ମଙ୍ଗଲଶ୍ଲୋକାଃ
ମଙ୍ଗଲଂ ଭଗଵାନ୍ଵିଷ୍ଣୁର୍ମଙ୍ଗଲଂ ମଧୁସୂଦନଃ ।
1
ମଙ୍ଗଲଂ ପୁଣ୍ଡରୀକାକ୍ଷୋ ମଙ୍ଗଲଂ ଗରୁଡଧ୍ଵଜଃ ॥ 1
ମଙ୍ଗଲଂ କୋସଲେନ୍ଦ୍ରାଯ ମହନୀଯଗୁଣାବ୍ଧଯେ ।
2
ଚକ୍ରଵର୍ତିତନୂଜାଯ ସାର୍ଵଭୌମାଯ ମଙ୍ଗଲମ୍ ॥ 2
ଵେଦଵେଦାନ୍ତଵେଦ୍ଯାଯ ମେଘଶ୍ଯାମଲମୂର୍ତଯେ ।
3
ପୁଂସାଂ ମୋହନରୂପାଯ ପୁଣ୍ଯଶ୍ଲୋକାଯ ମଙ୍ଗଲମ୍ ॥ 3
ଵିଶ୍ଵାମିତ୍ରାନ୍ତରଙ୍ଗାଯ ମିଥିଲାନଗରୀପତେଃ ।
4
ଭାଗ୍ଯାନାଂ ପରିପାକାଯ ଭଵ୍ଯରୂପାଯ ମଙ୍ଗଲମ୍ ॥ 4
ପିତୃଭକ୍ତାଯ ସତତଂ ଭ୍ରାତୃଭିଃ ସହ ସୀତଯା ।
5
ନନ୍ଦିତାଖିଲଲୋକାଯ ରାମଚନ୍ଦ୍ରାଯ ମଙ୍ଗଲମ୍ ॥ 5
ତ୍ଯକ୍ତସାକେତଵାସାଯ ଚିତ୍ରକୂଟଵିହାରିଣେ ।
6
ସେଵ୍ଯାଯ ସର୍ଵଯମିନାଂ ଧୀରୋଦାତ୍ତାଯ ମଙ୍ଗଲମ୍ ॥ 6
ସୌମିତ୍ରିଣା ଚ ଜାନକ୍ଯା ଚାପବାଣାସିଧାରିଣା ।
7
ସଂସେଵ୍ଯାଯ ସଦା ଭକ୍ତ୍ଯା ସାନୁଜାଯାସ୍ତୁ ମଙ୍ଗଲମ୍ ॥ 7
ଦଣ୍ଡକାରଣ୍ଯଵାସାଯ ଖଣ୍ଡିତାମରଶତ୍ରଵେ ।
8
ଗୃଧ୍ରରାଜାଯ ଭକ୍ତାଯ ମୁକ୍ତିଦାଯାସ୍ତୁ ମଙ୍ଗଲମ୍ ॥ 8
ସାଦରଂ ଶବରୀଦତ୍ତଫଲମୂଲାଭିଲାଷିଣେ ।
9
ସୌଲଭ୍ଯପରିପୂର୍ଣାଯ ସତ୍ତ୍ଵୋଦ୍ଯୁକ୍ତାଯ ମଙ୍ଗଲମ୍ ॥ 9
ହନୂମତ୍ସମଵେତାଯ ହରୀଶାଭୀଷ୍ଟଦାଯିନେ ।
10
ଵାଲିପ୍ରମଥନାଯାସ୍ତୁ ମହାଧୀରାଯ ମଙ୍ଗଲମ୍ ॥ 10
ଶ୍ରୀମତେ ରଘୁଵୀରାଯ ସେତୁଲଙ୍ଘିତସିନ୍ଧଵେ ।
11
ଜିତରାକ୍ଷସରାଜାଯ ରଣଧୀରାଯ ମଙ୍ଗଲମ୍ ॥ 11
ଆସାଦ୍ଯ ନଗରୀଂ ଦିଵ୍ଯାମଭିଷିକ୍ତାଯ ସୀତଯା ।
12
ରାଜାଧିରାଜରାଜାଯ ରାମଭଦ୍ରାଯ ମଙ୍ଗଲମ୍ ॥ 12
ଵିଭୀଷଣକୃତେ ପ୍ରୀତ୍ଯା ଵିଶ୍ଵାଭୀଷ୍ଟପ୍ରଦାଯିନେ ।
13
ଜାନକୀପ୍ରାଣନାଥାଯ ସଦା ରାମାଯ ମଙ୍ଗଲମ୍ ॥ 13
—-
ଶ୍ରୀରାମଂ ତ୍ରିଜଗଦ୍ଗୁରୁଂ ସୁରଵରଂ ସୀତାମନୋନାଯକଂ
ଶ୍ଯାମାଙ୍ଗଂ ଶଶିକୋଟିପୂର୍ଣଵଦନଂ ଚଞ୍ଚତ୍କଲାକୌସ୍ତୁଭମ୍ ।
ସୌମ୍ଯଂ ସତ୍ଯଗୁଣୋତ୍ତମଂ ସୁସରଯୂତୀରେ ଵସନ୍ତଂ ପ୍ରଭୁଂ
14
ତ୍ରାତାରଂ ସକଲାର୍ଥସିଦ୍ଧିସହିତଂ ଵନ୍ଦେ ରଘୂଣାଂ ପତିମ୍ ॥ 14
ଶ୍ରୀରାଘଵଂ ଦଶରଥାତ୍ମଜମପ୍ରମେଯଂ
ସୀତାପତିଂ ରଘୁଵରାନ୍ଵଯରତ୍ନଦୀପମ୍ ।
ଆଜାନୁବାହୁମରଵିନ୍ଦଦଲାଯତାକ୍ଷଂ
15
ରାମଂ ନିଶାଚରଵିନାଶକରଂ ନମାମି ॥ 15
ଶ୍ରୀରାମଚନ୍ଦ୍ର କରୁଣାକର ରାଘଵେନ୍ଦ୍ର
ରାଜେନ୍ଦ୍ରଚନ୍ଦ୍ର ରଘୁଵଂଶସମୁଦ୍ରଚନ୍ଦ୍ର ।
ସୁଗ୍ରୀଵନେତ୍ରଯୁଗଲୋତ୍ପଲ-ପୂର୍ଣଚନ୍ଦ୍ର
16
ସୀତାମନଃକୁମୁଦଚନ୍ଦ୍ର ନମୋ ନମସ୍ତେ ॥ 16
ସୀତାମନୋମାନସରାଜହଂସ
ସଂସାରସନ୍ତାପହର କ୍ଷମାଵନ୍ ।
ଶ୍ରୀରାମ ଦୈତ୍ଯାନ୍ତକ ଶାନ୍ତରୂପ
17
ଶ୍ରୀତାରକବ୍ରହ୍ମ ନମୋ ନମସ୍ତେ ॥ 17
ଵିଷ୍ଣୋ ରାଘଵ ଵାସୁଦେଵ ନୃହରେ ଦେଵୌଘଚୂଡାମଣେ ।
18
ସଂସାରାର୍ଣଵକର୍ଣଧାରକ ହରେ କୃଷ୍ଣାଯ ତୁଭ୍ଯଂ ନମଃ ॥ 18
ସୁଗ୍ରୀଵାଦିସମସ୍ତଵାନରଵରୈସ୍ସଂସେଵ୍ଯମାନଂ ସଦା ।
19
ଵିଶ୍ଵାମିତ୍ରପରାଶରାଦିମୁନିଭିସ୍ସଂସ୍ତୂଯମାନଂ ଭଜେ ॥ 19
ରାମଂ ଚନ୍ଦନଶୀତଲଂ କ୍ଷିତିସୁତାମୋହାକରଂ ଶ୍ରୀକରଂ
ଵୈଦେହୀନଯନାରଵିନ୍ଦମିହିରଂ ସମ୍ପୂର୍ଣଚନ୍ଦ୍ରାନନମ୍ ।
ରାଜାନଂ କରୁଣାସମେତନଯନଂ ସୀତାମନୋନନ୍ଦନଂ
20
ସୀତାଦର୍ପଣଚାରୁଗଣ୍ଡଲଲିତଂ ଵନ୍ଦେ ସଦା ରାଘଵମ୍ ॥ 20
ଜାନାତି ରାମ ତଵ ନାମରୁଚିଂ ମହେଶୋ
ଜାନାତି ଗୌତମସତୀ ଚରଣପ୍ରଭାଵମ୍ ।
ଜାନାତି ଦୋର୍ବଲପରାକ୍ରମମୀଶଚାପୋ
21
ଜାନାତ୍ଯମୋଘପଟୁବାଣଗତିଂ ପଯୋଧିଃ ॥ 21
ମାତା ରାମୋ ମତ୍ପିତା ରାମଚନ୍ଦ୍ରୋ
ଭ୍ରାତା ରାମୋ ମତ୍ସଖା ରାଘଵେଶଃ ।
ସର୍ଵସ୍ଵଂ ମେ ରାମଚନ୍ଦ୍ରୋ ଦାଯାଲୁ-
22
ର୍ନାନ୍ଯଂ ଦୈଵଂ ନୈଵ ଜାନେ ନ ଜାନେ ॥ 22
ଵିମଲକମଲନେତ୍ରଂ ଵିସ୍ଫୁରନ୍ନୀଲଗାତ୍ରଂ
ତପନକୁଲପଵିତ୍ରଂ ଦାନଵଧ୍ଵନ୍ତମିତ୍ରମ୍ ।
ଭୁଵନଶୁଭଚରିତ୍ରଂ ଭୂମିପୁତ୍ରୀକଲତ୍ରଂ
23
ଦଶରଥଵରପୁତ୍ରଂ ନୌମି ରାମାଖ୍ଯମିତ୍ରମ୍ ॥ 23
ମାର୍ଗେ ମାର୍ଗେ ଶାଖିନାଂ ରତ୍ନଵେଦୀ
ଵେଦ୍ଯାଂ ଵେଦ୍ଯାଂ କିନ୍ନରୀବୃନ୍ଦଗୀତମ୍ ।
ଗୀତେ ଗୀତେ ମଞ୍ଜୁଲାଲାପଗୋଷ୍ଠୀ
24
ଗୋଷ୍ଠ୍ଯାଂ ଗୋଷ୍ଠ୍ଯାଂ ତ୍ଵତ୍କଥା ରାମଚନ୍ଦ୍ର ॥ 24
ଵୃକ୍ଷେ ଵୃକ୍ଷେ ଵୀକ୍ଷିତାଃ ପକ୍ଷିସଙ୍ଘାଃ
ସଙ୍ଘେ ସଙ୍ଘେ ମଞ୍ଜୁଲାମୋଦଵାକ୍ଯମ୍ ।
ଵାକ୍ଯେ ଵାକ୍ଯେ ମଞ୍ଜୁଲାଲାପଗୋଷ୍ଠୀ
25
ଗୋଷ୍ଠ୍ଯାଂ ଗୋଷ୍ଠ୍ଯାଂ ତ୍ଵତ୍କଥା ରାମଚନ୍ଦ୍ର ॥ 25
ଦୁରିତତିମିରଚନ୍ଦ୍ରୋ ଦୁଷ୍ଟକଞ୍ଜାତଚନ୍ଦ୍ରଃ
ସୁରକୁଵଲଯଚନ୍ଦ୍ରସ୍ସୂର୍ଯଵଂଶାବ୍ଧିଚନ୍ଦ୍ରଃ ।
ସ୍ଵଜନନିଵହଚନ୍ଦ୍ରଶ୍ଶତ୍ରୁରାଜୀଵଚନ୍ଦ୍ରଃ
26
ପ୍ରଣତକୁମୁଦଚନ୍ଦ୍ରଃ ପାତୁ ମାଂ ରାମଚନ୍ଦ୍ରଃ ॥ 26
କଲ୍ଯାଣଦଂ କୌଶିକଯଜ୍ଞପାଲଂ
କଲାନିଧିଂ କାଞ୍ଚନଶୈଲଧୀରମ୍ ।
କଞ୍ଜାତନେତ୍ରଂ କରୁଣାସମୁଦ୍ରଂ
27
କାକୁତ୍ସ୍ଥରାମଂ କଲଯାମି ଚିତ୍ତେ ॥ 27
ରାଜୀଵାଯତଲୋଚନଂ ରଘୁଵରଂ ନୀଲୋତ୍ପଲଶ୍ଯାମଲଂ
ମନ୍ଦାରାଞ୍ଚିତମଣ୍ଡପେ ସୁଲଲିତେ ସୌଵର୍ଣକେ ପୁଷ୍ପକେ ।
ଆସ୍ଥାନେ ନଵରତ୍ନରାଜିଖଚିତେ ସିଂହାସନେ ସଂସ୍ଥିତଂ
28
ସୀତାଲକ୍ଷ୍ମଣଲୋକପାଲସହିତଂ ଵନ୍ଦେ ମୁନୀନ୍ଦ୍ରାସ୍ପଦମ୍ ॥ 28
ଧ୍ଯାଯେ ରାମଂ ସୁଧାଂଶୁଂ ନତସକଲଭଵାରଣ୍ଯତାପପ୍ରହାରମ୍ ।
ଶ୍ଯାମଂ ଶାନ୍ତଂ ସୁରେନ୍ଦ୍ରଂ ସୁରମୁନିଵିନୁତଂ କୋଟିସୂର୍ଯପ୍ରକାଶମ୍ ।
ସୀତାସୌମିତ୍ରିସେଵ୍ଯଂ ସୁରନରସୁଗମଂ ଦିଵ୍ଯସିଂହାସନସ୍ଥମ୍ ।
29
ସାଯାହ୍ନେ ରାମଚନ୍ଦ୍ରଂ ସ୍ମିତରୁଚିରମୁଖଂ ସର୍ଵଦା ମେ ପ୍ରସନ୍ନମ୍ ॥ 29
ଇନ୍ଦ୍ରନୀଲମଣିସନ୍ନିଭଦେହଂ
ଵନ୍ଦନୀଯମସକୃନ୍ମୁନିବୃନ୍ଦୈଃ ।
ଲମ୍ବମାନତୁଲସୀଵନମାଲଂ
30
ଚିନ୍ତଯାମି ସତତଂ ରଘୁଵୀରମ୍ ॥ 30
ସମ୍ପୂର୍ଣଚନ୍ଦ୍ରଵଦନଂ ସରସୀରୁହାକ୍ଷଂ
ମାଣିକ୍ଯକୁଣ୍ଡଲଧରଂ ମୁକୁଟାଭିରାମମ୍ ।
ଚାମ୍ପେଯଗୌରଵସନଂ ଶରଚାପହସ୍ତଂ
31
ଶ୍ରୀରାମଚନ୍ଦ୍ରମନିଶଂ ମନସା ସ୍ମରାମି ॥ 31
ମାତୁଃ ପାର୍ଶ୍ଵେ ଚରନ୍ତଂ ମଣିମଯଶଯନେ ମଞ୍ଜୁଭୂଷାଞ୍ଚିତାଙ୍ଗମ୍ ।
ମନ୍ଦଂ ମନ୍ଦଂ ପିବନ୍ତଂ ମୁକୁଲିତନଯନଂ ସ୍ତନ୍ଯମନ୍ଯସ୍ତନାଗ୍ରମ୍ ।
ଅଙ୍ଗୁଲ୍ଯାଗ୍ରୈଃ ସ୍ପୃଶନ୍ତଂ ସୁଖପରଵଶଯା ସସ୍ମିତାଲିଙ୍ଗିତାଙ୍ଗମ୍ ।
32
ଗାଢଂ ଗାଢଂ ଜନନ୍ଯା କଲଯତୁ ହୃଦଯଂ ମାମକଂ ରାମବାଲମ୍ ॥ 32
ରାମାଭିରାମଂ ନଯନାଭିରାମଂ
ଵାଚାଭିରାମଂ ଵଦନାଭିରାମମ୍ ।
ସର୍ଵାଭିରାମଂ ଚ ସଦାଭିରାମଂ
33
ଵନ୍ଦେ ସଦା ଦାଶରଥିଂ ଚ ରାମମ୍ ॥ 33
ରାଶବ୍ଦୋଚ୍ଚାରମାତ୍ରେଣ ମୁଖାନ୍ନିର୍ଯାତି ପାତକାଃ ।
34
ପୁନଃ ପ୍ରଵେଶଭୀତ୍ଯା ଚ ମକାରସ୍ତୁ କଵାଟଵତ୍ ॥ 34
ଅନର୍ଘମାଣିକ୍ଯଵିରାଜମାନ-
ଶ୍ରୀପାଦୁକାଲଙ୍କୃତଶୋଭନାଭ୍ଯାମ୍ ।
ଅଶେଷବୃନ୍ଦାରକଵନ୍ଦିତାଭ୍ଯାଂ
35
ନମୋ ନମୋ ରାମପଦାମ୍ବୁଜାଭ୍ଯାମ୍ ॥ 35
ଚଲତ୍କନକକୁଣ୍ଡଲୋଲ୍ଲସିତଦିଵ୍ଯଗଣ୍ଡସ୍ଥଲଂ
ଚରାଚରଜଗନ୍ମଯଂ ଚରଣପଦ୍ମଗଙ୍ଗାଶ୍ରଯମ୍ ।
ଚତୁର୍ଵିଧଫଲପ୍ରଦଂ ଚରମପୀଠମଧ୍ଯସ୍ଥିତଂ
36
ଚିଦଂଶମଖିଲାସ୍ପଦଂ ଦଶରଥାତ୍ମଜଂ ଚିନ୍ତଯେ ॥ 36
ସନନ୍ଦନମୁନିପ୍ରିଯଂ ସକଲଵର୍ଣଵେଦାତ୍ମକଂ
ସମସ୍ତନିଗମାଗମସ୍ଫୁରିତତତ୍ତ୍ଵସିଂହାସନମ୍ ।
ସହସ୍ରନଯନାବ୍ଜଜାଦ୍ଯମରବୃନ୍ଦସଂସେଵିତଂ
37
ସମଷ୍ଟିପୁରଵଲ୍ଲଭଂ ଦଶରଥାତ୍ମଜଂ ଚିନ୍ତଯେ ॥ 37
ଜାଗ୍ରତ୍ସ୍ଵପ୍ନସୁଷୁପ୍ତି-କାଲଵିଲସତ୍ତତ୍ତ୍ଵାତ୍ମଚିନ୍ମାତ୍ରକଂ
ଚୈତନ୍ଯାତ୍ମକମାଧିପାପରହିତଂ ଭୂମ୍ଯାଦିତନ୍ମାତ୍ରକମ୍ ।
ଶାମ୍ଭଵ୍ଯାଦିସମସ୍ତଯୋଗକୁଲକଂ ସାଙ୍ଖ୍ଯାଦିତତ୍ତ୍ଵାତ୍ପରଂ
38
ଶବ୍ଦାଵାଚ୍ଯମହଂ ନମାମି ସତତଂ ଵ୍ଯୁତ୍ପତ୍ତିନାଶାତ୍ପରମ୍ ॥ 38
ଇକ୍ଷ୍ଵାକୁଵଂଶାର୍ଣଵଜାତରତ୍ନଂ
ସୀତାଙ୍ଗନାଯୌଵନଭାଗ୍ଯରତ୍ନମ୍ ।
ଵୈକୁଣ୍ଠରତ୍ନଂ ମମ ଭାଗ୍ଯରତ୍ନଂ
39
ଶ୍ରୀରାମରତ୍ନଂ ଶିରସା ନମାମି ॥ 39
ଇକ୍ଷ୍ଵାକୁନନ୍ଦନଂ ସୁଗ୍ରୀଵପୂଜିତଂ
ତ୍ରୈଲୋକ୍ଯରକ୍ଷକଂ ସତ୍ଯସନ୍ଧଂ ସଦା ।
ରାଘଵଂ ରଘୁପତିଂ ରାଜୀଵଲୋଚନଂ
40
ରାମଚନ୍ଦ୍ରଂ ଭଜେ ରାଘଵେଶଂ ଭଜେ ॥ 40
ଭକ୍ତପ୍ରିଯଂ ଭକ୍ତସମାଧିଗମ୍ଯଂ
ଚିନ୍ତାହରଂ ଚିନ୍ତିତକାମଧେନୁମ୍ ।
ସୂର୍ଯେନ୍ଦୁକୋଟିଦ୍ଯୁତିଭାସ୍ଵରଂ ତଂ
41
ରାମଂ ଭଜେ ରାଘଵରାମଚନ୍ଦ୍ରମ୍ ॥ 41
ଶ୍ରୀରାମଂ ଜନକକ୍ଷିତୀଶ୍ଵରସୁତାଵକ୍ତ୍ରାମ୍ବୁଜାହାରିଣଂ
ଶ୍ରୀମଦ୍ଭାନୁକୁଲାବ୍ଧିକୌସ୍ତୁଭମଣିଂ ଶ୍ରୀରତ୍ନଵକ୍ଷସ୍ସ୍ଥଲମ୍ ।
ଶ୍ରୀକଣ୍ଠାଦ୍ଯମରୌଘରତ୍ନମକୁଟାଲଙ୍କାରପାଦାମ୍ବୁଜଂ
42
ଶ୍ରୀଵତ୍ସୋଜ୍ଜ୍ଵଲମିନ୍ଦ୍ରନୀଲସଦୃଶଂ ଶ୍ରୀରାମଚନ୍ଦ୍ରଂ ଭଜେ ॥ 42
ରାମଚନ୍ଦ୍ର ଚରିତାକଥାମୃତଂ
ଲକ୍ଷ୍ମଣାଗ୍ରଜଗୁଣାନୁକୀର୍ତନମ୍ ।
ରାଘଵେଶ ତଵ ପାଦସେଵନଂ
43
ସମ୍ଭଵନ୍ତୁ ମମ ଜନ୍ମଜନ୍ମନି ॥ 43
ଅଜ୍ଞାନସମ୍ଭଵ-ଭଵାମ୍ବୁଧିବାଡବାଗ୍ନି-
ରଵ୍ଯକ୍ତତତ୍ତ୍ଵନିକରପ୍ରଣଵାଧିରୂଢଃ ।
ସୀତାସମେତମନୁଜେନ ହୃଦନ୍ତରାଲେ
44
ପ୍ରାଣପ୍ରଯାଣସମଯେ ମମ ସନ୍ନିଧତ୍ତେ ॥ 44
ରାମୋ ମତ୍କୁଲଦୈଵତଂ ସକରୁଣଂ ରାମଂ ଭଜେ ସାଦରଂ
ରାମେଣାଖିଲଘୋରପାପନିହତୀ ରାମାଯ ତସ୍ମୈ ନମଃ ।
ରାମାନ୍ନାସ୍ତି ଜଗତ୍ରଯୈକସୁଲଭୋ ରାମସ୍ଯ ଦାସୋଽସ୍ମ୍ଯହଂ
45
ରାମେ ପ୍ରୀତିରତୀଵ ମେ କୁଲଗୁରୋ ଶ୍ରୀରାମ ରକ୍ଷସ୍ଵ ମାମ୍ ॥ 45
ଵୈଦେହୀସହିତଂ ସୁରଦ୍ରୁମତଲେ ହୈମେ ମହାମଣ୍ଟପେ ।
ମଧ୍ଯେପୁଷ୍ପକମାସନେ ମଣିମଯେ ଵୀରାସନେ ସଂସ୍ଥିତମ୍ ।
ଅଗ୍ରେ ଵାଚଯତି ପ୍ରଭଞ୍ଜନସୁତେ ତତ୍ତ୍ଵଂ ମୁନିଭ୍ଯଃ ପରମ୍ ।
46
ଵ୍ଯାଖ୍ଯାନ୍ତଂ ଭରତାଦିଭିଃ ପରିଵୃତଂ ରାମଂ ଭଜେ ଶ୍ଯାମଲମ୍ ॥ 46
ଵାମେ ଭୂମିସୁତା ପୁରସ୍ତୁ ହନୁମାନ୍ପଶ୍ଚାତ୍ସୁମିତ୍ରାସୁତ-
ଶ୍ଶତ୍ରୁଘ୍ନୋ ଭରତଶ୍ଚ ପାର୍ଶ୍ଵଦଲଯୋର୍ଵାଯ୍ଵାଦିକୋଣେଷ୍ଵପି ।
ସୁଗ୍ରୀଵଶ୍ଚ ଵିଭୀଷଣଶ୍ଚ ଯୁଵରାଟ୍ ତାରାସୁତୋ ଜାମ୍ବଵାନ୍
47
ମଧ୍ଯେ ନୀଲସରୋଜକୋମଲରୁଚିଂ ରାମଂ ଭଜେ ଶ୍ଯାମଲମ୍ ॥ 47
କେଯୂରାଙ୍ଗଦକଙ୍କଣୈର୍ମଣିଗଣୈର୍ଵୈରୋଚମାନଂ ସଦା
ରାକାପର୍ଵଣିଚନ୍ଦ୍ରକୋଟିସଦୃଶଂ ଛତ୍ରେଣ ଵୈରାଜିତମ୍ ।
ହେମସ୍ତମ୍ଭସହସ୍ରଷୋଡଶଯୁତେ ମଧ୍ଯେ ମହାମଣ୍ଡପେ
48
ଦେଵେଶଂ ଭରତାଦିଭିଃ ପରିଵୃତଂ ରାମଂ ଭଜେ ଶ୍ଯାମଲମ୍ ॥ 48
ସାକେତେ ଶରଦିନ୍ଦୁକୁନ୍ଦଧଵଲେ ସୌଘେ ମହାମଣ୍ଟପେ ।
ପର୍ଯସ୍ତାଗରୁଧୂପଧୂମପଟଲେ କର୍ପୂରଦୀପୋଜ୍ଜ୍ଵଲେ ।
ସୁଗ୍ରୀଵାଙ୍ଗଦଵାଯୁପୁତ୍ରସହିତଂ ସୌମିତ୍ରିଣା ସେଵିତଂ
49
ଲୀଲାମାନୁଷଵିଗ୍ରହଂ ରଘୁପତିଂ ରାମଂ ଭଜେ ଶ୍ଯାମଲମ୍ ॥ 49
ଶାନ୍ତଂ ଶାରଦଚନ୍ଦ୍ରକୋଟିସଦୃଶଂ ଚନ୍ଦ୍ରାଭିରାମାନନଂ
ଚନ୍ଦ୍ରାର୍କାଗ୍ନିଵିକାସିକୁଣ୍ଡଲଧରଂ ଚନ୍ଦ୍ରାଵତଂସସ୍ତୁତମ୍ ।
ଵୀଣାପୁସ୍ତକସାକ୍ଷସୂତ୍ରଵିଲସଦ୍ଵ୍ଯାଖ୍ଯାନମୁଦ୍ରାକରଂ
50
ଦେଵେଶଂ ଭରତାଦିଭିଃ ପରିଵୃତଂ ରାମଂ ଭଜେ ଶ୍ଯାମଲମ୍ ॥ 50
ରାମଂ ରାକ୍ଷସମର୍ଦନଂ ରଘୁପତିଂ ଶକ୍ରାରିଵିଧ୍ଵଂସିନଂ
ସୁଗ୍ରୀଵେପ୍ସିତରାଜ୍ଯଦଂ ସୁରପତେଃ ପୁତ୍ରାନ୍ତକଂ ଶାର୍ଙ୍ଗିଣମ୍ ।
ଭକ୍ତାନାମଭଯପ୍ରଦଂ ଭଯହରଂ ପାପୌଘଵିଧ୍ଵଂସିନଂ
51
ସୀତାସେଵିତପାଦପଦ୍ମଯୁଗଲଂ ରାମଂ ଭଜେ ଶ୍ଯାମଲମ୍ ॥ 51
କନ୍ଦର୍ପାଯୁତକୋଟିକୋଟିତୁଲିତଂ କାଲାମ୍ବୁଦଶ୍ଯାମଲଂ
କମ୍ବୁଗ୍ରୀଵମୁଦାରକୌସ୍ତୁଭଧରଂ କର୍ଣାଵତଂସୋତ୍ପଲମ୍ ।
କସ୍ତୂରୀତିଲକୋଜ୍ଜ୍ଵଲଂ ସ୍ମିତମୁଖଂ ଚିନ୍ମୁଦ୍ରଯାଲଙ୍କୃତଂ
52
ସୀତାଲକ୍ଷ୍ମଣଵାଯୁପୁତ୍ରସହିତଂ ସିଂହାସନସ୍ଥଂ ଭଜେ ॥ 52
ସାକେତେ ନଵରତ୍ନପଙ୍କ୍ତିଖଚିତେ ଚିତ୍ରଧ୍ଵଜାଲଙ୍କୃତେ
ଵାସେ ସ୍ଵର୍ଣମଯେ ଦଲାଷ୍ଟଲଲିତେ ପଦ୍ମେ ଵିମାନୋତ୍ତମେ ।
ଆସୀନଂ ଭରତାଦିସୋଦରଜନୈଃ ଶାଖାମୃଗୈଃ କିନ୍ନରୈଃ
53
ଦିକ୍ପାଲୈର୍ମୁନିପୁଙ୍ଗଵୈର୍ନୃପଗଣୈସ୍ସଂସେଵ୍ଯମାନଂ ଭଜେ ॥ 53
କସ୍ତୂରୀଘନସାରକୁଙ୍କୁମଲସଚ୍ଛ୍ରୀଚନ୍ଦନାଲଙ୍କୃତଂ
କନ୍ଦର୍ପାଧିକସୁନ୍ଦରଂ ଘନନିଭଂ କାକୁତ୍ସ୍ଥଵଂଶଧ୍ଵଜମ୍ ।
କଲ୍ଯାଣାମ୍ଭରଵେଷ୍ଟିତଂ କମଲଯା ଯୁକ୍ତଂ କଲାଵଲ୍ଲଭଂ
54
କଲ୍ଯାଣାଚଲକାର୍ମୁକପ୍ରିଯସଖଂ କଲ୍ଯାଣରାମଂ ଭଜେ ॥ 54
ମୁକ୍ତେର୍ମୂଲଂ ମୁନିଵରହୃଦାନନ୍ଦକନ୍ଦଂ ମୁକୁନ୍ଦଂ
କୂଟସ୍ଥାଖ୍ଯଂ ସକଲଵରଦଂ ସର୍ଵଚୈତନ୍ଯରୂପମ୍ ।
ନାଦାତୀତଂ କମଲନିଲଯଂ ନାଦନାଦାନ୍ତତତ୍ତ୍ଵଂ
55
ନାଦାତୀତଂ ପ୍ରକୃତିରହିତଂ ରାମଚନ୍ଦ୍ରଂ ଭଜେଽହମ୍ ॥ 55
ତାରାକାରଂ ନିଖିଲନିଲଯଂ ତତ୍ତ୍ଵମସ୍ଯାଦିଲକ୍ଷ୍ଯଂ
ଶବ୍ଦାଵାଚ୍ଯଂ ତ୍ରିଗୁଣରହିତଂ ଵ୍ଯୋମମଙ୍ଗୁଷ୍ଠମାତ୍ରମ୍ ।
ନିର୍ଵାଣାଖ୍ଯଂ ସଗୁଣମଗୁଣଵ୍ଯୋମରନ୍ଧ୍ରାନ୍ତରସ୍ଥଂ
56
ସୌଷୁମ୍ନାନ୍ତଃ ପ୍ରଣଵସହିତଂ ରାମଚନ୍ଦ୍ରଂ ଭଜେଽହମ୍ ॥ 56
ନିଜାନନ୍ଦାକାରଂ ନିଗମତୁରଗାରାଧିତପଦଂ
ପରବ୍ରହ୍ମାନନ୍ଦଂ ପରମପଦଗଂ ପାପହରଣମ୍ ।
କୃପାପାରାଵାରଂ ପରମପୁରୁଷଂ ପଦ୍ମନିଲଯଂ
57
ଭଜେ ରାମଂ ଶ୍ଯାମଂ ପ୍ରକୃତିରହିତଂ ନିର୍ଗୁଣମହମ୍ ॥ 57
ସାକେତେ ନଗରେ ସମସ୍ତମହିମାଧାରେ ଜଗନ୍ମୋହନେ
ରତ୍ନସ୍ତମ୍ଭସହସ୍ରମଣ୍ଟପମହାସିଂହାସନେ ସାମ୍ବୁଜେ ।
ଵିଶ୍ଵାମିତ୍ରଵସିଷ୍ଠଗୌତମଶୁକଵ୍ଯାସାଦିଭିର୍ମୌନିଭିଃ
58
ଧ୍ଯେଯଂ ଲକ୍ଷ୍ମଣଲୋକପାଲସହିତଂ ସୀତାସମେତଂ ଭଜେ ॥ 58
ରାମଂ ଶ୍ଯାମାଭିରାମଂ ରଵିଶଶିନଯନଂ କୋଟିସୂର୍ଯପ୍ରକାଶଂ
ଦିଵ୍ଯଂ ଦିଵ୍ଯାସ୍ତ୍ରପାଣିଂ ଶରମୁଖଶରଧିଂ ଚାରୁକୋଡଣ୍ଡହସ୍ତମ୍ ।
କାଲଂ କାଲାଗ୍ନିରୁଦ୍ରଂ ରିପୁକୁଲଦହନଂ ଵିଘ୍ନଵିଚ୍ଛେଦଦକ୍ଷଂ
59
ଭୀମଂ ଭୀମାଟ୍ଟହାସଂ ସକଲଭଯହରଂ ରାମଚନ୍ଦ୍ରଂ ଭଜେଽହମ୍ ॥ 59
ଶ୍ରୀରାମଂ ଭୁଵନୈକସୁନ୍ଦରତନୁଂ ଧାରାଧରଶ୍ଯାମଲଂ
ରାଜୀଵାଯତଲୋଚନଂ ରଘୁଵରଂ ରାକେନ୍ଦୁବିମ୍ବାନନମ୍ ।
କୋଦଣ୍ଡାଦିନିଜାଯୁଧାଶ୍ରିତଭୁଜୈର୍ଭ୍ରାନ୍ତଂ ଵିଦେହାତ୍ମଜା-
60
ଧୀଶଂ ଭକ୍ତଜନାଵନଂ ରଘୁଵରଂ ଶ୍ରୀରାମଚନ୍ଦ୍ରଂ ଭଜେ ॥ 60
ଶ୍ରୀଵତ୍ସାଙ୍କମୁଦାରକୌସ୍ତୁଭଲସତ୍ପୀତାମ୍ବରାଲଙ୍କୃତଂ
ନାନାରତ୍ନଵିରାଜମାନମକୁଟଂ ନୀଲାମ୍ବୁଦଶ୍ଯାମଲମ୍ ।
କସ୍ତୂରୀଘନସାରଚର୍ଚିତତନୁଂ ମନ୍ଦାରମାଲାଧରଂ
61
କନ୍ଦର୍ପାଯୁତସୁନ୍ଦରଂ ରଘୁପତିଂ ସୀତାସମେତଂ ଭଜେ ॥ 61
ସଦାନନ୍ଦଦେଵେ ସହସ୍ରାରପଦ୍ମେ
ଗଲଚ୍ଚନ୍ଦ୍ରପୀଯୂଷଧାରାମୃତାନ୍ତେ ।
ସ୍ଥିତଂ ରାମମୂର୍ତିଂ ନିଷେଵେ ନିଷେଵେ-
62
ଽନ୍ଯଦୈଵଂ ନ ସେଵେ ନ ସେଵେ ନ ସେଵେ ॥ 62
ସୁଧାଭାସିତଦ୍ଵୀପମଧ୍ଯେ ଵିମାନେ
ସୁପର୍ଵାଲିଵୃକ୍ଷୋଜ୍ଜ୍ଵଲେ ଶେଷତଲ୍ପେ ।
ନିଷଣ୍ଣଂ ରମାଙ୍କଂ ନିଷେଵେ ନିଷେଵେ-
63
ଽନ୍ଯଦୈଵଂ ନ ସେଵେ ନ ସେଵେ ନ ସେଵେ ॥ 63
ଚିଦଂଶଂ ସମାନନ୍ଦମାନନ୍ଦକନ୍ଦଂ
ସୁଷୁମ୍ନାଖ୍ଯରନ୍ଧ୍ରାନ୍ତରାଲେ ଚ ହଂସମ୍ ।
ସଚକ୍ରଂ ସଶଙ୍ଖଂ ସପୀତାମ୍ବରାଙ୍କଂ
64
ପରଞ୍ଚାନ୍ଯଦୈଵଂ ନ ଜାନେ ନ ଜାନେ ॥ 64
ଚତୁର୍ଵେଦକୂଟୋଲ୍ଲସତ୍କାରଣାଖ୍ଯଂ
ସ୍ଫୁରଦ୍ଦିଵ୍ଯଵୈମାନିକେ ଭୋଗିତଲ୍ପେ ।
ପରନ୍ଧାମମୂର୍ତିଂ ନିଷଣ୍ଣଂ ନିଷେଵେ
65
ନିଷେଵେଽନ୍ଯଦୈଵଂ ନ ସେଵେ ନ ସେଵେ ॥ 65
ସିଂହାସନସ୍ଥଂ ସୁରସେଵିତଵ୍ଯଂ
ରତ୍ନାଙ୍କିତାଲଙ୍କୃତପାଦପଦ୍ମମ୍ ।
ସୀତାସମେତଂ ଶଶିସୂର୍ଯନେତ୍ରଂ
66
ରାମଂ ଭଜେ ରାଘଵ ରାମଚନ୍ଦ୍ରମ୍ ॥ 66
ରାମଂ ପୁରାଣପୁରୁଷଂ ରମଣୀଯଵେଷଂ
ରାଜାଧିରାଜମକୁଟାର୍ଚିତପାଦପୀଠମ୍ ।
ସୀତାପତିଂ ସୁନଯନଂ ଜଗଦେକଵୀରଂ
67
ଶ୍ରୀରାମଚନ୍ଦ୍ରମନିଶଂ କଲଯାମି ଚିତ୍ତେ ॥ 67
ପରାନନ୍ଦଵସ୍ତୁସ୍ଵରୂପାଦିସାକ୍ଷିଂ
ପରବ୍ରହ୍ମଗମ୍ଯଂ ପରଞ୍ଜ୍ଯୋତିମୂର୍ତିମ୍ ।
ପରାଶକ୍ତିମିତ୍ରାଽପ୍ରିଯାରାଧିତାଙ୍ଘ୍ରିଂ
68
ପରନ୍ଧାମରୂପଂ ଭଜେ ରାମଚନ୍ଦ୍ରମ୍ ॥ 68
ମନ୍ଦସ୍ମିତଂ କୁଣ୍ଡଲଗଣ୍ଡଭାଗଂ
ପୀତାମ୍ବରଂ ଭୂଷଣଭୂଷିତାଙ୍ଗମ୍ ।
ନୀଲୋତ୍ପଲାଙ୍ଗଂ ଭୁଵନୈକମିତ୍ରଂ
69
ରାମଂ ଭଜେ ରାଘଵ ରାମଚନ୍ଦ୍ରମ୍ ॥ 69
ଅଚିନ୍ତ୍ଯମଵ୍ଯକ୍ତମନନ୍ତରୂପ-
ମଦ୍ଵୈତମାନନ୍ଦମନାଦିଗମ୍ଯମ୍ ।
ପୁଣ୍ଯସ୍ଵରୂପଂ ପୁରୁଷୋତ୍ତମାଖ୍ଯଂ
70
ରାମଂ ଭଜେ ରାଘଵ ରାମଚନ୍ଦ୍ରମ୍ ॥ 70
ପଦ୍ମାସନସ୍ଥଂ ସୁରସେଵିତଵ୍ଯଂ
ପଦ୍ମାଲଯାନନ୍ଦକଟାକ୍ଷଵୀକ୍ଷ୍ଯମ୍ ।
ଗନ୍ଧର୍ଵଵିଦ୍ଯାଧରଗୀଯମାନଂ
71
ରାମଂ ଭଜେ ରାଘଵ ରାମଚନ୍ଦ୍ରମ୍ ॥ 71
ଅନନ୍ତକୀର୍ତିଂ ଵରଦଂ ପ୍ରସନ୍ନଂ
ପଦ୍ମାସନଂ ସେଵକପାରିଜାତମ୍ ।
ରାଜାଧିରାଜଂ ରଘୁଵୀରକେତୁଂ
72
ରାମଂ ଭଜେ ରାଘଵ ରାମଚନ୍ଦ୍ରମ୍ ॥ 72
ସୁଗ୍ରୀଵମିତ୍ରଂ ସୁଜନାନୁରୂପଂ
ଲଙ୍କାହରଂ ରାକ୍ଷସଵଂଶନାଶମ୍ ।
ଵେଦାଶ୍ରଯାଙ୍ଗଂ ଵିପୁଲାଯତାକ୍ଷଂ
73
ରାମଂ ଭଜେ ରାଘଵ ରାମଚନ୍ଦ୍ରମ୍ ॥ 73
ସକୃତ୍ପ୍ରଣତରକ୍ଷାଯାଂ ସାକ୍ଷୀ ଯସ୍ଯ ଵିଭୀଷଣଃ ।
74
ସାପରାଧପ୍ରତୀକାରଃ ସ ଶ୍ରୀରାମୋ ଗତିର୍ମମ ॥ 74
ଫଲମୂଲାଶିନୌ ଦାନ୍ତୌ ତାପସୌ ଧର୍ମଚାରିଣୌ ।
75
ରକ୍ଷଃକୁଲଵିହନ୍ତାରୌ ଭ୍ରାତରୌ ରାମଲକ୍ଷ୍ମଣୌ ॥ 75
ତରୁଣୌ ରୂପସମ୍ପନ୍ନୌ ସୁକୁମାରୌ ମହାବଲୌ ।
76
ପୁଣ୍ଡରୀକ ଵିଶାଲାକ୍ଷୌ ଚୀରକୃଷ୍ଣାଜିନାମ୍ବରୌ ॥ 76
କୌସଲ୍ଯାନଯନେନ୍ଦୁଂ ଦଶରଥମୁଖାରଵିନ୍ଦମାର୍ତାଣ୍ଡମ୍ ।
77
ସୀତାମାନସହଂସଂ ରାମଂ ରାଜୀଵଲୋଚନଂ ଵନ୍ଦେ ॥ 77
ଭର୍ଜନଂ ଭଵବୀଜାନାଂ ମାର୍ଜନଂ ସୁଖସମ୍ପଦାମ୍ ।
78
ତର୍ଜନଂ ଯମଦୂତାନାଂ ରାମରାମେତି କୀର୍ତନମ୍ ॥ 78
ନ ଜାନେ ଜାନକୀ ଜାନେ ରାମ ତ୍ଵନ୍ନାମଵୈଭଵମ୍ ।
79
ସର୍ଵେଶୋ ଭଗଵାନ୍ ଶମ୍ଭୁର୍ଵାଲ୍ମୀକିର୍ଵେତ୍ତି ଵା ନଵା ॥ 79
କରତଲଧୃତଚାପଂ କାଲମେଘସ୍ଵରୂପଂ
ସରସିଜଦଲନେତ୍ରଂ ଚାରୁହାସଂ ସୁଗାତ୍ରମ୍ ।
ଵିଚିନୁତଵନଵାସଂ ଵିକ୍ରମୋଦଗ୍ରଵେଷଂ
80
ପ୍ରଣମତ ରଘୁନାଥଂ ଜାନକୀପ୍ରାଣନାଥମ୍ ॥ 80
ଵିଦ୍ଯୁତ୍ସ୍ଫୁରନ୍ମକରକୁଣ୍ଡଲଦୀପ୍ତଚାରୁ-
ଗଣ୍ଡସ୍ଥଲଂ ମଣିକିରୀଟଵିରାଜମାନମ୍ ।
ପୀତାମ୍ବରଂ ଜଲଦନୀଲମୁଦାରକାନ୍ତିଂ
81
ଶ୍ରୀରାମଚନ୍ଦ୍ରମନିଶଂ କଲଯାମି ଚିତ୍ତେ ॥ 81
ରତ୍ନୋଲ୍ଲସଜ୍ଜ୍ଵଲିତକୁଣ୍ଡଲଗଣ୍ଡଭାଗଂ
କସ୍ତୂରିକାତିଲକଶୋଭିତଫାଲଭାଗମ୍ ।
କର୍ଣାନ୍ତଦୀର୍ଘନଯନଂ କରୁଣାକଟାକ୍ଷଂ
82
ଶ୍ରୀରାମଚନ୍ଦ୍ର ମୁଖମାତ୍ମନି ସନ୍ନିଧତ୍ତମ୍ ॥ 82
ଵୈଦେହୀସହିତଂ ଚ ଲକ୍ଷ୍ମଣଯୁତଂ କୈକେଯିପୁତ୍ରାନ୍ଵିତଂ
ସୁଗ୍ରୀଵଂ ଚ ଵିଭୀଷଣାନିଲସୁତୌ ନୀଲଂ ନଲଂ ସାଙ୍ଗଦମ୍ ।
ଵିଶ୍ଵାମିତ୍ରଵସିଷ୍ଠଗୌତମଭରଦ୍ଵାଜାଦିକାନ୍ ମାନଯନ୍
83
ରାମୋ ମାରୁତିସେଵିତଃ ସ୍ମରତୁ ମାଂ ସାମ୍ରାଜ୍ଯସିଂହାସନେ ॥ 83
ସକଲଗୁଣନିଧାନଂ ଯୋଗିଭିସ୍ସ୍ତୂଯମାନଂ
ଭଜିତସୁରଵିମାନଂ ରକ୍ଷିତେନ୍ଦ୍ରାଦିମାନମ୍ ।
ମହିତଵୃଷଭଯାନଂ ସୀତଯା ଶୋଭମାନଂ
84
ସ୍ମରତୁ ହୃଦଯଭାନୁଂ ବ୍ରହ୍ମରାମାଭିରାମମ୍ ॥ 84
ତ୍ରିଦଶକୁମୁଦଚନ୍ଦ୍ରୋ ଦାନଵାମ୍ଭୋଜଚନ୍ଦ୍ରୋ
ଦୁରିତତିମିରଚନ୍ଦ୍ରୋ ଯୋଗିନାଂ ଜ୍ଞାନଚନ୍ଦ୍ରଃ ।
ପ୍ରଣତନଯନଚନ୍ଦ୍ରୋ ମୈଥିଲୀନେତ୍ରଚନ୍ଦ୍ରୋ
85
ଦଶମୁଖରିପୁଚନ୍ଦ୍ରଃ ପାତୁ ମାଂ ରାମଚନ୍ଦ୍ରଃ ॥ 85
ଯନ୍ନାମୈଵ ସହସ୍ରନାମସଦୃଶଂ ଯନ୍ନାମ ଵେଦୈସ୍ସମଂ
ଯନ୍ନାମାଙ୍କିତଵାକ୍ଯ-ମାସୁରବଲସ୍ତ୍ରୀଗର୍ଭଵିଚ୍ଛେଦନମ୍ ।
ଯନ୍ନାମ ଶ୍ଵପଚାର୍ଯଭେଦରହିତଂ ମୁକ୍ତିପ୍ରଦାନୋଜ୍ଜ୍ଵଲଂ
86
ତନ୍ନାମାଽଲଘୁରାମରାମରମଣଂ ଶ୍ରୀରାମନାମାମୃତମ୍ ॥ 86
ରାଜୀଵନେତ୍ର ରଘୁପୁଙ୍ଗଵ ରାମଭଦ୍ର
ରାକେନ୍ଦୁବିମ୍ବସଦୃଶାନନ ନୀଲଗାତ୍ର ।
ରାମାଽଭିରାମ ରଘୁଵଂଶସମୁଦ୍ଭଵ ତ୍ଵଂ
87
ଶ୍ରୀରାମଚନ୍ଦ୍ର ମମ ଦେହି କରାଵଲମ୍ବମ୍ ॥ 87
ମାଣିକ୍ଯମଞ୍ଜୀରପଦାରଵିନ୍ଦଂ
ରାମାର୍କସମ୍ଫୁଲ୍ଲମୁଖାରଵିନ୍ଦମ୍ ।
ଭକ୍ତାଭଯପ୍ରାପିକରାରଵିନ୍ଦାଂ
88
ଦେଵୀଂ ଭଜେ ରାଘଵଵଲ୍ଲଭାଂ ତାମ୍ ॥ 88
ଜଯତୁ ଵିଜଯକାରୀ ଜାନକୀମୋଦକାରୀ
ତପନକୁଲଵିହାରୀ ଦଣ୍ଡକାରଣ୍ଯଚାରୀ ।
ଦଶଵଦନକୁଠାରୀ ଦୈତ୍ଯଵିଚ୍ଛେଦକାରୀ
89
ମଣିମକୁଟକଧାରୀ ଚଣ୍ଡକୋଦଣ୍ଡଧାରୀ ॥ 89
ରାମଃ ପିତା ରଘଵ ଏଵ ମାତା
ରାମସ୍ସୁବନ୍ଧୁଶ୍ଚ ସଖା ହିତଶ୍ଚ ।
ରାମୋ ଗୁରୁର୍ମେ ପରମଂ ଚ ଦୈଵଂ
90
ରାମଂ ଵିନା ନାଽନ୍ଯମହଂ ସ୍ମରାମି ॥ 90
ଶ୍ରୀରାମ ମେ ତ୍ଵଂ ହି ପିତା ଚ ମାତା
ଶ୍ରୀରାମ ମେ ତ୍ଵଂ ହି ସୁହୃଚ୍ଚ ବନ୍ଧୁଃ ।
ଶ୍ରୀରାମ ମେ ତ୍ଵଂ ହି ଗୁରୁଶ୍ଚ ଗୋଷ୍ଠୀ
91
ଶ୍ରୀରାମ ମେ ତ୍ଵଂ ହି ସମସ୍ତମେଵ ॥ 91
ରାମଚନ୍ଦ୍ରଚରିତାମୃତପାନଂ
ସୋମପାନଶତକୋଟିସମାନମ୍ ।
ସୋମପାନଶତକୋଟିଭିରୀଯା-
92
ଜ୍ଜନ୍ମ ନୈତି ରଘୁନାଯକନାମ୍ନା ॥ 92
ରାମ ରାମ ଦଯାସିନ୍ଧୋ ରାଵଣାରେ ଜଗତ୍ପତେ ।
93
ତ୍ଵତ୍ପାଦକମଲାସକ୍ତି-ର୍ଭଵେଜ୍ଜନ୍ମନି ଜନ୍ମନି ॥ 93
ଶ୍ରୀରାମଚନ୍ଦ୍ରେତି ଦଯାପରେତି
ଭକ୍ତପ୍ରିଯେତି ଭଵବନ୍ଧନମୋଚନେତି ।
ନାଥେତି ନାଗଶଯନେତି ସଦା ସ୍ତୁଵନ୍ତଂ
94
ମାଂ ପାହି ଭୀତମନିଶଂ କୃପଣଂ କୃପାଲୋ ॥ 94
ଅଯୋଧ୍ଯାନାଥ ରାଜେନ୍ଦ୍ର ସୀତାକାନ୍ତ ଜଗତ୍ପତେ ।
95
ଶ୍ରୀରାମ ପୁଣ୍ଡରୀକାକ୍ଷ ରାମଚନ୍ଦ୍ର ନମୋଽସ୍ତୁ ତେ ॥ 95
ହେ ରାମ ହେ ରମଣ ହେ ଜଗଦେକଵୀର
ହେ ନାଥ ହେ ରଘୁପତେ କରୁଣାଲଵାଲ ।
ହେ ଜାନକୀରମଣ ହେ ଜଗଦେକବନ୍ଧୋ
96
ମାଂ ପାହି ଦୀନମନିଶଂ କୃପଣଂ କୃତଘ୍ନମ୍ ॥ 96
ଜାନାତି ରାମ ତଵ ତତ୍ତ୍ଵଗତିଂ ହନୂମାନ୍ ।
ଜାନାତି ରାମ ତଵ ସଖ୍ଯଗତିଂ କପୀଶଃ ।
ଜାନାତି ରାମ ତଵ ଯୁଦ୍ଧଗତିଂ ଦଶାସ୍ଯୋ ।
97
ଜାନାତି ରାମ ଧନଦାନୁଜ ଏଵ ସତ୍ଯମ୍ ॥ 97
ସେଵ୍ଯଂ ଶ୍ରୀରାମମନ୍ତ୍ରଂ ଶ୍ରଵଣଶୁଭକରଂ ଶ୍ରେଷ୍ଠସୁଜ୍ଞାନିମନ୍ତ୍ରଂ
ସ୍ତଵ୍ଯଂ ଶ୍ରୀରାମମନ୍ତ୍ରଂ ନରକଦୁରିତଦୁର୍ଵାରନିର୍ଘାତମନ୍ତ୍ରମ୍ ।
ଭଵ୍ଯଂ ଶ୍ରୀରାମମନ୍ତ୍ରଂ ଭଜତୁ ଭଜତୁ ସଂସାରନିସ୍ତାରମନ୍ତ୍ରଂ
98
ଦିଵ୍ଯଂ ଶ୍ରୀରାମମନ୍ତ୍ରଂ ଦିଵି ଭୁଵି ଵିଲସନ୍ମୋକ୍ଷରକ୍ଷୈକମନ୍ତ୍ରମ୍ ॥ 98
ନିଖିଲନିଲଯମନ୍ତ୍ରଂ ନିତ୍ଯତତ୍ତ୍ଵାଖ୍ଯମନ୍ତ୍ରଂ
ଭଵକୁଲହରମନ୍ତ୍ରଂ ଭୂମିଜାପ୍ରାଣମନ୍ତ୍ରମ୍ ।
ପଵନଜନୁତମନ୍ତ୍ରଂ ପାର୍ଵତୀମୋକ୍ଷମନ୍ତ୍ରଂ
99
ପଶୁପତିନିଜମନ୍ତ୍ରଂ ପାତୁ ମାଂ ରାମମନ୍ତ୍ରମ୍ ॥ 99
ପ୍ରଣଵନିଲଯମନ୍ତ୍ରଂ ପ୍ରାଣନିର୍ଵାଣମନ୍ତ୍ରଂ
ପ୍ରକୃତିପୁରୁଷମନ୍ତ୍ରଂ ବ୍ରହ୍ମରୁଦ୍ରେନ୍ଦ୍ରମନ୍ତ୍ରମ୍ ।
ପ୍ରକଟଦୁରିତରାଗଦ୍ଵେଷନିର୍ଣାଶମନ୍ତ୍ରଂ
100
ରଘୁପତିନିଜମନ୍ତ୍ରଂ ରାମରାମେତିମନ୍ତ୍ରମ୍ ॥ 100
ଦଶରଥସୁତମନ୍ତ୍ରଂ ଦୈତ୍ଯସଂହାରମନ୍ତ୍ରଂ
ଵିବୁଧଵିନୁତମନ୍ତ୍ରଂ ଵିଶ୍ଵଵିଖ୍ଯାତମନ୍ତ୍ରମ୍ ।
ମୁନିଗଣନୁତମନ୍ତ୍ରଂ ମୁକ୍ତିମାର୍ଗୈକମନ୍ତ୍ରଂ
101
ରଘୁପତିନିଜମନ୍ତ୍ରଂ ରାମରାମେତିମନ୍ତ୍ରମ୍ ॥ 101
ସଂସାରସାଗରଭଯାପହଵିଶ୍ଵମନ୍ତ୍ରଂ
