Shiva Mahimna Stotram — Sinhala Script

අථ ශ්රී ශිවමහිම්නස්තෝත්රම් ..

මහිම්නඃ පාරං තේ පරමවිදුෂෝ යද්යසදෘශී

ස්තුතිර්බ්රහ්මාදීනාමපි තදවසන්නාස්ත්වයි ගිරඃ .

අථා(අ)වාච්යඃ සර්වඃ ස්වමතිපරිණාමාවධි ගෘණන්

මමාප්යේෂ ස්තෝත්රේ හර නිරපවාදඃ පරිකරඃ .. 1 ..

අතීතඃ පන්ථානං තව ච මහිමා වාඞ්මනසයෝඃ

අතද්ව්යාවෘත්ත්යා යං චකිතමභිධත්තේ ශ්රුතිරපි .

ස කස්ය ස්තෝතව්යඃ කතිවිධගුණඃ කස්ය විෂයඃ

පදේ ත්වර්වාචීනේ පතති න මනඃ කස්ය න වචඃ .. 2 ..

මධුස්ඵීතා වාචඃ පරමමමෘතං නිර්මිතවතඃ

තව බ්රහ්මන් කිං වාගපි සුරගුරෝර්විස්මයපදම් .

මම ත්වේතාං වාණීං ගුණකථනපුණ්යේන භවතඃ

පුනාමීත්යර්ථේ(අ)ස්මින් පුරමථන බුද්ධිර්ව්යවසිතා .. 3 ..

තවෛශ්වර්යං යත්තජ්ජගදුදයරක්ෂාප්රලයකෘත්

ත්රයීවස්තු ව්යස්තං තිස්රුෂු ගුණභින්නාසු තනුෂු .

අභව්යානාමස්මින් වරද රමණීයාමරමණීං

විහන්තුං ව්යාක්රෝශීං විදධත ඉහෛකේ ජඩධියඃ .. 4 ..

කිමීහඃ කිඞ්කායඃ ස ඛලු කිමුපායස්ත්රිභුවනං

කිමාධාරෝ ධාතා සෘජති කිමුපාදාන ඉති ච .

අතර්ක්යෛශ්වර්යේ ත්වය්යනවසර දුඃස්ථෝ හතධියඃ

කුතර්කෝ(අ)යං කාංශ්චිත් මුඛරයති මෝහාය ජගතඃ .. 5 ..

අජන්මානෝ ලෝකාඃ කිමවයවවන්තෝ(අ)පි ජගතාං

අධිෂ්ඨාතාරං කිං භවවිධිරනාදෘත්ය භවති .

අනීශෝ වා කුර්යාද් භුවනජනනේ කඃ පරිකරෝ

යතෝ මන්දාස්ත්වාං ප්රත්යමරවර සංශේරත ඉමේ .. 6 ..

ත්රයී සාඞ්ඛ්යං යෝගඃ පශුපතිමතං වෛෂ්ණවමිති

ප්රභින්නේ ප්රස්ථානේ පරමිදමදඃ පථ්යමිති ච .

රුචීනාං වෛචිත්ර්යාදෘජුකුටිල නානාපථජුෂාං

නෘණාමේකෝ ගම්යස්ත්වමසි පයසාමර්ණව ඉව .. 7 ..

මහෝක්ෂඃ ඛට්වාඞ්ගං පරශුරජිනං භස්ම ඵණිනඃ

කපාලං චේතීයත්තව වරද තන්ත්රෝපකරණම් .

සුරාස්තාං තාමෘද්ධිං දධති තු භවද්භූප්රණිහිතාං

න හි ස්වාත්මාරාමං විෂයමෘගතෘෂ්ණා භ්රමයති .. 8 ..

ධ්රුවං කශ්චිත් සර්වං සකලමපරස්ත්වධ්රුවමිදං

පරෝ ධ්රෞව්යා(අ)ධ්රෞව්යේ ජගති ගදති ව්යස්තවිෂයේ .

සමස්තේ(අ)ප්යේතස්මින් පුරමථන තෛර්විස්මිත ඉව

ස්තුවන් ජිහ්රේමි ත්වාං න ඛලු නනු ධෘෂ්ටා මුඛරතා .. 9 ..

තවෛශ්වර්යං යත්නාද් යදුපරි විරිඤ්චිර්හරිරධඃ

පරිච්ඡේතුං යාතාවනලමනලස්කන්ධවපුෂඃ .

තතෝ භක්තිශ්රද්ධා-භරගුරු-ගෘණද්භ්යාං ගිරිශ යත්

ස්වයං තස්ථේ තාභ්යාං තව කිමනුවෘත්තිර්න ඵලති .. 10 ..

අයත්නාදාසාද්ය ත්රිභුවනමවෛරව්යතිකරං

දශාස්යෝ යද්බාහූනභෘත රණකණ්ඩූ-පරවශාන් .

ශිරඃපද්මශ්රේණී-රචිතචරණාම්භෝරුහ-බලේඃ

ස්ථිරායාස්ත්වද්භක්තේස්ත්රිපුරහර විස්ඵූර්ජිතමිදම් .. 11 ..

අමුෂ්ය ත්වත්සේවා-සමධිගතසාරං භුජවනං

බලාත් කෛලාසේ(අ)පි ත්වදධිවසතෞ වික්රමයතඃ .

අලභ්යා පාතාලේ(අ)ප්යලසචලිතාඞ්ගුෂ්ඨශිරසි

ප්රතිෂ්ඨා ත්වය්යාසීද් ධ්රුවමුපචිතෝ මුහ්යති ඛලඃ .. 12 ..

යදෘද්ධිං සුත්රාම්ණෝ වරද පරමෝච්චෛරපි සතීං

අධශ්චක්රේ බාණඃ පරිජනවිධේයත්රිභුවනඃ .

න තච්චිත්රං තස්මින් වරිවසිතරි ත්වච්චරණයෝඃ

න කස්යාප්යුන්නත්යෛ භවති ශිරසස්ත්වය්යවනතිඃ .. 13 ..

