Shiva Padadi Keshanta Varnana Stotram — Oriya Script

କଲ୍ଯାଣଂ ନୋ ଵିଧତ୍ତାଂ କଟକତଟଲସତ୍କଲ୍ପଵାଟୀନିକୁଞ୍ଜ-

-କ୍ରୀଡାସଂସକ୍ତଵିଦ୍ଯାଧରନିକରଵଧୂଗୀତରୁଦ୍ରାପଦାନଃ ।

ତାରୈର୍ହେରମ୍ବନାଦୈସ୍ତରଲିତନିନଦତ୍ତାରକାରାତିକେକୀ

କୈଲାସଃ ଶର୍ଵନିର୍ଵୃତ୍ଯଭିଜନକପଦଃ ସର୍ଵଦା ପର୍ଵତେନ୍ଦ୍ରଃ ॥ 1 ॥

ଯସ୍ଯ ପ୍ରାହୁଃ ସ୍ଵରୂପଂ ସକଲଦିଵିଷଦାଂ ସାରସର୍ଵସ୍ଵଯୋଗଂ

ଯସ୍ଯେଷୁଃ ଶାର୍‍ଙ୍ଗଧନ୍ଵା ସମଜନି ଜଗତାଂ ରକ୍ଷଣେ ଜାଗରୂକଃ ।

ମୌର୍ଵୀ ଦର୍ଵୀକରାଣାମପି ଚ ପରିବୃଢଃ ପୂସ୍ତ୍ରଯୀ ସା ଚ ଲକ୍ଷ୍ଯଂ

ସୋଽଵ୍ଯାଦଵ୍ଯାଜମସ୍ମାନଶିଵଭିଦନିଶଂ ନାକିନାଂ ଶ୍ରୀପିନାକଃ ॥ 2 ॥

ଆତଙ୍କାଵେଗହାରୀ ସକଲଦିଵିଷଦାମଙ୍ଘ୍ରିପଦ୍ମାଶ୍ରଯାଣାଂ

ମାତଙ୍ଗାଦ୍ଯୁଗ୍ରଦୈତ୍ଯପ୍ରକରତନୁଗଲଦ୍ରକ୍ତଧାରାକ୍ତଧାରଃ ।

କ୍ରୂରଃ ସୂରାଯୁତାନାମପି ଚ ପରିଭଵଂ ସ୍ଵୀଯଭାସା ଵିତନ୍ଵ-

-ନ୍ଘୋରାକାରଃ କୁଠାରୋ ଦୃଢତରଦୁରିତାଖ୍ଯାଟଵୀଂ ପାଟଯେନ୍ନଃ ॥ 3 ॥

କାଲାରାତେଃ କରାଗ୍ରେ କୃତଵସତିରୁରଃଶାଣଶାତୋ ରିପୂଣାଂ

କାଲେ କାଲେ କୁଲାଦ୍ରିପ୍ରଵରତନଯଯା କଲ୍ପିତସ୍ନେହଲେପଃ ।

ପାଯାନ୍ନଃ ପାଵକାର୍ଚିଃପ୍ରସରସଖମୁଖଃ ପାପହନ୍ତା ନିତାନ୍ତଂ

ଶୂଲଃ ଶ୍ରୀପାଦସେଵାଭଜନରସଜୁଷାଂ ପାଲନୈକାନ୍ତଶୀଲଃ ॥ 4 ॥

ଦେଵସ୍ଯାଙ୍କାଶ୍ରଯାଯାଃ କୁଲଗିରିଦୁହିତୁର୍ନେତ୍ରକୋଣପ୍ରଚାର-

-ପ୍ରସ୍ତାରାନତ୍ଯୁଦାରାନ୍ପିପଠିଷୁରିଵ ଯୋ ନିତ୍ଯମତ୍ଯାଦରେଣ ।

ଆଧତ୍ତେ ଭଙ୍ଗିତୁଙ୍ଗୈରନିଶମଵଯଵୈରନ୍ତରଙ୍ଗଂ ସମୋଦଂ

ସୋମାପୀଡସ୍ଯ ସୋଽଯଂ ପ୍ରଦିଶତୁ କୁଶଲଂ ପାଣିରଙ୍ଗଃ କୁରଙ୍ଗଃ ॥ 5 ॥

କଣ୍ଠପ୍ରାନ୍ତାଵସଜ୍ଜତ୍କନକମଯମହାଘଣ୍ଟିକାଘୋରଘୋଷୈଃ

କଣ୍ଠାରାଵୈରକୁଣ୍ଠୈରପି ଭରିତଜଗଚ୍ଚକ୍ରଵାଲାନ୍ତରାଲଃ ।

ଚଣ୍ଡଃ ପ୍ରୋଦ୍ଦଣ୍ଡଶୃଙ୍ଗଃ କକୁଦକବଲିତୋତ୍ତୁଙ୍ଗକୈଲାସଶୃଙ୍ଗଃ

କଣ୍ଠେକାଲସ୍ଯ ଵାହଃ ଶମଯତୁ ଶମଲଂ ଶାଶ୍ଵତଃ ଶାକ୍ଵରେନ୍ଦ୍ରଃ ॥ 6 ॥

ନିର୍ଯଦ୍ଦାନାମ୍ବୁଧାରାପରିମଲତରଲୀଭୂତରୋଲମ୍ବପାଲୀ-

-ଝଙ୍କାରୈଃ ଶଙ୍କରାଦ୍ରେଃ ଶିଖରଶତଦରୀଃ ପୂରଯନ୍ଭୂରିଘୋଷୈଃ ।

ଶାର୍ଵଃ ସୌଵର୍ଣଶୈଲପ୍ରତିମପୃଥୁଵପୁଃ ସର୍ଵଵିଘ୍ନାପହର୍ତା

ଶର୍ଵାଣ୍ଯାଃ ପୂର୍ଵସୂନୁଃ ସ ଭଵତୁ ଭଵତାଂ ସ୍ଵସ୍ତିଦୋ ହସ୍ତିଵକ୍ତ୍ରଃ ॥ 7 ॥

ଯଃ ପୁଣ୍ଯୈର୍ଦେଵତାନାଂ ସମଜନି ଶିଵଯୋଃ ଶ୍ଲାଘ୍ଯଵୀର୍ଯୈକମତ୍ଯା-

-ଦ୍ଯନ୍ନାମ୍ନି ଶ୍ରୂଯମାଣେ ଦିତିଜଭଟଘଟା ଭୀତିଭାରଂ ଭଜନ୍ତେ ।

ଭୂଯାତ୍ସୋଽଯଂ ଵିଭୂତ୍ଯୈ ନିଶିତଶରଶିଖାପାଟିତକ୍ରୌଞ୍ଚଶୈଲଃ

ସଂସାରାଗାଧକୂପୋଦରପତିତସମୁତ୍ତାରକସ୍ତାରକାରିଃ ॥ 8 ॥

ଆରୂଢଃ ପ୍ରୌଢଵେଗପ୍ରଵିଜିତପଵନଂ ତୁଙ୍ଗତୁଙ୍ଗଂ ତୁରଙ୍ଗଂ

ଚେଲଂ ନୀଲଂ ଵସାନଃ କରତଲଵିଲସତ୍କାଣ୍ଡକୋଦଣ୍ଡଦଣ୍ଡଃ ।

ରାଗଦ୍ଵେଷାଦିନାନାଵିଧମୃଗପଟଲୀଭୀତିକୃଦ୍ଭୂତଭର୍ତା

କୁର୍ଵନ୍ନାଖେଟଲୀଲାଂ ପରିଲସତୁ ମନଃକାନନେ ମାମକୀନେ ॥ 9 ॥

ଅମ୍ଭୋଜାଭ୍ଯାଂ ଚ ରମ୍ଭାରଥଚରଣଲତାଦ୍ଵନ୍ଦ୍ଵକୁମ୍ଭୀନ୍ଦ୍ରକୁମ୍ଭୈ-

-ର୍ବିମ୍ବେନେନ୍ଦୋଶ୍ଚ କମ୍ବୋରୁପରି ଵିଲସତା ଵିଦ୍ରୁମେଣୋତ୍ପଲାଭ୍ଯାମ୍ ।

ଅମ୍ଭୋଦେନାପି ସମ୍ଭାଵିତମୁପଜନିତାଡମ୍ବରଂ ଶମ୍ବରାରେଃ

ଶମ୍ଭୋଃ ସମ୍ଭୋଗଯୋଗ୍ଯଂ କିମପି ଧନମିଦଂ ସମ୍ଭଵେତ୍ସମ୍ପଦେ ନଃ ॥ 10 ॥

ଵେଣୀସୌଭାଗ୍ଯଵିସ୍ମାପିତତପନସୁତାଚାରୁଵେଣୀଵିଲାସା-

-ନ୍ଵାଣୀନିର୍ଧୂତଵାଣୀକରତଲଵିଧୃତୋଦାରଵୀଣାଵିରାଵାନ୍ ।

