1.3 - Vajapeyabrahmanam - Krishna Yajurveda Taittiriya Brahmana Pathah - Devasurah Sam Yatta — Kannada Script

ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಬ್ರಾಹ್ಮಣೇ ಪ್ರಥಮಾಷ್ಟಕೇ ತೃತೀಯಃ ಪ್ರಪಾಠಕಃ - ವಾಜಪೇಯಬ್ರಾಹ್ಮಣಂ

ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,

ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥

ಅನುವಾಕಂ 1 - ಪುನರಾಧೇಯಶೇಷಃ ಆಜ್ಯಭಾಗಯೋರ್ವಿಶೇಷಃ

ದೇ॒ವಾ॒ಸು॒ರಾ-ಸ್ಸಂ-ಯಁ॑ತ್ತಾ ಆಸನ್ನ್ । ತೇ ದೇ॒ವಾ ವಿ॑ಜ॒ಯ-ಮು॑ಪ॒ಯನ್ತಃ॑ । ಅ॒ಗ್ನೀಷೋಮ॑ಯೋ-ಸ್ತೇಜ॒ಸ್ವಿನೀ᳚ಸ್ತ॒ನೂ-ಸ್ಸ-ನ್ನ್ಯ॑ದಧತ । ಇ॒ದಮು॑ ನೋ ಭವಿಷ್ಯತಿ । ಯದಿ॑ ನೋ ಜೇ॒ಷ್ಯನ್ತೀತಿ॑ । ತೇನಾ॒ಗ್ನೀಷೋಮಾ॒-ವಪಾ᳚ಕ್ರಾಮತಾಮ್ । ತೇ ದೇ॒ವಾ ವಿ॒ಜಿತ್ಯ॑ । ಅ॒ಗ್ನೀಷೋಮಾ॒-ವನ್ವೈ᳚ಚ್ಛನ್ನ್ । ತೇ᳚-ಽಗ್ನಿ-ಮನ್ವ॑ವಿನ್ದ-ನ್ನೃ॒ತುಷೂ-ಥ್ಸ॑ನ್ನಮ್ । ತಸ್ಯ॒ ವಿಭ॑ಕ್ತೀಭಿ-ಸ್ತೇಜ॒ಸ್ವಿನೀ᳚ಸ್ತ॒ನೂ-ರವಾ॑ರುನ್ಧತ ॥ 1 ॥

ತೇ ಸೋಮ॒-ಮನ್ವ॑ವಿನ್ದನ್ನ್ । ತಮ॑ಘ್ನನ್ನ್ । ತಸ್ಯ॑ ಯಥಾ-ಽಭಿ॒ಜ್ಞಾಯ॑-ನ್ತ॒ನೂ-ರ್ವ್ಯ॑ಗೃಹ್ಣತ । ತೇ ಗ್ರಹಾ॑ ಅಭವನ್ನ್ । ತ-ದ್ಗ್ರಹಾ॑ಣಾ-ಙ್ಗ್ರಹ॒ತ್ವಮ್ । ಯಸ್ಯೈ॒ವಂ-ವಿಁ॒ದುಷೋ॒ ಗ್ರಹಾ॑ ಗೃ॒ಹ್ಯನ್ತೇ᳚ । ತಸ್ಯ॒ ತ್ವೇ॑ವ ಗೃ॑ಹೀ॒ತಾಃ ॥ ನಾನಾ᳚ಗ್ನೇಯ-ಮ್ಪುನರಾ॒ಧೇಯೇ॑ ಕುರ್ಯಾತ್ । ಯದನಾ᳚ಗ್ನೇಯ-ಮ್ಪುನರಾ॒ಧೇಯೇ॑ ಕು॒ರ್ಯಾತ್ । ವ್ಯೃ॑ದ್ಧಮೇ॒ವ ತತ್ ॥ 2 ॥

ಅನಾ᳚ಗ್ನೇಯಂ॒-ವಾಁ ಏ॒ತ-ತ್ಕ್ರಿ॑ಯತೇ । ಯ-ಥ್ಸ॒ಮಿಧ॒-ಸ್ತನೂ॒ನಪಾ॑ತಮಿ॒ಡೋ ಬ॒ರ್॒ಹಿ-ರ್ಯ॑ಜತಿ ॥ ಉ॒ಭಾವಾ᳚ಗ್ನೇ॒ಯಾ-ವಾಜ್ಯ॑ಭಾಗೌ ಸ್ಯಾತಾಮ್ ॥ ಅನಾ᳚ಜ್ಯಭಾಗೌ-ಭವತ॒ ಇತ್ಯಾ॑ಹುಃ । ಯದು॒ಭಾವಾ᳚ಗ್ನೇ॒ಯಾವ॒ನ್ವಞ್ಚಾ॒ವಿತಿ॑ । ಅ॒ಗ್ನಯೇ॒ ಪವ॑ಮಾನಾ॒ಯೋತ್ತ॑ರ-ಸ್ಸ್ಯಾತ್ । ಯ-ತ್ಪವ॑ಮಾನಾಯ । ತೇನಾಜ್ಯ॑ ಭಾಗಃ । ತೇನ॑ ಸೌ॒ಮ್ಯಃ ॥ ಬುಧ॑ನ್ವತ್ಯಾಗ್ನೇ॒ಯ-ಸ್ಯಾಜ್ಯ॑-ಭಾಗಸ್ಯ ಪುರೋ-ಽನುವಾ॒ಕ್ಯಾ॑ ಭವತಿ ॥ 3 ॥

ಯಥಾ॑ ಸು॒ಪ್ತ-ಮ್ಬೋ॒ಧಯ॑ತಿ । ತಾ॒ದೃಗೇ॒ವ ತತ್ ॥ ಅ॒ಗ್ನಿನ್ಯ॑ಕ್ತಾಃ ಪತ್ನೀ ಸಂಯಾಁ॒ಜಾನಾ॒ಮೃಚಃ॑ ಸ್ಯುಃ । ತೇನಾ᳚ಗ್ನೇ॒ಯಗ್ಂ ಸರ್ವ॑-ಮ್ಭವತಿ ॥ ಏ॒ಕ॒ಧಾ ತೇ॑ಜ॒ಸ್ವಿನೀ᳚-ನ್ದೇ॒ವತಾ॒-ಮುಪೈ॒ತೀತ್ಯಾ॑ಹುಃ । ಸೈನ॑ಮೀಶ್ವ॒ರಾ ಪ್ರ॒ದಹ॒ ಇತಿ॑ ॥ ನೇತಿ॑ ಬ್ರೂಯಾತ್ । ಪ್ರ॒ಜನ॑ನಂ॒-ವಾಁ ಅ॒ಗ್ನಿಃ । ಪ್ರ॒ಜನ॑ನ-ಮೇ॒ವೋಪೈ॒ತೀತಿ॑ ॥ ಕೃ॒ತಯ॑ಜು॒-ಸ್ಸಮ್ಭೃ॑ತ ಸಮ್ಭಾರ॒ ಇತ್ಯಾ॑ಹುಃ ॥ 4 ॥

ನ ಸ॒ಭೃನ್ತ್ಯಾ᳚-ಸ್ಸಮ್ಭಾ॒ರಾಃ । ನ ಯಜುಃ॑ ಕಾ॒ರ್ಯ॑ಮಿತಿ॑ ॥ ಅಥೋ॒ ಖಲು॑ । ಸ॒ಭೃನ್ತ್ಯಾ॑ ಏ॒ವ ಸ॑ಭಾಂ॒ರಾಃ । ಕಾ॒ರ್ಯಂ॑-ಯಁಜುಃ॑ । ಪು॒ನ॒ರಾ॒ಧೇಯ॑ಸ್ಯ॒ ಸಮೃ॑ದ್ಧ್ಯೈ ॥ ತೇನೋ॑ಪಾ॒ಗ್ಂ॒ಶು ಪ್ರಚ॑ರತಿ । ಏಷ್ಯ॑ ಇವ॒ ವಾ ಏ॒ಷಃ । ಯ-ತ್ಪು॑ನ-ರಾ॒ಧೇಯಃ॑ । ಯಥೋ॑ಪಾ॒ಗ್ಂ॒ಶು ನ॒ಷ್ಟಮಿ॒ಚ್ಛತಿ॑ ॥ 5 ॥

ತಾ॒ದೃಗೇ॒ವ ತತ್ ॥ ಉ॒ಚ್ಚೈ-ಸ್ಸ್ವಿ॑ಷ್ಟ॒ಕೃತ॒ಮು-ಥ್ಸೃ॑ಜತಿ । ಯಥಾ॑ ನ॒ಷ್ಟಂ-ವಿಁ॒ತ್ವಾ ಪ್ರಾಹಾ॒ಯಮಿತಿ॑ । ತಾ॒ದೃಗೇ॒ವ ತತ್ ॥ ಏ॒ಕ॒ಧಾ ತೇ॑ಜ॒ಸ್ವಿನೀ᳚-ನ್ದೇ॒ವತಾ॒ಮುಪೈ॒ತೀತ್ಯಾ॑ಹುಃ । ಸೈನ॑ಮೀಶ್ವ॒ರಾ ಪ್ರ॒ದಹ॒ ಇತಿ॑ । ತತ್ತಥಾ॒ ನೋಪೈ॑ತಿ । ಪ್ರ॒ಯಾ॒ಜಾ॒ನೂ॒ಯಾ॒ಜೇಷ್ವೇ॒ವ ವಿಭ॑ಕ್ತೀಃ ಕುರ್ಯಾತ್ । ಯ॒ಥಾ॒ಪೂ॒ರ್ವ-ಮಾಜ್ಯ॑ಭಾಗೌ॒ ಸ್ಯಾತಾ᳚ಮ್ । ಏ॒ವ-ಮ್ಪ॑ತ್ನೀ ಸಂಯಾಁ॒ಜಾಃ ॥ 6 ॥

ತ-ದ್ವೈ᳚ಶ್ವಾನ॒ರವ॑ತ್-ಪ್ರ॒ಜನ॑ನವತ್ತರ॒-ಮುಪೈ॒ತೀತಿ॑ ॥ ತದಾ॑ಹುಃ । ವ್ಯೃ॑ದ್ಧಂ॒-ವಾಁ ಏ॒ತತ್ । ಅನಾ᳚ಗ್ನೇಯಂ॒-ವಾಁ ಏ॒ತ-ತ್ಕ್ರಿ॑ಯತ॒ ಇತಿ॑ ॥ ನೇತಿ॑ ಬ್ರೂಯಾತ್ । ಅ॒ಗ್ನಿ-ಮ್ಪ್ರ॑ಥ॒ಮಂ-ವಿಁಭ॑ಕ್ತೀನಾಂ-ಯಁಜತಿ । ಅ॒ಗ್ನಿಮು॑ತ್ತ॒ಮ-ಮ್ಪ॑ತ್ನೀ ಸಂಯಾಁ॒ಜಾನಾ᳚ಮ್ । ತೇನಾ᳚ಗ್ನೇ॒ಯಮ್ । ತೇನ॒ ಸಮೃ॑ದ್ಧ-ಙ್ಕ್ರಿಯತ॒ ಇತಿ॑ ॥ 7 ॥

(ಅ॒ರು॒ನ್ಧ॒ - ತೈ॒ವ ತ-ದ್- ಭ॑ವತಿ॒ - ಸಮ್ಭೃ॑ತಸಮ್ಭಾರ॒ ಇತ್ಯಾ॑ಹು - ರಿ॒ಚ್ಛತಿ॑ - ಪತ್ನೀಸಂಯಾಁ॒ಜಾ - +ನವ॑ ಚ) ( ಆ1)

ಅನುವಾಕಂ 2 - ವಾಜಪೇಯಸ್ಯ ವಿಧಿಃ

ದೇ॒ವಾ ವೈ ಯಥಾ॒ದರ್ಶಂ॑-ಯಁ॒ಜ್ಞಾನಾಹ॑ರನ್ತ । ಯೋ᳚-ಽಗ್ನಿಷ್ಟೋ॒ಮಮ್ । ಯ ಉ॒ಕ್ಥ್ಯ᳚ಮ್ । ಯೋ॑-ಽತಿರಾ॒ತ್ರಮ್ । ತೇ ಸ॒ಹೈವ ಸರ್ವೇ॑ ವಾಜ॒ಪೇಯ॑-ಮಪಶ್ಯನ್ನ್ । ತೇ । ಅ॒ನ್ಯೋ᳚ನ್ಯಸ್ಮೈ॒ ನಾತಿ॑ಷ್ಠನ್ತ । ಅ॒ಹಮ॒ನೇನ॑ ಯಜಾ॒ ಇತಿ॑ । ತೇ᳚-ಽಬ್ರುವನ್ನ್ । ಆ॒ಜಿಮ॒ಸ್ಯ ಧಾ॑ವಾ॒ಮೇತಿ॑ ॥ 8 ॥

ತಸ್ಮಿ॑-ನ್ನಾ॒ಜಿಮ॑ಧಾವನ್ನ್ । ತ-ಮ್ಬೃಹ॒ಸ್ಪತಿ॒-ರುದ॑ಜಯತ್ । ತೇನಾ॑ಯಜತ । ಸ ಸ್ವಾರಾ᳚ಜ್ಯ-ಮಗಚ್ಛತ್ । ತಮಿನ್ದ್ರೋ᳚-ಽಬ್ರವೀತ್ । ಮಾಮ॒ನೇನ॑ ಯಾಜ॒ಯೇತಿ॑ । ತೇನೇನ್ದ್ರ॑-ಮಯಾಜಯತ್ । ಸೋ-ಽಗ್ರ॑-ನ್ದೇ॒ವತಾ॑ನಾ॒-ಮ್ಪರ್ಯೈ᳚ತ್ । ಅಗ॑ಚ್ಛ॒-ಥ್ಸ್ವಾರಾ᳚ಜ್ಯಮ್ । ಅತಿ॑ಷ್ಠನ್ತಾಸ್ಮೈ॒ ಜ್ಯೈಷ್ಠ್ಯಾ॑ಯ ॥ 9 ॥

ಯ ಏ॒ವಂ-ವಿಁ॒ದ್ವಾನ್. ವಾ॑ಜ॒ಪೇಯೇ॑ನ॒ ಯಜ॑ತೇ । ಗಚ್ಛ॑ತಿ॒ ಸ್ವಾರಾ᳚ಜ್ಯಮ್ । ಅಗ್ರಗ್ಂ॑ ಸಮಾ॒ನಾನಾ॒-ಮ್ಪರ್ಯೇ॑ತಿ । ತಿಷ್ಠ॑ನ್ತೇ-ಽಸ್ಮೈ॒ ಜ್ಯೈಷ್ಠ್ಯಾ॑ಯ ॥ ಸ ವಾ ಏ॒ಷ ಬ್ರಾ᳚ಹ್ಮ॒ಣಸ್ಯ॑ ಚೈ॒ವ ರಾ॑ಜ॒ನ್ಯ॑ಸ್ಯ ಚ ಯ॒ಜ್ಞಃ ॥ ತಂ-ವಾಁ ಏ॒ತಂ-ವಾಁ॑ಜ॒ಪೇಯ॒ ಇತ್ಯಾ॑ಹುಃ । ವಾ॒ಜಾಪ್ಯೋ॒ ವಾ ಏ॒ಷಃ । ವಾಜ॒ಗ್ಗ್॒ ಹ್ಯೇ॑ತೇನ॑ ದೇ॒ವಾ ಐಫ್ಸನ್ನ್॑ ॥ ಸೋಮೋ॒ ವೈ ವಾ॑ಜ॒ಪೇಯಃ॑ । ಯೋ ವೈ ಸೋಮಂ॑-ವಾಁಜ॒ಪೇಯಂ॒-ವೇಁದ॑ ॥ 10 ॥

ವಾ॒ಜ್ಯೇ॑ವೈನ॑-ಮ್ಪೀ॒ತ್ವಾ ಭ॑ವತಿ । ಆ-ಽಸ್ಯ॑ ವಾ॒ಜೀ ಜಾ॑ಯತೇ ॥ ಅನ್ನಂ॒-ವೈಁ ವಾ॑ಜ॒ಪೇಯಃ॑ । ಯ ಏ॒ವಂ-ವೇಁದ॑ । ಅತ್ತ್ಯನ್ನ᳚ಮ್ । ಆ-ಽಸ್ಯಾ᳚ನ್ನಾ॒ದೋ ಜಾ॑ಯತೇ ॥ ಬ್ರಹ್ಮ॒ ವೈ ವಾ॑ಜ॒ಪೇಯಃ॑ । ಯ ಏ॒ವಂ-ವೇಁದ॑ । ಅತ್ತಿ॒ ಬ್ರಹ್ಮ॒ಣಾ-ಽನ್ನ᳚ಮ್ । ಆ-ಽಸ್ಯ॑ ಬ್ರ॒ಹ್ಮಾ ಜಾ॑ಯತೇ ॥ 11 ॥

ವಾಗ್ವೈ ವಾಜ॑ಸ್ಯ ಪ್ರಸ॒ವಃ । ಯ ಏ॒ವಂ-ವೇಁದ॑ । ಕ॒ರೋತಿ॑ ವಾ॒ಚಾ ವೀ॒ರ್ಯ᳚ಮ್ । ಐನಂ॑-ವಾಁ॒ಚಾ ಗ॑ಚ್ಛತಿ । ಅಪಿ॑ವತೀಂ॒-ವಾಁಚಂ॑-ವಁದತಿ ॥ ಪ್ರ॒ಜಾಪ॑ತಿ-ರ್ದೇ॒ವೇಭ್ಯೋ॑ ಯ॒ಜ್ಞಾನ್ ವ್ಯಾದಿ॑ಶತ್ । ಸ ಆ॒ತ್ಮನ್ ವಾ॑ಜ॒ಪೇಯ॑-ಮಧತ್ತ । ತ-ನ್ದೇ॒ವಾ ಅ॑ಬ್ರುವನ್ನ್ । ಏ॒ಷ ವಾವ ಯ॒ಜ್ಞಃ । ಯ-ದ್ವಾ॑ಜ॒ಪೇಯಃ॑ ॥ 12 ॥

ಅಪ್ಯೇ॒ವ ನೋ-ಽತ್ರಾ॒ಸ್ತ್ವಿತಿ॑ । ತೇಭ್ಯ॑ ಏ॒ತಾ ಉಜ್ಜಿ॑ತೀಃ॒ ಪ್ರಾಯ॑ಚ್ಛತ್ ॥ ತಾ ವಾ ಏ॒ತಾ ಉಜ್ಜಿ॑ತಯೋ॒ ವ್ಯಾಖ್ಯಾ॑ಯನ್ತೇ । ಯ॒ಜ್ಞಸ್ಯ॑ ಸರ್ವ॒ತ್ವಾಯ॑ । ದೇ॒ವತಾ॑ನಾ॒-ಮನಿ॑ರ್ಭಾಗಾಯ ॥ ದೇ॒ವಾ ವೈ ಬ್ರಹ್ಮ॑ಣ॒ಶ್ಚಾನ್ನ॑ಸ್ಯ ಚ॒ ಶಮ॑ಲ॒ಮಪಾ᳚ಘ್ನನ್ನ್ । ಯ-ದ್ಬ್ರಹ್ಮ॑ಣ॒-ಶ್ಶಮ॑ಲ॒ಮಾಸೀ᳚ತ್ । ಸಾ ಗಾಥಾ॑ ನಾರಾಶ॒ಗ್ಗ್॒ಸ್ಯ॑ ಭವತ್ । ಯದನ್ನ॑ಸ್ಯ । ಸಾ ಸುರಾ᳚ ॥ 13 ॥

ತಸ್ಮಾ॒-ದ್ಗಾಯ॑ತಶ್ಚ ಮ॒ತ್ತಸ್ಯ॑ ಚ॒ ನ ಪ್ರ॑ತಿ॒ಗೃಹ್ಯ᳚ಮ್ । ಯ-ತ್ಪ್ರ॑ತಿಗೃಹ್ಣೀ॒ಯಾತ್ । ಶಮ॑ಲ॒-ಮ್ಪ್ರತಿ॑ಗೃಹ್ಣೀಯಾತ್ ॥ ಸರ್ವಾ॒ ವಾ ಏ॒ತಸ್ಯ॒ ವಾಚೋ ಽವ॑ರುದ್ಧಾಃ । ಯೋ ವಾ॑ಜಪೇಯಯಾ॒ಜೀ । ಯಾ ಪೃ॑ಥಿ॒ವ್ಯಾಂ-ಯಾಁ-ಽಗ್ನೌ ಯಾ ರ॑ಥನ್ತ॒ರೇ । ಯಾ-ಽನ್ತರಿ॑ಕ್ಷೇ॒ ಯಾ ವಾ॒ಯೌ ಯಾ ವಾ॑ಮದೇ॒ವ್ಯೇ । ಯಾ ದಿ॒ವಿ ಯಾ-ಽಽದಿ॒ತ್ಯೇ ಯಾ ಬೃ॑ಹ॒ತಿ । ಯಾ-ಽಫ್ಸು ಯೌಷ॑ಧೀಷು॒ ಯಾ ವನ॒ಸ್ಪತಿ॑ಷು ॥ ತಸ್ಮಾ᳚-ದ್ವಾಜಪೇಯಯಾ॒ಜ್ಯಾರ್ತ್ವಿ॑ಜೀನಃ । ಸರ್ವಾ॒ ಹ್ಯ॑ಸ್ಯ॒ ವಾಚೋ ಽವ॑ರುದ್ಧಾಃ ॥ 14 ॥

(ಧಾ॒ವಾ॒ಮೇತಿ॒ - ಜ್ಯೈಷ್ಠ್ಯಾ॑ಯ॒ - ವೇದ॑ - ಬ್ರ॒ಹ್ಮಾ ಜಾ॑ಯತೇ-ವಾಜ॒ಪೇಯಃ॒-ಸುರಾ-ಽಽರ್ತ್ವಿ॑ಜೀನ॒ ಏಕಂ॑ ಚ ) (ಅ. 2)

ಅನುವಾಕಂ 3 - ತಸ್ಯಗ್ರಹವಿಶೇಷಾಃ

ದೇ॒ವಾ ವೈ ಯದ॒ನ್ಯೈ-ರ್ಗ್ರಹೈ᳚-ರ್ಯ॒ಜ್ಞಸ್ಯ॒ ನಾವಾರು॑ನ್ಧತ । ತದ॑ತಿಗ್ರಾ॒ಹ್ಯೈ॑-ರತಿ॒ಗೃಹ್ಯಾ-ವಾ॑ರುನ್ಧತ । ತದ॑ತಿಗ್ರಾ॒ಹ್ಯಾ॑ಣಾ-ಮತಿಗ್ರಾಹ್ಯ॒ತ್ವಮ್ ॥ ಯದ॑ತಿಗ್ರಾ॒ಹ್ಯಾ॑ ಗೃ॒ಹ್ಯನ್ತೇ᳚ । ಯದೇ॒ವಾನ್ಯೈ-ರ್ಗ್ರಹೈ᳚-ರ್ಯ॒ಜ್ಞಸ್ಯ॒ ನಾವ॑ರು॒ನ್ಧೇ । ತದೇ॒ವ ತೈರ॑ತಿ॒ಗೃಹ್ಯಾ-ವ॑ರುನ್ಧೇ ॥ ಪಞ್ಚ॑ ಗೃಹ್ಯನ್ತೇ । ಪಾಙ್ಕ್ತೋ॑ ಯ॒ಜ್ಞಃ । ಯಾವಾ॑ನೇ॒ವ ಯ॒ಜ್ಞಃ । ತಮಾ॒ಪ್ತ್ವಾ ಽವ॑ರುನ್ಧೇ ॥ 15 ॥

ಸರ್ವ॑ ಐ॒ನ್ದ್ರಾ ಭ॑ವನ್ತಿ । ಏ॒ಕ॒ಧೈವ ಯಜ॑ಮಾನ ಇನ್ದ್ರಿ॒ಯ-ನ್ದ॑ಧತಿ ॥ ಸ॒ಪ್ತದ॑ಶ ಪ್ರಾಜಾಪ॒ತ್ಯಾ ಗ್ರಹಾ॑ ಗೃಹ್ಯನ್ತೇ । ಸ॒ಪ್ತ॒ದ॒ಶಃ ಪ್ರ॒ಜಾಪ॑ತಿಃ । ಪ್ರ॒ಜಾಪ॑ತೇ॒-ರಾಪ್ತ್ಯೈ᳚ ॥ ಏಕ॑ಯ॒ರ್ಚಾ ಗೃ॑ಹ್ಣಾತಿ । ಏ॒ಕ॒ಧೈವ ಯಜ॑ಮಾನೇ ವೀ॒ರ್ಯ॑-ನ್ದಧಾತಿ ॥ ಸೋ॒ಮ॒ಗ್ರ॒ಹಾಗ್ಶ್ಚ॑ ಸುರಾಗ್ರ॒ಹಾಗ್ಶ್ಚ॑ ಗೃಹ್ಣಾತಿ । ಏ॒ತ-ದ್ವೈ ದೇ॒ವಾನಾ᳚-ಮ್ಪರ॒ಮಮನ್ನ᳚ಮ್ । ಯ-ಥ್ಸೋಮಃ॑ ॥ 16 ॥

ಏ॒ತ-ನ್ಮ॑ನು॒ಷ್ಯಾ॑ಣಾಮ್ । ಯ-ಥ್ಸುರಾ᳚ । ಪ॒ರ॒ಮೇಣೈ॒ವಾಸ್ಮಾ॑ ಅ॒ನ್ನಾದ್ಯೇ॒ನಾವ॑ರ-ಮ॒ನ್ನಾದ್ಯ॒-ಮವ॑ರುನ್ಧೇ ॥ ಸೋ॒ಮ॒ಗ್ರ॒ಹಾ-ನ್ಗೃ॑ಹ್ಣಾತಿ । ಬ್ರಹ್ಮ॑ಣೋ॒ ವಾ ಏ॒ತ-ತ್ತೇಜಃ॑ । ಯ-ಥ್ಸೋಮಃ॑ । ಬ್ರಹ್ಮ॑ಣ ಏ॒ವ ತೇಜ॑ಸಾ॒ ತೇಜೋ॒ ಯಜ॑ಮಾನೇ ದಧಾತಿ । ಸು॒ರಾ॒ಗ್ರ॒ಹಾ-ನ್ಗೃ॑ಹ್ಣಾತಿ । ಅನ್ನ॑ಸ್ಯ॒ ವಾ ಏ॒ತಚ್ಛಮ॑ಲಮ್ । ಯ-ಥ್ಸುರಾ᳚ ॥ 17 ॥

ಅನ್ನ॑ಸ್ಯೈ॒ವ ಶಮ॑ಲೇನ॒ ಶಮ॑ಲಂ॒-ಯಁಜ॑ಮಾನಾ॒-ದಪ॑ಹನ್ತಿ ॥ ಸೋ॒ಮ॒ಗ್ರ॒ಹಾಗ್ಶ್ಚ॑ ಸುರಾಗ್ರ॒ಹಾಗ್ಶ್ಚ॑ ಗೃಹ್ಣಾತಿ । ಪುಮಾ॒ನ್॒. ವೈ ಸೋಮಃ॑ । ಸ್ತ್ರೀ ಸುರಾ᳚ । ತ-ನ್ಮಿ॑ಥು॒ನಮ್ । ಮಿ॒ಥು॒ನಮೇ॒ವಾಸ್ಯ॒ ತ-ದ್ಯ॒ಜ್ಞೇ ಕ॑ರೋತಿ ಪ್ರ॒ಜನ॑ನಾಯ । ಆ॒ತ್ಮಾನ॑ಮೇ॒ವ ಸೋ॑ಮಗ್ರ॒ಹೈ-ಸ್ಸ್ಪೃ॑ಣೋತಿ । ಜಾ॒ಯಾಗ್ಂ ಸು॑ರಾ ಗ್ರ॒ಹೈಃ । ತಸ್ಮಾ᳚-ದ್ವಾಜಪೇಯಯಾ॒ಜ್ಯ॑ಮುಷ್ಮಿ॑ಁಲ್ಲೋ॒ಕೇ ಸ್ತ್ರಿಯ॒ಗ್ಂ॒ ಸಮ್ಭ॑ವತಿ । ವಾ॒ಜ॒ಪೇಯಾ॑-ಭಿಜಿತ॒ಗ್ಗ್॒ ಹ್ಯ॑ಸ್ಯ ॥ 18 ॥

