കാരണപരചിദ്രൂപാ കാഞ്ചീപുരസീമ്നി കാമപീഠഗതാ ।
കാചന വിഹരതി കരുണാ കാശ്മീരസ്തബകകോമലാങ്ഗലതാ ॥1॥
കഞ്ചന കാഞ്ചീനിലയം കരധൃതകോദണ്ഡബാണസൃണിപാശമ് ।
കഠിനസ്തനഭരനമ്രം കൈവല്യാനന്ദകന്ദമവലമ്ബേ ॥2॥
ചിന്തിതഫലപരിപോഷണചിന്താമണിരേവ കാഞ്ചിനിലയാ മേ ।
ചിരതരസുചരിതസുലഭാ ചിത്തം ശിശിരയതു ചിത്സുഖാധാരാ ॥3॥
കുടിലകചം കഠിനകുചം കുന്ദസ്മിതകാന്തി കുങ്കുമച്ഛായമ് ।
കുരുതേ വിഹൃതിം കാഞ്ച്യാം കുലപര്വതസാര്വഭൌമസര്വസ്വമ് ॥4॥
പഞ്ചശരശാസ്ത്രബോധനപരമാചാര്യേണ ദൃഷ്ടിപാതേന ।
കാഞ്ചീസീമ്നി കുമാരീ കാചന മോഹയതി കാമജേതാരമ് ॥5॥
പരയാ കാഞ്ചീപുരയാ പര്വതപര്യായപീനകുചഭരയാ ।
പരതന്ത്രാ വയമനയാ പങ്കജസബ്രഹ്മചാരിലോചനയാ ॥6॥
ഐശ്വര്യമിന്ദുമൌലേരൈകത്മ്യപ്രകൃതി കാഞ്ചിമധ്യഗതമ് ।
ഐന്ദവകിശോരശേഖരമൈദമ്പര്യം ചകാസ്തി നിഗമാനാമ് ॥7॥
ശ്രിതകമ്പസീമാനം ശിഥിലിതപരമശിവധൈര്യമഹിമാനമ് ।
കലയേ പടലിമാനം കഞ്ചന കഞ്ചുകിതഭുവനഭൂമാനമ് ॥8॥
ആദൃതകാഞ്ചീനിലയമാദ്യാമാരൂഢയൌവനാടോപാമ് ।
ആഗമവതംസകലികാമാനന്ദാദ്വൈതകന്ദലീം വന്ദേ ॥9॥
തുങ്ഗാഭിരാമകുചഭരശൃങ്ഗാരിതമാശ്രയാമി കാഞ്ചിഗതമ് ।
ഗങ്ഗാധരപരതന്ത്രം ശൃങ്ഗാരാദ്വൈതതന്ത്രസിദ്ധാന്തമ് ॥10॥
കാഞ്ചീരത്നവിഭൂഷാം കാമപി കന്ദര്പസൂതികാപാങ്ഗീമ് ।
പരമാം കലാമുപാസേ പരശിവവാമാങ്കപീഠികാസീനാമ് ॥11॥
കമ്പാതീചരാണാം കരുണാകോരകിതദൃഷ്ടിപാതാനാമ് ।
കേലീവനം മനോ മേ കേഷാഞ്ചിദ്ഭവതു ചിദ്വിലാസാനാമ് ॥12॥
ആമ്രതരുമൂലവസതേരാദിമപുരുഷസ്യ നയനപീയൂഷമ് ।
ആരബ്ധയൌവനോത്സവമാമ്നായരഹസ്യമന്തരവലമ്ബേ ॥13॥
അധികാഞ്ചി പരമയോഗിഭിരാദിമപരപീഠസീമ്നി ദൃശ്യേന ।
അനുബദ്ധം മമ മാനസമരുണിമസര്വസ്വസമ്പ്രദായേന ॥14॥
അങ്കിതശങ്കരദേഹാമങ്കുരിതോരോജകങ്കണാശ്ലേഷൈഃ ।
അധികാഞ്ചി നിത്യതരുണീമദ്രാക്ഷം കാഞ്ചിദദ്ഭുതാം ബാലാമ് ॥15॥
മധുരധനുഷാ മഹീധരജനുഷാ നന്ദാമി സുരഭിബാണജുഷാ ।
ചിദ്വപുഷാ കാഞ്ചിപുരേ കേലിജുഷാ ബന്ധുജീവകാന്തിമുഷാ ॥16॥
മധുരസ്മിതേന രമതേ മാംസലകുചഭാരമന്ദഗമനേന ।
മധ്യേകാഞ്ചി മനോ മേ മനസിജസാമ്രാജ്യഗര്വബീജേന ॥17॥
ധരണിമയീം തരണിമയീം പവനമയീം ഗഗനദഹനഹോതൃമയീമ് ।
അമ്ബുമയീമിന്ദുമയീമമ്ബാമനുകമ്പമാദിമാമീക്ഷേ ॥18॥
ലീനസ്ഥിതി മുനിഹൃദയേ ധ്യാനസ്തിമിതം തപസ്യദുപകമ്പമ് ।
പീനസ്തനഭരമീഡേ മീനധ്വജതന്ത്രപരമതാത്പര്യമ് ॥19॥
ശ്വേതാ മന്ഥരഹസിതേ ശാതാ മധ്യേ ച വാഡ്ഭനോഽതീതാ ।
ശീതാ ലോചനപാതേ സ്ഫീതാ കുചസീമ്നി ശാശ്വതീ മാതാ ॥20॥
പുരതഃ കദാ ന കരവൈ പുരവൈരിവിമര്ദപുലകിതാങ്ഗലതാമ് ।
പുനതീം കാഞ്ചീദേശം പുഷ്പായുധവീര്യസരസപരിപാടീമ് ॥21॥
പുണ്യാ കാഽപി പുരന്ധ്രീ പുങ്ഖിതകന്ദര്പസമ്പദാ വപുഷാ ।
പുലിനചരീ കമ്പായാഃ പുരമഥനം പുലകനിചുലിതം കുരുതേ ॥22॥
തനിമാദ്വൈതവലഗ്നം തരുണാരുണസമ്പ്രദായതനുലേഖമ് ।
തടസീമനി കമ്പായാസ്തരുണിമസര്വസ്വമാദ്യമദ്രാക്ഷമ് ॥23॥
പൌഷ്ടികകര്മവിപാകം പൌഷ്പശരം സവിധസീമ്നി കമ്പായാഃ ।
അദ്രാക്ഷമാത്തയൌവനമഭ്യുദയം കഞ്ചിദര്ധശശിമൌലൈഃ ॥24॥
സംശ്രിതകാഞ്ചീദേശേ സരസിജദൌര്ഭാഗ്യജാഗ്രദുത്തംസേ ।
സംവിന്മയേ വിലീയേ സാരസ്വതപുരുഷകാരസാമ്രാജ്യേ ॥25॥
മോദിതമധുകരവിശിഖം സ്വാദിമസമുദായസാരകോദണ്ഡമ് ।
ആദൃതകാഞ്ചീഖേലനമാദിമമാരുണ്യഭേദമാകലയേ ॥26॥
ഉരരീകൃതകാഞ്ചിപുരീമുപനിഷദരവിന്ദകുഹരമധുധാരാമ് ।
ഉന്നമ്രസ്തനകലശീമുത്സവലഹരീമുപാസ്മഹേ ശമ്ഭോഃ ॥27॥
ഏണശിശുദീര്ഘലോചനമേനഃപരിപന്ഥി സന്തതം ഭജതാമ് ।
ഏകാമ്രനാഥജീവിതമേവമ്പദദൂരമേകമവലമ്ബേ ॥28॥
സ്മയമാനമുഖം കാഞ്ചീഭയമാനം കമപി ദേവതാഭേദമ് ।
ദയമാനം വീക്ഷ്യ മുഹുര്വയമാനന്ദാമൃതാമ്ബുധൌ മഗ്നാഃ ॥29॥
കുതുകജുഷി കാഞ്ചിദേശേ കുമുദതപോരാശിപാകശേഖരിതേ ।
കുരുതേ മനോവിഹാരം കുലഗിരിപരിബൃഢകുലൈകമണിദീപേ ॥30॥
വീക്ഷേമഹി കാഞ്ചിപുരേ വിപുലസ്തനകലശഗരിമപരവശിതമ് ।
വിദ്രുമസഹചരദേഹം വിഭ്രമസമവായസാരസന്നാഹമ് ॥31॥
കുരുവിന്ദഗോത്രഗാത്രം കൂലചരം കമപി നൌമി കമ്പായാഃ ।
കൂലങ്കഷകുചകുമ്ഭം കുസുമായുധവീര്യസാരസംരമ്ഭമ് ॥32॥
കുഡൂമലിതകുചകിശോരൈഃ കുര്വാണൈഃ കാഞ്ചിദേശസൌഹാര്ദമ് ।
കുങ്കുമശോണൈര്നിചിതം കുശലപഥം ശമ്ഭുസുകൃതസമ്ഭാരൈഃ ॥33॥
അങ്കിതകചേന കേനചിദന്ധങ്കരണൌഷധേന കമലാനാമ് ।
അന്തഃപുരേണ ശമ്ഭോരലങ്ക്രിയാ കാഽപി കല്പ്യതേ കാഞ്ച്യാമ് ॥34॥
ഊരീകരോമി സന്തതമൂഷ്മലഫാലേന ലലിതം പുംസാ ।
ഉപകമ്പമുചിതഖേലനമുര്വീധരവംശസമ്പദുന്മേഷമ് ॥35॥
അങ്കുരിതസ്തനകോരകമങ്കാലങ്കാരമേകചൂതപതേഃ ।
ആലോകേമഹി കോമലമാഗമസംലാപസാരയാഥാര്ഥ്യമ് ॥36॥
പുഞ്ജിതകരുണമുദഞ്ചിതശിഞ്ജിതമണികാഞ്ചി കിമപി കാഞ്ചിപുരേ ।
മഞ്ജരിതമൃദുലഹാസം പിഞ്ജരതനുരുചി പിനാകിമൂലധനമ് ॥37॥
ലോലഹൃദയോഽസ്തി ശമ്ഭോര്ലോചനയുഗലേന ലേഹ്യമാനായാമ് ।
ലലിതപരമശിവായാം ലാവണ്യാമൃതതരങ്ഗമാലായാമ് ॥38॥
മധുകരസഹചരചികുരൈര്മദനാഗമസമയദീക്ഷിതകടാക്ഷൈഃ ।
മണ്ഡിതകമ്പാതീരൈര്മങ്ഗലകന്ദൈര്മമാസ്തു സാരൂപ്യമ് ॥39॥
വദനാരവിന്ദവക്ഷോവാമാങ്കതടീവശംവദീഭൂതാ ।
പൂരുഷത്രിതയേ ത്രേധാ പുരന്ധ്രിരൂപാ ത്വമേവ കാമാക്ഷി ॥40॥
ബാധാകരീം ഭവാബ്ധേരാധാരാദ്യമ്ബുജേഷു വിചരന്തീമ് ।
ആധാരീകൃതകാഞ്ചീ ബോധാമൃതവീചിമേവ വിമൃശാമഃ ॥41॥
കലയാമ്യന്തഃ ശശധരകലയാഽങ്കിതമൌലിമമലചിദ്വലയാമ് ।
അലയാമാഗമപീഠീനിലയാം വലയാങ്കസുന്ദരീമമ്ബാമ് ॥42॥
ശര്വാദിപരമസാധകഗുര്വാനീതായ കാമപീഠജുഷേ ।
സര്വാകൃതയേ ശോണിമഗര്വായാസ്മൈ സമര്പ്യതേ ഹൃദയമ് ॥43॥
സമയാ സാന്ധ്യമയൂഖൈഃ സമയാ ബുദ്ധയാ സദൈവ ശീലിതയാ ।
ഉമയാ കാഞ്ചീരതയാ ന മയാ ലഭ്യതേ കിം നു താദാത്മ്യമ് ॥44॥
ജന്തോസ്തവ പദപൂജനസന്തോഷതരങ്ഗിതസ്യ കാമാക്ഷി ।
വന്ധോ യദി ഭവതി പുനഃ സിന്ധോരമ്ഭസ്സു ബമ്ഭ്രമീതി ശിലാ ॥45॥
കുണ്ഡലി കുമാരി കുടിലേ ചണ്ഡി ചരാചരസവിത്രി ചാമുണ്ഡേ ।
ഗുണിനി ഗുഹാരിണി ഗുഹ്യേ ഗുരുമൂര്തേ ത്വാം നമാമി കാമാക്ഷി ॥46॥
അഭിദാകൃതിര്ഭിദാകൃതിരചിദാകൃതിരപി ചിദാകൃതിര്മാതഃ ।
അനഹന്താ ത്വമഹന്താ ഭ്രമയസി കാമാക്ഷി ശാശ്വതീ വിശ്വമ് ॥47॥
ശിവ ശിവ പശ്യന്തി സമം ശ്രീകാമാക്ഷീകടാക്ഷിതാഃ പുരുഷാഃ ।
വിപിനം ഭവനമമിത്രം മിത്രം ലോഷ്ടം ച യുവതിബിമ്ബോഷ്ഠമ് ॥48॥
കാമപരിപന്ഥികാമിനി കാമേശ്വരി കാമപീഠമധ്യഗതേ ।
കാമദുഘാ ഭവ കമലേ കാമകലേ കാമകോടി കാമാക്ഷി ॥49॥
മധ്യേഹൃദയം മധ്യേനിടിലം മധ്യേശിരോഽപി വാസ്തവ്യാമ് ।
ചണ്ഡകരശക്രകാര്മുകചന്ദ്രസമാഭാം നമാമി കാമാക്ഷീമ് ॥50॥
അധികാഞ്ചി കേലിലോലൈരഖിലാഗമയന്ത്രതന്ത്രമയൈഃ ।
അതിശീതം മമ മാനസമസമശരദ്രോഹിജീവനോപായൈഃ ॥51॥
നന്ദതി മമ ഹൃദി കാചന മന്ദിരയന്തീ നിരന്തരം കാഞ്ചീമ് ।
ഇന്ദുരവിമണ്ഡലകുചാ ബിന്ദുവിയന്നാദപരിണതാ തരുണീ ॥52॥
ശമ്പാലതാസവര്ണം സമ്പാദയിതും ഭവജ്വരചികിത്സാമ് ।
ലിമ്പാമി മനസി കിഞ്ചന കമ്പാതടരോഹി സിദ്ധഭൈഷജ്യമ് ॥53॥
അനുമിതകുചകാഠിന്യാമധിവക്ഷഃപീഠമങ്ഗജന്മരിപോഃ ।
ആനന്ദദാം ഭജേ താമാനങ്ഗബ്രഹ്മതത്വബോധസിരാമ് ॥54॥
ഐക്ഷിഷി പാശാങ്കുശധരഹസ്താന്തം വിസ്മയാര്ഹവൃത്താന്തമ് ।
അധികാഞ്ചി നിഗമവാചാം സിദ്ധാന്തം ശൂലപാണിശുദ്ധാന്തമ് ॥55॥
ആഹിതവിലാസഭങ്ഗീമാബ്രഹ്മസ്തമ്ബശില്പകല്പനയാ ।