ଏଣୀନେତ୍ରାନ୍ତଭଙ୍ଗୀନିରସନନିପୁଣାପାଙ୍ଗକୋଣାନୁପାସେ

ଶୋଣାନ୍ପ୍ରାଣାନୁଦୂଢପ୍ରତିନଵସୁଷମାକନ୍ଦଲାନିନ୍ଦୁମୌଲେଃ ॥ 11 ॥

ନୃତ୍ତାରମ୍ଭେଷୁ ହସ୍ତାହତମୁରଜଧିମିଦ୍ଧିଙ୍କୃତୈରତ୍ଯୁଦାରୈ-

-ଶ୍ଚିତ୍ତାନନ୍ଦଂ ଵିଧତ୍ତେ ସଦସି ଭଗଵତଃ ସନ୍ତତଂ ଯଃ ସ ନନ୍ଦୀ ।

ଚଣ୍ଡୀଶାଦ୍ଯାସ୍ତଥାନ୍ଯେ ଚତୁରଗୁଣଗଣପ୍ରୀଣିତସ୍ଵାମିସତ୍କା-

-ରୋତ୍କର୍ଷୋଦ୍ଯତ୍ପ୍ରସାଦାଃ ପ୍ରମଥପରିବୃଢାଃ ପାନ୍ତୁ ସନ୍ତୋଷିଣୋ ନଃ ॥ 12 ॥

ମୁକ୍ତାମାଣିକ୍ଯଜାଲୈଃ ପରିକଲିତମହାସାଲମାଲୋକନୀଯଂ

ପ୍ରତ୍ଯୁପ୍ତାନର୍ଘରତ୍ନୈର୍ଦିଶି ଦିଶି ଭଵନୈଃ କଲ୍ପିତୈର୍ଦିକ୍ପତୀନାମ୍ ।

ଉଦ୍ଯାନୈରଦ୍ରିକନ୍ଯାପରିଜନଵନିତାମାନନୀଯୈଃ ପରୀତଂ

ହୃଦ୍ଯଂ ହୃଦ୍ଯସ୍ତୁ ନିତ୍ଯଂ ମମ ଭୁଵନପତେର୍ଧାମ ସୋମାର୍ଧମୌଲେଃ ॥ 13 ॥

ସ୍ତମ୍ଭୈର୍ଜମ୍ଭାରିରତ୍ନପ୍ରଵରଵିରଚିତୈଃ ସମ୍ଭୃତୋପାନ୍ତଭାଗଂ

ଶୁମ୍ଭତ୍ସୋପାନମାର୍ଗଂ ଶୁଚିମଣିନିଚଯୈର୍ଗୁମ୍ଭିତାନଲ୍ପଶିଲ୍ପମ୍ ।

କୁମ୍ଭୈଃ ସମ୍ପୂର୍ଣଶୋଭଂ ଶିରସି ସୁଘଟିତୈଃ ଶାତକୁମ୍ଭୈରପଙ୍କୈଃ

ଶମ୍ଭୋଃ ସମ୍ଭାଵନୀଯଂ ସକଲମୁନିଜନୈଃ ସ୍ଵସ୍ତିଦଂ ସ୍ଯାତ୍ସଦୋ ନଃ ॥ 14 ॥

ନ୍ଯସ୍ତୋ ମଧ୍ଯେ ସଭାଯାଃ ପରିସରଵିଲସତ୍ପାଦପୀଠାଭିରାମୋ

ହୃଦ୍ଯଃ ପାଦୈଶ୍ଚତୁର୍ଭିଃ କନକମଣିମଯୈରୁଚ୍ଚକୈରୁଜ୍ଜ୍ଵଲାତ୍ମା ॥

ଵାସୋରତ୍ନେନ କେନାପ୍ଯଧିକମୃଦୁତରେଣାସ୍ତୃତୋ ଵିସ୍ତୃତଶ୍ରୀଃ

ପୀଠଃ ପୀଡାଭରଂ ନଃ ଶମଯତୁ ଶିଵଯୋଃ ସ୍ଵୈରସଂଵାସଯୋଗ୍ଯଃ ॥ 15 ॥

ଆସୀନସ୍ଯାଧିପୀଠଂ ତ୍ରିଜଗଦଧିପତେରଙ୍ଘ୍ରିପୀଠାନୁଷକ୍ତୌ

ପାଥୋଜାଭୋଗଭାଜୌ ପରିମୃଦୁଲତଲୋଲ୍ଲାସିପଦ୍ମାଦିରେଖୌ ।

ପାତାଂ ପାଦାଵୁଭୌ ତୌ ନମଦମରକିରୀଟୋଲ୍ଲସଚ୍ଚାରୁହୀର-

-ଶ୍ରେଣୀଶୋଣାଯମାନୋନ୍ନତନଖଦଶକୋଦ୍ଭାସମାନୌ ସମାନୌ ॥ 16 ॥

ଯନ୍ନାଦୋ ଵେଦଵାଚାଂ ନିଗଦତି ନିଖିଲଂ ଲକ୍ଷଣଂ ପକ୍ଷିକେତୁ-

-ର୍ଲକ୍ଷ୍ମୀସମ୍ଭୋଗସୌଖ୍ଯଂ ଵିରଚଯତି ଯଯୋଶ୍ଚାପରେ ରୂପଭେଦେ ।

ଶମ୍ଭୋଃ ସମ୍ଭାଵନୀଯେ ପଦକମଲସମାସଙ୍ଗତସ୍ତୁଙ୍ଗଶୋଭେ

ମାଙ୍ଗଲ୍ଯଂ ନଃ ସମଗ୍ରଂ ସକଲସୁଖକରେ ନୂପୁରେ ପୂରଯେତାମ୍ ॥ 17 ॥

ଅଙ୍ଗେ ଶୃଙ୍ଗାରଯୋନେଃ ସପଦି ଶଲଭତାଂ ନେତ୍ରଵହ୍ନୌ ପ୍ରଯାତେ

ଶତ୍ରୋରୁଦ୍ଧୃତ୍ଯ ତସ୍ମାଦିଷୁଧିଯୁଗମଧୋ ନ୍ଯସ୍ତମଗ୍ରେ କିମେତତ୍ ।

ଶଙ୍କାମିତ୍ଥଂ ନତାନାମମରପରିଷଦାମନ୍ତରଙ୍କୂରଯତ୍ତ-

-ତ୍ସଙ୍ଘାତଂ ଚାରୁ ଜଙ୍ଘାଯୁଗମଖିଲପତେରଂହସାଂ ସଂହରେନ୍ନଃ ॥ 18 ॥

ଜାନୁଦ୍ଵନ୍ଦ୍ଵେନ ମୀନଧ୍ଵଜନୃଵରସମୁଦ୍ରୋପମାନେନ ସାକଂ

ରାଜନ୍ତୌ ରାଜରମ୍ଭାକରିକରକନକସ୍ତମ୍ଭସମ୍ଭାଵନୀଯୌ ।

ଊରୂ ଗୌରୀକରାମ୍ଭୋରୁହସରସସମାମର୍ଦନାନନ୍ଦଭାଜୌ

ଚାରୂ ଦୂରୀକ୍ରିଯାସ୍ତାଂ ଦୁରିତମୁପଚିତଂ ଜନ୍ମଜନ୍ମାନ୍ତରେ ନଃ ॥ 19 ॥

ଆମୁକ୍ତାନର୍ଘରତ୍ନପ୍ରକରକରପରିଷ୍ଵକ୍ତକଲ୍ଯାଣକାଞ୍ଚୀ-

-ଦାମ୍ନା ବଦ୍ଦେନ ଦୁଗ୍ଧଦ୍ଯୁତିନିଚଯମୁଷା ଚୀନପଟ୍ଟାମ୍ବରେଣ ।

ସଂଵୀତେ ଶୈଲକନ୍ଯାସୁଚରିତପରିପାକାଯମାଣେ ନିତମ୍ବେ

ନିତ୍ଯଂ ନର୍ନର୍ତୁ ଚିତ୍ତଂ ମମ ନିଖିଲଜଗତ୍ସ୍ଵାମିନଃ ସୋମମୌଲେଃ ॥ 20 ॥

ସନ୍ଧ୍ଯାକାଲାନୁରଜ୍ଯଦ୍ଦିନକରସରୁଚା କାଲଧୌତେନ ଗାଢଂ

ଵ୍ଯାନଦ୍ଧଃ ସ୍ନିଗ୍ଧମୁଗ୍ଧଃ ସରସମୁଦରବନ୍ଧେନ ଵୀତୋପମେନ ।

ଉଦ୍ଦୀପ୍ତୈଃ ସ୍ଵପ୍ରକାଶୈରୁପଚିତମହିମା ମନ୍ମଥାରେରୁଦାରୋ

ମଧ୍ଯୋ ମିଥ୍ଯାର୍ଥସଧ୍ର୍ଯଙ୍ମମ ଦିଶତୁ ସଦା ସଙ୍ଗତିଂ ମଙ୍ଗଲାନାମ୍ ॥ 21 ॥