අකාණ්ඩ-බ්රහ්මාණ්ඩ-ක්ෂයචකිත-දේවාසුරකෘපා

විධේයස්යා(අ)(අ)සීද් යස්ත්රිනයන විෂං සංහෘතවතඃ .

ස කල්මාෂඃ කණ්ඨේ තව න කුරුතේ න ශ්රියමහෝ

විකාරෝ(අ)පි ශ්ලාඝ්යෝ භුවන-භය- භඞ්ග- ව්යසනිනඃ .. 14 ..

අසිද්ධාර්ථා නෛව ක්වචිදපි සදේවාසුරනරේ

නිවර්තන්තේ නිත්යං ජගති ජයිනෝ යස්ය විශිඛාඃ .

ස පශ්යන්නීශ ත්වාමිතරසුරසාධාරණමභූත්

ස්මරඃ ස්මර්තව්යාත්මා න හි වශිෂු පථ්යඃ පරිභවඃ .. 15 ..

මහී පාදාඝාතාද් ව්රජති සහසා සංශයපදං

පදං විෂ්ණෝර්භ්රාම්යද් භුජ-පරිඝ-රුග්ණ-ග්රහ- ගණම් .

මුහුර්ද්යෞර්දෞස්ථ්යං යාත්යනිභෘත-ජටා-තාඩිත-තටා

ජගද්රක්ෂායෛ ත්වං නටසි නනු වාමෛව විභුතා .. 16 ..

වියද්ව්යාපී තාරා-ගණ-ගුණිත-ඵේනෝද්ගම-රුචිඃ

ප්රවාහෝ වාරාං යඃ පෘෂතලඝුදෘෂ්ටඃ ශිරසි තේ .

ජගද්ද්වීපාකාරං ජලධිවලයං තේන කෘතමිති

අනේනෛවෝන්නේයං ධෘතමහිම දිව්යං තව වපුඃ .. 17 ..

රථඃ ක්ෂෝණී යන්තා ශතධෘතිරගේන්ද්රෝ ධනුරථෝ

රථාඞ්ගේ චන්ද්රාර්කෞ රථ-චරණ-පාණිඃ ශර ඉති .

දිධක්ෂෝස්තේ කෝ(අ)යං ත්රිපුරතෘණමාඩම්බර-විධිඃ

විධේයෛඃ ක්රීඩන්ත්යෝ න ඛලු පරතන්ත්රාඃ ප්රභුධියඃ .. 18 ..

හරිස්තේ සාහස්රං කමල බලිමාධාය පදයෝඃ

යදේකෝනේ තස්මින් නිජමුදහරන්නේත්රකමලම් .

ගතෝ භක්ත්යුද්රේකඃ පරිණතිමසෞ චක්රවපුෂඃ

ත්රයාණාං රක්ෂායෛ ත්රිපුරහර ජාගර්ති ජගතාම් .. 19 ..

ක්රතෞ සුප්තේ ජාග්රත් ත්වමසි ඵලයෝගේ ක්රතුමතාං

ක්ව කර්ම ප්රධ්වස්තං ඵලති පුරුෂාරාධනමෘතේ .

අතස්ත්වාං සම්ප්රේක්ෂ්ය ක්රතුෂු ඵලදාන-ප්රතිභුවං

ශ්රුතෞ ශ්රද්ධාං බධ්වා දෘඪපරිකරඃ කර්මසු ජනඃ .. 20 ..

ක්රියාදක්ෂෝ දක්ෂඃ ක්රතුපතිරධීශස්තනුභෘතාං

ඍෂීණාමාර්ත්විජ්යං ශරණද සදස්යාඃ සුර-ගණාඃ .

ක්රතුභ්රංශස්ත්වත්තඃ ක්රතුඵල-විධාන-ව්යසනිනඃ

ධ්රුවං කර්තුඃ ශ්රද්ධා-විධුරමභිචාරාය හි මඛාඃ .. 21 ..

ප්රජානාථං නාථ ප්රසභමභිකං ස්වාං දුහිතරං

ගතං රෝහිද් භූතාං රිරමයිෂුමෘෂ්යස්ය වපුෂා .

ධනුෂ්පාණේර්යාතං දිවමපි සපත්රාකෘතමමුං

ත්රසන්තං තේ(අ)ද්යාපි ත්යජති න මෘගව්යාධරභසඃ .. 22 ..

ස්වලාවණ්යාශංසා ධෘතධනුෂමහ්නාය තෘණවත්

පුරඃ ප්ලුෂ්ටං දෘෂ්ට්වා පුරමථන පුෂ්පායුධමපි .

යදි ස්ත්රෛණං දේවී යමනිරත-දේහාර්ධ-ඝටනාත්

අවෛති ත්වාමද්ධා බත වරද මුග්ධා යුවතයඃ .. 23 ..

ශ්මශානේෂ්වාක්රීඩා ස්මරහර පිශාචාඃ සහචරාඃ

චිතා-භස්මාලේපඃ ස්රගපි නෘකරෝටී-පරිකරඃ .

අමඞ්ගල්යං ශීලං තව භවතු නාමෛවමඛිලං

තථාපි ස්මර්තෲණාං වරද පරමං මඞ්ගලමසි .. 24 ..

මනඃ ප්රත්යක්චිත්තේ සවිධමවිධායාත්ත-මරුතඃ

ප්රහෘෂ්යද්රෝමාණඃ ප්රමද-සලිලෝත්සඞ්ගති-දෘශඃ .

යදාලෝක්යාහ්ලාදං හ්රද ඉව නිමජ්යාමෘතමයේ

දධත්යන්තස්තත්ත්වං කිමපි යමිනස්තත් කිල භවාන් .. 25 ..

ත්වමර්කස්ත්වං සෝමස්ත්වමසි පවනස්ත්වං හුතවහඃ

ත්වමාපස්ත්වං ව්යෝම ත්වමු ධරණිරාත්මා ත්වමිති ච .

