Amba Stavah — Sinhala Script

යාමාමනන්ති මුනයඃ ප්රකෘතිං පුරාණීං

විද්යේති යාං ශ්රුතිරහස්යවිදෝ වදන්ති .

තාමර්ධපල්ලවිතශඞ්කරරූපමුද්රාං

දේවීමනන්යශරණඃ ශරණං ප්රපද්යේ .. 1 ..

අම්බ ස්තවේෂු තව තාවදකර්තෘකාණි

කුණ්ඨීභවන්ති වචසාමපි ගුම්භනානි .

ඩිම්භස්ය මේ ස්තුතිරසාවසමඤ්ජසාපි

වාත්සල්යනිඝ්නහෘදයාං භවතීං ධිනෝතු .. 2 ..

ව්යෝමේති බින්දුරිති නාද ඉතීන්දුලේඛා-

-රූපේති වාග්භවතනූරිති මාතෘකේති .

නිඃස්යන්දමානසුඛබෝධසුධාස්වරූපා

විද්යෝතසේ මනසි භාග්යවතාං ජනානාම් .. 3 ..

ආවිර්භවත්පුලකසන්තතිභිඃ ශරීරෛ-

-ර්නිඃස්යන්දමානසලිලෛර්නයනෛශ්ච නිත්යම් .

වාග්භිශ්ච ගද්ගදපදාභිරුපාසතේ යේ

පාදෞ තවාම්බ භුවනේෂු ත ඒව ධන්යාඃ .. 4 ..

වක්ත්රං යදුද්යතමභිෂ්ටුතයේ භවත්යා-

-ස්තුභ්යං නමෝ යදපි දේවි ශිරඃ කරෝති .

චේතශ්ච යත්ත්වයි පරායණමම්බ තානි

කස්යාපි කෛරපි භවන්ති තපෝවිශේෂෛඃ .. 5 ..

මූලාලවාලකුහරාදුදිතා භවානි

නිර්භිද්ය ෂට්සරසිජානි තටිල්ලතේව .

භූයෝ(අ)පි තත්ර විශසි ධ්රුවමණ්ඩලේන්දු-

-නිඃස්යන්දමානපරමාමෘතතෝයරූපා .. 6 ..

දග්ධං යදා මදනමේකමනේකධා තේ

මුග්ධඃ කටාක්ෂවිධිරඞ්කුරයාඤ්චකාර .

ධත්තේ තදාප්රභෘති දේවි ලලාටනේත්රං

සත්යං හ්රියෛව මුකුලීකෘතමින්දුමෞලේඃ .. 7 ..

අජ්ඤාතසම්භවමනාකලිතාන්වවායං

භික්ෂුං කපාලිනමවාසසමද්විතීයම් .

පූර්වං කරග්රහණමඞ්ගලතෝ භවත්යාඃ

ශම්භුං ක ඒව බුබුධේ ගිරිරාජකන්යේ .. 8 ..

චර්මාම්බරං ච ශවභස්මවිලේපනං ච

භික්ෂාටනං ච නටනං ච පරේතභූමෞ .

වේතාලසංහතිපරිග්රහතා ච ශම්භෝඃ

ශෝභාං බිභර්ති ගිරිජේ තව සාහචර්යාත් .. 9 ..

කල්පෝපසංහරණකේලිෂු පණ්ඩිතානි

චණ්ඩානි ඛණ්ඩපරශෝරපි තාණ්ඩවානි .

ආලෝකනේන තව කෝමලිතානි මාත-

-ර්ලාස්යාත්මනා පරිණමන්ති ජගද්විභූත්යෛ .. 10 ..

ජන්තෝරපශ්චිමතනෝඃ සති කර්මසාම්යේ

නිඃශේෂපාශපටලච්ඡිදුරා නිමේෂාත් .

කල්යාණි දේශිකකටාක්ෂසමාශ්රයේණ

කාරුණ්යතෝ භවති ශාම්භවවේදදීක්ෂා .. 11 ..

මුක්තාවිභූෂණවතී නවවිද්රුමාභා

යච්චේතසි ස්ඵුරසි තාරකිතේව සන්ධ්යා .

ඒකඃ ස ඒව භුවනත්රයසුන්දරීණාං

කන්දර්පතාං ව්රජති පඤ්චශරීං විනාපි .. 12 ..

යේ භාවයන්ත්යමෘතවාහිභිරංශුජාලෛ-

-රාප්යායමානභුවනාමමෘතේශ්වරීං ත්වාම් .