ନାଭୀଚକ୍ରାଲଵାଲାନ୍ନଵନଵସୁଷମାଦୋହଦଶ୍ରୀପରୀତା-

-ଦୁଦ୍ଗଚ୍ଛନ୍ତୀ ପୁରସ୍ତାଦୁଦରପଥମତିକ୍ରମ୍ଯ ଵକ୍ଷଃ ପ୍ରଯାନ୍ତି ।

ଶ୍ଯାମା କାମାଗମାର୍ଥପ୍ରକଥନଲିପିଵଦ୍ଭାସତେ ଯା ନିକାମଂ

ସା ମା ସୋମାର୍ଧମୌଲେଃ ସୁଖଯତୁ ସତତଂ ରୋମଵଲ୍ଲୀମତଲ୍ଲୀ ॥ 22 ॥

ଆଶ୍ଲେଷେଷ୍ଵଦ୍ରିଜାଯାଃ କଠିନକୁଚତଟୀଲିପ୍ତକାଶ୍ମୀରପଙ୍କ-

-ଵ୍ଯାସଙ୍ଗାଦୁଦ୍ଯଦର୍କଦ୍ଯୁତିଭିରୁପଚିତସ୍ପର୍ଧମୁଦ୍ଦାମହୃଦ୍ଯମ୍ ।

ଦକ୍ଷାରାତେରୁଦୂଢପ୍ରତିନଵମଣିମାଲାଵଲୀଭାସମାନଂ

ଵକ୍ଷୋ ଵିକ୍ଷୋଭିତାଘଂ ସତତନତିଜୁଷାଂ ରକ୍ଷତାଦକ୍ଷତଂ ନଃ ॥ 23 ॥

ଵାମାଙ୍କେ ଵିସ୍ଫୁରନ୍ତ୍ଯାଃ କରତଲଵିଲସଚ୍ଚାରୁରକ୍ତୋତ୍ପଲାଯାଃ

କାନ୍ତାଯା ଵାମଵକ୍ଷୋରୁହଭରଶିଖରୋନ୍ମର୍ଦନଵ୍ଯଗ୍ରମେକମ୍ ।

ଅନ୍ଯାଂସ୍ତ୍ରୀନପ୍ଯୁଦାରାନ୍ଵରପରଶୁମୃଗାଲଙ୍କୃତାନିନ୍ଦୁମୌଲେ-

-ର୍ବାହୂନାବଦ୍ଧହେମାଙ୍ଗଦମଣିକଟକାନନ୍ତରାଲୋକଯାମଃ ॥ 24 ॥

ସମ୍ଭ୍ରାନ୍ତାଯାଃ ଶିଵାଯାଃ ପତିଵିଲଯଭିଯା ସର୍ଵଲୋକୋପତାପା-

-ତ୍ସଂଵିଗ୍ନସ୍ଯାପି ଵିଷ୍ଣୋଃ ସରଭସମୁଭଯୋର୍ଵାରଣପ୍ରେରଣାଭ୍ଯାମ୍ ।

ମଧ୍ଯେ ତ୍ରୈଶଙ୍କଵୀଯାମନୁଭଵତି ଦଶାଂ ଯତ୍ର ହାଲାହଲୋଷ୍ମା

ସୋଽଯଂ ସର୍ଵାପଦାଂ ନଃ ଶମଯତୁ ନିଚଯଂ ନୀଲକଣ୍ଠସ୍ଯ କଣ୍ଠଃ ॥ 25 ॥

ହୃଦ୍ଯୈରଦ୍ରୀନ୍ଦ୍ରକନ୍ଯାମୃଦୁଦଶନପଦୈର୍ମୁଦ୍ରିତୋ ଵିଦ୍ରୁମଶ୍ରୀ-

-ରୁଦ୍ଦ୍ଯୋତନ୍ତ୍ଯା ନିତାନ୍ତଂ ଧଵଲଧଵଲଯା ମିଶ୍ରିତୋ ଦନ୍ତକାନ୍ତ୍ଯା ।

ମୁକ୍ତାମାଣିକ୍ଯଜାଲଵ୍ଯତିକରସଦୃଶା ତେଜସା ଭାସମାନଃ

ସଦ୍ଯୋଜାତସ୍ଯ ଦଦ୍ଯାଦଧରମଣିରସୌ ସମ୍ପଦାଂ ସଞ୍ଚଯଂ ନଃ ॥ 26 ॥

କର୍ଣାଲଙ୍କାରନାନାମଣିନିକରରୁଚାଂ ସଞ୍ଚଯୈରଞ୍ଚିତାଯାଂ

ଵର୍ଣ୍ଯାଯାଂ ସ୍ଵର୍ଣପଦ୍ମୋଦରପରିଵିଲସତ୍କର୍ଣିକାସନ୍ନିଭାଯାମ୍ ।

ପଦ୍ଧତ୍ଯାଂ ପ୍ରାଣଵାଯୋଃ ପ୍ରଣତଜନହୃଦମ୍ଭୋଜଵାସସ୍ଯ ଶମ୍ଭୋ-

-ର୍ନିତ୍ଯଂ ନଶ୍ଚିତ୍ତମେତଦ୍ଵିରଚଯତୁ ସୁଖେନାସିକାଂ ନାସିକାଯାମ୍ ॥ 27 ॥

ଅତ୍ଯନ୍ତଂ ଭାସମାନେ ରୁଚିରତରରୁଚାଂ ସଙ୍ଗମାତ୍ସନ୍ମଣୀନା-

-ମୁଦ୍ଯଚ୍ଚଣ୍ଡାଂଶୁଧାମପ୍ରସରନିରସନସ୍ପଷ୍ଟଦୃଷ୍ଟାପଦାନେ ।

ଭୂଯାସ୍ତାଂ ଭୂତଯେ ନଃ କରିଵରଜଯିନଃ କର୍ଣପାଶାଵଲମ୍ବେ

ଭକ୍ତାଲୀଭାଲସଜ୍ଜଜ୍ଜନିମରଣଲିପେଃ କୁଣ୍ଡଲେ କୁଣ୍ଡଲେ ତେ ॥ 28 ॥

ଯାଭ୍ଯାଂ କାଲଵ୍ଯଵସ୍ଥା ଭଵତି ତନୁମତାଂ ଯୋ ମୁଖଂ ଦେଵତାନାଂ

ଯେଷାମାହୁଃ ସ୍ଵରୂପଂ ଜଗତି ମୁନିଵରା ଦେଵତାନାଂ ତ୍ରଯୀଂ ତାମ୍ ।

ରୁଦ୍ରାଣୀଵକ୍ତ୍ରପଙ୍କେରୁହସତତଵିହାରୋତ୍ସୁକେନ୍ଦିନ୍ଦିରେଭ୍ଯ-

-ସ୍ତେଭ୍ଯସ୍ତ୍ରିଭ୍ଯଃ ପ୍ରଣାମାଞ୍ଜଲିମୁପରଚଯେ ତ୍ରୀକ୍ଷଣସ୍ଯେକ୍ଷଣେଭ୍ଯଃ ॥ 29 ॥

ଵାମଂ ଵାମାଙ୍କଗାଯା ଵଦନସରସିଜେ ଵ୍ଯାଵଲଦ୍ଵଲ୍ଲଭାଯା

ଵ୍ଯାନମ୍ରେଷ୍ଵନ୍ଯଦନ୍ଯତ୍ପୁନରଲିକଭଵଂ ଵୀତନିଃଶେଷରୌକ୍ଷ୍ଯମ୍ ।

ଭୂଯୋ ଭୂଯୋପି ମୋଦାନ୍ନିପତଦତିଦଯାଶୀତଲଂ ଚୂତବାଣେ

ଦକ୍ଷାରେରୀକ୍ଷଣାନାଂ ତ୍ରଯମପହରତାଦାଶୁ ତାପତ୍ରଯଂ ନଃ ॥ 30 ॥

ଯସ୍ମିନ୍ନର୍ଧେନ୍ଦୁମୁଗ୍ଧଦ୍ଯୁତିନିଚଯତିରସ୍କାରନିସ୍ତନ୍ଦ୍ରକାନ୍ତୌ

କାଶ୍ମୀରକ୍ଷୋଦସଙ୍କଲ୍ପତମିଵ ରୁଚିରଂ ଚିତ୍ରକଂ ଭାତି ନେତ୍ରମ୍ ।

ତସ୍ମିନ୍ନୁଲ୍ଲୀଲଚିଲ୍ଲୀନଟଵରତରୁଣୀଲାସ୍ଯରଙ୍ଗାଯମାଣେ

କାଲାରେଃ ଫାଲଦେଶେ ଵିହରତୁ ହୃଦଯଂ ଵୀତଚିନ୍ତାନ୍ତରଂ ନଃ ॥ 31 ॥

ସ୍ଵାମିନ୍ଗଙ୍ଗାମିଵାଙ୍ଗୀକୁରୁ ତଵ ଶିରସା ମାମପୀତ୍ଯର୍ଥଯନ୍ତୀଂ

