తైత్తిరీయ బ్రాహ్మణ - అష్టకం 3, ప్రశ్నః 1,
తైత్తిరీయ సంహితా - కాణ్డ 3, ప్రపాఠకః 5, అనువాకం 1
నక్షత్రం - కృత్తికా, దేవతా - అగ్నిః
ఓం అ॒గ్నిర్నః॑ పాతు॒ కృత్తి॑కాః । నక్ష॑త్ర-న్దే॒వమి॑న్ద్రి॒యమ్ ।
ఇ॒దమా॑సాం-విఁచక్ష॒ణమ్ । హ॒విరా॒స-ఞ్జు॑హోతన ।
యస్య॒ భాన్తి॑ ర॒శ్మయో॒ యస్య॑ కే॒తవః॑ । యస్యే॒మా విశ్వా॒ భువ॑నాని॒ సర్వా᳚ ।
1
స కృత్తి॑కాభి-ర॒భిసం॒వఁసా॑నః । అ॒గ్నిర్నో॑ దే॒వస్సు॑వి॒తే ద॑ధాతు ॥ 1
నక్షత్రం - రోహిణీ, దేవతా - ప్రజాపతిః
ప్ర॒జాప॑తే రోహి॒ణీవే॑తు॒ పత్నీ᳚ । వి॒శ్వరూ॑పా బృహ॒తీ చి॒త్రభా॑నుః ।
సా నో॑ య॒జ్ఞస్య॑ సువి॒తే ద॑ధాతు । యథా॒ జీవే॑మ శ॒రద॒స్సవీ॑రాః ।
రో॒హి॒ణీ దే॒వ్యుద॑గాత్పు॒రస్తా᳚త్ । విశ్వా॑ రూ॒పాణి॑ ప్రతి॒మోద॑మానా ।
2
ప్ర॒జాప॑తిగ్ం హ॒విషా॑ వ॒ర్ధయ॑న్తీ । ప్రి॒యా దే॒వానా॒-ముప॑యాతు య॒జ్ఞమ్ ॥ 2
నక్షత్రం - మృగశీర్షః, దేవతా - సోమః
సోమో॒ రాజా॑ మృగశీ॒ర్॒షేణ॒ ఆగన్న్॑ । శి॒వ-న్నక్ష॑త్ర-మ్ప్రి॒యమ॑స్య॒ ధామ॑ ।
ఆ॒ప్యాయ॑మానో బహు॒ధా జనే॑షు । రేతః॑ ప్ర॒జాం-యఁజ॑మానే దధాతు ।
యత్తే॒ నక్ష॑త్ర-మ్మృగశీ॒ర్॒షమస్తి॑ । ప్రి॒యగ్ం రా॑జ-న్ప్రి॒యత॑మ-మ్ప్రి॒యాణా᳚మ్ ।
3
తస్మై॑ తే సోమ హ॒విషా॑ విధేమ । శన్న॑ ఏధి ద్వి॒పదే॒ శఞ్చతు॑ష్పదే ॥ 3
నక్షత్రం - ఆర్ద్రా, దేవతా - రుద్రః
ఆ॒ర్ద్రయా॑ రు॒ద్రః ప్రథ॑మా న ఏతి । శ్రేష్ఠో॑ దే॒వానా॒-మ్పతి॑రఘ్ని॒యానా᳚మ్ ।
నక్ష॑త్రమస్య హ॒విషా॑ విధేమ । మా నః॑ ప్ర॒జాగ్ం రీ॑రిష॒న్మోత వీ॒రాన్ ।
హే॒తీ రు॒ద్రస్య॒ పరి॑ణో వృణక్తు । ఆ॒ర్ద్రా నక్ష॑త్ర-ఞ్జుషతాగ్ం హ॒విర్నః॑ ।
4
ప్ర॒ము॒ఞ్చమా॑నౌ దురి॒తాని॒ విశ్వా᳚ । అపా॒ఘశగ్ం॑ సన్ను-దతా॒మరా॑తిమ్ ॥ 4
నక్షత్రం - పునర్వసు, దేవతా - అదితిః
పున॑ర్నో దే॒వ్యది॑తి-స్పృణోతు । పున॑ర్వసూ నః॒ పున॒రేతాం᳚-యఁ॒జ్ఞమ్ ।
పున॑ర్నో దే॒వా అ॒భియ॑న్తు॒ సర్వే᳚ । పునః॑ పునర్వో హ॒విషా॑ యజామః ।
ఏ॒వా న దే॒వ్య-ది॑తిరన॒ర్వా । విశ్వ॑స్య భ॒ర్త్రీ జగ॑తః ప్రతి॒ష్ఠా ।
5
పున॑ర్వసూ హ॒విషా॑ వ॒ర్ధయ॑న్తీ । ప్రి॒య-న్దే॒వానా॒-మప్యే॑తు॒ పాథః॑ ॥ 5
నక్షత్రం - పుష్యః, దేవతా - బృహస్పతిః
బృహ॒స్పతిః॑ ప్రథ॒మఞ్జాయ॑మానః । తి॒ష్య॑-న్నక్ష॑త్రమ॒భి సమ్బ॑భూవ ।
శ్రేష్ఠో॑ దే॒వానా॒-మ్పృత॑నాసు జి॒ష్ణుః । ది॒శో-ఽను॒ సర్వా॒ అభ॑యన్నో అస్తు ।
తి॒ష్యః॑ పు॒రస్తా॑దు॒త మ॑ధ్య॒తో నః॑ । బృహ॒స్పతి॑ర్నః॒ పరి॑పాతు ప॒శ్చాత్ ।
6
బాధే॑ తా॒న్ద్వేషో॒ అభ॑య-ఙ్కృణుతామ్ । సు॒వీర్య॑స్య॒ పత॑యస్యామ ॥ 6
నక్షత్రం -ఆశ్రేషమ్, దేవతా - సర్పాః
ఇ॒దగ్ం స॒ర్పేభ్యో॑ హ॒విర॑స్తు॒ జుష్ట᳚మ్ । ఆ॒శ్రే॒షా యేషా॑మను॒యన్తి॒ చేతః॑ ।
యే అ॒న్తరి॑క్ష-మ్పృథి॒వీం-క్షి॒యన్తి॑ । తేన॑ స్స॒ర్పాసో॒ హవ॒మాగ॑మిష్ఠాః ।
యే రో॑చ॒నే సూర్య॒స్యాపి॑ స॒ర్పాః । యే దివ॑-న్దే॒వీ-మను॑స॒ఞ్చర॑న్తి ।
7
యేషా॑మాశ్రే॒షా అ॑ను॒యన్తి॒ కామ᳚మ్ । తేభ్య॑-స్స॒ర్పేభ్యో॒ మధు॑-మజ్జుహోమి ॥ 7
నక్షత్రం - మఘా, దేవతా - పితరః
ఉప॑హూతాః పి॒తరో॒ యే మ॒ఘాసు॑ । మనో॑జవస-స్సు॒కృత॑-స్సుకృ॒త్యాః ।
తే నో॒ నక్ష॑త్రే॒ హవ॒మాగ॑మిష్ఠాః । స్వ॒ధాభి॑ర్య॒జ్ఞ-మ్ప్రయ॑త-ఞ్జుషన్తామ్ ।
యే అ॑గ్నిద॒గ్ధా యే-ఽన॑గ్ని-దగ్ధాః । యే॑-ఽముల్లో॒క-మ్పి॒తరః॑, క్షి॒యన్తి॑ ।
8
యాగ్శ్చ॑ వి॒ద్మయాగ్ం ఉ॑ చ॒ న ప్ర॑వి॒ద్మ । మ॒ఘాసు॑ య॒జ్ఞగ్ం సుకృ॑త-ఞ్జుషన్తామ్ ॥ 8