ಪೂರ್ವೇ॑ ಸೋಮಗ್ರ॒ಹಾ ಗೃ॑ಹ್ಯನ್ತೇ । ಅಪ॑ರೇ ಸುರಾಗ್ರ॒ಹಾಃ । ಪು॒ರೋ॒ಕ್ಷಗ್ಂ ಸೋ॑ಮಗ್ರ॒ಹಾನ್ಥ್- ಸಾ॑ದಯತಿ । ಪ॒ಶ್ಚಾ॒ದ॒ಕ್ಷಗ್ಂ ಸು॑ರಾಗ್ರ॒ಹಾನ್ । ಪಾ॒ಪ॒ವ॒ಸ್ಯ॒ಸಸ್ಯ॒ ವಿಧೃ॑ತ್ಯೈ ॥ ಏ॒ಷ ವೈ ಯಜ॑ಮಾನಃ । ಯ-ಥ್ಸೋಮಃ॑ । ಅನ್ನ॒ಗ್ಂ॒ ಸುರಾ᳚ । ಸೋ॒ಮ॒ಗ್ರ॒ಹಾಗ್ಶ್ಚ॑ ಸುರಾಗ್ರ॒ಹಾಗ್ಶ್ಚ॒ ವ್ಯತಿ॑ಷಜತಿ । ಅ॒ನ್ನಾದ್ಯೇ॑ನೈ॒ವೈನಂ॒-ವ್ಯಁತಿ॑ಷಜತಿ ॥ 19 ॥

ಸ॒ಪೃಞ್ಚಃ॑ ಸ್ಥ॒ ಸ-ಮ್ಮಾ॑ ಭ॒ದ್ರೇಣ॑ ಪೃ॒ಙ್ಕ್ತೇತ್ಯಾ॑ಹ । ಅನ್ನಂ॒-ವೈಁ ಭ॒ದ್ರಮ್ । ಅ॒ನ್ನಾದ್ಯೇ॑ನೈ॒ವೈನ॒ಗ್ಂ॒ ಸಗ್ಂಸೃ॑ಜತಿ ॥ ಅನ್ನ॑ಸ್ಯ॒ ವಾ ಏ॒ತಚ್ಛಮ॑ಲಮ್ । ಯ-ಥ್ಸುರಾ᳚ । ಪಾ॒ಪ್ಮೆವ॒ ಖಲು॒ ವೈ ಶಮ॑ಲಮ್ । ಪಾ॒ಪ್ಮನಾ॒ ವಾ ಏ॑ನಮೇ॒ತಚ್ಛಮ॑ಲೇನ॒ ವ್ಯತಿ॑ಷಜತಿ । ಯ-ಥ್ಸೋ॑ಮಗ್ರ॒ಹಾಗ್ಶ್ಚ॑ ಸುರಾಗ್ರ॒ಹಾಗ್ಶ್ಚ॑ ವ್ಯತಿ॒ಷಜ॑ತಿ ॥ ವಿ॒ಪೃಚಃ॑ ಸ್ಥ॒ ವಿ ಮಾ॑ ಪಾ॒ಪ್ಮನಾ॑ ಪೃ॒ಙ್ಕ್ತೇತ್ಯಾ॑ಹ । ಪಾ॒ಪ್ಮನೈ॒ವೈನ॒ಗ್ಂ॒ ಶಮ॑ಲೇನ॒ ವ್ಯಾವ॑ರ್ತಯತಿ ॥ 20 ॥

ತಸ್ಮಾ᳚-ದ್ವಾಜಪೇಯಯಾ॒ಜೀ ಪೂ॒ತೋ ಮೇದ್ಧ್ಯೋ॑ ದಕ್ಷಿ॒ಣ್ಯಃ॑ ॥ ಪ್ರಾಂಉ-ದ್ದ್ರ॑ವತಿ ಸೋಮಗ್ರ॒ಹೈಃ । ಅ॒ಮುಮೇ॒ವ ತೈ-ರ್ಲೋ॒ಕ-ಮ॒ಭಿಜ॑ಯತಿ । ಪ್ರ॒ತ್ಯಙ್ಖ್ಸು॑ರಾ ಗ್ರ॒ಹೈಃ । ಇ॒ಮಮೇ॒ವ ತೈ-ರ್ಲೋ॒ಕ-ಮ॒ಭಿಜ॑ಯತಿ ॥ ಪ್ರತಿ॑ಷ್ಠನ್ತಿ ಸೋಮಗ್ರ॒ಹೈಃ । ಯಾವ॑ದೇ॒ವ ಸ॒ತ್ಯಮ್ । ತೇನ॑ ಸೂಯತೇ ॥ ವಾ॒ಜ॒ಸೃದ್ಭ್ಯಃ॑ ಸುರಾಗ್ರ॒ಹಾನ್. ಹ॑ರನ್ತಿ । ಅನೃ॑ತೇನೈ॒ವ ವಿಶ॒ಗ್ಂ॒ ಸಗ್ಂಸೃ॑ಜತಿ ॥ ಹಿ॒ರ॒ಣ್ಯ॒ಪಾ॒ತ್ರ-ಮ್ಮಧೋಃ᳚ ಪೂ॒ರ್ಣ-ನ್ದ॑ದಾತಿ । ಮ॒ಧ॒ವ್ಯೋ॑-ಽಸಾ॒ನೀತಿ॑ ॥ ಏ॒ಕ॒ಧಾ ಬ್ರ॒ಹ್ಮಣ॒ ಉಪ॑ ಹರತಿ । ಏ॒ಕ॒ಧೈವ ಯಜ॑ಮಾನ॒ ಆಯು॒ಸ್ತೇಜೋ॑ ದಧಾತಿ ॥ 21 ॥

(ಆ॒ಪ್ತ್ವಾ-ಽವ॑ರುನ್ಧೇ॒ - ಸೋಮಃ॒ - ಶಮ॑ಲಂ॒-ಯಁ-ಥ್ಸುರಾ॒ - ಹ್ಯ॑-ಸ್ಯೈನಂ॒-ವ್ಯಁತಿ॑ಷಜತಿ॒ - ವ್ಯಾವ॑ರ್ತಯತಿ - ಸೃಜತಿ ಚ॒ತ್ವಾರಿ॑ ಚ ) (ಅ. 3)

ಅನುವಾಕಂ 4 - ಪಶವ-ಸ್ಸಪ್ತದಶ

ಬ್ರ॒ಹ್ಮ॒ವಾ॒ದಿನೋ॑ ವದನ್ತಿ । ನಾಗ್ನಿ॑ಷ್ಟೋ॒ಮೋ ನೋಕ್ಥ್ಯಃ॑ । ನ ಷೋ॑ಡ॒ಶೀ ನಾತಿ॑ರಾ॒ತ್ರಃ । ಅಥ॒ ಕಸ್ಮಾ᳚-ದ್ವಾಜ॒ಪೇಯೇ॒ ಸರ್ವೇ॑ ಯಜ್ಞಕ್ರ॒ತವೋ-ಽವ॑ರುದ್ಧ್ಯನ್ತ॒ ಇತಿ॑ । ಪ॒ಶುಭಿ॒ರಿತಿ॑ ಬ್ರೂಯಾತ್ ॥ ಆ॒ಗ್ನೇ॒ಯ-ಮ್ಪ॒ಶುಮಾಲ॑ಭತೇ । ಅ॒ಗ್ನಿ॒ಷ್ಟೋ॒ಮಮೇ॒ವ ತೇನಾವ॑ರುನ್ಧೇ । ಐ॒ನ್ದ್ರಾ॒ಗ್ನೇನೋ॒ಕ್ಥ್ಯ᳚ಮ್ । ಐ॒ನ್ದ್ರೇಣ॑ ಷೋಡ॒ಶಿನಃ॑ ಸ್ತೋ॒ತ್ರಮ್ । ಸಾ॒ರ॒ಸ್ವ॒ತ್ಯಾ-ಽತಿ॑ರಾ॒ತ್ರಮ್ ॥ 22 ॥

ಮಾ॒ರು॒ತ್ಯಾ ಬೃ॑ಹ॒ತ-ಸ್ಸ್ತೋ॒ತ್ರಮ್ । ಏ॒ತಾವ॑ನ್ತೋ॒ ವೈ ಯ॑ಜ್ಞಕ್ರ॒ತವಃ॑ । ತಾ-ನ್ಪ॒ಶುಭಿ॑ರೇ॒ವಾ-ವ॑ರುನ್ಧೇ ॥ ಆ॒ತ್ಮಾನ॑ಮೇ॒ವ ಸ್ಪೃ॑ಣೋ-ತ್ಯಗ್ನಿಷ್ಟೋ॒ಮೇನ॑ । ಪ್ರಾ॒ಣಾ॒ಪಾ॒ನಾ-ವು॒ಕ್ಥ್ಯೇ॑ನ । ವೀ॒ರ್ಯಗ್ಂ॑ ಷೋಡ॒ಶಿನಃ॑ ಸ್ತೋ॒ತ್ರೇಣ॑ । ವಾಚ॑-ಮತಿರಾ॒ತ್ರೇಣ॑ । ಪ್ರ॒ಜಾ-ಮ್ಬೃ॑ಹ॒ತ-ಸ್ಸ್ತೋ॒ತ್ರೇಣ॑ । ಇ॒ಮಮೇ॒ವ ಲೋ॒ಕಮ॒ಭಿ ಜ॑ಯತ್ಯಗ್ನಿಷ್ಟೋ॒ಮೇನ॑ । ಅ॒ನ್ತರಿ॑ಕ್ಷ-ಮು॒ಕ್ಥ್ಯೇ॑ನ ॥ 23 ॥

ಸು॒ವ॒ರ್ಗಂ-ಲೋಁ॒ಕಗ್ಂ ಷೋ॑ಡ॒ಶಿನಃ॑ ಸ್ತೋ॒ತ್ರೇಣ॑ । ದೇ॒ವ॒ಯಾನಾ॑ನೇ॒ವ ಪ॒ಥ ಆರೋ॑ಹ-ತ್ಯತಿರಾ॒ತ್ರೇಣ॑ । ನಾಕಗ್ಂ॑ ರೋಹತಿ ಬೃಹ॒ತ-ಸ್ಸ್ತೋ॒ತ್ರೇಣ॑ । ತೇಜ॑ ಏ॒ವಾತ್ಮ-ನ್ಧ॑ತ್ತ ಆಗ್ನೇ॒ಯೇನ॑ ಪ॒ಶುನಾ᳚ । ಓಜೋ॒ ಬಲ॑ಮೈನ್ದ್ರಾ॒ಗ್ನೇನ॑ । ಇ॒ನ್ದ್ರಿ॒ಯ-ಮೈ॒ನ್ದ್ರೇಣ॑ । ವಾಚಗ್ಂ॑ ಸಾರಸ್ವ॒ತ್ಯಾ । ಉ॒ಭಾವೇ॒ವ ದೇ॑ವಲೋ॒ಕ-ಞ್ಚ॑ ಮನುಷ್ಯಲೋ॒ಕ-ಞ್ಚಾ॒ಭಿಜ॑ಯತಿ ಮಾರು॒ತ್ಯಾ ವ॒ಶಯಾ᳚ ॥ ಸ॒ಪ್ತದ॑ಶ ಪ್ರಾಜಾಪ॒ತ್ಯಾ-ನ್ಪ॒ಶೂನಾಲ॑ಭತೇ । ಸ॒ಪ್ತ॒ದ॒ಶಃ ಪ್ರ॒ಜಾಪ॑ತಿಃ ॥ 24 ॥

ಪ್ರ॒ಜಾಪ॑ತೇ॒ರಾಪ್ತ್ಯೈ᳚ ॥ ಶ್ಯಾ॒ಮಾ ಏಕ॑ರೂಪಾ ಭವನ್ತಿ । ಏ॒ವಮಿ॑ವ॒ ಹಿ ಪ್ರ॒ಜಾಪ॑ತಿ॒-ಸ್ಸಮೃ॑ದ್ಧ್ಯೈ ॥ ತಾ-ನ್ಪರ್ಯ॑ಗ್ನಿಕೃತಾ॒-ನುಥ್ಸೃ॑ಜತಿ ॥ ಮ॒ರುತೋ॑ ಯ॒ಜ್ಞಮ॑ಜಿಘಾಗ್ಂಸ-ನ್ಪ್ರ॒ಜಾಪ॑ತೇಃ । ತೇಭ್ಯ॑ ಏ॒ತಾ-ಮ್ಮಾ॑ರು॒ತೀಂ-ವಁ॒ಶಾಮಾಲ॑ಭತ । ತಯೈ॒ವೈನಾ॑-ನಶಮಯತ್ ॥ ಮಾ॒ರು॒ತ್ಯಾ ಪ್ರ॒ಚರ್ಯ॑ । ಏ॒ತಾನ್-ಥ್ಸಞ್ಜ್ಞ॑ಪಯೇತ್ । ಮ॒ರುತ॑ ಏ॒ವ ಶ॑ಮಯಿ॒ತ್ವಾ ॥ 25 ॥

ಏ॒ತೈಃ ಪ್ರಚ॑ರತಿ । ಯ॒ಜ್ಞಸ್ಯಾಘಾ॑ತಾಯ ॥ ಏ॒ಕ॒ಧಾ ವ॒ಪಾ ಜು॑ಹೋತಿ । ಏ॒ಕ॒ದೇ॒ವ॒ತ್ಯಾ॑ ಹಿ । ಏ॒ತೇ । ಅಥೋ॑ ಏಕ॒ಧೈವ ಯಜ॑ಮಾನೇ ವೀ॒ರ್ಯ॑-ನ್ದಧಾತಿ ॥ ನೈ॒ವಾ॒ರೇಣ॑ ಸ॒ಪ್ತದ॑ಶಶರಾವೇ-ಣೈ॒ತರ್ಹಿ॒ ಪ್ರಚ॑ರತಿ । ಏ॒ತ-ತ್ಪು॑ರೋಡಾಶಾ॒ ಹ್ಯೇ॑ತೇ । ಅಥೋ॑ ಪಶೂ॒ನಾಮೇ॒ವ ಛಿ॒ದ್ರಮಪಿ॑ದಧಾತಿ ॥ ಸಾ॒ರ॒ಸ್ವ॒ತ್ಯೋತ್ತ॒ಮಯಾ॒ ಪ್ರಚ॑ರತಿ । ವಾಗ್ ವೈ ಸರ॑ಸ್ವತೀ । ತಸ್ಮಾ᳚-ತ್ಪ್ರಾ॒ಣಾನಾಂ॒-ವಾಁಗು॑ತ್ತ॒ಮಾ । ಅಥೋ᳚ ಪ್ರ॒ಜಾಪ॑ತಾವೇ॒ವ ಯ॒ಜ್ಞ-ಮ್ಪ್ರತಿ॑ಷ್ಠಾಪಯತಿ । ಪ್ರ॒ಜಾಪ॑ತಿ॒ರ್॒ ಹಿ ವಾಕ್ ॥ ಅಪ॑ನ್ನದತೀ ಭವತಿ । ತಸ್ಮಾ᳚-ನ್ಮನು॒ಷ್ಯಾ᳚-ಸ್ಸರ್ವಾಂ॒-ವಾಁಚಂ॑-ವಁದನ್ತಿ ॥ 26 ॥

(ಅ॒ತಿ॒ರಾ॒ತ್ರ - ಮ॒ನ್ತರಿ॑ಕ್ಷಮು॒ಕ್ಥ್ಯೇ॑ನ - ಪ್ರ॒ಜಾಪ॑ತಿಃ - ಶಮಯಿ॒ತ್ವೋತ್ - ತ॒ಮಯಾ॒ ಪ್ರಚ॑ರತಿ॒ ಷಟ್ ಚ॑) (ಅ. 4)

ಅನುವಾಕಂ 5 - ರಥಯಾಜನಮ್

ಸಾ॒ವಿ॒ತ್ರ-ಞ್ಜು॑ಹೋತಿ॒ ಕರ್ಮ॑ಣಃ ಕರ್ಮಣಃ ಪು॒ರಸ್ತಾ᳚ತ್ ॥ ಕಸ್ತ-ದ್ವೇ॒ದೇತ್ಯಾ॑ಹುಃ । ಯ-ದ್ವಾ॑ಜ॒ಪೇಯ॑ಸ್ಯ॒ ಪೂರ್ವಂ॒-ಯಁದಪ॑ರ॒ಮಿತಿ॑ । ಸ॒ವಿ॒ತೃಪ್ರ॑ಸೂತ ಏ॒ವ ಯ॑ಥಾಪೂ॒ರ್ವ-ಙ್ಕರ್ಮಾ॑ಣಿ ಕರೋತಿ ॥ ಸವ॑ನೇ ಸವನೇ ಜುಹೋತಿ । ಆ॒ಕ್ರಮ॑ಣಮೇ॒ವ ತ-ಥ್ಸೇತುಂ॒-ಯಁಜ॑ಮಾನಃ ಕುರುತೇ । ಸು॒ವ॒ರ್ಗಸ್ಯ॑ ಲೋ॒ಕಸ್ಯ॒ ಸಮ॑ಷ್ಟ್ಯೈ ॥ ವಾ॒ಚಸ್ಪತಿ॒-ರ್ವಾಚ॑ಮ॒ದ್ಯ ಸ್ವ॑ದಾತಿ ನ॒ ಇತ್ಯಾ॑ಹ । ವಾಗ್ವೈ ದೇ॒ವಾನಾ᳚-ಮ್ಪು॒ರಾ-ಽನ್ನ॑ಮಾಸೀತ್ । ವಾಚ॑ಮೇ॒ವಾಸ್ಮಾ॒ ಅನ್ನಗ್ಗ್॑ ಸ್ವದಯತಿ ॥ 27 ॥

ಇನ್ದ್ರ॑ಸ್ಯ॒ ವಜ್ರೋ॑-ಽಸಿ॒ ವಾರ್ತ್ರ॑ಘ್ನ॒ ಇತಿ॒ ರಥ॑ಮು॒ಪಾವ॑ಹರತಿ॒ ವಿಜಿ॑ತ್ಯೈ ॥ ವಾಜ॑ಸ್ಯ॒ ನು ಪ್ರ॑ಸ॒ವೇ ಮಾ॒ತರ॑-ಮ್ಮ॒ಹೀಮಿತ್ಯಾ॑ಹ । ಯಚ್ಚೈ॒ವೇಯಮ್ । ಯಚ್ಚಾ॒ಸ್ಯಾಮಧಿ॑ । ತದೇ॒ವಾ-ವ॑ರುನ್ಧೇ । ಅಥೋ॒ ತಸ್ಮಿ॑ನ್ನೇ॒ವೋಭಯೇ॒-ಽಭಿಷಿ॑ಚ್ಯತೇ ॥ ಅ॒ಫ್ಸ್ವ॑ನ್ತರ॒-ಮೃತ॑ಮ॒ಫ್ಸು ಭೇ॑ಷ॒ಜಮಿತ್ಯಶ್ವಾ᳚-ನ್ಪಲ್ಪೂಲಯತಿ । ಅ॒ಫ್ಸು ವಾ ಅಶ್ವ॑ಸ್ಯ॒ ತೃತೀ॑ಯ॒-ಮ್ಪ್ರವಿ॑ಷ್ಟಮ್ । ತದ॑ನು॒ವೇನ॒ನ್ವವ॑ಪ್ಲವತೇ । ಯದ॒ಫ್ಸು ಪ॑ಲ್ಪೂ॒ಲಯ॑ತಿ ॥ 28 ॥

ಯದೇ॒ವಾಸ್ಯಾ॒ಫ್ಸು ಪ್ರವಿ॑ಷ್ಟಮ್ । ತದೇ॒ವಾವ॑ರುನ್ಧೇ ॥ ಬ॒ಹು ವಾ ಅಶ್ವೋ॑-ಽಮೇ॒ದ್ಧ್ಯ-ಮುಪ॑ಗಚ್ಛತಿ । ಯದ॒ಫ್ಸು ಪ॑ಲ್ಪೂ॒ಲಯ॑ತಿ । ಮೇದ್ಧ್ಯಾ॑ನೇ॒ವೈನಾ᳚ನ್ ಕರೋತಿ ॥ ವಾ॒ಯುರ್ವಾ᳚ ತ್ವಾ॒ ಮನು॑ರ್ವಾ॒ ತ್ವೇತ್ಯಾ॑ಹ । ಏ॒ತಾ ವಾ ಏ॒ತ-ನ್ದೇ॒ವತಾ॒ ಅಗ್ರೇ॒ ಅಶ್ವ॑ಮಯುಞ್ಜನ್ನ್ । ತಾಭಿ॑ರೇ॒ವೈನಾನ್॑. ಯುನಕ್ತಿ । ಸ॒ವಸ್ಯೋಜ್ಜಿ॑ತ್ಯೈ ॥ ಯಜು॑ಷಾ ಯುನಕ್ತಿ॒ ವ್ಯಾವೃ॑ತ್ತ್ಯೈ ॥ 29 ॥

ಅಪಾ᳚-ನ್ನ ಪಾದಾಶುಹೇಮ॒ನ್ನಿತಿ॒ ಸಮ್ಮಾ᳚ರ್ಷ್ಟಿ । ಮೇದ್ಧ್ಯಾ॑ನೇ॒ವೈನಾ᳚ನ್ ಕರೋತಿ । ಅಥೋ॒ ಸ್ತೌತ್ಯೇ॒ವೈನಾ॑ನಾ॒ಜಿಗ್ಂ ಸ॑ರಿಷ್ಯ॒ತಃ ॥ ವಿ॒ಷ್ಣು॒ ಕ್ರ॒ಮಾನ್ ಕ್ರ॑ಮತೇ । ವಿಷ್ಣು॑ರೇ॒ವ ಭೂ॒ತ್ವೇಮಾಁಲ್ಲೋ॒ಕಾ-ನ॒ಭಿಜ॑ಯತಿ ॥ ವೈ॒ಶ್ವ॒ದೇ॒ವೋ ವೈ ರಥಃ॑ । ಅ॒ಙ್ಕೌ ನ್ಯ॒ಙ್ಕಾವ॒ಭಿತೋ॒ ರಥಂ॒-ಯಾಁವಿತ್ಯಾ॑ಹ । ಯಾ ಏ॒ವ ದೇ॒ವತಾ॒ ರಥೇ॒ ಪ್ರವಿ॑ಷ್ಟಾಃ । ತಾಭ್ಯ॑ ಏ॒ವ ನಮ॑ಸ್ಕರೋತಿ । ಆ॒ತ್ಮನೋ-ಽನಾ᳚ರ್ತ್ಯೈ ॥ ಅಶ॑ಮರಥ-ಮ್ಭಾವುಕೋ-ಽಸ್ಯ॒ ರಥೋ॑ ಭವತಿ । ಯ ಏ॒ವಂ-ವೇಁದ॑ ॥ 30 ॥

(ಸ್ವ॒ದ॒ಯ॒ತಿ॒ - ಪ॒ಲ್ಪೂ॒ಲಯ॑ತಿ॒ - ವ್ಯಾವೃ॑ತ್ತ್ಯಾ॒ - ಅನಾ᳚ರ್ತ್ಯೈ॒ ದ್ವೇ ಚ॑) (ಅ. 5)

ಅನುವಾಕಂ 6 - ರಥಧಾವನಮ್

ದೇ॒ವಸ್ಯಾ॒ಹಗ್ಂ ಸ॑ವಿ॒ತುಃ ಪ್ರ॑ಸ॒ವೇ ಬೃಹ॒ಸ್ಪತಿ॑ನಾ ವಾಜ॒ಜಿತಾ॒ ವಾಜ॑-ಞ್ಜೇಷ॒ಮಿತ್ಯಾ॑ಹ । ಸ॒ವಿ॒ತೃಪ್ರ॑ಸೂತ ಏ॒ವ ಬ್ರಹ್ಮ॑ಣಾ॒ ವಾಜ॒ಮುಜ್ಜ॑ಯತಿ ॥ ದೇ॒ವಸ್ಯಾ॒ಹಗ್ಂ ಸ॑ವಿ॒ತುಃ ಪ್ರ॑ಸ॒ವೇ ಬೃಹ॒ಸ್ಪತಿ॑ನಾ ವಾಜ॒ಜಿತಾ॒ ವರ್ಷಿ॑ಷ್ಠ॒-ನ್ನಾಕಗ್ಂ॑ ರುಹೇಯ॒ಮಿತ್ಯಾ॑ಹ । ಸ॒ವಿ॒ತೃಪ್ರ॑ಸೂತ ಏ॒ವ ಬ್ರಹ್ಮ॑ಣಾ॒ ವರ್ಷಿ॑ಷ್ಠ॒-ನ್ನಾಕಗ್ಂ॑ ರೋಹತಿ ॥ ಚಾತ್ವಾ॑ಲೇ ರಥಚ॒ಕ್ರ-ನ್ನಿಮಿ॑ತಗ್ಂ ರೋಹತಿ । ಅತೋ॒ ವಾ ಅಙ್ಗಿ॑ರಸ ಉತ್ತ॒ಮಾ-ಸ್ಸು॑ವ॒ರ್ಗಂ-ಲೋಁ॒ಕಮಾ॑ಯನ್ನ್ । ಸಾ॒ಕ್ಷಾದೇ॒ವ ಯಜ॑ಮಾನ-ಸ್ಸುವ॒ರ್ಗಂ-ಲೋಁ॒ಕಮೇ॑ತಿ ॥ ಆವೇ᳚ಷ್ಟಯತಿ । ವಜ್ರೋ॒ ವೈ ರಥಃ॑ । ವಜ್ರೇ॑ಣೈ॒ವ ದಿಶೋ॒-ಽಭಿಜ॑ಯತಿ ॥ 31 ॥

ವಾ॒ಜಿನಾ॒ಗ್ಂ॒ ಸಾಮ॑ ಗಾಯತೇ । ಅನ್ನಂ॒-ವೈಁ ವಾಜಃ॑ । ಅನ್ನ॑ಮೇ॒-ವಾವ॑ರುನ್ಧೇ ॥ ವಾ॒ಚೋ ವರ್ಷ್ಮ॑ ದೇ॒ವೇಭ್ಯೋ-ಽಪಾ᳚ಕ್ರಾಮತ್ । ತ-ದ್ವನ॒ಸ್ಪತೀ॒-ನ್ಪ್ರಾವಿ॑ಶತ್ । ಸೈಷಾ ವಾಗ್-ವನ॒ಸ್ಪತಿ॑ಷು ವದತಿ । ಯಾ ದು॑ನ್ದು॒ಭೌ । ತಸ್ಮಾ᳚-ದ್ದುನ್ದು॒ಭಿ-ಸ್ಸರ್ವಾ॒ ವಾಚೋತಿ॑ ವದತಿ ॥ ದು॒ನ್ದು॒ಭೀನ್-ಥ್ಸ॒ಮಾಘ್ನ॑ನ್ತಿ । ಪ॒ರ॒ಮಾ ವಾ ಏ॒ಷಾ ವಾಕ್ ॥ 32 ॥