ആശ്രിതകാഞ്ചീമതുലാമാദ്യാം വിസ്ഫൂര്തിമാദ്രിയേ വിദ്യാമ് ॥56॥
മൂകോഽപി ജടിലദുര്ഗതിശോകോഽപി സ്മരതി യഃ ക്ഷണം ഭവതീമ് ।
ഏകോ ഭവതി സ ജന്തുര്ലോകോത്തരകീര്തിരേവ കാമാക്ഷി ॥57॥
പഞ്ചദശവര്ണരൂപം കഞ്ചന കാഞ്ചീവിഹാരധൌരേയമ് ।
പഞ്ചശരീയം ശമ്ഭോര്വഞ്ചനവൈദഗ്ധ്യമൂലമവലമ്ബേ ॥58॥
പരിണതിമതീം ചതുര്ധാ പദവീം സുധിയാം സമേത്യ സൌഷുമ്നീമ് ।
പഞ്ചാശദര്ണകല്പിതമദശില്പാം ത്വാം നമാമി കാമാക്ഷി ॥59॥
ആദിക്ഷന്മമ ഗുരുരാഡാദിക്ഷാന്താക്ഷരാത്മികാം വിദ്യാമ് ।
സ്വാദിഷ്ഠചാപദണ്ഡാം നേദിഷ്ഠാമേവ കാമപീഠഗതാമ് ॥60॥
തുഷ്യാമി ഹര്ഷിതസ്മരശാസനയാ കാഞ്ചിപുരകൃതാസനയാ ।
സ്വാസനയാ സകലജഗദ്ഭാസനയാ കലിതശമ്ബരാസനയാ ॥61॥
പ്രേമവതീ കമ്പായാം സ്ഥേമവതീ യതിമനസ്സു ഭൂമവതീ ।
സാമവതീ നിത്യഗിരാ സോമവതീ ശിരസി ഭാതി ഹൈമവതീ ॥62॥
കൌതുകിനാ കമ്പായാം കൌസുമചാപേന കീലിതേനാന്തഃ ।
കുലദൈവതേന മഹതാ കുഡ്മലമുദ്രാം ധുനോതു നഃപ്രതിഭാ ॥63॥
യൂനാ കേനാപി മിലദ്ദേഹാ സ്വാഹാസഹായതിലകേന ।
സഹകാരമൂലദേശേ സംവിദ്രൂപാ കുടുമ്ബിനീ രമതേ ॥64॥
കുസുമശരഗര്വസമ്പത്കോശഗൃഹം ഭാതി കാഞ്ചിദേശഗതമ് ।
സ്ഥാപിതമസ്മിന്കഥമപി ഗോപിതമന്തര്മയാ മനോരത്നമ് ॥65॥
ദഗ്ധഷഡധ്വാരണ്യം ദരദലിതകുസുമ്ഭസമ്ഭൃതാരുണ്യമ് ।
കലയേ നവതാരുണ്യം കമ്പാതടസീമ്നി കിമപി കാരുണ്യമ് ॥66॥
അധികാഞ്ചി വര്ധമാനാമതുലാം കരവാണി പാരണാമക്ഷ്ണോഃ ।
ആനന്ദപാകഭേദാമരുണിമപരിണാമഗര്വപല്ലവിതാമ് ॥67॥
ബാണസൃണിപാശകാര്മുകപാണിമമും കമപി കാമപീഠഗതമ് ।
ഏണധരകോണചൂഡം ശോണിമപരിപാകഭേദമാകലയേ ॥68॥
കിം വാ ഫലതി മമാന്യൌര്ബിമ്ബാധരചുമ്ബിമന്ദഹാസമുഖീ ।
സമ്ബാധകരീ തമസാമമ്ബാ ജാഗര്തി മനസി കാമാക്ഷീ ॥69॥
മഞ്ചേ സദാശിവമയേ പരിശിവമയലലിതപൌഷ്പപര്യങ്കേ ।
അധിചക്രമധ്യമാസ്തേ കാമാക്ഷീ നാമ കിമപി മമ ഭാഗ്യമ് ॥70॥
രക്ഷ്യോഽസ്മി കാമപീഠീലാസികയാ ഘനകൃപാമ്ബുരാശികയാ ।
ശ്രുതിയുവതികുന്തലീമണിമാലികയാ തുഹിനശൈലബാലികയാ ॥71॥
ലീയേ പുരഹരജായേ മായേ തവ തരുണപല്ലവച്ഛായേ ।
ചരണേ ചന്ദ്രാഭരണേ കാഞ്ചീശരണേ നതാര്തിസംഹരണേ ॥72॥
മൂര്തിമതി മുക്തിബീജേ മൂര്ധ്നി സ്തബകിതചകോരസാമ്രാജ്യേ ।
മോദിതകമ്പാകൂലേ മുഹുര്മുഹുര്മനസി മുമുദിഷാഽസ്മാകമ് ॥73॥
വേദമയീം നാദമയീം ബിന്ദുമയീം പരപദോദ്യദിന്ദുമയീമ് ।
മന്ത്രമയീം തന്ത്രമയീം പ്രകൃതിമയീം നൌമി വിശ്വവികൃതിമയീമ് ॥74॥
പുരമഥനപുണ്യകോടീ പുഞ്ജിതകവിലോകസൂക്തിരസധാടീ ।
മനസി മമ കാമകോടീ വിഹരതു കരുണാവിപാകപരിപാടീ ॥75॥
കുടിലം ചടുലം പൃഥുലം മൃദുലം കചനയനജഘനചരണേഷു ।
അവലോകിതമവലമ്ബിതമധികമ്പാതടമമേയമസ്മാഭിഃ ॥76॥
പ്രത്യങ്മുഖ്യാ ദൃഷ്ടയാ പ്രസാദദീപാങ്കുരേണ കാമാക്ഷ്യാഃ ।
പശ്യാമി നിസ്തുലമഹോ പചേലിമം കമപി പരശിവോല്ലാസമ് ॥77॥
വിദ്യേ വിധാതൃവിഷയേ കാത്യായനി കാലി കാമകോടികലേ ।
ഭാരതി ഭൈരവി ഭദ്രേ ശാകിനി ശാമ്ഭവി ശിവേ സ്തുവേ ഭവതീമ് ॥78॥
മാലിനി മഹേശചാലിനി കാഞ്ചീഖേലിനി വിപക്ഷകാലിനി തേ ।
ശൂലിനി വിദ്രുമശാലിനി സുരജനപാലിനി കപാലിനി നമോഽസ്തു ॥79॥
ദേശിക ഇതി കിം ശങ്കേ തത്താദൃക്തവ നു തരുണിമോന്മേഷഃ ।
കാമാക്ഷി ശൂലപാണേഃ കാമാഗമസമയദീക്ഷായാമ് ॥80॥
വേതണ്ഡകുമ്ഭഡമ്ബരവൈതണ്ഡികകുചഭരാര്തമധ്യായ ।
കുങ്കുമരുചേ നമസ്യാം ശങ്കരനയനാമൃതായ രചയാമഃ ॥81॥
അധികാഞ്ചിതമണികാഞ്ചനകാഞ്ചീമധികാഞ്ചി കാഞ്ചിദദ്രാക്ഷമ് ।
അവനതജനാനുകമ്പാമനുകമ്പാകൂലമസ്മദനുകൂലാമ് ॥82॥
പരിചിതകമ്പാതീരം പര്വതരാജന്യസുകൃതസന്നാഹമ് ।
പരഗുരുകൃപയാ വീക്ഷേ പരമശിവോത്സങ്ഗമങ്ഗലാഭരണമ് ॥83॥
ദഗ്ധമദനസ്യ ശമ്ഭോഃ പ്രഥീയസീം ബ്രഹ്മചര്യവൈദഗ്ധീമ് ।
തവ ദേവി തരുണിമശ്രീചതുരിമപാകോ ന ചക്ഷമേ മാതഃ ॥84॥
മദജലതമാലപത്രാ വസനിതപത്രാ കരാദൃതഖാനിത്രാ ।
വിഹരതി പുലിന്ദയോഷാ ഗുഞ്ജാഭൂഷാ ഫണീന്ദ്രകൃതവേഷാ ॥85॥
അങ്കേ ശുകിനീ ഗീതേ കൌതുകിനീ പരിസരേ ച ഗായകിനീ ।
ജയസി സവിധേഽമ്ബ ഭൈരവമണ്ഡലിനീ ശ്രവസി ശങ്ഖകുന്ഡലിനീ ॥86॥
പ്രണതജനതാപവര്ഗാ കൃതബഹുസര്ഗാ സസിംഹസംസര്ഗാ ।
കാമാക്ഷി മുദിതഭര്ഗാ ഹതരിപുവര്ഗാ ത്വമേവ സാ ദുര്ഗാ ॥87॥
ശ്രവണചലദ്വേതണ്ഡാ സമരോദ്ദണ്ഡാ ധുതാസുരശിഖണ്ഡാ ।
ദേവി കലിതാന്ത്രഷണ്ഡാ ധൃതനരമുണ്ഡാ ത്വമേവ ചാമുണ്ഡാ ॥88॥
ഉര്വീധരേന്ദ്രകന്യേ ദര്വീഭരിതേന ഭക്തപൂരേണ ।
ഗുര്വീമകിഞ്ചനാര്തി ഖര്വീകുരുഷേ ത്വമേവ കാമാക്ഷി ॥89॥
താഡിതരിപുപരിപീഡനഭയഹരണ നിപുണഹലമുസലാ ।
ക്രോഡപതിഭീഷണമുഖീ ക്രീഡസി ജഗതി ത്വമേവ കാമാക്ഷി ॥90॥
സ്മരമഥനവരണലോലാ മന്മഥഹേലാവിലാസമണിശാലാ ।
കനകരുചിചൌര്യശീലാ ത്വമമ്ബ ബാലാ കരാബ്ജധൃതമാലാ ॥91॥
വിമലപടീ കമലകുടീ പുസ്തകരുദ്രാക്ഷശസ്തഹസ്തപുടീ ।
കാമാക്ഷി പക്ഷ്മലാക്ഷീ കലിതവിപഞ്ചീ വിഭാസി വൈരിഞ്ചീ ॥92॥
കുങ്കുമരുചിപിങ്ഗമസൃക്പങ്കിലമുണ്ഡാലിമണ്ഡിതം മാതഃ ।
ശ്രീകാമാക്ഷി തദീയസങ്ഗമകലാമന്ദീഭവത്കൌതുകഃ
ജയതി തവ രൂപധേയം ജപപടപുസ്തകവരാഭയകരാബ്ജമ് ॥93॥
കനകമണികലിതഭൂഷാം കാലായസകലഹശീലകാന്തികലാമ് ।
കാമാക്ഷി ശീലയേ ത്വാം കപാലശൂലാഭിരാമകരകമലാമ് ॥94॥
ലോഹിതിമപുഞ്ജമധ്യേ മോഹിതഭുവനേ മുദാ നിരീക്ഷന്തേ ।
വദനം തവ കുവയുഗലം കാഞ്ചീസീമാം ച കേഽപി കാമാക്ഷി ॥95॥
ജലധിദ്വിഗുണിതഹുതബഹദിശാദിനേശ്വരകലാശ്വിനേയദലൈഃ ।
നലിനൈര്മഹേശി ഗച്ഛസി സര്വോത്തരകരകമലദലമമലമ് ॥96॥
സത്കൃതദേശികചരണാഃ സബീജനിര്ബീജയോഗനിശ്രേണ്യാ ।
അപവര്ഗസൌധവലഭീമാരോഹന്ത്യമ്ബ കേഽപി തവ കൃപയാ ॥97॥
അന്തരപി ബഹിരപി ത്വം ജന്തുതതേരന്തകാന്തകൃദഹന്തേ ।
ചിന്തിതസന്താനവതാം സന്തതമപി തന്തനീഷി മഹിമാനമ് ॥98॥
കലമഞ്ജുലവാഗനുമിതഗലപഞ്ജരഗതശുകഗ്രഹൌത്കണ്ഠ്യാത് ।
അമ്ബ രദനാമ്ബരം തേ ബിമ്ബഫലം ശമ്ബരാരിണാ ന്യസ്തമ് ॥99॥
ജയ ജയ ജഗദമ്ബ ശിവേ ജയ ജയ കാമാക്ഷി ജയ ജയാദ്രിസുതേ ।
ജയ ജയ മഹേശദയിതേ ജയ ജയ ചിദ്ഗഗനകൌമുദീധാരേ ॥100॥
ആര്യാശതകം ഭക്ത്യാ പഠതാമാര്യാകടാക്ഷേണ ।
നിസ്സരതി വദനകമലാദ്വാണീ പീയൂഷധോരണീ ദിവ്യാ ॥101॥
॥ ഇതി ആര്യാശതകം സമ്പൂര്ണമ് ॥
Roman (IAST) Transliteration
kāraṇaparacidrūpā kāñcīpurasīmni kāmapīṭhagatā |
kācana viharati karuṇā kāśmīrastabakakomalāṅgalatā ||1||
kañcana kāñcīnilayaṃ karadhṛtakodaṇḍabāṇasṛṇipāśam |
kaṭhinastanabharanamraṃ kaivalyānandakandamavalambe ||2||
cintitaphalaparipoṣaṇacintāmaṇireva kāñcinilayā me |
ciratarasucaritasulabhā cittaṃ śiśirayatu citsukhādhārā ||3||
kuṭilakacaṃ kaṭhinakucaṃ kundasmitakānti kuṅkumacchāyam |
kurute vihṛtiṃ kāñcyāṃ kulaparvatasārvabhaumasarvasvam ||4||
pañcaśaraśāstrabodhanaparamācāryeṇa dṛṣṭipātena |
kāñcīsīmni kumārī kācana mohayati kāmajetāram ||5||
parayā kāñcīpurayā parvataparyāyapīnakucabharayā |
paratantrā vayamanayā paṅkajasabrahmacārilocanayā ||6||
aiśvaryamindumauleraikatmyaprakṛti kāñcimadhyagatam |
aindavakiśoraśekharamaidamparyaṃ cakāsti nigamānām ||7||
śritakampasīmānaṃ śithilitaparamaśivadhairyamahimānam |
