣā̭ yajāma |
apa̭ pā॒pmāna॒-mbhara̭ṇī-rbharantu ||
ni॒veśa̭nī sa॒ṅgama̭nī॒ vasṷ̄nāṃ॒-vi~śvā̭ rū॒pāṇi॒ vasū᳚nyāve॒śaya̭ntī | sa॒ha॒sra॒po॒ṣagṃ su॒bhagā॒ rarā̭ṇā॒ sā na॒ āga॒n varca̭sā saṃvi~dā॒nā || yattḙ de॒vā ada̭dhu-rbhāga॒dheya॒mamā̭vāsye saṃ॒va~sa̭nto mahi॒tvā | sāno̭ ya॒jña-mpi̭pṛhi viśvavāre ra॒yi-nno̭ dhehi subhage su॒vīra᳚m || || 23 ||
(ta॒tāra॒ - mahyaṃ̭ - prāsa॒cīryā - yā᳚ntu ya॒jñaṃ - ~vācagg̭ - sva॒sti - de॒vā-anṷ yanti॒ sarve॒-vāja̭bastyau॒-sama̭ktau-de॒vā strīṇi̭ ca) (a. 2)
anuvākaṃ 3 - cāndramasādīnāṃ saptanāmiṣṭīnāṃ-yā~jyānuvākyāḥ
navo̭navo bhavati॒ jāya̭mā॒no-'hnā᳚-ṅke॒turu॒ṣasā̭ me॒tyagre᳚ | bhā॒ga-nde॒vebhyo॒ vida̭dhātyā॒ya-npraca॒ndramā᳚stirati dī॒rghamāyuḥ̭ || yamā̭di॒tyā
a॒gṃ॒śumā᳚pyā॒yaya̭nti yamā̭di॒tyā a॒gṃ॒śumā᳚pyā॒yaya̭nti॒ yamakṣi̭ta॒-makṣi̭tayaḥ॒ piba̭nti | tena̭ no॒ rājā॒ varṷṇo॒ bṛha॒spati॒rā pyā̭yayantu॒ bhuva̭nasya go॒pāḥ |||| ye virṷ̄pe॒ sama̭nasā saṃ॒vya~ya̭ntī | sa॒mā॒na-ntantṷ-mpari tāta॒nāte᳚ | vi॒bhū pra॒bhū a̭nu॒bhū vi॒śvato̭ huve |
te no॒ nakṣa̭tre॒ hava॒māga̭metam ||
va॒ya-nde॒vī brahma̭ṇā saṃvi~dā॒nāḥ |
su॒ratnā̭so de॒vavī̭ti॒-ndadhā̭nāḥ |
a॒ho॒rā॒tre ha॒viṣā̭ va॒rdhaya̭ntaḥ |
ati̭ pā॒pmāna॒-mati̭muktyā gamema || pratyṷvadṛśyāya॒tī || 24 ||
vyu॒cchantī̭ duhi॒tā di॒vaḥ | a॒po ma॒hī vṛ̭ṇute॒ cakṣṷṣā || tamo॒ jyoti̭ṣkṛṇoti sū॒narī᳚ | udu॒striyā᳚-ssacate॒ sūryaḥ̭ | sa cā̭ u॒dyannakṣa̭tra-marci॒mat | tavedṷṣo॒ vyuṣi॒ sūrya̭sya ca ||
sa-mbha॒ktena̭ gamemahi | tanno॒ nakṣa̭tra-marci॒mat | bhā॒nu॒matteja̭ u॒ccara̭t | upa̭ ya॒jña-mi॒hāga̭mat || 25 ||
pra nakṣa̭trāya de॒vāya̭ | indrā॒yendugṃ̭ havāmahe |
sa naḥ̭ savi॒tā sṷva-thsa॒nim | pu॒ṣṭi॒dāṃ-vī~॒rava̭ttamam || udu॒ tya-ñjā॒tavḙdasa-nde॒vaṃ-va~̭hanti ke॒tavaḥ̭ | dṛ॒śe viśvā̭ya॒ sūrya᳚m || ci॒tra-nde॒vānā॒-muda̭gā॒danī̭ka॒-ñcakṣṷ-rmi॒trasya॒ varṷṇasyā॒-'gneḥ | ā-' prā॒ dyāvā̭pṛthi॒vī a॒ntari̭kṣa॒gṃ॒ sūrya̭ ā॒tmā jaga̭tasta॒sthuṣa̭śca ||||
adi̭tirna uruṣya॒tvadi̭ti॒-śśarma̭ yacchatu | adi̭tiḥ pā॒tvagṃ ha̭saḥ || ma॒hīmū॒ṣu mā॒taragṃ̭ suvra॒tānā̭mṛ॒tasya॒ patnī॒mava̭se huvema | tu॒vi॒kṣa॒trāma॒jara̭ntīmurū॒cīgṃ su॒śarmā̭ṇa॒madi̭tigṃ su॒praṇī̭tim || ||
i॒daṃ-vi~ṣṇu॒-rvica̭krame tre॒dhā ni da̭dhe pa॒dam | sa mṷ̄ḍhamasya pāgṃ su॒re || prata-dviṣṇuḥ̭ stavate vī॒ryā̭ya | mṛ॒go na bhī॒maḥ kṷca॒ro gi̭ri॒ṣṭhāḥ | yasyo॒ruṣṷ tri॒ṣu vi॒krama̭ṇeṣu | adhi̭kṣi॒yanti॒ bhuva̭nāni॒ viśvā᳚ || ||
a॒gnirmū॒rdhā di॒vaḥ ka॒ku-tpatiḥ̭ pṛthi॒vyā a॒yam | a॒pāgṃ retāgṃ̭si jinvati || bhuvo̭ ya॒jñasya॒ raja̭saśca ne॒tā yatrā̭ ni॒yudbhi॒-ssaca̭se śi॒vābhiḥ̭ | di॒vi mū॒rdhāna̭-ndadhiṣe suva॒r॒ṣā-ñji॒hvāma̭gne cakṛṣe havya॒vāha᳚m || ||
anṷ no॒-'dyā-'nṷmati-rya॒jña-nde॒veṣṷ manyatām | a॒gniśca̭ havya॒vāha̭no॒ bhava̭tā-ndā॒śuṣe॒ mayaḥ̭ || anvida̭numate॒ tva-mmanyā̭sai॒ śañca̭naḥ kṛdhi | kratve॒ dakṣā̭ya no hinu॒ praṇa॒ āyūgṃ̭ṣi tāriṣaḥ || ||
ha॒vya॒vāha̭-mabhimāti॒ṣā-'ha᳚m | ra॒kṣo॒haṇa॒-mpṛta̭nāsu ji॒ṣṇum | jyoti̭ṣmanta॒-ndīdya̭ta॒-mpura̭ndhim | a॒gnigg svi̭ṣṭa॒kṛta॒mā hṷvema || svi̭ṣṭamagne a॒bhi ta-tpṛ̭ṇāhi | viśvā̭ deva॒ pṛta̭nā a॒bhiṣya | u॒ru-nnaḥ॒ panthā᳚-mpradi॒śanvi bhā̭hi | jyoti̭ṣmaddhehya॒jara̭-nna॒ āyuḥ̭ || || 26 ||
(ā॒ya॒tya̭ - gama॒th - svi̭ṣṭam) (a. 3)
anuvākaṃ 4 - deva nakṣatreṣṭibrāhmaṇam
a॒gnirvā a̭kāmayata | a॒nnā॒do de॒vānāg̭ syā॒miti̭ |
sa e॒tama॒gnaye॒ kṛtti̭kābhyaḥ puro॒ḍāśa̭-ma॒ṣṭāka̭pāla॒-nnira̭vapat | tato॒ vai so᳚-'nnā॒do de॒vānā̭mabhavat | a॒gnirvai de॒vānā̭mannā॒daḥ ||
yathā̭ ha॒ vā a॒gni-rde॒vanā̭-mannā॒daḥ |
e॒vagṃ ha॒ vā e॒ṣa ma̭nu॒ṣyā̭ṇā-mbhavati |
ya e॒tena̭ ha॒viṣā॒ yaja̭te | ya ṷ cainade॒vaṃ-ve~da̭ || so-'tra̭ juhoti | a॒gnaye॒ svāhā॒ kṛtti̭kābhya॒-ssvāhā᳚ | a॒mbāyai॒ svāhā̭ du॒lāyai॒ svāhā᳚ | ni॒ta॒tnyai svāhā॒ 'bhraya̭ntyai॒ svāhā᳚ | me॒ghaya̭ntyai॒ svāhā̭ va॒ra॒.ṣaya̭ntyai॒ svāhā᳚ | cu॒pu॒ṇīkā̭yai॒ svāheti̭ || 27 ||
pra॒jāpa̭tiḥ pra॒jā a̭sṛjata | tā a̭smā-thsṛ॒ṣṭāḥ parā̭cīrāyann | tāsāgṃ̭ rohi॒ṇī-ma॒bhya̭ddhyāyat | so̭-'kāmayata | upa॒ mā-''va̭rteta | samḙnayā gacche॒yeti̭ | sa e॒ta-mpra॒jāpa̭taye rohi॒ṇyai ca॒ru-nnira̭vapat | tato॒ vai sā tamu॒pāva̭rtata | samḙnayā 'gacchata || upa̭ ha॒ vā ḙna-mpri॒yamāva̭rtate |
sa-mpri॒yeṇa̭ gacchate | ya e॒tena̭ ha॒viṣā॒ yaja̭te |
ya ṷ cainade॒vaṃ-ve~da̭ || so-'tra̭ juhoti |
pra॒jāpa̭taye॒ svāhā̭ rohi॒ṇyai svāhā᳚ |
roca̭mānāyai॒ svāhā᳚ pra॒jābhya॒-ssvāheti̭ || 28 ||
somo॒ vā a̭kāmayata | oṣa̭dhīnāgṃ rā॒jya-ma॒bhija̭yeya॒miti̭ | sa e॒tagṃ somā̭ya mṛgaśī॒ra॒.ṣāya̭ śyāmā॒ka-ñca॒ru-mpaya̭si॒ nira̭vapat | tato॒ vai sa oṣa̭dhīnāgṃ
rā॒jyama॒bhya̭jayat | sa॒mā॒nānāgṃ̭ ha॒ vai rā॒jyama॒bhija̭yati | ya e॒tena̭ ha॒viṣā॒ yaja̭te |
ya ṷ cainade॒vaṃ-ve~da̭ | so-'tra̭ juhoti |
somā̭ya॒ svāhā̭ mṛgaśī॒ra॒.ṣāya॒ svāhā᳚ |
i॒nva॒kābhya॒-ssvāhauṣa̭dhībhya॒-ssvāhā᳚ |
rā॒jyāya॒ svāhā॒ 'bhiji̭tyai॒ svāheti̭ || 29 ||
ru॒dro vā a̭kāmayata | pa॒śu॒mān-thsyā॒miti̭ |
sa e॒tagṃ ru॒drāyā॒rdrāyai॒ praiya̭ṅgava-ñca॒ru-mpaya̭si॒ nira̭vapat | tato॒ vai sa pa̭śu॒māna̭bhavat | pa॒śu॒mān. ha॒ vai bha̭vati | ya e॒tena̭ ha॒viṣā॒ yaja̭te | ya ṷ cainade॒vaṃ-ve~da̭ | so-'tra̭ juhoti | ru॒drāya॒ svāhā॒ ''rdrāyai॒ svāhā᳚ | pinva̭mānāyai॒ svāhā̭ pa॒śubhya॒-ssvāheti̭ || 30 ||
ṛ॒kṣā vā i॒yama̭lo॒makā̭-''sīt | sā-'kā̭mayata |
oṣa̭dhībhi॒-rvana॒spati̭bhiḥ॒ prajā̭ye॒yeti̭ |
saitamadi̭tyai॒ puna̭rvasubhyā-ñca॒ru-nnira̭vapat |
tato॒ vā i॒yamoṣa̭dhībhi॒-rvana॒spati̭bhiḥ॒ prājā̭yata |
prajā̭yate ha॒ vai pra॒jayā̭ pa॒śubhiḥ̭ | ya e॒tena̭ ha॒viṣā॒ yaja̭te | ya ṷ cainade॒vaṃ-ve~da̭ |
so-'tra̭ juhoti | adi̭tyai॒ svāhā॒ puna̭rvasubhyām |
svāhā-''bhū᳚tyai॒ svāhā॒ prajā᳚tyai॒ svāheti̭ || 31 ||
bṛha॒spati॒rvā a̭kāmayata | bra॒hma॒va॒rca॒sī syā॒miti̭ |
sa e॒ta-mbṛha॒spata̭ye ti॒ṣyā̭ya naivā॒ra-ñca॒ru-mpaya̭si॒ nira̭vapat | tato॒ vai sa bra̭hmavarca॒sya̭bhavat | bra॒hma॒va॒rca॒sī ha॒ vai bha̭vati | ya e॒tena̭ ha॒viṣā॒ yaja̭te | ya ṷ cainade॒vaṃ-ve~da̭ | so-'tra̭ juhoti |
bṛha॒spata̭ye॒ svāhā̭ ti॒ṣyā̭ya॒ svāhā᳚ | bra॒hma॒va॒rca॒sāya॒ svāheti̭ || 32 ||
de॒vā॒su॒rā-ssaṃya~̭ttā āsann | te de॒vā-ssa॒rpebhya̭ āśre॒ṣābhya॒ ājyḙ kara॒mbha-nnira̭vapann |
tāne॒tābhi̭re॒va de॒vatā̭-bhi॒rupā̭nayann |
e॒tābhi̭rha॒ vai de॒vatā̭bhi-rdvi॒ṣanta॒-mbhrātṛ̭vya॒-mupa̭nayati | ya e॒tena̭ ha॒viṣā॒ yaja̭te |
ya ṷ cainade॒vaṃ-ve~da̭ | so-'tra̭ juhoti |
sa॒rpebhya॒-ssvāhā᳚-''śre॒ṣābhya॒-ssvāhā᳚ | da॒nda॒śūke᳚bhya॒-ssvāheti̭ || 33 ||
pi॒taro॒ vā a̭kāmayanta | pi॒tṛ॒lo॒ka ṛ̭ddhnuyā॒meti̭ |
ta e॒ta-mpi॒tṛbhyo̭ ma॒ghābhyaḥ̭ puro॒ḍāśa॒gṃ॒ ṣaṭka̭pāla॒-nnira̭vapann | tato॒ vai te pi̭tṛlo॒ka ā᳚rdhnuvann | pi॒tṛ॒lo॒ke ha॒ vā ṛ̭dhnoti |
ya e॒tena̭ ha॒viṣā॒ yaja̭te | ya ṷ cainade॒vaṃ-ve~da̭ | so-'tra̭ juhoti | pi॒tṛbhya॒-ssvāhā̭ ma॒ghābhyaḥ̭ |
svāhā̭ 'na॒ghābhya॒-ssvāhā̭ 'ga॒dābhyaḥ̭ |
svāhā̭ 'rundha॒tībhya॒-ssvāheti̭ || 34 ||
a॒rya॒mā vā a̭kāmayata | pa॒śu॒mān-thsyā॒miti̭ |
sa e॒tama̭rya॒mṇe phalgṷnībhyā-ñca॒ru-nnira̭vapat |
tato॒ vai sa pa̭śu॒māna̭bhavat |
pa॒śu॒mān. ha॒ vai bha̭vati | ya e॒tena̭ ha॒viṣā॒ yaja̭te |
ya ṷ cainade॒vaṃ-ve~da̭ | so-'tra̭ juhoti | a॒rya॒mṇe svāhā॒ phalgṷnībhyā॒g॒ svāhā᳚ |
pa॒śubhya॒-ssvāheti̭ || 35 ||
bhago॒ vā a̭kāmayata | bha॒gī śre॒ṣṭhī de॒vānāg̭ syā॒miti̭ | sa e॒ta-mbhagā̭ya॒ phalgṷnībhyā-ñca॒ru-nnira̭vapat | tato॒ vai sa bha॒gī śre॒ṣṭhī de॒vānā̭mabhavat |
bha॒gī ha॒ vai śre॒ṣṭhī sa̭mā॒nānā᳚-mbhavati | ya e॒tena̭ ha॒viṣā॒ yaja̭te | ya ṷ cainade॒vaṃ-ve~da̭ | so-'tra̭ juhoti | bhagā̭ya॒ svāhā॒ phalgṷnībhyā॒g॒ svāhā᳚ | śraiṣṭhyā̭ya॒ svāheti̭ || 36 ||
sa॒vi॒tā vā a̭kāmayata | śranmḙ de॒vā dadhī̭rann | sa॒vi॒tā syā॒miti̭ | sa e॒tagṃ sa̭vi॒tre hastā̭ya puro॒ḍāśa॒-ndvāda̭śakapāla॒-nnira̭vapadāśū॒nāṃ
~vrī̭hī॒ṇām | tato॒ vai tasmai॒ śradde॒vā ada̭dhata | sa॒vi॒tā-'bha̭vat | śraddha॒ vā a̭smai manu॒ṣyā̭ dadhate | sa॒vi॒tā sa̭mā॒nānā᳚-mbhavati | ya e॒tena̭ ha॒viṣā॒ yaja̭te | ya ṷ cainade॒vaṃ-ve~da̭ | so-'tra̭ juhoti |
sa॒vi॒tre svāhā॒ hastā̭ya | svāhā̭ dada॒te svāhā̭ pṛṇa॒te | svāhā᳚ pra॒yaccha̭te॒ svāhā᳚ pratigṛbhṇa॒te svāheti̭ || 37 ||
tvaṣṭā॒ vā a̭kāmayata | ci॒tra-mpra॒jāṃ-vi~̭nde॒yeti̭ |
sa e॒ta-ntvaṣṭrḙ ci॒trāyai̭ puro॒ḍāśa̭ma॒ṣṭā-ka̭pāla॒-nnira̭vapat | tato॒ vai sa ci॒tra-mpra॒jāma̭vindata | ci॒tragṃ ha॒ vai pra॒jāṃ-vi~̭ndate |
ya e॒tena̭ ha॒viṣā॒ yaja̭te |
ya ṷ cainade॒vaṃ-ve~da̭ | so-'tra̭ juhoti |
tvaṣṭre॒ svāhā̭ ci॒trāyai॒ svāhā᳚ |
caitrā̭ya॒ svāhā᳚ pra॒jāyai॒ svāheti̭ || 38 ||
vā॒yurvā a̭kāmayata | kā॒ma॒cāra̭me॒ṣu lo॒keṣva॒bhija̭yeya॒miti̭ | sa e॒ta-dvā॒yave॒ niṣṭyā̭yai gṛ॒ṣṭyai du॒gdha-mpayo॒ nira̭vapat |
tato॒ vai sa kā̭ma॒cāra̭me॒ṣu lo॒keṣva॒bhya̭jayat |
kā॒ma॒cāragṃ̭ ha॒ vā e॒ṣu lo॒keṣva॒bhija̭yati |
ya e॒tena̭ ha॒viṣā॒ yaja̭te | ya ṷ cainade॒vaṃ-ve~da̭ | so-'tra̭ juhoti | vā॒yave॒ svāhā॒ niṣṭyā̭yai॒ svāhā᳚ |
kā॒ma॒cārā̭ya॒ svāhā॒-'bhiji̭tyai॒ svāheti̭ || 39 ||
i॒ndrā॒gnī vā a̭kāmayetām | śraiṣṭhya̭-nde॒vānā̭-ma॒bhija̭ye॒veti̭ | tāve॒tami̭ndrā॒gnibhyāṃ॒-vi~śā̭khābhyā-mpuro॒ḍāśa॒-mekā̭daśakapāla॒-nnira̭vapatām | tato॒ vai tau śraiṣṭhya̭-nde॒vānā̭-ma॒bhya̭jayatām | śraiṣṭhyagṃ̭ ha॒ vai sa̭mā॒nānā̭ma॒bhija̭yati | ya e॒tena̭ ha॒viṣā॒ yaja̭te |
ya ṷ cainade॒vaṃ-ve~da̭ | so-'tra̭ juhoti |
i॒ndrā॒gnibhyā॒g॒ svāhā॒ viśā̭khābhyā॒g॒ svāhā᳚ |
śraiṣṭhyā̭ya॒ svāhā॒ 'bhiji̭tyai॒ svāheti̭ || 40 ||
athai॒tat-pau᳚rṇamā॒syā ājya॒-nnirva̭pati | kāmo॒ vai pau᳚rṇamā॒sī | kāma॒ ājya᳚m | kāmḙnai॒va kāma॒gṃ॒ sama̭rdhayati | kṣi॒pramḙna॒gṃ॒ sa kāma॒ upa̭namati | yena॒ kāmḙna॒ yaja̭te | so-'tra̭ juhoti |
pau॒rṇa॒mā॒syai svāhā॒ kāmā̭ya॒ svāhā-''ga̭tyai॒ svāheti̭ || 41 ||
anuvākaṃ 5 - yamanakṣatreṣṭibrāhmaṇam
mi॒tro vā a̭kāmayata | mi॒tra॒dheya̭me॒ṣu lo॒keṣva॒bhi ja̭yeya॒miti̭ | sa e॒ta-mmi॒trāyā̭nūrā॒dhebhya̭śca॒ru-nnira̭vapat | tato॒ vai sa mi̭tra॒dheya̭me॒ṣu lo॒keṣva॒bhya̭jayat | mi॒tra॒dheyagṃ̭ ha॒ vā e॒ṣu lo॒keṣva॒bhija̭yati | ya e॒tena̭ ha॒viṣā॒ yaja̭te |
ya ṷ cainade॒vaṃ-ve~da̭ | so-'tra̭ juhoti |