ಯಾ ದು॑ನ್ದು॒ಭೌ । ಪ॒ರ॒ಮಯೈ॒ವ ವಾ॒ಚಾ-ಽವ॑ರಾಂ॒-ವಾಁಚ॒ಮ-ವ॑ರುನ್ಧೇ । ಅಥೋ॑ ವಾ॒ಚ ಏ॒ವ ವರ್ಷ್ಮ॒ ಯಜ॑ಮಾ॒ನೋ ಽವ॑ರುನ್ಧೇ ॥ ಇನ್ದ್ರಾ॑ಯ॒ ವಾಚಂ॑-ವಁದ॒ತೇನ್ದ್ರಂ॒-ವಾಁಜ॑-ಞ್ಜಾಪಯ॒ತೇನ್ದ್ರೋ॒ ವಾಜ॑ಮಜಯಿ॒-ದಿತ್ಯಾ॑ಹ । ಏ॒ಷ ವಾ ಏ॒ತರ್ಹೀನ್ದ್ರಃ॑ । ಯೋ ಯಜ॑ತೇ । ಯಜ॑ಮಾನ ಏ॒ವ ವಾಜ॒ಮುಜ್ಜ॑ಯತಿ ॥ ಸ॒ಪ್ತದ॑ಶ ಪ್ರವ್ಯಾ॒ಧಾನಾ॒ಜಿ-ನ್ಧಾ॑ವನ್ತಿ । ಸ॒ಪ್ತ॒ದ॒ಶಗ್ಗ್ ಸ್ತೋ॒ತ್ರ-ಮ್ಭ॑ವತಿ । ಸ॒ಪ್ತದ॑ಶ ಸಪ್ತದಶ ದೀಯನ್ತೇ ॥ 33 ॥

ಸ॒ಪ್ತ॒ದ॒ಶಃ ಪ್ರ॒ಜಾಪ॑ತಿಃ । ಪ್ರ॒ಜಾಪ॑ತೇ॒-ರಾಪ್ತ್ಯೈ᳚ ॥ ಅರ್ವಾ॑-ಽಸಿ॒ ಸಪ್ತಿ॑ರಸಿ ವಾ॒ಜ್ಯ॑ಸೀತ್ಯಾ॑ಹ । ಅ॒ಗ್ನಿರ್ವಾ ಅರ್ವಾ᳚ । ವಾ॒ಯು-ಸ್ಸಪ್ತಿಃ॑ । ಆ॒ದಿ॒ತ್ಯೋ ವಾ॒ಜೀ । ಏ॒ತಾಭಿ॑ರೇ॒ವಾಸ್ಮೈ॑ ದೇ॒ವತಾ॑ಭಿ-ರ್ದೇವರ॒ಥಂ-ಯುಁ॑ನಕ್ತಿ ॥ ಪ್ರ॒ಷ್ಟಿ॒ವಾ॒ಹಿನಂ॑-ಯುಁನಕ್ತಿ । ಪ್ರ॒ಷ್ಟಿ॒ವಾ॒ಹೀ ವೈ ದೇ॑ವರ॒ಥಃ । ದೇ॒ವ॒ರ॒ಥಮೇ॒ವಾಸ್ಮೈ॑ ಯುನಕ್ತಿ ॥ 34 ॥

ವಾಜಿ॑ನೋ॒ ವಾಜ॑-ನ್ಧಾವತ॒ ಕಾಷ್ಠಾ᳚-ಙ್ಗಚ್ಛ॒ತೇತ್ಯಾ॑ಹ । ಸು॒ವ॒ರ್ಗೋ ವೈ ಲೋ॒ಕಃ ಕಾಷ್ಠಾ᳚ । ಸು॒ವ॒ರ್ಗಮೇ॒ವ ಲೋ॒ಕಂ-ಯಁ॑ನ್ತಿ ॥ ಸು॒ವ॒ರ್ಗಂ-ವಾಁ ಏ॒ತೇ ಲೋ॒ಕಂ-ಯಁ॑ನ್ತಿ । ಯ ಆ॒ಜಿ-ನ್ಧಾವ॑ನ್ತಿ ॥ ಪ್ರಾಞ್ಚೋ॑ ಧಾವನ್ತಿ । ಪ್ರಾಂಇ॑ವ॒ ಹಿ ಸು॑ವ॒ರ್ಗೋ ಲೋ॒ಕಃ ॥ ಚ॒ತ॒ಸೃಭಿ॒ರನು॑ ಮನ್ತ್ರಯತೇ । ಚ॒ತ್ವಾರಿ॒ ಛನ್ದಾಗ್ಂ॑ಸಿ । ಛನ್ದೋ॑ಭಿರೇ॒ವೈನಾ᳚ನ್-ಥ್ಸುವ॒ರ್ಗಂ-ಲೋಁ॒ಕ-ಙ್ಗ॑ಮಯತಿ ॥ 35 ॥

ಪ್ರ ವಾ ಏ॒ತೇ᳚-ಽಸ್ಮಾಲ್-ಲೋ॒ಕಾಚ್ಚ್ಯ॑ವನ್ತೇ । ಯ ಆ॒ಜಿ-ನ್ಧಾವ॑ನ್ತಿ । ಉದ॑ಞ್ಚ॒ ಆವ॑ರ್ತನ್ತೇ । ಅ॒ಸ್ಮಾದೇ॒ವ ತೇನ॑ ಲೋ॒ಕಾನ್ನಯ॑ನ್ತಿ ॥ ರ॒ಥ॒ವಿ॒ಮೋ॒ಚ॒ನೀಯ॑-ಞ್ಜುಹೋತಿ॒ ಪ್ರತಿ॑ಷ್ಠಿತ್ಯೈ ॥ ಆ ಮಾ॒ ವಾಜ॑ಸ್ಯ ಪ್ರಸ॒ವೋ ಜ॑ಗಮ್ಯಾ॒ದಿತ್ಯಾ॑ಹ । ಅನ್ನಂ॒-ವೈಁ ವಾಜಃ॑ । ಅನ್ನ॑ಮೇ॒ವಾವ॑ರುನ್ಧೇ ॥ ಯ॒ಥಾ॒ಲೋ॒ಕಂ-ವಾಁ ಏ॒ತ ಉಜ್ಜ॑ಯನ್ತಿ । ಯ ಆ॒ಜಿ-ನ್ಧಾವ॑ನ್ತಿ ॥ 36 ॥

ಕೃ॒ಷ್ಣಲ॑-ಙ್ಕೃಷ್ಣಲಂ-ವಾಁಜ॒ಸೃದ್ಭ್ಯಃ॒ ಪ್ರಯ॑ಚ್ಛತಿ । ಯಮೇ॒ವ ತೇ ವಾಜಂ॑-ಲೋಁ॒ಕಮು॒ಜ್ಜಯ॑ನ್ತಿ । ತ-ಮ್ಪ॑ರಿ॒ಕ್ರೀಯಾ-ವ॑ರುನ್ಧೇ ॥ ಏ॒ಕ॒ಧಾ ಬ್ರ॒ಹ್ಮಣ॒ ಉಪ॑ಹರತಿ । ಏ॒ಕ॒ಧೈವ ಯಜ॑ಮಾನೇ ವೀ॒ರ್ಯ॑-ನ್ದಧಾತಿ ॥ ದೇ॒ವಾ ವಾ ಓಷ॑ಧೀಷ್ವಾ॒ಜಿಮ॑ಯುಃ । ತಾ ಬೃಹ॒ಸ್ಪತಿ॒-ರುದ॑ಜಯತ್ । ಸ ನೀ॒ವಾರಾ॒ನ್ನಿರ॑ವೃಣೀತ । ತನ್ನೀ॒ವಾರಾ॑ಣಾ-ನ್ನೀವಾರ॒ತ್ವಮ್ ॥ ನೈ॒ವಾ॒ರಶ್ಚ॒ರು-ರ್ಭ॑ವತಿ ॥ 37 ॥

ಏ॒ತದ್ವೈ ದೇ॒ವಾನಾ᳚-ಮ್ಪರ॒ಮಮನ್ನ᳚ಮ್ । ಯನ್ನೀ॒ವಾರಾಃ᳚ । ಪ॒ರ॒ಮೇಣೈ॒ವಾಸ್ಮಾ॑ ಅ॒ನ್ನಾದ್ಯೇ॒-ನಾವ॑ರ-ಮ॒ನ್ನಾದ್ಯ॒ಮವ॑ರುನ್ಧೇ ॥ ಸ॒ಪ್ತದ॑ಶಶರಾವೋ ಭವತಿ । ಸ॒ಪ್ತ॒ದ॒ಶಃ ಪ್ರ॒ಜಾಪ॑ತಿಃ । ಪ್ರ॒ಜಾಪ॑ತೇ॒-ರಾಪ್ತ್ಯೈ᳚ ॥ ಕ್ಷೀ॒ರೇ ಭ॑ವತಿ । ರುಚ॑ಮೇ॒ವಾಸ್ಮಿ॑ನ್-ದಧಾತಿ ॥ ಸ॒ರ್ಪಿಷ್ವಾ᳚-ನ್ಭವತಿ ಮೇದ್ಧ್ಯ॒ತ್ವಾಯ॑ ॥ ಬಾ॒ರ್॒ಹ॒ಸ್ಪ॒ತ್ಯೋ ವಾ ಏ॒ಷ ದೇ॒ವತ॑ಯಾ ॥ 38 ॥

ಯೋ ವಾ॑ಜ॒ಪೇಯೇ॑ನ॒ ಯಜ॑ತೇ । ಬಾ॒ರ್॒ಹ॒ಸ್ಪ॒ತ್ಯ ಏ॒ಷ ಚ॒ರುಃ ॥ ಅಶ್ವಾ᳚ನ್-ಥ್ಸರಿಷ್ಯ॒ತ-ಸ್ಸ॒ಸ್ರುಷ॒ಶ್ಚಾವ॑-ಘ್ರಾಪಯತಿ । ಯಮೇ॒ವ ತೇ ವಾಜಂ॑-ಲೋಁ॒ಕಮು॒ಜ್ಜಯ॑ನ್ತಿ । ತಮೇ॒ವಾವ॑ರುನ್ಧೇ ॥ ಅಜೀ॑ಜಿಪತ ವನಸ್ಪತಯ॒ ಇನ್ದ್ರಂ॒-ವಾಁಜಂ॒-ವಿಁಮು॑ಚ್ಯದ್ಧ್ವ॒ಮಿತಿ॑ ದುನ್ದು॒ಭೀನ್. ವಿಮು॑ಞ್ಚತಿ । ಯಮೇ॒ವ ತೇ ವಾಜಂ॑-ಲೋಁ॒ಕಮಿ॑ನ್ದ್ರಿ॒ಯ-ನ್ದು॑ನ್ದು॒ಭಯ॑ ಉ॒ಜ್ಜಯ॑ನ್ತಿ । ತಮೇ॒ವಾ-ವ॑ರುನ್ಧೇ ॥ 39 ॥

(ಅ॒ಭಿಜ॑ಯತಿ॒ - ವಾ ಏ॒ಷಾ ವಾಗ್ - ದೀ॑ಯನ್ತೇ - ಽಸ್ಮೈ ಯುನಕ್ತಿ - ಗಮಯತಿ॒ - ಯ ಆ॒ಜಿ-ನ್ಧಾವ॑ನ್ತಿ - ಭವತಿ - ದೇ॒ವತ॑ಯಾ॒ - +-ಽಷ್ಟೌ ಚ॑) (ಅ. 6)

ಅನುವಾಕಂ 7 - ಯೂಪಾರೋಹಣಮ್

ತಾ॒ರ್ಪ್ಯಂ-ಯಁಜ॑ಮಾನ॒-ಮ್ಪರಿ॑ಧಾಪಯತಿ । ಯ॒ಜ್ಞೋ ವೈ ತಾ॒ರ್ಪ್ಯಮ್ । ಯ॒ಜ್ಞೇನೈ॒ವೈನ॒ಗ್ಂ॒ ಸಮ॑ರ್ಧಯತಿ । ದ॒ರ್ಭ॒ಮಯ॒-ಮ್ಪರಿ॑ಧಾಪಯತಿ । ಪ॒ವಿತ್ರಂ॒-ವೈಁ ದ॒ರ್ಭಾಃ । ಪು॒ನಾತ್ಯೇ॒ವೈನ᳚ಮ್ । ವಾಜಂ॒-ವಾಁ ಏ॒ಷೋ-ಽವ॑ರುರುಥ್ಸತೇ । ಯೋ ವಾ॑ಜ॒ಪೇಯೇ॑ನ॒ ಯಜ॑ತೇ । ಓಷ॑ಧಯಃ॒ ಖಲು॒ ವೈ ವಾಜಃ॑ । ಯ-ದ್ದ॑ರ್ಭ॒ಮಯ॑-ಮ್ಪರಿಧಾ॒ಪಯ॑ತಿ ॥ 40 ॥

ವಾಜ॒ಸ್ಯಾವ॑-ರುದ್ಧ್ಯೈ ॥ ಜಾಯ॒ ಏಹಿ॒ ಸುವೋ॒ ರೋಹಾ॒ವೇತ್ಯಾ॑ಹ । ಪತ್ನಿ॑ಯಾ ಏ॒ವೈಷ ಯ॒ಜ್ಞಸ್ಯಾ᳚ನ್-ವಾರ॒ಮ್ಭೋ-ಽನ॑ವಚ್ಛಿತ್ಯೈ ॥ ಸ॒ಪ್ತದ॑ಶಾ-ರತ್ನಿ॒ರ್ಯೂಪೋ॑ ಭವತಿ । ಸ॒ಪ್ತ॒ದ॒ಶಃ ಪ್ರ॒ಜಾಪ॑ತಿಃ । ಪ್ರ॒ಜಾಪ॑ತೇ॒ರಾಪ್ತ್ಯೈ᳚ ॥ ತೂ॒ಪ॒ರ-ಶ್ಚತು॑ರಶ್ರಿ-ರ್ಭವತಿ ॥ ಗೌ॒ಧೂ॒ಮ-ಞ್ಚ॒ಷಾಲ᳚ಮ್ । ನ ವಾ ಏ॒ತೇ ವ್ರೀ॒ಹಯೋ॒ ನ ಯವಾಃ᳚ । ಯ-ದ್ಗೋ॒ಧೂಮಾಃ᳚ ॥ 41 ॥

ಏ॒ವಮಿ॑ವ॒ ಹಿ ಪ್ರ॒ಜಾಪ॑ತಿ॒-ಸ್ಸಮೃ॑ದ್ಧ್ಯೈ । ಅಥೋ॑ ಅ॒ಮುಮೇ॒ವಾಸ್ಮೈ॑ ಲೋ॒ಕಮನ್ನ॑ವನ್ತ-ಙ್ಕರೋತಿ ॥ ವಾಸೋ॑ಭಿ-ರ್ವೇಷ್ಟಯತಿ । ಏ॒ಷ ವೈ ಯಜ॑ಮಾನಃ । ಯದ್ಯೂಪಃ॑ । ಸ॒ರ್ವ॒ದೇ॒ವ॒ತ್ಯಂ॑-ವಾಁಸಃ॑ । ಸರ್ವಾ॑ಭಿರೇ॒ವೈನ॑-ನ್ದೇ॒ವತಾ॑ಭಿ॒-ಸ್ಸಮ॑ರ್ಧಯತಿ । ಅಥೋ॑ ಆ॒ಕ್ರಮ॑ಣಮೇ॒ವ ತಥ್ಸೇತುಂ॒-ಯಁಜ॑ಮಾನಃ ಕುರುತೇ । ಸು॒ವ॒ರ್ಗಸ್ಯ॑ ಲೋ॒ಕಸ್ಯ॒ ಸಮ॑ಷ್ಟ್ಯೈ ॥ ದ್ವಾದ॑ಶ ವಾಜಪ್ರಸ॒ವೀಯಾ॑ನಿ ಜುಹೋತಿ ॥ 42 ॥

ದ್ವಾದ॑ಶ॒ ಮಾಸಾ᳚-ಸ್ಸಂವಁಥ್ಸ॒ರಃ । ಸಂ॒ವಁ॒ಥ್ಸ॒ರಮೇ॒ವ ಪ್ರೀ॑ಣಾತಿ । ಅಥೋ॑ ಸಂವಁಥ್ಸ॒ರಮೇ॒ವಾಸ್ಮಾ॒ ಉಪ॑ ದಧಾತಿ । ಸು॒ವ॒ರ್ಗಸ್ಯ॑ ಲೋ॒ಕಸ್ಯ॒ ಸಮ॑ಷ್ಟ್ಯೈ ॥ ದ॒ಶಭಿಃ॒ ಕಲ್ಪೈ॑ ರೋಹತಿ । ನವ॒ ವೈ ಪುರು॑ಷೇ ಪ್ರಾ॒ಣಾಃ । ನಾಭಿ॑ರ್ದಶ॒ಮೀ । ಪ್ರಾ॒ಣಾನೇ॒ವ ಯ॑ಥಾಸ್ಥಾ॒ನ-ಙ್ಕ॑ಲ್ಪಯಿ॒ತ್ವಾ । ಸು॒ವ॒ರ್ಗಂ-ಲೋಁ॒ಕಮೇ॑ತಿ । ಏ॒ತಾವ॒ದ್ವೈ ಪುರು॑ಷಸ್ಯ॒ ಸ್ವಮ್ ॥ 43 ॥

ಯಾವ॑ತ್-ಪ್ರಾ॒ಣಾಃ । ಯಾವ॑ದೇ॒ವಾಸ್ಯಾಸ್ತಿ॑ । ತೇನ॑ ಸ॒ಹ ಸು॑ವ॒ರ್ಗಂ-ಲೋಁ॒ಕಮೇ॑ತಿ ॥ ಸುವ॑ರ್ದೇ॒ವಾಗ್ಂ ಅ॑ಗ॒ನ್ಮೇತ್ಯಾ॑ಹ । ಸು॒ವ॒ರ್ಗಮೇ॒ವ ಲೋ॒ಕಮೇ॑ತಿ । ಅ॒ಮೃತಾ॑ ಅಭೂ॒ಮೇತ್ಯಾ॑ಹ । ಅ॒ಮೃತ॑ಮಿವ॒ ಹಿ ಸು॑ವ॒ರ್ಗೋ ಲೋ॒ಕಃ । ಪ್ರ॒ಜಾಪ॑ತೇಃ ಪ್ರ॒ಜಾ ಅ॑ಭೂ॒ಮೇತ್ಯಾ॑ಹ । ಪ್ರಾ॒ಜಾ॒ಪ॒ತ್ಯೋ ವಾ ಅ॒ಯಂ-ಲೋಁ॒ಕಃ । ಅ॒ಸ್ಮಾದೇ॒ವ ತೇನ॑ ಲೋ॒ಕಾನ್ನೈತಿ॑ ॥ 44 ॥

ಸಮ॒ಹ-ಮ್ಪ್ರ॒ಜಯಾ॒ ಸ-ಮ್ಮಯಾ᳚ ಪ್ರ॒ಜೇತ್ಯಾ॑ಹ । ಆ॒ಶಿಷ॑ಮೇ॒ವೈತಾ-ಮಾಶಾ᳚ಸ್ತೇ ॥ ಆ॒ಸ॒ಪು॒ಟೈ-ರ್ಘ್ನ॑ನ್ತಿ । ಅನ್ನಂ॒-ವಾಁ ಇ॒ಯಮ್ । ಅ॒ನ್ನಾದ್ಯೇ॑ನೈ॒ವೈನ॒ಗ್ಂ॒ ಸಮ॑ರ್ಧಯನ್ತಿ । ಊಷೈ᳚-ರ್ಘ್ನನ್ತಿ । ಏ॒ತೇ ಹಿ ಸಾ॒ಕ್ಷಾದನ್ನ᳚ಮ್ । ಯದೂಷಾಃ᳚ । ಸಾ॒ಕ್ಷಾದೇ॒ವೈನ॑-ಮ॒ನ್ನಾದ್ಯೇ॑ನ॒ ಸಮ॑ರ್ಧಯನ್ತಿ ॥ ಪು॒ರಸ್ತಾ᳚ತ್-ಪ್ರ॒ತ್ಯಞ್ಚ᳚-ಙ್ಘ್ನನ್ತಿ ॥ 45 ॥

ಪು॒ರಸ್ತಾ॒ದ್ಧಿ ಪ್ರ॑ತೀ॒ಚೀನ॒-ಮನ್ನ॑ಮ॒ದ್ಯತೇ᳚ ॥ ಶೀ॒ರ್॒ಷ॒ತೋ ಘ್ನ॑ನ್ತಿ । ಶೀ॒ರ್॒ಷ॒ತೋ ಹ್ಯನ್ನ॑ಮ॒ದ್ಯತೇ᳚ ॥ ದಿ॒ಗ್ಭ್ಯೋ ಘ್ನ॑ನ್ತಿ । ದಿ॒ಗ್ಭ್ಯ ಏ॒ವಾಸ್ಮಾ॑ ಅ॒ನ್ನಾದ್ಯ॒-ಮವ॑ರುನ್ಧತೇ ॥ ಈ॒ಶ್ವ॒ರೋ ವಾ ಏ॒ಷ ಪರಾಂ᳚-ಪ್ರ॒ದಘಃ॑ । ಯೋ ಯೂಪ॒ಗ್ಂ॒ ರೋಹ॑ತಿ ॥ ಹಿರ॑ಣ್ಯಮ॒ದ್ಧ್ಯ-ವ॑ರೋಹತಿ । ಅ॒ಮೃತಂ॒-ವೈಁ ಹಿರ॑ಣ್ಯಮ್ । ಅ॒ಮೃತಗ್ಂ॑ ಸುವ॒ರ್ಗೋ ಲೋ॒ಕಃ ॥ 46 ॥

ಅ॒ಮೃತ॑ ಏ॒ವ ಸು॑ವ॒ರ್ಗೇ ಲೋ॒ಕೇ ಪ್ರತಿ॑ ತಿಷ್ಠತಿ ॥ ಶ॒ತಮಾ॑ನ-ಮ್ಭವತಿ । ಶ॒ತಾಯುಃ॒ ಪುರು॑ಷ-ಶ್ಶ॒ತೇನ್ದ್ರಿ॑ಯಃ । ಆಯು॑ಷ್ಯೇ॒ವೇನ್ದ್ರಿ॒ಯೇ ಪ್ರತಿ॑ ತಿಷ್ಠತಿ ॥ ಪುಷ್ಟ್ಯೈ॒ ವಾ ಏ॒ತ-ದ್ರೂ॒ಪಮ್ । ಯದ॒ಜಾ । ತ್ರಿ-ಸ್ಸಂ॑ವಁಥ್ಸ॒ರಸ್ಯಾ॒ನ್ಯಾನ್-ಪ॒ಶೂ-ನ್ಪರಿ॒ ಪ್ರಜಾ॑ಯತೇ ॥ ಬ॒ಸ್ತಾ॒ಜಿ॒ನ-ಮ॒ದ್ಧ್ಯವ॑ ರೋಹತಿ । ಪುಷ್ಟ್ಯಾ॑ಮೇ॒ವ ಪ್ರ॒ಜನ॑ನೇ॒ ಪ್ರತಿ॑ತಿಷ್ಠತಿ ॥ 47 ॥

(ಪ॒ರಿ॒ಧಾ॒ಪಯ॑ತಿ - ಗೋ॒ಧೂಮಾ॑ - ಜುಹೋತಿ॒ - ಸ್ವಂ - ನೈತಿ॑ - ಪ್ರ॒ತ್ಯಞ್ಜ॑-ಙ್ಘ್ನನ್ತಿ - ಲೋ॒ಕೋ - +ನವ॑ ಚ (ಅ. 7)

ಅನುವಾಕಂ 8 - ಅನ್ನಹೋಮಾಃ, ಅಭಿಷೇಕಶ್ಚ

ಸ॒ಪ್ತಾನ್ನ॑-ಹೋ॒ಮಾಞ್ಜು॑ಹೋತಿ । ಸ॒ಪ್ತ ವಾ ಅನ್ನಾ॑ನಿ । ಯಾವ॑ನ್ತ್ಯೇ॒ವಾನ್ನಾ॑ನಿ । ತಾನ್ಯೇ॒ವಾವ॑ರುನ್ಧೇ । ಸ॒ಪ್ತ ಗ್ರಾ॒ಮ್ಯಾ ಓಷ॑ಧಯಃ । ಸ॒ಪ್ತಾರ॒ಣ್ಯಾಃ । ಉ॒ಭಯೀ॑ಷಾ॒-ಮವ॑ರುದ್ಧ್ಯೈ ॥ ಅನ್ನ॑ಸ್ಯಾ-ನ್ನಸ್ಯ ಜುಹೋತಿ । ಅನ್ನ॑ಸ್ಯಾನ್ನ॒ಸ್ಯಾ-ವ॑ರುದ್ಧ್ಯೈ ॥ ಯ-ದ್ವಾ॑ಜಪೇಯಯಾ॒ಜ್ಯ-ನ॑ವರುದ್ಧಸ್ಯಾಶ್ಞೀ॒ಯಾತ್ ॥ 48 ॥

ಅವ॑ರುದ್ಧೇನ॒ ವ್ಯೃ॑ದ್ಧ್ಯೇತ । ಸರ್ವ॑ಸ್ಯ ಸಮವ॒ದಾಯ॑ ಜುಹೋತಿ । ಅನ॑ವರುದ್ಧ॒-ಸ್ಯಾವ॑ರುದ್ಧ್ಯೈ ॥ ಔದು॑ಮ್ಬರೇಣ ಸ್ರು॒ವೇಣ॑ ಜುಹೋತಿ । ಊರ್ಗ್ವಾ ಅನ್ನ॑-ಮುದು॒ಮ್ಬರಃ॑ । ಊ॒ರ್ಜ ಏ॒ವಾನ್ನಾದ್ಯ॒ಸ್ಯಾವ॑ರುದ್ಧ್ಯೈ ॥ ದೇ॒ವಸ್ಯ॑ ತ್ವಾ ಸವಿ॒ತುಃ ಪ್ರ॑ಸ॒ವ ಇತ್ಯಾ॑ಹ । ಸ॒ವಿ॒ತೃ ಪ್ರ॑ಸೂತ ಏ॒ವೈನ॒-ಮ್ಬ್ರಹ್ಮ॑ಣಾ ದೇ॒ವತಾ॑ಭಿ-ರ॒ಭಿಷಿ॑ಞ್ಚತಿ ॥ ಅನ್ನ॑ಸ್ಯಾನ್ನಸ್ಯಾ॒ಭಿಷಿ॑ಞ್ಚತಿ । ಅನ್ನ॑ಸ್ಯಾನ್ನ॒ಸ್ಯಾವ॑ರುದ್ಧ್ಯೈ ॥ 49 ॥

ಪು॒ರಸ್ತಾ᳚ತ್-ಪ್ರ॒ತ್ಯಞ್ಚ॑-ಮ॒ಭಿಷಿ॑ಞ್ಚತಿ । ಪು॒ರಸ್ತಾ॒ದ್ಧಿ-ಪ್ರ॑ತೀ॒ಚೀನ॒-ಮನ್ನ॑ಮ॒ದ್ಯತೇ᳚ । ಶೀ॒ರ್॒ಷ॒ತೋ॑-ಽಭಿಷಿ॑ಞ್ಚತಿ । ಶೀ॒ರ್॒ಷ॒ತೋ ಹ್ಯನ್ನ॑ಮ॒ದ್ಯತೇ᳚ ॥ ಆಮುಖಾ॑ದ॒ನ್ವವ॑ ಸ್ರಾವಯತಿ । ಮು॒ಖ॒ತ ಏ॒ವಾಸ್ಮಾ॑ ಅ॒ನ್ನಾದ್ಯ॑-ನ್ದಧಾತಿ ॥ ಅ॒ಗ್ನೇಸ್ತ್ವಾ॒ ಸಾಮ್ರಾ᳚ಜ್ಯೇನಾ॒ಭಿಷಿ॑ಞ್ಚಾ॒ಮೀತ್ಯಾ॑ಹ । ಏ॒ಷ ವಾ ಅ॒ಗ್ನೇ-ಸ್ಸ॒ವಃ । ತೇನೈ॒ವೈನ॑-ಮ॒ಭಿಷಿ॑ಞ್ಚತಿ । ಇನ್ದ್ರ॑ಸ್ಯ ತ್ವಾ॒ ಸಾಮ್ರಾ᳚ಜ್ಯೇನಾ॒ಭಿಷಿ॑ಞ್ಚಾ॒ಮೀತ್ಯಾ॑ಹ ॥ 50 ॥

