𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌸𑍁𑌨𑍍𑌦𑌰𑌕𑌾𑌣𑍍𑌡𑌮𑍍 ।
𑌅𑌥 𑌪𑌞𑍍𑌚𑌾𑌶𑌸𑍍𑌸𑌰𑍍𑌗𑌃 ।
𑌤𑌮𑍁𑌦𑍍𑌵𑍀𑌕𑍍𑌷𑍍𑌯 𑌮𑌹𑌾𑌬𑌾𑌹𑍁𑌃 𑌪𑌿𑌙𑍍𑌗𑌾𑌕𑍍𑌷𑌂 𑌪𑍁𑌰𑌤 𑌸𑍍𑌥𑌿𑌤𑌮𑍍 ।
𑌕𑍋𑌪𑍇𑌨 𑌮𑌹𑌤𑌾𑌽𑌵𑌿𑌷𑍍𑌟𑍋 𑌰𑌾𑌵𑌣𑍋 𑌲𑍋𑌕𑌰𑌾𑌵𑌣𑌃 ॥ 1 ॥
𑌶𑌙𑍍𑌕𑌾𑌹𑍃𑌤𑌾𑌤𑍍𑌮𑌾 𑌦𑌧𑍍𑌯𑍗 𑌸 𑌕𑌪𑍀𑌨𑍍𑌦𑍍𑌰𑌂 𑌤𑍇𑌜𑌸𑌾𑌵𑍃𑌤𑌮𑍍 ।
𑌕𑌿𑌮𑍇𑌷 𑌭𑌗𑌵𑌾𑌨𑍍𑌨𑌨𑍍𑌦𑍀 𑌭𑌵𑍇𑌤𑍍𑌸𑌾𑌕𑍍𑌷𑌾𑌦𑌿𑌹𑌾𑌗𑌤𑌃 ॥ 2 ॥
𑌯𑍇𑌨 𑌶𑌪𑍍𑌤𑍋𑌽𑌸𑍍𑌮𑌿 𑌕𑍈𑌲𑌾𑌸𑍇 𑌮𑌯𑌾 𑌸𑌞𑍍𑌚𑌾𑌲𑌿𑌤𑍇 𑌪𑍁𑌰𑌾 ।
𑌸𑍋𑌽𑌯𑌂 𑌵𑌾𑌨𑌰𑌮𑍂𑌰𑍍𑌤𑌿𑌸𑍍𑌸𑍍𑌯𑌾𑌤𑍍𑌕𑌿𑌂𑌸𑍍𑌵𑌿𑌦𑍍𑌬𑌾𑌣𑍋 𑌮𑌹𑌾𑌽𑌸𑍁𑌰𑌃 ॥ 3 ॥
𑌸 𑌰𑌾𑌜𑌾 𑌰𑍋𑌷𑌤𑌾𑌮𑍍𑌰𑌾𑌕𑍍𑌷𑌃 𑌪𑍍𑌰𑌹𑌸𑍍𑌤𑌂 𑌮𑌨𑍍𑌤𑍍𑌰𑌿𑌸𑌤𑍍𑌤𑌮𑌮𑍍 ।
𑌕𑌾𑌲𑌯𑍁𑌕𑍍𑌤𑌮𑍁𑌵𑌾𑌚𑍇𑌦𑌂 𑌵𑌚𑍋𑌽𑌵𑌿𑌪𑍁𑌲𑌮𑌰𑍍𑌥𑌵𑌤𑍍 ॥ 4 ॥
𑌦𑍁𑌰𑌾𑌤𑍍𑌮𑌾 𑌪𑍃𑌚𑍍𑌛𑍍𑌯𑌤𑌾𑌮𑍇𑌷 𑌕𑍁𑌤𑌃 𑌕𑌿𑌂 𑌵𑌾𑌤𑍍𑌰 𑌕𑌾𑌰𑌣𑌮𑍍 ।
𑌵𑌨𑌭𑌙𑍍𑌗𑍇 𑌚 𑌕𑍋𑌽𑌸𑍍𑌯𑌾𑌰𑍍𑌥𑍋 𑌰𑌾𑌕𑍍𑌷𑌸𑍀𑌨𑌾𑌂 𑌚 𑌤𑌰𑍍𑌜𑌨𑍇 ॥ 5 ॥
𑌮𑌤𑍍𑌪𑍁𑌰𑍀𑌮𑌪𑍍𑌰𑌧𑍃𑌷𑍍𑌯𑌾𑌂 𑌵𑌾𑌽𑌗𑌮𑌨𑍇 𑌕𑌿𑌂 𑌪𑍍𑌰𑌯𑍋𑌜𑌨𑌮𑍍 ।
𑌆𑌯𑍋𑌧𑌨𑍇 𑌵𑌾 𑌕𑌿𑌂 𑌕𑌾𑌰𑍍𑌯𑌂 𑌪𑍃𑌚𑍍𑌛𑌯𑌤𑌾𑌮𑍇𑌷 𑌦𑍁𑌰𑍍𑌮𑌤𑌿𑌃 ॥ 6 ॥
𑌰𑌾𑌵𑌣𑌸𑍍𑌯 𑌵𑌚𑌶𑍍𑌶𑍍𑌰𑍁𑌤𑍍𑌵𑌾 𑌪𑍍𑌰𑌹𑌸𑍍𑌤𑍋 𑌵𑌾𑌕𑍍𑌯𑌮𑌬𑍍𑌰𑌵𑍀𑌤𑍍 ।
𑌸𑌮𑌾𑌶𑍍𑌵𑌸𑌿𑌹𑌿 𑌭𑌦𑍍𑌰𑌂 𑌤𑍇 𑌨 𑌭𑍀𑌃 𑌕𑌾𑌰𑍍𑌯𑌾 𑌤𑍍𑌵𑌯𑌾 𑌕𑌪𑍇 ॥ 7 ॥
𑌯𑌦𑌿 𑌤𑌾𑌵𑌤𑍍𑌤𑍍𑌵𑌮𑌿𑌨𑍍𑌦𑍍𑌰𑍇𑌣 𑌪𑍍𑌰𑍇𑌷𑌿𑌤𑍋 𑌰𑌾𑌵𑌣𑌾𑌲𑌯𑌮𑍍 ।
𑌤𑌤𑍍𑌤𑍍𑌵𑌮𑌾𑌖𑍍𑌯𑌾𑌹𑌿 𑌮𑌾 𑌭𑍂𑌤𑍍𑌤𑍇 𑌭𑌯𑌂 𑌵𑌾𑌨𑌰 𑌮𑍋𑌕𑍍𑌷𑍍𑌯𑌸𑍇 ॥ 8 ॥
𑌯𑌦𑌿 𑌵𑍈𑌶𑍍𑌰𑌵𑌣𑌸𑍍𑌯 𑌤𑍍𑌵𑌂 𑌯𑌮𑌸𑍍𑌯 𑌵𑌰𑍁𑌣𑌸𑍍𑌯 𑌚 ।
𑌚𑌾𑌰𑌰𑍂𑌪𑌮𑌿𑌦𑌂 𑌕𑍃𑌤𑍍𑌵𑌾 𑌪𑍍𑌰𑌵𑌿𑌷𑍍𑌟𑍋 𑌨𑌃 𑌪𑍁𑌰𑍀𑌮𑌿𑌮𑌾𑌮𑍍 ॥ 9 ॥
𑌵𑌿𑌷𑍍𑌣𑍁𑌨𑌾 𑌪𑍍𑌰𑍇𑌷𑌿𑌤𑍋 𑌵𑌾𑌽𑌪𑌿 𑌦𑍂𑌤𑍋 𑌵𑌿𑌜𑌯𑌕𑌾𑌙𑍍𑌕𑍍𑌷𑌿𑌣𑌾 ।
𑌨 𑌹𑌿 𑌤𑍇 𑌵𑌾𑌨𑌰𑌂 𑌤𑍇𑌜𑍋 𑌰𑍂𑌪𑌮𑌾𑌤𑍍𑌰𑌂 𑌤𑍁 𑌵𑌾𑌨𑌰𑌮𑍍 ॥ 10 ॥
𑌤𑌤𑍍𑌤𑍍𑌵𑌤𑌃 𑌕𑌥𑌯𑌸𑍍𑌵𑌾𑌦𑍍𑌯 𑌤𑌤𑍋 𑌵𑌾𑌨𑌰 𑌮𑍋𑌕𑍍𑌷𑍍𑌯𑌸𑍇 ।
𑌅𑌨𑍃𑌤𑌂 𑌵𑌦𑌤𑌶𑍍𑌚𑌾𑌪𑌿 𑌦𑍁𑌰𑍍𑌲𑌭𑌂 𑌤𑌵 𑌜𑍀𑌵𑌿𑌤𑌮𑍍 ॥ 11 ॥
𑌅𑌥𑌵𑌾 𑌯𑌨𑍍𑌨𑌿𑌮𑌿𑌤𑍍𑌤𑌸𑍍𑌤𑍇 𑌪𑍍𑌰𑌵𑍇𑌶𑍋 𑌰𑌾𑌵𑌣𑌾𑌲𑌯𑍇 ।
𑌏𑌵𑌮𑍁𑌕𑍍𑌤𑍋 𑌹𑌰𑌿𑌶𑍍𑌰𑍇𑌷𑍍𑌠𑌸𑍍𑌤𑌦𑌾 𑌰𑌕𑍍𑌷𑍋𑌗𑌣𑍇𑌶𑍍𑌵𑌰𑌮𑍍 ॥ 12 ॥
𑌅𑌬𑍍𑌰𑌵𑍀𑌨𑍍𑌨𑌾𑌸𑍍𑌮𑌿 𑌶𑌕𑍍𑌰𑌸𑍍𑌯 𑌯𑌮𑌸𑍍𑌯 𑌵𑌰𑍁𑌣𑌸𑍍𑌯 𑌵𑌾 ।
𑌧𑌨𑌦𑍇𑌨 𑌨 𑌮𑍇 𑌸𑌖𑍍𑌯𑌂 𑌵𑌿𑌷𑍍𑌣𑍁𑌨𑌾 𑌨𑌾𑌸𑍍𑌮𑌿 𑌚𑍋𑌦𑌿𑌤𑌃 ॥ 13 ॥
𑌜𑌾𑌤𑌿𑌰𑍇𑌵 𑌮𑌮 𑌤𑍍𑌵𑍇𑌷𑌾 𑌵𑌾𑌨𑌰𑍋𑌽𑌹𑌮𑌿𑌹𑌾𑌗𑌤𑌃 ।
𑌦𑌰𑍍𑌶𑌨𑍇 𑌰𑌾𑌕𑍍𑌷𑌸𑍇𑌨𑍍𑌦𑍍𑌰𑌸𑍍𑌯 𑌦𑍁𑌰𑍍𑌲𑌭𑍇 𑌤𑌦𑌿𑌦𑌂 𑌮𑌯𑌾 ॥ 14 ॥