mi॒trāya॒ svāhā̭ 'nūrā॒dhebhya॒-ssvāhā᳚ |
mi॒tra॒dheyā̭ya॒ svāhā॒ 'bhiji̭tyai॒ svāheti̭ || 42 ||
indro॒ vā a̭kāmayata | jyaiṣṭhya̭-nde॒vānā̭-ma॒bhija̭yeya॒miti̭ | sa e॒tamindrā̭ya jye॒ṣṭhāyai̭ puro॒ḍāśa॒-mekā̭daśakapāla॒-nnira̭vapa-nma॒hāvrī̭hīṇām | tato॒ vai sa jyaiṣṭhya̭-nde॒vānā̭ma॒bhya̭jayat | jyaiṣṭhyagṃ̭ ha॒ vai sa̭mā॒nānā̭-ma॒bhija̭yati | ya e॒tena̭ ha॒viṣā॒ yaja̭te |
ya ṷ cainade॒vaṃ-ve~da̭ | so-'tra̭ juhoti | indrā̭ya॒ svāhā᳚ jye॒ṣṭhāyai॒ svāhā᳚ |
jyaiṣṭhyā̭ya॒ svāhā॒ 'bhiji̭tyai॒ svāheti̭ || 43 ||
pra॒jāpa̭ti॒rvā a̭kāmayata | mūla̭-mpra॒jāṃ-vi~̭nde॒yeti̭ | sa e॒ta-mpra॒jāpa̭taye॒ mūlā̭ya ca॒ru-nnira̭vapat | tato॒ vai sa mūla̭-mpra॒jāma̭vindata | mūlagṃ̭ ha॒ vai pra॒jāṃ-vi~̭ndate | ya e॒tena̭ ha॒viṣā॒ yaja̭te | ya ṷ cainade॒vaṃ-ve~da̭ | so-'tra̭ juhoti | pra॒jāpa̭taye॒ svāhā॒ mūlā̭ya॒ svāhā᳚ | pra॒jāyai॒ svāheti̭ || 44 ||
āpo॒ vā a̭kāmayanta | sa॒mu॒dra-ṅkāma̭ma॒ bhija̭ye॒meti̭ | tā e॒tama॒dbhyo̭-'ṣā॒ḍhābhya̭śca॒ru-nnira̭vapann | tato॒ vai tā-ssa̭mu॒dra-ṅkāma̭ma॒bhya̭jayann | sa॒mu॒dragṃ ha॒ vai kāma̭ma॒bhija̭yati | ya e॒tena̭ ha॒viṣā॒ yaja̭te |
ya ṷ cainade॒vaṃ-ve~da̭ | so-'tra̭ juhoti |
a॒dbhya-ssvāhā̭ 'ṣā॒ḍhābhya॒-ssvāhā᳚ | sa॒mu॒drāya॒ svāhā॒ kāmā̭ya॒ svāhā᳚ | a॒bhiji̭tyai॒ svāheti̭ || 45 ||
viśve॒ vai de॒vā a̭kāmayanta | a॒na॒pa॒ja॒yya-ñja̭ye॒meti̭ | ta e॒taṃ-vi~śve᳚bhyo de॒vebhyo̭-'ṣā॒ḍhābhya̭śca॒ru-nnira̭vapann |
tato॒ vai tḙ-'napaja॒yya-ma̭jayann | a॒na॒pa॒ja॒yyagṃ ha॒ vai ja̭yati | ya e॒tena̭ ha॒viṣā॒ yaja̭te | ya ṷ cainade॒vaṃ-ve~da̭ | so-'tra̭ juhoti |
viśve᳚bhyo de॒vebhya॒-ssvāhā̭ 'ṣā॒ḍhābhya॒-ssvāhā᳚ |
a॒na॒pa॒ja॒yyāya॒ svāhā॒ jityai॒ svāheti̭ || 46 ||
brahma॒ vā a̭kāmayata | bra॒hma॒lo॒kama॒bhija̭yeya॒miti̭ |
tade॒ta-mbrahma̭ṇe-'bhi॒jitḙ ca॒ru-nnira̭vapat |
tato॒ vai tadbra̭hmalo॒kama॒bhya̭jayat | bra॒hma॒lo॒kagṃ ha॒ vā a॒bhija̭yati | ya e॒tena̭ ha॒viṣā॒ yaja̭te | ya ṷ cainade॒vaṃ-ve~da̭ | so-'tra̭ juhoti | brahma̭ṇe॒ svāhā̭ 'bhi॒jite॒ svāhā᳚ | bra॒hma॒lo॒kāya॒ svāhā॒ 'bhiji̭tyai॒ svāheti̭ || 47 ||
viṣṇu॒rvā a̭kāmayata | puṇya॒gg॒ ślokagṃ̭ śṛṇvīya |
na mā̭ pā॒pī kī॒rtirāga̭cche॒diti̭ | sa e॒taṃ-vi~ṣṇa̭ve śro॒ṇāyai̭ puro॒ḍāśa̭-ntrikapā॒la-nnira̭vapat |
tato॒ vai sa puṇya॒gg॒ śloka̭ma śṛṇuta | naina̭-mpā॒pī kī॒rtirā- ga̭cchat | puṇyagṃ̭ ha॒ vai ślokagṃ̭ śṛṇute | naina̭-mpā॒pī kī॒rtirāga̭cchati | ya e॒tena̭ ha॒viṣā॒ yaja̭te | ya ṷ cainade॒vaṃ-ve~da̭ | so-'tra̭ juhoti |
viṣṇa̭ve॒ svāhā᳚ śro॒ṇāyai॒ svāhā᳚ |
ślokā̭ya॒ svāhā᳚ śru॒tāya॒ svāheti̭ || 48 ||
vasa̭vo॒ vā a̭kāmayanta | agra̭-nde॒vatā̭nā॒-mparī̭yā॒meti̭ | ta e॒taṃ-va~sṷbhya॒-śśravi̭ṣṭhābhyaḥ puro॒ḍāśa̭ma॒ṣṭāka̭pāla॒-nnira̭vapann |
tato॒ vai te-'gra̭-nde॒vatā̭nā॒-mparyā̭yann |
agragṃ̭ ha॒ vai sa̭mā॒nānā॒-mparyḙti |
ya e॒tena̭ ha॒viṣā॒ yaja̭te | ya ṷ cainade॒vaṃ-ve~da̭ | so-'tra̭ juhoti | vasṷbhya॒-ssvāhā॒ śravi̭ṣṭhābhya॒-ssvāhā᳚ | agrā̭ya॒ svāhā॒ parī᳚tyai॒ svāheti̭ || 49 ||
indro॒ vā a̭kāmayata | dṛ॒ḍho 'śi̭thila-ssyā॒miti̭ |
sa e॒taṃ-va~rṷṇāya śa॒tabhi̭ṣaje bheṣa॒jebhyaḥ̭ puro॒ḍāśa॒-ndaśa̭kapāla॒-nnira̭vapat-kṛ॒ṣṇānāṃ᳚-vrī~hī॒ṇām | tato॒ vai sa dṛ॒ḍho-'śi̭thilo-'bhavat |
dṛ॒ḍho ha॒ vā aśi̭thilo bhavati | ya e॒tena̭ ha॒viṣā॒ yaja̭te | ya ṷ cainade॒vaṃ-ve~da̭ | so-'tra̭ juhoti |
varṷṇāya॒ svāhā̭ śa॒tabhi̭ṣaje॒ svāhā᳚ |
bhe॒ṣa॒jebhya॒-ssvāheti̭ || 50 ||
a॒jo vā eka̭pādakāmayata | te॒ja॒svī bra̭hmavarca॒sī syā॒miti̭ | sa e॒tama॒jāyaika̭pade proṣṭhapa॒debhya̭-śca॒ru-nnira̭vapat | tato॒ vai sa tḙja॒svī bra̭hmavarca॒sya̭bhavat | te॒ja॒svī ha॒ vai bra̭hmavarca॒sī bha̭vati | ya e॒tena̭ ha॒viṣā॒ yaja̭te |
ya ṷ cainade॒vaṃ-ve~da̭ | so-'tra̭ juhoti |
a॒jāyaika̭pade॒ svāhā᳚ proṣṭhapa॒debhya॒-ssvāhā᳚ |
teja̭se॒ svāhā᳚ brahmavarca॒sāya॒ svāheti̭ || 51 ||
ahi॒rvai bu॒ddhniyo̭-'kāmayata | i॒mā-mpra̭ti॒ṣṭhāṃ-vi~̭nde॒yeti̭ | sa e॒tamaha̭ye bu॒ddhniyā̭ya proṣṭhapa॒debhyaḥ̭ puro॒ḍāśa॒-mbhūmi̭kapāla॒-nnira̭vapat | tato॒ vai sa i॒mā-mpra̭ti॒ṣṭhā-ma̭vindata | i॒māgṃ ha॒ vai pra̭ti॒ṣṭhāṃ-vi~̭ndate |
ya e॒tena̭ ha॒viṣā॒ yaja̭te | ya ṷ cainade॒vaṃ-ve~da̭ | so-'tra̭ juhoti | aha̭ye bu॒ddhniyā̭ya॒ svāhā᳚ proṣṭhapa॒debhya॒-ssvāhā᳚ |
pra॒ti॒ṣṭhāyai॒ svāheti̭ || 52 ||
pū॒ṣā vā a̭kāmayata | pa॒śu॒mān-thsyā॒miti̭ |
sa e॒ta-mpū॒ṣṇe re॒vatyai̭ ca॒ru-nnira̭vapat |
tato॒ vai sa pa̭śu॒māna̭bhavat |
pa॒śu॒mān. ha॒ vai bha̭vati | ya e॒tena̭ ha॒viṣā॒ yaja̭te | ya ṷ cainade॒vaṃ-ve~da̭ |
so-'tra̭ juhoti | pū॒ṣṇe svāhā̭ re॒vatyai॒ svāhā᳚ |
pa॒śubhya॒-ssvāheti̭ || 53 ||
a॒śvinau॒ vā a̭kāmayetām | śro॒tra॒svinā॒vaba̭dhirau syā॒veti̭ | tāve॒tama॒śvibhyā̭-maśva॒yugbhyā᳚-mpuro॒ḍāśa̭-ndvikapā॒la-nnira̭vapatām |
tato॒ vai tau śro᳚tra॒svinā॒vaba̭dhirā-vabhavatām |
śro॒tra॒svī ha॒ vā aba̭dhiro bhavati | ya e॒tena̭ ha॒viṣā॒ yaja̭te | ya ṷ cainade॒vaṃ-ve~da̭ | so-'tra̭ juhoti |
a॒śvibhyā॒g॒ svāhā᳚-'śva॒yugbhyā॒g॒ svāhā᳚ |
śrotrā̭ya॒ svāhā॒ śrutyai॒ svāheti̭ || 54 ||
ya॒mo vā a̭kāmayata |
pi॒tṛ॒ṇāgṃ rā॒jya-ma॒bhija̭yeya॒miti̭ |
sa e॒taṃ-ya~॒māyā̭pa॒bhara̭ṇībhyaśca॒ru-nnira̭vapat |
tato॒ vai sa pi̭tṛ॒ṇāgṃ rā॒jyama॒bhya̭jayat |
sa॒mā॒nānāgṃ̭ ha॒ vai rā॒jyama॒bhija̭yati |
ya e॒tena̭ ha॒viṣā॒ yaja̭te |
ya ṷ cainade॒vaṃ-ve~da̭ | so-'tra̭ juhoti |
ya॒māya॒ svāhā̭ 'pa॒bhara̭ṇībhya॒-ssvāhā᳚ |
rā॒jyāya॒ svāhā॒ 'bhiji̭tyai svāheti̭ || 55 ||
athai॒tada̭-mā॒vāsyā̭yā॒ ājya॒-nnirva̭pati |
kāmo॒ vā a̭māvā॒syā᳚ | kāma॒ ājya᳚m | kāmḙnai॒va kāma॒gṃ॒ sama̭rdhayati | kṣi॒pramḙna॒gṃ॒ sa kāma॒ upa̭namati | yena॒ kāmḙna॒ yaja̭te | so-'tra̭ juhoti | a॒mā॒vā॒syā̭yai॒ svāhā॒ kāmā̭ya॒ svāhā ''ga̭tyai॒ svāheti̭ || 56 ||
bu॒ddhniyaḥ̭ - pu॒ṣā - 'śvinaṷ - ya॒mo daśa̭da॒śā - thai॒tada̭ - māvā॒syā̭yā a॒ṣṭau pañca̭daśa ) (a. 5)
anuvākaṃ 6 - cāndramasādīṣṭibrāhmaṇam
ca॒ndramā॒ vā a̭kāmayata | a॒ho॒rā॒trā-na̭rdhamā॒sā-nmāsā̭-nṛ॒tūnth- saṃ̭va~thsa॒ra-mā॒ptvā | ca॒ndrama̭sa॒-ssāyṷjyagṃ salo॒katā̭-māpnuyā॒miti̭ | sa e॒ta-ñca॒ndrama̭se pratī॒dṛśyā̭yai puro॒ḍāśa॒-mpañca̭daśakapāla॒-nnira̭vapat |
tato॒ vai so̭-'horā॒trā-na̭rdhamā॒sā-nmāsā̭-nṛ॒tūn-thsaṃ̭va~thsa॒ra-mā॒ptvā |
ca॒ndrama̭sa॒-ssāyṷjyagṃ salo॒katā̭māpnot |
a॒ho॒rā॒trān. ha॒ vā a̭rdhamā॒sā-nmāsā̭n-ṛ॒tūn-thsaṃ̭va~thsa॒ra-mā॒ptvā | ca॒ndrama̭sa॒-ssāyṷjyagṃ salo॒katā̭māpnoti | ya e॒tena̭ ha॒viṣā॒ yaja̭te |
ya ṷ cainade॒vaṃ-ve~da̭ | so-'tra̭ juhoti |
ca॒ndrama̭se॒ svāhā᳚ pratī॒dṛśyā̭yai॒ svāhā᳚ |
a॒ho॒rā॒trebhya॒-ssvāhā᳚ 'rdhamā॒sebhya॒-ssvāhā᳚ |
māse᳚bhya॒-ssvāha॒rtubhya॒-ssvāhā᳚ | saṃ॒va~॒thsa॒rāya॒ svāheti̭ || 57 ||
a॒ho॒rā॒tre vā a̭kāmayetām | atya̭horā॒tre mṷcyevahi |
na nā̭vahorā॒tre ā᳚pnuyātā॒miti̭ | te e॒tama̭ho-rā॒trābhyā᳚-ñca॒ru-nnira̭vapatām | dva॒yānāṃ᳚-vrī~hī॒ṇām | śu॒klānā᳚-ñca kṛ॒ṣṇānā᳚-ñca | sa॒vā॒tyordu॒gdhe | śve॒tāyai̭ ca kṛ॒ṣṇāyai̭ ca |
tato॒ vai te atya̭horā॒tre a̭mucyete |
nainḙ ahorā॒tre ā᳚pnutām | ati̭ ha॒ vā a̭horā॒tre mṷcyate | naina̭mahorā॒tre ā᳚pnutaḥ | ya e॒tena̭ ha॒viṣā॒ yaja̭te | ya ṷ cainade॒vaṃve~da̭ |
so-'tra̭ juhoti | ahne॒ svāhā॒ rātri̭yai॒ svāhā᳚ |
ati̭muktyai॒ svāheti̭ || 58 ||
u॒ṣā vā a̭kāmayata | pri॒yā ''di॒tyasya̭ su॒bhagā᳚ syā॒miti̭ | saitamu॒ṣasḙ ca॒ru-nnira̭vapat |
tato॒ vai sā pri॒yā ''di॒tyasya̭ su॒bhagā̭ 'bhavat |
pri॒yo ha॒ vai sa̭mā॒nānāgṃ̭ su॒bhago̭ bhavati | ya e॒tena̭ ha॒viṣā॒ yaja̭te | ya ṷ cainade॒vaṃ-ve~da̭ | so-'tra̭ juhoti | u॒ṣase॒ svāhā॒ vyṷṣṭyai॒ svāhā᳚ |
vyū॒ṣuṣyai॒ svāhā᳚ vyu॒cchantyai॒ svāhā᳚ | vyṷṣṭāyai॒ svāheti̭ || 59 ||
athai॒tasmai॒ nakṣa̭trāya ca॒ru-nnirva̭pati | yathā॒ tva-nde॒vānā॒masi̭ | e॒vama॒ha-mma̭nu॒ṣyā̭ṇā-mbhūyāsa॒miti̭ | yathā̭ ha॒ vā e॒ta-dde॒vānā᳚m |
e॒vagṃ ha॒ vā e॒ṣa ma̭nu॒ṣyā̭ṇā-mbhavati | ya e॒tena̭ ha॒viṣā॒ yaja̭te | ya ṷ cainade॒vaṃ-ve~da̭ | so-'tra̭ juhoti | nakṣa̭trāya॒ svāho̭deṣya॒te svāhā᳚ |
u॒dya॒te svāhodi̭tāya॒ svāhā᳚ | hara̭se॒ svāhā॒ bhara̭se॒ svāhā᳚ | bhrāja̭se॒ svāhā॒ teja̭se॒ svāhā᳚ |
tapa̭se॒ svāhā᳚ brahmavarca॒sāya॒ svāheti̭ || 60 ||
sūryo॒ vā a̭kāmayata | nakṣa̭trāṇā-mprati॒ṣṭhā syā॒miti̭ | sa e॒tagṃ sūryā̭ya॒ nakṣa̭trebhyaśca॒ru-nnira̭vapat |
tato॒ vai sa nakṣa̭trāṇā-mprati॒ṣṭhā 'bha̭vat |
pra॒ti॒ṣṭhā ha॒ vai sa̭mā॒nānā᳚-mbhavati |
ya e॒tena̭ ha॒viṣā॒ yaja̭te |
ya ṷ cainade॒vaṃ-ve~da̭ | so-'tra̭ juhoti |
sūryā̭ya॒ svāhā॒ nakṣa̭trebhya॒-ssvāhā᳚ | pra॒ti॒ṣṭhāyai॒ svāheti̭ || 61 ||
athai॒tamadi̭tyai ca॒ru-nnirva̭pati | i॒yaṃ-vā~ adi̭tiḥ |
a॒syāme॒va prati̭ tiṣṭhati | so-'tra̭ juhoti |
adi̭tyai॒ svāhā᳚ prati॒ṣṭhāyai॒ svāheti̭ || 62 ||
athai॒taṃ-vi~ṣṇa̭ve ca॒ru-nnirva̭pati | ya॒jño vai viṣṇuḥ̭ | ya॒jña e॒vānta॒taḥ prati̭ tiṣṭhati | so-'tra̭ juhoti | viṣṇa̭ve॒ svāhā̭ ya॒jñāya॒ svāhā᳚ | pra॒ti॒ṣṭhāyai॒ svāheti̭ || 63 ||
(ca॒ndramāḥ॒ pañca̭daśā - horā॒tre sa॒ptada̭ - śo॒ṣā ekā̭da॒śā - thai॒tasmai॒ nakṣa̭ttāya॒ trayo̭daśa॒ - sūryo॒ daśā - thai॒tamadi̭tyai॒ pañcā - thai॒taṃ-vi~ṣṇa̭ve॒ ṣaṭ-thsa॒pta) (a. 6)
[sa॒vi॒tā-''śū॒nāṃ-vrī~̭hī॒ṇāmindro̭ ma॒hāvrī̭hīṇā॒mindraḥ̭ kṛ॒ṣṇānoṃ᳚
~vrīhī॒ṇāma̭horā॒tre dva॒yānāṃ᳚-vrī~hī॒ṇām | pi॒tara॒-ṣṣaṭka̭pālagṃ savi॒tā dvāda̭śakapālamindrā॒gnī ekā̭daśakapāla॒mindra॒ ekā̭daśakapāla॒mindro॒ daśa̭kapālaṃ॒-vi~ṣṇṷstrikapā॒lamahi॒-rbhūmi̭kapālama॒śvinau᳚ dvikapā॒la-ñca॒ndramāḥ॒ pañca̭daśakapāla-ma॒gniratvaṣṭā॒ vasa̭vo॒-'ṣṭāka̭pālama॒nyatra̭ ca॒rum | ru॒dro᳚-'rya॒mā pū॒ṣā pa̭śu॒mān-thsyā॒gṃ॒ somo̭ ru॒dro bṛha॒spatiḥ॒ paya̭si vā॒yuḥ paya॒-ssomo̭ vā॒yuri̭ndrā॒gnī mi॒tra indra॒ āpo॒ brahma̭ ya॒mo̭-'bhiji̭tyai॒ tvaṣṭā᳚ pra॒jāpa̭tiḥ pra॒jāyai̭ paurṇamā॒syā a̭māvā॒syā̭yā॒ āga̭tyai॒ viśve॒ jityā̭
a॒śvinau॒ śrutyai᳚ | brahma॒ tade॒taṃ-vi~ṣṇu॒-ssa e॒taṃ-vā~॒yu-ssa e॒tadāpa॒stāḥ | pi॒taro॒ viśve॒ vasa̭vo-'kāmayanta॒meti॒ ta e॒ta-nnira̭vapann | āpo̭-'kāmayanta॒ meti॒ tā e॒ta-nnira̭vapann | i॒ndrā॒gnī a॒śvinā̭vakāmayetāṃ॒-ve~ti॒ tāve॒ta-nnira̭vapadām | a॒ho॒rā॒tre vā a̭kāmayetā॒miti॒ te e॒ta-nnira̭vapatām |
a॒nyatrā̭kāmayata॒miti॒ sa e॒ta-nnira̭vapat | i॒ndrā॒gnī śraiṣṭhya॒mindro॒ jyaiṣṭhya॒mindro̭ dṛ॒ḍhaḥ |
āhi॒-ssūryo-'di̭tyai॒ viṣṇa̭ve prati॒ṣṭhāyai᳚ |
