Shri Venkateshvara Sahasranama Stotram — Devanagari Script

Verse 1

भगवन् केन विधिना नामभिर्वेङ्कटेश्वरम् ।
पूजयामास तं देवं ब्रह्मा तु कमलैः शुभैः ॥ 1 ॥

bhagavan kena vidhinā nāmabhirveṅkaṭeśvaram |
pūjayāmāsa taṃ devaṃ brahmā tu kamalaiḥ śubhaiḥ || 1 ||

Verse 2

पृच्छामि तानि नामानि गुणयोगपराणि किम् ।
मुख्यवृत्तीनि किं ब्रूहि लक्षकाण्यथवा हरेः ॥ 2 ॥

pṛcchāmi tāni nāmāni guṇayogaparāṇi kim |
mukhyavṛttīni kiṃ brūhi lakṣakāṇyathavā hareḥ || 2 ||

Verse 3

नामान्यनन्तानि हरेः गुणयोगानि कानि चित् ।
मुख्यवृत्तीनि चान्यानि लक्षकाण्यपराणि च ॥ 3 ॥

nāmānyanantāni hareḥ guṇayogāni kāni cit |
mukhyavṛttīni cānyāni lakṣakāṇyaparāṇi ca || 3 ||

Verse 4

परमार्थैः सर्वशब्दैरेको ज्ञेयः परः पुमान् ।
आदिमध्यान्तरहितस्त्वव्यक्तोऽनन्तरूपभृत् ॥ 4 ॥

paramārthaiḥ sarvaśabdaireko jñeyaḥ paraḥ pumān |
ādimadhyāntarahitastvavyakto'nantarūpabhṛt || 4 ||

Verse 5

चन्द्रार्कवह्निवाय्वाद्या ग्रहर्क्षाणि नभो दिशः ।
अन्वयव्यतिरेकाभ्यां सन्ति नो सन्ति यन्मतेः ॥ 5 ॥

candrārkavahnivāyvādyā graharkṣāṇi nabho diśaḥ |
anvayavyatirekābhyāṃ santi no santi yanmateḥ || 5 ||

Verse 6

तस्य देवस्य नाम्नां हि पारं गन्तुं हि कः क्षमः ।
तथाऽपि चाभिधानानि वेङ्कटेशस्य कानिचित् ॥ 6 ॥

tasya devasya nāmnāṃ hi pāraṃ gantuṃ hi kaḥ kṣamaḥ |
tathā'pi cābhidhānāni veṅkaṭeśasya kānicit || 6 ||

Verse 7

ब्रह्मगीतानि पुण्यानि तानि वक्ष्यामि सुव्रत ।
यदुच्चारणमात्रेण विमुक्ताघः परं व्रजेत् ॥ 7 ॥

brahmagītāni puṇyāni tāni vakṣyāmi suvrata |
yaduccāraṇamātreṇa vimuktāghaḥ paraṃ vrajet || 7 ||

Verse 8

वेङ्कटेशस्य नाम्नां हि सहस्रस्य ऋषिर्विधिः ।
छन्दोऽनुष्टुप्तथा देवः श्रीवत्साङ्को रमापतिः ॥ 8 ॥

veṅkaṭeśasya nāmnāṃ hi sahasrasya ṛṣirvidhiḥ |
chando'nuṣṭuptathā devaḥ śrīvatsāṅko ramāpatiḥ || 8 ||

Verse 9

बीजभूतस्तथोङ्कारो ह्रीं क्लीं शक्तिश्च कीलकम् ।
ॐ नमो वेङ्कटेशायेत्यादिर्मन्त्रोऽत्र कथ्यते ॥ 9 ॥

bījabhūtastathoṅkāro hrīṃ klīṃ śaktiśca kīlakam |
oṃ namo veṅkaṭeśāyetyādirmantro'tra kathyate || 9 ||

Verse 10

ब्रह्माण्डगर्भः कवचमस्त्रं चक्रगदाधरः ।
विनियोगोऽभीष्टसिद्धौ हृदयं सामगायनः ॥ 10 ॥

brahmāṇḍagarbhaḥ kavacamastraṃ cakragadādharaḥ |
viniyogo'bhīṣṭasiddhau hṛdayaṃ sāmagāyanaḥ || 10 ||

अस्य श्री वेङ्कटेश सहस्रनाम स्तोत्र महामन्त्रस्य ब्रह्मा ऋषिः अनुष्टुप् छन्दः श्रीवत्साङ्को रमापतिर्देवता ॐ बीजं ह्रीं शक्तिः क्लीं कीलकं ब्रह्माण्डगर्भ इति कवचं चक्रगदाधर इत्यस्त्रं सामगानमिति हृदयं ॐ नमो वेङ्कटेशायेत्यादिर्मन्त्रः श्री वेङ्कटेश प्रीत्यर्थे जपे विनियोगः ॥
ध्यानम्
भास्वच्चन्द्रमसौ यदीयनयने भार्या यदीया रमा
यस्माद्विश्वसृडप्यभूद्यमिकुलं यद्ध्यानयुक्तं सदा
नाथो यो जगतां नगेन्द्रदुहितुर्नाथोऽपि यद्भक्तिमान्
तातो यो मदनस्य यो दुरितहा तं वेङ्कटेशं भजे ॥
ऊर्ध्वौ हस्तौ यदीयौ सुररिपुदलने बिभ्रतौ शङ्खचक्रे
सेव्यावङ्घ्री स्वकीयावभिदधदधरो दक्षिणो यस्य पाणिः ।
तावन्मात्रं भवाब्धिं गमयति भजतामूरुगो वामपाणिः
श्रीवत्साङ्कश्च लक्ष्मीर्यदुरसि लसतस्तं भजे वेङ्कटेशम् ॥

asya śrī veṅkaṭeśa sahasranāma stotra mahāmantrasya brahmā ṛṣiḥ anuṣṭup chandaḥ śrīvatsāṅko ramāpatirdevatā oṃ bījaṃ hrīṃ śaktiḥ klīṃ kīlakaṃ brahmāṇḍagarbha iti kavacaṃ cakragadādhara ityastraṃ sāmagānamiti hṛdayaṃ oṃ namo veṅkaṭeśāyetyādirmantraḥ śrī veṅkaṭeśa prītyarthe jape viniyogaḥ ||
dhyānam
bhāsvaccandramasau yadīyanayane bhāryā yadīyā ramā
yasmādviśvasṛḍapyabhūdyamikulaṃ yaddhyānayuktaṃ sadā
nātho yo jagatāṃ nagendraduhiturnātho'pi yadbhaktimān
tāto yo madanasya yo duritahā taṃ veṅkaṭeśaṃ bhaje ||
ūrdhvau hastau yadīyau suraripudalane bibhratau śaṅkhacakre
sevyāvaṅghrī svakīyāvabhidadhadadharo dakṣiṇo yasya pāṇiḥ |
tāvanmātraṃ bhavābdhiṃ gamayati bhajatāmūrugo vāmapāṇiḥ
śrīvatsāṅkaśca lakṣmīryadurasi lasatastaṃ bhaje veṅkaṭeśam ||

इति ध्यायन् वेङ्कटेशं श्रीवत्साङ्कं रमापतिम् ।
वेङ्कटेशो विरूपाक्ष इत्यारभ्य जपेत्क्रमात् ॥

Verse 1

स्तोत्रं
ॐ वेङ्कटेशो विरूपाक्षो विश्वेशो विश्वभावनः ।
विश्वसृड्विश्वसंहर्ता विश्वप्राणो विराड्वपुः ॥ 1 ॥

stotraṃ
oṃ veṅkaṭeśo virūpākṣo viśveśo viśvabhāvanaḥ |
viśvasṛḍviśvasaṃhartā viśvaprāṇo virāḍvapuḥ || 1 ||

Verse 2

शेषाद्रिनिलयोऽशेषभक्तदुःखप्रणाशनः ।
शेषस्तुत्यः शेषशायी विशेषज्ञो विभुः स्वभूः ॥ 2 ॥

śeṣādrinilayo'śeṣabhaktaduḥkhapraṇāśanaḥ |
śeṣastutyaḥ śeṣaśāyī viśeṣajño vibhuḥ svabhūḥ || 2 ||

Verse 3

विष्णुर्जिष्णुश्च वर्धिष्णुरुत्सहिष्णुः सहिष्णुकः ।
भ्राजिष्णुश्च ग्रसिष्णुश्च वर्तिष्णुश्च भरिष्णुकः ॥ 3 ॥

viṣṇurjiṣṇuśca vardhiṣṇurutsahiṣṇuḥ sahiṣṇukaḥ |
bhrājiṣṇuśca grasiṣṇuśca vartiṣṇuśca bhariṣṇukaḥ || 3 ||

Verse 4

कालयन्ता कालगोप्ता कालः कालान्तकोऽखिलः ।
कालगम्यः कालकण्ठवन्द्यः कालकलेश्वरः ॥ 4 ॥

kālayantā kālagoptā kālaḥ kālāntako'khilaḥ |
kālagamyaḥ kālakaṇṭhavandyaḥ kālakaleśvaraḥ || 4 ||

Verse 5

शम्भुः स्वयम्भूरम्भोजनाभिः स्तम्भितवारिधिः ।
अम्भोधिनन्दिनीजानिः शोणाम्भोजपदप्रभः ॥ 5 ॥

śambhuḥ svayambhūrambhojanābhiḥ stambhitavāridhiḥ |
ambhodhinandinījāniḥ śoṇāmbhojapadaprabhaḥ || 5 ||