𑌵𑌨𑌂 𑌰𑌾𑌕𑍍𑌷𑌸𑌰𑌾𑌜𑌸𑍍𑌯 𑌦𑌰𑍍𑌶𑌨𑌾𑌰𑍍𑌥𑍇 𑌵𑌿𑌨𑌾𑌶𑌿𑌤𑌮𑍍 ।
𑌤𑌤𑌸𑍍𑌤𑍇 𑌰𑌾𑌕𑍍𑌷𑌸𑌾𑌃 𑌪𑍍𑌰𑌾𑌪𑍍𑌤𑌾 𑌬𑌲𑌿𑌨𑍋 𑌯𑍁𑌦𑍍𑌧𑌕𑌾𑌙𑍍𑌕𑍍𑌷𑌿𑌣𑌃 ।
𑌰𑌕𑍍𑌷𑌣𑌾𑌰𑍍𑌥𑌂 𑌤𑍁 𑌦𑍇𑌹𑌸𑍍𑌯 𑌪𑍍𑌰𑌤𑌿𑌯𑍁𑌦𑍍𑌧𑌾 𑌮𑌯𑌾 𑌰𑌣𑍇 ॥ 15 ॥
𑌅𑌸𑍍𑌤𑍍𑌰𑌪𑌾𑌶𑍈𑌰𑍍𑌨 𑌶𑌕𑍍𑌯𑍋𑌽𑌹𑌂 𑌬𑌦𑍍𑌧𑍁𑌂 𑌦𑍇𑌵𑌾𑌸𑍁𑌰𑍈𑌰𑌪𑌿 ॥ 16 ॥
𑌪𑌿𑌤𑌾𑌮𑌹𑌾𑌦𑍇𑌷 𑌵𑌰𑍋 𑌮𑌾𑌮𑌾𑌪𑍍𑌯𑍇𑌷𑍋𑌽𑌭𑍍𑌯𑍁𑌪𑌾𑌗𑌤𑌃 ।
𑌰𑌾𑌜𑌾𑌨𑌂 𑌦𑍍𑌰𑌷𑍍𑌟𑍁𑌕𑌾𑌮𑍇𑌨 𑌮𑌯𑌾𑌸𑍍𑌤𑍍𑌰𑌮𑌨𑍁𑌵𑌰𑍍𑌤𑌿𑌤𑌮𑍍 ॥ 17 ॥
𑌵𑌿𑌮𑍁𑌕𑍍𑌤𑍋 𑌹𑍍𑌯𑌹𑌮𑌸𑍍𑌤𑍍𑌰𑍇𑌣 𑌰𑌾𑌕𑍍𑌷𑌸𑍈𑌸𑍍𑌤𑍍𑌵𑌭𑌿𑌪𑍀𑌡𑌿𑌤𑌃 ।
𑌕𑍇𑌨𑌚𑌿𑌦𑍍𑌰𑌾𑌜𑌕𑌾𑌰𑍍𑌯𑍇𑌣 𑌸𑌮𑍍𑌪𑍍𑌰𑌾𑌪𑍍𑌤𑍋𑌽𑌸𑍍𑌮𑌿 𑌤𑌵𑌾𑌨𑍍𑌤𑌿𑌕𑌮𑍍 ॥ 18 ॥
𑌦𑍂𑌤𑍋𑌽𑌹𑌮𑌿𑌤𑌿 𑌵𑌿𑌜𑍍𑌞𑍇𑌯𑍋 𑌰𑌾𑌘𑌵𑌸𑍍𑌯𑌾𑌮𑌿𑌤𑍗𑌜𑌸𑌃 ।
𑌶𑍍𑌰𑍂𑌯𑌤𑌾𑌂 𑌚𑌾𑌪𑌿 𑌵𑌚𑌨𑌂 𑌮𑌮 𑌪𑌥𑍍𑌯𑌮𑌿𑌦𑌂 𑌪𑍍𑌰𑌭𑍋 ॥ 19 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌸𑍁𑌨𑍍𑌦𑌰𑌕𑌾𑌣𑍍𑌡𑍇 𑌪𑌞𑍍𑌚𑌾𑌶𑌸𑍍𑌸𑌰𑍍𑌗𑌃 ॥
Roman (IAST) Transliteration
śrīmadvālmīkīya rāmāyaṇe sundarakāṇḍam |
atha pañcāśassargaḥ |
tamudvīkṣya mahābāhuḥ piṅgākṣaṃ purata sthitam |
kopena mahatā'viṣṭo rāvaṇo lokarāvaṇaḥ || 1 ||
śaṅkāhṛtātmā dadhyau sa kapīndraṃ tejasāvṛtam |
kimeṣa bhagavānnandī bhavetsākṣādihāgataḥ || 2 ||
yena śapto'smi kailāse mayā sañcālite purā |
so'yaṃ vānaramūrtissyātkiṃsvidbāṇo mahā'suraḥ || 3 ||
sa rājā roṣatāmrākṣaḥ prahastaṃ mantrisattamam |
kālayuktamuvācedaṃ vaco'vipulamarthavat || 4 ||
durātmā pṛcchyatāmeṣa kutaḥ kiṃ vātra kāraṇam |
vanabhaṅge ca ko'syārtho rākṣasīnāṃ ca tarjane || 5 ||
matpurīmapradhṛṣyāṃ vā'gamane kiṃ prayojanam |
āyodhane vā kiṃ kāryaṃ pṛcchayatāmeṣa durmatiḥ || 6 ||
rāvaṇasya vacaśśrutvā prahasto vākyamabravīt |
samāśvasihi bhadraṃ te na bhīḥ kāryā tvayā kape || 7 ||
