યામુનાર્યસુધામ્ભોધિમવગાહ્ય યથામતિ ।
આદાય ભક્તિયોગાખ્યં રત્નં સન્દર્શયામ્યહમ્ ॥
સ્વાધીન ત્રિવિધચેતનાચેતનસ્વરૂપસ્થિતિ પ્રવૃત્તિભેદં, ક્લેશ કર્માદ્યશેષદોષાસંસ્પૃષ્ટં, સ્વાભાવિકાનવધિકાતિશય જ્ઞાનબલૈશ્વર્યવીર્યશક્તિતેજઃ પ્રભૃત્યસઙ્ખ્યેય કલ્યાણગુણગણૌઘ મહાર્ણવં, પરમપુરુષં, ભગવન્તં, નારાયણં, સ્વામિત્વેન સુહૃત્વેન ગુરુત્વેન ચ પરિગૃહ્ય ઐકાન્તિકાત્યન્તિક તત્પાદામ્બુજદ્વય પરિચર્યૈકમનોરથઃ, તત્પ્રાપ્તયે ચ તત્પાદામ્બુજદ્વય પ્રપત્તેરન્યન્ન મે કલ્પકોટિસહસ્રેણાપિ સાધનમસ્તીતિ મન્વાનઃ, તસ્યૈવ ભગવતો નારાયણસ્ય અખિલસત્ત્વદયૈકસાગરસ્ય અનાલોચિત ગુણગુણાખણ્ડ જનાનુકૂલામર્યાદ શીલવતઃ, સ્વાભાવિકાનવધિકાતિશય ગુણવત્તયા દેવતિર્યઙ્મનુષ્યાદ્યખિલજન હૃદયાનન્દનસ્ય આશ્રિતવાત્સલ્યૈકજલધેઃ ભક્તજનસંશ્લેષૈકભોગસ્ય નિત્યજ્ઞાનક્રિયૈશ્વર્યાદિ ભોગસામગ્રીસમૃદ્ધસ્ય, મહાવિભૂતેઃ, શ્રીમચ્ચરણારવિન્દયુગલં અનન્યાત્મસઞ્જીવનેન તદ્ગતસર્વભાવેન શરણમનુવ્રજેત્ । તતશ્ચ પ્રત્યહમાત્મોજ્જીવનાયૈવમનુસ્મરેત્ । ચતુર્દશભુવનાત્મકં અણ્ડં, દશગુણિતોત્તરં ચ આવરણસપ્તકં, સમસ્તં કાર્યકારણ(જાત)મતીત્ય, વર્તમાને પરમવ્યોમશબ્દાભિધેયે, બ્રહ્માદીનાં વાઙ્મનસાઽગોચરે, શ્રીમતિ વૈકુણ્ઠે દિવ્યલોકે, સનકવિધિશિવાદિભિરપિ અચિન્ત્યસ્વભાવૈશ્વર્યૈઃ, નિત્યસિદ્ધૈરનન્તૈર્ભગવદાનુકૂલ્યૈક ભોગૈર્દિવ્યપુરુષૈઃ મહાત્મભિઃ આપૂરિતે, તેષામપિ ઇયત્પરિમાણં, ઇયદૈશ્વર્યં, ઈદૃશસ્વભાવમિતિ પરિચ્છેત્તુમયોગ્યે, દિવ્યાવરણશતસહસ્રાવૃતે, દિવ્યકલ્પકતરૂપશોભિતે, દિવ્યોદ્યાન શતસહસ્રકોટિભિરાવૃતે, અતિપ્રમાણે દિવ્યાયતને, કસ્મિંશ્ચિદ્વિચિત્ર દિવ્યરત્નમય દિવ્યાસ્થાનમણ્ડપે, દિવ્યરત્નસ્તમ્ભ શતસહસ્રકોટિભિરુપશોભિતે,
દિવ્યનાનારત્નકૃતસ્થલ વિચિત્રિતે, દિવ્યાલઙ્કારાલઙ્કૃતે, પરિતઃ પતિતૈઃ પતમાનૈઃ પાદપસ્થૈશ્ચ નાનાગન્ધવર્ણૈર્દિવ્યપુષ્પૈઃ શોભમાનૈર્દિવ્યપુષ્પોપવનૈરુપશોભિતે, સઙ્કીર્ણપારિજાતાદિ કલ્પદ્રુમોપશોભિતૈઃ, અસઙ્કીર્ણૈશ્ચ કૈશ્ચિદન્તસ્સ્થપુષ્પરત્નાદિનિર્મિત દિવ્યલીલામણ્ડપ શતસહસ્રોપશોભિતૈઃ, સર્વદાઽનુભૂયમાનૈરપ્યપૂર્વવદાશ્ચર્યમાવહદ્ભિઃ ક્રીડાશૈલ શતસહસ્રૈરલઙ્કૃતૈઃ, કૈશ્ચિન્નારાયણદિવ્યલીલાઽસાધારણૈઃ, કૈશ્ચિત્પદ્મવનાલયા દિવ્યલીલાઽસાધારણૈઃ, સાધારણૈશ્ચ કૈશ્ચિત્ શુકશારિકામયૂરકોકિલાદિભિઃ કોમલકૂજિતૈરાકુલૈઃ, દિવ્યોદ્યાન શતસહસ્રૈરાવૃતે, મણિમુક્તાપ્રવાલ કૃતસોપાનૈઃ, દિવ્યામલામૃતરસોદકૈઃ, દિવ્યાણ્ડજવરૈઃ, અતિરમણીયદર્શનૈઃ અતિમનોહરમધુરસ્વરૈઃ આકુલૈઃ, અન્તસ્થ મુક્તામય દિવ્યક્રીડાસ્થાનોપશોભિતૈઃ દિવ્યસૌગન્ધિકવાપીશતસહસ્રૈઃ, દિવ્યરાજહંસાવલીવિરાજિતૈરાવૃતે, નિરસ્તાતિશયાનન્દૈકરસતયા ચાનન્ત્યાચ્ચ પ્રવિષ્ટાનુન્માદયદ્ભિઃ ક્રીડોદ્દેશૈર્વિરાજિતે, તત્ર તત્ર કૃત દિવ્યપુષ્પપર્યઙ્કોપશોભિતે, નાનાપુષ્પાસવાસ્વાદ મત્તભૃઙ્ગાવલીભિઃ ઉદ્ગીયમાન દિવ્યગાન્ધર્વેણાપૂરિતે, ચન્દનાગરુકર્પૂર દિવ્યપુષ્પાવગાહિ મન્દાનિલાસેવ્યમાને, મધ્યે પુષ્પસઞ્ચય વિચિત્રિતે, મહતિ દિવ્યયોગપર્યઙ્કે અનન્તભોગિનિ, શ્રીમદ્વૈકુણ્ઠૈશ્વર્યાદિ દિવ્યલોકં આત્મકાન્ત્યા વિશ્વમાપ્યાયયન્ત્યા શેષ શેષાશનાદિ સર્વપરિજનં ભગવતસ્તત્તદવસ્થોચિત પરિચર્યાયાં આજ્ઞાપયન્ત્યા, શીલરૂપગુણ વિલાસાદિભિઃ આત્માનુરૂપયા શ્રિયા સહાસીનં, પ્રત્યગ્રોન્મીલિત સરસિજસદૃશ નયનયુગલં, સ્વચ્છનીલજીમૂતસઙ્કાશં, અત્યુજ્જ્વલપીતવાસસં, સ્વયા પ્રભયાઽતિનિર્મલયા અતિશીતલયા અતિકોમલયા સ્વચ્છમાણિક્યાભયા કૃત્સ્નં જગદ્ભાસયન્તં,