ಇ॒ನ್ದ್ರಿ॒ಯ-ಮೇ॒ವಾಸ್ಮಿ॑-ನ್ನೇ॒ತೇನ॑ ದಧಾತಿ । ಬೃಹ॒ಸ್ಪತೇ᳚ಸ್ತ್ವಾ॒ ಸಾಮ್ರಾ᳚ಜ್ಯೇನಾ॒ಭಿಷಿ॑ಞ್ಚಾ॒-ಮೀತ್ಯಾ॑ಹ । ಬ್ರಹ್ಮ॒ ವೈ ದೇ॒ವಾನಾ॒-ಮ್ಬೃಹ॒ಸ್ಪತಿಃ॑ । ಬ್ರಹ್ಮ॑ಣೈ॒ವೈನ॑-ಮ॒ಭಿಷಿ॑ಞ್ಚತಿ ॥ ಸೋ॒ಮ॒ಗ್ರ॒ಹಾಗ್ಶ್ಚಾ॑-ವದಾನೀ॒ಯಾನಿ॑ ಚ॒ರ್ತ್ವಿಗ್ಭ್ಯ॒ ಉಪ॑ ಹರನ್ತಿ । ಅ॒ಮುಮೇ॒ವ ತೈ-ರ್ಲೋ॒ಕ-ಮನ್ನ॑ವನ್ತ-ಙ್ಕರೋತಿ । ಸು॒ರಾ॒ಗ್ರ॒ಹಾಗ್ಶ್ಚಾ॑-ನವದಾನೀ॒ಯಾನಿ॑ ಚ ವಾಜ॒ಸೃದ್ಭ್ಯಃ॑ । ಇ॒ಮಮೇ॒ವ ತೈ-ರ್ಲೋ॒ಕ-ಮನ್ನ॑ವನ್ತ-ಙ್ಕರೋತಿ । ಅಥೋ॑ ಉ॒ಭಯೀ᳚ಷ್ವೇ॒ವಾಭಿಷಿ॑ಚ್ಯತೇ ॥ ವಿ॒ಮಾ॒ಥ-ಙ್ಕು॑ರ್ವತೇ ವಾಜ॒ಸೃತಃ॑ ॥ 51 ॥

ಇ॒ನ್ದ್ರಿ॒ಯಸ್ಯಾವ॑ರುದ್ಧ್ಯೈ ॥ ಅನಿ॑ರುಕ್ತಾಭಿಃ ಪ್ರಾತಸ್ಸವ॒ನೇ ಸ್ತು॑ವತೇ । ಅನಿ॑ರುಕ್ತಃ ಪ್ರ॒ಜಾಪ॑ತಿಃ । ಪ್ರ॒ಜಾಪ॑ತೇ॒ರಾಪ್ತ್ಯೈ᳚ । ವಾಜ॑ವತೀಭಿ॒-ರ್ಮಾದ್ಧ್ಯ॑ನ್ದಿನೇ । ಅನ್ನಂ॒-ವೈಁ ವಾಜಃ॑ । ಅನ್ನ॑ಮೇ॒ವಾ-ವ॑ರುನ್ಧೇ । ಶಿ॒ಪಿ॒ವಿ॒ಷ್ಟವ॑ತೀಭಿ-ಸ್ತೃತೀಯಸವ॒ನೇ । ಯ॒ಜ್ಞೋ ವೈ ವಿಷ್ಣುಃ॑ । ಪ॒ಶವ॒-ಶ್ಶಿಪಿಃ॑ । ಯ॒ಜ್ಞ ಏ॒ವ ಪ॒ಶುಷು॒ ಪ್ರತಿ॑ ತಿಷ್ಠತಿ ॥ ಬೃ॒ಹದನ್ತ್ಯ॑-ಮ್ಭವತಿ । ಅನ್ತ॑ಮೇ॒ವೈನಗ್ಗ್॑ ಶ್ರಿ॒ಯೈ ಗ॑ಮಯತಿ ॥ 52 ॥

(ಅ॒ಶ್ಞೀ॒ಯಾ - ದನ್ನ॑ಸ್ಯಾನ್ನ॒ಸ್ಯಾ ವ॑ರುದ್ಧ್ಯಾ॒ - ಇನ್ದ್ರ॑ಸ್ಯ ತ್ವಾ॒ ಸಾಮ್ರಾ᳚ಜ್ಯೇನಾ॒ಭಿಷಿ॑ಞ್ಚಾ॒ ಮೀತ್ಯಾ॑ಹ-ವಾಜ॒ಸೃತಃ॒ - ಶಿಪಿ॒ ಸ್ತ್ರೀಣಿ॑ ಚ) (ಅ. 8)

ಅನುವಾಕಂ 9 - ಅತಿಗ್ರಾಹ್ಯಾಃ, ಪಞ್ಚೈನ್ದ್ರಾಃ

ನೃ॒ಷದ॒-ನ್ತ್ವೇತ್ಯಾ॑ಹ । ಪ್ರ॒ಜಾ ವೈ ನೄನ್ । ಪ್ರ॒ಜಾನಾ॑ಮೇ॒ವೈತೇನ॑ ಸೂಯತೇ । ದ್ರು॒ಷದ॒ಮಿತ್ಯಾ॑ಹ । ವನ॒ಸ್ಪತ॑ಯೋ॒ ವೈ ದ್ರು । ವನ॒ಸ್ಪತೀ॑ನಾಮೇ॒ವೈ ತೇನ॑ ಸೂಯತೇ । ಭು॒ವ॒ನ॒ಸದ॒-ಮಿತ್ಯಾ॑ಹ । ಯ॒ದಾ ವೈ ವಸೀ॑ಯಾ॒-ನ್ಭವ॑ತಿ । ಭುವ॑ನಮಗ॒ನ್ನಿತಿ॒ ವೈ ತಮಾ॑ಹುಃ । ಭುವ॑ನಮೇ॒ವೈತೇನ॑ ಗಚ್ಛತಿ ॥ 53 ॥

ಅ॒ಫ್ಸು॒ಷದ॑-ನ್ತ್ವಾ ಘೃತ॒ಸದ॒-ಮಿತ್ಯಾ॑ಹ । ಅ॒ಪಾಮೇ॒ವೈತೇನ॑ ಘೃ॒ತಸ್ಯ॑ ಸೂಯತೇ । ವ್ಯೋ॒ಮ॒ಸದ॒-ಮಿತ್ಯಾ॑ಹ । ಯ॒ದಾ ವೈ ವಸೀ॑ಯಾ॒-ನ್ಭವ॑ತಿ । ವ್ಯೋ॑ಮಾಗ॒ನ್ನಿತಿ॒ ವೈ ತಮಾ॑ಹುಃ । ವ್ಯೋ॑ಮೈ॒ವೈತೇನ॑ ಗಚ್ಛತಿ ॥ ಪೃ॒ಥಿ॒ವಿ॒ಷದ॑-ನ್ತ್ವಾ-ಽನ್ತರಿಕ್ಷ॒ಸದ॒-ಮಿತ್ಯಾ॑ಹ । ಏ॒ಷಾಮೇ॒ವೈತೇನ॑ ಲೋ॒ಕಾನಾಗ್ಂ॑ ಸೂಯತೇ । ತಸ್ಮಾ᳚-ದ್ವಾಜಪೇ-ಯಯಾ॒ಜೀ ನ ಕ-ಞ್ಚ॒ನ ಪ್ರ॒ತ್ಯವ॑ರೋಹತಿ । ಅಪೀ॑ವ॒ ಹಿ ದೇ॒ವತಾ॑ನಾಗ್ಂ ಸೂ॒ಯತೇ᳚ ॥ 54 ॥

ನಾ॒ಕ॒ಸದ॒-ಮಿತ್ಯಾ॑ಹ । ಯ॒ದಾವೈ ವಸೀ॑ಯಾ॒-ನ್ಭವ॑ತಿ । ನಾಕ॑ಮಗ॒ನ್ನಿತಿ॒ ವೈ ತಮಾ॑ಹುಃ । ನಾಕ॑ಮೇ॒ವೈತೇನ॑ ಗಚ್ಛತಿ ॥ ಯೇ ಗ್ರಹಾಃ᳚ ಪಞ್ಚಜ॒ನೀನಾ॒ ಇತ್ಯಾ॑ಹ । ಪ॒ಞ್ಚ॒ಜ॒ನಾನಾ॑-ಮೇ॒ವೈತೇನ॑ ಸೂಯತೇ ॥ ಅ॒ಪಾಗ್ಂ ರಸ॒ಮುದ್ವ॑ಯಸ॒-ಮಿತ್ಯಾ॑ಹ । ಅ॒ಪಾಮೇ॒ವೈತೇನ॒ ರಸ॑ಸ್ಯ ಸೂಯತೇ । ಸೂರ್ಯ॑ರಶ್ಮಿಗ್ಂ ಸ॒ಮಾಭೃ॑ತ॒-ಮಿತ್ಯಾ॑ಹ ಸಶುಕ್ರ॒ತ್ವಾಯ॑ ॥ 55 ॥

(ಗ॒ಚ್ಛ॒ತಿ॒ - ಸೂ॒ಯತೇ॒ - +ನವ॑ ಚ) (ಅ. 9)

ಅನುವಾಕಂ 10 - ಪಿಣ್ಡಪಿತೃಯಜ್ಞಃ ದರ್ಶಪೂರ್ಣಮಾಸಬ್ರಾಹ್ಮಣಶೇಷಃ

ಇನ್ದ್ರೋ ವೃ॒ತ್ರಗ್ಂ ಹ॒ತ್ವಾ । ಅಸು॑ರಾ-ನ್ಪರಾ॒ಭಾವ್ಯ॑ । ಸೋ॑-ಽಮಾವಾ॒ಸ್ಯಾ᳚-ಮ್ಪ್ರತ್ಯಾಗ॑ಚ್ಛತ್ । ತೇ ಪಿ॒ತರಃ॑ ಪೂರ್ವೇ॒ದ್ಯು-ರಾಗ॑ಚ್ಛನ್ನ್ । ಪಿ॒ತೄನ್. ಯ॒ಜ್ಞೋ॑-ಽಗಚ್ಛತ್ । ತ-ನ್ದೇ॒ವಾಃ ಪುನ॑ರಯಾಚನ್ತ । ತಮೇ᳚ಭ್ಯೋ॒ ನ ಪುನ॑ರದದುಃ । ತೇ᳚-ಽಬ್ರುವ॒ನ್ ವರಂ॑-ವೃಁಣಾಮಹೈ । ಅಥ॑ ವಃ॒ ಪುನ॑ರ್ದಾಸ್ಯಾಮಃ । ಅ॒ಸ್ಮಭ್ಯ॑ಮೇ॒ವ ಪೂ᳚ರ್ವೇ॒ದ್ಯುಃ ಕ್ರಿ॑ಯಾತಾ॒ ಇತಿ॑ ॥ 56 ॥

ತಮೇ᳚ಭ್ಯಃ॒ ಪುನ॑ರದದುಃ । ತಸ್ಮಾ᳚ತ್-ಪಿ॒ತೃಭ್ಯಃ॑ ಪೂರ್ವೇ॒ದ್ಯುಃ ಕ್ರಿ॑ಯತೇ । ಯ-ತ್ಪಿ॒ತೃಭ್ಯಃ॑ ಪೂರ್ವೇ॒ದ್ಯುಃ ಕ॒ರೋತಿ॑ । ಪಿ॒ತೃಭ್ಯ॑ ಏ॒ವ ತ-ದ್ಯ॒ಜ್ಞ-ನ್ನಿ॒ಷ್ಕ್ರೀಯ॒ ಯಜ॑ಮಾನಃ॒ ಪ್ರತ॑ನುತೇ ॥ ಸೋಮಾ॑ಯ ಪಿ॒ತೃಪೀ॑ತಾಯ ಸ್ವ॒ಧಾ ನಮ॒ ಇತ್ಯಾ॑ಹ । ಪಿ॒ತುರೇ॒ವಾಧಿ॑ ಸೋಮಪೀ॒ಥಮವ॑ ರುನ್ಧೇ । ನ ಹಿ ಪಿ॒ತಾ ಪ್ರ॒ಮೀಯ॑ಮಾಣ॒ ಆಹೈ॒ಷ ಸೋ॑ಮಪೀ॒ಥ ಇತಿ॑ । ಇ॒ನ್ದ್ರಿ॒ಯಂ-ವೈಁ ಸೋ॑ಮಪೀ॒ಥಃ । ಇ॒ನ್ದ್ರಿ॒ಯಮೇ॒ವ ಸೋ॑ಮಪೀ॒ಥಮವ॑-ರುನ್ಧೇ । ತೇನ᳚ನ್ದ್ರಿ॒ಯೇಣ॑ ದ್ವಿ॒ತೀಯಾ᳚-ಞ್ಜಾ॒ಯಾಮ॒ಭ್ಯ॑ಶ್ಞುತೇ ॥ 57 ॥

ಏ॒ತ-ದ್ವೈ ಬ್ರಾಹ್ಮ॑ಣ-ಮ್ಪು॒ರಾ ವಾ॑ಜಶ್ರವ॒ಸಾ ವಿ॒ದಾಮ॑ಕ್ರನ್ನ್ । ತಸ್ಮಾ॒-ತ್ತೇ ದ್ವೇದ್ವೇ॑ ಜಾ॒ಯೇ ಅ॒ಭ್ಯಾ᳚ಕ್ಷತ । ಯ ಏ॒ವಂ-ವೇಁದ॑ । ಅ॒ಭಿ ದ್ವಿ॒ತೀಯಾ᳚-ಞ್ಜಾ॒ಯಾಮ॑ಶ್ಞುತೇ ॥ ಅ॒ಗ್ನಯೇ॑ ಕವ್ಯ॒ವಾಹ॑ನಾಯ ಸ್ವ॒ಧಾ ನಮ॒ ಇತ್ಯಾ॑ಹ । ಯ ಏ॒ವ ಪಿ॑ತೃ॒ಣಾಮ॒ಗ್ನಿಃ । ತ-ಮ್ಪ್ರೀ॑ಣಾತಿ ॥ ತಿ॒ಸ್ರ ಆಹು॑ತೀ-ರ್ಜುಹೋತಿ ॥ ತ್ರಿರ್ನಿದ॑ಧಾತಿ ॥ ಷಟ್-ಥ್ಸಮ್ಪ॑ದ್ಯನ್ತೇ ॥ 58 ॥

ಷಡ್ವಾ ಋ॒ತವಃ॑ । ಋ॒ತೂನೇ॒ವ ಪ್ರೀ॑ಣಾತಿ ॥ ತೂ॒ಷ್ಣೀ-ಮ್ಮೇಕ್ಷ॑ಣ॒-ಮಾದ॑ಧಾತಿ । ಅಸ್ತಿ॑ ವಾ॒ ಹಿ ಷ॒ಷ್ಠ ಋ॒ತುರ್ನ ವಾ᳚ ॥ ದೇ॒ವಾನ್. ವೈ ಪಿ॒ತೄ-ನ್ಪ್ರೀ॒ತಾನ್ । ಮ॒ನು॒ಷ್ಯಾಃ᳚ ಪಿ॒ತರೋ-ಽನು॒ ಪ್ರಪಿ॑ಪತೇ । ತಿ॒ಸ್ರ ಆಹು॑ತೀ-ರ್ಜುಹೋತಿ । ತ್ರಿರ್ನಿದ॑ಧಾತಿ । ಷಟ್-ಥ್ಸಮ್ಪ॑ದ್ಯನ್ತೇ । ಷಡ್ವಾ ಋ॒ತವಃ॑ ॥ 59 ॥

ಋ॒ತವಃ॒ ಖಲು॒ ವೈ ದೇ॒ವಾಃ ಪಿ॒ತರಃ॑ । ಋ॒ತೂನೇ॒ವ ದೇ॒ವಾ-ನ್ಪಿ॒ತೄ-ನ್ಪ್ರೀ॑ಣಾತಿ । ತಾನ್ಪ್ರೀ॒ತಾನ್ । ಮ॒ನು॒ಷ್ಯಾಃ᳚ ಪಿ॒ತರೋ-ಽನು॒ ಪ್ರಪಿ॑ಪತೇ ॥ ಸ॒ಕೃ॒ದಾ॒ಚ್ಛಿ॒ನ್ನ-ಮ್ಬ॒ರ್॒ಹಿ-ರ್ಭ॑ವತಿ । ಸ॒ಕೃದಿ॑ವ॒ ಹಿ ಪಿ॒ತರಃ॑ ॥ ತ್ರಿರ್ನಿದ॑ಧಾತಿ । ತೃ॒ತೀಯೇ॒ ವಾ ಇ॒ತೋ ಲೋ॒ಕೇ ಪಿ॒ತರಃ॑ । ತಾನೇ॒ವ ಪ್ರೀ॑ಣಾತಿ ॥ ಪರಾಂ॒ಆವ॑ರ್ತತೇ ॥ 60 ॥

ಹ್ಲೀಕಾ॒ ಹಿ ಪಿ॒ತರಃ॑ ॥ ಒಷ್ಮಣೋ᳚ ವ್ಯಾ॒ವೃತ॒ ಉಪಾ᳚ಸ್ತೇ । ಊ॒ಷ್ಮಭಾ॑ಗಾ॒ ಹಿ ಪಿ॒ತರಃ॑ ॥ ಬ್ರ॒ಹ್ಮ॒ವಾ॒ದಿನೋ॑ ವದನ್ತಿ । ಪ್ರಾಶ್ಯಾಂ(3)ನ ಪ್ರಾಶ್ಯಾ(3)ಮಿತಿ॑ । ಯ-ತ್ಪ್ರಾ᳚ಶ್ಞೀ॒ಯಾತ್ । ಜನ್ಯ॒ಮನ್ನ॑ಮದ್ಯಾತ್ । ಪ್ರ॒ಮಾಯು॑ಕ-ಸ್ಸ್ಯಾತ್ । ಯನ್ನ ಪ್ರಾ᳚ಶ್ಞೀ॒ಯಾತ್ । ಅಹ॑ವಿ-ಸ್ಸ್ಯಾತ್ ॥ 61 ॥

ಪಿ॒ತೃಭ್ಯ॒ ಆವೃ॑ಶ್ಚ್ಯೇತ । ಅ॒ವ॒ಘ್ರೇಯ॑ಮೇ॒ವ । ತನ್ನೇವ॒ ಪ್ರಾಶಿ॑ತ॒-ನ್ನೇವಾಪ್ರಾ॑ಶಿತಮ್ ॥ ವೀ॒ರಂ-ವಾಁ॒ ವೈ ಪಿ॒ತರಃ॑ ಪ್ರ॒ಯನ್ತೋ॒ ಹರ॑ನ್ತಿ । ವೀ॒ರಂ-ವಾಁ॑ ದದತಿ । ದ॒ಶಾ-ಞ್ಛಿ॑ನತ್ತಿ । ಹರ॑ಣಭಾಗಾ॒ ಹಿ ಪಿ॒ತರಃ॑ । ಪಿ॒ತೄನೇ॒ವ ನಿ॒ರವ॑ದಯತೇ ॥ ಉತ್ತ॑ರ॒ ಆಯು॑ಷಿ॒ ಲೋಮ॑ ಛಿನ್ದೀತ । ಪಿ॒ತೃ॒ಣಾಗ್ ಹ್ಯೇ॑ತರ್ಹಿ॒ ನೇದೀ॑ಯಃ ॥ 62 ॥

ನಮ॑ಸ್ಕರೋತಿ । ನ॒ಮ॒ಸ್ಕಾ॒ರೋ ಹಿ ಪಿ॑ತೃ॒ಣಾಮ್ ॥ ನಮೋ॑ ವಃ ಪಿತರೋ॒ ರಸಾ॑ಯ । ನಮೋ॑ ವಃ ಪಿತರ॒-ಶ್ಶುಷ್ಮಾ॑ಯ । ನಮೋ॑ ವಃ ಪಿತರೋ ಜೀ॒ವಾಯ॑ । ನಮೋ॑ ವಃ ಪಿತರ-ಸ್ಸ್ವ॒ಧಾಯೈ᳚ । ನಮೋ॑ ವಃ ಪಿತರೋ ಮ॒ನ್ಯವೇ᳚ । ನಮೋ॑ ವಃ ಪಿತರೋ ಘೋ॒ರಾಯ॑ । ಪಿತ॑ರೋ॒ ನಮೋ॑ ವಃ । ಯ ಏ॒ತಸ್ಮಿ॑ನ್ ಁಲೋ॒ಕೇ ಸ್ಥ ॥ 63 ॥

ಯು॒ಷ್ಮಾಗ್ಸ್ತೇ-ಽನು॑ । ಯೇ᳚-ಽಸ್ಮಿಁಲ್ಲೋ॒ಕೇ । ಮಾ-ನ್ತೇ ನು॑ । ಯ ಏ॒ತಸ್ಮಿ॑ಁಲ್ಲೋ॒ಕೇ ಸ್ಥ । ಯೂ॒ಯ-ನ್ತೇಷಾಂ॒-ವಁಸಿ॑ಷ್ಠಾ ಭೂಯಾಸ್ತ । ಯೇ᳚-ಽಸ್ಮಿಁಲ್ಲೋ॒ಕೇ । ಅ॒ಹ-ನ್ತೇಷಾಂ॒-ವಁಸಿ॑ಷ್ಠೋ ಭೂಯಾಸ॒ಮಿತ್ಯಾ॑ಹ । ವಸಿ॑ಷ್ಠ-ಸ್ಸಮಾ॒ನಾನಾ᳚-ಮ್ಭವತಿ । ಯ ಏ॒ವಂ-ವಿಁ॒ದ್ವಾನ್-ಪಿ॒ತೃಭ್ಯಃ॑ ಕ॒ರೋತಿ॑ ॥ ಏ॒ಷ ವೈ ಮ॑ನು॒ಷ್ಯಾ॑ಣಾಂ-ಯಁ॒ಜ್ಞಃ ॥ 64 ॥

ದೇ॒ವಾನಾಂ॒-ವಾಁ ಇತ॑ರೇ ಯ॒ಜ್ಞಾಃ । ತೇನ॒ ವಾ ಏ॒ತ-ತ್ಪಿ॑ತೃಲೋ॒ಕೇ ಚ॑ರತಿ ॥ ಯ-ತ್ಪಿ॒ತೃಭ್ಯಃ॑ ಕ॒ರೋತಿ॑ । ಸ ಈ᳚ಶ್ವ॒ರಃ ಪ್ರಮೇ॑ತೋಃ । ಪ್ರಾ॒ಜಾ॒ಪ॒ತ್ಯಯ॒ರ್ಚಾ ಪುನ॒ರೈತಿ॑ । ಯ॒ಜ್ಞೋ ವೈ ಪ್ರ॒ಜಾಪ॑ತಿಃ । ಯ॒ಜ್ಞೇನೈ॒ವ ಸ॒ಹ ಪುನ॒ರೈತಿ॑ । ನ ಪ್ರ॒ಮಾಯು॑ಕೋ ಭವತಿ ॥ ಪಿ॒ತೃ॒ಲೋ॒ಕೇ ವಾ ಏ॒ತ-ದ್ಯಜ॑ಮಾನಶ್ಚರತಿ । ಯ-ತ್ಪಿ॒ತೃಭ್ಯಃ॑ ಕ॒ರೋತಿ॑ । ಸ ಈ᳚ಶ್ವ॒ರ ಆರ್ತಿ॒ಮಾರ್ತೋಃ᳚ । ಪ್ರ॒ಜಾಪ॑ತಿ॒-ಸ್ತ್ವಾವೈನ॒-ನ್ತತ॒ ಉನ್ನೇ॑ತುಮರ್ಹ॒ತೀತ್ಯಾ॑ಹುಃ । ಯ-ತ್ಪ್ರಾ॑ಜಾಪ॒ತ್ಯಯ॒ರ್ಚಾ ಪುನ॒ರೈತಿ॑ । ಪ್ರ॒ಜಾಪ॑ತಿರೇ॒ವೈನ॒-ನ್ತತ॒ ಉನ್ನ॑ಯತಿ । ನಾರ್ತಿ॒ಮಾರ್ಚ್ಛ॑ತಿ॒ ಯಜ॑ಮಾನಃ ॥ 65 ॥

(ಇತ್ಯ॑ - ಶ್ಞುತೇ - ಪದ್ಯನ್ತೇ - ಪದ್ಯನ್ತೇ॒ ಷಡ್ವಾ ಋ॒ತವೋ॑ - ವರ್ತ॒ತೇ-ಽ - ಹ॑ವಿ-ಸ್ಸ್ಯಾ॒ನ್ - ನೇದೀ॑ಯಃ॒ - ಸ್ಥ - ಯ॒ಜ್ಞೋ - ಯಜ॑ಮಾನಶ್ಚರತಿ॒ ಯ-ತ್ಪಿ॒ತೃಭ್ಯಃ॑ ಕ॒ರೋತಿ॒ ಪಞ್ಚ॑ ಚ) (ಅ. 10)

(ದೇ॒ವಾ॒ಸು॒ರಾ ಅ॒ಗ್ನೀಷೋಮ॑ಯೋ--ರ್ ದೇ॒ವಾ ವೈ ಯಥಾ॒ ದರ್ಶಂ॑ - ದೇ॒ವಾ ವೈ ಯದ॒ನ್ಯೈ-ರ್ಗ್ರಹೈ᳚--ರ್ ಬ್ರಹ್ಮವಾ॒ದಿನೋ॒ ನಾಗ್ನಿ॑ಷ್ಟೋ॒ಮೋ ನ - ಸಾ॑ವಿ॒ತ್ರಂ - ದೇ॒ವಸ್ಯಾ॒ಹಂ - ತಾ॒ರ್ಪ್ಯಗ್ಂ - ಸ॒ಪ್ತಾನ್ನ॑ಹೋ॒ಮಾನ್ - ನೃ॒ಷದಂ॒ - ತ್ವೇನ್ದ್ರೋ॑ ವೃ॒ತ್ರಗ್ಂ ಹ॒ತ್ವಾ ದಶ॑)

(ದೇ॒ವಾ॒ಸು॒ರಾ - ವಾ॒ಜ್ಯೇ॑ವೈನಂ॒ - ತಸ್ಮಾ᳚-ದ್ವಾಜಪೇಯಯಾ॒ಜೀ - ದೇ॒ವಸ್ಯಾ॒ಹಂ - ಁವಾಜ॒ಸ್ಯಾವ॑ರುದ್ಧ್ಯಾ- ಇನ್ದ್ರಿ॒ಯಮೇ॒ವಾಸ್ಮಿ॒ನ್॒. - ಹ್ಲೀಕಾ॒ ಹಿ ಪಿ॒ತರಃ॒ ಪಞ್ಚ॑ಷಷ್ಟಿಃ)

(ದೇ॒ವಾ॒ಸು॒ರಾ - ಯಜ॑ಮಾನಃ)

॥ ಹರಿಃ॑ ಓಮ್ ॥

॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಬ್ರಾಹ್ಮಣೇ ಪ್ರಥಮಾಷ್ಟಕೇ ತೃತೀಯಃ ಪ್ರಪಾಠಕ-ಸ್ಸಮಾಪ್ತಃ ॥