yadi tāvattvamindreṇa preṣito rāvaṇālayam |
tattvamākhyāhi mā bhūtte bhayaṃ vānara mokṣyase || 8 ||
yadi vaiśravaṇasya tvaṃ yamasya varuṇasya ca |
cārarūpamidaṃ kṛtvā praviṣṭo naḥ purīmimām || 9 ||
viṣṇunā preṣito vā'pi dūto vijayakāṅkṣiṇā |
na hi te vānaraṃ tejo rūpamātraṃ tu vānaram || 10 ||
tattvataḥ kathayasvādya tato vānara mokṣyase |
anṛtaṃ vadataścāpi durlabhaṃ tava jīvitam || 11 ||
athavā yannimittaste praveśo rāvaṇālaye |
evamukto hariśreṣṭhastadā rakṣogaṇeśvaram || 12 ||
abravīnnāsmi śakrasya yamasya varuṇasya vā |
dhanadena na me sakhyaṃ viṣṇunā nāsmi coditaḥ || 13 ||
jātireva mama tveṣā vānaro'hamihāgataḥ |
darśane rākṣasendrasya durlabhe tadidaṃ mayā || 14 ||
vanaṃ rākṣasarājasya darśanārthe vināśitam |
tataste rākṣasāḥ prāptā balino yuddhakāṅkṣiṇaḥ |
rakṣaṇārthaṃ tu dehasya pratiyuddhā mayā raṇe || 15 ||
astrapāśairna śakyo'haṃ baddhuṃ devāsurairapi || 16 ||
pitāmahādeṣa varo māmāpyeṣo'bhyupāgataḥ |
rājānaṃ draṣṭukāmena mayāstramanuvartitam || 17 ||
vimukto hyahamastreṇa rākṣasaistvabhipīḍitaḥ |
kenacidrājakāryeṇa samprāpto'smi tavāntikam || 18 ||
dūto'hamiti vijñeyo rāghavasyāmitaujasaḥ |
śrūyatāṃ cāpi vacanaṃ mama pathyamidaṃ prabho || 19 ||
ityārṣe śrīmadrāmāyaṇe vālmīkīya ādikāvye sundarakāṇḍe pañcāśassargaḥ ||
Sanskrit — Devanagari (original)
