1.7 - Rajasuyanubrahmanam - Krishna Yajurveda Taittiriya Brahmana Pathah - Etad Brahmananyeva — Sinhala Script

කෘෂ්ණ යජුර්වේදීය තෛත්තිරීය බ්රාහ්මණේ ප්රථමාෂ්ටකේ සප්තමඃ ප්රපාඨකඃ - රාජසූයානුබ්රාහ්මණං

ඕ-න්නමඃ පරමාත්මනේ, ශ්රී මහාගණපතයේ නමඃ,

ශ්රී ගුරුභ්යෝ නමඃ . හ॒රිඃ॒ ඕම් ..

අනුවාකං 1 - ශුනාසීරීයේන්ද්රතුරීයපඤ්චාවත්තීයාපාමාර්ගහෝමාඃ

ඒ॒ත-ද්බ්රා᳚හ්මණාන්යේ॒ව පඤ්ච॑ හ॒වීග්ංෂි॑ . අථේන්ද්රා॑ය॒ ශුනා॒සීරා॑ය පුරෝ॒ඩාශ॒-න්ද්වාද॑ශකපාල॒-න්නිර්ව॑පති . සං॒වँ॒ථ්ස॒රෝ වා ඉන්ද්රා॒ ශුනා॒සීරඃ॑ . සං॒වँ॒ථ්ස॒රේණෛ॒වාස්මා॒ අන්න॒මව॑ රුන්ධේ . වා॒ය॒ව්ය॑-ම්පයෝ॑ භවති . වා॒යුර්වෛ වෘෂ්ට්යෛ᳚ ප්රදාපයි॒තා . ස ඒ॒වාස්මෛ॒ වෘෂ්ටි॒-ම්ප්රදා॑පයති . සෞ॒ර්ය॑ ඒක॑කපාලෝ භවති . සූර්යේ॑ණ॒ වා අ॒මුෂ්මි॑ँල්ලෝ॒කේ වෘෂ්ටි॑ර්ධෘ॒තා . ස ඒ॒වාස්මෛ॒ වෘෂ්ටි॒-න්නි ය॑ච්ඡති .. 1 ..

ද්වා॒ද॒ශ॒ග॒වග්ං සීර॒-න්දක්ෂි॑ණා॒ සමෘ॑ද්ධ්යෛ . දේ॒වා॒සු॒රා-ස්සංයँ॑ත්තා ආසන්න් . තේ දේ॒වා අ॒ග්නිම॑බ්රුවන්න් . ත්වයා॑ වී॒රේණාසු॑රාන॒-භිභ॑වා॒මේති॑ . සෝ᳚-(අ)බ්රවීත් . ත්රේ॒ධා-(අ)හමා॒ත්මානං॒-විँක॑රිෂ්ය॒ ඉති॑ . ස ත්රේ॒ධා (අ)(අ)ත්මානං॒-ව්යँ॑කුරුත . අ॒ග්නි-න්තෘතී॑යම් . රු॒ද්ර-න්තෘතී॑යම් . වරු॑ණ॒-න්තෘතී॑යම් .. 2 ..

සෝ᳚-(අ)බ්රවීත් . ක ඉ॒ද-න්තු॒රීය॒මිති॑ . අ॒හමිතීන්ද්රෝ᳚-(අ)බ්රවීත් .

ස-න්තු සෘ॑ජාවහා॒ ඉති॑ . තෞ සම॑සෘජේතාම් . ස ඉන්ද්ර॑ස්තු॒රීය॑-මභවත් . යදින්ද්ර॑-ස්තු॒රීය॒-මභ॑වත් . තදි॑න්ද්ර-තුරී॒යස්යේ᳚න්ද්ර-තුරීය॒ත්වම් . තතෝ॒ වෛ දේ॒වා ව්ය॑ජයන්ත . යදි॑න්ද්රතුරී॒ය-න්නි॑රු॒ප්යතේ॒ විජි॑ත්යෛ .. 3 ..

ව॒හිනී॑ ධේ॒නු-ර්දක්ෂි॑ණා . ය-ද්ව॒හිනී᳚ . තේනා᳚ග්නේ॒යී .

ය-ද්ගෞඃ . තේන॑ රෞ॒ද්රී . ය-ද්ධේ॒නුඃ . තේනෛ॒න්ද්රී . යථ්ස්ත්රී ස॒තී දා॒න්තා . තේන॑ වාරු॒ණී සමෘ॑ද්ධ්යෛ . ප්ර॒ජාප॑ති-ර්ය॒ජ්ඤම॑සෘජත .. 4 ..

තග්ං සෘ॒ෂ්ටග්ං රක්ෂාග්॑ස්යජිඝාග්ංසන්න් . ස ඒ॒තාඃ ප්ර॒ජාප॑ති-රා॒ත්මනෝ॑ දේ॒වතා॒ නිර॑මිමීත . තාභි॒ර්වෛ ස දි॒ග්භ්යෝ රක්ෂාග්ං॑සි॒ ප්රාණු॑දත . ය-ත්ප॑ඤ්චාව॒ත්තීය॑-ඤ්ජු॒හෝති॑ . දි॒ග්භ්ය ඒ॒ව ත-ද්යජ॑මානෝ॒ රක්ෂාග්ං॑සි॒ ප්රණු॑දතේ . සමූ॑ඪ॒ග්ං॒ රක්ෂ॒-ස්සන්ද॑ග්ධ॒ග්ං॒ රක්ෂ॒ ඉත්යා॑හ . රක්ෂාග්॑ස්යේ॒ව සන්ද॑හති . අ॒ග්නයේ॑ රක්ෂෝ॒ඝ්නේ ස්වාහේත්යා॑හ . දේ॒වතා᳚භ්ය ඒ॒ව වි॑ජිග්යා॒නාභ්යෝ॑ භාග॒ධේය॑-ඞ්කරෝති . ප්ර॒ෂ්ටි॒වා॒හී රථෝ॒ දක්ෂි॑ණා॒ සමෘ॑ද්ධ්යෛ .. 5 ..

ඉන්ද්රෝ॑ වෘ॒ත්රග්ං හ॒ත්වා . අසු॑රා-න්පරා॒භාව්ය॑ . නමු॑චිමාසු॒ර-න්නාල॑භත . තග්ං ශ॒ච්යා॑-(අ)ගෘහ්ණාත් . තෞ සම॑ලභේතාම් . සෝ᳚-(අ)ස්මා-ද॒භිශු॑නතරෝ-(අ)භවත් . සෝ᳚-(අ)බ්රවීත් . ස॒ධාංග්ං සන්ද॑ධාවහෛ . අථ॒ ත්වා-(අ)ව॑ ස්රක්ෂ්යාමි . න මා॒ ශුෂ්කේ॑ණ॒ නාර්ද්රේණ॑ හනඃ .. 6 ..

න දිවා॒ න නක්ත॒මිති॑ . ස ඒ॒තම॒පා-ම්ඵේන॑මසිඤ්චත් . න වා ඒ॒ෂ ශුෂ්කෝ॒ නාර්ද්රෝ ව්යු॑ෂ්ටා (අ)(අ)සීත් . අනු॑දිත॒-ස්සූර්යඃ॑ . න වා ඒ॒ත-ද්දිවා॒ න නක්ත᳚ම් . තස්යෛ॒තස්මි॑න් ँලෝ॒කේ . අ॒පා-ම්ඵේනේ॑න॒ ශිර॒ උද॑වර්තයත් . තදේ॑න॒මන්ව॑වර්තත . මිත්ර॑ද්රු॒ගිති॑ .. 7 ..

ස ඒ॒තාන॑පාමා॒ර්ගාන॑ජනයත් . තාන॑ජුහෝත් . තෛර්වෛ ස රක්ෂා॒ග්॒ස්යපා॑හත . යද॑පාමාර්ග හෝ॒මෝ භව॑ති . රක්ෂ॑සා॒-මප॑හත්යෛ . ඒ॒කෝ॒ල් මු॒කේන॑ යන්ති . තද්ධි රක්ෂ॑සා-ම්භාග॒ධේය᳚ම් . ඉ॒මා-න්දිශං॑-යँන්ති . ඒ॒ෂා වෛ රක්ෂ॑සා॒-න්දික් . ස්වායා॑මේ॒ව දි॒ශි රක්ෂාග්ං॑සි හන්ති .. 8 ..

ස්වකෘ॑ත॒ ඉරි॑ණේ ජුහෝති ප්රද॒රේ වා᳚ . ඒ॒ත-ද්වෛ රක්ෂ॑සාමා॒යත॑නම් . ස්ව ඒ॒වායත॑නේ॒ රක්ෂාග්ං॑සි හන්ති . ප॒ර්ණ॒මයේ॑න ස්රු॒වේණ॑ ජුහෝති . බ්රහ්ම॒ වෛ ප॒ර්ණඃ . බ්රහ්ම॑ණෛ॒ව රක්ෂාග්ං॑සි හන්ති . දේ॒වස්ය॑ ත්වා සවි॒තුඃ ප්ර॑ස॒ව ඉත්යා॑හ . ස॒වි॒තෘප්ර॑සූත ඒ॒ව රක්ෂාග්ං॑සි හන්ති . හ॒තග්ං රක්ෂෝ (අ)ව॑ධිෂ්ම॒ රක්ෂ॒ ඉත්යා॑හ . රක්ෂ॑සා॒ග්॒ ස්තෘත්යෛ᳚ . යද්වස්තේ॒ ත-ද්දක්ෂි॑ණා නි॒රව॑ත්ත්යෛ . අප්ර॑තීක්ෂ॒මා ය॑න්ති . රක්ෂ॑සා-ම॒න්තර්හි॑ත්යෛ .. 9 ..

(ය॒ච්ඡ॒ති॒ - වරු॑ණ॒-න්තෘතී॑යං॒ - ँවිජි॑ත්යා - අසෘජත॒ - සමෘ॑ද්ධ්යෛ - හනෝ॒ - මිත්ර॑ද්රු॒ගිති॑ - හන්ති॒ - ස්තෘත්යෛ॒ ත්රීණි॑ ච) (අ. 1)

අනුවාකං 2 - දේවිකාවහවීංෂි

ධා॒ත්රේ පු॑රෝ॒ඩාශ॒-න්ද්වාද॑ශකපාල॒-න්නිර්ව॑පති . සං॒වँ॒ථ්ස॒රෝ වෛ ධා॒තා . සං॒වँ॒ථ්ස॒රේණෛ॒වාස්මෛ᳚ ප්ර॒ජාඃ ප්රජ॑නයති . අන්වේ॒වාස්මා॒ අනු॑මතිර්මන්යතේ . රා॒තේ රා॒කා . ප්ර සි॑නීවා॒ලී ජ॑නයති . ප්ර॒ජාස්වේ॒ව ප්රජා॑තාසු කු॒හ්වා॑ වාච॑-න්දධාති . මි॒ථු॒නෞ ගාවෞ॒ දක්ෂි॑ණා॒ සමෘ॑ද්ධ්යෛ . ආ॒ග්නා॒වෛ॒ෂ්ණ॒ව-මේකා॑දශකපාල॒-න්නිර්ව॑පති . ඓ॒න්ද්රා॒වෛ॒ෂ්ණ॒ව-මේකා॑දශකපාලම් .. 10 ..

වෛ॒ෂ්ණ॒ව-න්ත්රි॑කපා॒ලම් . වී॒ර්යං॑-වාँ අ॒ග්නිඃ . වී॒ර්ය॑මින්ද්රඃ॑ . වී॒ර්යං॑-විँෂ්ණුඃ॑ . ප්ර॒ජා ඒ॒ව ප්රජා॑තා වී॒ර්යේ᳚ ප්රති॑ෂ්ඨාපයති . තස්මා᳚-ත්ප්ර॒ජා වී॒ර්යා॑වතීඃ . වා॒ම॒න ඍ॑ෂ॒භෝ ව॒හී දක්ෂි॑ණා . යද්ව॒හී . තේනා᳚ග්නේ॒යඃ . යදෘ॑ෂ॒භඃ .. 11 ..

තේනෛ॒න්ද්රඃ . යද්වා॑ම॒නඃ . තේන॑ වෛෂ්ණ॒ව-ස්සමෘ॑ද්ධ්යෛ . අ॒ග්නී॒ෂෝ॒මීය॒-මේකා॑දශකපාල॒-න්නිර්ව॑පති . ඉ॒න්ද්රා॒සෝ॒මීය॒-මේකා॑දශකපාලම් . සෞ॒ම්ය-ඤ්ච॒රුම් . සෝමෝ॒ වෛ රේ॑තෝ॒ධාඃ . අ॒ග්නිඃ ප්ර॒ජානා᳚-ම්ප්රජනයි॒තා . වෘ॒ද්ධානා॒මින්ද්රඃ॑ ප්රදාපයි॒තා . සෝම॑ ඒ॒වාස්මෛ॒ රේතෝ॒ දධා॑ති .. 12 ..

අ॒ග්නිඃ ප්ර॒ජා-ම්ප්රජ॑නයති . වෘ॒ද්ධාමින්ද්රඃ॒ ප්රය॑ච්ඡති . බ॒භ්රු-ර්දක්ෂි॑ණා॒ සමෘ॑ද්ධ්යෛ . සෝ॒මා॒පෞ॒ෂ්ණ-ඤ්ච॒රු-න්නිර්ව॑පති . ඓ॒න්ද්රා॒පෞ॒ෂ්ණ-ඤ්ච॒රුම් . සෝමෝ॒ වෛ රේ॑තෝ॒ධාඃ . පූ॒ෂා ප॑ශූ॒නා-ම්ප්ර॑ජනයි॒තා . වෘ॒ද්ධානා॒මින්ද්රඃ॑ ප්රදාපයි॒තා . සෝම॑ ඒ॒වාස්මෛ॒ රේතෝ॒ දධා॑ති . පූ॒ෂා ප॒ශූ-න්ප්රජ॑නයති .. 13 ..

වෘ॒ද්ධානින්ද්රඃ॒ ප්රය॑ච්ඡති . පෞ॒ෂ්ණශ්ච॒රු-ර්භ॑වති . ඉ॒යං-වෛँ පූ॒ෂා . අ॒ස්යාමේ॒ව ප්රති॑ තිෂ්ඨති . ශ්යා॒මෝ දක්ෂි॑ණා॒ සමෘ॑ද්ධ්යෛ . බ॒හු වෛ පුරු॑ෂෝ-(අ)මේ॒ද්ධ්ය-මුප॑ගච්ඡති . වෛ॒ශ්වා॒න॒ර-න්ද්වාද॑ශකපාල॒-න්නිර්ව॑පති . සං॒වँ॒ථ්ස॒රෝ වා අ॒ග්නි-ර්වෛ᳚ශ්වාන॒රඃ . සං॒වँ॒ථ්ස॒රේණෛ॒වෛනග්ග්॑ ස්වදයති . හිර॑ණ්ය॒-න්දක්ෂි॑ණා .. 14 ..

ප॒විත්රං॒-වෛँ හිර॑ණ්යම් . පු॒නාත්යේ॒වෛන᳚ම් . බ॒හු වෛ රා॑ජ॒න්යෝ (අ)නෘ॑ත-ඞ්කරෝති . උප॑ ජා॒ම්යෛ හර॑තේ . ජි॒නාති॑ බ්රාහ්ම॒ණම් . වද॒ත්යනෘ॑තම් . අනෘ॑තේ॒ ඛලු॒ වෛ ක්රි॒යමා॑ණේ॒ වරු॑ණෝ ගෘහ්ණාති . වා॒රු॒ණං-යँ॑ව॒මය॑-ඤ්ච॒රු-න්නිර්ව॑පති . ව॒රු॒ණ॒පා॒ශාදේ॒වෛන॑-ම්මුඤ්චති . අශ්වෝ॒ දක්ෂි॑ණා . වා॒රු॒ණෝ හි දේ॒වත॒යා-(අ)ශ්ව॒-ස්සමෘ॑ද්ධ්යෛ .. 15 ..

(ඓ॒න්ද්රා॒වෛ॒ෂ්ණා॒වමේකා॑දශකපාලං॒-ँයදෘ॑ෂ॒භෝ- දධා॑ති-පූ॒ෂා ප॒ශූ-න්ප්රජ॑නයති॒-හිර॑ණ්යං॒ දක්ෂි॑ණා॒-දක්ෂි॒ණෛකං॑ ච) (අ. 2)

අනුවාකං 3 - රත්නිනාං හවීංෂි

ර॒ත්නිනා॑මේ॒තානි॑ හ॒වීග්ංෂි॑ භවන්ති . ඒ॒තේ වෛ රා॒ෂ්ට්රස්ය॑ ප්රදා॒තාරඃ॑ . ඒ॒තේ॑-(අ)පාදා॒තාරඃ॑ . ය ඒ॒ව රා॒ෂ්ට්රස්ය॑ ප්රදා॒තාරඃ॑ . යේ॑-(අ)පාදා॒තාරඃ॑ . ත ඒ॒වාස්මෛ॑ රා॒ෂ්ට්ර-ම්ප්රය॑ච්ඡන්ති . රා॒ෂ්ට්රමේ॒ව භ॑වති . ය-ථ්ස॑මා॒හෘත්ය॑ නි॒ර්වපේ᳚ත් . අර॑ත්නින-ස්ස්යුඃ . ය॒ථා॒ය॒ථ-න්නිර්ව॑පති රත්නි॒ත්වාය॑ .. 16 ..

ය-ථ්ස॒ද්යෝ නි॒ර්වපේ᳚ත් . යාව॑තී॒මේකේ॑න හ॒විෂා॒-(අ)(අ)ශිෂ॑මව රු॒න්ධේ . තාව॑තී॒මව॑ රුන්ධීත . අ॒න්ව॒හ-න්නිර්ව॑පති . භූය॑සීමේ॒වාශිෂ॒මව॑ රුන්ධේ . භූය॑සෝ යජ්ඤක්ර॒තූනුපෛ॑ති . බා॒ර්॒හ॒ස්ප॒ත්ය-ඤ්ච॒රු-න්නිර්ව॑පති බ්ර॒හ්මණෝ॑ ගෘ॒හේ . මු॒ඛ॒ත ඒ॒වාස්මෛ॒ බ්රහ්ම॒ සග්ග්ශ්ය॑ති . අථෝ॒ බ්රහ්ම॑න්නේ॒ව ක්ෂ॒ත්ර-ම॒න්වාර॑ම්භයති . ශි॒ති॒පෘ॒ෂ්ඨෝ දක්ෂි॑ණා॒ සමෘ॑ද්ධ්යෛ .. 17 ..

ඓ॒න්ද්ර-මේකා॑දශකපාලග්ං රාජ॒න්ය॑ස්ය ගෘ॒හේ . ඉ॒න්ද්රි॒යමේ॒වාව॑ රුන්ධේ . ඍ॒ෂ॒භෝ දක්ෂි॑ණා॒ සමෘ॑ද්ධ්යෛ . ආ॒දි॒ත්ය-ඤ්ච॒රු-ම්මහි॑ෂ්යෛ ගෘ॒හේ . ඉ॒යං-වාँ අදි॑තිඃ . අ॒ස්යාමේ॒ව ප්රති॑තිෂ්ඨති . ධේ॒නු-ර්දක්ෂි॑ණා॒ සමෘ॑ද්ධ්යෛ . භගා॑ය ච॒රුං-වාँ॒වාතා॑යෛ ගෘ॒හේ . භග॑මේ॒වාස්මි॑-න්දධාති . විචි॑ත්තගර්භා පෂ්ඨෞ॒හී දක්ෂි॑ණා॒ සමෘ॑ද්ධ්යෛ .. 18 ..

නෛ॒ර්॒ඍ॒ත-ඤ්ච॒රු-ම්ප॑රිවෘ॒ක්ත්යෛ॑ ගෘ॒හේ කෘ॒ෂ්ණානාං᳚-ව්රීँහී॒ණා-න්න॒ඛනි॑ර්භින්නම් . පා॒ප්මාන॑මේ॒ව නිර්-ඍ॑ති-න්නි॒රව॑දයතේ . කෘ॒ෂ්ණා කූ॒ටා දක්ෂි॑ණා॒ සමෘ॑ද්ධ්යෛ . ආ॒ග්නේ॒ය-ම॒ෂ්ටාක॑පාලග්ං සේනා॒න්යෝ॑ ගෘ॒හේ . සේනා॑මේ॒වාස්ය॒ සග්ග්ශ්ය॑ති . හිර॑ණ්ය॒-න්දක්ෂි॑ණා॒ සමෘ॑ද්ධ්යෛ . වා॒රු॒ණ-න්දශ॑කපාලග්ං සූ॒තස්ය॑ ගෘ॒හේ . ව॒රු॒ණ॒ස॒වමේ॒වාව॑-රුන්ධේ . ම॒හානි॑රෂ්ටෝ॒ දක්ෂි॑ණා॒ සමෘ॑ද්ධ්යෛ . මා॒රු॒තග්ං ස॒ප්තක॑පාල-ඞ්ග්රාම॒ණ්යෝ॑ ගෘ॒හේ .. 19 ..

අන්නං॒-වෛँ ම॒රුතඃ॑ . අන්න॑මේ॒වාව॑-රුන්ධේ . පෘශ්ඤි॒-ර්දක්ෂි॑ණා॒ සමෘ॑ද්ධ්යෛ . සා॒වි॒ත්ර-න්ද්වාද॑ශකපාල-ඞ්ක්ෂ॒ත්තුර්ගෘ॒හේ ප්රසූ᳚ත්යෛ . උ॒ප॒ද්ධ්ව॒ස්තෝ දක්ෂි॑ණා॒ සමෘ॑ද්ධ්යෛ . ආ॒ශ්වි॒න-න්ද්වි॑කපා॒ලග්ං ස॑ග්රංහී॒තුර්ගෘ॒හේ . අ॒ශ්විනෞ॒ වෛ දේ॒වානා᳚-ම්භි॒ෂජෞ᳚ . තාභ්යා॑මේ॒වාස්මෛ॑ භේෂ॒ජ-ඞ්ක॑රෝති . ස॒වා॒ත්යෞ॑ දක්ෂි॑ණා॒ සමෘ॑ද්ධ්යෛ . පෞ॒ෂ්ණ-ඤ්ච॒රු-ම්භා॑ගදු॒ඝස්ය॑ ගෘ॒හේ .. 20 ..

අන්නං॒-වෛँ පූ॒ෂා . අන්න॑මේ॒වාව॑ රුන්ධේ . ශ්යා॒මෝ දක්ෂි॑ණා॒ සමෘ॑ද්ධ්යෛ . රෞ॒ද්ර-ඞ්ගා॑වීධු॒ක-ඤ්ච॒රුම॑ක්ෂාවා॒පස්ය॑ ගෘ॒හේ . අ॒න්ත॒ත ඒ॒ව රු॒ද්ර-න්නි॒රව॑දයතේ . ශ॒බල॒ උද්වා॑රෝ॒ දක්ෂි॑ණා॒ සමෘ॑ද්ධ්යෛ . ද්වාද॑ශෛ॒තානි॑ හ॒වීග්ංෂි॑ භවන්ති . ද්වාද॑ශ॒ මාසා᳚-ස්සංවँථ්ස॒රඃ . සං॒වँ॒ථ්ස॒රේණෛ॒වාස්මෛ॑ රා॒ෂ්ට්රමව॑-රුන්ධේ . රා॒ෂ්ට්රමේ॒ව භ॑වති .. 21 ..

යන්න ප්ර॑ති නි॒ර්වපේ᳚ත් . ර॒ත්නින॑ ආ॒ශිෂෝ-(අ)ව॑රුන්ධීරන්න් . ප්රති॒ නිර්ව॑පති . ඉන්ද්රා॑ය සු॒ත්රාම්ණේ॑ පුරෝ॒ඩාශ॒-මේකා॑දශකපාලම් . ඉන්ද්රා॑යාග්ංහෝ॒මුචේ᳚ . ආ॒ශිෂ॑ ඒ॒වාව॑රුන්ධේ . අ॒ය-න්නෝ॒ රාජා॑ වෘත්ර॒හා රාජා॑ භූ॒ත්වා වෘ॒ත්රං-වँ॑ද්ධ්යා॒දිත්යා॑හ . ආ॒ශිෂ॑මේ॒වෛතාමාශා᳚ස්තේ . මෛ॒ත්රා॒-බා॒ර්॒හ॒ස්ප॒ත්ය-ම්භ॑වති . ශ්වේ॒තායෛ᳚ ශ්වේ॒තව॑ථ්සායෛ දු॒ග්ධේ .. 22 ..