තේ ලඞ්ඝයන්ති නනු මාතරලඞ්ඝනීයාං

බ්රහ්මාදිභිඃ සුරවරෛරපි කාලකක්ෂාම් .. 13 ..

යඃ ස්ඵාටිකාක්ෂගුණපුස්තකකුණ්ඩිකාඪ්යාං

ව්යාඛ්යාසමුද්යතකරාං ශරදින්දුශුභ්රාම් .

පද්මාසනාං ච හෘදයේ භවතීමුපාස්තේ

මාතඃ ස විශ්වකවිතාර්කිකචක්රවර්තී .. 14 ..

බර්හාවතංසයුතබර්බරකේශපාශාං

ගුඤ්ජාවලීකෘතඝනස්තනහාරශෝභාම් .

ශ්යාමාං ප්රවාලවදනාං සුකුමාරහස්තාං

ත්වාමේව නෞමි ශබරීං ශබරස්ය ජායාම් .. 15 ..

අර්ධේන කිං නවලතාලලිතේන මුග්ධේ

ක්රීතං විභෝඃ පරුෂමර්ධමිදං ත්වයේති .

ආලීජනස්ය පරිහාසවචාංසි මන්යේ

මන්දස්මිතේන තව දේවි ජඩී භවන්ති .. 16 ..

බ්රහ්මාණ්ඩ බුද්බුදකදම්බකසඞ්කුලෝ(අ)යං

මායෝදධිර්විවිධදුඃඛතරඞ්ගමාලඃ .

ආශ්චර්යමම්බ ඣටිති ප්රලයං ප්රයාති

ත්වද්ධ්යානසන්තතිමහාබඩබාමුඛාග්නෞ .. 17 ..

දාක්ෂායණීති කුටිලේති කුහාරිණීති

කාත්යායනීති කමලේති කලාවතීති .

ඒකා සතී භගවතී පරමාර්ථතෝ(අ)පි

සන්දෘශ්යසේ බහුවිධා නනු නර්තකීව .. 18 ..

ආනන්දලක්ෂණමනාහතනාම්නි දේශේ

නාදාත්මනා පරිණතං තව රූපමීශේ .

ප්රත්යඞ්මුඛේන මනසා පරිචීයමානං

ශංසන්ති නේත්රසලිලෛඃ පුලකෛශ්ච ධන්යාඃ .. 19 ..

ත්වං චන්ද්රිකා ශශිනි තිග්මරුචෞ රුචිස්ත්වං

ත්වං චේතනාසි පුරුෂේ පවනේ බලං ත්වම් .

ත්වං ස්වාදුතාසි සලිලේ ශිඛිනි ත්වමූෂ්මා

නිඃසාරමේව නිඛිලං ත්වදෘතේ යදි ස්යාත් .. 20 ..

ජ්යෝතීංෂි යද්දිවි චරන්ති යදන්තරික්ෂං

සූතේ පයාංසි යදහිර්ධරණීං ච ධත්තේ .

යද්වාති වායුරනලෝ යදුදර්චිරාස්තේ

තත්සර්වමම්බ තව කේවලමාජ්ඤයෛව .. 21 ..

සඞ්කෝචමිච්ඡසි යදා ගිරිජේ තදානීං

වාක්තර්කයෝස්ත්වමසි භූමිරනාමරූපා .

යද්වා විකාසමුපයාසි යදා තදානීං

ත්වන්නාමරූපගණනාඃ සුකරා භවන්ති .. 22 ..

භෝගාය දේවි භවතීං කෘතිනඃ ප්රණම්ය

භ්රූකිඞ්කරීකෘතසරෝජගෘහාඃ සහස්රම් .

චින්තාමණිප්රචයකල්පිතකේලිශෛලේ

කල්පද්රුමෝපවන ඒව චිරං රමන්තේ .. 23 ..

හර්තුං ත්වමේව භවසි ත්වදධීනමීශේ

සංසාරතාපමඛිලං දයයා පශූනාම් .

වෛකර්තනී කිරණසංහතිරේව ශක්තා

ධර්මං නිජං ශමයිතුං නිජයෛව වෘෂ්ට්යා .. 24 ..

ශක්තිඃ ශරීරමධිදෛවතමන්තරාත්මා

ජ්ඤානං ක්රියා කරණමාසනජාලමිච්ඡා .