ଧନ୍ଯାଂ କନ୍ଯାଂ ଖରାଂଶୋଃ ଶିରସି ଵହତି କିଂ ନ୍ଵେଷ କାରୁଣ୍ଯଶାଲୀ ।

ଇତ୍ଥଂ ଶଙ୍କାଂ ଜନାନାଂ ଜନଯଦତିଘନଂ କୈଶିକଂ କାଲମେଘ-

-ଚ୍ଛାଯଂ ଭୂଯାଦୁଦାରଂ ତ୍ରିପୁରଵିଜଯିନଃ ଶ୍ରେଯସେ ଭୂଯସେ ନଃ ॥ 32 ॥

ଶୃଙ୍ଗାରାକଲ୍ପଯୋଗ୍ଯୈଃ ଶିଖରିଵରସୁତାସତ୍ସଖୀହସ୍ତଲୂନୈଃ

ସୂନୈରାବଦ୍ଧମାଲାଵଲିପରିଵିଲସତ୍ସୌରଭାକୃଷ୍ଟଭୃଙ୍ଗମ୍ ।

ତୁଙ୍ଗଂ ମାଣିକ୍ଯକାନ୍ତ୍ଯା ପରିହସିତସୁରାଵାସଶୈଲେନ୍ଦ୍ରଶୃଙ୍ଗଂ

ସଙ୍ଘଂ ନଃ ସଙ୍କଟାନାଂ ଵିଘଟଯତୁ ସଦା କାଙ୍କଟୀକଂ କିରୀଟମ୍ ॥ 33 ॥

ଵକ୍ରାକାରଃ କଲଙ୍କୀ ଜଡତନୁରହମପ୍ଯଙ୍ଘ୍ରିସେଵାନୁଭାଵା-

-ଦୁତ୍ତଂସତ୍ଵଂ ପ୍ରଯାତଃ ସୁଲଭତରଘୃଣାସ୍ଯନ୍ଦିନଶ୍ଚନ୍ଦ୍ରମୌଲେଃ ।

ତତ୍ସେଵନ୍ତାଂ ଜନୌଘାଃ ଶିଵମିତି ନିଜଯାଵସ୍ଥଯୈଵ ବ୍ରୁଵାଣଂ

ଵନ୍ଦେ ଦେଵସ୍ଯ ଶମ୍ଭୋର୍ମୁକୁଟସୁଘଟିତଂ ମୁଗ୍ଧପୀଯୂଷଭାନୁମ୍ ॥ 34 ॥

କାନ୍ତ୍ଯା ସମ୍ଫୁଲ୍ଲମଲ୍ଲୀକୁସୁମଧଵଲଯା ଵ୍ଯାପ୍ଯ ଵିଶ୍ଵଂ ଵିରାଜ-

-ନ୍ଵୃତ୍ତାକାରୋ ଵିତନ୍ଵନ୍ମୁହୁରପି ଚ ପରାଂ ନିର୍ଵୃତିଂ ପାଦଭାଜାମ୍ ।

ସାନନ୍ଦଂ ନନ୍ଦିଦୋଷ୍ଣା ମଣିକଟକଵତା ଵାହ୍ଯମାନଃ ପୁରାରେଃ

ଶ୍ଵେତଚ୍ଛତ୍ରାଖ୍ଯଶୀତଦ୍ଯୁତିରପହରତାଦାପଦସ୍ତାପଦା ନଃ ॥ 35 ॥

ଦିଵ୍ଯାକଲ୍ପୋଜ୍ଜ୍ଵଲାନାଂ ଶିଵଗିରିସୁତଯୋଃ ପାର୍ଶ୍ଵଯୋରାଶ୍ରିତାନାଂ

ରୁଦ୍ରାଣୀସତ୍ସଖୀନାଂ ମଦତରଲକଟାକ୍ଷାଞ୍ଚଲୈରଞ୍ଚିତାନାମ୍ ।

ଉଦ୍ଵେଲ୍ଲଦ୍ବାହୁଵଲ୍ଲୀଵିଲସନସମଯେ ଚାମରାନ୍ଦୋଲନୀନା-

-ମୁଦ୍ଭୂତଃ କଙ୍କଣାଲୀଵଲଯକଲକଲୋ ଵାରଯେଦାପଦୋ ନଃ ॥ 36 ॥

ସ୍ଵର୍ଗୌକଃସୁନ୍ଦରୀଣାଂ ସୁଲଲିତଵପୁଷାଂ ସ୍ଵାମିସେଵାପରାଣାଂ

ଵଲ୍ଗଦ୍ଭୂଷାଣି ଵକ୍ରାମ୍ବୁଜପରିଵିଗଲନ୍ମୁଗ୍ଧଗୀତାମୃତାନି ।

ନିତ୍ଯଂ ନୃତ୍ତାନ୍ଯୁପାସେ ଭୁଜଵିଧୁତିପଦନ୍ଯାସଭାଵାଵଲୋକ-

-ପ୍ରତ୍ଯୁଦ୍ଯତ୍ପ୍ରୀତିମାଦ୍ଯତ୍ପ୍ରମଥନଟନଟୀଦତ୍ତସମ୍ଭାଵନାନି ॥ 37 ॥

ସ୍ଥାନପ୍ରାପ୍ତ୍ଯା ସ୍ଵରାଣାଂ କିମପି ଵିଶଦତାଂ ଵ୍ଯଞ୍ଜଯନ୍ମଞ୍ଜୁଵୀଣା-

-ସ୍ଵାନାଵଚ୍ଛିନ୍ନତାଲକ୍ରମମମୃତମିଵାସ୍ଵାଦ୍ଯମାନଂ ଶିଵାଭ୍ଯାମ୍ ।

ନାନାରାଗାତିହୃଦ୍ଯଂ ନଵରସମଧୁରସ୍ତୋତ୍ରଜାତାନୁଵିଦ୍ଧଂ

ଗାନଂ ଵୀଣାମହର୍ଷେଃ କଲମତିଲଲିତଂ କର୍ଣପୂରଯତାଂ ନଃ ॥ 38 ॥

ଚେତୋ ଜାତପ୍ରମୋଦଂ ସପଦି ଵିଦଧତୀ ପ୍ରାଣିନାଂ ଵାଣିନୀନାଂ

ପାଣିଦ୍ଵନ୍ଦ୍ଵାଗ୍ରଜାଗ୍ରତ୍ସୁଲଲିତରଣିତସ୍ଵର୍ଣତାଲାନୁକୂଲା ।

ସ୍ଵୀଯାରାଵେଣ ପାଥୋଧରରଵପଟୁନା ନାଦଯନ୍ତୀ ମଯୂରୀଂ

ମାଯୂରୀ ମନ୍ଦଭାଵଂ ମଣିମୁରଜଭଵା ମାର୍ଜନା ମାର୍ଜଯେନ୍ନଃ ॥ 39 ॥

ଦେଵେଭ୍ଯୋ ଦାନଵେଭ୍ଯଃ ପିତୃମୁନିପରିଷତ୍ସିଦ୍ଧଵିଦ୍ଯାଧରେଭ୍ଯଃ

ସାଧ୍ଯେଭ୍ଯଶ୍ଚାରଣେଭ୍ଯୋ ମନୁଜପଶୁପତଜ୍ଜାତିକୀଟାଦିକେଭ୍ଯଃ ।

ଶ୍ରୀକୈଲାସପ୍ରରୂଢାସ୍ତୃଣଵିଟପିମୁଖାଶ୍ଚାପି ଯେ ସନ୍ତି ତେଭ୍ଯଃ

ସର୍ଵେଭ୍ଯୋ ନିର୍ଵିଚାରଂ ନତିମୁପରଚଯେ ଶର୍ଵପାଦାଶ୍ରଯେଭ୍ଯଃ ॥ 40 ॥

ଧ୍ଯାଯନ୍ନିତ୍ଥଂ ପ୍ରଭାତେ ପ୍ରତିଦିଵସମିଦଂ ସ୍ତୋତ୍ରରତ୍ନଂ ପଠେଦ୍ଯଃ

କିଂ ଵା ବ୍ରୂମସ୍ତଦୀଯଂ ସୁଚରିତମଥଵା କୀର୍ତଯାମଃ ସମାସାତ୍ ।

ସମ୍ପଜ୍ଜାତଂ ସମଗ୍ରଂ ସଦସି ବହୁମତିଂ ସର୍ଵଲୋକପ୍ରିଯତ୍ଵଂ

ସମ୍ପ୍ରାପ୍ଯାଯୁଃଶତାନ୍ତେ ପଦମଯତି ପରବ୍ରହ୍ମଣୋ ମନ୍ମଥାରେଃ ॥ 41 ॥

ଇତି ଶ୍ରୀମତ୍ପରମହଂସପରିଵ୍ରାଜକାଚାର୍ଯସ୍ଯ ଶ୍ରୀଗୋଵିନ୍ଦଭଗଵତ୍ପୂଜ୍ଯପାଦଶିଷ୍ଯସ୍ଯ ଶ୍ରୀମଚ୍ଛଙ୍କରଭଗଵତଃ କୃତୌ ଶ୍ରୀ ଶିଵ ପାଦାଦିକେଶାନ୍ତଵର୍ଣନ ସ୍ତୋତ୍ରମ୍ ॥