Verse 6

कम्बुग्रीवः शम्बरारिरूपः शम्बरजेक्षणः ।
बिम्बाधरो बिम्बरूपी प्रतिबिम्बक्रियातिगः ॥ 6 ॥

kambugrīvaḥ śambarārirūpaḥ śambarajekṣaṇaḥ |
bimbādharo bimbarūpī pratibimbakriyātigaḥ || 6 ||

Verse 7

गुणवान् गुणगम्यश्च गुणातीतो गुणप्रियः ।
दुर्गुणध्वंसकृत्सर्वसुगुणो गुणभासकः ॥ 7 ॥

guṇavān guṇagamyaśca guṇātīto guṇapriyaḥ |
durguṇadhvaṃsakṛtsarvasuguṇo guṇabhāsakaḥ || 7 ||

Verse 8

परेशः परमात्मा च परञ्ज्योतिः परा गतिः ।
परं पदं वियद्वासाः पारम्पर्यशुभप्रदः ॥ 8 ॥

pareśaḥ paramātmā ca parañjyotiḥ parā gatiḥ |
paraṃ padaṃ viyadvāsāḥ pāramparyaśubhapradaḥ || 8 ||

Verse 9

ब्रह्माण्डगर्भो ब्रह्मण्यो ब्रह्मसृड्ब्रह्मबोधितः ।
ब्रह्मस्तुत्यो ब्रह्मवादी ब्रह्मचर्यपरायणः ॥ 9 ॥

brahmāṇḍagarbho brahmaṇyo brahmasṛḍbrahmabodhitaḥ |
brahmastutyo brahmavādī brahmacaryaparāyaṇaḥ || 9 ||

Verse 10

सत्यव्रतार्थसन्तुष्टः सत्यरूपी झषाङ्गवान् ।
सोमकप्राणहारी चाऽऽनीताम्नायोऽब्धिसञ्चरः ॥ 10 ॥

satyavratārthasantuṣṭaḥ satyarūpī jhaṣāṅgavān |
somakaprāṇahārī cā''nītāmnāyo'bdhisañcaraḥ || 10 ||

Verse 11

देवासुरवरस्तुत्यः पतन्मन्दरधारकः ।
धन्वन्तरिः कच्छपाङ्गः पयोनिधिविमन्थकः ॥ 11 ॥

devāsuravarastutyaḥ patanmandaradhārakaḥ |
dhanvantariḥ kacchapāṅgaḥ payonidhivimanthakaḥ || 11 ||

Verse 12

अमरामृतसन्धाता धृतसं‍मोहिनीवपुः ।
हरमोहकमायावी रक्षस्सन्दोहभञ्जनः ॥ 12 ॥

amarāmṛtasandhātā dhṛtasaṃ‍mohinīvapuḥ |
haramohakamāyāvī rakṣassandohabhañjanaḥ || 12 ||

Verse 13

हिरण्याक्षविदारी च यज्ञो यज्ञविभावनः ।
यज्ञीयोर्वीसमुद्धर्ता लीलाक्रोडः प्रतापवान् ॥ 13 ॥

hiraṇyākṣavidārī ca yajño yajñavibhāvanaḥ |
yajñīyorvīsamuddhartā līlākroḍaḥ pratāpavān || 13 ||

Verse 14

दण्डकासुरविध्वंसी वक्रदंष्ट्रः क्षमाधरः ।
गन्धर्वशापहरणः पुण्यगन्धो विचक्षणः ॥ 14 ॥

daṇḍakāsuravidhvaṃsī vakradaṃṣṭraḥ kṣamādharaḥ |
gandharvaśāpaharaṇaḥ puṇyagandho vicakṣaṇaḥ || 14 ||

Verse 15

करालवक्त्रः सोमार्कनेत्रः षड्गुणवैभवः ।
श्वेतघोणी घूर्णितभ्रूर्घुर्घुरध्वनिविभ्रमः ॥ 15 ॥

karālavaktraḥ somārkanetraḥ ṣaḍguṇavaibhavaḥ |
śvetaghoṇī ghūrṇitabhrūrghurghuradhvanivibhramaḥ || 15 ||

Verse 16

द्राघीयान् नीलकेशी च जाग्रदम्बुजलोचनः ।
घृणावान् घृणिसम्मोहो महाकालाग्निदीधितिः ॥ 16 ॥

drāghīyān nīlakeśī ca jāgradambujalocanaḥ |
ghṛṇāvān ghṛṇisammoho mahākālāgnidīdhitiḥ || 16 ||

Verse 17

ज्वालाकरालवदनो महोल्काकुलवीक्षणः ।
सटानिर्भिन्नमेघौघो दंष्ट्रारुग्व्याप्तदिक्तटः ॥ 17 ॥

jvālākarālavadano maholkākulavīkṣaṇaḥ |
saṭānirbhinnameghaugho daṃṣṭrārugvyāptadiktaṭaḥ || 17 ||

Verse 18

उच्छ्वासाकृष्टभूतेशो निश्श्वासत्यक्तविश्वसृट् ।
अन्तर्भ्रमज्जगद्गर्भोऽनन्तो ब्रह्मकपालहृत् ॥ 18 ॥

ucchvāsākṛṣṭabhūteśo niśśvāsatyaktaviśvasṛṭ |
antarbhramajjagadgarbho'nanto brahmakapālahṛt || 18 ||

Verse 19

उग्रो वीरो महाविष्णुर्ज्वलनः सर्वतोमुखः ।
नृसिंहो भीषणो भद्रो मृत्युमृत्युः सनातनः ॥ 19 ॥

ugro vīro mahāviṣṇurjvalanaḥ sarvatomukhaḥ |
nṛsiṃho bhīṣaṇo bhadro mṛtyumṛtyuḥ sanātanaḥ || 19 ||

Verse 20

सभास्तम्भोद्भवो भीमः शीरोमाली महेश्वरः ।
द्वादशादित्यचूडालः कल्पधूमसटाच्छविः ॥ 20 ॥

sabhāstambhodbhavo bhīmaḥ śīromālī maheśvaraḥ |
dvādaśādityacūḍālaḥ kalpadhūmasaṭācchaviḥ || 20 ||

Verse 21

हिरण्यकोरःस्थलभिन्नखः सिंहमुखोऽनघः ।
प्रह्लादवरदो धीमान् भक्तसङ्घप्रतिष्ठितः ॥ 21 ॥

hiraṇyakoraḥsthalabhinnakhaḥ siṃhamukho'naghaḥ |
prahlādavarado dhīmān bhaktasaṅghapratiṣṭhitaḥ || 21 ||

Verse 22

ब्रह्मरुद्रादिसंसेव्यः सिद्धसाध्यप्रपूजितः ।
लक्ष्मीनृसिंहो देवेशो ज्वालाजिह्वान्त्रमालिकः ॥ 22 ॥

brahmarudrādisaṃsevyaḥ siddhasādhyaprapūjitaḥ |
lakṣmīnṛsiṃho deveśo jvālājihvāntramālikaḥ || 22 ||

Verse 23

खड्गी खेटी महेष्वासी कपाली मुसली हली ।
पाशी शूली महाबाहुर्ज्वरघ्नो रोगलुण्ठकः ॥ 23 ॥

khaḍgī kheṭī maheṣvāsī kapālī musalī halī |
pāśī śūlī mahābāhurjvaraghno rogaluṇṭhakaḥ || 23 ||

Verse 24

मौञ्जीयुक् छात्रको दण्डी कृष्णाजिनधरो वटुः ।
अधीतवेदो वेदान्तोद्धारको ब्रह्मनैष्ठिकः ॥ 24 ॥

mauñjīyuk chātrako daṇḍī kṛṣṇājinadharo vaṭuḥ |
adhītavedo vedāntoddhārako brahmanaiṣṭhikaḥ || 24 ||

Verse 25

अहीनशयनप्रीतः आदितेयोऽनघो हरिः ।
संवित्प्रियः सामवेद्यो बलिवेश्मप्रतिष्ठितः ॥ 25 ॥

ahīnaśayanaprītaḥ āditeyo'nagho hariḥ |
saṃvitpriyaḥ sāmavedyo baliveśmapratiṣṭhitaḥ || 25 ||

Verse 26

बलिक्षालितपादाब्जो विन्ध्यावलिविमानितः ।
त्रिपादभूमिस्वीकर्ता विश्वरूपप्रदर्शकः ॥ 26 ॥

balikṣālitapādābjo vindhyāvalivimānitaḥ |
tripādabhūmisvīkartā viśvarūpapradarśakaḥ || 26 ||

Verse 27

धृतत्रिविक्रमः स्वाङ्घ्रिनखभिन्नाण्डखर्परः ।
पज्जातवाहिनीधारापवित्रितजगत्त्रयः ॥ 27 ॥

dhṛtatrivikramaḥ svāṅghrinakhabhinnāṇḍakharparaḥ |
pajjātavāhinīdhārāpavitritajagattrayaḥ || 27 ||

Verse 28

विधिसम्मानितः पुण्यो दैत्ययोद्धा जयोर्जितः ।
सुरराज्यप्रदः शुक्रमदहृत्सुगतीश्वरः ॥ 28 ॥

vidhisammānitaḥ puṇyo daityayoddhā jayorjitaḥ |
surarājyapradaḥ śukramadahṛtsugatīśvaraḥ || 28 ||

Verse 29

जामदग्न्यः कुठारी च कार्तवीर्यविदारणः ।
रेणुकायाः शिरोहारी दुष्टक्षत्रियमर्दनः ॥ 29 ॥

jāmadagnyaḥ kuṭhārī ca kārtavīryavidāraṇaḥ |
reṇukāyāḥ śirohārī duṣṭakṣatriyamardanaḥ || 29 ||