somo̭ ya॒ma-ssa̭mā॒nānā᳚m | a॒gnirno̭ rīriṣada॒nyatra̭ rīriṣaḥ]
[vi॒duṣo̭ ha॒viṣā॒ ya ṷ cainade॒vaṃ-ve~da̭ | iṣṭi̭bhi॒rya ṷ cainā e॒vaṃ-ve~da̭ |
a॒nyatra̭ brāhma॒ṇe ya ṷ cainame॒vaṃ-ve~da̭ ]
phrapātaka khorvai vi-thstarting phadams òf 1 tò 6 ānuvākams ḥ-
(a॒gnirna̭-ṛ॒ddhyāsma॒-navo̭navo॒-'gni-rmi॒tra - śca॒ndramā॒-ṣṣaṭ)
(a॒gnirna॒ - stanno̭ vā॒yu - rahi̭rbū॒ddhniya̭ - ṛ॒kṣā vā i॒ya - mathai॒ta-tpau᳚rṇamā॒syā - a॒jo vā eka̭pā॒th - sūrya॒ striṣa̭ṣṭiḥ)
(a॒gnirnaḥ̭ - pātu prati॒ṣṭhāyai॒ svāheti̭ )
|| hariḥ̭ om ||
|| kṛṣṇa yajurvedīya taittirīya brāhmaṇe tṛtīyāṣṭake prathamaḥ prapāṭhaka-ssamāptaḥ ||
Sanskrit — Devanagari (original)
कृष्ण यजुर्वेदीय तैत्तिरीय ब्राह्मणे तृतीयाष्टके प्रथमः प्रपाठकः - नक्षत्रेष्टीनां-याँज्या-ऽनुवाक्या ब्राह्मणानि
ओ-न्नमः परमात्मने, श्री महागणपतये नमः,
श्री गुरुभ्यो नमः । ह॒रिः॒ ओम् ॥
अनुवाकं 1 - देवनक्षत्राणां-याँज्यानुवाक्याः
अ॒ग्निर्नः॑ पातु॒ कृत्ति॑काः । नक्ष॑त्र-न्दे॒वमि॑न्द्रि॒यम् । इ॒दमा॑सां-विँचक्ष॒णम् । ह॒विरा॒स-ञ्जु॑होतन ॥ यस्य॒ भान्ति॑ र॒श्मयो॒ यस्य॑ के॒तवः॑ । यस्ये॒मा विश्वा॒ भुव॑नानि॒ सर्वा᳚ ।
स कृत्ति॑काभिर॒भि सं॒वँसा॑नः । अ॒ग्निर्नो॑ दे॒व-स्सु॑वि॒ते द॑धातु ॥ प्र॒जाप॑ते रोहि॒णी वे॑तु॒ पत्नी᳚ ।
वि॒श्वरू॑पा बृह॒ती चि॒त्रभा॑नुः ॥ 1 ॥
सा नो॑ य॒ज्ञस्य॑ सुवि॒ते द॑धातु । यथा॒ जीवे॑म श॒रद॒-स्सवी॑राः ॥ रो॒हि॒णी दे॒व्युद॑गा-त्पु॒रस्ता᳚त् । विश्वा॑ रू॒पाणि॑ प्रति॒मोद॑माना । प्र॒जाप॑तिग्ं ह॒विषा॑ व॒र्धय॑न्ती । प्रि॒या दे॒वाना॒-मुप॑यातु य॒ज्ञम् ॥ सोमो॒ राजा॑ मृगशी॒र॒.षेण॒ आगन्न्॑ । शि॒व-न्नक्ष॑त्र-म्प्रि॒यम॑स्य॒ धाम॑ ।
आ॒प्याय॑मानो बहु॒धा जने॑षु ।
रेतः॑ प्र॒जां-यँज॑माने दधातु ॥ 2 ॥
य-त्ते॒ नक्ष॑त्र-म्मृगशी॒र॒.षमस्ति॑ ।
प्रि॒यग्ं रा॑ज-न्प्रि॒यत॑म-म्प्रि॒याणा᳚म् ।
तस्मै॑ ते सोम ह॒विषा॑ विधेम ।
शन्न॑ एधि द्वि॒पदे॒ श-ञ्चतु॑ष्पदे ॥
आ॒र्द्रया॑ रु॒द्रः प्रथ॑मान एति । श्रेष्ठो॑ दे॒वाना॒-म्पति॑रघ्नि॒याना᳚म् । नक्ष॑त्रमस्य ह॒विषा॑ विधेम । मा नः॑ प्र॒जाग्ं री॑रिष॒-न्मोत वी॒रान् ॥
हे॒ती रु॒द्रस्य॒ परि॑णो वृणक्तु । आ॒र्द्रा नक्ष॑त्र-ञ्जुषताग्ं ह॒विर्नः॑ ॥ 3 ॥
प्र॒मु॒ञ्चमा॑नौ दुरि॒तानि॒ विश्वा᳚ । अपा॒घशग्ं॑ स-न्नुदता॒मरा॑तिम् ॥ पुन॑र्नो दे॒व्यदि॑ति-स्स्पृणोतु । पुन॑र्वसू नः॒ पुन॒रेतां᳚-यँ॒ज्ञम् ।
पुन॑र्नो दे॒वा अ॒भिय॑न्तु॒ सर्वे᳚ । पुनः॑ पुनर्वो ह॒विषा॑ यजामः ॥ ए॒वा न दे॒व्यदि॑तिरन॒र्वा । विश्व॑स्य भ॒र्त्री जग॑तः प्रति॒ष्ठा । पुन॑र्वसू ह॒विषा॑ व॒र्धय॑न्ती । प्रि॒य-न्दे॒वाना॒-मप्ये॑तु॒ पाथः॑ ॥ 4 ॥
बृह॒स्पतिः॑ प्रथ॒म-ञ्जाय॑मानः । ति॒ष्य॑-न्नक्ष॑त्रम॒भि सम्ब॑भूव । श्रेष्ठो॑ दे॒वाना॒-म्पृत॑नासु जि॒ष्णुः । दिशो-ऽनु॒ सर्वा॒ अभ॑यन्नो अस्तु ॥
ति॒ष्यः॑ पु॒रस्ता॑दु॒त म॑द्ध्य॒तो नः॑ । बृह॒स्पति॑ र्नः॒ परि॑पातु प॒श्चात् । बाधे॑ता॒-न्द्वेषो॒ अभ॑य-ङ्कृणुताम् । सु॒वीर्य॑स्य॒ पत॑य-स्स्याम ॥
इ॒दग्ं स॒र्पेभ्यो॑ ह॒विर॑स्तु॒ जुष्ट᳚म् ।
आ॒श्रे॒षा येषा॑-मनु॒यन्ति॒ चेतः॑ ॥ 5 ॥
ये अ॒न्तरि॑क्ष-म्पृथि॒वी-ङ्क्षि॒यन्ति॑ । तेनः॑ स॒र्पासो॒ हव॒माग॑मिष्ठाः ॥ ये रो॑च॒ने सूर्य॒स्यापि॑
स॒र्पाः । ये दिव॑-न्दे॒वीमनु॑ स॒ञ्चर॑न्ति ।
येषा॑माश्रे॒षा अ॑नु॒यन्ति॒ काम᳚म् ।
तेभ्यः॑ स॒र्पेभ्यो॒ मधु॑मज्जुहोमि ॥
उप॑हूताः पि॒तरो॒ ये म॒घासु॑ । मनो॑जवस-स्सु॒कृतः॑ सुकृ॒त्याः । ते नो॒ नक्ष॑त्रे॒ हव॒माग॑मिष्ठाः । स्व॒धाभि॑ र्य॒ज्ञ-म्प्रय॑त-ञ्जुषन्ताम् ॥ 6 ॥
ये अ॑ग्निद॒ग्धा ये-ऽन॑ग्नि-दग्धाः । ये॑-ऽमुं-लोँ॒क-म्पि॒तरः॑ क्षि॒यन्ति॑ । याग्श्च॑ वि॒द्मयाग्ं उ॑ च॒ न प्र॑वि॒द्म । म॒घासु॑ य॒ज्ञग्ं सुकृ॑त-ञ्जुषन्ताम् ॥
गवा॒-म्पतिः॒ फल्गु॑नीनामसि॒ त्वम् । तद॑र्यमन् वरुण मित्र॒ चारु॑ । त-न्त्वा॑ व॒यग्ं स॑नि॒तारग्ं॑ सनी॒नाम् । जी॒वा जीव॑न्त॒मुप॒ संविँ॑शेम ॥
येने॒मा विश्वा॒ भुव॑नानि॒ सञ्जि॑ता ।
यस्य॑ दे॒वा अ॑नु सं॒यँन्ति॒ चेतः॑ ॥ 7 ॥
अ॒र्य॒मा राजा॒-ऽजर॒स्तुवि॑ष्मान् । फल्गु॑नीना-मृष॒भो रो॑रवीति ॥ श्रेष्ठो॑ दे॒वाना᳚-म्भगवो भगासि । तत्त्वा॑ विदुः॒ फल्गु॑नी॒स्तस्य॑ वित्तात् । अ॒स्मभ्य॑-ङ्क्ष॒त्रम॒जरग्ं॑ सु॒वीर्य᳚म् । गोम॒दश्व॑-व॒दुप॒-सन्नु॑दे॒ह ॥ भगो॑ ह दा॒ता भग॒ इ-त्प्र॑दा॒ता । भगो॑ दे॒वीः फल्गु॑नी॒रावि॑वेश । भग॒स्येत्त-म्प्र॑स॒व-ङ्ग॑मेम । यत्र॑ दे॒वै-स्स॑ध॒माद॑-म्मदेम ॥ 8 ॥
आया॑तु दे॒व-स्स॑वि॒तोप॑यातु । हि॒र॒ण्यये॑न सु॒वृता॒ रथे॑न । वह॒न्॒. हस्तग्ं॑ सु॒भगं॑-विँद्म॒नाप॑सम् । प्र॒यच्छ॑न्त॒-म्पपु॑रि॒-म्पुण्य॒मच्छ॑ ॥
हस्तः॒ प्रय॑च्छ त्व॒मृतं॒-वँसी॑यः ।
दक्षि॑णेन॒ प्रति॑गृभ्णीम एनत् ।
दा॒तार॑म॒द्य स॑वि॒ता वि॑देय ।
यो नो॒ हस्ता॑य प्रसु॒वाति॑ य॒ज्ञम् ॥
त्वष्टा॒ नक्ष॑त्रम॒भ्ये॑ति चि॒त्राम् ।
सु॒भग्ं स॑सं-युँव॒तिग्ं रोच॑मानाम् ॥ 9 ॥
नि॒वे॒शय॑-न्न॒मृता॒-न्मर्त्याग्॑श्च ।
रू॒पाणि॑ पि॒ग्ं॒श-न्भुव॑नानि॒ विश्वा᳚ ॥
तन्न॒स्त्वष्टा॒ तदु॑ चि॒त्रा विच॑ष्टाम् ।
तन्नक्ष॑त्र-म्भूरि॒दा अ॑स्तु॒ मह्य᳚म् ।
तन्नः॑ प्र॒जां-वीँ॒रव॑तीग्ं सनोतु ।
गोभि॑र्नो॒ अश्वै॒-स्सम॑नक्तु य॒ज्ञम् ॥
वा॒युर्नक्ष॑त्र-म॒भ्ये॑ति॒ निष्ट्या᳚म् ।
ति॒ग्मशृ॑ङ्गो वृष॒भो रोरु॑वाणः ।
स॒मी॒रय॒-न्भुव॑ना मात॒रिश्वा᳚ ।
अप॒ द्वेषाग्ं॑सि नुदता॒मरा॑तीः ॥ 10 ॥
तन्नो॑ वा॒यस्तदु॒ निष्ट्या॑ शृणोतु ।
तन्नक्ष॑त्र-म्भूरि॒दा अ॑स्तु॒ मह्य᳚म् ।
तन्नो॑ दे॒वासो॒ अनु॑ जानन्तु॒ काम᳚म् । यथा॒ तरे॑म दुरि॒तानि॒ विश्वा᳚ ॥ दू॒रम॒स्मच्छत्र॑वो यन्तु भी॒ताः । तदि॑न्द्रा॒ग्नी कृ॑णुता॒-न्त-द्विशा॑खे ।
तन्नो॑ दे॒वा अनु॑मदन्तु य॒ज्ञम् । प॒श्चा-त्पु॒रस्ता॒-दभ॑यन्नो अस्तु ॥ नक्ष॑त्राणा॒-मधि॑पत्नी॒ विशा॑खे ।
श्रेष्ठा॑विन्द्रा॒ग्नी भुव॑नस्य गो॒पौ ॥ 11 ॥
विषू॑च॒-श्शत्रू॑-नप॒बाध॑मानौ । अप॒ क्षुध॑-न्नुदता॒मरा॑तिम् ॥ पू॒र्णा प॒श्चादु॒त पू॒र्णा पु॒रस्ता᳚त् । उन्म॑द्ध्य॒तः पौ᳚र्णमा॒सी जि॑गाय ।
तस्या᳚-न्दे॒वा अधि॑ सं॒वँस॑न्तः ।
उ॒त्त॒मे नाक॑ इ॒ह मा॑दयन्ताम् ॥
पृ॒थ्वी सु॒वर्चा॑ युव॒ति-स्स॒जोषाः᳚ । पौ॒र्ण॒मा॒स्युद॑गा॒-च्छोभ॑माना ।
आ॒प्या॒यय॑न्ती दुरि॒तानि॒ विश्वा᳚ ।
उ॒रु-न्दुहां॒-यँज॑मानाय य॒ज्ञम् ॥ 12 ॥
(चि॒त्रभा॑नु॒-र् यज॑माने दधातु - ह॒विर्नः॒ - पाथ॒ - श्चेतो॑ - जुषन्तां॒ - चेतो॑ - मदेम॒ - रोच॑माना॒ - मरा॑ती--र् गो॒पौ - य॒ज्ञं) (अ. 1)
अनुवाकं 2 - यमनक्षत्राणां-याँज्यानुवाक्याः
ऋ॒द्ध्यास्म॑ ह॒व्यै-र्नम॑सोप॒ सद्य॑ ।
मि॒त्र-न्दे॒व-म्मि॑त्र॒धेय॑न्नो अस्तु । अ॒नू॒रा॒धान्. ह॒विषा॑ व॒र्धय॑न्तः । श॒त-ञ्जी॑वेम श॒रद॒-स्सवी॑राः ॥ चि॒त्र-न्नक्ष॑त्र॒-मुद॑गा-त्पु॒रस्ता᳚त् । अ॒नू॒रा॒धास॒ इति॒ य-द्वद॑न्ति । तन्मि॒त्र ए॑ति प॒थिभि॑ र्देव॒यानैः᳚ । हि॒र॒ण्ययै॒ र्वित॑तै-र॒न्तरि॑क्षे ॥
इन्द्रो᳚ ज्ये॒ष्ठामनु॒ नक्ष॑त्रमेति । यस्मि॑न् वृ॒त्रं-वृँ॑त्र॒ तूर्ये॑ त॒तार॑ ॥ 13 ॥
तस्मि॑न् व॒यम॒मृत॒-न्दुहा॑नाः । क्षुध॑-न्तरेम॒ दुरि॑ति॒-न्दुरि॑ष्टिम् ॥ पु॒र॒न्द॒राय॑ वृष॒भाय॑ धृ॒ष्णवे᳚ । अषा॑ढाय॒ सह॑मानाय मी॒ढुषे᳚ ।
इन्द्रा॑य ज्ये॒ष्ठा मधु॑म॒-द्दुहा॑ना ।
उ॒रु-ङ्कृ॑णोतु॒ यज॑मानाय लो॒कम् ॥
मूल॑-म्प्र॒जां-वीँ॒रव॑तीं-विँदेय । परा᳚च्येतु॒ निर्-ऋ॑तिः परा॒चा । गोभि॒ र्नक्ष॑त्र-म्प॒शुभि॒-स्सम॑क्तम् । अह॑र्भूया॒-द्यज॑मानाय॒ मह्य᳚म् ॥ 14 ॥
अह॑र्नो अ॒द्य सु॑वि॒ते द॑धातु । मूल॒-न्नक्ष॑त्र॒मिति॒ य-द्वद॑न्ति । परा॑चीं-वाँ॒चा निर्-ऋ॑ति-न्नुदामि ।
शि॒व-म्प्र॒जायै॑ शि॒वम॑स्तु॒ मह्य᳚म् ॥
या दि॒व्या आपः॒ पय॑सा स-म्बभू॒वुः । या अ॒न्तरि॑क्ष उ॒त पार्थि॑वी॒र्याः । यासा॑मषा॒ढा अ॑नु॒यन्ति॒
काम᳚म् । ता न॒ आप॒-श्शग्ग् स्यो॒ना भ॑वन्तु ॥
याश्च॒ कूप्या॒ याश्च॑ ना॒द्या᳚-स्समु॒द्रियाः᳚ ।
याश्च॑ वैश॒न्तीरु॒त प्रा॑स॒चीर्याः ॥ 15 ॥
यासा॑मषा॒ढा मधु॑ भ॒क्षय॑न्ति । ता न॒ आप॒-श्शग्ग् स्यो॒ना भ॑वन्तु ॥ तन्नो॒ विश्वे॒ उप॑ शृण्वन्तु दे॒वाः । तद॑षा॒ढा अ॒भि संयँ॑न्तु य॒ज्ञम् ।
तन्नक्ष॑त्र-म्प्रथता-म्प॒शुभ्यः॑ ।
कृ॒षि-र्वृ॒ष्टि-र्यज॑मानाय कल्पताम् ॥
शु॒भ्राः क॒न्या॑ युव॒तयः॑ सु॒पेश॑सः । क॒र्म॒कृतः॑ सु॒कृतो॑ वी॒र्या॑वतीः ।
विश्वा᳚-न्दे॒वान्. ह॒विषा॑ व॒र्धय॑न्तीः ।
अ॒षा॒ढाः काम॒मुप॑यान्तु य॒ज्ञम् ॥ 16 ॥
यस्मि॒-न्ब्रह्मा॒-ऽभ्यज॑य॒-थ्सर्व॑मे॒तत् ।
अ॒मुञ्च॑ लो॒क मि॒दमू॑च॒ सर्व᳚म् ।
तन्नो॒ नक्ष॑त्रमभि॒जि-द्वि॒जित्य॑ । श्रिय॑-न्दधा॒-त्वहृ॑णीयमानम् ॥ उ॒भौ लो॒कौ ब्रह्म॑णा॒ सञ्जि॑ते॒मौ । तन्नो॒ नक्ष॑त्रमभि॒जि-द्विच॑ष्टाम् ।
तस्मि॑न् व॒य-म्पृत॑ना॒-स्स-ञ्ज॑येम ।
तन्नो॑ दे॒वासो॒ अनु॑जानन्तु॒ काम᳚म् ॥
शृ॒ण्वन्ति॑ श्रो॒णा-म॒मृत॑स्य गो॒पाम् ।
पुण्या॑मस्या॒ उप॑शृणोमि॒ वाच᳚म् ॥ 17 ॥
म॒ही-न्दे॒वीं-विँष्णु॑पत्नी-मजू॒र्याम् । प्र॒तीची॑मेनाग्ं ह॒विषा॑ यजामः ॥
त्रे॒धा विष्णु॑-रुरुगा॒यो विच॑क्रमे ।
म॒ही-न्दिव॑-म्पृथि॒वी-म॒न्तरि॑क्षम् ।
तच्छ्रो॒णैति॒ श्रव॑ इ॒च्छमा॑ना ।
पुण्य॒ग्ग्॒ श्लोकं॒-यँज॑मानाय कृण्व॒ती ॥
अ॒ष्टौ दे॒वा वस॑व-स्सो॒म्यासः॑ ।
चत॑स्रो दे॒वी र॒जरा॒-श्श्रवि॑ष्ठाः ।
ते य॒ज्ञ-म्पा᳚न्तु॒ रज॑सः प॒रस्ता᳚त् ।
सं॒वँ॒थ्स॒रीण॑-म॒मृतग्ग्॑ स्व॒स्ति ॥ 18 ॥
य॒ज्ञ-न्नः॑ पान्तु॒ वस॑वः पु॒रस्ता᳚त् । द॒क्षि॒ण॒तो॑-ऽभिय॑न्तु॒ श्रवि॑ष्ठाः । पुण्य॒-न्नक्ष॑त्रम॒भि संविँ॑शाम । मा नो॒ अरा॑ति-र॒घश॒ग्ं॒सा गन्न्॑ ॥
क्ष॒त्रस्य॒ राजा॒ वरु॑णो-ऽधिरा॒जः । नक्ष॑त्राणाग्ं श॒तभि॑ष॒ग् वसि॑ष्ठः । तौ दे॒वेभ्यः॑ कृणुतो दी॒र्घमायुः॑ । श॒तग्ं स॒हस्रा॑ भेष॒जानि॑ धत्तः ॥
य॒ज्ञन्नो॒ राजा॒ वरु॑ण॒ उप॑यातु । तन्नो॒ विश्वे॑ अ॒भि संयँ॑न्तु दे॒वाः ॥ 19 ॥
तन्नो॒ नक्ष॑त्रग्ं श॒तभि॑षग् जुषा॒णम् । दी॒र्घमायुः॒ प्रति॑र-द्भेष॒जानि॑ ॥ अ॒ज एक॑पा॒दुद॑गा-त्पु॒रस्ता᳚त् । विश्वा॑ भू॒तानि॑ प्रति॒मोद॑मानः । तस्य॑ दे॒वाः प्र॑स॒वं-यँ॑न्ति॒ सर्वे᳚ । प्रो॒ष्ठ॒प॒दासो॑ अ॒मृत॑स्य गो॒पाः ॥
वि॒भ्राज॑मान-स्समिधा॒न उ॒ग्रः । आ-ऽन्तरि॑क्ष-मरुह॒द-ग॒न्द्याम् । तग्ं सूर्य॑-न्दे॒व-म॒जमेक॑पादम् । प्रो॒ष्ठ॒प॒दासो॒ अनु॑यन्ति॒ सर्वे᳚ ॥ 20 ॥
अहि॑-र्बु॒द्ध्नियः॒ प्रथ॑मान एति । श्रेष्ठो॑ दे॒वाना॑मु॒त मानु॑षाणाम् । त-म्ब्रा᳚ह्म॒णा-स्सो॑म॒पा-स्सो॒म्यासः॑ ।
प्रो॒ष्ठ॒प॒दासो॑ अ॒भि र॑क्षन्ति॒ सर्वे᳚ ॥
च॒त्वार॒ एक॑म॒भि कर्म॑ दे॒वाः ।
प्रो॒ष्ठ॒प॒दास॒ इति॒ यान्. वद॑न्ति ।
ते बु॒द्धनिय॑-म्परि॒षद्यग्ग्॑ स्तु॒वन्तः॑ ।
अहिग्ं॑ रक्षन्ति॒ नम॑सोप॒सद्य॑ ॥
पू॒षा रे॒वत्यन्वे॑ति॒ पन्था᳚म् । पु॒ष्टि॒पती॑ पशु॒पा वाज॑बस्त्यौ ॥ 21 ॥
इ॒मानि॑ ह॒व्या प्रय॑ता जुषा॒णा ।
सु॒गैर्नो॒ यानै॒रुप॑यातां-यँ॒ज्ञम् ॥
क्षु॒द्रा-न्प॒शू-न्र॑क्षतु रे॒वती॑ नः ।
गावो॑ नो॒ अश्वा॒ग्ं॒ अन्वे॑तु पू॒षा ।
अन्न॒ग्ं॒ रक्ष॑न्तौ बहु॒धा विरू॑पम् ।
वाजग्ं॑ सनुतां॒-यँज॑मानाय य॒ज्ञम् ॥
तद॒श्विना॑-वश्व॒युजोप॑याताम् ।
शुभ॒-ङ्गमि॑ष्ठौ सु॒यमे॑भि॒रश्वैः᳚ ।
स्व-न्नक्ष॑त्रग्ं ह॒विषा॒ यज॑न्तौ ।
मद्ध्वा॒ सम्पृ॑क्तौ॒ यजु॑षा॒ सम॑क्तौ ॥ 22 ॥
यौ दे॒वाना᳚-म्भि॒षजौ॑ हव्यवा॒हौ । विश्व॑स्य दू॒ता-व॒मृत॑स्य गो॒पौ । तौ नक्ष॑त्र-ञ्जुजुषा॒णो-प॑याताम् । नमो॒-ऽश्विभ्या᳚-ङ्कृणुमो-ऽश्व॒युग्भ्या᳚म् ॥
अप॑ पा॒प्मान॒-म्भर॑णीर्भरन्तु । त-द्य॒मो राजा॒ भग॑वा॒न्॒. विच॑ष्टाम् । लो॒कस्य॒ राजा॑ मह॒तो म॒हान्. हि । सु॒ग-न्नः॒ पन्था॒मभ॑य-ङ्कृणोतु ॥
यस्मि॒-न्नक्ष॑त्रे य॒म एति॒ राजा᳚ ।
यस्मि॑-न्नेनम॒भ्यषि॑चन्न्त दे॒वाः ।
तद॑स्य चि॒त्रग्ं ह॒विषा॑ यजाम ।