බා॒ර්॒හ॒ස්ප॒ත්යේ මෛ॒ත්රමපි॑ දධාති . බ්රහ්ම॑ චෛ॒වාස්මෛ᳚ ක්ෂ॒ත්ර-ඤ්ච॑ ස॒මීචී॑ දධාති . අථෝ॒ බ්රහ්ම॑න්නේ॒ව ක්ෂ॒ත්ර-ම්ප්රති॑ෂ්ඨාපයති . බා॒ර්॒හ॒ස්ප॒ත්යේන॒ පූර්වේ॑ණ॒ ප්රච॑රති . මු॒ඛ॒ත ඒ॒වාස්මෛ॒ බ්රහ්ම॒ සග්ග්ශ්ය॑ති . අථෝ॒ බ්රහ්ම॑න්නේ॒ව ක්ෂ॒ත්ර-ම॒න්වාර॑ම්භයති . ස්ව॒ය॒-ඞ්කෘ॒තා වේදි॑ර්භවති . ස්ව॒ය॒දි॒න්න-ම්බ॒ර්॒හිඃ . ස්ව॒ය॒කෘ॒න්ත ඉ॒ද්ධ්මඃ . අන॑භිජිතස්යා॒-භිජි॑ත්යෛ . තස්මා॒-ද්රාජ්ඤා॒මර॑ණ්ය-ම॒භිජි॑තම් . සෛව ශ්වේ॒තා ශ්වේ॒තව॑ථ්සා॒ දක්ෂි॑ණා॒ සමෘ॑ද්ධ්යෛ .. 23 ..

(ර॒ත්නි॒ත්වාය॒ - සමෘ॑ද්ධ්යෛ - පෂ්ඨෞ॒හි දක්ෂි॑ණා॒ සමෘ॑ද්ධ්යෛ - ග්රාම॒ණ්යෝ॑ ගෘ॒හේ - භා॑ගදු॒ඝස්ය॑ ගෘ॒හේ-භ॑වති - දු॒ග්ධේ॑ - (අ)භිජි॑ත්යෛ॒ ද්වේ ච॑) (අ. 3)

අනුවාකං 4 - දේවසුවාං හවීංෂි

දේ॒ව॒සු॒වාමේ॒තානි॑ හ॒වීග්ංෂි॑ භවන්ති . ඒ॒තාව॑න්තෝ॒ වෛ දේ॒වානාග්ං॑ ස॒වාඃ . ත ඒ॒වාස්මෛ॑ ස॒වා-න්ප්රය॑ච්ඡන්ති . ත ඒ॑නග්ං සුවන්තේ . අ॒ග්නිරේ॒වෛන॑-ඞ්ගෘ॒හප॑තීනාග්ං සුවතේ . සෝමෝ॒ වන॒ස්පතී॑නාම් . රු॒ද්රඃ ප॑ශූ॒නාම් . බෘහ॒ස්පති॑-ර්වා॒චාම් . ඉන්ද්රෝ᳚ ජ්යේ॒ෂ්ඨානා᳚ම් . මි॒ත්ර-ස්ස॒ත්යානා᳚ම් .. 24 ..

වරු॑ණෝ॒ ධර්ම॑පතීනාම් . ඒ॒තදේ॒ව සර්ව॑-ම්භවති . ස॒වි॒තා ත්වා᳚ ප්රස॒වානාග්ං॑ සුවතා॒මිති॒ හස්ත॑-ඞ්ගෘහ්ණාති॒ ප්රසූ᳚ත්යෛ . යේ දේ॑වා දේව॒සුව॒-ස්ස්ථේත්යා॑හ . ය॒ථා॒ ය॒ජුරේ॒වෛ තත් . ම॒හ॒තේ ක්ෂ॒ත්රාය॑ මහ॒ත ආධි॑පත්යාය මහ॒තේ ජාන॑රාජ්යා॒යේත්යා॑හ . ආ॒ශිෂ॑මේ॒වෛතාමාශා᳚ස්තේ . ඒ॒ෂ වෝ॑ භරතා॒ රාජා॒ සෝමෝ॒-(අ)ස්මාක॑-ම්බ්රාහ්ම॒ණානා॒ග්ං॒ රාජේත්යා॑හ . තස්මා॒-ථ්සෝම॑රාජානෝ බ්රාහ්ම॒ණාඃ . ප්රති॒ ත්යන්නාම॑ රා॒ජ්යම॑ධා॒යීත්යා॑හ .. 25 ..

රා॒ජ්යමේ॒වාස්මි॒-න්ප්රති॑ දධාති . ස්වා-න්ත॒නුවං॒-වँරු॑ණෝ අශිශ්රේ॒දිත්යා॑හ . ව॒රු॒ණ॒ස॒වමේ॒වා-ව॑රුන්ධේ . ශුචේ᳚ර්මි॒ත්රස්ය॒ ව්රත්යා॑ අභූ॒මේත්යා॑හ . ශුචි॑මේ॒වෛනං॒-ව්රँත්ය॑-ඞ්කරෝති . අම॑න්මහි මහ॒ත ඍ॒තස්ය॒ නාමේත්යා॑හ . ම॒නු॒ත ඒ॒වෛන᳚ම් . සර්වේ॒ ව්රාතා॒ වරු॑ණස්යා භූව॒න්නිත්යා॑හ . සර්ව॑ව්රාතමේ॒වෛන॑-ඞ්කරෝති . වි මි॒ත්ර ඒවෛ॒රරා॑ති-මතාරී॒දිත්යා॑හ .. 26 ..

අරා॑තිමේ॒වෛන॑-න්තාරයති . අසූ॑ෂුදන්ත ය॒ජ්ඤියා॑ ඍ॒තේනේත්යා॑හ . ස්ව॒දය॑ත්යේ॒වෛන᳚ම් . ව්යු॑ ත්රි॒තෝ ජ॑රි॒මාණ॑-න්න ආන॒ඩිත්යා॑හ . ආයු॑රේ॒වාස්මි॑-න්දධාති . ද්වාභ්යාං॒-විँමෘ॑ෂ්ටේ . ද්වි॒පා-ද්යජ॑මානඃ॒ ප්රති॑ෂ්ඨිත්යෛ . අ॒ග්නී॒ෂෝ॒මීය॑ස්ය॒ චෛකා॑දශකපාලස්ය දේවසු॒වා-ඤ්ච॑ හ॒විෂා॑ම॒ග්නයේ᳚ ස්විෂ්ට॒කෘතේ॑ ස॒මව॑ද්යති . දේ॒වතා॑භිරේ॒වෛන॑-මුභ॒යතඃ॒ පරි॑ගෘහ්ණාති . වි॒ෂ්ණු॒ක්ර॒මාන් ක්ර॑මතේ( ) . විෂ්ණු॑රේ॒ව භූ॒ත්වේමාँල්ලෝ॒කා-න॒භිජ॑යති .. 27 ..

(ස॒ත්යානා॑-මධා॒යීත්යා॑-හාතාරී॒දිත්යා॑හ-ක්රමත॒ ඒක॑-ඤ්ච) (අ. 4)

අනුවාකං 5 - අභිෂේකාර්ථමපාඞ්ග්රහග්රහණම්

අ॒ර්ථේත॒-ස්ස්ථේති॑ ජුහෝති . ආහු॑ත්යෛ॒වෛනා॑ නි॒ෂ්ක්රීය॑ ගෘහ්ණාති . අථෝ॑ හ॒විෂ්කෘ॑තානාමේ॒වාභිඝෘ॑තානා-ඞ්ගෘහ්ණාති . වහ॑න්තීනා-ඞ්ගෘහ්ණාති . ඒ॒තා වා අ॒පාග්ං රා॒ෂ්ට්රම් . රා॒ෂ්ට්රමේ॒වාස්මෛ॑ ගෘහ්ණාති . අථෝ॒ ශ්රිය॑මේ॒වෛන॑ම॒භි ව॑හන්ති . අ॒පා-ම්පති॑ර॒සීත්යා॑හ . මි॒ථු॒නමේ॒වාකඃ॑ . වෘෂා᳚-(අ)ස්යූ॒ර්මිරිත්යා॑හ .. 28 ..

ඌ॒ර්මි॒මන්ත॑මේ॒වෛන॑-ඞ්කරෝති . වෘ॒ෂ॒සේ॒නෝ॑-(අ)සීත්යා॑හ . සේනා॑මේ॒වාස්ය॒ සග්ග්ශ්ය॑ති . ව්ර॒ජ॒ක්ෂිත॒-ස්ස්ථේත්යා॑හ . ඒ॒තා වා අ॒පාං-විँශඃ॑ . විශ॑මේ॒වාස්මෛ॒ පර්යූ॑හති . ම॒රුතා॒මෝජ॒-ස්ස්ථේත්යා॑හ . අන්නං॒-වෛँ ම॒රුතඃ॑ . අන්න॑මේ॒වා ව॑රුන්ධේ . සූර්ය॑වර්චස॒-ස්ස්ථේත්යා॑හ .. 29 ..

රා॒ෂ්ට්රමේ॒ව ව॑ර්ච॒ස්ව්ය॑කඃ . සූර්ය॑ත්වචස॒-ස්ස්ථේත්යා॑හ . ස॒ත්යං-වාँ ඒ॒තත් . ය-ද්වර්ෂ॑ති . අනෘ॑තං॒-යँදා॒තප॑ති॒ වර්ෂ॑ති . ස॒ත්යා॒නෘ॒තේ ඒ॒වාව॑රුන්ධේ . නෛනග්ං॑ සත්යානෘ॒තේ උ॑දි॒තේ හිග්ග්॑ස්තඃ . ය ඒ॒වං-වේँද॑ . මාන්දා॒-ස්ස්ථේත්යා॑හ . රා॒ෂ්ට්රමේ॒ව බ්ර॑හ්මවර්ච॒ස්ය॑කඃ .. 30 ..

වාශා॒-ස්ස්ථේත්යා॑හ . රා॒ෂ්ට්රමේ॒ව ව॒ශ්ය॑කඃ . ශක්ව॑රී॒-ස්ස්ථේත්යා॑හ . ප॒ශවෝ॒ වෛ ශක්ව॑රීඃ . ප॒ශූනේ॒වාව॑ රුන්ධේ . වි॒ශ්ව॒භෘත॒-ස්ස්ථේත්යා॑හ . රා॒ෂ්ට්රමේ॒ව ප॑ය॒ස්ව්ය॑කඃ . ජ॒න॒භෘත॒-ස්ස්ථේත්යා॑හ . රා॒ෂ්ට්රමේ॒වේන්ද්රි॑යා॒ව්ය॑කඃ . අ॒ග්නේස්තේ॑ජ॒ස්යා᳚-ස්ස්ථේත්යා॑හ .. 31 ..

රා॒ෂ්ට්රමේ॒ව තේ॑ජ॒ස්ව්ය॑කඃ . අ॒පාමෝෂ॑ධීනා॒ග්ං॒ රස॒-ස්ස්ථේත්යා॑හ . රා॒ෂ්ට්රමේ॒ව ම॑ධ॒ව්ය॑මකඃ . සා॒ර॒ස්ව॒ත-ඞ්ග්රහ॑-ඞ්ගෘහ්ණාති . ඒ॒ෂා වා අ॒පා-ම්පෘ॒ෂ්ඨම් . යථ්සර॑ස්වතී . පෘ॒ෂ්ඨමේ॒වෛනග්ං॑ සමා॒නානා᳚-ඞ්කරෝති . ෂෝ॒ඩ॒ශභි॑-ර්ගෘහ්ණාති . ෂෝඩ॑ශකලෝ॒ වෛ පුරු॑ෂඃ . යාවා॑නේ॒ව පුරු॑ෂඃ . තස්මි॑න් වී॒ර්ය॑-න්දධාති . ෂෝ॒ඩ॒ශභි॑-ර්ජු॒හෝති॑ ෂෝඩ॒ශභි॑-ර්ගෘහ්ණාති . ද්වාත්රිග්ං॑ශ॒-ථ්සම්ප॑ද්යන්තේ . ද්වාත්රිග්ං॑ශදක්ෂරා (අ)නු॒ෂ්ටුක් . වාග॑නු॒ෂ්ටු-ඵ්සර්වා॑ණි॒ ඡන්දාග්ං॑සි . වා॒චෛවෛන॒ග්ං॒ සර්වේ॑භි॒-ශ්ඡන්දෝ॑භි-ර॒භිෂි॑ඤ්චති .. 32 ..

(ඌ॒ර්මිරිත්යා॑හ॒ - සූර්ය॑වර්චස॒-ස්ස්ථේත්යා॑හ - බ්රහ්මවර්ච॒ස්ය॑ක - ස්තේජ॒ස්යා᳚-ස්ස්ථේත්යා॑හෛ॒ව - පුරු॑ෂ॒-ෂ්ෂට්ච॑) (අ. 5)

අනුවාකං 6 - අභිෂේකාර්ථජලසංස්කාරඃ

දේවී॑රාප॒-ස්ස-ම්මධු॑මතී॒-ර්මධු॑මතීභි-ස්සෘජ්යද්ධ්ව॒මිත්යා॑හ . බ්රහ්ම॑ණෛ॒වෛනා॒-ස්සග්ං සෘ॑ජති . අනා॑ධෘෂ්ටා-ස්සීද॒තේත්යා॑හ . බ්රහ්ම॑ණෛ॒වෛනා᳚-ස්සාදයති . අ॒න්ත॒රා හෝතු॑ශ්ච॒ ධිෂ්ණි॑ය-ම්බ්රාහ්මණාච්ඡ॒ග්ං॒ සින॑ශ්ච සාදයති . ආ॒ග්නේ॒යෝ වෛ හෝතා᳚ . ඓ॒න්ද්රෝ බ්රා᳚හ්මණාච්ඡ॒ග්ං॒සී . තේජ॑සා චෛ॒වේන්ද්රි॒යේණ॑ චෝභ॒යතෝ॑ රා॒ෂ්ට්ර-ම්පරි॑ගෘහ්ණාති . හිර॑ණ්යේ॒නෝ-ත්පු॑නාති . ආහු॑ත්යෛ॒ හි ප॒විත්රා᳚භ්යාමුත්පු॒නන්ති॒ ව්යාවෘ॑ත්ත්යෛ .. 33 ..

ශ॒තමා॑න-ම්භවති . ශ॒තායුඃ॒ පුරු॑ෂ-ශ්ශ॒තේන්ද්රි॑යඃ . ආයු॑ෂ්යේ॒වේන්ද්රි॒යේ ප්රති॑තිෂ්ඨති . අනි॑භෘෂ්ටම॒සීත්යා॑හ . අනි॑භෘෂ්ට॒ග්ග්॒ හ්යේ॑තත් . වා॒චෝ බන්ධු॒රිත්යා॑හ . වා॒චෝ හ්යේ॑ෂ බන්ධුඃ॑ . ත॒පෝ॒ජා ඉත්යා॑හ . ත॒පෝ॒ජා හ්යේ॑තත් . සෝම॑ස්ය දා॒ත්රම॒සීත්යා॑හ .. 34 ..

සෝම॑ස්ය॒ හ්යේ॑තද්දා॒ත්රම් . ශු॒ක්රා වඃ॑ ශු॒ක්රේණෝත්පු॑නා॒මීත්යා॑හ . ශු॒ක්රා හ්යාපඃ॑ . ශු॒ක්රග්ං හිර॑ණ්යම් . ච॒න්ද්රාශ්ච॒න්ද්රේණේත්යා॑හ . ච॒න්ද්රා හ්යාපඃ॑ . ච॒න්ද්රග්ං හිර॑ණ්යම් . අ॒මෘතා॑ අ॒මෘතේ॒නේත්යා॑හ . අ॒මෘතා॒ හ්යාපඃ॑ . අ॒මෘත॒ග්ං॒ හිර॑ණ්යම් .. 35 ..

ස්වාහා॑ රාජ॒සූයා॒යේත්යා॑හ . රා॒ජ॒සූයා॑ය॒ හ්යේ॑නා උත්පු॒නාති॑ . ස॒ධ॒මාදෝ᳚ ද්යු॒ම්නිනී॒රූර්ජ॑ ඒ॒තා ඉති॑ වාරු॒ණ්යර්චා ගෘ॑හ්ණාති . ව॒රු॒ණ॒ස॒වමේ॒වා ව॑රුන්ධේ . ඒක॑යා ගෘහ්ණාති . ඒ॒ක॒ධෛව යජ॑මානේ වී॒ර්ය॑-න්දධාති . ක්ෂ॒ත්රස්යෝල්බ॑මසි ක්ෂ॒ත්රස්ය॒ යෝනි॑ර॒සීති॑ තා॒ර්ප්ය-ඤ්චෝ॒ෂ්ණීෂ॑-ඤ්ච॒ ප්රය॑ච්ඡති සයෝනි॒ත්වාය॑ . ඒක॑ශතේන දර්භපුඤ්ජී॒ලෛඃ ප॑වයති . ශ॒තායු॒ර්වෛ පුරු॑ෂ-ශ්ශ॒තවී᳚ර්යඃ . ආ॒ත්මෛක॑ශ॒තඃ .. 36 ..

යාවා॑නේ॒ව පුරු॑ෂඃ . තස්මි॑න් වී॒ර්ය॑-න්දධාති . දද්ධ්යා॑ශයති . ඉ॒න්ද්රි॒යමේ॒වා-ව॑රුන්ධේ . උ॒දු॒ම්බර॑-මාශයති . අ॒න්නාද්ය॒ස්යාව॑ රුද්ධ්යෛ . ශෂ්පා᳚ණ්යාශයති . සුරා॑බලි-මේ॒වෛන॑-ඞ්කරෝති . ආ॒විද॑ ඒ॒තා භ॑වන්ති . ආ॒විද॑මේ॒වෛන॑-ඞ්ගමයන්ති .. 37 ..

අ॒ග්නිරේ॒වෛන॒-ඞ්ගාර්හ॑පත්යේනාවති . ඉන්ද්ර॑ ඉන්ද්රි॒යේණ॑ . පූ॒ෂා ප॒ශුභිඃ॑ . මි॒ත්රාවරු॑ණෞ ප්රාණාපා॒නාභ්යා᳚ම් . ඉන්ද්රෝ॑ වෘ॒ත්රාය॒ වජ්ර॒මුද॑යච්ඡත් . ස දිව॑මලිඛත් . සෝ᳚-(අ)ර්ය॒ම්ණඃ පන්ථා॑ අභවත් . ස ආවි॑න්නේ॒ ද්යාවා॑පෘථි॒වී ධෘ॒තව්ර॑තේ॒ ඉති॒ ද්යාවා॑පෘථි॒වී උපා॑ධාවත් . ස ආ॒භ්යාමේ॒ව ප්රසූ॑ත॒ ඉන්ද්රෝ॑ වෘ॒ත්රාය॒ වජ්ර॒-ම්ප්රාහ॑රත් . ආවි॑න්නේ॒ ද්යාවා॑පෘථි॒වී ධෘ॒තව්ර॑තේ॒ ඉති॒ යදාහ॑ .. 38 ..

ආ॒භ්යාමේ॒ව ප්රසූ॑තෝ॒ යජ॑මානෝ॒ වජ්ර॒-ම්භ්රාතෘ॑ව්යාය॒ ප්රහ॑රති . ආවි॑න්නා දේ॒ව්යදි॑ති-ර්විශ්වරූ॒පීත්යා॑හ . ඉ॒යං-වෛँ දේ॒ව්යදි॑ති-ර්විශ්වරූ॒පී . අ॒ස්යාමේ॒ව ප්රති॑ තිෂ්ඨති . ආවි॑න්නෝ॒-(අ)යම॒සාවා॑මුෂ්යාය॒ණෝ᳚-(අ)ස්යාං-විँ॒ශ්ය॑ස්මි-න්රා॒ෂ්ට්ර ඉත්යා॑හ . වි॒ශෛවෛනග්ං॑ රා॒ෂ්ට්රේණ॒ සම॑ර්ධයති . ම॒හ॒තේ ක්ෂ॒ත්රාය॑ මහ॒ත ආධි॑පත්යාය මහ॒තේ ජාන॑රාජ්යා॒යේත්යා॑හ . ආ॒ශිෂ॑මේ॒වෛතාමාශා᳚ස්තේ . ඒ॒ෂ වෝ॑ භරතා॒ රාජා॒ සෝමෝ॒-(අ)ස්මාක॑-ම්බ්රාහ්ම॒ණානා॒ග්ං॒ රාජේත්යා॑හ . තස්මා॒-ථ්සෝම॑රාජානෝ බ්රාහ්ම॒ණාඃ .. 39 ..

ඉන්ද්ර॑ස්ය॒ වජ්රෝ॑-(අ)සි॒ වාර්ත්ර॑ඝ්න॒ ඉති॒ ධනුඃ॒ ප්රය॑ච්ඡති॒ විජි॑ත්යෛ . ශ॒ත්රු॒බාධ॑නා॒-ස්ස්ථේතීෂූන්॑ . ශත්රූ॑නේ॒වාස්ය॑ බාධන්තේ . පා॒ත මා᳚ ප්ර॒ත්යඤ්ච॑-ම්පා॒ත මා॑ ති॒ර්යඤ්ච॑ම॒න්වඤ්ච॑-ම්මා පා॒තේත්යා॑හ . ති॒ස්රෝ වෛ ශ॑ර॒ව්යාඃ᳚ . ප්ර॒තීචී॑ ති॒රශ්ච්ය॒නූචී᳚ . තාභ්ය॑ ඒ॒වෛන॑-ම්පාන්ති . දි॒ග්භ්යෝ මා॑ පා॒තේත්යා॑හ . දි॒ග්භ්ය ඒ॒වෛන॑-ම්පාන්ති . විශ්වා᳚භ්යෝ මා නා॒ෂ්ට්රාභ්යඃ॑ පා॒තේත්යා॑හ . අප॑රිමිතාදේ॒වෛන॑-ම්පාන්ති . හිර॑ණ්යවර්ණාවු॒ෂසාං᳚-විँරෝ॒ක ඉති॑ ත්රි॒ෂ්ටුභා॑ බා॒හූ උ-ද්ගෘ॑හ්ණාති . ඉ॒න්ද්රි॒යං-වෛँ වී॒ර්ය॑-න්ත්රි॒ෂ්ටුක් . ඉ॒න්ද්රි॒යමේ॒ව වී॒ර්ය॑-මු॒පරි॑ෂ්ටාදා॒ත්මන්-ධ॑ත්තේ .. 40 ..

(ව්යාවෘ॑ත්ත්යෛ-දා॒ත්රම॒සීත්යා॑හා॒-මෘත॒ග්ං॒ හිර॑ණ්ය-මේකශ॒තෝ-ග॑මය॒න්-ත්යාහ॑-බ්රාහ්මා॒ණා-නා॒ෂ්ට්රාභ්යඃ॑ පා॒තේත්යා॑හ ච॒ත්වාරි॑ ච) (අ. 6)

අනුවාකං 7 - දිග්ව්යාස්ථාපනම්

දිශෝ॒ ව්යාස්ථා॑පයති . දි॒ශාම॒භිජි॑ත්යෛ . යද॑නු ප්ර॒ක්රාමේ᳚ත් . අ॒භි දිශෝ॑ ජයේත් . උත්තු මා᳚ද්යේත් . මන॒සා-(අ)නු॒ ප්රක්රා॑මති . අ॒භි දිශෝ॑ ජයති . නෝන්මා᳚ද්යති . ස॒මිධ॒මා ති॒ෂ්ඨේත්යා॑හ . තේජ॑ ඒ॒වාව॑රුන්ධේ .. 41 ..

උ॒ග්රාමා ති॒ෂ්ඨේත්යා॑හ . ඉ॒න්ද්රි॒යමේ॒වාව॑ රුන්ධේ . වි॒රාජ॒මා ති॒ෂ්ඨේත්යා॑හ . අ॒න්නාද්ය॑මේ॒වාව॑ රුන්ධේ . උදී॑චී॒මා ති॒ෂ්ඨේත්යා॑හ . ප॒ශූනේ॒වාව॑ රුන්ධේ . ඌ॒ර්ධ්වාමා ති॒ෂ්ඨේත්යා॑හ . සු॒ව॒ර්ගමේ॒ව ලෝ॒ක-ම॒භිජ॑යති . අනූජ්ජි॑හීතේ . සු॒ව॒ර්ගස්ය॑ ලෝ॒කස්ය॒ සම॑ෂ්ට්යෛ .. 42 ..

මා॒රු॒ත ඒ॒ෂ භ॑වති . අන්නං॒-වෛँ ම॒රුතඃ॑ . අන්න॑මේ॒වාව॑ රුන්ධේ . ඒක॑විග්ංශතිකපාලෝ භවති॒ ප්රති॑ෂ්ඨිත්යෛ . යෝ॑-(අ)රණ්යේ (අ)නුවා॒ක්යෝ॑ ග॒ණඃ . ත-ම්ම॑ද්ධ්ය॒ත උප॑දධාති . ග්රා॒ම්යෛරේ॒ව ප॒ශුභි॑-රාර॒ණ්යා-න්ප॒ශූ-න්පරි॑ගෘහ්ණාති . තස්මා᳚-ද්ග්රා॒ම්යෛඃ ප॒ශුභි॑රාර॒ණ්යාඃ ප॒ශවඃ॒ පරි॑ගෘහීතාඃ . පෘථි॑ර්වෛ॒න්යඃ . අ॒භ්ය॑ෂිච්යත .. 43 ..

