ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾ-ನ್ದ್ವಿತೀಯಕಾಣ್ಡೇ ಪಞ್ಚಮಃ ಪ್ರಶ್ನಃ - ಇಷ್ಟಿವಿಧಾನಂ
ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥
ವಿ॒ಶ್ವರೂ॑ಪೋ॒ ವೈ ತ್ವಾ॒ಷ್ಟ್ರಃ ಪು॒ರೋಹಿ॑ತೋ ದೇ॒ವಾನಾ॑ಮಾಸೀ-ಥ್ಸ್ವ॒ಸ್ರೀಯೋ-ಽಸು॑ರಾಣಾ॒-ನ್ತಸ್ಯ॒ ತ್ರೀಣಿ॑ ಶೀ॒ರ್॒ಷಾಣ್ಯಾ॑ಸನ್-ಥ್ಸೋಮ॒ಪಾನಗ್ಂ॑ ಸುರಾ॒ಪಾನ॑-ಮ॒ನ್ನಾದ॑ನ॒ಗ್ಂ॒ ಸ ಪ್ರ॒ತ್ಯಕ್ಷ॑-ನ್ದೇ॒ವೇಭ್ಯೋ॑ ಭಾ॒ಗಮ॑ವದ-ತ್ಪ॒ರೋಕ್ಷ॒ಮಸು॑ರೇಭ್ಯ॒-ಸ್ಸರ್ವ॑ಸ್ಮೈ॒ ವೈ ಪ್ರ॒ತ್ಯಕ್ಷ॑-ಮ್ಭಾ॒ಗಂ-ವಁ॑ದನ್ತಿ॒ ಯಸ್ಮಾ॑ ಏ॒ವ ಪ॒ರೋಕ್ಷಂ॒-ವಁದ॑ನ್ತಿ॒ ತಸ್ಯ॑ ಭಾ॒ಗ ಉ॑ದಿ॒ತಸ್ತಸ್ಮಾ॒ದಿನ್ದ್ರೋ॑ ಽಬಿಭೇದೀ॒ದೃಂ-ವೈಁ ರಾ॒ಷ್ಟ್ರಂ-ವಿಁ ಪ॒ರ್ಯಾವ॑ರ್ತಯ॒ತೀತಿ॒ ತಸ್ಯ॒ ವಜ್ರ॑ಮಾ॒ದಾಯ॑ ಶೀ॒ರ್॒ಷಾಣ್ಯ॑ಚ್ಛಿನ॒ದ್ಯ-ಥ್ಸೋ॑ಮ॒ಪಾನ॒- [-ಥ್ಸೋ॑ಮ॒ಪಾನ᳚ಮ್, ಆಸೀ॒ಥ್ಸ] 1
-ಮಾಸೀ॒ಥ್ಸ ಕ॒ಪಿಞ್ಜ॑ಲೋ ಽಭವ॒-ದ್ಯ-ಥ್ಸು॑ರಾ॒ಪಾನ॒ಗ್ಂ॒ ಸ ಕ॑ಲ॒ವಿಙ್ಕೋ॒ ಯದ॒ನ್ನಾದ॑ನ॒ಗ್ಂ॒ ಸ ತಿ॑ತ್ತಿ॒ರಿಸ್ತಸ್ಯಾ᳚ಞ್ಜ॒ಲಿನಾ᳚ ಬ್ರಹ್ಮಹ॒ತ್ಯಾಮುಪಾ॑ಗೃಹ್ಣಾ॒-ತ್ತಾಗ್ಂ ಸಂ॑ವಁಥ್ಸ॒ರಮ॑ಬಿಭ॒ಸ್ತ-ಮ್ಭೂ॒ತಾನ್ಯ॒ಭ್ಯ॑ಕ್ರೋಶ॒-ನ್ಬ್ರಹ್ಮ॑ಹ॒ನ್ನಿತಿ॒ ಸ ಪೃ॑ಥಿ॒ವೀಮುಪಾ॑ಸೀದದ॒ಸ್ಯೈ ಬ್ರ॑ಹ್ಮಹ॒ತ್ಯಾಯೈ॒ ತೃತೀ॑ಯ॒-ಮ್ಪ್ರತಿ॑ ಗೃಹಾ॒ಣೇತಿ॒ ಸಾ-ಽಬ್ರ॑ವೀ॒ದ್ವರಂ॑-ವೃಁಣೈ ಖಾ॒ತಾ-ತ್ಪ॑ರಾಭವಿ॒ಷ್ಯನ್ತೀ॑ ಮನ್ಯೇ॒ ತತೋ॒ ಮಾ ಪರಾ॑ ಭೂವ॒ಮಿತಿ॑ಪು॒ರಾ ತೇ॑ [ಭೂವ॒ಮಿತಿ॑ಪು॒ರಾ ತೇ᳚, ಸಂವಁಥ್ಸ॒ರಾದಪಿ॑] 2
ಸಂವಁಥ್ಸ॒ರಾದಪಿ॑ ರೋಹಾ॒ದಿತ್ಯ॑ಬ್ರವೀ॒-ತ್ತಸ್ಮಾ᳚-ತ್ಪು॒ರಾ ಸಂ॑ವಁಥ್ಸ॒ರಾ-ತ್ಪೃ॑ಥಿ॒ವ್ಯೈ ಖಾ॒ತಮಪಿ॑ ರೋಹತಿ॒ ವಾರೇ॑ವೃತ॒ಗ್ಗ್॒ ಹ್ಯ॑ಸ್ಯೈ॒ ತೃತೀ॑ಯ-ಮ್ಬ್ರಹ್ಮಹ॒ತ್ಯಾಯೈ॒ ಪ್ರತ್ಯ॑ಗೃಹ್ಣಾ॒-ತ್ತ-ಥ್ಸ್ವಕೃ॑ತ॒ಮಿರಿ॑ಣಮಭವ॒-ತ್ತಸ್ಮಾ॒ದಾಹಿ॑ತಾಗ್ನಿ-ಶ್ಶ್ರ॒ದ್ಧಾದೇ॑ವ॒-ಸ್ಸ್ವಕೃ॑ತ॒ ಇರಿ॑ಣೇ॒ ನಾವ॑ ಸ್ಯೇ-ದ್ಬ್ರಹ್ಮಹ॒ತ್ಯಾಯೈ॒ ಹ್ಯೇ॑ಷ ವರ್ಣ॒-ಸ್ಸ ವನ॒ಸ್ಪತೀ॒ನುಪಾ॑ಸೀದದ॒ಸ್ಯೈ ಬ್ರ॑ಹ್ಮಹ॒ತ್ಯಾಯೈ॒ ತೃತೀ॑ಯ॒-ಮ್ಪ್ರತಿ॑ ಗೃಹ್ಣೀ॒ತೇತಿ॒ ತೇ᳚-ಽಬ್ರುವ॒ನ್ ವರಂ॑-ವೃಁಣಾಮಹೈ ವೃ॒ಕ್ಣಾ- [ವೃ॒ಕ್ಣಾತ್, ಪ॒ರಾ॒ಭ॒ವಿ॒ಷ್ಯನ್ತೋ॑] 3
-ತ್ಪ॑ರಾಭವಿ॒ಷ್ಯನ್ತೋ॑ ಮನ್ಯಾಮಹೇ॒ ತತೋ॒ ಮಾ ಪರಾ॑ ಭೂ॒ಮೇತ್ಯಾ॒ವ್ರಶ್ಚ॑ನಾದ್ವೋ॒ ಭೂಯಾಗ್ಂ॑ಸ॒ ಉತ್ತಿ॑ಷ್ಠಾ॒ನಿತ್ಯ॑ಬ್ರವೀ॒-ತ್ತಸ್ಮಾ॑ದಾ॒ವ್ರಶ್ಚ॑ನಾ-ದ್ವೃ॒ಕ್ಷಾಣಾ॒-ಮ್ಭೂಯಾಗ್ಂ॑ಸ॒ ಉತ್ತಿ॑ಷ್ಠನ್ತಿ॒ ವಾರೇ॑ವೃತ॒ಗ್ಗ್॒ ಹ್ಯೇ॑ಷಾ॒-ನ್ತೃತೀ॑ಯ-ಮ್ಬ್ರಹ್ಮಹ॒ತ್ಯಾಯೈ॒ ಪ್ರತ್ಯ॑ಗೃಣ್ಹ॒ನ್ಥ್ಸ ನಿ॑ರ್ಯಾ॒ಸೋ॑ ಽಭವ॒-ತ್ತಸ್ಮಾ᳚ನ್ನಿರ್ಯಾ॒ಸಸ್ಯ॒ ನಾ-ಽಽಶ್ಯ॑-ಮ್ಬ್ರಹ್ಮಹ॒ತ್ಯಾಯೈ॒ ಹ್ಯೇ॑ಷ ವರ್ಣೋ-ಽಥೋ॒ ಖಲು॒ ಯ ಏ॒ವ ಲೋಹಿ॑ತೋ॒ ಯೋ ವಾ॒-ಽಽವ್ರಶ್ಚ॑ನಾನ್ನಿ॒ರ್ಯೇಷ॑ತಿ॒ ತಸ್ಯ॒ ನಾ-ಽಽಶ್ಯ॑- [ನಾ-ಽಽಶ್ಯ᳚ಮ್, ಕಾಮ॑ಮ॒ನ್ಯಸ್ಯ॒] 4
-ಙ್ಕಾಮ॑ಮ॒ನ್ಯಸ್ಯ॒ ಸಸ್ತ್ರೀ॑ಷಗ್ಂಸಾ॒ದ-ಮುಪಾ॑ಸೀದದ॒ಸ್ಯೈ ಬ್ರ॑ಹ್ಮಹ॒ತ್ಯಾಯೈ॒ ತೃತೀ॑ಯ॒-ಮ್ಪ್ರತಿ॑ ಗೃಹ್ಣೀ॒ತೇತಿ॒ ತಾ ಅ॑ಬ್ರುವ॒ನ್ ವರಂ॑-ವೃಁಣಾಮಹಾ॒ ಋತ್ವಿ॑ಯಾ-ತ್ಪ್ರ॒ಜಾಂ-ವಿಁ॑ನ್ದಾಮಹೈ॒ ಕಾಮ॒ಮಾ ವಿಜ॑ನಿತೋ॒-ಸ್ಸ-ಮ್ಭ॑ವಾ॒ಮೇತಿ॒ ತಸ್ಮಾ॒ದೃತ್ವಿ॑ಯಾ॒-ಥ್ಸ್ತ್ರಿಯಃ॑ ಪ್ರ॒ಜಾಂ ಁವಿ॑ನ್ದನ್ತೇ॒ ಕಾಮ॒ಮಾ ವಿಜ॑ನಿತೋ॒-ಸ್ಸಮ್ಭ॑ವನ್ತಿ॒ ವಾರೇ॑ವೃತ॒ಗ್ಗ್॒ ಹ್ಯಾ॑ಸಾ॒-ನ್ತೃತೀ॑ಯ-ಮ್ಬ್ರಹ್ಮಹ॒ತ್ಯಾಯೈ॒ ಪ್ರತ್ಯ॑ಗೃಹ್ಣ॒ನ್-ಥ್ಸಾ ಮಲ॑ವದ್ವಾಸಾ ಅಭವ॒-ತ್ತಸ್ಮಾ॒-ನ್ಮಲ॑ವ-ದ್ವಾಸಸಾ॒ ನ ಸಂವಁ॑ದೇತ॒- [ಸಂವಁ॑ದೇತ, ನ ಸ॒ಹಾ-ಽಽಸೀ॑ತ॒] 5
-ನ ಸ॒ಹಾ-ಽಽಸೀ॑ತ॒ ನಾಸ್ಯಾ॒ ಅನ್ನ॑ಮದ್ಯಾ-ದ್ಬ್ರಹ್ಮಹ॒ತ್ಯಾಯೈ॒ ಹ್ಯೇ॑ಷಾ ವರ್ಣ॑-ಮ್ಪ್ರತಿ॒ಮುಚ್ಯಾ ಽಽಸ್ತೇ-ಽಥೋ॒ ಖಲ್ವಾ॑ಹುರ॒ಭ್ಯಞ್ಜ॑ನಂ॒-ವಾಁವ ಸ್ತ್ರಿ॒ಯಾ ಅನ್ನ॑ಮ॒ಭ್ಯಞ್ಜ॑ನಮೇ॒ವ ನ ಪ್ರ॑ತಿ॒ಗೃಹ್ಯ॒-ಙ್ಕಾಮ॑ಮ॒ನ್ಯದಿತಿ॒ ಯಾ-ಮ್ಮಲ॑ವ-ದ್ವಾಸಸಗ್ಂ ಸ॒ಭಂವಁ॑ನ್ತಿ॒ ಯಸ್ತತೋ॒ ಜಾಯ॑ತೇ॒ ಸೋ॑-ಽಭಿಶ॒ಸ್ತೋ ಯಾಮರ॑ಣ್ಯೇ॒ ತಸ್ಯೈ᳚ ಸ್ತೇ॒ನೋ ಯಾ-ಮ್ಪರಾ॑ಚೀ॒-ನ್ತಸ್ಯೈ᳚ ಹ್ರೀತಮು॒ಖ್ಯ॑ಪಗ॒ಲ್ಭೋ ಯಾ ಸ್ನಾತಿ॒ ತಸ್ಯಾ॑ ಅ॒ಫ್ಸು ಮಾರು॑ಕೋ॒ ಯಾ- [ಮಾರು॑ಕೋ॒ ಯಾ, ಅ॒ಭ್ಯ॒ಙ್ಕ್ತೇ] 6
-ಽಭ್ಯ॒ಙ್ಕ್ತೇ ತಸ್ಯೈ॑ ದು॒ಶ್ಚರ್ಮಾ॒ ಯಾ ಪ್ರ॑ಲಿ॒ಖತೇ॒ ತಸ್ಯೈ॑ ಖಲ॒ತಿರ॑ಪಮಾ॒ರೀ ಯಾ-ಽಽಙ್ಕ್ತೇ ತಸ್ಯೈ॑ ಕಾ॒ಣೋ ಯಾ ದ॒ತೋ ಧಾವ॑ತೇ॒ ತಸ್ಯೈ᳚ ಶ್ಯಾ॒ವದ॒ನ್॒. ಯಾ ನ॒ಖಾನಿ॑ ನಿಕೃ॒ನ್ತತೇ॒ ತಸ್ಯೈ॑ ಕುನ॒ಖೀ ಯಾ ಕೃ॒ಣತ್ತಿ॒ ತಸ್ಯೈ᳚ ಕ್ಲೀ॒ಬೋ ಯಾ ರಜ್ಜುಗ್ಂ॑ ಸೃ॒ಜತಿ॒ ತಸ್ಯಾ॑ ಉ॒-ದ್ಬನ್ಧು॑ಕೋ॒ ಯಾ ಪ॒ರ್ಣೇನ॒ ಪಿಬ॑ತಿ॒ ತಸ್ಯಾ॑ ಉ॒ನ್ಮಾದು॑ಕೋ॒ ಯಾ ಖ॒ರ್ವೇಣ॒ ಪಿಬ॑ತಿ॒ ತಸ್ಯೈ॑ ಖ॒ರ್ವಸ್ತಿ॒ಸ್ರೋ ರಾತ್ರೀ᳚ರ್ವ್ರ॒ತ-ಞ್ಚ॑ರೇದಞ್ಜ॒ಲಿನಾ॑ ವಾ॒ ಪಿಬೇ॒ದಖ॑ರ್ವೇಣ ವಾ॒ ಪಾತ್ರೇ॑ಣ ಪ್ರ॒ಜಾಯೈ॑ ಗೋಪೀ॒ಥಾಯ॑ ॥ 7 ॥
(ಯ-ಥ್ಸೋ॑ಮ॒ಪಾನಂ॑ - ತೇ - ವೃ॒ಕ್ಣಾತ್- ತಸ್ಯ॒ ನಾ-ಽಽಶ್ಯಂ॑ - ಁವದೇತ॒ -ಮಾರು॑ಕೋ॒ ಯಾ -ಽಖ॑ರ್ವೇಣ ವಾ॒ - ತ್ರೀಣಿ॑ ಚ) (ಅ. 1)
ತ್ವಷ್ಟಾ॑ ಹ॒ತಪು॑ತ್ರೋ॒ ವೀನ್ದ್ರ॒ಗ್ಂ॒ ಸೋಮ॒ಮಾ-ಽಹ॑ರ॒-ತ್ತಸ್ಮಿ॒ನ್ನಿನ್ದ್ರ॑ ಉಪಹ॒ವಮೈ᳚ಚ್ಛತ॒ ತ-ನ್ನೋಪಾ᳚ಹ್ವಯತ ಪು॒ತ್ರ-ಮ್ಮೇ॑-ಽವಧೀ॒ರಿತಿ॒ ಸ ಯ॑ಜ್ಞವೇಶ॒ಸ-ಙ್ಕೃ॒ತ್ವಾ ಪ್ರಾ॒ಸಹಾ॒ ಸೋಮ॑ಮಪಿಬ॒-ತ್ತಸ್ಯ॒ ಯದ॒ತ್ಯಶಿ॑ಷ್ಯತ॒ ತ-ತ್ತ್ವಷ್ಟಾ॑-ಽಽಹವ॒ನೀಯ॒ಮುಪ॒ ಪ್ರಾವ॑ರ್ತಯ॒-ಥ್ಸ್ವಾಹೇನ್ದ್ರ॑ಶತ್ರು-ರ್ವರ್ಧ॒ಸ್ವೇತಿ॒ ಯದವ॑ರ್ತಯ॒-ತ್ತ-ದ್ವೃ॒ತ್ರಸ್ಯ॑ ವೃತ್ರ॒ತ್ವಂ-ಯಁದಬ್ರ॑ವೀ॒-ಥ್ಸ್ವಾಹೇನ್ದ್ರ॑ಶತ್ರು-ರ್ವರ್ಧ॒ಸ್ವೇತಿ॒ ತಸ್ಮಾ॑ದ॒ಸ್ಯೇ- [ತಸ್ಮಾ॑ದಸ್ಯ, ಇನ್ದ್ರ॒-ಶ್ಶತ್ರು॑ರಭವ॒ಥ್ಸ] 8
-ನ್ದ್ರ॒-ಶ್ಶತ್ರು॑ರಭವ॒ಥ್ಸ ಸ॒ಭಂವಁ॑ನ್ನ॒ಗ್ನೀಷೋಮಾ॑ವ॒ಭಿ ಸಮ॑ಭವ॒-ಥ್ಸ ಇ॑ಷುಮಾ॒ತ್ರಮಿ॑ಷುಮಾತ್ರಂ॒-ವಿಁಷ್ವ॑ಙ್ಙವರ್ಧತ॒ ಸ ಇ॒ಮಾಂ-ಲೋಁ॒ಕಾನ॑ವೃಣೋ॒ದ್ಯದಿ॒ಮಾಂ-ಲೋಁ॒ಕಾನವೃ॑ಣೋ॒-ತ್ತ-ದ್ವೃ॒ತ್ರಸ್ಯ॑ ವೃತ್ರ॒ತ್ವ-ನ್ತಸ್ಮಾ॒ದಿನ್ದ್ರೋ॑-ಽಬಿಭೇ॒-ಥ್ಸ ಪ್ರ॒ಜಾಪ॑ತಿ॒ಮುಪಾ॑ಧಾವ॒-ಚ್ಛತ್ರು॑ರ್ಮೇ-ಽ ಜ॒ನೀತಿ॒ ತಸ್ಮೈ॒ ವಜ್ರಗ್ಂ॑ ಸಿ॒ಕ್ತ್ವಾ ಪ್ರಾಯ॑ಚ್ಛದೇ॒ತೇನ॑ ಜ॒ಹೀತಿ॒ ತೇನಾ॒ಭ್ಯಾ॑ಯತ॒ ತಾವ॑ಬ್ರೂತಾಮ॒ಗ್ನೀಷೋಮೌ॒ ಮಾ [ ] 9
ಪ್ರಹಾ॑ರಾ॒ವಮ॒ನ್ತ-ಸ್ಸ್ವ॒ ಇತಿ॒ ಮಮ॒ ವೈ ಯು॒ವಗ್ಗ್ಸ್ಥ॒ ಇತ್ಯ॑ಬ್ರವೀ॒-ನ್ಮಾಮ॒ಭ್ಯೇತ॒ಮಿತಿ॒ ತೌ ಭಾ॑ಗ॒ಧೇಯ॑ಮೈಚ್ಛೇತಾ॒-ನ್ತಾಭ್ಯಾ॑-ಮೇ॒ತಮ॑ಗ್ನೀಷೋ॒ಮೀಯ॒-ಮೇಕಾ॑ದಶಕಪಾಲ-ಮ್ಪೂ॒ರ್ಣಮಾ॑ಸೇ॒ ಪ್ರಾಯ॑ಚ್ಛ॒-ತ್ತಾವ॑ಬ್ರೂತಾಮ॒ಭಿ ಸನ್ದ॑ಷ್ಟೌ॒ ವೈ ಸ್ವೋ॒ ನ ಶ॑ಕ್ನುವ॒ ಐತು॒ಮಿತಿ॒ ಸ ಇನ್ದ್ರ॑ ಆ॒ತ್ಮನಃ॑ ಶೀತರೂ॒ರಾವ॑ಜನಯ॒-ತ್ತಚ್ಛೀ॑ತರೂ॒ರಯೋ॒ರ್ಜನ್ಮ॒ ಯ ಏ॒ವಗ್ಂ ಶೀ॑ತರೂ॒ರಯೋ॒ರ್ಜನ್ಮ॒ ವೇದ॒ [ವೇದ॑, ನೈನಗ್ಂ॑] 10
ನೈನಗ್ಂ॑ ಶೀತರೂ॒ರೌ ಹ॑ತ॒ಸ್ತಾಭ್ಯಾ॑ಮೇನಮ॒ಭ್ಯ॑ನಯ॒-ತ್ತಸ್ಮಾ᳚-ಜ್ಜಞ್ಜ॒ಭ್ಯಮಾ॑ನಾದ॒ಗ್ನೀಷೋಮೌ॒ ನಿರ॑ಕ್ರಾಮತಾ-ಮ್ಪ್ರಾಣಾಪಾ॒ನೌ ವಾ ಏ॑ನ॒-ನ್ತದ॑ಜಹಿತಾ-ಮ್ಪ್ರಾ॒ಣೋ ವೈ ದಕ್ಷೋ॑-ಽಪಾ॒ನಃ ಕ್ರತು॒ಸ್ತಸ್ಮಾ᳚-ಜ್ಜಞ್ಜ॒ಭ್ಯಮಾ॑ನೋ ಬ್ರೂಯಾ॒ನ್ಮಯಿ॑ ದಕ್ಷಕ್ರ॒ತೂ ಇತಿ॑ ಪ್ರಾಣಾಪಾ॒ನಾವೇ॒ವಾ-ಽಽತ್ಮ-ನ್ಧ॑ತ್ತೇ॒ ಸರ್ವ॒ಮಾಯು॑ರೇತಿ॒ ಸ ದೇ॒ವತಾ॑ ವೃ॒ತ್ರಾನ್ನಿ॒ರ್॒ಹೂಯ॒ ವಾರ್ತ್ರ॑ಘ್ನಗ್ಂ ಹ॒ವಿಃ ಪೂ॒ರ್ಣಮಾ॑ಸೇ॒ ನಿರ॑ವಪ॒-ದ್ಘ್ನನ್ತಿ॒ ವಾ ಏ॑ನ-ಮ್ಪೂ॒ರ್ಣಮಾ॑ಸ॒ ಆ- [ಆ, ಅ॒ಮಾ॒ವಾ॒ಸ್ಯಾ॑ಯಾಂ-] 11
-ಽಮಾ॑ವಾ॒ಸ್ಯಾ॑ಯಾ-ಮ್ಪ್ಯಾಯಯನ್ತಿ॒ ತಸ್ಮಾ॒-ದ್ವಾರ್ತ್ರ॑ಘ್ನೀ ಪೂ॒ರ್ಣಮಾ॒ಸೇ ಽನೂ᳚ಚ್ಯೇತೇ॒ ವೃಧ॑ನ್ವತೀ ಅಮಾವಾ॒ಸ್ಯಾ॑ಯಾ॒-ನ್ತ-ಥ್ಸ॒ಗ್ಗ್॒ಸ್ಥಾಪ್ಯ॒ ವಾರ್ತ್ರ॑ಘ್ನಗ್ಂ ಹ॒ವಿರ್ವಜ್ರ॑ಮಾ॒ದಾಯ॒ ಪುನ॑ರ॒ಭ್ಯಾ॑ಯತ॒ ತೇ ಅ॑ಬ್ರೂತಾ॒-ನ್ದ್ಯಾವಾ॑ಪೃಥಿ॒ವೀ ಮಾ ಪ್ರ ಹಾ॑ರಾ॒ವಯೋ॒ರ್ವೈ ಶ್ರಿ॒ತ ಇತಿ॒ ತೇ ಅ॑ಬ್ರೂತಾಂ॒-ವಁರಂ॑-ವೃಁಣಾವಹೈ॒ ನಕ್ಷ॑ತ್ರವಿಹಿತಾ॒-ಽಹಮಸಾ॒ನೀತ್ಯ॒ಸಾವ॑ಬ್ರವೀ- ಚ್ಚಿ॒ತ್ರವಿ॑ಹಿತಾ॒- ಽಹಮಿತೀ॒ಯ-ನ್ತಸ್ಮಾ॒ನ್ನಕ್ಷ॑ತ್ರವಿಹಿತಾ॒-ಽಸೌ ಚಿ॒ತ್ರವಿ॑ಹಿತೇ॒-ಽಯಂ-ಯಁ ಏ॒ವ-ನ್ದ್ಯಾವಾ॑ಪೃಥಿ॒ವ್ಯೋ- [-ದ್ಯಾವಾ॑ಪೃಥಿ॒ವ್ಯೋಃ, ವರಂ॒-ವೇಁದೈನಂ॒-ವಁರೋ॑] 12
-ರ್ವರಂ॒-ವೇಁದೈನಂ॒-ವಁರೋ॑ ಗಚ್ಛತಿ॒ ಸ ಆ॒ಭ್ಯಾಮೇ॒ವ ಪ್ರಸೂ॑ತ॒ ಇನ್ದ್ರೋ॑ ವೃ॒ತ್ರಮ॑ಹ॒-ನ್ತೇ ದೇ॒ವಾ ವೃ॒ತ್ರಗ್ಂ ಹ॒ತ್ವಾ-ಽಗ್ನೀಷೋಮಾ॑ವಬ್ರುವನ್. ಹ॒ವ್ಯ-ನ್ನೋ॑ ವಹತ॒ಮಿತಿ॒ ತಾವ॑ಬ್ರೂತಾ॒ಮಪ॑ತೇಜಸೌ॒ ವೈ ತ್ಯೌ ವೃ॒ತ್ರೇ ವೈ ತ್ಯಯೋ॒ಸ್ತೇಜ॒ ಇತಿ॒ ತೇ᳚-ಽಬ್ರುವ॒ನ್ ಕ ಇ॒ದಮಚ್ಛೈ॒ತೀತಿ॒ ಗೌರಿತ್ಯ॑ಬ್ರುವ॒-ನ್ಗೌರ್ವಾವ ಸರ್ವ॑ಸ್ಯ ಮಿ॒ತ್ರಮಿತಿ॒ ಸಾ-ಽಬ್ರ॑ವೀ॒- [ಸಾ-ಽಬ್ರ॑ವೀತ್, ವರಂ॑-ವೃಁಣೈ॒ ಮಯ್ಯೇ॒ವ] 13
-ದ್ವರಂ॑-ವೃಁಣೈ॒ ಮಯ್ಯೇ॒ವ ಸ॒ತೋ-ಽಭಯೇ॑ನ ಭುನಜಾದ್ಧ್ವಾ॒ ಇತಿ॒ ತ-ದ್ಗೌರಾ-ಽಹ॑ರ॒-ತ್ತಸ್ಮಾ॒-ದ್ಗವಿ॑ ಸ॒ತೋಭಯೇ॑ನ ಭುಞ್ಜತ ಏ॒ತದ್ವಾ ಅ॒ಗ್ನೇಸ್ತೇಜೋ॒ ಯ-ದ್ಘೃ॒ತಮೇ॒ತ-ಥ್ಸೋಮ॑ಸ್ಯ॒ ಯ-ತ್ಪಯೋ॒ ಯ ಏ॒ವಮ॒ಗ್ನೀಷೋಮ॑ಯೋ॒ ಸ್ತೇಜೋ॒ ವೇದ॑ ತೇಜ॒ಸ್ವ್ಯೇ॑ವ ಭ॑ವತಿ ಬ್ರಹ್ಮವಾ॒ದಿನೋ॑ ವದನ್ತಿ ಕಿನ್ದೇವ॒ತ್ಯ॑-ಮ್ಪೌರ್ಣಮಾ॒ಸಮಿತಿ॑ ಪ್ರಾಜಾಪ॒ತ್ಯಮಿತಿ॑ ಬ್ರೂಯಾ॒-ತ್ತೇನೇನ್ದ್ರ॑-ಞ್ಜ್ಯೇ॒ಷ್ಠ-ಮ್ಪು॒ತ್ರ-ನ್ನಿ॒ರವಾ॑ಸಾಯಯ॒ದಿತಿ॒ ತಸ್ಮಾ᳚- -ಜ್ಜ್ಯೇ॒ಷ್ಠ-ಮ್ಪು॒ತ್ರ-ನ್ಧನೇ॑ನ ನಿ॒ರವ॑ಸಾಯಯನ್ತಿ ॥ 14 ॥
(ಅ॒ಸ್ಯ॒ - ಮಾ - ವೇದಾ - ಽಽ - ದ್ಯಾವಾ॑ಪೃಥಿ॒ವ್ಯೋ - ರ॑ಬ್ರವೀ॒ - ದಿತಿ॒ ತಸ್ಮಾ᳚ - ಚ್ಚ॒ತ್ವಾರಿ॑ ಚ) (ಅ. 2)
ಇನ್ದ್ರಂ॑-ವೃಁ॒ತ್ರ-ಞ್ಜ॑ಘ್ನಿ॒ವಾಗ್ಂಸ॒-ಮ್ಮೃಧೋ॒-ಽಭಿ ಪ್ರಾವೇ॑ಪನ್ತ॒ ಸ ಏ॒ತಂ-ವೈಁ॑ಮೃ॒ಧ-ಮ್ಪೂ॒ಎಣಮಾ॑ಸೇ-ಽನುನಿರ್ವಾ॒ಪ್ಯ॑ಮಪಶ್ಯ॒-ತ್ತ-ನ್ನಿರ॑ವಪ॒-ತ್ತೇನ॒ ವೈ ಸ ಮೃಧೋ-ಽಪಾ॑ಹತ॒ ಯದ್ವೈ॑ಮೃ॒ಧಃ ಪೂ॒ರ್ಣಮಾ॑ಸೇ-ಽನುನಿರ್ವಾ॒ಪ್ಯೋ॑ ಭವ॑ತಿ॒ ಮೃಧ॑ ಏ॒ವ ತೇನ॒ ಯಜ॑ಮಾ॒ನೋ ಽಪ॑ ಹತ॒ ಇನ್ದ್ರೋ॑ ವೃ॒ತ್ರಗ್ಂ ಹ॒ತ್ವಾ ದೇ॒ವತಾ॑ಭಿಶ್ಚೇನ್ದ್ರಿ॒ಯೇಣ॑ ಚ॒ ವ್ಯಾ᳚ರ್ಧ್ಯತ॒ ಸ ಏ॒ತಮಾ᳚ಗ್ನೇ॒ಯ-ಮ॒ಷ್ಟಾಕ॑ಪಾಲ-ಮಮಾವಾ॒ಸ್ಯಾ॑ಯಾಮಪಶ್ಯದೈ॒ನ್ದ್ರ-ನ್ದಧಿ॒ [-ದಧಿ॑, ತ-ನ್ನಿರ॑ವಪ॒-ತ್ತೇನ॒] 15
ತ-ನ್ನಿರ॑ವಪ॒-ತ್ತೇನ॒ ವೈ ಸ ದೇ॒ವತಾ᳚ಶ್ಚೇನ್ದ್ರಿ॒ಯ-ಞ್ಚಾವಾ॑ರುನ್ಧ॒ಯದಾ᳚ಗ್ನೇ॒ಯೋ᳚ ಽಷ್ಟಾಕ॑ಪಾಲೋ ಽಮಾವಾ॒ಸ್ಯಾ॑ಯಾ॒-ಮ್ಭವ॑ತ್ಯೈ॒ನ್ದ್ರ-ನ್ದಧಿ॑ ದೇ॒ವತಾ᳚ಶ್ಚೈ॒ವ ತೇನೇ᳚ನ್ದ್ರಿ॒ಯ-ಞ್ಚ॒ ಯಜ॑ಮಾ॒ನೋ-ಽವ॑ ರುನ್ಧ॒ ಇನ್ದ್ರ॑ಸ್ಯ ವೃ॒ತ್ರ-ಞ್ಜ॒ಘ್ನುಷ॑ ಇನ್ದ್ರಿ॒ಯಂ-ವೀಁ॒ರ್ಯ॑-ಮ್ಪೃಥಿ॒ವೀಮನು॒ ವ್ಯಾ᳚ರ್ಚ್ಛ॒-ತ್ತದೋಷ॑ಧಯೋ ವೀ॒ರುಧೋ॑-ಽಭವ॒ನ್ಥ್ಸ ಪ್ರ॒ಜಾಪ॑ತಿ॒ಮುಪಾ॑ಧಾವ-ದ್ವೃ॒ತ್ರ-ಮ್ಮೇ॑ ಜ॒ಘ್ನುಷ॑ ಇನ್ದ್ರಿ॒ಯಂ-ವೀಁ॒ರ್ಯ॑- [ವೀ॒ರ್ಯ᳚ಮ್, ಪೃ॒ಥಿ॒ವೀಮನು॒] 16
-ಮ್ಪೃಥಿ॒ವೀಮನು॒ ವ್ಯಾ॑ರ॒-ತ್ತದೋಷ॑ಧಯೋ ವೀ॒ರುಧೋ॑-ಽಭೂವ॒ನ್ನಿತಿ॒ ಸ ಪ್ರ॒ಜಾಪ॑ತಿಃ ಪ॒ಶೂನ॑ಬ್ರವೀದೇ॒ತದ॑ಸ್ಮೈ॒ ಸ-ನ್ನ॑ಯ॒ತೇತಿ॒ ತ-ತ್ಪ॒ಶವ॒ ಓಷ॑ಧೀ॒ಭ್ಯೋ ಽಧ್ಯಾ॒ತ್ಮನ್-ಥ್ಸಮ॑ನಯ॒-ನ್ತ-ತ್ಪ್ರತ್ಯ॑ದುಹ॒ನ್॒. ಯ-ಥ್ಸ॒ಮನ॑ಯ॒-ನ್ತ-ಥ್ಸಾ᳚-ನ್ನಾ॒ಯ್ಯಸ್ಯ॑ ಸಾನ್ನಾಯ್ಯ॒ತ್ವಂ-ಯಁ-ತ್ಪ್ರ॒ತ್ಯದು॑ಹ॒-ನ್ತ-ತ್ಪ್ರ॑ತಿ॒ಧುಷಃ॑ ಪ್ರತಿಧು॒ಕ್ತ್ವಗ್ಂ ಸಮ॑ನೈಷುಃ॒ ಪ್ರತ್ಯ॑ಧುಕ್ಷ॒-ನ್ನ ತು ಮಯಿ॑ ಶ್ರಯತ॒ ಇತ್ಯ॑ಬ್ರವೀದೇ॒ತದ॑ಸ್ಮೈ [ ] 17
ಶೃ॒ತ-ಙ್ಕು॑ರು॒ತೇತ್ಯ॑ಬ್ರವೀ॒-ತ್ತದ॑ಸ್ಮೈ ಶೃ॒ತ-ಮ॑ಕುರ್ವನ್ನಿನ್ದ್ರಿ॒ಯಂ-ವಾಁವಾಸ್ಮಿ॑ನ್ ವೀ॒ರ್ಯ॑-ನ್ತದ॑ಶ್ರಯ॒-ನ್ತಚ್ಛೃ॒ತಸ್ಯ॑ ಶೃತ॒ತ್ವಗ್ಂ ಸಮ॑ನೈಷುಃ॒ ಪ್ರತ್ಯ॑ಧುಕ್ಷಞ್ಛೃ॒ತಮ॑ಕ್ರ॒-ನ್ನ ತು ಮಾ॑ ಧಿನೋ॒ತೀತ್ಯ॑ಬ್ರವೀದೇ॒ತದ॑ಸ್ಮೈ॒ ದಧಿ॑ ಕುರು॒ತೇತ್ಯ॑ಬ್ರವೀ॒-ತ್ತದ॑ಸ್ಮೈ॒ ದದ್ಧ್ಯ॑ಕುರ್ವ॒-ನ್ತದೇ॑ನಮಧಿನೋ॒-ತ್ತದ್ದ॒ದ್ಧ್ನೋ ದ॑ಧಿ॒ತ್ವ-ಮ್ಬ್ರ॑ಹ್ಮವಾ॒ದಿನೋ॑ ವದನ್ತಿ ದ॒ದ್ಧ್ನಃ ಪೂರ್ವ॑ಸ್ಯಾವ॒ದೇಯ॒- [ಪೂರ್ವ॑ಸ್ಯಾವ॒ದೇಯ᳚ಮ್, ದಧಿ॒ ಹಿ] 18
-ನ್ದಧಿ॒ ಹಿ ಪೂರ್ವ॑-ಙ್ಕ್ರಿ॒ಯತ॒ ಇತ್ಯನಾ॑ದೃತ್ಯ॒ ತಚ್ಛೃ॒ತಸ್ಯೈ॒ವ ಪೂರ್ವ॒ಸ್ಯಾವ॑ ದ್ಯೇದಿನ್ದ್ರಿ॒ಯಮೇ॒ವಾಸ್ಮಿ॑ನ್ ವೀ॒ರ್ಯಗ್ಗ್॑ ಶ್ರಿ॒ತ್ವಾ ದ॒ದ್ಧ್ನೋ ಪರಿ॑ಷ್ಟಾದ್ಧಿನೋತಿ ಯಥಾಪೂ॒ರ್ವಮುಪೈ॑ತಿ॒ ಯ-ತ್ಪೂ॒ತೀಕೈ᳚ರ್ವಾ ಪರ್ಣವ॒ಲ್ಕೈರ್ವಾ॑ ಽಽತ॒ಞ್ಚ್ಯಾ-ಥ್ಸೌ॒ಮ್ಯ-ನ್ತದ್ಯ-ತ್ಕ್ವ॑ಲೈ ರಾಕ್ಷ॒ಸ-ನ್ತದ್ಯ-ತ್ತ॑ಣ್ಡು॒ಲೈರ್ವೈ᳚ಶ್ವದೇ॒ವ-ನ್ತದ್ಯದಾ॒ತಞ್ಚ॑ನೇನ ಮಾನು॒ಷ-ನ್ತ-ದ್ಯ-ದ್ದ॒ದ್ಧ್ನಾ ತ-ಥ್ಸೇನ್ದ್ರ॑-ನ್ದ॒ದ್ಧ್ನಾ ಽಽತ॑ನಕ್ತಿ [ತ॑ನಕ್ತಿ, ಸೇ॒ನ್ದ್ರ॒ತ್ವಾಯಾ᳚-] 19
ಸೇನ್ದ್ರ॒ತ್ವಾಯಾ᳚-ಽಗ್ನಿಹೋತ್ರೋಚ್ಛೇಷ॒ಣಮ॒ಭ್ಯಾ-ತ॑ನಕ್ತಿ ಯ॒ಜ್ಞಸ್ಯ॒ ಸನ್ತ॑ತ್ಯಾ॒ ಇನ್ದ್ರೋ॑ ವೃ॒ತ್ರಗ್ಂ ಹ॒ತ್ವಾ ಪರಾ᳚-ಮ್ಪರಾ॒ವತ॑-ಮಗಚ್ಛ॒-ದಪಾ॑ರಾಧ॒ಮಿತಿ॒ ಮನ್ಯ॑ಮಾನ॒ಸ್ತ-ನ್ದೇ॒ವತಾಃ॒ ಪ್ರೈಷ॑ಮೈಚ್ಛ॒ನ್-ಥ್ಸೋ᳚-ಽಬ್ರವೀ-ತ್ಪ್ರ॒ಜಾಪ॑ತಿ॒ರ್ಯಃ ಪ್ರ॑ಥ॒ಮೋ॑-ಽನುವಿ॒ನ್ದತಿ॒ ತಸ್ಯ॑ ಪ್ರಥ॒ಮ-ಮ್ಭಾ॑ಗ॒ಧೇಯ॒ಮಿತಿ॒ ತ-ಮ್ಪಿ॒ತರೋ-ಽನ್ವ॑ವಿನ್ದ॒-ನ್ತಸ್ಮಾ᳚-ತ್ಪಿ॒ತೃಭ್ಯಃ॑ ಪೂರ್ವೇ॒ದ್ಯುಃ ಕ್ರಿ॑ಯತೇ॒ ಸೋ॑-ಽಮಾವಾ॒ಸ್ಯಾ᳚-ಮ್ಪ್ರತ್ಯಾ-ಽಗ॑ಚ್ಛ॒-ತ್ತ-ನ್ದೇ॒ವಾ ಅ॒ಭಿ ಸಮ॑ಗಚ್ಛನ್ತಾ॒ಮಾ ವೈ ನೋ॒- [ವೈ ನಃ॑, ಅ॒ದ್ಯ ವಸು॑] 20
-ಽದ್ಯ ವಸು॑ ವಸ॒ತೀತೀನ್ದ್ರೋ॒ ಹಿ ದೇ॒ವಾನಾಂ॒-ವಁಸು॒ ತದ॑ಮಾವಾ॒ಸ್ಯಾ॑ಯಾ ಅಮಾವಾಸ್ಯ॒ತ್ವ-ಮ್ಬ್ರ॑ಹ್ಮವಾ॒ದಿನೋ॑ ವದನ್ತಿ ಕಿನ್ದೇವ॒ತ್ಯಗ್ಂ॑ ಸಾನ್ನಾ॒ಯ್ಯಮಿತಿ॑ ವೈಶ್ವದೇ॒ವಮಿತಿ॑ ಬ್ರೂಯಾ॒-ದ್ವಿಶ್ವೇ॒ ಹಿ ತದ್ದೇ॒ವಾ ಭಾ॑ಗ॒ಧೇಯ॑ಮ॒ಭಿ ಸ॒ಮಗ॑ಚ್ಛ॒ನ್ತೇತ್ಯಥೋ॒ ಖಲ್ವೈ॒ನ್ದ್ರಮಿತ್ಯೇ॒ವ ಬ್ರೂ॑ಯಾ॒ದಿನ್ದ್ರಂ॒-ವಾಁವ ತೇ ತ-ದ್ಭಿ॑ಷ॒ಜ್ಯನ್ತೋ॒-ಽಭಿ ಸಮ॑ಗಚ್ಛ॒ನ್ತೇತಿ॑ ॥ 21 ॥
(ದಧಿ॑ - ಮೇ ಜ॒ಘ್ನುಷ॑ ಇನ್ದ್ರಿ॒ಯಂ-ವೀಁ॒ರ್ಯ॑ - ಮಿತ್ಯ॑ಬ್ರವೀದೇ॒ತದ॑ಸ್ಮಾ - ಅವ॒ದೇಯಂ॑ - ತನಕ್ತಿ - ನೋ॒ - ದ್ವಿಚ॑ತ್ವಾರಿಗ್ಂಶಚ್ಚ) (ಅ. 3)
ಬ್ರ॒ಹ್ಮ॒ವಾ॒ದಿನೋ॑ ವದನ್ತಿ॒ ಸ ತ್ವೈ ದ॑॑ರ್ಶಪೂರ್ಣಮಾ॒ಸೌ ಯ॑ಜೇತ॒ ಯ ಏ॑ನೌ॒ ಸೇನ್ದ್ರೌ॒ ಯಜೇ॒ತೇತಿ॑ ವೈಮೃ॒ಧಃ ಪೂ॒ರ್ಣಮಾ॑ಸೇ ಽನುನಿರ್ವಾ॒ಪ್ಯೋ॑ ಭವತಿ॒ ತೇನ॑ ಪೂ॒ರ್ಣಮಾ॑ಸ॒-ಸ್ಸೇನ್ದ್ರ॑ ಐ॒ನ್ದ್ರ-ನ್ದದ್ಧ್ಯ॑ಮಾವಾ॒ಸ್ಯಾ॑ಯಾ॒-ನ್ತೇನಾ॑ಮಾವಾ॒ಸ್ಯಾ॑ ಸೇನ್ದ್ರಾ॒ ಯ ಏ॒ವಂ-ವಿಁ॒ದ್ವಾ-ನ್ದ॑ರ್ಶಪೂರ್ಣಮಾ॒ಸೌ ಯಜ॑ತೇ॒ ಸೇನ್ದ್ರಾ॑ವೇ॒ವೈನೌ॑ ಯಜತೇ॒ ಶ್ವ-ಶ್ಶ್ವೋ᳚-ಽಸ್ಮಾ ಈಜಾ॒ನಾಯ॒ ವಸೀ॑ಯೋ ಭವತಿ ದೇ॒ವಾ ವೈ ಯ-ದ್ಯ॒ಜ್ಞೇ ಽಕು॑ರ್ವತ॒ತದಸು॑ರಾ ಅಕುರ್ವತ॒ ತೇ ದೇ॒ವಾ ಏ॒ತಾ- [ದೇ॒ವಾ ಏ॒ತಾಮ್, ಇಷ್ಟಿ॑-ಮಪಶ್ಯನ್-] 22
-ಮಿಷ್ಟಿ॑-ಮಪಶ್ಯ-ನ್ನಾಗ್ನಾವೈಷ್ಣ॒ವ-ಮೇಕಾ॑ದಶಕಪಾಲ॒ಗ್ಂ॒ ಸರ॑ಸ್ವತ್ಯೈ ಚ॒ರುಗ್ಂ ಸರ॑ಸ್ವತೇ ಚ॒ರು-ನ್ತಾ-ಮ್ಪೌ᳚ರ್ಣಮಾ॒ಸಗ್ಂ ಸ॒ಗ್ಗ್॒ಸ್ಥಾಪ್ಯಾನು॒ ನಿರ॑ವಪ॒-ನ್ತತೋ॑ ದೇ॒ವಾ ಅಭ॑ವ॒-ನ್ಪರಾ-ಽಸು॑ರಾ॒ ಯೋ ಭ್ರಾತೃ॑ವ್ಯವಾ॒ನ್ಥ್ಸ್ಯಾ-ಥ್ಸ ಪೌ᳚ರ್ಣಮಾ॒ಸಗ್ಂ ಸ॒ಗ್ಗ್॒ಸ್ಥಾಪ್ಯೈ॒ತಾಮಿಷ್ಟಿ॒ಮನು॒ ನಿರ್ವ॑ಪೇ-ತ್ಪೌರ್ಣಮಾ॒ಸೇನೈ॒ವ ವಜ್ರ॒-ಮ್ಭ್ರಾತೃ॑ವ್ಯಾಯ ಪ್ರ॒ಹೃತ್ಯಾ᳚-ಽಽಗ್ನಾವೈಷ್ಣ॒ವೇನ॑ ದೇ॒ವತಾ᳚ಶ್ಚ ಯ॒ಜ್ಞ-ಞ್ಚ॒ ಭ್ರಾತೃ॑ವ್ಯಸ್ಯ ವೃಙ್ಕ್ತೇ ಮಿಥು॒ನಾ-ನ್ಪ॒ಶೂನ್-ಥ್ಸಾ॑ರಸ್ವ॒ತಾಭ್ಯಾಂ॒-ಯಾಁವ॑ದೇ॒ವಾಸ್ಯಾಸ್ತಿ॒ ತ- [ಯಾವ॑ದೇ॒ವಾಸ್ಯಾಸ್ತಿ॒ ತತ್, ಸರ್ವಂ॑-ವೃಁಙ್ಕ್ತೇ] 23
-ಥ್ಸರ್ವಂ॑-ವೃಁಙ್ಕ್ತೇ ಪೌರ್ಣಮಾ॒ಸೀಮೇ॒ವ ಯ॑ಜೇತ॒ ಭ್ರಾತೃ॑ವ್ಯವಾ॒ನ್ನಾಮಾ॑ವಾ॒ಸ್ಯಾಗ್ಂ॑ ಹ॒ತ್ವಾ ಭ್ರಾತೃ॑ವ್ಯ॒-ನ್ನಾ-ಽಽಪ್ಯಾ॑ಯಯತಿ ಸಾಕಮ್ಪ್ರಸ್ಥಾ॒ಯೀಯೇ॑ನ ಯಜೇತ ಪ॒ಶುಕಾ॑ಮೋ॒ಯಸ್ಮೈ॒ ವಾ ಅಲ್ಪೇ॑ನಾ॒-ಽಽಹರ॑ನ್ತಿ॒ ನಾ-ಽಽತ್ಮನಾ॒ ತೃಪ್ಯ॑ತಿ॒ ನಾನ್ಯಸ್ಮೈ॑ ದದಾತಿ॒ ಯಸ್ಮೈ॑ ಮಹ॒ತಾ ತೃಪ್ಯ॑ತ್ಯಾ॒ತ್ಮನಾ॒ ದದಾ᳚ತ್ಯ॒ನ್ಯಸ್ಮೈ॑ ಮಹ॒ತಾ ಪೂ॒ರ್ಣಗ್ಂ ಹೋ॑ತ॒ವ್ಯ॑-ನ್ತೃ॒ಪ್ತ ಏ॒ವೈನ॒ಮಿನ್ದ್ರಃ॑ ಪ್ರ॒ಜಯಾ॑ ಪ॒ಶುಭಿ॑ಸ್ತರ್ಪಯತಿ ದಾರುಪಾ॒ತ್ರೇಣ॑ ಜುಹೋತಿ॒ ನ ಹಿ ಮೃ॒ನ್ಮಯ॒ಮಾಹು॑ತಿಮಾನ॒ಶ ಔದು॑ಮ್ಬರ- [ಔದು॑ಮ್ಬರಮ್, ಭ॒ವ॒ತ್ಯೂರ್ಗ್ವಾ] 24
-ಮ್ಭವ॒ತ್ಯೂರ್ಗ್ವಾ ಉ॑ದು॒ಮ್ಬರ॒ ಊರ್-ಕ್ಪ॒ಶವ॑ ಊ॒ರ್ಜೈವಾಸ್ಮಾ॒ ಊರ್ಜ॑-ಮ್ಪ॒ಶೂನವ॑ ರುನ್ಧೇ॒ ನಾಗ॑ತಶ್ರೀರ್ಮಹೇ॒ನ್ದ್ರಂ-ಯಁ॑ಜೇತ॒ ತ್ರಯೋ॒ ವೈ ಗ॒ತಶ್ರಿ॑ಯ-ಶ್ಶುಶ್ರು॒ವಾ-ನ್ಗ್ರಾ॑ಮ॒ಣೀ ರಾ॑ಜ॒ನ್ಯ॑ಸ್ತೇಷಾ᳚-ಮ್ಮಹೇ॒ನ್ದ್ರೋ ದೇ॒ವತಾ॒ ಯೋ ವೈ ಸ್ವಾ-ನ್ದೇ॒ವತಾ॑ಮತಿ॒ ಯಜ॑ತೇ॒ ಪ್ರಸ್ವಾಯೈ॑ ದೇ॒ವತಾ॑ಯೈಚ್ಯವತೇ॒ ನ ಪರಾ॒-ಮ್ಪ್ರಾಪ್ನೋ॑ತಿ॒ ಪಾಪೀ॑ಯಾ-ನ್ಭವತಿ ಸಂವಁಥ್ಸ॒ರ-ಮಿನ್ದ್ರಂ॑-ಯಁಜೇತ ಸಂವಁಥ್ಸ॒ರಗ್ಂ ಹಿ ವ್ರ॒ತ-ನ್ನಾ-ಽತಿ॒ ಸ್ವೈ- [ವ್ರ॒ತ-ನ್ನಾ-ಽತಿ॒ ಸ್ವಾ, ಏ॒ವೈನ॑-ನ್ದೇ॒ವತೇ॒ಜ್ಯಮಾ॑ನಾ॒] 25
-ವೈನ॑-ನ್ದೇ॒ವತೇ॒ಜ್ಯಮಾ॑ನಾ॒ ಭೂತ್ಯಾ॑ ಇನ್ಧೇ॒ ವಸೀ॑ಯಾ-ನ್ಭವತಿ ಸಂವಁಥ್ಸ॒ರಸ್ಯ॑ ಪ॒ರಸ್ತಾ॑ದ॒ಗ್ನಯೇ᳚ ವ್ರ॒ತಪ॑ತಯೇ ಪುರೋ॒ಡಾಶ॑ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ-ಥ್ಸಂವಁಥ್ಸ॒ರಮೇ॒ವೈನಂ॑-ವೃಁ॒ತ್ರ-ಞ್ಜ॑ಘ್ನಿ॒ವಾಗ್ಂ ಸ॑ಮ॒ಗ್ನಿ-ರ್ವ್ರ॒ತಪ॑ತಿ-ರ್ವ್ರ॒ತಮಾ ಲ॑ಮ್ಭಯತಿ॒ ತತೋ-ಽಧಿ॒ ಕಾಮಂ॑-ಯಁಜೇತ ॥ 26 ॥
(ಏ॒ತಾಂ - ತ - ದೌದು॑ಮ್ಬರ॒ಗ್ಗ್॒ - ಸ್ವಾ - ತ್ರಿ॒ಗ್ಂ॒ಶಚ್ಚ॑ ) (ಅ. 4)
ನಾಸೋ॑ಮಯಾಜೀ॒ ಸ-ನ್ನ॑ಯೇ॒ದನಾ॑ಗತಂ॒-ವಾಁ ಏ॒ತಸ್ಯ॒ ಪಯೋ॒ ಯೋ-ಽಸೋ॑ಮಯಾಜೀ॒ ಯದಸೋ॑ಮಯಾಜೀ ಸ॒-ನ್ನಯೇ᳚-ತ್ಪರಿಮೋ॒ಷ ಏ॒ವ ಸೋ-ಽನೃ॑ತ-ಙ್ಕರೋ॒ತ್ಯಥೋ॒ ಪರೈ॒ವ ಸಿ॑ಚ್ಯತೇ ಸೋಮಯಾ॒ಜ್ಯೇ॑ವ ಸ-ನ್ನ॑ಯೇ॒-ತ್ಪಯೋ॒ ವೈ ಸೋಮಃ॒ ಪಯಃ॑ ಸಾನ್ನಾ॒ಯ್ಯ-ಮ್ಪಯ॑ಸೈ॒ವ ಪಯ॑ ಆ॒ತ್ಮ-ನ್ಧ॑ತ್ತೇ॒ ವಿ ವಾ ಏ॒ತ-ಮ್ಪ್ರ॒ಜಯಾ॑ ಪ॒ಶುಭಿ॑ರರ್ಧಯತಿ ವ॒ರ್ಧಯ॑ತ್ಯಸ್ಯ॒ ಭ್ರಾತೃ॑ವ್ಯಂ॒-ಯಁಸ್ಯ॑ ಹ॒ವಿರ್ನಿರು॑ಪ್ತ-ಮ್ಪು॒ರಸ್ತಾ᳚ಚ್ಚ॒ನ್ದ್ರಮಾ॑ [ಪು॒ರಸ್ತಾ᳚ಚ್ಚ॒ನ್ದ್ರಮಾಃ᳚, ಅ॒ಭ್ಯು॑ದೇತಿ॑] 27
ಅ॒ಭ್ಯು॑ದೇತಿ॑ ತ್ರೇ॒ಧಾ ತ॑ಣ್ಡು॒ಲಾನ್. ವಿ ಭ॑ಜೇ॒ದ್ಯೇ ಮ॑ದ್ಧ್ಯ॒ಮಾ-ಸ್ಸ್ಯುಸ್ತಾನ॒ಗ್ನಯೇ॑ ದಾ॒ತ್ರೇ ಪು॑ರೋ॒ಡಾಶ॑ಮ॒ಷ್ಟಾಕ॑ಪಾಲ-ಙ್ಕುರ್ಯಾ॒ದ್ಯೇ ಸ್ಥವಿ॑ಷ್ಠಾ॒ಸ್ತಾನಿನ್ದ್ರಾ॑ಯ ಪ್ರದಾ॒ತ್ರೇ ದ॒ಧಗ್ಗ್ಶ್ಚ॒ರುಂ-ಯೇಁ-ಽಣಿ॑ಷ್ಠಾ॒ಸ್ತಾನ್. ವಿಷ್ಣ॑ವೇ ಶಿಪಿವಿ॒ಷ್ಟಾಯ॑ ಶೃ॒ತೇ ಚ॒ರುಮ॒ಗ್ನಿರೇ॒ವಾಸ್ಮೈ᳚ ಪ್ರ॒ಜಾ-ಮ್ಪ್ರ॑ಜ॒ನಯ॑ತಿ ವೃ॒ದ್ಧಾಮಿನ್ದ್ರಃ॒ ಪ್ರಯ॑ಚ್ಛತಿ ಯ॒ಜ್ಞೋ ವೈ ವಿಷ್ಣುಃ॑ ಪ॒ಶವ॒-ಶ್ಶಿಪಿ॑ರ್ಯ॒ಜ್ಞ ಏ॒ವ ಪ॒ಶುಷು॒ ಪ್ರತಿ॑ತಿಷ್ಠತಿ॒ ನ ದ್ವೇ [ನ ದ್ವೇ, ಯ॒ಜೇ॒ತ॒ ಯ-ತ್ಪೂರ್ವ॑ಯಾ] 28
ಯ॑ಜೇತ॒ ಯ-ತ್ಪೂರ್ವ॑ಯಾ ಸಮ್ಪ್ರ॒ತಿ ಯಜೇ॒ತೋತ್ತ॑ರಯಾ ಛ॒ಮ್ಬಟ್ಕು॑ರ್ಯಾ॒ದ್ಯದುತ್ತ॑ರಯಾ ಸಮ್ಪ್ರ॒ತಿ ಯಜೇ॑ತ॒ ಪೂರ್ವ॑ಯಾ ಛ॒ಮ್ಬಟ್ಕು॑ರ್ಯಾ॒ನ್ನೇಷ್ಟಿ॒ರ್ಭವ॑ತಿ॒ ನ ಯ॒ಜ್ಞಸ್ತದನು॑ ಹ್ರೀತಮು॒ಖ್ಯ॑ಪಗ॒ಲ್ಭೋ ಜಾ॑ಯತ॒ ಏಕಾ॑ಮೇ॒ವ ಯ॑ಜೇತ ಪ್ರಗ॒ಲ್ಭೋ᳚-ಽಸ್ಯ ಜಾಯ॒ತೇ ಽನಾ॑ದೃತ್ಯ॒ ತ-ದ್ದ್ವೇ ಏ॒ವ ಯ॑ಜೇತ ಯಜ್ಞ ಮು॒ಖಮೇ॒ವ ಪೂರ್ವ॑ಯಾ॒-ಽಽಲಭ॑ತೇ॒ ಯಜ॑ತ॒ ಉತ್ತ॑ರಯಾ ದೇ॒ವತಾ॑ ಏ॒ವ ಪೂರ್ವ॑ಯಾ ಽವರು॒ನ್ಧ ಇ॑ನ್ದ್ರಿ॒ಯ-ಮುತ್ತ॑ರಯಾ ದೇವಲೋ॒ಕಮೇ॒ವ [ ] 29
ಪೂರ್ವ॑ಯಾ-ಽಭಿ॒ಜಯ॑ತಿ ಮನುಷ್ಯಲೋ॒ಕಮುತ್ತ॑ರಯಾ॒ ಭೂಯ॑ಸೋ ಯಜ್ಞಕ್ರ॒ತೂನುಪೈ᳚ತ್ಯೇ॒ಷಾ ವೈ ಸು॒ಮನಾ॒ ನಾಮೇಷ್ಟಿ॒ರ್ಯಮ॒ದ್ಯೇಜಾ॒ನ-ಮ್ಪ॒ಶ್ಚಾಚ್ಚ॒ನ್ದ್ರಮಾ॑ ಅ॒ಭ್ಯು॑ದೇತ್ಯ॒ಸ್ಮಿನ್ನೇ॒ವಾಸ್ಮೈ॑ ಲೋ॒ಕೇ-ಽರ್ಧು॑ಕ-ಮ್ಭವತಿ ದಾಕ್ಷಾಯಣ ಯ॒ಜ್ಞೇನ॑ ಸುವ॒ರ್ಗಕಾ॑ಮೋ ಯಜೇತ ಪೂ॒ರ್ಣಮಾ॑ಸೇ॒ ಸ-ನ್ನ॑ಯೇ-ನ್ಮೈತ್ರಾವರು॒ಣ್ಯಾ ಽಽಮಿಕ್ಷ॑ಯಾ ಽಮಾವಾ॒ಸ್ಯಾ॑ಯಾಂ-ಯಁಜೇತ ಪೂ॒ರ್ಣಮಾ॑ಸೇ॒ ವೈ ದೇ॒ವಾನಾಗ್ಂ॑ ಸು॒ತಸ್ತೇಷಾ॑ಮೇ॒ತಮ॑ರ್ಧಮಾ॒ಸ-ಮ್ಪ್ರಸು॑ತ॒ಸ್ತೇಷಾ᳚-ಮ್ಮೈತ್ರಾವರು॒ಣೀ ವ॒ಶಾ-ಽಮಾ॑ವಾ॒ಸ್ಯಾ॑ಯಾ-ಮನೂಬ॒ನ್ಧ್ಯಾ॑ ಯ- [-ಮನೂಬ॒ನ್ಧ್ಯಾ॑ ಯತ್, ಪೂ॒ರ್ವೇ॒ದ್ಯು ರ್ಯಜ॑ತೇ॒] 30
-ತ್ಪೂ᳚ರ್ವೇ॒ದ್ಯು ರ್ಯಜ॑ತೇ॒ ವೇದಿ॑ಮೇ॒ವ ತ-ತ್ಕ॑ರೋತಿ॒ ಯ-ದ್ವ॒ಥ್ಸಾ-ನ॑ಪಾಕ॒ರೋತಿ॑ ಸದೋಹವಿರ್ಧಾ॒ನೇ ಏ॒ವ ಸ-ಮ್ಮಿ॑ನೋತಿ॒ ಯದ್ಯಜ॑ತೇ ದೇ॒ವೈರೇ॒ವ ಸು॒ತ್ಯಾಗ್ಂ ಸ-ಮ್ಪಾ॑ದಯತಿ॒ ಸ ಏ॒ತಮ॑ರ್ಧಮಾ॒ಸಗ್ಂ ಸ॑ಧ॒ಮಾದ॑-ನ್ದೇ॒ವೈ-ಸ್ಸೋಮ॑-ಮ್ಪಿಬತಿ॒ ಯ-ನ್ಮೈ᳚ತ್ರಾವರು॒ಣ್ಯಾ ಽಽಮಿಕ್ಷ॑ಯಾ ಽಮಾವಾ॒ಸ್ಯಾ॑ಯಾಂ॒-ಯಁಜ॑ತೇ॒ ಯೈವಾಸೌ ದೇ॒ವಾನಾಂ᳚-ವಁ॒ಶಾ-ಽನೂ॑ಬ॒ನ್ಧ್ಯಾ॑ ಸೋ ಏ॒ವೈಷೈತಸ್ಯ॑ ಸಾ॒ಕ್ಷಾದ್ವಾ ಏ॒ಷ ದೇ॒ವಾನ॒ಭ್ಯಾರೋ॑ಹತಿ॒ ಯ ಏ॑ಷಾಂ-ಯಁ॒ಜ್ಞ- [ಯ॒ಜ್ಞಮ್, ಅ॒ಭ್ಯಾ॒ರೋಹ॑ತಿ॒] 31
-ಮ॑ಭ್ಯಾ॒ರೋಹ॑ತಿ॒ ಯಥಾ॒ ಖಲು॒ವೈ ಶ್ರೇಯಾ॑ನ॒ಭ್ಯಾರೂ॑ಢಃ ಕಾ॒ಮಯ॑ತೇ॒ ತಥಾ॑ ಕರೋತಿ॒ ಯದ್ಯ॑ವ॒ವಿದ್ಧ್ಯ॑ತಿ॒ ಪಾಪೀ॑ಯಾ-ನ್ಭವತಿ॒ ಯದಿ॒ ನಾವ॒ವಿದ್ಧ್ಯ॑ತಿ ಸ॒ದೃಂ-ವ್ಯಾಁ॒ವೃತ್ಕಾ॑ಮ ಏ॒ತೇನ॑ ಯ॒ಜ್ಞೇನ॑ ಯಜೇತ ಕ್ಷು॒ರಪ॑ವಿ॒ರ್ಹ್ಯೇ॑ಷ ಯ॒ಜ್ಞಸ್ತಾ॒ಜ-ಕ್ಪುಣ್ಯೋ॑ ವಾ॒ ಭವ॑ತಿ॒ ಪ್ರ ವಾ॑ ಮೀಯತೇ॒ ತಸ್ಯೈ॒ತದ್ವ್ರ॒ತ-ನ್ನಾನೃ॑ತಂ-ವಁದೇ॒ನ್ನ ಮಾ॒ಗ್ಂ॒ ಸಮ॑ಶ್ಞೀಯಾ॒ನ್ನ ಸ್ತ್ರಿಯ॒ಮುಪೇ॑ಯಾ॒ನ್ನಾಸ್ಯ॒ ಪಲ್ಪೂ॑ಲನೇನ॒ ವಾಸಃ॑ ಪಲ್ಪೂಲಯೇಯು -ರೇ॒ತದ್ಧಿ ದೇ॒ವಾ-ಸ್ಸರ್ವ॒-ನ್ನ ಕು॒ರ್ವನ್ತಿ॑ ॥ 32 ॥
(ಚ॒ನ್ದ್ರಮಾ॒ -ದ್ವೇ -ದೇ॑ವಲೋ॒ಕಮೇ॒ವ - ಯ-ದ್ಯ॒ಜ್ಞಂ- ಪ॑ಲ್ಪೂಲಯೇಯುಃ॒ -ಷಟ್ ಚ॑) (ಅ. 5)
ಏ॒ಷ ವೈ ದೇ॑ವರ॒ಥೋ ಯ-ದ್ದ॑ರ್ಶಪೂರ್ಣಮಾ॒ಸೌ ಯೋ ದ॑ರ್ಶಪೂರ್ಣಮಾ॒ಸಾವಿ॒ಷ್ಟ್ವಾ ಸೋಮೇ॑ನ॒ ಯಜ॑ತೇ॒ ರಥ॑ಸ್ಪಷ್ಟ ಏ॒ವಾವ॒ಸಾನೇ॒ ವರೇ॑ ದೇ॒ವಾನಾ॒ಮವ॑ ಸ್ಯತ್ಯೇ॒ತಾನಿ॒ ವಾ ಅಙ್ಗಾ॒ಪರೂಗ್ಂ॑ಷಿ ಸಂವಁಥ್ಸ॒ರಸ್ಯ॒ ಯ-ದ್ದ॑ರ್ಶಪೂರ್ಣಮಾ॒ಸೌ ಯ ಏ॒ವಂ-ವಿಁ॒ದ್ವಾ-ನ್ದ॑ರ್ಶಪೂರ್ಣಮಾ॒ಸೌ ಯಜ॒ತೇ-ಽಙ್ಗಾ॒ಪರೂಗ್॑ಷ್ಯೇ॒ವ ಸಂ॑ವಁಥ್ಸ॒ರಸ್ಯ॒ ಪ್ರತಿ॑ ದಧಾತ್ಯೇ॒ ತೇ ವೈ ಸಂ॑ವಁಥ್ಸ॒ರಸ್ಯ॒ ಚಕ್ಷು॑ಷೀ॒ ಯ-ದ್ದ॑ರ್ಶಪೂರ್ಣಮಾ॒ಸೌ ಯ ಏ॒ವಂ-ವಿಁ॒ದ್ವಾ-ನ್ದ॑ರ್ಶಪೂರ್ಣಮಾ॒ಸೌ ಯಜ॑ತೇ॒ ತಾಭ್ಯಾ॑ಮೇ॒ವ ಸು॑ವ॒ರ್ಗಂ-ಲೋಁ॒ಕಮನು॑ ಪಶ್ಯ- [ಪಶ್ಯತಿ, ಏ॒ಷಾ ವೈ] 33
-ತ್ಯೇ॒ಷಾ ವೈ ದೇ॒ವಾನಾಂ॒-ವಿಁಕ್ರಾ᳚ನ್ತಿ॒ ರ್ಯ-ದ್ದ॑ರ್ಶಪೂರ್ಣಮಾ॒ಸೌ ಯ ಏ॒ವಂ-ವಿಁ॒ದ್ವಾ-ನ್ದ॑ರ್ಶಪೂರ್ಣಮಾ॒ಸೌ ಯಜ॑ತೇ ದೇ॒ವಾನಾ॑ಮೇ॒ವ ವಿಕ್ರಾ᳚ನ್ತಿ॒ಮನು॒ ವಿಕ್ರ॑ಮತ ಏ॒ಷ ವೈ ದೇ॑ವ॒ಯಾನಃ॒ ಪನ್ಥಾ॒ ಯ-ದ್ದ॑ರ್ಶಪೂರ್ಣಮಾ॒ಸೌ ಯ ಏ॒ವಂ-ವಿಁ॒ದ್ವಾ-ನ್ದ॑ರ್ಶಪೂರ್ಣಮಾ॒ಸೌ ಯಜ॑ತೇ॒ ಯ ಏ॒ವ ದೇ॑ವ॒ಯಾನಃ॒ ಪನ್ಥಾ॒ಸ್ತಗ್ಂ ಸ॒ಮಾರೋ॑ಹತ್ಯೇ॒ತೌ ವೈ ದೇ॒ವಾನಾ॒ಗ್ಂ॒ ಹರೀ॒ ಯ-ದ್ದ॑ರ್ಶಪೂರ್ಣಮಾ॒ಸೌ ಯ ಏ॒ವಂ-ವಿಁ॒ದ್ವಾ-ನ್ದ॑ರ್ಶಪೂರ್ಣಮಾ॒ಸೌ ಯಜ॑ತೇ॒ ಯಾವೇ॒ವ ದೇ॒ವಾನಾ॒ಗ್ಂ॒ ಹರೀ॒ ತಾಭ್ಯಾ॑- [ಹರೀ॒ ತಾಭ್ಯಾ᳚ಮ್, ಏ॒ವೈಭ್ಯೋ॑ ಹ॒ವ್ಯಂ-] 34
-ಮೇ॒ವೈಭ್ಯೋ॑ ಹ॒ವ್ಯಂ-ವಁ॑ಹತ್ಯೇ॒ತದ್ವೈ ದೇ॒ವಾನಾ॑ಮಾ॒ಸ್ಯಂ॑-ಯಁ-ದ್ದ॑ರ್ಶಪೂರ್ಣಮಾ॒ಸೌ ಯ ಏ॒ವಂ-ವಿಁ॒ದ್ವಾ-ನ್ದ॑ರ್ಶಪೂರ್ಣಮಾ॒ಸೌ ಯಜ॑ತೇ ಸಾ॒ಕ್ಷಾದೇ॒ವ ದೇ॒ವಾನಾ॑ಮಾ॒ಸ್ಯೇ॑ ಜುಹೋತ್ಯೇ॒ಷ ವೈ ಹ॑ವಿರ್ಧಾ॒ನೀ ಯೋ ದ॑ರ್ಶಪೂರ್ಣಮಾಸಯಾ॒ಜೀ ಸಾ॒ಯಮ್ಪ್ರಾ॑ತರಗ್ನಿಹೋ॒ತ್ರ-ಞ್ಜು॑ಹೋತಿ॒ ಯಜ॑ತೇ ದರ್ಶಪೂರ್ಣಮಾ॒ಸಾ-ವಹ॑ರಹರ್-ಹವಿರ್ಧಾ॒ನಿನಾಗ್ಂ॑ ಸು॒ತೋ ಯ ಏ॒ವಂ-ವಿಁ॒ದ್ವಾ-ನ್ದ॑ರ್ಶಪೂರ್ಣಮಾ॒ಸೌ ಯಜ॑ತೇ ಹವಿರ್ಧಾ॒ನ್ಯ॑ಸ್ಮೀತಿ॒ ಸರ್ವ॑ಮೇ॒ವಾಸ್ಯ॑ ಬರ್ಹಿ॒ಷ್ಯ॑-ನ್ದ॒ತ್ತ-ಮ್ಭ॑ವತಿ ದೇ॒ವಾವಾ ಅಹ॑- [ಅಹಃ, ಯ॒ಜ್ಞಿಯ॒-ನ್ನಾವಿ॑ನ್ದ॒-ನ್ತೇ] 35
-ರ್ಯ॒ಜ್ಞಿಯ॒-ನ್ನಾವಿ॑ನ್ದ॒-ನ್ತೇ ದ॑ರ್ಶಪೂರ್ಣಮಾ॒ಸಾವ॑ಪುನ॒-ನ್ತೌ ವಾ ಏ॒ತೌ ಪೂ॒ತೌ ಮೇದ್ಧ್ಯೌ॒ ಯ-ದ್ದ॑ರ್ಶಪೂರ್ಣಮಾ॒ಸೌ ಯ ಏ॒ವಂ-ವಿಁ॒ದ್ವಾ-ನ್ದ॑ರ್ಶಪೂರ್ಣಮಾ॒ಸೌ ಯಜ॑ತೇ ಪೂ॒ತಾವೇ॒ವೈನೌ॒ ಮೇದ್ಧ್ಯೌ॑ ಯಜತೇ॒ ನಾಮಾ॑ವಾ॒ಸ್ಯಾ॑ಯಾ-ಞ್ಚ ಪೌರ್ಣಮಾ॒ಸ್ಯಾ-ಞ್ಚ॒ ಸ್ತ್ರಿಯ॒-ಮುಪೇ॑ಯಾ॒ದ್ಯ- ದು॑ಪೇ॒ಯಾನ್ನಿರಿ॑ನ್ದ್ರಿಯ-ಸ್ಸ್ಯಾ॒-ಥ್ಸೋಮ॑ಸ್ಯ॒ ವೈ ರಾಜ್ಞೋ᳚-ಽರ್ಧಮಾ॒ಸಸ್ಯ॒ ರಾತ್ರ॑ಯಃ॒ ಪತ್ನ॑ಯ ಆಸ॒-ನ್ತಾಸಾ॑ಮಮಾವಾ॒ಸ್ಯಾ᳚-ಞ್ಚ ಪೌರ್ಣಮಾ॒ಸೀ-ಞ್ಚ॒ ನೋಪೈ॒- [ನೋಪೈ᳚ತ್, ತೇ ಏ॑ನಮ॒ಭಿ] 36
-ತ್ತೇ ಏ॑ನಮ॒ಭಿ ಸಮ॑ನಹ್ಯೇತಾ॒-ನ್ತಂ-ಯಁಕ್ಷ್ಮ॑ ಆರ್ಚ್ಛ॒-ದ್ರಾಜಾ॑ನಂ॒-ಯಁಕ್ಷ್ಮ॑ ಆರ॒ದಿತಿ॒ ತ-ದ್ರಾ॑ಜಯ॒ಕ್ಷ್ಮಸ್ಯ॒ ಜನ್ಮ॒ ಯ-ತ್ಪಾಪೀ॑ಯಾ॒ನಭ॑ವ॒-ತ್ತ-ತ್ಪಾ॑ಪಯ॒ಕ್ಷ್ಮಸ್ಯ॒ ಯಜ್ಜಾ॒ಯಾಭ್ಯಾ॒ಮವಿ॑ನ್ದ॒-ತ್ತಜ್ಜಾ॒ಯೇನ್ಯ॑ಸ್ಯ॒ ಯ ಏ॒ವಮೇ॒ತೇಷಾಂ॒-ಯಁಕ್ಷ್ಮಾ॑ಣಾ॒-ಞ್ಜನ್ಮ॒ ವೇದ॒ ನೈನ॑ಮೇ॒ತೇ ಯಕ್ಷ್ಮಾ॑ವಿನ್ದನ್ತಿ॒ ಸ ಏ॒ತೇ ಏ॒ವ ನ॑ಮ॒ಸ್ಯನ್ನುಪಾ॑ಧಾವ॒-ತ್ತೇ ಅ॑ಬ್ರೂತಾಂ॒-ವಁರಂ॑-ವೃಁಣಾವಹಾ ಆ॒ವ-ನ್ದೇ॒ವಾನಾ᳚-ಮ್ಭಾಗ॒ಧೇ ಅ॑ಸಾವಾ॒- [ಅ॑ಸಾವ, ಆ॒ವದಧಿ॑ ದೇ॒ವಾ] 37
