Kalyanavrishti Stavah — Sinhala Script

කල්යාණවෘෂ්ටිභිරිවාමෘතපූරිතාභි-

-ර්ලක්ෂ්මීස්වයංවරණමඞ්ගලදීපිකාභිඃ .

සේවාභිරම්බ තව පාදසරෝජමූලේ

නාකාරි කිං මනසි භාග්යවතාං ජනානාම් .. 1 ..

ඒතාවදේව ජනනි ස්පෘහණීයමාස්තේ

ත්වද්වන්දනේෂු සලිලස්ථගිතේ ච නේත්රේ .

සාන්නිධ්යමුද්යදරුණායුතසෝදරස්ය

ත්වද්විග්රහස්ය පරයා සුධයාප්ලුතස්ය .. 2 ..

ඊශත්වනාමකලුෂාඃ කති වා න සන්ති

බ්රහ්මාදයඃ ප්රතිභවං ප්රලයාභිභූතාඃ .

ඒකඃ ස ඒව ජනනි ස්ථිරසිද්ධිරාස්තේ

යඃ පාදයෝස්තව සකෘත්ප්රණතිං කරෝති .. 3 ..

ලබ්ධ්වා සකෘත්ත්රිපුරසුන්දරි තාවකීනං

කාරුණ්යකන්දලිතකාන්තිභරං කටාක්ෂම් .

කන්දර්පකෝටිසුභගාස්ත්වයි භක්තිභාජඃ

සම්මෝහයන්ති තරුණීර්භුවනත්රයේ(අ)පි .. 4 ..

හ්රීං‍කාරමේව තව නාම ගෘණන්ති වේදා

මාතස්ත්රිකෝණනිලයේ ත්රිපුරේ ත්රිනේත්රේ .

ත්වත්සංස්මෘතෞ යමභටාභිභවං විහාය

දීව්යන්ති නන්දනවනේ සහ ලෝකපාලෛඃ .. 5 ..

හන්තුඃ පුරාමධිගලං පරිපීයමානඃ

ක්රූරඃ කථං න භවිතා ගරලස්ය වේගඃ .

නාශ්වාසනාය යදි මාතරිදං තවාර්ථං

දේහස්ය ශශ්වදමෘතාප්ලුතශීතලස්ය .. 6 ..

සර්වජ්ඤතාං සදසි වාක්පටුතාං ප්රසූතේ

දේවි ත්වදඞ්ඝ්රිසරසීරුහයෝඃ ප්රණාමඃ .

කිං ච ස්ඵුරන්මකුටමුජ්ජ්වලමාතපත්රං

ද්වේ චාමරේ ච මහතීං වසුධාං දදාති .. 7 ..

කල්පද්රුමෛරභිමතප්රතිපාදනේෂු

කාරුණ්යවාරිධිභිරම්බ භවාත්කටාක්ෂෛඃ .

ආලෝකය ත්රිපුරසුන්දරි මාමනාථං

ත්වය්යේව භක්තිභරිතං ත්වයි බද්ධතෘෂ්ණම් .. 8 ..

හන්තේතරේෂ්වපි මනාංසි නිධාය චාන්යේ

භක්තිං වහන්ති කිල පාමරදෛවතේෂු .

ත්වාමේව දේවි මනසා සමනුස්මරාමි

ත්වාමේව නෞමි ශරණං ජනනි ත්වමේව .. 9 ..

ලක්ෂ්යේෂු සත්ස්වපි කටාක්ෂනිරීක්ෂණානා-

-මාලෝකය ත්රිපුරසුන්දරි මාං කදාචිත් .

නූනං මයා තු සදෘශඃ කරුණෛකපාත්රං

ජාතෝ ජනිෂ්යති ජනෝ න ච ජායතේ වා .. 10 ..

හ්රීං හ්රීමිති ප්රතිදිනං ජපතාං තවාඛ්යාං

කිං නාම දුර්ලභමිහ ත්රිපුරාධිවාසේ .

මාලාකිරීටමදවාරණමානනීයා

තාන්සේවතේ වසුමතී ස්වයමේව ලක්ෂ්මීඃ .. 11 ..