अप॑ पा॒प्मान॒-म्भर॑णी-र्भरन्तु ॥
नि॒वेश॑नी स॒ङ्गम॑नी॒ वसू॑नां॒-विँश्वा॑ रू॒पाणि॒ वसू᳚न्यावे॒शय॑न्ती । स॒ह॒स्र॒पो॒षग्ं सु॒भगा॒ ररा॑णा॒ सा न॒ आग॒न् वर्च॑सा संविँदा॒ना ॥ यत्ते॑ दे॒वा अद॑धु-र्भाग॒धेय॒ममा॑वास्ये सं॒वँस॑न्तो महि॒त्वा । सानो॑ य॒ज्ञ-म्पि॑पृहि विश्ववारे र॒यि-न्नो॑ धेहि सुभगे सु॒वीर᳚म् ॥ ॥ 23 ॥
(त॒तार॒ - मह्यं॑ - प्रास॒चीर्या - या᳚न्तु य॒ज्ञं - ँवाचग्ग्॑ - स्व॒स्ति - दे॒वा-अनु॑ यन्ति॒ सर्वे॒-वाज॑बस्त्यौ॒-सम॑क्तौ-दे॒वा स्त्रीणि॑ च) (अ. 2)
अनुवाकं 3 - चान्द्रमसादीनां सप्तनामिष्टीनां-याँज्यानुवाक्याः
नवो॑नवो भवति॒ जाय॑मा॒नो-ऽह्ना᳚-ङ्के॒तुरु॒षसा॑ मे॒त्यग्रे᳚ । भा॒ग-न्दे॒वेभ्यो॒ विद॑धात्या॒य-न्प्रच॒न्द्रमा᳚स्तिरति दी॒र्घमायुः॑ ॥ यमा॑दि॒त्या
अ॒ग्ं॒शुमा᳚प्या॒यय॑न्ति यमा॑दि॒त्या अ॒ग्ं॒शुमा᳚प्या॒यय॑न्ति॒ यमक्षि॑त॒-मक्षि॑तयः॒ पिब॑न्ति । तेन॑ नो॒ राजा॒ वरु॑णो॒ बृह॒स्पति॒रा प्या॑ययन्तु॒ भुव॑नस्य गो॒पाः ॥॥ ये विरू॑पे॒ सम॑नसा सं॒व्यँय॑न्ती । स॒मा॒न-न्तन्तु॑-म्परि तात॒नाते᳚ । वि॒भू प्र॒भू अ॑नु॒भू वि॒श्वतो॑ हुवे ।
ते नो॒ नक्ष॑त्रे॒ हव॒माग॑मेतम् ॥
व॒य-न्दे॒वी ब्रह्म॑णा संविँदा॒नाः ।
सु॒रत्ना॑सो दे॒ववी॑ति॒-न्दधा॑नाः ।
अ॒हो॒रा॒त्रे ह॒विषा॑ व॒र्धय॑न्तः ।
अति॑ पा॒प्मान॒-मति॑मुक्त्या गमेम ॥ प्रत्यु॑वदृश्याय॒ती ॥ 24 ॥
व्यु॒च्छन्ती॑ दुहि॒ता दि॒वः । अ॒पो म॒ही वृ॑णुते॒ चक्षु॑षा ॥ तमो॒ ज्योति॑ष्कृणोति सू॒नरी᳚ । उदु॒स्त्रिया᳚-स्सचते॒ सूर्यः॑ । स चा॑ उ॒द्यन्नक्ष॑त्र-मर्चि॒मत् । तवेदु॑षो॒ व्युषि॒ सूर्य॑स्य च ॥
स-म्भ॒क्तेन॑ गमेमहि । तन्नो॒ नक्ष॑त्र-मर्चि॒मत् । भा॒नु॒मत्तेज॑ उ॒च्चर॑त् । उप॑ य॒ज्ञ-मि॒हाग॑मत् ॥ 25 ॥
प्र नक्ष॑त्राय दे॒वाय॑ । इन्द्रा॒येन्दुग्ं॑ हवामहे ।
स नः॑ सवि॒ता सु॑व-थ्स॒निम् । पु॒ष्टि॒दां-वीँ॒रव॑त्तमम् ॥ उदु॒ त्य-ञ्जा॒तवे॑दस-न्दे॒वं-वँ॑हन्ति के॒तवः॑ । दृ॒शे विश्वा॑य॒ सूर्य᳚म् ॥ चि॒त्र-न्दे॒वाना॒-मुद॑गा॒दनी॑क॒-ञ्चक्षु॑-र्मि॒त्रस्य॒ वरु॑णस्या॒-ऽग्नेः । आ-ऽ प्रा॒ द्यावा॑पृथि॒वी अ॒न्तरि॑क्ष॒ग्ं॒ सूर्य॑ आ॒त्मा जग॑तस्त॒स्थुष॑श्च ॥॥
अदि॑तिर्न उरुष्य॒त्वदि॑ति॒-श्शर्म॑ यच्छतु । अदि॑तिः पा॒त्वग्ं ह॑सः ॥ म॒हीमू॒षु मा॒तरग्ं॑ सुव्र॒ताना॑मृ॒तस्य॒ पत्नी॒मव॑से हुवेम । तु॒वि॒क्ष॒त्राम॒जर॑न्तीमुरू॒चीग्ं सु॒शर्मा॑ण॒मदि॑तिग्ं सु॒प्रणी॑तिम् ॥ ॥
इ॒दं-विँष्णु॒-र्विच॑क्रमे त्रे॒धा नि द॑धे प॒दम् । स मू॑ढमस्य पाग्ं सु॒रे ॥ प्रत-द्विष्णुः॑ स्तवते वी॒र्या॑य । मृ॒गो न भी॒मः कु॑च॒रो गि॑रि॒ष्ठाः । यस्यो॒रुषु॑ त्रि॒षु वि॒क्रम॑णेषु । अधि॑क्षि॒यन्ति॒ भुव॑नानि॒ विश्वा᳚ ॥ ॥
अ॒ग्निर्मू॒र्धा दि॒वः क॒कु-त्पतिः॑ पृथि॒व्या अ॒यम् । अ॒पाग्ं रेताग्ं॑सि जिन्वति ॥ भुवो॑ य॒ज्ञस्य॒ रज॑सश्च ने॒ता यत्रा॑ नि॒युद्भि॒-स्सच॑से शि॒वाभिः॑ । दि॒वि मू॒र्धान॑-न्दधिषे सुव॒र्॒षा-ञ्जि॒ह्वाम॑ग्ने चकृषे हव्य॒वाह᳚म् ॥ ॥
अनु॑ नो॒-ऽद्या-ऽनु॑मति-र्य॒ज्ञ-न्दे॒वेषु॑ मन्यताम् । अ॒ग्निश्च॑ हव्य॒वाह॑नो॒ भव॑ता-न्दा॒शुषे॒ मयः॑ ॥ अन्विद॑नुमते॒ त्व-म्मन्या॑सै॒ शञ्च॑नः कृधि । क्रत्वे॒ दक्षा॑य नो हिनु॒ प्रण॒ आयूग्ं॑षि तारिषः ॥ ॥
ह॒व्य॒वाह॑-मभिमाति॒षा-ऽह᳚म् । र॒क्षो॒हण॒-म्पृत॑नासु जि॒ष्णुम् । ज्योति॑ष्मन्त॒-न्दीद्य॑त॒-म्पुर॑न्धिम् । अ॒ग्निग्ग् स्वि॑ष्ट॒कृत॒मा हु॑वेम ॥ स्वि॑ष्टमग्ने अ॒भि त-त्पृ॑णाहि । विश्वा॑ देव॒ पृत॑ना अ॒भिष्य । उ॒रु-न्नः॒ पन्था᳚-म्प्रदि॒शन्वि भा॑हि । ज्योति॑ष्मद्धेह्य॒जर॑-न्न॒ आयुः॑ ॥ ॥ 26 ॥
(आ॒य॒त्य॑ - गम॒थ् - स्वि॑ष्टम्) (अ. 3)
अनुवाकं 4 - देव नक्षत्रेष्टिब्राह्मणम्
अ॒ग्निर्वा अ॑कामयत । अ॒न्ना॒दो दे॒वानाग्॑ स्या॒मिति॑ ।
स ए॒तम॒ग्नये॒ कृत्ति॑काभ्यः पुरो॒डाश॑-म॒ष्टाक॑पाल॒-न्निर॑वपत् । ततो॒ वै सो᳚-ऽन्ना॒दो दे॒वाना॑मभवत् । अ॒ग्निर्वै दे॒वाना॑मन्ना॒दः ॥
यथा॑ ह॒ वा अ॒ग्नि-र्दे॒वना॑-मन्ना॒दः ।
ए॒वग्ं ह॒ वा ए॒ष म॑नु॒ष्या॑णा-म्भवति ।
य ए॒तेन॑ ह॒विषा॒ यज॑ते । य उ॑ चैनदे॒वं-वेँद॑ ॥ सो-ऽत्र॑ जुहोति । अ॒ग्नये॒ स्वाहा॒ कृत्ति॑काभ्य॒-स्स्वाहा᳚ । अ॒म्बायै॒ स्वाहा॑ दु॒लायै॒ स्वाहा᳚ । नि॒त॒त्न्यै स्वाहा॒ ऽभ्रय॑न्त्यै॒ स्वाहा᳚ । मे॒घय॑न्त्यै॒ स्वाहा॑ व॒र॒.षय॑न्त्यै॒ स्वाहा᳚ । चु॒पु॒णीका॑यै॒ स्वाहेति॑ ॥ 27 ॥
प्र॒जाप॑तिः प्र॒जा अ॑सृजत । ता अ॑स्मा-थ्सृ॒ष्टाः परा॑चीरायन्न् । तासाग्ं॑ रोहि॒णी-म॒भ्य॑द्ध्यायत् । सो॑-ऽकामयत । उप॒ मा-ऽऽव॑र्तेत । समे॑नया गच्छे॒येति॑ । स ए॒त-म्प्र॒जाप॑तये रोहि॒ण्यै च॒रु-न्निर॑वपत् । ततो॒ वै सा तमु॒पाव॑र्तत । समे॑नया ऽगच्छत ॥ उप॑ ह॒ वा ए॑न-म्प्रि॒यमाव॑र्तते ।
स-म्प्रि॒येण॑ गच्छते । य ए॒तेन॑ ह॒विषा॒ यज॑ते ।
य उ॑ चैनदे॒वं-वेँद॑ ॥ सो-ऽत्र॑ जुहोति ।
प्र॒जाप॑तये॒ स्वाहा॑ रोहि॒ण्यै स्वाहा᳚ ।
रोच॑मानायै॒ स्वाहा᳚ प्र॒जाभ्य॒-स्स्वाहेति॑ ॥ 28 ॥
सोमो॒ वा अ॑कामयत । ओष॑धीनाग्ं रा॒ज्य-म॒भिज॑येय॒मिति॑ । स ए॒तग्ं सोमा॑य मृगशी॒र॒.षाय॑ श्यामा॒क-ञ्च॒रु-म्पय॑सि॒ निर॑वपत् । ततो॒ वै स ओष॑धीनाग्ं
रा॒ज्यम॒भ्य॑जयत् । स॒मा॒नानाग्ं॑ ह॒ वै रा॒ज्यम॒भिज॑यति । य ए॒तेन॑ ह॒विषा॒ यज॑ते ।
य उ॑ चैनदे॒वं-वेँद॑ । सो-ऽत्र॑ जुहोति ।
सोमा॑य॒ स्वाहा॑ मृगशी॒र॒.षाय॒ स्वाहा᳚ ।
इ॒न्व॒काभ्य॒-स्स्वाहौष॑धीभ्य॒-स्स्वाहा᳚ ।
रा॒ज्याय॒ स्वाहा॒ ऽभिजि॑त्यै॒ स्वाहेति॑ ॥ 29 ॥
रु॒द्रो वा अ॑कामयत । प॒शु॒मान्-थ्स्या॒मिति॑ ।
स ए॒तग्ं रु॒द्राया॒र्द्रायै॒ प्रैय॑ङ्गव-ञ्च॒रु-म्पय॑सि॒ निर॑वपत् । ततो॒ वै स प॑शु॒मान॑भवत् । प॒शु॒मान्. ह॒ वै भ॑वति । य ए॒तेन॑ ह॒विषा॒ यज॑ते । य उ॑ चैनदे॒वं-वेँद॑ । सो-ऽत्र॑ जुहोति । रु॒द्राय॒ स्वाहा॒ ऽऽर्द्रायै॒ स्वाहा᳚ । पिन्व॑मानायै॒ स्वाहा॑ प॒शुभ्य॒-स्स्वाहेति॑ ॥ 30 ॥
ऋ॒क्षा वा इ॒यम॑लो॒मका॑-ऽऽसीत् । सा-ऽका॑मयत ।
ओष॑धीभि॒-र्वन॒स्पति॑भिः॒ प्रजा॑ये॒येति॑ ।
सैतमदि॑त्यै॒ पुन॑र्वसुभ्या-ञ्च॒रु-न्निर॑वपत् ।
ततो॒ वा इ॒यमोष॑धीभि॒-र्वन॒स्पति॑भिः॒ प्राजा॑यत ।
प्रजा॑यते ह॒ वै प्र॒जया॑ प॒शुभिः॑ । य ए॒तेन॑ ह॒विषा॒ यज॑ते । य उ॑ चैनदे॒वं-वेँद॑ ।
सो-ऽत्र॑ जुहोति । अदि॑त्यै॒ स्वाहा॒ पुन॑र्वसुभ्याम् ।
स्वाहा-ऽऽभू᳚त्यै॒ स्वाहा॒ प्रजा᳚त्यै॒ स्वाहेति॑ ॥ 31 ॥
बृह॒स्पति॒र्वा अ॑कामयत । ब्र॒ह्म॒व॒र्च॒सी स्या॒मिति॑ ।
स ए॒त-म्बृह॒स्पत॑ये ति॒ष्या॑य नैवा॒र-ञ्च॒रु-म्पय॑सि॒ निर॑वपत् । ततो॒ वै स ब्र॑ह्मवर्च॒स्य॑भवत् । ब्र॒ह्म॒व॒र्च॒सी ह॒ वै भ॑वति । य ए॒तेन॑ ह॒विषा॒ यज॑ते । य उ॑ चैनदे॒वं-वेँद॑ । सो-ऽत्र॑ जुहोति ।
बृह॒स्पत॑ये॒ स्वाहा॑ ति॒ष्या॑य॒ स्वाहा᳚ । ब्र॒ह्म॒व॒र्च॒साय॒ स्वाहेति॑ ॥ 32 ॥
दे॒वा॒सु॒रा-स्संयँ॑त्ता आसन्न् । ते दे॒वा-स्स॒र्पेभ्य॑ आश्रे॒षाभ्य॒ आज्ये॑ कर॒म्भ-न्निर॑वपन्न् ।
ताने॒ताभि॑रे॒व दे॒वता॑-भि॒रुपा॑नयन्न् ।
ए॒ताभि॑र्ह॒ वै दे॒वता॑भि-र्द्वि॒षन्त॒-म्भ्रातृ॑व्य॒-मुप॑नयति । य ए॒तेन॑ ह॒विषा॒ यज॑ते ।
य उ॑ चैनदे॒वं-वेँद॑ । सो-ऽत्र॑ जुहोति ।
स॒र्पेभ्य॒-स्स्वाहा᳚-ऽऽश्रे॒षाभ्य॒-स्स्वाहा᳚ । द॒न्द॒शूके᳚भ्य॒-स्स्वाहेति॑ ॥ 33 ॥
पि॒तरो॒ वा अ॑कामयन्त । पि॒तृ॒लो॒क ऋ॑द्ध्नुया॒मेति॑ ।
त ए॒त-म्पि॒तृभ्यो॑ म॒घाभ्यः॑ पुरो॒डाश॒ग्ं॒ षट्क॑पाल॒-न्निर॑वपन्न् । ततो॒ वै ते पि॑तृलो॒क आ᳚र्ध्नुवन्न् । पि॒तृ॒लो॒के ह॒ वा ऋ॑ध्नोति ।
य ए॒तेन॑ ह॒विषा॒ यज॑ते । य उ॑ चैनदे॒वं-वेँद॑ । सो-ऽत्र॑ जुहोति । पि॒तृभ्य॒-स्स्वाहा॑ म॒घाभ्यः॑ ।
स्वाहा॑ ऽन॒घाभ्य॒-स्स्वाहा॑ ऽग॒दाभ्यः॑ ।
स्वाहा॑ ऽरुन्ध॒तीभ्य॒-स्स्वाहेति॑ ॥ 34 ॥
अ॒र्य॒मा वा अ॑कामयत । प॒शु॒मान्-थ्स्या॒मिति॑ ।
स ए॒तम॑र्य॒म्णे फल्गु॑नीभ्या-ञ्च॒रु-न्निर॑वपत् ।
ततो॒ वै स प॑शु॒मान॑भवत् ।
प॒शु॒मान्. ह॒ वै भ॑वति । य ए॒तेन॑ ह॒विषा॒ यज॑ते ।
य उ॑ चैनदे॒वं-वेँद॑ । सो-ऽत्र॑ जुहोति । अ॒र्य॒म्णे स्वाहा॒ फल्गु॑नीभ्या॒ग्॒ स्वाहा᳚ ।
प॒शुभ्य॒-स्स्वाहेति॑ ॥ 35 ॥
भगो॒ वा अ॑कामयत । भ॒गी श्रे॒ष्ठी दे॒वानाग्॑ स्या॒मिति॑ । स ए॒त-म्भगा॑य॒ फल्गु॑नीभ्या-ञ्च॒रु-न्निर॑वपत् । ततो॒ वै स भ॒गी श्रे॒ष्ठी दे॒वाना॑मभवत् ।
भ॒गी ह॒ वै श्रे॒ष्ठी स॑मा॒नाना᳚-म्भवति । य ए॒तेन॑ ह॒विषा॒ यज॑ते । य उ॑ चैनदे॒वं-वेँद॑ । सो-ऽत्र॑ जुहोति । भगा॑य॒ स्वाहा॒ फल्गु॑नीभ्या॒ग्॒ स्वाहा᳚ । श्रैष्ठ्या॑य॒ स्वाहेति॑ ॥ 36 ॥
स॒वि॒ता वा अ॑कामयत । श्रन्मे॑ दे॒वा दधी॑रन्न् । स॒वि॒ता स्या॒मिति॑ । स ए॒तग्ं स॑वि॒त्रे हस्ता॑य पुरो॒डाश॒-न्द्वाद॑शकपाल॒-न्निर॑वपदाशू॒नां
ँव्री॑ही॒णाम् । ततो॒ वै तस्मै॒ श्रद्दे॒वा अद॑धत । स॒वि॒ता-ऽभ॑वत् । श्रद्ध॒ वा अ॑स्मै मनु॒ष्या॑ दधते । स॒वि॒ता स॑मा॒नाना᳚-म्भवति । य ए॒तेन॑ ह॒विषा॒ यज॑ते । य उ॑ चैनदे॒वं-वेँद॑ । सो-ऽत्र॑ जुहोति ।
स॒वि॒त्रे स्वाहा॒ हस्ता॑य । स्वाहा॑ दद॒ते स्वाहा॑ पृण॒ते । स्वाहा᳚ प्र॒यच्छ॑ते॒ स्वाहा᳚ प्रतिगृभ्ण॒ते स्वाहेति॑ ॥ 37 ॥
त्वष्टा॒ वा अ॑कामयत । चि॒त्र-म्प्र॒जां-विँ॑न्दे॒येति॑ ।
स ए॒त-न्त्वष्ट्रे॑ चि॒त्रायै॑ पुरो॒डाश॑म॒ष्टा-क॑पाल॒-न्निर॑वपत् । ततो॒ वै स चि॒त्र-म्प्र॒जाम॑विन्दत । चि॒त्रग्ं ह॒ वै प्र॒जां-विँ॑न्दते ।
य ए॒तेन॑ ह॒विषा॒ यज॑ते ।
य उ॑ चैनदे॒वं-वेँद॑ । सो-ऽत्र॑ जुहोति ।
त्वष्ट्रे॒ स्वाहा॑ चि॒त्रायै॒ स्वाहा᳚ ।
चैत्रा॑य॒ स्वाहा᳚ प्र॒जायै॒ स्वाहेति॑ ॥ 38 ॥
वा॒युर्वा अ॑कामयत । का॒म॒चार॑मे॒षु लो॒केष्व॒भिज॑येय॒मिति॑ । स ए॒त-द्वा॒यवे॒ निष्ट्या॑यै गृ॒ष्ट्यै दु॒ग्ध-म्पयो॒ निर॑वपत् ।
ततो॒ वै स का॑म॒चार॑मे॒षु लो॒केष्व॒भ्य॑जयत् ।
का॒म॒चारग्ं॑ ह॒ वा ए॒षु लो॒केष्व॒भिज॑यति ।
य ए॒तेन॑ ह॒विषा॒ यज॑ते । य उ॑ चैनदे॒वं-वेँद॑ । सो-ऽत्र॑ जुहोति । वा॒यवे॒ स्वाहा॒ निष्ट्या॑यै॒ स्वाहा᳚ ।
का॒म॒चारा॑य॒ स्वाहा॒-ऽभिजि॑त्यै॒ स्वाहेति॑ ॥ 39 ॥
इ॒न्द्रा॒ग्नी वा अ॑कामयेताम् । श्रैष्ठ्य॑-न्दे॒वाना॑-म॒भिज॑ये॒वेति॑ । तावे॒तमि॑न्द्रा॒ग्निभ्यां॒-विँशा॑खाभ्या-म्पुरो॒डाश॒-मेका॑दशकपाल॒-न्निर॑वपताम् । ततो॒ वै तौ श्रैष्ठ्य॑-न्दे॒वाना॑-म॒भ्य॑जयताम् । श्रैष्ठ्यग्ं॑ ह॒ वै स॑मा॒नाना॑म॒भिज॑यति । य ए॒तेन॑ ह॒विषा॒ यज॑ते ।
य उ॑ चैनदे॒वं-वेँद॑ । सो-ऽत्र॑ जुहोति ।
इ॒न्द्रा॒ग्निभ्या॒ग्॒ स्वाहा॒ विशा॑खाभ्या॒ग्॒ स्वाहा᳚ ।
श्रैष्ठ्या॑य॒ स्वाहा॒ ऽभिजि॑त्यै॒ स्वाहेति॑ ॥ 40 ॥
अथै॒तत्-पौ᳚र्णमा॒स्या आज्य॒-न्निर्व॑पति । कामो॒ वै पौ᳚र्णमा॒सी । काम॒ आज्य᳚म् । कामे॑नै॒व काम॒ग्ं॒ सम॑र्धयति । क्षि॒प्रमे॑न॒ग्ं॒ स काम॒ उप॑नमति । येन॒ कामे॑न॒ यज॑ते । सो-ऽत्र॑ जुहोति ।
पौ॒र्ण॒मा॒स्यै स्वाहा॒ कामा॑य॒ स्वाहा-ऽऽग॑त्यै॒ स्वाहेति॑ ॥ 41 ॥
अनुवाकं 5 - यमनक्षत्रेष्टिब्राह्मणम्
मि॒त्रो वा अ॑कामयत । मि॒त्र॒धेय॑मे॒षु लो॒केष्व॒भि ज॑येय॒मिति॑ । स ए॒त-म्मि॒त्राया॑नूरा॒धेभ्य॑श्च॒रु-न्निर॑वपत् । ततो॒ वै स मि॑त्र॒धेय॑मे॒षु लो॒केष्व॒भ्य॑जयत् । मि॒त्र॒धेयग्ं॑ ह॒ वा ए॒षु लो॒केष्व॒भिज॑यति । य ए॒तेन॑ ह॒विषा॒ यज॑ते ।
य उ॑ चैनदे॒वं-वेँद॑ । सो-ऽत्र॑ जुहोति ।
मि॒त्राय॒ स्वाहा॑ ऽनूरा॒धेभ्य॒-स्स्वाहा᳚ ।
मि॒त्र॒धेया॑य॒ स्वाहा॒ ऽभिजि॑त्यै॒ स्वाहेति॑ ॥ 42 ॥
इन्द्रो॒ वा अ॑कामयत । ज्यैष्ठ्य॑-न्दे॒वाना॑-म॒भिज॑येय॒मिति॑ । स ए॒तमिन्द्रा॑य ज्ये॒ष्ठायै॑ पुरो॒डाश॒-मेका॑दशकपाल॒-न्निर॑वप-न्म॒हाव्री॑हीणाम् । ततो॒ वै स ज्यैष्ठ्य॑-न्दे॒वाना॑म॒भ्य॑जयत् । ज्यैष्ठ्यग्ं॑ ह॒ वै स॑मा॒नाना॑-म॒भिज॑यति । य ए॒तेन॑ ह॒विषा॒ यज॑ते ।
य उ॑ चैनदे॒वं-वेँद॑ । सो-ऽत्र॑ जुहोति । इन्द्रा॑य॒ स्वाहा᳚ ज्ये॒ष्ठायै॒ स्वाहा᳚ ।
ज्यैष्ठ्या॑य॒ स्वाहा॒ ऽभिजि॑त्यै॒ स्वाहेति॑ ॥ 43 ॥
प्र॒जाप॑ति॒र्वा अ॑कामयत । मूल॑-म्प्र॒जां-विँ॑न्दे॒येति॑ । स ए॒त-म्प्र॒जाप॑तये॒ मूला॑य च॒रु-न्निर॑वपत् । ततो॒ वै स मूल॑-म्प्र॒जाम॑विन्दत । मूलग्ं॑ ह॒ वै प्र॒जां-विँ॑न्दते । य ए॒तेन॑ ह॒विषा॒ यज॑ते । य उ॑ चैनदे॒वं-वेँद॑ । सो-ऽत्र॑ जुहोति । प्र॒जाप॑तये॒ स्वाहा॒ मूला॑य॒ स्वाहा᳚ । प्र॒जायै॒ स्वाहेति॑ ॥ 44 ॥