నక్షత్రం - పూర్వఫల్గునీ, దేవతా - అర్యమా
గవా॒-మ్పతిః॒ ఫల్గు॑నీ-నామసి॒ త్వమ్ । తద॑ర్యమన్వరుణ మిత్ర॒ చారు॑ ।
త-న్త్వా॑ వ॒యగ్ం స॑ని॒తారగ్ం॑ సనీ॒నామ్ । జీ॒వా జీవ॑న్త॒ముప॒ సంవిఁ॑శేమ ।
యేనే॒మా విశ్వా॒ భువ॑నాని॒ సఞ్జి॑తా । యస్య॑ దే॒వా అ॑నుసం॒యఁన్తి॒ చేతః॑ ।
9
అ॒ర్య॒మా రాజా॒-ఽజర॒స్తు వి॑ష్మాన్ । ఫల్గు॑నీనా-మృష॒భో రో॑రవీతి ॥ 9
నక్షత్రం - ఉత్తర ఫల్గునీ, దేవతా - భగః
శ్రేష్ఠో॑ దే॒వానా᳚-మ్భగవో భగాసి । తత్త్వా॑ విదుః॒ ఫల్గు॑నీ॒-స్తస్య॑ విత్తాత్ ।
అ॒స్మభ్యం॑-క్ష॒త్రమ॒జరగ్ం॑ సు॒వీర్య᳚మ్ । గోమ॒దశ్వ॑-వ॒దుప॒సన్ను॑-దే॒హ ।
భగో॑హ దా॒తా భగ॒ ఇత్ప్ర॑దా॒తా । భగో॑ దే॒వీః ఫల్గు॑నీ॒-రావి॑వేశ ।
10
భగ॒స్యేత్త-మ్ప్ర॑స॒వ-ఙ్గ॑మేమ । యత్ర॑ దే॒వై-స్స॑ధ॒మాద॑-మ్మదేమ ॥ 10
నక్షత్రం - హస్తః, దేవతా - సవితా
ఆయా॑తు దే॒వ-స్స॑వి॒తో ప॑యాతు । హి॒ర॒ణ్యయే॑న సు॒వృతా॒ రథే॑న ।
వహ॒న॒, హస్తగ్ం॑ సు॒భగం॑-విఁద్మ॒నాప॑సమ్ । ప్ర॒యచ్ఛ॑న్త॒-మ్పపు॑రి॒-మ్పుణ్య॒మచ్ఛ॑ ।
హస్తః॒ ప్రయ॑చ్ఛ త్వ॒మృతం॒-వఁసీ॑యః । దక్షి॑ణేన॒ ప్రతి॑గృభ్ణీమ ఏనత్ ।
11
దా॒తార॑-మ॒ద్య స॑వి॒తా వి॑దేయ । యో నో॒ హస్తా॑య ప్రసు॒వాతి॑ య॒జ్ఞమ్ ॥ 11
నక్షత్రం - చిత్రా, దేవతా - త్వష్టా
త్వష్టా॒ నక్ష॑త్ర-మ॒భ్యే॑తి చి॒త్రామ్ । సు॒భగ్ం స॑సంయుఁవ॒తిగ్ం రోచ॑మానామ్ ।
ని॒వే॒శయ॑-న్న॒మృతా॒-న్మర్త్యాగ్॑శ్చ । రూ॒పాణి॑ పి॒గ్ం॒శ-న్భువ॑నాని॒ విశ్వా᳚ ।
తన్న॒స్త్వష్టా॒ తదు॑ చి॒త్రా విచ॑ష్టామ్ । తన్నక్ష॑త్ర-మ్భూరి॒దా అ॑స్తు॒ మహ్య᳚మ్ ।
12
తన్నః॑ ప్ర॒జాం-వీఁ॒రవ॑తీగ్ం సనోతు । గోభి॑ర్నో॒ అశ్వై॒-స్సమ॑నక్తు య॒జ్ఞమ్ ॥ 12
నక్షత్రం - స్వాతీ, దేవతా - వాయుః
వా॒యు-ర్నక్ష॑త్ర-మ॒భ్యే॑తి॒ నిష్ట్యా᳚మ్ । తి॒గ్మశృ॑ఙ్గో వృష॒భో రోరు॑వాణః ।
స॒మీ॒రయ॒-న్భువ॑నా మాత॒రిశ్వా᳚ । అప॒ ద్వేషాగ్ం॑సి నుదతా॒మరా॑తీః ।
తన్నో॑ వా॒యస్తదు॒ నిష్ట్యా॑ శృణోతు । తన్నక్ష॑త్ర-మ్భూరి॒దా అ॑స్తు॒ మహ్య᳚మ్ ।
13
తన్నో॑ దే॒వాసో॒ అను॑ జానన్తు॒ కామ᳚మ్ । యథా॒ తరే॑మ దురి॒తాని॒ విశ్వా᳚ ॥ 13
నక్షత్రం - విశాఖా, దేవతా - ఇన్ద్రాగ్నీ
దూ॒రమ॒స్మచ్ఛత్ర॑వో యన్తు భీ॒తాః । తది॑న్ద్రా॒గ్నీ కృ॑ణుతా॒-న్తద్విశా॑ఖే ।
తన్నో॑ దే॒వా అను॑మదన్తు య॒జ్ఞమ్ । ప॒శ్చా-త్పు॒రస్తా॒-దభ॑యన్నో అస్తు ।
నక్ష॑త్రాణా॒-మధి॑పత్నీ॒ విశా॑ఖే । శ్రేష్ఠా॑-విన్ద్రా॒గ్నీ భువ॑నస్య గో॒పౌ ।
14
విషూ॑చ॒-శ్శత్రూ॑నప॒బాధ॑మానౌ । అప॒క్షుధ॑-న్నుదతా॒మరా॑తిమ్ ॥ 14
పౌర్ణమాసి
పూ॒ర్ణా ప॒శ్చాదు॒త పూ॒ర్ణా పు॒రస్తా᳚త్ । ఉన్మ॑ధ్య॒తః పౌ᳚ర్ణమా॒సీ జి॑గాయ ।
తస్యా᳚-న్దే॒వా అధి॑ సం॒-వఁస॑న్తః । ఉ॒త్త॒మే నాక॑ ఇ॒హ మా॑దయన్తామ్ ।
పృ॒థ్వీ సు॒వర్చా॑ యువ॒తి-స్స॒జోషాః᳚ । పౌ॒ర్ణ॒మా॒స్యుద॑గా॒-చ్ఛోభ॑మానా ।
15
ఆ॒ప్యా॒యయ॑న్తీ దురి॒తాని॒ విశ్వా᳚ । ఉ॒రు-న్దుహాం॒-యఁజ॑మానాయ య॒జ్ఞమ్ ॥ 15
నక్షత్రం - అనూరాధా, దేవతా - మిత్రః
ఋ॒ద్ధ్యాస్మ॑ హ॒వ్యై-ర్నమ॑సోప॒-సద్య॑ । మి॒త్ర-న్దే॒వ-మ్మి॑త్ర॒ధేయ॑న్నో అస్తు ।
అ॒నూ॒రా॒ధాన్, హ॒విషా॑ వ॒ర్ధయ॑న్తః । శ॒త-ఞ్జీ॑వేమ శ॒రద॒-స్సవీ॑రాః ।
చి॒త్రం-నక్ష॑త్ర॒-ముద॑గా-త్పు॒రస్తా᳚త్ । అ॒నూ॒రా॒ధా స॒ ఇతి॒ యద్వద॑న్తి ।
16
తన్మి॒త్ర ఏ॑తి ప॒థిభి॑-ర్దేవ॒యానైః᳚ । హి॒ర॒ణ్యయై॒-ర్విత॑తై-ర॒న్తరి॑క్షే ॥ 16