ඓශ්වර්යමායතනමාවරණානි ච ත්වං

කිං තන්න යද්භවසි දේවි ශශාඞ්කමෞලේඃ .. 25 ..

භූමෞ නිවෘත්තිරුදිතා පයසි ප්රතිෂ්ඨා

විද්යා(අ)නලේ මරුති ශාන්තිරතීවකාන්තිඃ .

ව්යෝම්නීති යාඃ කිල කලාඃ කලයන්ති විශ්වං

තාසාං හි දූරතරමම්බ පදං ත්වදීයම් .. 26 ..

යාවත්පදං පදසරෝජයුගං ත්වදීයං

නාඞ්ගීකරෝති හෘදයේෂු ජගච්ඡරණ්යේ .

තාවද්විකල්පජටිලාඃ කුටිලප්රකාරා-

-ස්තර්කග්රහාඃ සමයිනාං ප්රලයං න යාන්ති .. 27 ..

නිර්දේවයානපිතෘයානවිහාරමේකේ

කෘත්වා මනඃ කරණමණ්ඩලසාර්වභෞමම් .

ධ්යානේ නිවේශ්ය තව කාරණපඤ්චකස්ය

පර්වාණි පාර්වති නයන්ති නිජාසනත්වම් .. 28 ..

ස්ථූලාසු මූර්තිෂු මහීප්රමුඛාසු මූර්තේඃ

කස්යාශ්චනාපි තව වෛභවමම්බ යස්යාඃ .

පත්යා ගිරාමපි න ශක්යත ඒව වක්තුං

සාපි ස්තුතා කිල මයේති තිතික්ෂිතව්යම් .. 29 ..

කාලාග්නිකෝටිරුචිමම්බ ෂඩධ්වශුද්ධෞ

ආප්ලාවනේෂු භවතීමමෘතෞඝවෘෂ්ටිම් .

ශ්යාමාං ඝනස්තනතටාං ශකලීකෘතාඝාං

ධ්යායන්ත ඒව ජගතාං ගුරවෝ භවන්ති .. 30 ..

විද්යාං පරාං කතිචිදම්බරමම්බ කේචි-

-දානන්දමේව කතිචිත්කතිචිච්ච මායාම් .

ත්වාං විශ්වමාහුරපරේ වයමාමනාමඃ

සාක්ෂාදපාරකරුණාං ගුරුමූර්තිමේව .. 31 ..

කුවලයදලනීලං බර්බරස්නිග්ධකේශං

පෘථුතරකුචභාරාක්රාන්තකාන්තාවලග්නම් .

කිමිහ බහුභිරුක්තෛස්ත්වත්ස්වරූපං පරං නඃ

සකලජනනි මාතඃ සන්තතං සන්නිධත්තාම් .. 32 ..

ඉති ශ්රීකාලිදාස විරචිත පඤ්චස්තව්යාං චතුර්ථඃ අම්බාස්තවඃ .