आपो॒ वा अ॑कामयन्त । स॒मु॒द्र-ङ्काम॑म॒ भिज॑ये॒मेति॑ । ता ए॒तम॒द्भ्यो॑-ऽषा॒ढाभ्य॑श्च॒रु-न्निर॑वपन्न् । ततो॒ वै ता-स्स॑मु॒द्र-ङ्काम॑म॒भ्य॑जयन्न् । स॒मु॒द्रग्ं ह॒ वै काम॑म॒भिज॑यति । य ए॒तेन॑ ह॒विषा॒ यज॑ते ।
य उ॑ चैनदे॒वं-वेँद॑ । सो-ऽत्र॑ जुहोति ।
अ॒द्भ्य-स्स्वाहा॑ ऽषा॒ढाभ्य॒-स्स्वाहा᳚ । स॒मु॒द्राय॒ स्वाहा॒ कामा॑य॒ स्वाहा᳚ । अ॒भिजि॑त्यै॒ स्वाहेति॑ ॥ 45 ॥
विश्वे॒ वै दे॒वा अ॑कामयन्त । अ॒न॒प॒ज॒य्य-ञ्ज॑ये॒मेति॑ । त ए॒तं-विँश्वे᳚भ्यो दे॒वेभ्यो॑-ऽषा॒ढाभ्य॑श्च॒रु-न्निर॑वपन्न् ।
ततो॒ वै ते॑-ऽनपज॒य्य-म॑जयन्न् । अ॒न॒प॒ज॒य्यग्ं ह॒ वै ज॑यति । य ए॒तेन॑ ह॒विषा॒ यज॑ते । य उ॑ चैनदे॒वं-वेँद॑ । सो-ऽत्र॑ जुहोति ।
विश्वे᳚भ्यो दे॒वेभ्य॒-स्स्वाहा॑ ऽषा॒ढाभ्य॒-स्स्वाहा᳚ ।
अ॒न॒प॒ज॒य्याय॒ स्वाहा॒ जित्यै॒ स्वाहेति॑ ॥ 46 ॥
ब्रह्म॒ वा अ॑कामयत । ब्र॒ह्म॒लो॒कम॒भिज॑येय॒मिति॑ ।
तदे॒त-म्ब्रह्म॑णे-ऽभि॒जिते॑ च॒रु-न्निर॑वपत् ।
ततो॒ वै तद्ब्र॑ह्मलो॒कम॒भ्य॑जयत् । ब्र॒ह्म॒लो॒कग्ं ह॒ वा अ॒भिज॑यति । य ए॒तेन॑ ह॒विषा॒ यज॑ते । य उ॑ चैनदे॒वं-वेँद॑ । सो-ऽत्र॑ जुहोति । ब्रह्म॑णे॒ स्वाहा॑ ऽभि॒जिते॒ स्वाहा᳚ । ब्र॒ह्म॒लो॒काय॒ स्वाहा॒ ऽभिजि॑त्यै॒ स्वाहेति॑ ॥ 47 ॥
विष्णु॒र्वा अ॑कामयत । पुण्य॒ग्ग्॒ श्लोकग्ं॑ शृण्वीय ।
न मा॑ पा॒पी की॒र्तिराग॑च्छे॒दिति॑ । स ए॒तं-विँष्ण॑वे श्रो॒णायै॑ पुरो॒डाश॑-न्त्रिकपा॒ल-न्निर॑वपत् ।
ततो॒ वै स पुण्य॒ग्ग्॒ श्लोक॑म शृणुत । नैन॑-म्पा॒पी की॒र्तिरा- ग॑च्छत् । पुण्यग्ं॑ ह॒ वै श्लोकग्ं॑ शृणुते । नैन॑-म्पा॒पी की॒र्तिराग॑च्छति । य ए॒तेन॑ ह॒विषा॒ यज॑ते । य उ॑ चैनदे॒वं-वेँद॑ । सो-ऽत्र॑ जुहोति ।
विष्ण॑वे॒ स्वाहा᳚ श्रो॒णायै॒ स्वाहा᳚ ।
श्लोका॑य॒ स्वाहा᳚ श्रु॒ताय॒ स्वाहेति॑ ॥ 48 ॥
वस॑वो॒ वा अ॑कामयन्त । अग्र॑-न्दे॒वता॑ना॒-म्परी॑या॒मेति॑ । त ए॒तं-वँसु॑भ्य॒-श्श्रवि॑ष्ठाभ्यः पुरो॒डाश॑म॒ष्टाक॑पाल॒-न्निर॑वपन्न् ।
ततो॒ वै ते-ऽग्र॑-न्दे॒वता॑ना॒-म्पर्या॑यन्न् ।
अग्रग्ं॑ ह॒ वै स॑मा॒नाना॒-म्पर्ये॑ति ।
य ए॒तेन॑ ह॒विषा॒ यज॑ते । य उ॑ चैनदे॒वं-वेँद॑ । सो-ऽत्र॑ जुहोति । वसु॑भ्य॒-स्स्वाहा॒ श्रवि॑ष्ठाभ्य॒-स्स्वाहा᳚ । अग्रा॑य॒ स्वाहा॒ परी᳚त्यै॒ स्वाहेति॑ ॥ 49 ॥
इन्द्रो॒ वा अ॑कामयत । दृ॒ढो ऽशि॑थिल-स्स्या॒मिति॑ ।
स ए॒तं-वँरु॑णाय श॒तभि॑षजे भेष॒जेभ्यः॑ पुरो॒डाश॒-न्दश॑कपाल॒-न्निर॑वपत्-कृ॒ष्णानां᳚-व्रीँही॒णाम् । ततो॒ वै स दृ॒ढो-ऽशि॑थिलो-ऽभवत् ।
दृ॒ढो ह॒ वा अशि॑थिलो भवति । य ए॒तेन॑ ह॒विषा॒ यज॑ते । य उ॑ चैनदे॒वं-वेँद॑ । सो-ऽत्र॑ जुहोति ।
वरु॑णाय॒ स्वाहा॑ श॒तभि॑षजे॒ स्वाहा᳚ ।
भे॒ष॒जेभ्य॒-स्स्वाहेति॑ ॥ 50 ॥
अ॒जो वा एक॑पादकामयत । ते॒ज॒स्वी ब्र॑ह्मवर्च॒सी स्या॒मिति॑ । स ए॒तम॒जायैक॑पदे प्रोष्ठप॒देभ्य॑-श्च॒रु-न्निर॑वपत् । ततो॒ वै स ते॑ज॒स्वी ब्र॑ह्मवर्च॒स्य॑भवत् । ते॒ज॒स्वी ह॒ वै ब्र॑ह्मवर्च॒सी भ॑वति । य ए॒तेन॑ ह॒विषा॒ यज॑ते ।
य उ॑ चैनदे॒वं-वेँद॑ । सो-ऽत्र॑ जुहोति ।
अ॒जायैक॑पदे॒ स्वाहा᳚ प्रोष्ठप॒देभ्य॒-स्स्वाहा᳚ ।
तेज॑से॒ स्वाहा᳚ ब्रह्मवर्च॒साय॒ स्वाहेति॑ ॥ 51 ॥
अहि॒र्वै बु॒द्ध्नियो॑-ऽकामयत । इ॒मा-म्प्र॑ति॒ष्ठां-विँ॑न्दे॒येति॑ । स ए॒तमह॑ये बु॒द्ध्निया॑य प्रोष्ठप॒देभ्यः॑ पुरो॒डाश॒-म्भूमि॑कपाल॒-न्निर॑वपत् । ततो॒ वै स इ॒मा-म्प्र॑ति॒ष्ठा-म॑विन्दत । इ॒माग्ं ह॒ वै प्र॑ति॒ष्ठां-विँ॑न्दते ।
य ए॒तेन॑ ह॒विषा॒ यज॑ते । य उ॑ चैनदे॒वं-वेँद॑ । सो-ऽत्र॑ जुहोति । अह॑ये बु॒द्ध्निया॑य॒ स्वाहा᳚ प्रोष्ठप॒देभ्य॒-स्स्वाहा᳚ ।
प्र॒ति॒ष्ठायै॒ स्वाहेति॑ ॥ 52 ॥
पू॒षा वा अ॑कामयत । प॒शु॒मान्-थ्स्या॒मिति॑ ।
स ए॒त-म्पू॒ष्णे रे॒वत्यै॑ च॒रु-न्निर॑वपत् ।
ततो॒ वै स प॑शु॒मान॑भवत् ।
प॒शु॒मान्. ह॒ वै भ॑वति । य ए॒तेन॑ ह॒विषा॒ यज॑ते । य उ॑ चैनदे॒वं-वेँद॑ ।
सो-ऽत्र॑ जुहोति । पू॒ष्णे स्वाहा॑ रे॒वत्यै॒ स्वाहा᳚ ।
प॒शुभ्य॒-स्स्वाहेति॑ ॥ 53 ॥
अ॒श्विनौ॒ वा अ॑कामयेताम् । श्रो॒त्र॒स्विना॒वब॑धिरौ स्या॒वेति॑ । तावे॒तम॒श्विभ्या॑-मश्व॒युग्भ्या᳚-म्पुरो॒डाश॑-न्द्विकपा॒ल-न्निर॑वपताम् ।
ततो॒ वै तौ श्रो᳚त्र॒स्विना॒वब॑धिरा-वभवताम् ।
श्रो॒त्र॒स्वी ह॒ वा अब॑धिरो भवति । य ए॒तेन॑ ह॒विषा॒ यज॑ते । य उ॑ चैनदे॒वं-वेँद॑ । सो-ऽत्र॑ जुहोति ।
अ॒श्विभ्या॒ग्॒ स्वाहा᳚-ऽश्व॒युग्भ्या॒ग्॒ स्वाहा᳚ ।
श्रोत्रा॑य॒ स्वाहा॒ श्रुत्यै॒ स्वाहेति॑ ॥ 54 ॥
य॒मो वा अ॑कामयत ।
पि॒तृ॒णाग्ं रा॒ज्य-म॒भिज॑येय॒मिति॑ ।
स ए॒तं-यँ॒माया॑प॒भर॑णीभ्यश्च॒रु-न्निर॑वपत् ।
ततो॒ वै स पि॑तृ॒णाग्ं रा॒ज्यम॒भ्य॑जयत् ।
स॒मा॒नानाग्ं॑ ह॒ वै रा॒ज्यम॒भिज॑यति ।
य ए॒तेन॑ ह॒विषा॒ यज॑ते ।
य उ॑ चैनदे॒वं-वेँद॑ । सो-ऽत्र॑ जुहोति ।
य॒माय॒ स्वाहा॑ ऽप॒भर॑णीभ्य॒-स्स्वाहा᳚ ।
रा॒ज्याय॒ स्वाहा॒ ऽभिजि॑त्यै स्वाहेति॑ ॥ 55 ॥
अथै॒तद॑-मा॒वास्या॑या॒ आज्य॒-न्निर्व॑पति ।
कामो॒ वा अ॑मावा॒स्या᳚ । काम॒ आज्य᳚म् । कामे॑नै॒व काम॒ग्ं॒ सम॑र्धयति । क्षि॒प्रमे॑न॒ग्ं॒ स काम॒ उप॑नमति । येन॒ कामे॑न॒ यज॑ते । सो-ऽत्र॑ जुहोति । अ॒मा॒वा॒स्या॑यै॒ स्वाहा॒ कामा॑य॒ स्वाहा ऽऽग॑त्यै॒ स्वाहेति॑ ॥ 56 ॥
बु॒द्ध्नियः॑ - पु॒षा - ऽश्विनौ॑ - य॒मो दश॑द॒शा - थै॒तद॑ - मावा॒स्या॑या अ॒ष्टौ पञ्च॑दश ) (अ. 5)
अनुवाकं 6 - चान्द्रमसादीष्टिब्राह्मणम्
च॒न्द्रमा॒ वा अ॑कामयत । अ॒हो॒रा॒त्रा-न॑र्धमा॒सा-न्मासा॑-नृ॒तून्थ्- सं॑वँथ्स॒र-मा॒प्त्वा । च॒न्द्रम॑स॒-स्सायु॑ज्यग्ं सलो॒कता॑-माप्नुया॒मिति॑ । स ए॒त-ञ्च॒न्द्रम॑से प्रती॒दृश्या॑यै पुरो॒डाश॒-म्पञ्च॑दशकपाल॒-न्निर॑वपत् ।
ततो॒ वै सो॑-ऽहोरा॒त्रा-न॑र्धमा॒सा-न्मासा॑-नृ॒तून्-थ्सं॑वँथ्स॒र-मा॒प्त्वा ।
च॒न्द्रम॑स॒-स्सायु॑ज्यग्ं सलो॒कता॑माप्नोत् ।
अ॒हो॒रा॒त्रान्. ह॒ वा अ॑र्धमा॒सा-न्मासा॑न्-ऋ॒तून्-थ्सं॑वँथ्स॒र-मा॒प्त्वा । च॒न्द्रम॑स॒-स्सायु॑ज्यग्ं सलो॒कता॑माप्नोति । य ए॒तेन॑ ह॒विषा॒ यज॑ते ।
य उ॑ चैनदे॒वं-वेँद॑ । सो-ऽत्र॑ जुहोति ।
च॒न्द्रम॑से॒ स्वाहा᳚ प्रती॒दृश्या॑यै॒ स्वाहा᳚ ।
अ॒हो॒रा॒त्रेभ्य॒-स्स्वाहा᳚ ऽर्धमा॒सेभ्य॒-स्स्वाहा᳚ ।
मासे᳚भ्य॒-स्स्वाह॒र्तुभ्य॒-स्स्वाहा᳚ । सं॒वँ॒थ्स॒राय॒ स्वाहेति॑ ॥ 57 ॥
अ॒हो॒रा॒त्रे वा अ॑कामयेताम् । अत्य॑होरा॒त्रे मु॑च्येवहि ।
न ना॑वहोरा॒त्रे आ᳚प्नुयाता॒मिति॑ । ते ए॒तम॑हो-रा॒त्राभ्या᳚-ञ्च॒रु-न्निर॑वपताम् । द्व॒यानां᳚-व्रीँही॒णाम् । शु॒क्लाना᳚-ञ्च कृ॒ष्णाना᳚-ञ्च । स॒वा॒त्योर्दु॒ग्धे । श्वे॒तायै॑ च कृ॒ष्णायै॑ च ।
ततो॒ वै ते अत्य॑होरा॒त्रे अ॑मुच्येते ।
नैने॑ अहोरा॒त्रे आ᳚प्नुताम् । अति॑ ह॒ वा अ॑होरा॒त्रे मु॑च्यते । नैन॑महोरा॒त्रे आ᳚प्नुतः । य ए॒तेन॑ ह॒विषा॒ यज॑ते । य उ॑ चैनदे॒वंवेँद॑ ।
सो-ऽत्र॑ जुहोति । अह्ने॒ स्वाहा॒ रात्रि॑यै॒ स्वाहा᳚ ।
अति॑मुक्त्यै॒ स्वाहेति॑ ॥ 58 ॥
उ॒षा वा अ॑कामयत । प्रि॒या ऽऽदि॒त्यस्य॑ सु॒भगा᳚ स्या॒मिति॑ । सैतमु॒षसे॑ च॒रु-न्निर॑वपत् ।
ततो॒ वै सा प्रि॒या ऽऽदि॒त्यस्य॑ सु॒भगा॑ ऽभवत् ।
प्रि॒यो ह॒ वै स॑मा॒नानाग्ं॑ सु॒भगो॑ भवति । य ए॒तेन॑ ह॒विषा॒ यज॑ते । य उ॑ चैनदे॒वं-वेँद॑ । सो-ऽत्र॑ जुहोति । उ॒षसे॒ स्वाहा॒ व्यु॑ष्ट्यै॒ स्वाहा᳚ ।
व्यू॒षुष्यै॒ स्वाहा᳚ व्यु॒च्छन्त्यै॒ स्वाहा᳚ । व्यु॑ष्टायै॒ स्वाहेति॑ ॥ 59 ॥
अथै॒तस्मै॒ नक्ष॑त्राय च॒रु-न्निर्व॑पति । यथा॒ त्व-न्दे॒वाना॒मसि॑ । ए॒वम॒ह-म्म॑नु॒ष्या॑णा-म्भूयास॒मिति॑ । यथा॑ ह॒ वा ए॒त-द्दे॒वाना᳚म् ।
ए॒वग्ं ह॒ वा ए॒ष म॑नु॒ष्या॑णा-म्भवति । य ए॒तेन॑ ह॒विषा॒ यज॑ते । य उ॑ चैनदे॒वं-वेँद॑ । सो-ऽत्र॑ जुहोति । नक्ष॑त्राय॒ स्वाहो॑देष्य॒ते स्वाहा᳚ ।
उ॒द्य॒ते स्वाहोदि॑ताय॒ स्वाहा᳚ । हर॑से॒ स्वाहा॒ भर॑से॒ स्वाहा᳚ । भ्राज॑से॒ स्वाहा॒ तेज॑से॒ स्वाहा᳚ ।
तप॑से॒ स्वाहा᳚ ब्रह्मवर्च॒साय॒ स्वाहेति॑ ॥ 60 ॥
सूर्यो॒ वा अ॑कामयत । नक्ष॑त्राणा-म्प्रति॒ष्ठा स्या॒मिति॑ । स ए॒तग्ं सूर्या॑य॒ नक्ष॑त्रेभ्यश्च॒रु-न्निर॑वपत् ।
ततो॒ वै स नक्ष॑त्राणा-म्प्रति॒ष्ठा ऽभ॑वत् ।
प्र॒ति॒ष्ठा ह॒ वै स॑मा॒नाना᳚-म्भवति ।
य ए॒तेन॑ ह॒विषा॒ यज॑ते ।
य उ॑ चैनदे॒वं-वेँद॑ । सो-ऽत्र॑ जुहोति ।
सूर्या॑य॒ स्वाहा॒ नक्ष॑त्रेभ्य॒-स्स्वाहा᳚ । प्र॒ति॒ष्ठायै॒ स्वाहेति॑ ॥ 61 ॥
अथै॒तमदि॑त्यै च॒रु-न्निर्व॑पति । इ॒यं-वाँ अदि॑तिः ।
अ॒स्यामे॒व प्रति॑ तिष्ठति । सो-ऽत्र॑ जुहोति ।
अदि॑त्यै॒ स्वाहा᳚ प्रति॒ष्ठायै॒ स्वाहेति॑ ॥ 62 ॥
अथै॒तं-विँष्ण॑वे च॒रु-न्निर्व॑पति । य॒ज्ञो वै विष्णुः॑ । य॒ज्ञ ए॒वान्त॒तः प्रति॑ तिष्ठति । सो-ऽत्र॑ जुहोति । विष्ण॑वे॒ स्वाहा॑ य॒ज्ञाय॒ स्वाहा᳚ । प्र॒ति॒ष्ठायै॒ स्वाहेति॑ ॥ 63 ॥
(च॒न्द्रमाः॒ पञ्च॑दशा - होरा॒त्रे स॒प्तद॑ - शो॒षा एका॑द॒शा - थै॒तस्मै॒ नक्ष॑त्ताय॒ त्रयो॑दश॒ - सूर्यो॒ दशा - थै॒तमदि॑त्यै॒ पञ्चा - थै॒तं-विँष्ण॑वे॒ षट्-थ्स॒प्त) (अ. 6)
[स॒वि॒ता-ऽऽशू॒नां-व्रीँ॑ही॒णामिन्द्रो॑ म॒हाव्री॑हीणा॒मिन्द्रः॑ कृ॒ष्णानों᳚
ँव्रीही॒णाम॑होरा॒त्रे द्व॒यानां᳚-व्रीँही॒णाम् । पि॒तर॒-ष्षट्क॑पालग्ं सवि॒ता द्वाद॑शकपालमिन्द्रा॒ग्नी एका॑दशकपाल॒मिन्द्र॒ एका॑दशकपाल॒मिन्द्रो॒ दश॑कपालं॒-विँष्णु॑स्त्रिकपा॒लमहि॒-र्भूमि॑कपालम॒श्विनौ᳚ द्विकपा॒ल-ञ्च॒न्द्रमाः॒ पञ्च॑दशकपाल-म॒ग्निरत्वष्टा॒ वस॑वो॒-ऽष्टाक॑पालम॒न्यत्र॑ च॒रुम् । रु॒द्रो᳚-ऽर्य॒मा पू॒षा प॑शु॒मान्-थ्स्या॒ग्ं॒ सोमो॑ रु॒द्रो बृह॒स्पतिः॒ पय॑सि वा॒युः पय॒-स्सोमो॑ वा॒युरि॑न्द्रा॒ग्नी मि॒त्र इन्द्र॒ आपो॒ ब्रह्म॑ य॒मो॑-ऽभिजि॑त्यै॒ त्वष्टा᳚ प्र॒जाप॑तिः प्र॒जायै॑ पौर्णमा॒स्या अ॑मावा॒स्या॑या॒ आग॑त्यै॒ विश्वे॒ जित्या॑
अ॒श्विनौ॒ श्रुत्यै᳚ । ब्रह्म॒ तदे॒तं-विँष्णु॒-स्स ए॒तं-वाँ॒यु-स्स ए॒तदाप॒स्ताः । पि॒तरो॒ विश्वे॒ वस॑वो-ऽकामयन्त॒मेति॒ त ए॒त-न्निर॑वपन्न् । आपो॑-ऽकामयन्त॒ मेति॒ ता ए॒त-न्निर॑वपन्न् । इ॒न्द्रा॒ग्नी अ॒श्विना॑वकामयेतां॒-वेँति॒ तावे॒त-न्निर॑वपदाम् । अ॒हो॒रा॒त्रे वा अ॑कामयेता॒मिति॒ ते ए॒त-न्निर॑वपताम् ।
अ॒न्यत्रा॑कामयत॒मिति॒ स ए॒त-न्निर॑वपत् । इ॒न्द्रा॒ग्नी श्रैष्ठ्य॒मिन्द्रो॒ ज्यैष्ठ्य॒मिन्द्रो॑ दृ॒ढः ।
आहि॒-स्सूर्यो-ऽदि॑त्यै॒ विष्ण॑वे प्रति॒ष्ठायै᳚ ।
सोमो॑ य॒म-स्स॑मा॒नाना᳚म् । अ॒ग्निर्नो॑ रीरिषद॒न्यत्र॑ रीरिषः]
[वि॒दुषो॑ ह॒विषा॒ य उ॑ चैनदे॒वं-वेँद॑ । इष्टि॑भि॒र्य उ॑ चैना ए॒वं-वेँद॑ ।
अ॒न्यत्र॑ ब्राह्म॒णे य उ॑ चैनमे॒वं-वेँद॑ ]
फ्रपातक खोर्वै वि-थ्स्तर्तिन्ग् फदम्स् ऒf 1 तॊ 6 आनुवाकम्स् ः-
(अ॒ग्निर्न॑-ऋ॒द्ध्यास्म॒-नवो॑नवो॒-ऽग्नि-र्मि॒त्र - श्च॒न्द्रमा॒-ष्षट्)
(अ॒ग्निर्न॒ - स्तन्नो॑ वा॒यु - रहि॑र्बू॒द्ध्निय॑ - ऋ॒क्षा वा इ॒य - मथै॒त-त्पौ᳚र्णमा॒स्या - अ॒जो वा एक॑पा॒थ् - सूर्य॒ स्त्रिष॑ष्टिः)
(अ॒ग्निर्नः॑ - पातु प्रति॒ष्ठायै॒ स्वाहेति॑ )
॥ हरिः॑ ओम् ॥
॥ कृष्ण यजुर्वेदीय तैत्तिरीय ब्राह्मणे तृतीयाष्टके प्रथमः प्रपाठक-स्समाप्तः ॥
kṛṣṇa yajurvedīya taittirīya brāhmaṇe tṛtīyāṣṭake prathamaḥ prapāṭhakaḥ - nakṣatreṣṭīnāṃ-yā~jyā-'nuvākyā brāhmaṇāni
o-nnamaḥ paramātmane, śrī mahāgaṇapataye namaḥ,
śrī gurubhyo namaḥ | ha॒riḥ॒ om ||
anuvākaṃ 1 - devanakṣatrāṇāṃ-yā~jyānuvākyāḥ
a॒gnirnaḥ̭ pātu॒ kṛtti̭kāḥ | nakṣa̭tra-nde॒vami̭ndri॒yam | i॒damā̭sāṃ-vi~cakṣa॒ṇam | ha॒virā॒sa-ñjṷhotana || yasya॒ bhānti̭ ra॒śmayo॒ yasya̭ ke॒tavaḥ̭ | yasye॒mā viśvā॒ bhuva̭nāni॒ sarvā᳚ |
sa kṛtti̭kābhira॒bhi saṃ॒va~sā̭naḥ | a॒gnirno̭ de॒va-ssṷvi॒te da̭dhātu || pra॒jāpa̭te rohi॒ṇī vḙtu॒ patnī᳚ |