Verse 30

वर्चस्वी दानशीलश्च धनुष्मान् ब्रह्मवित्तमः ।
अत्युदग्रः समग्रश्च न्यग्रोधो दुष्टनिग्रहः ॥ 30 ॥

varcasvī dānaśīlaśca dhanuṣmān brahmavittamaḥ |
atyudagraḥ samagraśca nyagrodho duṣṭanigrahaḥ || 30 ||

Verse 31

रविवंशसमुद्भूतो राघवो भरताग्रजः ।
कौसल्यातनयो रामो विश्वामित्रप्रियङ्करः ॥ 31 ॥

ravivaṃśasamudbhūto rāghavo bharatāgrajaḥ |
kausalyātanayo rāmo viśvāmitrapriyaṅkaraḥ || 31 ||

Verse 32

ताटकारिः सुबाहुघ्नो बलातिबलमन्त्रवान् ।
अहल्याशापविच्छेदी प्रविष्टजनकालयः ॥ 32 ॥

tāṭakāriḥ subāhughno balātibalamantravān |
ahalyāśāpavicchedī praviṣṭajanakālayaḥ || 32 ||

Verse 33

स्वयंवरसभासंस्थ ईशचापप्रभञ्जनः ।
जानकीपरिणेता च जनकाधीशसंस्तुतः ॥ 33 ॥

svayaṃvarasabhāsaṃstha īśacāpaprabhañjanaḥ |
jānakīpariṇetā ca janakādhīśasaṃstutaḥ || 33 ||

Verse 34

जमदग्नितनूजातयोद्धाऽयोध्याधिपाग्रणीः ।
पितृवाक्यप्रतीपालस्त्यक्तराज्यः सलक्ष्मणः ॥ 34 ॥

jamadagnitanūjātayoddhā'yodhyādhipāgraṇīḥ |
pitṛvākyapratīpālastyaktarājyaḥ salakṣmaṇaḥ || 34 ||

Verse 35

ससीतश्चित्रकूटस्थो भरताहितराज्यकः ।
काकदर्पप्रहर्ता च दण्डकारण्यवासकः ॥ 35 ॥

sasītaścitrakūṭastho bharatāhitarājyakaḥ |
kākadarpaprahartā ca daṇḍakāraṇyavāsakaḥ || 35 ||

Verse 36

पञ्चवट्यां विहारी च स्वधर्मपरिपोषकः ।
विराधहाऽगस्त्यमुख्यमुनिसम्मानितः पुमान् ॥ 36 ॥

pañcavaṭyāṃ vihārī ca svadharmaparipoṣakaḥ |
virādhahā'gastyamukhyamunisammānitaḥ pumān || 36 ||

Verse 37

इन्द्रचापधरः खड्गधरश्चाक्षयसायकः ।
खरान्तको दूषणारिस्त्रिशिरस्करिपुर्वृषः ॥ 37 ॥

indracāpadharaḥ khaḍgadharaścākṣayasāyakaḥ |
kharāntako dūṣaṇāristriśiraskaripurvṛṣaḥ || 37 ||

Verse 38

ततः शूर्पणखानासाच्छेत्ता वल्कलधारकः ।
जटावान् पर्णशालास्थो मारीचबलमर्दकः ॥ 38 ॥

tataḥ śūrpaṇakhānāsācchettā valkaladhārakaḥ |
jaṭāvān parṇaśālāstho mārīcabalamardakaḥ || 38 ||

Verse 39

पक्षिराट्कृतसंवादो रवितेजा महाबलः ।
शबर्यानीतफलभुक् हनूमत्परितोषितः ॥ 39 ॥

pakṣirāṭkṛtasaṃvādo ravitejā mahābalaḥ |
śabaryānītaphalabhuk hanūmatparitoṣitaḥ || 39 ||

Verse 40

सुग्रीवाऽभयदो दैत्यकायक्षेपणभासुरः ।
सप्ततालसमुच्छेत्ता वालिहृत्कपिसंवृतः ॥ 40 ॥

sugrīvā'bhayado daityakāyakṣepaṇabhāsuraḥ |
saptatālasamucchettā vālihṛtkapisaṃvṛtaḥ || 40 ||

Verse 41

वायुसूनुकृतासेवस्त्यक्तपम्पः कुशासनः ।
उदन्वत्तीरगः शूरो विभीषणवरप्रदः ॥ 41 ॥

vāyusūnukṛtāsevastyaktapampaḥ kuśāsanaḥ |
udanvattīragaḥ śūro vibhīṣaṇavarapradaḥ || 41 ||

Verse 42

सेतुकृद्दैत्यहा प्राप्तलङ्कोऽलङ्कारवान् स्वयम् ।
अतिकायशिरश्छेत्ता कुम्भकर्णविभेदनः ॥ 42 ॥

setukṛddaityahā prāptalaṅko'laṅkāravān svayam |
atikāyaśiraśchettā kumbhakarṇavibhedanaḥ || 42 ||

Verse 43

दशकण्ठशिरोध्वंसी जाम्बवत्प्रमुखावृतः ।
जानकीशः सुराध्यक्षः साकेतेशः पुरातनः ॥ 43 ॥

daśakaṇṭhaśirodhvaṃsī jāmbavatpramukhāvṛtaḥ |
jānakīśaḥ surādhyakṣaḥ sāketeśaḥ purātanaḥ || 43 ||

Verse 44

पुण्यश्लोको वेदवेद्यः स्वामितीर्थनिवासकः ।
लक्ष्मीसरःकेलिलोलो लक्ष्मीशो लोकरक्षकः ॥ 44 ॥

puṇyaśloko vedavedyaḥ svāmitīrthanivāsakaḥ |
lakṣmīsaraḥkelilolo lakṣmīśo lokarakṣakaḥ || 44 ||

Verse 45

देवकीगर्भसम्भूतो यशोदेक्षणलालितः ।
वसुदेवकृतस्तोत्रो नन्दगोपमनोहरः ॥ 45 ॥

devakīgarbhasambhūto yaśodekṣaṇalālitaḥ |
vasudevakṛtastotro nandagopamanoharaḥ || 45 ||

Verse 46

चतुर्भुजः कोमलाङ्गो गदावान्नीलकुन्तलः ।
पूतनाप्राणसंहर्ता तृणावर्तविनाशनः ॥ 46 ॥

caturbhujaḥ komalāṅgo gadāvānnīlakuntalaḥ |
pūtanāprāṇasaṃhartā tṛṇāvartavināśanaḥ || 46 ||

Verse 47

गर्गारोपितनामाङ्को वासुदेवो ह्यधोक्षजः ।
गोपिकास्तन्यपायी च बलभद्रानुजोऽच्युतः ॥ 47 ॥

gargāropitanāmāṅko vāsudevo hyadhokṣajaḥ |
gopikāstanyapāyī ca balabhadrānujo'cyutaḥ || 47 ||

Verse 48

वैयाघ्रनखभूषश्च वत्सजिद्वत्सवर्धनः ।
क्षीरसाराशनरतो दधिभाण्डप्रमर्दनः ॥ 48 ॥

vaiyāghranakhabhūṣaśca vatsajidvatsavardhanaḥ |
kṣīrasārāśanarato dadhibhāṇḍapramardanaḥ || 48 ||

Verse 49

नवनीतापहर्ता च नीलनीरदभासुरः ।
आभीरदृष्टदौर्जन्यो नीलपद्मनिभाननः ॥ 49 ॥

navanītāpahartā ca nīlanīradabhāsuraḥ |
ābhīradṛṣṭadaurjanyo nīlapadmanibhānanaḥ || 49 ||

Verse 50

मातृदर्शितविश्वाऽऽस्य उलूखलनिबन्धनः ।
नलकूबरशापान्तो गोधूलिच्छुरिताङ्गकः ॥ 50 ॥

mātṛdarśitaviśvā''sya ulūkhalanibandhanaḥ |
nalakūbaraśāpānto godhūlicchuritāṅgakaḥ || 50 ||

Verse 51

गोसङ्घरक्षकः श्रीशो बृन्दारण्यनिवासकः ।
वत्सान्तको बकद्वेषी दैत्याम्बुदमहानिलः ॥ 51 ॥

gosaṅgharakṣakaḥ śrīśo bṛndāraṇyanivāsakaḥ |
vatsāntako bakadveṣī daityāmbudamahānilaḥ || 51 ||

Verse 52

महाजगरचण्डाग्निः शकटप्राणकण्टकः ।
इन्द्रसेव्यः पुण्यगात्रः खरजिच्चण्डदीधितिः ॥ 52 ॥

mahājagaracaṇḍāgniḥ śakaṭaprāṇakaṇṭakaḥ |
indrasevyaḥ puṇyagātraḥ kharajiccaṇḍadīdhitiḥ || 52 ||

Verse 53

तालपक्वफलाशी च कालीयफणिदर्पहा ।
नागपत्नीस्तुतिप्रीतः प्रलम्बासुरखण्डनः ॥ 53 ॥

tālapakvaphalāśī ca kālīyaphaṇidarpahā |
nāgapatnīstutiprītaḥ pralambāsurakhaṇḍanaḥ || 53 ||

Verse 54

दावाग्निबलसंहारी फलाहारी गदाग्रजः ।
गोपाङ्गनाचेलचोरः पाथोलीलाविशारदः ॥ 54 ॥

dāvāgnibalasaṃhārī phalāhārī gadāgrajaḥ |
gopāṅganācelacoraḥ pātholīlāviśāradaḥ || 54 ||