Roman (IAST) Transliteration

kṛṣṇa yajurvedīya taittirīya brāhmaṇe prathamāṣṭake tṛtīyaḥ prapāṭhakaḥ - vājapeyabrāhmaṇaṃ

o-nnamaḥ paramātmane, śrī mahāgaṇapataye namaḥ,

śrī gurubhyo namaḥ | ha॒riḥ॒ om ||

anuvākaṃ 1 - punarādheyaśeṣaḥ ājyabhāgayorviśeṣaḥ

de॒vā॒su॒rā-ssaṃ-ya~̭ttā āsann | te de॒vā vi̭ja॒ya-mṷpa॒yantaḥ̭ | a॒gnīṣoma̭yo-steja॒svinī᳚sta॒nū-ssa-nnya̭dadhata | i॒damṷ no bhaviṣyati | yadi̭ no je॒ṣyantīti̭ | tenā॒gnīṣomā॒-vapā᳚krāmatām | te de॒vā vi॒jitya̭ | a॒gnīṣomā॒-vanvai᳚cchann | te᳚-'gni-manva̭vinda-nnṛ॒tuṣū-thsa̭nnam | tasya॒ vibha̭ktībhi-steja॒svinī᳚sta॒nū-ravā̭rundhata || 1 ||

te soma॒-manva̭vindann | tama̭ghnann | tasya̭ yathā-'bhi॒jñāya̭-nta॒nū-rvya̭gṛhṇata | te grahā̭ abhavann | ta-dgrahā̭ṇā-ṅgraha॒tvam | yasyai॒vaṃ-vi~॒duṣo॒ grahā̭ gṛ॒hyante᳚ | tasya॒ tvḙva gṛ̭hī॒tāḥ || nānā᳚gneya-mpunarā॒dheyḙ kuryāt | yadanā᳚gneya-mpunarā॒dheyḙ ku॒ryāt | vyṛ̭ddhame॒va tat || 2 ||

anā᳚gneyaṃ॒-vā~ e॒ta-tkri̭yate | ya-thsa॒midha॒-stanū॒napā̭tami॒ḍo ba॒r॒hi-rya̭jati || u॒bhāvā᳚gne॒yā-vājya̭bhāgau syātām || anā᳚jyabhāgau-bhavata॒ ityā̭huḥ | yadu॒bhāvā᳚gne॒yāva॒nvañcā॒viti̭ | a॒gnaye॒ pava̭mānā॒yotta̭ra-ssyāt | ya-tpava̭mānāya | tenājya̭ bhāgaḥ | tena̭ sau॒myaḥ || budha̭nvatyāgne॒ya-syājya̭-bhāgasya puro-'nuvā॒kyā̭ bhavati || 3 ||

yathā̭ su॒pta-mbo॒dhaya̭ti | tā॒dṛge॒va tat || a॒gninya̭ktāḥ patnī saṃyā~॒jānā॒mṛcaḥ̭ syuḥ | tenā᳚gne॒yagṃ sarva̭-mbhavati || e॒ka॒dhā tḙja॒svinī᳚-nde॒vatā॒-mupai॒tītyā̭huḥ | saina̭mīśva॒rā pra॒daha॒ iti̭ || neti̭ brūyāt | pra॒jana̭naṃ॒-vā~ a॒gniḥ | pra॒jana̭na-me॒vopai॒tīti̭ || kṛ॒taya̭ju॒-ssambhṛ̭ta sambhāra॒ ityā̭huḥ || 4 ||

na sa॒bhṛntyā᳚-ssambhā॒rāḥ | na yajuḥ̭ kā॒rya̭miti̭ || atho॒ khalṷ | sa॒bhṛntyā̭ e॒va sa̭bhāṃ॒rāḥ | kā॒ryaṃ̭-ya~juḥ̭ | pu॒na॒rā॒dheya̭sya॒ samṛ̭ddhyai || teno̭pā॒gṃ॒śu praca̭rati | eṣya̭ iva॒ vā e॒ṣaḥ | ya-tpṷna-rā॒dheyaḥ̭ | yatho̭pā॒gṃ॒śu na॒ṣṭami॒cchati̭ || 5 ||

tā॒dṛge॒va tat || u॒ccai-ssvi̭ṣṭa॒kṛta॒mu-thsṛ̭jati | yathā̭ na॒ṣṭaṃ-vi~॒tvā prāhā॒yamiti̭ | tā॒dṛge॒va tat || e॒ka॒dhā tḙja॒svinī᳚-nde॒vatā॒mupai॒tītyā̭huḥ | saina̭mīśva॒rā pra॒daha॒ iti̭ | tattathā॒ nopai̭ti | pra॒yā॒jā॒nū॒yā॒jeṣve॒va vibha̭ktīḥ kuryāt | ya॒thā॒pū॒rva-mājya̭bhāgau॒ syātā᳚m | e॒va-mpa̭tnī saṃyā~॒jāḥ || 6 ||

ta-dvai᳚śvāna॒rava̭t-pra॒jana̭navattara॒-mupai॒tīti̭ || tadā̭huḥ | vyṛ̭ddhaṃ॒-vā~ e॒tat | anā᳚gneyaṃ॒-vā~ e॒ta-tkri̭yata॒ iti̭ || neti̭ brūyāt | a॒gni-mpra̭tha॒maṃ-vi~bha̭ktīnāṃ-ya~jati | a॒gnimṷtta॒ma-mpa̭tnī saṃyā~॒jānā᳚m | tenā᳚gne॒yam | tena॒ samṛ̭ddha-ṅkriyata॒ iti̭ || 7 ||

(a॒ru॒ndha॒ - tai॒va ta-d- bha̭vati॒ - sambhṛ̭tasambhāra॒ ityā̭hu - ri॒cchati̭ - patnīsaṃyā~॒jā - +nava̭ ca) ( ā1)

anuvākaṃ 2 - vājapeyasya vidhiḥ

de॒vā vai yathā॒darśaṃ̭-ya~॒jñānāha̭ranta | yo᳚-'gniṣṭo॒mam | ya u॒kthya᳚m | yo̭-'tirā॒tram | te sa॒haiva sarvḙ vāja॒peya̭-mapaśyann | te | a॒nyo᳚nyasmai॒ nāti̭ṣṭhanta | a॒hama॒nena̭ yajā॒ iti̭ | te᳚-'bruvann | ā॒jima॒sya dhā̭vā॒meti̭ || 8 ||

tasmi̭-nnā॒jima̭dhāvann | ta-mbṛha॒spati॒-ruda̭jayat | tenā̭yajata | sa svārā᳚jya-magacchat | tamindro᳚-'bravīt | māma॒nena̭ yāja॒yeti̭ | tenendra̭-mayājayat | so-'gra̭-nde॒vatā̭nā॒-mparyai᳚t | aga̭ccha॒-thsvārā᳚jyam | ati̭ṣṭhantāsmai॒ jyaiṣṭhyā̭ya || 9 ||

ya e॒vaṃ-vi~॒dvān. vā̭ja॒peyḙna॒ yaja̭te | gaccha̭ti॒ svārā᳚jyam | agragṃ̭ samā॒nānā॒-mparyḙti | tiṣṭha̭nte-'smai॒ jyaiṣṭhyā̭ya || sa vā e॒ṣa brā᳚hma॒ṇasya̭ cai॒va rā̭ja॒nya̭sya ca ya॒jñaḥ || taṃ-vā~ e॒taṃ-vā~̭ja॒peya॒ ityā̭huḥ | vā॒jāpyo॒ vā e॒ṣaḥ | vāja॒gg॒ hyḙtena̭ de॒vā aiphsanṋ || somo॒ vai vā̭ja॒peyaḥ̭ | yo vai somaṃ̭-vā~ja॒peyaṃ॒-ve~da̭ || 10 ||

vā॒jyḙvaina̭-mpī॒tvā bha̭vati | ā-'sya̭ vā॒jī jā̭yate || annaṃ॒-vai~ vā̭ja॒peyaḥ̭ | ya e॒vaṃ-ve~da̭ | attyanna᳚m | ā-'syā᳚nnā॒do jā̭yate || brahma॒ vai vā̭ja॒peyaḥ̭ | ya e॒vaṃ-ve~da̭ | atti॒ brahma॒ṇā-'nna᳚m | ā-'sya̭ bra॒hmā jā̭yate || 11 ||

vāgvai vāja̭sya prasa॒vaḥ | ya e॒vaṃ-ve~da̭ | ka॒roti̭ vā॒cā vī॒rya᳚m | ainaṃ̭-vā~॒cā ga̭cchati | api̭vatīṃ॒-vā~caṃ̭-va~dati || pra॒jāpa̭ti-rde॒vebhyo̭ ya॒jñān vyādi̭śat | sa ā॒tman vā̭ja॒peya̭-madhatta | ta-nde॒vā a̭bruvann | e॒ṣa vāva ya॒jñaḥ | ya-dvā̭ja॒peyaḥ̭ || 12 ||

apye॒va no-'trā॒stviti̭ | tebhya̭ e॒tā ujji̭tīḥ॒ prāya̭cchat || tā vā e॒tā ujji̭tayo॒ vyākhyā̭yante | ya॒jñasya̭ sarva॒tvāya̭ | de॒vatā̭nā॒-mani̭rbhāgāya || de॒vā vai brahma̭ṇa॒ścānna̭sya ca॒ śama̭la॒mapā᳚ghnann | ya-dbrahma̭ṇa॒-śśama̭la॒māsī᳚t | sā gāthā̭ nārāśa॒gg॒sya̭ bhavat | yadanna̭sya | sā surā᳚ || 13 ||

tasmā॒-dgāya̭taśca ma॒ttasya̭ ca॒ na pra̭ti॒gṛhya᳚m | ya-tpra̭tigṛhṇī॒yāt | śama̭la॒-mprati̭gṛhṇīyāt || sarvā॒ vā e॒tasya॒ vāco 'va̭ruddhāḥ | yo vā̭japeyayā॒jī | yā pṛ̭thi॒vyāṃ-yā~-'gnau yā ra̭thanta॒re | yā-'ntari̭kṣe॒ yā vā॒yau yā vā̭made॒vye | yā di॒vi yā-''di॒tye yā bṛ̭ha॒ti | yā-'phsu yauṣa̭dhīṣu॒ yā vana॒spati̭ṣu || tasmā᳚-dvājapeyayā॒jyārtvi̭jīnaḥ | sarvā॒ hya̭sya॒ vāco 'va̭ruddhāḥ || 14 ||

(dhā॒vā॒meti॒ - jyaiṣṭhyā̭ya॒ - veda̭ - bra॒hmā jā̭yate-vāja॒peyaḥ॒-surā-''rtvi̭jīna॒ ekaṃ̭ ca ) (a. 2)

anuvākaṃ 3 - tasyagrahaviśeṣāḥ

de॒vā vai yada॒nyai-rgrahai᳚-rya॒jñasya॒ nāvārṷndhata | tada̭tigrā॒hyai̭-rati॒gṛhyā-vā̭rundhata | tada̭tigrā॒hyā̭ṇā-matigrāhya॒tvam || yada̭tigrā॒hyā̭ gṛ॒hyante᳚ | yade॒vānyai-rgrahai᳚-rya॒jñasya॒ nāva̭ru॒ndhe | tade॒va taira̭ti॒gṛhyā-va̭rundhe || pañca̭ gṛhyante | pāṅkto̭ ya॒jñaḥ | yāvā̭ne॒va ya॒jñaḥ | tamā॒ptvā 'va̭rundhe || 15 ||

sarva̭ ai॒ndrā bha̭vanti | e॒ka॒dhaiva yaja̭māna indri॒ya-nda̭dhati || sa॒ptada̭śa prājāpa॒tyā grahā̭ gṛhyante | sa॒pta॒da॒śaḥ pra॒jāpa̭tiḥ | pra॒jāpa̭te॒-rāptyai᳚ || eka̭ya॒rcā gṛ̭hṇāti | e॒ka॒dhaiva yaja̭māne vī॒rya̭-ndadhāti || so॒ma॒gra॒hāgśca̭ surāgra॒hāgśca̭ gṛhṇāti | e॒ta-dvai de॒vānā᳚-mpara॒mamanna᳚m | ya-thsomaḥ̭ || 16 ||

e॒ta-nma̭nu॒ṣyā̭ṇām | ya-thsurā᳚ | pa॒ra॒meṇai॒vāsmā̭ a॒nnādye॒nāva̭ra-ma॒nnādya॒-mava̭rundhe || so॒ma॒gra॒hā-ngṛ̭hṇāti | brahma̭ṇo॒ vā e॒ta-ttejaḥ̭ | ya-thsomaḥ̭ | brahma̭ṇa e॒va teja̭sā॒ tejo॒ yaja̭māne dadhāti | su॒rā॒gra॒hā-ngṛ̭hṇāti | anna̭sya॒ vā e॒tacchama̭lam | ya-thsurā᳚ || 17 ||

anna̭syai॒va śama̭lena॒ śama̭laṃ॒-ya~ja̭mānā॒-dapa̭hanti || so॒ma॒gra॒hāgśca̭ surāgra॒hāgśca̭ gṛhṇāti | pumā॒n॒. vai somaḥ̭ | strī surā᳚ | ta-nmi̭thu॒nam | mi॒thu॒name॒vāsya॒ ta-dya॒jñe ka̭roti pra॒jana̭nāya | ā॒tmāna̭me॒va so̭magra॒hai-sspṛ̭ṇoti | jā॒yāgṃ sṷrā gra॒haiḥ | tasmā᳚-dvājapeyayā॒jya̭muṣmi̭~llo॒ke striya॒gṃ॒ sambha̭vati | vā॒ja॒peyā̭-bhijita॒gg॒ hya̭sya || 18 ||

pūrvḙ somagra॒hā gṛ̭hyante | apa̭re surāgra॒hāḥ | pu॒ro॒kṣagṃ so̭magra॒hānth- sā̭dayati | pa॒ścā॒da॒kṣagṃ sṷrāgra॒hān | pā॒pa॒va॒sya॒sasya॒ vidhṛ̭tyai || e॒ṣa vai yaja̭mānaḥ | ya-thsomaḥ̭ | anna॒gṃ॒ surā᳚ | so॒ma॒gra॒hāgśca̭ surāgra॒hāgśca॒ vyati̭ṣajati | a॒nnādyḙnai॒vainaṃ॒-vya~ti̭ṣajati || 19 ||

sa॒pṛñcaḥ̭ stha॒ sa-mmā̭ bha॒dreṇa̭ pṛ॒ṅktetyā̭ha | annaṃ॒-vai~ bha॒dram | a॒nnādyḙnai॒vaina॒gṃ॒ sagṃsṛ̭jati || anna̭sya॒ vā e॒tacchama̭lam | ya-thsurā᳚ | pā॒pmèva॒ khalu॒ vai śama̭lam | pā॒pmanā॒ vā ḙname॒tacchama̭lena॒ vyati̭ṣajati | ya-thso̭magra॒hāgśca̭ surāgra॒hāgśca̭ vyati॒ṣaja̭ti || vi॒pṛcaḥ̭ stha॒ vi mā̭ pā॒pmanā̭ pṛ॒ṅktetyā̭ha | pā॒pmanai॒vaina॒gṃ॒ śama̭lena॒ vyāva̭rtayati || 20 ||

tasmā᳚-dvājapeyayā॒jī pū॒to meddhyo̭ dakṣi॒ṇyaḥ̭ || prāṃu-ddra̭vati somagra॒haiḥ | a॒mume॒va tai-rlo॒ka-ma॒bhija̭yati | pra॒tyaṅkhsṷrā gra॒haiḥ | i॒mame॒va tai-rlo॒ka-ma॒bhija̭yati || prati̭ṣṭhanti somagra॒haiḥ | yāva̭de॒va sa॒tyam | tena̭ sūyate || vā॒ja॒sṛdbhyaḥ̭ surāgra॒hān. ha̭ranti | anṛ̭tenai॒va viśa॒gṃ॒ sagṃsṛ̭jati || hi॒ra॒ṇya॒pā॒tra-mmadhoḥ᳚ pū॒rṇa-nda̭dāti | ma॒dha॒vyo̭-'sā॒nīti̭ || e॒ka॒dhā bra॒hmaṇa॒ upa̭ harati | e॒ka॒dhaiva yaja̭māna॒ āyu॒stejo̭ dadhāti || 21 ||

(ā॒ptvā-'va̭rundhe॒ - somaḥ॒ - śama̭laṃ॒-ya~-thsurā॒ - hya̭-syainaṃ॒-vya~ti̭ṣajati॒ - vyāva̭rtayati - sṛjati ca॒tvāri̭ ca ) (a. 3)

anuvākaṃ 4 - paśava-ssaptadaśa

bra॒hma॒vā॒dino̭ vadanti | nāgni̭ṣṭo॒mo nokthyaḥ̭ | na ṣo̭ḍa॒śī nāti̭rā॒traḥ | atha॒ kasmā᳚-dvāja॒peye॒ sarvḙ yajñakra॒tavo-'va̭ruddhyanta॒ iti̭ | pa॒śubhi॒riti̭ brūyāt || ā॒gne॒ya-mpa॒śumāla̭bhate | a॒gni॒ṣṭo॒mame॒va tenāva̭rundhe | ai॒ndrā॒gneno॒kthya᳚m | ai॒ndreṇa̭ ṣoḍa॒śinaḥ̭ sto॒tram | sā॒ra॒sva॒tyā-'ti̭rā॒tram || 22 ||

mā॒ru॒tyā bṛ̭ha॒ta-ssto॒tram | e॒tāva̭nto॒ vai ya̭jñakra॒tavaḥ̭ | tā-npa॒śubhi̭re॒vā-va̭rundhe || ā॒tmāna̭me॒va spṛ̭ṇo-tyagniṣṭo॒mena̭ | prā॒ṇā॒pā॒nā-vu॒kthyḙna | vī॒ryagṃ̭ ṣoḍa॒śinaḥ̭ sto॒treṇa̭ | vāca̭-matirā॒treṇa̭ | pra॒jā-mbṛ̭ha॒ta-ssto॒treṇa̭ | i॒mame॒va lo॒kama॒bhi ja̭yatyagniṣṭo॒mena̭ | a॒ntari̭kṣa-mu॒kthyḙna || 23 ||

su॒va॒rgaṃ-lo~॒kagṃ ṣo̭ḍa॒śinaḥ̭ sto॒treṇa̭ | de॒va॒yānā̭ne॒va pa॒tha āro̭ha-tyatirā॒treṇa̭ | nākagṃ̭ rohati bṛha॒ta-ssto॒treṇa̭ | teja̭ e॒vātma-ndha̭tta āgne॒yena̭ pa॒śunā᳚ | ojo॒ bala̭maindrā॒gnena̭ | i॒ndri॒ya-mai॒ndreṇa̭ | vācagṃ̭ sārasva॒tyā | u॒bhāve॒va dḙvalo॒ka-ñca̭ manuṣyalo॒ka-ñcā॒bhija̭yati māru॒tyā va॒śayā᳚ || sa॒ptada̭śa prājāpa॒tyā-npa॒śūnāla̭bhate | sa॒pta॒da॒śaḥ pra॒jāpa̭tiḥ || 24 ||

pra॒jāpa̭te॒rāptyai᳚ || śyā॒mā eka̭rūpā bhavanti | e॒vami̭va॒ hi pra॒jāpa̭ti॒-ssamṛ̭ddhyai || tā-nparya̭gnikṛtā॒-nuthsṛ̭jati || ma॒ruto̭ ya॒jñama̭jighāgṃsa-npra॒jāpa̭teḥ | tebhya̭ e॒tā-mmā̭ru॒tīṃ-va~॒śāmāla̭bhata | tayai॒vainā̭-naśamayat || mā॒ru॒tyā pra॒carya̭ | e॒tān-thsañjña̭payet | ma॒ruta̭ e॒va śa̭mayi॒tvā || 25 ||

e॒taiḥ praca̭rati | ya॒jñasyāghā̭tāya || e॒ka॒dhā va॒pā jṷhoti | e॒ka॒de॒va॒tyā̭ hi | e॒te | atho̭ eka॒dhaiva yaja̭māne vī॒rya̭-ndadhāti || nai॒vā॒reṇa̭ sa॒ptada̭śaśarāve-ṇai॒tarhi॒ praca̭rati | e॒ta-tpṷroḍāśā॒ hyḙte | atho̭ paśū॒nāme॒va chi॒dramapi̭dadhāti || sā॒ra॒sva॒tyotta॒mayā॒ praca̭rati | vāg vai sara̭svatī | tasmā᳚-tprā॒ṇānāṃ॒-vā~gṷtta॒mā | atho᳚ pra॒jāpa̭tāve॒va ya॒jña-mprati̭ṣṭhāpayati | pra॒jāpa̭ti॒r॒ hi vāk || apa̭nnadatī bhavati | tasmā᳚-nmanu॒ṣyā᳚-ssarvāṃ॒-vā~caṃ̭-va~danti || 26 ||

(a॒ti॒rā॒tra - ma॒ntari̭kṣamu॒kthyḙna - pra॒jāpa̭tiḥ - śamayi॒tvot - ta॒mayā॒ praca̭rati॒ ṣaṭ ca̭) (a. 4)

anuvākaṃ 5 - rathayājanam

sā॒vi॒tra-ñjṷhoti॒ karma̭ṇaḥ karmaṇaḥ pu॒rastā᳚t || kasta-dve॒detyā̭huḥ | ya-dvā̭ja॒peya̭sya॒ pūrvaṃ॒-ya~dapa̭ra॒miti̭ | sa॒vi॒tṛpra̭sūta e॒va ya̭thāpū॒rva-ṅkarmā̭ṇi karoti || sava̭ne savane juhoti | ā॒krama̭ṇame॒va ta-thsetuṃ॒-ya~ja̭mānaḥ kurute | su॒va॒rgasya̭ lo॒kasya॒ sama̭ṣṭyai || vā॒caspati॒-rvāca̭ma॒dya sva̭dāti na॒ ityā̭ha | vāgvai de॒vānā᳚-mpu॒rā-'nna̭māsīt | vāca̭me॒vāsmā॒ annagg̭ svadayati || 27 ||

indra̭sya॒ vajro̭-'si॒ vārtra̭ghna॒ iti॒ ratha̭mu॒pāva̭harati॒ viji̭tyai || vāja̭sya॒ nu pra̭sa॒ve mā॒tara̭-mma॒hīmityā̭ha | yaccai॒veyam | yaccā॒syāmadhi̭ | tade॒vā-va̭rundhe | atho॒ tasmi̭nne॒vobhaye॒-'bhiṣi̭cyate || a॒phsva̭ntara॒-mṛta̭ma॒phsu bhḙṣa॒jamityaśvā᳚-npalpūlayati | a॒phsu vā aśva̭sya॒ tṛtī̭ya॒-mpravi̭ṣṭam | tada̭nu॒vena॒nvava̭plavate | yada॒phsu pa̭lpū॒laya̭ti || 28 ||

yade॒vāsyā॒phsu pravi̭ṣṭam | tade॒vāva̭rundhe || ba॒hu vā aśvo̭-'me॒ddhya-mupa̭gacchati | yada॒phsu pa̭lpū॒laya̭ti | meddhyā̭ne॒vainā᳚n karoti || vā॒yurvā᳚ tvā॒ manṷrvā॒ tvetyā̭ha | e॒tā vā e॒ta-nde॒vatā॒ agre॒ aśva̭mayuñjann | tābhi̭re॒vaināṋ. yunakti | sa॒vasyojji̭tyai || yajṷṣā yunakti॒ vyāvṛ̭ttyai || 29 ||

apā᳚-nna pādāśuhema॒nniti॒ sammā᳚rṣṭi | meddhyā̭ne॒vainā᳚n karoti | atho॒ stautye॒vainā̭nā॒jigṃ sa̭riṣya॒taḥ || vi॒ṣṇu॒ kra॒mān kra̭mate | viṣṇṷre॒va bhū॒tvemā~llo॒kā-na॒bhija̭yati || vai॒śva॒de॒vo vai rathaḥ̭ | a॒ṅkau nya॒ṅkāva॒bhito॒ rathaṃ॒-yā~vityā̭ha | yā e॒va de॒vatā॒ rathe॒ pravi̭ṣṭāḥ | tābhya̭ e॒va nama̭skaroti | ā॒tmano-'nā᳚rtyai || aśa̭maratha-mbhāvuko-'sya॒ ratho̭ bhavati | ya e॒vaṃ-ve~da̭ || 30 ||

(sva॒da॒ya॒ti॒ - pa॒lpū॒laya̭ti॒ - vyāvṛ̭ttyā॒ - anā᳚rtyai॒ dve ca̭) (a. 5)

anuvākaṃ 6 - rathadhāvanam

de॒vasyā॒hagṃ sa̭vi॒tuḥ pra̭sa॒ve bṛha॒spati̭nā vāja॒jitā॒ vāja̭-ñjeṣa॒mityā̭ha | sa॒vi॒tṛpra̭sūta e॒va brahma̭ṇā॒ vāja॒mujja̭yati || de॒vasyā॒hagṃ sa̭vi॒tuḥ pra̭sa॒ve bṛha॒spati̭nā vāja॒jitā॒ varṣi̭ṣṭha॒-nnākagṃ̭ ruheya॒mityā̭ha | sa॒vi॒tṛpra̭sūta e॒va brahma̭ṇā॒ varṣi̭ṣṭha॒-nnākagṃ̭ rohati || cātvā̭le rathaca॒kra-nnimi̭tagṃ rohati | ato॒ vā aṅgi̭rasa utta॒mā-ssṷva॒rgaṃ-lo~॒kamā̭yann | sā॒kṣāde॒va yaja̭māna-ssuva॒rgaṃ-lo~॒kamḙti || āve᳚ṣṭayati | vajro॒ vai rathaḥ̭ | vajrḙṇai॒va diśo॒-'bhija̭yati || 31 ||

vā॒jinā॒gṃ॒ sāma̭ gāyate | annaṃ॒-vai~ vājaḥ̭ | anna̭me॒-vāva̭rundhe || vā॒co varṣma̭ de॒vebhyo-'pā᳚krāmat | ta-dvana॒spatī॒-nprāvi̭śat | saiṣā vāg-vana॒spati̭ṣu vadati | yā dṷndu॒bhau | tasmā᳚-ddundu॒bhi-ssarvā॒ vācoti̭ vadati || du॒ndu॒bhīn-thsa॒māghna̭nti | pa॒ra॒mā vā e॒ṣā vāk || 32 ||

yā dṷndu॒bhau | pa॒ra॒mayai॒va vā॒cā-'va̭rāṃ॒-vā~ca॒ma-va̭rundhe | atho̭ vā॒ca e॒va varṣma॒ yaja̭mā॒no 'va̭rundhe || indrā̭ya॒ vācaṃ̭-va~da॒tendraṃ॒-vā~ja̭-ñjāpaya॒tendro॒ vāja̭majayi॒-dityā̭ha | e॒ṣa vā e॒tarhīndraḥ̭ | yo yaja̭te | yaja̭māna e॒va vāja॒mujja̭yati || sa॒ptada̭śa pravyā॒dhānā॒ji-ndhā̭vanti | sa॒pta॒da॒śagg sto॒tra-mbha̭vati | sa॒ptada̭śa saptadaśa dīyante || 33 ||

sa॒pta॒da॒śaḥ pra॒jāpa̭tiḥ | pra॒jāpa̭te॒-rāptyai᳚ || arvā̭-'si॒ sapti̭rasi vā॒jya̭sītyā̭ha | a॒gnirvā arvā᳚ | vā॒yu-ssaptiḥ̭ | ā॒di॒tyo vā॒jī | e॒tābhi̭re॒vāsmai̭ de॒vatā̭bhi-rdevara॒thaṃ-yu~̭nakti || pra॒ṣṭi॒vā॒hinaṃ̭-yu~nakti | pra॒ṣṭi॒vā॒hī vai dḙvara॒thaḥ | de॒va॒ra॒thame॒vāsmai̭ yunakti || 34 ||

vāji̭no॒ vāja̭-ndhāvata॒ kāṣṭhā᳚-ṅgaccha॒tetyā̭ha | su॒va॒rgo vai lo॒kaḥ kāṣṭhā᳚ | su॒va॒rgame॒va lo॒kaṃ-ya~̭nti || su॒va॒rgaṃ-vā~ e॒te lo॒kaṃ-ya~̭nti | ya ā॒ji-ndhāva̭nti || prāñco̭ dhāvanti | prāṃi̭va॒ hi sṷva॒rgo lo॒kaḥ || ca॒ta॒sṛbhi॒ranṷ mantrayate | ca॒tvāri॒ chandāgṃ̭si | chando̭bhire॒vainā᳚n-thsuva॒rgaṃ-lo~॒ka-ṅga̭mayati || 35 ||

pra vā e॒te᳚-'smāl-lo॒kāccya̭vante | ya ā॒ji-ndhāva̭nti | uda̭ñca॒ āva̭rtante | a॒smāde॒va tena̭ lo॒kānnaya̭nti || ra॒tha॒vi॒mo॒ca॒nīya̭-ñjuhoti॒ prati̭ṣṭhityai || ā mā॒ vāja̭sya prasa॒vo ja̭gamyā॒dityā̭ha | annaṃ॒-vai~ vājaḥ̭ | anna̭me॒vāva̭rundhe || ya॒thā॒lo॒kaṃ-vā~ e॒ta ujja̭yanti | ya ā॒ji-ndhāva̭nti || 36 ||

kṛ॒ṣṇala̭-ṅkṛṣṇalaṃ-vā~ja॒sṛdbhyaḥ॒ praya̭cchati | yame॒va te vājaṃ̭-lo~॒kamu॒jjaya̭nti | ta-mpa̭ri॒krīyā-va̭rundhe || e॒ka॒dhā bra॒hmaṇa॒ upa̭harati | e॒ka॒dhaiva yaja̭māne vī॒rya̭-ndadhāti || de॒vā vā oṣa̭dhīṣvā॒jima̭yuḥ | tā bṛha॒spati॒-ruda̭jayat | sa nī॒vārā॒nnira̭vṛṇīta | tannī॒vārā̭ṇā-nnīvāra॒tvam || nai॒vā॒raśca॒ru-rbha̭vati || 37 ||

e॒tadvai de॒vānā᳚-mpara॒mamanna᳚m | yannī॒vārāḥ᳚ | pa॒ra॒meṇai॒vāsmā̭ a॒nnādye॒-nāva̭ra-ma॒nnādya॒mava̭rundhe || sa॒ptada̭śaśarāvo bhavati | sa॒pta॒da॒śaḥ pra॒jāpa̭tiḥ | pra॒jāpa̭te॒-rāptyai᳚ || kṣī॒re bha̭vati | ruca̭me॒vāsmi̭n-dadhāti || sa॒rpiṣvā᳚-nbhavati meddhya॒tvāya̭ || bā॒r॒ha॒spa॒tyo vā e॒ṣa de॒vata̭yā || 38 ||

yo vā̭ja॒peyḙna॒ yaja̭te | bā॒r॒ha॒spa॒tya e॒ṣa ca॒ruḥ || aśvā᳚n-thsariṣya॒ta-ssa॒sruṣa॒ścāva̭-ghrāpayati | yame॒va te vājaṃ̭-lo~॒kamu॒jjaya̭nti | tame॒vāva̭rundhe || ajī̭jipata vanaspataya॒ indraṃ॒-vā~jaṃ॒-vi~mṷcyaddhva॒miti̭ dundu॒bhīn. vimṷñcati | yame॒va te vājaṃ̭-lo~॒kami̭ndri॒ya-ndṷndu॒bhaya̭ u॒jjaya̭nti | tame॒vā-va̭rundhe || 39 ||