અચિન્ત્યદિવ્યાદ્ભુત નિત્યયૌવન સ્વભાવલાવણ્યમયામૃતસાગરં, અતિસૌકુમાર્યાદિ ઈષત્ પ્રસ્વિન્નવદાલક્ષ્યમાણ લલાટફલક દિવ્યાલકાવલીવિરાજિતં, પ્રબુદ્ધમુગ્ધામ્બુજ ચારુલોચનં, સવિભ્રમભ્રૂલતં, ઉજ્જ્વલાધરં, શુચિસ્મિતં, કોમલગણ્ડં, ઉન્નસં, ઉદગ્રપીનાંસ વિલમ્બિકુણ્ડલાલકાવલી બન્ધુર કમ્બુકન્ધરં, પ્રિયાવતંસોત્પલ કર્ણભૂષણશ્લથાલકાબન્ધ વિમર્દશંસિભિઃ ચતુર્ભિરાજાનુવિલમ્બિભિર્ભુજૈર્વિરાજિતં, અતિકોમલ દિવ્યરેખાલઙ્કૃતાતામ્રકરતલં, દિવ્યાઙ્ગુલીયકવિરાજિતં, અતિકોમલ દિવ્યનખાવલીવિરાજિતં, અતિરક્તાઙ્ગુલીભિરલઙ્કૃતં, તત્ક્ષણોન્મીલિત પુણ્ડરીક સદૃશચરણયુગલં, અતિમનોહર કિરીટમકુટ ચૂડાવતંસ મકરકુણ્ડલ ગ્રૈવેયક હાર કેયૂર કટક શ્રીવત્સ કૌસ્તુભ મુક્તાદામોદરબન્ધન પીતામ્બર કાઞ્ચીગુણ નૂપુરાદિભિરત્યન્ત સુખસ્પર્શૈઃ દિવ્યગન્ધૈર્ભૂષણૈર્ભૂષિતં, શ્રીમત્યા વૈજયન્ત્યા વનમાલયા વિરાજિતં, શઙ્ખચક્રગદાઽસિ શાર્ઙ્ગાદિ દિવ્યાયુધૈઃ સેવ્યમાનં, સ્વસઙ્કલ્પમાત્રાવક્લુપ્ત જગજ્જન્મસ્થિતિધ્વંસાદિકે શ્રીમતિ વિષ્વક્સેને ન્યસ્ત સમસ્તાત્મૈશ્વર્યં, વૈનતેયાદિભિઃ સ્વભાવતો નિરસ્ત સમસ્ત સાંસારિક સ્વભાવૈઃ ભગવત્પરિચર્યાકરણ યોગ્યૈર્ભગવત્પરિચર્યૈકભોગૈ-ર્નિત્યસિદ્ધૈરનન્તૈઃ યથા યોગં સેવ્યમાનં, આત્મભોગેન અનનુસંહિતપરાદિકાલ દિવ્યામલ કોમલાવલોકનેન વિશ્વમાહ્લાદયન્તં, ઈષદુન્મીલિત મુખામ્બુજોદરવિનિર્ગતેન દિવ્યાનનારવિન્દ શોભાજનનેન દિવ્યગામ્ભીર્યૌદાર્ય સૌન્દર્ય માધુર્યાદ્યનવધિક ગુણગણવિભૂષિતેન, અતિમનોહર દિવ્યભાવગર્ભેણ દિવ્યલીલાઽઽલાપામૃતેન અખિલજન હૃદયાન્તરાણ્યાપૂરયન્તં ભગવન્તં નારાયણં ધ્યાનયોગેન દૃષ્ટ્વા, તતો ભગવતો નિત્યસ્વામ્યમાત્મનો નિત્યદાસ્યં ચ યથાવસ્થિતમનુસન્ધાય, કદાઽહં ભગવન્તં નારાયણં, મમ કુલનાથં, મમ કુલદૈવતં, મમ કુલધનં, મમ ભોગ્યં, મમ માતરં, મમ પિતરં, મમ સર્વં સાક્ષાત્કરવાણિ ચક્ષુષા ।
કદાઽહં ભગવત્પાદામ્બુજદ્વયં શિરસા સઙ્ગ્રહીષ્યામિ । કદાઽહં ભગવત્પાદામ્બુજદ્વય પરિચર્યાઽઽશયા નિરસ્તસમસ્તેતર ભોગાશઃ, અપગત સમસ્ત સાંસારિકસ્વભાવઃ તત્પાદામ્બુજદ્વયં પ્રવેક્ષ્યામિ । કદાઽહં ભગવત્પાદામ્બુજદ્વય પરિચર્યાકરણયોગ્ય-સ્તદેકભોગસ્તત્પાદૌ પરિચરિષ્યામિ । કદા માં ભગવાન્ સ્વકીયયા અતિશીતલયા દૃશા અવલોક્ય, સ્નિગ્ધગમ્ભીરમધુરયા ગિરા પરિચર્યાયાં આજ્ઞાપયિષ્યતિ, ઇતિ ભગવત્પરિચર્યાયામાશાં વર્ધયિત્વા તયૈવાઽશયા તત્પ્રસાદોપબૃંહિતયા ભગવન્તમુપેત્ય, દૂરાદેવ ભગવન્તં શેષભોગે શ્રિયા સહાસીનં વૈનતેયાદિભિઃ સેવ્યમાનં, સમસ્તપરિવારાય શ્રીમતે નારાયણાય નમઃ, ઇતિ પ્રણમ્ય ઉત્થાયોત્થાય પુનઃ પુનઃ પ્રણમ્ય અત્યન્ત સાધ્વસવિનયાવનતો ભૂત્વા, ભગવત્પારિષદગણનાયકૈર્દ્વારપાલૈઃ કૃપયા સ્નેહગર્ભયા દૃશાઽવલોકિતઃ સમ્યગભિવન્દિતૈસ્તૈસ્તૈરેવાનુમતો ભગવન્તમુપેત્ય, શ્રીમતા મૂલમન્ત્રેણ મામૈકાન્તિકાત્યન્તિક પરિચર્યાકરણાય પરિગૃહ્ણીષ્વ ઇતિ યાચમાનઃ પ્રણમ્યાત્માનં ભગવતે નિવેદયેત્ ।
તતો ભગવતા સ્વયમેવાત્મસઞ્જીવનેન અમર્યાદશીલવતા અતિપ્રેમાન્વિતેન અવલોકનેનાવલોક્ય સર્વદેશ સર્વકાલ સર્વાવસ્થોચિતાત્યન્તશેષભાવાય સ્વીકૃતોઽનુજ્ઞાતશ્ચ અત્યન્તસાધ્વસવિનયાવનતઃ કિઙ્કુર્વાણઃ કૃતાઞ્જલિપુટો ભગવન્તમુપાસીત । તતશ્ચાનુભૂયમાન ભાવવિશેષઃ નિરતિશયપ્રીત્યાઽન્યત્કિઞ્ચિત્કર્તું દ્રષ્ટું સ્મર્તુમશક્તઃ પુનરપિ શેષભાવમેવ યાચમાનો ભગવન્તમેવાવિચ્છિન્નસ્રોતોરૂપેણાવલોકનેન અવલોકયન્નાસીત । તતો ભગવતા સ્વયમેવાત્મસઞ્જીવનેનાવલોકનેનાવલોક્ય સસ્મિતમાહૂય સમસ્તક્લેશાપહં નિરતિશયસુખાવહમાત્મીયં, શ્રીમત્પાદારવિન્દયુગલં શિરસિ કૃતં ધ્યાત્વા, અમૃતસાગરાન્તર્નિમગ્નસર્વાવયવઃ સુખમાસીત ।
લક્ષ્મીપતેર્યતિપતેશ્ચ દયૈકધામ્નોઃ
યોઽસૌ પુરા સમજનિષ્ટ જગદ્ધિતાર્થમ્ ।
પ્રાપ્યં પ્રકાશયતુ નઃ પરમં રહસ્યં
સંવાદ એષ શરણાગતિ મન્ત્રસારઃ ॥
ઇતિ શ્રીભગવદ્રામાનુજવિરચિતે શ્રીવૈકુણ્ઠગદ્યમ્ ।
Roman (IAST) Transliteration
yāmunāryasudhāmbhodhimavagāhya yathāmati |
ādāya bhaktiyogākhyaṃ ratnaṃ sandarśayāmyaham ||