నక్షత్రం - జ్యేష్ఠా, దేవతా - ఇన్ద్రః
ఇన్ద్రో᳚ జ్యే॒ష్ఠా మను॒ నక్ష॑త్రమేతి । యస్మి॑న్ వృ॒త్రం-వృఁ॑త్ర॒ తూర్యే॑ త॒తార॑ ।
తస్మి॑న్వ॒య-మ॒మృత॒-న్దుహా॑నాః । క్షుధ॑న్తరేమ॒ దురి॑తి॒-న్దురి॑ష్టిమ్ ।
పు॒ర॒న్ద॒రాయ॑ వృష॒భాయ॑ ధృ॒ష్ణవే᳚ । అషా॑ఢాయ॒ సహ॑మానాయ మీ॒ఢుషే᳚ ।
17
ఇన్ద్రా॑య జ్యే॒ష్ఠా మధు॑మ॒ద్దుహా॑నా । ఉ॒రు-ఙ్కృ॑ణోతు॒ యజ॑మానాయ లో॒కమ్ ॥ 17
నక్షత్రం - మూలమ్, దేవతా - ప్రజాపతిః
మూల॑-మ్ప్ర॒జాం-వీఁ॒రవ॑తీం-విఁదేయ । పరా᳚చ్యేతు॒ నిర్-ఋ॑తిః పరా॒చా ।
గోభి॒-ర్నక్ష॑త్ర-మ్ప॒శుభి॒-స్సమ॑క్తమ్ । అహ॑-ర్భూయా॒-ద్యజ॑మానాయ॒ మహ్య᳚మ్ ।
అహ॑ర్నో అ॒ద్య సు॑వి॒తే ద॑ధాతు । మూల॒-న్నక్ష॑త్ర॒మితి॒ యద్వద॑న్తి ।
18
పరా॑చీం-వాఁ॒చా నిర్-ఋ॑తి-న్నుదామి । శి॒వ-మ్ప్ర॒జాయై॑ శి॒వమ॑స్తు॒ మహ్య᳚మ్ ॥ 18
నక్షత్రం - పూర్వాషాఢా, దేవతా - ఆపః
యా ది॒వ్యా ఆపః॒ పయ॑సా సమ్బభూ॒వుః । యా అ॒న్తరి॑క్ష ఉ॒త పార్థి॑వీ॒ర్యాః ।
యాసా॑మషా॒ఢా అ॑ను॒యన్తి॒ కామ᳚మ్ । తా న॒ ఆప॒-శ్శగ్గ్ స్యో॒నా భ॑వన్తు ।
యాశ్చ॒ కూప్యా॒ యాశ్చ॑ నా॒ద్యా᳚-స్సము॒ద్రియాః᳚ । యాశ్చ॑ వైశ॒న్తీరు॒త ప్రా॑స॒చీర్యాః ।
19
యాసా॑మషా॒ఢా మధు॑ భ॒క్షయ॑న్తి । తా న॒ ఆప॒-శ్శగ్గ్ స్యో॒నా భ॑వన్తు ॥ 19
నక్షత్రం - ఉత్తరాషాఢా, దేవతా - విశ్వేదేవః
తన్నో॒ విశ్వే॒ ఉప॑ శృణ్వన్తు దే॒వాః । తద॑షా॒ఢా అ॒భిసంయఁ॑న్తు య॒జ్ఞమ్ ।
తన్నక్ష॑త్ర-మ్ప్రథతా-మ్ప॒శుభ్యః॑ । కృ॒షి-ర్వృ॒ష్టి-ర్యజ॑మానాయ కల్పతామ్ ।
శు॒భ్రాః క॒న్యా॑ యువ॒తయ॑-స్సు॒పేశ॑సః । క॒ర్మ॒కృత॑-స్సు॒కృతో॑ వీ॒ర్యా॑వతీః ।
విశ్వా᳚-న్దే॒వాన్, హ॒విషా॑ వ॒ర్ధయ॑న్తీః ।
20
అ॒షా॒ఢాః కామ॒ ముప॑యాన్తు య॒జ్ఞమ్ ॥ 20
నక్షత్రం - అభిజిత్, దేవతా - బ్రహ్మా
యస్మి॒-న్బ్రహ్మా॒భ్యజ॑య॒-థ్సర్వ॑మే॒తత్ । అ॒ముఞ్చ॑ లో॒క మి॒దమూ॑చ॒ సర్వ᳚మ్ ।
తన్నో॒ నక్ష॑త్ర-మభి॒జి-ద్వి॒జిత్య॑ । శ్రియ॑-న్దధా॒త్వ-హృ॑ణీయమానమ్ ।
ఉ॒భౌ లో॒కౌ బ్రహ్మ॑ణా॒ సఞ్జి॑తే॒మౌ । తన్నో॒ నక్ష॑త్ర-మభి॒జి-ద్విచ॑ష్టామ్ ।
21
తస్మి॑న్ వ॒య-మ్పృత॑నా॒ స్సఞ్జ॑యేమ । తన్నో॑ దే॒వాసో॒ అను॑జానన్తు॒ కామ᳚మ్ ॥ 21
నక్షత్రం - శ్రవణమ్, దేవతా - విష్ణుః
శృ॒ణ్వన్తి॑ శ్రో॒ణా-మ॒మృత॑స్య గో॒పామ్ । పుణ్యా॑మస్యా॒ ఉప॑శృణోమి॒ వాచ᳚మ్ ।
మ॒హీ-న్దే॒వీం-విఁష్ణు॑పత్నీ మజూ॒ర్యామ్ । ప్ర॒తీచీ॑ మేనాగ్ం హ॒విషా॑ యజామః ।
త్రే॒ధా విష్ణు॑-రురుగా॒యో విచ॑క్రమే । మ॒హీ-న్దివ॑-మ్పృథి॒వీ-మ॒న్తరి॑క్షమ్ ।
22
తచ్ఛ్రో॒ణైతి॒ శ్రవ॑-ఇ॒చ్ఛమా॑నా । పుణ్య॒గ్గ్॒ శ్లోకం॒-యఁజ॑మానాయ కృణ్వ॒తీ ॥ 22
నక్షత్రం - శ్రవిష్టా, దేవతా - వసవః
అ॒ష్టౌ దే॒వా వస॑వస్సో॒మ్యాసః॑ । చత॑స్రో దే॒వీ ర॒జరా॒-శ్శ్రవి॑ష్ఠాః ।
తే య॒జ్ఞ-మ్పా᳚న్తు॒ రజ॑సః ప॒రస్తా᳚త్ । సం॒వఁ॒థ్స॒రీణ॑-మ॒మృతగ్గ్॑ స్వ॒స్తి ।
య॒జ్ఞ-న్నః॑ పాన్తు॒ వస॑వః పు॒రస్తా᳚త్ । ద॒క్షి॒ణ॒తో॑-ఽభియ॑న్తు॒ శ్రవి॑ష్ఠాః ।
23
పుణ్య॒న్నక్ష॑త్రమ॒భి సంవిఁ॑శామ । మా నో॒ అరా॑తి-ర॒ఘశ॒గ్ం॒ సాగన్న్॑ ॥ 23
నక్షత్రం - శతభిషక్, దేవతా - వరుణః
క్ష॒త్రస్య॒ రాజా॒ వరు॑ణో-ఽధిరా॒జః । నక్ష॑త్రాణాగ్ం శ॒తభి॑ష॒గ్ వసి॑ష్ఠః ।
తౌ దే॒వేభ్యః॑ కృణుతో దీ॒ర్ఘమాయః॑ । శ॒తగ్ం స॒హస్రా॑ భేష॒జాని॑ ధత్తః ।
య॒జ్ఞన్నో॒ రాజా॒ వరు॑ణ॒ ఉప॑యాతు । తన్నో॒ విశ్వే॑ అ॒భిసంయఁ॑న్తు దే॒వాః ।
24