-ಽವದಧಿ॑ ದೇ॒ವಾ ಇ॑ಜ್ಯಾನ್ತಾ॒ ಇತಿ॒ ತಸ್ಮಾ᳚-ಥ್ಸ॒ದೃಶೀ॑ನಾ॒ಗ್ಂ॒ ರಾತ್ರೀ॑ಣಾ-ಮಮಾವಾ॒ಸ್ಯಾ॑ಯಾ-ಞ್ಚ ಪೌರ್ಣಮಾ॒ಸ್ಯಾ-ಞ್ಚ॑ ದೇ॒ವಾ ಇ॑ಜ್ಯನ್ತ ಏ॒ತೇ ಹಿ ದೇ॒ವಾನಾ᳚-ಮ್ಭಾಗ॒ಧೇ ಭಾ॑ಗ॒ಧಾ ಅ॑ಸ್ಮೈ ಮನು॒ಷ್ಯಾ॑ ಭವನ್ತಿ॒ ಯ ಏ॒ವಂ-ವೇಁದ॑ ಭೂ॒ತಾನಿ॒ ಕ್ಷುಧ॑ಮಘ್ನನ್-ಥ್ಸ॒ದ್ಯೋ ಮ॑ನು॒ಷ್ಯಾ॑ ಅರ್ಧಮಾ॒ಸೇ ದೇ॒ವಾ ಮಾ॒ಸಿ ಪಿ॒ತರಃ॑ ಸಂವಁಥ್ಸ॒ರೇ ವನ॒ಸ್ಪತ॑ಯ॒-ಸ್ತಸ್ಮಾ॒-ದಹ॑ರಹ-ರ್ಮನು॒ಷ್ಯಾ॑ ಅಶ॑ನಮಿಚ್ಛನ್ತೇ ಽರ್ಧಮಾ॒ಸೇ ದೇ॒ವಾ ಇ॑ಜ್ಯನ್ತೇ ಮಾ॒ಸಿ ಪಿ॒ತೃಭ್ಯಃ॑ ಕ್ರಿಯತೇ ಸಂವಁಥ್ಸ॒ರೇ ವನ॒ಸ್ಪತ॑ಯಃ॒ ಫಲ॑-ಙ್ಗೃಹ್ಣನ್ತಿ॒ ಯ ಏ॒ವಂ-ವೇಁದ॒ ಹನ್ತಿ॒ ಕ್ಷುಧ॒-ಮ್ಭ್ರಾತೃ॑ವ್ಯಮ್ ॥ 38 ॥
(ಪ॒ಶ್ಯ॒ತಿ॒ - ತಾಭ್ಯಾ॒ -ಮಹ॑ - ರೈ - ದಸಾವ॒ -ಫಲಗ್ಂ॑ -ಸ॒ಪ್ತ ಚ॑) (ಅ. 6)
ದೇ॒ವಾ ವೈ ನರ್ಚಿ ನ ಯಜು॑ಷ್ಯಶ್ರಯನ್ತ॒ ತೇ ಸಾಮ॑ನ್ನೇ॒ವಾ-ಽಶ್ರ॑ಯನ್ತ॒ ಹಿ-ಙ್ಕ॑ರೋತಿ॒ ಸಾಮೈ॒ವಾ-ಽಕ॒ರ್॒ಹಿ-ಙ್ಕ॑ರೋತಿ॒ ಯತ್ರೈ॒ವ ದೇ॒ವಾ ಅಶ್ರ॑ಯನ್ತ॒ ತತ॑ ಏ॒ವೈನಾ॒-ನ್ಪ್ರಯು॑ಙ್ಕ್ತೇ॒ ಹಿ-ಙ್ಕ॑ರೋತಿ ವಾ॒ಚ ಏ॒ವೈಷ ಯೋಗೋ॒ ಹಿ-ಙ್ಕ॑ರೋತಿ ಪ್ರ॒ಜಾ ಏ॒ವ ತ-ದ್ಯಜ॑ಮಾನ-ಸ್ಸೃಜತೇ॒ ತ್ರಿಃ ಪ್ರ॑ಥ॒ಮಾಮನ್ವಾ॑ಹ॒ ತ್ರಿರು॑ತ್ತ॒ಮಾಂ-ಯಁ॒ಜ್ಞಸ್ಯೈ॒ವ ತದ್ಬ॒ರ್॒ಸ- [ತದ್ಬ॒ರ್॒ಸಮ್, ನ॒ಹ್ಯ॒ತ್ಯಪ್ರ॑ಸ್ರಗ್ಂಸಾಯ॒-] 39
-ನ್ನ॑ಹ್ಯ॒ತ್ಯಪ್ರ॑ಸ್ರಗ್ಂಸಾಯ॒ ಸನ್ತ॑ತ॒ಮನ್ವಾ॑ಹ ಪ್ರಾ॒ಣಾನಾ॑ಮ॒ನ್ನಾದ್ಯ॑ಸ್ಯ॒ ಸನ್ತ॑ತ್ಯಾ॒ ಅಥೋ॒ ರಕ್ಷ॑ಸಾ॒ಮಪ॑ಹತ್ಯೈ॒ ರಾಥ॑ತಂರೀ-ಮ್ಪ್ರಥ॒ಮಾಮನ್ವಾ॑ಹ॒ ರಾಥ॑ತಂರೋ॒ ವಾ ಅ॒ಯಂ-ಲೋಁ॒ಕ ಇ॒ಮಮೇ॒ವ ಲೋ॒ಕಮ॒ಭಿ ಜ॑ಯತಿ॒ ತ್ರಿರ್ವಿ ಗೃ॑ಹ್ಣಾತಿ॒ ತ್ರಯ॑ ಇ॒ಮೇ ಲೋ॒ಕಾ ಇ॒ಮಾನೇ॒ವ ಲೋ॒ಕಾನ॒ಭಿ ಜ॑ಯತಿ॒ ಬಾರ್ಹ॑ತೀಮುತ್ತ॒ಮಾ-ಮನ್ವಾ॑ಹ॒ ಬಾರ್ಹ॑ತೋ॒ ವಾ ಅ॒ಸೌ ಲೋ॒ಕೋ॑-ಽಮುಮೇ॒ವ ಲೋ॒ಕಮ॒ಭಿ ಜ॑ಯತಿ॒ ಪ್ರ ವೋ॒ [ಪ್ರ ವಃ॑, ವಾಜಾ॒] 40
ವಾಜಾ॒ ಇತ್ಯನಿ॑ರುಕ್ತಾ-ಮ್ಪ್ರಾಜಾಪ॒ತ್ಯಾಮನ್ವಾ॑ಹ ಯ॒ಜ್ಞೋ ವೈ ಪ್ರ॒ಜಾಪ॑ತಿರ್ಯ॒ಜ್ಞಮೇ॒ವ ಪ್ರ॒ಜಾಪ॑ತಿ॒ಮಾ ರ॑ಭತೇ॒ ಪ್ರವೋ॒ ವಾಜಾ॒ ಇತ್ಯನ್ವಾ॒ಹಾನ್ನಂ॒-ವೈಁ ವಾಜೋ-ಽನ್ನ॑ಮೇ॒ವಾವ॑ ರುನ್ಧೇ॒ ಪ್ರವೋ॒ ವಾಜಾ॒ ಇತ್ಯನ್ವಾ॑ಹ॒ ತಸ್ಮಾ᳚-ತ್ಪ್ರಾ॒ಚೀನ॒ಗ್ಂ॒ ರೇತೋ॑ ಧೀಯ॒ತೇ-ಽಗ್ನ॒ ಆ ಯಾ॑ಹಿ ವೀ॒ತಯ॒ ಇತ್ಯಾ॑ಹ॒ ತಸ್ಮಾ᳚-ತ್ಪ್ರ॒ತೀಚೀಃ᳚ ಪ್ರ॒ಜಾ ಜಾ॑ಯನ್ತೇ॒ ಪ್ರವೋ॒ ವಾಜಾ॒ [ವಾಜಾಃ᳚, ಇತ್ಯನ್ವಾ॑ಹ॒] 41
ಇತ್ಯನ್ವಾ॑ಹ॒ ಮಾಸಾ॒ ವೈ ವಾಜಾ॑ ಅರ್ಧಮಾ॒ಸಾ ಅ॒ಭಿದ್ಯ॑ವೋ ದೇ॒ವಾ ಹ॒ವಿಷ್ಮ॑ನ್ತೋ॒ ಗೌರ್ಘೃ॒ತಾಚೀ॑ ಯ॒ಜ್ಞೋ ದೇ॒ವಾಞ್ಜಿ॑ಗಾತಿ॒ ಯಜ॑ಮಾನ-ಸ್ಸುಮ್ನ॒ಯು-ರಿ॒ದ-ಮ॑ಸೀ॒ದ-ಮ॒ಸೀತ್ಯೇ॒ವ ಯ॒ಜ್ಞಸ್ಯ॑ ಪ್ರಿ॒ಯ-ನ್ಧಾಮಾವ॑ ರುನ್ಧೇ॒ ಯ-ಙ್ಕಾ॒ಮಯೇ॑ತ॒ ಸರ್ವ॒-ಮಾಯು॑-ರಿಯಾ॒-ದಿತಿ॒ ಪ್ರ ವೋ॒ ವಾಜಾ॒ ಇತಿ॒ ತಸ್ಯಾ॒ನೂಚ್ಯಾಗ್ನ॒ ಆ ಯಾ॑ಹಿ ವೀ॒ತಯ॒ ಇತಿ॒ ಸನ್ತ॑ತ॒-ಮುತ್ತ॑ರ-ಮರ್ಧ॒ರ್ಚಮಾ ಲ॑ಭೇತ [ ] 42
ಪ್ರಾ॒ಣೇನೈ॒ವಾ-ಽಸ್ಯಾ॑-ಽಪಾ॒ನ-ನ್ದಾ॑ಧಾರ॒ ಸರ್ವ॒ಮಾಯು॑ರೇತಿ॒ ಯೋ ವಾ ಅ॑ರ॒ತ್ನಿಗ್ಂ ಸಾ॑ಮಿಧೇ॒ನೀನಾಂ॒-ವೇಁದಾ॑ರ॒ತ್ನಾವೇ॒ವ ಭ್ರಾತೃ॑ವ್ಯ-ಙ್ಕುರುತೇ-ಽರ್ಧ॒ರ್ಚೌ ಸ-ನ್ದ॑ಧಾತ್ಯೇ॒ಷ ವಾ ಅ॑ರ॒ತ್ನಿ-ಸ್ಸಾ॑ಮಿಧೇ॒ನೀನಾಂ॒-ಯಁ ಏ॒ವಂ-ವೇಁದಾ॑ರ॒ತ್ನಾವೇ॒ವ ಭ್ರಾತೃ॑ವ್ಯ-ಙ್ಕುರುತ॒ ಋಷೇರ್॑-ಋಷೇ॒ರ್ವಾ ಏ॒ತಾ ನಿರ್ಮಿ॑ತಾ॒ ಯ-ಥ್ಸಾ॑ಮಿಧೇ॒ನ್ಯ॑ಸ್ತಾ ಯದಸಂ॑-ಯುಁಕ್ತಾ॒-ಸ್ಸ್ಯುಃ ಪ್ರ॒ಜಯಾ॑ ಪ॒ಶುಭಿ॒ ರ್ಯಜ॑ಮಾನಸ್ಯ॒ ವಿ ತಿ॑ಷ್ಠೇರನ್ನರ್ಧ॒ರ್ಚೌ ಸ-ನ್ದ॑ಧಾತಿ॒ ಸಂ ಁಯು॑ನಕ್ತ್ಯೇ॒ವೈನಾ॒ಸ್ತಾ ಅ॑ಸ್ಮೈ॒ ಸಂಯುಁ॑ಕ್ತಾ॒ ಅವ॑ರುದ್ಧಾ॒-ಸ್ಸರ್ವಾ॑-ಮಾ॒ಶಿಷ॑-ನ್ದುಹ್ರೇ ॥ 43 ॥
(ಬ॒ರ್ಸಂ - ಁವೋ॑ - ಜಾಯನ್ತೇ॒ ಪ್ರವೋ॒ ವಾಜಾ॑ - ಲಭೇತ - ದಧಾತಿ॒ ಸಂ - ದಶ॑ ಚ) (ಅ. 7)
ಅಯ॑ಜ್ಞೋ॒ ವಾ ಏ॒ಷ ಯೋ॑-ಽಸಾ॒ಮಾ-ಽಗ್ನ॒ ಆ ಯಾ॑ಹಿ ವೀ॒ತಯ॒ ಇತ್ಯಾ॑ಹ ರಥನ್ತ॒ರಸ್ಯೈ॒ಷ ವರ್ಣ॒ಸ್ತ-ನ್ತ್ವಾ॑ ಸ॒ಮಿದ್ಭಿ॑ರಙ್ಗಿರ॒ ಇತ್ಯಾ॑ಹ ವಾಮದೇ॒ವ್ಯಸ್ಯೈ॒ಷ ವರ್ಣೋ॑ ಬೃ॒ಹದ॑ಗ್ನೇ ಸು॒ವೀರ್ಯ॒ಮಿತ್ಯಾ॑ಹ ಬೃಹ॒ತ ಏ॒ಷ ವರ್ಣೋ॒ ಯದೇ॒ತ-ನ್ತೃ॒ಚಮ॒ನ್ವಾಹ॑ ಯ॒ಜ್ಞಮೇ॒ವ ತ-ಥ್ಸಾಮ॑ನ್ವನ್ತ-ಙ್ಕರೋತ್ಯ॒ಗ್ನಿರ॒ಮುಷ್ಮಿ॑ನ್ ಁಲೋ॒ಕ ಆಸೀ॑ದಾದಿ॒ತ್ಯೋ᳚-ಽಸ್ಮಿ-ನ್ತಾವಿ॒ಮೌ ಲೋ॒ಕಾವಶಾ᳚ನ್ತಾ- [ಲೋ॒ಕಾವಶಾ᳚ನ್ತೌ, ಆ॒ಸ್ತಾ॒-ನ್ತೇ ದೇ॒ವಾ] 44
-ವಾಸ್ತಾ॒-ನ್ತೇ ದೇ॒ವಾ ಅ॑ಬ್ರುವ॒ನ್ನೇತೇ॒ಮೌ ವಿ ಪರ್ಯೂ॑ಹಾ॒ಮೇತ್ಯಗ್ನ॒ ಆ ಯಾ॑ಹಿ ವೀ॒ತಯ॒ ಇತ್ಯ॒ಸ್ಮಿನ್ ಁಲೋ॒ಕೇ᳚-ಽಗ್ನಿಮ॑ದಧು ರ್ಬೃ॒ಹದ॑ಗ್ನೇ ಸು॒ವೀರ್ಯ॒ಮಿತ್ಯ॒ಮುಷ್ಮಿ॑ನ್ ಁಲೋ॒ಕ ಆ॑ದಿ॒ತ್ಯ-ನ್ತತೋ॒ ವಾ ಇ॒ಮೌ ಲೋ॒ಕಾವ॑ಶಾಮ್ಯತಾಂ॒-ಯಁದೇ॒ವಮ॒ನ್ವಾಹಾ॒ನಯೋ᳚ ರ್ಲೋ॒ಕಯೋ॒-ಶ್ಶಾನ್ತ್ಯೈ॒ ಶಾಮ್ಯ॑ತೋ-ಽಸ್ಮಾ ಇ॒ಮೌ ಲೋ॒ಕೌ ಯ ಏ॒ವಂ-ವೇಁದ॒ ಪಞ್ಚ॑ದಶ ಸಾಮಿಧೇ॒ನೀರನ್ವಾ॑ಹ॒ ಪಞ್ಚ॑ದಶ॒ [ಪಞ್ಚ॑ದಶ, ವಾ ಅ॑ರ್ಧಮಾ॒ಸಸ್ಯ॒] 45
ವಾ ಅ॑ರ್ಧಮಾ॒ಸಸ್ಯ॒ ರಾತ್ರ॑ಯೋ-ಽರ್ಧಮಾಸ॒ಶ-ಸ್ಸಂ॑ವಁಥ್ಸ॒ರ ಆ᳚ಪ್ಯತೇ॒ ತಾಸಾ॒-ನ್ತ್ರೀಣಿ॑ ಚ ಶ॒ತಾನಿ॑ ಷ॒ಷ್ಟಿಶ್ಚಾ॒ಕ್ಷರಾ॑ಣಿ॒ ತಾವ॑ತೀ-ಸ್ಸಂವಁಥ್ಸ॒ರಸ್ಯ॒ ರಾತ್ರ॑ಯೋ-ಽಕ್ಷರ॒ಶ ಏ॒ವ ಸಂ॑ವಁಥ್ಸ॒ರಮಾ᳚ಪ್ನೋತಿ ನೃ॒ಮೇಧ॑ಶ್ಚ॒ ಪರು॑ಚ್ಛೇಪಶ್ಚ ಬ್ರಹ್ಮ॒ವಾದ್ಯ॑ಮವದೇತಾಮ॒ಸ್ಮಿ-ನ್ದಾರಾ॑ವಾ॒ರ್ದ್ರೇ᳚-ಽಗ್ನಿ-ಞ್ಜ॑ನಯಾವ ಯತ॒ರೋ ನೌ॒ ಬ್ರಹ್ಮೀ॑ಯಾ॒ನಿತಿ॑ ನೃ॒ಮೇಧೋ॒-ಽಭ್ಯ॑ವದ॒-ಥ್ಸ ಧೂ॒ಮಮ॑ಜನಯ॒-ತ್ಪರು॑ಚ್ಛೇಪೋ॒ ಽಭ್ಯ॑ವದ॒-ಥ್ಸೋ᳚-ಽಗ್ನಿಮ॑ಜನಯ॒ದೃಷ॒ ಇತ್ಯ॑ಬ್ರವೀ॒- [ಇತ್ಯ॑ಬ್ರವೀತ್, ಯಥ್ಸ॒ಮಾವ॑ದ್ವಿ॒ದ್ವ] 46
-ದ್ಯಥ್ಸ॒ಮಾವ॑ದ್ವಿ॒ದ್ವ ಕ॒ಥಾ ತ್ವಮ॒ಗ್ನಿಮಜೀ॑ಜನೋ॒ ನಾಹಮಿತಿ॑ ಸಾಮಿಧೇ॒ನೀನಾ॑ಮೇ॒ವಾಹಂ-ವಁರ್ಣಂ॑-ವೇಁ॒ದೇತ್ಯ॑ಬ್ರವೀ॒ದ್ಯ-ದ್ಘೃ॒ತವ॑-ತ್ಪ॒ದಮ॑ನೂ॒ಚ್ಯತೇ॒ ಸ ಆ॑ಸಾಂ॒-ವಁರ್ಣ॒ಸ್ತ-ನ್ತ್ವಾ॑ ಸ॒ಮಿದ್ಭಿ॑ರಙ್ಗಿರ॒ ಇತ್ಯಾ॑ಹ ಸಾಮಿಧೇ॒ನೀಷ್ವೇ॒ವ ತಜ್ಜ್ಯೋತಿ॑ ರ್ಜನಯತಿ॒ ಸ್ತ್ರಿಯ॒ಸ್ತೇನ॒ ಯದೃಚ॒-ಸ್ಸ್ತ್ರಿಯ॒ಸ್ತೇನ॒ ಯ-ದ್ಗಾ॑ಯ॒ತ್ರಿಯ॒-ಸ್ಸ್ತ್ರಿಯ॒ಸ್ತೇನ॒ ಯ-ಥ್ಸಾ॑ಮಿಧೇ॒ನ್ಯೋ॑ ವೃಷ॑ಣ್ವತೀ॒-ಮನ್ವಾ॑ಹ॒ [ವೃಷ॑ಣ್ವತೀ॒-ಮನ್ವಾ॑ಹ, ತೇನ॒ ಪುಗ್ಗ್ಸ್ವ॑ತೀ॒ಸ್ತೇನ॒] 47
ತೇನ॒ ಪುಗ್ಗ್ಸ್ವ॑ತೀ॒ಸ್ತೇನ॒ ಸೇನ್ದ್ರಾ॒ಸ್ತೇನ॑ ಮಿಥು॒ನಾ ಅ॒ಗ್ನಿರ್ದೇ॒ವಾನಾ᳚-ನ್ದೂ॒ತ ಆಸೀ॑ದು॒ಶನಾ॑ ಕಾ॒ವ್ಯೋ-ಽಸು॑ರಾಣಾ॒-ನ್ತೌ ಪ್ರ॒ಜಾಪ॑ತಿ-ಮ್ಪ್ರ॒ಶ್ಞಮೈ॑ತಾ॒ಗ್ಂ॒ ಸ ಪ್ರ॒ಜಾಪ॑ತಿರ॒ಗ್ನಿ-ನ್ದೂ॒ತಂ-ವೃಁ॑ಣೀಮಹ॒ ಇತ್ಯ॒ಭಿ ಪ॒ರ್ಯಾವ॑ರ್ತತ॒ ತತೋ॑ ದೇ॒ವಾ ಅಭ॑ವ॒-ನ್ಪರಾ-ಽಸು॑ರಾ॒ ಯಸ್ಯೈ॒ವಂ-ವಿಁ॒ದುಷೋ॒-ಽಗ್ನಿ-ನ್ದೂ॒ತಂ-ವೃಁ॑ಣೀಮಹ॒ ಇತ್ಯ॒ನ್ವಾಹ॒ ಭವ॑ತ್ಯಾ॒ತ್ಮನಾ॒ ಪರಾ᳚-ಽಸ್ಯ॒ ಭ್ರಾತೃ॑ವ್ಯೋ ಭವತ್ಯದ್ಧ್ವ॒ರವ॑ತೀ॒ಮನ್ವಾ॑ಹ॒ ಭ್ರಾತೃ॑ವ್ಯಮೇ॒ವೈತಯಾ᳚ [ಭ್ರಾತೃ॑ವ್ಯಮೇ॒ವೈತಯಾ᳚, ಧ್ವ॒ರ॒ತಿ॒ ಶೋ॒ಚಿಷ್ಕೇ॑ಶ॒ಸ್ತಮೀ॑ಮಹ॒] 48
ಧ್ವರತಿ ಶೋ॒ಚಿಷ್ಕೇ॑ಶ॒ಸ್ತಮೀ॑ಮಹ॒ ಇತ್ಯಾ॑ಹ ಪ॒ವಿತ್ರ॑ಮೇ॒ವೈತ-ದ್ಯಜ॑ಮಾನಮೇ॒ವೈತಯಾ॑ ಪವಯತಿ॒ ಸಮಿ॑ದ್ಧೋ ಅಗ್ನ ಆಹು॒ತೇತ್ಯಾ॑ಹ ಪರಿ॒ಧಿಮೇ॒ವೈತ-ಮ್ಪರಿ॑ ದಧಾ॒ತ್ಯಸ್ಕ॑ನ್ದಾಯ॒ ಯದತ॑ ಊ॒ರ್ಧ್ವಮ॑ಭ್ಯಾದ॒ದ್ಧ್ಯಾದ್ಯಥಾ॑ ಬಹಿಃ ಪರಿ॒ಧಿ ಸ್ಕನ್ದ॑ತಿ ತಾ॒ದೃಗೇ॒ವ ತ-ತ್ತ್ರಯೋ॒ ವಾ ಅ॒ಗ್ನಯೋ॑ ಹವ್ಯ॒ವಾಹ॑ನೋ ದೇ॒ವಾನಾ᳚-ಙ್ಕವ್ಯ॒ವಾಹ॑ನಃ ಪಿತೃ॒ಣಾಗ್ಂ ಸ॒ಹರ॑ಕ್ಷಾ॒ ಅಸು॑ರಾಣಾ॒-ನ್ತ ಏ॒ತರ್ಹ್ಯಾ ಶಗ್ಂ॑ಸನ್ತೇ॒ ಮಾಂ-ವಁ॑ರಿಷ್ಯತೇ॒ ಮಾ- [ಮಾಮ್, ಇತಿ॑] 49
-ಮಿತಿ॑ ವೃಣೀ॒ದ್ಧ್ವಗ್ಂ ಹ॑ವ್ಯ॒ವಾಹ॑ನ॒ಮಿತ್ಯಾ॑ಹ॒ ಯ ಏ॒ವ ದೇ॒ವಾನಾ॒-ನ್ತಂ-ವೃಁ॑ಣೀತ ಆರ್ಷೇ॒ಯಂ-ವೃಁ॑ಣೀತೇ॒ ಬನ್ಧೋ॑ರೇ॒ವ ನೈತ್ಯಥೋ॒ ಸನ್ತ॑ತ್ಯೈ ಪ॒ರಸ್ತಾ॑ದ॒ರ್ವಾಚೋ॑ ವೃಣೀತೇ॒ ತಸ್ಮಾ᳚-ತ್ಪ॒ರಸ್ತಾ॑ದ॒ರ್ವಾಞ್ಚೋ॑ ಮನು॒ಷ್ಯಾ᳚-ನ್ಪಿ॒ತರೋ-ಽನು॒ ಪ್ರ ಪಿ॑ಪತೇ ॥ 50 ॥
(ಅಶಾ᳚ನ್ತಾ - ವಾಹ॒ ಪಞ್ಚ॑ದಶಾ - ಬ್ರವೀ॒ - ದನ್ವಾ॑ಹೈ॒ - ತಯಾ॑ - ವರಿಷ್ಯತೇ॒ ಮಾ - ಮೇಕಾ॒ನ್ನತ್ರಿ॒ಗ್ಂ॒ಶಚ್ಚ॑) (ಅ. 8)
ಅಗ್ನೇ॑ ಮ॒ಹಾಗ್ಂ ಅ॒ಸೀತ್ಯಾ॑ಹ ಮ॒ಹಾನ್. ಹ್ಯೇ॑ಷ ಯದ॒ಗ್ನಿ ರ್ಬ್ರಾ᳚ಹ್ಮ॒ಣೇತ್ಯಾ॑ಹ ಬ್ರಾಹ್ಮ॒ಣೋ ಹ್ಯೇ॑ಷ ಭಾ॑ರ॒ತೇತ್ಯಾ॑ಹೈ॒ಷ ಹಿ ದೇ॒ವೇಭ್ಯೋ॑ ಹ॒ವ್ಯ-ಮ್ಭರ॑ತಿ ದೇ॒ವೇದ್ಧ॒ ಇತ್ಯಾ॑ಹ ದೇ॒ವಾ ಹ್ಯೇ॑ತಮೈನ್ಧ॑ತ॒ ಮನ್ವಿ॑ದ್ಧ॒ ಇತ್ಯಾ॑ಹ॒ ಮನು॒ರ್ಹ್ಯೇ॑ತಮುತ್ತ॑ರೋ ದೇ॒ವೇಭ್ಯ॒ ಐನ್ಧರ್ಷಿ॑ಷ್ಟುತ॒ ಇತ್ಯಾ॒ಹರ್ಷ॑ಯೋ॒ ಹ್ಯೇ॑ತಮಸ್ತು॑ವ॒ನ್ ವಿಪ್ರಾ॑ನುಮದಿತ॒ ಇತ್ಯಾ॑ಹ॒ [ಇತ್ಯಾ॑ಹ, ವಿಪ್ರಾ॒ ಹ್ಯೇ॑ತೇ] 51
ವಿಪ್ರಾ॒ ಹ್ಯೇ॑ತೇ ಯಚ್ಛು॑ಶ್ರು॒ವಾಗ್ಂಸಃ॑ ಕವಿಶ॒ಸ್ತ ಇತ್ಯಾ॑ಹ ಕ॒ವಯೋ॒ ಹ್ಯೇ॑ತೇ ಯಚ್ಛು॑ಶ್ರು॒ವಾಗ್ಂಸೋ॒ ಬ್ರಹ್ಮ॑ಸಗ್ಂಶಿತ॒ ಇತ್ಯಾ॑ಹ॒ ಬ್ರಹ್ಮ॑ಸಗ್ಂಶಿತೋ॒ ಹ್ಯೇ॑ಷ ಘೃ॒ತಾಹ॑ವನ॒ ಇತ್ಯಾ॑ಹ ಘೃತಾಹು॒ತಿರ್ಹ್ಯ॑ಸ್ಯ ಪ್ರಿ॒ಯತ॑ಮಾ ಪ್ರ॒ಣೀರ್ಯ॒ಜ್ಞಾನಾ॒ಮಿತ್ಯಾ॑ಹ ಪ್ರ॒ಣೀರ್ಹ್ಯೇ॑ಷ ಯ॒ಜ್ಞಾನಾಗ್ಂ॑ ರ॒ಥೀರ॑ದ್ಧ್ವ॒ರಾಣಾ॒ಮಿತ್ಯಾ॑ಹೈ॒ಷ ಹಿ ದೇ॑ವರ॒ಥೋ॑-ಽತೂರ್ತೋ॒ ಹೋತೇತ್ಯಾ॑ಹ॒ ನ ಹ್ಯೇ॑ತ-ಙ್ಕಶ್ಚ॒ನ [ ] 52
ತರ॑ತಿ॒ ತೂರ್ಣಿ॑ರ್-ಹವ್ಯ॒ವಾಡಿತ್ಯಾ॑ಹ॒ ಸರ್ವ॒ಗ್ಗ್॒ಹ್ಯೇ॑ಷ ತರ॒ತ್ಯಾಸ್ಪಾತ್ರ॑-ಞ್ಜು॒ಹೂರ್ದೇ॒ವಾನಾ॒ಮಿತ್ಯಾ॑ಹ ಜು॒ಹೂರ್ಹ್ಯೇ॑ಷ ದೇ॒ವಾನಾ᳚-ಞ್ಚಮ॒ಸೋ ದೇ॑ವ॒ಪಾನ॒ ಇತ್ಯಾ॑ಹ ಚಮ॒ಸೋ ಹ್ಯೇ॑ಷ ದೇ॑ವ॒ಪಾನೋ॒-ಽರಾಗ್ಂ ಇ॑ವಾಗ್ನೇ ನೇ॒ಮಿರ್ದೇ॒ವಾಗ್ಸ್ತ್ವ-ಮ್ಪ॑ರಿ॒ಭೂರ॒ಸೀತ್ಯಾ॑ಹ ದೇ॒ವಾನ್ ಹ್ಯೇ॑ಷ ಪ॑ರಿ॒ಭೂರ್ಯ-ದ್ಬ್ರೂ॒ಯಾದಾ ವ॑ಹ ದೇ॒ವಾ-ನ್ದೇ॑ವಯ॒ತೇ ಯಜ॑ಮಾನಾ॒ಯೇತಿ॒ ಭ್ರಾತೃ॑ವ್ಯಮಸ್ಮೈ [ಭ್ರಾತೃ॑ವ್ಯಮಸ್ಮೈ, ಜ॒ನ॒ಯೇ॒ದಾ ವ॑ಹ] 53
ಜನಯೇ॒ದಾ ವ॑ಹ ದೇ॒ವಾನ್. ಯಜ॑ಮಾನಾ॒ಯೇತ್ಯಾ॑ಹ॒ ಯಜ॑ಮಾನಮೇ॒ವೈತೇನ॑ ವರ್ಧಯತ್ಯ॒ಗ್ನಿಮ॑ಗ್ನ॒ ಆ ವ॑ಹ॒ ಸೋಮ॒ಮಾ ವ॒ಹೇತ್ಯಾ॑ಹ ದೇ॒ವತಾ॑ ಏ॒ವ ತ-ದ್ಯ॑ಥಾಪೂ॒ರ್ವಮುಪ॑ ಹ್ವಯತ॒ ಆ ಚಾ᳚ಗ್ನೇ ದೇ॒ವಾನ್. ವಹ॑ ಸು॒ಯಜಾ॑ ಚ ಯಜ ಜಾತವೇದ॒ ಇತ್ಯಾ॑ಹಾ॒ಗ್ನಿಮೇ॒ವ ತ-ಥ್ಸಗ್ಗ್ ಶ್ಯ॑ತಿ॒ ಸೋ᳚-ಽಸ್ಯ॒ ಸಗ್ಂಶಿ॑ತೋ ದೇ॒ವೇಭ್ಯೋ॑ ಹ॒ವ್ಯಂ-ವಁ॑ಹತ್ಯ॒ಗ್ನಿರ್-ಹೋತೇ- [-ಹೋತಾ᳚, ಇತ್ಯಾ॑ಹಾ॒-ಽಗ್ನಿರ್ವೈ] 54
-ತ್ಯಾ॑ಹಾ॒-ಽಗ್ನಿರ್ವೈ ದೇ॒ವಾನಾ॒ಗ್ಂ॒ ಹೋತಾ॒ ಯ ಏ॒ವ ದೇ॒ವಾನಾ॒ಗ್ಂ॒ ಹೋತಾ॒ ತಂ-ವೃಁ॑ಣೀತೇ॒ಸ್ಮೋ ವ॒ಯಮಿತ್ಯಾ॑ಹಾ॒-ಽಽತ್ಮಾನ॑ಮೇ॒ವ ಸ॒ತ್ತ್ವ-ಙ್ಗ॑ಮಯತಿ ಸಾ॒ಧು ತೇ॑ ಯಜಮಾನ ದೇ॒ವತೇತ್ಯಾ॑ಹಾ॒-ಽಽಶಿಷ॑ಮೇ॒ವೈತಾಮಾ ಶಾ᳚ಸ್ತೇ॒ ಯದ್ಬ್ರೂ॒ಯಾ-ದ್ಯೋ᳚-ಽಗ್ನಿಗ್ಂ ಹೋತಾ॑ರ॒ಮವೃ॑ಥಾ॒ ಇತ್ಯ॒ಗ್ನಿನೋ॑ಭ॒ಯತೋ॒ ಯಜ॑ಮಾನ॒-ಮ್ಪರಿ॑ ಗೃಹ್ಣೀಯಾ-ತ್ಪ್ರ॒ಮಾಯು॑ಕ-ಸ್ಸ್ಯಾ-ದ್ಯಜಮಾನದೇವ॒ತ್ಯಾ॑ ವೈ ಜು॒ಹೂರ್ಭ್ರಾ॑ತೃವ್ಯ ದೇವ॒ತ್ಯೋ॑ಪ॒ಭೃ- [ದೇವ॒ತ್ಯೋ॑ಪ॒ಭೃತ್, ಯದ್ದ್ವೇ ಇ॑ವ] 55
-ದ್ಯದ್ದ್ವೇ ಇ॑ವ ಬ್ರೂ॒ಯಾ-ದ್ಭ್ರಾತೃ॑ವ್ಯಮಸ್ಮೈ ಜನಯೇ-ದ್ಘೃ॒ತವ॑ತೀಮದ್ಧ್ವರ್ಯೋ॒ ಸ್ರುಚ॒ಮಾ-ಽಸ್ಯ॒ಸ್ವೇತ್ಯಾ॑ಹ॒ ಯಜ॑ಮಾನ ಮೇ॒ವೈತೇನ॑ ವರ್ಧಯತಿ ದೇವಾ॒ಯುವ॒ಮಿತ್ಯಾ॑ಹ ದೇ॒ವಾನ್. ಹ್ಯೇ॑ಷಾ-ಽವ॑ತಿ ವಿ॒ಶ್ವವಾ॑ರಾ॒ಮಿತ್ಯಾ॑ಹ॒ ವಿಶ್ವ॒ಗ್ಗ್॒ ಹ್ಯೇ॑ಷಾ-ಽವ॒ತೀಡಾ॑ಮಹೈ ದೇ॒ವಾಗ್ಂ ಈ॒ಡೇನ್ಯಾ᳚ನ್ನಮ॒ಸ್ಯಾಮ॑ ನಮ॒ಸ್ಯಾನ್॑ ಯಜಾ॑ಮ ಯ॒ಜ್ಞಿಯಾ॒ನಿತ್ಯಾ॑ಹಮನು॒ಷ್ಯಾ॑ ವಾ ಈ॒ಡೇನ್ಯಾಃ᳚ ಪಿ॒ತರೋ॑ ನಮ॒ಸ್ಯಾ॑ ದೇ॒ವಾ ಯ॒ಜ್ಞಿಯಾ॑ ದೇ॒ವತಾ॑ ಏ॒ವ ತ-ದ್ಯ॑ಥಾಭಾ॒ಗಂ-ಯಁ॑ಜತಿ ॥ 56 ॥
(ವಿಪ್ರಾ॑ನುಮದಿತ॒ ಇತ್ಯಾ॑ಹ - ಚ॒ನಾ - ಽಸ್ಮೈ॒ - ಹೋತೋ॑ - ಪ॒ಭೃ-ದ್- ದೇ॒ವತಾ॑ ಏ॒ವ - ತ್ರೀಣಿ॑ ಚ) (ಅ. 9)
ತ್ರೀಗ್ಸ್ತೃ॒ಚಾನನು॑ ಬ್ರೂಯಾ-ದ್ರಾಜ॒ನ್ಯ॑ಸ್ಯ॒ ತ್ರಯೋ॒ ವಾ ಅ॒ನ್ಯೇ ರಾ॑ಜ॒ನ್ಯಾ᳚-ತ್ಪುರು॑ಷಾ ಬ್ರಾಹ್ಮ॒ಣೋ ವೈಶ್ಯಃ॑ ಶೂ॒ದ್ರಸ್ತಾನೇ॒ವಾಸ್ಮಾ॒ ಅನು॑ಕಾನ್ ಕರೋತಿ॒ ಪಞ್ಚ॑ದ॒ಶಾನು॑ ಬ್ರೂಯಾ-ದ್ರಾಜ॒ನ್ಯ॑ಸ್ಯ ಪಞ್ಚದ॒ಶೋ ವೈ ರಾ॑ಜ॒ನ್ಯಃ॑ ಸ್ವ ಏ॒ವೈನ॒ಗ್ಗ್॒ ಸ್ತೋಮೇ॒ ಪ್ರತಿ॑ಷ್ಠಾಪಯತಿ ತ್ರಿ॒ಷ್ಟುಭಾ॒ ಪರಿ॑ ದದ್ಧ್ಯಾದಿನ್ದ್ರಿ॒ಯಂ-ವೈಁ ತ್ರಿ॒ಷ್ಟುಗಿ॑ನ್ದ್ರಿ॒ಯಕಾ॑ಮಃ॒ ಖಲು॒ ವೈ ರಾ॑ಜ॒ನ್ಯೋ॑ ಯಜತೇ ತ್ರಿ॒ಷ್ಟುಭೈ॒ವಾಸ್ಮಾ॑ ಇನ್ದ್ರಿ॒ಯ-ಮ್ಪರಿ॑ ಗೃಹ್ಣಾತಿ॒ ಯದಿ॑ ಕಾ॒ಮಯೇ॑ತ [ಕಾ॒ಮಯೇ॑ತ, ಬ್ರ॒ಹ್ಮ॒ವ॒ರ್ಚ॒ಸಮ॒ಸ್ತ್ವಿತಿ॑] 57
ಬ್ರಹ್ಮವರ್ಚ॒ಸಮ॒ಸ್ತ್ವಿತಿ॑ ಗಾಯತ್ರಿ॒ಯಾ ಪರಿ॑ ದದ್ಧ್ಯಾ-ದ್ಬ್ರಹ್ಮವರ್ಚ॒ಸಂ-ವೈಁ ಗಾ॑ಯ॒ತ್ರೀ ಬ್ರ॑ಹ್ಮವರ್ಚ॒ಸಮೇ॒ವ ಭ॑ವತಿ ಸ॒ಪ್ತದ॒ಶಾನು॑ ಬ್ರೂಯಾ॒-ದ್ವೈಶ್ಯ॑ಸ್ಯ ಸಪ್ತದ॒ಶೋ ವೈ ವೈಶ್ಯ॒-ಸ್ಸ್ವ ಏ॒ವೈನ॒ಗ್ಗ್॒ ಸ್ತೋಮೇ॒ ಪ್ರತಿ॑ ಷ್ಠಾಪಯತಿ॒ಜಗ॑ತ್ಯಾ॒ ಪರಿ॑ ದದ್ಧ್ಯಾ॒ಜ್ಜಾಗ॑ತಾ॒ ವೈ ಪ॒ಶವಃ॑ ಪ॒ಶುಕಾ॑ಮಃ॒ ಖಲು॒ ವೈ ವೈಶ್ಯೋ॑ ಯಜತೇ॒ ಜಗ॑ತ್ಯೈ॒ವಾಸ್ಮೈ॑ ಪ॒ಶೂ-ನ್ಪರಿ॑ ಗೃಹ್ಣಾ॒ತ್ಯೇ ಕ॑ವಿಗ್ಂ ಶತಿ॒ಮನು॑ ಬ್ರೂಯಾ-ತ್ಪ್ರತಿ॒ಷ್ಠಾಕಾ॑ಮಸ್ಯೈ ಕವಿ॒ಗ್ಂ॒ಶ-ಸ್ಸ್ತೋಮಾ॑ನಾ-ಮ್ಪ್ರತಿ॒ಷ್ಠಾ ಪ್ರತಿ॑ಷ್ಠಿತ್ಯೈ॒ [ಪ್ರತಿ॑ಷ್ಠಿತ್ಯೈ, ಚತು॑ರ್ವಿಗ್ಂಶತಿ॒ಮನು॑] 58
ಚತು॑ರ್ವಿಗ್ಂಶತಿ॒ಮನು॑ ಬ್ರೂಯಾ-ದ್ಬ್ರಹ್ಮವರ್ಚ॒ಸ-ಕಾ॑ಮಸ್ಯ॒ ಚತು॑ರ್ವಿಗ್ಂಶತ್ಯಕ್ಷರಾ ಗಾಯ॒ತ್ರೀ ಗಾ॑ಯ॒ತ್ರೀ ಬ್ರ॑ಹ್ಮವರ್ಚ॒ಸ-ಙ್ಗಾ॑ಯತ್ರಿ॒ಯೈವಾಸ್ಮೈ᳚ ಬ್ರಹ್ಮವರ್ಚ॒ಸಮವ॑ ರುನ್ಧೇ ತ್ರಿ॒ಗ್ಂ॒ಶತ॒ಮನು॑ ಬ್ರೂಯಾ॒ದನ್ನ॑ಕಾಮಸ್ಯ ತ್ರಿ॒ಗ್ಂ॒ಶದ॑ಕ್ಷರಾ ವಿ॒ರಾಡನ್ನಂ॑-ವಿಁ॒ರಾ-ಡ್ವಿ॒ರಾಜೈ॒ವಾಸ್ಮಾ॑ ಅ॒ನ್ನಾದ್ಯ॒ಮವ॑ ರುನ್ಧೇ॒ ದ್ವಾತ್ರಿಗ್ಂ॑ಶತ॒ಮನು॑ ಬ್ರೂಯಾ-ತ್ಪ್ರತಿ॒ಷ್ಠಾಕಾ॑ಮಸ್ಯ॒ ದ್ವಾತ್ರಿಗ್ಂ॑ಶದಕ್ಷರಾ ಽನು॒ಷ್ಟುಗ॑ನು॒ಷ್ಟು-ಪ್ಛನ್ದ॑ಸಾ-ಮ್ಪ್ರತಿ॒ಷ್ಠಾ ಪ್ರತಿ॑ಷ್ಠಿತ್ಯೈ॒ ಷಟ್ತ್ರಿಗ್ಂ॑ಶತ॒ಮನು॑ ಬ್ರೂಯಾ-ತ್ಪ॒ಶುಕಾ॑ಮಸ್ಯ॒ ಷಟ್ತ್ರಿಗ್ಂ॑ಶದಕ್ಷರಾ ಬೃಹ॒ತೀ ಬಾರ್ಹ॑ತಾಃ ಪ॒ಶವೋ॑ ಬೃಹ॒ತ್ಯೈವಾಸ್ಮೈ॑ ಪ॒ಶೂ- [ಪ॒ಶೂನ್, ಅವ॑ ರುನ್ಧೇ॒] 59
-ನವ॑ ರುನ್ಧೇ॒ ಚತು॑ಶ್ಚತ್ವಾರಿಗ್ಂಶತ॒ಮನು॑ ಬ್ರೂಯಾದಿನ್ದ್ರಿ॒ಯಕಾ॑ಮಸ್ಯ॒ ಚತು॑ಶ್ಚತ್ವಾರಿಗ್ಂಶದಕ್ಷರಾ ತ್ರಿ॒ಷ್ಟುಗಿ॑ನ್ದ್ರಿ॒ಯ-ನ್ತ್ರಿ॒ಷ್ಟು-ಪ್ತ್ರಿ॒ಷ್ಟುಭೈ॒ವಾಸ್ಮಾ॑ ಇನ್ದ್ರಿ॒ಯಮವ॑ ರುನ್ಧೇ॒ ಽಷ್ಟಾಚ॑ತ್ವಾರಿಗ್ಂ ಶತ॒ಮನು॑ ಬ್ರೂಯಾ-ತ್ಪ॒ಶುಕಾ॑ಮಸ್ಯಾ॒ಷ್ಟಾಚ॑ತ್ವಾರಿಗ್ಂಶದಕ್ಷರಾ॒ ಜಗ॑ತೀ॒ ಜಾಗ॑ತಾಃ ಪ॒ಶವೋ॒ಜಗ॑ತ್ಯೈ॒ವಾಸ್ಮೈ॑ ಪ॒ಶೂನವ॑ ರುನ್ಧೇ॒ ಸರ್ವಾ॑ಣಿ॒ ಛನ್ದಾ॒ಗ್॒ ಸ್ಯನು॑ ಬ್ರೂಯಾ-ದ್ಬಹುಯಾ॒ಜಿನ॒-ಸ್ಸರ್ವಾ॑ಣಿ॒ ವಾ ಏ॒ತಸ್ಯ॒ ಛನ್ದಾ॒ಗ್॒ಸ್ಯ ವ॑ರುದ್ಧಾನಿ॒ ಯೋ ಬ॑ಹುಯಾ॒ಜ್ಯಪ॑ರಿಮಿತ॒ಮನು॑ ಬ್ರೂಯಾ॒ದಪ॑ರಿಮಿತ॒ಸ್ಯಾ ವ॑ರುಧ್ಯೈ ॥ 60 ॥
(ಕಾ॒ಮಯೇ॑ತ॒ - ಪ್ರತಿ॑ಷ್ಠಿತ್ಯೈ - ಪ॒ಶೂನ್ಥ್ - ಸ॒ಪ್ತಚ॑ತ್ವಾರಿಗ್ಂಶಚ್ಚ) (ಅ. 10)
ನಿವೀ॑ತ-ಮ್ಮನು॒ಷ್ಯಾ॑ಣಾ-ಮ್ಪ್ರಾಚೀನಾವೀ॒ತ-ಮ್ಪಿ॑ತೃ॒ಣಾಮುಪ॑ವೀತ-ನ್ದೇ॒ವಾನಾ॒ಮುಪ॑ ವ್ಯಯತೇ ದೇವಲ॒ಕ್ಷ್ಮಮೇ॒ವ ತ-ತ್ಕು॑ರುತೇ॒ ತಿಷ್ಠ॒ನ್ನನ್ವಾ॑ಹ॒ ತಿಷ್ಠ॒ನ್ನ್॒. ಹ್ಯಾಶ್ರು॑ತತರಂ॒-ವಁದ॑ತಿ॒ ತಿಷ್ಠ॒ನ್ನನ್ವಾ॑ಹ ಸುವ॒ರ್ಗಸ್ಯ॑ ಲೋ॒ಕಸ್ಯಾ॒ಭಿಜಿ॑ತ್ಯಾ॒ ಆಸೀ॑ನೋ ಯಜತ್ಯ॒ಸ್ಮಿನ್ನೇ॒ವ ಲೋ॒ಕೇ ಪ್ರತಿ॑ತಿಷ್ಠತಿ॒ ಯ-ತ್ಕ್ರೌ॒ಞ್ಚಮ॒ನ್ವಾಹಾ॑-ಽಽಸು॒ರ-ನ್ತ-ದ್ಯನ್ಮ॒ನ್ದ್ರ-ಮ್ಮಾ॑ನು॒ಷ-ನ್ತದ್ಯದ॑ನ್ತ॒ರಾ ತ-ಥ್ಸದೇ॑ವಮನ್ತ॒ರಾ-ಽನೂಚ್ಯಗ್ಂ॑ ಸದೇವ॒ತ್ವಾಯ॑ ವಿ॒ದ್ವಾಗ್ಂಸೋ॒ ವೈ [ ] 61
ಪು॒ರಾ ಹೋತಾ॑ರೋ-ಽಭೂವ॒-ನ್ತಸ್ಮಾ॒-ದ್ವಿಧೃ॑ತಾ॒ ಅದ್ಧ್ವಾ॒ನೋ-ಽಭೂ॑ವ॒-ನ್ನ ಪನ್ಥಾ॑ನ॒-ಸ್ಸಮ॑ರುಕ್ಷನ್ನನ್ತರ್ವೇ॒ದ್ಯ॑ನ್ಯಃ ಪಾದೋ॒ ಭವ॑ತಿ ಬಹಿರ್ವೇ॒ದ್ಯ॑ನ್ಯೋ-ಽಥಾನ್ವಾ॒ಹಾದ್ಧ್ವ॑ನಾಂ॒-ವಿಁಧೃ॑ತ್ಯೈ ಪ॒ಥಾಮಸಗ್ಂ॑ ರೋಹಾ॒ಯಾಥೋ॑ ಭೂ॒ತಞ್ಚೈ॒ವ ಭ॑ವಿ॒ಷ್ಯಚ್ಚಾವ॑ ರು॒ನ್ಧೇ-ಽಥೋ॒ ಪರಿ॑ಮಿತ-ಞ್ಚೈ॒ವಾಪ॑ರಿಮಿತ॒-ಞ್ಚಾವ॑ ರು॒ನ್ಧೇ-ಽಥೋ᳚ ಗ್ರಾ॒ಮ್ಯಾಗ್ಶ್ಚೈ॒ವ ಪ॒ಶೂನಾ॑ರ॒ಣ್ಯಾಗ್ಶ್ಚಾವ॑ ರು॒ನ್ಧೇ-ಽಥೋ॑ [ರು॒ನ್ಧೇ-ಽಥೋ᳚, ದೇ॒ವ॒ಲೋ॒ಕ-ಞ್ಚೈ॒ವ] 62
ದೇವಲೋ॒ಕ-ಞ್ಚೈ॒ವ ಮ॑ನುಷ್ಯ ಲೋ॒ಕ-ಞ್ಚಾ॒ಭಿ ಜ॑ಯತಿ ದೇ॒ವಾ ವೈ ಸಾ॑ಮಿಧೇ॒ನೀರ॒ನೂಚ್ಯ॑ ಯ॒ಜ್ಞ-ನ್ನಾನ್ವ॑ಪಶ್ಯ॒ನ್ಥ್ಸ ಪ್ರ॒ಜಾಪ॑ತಿಸ್ತೂ॒ಷ್ಣೀ-ಮಾ॑ಘಾ॒ರಮಾ ಽಘಾ॑ರಯ॒-ತ್ತತೋ॒ ವೈ ದೇ॒ವಾ ಯ॒ಜ್ಞಮನ್ವ॑ಪಶ್ಯ॒ನ್॒. ಯ-ತ್ತೂ॒ಷ್ಣೀಮಾ॑ಘಾ॒ರ-ಮಾ॑ಘಾ॒ರಯ॑ತಿ ಯ॒ಜ್ಞಸ್ಯಾನು॑ಖ್ಯಾತ್ಯಾ॒ ಅಥೋ॑ ಸಾಮಿಧೇ॒ನೀರೇ॒ವಾಭ್ಯ॑-ನ॒ಕ್ತ್ಯಲೂ᳚ಕ್ಷೋ ಭವತಿ॒ ಯ ಏ॒ವಂ-ವೇಁದಾಥೋ॑ ತ॒ರ್ಪಯ॑ತ್ಯೇ॒ವೈನಾ॒-ಸ್ತೃಪ್ಯ॑ತಿ ಪ್ರ॒ಜಯಾ॑ ಪ॒ಶುಭಿ॒- [ಪ॒ಶುಭಿಃ॑, ಯ ಏ॒ವಂ-ವೇಁದ॒] 63
-ರ್ಯ ಏ॒ವಂ-ವೇಁದ॒ ಯದೇಕ॑ಯಾ ಽಽಘಾ॒ರಯೇ॒ದೇಕಾ᳚-ಮ್ಪ್ರೀಣೀಯಾ॒ದ್ಯ-ದ್ದ್ವಾಭ್ಯಾ॒-ನ್ದ್ವೇ ಪ್ರೀ॑ಣೀಯಾ॒ದ್ಯ-ದ್ತಿ॒ಸೃಭಿ॒ರತಿ॒ ತದ್ರೇ॑ಚಯೇ॒ತ್ಮನ॒ಸಾ ಽಽಘಾ॑ರಯತಿ॒ ಮನ॑ಸಾ॒ ಹ್ಯನಾ᳚ಪ್ತಮಾ॒ಪ್ಯತೇ॑ ತಿ॒ರ್ಯಞ್ಚ॒ಮಾ ಘಾ॑ರಯ॒ತ್ಯಛ॑ಮ್ಬಟ್ಕಾರಂ॒-ವಾಁಕ್ಚ॒ ಮನ॑ಶ್ಚಾ ಽಽರ್ತೀಯೇತಾಮ॒ಹ-ನ್ದೇ॒ವೇಭ್ಯೋ॑ ಹ॒ವ್ಯಂ-ವಁ॑ಹಾ॒ಮೀತಿ॒ ವಾಗ॑ಬ್ರವೀದ॒ಹ-ನ್ದೇ॒ವೇಭ್ಯ॒ ಇತಿ॒ ಮನ॒ಸ್ತೌ ಪ್ರ॒ಜಾಪ॑ತಿ-ಮ್ಪ್ರ॒ಶ್ಞಮೈ॑ತಾ॒ಗ್ಂ॒ ಸೋ᳚-ಽಬ್ರವೀ- [ಸೋ᳚-ಽಬ್ರವೀತ್, ಪ್ರ॒ಜಾಪ॑ತಿರ್ದೂ॒ತೀರೇ॒ವ] 64
-ತ್ಪ್ರ॒ಜಾಪ॑ತಿರ್ದೂ॒ತೀರೇ॒ವ ತ್ವ-ಮ್ಮನ॑ಸೋ-ಽಸಿ॒ ಯದ್ಧಿ ಮನ॑ಸಾ॒ ಧ್ಯಾಯ॑ತಿ॒ ತದ್ವಾ॒ಚಾ ವದ॒ತೀತಿ॒ ತ-ತ್ಖಲು॒ ತುಭ್ಯ॒-ನ್ನ ವಾ॒ಚಾ ಜು॑ಹವ॒ನ್ನಿತ್ಯ॑ಬ್ರವೀ॒-ತ್ತಸ್ಮಾ॒ನ್ಮನ॑ಸಾ ಪ್ರ॒ಜಾಪ॑ತಯೇ ಜುಹ್ವತಿ॒ಮನ॑ ಇವ॒ ಹಿ ಪ್ರ॒ಜಾಪ॑ತಿಃ ಪ್ರ॒ಜಾಪ॑ತೇ॒ರಾಪ್ತ್ಯೈ॑ ಪರಿ॒ಧೀನ್ಥ್ಸ-ಮ್ಮಾ᳚ರ್ಷ್ಟಿ ಪು॒ನಾತ್ಯೇ॒ವೈನಾ॒ನ್ತ್ರಿರ್ಮ॑ದ್ಧ್ಯ॒ಮ-ನ್ತ್ರಯೋ॒ ವೈ ಪ್ರಾ॒ಣಾಃ ಪ್ರಾ॒ಣಾನೇ॒ವಾಭಿ ಜ॑ಯತಿ॒ ತ್ರಿರ್ದ॑ಕ್ಷಿಣಾ॒ರ್ಧ್ಯಂ॑ ತ್ರಯ॑ [-ತ್ರಯಃ॑, ಇ॒ಮೇ ಲೋ॒ಕಾ] 65
ಇ॒ಮೇ ಲೋ॒ಕಾ ಇ॒ಮಾನೇ॒ವ ಲೋ॒ಕಾನ॒ಭಿ ಜ॑ಯತಿ॒ ತ್ರಿರು॑ತ್ತರಾ॒ರ್ಧ್ಯ॑-ನ್ತ್ರಯೋ॒ ವೈ ದೇ॑ವ॒ಯಾನಾಃ॒ ಪನ್ಥಾ॑ನ॒ಸ್ತಾನೇ॒ವಾಭಿ ಜ॑ಯತಿ॒ ತ್ರಿರುಪ॑ ವಾಜಯತಿ॒ ತ್ರಯೋ॒ ವೈ ದೇ॑ವಲೋ॒ಕಾ ದೇ॑ವಲೋ॒ಕಾನೇ॒ವಾಭಿ ಜ॑ಯತಿ॒ ದ್ವಾದ॑ಶ॒ ಸ-ಮ್ಪ॑ದ್ಯನ್ತೇ॒ ದ್ವಾದ॑ಶ॒ ಮಾಸಾ᳚-ಸ್ಸಂವಁಥ್ಸ॒ರ-ಸ್ಸಂ॑ವಁಥ್ಸ॒ರಮೇ॒ವ ಪ್ರೀ॑ಣಾ॒ತ್ಯಥೋ॑ ಸಂವಁಥ್ಸ॒ರಮೇ॒ವಾಸ್ಮಾ॒ ಉಪ॑ ದಧಾತಿ ಸುವ॒ರ್ಗಸ್ಯ॑ ಲೋ॒ಕಸ್ಯ॒ ಸಮ॑ಷ್ಟ್ಯಾ ಆಘಾ॒ರಮಾ ಘಾ॑ರಯತಿ ತಿ॒ರ ಇ॑ವ॒ [ತಿ॒ರ ಇ॑ವ, ವೈ ಸು॑ವ॒ರ್ಗೋ] 66
ವೈ ಸು॑ವ॒ರ್ಗೋ ಲೋ॒ಕ-ಸ್ಸು॑ವ॒ರ್ಗಮೇ॒ವಾಸ್ಮೈ॑ ಲೋ॒ಕ-ಮ್ಪ್ರರೋ॑ಚಯತ್ಯೃ॒ಜುಮಾ ಘಾ॑ರಯತ್ಯೃ॒ಜುರಿ॑ವ॒ ಹಿ ಪ್ರಾ॒ಣ-ಸ್ಸನ್ತ॑ತ॒ಮಾ ಘಾ॑ರಯತಿ ಪ್ರಾ॒ಣಾನಾ॑ಮ॒ನ್ನಾದ್ಯ॑ಸ್ಯ॒ ಸನ್ತ॑ತ್ಯಾ॒ ಅಥೋ॒ ರಕ್ಷ॑ಸಾ॒ಮಪ॑ಹತ್ಯೈ॒ ಯ-ಙ್ಕಾ॒ಮಯೇ॑ತ ಪ್ರ॒ಮಾಯು॑ಕ-ಸ್ಸ್ಯಾ॒ದಿತಿ॑ ಜಿ॒ಹ್ಮ-ನ್ತಸ್ಯಾ ಽಽಘಾ॑ರಯೇ-ತ್ಪ್ರಾ॒ಣಮೇ॒ವಾಸ್ಮಾ᳚ಜ್ಜಿ॒ಹ್ಮ-ನ್ನ॑ಯತಿ ತಾ॒ಜ-ಕ್ಪ್ರಮೀ॑ಯತೇ॒ಶಿರೋ॒ ವಾ ಏ॒ತ-ದ್ಯ॒ಜ್ಞಸ್ಯ॒ ಯದಾ॑ಘಾ॒ರ ಆ॒ತ್ಮಾ ಧ್ರು॒ವಾ- [ಆ॒ತ್ಮಾ ಧ್ರು॒ವಾ, ಆ॒ಘಾ॒ರಮಾ॒ಘಾರ್ಯ॑] 67
-ಽಽಘಾ॒ರಮಾ॒ಘಾರ್ಯ॑ ಧ್ರು॒ವಾಗ್ಂ ಸಮ॑ನಕ್ತ್ಯಾ॒ತ್ಮನ್ನೇ॒ವ ಯ॒ಜ್ಞಸ್ಯ॒ ಶಿರಃ॒ ಪ್ರತಿ॑ ದಧಾತ್ಯ॒ಗ್ನಿ-ರ್ದೇ॒ವಾನಾ᳚-ನ್ದೂ॒ತ ಆಸೀ॒-ದ್ದೈವ್ಯೋ-ಽಸು॑ರಾಣಾ॒-ನ್ತೌ ಪ್ರ॒ಜಾಪ॑ತಿ-ಮ್ಪ್ರ॒ಶ್ಞ-ಮೈ॑ತಾ॒ಗ್ಂ॒ ಸ ಪ್ರ॒ಜಾಪ॑ತಿ ರ್ಬ್ರಾಹ್ಮ॒ಣ-ಮ॑ಬ್ರವೀ-ದೇ॒ತದ್ವಿ ಬ್ರೂ॒ಹೀತ್ಯಾ ಶ್ರಾ॑ವ॒ಯೇತೀ॒ದ-ನ್ದೇ॑ವಾ-ಶ್ಶೃಣು॒ತೇತಿ॒ ವಾವ ತದ॑ಬ್ರವೀ-ದ॒ಗ್ನಿ ರ್ದೇ॒ವೋ ಹೋತೇತಿ॒ ಯ ಏ॒ವ ದೇ॒ವಾನಾ॒-ನ್ತಮ॑ವೃಣೀತ॒ ತತೋ॑ ದೇ॒ವಾ [ದೇ॒ವಾಃ, ಅಭ॑ವ॒-ನ್ಪರಾ-ಽಸು॑ರಾ॒] 68
ಅಭ॑ವ॒-ನ್ಪರಾ-ಽಸು॑ರಾ॒ ಯಸ್ಯೈ॒ವಂ-ವಿಁ॒ದುಷಃ॑ ಪ್ರವ॒ರ-ಮ್ಪ್ರ॑ವೃ॒ಣತೇ॒ ಭವ॑ತ್ಯಾ॒ತ್ಮನಾ॒ ಪರಾ᳚-ಽಸ್ಯ॒ ಭ್ರಾತೃ॑ವ್ಯೋ ಭವತಿ॒ ಯದ್ಬ್ರಾ᳚ಹ್ಮ॒ಣಶ್ಚಾ ಬ್ರಾ᳚ಹ್ಮಣಶ್ಚ ಪ್ರ॒ಶ್ಞ-ಮೇ॒ಯಾತಾ᳚-ಮ್ಬ್ರಾಹ್ಮ॒ಣಾಯಾಧಿ॑ ಬ್ರೂಯಾ॒-ದ್ಯ-ದ್ಬ್ರಾ᳚ಹ್ಮ॒ಣಾಯಾ॒-ಽದ್ಧ್ಯಾಹಾ॒ ಽಽತ್ಮನೇ-ಽದ್ಧ್ಯಾ॑ಹ॒ ಯದ್ಬ್ರಾ᳚ಹ್ಮ॒ಣ-ಮ್ಪ॒ರಾಹಾ॒-ಽಽತ್ಮಾನ॒-ಮ್ಪರಾ॑-ಽಽಹ॒ ತಸ್ಮಾ᳚-ದ್ಬ್ರಾಹ್ಮ॒ಣೋ ನ ಪ॒ರೋಚ್ಯಃ॑ ॥ 69 ॥
(ವಾ - ಆ॑ರ॒ಣ್ಯಾಗ್ಶ್ಚಾವ॑ ರು॒ನ್ಧೇ-ಽಥೋ॑ - ಪ॒ಶುಭಿಃ॒ - ಸೋ᳚-ಽಬ್ರವೀ-ದ್- ದಕ್ಷಿಣಾ॒ರ್ಧ್ಯಂ॑ ತ್ರಯ॑ -ಇವ - ಧ್ರು॒ವಾ - ದೇ॒ವಾ - ಶ್ಚ॑ತ್ವಾರಿ॒ಗ್ಂ॒ಶಚ್ಚ॑ ) (ಅ. 11)
ಆಯು॑ಷ್ಟ ಆಯು॒ರ್ದಾ ಅ॑ಗ್ನ॒ ಆ ಪ್ಯಾ॑ಯಸ್ವ॒ ಸ-ನ್ತೇ ಽವ॑ ತೇ॒ ಹೇಡ॒ ಉದು॑ತ್ತ॒ಮ-ಮ್ಪ್ರಣೋ॑ ದೇ॒ವ್ಯಾ ನೋ॑ ದಿ॒ವೋ ಽಗ್ನಾ॑ ವಿಷ್ಣೂ॒ ಅಗ್ನಾ॑ವಿಷ್ಣೂ ಇ॒ಮ-ಮ್ಮೇ॑ ವರುಣ॒-ತತ್ತ್ವಾ॑ ಯಾ॒ ಮ್ಯು ದು॒ತ್ಯ-ಞ್ಚಿ॒ತ್ರಮ್ ॥ ಅ॒ಪಾ-ನ್ನಪಾ॒ದಾ ಹ್ಯಸ್ಥಾ॑-ದು॒ಪಸ್ಥ॑-ಞ್ಜಿ॒ಹ್ಮಾನಾ॑-ಮೂ॒ರ್ಧ್ವೋ ವಿ॒ದ್ಯುತಂ॒-ವಁಸಾ॑ನಃ । ತಸ್ಯ॒ ಜ್ಯೇಷ್ಠ॑-ಮ್ಮಹಿ॒ಮಾನಂ॒-ವಁಹ॑ನ್ತೀ॒ರ್॒ ಹಿರ॑ಣ್ಯವರ್ಣಾಃ॒ ಪರಿ॑ ಯನ್ತಿ ಯ॒ಹ್ವೀಃ ॥ ಸ- [ಸಮ್, ಅ॒ನ್ಯಾ ಯನ್ತ್ಯುಪ॑] 70
-ಮ॒ನ್ಯಾ ಯನ್ತ್ಯುಪ॑ ಯನ್ತ್ಯ॒ನ್ಯಾ-ಸ್ಸ॑ಮಾ॒ನಮೂ॒ರ್ವ-ನ್ನ॒ದ್ಯಃ॑ ಪೃಣನ್ತಿ । ತಮೂ॒ ಶುಚಿ॒ಗ್ಂ॒ ಶುಚ॑ಯೋ ದೀದಿ॒ವಾಗ್ಂ ಸ॑ಮ॒ಪಾ-ನ್ನಪಾ॑ತ॒-ಮ್ಪರಿ॑ತಸ್ಥು॒ರಾಪಃ॑ । ತಮಸ್ಮೇ॑ರಾ ಯುವ॒ತಯೋ॒ ಯುವಾ॑ನ-ಮ್ಮರ್ಮೃ॒ಜ್ಯಮಾ॑ನಾಃ॒ ಪರಿ॑ ಯ॒ನ್ತ್ಯಾಪಃ॑ ॥ ಸ ಶು॒ಕ್ರೇಣ॒ ಶಿಕ್ವ॑ನಾ ರೇ॒ವದ॒ಗ್ನಿರ್ದೀ॒ದಾಯಾ॑ನಿ॒ದ್ಧ್ಮೋ ಘೃ॒ತನಿ॑ರ್ಣಿಗ॒ಫ್ಸು ॥ ಇನ್ದ್ರಾ॒ವರು॑ಣಯೋರ॒ಹಗ್ಂಸ॒ಮ್ರಾಜೋ॒ರವ॒ ಆ ವೃ॑ಣೇ । ತಾ ನೋ॑ ಮೃಡಾತ ಈ॒ದೃಶೇ᳚ ॥ ಇನ್ದ್ರಾ॑ವರುಣಾ ಯು॒ವಮ॑ದ್ಧ್ವ॒ರಾಯ॑ ನೋ [ಯು॒ವಮ॑ದ್ಧ್ವ॒ರಾಯ॑ ನಃ, ವಿ॒ಶೇ ಜನಾ॑ಯ॒] 71
ವಿ॒ಶೇ ಜನಾ॑ಯ॒ ಮಹಿ॒ ಶರ್ಮ॑ ಯಚ್ಛತಮ್ । ದೀ॒ರ್ಘಪ್ರ॑ಯಜ್ಯು॒ಮತಿ॒ ಯೋ ವ॑ನು॒ಷ್ಯತಿ॑ ವ॒ಯ-ಞ್ಜ॑ಯೇಮ॒ ಪೃತ॑ನಾಸು ದೂ॒ಢ್ಯಃ॑ ॥ ಆ ನೋ॑ಮಿತ್ರಾವರುಣಾ॒, ಪ್ರಬಾ॒ಹವಾ᳚ ॥ ತ್ವ-ನ್ನೋ॑ ಅಗ್ನೇ॒ ವರು॑ಣಸ್ಯ ವಿ॒ದ್ವಾ-ನ್ದೇ॒ವಸ್ಯ॒ ಹೇಡೋ-ಽವ॑ ಯಾಸಿ ಸೀಷ್ಠಾಃ । ಯಜಿ॑ಷ್ಠೋ॒ ವಹ್ನಿ॑ ತಮ॒-ಶ್ಶೋಶು॑ಚಾನೋ॒ ವಿಶ್ವಾ॒ ದ್ವೇಷಾಗ್ಂ॑ಸಿ॒ ಪ್ರಮು॑ಮುಗ್ಧ್ಯ॒ಸ್ಮತ್ ॥ ಸ ತ್ವನ್ನೋ॑ ಅಗ್ನೇ-ಽವ॒ಮೋ ಭ॑ವೋ॒ತೀ ನೇದಿ॑ಷ್ಠೋ ಅ॒ಸ್ಯಾ ಉ॒ಷಸೋ॒ ವ್ಯು॑ಷ್ಟೌ । ಅವ॑ ಯಕ್ಷ್ವ ನೋ॒ ವರು॑ಣ॒ಗ್ಂ॒ [ನೋ॒ ವರು॑ಣಮ್, ರರಾ॑ಣೋ ವೀ॒ಹಿ] 72
ರರಾ॑ಣೋ ವೀ॒ಹಿ ಮೃ॑ಡೀ॒ಕಗ್ಂ ಸು॒ಹವೋ॑ ನ ಏಧಿ ॥ ಪ್ರಪ್ರಾ॒ಯಮ॒ಗ್ನಿರ್ಭ॑ರ॒ತಸ್ಯ॑ ಶೃಣ್ವೇ॒ ವಿ ಯ-ಥ್ಸೂರ್ಯೋ॒ ನ ರೋಚ॑ತೇ ಬೃ॒ಹದ್ಭಾಃ । ಅ॒ಭಿ ಯಃ ಪೂ॒ರು-ಮ್ಪೃತ॑ನಾಸು ತ॒ಸ್ಥೌ ದೀ॒ದಾಯ॒ ದೈವ್ಯೋ॒ ಅತಿ॑ಥಿ-ಶ್ಶಿ॒ವೋ ನಃ॑ ॥ ಪ್ರ ತೇ॑ ಯಕ್ಷಿ॒ ಪ್ರ ತ॑ ಇಯರ್ಮಿ॒ ಮನ್ಮ॒ ಭುವೋ॒ ಯಥಾ॒ ವನ್ದ್ಯೋ॑ ನೋ॒ ಹವೇ॑ಷು । ಧನ್ವ॑ನ್ನಿವ ಪ್ರ॒ಪಾ ಅ॑ಸಿ॒ ತ್ವಮ॑ಗ್ನ ಇಯ॒ಕ್ಷವೇ॑ ಪೂ॒ರವೇ᳚ ಪ್ರತ್ನ ರಾಜನ್ನ್ ॥ 73 ॥
ವಿ ಪಾಜ॑ಸಾ॒ ವಿ ಜ್ಯೋತಿ॑ಷಾ ॥ ಸ ತ್ವಮ॑ಗ್ನೇ॒ ಪ್ರತೀ॑ಕೇನ॒ ಪ್ರತ್ಯೋ॑ಷ ಯಾತುಧಾ॒ನ್ಯಃ॑ । ಉ॒ರು॒ಕ್ಷಯೇ॑ಷು॒ ದೀದ್ಯ॑ತ್ ॥ ತಗ್ಂ ಸು॒ಪ್ರತೀ॑ಕಗ್ಂ ಸು॒ದೃಶ॒ಗ್ಗ್॒ ಸ್ವಞ್ಚ॒-ಮವಿ॑ದ್ವಾಗ್ಂಸೋ ವಿ॒ದುಷ್ಟ॑ರಗ್ಂ ಸಪೇಮ । ಸ ಯ॑ಕ್ಷ॒-ದ್ವಿಶ್ವಾ॑ ವ॒ಯುನಾ॑ನಿ ವಿ॒ದ್ವಾ-ನ್ಪ್ರ ಹ॒ವ್ಯ-ಮ॒ಗ್ನಿ-ರ॒ಮೃತೇ॑ಷು ವೋಚತ್ ॥ ಅ॒ಗ್ಂ॒ಹೋ॒ಮುಚೇ॑ ವಿ॒ವೇಷ॒ ಯನ್ಮಾ॒ ವಿನ॑ ಇ॒ನ್ದ್ರೇ-ನ್ದ್ರ॑ ಕ್ಷ॒ತ್ರಮಿ॑ನ್ದ್ರಿ॒ಯಾಣಿ॑ ಶತಕ್ರ॒ತೋ ಽನು॑ ತೇ ದಾಯಿ ॥ 74 ॥
(ಯ॒ಹ್ವೀ-ಸ್ಸ - ಮ॑ಧ್ವ॒ರಾಯ॑ ನೋ॒ - ವರು॑ಣಗ್ಂ - ರಾಜ॒ಗ್ಗ್॒ -ತು॑ಶ್ಚತ್ವಾರಿಗ್ಂಶಚ್ಚ) (ಅ. 12)
(ವಿ॒ಶ್ವರೂ॑ಪ॒ - ಸ್ತ್ವಷ್ಟೇ - ನ್ದ್ರಂ॑-ವೃಁ॒ತ್ರಂ - ಬ್ರ॑ಹ್ಮವಾ॒ದಿನ॒-ಸ್ಸ ತ್ವೈ - ನಾ-ಽಸೋ॑ಮಯಾಜ್ಯೇ॒ - ಷ ವೈ ದೇ॑ವರ॒ಥೋ - ದೇ॒ವಾ ವೈ ನರ್ಚಿ ನಾ - ಯ॒ಜ್ಞೋ - ಽಗ್ನೇ॑ ಮ॒ಹಾನ್ - ತ್ರೀನ್ - ನಿವೀ॑ತ॒ - ಮಾಯು॑ಷ್ಟೇ॒ - ದ್ವಾದ॑ಶ)
(ವಿ॒ಶ್ವರೂ॑ಪೋ॒ - ನೈನಗ್ಂ॑ ಶೀತರೂ॒ರಾ - ವ॒ದ್ಯ ವಸು॑ - ಪೂರ್ವೇ॒ದ್ಯು - ರ್ವಾಜಾ॒ ಇತ್ಯ - ಗ್ನೇ॑ ಮ॒ಹಾನ್ - ನಿವೀ॑ತ - ಮ॒ನ್ಯಾ ಯನ್ತಿ॒ - ಚತುಃ॑ ಸಪ್ತತಿಃ )
(ವಿ॒ಶ್ವರೂಪೋ॒, ಽನು॑ ತೇ ದಾಯಿ)
॥ ಹರಿಃ॑ ಓಮ್ ॥
॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾ-ನ್ದ್ವಿತೀಯಕಾಣ್ಡೇ ಪಞ್ಚಮಃ ಪ್ರಶ್ನ-ಸ್ಸಮಾಪ್ತಃ ॥
Roman (IAST) Transliteration
kṛṣṇa yajurvedīya taittirīya saṃhitāyā-ndvitīyakāṇḍe pañcamaḥ praśnaḥ - iṣṭividhānaṃ
o-nnamaḥ paramātmane, śrī mahāgaṇapataye namaḥ,
śrī gurubhyo namaḥ | ha॒riḥ॒ om ||
vi॒śvarṷ̄po॒ vai tvā॒ṣṭraḥ pu॒rohi̭to de॒vānā̭māsī-thsva॒srīyo-'sṷrāṇā॒-ntasya॒ trīṇi̭ śī॒r॒ṣāṇyā̭san-thsoma॒pānagṃ̭ surā॒pāna̭-ma॒nnāda̭na॒gṃ॒ sa pra॒tyakṣa̭-nde॒vebhyo̭ bhā॒gama̭vada-tpa॒rokṣa॒masṷrebhya॒-ssarva̭smai॒ vai pra॒tyakṣa̭-mbhā॒gaṃ-va~̭danti॒ yasmā̭ e॒va pa॒rokṣaṃ॒-va~da̭nti॒ tasya̭ bhā॒ga ṷdi॒tastasmā॒dindro̭ 'bibhedī॒dṛṃ-vai~ rā॒ṣṭraṃ-vi~ pa॒ryāva̭rtaya॒tīti॒ tasya॒ vajra̭mā॒dāya̭ śī॒r॒ṣāṇya̭cchina॒dya-thso̭ma॒pāna॒- [-thso̭ma॒pāna᳚m, āsī॒thsa] 1