සම්පත්කරාණි සකලේන්ද්රියනන්දනානි

සාම්රාජ්යදානනිරතානි සරෝරුහාක්ෂි .

ත්වද්වන්දනානි දුරිතාහරණෝද්යතානි

මාමේව මාතරනිශං කලයන්තු නාන්යම් .. 12 ..

කල්පෝපසංහෘතිෂු කල්පිතතාණ්ඩවස්ය

දේවස්ය ඛණ්ඩපරශෝඃ පරභෛරවස්ය .

පාශාඞ්කුශෛක්ෂවශරාසනපුෂ්පබාණා

සා සාක්ෂිණී විජයතේ තව මූර්තිරේකා .. 13 ..

ලග්නං සදා භවතු මාතරිදං තවාර්ධං

තේජඃ පරං බහුලකුඞ්කුමපඞ්කශෝණම් .

භාස්වත්කිරීටමමෘතාංශුකලාවතංසං

මධ්යේ ත්රිකෝණනිලයං පරමාමෘතාර්ද්රම් .. 14 ..

හ්රීං‍කාරමේව තව නාම තදේව රූපං

ත්වන්නාම දුර්ලභමිහ ත්රිපුරේ ගෘණන්ති .

ත්වත්තේජසා පරිණතං වියදාදිභූතං

සෞඛ්යං තනෝති සරසීරුහසම්භවාදේඃ .. 15 ..

හ්රීං‍කාරත්රයසම්පුටේන මහතා මන්ත්රේණ සන්දීපිතං

ස්තෝත්රං යඃ ප්රතිවාසරං තව පුරෝ මාතර්ජපේන්මන්ත්රවිත් .

තස්ය ක්ෂෝණිභුජෝ භවන්ති වශගා ලක්ෂ්මීශ්චිරස්ථායිනී

වාණී නිර්මලසූක්තිභාරභාරිතා ජාගර්ති දීර්ඝං වයඃ .. 16 ..

ඉති ශ්රීමත්පරමහංසපරිව්රාජකාචාර්යස්ය ශ්රීගෝවින්දභගවත්පූජ්යපාදශිෂ්යස්ය ශ්රීමච්ඡඞ්කරභගවතඃ කෘතෞ කල්යාණවෘෂ්ටි ස්තවඃ .