(a॒bhija̭yati॒ - vā e॒ṣā vāg - dī̭yante - 'smai yunakti - gamayati॒ - ya ā॒ji-ndhāva̭nti - bhavati - de॒vata̭yā॒ - +-'ṣṭau ca̭) (a. 6)

anuvākaṃ 7 - yūpārohaṇam

tā॒rpyaṃ-ya~ja̭māna॒-mpari̭dhāpayati | ya॒jño vai tā॒rpyam | ya॒jñenai॒vaina॒gṃ॒ sama̭rdhayati | da॒rbha॒maya॒-mpari̭dhāpayati | pa॒vitraṃ॒-vai~ da॒rbhāḥ | pu॒nātye॒vaina᳚m | vājaṃ॒-vā~ e॒ṣo-'va̭ruruthsate | yo vā̭ja॒peyḙna॒ yaja̭te | oṣa̭dhayaḥ॒ khalu॒ vai vājaḥ̭ | ya-dda̭rbha॒maya̭-mparidhā॒paya̭ti || 40 ||

vāja॒syāva̭-ruddhyai || jāya॒ ehi॒ suvo॒ rohā॒vetyā̭ha | patni̭yā e॒vaiṣa ya॒jñasyā᳚n-vāra॒mbho-'na̭vacchityai || sa॒ptada̭śā-ratni॒ryūpo̭ bhavati | sa॒pta॒da॒śaḥ pra॒jāpa̭tiḥ | pra॒jāpa̭te॒rāptyai᳚ || tū॒pa॒ra-ścatṷraśri-rbhavati || gau॒dhū॒ma-ñca॒ṣāla᳚m | na vā e॒te vrī॒hayo॒ na yavāḥ᳚ | ya-dgo॒dhūmāḥ᳚ || 41 ||

e॒vami̭va॒ hi pra॒jāpa̭ti॒-ssamṛ̭ddhyai | atho̭ a॒mume॒vāsmai̭ lo॒kamanna̭vanta-ṅkaroti || vāso̭bhi-rveṣṭayati | e॒ṣa vai yaja̭mānaḥ | yadyūpaḥ̭ | sa॒rva॒de॒va॒tyaṃ̭-vā~saḥ̭ | sarvā̭bhire॒vaina̭-nde॒vatā̭bhi॒-ssama̭rdhayati | atho̭ ā॒krama̭ṇame॒va tathsetuṃ॒-ya~ja̭mānaḥ kurute | su॒va॒rgasya̭ lo॒kasya॒ sama̭ṣṭyai || dvāda̭śa vājaprasa॒vīyā̭ni juhoti || 42 ||

dvāda̭śa॒ māsā᳚-ssaṃva~thsa॒raḥ | saṃ॒va~॒thsa॒rame॒va prī̭ṇāti | atho̭ saṃva~thsa॒rame॒vāsmā॒ upa̭ dadhāti | su॒va॒rgasya̭ lo॒kasya॒ sama̭ṣṭyai || da॒śabhiḥ॒ kalpai̭ rohati | nava॒ vai purṷṣe prā॒ṇāḥ | nābhi̭rdaśa॒mī | prā॒ṇāne॒va ya̭thāsthā॒na-ṅka̭lpayi॒tvā | su॒va॒rgaṃ-lo~॒kamḙti | e॒tāva॒dvai purṷṣasya॒ svam || 43 ||

yāva̭t-prā॒ṇāḥ | yāva̭de॒vāsyāsti̭ | tena̭ sa॒ha sṷva॒rgaṃ-lo~॒kamḙti || suva̭rde॒vāgṃ a̭ga॒nmetyā̭ha | su॒va॒rgame॒va lo॒kamḙti | a॒mṛtā̭ abhū॒metyā̭ha | a॒mṛta̭miva॒ hi sṷva॒rgo lo॒kaḥ | pra॒jāpa̭teḥ pra॒jā a̭bhū॒metyā̭ha | prā॒jā॒pa॒tyo vā a॒yaṃ-lo~॒kaḥ | a॒smāde॒va tena̭ lo॒kānnaiti̭ || 44 ||

sama॒ha-mpra॒jayā॒ sa-mmayā᳚ pra॒jetyā̭ha | ā॒śiṣa̭me॒vaitā-māśā᳚ste || ā॒sa॒pu॒ṭai-rghna̭nti | annaṃ॒-vā~ i॒yam | a॒nnādyḙnai॒vaina॒gṃ॒ sama̭rdhayanti | ūṣai᳚-rghnanti | e॒te hi sā॒kṣādanna᳚m | yadūṣāḥ᳚ | sā॒kṣāde॒vaina̭-ma॒nnādyḙna॒ sama̭rdhayanti || pu॒rastā᳚t-pra॒tyañca᳚-ṅghnanti || 45 ||

pu॒rastā॒ddhi pra̭tī॒cīna॒-manna̭ma॒dyate᳚ || śī॒r॒ṣa॒to ghna̭nti | śī॒r॒ṣa॒to hyanna̭ma॒dyate᳚ || di॒gbhyo ghna̭nti | di॒gbhya e॒vāsmā̭ a॒nnādya॒-mava̭rundhate || ī॒śva॒ro vā e॒ṣa parāṃ᳚-pra॒daghaḥ̭ | yo yūpa॒gṃ॒ roha̭ti || hira̭ṇyama॒ddhya-va̭rohati | a॒mṛtaṃ॒-vai~ hira̭ṇyam | a॒mṛtagṃ̭ suva॒rgo lo॒kaḥ || 46 ||

a॒mṛta̭ e॒va sṷva॒rge lo॒ke prati̭ tiṣṭhati || śa॒tamā̭na-mbhavati | śa॒tāyuḥ॒ purṷṣa-śśa॒tendri̭yaḥ | āyṷṣye॒vendri॒ye prati̭ tiṣṭhati || puṣṭyai॒ vā e॒ta-drū॒pam | yada॒jā | tri-ssaṃ̭va~thsa॒rasyā॒nyān-pa॒śū-npari॒ prajā̭yate || ba॒stā॒ji॒na-ma॒ddhyava̭ rohati | puṣṭyā̭me॒va pra॒jana̭ne॒ prati̭tiṣṭhati || 47 ||

(pa॒ri॒dhā॒paya̭ti - go॒dhūmā̭ - juhoti॒ - svaṃ - naiti̭ - pra॒tyañja̭-ṅghnanti - lo॒ko - +nava̭ ca (a. 7)

anuvākaṃ 8 - annahomāḥ, abhiṣekaśca

sa॒ptānna̭-ho॒māñjṷhoti | sa॒pta vā annā̭ni | yāva̭ntye॒vānnā̭ni | tānye॒vāva̭rundhe | sa॒pta grā॒myā oṣa̭dhayaḥ | sa॒ptāra॒ṇyāḥ | u॒bhayī̭ṣā॒-mava̭ruddhyai || anna̭syā-nnasya juhoti | anna̭syānna॒syā-va̭ruddhyai || ya-dvā̭japeyayā॒jya-na̭varuddhasyāśñī॒yāt || 48 ||

ava̭ruddhena॒ vyṛ̭ddhyeta | sarva̭sya samava॒dāya̭ juhoti | ana̭varuddha॒-syāva̭ruddhyai || audṷmbareṇa sru॒veṇa̭ juhoti | ūrgvā anna̭-mudu॒mbaraḥ̭ | ū॒rja e॒vānnādya॒syāva̭ruddhyai || de॒vasya̭ tvā savi॒tuḥ pra̭sa॒va ityā̭ha | sa॒vi॒tṛ pra̭sūta e॒vaina॒-mbrahma̭ṇā de॒vatā̭bhi-ra॒bhiṣi̭ñcati || anna̭syānnasyā॒bhiṣi̭ñcati | anna̭syānna॒syāva̭ruddhyai || 49 ||

pu॒rastā᳚t-pra॒tyañca̭-ma॒bhiṣi̭ñcati | pu॒rastā॒ddhi-pra̭tī॒cīna॒-manna̭ma॒dyate᳚ | śī॒r॒ṣa॒to̭-'bhiṣi̭ñcati | śī॒r॒ṣa॒to hyanna̭ma॒dyate᳚ || āmukhā̭da॒nvava̭ srāvayati | mu॒kha॒ta e॒vāsmā̭ a॒nnādya̭-ndadhāti || a॒gnestvā॒ sāmrā᳚jyenā॒bhiṣi̭ñcā॒mītyā̭ha | e॒ṣa vā a॒gne-ssa॒vaḥ | tenai॒vaina̭-ma॒bhiṣi̭ñcati | indra̭sya tvā॒ sāmrā᳚jyenā॒bhiṣi̭ñcā॒mītyā̭ha || 50 ||

i॒ndri॒ya-me॒vāsmi̭-nne॒tena̭ dadhāti | bṛha॒spate᳚stvā॒ sāmrā᳚jyenā॒bhiṣi̭ñcā॒-mītyā̭ha | brahma॒ vai de॒vānā॒-mbṛha॒spatiḥ̭ | brahma̭ṇai॒vaina̭-ma॒bhiṣi̭ñcati || so॒ma॒gra॒hāgścā̭-vadānī॒yāni̭ ca॒rtvigbhya॒ upa̭ haranti | a॒mume॒va tai-rlo॒ka-manna̭vanta-ṅkaroti | su॒rā॒gra॒hāgścā̭-navadānī॒yāni̭ ca vāja॒sṛdbhyaḥ̭ | i॒mame॒va tai-rlo॒ka-manna̭vanta-ṅkaroti | atho̭ u॒bhayī᳚ṣve॒vābhiṣi̭cyate || vi॒mā॒tha-ṅkṷrvate vāja॒sṛtaḥ̭ || 51 ||

i॒ndri॒yasyāva̭ruddhyai || ani̭ruktābhiḥ prātassava॒ne stṷvate | ani̭ruktaḥ pra॒jāpa̭tiḥ | pra॒jāpa̭te॒rāptyai᳚ | vāja̭vatībhi॒-rmāddhya̭ndine | annaṃ॒-vai~ vājaḥ̭ | anna̭me॒vā-va̭rundhe | śi॒pi॒vi॒ṣṭava̭tībhi-stṛtīyasava॒ne | ya॒jño vai viṣṇuḥ̭ | pa॒śava॒-śśipiḥ̭ | ya॒jña e॒va pa॒śuṣu॒ prati̭ tiṣṭhati || bṛ॒hadantya̭-mbhavati | anta̭me॒vainagg̭ śri॒yai ga̭mayati || 52 ||

(a॒śñī॒yā - danna̭syānna॒syā va̭ruddhyā॒ - indra̭sya tvā॒ sāmrā᳚jyenā॒bhiṣi̭ñcā॒ mītyā̭ha-vāja॒sṛtaḥ॒ - śipi॒ strīṇi̭ ca) (a. 8)

anuvākaṃ 9 - atigrāhyāḥ, pañcaindrāḥ

nṛ॒ṣada॒-ntvetyā̭ha | pra॒jā vai nṝn | pra॒jānā̭me॒vaitena̭ sūyate | dru॒ṣada॒mityā̭ha | vana॒spata̭yo॒ vai dru | vana॒spatī̭nāme॒vai tena̭ sūyate | bhu॒va॒na॒sada॒-mityā̭ha | ya॒dā vai vasī̭yā॒-nbhava̭ti | bhuva̭namaga॒nniti॒ vai tamā̭huḥ | bhuva̭name॒vaitena̭ gacchati || 53 ||

a॒phsu॒ṣada̭-ntvā ghṛta॒sada॒-mityā̭ha | a॒pāme॒vaitena̭ ghṛ॒tasya̭ sūyate | vyo॒ma॒sada॒-mityā̭ha | ya॒dā vai vasī̭yā॒-nbhava̭ti | vyo̭māga॒nniti॒ vai tamā̭huḥ | vyo̭mai॒vaitena̭ gacchati || pṛ॒thi॒vi॒ṣada̭-ntvā-'ntarikṣa॒sada॒-mityā̭ha | e॒ṣāme॒vaitena̭ lo॒kānāgṃ̭ sūyate | tasmā᳚-dvājape-yayā॒jī na ka-ñca॒na pra॒tyava̭rohati | apī̭va॒ hi de॒vatā̭nāgṃ sū॒yate᳚ || 54 ||

nā॒ka॒sada॒-mityā̭ha | ya॒dāvai vasī̭yā॒-nbhava̭ti | nāka̭maga॒nniti॒ vai tamā̭huḥ | nāka̭me॒vaitena̭ gacchati || ye grahāḥ᳚ pañcaja॒nīnā॒ ityā̭ha | pa॒ñca॒ja॒nānā̭-me॒vaitena̭ sūyate || a॒pāgṃ rasa॒mudva̭yasa॒-mityā̭ha | a॒pāme॒vaitena॒ rasa̭sya sūyate | sūrya̭raśmigṃ sa॒mābhṛ̭ta॒-mityā̭ha saśukra॒tvāya̭ || 55 ||

(ga॒ccha॒ti॒ - sū॒yate॒ - +nava̭ ca) (a. 9)

anuvākaṃ 10 - piṇḍapitṛyajñaḥ darśapūrṇamāsabrāhmaṇaśeṣaḥ

indro vṛ॒tragṃ ha॒tvā | asṷrā-nparā॒bhāvya̭ | so̭-'māvā॒syā᳚-mpratyāga̭cchat | te pi॒taraḥ̭ pūrve॒dyu-rāga̭cchann | pi॒tṝn. ya॒jño̭-'gacchat | ta-nde॒vāḥ puna̭rayācanta | tame᳚bhyo॒ na puna̭radaduḥ | te᳚-'bruva॒n varaṃ̭-vṛ~ṇāmahai | atha̭ vaḥ॒ puna̭rdāsyāmaḥ | a॒smabhya̭me॒va pū᳚rve॒dyuḥ kri̭yātā॒ iti̭ || 56 ||

tame᳚bhyaḥ॒ puna̭radaduḥ | tasmā᳚t-pi॒tṛbhyaḥ̭ pūrve॒dyuḥ kri̭yate | ya-tpi॒tṛbhyaḥ̭ pūrve॒dyuḥ ka॒roti̭ | pi॒tṛbhya̭ e॒va ta-dya॒jña-nni॒ṣkrīya॒ yaja̭mānaḥ॒ prata̭nute || somā̭ya pi॒tṛpī̭tāya sva॒dhā nama॒ ityā̭ha | pi॒ture॒vādhi̭ somapī॒thamava̭ rundhe | na hi pi॒tā pra॒mīya̭māṇa॒ āhai॒ṣa so̭mapī॒tha iti̭ | i॒ndri॒yaṃ-vai~ so̭mapī॒thaḥ | i॒ndri॒yame॒va so̭mapī॒thamava̭-rundhe | tena᳚ndri॒yeṇa̭ dvi॒tīyā᳚-ñjā॒yāma॒bhya̭śñute || 57 ||

e॒ta-dvai brāhma̭ṇa-mpu॒rā vā̭jaśrava॒sā vi॒dāma̭krann | tasmā॒-tte dvedvḙ jā॒ye a॒bhyā᳚kṣata | ya e॒vaṃ-ve~da̭ | a॒bhi dvi॒tīyā᳚-ñjā॒yāma̭śñute || a॒gnayḙ kavya॒vāha̭nāya sva॒dhā nama॒ ityā̭ha | ya e॒va pi̭tṛ॒ṇāma॒gniḥ | ta-mprī̭ṇāti || ti॒sra āhṷtī-rjuhoti || trirnida̭dhāti || ṣaṭ-thsampa̭dyante || 58 ||

ṣaḍvā ṛ॒tavaḥ̭ | ṛ॒tūne॒va prī̭ṇāti || tū॒ṣṇī-mmekṣa̭ṇa॒-māda̭dhāti | asti̭ vā॒ hi ṣa॒ṣṭha ṛ॒turna vā᳚ || de॒vān. vai pi॒tṝ-nprī॒tān | ma॒nu॒ṣyāḥ᳚ pi॒taro-'nu॒ prapi̭pate | ti॒sra āhṷtī-rjuhoti | trirnida̭dhāti | ṣaṭ-thsampa̭dyante | ṣaḍvā ṛ॒tavaḥ̭ || 59 ||

ṛ॒tavaḥ॒ khalu॒ vai de॒vāḥ pi॒taraḥ̭ | ṛ॒tūne॒va de॒vā-npi॒tṝ-nprī̭ṇāti | tānprī॒tān | ma॒nu॒ṣyāḥ᳚ pi॒taro-'nu॒ prapi̭pate || sa॒kṛ॒dā॒cchi॒nna-mba॒r॒hi-rbha̭vati | sa॒kṛdi̭va॒ hi pi॒taraḥ̭ || trirnida̭dhāti | tṛ॒tīye॒ vā i॒to lo॒ke pi॒taraḥ̭ | tāne॒va prī̭ṇāti || parāṃ॒āva̭rtate || 60 ||

hlīkā॒ hi pi॒taraḥ̭ || òṣmaṇo᳚ vyā॒vṛta॒ upā᳚ste | ū॒ṣmabhā̭gā॒ hi pi॒taraḥ̭ || bra॒hma॒vā॒dino̭ vadanti | prāśyāṃ(3)na prāśyā(3)miti̭ | ya-tprā᳚śñī॒yāt | janya॒manna̭madyāt | pra॒māyṷka-ssyāt | yanna prā᳚śñī॒yāt | aha̭vi-ssyāt || 61 ||

pi॒tṛbhya॒ āvṛ̭ścyeta | a॒va॒ghreya̭me॒va | tanneva॒ prāśi̭ta॒-nnevāprā̭śitam || vī॒raṃ-vā~॒ vai pi॒taraḥ̭ pra॒yanto॒ hara̭nti | vī॒raṃ-vā~̭ dadati | da॒śā-ñchi̭natti | hara̭ṇabhāgā॒ hi pi॒taraḥ̭ | pi॒tṝne॒va ni॒rava̭dayate || utta̭ra॒ āyṷṣi॒ loma̭ chindīta | pi॒tṛ॒ṇāg hyḙtarhi॒ nedī̭yaḥ || 62 ||

nama̭skaroti | na॒ma॒skā॒ro hi pi̭tṛ॒ṇām || namo̭ vaḥ pitaro॒ rasā̭ya | namo̭ vaḥ pitara॒-śśuṣmā̭ya | namo̭ vaḥ pitaro jī॒vāya̭ | namo̭ vaḥ pitara-ssva॒dhāyai᳚ | namo̭ vaḥ pitaro ma॒nyave᳚ | namo̭ vaḥ pitaro gho॒rāya̭ | pita̭ro॒ namo̭ vaḥ | ya e॒tasmi̭n ~lo॒ke stha || 63 ||

yu॒ṣmāgste-'nṷ | ye᳚-'smi~llo॒ke | mā-nte nṷ | ya e॒tasmi̭~llo॒ke stha | yū॒ya-nteṣāṃ॒-va~si̭ṣṭhā bhūyāsta | ye᳚-'smi~llo॒ke | a॒ha-nteṣāṃ॒-va~si̭ṣṭho bhūyāsa॒mityā̭ha | vasi̭ṣṭha-ssamā॒nānā᳚-mbhavati | ya e॒vaṃ-vi~॒dvān-pi॒tṛbhyaḥ̭ ka॒roti̭ || e॒ṣa vai ma̭nu॒ṣyā̭ṇāṃ-ya~॒jñaḥ || 64 ||

de॒vānāṃ॒-vā~ ita̭re ya॒jñāḥ | tena॒ vā e॒ta-tpi̭tṛlo॒ke ca̭rati || ya-tpi॒tṛbhyaḥ̭ ka॒roti̭ | sa ī᳚śva॒raḥ pramḙtoḥ | prā॒jā॒pa॒tyaya॒rcā puna॒raiti̭ | ya॒jño vai pra॒jāpa̭tiḥ | ya॒jñenai॒va sa॒ha puna॒raiti̭ | na pra॒māyṷko bhavati || pi॒tṛ॒lo॒ke vā e॒ta-dyaja̭mānaścarati | ya-tpi॒tṛbhyaḥ̭ ka॒roti̭ | sa ī᳚śva॒ra ārti॒mārtoḥ᳚ | pra॒jāpa̭ti॒-stvāvaina॒-ntata॒ unnḙtumarha॒tītyā̭huḥ | ya-tprā̭jāpa॒tyaya॒rcā puna॒raiti̭ | pra॒jāpa̭tire॒vaina॒-ntata॒ unna̭yati | nārti॒mārccha̭ti॒ yaja̭mānaḥ || 65 ||

(itya̭ - śñute - padyante - padyante॒ ṣaḍvā ṛ॒tavo̭ - varta॒te-' - ha̭vi-ssyā॒n - nedī̭yaḥ॒ - stha - ya॒jño - yaja̭mānaścarati॒ ya-tpi॒tṛbhyaḥ̭ ka॒roti॒ pañca̭ ca) (a. 10)

(de॒vā॒su॒rā a॒gnīṣoma̭yo--r de॒vā vai yathā॒ darśaṃ̭ - de॒vā vai yada॒nyai-rgrahai᳚--r brahmavā॒dino॒ nāgni̭ṣṭo॒mo na - sā̭vi॒traṃ - de॒vasyā॒haṃ - tā॒rpyagṃ - sa॒ptānna̭ho॒mān - nṛ॒ṣadaṃ॒ - tvendro̭ vṛ॒tragṃ ha॒tvā daśa̭)

(de॒vā॒su॒rā - vā॒jyḙvainaṃ॒ - tasmā᳚-dvājapeyayā॒jī - de॒vasyā॒haṃ - ~vāja॒syāva̭ruddhyā- indri॒yame॒vāsmi॒n॒. - hlīkā॒ hi pi॒taraḥ॒ pañca̭ṣaṣṭiḥ)

(de॒vā॒su॒rā - yaja̭mānaḥ)

|| hariḥ̭ om ||

|| kṛṣṇa yajurvedīya taittirīya brāhmaṇe prathamāṣṭake tṛtīyaḥ prapāṭhaka-ssamāptaḥ ||

Sanskrit — Devanagari (original)

कृष्ण यजुर्वेदीय तैत्तिरीय ब्राह्मणे प्रथमाष्टके तृतीयः प्रपाठकः - वाजपेयब्राह्मणं

ओ-न्नमः परमात्मने, श्री महागणपतये नमः,

श्री गुरुभ्यो नमः । ह॒रिः॒ ओम् ॥

अनुवाकं 1 - पुनराधेयशेषः आज्यभागयोर्विशेषः

दे॒वा॒सु॒रा-स्सं-यँ॑त्ता आसन्न् । ते दे॒वा वि॑ज॒य-मु॑प॒यन्तः॑ । अ॒ग्नीषोम॑यो-स्तेज॒स्विनी᳚स्त॒नू-स्स-न्न्य॑दधत । इ॒दमु॑ नो भविष्यति । यदि॑ नो जे॒ष्यन्तीति॑ । तेना॒ग्नीषोमा॒-वपा᳚क्रामताम् । ते दे॒वा वि॒जित्य॑ । अ॒ग्नीषोमा॒-वन्वै᳚च्छन्न् । ते᳚-ऽग्नि-मन्व॑विन्द-न्नृ॒तुषू-थ्स॑न्नम् । तस्य॒ विभ॑क्तीभि-स्तेज॒स्विनी᳚स्त॒नू-रवा॑रुन्धत ॥ 1 ॥

ते सोम॒-मन्व॑विन्दन्न् । तम॑घ्नन्न् । तस्य॑ यथा-ऽभि॒ज्ञाय॑-न्त॒नू-र्व्य॑गृह्णत । ते ग्रहा॑ अभवन्न् । त-द्ग्रहा॑णा-ङ्ग्रह॒त्वम् । यस्यै॒वं-विँ॒दुषो॒ ग्रहा॑ गृ॒ह्यन्ते᳚ । तस्य॒ त्वे॑व गृ॑ही॒ताः ॥ नाना᳚ग्नेय-म्पुनरा॒धेये॑ कुर्यात् । यदना᳚ग्नेय-म्पुनरा॒धेये॑ कु॒र्यात् । व्यृ॑द्धमे॒व तत् ॥ 2 ॥

अना᳚ग्नेयं॒-वाँ ए॒त-त्क्रि॑यते । य-थ्स॒मिध॒-स्तनू॒नपा॑तमि॒डो ब॒र्॒हि-र्य॑जति ॥ उ॒भावा᳚ग्ने॒या-वाज्य॑भागौ स्याताम् ॥ अना᳚ज्यभागौ-भवत॒ इत्या॑हुः । यदु॒भावा᳚ग्ने॒याव॒न्वञ्चा॒विति॑ । अ॒ग्नये॒ पव॑माना॒योत्त॑र-स्स्यात् । य-त्पव॑मानाय । तेनाज्य॑ भागः । तेन॑ सौ॒म्यः ॥ बुध॑न्वत्याग्ने॒य-स्याज्य॑-भागस्य पुरो-ऽनुवा॒क्या॑ भवति ॥ 3 ॥

यथा॑ सु॒प्त-म्बो॒धय॑ति । ता॒दृगे॒व तत् ॥ अ॒ग्निन्य॑क्ताः पत्नी संयाँ॒जाना॒मृचः॑ स्युः । तेना᳚ग्ने॒यग्ं सर्व॑-म्भवति ॥ ए॒क॒धा ते॑ज॒स्विनी᳚-न्दे॒वता॒-मुपै॒तीत्या॑हुः । सैन॑मीश्व॒रा प्र॒दह॒ इति॑ ॥ नेति॑ ब्रूयात् । प्र॒जन॑नं॒-वाँ अ॒ग्निः । प्र॒जन॑न-मे॒वोपै॒तीति॑ ॥ कृ॒तय॑जु॒-स्सम्भृ॑त सम्भार॒ इत्या॑हुः ॥ 4 ॥