-māsī॒thsa ka॒piñja̭lo 'bhava॒-dya-thsṷrā॒pāna॒gṃ॒ sa ka̭la॒viṅko॒ yada॒nnāda̭na॒gṃ॒ sa ti̭tti॒ristasyā᳚ñja॒linā᳚ brahmaha॒tyāmupā̭gṛhṇā॒-ttāgṃ saṃ̭va~thsa॒rama̭bibha॒sta-mbhū॒tānya॒bhya̭krośa॒-nbrahma̭ha॒nniti॒ sa pṛ̭thi॒vīmupā̭sīdada॒syai bra̭hmaha॒tyāyai॒ tṛtī̭ya॒-mprati̭ gṛhā॒ṇeti॒ sā-'bra̭vī॒dvaraṃ̭-vṛ~ṇai khā॒tā-tpa̭rābhavi॒ṣyantī̭ manye॒ tato॒ mā parā̭ bhūva॒miti̭pu॒rā tḙ [bhūva॒miti̭pu॒rā te᳚, saṃva~thsa॒rādapi̭] 2
saṃva~thsa॒rādapi̭ rohā॒ditya̭bravī॒-ttasmā᳚-tpu॒rā saṃ̭va~thsa॒rā-tpṛ̭thi॒vyai khā॒tamapi̭ rohati॒ vārḙvṛta॒gg॒ hya̭syai॒ tṛtī̭ya-mbrahmaha॒tyāyai॒ pratya̭gṛhṇā॒-tta-thsvakṛ̭ta॒miri̭ṇamabhava॒-ttasmā॒dāhi̭tāgni-śśra॒ddhādḙva॒-ssvakṛ̭ta॒ iri̭ṇe॒ nāva̭ sye-dbrahmaha॒tyāyai॒ hyḙṣa varṇa॒-ssa vana॒spatī॒nupā̭sīdada॒syai bra̭hmaha॒tyāyai॒ tṛtī̭ya॒-mprati̭ gṛhṇī॒teti॒ te᳚-'bruva॒n varaṃ̭-vṛ~ṇāmahai vṛ॒kṇā- [vṛ॒kṇāt, pa॒rā॒bha॒vi॒ṣyanto̭] 3
-tpa̭rābhavi॒ṣyanto̭ manyāmahe॒ tato॒ mā parā̭ bhū॒metyā॒vraśca̭nādvo॒ bhūyāgṃ̭sa॒ utti̭ṣṭhā॒nitya̭bravī॒-ttasmā̭dā॒vraśca̭nā-dvṛ॒kṣāṇā॒-mbhūyāgṃ̭sa॒ utti̭ṣṭhanti॒ vārḙvṛta॒gg॒ hyḙṣā॒-ntṛtī̭ya-mbrahmaha॒tyāyai॒ pratya̭gṛṇha॒nthsa ni̭ryā॒so̭ 'bhava॒-ttasmā᳚nniryā॒sasya॒ nā-''śya̭-mbrahmaha॒tyāyai॒ hyḙṣa varṇo-'tho॒ khalu॒ ya e॒va lohi̭to॒ yo vā॒-''vraśca̭nānni॒ryeṣa̭ti॒ tasya॒ nā-''śya̭- [nā-''śya᳚m, kāma̭ma॒nyasya॒] 4
-ṅkāma̭ma॒nyasya॒ sastrī̭ṣagṃsā॒da-mupā̭sīdada॒syai bra̭hmaha॒tyāyai॒ tṛtī̭ya॒-mprati̭ gṛhṇī॒teti॒ tā a̭bruva॒n varaṃ̭-vṛ~ṇāmahā॒ ṛtvi̭yā-tpra॒jāṃ-vi~̭ndāmahai॒ kāma॒mā vija̭nito॒-ssa-mbha̭vā॒meti॒ tasmā॒dṛtvi̭yā॒-thstriyaḥ̭ pra॒jāṃ ~vi̭ndante॒ kāma॒mā vija̭nito॒-ssambha̭vanti॒ vārḙvṛta॒gg॒ hyā̭sā॒-ntṛtī̭ya-mbrahmaha॒tyāyai॒ pratya̭gṛhṇa॒n-thsā mala̭vadvāsā abhava॒-ttasmā॒-nmala̭va-dvāsasā॒ na saṃva~̭deta॒- [saṃva~̭deta, na sa॒hā-''sī̭ta॒] 5
-na sa॒hā-''sī̭ta॒ nāsyā॒ anna̭madyā-dbrahmaha॒tyāyai॒ hyḙṣā varṇa̭-mprati॒mucyā ''ste-'tho॒ khalvā̭hura॒bhyañja̭naṃ॒-vā~va stri॒yā anna̭ma॒bhyañja̭name॒va na pra̭ti॒gṛhya॒-ṅkāma̭ma॒nyaditi॒ yā-mmala̭va-dvāsasagṃ sa॒bhaṃva~̭nti॒ yastato॒ jāya̭te॒ so̭-'bhiśa॒sto yāmara̭ṇye॒ tasyai᳚ ste॒no yā-mparā̭cī॒-ntasyai᳚ hrītamu॒khya̭paga॒lbho yā snāti॒ tasyā̭ a॒phsu mārṷko॒ yā- [mārṷko॒ yā, a॒bhya॒ṅkte] 6
-'bhya॒ṅkte tasyai̭ du॒ścarmā॒ yā pra̭li॒khate॒ tasyai̭ khala॒tira̭pamā॒rī yā-''ṅkte tasyai̭ kā॒ṇo yā da॒to dhāva̭te॒ tasyai᳚ śyā॒vada॒n॒. yā na॒khāni̭ nikṛ॒ntate॒ tasyai̭ kuna॒khī yā kṛ॒ṇatti॒ tasyai᳚ klī॒bo yā rajjugṃ̭ sṛ॒jati॒ tasyā̭ u॒-dbandhṷko॒ yā pa॒rṇena॒ piba̭ti॒ tasyā̭ u॒nmādṷko॒ yā kha॒rveṇa॒ piba̭ti॒ tasyai̭ kha॒rvasti॒sro rātrī᳚rvra॒ta-ñca̭redañja॒linā̭ vā॒ pibe॒dakha̭rveṇa vā॒ pātrḙṇa pra॒jāyai̭ gopī॒thāya̭ || 7 ||
(ya-thso̭ma॒pānaṃ̭ - te - vṛ॒kṇāt- tasya॒ nā-''śyaṃ̭ - ~vadeta॒ -mārṷko॒ yā -'kha̭rveṇa vā॒ - trīṇi̭ ca) (a. 1)
tvaṣṭā̭ ha॒tapṷtro॒ vīndra॒gṃ॒ soma॒mā-'ha̭ra॒-ttasmi॒nnindra̭ upaha॒vamai᳚cchata॒ ta-nnopā᳚hvayata pu॒tra-mmḙ-'vadhī॒riti॒ sa ya̭jñaveśa॒sa-ṅkṛ॒tvā prā॒sahā॒ soma̭mapiba॒-ttasya॒ yada॒tyaśi̭ṣyata॒ ta-ttvaṣṭā̭-''hava॒nīya॒mupa॒ prāva̭rtaya॒-thsvāhendra̭śatru-rvardha॒sveti॒ yadava̭rtaya॒-tta-dvṛ॒trasya̭ vṛtra॒tvaṃ-ya~dabra̭vī॒-thsvāhendra̭śatru-rvardha॒sveti॒ tasmā̭da॒sye- [tasmā̭dasya, indra॒-śśatrṷrabhava॒thsa] 8
-ndra॒-śśatrṷrabhava॒thsa sa॒bhaṃva~̭nna॒gnīṣomā̭va॒bhi sama̭bhava॒-thsa i̭ṣumā॒trami̭ṣumātraṃ॒-vi~ṣva̭ṅṅavardhata॒ sa i॒māṃ-lo~॒kāna̭vṛṇo॒dyadi॒māṃ-lo~॒kānavṛ̭ṇo॒-tta-dvṛ॒trasya̭ vṛtra॒tva-ntasmā॒dindro̭-'bibhe॒-thsa pra॒jāpa̭ti॒mupā̭dhāva॒-cchatrṷrme-' ja॒nīti॒ tasmai॒ vajragṃ̭ si॒ktvā prāya̭cchade॒tena̭ ja॒hīti॒ tenā॒bhyā̭yata॒ tāva̭brūtāma॒gnīṣomau॒ mā [ ] 9
prahā̭rā॒vama॒nta-ssva॒ iti॒ mama॒ vai yu॒vaggstha॒ itya̭bravī॒-nmāma॒bhyeta॒miti॒ tau bhā̭ga॒dheya̭maicchetā॒-ntābhyā̭-me॒tama̭gnīṣo॒mīya॒-mekā̭daśakapāla-mpū॒rṇamā̭se॒ prāya̭ccha॒-ttāva̭brūtāma॒bhi sanda̭ṣṭau॒ vai svo॒ na śa̭knuva॒ aitu॒miti॒ sa indra̭ ā॒tmanaḥ̭ śītarū॒rāva̭janaya॒-ttacchī̭tarū॒rayo॒rjanma॒ ya e॒vagṃ śī̭tarū॒rayo॒rjanma॒ veda॒ [veda̭, nainagṃ̭] 10
nainagṃ̭ śītarū॒rau ha̭ta॒stābhyā̭menama॒bhya̭naya॒-ttasmā᳚-jjañja॒bhyamā̭nāda॒gnīṣomau॒ nira̭krāmatā-mprāṇāpā॒nau vā ḙna॒-ntada̭jahitā-mprā॒ṇo vai dakṣo̭-'pā॒naḥ kratu॒stasmā᳚-jjañja॒bhyamā̭no brūyā॒nmayi̭ dakṣakra॒tū iti̭ prāṇāpā॒nāve॒vā-''tma-ndha̭tte॒ sarva॒māyṷreti॒ sa de॒vatā̭ vṛ॒trānni॒r॒hūya॒ vārtra̭ghnagṃ ha॒viḥ pū॒rṇamā̭se॒ nira̭vapa॒-dghnanti॒ vā ḙna-mpū॒rṇamā̭sa॒ ā- [ā, a॒mā॒vā॒syā̭yāṃ-] 11
-'mā̭vā॒syā̭yā-mpyāyayanti॒ tasmā॒-dvārtra̭ghnī pū॒rṇamā॒se 'nū᳚cyete॒ vṛdha̭nvatī amāvā॒syā̭yā॒-nta-thsa॒gg॒sthāpya॒ vārtra̭ghnagṃ ha॒virvajra̭mā॒dāya॒ puna̭ra॒bhyā̭yata॒ te a̭brūtā॒-ndyāvā̭pṛthi॒vī mā pra hā̭rā॒vayo॒rvai śri॒ta iti॒ te a̭brūtāṃ॒-va~raṃ̭-vṛ~ṇāvahai॒ nakṣa̭travihitā॒-'hamasā॒nītya॒sāva̭bravī- cci॒travi̭hitā॒- 'hamitī॒ya-ntasmā॒nnakṣa̭travihitā॒-'sau ci॒travi̭hite॒-'yaṃ-ya~ e॒va-ndyāvā̭pṛthi॒vyo- [-dyāvā̭pṛthi॒vyoḥ, varaṃ॒-ve~dainaṃ॒-va~ro̭] 12
-rvaraṃ॒-ve~dainaṃ॒-va~ro̭ gacchati॒ sa ā॒bhyāme॒va prasṷ̄ta॒ indro̭ vṛ॒trama̭ha॒-nte de॒vā vṛ॒tragṃ ha॒tvā-'gnīṣomā̭vabruvan. ha॒vya-nno̭ vahata॒miti॒ tāva̭brūtā॒mapa̭tejasau॒ vai tyau vṛ॒tre vai tyayo॒steja॒ iti॒ te᳚-'bruva॒n ka i॒damacchai॒tīti॒ gauritya̭bruva॒-ngaurvāva sarva̭sya mi॒tramiti॒ sā-'bra̭vī॒- [sā-'bra̭vīt, varaṃ̭-vṛ~ṇai॒ mayye॒va] 13
-dvaraṃ̭-vṛ~ṇai॒ mayye॒va sa॒to-'bhayḙna bhunajāddhvā॒ iti॒ ta-dgaurā-'ha̭ra॒-ttasmā॒-dgavi̭ sa॒tobhayḙna bhuñjata e॒tadvā a॒gnestejo॒ ya-dghṛ॒tame॒ta-thsoma̭sya॒ ya-tpayo॒ ya e॒vama॒gnīṣoma̭yo॒ stejo॒ veda̭ teja॒svyḙva bha̭vati brahmavā॒dino̭ vadanti kindeva॒tya̭-mpaurṇamā॒samiti̭ prājāpa॒tyamiti̭ brūyā॒-ttenendra̭-ñjye॒ṣṭha-mpu॒tra-nni॒ravā̭sāyaya॒diti॒ tasmā᳚- -jjye॒ṣṭha-mpu॒tra-ndhanḙna ni॒rava̭sāyayanti || 14 ||
(a॒sya॒ - mā - vedā - '' - dyāvā̭pṛthi॒vyo - ra̭bravī॒ - diti॒ tasmā᳚ - cca॒tvāri̭ ca) (a. 2)
indraṃ̭-vṛ~॒tra-ñja̭ghni॒vāgṃsa॒-mmṛdho॒-'bhi prāvḙpanta॒ sa e॒taṃ-vai~̭mṛ॒dha-mpū॒èṇamā̭se-'nunirvā॒pya̭mapaśya॒-tta-nnira̭vapa॒-ttena॒ vai sa mṛdho-'pā̭hata॒ yadvai̭mṛ॒dhaḥ pū॒rṇamā̭se-'nunirvā॒pyo̭ bhava̭ti॒ mṛdha̭ e॒va tena॒ yaja̭mā॒no 'pa̭ hata॒ indro̭ vṛ॒tragṃ ha॒tvā de॒vatā̭bhiścendri॒yeṇa̭ ca॒ vyā᳚rdhyata॒ sa e॒tamā᳚gne॒ya-ma॒ṣṭāka̭pāla-mamāvā॒syā̭yāmapaśyadai॒ndra-ndadhi॒ [-dadhi̭, ta-nnira̭vapa॒-ttena॒] 15
ta-nnira̭vapa॒-ttena॒ vai sa de॒vatā᳚ścendri॒ya-ñcāvā̭rundha॒yadā᳚gne॒yo᳚ 'ṣṭāka̭pālo 'māvā॒syā̭yā॒-mbhava̭tyai॒ndra-ndadhi̭ de॒vatā᳚ścai॒va tene᳚ndri॒ya-ñca॒ yaja̭mā॒no-'va̭ rundha॒ indra̭sya vṛ॒tra-ñja॒ghnuṣa̭ indri॒yaṃ-vī~॒rya̭-mpṛthi॒vīmanu॒ vyā᳚rccha॒-ttadoṣa̭dhayo vī॒rudho̭-'bhava॒nthsa pra॒jāpa̭ti॒mupā̭dhāva-dvṛ॒tra-mmḙ ja॒ghnuṣa̭ indri॒yaṃ-vī~॒rya̭- [vī॒rya᳚m, pṛ॒thi॒vīmanu॒] 16
-mpṛthi॒vīmanu॒ vyā̭ra॒-ttadoṣa̭dhayo vī॒rudho̭-'bhūva॒nniti॒ sa pra॒jāpa̭tiḥ pa॒śūna̭bravīde॒tada̭smai॒ sa-nna̭ya॒teti॒ ta-tpa॒śava॒ oṣa̭dhī॒bhyo 'dhyā॒tman-thsama̭naya॒-nta-tpratya̭duha॒n॒. ya-thsa॒mana̭ya॒-nta-thsā᳚-nnā॒yyasya̭ sānnāyya॒tvaṃ-ya~-tpra॒tyadṷha॒-nta-tpra̭ti॒dhuṣaḥ̭ pratidhu॒ktvagṃ sama̭naiṣuḥ॒ pratya̭dhukṣa॒-nna tu mayi̭ śrayata॒ itya̭bravīde॒tada̭smai [ ] 17
śṛ॒ta-ṅkṷru॒tetya̭bravī॒-ttada̭smai śṛ॒ta-ma̭kurvannindri॒yaṃ-vā~vāsmi̭n vī॒rya̭-ntada̭śraya॒-ntacchṛ॒tasya̭ śṛta॒tvagṃ sama̭naiṣuḥ॒ pratya̭dhukṣañchṛ॒tama̭kra॒-nna tu mā̭ dhino॒tītya̭bravīde॒tada̭smai॒ dadhi̭ kuru॒tetya̭bravī॒-ttada̭smai॒ daddhya̭kurva॒-ntadḙnamadhino॒-ttadda॒ddhno da̭dhi॒tva-mbra̭hmavā॒dino̭ vadanti da॒ddhnaḥ pūrva̭syāva॒deya॒- [pūrva̭syāva॒deya᳚m, dadhi॒ hi] 18
-ndadhi॒ hi pūrva̭-ṅkri॒yata॒ ityanā̭dṛtya॒ tacchṛ॒tasyai॒va pūrva॒syāva̭ dyedindri॒yame॒vāsmi̭n vī॒ryagg̭ śri॒tvā da॒ddhno pari̭ṣṭāddhinoti yathāpū॒rvamupai̭ti॒ ya-tpū॒tīkai᳚rvā parṇava॒lkairvā̭ ''ta॒ñcyā-thsau॒mya-ntadya-tkva̭lai rākṣa॒sa-ntadya-tta̭ṇḍu॒lairvai᳚śvade॒va-ntadyadā॒tañca̭nena mānu॒ṣa-nta-dya-dda॒ddhnā ta-thsendra̭-nda॒ddhnā ''ta̭nakti [ta̭nakti, se॒ndra॒tvāyā᳚-] 19
sendra॒tvāyā᳚-'gnihotroccheṣa॒ṇama॒bhyā-ta̭nakti ya॒jñasya॒ santa̭tyā॒ indro̭ vṛ॒tragṃ ha॒tvā parā᳚-mparā॒vata̭-magaccha॒-dapā̭rādha॒miti॒ manya̭māna॒sta-nde॒vatāḥ॒ praiṣa̭maiccha॒n-thso᳚-'bravī-tpra॒jāpa̭ti॒ryaḥ pra̭tha॒mo̭-'nuvi॒ndati॒ tasya̭ pratha॒ma-mbhā̭ga॒dheya॒miti॒ ta-mpi॒taro-'nva̭vinda॒-ntasmā᳚-tpi॒tṛbhyaḥ̭ pūrve॒dyuḥ kri̭yate॒ so̭-'māvā॒syā᳚-mpratyā-'ga̭ccha॒-tta-nde॒vā a॒bhi sama̭gacchantā॒mā vai no॒- [vai naḥ̭, a॒dya vasṷ] 20
-'dya vasṷ vasa॒tītīndro॒ hi de॒vānāṃ॒-va~su॒ tada̭māvā॒syā̭yā amāvāsya॒tva-mbra̭hmavā॒dino̭ vadanti kindeva॒tyagṃ̭ sānnā॒yyamiti̭ vaiśvade॒vamiti̭ brūyā॒-dviśve॒ hi tadde॒vā bhā̭ga॒dheya̭ma॒bhi sa॒maga̭ccha॒ntetyatho॒ khalvai॒ndramitye॒va brṷ̄yā॒dindraṃ॒-vā~va te ta-dbhi̭ṣa॒jyanto॒-'bhi sama̭gaccha॒nteti̭ || 21 ||
(dadhi̭ - me ja॒ghnuṣa̭ indri॒yaṃ-vī~॒rya̭ - mitya̭bravīde॒tada̭smā - ava॒deyaṃ̭ - tanakti - no॒ - dvica̭tvārigṃśacca) (a. 3)
bra॒hma॒vā॒dino̭ vadanti॒ sa tvai da̭̭rśapūrṇamā॒sau ya̭jeta॒ ya ḙnau॒ sendrau॒ yaje॒teti̭ vaimṛ॒dhaḥ pū॒rṇamā̭se 'nunirvā॒pyo̭ bhavati॒ tena̭ pū॒rṇamā̭sa॒-ssendra̭ ai॒ndra-ndaddhya̭māvā॒syā̭yā॒-ntenā̭māvā॒syā̭ sendrā॒ ya e॒vaṃ-vi~॒dvā-nda̭rśapūrṇamā॒sau yaja̭te॒ sendrā̭ve॒vainaṷ yajate॒ śva-śśvo᳚-'smā ījā॒nāya॒ vasī̭yo bhavati de॒vā vai ya-dya॒jñe 'kṷrvata॒tadasṷrā akurvata॒ te de॒vā e॒tā- [de॒vā e॒tām, iṣṭi̭-mapaśyan-] 22
-miṣṭi̭-mapaśya-nnāgnāvaiṣṇa॒va-mekā̭daśakapāla॒gṃ॒ sara̭svatyai ca॒rugṃ sara̭svate ca॒ru-ntā-mpau᳚rṇamā॒sagṃ sa॒gg॒sthāpyānu॒ nira̭vapa॒-ntato̭ de॒vā abha̭va॒-nparā-'sṷrā॒ yo bhrātṛ̭vyavā॒nthsyā-thsa pau᳚rṇamā॒sagṃ sa॒gg॒sthāpyai॒tāmiṣṭi॒manu॒ nirva̭pe-tpaurṇamā॒senai॒va vajra॒-mbhrātṛ̭vyāya pra॒hṛtyā᳚-''gnāvaiṣṇa॒vena̭ de॒vatā᳚śca ya॒jña-ñca॒ bhrātṛ̭vyasya vṛṅkte mithu॒nā-npa॒śūn-thsā̭rasva॒tābhyāṃ॒-yā~va̭de॒vāsyāsti॒ ta- [yāva̭de॒vāsyāsti॒ tat, sarvaṃ̭-vṛ~ṅkte] 23
-thsarvaṃ̭-vṛ~ṅkte paurṇamā॒sīme॒va ya̭jeta॒ bhrātṛ̭vyavā॒nnāmā̭vā॒syāgṃ̭ ha॒tvā bhrātṛ̭vya॒-nnā-''pyā̭yayati sākamprasthā॒yīyḙna yajeta pa॒śukā̭mo॒yasmai॒ vā alpḙnā॒-''hara̭nti॒ nā-''tmanā॒ tṛpya̭ti॒ nānyasmai̭ dadāti॒ yasmai̭ maha॒tā tṛpya̭tyā॒tmanā॒ dadā᳚tya॒nyasmai̭ maha॒tā pū॒rṇagṃ ho̭ta॒vya̭-ntṛ॒pta e॒vaina॒mindraḥ̭ pra॒jayā̭ pa॒śubhi̭starpayati dārupā॒treṇa̭ juhoti॒ na hi mṛ॒nmaya॒māhṷtimāna॒śa audṷmbara- [audṷmbaram, bha॒va॒tyūrgvā] 24
-mbhava॒tyūrgvā ṷdu॒mbara॒ ūr-kpa॒śava̭ ū॒rjaivāsmā॒ ūrja̭-mpa॒śūnava̭ rundhe॒ nāga̭taśrīrmahe॒ndraṃ-ya~̭jeta॒ trayo॒ vai ga॒taśri̭ya-śśuśru॒vā-ngrā̭ma॒ṇī rā̭ja॒nya̭steṣā᳚-mmahe॒ndro de॒vatā॒ yo vai svā-nde॒vatā̭mati॒ yaja̭te॒ prasvāyai̭ de॒vatā̭yaicyavate॒ na parā॒-mprāpno̭ti॒ pāpī̭yā-nbhavati saṃva~thsa॒ra-mindraṃ̭-ya~jeta saṃva~thsa॒ragṃ hi vra॒ta-nnā-'ti॒ svai- [vra॒ta-nnā-'ti॒ svā, e॒vaina̭-nde॒vate॒jyamā̭nā॒] 25
-vaina̭-nde॒vate॒jyamā̭nā॒ bhūtyā̭ indhe॒ vasī̭yā-nbhavati saṃva~thsa॒rasya̭ pa॒rastā̭da॒gnaye᳚ vra॒tapa̭taye puro॒ḍāśa̭ma॒ṣṭāka̭pāla॒-nnirva̭pe-thsaṃva~thsa॒rame॒vainaṃ̭-vṛ~॒tra-ñja̭ghni॒vāgṃ sa̭ma॒gni-rvra॒tapa̭ti-rvra॒tamā la̭mbhayati॒ tato-'dhi॒ kāmaṃ̭-ya~jeta || 26 ||
(e॒tāṃ - ta - daudṷmbara॒gg॒ - svā - tri॒gṃ॒śacca̭ ) (a. 4)
nāso̭mayājī॒ sa-nna̭ye॒danā̭gataṃ॒-vā~ e॒tasya॒ payo॒ yo-'so̭mayājī॒ yadaso̭mayājī sa॒-nnaye᳚-tparimo॒ṣa e॒va so-'nṛ̭ta-ṅkaro॒tyatho॒ parai॒va si̭cyate somayā॒jyḙva sa-nna̭ye॒-tpayo॒ vai somaḥ॒ payaḥ̭ sānnā॒yya-mpaya̭sai॒va paya̭ ā॒tma-ndha̭tte॒ vi vā e॒ta-mpra॒jayā̭ pa॒śubhi̭rardhayati va॒rdhaya̭tyasya॒ bhrātṛ̭vyaṃ॒-ya~sya̭ ha॒virnirṷpta-mpu॒rastā᳚cca॒ndramā̭ [pu॒rastā᳚cca॒ndramāḥ᳚, a॒bhyṷdeti̭] 27
a॒bhyṷdeti̭ tre॒dhā ta̭ṇḍu॒lān. vi bha̭je॒dye ma̭ddhya॒mā-ssyustāna॒gnayḙ dā॒tre pṷro॒ḍāśa̭ma॒ṣṭāka̭pāla-ṅkuryā॒dye sthavi̭ṣṭhā॒stānindrā̭ya pradā॒tre da॒dhaggśca॒ruṃ-ye~-'ṇi̭ṣṭhā॒stān. viṣṇa̭ve śipivi॒ṣṭāya̭ śṛ॒te ca॒ruma॒gnire॒vāsmai᳚ pra॒jā-mpra̭ja॒naya̭ti vṛ॒ddhāmindraḥ॒ praya̭cchati ya॒jño vai viṣṇuḥ̭ pa॒śava॒-śśipi̭rya॒jña e॒va pa॒śuṣu॒ prati̭tiṣṭhati॒ na dve [na dve, ya॒je॒ta॒ ya-tpūrva̭yā] 28
ya̭jeta॒ ya-tpūrva̭yā sampra॒ti yaje॒totta̭rayā cha॒mbaṭkṷryā॒dyadutta̭rayā sampra॒ti yajḙta॒ pūrva̭yā cha॒mbaṭkṷryā॒nneṣṭi॒rbhava̭ti॒ na ya॒jñastadanṷ hrītamu॒khya̭paga॒lbho jā̭yata॒ ekā̭me॒va ya̭jeta praga॒lbho᳚-'sya jāya॒te 'nā̭dṛtya॒ ta-ddve e॒va ya̭jeta yajña mu॒khame॒va pūrva̭yā॒-''labha̭te॒ yaja̭ta॒ utta̭rayā de॒vatā̭ e॒va pūrva̭yā 'varu॒ndha i̭ndri॒ya-mutta̭rayā devalo॒kame॒va [ ] 29
pūrva̭yā-'bhi॒jaya̭ti manuṣyalo॒kamutta̭rayā॒ bhūya̭so yajñakra॒tūnupai᳚tye॒ṣā vai su॒manā॒ nāmeṣṭi॒ryama॒dyejā॒na-mpa॒ścācca॒ndramā̭ a॒bhyṷdetya॒sminne॒vāsmai̭ lo॒ke-'rdhṷka-mbhavati dākṣāyaṇa ya॒jñena̭ suva॒rgakā̭mo yajeta pū॒rṇamā̭se॒ sa-nna̭ye-nmaitrāvaru॒ṇyā ''mikṣa̭yā 'māvā॒syā̭yāṃ-ya~jeta pū॒rṇamā̭se॒ vai de॒vānāgṃ̭ su॒tasteṣā̭me॒tama̭rdhamā॒sa-mprasṷta॒steṣā᳚-mmaitrāvaru॒ṇī va॒śā-'mā̭vā॒syā̭yā-manūba॒ndhyā̭ ya- [-manūba॒ndhyā̭ yat, pū॒rve॒dyu ryaja̭te॒] 30
-tpū᳚rve॒dyu ryaja̭te॒ vedi̭me॒va ta-tka̭roti॒ ya-dva॒thsā-na̭pāka॒roti̭ sadohavirdhā॒ne e॒va sa-mmi̭noti॒ yadyaja̭te de॒vaire॒va su॒tyāgṃ sa-mpā̭dayati॒ sa e॒tama̭rdhamā॒sagṃ sa̭dha॒māda̭-nde॒vai-ssoma̭-mpibati॒ ya-nmai᳚trāvaru॒ṇyā ''mikṣa̭yā 'māvā॒syā̭yāṃ॒-ya~ja̭te॒ yaivāsau de॒vānāṃ᳚-va~॒śā-'nṷ̄ba॒ndhyā̭ so e॒vaiṣaitasya̭ sā॒kṣādvā e॒ṣa de॒vāna॒bhyāro̭hati॒ ya ḙṣāṃ-ya~॒jña- [ya॒jñam, a॒bhyā॒roha̭ti॒] 31
-ma̭bhyā॒roha̭ti॒ yathā॒ khalu॒vai śreyā̭na॒bhyārṷ̄ḍhaḥ kā॒maya̭te॒ tathā̭ karoti॒ yadya̭va॒viddhya̭ti॒ pāpī̭yā-nbhavati॒ yadi॒ nāva॒viddhya̭ti sa॒dṛṃ-vyā~॒vṛtkā̭ma e॒tena̭ ya॒jñena̭ yajeta kṣu॒rapa̭vi॒rhyḙṣa ya॒jñastā॒ja-kpuṇyo̭ vā॒ bhava̭ti॒ pra vā̭ mīyate॒ tasyai॒tadvra॒ta-nnānṛ̭taṃ-va~de॒nna mā॒gṃ॒ sama̭śñīyā॒nna striya॒mupḙyā॒nnāsya॒ palpṷ̄lanena॒ vāsaḥ̭ palpūlayeyu -re॒taddhi de॒vā-ssarva॒-nna ku॒rvanti̭ || 32 ||
(ca॒ndramā॒ -dve -dḙvalo॒kame॒va - ya-dya॒jñaṃ- pa̭lpūlayeyuḥ॒ -ṣaṭ ca̭) (a. 5)
e॒ṣa vai dḙvara॒tho ya-dda̭rśapūrṇamā॒sau yo da̭rśapūrṇamā॒sāvi॒ṣṭvā somḙna॒ yaja̭te॒ ratha̭spaṣṭa e॒vāva॒sāne॒ varḙ de॒vānā॒mava̭ syatye॒tāni॒ vā aṅgā॒parūgṃ̭ṣi saṃva~thsa॒rasya॒ ya-dda̭rśapūrṇamā॒sau ya e॒vaṃ-vi~॒dvā-nda̭rśapūrṇamā॒sau yaja॒te-'ṅgā॒parūg̭ṣye॒va saṃ̭va~thsa॒rasya॒ prati̭ dadhātye॒ te vai saṃ̭va~thsa॒rasya॒ cakṣṷṣī॒ ya-dda̭rśapūrṇamā॒sau ya e॒vaṃ-vi~॒dvā-nda̭rśapūrṇamā॒sau yaja̭te॒ tābhyā̭me॒va sṷva॒rgaṃ-lo~॒kamanṷ paśya- [paśyati, e॒ṣā vai] 33
-tye॒ṣā vai de॒vānāṃ॒-vi~krā᳚nti॒ rya-dda̭rśapūrṇamā॒sau ya e॒vaṃ-vi~॒dvā-nda̭rśapūrṇamā॒sau yaja̭te de॒vānā̭me॒va vikrā᳚nti॒manu॒ vikra̭mata e॒ṣa vai dḙva॒yānaḥ॒ panthā॒ ya-dda̭rśapūrṇamā॒sau ya e॒vaṃ-vi~॒dvā-nda̭rśapūrṇamā॒sau yaja̭te॒ ya e॒va dḙva॒yānaḥ॒ panthā॒stagṃ sa॒māro̭hatye॒tau vai de॒vānā॒gṃ॒ harī॒ ya-dda̭rśapūrṇamā॒sau ya e॒vaṃ-vi~॒dvā-nda̭rśapūrṇamā॒sau yaja̭te॒ yāve॒va de॒vānā॒gṃ॒ harī॒ tābhyā̭- [harī॒ tābhyā᳚m, e॒vaibhyo̭ ha॒vyaṃ-] 34
-me॒vaibhyo̭ ha॒vyaṃ-va~̭hatye॒tadvai de॒vānā̭mā॒syaṃ̭-ya~-dda̭rśapūrṇamā॒sau ya e॒vaṃ-vi~॒dvā-nda̭rśapūrṇamā॒sau yaja̭te sā॒kṣāde॒va de॒vānā̭mā॒syḙ juhotye॒ṣa vai ha̭virdhā॒nī yo da̭rśapūrṇamāsayā॒jī sā॒yamprā̭taragniho॒tra-ñjṷhoti॒ yaja̭te darśapūrṇamā॒sā-vaha̭rahar-havirdhā॒nināgṃ̭ su॒to ya e॒vaṃ-vi~॒dvā-nda̭rśapūrṇamā॒sau yaja̭te havirdhā॒nya̭smīti॒ sarva̭me॒vāsya̭ barhi॒ṣya̭-nda॒tta-mbha̭vati de॒vāvā aha̭- [ahaḥ, ya॒jñiya॒-nnāvi̭nda॒-nte] 35
-rya॒jñiya॒-nnāvi̭nda॒-nte da̭rśapūrṇamā॒sāva̭puna॒-ntau vā e॒tau pū॒tau meddhyau॒ ya-dda̭rśapūrṇamā॒sau ya e॒vaṃ-vi~॒dvā-nda̭rśapūrṇamā॒sau yaja̭te pū॒tāve॒vainau॒ meddhyaṷ yajate॒ nāmā̭vā॒syā̭yā-ñca paurṇamā॒syā-ñca॒ striya॒-mupḙyā॒dya- dṷpe॒yānniri̭ndriya-ssyā॒-thsoma̭sya॒ vai rājño᳚-'rdhamā॒sasya॒ rātra̭yaḥ॒ patna̭ya āsa॒-ntāsā̭mamāvā॒syā᳚-ñca paurṇamā॒sī-ñca॒ nopai॒- [nopai᳚t, te ḙnama॒bhi] 36
-tte ḙnama॒bhi sama̭nahyetā॒-ntaṃ-ya~kṣma̭ ārccha॒-drājā̭naṃ॒-ya~kṣma̭ āra॒diti॒ ta-drā̭jaya॒kṣmasya॒ janma॒ ya-tpāpī̭yā॒nabha̭va॒-tta-tpā̭paya॒kṣmasya॒ yajjā॒yābhyā॒mavi̭nda॒-ttajjā॒yenya̭sya॒ ya e॒vame॒teṣāṃ॒-ya~kṣmā̭ṇā॒-ñjanma॒ veda॒ naina̭me॒te yakṣmā̭vindanti॒ sa e॒te e॒va na̭ma॒syannupā̭dhāva॒-tte a̭brūtāṃ॒-va~raṃ̭-vṛ~ṇāvahā ā॒va-nde॒vānā᳚-mbhāga॒dhe a̭sāvā॒- [a̭sāva, ā॒vadadhi̭ de॒vā] 37