Roman (IAST) Transliteration

kalyāṇavṛṣṭibhirivāmṛtapūritābhi-

-rlakṣmīsvayaṃvaraṇamaṅgaladīpikābhiḥ |

sevābhiramba tava pādasarojamūle

nākāri kiṃ manasi bhāgyavatāṃ janānām || 1 ||

etāvadeva janani spṛhaṇīyamāste

tvadvandaneṣu salilasthagite ca netre |

sānnidhyamudyadaruṇāyutasodarasya

tvadvigrahasya parayā sudhayāplutasya || 2 ||

īśatvanāmakaluṣāḥ kati vā na santi

brahmādayaḥ pratibhavaṃ pralayābhibhūtāḥ |

ekaḥ sa eva janani sthirasiddhirāste

yaḥ pādayostava sakṛtpraṇatiṃ karoti || 3 ||

labdhvā sakṛttripurasundari tāvakīnaṃ

kāruṇyakandalitakāntibharaṃ kaṭākṣam |

kandarpakoṭisubhagāstvayi bhaktibhājaḥ

sammohayanti taruṇīrbhuvanatraye'pi || 4 ||

hrīṃ‍kārameva tava nāma gṛṇanti vedā

mātastrikoṇanilaye tripure trinetre |

tvatsaṃsmṛtau yamabhaṭābhibhavaṃ vihāya

dīvyanti nandanavane saha lokapālaiḥ || 5 ||

hantuḥ purāmadhigalaṃ paripīyamānaḥ

krūraḥ kathaṃ na bhavitā garalasya vegaḥ |

nāśvāsanāya yadi mātaridaṃ tavārthaṃ

dehasya śaśvadamṛtāplutaśītalasya || 6 ||

sarvajñatāṃ sadasi vākpaṭutāṃ prasūte

devi tvadaṅghrisarasīruhayoḥ praṇāmaḥ |

kiṃ ca sphuranmakuṭamujjvalamātapatraṃ

dve cāmare ca mahatīṃ vasudhāṃ dadāti || 7 ||

kalpadrumairabhimatapratipādaneṣu

kāruṇyavāridhibhiramba bhavātkaṭākṣaiḥ |

ālokaya tripurasundari māmanāthaṃ

tvayyeva bhaktibharitaṃ tvayi baddhatṛṣṇam || 8 ||

hantetareṣvapi manāṃsi nidhāya cānye

bhaktiṃ vahanti kila pāmaradaivateṣu |

tvāmeva devi manasā samanusmarāmi

tvāmeva naumi śaraṇaṃ janani tvameva || 9 ||

lakṣyeṣu satsvapi kaṭākṣanirīkṣaṇānā-

-mālokaya tripurasundari māṃ kadācit |

nūnaṃ mayā tu sadṛśaḥ karuṇaikapātraṃ

jāto janiṣyati jano na ca jāyate vā || 10 ||

hrīṃ hrīmiti pratidinaṃ japatāṃ tavākhyāṃ

kiṃ nāma durlabhamiha tripurādhivāse |

mālākirīṭamadavāraṇamānanīyā

tānsevate vasumatī svayameva lakṣmīḥ || 11 ||

sampatkarāṇi sakalendriyanandanāni

sāmrājyadānaniratāni saroruhākṣi |

tvadvandanāni duritāharaṇodyatāni

māmeva mātaraniśaṃ kalayantu nānyam || 12 ||

kalpopasaṃhṛtiṣu kalpitatāṇḍavasya

devasya khaṇḍaparaśoḥ parabhairavasya |

pāśāṅkuśaikṣavaśarāsanapuṣpabāṇā

sā sākṣiṇī vijayate tava mūrtirekā || 13 ||

lagnaṃ sadā bhavatu mātaridaṃ tavārdhaṃ

tejaḥ paraṃ bahulakuṅkumapaṅkaśoṇam |

bhāsvatkirīṭamamṛtāṃśukalāvataṃsaṃ

madhye trikoṇanilayaṃ paramāmṛtārdram || 14 ||

hrīṃ‍kārameva tava nāma tadeva rūpaṃ

tvannāma durlabhamiha tripure gṛṇanti |

tvattejasā pariṇataṃ viyadādibhūtaṃ

saukhyaṃ tanoti sarasīruhasambhavādeḥ || 15 ||

hrīṃ‍kāratrayasampuṭena mahatā mantreṇa sandīpitaṃ

stotraṃ yaḥ prativāsaraṃ tava puro mātarjapenmantravit |

tasya kṣoṇibhujo bhavanti vaśagā lakṣmīścirasthāyinī

vāṇī nirmalasūktibhārabhāritā jāgarti dīrghaṃ vayaḥ || 16 ||

iti śrīmatparamahaṃsaparivrājakācāryasya śrīgovindabhagavatpūjyapādaśiṣyasya śrīmacchaṅkarabhagavataḥ kṛtau kalyāṇavṛṣṭi stavaḥ |

Sanskrit — Devanagari (original)