vi॒śvarṷ̄pā bṛha॒tī ci॒trabhā̭nuḥ || 1 ||
sā no̭ ya॒jñasya̭ suvi॒te da̭dhātu | yathā॒ jīvḙma śa॒rada॒-ssavī̭rāḥ || ro॒hi॒ṇī de॒vyuda̭gā-tpu॒rastā᳚t | viśvā̭ rū॒pāṇi̭ prati॒moda̭mānā | pra॒jāpa̭tigṃ ha॒viṣā̭ va॒rdhaya̭ntī | pri॒yā de॒vānā॒-mupa̭yātu ya॒jñam || somo॒ rājā̭ mṛgaśī॒ra॒.ṣeṇa॒ āganṋ | śi॒va-nnakṣa̭tra-mpri॒yama̭sya॒ dhāma̭ |
ā॒pyāya̭māno bahu॒dhā janḙṣu |
retaḥ̭ pra॒jāṃ-ya~ja̭māne dadhātu || 2 ||
ya-tte॒ nakṣa̭tra-mmṛgaśī॒ra॒.ṣamasti̭ |
pri॒yagṃ rā̭ja-npri॒yata̭ma-mpri॒yāṇā᳚m |
tasmai̭ te soma ha॒viṣā̭ vidhema |
śanna̭ edhi dvi॒pade॒ śa-ñcatṷṣpade ||
ā॒rdrayā̭ ru॒draḥ pratha̭māna eti | śreṣṭho̭ de॒vānā॒-mpati̭raghni॒yānā᳚m | nakṣa̭tramasya ha॒viṣā̭ vidhema | mā naḥ̭ pra॒jāgṃ rī̭riṣa॒-nmota vī॒rān ||
he॒tī ru॒drasya॒ pari̭ṇo vṛṇaktu | ā॒rdrā nakṣa̭tra-ñjuṣatāgṃ ha॒virnaḥ̭ || 3 ||
pra॒mu॒ñcamā̭nau duri॒tāni॒ viśvā᳚ | apā॒ghaśagṃ̭ sa-nnudatā॒marā̭tim || puna̭rno de॒vyadi̭ti-sspṛṇotu | puna̭rvasū naḥ॒ puna॒retāṃ᳚-ya~॒jñam |
puna̭rno de॒vā a॒bhiya̭ntu॒ sarve᳚ | punaḥ̭ punarvo ha॒viṣā̭ yajāmaḥ || e॒vā na de॒vyadi̭tirana॒rvā | viśva̭sya bha॒rtrī jaga̭taḥ prati॒ṣṭhā | puna̭rvasū ha॒viṣā̭ va॒rdhaya̭ntī | pri॒ya-nde॒vānā॒-mapyḙtu॒ pāthaḥ̭ || 4 ||
bṛha॒spatiḥ̭ pratha॒ma-ñjāya̭mānaḥ | ti॒ṣya̭-nnakṣa̭trama॒bhi samba̭bhūva | śreṣṭho̭ de॒vānā॒-mpṛta̭nāsu ji॒ṣṇuḥ | diśo-'nu॒ sarvā॒ abha̭yanno astu ||
ti॒ṣyaḥ̭ pu॒rastā̭du॒ta ma̭ddhya॒to naḥ̭ | bṛha॒spati̭ rnaḥ॒ pari̭pātu pa॒ścāt | bādhḙtā॒-ndveṣo॒ abha̭ya-ṅkṛṇutām | su॒vīrya̭sya॒ pata̭ya-ssyāma ||
i॒dagṃ sa॒rpebhyo̭ ha॒vira̭stu॒ juṣṭa᳚m |
ā॒śre॒ṣā yeṣā̭-manu॒yanti॒ cetaḥ̭ || 5 ||
ye a॒ntari̭kṣa-mpṛthi॒vī-ṅkṣi॒yanti̭ | tenaḥ̭ sa॒rpāso॒ hava॒māga̭miṣṭhāḥ || ye ro̭ca॒ne sūrya॒syāpi̭
sa॒rpāḥ | ye diva̭-nde॒vīmanṷ sa॒ñcara̭nti |
yeṣā̭māśre॒ṣā a̭nu॒yanti॒ kāma᳚m |
tebhyaḥ̭ sa॒rpebhyo॒ madhṷmajjuhomi ||
upa̭hūtāḥ pi॒taro॒ ye ma॒ghāsṷ | mano̭javasa-ssu॒kṛtaḥ̭ sukṛ॒tyāḥ | te no॒ nakṣa̭tre॒ hava॒māga̭miṣṭhāḥ | sva॒dhābhi̭ rya॒jña-mpraya̭ta-ñjuṣantām || 6 ||
ye a̭gnida॒gdhā ye-'na̭gni-dagdhāḥ | yḙ-'muṃ-lo~॒ka-mpi॒taraḥ̭ kṣi॒yanti̭ | yāgśca̭ vi॒dmayāgṃ ṷ ca॒ na pra̭vi॒dma | ma॒ghāsṷ ya॒jñagṃ sukṛ̭ta-ñjuṣantām ||
gavā॒-mpatiḥ॒ phalgṷnīnāmasi॒ tvam | tada̭ryaman varuṇa mitra॒ cārṷ | ta-ntvā̭ va॒yagṃ sa̭ni॒tāragṃ̭ sanī॒nām | jī॒vā jīva̭nta॒mupa॒ saṃvi~̭śema ||
yene॒mā viśvā॒ bhuva̭nāni॒ sañji̭tā |
yasya̭ de॒vā a̭nu saṃ॒ya~nti॒ cetaḥ̭ || 7 ||
a॒rya॒mā rājā॒-'jara॒stuvi̭ṣmān | phalgṷnīnā-mṛṣa॒bho ro̭ravīti || śreṣṭho̭ de॒vānā᳚-mbhagavo bhagāsi | tattvā̭ viduḥ॒ phalgṷnī॒stasya̭ vittāt | a॒smabhya̭-ṅkṣa॒trama॒jaragṃ̭ su॒vīrya᳚m | goma॒daśva̭-va॒dupa॒-sannṷde॒ha || bhago̭ ha dā॒tā bhaga॒ i-tpra̭dā॒tā | bhago̭ de॒vīḥ phalgṷnī॒rāvi̭veśa | bhaga॒syetta-mpra̭sa॒va-ṅga̭mema | yatra̭ de॒vai-ssa̭dha॒māda̭-mmadema || 8 ||
āyā̭tu de॒va-ssa̭vi॒topa̭yātu | hi॒ra॒ṇyayḙna su॒vṛtā॒ rathḙna | vaha॒n॒. hastagṃ̭ su॒bhagaṃ̭-vi~dma॒nāpa̭sam | pra॒yaccha̭nta॒-mpapṷri॒-mpuṇya॒maccha̭ ||
hastaḥ॒ praya̭ccha tva॒mṛtaṃ॒-va~sī̭yaḥ |
dakṣi̭ṇena॒ prati̭gṛbhṇīma enat |
dā॒tāra̭ma॒dya sa̭vi॒tā vi̭deya |
yo no॒ hastā̭ya prasu॒vāti̭ ya॒jñam ||
tvaṣṭā॒ nakṣa̭trama॒bhyḙti ci॒trām |
su॒bhagṃ sa̭saṃ-yu~va॒tigṃ roca̭mānām || 9 ||
ni॒ve॒śaya̭-nna॒mṛtā॒-nmartyāg̭śca |
rū॒pāṇi̭ pi॒gṃ॒śa-nbhuva̭nāni॒ viśvā᳚ ||
tanna॒stvaṣṭā॒ tadṷ ci॒trā vica̭ṣṭām |
tannakṣa̭tra-mbhūri॒dā a̭stu॒ mahya᳚m |
tannaḥ̭ pra॒jāṃ-vī~॒rava̭tīgṃ sanotu |
gobhi̭rno॒ aśvai॒-ssama̭naktu ya॒jñam ||
vā॒yurnakṣa̭tra-ma॒bhyḙti॒ niṣṭyā᳚m |
ti॒gmaśṛ̭ṅgo vṛṣa॒bho rorṷvāṇaḥ |
sa॒mī॒raya॒-nbhuva̭nā māta॒riśvā᳚ |
apa॒ dveṣāgṃ̭si nudatā॒marā̭tīḥ || 10 ||
tanno̭ vā॒yastadu॒ niṣṭyā̭ śṛṇotu |
tannakṣa̭tra-mbhūri॒dā a̭stu॒ mahya᳚m |
tanno̭ de॒vāso॒ anṷ jānantu॒ kāma᳚m | yathā॒ tarḙma duri॒tāni॒ viśvā᳚ || dū॒rama॒smacchatra̭vo yantu bhī॒tāḥ | tadi̭ndrā॒gnī kṛ̭ṇutā॒-nta-dviśā̭khe |
tanno̭ de॒vā anṷmadantu ya॒jñam | pa॒ścā-tpu॒rastā॒-dabha̭yanno astu || nakṣa̭trāṇā॒-madhi̭patnī॒ viśā̭khe |
śreṣṭhā̭vindrā॒gnī bhuva̭nasya go॒pau || 11 ||
viṣṷ̄ca॒-śśatrṷ̄-napa॒bādha̭mānau | apa॒ kṣudha̭-nnudatā॒marā̭tim || pū॒rṇā pa॒ścādu॒ta pū॒rṇā pu॒rastā᳚t | unma̭ddhya॒taḥ pau᳚rṇamā॒sī ji̭gāya |
tasyā᳚-nde॒vā adhi̭ saṃ॒va~sa̭ntaḥ |
u॒tta॒me nāka̭ i॒ha mā̭dayantām ||
pṛ॒thvī su॒varcā̭ yuva॒ti-ssa॒joṣāḥ᳚ | pau॒rṇa॒mā॒syuda̭gā॒-cchobha̭mānā |
ā॒pyā॒yaya̭ntī duri॒tāni॒ viśvā᳚ |
u॒ru-nduhāṃ॒-ya~ja̭mānāya ya॒jñam || 12 ||
(ci॒trabhā̭nu॒-r yaja̭māne dadhātu - ha॒virnaḥ॒ - pātha॒ - śceto̭ - juṣantāṃ॒ - ceto̭ - madema॒ - roca̭mānā॒ - marā̭tī--r go॒pau - ya॒jñaṃ) (a. 1)
anuvākaṃ 2 - yamanakṣatrāṇāṃ-yā~jyānuvākyāḥ
ṛ॒ddhyāsma̭ ha॒vyai-rnama̭sopa॒ sadya̭ |
mi॒tra-nde॒va-mmi̭tra॒dheya̭nno astu | a॒nū॒rā॒dhān. ha॒viṣā̭ va॒rdhaya̭ntaḥ | śa॒ta-ñjī̭vema śa॒rada॒-ssavī̭rāḥ || ci॒tra-nnakṣa̭tra॒-muda̭gā-tpu॒rastā᳚t | a॒nū॒rā॒dhāsa॒ iti॒ ya-dvada̭nti | tanmi॒tra ḙti pa॒thibhi̭ rdeva॒yānaiḥ᳚ | hi॒ra॒ṇyayai॒ rvita̭tai-ra॒ntari̭kṣe ||
indro᳚ jye॒ṣṭhāmanu॒ nakṣa̭trameti | yasmi̭n vṛ॒traṃ-vṛ~̭tra॒ tūryḙ ta॒tāra̭ || 13 ||
tasmi̭n va॒yama॒mṛta॒-nduhā̭nāḥ | kṣudha̭-ntarema॒ duri̭ti॒-nduri̭ṣṭim || pu॒ra॒nda॒rāya̭ vṛṣa॒bhāya̭ dhṛ॒ṣṇave᳚ | aṣā̭ḍhāya॒ saha̭mānāya mī॒ḍhuṣe᳚ |
indrā̭ya jye॒ṣṭhā madhṷma॒-dduhā̭nā |
u॒ru-ṅkṛ̭ṇotu॒ yaja̭mānāya lo॒kam ||
mūla̭-mpra॒jāṃ-vī~॒rava̭tīṃ-vi~deya | parā᳚cyetu॒ nir-ṛ̭tiḥ parā॒cā | gobhi॒ rnakṣa̭tra-mpa॒śubhi॒-ssama̭ktam | aha̭rbhūyā॒-dyaja̭mānāya॒ mahya᳚m || 14 ||
aha̭rno a॒dya sṷvi॒te da̭dhātu | mūla॒-nnakṣa̭tra॒miti॒ ya-dvada̭nti | parā̭cīṃ-vā~॒cā nir-ṛ̭ti-nnudāmi |
śi॒va-mpra॒jāyai̭ śi॒vama̭stu॒ mahya᳚m ||
yā di॒vyā āpaḥ॒ paya̭sā sa-mbabhū॒vuḥ | yā a॒ntari̭kṣa u॒ta pārthi̭vī॒ryāḥ | yāsā̭maṣā॒ḍhā a̭nu॒yanti॒
kāma᳚m | tā na॒ āpa॒-śśagg syo॒nā bha̭vantu ||
yāśca॒ kūpyā॒ yāśca̭ nā॒dyā᳚-ssamu॒driyāḥ᳚ |
yāśca̭ vaiśa॒ntīru॒ta prā̭sa॒cīryāḥ || 15 ||
yāsā̭maṣā॒ḍhā madhṷ bha॒kṣaya̭nti | tā na॒ āpa॒-śśagg syo॒nā bha̭vantu || tanno॒ viśve॒ upa̭ śṛṇvantu de॒vāḥ | tada̭ṣā॒ḍhā a॒bhi saṃya~̭ntu ya॒jñam |
tannakṣa̭tra-mprathatā-mpa॒śubhyaḥ̭ |
kṛ॒ṣi-rvṛ॒ṣṭi-ryaja̭mānāya kalpatām ||
śu॒bhrāḥ ka॒nyā̭ yuva॒tayaḥ̭ su॒peśa̭saḥ | ka॒rma॒kṛtaḥ̭ su॒kṛto̭ vī॒ryā̭vatīḥ |
viśvā᳚-nde॒vān. ha॒viṣā̭ va॒rdhaya̭ntīḥ |
a॒ṣā॒ḍhāḥ kāma॒mupa̭yāntu ya॒jñam || 16 ||
yasmi॒-nbrahmā॒-'bhyaja̭ya॒-thsarva̭me॒tat |
a॒muñca̭ lo॒ka mi॒damṷ̄ca॒ sarva᳚m |
tanno॒ nakṣa̭tramabhi॒ji-dvi॒jitya̭ | śriya̭-ndadhā॒-tvahṛ̭ṇīyamānam || u॒bhau lo॒kau brahma̭ṇā॒ sañji̭te॒mau | tanno॒ nakṣa̭tramabhi॒ji-dvica̭ṣṭām |
tasmi̭n va॒ya-mpṛta̭nā॒-ssa-ñja̭yema |
tanno̭ de॒vāso॒ anṷjānantu॒ kāma᳚m ||
śṛ॒ṇvanti̭ śro॒ṇā-ma॒mṛta̭sya go॒pām |
puṇyā̭masyā॒ upa̭śṛṇomi॒ vāca᳚m || 17 ||
ma॒hī-nde॒vīṃ-vi~ṣṇṷpatnī-majū॒ryām | pra॒tīcī̭menāgṃ ha॒viṣā̭ yajāmaḥ ||
tre॒dhā viṣṇṷ-rurugā॒yo vica̭krame |
ma॒hī-ndiva̭-mpṛthi॒vī-ma॒ntari̭kṣam |
tacchro॒ṇaiti॒ śrava̭ i॒cchamā̭nā |
puṇya॒gg॒ ślokaṃ॒-ya~ja̭mānāya kṛṇva॒tī ||
a॒ṣṭau de॒vā vasa̭va-sso॒myāsaḥ̭ |
cata̭sro de॒vī ra॒jarā॒-śśravi̭ṣṭhāḥ |
te ya॒jña-mpā᳚ntu॒ raja̭saḥ pa॒rastā᳚t |
saṃ॒va~॒thsa॒rīṇa̭-ma॒mṛtagg̭ sva॒sti || 18 ||
ya॒jña-nnaḥ̭ pāntu॒ vasa̭vaḥ pu॒rastā᳚t | da॒kṣi॒ṇa॒to̭-'bhiya̭ntu॒ śravi̭ṣṭhāḥ | puṇya॒-nnakṣa̭trama॒bhi saṃvi~̭śāma | mā no॒ arā̭ti-ra॒ghaśa॒gṃ॒sā ganṋ ||
kṣa॒trasya॒ rājā॒ varṷṇo-'dhirā॒jaḥ | nakṣa̭trāṇāgṃ śa॒tabhi̭ṣa॒g vasi̭ṣṭhaḥ | tau de॒vebhyaḥ̭ kṛṇuto dī॒rghamāyuḥ̭ | śa॒tagṃ sa॒hasrā̭ bheṣa॒jāni̭ dhattaḥ ||
ya॒jñanno॒ rājā॒ varṷṇa॒ upa̭yātu | tanno॒ viśvḙ a॒bhi saṃya~̭ntu de॒vāḥ || 19 ||
tanno॒ nakṣa̭tragṃ śa॒tabhi̭ṣag juṣā॒ṇam | dī॒rghamāyuḥ॒ prati̭ra-dbheṣa॒jāni̭ || a॒ja eka̭pā॒duda̭gā-tpu॒rastā᳚t | viśvā̭ bhū॒tāni̭ prati॒moda̭mānaḥ | tasya̭ de॒vāḥ pra̭sa॒vaṃ-ya~̭nti॒ sarve᳚ | pro॒ṣṭha॒pa॒dāso̭ a॒mṛta̭sya go॒pāḥ ||
vi॒bhrāja̭māna-ssamidhā॒na u॒graḥ | ā-'ntari̭kṣa-maruha॒da-ga॒ndyām | tagṃ sūrya̭-nde॒va-ma॒jameka̭pādam | pro॒ṣṭha॒pa॒dāso॒ anṷyanti॒ sarve᳚ || 20 ||
ahi̭-rbu॒ddhniyaḥ॒ pratha̭māna eti | śreṣṭho̭ de॒vānā̭mu॒ta mānṷṣāṇām | ta-mbrā᳚hma॒ṇā-sso̭ma॒pā-sso॒myāsaḥ̭ |
pro॒ṣṭha॒pa॒dāso̭ a॒bhi ra̭kṣanti॒ sarve᳚ ||
ca॒tvāra॒ eka̭ma॒bhi karma̭ de॒vāḥ |
pro॒ṣṭha॒pa॒dāsa॒ iti॒ yān. vada̭nti |
te bu॒ddhaniya̭-mpari॒ṣadyagg̭ stu॒vantaḥ̭ |
ahigṃ̭ rakṣanti॒ nama̭sopa॒sadya̭ ||
pū॒ṣā re॒vatyanvḙti॒ panthā᳚m | pu॒ṣṭi॒patī̭ paśu॒pā vāja̭bastyau || 21 ||
i॒māni̭ ha॒vyā praya̭tā juṣā॒ṇā |
su॒gairno॒ yānai॒rupa̭yātāṃ-ya~॒jñam ||
kṣu॒drā-npa॒śū-nra̭kṣatu re॒vatī̭ naḥ |
gāvo̭ no॒ aśvā॒gṃ॒ anvḙtu pū॒ṣā |
anna॒gṃ॒ rakṣa̭ntau bahu॒dhā virṷ̄pam |
vājagṃ̭ sanutāṃ॒-ya~ja̭mānāya ya॒jñam ||
tada॒śvinā̭-vaśva॒yujopa̭yātām |
śubha॒-ṅgami̭ṣṭhau su॒yamḙbhi॒raśvaiḥ᳚ |
sva-nnakṣa̭tragṃ ha॒viṣā॒ yaja̭ntau |
maddhvā॒ sampṛ̭ktau॒ yajṷṣā॒ sama̭ktau || 22 ||
yau de॒vānā᳚-mbhi॒ṣajaṷ havyavā॒hau | viśva̭sya dū॒tā-va॒mṛta̭sya go॒pau | tau nakṣa̭tra-ñjujuṣā॒ṇo-pa̭yātām | namo॒-'śvibhyā᳚-ṅkṛṇumo-'śva॒yugbhyā᳚m ||
apa̭ pā॒pmāna॒-mbhara̭ṇīrbharantu | ta-dya॒mo rājā॒ bhaga̭vā॒n॒. vica̭ṣṭām | lo॒kasya॒ rājā̭ maha॒to ma॒hān. hi | su॒ga-nnaḥ॒ panthā॒mabha̭ya-ṅkṛṇotu ||
yasmi॒-nnakṣa̭tre ya॒ma eti॒ rājā᳚ |
yasmi̭-nnenama॒bhyaṣi̭cannta de॒vāḥ |
tada̭sya ci॒tragṃ ha॒viṣā̭ yajāma |
apa̭ pā॒pmāna॒-mbhara̭ṇī-rbharantu ||
ni॒veśa̭nī sa॒ṅgama̭nī॒ vasṷ̄nāṃ॒-vi~śvā̭ rū॒pāṇi॒ vasū᳚nyāve॒śaya̭ntī | sa॒ha॒sra॒po॒ṣagṃ su॒bhagā॒ rarā̭ṇā॒ sā na॒ āga॒n varca̭sā saṃvi~dā॒nā || yattḙ de॒vā ada̭dhu-rbhāga॒dheya॒mamā̭vāsye saṃ॒va~sa̭nto mahi॒tvā | sāno̭ ya॒jña-mpi̭pṛhi viśvavāre ra॒yi-nno̭ dhehi subhage su॒vīra᳚m || || 23 ||
(ta॒tāra॒ - mahyaṃ̭ - prāsa॒cīryā - yā᳚ntu ya॒jñaṃ - ~vācagg̭ - sva॒sti - de॒vā-anṷ yanti॒ sarve॒-vāja̭bastyau॒-sama̭ktau-de॒vā strīṇi̭ ca) (a. 2)
anuvākaṃ 3 - cāndramasādīnāṃ saptanāmiṣṭīnāṃ-yā~jyānuvākyāḥ
navo̭navo bhavati॒ jāya̭mā॒no-'hnā᳚-ṅke॒turu॒ṣasā̭ me॒tyagre᳚ | bhā॒ga-nde॒vebhyo॒ vida̭dhātyā॒ya-npraca॒ndramā᳚stirati dī॒rghamāyuḥ̭ || yamā̭di॒tyā