Roman (IAST) Transliteration

yāmāmananti munayaḥ prakṛtiṃ purāṇīṃ

vidyeti yāṃ śrutirahasyavido vadanti |

tāmardhapallavitaśaṅkararūpamudrāṃ

devīmananyaśaraṇaḥ śaraṇaṃ prapadye || 1 ||

amba staveṣu tava tāvadakartṛkāṇi

kuṇṭhībhavanti vacasāmapi gumbhanāni |

ḍimbhasya me stutirasāvasamañjasāpi

vātsalyanighnahṛdayāṃ bhavatīṃ dhinotu || 2 ||

vyometi binduriti nāda itīndulekhā-

-rūpeti vāgbhavatanūriti mātṛketi |

niḥsyandamānasukhabodhasudhāsvarūpā

vidyotase manasi bhāgyavatāṃ janānām || 3 ||

āvirbhavatpulakasantatibhiḥ śarīrai-

-rniḥsyandamānasalilairnayanaiśca nityam |

vāgbhiśca gadgadapadābhirupāsate ye

pādau tavāmba bhuvaneṣu ta eva dhanyāḥ || 4 ||

vaktraṃ yadudyatamabhiṣṭutaye bhavatyā-

-stubhyaṃ namo yadapi devi śiraḥ karoti |

cetaśca yattvayi parāyaṇamamba tāni

kasyāpi kairapi bhavanti tapoviśeṣaiḥ || 5 ||

mūlālavālakuharāduditā bhavāni

nirbhidya ṣaṭsarasijāni taṭillateva |

bhūyo'pi tatra viśasi dhruvamaṇḍalendu-

-niḥsyandamānaparamāmṛtatoyarūpā || 6 ||

dagdhaṃ yadā madanamekamanekadhā te

mugdhaḥ kaṭākṣavidhiraṅkurayāñcakāra |

dhatte tadāprabhṛti devi lalāṭanetraṃ

satyaṃ hriyaiva mukulīkṛtamindumauleḥ || 7 ||

ajñātasambhavamanākalitānvavāyaṃ

bhikṣuṃ kapālinamavāsasamadvitīyam |

pūrvaṃ karagrahaṇamaṅgalato bhavatyāḥ

śambhuṃ ka eva bubudhe girirājakanye || 8 ||

carmāmbaraṃ ca śavabhasmavilepanaṃ ca

bhikṣāṭanaṃ ca naṭanaṃ ca paretabhūmau |

vetālasaṃhatiparigrahatā ca śambhoḥ

śobhāṃ bibharti girije tava sāhacaryāt || 9 ||

kalpopasaṃharaṇakeliṣu paṇḍitāni

caṇḍāni khaṇḍaparaśorapi tāṇḍavāni |

ālokanena tava komalitāni māta-

-rlāsyātmanā pariṇamanti jagadvibhūtyai || 10 ||

jantorapaścimatanoḥ sati karmasāmye

niḥśeṣapāśapaṭalacchidurā nimeṣāt |

kalyāṇi deśikakaṭākṣasamāśrayeṇa

kāruṇyato bhavati śāmbhavavedadīkṣā || 11 ||

muktāvibhūṣaṇavatī navavidrumābhā

yaccetasi sphurasi tārakiteva sandhyā |

ekaḥ sa eva bhuvanatrayasundarīṇāṃ

kandarpatāṃ vrajati pañcaśarīṃ vināpi || 12 ||

ye bhāvayantyamṛtavāhibhiraṃśujālai-

-rāpyāyamānabhuvanāmamṛteśvarīṃ tvām |

te laṅghayanti nanu mātaralaṅghanīyāṃ

brahmādibhiḥ suravarairapi kālakakṣām || 13 ||

yaḥ sphāṭikākṣaguṇapustakakuṇḍikāḍhyāṃ

vyākhyāsamudyatakarāṃ śaradinduśubhrām |

padmāsanāṃ ca hṛdaye bhavatīmupāste

mātaḥ sa viśvakavitārkikacakravartī || 14 ||

barhāvataṃsayutabarbarakeśapāśāṃ

guñjāvalīkṛtaghanastanahāraśobhām |

śyāmāṃ pravālavadanāṃ sukumārahastāṃ

tvāmeva naumi śabarīṃ śabarasya jāyām || 15 ||

ardhena kiṃ navalatālalitena mugdhe

krītaṃ vibhoḥ paruṣamardhamidaṃ tvayeti |

ālījanasya parihāsavacāṃsi manye

mandasmitena tava devi jaḍī bhavanti || 16 ||

brahmāṇḍa budbudakadambakasaṅkulo'yaṃ