कल्याणवृष्टिभिरिवामृतपूरिताभि-

-र्लक्ष्मीस्वयंवरणमङ्गलदीपिकाभिः ।

सेवाभिरम्ब तव पादसरोजमूले

नाकारि किं मनसि भाग्यवतां जनानाम् ॥ 1 ॥

एतावदेव जननि स्पृहणीयमास्ते

त्वद्वन्दनेषु सलिलस्थगिते च नेत्रे ।

सान्निध्यमुद्यदरुणायुतसोदरस्य

त्वद्विग्रहस्य परया सुधयाप्लुतस्य ॥ 2 ॥

ईशत्वनामकलुषाः कति वा न सन्ति

ब्रह्मादयः प्रतिभवं प्रलयाभिभूताः ।

एकः स एव जननि स्थिरसिद्धिरास्ते

यः पादयोस्तव सकृत्प्रणतिं करोति ॥ 3 ॥

लब्ध्वा सकृत्त्रिपुरसुन्दरि तावकीनं

कारुण्यकन्दलितकान्तिभरं कटाक्षम् ।

कन्दर्पकोटिसुभगास्त्वयि भक्तिभाजः

सम्मोहयन्ति तरुणीर्भुवनत्रयेऽपि ॥ 4 ॥

ह्रीं‍कारमेव तव नाम गृणन्ति वेदा

मातस्त्रिकोणनिलये त्रिपुरे त्रिनेत्रे ।

त्वत्संस्मृतौ यमभटाभिभवं विहाय

दीव्यन्ति नन्दनवने सह लोकपालैः ॥ 5 ॥

हन्तुः पुरामधिगलं परिपीयमानः

क्रूरः कथं न भविता गरलस्य वेगः ।

नाश्वासनाय यदि मातरिदं तवार्थं

देहस्य शश्वदमृताप्लुतशीतलस्य ॥ 6 ॥

सर्वज्ञतां सदसि वाक्पटुतां प्रसूते

देवि त्वदङ्घ्रिसरसीरुहयोः प्रणामः ।

किं च स्फुरन्मकुटमुज्ज्वलमातपत्रं

द्वे चामरे च महतीं वसुधां ददाति ॥ 7 ॥

कल्पद्रुमैरभिमतप्रतिपादनेषु

कारुण्यवारिधिभिरम्ब भवात्कटाक्षैः ।

आलोकय त्रिपुरसुन्दरि मामनाथं

त्वय्येव भक्तिभरितं त्वयि बद्धतृष्णम् ॥ 8 ॥

हन्तेतरेष्वपि मनांसि निधाय चान्ये

भक्तिं वहन्ति किल पामरदैवतेषु ।

त्वामेव देवि मनसा समनुस्मरामि

त्वामेव नौमि शरणं जननि त्वमेव ॥ 9 ॥

लक्ष्येषु सत्स्वपि कटाक्षनिरीक्षणाना-

-मालोकय त्रिपुरसुन्दरि मां कदाचित् ।

नूनं मया तु सदृशः करुणैकपात्रं

जातो जनिष्यति जनो न च जायते वा ॥ 10 ॥

ह्रीं ह्रीमिति प्रतिदिनं जपतां तवाख्यां

किं नाम दुर्लभमिह त्रिपुराधिवासे ।

मालाकिरीटमदवारणमाननीया

तान्सेवते वसुमती स्वयमेव लक्ष्मीः ॥ 11 ॥

सम्पत्कराणि सकलेन्द्रियनन्दनानि

साम्राज्यदाननिरतानि सरोरुहाक्षि ।

त्वद्वन्दनानि दुरिताहरणोद्यतानि

मामेव मातरनिशं कलयन्तु नान्यम् ॥ 12 ॥

कल्पोपसंहृतिषु कल्पितताण्डवस्य

देवस्य खण्डपरशोः परभैरवस्य ।

पाशाङ्कुशैक्षवशरासनपुष्पबाणा

सा साक्षिणी विजयते तव मूर्तिरेका ॥ 13 ॥

लग्नं सदा भवतु मातरिदं तवार्धं

तेजः परं बहुलकुङ्कुमपङ्कशोणम् ।

भास्वत्किरीटममृतांशुकलावतंसं

मध्ये त्रिकोणनिलयं परमामृतार्द्रम् ॥ 14 ॥

ह्रीं‍कारमेव तव नाम तदेव रूपं

त्वन्नाम दुर्लभमिह त्रिपुरे गृणन्ति ।

त्वत्तेजसा परिणतं वियदादिभूतं

सौख्यं तनोति सरसीरुहसम्भवादेः ॥ 15 ॥

ह्रीं‍कारत्रयसम्पुटेन महता मन्त्रेण सन्दीपितं

स्तोत्रं यः प्रतिवासरं तव पुरो मातर्जपेन्मन्त्रवित् ।

तस्य क्षोणिभुजो भवन्ति वशगा लक्ष्मीश्चिरस्थायिनी

वाणी निर्मलसूक्तिभारभारिता जागर्ति दीर्घं वयः ॥ 16 ॥

इति श्रीमत्परमहंसपरिव्राजकाचार्यस्य श्रीगोविन्दभगवत्पूज्यपादशिष्यस्य श्रीमच्छङ्करभगवतः कृतौ कल्याणवृष्टि स्तवः ।