පරිච්ඡින්නාමේවං ත්වයි පරිණතා බිභ්රති ගිරං

න විද්මස්තත්තත්ත්වං වයමිහ තු යත් ත්වං න භවසි .. 26 ..

ත්රයීං තිස්රෝ වෘත්තීස්ත්රිභුවනමථෝ ත්රීනපි සුරාන්

අකාරාද්යෛර්වර්ණෛස්ත්රිභිරභිදධත් තීර්ණවිකෘති .

තුරීයං තේ ධාම ධ්වනිභිරවරුන්ධානමණුභිඃ

සමස්තං ව්යස්තං ත්වාං ශරණද ගෘණාත්යෝමිති පදම් .. 27 ..

භවඃ ශර්වෝ රුද්රඃ පශුපතිරථෝග්රඃ සහමහාන්

තථා භීමේශානාවිති යදභිධානාෂ්ටකමිදම් .

අමුෂ්මින් ප්රත්යේකං ප්රවිචරති දේව ශ්රුතිරපි

ප්රියායාස්මෛධාම්නේ ප්රණිහිත-නමස්යෝ(අ)ස්මි භවතේ .. 28 ..

නමෝ නේදිෂ්ඨාය ප්රියදව දවිෂ්ඨාය ච නමඃ

නමඃ ක්ෂෝදිෂ්ඨාය ස්මරහර මහිෂ්ඨාය ච නමඃ .

නමෝ වර්ෂිෂ්ඨාය ත්රිනයන යවිෂ්ඨාය ච නමඃ

නමඃ සර්වස්මෛ තේ තදිදමිතිසර්වාය ච නමඃ .. 29 ..

බහුල-රජසේ විශ්වෝත්පත්තෞ භවාය නමෝ නමඃ

ප්රබල-තමසේ තත් සංහාරේ හරාය නමෝ නමඃ .

ජන-සුඛකෘතේ සත්ත්වෝද්රික්තෞ මෘඩාය නමෝ නමඃ

ප්රමහසි පදේ නිස්ත්රෛගුණ්යේ ශිවාය නමෝ නමඃ .. 30 ..

කෘශ-පරිණති-චේතඃ ක්ලේශවශ්යං ක්ව චේදං

ක්ව ච තව ගුණ-සීමෝල්ලඞ්ඝිනී ශශ්වදෘද්ධිඃ .

ඉති චකිතමමන්දීකෘත්ය මාං භක්තිරාධාද්

වරද චරණයෝස්තේ වාක්ය-පුෂ්පෝපහාරම් .. 31 ..

අසිත-ගිරි-සමං ස්යාත් කජ්ජලං සින්ධු-පාත්රේ

සුර-තරුවර-ශාඛා ලේඛනී පත්රමුර්වී .

ලිඛති යදි ගෘහීත්වා ශාරදා සර්වකාලං

තදපි තව ගුණානාමීශ පාරං න යාති .. 32 ..

අසුර-සුර-මුනීන්ද්රෛරර්චිතස්යේන්දු-මෞලේඃ

ග්රථිත-ගුණමහිම්නෝ නිර්ගුණස්යේශ්වරස්ය .

සකල-ගණ-වරිෂ්ඨඃ පුෂ්පදන්තාභිධානඃ

රුචිරමලඝුවෘත්තෛඃ ස්තෝත්රමේතච්චකාර .. 33 ..

අහරහරනවද්යං ධූර්ජටේඃ ස්තෝත්රමේතත්

පඨති පරමභක්ත්යා ශුද්ධ-චිත්තඃ පුමාන් යඃ .

ස භවති ශිවලෝකේ රුද්රතුල්යස්තථා(අ)ත්ර

ප්රචුරතර-ධනායුඃ පුත්රවාන් කීර්තිමාංශ්ච .. 34 ..

මහේශාන්නාපරෝ දේවෝ මහිම්නෝ නාපරා ස්තුතිඃ .

අඝෝරාන්නාපරෝ මන්ත්රෝ නාස්ති තත්ත්වං ගුරෝඃ පරම් .. 35 ..

දීක්ෂා දානං තපස්තීර්ථං ජ්ඤානං යාගාදිකාඃ ක්රියාඃ .

මහිම්නස්තව පාඨස්ය කලාං නාර්හන්ති ෂෝඩශීම් .. 36 ..

කුසුමදශන-නාමා සර්ව-ගන්ධර්ව-රාජඃ

ශශිධරවර-මෞලේර්දේවදේවස්ය දාසඃ .

ස ඛලු නිජ-මහිම්නෝ භ්රෂ්ට ඒවාස්ය රෝෂාත්

ස්තවනමිදමකාර්ෂීද් දිව්ය-දිව්යං මහිම්නඃ .. 37 ..

සුරගුරුමභිපූජ්ය ස්වර්ග-මෝක්ෂෛක-හේතුං [සුරවරමුනිපූජ්යං]

පඨති යදි මනුෂ්යඃ ප්රාඤ්ජලිර්නාන්ය-චේතාඃ .

ව්රජති ශිව-සමීපං කින්නරෛඃ ස්තූයමානඃ

ස්තවනමිදමමෝඝං පුෂ්පදන්තප්රණීතම් .. 38 ..

ශ්රී පුෂ්පදන්ත-මුඛ-පඞ්කජ-නිර්ගතේන

ස්තෝත්රේණ කිල්බිෂ-හරේණ හර-ප්රියේණ .

කණ්ඨස්ථිතේන පඨිතේන සමාහිතේන

සුප්රීණිතෝ භවති භූතපතිර්මහේශඃ .. 43 ..

ආසමාප්තමිදං ස්තෝත්රං පුණ්යං ගන්ධර්ව-භාෂිතම් .

අනෞපම්යං මනෝහාරි සර්වමීශ්වරවර්ණනම් .. 39 ..

තව තත්ත්වං න ජානාමි කීදෘශෝ(අ)සි මහේශ්වර .