Roman (IAST) Transliteration

kalyāṇaṃ no vidhattāṃ kaṭakataṭalasatkalpavāṭīnikuñja-

-krīḍāsaṃsaktavidyādharanikaravadhūgītarudrāpadānaḥ |

tārairherambanādaistaralitaninadattārakārātikekī

kailāsaḥ śarvanirvṛtyabhijanakapadaḥ sarvadā parvatendraḥ || 1 ||

yasya prāhuḥ svarūpaṃ sakaladiviṣadāṃ sārasarvasvayogaṃ

yasyeṣuḥ śār‍ṅgadhanvā samajani jagatāṃ rakṣaṇe jāgarūkaḥ |

maurvī darvīkarāṇāmapi ca paribṛḍhaḥ pūstrayī sā ca lakṣyaṃ

so'vyādavyājamasmānaśivabhidaniśaṃ nākināṃ śrīpinākaḥ || 2 ||

ātaṅkāvegahārī sakaladiviṣadāmaṅghripadmāśrayāṇāṃ

mātaṅgādyugradaityaprakaratanugaladraktadhārāktadhāraḥ |

krūraḥ sūrāyutānāmapi ca paribhavaṃ svīyabhāsā vitanva-

-nghorākāraḥ kuṭhāro dṛḍhataraduritākhyāṭavīṃ pāṭayennaḥ || 3 ||

kālārāteḥ karāgre kṛtavasatiruraḥśāṇaśāto ripūṇāṃ

kāle kāle kulādripravaratanayayā kalpitasnehalepaḥ |

pāyānnaḥ pāvakārciḥprasarasakhamukhaḥ pāpahantā nitāntaṃ

śūlaḥ śrīpādasevābhajanarasajuṣāṃ pālanaikāntaśīlaḥ || 4 ||

devasyāṅkāśrayāyāḥ kulagiriduhiturnetrakoṇapracāra-

-prastārānatyudārānpipaṭhiṣuriva yo nityamatyādareṇa |

ādhatte bhaṅgituṅgairaniśamavayavairantaraṅgaṃ samodaṃ

somāpīḍasya so'yaṃ pradiśatu kuśalaṃ pāṇiraṅgaḥ kuraṅgaḥ || 5 ||

kaṇṭhaprāntāvasajjatkanakamayamahāghaṇṭikāghoraghoṣaiḥ

kaṇṭhārāvairakuṇṭhairapi bharitajagaccakravālāntarālaḥ |

caṇḍaḥ proddaṇḍaśṛṅgaḥ kakudakabalitottuṅgakailāsaśṛṅgaḥ

kaṇṭhekālasya vāhaḥ śamayatu śamalaṃ śāśvataḥ śākvarendraḥ || 6 ||

niryaddānāmbudhārāparimalataralībhūtarolambapālī-

-jhaṅkāraiḥ śaṅkarādreḥ śikharaśatadarīḥ pūrayanbhūrighoṣaiḥ |

śārvaḥ sauvarṇaśailapratimapṛthuvapuḥ sarvavighnāpahartā

śarvāṇyāḥ pūrvasūnuḥ sa bhavatu bhavatāṃ svastido hastivaktraḥ || 7 ||

yaḥ puṇyairdevatānāṃ samajani śivayoḥ ślāghyavīryaikamatyā-

-dyannāmni śrūyamāṇe ditijabhaṭaghaṭā bhītibhāraṃ bhajante |

bhūyātso'yaṃ vibhūtyai niśitaśaraśikhāpāṭitakrauñcaśailaḥ

saṃsārāgādhakūpodarapatitasamuttārakastārakāriḥ || 8 ||

ārūḍhaḥ prauḍhavegapravijitapavanaṃ tuṅgatuṅgaṃ turaṅgaṃ

celaṃ nīlaṃ vasānaḥ karatalavilasatkāṇḍakodaṇḍadaṇḍaḥ |

rāgadveṣādinānāvidhamṛgapaṭalībhītikṛdbhūtabhartā

kurvannākheṭalīlāṃ parilasatu manaḥkānane māmakīne || 9 ||

ambhojābhyāṃ ca rambhārathacaraṇalatādvandvakumbhīndrakumbhai-

-rbimbenendośca kamborupari vilasatā vidrumeṇotpalābhyām |

ambhodenāpi sambhāvitamupajanitāḍambaraṃ śambarāreḥ

śambhoḥ sambhogayogyaṃ kimapi dhanamidaṃ sambhavetsampade naḥ || 10 ||

veṇīsaubhāgyavismāpitatapanasutācāruveṇīvilāsā-

-nvāṇīnirdhūtavāṇīkaratalavidhṛtodāravīṇāvirāvān |

eṇīnetrāntabhaṅgīnirasananipuṇāpāṅgakoṇānupāse

śoṇānprāṇānudūḍhapratinavasuṣamākandalānindumauleḥ || 11 ||

nṛttārambheṣu hastāhatamurajadhimiddhiṅkṛtairatyudārai-

-ścittānandaṃ vidhatte sadasi bhagavataḥ santataṃ yaḥ sa nandī |

caṇḍīśādyāstathānye caturaguṇagaṇaprīṇitasvāmisatkā-

-rotkarṣodyatprasādāḥ pramathaparibṛḍhāḥ pāntu santoṣiṇo naḥ || 12 ||

muktāmāṇikyajālaiḥ parikalitamahāsālamālokanīyaṃ

pratyuptānargharatnairdiśi diśi bhavanaiḥ kalpitairdikpatīnām |

udyānairadrikanyāparijanavanitāmānanīyaiḥ parītaṃ

hṛdyaṃ hṛdyastu nityaṃ mama bhuvanapaterdhāma somārdhamauleḥ || 13 ||

stambhairjambhāriratnapravaraviracitaiḥ sambhṛtopāntabhāgaṃ

śumbhatsopānamārgaṃ śucimaṇinicayairgumbhitānalpaśilpam |

kumbhaiḥ sampūrṇaśobhaṃ śirasi sughaṭitaiḥ śātakumbhairapaṅkaiḥ

śambhoḥ sambhāvanīyaṃ sakalamunijanaiḥ svastidaṃ syātsado naḥ || 14 ||

nyasto madhye sabhāyāḥ parisaravilasatpādapīṭhābhirāmo

hṛdyaḥ pādaiścaturbhiḥ kanakamaṇimayairuccakairujjvalātmā ||

vāsoratnena kenāpyadhikamṛdutareṇāstṛto vistṛtaśrīḥ

pīṭhaḥ pīḍābharaṃ naḥ śamayatu śivayoḥ svairasaṃvāsayogyaḥ || 15 ||

āsīnasyādhipīṭhaṃ trijagadadhipateraṅghripīṭhānuṣaktau

pāthojābhogabhājau parimṛdulatalollāsipadmādirekhau |

pātāṃ pādāvubhau tau namadamarakirīṭollasaccāruhīra-

-śreṇīśoṇāyamānonnatanakhadaśakodbhāsamānau samānau || 16 ||

yannādo vedavācāṃ nigadati nikhilaṃ lakṣaṇaṃ pakṣiketu-

-rlakṣmīsambhogasaukhyaṃ viracayati yayoścāpare rūpabhede |

śambhoḥ sambhāvanīye padakamalasamāsaṅgatastuṅgaśobhe

māṅgalyaṃ naḥ samagraṃ sakalasukhakare nūpure pūrayetām || 17 ||

aṅge śṛṅgārayoneḥ sapadi śalabhatāṃ netravahnau prayāte

śatroruddhṛtya tasmādiṣudhiyugamadho nyastamagre kimetat |

śaṅkāmitthaṃ natānāmamarapariṣadāmantaraṅkūrayatta-

-tsaṅghātaṃ cāru jaṅghāyugamakhilapateraṃhasāṃ saṃharennaḥ || 18 ||

jānudvandvena mīnadhvajanṛvarasamudropamānena sākaṃ

rājantau rājarambhākarikarakanakastambhasambhāvanīyau |

ūrū gaurīkarāmbhoruhasarasasamāmardanānandabhājau

cārū dūrīkriyāstāṃ duritamupacitaṃ janmajanmāntare naḥ || 19 ||

āmuktānargharatnaprakarakarapariṣvaktakalyāṇakāñcī-

-dāmnā baddena dugdhadyutinicayamuṣā cīnapaṭṭāmbareṇa |

saṃvīte śailakanyāsucaritaparipākāyamāṇe nitambe

nityaṃ narnartu cittaṃ mama nikhilajagatsvāminaḥ somamauleḥ || 20 ||

sandhyākālānurajyaddinakarasarucā kāladhautena gāḍhaṃ

vyānaddhaḥ snigdhamugdhaḥ sarasamudarabandhena vītopamena |

uddīptaiḥ svaprakāśairupacitamahimā manmathārerudāro