ସାକ୍ଷାନ୍ମୁମୁକ୍ଷୁଜନସେଵିତସିଦ୍ଧମନ୍ତ୍ରମ୍ ।
ସାରଙ୍ଗହସ୍ତମୁଖହସ୍ତନିଵାସମନ୍ତ୍ରଂ
102
କୈଵଲ୍ଯମନ୍ତ୍ରମନିଶଂ ଭଜ ରାମମନ୍ତ୍ରମ୍ ॥ 102
ଜଯତୁ ଜଯତୁ ମନ୍ତ୍ରଂ ଜନ୍ମସାଫଲ୍ଯମନ୍ତ୍ରଂ
ଜନନମରଣଭେଦକ୍ଲେଶଵିଚ୍ଛେଦମନ୍ତ୍ରମ୍ ।
ସକଲନିଗମମନ୍ତ୍ରଂ ସର୍ଵଶାସ୍ତ୍ରୈକମନ୍ତ୍ରଂ
103
ରଘୁପତିନିଜମନ୍ତ୍ରଂ ରାମରାମେତିମନ୍ତ୍ରମ୍ ॥ 103
ଜଗତି ଵିଶଦମନ୍ତ୍ରଂ ଜାନକୀପ୍ରାଣମନ୍ତ୍ରଂ
ଵିବୁଧଵିନୁତମନ୍ତ୍ରଂ ଵିଶ୍ଵଵିଖ୍ଯାତମନ୍ତ୍ରମ୍ ।
ଦଶରଥସୁତମନ୍ତ୍ରଂ ଦୈତ୍ଯସଂହାରମନ୍ତ୍ରଂ
104
ରଘୁପତିନିଜମନ୍ତ୍ରଂ ରାମରାମେତିମନ୍ତ୍ରମ୍ ॥ 104
ବ୍ରହ୍ମାଦିଯୋଗିମୁନିପୂଜିତସିଦ୍ଧମନ୍ତ୍ରଂ
ଦାରିଦ୍ର୍ଯଦୁଃଖଭଵରୋଗଵିନାଶମନ୍ତ୍ରମ୍ ।
ସଂସାରସାଗରସମୁତ୍ତରଣୈକମନ୍ତ୍ରଂ
105
ଵନ୍ଦେ ମହାଭଯହରଂ ରଘୁରାମମନ୍ତ୍ରମ୍ ॥ 105
ଶତ୍ରୁଚ୍ଛେଦୈକମନ୍ତ୍ରଂ ସରସମୁପନିଷଦ୍ଵାକ୍ଯସମ୍ପୂଜ୍ଯମନ୍ତ୍ରଂ
ସଂସାରୋତ୍ତାରମନ୍ତ୍ରଂ ସମୁଚିତସମଯେ ସଙ୍ଗନିର୍ଯାଣମନ୍ତ୍ରମ୍ ।
ସର୍ଵୈଶ୍ଵର୍ଯୈକମନ୍ତ୍ରଂ ଵ୍ଯସନଭୁଜଗସନ୍ଦଷ୍ଟସନ୍ତ୍ରାଣମନ୍ତ୍ରଂ
106
ଜିହ୍ଵେ ଶ୍ରୀରାମମନ୍ତ୍ରଂ ଜପ ଜପ ସଫଲଂ ଜନ୍ମସାଫଲ୍ଯମନ୍ତ୍ରମ୍ ॥ 106
ନିତ୍ଯଂ ଶ୍ରୀରାମମନ୍ତ୍ରଂ ନିରୁପମମଧିକଂ ନୀତିସୁଜ୍ଞାନମନ୍ତ୍ରଂ
ସତ୍ଯଂ ଶ୍ରୀରାମମନ୍ତ୍ରଂ ସଦମଲହୃଦଯେ ସର୍ଵଦାରୋଗ୍ଯମନ୍ତ୍ରମ୍ ।
ସ୍ତୁତ୍ଯଂ ଶ୍ରୀରାମମନ୍ତ୍ରଂ ସୁଲଲିତସୁମନସ୍ସୌଖ୍ଯସୌଭାଗ୍ଯମନ୍ତ୍ରଂ
107
ପଠ୍ଯଂ ଶ୍ରୀରାମମନ୍ତ୍ରଂ ପଵନଜଵରଦଂ ପାତୁ ମାଂ ରାମମନ୍ତ୍ରମ୍ ॥ 107
ଵ୍ଯାମୋହପ୍ରଶମୌଷଧଂ ମୁନିମନୋଵୃତ୍ତିପ୍ରଵୃତ୍ତ୍ଯୌଷଧଂ
ଦୈତ୍ଯୋନ୍ମୂଲକରୌଷଧଂ ଭଵଭଯପ୍ରଧ୍ଵଂସନୈକୌଷଧମ୍ ।
ଭକ୍ତାନନ୍ଦକରୌଷଧଂ ତ୍ରିଭୁଵନେ ସଞ୍ଜୀଵନୈକୌଷଧଂ
108
ଶ୍ରେଯଃ ପ୍ରାପ୍ତିକରୌଷଧଂ ପିବ ମନଃ ଶ୍ରୀରାମନାମୌଷଧମ୍ ॥ 108
ସକଲଭୁଵନରତ୍ନଂ ସର୍ଵଶାସ୍ତ୍ରାର୍ଥରତ୍ନଂ
ସମରଵିଜଯରତ୍ନଂ ସଚ୍ଚିଦାନନ୍ଦରତ୍ନମ୍ ।
ଦଶମୁଖହରରତ୍ନଂ ଦାନଵାରାତିରତ୍ନଂ
109
ରଘୁକୁଲନୃପରତ୍ନଂ ପାତୁ ମାଂ ରାମରତ୍ନମ୍ ॥ 109
ସକଲଭୁଵନରତ୍ନଂ ସଚ୍ଚିଦାନନ୍ଦରତ୍ନଂ
ସକଲହୃଦଯରତ୍ନଂ ସୂର୍ଯବିମ୍ବାନ୍ତରତ୍ନମ୍ ।
ଵିମଲସୁକୃତରତ୍ନଂ ଵେଦଵେଦାନ୍ତରତ୍ନଂ
110
ପୁରହରଜପରତ୍ନଂ ପାତୁ ମାଂ ରାମରତ୍ନମ୍ ॥ 110
ନିଗମଶିଖରରତ୍ନଂ ନିର୍ମଲାନନ୍ଦରତ୍ନଂ
ନିରୁପମଗୁଣରତ୍ନଂ ନାଦନାଦାନ୍ତରତ୍ନମ୍ ।
ଦଶରଥକୁଲରତ୍ନଂ ଦ୍ଵାଦଶାନ୍ତସ୍ସ୍ଥରତ୍ନଂ
111
ପଶୁପତିଜପରତ୍ନଂ ପାତୁ ମାଂ ରାମରତ୍ନମ୍ ॥ 111
ଶତମଖସୁତରତ୍ନଂ ଷୋଡଶାନ୍ତସ୍ସ୍ଥରତ୍ନଂ
ମୁନିଜନଜପରତ୍ନଂ ମୁଖ୍ଯଵୈକୁଣ୍ଠରତ୍ନମ୍ ।
ନିରୁପମଗୁଣରତ୍ନଂ ନୀରଜାନ୍ତସ୍ସ୍ଥରତ୍ନଂ
112
ପରମପଦଵିରତ୍ନଂ ପାତୁ ମାଂ ରାମରତ୍ନମ୍ ॥ 112
ସକଲସୁକୃତରତ୍ନଂ ସତ୍ଯଵାକ୍ଯାର୍ଥରତ୍ନଂ
ଶମଦମଗୁଣରତ୍ନଂ ଶାଶ୍ଵତାନନ୍ଦରତ୍ନମ୍ ।
ପ୍ରଣଯନିଲଯରତ୍ନଂ ପ୍ରସ୍ଫୁଟଦ୍ଯୋତିରତ୍ନଂ
113
ପରମପଦଵିରତ୍ନଂ ପାତୁ ମାଂ ରାମରତ୍ନମ୍ ॥ 113
ନିଗମଶିଖରରତ୍ନଂ ନିତ୍ଯମାଶାସ୍ଯରତ୍ନଂ
ଜନନୁତନୃପରତ୍ନଂ ଜାନକୀରୂପରତ୍ନମ୍ ।
ଭୁଵନଵଲଯରତ୍ନଂ ଭୂଭୁଜାମେକରତ୍ନଂ
114
ରଘୁକୁଲଵରରତ୍ନଂ ପାତୁ ମାଂ ରାମରତ୍ନମ୍ ॥ 114
ଵିଶାଲନେତ୍ରଂ ପରିପୂର୍ଣଗାତ୍ରଂ
ସୀତାକଲତ୍ରଂ ସୁରଵୈରିଜୈତ୍ରମ୍ ।
କାରୁଣ୍ଯପାତ୍ରଂ ଜଗତଃ ପଵିତ୍ରଂ
115
ଶ୍ରୀରାମରତ୍ନଂ ପ୍ରଣତୋଽସ୍ମି ନିତ୍ଯମ୍ ॥ 115
ହେ ଗୋପାଲକ ହେ ଦଯାଜଲନିଧେ ହେ ସଦ୍ଗୁଣାମ୍ଭୋନିଧେ
ହେ ଦୈତ୍ଯାନ୍ତକ ହେ ଵିଭୀଷଣଦଯାପରୀଣ ହେ ଭୂପତେ ।
ହେ ଵୈଦେହସୁତାମନୋଜଵିହୃତେ ହେ କୋଟିମାରାକୃତେ
116
ହେ ନଵ୍ଯାମ୍ବୁଜନେତ୍ର ପାଲଯ ପରଂ ଜାନାମି ନ ତ୍ଵାଂ ଵିନା ॥ 116
ଯସ୍ଯ କିଞ୍ଚିଦପି ନୋ ହରଣୀଯଂ
କର୍ମ କିଞ୍ଚିଦପି ନୋ ଚରଣୀଯମ୍ ।
ରାମନାମ ଚ ସଦା ସ୍ମରଣୀଯଂ
117
ଲୀଲଯା ଭଵଜଲଂ ତରଣୀଯମ୍ ॥ 117
ଦଶରଥସୁତମୀଶଂ ଦଣ୍ଡକାରଣ୍ଯଵାସଂ
ଶତମଖମଣିନୀଲଂ ଜାନକୀପ୍ରାଣଲୋଲମ୍ ।
ସକଲଭୁଵନମୋହଂ ସନ୍ନୁତାମ୍ଭୋଦଦେହଂ
118
ବହୁଲନୁତସମୁଦ୍ରଂ ଭାଵଯେ ରାମଭଦ୍ରମ୍ ॥ 118
ଵିଶାଲନେତ୍ରଂ ପରିପୂର୍ଣଗାତ୍ରଂ
ସୀତାକଲତ୍ରଂ ସୁରଵୈରିଜୈତ୍ରମ୍ ।
ଜଗତ୍ପଵିତ୍ରଂ ପରମାତ୍ମତନ୍ତ୍ରଂ
119
ଶ୍ରୀରାମଚନ୍ଦ୍ରଂ ପ୍ରଣମାମି ଚିତ୍ତେ ॥ 119
ଜଯ ଜଯ ରଘୁରାମ ଶ୍ରୀମୁଖାମ୍ଭୋଜଭାନୋ
ଜଯ ଜଯ ରଘୁଵୀର ଶ୍ରୀମଦମ୍ଭୋଜନେତ୍ର ।
ଜଯ ଜଯ ରଘୁନାଥ ଶ୍ରୀକରାଭ୍ଯର୍ଚିତାଙ୍ଘ୍ରି
120
ଜଯ ଜଯ ରଘୁଵର୍ଯ ଶ୍ରୀଶ କାରୁଣ୍ଯସିନ୍ଧୋ ॥ 120
ମନ୍ଦାରମୂଲେ ମଣିପୀଠସଂସ୍ଥଂ
ସୁଧାପ୍ଲୁତଂ ଦିଵ୍ଯଵିରାଟ୍ସ୍ଵରୂପମ୍ ।
ସବିନ୍ଦୁନାଦାନ୍ତକଲାନ୍ତତୁର୍ଯ-
121
ମୂର୍ତିଂ ଭଜେଽହଂ ରଘୁଵଂଶରତ୍ନମ୍ ॥ 121
ନାଦଂ ନାଦଵିନୀଲଚିତ୍ତପଵନଂ ନାଦାନ୍ତତ୍ତ୍ଵପ୍ରିଯଂ
ନାମାକାରଵିଵର୍ଜିତଂ ନଵଘନଶ୍ଯାମାଙ୍ଗନାଦପ୍ରିଯମ୍ ।
ନାଦାମ୍ଭୋଜମରନ୍ଦମତ୍ତଵିଲସଦ୍ଭୃଙ୍ଗଂ ମଦାନ୍ତସ୍ସ୍ଥିତଂ
122
ନାଦାନ୍ତଧୃଵମଣ୍ଡଲାବ୍ଜରୁଚିରଂ ରାମଂ ଭଜେ ତାରକମ୍ ॥ 122
ନାନାଭୂତହୃଦବ୍ଜପଦ୍ମନିଲଯଂ ନାମୋଜ୍ଜ୍ଵଲାଭୂଷଣମ୍ ।
ନାମସ୍ତୋତ୍ରପଵିତ୍ରିତତ୍ରିଭୁଵନଂ ନାରାଯଣାଷ୍ଟାକ୍ଷରମ୍ ।
ନାଦାନ୍ତେନ୍ଦୁଗଲତ୍ସୁଧାପ୍ଲୁତତନୁଂ ନାନାତ୍ମଚିନ୍ମାତ୍ରକମ୍ ।
123
ନାନାକୋଟିଯୁଗାନ୍ତଭାନୁସଦୃଶଂ ରାମଂ ଭଜେ ତାରକମ୍ ॥ 123
ଵେଦ୍ଯଂ ଵେଦଗୁରୁଂ ଵିରିଞ୍ଚିଜନକଂ ଵେଦାନ୍ତମୂର୍ତିଂ ସ୍ଫୁର-
ଦ୍ଵେଦଂ ଵେଦକଲାପମୂଲମହିମାଧାରାନ୍ତକନ୍ଦାଙ୍କୁରମ୍ ।
ଵେଦଶୃଙ୍ଗସମାନଶେଷଶଯନଂ ଵେଦାନ୍ତଵେଦ୍ଯାତ୍ମକଂ
124
ଵେଦାରାଧିତପାଦପଙ୍କଜମହଂ ରାମଂ ଭଜେ ତାରକମ୍ ॥ 124
ମଜ୍ଜୀଵଂ ମଦନୁଗ୍ରହଂ ମଦଧିପଂ ମଦ୍ଭାଵନଂ ମତ୍ସୁଖଂ
ମତ୍ତାତଂ ମମ ସଦ୍ଗୁରୁଂ ମମ ଵରଂ ମୋହାନ୍ଧଵିଚ୍ଛେଦନମ୍ ।
ମତ୍ପୁଣ୍ଯଂ ମଦନେକବାନ୍ଧଵଜନଂ ମଜ୍ଜୀଵନଂ ମନ୍ନିଧିଂ
125
ମତ୍ସିଦ୍ଧିଂ ମମ ସର୍ଵକର୍ମସୁକୃତଂ ରାମଂ ଭଜେ ତାରକମ୍ ॥ 125
ନିତ୍ଯଂ ନୀରଜଲୋଚନଂ ନିରୁପମଂ ନୀଵାରଶୂକୋପମଂ
ନିର୍ଭେଦାନୁଭଵଂ ନିରନ୍ତରଗୁଣଂ ନୀଲାଙ୍ଗରାଗୋଜ୍ଜ୍ଵଲମ୍ ।
ନିଷ୍ପାପଂ ନିଗମାଗମାର୍ଚିତପଦଂ ନିତ୍ଯାତ୍ମକଂ ନିର୍ମଲଂ
126
ନିଷ୍ପୁଣ୍ଯଂ ନିଖିଲଂ ନିରଞ୍ଜନପଦଂ ରାମଂ ଭଜେ ତାରକମ୍ ॥ 126
ଧ୍ଯାଯେ ତ୍ଵାଂ ହୃଦଯାମ୍ବୁଜେ ରଘୁପତିଂ ଵିଜ୍ଞାନଦୀପାଙ୍କୁରଂ
ହଂସୋହଂସପରମ୍ପରାଦିମହିମାଧାରଂ ଜଗନ୍ମୋହନମ୍ ।
ହସ୍ତାମ୍ଭୋଜଗଦାବ୍ଜଚକ୍ରମତୁଲଂ ପୀତାମ୍ବରଂ କୌସ୍ତୁଭଂ
127
ଶ୍ରୀଵତ୍ସଂ ପୁରୁଷୋତ୍ତମଂ ମଣିନିଭଂ ରାମଂ ଭଜେ ତାରକମ୍ ॥ 127
ସତ୍ଯଜ୍ଞାନମନନ୍ତମଚ୍ଯୁତମଜଂ ଚାଵ୍ଯାକୃତଂ ତତ୍ପରଂ
କୂଟସ୍ଥାଦିସମସ୍ତସାକ୍ଷିମନଘଂ ସାକ୍ଷାଦ୍ଵିରାଟ୍ତତ୍ତ୍ଵଦମ୍ ।
ଵେଦ୍ଯଂ ଵିଶ୍ଵମଯଂ ସ୍ଵଲୀନଭୁଵନସ୍ଵାରାଜ୍ଯସୌଖ୍ଯପ୍ରଦଂ
128
ପୂର୍ଣଂ ପୂର୍ଣତରଂ ପୁରାଣପୁରୁଷଂ ରାମଂ ଭଜେ ତାରକମ୍ ॥ 128
ରାମଂ ରାକ୍ଷସଵଂଶନାଶନକରଂ ରାକେନ୍ଦୁବିମ୍ବାନନଂ
ରକ୍ଷୋରିଂ ରଘୁଵଂଶଵର୍ଧନକରଂ ରକ୍ତାଧରଂ ରାଘଵମ୍ ।
ରାଧାଯାତ୍ମନିଵାସିନଂ ରଵିନିଭଂ ରମ୍ଯଂ ରମାନାଯକଂ
129
ରନ୍ଧ୍ରାନ୍ତର୍ଗତଶେଷଶାଯିନମହଂ ରାମଂ ଭଜେ ତାରକମ୍ ॥ 129
ଓତପ୍ରୋତସମସ୍ତଵସ୍ତୁନିଚଯଂ ଓଙ୍କାରବୀଜାକ୍ଷରଂ
ଓଙ୍କାରପ୍ରକୃତିଂ ଷଡକ୍ଷରହିତଂ ଓଙ୍କାରକନ୍ଦାଙ୍କୁରମ୍ ।
ଓଙ୍କାରସ୍ଫୁଟଭୂର୍ଭୁଵସ୍ସୁପରିତଂ ଓଘତ୍ରଯାରାଧିତମ୍
130
ଓଙ୍କାରୋଜ୍ଜ୍ଵଲସିଂହପୀଠନିଲଯଂ ରାମଂ ଭଜେ ତାରକମ୍ ॥ 130
ସାକେତେ ନଗରେ ସମସ୍ତସୁଖଦେ ହର୍ମ୍ଯେଽବ୍ଜକୋଟିଦ୍ଯୁତେ
ନକ୍ଷତ୍ରଗ୍ରହପଙ୍କ୍ତିଲଗ୍ନଶିଖରେ ଚାନ୍ତର୍ଯପଙ୍କେରୁହେ ।
ଵାଲ୍ମୀକାତ୍ରିପରାଶରାଦିମୁନିଭିସ୍ସଂସେଵ୍ଯମାନଂ ସ୍ଥିତଂ
131
ସୀତାଲଙ୍କୃତଵାମଭାଗମନିଶଂ ରାମଂ ଭଜେ ତାରକମ୍ ॥ 131
ଵୈକୁଣ୍ଠେ ନଗରେ ସୁରଦ୍ରୁମତଲେ ଚାନନ୍ଦଵପ୍ରାନ୍ତରେ
ନାନାରତ୍ନଵିନିର୍ମିତସ୍ଫୁଟପଟୁପ୍ରାକାରସଂଵେଷ୍ଟିତେ ।
ସୌଧେନ୍ଦୂପଲଶେଷତଲ୍ପଲଲିତେ ନୀଲୋତ୍ପଲଚ୍ଛାଦିତେ
132
ପର୍ଯଙ୍କେ ଶଯନଂ ରମାଦିସହିତଂ ରାମଂ ଭଜେ ତାରକମ୍ ॥ 132
ଵନ୍ଦେ ରାମମନାଦିପୂରୁଷମଜଂ ଵନ୍ଦେ ରମାନାଯକଂ
ଵନ୍ଦେ ହାରିକିରୀଟକୁଣ୍ଡଲଧରଂ ଵନ୍ଦେ ସୁନୀଲଦ୍ଯୁତିମ୍ ।
ଵନ୍ଦେ ଚାପକଲମ୍ବକୋଜ୍ଜ୍ଵଲକରଂ ଵନ୍ଦେ ଜଗନ୍ମଙ୍ଗଲଂ
133
ଵନ୍ଦେ ପଙ୍କ୍ତିରଥାତ୍ମଜଂ ମମ ଗୁରୁଂ ଵନ୍ଦେ ସଦା ରାଘଵମ୍ ॥ 133
ଵନ୍ଦେ ଶୌନକଗୌତମାଦ୍ଯଭିନୁତଂ ଵନ୍ଦେ ଘନଶ୍ଯାମଲଂ
ଵନ୍ଦେ ତାରକପୀଠମଧ୍ଯନିଲଯଂ ଵନ୍ଦେ ଜଗନ୍ନାଯକମ୍ ।
ଵନ୍ଦେ ଭକ୍ତଜନୌଘଦେଵିଵଟପଂ ଵନ୍ଦେ ଧନୁର୍ଵଲ୍ଲଭଂ
134
ଵନ୍ଦେ ତତ୍ତ୍ଵମସୀତିଵାକ୍ଯଜନକଂ ଵନ୍ଦେ ସଦା ରାଘଵମ୍ ॥ 134
ଵନ୍ଦେ ସୂର୍ଯଶଶାଙ୍କଲୋଚନଯୁଗଂ ଵନ୍ଦେ ଜଗତ୍ପାଵନଂ
ଵନ୍ଦେ ପତ୍ରସହସ୍ରପଦ୍ମନିଲଯଂ ଵନ୍ଦେ ପୁରାରିପ୍ରିଯମ୍ ।
ଵନ୍ଦେ ରାକ୍ଷସଵଂଶନାଶନକରଂ ଵନ୍ଦେ ସୁଧାଶୀତଲଂ
135
ଵନ୍ଦେ ଦେଵକପୀନ୍ଦ୍ରକୋଟିଵିନୁତଂ ଵନ୍ଦେ ସଦା ରାଘଵମ୍ ॥ 135
ଵନ୍ଦେ ସାଗରଗର୍ଵଭଙ୍ଗଵିଶିଖଂ ଵନ୍ଦେ ଜଗଜ୍ଜୀଵନଂ
ଵନ୍ଦେ କୌଶିକଯାଗରକ୍ଷଣକରଂ ଵନ୍ଦେ ଗୁରୁଣାଂ ଗୁରୁମ୍ ।
ଵନ୍ଦେ ବାଣଶରାସନୋଜ୍ଜ୍ଵଲକରଂ ଵନ୍ଦେ ଜଟାଵଲ୍କଲଂ
136
ଵନ୍ଦେ ଲକ୍ଷ୍ମଣଭୂମିଜାନ୍ଵିତମହଂ ଵନ୍ଦେ ସଦା ରାଘଵମ୍ ॥ 136
ଵନ୍ଦେ ପାଣ୍ଡରପୁଣ୍ଡରୀକନଯନଂ ଵନ୍ଦେଽବ୍ଜବିମ୍ବାନନଂ
ଵନ୍ଦେ କମ୍ବୁଗଲଂ କରାବ୍ଜଯୁଗଲଂ ଵନ୍ଦେ ଲଲାଟୋଜ୍ଜ୍ଵଲମ୍ ।
ଵନ୍ଦେ ପୀତଦୁକୂଲମମ୍ବୁଦନିଭଂ ଵନ୍ଦେ ଜଗନ୍ମୋହନଂ
137
ଵନ୍ଦେ କାରଣମାନୁଷୋଜ୍ଜ୍ଵଲତନୁଂ ଵନ୍ଦେ ସଦା ରାଘଵମ୍ ॥ 137
ଵନ୍ଦେ ନୀଲସରୋଜକୋମଲରୁଚିଂ ଵନ୍ଦେ ଜଗଦ୍ଵନ୍ଦିତଂ
ଵନ୍ଦେ ସୂର୍ଯକୁଲାବ୍ଧିକୌସ୍ତୁଭମଣିଂ ଵନ୍ଦେ ସୁରାରାଧିତମ୍ ।
ଵନ୍ଦେ ପାତକପଞ୍ଚକପ୍ରହରଣଂ ଵନ୍ଦେ ଜଗତ୍କାରଣଂ
138
ଵନ୍ଦେ ଵିଂଶତିପଞ୍ଚତତ୍ତ୍ଵରହିତଂ ଵନ୍ଦେ ସଦା ରାଘଵମ୍ ॥ 138
ଵନ୍ଦେ ସାଧକଵର୍ଗକଲ୍ପକତରୁଂ ଵନ୍ଦେ ତ୍ରିମୂର୍ତ୍ଯାତ୍ମକଂ
ଵନ୍ଦେ ନାଦଲଯାନ୍ତରସ୍ଥଲଗତଂ ଵନ୍ଦେ ତ୍ରିଵର୍ଗାତ୍ମକମ୍ ।
ଵନ୍ଦେ ରାଗଵିହୀନଚିତ୍ତସୁଲଭଂ ଵନ୍ଦେ ସଭାନାଯକଂ
139
ଵନ୍ଦେ ପୂର୍ଣଦଯାମୃତାର୍ଣଵମହଂ ଵନ୍ଦେ ସଦା ରାଘଵମ୍ ॥ 139
ଵନ୍ଦେ ସାତ୍ତ୍ଵିକତତ୍ତ୍ଵମୁଦ୍ରିତତନୁଂ ଵନ୍ଦେ ସୁଧାଦାଯକଂ
ଵନ୍ଦେ ଚାରୁଚତୁର୍ଭୁଜଂ ମଣିନିଭଂ ଵନ୍ଦେ ଷଡବ୍ଜସ୍ଥିତମ୍ ।
ଵନ୍ଦେ ବ୍ରହ୍ମପିପୀଲିକାଦିନିଲଯଂ ଵନ୍ଦେ ଵିରାଟ୍ଵିଗ୍ରହଂ
140
ଵନ୍ଦେ ପନ୍ନଗତଲ୍ପଶାଯିନମହଂ ଵନ୍ଦେ ସଦା ରାଘଵମ୍ ॥ 140
ସିଂହାସନସ୍ଥଂ ମୁନିସିଦ୍ଧସେଵ୍ଯଂ
ରକ୍ତୋତ୍ପଲାଲଙ୍କୃତପାଦପଦ୍ମମ୍ ।
ସୀତାସମେତଂ ଶଶିସୂର୍ଯନେତ୍ରଂ
141
ରାମଂ ଭଜେ ରାଘଵରାମଚନ୍ଦ୍ରମ୍ ॥ 141
ଶ୍ରୀରାମଭଦ୍ରାଶ୍ରିତସଦ୍ଗୁରୂଣାଂ
ପାଦାରଵିନ୍ଦଂ ଭଜତାଂ ନରାଣାମ୍ ।
ଆରୋଗ୍ଯମୈଶ୍ଵର୍ଯମନନ୍ତକୀର୍ତି-
142
ରନ୍ତେ ଚ ଵିଷ୍ଣୋଃ ପଦମସ୍ତି ସତ୍ଯମ୍ ॥ 142
ଦଶରଥଵରପୁତ୍ରଂ ଜାନକୀସତ୍କଲତ୍ରଂ
ଦଶମୁଖହରଦକ୍ଷଂ ପଦ୍ମପତ୍ରାଯତାକ୍ଷମ୍ ।
କରଧୃତଶରଚାପଂ ଚାରୁମୁକ୍ତାକଲାପଂ
143
ରଘୁକୁଲନୃଵରେଣ୍ଯଂ ରାମମୀଡେ ଶରଣ୍ଯମ୍ ॥ 143
ଦଶମୁଖଗଜସିଂହଂ ଦୈତ୍ଯଗର୍ଵାତିରଂହଂ
କଦନଭଯଦହସ୍ତଂ ତାରକବ୍ରହ୍ମ ଶସ୍ତମ୍ ।
ମଣିଖଚିତକିରୀଟଂ ମଞ୍ଜୁଲାଲାପଵାଟଂ
144
ଦଶରଥକୁଲଚନ୍ଦ୍ରଂ ରାମଚନ୍ଦ୍ରଂ ଭଜେଽହମ୍ ॥ 144
ରାମଂ ରକ୍ତସରୋରୁହାକ୍ଷମମଲଂ ଲଙ୍କାଧିନାଥାନ୍ତକଂ
କୌସଲ୍ଯାନଯନୋତ୍ସୁକଂ ରଘୁଵରଂ ନାଗେନ୍ଦ୍ରତଲ୍ପସ୍ଥିତମ୍ ।
ଵୈଦେହୀକୁଚକୁମ୍ଭକୁଙ୍କୁମରଜୋଲଙ୍କାରହାରଂ ହରିଂ
145
ମାଯାମାନୁଷଵିଗ୍ରହଂ ରଘୁପତିଂ ସୀତାସମେତଂ ଭଜେ ॥ 145
ରାମଂ ରାକ୍ଷସମର୍ଦନଂ ରଘୁଵରଂ ଦୈତେଯଭିଧ୍ଵଂସିନଂ
ସୁଗ୍ରୀଵେପ୍ସିତରାଜ୍ଯଦଂ ସୁରପତେର୍ଭୀତ୍ଯନ୍ତକଂ ଶାର୍ଙ୍ଗିଣମ୍ ।
ଭକ୍ତାନାମଭଯପ୍ରଦଂ ଭଯହରଂ ପାପୌଘଵିଧ୍ଵଂସିନଂ
146
ସାମୀରିସ୍ତୁତପାଦପଦ୍ମଯୁଗଲଂ ସୀତାସମେତଂ ଭଜେ ॥ 146
ଯତ୍ପାଦାମ୍ବୁଜରେଣୁନା ମୁନିସତୀ ମୁକ୍ତିଙ୍ଗତା ଯନ୍ମହଃ
ପୁଣ୍ଯଂ ପାତକନାଶନଂ ତ୍ରିଜଗତାଂ ଭାତି ସ୍ମୃତଂ ପାଵନମ୍ ।
ସ୍ମୃତ୍ଵା ରାଘଵମପ୍ରମେଯମମଲଂ ପୂର୍ଣେନ୍ଦୁମନ୍ଦସ୍ମିତଂ
147
ତଂ ରାମଂ ସରସୀରୁହାକ୍ଷମମଲଂ ସୀତାସମେତଂ ଭଜେ ॥ 147
ଵୈଦେହୀକୁଚମଣ୍ଡଲାଗ୍ର-ଵିଲସନ୍ମାଣିକ୍ଯହସ୍ତାମ୍ବୁଜଂ
ଚଞ୍ଚତ୍କଙ୍କଣହାରନୂପୁର-ଲସତ୍କେଯୂରହାରାନ୍ଵିତମ୍ ।
ଦିଵ୍ଯଶ୍ରୀମଣିକୁଣ୍ଡଲୋଜ୍ଜ୍ଵଲ-ମହାଭୂଷାସହସ୍ରାନ୍ଵିତଂ
148
ଵୀରଶ୍ରୀରଘୁପୁଙ୍ଗଵଂ ଗୁଣନିଧିଂ ସୀତାସମେତଂ ଭଜେ ॥ 148
ଵୈଦେହୀକୁଚମଣ୍ଡଲୋପରି-ଲସନ୍ମାଣିକ୍ଯହାରାଵଲୀ-
ମଧ୍ଯସ୍ଥଂ ନଵନୀତକୋମଲରୁଚିଂ ନୀଲୋତ୍ପଲଶ୍ଯାମଲମ୍ ।
କନ୍ଦର୍ପାଯୁତକୋଟିସୁନ୍ଦରତନୁଂ ପୂର୍ଣେନ୍ଦୁବିମ୍ବାନନଂ
149
କୌସଲ୍ଯାକୁଲଭୂଷଣଂ ରଘୁପତିଂ ସୀତାସମେତଂ ଭଜେ ॥ 149
ଦିଵ୍ଯାରଣ୍ଯଯତୀନ୍ଦ୍ରନାମନଗରେ ମଧ୍ଯେ ମହାମଣ୍ଟପେ
ସ୍ଵର୍ଣସ୍ତମ୍ଭସହସ୍ରଷୋଡଶଯୁତେ ମନ୍ଦାରମୂଲାଶ୍ରିତେ ।
ନାନାରତ୍ନଵିଚିତ୍ରନିର୍ମଲମହାସିଂହାସନେ ସଂସ୍ଥିତଂ
150
ସୀତାଲକ୍ଷ୍ମଣସେଵିତଂ ରଘୁପତିଂ ସୀତାସମେତଂ ଭଜେ ॥ 150
କସ୍ତୂରୀତିଲକଂ କପୀନ୍ଦ୍ରହରଣଂ କାରୁଣ୍ଯଵାରାନ୍ନିଧିଂ
କ୍ଷୀରାମ୍ଭୋଧିସୁତାମୁଖାବ୍ଜମଧୁପଂ କଲ୍ଯାଣସମ୍ପନ୍ନିଧିମ୍ ।
କୌସଲ୍ଯାନଯନୋତ୍ସୁକଂ କପିଵରତ୍ରାଣଂ ମହାପୌରୁଷଂ
151
କୌମାରପ୍ରିଯମର୍କକୋଟିସଦୃଶଂ ସୀତାସମେତଂ ଭଜେ ॥ 151
ଵିଦ୍ଯୁତ୍କୋଟିଦିଵାକରଦ୍ଯୁତିନିଭଂ ଶ୍ରୀକୌସ୍ତୁଭାଲଙ୍କୃତଂ
ଯୋଗୀନ୍ଦ୍ରୈସ୍ସନକାଦିଭିଃ ପରିଵୃତଂ କୈଲାସନାଥପ୍ରିଯମ୍ ।
ମୁକ୍ତାରତ୍ନକିରୀଟକୁଣ୍ଡଲଧରଂ ଗ୍ରୈଵେଯହାରାନ୍ଵିତଂ
152
ଵୈଦେହୀକୁଚସନ୍ନିଵାସମନିଶଂ ସୀତାସମେତଂ ଭଜେ ॥ 152
ମେଘଶ୍ଯାମଲମମ୍ବୁଜାତନଯନଂ ଵିସ୍ତୀର୍ଣଵକ୍ଷସ୍ସ୍ଥଲଂ
ବାହୁଦ୍ଵନ୍ଦ୍ଵଵିରାଜିତଂ ସୁଵଦନଂ ଶୋଣାଙ୍ଘ୍ରିପଙ୍କେରୁହମ୍ ।
ନାନାରତ୍ନଵିଚିତ୍ରଭୂଷଣଯୁତଂ କୋଦଣ୍ଡବାଣାଙ୍କିତଂ
153
ତ୍ରୈଲୋକ୍ଯାଽପ୍ରତିମାନସୁନ୍ଦରତନୁଂ ସୀତାସମେତଂ ଭଜେ ॥ 153
ଵୈଦେହୀଯୁତଵାମଭାଗମତୁଲଂ ଵନ୍ଦାରୁମନ୍ଦାରକଂ
ଵନ୍ଦେ ପ୍ରସ୍ତୁତକୀର୍ତିଵାସିତତରୁଚ୍ଛାଯାନୁକାରିପ୍ରଭମ୍ ।
ଵୈଦେହୀକୁଚକୁଙ୍କୁମାଙ୍କିତମହୋରସ୍କଂ ମହାଭୂଷଣଂ
154
ଵେଦାନ୍ତୈରୁପଗୀଯମାନମସକୃତ୍ସୀତାସମେତଂ ଭଜେ ॥ 154
ଦେଵାନାଂ ହିତକାରଣେନ ଭୁଵନେ ଧୃତ୍ଵାଽଵତାରଂ ଧ୍ରୁଵଂ
ରାମଂ କୌଶିକଯଜ୍ଞଵିଘ୍ନଦଲନଂ ତତ୍ତାଟକାସଂହରମ୍ ।
ନିତ୍ଯଂ ଗୌତମପତ୍ନିଶାପଦଲନଶ୍ରୀପାଦରେଣୁଂ ଶୁଭଂ
155
ଶମ୍ଭୋରୁତ୍କଟଚାପଖଣ୍ଡନମହାସତ୍ଵଂ ଭଜେ ରାଘଵମ୍ ॥ 155
ଶ୍ରୀରାମଂ ନଵରତ୍ନକୁଣ୍ଡଲଧରଂ ଶ୍ରୀରାମରକ୍ଷାମଣିଂ
ଶ୍ରୀରାମଂ ଚ ସହସ୍ରଭାନୁସଦୃଶଂ ଶ୍ରୀରାମଚନ୍ଦ୍ରୋଦଯମ୍ ।
ଶ୍ରୀରାମଂ ଶ୍ରୁତକୀର୍ତିମାକରମହଂ ଶ୍ରୀରାମମୁକ୍ତିପ୍ରଦଂ
156
ଶ୍ରୀରାମଂ ରଘୁନନ୍ଦନଂ ଭଯହରଂ ଶ୍ରୀରାମଚନ୍ଦ୍ରଂ ଭଜେ ॥ 156
ରାମମିନ୍ଦୀଵରଶ୍ଯାମଂ ରାଜୀଵାଯତଲୋଚନମ୍ ।
157
ଜ୍ଯାଘୋଷନିର୍ଜିତାରାତିଂ ଜାନକୀରମଣଂ ଭଜେ ॥ 157
ଦୀର୍ଘବାହୁମରଵିନ୍ଦଲୋଚନଂ
ଦୀନଵତ୍ସଲମନାଥରକ୍ଷକମ୍ ।
ଦୀକ୍ଷିତଂ ସକଲଲୋକରକ୍ଷଣେ
158
ଦୈଵତଂ ଦଶରଥାତ୍ମଜଂ ଭଜେ ॥ 158
ପ୍ରାତସ୍ସ୍ମରାମି ରଘୁନାଥମୁଖାରଵିନ୍ଦଂ
ମନ୍ଦସ୍ମିତଂ ମଧୁରଭାଷି ଵିଶାଲଫାଲମ୍ ।
କର୍ଣାଵଲମ୍ବିଚଲକୁଣ୍ଡଲଗଣ୍ଡଭାଗଂ
159
କର୍ଣାନ୍ତଦୀର୍ଘନଯନଂ ନଯନାଭିରାମମ୍ ॥ 159
ପ୍ରାତର୍ଭଜାମି ରଘୁନାଥକରାରଵିନ୍ଦଂ
ରକ୍ଷୋଗଣାଯ ଭଯଦଂ ଵରଦଂ ନିଜେଭ୍ଯଃ ।
ଯଦ୍ରାଜସଂସଦି ଵିଭିଦ୍ଯ ମହେଶଚାପଂ
160
ସୀତାକରଗ୍ରହଣମଙ୍ଗଲମାପ ସଦ୍ଯଃ ॥ 160
ପ୍ରାତର୍ନମାମି ରଘୁନାଥପଦାରଵିନ୍ଦଂ
ପଦ୍ମାଙ୍କୁଶାଦିଶୁଭରେଖଶୁଭାଵହଂ ଚ ।
ଯୋଗୀନ୍ଦ୍ରମାନସମଧୁଵ୍ରତସେଵ୍ଯମାନଂ
161
ଶାପାପହଂ ସପଦି ଗୌତମଧର୍ମପତ୍ନ୍ଯାଃ ॥ 161
ପ୍ରାତର୍ଵଦାମି ଵଚସା ରଘୁନାଥନାମ
ଵାଗ୍ଦୋଷହାରି ସକଲଂ କଲୁଷଂ ନିହନ୍ତୃ ।
ଯତ୍ପାର୍ଵତୀ ସ୍ଵପତିନା ସହ ଭୋକ୍ତୁକାମା
162
ପ୍ରୀତ୍ଯା ସହସ୍ରହରିନାମସମଂ ଜଜାପ ॥ 162
ପ୍ରାତଃ ଶ୍ରଯେ ଶ୍ରୁତିନୁତଂ ରଘୁନାଥମୂର୍ତିଂ
ନୀଲାମ୍ବୁଦୋତ୍ପଲସିତେତରରତ୍ନନୀଲାମ୍ ।
ଆମୁକ୍ତମୌକ୍ତିକଵିଶେଷଵିଭୂଷଣାଢ୍ଯାଂ
163
ଧ୍ଯେଯାଂ ସମସ୍ତମୁନିଭିର୍ନିଜଭୃତ୍ଯମୁଖ୍ଯୈଃ ॥ 163
ରଘୁକୁଲଵରନାଥୋ ଜାନକୀପ୍ରାଣନାଥଃ
ପିତୃଵଚନଵିଧାତା କୀଶରାଜ୍ଯପ୍ରଦାତା ।
ପ୍ରତିନିଶିଚରନାଶଃ ପ୍ରାପ୍ତରାଜ୍ଯପ୍ରଵେଶୋ
164
ଵିହିତଭୁଵନରକ୍ଷଃ ପାତୁ ପଦ୍ମାଯତାକ୍ଷଃ ॥ 164
କୁଵଲଯଦଲନୀଲଃ ପୀତଵାସାଃ ସ୍ମିତାସ୍ଯୋ
ଵିଵିଧରୁଚିରଭୂଷାଭୂଷିତୋ ଦିଵ୍ଯମୂର୍ତିଃ ।
ଦଶରଥକୁଲନାଥୋ ଜାନକୀପ୍ରାଣନାଥୋ
165
ନିଵସତୁ ମମ ଚିତ୍ତେ ସର୍ଵଦା ରାମଚନ୍ଦ୍ରଃ ॥ 165
ଜଯତୁ ଜଯତୁ ରାମୋ ଜାନକୀଵଲ୍ଲଭୋଽଯଂ
ଜଯତୁ ଜଯତୁ ରାମଶ୍ଚନ୍ଦ୍ରଚୂଡାର୍ଚିତାଙ୍ଘ୍ରିଃ ।
ଜଯତୁ ଜଯତୁ ଵାଣୀନାଥନାଥଃ ପରାତ୍ମା
166
ଜଯତୁ ଜଯତୁ ରାମୋଽନାଥନାଥଃ କୃପାଲୁଃ ॥ 166
ଵଦତୁ ଵଦତୁ ଵାଣୀ ରାମରାମେତି ନିତ୍ଯଂ
ଜଯତୁ ଜଯତୁ ଚିତ୍ତଂ ରାମପାଦାରଵିନ୍ଦମ୍ ।
ନମତୁ ନମତୁ ଦେହଂ ସନ୍ତତଂ ରାମଚନ୍ଦ୍ରଂ
167
ନ ଭଵତୁ ମମ ପାପଂ ଜନ୍ମଜନ୍ମାନ୍ତରେଷୁ ॥ 167
ଆନନ୍ଦରୂପଂ ଵରଦଂ ପ୍ରସନ୍ନଂ
ସିଂହେକ୍ଷଣଂ ସେଵକପାରିଜାତମ୍ ।
ନୀଲୋତ୍ପଲାଙ୍ଗଂ ଭୁଵନୈକମିତ୍ରଂ
168
ରାମଂ ଭଜେ ରାଘଵରାମଚନ୍ଦ୍ରମ୍ ॥ 168
ଲଙ୍କାଵିରାମଂ ରଣରଙ୍ଗଭୀମଂ
ରାଜୀଵନେତ୍ରଂ ରଘୁଵଂଶମିତ୍ରମ୍ ।
କାରୁଣ୍ଯମୂର୍ତିଂ କରୁଣାପ୍ରପୂର୍ତିଂ
169
ଶ୍ରୀରାମଚନ୍ଦ୍ରଂ ଶରଣଂ ପ୍ରପଦ୍ଯେ ॥ 169
ସୁଗ୍ରୀଵମିତ୍ରଂ ପରମଂ ପଵିତ୍ରଂ
ସୀତାକଲତ୍ରଂ ନଵହେମସୂତ୍ରମ୍ ।
କାରୁଣ୍ଯପାତ୍ରଂ ଶତପତ୍ରନେତ୍ରଂ
170
ଶ୍ରୀରାମଚନ୍ଦ୍ରଂ ଶିରସା ନମାମି ॥ 170
ଶ୍ରୀରାଘଵେତି ରମଣେତି ରଘୂଦ୍ଵହେତି
ରାମେତି ରାଵଣହରେତି ରମାଧଵେତି ।
ସାକେତନାଥସୁମୁଖେତି ଚ ସୁଵ୍ରତେତି
171
ଵାଣୀ ସଦା ଵଦତୁ ରାମ ହରେ ହରେତି ॥ 171
ଶ୍ରୀରାମନାମାମୃତମନ୍ତ୍ରବୀଜଂ
ସଞ୍ଜୀଵନଂ ଚେନ୍ମନସି ପ୍ରତିଷ୍ଠମ୍ ।
ହାଲାହଲଂ ଵା ପ୍ରଲଯାନଲଂ ଵା
172
ମୃତ୍ଯୋର୍ମୁଖଂ ଵା ଵିତଥୀକରୋତି ॥ 172
କିଂ ଯୋଗଶାସ୍ତ୍ରୈଃ କିମଶେଷଵିଦ୍ଯା
କିଂ ଯାଗଗଙ୍ଗାଦିଵିଶେଷତୀର୍ଥୈଃ ।
କିଂ ବ୍ରହ୍ମଚର୍ଯାଶ୍ରମସଞ୍ଚରେଣ
173
ଭକ୍ତିର୍ନଚେତ୍ତେ ରଘୁଵଂଶକୀର୍ତ୍ଯାମ୍ ॥ 173
ଇଦଂ ଶରୀରଂ ଶ୍ଲଥସନ୍ଧିଜର୍ଝରଂ
ପତତ୍ଯଵଶ୍ଯଂ ପରିଣାମପେଶଲମ୍ ।
କିମୌଷଥଂ ପୃଚ୍ଛସି ମୂଢ ଦୁର୍ମତେ
174
ନିରାମଯଂ ରାମକଥାମୃତଂ ପିବ ॥ 174
ହେ ରାମଭଦ୍ରାଶ୍ରଯ ହେ କୃପାଲୋ
ହେ ଭକ୍ତଲୋକୈକଶରଣ୍ଯମୂର୍ତେ ।
ପୁନୀହି ମାଂ ତ୍ଵଚ୍ଚରଣାରଵିନ୍ଦଂ
175
ଜଗତ୍ପଵିତ୍ରଂ ଶରଣଂ ମମାଽସ୍ତୁ ॥ 175
ନୀଲାଭ୍ରଦେହ ନିଖିଲେଶ ଜଗନ୍ନିଵାସ
ରାଜୀଵନେତ୍ର ରମଣୀଯଗୁଣାଭିରାମ ।
ଶ୍ରୀଦାମ ଦୈତ୍ଯକୁଲମର୍ଦନ ରାମଚନ୍ଦ୍ର
176
ତ୍ଵତ୍ପାଦପଦ୍ମମନିଶଂ କଲଯାମି ଚିତ୍ତେ ॥ 176
ଶ୍ରୀରାମଚନ୍ଦ୍ର କରୁଣାକର ଦୀନବନ୍ଧୋ
ସୀତାସମେତ ଭରତାଗ୍ରଜ ରାଘଵେଶ ।
ପାପାର୍ତିଭଞ୍ଜନ ଭଯାତୁରଦୀନବନ୍ଧୋ
177
ପାପାମ୍ବୁଧୌ ପତିତମୁଦ୍ଧର ମାମନାଥମ୍ ॥ 177
ଇନ୍ଦୀଵରଦଲଶ୍ଯାମ-ମିନ୍ଦୁକୋଟିନିଭାନନମ୍ ।
175
କନ୍ଦର୍ପକୋଟିଲାଵଣ୍ଯଂ ଵନ୍ଦେଽହଂ ରଘୁନନ୍ଦନମ୍ ॥ 175
ଇତି ଶ୍ରୀବୋଧେନ୍ଦ୍ରସରସ୍ଵତୀ କୃତ ଶ୍ରୀରାମକର୍ଣାମୃତମ୍ ॥
Roman (IAST) Transliteration
maṅgalaślokāḥ
maṅgalaṃ bhagavānviṣṇurmaṅgalaṃ madhusūdanaḥ |
maṅgalaṃ puṇḍarīkākṣo maṅgalaṃ garuḍadhvajaḥ || 1
maṅgalaṃ kosalendrāya mahanīyaguṇābdhaye |
cakravartitanūjāya sārvabhaumāya maṅgalam || 2
vedavedāntavedyāya meghaśyāmalamūrtaye |
puṃsāṃ mohanarūpāya puṇyaślokāya maṅgalam || 3
viśvāmitrāntaraṅgāya mithilānagarīpateḥ |
bhāgyānāṃ paripākāya bhavyarūpāya maṅgalam || 4
pitṛbhaktāya satataṃ bhrātṛbhiḥ saha sītayā |
nanditākhilalokāya rāmacandrāya maṅgalam || 5
tyaktasāketavāsāya citrakūṭavihāriṇe |
sevyāya sarvayamināṃ dhīrodāttāya maṅgalam || 6
saumitriṇā ca jānakyā cāpabāṇāsidhāriṇā |
saṃsevyāya sadā bhaktyā sānujāyāstu maṅgalam || 7
daṇḍakāraṇyavāsāya khaṇḍitāmaraśatrave |
gṛdhrarājāya bhaktāya muktidāyāstu maṅgalam || 8
sādaraṃ śabarīdattaphalamūlābhilāṣiṇe |
saulabhyaparipūrṇāya sattvodyuktāya maṅgalam || 9
hanūmatsamavetāya harīśābhīṣṭadāyine |
vālipramathanāyāstu mahādhīrāya maṅgalam || 10
śrīmate raghuvīrāya setulaṅghitasindhave |
jitarākṣasarājāya raṇadhīrāya maṅgalam || 11
āsādya nagarīṃ divyāmabhiṣiktāya sītayā |
rājādhirājarājāya rāmabhadrāya maṅgalam || 12
vibhīṣaṇakṛte prītyā viśvābhīṣṭapradāyine |
jānakīprāṇanāthāya sadā rāmāya maṅgalam || 13
—-
śrīrāmaṃ trijagadguruṃ suravaraṃ sītāmanonāyakaṃ
śyāmāṅgaṃ śaśikoṭipūrṇavadanaṃ cañcatkalākaustubham |
saumyaṃ satyaguṇottamaṃ susarayūtīre vasantaṃ prabhuṃ
trātāraṃ sakalārthasiddhisahitaṃ vande raghūṇāṃ patim || 14
śrīrāghavaṃ daśarathātmajamaprameyaṃ
sītāpatiṃ raghuvarānvayaratnadīpam |
ājānubāhumaravindadalāyatākṣaṃ
rāmaṃ niśācaravināśakaraṃ namāmi || 15