kalaye paṭalimānaṃ kañcana kañcukitabhuvanabhūmānam ||8||
ādṛtakāñcīnilayamādyāmārūḍhayauvanāṭopām |
āgamavataṃsakalikāmānandādvaitakandalīṃ vande ||9||
tuṅgābhirāmakucabharaśṛṅgāritamāśrayāmi kāñcigatam |
gaṅgādharaparatantraṃ śṛṅgārādvaitatantrasiddhāntam ||10||
kāñcīratnavibhūṣāṃ kāmapi kandarpasūtikāpāṅgīm |
paramāṃ kalāmupāse paraśivavāmāṅkapīṭhikāsīnām ||11||
kampātīcarāṇāṃ karuṇākorakitadṛṣṭipātānām |
kelīvanaṃ mano me keṣāñcidbhavatu cidvilāsānām ||12||
āmratarumūlavasaterādimapuruṣasya nayanapīyūṣam |
ārabdhayauvanotsavamāmnāyarahasyamantaravalambe ||13||
adhikāñci paramayogibhirādimaparapīṭhasīmni dṛśyena |
anubaddhaṃ mama mānasamaruṇimasarvasvasampradāyena ||14||
aṅkitaśaṅkaradehāmaṅkuritorojakaṅkaṇāśleṣaiḥ |
adhikāñci nityataruṇīmadrākṣaṃ kāñcidadbhutāṃ bālām ||15||
madhuradhanuṣā mahīdharajanuṣā nandāmi surabhibāṇajuṣā |
cidvapuṣā kāñcipure kelijuṣā bandhujīvakāntimuṣā ||16||
madhurasmitena ramate māṃsalakucabhāramandagamanena |
madhyekāñci mano me manasijasāmrājyagarvabījena ||17||
dharaṇimayīṃ taraṇimayīṃ pavanamayīṃ gaganadahanahotṛmayīm |
ambumayīmindumayīmambāmanukampamādimāmīkṣe ||18||
līnasthiti munihṛdaye dhyānastimitaṃ tapasyadupakampam |
pīnastanabharamīḍe mīnadhvajatantraparamatātparyam ||19||
śvetā mantharahasite śātā madhye ca vāḍbhano'tītā |
śītā locanapāte sphītā kucasīmni śāśvatī mātā ||20||
purataḥ kadā na karavai puravairivimardapulakitāṅgalatām |
punatīṃ kāñcīdeśaṃ puṣpāyudhavīryasarasaparipāṭīm ||21||
puṇyā kā'pi purandhrī puṅkhitakandarpasampadā vapuṣā |
pulinacarī kampāyāḥ puramathanaṃ pulakaniculitaṃ kurute ||22||
tanimādvaitavalagnaṃ taruṇāruṇasampradāyatanulekham |
taṭasīmani kampāyāstaruṇimasarvasvamādyamadrākṣam ||23||
pauṣṭikakarmavipākaṃ pauṣpaśaraṃ savidhasīmni kampāyāḥ |
adrākṣamāttayauvanamabhyudayaṃ kañcidardhaśaśimaulaiḥ ||24||
saṃśritakāñcīdeśe sarasijadaurbhāgyajāgraduttaṃse |
saṃvinmaye vilīye sārasvatapuruṣakārasāmrājye ||25||
moditamadhukaraviśikhaṃ svādimasamudāyasārakodaṇḍam |
ādṛtakāñcīkhelanamādimamāruṇyabhedamākalaye ||26||
urarīkṛtakāñcipurīmupaniṣadaravindakuharamadhudhārām |
unnamrastanakalaśīmutsavalaharīmupāsmahe śambhoḥ ||27||
eṇaśiśudīrghalocanamenaḥparipanthi santataṃ bhajatām |
ekāmranāthajīvitamevampadadūramekamavalambe ||28||
smayamānamukhaṃ kāñcībhayamānaṃ kamapi devatābhedam |
dayamānaṃ vīkṣya muhurvayamānandāmṛtāmbudhau magnāḥ ||29||
kutukajuṣi kāñcideśe kumudataporāśipākaśekharite |
kurute manovihāraṃ kulagiriparibṛḍhakulaikamaṇidīpe ||30||
vīkṣemahi kāñcipure vipulastanakalaśagarimaparavaśitam |
vidrumasahacaradehaṃ vibhramasamavāyasārasannāham ||31||
kuruvindagotragātraṃ kūlacaraṃ kamapi naumi kampāyāḥ |
kūlaṅkaṣakucakumbhaṃ kusumāyudhavīryasārasaṃrambham ||32||
kuḍūmalitakucakiśoraiḥ kurvāṇaiḥ kāñcideśasauhārdam |
kuṅkumaśoṇairnicitaṃ kuśalapathaṃ śambhusukṛtasambhāraiḥ ||33||
aṅkitakacena kenacidandhaṅkaraṇauṣadhena kamalānām |
antaḥpureṇa śambhoralaṅkriyā kā'pi kalpyate kāñcyām ||34||
ūrīkaromi santatamūṣmalaphālena lalitaṃ puṃsā |
upakampamucitakhelanamurvīdharavaṃśasampadunmeṣam ||35||
aṅkuritastanakorakamaṅkālaṅkāramekacūtapateḥ |
ālokemahi komalamāgamasaṃlāpasārayāthārthyam ||36||
puñjitakaruṇamudañcitaśiñjitamaṇikāñci kimapi kāñcipure |
mañjaritamṛdulahāsaṃ piñjaratanuruci pinākimūladhanam ||37||
lolahṛdayo'sti śambhorlocanayugalena lehyamānāyām |
lalitaparamaśivāyāṃ lāvaṇyāmṛtataraṅgamālāyām ||38||
madhukarasahacaracikurairmadanāgamasamayadīkṣitakaṭākṣaiḥ |
maṇḍitakampātīrairmaṅgalakandairmamāstu sārūpyam ||39||
vadanāravindavakṣovāmāṅkataṭīvaśaṃvadībhūtā |
pūruṣatritaye tredhā purandhrirūpā tvameva kāmākṣi ||40||
bādhākarīṃ bhavābdherādhārādyambujeṣu vicarantīm |
ādhārīkṛtakāñcī bodhāmṛtavīcimeva vimṛśāmaḥ ||41||
kalayāmyantaḥ śaśadharakalayā'ṅkitamaulimamalacidvalayām |
alayāmāgamapīṭhīnilayāṃ valayāṅkasundarīmambām ||42||
śarvādiparamasādhakagurvānītāya kāmapīṭhajuṣe |
sarvākṛtaye śoṇimagarvāyāsmai samarpyate hṛdayam ||43||
samayā sāndhyamayūkhaiḥ samayā buddhayā sadaiva śīlitayā |
umayā kāñcīratayā na mayā labhyate kiṃ nu tādātmyam ||44||
jantostava padapūjanasantoṣataraṅgitasya kāmākṣi |
vandho yadi bhavati punaḥ sindhorambhassu bambhramīti śilā ||45||
kuṇḍali kumāri kuṭile caṇḍi carācarasavitri cāmuṇḍe |
guṇini guhāriṇi guhye gurumūrte tvāṃ namāmi kāmākṣi ||46||
abhidākṛtirbhidākṛtiracidākṛtirapi cidākṛtirmātaḥ |
anahantā tvamahantā bhramayasi kāmākṣi śāśvatī viśvam ||47||
śiva śiva paśyanti samaṃ śrīkāmākṣīkaṭākṣitāḥ puruṣāḥ |
vipinaṃ bhavanamamitraṃ mitraṃ loṣṭaṃ ca yuvatibimboṣṭham ||48||
kāmaparipanthikāmini kāmeśvari kāmapīṭhamadhyagate |
kāmadughā bhava kamale kāmakale kāmakoṭi kāmākṣi ||49||
madhyehṛdayaṃ madhyeniṭilaṃ madhyeśiro'pi vāstavyām |
caṇḍakaraśakrakārmukacandrasamābhāṃ namāmi kāmākṣīm ||50||
adhikāñci kelilolairakhilāgamayantratantramayaiḥ |
atiśītaṃ mama mānasamasamaśaradrohijīvanopāyaiḥ ||51||
nandati mama hṛdi kācana mandirayantī nirantaraṃ kāñcīm |
induravimaṇḍalakucā binduviyannādapariṇatā taruṇī ||52||
śampālatāsavarṇaṃ sampādayituṃ bhavajvaracikitsām |
limpāmi manasi kiñcana kampātaṭarohi siddhabhaiṣajyam ||53||
anumitakucakāṭhinyāmadhivakṣaḥpīṭhamaṅgajanmaripoḥ |
ānandadāṃ bhaje tāmānaṅgabrahmatatvabodhasirām ||54||
aikṣiṣi pāśāṅkuśadharahastāntaṃ vismayārhavṛttāntam |
adhikāñci nigamavācāṃ siddhāntaṃ śūlapāṇiśuddhāntam ||55||