madhyo mithyārthasadhryaṅmama diśatu sadā saṅgatiṃ maṅgalānām || 21 ||

nābhīcakrālavālānnavanavasuṣamādohadaśrīparītā-

-dudgacchantī purastādudarapathamatikramya vakṣaḥ prayānti |

śyāmā kāmāgamārthaprakathanalipivadbhāsate yā nikāmaṃ

sā mā somārdhamauleḥ sukhayatu satataṃ romavallīmatallī || 22 ||

āśleṣeṣvadrijāyāḥ kaṭhinakucataṭīliptakāśmīrapaṅka-

-vyāsaṅgādudyadarkadyutibhirupacitaspardhamuddāmahṛdyam |

dakṣārāterudūḍhapratinavamaṇimālāvalībhāsamānaṃ

vakṣo vikṣobhitāghaṃ satatanatijuṣāṃ rakṣatādakṣataṃ naḥ || 23 ||

vāmāṅke visphurantyāḥ karatalavilasaccāruraktotpalāyāḥ

kāntāyā vāmavakṣoruhabharaśikharonmardanavyagramekam |

anyāṃstrīnapyudārānvaraparaśumṛgālaṅkṛtānindumaule-

-rbāhūnābaddhahemāṅgadamaṇikaṭakānantarālokayāmaḥ || 24 ||

sambhrāntāyāḥ śivāyāḥ pativilayabhiyā sarvalokopatāpā-

-tsaṃvignasyāpi viṣṇoḥ sarabhasamubhayorvāraṇapreraṇābhyām |

madhye traiśaṅkavīyāmanubhavati daśāṃ yatra hālāhaloṣmā

so'yaṃ sarvāpadāṃ naḥ śamayatu nicayaṃ nīlakaṇṭhasya kaṇṭhaḥ || 25 ||

hṛdyairadrīndrakanyāmṛdudaśanapadairmudrito vidrumaśrī-

-ruddyotantyā nitāntaṃ dhavaladhavalayā miśrito dantakāntyā |

muktāmāṇikyajālavyatikarasadṛśā tejasā bhāsamānaḥ

sadyojātasya dadyādadharamaṇirasau sampadāṃ sañcayaṃ naḥ || 26 ||

karṇālaṅkāranānāmaṇinikararucāṃ sañcayairañcitāyāṃ

varṇyāyāṃ svarṇapadmodaraparivilasatkarṇikāsannibhāyām |

paddhatyāṃ prāṇavāyoḥ praṇatajanahṛdambhojavāsasya śambho-

-rnityaṃ naścittametadviracayatu sukhenāsikāṃ nāsikāyām || 27 ||

atyantaṃ bhāsamāne ruciratararucāṃ saṅgamātsanmaṇīnā-

-mudyaccaṇḍāṃśudhāmaprasaranirasanaspaṣṭadṛṣṭāpadāne |

bhūyāstāṃ bhūtaye naḥ karivarajayinaḥ karṇapāśāvalambe

bhaktālībhālasajjajjanimaraṇalipeḥ kuṇḍale kuṇḍale te || 28 ||

yābhyāṃ kālavyavasthā bhavati tanumatāṃ yo mukhaṃ devatānāṃ

yeṣāmāhuḥ svarūpaṃ jagati munivarā devatānāṃ trayīṃ tām |

rudrāṇīvaktrapaṅkeruhasatatavihārotsukendindirebhya-

-stebhyastribhyaḥ praṇāmāñjalimuparacaye trīkṣaṇasyekṣaṇebhyaḥ || 29 ||

vāmaṃ vāmāṅkagāyā vadanasarasije vyāvaladvallabhāyā

vyānamreṣvanyadanyatpunaralikabhavaṃ vītaniḥśeṣaraukṣyam |

bhūyo bhūyopi modānnipatadatidayāśītalaṃ cūtabāṇe

dakṣārerīkṣaṇānāṃ trayamapaharatādāśu tāpatrayaṃ naḥ || 30 ||

yasminnardhendumugdhadyutinicayatiraskāranistandrakāntau

kāśmīrakṣodasaṅkalpatamiva ruciraṃ citrakaṃ bhāti netram |

tasminnullīlacillīnaṭavarataruṇīlāsyaraṅgāyamāṇe

kālāreḥ phāladeśe viharatu hṛdayaṃ vītacintāntaraṃ naḥ || 31 ||

svāmingaṅgāmivāṅgīkuru tava śirasā māmapītyarthayantīṃ

dhanyāṃ kanyāṃ kharāṃśoḥ śirasi vahati kiṃ nveṣa kāruṇyaśālī |

itthaṃ śaṅkāṃ janānāṃ janayadatighanaṃ kaiśikaṃ kālamegha-

-cchāyaṃ bhūyādudāraṃ tripuravijayinaḥ śreyase bhūyase naḥ || 32 ||

śṛṅgārākalpayogyaiḥ śikharivarasutāsatsakhīhastalūnaiḥ

sūnairābaddhamālāvaliparivilasatsaurabhākṛṣṭabhṛṅgam |

tuṅgaṃ māṇikyakāntyā parihasitasurāvāsaśailendraśṛṅgaṃ

saṅghaṃ naḥ saṅkaṭānāṃ vighaṭayatu sadā kāṅkaṭīkaṃ kirīṭam || 33 ||

vakrākāraḥ kalaṅkī jaḍatanurahamapyaṅghrisevānubhāvā-

-duttaṃsatvaṃ prayātaḥ sulabhataraghṛṇāsyandinaścandramauleḥ |

tatsevantāṃ janaughāḥ śivamiti nijayāvasthayaiva bruvāṇaṃ

vande devasya śambhormukuṭasughaṭitaṃ mugdhapīyūṣabhānum || 34 ||

kāntyā samphullamallīkusumadhavalayā vyāpya viśvaṃ virāja-

-nvṛttākāro vitanvanmuhurapi ca parāṃ nirvṛtiṃ pādabhājām |

sānandaṃ nandidoṣṇā maṇikaṭakavatā vāhyamānaḥ purāreḥ

śvetacchatrākhyaśītadyutirapaharatādāpadastāpadā naḥ || 35 ||

divyākalpojjvalānāṃ śivagirisutayoḥ pārśvayorāśritānāṃ

rudrāṇīsatsakhīnāṃ madataralakaṭākṣāñcalairañcitānām |

udvelladbāhuvallīvilasanasamaye cāmarāndolanīnā-

-mudbhūtaḥ kaṅkaṇālīvalayakalakalo vārayedāpado naḥ || 36 ||

svargaukaḥsundarīṇāṃ sulalitavapuṣāṃ svāmisevāparāṇāṃ

valgadbhūṣāṇi vakrāmbujaparivigalanmugdhagītāmṛtāni |

nityaṃ nṛttānyupāse bhujavidhutipadanyāsabhāvāvaloka-

-pratyudyatprītimādyatpramathanaṭanaṭīdattasambhāvanāni || 37 ||

sthānaprāptyā svarāṇāṃ kimapi viśadatāṃ vyañjayanmañjuvīṇā-

-svānāvacchinnatālakramamamṛtamivāsvādyamānaṃ śivābhyām |

nānārāgātihṛdyaṃ navarasamadhurastotrajātānuviddhaṃ

gānaṃ vīṇāmaharṣeḥ kalamatilalitaṃ karṇapūrayatāṃ naḥ || 38 ||

ceto jātapramodaṃ sapadi vidadhatī prāṇināṃ vāṇinīnāṃ

pāṇidvandvāgrajāgratsulalitaraṇitasvarṇatālānukūlā |

svīyārāveṇa pāthodhararavapaṭunā nādayantī mayūrīṃ

māyūrī mandabhāvaṃ maṇimurajabhavā mārjanā mārjayennaḥ || 39 ||

devebhyo dānavebhyaḥ pitṛmunipariṣatsiddhavidyādharebhyaḥ

sādhyebhyaścāraṇebhyo manujapaśupatajjātikīṭādikebhyaḥ |

śrīkailāsaprarūḍhāstṛṇaviṭapimukhāścāpi ye santi tebhyaḥ

sarvebhyo nirvicāraṃ natimuparacaye śarvapādāśrayebhyaḥ || 40 ||

dhyāyannitthaṃ prabhāte pratidivasamidaṃ stotraratnaṃ paṭhedyaḥ

kiṃ vā brūmastadīyaṃ sucaritamathavā kīrtayāmaḥ samāsāt |

sampajjātaṃ samagraṃ sadasi bahumatiṃ sarvalokapriyatvaṃ

samprāpyāyuḥśatānte padamayati parabrahmaṇo manmathāreḥ || 41 ||

iti śrīmatparamahaṃsaparivrājakācāryasya śrīgovindabhagavatpūjyapādaśiṣyasya śrīmacchaṅkarabhagavataḥ kṛtau śrī śiva pādādikeśāntavarṇana stotram ||

Sanskrit — Devanagari (original)