ස රා॒ෂ්ට්ර-න්නාභ॑වත් . ස ඒ॒තානි॑ පා॒ර්ථාන්ය॑පශ්යත් . තාන්ය॑ජුහෝත් . තෛර්වෛ ස රා॒ෂ්ට්ර-ම॑භවත් . යත්පා॒ර්ථානි॑ ජු॒හෝති॑ . රා॒ෂ්ට්රමේ॒ව භ॑වති . බා॒ර්॒හ॒ස්ප॒ත්ය-ම්පූර්වේ॑ෂාමුත්ත॒ම-ම්භ॑වති . ඓ॒න්ද්රමුත්ත॑රේෂා-ම්ප්රථ॒මම් . බ්රහ්ම॑ චෛ॒වාස්මෛ᳚ ක්ෂ॒ත්ර-ඤ්ච॑ ස॒මීචී॑ දධාති . අථෝ॒ බ්රහ්ම॑න්නේ॒ව ක්ෂ॒ත්ර-ම්ප්රති॑ෂ්ඨාපයති .. 44 ..

ෂට්පු॒රස්තා॑-දභිෂේ॒කස්ය॑ ජුහෝති . ෂඩු॒පරි॑ෂ්ටාත් . ද්වාද॑ශ॒ ස-ම්ප॑ද්යන්තේ . ද්වාද॑ශ॒ මාසා᳚-ස්සංවँථ්ස॒රඃ . සං॒වँ॒ථ්ස॒රඃ ඛලු॒ වෛ දේ॒වානා॒-ම්පූඃ . දේ॒වානා॑මේ॒ව පුර॑-ම්මද්ධ්ය॒තෝ ව්යව॑සර්පති . තස්ය॒ න කුත॑ශ්ච॒ නෝපා᳚ව්යා॒ධෝ භ॑වති . භූ॒තානා॒-මවේ᳚ෂ්ටී-ර්ජුහෝති . අත්රා᳚ත්ර॒ වෛ මෘ॒ත්යු-ර්ජා॑යතේ . යත්ර॑ යත්රෛ॒ව මෘ॒ත්යු-ර්ජාය॑තේ . තත॑ ඒ॒වෛන॒මව॑යජතේ . තස්මා᳚-ද්රාජ॒සූයේ॑නේජා॒න-ස්සර්ව॒මායු॑රේති . සර්වේ॒ හ්ය॑ස්ය මෘ॒ත්යවෝ-(අ)වේ᳚ෂ්ටාඃ . තස්මා᳚-ද්රාජ॒සූයේ॑නේජා॒නෝ නාභිච॑රිත॒වෛ . ප්ර॒ත්යගේ॑න-මභිචා॒ර-ස්ස්තෘ॑ණුතේ .. 45 ..

(රු॒න්ධේ॒-සම॑ෂ්ට්යා-අසිච්යත-ස්ථාපයති॒-ජාය॑තේ॒ පඤ්ච॑ ච) (අ. 7)

අනුවාකං 8 - අභිෂේකඃ

සෝම॑ස්ය॒ ත්විෂි॑රසි॒ තවේ॑ව මේ॒ ත්විෂි॑ර්භූයා॒දිති॑ ශාර්දූලච॒ර්මෝප॑ස්තෘණාති . යෛව සෝමේ॒ ත්විෂිඃ॑ . යා ශා᳚ර්දූ॒ලේ . තාමේ॒වාව॑ රුන්ධේ . මෘ॒ත්යෝර්වා ඒ॒ෂ වර්ණඃ॑ . යච්ඡා᳚ර්දූ॒ලඃ . අ॒මෘත॒ග්ං॒ හිර॑ණ්යම් . අ॒මෘත॑මසි මෘ॒ත්යෝර්මා॑ පා॒හීති॒ හිර॑ණ්ය॒-මුපා᳚ස්යති . අ॒මෘත॑මේ॒ව මෘ॒ත්යෝර॒න්ත-ර්ධ॑ත්තේ . ශ॒තමා॑න-ම්භවති .. 46 ..

ශ॒තායුඃ॒ පුරු॑ෂ-ශ්ශ॒තේන්ද්රි॑යඃ . ආයු॑ෂ්යේ॒වේන්ද්රි॒යේ ප්රති॑ තිෂ්ඨති . දි॒ද්යෝන්මා॑ පා॒හීත්යු॒පරි॑ෂ්ටා॒දධි॒ නිද॑ධාති . උ॒භ॒යත॑ ඒ॒වාස්මෛ॒ ශර්ම॑ දධාති . අවේ᳚ෂ්ටා දන්ද॒ශූකා॒ ඉති॑ ක්ලී॒බග්ං සීසේ॑න විද්ධ්යති . ද॒න්ද॒ශූකා॑-නේ॒වාව॑ යජතේ . තස්මා᳚-ත්ක්ලී॒බ-න්ද॑න්ද॒ශූකා॒ දග්ංශු॑කාඃ . නිර॑ස්ත॒-න්නමු॑චේ॒-ශ්ශිර॒ ඉති॑ ලෝහිතාය॒ස-න්නිර॑ස්යති . පා॒ප්මාන॑මේ॒ව නමු॑චි-න්නි॒රව॑දයතේ . ප්රා॒ණා ආ॒ත්මනඃ॒ පූර්වේ॑-(අ)භි॒ෂිච්යා॒ ඉත්යා॑හුඃ .. 47 ..

සෝමෝ॒ රාජා॒ වරු॑ණඃ . දේ॒වා ධ॑ර්ම॒සුව॑ශ්ච॒ යේ . තේ තේ॒ වාචග්ං॑ සුවන්තා॒-න්තේ තේ᳚ ප්රා॒ණග්ං සු॑වන්තා॒මිත්යා॑හ . ප්රා॒ණානේ॒වාත්මනඃ॒ පූර්වා॑-න॒භිෂි॑ඤ්චති . ය-ද්බ්රූ॒යාත් . අ॒ග්නේස්ත්වා॒ තේජ॑සා॒ (අ)භිෂි॑ඤ්චා॒මීති॑ . තේ॒ජ॒ස්ව්යේ॑ව ස්යා᳚ත් . දු॒ශ්චර්මා॒ තු භ॑වේත් . සෝම॑ස්ය ත්වා ද්යු॒ම්නේනා॒-භිෂි॑ඤ්චා॒මීත්යා॑හ . සෞ॒ම්යෝ වෛ දේ॒වත॑යා॒ පුරු॑ෂඃ .. 48 ..

ස්වයෛ॒වෛන॑-න්දේ॒වත॑යා॒-(අ)භිෂි॑ඤ්චති . අ॒ග්නේ-ස්තේජ॒සේත්යා॑හ . තේජ॑ ඒ॒වාස්මි॑-න්දධාති . සූර්ය॑ස්ය॒ වර්ච॒සේත්යා॑හ . වර්ච॑ ඒ॒වාස්මි॑-න්දධාති . ඉන්ද්ර॑ස්යේ-න්ද්රි॒යේණේත්යා॑හ . ඉ॒න්ද්රි॒යමේ॒වාස්මි॑-න්දධාති . මි॒ත්රාවරු॑ණයෝ-ර්වී॒ර්යේ॑ණේත්යා॑හ . වී॒ර්ය॑මේ॒වාස්මි॑-න්දධාති . ම॒රුතා॒මෝජ॒සේත්යා॑හ .. 49 ..

ඕජ॑ ඒ॒වාස්මි॑-න්දධාති . ක්ෂ॒ත්රාණා᳚-ඞ්ක්ෂ॒ත්රප॑තිර॒සීත්යා॑හ . ක්ෂ॒ත්රාණා॑මේ॒වෛන॑-ඞ්ක්ෂ॒ත්රප॑ති-ඞ්කරෝති . අති॑ දි॒වස්පා॒හීත්යා॑හ . අත්ය॒න්යා-න්පා॒හීති॒ වාවෛතදා॑හ . ස॒මාව॑වෘත්රන්න-ධ॒රාගුදී॑චී॒-රිත්යා॑හ . රා॒ෂ්ට්රමේ॒වාස්මි॑-න්ධ්රු॒වම॑කඃ . උ॒ච්ඡේෂ॑ණේන ජුහෝති . උ॒ච්ඡේෂ॑ණභාගෝ॒ වෛ රු॒ද්රඃ . භා॒ග॒ධේයේ॑නෛ॒ව රු॒ද්ර-න්නි॒රව॑දයතේ .. 50 ..

උද॑ම්ප॒රේත්යාග්නී᳚ද්ධ්රේ ජුහෝති . ඒ॒ෂා වෛ රු॒ද්රස්ය॒ දික් . ස්වායා॑මේ॒ව දි॒ශි රු॒ද්ර-න්නි॒රව॑දයතේ . රුද්ර॒ යත්තේ॒ ක්රයී॒ පර॒-න්නාමේත්යා॑හ . යද්වා අ॑ස්ය॒ ක්රයී॒ පර॒-න්නාම॑ . තේන॒ වා ඒ॒ෂ හි॑නස්ති . යග්ං හි॒නස්ති॑ . තේනෛ॒වෛනග්ං॑ ස॒හ ශ॑මයති . තස්මෛ॑ හු॒තම॑සි ය॒මේෂ්ට॑ම॒සීත්යා॑හ . ය॒මාදේ॒වාස්ය॑ මෘ॒ත්යුමව॑යජතේ .. 51 ..

ප්රජා॑පතේ॒ න ත්වදේ॒තාන්ය॒න්ය ඉති॒ තස්යෛ॑ ගෘ॒හේ ජු॑හුයාත් . යා-ඞ්කා॒මයේ॑ත රා॒ෂ්ට්රම॑ස්යෛ ප්ර॒ජා ස්යා॒දිති॑ . රා॒ෂ්ට්රමේ॒වාස්යෛ᳚ ප්ර॒ජා භ॑වති . ප॒ර්ණ॒-මයේ॑නා-ද්ධ්ව॒ර්යු-ර॒භිෂි॑ඤ්චති . බ්ර॒හ්ම॒ව॒ර්ච॒සමේ॒වාස්මි॒න්-ත්විෂි॑-න්දධාති . ඖදු॑ම්බරේණ රාජ॒න්යඃ॑ . ඌර්ජ॑මේ॒වාස්මි॑-න්න॒න්නාද්ය॑-න්දධාති . ආශ්ව॑ත්ථේන॒ වෛශ්යඃ॑ . විශ॑මේ॒වාස්මි॒-න්පුෂ්ටි॑-න්දධාති . නෛය॑ග්රෝධේන॒ ජන්යඃ॑( ) . මි॒ත්රාණ්යේ॒වාස්මෛ॑ කල්පයති . අථෝ॒ ප්රති॑ෂ්ඨිත්යෛ .. 52 ..

(භ॒ව॒ - ත්යා॒හුඃ॒ - පුරු॑ෂ॒ - ඕජ॒සේත්යා॑හ - නි॒රව॑දයතේ - යජතේ॒ - ජන්යෝ॒ ද්වේ ච॑) (අ. 8)

අනුවාකං 9 - ස්ථාරෝහණම්. විජයඃ

ඉන්ද්ර॑ස්ය॒ වජ්රෝ॑-(අ)සි॒ වාර්ත්ර॑ඝ්න॒ ඉති॒ රථ॑මු॒පාව॑හරති॒ විජි॑ත්යෛ . මි॒ත්රාවරු॑ණයෝස්ත්වා ප්රශා॒ස්ත්රෝඃ ප්ර॒ශිෂා॑ යුන॒ජ්මීත්යා॑හ . බ්රහ්ම॑ණෛ॒වෛන॑-න්දේ॒වතා᳚භ්යාං-යුँනක්ති . ප්ර॒ෂ්ටි॒වා॒හිනං॑-යුँනක්ති . ප්ර॒ෂ්ටි॒වා॒හී වෛ දේ॑වර॒ථඃ . දේ॒ව॒ර॒ථ-මේ॒වාස්මෛ॑ යුනක්ති . ත්රයෝ-(අ)ශ්වා॑ භවන්ති . රථ॑ශ්චතු॒ර්ථඃ . ද්වෞ ස॑ව්යේෂ්ඨසාර॒ථී . ෂට්-ථ්සම්ප॑ද්යන්තේ .. 53 ..

ෂඩ්වා ඍ॒තවඃ॑ . ඍ॒තුභි॑රේ॒වෛනං॑-යුँනක්ති . වි॒ෂ්ණු॒ක්ර॒මාන්-ක්ර॑මතේ . විෂ්ණු॑රේ॒ව භූ॒ත්වේමාන් ँලෝ॒කාන॒භිජ॑යති . යඃ, ක්ෂ॒ත්රියඃ॒ ප්රති॑හිතඃ . සෝ᳚-(අ)න්වාර॑භතේ . රා॒ෂ්ට්රමේ॒ව භ॑වති . ත්රි॒ෂ්ටුභා॒ (අ)න්වාර॑භතේ . ඉ॒න්ද්රි॒යං-වෛँ ත්රි॒ෂ්ටුක් . ඉ॒න්ද්රි॒යමේ॒ව යජ॑මානේ දධාති .. 54 ..

ම॒රුතා᳚-ම්ප්රස॒වේ ජේ॑ෂ॒මිත්යා॑හ . ම॒රුද්භි॑රේ॒ව ප්රසූ॑ත॒ උජ්ජ॑යති . ආ॒ප්ත-ම්මන॒ ඉත්යා॑හ . යදේ॒ව මන॒සෛඵ්සී᳚ත් . තදා॑පත් . රා॒ජ॒න්ය॑-ඤ්ජිනාති . අනා᳚ක්රාන්ත ඒ॒වාක්ර॑මතේ . වි වා ඒ॒ෂ ඉ॑න්ද්රි॒යේණ॑ වී॒ර්යේ॑ණර්ධ්යතේ . යෝ රා॑ජ॒න්ය॑-ඤ්ජි॒නාති॑ . සම॒හමි॑න්ද්රි॒යේණ॑ වී॒ර්යේ॑ණේත්යා॑හ .. 55 ..

ඉ॒න්ද්රි॒යමේ॒ව වී॒ර්ය॑මා॒ත්මන්-ධ॑ත්තේ . ප॒ශූ॒නා-ම්ම॒න්යුර॑සි॒ තවේ॑ව මේ ම॒න්යුර්භූ॑යා॒දිති॒ වාරා॑හී උපා॒නහා॒වුප॑ මුඤ්චතේ . ප॒ශූ॒නාං-වාँ ඒ॒ෂ ම॒න්යුඃ . ය-ද්ව॑රා॒හඃ . තේනෛ॒ව ප॑ශූ॒නා-ම්ම॒න්යුමා॒ත්ම-න්ධ॑ත්තේ . අ॒භි වා ඉ॒යග්ං සු॑ෂුවා॒ණ-ඞ්කා॑මයතේ . තස්යේ᳚ශ්ව॒රේන්ද්රි॒යං-වීँ॒ර්ය॑මාදා॑තෝඃ . වාරා॑හී උපා॒නහා॒වුප॑මුඤ්චතේ . අ॒ස්යා ඒ॒වාන්තර්ධ॑ත්තේ . ඉ॒න්ද්රි॒යස්ය॑ වී॒ර්ය॑ස්යානා᳚ත්ත්යෛ .. 56 ..

නමෝ॑ මා॒ත්රේ පෘ॑ථි॒ව්යා ඉත්යා॒හාහිග්ං॑ සායෛ . ඉය॑ද॒ස්යා-යු॑ර॒ස්යායු॑ර්මේ ධේ॒හීත්යා॑හ . ආයුරේ॒වාත්මන්-ධ॑ත්තේ . ඌර්ග॒ස්යූර්ජ॑-ම්මේ ධේ॒හීත්යා॑හ . ඌර්ජ॑ම॒වාත්ම-න්ධ॑ත්තේ . යුඞ්ඞ॑සි॒ වර්චෝ॑-(අ)සි॒ වර්චෝ॒ මයි॑ ධේ॒හීත්යා॑හ . වර්ච॑ ඒ॒වාත්ම-න්ධ॑ත්තේ . ඒ॒ක॒ධා බ්ර॒හ්මණ॒ උප॑ හරති . ඒ॒ක॒ධෛව යජ॑මාන॒ ආයු॒රූර්ජං॒-වँර්චෝ॑ දධාති . ර॒ථ॒වි॒මෝ॒ච॒නීයා॑ ජුහෝති॒ ප්රති॑ෂ්ඨිත්යෛ .. 57 ..

ත්රයෝ-(අ)ශ්වා॑ භවන්ති . රථ॑ශ්චතු॒ර්ථඃ . තස්මා᳚-ච්ච॒තුර්ජු॑හෝති . යදු॒භෞ ස॒හාව॒තිෂ්ඨේ॑තාම් . ස॒මා॒නං-ලෝँ॒කමි॑යාතාම් . ස॒හ ස॑ග්රංහී॒ත්රා ර॑ථ॒වාහ॑නේ॒ රථ॒මාද॑ධාති . සු॒ව॒ර්ගාදේ॒වෛනං॑-ලෝँ॒කාද॒න්තර්ද॑ධාති . හ॒ග්ං॒ස-ශ්ශු॑චි॒ෂදිත්යා ද॑ධාති . බ්රහ්ම॑ණෛ॒වෛන॑-මුපාව॒හර॑ති . බ්රහ්ම॒ණා (අ)(අ)ද॑ධාති . අති॑ච්ඡන්ද॒සා (අ)(අ)ද॑ධාති . අති॑ච්ඡන්දා॒ වෛ සර්වා॑ණි॒ ඡන්දාග්ං॑සි . සර්වේ॑භිරේ॒වෛන॒-ඤ්ඡන්දෝ॑භි॒-රාද॑ධාති . වර්ෂ්ම॒ වා ඒ॒ෂා ඡන්ද॑සාම් . යදති॑ච්ඡන්දාඃ . යදති॑ච්ඡන්දසා॒ දධා॑ති . වර්ෂ්මෛ॒වෛනග්ං॑ සමා॒නානා᳚-ඞ්කරෝති .. 58 ..

(ප॒ද්ය॒න්තේ॒ - ද॒ධා॒ති॒ - වී॒ර්යේ॑ණේත්යා॒හා - නා᳚ත්යෛ॒ - ප්රති॑ෂ්ඨිත්යෛ॒ - බ්රහ්ම॒ණා-(අ)(අ)ද॑ධාති ස॒ප්ත ච॑) (අ. 9)

අනුවාකං 10 - ආසනේ සමුපවේශ-ස්සර්වෛස්සේව්යත්ව-ඤ්ච

මි॒ත්රෝ॑-(අ)සි॒ වරු॑ණෝ॒-(අ)සීත්යා॑හ . මෛ॒ත්රං-වාँ අහඃ॑ . වා॒රු॒ණී රාත්රිඃ॑ . අ॒හෝ॒රා॒ත්රාභ්යා॑-මේ॒වෛන॑-මු॒පාව॑හරති . මි॒ත්රෝ॑-(අ)සි॒ වරු॑ණෝ॒සීත්යා॑හ . මෛ॒ත්රෝ වෛ දක්ෂි॑ණඃ . වා॒රු॒ණ-ස්ස॒ව්යඃ . වෛ॒ශ්ව॒දේ॒ව්යා॑මික්ෂා᳚ . ස්වමේ॒වෛනෞ॑ භාග॒ධේය॑-මු॒පාව॑හරති . සම॒හං-විँශ්වෛ᳚ර්දේ॒වෛ-රිත්යා॑හ .. 59 ..

වෛ॒ශ්ව॒දේ॒ව්යෝ॑ වෛ ප්ර॒ජාඃ . තා ඒ॒වාද්යාඃ᳚ කුරුතේ . ක්ෂ॒ත්රස්ය॒ නාභි॑රසි ක්ෂ॒ත්රස්ය॒ යෝනි॑-ර॒සීත්ය॑ධීවා॒සමා-ස්තෘ॑ණාති සයෝනි॒ත්වාය॑ . ස්යෝ॒නාමාසී॑ද සු॒ෂදා॒මාසී॒දේත්යා॑හ . ය॒ථා॒ ය॒ජුරේ॒වෛ තත් . මා ත්වා॑ හිග්ංසී॒-න්මා මා॑ හිග්ංසී॒දිත්යා॒හා-හිග්ං॑සායෛ . නිෂ॑සාද ධෘ॒තව්ර॑තෝ॒ වරු॑ණඃ ප॒ස්ත්යා᳚ස්වා සාම්රා᳚ජ්යාය සු॒ක්රතු॒රිත්යා॑හ . සාම්රා᳚ජ්යමේ॒වෛනග්ං॑ සු॒ක්රතු॑-ඞ්කරෝති . බ්රහ්මා(3)න්ත්වග්ං රා॑ජන්-බ්ර॒හ්මා-(අ)සි॑ සවි॒තා-(අ)සි॑ ස॒ත්යස॑ව॒ ඉත්යා॑හ . ස॒වි॒තාර॑-මේ॒වෛනග්ං॑ ස॒ත්යස॑ව-ඞ්කරෝති .. 60 ..

බ්රහ්මා(3)න්ත්වග්ං රා॑ජන්-බ්ර॒හ්මා-(අ)සීන්ද්රෝ॑-(අ)සි ස॒ත්යෞජා॒ ඉත්යා॑හ . ඉන්ද්ර॑මේ॒වෛනග්ං॑ ස॒ත්යෞජ॑ස-ඞ්කරෝති . බ්රහ්මා(3)න්ත්වග්ං රා॑ජන්-බ්ර॒හ්මා-(අ)සි॑ මි॒ත්රෝ॑-(අ)සි සු॒ශේව॒ ඉත්යා॑හ . මි॒ත්රමේ॒වෛනග්ං॑ සු॒ශේව॑-ඞ්කරෝති . බ්රහ්මා(3)න්ත්වග්ං රා॑ජන්-බ්ර॒හ්මා-(අ)සි॒ වරු॑ණෝ-(අ)සි ස॒ත්යධ॒ර්මේත්යා॑හ . වරු॑ණමේ॒වෛනග්ං॑ ස॒ත්යධ॑ර්මාණ-ඞ්කරෝති . ස॒වි॒තා-(අ)සි॑ ස॒ත්යස॑ව॒ ඉත්යා॑හ . ගා॒ය॒ත්රී-මේ॒වෛතේනා॑භි॒ව්යාහ॑රති . ඉන්ද්රෝ॑-(අ)සි ස॒ත්යෞජා॒ ඉත්යා॑හ . ත්රි॒ෂ්ටුභ॑-මේ॒වෛතේනා॑භි॒-ව්යාහ॑රති .. 61 ..

මි॒ත්රෝ॑-(අ)සි සු॒ශේව॒ ඉත්යා॑හ . ජග॑තී-මේ॒වෛතේනා॑භි॒ව්යාහ॑රති . ස॒ත්යමේ॒තා දේ॒වතාඃ᳚ . ස॒ත්යමේ॒තානි॒ ඡන්දාග්ං॑සි . ස॒ත්යමේ॒වාව॑ රුන්ධේ . වරු॑ණෝ-(අ)සි ස॒ත්යධ॒ර්මේත්යා॑හ . අ॒නු॒ෂ්ටුභ॑-මේ॒වෛතේනා॑භි॒ව්යාහ॑රති . ස॒ත්යා॒නෘ॒තේ වා අ॑නු॒ෂ්ටුප් . ස॒ත්යා॒නෘ॒තේ වරු॑ණඃ . ස॒ත්යා॒නෘ॒තේ ඒ॒වාව॑රුන්ධේ .. 62 ..

නෛනග්ං॑ සත්යානෘ॒තේ උ॑දි॒තේ හිග්ග්॑ස්තඃ . ය ඒ॒වං-වේँද॑ . ඉන්ද්ර॑ස්ය॒ වජ්රෝ॑-(අ)සි॒ වාර්ත්ර॑ඝ්න॒ ඉති॒ ස්ඵ්ය-ම්ප්රය॑ච්ඡති . වජ්රෝ॒ වෛ ස්ඵ්යඃ . වජ්රේ॑ණෛ॒වාස්මා॑ අවරප॒රග්ං ර॑න්ධයති . ඒ॒වග්ං හි තච්ඡ්රේයඃ॑ . යද॑ස්මා ඒ॒තේ රද්ධ්යේ॑යුඃ . දිශෝ॒-(අ)භ්ය॑යග්ං රාජා॑ (අ)භූ॒දිති॒ පඤ්චා॒ක්ෂාන්-ප්රය॑ච්ඡති . ඒ॒තේ වෛ සර්වේ-(අ)යාඃ᳚ . අප॑රාජායින-මේ॒වෛන॑-ඞ්කරෝති .. 63 ..