svādhīna trividhacetanācetanasvarūpasthiti pravṛttibhedaṃ, kleśa karmādyaśeṣadoṣāsaṃspṛṣṭaṃ, svābhāvikānavadhikātiśaya jñānabalaiśvaryavīryaśaktitejaḥ prabhṛtyasaṅkhyeya kalyāṇaguṇagaṇaugha mahārṇavaṃ, paramapuruṣaṃ, bhagavantaṃ, nārāyaṇaṃ, svāmitvena suhṛtvena gurutvena ca parigṛhya aikāntikātyantika tatpādāmbujadvaya paricaryaikamanorathaḥ, tatprāptaye ca tatpādāmbujadvaya prapatteranyanna me kalpakoṭisahasreṇāpi sādhanamastīti manvānaḥ, tasyaiva bhagavato nārāyaṇasya akhilasattvadayaikasāgarasya anālocita guṇaguṇākhaṇḍa janānukūlāmaryāda śīlavataḥ, svābhāvikānavadhikātiśaya guṇavattayā devatiryaṅmanuṣyādyakhilajana hṛdayānandanasya āśritavātsalyaikajaladheḥ bhaktajanasaṃśleṣaikabhogasya nityajñānakriyaiśvaryādi bhogasāmagrīsamṛddhasya, mahāvibhūteḥ, śrīmaccaraṇāravindayugalaṃ ananyātmasañjīvanena tadgatasarvabhāvena śaraṇamanuvrajet | tataśca pratyahamātmojjīvanāyaivamanusmaret | caturdaśabhuvanātmakaṃ aṇḍaṃ, daśaguṇitottaraṃ ca āvaraṇasaptakaṃ, samastaṃ kāryakāraṇa(jāta)matītya, vartamāne paramavyomaśabdābhidheye, brahmādīnāṃ vāṅmanasā'gocare, śrīmati vaikuṇṭhe divyaloke, sanakavidhiśivādibhirapi acintyasvabhāvaiśvaryaiḥ, nityasiddhairanantairbhagavadānukūlyaika bhogairdivyapuruṣaiḥ mahātmabhiḥ āpūrite, teṣāmapi iyatparimāṇaṃ, iyadaiśvaryaṃ, īdṛśasvabhāvamiti paricchettumayogye, divyāvaraṇaśatasahasrāvṛte, divyakalpakatarūpaśobhite, divyodyāna śatasahasrakoṭibhirāvṛte, atipramāṇe divyāyatane, kasmiṃścidvicitra divyaratnamaya divyāsthānamaṇḍape, divyaratnastambha śatasahasrakoṭibhirupaśobhite,
divyanānāratnakṛtasthala vicitrite, divyālaṅkārālaṅkṛte, paritaḥ patitaiḥ patamānaiḥ pādapasthaiśca nānāgandhavarṇairdivyapuṣpaiḥ śobhamānairdivyapuṣpopavanairupaśobhite, saṅkīrṇapārijātādi kalpadrumopaśobhitaiḥ, asaṅkīrṇaiśca kaiścidantassthapuṣparatnādinirmita divyalīlāmaṇḍapa śatasahasropaśobhitaiḥ, sarvadā'nubhūyamānairapyapūrvavadāścaryamāvahadbhiḥ krīḍāśaila śatasahasrairalaṅkṛtaiḥ, kaiścinnārāyaṇadivyalīlā'sādhāraṇaiḥ, kaiścitpadmavanālayā divyalīlā'sādhāraṇaiḥ, sādhāraṇaiśca kaiścit śukaśārikāmayūrakokilādibhiḥ komalakūjitairākulaiḥ, divyodyāna śatasahasrairāvṛte, maṇimuktāpravāla kṛtasopānaiḥ, divyāmalāmṛtarasodakaiḥ, divyāṇḍajavaraiḥ, atiramaṇīyadarśanaiḥ atimanoharamadhurasvaraiḥ ākulaiḥ, antastha muktāmaya divyakrīḍāsthānopaśobhitaiḥ divyasaugandhikavāpīśatasahasraiḥ, divyarājahaṃsāvalīvirājitairāvṛte, nirastātiśayānandaikarasatayā cānantyācca praviṣṭānunmādayadbhiḥ krīḍoddeśairvirājite, tatra tatra kṛta divyapuṣpaparyaṅkopaśobhite, nānāpuṣpāsavāsvāda mattabhṛṅgāvalībhiḥ udgīyamāna divyagāndharveṇāpūrite, candanāgarukarpūra divyapuṣpāvagāhi mandānilāsevyamāne, madhye puṣpasañcaya vicitrite, mahati divyayogaparyaṅke anantabhogini, śrīmadvaikuṇṭhaiśvaryādi divyalokaṃ ātmakāntyā viśvamāpyāyayantyā śeṣa śeṣāśanādi sarvaparijanaṃ bhagavatastattadavasthocita paricaryāyāṃ ājñāpayantyā, śīlarūpaguṇa vilāsādibhiḥ ātmānurūpayā śriyā sahāsīnaṃ, pratyagronmīlita sarasijasadṛśa nayanayugalaṃ, svacchanīlajīmūtasaṅkāśaṃ, atyujjvalapītavāsasaṃ, svayā prabhayā'tinirmalayā atiśītalayā atikomalayā svacchamāṇikyābhayā kṛtsnaṃ jagadbhāsayantaṃ,