a॒gṃ॒śumā᳚pyā॒yaya̭nti yamā̭di॒tyā a॒gṃ॒śumā᳚pyā॒yaya̭nti॒ yamakṣi̭ta॒-makṣi̭tayaḥ॒ piba̭nti | tena̭ no॒ rājā॒ varṷṇo॒ bṛha॒spati॒rā pyā̭yayantu॒ bhuva̭nasya go॒pāḥ |||| ye virṷ̄pe॒ sama̭nasā saṃ॒vya~ya̭ntī | sa॒mā॒na-ntantṷ-mpari tāta॒nāte᳚ | vi॒bhū pra॒bhū a̭nu॒bhū vi॒śvato̭ huve |
te no॒ nakṣa̭tre॒ hava॒māga̭metam ||
va॒ya-nde॒vī brahma̭ṇā saṃvi~dā॒nāḥ |
su॒ratnā̭so de॒vavī̭ti॒-ndadhā̭nāḥ |
a॒ho॒rā॒tre ha॒viṣā̭ va॒rdhaya̭ntaḥ |
ati̭ pā॒pmāna॒-mati̭muktyā gamema || pratyṷvadṛśyāya॒tī || 24 ||
vyu॒cchantī̭ duhi॒tā di॒vaḥ | a॒po ma॒hī vṛ̭ṇute॒ cakṣṷṣā || tamo॒ jyoti̭ṣkṛṇoti sū॒narī᳚ | udu॒striyā᳚-ssacate॒ sūryaḥ̭ | sa cā̭ u॒dyannakṣa̭tra-marci॒mat | tavedṷṣo॒ vyuṣi॒ sūrya̭sya ca ||
sa-mbha॒ktena̭ gamemahi | tanno॒ nakṣa̭tra-marci॒mat | bhā॒nu॒matteja̭ u॒ccara̭t | upa̭ ya॒jña-mi॒hāga̭mat || 25 ||
pra nakṣa̭trāya de॒vāya̭ | indrā॒yendugṃ̭ havāmahe |
sa naḥ̭ savi॒tā sṷva-thsa॒nim | pu॒ṣṭi॒dāṃ-vī~॒rava̭ttamam || udu॒ tya-ñjā॒tavḙdasa-nde॒vaṃ-va~̭hanti ke॒tavaḥ̭ | dṛ॒śe viśvā̭ya॒ sūrya᳚m || ci॒tra-nde॒vānā॒-muda̭gā॒danī̭ka॒-ñcakṣṷ-rmi॒trasya॒ varṷṇasyā॒-'gneḥ | ā-' prā॒ dyāvā̭pṛthi॒vī a॒ntari̭kṣa॒gṃ॒ sūrya̭ ā॒tmā jaga̭tasta॒sthuṣa̭śca ||||
adi̭tirna uruṣya॒tvadi̭ti॒-śśarma̭ yacchatu | adi̭tiḥ pā॒tvagṃ ha̭saḥ || ma॒hīmū॒ṣu mā॒taragṃ̭ suvra॒tānā̭mṛ॒tasya॒ patnī॒mava̭se huvema | tu॒vi॒kṣa॒trāma॒jara̭ntīmurū॒cīgṃ su॒śarmā̭ṇa॒madi̭tigṃ su॒praṇī̭tim || ||
i॒daṃ-vi~ṣṇu॒-rvica̭krame tre॒dhā ni da̭dhe pa॒dam | sa mṷ̄ḍhamasya pāgṃ su॒re || prata-dviṣṇuḥ̭ stavate vī॒ryā̭ya | mṛ॒go na bhī॒maḥ kṷca॒ro gi̭ri॒ṣṭhāḥ | yasyo॒ruṣṷ tri॒ṣu vi॒krama̭ṇeṣu | adhi̭kṣi॒yanti॒ bhuva̭nāni॒ viśvā᳚ || ||
a॒gnirmū॒rdhā di॒vaḥ ka॒ku-tpatiḥ̭ pṛthi॒vyā a॒yam | a॒pāgṃ retāgṃ̭si jinvati || bhuvo̭ ya॒jñasya॒ raja̭saśca ne॒tā yatrā̭ ni॒yudbhi॒-ssaca̭se śi॒vābhiḥ̭ | di॒vi mū॒rdhāna̭-ndadhiṣe suva॒r॒ṣā-ñji॒hvāma̭gne cakṛṣe havya॒vāha᳚m || ||
anṷ no॒-'dyā-'nṷmati-rya॒jña-nde॒veṣṷ manyatām | a॒gniśca̭ havya॒vāha̭no॒ bhava̭tā-ndā॒śuṣe॒ mayaḥ̭ || anvida̭numate॒ tva-mmanyā̭sai॒ śañca̭naḥ kṛdhi | kratve॒ dakṣā̭ya no hinu॒ praṇa॒ āyūgṃ̭ṣi tāriṣaḥ || ||
ha॒vya॒vāha̭-mabhimāti॒ṣā-'ha᳚m | ra॒kṣo॒haṇa॒-mpṛta̭nāsu ji॒ṣṇum | jyoti̭ṣmanta॒-ndīdya̭ta॒-mpura̭ndhim | a॒gnigg svi̭ṣṭa॒kṛta॒mā hṷvema || svi̭ṣṭamagne a॒bhi ta-tpṛ̭ṇāhi | viśvā̭ deva॒ pṛta̭nā a॒bhiṣya | u॒ru-nnaḥ॒ panthā᳚-mpradi॒śanvi bhā̭hi | jyoti̭ṣmaddhehya॒jara̭-nna॒ āyuḥ̭ || || 26 ||
(ā॒ya॒tya̭ - gama॒th - svi̭ṣṭam) (a. 3)
anuvākaṃ 4 - deva nakṣatreṣṭibrāhmaṇam
a॒gnirvā a̭kāmayata | a॒nnā॒do de॒vānāg̭ syā॒miti̭ |
sa e॒tama॒gnaye॒ kṛtti̭kābhyaḥ puro॒ḍāśa̭-ma॒ṣṭāka̭pāla॒-nnira̭vapat | tato॒ vai so᳚-'nnā॒do de॒vānā̭mabhavat | a॒gnirvai de॒vānā̭mannā॒daḥ ||
yathā̭ ha॒ vā a॒gni-rde॒vanā̭-mannā॒daḥ |
e॒vagṃ ha॒ vā e॒ṣa ma̭nu॒ṣyā̭ṇā-mbhavati |
ya e॒tena̭ ha॒viṣā॒ yaja̭te | ya ṷ cainade॒vaṃ-ve~da̭ || so-'tra̭ juhoti | a॒gnaye॒ svāhā॒ kṛtti̭kābhya॒-ssvāhā᳚ | a॒mbāyai॒ svāhā̭ du॒lāyai॒ svāhā᳚ | ni॒ta॒tnyai svāhā॒ 'bhraya̭ntyai॒ svāhā᳚ | me॒ghaya̭ntyai॒ svāhā̭ va॒ra॒.ṣaya̭ntyai॒ svāhā᳚ | cu॒pu॒ṇīkā̭yai॒ svāheti̭ || 27 ||
pra॒jāpa̭tiḥ pra॒jā a̭sṛjata | tā a̭smā-thsṛ॒ṣṭāḥ parā̭cīrāyann | tāsāgṃ̭ rohi॒ṇī-ma॒bhya̭ddhyāyat | so̭-'kāmayata | upa॒ mā-''va̭rteta | samḙnayā gacche॒yeti̭ | sa e॒ta-mpra॒jāpa̭taye rohi॒ṇyai ca॒ru-nnira̭vapat | tato॒ vai sā tamu॒pāva̭rtata | samḙnayā 'gacchata || upa̭ ha॒ vā ḙna-mpri॒yamāva̭rtate |
sa-mpri॒yeṇa̭ gacchate | ya e॒tena̭ ha॒viṣā॒ yaja̭te |
ya ṷ cainade॒vaṃ-ve~da̭ || so-'tra̭ juhoti |
pra॒jāpa̭taye॒ svāhā̭ rohi॒ṇyai svāhā᳚ |
roca̭mānāyai॒ svāhā᳚ pra॒jābhya॒-ssvāheti̭ || 28 ||
somo॒ vā a̭kāmayata | oṣa̭dhīnāgṃ rā॒jya-ma॒bhija̭yeya॒miti̭ | sa e॒tagṃ somā̭ya mṛgaśī॒ra॒.ṣāya̭ śyāmā॒ka-ñca॒ru-mpaya̭si॒ nira̭vapat | tato॒ vai sa oṣa̭dhīnāgṃ
rā॒jyama॒bhya̭jayat | sa॒mā॒nānāgṃ̭ ha॒ vai rā॒jyama॒bhija̭yati | ya e॒tena̭ ha॒viṣā॒ yaja̭te |
ya ṷ cainade॒vaṃ-ve~da̭ | so-'tra̭ juhoti |
somā̭ya॒ svāhā̭ mṛgaśī॒ra॒.ṣāya॒ svāhā᳚ |
i॒nva॒kābhya॒-ssvāhauṣa̭dhībhya॒-ssvāhā᳚ |
rā॒jyāya॒ svāhā॒ 'bhiji̭tyai॒ svāheti̭ || 29 ||
ru॒dro vā a̭kāmayata | pa॒śu॒mān-thsyā॒miti̭ |
sa e॒tagṃ ru॒drāyā॒rdrāyai॒ praiya̭ṅgava-ñca॒ru-mpaya̭si॒ nira̭vapat | tato॒ vai sa pa̭śu॒māna̭bhavat | pa॒śu॒mān. ha॒ vai bha̭vati | ya e॒tena̭ ha॒viṣā॒ yaja̭te | ya ṷ cainade॒vaṃ-ve~da̭ | so-'tra̭ juhoti | ru॒drāya॒ svāhā॒ ''rdrāyai॒ svāhā᳚ | pinva̭mānāyai॒ svāhā̭ pa॒śubhya॒-ssvāheti̭ || 30 ||
ṛ॒kṣā vā i॒yama̭lo॒makā̭-''sīt | sā-'kā̭mayata |
oṣa̭dhībhi॒-rvana॒spati̭bhiḥ॒ prajā̭ye॒yeti̭ |
saitamadi̭tyai॒ puna̭rvasubhyā-ñca॒ru-nnira̭vapat |
tato॒ vā i॒yamoṣa̭dhībhi॒-rvana॒spati̭bhiḥ॒ prājā̭yata |
prajā̭yate ha॒ vai pra॒jayā̭ pa॒śubhiḥ̭ | ya e॒tena̭ ha॒viṣā॒ yaja̭te | ya ṷ cainade॒vaṃ-ve~da̭ |
so-'tra̭ juhoti | adi̭tyai॒ svāhā॒ puna̭rvasubhyām |
svāhā-''bhū᳚tyai॒ svāhā॒ prajā᳚tyai॒ svāheti̭ || 31 ||
bṛha॒spati॒rvā a̭kāmayata | bra॒hma॒va॒rca॒sī syā॒miti̭ |
sa e॒ta-mbṛha॒spata̭ye ti॒ṣyā̭ya naivā॒ra-ñca॒ru-mpaya̭si॒ nira̭vapat | tato॒ vai sa bra̭hmavarca॒sya̭bhavat | bra॒hma॒va॒rca॒sī ha॒ vai bha̭vati | ya e॒tena̭ ha॒viṣā॒ yaja̭te | ya ṷ cainade॒vaṃ-ve~da̭ | so-'tra̭ juhoti |
bṛha॒spata̭ye॒ svāhā̭ ti॒ṣyā̭ya॒ svāhā᳚ | bra॒hma॒va॒rca॒sāya॒ svāheti̭ || 32 ||
de॒vā॒su॒rā-ssaṃya~̭ttā āsann | te de॒vā-ssa॒rpebhya̭ āśre॒ṣābhya॒ ājyḙ kara॒mbha-nnira̭vapann |
tāne॒tābhi̭re॒va de॒vatā̭-bhi॒rupā̭nayann |
e॒tābhi̭rha॒ vai de॒vatā̭bhi-rdvi॒ṣanta॒-mbhrātṛ̭vya॒-mupa̭nayati | ya e॒tena̭ ha॒viṣā॒ yaja̭te |
ya ṷ cainade॒vaṃ-ve~da̭ | so-'tra̭ juhoti |
sa॒rpebhya॒-ssvāhā᳚-''śre॒ṣābhya॒-ssvāhā᳚ | da॒nda॒śūke᳚bhya॒-ssvāheti̭ || 33 ||
pi॒taro॒ vā a̭kāmayanta | pi॒tṛ॒lo॒ka ṛ̭ddhnuyā॒meti̭ |
ta e॒ta-mpi॒tṛbhyo̭ ma॒ghābhyaḥ̭ puro॒ḍāśa॒gṃ॒ ṣaṭka̭pāla॒-nnira̭vapann | tato॒ vai te pi̭tṛlo॒ka ā᳚rdhnuvann | pi॒tṛ॒lo॒ke ha॒ vā ṛ̭dhnoti |
ya e॒tena̭ ha॒viṣā॒ yaja̭te | ya ṷ cainade॒vaṃ-ve~da̭ | so-'tra̭ juhoti | pi॒tṛbhya॒-ssvāhā̭ ma॒ghābhyaḥ̭ |
svāhā̭ 'na॒ghābhya॒-ssvāhā̭ 'ga॒dābhyaḥ̭ |
svāhā̭ 'rundha॒tībhya॒-ssvāheti̭ || 34 ||
a॒rya॒mā vā a̭kāmayata | pa॒śu॒mān-thsyā॒miti̭ |
sa e॒tama̭rya॒mṇe phalgṷnībhyā-ñca॒ru-nnira̭vapat |
tato॒ vai sa pa̭śu॒māna̭bhavat |
pa॒śu॒mān. ha॒ vai bha̭vati | ya e॒tena̭ ha॒viṣā॒ yaja̭te |
ya ṷ cainade॒vaṃ-ve~da̭ | so-'tra̭ juhoti | a॒rya॒mṇe svāhā॒ phalgṷnībhyā॒g॒ svāhā᳚ |
pa॒śubhya॒-ssvāheti̭ || 35 ||
bhago॒ vā a̭kāmayata | bha॒gī śre॒ṣṭhī de॒vānāg̭ syā॒miti̭ | sa e॒ta-mbhagā̭ya॒ phalgṷnībhyā-ñca॒ru-nnira̭vapat | tato॒ vai sa bha॒gī śre॒ṣṭhī de॒vānā̭mabhavat |
bha॒gī ha॒ vai śre॒ṣṭhī sa̭mā॒nānā᳚-mbhavati | ya e॒tena̭ ha॒viṣā॒ yaja̭te | ya ṷ cainade॒vaṃ-ve~da̭ | so-'tra̭ juhoti | bhagā̭ya॒ svāhā॒ phalgṷnībhyā॒g॒ svāhā᳚ | śraiṣṭhyā̭ya॒ svāheti̭ || 36 ||
sa॒vi॒tā vā a̭kāmayata | śranmḙ de॒vā dadhī̭rann | sa॒vi॒tā syā॒miti̭ | sa e॒tagṃ sa̭vi॒tre hastā̭ya puro॒ḍāśa॒-ndvāda̭śakapāla॒-nnira̭vapadāśū॒nāṃ
~vrī̭hī॒ṇām | tato॒ vai tasmai॒ śradde॒vā ada̭dhata | sa॒vi॒tā-'bha̭vat | śraddha॒ vā a̭smai manu॒ṣyā̭ dadhate | sa॒vi॒tā sa̭mā॒nānā᳚-mbhavati | ya e॒tena̭ ha॒viṣā॒ yaja̭te | ya ṷ cainade॒vaṃ-ve~da̭ | so-'tra̭ juhoti |
sa॒vi॒tre svāhā॒ hastā̭ya | svāhā̭ dada॒te svāhā̭ pṛṇa॒te | svāhā᳚ pra॒yaccha̭te॒ svāhā᳚ pratigṛbhṇa॒te svāheti̭ || 37 ||
tvaṣṭā॒ vā a̭kāmayata | ci॒tra-mpra॒jāṃ-vi~̭nde॒yeti̭ |
sa e॒ta-ntvaṣṭrḙ ci॒trāyai̭ puro॒ḍāśa̭ma॒ṣṭā-ka̭pāla॒-nnira̭vapat | tato॒ vai sa ci॒tra-mpra॒jāma̭vindata | ci॒tragṃ ha॒ vai pra॒jāṃ-vi~̭ndate |
ya e॒tena̭ ha॒viṣā॒ yaja̭te |
ya ṷ cainade॒vaṃ-ve~da̭ | so-'tra̭ juhoti |
tvaṣṭre॒ svāhā̭ ci॒trāyai॒ svāhā᳚ |
caitrā̭ya॒ svāhā᳚ pra॒jāyai॒ svāheti̭ || 38 ||
vā॒yurvā a̭kāmayata | kā॒ma॒cāra̭me॒ṣu lo॒keṣva॒bhija̭yeya॒miti̭ | sa e॒ta-dvā॒yave॒ niṣṭyā̭yai gṛ॒ṣṭyai du॒gdha-mpayo॒ nira̭vapat |
tato॒ vai sa kā̭ma॒cāra̭me॒ṣu lo॒keṣva॒bhya̭jayat |
kā॒ma॒cāragṃ̭ ha॒ vā e॒ṣu lo॒keṣva॒bhija̭yati |
ya e॒tena̭ ha॒viṣā॒ yaja̭te | ya ṷ cainade॒vaṃ-ve~da̭ | so-'tra̭ juhoti | vā॒yave॒ svāhā॒ niṣṭyā̭yai॒ svāhā᳚ |
kā॒ma॒cārā̭ya॒ svāhā॒-'bhiji̭tyai॒ svāheti̭ || 39 ||
i॒ndrā॒gnī vā a̭kāmayetām | śraiṣṭhya̭-nde॒vānā̭-ma॒bhija̭ye॒veti̭ | tāve॒tami̭ndrā॒gnibhyāṃ॒-vi~śā̭khābhyā-mpuro॒ḍāśa॒-mekā̭daśakapāla॒-nnira̭vapatām | tato॒ vai tau śraiṣṭhya̭-nde॒vānā̭-ma॒bhya̭jayatām | śraiṣṭhyagṃ̭ ha॒ vai sa̭mā॒nānā̭ma॒bhija̭yati | ya e॒tena̭ ha॒viṣā॒ yaja̭te |
ya ṷ cainade॒vaṃ-ve~da̭ | so-'tra̭ juhoti |
i॒ndrā॒gnibhyā॒g॒ svāhā॒ viśā̭khābhyā॒g॒ svāhā᳚ |
śraiṣṭhyā̭ya॒ svāhā॒ 'bhiji̭tyai॒ svāheti̭ || 40 ||
athai॒tat-pau᳚rṇamā॒syā ājya॒-nnirva̭pati | kāmo॒ vai pau᳚rṇamā॒sī | kāma॒ ājya᳚m | kāmḙnai॒va kāma॒gṃ॒ sama̭rdhayati | kṣi॒pramḙna॒gṃ॒ sa kāma॒ upa̭namati | yena॒ kāmḙna॒ yaja̭te | so-'tra̭ juhoti |
pau॒rṇa॒mā॒syai svāhā॒ kāmā̭ya॒ svāhā-''ga̭tyai॒ svāheti̭ || 41 ||
anuvākaṃ 5 - yamanakṣatreṣṭibrāhmaṇam
mi॒tro vā a̭kāmayata | mi॒tra॒dheya̭me॒ṣu lo॒keṣva॒bhi ja̭yeya॒miti̭ | sa e॒ta-mmi॒trāyā̭nūrā॒dhebhya̭śca॒ru-nnira̭vapat | tato॒ vai sa mi̭tra॒dheya̭me॒ṣu lo॒keṣva॒bhya̭jayat | mi॒tra॒dheyagṃ̭ ha॒ vā e॒ṣu lo॒keṣva॒bhija̭yati | ya e॒tena̭ ha॒viṣā॒ yaja̭te |
ya ṷ cainade॒vaṃ-ve~da̭ | so-'tra̭ juhoti |
mi॒trāya॒ svāhā̭ 'nūrā॒dhebhya॒-ssvāhā᳚ |
mi॒tra॒dheyā̭ya॒ svāhā॒ 'bhiji̭tyai॒ svāheti̭ || 42 ||
indro॒ vā a̭kāmayata | jyaiṣṭhya̭-nde॒vānā̭-ma॒bhija̭yeya॒miti̭ | sa e॒tamindrā̭ya jye॒ṣṭhāyai̭ puro॒ḍāśa॒-mekā̭daśakapāla॒-nnira̭vapa-nma॒hāvrī̭hīṇām | tato॒ vai sa jyaiṣṭhya̭-nde॒vānā̭ma॒bhya̭jayat | jyaiṣṭhyagṃ̭ ha॒ vai sa̭mā॒nānā̭-ma॒bhija̭yati | ya e॒tena̭ ha॒viṣā॒ yaja̭te |
ya ṷ cainade॒vaṃ-ve~da̭ | so-'tra̭ juhoti | indrā̭ya॒ svāhā᳚ jye॒ṣṭhāyai॒ svāhā᳚ |
jyaiṣṭhyā̭ya॒ svāhā॒ 'bhiji̭tyai॒ svāheti̭ || 43 ||
pra॒jāpa̭ti॒rvā a̭kāmayata | mūla̭-mpra॒jāṃ-vi~̭nde॒yeti̭ | sa e॒ta-mpra॒jāpa̭taye॒ mūlā̭ya ca॒ru-nnira̭vapat | tato॒ vai sa mūla̭-mpra॒jāma̭vindata | mūlagṃ̭ ha॒ vai pra॒jāṃ-vi~̭ndate | ya e॒tena̭ ha॒viṣā॒ yaja̭te | ya ṷ cainade॒vaṃ-ve~da̭ | so-'tra̭ juhoti | pra॒jāpa̭taye॒ svāhā॒ mūlā̭ya॒ svāhā᳚ | pra॒jāyai॒ svāheti̭ || 44 ||