Verse 55

वंशगानप्रवीणश्च गोपीहस्ताम्बुजार्चितः ।
मुनिपत्न्याहृताहारो मुनिश्रेष्ठो मुनिप्रियः ॥ 55 ॥

vaṃśagānapravīṇaśca gopīhastāmbujārcitaḥ |
munipatnyāhṛtāhāro muniśreṣṭho munipriyaḥ || 55 ||

Verse 56

गोवर्धनाद्रिसन्धर्ता सङ्क्रन्दनतमोऽपहः ।
सदुद्यानविलासी च रासक्रीडापरायणः ॥ 56 ॥

govardhanādrisandhartā saṅkrandanatamo'pahaḥ |
sadudyānavilāsī ca rāsakrīḍāparāyaṇaḥ || 56 ||

Verse 57

वरुणाभ्यर्चितो गोपीप्रार्थितः पुरुषोत्तमः ।
अक्रूरस्तुतिसम्प्रीतः कुब्जायौवनदायकः ॥ 57 ॥

varuṇābhyarcito gopīprārthitaḥ puruṣottamaḥ |
akrūrastutisamprītaḥ kubjāyauvanadāyakaḥ || 57 ||

Verse 58

मुष्टिकोरःप्रहारी च चाणूरोदरदारणः ।
मल्लयुद्धाग्रगण्यश्च पितृबन्धनमोचकः ॥ 58 ॥

muṣṭikoraḥprahārī ca cāṇūrodaradāraṇaḥ |
mallayuddhāgragaṇyaśca pitṛbandhanamocakaḥ || 58 ||

Verse 59

मत्तमातङ्गपञ्चास्यः कंसग्रीवानिकृन्तनः ।
उग्रसेनप्रतिष्ठाता रत्नसिंहासनस्थितः ॥ 59 ॥

mattamātaṅgapañcāsyaḥ kaṃsagrīvānikṛntanaḥ |
ugrasenapratiṣṭhātā ratnasiṃhāsanasthitaḥ || 59 ||

Verse 60

कालनेमिखलद्वेषी मुचुकुन्दवरप्रदः ।
साल्वसेवितदुर्धर्षराजस्मयनिवारणः ॥ 60 ॥

kālanemikhaladveṣī mucukundavarapradaḥ |
sālvasevitadurdharṣarājasmayanivāraṇaḥ || 60 ||

Verse 61

रुक्मिगर्वापहारी च रुक्मिणीनयनोत्सवः ।
प्रद्युम्नजनकः कामी प्रद्युम्नो द्वारकाधिपः ॥ 61 ॥

rukmigarvāpahārī ca rukmiṇīnayanotsavaḥ |
pradyumnajanakaḥ kāmī pradyumno dvārakādhipaḥ || 61 ||

Verse 62

मण्याहर्ता महामायो जाम्बवत्कृतसङ्गरः ।
जाम्बूनदाम्बरधरो गम्यो जाम्बवतीविभुः ॥ 62 ॥

maṇyāhartā mahāmāyo jāmbavatkṛtasaṅgaraḥ |
jāmbūnadāmbaradharo gamyo jāmbavatīvibhuḥ || 62 ||

Verse 63

कालिन्दीप्रथितारामकेलिर्गुञ्जावतंसकः ।
मन्दारसुमनोभास्वान् शचीशाभीष्टदायकः ॥ 63 ॥

kālindīprathitārāmakelirguñjāvataṃsakaḥ |
mandārasumanobhāsvān śacīśābhīṣṭadāyakaḥ || 63 ||

Verse 64

सत्राजिन्मानसोल्लासी सत्याजानिः शुभावहः ।
शतधन्वहरः सिद्धः पाण्डवप्रियकोत्सवः ॥ 64 ॥

satrājinmānasollāsī satyājāniḥ śubhāvahaḥ |
śatadhanvaharaḥ siddhaḥ pāṇḍavapriyakotsavaḥ || 64 ||

Verse 65

भद्रप्रियः सुभद्राया भ्राता नाग्नाजितीविभुः ।
किरीटकुण्डलधरः कल्पपल्लवलालितः ॥ 65 ॥

bhadrapriyaḥ subhadrāyā bhrātā nāgnājitīvibhuḥ |
kirīṭakuṇḍaladharaḥ kalpapallavalālitaḥ || 65 ||

Verse 66

भैष्मीप्रणयभाषावान् मित्रविन्दाधिपोऽभयः ।
स्वमूर्तिकेलिसम्प्रीतो लक्ष्मणोदारमानसः ॥ 66 ॥

bhaiṣmīpraṇayabhāṣāvān mitravindādhipo'bhayaḥ |
svamūrtikelisamprīto lakṣmaṇodāramānasaḥ || 66 ||

Verse 67

प्राग्ज्योतिषाधिपध्वंसी तत्सैन्यान्तकरोऽमृतः ।
भूमिस्तुतो भूरिभोगो भूषणाम्बरसंयुतः ॥ 67 ॥

prāgjyotiṣādhipadhvaṃsī tatsainyāntakaro'mṛtaḥ |
bhūmistuto bhūribhogo bhūṣaṇāmbarasaṃyutaḥ || 67 ||

Verse 68

बहुरामाकृताह्लादो गन्धमाल्यानुलेपनः ।
नारदादृष्टचरितो देवेशो विश्वराड्गुरुः ॥ 68 ॥

bahurāmākṛtāhlādo gandhamālyānulepanaḥ |
nāradādṛṣṭacarito deveśo viśvarāḍguruḥ || 68 ||

Verse 69

बाणबाहुविदारश्च तापज्वरविनाशकः ।
उषोद्धर्षयिताऽव्यक्तः शिववाक्तुष्टमानसः ॥ 69 ॥

bāṇabāhuvidāraśca tāpajvaravināśakaḥ |
uṣoddharṣayitā'vyaktaḥ śivavāktuṣṭamānasaḥ || 69 ||

Verse 70

महेशज्वरसंस्तुत्यः शीतज्वरभयान्तकः ।
नृगराजोद्धारकश्च पौण्ड्रकादिवधोद्यतः ॥ 70 ॥

maheśajvarasaṃstutyaḥ śītajvarabhayāntakaḥ |
nṛgarājoddhārakaśca pauṇḍrakādivadhodyataḥ || 70 ||

Verse 71

विविधारिच्छलोद्विग्नब्राह्मणेषु दयापरः ।
जरासन्धबलद्वेषी केशिदैत्यभयङ्करः ॥ 71 ॥

vividhāricchalodvignabrāhmaṇeṣu dayāparaḥ |
jarāsandhabaladveṣī keśidaityabhayaṅkaraḥ || 71 ||

Verse 72

चक्री चैद्यान्तकः सभ्यो राजबन्धविमोचकः ।
राजसूयहविर्भोक्ता स्निग्धाङ्गः शुभलक्षणः ॥ 72 ॥

cakrī caidyāntakaḥ sabhyo rājabandhavimocakaḥ |
rājasūyahavirbhoktā snigdhāṅgaḥ śubhalakṣaṇaḥ || 72 ||

Verse 73

धानाभक्षणसम्प्रीतः कुचेलाभीष्टदायकः ।
सत्त्वादिगुणगम्भीरो द्रौपदीमानरक्षकः ॥ 73 ॥

dhānābhakṣaṇasamprītaḥ kucelābhīṣṭadāyakaḥ |
sattvādiguṇagambhīro draupadīmānarakṣakaḥ || 73 ||

Verse 74

भीष्मध्येयो भक्तवश्यो भीमपूज्यो दयानिधिः ।
दन्तवक्त्रशिरश्छेत्ता कृष्णः कृष्णासखः स्वराट् ॥ 74 ॥

bhīṣmadhyeyo bhaktavaśyo bhīmapūjyo dayānidhiḥ |
dantavaktraśiraśchettā kṛṣṇaḥ kṛṣṇāsakhaḥ svarāṭ || 74 ||

Verse 75

वैजयन्तीप्रमोदी च बर्हिबर्हविभूषणः ।
पार्थकौरवसन्धानकारी दुश्शासनान्तकः ॥ 75 ॥

vaijayantīpramodī ca barhibarhavibhūṣaṇaḥ |
pārthakauravasandhānakārī duśśāsanāntakaḥ || 75 ||

Verse 76

बुद्धो विशुद्धः सर्वज्ञः क्रतुहिंसाविनिन्दकः ।
त्रिपुरस्त्रीमानभङ्गः सर्वशास्त्रविशारदः ॥ 76 ॥

buddho viśuddhaḥ sarvajñaḥ kratuhiṃsāvinindakaḥ |
tripurastrīmānabhaṅgaḥ sarvaśāstraviśāradaḥ || 76 ||

Verse 77

निर्विकारो निर्ममश्च निराभासो निरामयः ।
जगन्मोहकधर्मी च दिग्वस्त्रो दिक्पतीश्वरः ॥ 77 ॥

nirvikāro nirmamaśca nirābhāso nirāmayaḥ |
jaganmohakadharmī ca digvastro dikpatīśvaraḥ || 77 ||

Verse 78

कल्की म्लेच्छप्रहर्ता च दुष्टनिग्रहकारकः ।
धर्मप्रतिष्टाकारी च चातुर्वर्ण्यविभागकृत् ॥ 78 ॥

kalkī mlecchaprahartā ca duṣṭanigrahakārakaḥ |
dharmapratiṣṭākārī ca cāturvarṇyavibhāgakṛt || 78 ||

Verse 79

युगान्तको युगाक्रान्तो युगकृद्युगभासकः ।
कामारिः कामकारी च निष्कामः कामितार्थदः ॥ 79 ॥

yugāntako yugākrānto yugakṛdyugabhāsakaḥ |
kāmāriḥ kāmakārī ca niṣkāmaḥ kāmitārthadaḥ || 79 ||