acintyadivyādbhuta nityayauvana svabhāvalāvaṇyamayāmṛtasāgaraṃ, atisaukumāryādi īṣat prasvinnavadālakṣyamāṇa lalāṭaphalaka divyālakāvalīvirājitaṃ, prabuddhamugdhāmbuja cārulocanaṃ, savibhramabhrūlataṃ, ujjvalādharaṃ, śucismitaṃ, komalagaṇḍaṃ, unnasaṃ, udagrapīnāṃsa vilambikuṇḍalālakāvalī bandhura kambukandharaṃ, priyāvataṃsotpala karṇabhūṣaṇaślathālakābandha vimardaśaṃsibhiḥ caturbhirājānuvilambibhirbhujairvirājitaṃ, atikomala divyarekhālaṅkṛtātāmrakaratalaṃ, divyāṅgulīyakavirājitaṃ, atikomala divyanakhāvalīvirājitaṃ, atiraktāṅgulībhiralaṅkṛtaṃ, tatkṣaṇonmīlita puṇḍarīka sadṛśacaraṇayugalaṃ, atimanohara kirīṭamakuṭa cūḍāvataṃsa makarakuṇḍala graiveyaka hāra keyūra kaṭaka śrīvatsa kaustubha muktādāmodarabandhana pītāmbara kāñcīguṇa nūpurādibhiratyanta sukhasparśaiḥ divyagandhairbhūṣaṇairbhūṣitaṃ, śrīmatyā vaijayantyā vanamālayā virājitaṃ, śaṅkhacakragadā'si śārṅgādi divyāyudhaiḥ sevyamānaṃ, svasaṅkalpamātrāvaklupta jagajjanmasthitidhvaṃsādike śrīmati viṣvaksene nyasta samastātmaiśvaryaṃ, vainateyādibhiḥ svabhāvato nirasta samasta sāṃsārika svabhāvaiḥ bhagavatparicaryākaraṇa yogyairbhagavatparicaryaikabhogai-rnityasiddhairanantaiḥ yathā yogaṃ sevyamānaṃ, ātmabhogena ananusaṃhitaparādikāla divyāmala komalāvalokanena viśvamāhlādayantaṃ, īṣadunmīlita mukhāmbujodaravinirgatena divyānanāravinda śobhājananena divyagāmbhīryaudārya saundarya mādhuryādyanavadhika guṇagaṇavibhūṣitena, atimanohara divyabhāvagarbheṇa divyalīlā''lāpāmṛtena akhilajana hṛdayāntarāṇyāpūrayantaṃ bhagavantaṃ nārāyaṇaṃ dhyānayogena dṛṣṭvā, tato bhagavato nityasvāmyamātmano nityadāsyaṃ ca yathāvasthitamanusandhāya, kadā'haṃ bhagavantaṃ nārāyaṇaṃ, mama kulanāthaṃ, mama kuladaivataṃ, mama kuladhanaṃ, mama bhogyaṃ, mama mātaraṃ, mama pitaraṃ, mama sarvaṃ sākṣātkaravāṇi cakṣuṣā |
kadā'haṃ bhagavatpādāmbujadvayaṃ śirasā saṅgrahīṣyāmi | kadā'haṃ bhagavatpādāmbujadvaya paricaryā''śayā nirastasamastetara bhogāśaḥ, apagata samasta sāṃsārikasvabhāvaḥ tatpādāmbujadvayaṃ pravekṣyāmi | kadā'haṃ bhagavatpādāmbujadvaya paricaryākaraṇayogya-stadekabhogastatpādau paricariṣyāmi | kadā māṃ bhagavān svakīyayā atiśītalayā dṛśā avalokya, snigdhagambhīramadhurayā girā paricaryāyāṃ ājñāpayiṣyati, iti bhagavatparicaryāyāmāśāṃ vardhayitvā tayaivā'śayā tatprasādopabṛṃhitayā bhagavantamupetya, dūrādeva bhagavantaṃ śeṣabhoge śriyā sahāsīnaṃ vainateyādibhiḥ sevyamānaṃ, samastaparivārāya śrīmate nārāyaṇāya namaḥ, iti praṇamya utthāyotthāya punaḥ punaḥ praṇamya atyanta sādhvasavinayāvanato bhūtvā, bhagavatpāriṣadagaṇanāyakairdvārapālaiḥ kṛpayā snehagarbhayā dṛśā'valokitaḥ samyagabhivanditaistaistairevānumato bhagavantamupetya, śrīmatā mūlamantreṇa māmaikāntikātyantika paricaryākaraṇāya parigṛhṇīṣva iti yācamānaḥ praṇamyātmānaṃ bhagavate nivedayet |
tato bhagavatā svayamevātmasañjīvanena amaryādaśīlavatā atipremānvitena avalokanenāvalokya sarvadeśa sarvakāla sarvāvasthocitātyantaśeṣabhāvāya svīkṛto'nujñātaśca atyantasādhvasavinayāvanataḥ kiṅkurvāṇaḥ kṛtāñjalipuṭo bhagavantamupāsīta | tataścānubhūyamāna bhāvaviśeṣaḥ niratiśayaprītyā'nyatkiñcitkartuṃ draṣṭuṃ smartumaśaktaḥ punarapi śeṣabhāvameva yācamāno bhagavantamevāvicchinnasrotorūpeṇāvalokanena avalokayannāsīta | tato bhagavatā svayamevātmasañjīvanenāvalokanenāvalokya sasmitamāhūya samastakleśāpahaṃ niratiśayasukhāvahamātmīyaṃ, śrīmatpādāravindayugalaṃ śirasi kṛtaṃ dhyātvā, amṛtasāgarāntarnimagnasarvāvayavaḥ sukhamāsīta |
lakṣmīpateryatipateśca dayaikadhāmnoḥ
yo'sau purā samajaniṣṭa jagaddhitārtham |
prāpyaṃ prakāśayatu naḥ paramaṃ rahasyaṃ
saṃvāda eṣa śaraṇāgati mantrasāraḥ ||
iti śrībhagavadrāmānujaviracite śrīvaikuṇṭhagadyam |
Sanskrit — Devanagari (original)
यामुनार्यसुधाम्भोधिमवगाह्य यथामति ।