māyodadhirvividhaduḥkhataraṅgamālaḥ |

āścaryamamba jhaṭiti pralayaṃ prayāti

tvaddhyānasantatimahābaḍabāmukhāgnau || 17 ||

dākṣāyaṇīti kuṭileti kuhāriṇīti

kātyāyanīti kamaleti kalāvatīti |

ekā satī bhagavatī paramārthato'pi

sandṛśyase bahuvidhā nanu nartakīva || 18 ||

ānandalakṣaṇamanāhatanāmni deśe

nādātmanā pariṇataṃ tava rūpamīśe |

pratyaṅmukhena manasā paricīyamānaṃ

śaṃsanti netrasalilaiḥ pulakaiśca dhanyāḥ || 19 ||

tvaṃ candrikā śaśini tigmarucau rucistvaṃ

tvaṃ cetanāsi puruṣe pavane balaṃ tvam |

tvaṃ svādutāsi salile śikhini tvamūṣmā

niḥsārameva nikhilaṃ tvadṛte yadi syāt || 20 ||

jyotīṃṣi yaddivi caranti yadantarikṣaṃ

sūte payāṃsi yadahirdharaṇīṃ ca dhatte |

yadvāti vāyuranalo yadudarcirāste

tatsarvamamba tava kevalamājñayaiva || 21 ||

saṅkocamicchasi yadā girije tadānīṃ

vāktarkayostvamasi bhūmiranāmarūpā |

yadvā vikāsamupayāsi yadā tadānīṃ

tvannāmarūpagaṇanāḥ sukarā bhavanti || 22 ||

bhogāya devi bhavatīṃ kṛtinaḥ praṇamya

bhrūkiṅkarīkṛtasarojagṛhāḥ sahasram |

cintāmaṇipracayakalpitakeliśaile

kalpadrumopavana eva ciraṃ ramante || 23 ||

hartuṃ tvameva bhavasi tvadadhīnamīśe

saṃsāratāpamakhilaṃ dayayā paśūnām |

vaikartanī kiraṇasaṃhatireva śaktā

dharmaṃ nijaṃ śamayituṃ nijayaiva vṛṣṭyā || 24 ||

śaktiḥ śarīramadhidaivatamantarātmā

jñānaṃ kriyā karaṇamāsanajālamicchā |

aiśvaryamāyatanamāvaraṇāni ca tvaṃ

kiṃ tanna yadbhavasi devi śaśāṅkamauleḥ || 25 ||

bhūmau nivṛttiruditā payasi pratiṣṭhā

vidyā'nale maruti śāntiratīvakāntiḥ |

vyomnīti yāḥ kila kalāḥ kalayanti viśvaṃ

tāsāṃ hi dūrataramamba padaṃ tvadīyam || 26 ||

yāvatpadaṃ padasarojayugaṃ tvadīyaṃ

nāṅgīkaroti hṛdayeṣu jagaccharaṇye |

tāvadvikalpajaṭilāḥ kuṭilaprakārā-

-starkagrahāḥ samayināṃ pralayaṃ na yānti || 27 ||

nirdevayānapitṛyānavihārameke

kṛtvā manaḥ karaṇamaṇḍalasārvabhaumam |

dhyāne niveśya tava kāraṇapañcakasya

parvāṇi pārvati nayanti nijāsanatvam || 28 ||

sthūlāsu mūrtiṣu mahīpramukhāsu mūrteḥ

kasyāścanāpi tava vaibhavamamba yasyāḥ |

patyā girāmapi na śakyata eva vaktuṃ

sāpi stutā kila mayeti titikṣitavyam || 29 ||

kālāgnikoṭirucimamba ṣaḍadhvaśuddhau

āplāvaneṣu bhavatīmamṛtaughavṛṣṭim |

śyāmāṃ ghanastanataṭāṃ śakalīkṛtāghāṃ

dhyāyanta eva jagatāṃ guravo bhavanti || 30 ||

vidyāṃ parāṃ katicidambaramamba keci-

-dānandameva katicitkaticicca māyām |

tvāṃ viśvamāhurapare vayamāmanāmaḥ

sākṣādapārakaruṇāṃ gurumūrtimeva || 31 ||

kuvalayadalanīlaṃ barbarasnigdhakeśaṃ

pṛthutarakucabhārākrāntakāntāvalagnam |

kimiha bahubhiruktaistvatsvarūpaṃ paraṃ naḥ

sakalajanani mātaḥ santataṃ sannidhattām || 32 ||

iti śrīkālidāsa viracita pañcastavyāṃ caturthaḥ ambāstavaḥ |

Sanskrit — Devanagari (original)