తన్నో॒ నక్ష॑త్రగ్ం శ॒తభి॑షగ్ జుషా॒ణమ్ । దీ॒ర్ఘమాయుః॒ ప్రతి॑ర-ద్భేష॒జాని॑ ॥ 24
నక్షత్రం - పూర్వప్రోష్ఠపదా, దేవతా - అజయేకపాదః
అ॒జ ఏక॑పా॒- దుద॑గా-త్పు॒రస్తా᳚త్ । విశ్వా॑ భూ॒తాని॑ ప్రతి॒ మోద॑మానః ।
తస్య॑ దే॒వాః ప్ర॑స॒వం-యఁ॑న్తి॒ సర్వే᳚ । ప్రో॒ష్ఠ॒ప॒దాసో॑ అ॒మృత॑స్య గో॒పాః ।
వి॒భ్రాజ॑మాన-స్సమిధా॒న ఉ॒గ్రః । ఆ-ఽన్తరి॑క్ష-మరుహ॒ద-ద్గ॒న్ద్యామ్ ।
25
తగ్ం సూర్య॑-న్దే॒వ-మ॒జమేక॑పాదమ్ । ప్రో॒ష్ఠ॒ప॒దాసో॒ అను॑యన్తి॒ సర్వే᳚ ॥ 25
నక్షత్రం - ఉత్తరప్రోష్ఠపదా, దేవతా - అహిర్బుద్ధ్నియః
అహి॑-ర్బు॒ద్ధ్నియః॒ ప్రథ॑మాన ఏతి । శ్రేష్ఠో॑ దే॒వానా॑ము॒త మాను॑షాణామ్ ।
త-మ్బ్రా᳚హ్మ॒ణా-స్సో॑మ॒పా-స్సో॒మ్యాసః॑ । ప్రో॒ష్ఠ॒ప॒దాసో॑ అ॒భిర॑క్షన్తి॒ సర్వే᳚ ।
చ॒త్వార॒ ఏక॑మ॒భి కర్మ॑ దే॒వాః । ప్రో॒ష్ఠ॒ప॒దాస॒ ఇతి॒ యాన్, వద॑న్తి ।
26
తే బు॒ద్ధనియ॑-మ్పరి॒షద్యగ్గ్॑ స్తు॒వన్తః॑ । అహిగ్ం॑ రక్షన్తి॒ నమ॑సోప॒ సద్య॑ ॥ 26
నక్షత్రం - రేవతీ, దేవతా - పూషా
పూ॒షా రే॒వత్యన్వే॑తి॒ పన్థా᳚మ్ । పు॒ష్టి॒పతీ॑ పశు॒పా వాజ॑బస్త్యౌ ।
ఇ॒మాని॑ హ॒వ్యా ప్రయ॑తా జుషా॒ణా । సు॒గైర్నో॒ యానై॒రుప॑యాతాం-యఁ॒జ్ఞమ్ ।
క్షు॒ద్రా-న్ప॒శూ-న్ర॑క్షతు రే॒వతీ॑ నః । గావో॑ నో॒ అశ్వా॒గ్ం॒ అన్వే॑తు పూ॒షా ।
27
అన్న॒గ్ం॒ రక్ష॑న్తౌ బహు॒ధా విరూ॑పమ్ । వాజగ్ం॑ సనుతాం॒-యఁజ॑మానాయ య॒జ్ఞమ్ ॥ 27
నక్షత్రం - అశ్వినీ, దేవతా - అశ్వినీ దేవ
తద॒శ్వినా॑-వశ్వ॒యుజో-ప॑యాతామ్ । శుభ॒ఙ్గమి॑ష్ఠౌ సు॒యమే॑భి॒రశ్వైః᳚ ।
స్వన్నక్ష॑త్రగ్ం హ॒విషా॒ యజ॑న్తౌ । మద్ధ్వా॒-సమ్పృ॑క్తౌ॒ యజు॑షా॒ సమ॑క్తౌ ।
యౌ దే॒వానా᳚-మ్భి॒షజౌ॑ హవ్యవా॒హౌ । విశ్వ॑స్య దూ॒తా-వ॒మృత॑స్య గో॒పౌ ।
28
తౌ నక్ష॑త్రం-జుజుషా॒ణో-ప॑యాతామ్ । నమో॒-ఽశ్విభ్యా᳚-ఙ్కృణుమో-ఽశ్వ॒గ్యుభ్యా᳚మ్ ॥ 28
నక్షత్రం - అపభరణీ, దేవతా - యమః
అప॑ పా॒ప్మాన॒-మ్భర॑ణీ-ర్భరన్తు । తద్య॒మో రాజా॒ భగ॑వా॒న్॒, విచ॑ష్టామ్ ।
లో॒కస్య॒ రాజా॑ మహ॒తో మ॒హాన్, హి । సు॒గన్నః॒ పన్థా॒మభ॑య-ఙ్కృణోతు ।
యస్మి॒-న్నక్ష॑త్రే య॒మ ఏతి॒ రాజా᳚ । యస్మి॑న్నేన-మ॒భ్యషి॑ఞ్చన్త దే॒వాః ।
29
తద॑స్య చి॒త్రగ్ం హ॒విషా॑ యజామ । అప॑ పా॒ప్మాన॒-మ్భర॑ణీ-ర్భరన్తు ॥ 29
అమావాసి
ని॒వేశ॑నీ స॒ఙ్గమ॑నీ॒ వసూ॑నాం॒-విఁశ్వా॑ రూ॒పాణి॒ వసూ᳚న్యా-వే॒శయ॑న్తీ ।
స॒హ॒స్ర॒-పో॒షగ్ం సు॒భగా॒ రరా॑ణా॒ సా న॒ ఆగ॒న్ వర్చ॑సా సంవిఁదా॒నా ।
యత్తే॑ దే॒వా అద॑ధు-ర్భాగ॒ధేయ॒-మమా॑వాస్యే సం॒వఁస॑న్తో మహి॒త్వా ।
30
సా నో॑ య॒జ్ఞ-మ్పి॑పృహి విశ్వవారే ర॒యిన్నో॑ ధేహి సుభగే సు॒వీర᳚మ్ ॥ 30
ఓం శాన్తి॒-శ్శాన్తి॒-శ్శాన్తిః॑ ॥
31-40: Optional for Additional Chanting
చన్ద్రమా
నవో॑ నవో భవతి॒ జాయ॑మా॒నో-ఽహ్నా᳚-ఙ్కే॒తు-రు॒షసా॑ మే॒త్యగ్రే᳚ ।
భా॒గ-న్దే॒వేభ్యో॒ విద॑ధాత్యా॒య-న్ప్రచ॒న్ద్రమా᳚స్తిరితి దీ॒ర్ఘమాయుః॑ ॥
యమా॑ది॒త్యా అ॒గ్ం॒శుమా᳚ప్యా॒యయ॑న్తి॒ యమక్షి॑త॒-మక్షి॑తయః॒ పిబ॑న్తి ।
31
తేన॑ నో॒ రాజా॒ వరు॑ణో॒ బృహ॒స్పతి॒ రాప్యా॑యయన్తు॒ భువ॑నస్య గో॒పాః ॥ 31
అహో రాత్ర
యే విరూ॑పే॒ సమ॑నసా సంవ్యఁయ॑న్తీ । స॒మా॒న-న్తన్తు॑-మ్పరితా-త॒నాతే᳚ ।
వి॒భూ ప్ర॒భూ అ॑ను॒భూ వి॒శ్వతో॑ హువే । తే నో॒ నక్ష॑త్రే॒ హవ॒మాగ॑-మేతమ్ ।
వ॒య-న్దే॒వీ బ్రహ్మ॑ణా సంవిఁదా॒నాః । సు॒రత్నా॑సో దే॒వవీ॑తి॒-న్దధా॑నాః ।
32