आदाय भक्तियोगाख्यं रत्नं सन्दर्शयाम्यहम् ॥
स्वाधीन त्रिविधचेतनाचेतनस्वरूपस्थिति प्रवृत्तिभेदं, क्लेश कर्माद्यशेषदोषासंस्पृष्टं, स्वाभाविकानवधिकातिशय ज्ञानबलैश्वर्यवीर्यशक्तितेजः प्रभृत्यसङ्ख्येय कल्याणगुणगणौघ महार्णवं, परमपुरुषं, भगवन्तं, नारायणं, स्वामित्वेन सुहृत्वेन गुरुत्वेन च परिगृह्य ऐकान्तिकात्यन्तिक तत्पादाम्बुजद्वय परिचर्यैकमनोरथः, तत्प्राप्तये च तत्पादाम्बुजद्वय प्रपत्तेरन्यन्न मे कल्पकोटिसहस्रेणापि साधनमस्तीति मन्वानः, तस्यैव भगवतो नारायणस्य अखिलसत्त्वदयैकसागरस्य अनालोचित गुणगुणाखण्ड जनानुकूलामर्याद शीलवतः, स्वाभाविकानवधिकातिशय गुणवत्तया देवतिर्यङ्मनुष्याद्यखिलजन हृदयानन्दनस्य आश्रितवात्सल्यैकजलधेः भक्तजनसंश्लेषैकभोगस्य नित्यज्ञानक्रियैश्वर्यादि भोगसामग्रीसमृद्धस्य, महाविभूतेः, श्रीमच्चरणारविन्दयुगलं अनन्यात्मसञ्जीवनेन तद्गतसर्वभावेन शरणमनुव्रजेत् । ततश्च प्रत्यहमात्मोज्जीवनायैवमनुस्मरेत् । चतुर्दशभुवनात्मकं अण्डं, दशगुणितोत्तरं च आवरणसप्तकं, समस्तं कार्यकारण(जात)मतीत्य, वर्तमाने परमव्योमशब्दाभिधेये, ब्रह्मादीनां वाङ्मनसाऽगोचरे, श्रीमति वैकुण्ठे दिव्यलोके, सनकविधिशिवादिभिरपि अचिन्त्यस्वभावैश्वर्यैः, नित्यसिद्धैरनन्तैर्भगवदानुकूल्यैक भोगैर्दिव्यपुरुषैः महात्मभिः आपूरिते, तेषामपि इयत्परिमाणं, इयदैश्वर्यं, ईदृशस्वभावमिति परिच्छेत्तुमयोग्ये, दिव्यावरणशतसहस्रावृते, दिव्यकल्पकतरूपशोभिते, दिव्योद्यान शतसहस्रकोटिभिरावृते, अतिप्रमाणे दिव्यायतने, कस्मिंश्चिद्विचित्र दिव्यरत्नमय दिव्यास्थानमण्डपे, दिव्यरत्नस्तम्भ शतसहस्रकोटिभिरुपशोभिते,
दिव्यनानारत्नकृतस्थल विचित्रिते, दिव्यालङ्कारालङ्कृते, परितः पतितैः पतमानैः पादपस्थैश्च नानागन्धवर्णैर्दिव्यपुष्पैः शोभमानैर्दिव्यपुष्पोपवनैरुपशोभिते, सङ्कीर्णपारिजातादि कल्पद्रुमोपशोभितैः, असङ्कीर्णैश्च कैश्चिदन्तस्स्थपुष्परत्नादिनिर्मित दिव्यलीलामण्डप शतसहस्रोपशोभितैः, सर्वदाऽनुभूयमानैरप्यपूर्ववदाश्चर्यमावहद्भिः क्रीडाशैल शतसहस्रैरलङ्कृतैः, कैश्चिन्नारायणदिव्यलीलाऽसाधारणैः, कैश्चित्पद्मवनालया दिव्यलीलाऽसाधारणैः, साधारणैश्च कैश्चित् शुकशारिकामयूरकोकिलादिभिः कोमलकूजितैराकुलैः, दिव्योद्यान शतसहस्रैरावृते, मणिमुक्ताप्रवाल कृतसोपानैः, दिव्यामलामृतरसोदकैः, दिव्याण्डजवरैः, अतिरमणीयदर्शनैः अतिमनोहरमधुरस्वरैः आकुलैः, अन्तस्थ मुक्तामय दिव्यक्रीडास्थानोपशोभितैः दिव्यसौगन्धिकवापीशतसहस्रैः, दिव्यराजहंसावलीविराजितैरावृते, निरस्तातिशयानन्दैकरसतया चानन्त्याच्च प्रविष्टानुन्मादयद्भिः क्रीडोद्देशैर्विराजिते, तत्र तत्र कृत दिव्यपुष्पपर्यङ्कोपशोभिते, नानापुष्पासवास्वाद मत्तभृङ्गावलीभिः उद्गीयमान दिव्यगान्धर्वेणापूरिते, चन्दनागरुकर्पूर दिव्यपुष्पावगाहि मन्दानिलासेव्यमाने, मध्ये पुष्पसञ्चय विचित्रिते, महति दिव्ययोगपर्यङ्के अनन्तभोगिनि, श्रीमद्वैकुण्ठैश्वर्यादि दिव्यलोकं आत्मकान्त्या विश्वमाप्याययन्त्या शेष शेषाशनादि सर्वपरिजनं भगवतस्तत्तदवस्थोचित परिचर्यायां आज्ञापयन्त्या, शीलरूपगुण विलासादिभिः आत्मानुरूपया श्रिया सहासीनं, प्रत्यग्रोन्मीलित सरसिजसदृश नयनयुगलं, स्वच्छनीलजीमूतसङ्काशं, अत्युज्ज्वलपीतवाससं, स्वया प्रभयाऽतिनिर्मलया अतिशीतलया अतिकोमलया स्वच्छमाणिक्याभया कृत्स्नं जगद्भासयन्तं,