-'vadadhi̭ de॒vā i̭jyāntā॒ iti॒ tasmā᳚-thsa॒dṛśī̭nā॒gṃ॒ rātrī̭ṇā-mamāvā॒syā̭yā-ñca paurṇamā॒syā-ñca̭ de॒vā i̭jyanta e॒te hi de॒vānā᳚-mbhāga॒dhe bhā̭ga॒dhā a̭smai manu॒ṣyā̭ bhavanti॒ ya e॒vaṃ-ve~da̭ bhū॒tāni॒ kṣudha̭maghnan-thsa॒dyo ma̭nu॒ṣyā̭ ardhamā॒se de॒vā mā॒si pi॒taraḥ̭ saṃva~thsa॒re vana॒spata̭ya॒-stasmā॒-daha̭raha-rmanu॒ṣyā̭ aśa̭namicchante 'rdhamā॒se de॒vā i̭jyante mā॒si pi॒tṛbhyaḥ̭ kriyate saṃva~thsa॒re vana॒spata̭yaḥ॒ phala̭-ṅgṛhṇanti॒ ya e॒vaṃ-ve~da॒ hanti॒ kṣudha॒-mbhrātṛ̭vyam || 38 ||
(pa॒śya॒ti॒ - tābhyā॒ -maha̭ - rai - dasāva॒ -phalagṃ̭ -sa॒pta ca̭) (a. 6)
de॒vā vai narci na yajṷṣyaśrayanta॒ te sāma̭nne॒vā-'śra̭yanta॒ hi-ṅka̭roti॒ sāmai॒vā-'ka॒r॒hi-ṅka̭roti॒ yatrai॒va de॒vā aśra̭yanta॒ tata̭ e॒vainā॒-nprayṷṅkte॒ hi-ṅka̭roti vā॒ca e॒vaiṣa yogo॒ hi-ṅka̭roti pra॒jā e॒va ta-dyaja̭māna-ssṛjate॒ triḥ pra̭tha॒māmanvā̭ha॒ trirṷtta॒māṃ-ya~॒jñasyai॒va tadba॒r॒sa- [tadba॒r॒sam, na॒hya॒tyapra̭sragṃsāya॒-] 39
-nna̭hya॒tyapra̭sragṃsāya॒ santa̭ta॒manvā̭ha prā॒ṇānā̭ma॒nnādya̭sya॒ santa̭tyā॒ atho॒ rakṣa̭sā॒mapa̭hatyai॒ rātha̭taṃrī-mpratha॒māmanvā̭ha॒ rātha̭taṃro॒ vā a॒yaṃ-lo~॒ka i॒mame॒va lo॒kama॒bhi ja̭yati॒ trirvi gṛ̭hṇāti॒ traya̭ i॒me lo॒kā i॒māne॒va lo॒kāna॒bhi ja̭yati॒ bārha̭tīmutta॒mā-manvā̭ha॒ bārha̭to॒ vā a॒sau lo॒ko̭-'mume॒va lo॒kama॒bhi ja̭yati॒ pra vo॒ [pra vaḥ̭, vājā॒] 40
vājā॒ ityani̭ruktā-mprājāpa॒tyāmanvā̭ha ya॒jño vai pra॒jāpa̭tirya॒jñame॒va pra॒jāpa̭ti॒mā ra̭bhate॒ pravo॒ vājā॒ ityanvā॒hānnaṃ॒-vai~ vājo-'nna̭me॒vāva̭ rundhe॒ pravo॒ vājā॒ ityanvā̭ha॒ tasmā᳚-tprā॒cīna॒gṃ॒ reto̭ dhīya॒te-'gna॒ ā yā̭hi vī॒taya॒ ityā̭ha॒ tasmā᳚-tpra॒tīcīḥ᳚ pra॒jā jā̭yante॒ pravo॒ vājā॒ [vājāḥ᳚, ityanvā̭ha॒] 41
ityanvā̭ha॒ māsā॒ vai vājā̭ ardhamā॒sā a॒bhidya̭vo de॒vā ha॒viṣma̭nto॒ gaurghṛ॒tācī̭ ya॒jño de॒vāñji̭gāti॒ yaja̭māna-ssumna॒yu-ri॒da-ma̭sī॒da-ma॒sītye॒va ya॒jñasya̭ pri॒ya-ndhāmāva̭ rundhe॒ ya-ṅkā॒mayḙta॒ sarva॒-māyṷ-riyā॒-diti॒ pra vo॒ vājā॒ iti॒ tasyā॒nūcyāgna॒ ā yā̭hi vī॒taya॒ iti॒ santa̭ta॒-mutta̭ra-mardha॒rcamā la̭bheta [ ] 42
prā॒ṇenai॒vā-'syā̭-'pā॒na-ndā̭dhāra॒ sarva॒māyṷreti॒ yo vā a̭ra॒tnigṃ sā̭midhe॒nīnāṃ॒-ve~dā̭ra॒tnāve॒va bhrātṛ̭vya-ṅkurute-'rdha॒rcau sa-nda̭dhātye॒ṣa vā a̭ra॒tni-ssā̭midhe॒nīnāṃ॒-ya~ e॒vaṃ-ve~dā̭ra॒tnāve॒va bhrātṛ̭vya-ṅkuruta॒ ṛṣer̭-ṛṣe॒rvā e॒tā nirmi̭tā॒ ya-thsā̭midhe॒nya̭stā yadasaṃ̭-yu~ktā॒-ssyuḥ pra॒jayā̭ pa॒śubhi॒ ryaja̭mānasya॒ vi ti̭ṣṭherannardha॒rcau sa-nda̭dhāti॒ saṃ ~yṷnaktye॒vainā॒stā a̭smai॒ saṃyu~̭ktā॒ ava̭ruddhā॒-ssarvā̭-mā॒śiṣa̭-nduhre || 43 ||
(ba॒rsaṃ - ~vo̭ - jāyante॒ pravo॒ vājā̭ - labheta - dadhāti॒ saṃ - daśa̭ ca) (a. 7)
aya̭jño॒ vā e॒ṣa yo̭-'sā॒mā-'gna॒ ā yā̭hi vī॒taya॒ ityā̭ha rathanta॒rasyai॒ṣa varṇa॒sta-ntvā̭ sa॒midbhi̭raṅgira॒ ityā̭ha vāmade॒vyasyai॒ṣa varṇo̭ bṛ॒hada̭gne su॒vīrya॒mityā̭ha bṛha॒ta e॒ṣa varṇo॒ yade॒ta-ntṛ॒cama॒nvāha̭ ya॒jñame॒va ta-thsāma̭nvanta-ṅkarotya॒gnira॒muṣmi̭n ~lo॒ka āsī̭dādi॒tyo᳚-'smi-ntāvi॒mau lo॒kāvaśā᳚ntā- [lo॒kāvaśā᳚ntau, ā॒stā॒-nte de॒vā] 44
-vāstā॒-nte de॒vā a̭bruva॒nnete॒mau vi paryṷ̄hā॒metyagna॒ ā yā̭hi vī॒taya॒ itya॒smin ~lo॒ke᳚-'gnima̭dadhu rbṛ॒hada̭gne su॒vīrya॒mitya॒muṣmi̭n ~lo॒ka ā̭di॒tya-ntato॒ vā i॒mau lo॒kāva̭śāmyatāṃ॒-ya~de॒vama॒nvāhā॒nayo᳚ rlo॒kayo॒-śśāntyai॒ śāmya̭to-'smā i॒mau lo॒kau ya e॒vaṃ-ve~da॒ pañca̭daśa sāmidhe॒nīranvā̭ha॒ pañca̭daśa॒ [pañca̭daśa, vā a̭rdhamā॒sasya॒] 45
vā a̭rdhamā॒sasya॒ rātra̭yo-'rdhamāsa॒śa-ssaṃ̭va~thsa॒ra ā᳚pyate॒ tāsā॒-ntrīṇi̭ ca śa॒tāni̭ ṣa॒ṣṭiścā॒kṣarā̭ṇi॒ tāva̭tī-ssaṃva~thsa॒rasya॒ rātra̭yo-'kṣara॒śa e॒va saṃ̭va~thsa॒ramā᳚pnoti nṛ॒medha̭śca॒ parṷcchepaśca brahma॒vādya̭mavadetāma॒smi-ndārā̭vā॒rdre᳚-'gni-ñja̭nayāva yata॒ro nau॒ brahmī̭yā॒niti̭ nṛ॒medho॒-'bhya̭vada॒-thsa dhū॒mama̭janaya॒-tparṷcchepo॒ 'bhya̭vada॒-thso᳚-'gnima̭janaya॒dṛṣa॒ itya̭bravī॒- [itya̭bravīt, yathsa॒māva̭dvi॒dva] 46
-dyathsa॒māva̭dvi॒dva ka॒thā tvama॒gnimajī̭jano॒ nāhamiti̭ sāmidhe॒nīnā̭me॒vāhaṃ-va~rṇaṃ̭-ve~॒detya̭bravī॒dya-dghṛ॒tava̭-tpa॒dama̭nū॒cyate॒ sa ā̭sāṃ॒-va~rṇa॒sta-ntvā̭ sa॒midbhi̭raṅgira॒ ityā̭ha sāmidhe॒nīṣve॒va tajjyoti̭ rjanayati॒ striya॒stena॒ yadṛca॒-sstriya॒stena॒ ya-dgā̭ya॒triya॒-sstriya॒stena॒ ya-thsā̭midhe॒nyo̭ vṛṣa̭ṇvatī॒-manvā̭ha॒ [vṛṣa̭ṇvatī॒-manvā̭ha, tena॒ puggsva̭tī॒stena॒] 47
tena॒ puggsva̭tī॒stena॒ sendrā॒stena̭ mithu॒nā a॒gnirde॒vānā᳚-ndū॒ta āsī̭du॒śanā̭ kā॒vyo-'sṷrāṇā॒-ntau pra॒jāpa̭ti-mpra॒śñamai̭tā॒gṃ॒ sa pra॒jāpa̭tira॒gni-ndū॒taṃ-vṛ~̭ṇīmaha॒ itya॒bhi pa॒ryāva̭rtata॒ tato̭ de॒vā abha̭va॒-nparā-'sṷrā॒ yasyai॒vaṃ-vi~॒duṣo॒-'gni-ndū॒taṃ-vṛ~̭ṇīmaha॒ itya॒nvāha॒ bhava̭tyā॒tmanā॒ parā᳚-'sya॒ bhrātṛ̭vyo bhavatyaddhva॒rava̭tī॒manvā̭ha॒ bhrātṛ̭vyame॒vaitayā᳚ [bhrātṛ̭vyame॒vaitayā᳚, dhva॒ra॒ti॒ śo॒ciṣkḙśa॒stamī̭maha॒] 48
dhvarati śo॒ciṣkḙśa॒stamī̭maha॒ ityā̭ha pa॒vitra̭me॒vaita-dyaja̭māname॒vaitayā̭ pavayati॒ sami̭ddho agna āhu॒tetyā̭ha pari॒dhime॒vaita-mpari̭ dadhā॒tyaska̭ndāya॒ yadata̭ ū॒rdhvama̭bhyāda॒ddhyādyathā̭ bahiḥ pari॒dhi skanda̭ti tā॒dṛge॒va ta-ttrayo॒ vā a॒gnayo̭ havya॒vāha̭no de॒vānā᳚-ṅkavya॒vāha̭naḥ pitṛ॒ṇāgṃ sa॒hara̭kṣā॒ asṷrāṇā॒-nta e॒tarhyā śagṃ̭sante॒ māṃ-va~̭riṣyate॒ mā- [mām, iti̭] 49
-miti̭ vṛṇī॒ddhvagṃ ha̭vya॒vāha̭na॒mityā̭ha॒ ya e॒va de॒vānā॒-ntaṃ-vṛ~̭ṇīta ārṣe॒yaṃ-vṛ~̭ṇīte॒ bandho̭re॒va naityatho॒ santa̭tyai pa॒rastā̭da॒rvāco̭ vṛṇīte॒ tasmā᳚-tpa॒rastā̭da॒rvāñco̭ manu॒ṣyā᳚-npi॒taro-'nu॒ pra pi̭pate || 50 ||
(aśā᳚ntā - vāha॒ pañca̭daśā - bravī॒ - danvā̭hai॒ - tayā̭ - variṣyate॒ mā - mekā॒nnatri॒gṃ॒śacca̭) (a. 8)
agnḙ ma॒hāgṃ a॒sītyā̭ha ma॒hān. hyḙṣa yada॒gni rbrā᳚hma॒ṇetyā̭ha brāhma॒ṇo hyḙṣa bhā̭ra॒tetyā̭hai॒ṣa hi de॒vebhyo̭ ha॒vya-mbhara̭ti de॒veddha॒ ityā̭ha de॒vā hyḙtamaindha̭ta॒ manvi̭ddha॒ ityā̭ha॒ manu॒rhyḙtamutta̭ro de॒vebhya॒ aindharṣi̭ṣṭuta॒ ityā॒harṣa̭yo॒ hyḙtamastṷva॒n viprā̭numadita॒ ityā̭ha॒ [ityā̭ha, viprā॒ hyḙte] 51
viprā॒ hyḙte yacchṷśru॒vāgṃsaḥ̭ kaviśa॒sta ityā̭ha ka॒vayo॒ hyḙte yacchṷśru॒vāgṃso॒ brahma̭sagṃśita॒ ityā̭ha॒ brahma̭sagṃśito॒ hyḙṣa ghṛ॒tāha̭vana॒ ityā̭ha ghṛtāhu॒tirhya̭sya pri॒yata̭mā pra॒ṇīrya॒jñānā॒mityā̭ha pra॒ṇīrhyḙṣa ya॒jñānāgṃ̭ ra॒thīra̭ddhva॒rāṇā॒mityā̭hai॒ṣa hi dḙvara॒tho̭-'tūrto॒ hotetyā̭ha॒ na hyḙta-ṅkaśca॒na [ ] 52
tara̭ti॒ tūrṇi̭r-havya॒vāḍityā̭ha॒ sarva॒gg॒hyḙṣa tara॒tyāspātra̭-ñju॒hūrde॒vānā॒mityā̭ha ju॒hūrhyḙṣa de॒vānā᳚-ñcama॒so dḙva॒pāna॒ ityā̭ha cama॒so hyḙṣa dḙva॒pāno॒-'rāgṃ i̭vāgne ne॒mirde॒vāgstva-mpa̭ri॒bhūra॒sītyā̭ha de॒vān hyḙṣa pa̭ri॒bhūrya-dbrū॒yādā va̭ha de॒vā-ndḙvaya॒te yaja̭mānā॒yeti॒ bhrātṛ̭vyamasmai [bhrātṛ̭vyamasmai, ja॒na॒ye॒dā va̭ha] 53
janaye॒dā va̭ha de॒vān. yaja̭mānā॒yetyā̭ha॒ yaja̭māname॒vaitena̭ vardhayatya॒gnima̭gna॒ ā va̭ha॒ soma॒mā va॒hetyā̭ha de॒vatā̭ e॒va ta-dya̭thāpū॒rvamupa̭ hvayata॒ ā cā᳚gne de॒vān. vaha̭ su॒yajā̭ ca yaja jātaveda॒ ityā̭hā॒gnime॒va ta-thsagg śya̭ti॒ so᳚-'sya॒ sagṃśi̭to de॒vebhyo̭ ha॒vyaṃ-va~̭hatya॒gnir-hote- [-hotā᳚, ityā̭hā॒-'gnirvai] 54
-tyā̭hā॒-'gnirvai de॒vānā॒gṃ॒ hotā॒ ya e॒va de॒vānā॒gṃ॒ hotā॒ taṃ-vṛ~̭ṇīte॒smo va॒yamityā̭hā॒-''tmāna̭me॒va sa॒ttva-ṅga̭mayati sā॒dhu tḙ yajamāna de॒vatetyā̭hā॒-''śiṣa̭me॒vaitāmā śā᳚ste॒ yadbrū॒yā-dyo᳚-'gnigṃ hotā̭ra॒mavṛ̭thā॒ itya॒gnino̭bha॒yato॒ yaja̭māna॒-mpari̭ gṛhṇīyā-tpra॒māyṷka-ssyā-dyajamānadeva॒tyā̭ vai ju॒hūrbhrā̭tṛvya deva॒tyo̭pa॒bhṛ- [deva॒tyo̭pa॒bhṛt, yaddve i̭va] 55
-dyaddve i̭va brū॒yā-dbhrātṛ̭vyamasmai janaye-dghṛ॒tava̭tīmaddhvaryo॒ sruca॒mā-'sya॒svetyā̭ha॒ yaja̭māna me॒vaitena̭ vardhayati devā॒yuva॒mityā̭ha de॒vān. hyḙṣā-'va̭ti vi॒śvavā̭rā॒mityā̭ha॒ viśva॒gg॒ hyḙṣā-'va॒tīḍā̭mahai de॒vāgṃ ī॒ḍenyā᳚nnama॒syāma̭ nama॒syāṋ yajā̭ma ya॒jñiyā॒nityā̭hamanu॒ṣyā̭ vā ī॒ḍenyāḥ᳚ pi॒taro̭ nama॒syā̭ de॒vā ya॒jñiyā̭ de॒vatā̭ e॒va ta-dya̭thābhā॒gaṃ-ya~̭jati || 56 ||
(viprā̭numadita॒ ityā̭ha - ca॒nā - 'smai॒ - hoto̭ - pa॒bhṛ-d- de॒vatā̭ e॒va - trīṇi̭ ca) (a. 9)
trīgstṛ॒cānanṷ brūyā-drāja॒nya̭sya॒ trayo॒ vā a॒nye rā̭ja॒nyā᳚-tpurṷṣā brāhma॒ṇo vaiśyaḥ̭ śū॒drastāne॒vāsmā॒ anṷkān karoti॒ pañca̭da॒śānṷ brūyā-drāja॒nya̭sya pañcada॒śo vai rā̭ja॒nyaḥ̭ sva e॒vaina॒gg॒ stome॒ prati̭ṣṭhāpayati tri॒ṣṭubhā॒ pari̭ daddhyādindri॒yaṃ-vai~ tri॒ṣṭugi̭ndri॒yakā̭maḥ॒ khalu॒ vai rā̭ja॒nyo̭ yajate tri॒ṣṭubhai॒vāsmā̭ indri॒ya-mpari̭ gṛhṇāti॒ yadi̭ kā॒mayḙta [kā॒mayḙta, bra॒hma॒va॒rca॒sama॒stviti̭] 57
brahmavarca॒sama॒stviti̭ gāyatri॒yā pari̭ daddhyā-dbrahmavarca॒saṃ-vai~ gā̭ya॒trī bra̭hmavarca॒same॒va bha̭vati sa॒ptada॒śānṷ brūyā॒-dvaiśya̭sya saptada॒śo vai vaiśya॒-ssva e॒vaina॒gg॒ stome॒ prati̭ ṣṭhāpayati॒jaga̭tyā॒ pari̭ daddhyā॒jjāga̭tā॒ vai pa॒śavaḥ̭ pa॒śukā̭maḥ॒ khalu॒ vai vaiśyo̭ yajate॒ jaga̭tyai॒vāsmai̭ pa॒śū-npari̭ gṛhṇā॒tye ka̭vigṃ śati॒manṷ brūyā-tprati॒ṣṭhākā̭masyai kavi॒gṃ॒śa-sstomā̭nā-mprati॒ṣṭhā prati̭ṣṭhityai॒ [prati̭ṣṭhityai, catṷrvigṃśati॒manṷ] 58
catṷrvigṃśati॒manṷ brūyā-dbrahmavarca॒sa-kā̭masya॒ catṷrvigṃśatyakṣarā gāya॒trī gā̭ya॒trī bra̭hmavarca॒sa-ṅgā̭yatri॒yaivāsmai᳚ brahmavarca॒samava̭ rundhe tri॒gṃ॒śata॒manṷ brūyā॒danna̭kāmasya tri॒gṃ॒śada̭kṣarā vi॒rāḍannaṃ̭-vi~॒rā-ḍvi॒rājai॒vāsmā̭ a॒nnādya॒mava̭ rundhe॒ dvātrigṃ̭śata॒manṷ brūyā-tprati॒ṣṭhākā̭masya॒ dvātrigṃ̭śadakṣarā 'nu॒ṣṭuga̭nu॒ṣṭu-pchanda̭sā-mprati॒ṣṭhā prati̭ṣṭhityai॒ ṣaṭtrigṃ̭śata॒manṷ brūyā-tpa॒śukā̭masya॒ ṣaṭtrigṃ̭śadakṣarā bṛha॒tī bārha̭tāḥ pa॒śavo̭ bṛha॒tyaivāsmai̭ pa॒śū- [pa॒śūn, ava̭ rundhe॒] 59
-nava̭ rundhe॒ catṷścatvārigṃśata॒manṷ brūyādindri॒yakā̭masya॒ catṷścatvārigṃśadakṣarā tri॒ṣṭugi̭ndri॒ya-ntri॒ṣṭu-ptri॒ṣṭubhai॒vāsmā̭ indri॒yamava̭ rundhe॒ 'ṣṭāca̭tvārigṃ śata॒manṷ brūyā-tpa॒śukā̭masyā॒ṣṭāca̭tvārigṃśadakṣarā॒ jaga̭tī॒ jāga̭tāḥ pa॒śavo॒jaga̭tyai॒vāsmai̭ pa॒śūnava̭ rundhe॒ sarvā̭ṇi॒ chandā॒g॒ syanṷ brūyā-dbahuyā॒jina॒-ssarvā̭ṇi॒ vā e॒tasya॒ chandā॒g॒sya va̭ruddhāni॒ yo ba̭huyā॒jyapa̭rimita॒manṷ brūyā॒dapa̭rimita॒syā va̭rudhyai || 60 ||
(kā॒mayḙta॒ - prati̭ṣṭhityai - pa॒śūnth - sa॒ptaca̭tvārigṃśacca) (a. 10)
nivī̭ta-mmanu॒ṣyā̭ṇā-mprācīnāvī॒ta-mpi̭tṛ॒ṇāmupa̭vīta-nde॒vānā॒mupa̭ vyayate devala॒kṣmame॒va ta-tkṷrute॒ tiṣṭha॒nnanvā̭ha॒ tiṣṭha॒nn॒. hyāśrṷtataraṃ॒-va~da̭ti॒ tiṣṭha॒nnanvā̭ha suva॒rgasya̭ lo॒kasyā॒bhiji̭tyā॒ āsī̭no yajatya॒sminne॒va lo॒ke prati̭tiṣṭhati॒ ya-tkrau॒ñcama॒nvāhā̭-''su॒ra-nta-dyanma॒ndra-mmā̭nu॒ṣa-ntadyada̭nta॒rā ta-thsadḙvamanta॒rā-'nūcyagṃ̭ sadeva॒tvāya̭ vi॒dvāgṃso॒ vai [ ] 61
pu॒rā hotā̭ro-'bhūva॒-ntasmā॒-dvidhṛ̭tā॒ addhvā॒no-'bhṷ̄va॒-nna panthā̭na॒-ssama̭rukṣannantarve॒dya̭nyaḥ pādo॒ bhava̭ti bahirve॒dya̭nyo-'thānvā॒hāddhva̭nāṃ॒-vi~dhṛ̭tyai pa॒thāmasagṃ̭ rohā॒yātho̭ bhū॒tañcai॒va bha̭vi॒ṣyaccāva̭ ru॒ndhe-'tho॒ pari̭mita-ñcai॒vāpa̭rimita॒-ñcāva̭ ru॒ndhe-'tho᳚ grā॒myāgścai॒va pa॒śūnā̭ra॒ṇyāgścāva̭ ru॒ndhe-'tho̭ [ru॒ndhe-'tho᳚, de॒va॒lo॒ka-ñcai॒va] 62
devalo॒ka-ñcai॒va ma̭nuṣya lo॒ka-ñcā॒bhi ja̭yati de॒vā vai sā̭midhe॒nīra॒nūcya̭ ya॒jña-nnānva̭paśya॒nthsa pra॒jāpa̭tistū॒ṣṇī-mā̭ghā॒ramā 'ghā̭raya॒-ttato॒ vai de॒vā ya॒jñamanva̭paśya॒n॒. ya-ttū॒ṣṇīmā̭ghā॒ra-mā̭ghā॒raya̭ti ya॒jñasyānṷkhyātyā॒ atho̭ sāmidhe॒nīre॒vābhya̭-na॒ktyalū᳚kṣo bhavati॒ ya e॒vaṃ-ve~dātho̭ ta॒rpaya̭tye॒vainā॒-stṛpya̭ti pra॒jayā̭ pa॒śubhi॒- [pa॒śubhiḥ̭, ya e॒vaṃ-ve~da॒] 63
-rya e॒vaṃ-ve~da॒ yadeka̭yā ''ghā॒raye॒dekā᳚-mprīṇīyā॒dya-ddvābhyā॒-ndve prī̭ṇīyā॒dya-dti॒sṛbhi॒rati॒ tadrḙcaye॒tmana॒sā ''ghā̭rayati॒ mana̭sā॒ hyanā᳚ptamā॒pyatḙ ti॒ryañca॒mā ghā̭raya॒tyacha̭mbaṭkāraṃ॒-vā~kca॒ mana̭ścā ''rtīyetāma॒ha-nde॒vebhyo̭ ha॒vyaṃ-va~̭hā॒mīti॒ vāga̭bravīda॒ha-nde॒vebhya॒ iti॒ mana॒stau pra॒jāpa̭ti-mpra॒śñamai̭tā॒gṃ॒ so᳚-'bravī- [so᳚-'bravīt, pra॒jāpa̭tirdū॒tīre॒va] 64
-tpra॒jāpa̭tirdū॒tīre॒va tva-mmana̭so-'si॒ yaddhi mana̭sā॒ dhyāya̭ti॒ tadvā॒cā vada॒tīti॒ ta-tkhalu॒ tubhya॒-nna vā॒cā jṷhava॒nnitya̭bravī॒-ttasmā॒nmana̭sā pra॒jāpa̭taye juhvati॒mana̭ iva॒ hi pra॒jāpa̭tiḥ pra॒jāpa̭te॒rāptyai̭ pari॒dhīnthsa-mmā᳚rṣṭi pu॒nātye॒vainā॒ntrirma̭ddhya॒ma-ntrayo॒ vai prā॒ṇāḥ prā॒ṇāne॒vābhi ja̭yati॒ trirda̭kṣiṇā॒rdhyaṃ̭ traya̭ [-trayaḥ̭, i॒me lo॒kā] 65
i॒me lo॒kā i॒māne॒va lo॒kāna॒bhi ja̭yati॒ trirṷttarā॒rdhya̭-ntrayo॒ vai dḙva॒yānāḥ॒ panthā̭na॒stāne॒vābhi ja̭yati॒ trirupa̭ vājayati॒ trayo॒ vai dḙvalo॒kā dḙvalo॒kāne॒vābhi ja̭yati॒ dvāda̭śa॒ sa-mpa̭dyante॒ dvāda̭śa॒ māsā᳚-ssaṃva~thsa॒ra-ssaṃ̭va~thsa॒rame॒va prī̭ṇā॒tyatho̭ saṃva~thsa॒rame॒vāsmā॒ upa̭ dadhāti suva॒rgasya̭ lo॒kasya॒ sama̭ṣṭyā āghā॒ramā ghā̭rayati ti॒ra i̭va॒ [ti॒ra i̭va, vai sṷva॒rgo] 66
vai sṷva॒rgo lo॒ka-ssṷva॒rgame॒vāsmai̭ lo॒ka-mpraro̭cayatyṛ॒jumā ghā̭rayatyṛ॒juri̭va॒ hi prā॒ṇa-ssanta̭ta॒mā ghā̭rayati prā॒ṇānā̭ma॒nnādya̭sya॒ santa̭tyā॒ atho॒ rakṣa̭sā॒mapa̭hatyai॒ ya-ṅkā॒mayḙta pra॒māyṷka-ssyā॒diti̭ ji॒hma-ntasyā ''ghā̭raye-tprā॒ṇame॒vāsmā᳚jji॒hma-nna̭yati tā॒ja-kpramī̭yate॒śiro॒ vā e॒ta-dya॒jñasya॒ yadā̭ghā॒ra ā॒tmā dhru॒vā- [ā॒tmā dhru॒vā, ā॒ghā॒ramā॒ghārya̭] 67
-''ghā॒ramā॒ghārya̭ dhru॒vāgṃ sama̭naktyā॒tmanne॒va ya॒jñasya॒ śiraḥ॒ prati̭ dadhātya॒gni-rde॒vānā᳚-ndū॒ta āsī॒-ddaivyo-'sṷrāṇā॒-ntau pra॒jāpa̭ti-mpra॒śña-mai̭tā॒gṃ॒ sa pra॒jāpa̭ti rbrāhma॒ṇa-ma̭bravī-de॒tadvi brū॒hītyā śrā̭va॒yetī॒da-ndḙvā-śśṛṇu॒teti॒ vāva tada̭bravī-da॒gni rde॒vo hoteti॒ ya e॒va de॒vānā॒-ntama̭vṛṇīta॒ tato̭ de॒vā [de॒vāḥ, abha̭va॒-nparā-'sṷrā॒] 68
abha̭va॒-nparā-'sṷrā॒ yasyai॒vaṃ-vi~॒duṣaḥ̭ prava॒ra-mpra̭vṛ॒ṇate॒ bhava̭tyā॒tmanā॒ parā᳚-'sya॒ bhrātṛ̭vyo bhavati॒ yadbrā᳚hma॒ṇaścā brā᳚hmaṇaśca pra॒śña-me॒yātā᳚-mbrāhma॒ṇāyādhi̭ brūyā॒-dya-dbrā᳚hma॒ṇāyā॒-'ddhyāhā॒ ''tmane-'ddhyā̭ha॒ yadbrā᳚hma॒ṇa-mpa॒rāhā॒-''tmāna॒-mparā̭-''ha॒ tasmā᳚-dbrāhma॒ṇo na pa॒rocyaḥ̭ || 69 ||
(vā - ā̭ra॒ṇyāgścāva̭ ru॒ndhe-'tho̭ - pa॒śubhiḥ॒ - so᳚-'bravī-d- dakṣiṇā॒rdhyaṃ̭ traya̭ -iva - dhru॒vā - de॒vā - śca̭tvāri॒gṃ॒śacca̭ ) (a. 11)
āyṷṣṭa āyu॒rdā a̭gna॒ ā pyā̭yasva॒ sa-nte 'va̭ te॒ heḍa॒ udṷtta॒ma-mpraṇo̭ de॒vyā no̭ di॒vo 'gnā̭ viṣṇū॒ agnā̭viṣṇū i॒ma-mmḙ varuṇa॒-tattvā̭ yā॒ myu du॒tya-ñci॒tram || a॒pā-nnapā॒dā hyasthā̭-du॒pastha̭-ñji॒hmānā̭-mū॒rdhvo vi॒dyutaṃ॒-va~sā̭naḥ | tasya॒ jyeṣṭha̭-mmahi॒mānaṃ॒-va~ha̭ntī॒r॒ hira̭ṇyavarṇāḥ॒ pari̭ yanti ya॒hvīḥ || sa- [sam, a॒nyā yantyupa̭] 70
-ma॒nyā yantyupa̭ yantya॒nyā-ssa̭mā॒namū॒rva-nna॒dyaḥ̭ pṛṇanti | tamū॒ śuci॒gṃ॒ śuca̭yo dīdi॒vāgṃ sa̭ma॒pā-nnapā̭ta॒-mpari̭tasthu॒rāpaḥ̭ | tamasmḙrā yuva॒tayo॒ yuvā̭na-mmarmṛ॒jyamā̭nāḥ॒ pari̭ ya॒ntyāpaḥ̭ || sa śu॒kreṇa॒ śikva̭nā re॒vada॒gnirdī॒dāyā̭ni॒ddhmo ghṛ॒tani̭rṇiga॒phsu || indrā॒varṷṇayora॒hagṃsa॒mrājo॒rava॒ ā vṛ̭ṇe | tā no̭ mṛḍāta ī॒dṛśe᳚ || indrā̭varuṇā yu॒vama̭ddhva॒rāya̭ no [yu॒vama̭ddhva॒rāya̭ naḥ, vi॒śe janā̭ya॒] 71
vi॒śe janā̭ya॒ mahi॒ śarma̭ yacchatam | dī॒rghapra̭yajyu॒mati॒ yo va̭nu॒ṣyati̭ va॒ya-ñja̭yema॒ pṛta̭nāsu dū॒ḍhyaḥ̭ || ā no̭mitrāvaruṇā॒, prabā॒havā᳚ || tva-nno̭ agne॒ varṷṇasya vi॒dvā-nde॒vasya॒ heḍo-'va̭ yāsi sīṣṭhāḥ | yaji̭ṣṭho॒ vahni̭ tama॒-śśośṷcāno॒ viśvā॒ dveṣāgṃ̭si॒ pramṷmugdhya॒smat || sa tvanno̭ agne-'va॒mo bha̭vo॒tī nedi̭ṣṭho a॒syā u॒ṣaso॒ vyṷṣṭau | ava̭ yakṣva no॒ varṷṇa॒gṃ॒ [no॒ varṷṇam, rarā̭ṇo vī॒hi] 72
rarā̭ṇo vī॒hi mṛ̭ḍī॒kagṃ su॒havo̭ na edhi || praprā॒yama॒gnirbha̭ra॒tasya̭ śṛṇve॒ vi ya-thsūryo॒ na roca̭te bṛ॒hadbhāḥ | a॒bhi yaḥ pū॒ru-mpṛta̭nāsu ta॒sthau dī॒dāya॒ daivyo॒ ati̭thi-śśi॒vo naḥ̭ || pra tḙ yakṣi॒ pra ta̭ iyarmi॒ manma॒ bhuvo॒ yathā॒ vandyo̭ no॒ havḙṣu | dhanva̭nniva pra॒pā a̭si॒ tvama̭gna iya॒kṣavḙ pū॒rave᳚ pratna rājann || 73 ||
vi pāja̭sā॒ vi jyoti̭ṣā || sa tvama̭gne॒ pratī̭kena॒ pratyo̭ṣa yātudhā॒nyaḥ̭ | u॒ru॒kṣayḙṣu॒ dīdya̭t || tagṃ su॒pratī̭kagṃ su॒dṛśa॒gg॒ svañca॒-mavi̭dvāgṃso vi॒duṣṭa̭ragṃ sapema | sa ya̭kṣa॒-dviśvā̭ va॒yunā̭ni vi॒dvā-npra ha॒vya-ma॒gni-ra॒mṛtḙṣu vocat || a॒gṃ॒ho॒mucḙ vi॒veṣa॒ yanmā॒ vina̭ i॒ndre-ndra̭ kṣa॒trami̭ndri॒yāṇi̭ śatakra॒to 'nṷ te dāyi || 74 ||
(ya॒hvī-ssa - ma̭dhva॒rāya̭ no॒ - varṷṇagṃ - rāja॒gg॒ -tṷścatvārigṃśacca) (a. 12)
(vi॒śvarṷ̄pa॒ - stvaṣṭe - ndraṃ̭-vṛ~॒traṃ - bra̭hmavā॒dina॒-ssa tvai - nā-'so̭mayājye॒ - ṣa vai dḙvara॒tho - de॒vā vai narci nā - ya॒jño - 'gnḙ ma॒hān - trīn - nivī̭ta॒ - māyṷṣṭe॒ - dvāda̭śa)
(vi॒śvarṷ̄po॒ - nainagṃ̭ śītarū॒rā - va॒dya vasṷ - pūrve॒dyu - rvājā॒ itya - gnḙ ma॒hān - nivī̭ta - ma॒nyā yanti॒ - catuḥ̭ saptatiḥ )
(vi॒śvarūpo॒, 'nṷ te dāyi)
|| hariḥ̭ om ||
|| kṛṣṇa yajurvedīya taittirīya saṃhitāyā-ndvitīyakāṇḍe pañcamaḥ praśna-ssamāptaḥ ||
Sanskrit — Devanagari (original)