යාදෘශෝ(අ)සි මහාදේව තාදෘශාය නමෝ නමඃ .. 41 ..

ඒකකාලං ද්විකාලං වා ත්රිකාලං යඃ පඨේන්නරඃ .

සර්වපාප-විනිර්මුක්තඃ ශිව ලෝකේ මහීයතේ .. 42 ..

ඉත්යේෂා වාඞ්මයී පූජා ශ්රීමච්ඡඞ්කර-පාදයෝඃ .

අර්පිතා තේන දේවේශඃ ප්රීයතාං මේ සදාශිවඃ .. 40 ..

.. ඉති ශ්රී පුෂ්පදන්ත විරචිතං ශිවමහිම්න-ස්තෝත්රං සමාප්තම් ..

Roman (IAST) Transliteration

atha śrī śivamahimnastotram ||

mahimnaḥ pāraṃ te paramaviduṣo yadyasadṛśī

stutirbrahmādīnāmapi tadavasannāstvayi giraḥ |

athā'vācyaḥ sarvaḥ svamatipariṇāmāvadhi gṛṇan

mamāpyeṣa stotre hara nirapavādaḥ parikaraḥ || 1 ||

atītaḥ panthānaṃ tava ca mahimā vāṅmanasayoḥ

atadvyāvṛttyā yaṃ cakitamabhidhatte śrutirapi |

sa kasya stotavyaḥ katividhaguṇaḥ kasya viṣayaḥ

pade tvarvācīne patati na manaḥ kasya na vacaḥ || 2 ||

madhusphītā vācaḥ paramamamṛtaṃ nirmitavataḥ

tava brahman kiṃ vāgapi suragurorvismayapadam |

mama tvetāṃ vāṇīṃ guṇakathanapuṇyena bhavataḥ

punāmītyarthe'smin puramathana buddhirvyavasitā || 3 ||

tavaiśvaryaṃ yattajjagadudayarakṣāpralayakṛt

trayīvastu vyastaṃ tisruṣu guṇabhinnāsu tanuṣu |

abhavyānāmasmin varada ramaṇīyāmaramaṇīṃ

vihantuṃ vyākrośīṃ vidadhata ihaike jaḍadhiyaḥ || 4 ||

kimīhaḥ kiṅkāyaḥ sa khalu kimupāyastribhuvanaṃ

kimādhāro dhātā sṛjati kimupādāna iti ca |

atarkyaiśvarye tvayyanavasara duḥstho hatadhiyaḥ

kutarko'yaṃ kāṃścit mukharayati mohāya jagataḥ || 5 ||

ajanmāno lokāḥ kimavayavavanto'pi jagatāṃ

adhiṣṭhātāraṃ kiṃ bhavavidhiranādṛtya bhavati |

anīśo vā kuryād bhuvanajanane kaḥ parikaro

yato mandāstvāṃ pratyamaravara saṃśerata ime || 6 ||

trayī sāṅkhyaṃ yogaḥ paśupatimataṃ vaiṣṇavamiti

prabhinne prasthāne paramidamadaḥ pathyamiti ca |

rucīnāṃ vaicitryādṛjukuṭila nānāpathajuṣāṃ

nṛṇāmeko gamyastvamasi payasāmarṇava iva || 7 ||

mahokṣaḥ khaṭvāṅgaṃ paraśurajinaṃ bhasma phaṇinaḥ

kapālaṃ cetīyattava varada tantropakaraṇam |

surāstāṃ tāmṛddhiṃ dadhati tu bhavadbhūpraṇihitāṃ

na hi svātmārāmaṃ viṣayamṛgatṛṣṇā bhramayati || 8 ||

dhruvaṃ kaścit sarvaṃ sakalamaparastvadhruvamidaṃ

paro dhrauvyā'dhrauvye jagati gadati vyastaviṣaye |

samaste'pyetasmin puramathana tairvismita iva

stuvan jihremi tvāṃ na khalu nanu dhṛṣṭā mukharatā || 9 ||

tavaiśvaryaṃ yatnād yadupari viriñcirhariradhaḥ

paricchetuṃ yātāvanalamanalaskandhavapuṣaḥ |

tato bhaktiśraddhā-bharaguru-gṛṇadbhyāṃ giriśa yat

svayaṃ tasthe tābhyāṃ tava kimanuvṛttirna phalati || 10 ||

ayatnādāsādya tribhuvanamavairavyatikaraṃ

daśāsyo yadbāhūnabhṛta raṇakaṇḍū-paravaśān |

śiraḥpadmaśreṇī-racitacaraṇāmbhoruha-baleḥ

sthirāyāstvadbhaktestripurahara visphūrjitamidam || 11 ||

amuṣya tvatsevā-samadhigatasāraṃ bhujavanaṃ

balāt kailāse'pi tvadadhivasatau vikramayataḥ |

alabhyā pātāle'pyalasacalitāṅguṣṭhaśirasi

pratiṣṭhā tvayyāsīd dhruvamupacito muhyati khalaḥ || 12 ||

yadṛddhiṃ sutrāmṇo varada paramoccairapi satīṃ

adhaścakre bāṇaḥ parijanavidheyatribhuvanaḥ |

na taccitraṃ tasmin varivasitari tvaccaraṇayoḥ

na kasyāpyunnatyai bhavati śirasastvayyavanatiḥ || 13 ||

akāṇḍa-brahmāṇḍa-kṣayacakita-devāsurakṛpā

vidheyasyā''sīd yastrinayana viṣaṃ saṃhṛtavataḥ |

sa kalmāṣaḥ kaṇṭhe tava na kurute na śriyamaho

vikāro'pi ślāghyo bhuvana-bhaya- bhaṅga- vyasaninaḥ || 14 ||

asiddhārthā naiva kvacidapi sadevāsuranare

nivartante nityaṃ jagati jayino yasya viśikhāḥ |

sa paśyannīśa tvāmitarasurasādhāraṇamabhūt

smaraḥ smartavyātmā na hi vaśiṣu pathyaḥ paribhavaḥ || 15 ||

mahī pādāghātād vrajati sahasā saṃśayapadaṃ

padaṃ viṣṇorbhrāmyad bhuja-parigha-rugṇa-graha- gaṇam |

muhurdyaurdausthyaṃ yātyanibhṛta-jaṭā-tāḍita-taṭā

jagadrakṣāyai tvaṃ naṭasi nanu vāmaiva vibhutā || 16 ||

viyadvyāpī tārā-gaṇa-guṇita-phenodgama-ruciḥ

pravāho vārāṃ yaḥ pṛṣatalaghudṛṣṭaḥ śirasi te |

jagaddvīpākāraṃ jaladhivalayaṃ tena kṛtamiti

anenaivonneyaṃ dhṛtamahima divyaṃ tava vapuḥ || 17 ||

rathaḥ kṣoṇī yantā śatadhṛtiragendro dhanuratho

rathāṅge candrārkau ratha-caraṇa-pāṇiḥ śara iti |

didhakṣoste ko'yaṃ tripuratṛṇamāḍambara-vidhiḥ

vidheyaiḥ krīḍantyo na khalu paratantrāḥ prabhudhiyaḥ || 18 ||

hariste sāhasraṃ kamala balimādhāya padayoḥ

yadekone tasmin nijamudaharannetrakamalam |

gato bhaktyudrekaḥ pariṇatimasau cakravapuṣaḥ

trayāṇāṃ rakṣāyai tripurahara jāgarti jagatām || 19 ||

kratau supte jāgrat tvamasi phalayoge kratumatāṃ