Verse 80

भर्गो वरेण्यः सवितुः शार्ङ्गी वैकुण्ठमन्दिरः ।
हयग्रीवः कैटभारिः ग्राहघ्नो गजरक्षकः ॥ 80 ॥

bhargo vareṇyaḥ savituḥ śārṅgī vaikuṇṭhamandiraḥ |
hayagrīvaḥ kaiṭabhāriḥ grāhaghno gajarakṣakaḥ || 80 ||

Verse 81

सर्वसंशयविच्छेत्ता सर्वभक्तसमुत्सुकः ।
कपर्दी कामहारी च कला काष्ठा स्मृतिर्धृतिः ॥ 81 ॥

sarvasaṃśayavicchettā sarvabhaktasamutsukaḥ |
kapardī kāmahārī ca kalā kāṣṭhā smṛtirdhṛtiḥ || 81 ||

Verse 82

अनादिरप्रमेयौजाः प्रधानः सन्निरूपकः ।
निर्लेपो निःस्पृहोऽसङ्गो निर्भयो नीतिपारगः ॥ 82 ॥

anādiraprameyaujāḥ pradhānaḥ sannirūpakaḥ |
nirlepo niḥspṛho'saṅgo nirbhayo nītipāragaḥ || 82 ||

Verse 83

निष्प्रेष्यो निष्क्रियः शान्तो निष्प्रपञ्चो निधिर्नयः
कर्म्यकर्मी विकर्मी च कर्मेप्सुः कर्मभावनः ॥ 83 ॥

niṣpreṣyo niṣkriyaḥ śānto niṣprapañco nidhirnayaḥ
karmyakarmī vikarmī ca karmepsuḥ karmabhāvanaḥ || 83 ||

Verse 84

कर्माङ्गः कर्मविन्यासो महाकर्मी महाव्रती ।
कर्मभुक्कर्मफलदः कर्मेशः कर्मनिग्रहः ॥ 84 ॥

karmāṅgaḥ karmavinyāso mahākarmī mahāvratī |
karmabhukkarmaphaladaḥ karmeśaḥ karmanigrahaḥ || 84 ||

Verse 85

नरो नारायणो दान्तः कपिलः कामदः शुचिः ।
तप्ता जप्ताऽक्षमालावान् गन्ता नेता लयो गतिः ॥ 85 ॥

naro nārāyaṇo dāntaḥ kapilaḥ kāmadaḥ śuciḥ |
taptā japtā'kṣamālāvān gantā netā layo gatiḥ || 85 ||

Verse 86

शिष्टो द्रष्टा रिपुद्वेष्टा रोष्टा वेष्टा महानटः ।
रोद्धा बोद्धा महायोद्धा श्रद्धावान् सत्यधीः शुभः ॥ 86 ॥

śiṣṭo draṣṭā ripudveṣṭā roṣṭā veṣṭā mahānaṭaḥ |
roddhā boddhā mahāyoddhā śraddhāvān satyadhīḥ śubhaḥ || 86 ||

Verse 87

मन्त्री मन्त्रो मन्त्रगम्यो मन्त्रकृत्परमन्त्रहृत् ।
मन्त्रभृन्मन्त्रफलदो मन्त्रेशो मन्त्रविग्रहः ॥ 87 ॥

mantrī mantro mantragamyo mantrakṛtparamantrahṛt |
mantrabhṛnmantraphalado mantreśo mantravigrahaḥ || 87 ||

Verse 88

मन्त्राङ्गो मन्त्रविन्यासो महामन्त्रो महाक्रमः ।
स्थिरधीः स्थिरविज्ञानः स्थिरप्रज्ञः स्थिरासनः ॥ 88 ॥

mantrāṅgo mantravinyāso mahāmantro mahākramaḥ |
sthiradhīḥ sthiravijñānaḥ sthiraprajñaḥ sthirāsanaḥ || 88 ||

Verse 89

स्थिरयोगः स्थिराधारः स्थिरमार्गः स्थिरागमः ।
निश्श्रेयसो निरीहोऽग्निर्निरवद्यो निरञ्जनः ॥ 89 ॥

sthirayogaḥ sthirādhāraḥ sthiramārgaḥ sthirāgamaḥ |
niśśreyaso nirīho'gnirniravadyo nirañjanaḥ || 89 ||

Verse 90

निर्वैरो निरहङ्कारो निर्दम्भो निरसूयकः ।
अनन्तोऽनन्तबाहूरुरनन्ताङ्घ्रिरनन्तदृक् ॥ 90 ॥

nirvairo nirahaṅkāro nirdambho nirasūyakaḥ |
ananto'nantabāhūruranantāṅghriranantadṛk || 90 ||

Verse 91

अनन्तवक्त्रोऽनन्ताङ्गोऽनन्तरूपो ह्यनन्तकृत् ।
ऊर्ध्वरेता ऊर्ध्वलिङ्गो ह्यूर्ध्वमूर्धोर्ध्वशाखकः ॥ 91 ॥

anantavaktro'nantāṅgo'nantarūpo hyanantakṛt |
ūrdhvaretā ūrdhvaliṅgo hyūrdhvamūrdhordhvaśākhakaḥ || 91 ||

Verse 92

ऊर्ध्व ऊर्ध्वाध्वरक्षी च ह्यूर्ध्वज्वालो निराकुलः ।
बीजं बीजप्रदो नित्यो निदानं निष्कृतिः कृती ॥ 92 ॥

ūrdhva ūrdhvādhvarakṣī ca hyūrdhvajvālo nirākulaḥ |
bījaṃ bījaprado nityo nidānaṃ niṣkṛtiḥ kṛtī || 92 ||

Verse 93

महानणीयन् गरिमा सुषमा चित्रमालिकः ।
नभः स्पृङ्नभसो ज्योतिर्नभस्वान्निर्नभा नभः ॥ 93 ॥

mahānaṇīyan garimā suṣamā citramālikaḥ |
nabhaḥ spṛṅnabhaso jyotirnabhasvānnirnabhā nabhaḥ || 93 ||

Verse 94

अभुर्विभुः प्रभुः शम्भुर्महीयान् भूर्भुवाकृतिः ।
महानन्दो महाशूरो महोराशिर्महोत्सवः ॥ 94 ॥

abhurvibhuḥ prabhuḥ śambhurmahīyān bhūrbhuvākṛtiḥ |
mahānando mahāśūro mahorāśirmahotsavaḥ || 94 ||

Verse 95

महाक्रोधो महाज्वालो महाशान्तो महागुणः ।
सत्यव्रतः सत्यपरः सत्यसन्धः सतां गतिः ॥ 95 ॥

mahākrodho mahājvālo mahāśānto mahāguṇaḥ |
satyavrataḥ satyaparaḥ satyasandhaḥ satāṃ gatiḥ || 95 ||

Verse 96

सत्येशः सत्यसङ्कल्पः सत्यचारित्रलक्षणः ।
अन्तश्चरो ह्यन्तरात्मा परमात्मा चिदात्मकः ॥ 96 ॥

satyeśaḥ satyasaṅkalpaḥ satyacāritralakṣaṇaḥ |
antaścaro hyantarātmā paramātmā cidātmakaḥ || 96 ||

Verse 97

रोचनो रोचमानश्च साक्षी शौरिर्जनार्दनः ।
मुकुन्दो नन्दनिष्पन्दः स्वर्णबिन्दुः पुरन्दरः ॥ 97 ॥

rocano rocamānaśca sākṣī śaurirjanārdanaḥ |
mukundo nandaniṣpandaḥ svarṇabinduḥ purandaraḥ || 97 ||

Verse 98

अरिन्दमः सुमन्दश्च कुन्दमन्दारहासवान् ।
स्यन्दनारूढचण्डाङ्गो ह्यानन्दी नन्दनन्दनः ॥ 98 ॥

arindamaḥ sumandaśca kundamandārahāsavān |
syandanārūḍhacaṇḍāṅgo hyānandī nandanandanaḥ || 98 ||

Verse 99

अनसूयानन्दनोऽत्रिनेत्रानन्दः सुनन्दवान् ।
शङ्खवान्पङ्कजकरः कुङ्कुमाङ्को जयाङ्कुशः ॥ 99 ॥

anasūyānandano'trinetrānandaḥ sunandavān |
śaṅkhavānpaṅkajakaraḥ kuṅkumāṅko jayāṅkuśaḥ || 99 ||

Verse 100

अम्भोजमकरन्दाढ्यो निष्पङ्कोऽगरुपङ्किलः ।
इन्द्रश्चन्द्ररथश्चन्द्रोऽतिचन्द्रश्चन्द्रभासकः ॥ 100 ॥

ambhojamakarandāḍhyo niṣpaṅko'garupaṅkilaḥ |
indraścandrarathaścandro'ticandraścandrabhāsakaḥ || 100 ||

Verse 101

उपेन्द्र इन्द्रराजश्च वागिन्द्रश्चन्द्रलोचनः ।
प्रत्यक् पराक् परन्धाम परमार्थः परात्परः ॥ 101 ॥

upendra indrarājaśca vāgindraścandralocanaḥ |
pratyak parāk parandhāma paramārthaḥ parātparaḥ || 101 ||

Verse 102

अपारवाक् पारगामी पारावारः परावरः ।
सहस्वानर्थदाता च सहनः साहसी जयी ॥ 102 ॥

apāravāk pāragāmī pārāvāraḥ parāvaraḥ |
sahasvānarthadātā ca sahanaḥ sāhasī jayī || 102 ||