śrīrāmacandra karuṇākara rāghavendra
rājendracandra raghuvaṃśasamudracandra |
sugrīvanetrayugalotpala-pūrṇacandra
sītāmanaḥkumudacandra namo namaste || 16
sītāmanomānasarājahaṃsa
saṃsārasantāpahara kṣamāvan |
śrīrāma daityāntaka śāntarūpa
śrītārakabrahma namo namaste || 17
viṣṇo rāghava vāsudeva nṛhare devaughacūḍāmaṇe |
saṃsārārṇavakarṇadhāraka hare kṛṣṇāya tubhyaṃ namaḥ || 18
sugrīvādisamastavānaravaraissaṃsevyamānaṃ sadā |
viśvāmitraparāśarādimunibhissaṃstūyamānaṃ bhaje || 19
rāmaṃ candanaśītalaṃ kṣitisutāmohākaraṃ śrīkaraṃ
vaidehīnayanāravindamihiraṃ sampūrṇacandrānanam |
rājānaṃ karuṇāsametanayanaṃ sītāmanonandanaṃ
sītādarpaṇacārugaṇḍalalitaṃ vande sadā rāghavam || 20
jānāti rāma tava nāmaruciṃ maheśo
jānāti gautamasatī caraṇaprabhāvam |
jānāti dorbalaparākramamīśacāpo
jānātyamoghapaṭubāṇagatiṃ payodhiḥ || 21
mātā rāmo matpitā rāmacandro
bhrātā rāmo matsakhā rāghaveśaḥ |
sarvasvaṃ me rāmacandro dāyālu-
rnānyaṃ daivaṃ naiva jāne na jāne || 22
vimalakamalanetraṃ visphurannīlagātraṃ
tapanakulapavitraṃ dānavadhvantamitram |
bhuvanaśubhacaritraṃ bhūmiputrīkalatraṃ
daśarathavaraputraṃ naumi rāmākhyamitram || 23
mārge mārge śākhināṃ ratnavedī
vedyāṃ vedyāṃ kinnarībṛndagītam |
gīte gīte mañjulālāpagoṣṭhī
goṣṭhyāṃ goṣṭhyāṃ tvatkathā rāmacandra || 24
vṛkṣe vṛkṣe vīkṣitāḥ pakṣisaṅghāḥ
saṅghe saṅghe mañjulāmodavākyam |
vākye vākye mañjulālāpagoṣṭhī
goṣṭhyāṃ goṣṭhyāṃ tvatkathā rāmacandra || 25
duritatimiracandro duṣṭakañjātacandraḥ
surakuvalayacandrassūryavaṃśābdhicandraḥ |
svajananivahacandraśśatrurājīvacandraḥ
praṇatakumudacandraḥ pātu māṃ rāmacandraḥ || 26
kalyāṇadaṃ kauśikayajñapālaṃ
kalānidhiṃ kāñcanaśailadhīram |
kañjātanetraṃ karuṇāsamudraṃ
kākutstharāmaṃ kalayāmi citte || 27
rājīvāyatalocanaṃ raghuvaraṃ nīlotpalaśyāmalaṃ
mandārāñcitamaṇḍape sulalite sauvarṇake puṣpake |
āsthāne navaratnarājikhacite siṃhāsane saṃsthitaṃ
sītālakṣmaṇalokapālasahitaṃ vande munīndrāspadam || 28
dhyāye rāmaṃ sudhāṃśuṃ natasakalabhavāraṇyatāpaprahāram |
śyāmaṃ śāntaṃ surendraṃ suramunivinutaṃ koṭisūryaprakāśam |
sītāsaumitrisevyaṃ suranarasugamaṃ divyasiṃhāsanastham |
sāyāhne rāmacandraṃ smitaruciramukhaṃ sarvadā me prasannam || 29
indranīlamaṇisannibhadehaṃ
vandanīyamasakṛnmunibṛndaiḥ |
lambamānatulasīvanamālaṃ
cintayāmi satataṃ raghuvīram || 30
sampūrṇacandravadanaṃ sarasīruhākṣaṃ
māṇikyakuṇḍaladharaṃ mukuṭābhirāmam |
cāmpeyagauravasanaṃ śaracāpahastaṃ
śrīrāmacandramaniśaṃ manasā smarāmi || 31
mātuḥ pārśve carantaṃ maṇimayaśayane mañjubhūṣāñcitāṅgam |
mandaṃ mandaṃ pibantaṃ mukulitanayanaṃ stanyamanyastanāgram |
aṅgulyāgraiḥ spṛśantaṃ sukhaparavaśayā sasmitāliṅgitāṅgam |
gāḍhaṃ gāḍhaṃ jananyā kalayatu hṛdayaṃ māmakaṃ rāmabālam || 32
rāmābhirāmaṃ nayanābhirāmaṃ
vācābhirāmaṃ vadanābhirāmam |
sarvābhirāmaṃ ca sadābhirāmaṃ
vande sadā dāśarathiṃ ca rāmam || 33
rāśabdoccāramātreṇa mukhānniryāti pātakāḥ |
punaḥ praveśabhītyā ca makārastu kavāṭavat || 34
anarghamāṇikyavirājamāna-
śrīpādukālaṅkṛtaśobhanābhyām |
aśeṣabṛndārakavanditābhyāṃ
namo namo rāmapadāmbujābhyām || 35
calatkanakakuṇḍalollasitadivyagaṇḍasthalaṃ
carācarajaganmayaṃ caraṇapadmagaṅgāśrayam |
caturvidhaphalapradaṃ caramapīṭhamadhyasthitaṃ
cidaṃśamakhilāspadaṃ daśarathātmajaṃ cintaye || 36
sanandanamunipriyaṃ sakalavarṇavedātmakaṃ
samastanigamāgamasphuritatattvasiṃhāsanam |
sahasranayanābjajādyamarabṛndasaṃsevitaṃ
samaṣṭipuravallabhaṃ daśarathātmajaṃ cintaye || 37
jāgratsvapnasuṣupti-kālavilasattattvātmacinmātrakaṃ
caitanyātmakamādhipāparahitaṃ bhūmyāditanmātrakam |
śāmbhavyādisamastayogakulakaṃ sāṅkhyāditattvātparaṃ
śabdāvācyamahaṃ namāmi satataṃ vyutpattināśātparam || 38
ikṣvākuvaṃśārṇavajātaratnaṃ
sītāṅganāyauvanabhāgyaratnam |
vaikuṇṭharatnaṃ mama bhāgyaratnaṃ
śrīrāmaratnaṃ śirasā namāmi || 39
ikṣvākunandanaṃ sugrīvapūjitaṃ
trailokyarakṣakaṃ satyasandhaṃ sadā |
rāghavaṃ raghupatiṃ rājīvalocanaṃ
rāmacandraṃ bhaje rāghaveśaṃ bhaje || 40
bhaktapriyaṃ bhaktasamādhigamyaṃ
cintāharaṃ cintitakāmadhenum |
sūryendukoṭidyutibhāsvaraṃ taṃ
rāmaṃ bhaje rāghavarāmacandram || 41
śrīrāmaṃ janakakṣitīśvarasutāvaktrāmbujāhāriṇaṃ
śrīmadbhānukulābdhikaustubhamaṇiṃ śrīratnavakṣassthalam |
śrīkaṇṭhādyamaraugharatnamakuṭālaṅkārapādāmbujaṃ
śrīvatsojjvalamindranīlasadṛśaṃ śrīrāmacandraṃ bhaje || 42
rāmacandra caritākathāmṛtaṃ
lakṣmaṇāgrajaguṇānukīrtanam |
rāghaveśa tava pādasevanaṃ
sambhavantu mama janmajanmani || 43
ajñānasambhava-bhavāmbudhibāḍabāgni-
ravyaktatattvanikarapraṇavādhirūḍhaḥ |
sītāsametamanujena hṛdantarāle
prāṇaprayāṇasamaye mama sannidhatte || 44
rāmo matkuladaivataṃ sakaruṇaṃ rāmaṃ bhaje sādaraṃ
rāmeṇākhilaghorapāpanihatī rāmāya tasmai namaḥ |
rāmānnāsti jagatrayaikasulabho rāmasya dāso'smyahaṃ
rāme prītiratīva me kulaguro śrīrāma rakṣasva mām || 45
vaidehīsahitaṃ suradrumatale haime mahāmaṇṭape |
madhyepuṣpakamāsane maṇimaye vīrāsane saṃsthitam |
agre vācayati prabhañjanasute tattvaṃ munibhyaḥ param |
vyākhyāntaṃ bharatādibhiḥ parivṛtaṃ rāmaṃ bhaje śyāmalam || 46
vāme bhūmisutā purastu hanumānpaścātsumitrāsuta-
śśatrughno bharataśca pārśvadalayorvāyvādikoṇeṣvapi |
sugrīvaśca vibhīṣaṇaśca yuvarāṭ tārāsuto jāmbavān
madhye nīlasarojakomalaruciṃ rāmaṃ bhaje śyāmalam || 47
keyūrāṅgadakaṅkaṇairmaṇigaṇairvairocamānaṃ sadā
rākāparvaṇicandrakoṭisadṛśaṃ chatreṇa vairājitam |
hemastambhasahasraṣoḍaśayute madhye mahāmaṇḍape
deveśaṃ bharatādibhiḥ parivṛtaṃ rāmaṃ bhaje śyāmalam || 48
sākete śaradindukundadhavale saughe mahāmaṇṭape |
paryastāgarudhūpadhūmapaṭale karpūradīpojjvale |
sugrīvāṅgadavāyuputrasahitaṃ saumitriṇā sevitaṃ
līlāmānuṣavigrahaṃ raghupatiṃ rāmaṃ bhaje śyāmalam || 49
śāntaṃ śāradacandrakoṭisadṛśaṃ candrābhirāmānanaṃ
candrārkāgnivikāsikuṇḍaladharaṃ candrāvataṃsastutam |
vīṇāpustakasākṣasūtravilasadvyākhyānamudrākaraṃ
deveśaṃ bharatādibhiḥ parivṛtaṃ rāmaṃ bhaje śyāmalam || 50
rāmaṃ rākṣasamardanaṃ raghupatiṃ śakrārividhvaṃsinaṃ
sugrīvepsitarājyadaṃ surapateḥ putrāntakaṃ śārṅgiṇam |
bhaktānāmabhayapradaṃ bhayaharaṃ pāpaughavidhvaṃsinaṃ
sītāsevitapādapadmayugalaṃ rāmaṃ bhaje śyāmalam || 51
kandarpāyutakoṭikoṭitulitaṃ kālāmbudaśyāmalaṃ
kambugrīvamudārakaustubhadharaṃ karṇāvataṃsotpalam |
kastūrītilakojjvalaṃ smitamukhaṃ cinmudrayālaṅkṛtaṃ
sītālakṣmaṇavāyuputrasahitaṃ siṃhāsanasthaṃ bhaje || 52
sākete navaratnapaṅktikhacite citradhvajālaṅkṛte
vāse svarṇamaye dalāṣṭalalite padme vimānottame |
āsīnaṃ bharatādisodarajanaiḥ śākhāmṛgaiḥ kinnaraiḥ
dikpālairmunipuṅgavairnṛpagaṇaissaṃsevyamānaṃ bhaje || 53
kastūrīghanasārakuṅkumalasacchrīcandanālaṅkṛtaṃ
kandarpādhikasundaraṃ ghananibhaṃ kākutsthavaṃśadhvajam |
kalyāṇāmbharaveṣṭitaṃ kamalayā yuktaṃ kalāvallabhaṃ
kalyāṇācalakārmukapriyasakhaṃ kalyāṇarāmaṃ bhaje || 54
muktermūlaṃ munivarahṛdānandakandaṃ mukundaṃ
kūṭasthākhyaṃ sakalavaradaṃ sarvacaitanyarūpam |
nādātītaṃ kamalanilayaṃ nādanādāntatattvaṃ
nādātītaṃ prakṛtirahitaṃ rāmacandraṃ bhaje'ham || 55
tārākāraṃ nikhilanilayaṃ tattvamasyādilakṣyaṃ
śabdāvācyaṃ triguṇarahitaṃ vyomamaṅguṣṭhamātram |
nirvāṇākhyaṃ saguṇamaguṇavyomarandhrāntarasthaṃ
sauṣumnāntaḥ praṇavasahitaṃ rāmacandraṃ bhaje'ham || 56
nijānandākāraṃ nigamaturagārādhitapadaṃ
parabrahmānandaṃ paramapadagaṃ pāpaharaṇam |
kṛpāpārāvāraṃ paramapuruṣaṃ padmanilayaṃ
bhaje rāmaṃ śyāmaṃ prakṛtirahitaṃ nirguṇamaham || 57
sākete nagare samastamahimādhāre jaganmohane
ratnastambhasahasramaṇṭapamahāsiṃhāsane sāmbuje |
viśvāmitravasiṣṭhagautamaśukavyāsādibhirmaunibhiḥ
dhyeyaṃ lakṣmaṇalokapālasahitaṃ sītāsametaṃ bhaje || 58
rāmaṃ śyāmābhirāmaṃ raviśaśinayanaṃ koṭisūryaprakāśaṃ
divyaṃ divyāstrapāṇiṃ śaramukhaśaradhiṃ cārukoḍaṇḍahastam |
kālaṃ kālāgnirudraṃ ripukuladahanaṃ vighnavicchedadakṣaṃ
bhīmaṃ bhīmāṭṭahāsaṃ sakalabhayaharaṃ rāmacandraṃ bhaje'ham || 59
śrīrāmaṃ bhuvanaikasundaratanuṃ dhārādharaśyāmalaṃ
rājīvāyatalocanaṃ raghuvaraṃ rākendubimbānanam |
kodaṇḍādinijāyudhāśritabhujairbhrāntaṃ videhātmajā-
dhīśaṃ bhaktajanāvanaṃ raghuvaraṃ śrīrāmacandraṃ bhaje || 60
śrīvatsāṅkamudārakaustubhalasatpītāmbarālaṅkṛtaṃ
nānāratnavirājamānamakuṭaṃ nīlāmbudaśyāmalam |
kastūrīghanasāracarcitatanuṃ mandāramālādharaṃ
kandarpāyutasundaraṃ raghupatiṃ sītāsametaṃ bhaje || 61
sadānandadeve sahasrārapadme
galaccandrapīyūṣadhārāmṛtānte |
sthitaṃ rāmamūrtiṃ niṣeve niṣeve-
'nyadaivaṃ na seve na seve na seve || 62
sudhābhāsitadvīpamadhye vimāne
suparvālivṛkṣojjvale śeṣatalpe |
niṣaṇṇaṃ ramāṅkaṃ niṣeve niṣeve-
'nyadaivaṃ na seve na seve na seve || 63
cidaṃśaṃ samānandamānandakandaṃ
suṣumnākhyarandhrāntarāle ca haṃsam |
sacakraṃ saśaṅkhaṃ sapītāmbarāṅkaṃ
parañcānyadaivaṃ na jāne na jāne || 64
caturvedakūṭollasatkāraṇākhyaṃ
sphuraddivyavaimānike bhogitalpe |
parandhāmamūrtiṃ niṣaṇṇaṃ niṣeve
niṣeve'nyadaivaṃ na seve na seve || 65
siṃhāsanasthaṃ surasevitavyaṃ
ratnāṅkitālaṅkṛtapādapadmam |
sītāsametaṃ śaśisūryanetraṃ
rāmaṃ bhaje rāghava rāmacandram || 66
rāmaṃ purāṇapuruṣaṃ ramaṇīyaveṣaṃ
rājādhirājamakuṭārcitapādapīṭham |
sītāpatiṃ sunayanaṃ jagadekavīraṃ
śrīrāmacandramaniśaṃ kalayāmi citte || 67
parānandavastusvarūpādisākṣiṃ
parabrahmagamyaṃ parañjyotimūrtim |
parāśaktimitrā'priyārādhitāṅghriṃ
parandhāmarūpaṃ bhaje rāmacandram || 68
mandasmitaṃ kuṇḍalagaṇḍabhāgaṃ
pītāmbaraṃ bhūṣaṇabhūṣitāṅgam |
nīlotpalāṅgaṃ bhuvanaikamitraṃ
rāmaṃ bhaje rāghava rāmacandram || 69
acintyamavyaktamanantarūpa-
madvaitamānandamanādigamyam |
puṇyasvarūpaṃ puruṣottamākhyaṃ
rāmaṃ bhaje rāghava rāmacandram || 70
padmāsanasthaṃ surasevitavyaṃ
padmālayānandakaṭākṣavīkṣyam |
gandharvavidyādharagīyamānaṃ
rāmaṃ bhaje rāghava rāmacandram || 71
anantakīrtiṃ varadaṃ prasannaṃ
padmāsanaṃ sevakapārijātam |
rājādhirājaṃ raghuvīraketuṃ
rāmaṃ bhaje rāghava rāmacandram || 72
sugrīvamitraṃ sujanānurūpaṃ
laṅkāharaṃ rākṣasavaṃśanāśam |
vedāśrayāṅgaṃ vipulāyatākṣaṃ
rāmaṃ bhaje rāghava rāmacandram || 73
sakṛtpraṇatarakṣāyāṃ sākṣī yasya vibhīṣaṇaḥ |
sāparādhapratīkāraḥ sa śrīrāmo gatirmama || 74
phalamūlāśinau dāntau tāpasau dharmacāriṇau |
rakṣaḥkulavihantārau bhrātarau rāmalakṣmaṇau || 75
taruṇau rūpasampannau sukumārau mahābalau |
puṇḍarīka viśālākṣau cīrakṛṣṇājināmbarau || 76
kausalyānayanenduṃ daśarathamukhāravindamārtāṇḍam |
sītāmānasahaṃsaṃ rāmaṃ rājīvalocanaṃ vande || 77
bharjanaṃ bhavabījānāṃ mārjanaṃ sukhasampadām |
tarjanaṃ yamadūtānāṃ rāmarāmeti kīrtanam || 78
na jāne jānakī jāne rāma tvannāmavaibhavam |
sarveśo bhagavān śambhurvālmīkirvetti vā navā || 79
karataladhṛtacāpaṃ kālameghasvarūpaṃ
sarasijadalanetraṃ cāruhāsaṃ sugātram |
vicinutavanavāsaṃ vikramodagraveṣaṃ
praṇamata raghunāthaṃ jānakīprāṇanātham || 80
vidyutsphuranmakarakuṇḍaladīptacāru-
gaṇḍasthalaṃ maṇikirīṭavirājamānam |
pītāmbaraṃ jaladanīlamudārakāntiṃ
śrīrāmacandramaniśaṃ kalayāmi citte || 81
ratnollasajjvalitakuṇḍalagaṇḍabhāgaṃ
kastūrikātilakaśobhitaphālabhāgam |
karṇāntadīrghanayanaṃ karuṇākaṭākṣaṃ
śrīrāmacandra mukhamātmani sannidhattam || 82
vaidehīsahitaṃ ca lakṣmaṇayutaṃ kaikeyiputrānvitaṃ
sugrīvaṃ ca vibhīṣaṇānilasutau nīlaṃ nalaṃ sāṅgadam |
viśvāmitravasiṣṭhagautamabharadvājādikān mānayan
rāmo mārutisevitaḥ smaratu māṃ sāmrājyasiṃhāsane || 83
sakalaguṇanidhānaṃ yogibhisstūyamānaṃ
bhajitasuravimānaṃ rakṣitendrādimānam |
mahitavṛṣabhayānaṃ sītayā śobhamānaṃ
smaratu hṛdayabhānuṃ brahmarāmābhirāmam || 84
tridaśakumudacandro dānavāmbhojacandro
duritatimiracandro yogināṃ jñānacandraḥ |
praṇatanayanacandro maithilīnetracandro
daśamukharipucandraḥ pātu māṃ rāmacandraḥ || 85
yannāmaiva sahasranāmasadṛśaṃ yannāma vedaissamaṃ
yannāmāṅkitavākya-māsurabalastrīgarbhavicchedanam |
yannāma śvapacāryabhedarahitaṃ muktipradānojjvalaṃ
tannāmā'laghurāmarāmaramaṇaṃ śrīrāmanāmāmṛtam || 86
rājīvanetra raghupuṅgava rāmabhadra
rākendubimbasadṛśānana nīlagātra |
rāmā'bhirāma raghuvaṃśasamudbhava tvaṃ
śrīrāmacandra mama dehi karāvalambam || 87
māṇikyamañjīrapadāravindaṃ
rāmārkasamphullamukhāravindam |
bhaktābhayaprāpikarāravindāṃ
devīṃ bhaje rāghavavallabhāṃ tām || 88
jayatu vijayakārī jānakīmodakārī
tapanakulavihārī daṇḍakāraṇyacārī |
daśavadanakuṭhārī daityavicchedakārī
maṇimakuṭakadhārī caṇḍakodaṇḍadhārī || 89
rāmaḥ pitā raghava eva mātā
rāmassubandhuśca sakhā hitaśca |
rāmo gururme paramaṃ ca daivaṃ
rāmaṃ vinā nā'nyamahaṃ smarāmi || 90
śrīrāma me tvaṃ hi pitā ca mātā
śrīrāma me tvaṃ hi suhṛcca bandhuḥ |
śrīrāma me tvaṃ hi guruśca goṣṭhī
śrīrāma me tvaṃ hi samastameva || 91
rāmacandracaritāmṛtapānaṃ
somapānaśatakoṭisamānam |
somapānaśatakoṭibhirīyā-
jjanma naiti raghunāyakanāmnā || 92
rāma rāma dayāsindho rāvaṇāre jagatpate |
tvatpādakamalāsakti-rbhavejjanmani janmani || 93
śrīrāmacandreti dayāpareti
bhaktapriyeti bhavabandhanamocaneti |
nātheti nāgaśayaneti sadā stuvantaṃ
māṃ pāhi bhītamaniśaṃ kṛpaṇaṃ kṛpālo || 94
ayodhyānātha rājendra sītākānta jagatpate |
śrīrāma puṇḍarīkākṣa rāmacandra namo'stu te || 95
he rāma he ramaṇa he jagadekavīra
he nātha he raghupate karuṇālavāla |
he jānakīramaṇa he jagadekabandho
māṃ pāhi dīnamaniśaṃ kṛpaṇaṃ kṛtaghnam || 96
jānāti rāma tava tattvagatiṃ hanūmān |
jānāti rāma tava sakhyagatiṃ kapīśaḥ |
jānāti rāma tava yuddhagatiṃ daśāsyo |
jānāti rāma dhanadānuja eva satyam || 97
sevyaṃ śrīrāmamantraṃ śravaṇaśubhakaraṃ śreṣṭhasujñānimantraṃ
stavyaṃ śrīrāmamantraṃ narakaduritadurvāranirghātamantram |
bhavyaṃ śrīrāmamantraṃ bhajatu bhajatu saṃsāranistāramantraṃ
divyaṃ śrīrāmamantraṃ divi bhuvi vilasanmokṣarakṣaikamantram || 98
nikhilanilayamantraṃ nityatattvākhyamantraṃ
bhavakulaharamantraṃ bhūmijāprāṇamantram |
pavanajanutamantraṃ pārvatīmokṣamantraṃ
paśupatinijamantraṃ pātu māṃ rāmamantram || 99
praṇavanilayamantraṃ prāṇanirvāṇamantraṃ
prakṛtipuruṣamantraṃ brahmarudrendramantram |
prakaṭaduritarāgadveṣanirṇāśamantraṃ
raghupatinijamantraṃ rāmarāmetimantram || 100
daśarathasutamantraṃ daityasaṃhāramantraṃ
vibudhavinutamantraṃ viśvavikhyātamantram |