āhitavilāsabhaṅgīmābrahmastambaśilpakalpanayā |
āśritakāñcīmatulāmādyāṃ visphūrtimādriye vidyām ||56||
mūko'pi jaṭiladurgatiśoko'pi smarati yaḥ kṣaṇaṃ bhavatīm |
eko bhavati sa janturlokottarakīrtireva kāmākṣi ||57||
pañcadaśavarṇarūpaṃ kañcana kāñcīvihāradhaureyam |
pañcaśarīyaṃ śambhorvañcanavaidagdhyamūlamavalambe ||58||
pariṇatimatīṃ caturdhā padavīṃ sudhiyāṃ sametya sauṣumnīm |
pañcāśadarṇakalpitamadaśilpāṃ tvāṃ namāmi kāmākṣi ||59||
ādikṣanmama gururāḍādikṣāntākṣarātmikāṃ vidyām |
svādiṣṭhacāpadaṇḍāṃ nediṣṭhāmeva kāmapīṭhagatām ||60||
tuṣyāmi harṣitasmaraśāsanayā kāñcipurakṛtāsanayā |
svāsanayā sakalajagadbhāsanayā kalitaśambarāsanayā ||61||
premavatī kampāyāṃ sthemavatī yatimanassu bhūmavatī |
sāmavatī nityagirā somavatī śirasi bhāti haimavatī ||62||
kautukinā kampāyāṃ kausumacāpena kīlitenāntaḥ |
kuladaivatena mahatā kuḍmalamudrāṃ dhunotu naḥpratibhā ||63||
yūnā kenāpi miladdehā svāhāsahāyatilakena |
sahakāramūladeśe saṃvidrūpā kuṭumbinī ramate ||64||
kusumaśaragarvasampatkośagṛhaṃ bhāti kāñcideśagatam |
sthāpitamasminkathamapi gopitamantarmayā manoratnam ||65||
dagdhaṣaḍadhvāraṇyaṃ daradalitakusumbhasambhṛtāruṇyam |
kalaye navatāruṇyaṃ kampātaṭasīmni kimapi kāruṇyam ||66||
adhikāñci vardhamānāmatulāṃ karavāṇi pāraṇāmakṣṇoḥ |
ānandapākabhedāmaruṇimapariṇāmagarvapallavitām ||67||
bāṇasṛṇipāśakārmukapāṇimamuṃ kamapi kāmapīṭhagatam |
eṇadharakoṇacūḍaṃ śoṇimaparipākabhedamākalaye ||68||
kiṃ vā phalati mamānyaurbimbādharacumbimandahāsamukhī |
sambādhakarī tamasāmambā jāgarti manasi kāmākṣī ||69||
mañce sadāśivamaye pariśivamayalalitapauṣpaparyaṅke |
adhicakramadhyamāste kāmākṣī nāma kimapi mama bhāgyam ||70||
rakṣyo'smi kāmapīṭhīlāsikayā ghanakṛpāmburāśikayā |
śrutiyuvatikuntalīmaṇimālikayā tuhinaśailabālikayā ||71||
līye puraharajāye māye tava taruṇapallavacchāye |
caraṇe candrābharaṇe kāñcīśaraṇe natārtisaṃharaṇe ||72||
mūrtimati muktibīje mūrdhni stabakitacakorasāmrājye |
moditakampākūle muhurmuhurmanasi mumudiṣā'smākam ||73||
vedamayīṃ nādamayīṃ bindumayīṃ parapadodyadindumayīm |
mantramayīṃ tantramayīṃ prakṛtimayīṃ naumi viśvavikṛtimayīm ||74||
puramathanapuṇyakoṭī puñjitakavilokasūktirasadhāṭī |
manasi mama kāmakoṭī viharatu karuṇāvipākaparipāṭī ||75||
kuṭilaṃ caṭulaṃ pṛthulaṃ mṛdulaṃ kacanayanajaghanacaraṇeṣu |
avalokitamavalambitamadhikampātaṭamameyamasmābhiḥ ||76||
pratyaṅmukhyā dṛṣṭayā prasādadīpāṅkureṇa kāmākṣyāḥ |
paśyāmi nistulamaho pacelimaṃ kamapi paraśivollāsam ||77||
vidye vidhātṛviṣaye kātyāyani kāli kāmakoṭikale |
bhārati bhairavi bhadre śākini śāmbhavi śive stuve bhavatīm ||78||
mālini maheśacālini kāñcīkhelini vipakṣakālini te |
śūlini vidrumaśālini surajanapālini kapālini namo'stu ||79||
deśika iti kiṃ śaṅke tattādṛktava nu taruṇimonmeṣaḥ |
kāmākṣi śūlapāṇeḥ kāmāgamasamayadīkṣāyām ||80||
vetaṇḍakumbhaḍambaravaitaṇḍikakucabharārtamadhyāya |
kuṅkumaruce namasyāṃ śaṅkaranayanāmṛtāya racayāmaḥ ||81||
adhikāñcitamaṇikāñcanakāñcīmadhikāñci kāñcidadrākṣam |
avanatajanānukampāmanukampākūlamasmadanukūlām ||82||
paricitakampātīraṃ parvatarājanyasukṛtasannāham |
paragurukṛpayā vīkṣe paramaśivotsaṅgamaṅgalābharaṇam ||83||
dagdhamadanasya śambhoḥ prathīyasīṃ brahmacaryavaidagdhīm |
tava devi taruṇimaśrīcaturimapāko na cakṣame mātaḥ ||84||
madajalatamālapatrā vasanitapatrā karādṛtakhānitrā |
viharati pulindayoṣā guñjābhūṣā phaṇīndrakṛtaveṣā ||85||
aṅke śukinī gīte kautukinī parisare ca gāyakinī |
jayasi savidhe'mba bhairavamaṇḍalinī śravasi śaṅkhakunḍalinī ||86||
praṇatajanatāpavargā kṛtabahusargā sasiṃhasaṃsargā |
kāmākṣi muditabhargā hataripuvargā tvameva sā durgā ||87||
śravaṇacaladvetaṇḍā samaroddaṇḍā dhutāsuraśikhaṇḍā |
devi kalitāntraṣaṇḍā dhṛtanaramuṇḍā tvameva cāmuṇḍā ||88||
urvīdharendrakanye darvībharitena bhaktapūreṇa |
gurvīmakiñcanārti kharvīkuruṣe tvameva kāmākṣi ||89||
tāḍitaripuparipīḍanabhayaharaṇa nipuṇahalamusalā |
kroḍapatibhīṣaṇamukhī krīḍasi jagati tvameva kāmākṣi ||90||
smaramathanavaraṇalolā manmathahelāvilāsamaṇiśālā |
kanakarucicauryaśīlā tvamamba bālā karābjadhṛtamālā ||91||
vimalapaṭī kamalakuṭī pustakarudrākṣaśastahastapuṭī |
kāmākṣi pakṣmalākṣī kalitavipañcī vibhāsi vairiñcī ||92||
kuṅkumarucipiṅgamasṛkpaṅkilamuṇḍālimaṇḍitaṃ mātaḥ |
śrīkāmākṣi tadīyasaṅgamakalāmandībhavatkautukaḥ
jayati tava rūpadheyaṃ japapaṭapustakavarābhayakarābjam ||93||
kanakamaṇikalitabhūṣāṃ kālāyasakalahaśīlakāntikalām |
kāmākṣi śīlaye tvāṃ kapālaśūlābhirāmakarakamalām ||94||
lohitimapuñjamadhye mohitabhuvane mudā nirīkṣante |
vadanaṃ tava kuvayugalaṃ kāñcīsīmāṃ ca ke'pi kāmākṣi ||95||
jaladhidviguṇitahutabahadiśādineśvarakalāśvineyadalaiḥ |
nalinairmaheśi gacchasi sarvottarakarakamaladalamamalam ||96||
satkṛtadeśikacaraṇāḥ sabījanirbījayoganiśreṇyā |
apavargasaudhavalabhīmārohantyamba ke'pi tava kṛpayā ||97||
antarapi bahirapi tvaṃ jantutaterantakāntakṛdahante |
cintitasantānavatāṃ santatamapi tantanīṣi mahimānam ||98||
kalamañjulavāganumitagalapañjaragataśukagrahautkaṇṭhyāt |
amba radanāmbaraṃ te bimbaphalaṃ śambarāriṇā nyastam ||99||
jaya jaya jagadamba śive jaya jaya kāmākṣi jaya jayādrisute |
jaya jaya maheśadayite jaya jaya cidgaganakaumudīdhāre ||100||
āryāśatakaṃ bhaktyā paṭhatāmāryākaṭākṣeṇa |
nissarati vadanakamalādvāṇī pīyūṣadhoraṇī divyā ||101||
|| iti āryāśatakaṃ sampūrṇam ||
Sanskrit — Devanagari (original)
कारणपरचिद्रूपा काञ्चीपुरसीम्नि कामपीठगता ।