कल्याणं नो विधत्तां कटकतटलसत्कल्पवाटीनिकुञ्ज-

-क्रीडासंसक्तविद्याधरनिकरवधूगीतरुद्रापदानः ।

तारैर्हेरम्बनादैस्तरलितनिनदत्तारकारातिकेकी

कैलासः शर्वनिर्वृत्यभिजनकपदः सर्वदा पर्वतेन्द्रः ॥ 1 ॥

यस्य प्राहुः स्वरूपं सकलदिविषदां सारसर्वस्वयोगं

यस्येषुः शार्‍ङ्गधन्वा समजनि जगतां रक्षणे जागरूकः ।

मौर्वी दर्वीकराणामपि च परिबृढः पूस्त्रयी सा च लक्ष्यं

सोऽव्यादव्याजमस्मानशिवभिदनिशं नाकिनां श्रीपिनाकः ॥ 2 ॥

आतङ्कावेगहारी सकलदिविषदामङ्घ्रिपद्माश्रयाणां

मातङ्गाद्युग्रदैत्यप्रकरतनुगलद्रक्तधाराक्तधारः ।

क्रूरः सूरायुतानामपि च परिभवं स्वीयभासा वितन्व-

-न्घोराकारः कुठारो दृढतरदुरिताख्याटवीं पाटयेन्नः ॥ 3 ॥

कालारातेः कराग्रे कृतवसतिरुरःशाणशातो रिपूणां

काले काले कुलाद्रिप्रवरतनयया कल्पितस्नेहलेपः ।

पायान्नः पावकार्चिःप्रसरसखमुखः पापहन्ता नितान्तं

शूलः श्रीपादसेवाभजनरसजुषां पालनैकान्तशीलः ॥ 4 ॥

देवस्याङ्काश्रयायाः कुलगिरिदुहितुर्नेत्रकोणप्रचार-

-प्रस्तारानत्युदारान्पिपठिषुरिव यो नित्यमत्यादरेण ।

आधत्ते भङ्गितुङ्गैरनिशमवयवैरन्तरङ्गं समोदं

सोमापीडस्य सोऽयं प्रदिशतु कुशलं पाणिरङ्गः कुरङ्गः ॥ 5 ॥

कण्ठप्रान्तावसज्जत्कनकमयमहाघण्टिकाघोरघोषैः

कण्ठारावैरकुण्ठैरपि भरितजगच्चक्रवालान्तरालः ।

चण्डः प्रोद्दण्डशृङ्गः ककुदकबलितोत्तुङ्गकैलासशृङ्गः

कण्ठेकालस्य वाहः शमयतु शमलं शाश्वतः शाक्वरेन्द्रः ॥ 6 ॥

निर्यद्दानाम्बुधारापरिमलतरलीभूतरोलम्बपाली-

-झङ्कारैः शङ्कराद्रेः शिखरशतदरीः पूरयन्भूरिघोषैः ।

शार्वः सौवर्णशैलप्रतिमपृथुवपुः सर्वविघ्नापहर्ता

शर्वाण्याः पूर्वसूनुः स भवतु भवतां स्वस्तिदो हस्तिवक्त्रः ॥ 7 ॥

यः पुण्यैर्देवतानां समजनि शिवयोः श्लाघ्यवीर्यैकमत्या-

-द्यन्नाम्नि श्रूयमाणे दितिजभटघटा भीतिभारं भजन्ते ।

भूयात्सोऽयं विभूत्यै निशितशरशिखापाटितक्रौञ्चशैलः

संसारागाधकूपोदरपतितसमुत्तारकस्तारकारिः ॥ 8 ॥

आरूढः प्रौढवेगप्रविजितपवनं तुङ्गतुङ्गं तुरङ्गं

चेलं नीलं वसानः करतलविलसत्काण्डकोदण्डदण्डः ।

रागद्वेषादिनानाविधमृगपटलीभीतिकृद्भूतभर्ता

कुर्वन्नाखेटलीलां परिलसतु मनःकानने मामकीने ॥ 9 ॥

अम्भोजाभ्यां च रम्भारथचरणलताद्वन्द्वकुम्भीन्द्रकुम्भै-

-र्बिम्बेनेन्दोश्च कम्बोरुपरि विलसता विद्रुमेणोत्पलाभ्याम् ।

अम्भोदेनापि सम्भावितमुपजनिताडम्बरं शम्बरारेः

शम्भोः सम्भोगयोग्यं किमपि धनमिदं सम्भवेत्सम्पदे नः ॥ 10 ॥

वेणीसौभाग्यविस्मापिततपनसुताचारुवेणीविलासा-

-न्वाणीनिर्धूतवाणीकरतलविधृतोदारवीणाविरावान् ।

एणीनेत्रान्तभङ्गीनिरसननिपुणापाङ्गकोणानुपासे

शोणान्प्राणानुदूढप्रतिनवसुषमाकन्दलानिन्दुमौलेः ॥ 11 ॥

नृत्तारम्भेषु हस्ताहतमुरजधिमिद्धिङ्कृतैरत्युदारै-

-श्चित्तानन्दं विधत्ते सदसि भगवतः सन्ततं यः स नन्दी ।

चण्डीशाद्यास्तथान्ये चतुरगुणगणप्रीणितस्वामिसत्का-

-रोत्कर्षोद्यत्प्रसादाः प्रमथपरिबृढाः पान्तु सन्तोषिणो नः ॥ 12 ॥

मुक्तामाणिक्यजालैः परिकलितमहासालमालोकनीयं

प्रत्युप्तानर्घरत्नैर्दिशि दिशि भवनैः कल्पितैर्दिक्पतीनाम् ।

उद्यानैरद्रिकन्यापरिजनवनितामाननीयैः परीतं

हृद्यं हृद्यस्तु नित्यं मम भुवनपतेर्धाम सोमार्धमौलेः ॥ 13 ॥

स्तम्भैर्जम्भारिरत्नप्रवरविरचितैः सम्भृतोपान्तभागं

शुम्भत्सोपानमार्गं शुचिमणिनिचयैर्गुम्भितानल्पशिल्पम् ।

कुम्भैः सम्पूर्णशोभं शिरसि सुघटितैः शातकुम्भैरपङ्कैः

शम्भोः सम्भावनीयं सकलमुनिजनैः स्वस्तिदं स्यात्सदो नः ॥ 14 ॥

न्यस्तो मध्ये सभायाः परिसरविलसत्पादपीठाभिरामो

हृद्यः पादैश्चतुर्भिः कनकमणिमयैरुच्चकैरुज्ज्वलात्मा ॥

वासोरत्नेन केनाप्यधिकमृदुतरेणास्तृतो विस्तृतश्रीः

पीठः पीडाभरं नः शमयतु शिवयोः स्वैरसंवासयोग्यः ॥ 15 ॥

आसीनस्याधिपीठं त्रिजगदधिपतेरङ्घ्रिपीठानुषक्तौ

पाथोजाभोगभाजौ परिमृदुलतलोल्लासिपद्मादिरेखौ ।

पातां पादावुभौ तौ नमदमरकिरीटोल्लसच्चारुहीर-

-श्रेणीशोणायमानोन्नतनखदशकोद्भासमानौ समानौ ॥ 16 ॥

यन्नादो वेदवाचां निगदति निखिलं लक्षणं पक्षिकेतु-

-र्लक्ष्मीसम्भोगसौख्यं विरचयति ययोश्चापरे रूपभेदे ।

शम्भोः सम्भावनीये पदकमलसमासङ्गतस्तुङ्गशोभे

माङ्गल्यं नः समग्रं सकलसुखकरे नूपुरे पूरयेताम् ॥ 17 ॥

अङ्गे शृङ्गारयोनेः सपदि शलभतां नेत्रवह्नौ प्रयाते

शत्रोरुद्धृत्य तस्मादिषुधियुगमधो न्यस्तमग्रे किमेतत् ।

शङ्कामित्थं नतानाममरपरिषदामन्तरङ्कूरयत्त-

-त्सङ्घातं चारु जङ्घायुगमखिलपतेरंहसां संहरेन्नः ॥ 18 ॥

जानुद्वन्द्वेन मीनध्वजनृवरसमुद्रोपमानेन साकं

राजन्तौ राजरम्भाकरिकरकनकस्तम्भसम्भावनीयौ ।

ऊरू गौरीकराम्भोरुहसरससमामर्दनानन्दभाजौ

चारू दूरीक्रियास्तां दुरितमुपचितं जन्मजन्मान्तरे नः ॥ 19 ॥

आमुक्तानर्घरत्नप्रकरकरपरिष्वक्तकल्याणकाञ्ची-

-दाम्ना बद्देन दुग्धद्युतिनिचयमुषा चीनपट्टाम्बरेण ।

संवीते शैलकन्यासुचरितपरिपाकायमाणे नितम्बे

नित्यं नर्नर्तु चित्तं मम निखिलजगत्स्वामिनः सोममौलेः ॥ 20 ॥

सन्ध्याकालानुरज्यद्दिनकरसरुचा कालधौतेन गाढं

व्यानद्धः स्निग्धमुग्धः सरसमुदरबन्धेन वीतोपमेन ।

उद्दीप्तैः स्वप्रकाशैरुपचितमहिमा मन्मथारेरुदारो

मध्यो मिथ्यार्थसध्र्यङ्मम दिशतु सदा सङ्गतिं मङ्गलानाम् ॥ 21 ॥

नाभीचक्रालवालान्नवनवसुषमादोहदश्रीपरीता-