అ॒హో॒రా॒త్రే హ॒విషా॑ వ॒ర్ధయ॑న్తః । అతి॑ పా॒ప్మాన॒-మతి॑ముక్త్యా గమేమ ॥ 32
ఉషా
ప్రత్యు॑వ దృశ్యాయ॒తీ । వ్యు॒చ్ఛన్తీ॑ దుహి॒తా ది॒వః ।
అ॒పో మ॒హీ వృ॑ణుతే॒ చక్షు॑షా । తమో॒ జ్యోతి॑ష్కృణోతి సూ॒నరీ᳚ ।
ఉదు॒ స్త్రియా᳚స్సచతే॒ సూర్యః॑ । స చా॑ ఉ॒ద్యన్నక్ష॑త్ర మర్చి॒మత్ ।
33
త వేదు॑షో॒ వ్యుషి॒ సూర్య॑స్య చ । సమ్భ॒క్తేన॑ గమేమహి ॥ 33
నక్షత్రః
తన్నో॒ నక్ష॑త్ర మర్చి॒మత్ । భా॒ను॒మత్తేజ॑ ఉ॒చ్ఛర॑త్ ।
ఉప॑య॒జ్ఞ-మి॒హాగ॑మత్ । ప్రనక్ష॑త్రాయ దే॒వాయ॑ । ఇన్ద్రా॒యేన్దుగ్ం॑ హవామహే ।
34
స న॑ స్సవి॒తా సు॑వథ్స॒నిమ్ । పు॒ష్టి॒దాం-వీఁ॒రవ॑త్తమమ్ ॥ 34
సూర్యః
ఉదు॒త్య-ఞ్జా॒తవే॑దస-న్దే॒వం-వఁ॑హన్తి కే॒తవః॑ । దృ॒శే విశ్వా॑య॒ సూర్య᳚మ్ ।
చి॒త్ర-న్దే॒వానా॒ ముద॑గా॒దనీ॑క॒-ఞ్చక్షు॑-ర్మి॒త్రస్య॒ వరు॑ణస్యా॒గ్నేః ।
35
ఆ-ఽప్రా॒ ద్యావా॑పృథి॒వీ అ॒న్తరి॑క్ష॒గ్ం॒ సూర్య॑ ఆ॒త్మా జగ॑తస్త॒స్థుష॑శ్చ ॥ 35
అదితిః
అది॑తిర్న ఉరుష్య॒-త్వది॑తి॒-శ్శర్మ॑ యచ్ఛతు । అది॑తిః పా॒త్వగ్ం హ॑సః।
మ॒హీమూ॒షు మా॒తరగ్ం॑ సువ్ర॒తానా॑-మృ॒తస్య॒ పత్నీ॒ మవ॑సే హువేమ ।
36
తు॒వి॒క్ష॒త్రా-మ॒జర॑న్తీ మురూ॒చీగ్ం సు॒శర్మా॑ణ॒-మది॑తిగ్ం సు॒ప్రణీ॑తిమ్ ॥ 36
విష్ణుః
ఇ॒దం-విఁష్ణు॒-ర్విచ॑క్రమే త్రే॒ధా నిద॑ధే ప॒దమ్ । సమూ॑ఢమస్య పాగ్ం సు॒రే ।
ప్రతద్విష్ణు॑ స్తవతే వీ॒ర్యా॑య । మృ॒గో న భీ॒మః కు॑చ॒రో గి॑రి॒ష్ఠాః ।
37
యస్యో॒రుషు॑ త్రి॒షు వి॒క్రమ॑ణేషు । అధి॑క్షి॒యన్తి॒ భువ॑నాని॒ విశ్వా᳚ ॥ 37
అగ్నిః
అ॒గ్ని-ర్మూ॒ద్ర్ధా ది॒వః క॒కుత్పతిః॑ పృథి॒వ్యా అ॒యమ్ ।
అ॒పాగ్ం రేతాగ్ం॑సి జిన్వతి ।
భువో॑ య॒జ్ఞస్య॒ రజ॑సశ్చ నే॒తా యత్రా॑ ని॒యుద్భి॒-స్సచ॑సే శి॒వాభిః॑ ।
38
ది॒వి మూ॒ద్ర్ధాన॑-న్దధిషే సువ॒ర్॒షా-ఞ్జి॒హ్వామ॑గ్నే చకృషే హవ్య॒వాహం᳚ ॥ 38
అనుమతీ
అను॑నో॒-ఽద్యాను॑మతి-ర్య॒జ్ఞ-న్దే॒వేషు॑ మన్యతామ్ ।
అ॒గ్నిశ్చ॑ హవ్య॒వాహ॑నో॒ భవ॑తా-న్దా॒శుషే॒ మయః॑ ।
అన్విద॑నుమతే॒ త్వ-మ్మన్యా॑సై॒ శఞ్చ॑ నః కృధి ।
39
క్రత్వే॒ దక్షా॑య నో హిను॒ ప్రణ॒ ఆయూగ్ం॑షి తారిషః ॥ 39
హవ్యవాహః (అగ్నిః)
హ॒వ్య॒వాహ॑మభి-మాతి॒షాహ᳚మ్ । ర॒క్షో॒హణ॒-మ్పృత॑నాసు జి॒ష్ణుమ్ ।
జ్యోతి॑ష్మన్త॒-న్దీద్య॑త॒-మ్పుర॑న్ధిమ్ । అ॒గ్నిగ్గ్ స్వి॑ష్ట॒ కృత॒మాహు॑వేమ ।
స్వి॑ష్ట మగ్నే అ॒భిత-త్పృ॑ణాహి । విశ్వా॑ దేవ॒ పృత॑నా అ॒భిష్య ।
40
ఉ॒రున్నః॒ పన్థా᳚-మ్ప్రది॒శన్ విభా॑హి । జ్యోతి॑ష్మద్ధేహ్య॒ జర॑న్న॒ ఆయుః॑ ॥ 40
ఓం శాన్తి॒-శ్శాన్తి॒-శ్శాన్తిః॑ ॥
Roman (IAST) Transliteration
taittirīya brāhmaṇa - aṣṭakaṃ 3, praśnaḥ 1,
taittirīya saṃhitā - kāṇḍa 3, prapāṭhakaḥ 5, anuvākaṃ 1
nakṣatraṃ - kṛttikā, devatā - agniḥ
oṃ a॒gnirnaḥ̭ pātu॒ kṛtti̭kāḥ | nakṣa̭tra-nde॒vami̭ndri॒yam |
i॒damā̭sāṃ-vi~cakṣa॒ṇam | ha॒virā॒sa-ñjṷhotana |
yasya॒ bhānti̭ ra॒śmayo॒ yasya̭ ke॒tavaḥ̭ | yasye॒mā viśvā॒ bhuva̭nāni॒ sarvā᳚ |
sa kṛtti̭kābhi-ra॒bhisaṃ॒va~sā̭naḥ | a॒gnirno̭ de॒vassṷvi॒te da̭dhātu || 1
nakṣatraṃ - rohiṇī, devatā - prajāpatiḥ
pra॒jāpa̭te rohi॒ṇīvḙtu॒ patnī᳚ | vi॒śvarṷ̄pā bṛha॒tī ci॒trabhā̭nuḥ |
sā no̭ ya॒jñasya̭ suvi॒te da̭dhātu | yathā॒ jīvḙma śa॒rada॒ssavī̭rāḥ |