āpo॒ vā a̭kāmayanta | sa॒mu॒dra-ṅkāma̭ma॒ bhija̭ye॒meti̭ | tā e॒tama॒dbhyo̭-'ṣā॒ḍhābhya̭śca॒ru-nnira̭vapann | tato॒ vai tā-ssa̭mu॒dra-ṅkāma̭ma॒bhya̭jayann | sa॒mu॒dragṃ ha॒ vai kāma̭ma॒bhija̭yati | ya e॒tena̭ ha॒viṣā॒ yaja̭te |
ya ṷ cainade॒vaṃ-ve~da̭ | so-'tra̭ juhoti |
a॒dbhya-ssvāhā̭ 'ṣā॒ḍhābhya॒-ssvāhā᳚ | sa॒mu॒drāya॒ svāhā॒ kāmā̭ya॒ svāhā᳚ | a॒bhiji̭tyai॒ svāheti̭ || 45 ||
viśve॒ vai de॒vā a̭kāmayanta | a॒na॒pa॒ja॒yya-ñja̭ye॒meti̭ | ta e॒taṃ-vi~śve᳚bhyo de॒vebhyo̭-'ṣā॒ḍhābhya̭śca॒ru-nnira̭vapann |
tato॒ vai tḙ-'napaja॒yya-ma̭jayann | a॒na॒pa॒ja॒yyagṃ ha॒ vai ja̭yati | ya e॒tena̭ ha॒viṣā॒ yaja̭te | ya ṷ cainade॒vaṃ-ve~da̭ | so-'tra̭ juhoti |
viśve᳚bhyo de॒vebhya॒-ssvāhā̭ 'ṣā॒ḍhābhya॒-ssvāhā᳚ |
a॒na॒pa॒ja॒yyāya॒ svāhā॒ jityai॒ svāheti̭ || 46 ||
brahma॒ vā a̭kāmayata | bra॒hma॒lo॒kama॒bhija̭yeya॒miti̭ |
tade॒ta-mbrahma̭ṇe-'bhi॒jitḙ ca॒ru-nnira̭vapat |
tato॒ vai tadbra̭hmalo॒kama॒bhya̭jayat | bra॒hma॒lo॒kagṃ ha॒ vā a॒bhija̭yati | ya e॒tena̭ ha॒viṣā॒ yaja̭te | ya ṷ cainade॒vaṃ-ve~da̭ | so-'tra̭ juhoti | brahma̭ṇe॒ svāhā̭ 'bhi॒jite॒ svāhā᳚ | bra॒hma॒lo॒kāya॒ svāhā॒ 'bhiji̭tyai॒ svāheti̭ || 47 ||
viṣṇu॒rvā a̭kāmayata | puṇya॒gg॒ ślokagṃ̭ śṛṇvīya |
na mā̭ pā॒pī kī॒rtirāga̭cche॒diti̭ | sa e॒taṃ-vi~ṣṇa̭ve śro॒ṇāyai̭ puro॒ḍāśa̭-ntrikapā॒la-nnira̭vapat |
tato॒ vai sa puṇya॒gg॒ śloka̭ma śṛṇuta | naina̭-mpā॒pī kī॒rtirā- ga̭cchat | puṇyagṃ̭ ha॒ vai ślokagṃ̭ śṛṇute | naina̭-mpā॒pī kī॒rtirāga̭cchati | ya e॒tena̭ ha॒viṣā॒ yaja̭te | ya ṷ cainade॒vaṃ-ve~da̭ | so-'tra̭ juhoti |
viṣṇa̭ve॒ svāhā᳚ śro॒ṇāyai॒ svāhā᳚ |
ślokā̭ya॒ svāhā᳚ śru॒tāya॒ svāheti̭ || 48 ||
vasa̭vo॒ vā a̭kāmayanta | agra̭-nde॒vatā̭nā॒-mparī̭yā॒meti̭ | ta e॒taṃ-va~sṷbhya॒-śśravi̭ṣṭhābhyaḥ puro॒ḍāśa̭ma॒ṣṭāka̭pāla॒-nnira̭vapann |
tato॒ vai te-'gra̭-nde॒vatā̭nā॒-mparyā̭yann |
agragṃ̭ ha॒ vai sa̭mā॒nānā॒-mparyḙti |
ya e॒tena̭ ha॒viṣā॒ yaja̭te | ya ṷ cainade॒vaṃ-ve~da̭ | so-'tra̭ juhoti | vasṷbhya॒-ssvāhā॒ śravi̭ṣṭhābhya॒-ssvāhā᳚ | agrā̭ya॒ svāhā॒ parī᳚tyai॒ svāheti̭ || 49 ||
indro॒ vā a̭kāmayata | dṛ॒ḍho 'śi̭thila-ssyā॒miti̭ |
sa e॒taṃ-va~rṷṇāya śa॒tabhi̭ṣaje bheṣa॒jebhyaḥ̭ puro॒ḍāśa॒-ndaśa̭kapāla॒-nnira̭vapat-kṛ॒ṣṇānāṃ᳚-vrī~hī॒ṇām | tato॒ vai sa dṛ॒ḍho-'śi̭thilo-'bhavat |
dṛ॒ḍho ha॒ vā aśi̭thilo bhavati | ya e॒tena̭ ha॒viṣā॒ yaja̭te | ya ṷ cainade॒vaṃ-ve~da̭ | so-'tra̭ juhoti |
varṷṇāya॒ svāhā̭ śa॒tabhi̭ṣaje॒ svāhā᳚ |
bhe॒ṣa॒jebhya॒-ssvāheti̭ || 50 ||
a॒jo vā eka̭pādakāmayata | te॒ja॒svī bra̭hmavarca॒sī syā॒miti̭ | sa e॒tama॒jāyaika̭pade proṣṭhapa॒debhya̭-śca॒ru-nnira̭vapat | tato॒ vai sa tḙja॒svī bra̭hmavarca॒sya̭bhavat | te॒ja॒svī ha॒ vai bra̭hmavarca॒sī bha̭vati | ya e॒tena̭ ha॒viṣā॒ yaja̭te |
ya ṷ cainade॒vaṃ-ve~da̭ | so-'tra̭ juhoti |
a॒jāyaika̭pade॒ svāhā᳚ proṣṭhapa॒debhya॒-ssvāhā᳚ |
teja̭se॒ svāhā᳚ brahmavarca॒sāya॒ svāheti̭ || 51 ||
ahi॒rvai bu॒ddhniyo̭-'kāmayata | i॒mā-mpra̭ti॒ṣṭhāṃ-vi~̭nde॒yeti̭ | sa e॒tamaha̭ye bu॒ddhniyā̭ya proṣṭhapa॒debhyaḥ̭ puro॒ḍāśa॒-mbhūmi̭kapāla॒-nnira̭vapat | tato॒ vai sa i॒mā-mpra̭ti॒ṣṭhā-ma̭vindata | i॒māgṃ ha॒ vai pra̭ti॒ṣṭhāṃ-vi~̭ndate |
ya e॒tena̭ ha॒viṣā॒ yaja̭te | ya ṷ cainade॒vaṃ-ve~da̭ | so-'tra̭ juhoti | aha̭ye bu॒ddhniyā̭ya॒ svāhā᳚ proṣṭhapa॒debhya॒-ssvāhā᳚ |
pra॒ti॒ṣṭhāyai॒ svāheti̭ || 52 ||
pū॒ṣā vā a̭kāmayata | pa॒śu॒mān-thsyā॒miti̭ |
sa e॒ta-mpū॒ṣṇe re॒vatyai̭ ca॒ru-nnira̭vapat |
tato॒ vai sa pa̭śu॒māna̭bhavat |
pa॒śu॒mān. ha॒ vai bha̭vati | ya e॒tena̭ ha॒viṣā॒ yaja̭te | ya ṷ cainade॒vaṃ-ve~da̭ |
so-'tra̭ juhoti | pū॒ṣṇe svāhā̭ re॒vatyai॒ svāhā᳚ |
pa॒śubhya॒-ssvāheti̭ || 53 ||
a॒śvinau॒ vā a̭kāmayetām | śro॒tra॒svinā॒vaba̭dhirau syā॒veti̭ | tāve॒tama॒śvibhyā̭-maśva॒yugbhyā᳚-mpuro॒ḍāśa̭-ndvikapā॒la-nnira̭vapatām |
tato॒ vai tau śro᳚tra॒svinā॒vaba̭dhirā-vabhavatām |
śro॒tra॒svī ha॒ vā aba̭dhiro bhavati | ya e॒tena̭ ha॒viṣā॒ yaja̭te | ya ṷ cainade॒vaṃ-ve~da̭ | so-'tra̭ juhoti |
a॒śvibhyā॒g॒ svāhā᳚-'śva॒yugbhyā॒g॒ svāhā᳚ |
śrotrā̭ya॒ svāhā॒ śrutyai॒ svāheti̭ || 54 ||
ya॒mo vā a̭kāmayata |
pi॒tṛ॒ṇāgṃ rā॒jya-ma॒bhija̭yeya॒miti̭ |
sa e॒taṃ-ya~॒māyā̭pa॒bhara̭ṇībhyaśca॒ru-nnira̭vapat |
tato॒ vai sa pi̭tṛ॒ṇāgṃ rā॒jyama॒bhya̭jayat |
sa॒mā॒nānāgṃ̭ ha॒ vai rā॒jyama॒bhija̭yati |
ya e॒tena̭ ha॒viṣā॒ yaja̭te |
ya ṷ cainade॒vaṃ-ve~da̭ | so-'tra̭ juhoti |
ya॒māya॒ svāhā̭ 'pa॒bhara̭ṇībhya॒-ssvāhā᳚ |
rā॒jyāya॒ svāhā॒ 'bhiji̭tyai svāheti̭ || 55 ||
athai॒tada̭-mā॒vāsyā̭yā॒ ājya॒-nnirva̭pati |
kāmo॒ vā a̭māvā॒syā᳚ | kāma॒ ājya᳚m | kāmḙnai॒va kāma॒gṃ॒ sama̭rdhayati | kṣi॒pramḙna॒gṃ॒ sa kāma॒ upa̭namati | yena॒ kāmḙna॒ yaja̭te | so-'tra̭ juhoti | a॒mā॒vā॒syā̭yai॒ svāhā॒ kāmā̭ya॒ svāhā ''ga̭tyai॒ svāheti̭ || 56 ||
bu॒ddhniyaḥ̭ - pu॒ṣā - 'śvinaṷ - ya॒mo daśa̭da॒śā - thai॒tada̭ - māvā॒syā̭yā a॒ṣṭau pañca̭daśa ) (a. 5)
anuvākaṃ 6 - cāndramasādīṣṭibrāhmaṇam
ca॒ndramā॒ vā a̭kāmayata | a॒ho॒rā॒trā-na̭rdhamā॒sā-nmāsā̭-nṛ॒tūnth- saṃ̭va~thsa॒ra-mā॒ptvā | ca॒ndrama̭sa॒-ssāyṷjyagṃ salo॒katā̭-māpnuyā॒miti̭ | sa e॒ta-ñca॒ndrama̭se pratī॒dṛśyā̭yai puro॒ḍāśa॒-mpañca̭daśakapāla॒-nnira̭vapat |
tato॒ vai so̭-'horā॒trā-na̭rdhamā॒sā-nmāsā̭-nṛ॒tūn-thsaṃ̭va~thsa॒ra-mā॒ptvā |
ca॒ndrama̭sa॒-ssāyṷjyagṃ salo॒katā̭māpnot |
a॒ho॒rā॒trān. ha॒ vā a̭rdhamā॒sā-nmāsā̭n-ṛ॒tūn-thsaṃ̭va~thsa॒ra-mā॒ptvā | ca॒ndrama̭sa॒-ssāyṷjyagṃ salo॒katā̭māpnoti | ya e॒tena̭ ha॒viṣā॒ yaja̭te |
ya ṷ cainade॒vaṃ-ve~da̭ | so-'tra̭ juhoti |
ca॒ndrama̭se॒ svāhā᳚ pratī॒dṛśyā̭yai॒ svāhā᳚ |
a॒ho॒rā॒trebhya॒-ssvāhā᳚ 'rdhamā॒sebhya॒-ssvāhā᳚ |
māse᳚bhya॒-ssvāha॒rtubhya॒-ssvāhā᳚ | saṃ॒va~॒thsa॒rāya॒ svāheti̭ || 57 ||
a॒ho॒rā॒tre vā a̭kāmayetām | atya̭horā॒tre mṷcyevahi |
na nā̭vahorā॒tre ā᳚pnuyātā॒miti̭ | te e॒tama̭ho-rā॒trābhyā᳚-ñca॒ru-nnira̭vapatām | dva॒yānāṃ᳚-vrī~hī॒ṇām | śu॒klānā᳚-ñca kṛ॒ṣṇānā᳚-ñca | sa॒vā॒tyordu॒gdhe | śve॒tāyai̭ ca kṛ॒ṣṇāyai̭ ca |
tato॒ vai te atya̭horā॒tre a̭mucyete |
nainḙ ahorā॒tre ā᳚pnutām | ati̭ ha॒ vā a̭horā॒tre mṷcyate | naina̭mahorā॒tre ā᳚pnutaḥ | ya e॒tena̭ ha॒viṣā॒ yaja̭te | ya ṷ cainade॒vaṃve~da̭ |
so-'tra̭ juhoti | ahne॒ svāhā॒ rātri̭yai॒ svāhā᳚ |
ati̭muktyai॒ svāheti̭ || 58 ||
u॒ṣā vā a̭kāmayata | pri॒yā ''di॒tyasya̭ su॒bhagā᳚ syā॒miti̭ | saitamu॒ṣasḙ ca॒ru-nnira̭vapat |
tato॒ vai sā pri॒yā ''di॒tyasya̭ su॒bhagā̭ 'bhavat |
pri॒yo ha॒ vai sa̭mā॒nānāgṃ̭ su॒bhago̭ bhavati | ya e॒tena̭ ha॒viṣā॒ yaja̭te | ya ṷ cainade॒vaṃ-ve~da̭ | so-'tra̭ juhoti | u॒ṣase॒ svāhā॒ vyṷṣṭyai॒ svāhā᳚ |
vyū॒ṣuṣyai॒ svāhā᳚ vyu॒cchantyai॒ svāhā᳚ | vyṷṣṭāyai॒ svāheti̭ || 59 ||
athai॒tasmai॒ nakṣa̭trāya ca॒ru-nnirva̭pati | yathā॒ tva-nde॒vānā॒masi̭ | e॒vama॒ha-mma̭nu॒ṣyā̭ṇā-mbhūyāsa॒miti̭ | yathā̭ ha॒ vā e॒ta-dde॒vānā᳚m |
e॒vagṃ ha॒ vā e॒ṣa ma̭nu॒ṣyā̭ṇā-mbhavati | ya e॒tena̭ ha॒viṣā॒ yaja̭te | ya ṷ cainade॒vaṃ-ve~da̭ | so-'tra̭ juhoti | nakṣa̭trāya॒ svāho̭deṣya॒te svāhā᳚ |
u॒dya॒te svāhodi̭tāya॒ svāhā᳚ | hara̭se॒ svāhā॒ bhara̭se॒ svāhā᳚ | bhrāja̭se॒ svāhā॒ teja̭se॒ svāhā᳚ |
tapa̭se॒ svāhā᳚ brahmavarca॒sāya॒ svāheti̭ || 60 ||
sūryo॒ vā a̭kāmayata | nakṣa̭trāṇā-mprati॒ṣṭhā syā॒miti̭ | sa e॒tagṃ sūryā̭ya॒ nakṣa̭trebhyaśca॒ru-nnira̭vapat |
tato॒ vai sa nakṣa̭trāṇā-mprati॒ṣṭhā 'bha̭vat |
pra॒ti॒ṣṭhā ha॒ vai sa̭mā॒nānā᳚-mbhavati |
ya e॒tena̭ ha॒viṣā॒ yaja̭te |
ya ṷ cainade॒vaṃ-ve~da̭ | so-'tra̭ juhoti |
sūryā̭ya॒ svāhā॒ nakṣa̭trebhya॒-ssvāhā᳚ | pra॒ti॒ṣṭhāyai॒ svāheti̭ || 61 ||
athai॒tamadi̭tyai ca॒ru-nnirva̭pati | i॒yaṃ-vā~ adi̭tiḥ |
a॒syāme॒va prati̭ tiṣṭhati | so-'tra̭ juhoti |
adi̭tyai॒ svāhā᳚ prati॒ṣṭhāyai॒ svāheti̭ || 62 ||
athai॒taṃ-vi~ṣṇa̭ve ca॒ru-nnirva̭pati | ya॒jño vai viṣṇuḥ̭ | ya॒jña e॒vānta॒taḥ prati̭ tiṣṭhati | so-'tra̭ juhoti | viṣṇa̭ve॒ svāhā̭ ya॒jñāya॒ svāhā᳚ | pra॒ti॒ṣṭhāyai॒ svāheti̭ || 63 ||
(ca॒ndramāḥ॒ pañca̭daśā - horā॒tre sa॒ptada̭ - śo॒ṣā ekā̭da॒śā - thai॒tasmai॒ nakṣa̭ttāya॒ trayo̭daśa॒ - sūryo॒ daśā - thai॒tamadi̭tyai॒ pañcā - thai॒taṃ-vi~ṣṇa̭ve॒ ṣaṭ-thsa॒pta) (a. 6)
[sa॒vi॒tā-''śū॒nāṃ-vrī~̭hī॒ṇāmindro̭ ma॒hāvrī̭hīṇā॒mindraḥ̭ kṛ॒ṣṇānoṃ᳚
~vrīhī॒ṇāma̭horā॒tre dva॒yānāṃ᳚-vrī~hī॒ṇām | pi॒tara॒-ṣṣaṭka̭pālagṃ savi॒tā dvāda̭śakapālamindrā॒gnī ekā̭daśakapāla॒mindra॒ ekā̭daśakapāla॒mindro॒ daśa̭kapālaṃ॒-vi~ṣṇṷstrikapā॒lamahi॒-rbhūmi̭kapālama॒śvinau᳚ dvikapā॒la-ñca॒ndramāḥ॒ pañca̭daśakapāla-ma॒gniratvaṣṭā॒ vasa̭vo॒-'ṣṭāka̭pālama॒nyatra̭ ca॒rum | ru॒dro᳚-'rya॒mā pū॒ṣā pa̭śu॒mān-thsyā॒gṃ॒ somo̭ ru॒dro bṛha॒spatiḥ॒ paya̭si vā॒yuḥ paya॒-ssomo̭ vā॒yuri̭ndrā॒gnī mi॒tra indra॒ āpo॒ brahma̭ ya॒mo̭-'bhiji̭tyai॒ tvaṣṭā᳚ pra॒jāpa̭tiḥ pra॒jāyai̭ paurṇamā॒syā a̭māvā॒syā̭yā॒ āga̭tyai॒ viśve॒ jityā̭
a॒śvinau॒ śrutyai᳚ | brahma॒ tade॒taṃ-vi~ṣṇu॒-ssa e॒taṃ-vā~॒yu-ssa e॒tadāpa॒stāḥ | pi॒taro॒ viśve॒ vasa̭vo-'kāmayanta॒meti॒ ta e॒ta-nnira̭vapann | āpo̭-'kāmayanta॒ meti॒ tā e॒ta-nnira̭vapann | i॒ndrā॒gnī a॒śvinā̭vakāmayetāṃ॒-ve~ti॒ tāve॒ta-nnira̭vapadām | a॒ho॒rā॒tre vā a̭kāmayetā॒miti॒ te e॒ta-nnira̭vapatām |
a॒nyatrā̭kāmayata॒miti॒ sa e॒ta-nnira̭vapat | i॒ndrā॒gnī śraiṣṭhya॒mindro॒ jyaiṣṭhya॒mindro̭ dṛ॒ḍhaḥ |
āhi॒-ssūryo-'di̭tyai॒ viṣṇa̭ve prati॒ṣṭhāyai᳚ |
somo̭ ya॒ma-ssa̭mā॒nānā᳚m | a॒gnirno̭ rīriṣada॒nyatra̭ rīriṣaḥ]
[vi॒duṣo̭ ha॒viṣā॒ ya ṷ cainade॒vaṃ-ve~da̭ | iṣṭi̭bhi॒rya ṷ cainā e॒vaṃ-ve~da̭ |
a॒nyatra̭ brāhma॒ṇe ya ṷ cainame॒vaṃ-ve~da̭ ]
phrapātaka khorvai vi-thstarting phadams òf 1 tò 6 ānuvākams ḥ-
(a॒gnirna̭-ṛ॒ddhyāsma॒-navo̭navo॒-'gni-rmi॒tra - śca॒ndramā॒-ṣṣaṭ)
(a॒gnirna॒ - stanno̭ vā॒yu - rahi̭rbū॒ddhniya̭ - ṛ॒kṣā vā i॒ya - mathai॒ta-tpau᳚rṇamā॒syā - a॒jo vā eka̭pā॒th - sūrya॒ striṣa̭ṣṭiḥ)
(a॒gnirnaḥ̭ - pātu prati॒ṣṭhāyai॒ svāheti̭ )
|| hariḥ̭ om ||
|| kṛṣṇa yajurvedīya taittirīya brāhmaṇe tṛtīyāṣṭake prathamaḥ prapāṭhaka-ssamāptaḥ ||
🕉️ This is the original Sanskrit rendered in Telugu script.
Pronunciation is identical to the Sanskrit Devanagari version.