munigaṇanutamantraṃ muktimārgaikamantraṃ
raghupatinijamantraṃ rāmarāmetimantram || 101
saṃsārasāgarabhayāpahaviśvamantraṃ
sākṣānmumukṣujanasevitasiddhamantram |
sāraṅgahastamukhahastanivāsamantraṃ
kaivalyamantramaniśaṃ bhaja rāmamantram || 102
jayatu jayatu mantraṃ janmasāphalyamantraṃ
jananamaraṇabhedakleśavicchedamantram |
sakalanigamamantraṃ sarvaśāstraikamantraṃ
raghupatinijamantraṃ rāmarāmetimantram || 103
jagati viśadamantraṃ jānakīprāṇamantraṃ
vibudhavinutamantraṃ viśvavikhyātamantram |
daśarathasutamantraṃ daityasaṃhāramantraṃ
raghupatinijamantraṃ rāmarāmetimantram || 104
brahmādiyogimunipūjitasiddhamantraṃ
dāridryaduḥkhabhavarogavināśamantram |
saṃsārasāgarasamuttaraṇaikamantraṃ
vande mahābhayaharaṃ raghurāmamantram || 105
śatrucchedaikamantraṃ sarasamupaniṣadvākyasampūjyamantraṃ
saṃsārottāramantraṃ samucitasamaye saṅganiryāṇamantram |
sarvaiśvaryaikamantraṃ vyasanabhujagasandaṣṭasantrāṇamantraṃ
jihve śrīrāmamantraṃ japa japa saphalaṃ janmasāphalyamantram || 106
nityaṃ śrīrāmamantraṃ nirupamamadhikaṃ nītisujñānamantraṃ
satyaṃ śrīrāmamantraṃ sadamalahṛdaye sarvadārogyamantram |
stutyaṃ śrīrāmamantraṃ sulalitasumanassaukhyasaubhāgyamantraṃ
paṭhyaṃ śrīrāmamantraṃ pavanajavaradaṃ pātu māṃ rāmamantram || 107
vyāmohapraśamauṣadhaṃ munimanovṛttipravṛttyauṣadhaṃ
daityonmūlakarauṣadhaṃ bhavabhayapradhvaṃsanaikauṣadham |
bhaktānandakarauṣadhaṃ tribhuvane sañjīvanaikauṣadhaṃ
śreyaḥ prāptikarauṣadhaṃ piba manaḥ śrīrāmanāmauṣadham || 108
sakalabhuvanaratnaṃ sarvaśāstrārtharatnaṃ
samaravijayaratnaṃ saccidānandaratnam |
daśamukhahararatnaṃ dānavārātiratnaṃ
raghukulanṛparatnaṃ pātu māṃ rāmaratnam || 109
sakalabhuvanaratnaṃ saccidānandaratnaṃ
sakalahṛdayaratnaṃ sūryabimbāntaratnam |
vimalasukṛtaratnaṃ vedavedāntaratnaṃ
puraharajaparatnaṃ pātu māṃ rāmaratnam || 110
nigamaśikhararatnaṃ nirmalānandaratnaṃ
nirupamaguṇaratnaṃ nādanādāntaratnam |
daśarathakularatnaṃ dvādaśāntasstharatnaṃ
paśupatijaparatnaṃ pātu māṃ rāmaratnam || 111
śatamakhasutaratnaṃ ṣoḍaśāntasstharatnaṃ
munijanajaparatnaṃ mukhyavaikuṇṭharatnam |
nirupamaguṇaratnaṃ nīrajāntasstharatnaṃ
paramapadaviratnaṃ pātu māṃ rāmaratnam || 112
sakalasukṛtaratnaṃ satyavākyārtharatnaṃ
śamadamaguṇaratnaṃ śāśvatānandaratnam |
praṇayanilayaratnaṃ prasphuṭadyotiratnaṃ
paramapadaviratnaṃ pātu māṃ rāmaratnam || 113
nigamaśikhararatnaṃ nityamāśāsyaratnaṃ
jananutanṛparatnaṃ jānakīrūparatnam |
bhuvanavalayaratnaṃ bhūbhujāmekaratnaṃ
raghukulavararatnaṃ pātu māṃ rāmaratnam || 114
viśālanetraṃ paripūrṇagātraṃ
sītākalatraṃ suravairijaitram |
kāruṇyapātraṃ jagataḥ pavitraṃ
śrīrāmaratnaṃ praṇato'smi nityam || 115
he gopālaka he dayājalanidhe he sadguṇāmbhonidhe
he daityāntaka he vibhīṣaṇadayāparīṇa he bhūpate |
he vaidehasutāmanojavihṛte he koṭimārākṛte
he navyāmbujanetra pālaya paraṃ jānāmi na tvāṃ vinā || 116
yasya kiñcidapi no haraṇīyaṃ
karma kiñcidapi no caraṇīyam |
rāmanāma ca sadā smaraṇīyaṃ
līlayā bhavajalaṃ taraṇīyam || 117
daśarathasutamīśaṃ daṇḍakāraṇyavāsaṃ
śatamakhamaṇinīlaṃ jānakīprāṇalolam |
sakalabhuvanamohaṃ sannutāmbhodadehaṃ
bahulanutasamudraṃ bhāvaye rāmabhadram || 118
viśālanetraṃ paripūrṇagātraṃ
sītākalatraṃ suravairijaitram |
jagatpavitraṃ paramātmatantraṃ
śrīrāmacandraṃ praṇamāmi citte || 119
jaya jaya raghurāma śrīmukhāmbhojabhāno
jaya jaya raghuvīra śrīmadambhojanetra |
jaya jaya raghunātha śrīkarābhyarcitāṅghri
jaya jaya raghuvarya śrīśa kāruṇyasindho || 120
mandāramūle maṇipīṭhasaṃsthaṃ
sudhāplutaṃ divyavirāṭsvarūpam |
sabindunādāntakalāntaturya-
mūrtiṃ bhaje'haṃ raghuvaṃśaratnam || 121
nādaṃ nādavinīlacittapavanaṃ nādāntattvapriyaṃ
nāmākāravivarjitaṃ navaghanaśyāmāṅganādapriyam |
nādāmbhojamarandamattavilasadbhṛṅgaṃ madāntassthitaṃ
nādāntadhṛvamaṇḍalābjaruciraṃ rāmaṃ bhaje tārakam || 122
nānābhūtahṛdabjapadmanilayaṃ nāmojjvalābhūṣaṇam |
nāmastotrapavitritatribhuvanaṃ nārāyaṇāṣṭākṣaram |
nādāntendugalatsudhāplutatanuṃ nānātmacinmātrakam |
nānākoṭiyugāntabhānusadṛśaṃ rāmaṃ bhaje tārakam || 123
vedyaṃ vedaguruṃ viriñcijanakaṃ vedāntamūrtiṃ sphura-
dvedaṃ vedakalāpamūlamahimādhārāntakandāṅkuram |
vedaśṛṅgasamānaśeṣaśayanaṃ vedāntavedyātmakaṃ
vedārādhitapādapaṅkajamahaṃ rāmaṃ bhaje tārakam || 124
majjīvaṃ madanugrahaṃ madadhipaṃ madbhāvanaṃ matsukhaṃ
mattātaṃ mama sadguruṃ mama varaṃ mohāndhavicchedanam |
matpuṇyaṃ madanekabāndhavajanaṃ majjīvanaṃ mannidhiṃ
matsiddhiṃ mama sarvakarmasukṛtaṃ rāmaṃ bhaje tārakam || 125
nityaṃ nīrajalocanaṃ nirupamaṃ nīvāraśūkopamaṃ
nirbhedānubhavaṃ nirantaraguṇaṃ nīlāṅgarāgojjvalam |
niṣpāpaṃ nigamāgamārcitapadaṃ nityātmakaṃ nirmalaṃ
niṣpuṇyaṃ nikhilaṃ nirañjanapadaṃ rāmaṃ bhaje tārakam || 126
dhyāye tvāṃ hṛdayāmbuje raghupatiṃ vijñānadīpāṅkuraṃ
haṃsohaṃsaparamparādimahimādhāraṃ jaganmohanam |
hastāmbhojagadābjacakramatulaṃ pītāmbaraṃ kaustubhaṃ
śrīvatsaṃ puruṣottamaṃ maṇinibhaṃ rāmaṃ bhaje tārakam || 127
satyajñānamanantamacyutamajaṃ cāvyākṛtaṃ tatparaṃ
kūṭasthādisamastasākṣimanaghaṃ sākṣādvirāṭtattvadam |
vedyaṃ viśvamayaṃ svalīnabhuvanasvārājyasaukhyapradaṃ
pūrṇaṃ pūrṇataraṃ purāṇapuruṣaṃ rāmaṃ bhaje tārakam || 128
rāmaṃ rākṣasavaṃśanāśanakaraṃ rākendubimbānanaṃ
rakṣoriṃ raghuvaṃśavardhanakaraṃ raktādharaṃ rāghavam |
rādhāyātmanivāsinaṃ ravinibhaṃ ramyaṃ ramānāyakaṃ
randhrāntargataśeṣaśāyinamahaṃ rāmaṃ bhaje tārakam || 129
otaprotasamastavastunicayaṃ oṅkārabījākṣaraṃ
oṅkāraprakṛtiṃ ṣaḍakṣarahitaṃ oṅkārakandāṅkuram |
oṅkārasphuṭabhūrbhuvassuparitaṃ oghatrayārādhitam
oṅkārojjvalasiṃhapīṭhanilayaṃ rāmaṃ bhaje tārakam || 130
sākete nagare samastasukhade harmye'bjakoṭidyute
nakṣatragrahapaṅktilagnaśikhare cāntaryapaṅkeruhe |
vālmīkātriparāśarādimunibhissaṃsevyamānaṃ sthitaṃ
sītālaṅkṛtavāmabhāgamaniśaṃ rāmaṃ bhaje tārakam || 131
vaikuṇṭhe nagare suradrumatale cānandavaprāntare
nānāratnavinirmitasphuṭapaṭuprākārasaṃveṣṭite |
saudhendūpalaśeṣatalpalalite nīlotpalacchādite
paryaṅke śayanaṃ ramādisahitaṃ rāmaṃ bhaje tārakam || 132
vande rāmamanādipūruṣamajaṃ vande ramānāyakaṃ
vande hārikirīṭakuṇḍaladharaṃ vande sunīladyutim |
vande cāpakalambakojjvalakaraṃ vande jaganmaṅgalaṃ
vande paṅktirathātmajaṃ mama guruṃ vande sadā rāghavam || 133
vande śaunakagautamādyabhinutaṃ vande ghanaśyāmalaṃ
vande tārakapīṭhamadhyanilayaṃ vande jagannāyakam |
vande bhaktajanaughadevivaṭapaṃ vande dhanurvallabhaṃ
vande tattvamasītivākyajanakaṃ vande sadā rāghavam || 134
vande sūryaśaśāṅkalocanayugaṃ vande jagatpāvanaṃ
vande patrasahasrapadmanilayaṃ vande purāripriyam |
vande rākṣasavaṃśanāśanakaraṃ vande sudhāśītalaṃ
vande devakapīndrakoṭivinutaṃ vande sadā rāghavam || 135
vande sāgaragarvabhaṅgaviśikhaṃ vande jagajjīvanaṃ
vande kauśikayāgarakṣaṇakaraṃ vande guruṇāṃ gurum |
vande bāṇaśarāsanojjvalakaraṃ vande jaṭāvalkalaṃ
vande lakṣmaṇabhūmijānvitamahaṃ vande sadā rāghavam || 136
vande pāṇḍarapuṇḍarīkanayanaṃ vande'bjabimbānanaṃ
vande kambugalaṃ karābjayugalaṃ vande lalāṭojjvalam |
vande pītadukūlamambudanibhaṃ vande jaganmohanaṃ
vande kāraṇamānuṣojjvalatanuṃ vande sadā rāghavam || 137
vande nīlasarojakomalaruciṃ vande jagadvanditaṃ
vande sūryakulābdhikaustubhamaṇiṃ vande surārādhitam |
vande pātakapañcakapraharaṇaṃ vande jagatkāraṇaṃ
vande viṃśatipañcatattvarahitaṃ vande sadā rāghavam || 138
vande sādhakavargakalpakataruṃ vande trimūrtyātmakaṃ
vande nādalayāntarasthalagataṃ vande trivargātmakam |
vande rāgavihīnacittasulabhaṃ vande sabhānāyakaṃ
vande pūrṇadayāmṛtārṇavamahaṃ vande sadā rāghavam || 139
vande sāttvikatattvamudritatanuṃ vande sudhādāyakaṃ
vande cārucaturbhujaṃ maṇinibhaṃ vande ṣaḍabjasthitam |
vande brahmapipīlikādinilayaṃ vande virāṭvigrahaṃ
vande pannagatalpaśāyinamahaṃ vande sadā rāghavam || 140
siṃhāsanasthaṃ munisiddhasevyaṃ
raktotpalālaṅkṛtapādapadmam |
sītāsametaṃ śaśisūryanetraṃ
rāmaṃ bhaje rāghavarāmacandram || 141
śrīrāmabhadrāśritasadgurūṇāṃ
pādāravindaṃ bhajatāṃ narāṇām |
ārogyamaiśvaryamanantakīrti-
rante ca viṣṇoḥ padamasti satyam || 142
daśarathavaraputraṃ jānakīsatkalatraṃ
daśamukhaharadakṣaṃ padmapatrāyatākṣam |
karadhṛtaśaracāpaṃ cārumuktākalāpaṃ
raghukulanṛvareṇyaṃ rāmamīḍe śaraṇyam || 143
daśamukhagajasiṃhaṃ daityagarvātiraṃhaṃ
kadanabhayadahastaṃ tārakabrahma śastam |
maṇikhacitakirīṭaṃ mañjulālāpavāṭaṃ
daśarathakulacandraṃ rāmacandraṃ bhaje'ham || 144
rāmaṃ raktasaroruhākṣamamalaṃ laṅkādhināthāntakaṃ
kausalyānayanotsukaṃ raghuvaraṃ nāgendratalpasthitam |
vaidehīkucakumbhakuṅkumarajolaṅkārahāraṃ hariṃ
māyāmānuṣavigrahaṃ raghupatiṃ sītāsametaṃ bhaje || 145
rāmaṃ rākṣasamardanaṃ raghuvaraṃ daiteyabhidhvaṃsinaṃ
sugrīvepsitarājyadaṃ surapaterbhītyantakaṃ śārṅgiṇam |
bhaktānāmabhayapradaṃ bhayaharaṃ pāpaughavidhvaṃsinaṃ
sāmīristutapādapadmayugalaṃ sītāsametaṃ bhaje || 146
yatpādāmbujareṇunā munisatī muktiṅgatā yanmahaḥ
puṇyaṃ pātakanāśanaṃ trijagatāṃ bhāti smṛtaṃ pāvanam |
smṛtvā rāghavamaprameyamamalaṃ pūrṇendumandasmitaṃ
taṃ rāmaṃ sarasīruhākṣamamalaṃ sītāsametaṃ bhaje || 147
vaidehīkucamaṇḍalāgra-vilasanmāṇikyahastāmbujaṃ
cañcatkaṅkaṇahāranūpura-lasatkeyūrahārānvitam |
divyaśrīmaṇikuṇḍalojjvala-mahābhūṣāsahasrānvitaṃ
vīraśrīraghupuṅgavaṃ guṇanidhiṃ sītāsametaṃ bhaje || 148
vaidehīkucamaṇḍalopari-lasanmāṇikyahārāvalī-
madhyasthaṃ navanītakomalaruciṃ nīlotpalaśyāmalam |
kandarpāyutakoṭisundaratanuṃ pūrṇendubimbānanaṃ
kausalyākulabhūṣaṇaṃ raghupatiṃ sītāsametaṃ bhaje || 149
divyāraṇyayatīndranāmanagare madhye mahāmaṇṭape
svarṇastambhasahasraṣoḍaśayute mandāramūlāśrite |
nānāratnavicitranirmalamahāsiṃhāsane saṃsthitaṃ
sītālakṣmaṇasevitaṃ raghupatiṃ sītāsametaṃ bhaje || 150
kastūrītilakaṃ kapīndraharaṇaṃ kāruṇyavārānnidhiṃ
kṣīrāmbhodhisutāmukhābjamadhupaṃ kalyāṇasampannidhim |
kausalyānayanotsukaṃ kapivaratrāṇaṃ mahāpauruṣaṃ
kaumārapriyamarkakoṭisadṛśaṃ sītāsametaṃ bhaje || 151
vidyutkoṭidivākaradyutinibhaṃ śrīkaustubhālaṅkṛtaṃ
yogīndraissanakādibhiḥ parivṛtaṃ kailāsanāthapriyam |
muktāratnakirīṭakuṇḍaladharaṃ graiveyahārānvitaṃ
vaidehīkucasannivāsamaniśaṃ sītāsametaṃ bhaje || 152
meghaśyāmalamambujātanayanaṃ vistīrṇavakṣassthalaṃ
bāhudvandvavirājitaṃ suvadanaṃ śoṇāṅghripaṅkeruham |
nānāratnavicitrabhūṣaṇayutaṃ kodaṇḍabāṇāṅkitaṃ
trailokyā'pratimānasundaratanuṃ sītāsametaṃ bhaje || 153
vaidehīyutavāmabhāgamatulaṃ vandārumandārakaṃ
vande prastutakīrtivāsitatarucchāyānukāriprabham |
vaidehīkucakuṅkumāṅkitamahoraskaṃ mahābhūṣaṇaṃ
vedāntairupagīyamānamasakṛtsītāsametaṃ bhaje || 154
devānāṃ hitakāraṇena bhuvane dhṛtvā'vatāraṃ dhruvaṃ
rāmaṃ kauśikayajñavighnadalanaṃ tattāṭakāsaṃharam |
nityaṃ gautamapatniśāpadalanaśrīpādareṇuṃ śubhaṃ
śambhorutkaṭacāpakhaṇḍanamahāsatvaṃ bhaje rāghavam || 155
śrīrāmaṃ navaratnakuṇḍaladharaṃ śrīrāmarakṣāmaṇiṃ
śrīrāmaṃ ca sahasrabhānusadṛśaṃ śrīrāmacandrodayam |
śrīrāmaṃ śrutakīrtimākaramahaṃ śrīrāmamuktipradaṃ
śrīrāmaṃ raghunandanaṃ bhayaharaṃ śrīrāmacandraṃ bhaje || 156
rāmamindīvaraśyāmaṃ rājīvāyatalocanam |
jyāghoṣanirjitārātiṃ jānakīramaṇaṃ bhaje || 157
dīrghabāhumaravindalocanaṃ
dīnavatsalamanātharakṣakam |
dīkṣitaṃ sakalalokarakṣaṇe
daivataṃ daśarathātmajaṃ bhaje || 158
prātassmarāmi raghunāthamukhāravindaṃ
mandasmitaṃ madhurabhāṣi viśālaphālam |
karṇāvalambicalakuṇḍalagaṇḍabhāgaṃ
karṇāntadīrghanayanaṃ nayanābhirāmam || 159
prātarbhajāmi raghunāthakarāravindaṃ
rakṣogaṇāya bhayadaṃ varadaṃ nijebhyaḥ |
yadrājasaṃsadi vibhidya maheśacāpaṃ
sītākaragrahaṇamaṅgalamāpa sadyaḥ || 160
prātarnamāmi raghunāthapadāravindaṃ
padmāṅkuśādiśubharekhaśubhāvahaṃ ca |
yogīndramānasamadhuvratasevyamānaṃ
śāpāpahaṃ sapadi gautamadharmapatnyāḥ || 161
prātarvadāmi vacasā raghunāthanāma
vāgdoṣahāri sakalaṃ kaluṣaṃ nihantṛ |
yatpārvatī svapatinā saha bhoktukāmā
prītyā sahasraharināmasamaṃ jajāpa || 162
prātaḥ śraye śrutinutaṃ raghunāthamūrtiṃ
nīlāmbudotpalasitetararatnanīlām |
āmuktamauktikaviśeṣavibhūṣaṇāḍhyāṃ
dhyeyāṃ samastamunibhirnijabhṛtyamukhyaiḥ || 163
raghukulavaranātho jānakīprāṇanāthaḥ
pitṛvacanavidhātā kīśarājyapradātā |
pratiniśicaranāśaḥ prāptarājyapraveśo
vihitabhuvanarakṣaḥ pātu padmāyatākṣaḥ || 164
kuvalayadalanīlaḥ pītavāsāḥ smitāsyo
vividharucirabhūṣābhūṣito divyamūrtiḥ |
daśarathakulanātho jānakīprāṇanātho
nivasatu mama citte sarvadā rāmacandraḥ || 165
jayatu jayatu rāmo jānakīvallabho'yaṃ
jayatu jayatu rāmaścandracūḍārcitāṅghriḥ |
jayatu jayatu vāṇīnāthanāthaḥ parātmā
jayatu jayatu rāmo'nāthanāthaḥ kṛpāluḥ || 166
vadatu vadatu vāṇī rāmarāmeti nityaṃ
jayatu jayatu cittaṃ rāmapādāravindam |
namatu namatu dehaṃ santataṃ rāmacandraṃ
na bhavatu mama pāpaṃ janmajanmāntareṣu || 167
ānandarūpaṃ varadaṃ prasannaṃ
siṃhekṣaṇaṃ sevakapārijātam |
nīlotpalāṅgaṃ bhuvanaikamitraṃ
rāmaṃ bhaje rāghavarāmacandram || 168
laṅkāvirāmaṃ raṇaraṅgabhīmaṃ
rājīvanetraṃ raghuvaṃśamitram |
kāruṇyamūrtiṃ karuṇāprapūrtiṃ
śrīrāmacandraṃ śaraṇaṃ prapadye || 169
sugrīvamitraṃ paramaṃ pavitraṃ
sītākalatraṃ navahemasūtram |
kāruṇyapātraṃ śatapatranetraṃ
śrīrāmacandraṃ śirasā namāmi || 170
śrīrāghaveti ramaṇeti raghūdvaheti
rāmeti rāvaṇahareti ramādhaveti |
sāketanāthasumukheti ca suvrateti
vāṇī sadā vadatu rāma hare hareti || 171
śrīrāmanāmāmṛtamantrabījaṃ
sañjīvanaṃ cenmanasi pratiṣṭham |
hālāhalaṃ vā pralayānalaṃ vā
mṛtyormukhaṃ vā vitathīkaroti || 172
kiṃ yogaśāstraiḥ kimaśeṣavidyā
kiṃ yāgagaṅgādiviśeṣatīrthaiḥ |
kiṃ brahmacaryāśramasañcareṇa
bhaktirnacette raghuvaṃśakīrtyām || 173
idaṃ śarīraṃ ślathasandhijarjharaṃ
patatyavaśyaṃ pariṇāmapeśalam |
kimauṣathaṃ pṛcchasi mūḍha durmate
nirāmayaṃ rāmakathāmṛtaṃ piba || 174
he rāmabhadrāśraya he kṛpālo
he bhaktalokaikaśaraṇyamūrte |
punīhi māṃ tvaccaraṇāravindaṃ
jagatpavitraṃ śaraṇaṃ mamā'stu || 175
nīlābhradeha nikhileśa jagannivāsa
rājīvanetra ramaṇīyaguṇābhirāma |
śrīdāma daityakulamardana rāmacandra
tvatpādapadmamaniśaṃ kalayāmi citte || 176
śrīrāmacandra karuṇākara dīnabandho
sītāsameta bharatāgraja rāghaveśa |