ඕ॒ද॒නමුද්බ්රු॑වතේ . ප॒ර॒මේ॒ෂ්ඨී වා ඒ॒ෂඃ . යදෝ॑ද॒නඃ . ප॒ර॒මාමේ॒වෛන॒ග්ග්॒ ශ්රිය॑-ඞ්ගමයති . සුශ්ලෝ॒කාँ(4) සුම॑ඞ්ග॒ලාँ(4) සත්ය॑රා॒ජා(3)නිත්යා॑හ . ආ॒ශිෂ॑මේ॒වෛතාමා ශා᳚ස්තේ . ශෞ॒න॒-ශ්ශේ॒පමාඛ්යා॑පයතේ . ව॒රු॒ණ॒පා॒ශා-දේ॒වෛන॑-ම්මුඤ්චති . ප॒ර॒-ශ්ශ॒ත-ම්භ॑වති . ශ॒තායුඃ॒ පුරු॑ෂ-ශ්ශ॒තේන්ද්රි॑යඃ( ) . ආයු॑ෂ්යේ॒වේන්ද්රි॒යේ ප්රති॑තිෂ්ඨති . මා॒රු॒තස්ය॒ චෛක॑විග්ංශතිකපාලස්ය වෛශ්වදේ॒ව්යෛ චා॒මික්ෂා॑යා අ॒ග්නයේ᳚ ස්විෂ්ට॒කෘතේ॑ ස॒මව॑ද්යති . දේ॒වතා॑භිරේ॒වෛන॑-මුභ॒යතඃ॒ පරි॑ගෘහ්ණාති . අ॒පා-න්නප්ත්රේ॒ ස්වාහෝ॒ර්ජෝ නප්ත්රේ॒ ස්වාහා॒-(අ)ග්නයේ॑ ගෘ॒හප॑තයේ॒ ස්වාහේති॑ ති॒ස්ර ආහු॑තී-ර්ජුහෝති . ත්රය॑ ඉ॒මේ ලෝ॒කාඃ . ඒ॒ෂ්වේ॑ව ලෝ॒කේෂු॒ ප්රති॑ තිෂ්ඨති .. 64 ..

(දේ॒වෛරිත්යා॑හ - ස॒ත්යස॑ව-ඞ්කරෝති - ත්රි॒ෂ්ටුභ॑මේ॒වෛතේනා॑භි॒ ව්යාහ॑රති- සත්යානෘ॒තේ ඒ॒වාව॑රුන්ධේ - කරෝති - ශ॒තේන්ද්රි॑ය॒-ෂ්ෂට්ච॑) (අ. 10)

(ඒ॒ත-ද්බ්රා᳚හ්මණානි - ධා॒ත්රේ - රා॒ත්නිනාං᳚ - දේවසු॒වා - ම॒ර්ථේතෝ॒ - දේවී॒--ර් දිශඃ॒ - සෝම॒ස්යේ - න්ද්ර॑ස්ය - මි॒ත්රෝ දශ॑)

(ඒ॒ත-ද්බ්රා᳚හ්මණානි - වෛෂ්ණ॒ව-න්ත්රි॑කපා॒ල - මන්නං॒-වෛँ පූ॒ෂා - වාශා॒-ස්ස්ථේත්යා॑හ॒ - දිශෝ॒ ව්යාස්ථා॑පය॒ - ත්යුද॑ම්ප॒රේත්ය॒ - බ්රහ්මා(3)න්ත්වග්ං රා॑ජ॒-ඤ්චතු॑ෂ්ෂෂ්ටිඃ

(ඒ॒ත-ද්බ්රා᳚හ්මණානි॒ - ප්රති॑ තිෂ්ඨති)

.. හරිඃ॑ ඕම් ..

.. කෘෂ්ණ යජුර්වේදීය තෛත්තිරීය බ්රාහ්මණේ ප්රථමාෂ්ටකේ සප්තමඃ ප්රපාඨක-ස්සමාප්තඃ ..

Roman (IAST) Transliteration

kṛṣṇa yajurvedīya taittirīya brāhmaṇe prathamāṣṭake saptamaḥ prapāṭhakaḥ - rājasūyānubrāhmaṇaṃ

o-nnamaḥ paramātmane, śrī mahāgaṇapataye namaḥ,

śrī gurubhyo namaḥ | ha॒riḥ॒ om ||

anuvākaṃ 1 - śunāsīrīyendraturīyapañcāvattīyāpāmārgahomāḥ

e॒ta-dbrā᳚hmaṇānye॒va pañca̭ ha॒vīgṃṣi̭ | athendrā̭ya॒ śunā॒sīrā̭ya puro॒ḍāśa॒-ndvāda̭śakapāla॒-nnirva̭pati | saṃ॒va~॒thsa॒ro vā indrā॒ śunā॒sīraḥ̭ | saṃ॒va~॒thsa॒reṇai॒vāsmā॒ anna॒mava̭ rundhe | vā॒ya॒vya̭-mpayo̭ bhavati | vā॒yurvai vṛṣṭyai᳚ pradāpayi॒tā | sa e॒vāsmai॒ vṛṣṭi॒-mpradā̭payati | sau॒rya̭ eka̭kapālo bhavati | sūryḙṇa॒ vā a॒muṣmi̭~llo॒ke vṛṣṭi̭rdhṛ॒tā | sa e॒vāsmai॒ vṛṣṭi॒-nni ya̭cchati || 1 ||

dvā॒da॒śa॒ga॒vagṃ sīra॒-ndakṣi̭ṇā॒ samṛ̭ddhyai | de॒vā॒su॒rā-ssaṃya~̭ttā āsann | te de॒vā a॒gnima̭bruvann | tvayā̭ vī॒reṇāsṷrāna॒-bhibha̭vā॒meti̭ | so᳚-'bravīt | tre॒dhā-'hamā॒tmānaṃ॒-vi~ka̭riṣya॒ iti̭ | sa tre॒dhā ''tmānaṃ॒-vya~̭kuruta | a॒gni-ntṛtī̭yam | ru॒dra-ntṛtī̭yam | varṷṇa॒-ntṛtī̭yam || 2 ||

so᳚-'bravīt | ka i॒da-ntu॒rīya॒miti̭ | a॒hamitīndro᳚-'bravīt |

sa-ntu sṛ̭jāvahā॒ iti̭ | tau sama̭sṛjetām | sa indra̭stu॒rīya̭-mabhavat | yadindra̭-stu॒rīya॒-mabha̭vat | tadi̭ndra-turī॒yasye᳚ndra-turīya॒tvam | tato॒ vai de॒vā vya̭jayanta | yadi̭ndraturī॒ya-nni̭ru॒pyate॒ viji̭tyai || 3 ||

va॒hinī̭ dhe॒nu-rdakṣi̭ṇā | ya-dva॒hinī᳚ | tenā᳚gne॒yī |

ya-dgauḥ | tena̭ rau॒drī | ya-ddhe॒nuḥ | tenai॒ndrī | yathstrī sa॒tī dā॒ntā | tena̭ vāru॒ṇī samṛ̭ddhyai | pra॒jāpa̭ti-rya॒jñama̭sṛjata || 4 ||

tagṃ sṛ॒ṣṭagṃ rakṣāg̭syajighāgṃsann | sa e॒tāḥ pra॒jāpa̭ti-rā॒tmano̭ de॒vatā॒ nira̭mimīta | tābhi॒rvai sa di॒gbhyo rakṣāgṃ̭si॒ prāṇṷdata | ya-tpa̭ñcāva॒ttīya̭-ñju॒hoti̭ | di॒gbhya e॒va ta-dyaja̭māno॒ rakṣāgṃ̭si॒ praṇṷdate | samṷ̄ḍha॒gṃ॒ rakṣa॒-ssanda̭gdha॒gṃ॒ rakṣa॒ ityā̭ha | rakṣāg̭sye॒va sanda̭hati | a॒gnayḙ rakṣo॒ghne svāhetyā̭ha | de॒vatā᳚bhya e॒va vi̭jigyā॒nābhyo̭ bhāga॒dheya̭-ṅkaroti | pra॒ṣṭi॒vā॒hī ratho॒ dakṣi̭ṇā॒ samṛ̭ddhyai || 5 ||

indro̭ vṛ॒tragṃ ha॒tvā | asṷrā-nparā॒bhāvya̭ | namṷcimāsu॒ra-nnāla̭bhata | tagṃ śa॒cyā̭-'gṛhṇāt | tau sama̭labhetām | so᳚-'smā-da॒bhiśṷnataro-'bhavat | so᳚-'bravīt | sa॒dhāṃgṃ sanda̭dhāvahai | atha॒ tvā-'va̭ srakṣyāmi | na mā॒ śuṣkḙṇa॒ nārdreṇa̭ hanaḥ || 6 ||

na divā॒ na nakta॒miti̭ | sa e॒tama॒pā-mphena̭masiñcat | na vā e॒ṣa śuṣko॒ nārdro vyṷṣṭā ''sīt | anṷdita॒-ssūryaḥ̭ | na vā e॒ta-ddivā॒ na nakta᳚m | tasyai॒tasmi̭n ~lo॒ke | a॒pā-mphenḙna॒ śira॒ uda̭vartayat | tadḙna॒manva̭vartata | mitra̭dru॒giti̭ || 7 ||

sa e॒tāna̭pāmā॒rgāna̭janayat | tāna̭juhot | tairvai sa rakṣā॒g॒syapā̭hata | yada̭pāmārga ho॒mo bhava̭ti | rakṣa̭sā॒-mapa̭hatyai | e॒ko॒l mu॒kena̭ yanti | taddhi rakṣa̭sā-mbhāga॒dheya᳚m | i॒mā-ndiśaṃ̭-ya~nti | e॒ṣā vai rakṣa̭sā॒-ndik | svāyā̭me॒va di॒śi rakṣāgṃ̭si hanti || 8 ||

svakṛ̭ta॒ iri̭ṇe juhoti prada॒re vā᳚ | e॒ta-dvai rakṣa̭sāmā॒yata̭nam | sva e॒vāyata̭ne॒ rakṣāgṃ̭si hanti | pa॒rṇa॒mayḙna sru॒veṇa̭ juhoti | brahma॒ vai pa॒rṇaḥ | brahma̭ṇai॒va rakṣāgṃ̭si hanti | de॒vasya̭ tvā savi॒tuḥ pra̭sa॒va ityā̭ha | sa॒vi॒tṛpra̭sūta e॒va rakṣāgṃ̭si hanti | ha॒tagṃ rakṣo 'va̭dhiṣma॒ rakṣa॒ ityā̭ha | rakṣa̭sā॒g॒ stṛtyai᳚ | yadvaste॒ ta-ddakṣi̭ṇā ni॒rava̭ttyai | apra̭tīkṣa॒mā ya̭nti | rakṣa̭sā-ma॒ntarhi̭tyai || 9 ||

(ya॒ccha॒ti॒ - varṷṇa॒-ntṛtī̭yaṃ॒ - ~viji̭tyā - asṛjata॒ - samṛ̭ddhyai - hano॒ - mitra̭dru॒giti̭ - hanti॒ - stṛtyai॒ trīṇi̭ ca) (a. 1)

anuvākaṃ 2 - devikāvahavīṃṣi

dhā॒tre pṷro॒ḍāśa॒-ndvāda̭śakapāla॒-nnirva̭pati | saṃ॒va~॒thsa॒ro vai dhā॒tā | saṃ॒va~॒thsa॒reṇai॒vāsmai᳚ pra॒jāḥ praja̭nayati | anve॒vāsmā॒ anṷmatirmanyate | rā॒te rā॒kā | pra si̭nīvā॒lī ja̭nayati | pra॒jāsve॒va prajā̭tāsu ku॒hvā̭ vāca̭-ndadhāti | mi॒thu॒nau gāvau॒ dakṣi̭ṇā॒ samṛ̭ddhyai | ā॒gnā॒vai॒ṣṇa॒va-mekā̭daśakapāla॒-nnirva̭pati | ai॒ndrā॒vai॒ṣṇa॒va-mekā̭daśakapālam || 10 ||

vai॒ṣṇa॒va-ntri̭kapā॒lam | vī॒ryaṃ̭-vā~ a॒gniḥ | vī॒rya̭mindraḥ̭ | vī॒ryaṃ̭-vi~ṣṇuḥ̭ | pra॒jā e॒va prajā̭tā vī॒rye᳚ prati̭ṣṭhāpayati | tasmā᳚-tpra॒jā vī॒ryā̭vatīḥ | vā॒ma॒na ṛ̭ṣa॒bho va॒hī dakṣi̭ṇā | yadva॒hī | tenā᳚gne॒yaḥ | yadṛ̭ṣa॒bhaḥ || 11 ||

tenai॒ndraḥ | yadvā̭ma॒naḥ | tena̭ vaiṣṇa॒va-ssamṛ̭ddhyai | a॒gnī॒ṣo॒mīya॒-mekā̭daśakapāla॒-nnirva̭pati | i॒ndrā॒so॒mīya॒-mekā̭daśakapālam | sau॒mya-ñca॒rum | somo॒ vai rḙto॒dhāḥ | a॒gniḥ pra॒jānā᳚-mprajanayi॒tā | vṛ॒ddhānā॒mindraḥ̭ pradāpayi॒tā | soma̭ e॒vāsmai॒ reto॒ dadhā̭ti || 12 ||

a॒gniḥ pra॒jā-mpraja̭nayati | vṛ॒ddhāmindraḥ॒ praya̭cchati | ba॒bhru-rdakṣi̭ṇā॒ samṛ̭ddhyai | so॒mā॒pau॒ṣṇa-ñca॒ru-nnirva̭pati | ai॒ndrā॒pau॒ṣṇa-ñca॒rum | somo॒ vai rḙto॒dhāḥ | pū॒ṣā pa̭śū॒nā-mpra̭janayi॒tā | vṛ॒ddhānā॒mindraḥ̭ pradāpayi॒tā | soma̭ e॒vāsmai॒ reto॒ dadhā̭ti | pū॒ṣā pa॒śū-npraja̭nayati || 13 ||

vṛ॒ddhānindraḥ॒ praya̭cchati | pau॒ṣṇaśca॒ru-rbha̭vati | i॒yaṃ-vai~ pū॒ṣā | a॒syāme॒va prati̭ tiṣṭhati | śyā॒mo dakṣi̭ṇā॒ samṛ̭ddhyai | ba॒hu vai purṷṣo-'me॒ddhya-mupa̭gacchati | vai॒śvā॒na॒ra-ndvāda̭śakapāla॒-nnirva̭pati | saṃ॒va~॒thsa॒ro vā a॒gni-rvai᳚śvāna॒raḥ | saṃ॒va~॒thsa॒reṇai॒vainagg̭ svadayati | hira̭ṇya॒-ndakṣi̭ṇā || 14 ||

pa॒vitraṃ॒-vai~ hira̭ṇyam | pu॒nātye॒vaina᳚m | ba॒hu vai rā̭ja॒nyo 'nṛ̭ta-ṅkaroti | upa̭ jā॒myai hara̭te | ji॒nāti̭ brāhma॒ṇam | vada॒tyanṛ̭tam | anṛ̭te॒ khalu॒ vai kri॒yamā̭ṇe॒ varṷṇo gṛhṇāti | vā॒ru॒ṇaṃ-ya~̭va॒maya̭-ñca॒ru-nnirva̭pati | va॒ru॒ṇa॒pā॒śāde॒vaina̭-mmuñcati | aśvo॒ dakṣi̭ṇā | vā॒ru॒ṇo hi de॒vata॒yā-'śva॒-ssamṛ̭ddhyai || 15 ||

(ai॒ndrā॒vai॒ṣṇā॒vamekā̭daśakapālaṃ॒-~yadṛ̭ṣa॒bho- dadhā̭ti-pū॒ṣā pa॒śū-npraja̭nayati॒-hira̭ṇyaṃ॒ dakṣi̭ṇā॒-dakṣi॒ṇaikaṃ̭ ca) (a. 2)

anuvākaṃ 3 - ratnināṃ havīṃṣi

ra॒tninā̭me॒tāni̭ ha॒vīgṃṣi̭ bhavanti | e॒te vai rā॒ṣṭrasya̭ pradā॒tāraḥ̭ | e॒tḙ-'pādā॒tāraḥ̭ | ya e॒va rā॒ṣṭrasya̭ pradā॒tāraḥ̭ | yḙ-'pādā॒tāraḥ̭ | ta e॒vāsmai̭ rā॒ṣṭra-mpraya̭cchanti | rā॒ṣṭrame॒va bha̭vati | ya-thsa̭mā॒hṛtya̭ ni॒rvape᳚t | ara̭tnina-ssyuḥ | ya॒thā॒ya॒tha-nnirva̭pati ratni॒tvāya̭ || 16 ||

ya-thsa॒dyo ni॒rvape᳚t | yāva̭tī॒mekḙna ha॒viṣā॒-''śiṣa̭mava ru॒ndhe | tāva̭tī॒mava̭ rundhīta | a॒nva॒ha-nnirva̭pati | bhūya̭sīme॒vāśiṣa॒mava̭ rundhe | bhūya̭so yajñakra॒tūnupai̭ti | bā॒r॒ha॒spa॒tya-ñca॒ru-nnirva̭pati bra॒hmaṇo̭ gṛ॒he | mu॒kha॒ta e॒vāsmai॒ brahma॒ saggśya̭ti | atho॒ brahma̭nne॒va kṣa॒tra-ma॒nvāra̭mbhayati | śi॒ti॒pṛ॒ṣṭho dakṣi̭ṇā॒ samṛ̭ddhyai || 17 ||

ai॒ndra-mekā̭daśakapālagṃ rāja॒nya̭sya gṛ॒he | i॒ndri॒yame॒vāva̭ rundhe | ṛ॒ṣa॒bho dakṣi̭ṇā॒ samṛ̭ddhyai | ā॒di॒tya-ñca॒ru-mmahi̭ṣyai gṛ॒he | i॒yaṃ-vā~ adi̭tiḥ | a॒syāme॒va prati̭tiṣṭhati | dhe॒nu-rdakṣi̭ṇā॒ samṛ̭ddhyai | bhagā̭ya ca॒ruṃ-vā~॒vātā̭yai gṛ॒he | bhaga̭me॒vāsmi̭-ndadhāti | vici̭ttagarbhā paṣṭhau॒hī dakṣi̭ṇā॒ samṛ̭ddhyai || 18 ||

nai॒r॒ṛ॒ta-ñca॒ru-mpa̭rivṛ॒ktyai̭ gṛ॒he kṛ॒ṣṇānāṃ᳚-vrī~hī॒ṇā-nna॒khani̭rbhinnam | pā॒pmāna̭me॒va nir-ṛ̭ti-nni॒rava̭dayate | kṛ॒ṣṇā kū॒ṭā dakṣi̭ṇā॒ samṛ̭ddhyai | ā॒gne॒ya-ma॒ṣṭāka̭pālagṃ senā॒nyo̭ gṛ॒he | senā̭me॒vāsya॒ saggśya̭ti | hira̭ṇya॒-ndakṣi̭ṇā॒ samṛ̭ddhyai | vā॒ru॒ṇa-ndaśa̭kapālagṃ sū॒tasya̭ gṛ॒he | va॒ru॒ṇa॒sa॒vame॒vāva̭-rundhe | ma॒hāni̭raṣṭo॒ dakṣi̭ṇā॒ samṛ̭ddhyai | mā॒ru॒tagṃ sa॒ptaka̭pāla-ṅgrāma॒ṇyo̭ gṛ॒he || 19 ||

annaṃ॒-vai~ ma॒rutaḥ̭ | anna̭me॒vāva̭-rundhe | pṛśñi॒-rdakṣi̭ṇā॒ samṛ̭ddhyai | sā॒vi॒tra-ndvāda̭śakapāla-ṅkṣa॒tturgṛ॒he prasū᳚tyai | u॒pa॒ddhva॒sto dakṣi̭ṇā॒ samṛ̭ddhyai | ā॒śvi॒na-ndvi̭kapā॒lagṃ sa̭graṃhī॒turgṛ॒he | a॒śvinau॒ vai de॒vānā᳚-mbhi॒ṣajau᳚ | tābhyā̭me॒vāsmai̭ bheṣa॒ja-ṅka̭roti | sa॒vā॒tyaṷ dakṣi̭ṇā॒ samṛ̭ddhyai | pau॒ṣṇa-ñca॒ru-mbhā̭gadu॒ghasya̭ gṛ॒he || 20 ||

annaṃ॒-vai~ pū॒ṣā | anna̭me॒vāva̭ rundhe | śyā॒mo dakṣi̭ṇā॒ samṛ̭ddhyai | rau॒dra-ṅgā̭vīdhu॒ka-ñca॒ruma̭kṣāvā॒pasya̭ gṛ॒he | a॒nta॒ta e॒va ru॒dra-nni॒rava̭dayate | śa॒bala॒ udvā̭ro॒ dakṣi̭ṇā॒ samṛ̭ddhyai | dvāda̭śai॒tāni̭ ha॒vīgṃṣi̭ bhavanti | dvāda̭śa॒ māsā᳚-ssaṃva~thsa॒raḥ | saṃ॒va~॒thsa॒reṇai॒vāsmai̭ rā॒ṣṭramava̭-rundhe | rā॒ṣṭrame॒va bha̭vati || 21 ||

yanna pra̭ti ni॒rvape᳚t | ra॒tnina̭ ā॒śiṣo-'va̭rundhīrann | prati॒ nirva̭pati | indrā̭ya su॒trāmṇḙ puro॒ḍāśa॒-mekā̭daśakapālam | indrā̭yāgṃho॒muce᳚ | ā॒śiṣa̭ e॒vāva̭rundhe | a॒ya-nno॒ rājā̭ vṛtra॒hā rājā̭ bhū॒tvā vṛ॒traṃ-va~̭ddhyā॒dityā̭ha | ā॒śiṣa̭me॒vaitāmāśā᳚ste | mai॒trā॒-bā॒r॒ha॒spa॒tya-mbha̭vati | śve॒tāyai᳚ śve॒tava̭thsāyai du॒gdhe || 22 ||

bā॒r॒ha॒spa॒tye mai॒tramapi̭ dadhāti | brahma̭ cai॒vāsmai᳚ kṣa॒tra-ñca̭ sa॒mīcī̭ dadhāti | atho॒ brahma̭nne॒va kṣa॒tra-mprati̭ṣṭhāpayati | bā॒r॒ha॒spa॒tyena॒ pūrvḙṇa॒ praca̭rati | mu॒kha॒ta e॒vāsmai॒ brahma॒ saggśya̭ti | atho॒ brahma̭nne॒va kṣa॒tra-ma॒nvāra̭mbhayati | sva॒ya॒-ṅkṛ॒tā vedi̭rbhavati | sva॒ya॒di॒nna-mba॒r॒hiḥ | sva॒ya॒kṛ॒nta i॒ddhmaḥ | ana̭bhijitasyā॒-bhiji̭tyai | tasmā॒-drājñā॒mara̭ṇya-ma॒bhiji̭tam | saiva śve॒tā śve॒tava̭thsā॒ dakṣi̭ṇā॒ samṛ̭ddhyai || 23 ||

(ra॒tni॒tvāya॒ - samṛ̭ddhyai - paṣṭhau॒hi dakṣi̭ṇā॒ samṛ̭ddhyai - grāma॒ṇyo̭ gṛ॒he - bhā̭gadu॒ghasya̭ gṛ॒he-bha̭vati - du॒gdhḙ - 'bhiji̭tyai॒ dve ca̭) (a. 3)

anuvākaṃ 4 - devasuvāṃ havīṃṣi

de॒va॒su॒vāme॒tāni̭ ha॒vīgṃṣi̭ bhavanti | e॒tāva̭nto॒ vai de॒vānāgṃ̭ sa॒vāḥ | ta e॒vāsmai̭ sa॒vā-npraya̭cchanti | ta ḙnagṃ suvante | a॒gnire॒vaina̭-ṅgṛ॒hapa̭tīnāgṃ suvate | somo॒ vana॒spatī̭nām | ru॒draḥ pa̭śū॒nām | bṛha॒spati̭-rvā॒cām | indro᳚ jye॒ṣṭhānā᳚m | mi॒tra-ssa॒tyānā᳚m || 24 ||

varṷṇo॒ dharma̭patīnām | e॒tade॒va sarva̭-mbhavati | sa॒vi॒tā tvā᳚ prasa॒vānāgṃ̭ suvatā॒miti॒ hasta̭-ṅgṛhṇāti॒ prasū᳚tyai | ye dḙvā deva॒suva॒-ssthetyā̭ha | ya॒thā॒ ya॒jure॒vai tat | ma॒ha॒te kṣa॒trāya̭ maha॒ta ādhi̭patyāya maha॒te jāna̭rājyā॒yetyā̭ha | ā॒śiṣa̭me॒vaitāmāśā᳚ste | e॒ṣa vo̭ bharatā॒ rājā॒ somo॒-'smāka̭-mbrāhma॒ṇānā॒gṃ॒ rājetyā̭ha | tasmā॒-thsoma̭rājāno brāhma॒ṇāḥ | prati॒ tyannāma̭ rā॒jyama̭dhā॒yītyā̭ha || 25 ||

rā॒jyame॒vāsmi॒-nprati̭ dadhāti | svā-nta॒nuvaṃ॒-va~rṷṇo aśiśre॒dityā̭ha | va॒ru॒ṇa॒sa॒vame॒vā-va̭rundhe | śuce᳚rmi॒trasya॒ vratyā̭ abhū॒metyā̭ha | śuci̭me॒vainaṃ॒-vra~tya̭-ṅkaroti | ama̭nmahi maha॒ta ṛ॒tasya॒ nāmetyā̭ha | ma॒nu॒ta e॒vaina᳚m | sarve॒ vrātā॒ varṷṇasyā bhūva॒nnityā̭ha | sarva̭vrātame॒vaina̭-ṅkaroti | vi mi॒tra evai॒rarā̭ti-matārī॒dityā̭ha || 26 ||

arā̭time॒vaina̭-ntārayati | asṷ̄ṣudanta ya॒jñiyā̭ ṛ॒tenetyā̭ha | sva॒daya̭tye॒vaina᳚m | vyṷ tri॒to ja̭ri॒māṇa̭-nna āna॒ḍityā̭ha | āyṷre॒vāsmi̭-ndadhāti | dvābhyāṃ॒-vi~mṛ̭ṣṭe | dvi॒pā-dyaja̭mānaḥ॒ prati̭ṣṭhityai | a॒gnī॒ṣo॒mīya̭sya॒ caikā̭daśakapālasya devasu॒vā-ñca̭ ha॒viṣā̭ma॒gnaye᳚ sviṣṭa॒kṛtḙ sa॒mava̭dyati | de॒vatā̭bhire॒vaina̭-mubha॒yataḥ॒ pari̭gṛhṇāti | vi॒ṣṇu॒kra॒mān kra̭mate( ) | viṣṇṷre॒va bhū॒tvemā~llo॒kā-na॒bhija̭yati || 27 ||