काचन विहरति करुणा काश्मीरस्तबककोमलाङ्गलता ॥1॥
कञ्चन काञ्चीनिलयं करधृतकोदण्डबाणसृणिपाशम् ।
कठिनस्तनभरनम्रं कैवल्यानन्दकन्दमवलम्बे ॥2॥
चिन्तितफलपरिपोषणचिन्तामणिरेव काञ्चिनिलया मे ।
चिरतरसुचरितसुलभा चित्तं शिशिरयतु चित्सुखाधारा ॥3॥
कुटिलकचं कठिनकुचं कुन्दस्मितकान्ति कुङ्कुमच्छायम् ।
कुरुते विहृतिं काञ्च्यां कुलपर्वतसार्वभौमसर्वस्वम् ॥4॥
पञ्चशरशास्त्रबोधनपरमाचार्येण दृष्टिपातेन ।
काञ्चीसीम्नि कुमारी काचन मोहयति कामजेतारम् ॥5॥
परया काञ्चीपुरया पर्वतपर्यायपीनकुचभरया ।
परतन्त्रा वयमनया पङ्कजसब्रह्मचारिलोचनया ॥6॥
ऐश्वर्यमिन्दुमौलेरैकत्म्यप्रकृति काञ्चिमध्यगतम् ।
ऐन्दवकिशोरशेखरमैदम्पर्यं चकास्ति निगमानाम् ॥7॥
श्रितकम्पसीमानं शिथिलितपरमशिवधैर्यमहिमानम् ।
कलये पटलिमानं कञ्चन कञ्चुकितभुवनभूमानम् ॥8॥
आदृतकाञ्चीनिलयमाद्यामारूढयौवनाटोपाम् ।
आगमवतंसकलिकामानन्दाद्वैतकन्दलीं वन्दे ॥9॥
तुङ्गाभिरामकुचभरशृङ्गारितमाश्रयामि काञ्चिगतम् ।
गङ्गाधरपरतन्त्रं शृङ्गाराद्वैततन्त्रसिद्धान्तम् ॥10॥
काञ्चीरत्नविभूषां कामपि कन्दर्पसूतिकापाङ्गीम् ।
परमां कलामुपासे परशिववामाङ्कपीठिकासीनाम् ॥11॥
कम्पातीचराणां करुणाकोरकितदृष्टिपातानाम् ।
केलीवनं मनो मे केषाञ्चिद्भवतु चिद्विलासानाम् ॥12॥
आम्रतरुमूलवसतेरादिमपुरुषस्य नयनपीयूषम् ।
आरब्धयौवनोत्सवमाम्नायरहस्यमन्तरवलम्बे ॥13॥
अधिकाञ्चि परमयोगिभिरादिमपरपीठसीम्नि दृश्येन ।
अनुबद्धं मम मानसमरुणिमसर्वस्वसम्प्रदायेन ॥14॥
अङ्कितशङ्करदेहामङ्कुरितोरोजकङ्कणाश्लेषैः ।
अधिकाञ्चि नित्यतरुणीमद्राक्षं काञ्चिदद्भुतां बालाम् ॥15॥
मधुरधनुषा महीधरजनुषा नन्दामि सुरभिबाणजुषा ।
चिद्वपुषा काञ्चिपुरे केलिजुषा बन्धुजीवकान्तिमुषा ॥16॥
मधुरस्मितेन रमते मांसलकुचभारमन्दगमनेन ।
मध्येकाञ्चि मनो मे मनसिजसाम्राज्यगर्वबीजेन ॥17॥
धरणिमयीं तरणिमयीं पवनमयीं गगनदहनहोतृमयीम् ।
अम्बुमयीमिन्दुमयीमम्बामनुकम्पमादिमामीक्षे ॥18॥
लीनस्थिति मुनिहृदये ध्यानस्तिमितं तपस्यदुपकम्पम् ।
पीनस्तनभरमीडे मीनध्वजतन्त्रपरमतात्पर्यम् ॥19॥
श्वेता मन्थरहसिते शाता मध्ये च वाड्भनोऽतीता ।
शीता लोचनपाते स्फीता कुचसीम्नि शाश्वती माता ॥20॥
पुरतः कदा न करवै पुरवैरिविमर्दपुलकिताङ्गलताम् ।
पुनतीं काञ्चीदेशं पुष्पायुधवीर्यसरसपरिपाटीम् ॥21॥
पुण्या काऽपि पुरन्ध्री पुङ्खितकन्दर्पसम्पदा वपुषा ।
पुलिनचरी कम्पायाः पुरमथनं पुलकनिचुलितं कुरुते ॥22॥
तनिमाद्वैतवलग्नं तरुणारुणसम्प्रदायतनुलेखम् ।
तटसीमनि कम्पायास्तरुणिमसर्वस्वमाद्यमद्राक्षम् ॥23॥
पौष्टिककर्मविपाकं पौष्पशरं सविधसीम्नि कम्पायाः ।
अद्राक्षमात्तयौवनमभ्युदयं कञ्चिदर्धशशिमौलैः ॥24॥
संश्रितकाञ्चीदेशे सरसिजदौर्भाग्यजाग्रदुत्तंसे ।
संविन्मये विलीये सारस्वतपुरुषकारसाम्राज्ये ॥25॥
मोदितमधुकरविशिखं स्वादिमसमुदायसारकोदण्डम् ।
आदृतकाञ्चीखेलनमादिममारुण्यभेदमाकलये ॥26॥
उररीकृतकाञ्चिपुरीमुपनिषदरविन्दकुहरमधुधाराम् ।
उन्नम्रस्तनकलशीमुत्सवलहरीमुपास्महे शम्भोः ॥27॥
एणशिशुदीर्घलोचनमेनःपरिपन्थि सन्ततं भजताम् ।
एकाम्रनाथजीवितमेवम्पददूरमेकमवलम्बे ॥28॥
स्मयमानमुखं काञ्चीभयमानं कमपि देवताभेदम् ।
दयमानं वीक्ष्य मुहुर्वयमानन्दामृताम्बुधौ मग्नाः ॥29॥
कुतुकजुषि काञ्चिदेशे कुमुदतपोराशिपाकशेखरिते ।
कुरुते मनोविहारं कुलगिरिपरिबृढकुलैकमणिदीपे ॥30॥
वीक्षेमहि काञ्चिपुरे विपुलस्तनकलशगरिमपरवशितम् ।
विद्रुमसहचरदेहं विभ्रमसमवायसारसन्नाहम् ॥31॥
कुरुविन्दगोत्रगात्रं कूलचरं कमपि नौमि कम्पायाः ।
कूलङ्कषकुचकुम्भं कुसुमायुधवीर्यसारसंरम्भम् ॥32॥
कुडूमलितकुचकिशोरैः कुर्वाणैः काञ्चिदेशसौहार्दम् ।
कुङ्कुमशोणैर्निचितं कुशलपथं शम्भुसुकृतसम्भारैः ॥33॥
अङ्कितकचेन केनचिदन्धङ्करणौषधेन कमलानाम् ।
अन्तःपुरेण शम्भोरलङ्क्रिया काऽपि कल्प्यते काञ्च्याम् ॥34॥
ऊरीकरोमि सन्ततमूष्मलफालेन ललितं पुंसा ।
उपकम्पमुचितखेलनमुर्वीधरवंशसम्पदुन्मेषम् ॥35॥
अङ्कुरितस्तनकोरकमङ्कालङ्कारमेकचूतपतेः ।
आलोकेमहि कोमलमागमसंलापसारयाथार्थ्यम् ॥36॥
पुञ्जितकरुणमुदञ्चितशिञ्जितमणिकाञ्चि किमपि काञ्चिपुरे ।
मञ्जरितमृदुलहासं पिञ्जरतनुरुचि पिनाकिमूलधनम् ॥37॥
लोलहृदयोऽस्ति शम्भोर्लोचनयुगलेन लेह्यमानायाम् ।
ललितपरमशिवायां लावण्यामृततरङ्गमालायाम् ॥38॥
मधुकरसहचरचिकुरैर्मदनागमसमयदीक्षितकटाक्षैः ।
मण्डितकम्पातीरैर्मङ्गलकन्दैर्ममास्तु सारूप्यम् ॥39॥
वदनारविन्दवक्षोवामाङ्कतटीवशंवदीभूता ।
पूरुषत्रितये त्रेधा पुरन्ध्रिरूपा त्वमेव कामाक्षि ॥40॥
बाधाकरीं भवाब्धेराधाराद्यम्बुजेषु विचरन्तीम् ।
आधारीकृतकाञ्ची बोधामृतवीचिमेव विमृशामः ॥41॥
कलयाम्यन्तः शशधरकलयाऽङ्कितमौलिममलचिद्वलयाम् ।
अलयामागमपीठीनिलयां वलयाङ्कसुन्दरीमम्बाम् ॥42॥
शर्वादिपरमसाधकगुर्वानीताय कामपीठजुषे ।
सर्वाकृतये शोणिमगर्वायास्मै समर्प्यते हृदयम् ॥43॥
समया सान्ध्यमयूखैः समया बुद्धया सदैव शीलितया ।
उमया काञ्चीरतया न मया लभ्यते किं नु तादात्म्यम् ॥44॥
जन्तोस्तव पदपूजनसन्तोषतरङ्गितस्य कामाक्षि ।
वन्धो यदि भवति पुनः सिन्धोरम्भस्सु बम्भ्रमीति शिला ॥45॥
कुण्डलि कुमारि कुटिले चण्डि चराचरसवित्रि चामुण्डे ।
गुणिनि गुहारिणि गुह्ये गुरुमूर्ते त्वां नमामि कामाक्षि ॥46॥
अभिदाकृतिर्भिदाकृतिरचिदाकृतिरपि चिदाकृतिर्मातः ।
अनहन्ता त्वमहन्ता भ्रमयसि कामाक्षि शाश्वती विश्वम् ॥47॥
शिव शिव पश्यन्ति समं श्रीकामाक्षीकटाक्षिताः पुरुषाः ।
विपिनं भवनममित्रं मित्रं लोष्टं च युवतिबिम्बोष्ठम् ॥48॥
कामपरिपन्थिकामिनि कामेश्वरि कामपीठमध्यगते ।
कामदुघा भव कमले कामकले कामकोटि कामाक्षि ॥49॥
मध्येहृदयं मध्येनिटिलं मध्येशिरोऽपि वास्तव्याम् ।
चण्डकरशक्रकार्मुकचन्द्रसमाभां नमामि कामाक्षीम् ॥50॥
अधिकाञ्चि केलिलोलैरखिलागमयन्त्रतन्त्रमयैः ।
अतिशीतं मम मानसमसमशरद्रोहिजीवनोपायैः ॥51॥
नन्दति मम हृदि काचन मन्दिरयन्ती निरन्तरं काञ्चीम् ।
इन्दुरविमण्डलकुचा बिन्दुवियन्नादपरिणता तरुणी ॥52॥
शम्पालतासवर्णं सम्पादयितुं भवज्वरचिकित्साम् ।
लिम्पामि मनसि किञ्चन कम्पातटरोहि सिद्धभैषज्यम् ॥53॥
अनुमितकुचकाठिन्यामधिवक्षःपीठमङ्गजन्मरिपोः ।
आनन्ददां भजे तामानङ्गब्रह्मतत्वबोधसिराम् ॥54॥
ऐक्षिषि पाशाङ्कुशधरहस्तान्तं विस्मयार्हवृत्तान्तम् ।
अधिकाञ्चि निगमवाचां सिद्धान्तं शूलपाणिशुद्धान्तम् ॥55॥
आहितविलासभङ्गीमाब्रह्मस्तम्बशिल्पकल्पनया ।
आश्रितकाञ्चीमतुलामाद्यां विस्फूर्तिमाद्रिये विद्याम् ॥56॥