pāpārtibhañjana bhayāturadīnabandho
pāpāmbudhau patitamuddhara māmanātham || 177
indīvaradalaśyāma-mindukoṭinibhānanam |
kandarpakoṭilāvaṇyaṃ vande'haṃ raghunandanam || 175
iti śrībodhendrasarasvatī kṛta śrīrāmakarṇāmṛtam ||
Sanskrit — Devanagari (original)
मङ्गलश्लोकाः
मङ्गलं भगवान्विष्णुर्मङ्गलं मधुसूदनः ।
मङ्गलं पुण्डरीकाक्षो मङ्गलं गरुडध्वजः ॥ 1
मङ्गलं कोसलेन्द्राय महनीयगुणाब्धये ।
चक्रवर्तितनूजाय सार्वभौमाय मङ्गलम् ॥ 2
वेदवेदान्तवेद्याय मेघश्यामलमूर्तये ।
पुंसां मोहनरूपाय पुण्यश्लोकाय मङ्गलम् ॥ 3
विश्वामित्रान्तरङ्गाय मिथिलानगरीपतेः ।
भाग्यानां परिपाकाय भव्यरूपाय मङ्गलम् ॥ 4
पितृभक्ताय सततं भ्रातृभिः सह सीतया ।
नन्दिताखिललोकाय रामचन्द्राय मङ्गलम् ॥ 5
त्यक्तसाकेतवासाय चित्रकूटविहारिणे ।
सेव्याय सर्वयमिनां धीरोदात्ताय मङ्गलम् ॥ 6
सौमित्रिणा च जानक्या चापबाणासिधारिणा ।
संसेव्याय सदा भक्त्या सानुजायास्तु मङ्गलम् ॥ 7
दण्डकारण्यवासाय खण्डितामरशत्रवे ।
गृध्रराजाय भक्ताय मुक्तिदायास्तु मङ्गलम् ॥ 8
सादरं शबरीदत्तफलमूलाभिलाषिणे ।
सौलभ्यपरिपूर्णाय सत्त्वोद्युक्ताय मङ्गलम् ॥ 9
हनूमत्समवेताय हरीशाभीष्टदायिने ।
वालिप्रमथनायास्तु महाधीराय मङ्गलम् ॥ 10
श्रीमते रघुवीराय सेतुलङ्घितसिन्धवे ।
जितराक्षसराजाय रणधीराय मङ्गलम् ॥ 11
आसाद्य नगरीं दिव्यामभिषिक्ताय सीतया ।
राजाधिराजराजाय रामभद्राय मङ्गलम् ॥ 12
विभीषणकृते प्रीत्या विश्वाभीष्टप्रदायिने ।
जानकीप्राणनाथाय सदा रामाय मङ्गलम् ॥ 13
—-
श्रीरामं त्रिजगद्गुरुं सुरवरं सीतामनोनायकं
श्यामाङ्गं शशिकोटिपूर्णवदनं चञ्चत्कलाकौस्तुभम् ।
सौम्यं सत्यगुणोत्तमं सुसरयूतीरे वसन्तं प्रभुं
त्रातारं सकलार्थसिद्धिसहितं वन्दे रघूणां पतिम् ॥ 14
श्रीराघवं दशरथात्मजमप्रमेयं
सीतापतिं रघुवरान्वयरत्नदीपम् ।
आजानुबाहुमरविन्ददलायताक्षं
रामं निशाचरविनाशकरं नमामि ॥ 15
श्रीरामचन्द्र करुणाकर राघवेन्द्र
राजेन्द्रचन्द्र रघुवंशसमुद्रचन्द्र ।
सुग्रीवनेत्रयुगलोत्पल-पूर्णचन्द्र
सीतामनःकुमुदचन्द्र नमो नमस्ते ॥ 16
सीतामनोमानसराजहंस
संसारसन्तापहर क्षमावन् ।
श्रीराम दैत्यान्तक शान्तरूप
श्रीतारकब्रह्म नमो नमस्ते ॥ 17
विष्णो राघव वासुदेव नृहरे देवौघचूडामणे ।
संसारार्णवकर्णधारक हरे कृष्णाय तुभ्यं नमः ॥ 18
सुग्रीवादिसमस्तवानरवरैस्संसेव्यमानं सदा ।
विश्वामित्रपराशरादिमुनिभिस्संस्तूयमानं भजे ॥ 19
रामं चन्दनशीतलं क्षितिसुतामोहाकरं श्रीकरं
वैदेहीनयनारविन्दमिहिरं सम्पूर्णचन्द्राननम् ।
राजानं करुणासमेतनयनं सीतामनोनन्दनं
सीतादर्पणचारुगण्डललितं वन्दे सदा राघवम् ॥ 20
जानाति राम तव नामरुचिं महेशो
जानाति गौतमसती चरणप्रभावम् ।
जानाति दोर्बलपराक्रममीशचापो
जानात्यमोघपटुबाणगतिं पयोधिः ॥ 21
माता रामो मत्पिता रामचन्द्रो
भ्राता रामो मत्सखा राघवेशः ।
सर्वस्वं मे रामचन्द्रो दायालु-
र्नान्यं दैवं नैव जाने न जाने ॥ 22
विमलकमलनेत्रं विस्फुरन्नीलगात्रं
तपनकुलपवित्रं दानवध्वन्तमित्रम् ।
भुवनशुभचरित्रं भूमिपुत्रीकलत्रं
दशरथवरपुत्रं नौमि रामाख्यमित्रम् ॥ 23
मार्गे मार्गे शाखिनां रत्नवेदी
वेद्यां वेद्यां किन्नरीबृन्दगीतम् ।
गीते गीते मञ्जुलालापगोष्ठी
गोष्ठ्यां गोष्ठ्यां त्वत्कथा रामचन्द्र ॥ 24
वृक्षे वृक्षे वीक्षिताः पक्षिसङ्घाः
सङ्घे सङ्घे मञ्जुलामोदवाक्यम् ।
वाक्ये वाक्ये मञ्जुलालापगोष्ठी
गोष्ठ्यां गोष्ठ्यां त्वत्कथा रामचन्द्र ॥ 25
दुरिततिमिरचन्द्रो दुष्टकञ्जातचन्द्रः
सुरकुवलयचन्द्रस्सूर्यवंशाब्धिचन्द्रः ।
स्वजननिवहचन्द्रश्शत्रुराजीवचन्द्रः
प्रणतकुमुदचन्द्रः पातु मां रामचन्द्रः ॥ 26
कल्याणदं कौशिकयज्ञपालं
कलानिधिं काञ्चनशैलधीरम् ।
कञ्जातनेत्रं करुणासमुद्रं
काकुत्स्थरामं कलयामि चित्ते ॥ 27
राजीवायतलोचनं रघुवरं नीलोत्पलश्यामलं
मन्दाराञ्चितमण्डपे सुललिते सौवर्णके पुष्पके ।
आस्थाने नवरत्नराजिखचिते सिंहासने संस्थितं
सीतालक्ष्मणलोकपालसहितं वन्दे मुनीन्द्रास्पदम् ॥ 28
ध्याये रामं सुधांशुं नतसकलभवारण्यतापप्रहारम् ।
श्यामं शान्तं सुरेन्द्रं सुरमुनिविनुतं कोटिसूर्यप्रकाशम् ।
सीतासौमित्रिसेव्यं सुरनरसुगमं दिव्यसिंहासनस्थम् ।
सायाह्ने रामचन्द्रं स्मितरुचिरमुखं सर्वदा मे प्रसन्नम् ॥ 29
इन्द्रनीलमणिसन्निभदेहं
वन्दनीयमसकृन्मुनिबृन्दैः ।
लम्बमानतुलसीवनमालं
चिन्तयामि सततं रघुवीरम् ॥ 30
सम्पूर्णचन्द्रवदनं सरसीरुहाक्षं
माणिक्यकुण्डलधरं मुकुटाभिरामम् ।
चाम्पेयगौरवसनं शरचापहस्तं
श्रीरामचन्द्रमनिशं मनसा स्मरामि ॥ 31
मातुः पार्श्वे चरन्तं मणिमयशयने मञ्जुभूषाञ्चिताङ्गम् ।
मन्दं मन्दं पिबन्तं मुकुलितनयनं स्तन्यमन्यस्तनाग्रम् ।
अङ्गुल्याग्रैः स्पृशन्तं सुखपरवशया सस्मितालिङ्गिताङ्गम् ।
गाढं गाढं जनन्या कलयतु हृदयं मामकं रामबालम् ॥ 32
रामाभिरामं नयनाभिरामं
वाचाभिरामं वदनाभिरामम् ।
सर्वाभिरामं च सदाभिरामं
वन्दे सदा दाशरथिं च रामम् ॥ 33
राशब्दोच्चारमात्रेण मुखान्निर्याति पातकाः ।
पुनः प्रवेशभीत्या च मकारस्तु कवाटवत् ॥ 34
अनर्घमाणिक्यविराजमान-
श्रीपादुकालङ्कृतशोभनाभ्याम् ।
अशेषबृन्दारकवन्दिताभ्यां
नमो नमो रामपदाम्बुजाभ्याम् ॥ 35
चलत्कनककुण्डलोल्लसितदिव्यगण्डस्थलं
चराचरजगन्मयं चरणपद्मगङ्गाश्रयम् ।
चतुर्विधफलप्रदं चरमपीठमध्यस्थितं
चिदंशमखिलास्पदं दशरथात्मजं चिन्तये ॥ 36
सनन्दनमुनिप्रियं सकलवर्णवेदात्मकं
समस्तनिगमागमस्फुरिततत्त्वसिंहासनम् ।
सहस्रनयनाब्जजाद्यमरबृन्दसंसेवितं
समष्टिपुरवल्लभं दशरथात्मजं चिन्तये ॥ 37
जाग्रत्स्वप्नसुषुप्ति-कालविलसत्तत्त्वात्मचिन्मात्रकं
चैतन्यात्मकमाधिपापरहितं भूम्यादितन्मात्रकम् ।
शाम्भव्यादिसमस्तयोगकुलकं साङ्ख्यादितत्त्वात्परं
शब्दावाच्यमहं नमामि सततं व्युत्पत्तिनाशात्परम् ॥ 38
इक्ष्वाकुवंशार्णवजातरत्नं
सीताङ्गनायौवनभाग्यरत्नम् ।
वैकुण्ठरत्नं मम भाग्यरत्नं
श्रीरामरत्नं शिरसा नमामि ॥ 39
इक्ष्वाकुनन्दनं सुग्रीवपूजितं
त्रैलोक्यरक्षकं सत्यसन्धं सदा ।
राघवं रघुपतिं राजीवलोचनं
रामचन्द्रं भजे राघवेशं भजे ॥ 40
भक्तप्रियं भक्तसमाधिगम्यं
चिन्ताहरं चिन्तितकामधेनुम् ।
सूर्येन्दुकोटिद्युतिभास्वरं तं
रामं भजे राघवरामचन्द्रम् ॥ 41
श्रीरामं जनकक्षितीश्वरसुतावक्त्राम्बुजाहारिणं
श्रीमद्भानुकुलाब्धिकौस्तुभमणिं श्रीरत्नवक्षस्स्थलम् ।
श्रीकण्ठाद्यमरौघरत्नमकुटालङ्कारपादाम्बुजं
श्रीवत्सोज्ज्वलमिन्द्रनीलसदृशं श्रीरामचन्द्रं भजे ॥ 42
रामचन्द्र चरिताकथामृतं
लक्ष्मणाग्रजगुणानुकीर्तनम् ।
राघवेश तव पादसेवनं
सम्भवन्तु मम जन्मजन्मनि ॥ 43
अज्ञानसम्भव-भवाम्बुधिबाडबाग्नि-
रव्यक्ततत्त्वनिकरप्रणवाधिरूढः ।
सीतासमेतमनुजेन हृदन्तराले
प्राणप्रयाणसमये मम सन्निधत्ते ॥ 44
रामो मत्कुलदैवतं सकरुणं रामं भजे सादरं
रामेणाखिलघोरपापनिहती रामाय तस्मै नमः ।
रामान्नास्ति जगत्रयैकसुलभो रामस्य दासोऽस्म्यहं
रामे प्रीतिरतीव मे कुलगुरो श्रीराम रक्षस्व माम् ॥ 45
वैदेहीसहितं सुरद्रुमतले हैमे महामण्टपे ।
मध्येपुष्पकमासने मणिमये वीरासने संस्थितम् ।
अग्रे वाचयति प्रभञ्जनसुते तत्त्वं मुनिभ्यः परम् ।
व्याख्यान्तं भरतादिभिः परिवृतं रामं भजे श्यामलम् ॥ 46
वामे भूमिसुता पुरस्तु हनुमान्पश्चात्सुमित्रासुत-
श्शत्रुघ्नो भरतश्च पार्श्वदलयोर्वाय्वादिकोणेष्वपि ।
सुग्रीवश्च विभीषणश्च युवराट् तारासुतो जाम्बवान्
मध्ये नीलसरोजकोमलरुचिं रामं भजे श्यामलम् ॥ 47
केयूराङ्गदकङ्कणैर्मणिगणैर्वैरोचमानं सदा
राकापर्वणिचन्द्रकोटिसदृशं छत्रेण वैराजितम् ।
हेमस्तम्भसहस्रषोडशयुते मध्ये महामण्डपे
देवेशं भरतादिभिः परिवृतं रामं भजे श्यामलम् ॥ 48
साकेते शरदिन्दुकुन्दधवले सौघे महामण्टपे ।
पर्यस्तागरुधूपधूमपटले कर्पूरदीपोज्ज्वले ।
सुग्रीवाङ्गदवायुपुत्रसहितं सौमित्रिणा सेवितं
लीलामानुषविग्रहं रघुपतिं रामं भजे श्यामलम् ॥ 49
शान्तं शारदचन्द्रकोटिसदृशं चन्द्राभिरामाननं
चन्द्रार्काग्निविकासिकुण्डलधरं चन्द्रावतंसस्तुतम् ।
वीणापुस्तकसाक्षसूत्रविलसद्व्याख्यानमुद्राकरं
देवेशं भरतादिभिः परिवृतं रामं भजे श्यामलम् ॥ 50
रामं राक्षसमर्दनं रघुपतिं शक्रारिविध्वंसिनं
सुग्रीवेप्सितराज्यदं सुरपतेः पुत्रान्तकं शार्ङ्गिणम् ।
भक्तानामभयप्रदं भयहरं पापौघविध्वंसिनं
सीतासेवितपादपद्मयुगलं रामं भजे श्यामलम् ॥ 51
कन्दर्पायुतकोटिकोटितुलितं कालाम्बुदश्यामलं
कम्बुग्रीवमुदारकौस्तुभधरं कर्णावतंसोत्पलम् ।
कस्तूरीतिलकोज्ज्वलं स्मितमुखं चिन्मुद्रयालङ्कृतं
सीतालक्ष्मणवायुपुत्रसहितं सिंहासनस्थं भजे ॥ 52
साकेते नवरत्नपङ्क्तिखचिते चित्रध्वजालङ्कृते
वासे स्वर्णमये दलाष्टललिते पद्मे विमानोत्तमे ।
आसीनं भरतादिसोदरजनैः शाखामृगैः किन्नरैः
दिक्पालैर्मुनिपुङ्गवैर्नृपगणैस्संसेव्यमानं भजे ॥ 53
कस्तूरीघनसारकुङ्कुमलसच्छ्रीचन्दनालङ्कृतं
कन्दर्पाधिकसुन्दरं घननिभं काकुत्स्थवंशध्वजम् ।
कल्याणाम्भरवेष्टितं कमलया युक्तं कलावल्लभं
कल्याणाचलकार्मुकप्रियसखं कल्याणरामं भजे ॥ 54
मुक्तेर्मूलं मुनिवरहृदानन्दकन्दं मुकुन्दं
कूटस्थाख्यं सकलवरदं सर्वचैतन्यरूपम् ।
नादातीतं कमलनिलयं नादनादान्ततत्त्वं
नादातीतं प्रकृतिरहितं रामचन्द्रं भजेऽहम् ॥ 55
ताराकारं निखिलनिलयं तत्त्वमस्यादिलक्ष्यं
शब्दावाच्यं त्रिगुणरहितं व्योममङ्गुष्ठमात्रम् ।
निर्वाणाख्यं सगुणमगुणव्योमरन्ध्रान्तरस्थं
सौषुम्नान्तः प्रणवसहितं रामचन्द्रं भजेऽहम् ॥ 56
निजानन्दाकारं निगमतुरगाराधितपदं
परब्रह्मानन्दं परमपदगं पापहरणम् ।
कृपापारावारं परमपुरुषं पद्मनिलयं
भजे रामं श्यामं प्रकृतिरहितं निर्गुणमहम् ॥ 57
साकेते नगरे समस्तमहिमाधारे जगन्मोहने
रत्नस्तम्भसहस्रमण्टपमहासिंहासने साम्बुजे ।
विश्वामित्रवसिष्ठगौतमशुकव्यासादिभिर्मौनिभिः
ध्येयं लक्ष्मणलोकपालसहितं सीतासमेतं भजे ॥ 58
रामं श्यामाभिरामं रविशशिनयनं कोटिसूर्यप्रकाशं
दिव्यं दिव्यास्त्रपाणिं शरमुखशरधिं चारुकोडण्डहस्तम् ।
कालं कालाग्निरुद्रं रिपुकुलदहनं विघ्नविच्छेददक्षं
भीमं भीमाट्टहासं सकलभयहरं रामचन्द्रं भजेऽहम् ॥ 59
श्रीरामं भुवनैकसुन्दरतनुं धाराधरश्यामलं
राजीवायतलोचनं रघुवरं राकेन्दुबिम्बाननम् ।
कोदण्डादिनिजायुधाश्रितभुजैर्भ्रान्तं विदेहात्मजा-
धीशं भक्तजनावनं रघुवरं श्रीरामचन्द्रं भजे ॥ 60
श्रीवत्साङ्कमुदारकौस्तुभलसत्पीताम्बरालङ्कृतं
नानारत्नविराजमानमकुटं नीलाम्बुदश्यामलम् ।
कस्तूरीघनसारचर्चिततनुं मन्दारमालाधरं
कन्दर्पायुतसुन्दरं रघुपतिं सीतासमेतं भजे ॥ 61
सदानन्ददेवे सहस्रारपद्मे
गलच्चन्द्रपीयूषधारामृतान्ते ।
स्थितं राममूर्तिं निषेवे निषेवे-
ऽन्यदैवं न सेवे न सेवे न सेवे ॥ 62
सुधाभासितद्वीपमध्ये विमाने
सुपर्वालिवृक्षोज्ज्वले शेषतल्पे ।
निषण्णं रमाङ्कं निषेवे निषेवे-
ऽन्यदैवं न सेवे न सेवे न सेवे ॥ 63
चिदंशं समानन्दमानन्दकन्दं
सुषुम्नाख्यरन्ध्रान्तराले च हंसम् ।
सचक्रं सशङ्खं सपीताम्बराङ्कं
परञ्चान्यदैवं न जाने न जाने ॥ 64
चतुर्वेदकूटोल्लसत्कारणाख्यं
स्फुरद्दिव्यवैमानिके भोगितल्पे ।
परन्धाममूर्तिं निषण्णं निषेवे
निषेवेऽन्यदैवं न सेवे न सेवे ॥ 65
सिंहासनस्थं सुरसेवितव्यं
रत्नाङ्कितालङ्कृतपादपद्मम् ।
सीतासमेतं शशिसूर्यनेत्रं
रामं भजे राघव रामचन्द्रम् ॥ 66
रामं पुराणपुरुषं रमणीयवेषं
राजाधिराजमकुटार्चितपादपीठम् ।
सीतापतिं सुनयनं जगदेकवीरं
श्रीरामचन्द्रमनिशं कलयामि चित्ते ॥ 67
परानन्दवस्तुस्वरूपादिसाक्षिं
परब्रह्मगम्यं परञ्ज्योतिमूर्तिम् ।
पराशक्तिमित्राऽप्रियाराधिताङ्घ्रिं
परन्धामरूपं भजे रामचन्द्रम् ॥ 68
मन्दस्मितं कुण्डलगण्डभागं
पीताम्बरं भूषणभूषिताङ्गम् ।
नीलोत्पलाङ्गं भुवनैकमित्रं
रामं भजे राघव रामचन्द्रम् ॥ 69
अचिन्त्यमव्यक्तमनन्तरूप-
मद्वैतमानन्दमनादिगम्यम् ।
पुण्यस्वरूपं पुरुषोत्तमाख्यं
रामं भजे राघव रामचन्द्रम् ॥ 70
पद्मासनस्थं सुरसेवितव्यं
पद्मालयानन्दकटाक्षवीक्ष्यम् ।
गन्धर्वविद्याधरगीयमानं
रामं भजे राघव रामचन्द्रम् ॥ 71
अनन्तकीर्तिं वरदं प्रसन्नं
पद्मासनं सेवकपारिजातम् ।
राजाधिराजं रघुवीरकेतुं
रामं भजे राघव रामचन्द्रम् ॥ 72
सुग्रीवमित्रं सुजनानुरूपं
लङ्काहरं राक्षसवंशनाशम् ।
वेदाश्रयाङ्गं विपुलायताक्षं
रामं भजे राघव रामचन्द्रम् ॥ 73
सकृत्प्रणतरक्षायां साक्षी यस्य विभीषणः ।
सापराधप्रतीकारः स श्रीरामो गतिर्मम ॥ 74
फलमूलाशिनौ दान्तौ तापसौ धर्मचारिणौ ।
रक्षःकुलविहन्तारौ भ्रातरौ रामलक्ष्मणौ ॥ 75
तरुणौ रूपसम्पन्नौ सुकुमारौ महाबलौ ।
पुण्डरीक विशालाक्षौ चीरकृष्णाजिनाम्बरौ ॥ 76
कौसल्यानयनेन्दुं दशरथमुखारविन्दमार्ताण्डम् ।
सीतामानसहंसं रामं राजीवलोचनं वन्दे ॥ 77
भर्जनं भवबीजानां मार्जनं सुखसम्पदाम् ।
तर्जनं यमदूतानां रामरामेति कीर्तनम् ॥ 78
न जाने जानकी जाने राम त्वन्नामवैभवम् ।
सर्वेशो भगवान् शम्भुर्वाल्मीकिर्वेत्ति वा नवा ॥ 79
करतलधृतचापं कालमेघस्वरूपं
सरसिजदलनेत्रं चारुहासं सुगात्रम् ।
विचिनुतवनवासं विक्रमोदग्रवेषं
प्रणमत रघुनाथं जानकीप्राणनाथम् ॥ 80
विद्युत्स्फुरन्मकरकुण्डलदीप्तचारु-
गण्डस्थलं मणिकिरीटविराजमानम् ।
पीताम्बरं जलदनीलमुदारकान्तिं
श्रीरामचन्द्रमनिशं कलयामि चित्ते ॥ 81
रत्नोल्लसज्ज्वलितकुण्डलगण्डभागं
कस्तूरिकातिलकशोभितफालभागम् ।
कर्णान्तदीर्घनयनं करुणाकटाक्षं
श्रीरामचन्द्र मुखमात्मनि सन्निधत्तम् ॥ 82
वैदेहीसहितं च लक्ष्मणयुतं कैकेयिपुत्रान्वितं
सुग्रीवं च विभीषणानिलसुतौ नीलं नलं साङ्गदम् ।
विश्वामित्रवसिष्ठगौतमभरद्वाजादिकान् मानयन्
रामो मारुतिसेवितः स्मरतु मां साम्राज्यसिंहासने ॥ 83
सकलगुणनिधानं योगिभिस्स्तूयमानं
भजितसुरविमानं रक्षितेन्द्रादिमानम् ।
महितवृषभयानं सीतया शोभमानं
स्मरतु हृदयभानुं ब्रह्मरामाभिरामम् ॥ 84
त्रिदशकुमुदचन्द्रो दानवाम्भोजचन्द्रो
दुरिततिमिरचन्द्रो योगिनां ज्ञानचन्द्रः ।
प्रणतनयनचन्द्रो मैथिलीनेत्रचन्द्रो
दशमुखरिपुचन्द्रः पातु मां रामचन्द्रः ॥ 85
यन्नामैव सहस्रनामसदृशं यन्नाम वेदैस्समं
यन्नामाङ्कितवाक्य-मासुरबलस्त्रीगर्भविच्छेदनम् ।
यन्नाम श्वपचार्यभेदरहितं मुक्तिप्रदानोज्ज्वलं
तन्नामाऽलघुरामरामरमणं श्रीरामनामामृतम् ॥ 86
राजीवनेत्र रघुपुङ्गव रामभद्र
राकेन्दुबिम्बसदृशानन नीलगात्र ।
रामाऽभिराम रघुवंशसमुद्भव त्वं
श्रीरामचन्द्र मम देहि करावलम्बम् ॥ 87
माणिक्यमञ्जीरपदारविन्दं
रामार्कसम्फुल्लमुखारविन्दम् ।
भक्ताभयप्रापिकरारविन्दां
देवीं भजे राघववल्लभां ताम् ॥ 88
जयतु विजयकारी जानकीमोदकारी
तपनकुलविहारी दण्डकारण्यचारी ।
दशवदनकुठारी दैत्यविच्छेदकारी
मणिमकुटकधारी चण्डकोदण्डधारी ॥ 89
रामः पिता रघव एव माता
रामस्सुबन्धुश्च सखा हितश्च ।
रामो गुरुर्मे परमं च दैवं
रामं विना नाऽन्यमहं स्मरामि ॥ 90
श्रीराम मे त्वं हि पिता च माता
श्रीराम मे त्वं हि सुहृच्च बन्धुः ।
श्रीराम मे त्वं हि गुरुश्च गोष्ठी
श्रीराम मे त्वं हि समस्तमेव ॥ 91
रामचन्द्रचरितामृतपानं
सोमपानशतकोटिसमानम् ।
सोमपानशतकोटिभिरीया-
ज्जन्म नैति रघुनायकनाम्ना ॥ 92
राम राम दयासिन्धो रावणारे जगत्पते ।
त्वत्पादकमलासक्ति-र्भवेज्जन्मनि जन्मनि ॥ 93
श्रीरामचन्द्रेति दयापरेति
भक्तप्रियेति भवबन्धनमोचनेति ।
नाथेति नागशयनेति सदा स्तुवन्तं
मां पाहि भीतमनिशं कृपणं कृपालो ॥ 94
अयोध्यानाथ राजेन्द्र सीताकान्त जगत्पते ।
श्रीराम पुण्डरीकाक्ष रामचन्द्र नमोऽस्तु ते ॥ 95
हे राम हे रमण हे जगदेकवीर
हे नाथ हे रघुपते करुणालवाल ।
हे जानकीरमण हे जगदेकबन्धो
मां पाहि दीनमनिशं कृपणं कृतघ्नम् ॥ 96
जानाति राम तव तत्त्वगतिं हनूमान् ।
जानाति राम तव सख्यगतिं कपीशः ।
जानाति राम तव युद्धगतिं दशास्यो ।
जानाति राम धनदानुज एव सत्यम् ॥ 97
सेव्यं श्रीराममन्त्रं श्रवणशुभकरं श्रेष्ठसुज्ञानिमन्त्रं
स्तव्यं श्रीराममन्त्रं नरकदुरितदुर्वारनिर्घातमन्त्रम् ।
भव्यं श्रीराममन्त्रं भजतु भजतु संसारनिस्तारमन्त्रं
दिव्यं श्रीराममन्त्रं दिवि भुवि विलसन्मोक्षरक्षैकमन्त्रम् ॥ 98
निखिलनिलयमन्त्रं नित्यतत्त्वाख्यमन्त्रं
भवकुलहरमन्त्रं भूमिजाप्राणमन्त्रम् ।
पवनजनुतमन्त्रं पार्वतीमोक्षमन्त्रं
पशुपतिनिजमन्त्रं पातु मां राममन्त्रम् ॥ 99
प्रणवनिलयमन्त्रं प्राणनिर्वाणमन्त्रं
प्रकृतिपुरुषमन्त्रं ब्रह्मरुद्रेन्द्रमन्त्रम् ।
प्रकटदुरितरागद्वेषनिर्णाशमन्त्रं
रघुपतिनिजमन्त्रं रामरामेतिमन्त्रम् ॥ 100
दशरथसुतमन्त्रं दैत्यसंहारमन्त्रं
विबुधविनुतमन्त्रं विश्वविख्यातमन्त्रम् ।
मुनिगणनुतमन्त्रं मुक्तिमार्गैकमन्त्रं
रघुपतिनिजमन्त्रं रामरामेतिमन्त्रम् ॥ 101
संसारसागरभयापहविश्वमन्त्रं
साक्षान्मुमुक्षुजनसेवितसिद्धमन्त्रम् ।