kva karma pradhvastaṃ phalati puruṣārādhanamṛte |

atastvāṃ samprekṣya kratuṣu phaladāna-pratibhuvaṃ

śrutau śraddhāṃ badhvā dṛḍhaparikaraḥ karmasu janaḥ || 20 ||

kriyādakṣo dakṣaḥ kratupatiradhīśastanubhṛtāṃ

ṛṣīṇāmārtvijyaṃ śaraṇada sadasyāḥ sura-gaṇāḥ |

kratubhraṃśastvattaḥ kratuphala-vidhāna-vyasaninaḥ

dhruvaṃ kartuḥ śraddhā-vidhuramabhicārāya hi makhāḥ || 21 ||

prajānāthaṃ nātha prasabhamabhikaṃ svāṃ duhitaraṃ

gataṃ rohid bhūtāṃ riramayiṣumṛṣyasya vapuṣā |

dhanuṣpāṇeryātaṃ divamapi sapatrākṛtamamuṃ

trasantaṃ te'dyāpi tyajati na mṛgavyādharabhasaḥ || 22 ||

svalāvaṇyāśaṃsā dhṛtadhanuṣamahnāya tṛṇavat

puraḥ pluṣṭaṃ dṛṣṭvā puramathana puṣpāyudhamapi |

yadi straiṇaṃ devī yamanirata-dehārdha-ghaṭanāt

avaiti tvāmaddhā bata varada mugdhā yuvatayaḥ || 23 ||

śmaśāneṣvākrīḍā smarahara piśācāḥ sahacarāḥ

citā-bhasmālepaḥ sragapi nṛkaroṭī-parikaraḥ |

amaṅgalyaṃ śīlaṃ tava bhavatu nāmaivamakhilaṃ

tathāpi smartṝṇāṃ varada paramaṃ maṅgalamasi || 24 ||

manaḥ pratyakcitte savidhamavidhāyātta-marutaḥ

prahṛṣyadromāṇaḥ pramada-salilotsaṅgati-dṛśaḥ |

yadālokyāhlādaṃ hrada iva nimajyāmṛtamaye

dadhatyantastattvaṃ kimapi yaminastat kila bhavān || 25 ||

tvamarkastvaṃ somastvamasi pavanastvaṃ hutavahaḥ

tvamāpastvaṃ vyoma tvamu dharaṇirātmā tvamiti ca |

paricchinnāmevaṃ tvayi pariṇatā bibhrati giraṃ

na vidmastattattvaṃ vayamiha tu yat tvaṃ na bhavasi || 26 ||

trayīṃ tisro vṛttīstribhuvanamatho trīnapi surān

akārādyairvarṇaistribhirabhidadhat tīrṇavikṛti |

turīyaṃ te dhāma dhvanibhiravarundhānamaṇubhiḥ

samastaṃ vyastaṃ tvāṃ śaraṇada gṛṇātyomiti padam || 27 ||

bhavaḥ śarvo rudraḥ paśupatirathograḥ sahamahān

tathā bhīmeśānāviti yadabhidhānāṣṭakamidam |

amuṣmin pratyekaṃ pravicarati deva śrutirapi

priyāyāsmaidhāmne praṇihita-namasyo'smi bhavate || 28 ||

namo nediṣṭhāya priyadava daviṣṭhāya ca namaḥ

namaḥ kṣodiṣṭhāya smarahara mahiṣṭhāya ca namaḥ |

namo varṣiṣṭhāya trinayana yaviṣṭhāya ca namaḥ

namaḥ sarvasmai te tadidamitisarvāya ca namaḥ || 29 ||

bahula-rajase viśvotpattau bhavāya namo namaḥ

prabala-tamase tat saṃhāre harāya namo namaḥ |

jana-sukhakṛte sattvodriktau mṛḍāya namo namaḥ

pramahasi pade nistraiguṇye śivāya namo namaḥ || 30 ||

kṛśa-pariṇati-cetaḥ kleśavaśyaṃ kva cedaṃ

kva ca tava guṇa-sīmollaṅghinī śaśvadṛddhiḥ |

iti cakitamamandīkṛtya māṃ bhaktirādhād

varada caraṇayoste vākya-puṣpopahāram || 31 ||

asita-giri-samaṃ syāt kajjalaṃ sindhu-pātre

sura-taruvara-śākhā lekhanī patramurvī |

likhati yadi gṛhītvā śāradā sarvakālaṃ

tadapi tava guṇānāmīśa pāraṃ na yāti || 32 ||

asura-sura-munīndrairarcitasyendu-mauleḥ

grathita-guṇamahimno nirguṇasyeśvarasya |

sakala-gaṇa-variṣṭhaḥ puṣpadantābhidhānaḥ

ruciramalaghuvṛttaiḥ stotrametaccakāra || 33 ||

aharaharanavadyaṃ dhūrjaṭeḥ stotrametat

paṭhati paramabhaktyā śuddha-cittaḥ pumān yaḥ |

sa bhavati śivaloke rudratulyastathā'tra

pracuratara-dhanāyuḥ putravān kīrtimāṃśca || 34 ||

maheśānnāparo devo mahimno nāparā stutiḥ |

aghorānnāparo mantro nāsti tattvaṃ guroḥ param || 35 ||

dīkṣā dānaṃ tapastīrthaṃ jñānaṃ yāgādikāḥ kriyāḥ |

mahimnastava pāṭhasya kalāṃ nārhanti ṣoḍaśīm || 36 ||

kusumadaśana-nāmā sarva-gandharva-rājaḥ

śaśidharavara-maulerdevadevasya dāsaḥ |

sa khalu nija-mahimno bhraṣṭa evāsya roṣāt

stavanamidamakārṣīd divya-divyaṃ mahimnaḥ || 37 ||

suragurumabhipūjya svarga-mokṣaika-hetuṃ [suravaramunipūjyaṃ]

paṭhati yadi manuṣyaḥ prāñjalirnānya-cetāḥ |

vrajati śiva-samīpaṃ kinnaraiḥ stūyamānaḥ

stavanamidamamoghaṃ puṣpadantapraṇītam || 38 ||

śrī puṣpadanta-mukha-paṅkaja-nirgatena

stotreṇa kilbiṣa-hareṇa hara-priyeṇa |

kaṇṭhasthitena paṭhitena samāhitena

suprīṇito bhavati bhūtapatirmaheśaḥ || 43 ||

āsamāptamidaṃ stotraṃ puṇyaṃ gandharva-bhāṣitam |

anaupamyaṃ manohāri sarvamīśvaravarṇanam || 39 ||

tava tattvaṃ na jānāmi kīdṛśo'si maheśvara |

yādṛśo'si mahādeva tādṛśāya namo namaḥ || 41 ||

ekakālaṃ dvikālaṃ vā trikālaṃ yaḥ paṭhennaraḥ |

sarvapāpa-vinirmuktaḥ śiva loke mahīyate || 42 ||

ityeṣā vāṅmayī pūjā śrīmacchaṅkara-pādayoḥ |

arpitā tena deveśaḥ prīyatāṃ me sadāśivaḥ || 40 ||

|| iti śrī puṣpadanta viracitaṃ śivamahimna-stotraṃ samāptam ||

Sanskrit — Devanagari (original)