मूकोऽपि जटिलदुर्गतिशोकोऽपि स्मरति यः क्षणं भवतीम् ।
एको भवति स जन्तुर्लोकोत्तरकीर्तिरेव कामाक्षि ॥57॥
पञ्चदशवर्णरूपं कञ्चन काञ्चीविहारधौरेयम् ।
पञ्चशरीयं शम्भोर्वञ्चनवैदग्ध्यमूलमवलम्बे ॥58॥
परिणतिमतीं चतुर्धा पदवीं सुधियां समेत्य सौषुम्नीम् ।
पञ्चाशदर्णकल्पितमदशिल्पां त्वां नमामि कामाक्षि ॥59॥
आदिक्षन्मम गुरुराडादिक्षान्ताक्षरात्मिकां विद्याम् ।
स्वादिष्ठचापदण्डां नेदिष्ठामेव कामपीठगताम् ॥60॥
तुष्यामि हर्षितस्मरशासनया काञ्चिपुरकृतासनया ।
स्वासनया सकलजगद्भासनया कलितशम्बरासनया ॥61॥
प्रेमवती कम्पायां स्थेमवती यतिमनस्सु भूमवती ।
सामवती नित्यगिरा सोमवती शिरसि भाति हैमवती ॥62॥
कौतुकिना कम्पायां कौसुमचापेन कीलितेनान्तः ।
कुलदैवतेन महता कुड्मलमुद्रां धुनोतु नःप्रतिभा ॥63॥
यूना केनापि मिलद्देहा स्वाहासहायतिलकेन ।
सहकारमूलदेशे संविद्रूपा कुटुम्बिनी रमते ॥64॥
कुसुमशरगर्वसम्पत्कोशगृहं भाति काञ्चिदेशगतम् ।
स्थापितमस्मिन्कथमपि गोपितमन्तर्मया मनोरत्नम् ॥65॥
दग्धषडध्वारण्यं दरदलितकुसुम्भसम्भृतारुण्यम् ।
कलये नवतारुण्यं कम्पातटसीम्नि किमपि कारुण्यम् ॥66॥
अधिकाञ्चि वर्धमानामतुलां करवाणि पारणामक्ष्णोः ।
आनन्दपाकभेदामरुणिमपरिणामगर्वपल्लविताम् ॥67॥
बाणसृणिपाशकार्मुकपाणिममुं कमपि कामपीठगतम् ।
एणधरकोणचूडं शोणिमपरिपाकभेदमाकलये ॥68॥
किं वा फलति ममान्यौर्बिम्बाधरचुम्बिमन्दहासमुखी ।
सम्बाधकरी तमसामम्बा जागर्ति मनसि कामाक्षी ॥69॥
मञ्चे सदाशिवमये परिशिवमयललितपौष्पपर्यङ्के ।
अधिचक्रमध्यमास्ते कामाक्षी नाम किमपि मम भाग्यम् ॥70॥
रक्ष्योऽस्मि कामपीठीलासिकया घनकृपाम्बुराशिकया ।
श्रुतियुवतिकुन्तलीमणिमालिकया तुहिनशैलबालिकया ॥71॥
लीये पुरहरजाये माये तव तरुणपल्लवच्छाये ।
चरणे चन्द्राभरणे काञ्चीशरणे नतार्तिसंहरणे ॥72॥
मूर्तिमति मुक्तिबीजे मूर्ध्नि स्तबकितचकोरसाम्राज्ये ।
मोदितकम्पाकूले मुहुर्मुहुर्मनसि मुमुदिषाऽस्माकम् ॥73॥
वेदमयीं नादमयीं बिन्दुमयीं परपदोद्यदिन्दुमयीम् ।
मन्त्रमयीं तन्त्रमयीं प्रकृतिमयीं नौमि विश्वविकृतिमयीम् ॥74॥
पुरमथनपुण्यकोटी पुञ्जितकविलोकसूक्तिरसधाटी ।
मनसि मम कामकोटी विहरतु करुणाविपाकपरिपाटी ॥75॥
कुटिलं चटुलं पृथुलं मृदुलं कचनयनजघनचरणेषु ।
अवलोकितमवलम्बितमधिकम्पातटममेयमस्माभिः ॥76॥
प्रत्यङ्मुख्या दृष्टया प्रसाददीपाङ्कुरेण कामाक्ष्याः ।
पश्यामि निस्तुलमहो पचेलिमं कमपि परशिवोल्लासम् ॥77॥
विद्ये विधातृविषये कात्यायनि कालि कामकोटिकले ।
भारति भैरवि भद्रे शाकिनि शाम्भवि शिवे स्तुवे भवतीम् ॥78॥
मालिनि महेशचालिनि काञ्चीखेलिनि विपक्षकालिनि ते ।
शूलिनि विद्रुमशालिनि सुरजनपालिनि कपालिनि नमोऽस्तु ॥79॥
देशिक इति किं शङ्के तत्तादृक्तव नु तरुणिमोन्मेषः ।
कामाक्षि शूलपाणेः कामागमसमयदीक्षायाम् ॥80॥
वेतण्डकुम्भडम्बरवैतण्डिककुचभरार्तमध्याय ।
कुङ्कुमरुचे नमस्यां शङ्करनयनामृताय रचयामः ॥81॥
अधिकाञ्चितमणिकाञ्चनकाञ्चीमधिकाञ्चि काञ्चिदद्राक्षम् ।
अवनतजनानुकम्पामनुकम्पाकूलमस्मदनुकूलाम् ॥82॥
परिचितकम्पातीरं पर्वतराजन्यसुकृतसन्नाहम् ।
परगुरुकृपया वीक्षे परमशिवोत्सङ्गमङ्गलाभरणम् ॥83॥
दग्धमदनस्य शम्भोः प्रथीयसीं ब्रह्मचर्यवैदग्धीम् ।
तव देवि तरुणिमश्रीचतुरिमपाको न चक्षमे मातः ॥84॥
मदजलतमालपत्रा वसनितपत्रा करादृतखानित्रा ।
विहरति पुलिन्दयोषा गुञ्जाभूषा फणीन्द्रकृतवेषा ॥85॥
अङ्के शुकिनी गीते कौतुकिनी परिसरे च गायकिनी ।
जयसि सविधेऽम्ब भैरवमण्डलिनी श्रवसि शङ्खकुन्डलिनी ॥86॥
प्रणतजनतापवर्गा कृतबहुसर्गा ससिंहसंसर्गा ।
कामाक्षि मुदितभर्गा हतरिपुवर्गा त्वमेव सा दुर्गा ॥87॥
श्रवणचलद्वेतण्डा समरोद्दण्डा धुतासुरशिखण्डा ।
देवि कलितान्त्रषण्डा धृतनरमुण्डा त्वमेव चामुण्डा ॥88॥
उर्वीधरेन्द्रकन्ये दर्वीभरितेन भक्तपूरेण ।
गुर्वीमकिञ्चनार्ति खर्वीकुरुषे त्वमेव कामाक्षि ॥89॥
ताडितरिपुपरिपीडनभयहरण निपुणहलमुसला ।
क्रोडपतिभीषणमुखी क्रीडसि जगति त्वमेव कामाक्षि ॥90॥
स्मरमथनवरणलोला मन्मथहेलाविलासमणिशाला ।
कनकरुचिचौर्यशीला त्वमम्ब बाला कराब्जधृतमाला ॥91॥
विमलपटी कमलकुटी पुस्तकरुद्राक्षशस्तहस्तपुटी ।
कामाक्षि पक्ष्मलाक्षी कलितविपञ्ची विभासि वैरिञ्ची ॥92॥
कुङ्कुमरुचिपिङ्गमसृक्पङ्किलमुण्डालिमण्डितं मातः ।
श्रीकामाक्षि तदीयसङ्गमकलामन्दीभवत्कौतुकः
जयति तव रूपधेयं जपपटपुस्तकवराभयकराब्जम् ॥93॥
कनकमणिकलितभूषां कालायसकलहशीलकान्तिकलाम् ।
कामाक्षि शीलये त्वां कपालशूलाभिरामकरकमलाम् ॥94॥
लोहितिमपुञ्जमध्ये मोहितभुवने मुदा निरीक्षन्ते ।
वदनं तव कुवयुगलं काञ्चीसीमां च केऽपि कामाक्षि ॥95॥
जलधिद्विगुणितहुतबहदिशादिनेश्वरकलाश्विनेयदलैः ।
नलिनैर्महेशि गच्छसि सर्वोत्तरकरकमलदलममलम् ॥96॥
सत्कृतदेशिकचरणाः सबीजनिर्बीजयोगनिश्रेण्या ।
अपवर्गसौधवलभीमारोहन्त्यम्ब केऽपि तव कृपया ॥97॥
अन्तरपि बहिरपि त्वं जन्तुततेरन्तकान्तकृदहन्ते ।
चिन्तितसन्तानवतां सन्ततमपि तन्तनीषि महिमानम् ॥98॥
कलमञ्जुलवागनुमितगलपञ्जरगतशुकग्रहौत्कण्ठ्यात् ।
अम्ब रदनाम्बरं ते बिम्बफलं शम्बरारिणा न्यस्तम् ॥99॥
जय जय जगदम्ब शिवे जय जय कामाक्षि जय जयाद्रिसुते ।
जय जय महेशदयिते जय जय चिद्गगनकौमुदीधारे ॥100॥
आर्याशतकं भक्त्या पठतामार्याकटाक्षेण ।
निस्सरति वदनकमलाद्वाणी पीयूषधोरणी दिव्या ॥101॥
॥ इति आर्याशतकं सम्पूर्णम् ॥
kāraṇaparacidrūpā kāñcīpurasīmni kāmapīṭhagatā |
kācana viharati karuṇā kāśmīrastabakakomalāṅgalatā ||1||
kañcana kāñcīnilayaṃ karadhṛtakodaṇḍabāṇasṛṇipāśam |
kaṭhinastanabharanamraṃ kaivalyānandakandamavalambe ||2||
cintitaphalaparipoṣaṇacintāmaṇireva kāñcinilayā me |
ciratarasucaritasulabhā cittaṃ śiśirayatu citsukhādhārā ||3||
kuṭilakacaṃ kaṭhinakucaṃ kundasmitakānti kuṅkumacchāyam |
kurute vihṛtiṃ kāñcyāṃ kulaparvatasārvabhaumasarvasvam ||4||
pañcaśaraśāstrabodhanaparamācāryeṇa dṛṣṭipātena |
kāñcīsīmni kumārī kācana mohayati kāmajetāram ||5||
parayā kāñcīpurayā parvataparyāyapīnakucabharayā |
paratantrā vayamanayā paṅkajasabrahmacārilocanayā ||6||
aiśvaryamindumauleraikatmyaprakṛti kāñcimadhyagatam |
aindavakiśoraśekharamaidamparyaṃ cakāsti nigamānām ||7||
śritakampasīmānaṃ śithilitaparamaśivadhairyamahimānam |
kalaye paṭalimānaṃ kañcana kañcukitabhuvanabhūmānam ||8||