(sa॒tyānā̭-madhā॒yītyā̭-hātārī॒dityā̭ha-kramata॒ eka̭-ñca) (a. 4)

anuvākaṃ 5 - abhiṣekārthamapāṅgrahagrahaṇam

a॒rtheta॒-sstheti̭ juhoti | āhṷtyai॒vainā̭ ni॒ṣkrīya̭ gṛhṇāti | atho̭ ha॒viṣkṛ̭tānāme॒vābhighṛ̭tānā-ṅgṛhṇāti | vaha̭ntīnā-ṅgṛhṇāti | e॒tā vā a॒pāgṃ rā॒ṣṭram | rā॒ṣṭrame॒vāsmai̭ gṛhṇāti | atho॒ śriya̭me॒vaina̭ma॒bhi va̭hanti | a॒pā-mpati̭ra॒sītyā̭ha | mi॒thu॒name॒vākaḥ̭ | vṛṣā᳚-'syū॒rmirityā̭ha || 28 ||

ū॒rmi॒manta̭me॒vaina̭-ṅkaroti | vṛ॒ṣa॒se॒no̭-'sītyā̭ha | senā̭me॒vāsya॒ saggśya̭ti | vra॒ja॒kṣita॒-ssthetyā̭ha | e॒tā vā a॒pāṃ-vi~śaḥ̭ | viśa̭me॒vāsmai॒ paryṷ̄hati | ma॒rutā॒moja॒-ssthetyā̭ha | annaṃ॒-vai~ ma॒rutaḥ̭ | anna̭me॒vā va̭rundhe | sūrya̭varcasa॒-ssthetyā̭ha || 29 ||

rā॒ṣṭrame॒va va̭rca॒svya̭kaḥ | sūrya̭tvacasa॒-ssthetyā̭ha | sa॒tyaṃ-vā~ e॒tat | ya-dvarṣa̭ti | anṛ̭taṃ॒-ya~dā॒tapa̭ti॒ varṣa̭ti | sa॒tyā॒nṛ॒te e॒vāva̭rundhe | nainagṃ̭ satyānṛ॒te ṷdi॒te higg̭staḥ | ya e॒vaṃ-ve~da̭ | māndā॒-ssthetyā̭ha | rā॒ṣṭrame॒va bra̭hmavarca॒sya̭kaḥ || 30 ||

vāśā॒-ssthetyā̭ha | rā॒ṣṭrame॒va va॒śya̭kaḥ | śakva̭rī॒-ssthetyā̭ha | pa॒śavo॒ vai śakva̭rīḥ | pa॒śūne॒vāva̭ rundhe | vi॒śva॒bhṛta॒-ssthetyā̭ha | rā॒ṣṭrame॒va pa̭ya॒svya̭kaḥ | ja॒na॒bhṛta॒-ssthetyā̭ha | rā॒ṣṭrame॒vendri̭yā॒vya̭kaḥ | a॒gnestḙja॒syā᳚-ssthetyā̭ha || 31 ||

rā॒ṣṭrame॒va tḙja॒svya̭kaḥ | a॒pāmoṣa̭dhīnā॒gṃ॒ rasa॒-ssthetyā̭ha | rā॒ṣṭrame॒va ma̭dha॒vya̭makaḥ | sā॒ra॒sva॒ta-ṅgraha̭-ṅgṛhṇāti | e॒ṣā vā a॒pā-mpṛ॒ṣṭham | yathsara̭svatī | pṛ॒ṣṭhame॒vainagṃ̭ samā॒nānā᳚-ṅkaroti | ṣo॒ḍa॒śabhi̭-rgṛhṇāti | ṣoḍa̭śakalo॒ vai purṷṣaḥ | yāvā̭ne॒va purṷṣaḥ | tasmi̭n vī॒rya̭-ndadhāti | ṣo॒ḍa॒śabhi̭-rju॒hoti̭ ṣoḍa॒śabhi̭-rgṛhṇāti | dvātrigṃ̭śa॒-thsampa̭dyante | dvātrigṃ̭śadakṣarā 'nu॒ṣṭuk | vāga̭nu॒ṣṭu-phsarvā̭ṇi॒ chandāgṃ̭si | vā॒caivaina॒gṃ॒ sarvḙbhi॒-śchando̭bhi-ra॒bhiṣi̭ñcati || 32 ||

(ū॒rmirityā̭ha॒ - sūrya̭varcasa॒-ssthetyā̭ha - brahmavarca॒sya̭ka - steja॒syā᳚-ssthetyā̭hai॒va - purṷṣa॒-ṣṣaṭca̭) (a. 5)

anuvākaṃ 6 - abhiṣekārthajalasaṃskāraḥ

devī̭rāpa॒-ssa-mmadhṷmatī॒-rmadhṷmatībhi-ssṛjyaddhva॒mityā̭ha | brahma̭ṇai॒vainā॒-ssagṃ sṛ̭jati | anā̭dhṛṣṭā-ssīda॒tetyā̭ha | brahma̭ṇai॒vainā᳚-ssādayati | a॒nta॒rā hotṷśca॒ dhiṣṇi̭ya-mbrāhmaṇāccha॒gṃ॒ sina̭śca sādayati | ā॒gne॒yo vai hotā᳚ | ai॒ndro brā᳚hmaṇāccha॒gṃ॒sī | teja̭sā cai॒vendri॒yeṇa̭ cobha॒yato̭ rā॒ṣṭra-mpari̭gṛhṇāti | hira̭ṇye॒no-tpṷnāti | āhṷtyai॒ hi pa॒vitrā᳚bhyāmutpu॒nanti॒ vyāvṛ̭ttyai || 33 ||

śa॒tamā̭na-mbhavati | śa॒tāyuḥ॒ purṷṣa-śśa॒tendri̭yaḥ | āyṷṣye॒vendri॒ye prati̭tiṣṭhati | ani̭bhṛṣṭama॒sītyā̭ha | ani̭bhṛṣṭa॒gg॒ hyḙtat | vā॒co bandhu॒rityā̭ha | vā॒co hyḙṣa bandhuḥ̭ | ta॒po॒jā ityā̭ha | ta॒po॒jā hyḙtat | soma̭sya dā॒trama॒sītyā̭ha || 34 ||

soma̭sya॒ hyḙtaddā॒tram | śu॒krā vaḥ̭ śu॒kreṇotpṷnā॒mītyā̭ha | śu॒krā hyāpaḥ̭ | śu॒kragṃ hira̭ṇyam | ca॒ndrāśca॒ndreṇetyā̭ha | ca॒ndrā hyāpaḥ̭ | ca॒ndragṃ hira̭ṇyam | a॒mṛtā̭ a॒mṛte॒netyā̭ha | a॒mṛtā॒ hyāpaḥ̭ | a॒mṛta॒gṃ॒ hira̭ṇyam || 35 ||

svāhā̭ rāja॒sūyā॒yetyā̭ha | rā॒ja॒sūyā̭ya॒ hyḙnā utpu॒nāti̭ | sa॒dha॒mādo᳚ dyu॒mninī॒rūrja̭ e॒tā iti̭ vāru॒ṇyarcā gṛ̭hṇāti | va॒ru॒ṇa॒sa॒vame॒vā va̭rundhe | eka̭yā gṛhṇāti | e॒ka॒dhaiva yaja̭māne vī॒rya̭-ndadhāti | kṣa॒trasyolba̭masi kṣa॒trasya॒ yoni̭ra॒sīti̭ tā॒rpya-ñco॒ṣṇīṣa̭-ñca॒ praya̭cchati sayoni॒tvāya̭ | eka̭śatena darbhapuñjī॒laiḥ pa̭vayati | śa॒tāyu॒rvai purṷṣa-śśa॒tavī᳚ryaḥ | ā॒tmaika̭śa॒taḥ || 36 ||

yāvā̭ne॒va purṷṣaḥ | tasmi̭n vī॒rya̭-ndadhāti | daddhyā̭śayati | i॒ndri॒yame॒vā-va̭rundhe | u॒du॒mbara̭-māśayati | a॒nnādya॒syāva̭ ruddhyai | śaṣpā᳚ṇyāśayati | surā̭bali-me॒vaina̭-ṅkaroti | ā॒vida̭ e॒tā bha̭vanti | ā॒vida̭me॒vaina̭-ṅgamayanti || 37 ||

a॒gnire॒vaina॒-ṅgārha̭patyenāvati | indra̭ indri॒yeṇa̭ | pū॒ṣā pa॒śubhiḥ̭ | mi॒trāvarṷṇau prāṇāpā॒nābhyā᳚m | indro̭ vṛ॒trāya॒ vajra॒muda̭yacchat | sa diva̭malikhat | so᳚-'rya॒mṇaḥ panthā̭ abhavat | sa āvi̭nne॒ dyāvā̭pṛthi॒vī dhṛ॒tavra̭te॒ iti॒ dyāvā̭pṛthi॒vī upā̭dhāvat | sa ā॒bhyāme॒va prasṷ̄ta॒ indro̭ vṛ॒trāya॒ vajra॒-mprāha̭rat | āvi̭nne॒ dyāvā̭pṛthi॒vī dhṛ॒tavra̭te॒ iti॒ yadāha̭ || 38 ||

ā॒bhyāme॒va prasṷ̄to॒ yaja̭māno॒ vajra॒-mbhrātṛ̭vyāya॒ praha̭rati | āvi̭nnā de॒vyadi̭ti-rviśvarū॒pītyā̭ha | i॒yaṃ-vai~ de॒vyadi̭ti-rviśvarū॒pī | a॒syāme॒va prati̭ tiṣṭhati | āvi̭nno॒-'yama॒sāvā̭muṣyāya॒ṇo᳚-'syāṃ-vi~॒śya̭smi-nrā॒ṣṭra ityā̭ha | vi॒śaivainagṃ̭ rā॒ṣṭreṇa॒ sama̭rdhayati | ma॒ha॒te kṣa॒trāya̭ maha॒ta ādhi̭patyāya maha॒te jāna̭rājyā॒yetyā̭ha | ā॒śiṣa̭me॒vaitāmāśā᳚ste | e॒ṣa vo̭ bharatā॒ rājā॒ somo॒-'smāka̭-mbrāhma॒ṇānā॒gṃ॒ rājetyā̭ha | tasmā॒-thsoma̭rājāno brāhma॒ṇāḥ || 39 ||

indra̭sya॒ vajro̭-'si॒ vārtra̭ghna॒ iti॒ dhanuḥ॒ praya̭cchati॒ viji̭tyai | śa॒tru॒bādha̭nā॒-ssthetīṣūṋ | śatrṷ̄ne॒vāsya̭ bādhante | pā॒ta mā᳚ pra॒tyañca̭-mpā॒ta mā̭ ti॒ryañca̭ma॒nvañca̭-mmā pā॒tetyā̭ha | ti॒sro vai śa̭ra॒vyāḥ᳚ | pra॒tīcī̭ ti॒raścya॒nūcī᳚ | tābhya̭ e॒vaina̭-mpānti | di॒gbhyo mā̭ pā॒tetyā̭ha | di॒gbhya e॒vaina̭-mpānti | viśvā᳚bhyo mā nā॒ṣṭrābhyaḥ̭ pā॒tetyā̭ha | apa̭rimitāde॒vaina̭-mpānti | hira̭ṇyavarṇāvu॒ṣasāṃ᳚-vi~ro॒ka iti̭ tri॒ṣṭubhā̭ bā॒hū u-dgṛ̭hṇāti | i॒ndri॒yaṃ-vai~ vī॒rya̭-ntri॒ṣṭuk | i॒ndri॒yame॒va vī॒rya̭-mu॒pari̭ṣṭādā॒tman-dha̭tte || 40 ||

(vyāvṛ̭ttyai-dā॒trama॒sītyā̭hā॒-mṛta॒gṃ॒ hira̭ṇya-mekaśa॒to-ga̭maya॒n-tyāha̭-brāhmā॒ṇā-nā॒ṣṭrābhyaḥ̭ pā॒tetyā̭ha ca॒tvāri̭ ca) (a. 6)

anuvākaṃ 7 - digvyāsthāpanam

diśo॒ vyāsthā̭payati | di॒śāma॒bhiji̭tyai | yada̭nu pra॒krāme᳚t | a॒bhi diśo̭ jayet | uttu mā᳚dyet | mana॒sā-'nu॒ prakrā̭mati | a॒bhi diśo̭ jayati | nonmā᳚dyati | sa॒midha॒mā ti॒ṣṭhetyā̭ha | teja̭ e॒vāva̭rundhe || 41 ||

u॒grāmā ti॒ṣṭhetyā̭ha | i॒ndri॒yame॒vāva̭ rundhe | vi॒rāja॒mā ti॒ṣṭhetyā̭ha | a॒nnādya̭me॒vāva̭ rundhe | udī̭cī॒mā ti॒ṣṭhetyā̭ha | pa॒śūne॒vāva̭ rundhe | ū॒rdhvāmā ti॒ṣṭhetyā̭ha | su॒va॒rgame॒va lo॒ka-ma॒bhija̭yati | anūjji̭hīte | su॒va॒rgasya̭ lo॒kasya॒ sama̭ṣṭyai || 42 ||

mā॒ru॒ta e॒ṣa bha̭vati | annaṃ॒-vai~ ma॒rutaḥ̭ | anna̭me॒vāva̭ rundhe | eka̭vigṃśatikapālo bhavati॒ prati̭ṣṭhityai | yo̭-'raṇye 'nuvā॒kyo̭ ga॒ṇaḥ | ta-mma̭ddhya॒ta upa̭dadhāti | grā॒myaire॒va pa॒śubhi̭-rāra॒ṇyā-npa॒śū-npari̭gṛhṇāti | tasmā᳚-dgrā॒myaiḥ pa॒śubhi̭rāra॒ṇyāḥ pa॒śavaḥ॒ pari̭gṛhītāḥ | pṛthi̭rvai॒nyaḥ | a॒bhya̭ṣicyata || 43 ||

sa rā॒ṣṭra-nnābha̭vat | sa e॒tāni̭ pā॒rthānya̭paśyat | tānya̭juhot | tairvai sa rā॒ṣṭra-ma̭bhavat | yatpā॒rthāni̭ ju॒hoti̭ | rā॒ṣṭrame॒va bha̭vati | bā॒r॒ha॒spa॒tya-mpūrvḙṣāmutta॒ma-mbha̭vati | ai॒ndramutta̭reṣā-mpratha॒mam | brahma̭ cai॒vāsmai᳚ kṣa॒tra-ñca̭ sa॒mīcī̭ dadhāti | atho॒ brahma̭nne॒va kṣa॒tra-mprati̭ṣṭhāpayati || 44 ||

ṣaṭpu॒rastā̭-dabhiṣe॒kasya̭ juhoti | ṣaḍu॒pari̭ṣṭāt | dvāda̭śa॒ sa-mpa̭dyante | dvāda̭śa॒ māsā᳚-ssaṃva~thsa॒raḥ | saṃ॒va~॒thsa॒raḥ khalu॒ vai de॒vānā॒-mpūḥ | de॒vānā̭me॒va pura̭-mmaddhya॒to vyava̭sarpati | tasya॒ na kuta̭śca॒ nopā᳚vyā॒dho bha̭vati | bhū॒tānā॒-mave᳚ṣṭī-rjuhoti | atrā᳚tra॒ vai mṛ॒tyu-rjā̭yate | yatra̭ yatrai॒va mṛ॒tyu-rjāya̭te | tata̭ e॒vaina॒mava̭yajate | tasmā᳚-drāja॒sūyḙnejā॒na-ssarva॒māyṷreti | sarve॒ hya̭sya mṛ॒tyavo-'ve᳚ṣṭāḥ | tasmā᳚-drāja॒sūyḙnejā॒no nābhica̭rita॒vai | pra॒tyagḙna-mabhicā॒ra-sstṛ̭ṇute || 45 ||

(ru॒ndhe॒-sama̭ṣṭyā-asicyata-sthāpayati॒-jāya̭te॒ pañca̭ ca) (a. 7)

anuvākaṃ 8 - abhiṣekaḥ

soma̭sya॒ tviṣi̭rasi॒ tavḙva me॒ tviṣi̭rbhūyā॒diti̭ śārdūlaca॒rmopa̭stṛṇāti | yaiva some॒ tviṣiḥ̭ | yā śā᳚rdū॒le | tāme॒vāva̭ rundhe | mṛ॒tyorvā e॒ṣa varṇaḥ̭ | yacchā᳚rdū॒laḥ | a॒mṛta॒gṃ॒ hira̭ṇyam | a॒mṛta̭masi mṛ॒tyormā̭ pā॒hīti॒ hira̭ṇya॒-mupā᳚syati | a॒mṛta̭me॒va mṛ॒tyora॒nta-rdha̭tte | śa॒tamā̭na-mbhavati || 46 ||

śa॒tāyuḥ॒ purṷṣa-śśa॒tendri̭yaḥ | āyṷṣye॒vendri॒ye prati̭ tiṣṭhati | di॒dyonmā̭ pā॒hītyu॒pari̭ṣṭā॒dadhi॒ nida̭dhāti | u॒bha॒yata̭ e॒vāsmai॒ śarma̭ dadhāti | ave᳚ṣṭā danda॒śūkā॒ iti̭ klī॒bagṃ sīsḙna viddhyati | da॒nda॒śūkā̭-ne॒vāva̭ yajate | tasmā᳚-tklī॒ba-nda̭nda॒śūkā॒ dagṃśṷkāḥ | nira̭sta॒-nnamṷce॒-śśira॒ iti̭ lohitāya॒sa-nnira̭syati | pā॒pmāna̭me॒va namṷci-nni॒rava̭dayate | prā॒ṇā ā॒tmanaḥ॒ pūrvḙ-'bhi॒ṣicyā॒ ityā̭huḥ || 47 ||

somo॒ rājā॒ varṷṇaḥ | de॒vā dha̭rma॒suva̭śca॒ ye | te te॒ vācagṃ̭ suvantā॒-nte te᳚ prā॒ṇagṃ sṷvantā॒mityā̭ha | prā॒ṇāne॒vātmanaḥ॒ pūrvā̭-na॒bhiṣi̭ñcati | ya-dbrū॒yāt | a॒gnestvā॒ teja̭sā॒ 'bhiṣi̭ñcā॒mīti̭ | te॒ja॒svyḙva syā᳚t | du॒ścarmā॒ tu bha̭vet | soma̭sya tvā dyu॒mnenā॒-bhiṣi̭ñcā॒mītyā̭ha | sau॒myo vai de॒vata̭yā॒ purṷṣaḥ || 48 ||

svayai॒vaina̭-nde॒vata̭yā॒-'bhiṣi̭ñcati | a॒gne-steja॒setyā̭ha | teja̭ e॒vāsmi̭-ndadhāti | sūrya̭sya॒ varca॒setyā̭ha | varca̭ e॒vāsmi̭-ndadhāti | indra̭sye-ndri॒yeṇetyā̭ha | i॒ndri॒yame॒vāsmi̭-ndadhāti | mi॒trāvarṷṇayo-rvī॒ryḙṇetyā̭ha | vī॒rya̭me॒vāsmi̭-ndadhāti | ma॒rutā॒moja॒setyā̭ha || 49 ||

oja̭ e॒vāsmi̭-ndadhāti | kṣa॒trāṇā᳚-ṅkṣa॒trapa̭tira॒sītyā̭ha | kṣa॒trāṇā̭me॒vaina̭-ṅkṣa॒trapa̭ti-ṅkaroti | ati̭ di॒vaspā॒hītyā̭ha | atya॒nyā-npā॒hīti॒ vāvaitadā̭ha | sa॒māva̭vṛtranna-dha॒rāgudī̭cī॒-rityā̭ha | rā॒ṣṭrame॒vāsmi̭-ndhru॒vama̭kaḥ | u॒ccheṣa̭ṇena juhoti | u॒ccheṣa̭ṇabhāgo॒ vai ru॒draḥ | bhā॒ga॒dheyḙnai॒va ru॒dra-nni॒rava̭dayate || 50 ||

uda̭mpa॒retyāgnī᳚ddhre juhoti | e॒ṣā vai ru॒drasya॒ dik | svāyā̭me॒va di॒śi ru॒dra-nni॒rava̭dayate | rudra॒ yatte॒ krayī॒ para॒-nnāmetyā̭ha | yadvā a̭sya॒ krayī॒ para॒-nnāma̭ | tena॒ vā e॒ṣa hi̭nasti | yagṃ hi॒nasti̭ | tenai॒vainagṃ̭ sa॒ha śa̭mayati | tasmai̭ hu॒tama̭si ya॒meṣṭa̭ma॒sītyā̭ha | ya॒māde॒vāsya̭ mṛ॒tyumava̭yajate || 51 ||

prajā̭pate॒ na tvade॒tānya॒nya iti॒ tasyai̭ gṛ॒he jṷhuyāt | yā-ṅkā॒mayḙta rā॒ṣṭrama̭syai pra॒jā syā॒diti̭ | rā॒ṣṭrame॒vāsyai᳚ pra॒jā bha̭vati | pa॒rṇa॒-mayḙnā-ddhva॒ryu-ra॒bhiṣi̭ñcati | bra॒hma॒va॒rca॒same॒vāsmi॒n-tviṣi̭-ndadhāti | audṷmbareṇa rāja॒nyaḥ̭ | ūrja̭me॒vāsmi̭-nna॒nnādya̭-ndadhāti | āśva̭tthena॒ vaiśyaḥ̭ | viśa̭me॒vāsmi॒-npuṣṭi̭-ndadhāti | naiya̭grodhena॒ janyaḥ̭( ) | mi॒trāṇye॒vāsmai̭ kalpayati | atho॒ prati̭ṣṭhityai || 52 ||

(bha॒va॒ - tyā॒huḥ॒ - purṷṣa॒ - oja॒setyā̭ha - ni॒rava̭dayate - yajate॒ - janyo॒ dve ca̭) (a. 8)

anuvākaṃ 9 - sthārohaṇam. vijayaḥ

indra̭sya॒ vajro̭-'si॒ vārtra̭ghna॒ iti॒ ratha̭mu॒pāva̭harati॒ viji̭tyai | mi॒trāvarṷṇayostvā praśā॒stroḥ pra॒śiṣā̭ yuna॒jmītyā̭ha | brahma̭ṇai॒vaina̭-nde॒vatā᳚bhyāṃ-yu~nakti | pra॒ṣṭi॒vā॒hinaṃ̭-yu~nakti | pra॒ṣṭi॒vā॒hī vai dḙvara॒thaḥ | de॒va॒ra॒tha-me॒vāsmai̭ yunakti | trayo-'śvā̭ bhavanti | ratha̭ścatu॒rthaḥ | dvau sa̭vyeṣṭhasāra॒thī | ṣaṭ-thsampa̭dyante || 53 ||