कृष्ण यजुर्वेदीय तैत्तिरीय संहिताया-न्द्वितीयकाण्डे पञ्चमः प्रश्नः - इष्टिविधानं
ओ-न्नमः परमात्मने, श्री महागणपतये नमः,
श्री गुरुभ्यो नमः । ह॒रिः॒ ओम् ॥
वि॒श्वरू॑पो॒ वै त्वा॒ष्ट्रः पु॒रोहि॑तो दे॒वाना॑मासी-थ्स्व॒स्रीयो-ऽसु॑राणा॒-न्तस्य॒ त्रीणि॑ शी॒र्॒षाण्या॑सन्-थ्सोम॒पानग्ं॑ सुरा॒पान॑-म॒न्नाद॑न॒ग्ं॒ स प्र॒त्यक्ष॑-न्दे॒वेभ्यो॑ भा॒गम॑वद-त्प॒रोक्ष॒मसु॑रेभ्य॒-स्सर्व॑स्मै॒ वै प्र॒त्यक्ष॑-म्भा॒गं-वँ॑दन्ति॒ यस्मा॑ ए॒व प॒रोक्षं॒-वँद॑न्ति॒ तस्य॑ भा॒ग उ॑दि॒तस्तस्मा॒दिन्द्रो॑ ऽबिभेदी॒दृं-वैँ रा॒ष्ट्रं-विँ प॒र्याव॑र्तय॒तीति॒ तस्य॒ वज्र॑मा॒दाय॑ शी॒र्॒षाण्य॑च्छिन॒द्य-थ्सो॑म॒पान॒- [-थ्सो॑म॒पान᳚म्, आसी॒थ्स] 1
-मासी॒थ्स क॒पिञ्ज॑लो ऽभव॒-द्य-थ्सु॑रा॒पान॒ग्ं॒ स क॑ल॒विङ्को॒ यद॒न्नाद॑न॒ग्ं॒ स ति॑त्ति॒रिस्तस्या᳚ञ्ज॒लिना᳚ ब्रह्मह॒त्यामुपा॑गृह्णा॒-त्ताग्ं सं॑वँथ्स॒रम॑बिभ॒स्त-म्भू॒तान्य॒भ्य॑क्रोश॒-न्ब्रह्म॑ह॒न्निति॒ स पृ॑थि॒वीमुपा॑सीदद॒स्यै ब्र॑ह्मह॒त्यायै॒ तृती॑य॒-म्प्रति॑ गृहा॒णेति॒ सा-ऽब्र॑वी॒द्वरं॑-वृँणै खा॒ता-त्प॑राभवि॒ष्यन्ती॑ मन्ये॒ ततो॒ मा परा॑ भूव॒मिति॑पु॒रा ते॑ [भूव॒मिति॑पु॒रा ते᳚, संवँथ्स॒रादपि॑] 2
संवँथ्स॒रादपि॑ रोहा॒दित्य॑ब्रवी॒-त्तस्मा᳚-त्पु॒रा सं॑वँथ्स॒रा-त्पृ॑थि॒व्यै खा॒तमपि॑ रोहति॒ वारे॑वृत॒ग्ग्॒ ह्य॑स्यै॒ तृती॑य-म्ब्रह्मह॒त्यायै॒ प्रत्य॑गृह्णा॒-त्त-थ्स्वकृ॑त॒मिरि॑णमभव॒-त्तस्मा॒दाहि॑ताग्नि-श्श्र॒द्धादे॑व॒-स्स्वकृ॑त॒ इरि॑णे॒ नाव॑ स्ये-द्ब्रह्मह॒त्यायै॒ ह्ये॑ष वर्ण॒-स्स वन॒स्पती॒नुपा॑सीदद॒स्यै ब्र॑ह्मह॒त्यायै॒ तृती॑य॒-म्प्रति॑ गृह्णी॒तेति॒ ते᳚-ऽब्रुव॒न् वरं॑-वृँणामहै वृ॒क्णा- [वृ॒क्णात्, प॒रा॒भ॒वि॒ष्यन्तो॑] 3
-त्प॑राभवि॒ष्यन्तो॑ मन्यामहे॒ ततो॒ मा परा॑ भू॒मेत्या॒व्रश्च॑नाद्वो॒ भूयाग्ं॑स॒ उत्ति॑ष्ठा॒नित्य॑ब्रवी॒-त्तस्मा॑दा॒व्रश्च॑ना-द्वृ॒क्षाणा॒-म्भूयाग्ं॑स॒ उत्ति॑ष्ठन्ति॒ वारे॑वृत॒ग्ग्॒ ह्ये॑षा॒-न्तृती॑य-म्ब्रह्मह॒त्यायै॒ प्रत्य॑गृण्ह॒न्थ्स नि॑र्या॒सो॑ ऽभव॒-त्तस्मा᳚न्निर्या॒सस्य॒ ना-ऽऽश्य॑-म्ब्रह्मह॒त्यायै॒ ह्ये॑ष वर्णो-ऽथो॒ खलु॒ य ए॒व लोहि॑तो॒ यो वा॒-ऽऽव्रश्च॑नान्नि॒र्येष॑ति॒ तस्य॒ ना-ऽऽश्य॑- [ना-ऽऽश्य᳚म्, काम॑म॒न्यस्य॒] 4
-ङ्काम॑म॒न्यस्य॒ सस्त्री॑षग्ंसा॒द-मुपा॑सीदद॒स्यै ब्र॑ह्मह॒त्यायै॒ तृती॑य॒-म्प्रति॑ गृह्णी॒तेति॒ ता अ॑ब्रुव॒न् वरं॑-वृँणामहा॒ ऋत्वि॑या-त्प्र॒जां-विँ॑न्दामहै॒ काम॒मा विज॑नितो॒-स्स-म्भ॑वा॒मेति॒ तस्मा॒दृत्वि॑या॒-थ्स्त्रियः॑ प्र॒जां ँवि॑न्दन्ते॒ काम॒मा विज॑नितो॒-स्सम्भ॑वन्ति॒ वारे॑वृत॒ग्ग्॒ ह्या॑सा॒-न्तृती॑य-म्ब्रह्मह॒त्यायै॒ प्रत्य॑गृह्ण॒न्-थ्सा मल॑वद्वासा अभव॒-त्तस्मा॒-न्मल॑व-द्वाससा॒ न संवँ॑देत॒- [संवँ॑देत, न स॒हा-ऽऽसी॑त॒] 5
-न स॒हा-ऽऽसी॑त॒ नास्या॒ अन्न॑मद्या-द्ब्रह्मह॒त्यायै॒ ह्ये॑षा वर्ण॑-म्प्रति॒मुच्या ऽऽस्ते-ऽथो॒ खल्वा॑हुर॒भ्यञ्ज॑नं॒-वाँव स्त्रि॒या अन्न॑म॒भ्यञ्ज॑नमे॒व न प्र॑ति॒गृह्य॒-ङ्काम॑म॒न्यदिति॒ या-म्मल॑व-द्वाससग्ं स॒भंवँ॑न्ति॒ यस्ततो॒ जाय॑ते॒ सो॑-ऽभिश॒स्तो यामर॑ण्ये॒ तस्यै᳚ स्ते॒नो या-म्परा॑ची॒-न्तस्यै᳚ ह्रीतमु॒ख्य॑पग॒ल्भो या स्नाति॒ तस्या॑ अ॒फ्सु मारु॑को॒ या- [मारु॑को॒ या, अ॒भ्य॒ङ्क्ते] 6
-ऽभ्य॒ङ्क्ते तस्यै॑ दु॒श्चर्मा॒ या प्र॑लि॒खते॒ तस्यै॑ खल॒तिर॑पमा॒री या-ऽऽङ्क्ते तस्यै॑ का॒णो या द॒तो धाव॑ते॒ तस्यै᳚ श्या॒वद॒न्॒. या न॒खानि॑ निकृ॒न्तते॒ तस्यै॑ कुन॒खी या कृ॒णत्ति॒ तस्यै᳚ क्ली॒बो या रज्जुग्ं॑ सृ॒जति॒ तस्या॑ उ॒-द्बन्धु॑को॒ या प॒र्णेन॒ पिब॑ति॒ तस्या॑ उ॒न्मादु॑को॒ या ख॒र्वेण॒ पिब॑ति॒ तस्यै॑ ख॒र्वस्ति॒स्रो रात्री᳚र्व्र॒त-ञ्च॑रेदञ्ज॒लिना॑ वा॒ पिबे॒दख॑र्वेण वा॒ पात्रे॑ण प्र॒जायै॑ गोपी॒थाय॑ ॥ 7 ॥
(य-थ्सो॑म॒पानं॑ - ते - वृ॒क्णात्- तस्य॒ ना-ऽऽश्यं॑ - ँवदेत॒ -मारु॑को॒ या -ऽख॑र्वेण वा॒ - त्रीणि॑ च) (अ. 1)
त्वष्टा॑ ह॒तपु॑त्रो॒ वीन्द्र॒ग्ं॒ सोम॒मा-ऽह॑र॒-त्तस्मि॒न्निन्द्र॑ उपह॒वमै᳚च्छत॒ त-न्नोपा᳚ह्वयत पु॒त्र-म्मे॑-ऽवधी॒रिति॒ स य॑ज्ञवेश॒स-ङ्कृ॒त्वा प्रा॒सहा॒ सोम॑मपिब॒-त्तस्य॒ यद॒त्यशि॑ष्यत॒ त-त्त्वष्टा॑-ऽऽहव॒नीय॒मुप॒ प्राव॑र्तय॒-थ्स्वाहेन्द्र॑शत्रु-र्वर्ध॒स्वेति॒ यदव॑र्तय॒-त्त-द्वृ॒त्रस्य॑ वृत्र॒त्वं-यँदब्र॑वी॒-थ्स्वाहेन्द्र॑शत्रु-र्वर्ध॒स्वेति॒ तस्मा॑द॒स्ये- [तस्मा॑दस्य, इन्द्र॒-श्शत्रु॑रभव॒थ्स] 8
-न्द्र॒-श्शत्रु॑रभव॒थ्स स॒भंवँ॑न्न॒ग्नीषोमा॑व॒भि सम॑भव॒-थ्स इ॑षुमा॒त्रमि॑षुमात्रं॒-विँष्व॑ङ्ङवर्धत॒ स इ॒मां-लोँ॒कान॑वृणो॒द्यदि॒मां-लोँ॒कानवृ॑णो॒-त्त-द्वृ॒त्रस्य॑ वृत्र॒त्व-न्तस्मा॒दिन्द्रो॑-ऽबिभे॒-थ्स प्र॒जाप॑ति॒मुपा॑धाव॒-च्छत्रु॑र्मे-ऽ ज॒नीति॒ तस्मै॒ वज्रग्ं॑ सि॒क्त्वा प्राय॑च्छदे॒तेन॑ ज॒हीति॒ तेना॒भ्या॑यत॒ ताव॑ब्रूताम॒ग्नीषोमौ॒ मा [ ] 9
प्रहा॑रा॒वम॒न्त-स्स्व॒ इति॒ मम॒ वै यु॒वग्ग्स्थ॒ इत्य॑ब्रवी॒-न्माम॒भ्येत॒मिति॒ तौ भा॑ग॒धेय॑मैच्छेता॒-न्ताभ्या॑-मे॒तम॑ग्नीषो॒मीय॒-मेका॑दशकपाल-म्पू॒र्णमा॑से॒ प्राय॑च्छ॒-त्ताव॑ब्रूताम॒भि सन्द॑ष्टौ॒ वै स्वो॒ न श॑क्नुव॒ ऐतु॒मिति॒ स इन्द्र॑ आ॒त्मनः॑ शीतरू॒राव॑जनय॒-त्तच्छी॑तरू॒रयो॒र्जन्म॒ य ए॒वग्ं शी॑तरू॒रयो॒र्जन्म॒ वेद॒ [वेद॑, नैनग्ं॑] 10
नैनग्ं॑ शीतरू॒रौ ह॑त॒स्ताभ्या॑मेनम॒भ्य॑नय॒-त्तस्मा᳚-ज्जञ्ज॒भ्यमा॑नाद॒ग्नीषोमौ॒ निर॑क्रामता-म्प्राणापा॒नौ वा ए॑न॒-न्तद॑जहिता-म्प्रा॒णो वै दक्षो॑-ऽपा॒नः क्रतु॒स्तस्मा᳚-ज्जञ्ज॒भ्यमा॑नो ब्रूया॒न्मयि॑ दक्षक्र॒तू इति॑ प्राणापा॒नावे॒वा-ऽऽत्म-न्ध॑त्ते॒ सर्व॒मायु॑रेति॒ स दे॒वता॑ वृ॒त्रान्नि॒र्॒हूय॒ वार्त्र॑घ्नग्ं ह॒विः पू॒र्णमा॑से॒ निर॑वप॒-द्घ्नन्ति॒ वा ए॑न-म्पू॒र्णमा॑स॒ आ- [आ, अ॒मा॒वा॒स्या॑यां-] 11
-ऽमा॑वा॒स्या॑या-म्प्याययन्ति॒ तस्मा॒-द्वार्त्र॑घ्नी पू॒र्णमा॒से ऽनू᳚च्येते॒ वृध॑न्वती अमावा॒स्या॑या॒-न्त-थ्स॒ग्ग्॒स्थाप्य॒ वार्त्र॑घ्नग्ं ह॒विर्वज्र॑मा॒दाय॒ पुन॑र॒भ्या॑यत॒ ते अ॑ब्रूता॒-न्द्यावा॑पृथि॒वी मा प्र हा॑रा॒वयो॒र्वै श्रि॒त इति॒ ते अ॑ब्रूतां॒-वँरं॑-वृँणावहै॒ नक्ष॑त्रविहिता॒-ऽहमसा॒नीत्य॒साव॑ब्रवी- च्चि॒त्रवि॑हिता॒- ऽहमिती॒य-न्तस्मा॒न्नक्ष॑त्रविहिता॒-ऽसौ चि॒त्रवि॑हिते॒-ऽयं-यँ ए॒व-न्द्यावा॑पृथि॒व्यो- [-द्यावा॑पृथि॒व्योः, वरं॒-वेँदैनं॒-वँरो॑] 12
-र्वरं॒-वेँदैनं॒-वँरो॑ गच्छति॒ स आ॒भ्यामे॒व प्रसू॑त॒ इन्द्रो॑ वृ॒त्रम॑ह॒-न्ते दे॒वा वृ॒त्रग्ं ह॒त्वा-ऽग्नीषोमा॑वब्रुवन्. ह॒व्य-न्नो॑ वहत॒मिति॒ ताव॑ब्रूता॒मप॑तेजसौ॒ वै त्यौ वृ॒त्रे वै त्ययो॒स्तेज॒ इति॒ ते᳚-ऽब्रुव॒न् क इ॒दमच्छै॒तीति॒ गौरित्य॑ब्रुव॒-न्गौर्वाव सर्व॑स्य मि॒त्रमिति॒ सा-ऽब्र॑वी॒- [सा-ऽब्र॑वीत्, वरं॑-वृँणै॒ मय्ये॒व] 13
-द्वरं॑-वृँणै॒ मय्ये॒व स॒तो-ऽभये॑न भुनजाद्ध्वा॒ इति॒ त-द्गौरा-ऽह॑र॒-त्तस्मा॒-द्गवि॑ स॒तोभये॑न भुञ्जत ए॒तद्वा अ॒ग्नेस्तेजो॒ य-द्घृ॒तमे॒त-थ्सोम॑स्य॒ य-त्पयो॒ य ए॒वम॒ग्नीषोम॑यो॒ स्तेजो॒ वेद॑ तेज॒स्व्ये॑व भ॑वति ब्रह्मवा॒दिनो॑ वदन्ति किन्देव॒त्य॑-म्पौर्णमा॒समिति॑ प्राजाप॒त्यमिति॑ ब्रूया॒-त्तेनेन्द्र॑-ञ्ज्ये॒ष्ठ-म्पु॒त्र-न्नि॒रवा॑सायय॒दिति॒ तस्मा᳚- -ज्ज्ये॒ष्ठ-म्पु॒त्र-न्धने॑न नि॒रव॑साययन्ति ॥ 14 ॥
(अ॒स्य॒ - मा - वेदा - ऽऽ - द्यावा॑पृथि॒व्यो - र॑ब्रवी॒ - दिति॒ तस्मा᳚ - च्च॒त्वारि॑ च) (अ. 2)
इन्द्रं॑-वृँ॒त्र-ञ्ज॑घ्नि॒वाग्ंस॒-म्मृधो॒-ऽभि प्रावे॑पन्त॒ स ए॒तं-वैँ॑मृ॒ध-म्पू॒ऎणमा॑से-ऽनुनिर्वा॒प्य॑मपश्य॒-त्त-न्निर॑वप॒-त्तेन॒ वै स मृधो-ऽपा॑हत॒ यद्वै॑मृ॒धः पू॒र्णमा॑से-ऽनुनिर्वा॒प्यो॑ भव॑ति॒ मृध॑ ए॒व तेन॒ यज॑मा॒नो ऽप॑ हत॒ इन्द्रो॑ वृ॒त्रग्ं ह॒त्वा दे॒वता॑भिश्चेन्द्रि॒येण॑ च॒ व्या᳚र्ध्यत॒ स ए॒तमा᳚ग्ने॒य-म॒ष्टाक॑पाल-ममावा॒स्या॑यामपश्यदै॒न्द्र-न्दधि॒ [-दधि॑, त-न्निर॑वप॒-त्तेन॒] 15
त-न्निर॑वप॒-त्तेन॒ वै स दे॒वता᳚श्चेन्द्रि॒य-ञ्चावा॑रुन्ध॒यदा᳚ग्ने॒यो᳚ ऽष्टाक॑पालो ऽमावा॒स्या॑या॒-म्भव॑त्यै॒न्द्र-न्दधि॑ दे॒वता᳚श्चै॒व तेने᳚न्द्रि॒य-ञ्च॒ यज॑मा॒नो-ऽव॑ रुन्ध॒ इन्द्र॑स्य वृ॒त्र-ञ्ज॒घ्नुष॑ इन्द्रि॒यं-वीँ॒र्य॑-म्पृथि॒वीमनु॒ व्या᳚र्च्छ॒-त्तदोष॑धयो वी॒रुधो॑-ऽभव॒न्थ्स प्र॒जाप॑ति॒मुपा॑धाव-द्वृ॒त्र-म्मे॑ ज॒घ्नुष॑ इन्द्रि॒यं-वीँ॒र्य॑- [वी॒र्य᳚म्, पृ॒थि॒वीमनु॒] 16
-म्पृथि॒वीमनु॒ व्या॑र॒-त्तदोष॑धयो वी॒रुधो॑-ऽभूव॒न्निति॒ स प्र॒जाप॑तिः प॒शून॑ब्रवीदे॒तद॑स्मै॒ स-न्न॑य॒तेति॒ त-त्प॒शव॒ ओष॑धी॒भ्यो ऽध्या॒त्मन्-थ्सम॑नय॒-न्त-त्प्रत्य॑दुह॒न्॒. य-थ्स॒मन॑य॒-न्त-थ्सा᳚-न्ना॒य्यस्य॑ सान्नाय्य॒त्वं-यँ-त्प्र॒त्यदु॑ह॒-न्त-त्प्र॑ति॒धुषः॑ प्रतिधु॒क्त्वग्ं सम॑नैषुः॒ प्रत्य॑धुक्ष॒-न्न तु मयि॑ श्रयत॒ इत्य॑ब्रवीदे॒तद॑स्मै [ ] 17
शृ॒त-ङ्कु॑रु॒तेत्य॑ब्रवी॒-त्तद॑स्मै शृ॒त-म॑कुर्वन्निन्द्रि॒यं-वाँवास्मि॑न् वी॒र्य॑-न्तद॑श्रय॒-न्तच्छृ॒तस्य॑ शृत॒त्वग्ं सम॑नैषुः॒ प्रत्य॑धुक्षञ्छृ॒तम॑क्र॒-न्न तु मा॑ धिनो॒तीत्य॑ब्रवीदे॒तद॑स्मै॒ दधि॑ कुरु॒तेत्य॑ब्रवी॒-त्तद॑स्मै॒ दद्ध्य॑कुर्व॒-न्तदे॑नमधिनो॒-त्तद्द॒द्ध्नो द॑धि॒त्व-म्ब्र॑ह्मवा॒दिनो॑ वदन्ति द॒द्ध्नः पूर्व॑स्याव॒देय॒- [पूर्व॑स्याव॒देय᳚म्, दधि॒ हि] 18
-न्दधि॒ हि पूर्व॑-ङ्क्रि॒यत॒ इत्यना॑दृत्य॒ तच्छृ॒तस्यै॒व पूर्व॒स्याव॑ द्येदिन्द्रि॒यमे॒वास्मि॑न् वी॒र्यग्ग्॑ श्रि॒त्वा द॒द्ध्नो परि॑ष्टाद्धिनोति यथापू॒र्वमुपै॑ति॒ य-त्पू॒तीकै᳚र्वा पर्णव॒ल्कैर्वा॑ ऽऽत॒ञ्च्या-थ्सौ॒म्य-न्तद्य-त्क्व॑लै राक्ष॒स-न्तद्य-त्त॑ण्डु॒लैर्वै᳚श्वदे॒व-न्तद्यदा॒तञ्च॑नेन मानु॒ष-न्त-द्य-द्द॒द्ध्ना त-थ्सेन्द्र॑-न्द॒द्ध्ना ऽऽत॑नक्ति [त॑नक्ति, से॒न्द्र॒त्वाया᳚-] 19
सेन्द्र॒त्वाया᳚-ऽग्निहोत्रोच्छेष॒णम॒भ्या-त॑नक्ति य॒ज्ञस्य॒ सन्त॑त्या॒ इन्द्रो॑ वृ॒त्रग्ं ह॒त्वा परा᳚-म्परा॒वत॑-मगच्छ॒-दपा॑राध॒मिति॒ मन्य॑मान॒स्त-न्दे॒वताः॒ प्रैष॑मैच्छ॒न्-थ्सो᳚-ऽब्रवी-त्प्र॒जाप॑ति॒र्यः प्र॑थ॒मो॑-ऽनुवि॒न्दति॒ तस्य॑ प्रथ॒म-म्भा॑ग॒धेय॒मिति॒ त-म्पि॒तरो-ऽन्व॑विन्द॒-न्तस्मा᳚-त्पि॒तृभ्यः॑ पूर्वे॒द्युः क्रि॑यते॒ सो॑-ऽमावा॒स्या᳚-म्प्रत्या-ऽग॑च्छ॒-त्त-न्दे॒वा अ॒भि सम॑गच्छन्ता॒मा वै नो॒- [वै नः॑, अ॒द्य वसु॑] 20
-ऽद्य वसु॑ वस॒तीतीन्द्रो॒ हि दे॒वानां॒-वँसु॒ तद॑मावा॒स्या॑या अमावास्य॒त्व-म्ब्र॑ह्मवा॒दिनो॑ वदन्ति किन्देव॒त्यग्ं॑ सान्ना॒य्यमिति॑ वैश्वदे॒वमिति॑ ब्रूया॒-द्विश्वे॒ हि तद्दे॒वा भा॑ग॒धेय॑म॒भि स॒मग॑च्छ॒न्तेत्यथो॒ खल्वै॒न्द्रमित्ये॒व ब्रू॑या॒दिन्द्रं॒-वाँव ते त-द्भि॑ष॒ज्यन्तो॒-ऽभि सम॑गच्छ॒न्तेति॑ ॥ 21 ॥
(दधि॑ - मे ज॒घ्नुष॑ इन्द्रि॒यं-वीँ॒र्य॑ - मित्य॑ब्रवीदे॒तद॑स्मा - अव॒देयं॑ - तनक्ति - नो॒ - द्विच॑त्वारिग्ंशच्च) (अ. 3)
ब्र॒ह्म॒वा॒दिनो॑ वदन्ति॒ स त्वै द॑॑र्शपूर्णमा॒सौ य॑जेत॒ य ए॑नौ॒ सेन्द्रौ॒ यजे॒तेति॑ वैमृ॒धः पू॒र्णमा॑से ऽनुनिर्वा॒प्यो॑ भवति॒ तेन॑ पू॒र्णमा॑स॒-स्सेन्द्र॑ ऐ॒न्द्र-न्दद्ध्य॑मावा॒स्या॑या॒-न्तेना॑मावा॒स्या॑ सेन्द्रा॒ य ए॒वं-विँ॒द्वा-न्द॑र्शपूर्णमा॒सौ यज॑ते॒ सेन्द्रा॑वे॒वैनौ॑ यजते॒ श्व-श्श्वो᳚-ऽस्मा ईजा॒नाय॒ वसी॑यो भवति दे॒वा वै य-द्य॒ज्ञे ऽकु॑र्वत॒तदसु॑रा अकुर्वत॒ ते दे॒वा ए॒ता- [दे॒वा ए॒ताम्, इष्टि॑-मपश्यन्-] 22
-मिष्टि॑-मपश्य-न्नाग्नावैष्ण॒व-मेका॑दशकपाल॒ग्ं॒ सर॑स्वत्यै च॒रुग्ं सर॑स्वते च॒रु-न्ता-म्पौ᳚र्णमा॒सग्ं स॒ग्ग्॒स्थाप्यानु॒ निर॑वप॒-न्ततो॑ दे॒वा अभ॑व॒-न्परा-ऽसु॑रा॒ यो भ्रातृ॑व्यवा॒न्थ्स्या-थ्स पौ᳚र्णमा॒सग्ं स॒ग्ग्॒स्थाप्यै॒तामिष्टि॒मनु॒ निर्व॑पे-त्पौर्णमा॒सेनै॒व वज्र॒-म्भ्रातृ॑व्याय प्र॒हृत्या᳚-ऽऽग्नावैष्ण॒वेन॑ दे॒वता᳚श्च य॒ज्ञ-ञ्च॒ भ्रातृ॑व्यस्य वृङ्क्ते मिथु॒ना-न्प॒शून्-थ्सा॑रस्व॒ताभ्यां॒-याँव॑दे॒वास्यास्ति॒ त- [याव॑दे॒वास्यास्ति॒ तत्, सर्वं॑-वृँङ्क्ते] 23
-थ्सर्वं॑-वृँङ्क्ते पौर्णमा॒सीमे॒व य॑जेत॒ भ्रातृ॑व्यवा॒न्नामा॑वा॒स्याग्ं॑ ह॒त्वा भ्रातृ॑व्य॒-न्ना-ऽऽप्या॑ययति साकम्प्रस्था॒यीये॑न यजेत प॒शुका॑मो॒यस्मै॒ वा अल्पे॑ना॒-ऽऽहर॑न्ति॒ ना-ऽऽत्मना॒ तृप्य॑ति॒ नान्यस्मै॑ ददाति॒ यस्मै॑ मह॒ता तृप्य॑त्या॒त्मना॒ ददा᳚त्य॒न्यस्मै॑ मह॒ता पू॒र्णग्ं हो॑त॒व्य॑-न्तृ॒प्त ए॒वैन॒मिन्द्रः॑ प्र॒जया॑ प॒शुभि॑स्तर्पयति दारुपा॒त्रेण॑ जुहोति॒ न हि मृ॒न्मय॒माहु॑तिमान॒श औदु॑म्बर- [औदु॑म्बरम्, भ॒व॒त्यूर्ग्वा] 24
-म्भव॒त्यूर्ग्वा उ॑दु॒म्बर॒ ऊर्-क्प॒शव॑ ऊ॒र्जैवास्मा॒ ऊर्ज॑-म्प॒शूनव॑ रुन्धे॒ नाग॑तश्रीर्महे॒न्द्रं-यँ॑जेत॒ त्रयो॒ वै ग॒तश्रि॑य-श्शुश्रु॒वा-न्ग्रा॑म॒णी रा॑ज॒न्य॑स्तेषा᳚-म्महे॒न्द्रो दे॒वता॒ यो वै स्वा-न्दे॒वता॑मति॒ यज॑ते॒ प्रस्वायै॑ दे॒वता॑यैच्यवते॒ न परा॒-म्प्राप्नो॑ति॒ पापी॑या-न्भवति संवँथ्स॒र-मिन्द्रं॑-यँजेत संवँथ्स॒रग्ं हि व्र॒त-न्ना-ऽति॒ स्वै- [व्र॒त-न्ना-ऽति॒ स्वा, ए॒वैन॑-न्दे॒वते॒ज्यमा॑ना॒] 25
-वैन॑-न्दे॒वते॒ज्यमा॑ना॒ भूत्या॑ इन्धे॒ वसी॑या-न्भवति संवँथ्स॒रस्य॑ प॒रस्ता॑द॒ग्नये᳚ व्र॒तप॑तये पुरो॒डाश॑म॒ष्टाक॑पाल॒-न्निर्व॑पे-थ्संवँथ्स॒रमे॒वैनं॑-वृँ॒त्र-ञ्ज॑घ्नि॒वाग्ं स॑म॒ग्नि-र्व्र॒तप॑ति-र्व्र॒तमा ल॑म्भयति॒ ततो-ऽधि॒ कामं॑-यँजेत ॥ 26 ॥
(ए॒तां - त - दौदु॑म्बर॒ग्ग्॒ - स्वा - त्रि॒ग्ं॒शच्च॑ ) (अ. 4)
नासो॑मयाजी॒ स-न्न॑ये॒दना॑गतं॒-वाँ ए॒तस्य॒ पयो॒ यो-ऽसो॑मयाजी॒ यदसो॑मयाजी स॒-न्नये᳚-त्परिमो॒ष ए॒व सो-ऽनृ॑त-ङ्करो॒त्यथो॒ परै॒व सि॑च्यते सोमया॒ज्ये॑व स-न्न॑ये॒-त्पयो॒ वै सोमः॒ पयः॑ सान्ना॒य्य-म्पय॑सै॒व पय॑ आ॒त्म-न्ध॑त्ते॒ वि वा ए॒त-म्प्र॒जया॑ प॒शुभि॑रर्धयति व॒र्धय॑त्यस्य॒ भ्रातृ॑व्यं॒-यँस्य॑ ह॒विर्निरु॑प्त-म्पु॒रस्ता᳚च्च॒न्द्रमा॑ [पु॒रस्ता᳚च्च॒न्द्रमाः᳚, अ॒भ्यु॑देति॑] 27
अ॒भ्यु॑देति॑ त्रे॒धा त॑ण्डु॒लान्. वि भ॑जे॒द्ये म॑द्ध्य॒मा-स्स्युस्तान॒ग्नये॑ दा॒त्रे पु॑रो॒डाश॑म॒ष्टाक॑पाल-ङ्कुर्या॒द्ये स्थवि॑ष्ठा॒स्तानिन्द्रा॑य प्रदा॒त्रे द॒धग्ग्श्च॒रुं-येँ-ऽणि॑ष्ठा॒स्तान्. विष्ण॑वे शिपिवि॒ष्टाय॑ शृ॒ते च॒रुम॒ग्निरे॒वास्मै᳚ प्र॒जा-म्प्र॑ज॒नय॑ति वृ॒द्धामिन्द्रः॒ प्रय॑च्छति य॒ज्ञो वै विष्णुः॑ प॒शव॒-श्शिपि॑र्य॒ज्ञ ए॒व प॒शुषु॒ प्रति॑तिष्ठति॒ न द्वे [न द्वे, य॒जे॒त॒ य-त्पूर्व॑या] 28
य॑जेत॒ य-त्पूर्व॑या सम्प्र॒ति यजे॒तोत्त॑रया छ॒म्बट्कु॑र्या॒द्यदुत्त॑रया सम्प्र॒ति यजे॑त॒ पूर्व॑या छ॒म्बट्कु॑र्या॒न्नेष्टि॒र्भव॑ति॒ न य॒ज्ञस्तदनु॑ ह्रीतमु॒ख्य॑पग॒ल्भो जा॑यत॒ एका॑मे॒व य॑जेत प्रग॒ल्भो᳚-ऽस्य जाय॒ते ऽना॑दृत्य॒ त-द्द्वे ए॒व य॑जेत यज्ञ मु॒खमे॒व पूर्व॑या॒-ऽऽलभ॑ते॒ यज॑त॒ उत्त॑रया दे॒वता॑ ए॒व पूर्व॑या ऽवरु॒न्ध इ॑न्द्रि॒य-मुत्त॑रया देवलो॒कमे॒व [ ] 29
पूर्व॑या-ऽभि॒जय॑ति मनुष्यलो॒कमुत्त॑रया॒ भूय॑सो यज्ञक्र॒तूनुपै᳚त्ये॒षा वै सु॒मना॒ नामेष्टि॒र्यम॒द्येजा॒न-म्प॒श्चाच्च॒न्द्रमा॑ अ॒भ्यु॑देत्य॒स्मिन्ने॒वास्मै॑ लो॒के-ऽर्धु॑क-म्भवति दाक्षायण य॒ज्ञेन॑ सुव॒र्गका॑मो यजेत पू॒र्णमा॑से॒ स-न्न॑ये-न्मैत्रावरु॒ण्या ऽऽमिक्ष॑या ऽमावा॒स्या॑यां-यँजेत पू॒र्णमा॑से॒ वै दे॒वानाग्ं॑ सु॒तस्तेषा॑मे॒तम॑र्धमा॒स-म्प्रसु॑त॒स्तेषा᳚-म्मैत्रावरु॒णी व॒शा-ऽमा॑वा॒स्या॑या-मनूब॒न्ध्या॑ य- [-मनूब॒न्ध्या॑ यत्, पू॒र्वे॒द्यु र्यज॑ते॒] 30
-त्पू᳚र्वे॒द्यु र्यज॑ते॒ वेदि॑मे॒व त-त्क॑रोति॒ य-द्व॒थ्सा-न॑पाक॒रोति॑ सदोहविर्धा॒ने ए॒व स-म्मि॑नोति॒ यद्यज॑ते दे॒वैरे॒व सु॒त्याग्ं स-म्पा॑दयति॒ स ए॒तम॑र्धमा॒सग्ं स॑ध॒माद॑-न्दे॒वै-स्सोम॑-म्पिबति॒ य-न्मै᳚त्रावरु॒ण्या ऽऽमिक्ष॑या ऽमावा॒स्या॑यां॒-यँज॑ते॒ यैवासौ दे॒वानां᳚-वँ॒शा-ऽनू॑ब॒न्ध्या॑ सो ए॒वैषैतस्य॑ सा॒क्षाद्वा ए॒ष दे॒वान॒भ्यारो॑हति॒ य ए॑षां-यँ॒ज्ञ- [य॒ज्ञम्, अ॒भ्या॒रोह॑ति॒] 31
-म॑भ्या॒रोह॑ति॒ यथा॒ खलु॒वै श्रेया॑न॒भ्यारू॑ढः का॒मय॑ते॒ तथा॑ करोति॒ यद्य॑व॒विद्ध्य॑ति॒ पापी॑या-न्भवति॒ यदि॒ नाव॒विद्ध्य॑ति स॒दृं-व्याँ॒वृत्का॑म ए॒तेन॑ य॒ज्ञेन॑ यजेत क्षु॒रप॑वि॒र्ह्ये॑ष य॒ज्ञस्ता॒ज-क्पुण्यो॑ वा॒ भव॑ति॒ प्र वा॑ मीयते॒ तस्यै॒तद्व्र॒त-न्नानृ॑तं-वँदे॒न्न मा॒ग्ं॒ सम॑श्ञीया॒न्न स्त्रिय॒मुपे॑या॒न्नास्य॒ पल्पू॑लनेन॒ वासः॑ पल्पूलयेयु -रे॒तद्धि दे॒वा-स्सर्व॒-न्न कु॒र्वन्ति॑ ॥ 32 ॥
(च॒न्द्रमा॒ -द्वे -दे॑वलो॒कमे॒व - य-द्य॒ज्ञं- प॑ल्पूलयेयुः॒ -षट् च॑) (अ. 5)
ए॒ष वै दे॑वर॒थो य-द्द॑र्शपूर्णमा॒सौ यो द॑र्शपूर्णमा॒सावि॒ष्ट्वा सोमे॑न॒ यज॑ते॒ रथ॑स्पष्ट ए॒वाव॒साने॒ वरे॑ दे॒वाना॒मव॑ स्यत्ये॒तानि॒ वा अङ्गा॒परूग्ं॑षि संवँथ्स॒रस्य॒ य-द्द॑र्शपूर्णमा॒सौ य ए॒वं-विँ॒द्वा-न्द॑र्शपूर्णमा॒सौ यज॒ते-ऽङ्गा॒परूग्॑ष्ये॒व सं॑वँथ्स॒रस्य॒ प्रति॑ दधात्ये॒ ते वै सं॑वँथ्स॒रस्य॒ चक्षु॑षी॒ य-द्द॑र्शपूर्णमा॒सौ य ए॒वं-विँ॒द्वा-न्द॑र्शपूर्णमा॒सौ यज॑ते॒ ताभ्या॑मे॒व सु॑व॒र्गं-लोँ॒कमनु॑ पश्य- [पश्यति, ए॒षा वै] 33
-त्ये॒षा वै दे॒वानां॒-विँक्रा᳚न्ति॒ र्य-द्द॑र्शपूर्णमा॒सौ य ए॒वं-विँ॒द्वा-न्द॑र्शपूर्णमा॒सौ यज॑ते दे॒वाना॑मे॒व विक्रा᳚न्ति॒मनु॒ विक्र॑मत ए॒ष वै दे॑व॒यानः॒ पन्था॒ य-द्द॑र्शपूर्णमा॒सौ य ए॒वं-विँ॒द्वा-न्द॑र्शपूर्णमा॒सौ यज॑ते॒ य ए॒व दे॑व॒यानः॒ पन्था॒स्तग्ं स॒मारो॑हत्ये॒तौ वै दे॒वाना॒ग्ं॒ हरी॒ य-द्द॑र्शपूर्णमा॒सौ य ए॒वं-विँ॒द्वा-न्द॑र्शपूर्णमा॒सौ यज॑ते॒ यावे॒व दे॒वाना॒ग्ं॒ हरी॒ ताभ्या॑- [हरी॒ ताभ्या᳚म्, ए॒वैभ्यो॑ ह॒व्यं-] 34
-मे॒वैभ्यो॑ ह॒व्यं-वँ॑हत्ये॒तद्वै दे॒वाना॑मा॒स्यं॑-यँ-द्द॑र्शपूर्णमा॒सौ य ए॒वं-विँ॒द्वा-न्द॑र्शपूर्णमा॒सौ यज॑ते सा॒क्षादे॒व दे॒वाना॑मा॒स्ये॑ जुहोत्ये॒ष वै ह॑विर्धा॒नी यो द॑र्शपूर्णमासया॒जी सा॒यम्प्रा॑तरग्निहो॒त्र-ञ्जु॑होति॒ यज॑ते दर्शपूर्णमा॒सा-वह॑रहर्-हविर्धा॒निनाग्ं॑ सु॒तो य ए॒वं-विँ॒द्वा-न्द॑र्शपूर्णमा॒सौ यज॑ते हविर्धा॒न्य॑स्मीति॒ सर्व॑मे॒वास्य॑ बर्हि॒ष्य॑-न्द॒त्त-म्भ॑वति दे॒वावा अह॑- [अहः, य॒ज्ञिय॒-न्नावि॑न्द॒-न्ते] 35
-र्य॒ज्ञिय॒-न्नावि॑न्द॒-न्ते द॑र्शपूर्णमा॒साव॑पुन॒-न्तौ वा ए॒तौ पू॒तौ मेद्ध्यौ॒ य-द्द॑र्शपूर्णमा॒सौ य ए॒वं-विँ॒द्वा-न्द॑र्शपूर्णमा॒सौ यज॑ते पू॒तावे॒वैनौ॒ मेद्ध्यौ॑ यजते॒ नामा॑वा॒स्या॑या-ञ्च पौर्णमा॒स्या-ञ्च॒ स्त्रिय॒-मुपे॑या॒द्य- दु॑पे॒यान्निरि॑न्द्रिय-स्स्या॒-थ्सोम॑स्य॒ वै राज्ञो᳚-ऽर्धमा॒सस्य॒ रात्र॑यः॒ पत्न॑य आस॒-न्तासा॑ममावा॒स्या᳚-ञ्च पौर्णमा॒सी-ञ्च॒ नोपै॒- [नोपै᳚त्, ते ए॑नम॒भि] 36
-त्ते ए॑नम॒भि सम॑नह्येता॒-न्तं-यँक्ष्म॑ आर्च्छ॒-द्राजा॑नं॒-यँक्ष्म॑ आर॒दिति॒ त-द्रा॑जय॒क्ष्मस्य॒ जन्म॒ य-त्पापी॑या॒नभ॑व॒-त्त-त्पा॑पय॒क्ष्मस्य॒ यज्जा॒याभ्या॒मवि॑न्द॒-त्तज्जा॒येन्य॑स्य॒ य ए॒वमे॒तेषां॒-यँक्ष्मा॑णा॒-ञ्जन्म॒ वेद॒ नैन॑मे॒ते यक्ष्मा॑विन्दन्ति॒ स ए॒ते ए॒व न॑म॒स्यन्नुपा॑धाव॒-त्ते अ॑ब्रूतां॒-वँरं॑-वृँणावहा आ॒व-न्दे॒वाना᳚-म्भाग॒धे अ॑सावा॒- [अ॑साव, आ॒वदधि॑ दे॒वा] 37
-ऽवदधि॑ दे॒वा इ॑ज्यान्ता॒ इति॒ तस्मा᳚-थ्स॒दृशी॑ना॒ग्ं॒ रात्री॑णा-ममावा॒स्या॑या-ञ्च पौर्णमा॒स्या-ञ्च॑ दे॒वा इ॑ज्यन्त ए॒ते हि दे॒वाना᳚-म्भाग॒धे भा॑ग॒धा अ॑स्मै मनु॒ष्या॑ भवन्ति॒ य ए॒वं-वेँद॑ भू॒तानि॒ क्षुध॑मघ्नन्-थ्स॒द्यो म॑नु॒ष्या॑ अर्धमा॒से दे॒वा मा॒सि पि॒तरः॑ संवँथ्स॒रे वन॒स्पत॑य॒-स्तस्मा॒-दह॑रह-र्मनु॒ष्या॑ अश॑नमिच्छन्ते ऽर्धमा॒से दे॒वा इ॑ज्यन्ते मा॒सि पि॒तृभ्यः॑ क्रियते संवँथ्स॒रे वन॒स्पत॑यः॒ फल॑-ङ्गृह्णन्ति॒ य ए॒वं-वेँद॒ हन्ति॒ क्षुध॒-म्भ्रातृ॑व्यम् ॥ 38 ॥