Verse 103

तेजस्वी वायुविशिखी तपस्वी तापसोत्तमः ।
ऐश्वर्योद्भूतिकृद्भूतिरैश्वर्याङ्गकलापवान् ॥ 103 ॥

tejasvī vāyuviśikhī tapasvī tāpasottamaḥ |
aiśvaryodbhūtikṛdbhūtiraiśvaryāṅgakalāpavān || 103 ||

Verse 104

अम्भोधिशायी भगवान् सर्वज्ञः सामपारगः ।
महायोगी महाधीरो महाभोगी महाप्रभुः ॥ 104 ॥

ambhodhiśāyī bhagavān sarvajñaḥ sāmapāragaḥ |
mahāyogī mahādhīro mahābhogī mahāprabhuḥ || 104 ||

Verse 105

महावीरो महातुष्टिर्महापुष्टिर्महागुणः ।
महादेवो महाबाहुर्महाधर्मो महेश्वरः ॥ 105 ॥

mahāvīro mahātuṣṭirmahāpuṣṭirmahāguṇaḥ |
mahādevo mahābāhurmahādharmo maheśvaraḥ || 105 ||

Verse 106

समीपगो दूरगामी स्वर्गमार्गनिरर्गलः ।
नगो नगधरो नागो नागेशो नागपालकः ॥ 106 ॥

samīpago dūragāmī svargamārganirargalaḥ |
nago nagadharo nāgo nāgeśo nāgapālakaḥ || 106 ||

Verse 107

हिरण्मयः स्वर्णरेता हिरण्यार्चिर्हिरण्यदः ।
गुणगण्यः शरण्यश्च पुण्यकीर्तिः पुराणगः ॥ 107 ॥

hiraṇmayaḥ svarṇaretā hiraṇyārcirhiraṇyadaḥ |
guṇagaṇyaḥ śaraṇyaśca puṇyakīrtiḥ purāṇagaḥ || 107 ||

Verse 108

जन्यभृज्जन्यसन्नद्धो दिव्यपञ्चायुधो वशी ।
दौर्जन्यभङ्गः पर्जन्यः सौजन्यनिलयोऽलयः ॥ 108 ॥

janyabhṛjjanyasannaddho divyapañcāyudho vaśī |
daurjanyabhaṅgaḥ parjanyaḥ saujanyanilayo'layaḥ || 108 ||

Verse 109

जलन्धरान्तको भस्मदैत्यनाशी महामनाः ।
श्रेष्ठः श्रविष्ठो द्राघिष्ठो गरिष्ठो गरुडध्वजः ॥ 109 ॥

jalandharāntako bhasmadaityanāśī mahāmanāḥ |
śreṣṭhaḥ śraviṣṭho drāghiṣṭho gariṣṭho garuḍadhvajaḥ || 109 ||

Verse 110

ज्येष्ठो द्रढिष्ठो वर्षिष्ठो द्राघीयान् प्रणवः फणी ।
सम्प्रदायकरः स्वामी सुरेशो माधवो मधुः ॥ 110 ॥

jyeṣṭho draḍhiṣṭho varṣiṣṭho drāghīyān praṇavaḥ phaṇī |
sampradāyakaraḥ svāmī sureśo mādhavo madhuḥ || 110 ||

Verse 111

निर्निमेषो विधिर्वेधा बलवान् जीवनं बली ।
स्मर्ता श्रोता विकर्ता च ध्याता नेता समोऽसमः ॥ 111 ॥

nirnimeṣo vidhirvedhā balavān jīvanaṃ balī |
smartā śrotā vikartā ca dhyātā netā samo'samaḥ || 111 ||

Verse 112

होता पोता महावक्ता रन्ता मन्ता खलान्तकः ।
दाता ग्राहयिता माता नियन्ताऽनन्तवैभवः ॥ 112 ॥

hotā potā mahāvaktā rantā mantā khalāntakaḥ |
dātā grāhayitā mātā niyantā'nantavaibhavaḥ || 112 ||

Verse 113

गोप्ता गोपयिता हन्ता धर्मजागरिता धवः ।
कर्ता क्षेत्रकरः क्षेत्रप्रदः क्षेत्रज्ञ आत्मवित् ॥ 113 ॥

goptā gopayitā hantā dharmajāgaritā dhavaḥ |
kartā kṣetrakaraḥ kṣetrapradaḥ kṣetrajña ātmavit || 113 ||

Verse 114

क्षेत्री क्षेत्रहरः क्षेत्रप्रियः क्षेमकरो मरुत् ।
भक्तिप्रदो मुक्तिदायी शक्तिदो युक्तिदायकः ॥ 114 ॥

kṣetrī kṣetraharaḥ kṣetrapriyaḥ kṣemakaro marut |
bhaktiprado muktidāyī śaktido yuktidāyakaḥ || 114 ||

Verse 115

शक्तियुङ्मौक्तिकस्रग्वी सूक्तिराम्नायसूक्तिगः ।
धनञ्जयो धनाध्यक्षो धनिको धनदाधिपः ॥ 115 ॥

śaktiyuṅmauktikasragvī sūktirāmnāyasūktigaḥ |
dhanañjayo dhanādhyakṣo dhaniko dhanadādhipaḥ || 115 ||

Verse 116

महाधनो महामानी दुर्योधनविमानितः ।
रत्नाकरो रत्नरोची रत्नगर्भाश्रयः शुचिः ॥ 116 ॥

mahādhano mahāmānī duryodhanavimānitaḥ |
ratnākaro ratnarocī ratnagarbhāśrayaḥ śuciḥ || 116 ||

Verse 117

रत्नसानुनिधिर्मौलिरत्नभा रत्नकङ्कणः ।
अन्तर्लक्ष्योऽन्तरभ्यासी चान्तर्ध्येयो जितासनः ॥ 117 ॥

ratnasānunidhirmauliratnabhā ratnakaṅkaṇaḥ |
antarlakṣyo'ntarabhyāsī cāntardhyeyo jitāsanaḥ || 117 ||

Verse 118

अन्तरङ्गो दयावांश्च ह्यन्तर्मायो महार्णवः ।
सरसः सिद्धरसिकः सिद्धिः साध्यः सदागतिः ॥ 118 ॥

antaraṅgo dayāvāṃśca hyantarmāyo mahārṇavaḥ |
sarasaḥ siddharasikaḥ siddhiḥ sādhyaḥ sadāgatiḥ || 118 ||

Verse 119

आयुःप्रदो महायुष्मानर्चिष्मानोषधीपतिः ।
अष्टश्रीरष्टभागोऽष्टककुब्व्याप्तयशो व्रती ॥ 119 ॥

āyuḥprado mahāyuṣmānarciṣmānoṣadhīpatiḥ |
aṣṭaśrīraṣṭabhāgo'ṣṭakakubvyāptayaśo vratī || 119 ||

Verse 120

अष्टापदः सुवर्णाभो ह्यष्टमूर्तिस्त्रिमूर्तिमान् ।
अस्वप्नः स्वप्नगः स्वप्नः सुस्वप्नफलदायकः ॥ 120 ॥

aṣṭāpadaḥ suvarṇābho hyaṣṭamūrtistrimūrtimān |
asvapnaḥ svapnagaḥ svapnaḥ susvapnaphaladāyakaḥ || 120 ||

Verse 121

दुःस्वप्नध्वंसको ध्वस्तदुर्निमित्तः शिवङ्करः ।
सुवर्णवर्णः सम्भाव्यो वर्णितो वर्णसम्मुखः ॥ 121 ॥

duḥsvapnadhvaṃsako dhvastadurnimittaḥ śivaṅkaraḥ |
suvarṇavarṇaḥ sambhāvyo varṇito varṇasammukhaḥ || 121 ||

Verse 122

सुवर्णमुखरीतीरशिवध्यातपदाम्बुजः ।
दाक्षायणीवचस्तुष्टो दूर्वासोदृष्टिगोचरः ॥ 122 ॥

suvarṇamukharītīraśivadhyātapadāmbujaḥ |
dākṣāyaṇīvacastuṣṭo dūrvāsodṛṣṭigocaraḥ || 122 ||

Verse 123

अम्बरीषव्रतप्रीतो महाकृत्तिविभञ्जनः ।
महाभिचारकध्वंसी कालसर्पभयान्तकः ॥ 123 ॥

ambarīṣavrataprīto mahākṛttivibhañjanaḥ |
mahābhicārakadhvaṃsī kālasarpabhayāntakaḥ || 123 ||

Verse 124

सुदर्शनः कालमेघश्यामः श्रीमन्त्रभावितः ।
हेमाम्बुजसरःस्नायी श्रीमनोभाविताकृतिः ॥ 124 ॥

sudarśanaḥ kālameghaśyāmaḥ śrīmantrabhāvitaḥ |
hemāmbujasaraḥsnāyī śrīmanobhāvitākṛtiḥ || 124 ||

Verse 125

श्रीप्रदत्ताम्बुजस्रग्वी श्रीकेलिः श्रीनिधिर्भवः ।
श्रीप्रदो वामनो लक्ष्मीनायकश्च चतुर्भुजः ॥ 125 ॥

śrīpradattāmbujasragvī śrīkeliḥ śrīnidhirbhavaḥ |
śrīprado vāmano lakṣmīnāyakaśca caturbhujaḥ || 125 ||

Verse 126

सन्तृप्तस्तर्पितस्तीर्थस्नातृसौख्यप्रदर्शकः ।
अगस्त्यस्तुतिसंहृष्टो दर्शिताव्यक्तभावनः ॥ 126 ॥

santṛptastarpitastīrthasnātṛsaukhyapradarśakaḥ |
agastyastutisaṃhṛṣṭo darśitāvyaktabhāvanaḥ || 126 ||