ṣaḍvā ṛ॒tavaḥ̭ | ṛ॒tubhi̭re॒vainaṃ̭-yu~nakti | vi॒ṣṇu॒kra॒mān-kra̭mate | viṣṇṷre॒va bhū॒tvemān ~lo॒kāna॒bhija̭yati | yaḥ, kṣa॒triyaḥ॒ prati̭hitaḥ | so᳚-'nvāra̭bhate | rā॒ṣṭrame॒va bha̭vati | tri॒ṣṭubhā॒ 'nvāra̭bhate | i॒ndri॒yaṃ-vai~ tri॒ṣṭuk | i॒ndri॒yame॒va yaja̭māne dadhāti || 54 ||

ma॒rutā᳚-mprasa॒ve jḙṣa॒mityā̭ha | ma॒rudbhi̭re॒va prasṷ̄ta॒ ujja̭yati | ā॒pta-mmana॒ ityā̭ha | yade॒va mana॒saiphsī᳚t | tadā̭pat | rā॒ja॒nya̭-ñjināti | anā᳚krānta e॒vākra̭mate | vi vā e॒ṣa i̭ndri॒yeṇa̭ vī॒ryḙṇardhyate | yo rā̭ja॒nya̭-ñji॒nāti̭ | sama॒hami̭ndri॒yeṇa̭ vī॒ryḙṇetyā̭ha || 55 ||

i॒ndri॒yame॒va vī॒rya̭mā॒tman-dha̭tte | pa॒śū॒nā-mma॒nyura̭si॒ tavḙva me ma॒nyurbhṷ̄yā॒diti॒ vārā̭hī upā॒nahā॒vupa̭ muñcate | pa॒śū॒nāṃ-vā~ e॒ṣa ma॒nyuḥ | ya-dva̭rā॒haḥ | tenai॒va pa̭śū॒nā-mma॒nyumā॒tma-ndha̭tte | a॒bhi vā i॒yagṃ sṷṣuvā॒ṇa-ṅkā̭mayate | tasye᳚śva॒rendri॒yaṃ-vī~॒rya̭mādā̭toḥ | vārā̭hī upā॒nahā॒vupa̭muñcate | a॒syā e॒vāntardha̭tte | i॒ndri॒yasya̭ vī॒rya̭syānā᳚ttyai || 56 ||

namo̭ mā॒tre pṛ̭thi॒vyā ityā॒hāhigṃ̭ sāyai | iya̭da॒syā-yṷra॒syāyṷrme dhe॒hītyā̭ha | āyure॒vātman-dha̭tte | ūrga॒syūrja̭-mme dhe॒hītyā̭ha | ūrja̭ma॒vātma-ndha̭tte | yuṅṅa̭si॒ varco̭-'si॒ varco॒ mayi̭ dhe॒hītyā̭ha | varca̭ e॒vātma-ndha̭tte | e॒ka॒dhā bra॒hmaṇa॒ upa̭ harati | e॒ka॒dhaiva yaja̭māna॒ āyu॒rūrjaṃ॒-va~rco̭ dadhāti | ra॒tha॒vi॒mo॒ca॒nīyā̭ juhoti॒ prati̭ṣṭhityai || 57 ||

trayo-'śvā̭ bhavanti | ratha̭ścatu॒rthaḥ | tasmā᳚-cca॒turjṷhoti | yadu॒bhau sa॒hāva॒tiṣṭhḙtām | sa॒mā॒naṃ-lo~॒kami̭yātām | sa॒ha sa̭graṃhī॒trā ra̭tha॒vāha̭ne॒ ratha॒māda̭dhāti | su॒va॒rgāde॒vainaṃ̭-lo~॒kāda॒ntarda̭dhāti | ha॒gṃ॒sa-śśṷci॒ṣadityā da̭dhāti | brahma̭ṇai॒vaina̭-mupāva॒hara̭ti | brahma॒ṇā ''da̭dhāti | ati̭cchanda॒sā ''da̭dhāti | ati̭cchandā॒ vai sarvā̭ṇi॒ chandāgṃ̭si | sarvḙbhire॒vaina॒-ñchando̭bhi॒-rāda̭dhāti | varṣma॒ vā e॒ṣā chanda̭sām | yadati̭cchandāḥ | yadati̭cchandasā॒ dadhā̭ti | varṣmai॒vainagṃ̭ samā॒nānā᳚-ṅkaroti || 58 ||

(pa॒dya॒nte॒ - da॒dhā॒ti॒ - vī॒ryḙṇetyā॒hā - nā᳚tyai॒ - prati̭ṣṭhityai॒ - brahma॒ṇā-''da̭dhāti sa॒pta ca̭) (a. 9)

anuvākaṃ 10 - āsane samupaveśa-ssarvaissevyatva-ñca

mi॒tro̭-'si॒ varṷṇo॒-'sītyā̭ha | mai॒traṃ-vā~ ahaḥ̭ | vā॒ru॒ṇī rātriḥ̭ | a॒ho॒rā॒trābhyā̭-me॒vaina̭-mu॒pāva̭harati | mi॒tro̭-'si॒ varṷṇo॒sītyā̭ha | mai॒tro vai dakṣi̭ṇaḥ | vā॒ru॒ṇa-ssa॒vyaḥ | vai॒śva॒de॒vyā̭mikṣā᳚ | svame॒vainaṷ bhāga॒dheya̭-mu॒pāva̭harati | sama॒haṃ-vi~śvai᳚rde॒vai-rityā̭ha || 59 ||

vai॒śva॒de॒vyo̭ vai pra॒jāḥ | tā e॒vādyāḥ᳚ kurute | kṣa॒trasya॒ nābhi̭rasi kṣa॒trasya॒ yoni̭-ra॒sītya̭dhīvā॒samā-stṛ̭ṇāti sayoni॒tvāya̭ | syo॒nāmāsī̭da su॒ṣadā॒māsī॒detyā̭ha | ya॒thā॒ ya॒jure॒vai tat | mā tvā̭ higṃsī॒-nmā mā̭ higṃsī॒dityā॒hā-higṃ̭sāyai | niṣa̭sāda dhṛ॒tavra̭to॒ varṷṇaḥ pa॒styā᳚svā sāmrā᳚jyāya su॒kratu॒rityā̭ha | sāmrā᳚jyame॒vainagṃ̭ su॒kratṷ-ṅkaroti | brahmā(3)ntvagṃ rā̭jan-bra॒hmā-'si̭ savi॒tā-'si̭ sa॒tyasa̭va॒ ityā̭ha | sa॒vi॒tāra̭-me॒vainagṃ̭ sa॒tyasa̭va-ṅkaroti || 60 ||

brahmā(3)ntvagṃ rā̭jan-bra॒hmā-'sīndro̭-'si sa॒tyaujā॒ ityā̭ha | indra̭me॒vainagṃ̭ sa॒tyauja̭sa-ṅkaroti | brahmā(3)ntvagṃ rā̭jan-bra॒hmā-'si̭ mi॒tro̭-'si su॒śeva॒ ityā̭ha | mi॒trame॒vainagṃ̭ su॒śeva̭-ṅkaroti | brahmā(3)ntvagṃ rā̭jan-bra॒hmā-'si॒ varṷṇo-'si sa॒tyadha॒rmetyā̭ha | varṷṇame॒vainagṃ̭ sa॒tyadha̭rmāṇa-ṅkaroti | sa॒vi॒tā-'si̭ sa॒tyasa̭va॒ ityā̭ha | gā॒ya॒trī-me॒vaitenā̭bhi॒vyāha̭rati | indro̭-'si sa॒tyaujā॒ ityā̭ha | tri॒ṣṭubha̭-me॒vaitenā̭bhi॒-vyāha̭rati || 61 ||

mi॒tro̭-'si su॒śeva॒ ityā̭ha | jaga̭tī-me॒vaitenā̭bhi॒vyāha̭rati | sa॒tyame॒tā de॒vatāḥ᳚ | sa॒tyame॒tāni॒ chandāgṃ̭si | sa॒tyame॒vāva̭ rundhe | varṷṇo-'si sa॒tyadha॒rmetyā̭ha | a॒nu॒ṣṭubha̭-me॒vaitenā̭bhi॒vyāha̭rati | sa॒tyā॒nṛ॒te vā a̭nu॒ṣṭup | sa॒tyā॒nṛ॒te varṷṇaḥ | sa॒tyā॒nṛ॒te e॒vāva̭rundhe || 62 ||

nainagṃ̭ satyānṛ॒te ṷdi॒te higg̭staḥ | ya e॒vaṃ-ve~da̭ | indra̭sya॒ vajro̭-'si॒ vārtra̭ghna॒ iti॒ sphya-mpraya̭cchati | vajro॒ vai sphyaḥ | vajrḙṇai॒vāsmā̭ avarapa॒ragṃ ra̭ndhayati | e॒vagṃ hi tacchreyaḥ̭ | yada̭smā e॒te raddhyḙyuḥ | diśo॒-'bhya̭yagṃ rājā̭ 'bhū॒diti॒ pañcā॒kṣān-praya̭cchati | e॒te vai sarve-'yāḥ᳚ | apa̭rājāyina-me॒vaina̭-ṅkaroti || 63 ||

o॒da॒namudbrṷvate | pa॒ra॒me॒ṣṭhī vā e॒ṣaḥ | yado̭da॒naḥ | pa॒ra॒māme॒vaina॒gg॒ śriya̭-ṅgamayati | suślo॒kā~(4) suma̭ṅga॒lā~(4) satya̭rā॒jā(3)nityā̭ha | ā॒śiṣa̭me॒vaitāmā śā᳚ste | śau॒na॒-śśe॒pamākhyā̭payate | va॒ru॒ṇa॒pā॒śā-de॒vaina̭-mmuñcati | pa॒ra॒-śśa॒ta-mbha̭vati | śa॒tāyuḥ॒ purṷṣa-śśa॒tendri̭yaḥ( ) | āyṷṣye॒vendri॒ye prati̭tiṣṭhati | mā॒ru॒tasya॒ caika̭vigṃśatikapālasya vaiśvade॒vyai cā॒mikṣā̭yā a॒gnaye᳚ sviṣṭa॒kṛtḙ sa॒mava̭dyati | de॒vatā̭bhire॒vaina̭-mubha॒yataḥ॒ pari̭gṛhṇāti | a॒pā-nnaptre॒ svāho॒rjo naptre॒ svāhā॒-'gnayḙ gṛ॒hapa̭taye॒ svāheti̭ ti॒sra āhṷtī-rjuhoti | traya̭ i॒me lo॒kāḥ | e॒ṣvḙva lo॒keṣu॒ prati̭ tiṣṭhati || 64 ||

(de॒vairityā̭ha - sa॒tyasa̭va-ṅkaroti - tri॒ṣṭubha̭me॒vaitenā̭bhi॒ vyāha̭rati- satyānṛ॒te e॒vāva̭rundhe - karoti - śa॒tendri̭ya॒-ṣṣaṭca̭) (a. 10)

(e॒ta-dbrā᳚hmaṇāni - dhā॒tre - rā॒tnināṃ᳚ - devasu॒vā - ma॒rtheto॒ - devī॒--r diśaḥ॒ - soma॒sye - ndra̭sya - mi॒tro daśa̭)

(e॒ta-dbrā᳚hmaṇāni - vaiṣṇa॒va-ntri̭kapā॒la - mannaṃ॒-vai~ pū॒ṣā - vāśā॒-ssthetyā̭ha॒ - diśo॒ vyāsthā̭paya॒ - tyuda̭mpa॒retya॒ - brahmā(3)ntvagṃ rā̭ja॒-ñcatṷṣṣaṣṭiḥ

(e॒ta-dbrā᳚hmaṇāni॒ - prati̭ tiṣṭhati)

|| hariḥ̭ om ||

|| kṛṣṇa yajurvedīya taittirīya brāhmaṇe prathamāṣṭake saptamaḥ prapāṭhaka-ssamāptaḥ ||

Sanskrit — Devanagari (original)

कृष्ण यजुर्वेदीय तैत्तिरीय ब्राह्मणे प्रथमाष्टके सप्तमः प्रपाठकः - राजसूयानुब्राह्मणं

ओ-न्नमः परमात्मने, श्री महागणपतये नमः,

श्री गुरुभ्यो नमः । ह॒रिः॒ ओम् ॥

अनुवाकं 1 - शुनासीरीयेन्द्रतुरीयपञ्चावत्तीयापामार्गहोमाः

ए॒त-द्ब्रा᳚ह्मणान्ये॒व पञ्च॑ ह॒वीग्ंषि॑ । अथेन्द्रा॑य॒ शुना॒सीरा॑य पुरो॒डाश॒-न्द्वाद॑शकपाल॒-न्निर्व॑पति । सं॒वँ॒थ्स॒रो वा इन्द्रा॒ शुना॒सीरः॑ । सं॒वँ॒थ्स॒रेणै॒वास्मा॒ अन्न॒मव॑ रुन्धे । वा॒य॒व्य॑-म्पयो॑ भवति । वा॒युर्वै वृष्ट्यै᳚ प्रदापयि॒ता । स ए॒वास्मै॒ वृष्टि॒-म्प्रदा॑पयति । सौ॒र्य॑ एक॑कपालो भवति । सूर्ये॑ण॒ वा अ॒मुष्मि॑ँल्लो॒के वृष्टि॑र्धृ॒ता । स ए॒वास्मै॒ वृष्टि॒-न्नि य॑च्छति ॥ 1 ॥

द्वा॒द॒श॒ग॒वग्ं सीर॒-न्दक्षि॑णा॒ समृ॑द्ध्यै । दे॒वा॒सु॒रा-स्संयँ॑त्ता आसन्न् । ते दे॒वा अ॒ग्निम॑ब्रुवन्न् । त्वया॑ वी॒रेणासु॑रान॒-भिभ॑वा॒मेति॑ । सो᳚-ऽब्रवीत् । त्रे॒धा-ऽहमा॒त्मानं॒-विँक॑रिष्य॒ इति॑ । स त्रे॒धा ऽऽत्मानं॒-व्यँ॑कुरुत । अ॒ग्नि-न्तृती॑यम् । रु॒द्र-न्तृती॑यम् । वरु॑ण॒-न्तृती॑यम् ॥ 2 ॥

सो᳚-ऽब्रवीत् । क इ॒द-न्तु॒रीय॒मिति॑ । अ॒हमितीन्द्रो᳚-ऽब्रवीत् ।

स-न्तु सृ॑जावहा॒ इति॑ । तौ सम॑सृजेताम् । स इन्द्र॑स्तु॒रीय॑-मभवत् । यदिन्द्र॑-स्तु॒रीय॒-मभ॑वत् । तदि॑न्द्र-तुरी॒यस्ये᳚न्द्र-तुरीय॒त्वम् । ततो॒ वै दे॒वा व्य॑जयन्त । यदि॑न्द्रतुरी॒य-न्नि॑रु॒प्यते॒ विजि॑त्यै ॥ 3 ॥

व॒हिनी॑ धे॒नु-र्दक्षि॑णा । य-द्व॒हिनी᳚ । तेना᳚ग्ने॒यी ।

य-द्गौः । तेन॑ रौ॒द्री । य-द्धे॒नुः । तेनै॒न्द्री । यथ्स्त्री स॒ती दा॒न्ता । तेन॑ वारु॒णी समृ॑द्ध्यै । प्र॒जाप॑ति-र्य॒ज्ञम॑सृजत ॥ 4 ॥

तग्ं सृ॒ष्टग्ं रक्षाग्॑स्यजिघाग्ंसन्न् । स ए॒ताः प्र॒जाप॑ति-रा॒त्मनो॑ दे॒वता॒ निर॑मिमीत । ताभि॒र्वै स दि॒ग्भ्यो रक्षाग्ं॑सि॒ प्राणु॑दत । य-त्प॑ञ्चाव॒त्तीय॑-ञ्जु॒होति॑ । दि॒ग्भ्य ए॒व त-द्यज॑मानो॒ रक्षाग्ं॑सि॒ प्रणु॑दते । समू॑ढ॒ग्ं॒ रक्ष॒-स्सन्द॑ग्ध॒ग्ं॒ रक्ष॒ इत्या॑ह । रक्षाग्॑स्ये॒व सन्द॑हति । अ॒ग्नये॑ रक्षो॒घ्ने स्वाहेत्या॑ह । दे॒वता᳚भ्य ए॒व वि॑जिग्या॒नाभ्यो॑ भाग॒धेय॑-ङ्करोति । प्र॒ष्टि॒वा॒ही रथो॒ दक्षि॑णा॒ समृ॑द्ध्यै ॥ 5 ॥

इन्द्रो॑ वृ॒त्रग्ं ह॒त्वा । असु॑रा-न्परा॒भाव्य॑ । नमु॑चिमासु॒र-न्नाल॑भत । तग्ं श॒च्या॑-ऽगृह्णात् । तौ सम॑लभेताम् । सो᳚-ऽस्मा-द॒भिशु॑नतरो-ऽभवत् । सो᳚-ऽब्रवीत् । स॒धांग्ं सन्द॑धावहै । अथ॒ त्वा-ऽव॑ स्रक्ष्यामि । न मा॒ शुष्के॑ण॒ नार्द्रेण॑ हनः ॥ 6 ॥

न दिवा॒ न नक्त॒मिति॑ । स ए॒तम॒पा-म्फेन॑मसिञ्चत् । न वा ए॒ष शुष्को॒ नार्द्रो व्यु॑ष्टा ऽऽसीत् । अनु॑दित॒-स्सूर्यः॑ । न वा ए॒त-द्दिवा॒ न नक्त᳚म् । तस्यै॒तस्मि॑न् ँलो॒के । अ॒पा-म्फेने॑न॒ शिर॒ उद॑वर्तयत् । तदे॑न॒मन्व॑वर्तत । मित्र॑द्रु॒गिति॑ ॥ 7 ॥

स ए॒तान॑पामा॒र्गान॑जनयत् । तान॑जुहोत् । तैर्वै स रक्षा॒ग्॒स्यपा॑हत । यद॑पामार्ग हो॒मो भव॑ति । रक्ष॑सा॒-मप॑हत्यै । ए॒को॒ल् मु॒केन॑ यन्ति । तद्धि रक्ष॑सा-म्भाग॒धेय᳚म् । इ॒मा-न्दिशं॑-यँन्ति । ए॒षा वै रक्ष॑सा॒-न्दिक् । स्वाया॑मे॒व दि॒शि रक्षाग्ं॑सि हन्ति ॥ 8 ॥

स्वकृ॑त॒ इरि॑णे जुहोति प्रद॒रे वा᳚ । ए॒त-द्वै रक्ष॑सामा॒यत॑नम् । स्व ए॒वायत॑ने॒ रक्षाग्ं॑सि हन्ति । प॒र्ण॒मये॑न स्रु॒वेण॑ जुहोति । ब्रह्म॒ वै प॒र्णः । ब्रह्म॑णै॒व रक्षाग्ं॑सि हन्ति । दे॒वस्य॑ त्वा सवि॒तुः प्र॑स॒व इत्या॑ह । स॒वि॒तृप्र॑सूत ए॒व रक्षाग्ं॑सि हन्ति । ह॒तग्ं रक्षो ऽव॑धिष्म॒ रक्ष॒ इत्या॑ह । रक्ष॑सा॒ग्॒ स्तृत्यै᳚ । यद्वस्ते॒ त-द्दक्षि॑णा नि॒रव॑त्त्यै । अप्र॑तीक्ष॒मा य॑न्ति । रक्ष॑सा-म॒न्तर्हि॑त्यै ॥ 9 ॥

(य॒च्छ॒ति॒ - वरु॑ण॒-न्तृती॑यं॒ - ँविजि॑त्या - असृजत॒ - समृ॑द्ध्यै - हनो॒ - मित्र॑द्रु॒गिति॑ - हन्ति॒ - स्तृत्यै॒ त्रीणि॑ च) (अ. 1)

अनुवाकं 2 - देविकावहवींषि

धा॒त्रे पु॑रो॒डाश॒-न्द्वाद॑शकपाल॒-न्निर्व॑पति । सं॒वँ॒थ्स॒रो वै धा॒ता । सं॒वँ॒थ्स॒रेणै॒वास्मै᳚ प्र॒जाः प्रज॑नयति । अन्वे॒वास्मा॒ अनु॑मतिर्मन्यते । रा॒ते रा॒का । प्र सि॑नीवा॒ली ज॑नयति । प्र॒जास्वे॒व प्रजा॑तासु कु॒ह्वा॑ वाच॑-न्दधाति । मि॒थु॒नौ गावौ॒ दक्षि॑णा॒ समृ॑द्ध्यै । आ॒ग्ना॒वै॒ष्ण॒व-मेका॑दशकपाल॒-न्निर्व॑पति । ऐ॒न्द्रा॒वै॒ष्ण॒व-मेका॑दशकपालम् ॥ 10 ॥

वै॒ष्ण॒व-न्त्रि॑कपा॒लम् । वी॒र्यं॑-वाँ अ॒ग्निः । वी॒र्य॑मिन्द्रः॑ । वी॒र्यं॑-विँष्णुः॑ । प्र॒जा ए॒व प्रजा॑ता वी॒र्ये᳚ प्रति॑ष्ठापयति । तस्मा᳚-त्प्र॒जा वी॒र्या॑वतीः । वा॒म॒न ऋ॑ष॒भो व॒ही दक्षि॑णा । यद्व॒ही । तेना᳚ग्ने॒यः । यदृ॑ष॒भः ॥ 11 ॥

तेनै॒न्द्रः । यद्वा॑म॒नः । तेन॑ वैष्ण॒व-स्समृ॑द्ध्यै । अ॒ग्नी॒षो॒मीय॒-मेका॑दशकपाल॒-न्निर्व॑पति । इ॒न्द्रा॒सो॒मीय॒-मेका॑दशकपालम् । सौ॒म्य-ञ्च॒रुम् । सोमो॒ वै रे॑तो॒धाः । अ॒ग्निः प्र॒जाना᳚-म्प्रजनयि॒ता । वृ॒द्धाना॒मिन्द्रः॑ प्रदापयि॒ता । सोम॑ ए॒वास्मै॒ रेतो॒ दधा॑ति ॥ 12 ॥

अ॒ग्निः प्र॒जा-म्प्रज॑नयति । वृ॒द्धामिन्द्रः॒ प्रय॑च्छति । ब॒भ्रु-र्दक्षि॑णा॒ समृ॑द्ध्यै । सो॒मा॒पौ॒ष्ण-ञ्च॒रु-न्निर्व॑पति । ऐ॒न्द्रा॒पौ॒ष्ण-ञ्च॒रुम् । सोमो॒ वै रे॑तो॒धाः । पू॒षा प॑शू॒ना-म्प्र॑जनयि॒ता । वृ॒द्धाना॒मिन्द्रः॑ प्रदापयि॒ता । सोम॑ ए॒वास्मै॒ रेतो॒ दधा॑ति । पू॒षा प॒शू-न्प्रज॑नयति ॥ 13 ॥

वृ॒द्धानिन्द्रः॒ प्रय॑च्छति । पौ॒ष्णश्च॒रु-र्भ॑वति । इ॒यं-वैँ पू॒षा । अ॒स्यामे॒व प्रति॑ तिष्ठति । श्या॒मो दक्षि॑णा॒ समृ॑द्ध्यै । ब॒हु वै पुरु॑षो-ऽमे॒द्ध्य-मुप॑गच्छति । वै॒श्वा॒न॒र-न्द्वाद॑शकपाल॒-न्निर्व॑पति । सं॒वँ॒थ्स॒रो वा अ॒ग्नि-र्वै᳚श्वान॒रः । सं॒वँ॒थ्स॒रेणै॒वैनग्ग्॑ स्वदयति । हिर॑ण्य॒-न्दक्षि॑णा ॥ 14 ॥

प॒वित्रं॒-वैँ हिर॑ण्यम् । पु॒नात्ये॒वैन᳚म् । ब॒हु वै रा॑ज॒न्यो ऽनृ॑त-ङ्करोति । उप॑ जा॒म्यै हर॑ते । जि॒नाति॑ ब्राह्म॒णम् । वद॒त्यनृ॑तम् । अनृ॑ते॒ खलु॒ वै क्रि॒यमा॑णे॒ वरु॑णो गृह्णाति । वा॒रु॒णं-यँ॑व॒मय॑-ञ्च॒रु-न्निर्व॑पति । व॒रु॒ण॒पा॒शादे॒वैन॑-म्मुञ्चति । अश्वो॒ दक्षि॑णा । वा॒रु॒णो हि दे॒वत॒या-ऽश्व॒-स्समृ॑द्ध्यै ॥ 15 ॥

(ऐ॒न्द्रा॒वै॒ष्णा॒वमेका॑दशकपालं॒-ँयदृ॑ष॒भो- दधा॑ति-पू॒षा प॒शू-न्प्रज॑नयति॒-हिर॑ण्यं॒ दक्षि॑णा॒-दक्षि॒णैकं॑ च) (अ. 2)