(प॒श्य॒ति॒ - ताभ्या॒ -मह॑ - रै - दसाव॒ -फलग्ं॑ -स॒प्त च॑) (अ. 6)
दे॒वा वै नर्चि न यजु॑ष्यश्रयन्त॒ ते साम॑न्ने॒वा-ऽश्र॑यन्त॒ हि-ङ्क॑रोति॒ सामै॒वा-ऽक॒र्॒हि-ङ्क॑रोति॒ यत्रै॒व दे॒वा अश्र॑यन्त॒ तत॑ ए॒वैना॒-न्प्रयु॑ङ्क्ते॒ हि-ङ्क॑रोति वा॒च ए॒वैष योगो॒ हि-ङ्क॑रोति प्र॒जा ए॒व त-द्यज॑मान-स्सृजते॒ त्रिः प्र॑थ॒मामन्वा॑ह॒ त्रिरु॑त्त॒मां-यँ॒ज्ञस्यै॒व तद्ब॒र्॒स- [तद्ब॒र्॒सम्, न॒ह्य॒त्यप्र॑स्रग्ंसाय॒-] 39
-न्न॑ह्य॒त्यप्र॑स्रग्ंसाय॒ सन्त॑त॒मन्वा॑ह प्रा॒णाना॑म॒न्नाद्य॑स्य॒ सन्त॑त्या॒ अथो॒ रक्ष॑सा॒मप॑हत्यै॒ राथ॑तंरी-म्प्रथ॒मामन्वा॑ह॒ राथ॑तंरो॒ वा अ॒यं-लोँ॒क इ॒ममे॒व लो॒कम॒भि ज॑यति॒ त्रिर्वि गृ॑ह्णाति॒ त्रय॑ इ॒मे लो॒का इ॒माने॒व लो॒कान॒भि ज॑यति॒ बार्ह॑तीमुत्त॒मा-मन्वा॑ह॒ बार्ह॑तो॒ वा अ॒सौ लो॒को॑-ऽमुमे॒व लो॒कम॒भि ज॑यति॒ प्र वो॒ [प्र वः॑, वाजा॒] 40
वाजा॒ इत्यनि॑रुक्ता-म्प्राजाप॒त्यामन्वा॑ह य॒ज्ञो वै प्र॒जाप॑तिर्य॒ज्ञमे॒व प्र॒जाप॑ति॒मा र॑भते॒ प्रवो॒ वाजा॒ इत्यन्वा॒हान्नं॒-वैँ वाजो-ऽन्न॑मे॒वाव॑ रुन्धे॒ प्रवो॒ वाजा॒ इत्यन्वा॑ह॒ तस्मा᳚-त्प्रा॒चीन॒ग्ं॒ रेतो॑ धीय॒ते-ऽग्न॒ आ या॑हि वी॒तय॒ इत्या॑ह॒ तस्मा᳚-त्प्र॒तीचीः᳚ प्र॒जा जा॑यन्ते॒ प्रवो॒ वाजा॒ [वाजाः᳚, इत्यन्वा॑ह॒] 41
इत्यन्वा॑ह॒ मासा॒ वै वाजा॑ अर्धमा॒सा अ॒भिद्य॑वो दे॒वा ह॒विष्म॑न्तो॒ गौर्घृ॒ताची॑ य॒ज्ञो दे॒वाञ्जि॑गाति॒ यज॑मान-स्सुम्न॒यु-रि॒द-म॑सी॒द-म॒सीत्ये॒व य॒ज्ञस्य॑ प्रि॒य-न्धामाव॑ रुन्धे॒ य-ङ्का॒मये॑त॒ सर्व॒-मायु॑-रिया॒-दिति॒ प्र वो॒ वाजा॒ इति॒ तस्या॒नूच्याग्न॒ आ या॑हि वी॒तय॒ इति॒ सन्त॑त॒-मुत्त॑र-मर्ध॒र्चमा ल॑भेत [ ] 42
प्रा॒णेनै॒वा-ऽस्या॑-ऽपा॒न-न्दा॑धार॒ सर्व॒मायु॑रेति॒ यो वा अ॑र॒त्निग्ं सा॑मिधे॒नीनां॒-वेँदा॑र॒त्नावे॒व भ्रातृ॑व्य-ङ्कुरुते-ऽर्ध॒र्चौ स-न्द॑धात्ये॒ष वा अ॑र॒त्नि-स्सा॑मिधे॒नीनां॒-यँ ए॒वं-वेँदा॑र॒त्नावे॒व भ्रातृ॑व्य-ङ्कुरुत॒ ऋषेर्॑-ऋषे॒र्वा ए॒ता निर्मि॑ता॒ य-थ्सा॑मिधे॒न्य॑स्ता यदसं॑-युँक्ता॒-स्स्युः प्र॒जया॑ प॒शुभि॒ र्यज॑मानस्य॒ वि ति॑ष्ठेरन्नर्ध॒र्चौ स-न्द॑धाति॒ सं ँयु॑नक्त्ये॒वैना॒स्ता अ॑स्मै॒ संयुँ॑क्ता॒ अव॑रुद्धा॒-स्सर्वा॑-मा॒शिष॑-न्दुह्रे ॥ 43 ॥
(ब॒र्सं - ँवो॑ - जायन्ते॒ प्रवो॒ वाजा॑ - लभेत - दधाति॒ सं - दश॑ च) (अ. 7)
अय॑ज्ञो॒ वा ए॒ष यो॑-ऽसा॒मा-ऽग्न॒ आ या॑हि वी॒तय॒ इत्या॑ह रथन्त॒रस्यै॒ष वर्ण॒स्त-न्त्वा॑ स॒मिद्भि॑रङ्गिर॒ इत्या॑ह वामदे॒व्यस्यै॒ष वर्णो॑ बृ॒हद॑ग्ने सु॒वीर्य॒मित्या॑ह बृह॒त ए॒ष वर्णो॒ यदे॒त-न्तृ॒चम॒न्वाह॑ य॒ज्ञमे॒व त-थ्साम॑न्वन्त-ङ्करोत्य॒ग्निर॒मुष्मि॑न् ँलो॒क आसी॑दादि॒त्यो᳚-ऽस्मि-न्तावि॒मौ लो॒कावशा᳚न्ता- [लो॒कावशा᳚न्तौ, आ॒स्ता॒-न्ते दे॒वा] 44
-वास्ता॒-न्ते दे॒वा अ॑ब्रुव॒न्नेते॒मौ वि पर्यू॑हा॒मेत्यग्न॒ आ या॑हि वी॒तय॒ इत्य॒स्मिन् ँलो॒के᳚-ऽग्निम॑दधु र्बृ॒हद॑ग्ने सु॒वीर्य॒मित्य॒मुष्मि॑न् ँलो॒क आ॑दि॒त्य-न्ततो॒ वा इ॒मौ लो॒काव॑शाम्यतां॒-यँदे॒वम॒न्वाहा॒नयो᳚ र्लो॒कयो॒-श्शान्त्यै॒ शाम्य॑तो-ऽस्मा इ॒मौ लो॒कौ य ए॒वं-वेँद॒ पञ्च॑दश सामिधे॒नीरन्वा॑ह॒ पञ्च॑दश॒ [पञ्च॑दश, वा अ॑र्धमा॒सस्य॒] 45
वा अ॑र्धमा॒सस्य॒ रात्र॑यो-ऽर्धमास॒श-स्सं॑वँथ्स॒र आ᳚प्यते॒ तासा॒-न्त्रीणि॑ च श॒तानि॑ ष॒ष्टिश्चा॒क्षरा॑णि॒ ताव॑ती-स्संवँथ्स॒रस्य॒ रात्र॑यो-ऽक्षर॒श ए॒व सं॑वँथ्स॒रमा᳚प्नोति नृ॒मेध॑श्च॒ परु॑च्छेपश्च ब्रह्म॒वाद्य॑मवदेताम॒स्मि-न्दारा॑वा॒र्द्रे᳚-ऽग्नि-ञ्ज॑नयाव यत॒रो नौ॒ ब्रह्मी॑या॒निति॑ नृ॒मेधो॒-ऽभ्य॑वद॒-थ्स धू॒मम॑जनय॒-त्परु॑च्छेपो॒ ऽभ्य॑वद॒-थ्सो᳚-ऽग्निम॑जनय॒दृष॒ इत्य॑ब्रवी॒- [इत्य॑ब्रवीत्, यथ्स॒माव॑द्वि॒द्व] 46
-द्यथ्स॒माव॑द्वि॒द्व क॒था त्वम॒ग्निमजी॑जनो॒ नाहमिति॑ सामिधे॒नीना॑मे॒वाहं-वँर्णं॑-वेँ॒देत्य॑ब्रवी॒द्य-द्घृ॒तव॑-त्प॒दम॑नू॒च्यते॒ स आ॑सां॒-वँर्ण॒स्त-न्त्वा॑ स॒मिद्भि॑रङ्गिर॒ इत्या॑ह सामिधे॒नीष्वे॒व तज्ज्योति॑ र्जनयति॒ स्त्रिय॒स्तेन॒ यदृच॒-स्स्त्रिय॒स्तेन॒ य-द्गा॑य॒त्रिय॒-स्स्त्रिय॒स्तेन॒ य-थ्सा॑मिधे॒न्यो॑ वृष॑ण्वती॒-मन्वा॑ह॒ [वृष॑ण्वती॒-मन्वा॑ह, तेन॒ पुग्ग्स्व॑ती॒स्तेन॒] 47
तेन॒ पुग्ग्स्व॑ती॒स्तेन॒ सेन्द्रा॒स्तेन॑ मिथु॒ना अ॒ग्निर्दे॒वाना᳚-न्दू॒त आसी॑दु॒शना॑ का॒व्यो-ऽसु॑राणा॒-न्तौ प्र॒जाप॑ति-म्प्र॒श्ञमै॑ता॒ग्ं॒ स प्र॒जाप॑तिर॒ग्नि-न्दू॒तं-वृँ॑णीमह॒ इत्य॒भि प॒र्याव॑र्तत॒ ततो॑ दे॒वा अभ॑व॒-न्परा-ऽसु॑रा॒ यस्यै॒वं-विँ॒दुषो॒-ऽग्नि-न्दू॒तं-वृँ॑णीमह॒ इत्य॒न्वाह॒ भव॑त्या॒त्मना॒ परा᳚-ऽस्य॒ भ्रातृ॑व्यो भवत्यद्ध्व॒रव॑ती॒मन्वा॑ह॒ भ्रातृ॑व्यमे॒वैतया᳚ [भ्रातृ॑व्यमे॒वैतया᳚, ध्व॒र॒ति॒ शो॒चिष्के॑श॒स्तमी॑मह॒] 48
ध्वरति शो॒चिष्के॑श॒स्तमी॑मह॒ इत्या॑ह प॒वित्र॑मे॒वैत-द्यज॑मानमे॒वैतया॑ पवयति॒ समि॑द्धो अग्न आहु॒तेत्या॑ह परि॒धिमे॒वैत-म्परि॑ दधा॒त्यस्क॑न्दाय॒ यदत॑ ऊ॒र्ध्वम॑भ्याद॒द्ध्याद्यथा॑ बहिः परि॒धि स्कन्द॑ति ता॒दृगे॒व त-त्त्रयो॒ वा अ॒ग्नयो॑ हव्य॒वाह॑नो दे॒वाना᳚-ङ्कव्य॒वाह॑नः पितृ॒णाग्ं स॒हर॑क्षा॒ असु॑राणा॒-न्त ए॒तर्ह्या शग्ं॑सन्ते॒ मां-वँ॑रिष्यते॒ मा- [माम्, इति॑] 49
-मिति॑ वृणी॒द्ध्वग्ं ह॑व्य॒वाह॑न॒मित्या॑ह॒ य ए॒व दे॒वाना॒-न्तं-वृँ॑णीत आर्षे॒यं-वृँ॑णीते॒ बन्धो॑रे॒व नैत्यथो॒ सन्त॑त्यै प॒रस्ता॑द॒र्वाचो॑ वृणीते॒ तस्मा᳚-त्प॒रस्ता॑द॒र्वाञ्चो॑ मनु॒ष्या᳚-न्पि॒तरो-ऽनु॒ प्र पि॑पते ॥ 50 ॥
(अशा᳚न्ता - वाह॒ पञ्च॑दशा - ब्रवी॒ - दन्वा॑है॒ - तया॑ - वरिष्यते॒ मा - मेका॒न्नत्रि॒ग्ं॒शच्च॑) (अ. 8)
अग्ने॑ म॒हाग्ं अ॒सीत्या॑ह म॒हान्. ह्ये॑ष यद॒ग्नि र्ब्रा᳚ह्म॒णेत्या॑ह ब्राह्म॒णो ह्ये॑ष भा॑र॒तेत्या॑है॒ष हि दे॒वेभ्यो॑ ह॒व्य-म्भर॑ति दे॒वेद्ध॒ इत्या॑ह दे॒वा ह्ये॑तमैन्ध॑त॒ मन्वि॑द्ध॒ इत्या॑ह॒ मनु॒र्ह्ये॑तमुत्त॑रो दे॒वेभ्य॒ ऐन्धर्षि॑ष्टुत॒ इत्या॒हर्ष॑यो॒ ह्ये॑तमस्तु॑व॒न् विप्रा॑नुमदित॒ इत्या॑ह॒ [इत्या॑ह, विप्रा॒ ह्ये॑ते] 51
विप्रा॒ ह्ये॑ते यच्छु॑श्रु॒वाग्ंसः॑ कविश॒स्त इत्या॑ह क॒वयो॒ ह्ये॑ते यच्छु॑श्रु॒वाग्ंसो॒ ब्रह्म॑सग्ंशित॒ इत्या॑ह॒ ब्रह्म॑सग्ंशितो॒ ह्ये॑ष घृ॒ताह॑वन॒ इत्या॑ह घृताहु॒तिर्ह्य॑स्य प्रि॒यत॑मा प्र॒णीर्य॒ज्ञाना॒मित्या॑ह प्र॒णीर्ह्ये॑ष य॒ज्ञानाग्ं॑ र॒थीर॑द्ध्व॒राणा॒मित्या॑है॒ष हि दे॑वर॒थो॑-ऽतूर्तो॒ होतेत्या॑ह॒ न ह्ये॑त-ङ्कश्च॒न [ ] 52
तर॑ति॒ तूर्णि॑र्-हव्य॒वाडित्या॑ह॒ सर्व॒ग्ग्॒ह्ये॑ष तर॒त्यास्पात्र॑-ञ्जु॒हूर्दे॒वाना॒मित्या॑ह जु॒हूर्ह्ये॑ष दे॒वाना᳚-ञ्चम॒सो दे॑व॒पान॒ इत्या॑ह चम॒सो ह्ये॑ष दे॑व॒पानो॒-ऽराग्ं इ॑वाग्ने ने॒मिर्दे॒वाग्स्त्व-म्प॑रि॒भूर॒सीत्या॑ह दे॒वान् ह्ये॑ष प॑रि॒भूर्य-द्ब्रू॒यादा व॑ह दे॒वा-न्दे॑वय॒ते यज॑माना॒येति॒ भ्रातृ॑व्यमस्मै [भ्रातृ॑व्यमस्मै, ज॒न॒ये॒दा व॑ह] 53
जनये॒दा व॑ह दे॒वान्. यज॑माना॒येत्या॑ह॒ यज॑मानमे॒वैतेन॑ वर्धयत्य॒ग्निम॑ग्न॒ आ व॑ह॒ सोम॒मा व॒हेत्या॑ह दे॒वता॑ ए॒व त-द्य॑थापू॒र्वमुप॑ ह्वयत॒ आ चा᳚ग्ने दे॒वान्. वह॑ सु॒यजा॑ च यज जातवेद॒ इत्या॑हा॒ग्निमे॒व त-थ्सग्ग् श्य॑ति॒ सो᳚-ऽस्य॒ सग्ंशि॑तो दे॒वेभ्यो॑ ह॒व्यं-वँ॑हत्य॒ग्निर्-होते- [-होता᳚, इत्या॑हा॒-ऽग्निर्वै] 54
-त्या॑हा॒-ऽग्निर्वै दे॒वाना॒ग्ं॒ होता॒ य ए॒व दे॒वाना॒ग्ं॒ होता॒ तं-वृँ॑णीते॒स्मो व॒यमित्या॑हा॒-ऽऽत्मान॑मे॒व स॒त्त्व-ङ्ग॑मयति सा॒धु ते॑ यजमान दे॒वतेत्या॑हा॒-ऽऽशिष॑मे॒वैतामा शा᳚स्ते॒ यद्ब्रू॒या-द्यो᳚-ऽग्निग्ं होता॑र॒मवृ॑था॒ इत्य॒ग्निनो॑भ॒यतो॒ यज॑मान॒-म्परि॑ गृह्णीया-त्प्र॒मायु॑क-स्स्या-द्यजमानदेव॒त्या॑ वै जु॒हूर्भ्रा॑तृव्य देव॒त्यो॑प॒भृ- [देव॒त्यो॑प॒भृत्, यद्द्वे इ॑व] 55
-द्यद्द्वे इ॑व ब्रू॒या-द्भ्रातृ॑व्यमस्मै जनये-द्घृ॒तव॑तीमद्ध्वर्यो॒ स्रुच॒मा-ऽस्य॒स्वेत्या॑ह॒ यज॑मान मे॒वैतेन॑ वर्धयति देवा॒युव॒मित्या॑ह दे॒वान्. ह्ये॑षा-ऽव॑ति वि॒श्ववा॑रा॒मित्या॑ह॒ विश्व॒ग्ग्॒ ह्ये॑षा-ऽव॒तीडा॑महै दे॒वाग्ं ई॒डेन्या᳚न्नम॒स्याम॑ नम॒स्यान्॑ यजा॑म य॒ज्ञिया॒नित्या॑हमनु॒ष्या॑ वा ई॒डेन्याः᳚ पि॒तरो॑ नम॒स्या॑ दे॒वा य॒ज्ञिया॑ दे॒वता॑ ए॒व त-द्य॑थाभा॒गं-यँ॑जति ॥ 56 ॥
(विप्रा॑नुमदित॒ इत्या॑ह - च॒ना - ऽस्मै॒ - होतो॑ - प॒भृ-द्- दे॒वता॑ ए॒व - त्रीणि॑ च) (अ. 9)
त्रीग्स्तृ॒चाननु॑ ब्रूया-द्राज॒न्य॑स्य॒ त्रयो॒ वा अ॒न्ये रा॑ज॒न्या᳚-त्पुरु॑षा ब्राह्म॒णो वैश्यः॑ शू॒द्रस्ताने॒वास्मा॒ अनु॑कान् करोति॒ पञ्च॑द॒शानु॑ ब्रूया-द्राज॒न्य॑स्य पञ्चद॒शो वै रा॑ज॒न्यः॑ स्व ए॒वैन॒ग्ग्॒ स्तोमे॒ प्रति॑ष्ठापयति त्रि॒ष्टुभा॒ परि॑ दद्ध्यादिन्द्रि॒यं-वैँ त्रि॒ष्टुगि॑न्द्रि॒यका॑मः॒ खलु॒ वै रा॑ज॒न्यो॑ यजते त्रि॒ष्टुभै॒वास्मा॑ इन्द्रि॒य-म्परि॑ गृह्णाति॒ यदि॑ का॒मये॑त [का॒मये॑त, ब्र॒ह्म॒व॒र्च॒सम॒स्त्विति॑] 57
ब्रह्मवर्च॒सम॒स्त्विति॑ गायत्रि॒या परि॑ दद्ध्या-द्ब्रह्मवर्च॒सं-वैँ गा॑य॒त्री ब्र॑ह्मवर्च॒समे॒व भ॑वति स॒प्तद॒शानु॑ ब्रूया॒-द्वैश्य॑स्य सप्तद॒शो वै वैश्य॒-स्स्व ए॒वैन॒ग्ग्॒ स्तोमे॒ प्रति॑ ष्ठापयति॒जग॑त्या॒ परि॑ दद्ध्या॒ज्जाग॑ता॒ वै प॒शवः॑ प॒शुका॑मः॒ खलु॒ वै वैश्यो॑ यजते॒ जग॑त्यै॒वास्मै॑ प॒शू-न्परि॑ गृह्णा॒त्ये क॑विग्ं शति॒मनु॑ ब्रूया-त्प्रति॒ष्ठाका॑मस्यै कवि॒ग्ं॒श-स्स्तोमा॑ना-म्प्रति॒ष्ठा प्रति॑ष्ठित्यै॒ [प्रति॑ष्ठित्यै, चतु॑र्विग्ंशति॒मनु॑] 58
चतु॑र्विग्ंशति॒मनु॑ ब्रूया-द्ब्रह्मवर्च॒स-का॑मस्य॒ चतु॑र्विग्ंशत्यक्षरा गाय॒त्री गा॑य॒त्री ब्र॑ह्मवर्च॒स-ङ्गा॑यत्रि॒यैवास्मै᳚ ब्रह्मवर्च॒समव॑ रुन्धे त्रि॒ग्ं॒शत॒मनु॑ ब्रूया॒दन्न॑कामस्य त्रि॒ग्ं॒शद॑क्षरा वि॒राडन्नं॑-विँ॒रा-ड्वि॒राजै॒वास्मा॑ अ॒न्नाद्य॒मव॑ रुन्धे॒ द्वात्रिग्ं॑शत॒मनु॑ ब्रूया-त्प्रति॒ष्ठाका॑मस्य॒ द्वात्रिग्ं॑शदक्षरा ऽनु॒ष्टुग॑नु॒ष्टु-प्छन्द॑सा-म्प्रति॒ष्ठा प्रति॑ष्ठित्यै॒ षट्त्रिग्ं॑शत॒मनु॑ ब्रूया-त्प॒शुका॑मस्य॒ षट्त्रिग्ं॑शदक्षरा बृह॒ती बार्ह॑ताः प॒शवो॑ बृह॒त्यैवास्मै॑ प॒शू- [प॒शून्, अव॑ रुन्धे॒] 59
-नव॑ रुन्धे॒ चतु॑श्चत्वारिग्ंशत॒मनु॑ ब्रूयादिन्द्रि॒यका॑मस्य॒ चतु॑श्चत्वारिग्ंशदक्षरा त्रि॒ष्टुगि॑न्द्रि॒य-न्त्रि॒ष्टु-प्त्रि॒ष्टुभै॒वास्मा॑ इन्द्रि॒यमव॑ रुन्धे॒ ऽष्टाच॑त्वारिग्ं शत॒मनु॑ ब्रूया-त्प॒शुका॑मस्या॒ष्टाच॑त्वारिग्ंशदक्षरा॒ जग॑ती॒ जाग॑ताः प॒शवो॒जग॑त्यै॒वास्मै॑ प॒शूनव॑ रुन्धे॒ सर्वा॑णि॒ छन्दा॒ग्॒ स्यनु॑ ब्रूया-द्बहुया॒जिन॒-स्सर्वा॑णि॒ वा ए॒तस्य॒ छन्दा॒ग्॒स्य व॑रुद्धानि॒ यो ब॑हुया॒ज्यप॑रिमित॒मनु॑ ब्रूया॒दप॑रिमित॒स्या व॑रुध्यै ॥ 60 ॥
(का॒मये॑त॒ - प्रति॑ष्ठित्यै - प॒शून्थ् - स॒प्तच॑त्वारिग्ंशच्च) (अ. 10)
निवी॑त-म्मनु॒ष्या॑णा-म्प्राचीनावी॒त-म्पि॑तृ॒णामुप॑वीत-न्दे॒वाना॒मुप॑ व्ययते देवल॒क्ष्ममे॒व त-त्कु॑रुते॒ तिष्ठ॒न्नन्वा॑ह॒ तिष्ठ॒न्न्॒. ह्याश्रु॑ततरं॒-वँद॑ति॒ तिष्ठ॒न्नन्वा॑ह सुव॒र्गस्य॑ लो॒कस्या॒भिजि॑त्या॒ आसी॑नो यजत्य॒स्मिन्ने॒व लो॒के प्रति॑तिष्ठति॒ य-त्क्रौ॒ञ्चम॒न्वाहा॑-ऽऽसु॒र-न्त-द्यन्म॒न्द्र-म्मा॑नु॒ष-न्तद्यद॑न्त॒रा त-थ्सदे॑वमन्त॒रा-ऽनूच्यग्ं॑ सदेव॒त्वाय॑ वि॒द्वाग्ंसो॒ वै [ ] 61
पु॒रा होता॑रो-ऽभूव॒-न्तस्मा॒-द्विधृ॑ता॒ अद्ध्वा॒नो-ऽभू॑व॒-न्न पन्था॑न॒-स्सम॑रुक्षन्नन्तर्वे॒द्य॑न्यः पादो॒ भव॑ति बहिर्वे॒द्य॑न्यो-ऽथान्वा॒हाद्ध्व॑नां॒-विँधृ॑त्यै प॒थामसग्ं॑ रोहा॒याथो॑ भू॒तञ्चै॒व भ॑वि॒ष्यच्चाव॑ रु॒न्धे-ऽथो॒ परि॑मित-ञ्चै॒वाप॑रिमित॒-ञ्चाव॑ रु॒न्धे-ऽथो᳚ ग्रा॒म्याग्श्चै॒व प॒शूना॑र॒ण्याग्श्चाव॑ रु॒न्धे-ऽथो॑ [रु॒न्धे-ऽथो᳚, दे॒व॒लो॒क-ञ्चै॒व] 62
देवलो॒क-ञ्चै॒व म॑नुष्य लो॒क-ञ्चा॒भि ज॑यति दे॒वा वै सा॑मिधे॒नीर॒नूच्य॑ य॒ज्ञ-न्नान्व॑पश्य॒न्थ्स प्र॒जाप॑तिस्तू॒ष्णी-मा॑घा॒रमा ऽघा॑रय॒-त्ततो॒ वै दे॒वा य॒ज्ञमन्व॑पश्य॒न्॒. य-त्तू॒ष्णीमा॑घा॒र-मा॑घा॒रय॑ति य॒ज्ञस्यानु॑ख्यात्या॒ अथो॑ सामिधे॒नीरे॒वाभ्य॑-न॒क्त्यलू᳚क्षो भवति॒ य ए॒वं-वेँदाथो॑ त॒र्पय॑त्ये॒वैना॒-स्तृप्य॑ति प्र॒जया॑ प॒शुभि॒- [प॒शुभिः॑, य ए॒वं-वेँद॒] 63
-र्य ए॒वं-वेँद॒ यदेक॑या ऽऽघा॒रये॒देका᳚-म्प्रीणीया॒द्य-द्द्वाभ्या॒-न्द्वे प्री॑णीया॒द्य-द्ति॒सृभि॒रति॒ तद्रे॑चये॒त्मन॒सा ऽऽघा॑रयति॒ मन॑सा॒ ह्यना᳚प्तमा॒प्यते॑ ति॒र्यञ्च॒मा घा॑रय॒त्यछ॑म्बट्कारं॒-वाँक्च॒ मन॑श्चा ऽऽर्तीयेताम॒ह-न्दे॒वेभ्यो॑ ह॒व्यं-वँ॑हा॒मीति॒ वाग॑ब्रवीद॒ह-न्दे॒वेभ्य॒ इति॒ मन॒स्तौ प्र॒जाप॑ति-म्प्र॒श्ञमै॑ता॒ग्ं॒ सो᳚-ऽब्रवी- [सो᳚-ऽब्रवीत्, प्र॒जाप॑तिर्दू॒तीरे॒व] 64
-त्प्र॒जाप॑तिर्दू॒तीरे॒व त्व-म्मन॑सो-ऽसि॒ यद्धि मन॑सा॒ ध्याय॑ति॒ तद्वा॒चा वद॒तीति॒ त-त्खलु॒ तुभ्य॒-न्न वा॒चा जु॑हव॒न्नित्य॑ब्रवी॒-त्तस्मा॒न्मन॑सा प्र॒जाप॑तये जुह्वति॒मन॑ इव॒ हि प्र॒जाप॑तिः प्र॒जाप॑ते॒राप्त्यै॑ परि॒धीन्थ्स-म्मा᳚र्ष्टि पु॒नात्ये॒वैना॒न्त्रिर्म॑द्ध्य॒म-न्त्रयो॒ वै प्रा॒णाः प्रा॒णाने॒वाभि ज॑यति॒ त्रिर्द॑क्षिणा॒र्ध्यं॑ त्रय॑ [-त्रयः॑, इ॒मे लो॒का] 65
इ॒मे लो॒का इ॒माने॒व लो॒कान॒भि ज॑यति॒ त्रिरु॑त्तरा॒र्ध्य॑-न्त्रयो॒ वै दे॑व॒यानाः॒ पन्था॑न॒स्ताने॒वाभि ज॑यति॒ त्रिरुप॑ वाजयति॒ त्रयो॒ वै दे॑वलो॒का दे॑वलो॒काने॒वाभि ज॑यति॒ द्वाद॑श॒ स-म्प॑द्यन्ते॒ द्वाद॑श॒ मासा᳚-स्संवँथ्स॒र-स्सं॑वँथ्स॒रमे॒व प्री॑णा॒त्यथो॑ संवँथ्स॒रमे॒वास्मा॒ उप॑ दधाति सुव॒र्गस्य॑ लो॒कस्य॒ सम॑ष्ट्या आघा॒रमा घा॑रयति ति॒र इ॑व॒ [ति॒र इ॑व, वै सु॑व॒र्गो] 66
वै सु॑व॒र्गो लो॒क-स्सु॑व॒र्गमे॒वास्मै॑ लो॒क-म्प्ररो॑चयत्यृ॒जुमा घा॑रयत्यृ॒जुरि॑व॒ हि प्रा॒ण-स्सन्त॑त॒मा घा॑रयति प्रा॒णाना॑म॒न्नाद्य॑स्य॒ सन्त॑त्या॒ अथो॒ रक्ष॑सा॒मप॑हत्यै॒ य-ङ्का॒मये॑त प्र॒मायु॑क-स्स्या॒दिति॑ जि॒ह्म-न्तस्या ऽऽघा॑रये-त्प्रा॒णमे॒वास्मा᳚ज्जि॒ह्म-न्न॑यति ता॒ज-क्प्रमी॑यते॒शिरो॒ वा ए॒त-द्य॒ज्ञस्य॒ यदा॑घा॒र आ॒त्मा ध्रु॒वा- [आ॒त्मा ध्रु॒वा, आ॒घा॒रमा॒घार्य॑] 67
-ऽऽघा॒रमा॒घार्य॑ ध्रु॒वाग्ं सम॑नक्त्या॒त्मन्ने॒व य॒ज्ञस्य॒ शिरः॒ प्रति॑ दधात्य॒ग्नि-र्दे॒वाना᳚-न्दू॒त आसी॒-द्दैव्यो-ऽसु॑राणा॒-न्तौ प्र॒जाप॑ति-म्प्र॒श्ञ-मै॑ता॒ग्ं॒ स प्र॒जाप॑ति र्ब्राह्म॒ण-म॑ब्रवी-दे॒तद्वि ब्रू॒हीत्या श्रा॑व॒येती॒द-न्दे॑वा-श्शृणु॒तेति॒ वाव तद॑ब्रवी-द॒ग्नि र्दे॒वो होतेति॒ य ए॒व दे॒वाना॒-न्तम॑वृणीत॒ ततो॑ दे॒वा [दे॒वाः, अभ॑व॒-न्परा-ऽसु॑रा॒] 68
अभ॑व॒-न्परा-ऽसु॑रा॒ यस्यै॒वं-विँ॒दुषः॑ प्रव॒र-म्प्र॑वृ॒णते॒ भव॑त्या॒त्मना॒ परा᳚-ऽस्य॒ भ्रातृ॑व्यो भवति॒ यद्ब्रा᳚ह्म॒णश्चा ब्रा᳚ह्मणश्च प्र॒श्ञ-मे॒याता᳚-म्ब्राह्म॒णायाधि॑ ब्रूया॒-द्य-द्ब्रा᳚ह्म॒णाया॒-ऽद्ध्याहा॒ ऽऽत्मने-ऽद्ध्या॑ह॒ यद्ब्रा᳚ह्म॒ण-म्प॒राहा॒-ऽऽत्मान॒-म्परा॑-ऽऽह॒ तस्मा᳚-द्ब्राह्म॒णो न प॒रोच्यः॑ ॥ 69 ॥
(वा - आ॑र॒ण्याग्श्चाव॑ रु॒न्धे-ऽथो॑ - प॒शुभिः॒ - सो᳚-ऽब्रवी-द्- दक्षिणा॒र्ध्यं॑ त्रय॑ -इव - ध्रु॒वा - दे॒वा - श्च॑त्वारि॒ग्ं॒शच्च॑ ) (अ. 11)
आयु॑ष्ट आयु॒र्दा अ॑ग्न॒ आ प्या॑यस्व॒ स-न्ते ऽव॑ ते॒ हेड॒ उदु॑त्त॒म-म्प्रणो॑ दे॒व्या नो॑ दि॒वो ऽग्ना॑ विष्णू॒ अग्ना॑विष्णू इ॒म-म्मे॑ वरुण॒-तत्त्वा॑ या॒ म्यु दु॒त्य-ञ्चि॒त्रम् ॥ अ॒पा-न्नपा॒दा ह्यस्था॑-दु॒पस्थ॑-ञ्जि॒ह्माना॑-मू॒र्ध्वो वि॒द्युतं॒-वँसा॑नः । तस्य॒ ज्येष्ठ॑-म्महि॒मानं॒-वँह॑न्ती॒र्॒ हिर॑ण्यवर्णाः॒ परि॑ यन्ति य॒ह्वीः ॥ स- [सम्, अ॒न्या यन्त्युप॑] 70
-म॒न्या यन्त्युप॑ यन्त्य॒न्या-स्स॑मा॒नमू॒र्व-न्न॒द्यः॑ पृणन्ति । तमू॒ शुचि॒ग्ं॒ शुच॑यो दीदि॒वाग्ं स॑म॒पा-न्नपा॑त॒-म्परि॑तस्थु॒रापः॑ । तमस्मे॑रा युव॒तयो॒ युवा॑न-म्मर्मृ॒ज्यमा॑नाः॒ परि॑ य॒न्त्यापः॑ ॥ स शु॒क्रेण॒ शिक्व॑ना रे॒वद॒ग्निर्दी॒दाया॑नि॒द्ध्मो घृ॒तनि॑र्णिग॒फ्सु ॥ इन्द्रा॒वरु॑णयोर॒हग्ंस॒म्राजो॒रव॒ आ वृ॑णे । ता नो॑ मृडात ई॒दृशे᳚ ॥ इन्द्रा॑वरुणा यु॒वम॑द्ध्व॒राय॑ नो [यु॒वम॑द्ध्व॒राय॑ नः, वि॒शे जना॑य॒] 71
वि॒शे जना॑य॒ महि॒ शर्म॑ यच्छतम् । दी॒र्घप्र॑यज्यु॒मति॒ यो व॑नु॒ष्यति॑ व॒य-ञ्ज॑येम॒ पृत॑नासु दू॒ढ्यः॑ ॥ आ नो॑मित्रावरुणा॒, प्रबा॒हवा᳚ ॥ त्व-न्नो॑ अग्ने॒ वरु॑णस्य वि॒द्वा-न्दे॒वस्य॒ हेडो-ऽव॑ यासि सीष्ठाः । यजि॑ष्ठो॒ वह्नि॑ तम॒-श्शोशु॑चानो॒ विश्वा॒ द्वेषाग्ं॑सि॒ प्रमु॑मुग्ध्य॒स्मत् ॥ स त्वन्नो॑ अग्ने-ऽव॒मो भ॑वो॒ती नेदि॑ष्ठो अ॒स्या उ॒षसो॒ व्यु॑ष्टौ । अव॑ यक्ष्व नो॒ वरु॑ण॒ग्ं॒ [नो॒ वरु॑णम्, ररा॑णो वी॒हि] 72
ररा॑णो वी॒हि मृ॑डी॒कग्ं सु॒हवो॑ न एधि ॥ प्रप्रा॒यम॒ग्निर्भ॑र॒तस्य॑ शृण्वे॒ वि य-थ्सूर्यो॒ न रोच॑ते बृ॒हद्भाः । अ॒भि यः पू॒रु-म्पृत॑नासु त॒स्थौ दी॒दाय॒ दैव्यो॒ अति॑थि-श्शि॒वो नः॑ ॥ प्र ते॑ यक्षि॒ प्र त॑ इयर्मि॒ मन्म॒ भुवो॒ यथा॒ वन्द्यो॑ नो॒ हवे॑षु । धन्व॑न्निव प्र॒पा अ॑सि॒ त्वम॑ग्न इय॒क्षवे॑ पू॒रवे᳚ प्रत्न राजन्न् ॥ 73 ॥
वि पाज॑सा॒ वि ज्योति॑षा ॥ स त्वम॑ग्ने॒ प्रती॑केन॒ प्रत्यो॑ष यातुधा॒न्यः॑ । उ॒रु॒क्षये॑षु॒ दीद्य॑त् ॥ तग्ं सु॒प्रती॑कग्ं सु॒दृश॒ग्ग्॒ स्वञ्च॒-मवि॑द्वाग्ंसो वि॒दुष्ट॑रग्ं सपेम । स य॑क्ष॒-द्विश्वा॑ व॒युना॑नि वि॒द्वा-न्प्र ह॒व्य-म॒ग्नि-र॒मृते॑षु वोचत् ॥ अ॒ग्ं॒हो॒मुचे॑ वि॒वेष॒ यन्मा॒ विन॑ इ॒न्द्रे-न्द्र॑ क्ष॒त्रमि॑न्द्रि॒याणि॑ शतक्र॒तो ऽनु॑ ते दायि ॥ 74 ॥
(य॒ह्वी-स्स - म॑ध्व॒राय॑ नो॒ - वरु॑णग्ं - राज॒ग्ग्॒ -तु॑श्चत्वारिग्ंशच्च) (अ. 12)
(वि॒श्वरू॑प॒ - स्त्वष्टे - न्द्रं॑-वृँ॒त्रं - ब्र॑ह्मवा॒दिन॒-स्स त्वै - ना-ऽसो॑मयाज्ये॒ - ष वै दे॑वर॒थो - दे॒वा वै नर्चि ना - य॒ज्ञो - ऽग्ने॑ म॒हान् - त्रीन् - निवी॑त॒ - मायु॑ष्टे॒ - द्वाद॑श)
(वि॒श्वरू॑पो॒ - नैनग्ं॑ शीतरू॒रा - व॒द्य वसु॑ - पूर्वे॒द्यु - र्वाजा॒ इत्य - ग्ने॑ म॒हान् - निवी॑त - म॒न्या यन्ति॒ - चतुः॑ सप्ततिः )
(वि॒श्वरूपो॒, ऽनु॑ ते दायि)
॥ हरिः॑ ओम् ॥
॥ कृष्ण यजुर्वेदीय तैत्तिरीय संहिताया-न्द्वितीयकाण्डे पञ्चमः प्रश्न-स्समाप्तः ॥
kṛṣṇa yajurvedīya taittirīya saṃhitāyā-ndvitīyakāṇḍe pañcamaḥ praśnaḥ - iṣṭividhānaṃ
o-nnamaḥ paramātmane, śrī mahāgaṇapataye namaḥ,
śrī gurubhyo namaḥ | ha॒riḥ॒ om ||
vi॒śvarṷ̄po॒ vai tvā॒ṣṭraḥ pu॒rohi̭to de॒vānā̭māsī-thsva॒srīyo-'sṷrāṇā॒-ntasya॒ trīṇi̭ śī॒r॒ṣāṇyā̭san-thsoma॒pānagṃ̭ surā॒pāna̭-ma॒nnāda̭na॒gṃ॒ sa pra॒tyakṣa̭-nde॒vebhyo̭ bhā॒gama̭vada-tpa॒rokṣa॒masṷrebhya॒-ssarva̭smai॒ vai pra॒tyakṣa̭-mbhā॒gaṃ-va~̭danti॒ yasmā̭ e॒va pa॒rokṣaṃ॒-va~da̭nti॒ tasya̭ bhā॒ga ṷdi॒tastasmā॒dindro̭ 'bibhedī॒dṛṃ-vai~ rā॒ṣṭraṃ-vi~ pa॒ryāva̭rtaya॒tīti॒ tasya॒ vajra̭mā॒dāya̭ śī॒r॒ṣāṇya̭cchina॒dya-thso̭ma॒pāna॒- [-thso̭ma॒pāna᳚m, āsī॒thsa] 1