ādṛtakāñcīnilayamādyāmārūḍhayauvanāṭopām |
āgamavataṃsakalikāmānandādvaitakandalīṃ vande ||9||
tuṅgābhirāmakucabharaśṛṅgāritamāśrayāmi kāñcigatam |
gaṅgādharaparatantraṃ śṛṅgārādvaitatantrasiddhāntam ||10||
kāñcīratnavibhūṣāṃ kāmapi kandarpasūtikāpāṅgīm |
paramāṃ kalāmupāse paraśivavāmāṅkapīṭhikāsīnām ||11||
kampātīcarāṇāṃ karuṇākorakitadṛṣṭipātānām |
kelīvanaṃ mano me keṣāñcidbhavatu cidvilāsānām ||12||
āmratarumūlavasaterādimapuruṣasya nayanapīyūṣam |
ārabdhayauvanotsavamāmnāyarahasyamantaravalambe ||13||
adhikāñci paramayogibhirādimaparapīṭhasīmni dṛśyena |
anubaddhaṃ mama mānasamaruṇimasarvasvasampradāyena ||14||
aṅkitaśaṅkaradehāmaṅkuritorojakaṅkaṇāśleṣaiḥ |
adhikāñci nityataruṇīmadrākṣaṃ kāñcidadbhutāṃ bālām ||15||
madhuradhanuṣā mahīdharajanuṣā nandāmi surabhibāṇajuṣā |
cidvapuṣā kāñcipure kelijuṣā bandhujīvakāntimuṣā ||16||
madhurasmitena ramate māṃsalakucabhāramandagamanena |
madhyekāñci mano me manasijasāmrājyagarvabījena ||17||
dharaṇimayīṃ taraṇimayīṃ pavanamayīṃ gaganadahanahotṛmayīm |
ambumayīmindumayīmambāmanukampamādimāmīkṣe ||18||
līnasthiti munihṛdaye dhyānastimitaṃ tapasyadupakampam |
pīnastanabharamīḍe mīnadhvajatantraparamatātparyam ||19||
śvetā mantharahasite śātā madhye ca vāḍbhano'tītā |
śītā locanapāte sphītā kucasīmni śāśvatī mātā ||20||
purataḥ kadā na karavai puravairivimardapulakitāṅgalatām |
punatīṃ kāñcīdeśaṃ puṣpāyudhavīryasarasaparipāṭīm ||21||
puṇyā kā'pi purandhrī puṅkhitakandarpasampadā vapuṣā |
pulinacarī kampāyāḥ puramathanaṃ pulakaniculitaṃ kurute ||22||
tanimādvaitavalagnaṃ taruṇāruṇasampradāyatanulekham |
taṭasīmani kampāyāstaruṇimasarvasvamādyamadrākṣam ||23||
pauṣṭikakarmavipākaṃ pauṣpaśaraṃ savidhasīmni kampāyāḥ |
adrākṣamāttayauvanamabhyudayaṃ kañcidardhaśaśimaulaiḥ ||24||
saṃśritakāñcīdeśe sarasijadaurbhāgyajāgraduttaṃse |
saṃvinmaye vilīye sārasvatapuruṣakārasāmrājye ||25||
moditamadhukaraviśikhaṃ svādimasamudāyasārakodaṇḍam |
ādṛtakāñcīkhelanamādimamāruṇyabhedamākalaye ||26||
urarīkṛtakāñcipurīmupaniṣadaravindakuharamadhudhārām |
unnamrastanakalaśīmutsavalaharīmupāsmahe śambhoḥ ||27||
eṇaśiśudīrghalocanamenaḥparipanthi santataṃ bhajatām |
ekāmranāthajīvitamevampadadūramekamavalambe ||28||
smayamānamukhaṃ kāñcībhayamānaṃ kamapi devatābhedam |
dayamānaṃ vīkṣya muhurvayamānandāmṛtāmbudhau magnāḥ ||29||
kutukajuṣi kāñcideśe kumudataporāśipākaśekharite |
kurute manovihāraṃ kulagiriparibṛḍhakulaikamaṇidīpe ||30||
vīkṣemahi kāñcipure vipulastanakalaśagarimaparavaśitam |
vidrumasahacaradehaṃ vibhramasamavāyasārasannāham ||31||
kuruvindagotragātraṃ kūlacaraṃ kamapi naumi kampāyāḥ |
kūlaṅkaṣakucakumbhaṃ kusumāyudhavīryasārasaṃrambham ||32||
kuḍūmalitakucakiśoraiḥ kurvāṇaiḥ kāñcideśasauhārdam |
kuṅkumaśoṇairnicitaṃ kuśalapathaṃ śambhusukṛtasambhāraiḥ ||33||
aṅkitakacena kenacidandhaṅkaraṇauṣadhena kamalānām |
antaḥpureṇa śambhoralaṅkriyā kā'pi kalpyate kāñcyām ||34||
ūrīkaromi santatamūṣmalaphālena lalitaṃ puṃsā |
upakampamucitakhelanamurvīdharavaṃśasampadunmeṣam ||35||
aṅkuritastanakorakamaṅkālaṅkāramekacūtapateḥ |
ālokemahi komalamāgamasaṃlāpasārayāthārthyam ||36||
puñjitakaruṇamudañcitaśiñjitamaṇikāñci kimapi kāñcipure |
mañjaritamṛdulahāsaṃ piñjaratanuruci pinākimūladhanam ||37||
lolahṛdayo'sti śambhorlocanayugalena lehyamānāyām |
lalitaparamaśivāyāṃ lāvaṇyāmṛtataraṅgamālāyām ||38||
madhukarasahacaracikurairmadanāgamasamayadīkṣitakaṭākṣaiḥ |
maṇḍitakampātīrairmaṅgalakandairmamāstu sārūpyam ||39||
vadanāravindavakṣovāmāṅkataṭīvaśaṃvadībhūtā |
pūruṣatritaye tredhā purandhrirūpā tvameva kāmākṣi ||40||
bādhākarīṃ bhavābdherādhārādyambujeṣu vicarantīm |
ādhārīkṛtakāñcī bodhāmṛtavīcimeva vimṛśāmaḥ ||41||
kalayāmyantaḥ śaśadharakalayā'ṅkitamaulimamalacidvalayām |
alayāmāgamapīṭhīnilayāṃ valayāṅkasundarīmambām ||42||
śarvādiparamasādhakagurvānītāya kāmapīṭhajuṣe |
sarvākṛtaye śoṇimagarvāyāsmai samarpyate hṛdayam ||43||
samayā sāndhyamayūkhaiḥ samayā buddhayā sadaiva śīlitayā |
umayā kāñcīratayā na mayā labhyate kiṃ nu tādātmyam ||44||
jantostava padapūjanasantoṣataraṅgitasya kāmākṣi |
vandho yadi bhavati punaḥ sindhorambhassu bambhramīti śilā ||45||
kuṇḍali kumāri kuṭile caṇḍi carācarasavitri cāmuṇḍe |
guṇini guhāriṇi guhye gurumūrte tvāṃ namāmi kāmākṣi ||46||
abhidākṛtirbhidākṛtiracidākṛtirapi cidākṛtirmātaḥ |
anahantā tvamahantā bhramayasi kāmākṣi śāśvatī viśvam ||47||
śiva śiva paśyanti samaṃ śrīkāmākṣīkaṭākṣitāḥ puruṣāḥ |
vipinaṃ bhavanamamitraṃ mitraṃ loṣṭaṃ ca yuvatibimboṣṭham ||48||
kāmaparipanthikāmini kāmeśvari kāmapīṭhamadhyagate |
kāmadughā bhava kamale kāmakale kāmakoṭi kāmākṣi ||49||
madhyehṛdayaṃ madhyeniṭilaṃ madhyeśiro'pi vāstavyām |
caṇḍakaraśakrakārmukacandrasamābhāṃ namāmi kāmākṣīm ||50||
adhikāñci kelilolairakhilāgamayantratantramayaiḥ |
atiśītaṃ mama mānasamasamaśaradrohijīvanopāyaiḥ ||51||
nandati mama hṛdi kācana mandirayantī nirantaraṃ kāñcīm |
induravimaṇḍalakucā binduviyannādapariṇatā taruṇī ||52||
śampālatāsavarṇaṃ sampādayituṃ bhavajvaracikitsām |
limpāmi manasi kiñcana kampātaṭarohi siddhabhaiṣajyam ||53||
anumitakucakāṭhinyāmadhivakṣaḥpīṭhamaṅgajanmaripoḥ |
ānandadāṃ bhaje tāmānaṅgabrahmatatvabodhasirām ||54||
aikṣiṣi pāśāṅkuśadharahastāntaṃ vismayārhavṛttāntam |
adhikāñci nigamavācāṃ siddhāntaṃ śūlapāṇiśuddhāntam ||55||
āhitavilāsabhaṅgīmābrahmastambaśilpakalpanayā |