अथ श्री शिवमहिम्नस्तोत्रम् ॥

महिम्नः पारं ते परमविदुषो यद्यसदृशी

स्तुतिर्ब्रह्मादीनामपि तदवसन्नास्त्वयि गिरः ।

अथाऽवाच्यः सर्वः स्वमतिपरिणामावधि गृणन्

ममाप्येष स्तोत्रे हर निरपवादः परिकरः ॥ 1 ॥

अतीतः पन्थानं तव च महिमा वाङ्मनसयोः

अतद्व्यावृत्त्या यं चकितमभिधत्ते श्रुतिरपि ।

स कस्य स्तोतव्यः कतिविधगुणः कस्य विषयः

पदे त्वर्वाचीने पतति न मनः कस्य न वचः ॥ 2 ॥

मधुस्फीता वाचः परमममृतं निर्मितवतः

तव ब्रह्मन् किं वागपि सुरगुरोर्विस्मयपदम् ।

मम त्वेतां वाणीं गुणकथनपुण्येन भवतः

पुनामीत्यर्थेऽस्मिन् पुरमथन बुद्धिर्व्यवसिता ॥ 3 ॥

तवैश्वर्यं यत्तज्जगदुदयरक्षाप्रलयकृत्

त्रयीवस्तु व्यस्तं तिस्रुषु गुणभिन्नासु तनुषु ।

अभव्यानामस्मिन् वरद रमणीयामरमणीं

विहन्तुं व्याक्रोशीं विदधत इहैके जडधियः ॥ 4 ॥

किमीहः किङ्कायः स खलु किमुपायस्त्रिभुवनं

किमाधारो धाता सृजति किमुपादान इति च ।

अतर्क्यैश्वर्ये त्वय्यनवसर दुःस्थो हतधियः

कुतर्कोऽयं कांश्चित् मुखरयति मोहाय जगतः ॥ 5 ॥

अजन्मानो लोकाः किमवयववन्तोऽपि जगतां

अधिष्ठातारं किं भवविधिरनादृत्य भवति ।

अनीशो वा कुर्याद् भुवनजनने कः परिकरो

यतो मन्दास्त्वां प्रत्यमरवर संशेरत इमे ॥ 6 ॥

त्रयी साङ्ख्यं योगः पशुपतिमतं वैष्णवमिति

प्रभिन्ने प्रस्थाने परमिदमदः पथ्यमिति च ।

रुचीनां वैचित्र्यादृजुकुटिल नानापथजुषां

नृणामेको गम्यस्त्वमसि पयसामर्णव इव ॥ 7 ॥

महोक्षः खट्वाङ्गं परशुरजिनं भस्म फणिनः

कपालं चेतीयत्तव वरद तन्त्रोपकरणम् ।

सुरास्तां तामृद्धिं दधति तु भवद्भूप्रणिहितां

न हि स्वात्मारामं विषयमृगतृष्णा भ्रमयति ॥ 8 ॥

ध्रुवं कश्चित् सर्वं सकलमपरस्त्वध्रुवमिदं

परो ध्रौव्याऽध्रौव्ये जगति गदति व्यस्तविषये ।

समस्तेऽप्येतस्मिन् पुरमथन तैर्विस्मित इव

स्तुवन् जिह्रेमि त्वां न खलु ननु धृष्टा मुखरता ॥ 9 ॥

तवैश्वर्यं यत्नाद् यदुपरि विरिञ्चिर्हरिरधः

परिच्छेतुं यातावनलमनलस्कन्धवपुषः ।

ततो भक्तिश्रद्धा-भरगुरु-गृणद्भ्यां गिरिश यत्

स्वयं तस्थे ताभ्यां तव किमनुवृत्तिर्न फलति ॥ 10 ॥

अयत्नादासाद्य त्रिभुवनमवैरव्यतिकरं

दशास्यो यद्बाहूनभृत रणकण्डू-परवशान् ।

शिरःपद्मश्रेणी-रचितचरणाम्भोरुह-बलेः

स्थिरायास्त्वद्भक्तेस्त्रिपुरहर विस्फूर्जितमिदम् ॥ 11 ॥

अमुष्य त्वत्सेवा-समधिगतसारं भुजवनं

बलात् कैलासेऽपि त्वदधिवसतौ विक्रमयतः ।

अलभ्या पातालेऽप्यलसचलिताङ्गुष्ठशिरसि

प्रतिष्ठा त्वय्यासीद् ध्रुवमुपचितो मुह्यति खलः ॥ 12 ॥

यदृद्धिं सुत्राम्णो वरद परमोच्चैरपि सतीं

अधश्चक्रे बाणः परिजनविधेयत्रिभुवनः ।

न तच्चित्रं तस्मिन् वरिवसितरि त्वच्चरणयोः

न कस्याप्युन्नत्यै भवति शिरसस्त्वय्यवनतिः ॥ 13 ॥

अकाण्ड-ब्रह्माण्ड-क्षयचकित-देवासुरकृपा