ro॒hi॒ṇī de॒vyuda̭gātpu॒rastā᳚t | viśvā̭ rū॒pāṇi̭ prati॒moda̭mānā |
pra॒jāpa̭tigṃ ha॒viṣā̭ va॒rdhaya̭ntī | pri॒yā de॒vānā॒-mupa̭yātu ya॒jñam || 2
nakṣatraṃ - mṛgaśīrṣaḥ, devatā - somaḥ
somo॒ rājā̭ mṛgaśī॒r॒ṣeṇa॒ āganṋ | śi॒va-nnakṣa̭tra-mpri॒yama̭sya॒ dhāma̭ |
ā॒pyāya̭māno bahu॒dhā janḙṣu | retaḥ̭ pra॒jāṃ-ya~ja̭māne dadhātu |
yatte॒ nakṣa̭tra-mmṛgaśī॒r॒ṣamasti̭ | pri॒yagṃ rā̭ja-npri॒yata̭ma-mpri॒yāṇā᳚m |
tasmai̭ te soma ha॒viṣā̭ vidhema | śanna̭ edhi dvi॒pade॒ śañcatṷṣpade || 3
nakṣatraṃ - ārdrā, devatā - rudraḥ
ā॒rdrayā̭ ru॒draḥ pratha̭mā na eti | śreṣṭho̭ de॒vānā॒-mpati̭raghni॒yānā᳚m |
nakṣa̭tramasya ha॒viṣā̭ vidhema | mā naḥ̭ pra॒jāgṃ rī̭riṣa॒nmota vī॒rān |
he॒tī ru॒drasya॒ pari̭ṇo vṛṇaktu | ā॒rdrā nakṣa̭tra-ñjuṣatāgṃ ha॒virnaḥ̭ |
pra॒mu॒ñcamā̭nau duri॒tāni॒ viśvā᳚ | apā॒ghaśagṃ̭ sannu-datā॒marā̭tim || 4
nakṣatraṃ - punarvasu, devatā - aditiḥ
puna̭rno de॒vyadi̭ti-spṛṇotu | puna̭rvasū naḥ॒ puna॒retāṃ᳚-ya~॒jñam |
puna̭rno de॒vā a॒bhiya̭ntu॒ sarve᳚ | punaḥ̭ punarvo ha॒viṣā̭ yajāmaḥ |
e॒vā na de॒vya-di̭tirana॒rvā | viśva̭sya bha॒rtrī jaga̭taḥ prati॒ṣṭhā |
puna̭rvasū ha॒viṣā̭ va॒rdhaya̭ntī | pri॒ya-nde॒vānā॒-mapyḙtu॒ pāthaḥ̭ || 5
nakṣatraṃ - puṣyaḥ, devatā - bṛhaspatiḥ
bṛha॒spatiḥ̭ pratha॒mañjāya̭mānaḥ | ti॒ṣya̭-nnakṣa̭trama॒bhi samba̭bhūva |
śreṣṭho̭ de॒vānā॒-mpṛta̭nāsu ji॒ṣṇuḥ | di॒śo-'nu॒ sarvā॒ abha̭yanno astu |
ti॒ṣyaḥ̭ pu॒rastā̭du॒ta ma̭dhya॒to naḥ̭ | bṛha॒spati̭rnaḥ॒ pari̭pātu pa॒ścāt |
bādhḙ tā॒ndveṣo॒ abha̭ya-ṅkṛṇutām | su॒vīrya̭sya॒ pata̭yasyāma || 6
nakṣatraṃ -āśreṣam, devatā - sarpāḥ
i॒dagṃ sa॒rpebhyo̭ ha॒vira̭stu॒ juṣṭa᳚m | ā॒śre॒ṣā yeṣā̭manu॒yanti॒ cetaḥ̭ |
ye a॒ntari̭kṣa-mpṛthi॒vīṃ-kṣi॒yanti̭ | tena̭ ssa॒rpāso॒ hava॒māga̭miṣṭhāḥ |
ye ro̭ca॒ne sūrya॒syāpi̭ sa॒rpāḥ | ye diva̭-nde॒vī-manṷsa॒ñcara̭nti |
yeṣā̭māśre॒ṣā a̭nu॒yanti॒ kāma᳚m | tebhya̭-ssa॒rpebhyo॒ madhṷ-majjuhomi || 7
nakṣatraṃ - maghā, devatā - pitaraḥ
upa̭hūtāḥ pi॒taro॒ ye ma॒ghāsṷ | mano̭javasa-ssu॒kṛta̭-ssukṛ॒tyāḥ |
te no॒ nakṣa̭tre॒ hava॒māga̭miṣṭhāḥ | sva॒dhābhi̭rya॒jña-mpraya̭ta-ñjuṣantām |
ye a̭gnida॒gdhā ye-'na̭gni-dagdhāḥ | yḙ-'mullo॒ka-mpi॒taraḥ̭, kṣi॒yanti̭ |
yāgśca̭ vi॒dmayāgṃ ṷ ca॒ na pra̭vi॒dma | ma॒ghāsṷ ya॒jñagṃ sukṛ̭ta-ñjuṣantām || 8
nakṣatraṃ - pūrvaphalgunī, devatā - aryamā
gavā॒-mpatiḥ॒ phalgṷnī-nāmasi॒ tvam | tada̭ryamanvaruṇa mitra॒ cārṷ |
ta-ntvā̭ va॒yagṃ sa̭ni॒tāragṃ̭ sanī॒nām | jī॒vā jīva̭nta॒mupa॒ saṃvi~̭śema |
yene॒mā viśvā॒ bhuva̭nāni॒ sañji̭tā | yasya̭ de॒vā a̭nusaṃ॒ya~nti॒ cetaḥ̭ |
a॒rya॒mā rājā॒-'jara॒stu vi̭ṣmān | phalgṷnīnā-mṛṣa॒bho ro̭ravīti || 9
nakṣatraṃ - uttara phalgunī, devatā - bhagaḥ
śreṣṭho̭ de॒vānā᳚-mbhagavo bhagāsi | tattvā̭ viduḥ॒ phalgṷnī॒-stasya̭ vittāt |