अचिन्त्यदिव्याद्भुत नित्ययौवन स्वभावलावण्यमयामृतसागरं, अतिसौकुमार्यादि ईषत् प्रस्विन्नवदालक्ष्यमाण ललाटफलक दिव्यालकावलीविराजितं, प्रबुद्धमुग्धाम्बुज चारुलोचनं, सविभ्रमभ्रूलतं, उज्ज्वलाधरं, शुचिस्मितं, कोमलगण्डं, उन्नसं, उदग्रपीनांस विलम्बिकुण्डलालकावली बन्धुर कम्बुकन्धरं, प्रियावतंसोत्पल कर्णभूषणश्लथालकाबन्ध विमर्दशंसिभिः चतुर्भिराजानुविलम्बिभिर्भुजैर्विराजितं, अतिकोमल दिव्यरेखालङ्कृताताम्रकरतलं, दिव्याङ्गुलीयकविराजितं, अतिकोमल दिव्यनखावलीविराजितं, अतिरक्ताङ्गुलीभिरलङ्कृतं, तत्क्षणोन्मीलित पुण्डरीक सदृशचरणयुगलं, अतिमनोहर किरीटमकुट चूडावतंस मकरकुण्डल ग्रैवेयक हार केयूर कटक श्रीवत्स कौस्तुभ मुक्तादामोदरबन्धन पीताम्बर काञ्चीगुण नूपुरादिभिरत्यन्त सुखस्पर्शैः दिव्यगन्धैर्भूषणैर्भूषितं, श्रीमत्या वैजयन्त्या वनमालया विराजितं, शङ्खचक्रगदाऽसि शार्ङ्गादि दिव्यायुधैः सेव्यमानं, स्वसङ्कल्पमात्रावक्लुप्त जगज्जन्मस्थितिध्वंसादिके श्रीमति विष्वक्सेने न्यस्त समस्तात्मैश्वर्यं, वैनतेयादिभिः स्वभावतो निरस्त समस्त सांसारिक स्वभावैः भगवत्परिचर्याकरण योग्यैर्भगवत्परिचर्यैकभोगै-र्नित्यसिद्धैरनन्तैः यथा योगं सेव्यमानं, आत्मभोगेन अननुसंहितपरादिकाल दिव्यामल कोमलावलोकनेन विश्वमाह्लादयन्तं, ईषदुन्मीलित मुखाम्बुजोदरविनिर्गतेन दिव्याननारविन्द शोभाजननेन दिव्यगाम्भीर्यौदार्य सौन्दर्य माधुर्याद्यनवधिक गुणगणविभूषितेन, अतिमनोहर दिव्यभावगर्भेण दिव्यलीलाऽऽलापामृतेन अखिलजन हृदयान्तराण्यापूरयन्तं भगवन्तं नारायणं ध्यानयोगेन दृष्ट्वा, ततो भगवतो नित्यस्वाम्यमात्मनो नित्यदास्यं च यथावस्थितमनुसन्धाय, कदाऽहं भगवन्तं नारायणं, मम कुलनाथं, मम कुलदैवतं, मम कुलधनं, मम भोग्यं, मम मातरं, मम पितरं, मम सर्वं साक्षात्करवाणि चक्षुषा ।
कदाऽहं भगवत्पादाम्बुजद्वयं शिरसा सङ्ग्रहीष्यामि । कदाऽहं भगवत्पादाम्बुजद्वय परिचर्याऽऽशया निरस्तसमस्तेतर भोगाशः, अपगत समस्त सांसारिकस्वभावः तत्पादाम्बुजद्वयं प्रवेक्ष्यामि । कदाऽहं भगवत्पादाम्बुजद्वय परिचर्याकरणयोग्य-स्तदेकभोगस्तत्पादौ परिचरिष्यामि । कदा मां भगवान् स्वकीयया अतिशीतलया दृशा अवलोक्य, स्निग्धगम्भीरमधुरया गिरा परिचर्यायां आज्ञापयिष्यति, इति भगवत्परिचर्यायामाशां वर्धयित्वा तयैवाऽशया तत्प्रसादोपबृंहितया भगवन्तमुपेत्य, दूरादेव भगवन्तं शेषभोगे श्रिया सहासीनं वैनतेयादिभिः सेव्यमानं, समस्तपरिवाराय श्रीमते नारायणाय नमः, इति प्रणम्य उत्थायोत्थाय पुनः पुनः प्रणम्य अत्यन्त साध्वसविनयावनतो भूत्वा, भगवत्पारिषदगणनायकैर्द्वारपालैः कृपया स्नेहगर्भया दृशाऽवलोकितः सम्यगभिवन्दितैस्तैस्तैरेवानुमतो भगवन्तमुपेत्य, श्रीमता मूलमन्त्रेण मामैकान्तिकात्यन्तिक परिचर्याकरणाय परिगृह्णीष्व इति याचमानः प्रणम्यात्मानं भगवते निवेदयेत् ।
ततो भगवता स्वयमेवात्मसञ्जीवनेन अमर्यादशीलवता अतिप्रेमान्वितेन अवलोकनेनावलोक्य सर्वदेश सर्वकाल सर्वावस्थोचितात्यन्तशेषभावाय स्वीकृतोऽनुज्ञातश्च अत्यन्तसाध्वसविनयावनतः किङ्कुर्वाणः कृताञ्जलिपुटो भगवन्तमुपासीत । ततश्चानुभूयमान भावविशेषः निरतिशयप्रीत्याऽन्यत्किञ्चित्कर्तुं द्रष्टुं स्मर्तुमशक्तः पुनरपि शेषभावमेव याचमानो भगवन्तमेवाविच्छिन्नस्रोतोरूपेणावलोकनेन अवलोकयन्नासीत । ततो भगवता स्वयमेवात्मसञ्जीवनेनावलोकनेनावलोक्य सस्मितमाहूय समस्तक्लेशापहं निरतिशयसुखावहमात्मीयं, श्रीमत्पादारविन्दयुगलं शिरसि कृतं ध्यात्वा, अमृतसागरान्तर्निमग्नसर्वावयवः सुखमासीत ।
लक्ष्मीपतेर्यतिपतेश्च दयैकधाम्नोः
योऽसौ पुरा समजनिष्ट जगद्धितार्थम् ।
प्राप्यं प्रकाशयतु नः परमं रहस्यं
संवाद एष शरणागति मन्त्रसारः ॥
इति श्रीभगवद्रामानुजविरचिते श्रीवैकुण्ठगद्यम् ।
yāmunāryasudhāmbhodhimavagāhya yathāmati |
ādāya bhaktiyogākhyaṃ ratnaṃ sandarśayāmyaham ||