यामामनन्ति मुनयः प्रकृतिं पुराणीं

विद्येति यां श्रुतिरहस्यविदो वदन्ति ।

तामर्धपल्लवितशङ्कररूपमुद्रां

देवीमनन्यशरणः शरणं प्रपद्ये ॥ 1 ॥

अम्ब स्तवेषु तव तावदकर्तृकाणि

कुण्ठीभवन्ति वचसामपि गुम्भनानि ।

डिम्भस्य मे स्तुतिरसावसमञ्जसापि

वात्सल्यनिघ्नहृदयां भवतीं धिनोतु ॥ 2 ॥

व्योमेति बिन्दुरिति नाद इतीन्दुलेखा-

-रूपेति वाग्भवतनूरिति मातृकेति ।

निःस्यन्दमानसुखबोधसुधास्वरूपा

विद्योतसे मनसि भाग्यवतां जनानाम् ॥ 3 ॥

आविर्भवत्पुलकसन्ततिभिः शरीरै-

-र्निःस्यन्दमानसलिलैर्नयनैश्च नित्यम् ।

वाग्भिश्च गद्गदपदाभिरुपासते ये

पादौ तवाम्ब भुवनेषु त एव धन्याः ॥ 4 ॥

वक्त्रं यदुद्यतमभिष्टुतये भवत्या-

-स्तुभ्यं नमो यदपि देवि शिरः करोति ।

चेतश्च यत्त्वयि परायणमम्ब तानि

कस्यापि कैरपि भवन्ति तपोविशेषैः ॥ 5 ॥

मूलालवालकुहरादुदिता भवानि

निर्भिद्य षट्सरसिजानि तटिल्लतेव ।

भूयोऽपि तत्र विशसि ध्रुवमण्डलेन्दु-

-निःस्यन्दमानपरमामृततोयरूपा ॥ 6 ॥

दग्धं यदा मदनमेकमनेकधा ते

मुग्धः कटाक्षविधिरङ्कुरयाञ्चकार ।

धत्ते तदाप्रभृति देवि ललाटनेत्रं

सत्यं ह्रियैव मुकुलीकृतमिन्दुमौलेः ॥ 7 ॥

अज्ञातसम्भवमनाकलितान्ववायं

भिक्षुं कपालिनमवाससमद्वितीयम् ।

पूर्वं करग्रहणमङ्गलतो भवत्याः

शम्भुं क एव बुबुधे गिरिराजकन्ये ॥ 8 ॥

चर्माम्बरं च शवभस्मविलेपनं च

भिक्षाटनं च नटनं च परेतभूमौ ।

वेतालसंहतिपरिग्रहता च शम्भोः

शोभां बिभर्ति गिरिजे तव साहचर्यात् ॥ 9 ॥

कल्पोपसंहरणकेलिषु पण्डितानि

चण्डानि खण्डपरशोरपि ताण्डवानि ।

आलोकनेन तव कोमलितानि मात-

-र्लास्यात्मना परिणमन्ति जगद्विभूत्यै ॥ 10 ॥

जन्तोरपश्चिमतनोः सति कर्मसाम्ये

निःशेषपाशपटलच्छिदुरा निमेषात् ।

कल्याणि देशिककटाक्षसमाश्रयेण

कारुण्यतो भवति शाम्भववेददीक्षा ॥ 11 ॥

मुक्ताविभूषणवती नवविद्रुमाभा

यच्चेतसि स्फुरसि तारकितेव सन्ध्या ।

एकः स एव भुवनत्रयसुन्दरीणां

कन्दर्पतां व्रजति पञ्चशरीं विनापि ॥ 12 ॥

ये भावयन्त्यमृतवाहिभिरंशुजालै-

-राप्यायमानभुवनाममृतेश्वरीं त्वाम् ।

ते लङ्घयन्ति ननु मातरलङ्घनीयां

ब्रह्मादिभिः सुरवरैरपि कालकक्षाम् ॥ 13 ॥

यः स्फाटिकाक्षगुणपुस्तककुण्डिकाढ्यां

व्याख्यासमुद्यतकरां शरदिन्दुशुभ्राम् ।

पद्मासनां च हृदये भवतीमुपास्ते

मातः स विश्वकवितार्किकचक्रवर्ती ॥ 14 ॥

बर्हावतंसयुतबर्बरकेशपाशां

गुञ्जावलीकृतघनस्तनहारशोभाम् ।

श्यामां प्रवालवदनां सुकुमारहस्तां

त्वामेव नौमि शबरीं शबरस्य जायाम् ॥ 15 ॥

अर्धेन किं नवलताललितेन मुग्धे

क्रीतं विभोः परुषमर्धमिदं त्वयेति ।

आलीजनस्य परिहासवचांसि मन्ये

मन्दस्मितेन तव देवि जडी भवन्ति ॥ 16 ॥

ब्रह्माण्ड बुद्बुदकदम्बकसङ्कुलोऽयं

मायोदधिर्विविधदुःखतरङ्गमालः ।