-māsī॒thsa ka॒piñja̭lo 'bhava॒-dya-thsṷrā॒pāna॒gṃ॒ sa ka̭la॒viṅko॒ yada॒nnāda̭na॒gṃ॒ sa ti̭tti॒ristasyā᳚ñja॒linā᳚ brahmaha॒tyāmupā̭gṛhṇā॒-ttāgṃ saṃ̭va~thsa॒rama̭bibha॒sta-mbhū॒tānya॒bhya̭krośa॒-nbrahma̭ha॒nniti॒ sa pṛ̭thi॒vīmupā̭sīdada॒syai bra̭hmaha॒tyāyai॒ tṛtī̭ya॒-mprati̭ gṛhā॒ṇeti॒ sā-'bra̭vī॒dvaraṃ̭-vṛ~ṇai khā॒tā-tpa̭rābhavi॒ṣyantī̭ manye॒ tato॒ mā parā̭ bhūva॒miti̭pu॒rā tḙ [bhūva॒miti̭pu॒rā te᳚, saṃva~thsa॒rādapi̭] 2
saṃva~thsa॒rādapi̭ rohā॒ditya̭bravī॒-ttasmā᳚-tpu॒rā saṃ̭va~thsa॒rā-tpṛ̭thi॒vyai khā॒tamapi̭ rohati॒ vārḙvṛta॒gg॒ hya̭syai॒ tṛtī̭ya-mbrahmaha॒tyāyai॒ pratya̭gṛhṇā॒-tta-thsvakṛ̭ta॒miri̭ṇamabhava॒-ttasmā॒dāhi̭tāgni-śśra॒ddhādḙva॒-ssvakṛ̭ta॒ iri̭ṇe॒ nāva̭ sye-dbrahmaha॒tyāyai॒ hyḙṣa varṇa॒-ssa vana॒spatī॒nupā̭sīdada॒syai bra̭hmaha॒tyāyai॒ tṛtī̭ya॒-mprati̭ gṛhṇī॒teti॒ te᳚-'bruva॒n varaṃ̭-vṛ~ṇāmahai vṛ॒kṇā- [vṛ॒kṇāt, pa॒rā॒bha॒vi॒ṣyanto̭] 3
-tpa̭rābhavi॒ṣyanto̭ manyāmahe॒ tato॒ mā parā̭ bhū॒metyā॒vraśca̭nādvo॒ bhūyāgṃ̭sa॒ utti̭ṣṭhā॒nitya̭bravī॒-ttasmā̭dā॒vraśca̭nā-dvṛ॒kṣāṇā॒-mbhūyāgṃ̭sa॒ utti̭ṣṭhanti॒ vārḙvṛta॒gg॒ hyḙṣā॒-ntṛtī̭ya-mbrahmaha॒tyāyai॒ pratya̭gṛṇha॒nthsa ni̭ryā॒so̭ 'bhava॒-ttasmā᳚nniryā॒sasya॒ nā-''śya̭-mbrahmaha॒tyāyai॒ hyḙṣa varṇo-'tho॒ khalu॒ ya e॒va lohi̭to॒ yo vā॒-''vraśca̭nānni॒ryeṣa̭ti॒ tasya॒ nā-''śya̭- [nā-''śya᳚m, kāma̭ma॒nyasya॒] 4
-ṅkāma̭ma॒nyasya॒ sastrī̭ṣagṃsā॒da-mupā̭sīdada॒syai bra̭hmaha॒tyāyai॒ tṛtī̭ya॒-mprati̭ gṛhṇī॒teti॒ tā a̭bruva॒n varaṃ̭-vṛ~ṇāmahā॒ ṛtvi̭yā-tpra॒jāṃ-vi~̭ndāmahai॒ kāma॒mā vija̭nito॒-ssa-mbha̭vā॒meti॒ tasmā॒dṛtvi̭yā॒-thstriyaḥ̭ pra॒jāṃ ~vi̭ndante॒ kāma॒mā vija̭nito॒-ssambha̭vanti॒ vārḙvṛta॒gg॒ hyā̭sā॒-ntṛtī̭ya-mbrahmaha॒tyāyai॒ pratya̭gṛhṇa॒n-thsā mala̭vadvāsā abhava॒-ttasmā॒-nmala̭va-dvāsasā॒ na saṃva~̭deta॒- [saṃva~̭deta, na sa॒hā-''sī̭ta॒] 5
-na sa॒hā-''sī̭ta॒ nāsyā॒ anna̭madyā-dbrahmaha॒tyāyai॒ hyḙṣā varṇa̭-mprati॒mucyā ''ste-'tho॒ khalvā̭hura॒bhyañja̭naṃ॒-vā~va stri॒yā anna̭ma॒bhyañja̭name॒va na pra̭ti॒gṛhya॒-ṅkāma̭ma॒nyaditi॒ yā-mmala̭va-dvāsasagṃ sa॒bhaṃva~̭nti॒ yastato॒ jāya̭te॒ so̭-'bhiśa॒sto yāmara̭ṇye॒ tasyai᳚ ste॒no yā-mparā̭cī॒-ntasyai᳚ hrītamu॒khya̭paga॒lbho yā snāti॒ tasyā̭ a॒phsu mārṷko॒ yā- [mārṷko॒ yā, a॒bhya॒ṅkte] 6
-'bhya॒ṅkte tasyai̭ du॒ścarmā॒ yā pra̭li॒khate॒ tasyai̭ khala॒tira̭pamā॒rī yā-''ṅkte tasyai̭ kā॒ṇo yā da॒to dhāva̭te॒ tasyai᳚ śyā॒vada॒n॒. yā na॒khāni̭ nikṛ॒ntate॒ tasyai̭ kuna॒khī yā kṛ॒ṇatti॒ tasyai᳚ klī॒bo yā rajjugṃ̭ sṛ॒jati॒ tasyā̭ u॒-dbandhṷko॒ yā pa॒rṇena॒ piba̭ti॒ tasyā̭ u॒nmādṷko॒ yā kha॒rveṇa॒ piba̭ti॒ tasyai̭ kha॒rvasti॒sro rātrī᳚rvra॒ta-ñca̭redañja॒linā̭ vā॒ pibe॒dakha̭rveṇa vā॒ pātrḙṇa pra॒jāyai̭ gopī॒thāya̭ || 7 ||
(ya-thso̭ma॒pānaṃ̭ - te - vṛ॒kṇāt- tasya॒ nā-''śyaṃ̭ - ~vadeta॒ -mārṷko॒ yā -'kha̭rveṇa vā॒ - trīṇi̭ ca) (a. 1)
tvaṣṭā̭ ha॒tapṷtro॒ vīndra॒gṃ॒ soma॒mā-'ha̭ra॒-ttasmi॒nnindra̭ upaha॒vamai᳚cchata॒ ta-nnopā᳚hvayata pu॒tra-mmḙ-'vadhī॒riti॒ sa ya̭jñaveśa॒sa-ṅkṛ॒tvā prā॒sahā॒ soma̭mapiba॒-ttasya॒ yada॒tyaśi̭ṣyata॒ ta-ttvaṣṭā̭-''hava॒nīya॒mupa॒ prāva̭rtaya॒-thsvāhendra̭śatru-rvardha॒sveti॒ yadava̭rtaya॒-tta-dvṛ॒trasya̭ vṛtra॒tvaṃ-ya~dabra̭vī॒-thsvāhendra̭śatru-rvardha॒sveti॒ tasmā̭da॒sye- [tasmā̭dasya, indra॒-śśatrṷrabhava॒thsa] 8
-ndra॒-śśatrṷrabhava॒thsa sa॒bhaṃva~̭nna॒gnīṣomā̭va॒bhi sama̭bhava॒-thsa i̭ṣumā॒trami̭ṣumātraṃ॒-vi~ṣva̭ṅṅavardhata॒ sa i॒māṃ-lo~॒kāna̭vṛṇo॒dyadi॒māṃ-lo~॒kānavṛ̭ṇo॒-tta-dvṛ॒trasya̭ vṛtra॒tva-ntasmā॒dindro̭-'bibhe॒-thsa pra॒jāpa̭ti॒mupā̭dhāva॒-cchatrṷrme-' ja॒nīti॒ tasmai॒ vajragṃ̭ si॒ktvā prāya̭cchade॒tena̭ ja॒hīti॒ tenā॒bhyā̭yata॒ tāva̭brūtāma॒gnīṣomau॒ mā [ ] 9
prahā̭rā॒vama॒nta-ssva॒ iti॒ mama॒ vai yu॒vaggstha॒ itya̭bravī॒-nmāma॒bhyeta॒miti॒ tau bhā̭ga॒dheya̭maicchetā॒-ntābhyā̭-me॒tama̭gnīṣo॒mīya॒-mekā̭daśakapāla-mpū॒rṇamā̭se॒ prāya̭ccha॒-ttāva̭brūtāma॒bhi sanda̭ṣṭau॒ vai svo॒ na śa̭knuva॒ aitu॒miti॒ sa indra̭ ā॒tmanaḥ̭ śītarū॒rāva̭janaya॒-ttacchī̭tarū॒rayo॒rjanma॒ ya e॒vagṃ śī̭tarū॒rayo॒rjanma॒ veda॒ [veda̭, nainagṃ̭] 10
nainagṃ̭ śītarū॒rau ha̭ta॒stābhyā̭menama॒bhya̭naya॒-ttasmā᳚-jjañja॒bhyamā̭nāda॒gnīṣomau॒ nira̭krāmatā-mprāṇāpā॒nau vā ḙna॒-ntada̭jahitā-mprā॒ṇo vai dakṣo̭-'pā॒naḥ kratu॒stasmā᳚-jjañja॒bhyamā̭no brūyā॒nmayi̭ dakṣakra॒tū iti̭ prāṇāpā॒nāve॒vā-''tma-ndha̭tte॒ sarva॒māyṷreti॒ sa de॒vatā̭ vṛ॒trānni॒r॒hūya॒ vārtra̭ghnagṃ ha॒viḥ pū॒rṇamā̭se॒ nira̭vapa॒-dghnanti॒ vā ḙna-mpū॒rṇamā̭sa॒ ā- [ā, a॒mā॒vā॒syā̭yāṃ-] 11
-'mā̭vā॒syā̭yā-mpyāyayanti॒ tasmā॒-dvārtra̭ghnī pū॒rṇamā॒se 'nū᳚cyete॒ vṛdha̭nvatī amāvā॒syā̭yā॒-nta-thsa॒gg॒sthāpya॒ vārtra̭ghnagṃ ha॒virvajra̭mā॒dāya॒ puna̭ra॒bhyā̭yata॒ te a̭brūtā॒-ndyāvā̭pṛthi॒vī mā pra hā̭rā॒vayo॒rvai śri॒ta iti॒ te a̭brūtāṃ॒-va~raṃ̭-vṛ~ṇāvahai॒ nakṣa̭travihitā॒-'hamasā॒nītya॒sāva̭bravī- cci॒travi̭hitā॒- 'hamitī॒ya-ntasmā॒nnakṣa̭travihitā॒-'sau ci॒travi̭hite॒-'yaṃ-ya~ e॒va-ndyāvā̭pṛthi॒vyo- [-dyāvā̭pṛthi॒vyoḥ, varaṃ॒-ve~dainaṃ॒-va~ro̭] 12
-rvaraṃ॒-ve~dainaṃ॒-va~ro̭ gacchati॒ sa ā॒bhyāme॒va prasṷ̄ta॒ indro̭ vṛ॒trama̭ha॒-nte de॒vā vṛ॒tragṃ ha॒tvā-'gnīṣomā̭vabruvan. ha॒vya-nno̭ vahata॒miti॒ tāva̭brūtā॒mapa̭tejasau॒ vai tyau vṛ॒tre vai tyayo॒steja॒ iti॒ te᳚-'bruva॒n ka i॒damacchai॒tīti॒ gauritya̭bruva॒-ngaurvāva sarva̭sya mi॒tramiti॒ sā-'bra̭vī॒- [sā-'bra̭vīt, varaṃ̭-vṛ~ṇai॒ mayye॒va] 13
-dvaraṃ̭-vṛ~ṇai॒ mayye॒va sa॒to-'bhayḙna bhunajāddhvā॒ iti॒ ta-dgaurā-'ha̭ra॒-ttasmā॒-dgavi̭ sa॒tobhayḙna bhuñjata e॒tadvā a॒gnestejo॒ ya-dghṛ॒tame॒ta-thsoma̭sya॒ ya-tpayo॒ ya e॒vama॒gnīṣoma̭yo॒ stejo॒ veda̭ teja॒svyḙva bha̭vati brahmavā॒dino̭ vadanti kindeva॒tya̭-mpaurṇamā॒samiti̭ prājāpa॒tyamiti̭ brūyā॒-ttenendra̭-ñjye॒ṣṭha-mpu॒tra-nni॒ravā̭sāyaya॒diti॒ tasmā᳚- -jjye॒ṣṭha-mpu॒tra-ndhanḙna ni॒rava̭sāyayanti || 14 ||
(a॒sya॒ - mā - vedā - '' - dyāvā̭pṛthi॒vyo - ra̭bravī॒ - diti॒ tasmā᳚ - cca॒tvāri̭ ca) (a. 2)
indraṃ̭-vṛ~॒tra-ñja̭ghni॒vāgṃsa॒-mmṛdho॒-'bhi prāvḙpanta॒ sa e॒taṃ-vai~̭mṛ॒dha-mpū॒èṇamā̭se-'nunirvā॒pya̭mapaśya॒-tta-nnira̭vapa॒-ttena॒ vai sa mṛdho-'pā̭hata॒ yadvai̭mṛ॒dhaḥ pū॒rṇamā̭se-'nunirvā॒pyo̭ bhava̭ti॒ mṛdha̭ e॒va tena॒ yaja̭mā॒no 'pa̭ hata॒ indro̭ vṛ॒tragṃ ha॒tvā de॒vatā̭bhiścendri॒yeṇa̭ ca॒ vyā᳚rdhyata॒ sa e॒tamā᳚gne॒ya-ma॒ṣṭāka̭pāla-mamāvā॒syā̭yāmapaśyadai॒ndra-ndadhi॒ [-dadhi̭, ta-nnira̭vapa॒-ttena॒] 15
ta-nnira̭vapa॒-ttena॒ vai sa de॒vatā᳚ścendri॒ya-ñcāvā̭rundha॒yadā᳚gne॒yo᳚ 'ṣṭāka̭pālo 'māvā॒syā̭yā॒-mbhava̭tyai॒ndra-ndadhi̭ de॒vatā᳚ścai॒va tene᳚ndri॒ya-ñca॒ yaja̭mā॒no-'va̭ rundha॒ indra̭sya vṛ॒tra-ñja॒ghnuṣa̭ indri॒yaṃ-vī~॒rya̭-mpṛthi॒vīmanu॒ vyā᳚rccha॒-ttadoṣa̭dhayo vī॒rudho̭-'bhava॒nthsa pra॒jāpa̭ti॒mupā̭dhāva-dvṛ॒tra-mmḙ ja॒ghnuṣa̭ indri॒yaṃ-vī~॒rya̭- [vī॒rya᳚m, pṛ॒thi॒vīmanu॒] 16
-mpṛthi॒vīmanu॒ vyā̭ra॒-ttadoṣa̭dhayo vī॒rudho̭-'bhūva॒nniti॒ sa pra॒jāpa̭tiḥ pa॒śūna̭bravīde॒tada̭smai॒ sa-nna̭ya॒teti॒ ta-tpa॒śava॒ oṣa̭dhī॒bhyo 'dhyā॒tman-thsama̭naya॒-nta-tpratya̭duha॒n॒. ya-thsa॒mana̭ya॒-nta-thsā᳚-nnā॒yyasya̭ sānnāyya॒tvaṃ-ya~-tpra॒tyadṷha॒-nta-tpra̭ti॒dhuṣaḥ̭ pratidhu॒ktvagṃ sama̭naiṣuḥ॒ pratya̭dhukṣa॒-nna tu mayi̭ śrayata॒ itya̭bravīde॒tada̭smai [ ] 17
śṛ॒ta-ṅkṷru॒tetya̭bravī॒-ttada̭smai śṛ॒ta-ma̭kurvannindri॒yaṃ-vā~vāsmi̭n vī॒rya̭-ntada̭śraya॒-ntacchṛ॒tasya̭ śṛta॒tvagṃ sama̭naiṣuḥ॒ pratya̭dhukṣañchṛ॒tama̭kra॒-nna tu mā̭ dhino॒tītya̭bravīde॒tada̭smai॒ dadhi̭ kuru॒tetya̭bravī॒-ttada̭smai॒ daddhya̭kurva॒-ntadḙnamadhino॒-ttadda॒ddhno da̭dhi॒tva-mbra̭hmavā॒dino̭ vadanti da॒ddhnaḥ pūrva̭syāva॒deya॒- [pūrva̭syāva॒deya᳚m, dadhi॒ hi] 18
-ndadhi॒ hi pūrva̭-ṅkri॒yata॒ ityanā̭dṛtya॒ tacchṛ॒tasyai॒va pūrva॒syāva̭ dyedindri॒yame॒vāsmi̭n vī॒ryagg̭ śri॒tvā da॒ddhno pari̭ṣṭāddhinoti yathāpū॒rvamupai̭ti॒ ya-tpū॒tīkai᳚rvā parṇava॒lkairvā̭ ''ta॒ñcyā-thsau॒mya-ntadya-tkva̭lai rākṣa॒sa-ntadya-tta̭ṇḍu॒lairvai᳚śvade॒va-ntadyadā॒tañca̭nena mānu॒ṣa-nta-dya-dda॒ddhnā ta-thsendra̭-nda॒ddhnā ''ta̭nakti [ta̭nakti, se॒ndra॒tvāyā᳚-] 19
sendra॒tvāyā᳚-'gnihotroccheṣa॒ṇama॒bhyā-ta̭nakti ya॒jñasya॒ santa̭tyā॒ indro̭ vṛ॒tragṃ ha॒tvā parā᳚-mparā॒vata̭-magaccha॒-dapā̭rādha॒miti॒ manya̭māna॒sta-nde॒vatāḥ॒ praiṣa̭maiccha॒n-thso᳚-'bravī-tpra॒jāpa̭ti॒ryaḥ pra̭tha॒mo̭-'nuvi॒ndati॒ tasya̭ pratha॒ma-mbhā̭ga॒dheya॒miti॒ ta-mpi॒taro-'nva̭vinda॒-ntasmā᳚-tpi॒tṛbhyaḥ̭ pūrve॒dyuḥ kri̭yate॒ so̭-'māvā॒syā᳚-mpratyā-'ga̭ccha॒-tta-nde॒vā a॒bhi sama̭gacchantā॒mā vai no॒- [vai naḥ̭, a॒dya vasṷ] 20
-'dya vasṷ vasa॒tītīndro॒ hi de॒vānāṃ॒-va~su॒ tada̭māvā॒syā̭yā amāvāsya॒tva-mbra̭hmavā॒dino̭ vadanti kindeva॒tyagṃ̭ sānnā॒yyamiti̭ vaiśvade॒vamiti̭ brūyā॒-dviśve॒ hi tadde॒vā bhā̭ga॒dheya̭ma॒bhi sa॒maga̭ccha॒ntetyatho॒ khalvai॒ndramitye॒va brṷ̄yā॒dindraṃ॒-vā~va te ta-dbhi̭ṣa॒jyanto॒-'bhi sama̭gaccha॒nteti̭ || 21 ||
(dadhi̭ - me ja॒ghnuṣa̭ indri॒yaṃ-vī~॒rya̭ - mitya̭bravīde॒tada̭smā - ava॒deyaṃ̭ - tanakti - no॒ - dvica̭tvārigṃśacca) (a. 3)
bra॒hma॒vā॒dino̭ vadanti॒ sa tvai da̭̭rśapūrṇamā॒sau ya̭jeta॒ ya ḙnau॒ sendrau॒ yaje॒teti̭ vaimṛ॒dhaḥ pū॒rṇamā̭se 'nunirvā॒pyo̭ bhavati॒ tena̭ pū॒rṇamā̭sa॒-ssendra̭ ai॒ndra-ndaddhya̭māvā॒syā̭yā॒-ntenā̭māvā॒syā̭ sendrā॒ ya e॒vaṃ-vi~॒dvā-nda̭rśapūrṇamā॒sau yaja̭te॒ sendrā̭ve॒vainaṷ yajate॒ śva-śśvo᳚-'smā ījā॒nāya॒ vasī̭yo bhavati de॒vā vai ya-dya॒jñe 'kṷrvata॒tadasṷrā akurvata॒ te de॒vā e॒tā- [de॒vā e॒tām, iṣṭi̭-mapaśyan-] 22
-miṣṭi̭-mapaśya-nnāgnāvaiṣṇa॒va-mekā̭daśakapāla॒gṃ॒ sara̭svatyai ca॒rugṃ sara̭svate ca॒ru-ntā-mpau᳚rṇamā॒sagṃ sa॒gg॒sthāpyānu॒ nira̭vapa॒-ntato̭ de॒vā abha̭va॒-nparā-'sṷrā॒ yo bhrātṛ̭vyavā॒nthsyā-thsa pau᳚rṇamā॒sagṃ sa॒gg॒sthāpyai॒tāmiṣṭi॒manu॒ nirva̭pe-tpaurṇamā॒senai॒va vajra॒-mbhrātṛ̭vyāya pra॒hṛtyā᳚-''gnāvaiṣṇa॒vena̭ de॒vatā᳚śca ya॒jña-ñca॒ bhrātṛ̭vyasya vṛṅkte mithu॒nā-npa॒śūn-thsā̭rasva॒tābhyāṃ॒-yā~va̭de॒vāsyāsti॒ ta- [yāva̭de॒vāsyāsti॒ tat, sarvaṃ̭-vṛ~ṅkte] 23
-thsarvaṃ̭-vṛ~ṅkte paurṇamā॒sīme॒va ya̭jeta॒ bhrātṛ̭vyavā॒nnāmā̭vā॒syāgṃ̭ ha॒tvā bhrātṛ̭vya॒-nnā-''pyā̭yayati sākamprasthā॒yīyḙna yajeta pa॒śukā̭mo॒yasmai॒ vā alpḙnā॒-''hara̭nti॒ nā-''tmanā॒ tṛpya̭ti॒ nānyasmai̭ dadāti॒ yasmai̭ maha॒tā tṛpya̭tyā॒tmanā॒ dadā᳚tya॒nyasmai̭ maha॒tā pū॒rṇagṃ ho̭ta॒vya̭-ntṛ॒pta e॒vaina॒mindraḥ̭ pra॒jayā̭ pa॒śubhi̭starpayati dārupā॒treṇa̭ juhoti॒ na hi mṛ॒nmaya॒māhṷtimāna॒śa audṷmbara- [audṷmbaram, bha॒va॒tyūrgvā] 24
-mbhava॒tyūrgvā ṷdu॒mbara॒ ūr-kpa॒śava̭ ū॒rjaivāsmā॒ ūrja̭-mpa॒śūnava̭ rundhe॒ nāga̭taśrīrmahe॒ndraṃ-ya~̭jeta॒ trayo॒ vai ga॒taśri̭ya-śśuśru॒vā-ngrā̭ma॒ṇī rā̭ja॒nya̭steṣā᳚-mmahe॒ndro de॒vatā॒ yo vai svā-nde॒vatā̭mati॒ yaja̭te॒ prasvāyai̭ de॒vatā̭yaicyavate॒ na parā॒-mprāpno̭ti॒ pāpī̭yā-nbhavati saṃva~thsa॒ra-mindraṃ̭-ya~jeta saṃva~thsa॒ragṃ hi vra॒ta-nnā-'ti॒ svai- [vra॒ta-nnā-'ti॒ svā, e॒vaina̭-nde॒vate॒jyamā̭nā॒] 25
-vaina̭-nde॒vate॒jyamā̭nā॒ bhūtyā̭ indhe॒ vasī̭yā-nbhavati saṃva~thsa॒rasya̭ pa॒rastā̭da॒gnaye᳚ vra॒tapa̭taye puro॒ḍāśa̭ma॒ṣṭāka̭pāla॒-nnirva̭pe-thsaṃva~thsa॒rame॒vainaṃ̭-vṛ~॒tra-ñja̭ghni॒vāgṃ sa̭ma॒gni-rvra॒tapa̭ti-rvra॒tamā la̭mbhayati॒ tato-'dhi॒ kāmaṃ̭-ya~jeta || 26 ||
(e॒tāṃ - ta - daudṷmbara॒gg॒ - svā - tri॒gṃ॒śacca̭ ) (a. 4)
nāso̭mayājī॒ sa-nna̭ye॒danā̭gataṃ॒-vā~ e॒tasya॒ payo॒ yo-'so̭mayājī॒ yadaso̭mayājī sa॒-nnaye᳚-tparimo॒ṣa e॒va so-'nṛ̭ta-ṅkaro॒tyatho॒ parai॒va si̭cyate somayā॒jyḙva sa-nna̭ye॒-tpayo॒ vai somaḥ॒ payaḥ̭ sānnā॒yya-mpaya̭sai॒va paya̭ ā॒tma-ndha̭tte॒ vi vā e॒ta-mpra॒jayā̭ pa॒śubhi̭rardhayati va॒rdhaya̭tyasya॒ bhrātṛ̭vyaṃ॒-ya~sya̭ ha॒virnirṷpta-mpu॒rastā᳚cca॒ndramā̭ [pu॒rastā᳚cca॒ndramāḥ᳚, a॒bhyṷdeti̭] 27
a॒bhyṷdeti̭ tre॒dhā ta̭ṇḍu॒lān. vi bha̭je॒dye ma̭ddhya॒mā-ssyustāna॒gnayḙ dā॒tre pṷro॒ḍāśa̭ma॒ṣṭāka̭pāla-ṅkuryā॒dye sthavi̭ṣṭhā॒stānindrā̭ya pradā॒tre da॒dhaggśca॒ruṃ-ye~-'ṇi̭ṣṭhā॒stān. viṣṇa̭ve śipivi॒ṣṭāya̭ śṛ॒te ca॒ruma॒gnire॒vāsmai᳚ pra॒jā-mpra̭ja॒naya̭ti vṛ॒ddhāmindraḥ॒ praya̭cchati ya॒jño vai viṣṇuḥ̭ pa॒śava॒-śśipi̭rya॒jña e॒va pa॒śuṣu॒ prati̭tiṣṭhati॒ na dve [na dve, ya॒je॒ta॒ ya-tpūrva̭yā] 28
ya̭jeta॒ ya-tpūrva̭yā sampra॒ti yaje॒totta̭rayā cha॒mbaṭkṷryā॒dyadutta̭rayā sampra॒ti yajḙta॒ pūrva̭yā cha॒mbaṭkṷryā॒nneṣṭi॒rbhava̭ti॒ na ya॒jñastadanṷ hrītamu॒khya̭paga॒lbho jā̭yata॒ ekā̭me॒va ya̭jeta praga॒lbho᳚-'sya jāya॒te 'nā̭dṛtya॒ ta-ddve e॒va ya̭jeta yajña mu॒khame॒va pūrva̭yā॒-''labha̭te॒ yaja̭ta॒ utta̭rayā de॒vatā̭ e॒va pūrva̭yā 'varu॒ndha i̭ndri॒ya-mutta̭rayā devalo॒kame॒va [ ] 29
pūrva̭yā-'bhi॒jaya̭ti manuṣyalo॒kamutta̭rayā॒ bhūya̭so yajñakra॒tūnupai᳚tye॒ṣā vai su॒manā॒ nāmeṣṭi॒ryama॒dyejā॒na-mpa॒ścācca॒ndramā̭ a॒bhyṷdetya॒sminne॒vāsmai̭ lo॒ke-'rdhṷka-mbhavati dākṣāyaṇa ya॒jñena̭ suva॒rgakā̭mo yajeta pū॒rṇamā̭se॒ sa-nna̭ye-nmaitrāvaru॒ṇyā ''mikṣa̭yā 'māvā॒syā̭yāṃ-ya~jeta pū॒rṇamā̭se॒ vai de॒vānāgṃ̭ su॒tasteṣā̭me॒tama̭rdhamā॒sa-mprasṷta॒steṣā᳚-mmaitrāvaru॒ṇī va॒śā-'mā̭vā॒syā̭yā-manūba॒ndhyā̭ ya- [-manūba॒ndhyā̭ yat, pū॒rve॒dyu ryaja̭te॒] 30
-tpū᳚rve॒dyu ryaja̭te॒ vedi̭me॒va ta-tka̭roti॒ ya-dva॒thsā-na̭pāka॒roti̭ sadohavirdhā॒ne e॒va sa-mmi̭noti॒ yadyaja̭te de॒vaire॒va su॒tyāgṃ sa-mpā̭dayati॒ sa e॒tama̭rdhamā॒sagṃ sa̭dha॒māda̭-nde॒vai-ssoma̭-mpibati॒ ya-nmai᳚trāvaru॒ṇyā ''mikṣa̭yā 'māvā॒syā̭yāṃ॒-ya~ja̭te॒ yaivāsau de॒vānāṃ᳚-va~॒śā-'nṷ̄ba॒ndhyā̭ so e॒vaiṣaitasya̭ sā॒kṣādvā e॒ṣa de॒vāna॒bhyāro̭hati॒ ya ḙṣāṃ-ya~॒jña- [ya॒jñam, a॒bhyā॒roha̭ti॒] 31
-ma̭bhyā॒roha̭ti॒ yathā॒ khalu॒vai śreyā̭na॒bhyārṷ̄ḍhaḥ kā॒maya̭te॒ tathā̭ karoti॒ yadya̭va॒viddhya̭ti॒ pāpī̭yā-nbhavati॒ yadi॒ nāva॒viddhya̭ti sa॒dṛṃ-vyā~॒vṛtkā̭ma e॒tena̭ ya॒jñena̭ yajeta kṣu॒rapa̭vi॒rhyḙṣa ya॒jñastā॒ja-kpuṇyo̭ vā॒ bhava̭ti॒ pra vā̭ mīyate॒ tasyai॒tadvra॒ta-nnānṛ̭taṃ-va~de॒nna mā॒gṃ॒ sama̭śñīyā॒nna striya॒mupḙyā॒nnāsya॒ palpṷ̄lanena॒ vāsaḥ̭ palpūlayeyu -re॒taddhi de॒vā-ssarva॒-nna ku॒rvanti̭ || 32 ||
(ca॒ndramā॒ -dve -dḙvalo॒kame॒va - ya-dya॒jñaṃ- pa̭lpūlayeyuḥ॒ -ṣaṭ ca̭) (a. 5)
e॒ṣa vai dḙvara॒tho ya-dda̭rśapūrṇamā॒sau yo da̭rśapūrṇamā॒sāvi॒ṣṭvā somḙna॒ yaja̭te॒ ratha̭spaṣṭa e॒vāva॒sāne॒ varḙ de॒vānā॒mava̭ syatye॒tāni॒ vā aṅgā॒parūgṃ̭ṣi saṃva~thsa॒rasya॒ ya-dda̭rśapūrṇamā॒sau ya e॒vaṃ-vi~॒dvā-nda̭rśapūrṇamā॒sau yaja॒te-'ṅgā॒parūg̭ṣye॒va saṃ̭va~thsa॒rasya॒ prati̭ dadhātye॒ te vai saṃ̭va~thsa॒rasya॒ cakṣṷṣī॒ ya-dda̭rśapūrṇamā॒sau ya e॒vaṃ-vi~॒dvā-nda̭rśapūrṇamā॒sau yaja̭te॒ tābhyā̭me॒va sṷva॒rgaṃ-lo~॒kamanṷ paśya- [paśyati, e॒ṣā vai] 33
-tye॒ṣā vai de॒vānāṃ॒-vi~krā᳚nti॒ rya-dda̭rśapūrṇamā॒sau ya e॒vaṃ-vi~॒dvā-nda̭rśapūrṇamā॒sau yaja̭te de॒vānā̭me॒va vikrā᳚nti॒manu॒ vikra̭mata e॒ṣa vai dḙva॒yānaḥ॒ panthā॒ ya-dda̭rśapūrṇamā॒sau ya e॒vaṃ-vi~॒dvā-nda̭rśapūrṇamā॒sau yaja̭te॒ ya e॒va dḙva॒yānaḥ॒ panthā॒stagṃ sa॒māro̭hatye॒tau vai de॒vānā॒gṃ॒ harī॒ ya-dda̭rśapūrṇamā॒sau ya e॒vaṃ-vi~॒dvā-nda̭rśapūrṇamā॒sau yaja̭te॒ yāve॒va de॒vānā॒gṃ॒ harī॒ tābhyā̭- [harī॒ tābhyā᳚m, e॒vaibhyo̭ ha॒vyaṃ-] 34
-me॒vaibhyo̭ ha॒vyaṃ-va~̭hatye॒tadvai de॒vānā̭mā॒syaṃ̭-ya~-dda̭rśapūrṇamā॒sau ya e॒vaṃ-vi~॒dvā-nda̭rśapūrṇamā॒sau yaja̭te sā॒kṣāde॒va de॒vānā̭mā॒syḙ juhotye॒ṣa vai ha̭virdhā॒nī yo da̭rśapūrṇamāsayā॒jī sā॒yamprā̭taragniho॒tra-ñjṷhoti॒ yaja̭te darśapūrṇamā॒sā-vaha̭rahar-havirdhā॒nināgṃ̭ su॒to ya e॒vaṃ-vi~॒dvā-nda̭rśapūrṇamā॒sau yaja̭te havirdhā॒nya̭smīti॒ sarva̭me॒vāsya̭ barhi॒ṣya̭-nda॒tta-mbha̭vati de॒vāvā aha̭- [ahaḥ, ya॒jñiya॒-nnāvi̭nda॒-nte] 35
-rya॒jñiya॒-nnāvi̭nda॒-nte da̭rśapūrṇamā॒sāva̭puna॒-ntau vā e॒tau pū॒tau meddhyau॒ ya-dda̭rśapūrṇamā॒sau ya e॒vaṃ-vi~॒dvā-nda̭rśapūrṇamā॒sau yaja̭te pū॒tāve॒vainau॒ meddhyaṷ yajate॒ nāmā̭vā॒syā̭yā-ñca paurṇamā॒syā-ñca॒ striya॒-mupḙyā॒dya- dṷpe॒yānniri̭ndriya-ssyā॒-thsoma̭sya॒ vai rājño᳚-'rdhamā॒sasya॒ rātra̭yaḥ॒ patna̭ya āsa॒-ntāsā̭mamāvā॒syā᳚-ñca paurṇamā॒sī-ñca॒ nopai॒- [nopai᳚t, te ḙnama॒bhi] 36
-tte ḙnama॒bhi sama̭nahyetā॒-ntaṃ-ya~kṣma̭ ārccha॒-drājā̭naṃ॒-ya~kṣma̭ āra॒diti॒ ta-drā̭jaya॒kṣmasya॒ janma॒ ya-tpāpī̭yā॒nabha̭va॒-tta-tpā̭paya॒kṣmasya॒ yajjā॒yābhyā॒mavi̭nda॒-ttajjā॒yenya̭sya॒ ya e॒vame॒teṣāṃ॒-ya~kṣmā̭ṇā॒-ñjanma॒ veda॒ naina̭me॒te yakṣmā̭vindanti॒ sa e॒te e॒va na̭ma॒syannupā̭dhāva॒-tte a̭brūtāṃ॒-va~raṃ̭-vṛ~ṇāvahā ā॒va-nde॒vānā᳚-mbhāga॒dhe a̭sāvā॒- [a̭sāva, ā॒vadadhi̭ de॒vā] 37