svādhīna trividhacetanācetanasvarūpasthiti pravṛttibhedaṃ, kleśa karmādyaśeṣadoṣāsaṃspṛṣṭaṃ, svābhāvikānavadhikātiśaya jñānabalaiśvaryavīryaśaktitejaḥ prabhṛtyasaṅkhyeya kalyāṇaguṇagaṇaugha mahārṇavaṃ, paramapuruṣaṃ, bhagavantaṃ, nārāyaṇaṃ, svāmitvena suhṛtvena gurutvena ca parigṛhya aikāntikātyantika tatpādāmbujadvaya paricaryaikamanorathaḥ, tatprāptaye ca tatpādāmbujadvaya prapatteranyanna me kalpakoṭisahasreṇāpi sādhanamastīti manvānaḥ, tasyaiva bhagavato nārāyaṇasya akhilasattvadayaikasāgarasya anālocita guṇaguṇākhaṇḍa janānukūlāmaryāda śīlavataḥ, svābhāvikānavadhikātiśaya guṇavattayā devatiryaṅmanuṣyādyakhilajana hṛdayānandanasya āśritavātsalyaikajaladheḥ bhaktajanasaṃśleṣaikabhogasya nityajñānakriyaiśvaryādi bhogasāmagrīsamṛddhasya, mahāvibhūteḥ, śrīmaccaraṇāravindayugalaṃ ananyātmasañjīvanena tadgatasarvabhāvena śaraṇamanuvrajet | tataśca pratyahamātmojjīvanāyaivamanusmaret | caturdaśabhuvanātmakaṃ aṇḍaṃ, daśaguṇitottaraṃ ca āvaraṇasaptakaṃ, samastaṃ kāryakāraṇa(jāta)matītya, vartamāne paramavyomaśabdābhidheye, brahmādīnāṃ vāṅmanasā'gocare, śrīmati vaikuṇṭhe divyaloke, sanakavidhiśivādibhirapi acintyasvabhāvaiśvaryaiḥ, nityasiddhairanantairbhagavadānukūlyaika bhogairdivyapuruṣaiḥ mahātmabhiḥ āpūrite, teṣāmapi iyatparimāṇaṃ, iyadaiśvaryaṃ, īdṛśasvabhāvamiti paricchettumayogye, divyāvaraṇaśatasahasrāvṛte, divyakalpakatarūpaśobhite, divyodyāna śatasahasrakoṭibhirāvṛte, atipramāṇe divyāyatane, kasmiṃścidvicitra divyaratnamaya divyāsthānamaṇḍape, divyaratnastambha śatasahasrakoṭibhirupaśobhite,
divyanānāratnakṛtasthala vicitrite, divyālaṅkārālaṅkṛte, paritaḥ patitaiḥ patamānaiḥ pādapasthaiśca nānāgandhavarṇairdivyapuṣpaiḥ śobhamānairdivyapuṣpopavanairupaśobhite, saṅkīrṇapārijātādi kalpadrumopaśobhitaiḥ, asaṅkīrṇaiśca kaiścidantassthapuṣparatnādinirmita divyalīlāmaṇḍapa śatasahasropaśobhitaiḥ, sarvadā'nubhūyamānairapyapūrvavadāścaryamāvahadbhiḥ krīḍāśaila śatasahasrairalaṅkṛtaiḥ, kaiścinnārāyaṇadivyalīlā'sādhāraṇaiḥ, kaiścitpadmavanālayā divyalīlā'sādhāraṇaiḥ, sādhāraṇaiśca kaiścit śukaśārikāmayūrakokilādibhiḥ komalakūjitairākulaiḥ, divyodyāna śatasahasrairāvṛte, maṇimuktāpravāla kṛtasopānaiḥ, divyāmalāmṛtarasodakaiḥ, divyāṇḍajavaraiḥ, atiramaṇīyadarśanaiḥ atimanoharamadhurasvaraiḥ ākulaiḥ, antastha muktāmaya divyakrīḍāsthānopaśobhitaiḥ divyasaugandhikavāpīśatasahasraiḥ, divyarājahaṃsāvalīvirājitairāvṛte, nirastātiśayānandaikarasatayā cānantyācca praviṣṭānunmādayadbhiḥ krīḍoddeśairvirājite, tatra tatra kṛta divyapuṣpaparyaṅkopaśobhite, nānāpuṣpāsavāsvāda mattabhṛṅgāvalībhiḥ udgīyamāna divyagāndharveṇāpūrite, candanāgarukarpūra divyapuṣpāvagāhi mandānilāsevyamāne, madhye puṣpasañcaya vicitrite, mahati divyayogaparyaṅke anantabhogini, śrīmadvaikuṇṭhaiśvaryādi divyalokaṃ ātmakāntyā viśvamāpyāyayantyā śeṣa śeṣāśanādi sarvaparijanaṃ bhagavatastattadavasthocita paricaryāyāṃ ājñāpayantyā, śīlarūpaguṇa vilāsādibhiḥ ātmānurūpayā śriyā sahāsīnaṃ, pratyagronmīlita sarasijasadṛśa nayanayugalaṃ, svacchanīlajīmūtasaṅkāśaṃ, atyujjvalapītavāsasaṃ, svayā prabhayā'tinirmalayā atiśītalayā atikomalayā svacchamāṇikyābhayā kṛtsnaṃ jagadbhāsayantaṃ,
acintyadivyādbhuta nityayauvana svabhāvalāvaṇyamayāmṛtasāgaraṃ, atisaukumāryādi īṣat prasvinnavadālakṣyamāṇa lalāṭaphalaka divyālakāvalīvirājitaṃ, prabuddhamugdhāmbuja cārulocanaṃ, savibhramabhrūlataṃ, ujjvalādharaṃ, śucismitaṃ, komalagaṇḍaṃ, unnasaṃ, udagrapīnāṃsa vilambikuṇḍalālakāvalī bandhura kambukandharaṃ, priyāvataṃsotpala karṇabhūṣaṇaślathālakābandha vimardaśaṃsibhiḥ caturbhirājānuvilambibhirbhujairvirājitaṃ, atikomala divyarekhālaṅkṛtātāmrakaratalaṃ, divyāṅgulīyakavirājitaṃ, atikomala