न स॒भृन्त्या᳚-स्सम्भा॒राः । न यजुः॑ का॒र्य॑मिति॑ ॥ अथो॒ खलु॑ । स॒भृन्त्या॑ ए॒व स॑भां॒राः । का॒र्यं॑-यँजुः॑ । पु॒न॒रा॒धेय॑स्य॒ समृ॑द्ध्यै ॥ तेनो॑पा॒ग्ं॒शु प्रच॑रति । एष्य॑ इव॒ वा ए॒षः । य-त्पु॑न-रा॒धेयः॑ । यथो॑पा॒ग्ं॒शु न॒ष्टमि॒च्छति॑ ॥ 5 ॥

ता॒दृगे॒व तत् ॥ उ॒च्चै-स्स्वि॑ष्ट॒कृत॒मु-थ्सृ॑जति । यथा॑ न॒ष्टं-विँ॒त्वा प्राहा॒यमिति॑ । ता॒दृगे॒व तत् ॥ ए॒क॒धा ते॑ज॒स्विनी᳚-न्दे॒वता॒मुपै॒तीत्या॑हुः । सैन॑मीश्व॒रा प्र॒दह॒ इति॑ । तत्तथा॒ नोपै॑ति । प्र॒या॒जा॒नू॒या॒जेष्वे॒व विभ॑क्तीः कुर्यात् । य॒था॒पू॒र्व-माज्य॑भागौ॒ स्याता᳚म् । ए॒व-म्प॑त्नी संयाँ॒जाः ॥ 6 ॥

त-द्वै᳚श्वान॒रव॑त्-प्र॒जन॑नवत्तर॒-मुपै॒तीति॑ ॥ तदा॑हुः । व्यृ॑द्धं॒-वाँ ए॒तत् । अना᳚ग्नेयं॒-वाँ ए॒त-त्क्रि॑यत॒ इति॑ ॥ नेति॑ ब्रूयात् । अ॒ग्नि-म्प्र॑थ॒मं-विँभ॑क्तीनां-यँजति । अ॒ग्निमु॑त्त॒म-म्प॑त्नी संयाँ॒जाना᳚म् । तेना᳚ग्ने॒यम् । तेन॒ समृ॑द्ध-ङ्क्रियत॒ इति॑ ॥ 7 ॥

(अ॒रु॒न्ध॒ - तै॒व त-द्- भ॑वति॒ - सम्भृ॑तसम्भार॒ इत्या॑हु - रि॒च्छति॑ - पत्नीसंयाँ॒जा - +नव॑ च) ( आ1)

अनुवाकं 2 - वाजपेयस्य विधिः

दे॒वा वै यथा॒दर्शं॑-यँ॒ज्ञानाह॑रन्त । यो᳚-ऽग्निष्टो॒मम् । य उ॒क्थ्य᳚म् । यो॑-ऽतिरा॒त्रम् । ते स॒हैव सर्वे॑ वाज॒पेय॑-मपश्यन्न् । ते । अ॒न्यो᳚न्यस्मै॒ नाति॑ष्ठन्त । अ॒हम॒नेन॑ यजा॒ इति॑ । ते᳚-ऽब्रुवन्न् । आ॒जिम॒स्य धा॑वा॒मेति॑ ॥ 8 ॥

तस्मि॑-न्ना॒जिम॑धावन्न् । त-म्बृह॒स्पति॒-रुद॑जयत् । तेना॑यजत । स स्वारा᳚ज्य-मगच्छत् । तमिन्द्रो᳚-ऽब्रवीत् । माम॒नेन॑ याज॒येति॑ । तेनेन्द्र॑-मयाजयत् । सो-ऽग्र॑-न्दे॒वता॑ना॒-म्पर्यै᳚त् । अग॑च्छ॒-थ्स्वारा᳚ज्यम् । अति॑ष्ठन्तास्मै॒ ज्यैष्ठ्या॑य ॥ 9 ॥

य ए॒वं-विँ॒द्वान्. वा॑ज॒पेये॑न॒ यज॑ते । गच्छ॑ति॒ स्वारा᳚ज्यम् । अग्रग्ं॑ समा॒नाना॒-म्पर्ये॑ति । तिष्ठ॑न्ते-ऽस्मै॒ ज्यैष्ठ्या॑य ॥ स वा ए॒ष ब्रा᳚ह्म॒णस्य॑ चै॒व रा॑ज॒न्य॑स्य च य॒ज्ञः ॥ तं-वाँ ए॒तं-वाँ॑ज॒पेय॒ इत्या॑हुः । वा॒जाप्यो॒ वा ए॒षः । वाज॒ग्ग्॒ ह्ये॑तेन॑ दे॒वा ऐफ्सन्न्॑ ॥ सोमो॒ वै वा॑ज॒पेयः॑ । यो वै सोमं॑-वाँज॒पेयं॒-वेँद॑ ॥ 10 ॥

वा॒ज्ये॑वैन॑-म्पी॒त्वा भ॑वति । आ-ऽस्य॑ वा॒जी जा॑यते ॥ अन्नं॒-वैँ वा॑ज॒पेयः॑ । य ए॒वं-वेँद॑ । अत्त्यन्न᳚म् । आ-ऽस्या᳚न्ना॒दो जा॑यते ॥ ब्रह्म॒ वै वा॑ज॒पेयः॑ । य ए॒वं-वेँद॑ । अत्ति॒ ब्रह्म॒णा-ऽन्न᳚म् । आ-ऽस्य॑ ब्र॒ह्मा जा॑यते ॥ 11 ॥

वाग्वै वाज॑स्य प्रस॒वः । य ए॒वं-वेँद॑ । क॒रोति॑ वा॒चा वी॒र्य᳚म् । ऐनं॑-वाँ॒चा ग॑च्छति । अपि॑वतीं॒-वाँचं॑-वँदति ॥ प्र॒जाप॑ति-र्दे॒वेभ्यो॑ य॒ज्ञान् व्यादि॑शत् । स आ॒त्मन् वा॑ज॒पेय॑-मधत्त । त-न्दे॒वा अ॑ब्रुवन्न् । ए॒ष वाव य॒ज्ञः । य-द्वा॑ज॒पेयः॑ ॥ 12 ॥

अप्ये॒व नो-ऽत्रा॒स्त्विति॑ । तेभ्य॑ ए॒ता उज्जि॑तीः॒ प्राय॑च्छत् ॥ ता वा ए॒ता उज्जि॑तयो॒ व्याख्या॑यन्ते । य॒ज्ञस्य॑ सर्व॒त्वाय॑ । दे॒वता॑ना॒-मनि॑र्भागाय ॥ दे॒वा वै ब्रह्म॑ण॒श्चान्न॑स्य च॒ शम॑ल॒मपा᳚घ्नन्न् । य-द्ब्रह्म॑ण॒-श्शम॑ल॒मासी᳚त् । सा गाथा॑ नाराश॒ग्ग्॒स्य॑ भवत् । यदन्न॑स्य । सा सुरा᳚ ॥ 13 ॥

तस्मा॒-द्गाय॑तश्च म॒त्तस्य॑ च॒ न प्र॑ति॒गृह्य᳚म् । य-त्प्र॑तिगृह्णी॒यात् । शम॑ल॒-म्प्रति॑गृह्णीयात् ॥ सर्वा॒ वा ए॒तस्य॒ वाचो ऽव॑रुद्धाः । यो वा॑जपेयया॒जी । या पृ॑थि॒व्यां-याँ-ऽग्नौ या र॑थन्त॒रे । या-ऽन्तरि॑क्षे॒ या वा॒यौ या वा॑मदे॒व्ये । या दि॒वि या-ऽऽदि॒त्ये या बृ॑ह॒ति । या-ऽफ्सु यौष॑धीषु॒ या वन॒स्पति॑षु ॥ तस्मा᳚-द्वाजपेयया॒ज्यार्त्वि॑जीनः । सर्वा॒ ह्य॑स्य॒ वाचो ऽव॑रुद्धाः ॥ 14 ॥

(धा॒वा॒मेति॒ - ज्यैष्ठ्या॑य॒ - वेद॑ - ब्र॒ह्मा जा॑यते-वाज॒पेयः॒-सुरा-ऽऽर्त्वि॑जीन॒ एकं॑ च ) (अ. 2)

अनुवाकं 3 - तस्यग्रहविशेषाः

दे॒वा वै यद॒न्यै-र्ग्रहै᳚-र्य॒ज्ञस्य॒ नावारु॑न्धत । तद॑तिग्रा॒ह्यै॑-रति॒गृह्या-वा॑रुन्धत । तद॑तिग्रा॒ह्या॑णा-मतिग्राह्य॒त्वम् ॥ यद॑तिग्रा॒ह्या॑ गृ॒ह्यन्ते᳚ । यदे॒वान्यै-र्ग्रहै᳚-र्य॒ज्ञस्य॒ नाव॑रु॒न्धे । तदे॒व तैर॑ति॒गृह्या-व॑रुन्धे ॥ पञ्च॑ गृह्यन्ते । पाङ्क्तो॑ य॒ज्ञः । यावा॑ने॒व य॒ज्ञः । तमा॒प्त्वा ऽव॑रुन्धे ॥ 15 ॥

सर्व॑ ऐ॒न्द्रा भ॑वन्ति । ए॒क॒धैव यज॑मान इन्द्रि॒य-न्द॑धति ॥ स॒प्तद॑श प्राजाप॒त्या ग्रहा॑ गृह्यन्ते । स॒प्त॒द॒शः प्र॒जाप॑तिः । प्र॒जाप॑ते॒-राप्त्यै᳚ ॥ एक॑य॒र्चा गृ॑ह्णाति । ए॒क॒धैव यज॑माने वी॒र्य॑-न्दधाति ॥ सो॒म॒ग्र॒हाग्श्च॑ सुराग्र॒हाग्श्च॑ गृह्णाति । ए॒त-द्वै दे॒वाना᳚-म्पर॒ममन्न᳚म् । य-थ्सोमः॑ ॥ 16 ॥

ए॒त-न्म॑नु॒ष्या॑णाम् । य-थ्सुरा᳚ । प॒र॒मेणै॒वास्मा॑ अ॒न्नाद्ये॒नाव॑र-म॒न्नाद्य॒-मव॑रुन्धे ॥ सो॒म॒ग्र॒हा-न्गृ॑ह्णाति । ब्रह्म॑णो॒ वा ए॒त-त्तेजः॑ । य-थ्सोमः॑ । ब्रह्म॑ण ए॒व तेज॑सा॒ तेजो॒ यज॑माने दधाति । सु॒रा॒ग्र॒हा-न्गृ॑ह्णाति । अन्न॑स्य॒ वा ए॒तच्छम॑लम् । य-थ्सुरा᳚ ॥ 17 ॥

अन्न॑स्यै॒व शम॑लेन॒ शम॑लं॒-यँज॑माना॒-दप॑हन्ति ॥ सो॒म॒ग्र॒हाग्श्च॑ सुराग्र॒हाग्श्च॑ गृह्णाति । पुमा॒न्॒. वै सोमः॑ । स्त्री सुरा᳚ । त-न्मि॑थु॒नम् । मि॒थु॒नमे॒वास्य॒ त-द्य॒ज्ञे क॑रोति प्र॒जन॑नाय । आ॒त्मान॑मे॒व सो॑मग्र॒है-स्स्पृ॑णोति । जा॒याग्ं सु॑रा ग्र॒हैः । तस्मा᳚-द्वाजपेयया॒ज्य॑मुष्मि॑ँल्लो॒के स्त्रिय॒ग्ं॒ सम्भ॑वति । वा॒ज॒पेया॑-भिजित॒ग्ग्॒ ह्य॑स्य ॥ 18 ॥

पूर्वे॑ सोमग्र॒हा गृ॑ह्यन्ते । अप॑रे सुराग्र॒हाः । पु॒रो॒क्षग्ं सो॑मग्र॒हान्थ्- सा॑दयति । प॒श्चा॒द॒क्षग्ं सु॑राग्र॒हान् । पा॒प॒व॒स्य॒सस्य॒ विधृ॑त्यै ॥ ए॒ष वै यज॑मानः । य-थ्सोमः॑ । अन्न॒ग्ं॒ सुरा᳚ । सो॒म॒ग्र॒हाग्श्च॑ सुराग्र॒हाग्श्च॒ व्यति॑षजति । अ॒न्नाद्ये॑नै॒वैनं॒-व्यँति॑षजति ॥ 19 ॥

स॒पृञ्चः॑ स्थ॒ स-म्मा॑ भ॒द्रेण॑ पृ॒ङ्क्तेत्या॑ह । अन्नं॒-वैँ भ॒द्रम् । अ॒न्नाद्ये॑नै॒वैन॒ग्ं॒ सग्ंसृ॑जति ॥ अन्न॑स्य॒ वा ए॒तच्छम॑लम् । य-थ्सुरा᳚ । पा॒प्मॆव॒ खलु॒ वै शम॑लम् । पा॒प्मना॒ वा ए॑नमे॒तच्छम॑लेन॒ व्यति॑षजति । य-थ्सो॑मग्र॒हाग्श्च॑ सुराग्र॒हाग्श्च॑ व्यति॒षज॑ति ॥ वि॒पृचः॑ स्थ॒ वि मा॑ पा॒प्मना॑ पृ॒ङ्क्तेत्या॑ह । पा॒प्मनै॒वैन॒ग्ं॒ शम॑लेन॒ व्याव॑र्तयति ॥ 20 ॥

तस्मा᳚-द्वाजपेयया॒जी पू॒तो मेद्ध्यो॑ दक्षि॒ण्यः॑ ॥ प्रांउ-द्द्र॑वति सोमग्र॒हैः । अ॒मुमे॒व तै-र्लो॒क-म॒भिज॑यति । प्र॒त्यङ्ख्सु॑रा ग्र॒हैः । इ॒ममे॒व तै-र्लो॒क-म॒भिज॑यति ॥ प्रति॑ष्ठन्ति सोमग्र॒हैः । याव॑दे॒व स॒त्यम् । तेन॑ सूयते ॥ वा॒ज॒सृद्भ्यः॑ सुराग्र॒हान्. ह॑रन्ति । अनृ॑तेनै॒व विश॒ग्ं॒ सग्ंसृ॑जति ॥ हि॒र॒ण्य॒पा॒त्र-म्मधोः᳚ पू॒र्ण-न्द॑दाति । म॒ध॒व्यो॑-ऽसा॒नीति॑ ॥ ए॒क॒धा ब्र॒ह्मण॒ उप॑ हरति । ए॒क॒धैव यज॑मान॒ आयु॒स्तेजो॑ दधाति ॥ 21 ॥

(आ॒प्त्वा-ऽव॑रुन्धे॒ - सोमः॒ - शम॑लं॒-यँ-थ्सुरा॒ - ह्य॑-स्यैनं॒-व्यँति॑षजति॒ - व्याव॑र्तयति - सृजति च॒त्वारि॑ च ) (अ. 3)

अनुवाकं 4 - पशव-स्सप्तदश

ब्र॒ह्म॒वा॒दिनो॑ वदन्ति । नाग्नि॑ष्टो॒मो नोक्थ्यः॑ । न षो॑ड॒शी नाति॑रा॒त्रः । अथ॒ कस्मा᳚-द्वाज॒पेये॒ सर्वे॑ यज्ञक्र॒तवो-ऽव॑रुद्ध्यन्त॒ इति॑ । प॒शुभि॒रिति॑ ब्रूयात् ॥ आ॒ग्ने॒य-म्प॒शुमाल॑भते । अ॒ग्नि॒ष्टो॒ममे॒व तेनाव॑रुन्धे । ऐ॒न्द्रा॒ग्नेनो॒क्थ्य᳚म् । ऐ॒न्द्रेण॑ षोड॒शिनः॑ स्तो॒त्रम् । सा॒र॒स्व॒त्या-ऽति॑रा॒त्रम् ॥ 22 ॥

मा॒रु॒त्या बृ॑ह॒त-स्स्तो॒त्रम् । ए॒ताव॑न्तो॒ वै य॑ज्ञक्र॒तवः॑ । ता-न्प॒शुभि॑रे॒वा-व॑रुन्धे ॥ आ॒त्मान॑मे॒व स्पृ॑णो-त्यग्निष्टो॒मेन॑ । प्रा॒णा॒पा॒ना-वु॒क्थ्ये॑न । वी॒र्यग्ं॑ षोड॒शिनः॑ स्तो॒त्रेण॑ । वाच॑-मतिरा॒त्रेण॑ । प्र॒जा-म्बृ॑ह॒त-स्स्तो॒त्रेण॑ । इ॒ममे॒व लो॒कम॒भि ज॑यत्यग्निष्टो॒मेन॑ । अ॒न्तरि॑क्ष-मु॒क्थ्ये॑न ॥ 23 ॥

सु॒व॒र्गं-लोँ॒कग्ं षो॑ड॒शिनः॑ स्तो॒त्रेण॑ । दे॒व॒याना॑ने॒व प॒थ आरो॑ह-त्यतिरा॒त्रेण॑ । नाकग्ं॑ रोहति बृह॒त-स्स्तो॒त्रेण॑ । तेज॑ ए॒वात्म-न्ध॑त्त आग्ने॒येन॑ प॒शुना᳚ । ओजो॒ बल॑मैन्द्रा॒ग्नेन॑ । इ॒न्द्रि॒य-मै॒न्द्रेण॑ । वाचग्ं॑ सारस्व॒त्या । उ॒भावे॒व दे॑वलो॒क-ञ्च॑ मनुष्यलो॒क-ञ्चा॒भिज॑यति मारु॒त्या व॒शया᳚ ॥ स॒प्तद॑श प्राजाप॒त्या-न्प॒शूनाल॑भते । स॒प्त॒द॒शः प्र॒जाप॑तिः ॥ 24 ॥

प्र॒जाप॑ते॒राप्त्यै᳚ ॥ श्या॒मा एक॑रूपा भवन्ति । ए॒वमि॑व॒ हि प्र॒जाप॑ति॒-स्समृ॑द्ध्यै ॥ ता-न्पर्य॑ग्निकृता॒-नुथ्सृ॑जति ॥ म॒रुतो॑ य॒ज्ञम॑जिघाग्ंस-न्प्र॒जाप॑तेः । तेभ्य॑ ए॒ता-म्मा॑रु॒तीं-वँ॒शामाल॑भत । तयै॒वैना॑-नशमयत् ॥ मा॒रु॒त्या प्र॒चर्य॑ । ए॒तान्-थ्सञ्ज्ञ॑पयेत् । म॒रुत॑ ए॒व श॑मयि॒त्वा ॥ 25 ॥

ए॒तैः प्रच॑रति । य॒ज्ञस्याघा॑ताय ॥ ए॒क॒धा व॒पा जु॑होति । ए॒क॒दे॒व॒त्या॑ हि । ए॒ते । अथो॑ एक॒धैव यज॑माने वी॒र्य॑-न्दधाति ॥ नै॒वा॒रेण॑ स॒प्तद॑शशरावे-णै॒तर्हि॒ प्रच॑रति । ए॒त-त्पु॑रोडाशा॒ ह्ये॑ते । अथो॑ पशू॒नामे॒व छि॒द्रमपि॑दधाति ॥ सा॒र॒स्व॒त्योत्त॒मया॒ प्रच॑रति । वाग् वै सर॑स्वती । तस्मा᳚-त्प्रा॒णानां॒-वाँगु॑त्त॒मा । अथो᳚ प्र॒जाप॑तावे॒व य॒ज्ञ-म्प्रति॑ष्ठापयति । प्र॒जाप॑ति॒र्॒ हि वाक् ॥ अप॑न्नदती भवति । तस्मा᳚-न्मनु॒ष्या᳚-स्सर्वां॒-वाँचं॑-वँदन्ति ॥ 26 ॥

(अ॒ति॒रा॒त्र - म॒न्तरि॑क्षमु॒क्थ्ये॑न - प्र॒जाप॑तिः - शमयि॒त्वोत् - त॒मया॒ प्रच॑रति॒ षट् च॑) (अ. 4)

अनुवाकं 5 - रथयाजनम्

सा॒वि॒त्र-ञ्जु॑होति॒ कर्म॑णः कर्मणः पु॒रस्ता᳚त् ॥ कस्त-द्वे॒देत्या॑हुः । य-द्वा॑ज॒पेय॑स्य॒ पूर्वं॒-यँदप॑र॒मिति॑ । स॒वि॒तृप्र॑सूत ए॒व य॑थापू॒र्व-ङ्कर्मा॑णि करोति ॥ सव॑ने सवने जुहोति । आ॒क्रम॑णमे॒व त-थ्सेतुं॒-यँज॑मानः कुरुते । सु॒व॒र्गस्य॑ लो॒कस्य॒ सम॑ष्ट्यै ॥ वा॒चस्पति॒-र्वाच॑म॒द्य स्व॑दाति न॒ इत्या॑ह । वाग्वै दे॒वाना᳚-म्पु॒रा-ऽन्न॑मासीत् । वाच॑मे॒वास्मा॒ अन्नग्ग्॑ स्वदयति ॥ 27 ॥

इन्द्र॑स्य॒ वज्रो॑-ऽसि॒ वार्त्र॑घ्न॒ इति॒ रथ॑मु॒पाव॑हरति॒ विजि॑त्यै ॥ वाज॑स्य॒ नु प्र॑स॒वे मा॒तर॑-म्म॒हीमित्या॑ह । यच्चै॒वेयम् । यच्चा॒स्यामधि॑ । तदे॒वा-व॑रुन्धे । अथो॒ तस्मि॑न्ने॒वोभये॒-ऽभिषि॑च्यते ॥ अ॒फ्स्व॑न्तर॒-मृत॑म॒फ्सु भे॑ष॒जमित्यश्वा᳚-न्पल्पूलयति । अ॒फ्सु वा अश्व॑स्य॒ तृती॑य॒-म्प्रवि॑ष्टम् । तद॑नु॒वेन॒न्वव॑प्लवते । यद॒फ्सु प॑ल्पू॒लय॑ति ॥ 28 ॥

यदे॒वास्या॒फ्सु प्रवि॑ष्टम् । तदे॒वाव॑रुन्धे ॥ ब॒हु वा अश्वो॑-ऽमे॒द्ध्य-मुप॑गच्छति । यद॒फ्सु प॑ल्पू॒लय॑ति । मेद्ध्या॑ने॒वैना᳚न् करोति ॥ वा॒युर्वा᳚ त्वा॒ मनु॑र्वा॒ त्वेत्या॑ह । ए॒ता वा ए॒त-न्दे॒वता॒ अग्रे॒ अश्व॑मयुञ्जन्न् । ताभि॑रे॒वैनान्॑. युनक्ति । स॒वस्योज्जि॑त्यै ॥ यजु॑षा युनक्ति॒ व्यावृ॑त्त्यै ॥ 29 ॥

अपा᳚-न्न पादाशुहेम॒न्निति॒ सम्मा᳚र्ष्टि । मेद्ध्या॑ने॒वैना᳚न् करोति । अथो॒ स्तौत्ये॒वैना॑ना॒जिग्ं स॑रिष्य॒तः ॥ वि॒ष्णु॒ क्र॒मान् क्र॑मते । विष्णु॑रे॒व भू॒त्वेमाँल्लो॒का-न॒भिज॑यति ॥ वै॒श्व॒दे॒वो वै रथः॑ । अ॒ङ्कौ न्य॒ङ्काव॒भितो॒ रथं॒-याँवित्या॑ह । या ए॒व दे॒वता॒ रथे॒ प्रवि॑ष्टाः । ताभ्य॑ ए॒व नम॑स्करोति । आ॒त्मनो-ऽना᳚र्त्यै ॥ अश॑मरथ-म्भावुको-ऽस्य॒ रथो॑ भवति । य ए॒वं-वेँद॑ ॥ 30 ॥

(स्व॒द॒य॒ति॒ - प॒ल्पू॒लय॑ति॒ - व्यावृ॑त्त्या॒ - अना᳚र्त्यै॒ द्वे च॑) (अ. 5)

अनुवाकं 6 - रथधावनम्

दे॒वस्या॒हग्ं स॑वि॒तुः प्र॑स॒वे बृह॒स्पति॑ना वाज॒जिता॒ वाज॑-ञ्जेष॒मित्या॑ह । स॒वि॒तृप्र॑सूत ए॒व ब्रह्म॑णा॒ वाज॒मुज्ज॑यति ॥ दे॒वस्या॒हग्ं स॑वि॒तुः प्र॑स॒वे बृह॒स्पति॑ना वाज॒जिता॒ वर्षि॑ष्ठ॒-न्नाकग्ं॑ रुहेय॒मित्या॑ह । स॒वि॒तृप्र॑सूत ए॒व ब्रह्म॑णा॒ वर्षि॑ष्ठ॒-न्नाकग्ं॑ रोहति ॥ चात्वा॑ले रथच॒क्र-न्निमि॑तग्ं रोहति । अतो॒ वा अङ्गि॑रस उत्त॒मा-स्सु॑व॒र्गं-लोँ॒कमा॑यन्न् । सा॒क्षादे॒व यज॑मान-स्सुव॒र्गं-लोँ॒कमे॑ति ॥ आवे᳚ष्टयति । वज्रो॒ वै रथः॑ । वज्रे॑णै॒व दिशो॒-ऽभिज॑यति ॥ 31 ॥

वा॒जिना॒ग्ं॒ साम॑ गायते । अन्नं॒-वैँ वाजः॑ । अन्न॑मे॒-वाव॑रुन्धे ॥ वा॒चो वर्ष्म॑ दे॒वेभ्यो-ऽपा᳚क्रामत् । त-द्वन॒स्पती॒-न्प्रावि॑शत् । सैषा वाग्-वन॒स्पति॑षु वदति । या दु॑न्दु॒भौ । तस्मा᳚-द्दुन्दु॒भि-स्सर्वा॒ वाचोति॑ वदति ॥ दु॒न्दु॒भीन्-थ्स॒माघ्न॑न्ति । प॒र॒मा वा ए॒षा वाक् ॥ 32 ॥

या दु॑न्दु॒भौ । प॒र॒मयै॒व वा॒चा-ऽव॑रां॒-वाँच॒म-व॑रुन्धे । अथो॑ वा॒च ए॒व वर्ष्म॒ यज॑मा॒नो ऽव॑रुन्धे ॥ इन्द्रा॑य॒ वाचं॑-वँद॒तेन्द्रं॒-वाँज॑-ञ्जापय॒तेन्द्रो॒ वाज॑मजयि॒-दित्या॑ह । ए॒ष वा ए॒तर्हीन्द्रः॑ । यो यज॑ते । यज॑मान ए॒व वाज॒मुज्ज॑यति ॥ स॒प्तद॑श प्रव्या॒धाना॒जि-न्धा॑वन्ति । स॒प्त॒द॒शग्ग् स्तो॒त्र-म्भ॑वति । स॒प्तद॑श सप्तदश दीयन्ते ॥ 33 ॥

स॒प्त॒द॒शः प्र॒जाप॑तिः । प्र॒जाप॑ते॒-राप्त्यै᳚ ॥ अर्वा॑-ऽसि॒ सप्ति॑रसि वा॒ज्य॑सीत्या॑ह । अ॒ग्निर्वा अर्वा᳚ । वा॒यु-स्सप्तिः॑ । आ॒दि॒त्यो वा॒जी । ए॒ताभि॑रे॒वास्मै॑ दे॒वता॑भि-र्देवर॒थं-युँ॑नक्ति ॥ प्र॒ष्टि॒वा॒हिनं॑-युँनक्ति । प्र॒ष्टि॒वा॒ही वै दे॑वर॒थः । दे॒व॒र॒थमे॒वास्मै॑ युनक्ति ॥ 34 ॥