श्रीमद्वाल्मीकीय रामायणे सुन्दरकाण्डम् ।
अथ पञ्चाशस्सर्गः ।
तमुद्वीक्ष्य महाबाहुः पिङ्गाक्षं पुरत स्थितम् ।
कोपेन महताऽविष्टो रावणो लोकरावणः ॥ 1 ॥
शङ्काहृतात्मा दध्यौ स कपीन्द्रं तेजसावृतम् ।
किमेष भगवान्नन्दी भवेत्साक्षादिहागतः ॥ 2 ॥
येन शप्तोऽस्मि कैलासे मया सञ्चालिते पुरा ।
सोऽयं वानरमूर्तिस्स्यात्किंस्विद्बाणो महाऽसुरः ॥ 3 ॥
स राजा रोषताम्राक्षः प्रहस्तं मन्त्रिसत्तमम् ।
कालयुक्तमुवाचेदं वचोऽविपुलमर्थवत् ॥ 4 ॥
दुरात्मा पृच्छ्यतामेष कुतः किं वात्र कारणम् ।
वनभङ्गे च कोऽस्यार्थो राक्षसीनां च तर्जने ॥ 5 ॥
मत्पुरीमप्रधृष्यां वाऽगमने किं प्रयोजनम् ।
आयोधने वा किं कार्यं पृच्छयतामेष दुर्मतिः ॥ 6 ॥
रावणस्य वचश्श्रुत्वा प्रहस्तो वाक्यमब्रवीत् ।
समाश्वसिहि भद्रं ते न भीः कार्या त्वया कपे ॥ 7 ॥
यदि तावत्त्वमिन्द्रेण प्रेषितो रावणालयम् ।
तत्त्वमाख्याहि मा भूत्ते भयं वानर मोक्ष्यसे ॥ 8 ॥
यदि वैश्रवणस्य त्वं यमस्य वरुणस्य च ।
चाररूपमिदं कृत्वा प्रविष्टो नः पुरीमिमाम् ॥ 9 ॥
विष्णुना प्रेषितो वाऽपि दूतो विजयकाङ्क्षिणा ।
न हि ते वानरं तेजो रूपमात्रं तु वानरम् ॥ 10 ॥
तत्त्वतः कथयस्वाद्य ततो वानर मोक्ष्यसे ।
अनृतं वदतश्चापि दुर्लभं तव जीवितम् ॥ 11 ॥
अथवा यन्निमित्तस्ते प्रवेशो रावणालये ।
एवमुक्तो हरिश्रेष्ठस्तदा रक्षोगणेश्वरम् ॥ 12 ॥
अब्रवीन्नास्मि शक्रस्य यमस्य वरुणस्य वा ।
धनदेन न मे सख्यं विष्णुना नास्मि चोदितः ॥ 13 ॥
जातिरेव मम त्वेषा वानरोऽहमिहागतः ।
दर्शने राक्षसेन्द्रस्य दुर्लभे तदिदं मया ॥ 14 ॥
वनं राक्षसराजस्य दर्शनार्थे विनाशितम् ।