Verse 127

कपिलार्चिः कपिलवान् सुस्नाताघविपाटनः ।
वृषाकपिः कपिस्वामिमनोऽन्तःस्थितविग्रहः ॥ 127 ॥

kapilārciḥ kapilavān susnātāghavipāṭanaḥ |
vṛṣākapiḥ kapisvāmimano'ntaḥsthitavigrahaḥ || 127 ||

Verse 128

वह्निप्रियोऽर्थसम्भाव्यो जनलोकविधायकः ।
वह्निप्रभो वह्नितेजाः शुभाभीष्टप्रदो यमी ॥ 128 ॥

vahnipriyo'rthasambhāvyo janalokavidhāyakaḥ |
vahniprabho vahnitejāḥ śubhābhīṣṭaprado yamī || 128 ||

Verse 129

वारुणक्षेत्रनिलयो वरुणो वारणार्चितः ।
वायुस्थानकृतावासो वायुगो वायुसम्भृतः ॥ 129 ॥

vāruṇakṣetranilayo varuṇo vāraṇārcitaḥ |
vāyusthānakṛtāvāso vāyugo vāyusambhṛtaḥ || 129 ||

Verse 130

यमान्तकोऽभिजननो यमलोकनिवारणः ।
यमिनामग्रगण्यश्च संयमी यमभावितः ॥ 130 ॥

yamāntako'bhijanano yamalokanivāraṇaḥ |
yamināmagragaṇyaśca saṃyamī yamabhāvitaḥ || 130 ||

Verse 131

इन्द्रोद्यानसमीपस्थः इन्द्रदृग्विषयः प्रभुः ।
यक्षराट् सरसीवासो ह्यक्षय्यनिधिकोशकृत् ॥ 131 ॥

indrodyānasamīpasthaḥ indradṛgviṣayaḥ prabhuḥ |
yakṣarāṭ sarasīvāso hyakṣayyanidhikośakṛt || 131 ||

Verse 132

स्वामितीर्थकृतावासः स्वामिध्येयो ह्यधोक्षजः ।
वराहाद्यष्टतीर्थाभिसेविताङ्घ्रिसरोरुहः ॥ 132 ॥

svāmitīrthakṛtāvāsaḥ svāmidhyeyo hyadhokṣajaḥ |
varāhādyaṣṭatīrthābhisevitāṅghrisaroruhaḥ || 132 ||

Verse 133

पाण्डुतीर्थाभिषिक्ताङ्गो युधिष्ठिरवरप्रदः ।
भीमान्तःकरणारूढः श्वेतवाहनसख्यवान् ॥ 133 ॥

pāṇḍutīrthābhiṣiktāṅgo yudhiṣṭhiravarapradaḥ |
bhīmāntaḥkaraṇārūḍhaḥ śvetavāhanasakhyavān || 133 ||

Verse 134

नकुलाभयदो माद्रीसहदेवाभिवन्दितः ।
कृष्णाशपथसन्धाता कुन्तीस्तुतिरतो दमी ॥ 134 ॥

nakulābhayado mādrīsahadevābhivanditaḥ |
kṛṣṇāśapathasandhātā kuntīstutirato damī || 134 ||

Verse 135

नारदादिमुनिस्तुत्यो नित्यकर्मपरायणः ।
दर्शिताव्यक्तरूपश्च वीणानादप्रमोदितः ॥ 135 ॥

nāradādimunistutyo nityakarmaparāyaṇaḥ |
darśitāvyaktarūpaśca vīṇānādapramoditaḥ || 135 ||

Verse 136

षट्कोटितीर्थचर्यावान् देवतीर्थकृताश्रमः ।
बिल्वामलजलस्नायी सरस्वत्यम्बुसेवितः ॥ 136 ॥

ṣaṭkoṭitīrthacaryāvān devatīrthakṛtāśramaḥ |
bilvāmalajalasnāyī sarasvatyambusevitaḥ || 136 ||

Verse 137

तुम्बुरूदकसंस्पर्शजनचित्ततमोऽपहः ।
मत्स्यवामनकूर्मादितीर्थराजः पुराणभृत् ॥ 137 ॥

tumburūdakasaṃsparśajanacittatamo'pahaḥ |
matsyavāmanakūrmāditīrtharājaḥ purāṇabhṛt || 137 ||

Verse 138

चक्रध्येयपदाम्भोजः शङ्खपूजितपादुकः ।
रामतीर्थविहारी च बलभद्रप्रतिष्ठितः ॥ 138 ॥

cakradhyeyapadāmbhojaḥ śaṅkhapūjitapādukaḥ |
rāmatīrthavihārī ca balabhadrapratiṣṭhitaḥ || 138 ||

Verse 139

जामदग्न्यसरस्तीर्थजलसेचनतर्पितः ।
पापापहारिकीलालसुस्नाताघविनाशनः ॥ 139 ॥

jāmadagnyasarastīrthajalasecanatarpitaḥ |
pāpāpahārikīlālasusnātāghavināśanaḥ || 139 ||

Verse 140

नभोगङ्गाभिषिक्तश्च नागतीर्थाभिषेकवान् ।
कुमारधारातीर्थस्थो वटुवेषः सुमेखलः ॥ 140 ॥

nabhogaṅgābhiṣiktaśca nāgatīrthābhiṣekavān |
kumāradhārātīrthastho vaṭuveṣaḥ sumekhalaḥ || 140 ||

Verse 141

वृद्धस्य सुकुमारत्वप्रदः सौन्दर्यवान् सुखी ।
प्रियंवदो महाकुक्षिरिक्ष्वाकुकुलनन्दनः ॥ 141 ॥

vṛddhasya sukumāratvapradaḥ saundaryavān sukhī |
priyaṃvado mahākukṣirikṣvākukulanandanaḥ || 141 ||

Verse 142

नीलगोक्षीरधाराभूर्वराहाचलनायकः ।
भरद्वाजप्रतिष्ठावान् बृहस्पतिविभावितः ॥ 142 ॥

nīlagokṣīradhārābhūrvarāhācalanāyakaḥ |
bharadvājapratiṣṭhāvān bṛhaspativibhāvitaḥ || 142 ||

Verse 143

अञ्जनाकृतपूजावान् आञ्जनेयकरार्चितः ।
अञ्जनाद्रिनिवासश्च मुञ्जकेशः पुरन्दरः ॥ 143 ॥

añjanākṛtapūjāvān āñjaneyakarārcitaḥ |
añjanādrinivāsaśca muñjakeśaḥ purandaraḥ || 143 ||

Verse 144

किन्नरद्वयसम्बन्धिबन्धमोक्षप्रदायकः ।
वैखानसमखारम्भो वृषज्ञेयो वृषाचलः ॥ 144 ॥

kinnaradvayasambandhibandhamokṣapradāyakaḥ |
vaikhānasamakhārambho vṛṣajñeyo vṛṣācalaḥ || 144 ||

Verse 145

वृषकायप्रभेत्ता च क्रीडनाचारसम्भ्रमः ।
सौवर्चलेयविन्यस्तराज्यो नारायणः प्रियः ॥ 145 ॥

vṛṣakāyaprabhettā ca krīḍanācārasambhramaḥ |
sauvarcaleyavinyastarājyo nārāyaṇaḥ priyaḥ || 145 ||

Verse 146

दुर्मेधोभञ्जकः प्राज्ञो ब्रह्मोत्सवमहोत्सुकः ।
भद्रासुरशिरश्छेत्ता भद्रक्षेत्री सुभद्रवान् ॥ 146 ॥

durmedhobhañjakaḥ prājño brahmotsavamahotsukaḥ |
bhadrāsuraśiraśchettā bhadrakṣetrī subhadravān || 146 ||

Verse 147

मृगयाऽक्षीणसन्नाहः शङ्खराजन्यतुष्टिदः ।
स्थाणुस्थो वैनतेयाङ्गभावितो ह्यशरीरवान् ॥ 147 ॥

mṛgayā'kṣīṇasannāhaḥ śaṅkharājanyatuṣṭidaḥ |
sthāṇustho vainateyāṅgabhāvito hyaśarīravān || 147 ||

Verse 148

भोगीन्द्रभोगसंस्थानो ब्रह्मादिगणसेवितः ।
सहस्रार्कच्छटाभास्वद्विमानान्तःस्थितो गुणी ॥ 148 ॥

bhogīndrabhogasaṃsthāno brahmādigaṇasevitaḥ |
sahasrārkacchaṭābhāsvadvimānāntaḥsthito guṇī || 148 ||

Verse 149

विष्वक्सेनकृतस्तोत्रः सनन्दनवरीवृतः ।
जाह्नव्यादिनदीसेव्यः सुरेशाद्यभिवन्दितः ॥ 149 ॥

viṣvaksenakṛtastotraḥ sanandanavarīvṛtaḥ |
jāhnavyādinadīsevyaḥ sureśādyabhivanditaḥ || 149 ||

Verse 150

सुराङ्गनानृत्यपरो गन्धर्वोद्गायनप्रियः ।
राकेन्दुसङ्काशनखः कोमलाङ्घ्रिसरोरुहः ॥ 150 ॥

surāṅganānṛtyaparo gandharvodgāyanapriyaḥ |
rākendusaṅkāśanakhaḥ komalāṅghrisaroruhaḥ || 150 ||

Verse 151

कच्छपप्रपदः कुन्दगुल्फकः स्वच्छकूर्परः ।
मेदुरस्वर्णवस्त्राढ्यकटिदेशस्थमेखलः ॥ 151 ॥

kacchapaprapadaḥ kundagulphakaḥ svacchakūrparaḥ |
medurasvarṇavastrāḍhyakaṭideśasthamekhalaḥ || 151 ||