-दुद्गच्छन्ती पुरस्तादुदरपथमतिक्रम्य वक्षः प्रयान्ति ।

श्यामा कामागमार्थप्रकथनलिपिवद्भासते या निकामं

सा मा सोमार्धमौलेः सुखयतु सततं रोमवल्लीमतल्ली ॥ 22 ॥

आश्लेषेष्वद्रिजायाः कठिनकुचतटीलिप्तकाश्मीरपङ्क-

-व्यासङ्गादुद्यदर्कद्युतिभिरुपचितस्पर्धमुद्दामहृद्यम् ।

दक्षारातेरुदूढप्रतिनवमणिमालावलीभासमानं

वक्षो विक्षोभिताघं सततनतिजुषां रक्षतादक्षतं नः ॥ 23 ॥

वामाङ्के विस्फुरन्त्याः करतलविलसच्चारुरक्तोत्पलायाः

कान्ताया वामवक्षोरुहभरशिखरोन्मर्दनव्यग्रमेकम् ।

अन्यांस्त्रीनप्युदारान्वरपरशुमृगालङ्कृतानिन्दुमौले-

-र्बाहूनाबद्धहेमाङ्गदमणिकटकानन्तरालोकयामः ॥ 24 ॥

सम्भ्रान्तायाः शिवायाः पतिविलयभिया सर्वलोकोपतापा-

-त्संविग्नस्यापि विष्णोः सरभसमुभयोर्वारणप्रेरणाभ्याम् ।

मध्ये त्रैशङ्कवीयामनुभवति दशां यत्र हालाहलोष्मा

सोऽयं सर्वापदां नः शमयतु निचयं नीलकण्ठस्य कण्ठः ॥ 25 ॥

हृद्यैरद्रीन्द्रकन्यामृदुदशनपदैर्मुद्रितो विद्रुमश्री-

-रुद्द्योतन्त्या नितान्तं धवलधवलया मिश्रितो दन्तकान्त्या ।

मुक्तामाणिक्यजालव्यतिकरसदृशा तेजसा भासमानः

सद्योजातस्य दद्यादधरमणिरसौ सम्पदां सञ्चयं नः ॥ 26 ॥

कर्णालङ्कारनानामणिनिकररुचां सञ्चयैरञ्चितायां

वर्ण्यायां स्वर्णपद्मोदरपरिविलसत्कर्णिकासन्निभायाम् ।

पद्धत्यां प्राणवायोः प्रणतजनहृदम्भोजवासस्य शम्भो-

-र्नित्यं नश्चित्तमेतद्विरचयतु सुखेनासिकां नासिकायाम् ॥ 27 ॥

अत्यन्तं भासमाने रुचिरतररुचां सङ्गमात्सन्मणीना-

-मुद्यच्चण्डांशुधामप्रसरनिरसनस्पष्टदृष्टापदाने ।

भूयास्तां भूतये नः करिवरजयिनः कर्णपाशावलम्बे

भक्तालीभालसज्जज्जनिमरणलिपेः कुण्डले कुण्डले ते ॥ 28 ॥

याभ्यां कालव्यवस्था भवति तनुमतां यो मुखं देवतानां

येषामाहुः स्वरूपं जगति मुनिवरा देवतानां त्रयीं ताम् ।

रुद्राणीवक्त्रपङ्केरुहसततविहारोत्सुकेन्दिन्दिरेभ्य-

-स्तेभ्यस्त्रिभ्यः प्रणामाञ्जलिमुपरचये त्रीक्षणस्येक्षणेभ्यः ॥ 29 ॥

वामं वामाङ्कगाया वदनसरसिजे व्यावलद्वल्लभाया

व्यानम्रेष्वन्यदन्यत्पुनरलिकभवं वीतनिःशेषरौक्ष्यम् ।

भूयो भूयोपि मोदान्निपतदतिदयाशीतलं चूतबाणे

दक्षारेरीक्षणानां त्रयमपहरतादाशु तापत्रयं नः ॥ 30 ॥

यस्मिन्नर्धेन्दुमुग्धद्युतिनिचयतिरस्कारनिस्तन्द्रकान्तौ

काश्मीरक्षोदसङ्कल्पतमिव रुचिरं चित्रकं भाति नेत्रम् ।

तस्मिन्नुल्लीलचिल्लीनटवरतरुणीलास्यरङ्गायमाणे

कालारेः फालदेशे विहरतु हृदयं वीतचिन्तान्तरं नः ॥ 31 ॥

स्वामिन्गङ्गामिवाङ्गीकुरु तव शिरसा मामपीत्यर्थयन्तीं

धन्यां कन्यां खरांशोः शिरसि वहति किं न्वेष कारुण्यशाली ।

इत्थं शङ्कां जनानां जनयदतिघनं कैशिकं कालमेघ-

-च्छायं भूयादुदारं त्रिपुरविजयिनः श्रेयसे भूयसे नः ॥ 32 ॥

शृङ्गाराकल्पयोग्यैः शिखरिवरसुतासत्सखीहस्तलूनैः

सूनैराबद्धमालावलिपरिविलसत्सौरभाकृष्टभृङ्गम् ।

तुङ्गं माणिक्यकान्त्या परिहसितसुरावासशैलेन्द्रशृङ्गं

सङ्घं नः सङ्कटानां विघटयतु सदा काङ्कटीकं किरीटम् ॥ 33 ॥

वक्राकारः कलङ्की जडतनुरहमप्यङ्घ्रिसेवानुभावा-

-दुत्तंसत्वं प्रयातः सुलभतरघृणास्यन्दिनश्चन्द्रमौलेः ।

तत्सेवन्तां जनौघाः शिवमिति निजयावस्थयैव ब्रुवाणं

वन्दे देवस्य शम्भोर्मुकुटसुघटितं मुग्धपीयूषभानुम् ॥ 34 ॥

कान्त्या सम्फुल्लमल्लीकुसुमधवलया व्याप्य विश्वं विराज-

-न्वृत्ताकारो वितन्वन्मुहुरपि च परां निर्वृतिं पादभाजाम् ।

सानन्दं नन्दिदोष्णा मणिकटकवता वाह्यमानः पुरारेः

श्वेतच्छत्राख्यशीतद्युतिरपहरतादापदस्तापदा नः ॥ 35 ॥

दिव्याकल्पोज्ज्वलानां शिवगिरिसुतयोः पार्श्वयोराश्रितानां

रुद्राणीसत्सखीनां मदतरलकटाक्षाञ्चलैरञ्चितानाम् ।

उद्वेल्लद्बाहुवल्लीविलसनसमये चामरान्दोलनीना-

-मुद्भूतः कङ्कणालीवलयकलकलो वारयेदापदो नः ॥ 36 ॥

स्वर्गौकःसुन्दरीणां सुललितवपुषां स्वामिसेवापराणां

वल्गद्भूषाणि वक्राम्बुजपरिविगलन्मुग्धगीतामृतानि ।

नित्यं नृत्तान्युपासे भुजविधुतिपदन्यासभावावलोक-

-प्रत्युद्यत्प्रीतिमाद्यत्प्रमथनटनटीदत्तसम्भावनानि ॥ 37 ॥

स्थानप्राप्त्या स्वराणां किमपि विशदतां व्यञ्जयन्मञ्जुवीणा-

-स्वानावच्छिन्नतालक्रमममृतमिवास्वाद्यमानं शिवाभ्याम् ।

नानारागातिहृद्यं नवरसमधुरस्तोत्रजातानुविद्धं

गानं वीणामहर्षेः कलमतिललितं कर्णपूरयतां नः ॥ 38 ॥

चेतो जातप्रमोदं सपदि विदधती प्राणिनां वाणिनीनां

पाणिद्वन्द्वाग्रजाग्रत्सुललितरणितस्वर्णतालानुकूला ।

स्वीयारावेण पाथोधररवपटुना नादयन्ती मयूरीं

मायूरी मन्दभावं मणिमुरजभवा मार्जना मार्जयेन्नः ॥ 39 ॥

देवेभ्यो दानवेभ्यः पितृमुनिपरिषत्सिद्धविद्याधरेभ्यः

साध्येभ्यश्चारणेभ्यो मनुजपशुपतज्जातिकीटादिकेभ्यः ।

श्रीकैलासप्ररूढास्तृणविटपिमुखाश्चापि ये सन्ति तेभ्यः

सर्वेभ्यो निर्विचारं नतिमुपरचये शर्वपादाश्रयेभ्यः ॥ 40 ॥

ध्यायन्नित्थं प्रभाते प्रतिदिवसमिदं स्तोत्ररत्नं पठेद्यः

किं वा ब्रूमस्तदीयं सुचरितमथवा कीर्तयामः समासात् ।

सम्पज्जातं समग्रं सदसि बहुमतिं सर्वलोकप्रियत्वं

सम्प्राप्यायुःशतान्ते पदमयति परब्रह्मणो मन्मथारेः ॥ 41 ॥

इति श्रीमत्परमहंसपरिव्राजकाचार्यस्य श्रीगोविन्दभगवत्पूज्यपादशिष्यस्य श्रीमच्छङ्करभगवतः कृतौ श्री शिव पादादिकेशान्तवर्णन स्तोत्रम् ॥