a॒smabhyaṃ̭-kṣa॒trama॒jaragṃ̭ su॒vīrya᳚m | goma॒daśva̭-va॒dupa॒sannṷ-de॒ha |
bhago̭ha dā॒tā bhaga॒ itpra̭dā॒tā | bhago̭ de॒vīḥ phalgṷnī॒-rāvi̭veśa |
bhaga॒syetta-mpra̭sa॒va-ṅga̭mema | yatra̭ de॒vai-ssa̭dha॒māda̭-mmadema || 10
nakṣatraṃ - hastaḥ, devatā - savitā
āyā̭tu de॒va-ssa̭vi॒to pa̭yātu | hi॒ra॒ṇyayḙna su॒vṛtā॒ rathḙna |
vaha॒na॒, hastagṃ̭ su॒bhagaṃ̭-vi~dma॒nāpa̭sam | pra॒yaccha̭nta॒-mpapṷri॒-mpuṇya॒maccha̭ |
hastaḥ॒ praya̭ccha tva॒mṛtaṃ॒-va~sī̭yaḥ | dakṣi̭ṇena॒ prati̭gṛbhṇīma enat |
dā॒tāra̭-ma॒dya sa̭vi॒tā vi̭deya | yo no॒ hastā̭ya prasu॒vāti̭ ya॒jñam || 11
nakṣatraṃ - citrā, devatā - tvaṣṭā
tvaṣṭā॒ nakṣa̭tra-ma॒bhyḙti ci॒trām | su॒bhagṃ sa̭saṃyu~va॒tigṃ roca̭mānām |
ni॒ve॒śaya̭-nna॒mṛtā॒-nmartyāg̭śca | rū॒pāṇi̭ pi॒gṃ॒śa-nbhuva̭nāni॒ viśvā᳚ |
tanna॒stvaṣṭā॒ tadṷ ci॒trā vica̭ṣṭām | tannakṣa̭tra-mbhūri॒dā a̭stu॒ mahya᳚m |
tannaḥ̭ pra॒jāṃ-vī~॒rava̭tīgṃ sanotu | gobhi̭rno॒ aśvai॒-ssama̭naktu ya॒jñam || 12
nakṣatraṃ - svātī, devatā - vāyuḥ
vā॒yu-rnakṣa̭tra-ma॒bhyḙti॒ niṣṭyā᳚m | ti॒gmaśṛ̭ṅgo vṛṣa॒bho rorṷvāṇaḥ |
sa॒mī॒raya॒-nbhuva̭nā māta॒riśvā᳚ | apa॒ dveṣāgṃ̭si nudatā॒marā̭tīḥ |
tanno̭ vā॒yastadu॒ niṣṭyā̭ śṛṇotu | tannakṣa̭tra-mbhūri॒dā a̭stu॒ mahya᳚m |
tanno̭ de॒vāso॒ anṷ jānantu॒ kāma᳚m | yathā॒ tarḙma duri॒tāni॒ viśvā᳚ || 13
nakṣatraṃ - viśākhā, devatā - indrāgnī
dū॒rama॒smacchatra̭vo yantu bhī॒tāḥ | tadi̭ndrā॒gnī kṛ̭ṇutā॒-ntadviśā̭khe |
tanno̭ de॒vā anṷmadantu ya॒jñam | pa॒ścā-tpu॒rastā॒-dabha̭yanno astu |
nakṣa̭trāṇā॒-madhi̭patnī॒ viśā̭khe | śreṣṭhā̭-vindrā॒gnī bhuva̭nasya go॒pau |
viṣṷ̄ca॒-śśatrṷ̄napa॒bādha̭mānau | apa॒kṣudha̭-nnudatā॒marā̭tim || 14
paurṇamāsi
pū॒rṇā pa॒ścādu॒ta pū॒rṇā pu॒rastā᳚t | unma̭dhya॒taḥ pau᳚rṇamā॒sī ji̭gāya |
tasyā᳚-nde॒vā adhi̭ saṃ॒-va~sa̭ntaḥ | u॒tta॒me nāka̭ i॒ha mā̭dayantām |
pṛ॒thvī su॒varcā̭ yuva॒ti-ssa॒joṣāḥ᳚ | pau॒rṇa॒mā॒syuda̭gā॒-cchobha̭mānā |
ā॒pyā॒yaya̭ntī duri॒tāni॒ viśvā᳚ | u॒ru-nduhāṃ॒-ya~ja̭mānāya ya॒jñam || 15
nakṣatraṃ - anūrādhā, devatā - mitraḥ
ṛ॒ddhyāsma̭ ha॒vyai-rnama̭sopa॒-sadya̭ | mi॒tra-nde॒va-mmi̭tra॒dheya̭nno astu |
a॒nū॒rā॒dhān, ha॒viṣā̭ va॒rdhaya̭ntaḥ | śa॒ta-ñjī̭vema śa॒rada॒-ssavī̭rāḥ |
ci॒traṃ-nakṣa̭tra॒-muda̭gā-tpu॒rastā᳚t | a॒nū॒rā॒dhā sa॒ iti॒ yadvada̭nti |
tanmi॒tra ḙti pa॒thibhi̭-rdeva॒yānaiḥ᳚ | hi॒ra॒ṇyayai॒-rvita̭tai-ra॒ntari̭kṣe || 16
nakṣatraṃ - jyeṣṭhā, devatā - indraḥ
indro᳚ jye॒ṣṭhā manu॒ nakṣa̭trameti | yasmi̭n vṛ॒traṃ-vṛ~̭tra॒ tūryḙ ta॒tāra̭ |
tasmi̭nva॒ya-ma॒mṛta॒-nduhā̭nāḥ | kṣudha̭ntarema॒ duri̭ti॒-nduri̭ṣṭim |
pu॒ra॒nda॒rāya̭ vṛṣa॒bhāya̭ dhṛ॒ṣṇave᳚ | aṣā̭ḍhāya॒ saha̭mānāya mī॒ḍhuṣe᳚ |
indrā̭ya jye॒ṣṭhā madhṷma॒dduhā̭nā | u॒ru-ṅkṛ̭ṇotu॒ yaja̭mānāya lo॒kam || 17