-'vadadhi̭ de॒vā i̭jyāntā॒ iti॒ tasmā᳚-thsa॒dṛśī̭nā॒gṃ॒ rātrī̭ṇā-mamāvā॒syā̭yā-ñca paurṇamā॒syā-ñca̭ de॒vā i̭jyanta e॒te hi de॒vānā᳚-mbhāga॒dhe bhā̭ga॒dhā a̭smai manu॒ṣyā̭ bhavanti॒ ya e॒vaṃ-ve~da̭ bhū॒tāni॒ kṣudha̭maghnan-thsa॒dyo ma̭nu॒ṣyā̭ ardhamā॒se de॒vā mā॒si pi॒taraḥ̭ saṃva~thsa॒re vana॒spata̭ya॒-stasmā॒-daha̭raha-rmanu॒ṣyā̭ aśa̭namicchante 'rdhamā॒se de॒vā i̭jyante mā॒si pi॒tṛbhyaḥ̭ kriyate saṃva~thsa॒re vana॒spata̭yaḥ॒ phala̭-ṅgṛhṇanti॒ ya e॒vaṃ-ve~da॒ hanti॒ kṣudha॒-mbhrātṛ̭vyam || 38 ||
(pa॒śya॒ti॒ - tābhyā॒ -maha̭ - rai - dasāva॒ -phalagṃ̭ -sa॒pta ca̭) (a. 6)
de॒vā vai narci na yajṷṣyaśrayanta॒ te sāma̭nne॒vā-'śra̭yanta॒ hi-ṅka̭roti॒ sāmai॒vā-'ka॒r॒hi-ṅka̭roti॒ yatrai॒va de॒vā aśra̭yanta॒ tata̭ e॒vainā॒-nprayṷṅkte॒ hi-ṅka̭roti vā॒ca e॒vaiṣa yogo॒ hi-ṅka̭roti pra॒jā e॒va ta-dyaja̭māna-ssṛjate॒ triḥ pra̭tha॒māmanvā̭ha॒ trirṷtta॒māṃ-ya~॒jñasyai॒va tadba॒r॒sa- [tadba॒r॒sam, na॒hya॒tyapra̭sragṃsāya॒-] 39
-nna̭hya॒tyapra̭sragṃsāya॒ santa̭ta॒manvā̭ha prā॒ṇānā̭ma॒nnādya̭sya॒ santa̭tyā॒ atho॒ rakṣa̭sā॒mapa̭hatyai॒ rātha̭taṃrī-mpratha॒māmanvā̭ha॒ rātha̭taṃro॒ vā a॒yaṃ-lo~॒ka i॒mame॒va lo॒kama॒bhi ja̭yati॒ trirvi gṛ̭hṇāti॒ traya̭ i॒me lo॒kā i॒māne॒va lo॒kāna॒bhi ja̭yati॒ bārha̭tīmutta॒mā-manvā̭ha॒ bārha̭to॒ vā a॒sau lo॒ko̭-'mume॒va lo॒kama॒bhi ja̭yati॒ pra vo॒ [pra vaḥ̭, vājā॒] 40
vājā॒ ityani̭ruktā-mprājāpa॒tyāmanvā̭ha ya॒jño vai pra॒jāpa̭tirya॒jñame॒va pra॒jāpa̭ti॒mā ra̭bhate॒ pravo॒ vājā॒ ityanvā॒hānnaṃ॒-vai~ vājo-'nna̭me॒vāva̭ rundhe॒ pravo॒ vājā॒ ityanvā̭ha॒ tasmā᳚-tprā॒cīna॒gṃ॒ reto̭ dhīya॒te-'gna॒ ā yā̭hi vī॒taya॒ ityā̭ha॒ tasmā᳚-tpra॒tīcīḥ᳚ pra॒jā jā̭yante॒ pravo॒ vājā॒ [vājāḥ᳚, ityanvā̭ha॒] 41
ityanvā̭ha॒ māsā॒ vai vājā̭ ardhamā॒sā a॒bhidya̭vo de॒vā ha॒viṣma̭nto॒ gaurghṛ॒tācī̭ ya॒jño de॒vāñji̭gāti॒ yaja̭māna-ssumna॒yu-ri॒da-ma̭sī॒da-ma॒sītye॒va ya॒jñasya̭ pri॒ya-ndhāmāva̭ rundhe॒ ya-ṅkā॒mayḙta॒ sarva॒-māyṷ-riyā॒-diti॒ pra vo॒ vājā॒ iti॒ tasyā॒nūcyāgna॒ ā yā̭hi vī॒taya॒ iti॒ santa̭ta॒-mutta̭ra-mardha॒rcamā la̭bheta [ ] 42
prā॒ṇenai॒vā-'syā̭-'pā॒na-ndā̭dhāra॒ sarva॒māyṷreti॒ yo vā a̭ra॒tnigṃ sā̭midhe॒nīnāṃ॒-ve~dā̭ra॒tnāve॒va bhrātṛ̭vya-ṅkurute-'rdha॒rcau sa-nda̭dhātye॒ṣa vā a̭ra॒tni-ssā̭midhe॒nīnāṃ॒-ya~ e॒vaṃ-ve~dā̭ra॒tnāve॒va bhrātṛ̭vya-ṅkuruta॒ ṛṣer̭-ṛṣe॒rvā e॒tā nirmi̭tā॒ ya-thsā̭midhe॒nya̭stā yadasaṃ̭-yu~ktā॒-ssyuḥ pra॒jayā̭ pa॒śubhi॒ ryaja̭mānasya॒ vi ti̭ṣṭherannardha॒rcau sa-nda̭dhāti॒ saṃ ~yṷnaktye॒vainā॒stā a̭smai॒ saṃyu~̭ktā॒ ava̭ruddhā॒-ssarvā̭-mā॒śiṣa̭-nduhre || 43 ||
(ba॒rsaṃ - ~vo̭ - jāyante॒ pravo॒ vājā̭ - labheta - dadhāti॒ saṃ - daśa̭ ca) (a. 7)
aya̭jño॒ vā e॒ṣa yo̭-'sā॒mā-'gna॒ ā yā̭hi vī॒taya॒ ityā̭ha rathanta॒rasyai॒ṣa varṇa॒sta-ntvā̭ sa॒midbhi̭raṅgira॒ ityā̭ha vāmade॒vyasyai॒ṣa varṇo̭ bṛ॒hada̭gne su॒vīrya॒mityā̭ha bṛha॒ta e॒ṣa varṇo॒ yade॒ta-ntṛ॒cama॒nvāha̭ ya॒jñame॒va ta-thsāma̭nvanta-ṅkarotya॒gnira॒muṣmi̭n ~lo॒ka āsī̭dādi॒tyo᳚-'smi-ntāvi॒mau lo॒kāvaśā᳚ntā- [lo॒kāvaśā᳚ntau, ā॒stā॒-nte de॒vā] 44
-vāstā॒-nte de॒vā a̭bruva॒nnete॒mau vi paryṷ̄hā॒metyagna॒ ā yā̭hi vī॒taya॒ itya॒smin ~lo॒ke᳚-'gnima̭dadhu rbṛ॒hada̭gne su॒vīrya॒mitya॒muṣmi̭n ~lo॒ka ā̭di॒tya-ntato॒ vā i॒mau lo॒kāva̭śāmyatāṃ॒-ya~de॒vama॒nvāhā॒nayo᳚ rlo॒kayo॒-śśāntyai॒ śāmya̭to-'smā i॒mau lo॒kau ya e॒vaṃ-ve~da॒ pañca̭daśa sāmidhe॒nīranvā̭ha॒ pañca̭daśa॒ [pañca̭daśa, vā a̭rdhamā॒sasya॒] 45
vā a̭rdhamā॒sasya॒ rātra̭yo-'rdhamāsa॒śa-ssaṃ̭va~thsa॒ra ā᳚pyate॒ tāsā॒-ntrīṇi̭ ca śa॒tāni̭ ṣa॒ṣṭiścā॒kṣarā̭ṇi॒ tāva̭tī-ssaṃva~thsa॒rasya॒ rātra̭yo-'kṣara॒śa e॒va saṃ̭va~thsa॒ramā᳚pnoti nṛ॒medha̭śca॒ parṷcchepaśca brahma॒vādya̭mavadetāma॒smi-ndārā̭vā॒rdre᳚-'gni-ñja̭nayāva yata॒ro nau॒ brahmī̭yā॒niti̭ nṛ॒medho॒-'bhya̭vada॒-thsa dhū॒mama̭janaya॒-tparṷcchepo॒ 'bhya̭vada॒-thso᳚-'gnima̭janaya॒dṛṣa॒ itya̭bravī॒- [itya̭bravīt, yathsa॒māva̭dvi॒dva] 46
-dyathsa॒māva̭dvi॒dva ka॒thā tvama॒gnimajī̭jano॒ nāhamiti̭ sāmidhe॒nīnā̭me॒vāhaṃ-va~rṇaṃ̭-ve~॒detya̭bravī॒dya-dghṛ॒tava̭-tpa॒dama̭nū॒cyate॒ sa ā̭sāṃ॒-va~rṇa॒sta-ntvā̭ sa॒midbhi̭raṅgira॒ ityā̭ha sāmidhe॒nīṣve॒va tajjyoti̭ rjanayati॒ striya॒stena॒ yadṛca॒-sstriya॒stena॒ ya-dgā̭ya॒triya॒-sstriya॒stena॒ ya-thsā̭midhe॒nyo̭ vṛṣa̭ṇvatī॒-manvā̭ha॒ [vṛṣa̭ṇvatī॒-manvā̭ha, tena॒ puggsva̭tī॒stena॒] 47
tena॒ puggsva̭tī॒stena॒ sendrā॒stena̭ mithu॒nā a॒gnirde॒vānā᳚-ndū॒ta āsī̭du॒śanā̭ kā॒vyo-'sṷrāṇā॒-ntau pra॒jāpa̭ti-mpra॒śñamai̭tā॒gṃ॒ sa pra॒jāpa̭tira॒gni-ndū॒taṃ-vṛ~̭ṇīmaha॒ itya॒bhi pa॒ryāva̭rtata॒ tato̭ de॒vā abha̭va॒-nparā-'sṷrā॒ yasyai॒vaṃ-vi~॒duṣo॒-'gni-ndū॒taṃ-vṛ~̭ṇīmaha॒ itya॒nvāha॒ bhava̭tyā॒tmanā॒ parā᳚-'sya॒ bhrātṛ̭vyo bhavatyaddhva॒rava̭tī॒manvā̭ha॒ bhrātṛ̭vyame॒vaitayā᳚ [bhrātṛ̭vyame॒vaitayā᳚, dhva॒ra॒ti॒ śo॒ciṣkḙśa॒stamī̭maha॒] 48
dhvarati śo॒ciṣkḙśa॒stamī̭maha॒ ityā̭ha pa॒vitra̭me॒vaita-dyaja̭māname॒vaitayā̭ pavayati॒ sami̭ddho agna āhu॒tetyā̭ha pari॒dhime॒vaita-mpari̭ dadhā॒tyaska̭ndāya॒ yadata̭ ū॒rdhvama̭bhyāda॒ddhyādyathā̭ bahiḥ pari॒dhi skanda̭ti tā॒dṛge॒va ta-ttrayo॒ vā a॒gnayo̭ havya॒vāha̭no de॒vānā᳚-ṅkavya॒vāha̭naḥ pitṛ॒ṇāgṃ sa॒hara̭kṣā॒ asṷrāṇā॒-nta e॒tarhyā śagṃ̭sante॒ māṃ-va~̭riṣyate॒ mā- [mām, iti̭] 49
-miti̭ vṛṇī॒ddhvagṃ ha̭vya॒vāha̭na॒mityā̭ha॒ ya e॒va de॒vānā॒-ntaṃ-vṛ~̭ṇīta ārṣe॒yaṃ-vṛ~̭ṇīte॒ bandho̭re॒va naityatho॒ santa̭tyai pa॒rastā̭da॒rvāco̭ vṛṇīte॒ tasmā᳚-tpa॒rastā̭da॒rvāñco̭ manu॒ṣyā᳚-npi॒taro-'nu॒ pra pi̭pate || 50 ||
(aśā᳚ntā - vāha॒ pañca̭daśā - bravī॒ - danvā̭hai॒ - tayā̭ - variṣyate॒ mā - mekā॒nnatri॒gṃ॒śacca̭) (a. 8)
agnḙ ma॒hāgṃ a॒sītyā̭ha ma॒hān. hyḙṣa yada॒gni rbrā᳚hma॒ṇetyā̭ha brāhma॒ṇo hyḙṣa bhā̭ra॒tetyā̭hai॒ṣa hi de॒vebhyo̭ ha॒vya-mbhara̭ti de॒veddha॒ ityā̭ha de॒vā hyḙtamaindha̭ta॒ manvi̭ddha॒ ityā̭ha॒ manu॒rhyḙtamutta̭ro de॒vebhya॒ aindharṣi̭ṣṭuta॒ ityā॒harṣa̭yo॒ hyḙtamastṷva॒n viprā̭numadita॒ ityā̭ha॒ [ityā̭ha, viprā॒ hyḙte] 51
viprā॒ hyḙte yacchṷśru॒vāgṃsaḥ̭ kaviśa॒sta ityā̭ha ka॒vayo॒ hyḙte yacchṷśru॒vāgṃso॒ brahma̭sagṃśita॒ ityā̭ha॒ brahma̭sagṃśito॒ hyḙṣa ghṛ॒tāha̭vana॒ ityā̭ha ghṛtāhu॒tirhya̭sya pri॒yata̭mā pra॒ṇīrya॒jñānā॒mityā̭ha pra॒ṇīrhyḙṣa ya॒jñānāgṃ̭ ra॒thīra̭ddhva॒rāṇā॒mityā̭hai॒ṣa hi dḙvara॒tho̭-'tūrto॒ hotetyā̭ha॒ na hyḙta-ṅkaśca॒na [ ] 52
tara̭ti॒ tūrṇi̭r-havya॒vāḍityā̭ha॒ sarva॒gg॒hyḙṣa tara॒tyāspātra̭-ñju॒hūrde॒vānā॒mityā̭ha ju॒hūrhyḙṣa de॒vānā᳚-ñcama॒so dḙva॒pāna॒ ityā̭ha cama॒so hyḙṣa dḙva॒pāno॒-'rāgṃ i̭vāgne ne॒mirde॒vāgstva-mpa̭ri॒bhūra॒sītyā̭ha de॒vān hyḙṣa pa̭ri॒bhūrya-dbrū॒yādā va̭ha de॒vā-ndḙvaya॒te yaja̭mānā॒yeti॒ bhrātṛ̭vyamasmai [bhrātṛ̭vyamasmai, ja॒na॒ye॒dā va̭ha] 53
janaye॒dā va̭ha de॒vān. yaja̭mānā॒yetyā̭ha॒ yaja̭māname॒vaitena̭ vardhayatya॒gnima̭gna॒ ā va̭ha॒ soma॒mā va॒hetyā̭ha de॒vatā̭ e॒va ta-dya̭thāpū॒rvamupa̭ hvayata॒ ā cā᳚gne de॒vān. vaha̭ su॒yajā̭ ca yaja jātaveda॒ ityā̭hā॒gnime॒va ta-thsagg śya̭ti॒ so᳚-'sya॒ sagṃśi̭to de॒vebhyo̭ ha॒vyaṃ-va~̭hatya॒gnir-hote- [-hotā᳚, ityā̭hā॒-'gnirvai] 54
-tyā̭hā॒-'gnirvai de॒vānā॒gṃ॒ hotā॒ ya e॒va de॒vānā॒gṃ॒ hotā॒ taṃ-vṛ~̭ṇīte॒smo va॒yamityā̭hā॒-''tmāna̭me॒va sa॒ttva-ṅga̭mayati sā॒dhu tḙ yajamāna de॒vatetyā̭hā॒-''śiṣa̭me॒vaitāmā śā᳚ste॒ yadbrū॒yā-dyo᳚-'gnigṃ hotā̭ra॒mavṛ̭thā॒ itya॒gnino̭bha॒yato॒ yaja̭māna॒-mpari̭ gṛhṇīyā-tpra॒māyṷka-ssyā-dyajamānadeva॒tyā̭ vai ju॒hūrbhrā̭tṛvya deva॒tyo̭pa॒bhṛ- [deva॒tyo̭pa॒bhṛt, yaddve i̭va] 55
-dyaddve i̭va brū॒yā-dbhrātṛ̭vyamasmai janaye-dghṛ॒tava̭tīmaddhvaryo॒ sruca॒mā-'sya॒svetyā̭ha॒ yaja̭māna me॒vaitena̭ vardhayati devā॒yuva॒mityā̭ha de॒vān. hyḙṣā-'va̭ti vi॒śvavā̭rā॒mityā̭ha॒ viśva॒gg॒ hyḙṣā-'va॒tīḍā̭mahai de॒vāgṃ ī॒ḍenyā᳚nnama॒syāma̭ nama॒syāṋ yajā̭ma ya॒jñiyā॒nityā̭hamanu॒ṣyā̭ vā ī॒ḍenyāḥ᳚ pi॒taro̭ nama॒syā̭ de॒vā ya॒jñiyā̭ de॒vatā̭ e॒va ta-dya̭thābhā॒gaṃ-ya~̭jati || 56 ||
(viprā̭numadita॒ ityā̭ha - ca॒nā - 'smai॒ - hoto̭ - pa॒bhṛ-d- de॒vatā̭ e॒va - trīṇi̭ ca) (a. 9)
trīgstṛ॒cānanṷ brūyā-drāja॒nya̭sya॒ trayo॒ vā a॒nye rā̭ja॒nyā᳚-tpurṷṣā brāhma॒ṇo vaiśyaḥ̭ śū॒drastāne॒vāsmā॒ anṷkān karoti॒ pañca̭da॒śānṷ brūyā-drāja॒nya̭sya pañcada॒śo vai rā̭ja॒nyaḥ̭ sva e॒vaina॒gg॒ stome॒ prati̭ṣṭhāpayati tri॒ṣṭubhā॒ pari̭ daddhyādindri॒yaṃ-vai~ tri॒ṣṭugi̭ndri॒yakā̭maḥ॒ khalu॒ vai rā̭ja॒nyo̭ yajate tri॒ṣṭubhai॒vāsmā̭ indri॒ya-mpari̭ gṛhṇāti॒ yadi̭ kā॒mayḙta [kā॒mayḙta, bra॒hma॒va॒rca॒sama॒stviti̭] 57
brahmavarca॒sama॒stviti̭ gāyatri॒yā pari̭ daddhyā-dbrahmavarca॒saṃ-vai~ gā̭ya॒trī bra̭hmavarca॒same॒va bha̭vati sa॒ptada॒śānṷ brūyā॒-dvaiśya̭sya saptada॒śo vai vaiśya॒-ssva e॒vaina॒gg॒ stome॒ prati̭ ṣṭhāpayati॒jaga̭tyā॒ pari̭ daddhyā॒jjāga̭tā॒ vai pa॒śavaḥ̭ pa॒śukā̭maḥ॒ khalu॒ vai vaiśyo̭ yajate॒ jaga̭tyai॒vāsmai̭ pa॒śū-npari̭ gṛhṇā॒tye ka̭vigṃ śati॒manṷ brūyā-tprati॒ṣṭhākā̭masyai kavi॒gṃ॒śa-sstomā̭nā-mprati॒ṣṭhā prati̭ṣṭhityai॒ [prati̭ṣṭhityai, catṷrvigṃśati॒manṷ] 58
catṷrvigṃśati॒manṷ brūyā-dbrahmavarca॒sa-kā̭masya॒ catṷrvigṃśatyakṣarā gāya॒trī gā̭ya॒trī bra̭hmavarca॒sa-ṅgā̭yatri॒yaivāsmai᳚ brahmavarca॒samava̭ rundhe tri॒gṃ॒śata॒manṷ brūyā॒danna̭kāmasya tri॒gṃ॒śada̭kṣarā vi॒rāḍannaṃ̭-vi~॒rā-ḍvi॒rājai॒vāsmā̭ a॒nnādya॒mava̭ rundhe॒ dvātrigṃ̭śata॒manṷ brūyā-tprati॒ṣṭhākā̭masya॒ dvātrigṃ̭śadakṣarā 'nu॒ṣṭuga̭nu॒ṣṭu-pchanda̭sā-mprati॒ṣṭhā prati̭ṣṭhityai॒ ṣaṭtrigṃ̭śata॒manṷ brūyā-tpa॒śukā̭masya॒ ṣaṭtrigṃ̭śadakṣarā bṛha॒tī bārha̭tāḥ pa॒śavo̭ bṛha॒tyaivāsmai̭ pa॒śū- [pa॒śūn, ava̭ rundhe॒] 59
-nava̭ rundhe॒ catṷścatvārigṃśata॒manṷ brūyādindri॒yakā̭masya॒ catṷścatvārigṃśadakṣarā tri॒ṣṭugi̭ndri॒ya-ntri॒ṣṭu-ptri॒ṣṭubhai॒vāsmā̭ indri॒yamava̭ rundhe॒ 'ṣṭāca̭tvārigṃ śata॒manṷ brūyā-tpa॒śukā̭masyā॒ṣṭāca̭tvārigṃśadakṣarā॒ jaga̭tī॒ jāga̭tāḥ pa॒śavo॒jaga̭tyai॒vāsmai̭ pa॒śūnava̭ rundhe॒ sarvā̭ṇi॒ chandā॒g॒ syanṷ brūyā-dbahuyā॒jina॒-ssarvā̭ṇi॒ vā e॒tasya॒ chandā॒g॒sya va̭ruddhāni॒ yo ba̭huyā॒jyapa̭rimita॒manṷ brūyā॒dapa̭rimita॒syā va̭rudhyai || 60 ||
(kā॒mayḙta॒ - prati̭ṣṭhityai - pa॒śūnth - sa॒ptaca̭tvārigṃśacca) (a. 10)
nivī̭ta-mmanu॒ṣyā̭ṇā-mprācīnāvī॒ta-mpi̭tṛ॒ṇāmupa̭vīta-nde॒vānā॒mupa̭ vyayate devala॒kṣmame॒va ta-tkṷrute॒ tiṣṭha॒nnanvā̭ha॒ tiṣṭha॒nn॒. hyāśrṷtataraṃ॒-va~da̭ti॒ tiṣṭha॒nnanvā̭ha suva॒rgasya̭ lo॒kasyā॒bhiji̭tyā॒ āsī̭no yajatya॒sminne॒va lo॒ke prati̭tiṣṭhati॒ ya-tkrau॒ñcama॒nvāhā̭-''su॒ra-nta-dyanma॒ndra-mmā̭nu॒ṣa-ntadyada̭nta॒rā ta-thsadḙvamanta॒rā-'nūcyagṃ̭ sadeva॒tvāya̭ vi॒dvāgṃso॒ vai [ ] 61
pu॒rā hotā̭ro-'bhūva॒-ntasmā॒-dvidhṛ̭tā॒ addhvā॒no-'bhṷ̄va॒-nna panthā̭na॒-ssama̭rukṣannantarve॒dya̭nyaḥ pādo॒ bhava̭ti bahirve॒dya̭nyo-'thānvā॒hāddhva̭nāṃ॒-vi~dhṛ̭tyai pa॒thāmasagṃ̭ rohā॒yātho̭ bhū॒tañcai॒va bha̭vi॒ṣyaccāva̭ ru॒ndhe-'tho॒ pari̭mita-ñcai॒vāpa̭rimita॒-ñcāva̭ ru॒ndhe-'tho᳚ grā॒myāgścai॒va pa॒śūnā̭ra॒ṇyāgścāva̭ ru॒ndhe-'tho̭ [ru॒ndhe-'tho᳚, de॒va॒lo॒ka-ñcai॒va] 62
devalo॒ka-ñcai॒va ma̭nuṣya lo॒ka-ñcā॒bhi ja̭yati de॒vā vai sā̭midhe॒nīra॒nūcya̭ ya॒jña-nnānva̭paśya॒nthsa pra॒jāpa̭tistū॒ṣṇī-mā̭ghā॒ramā 'ghā̭raya॒-ttato॒ vai de॒vā ya॒jñamanva̭paśya॒n॒. ya-ttū॒ṣṇīmā̭ghā॒ra-mā̭ghā॒raya̭ti ya॒jñasyānṷkhyātyā॒ atho̭ sāmidhe॒nīre॒vābhya̭-na॒ktyalū᳚kṣo bhavati॒ ya e॒vaṃ-ve~dātho̭ ta॒rpaya̭tye॒vainā॒-stṛpya̭ti pra॒jayā̭ pa॒śubhi॒- [pa॒śubhiḥ̭, ya e॒vaṃ-ve~da॒] 63
-rya e॒vaṃ-ve~da॒ yadeka̭yā ''ghā॒raye॒dekā᳚-mprīṇīyā॒dya-ddvābhyā॒-ndve prī̭ṇīyā॒dya-dti॒sṛbhi॒rati॒ tadrḙcaye॒tmana॒sā ''ghā̭rayati॒ mana̭sā॒ hyanā᳚ptamā॒pyatḙ ti॒ryañca॒mā ghā̭raya॒tyacha̭mbaṭkāraṃ॒-vā~kca॒ mana̭ścā ''rtīyetāma॒ha-nde॒vebhyo̭ ha॒vyaṃ-va~̭hā॒mīti॒ vāga̭bravīda॒ha-nde॒vebhya॒ iti॒ mana॒stau pra॒jāpa̭ti-mpra॒śñamai̭tā॒gṃ॒ so᳚-'bravī- [so᳚-'bravīt, pra॒jāpa̭tirdū॒tīre॒va] 64
-tpra॒jāpa̭tirdū॒tīre॒va tva-mmana̭so-'si॒ yaddhi mana̭sā॒ dhyāya̭ti॒ tadvā॒cā vada॒tīti॒ ta-tkhalu॒ tubhya॒-nna vā॒cā jṷhava॒nnitya̭bravī॒-ttasmā॒nmana̭sā pra॒jāpa̭taye juhvati॒mana̭ iva॒ hi pra॒jāpa̭tiḥ pra॒jāpa̭te॒rāptyai̭ pari॒dhīnthsa-mmā᳚rṣṭi pu॒nātye॒vainā॒ntrirma̭ddhya॒ma-ntrayo॒ vai prā॒ṇāḥ prā॒ṇāne॒vābhi ja̭yati॒ trirda̭kṣiṇā॒rdhyaṃ̭ traya̭ [-trayaḥ̭, i॒me lo॒kā] 65
i॒me lo॒kā i॒māne॒va lo॒kāna॒bhi ja̭yati॒ trirṷttarā॒rdhya̭-ntrayo॒ vai dḙva॒yānāḥ॒ panthā̭na॒stāne॒vābhi ja̭yati॒ trirupa̭ vājayati॒ trayo॒ vai dḙvalo॒kā dḙvalo॒kāne॒vābhi ja̭yati॒ dvāda̭śa॒ sa-mpa̭dyante॒ dvāda̭śa॒ māsā᳚-ssaṃva~thsa॒ra-ssaṃ̭va~thsa॒rame॒va prī̭ṇā॒tyatho̭ saṃva~thsa॒rame॒vāsmā॒ upa̭ dadhāti suva॒rgasya̭ lo॒kasya॒ sama̭ṣṭyā āghā॒ramā ghā̭rayati ti॒ra i̭va॒ [ti॒ra i̭va, vai sṷva॒rgo] 66
vai sṷva॒rgo lo॒ka-ssṷva॒rgame॒vāsmai̭ lo॒ka-mpraro̭cayatyṛ॒jumā ghā̭rayatyṛ॒juri̭va॒ hi prā॒ṇa-ssanta̭ta॒mā ghā̭rayati prā॒ṇānā̭ma॒nnādya̭sya॒ santa̭tyā॒ atho॒ rakṣa̭sā॒mapa̭hatyai॒ ya-ṅkā॒mayḙta pra॒māyṷka-ssyā॒diti̭ ji॒hma-ntasyā ''ghā̭raye-tprā॒ṇame॒vāsmā᳚jji॒hma-nna̭yati tā॒ja-kpramī̭yate॒śiro॒ vā e॒ta-dya॒jñasya॒ yadā̭ghā॒ra ā॒tmā dhru॒vā- [ā॒tmā dhru॒vā, ā॒ghā॒ramā॒ghārya̭] 67
-''ghā॒ramā॒ghārya̭ dhru॒vāgṃ sama̭naktyā॒tmanne॒va ya॒jñasya॒ śiraḥ॒ prati̭ dadhātya॒gni-rde॒vānā᳚-ndū॒ta āsī॒-ddaivyo-'sṷrāṇā॒-ntau pra॒jāpa̭ti-mpra॒śña-mai̭tā॒gṃ॒ sa pra॒jāpa̭ti rbrāhma॒ṇa-ma̭bravī-de॒tadvi brū॒hītyā śrā̭va॒yetī॒da-ndḙvā-śśṛṇu॒teti॒ vāva tada̭bravī-da॒gni rde॒vo hoteti॒ ya e॒va de॒vānā॒-ntama̭vṛṇīta॒ tato̭ de॒vā [de॒vāḥ, abha̭va॒-nparā-'sṷrā॒] 68
abha̭va॒-nparā-'sṷrā॒ yasyai॒vaṃ-vi~॒duṣaḥ̭ prava॒ra-mpra̭vṛ॒ṇate॒ bhava̭tyā॒tmanā॒ parā᳚-'sya॒ bhrātṛ̭vyo bhavati॒ yadbrā᳚hma॒ṇaścā brā᳚hmaṇaśca pra॒śña-me॒yātā᳚-mbrāhma॒ṇāyādhi̭ brūyā॒-dya-dbrā᳚hma॒ṇāyā॒-'ddhyāhā॒ ''tmane-'ddhyā̭ha॒ yadbrā᳚hma॒ṇa-mpa॒rāhā॒-''tmāna॒-mparā̭-''ha॒ tasmā᳚-dbrāhma॒ṇo na pa॒rocyaḥ̭ || 69 ||
(vā - ā̭ra॒ṇyāgścāva̭ ru॒ndhe-'tho̭ - pa॒śubhiḥ॒ - so᳚-'bravī-d- dakṣiṇā॒rdhyaṃ̭ traya̭ -iva - dhru॒vā - de॒vā - śca̭tvāri॒gṃ॒śacca̭ ) (a. 11)
āyṷṣṭa āyu॒rdā a̭gna॒ ā pyā̭yasva॒ sa-nte 'va̭ te॒ heḍa॒ udṷtta॒ma-mpraṇo̭ de॒vyā no̭ di॒vo 'gnā̭ viṣṇū॒ agnā̭viṣṇū i॒ma-mmḙ varuṇa॒-tattvā̭ yā॒ myu du॒tya-ñci॒tram || a॒pā-nnapā॒dā hyasthā̭-du॒pastha̭-ñji॒hmānā̭-mū॒rdhvo vi॒dyutaṃ॒-va~sā̭naḥ | tasya॒ jyeṣṭha̭-mmahi॒mānaṃ॒-va~ha̭ntī॒r॒ hira̭ṇyavarṇāḥ॒ pari̭ yanti ya॒hvīḥ || sa- [sam, a॒nyā yantyupa̭] 70
-ma॒nyā yantyupa̭ yantya॒nyā-ssa̭mā॒namū॒rva-nna॒dyaḥ̭ pṛṇanti | tamū॒ śuci॒gṃ॒ śuca̭yo dīdi॒vāgṃ sa̭ma॒pā-nnapā̭ta॒-mpari̭tasthu॒rāpaḥ̭ | tamasmḙrā yuva॒tayo॒ yuvā̭na-mmarmṛ॒jyamā̭nāḥ॒ pari̭ ya॒ntyāpaḥ̭ || sa śu॒kreṇa॒ śikva̭nā re॒vada॒gnirdī॒dāyā̭ni॒ddhmo ghṛ॒tani̭rṇiga॒phsu || indrā॒varṷṇayora॒hagṃsa॒mrājo॒rava॒ ā vṛ̭ṇe | tā no̭ mṛḍāta ī॒dṛśe᳚ || indrā̭varuṇā yu॒vama̭ddhva॒rāya̭ no [yu॒vama̭ddhva॒rāya̭ naḥ, vi॒śe janā̭ya॒] 71
vi॒śe janā̭ya॒ mahi॒ śarma̭ yacchatam | dī॒rghapra̭yajyu॒mati॒ yo va̭nu॒ṣyati̭ va॒ya-ñja̭yema॒ pṛta̭nāsu dū॒ḍhyaḥ̭ || ā no̭mitrāvaruṇā॒, prabā॒havā᳚ || tva-nno̭ agne॒ varṷṇasya vi॒dvā-nde॒vasya॒ heḍo-'va̭ yāsi sīṣṭhāḥ | yaji̭ṣṭho॒ vahni̭ tama॒-śśośṷcāno॒ viśvā॒ dveṣāgṃ̭si॒ pramṷmugdhya॒smat || sa tvanno̭ agne-'va॒mo bha̭vo॒tī nedi̭ṣṭho a॒syā u॒ṣaso॒ vyṷṣṭau | ava̭ yakṣva no॒ varṷṇa॒gṃ॒ [no॒ varṷṇam, rarā̭ṇo vī॒hi] 72
rarā̭ṇo vī॒hi mṛ̭ḍī॒kagṃ su॒havo̭ na edhi || praprā॒yama॒gnirbha̭ra॒tasya̭ śṛṇve॒ vi ya-thsūryo॒ na roca̭te bṛ॒hadbhāḥ | a॒bhi yaḥ pū॒ru-mpṛta̭nāsu ta॒sthau dī॒dāya॒ daivyo॒ ati̭thi-śśi॒vo naḥ̭ || pra tḙ yakṣi॒ pra ta̭ iyarmi॒ manma॒ bhuvo॒ yathā॒ vandyo̭ no॒ havḙṣu | dhanva̭nniva pra॒pā a̭si॒ tvama̭gna iya॒kṣavḙ pū॒rave᳚ pratna rājann || 73 ||
vi pāja̭sā॒ vi jyoti̭ṣā || sa tvama̭gne॒ pratī̭kena॒ pratyo̭ṣa yātudhā॒nyaḥ̭ | u॒ru॒kṣayḙṣu॒ dīdya̭t || tagṃ su॒pratī̭kagṃ su॒dṛśa॒gg॒ svañca॒-mavi̭dvāgṃso vi॒duṣṭa̭ragṃ sapema | sa ya̭kṣa॒-dviśvā̭ va॒yunā̭ni vi॒dvā-npra ha॒vya-ma॒gni-ra॒mṛtḙṣu vocat || a॒gṃ॒ho॒mucḙ vi॒veṣa॒ yanmā॒ vina̭ i॒ndre-ndra̭ kṣa॒trami̭ndri॒yāṇi̭ śatakra॒to 'nṷ te dāyi || 74 ||
(ya॒hvī-ssa - ma̭dhva॒rāya̭ no॒ - varṷṇagṃ - rāja॒gg॒ -tṷścatvārigṃśacca) (a. 12)
(vi॒śvarṷ̄pa॒ - stvaṣṭe - ndraṃ̭-vṛ~॒traṃ - bra̭hmavā॒dina॒-ssa tvai - nā-'so̭mayājye॒ - ṣa vai dḙvara॒tho - de॒vā vai narci nā - ya॒jño - 'gnḙ ma॒hān - trīn - nivī̭ta॒ - māyṷṣṭe॒ - dvāda̭śa)
(vi॒śvarṷ̄po॒ - nainagṃ̭ śītarū॒rā - va॒dya vasṷ - pūrve॒dyu - rvājā॒ itya - gnḙ ma॒hān - nivī̭ta - ma॒nyā yanti॒ - catuḥ̭ saptatiḥ )
(vi॒śvarūpo॒, 'nṷ te dāyi)
|| hariḥ̭ om ||
|| kṛṣṇa yajurvedīya taittirīya saṃhitāyā-ndvitīyakāṇḍe pañcamaḥ praśna-ssamāptaḥ ||
🕉️ This is the original Sanskrit rendered in Kannada script.
Pronunciation is identical to the Sanskrit Devanagari version.