Verse 152

प्रोल्लसच्छुरिकाभास्वत्कटिदेशः शुभङ्करः ।
अनन्तपद्मजस्थाननाभिर्मौक्तिकमालिकः ॥ 152 ॥

prollasacchurikābhāsvatkaṭideśaḥ śubhaṅkaraḥ |
anantapadmajasthānanābhirmauktikamālikaḥ || 152 ||

Verse 153

मन्दारचाम्पेयमाली रत्नाभरणसम्भृतः ।
लम्बयज्ञोपवीती च चन्द्रश्रीखण्डलेपवान् ॥ 153 ॥

mandāracāmpeyamālī ratnābharaṇasambhṛtaḥ |
lambayajñopavītī ca candraśrīkhaṇḍalepavān || 153 ||

Verse 154

वरदोऽभयदश्चक्री शङ्खी कौस्तुभदीप्तिमान् ।
श्रीवत्साङ्कितवक्षस्को लक्ष्मीसंश्रितहृत्तटः ॥ 154 ॥

varado'bhayadaścakrī śaṅkhī kaustubhadīptimān |
śrīvatsāṅkitavakṣasko lakṣmīsaṃśritahṛttaṭaḥ || 154 ||

Verse 155

नीलोत्पलनिभाकारः शोणाम्भोजसमाननः ।
कोटिमन्मथलावण्यश्चन्द्रिकास्मितपूरितः ॥ 155 ॥

nīlotpalanibhākāraḥ śoṇāmbhojasamānanaḥ |
koṭimanmathalāvaṇyaścandrikāsmitapūritaḥ || 155 ||

Verse 156

सुधास्वच्छोर्ध्वपुण्ड्रश्च कस्तूरीतिलकाञ्चितः ।
पुण्डरीकेक्षणः स्वच्छो मौलिशोभाविराजितः ॥ 156 ॥

sudhāsvacchordhvapuṇḍraśca kastūrītilakāñcitaḥ |
puṇḍarīkekṣaṇaḥ svaccho mauliśobhāvirājitaḥ || 156 ||

Verse 157

पद्मस्थः पद्मनाभश्च सोममण्डलगो बुधः ।
वह्निमण्डलगः सूर्यः सूर्यमण्डलसंस्थितः ॥ 157 ॥

padmasthaḥ padmanābhaśca somamaṇḍalago budhaḥ |
vahnimaṇḍalagaḥ sūryaḥ sūryamaṇḍalasaṃsthitaḥ || 157 ||

Verse 158

श्रीपतिर्भूमिजानिश्च विमलाद्यभिसंवृतः ।
जगत्कुटुम्बजनिता रक्षकः कामितप्रदः ॥ 158 ॥

śrīpatirbhūmijāniśca vimalādyabhisaṃvṛtaḥ |
jagatkuṭumbajanitā rakṣakaḥ kāmitapradaḥ || 158 ||

Verse 159

अवस्थात्रययन्ता च विश्वतेजस्स्वरूपवान् ।
ज्ञप्तिर्ज्ञेयो ज्ञानगम्यो ज्ञानातीतः सुरातिगः ॥ 159 ॥

avasthātrayayantā ca viśvatejassvarūpavān |
jñaptirjñeyo jñānagamyo jñānātītaḥ surātigaḥ || 159 ||

Verse 160

ब्रह्माण्डान्तर्बहिर्व्याप्तो वेङ्कटाद्रिगदाधरः ।
वेङ्कटाद्रिगदाधर ॐ नमः इति ॥
एवं श्रीवेङ्कटेशस्य कीर्तितं परमाद्भुतम् ॥ 160 ॥

brahmāṇḍāntarbahirvyāpto veṅkaṭādrigadādharaḥ |
veṅkaṭādrigadādhara oṃ namaḥ iti ||
evaṃ śrīveṅkaṭeśasya kīrtitaṃ paramādbhutam || 160 ||

Verse 1

नाम्नां सहस्रं संश्राव्यं पवित्रं पुण्यवर्धनम् ।
श्रवणात्सर्वदोषघ्नं रोगघ्नं मृत्युनाशनम् ॥ 1 ॥

nāmnāṃ sahasraṃ saṃśrāvyaṃ pavitraṃ puṇyavardhanam |
śravaṇātsarvadoṣaghnaṃ rogaghnaṃ mṛtyunāśanam || 1 ||

Verse 2

दारिद्र्यभेदनं धर्म्यं सर्वैश्वर्यफलप्रदम् ।
कालाहिविषविच्छेदि ज्वरापस्मारभञ्जनम् ॥ 2 ॥

dāridryabhedanaṃ dharmyaṃ sarvaiśvaryaphalapradam |
kālāhiviṣavicchedi jvarāpasmārabhañjanam || 2 ||

Verse 3

[शत्रुक्षयकरं राजग्रहपीडानिवारणम् ।
ब्रह्मराक्षसकूष्माण्डभेतालभयभञ्जनम् ॥]
विद्याभिलाषी विद्यावान् धनार्थी धनवान् भवेत् ।
अनन्तकल्पजीवी स्यादायुष्कामो महायशाः ॥ 3 ॥

[śatrukṣayakaraṃ rājagrahapīḍānivāraṇam |
brahmarākṣasakūṣmāṇḍabhetālabhayabhañjanam ||]
vidyābhilāṣī vidyāvān dhanārthī dhanavān bhavet |
anantakalpajīvī syādāyuṣkāmo mahāyaśāḥ || 3 ||

Verse 4

पुत्रार्थी सुगुणान्पुत्रान् लभेताऽऽयुष्मतस्ततः ।
सङ्ग्रामे शत्रुविजयी सभायां प्रतिवादिजित् ॥ 4 ॥

putrārthī suguṇānputrān labhetā''yuṣmatastataḥ |
saṅgrāme śatruvijayī sabhāyāṃ prativādijit || 4 ||

Verse 5

दिव्यैर्नामभिरेभिस्तु तुलसीपूजनात्सकृत् ।
वैकुण्ठवासी भगवत्सदृशो विष्णुसन्निधौ ॥ 5 ॥

divyairnāmabhirebhistu tulasīpūjanātsakṛt |
vaikuṇṭhavāsī bhagavatsadṛśo viṣṇusannidhau || 5 ||

Verse 6

कल्हारपूजनान्मासात् द्वितीय इव यक्षराट् ।
नीलोत्पलार्चनात्सर्वराजपूज्यः सदा भवेत् ॥ 6 ॥

kalhārapūjanānmāsāt dvitīya iva yakṣarāṭ |
nīlotpalārcanātsarvarājapūjyaḥ sadā bhavet || 6 ||

Verse 7

हृत्संस्थितैर्नामभिस्तु भूयाद्दृग्विषयो हरिः ।
वाञ्छितार्थं तदा दत्वा वैकुण्ठं च प्रयच्छति ॥ 7 ॥

hṛtsaṃsthitairnāmabhistu bhūyāddṛgviṣayo hariḥ |
vāñchitārthaṃ tadā datvā vaikuṇṭhaṃ ca prayacchati || 7 ||

Verse 8

त्रिसन्ध्यं यो जपेन्नित्यं सम्पूज्य विधिना विभुम् ।
त्रिवारं पञ्चवारं वा प्रत्यहं क्रमशो यमी ॥ 8 ॥

trisandhyaṃ yo japennityaṃ sampūjya vidhinā vibhum |
trivāraṃ pañcavāraṃ vā pratyahaṃ kramaśo yamī || 8 ||

Verse 9

मासादलक्ष्मीनाशः स्यात् द्विमासात् स्यान्नरेन्द्रता ।
त्रिमासान्महदैश्वर्यं ततः सम्भाषणं भवेत् ॥ 9 ॥

māsādalakṣmīnāśaḥ syāt dvimāsāt syānnarendratā |
trimāsānmahadaiśvaryaṃ tataḥ sambhāṣaṇaṃ bhavet || 9 ||

Verse 10

मासं पठन्न्यूनकर्मपूर्तिं च समवाप्नुयात् ।
मार्गभ्रष्टश्च सन्मार्गं गतस्वः स्वं स्वकीयकम् ॥ 10 ॥

māsaṃ paṭhannyūnakarmapūrtiṃ ca samavāpnuyāt |
mārgabhraṣṭaśca sanmārgaṃ gatasvaḥ svaṃ svakīyakam || 10 ||

Verse 11

चाञ्चल्यचित्तोऽचाञ्चल्यं मनस्स्वास्थ्यं च गच्छति ।
आयुरारोग्यमैश्वर्यं ज्ञानं मोक्षं च विन्दति ॥ 11 ॥

cāñcalyacitto'cāñcalyaṃ manassvāsthyaṃ ca gacchati |
āyurārogyamaiśvaryaṃ jñānaṃ mokṣaṃ ca vindati || 11 ||

Verse 12

सर्वान्कामानवाप्नोति शाश्वतं च पदं तथा ।
सत्यं सत्यं पुनस्सत्यं सत्यं सत्यं न संशयः ॥ 12 ॥

sarvānkāmānavāpnoti śāśvataṃ ca padaṃ tathā |
satyaṃ satyaṃ punassatyaṃ satyaṃ satyaṃ na saṃśayaḥ || 12 ||

इति श्री ब्रह्माण्डपुराणे वसिष्ठनारदसंवादे श्रीवेङ्कटाचलमाहात्म्ये श्री वेङ्कटेश सहस्रनाम स्तोत्रं समाप्तम् ।

श्री वेङ्कटेश्वर सहस्रनाम स्तोत्रम्