सारङ्गहस्तमुखहस्तनिवासमन्त्रं
कैवल्यमन्त्रमनिशं भज राममन्त्रम् ॥ 102
जयतु जयतु मन्त्रं जन्मसाफल्यमन्त्रं
जननमरणभेदक्लेशविच्छेदमन्त्रम् ।
सकलनिगममन्त्रं सर्वशास्त्रैकमन्त्रं
रघुपतिनिजमन्त्रं रामरामेतिमन्त्रम् ॥ 103
जगति विशदमन्त्रं जानकीप्राणमन्त्रं
विबुधविनुतमन्त्रं विश्वविख्यातमन्त्रम् ।
दशरथसुतमन्त्रं दैत्यसंहारमन्त्रं
रघुपतिनिजमन्त्रं रामरामेतिमन्त्रम् ॥ 104
ब्रह्मादियोगिमुनिपूजितसिद्धमन्त्रं
दारिद्र्यदुःखभवरोगविनाशमन्त्रम् ।
संसारसागरसमुत्तरणैकमन्त्रं
वन्दे महाभयहरं रघुराममन्त्रम् ॥ 105
शत्रुच्छेदैकमन्त्रं सरसमुपनिषद्वाक्यसम्पूज्यमन्त्रं
संसारोत्तारमन्त्रं समुचितसमये सङ्गनिर्याणमन्त्रम् ।
सर्वैश्वर्यैकमन्त्रं व्यसनभुजगसन्दष्टसन्त्राणमन्त्रं
जिह्वे श्रीराममन्त्रं जप जप सफलं जन्मसाफल्यमन्त्रम् ॥ 106
नित्यं श्रीराममन्त्रं निरुपममधिकं नीतिसुज्ञानमन्त्रं
सत्यं श्रीराममन्त्रं सदमलहृदये सर्वदारोग्यमन्त्रम् ।
स्तुत्यं श्रीराममन्त्रं सुललितसुमनस्सौख्यसौभाग्यमन्त्रं
पठ्यं श्रीराममन्त्रं पवनजवरदं पातु मां राममन्त्रम् ॥ 107
व्यामोहप्रशमौषधं मुनिमनोवृत्तिप्रवृत्त्यौषधं
दैत्योन्मूलकरौषधं भवभयप्रध्वंसनैकौषधम् ।
भक्तानन्दकरौषधं त्रिभुवने सञ्जीवनैकौषधं
श्रेयः प्राप्तिकरौषधं पिब मनः श्रीरामनामौषधम् ॥ 108
सकलभुवनरत्नं सर्वशास्त्रार्थरत्नं
समरविजयरत्नं सच्चिदानन्दरत्नम् ।
दशमुखहररत्नं दानवारातिरत्नं
रघुकुलनृपरत्नं पातु मां रामरत्नम् ॥ 109
सकलभुवनरत्नं सच्चिदानन्दरत्नं
सकलहृदयरत्नं सूर्यबिम्बान्तरत्नम् ।
विमलसुकृतरत्नं वेदवेदान्तरत्नं
पुरहरजपरत्नं पातु मां रामरत्नम् ॥ 110
निगमशिखररत्नं निर्मलानन्दरत्नं
निरुपमगुणरत्नं नादनादान्तरत्नम् ।
दशरथकुलरत्नं द्वादशान्तस्स्थरत्नं
पशुपतिजपरत्नं पातु मां रामरत्नम् ॥ 111
शतमखसुतरत्नं षोडशान्तस्स्थरत्नं
मुनिजनजपरत्नं मुख्यवैकुण्ठरत्नम् ।
निरुपमगुणरत्नं नीरजान्तस्स्थरत्नं
परमपदविरत्नं पातु मां रामरत्नम् ॥ 112
सकलसुकृतरत्नं सत्यवाक्यार्थरत्नं
शमदमगुणरत्नं शाश्वतानन्दरत्नम् ।
प्रणयनिलयरत्नं प्रस्फुटद्योतिरत्नं
परमपदविरत्नं पातु मां रामरत्नम् ॥ 113
निगमशिखररत्नं नित्यमाशास्यरत्नं
जननुतनृपरत्नं जानकीरूपरत्नम् ।
भुवनवलयरत्नं भूभुजामेकरत्नं
रघुकुलवररत्नं पातु मां रामरत्नम् ॥ 114
विशालनेत्रं परिपूर्णगात्रं
सीताकलत्रं सुरवैरिजैत्रम् ।
कारुण्यपात्रं जगतः पवित्रं
श्रीरामरत्नं प्रणतोऽस्मि नित्यम् ॥ 115
हे गोपालक हे दयाजलनिधे हे सद्गुणाम्भोनिधे
हे दैत्यान्तक हे विभीषणदयापरीण हे भूपते ।
हे वैदेहसुतामनोजविहृते हे कोटिमाराकृते
हे नव्याम्बुजनेत्र पालय परं जानामि न त्वां विना ॥ 116
यस्य किञ्चिदपि नो हरणीयं
कर्म किञ्चिदपि नो चरणीयम् ।
रामनाम च सदा स्मरणीयं
लीलया भवजलं तरणीयम् ॥ 117
दशरथसुतमीशं दण्डकारण्यवासं
शतमखमणिनीलं जानकीप्राणलोलम् ।
सकलभुवनमोहं सन्नुताम्भोददेहं
बहुलनुतसमुद्रं भावये रामभद्रम् ॥ 118
विशालनेत्रं परिपूर्णगात्रं
सीताकलत्रं सुरवैरिजैत्रम् ।
जगत्पवित्रं परमात्मतन्त्रं
श्रीरामचन्द्रं प्रणमामि चित्ते ॥ 119
जय जय रघुराम श्रीमुखाम्भोजभानो
जय जय रघुवीर श्रीमदम्भोजनेत्र ।
जय जय रघुनाथ श्रीकराभ्यर्चिताङ्घ्रि
जय जय रघुवर्य श्रीश कारुण्यसिन्धो ॥ 120
मन्दारमूले मणिपीठसंस्थं
सुधाप्लुतं दिव्यविराट्स्वरूपम् ।
सबिन्दुनादान्तकलान्ततुर्य-
मूर्तिं भजेऽहं रघुवंशरत्नम् ॥ 121
नादं नादविनीलचित्तपवनं नादान्तत्त्वप्रियं
नामाकारविवर्जितं नवघनश्यामाङ्गनादप्रियम् ।
नादाम्भोजमरन्दमत्तविलसद्भृङ्गं मदान्तस्स्थितं
नादान्तधृवमण्डलाब्जरुचिरं रामं भजे तारकम् ॥ 122
नानाभूतहृदब्जपद्मनिलयं नामोज्ज्वलाभूषणम् ।
नामस्तोत्रपवित्रितत्रिभुवनं नारायणाष्टाक्षरम् ।
नादान्तेन्दुगलत्सुधाप्लुततनुं नानात्मचिन्मात्रकम् ।
नानाकोटियुगान्तभानुसदृशं रामं भजे तारकम् ॥ 123
वेद्यं वेदगुरुं विरिञ्चिजनकं वेदान्तमूर्तिं स्फुर-
द्वेदं वेदकलापमूलमहिमाधारान्तकन्दाङ्कुरम् ।
वेदशृङ्गसमानशेषशयनं वेदान्तवेद्यात्मकं
वेदाराधितपादपङ्कजमहं रामं भजे तारकम् ॥ 124
मज्जीवं मदनुग्रहं मदधिपं मद्भावनं मत्सुखं
मत्तातं मम सद्गुरुं मम वरं मोहान्धविच्छेदनम् ।
मत्पुण्यं मदनेकबान्धवजनं मज्जीवनं मन्निधिं
मत्सिद्धिं मम सर्वकर्मसुकृतं रामं भजे तारकम् ॥ 125
नित्यं नीरजलोचनं निरुपमं नीवारशूकोपमं
निर्भेदानुभवं निरन्तरगुणं नीलाङ्गरागोज्ज्वलम् ।
निष्पापं निगमागमार्चितपदं नित्यात्मकं निर्मलं
निष्पुण्यं निखिलं निरञ्जनपदं रामं भजे तारकम् ॥ 126
ध्याये त्वां हृदयाम्बुजे रघुपतिं विज्ञानदीपाङ्कुरं
हंसोहंसपरम्परादिमहिमाधारं जगन्मोहनम् ।
हस्ताम्भोजगदाब्जचक्रमतुलं पीताम्बरं कौस्तुभं
श्रीवत्सं पुरुषोत्तमं मणिनिभं रामं भजे तारकम् ॥ 127
सत्यज्ञानमनन्तमच्युतमजं चाव्याकृतं तत्परं
कूटस्थादिसमस्तसाक्षिमनघं साक्षाद्विराट्तत्त्वदम् ।
वेद्यं विश्वमयं स्वलीनभुवनस्वाराज्यसौख्यप्रदं
पूर्णं पूर्णतरं पुराणपुरुषं रामं भजे तारकम् ॥ 128
रामं राक्षसवंशनाशनकरं राकेन्दुबिम्बाननं
रक्षोरिं रघुवंशवर्धनकरं रक्ताधरं राघवम् ।
राधायात्मनिवासिनं रविनिभं रम्यं रमानायकं
रन्ध्रान्तर्गतशेषशायिनमहं रामं भजे तारकम् ॥ 129
ओतप्रोतसमस्तवस्तुनिचयं ओङ्कारबीजाक्षरं
ओङ्कारप्रकृतिं षडक्षरहितं ओङ्कारकन्दाङ्कुरम् ।
ओङ्कारस्फुटभूर्भुवस्सुपरितं ओघत्रयाराधितम्
ओङ्कारोज्ज्वलसिंहपीठनिलयं रामं भजे तारकम् ॥ 130
साकेते नगरे समस्तसुखदे हर्म्येऽब्जकोटिद्युते
नक्षत्रग्रहपङ्क्तिलग्नशिखरे चान्तर्यपङ्केरुहे ।
वाल्मीकात्रिपराशरादिमुनिभिस्संसेव्यमानं स्थितं
सीतालङ्कृतवामभागमनिशं रामं भजे तारकम् ॥ 131
वैकुण्ठे नगरे सुरद्रुमतले चानन्दवप्रान्तरे
नानारत्नविनिर्मितस्फुटपटुप्राकारसंवेष्टिते ।
सौधेन्दूपलशेषतल्पललिते नीलोत्पलच्छादिते
पर्यङ्के शयनं रमादिसहितं रामं भजे तारकम् ॥ 132
वन्दे राममनादिपूरुषमजं वन्दे रमानायकं
वन्दे हारिकिरीटकुण्डलधरं वन्दे सुनीलद्युतिम् ।
वन्दे चापकलम्बकोज्ज्वलकरं वन्दे जगन्मङ्गलं
वन्दे पङ्क्तिरथात्मजं मम गुरुं वन्दे सदा राघवम् ॥ 133
वन्दे शौनकगौतमाद्यभिनुतं वन्दे घनश्यामलं
वन्दे तारकपीठमध्यनिलयं वन्दे जगन्नायकम् ।
वन्दे भक्तजनौघदेविवटपं वन्दे धनुर्वल्लभं
वन्दे तत्त्वमसीतिवाक्यजनकं वन्दे सदा राघवम् ॥ 134
वन्दे सूर्यशशाङ्कलोचनयुगं वन्दे जगत्पावनं
वन्दे पत्रसहस्रपद्मनिलयं वन्दे पुरारिप्रियम् ।
वन्दे राक्षसवंशनाशनकरं वन्दे सुधाशीतलं
वन्दे देवकपीन्द्रकोटिविनुतं वन्दे सदा राघवम् ॥ 135
वन्दे सागरगर्वभङ्गविशिखं वन्दे जगज्जीवनं
वन्दे कौशिकयागरक्षणकरं वन्दे गुरुणां गुरुम् ।
वन्दे बाणशरासनोज्ज्वलकरं वन्दे जटावल्कलं
वन्दे लक्ष्मणभूमिजान्वितमहं वन्दे सदा राघवम् ॥ 136
वन्दे पाण्डरपुण्डरीकनयनं वन्देऽब्जबिम्बाननं
वन्दे कम्बुगलं कराब्जयुगलं वन्दे ललाटोज्ज्वलम् ।
वन्दे पीतदुकूलमम्बुदनिभं वन्दे जगन्मोहनं
वन्दे कारणमानुषोज्ज्वलतनुं वन्दे सदा राघवम् ॥ 137
वन्दे नीलसरोजकोमलरुचिं वन्दे जगद्वन्दितं
वन्दे सूर्यकुलाब्धिकौस्तुभमणिं वन्दे सुराराधितम् ।
वन्दे पातकपञ्चकप्रहरणं वन्दे जगत्कारणं
वन्दे विंशतिपञ्चतत्त्वरहितं वन्दे सदा राघवम् ॥ 138
वन्दे साधकवर्गकल्पकतरुं वन्दे त्रिमूर्त्यात्मकं
वन्दे नादलयान्तरस्थलगतं वन्दे त्रिवर्गात्मकम् ।
वन्दे रागविहीनचित्तसुलभं वन्दे सभानायकं
वन्दे पूर्णदयामृतार्णवमहं वन्दे सदा राघवम् ॥ 139
वन्दे सात्त्विकतत्त्वमुद्रिततनुं वन्दे सुधादायकं
वन्दे चारुचतुर्भुजं मणिनिभं वन्दे षडब्जस्थितम् ।
वन्दे ब्रह्मपिपीलिकादिनिलयं वन्दे विराट्विग्रहं
वन्दे पन्नगतल्पशायिनमहं वन्दे सदा राघवम् ॥ 140
सिंहासनस्थं मुनिसिद्धसेव्यं
रक्तोत्पलालङ्कृतपादपद्मम् ।
सीतासमेतं शशिसूर्यनेत्रं
रामं भजे राघवरामचन्द्रम् ॥ 141
श्रीरामभद्राश्रितसद्गुरूणां
पादारविन्दं भजतां नराणाम् ।
आरोग्यमैश्वर्यमनन्तकीर्ति-
रन्ते च विष्णोः पदमस्ति सत्यम् ॥ 142
दशरथवरपुत्रं जानकीसत्कलत्रं
दशमुखहरदक्षं पद्मपत्रायताक्षम् ।
करधृतशरचापं चारुमुक्ताकलापं
रघुकुलनृवरेण्यं राममीडे शरण्यम् ॥ 143
दशमुखगजसिंहं दैत्यगर्वातिरंहं
कदनभयदहस्तं तारकब्रह्म शस्तम् ।
मणिखचितकिरीटं मञ्जुलालापवाटं
दशरथकुलचन्द्रं रामचन्द्रं भजेऽहम् ॥ 144
रामं रक्तसरोरुहाक्षममलं लङ्काधिनाथान्तकं
कौसल्यानयनोत्सुकं रघुवरं नागेन्द्रतल्पस्थितम् ।
वैदेहीकुचकुम्भकुङ्कुमरजोलङ्कारहारं हरिं
मायामानुषविग्रहं रघुपतिं सीतासमेतं भजे ॥ 145
रामं राक्षसमर्दनं रघुवरं दैतेयभिध्वंसिनं
सुग्रीवेप्सितराज्यदं सुरपतेर्भीत्यन्तकं शार्ङ्गिणम् ।
भक्तानामभयप्रदं भयहरं पापौघविध्वंसिनं
सामीरिस्तुतपादपद्मयुगलं सीतासमेतं भजे ॥ 146
यत्पादाम्बुजरेणुना मुनिसती मुक्तिङ्गता यन्महः
पुण्यं पातकनाशनं त्रिजगतां भाति स्मृतं पावनम् ।
स्मृत्वा राघवमप्रमेयममलं पूर्णेन्दुमन्दस्मितं
तं रामं सरसीरुहाक्षममलं सीतासमेतं भजे ॥ 147
वैदेहीकुचमण्डलाग्र-विलसन्माणिक्यहस्ताम्बुजं
चञ्चत्कङ्कणहारनूपुर-लसत्केयूरहारान्वितम् ।
दिव्यश्रीमणिकुण्डलोज्ज्वल-महाभूषासहस्रान्वितं
वीरश्रीरघुपुङ्गवं गुणनिधिं सीतासमेतं भजे ॥ 148
वैदेहीकुचमण्डलोपरि-लसन्माणिक्यहारावली-
मध्यस्थं नवनीतकोमलरुचिं नीलोत्पलश्यामलम् ।
कन्दर्पायुतकोटिसुन्दरतनुं पूर्णेन्दुबिम्बाननं
कौसल्याकुलभूषणं रघुपतिं सीतासमेतं भजे ॥ 149
दिव्यारण्ययतीन्द्रनामनगरे मध्ये महामण्टपे
स्वर्णस्तम्भसहस्रषोडशयुते मन्दारमूलाश्रिते ।
नानारत्नविचित्रनिर्मलमहासिंहासने संस्थितं
सीतालक्ष्मणसेवितं रघुपतिं सीतासमेतं भजे ॥ 150
कस्तूरीतिलकं कपीन्द्रहरणं कारुण्यवारान्निधिं
क्षीराम्भोधिसुतामुखाब्जमधुपं कल्याणसम्पन्निधिम् ।
कौसल्यानयनोत्सुकं कपिवरत्राणं महापौरुषं
कौमारप्रियमर्ककोटिसदृशं सीतासमेतं भजे ॥ 151
विद्युत्कोटिदिवाकरद्युतिनिभं श्रीकौस्तुभालङ्कृतं
योगीन्द्रैस्सनकादिभिः परिवृतं कैलासनाथप्रियम् ।
मुक्तारत्नकिरीटकुण्डलधरं ग्रैवेयहारान्वितं
वैदेहीकुचसन्निवासमनिशं सीतासमेतं भजे ॥ 152
मेघश्यामलमम्बुजातनयनं विस्तीर्णवक्षस्स्थलं
बाहुद्वन्द्वविराजितं सुवदनं शोणाङ्घ्रिपङ्केरुहम् ।
नानारत्नविचित्रभूषणयुतं कोदण्डबाणाङ्कितं
त्रैलोक्याऽप्रतिमानसुन्दरतनुं सीतासमेतं भजे ॥ 153
वैदेहीयुतवामभागमतुलं वन्दारुमन्दारकं
वन्दे प्रस्तुतकीर्तिवासिततरुच्छायानुकारिप्रभम् ।
वैदेहीकुचकुङ्कुमाङ्कितमहोरस्कं महाभूषणं
वेदान्तैरुपगीयमानमसकृत्सीतासमेतं भजे ॥ 154
देवानां हितकारणेन भुवने धृत्वाऽवतारं ध्रुवं
रामं कौशिकयज्ञविघ्नदलनं तत्ताटकासंहरम् ।
नित्यं गौतमपत्निशापदलनश्रीपादरेणुं शुभं
शम्भोरुत्कटचापखण्डनमहासत्वं भजे राघवम् ॥ 155
श्रीरामं नवरत्नकुण्डलधरं श्रीरामरक्षामणिं
श्रीरामं च सहस्रभानुसदृशं श्रीरामचन्द्रोदयम् ।
श्रीरामं श्रुतकीर्तिमाकरमहं श्रीराममुक्तिप्रदं
श्रीरामं रघुनन्दनं भयहरं श्रीरामचन्द्रं भजे ॥ 156
राममिन्दीवरश्यामं राजीवायतलोचनम् ।
ज्याघोषनिर्जितारातिं जानकीरमणं भजे ॥ 157
दीर्घबाहुमरविन्दलोचनं
दीनवत्सलमनाथरक्षकम् ।
दीक्षितं सकललोकरक्षणे
दैवतं दशरथात्मजं भजे ॥ 158
प्रातस्स्मरामि रघुनाथमुखारविन्दं
मन्दस्मितं मधुरभाषि विशालफालम् ।
कर्णावलम्बिचलकुण्डलगण्डभागं
कर्णान्तदीर्घनयनं नयनाभिरामम् ॥ 159
प्रातर्भजामि रघुनाथकरारविन्दं
रक्षोगणाय भयदं वरदं निजेभ्यः ।
यद्राजसंसदि विभिद्य महेशचापं
सीताकरग्रहणमङ्गलमाप सद्यः ॥ 160
प्रातर्नमामि रघुनाथपदारविन्दं
पद्माङ्कुशादिशुभरेखशुभावहं च ।
योगीन्द्रमानसमधुव्रतसेव्यमानं
शापापहं सपदि गौतमधर्मपत्न्याः ॥ 161
प्रातर्वदामि वचसा रघुनाथनाम
वाग्दोषहारि सकलं कलुषं निहन्तृ ।
यत्पार्वती स्वपतिना सह भोक्तुकामा
प्रीत्या सहस्रहरिनामसमं जजाप ॥ 162
प्रातः श्रये श्रुतिनुतं रघुनाथमूर्तिं
नीलाम्बुदोत्पलसितेतररत्ननीलाम् ।
आमुक्तमौक्तिकविशेषविभूषणाढ्यां
ध्येयां समस्तमुनिभिर्निजभृत्यमुख्यैः ॥ 163
रघुकुलवरनाथो जानकीप्राणनाथः
पितृवचनविधाता कीशराज्यप्रदाता ।
प्रतिनिशिचरनाशः प्राप्तराज्यप्रवेशो
विहितभुवनरक्षः पातु पद्मायताक्षः ॥ 164
कुवलयदलनीलः पीतवासाः स्मितास्यो
विविधरुचिरभूषाभूषितो दिव्यमूर्तिः ।
दशरथकुलनाथो जानकीप्राणनाथो
निवसतु मम चित्ते सर्वदा रामचन्द्रः ॥ 165
जयतु जयतु रामो जानकीवल्लभोऽयं
जयतु जयतु रामश्चन्द्रचूडार्चिताङ्घ्रिः ।
जयतु जयतु वाणीनाथनाथः परात्मा
जयतु जयतु रामोऽनाथनाथः कृपालुः ॥ 166
वदतु वदतु वाणी रामरामेति नित्यं
जयतु जयतु चित्तं रामपादारविन्दम् ।
नमतु नमतु देहं सन्ततं रामचन्द्रं
न भवतु मम पापं जन्मजन्मान्तरेषु ॥ 167
आनन्दरूपं वरदं प्रसन्नं
सिंहेक्षणं सेवकपारिजातम् ।
नीलोत्पलाङ्गं भुवनैकमित्रं
रामं भजे राघवरामचन्द्रम् ॥ 168
लङ्काविरामं रणरङ्गभीमं
राजीवनेत्रं रघुवंशमित्रम् ।
कारुण्यमूर्तिं करुणाप्रपूर्तिं
श्रीरामचन्द्रं शरणं प्रपद्ये ॥ 169
सुग्रीवमित्रं परमं पवित्रं
सीताकलत्रं नवहेमसूत्रम् ।
कारुण्यपात्रं शतपत्रनेत्रं
श्रीरामचन्द्रं शिरसा नमामि ॥ 170
श्रीराघवेति रमणेति रघूद्वहेति
रामेति रावणहरेति रमाधवेति ।
साकेतनाथसुमुखेति च सुव्रतेति
वाणी सदा वदतु राम हरे हरेति ॥ 171
श्रीरामनामामृतमन्त्रबीजं
सञ्जीवनं चेन्मनसि प्रतिष्ठम् ।
हालाहलं वा प्रलयानलं वा
मृत्योर्मुखं वा वितथीकरोति ॥ 172
किं योगशास्त्रैः किमशेषविद्या
किं यागगङ्गादिविशेषतीर्थैः ।
किं ब्रह्मचर्याश्रमसञ्चरेण
भक्तिर्नचेत्ते रघुवंशकीर्त्याम् ॥ 173
इदं शरीरं श्लथसन्धिजर्झरं
पतत्यवश्यं परिणामपेशलम् ।
किमौषथं पृच्छसि मूढ दुर्मते
निरामयं रामकथामृतं पिब ॥ 174
हे रामभद्राश्रय हे कृपालो
हे भक्तलोकैकशरण्यमूर्ते ।
पुनीहि मां त्वच्चरणारविन्दं
जगत्पवित्रं शरणं ममाऽस्तु ॥ 175
नीलाभ्रदेह निखिलेश जगन्निवास
राजीवनेत्र रमणीयगुणाभिराम ।
श्रीदाम दैत्यकुलमर्दन रामचन्द्र
त्वत्पादपद्ममनिशं कलयामि चित्ते ॥ 176
श्रीरामचन्द्र करुणाकर दीनबन्धो
सीतासमेत भरताग्रज राघवेश ।
पापार्तिभञ्जन भयातुरदीनबन्धो
पापाम्बुधौ पतितमुद्धर मामनाथम् ॥ 177
इन्दीवरदलश्याम-मिन्दुकोटिनिभाननम् ।
कन्दर्पकोटिलावण्यं वन्देऽहं रघुनन्दनम् ॥ 175
इति श्रीबोधेन्द्रसरस्वती कृत श्रीरामकर्णामृतम् ॥
maṅgalaślokāḥ
maṅgalaṃ bhagavānviṣṇurmaṅgalaṃ madhusūdanaḥ |
maṅgalaṃ puṇḍarīkākṣo maṅgalaṃ garuḍadhvajaḥ || 1
maṅgalaṃ kosalendrāya mahanīyaguṇābdhaye |
cakravartitanūjāya sārvabhaumāya maṅgalam || 2
vedavedāntavedyāya meghaśyāmalamūrtaye |
puṃsāṃ mohanarūpāya puṇyaślokāya maṅgalam || 3
viśvāmitrāntaraṅgāya mithilānagarīpateḥ |
bhāgyānāṃ paripākāya bhavyarūpāya maṅgalam || 4
pitṛbhaktāya satataṃ bhrātṛbhiḥ saha sītayā |
nanditākhilalokāya rāmacandrāya maṅgalam || 5
tyaktasāketavāsāya citrakūṭavihāriṇe |
sevyāya sarvayamināṃ dhīrodāttāya maṅgalam || 6
saumitriṇā ca jānakyā cāpabāṇāsidhāriṇā |
saṃsevyāya sadā bhaktyā sānujāyāstu maṅgalam || 7
daṇḍakāraṇyavāsāya khaṇḍitāmaraśatrave |
gṛdhrarājāya bhaktāya muktidāyāstu maṅgalam || 8
sādaraṃ śabarīdattaphalamūlābhilāṣiṇe |
saulabhyaparipūrṇāya sattvodyuktāya maṅgalam || 9
hanūmatsamavetāya harīśābhīṣṭadāyine |
vālipramathanāyāstu mahādhīrāya maṅgalam || 10
śrīmate raghuvīrāya setulaṅghitasindhave |
jitarākṣasarājāya raṇadhīrāya maṅgalam || 11
āsādya nagarīṃ divyāmabhiṣiktāya sītayā |
rājādhirājarājāya rāmabhadrāya maṅgalam || 12
vibhīṣaṇakṛte prītyā viśvābhīṣṭapradāyine |
jānakīprāṇanāthāya sadā rāmāya maṅgalam || 13
—-
śrīrāmaṃ trijagadguruṃ suravaraṃ sītāmanonāyakaṃ
śyāmāṅgaṃ śaśikoṭipūrṇavadanaṃ cañcatkalākaustubham |
saumyaṃ satyaguṇottamaṃ susarayūtīre vasantaṃ prabhuṃ
trātāraṃ sakalārthasiddhisahitaṃ vande raghūṇāṃ patim || 14
śrīrāghavaṃ daśarathātmajamaprameyaṃ
sītāpatiṃ raghuvarānvayaratnadīpam |
ājānubāhumaravindadalāyatākṣaṃ
rāmaṃ niśācaravināśakaraṃ namāmi || 15
śrīrāmacandra karuṇākara rāghavendra
rājendracandra raghuvaṃśasamudracandra |
sugrīvanetrayugalotpala-pūrṇacandra
sītāmanaḥkumudacandra namo namaste || 16
sītāmanomānasarājahaṃsa
saṃsārasantāpahara kṣamāvan |
śrīrāma daityāntaka śāntarūpa
śrītārakabrahma namo namaste || 17
viṣṇo rāghava vāsudeva nṛhare devaughacūḍāmaṇe |
saṃsārārṇavakarṇadhāraka hare kṛṣṇāya tubhyaṃ namaḥ || 18