अनुवाकं 3 - रत्निनां हवींषि

र॒त्निना॑मे॒तानि॑ ह॒वीग्ंषि॑ भवन्ति । ए॒ते वै रा॒ष्ट्रस्य॑ प्रदा॒तारः॑ । ए॒ते॑-ऽपादा॒तारः॑ । य ए॒व रा॒ष्ट्रस्य॑ प्रदा॒तारः॑ । ये॑-ऽपादा॒तारः॑ । त ए॒वास्मै॑ रा॒ष्ट्र-म्प्रय॑च्छन्ति । रा॒ष्ट्रमे॒व भ॑वति । य-थ्स॑मा॒हृत्य॑ नि॒र्वपे᳚त् । अर॑त्निन-स्स्युः । य॒था॒य॒थ-न्निर्व॑पति रत्नि॒त्वाय॑ ॥ 16 ॥

य-थ्स॒द्यो नि॒र्वपे᳚त् । याव॑ती॒मेके॑न ह॒विषा॒-ऽऽशिष॑मव रु॒न्धे । ताव॑ती॒मव॑ रुन्धीत । अ॒न्व॒ह-न्निर्व॑पति । भूय॑सीमे॒वाशिष॒मव॑ रुन्धे । भूय॑सो यज्ञक्र॒तूनुपै॑ति । बा॒र्॒ह॒स्प॒त्य-ञ्च॒रु-न्निर्व॑पति ब्र॒ह्मणो॑ गृ॒हे । मु॒ख॒त ए॒वास्मै॒ ब्रह्म॒ सग्ग्श्य॑ति । अथो॒ ब्रह्म॑न्ने॒व क्ष॒त्र-म॒न्वार॑म्भयति । शि॒ति॒पृ॒ष्ठो दक्षि॑णा॒ समृ॑द्ध्यै ॥ 17 ॥

ऐ॒न्द्र-मेका॑दशकपालग्ं राज॒न्य॑स्य गृ॒हे । इ॒न्द्रि॒यमे॒वाव॑ रुन्धे । ऋ॒ष॒भो दक्षि॑णा॒ समृ॑द्ध्यै । आ॒दि॒त्य-ञ्च॒रु-म्महि॑ष्यै गृ॒हे । इ॒यं-वाँ अदि॑तिः । अ॒स्यामे॒व प्रति॑तिष्ठति । धे॒नु-र्दक्षि॑णा॒ समृ॑द्ध्यै । भगा॑य च॒रुं-वाँ॒वाता॑यै गृ॒हे । भग॑मे॒वास्मि॑-न्दधाति । विचि॑त्तगर्भा पष्ठौ॒ही दक्षि॑णा॒ समृ॑द्ध्यै ॥ 18 ॥

नै॒र्॒ऋ॒त-ञ्च॒रु-म्प॑रिवृ॒क्त्यै॑ गृ॒हे कृ॒ष्णानां᳚-व्रीँही॒णा-न्न॒खनि॑र्भिन्नम् । पा॒प्मान॑मे॒व निर्-ऋ॑ति-न्नि॒रव॑दयते । कृ॒ष्णा कू॒टा दक्षि॑णा॒ समृ॑द्ध्यै । आ॒ग्ने॒य-म॒ष्टाक॑पालग्ं सेना॒न्यो॑ गृ॒हे । सेना॑मे॒वास्य॒ सग्ग्श्य॑ति । हिर॑ण्य॒-न्दक्षि॑णा॒ समृ॑द्ध्यै । वा॒रु॒ण-न्दश॑कपालग्ं सू॒तस्य॑ गृ॒हे । व॒रु॒ण॒स॒वमे॒वाव॑-रुन्धे । म॒हानि॑रष्टो॒ दक्षि॑णा॒ समृ॑द्ध्यै । मा॒रु॒तग्ं स॒प्तक॑पाल-ङ्ग्राम॒ण्यो॑ गृ॒हे ॥ 19 ॥

अन्नं॒-वैँ म॒रुतः॑ । अन्न॑मे॒वाव॑-रुन्धे । पृश्ञि॒-र्दक्षि॑णा॒ समृ॑द्ध्यै । सा॒वि॒त्र-न्द्वाद॑शकपाल-ङ्क्ष॒त्तुर्गृ॒हे प्रसू᳚त्यै । उ॒प॒द्ध्व॒स्तो दक्षि॑णा॒ समृ॑द्ध्यै । आ॒श्वि॒न-न्द्वि॑कपा॒लग्ं स॑ग्रंही॒तुर्गृ॒हे । अ॒श्विनौ॒ वै दे॒वाना᳚-म्भि॒षजौ᳚ । ताभ्या॑मे॒वास्मै॑ भेष॒ज-ङ्क॑रोति । स॒वा॒त्यौ॑ दक्षि॑णा॒ समृ॑द्ध्यै । पौ॒ष्ण-ञ्च॒रु-म्भा॑गदु॒घस्य॑ गृ॒हे ॥ 20 ॥

अन्नं॒-वैँ पू॒षा । अन्न॑मे॒वाव॑ रुन्धे । श्या॒मो दक्षि॑णा॒ समृ॑द्ध्यै । रौ॒द्र-ङ्गा॑वीधु॒क-ञ्च॒रुम॑क्षावा॒पस्य॑ गृ॒हे । अ॒न्त॒त ए॒व रु॒द्र-न्नि॒रव॑दयते । श॒बल॒ उद्वा॑रो॒ दक्षि॑णा॒ समृ॑द्ध्यै । द्वाद॑शै॒तानि॑ ह॒वीग्ंषि॑ भवन्ति । द्वाद॑श॒ मासा᳚-स्संवँथ्स॒रः । सं॒वँ॒थ्स॒रेणै॒वास्मै॑ रा॒ष्ट्रमव॑-रुन्धे । रा॒ष्ट्रमे॒व भ॑वति ॥ 21 ॥

यन्न प्र॑ति नि॒र्वपे᳚त् । र॒त्निन॑ आ॒शिषो-ऽव॑रुन्धीरन्न् । प्रति॒ निर्व॑पति । इन्द्रा॑य सु॒त्राम्णे॑ पुरो॒डाश॒-मेका॑दशकपालम् । इन्द्रा॑याग्ंहो॒मुचे᳚ । आ॒शिष॑ ए॒वाव॑रुन्धे । अ॒य-न्नो॒ राजा॑ वृत्र॒हा राजा॑ भू॒त्वा वृ॒त्रं-वँ॑द्ध्या॒दित्या॑ह । आ॒शिष॑मे॒वैतामाशा᳚स्ते । मै॒त्रा॒-बा॒र्॒ह॒स्प॒त्य-म्भ॑वति । श्वे॒तायै᳚ श्वे॒तव॑थ्सायै दु॒ग्धे ॥ 22 ॥

बा॒र्॒ह॒स्प॒त्ये मै॒त्रमपि॑ दधाति । ब्रह्म॑ चै॒वास्मै᳚ क्ष॒त्र-ञ्च॑ स॒मीची॑ दधाति । अथो॒ ब्रह्म॑न्ने॒व क्ष॒त्र-म्प्रति॑ष्ठापयति । बा॒र्॒ह॒स्प॒त्येन॒ पूर्वे॑ण॒ प्रच॑रति । मु॒ख॒त ए॒वास्मै॒ ब्रह्म॒ सग्ग्श्य॑ति । अथो॒ ब्रह्म॑न्ने॒व क्ष॒त्र-म॒न्वार॑म्भयति । स्व॒य॒-ङ्कृ॒ता वेदि॑र्भवति । स्व॒य॒दि॒न्न-म्ब॒र्॒हिः । स्व॒य॒कृ॒न्त इ॒द्ध्मः । अन॑भिजितस्या॒-भिजि॑त्यै । तस्मा॒-द्राज्ञा॒मर॑ण्य-म॒भिजि॑तम् । सैव श्वे॒ता श्वे॒तव॑थ्सा॒ दक्षि॑णा॒ समृ॑द्ध्यै ॥ 23 ॥

(र॒त्नि॒त्वाय॒ - समृ॑द्ध्यै - पष्ठौ॒हि दक्षि॑णा॒ समृ॑द्ध्यै - ग्राम॒ण्यो॑ गृ॒हे - भा॑गदु॒घस्य॑ गृ॒हे-भ॑वति - दु॒ग्धे॑ - ऽभिजि॑त्यै॒ द्वे च॑) (अ. 3)

अनुवाकं 4 - देवसुवां हवींषि

दे॒व॒सु॒वामे॒तानि॑ ह॒वीग्ंषि॑ भवन्ति । ए॒ताव॑न्तो॒ वै दे॒वानाग्ं॑ स॒वाः । त ए॒वास्मै॑ स॒वा-न्प्रय॑च्छन्ति । त ए॑नग्ं सुवन्ते । अ॒ग्निरे॒वैन॑-ङ्गृ॒हप॑तीनाग्ं सुवते । सोमो॒ वन॒स्पती॑नाम् । रु॒द्रः प॑शू॒नाम् । बृह॒स्पति॑-र्वा॒चाम् । इन्द्रो᳚ ज्ये॒ष्ठाना᳚म् । मि॒त्र-स्स॒त्याना᳚म् ॥ 24 ॥

वरु॑णो॒ धर्म॑पतीनाम् । ए॒तदे॒व सर्व॑-म्भवति । स॒वि॒ता त्वा᳚ प्रस॒वानाग्ं॑ सुवता॒मिति॒ हस्त॑-ङ्गृह्णाति॒ प्रसू᳚त्यै । ये दे॑वा देव॒सुव॒-स्स्थेत्या॑ह । य॒था॒ य॒जुरे॒वै तत् । म॒ह॒ते क्ष॒त्राय॑ मह॒त आधि॑पत्याय मह॒ते जान॑राज्या॒येत्या॑ह । आ॒शिष॑मे॒वैतामाशा᳚स्ते । ए॒ष वो॑ भरता॒ राजा॒ सोमो॒-ऽस्माक॑-म्ब्राह्म॒णाना॒ग्ं॒ राजेत्या॑ह । तस्मा॒-थ्सोम॑राजानो ब्राह्म॒णाः । प्रति॒ त्यन्नाम॑ रा॒ज्यम॑धा॒यीत्या॑ह ॥ 25 ॥

रा॒ज्यमे॒वास्मि॒-न्प्रति॑ दधाति । स्वा-न्त॒नुवं॒-वँरु॑णो अशिश्रे॒दित्या॑ह । व॒रु॒ण॒स॒वमे॒वा-व॑रुन्धे । शुचे᳚र्मि॒त्रस्य॒ व्रत्या॑ अभू॒मेत्या॑ह । शुचि॑मे॒वैनं॒-व्रँत्य॑-ङ्करोति । अम॑न्महि मह॒त ऋ॒तस्य॒ नामेत्या॑ह । म॒नु॒त ए॒वैन᳚म् । सर्वे॒ व्राता॒ वरु॑णस्या भूव॒न्नित्या॑ह । सर्व॑व्रातमे॒वैन॑-ङ्करोति । वि मि॒त्र एवै॒ररा॑ति-मतारी॒दित्या॑ह ॥ 26 ॥

अरा॑तिमे॒वैन॑-न्तारयति । असू॑षुदन्त य॒ज्ञिया॑ ऋ॒तेनेत्या॑ह । स्व॒दय॑त्ये॒वैन᳚म् । व्यु॑ त्रि॒तो ज॑रि॒माण॑-न्न आन॒डित्या॑ह । आयु॑रे॒वास्मि॑-न्दधाति । द्वाभ्यां॒-विँमृ॑ष्टे । द्वि॒पा-द्यज॑मानः॒ प्रति॑ष्ठित्यै । अ॒ग्नी॒षो॒मीय॑स्य॒ चैका॑दशकपालस्य देवसु॒वा-ञ्च॑ ह॒विषा॑म॒ग्नये᳚ स्विष्ट॒कृते॑ स॒मव॑द्यति । दे॒वता॑भिरे॒वैन॑-मुभ॒यतः॒ परि॑गृह्णाति । वि॒ष्णु॒क्र॒मान् क्र॑मते( ) । विष्णु॑रे॒व भू॒त्वेमाँल्लो॒का-न॒भिज॑यति ॥ 27 ॥

(स॒त्याना॑-मधा॒यीत्या॑-हातारी॒दित्या॑ह-क्रमत॒ एक॑-ञ्च) (अ. 4)

अनुवाकं 5 - अभिषेकार्थमपाङ्ग्रहग्रहणम्

अ॒र्थेत॒-स्स्थेति॑ जुहोति । आहु॑त्यै॒वैना॑ नि॒ष्क्रीय॑ गृह्णाति । अथो॑ ह॒विष्कृ॑तानामे॒वाभिघृ॑ताना-ङ्गृह्णाति । वह॑न्तीना-ङ्गृह्णाति । ए॒ता वा अ॒पाग्ं रा॒ष्ट्रम् । रा॒ष्ट्रमे॒वास्मै॑ गृह्णाति । अथो॒ श्रिय॑मे॒वैन॑म॒भि व॑हन्ति । अ॒पा-म्पति॑र॒सीत्या॑ह । मि॒थु॒नमे॒वाकः॑ । वृषा᳚-ऽस्यू॒र्मिरित्या॑ह ॥ 28 ॥

ऊ॒र्मि॒मन्त॑मे॒वैन॑-ङ्करोति । वृ॒ष॒से॒नो॑-ऽसीत्या॑ह । सेना॑मे॒वास्य॒ सग्ग्श्य॑ति । व्र॒ज॒क्षित॒-स्स्थेत्या॑ह । ए॒ता वा अ॒पां-विँशः॑ । विश॑मे॒वास्मै॒ पर्यू॑हति । म॒रुता॒मोज॒-स्स्थेत्या॑ह । अन्नं॒-वैँ म॒रुतः॑ । अन्न॑मे॒वा व॑रुन्धे । सूर्य॑वर्चस॒-स्स्थेत्या॑ह ॥ 29 ॥

रा॒ष्ट्रमे॒व व॑र्च॒स्व्य॑कः । सूर्य॑त्वचस॒-स्स्थेत्या॑ह । स॒त्यं-वाँ ए॒तत् । य-द्वर्ष॑ति । अनृ॑तं॒-यँदा॒तप॑ति॒ वर्ष॑ति । स॒त्या॒नृ॒ते ए॒वाव॑रुन्धे । नैनग्ं॑ सत्यानृ॒ते उ॑दि॒ते हिग्ग्॑स्तः । य ए॒वं-वेँद॑ । मान्दा॒-स्स्थेत्या॑ह । रा॒ष्ट्रमे॒व ब्र॑ह्मवर्च॒स्य॑कः ॥ 30 ॥

वाशा॒-स्स्थेत्या॑ह । रा॒ष्ट्रमे॒व व॒श्य॑कः । शक्व॑री॒-स्स्थेत्या॑ह । प॒शवो॒ वै शक्व॑रीः । प॒शूने॒वाव॑ रुन्धे । वि॒श्व॒भृत॒-स्स्थेत्या॑ह । रा॒ष्ट्रमे॒व प॑य॒स्व्य॑कः । ज॒न॒भृत॒-स्स्थेत्या॑ह । रा॒ष्ट्रमे॒वेन्द्रि॑या॒व्य॑कः । अ॒ग्नेस्ते॑ज॒स्या᳚-स्स्थेत्या॑ह ॥ 31 ॥

रा॒ष्ट्रमे॒व ते॑ज॒स्व्य॑कः । अ॒पामोष॑धीना॒ग्ं॒ रस॒-स्स्थेत्या॑ह । रा॒ष्ट्रमे॒व म॑ध॒व्य॑मकः । सा॒र॒स्व॒त-ङ्ग्रह॑-ङ्गृह्णाति । ए॒षा वा अ॒पा-म्पृ॒ष्ठम् । यथ्सर॑स्वती । पृ॒ष्ठमे॒वैनग्ं॑ समा॒नाना᳚-ङ्करोति । षो॒ड॒शभि॑-र्गृह्णाति । षोड॑शकलो॒ वै पुरु॑षः । यावा॑ने॒व पुरु॑षः । तस्मि॑न् वी॒र्य॑-न्दधाति । षो॒ड॒शभि॑-र्जु॒होति॑ षोड॒शभि॑-र्गृह्णाति । द्वात्रिग्ं॑श॒-थ्सम्प॑द्यन्ते । द्वात्रिग्ं॑शदक्षरा ऽनु॒ष्टुक् । वाग॑नु॒ष्टु-फ्सर्वा॑णि॒ छन्दाग्ं॑सि । वा॒चैवैन॒ग्ं॒ सर्वे॑भि॒-श्छन्दो॑भि-र॒भिषि॑ञ्चति ॥ 32 ॥

(ऊ॒र्मिरित्या॑ह॒ - सूर्य॑वर्चस॒-स्स्थेत्या॑ह - ब्रह्मवर्च॒स्य॑क - स्तेज॒स्या᳚-स्स्थेत्या॑है॒व - पुरु॑ष॒-ष्षट्च॑) (अ. 5)

अनुवाकं 6 - अभिषेकार्थजलसंस्कारः

देवी॑राप॒-स्स-म्मधु॑मती॒-र्मधु॑मतीभि-स्सृज्यद्ध्व॒मित्या॑ह । ब्रह्म॑णै॒वैना॒-स्सग्ं सृ॑जति । अना॑धृष्टा-स्सीद॒तेत्या॑ह । ब्रह्म॑णै॒वैना᳚-स्सादयति । अ॒न्त॒रा होतु॑श्च॒ धिष्णि॑य-म्ब्राह्मणाच्छ॒ग्ं॒ सिन॑श्च सादयति । आ॒ग्ने॒यो वै होता᳚ । ऐ॒न्द्रो ब्रा᳚ह्मणाच्छ॒ग्ं॒सी । तेज॑सा चै॒वेन्द्रि॒येण॑ चोभ॒यतो॑ रा॒ष्ट्र-म्परि॑गृह्णाति । हिर॑ण्ये॒नो-त्पु॑नाति । आहु॑त्यै॒ हि प॒वित्रा᳚भ्यामुत्पु॒नन्ति॒ व्यावृ॑त्त्यै ॥ 33 ॥

श॒तमा॑न-म्भवति । श॒तायुः॒ पुरु॑ष-श्श॒तेन्द्रि॑यः । आयु॑ष्ये॒वेन्द्रि॒ये प्रति॑तिष्ठति । अनि॑भृष्टम॒सीत्या॑ह । अनि॑भृष्ट॒ग्ग्॒ ह्ये॑तत् । वा॒चो बन्धु॒रित्या॑ह । वा॒चो ह्ये॑ष बन्धुः॑ । त॒पो॒जा इत्या॑ह । त॒पो॒जा ह्ये॑तत् । सोम॑स्य दा॒त्रम॒सीत्या॑ह ॥ 34 ॥

सोम॑स्य॒ ह्ये॑तद्दा॒त्रम् । शु॒क्रा वः॑ शु॒क्रेणोत्पु॑ना॒मीत्या॑ह । शु॒क्रा ह्यापः॑ । शु॒क्रग्ं हिर॑ण्यम् । च॒न्द्राश्च॒न्द्रेणेत्या॑ह । च॒न्द्रा ह्यापः॑ । च॒न्द्रग्ं हिर॑ण्यम् । अ॒मृता॑ अ॒मृते॒नेत्या॑ह । अ॒मृता॒ ह्यापः॑ । अ॒मृत॒ग्ं॒ हिर॑ण्यम् ॥ 35 ॥

स्वाहा॑ राज॒सूया॒येत्या॑ह । रा॒ज॒सूया॑य॒ ह्ये॑ना उत्पु॒नाति॑ । स॒ध॒मादो᳚ द्यु॒म्निनी॒रूर्ज॑ ए॒ता इति॑ वारु॒ण्यर्चा गृ॑ह्णाति । व॒रु॒ण॒स॒वमे॒वा व॑रुन्धे । एक॑या गृह्णाति । ए॒क॒धैव यज॑माने वी॒र्य॑-न्दधाति । क्ष॒त्रस्योल्ब॑मसि क्ष॒त्रस्य॒ योनि॑र॒सीति॑ ता॒र्प्य-ञ्चो॒ष्णीष॑-ञ्च॒ प्रय॑च्छति सयोनि॒त्वाय॑ । एक॑शतेन दर्भपुञ्जी॒लैः प॑वयति । श॒तायु॒र्वै पुरु॑ष-श्श॒तवी᳚र्यः । आ॒त्मैक॑श॒तः ॥ 36 ॥

यावा॑ने॒व पुरु॑षः । तस्मि॑न् वी॒र्य॑-न्दधाति । दद्ध्या॑शयति । इ॒न्द्रि॒यमे॒वा-व॑रुन्धे । उ॒दु॒म्बर॑-माशयति । अ॒न्नाद्य॒स्याव॑ रुद्ध्यै । शष्पा᳚ण्याशयति । सुरा॑बलि-मे॒वैन॑-ङ्करोति । आ॒विद॑ ए॒ता भ॑वन्ति । आ॒विद॑मे॒वैन॑-ङ्गमयन्ति ॥ 37 ॥

अ॒ग्निरे॒वैन॒-ङ्गार्ह॑पत्येनावति । इन्द्र॑ इन्द्रि॒येण॑ । पू॒षा प॒शुभिः॑ । मि॒त्रावरु॑णौ प्राणापा॒नाभ्या᳚म् । इन्द्रो॑ वृ॒त्राय॒ वज्र॒मुद॑यच्छत् । स दिव॑मलिखत् । सो᳚-ऽर्य॒म्णः पन्था॑ अभवत् । स आवि॑न्ने॒ द्यावा॑पृथि॒वी धृ॒तव्र॑ते॒ इति॒ द्यावा॑पृथि॒वी उपा॑धावत् । स आ॒भ्यामे॒व प्रसू॑त॒ इन्द्रो॑ वृ॒त्राय॒ वज्र॒-म्प्राह॑रत् । आवि॑न्ने॒ द्यावा॑पृथि॒वी धृ॒तव्र॑ते॒ इति॒ यदाह॑ ॥ 38 ॥

आ॒भ्यामे॒व प्रसू॑तो॒ यज॑मानो॒ वज्र॒-म्भ्रातृ॑व्याय॒ प्रह॑रति । आवि॑न्ना दे॒व्यदि॑ति-र्विश्वरू॒पीत्या॑ह । इ॒यं-वैँ दे॒व्यदि॑ति-र्विश्वरू॒पी । अ॒स्यामे॒व प्रति॑ तिष्ठति । आवि॑न्नो॒-ऽयम॒सावा॑मुष्याय॒णो᳚-ऽस्यां-विँ॒श्य॑स्मि-न्रा॒ष्ट्र इत्या॑ह । वि॒शैवैनग्ं॑ रा॒ष्ट्रेण॒ सम॑र्धयति । म॒ह॒ते क्ष॒त्राय॑ मह॒त आधि॑पत्याय मह॒ते जान॑राज्या॒येत्या॑ह । आ॒शिष॑मे॒वैतामाशा᳚स्ते । ए॒ष वो॑ भरता॒ राजा॒ सोमो॒-ऽस्माक॑-म्ब्राह्म॒णाना॒ग्ं॒ राजेत्या॑ह । तस्मा॒-थ्सोम॑राजानो ब्राह्म॒णाः ॥ 39 ॥

इन्द्र॑स्य॒ वज्रो॑-ऽसि॒ वार्त्र॑घ्न॒ इति॒ धनुः॒ प्रय॑च्छति॒ विजि॑त्यै । श॒त्रु॒बाध॑ना॒-स्स्थेतीषून्॑ । शत्रू॑ने॒वास्य॑ बाधन्ते । पा॒त मा᳚ प्र॒त्यञ्च॑-म्पा॒त मा॑ ति॒र्यञ्च॑म॒न्वञ्च॑-म्मा पा॒तेत्या॑ह । ति॒स्रो वै श॑र॒व्याः᳚ । प्र॒तीची॑ ति॒रश्च्य॒नूची᳚ । ताभ्य॑ ए॒वैन॑-म्पान्ति । दि॒ग्भ्यो मा॑ पा॒तेत्या॑ह । दि॒ग्भ्य ए॒वैन॑-म्पान्ति । विश्वा᳚भ्यो मा ना॒ष्ट्राभ्यः॑ पा॒तेत्या॑ह । अप॑रिमितादे॒वैन॑-म्पान्ति । हिर॑ण्यवर्णावु॒षसां᳚-विँरो॒क इति॑ त्रि॒ष्टुभा॑ बा॒हू उ-द्गृ॑ह्णाति । इ॒न्द्रि॒यं-वैँ वी॒र्य॑-न्त्रि॒ष्टुक् । इ॒न्द्रि॒यमे॒व वी॒र्य॑-मु॒परि॑ष्टादा॒त्मन्-ध॑त्ते ॥ 40 ॥

(व्यावृ॑त्त्यै-दा॒त्रम॒सीत्या॑हा॒-मृत॒ग्ं॒ हिर॑ण्य-मेकश॒तो-ग॑मय॒न्-त्याह॑-ब्राह्मा॒णा-ना॒ष्ट्राभ्यः॑ पा॒तेत्या॑ह च॒त्वारि॑ च) (अ. 6)