divyanakhāvalīvirājitaṃ, atiraktāṅgulībhiralaṅkṛtaṃ, tatkṣaṇonmīlita puṇḍarīka sadṛśacaraṇayugalaṃ, atimanohara kirīṭamakuṭa cūḍāvataṃsa makarakuṇḍala graiveyaka hāra keyūra kaṭaka śrīvatsa kaustubha muktādāmodarabandhana pītāmbara kāñcīguṇa nūpurādibhiratyanta sukhasparśaiḥ divyagandhairbhūṣaṇairbhūṣitaṃ, śrīmatyā vaijayantyā vanamālayā virājitaṃ, śaṅkhacakragadā'si śārṅgādi divyāyudhaiḥ sevyamānaṃ, svasaṅkalpamātrāvaklupta jagajjanmasthitidhvaṃsādike śrīmati viṣvaksene nyasta samastātmaiśvaryaṃ, vainateyādibhiḥ svabhāvato nirasta samasta sāṃsārika svabhāvaiḥ bhagavatparicaryākaraṇa yogyairbhagavatparicaryaikabhogai-rnityasiddhairanantaiḥ yathā yogaṃ sevyamānaṃ, ātmabhogena ananusaṃhitaparādikāla divyāmala komalāvalokanena viśvamāhlādayantaṃ, īṣadunmīlita mukhāmbujodaravinirgatena divyānanāravinda śobhājananena divyagāmbhīryaudārya saundarya mādhuryādyanavadhika guṇagaṇavibhūṣitena, atimanohara divyabhāvagarbheṇa divyalīlā''lāpāmṛtena akhilajana hṛdayāntarāṇyāpūrayantaṃ bhagavantaṃ nārāyaṇaṃ dhyānayogena dṛṣṭvā, tato bhagavato nityasvāmyamātmano nityadāsyaṃ ca yathāvasthitamanusandhāya, kadā'haṃ bhagavantaṃ nārāyaṇaṃ, mama kulanāthaṃ, mama kuladaivataṃ, mama kuladhanaṃ, mama bhogyaṃ, mama mātaraṃ, mama pitaraṃ, mama sarvaṃ sākṣātkaravāṇi cakṣuṣā |
kadā'haṃ bhagavatpādāmbujadvayaṃ śirasā saṅgrahīṣyāmi | kadā'haṃ bhagavatpādāmbujadvaya paricaryā''śayā nirastasamastetara bhogāśaḥ, apagata samasta sāṃsārikasvabhāvaḥ tatpādāmbujadvayaṃ pravekṣyāmi | kadā'haṃ bhagavatpādāmbujadvaya paricaryākaraṇayogya-stadekabhogastatpādau paricariṣyāmi | kadā māṃ bhagavān svakīyayā atiśītalayā dṛśā avalokya, snigdhagambhīramadhurayā girā paricaryāyāṃ ājñāpayiṣyati, iti bhagavatparicaryāyāmāśāṃ vardhayitvā tayaivā'śayā tatprasādopabṛṃhitayā bhagavantamupetya, dūrādeva bhagavantaṃ śeṣabhoge śriyā sahāsīnaṃ vainateyādibhiḥ sevyamānaṃ, samastaparivārāya śrīmate nārāyaṇāya namaḥ, iti praṇamya utthāyotthāya punaḥ punaḥ praṇamya atyanta sādhvasavinayāvanato bhūtvā, bhagavatpāriṣadagaṇanāyakairdvārapālaiḥ kṛpayā snehagarbhayā dṛśā'valokitaḥ samyagabhivanditaistaistairevānumato bhagavantamupetya, śrīmatā mūlamantreṇa māmaikāntikātyantika paricaryākaraṇāya parigṛhṇīṣva iti yācamānaḥ praṇamyātmānaṃ bhagavate nivedayet |
tato bhagavatā svayamevātmasañjīvanena amaryādaśīlavatā atipremānvitena avalokanenāvalokya sarvadeśa sarvakāla sarvāvasthocitātyantaśeṣabhāvāya svīkṛto'nujñātaśca atyantasādhvasavinayāvanataḥ kiṅkurvāṇaḥ kṛtāñjalipuṭo bhagavantamupāsīta | tataścānubhūyamāna bhāvaviśeṣaḥ niratiśayaprītyā'nyatkiñcitkartuṃ draṣṭuṃ smartumaśaktaḥ punarapi śeṣabhāvameva yācamāno bhagavantamevāvicchinnasrotorūpeṇāvalokanena avalokayannāsīta | tato bhagavatā svayamevātmasañjīvanenāvalokanenāvalokya sasmitamāhūya samastakleśāpahaṃ niratiśayasukhāvahamātmīyaṃ, śrīmatpādāravindayugalaṃ śirasi kṛtaṃ dhyātvā, amṛtasāgarāntarnimagnasarvāvayavaḥ sukhamāsīta |
lakṣmīpateryatipateśca dayaikadhāmnoḥ
yo'sau purā samajaniṣṭa jagaddhitārtham |
prāpyaṃ prakāśayatu naḥ paramaṃ rahasyaṃ
saṃvāda eṣa śaraṇāgati mantrasāraḥ ||
iti śrībhagavadrāmānujaviracite śrīvaikuṇṭhagadyam |
🕉️ This is the original Sanskrit rendered in Gujarati script.
Pronunciation is identical to the Sanskrit Devanagari version.