āśritakāñcīmatulāmādyāṃ visphūrtimādriye vidyām ||56||
mūko'pi jaṭiladurgatiśoko'pi smarati yaḥ kṣaṇaṃ bhavatīm |
eko bhavati sa janturlokottarakīrtireva kāmākṣi ||57||
pañcadaśavarṇarūpaṃ kañcana kāñcīvihāradhaureyam |
pañcaśarīyaṃ śambhorvañcanavaidagdhyamūlamavalambe ||58||
pariṇatimatīṃ caturdhā padavīṃ sudhiyāṃ sametya sauṣumnīm |
pañcāśadarṇakalpitamadaśilpāṃ tvāṃ namāmi kāmākṣi ||59||
ādikṣanmama gururāḍādikṣāntākṣarātmikāṃ vidyām |
svādiṣṭhacāpadaṇḍāṃ nediṣṭhāmeva kāmapīṭhagatām ||60||
tuṣyāmi harṣitasmaraśāsanayā kāñcipurakṛtāsanayā |
svāsanayā sakalajagadbhāsanayā kalitaśambarāsanayā ||61||
premavatī kampāyāṃ sthemavatī yatimanassu bhūmavatī |
sāmavatī nityagirā somavatī śirasi bhāti haimavatī ||62||
kautukinā kampāyāṃ kausumacāpena kīlitenāntaḥ |
kuladaivatena mahatā kuḍmalamudrāṃ dhunotu naḥpratibhā ||63||
yūnā kenāpi miladdehā svāhāsahāyatilakena |
sahakāramūladeśe saṃvidrūpā kuṭumbinī ramate ||64||
kusumaśaragarvasampatkośagṛhaṃ bhāti kāñcideśagatam |
sthāpitamasminkathamapi gopitamantarmayā manoratnam ||65||
dagdhaṣaḍadhvāraṇyaṃ daradalitakusumbhasambhṛtāruṇyam |
kalaye navatāruṇyaṃ kampātaṭasīmni kimapi kāruṇyam ||66||
adhikāñci vardhamānāmatulāṃ karavāṇi pāraṇāmakṣṇoḥ |
ānandapākabhedāmaruṇimapariṇāmagarvapallavitām ||67||
bāṇasṛṇipāśakārmukapāṇimamuṃ kamapi kāmapīṭhagatam |
eṇadharakoṇacūḍaṃ śoṇimaparipākabhedamākalaye ||68||
kiṃ vā phalati mamānyaurbimbādharacumbimandahāsamukhī |
sambādhakarī tamasāmambā jāgarti manasi kāmākṣī ||69||
mañce sadāśivamaye pariśivamayalalitapauṣpaparyaṅke |
adhicakramadhyamāste kāmākṣī nāma kimapi mama bhāgyam ||70||
rakṣyo'smi kāmapīṭhīlāsikayā ghanakṛpāmburāśikayā |
śrutiyuvatikuntalīmaṇimālikayā tuhinaśailabālikayā ||71||
līye puraharajāye māye tava taruṇapallavacchāye |
caraṇe candrābharaṇe kāñcīśaraṇe natārtisaṃharaṇe ||72||
mūrtimati muktibīje mūrdhni stabakitacakorasāmrājye |
moditakampākūle muhurmuhurmanasi mumudiṣā'smākam ||73||
vedamayīṃ nādamayīṃ bindumayīṃ parapadodyadindumayīm |
mantramayīṃ tantramayīṃ prakṛtimayīṃ naumi viśvavikṛtimayīm ||74||
puramathanapuṇyakoṭī puñjitakavilokasūktirasadhāṭī |
manasi mama kāmakoṭī viharatu karuṇāvipākaparipāṭī ||75||
kuṭilaṃ caṭulaṃ pṛthulaṃ mṛdulaṃ kacanayanajaghanacaraṇeṣu |
avalokitamavalambitamadhikampātaṭamameyamasmābhiḥ ||76||
pratyaṅmukhyā dṛṣṭayā prasādadīpāṅkureṇa kāmākṣyāḥ |
paśyāmi nistulamaho pacelimaṃ kamapi paraśivollāsam ||77||
vidye vidhātṛviṣaye kātyāyani kāli kāmakoṭikale |
bhārati bhairavi bhadre śākini śāmbhavi śive stuve bhavatīm ||78||
mālini maheśacālini kāñcīkhelini vipakṣakālini te |
śūlini vidrumaśālini surajanapālini kapālini namo'stu ||79||
deśika iti kiṃ śaṅke tattādṛktava nu taruṇimonmeṣaḥ |
kāmākṣi śūlapāṇeḥ kāmāgamasamayadīkṣāyām ||80||
vetaṇḍakumbhaḍambaravaitaṇḍikakucabharārtamadhyāya |
kuṅkumaruce namasyāṃ śaṅkaranayanāmṛtāya racayāmaḥ ||81||
adhikāñcitamaṇikāñcanakāñcīmadhikāñci kāñcidadrākṣam |
avanatajanānukampāmanukampākūlamasmadanukūlām ||82||
paricitakampātīraṃ parvatarājanyasukṛtasannāham |
paragurukṛpayā vīkṣe paramaśivotsaṅgamaṅgalābharaṇam ||83||
dagdhamadanasya śambhoḥ prathīyasīṃ brahmacaryavaidagdhīm |
tava devi taruṇimaśrīcaturimapāko na cakṣame mātaḥ ||84||
madajalatamālapatrā vasanitapatrā karādṛtakhānitrā |
viharati pulindayoṣā guñjābhūṣā phaṇīndrakṛtaveṣā ||85||
aṅke śukinī gīte kautukinī parisare ca gāyakinī |
jayasi savidhe'mba bhairavamaṇḍalinī śravasi śaṅkhakunḍalinī ||86||
praṇatajanatāpavargā kṛtabahusargā sasiṃhasaṃsargā |
kāmākṣi muditabhargā hataripuvargā tvameva sā durgā ||87||
śravaṇacaladvetaṇḍā samaroddaṇḍā dhutāsuraśikhaṇḍā |
devi kalitāntraṣaṇḍā dhṛtanaramuṇḍā tvameva cāmuṇḍā ||88||
urvīdharendrakanye darvībharitena bhaktapūreṇa |
gurvīmakiñcanārti kharvīkuruṣe tvameva kāmākṣi ||89||
tāḍitaripuparipīḍanabhayaharaṇa nipuṇahalamusalā |
kroḍapatibhīṣaṇamukhī krīḍasi jagati tvameva kāmākṣi ||90||
smaramathanavaraṇalolā manmathahelāvilāsamaṇiśālā |
kanakarucicauryaśīlā tvamamba bālā karābjadhṛtamālā ||91||
vimalapaṭī kamalakuṭī pustakarudrākṣaśastahastapuṭī |
kāmākṣi pakṣmalākṣī kalitavipañcī vibhāsi vairiñcī ||92||
kuṅkumarucipiṅgamasṛkpaṅkilamuṇḍālimaṇḍitaṃ mātaḥ |
śrīkāmākṣi tadīyasaṅgamakalāmandībhavatkautukaḥ
jayati tava rūpadheyaṃ japapaṭapustakavarābhayakarābjam ||93||
kanakamaṇikalitabhūṣāṃ kālāyasakalahaśīlakāntikalām |
kāmākṣi śīlaye tvāṃ kapālaśūlābhirāmakarakamalām ||94||
lohitimapuñjamadhye mohitabhuvane mudā nirīkṣante |
vadanaṃ tava kuvayugalaṃ kāñcīsīmāṃ ca ke'pi kāmākṣi ||95||
jaladhidviguṇitahutabahadiśādineśvarakalāśvineyadalaiḥ |
nalinairmaheśi gacchasi sarvottarakarakamaladalamamalam ||96||
satkṛtadeśikacaraṇāḥ sabījanirbījayoganiśreṇyā |
apavargasaudhavalabhīmārohantyamba ke'pi tava kṛpayā ||97||
antarapi bahirapi tvaṃ jantutaterantakāntakṛdahante |
cintitasantānavatāṃ santatamapi tantanīṣi mahimānam ||98||
kalamañjulavāganumitagalapañjaragataśukagrahautkaṇṭhyāt |
amba radanāmbaraṃ te bimbaphalaṃ śambarāriṇā nyastam ||99||
jaya jaya jagadamba śive jaya jaya kāmākṣi jaya jayādrisute |
jaya jaya maheśadayite jaya jaya cidgaganakaumudīdhāre ||100||
āryāśatakaṃ bhaktyā paṭhatāmāryākaṭākṣeṇa |
nissarati vadanakamalādvāṇī pīyūṣadhoraṇī divyā ||101||
|| iti āryāśatakaṃ sampūrṇam ||
🕉️ This is the original Sanskrit rendered in Malayalam script.
Pronunciation is identical to the Sanskrit Devanagari version.