अनुवाकं 7 - दिग्व्यास्थापनम्

दिशो॒ व्यास्था॑पयति । दि॒शाम॒भिजि॑त्यै । यद॑नु प्र॒क्रामे᳚त् । अ॒भि दिशो॑ जयेत् । उत्तु मा᳚द्येत् । मन॒सा-ऽनु॒ प्रक्रा॑मति । अ॒भि दिशो॑ जयति । नोन्मा᳚द्यति । स॒मिध॒मा ति॒ष्ठेत्या॑ह । तेज॑ ए॒वाव॑रुन्धे ॥ 41 ॥

उ॒ग्रामा ति॒ष्ठेत्या॑ह । इ॒न्द्रि॒यमे॒वाव॑ रुन्धे । वि॒राज॒मा ति॒ष्ठेत्या॑ह । अ॒न्नाद्य॑मे॒वाव॑ रुन्धे । उदी॑ची॒मा ति॒ष्ठेत्या॑ह । प॒शूने॒वाव॑ रुन्धे । ऊ॒र्ध्वामा ति॒ष्ठेत्या॑ह । सु॒व॒र्गमे॒व लो॒क-म॒भिज॑यति । अनूज्जि॑हीते । सु॒व॒र्गस्य॑ लो॒कस्य॒ सम॑ष्ट्यै ॥ 42 ॥

मा॒रु॒त ए॒ष भ॑वति । अन्नं॒-वैँ म॒रुतः॑ । अन्न॑मे॒वाव॑ रुन्धे । एक॑विग्ंशतिकपालो भवति॒ प्रति॑ष्ठित्यै । यो॑-ऽरण्ये ऽनुवा॒क्यो॑ ग॒णः । त-म्म॑द्ध्य॒त उप॑दधाति । ग्रा॒म्यैरे॒व प॒शुभि॑-रार॒ण्या-न्प॒शू-न्परि॑गृह्णाति । तस्मा᳚-द्ग्रा॒म्यैः प॒शुभि॑रार॒ण्याः प॒शवः॒ परि॑गृहीताः । पृथि॑र्वै॒न्यः । अ॒भ्य॑षिच्यत ॥ 43 ॥

स रा॒ष्ट्र-न्नाभ॑वत् । स ए॒तानि॑ पा॒र्थान्य॑पश्यत् । तान्य॑जुहोत् । तैर्वै स रा॒ष्ट्र-म॑भवत् । यत्पा॒र्थानि॑ जु॒होति॑ । रा॒ष्ट्रमे॒व भ॑वति । बा॒र्॒ह॒स्प॒त्य-म्पूर्वे॑षामुत्त॒म-म्भ॑वति । ऐ॒न्द्रमुत्त॑रेषा-म्प्रथ॒मम् । ब्रह्म॑ चै॒वास्मै᳚ क्ष॒त्र-ञ्च॑ स॒मीची॑ दधाति । अथो॒ ब्रह्म॑न्ने॒व क्ष॒त्र-म्प्रति॑ष्ठापयति ॥ 44 ॥

षट्पु॒रस्ता॑-दभिषे॒कस्य॑ जुहोति । षडु॒परि॑ष्टात् । द्वाद॑श॒ स-म्प॑द्यन्ते । द्वाद॑श॒ मासा᳚-स्संवँथ्स॒रः । सं॒वँ॒थ्स॒रः खलु॒ वै दे॒वाना॒-म्पूः । दे॒वाना॑मे॒व पुर॑-म्मद्ध्य॒तो व्यव॑सर्पति । तस्य॒ न कुत॑श्च॒ नोपा᳚व्या॒धो भ॑वति । भू॒ताना॒-मवे᳚ष्टी-र्जुहोति । अत्रा᳚त्र॒ वै मृ॒त्यु-र्जा॑यते । यत्र॑ यत्रै॒व मृ॒त्यु-र्जाय॑ते । तत॑ ए॒वैन॒मव॑यजते । तस्मा᳚-द्राज॒सूये॑नेजा॒न-स्सर्व॒मायु॑रेति । सर्वे॒ ह्य॑स्य मृ॒त्यवो-ऽवे᳚ष्टाः । तस्मा᳚-द्राज॒सूये॑नेजा॒नो नाभिच॑रित॒वै । प्र॒त्यगे॑न-मभिचा॒र-स्स्तृ॑णुते ॥ 45 ॥

(रु॒न्धे॒-सम॑ष्ट्या-असिच्यत-स्थापयति॒-जाय॑ते॒ पञ्च॑ च) (अ. 7)

अनुवाकं 8 - अभिषेकः

सोम॑स्य॒ त्विषि॑रसि॒ तवे॑व मे॒ त्विषि॑र्भूया॒दिति॑ शार्दूलच॒र्मोप॑स्तृणाति । यैव सोमे॒ त्विषिः॑ । या शा᳚र्दू॒ले । तामे॒वाव॑ रुन्धे । मृ॒त्योर्वा ए॒ष वर्णः॑ । यच्छा᳚र्दू॒लः । अ॒मृत॒ग्ं॒ हिर॑ण्यम् । अ॒मृत॑मसि मृ॒त्योर्मा॑ पा॒हीति॒ हिर॑ण्य॒-मुपा᳚स्यति । अ॒मृत॑मे॒व मृ॒त्योर॒न्त-र्ध॑त्ते । श॒तमा॑न-म्भवति ॥ 46 ॥

श॒तायुः॒ पुरु॑ष-श्श॒तेन्द्रि॑यः । आयु॑ष्ये॒वेन्द्रि॒ये प्रति॑ तिष्ठति । दि॒द्योन्मा॑ पा॒हीत्यु॒परि॑ष्टा॒दधि॒ निद॑धाति । उ॒भ॒यत॑ ए॒वास्मै॒ शर्म॑ दधाति । अवे᳚ष्टा दन्द॒शूका॒ इति॑ क्ली॒बग्ं सीसे॑न विद्ध्यति । द॒न्द॒शूका॑-ने॒वाव॑ यजते । तस्मा᳚-त्क्ली॒ब-न्द॑न्द॒शूका॒ दग्ंशु॑काः । निर॑स्त॒-न्नमु॑चे॒-श्शिर॒ इति॑ लोहिताय॒स-न्निर॑स्यति । पा॒प्मान॑मे॒व नमु॑चि-न्नि॒रव॑दयते । प्रा॒णा आ॒त्मनः॒ पूर्वे॑-ऽभि॒षिच्या॒ इत्या॑हुः ॥ 47 ॥

सोमो॒ राजा॒ वरु॑णः । दे॒वा ध॑र्म॒सुव॑श्च॒ ये । ते ते॒ वाचग्ं॑ सुवन्ता॒-न्ते ते᳚ प्रा॒णग्ं सु॑वन्ता॒मित्या॑ह । प्रा॒णाने॒वात्मनः॒ पूर्वा॑-न॒भिषि॑ञ्चति । य-द्ब्रू॒यात् । अ॒ग्नेस्त्वा॒ तेज॑सा॒ ऽभिषि॑ञ्चा॒मीति॑ । ते॒ज॒स्व्ये॑व स्या᳚त् । दु॒श्चर्मा॒ तु भ॑वेत् । सोम॑स्य त्वा द्यु॒म्नेना॒-भिषि॑ञ्चा॒मीत्या॑ह । सौ॒म्यो वै दे॒वत॑या॒ पुरु॑षः ॥ 48 ॥

स्वयै॒वैन॑-न्दे॒वत॑या॒-ऽभिषि॑ञ्चति । अ॒ग्ने-स्तेज॒सेत्या॑ह । तेज॑ ए॒वास्मि॑-न्दधाति । सूर्य॑स्य॒ वर्च॒सेत्या॑ह । वर्च॑ ए॒वास्मि॑-न्दधाति । इन्द्र॑स्ये-न्द्रि॒येणेत्या॑ह । इ॒न्द्रि॒यमे॒वास्मि॑-न्दधाति । मि॒त्रावरु॑णयो-र्वी॒र्ये॑णेत्या॑ह । वी॒र्य॑मे॒वास्मि॑-न्दधाति । म॒रुता॒मोज॒सेत्या॑ह ॥ 49 ॥

ओज॑ ए॒वास्मि॑-न्दधाति । क्ष॒त्राणा᳚-ङ्क्ष॒त्रप॑तिर॒सीत्या॑ह । क्ष॒त्राणा॑मे॒वैन॑-ङ्क्ष॒त्रप॑ति-ङ्करोति । अति॑ दि॒वस्पा॒हीत्या॑ह । अत्य॒न्या-न्पा॒हीति॒ वावैतदा॑ह । स॒माव॑वृत्रन्न-ध॒रागुदी॑ची॒-रित्या॑ह । रा॒ष्ट्रमे॒वास्मि॑-न्ध्रु॒वम॑कः । उ॒च्छेष॑णेन जुहोति । उ॒च्छेष॑णभागो॒ वै रु॒द्रः । भा॒ग॒धेये॑नै॒व रु॒द्र-न्नि॒रव॑दयते ॥ 50 ॥

उद॑म्प॒रेत्याग्नी᳚द्ध्रे जुहोति । ए॒षा वै रु॒द्रस्य॒ दिक् । स्वाया॑मे॒व दि॒शि रु॒द्र-न्नि॒रव॑दयते । रुद्र॒ यत्ते॒ क्रयी॒ पर॒-न्नामेत्या॑ह । यद्वा अ॑स्य॒ क्रयी॒ पर॒-न्नाम॑ । तेन॒ वा ए॒ष हि॑नस्ति । यग्ं हि॒नस्ति॑ । तेनै॒वैनग्ं॑ स॒ह श॑मयति । तस्मै॑ हु॒तम॑सि य॒मेष्ट॑म॒सीत्या॑ह । य॒मादे॒वास्य॑ मृ॒त्युमव॑यजते ॥ 51 ॥

प्रजा॑पते॒ न त्वदे॒तान्य॒न्य इति॒ तस्यै॑ गृ॒हे जु॑हुयात् । या-ङ्का॒मये॑त रा॒ष्ट्रम॑स्यै प्र॒जा स्या॒दिति॑ । रा॒ष्ट्रमे॒वास्यै᳚ प्र॒जा भ॑वति । प॒र्ण॒-मये॑ना-द्ध्व॒र्यु-र॒भिषि॑ञ्चति । ब्र॒ह्म॒व॒र्च॒समे॒वास्मि॒न्-त्विषि॑-न्दधाति । औदु॑म्बरेण राज॒न्यः॑ । ऊर्ज॑मे॒वास्मि॑-न्न॒न्नाद्य॑-न्दधाति । आश्व॑त्थेन॒ वैश्यः॑ । विश॑मे॒वास्मि॒-न्पुष्टि॑-न्दधाति । नैय॑ग्रोधेन॒ जन्यः॑( ) । मि॒त्राण्ये॒वास्मै॑ कल्पयति । अथो॒ प्रति॑ष्ठित्यै ॥ 52 ॥

(भ॒व॒ - त्या॒हुः॒ - पुरु॑ष॒ - ओज॒सेत्या॑ह - नि॒रव॑दयते - यजते॒ - जन्यो॒ द्वे च॑) (अ. 8)

अनुवाकं 9 - स्थारोहणम्. विजयः

इन्द्र॑स्य॒ वज्रो॑-ऽसि॒ वार्त्र॑घ्न॒ इति॒ रथ॑मु॒पाव॑हरति॒ विजि॑त्यै । मि॒त्रावरु॑णयोस्त्वा प्रशा॒स्त्रोः प्र॒शिषा॑ युन॒ज्मीत्या॑ह । ब्रह्म॑णै॒वैन॑-न्दे॒वता᳚भ्यां-युँनक्ति । प्र॒ष्टि॒वा॒हिनं॑-युँनक्ति । प्र॒ष्टि॒वा॒ही वै दे॑वर॒थः । दे॒व॒र॒थ-मे॒वास्मै॑ युनक्ति । त्रयो-ऽश्वा॑ भवन्ति । रथ॑श्चतु॒र्थः । द्वौ स॑व्येष्ठसार॒थी । षट्-थ्सम्प॑द्यन्ते ॥ 53 ॥

षड्वा ऋ॒तवः॑ । ऋ॒तुभि॑रे॒वैनं॑-युँनक्ति । वि॒ष्णु॒क्र॒मान्-क्र॑मते । विष्णु॑रे॒व भू॒त्वेमान् ँलो॒कान॒भिज॑यति । यः, क्ष॒त्रियः॒ प्रति॑हितः । सो᳚-ऽन्वार॑भते । रा॒ष्ट्रमे॒व भ॑वति । त्रि॒ष्टुभा॒ ऽन्वार॑भते । इ॒न्द्रि॒यं-वैँ त्रि॒ष्टुक् । इ॒न्द्रि॒यमे॒व यज॑माने दधाति ॥ 54 ॥

म॒रुता᳚-म्प्रस॒वे जे॑ष॒मित्या॑ह । म॒रुद्भि॑रे॒व प्रसू॑त॒ उज्ज॑यति । आ॒प्त-म्मन॒ इत्या॑ह । यदे॒व मन॒सैफ्सी᳚त् । तदा॑पत् । रा॒ज॒न्य॑-ञ्जिनाति । अना᳚क्रान्त ए॒वाक्र॑मते । वि वा ए॒ष इ॑न्द्रि॒येण॑ वी॒र्ये॑णर्ध्यते । यो रा॑ज॒न्य॑-ञ्जि॒नाति॑ । सम॒हमि॑न्द्रि॒येण॑ वी॒र्ये॑णेत्या॑ह ॥ 55 ॥

इ॒न्द्रि॒यमे॒व वी॒र्य॑मा॒त्मन्-ध॑त्ते । प॒शू॒ना-म्म॒न्युर॑सि॒ तवे॑व मे म॒न्युर्भू॑या॒दिति॒ वारा॑ही उपा॒नहा॒वुप॑ मुञ्चते । प॒शू॒नां-वाँ ए॒ष म॒न्युः । य-द्व॑रा॒हः । तेनै॒व प॑शू॒ना-म्म॒न्युमा॒त्म-न्ध॑त्ते । अ॒भि वा इ॒यग्ं सु॑षुवा॒ण-ङ्का॑मयते । तस्ये᳚श्व॒रेन्द्रि॒यं-वीँ॒र्य॑मादा॑तोः । वारा॑ही उपा॒नहा॒वुप॑मुञ्चते । अ॒स्या ए॒वान्तर्ध॑त्ते । इ॒न्द्रि॒यस्य॑ वी॒र्य॑स्याना᳚त्त्यै ॥ 56 ॥

नमो॑ मा॒त्रे पृ॑थि॒व्या इत्या॒हाहिग्ं॑ सायै । इय॑द॒स्या-यु॑र॒स्यायु॑र्मे धे॒हीत्या॑ह । आयुरे॒वात्मन्-ध॑त्ते । ऊर्ग॒स्यूर्ज॑-म्मे धे॒हीत्या॑ह । ऊर्ज॑म॒वात्म-न्ध॑त्ते । युङ्ङ॑सि॒ वर्चो॑-ऽसि॒ वर्चो॒ मयि॑ धे॒हीत्या॑ह । वर्च॑ ए॒वात्म-न्ध॑त्ते । ए॒क॒धा ब्र॒ह्मण॒ उप॑ हरति । ए॒क॒धैव यज॑मान॒ आयु॒रूर्जं॒-वँर्चो॑ दधाति । र॒थ॒वि॒मो॒च॒नीया॑ जुहोति॒ प्रति॑ष्ठित्यै ॥ 57 ॥

त्रयो-ऽश्वा॑ भवन्ति । रथ॑श्चतु॒र्थः । तस्मा᳚-च्च॒तुर्जु॑होति । यदु॒भौ स॒हाव॒तिष्ठे॑ताम् । स॒मा॒नं-लोँ॒कमि॑याताम् । स॒ह स॑ग्रंही॒त्रा र॑थ॒वाह॑ने॒ रथ॒माद॑धाति । सु॒व॒र्गादे॒वैनं॑-लोँ॒काद॒न्तर्द॑धाति । ह॒ग्ं॒स-श्शु॑चि॒षदित्या द॑धाति । ब्रह्म॑णै॒वैन॑-मुपाव॒हर॑ति । ब्रह्म॒णा ऽऽद॑धाति । अति॑च्छन्द॒सा ऽऽद॑धाति । अति॑च्छन्दा॒ वै सर्वा॑णि॒ छन्दाग्ं॑सि । सर्वे॑भिरे॒वैन॒-ञ्छन्दो॑भि॒-राद॑धाति । वर्ष्म॒ वा ए॒षा छन्द॑साम् । यदति॑च्छन्दाः । यदति॑च्छन्दसा॒ दधा॑ति । वर्ष्मै॒वैनग्ं॑ समा॒नाना᳚-ङ्करोति ॥ 58 ॥

(प॒द्य॒न्ते॒ - द॒धा॒ति॒ - वी॒र्ये॑णेत्या॒हा - ना᳚त्यै॒ - प्रति॑ष्ठित्यै॒ - ब्रह्म॒णा-ऽऽद॑धाति स॒प्त च॑) (अ. 9)

अनुवाकं 10 - आसने समुपवेश-स्सर्वैस्सेव्यत्व-ञ्च

मि॒त्रो॑-ऽसि॒ वरु॑णो॒-ऽसीत्या॑ह । मै॒त्रं-वाँ अहः॑ । वा॒रु॒णी रात्रिः॑ । अ॒हो॒रा॒त्राभ्या॑-मे॒वैन॑-मु॒पाव॑हरति । मि॒त्रो॑-ऽसि॒ वरु॑णो॒सीत्या॑ह । मै॒त्रो वै दक्षि॑णः । वा॒रु॒ण-स्स॒व्यः । वै॒श्व॒दे॒व्या॑मिक्षा᳚ । स्वमे॒वैनौ॑ भाग॒धेय॑-मु॒पाव॑हरति । सम॒हं-विँश्वै᳚र्दे॒वै-रित्या॑ह ॥ 59 ॥

वै॒श्व॒दे॒व्यो॑ वै प्र॒जाः । ता ए॒वाद्याः᳚ कुरुते । क्ष॒त्रस्य॒ नाभि॑रसि क्ष॒त्रस्य॒ योनि॑-र॒सीत्य॑धीवा॒समा-स्तृ॑णाति सयोनि॒त्वाय॑ । स्यो॒नामासी॑द सु॒षदा॒मासी॒देत्या॑ह । य॒था॒ य॒जुरे॒वै तत् । मा त्वा॑ हिग्ंसी॒-न्मा मा॑ हिग्ंसी॒दित्या॒हा-हिग्ं॑सायै । निष॑साद धृ॒तव्र॑तो॒ वरु॑णः प॒स्त्या᳚स्वा साम्रा᳚ज्याय सु॒क्रतु॒रित्या॑ह । साम्रा᳚ज्यमे॒वैनग्ं॑ सु॒क्रतु॑-ङ्करोति । ब्रह्मा(3)न्त्वग्ं रा॑जन्-ब्र॒ह्मा-ऽसि॑ सवि॒ता-ऽसि॑ स॒त्यस॑व॒ इत्या॑ह । स॒वि॒तार॑-मे॒वैनग्ं॑ स॒त्यस॑व-ङ्करोति ॥ 60 ॥

ब्रह्मा(3)न्त्वग्ं रा॑जन्-ब्र॒ह्मा-ऽसीन्द्रो॑-ऽसि स॒त्यौजा॒ इत्या॑ह । इन्द्र॑मे॒वैनग्ं॑ स॒त्यौज॑स-ङ्करोति । ब्रह्मा(3)न्त्वग्ं रा॑जन्-ब्र॒ह्मा-ऽसि॑ मि॒त्रो॑-ऽसि सु॒शेव॒ इत्या॑ह । मि॒त्रमे॒वैनग्ं॑ सु॒शेव॑-ङ्करोति । ब्रह्मा(3)न्त्वग्ं रा॑जन्-ब्र॒ह्मा-ऽसि॒ वरु॑णो-ऽसि स॒त्यध॒र्मेत्या॑ह । वरु॑णमे॒वैनग्ं॑ स॒त्यध॑र्माण-ङ्करोति । स॒वि॒ता-ऽसि॑ स॒त्यस॑व॒ इत्या॑ह । गा॒य॒त्री-मे॒वैतेना॑भि॒व्याह॑रति । इन्द्रो॑-ऽसि स॒त्यौजा॒ इत्या॑ह । त्रि॒ष्टुभ॑-मे॒वैतेना॑भि॒-व्याह॑रति ॥ 61 ॥

मि॒त्रो॑-ऽसि सु॒शेव॒ इत्या॑ह । जग॑ती-मे॒वैतेना॑भि॒व्याह॑रति । स॒त्यमे॒ता दे॒वताः᳚ । स॒त्यमे॒तानि॒ छन्दाग्ं॑सि । स॒त्यमे॒वाव॑ रुन्धे । वरु॑णो-ऽसि स॒त्यध॒र्मेत्या॑ह । अ॒नु॒ष्टुभ॑-मे॒वैतेना॑भि॒व्याह॑रति । स॒त्या॒नृ॒ते वा अ॑नु॒ष्टुप् । स॒त्या॒नृ॒ते वरु॑णः । स॒त्या॒नृ॒ते ए॒वाव॑रुन्धे ॥ 62 ॥

नैनग्ं॑ सत्यानृ॒ते उ॑दि॒ते हिग्ग्॑स्तः । य ए॒वं-वेँद॑ । इन्द्र॑स्य॒ वज्रो॑-ऽसि॒ वार्त्र॑घ्न॒ इति॒ स्फ्य-म्प्रय॑च्छति । वज्रो॒ वै स्फ्यः । वज्रे॑णै॒वास्मा॑ अवरप॒रग्ं र॑न्धयति । ए॒वग्ं हि तच्छ्रेयः॑ । यद॑स्मा ए॒ते रद्ध्ये॑युः । दिशो॒-ऽभ्य॑यग्ं राजा॑ ऽभू॒दिति॒ पञ्चा॒क्षान्-प्रय॑च्छति । ए॒ते वै सर्वे-ऽयाः᳚ । अप॑राजायिन-मे॒वैन॑-ङ्करोति ॥ 63 ॥

ओ॒द॒नमुद्ब्रु॑वते । प॒र॒मे॒ष्ठी वा ए॒षः । यदो॑द॒नः । प॒र॒मामे॒वैन॒ग्ग्॒ श्रिय॑-ङ्गमयति । सुश्लो॒काँ(4) सुम॑ङ्ग॒लाँ(4) सत्य॑रा॒जा(3)नित्या॑ह । आ॒शिष॑मे॒वैतामा शा᳚स्ते । शौ॒न॒-श्शे॒पमाख्या॑पयते । व॒रु॒ण॒पा॒शा-दे॒वैन॑-म्मुञ्चति । प॒र॒-श्श॒त-म्भ॑वति । श॒तायुः॒ पुरु॑ष-श्श॒तेन्द्रि॑यः( ) । आयु॑ष्ये॒वेन्द्रि॒ये प्रति॑तिष्ठति । मा॒रु॒तस्य॒ चैक॑विग्ंशतिकपालस्य वैश्वदे॒व्यै चा॒मिक्षा॑या अ॒ग्नये᳚ स्विष्ट॒कृते॑ स॒मव॑द्यति । दे॒वता॑भिरे॒वैन॑-मुभ॒यतः॒ परि॑गृह्णाति । अ॒पा-न्नप्त्रे॒ स्वाहो॒र्जो नप्त्रे॒ स्वाहा॒-ऽग्नये॑ गृ॒हप॑तये॒ स्वाहेति॑ ति॒स्र आहु॑ती-र्जुहोति । त्रय॑ इ॒मे लो॒काः । ए॒ष्वे॑व लो॒केषु॒ प्रति॑ तिष्ठति ॥ 64 ॥

(दे॒वैरित्या॑ह - स॒त्यस॑व-ङ्करोति - त्रि॒ष्टुभ॑मे॒वैतेना॑भि॒ व्याह॑रति- सत्यानृ॒ते ए॒वाव॑रुन्धे - करोति - श॒तेन्द्रि॑य॒-ष्षट्च॑) (अ. 10)

(ए॒त-द्ब्रा᳚ह्मणानि - धा॒त्रे - रा॒त्निनां᳚ - देवसु॒वा - म॒र्थेतो॒ - देवी॒--र् दिशः॒ - सोम॒स्ये - न्द्र॑स्य - मि॒त्रो दश॑)

(ए॒त-द्ब्रा᳚ह्मणानि - वैष्ण॒व-न्त्रि॑कपा॒ल - मन्नं॒-वैँ पू॒षा - वाशा॒-स्स्थेत्या॑ह॒ - दिशो॒ व्यास्था॑पय॒ - त्युद॑म्प॒रेत्य॒ - ब्रह्मा(3)न्त्वग्ं रा॑ज॒-ञ्चतु॑ष्षष्टिः

(ए॒त-द्ब्रा᳚ह्मणानि॒ - प्रति॑ तिष्ठति)

॥ हरिः॑ ओम् ॥

॥ कृष्ण यजुर्वेदीय तैत्तिरीय ब्राह्मणे प्रथमाष्टके सप्तमः प्रपाठक-स्समाप्तः ॥