विधेयस्याऽऽसीद् यस्त्रिनयन विषं संहृतवतः ।

स कल्माषः कण्ठे तव न कुरुते न श्रियमहो

विकारोऽपि श्लाघ्यो भुवन-भय- भङ्ग- व्यसनिनः ॥ 14 ॥

असिद्धार्था नैव क्वचिदपि सदेवासुरनरे

निवर्तन्ते नित्यं जगति जयिनो यस्य विशिखाः ।

स पश्यन्नीश त्वामितरसुरसाधारणमभूत्

स्मरः स्मर्तव्यात्मा न हि वशिषु पथ्यः परिभवः ॥ 15 ॥

मही पादाघाताद् व्रजति सहसा संशयपदं

पदं विष्णोर्भ्राम्यद् भुज-परिघ-रुग्ण-ग्रह- गणम् ।

मुहुर्द्यौर्दौस्थ्यं यात्यनिभृत-जटा-ताडित-तटा

जगद्रक्षायै त्वं नटसि ननु वामैव विभुता ॥ 16 ॥

वियद्व्यापी तारा-गण-गुणित-फेनोद्गम-रुचिः

प्रवाहो वारां यः पृषतलघुदृष्टः शिरसि ते ।

जगद्द्वीपाकारं जलधिवलयं तेन कृतमिति

अनेनैवोन्नेयं धृतमहिम दिव्यं तव वपुः ॥ 17 ॥

रथः क्षोणी यन्ता शतधृतिरगेन्द्रो धनुरथो

रथाङ्गे चन्द्रार्कौ रथ-चरण-पाणिः शर इति ।

दिधक्षोस्ते कोऽयं त्रिपुरतृणमाडम्बर-विधिः

विधेयैः क्रीडन्त्यो न खलु परतन्त्राः प्रभुधियः ॥ 18 ॥

हरिस्ते साहस्रं कमल बलिमाधाय पदयोः

यदेकोने तस्मिन् निजमुदहरन्नेत्रकमलम् ।

गतो भक्त्युद्रेकः परिणतिमसौ चक्रवपुषः

त्रयाणां रक्षायै त्रिपुरहर जागर्ति जगताम् ॥ 19 ॥

क्रतौ सुप्ते जाग्रत् त्वमसि फलयोगे क्रतुमतां

क्व कर्म प्रध्वस्तं फलति पुरुषाराधनमृते ।

अतस्त्वां सम्प्रेक्ष्य क्रतुषु फलदान-प्रतिभुवं

श्रुतौ श्रद्धां बध्वा दृढपरिकरः कर्मसु जनः ॥ 20 ॥

क्रियादक्षो दक्षः क्रतुपतिरधीशस्तनुभृतां

ऋषीणामार्त्विज्यं शरणद सदस्याः सुर-गणाः ।

क्रतुभ्रंशस्त्वत्तः क्रतुफल-विधान-व्यसनिनः

ध्रुवं कर्तुः श्रद्धा-विधुरमभिचाराय हि मखाः ॥ 21 ॥

प्रजानाथं नाथ प्रसभमभिकं स्वां दुहितरं

गतं रोहिद् भूतां रिरमयिषुमृष्यस्य वपुषा ।

धनुष्पाणेर्यातं दिवमपि सपत्राकृतममुं

त्रसन्तं तेऽद्यापि त्यजति न मृगव्याधरभसः ॥ 22 ॥

स्वलावण्याशंसा धृतधनुषमह्नाय तृणवत्

पुरः प्लुष्टं दृष्ट्वा पुरमथन पुष्पायुधमपि ।

यदि स्त्रैणं देवी यमनिरत-देहार्ध-घटनात्

अवैति त्वामद्धा बत वरद मुग्धा युवतयः ॥ 23 ॥

श्मशानेष्वाक्रीडा स्मरहर पिशाचाः सहचराः

चिता-भस्मालेपः स्रगपि नृकरोटी-परिकरः ।

अमङ्गल्यं शीलं तव भवतु नामैवमखिलं

तथापि स्मर्तॄणां वरद परमं मङ्गलमसि ॥ 24 ॥

मनः प्रत्यक्चित्ते सविधमविधायात्त-मरुतः

प्रहृष्यद्रोमाणः प्रमद-सलिलोत्सङ्गति-दृशः ।

यदालोक्याह्लादं ह्रद इव निमज्यामृतमये

दधत्यन्तस्तत्त्वं किमपि यमिनस्तत् किल भवान् ॥ 25 ॥

त्वमर्कस्त्वं सोमस्त्वमसि पवनस्त्वं हुतवहः

त्वमापस्त्वं व्योम त्वमु धरणिरात्मा त्वमिति च ।

परिच्छिन्नामेवं त्वयि परिणता बिभ्रति गिरं

न विद्मस्तत्तत्त्वं वयमिह तु यत् त्वं न भवसि ॥ 26 ॥

त्रयीं तिस्रो वृत्तीस्त्रिभुवनमथो त्रीनपि सुरान्

अकाराद्यैर्वर्णैस्त्रिभिरभिदधत् तीर्णविकृति ।