आश्चर्यमम्ब झटिति प्रलयं प्रयाति

त्वद्ध्यानसन्ततिमहाबडबामुखाग्नौ ॥ 17 ॥

दाक्षायणीति कुटिलेति कुहारिणीति

कात्यायनीति कमलेति कलावतीति ।

एका सती भगवती परमार्थतोऽपि

सन्दृश्यसे बहुविधा ननु नर्तकीव ॥ 18 ॥

आनन्दलक्षणमनाहतनाम्नि देशे

नादात्मना परिणतं तव रूपमीशे ।

प्रत्यङ्मुखेन मनसा परिचीयमानं

शंसन्ति नेत्रसलिलैः पुलकैश्च धन्याः ॥ 19 ॥

त्वं चन्द्रिका शशिनि तिग्मरुचौ रुचिस्त्वं

त्वं चेतनासि पुरुषे पवने बलं त्वम् ।

त्वं स्वादुतासि सलिले शिखिनि त्वमूष्मा

निःसारमेव निखिलं त्वदृते यदि स्यात् ॥ 20 ॥

ज्योतींषि यद्दिवि चरन्ति यदन्तरिक्षं

सूते पयांसि यदहिर्धरणीं च धत्ते ।

यद्वाति वायुरनलो यदुदर्चिरास्ते

तत्सर्वमम्ब तव केवलमाज्ञयैव ॥ 21 ॥

सङ्कोचमिच्छसि यदा गिरिजे तदानीं

वाक्तर्कयोस्त्वमसि भूमिरनामरूपा ।

यद्वा विकासमुपयासि यदा तदानीं

त्वन्नामरूपगणनाः सुकरा भवन्ति ॥ 22 ॥

भोगाय देवि भवतीं कृतिनः प्रणम्य

भ्रूकिङ्करीकृतसरोजगृहाः सहस्रम् ।

चिन्तामणिप्रचयकल्पितकेलिशैले

कल्पद्रुमोपवन एव चिरं रमन्ते ॥ 23 ॥

हर्तुं त्वमेव भवसि त्वदधीनमीशे

संसारतापमखिलं दयया पशूनाम् ।

वैकर्तनी किरणसंहतिरेव शक्ता

धर्मं निजं शमयितुं निजयैव वृष्ट्या ॥ 24 ॥

शक्तिः शरीरमधिदैवतमन्तरात्मा

ज्ञानं क्रिया करणमासनजालमिच्छा ।

ऐश्वर्यमायतनमावरणानि च त्वं

किं तन्न यद्भवसि देवि शशाङ्कमौलेः ॥ 25 ॥

भूमौ निवृत्तिरुदिता पयसि प्रतिष्ठा

विद्याऽनले मरुति शान्तिरतीवकान्तिः ।

व्योम्नीति याः किल कलाः कलयन्ति विश्वं

तासां हि दूरतरमम्ब पदं त्वदीयम् ॥ 26 ॥

यावत्पदं पदसरोजयुगं त्वदीयं

नाङ्गीकरोति हृदयेषु जगच्छरण्ये ।

तावद्विकल्पजटिलाः कुटिलप्रकारा-

-स्तर्कग्रहाः समयिनां प्रलयं न यान्ति ॥ 27 ॥

निर्देवयानपितृयानविहारमेके

कृत्वा मनः करणमण्डलसार्वभौमम् ।

ध्याने निवेश्य तव कारणपञ्चकस्य

पर्वाणि पार्वति नयन्ति निजासनत्वम् ॥ 28 ॥

स्थूलासु मूर्तिषु महीप्रमुखासु मूर्तेः

कस्याश्चनापि तव वैभवमम्ब यस्याः ।

पत्या गिरामपि न शक्यत एव वक्तुं

सापि स्तुता किल मयेति तितिक्षितव्यम् ॥ 29 ॥

कालाग्निकोटिरुचिमम्ब षडध्वशुद्धौ

आप्लावनेषु भवतीममृतौघवृष्टिम् ।

श्यामां घनस्तनतटां शकलीकृताघां

ध्यायन्त एव जगतां गुरवो भवन्ति ॥ 30 ॥

विद्यां परां कतिचिदम्बरमम्ब केचि-

-दानन्दमेव कतिचित्कतिचिच्च मायाम् ।

त्वां विश्वमाहुरपरे वयमामनामः

साक्षादपारकरुणां गुरुमूर्तिमेव ॥ 31 ॥

कुवलयदलनीलं बर्बरस्निग्धकेशं

पृथुतरकुचभाराक्रान्तकान्तावलग्नम् ।

किमिह बहुभिरुक्तैस्त्वत्स्वरूपं परं नः

सकलजननि मातः सन्ततं सन्निधत्ताम् ॥ 32 ॥

इति श्रीकालिदास विरचित पञ्चस्तव्यां चतुर्थः अम्बास्तवः ।