ततस्ते राक्षसाः प्राप्ता बलिनो युद्धकाङ्क्षिणः ।
रक्षणार्थं तु देहस्य प्रतियुद्धा मया रणे ॥ 15 ॥
अस्त्रपाशैर्न शक्योऽहं बद्धुं देवासुरैरपि ॥ 16 ॥
पितामहादेष वरो मामाप्येषोऽभ्युपागतः ।
राजानं द्रष्टुकामेन मयास्त्रमनुवर्तितम् ॥ 17 ॥
विमुक्तो ह्यहमस्त्रेण राक्षसैस्त्वभिपीडितः ।
केनचिद्राजकार्येण सम्प्राप्तोऽस्मि तवान्तिकम् ॥ 18 ॥
दूतोऽहमिति विज्ञेयो राघवस्यामितौजसः ।
श्रूयतां चापि वचनं मम पथ्यमिदं प्रभो ॥ 19 ॥
इत्यार्षे श्रीमद्रामायणे वाल्मीकीय आदिकाव्ये सुन्दरकाण्डे पञ्चाशस्सर्गः ॥
śrīmadvālmīkīya rāmāyaṇe sundarakāṇḍam |
atha pañcāśassargaḥ |
tamudvīkṣya mahābāhuḥ piṅgākṣaṃ purata sthitam |
kopena mahatā'viṣṭo rāvaṇo lokarāvaṇaḥ || 1 ||
śaṅkāhṛtātmā dadhyau sa kapīndraṃ tejasāvṛtam |
kimeṣa bhagavānnandī bhavetsākṣādihāgataḥ || 2 ||
yena śapto'smi kailāse mayā sañcālite purā |
so'yaṃ vānaramūrtissyātkiṃsvidbāṇo mahā'suraḥ || 3 ||
sa rājā roṣatāmrākṣaḥ prahastaṃ mantrisattamam |
kālayuktamuvācedaṃ vaco'vipulamarthavat || 4 ||
durātmā pṛcchyatāmeṣa kutaḥ kiṃ vātra kāraṇam |
vanabhaṅge ca ko'syārtho rākṣasīnāṃ ca tarjane || 5 ||
matpurīmapradhṛṣyāṃ vā'gamane kiṃ prayojanam |
āyodhane vā kiṃ kāryaṃ pṛcchayatāmeṣa durmatiḥ || 6 ||
rāvaṇasya vacaśśrutvā prahasto vākyamabravīt |
samāśvasihi bhadraṃ te na bhīḥ kāryā tvayā kape || 7 ||
yadi tāvattvamindreṇa preṣito rāvaṇālayam |