sugrīvādisamastavānaravaraissaṃsevyamānaṃ sadā |
viśvāmitraparāśarādimunibhissaṃstūyamānaṃ bhaje || 19
rāmaṃ candanaśītalaṃ kṣitisutāmohākaraṃ śrīkaraṃ
vaidehīnayanāravindamihiraṃ sampūrṇacandrānanam |
rājānaṃ karuṇāsametanayanaṃ sītāmanonandanaṃ
sītādarpaṇacārugaṇḍalalitaṃ vande sadā rāghavam || 20
jānāti rāma tava nāmaruciṃ maheśo
jānāti gautamasatī caraṇaprabhāvam |
jānāti dorbalaparākramamīśacāpo
jānātyamoghapaṭubāṇagatiṃ payodhiḥ || 21
mātā rāmo matpitā rāmacandro
bhrātā rāmo matsakhā rāghaveśaḥ |
sarvasvaṃ me rāmacandro dāyālu-
rnānyaṃ daivaṃ naiva jāne na jāne || 22
vimalakamalanetraṃ visphurannīlagātraṃ
tapanakulapavitraṃ dānavadhvantamitram |
bhuvanaśubhacaritraṃ bhūmiputrīkalatraṃ
daśarathavaraputraṃ naumi rāmākhyamitram || 23
mārge mārge śākhināṃ ratnavedī
vedyāṃ vedyāṃ kinnarībṛndagītam |
gīte gīte mañjulālāpagoṣṭhī
goṣṭhyāṃ goṣṭhyāṃ tvatkathā rāmacandra || 24
vṛkṣe vṛkṣe vīkṣitāḥ pakṣisaṅghāḥ
saṅghe saṅghe mañjulāmodavākyam |
vākye vākye mañjulālāpagoṣṭhī
goṣṭhyāṃ goṣṭhyāṃ tvatkathā rāmacandra || 25
duritatimiracandro duṣṭakañjātacandraḥ
surakuvalayacandrassūryavaṃśābdhicandraḥ |
svajananivahacandraśśatrurājīvacandraḥ
praṇatakumudacandraḥ pātu māṃ rāmacandraḥ || 26
kalyāṇadaṃ kauśikayajñapālaṃ
kalānidhiṃ kāñcanaśailadhīram |
kañjātanetraṃ karuṇāsamudraṃ
kākutstharāmaṃ kalayāmi citte || 27
rājīvāyatalocanaṃ raghuvaraṃ nīlotpalaśyāmalaṃ
mandārāñcitamaṇḍape sulalite sauvarṇake puṣpake |
āsthāne navaratnarājikhacite siṃhāsane saṃsthitaṃ
sītālakṣmaṇalokapālasahitaṃ vande munīndrāspadam || 28
dhyāye rāmaṃ sudhāṃśuṃ natasakalabhavāraṇyatāpaprahāram |
śyāmaṃ śāntaṃ surendraṃ suramunivinutaṃ koṭisūryaprakāśam |
sītāsaumitrisevyaṃ suranarasugamaṃ divyasiṃhāsanastham |
sāyāhne rāmacandraṃ smitaruciramukhaṃ sarvadā me prasannam || 29
indranīlamaṇisannibhadehaṃ
vandanīyamasakṛnmunibṛndaiḥ |
lambamānatulasīvanamālaṃ
cintayāmi satataṃ raghuvīram || 30
sampūrṇacandravadanaṃ sarasīruhākṣaṃ
māṇikyakuṇḍaladharaṃ mukuṭābhirāmam |
cāmpeyagauravasanaṃ śaracāpahastaṃ
śrīrāmacandramaniśaṃ manasā smarāmi || 31
mātuḥ pārśve carantaṃ maṇimayaśayane mañjubhūṣāñcitāṅgam |
mandaṃ mandaṃ pibantaṃ mukulitanayanaṃ stanyamanyastanāgram |
aṅgulyāgraiḥ spṛśantaṃ sukhaparavaśayā sasmitāliṅgitāṅgam |
gāḍhaṃ gāḍhaṃ jananyā kalayatu hṛdayaṃ māmakaṃ rāmabālam || 32
rāmābhirāmaṃ nayanābhirāmaṃ
vācābhirāmaṃ vadanābhirāmam |
sarvābhirāmaṃ ca sadābhirāmaṃ
vande sadā dāśarathiṃ ca rāmam || 33
rāśabdoccāramātreṇa mukhānniryāti pātakāḥ |
punaḥ praveśabhītyā ca makārastu kavāṭavat || 34
anarghamāṇikyavirājamāna-
śrīpādukālaṅkṛtaśobhanābhyām |
aśeṣabṛndārakavanditābhyāṃ
namo namo rāmapadāmbujābhyām || 35
calatkanakakuṇḍalollasitadivyagaṇḍasthalaṃ
carācarajaganmayaṃ caraṇapadmagaṅgāśrayam |
caturvidhaphalapradaṃ caramapīṭhamadhyasthitaṃ
cidaṃśamakhilāspadaṃ daśarathātmajaṃ cintaye || 36
sanandanamunipriyaṃ sakalavarṇavedātmakaṃ
samastanigamāgamasphuritatattvasiṃhāsanam |
sahasranayanābjajādyamarabṛndasaṃsevitaṃ
samaṣṭipuravallabhaṃ daśarathātmajaṃ cintaye || 37
jāgratsvapnasuṣupti-kālavilasattattvātmacinmātrakaṃ
caitanyātmakamādhipāparahitaṃ bhūmyāditanmātrakam |
śāmbhavyādisamastayogakulakaṃ sāṅkhyāditattvātparaṃ
śabdāvācyamahaṃ namāmi satataṃ vyutpattināśātparam || 38
ikṣvākuvaṃśārṇavajātaratnaṃ
sītāṅganāyauvanabhāgyaratnam |
vaikuṇṭharatnaṃ mama bhāgyaratnaṃ
śrīrāmaratnaṃ śirasā namāmi || 39
ikṣvākunandanaṃ sugrīvapūjitaṃ
trailokyarakṣakaṃ satyasandhaṃ sadā |
rāghavaṃ raghupatiṃ rājīvalocanaṃ
rāmacandraṃ bhaje rāghaveśaṃ bhaje || 40
bhaktapriyaṃ bhaktasamādhigamyaṃ
cintāharaṃ cintitakāmadhenum |
sūryendukoṭidyutibhāsvaraṃ taṃ
rāmaṃ bhaje rāghavarāmacandram || 41
śrīrāmaṃ janakakṣitīśvarasutāvaktrāmbujāhāriṇaṃ
śrīmadbhānukulābdhikaustubhamaṇiṃ śrīratnavakṣassthalam |
śrīkaṇṭhādyamaraugharatnamakuṭālaṅkārapādāmbujaṃ
śrīvatsojjvalamindranīlasadṛśaṃ śrīrāmacandraṃ bhaje || 42
rāmacandra caritākathāmṛtaṃ
lakṣmaṇāgrajaguṇānukīrtanam |
rāghaveśa tava pādasevanaṃ
sambhavantu mama janmajanmani || 43
ajñānasambhava-bhavāmbudhibāḍabāgni-
ravyaktatattvanikarapraṇavādhirūḍhaḥ |
sītāsametamanujena hṛdantarāle
prāṇaprayāṇasamaye mama sannidhatte || 44
rāmo matkuladaivataṃ sakaruṇaṃ rāmaṃ bhaje sādaraṃ
rāmeṇākhilaghorapāpanihatī rāmāya tasmai namaḥ |
rāmānnāsti jagatrayaikasulabho rāmasya dāso'smyahaṃ
rāme prītiratīva me kulaguro śrīrāma rakṣasva mām || 45
vaidehīsahitaṃ suradrumatale haime mahāmaṇṭape |
madhyepuṣpakamāsane maṇimaye vīrāsane saṃsthitam |
agre vācayati prabhañjanasute tattvaṃ munibhyaḥ param |
vyākhyāntaṃ bharatādibhiḥ parivṛtaṃ rāmaṃ bhaje śyāmalam || 46
vāme bhūmisutā purastu hanumānpaścātsumitrāsuta-
śśatrughno bharataśca pārśvadalayorvāyvādikoṇeṣvapi |
sugrīvaśca vibhīṣaṇaśca yuvarāṭ tārāsuto jāmbavān
madhye nīlasarojakomalaruciṃ rāmaṃ bhaje śyāmalam || 47
keyūrāṅgadakaṅkaṇairmaṇigaṇairvairocamānaṃ sadā
rākāparvaṇicandrakoṭisadṛśaṃ chatreṇa vairājitam |
hemastambhasahasraṣoḍaśayute madhye mahāmaṇḍape
deveśaṃ bharatādibhiḥ parivṛtaṃ rāmaṃ bhaje śyāmalam || 48
sākete śaradindukundadhavale saughe mahāmaṇṭape |
paryastāgarudhūpadhūmapaṭale karpūradīpojjvale |
sugrīvāṅgadavāyuputrasahitaṃ saumitriṇā sevitaṃ
līlāmānuṣavigrahaṃ raghupatiṃ rāmaṃ bhaje śyāmalam || 49
śāntaṃ śāradacandrakoṭisadṛśaṃ candrābhirāmānanaṃ
candrārkāgnivikāsikuṇḍaladharaṃ candrāvataṃsastutam |
vīṇāpustakasākṣasūtravilasadvyākhyānamudrākaraṃ
deveśaṃ bharatādibhiḥ parivṛtaṃ rāmaṃ bhaje śyāmalam || 50
rāmaṃ rākṣasamardanaṃ raghupatiṃ śakrārividhvaṃsinaṃ
sugrīvepsitarājyadaṃ surapateḥ putrāntakaṃ śārṅgiṇam |
bhaktānāmabhayapradaṃ bhayaharaṃ pāpaughavidhvaṃsinaṃ
sītāsevitapādapadmayugalaṃ rāmaṃ bhaje śyāmalam || 51
kandarpāyutakoṭikoṭitulitaṃ kālāmbudaśyāmalaṃ
kambugrīvamudārakaustubhadharaṃ karṇāvataṃsotpalam |
kastūrītilakojjvalaṃ smitamukhaṃ cinmudrayālaṅkṛtaṃ
sītālakṣmaṇavāyuputrasahitaṃ siṃhāsanasthaṃ bhaje || 52
sākete navaratnapaṅktikhacite citradhvajālaṅkṛte
vāse svarṇamaye dalāṣṭalalite padme vimānottame |
āsīnaṃ bharatādisodarajanaiḥ śākhāmṛgaiḥ kinnaraiḥ
dikpālairmunipuṅgavairnṛpagaṇaissaṃsevyamānaṃ bhaje || 53
kastūrīghanasārakuṅkumalasacchrīcandanālaṅkṛtaṃ
kandarpādhikasundaraṃ ghananibhaṃ kākutsthavaṃśadhvajam |
kalyāṇāmbharaveṣṭitaṃ kamalayā yuktaṃ kalāvallabhaṃ
kalyāṇācalakārmukapriyasakhaṃ kalyāṇarāmaṃ bhaje || 54
muktermūlaṃ munivarahṛdānandakandaṃ mukundaṃ
kūṭasthākhyaṃ sakalavaradaṃ sarvacaitanyarūpam |
nādātītaṃ kamalanilayaṃ nādanādāntatattvaṃ
nādātītaṃ prakṛtirahitaṃ rāmacandraṃ bhaje'ham || 55
tārākāraṃ nikhilanilayaṃ tattvamasyādilakṣyaṃ
śabdāvācyaṃ triguṇarahitaṃ vyomamaṅguṣṭhamātram |
nirvāṇākhyaṃ saguṇamaguṇavyomarandhrāntarasthaṃ
sauṣumnāntaḥ praṇavasahitaṃ rāmacandraṃ bhaje'ham || 56
nijānandākāraṃ nigamaturagārādhitapadaṃ
parabrahmānandaṃ paramapadagaṃ pāpaharaṇam |
kṛpāpārāvāraṃ paramapuruṣaṃ padmanilayaṃ
bhaje rāmaṃ śyāmaṃ prakṛtirahitaṃ nirguṇamaham || 57
sākete nagare samastamahimādhāre jaganmohane
ratnastambhasahasramaṇṭapamahāsiṃhāsane sāmbuje |
viśvāmitravasiṣṭhagautamaśukavyāsādibhirmaunibhiḥ
dhyeyaṃ lakṣmaṇalokapālasahitaṃ sītāsametaṃ bhaje || 58
rāmaṃ śyāmābhirāmaṃ raviśaśinayanaṃ koṭisūryaprakāśaṃ
divyaṃ divyāstrapāṇiṃ śaramukhaśaradhiṃ cārukoḍaṇḍahastam |
kālaṃ kālāgnirudraṃ ripukuladahanaṃ vighnavicchedadakṣaṃ
bhīmaṃ bhīmāṭṭahāsaṃ sakalabhayaharaṃ rāmacandraṃ bhaje'ham || 59
śrīrāmaṃ bhuvanaikasundaratanuṃ dhārādharaśyāmalaṃ
rājīvāyatalocanaṃ raghuvaraṃ rākendubimbānanam |
kodaṇḍādinijāyudhāśritabhujairbhrāntaṃ videhātmajā-
dhīśaṃ bhaktajanāvanaṃ raghuvaraṃ śrīrāmacandraṃ bhaje || 60
śrīvatsāṅkamudārakaustubhalasatpītāmbarālaṅkṛtaṃ
nānāratnavirājamānamakuṭaṃ nīlāmbudaśyāmalam |
kastūrīghanasāracarcitatanuṃ mandāramālādharaṃ
kandarpāyutasundaraṃ raghupatiṃ sītāsametaṃ bhaje || 61
sadānandadeve sahasrārapadme
galaccandrapīyūṣadhārāmṛtānte |
sthitaṃ rāmamūrtiṃ niṣeve niṣeve-
'nyadaivaṃ na seve na seve na seve || 62
sudhābhāsitadvīpamadhye vimāne
suparvālivṛkṣojjvale śeṣatalpe |
niṣaṇṇaṃ ramāṅkaṃ niṣeve niṣeve-
'nyadaivaṃ na seve na seve na seve || 63
cidaṃśaṃ samānandamānandakandaṃ
suṣumnākhyarandhrāntarāle ca haṃsam |
sacakraṃ saśaṅkhaṃ sapītāmbarāṅkaṃ
parañcānyadaivaṃ na jāne na jāne || 64
caturvedakūṭollasatkāraṇākhyaṃ
sphuraddivyavaimānike bhogitalpe |
parandhāmamūrtiṃ niṣaṇṇaṃ niṣeve
niṣeve'nyadaivaṃ na seve na seve || 65
siṃhāsanasthaṃ surasevitavyaṃ
ratnāṅkitālaṅkṛtapādapadmam |
sītāsametaṃ śaśisūryanetraṃ
rāmaṃ bhaje rāghava rāmacandram || 66
rāmaṃ purāṇapuruṣaṃ ramaṇīyaveṣaṃ
rājādhirājamakuṭārcitapādapīṭham |
sītāpatiṃ sunayanaṃ jagadekavīraṃ
śrīrāmacandramaniśaṃ kalayāmi citte || 67
parānandavastusvarūpādisākṣiṃ
parabrahmagamyaṃ parañjyotimūrtim |
parāśaktimitrā'priyārādhitāṅghriṃ
parandhāmarūpaṃ bhaje rāmacandram || 68
mandasmitaṃ kuṇḍalagaṇḍabhāgaṃ
pītāmbaraṃ bhūṣaṇabhūṣitāṅgam |
nīlotpalāṅgaṃ bhuvanaikamitraṃ
rāmaṃ bhaje rāghava rāmacandram || 69
acintyamavyaktamanantarūpa-
madvaitamānandamanādigamyam |
puṇyasvarūpaṃ puruṣottamākhyaṃ
rāmaṃ bhaje rāghava rāmacandram || 70
padmāsanasthaṃ surasevitavyaṃ
padmālayānandakaṭākṣavīkṣyam |
gandharvavidyādharagīyamānaṃ
rāmaṃ bhaje rāghava rāmacandram || 71
anantakīrtiṃ varadaṃ prasannaṃ
padmāsanaṃ sevakapārijātam |
rājādhirājaṃ raghuvīraketuṃ
rāmaṃ bhaje rāghava rāmacandram || 72
sugrīvamitraṃ sujanānurūpaṃ
laṅkāharaṃ rākṣasavaṃśanāśam |
vedāśrayāṅgaṃ vipulāyatākṣaṃ
rāmaṃ bhaje rāghava rāmacandram || 73
sakṛtpraṇatarakṣāyāṃ sākṣī yasya vibhīṣaṇaḥ |
sāparādhapratīkāraḥ sa śrīrāmo gatirmama || 74
phalamūlāśinau dāntau tāpasau dharmacāriṇau |
rakṣaḥkulavihantārau bhrātarau rāmalakṣmaṇau || 75
taruṇau rūpasampannau sukumārau mahābalau |
puṇḍarīka viśālākṣau cīrakṛṣṇājināmbarau || 76
kausalyānayanenduṃ daśarathamukhāravindamārtāṇḍam |
sītāmānasahaṃsaṃ rāmaṃ rājīvalocanaṃ vande || 77
bharjanaṃ bhavabījānāṃ mārjanaṃ sukhasampadām |
tarjanaṃ yamadūtānāṃ rāmarāmeti kīrtanam || 78
na jāne jānakī jāne rāma tvannāmavaibhavam |
sarveśo bhagavān śambhurvālmīkirvetti vā navā || 79
karataladhṛtacāpaṃ kālameghasvarūpaṃ
sarasijadalanetraṃ cāruhāsaṃ sugātram |
vicinutavanavāsaṃ vikramodagraveṣaṃ
praṇamata raghunāthaṃ jānakīprāṇanātham || 80
vidyutsphuranmakarakuṇḍaladīptacāru-
gaṇḍasthalaṃ maṇikirīṭavirājamānam |
pītāmbaraṃ jaladanīlamudārakāntiṃ
śrīrāmacandramaniśaṃ kalayāmi citte || 81
ratnollasajjvalitakuṇḍalagaṇḍabhāgaṃ
kastūrikātilakaśobhitaphālabhāgam |
karṇāntadīrghanayanaṃ karuṇākaṭākṣaṃ
śrīrāmacandra mukhamātmani sannidhattam || 82
vaidehīsahitaṃ ca lakṣmaṇayutaṃ kaikeyiputrānvitaṃ
sugrīvaṃ ca vibhīṣaṇānilasutau nīlaṃ nalaṃ sāṅgadam |
viśvāmitravasiṣṭhagautamabharadvājādikān mānayan
rāmo mārutisevitaḥ smaratu māṃ sāmrājyasiṃhāsane || 83
sakalaguṇanidhānaṃ yogibhisstūyamānaṃ
bhajitasuravimānaṃ rakṣitendrādimānam |
mahitavṛṣabhayānaṃ sītayā śobhamānaṃ
smaratu hṛdayabhānuṃ brahmarāmābhirāmam || 84
tridaśakumudacandro dānavāmbhojacandro
duritatimiracandro yogināṃ jñānacandraḥ |
praṇatanayanacandro maithilīnetracandro
daśamukharipucandraḥ pātu māṃ rāmacandraḥ || 85
yannāmaiva sahasranāmasadṛśaṃ yannāma vedaissamaṃ
yannāmāṅkitavākya-māsurabalastrīgarbhavicchedanam |
yannāma śvapacāryabhedarahitaṃ muktipradānojjvalaṃ
tannāmā'laghurāmarāmaramaṇaṃ śrīrāmanāmāmṛtam || 86
rājīvanetra raghupuṅgava rāmabhadra
rākendubimbasadṛśānana nīlagātra |
rāmā'bhirāma raghuvaṃśasamudbhava tvaṃ
śrīrāmacandra mama dehi karāvalambam || 87
māṇikyamañjīrapadāravindaṃ
rāmārkasamphullamukhāravindam |
bhaktābhayaprāpikarāravindāṃ
devīṃ bhaje rāghavavallabhāṃ tām || 88
jayatu vijayakārī jānakīmodakārī
tapanakulavihārī daṇḍakāraṇyacārī |
daśavadanakuṭhārī daityavicchedakārī
maṇimakuṭakadhārī caṇḍakodaṇḍadhārī || 89
rāmaḥ pitā raghava eva mātā
rāmassubandhuśca sakhā hitaśca |
rāmo gururme paramaṃ ca daivaṃ
rāmaṃ vinā nā'nyamahaṃ smarāmi || 90
śrīrāma me tvaṃ hi pitā ca mātā
śrīrāma me tvaṃ hi suhṛcca bandhuḥ |
śrīrāma me tvaṃ hi guruśca goṣṭhī
śrīrāma me tvaṃ hi samastameva || 91
rāmacandracaritāmṛtapānaṃ
somapānaśatakoṭisamānam |
somapānaśatakoṭibhirīyā-
jjanma naiti raghunāyakanāmnā || 92
rāma rāma dayāsindho rāvaṇāre jagatpate |
tvatpādakamalāsakti-rbhavejjanmani janmani || 93
śrīrāmacandreti dayāpareti
bhaktapriyeti bhavabandhanamocaneti |
nātheti nāgaśayaneti sadā stuvantaṃ
māṃ pāhi bhītamaniśaṃ kṛpaṇaṃ kṛpālo || 94
ayodhyānātha rājendra sītākānta jagatpate |
śrīrāma puṇḍarīkākṣa rāmacandra namo'stu te || 95
he rāma he ramaṇa he jagadekavīra
he nātha he raghupate karuṇālavāla |
he jānakīramaṇa he jagadekabandho
māṃ pāhi dīnamaniśaṃ kṛpaṇaṃ kṛtaghnam || 96
jānāti rāma tava tattvagatiṃ hanūmān |
jānāti rāma tava sakhyagatiṃ kapīśaḥ |
jānāti rāma tava yuddhagatiṃ daśāsyo |
jānāti rāma dhanadānuja eva satyam || 97
sevyaṃ śrīrāmamantraṃ śravaṇaśubhakaraṃ śreṣṭhasujñānimantraṃ
stavyaṃ śrīrāmamantraṃ narakaduritadurvāranirghātamantram |
bhavyaṃ śrīrāmamantraṃ bhajatu bhajatu saṃsāranistāramantraṃ
divyaṃ śrīrāmamantraṃ divi bhuvi vilasanmokṣarakṣaikamantram || 98
nikhilanilayamantraṃ nityatattvākhyamantraṃ
bhavakulaharamantraṃ bhūmijāprāṇamantram |
pavanajanutamantraṃ pārvatīmokṣamantraṃ
paśupatinijamantraṃ pātu māṃ rāmamantram || 99
praṇavanilayamantraṃ prāṇanirvāṇamantraṃ
prakṛtipuruṣamantraṃ brahmarudrendramantram |
prakaṭaduritarāgadveṣanirṇāśamantraṃ
raghupatinijamantraṃ rāmarāmetimantram || 100
daśarathasutamantraṃ daityasaṃhāramantraṃ
vibudhavinutamantraṃ viśvavikhyātamantram |
munigaṇanutamantraṃ muktimārgaikamantraṃ
raghupatinijamantraṃ rāmarāmetimantram || 101
saṃsārasāgarabhayāpahaviśvamantraṃ
sākṣānmumukṣujanasevitasiddhamantram |
sāraṅgahastamukhahastanivāsamantraṃ
kaivalyamantramaniśaṃ bhaja rāmamantram || 102
jayatu jayatu mantraṃ janmasāphalyamantraṃ
jananamaraṇabhedakleśavicchedamantram |
sakalanigamamantraṃ sarvaśāstraikamantraṃ