तुरीयं ते धाम ध्वनिभिरवरुन्धानमणुभिः

समस्तं व्यस्तं त्वां शरणद गृणात्योमिति पदम् ॥ 27 ॥

भवः शर्वो रुद्रः पशुपतिरथोग्रः सहमहान्

तथा भीमेशानाविति यदभिधानाष्टकमिदम् ।

अमुष्मिन् प्रत्येकं प्रविचरति देव श्रुतिरपि

प्रियायास्मैधाम्ने प्रणिहित-नमस्योऽस्मि भवते ॥ 28 ॥

नमो नेदिष्ठाय प्रियदव दविष्ठाय च नमः

नमः क्षोदिष्ठाय स्मरहर महिष्ठाय च नमः ।

नमो वर्षिष्ठाय त्रिनयन यविष्ठाय च नमः

नमः सर्वस्मै ते तदिदमितिसर्वाय च नमः ॥ 29 ॥

बहुल-रजसे विश्वोत्पत्तौ भवाय नमो नमः

प्रबल-तमसे तत् संहारे हराय नमो नमः ।

जन-सुखकृते सत्त्वोद्रिक्तौ मृडाय नमो नमः

प्रमहसि पदे निस्त्रैगुण्ये शिवाय नमो नमः ॥ 30 ॥

कृश-परिणति-चेतः क्लेशवश्यं क्व चेदं

क्व च तव गुण-सीमोल्लङ्घिनी शश्वदृद्धिः ।

इति चकितममन्दीकृत्य मां भक्तिराधाद्

वरद चरणयोस्ते वाक्य-पुष्पोपहारम् ॥ 31 ॥

असित-गिरि-समं स्यात् कज्जलं सिन्धु-पात्रे

सुर-तरुवर-शाखा लेखनी पत्रमुर्वी ।

लिखति यदि गृहीत्वा शारदा सर्वकालं

तदपि तव गुणानामीश पारं न याति ॥ 32 ॥

असुर-सुर-मुनीन्द्रैरर्चितस्येन्दु-मौलेः

ग्रथित-गुणमहिम्नो निर्गुणस्येश्वरस्य ।

सकल-गण-वरिष्ठः पुष्पदन्ताभिधानः

रुचिरमलघुवृत्तैः स्तोत्रमेतच्चकार ॥ 33 ॥

अहरहरनवद्यं धूर्जटेः स्तोत्रमेतत्

पठति परमभक्त्या शुद्ध-चित्तः पुमान् यः ।

स भवति शिवलोके रुद्रतुल्यस्तथाऽत्र

प्रचुरतर-धनायुः पुत्रवान् कीर्तिमांश्च ॥ 34 ॥

महेशान्नापरो देवो महिम्नो नापरा स्तुतिः ।

अघोरान्नापरो मन्त्रो नास्ति तत्त्वं गुरोः परम् ॥ 35 ॥

दीक्षा दानं तपस्तीर्थं ज्ञानं यागादिकाः क्रियाः ।

महिम्नस्तव पाठस्य कलां नार्हन्ति षोडशीम् ॥ 36 ॥

कुसुमदशन-नामा सर्व-गन्धर्व-राजः

शशिधरवर-मौलेर्देवदेवस्य दासः ।

स खलु निज-महिम्नो भ्रष्ट एवास्य रोषात्

स्तवनमिदमकार्षीद् दिव्य-दिव्यं महिम्नः ॥ 37 ॥

सुरगुरुमभिपूज्य स्वर्ग-मोक्षैक-हेतुं [सुरवरमुनिपूज्यं]

पठति यदि मनुष्यः प्राञ्जलिर्नान्य-चेताः ।

व्रजति शिव-समीपं किन्नरैः स्तूयमानः

स्तवनमिदममोघं पुष्पदन्तप्रणीतम् ॥ 38 ॥

श्री पुष्पदन्त-मुख-पङ्कज-निर्गतेन

स्तोत्रेण किल्बिष-हरेण हर-प्रियेण ।

कण्ठस्थितेन पठितेन समाहितेन

सुप्रीणितो भवति भूतपतिर्महेशः ॥ 43 ॥

आसमाप्तमिदं स्तोत्रं पुण्यं गन्धर्व-भाषितम् ।

अनौपम्यं मनोहारि सर्वमीश्वरवर्णनम् ॥ 39 ॥

तव तत्त्वं न जानामि कीदृशोऽसि महेश्वर ।

यादृशोऽसि महादेव तादृशाय नमो नमः ॥ 41 ॥

एककालं द्विकालं वा त्रिकालं यः पठेन्नरः ।

सर्वपाप-विनिर्मुक्तः शिव लोके महीयते ॥ 42 ॥

इत्येषा वाङ्मयी पूजा श्रीमच्छङ्कर-पादयोः ।

अर्पिता तेन देवेशः प्रीयतां मे सदाशिवः ॥ 40 ॥

॥ इति श्री पुष्पदन्त विरचितं शिवमहिम्न-स्तोत्रं समाप्तम् ॥