tattvamākhyāhi mā bhūtte bhayaṃ vānara mokṣyase || 8 ||
yadi vaiśravaṇasya tvaṃ yamasya varuṇasya ca |
cārarūpamidaṃ kṛtvā praviṣṭo naḥ purīmimām || 9 ||
viṣṇunā preṣito vā'pi dūto vijayakāṅkṣiṇā |
na hi te vānaraṃ tejo rūpamātraṃ tu vānaram || 10 ||
tattvataḥ kathayasvādya tato vānara mokṣyase |
anṛtaṃ vadataścāpi durlabhaṃ tava jīvitam || 11 ||
athavā yannimittaste praveśo rāvaṇālaye |
evamukto hariśreṣṭhastadā rakṣogaṇeśvaram || 12 ||
abravīnnāsmi śakrasya yamasya varuṇasya vā |
dhanadena na me sakhyaṃ viṣṇunā nāsmi coditaḥ || 13 ||
jātireva mama tveṣā vānaro'hamihāgataḥ |
darśane rākṣasendrasya durlabhe tadidaṃ mayā || 14 ||
vanaṃ rākṣasarājasya darśanārthe vināśitam |
tataste rākṣasāḥ prāptā balino yuddhakāṅkṣiṇaḥ |
rakṣaṇārthaṃ tu dehasya pratiyuddhā mayā raṇe || 15 ||
astrapāśairna śakyo'haṃ baddhuṃ devāsurairapi || 16 ||
pitāmahādeṣa varo māmāpyeṣo'bhyupāgataḥ |
rājānaṃ draṣṭukāmena mayāstramanuvartitam || 17 ||
vimukto hyahamastreṇa rākṣasaistvabhipīḍitaḥ |
kenacidrājakāryeṇa samprāpto'smi tavāntikam || 18 ||
dūto'hamiti vijñeyo rāghavasyāmitaujasaḥ |
śrūyatāṃ cāpi vacanaṃ mama pathyamidaṃ prabho || 19 ||
ityārṣe śrīmadrāmāyaṇe vālmīkīya ādikāvye sundarakāṇḍe pañcāśassargaḥ ||
🕉️ This is the original Sanskrit rendered in Grantha script.
Pronunciation is identical to the Sanskrit Devanagari version.