raghupatinijamantraṃ rāmarāmetimantram || 103
jagati viśadamantraṃ jānakīprāṇamantraṃ
vibudhavinutamantraṃ viśvavikhyātamantram |
daśarathasutamantraṃ daityasaṃhāramantraṃ
raghupatinijamantraṃ rāmarāmetimantram || 104
brahmādiyogimunipūjitasiddhamantraṃ
dāridryaduḥkhabhavarogavināśamantram |
saṃsārasāgarasamuttaraṇaikamantraṃ
vande mahābhayaharaṃ raghurāmamantram || 105
śatrucchedaikamantraṃ sarasamupaniṣadvākyasampūjyamantraṃ
saṃsārottāramantraṃ samucitasamaye saṅganiryāṇamantram |
sarvaiśvaryaikamantraṃ vyasanabhujagasandaṣṭasantrāṇamantraṃ
jihve śrīrāmamantraṃ japa japa saphalaṃ janmasāphalyamantram || 106
nityaṃ śrīrāmamantraṃ nirupamamadhikaṃ nītisujñānamantraṃ
satyaṃ śrīrāmamantraṃ sadamalahṛdaye sarvadārogyamantram |
stutyaṃ śrīrāmamantraṃ sulalitasumanassaukhyasaubhāgyamantraṃ
paṭhyaṃ śrīrāmamantraṃ pavanajavaradaṃ pātu māṃ rāmamantram || 107
vyāmohapraśamauṣadhaṃ munimanovṛttipravṛttyauṣadhaṃ
daityonmūlakarauṣadhaṃ bhavabhayapradhvaṃsanaikauṣadham |
bhaktānandakarauṣadhaṃ tribhuvane sañjīvanaikauṣadhaṃ
śreyaḥ prāptikarauṣadhaṃ piba manaḥ śrīrāmanāmauṣadham || 108
sakalabhuvanaratnaṃ sarvaśāstrārtharatnaṃ
samaravijayaratnaṃ saccidānandaratnam |
daśamukhahararatnaṃ dānavārātiratnaṃ
raghukulanṛparatnaṃ pātu māṃ rāmaratnam || 109
sakalabhuvanaratnaṃ saccidānandaratnaṃ
sakalahṛdayaratnaṃ sūryabimbāntaratnam |
vimalasukṛtaratnaṃ vedavedāntaratnaṃ
puraharajaparatnaṃ pātu māṃ rāmaratnam || 110
nigamaśikhararatnaṃ nirmalānandaratnaṃ
nirupamaguṇaratnaṃ nādanādāntaratnam |
daśarathakularatnaṃ dvādaśāntasstharatnaṃ
paśupatijaparatnaṃ pātu māṃ rāmaratnam || 111
śatamakhasutaratnaṃ ṣoḍaśāntasstharatnaṃ
munijanajaparatnaṃ mukhyavaikuṇṭharatnam |
nirupamaguṇaratnaṃ nīrajāntasstharatnaṃ
paramapadaviratnaṃ pātu māṃ rāmaratnam || 112
sakalasukṛtaratnaṃ satyavākyārtharatnaṃ
śamadamaguṇaratnaṃ śāśvatānandaratnam |
praṇayanilayaratnaṃ prasphuṭadyotiratnaṃ
paramapadaviratnaṃ pātu māṃ rāmaratnam || 113
nigamaśikhararatnaṃ nityamāśāsyaratnaṃ
jananutanṛparatnaṃ jānakīrūparatnam |
bhuvanavalayaratnaṃ bhūbhujāmekaratnaṃ
raghukulavararatnaṃ pātu māṃ rāmaratnam || 114
viśālanetraṃ paripūrṇagātraṃ
sītākalatraṃ suravairijaitram |
kāruṇyapātraṃ jagataḥ pavitraṃ
śrīrāmaratnaṃ praṇato'smi nityam || 115
he gopālaka he dayājalanidhe he sadguṇāmbhonidhe
he daityāntaka he vibhīṣaṇadayāparīṇa he bhūpate |
he vaidehasutāmanojavihṛte he koṭimārākṛte
he navyāmbujanetra pālaya paraṃ jānāmi na tvāṃ vinā || 116
yasya kiñcidapi no haraṇīyaṃ
karma kiñcidapi no caraṇīyam |
rāmanāma ca sadā smaraṇīyaṃ
līlayā bhavajalaṃ taraṇīyam || 117
daśarathasutamīśaṃ daṇḍakāraṇyavāsaṃ
śatamakhamaṇinīlaṃ jānakīprāṇalolam |
sakalabhuvanamohaṃ sannutāmbhodadehaṃ
bahulanutasamudraṃ bhāvaye rāmabhadram || 118
viśālanetraṃ paripūrṇagātraṃ
sītākalatraṃ suravairijaitram |
jagatpavitraṃ paramātmatantraṃ
śrīrāmacandraṃ praṇamāmi citte || 119
jaya jaya raghurāma śrīmukhāmbhojabhāno
jaya jaya raghuvīra śrīmadambhojanetra |
jaya jaya raghunātha śrīkarābhyarcitāṅghri
jaya jaya raghuvarya śrīśa kāruṇyasindho || 120
mandāramūle maṇipīṭhasaṃsthaṃ
sudhāplutaṃ divyavirāṭsvarūpam |
sabindunādāntakalāntaturya-
mūrtiṃ bhaje'haṃ raghuvaṃśaratnam || 121
nādaṃ nādavinīlacittapavanaṃ nādāntattvapriyaṃ
nāmākāravivarjitaṃ navaghanaśyāmāṅganādapriyam |
nādāmbhojamarandamattavilasadbhṛṅgaṃ madāntassthitaṃ
nādāntadhṛvamaṇḍalābjaruciraṃ rāmaṃ bhaje tārakam || 122
nānābhūtahṛdabjapadmanilayaṃ nāmojjvalābhūṣaṇam |
nāmastotrapavitritatribhuvanaṃ nārāyaṇāṣṭākṣaram |
nādāntendugalatsudhāplutatanuṃ nānātmacinmātrakam |
nānākoṭiyugāntabhānusadṛśaṃ rāmaṃ bhaje tārakam || 123
vedyaṃ vedaguruṃ viriñcijanakaṃ vedāntamūrtiṃ sphura-
dvedaṃ vedakalāpamūlamahimādhārāntakandāṅkuram |
vedaśṛṅgasamānaśeṣaśayanaṃ vedāntavedyātmakaṃ
vedārādhitapādapaṅkajamahaṃ rāmaṃ bhaje tārakam || 124
majjīvaṃ madanugrahaṃ madadhipaṃ madbhāvanaṃ matsukhaṃ
mattātaṃ mama sadguruṃ mama varaṃ mohāndhavicchedanam |
matpuṇyaṃ madanekabāndhavajanaṃ majjīvanaṃ mannidhiṃ
matsiddhiṃ mama sarvakarmasukṛtaṃ rāmaṃ bhaje tārakam || 125
nityaṃ nīrajalocanaṃ nirupamaṃ nīvāraśūkopamaṃ
nirbhedānubhavaṃ nirantaraguṇaṃ nīlāṅgarāgojjvalam |
niṣpāpaṃ nigamāgamārcitapadaṃ nityātmakaṃ nirmalaṃ
niṣpuṇyaṃ nikhilaṃ nirañjanapadaṃ rāmaṃ bhaje tārakam || 126
dhyāye tvāṃ hṛdayāmbuje raghupatiṃ vijñānadīpāṅkuraṃ
haṃsohaṃsaparamparādimahimādhāraṃ jaganmohanam |
hastāmbhojagadābjacakramatulaṃ pītāmbaraṃ kaustubhaṃ
śrīvatsaṃ puruṣottamaṃ maṇinibhaṃ rāmaṃ bhaje tārakam || 127
satyajñānamanantamacyutamajaṃ cāvyākṛtaṃ tatparaṃ
kūṭasthādisamastasākṣimanaghaṃ sākṣādvirāṭtattvadam |
vedyaṃ viśvamayaṃ svalīnabhuvanasvārājyasaukhyapradaṃ
pūrṇaṃ pūrṇataraṃ purāṇapuruṣaṃ rāmaṃ bhaje tārakam || 128
rāmaṃ rākṣasavaṃśanāśanakaraṃ rākendubimbānanaṃ
rakṣoriṃ raghuvaṃśavardhanakaraṃ raktādharaṃ rāghavam |
rādhāyātmanivāsinaṃ ravinibhaṃ ramyaṃ ramānāyakaṃ
randhrāntargataśeṣaśāyinamahaṃ rāmaṃ bhaje tārakam || 129
otaprotasamastavastunicayaṃ oṅkārabījākṣaraṃ
oṅkāraprakṛtiṃ ṣaḍakṣarahitaṃ oṅkārakandāṅkuram |
oṅkārasphuṭabhūrbhuvassuparitaṃ oghatrayārādhitam
oṅkārojjvalasiṃhapīṭhanilayaṃ rāmaṃ bhaje tārakam || 130
sākete nagare samastasukhade harmye'bjakoṭidyute
nakṣatragrahapaṅktilagnaśikhare cāntaryapaṅkeruhe |
vālmīkātriparāśarādimunibhissaṃsevyamānaṃ sthitaṃ
sītālaṅkṛtavāmabhāgamaniśaṃ rāmaṃ bhaje tārakam || 131
vaikuṇṭhe nagare suradrumatale cānandavaprāntare
nānāratnavinirmitasphuṭapaṭuprākārasaṃveṣṭite |
saudhendūpalaśeṣatalpalalite nīlotpalacchādite
paryaṅke śayanaṃ ramādisahitaṃ rāmaṃ bhaje tārakam || 132
vande rāmamanādipūruṣamajaṃ vande ramānāyakaṃ
vande hārikirīṭakuṇḍaladharaṃ vande sunīladyutim |
vande cāpakalambakojjvalakaraṃ vande jaganmaṅgalaṃ
vande paṅktirathātmajaṃ mama guruṃ vande sadā rāghavam || 133
vande śaunakagautamādyabhinutaṃ vande ghanaśyāmalaṃ
vande tārakapīṭhamadhyanilayaṃ vande jagannāyakam |
vande bhaktajanaughadevivaṭapaṃ vande dhanurvallabhaṃ
vande tattvamasītivākyajanakaṃ vande sadā rāghavam || 134
vande sūryaśaśāṅkalocanayugaṃ vande jagatpāvanaṃ
vande patrasahasrapadmanilayaṃ vande purāripriyam |
vande rākṣasavaṃśanāśanakaraṃ vande sudhāśītalaṃ
vande devakapīndrakoṭivinutaṃ vande sadā rāghavam || 135
vande sāgaragarvabhaṅgaviśikhaṃ vande jagajjīvanaṃ
vande kauśikayāgarakṣaṇakaraṃ vande guruṇāṃ gurum |
vande bāṇaśarāsanojjvalakaraṃ vande jaṭāvalkalaṃ
vande lakṣmaṇabhūmijānvitamahaṃ vande sadā rāghavam || 136
vande pāṇḍarapuṇḍarīkanayanaṃ vande'bjabimbānanaṃ
vande kambugalaṃ karābjayugalaṃ vande lalāṭojjvalam |
vande pītadukūlamambudanibhaṃ vande jaganmohanaṃ
vande kāraṇamānuṣojjvalatanuṃ vande sadā rāghavam || 137
vande nīlasarojakomalaruciṃ vande jagadvanditaṃ
vande sūryakulābdhikaustubhamaṇiṃ vande surārādhitam |
vande pātakapañcakapraharaṇaṃ vande jagatkāraṇaṃ
vande viṃśatipañcatattvarahitaṃ vande sadā rāghavam || 138
vande sādhakavargakalpakataruṃ vande trimūrtyātmakaṃ
vande nādalayāntarasthalagataṃ vande trivargātmakam |
vande rāgavihīnacittasulabhaṃ vande sabhānāyakaṃ
vande pūrṇadayāmṛtārṇavamahaṃ vande sadā rāghavam || 139
vande sāttvikatattvamudritatanuṃ vande sudhādāyakaṃ
vande cārucaturbhujaṃ maṇinibhaṃ vande ṣaḍabjasthitam |
vande brahmapipīlikādinilayaṃ vande virāṭvigrahaṃ
vande pannagatalpaśāyinamahaṃ vande sadā rāghavam || 140
siṃhāsanasthaṃ munisiddhasevyaṃ
raktotpalālaṅkṛtapādapadmam |
sītāsametaṃ śaśisūryanetraṃ
rāmaṃ bhaje rāghavarāmacandram || 141
śrīrāmabhadrāśritasadgurūṇāṃ
pādāravindaṃ bhajatāṃ narāṇām |
ārogyamaiśvaryamanantakīrti-
rante ca viṣṇoḥ padamasti satyam || 142
daśarathavaraputraṃ jānakīsatkalatraṃ
daśamukhaharadakṣaṃ padmapatrāyatākṣam |
karadhṛtaśaracāpaṃ cārumuktākalāpaṃ
raghukulanṛvareṇyaṃ rāmamīḍe śaraṇyam || 143
daśamukhagajasiṃhaṃ daityagarvātiraṃhaṃ
kadanabhayadahastaṃ tārakabrahma śastam |
maṇikhacitakirīṭaṃ mañjulālāpavāṭaṃ
daśarathakulacandraṃ rāmacandraṃ bhaje'ham || 144
rāmaṃ raktasaroruhākṣamamalaṃ laṅkādhināthāntakaṃ
kausalyānayanotsukaṃ raghuvaraṃ nāgendratalpasthitam |
vaidehīkucakumbhakuṅkumarajolaṅkārahāraṃ hariṃ
māyāmānuṣavigrahaṃ raghupatiṃ sītāsametaṃ bhaje || 145
rāmaṃ rākṣasamardanaṃ raghuvaraṃ daiteyabhidhvaṃsinaṃ
sugrīvepsitarājyadaṃ surapaterbhītyantakaṃ śārṅgiṇam |
bhaktānāmabhayapradaṃ bhayaharaṃ pāpaughavidhvaṃsinaṃ
sāmīristutapādapadmayugalaṃ sītāsametaṃ bhaje || 146
yatpādāmbujareṇunā munisatī muktiṅgatā yanmahaḥ
puṇyaṃ pātakanāśanaṃ trijagatāṃ bhāti smṛtaṃ pāvanam |
smṛtvā rāghavamaprameyamamalaṃ pūrṇendumandasmitaṃ
taṃ rāmaṃ sarasīruhākṣamamalaṃ sītāsametaṃ bhaje || 147
vaidehīkucamaṇḍalāgra-vilasanmāṇikyahastāmbujaṃ
cañcatkaṅkaṇahāranūpura-lasatkeyūrahārānvitam |
divyaśrīmaṇikuṇḍalojjvala-mahābhūṣāsahasrānvitaṃ
vīraśrīraghupuṅgavaṃ guṇanidhiṃ sītāsametaṃ bhaje || 148
vaidehīkucamaṇḍalopari-lasanmāṇikyahārāvalī-
madhyasthaṃ navanītakomalaruciṃ nīlotpalaśyāmalam |
kandarpāyutakoṭisundaratanuṃ pūrṇendubimbānanaṃ
kausalyākulabhūṣaṇaṃ raghupatiṃ sītāsametaṃ bhaje || 149
divyāraṇyayatīndranāmanagare madhye mahāmaṇṭape
svarṇastambhasahasraṣoḍaśayute mandāramūlāśrite |
nānāratnavicitranirmalamahāsiṃhāsane saṃsthitaṃ
sītālakṣmaṇasevitaṃ raghupatiṃ sītāsametaṃ bhaje || 150
kastūrītilakaṃ kapīndraharaṇaṃ kāruṇyavārānnidhiṃ
kṣīrāmbhodhisutāmukhābjamadhupaṃ kalyāṇasampannidhim |
kausalyānayanotsukaṃ kapivaratrāṇaṃ mahāpauruṣaṃ
kaumārapriyamarkakoṭisadṛśaṃ sītāsametaṃ bhaje || 151
vidyutkoṭidivākaradyutinibhaṃ śrīkaustubhālaṅkṛtaṃ
yogīndraissanakādibhiḥ parivṛtaṃ kailāsanāthapriyam |
muktāratnakirīṭakuṇḍaladharaṃ graiveyahārānvitaṃ
vaidehīkucasannivāsamaniśaṃ sītāsametaṃ bhaje || 152
meghaśyāmalamambujātanayanaṃ vistīrṇavakṣassthalaṃ
bāhudvandvavirājitaṃ suvadanaṃ śoṇāṅghripaṅkeruham |
nānāratnavicitrabhūṣaṇayutaṃ kodaṇḍabāṇāṅkitaṃ
trailokyā'pratimānasundaratanuṃ sītāsametaṃ bhaje || 153
vaidehīyutavāmabhāgamatulaṃ vandārumandārakaṃ
vande prastutakīrtivāsitatarucchāyānukāriprabham |
vaidehīkucakuṅkumāṅkitamahoraskaṃ mahābhūṣaṇaṃ
vedāntairupagīyamānamasakṛtsītāsametaṃ bhaje || 154
devānāṃ hitakāraṇena bhuvane dhṛtvā'vatāraṃ dhruvaṃ
rāmaṃ kauśikayajñavighnadalanaṃ tattāṭakāsaṃharam |
nityaṃ gautamapatniśāpadalanaśrīpādareṇuṃ śubhaṃ
śambhorutkaṭacāpakhaṇḍanamahāsatvaṃ bhaje rāghavam || 155
śrīrāmaṃ navaratnakuṇḍaladharaṃ śrīrāmarakṣāmaṇiṃ
śrīrāmaṃ ca sahasrabhānusadṛśaṃ śrīrāmacandrodayam |
śrīrāmaṃ śrutakīrtimākaramahaṃ śrīrāmamuktipradaṃ
śrīrāmaṃ raghunandanaṃ bhayaharaṃ śrīrāmacandraṃ bhaje || 156
rāmamindīvaraśyāmaṃ rājīvāyatalocanam |
jyāghoṣanirjitārātiṃ jānakīramaṇaṃ bhaje || 157
dīrghabāhumaravindalocanaṃ
dīnavatsalamanātharakṣakam |
dīkṣitaṃ sakalalokarakṣaṇe
daivataṃ daśarathātmajaṃ bhaje || 158
prātassmarāmi raghunāthamukhāravindaṃ
mandasmitaṃ madhurabhāṣi viśālaphālam |
karṇāvalambicalakuṇḍalagaṇḍabhāgaṃ
karṇāntadīrghanayanaṃ nayanābhirāmam || 159
prātarbhajāmi raghunāthakarāravindaṃ
rakṣogaṇāya bhayadaṃ varadaṃ nijebhyaḥ |
yadrājasaṃsadi vibhidya maheśacāpaṃ
sītākaragrahaṇamaṅgalamāpa sadyaḥ || 160
prātarnamāmi raghunāthapadāravindaṃ
padmāṅkuśādiśubharekhaśubhāvahaṃ ca |
yogīndramānasamadhuvratasevyamānaṃ
śāpāpahaṃ sapadi gautamadharmapatnyāḥ || 161
prātarvadāmi vacasā raghunāthanāma
vāgdoṣahāri sakalaṃ kaluṣaṃ nihantṛ |
yatpārvatī svapatinā saha bhoktukāmā
prītyā sahasraharināmasamaṃ jajāpa || 162
prātaḥ śraye śrutinutaṃ raghunāthamūrtiṃ
nīlāmbudotpalasitetararatnanīlām |
āmuktamauktikaviśeṣavibhūṣaṇāḍhyāṃ
dhyeyāṃ samastamunibhirnijabhṛtyamukhyaiḥ || 163
raghukulavaranātho jānakīprāṇanāthaḥ
pitṛvacanavidhātā kīśarājyapradātā |
pratiniśicaranāśaḥ prāptarājyapraveśo
vihitabhuvanarakṣaḥ pātu padmāyatākṣaḥ || 164
kuvalayadalanīlaḥ pītavāsāḥ smitāsyo
vividharucirabhūṣābhūṣito divyamūrtiḥ |
daśarathakulanātho jānakīprāṇanātho
nivasatu mama citte sarvadā rāmacandraḥ || 165
jayatu jayatu rāmo jānakīvallabho'yaṃ
jayatu jayatu rāmaścandracūḍārcitāṅghriḥ |
jayatu jayatu vāṇīnāthanāthaḥ parātmā
jayatu jayatu rāmo'nāthanāthaḥ kṛpāluḥ || 166
vadatu vadatu vāṇī rāmarāmeti nityaṃ
jayatu jayatu cittaṃ rāmapādāravindam |
namatu namatu dehaṃ santataṃ rāmacandraṃ
na bhavatu mama pāpaṃ janmajanmāntareṣu || 167
ānandarūpaṃ varadaṃ prasannaṃ
siṃhekṣaṇaṃ sevakapārijātam |
nīlotpalāṅgaṃ bhuvanaikamitraṃ
rāmaṃ bhaje rāghavarāmacandram || 168
laṅkāvirāmaṃ raṇaraṅgabhīmaṃ
rājīvanetraṃ raghuvaṃśamitram |
kāruṇyamūrtiṃ karuṇāprapūrtiṃ
śrīrāmacandraṃ śaraṇaṃ prapadye || 169
sugrīvamitraṃ paramaṃ pavitraṃ
sītākalatraṃ navahemasūtram |
kāruṇyapātraṃ śatapatranetraṃ
śrīrāmacandraṃ śirasā namāmi || 170
śrīrāghaveti ramaṇeti raghūdvaheti
rāmeti rāvaṇahareti ramādhaveti |
sāketanāthasumukheti ca suvrateti
vāṇī sadā vadatu rāma hare hareti || 171
śrīrāmanāmāmṛtamantrabījaṃ
sañjīvanaṃ cenmanasi pratiṣṭham |
hālāhalaṃ vā pralayānalaṃ vā
mṛtyormukhaṃ vā vitathīkaroti || 172
kiṃ yogaśāstraiḥ kimaśeṣavidyā
kiṃ yāgagaṅgādiviśeṣatīrthaiḥ |
kiṃ brahmacaryāśramasañcareṇa
bhaktirnacette raghuvaṃśakīrtyām || 173
idaṃ śarīraṃ ślathasandhijarjharaṃ
patatyavaśyaṃ pariṇāmapeśalam |
kimauṣathaṃ pṛcchasi mūḍha durmate
nirāmayaṃ rāmakathāmṛtaṃ piba || 174
he rāmabhadrāśraya he kṛpālo
he bhaktalokaikaśaraṇyamūrte |
punīhi māṃ tvaccaraṇāravindaṃ
jagatpavitraṃ śaraṇaṃ mamā'stu || 175
nīlābhradeha nikhileśa jagannivāsa
rājīvanetra ramaṇīyaguṇābhirāma |
śrīdāma daityakulamardana rāmacandra
tvatpādapadmamaniśaṃ kalayāmi citte || 176
śrīrāmacandra karuṇākara dīnabandho
sītāsameta bharatāgraja rāghaveśa |
pāpārtibhañjana bhayāturadīnabandho
pāpāmbudhau patitamuddhara māmanātham || 177
indīvaradalaśyāma-mindukoṭinibhānanam |
kandarpakoṭilāvaṇyaṃ vande'haṃ raghunandanam || 175
iti śrībodhendrasarasvatī kṛta śrīrāmakarṇāmṛtam ||
🕉️ This is the original Sanskrit rendered in Oriya script.
Pronunciation is identical to the Sanskrit Devanagari version.