वाजि॑नो॒ वाज॑-न्धावत॒ काष्ठा᳚-ङ्गच्छ॒तेत्या॑ह । सु॒व॒र्गो वै लो॒कः काष्ठा᳚ । सु॒व॒र्गमे॒व लो॒कं-यँ॑न्ति ॥ सु॒व॒र्गं-वाँ ए॒ते लो॒कं-यँ॑न्ति । य आ॒जि-न्धाव॑न्ति ॥ प्राञ्चो॑ धावन्ति । प्रांइ॑व॒ हि सु॑व॒र्गो लो॒कः ॥ च॒त॒सृभि॒रनु॑ मन्त्रयते । च॒त्वारि॒ छन्दाग्ं॑सि । छन्दो॑भिरे॒वैना᳚न्-थ्सुव॒र्गं-लोँ॒क-ङ्ग॑मयति ॥ 35 ॥

प्र वा ए॒ते᳚-ऽस्माल्-लो॒काच्च्य॑वन्ते । य आ॒जि-न्धाव॑न्ति । उद॑ञ्च॒ आव॑र्तन्ते । अ॒स्मादे॒व तेन॑ लो॒कान्नय॑न्ति ॥ र॒थ॒वि॒मो॒च॒नीय॑-ञ्जुहोति॒ प्रति॑ष्ठित्यै ॥ आ मा॒ वाज॑स्य प्रस॒वो ज॑गम्या॒दित्या॑ह । अन्नं॒-वैँ वाजः॑ । अन्न॑मे॒वाव॑रुन्धे ॥ य॒था॒लो॒कं-वाँ ए॒त उज्ज॑यन्ति । य आ॒जि-न्धाव॑न्ति ॥ 36 ॥

कृ॒ष्णल॑-ङ्कृष्णलं-वाँज॒सृद्भ्यः॒ प्रय॑च्छति । यमे॒व ते वाजं॑-लोँ॒कमु॒ज्जय॑न्ति । त-म्प॑रि॒क्रीया-व॑रुन्धे ॥ ए॒क॒धा ब्र॒ह्मण॒ उप॑हरति । ए॒क॒धैव यज॑माने वी॒र्य॑-न्दधाति ॥ दे॒वा वा ओष॑धीष्वा॒जिम॑युः । ता बृह॒स्पति॒-रुद॑जयत् । स नी॒वारा॒न्निर॑वृणीत । तन्नी॒वारा॑णा-न्नीवार॒त्वम् ॥ नै॒वा॒रश्च॒रु-र्भ॑वति ॥ 37 ॥

ए॒तद्वै दे॒वाना᳚-म्पर॒ममन्न᳚म् । यन्नी॒वाराः᳚ । प॒र॒मेणै॒वास्मा॑ अ॒न्नाद्ये॒-नाव॑र-म॒न्नाद्य॒मव॑रुन्धे ॥ स॒प्तद॑शशरावो भवति । स॒प्त॒द॒शः प्र॒जाप॑तिः । प्र॒जाप॑ते॒-राप्त्यै᳚ ॥ क्षी॒रे भ॑वति । रुच॑मे॒वास्मि॑न्-दधाति ॥ स॒र्पिष्वा᳚-न्भवति मेद्ध्य॒त्वाय॑ ॥ बा॒र्॒ह॒स्प॒त्यो वा ए॒ष दे॒वत॑या ॥ 38 ॥

यो वा॑ज॒पेये॑न॒ यज॑ते । बा॒र्॒ह॒स्प॒त्य ए॒ष च॒रुः ॥ अश्वा᳚न्-थ्सरिष्य॒त-स्स॒स्रुष॒श्चाव॑-घ्रापयति । यमे॒व ते वाजं॑-लोँ॒कमु॒ज्जय॑न्ति । तमे॒वाव॑रुन्धे ॥ अजी॑जिपत वनस्पतय॒ इन्द्रं॒-वाँजं॒-विँमु॑च्यद्ध्व॒मिति॑ दुन्दु॒भीन्. विमु॑ञ्चति । यमे॒व ते वाजं॑-लोँ॒कमि॑न्द्रि॒य-न्दु॑न्दु॒भय॑ उ॒ज्जय॑न्ति । तमे॒वा-व॑रुन्धे ॥ 39 ॥

(अ॒भिज॑यति॒ - वा ए॒षा वाग् - दी॑यन्ते - ऽस्मै युनक्ति - गमयति॒ - य आ॒जि-न्धाव॑न्ति - भवति - दे॒वत॑या॒ - +-ऽष्टौ च॑) (अ. 6)

अनुवाकं 7 - यूपारोहणम्

ता॒र्प्यं-यँज॑मान॒-म्परि॑धापयति । य॒ज्ञो वै ता॒र्प्यम् । य॒ज्ञेनै॒वैन॒ग्ं॒ सम॑र्धयति । द॒र्भ॒मय॒-म्परि॑धापयति । प॒वित्रं॒-वैँ द॒र्भाः । पु॒नात्ये॒वैन᳚म् । वाजं॒-वाँ ए॒षो-ऽव॑रुरुथ्सते । यो वा॑ज॒पेये॑न॒ यज॑ते । ओष॑धयः॒ खलु॒ वै वाजः॑ । य-द्द॑र्भ॒मय॑-म्परिधा॒पय॑ति ॥ 40 ॥

वाज॒स्याव॑-रुद्ध्यै ॥ जाय॒ एहि॒ सुवो॒ रोहा॒वेत्या॑ह । पत्नि॑या ए॒वैष य॒ज्ञस्या᳚न्-वार॒म्भो-ऽन॑वच्छित्यै ॥ स॒प्तद॑शा-रत्नि॒र्यूपो॑ भवति । स॒प्त॒द॒शः प्र॒जाप॑तिः । प्र॒जाप॑ते॒राप्त्यै᳚ ॥ तू॒प॒र-श्चतु॑रश्रि-र्भवति ॥ गौ॒धू॒म-ञ्च॒षाल᳚म् । न वा ए॒ते व्री॒हयो॒ न यवाः᳚ । य-द्गो॒धूमाः᳚ ॥ 41 ॥

ए॒वमि॑व॒ हि प्र॒जाप॑ति॒-स्समृ॑द्ध्यै । अथो॑ अ॒मुमे॒वास्मै॑ लो॒कमन्न॑वन्त-ङ्करोति ॥ वासो॑भि-र्वेष्टयति । ए॒ष वै यज॑मानः । यद्यूपः॑ । स॒र्व॒दे॒व॒त्यं॑-वाँसः॑ । सर्वा॑भिरे॒वैन॑-न्दे॒वता॑भि॒-स्सम॑र्धयति । अथो॑ आ॒क्रम॑णमे॒व तथ्सेतुं॒-यँज॑मानः कुरुते । सु॒व॒र्गस्य॑ लो॒कस्य॒ सम॑ष्ट्यै ॥ द्वाद॑श वाजप्रस॒वीया॑नि जुहोति ॥ 42 ॥

द्वाद॑श॒ मासा᳚-स्संवँथ्स॒रः । सं॒वँ॒थ्स॒रमे॒व प्री॑णाति । अथो॑ संवँथ्स॒रमे॒वास्मा॒ उप॑ दधाति । सु॒व॒र्गस्य॑ लो॒कस्य॒ सम॑ष्ट्यै ॥ द॒शभिः॒ कल्पै॑ रोहति । नव॒ वै पुरु॑षे प्रा॒णाः । नाभि॑र्दश॒मी । प्रा॒णाने॒व य॑थास्था॒न-ङ्क॑ल्पयि॒त्वा । सु॒व॒र्गं-लोँ॒कमे॑ति । ए॒ताव॒द्वै पुरु॑षस्य॒ स्वम् ॥ 43 ॥

याव॑त्-प्रा॒णाः । याव॑दे॒वास्यास्ति॑ । तेन॑ स॒ह सु॑व॒र्गं-लोँ॒कमे॑ति ॥ सुव॑र्दे॒वाग्ं अ॑ग॒न्मेत्या॑ह । सु॒व॒र्गमे॒व लो॒कमे॑ति । अ॒मृता॑ अभू॒मेत्या॑ह । अ॒मृत॑मिव॒ हि सु॑व॒र्गो लो॒कः । प्र॒जाप॑तेः प्र॒जा अ॑भू॒मेत्या॑ह । प्रा॒जा॒प॒त्यो वा अ॒यं-लोँ॒कः । अ॒स्मादे॒व तेन॑ लो॒कान्नैति॑ ॥ 44 ॥

सम॒ह-म्प्र॒जया॒ स-म्मया᳚ प्र॒जेत्या॑ह । आ॒शिष॑मे॒वैता-माशा᳚स्ते ॥ आ॒स॒पु॒टै-र्घ्न॑न्ति । अन्नं॒-वाँ इ॒यम् । अ॒न्नाद्ये॑नै॒वैन॒ग्ं॒ सम॑र्धयन्ति । ऊषै᳚-र्घ्नन्ति । ए॒ते हि सा॒क्षादन्न᳚म् । यदूषाः᳚ । सा॒क्षादे॒वैन॑-म॒न्नाद्ये॑न॒ सम॑र्धयन्ति ॥ पु॒रस्ता᳚त्-प्र॒त्यञ्च᳚-ङ्घ्नन्ति ॥ 45 ॥

पु॒रस्ता॒द्धि प्र॑ती॒चीन॒-मन्न॑म॒द्यते᳚ ॥ शी॒र्॒ष॒तो घ्न॑न्ति । शी॒र्॒ष॒तो ह्यन्न॑म॒द्यते᳚ ॥ दि॒ग्भ्यो घ्न॑न्ति । दि॒ग्भ्य ए॒वास्मा॑ अ॒न्नाद्य॒-मव॑रुन्धते ॥ ई॒श्व॒रो वा ए॒ष परां᳚-प्र॒दघः॑ । यो यूप॒ग्ं॒ रोह॑ति ॥ हिर॑ण्यम॒द्ध्य-व॑रोहति । अ॒मृतं॒-वैँ हिर॑ण्यम् । अ॒मृतग्ं॑ सुव॒र्गो लो॒कः ॥ 46 ॥

अ॒मृत॑ ए॒व सु॑व॒र्गे लो॒के प्रति॑ तिष्ठति ॥ श॒तमा॑न-म्भवति । श॒तायुः॒ पुरु॑ष-श्श॒तेन्द्रि॑यः । आयु॑ष्ये॒वेन्द्रि॒ये प्रति॑ तिष्ठति ॥ पुष्ट्यै॒ वा ए॒त-द्रू॒पम् । यद॒जा । त्रि-स्सं॑वँथ्स॒रस्या॒न्यान्-प॒शू-न्परि॒ प्रजा॑यते ॥ ब॒स्ता॒जि॒न-म॒द्ध्यव॑ रोहति । पुष्ट्या॑मे॒व प्र॒जन॑ने॒ प्रति॑तिष्ठति ॥ 47 ॥

(प॒रि॒धा॒पय॑ति - गो॒धूमा॑ - जुहोति॒ - स्वं - नैति॑ - प्र॒त्यञ्ज॑-ङ्घ्नन्ति - लो॒को - +नव॑ च (अ. 7)

अनुवाकं 8 - अन्नहोमाः, अभिषेकश्च

स॒प्तान्न॑-हो॒माञ्जु॑होति । स॒प्त वा अन्ना॑नि । याव॑न्त्ये॒वान्ना॑नि । तान्ये॒वाव॑रुन्धे । स॒प्त ग्रा॒म्या ओष॑धयः । स॒प्तार॒ण्याः । उ॒भयी॑षा॒-मव॑रुद्ध्यै ॥ अन्न॑स्या-न्नस्य जुहोति । अन्न॑स्यान्न॒स्या-व॑रुद्ध्यै ॥ य-द्वा॑जपेयया॒ज्य-न॑वरुद्धस्याश्ञी॒यात् ॥ 48 ॥

अव॑रुद्धेन॒ व्यृ॑द्ध्येत । सर्व॑स्य समव॒दाय॑ जुहोति । अन॑वरुद्ध॒-स्याव॑रुद्ध्यै ॥ औदु॑म्बरेण स्रु॒वेण॑ जुहोति । ऊर्ग्वा अन्न॑-मुदु॒म्बरः॑ । ऊ॒र्ज ए॒वान्नाद्य॒स्याव॑रुद्ध्यै ॥ दे॒वस्य॑ त्वा सवि॒तुः प्र॑स॒व इत्या॑ह । स॒वि॒तृ प्र॑सूत ए॒वैन॒-म्ब्रह्म॑णा दे॒वता॑भि-र॒भिषि॑ञ्चति ॥ अन्न॑स्यान्नस्या॒भिषि॑ञ्चति । अन्न॑स्यान्न॒स्याव॑रुद्ध्यै ॥ 49 ॥

पु॒रस्ता᳚त्-प्र॒त्यञ्च॑-म॒भिषि॑ञ्चति । पु॒रस्ता॒द्धि-प्र॑ती॒चीन॒-मन्न॑म॒द्यते᳚ । शी॒र्॒ष॒तो॑-ऽभिषि॑ञ्चति । शी॒र्॒ष॒तो ह्यन्न॑म॒द्यते᳚ ॥ आमुखा॑द॒न्वव॑ स्रावयति । मु॒ख॒त ए॒वास्मा॑ अ॒न्नाद्य॑-न्दधाति ॥ अ॒ग्नेस्त्वा॒ साम्रा᳚ज्येना॒भिषि॑ञ्चा॒मीत्या॑ह । ए॒ष वा अ॒ग्ने-स्स॒वः । तेनै॒वैन॑-म॒भिषि॑ञ्चति । इन्द्र॑स्य त्वा॒ साम्रा᳚ज्येना॒भिषि॑ञ्चा॒मीत्या॑ह ॥ 50 ॥

इ॒न्द्रि॒य-मे॒वास्मि॑-न्ने॒तेन॑ दधाति । बृह॒स्पते᳚स्त्वा॒ साम्रा᳚ज्येना॒भिषि॑ञ्चा॒-मीत्या॑ह । ब्रह्म॒ वै दे॒वाना॒-म्बृह॒स्पतिः॑ । ब्रह्म॑णै॒वैन॑-म॒भिषि॑ञ्चति ॥ सो॒म॒ग्र॒हाग्श्चा॑-वदानी॒यानि॑ च॒र्त्विग्भ्य॒ उप॑ हरन्ति । अ॒मुमे॒व तै-र्लो॒क-मन्न॑वन्त-ङ्करोति । सु॒रा॒ग्र॒हाग्श्चा॑-नवदानी॒यानि॑ च वाज॒सृद्भ्यः॑ । इ॒ममे॒व तै-र्लो॒क-मन्न॑वन्त-ङ्करोति । अथो॑ उ॒भयी᳚ष्वे॒वाभिषि॑च्यते ॥ वि॒मा॒थ-ङ्कु॑र्वते वाज॒सृतः॑ ॥ 51 ॥

इ॒न्द्रि॒यस्याव॑रुद्ध्यै ॥ अनि॑रुक्ताभिः प्रातस्सव॒ने स्तु॑वते । अनि॑रुक्तः प्र॒जाप॑तिः । प्र॒जाप॑ते॒राप्त्यै᳚ । वाज॑वतीभि॒-र्माद्ध्य॑न्दिने । अन्नं॒-वैँ वाजः॑ । अन्न॑मे॒वा-व॑रुन्धे । शि॒पि॒वि॒ष्टव॑तीभि-स्तृतीयसव॒ने । य॒ज्ञो वै विष्णुः॑ । प॒शव॒-श्शिपिः॑ । य॒ज्ञ ए॒व प॒शुषु॒ प्रति॑ तिष्ठति ॥ बृ॒हदन्त्य॑-म्भवति । अन्त॑मे॒वैनग्ग्॑ श्रि॒यै ग॑मयति ॥ 52 ॥

(अ॒श्ञी॒या - दन्न॑स्यान्न॒स्या व॑रुद्ध्या॒ - इन्द्र॑स्य त्वा॒ साम्रा᳚ज्येना॒भिषि॑ञ्चा॒ मीत्या॑ह-वाज॒सृतः॒ - शिपि॒ स्त्रीणि॑ च) (अ. 8)

अनुवाकं 9 - अतिग्राह्याः, पञ्चैन्द्राः

नृ॒षद॒-न्त्वेत्या॑ह । प्र॒जा वै नॄन् । प्र॒जाना॑मे॒वैतेन॑ सूयते । द्रु॒षद॒मित्या॑ह । वन॒स्पत॑यो॒ वै द्रु । वन॒स्पती॑नामे॒वै तेन॑ सूयते । भु॒व॒न॒सद॒-मित्या॑ह । य॒दा वै वसी॑या॒-न्भव॑ति । भुव॑नमग॒न्निति॒ वै तमा॑हुः । भुव॑नमे॒वैतेन॑ गच्छति ॥ 53 ॥

अ॒फ्सु॒षद॑-न्त्वा घृत॒सद॒-मित्या॑ह । अ॒पामे॒वैतेन॑ घृ॒तस्य॑ सूयते । व्यो॒म॒सद॒-मित्या॑ह । य॒दा वै वसी॑या॒-न्भव॑ति । व्यो॑माग॒न्निति॒ वै तमा॑हुः । व्यो॑मै॒वैतेन॑ गच्छति ॥ पृ॒थि॒वि॒षद॑-न्त्वा-ऽन्तरिक्ष॒सद॒-मित्या॑ह । ए॒षामे॒वैतेन॑ लो॒कानाग्ं॑ सूयते । तस्मा᳚-द्वाजपे-यया॒जी न क-ञ्च॒न प्र॒त्यव॑रोहति । अपी॑व॒ हि दे॒वता॑नाग्ं सू॒यते᳚ ॥ 54 ॥

ना॒क॒सद॒-मित्या॑ह । य॒दावै वसी॑या॒-न्भव॑ति । नाक॑मग॒न्निति॒ वै तमा॑हुः । नाक॑मे॒वैतेन॑ गच्छति ॥ ये ग्रहाः᳚ पञ्चज॒नीना॒ इत्या॑ह । प॒ञ्च॒ज॒नाना॑-मे॒वैतेन॑ सूयते ॥ अ॒पाग्ं रस॒मुद्व॑यस॒-मित्या॑ह । अ॒पामे॒वैतेन॒ रस॑स्य सूयते । सूर्य॑रश्मिग्ं स॒माभृ॑त॒-मित्या॑ह सशुक्र॒त्वाय॑ ॥ 55 ॥

(ग॒च्छ॒ति॒ - सू॒यते॒ - +नव॑ च) (अ. 9)

अनुवाकं 10 - पिण्डपितृयज्ञः दर्शपूर्णमासब्राह्मणशेषः

इन्द्रो वृ॒त्रग्ं ह॒त्वा । असु॑रा-न्परा॒भाव्य॑ । सो॑-ऽमावा॒स्या᳚-म्प्रत्याग॑च्छत् । ते पि॒तरः॑ पूर्वे॒द्यु-राग॑च्छन्न् । पि॒तॄन्. य॒ज्ञो॑-ऽगच्छत् । त-न्दे॒वाः पुन॑रयाचन्त । तमे᳚भ्यो॒ न पुन॑रददुः । ते᳚-ऽब्रुव॒न् वरं॑-वृँणामहै । अथ॑ वः॒ पुन॑र्दास्यामः । अ॒स्मभ्य॑मे॒व पू᳚र्वे॒द्युः क्रि॑याता॒ इति॑ ॥ 56 ॥

तमे᳚भ्यः॒ पुन॑रददुः । तस्मा᳚त्-पि॒तृभ्यः॑ पूर्वे॒द्युः क्रि॑यते । य-त्पि॒तृभ्यः॑ पूर्वे॒द्युः क॒रोति॑ । पि॒तृभ्य॑ ए॒व त-द्य॒ज्ञ-न्नि॒ष्क्रीय॒ यज॑मानः॒ प्रत॑नुते ॥ सोमा॑य पि॒तृपी॑ताय स्व॒धा नम॒ इत्या॑ह । पि॒तुरे॒वाधि॑ सोमपी॒थमव॑ रुन्धे । न हि पि॒ता प्र॒मीय॑माण॒ आहै॒ष सो॑मपी॒थ इति॑ । इ॒न्द्रि॒यं-वैँ सो॑मपी॒थः । इ॒न्द्रि॒यमे॒व सो॑मपी॒थमव॑-रुन्धे । तेन᳚न्द्रि॒येण॑ द्वि॒तीया᳚-ञ्जा॒याम॒भ्य॑श्ञुते ॥ 57 ॥

ए॒त-द्वै ब्राह्म॑ण-म्पु॒रा वा॑जश्रव॒सा वि॒दाम॑क्रन्न् । तस्मा॒-त्ते द्वेद्वे॑ जा॒ये अ॒भ्या᳚क्षत । य ए॒वं-वेँद॑ । अ॒भि द्वि॒तीया᳚-ञ्जा॒याम॑श्ञुते ॥ अ॒ग्नये॑ कव्य॒वाह॑नाय स्व॒धा नम॒ इत्या॑ह । य ए॒व पि॑तृ॒णाम॒ग्निः । त-म्प्री॑णाति ॥ ति॒स्र आहु॑ती-र्जुहोति ॥ त्रिर्निद॑धाति ॥ षट्-थ्सम्प॑द्यन्ते ॥ 58 ॥

षड्वा ऋ॒तवः॑ । ऋ॒तूने॒व प्री॑णाति ॥ तू॒ष्णी-म्मेक्ष॑ण॒-माद॑धाति । अस्ति॑ वा॒ हि ष॒ष्ठ ऋ॒तुर्न वा᳚ ॥ दे॒वान्. वै पि॒तॄ-न्प्री॒तान् । म॒नु॒ष्याः᳚ पि॒तरो-ऽनु॒ प्रपि॑पते । ति॒स्र आहु॑ती-र्जुहोति । त्रिर्निद॑धाति । षट्-थ्सम्प॑द्यन्ते । षड्वा ऋ॒तवः॑ ॥ 59 ॥

ऋ॒तवः॒ खलु॒ वै दे॒वाः पि॒तरः॑ । ऋ॒तूने॒व दे॒वा-न्पि॒तॄ-न्प्री॑णाति । तान्प्री॒तान् । म॒नु॒ष्याः᳚ पि॒तरो-ऽनु॒ प्रपि॑पते ॥ स॒कृ॒दा॒च्छि॒न्न-म्ब॒र्॒हि-र्भ॑वति । स॒कृदि॑व॒ हि पि॒तरः॑ ॥ त्रिर्निद॑धाति । तृ॒तीये॒ वा इ॒तो लो॒के पि॒तरः॑ । ताने॒व प्री॑णाति ॥ परां॒आव॑र्तते ॥ 60 ॥

ह्लीका॒ हि पि॒तरः॑ ॥ ऒष्मणो᳚ व्या॒वृत॒ उपा᳚स्ते । ऊ॒ष्मभा॑गा॒ हि पि॒तरः॑ ॥ ब्र॒ह्म॒वा॒दिनो॑ वदन्ति । प्राश्यां(3)न प्राश्या(3)मिति॑ । य-त्प्रा᳚श्ञी॒यात् । जन्य॒मन्न॑मद्यात् । प्र॒मायु॑क-स्स्यात् । यन्न प्रा᳚श्ञी॒यात् । अह॑वि-स्स्यात् ॥ 61 ॥

पि॒तृभ्य॒ आवृ॑श्च्येत । अ॒व॒घ्रेय॑मे॒व । तन्नेव॒ प्राशि॑त॒-न्नेवाप्रा॑शितम् ॥ वी॒रं-वाँ॒ वै पि॒तरः॑ प्र॒यन्तो॒ हर॑न्ति । वी॒रं-वाँ॑ ददति । द॒शा-ञ्छि॑नत्ति । हर॑णभागा॒ हि पि॒तरः॑ । पि॒तॄने॒व नि॒रव॑दयते ॥ उत्त॑र॒ आयु॑षि॒ लोम॑ छिन्दीत । पि॒तृ॒णाग् ह्ये॑तर्हि॒ नेदी॑यः ॥ 62 ॥

नम॑स्करोति । न॒म॒स्का॒रो हि पि॑तृ॒णाम् ॥ नमो॑ वः पितरो॒ रसा॑य । नमो॑ वः पितर॒-श्शुष्मा॑य । नमो॑ वः पितरो जी॒वाय॑ । नमो॑ वः पितर-स्स्व॒धायै᳚ । नमो॑ वः पितरो म॒न्यवे᳚ । नमो॑ वः पितरो घो॒राय॑ । पित॑रो॒ नमो॑ वः । य ए॒तस्मि॑न् ँलो॒के स्थ ॥ 63 ॥

यु॒ष्माग्स्ते-ऽनु॑ । ये᳚-ऽस्मिँल्लो॒के । मा-न्ते नु॑ । य ए॒तस्मि॑ँल्लो॒के स्थ । यू॒य-न्तेषां॒-वँसि॑ष्ठा भूयास्त । ये᳚-ऽस्मिँल्लो॒के । अ॒ह-न्तेषां॒-वँसि॑ष्ठो भूयास॒मित्या॑ह । वसि॑ष्ठ-स्समा॒नाना᳚-म्भवति । य ए॒वं-विँ॒द्वान्-पि॒तृभ्यः॑ क॒रोति॑ ॥ ए॒ष वै म॑नु॒ष्या॑णां-यँ॒ज्ञः ॥ 64 ॥

दे॒वानां॒-वाँ इत॑रे य॒ज्ञाः । तेन॒ वा ए॒त-त्पि॑तृलो॒के च॑रति ॥ य-त्पि॒तृभ्यः॑ क॒रोति॑ । स ई᳚श्व॒रः प्रमे॑तोः । प्रा॒जा॒प॒त्यय॒र्चा पुन॒रैति॑ । य॒ज्ञो वै प्र॒जाप॑तिः । य॒ज्ञेनै॒व स॒ह पुन॒रैति॑ । न प्र॒मायु॑को भवति ॥ पि॒तृ॒लो॒के वा ए॒त-द्यज॑मानश्चरति । य-त्पि॒तृभ्यः॑ क॒रोति॑ । स ई᳚श्व॒र आर्ति॒मार्तोः᳚ । प्र॒जाप॑ति॒-स्त्वावैन॒-न्तत॒ उन्ने॑तुमर्ह॒तीत्या॑हुः । य-त्प्रा॑जाप॒त्यय॒र्चा पुन॒रैति॑ । प्र॒जाप॑तिरे॒वैन॒-न्तत॒ उन्न॑यति । नार्ति॒मार्च्छ॑ति॒ यज॑मानः ॥ 65 ॥

(इत्य॑ - श्ञुते - पद्यन्ते - पद्यन्ते॒ षड्वा ऋ॒तवो॑ - वर्त॒ते-ऽ - ह॑वि-स्स्या॒न् - नेदी॑यः॒ - स्थ - य॒ज्ञो - यज॑मानश्चरति॒ य-त्पि॒तृभ्यः॑ क॒रोति॒ पञ्च॑ च) (अ. 10)

(दे॒वा॒सु॒रा अ॒ग्नीषोम॑यो--र् दे॒वा वै यथा॒ दर्शं॑ - दे॒वा वै यद॒न्यै-र्ग्रहै᳚--र् ब्रह्मवा॒दिनो॒ नाग्नि॑ष्टो॒मो न - सा॑वि॒त्रं - दे॒वस्या॒हं - ता॒र्प्यग्ं - स॒प्तान्न॑हो॒मान् - नृ॒षदं॒ - त्वेन्द्रो॑ वृ॒त्रग्ं ह॒त्वा दश॑)

(दे॒वा॒सु॒रा - वा॒ज्ये॑वैनं॒ - तस्मा᳚-द्वाजपेयया॒जी - दे॒वस्या॒हं - ँवाज॒स्याव॑रुद्ध्या- इन्द्रि॒यमे॒वास्मि॒न्॒. - ह्लीका॒ हि पि॒तरः॒ पञ्च॑षष्टिः)

(दे॒वा॒सु॒रा - यज॑मानः)

॥ हरिः॑ ओम् ॥

॥ कृष्ण यजुर्वेदीय तैत्तिरीय ब्राह्मणे प्रथमाष्टके तृतीयः प्रपाठक-स्समाप्तः ॥