nakṣatraṃ - mūlam, devatā - prajāpatiḥ
mūla̭-mpra॒jāṃ-vī~॒rava̭tīṃ-vi~deya | parā᳚cyetu॒ nir-ṛ̭tiḥ parā॒cā |
gobhi॒-rnakṣa̭tra-mpa॒śubhi॒-ssama̭ktam | aha̭-rbhūyā॒-dyaja̭mānāya॒ mahya᳚m |
aha̭rno a॒dya sṷvi॒te da̭dhātu | mūla॒-nnakṣa̭tra॒miti॒ yadvada̭nti |
parā̭cīṃ-vā~॒cā nir-ṛ̭ti-nnudāmi | śi॒va-mpra॒jāyai̭ śi॒vama̭stu॒ mahya᳚m || 18
nakṣatraṃ - pūrvāṣāḍhā, devatā - āpaḥ
yā di॒vyā āpaḥ॒ paya̭sā sambabhū॒vuḥ | yā a॒ntari̭kṣa u॒ta pārthi̭vī॒ryāḥ |
yāsā̭maṣā॒ḍhā a̭nu॒yanti॒ kāma᳚m | tā na॒ āpa॒-śśagg syo॒nā bha̭vantu |
yāśca॒ kūpyā॒ yāśca̭ nā॒dyā᳚-ssamu॒driyāḥ᳚ | yāśca̭ vaiśa॒ntīru॒ta prā̭sa॒cīryāḥ |
yāsā̭maṣā॒ḍhā madhṷ bha॒kṣaya̭nti | tā na॒ āpa॒-śśagg syo॒nā bha̭vantu || 19
nakṣatraṃ - uttarāṣāḍhā, devatā - viśvedevaḥ
tanno॒ viśve॒ upa̭ śṛṇvantu de॒vāḥ | tada̭ṣā॒ḍhā a॒bhisaṃya~̭ntu ya॒jñam |
tannakṣa̭tra-mprathatā-mpa॒śubhyaḥ̭ | kṛ॒ṣi-rvṛ॒ṣṭi-ryaja̭mānāya kalpatām |
śu॒bhrāḥ ka॒nyā̭ yuva॒taya̭-ssu॒peśa̭saḥ | ka॒rma॒kṛta̭-ssu॒kṛto̭ vī॒ryā̭vatīḥ |
viśvā᳚-nde॒vān, ha॒viṣā̭ va॒rdhaya̭ntīḥ |
a॒ṣā॒ḍhāḥ kāma॒ mupa̭yāntu ya॒jñam || 20
nakṣatraṃ - abhijit, devatā - brahmā
yasmi॒-nbrahmā॒bhyaja̭ya॒-thsarva̭me॒tat | a॒muñca̭ lo॒ka mi॒damṷ̄ca॒ sarva᳚m |
tanno॒ nakṣa̭tra-mabhi॒ji-dvi॒jitya̭ | śriya̭-ndadhā॒tva-hṛ̭ṇīyamānam |
u॒bhau lo॒kau brahma̭ṇā॒ sañji̭te॒mau | tanno॒ nakṣa̭tra-mabhi॒ji-dvica̭ṣṭām |
tasmi̭n va॒ya-mpṛta̭nā॒ ssañja̭yema | tanno̭ de॒vāso॒ anṷjānantu॒ kāma᳚m || 21
nakṣatraṃ - śravaṇam, devatā - viṣṇuḥ
śṛ॒ṇvanti̭ śro॒ṇā-ma॒mṛta̭sya go॒pām | puṇyā̭masyā॒ upa̭śṛṇomi॒ vāca᳚m |
ma॒hī-nde॒vīṃ-vi~ṣṇṷpatnī majū॒ryām | pra॒tīcī̭ menāgṃ ha॒viṣā̭ yajāmaḥ |
tre॒dhā viṣṇṷ-rurugā॒yo vica̭krame | ma॒hī-ndiva̭-mpṛthi॒vī-ma॒ntari̭kṣam |
tacchro॒ṇaiti॒ śrava̭-i॒cchamā̭nā | puṇya॒gg॒ ślokaṃ॒-ya~ja̭mānāya kṛṇva॒tī || 22
nakṣatraṃ - śraviṣṭā, devatā - vasavaḥ
a॒ṣṭau de॒vā vasa̭vasso॒myāsaḥ̭ | cata̭sro de॒vī ra॒jarā॒-śśravi̭ṣṭhāḥ |
te ya॒jña-mpā᳚ntu॒ raja̭saḥ pa॒rastā᳚t | saṃ॒va~॒thsa॒rīṇa̭-ma॒mṛtagg̭ sva॒sti |
ya॒jña-nnaḥ̭ pāntu॒ vasa̭vaḥ pu॒rastā᳚t | da॒kṣi॒ṇa॒to̭-'bhiya̭ntu॒ śravi̭ṣṭhāḥ |
puṇya॒nnakṣa̭trama॒bhi saṃvi~̭śāma | mā no॒ arā̭ti-ra॒ghaśa॒gṃ॒ sāganṋ || 23
nakṣatraṃ - śatabhiṣak, devatā - varuṇaḥ
kṣa॒trasya॒ rājā॒ varṷṇo-'dhirā॒jaḥ | nakṣa̭trāṇāgṃ śa॒tabhi̭ṣa॒g vasi̭ṣṭhaḥ |
tau de॒vebhyaḥ̭ kṛṇuto dī॒rghamāyaḥ̭ | śa॒tagṃ sa॒hasrā̭ bheṣa॒jāni̭ dhattaḥ |
ya॒jñanno॒ rājā॒ varṷṇa॒ upa̭yātu | tanno॒ viśvḙ a॒bhisaṃya~̭ntu de॒vāḥ |
tanno॒ nakṣa̭tragṃ śa॒tabhi̭ṣag juṣā॒ṇam | dī॒rghamāyuḥ॒ prati̭ra-dbheṣa॒jāni̭ || 24
nakṣatraṃ - pūrvaproṣṭhapadā, devatā - ajayekapādaḥ
a॒ja eka̭pā॒- duda̭gā-tpu॒rastā᳚t | viśvā̭ bhū॒tāni̭ prati॒ moda̭mānaḥ |
tasya̭ de॒vāḥ pra̭sa॒vaṃ-ya~̭nti॒ sarve᳚ | pro॒ṣṭha॒pa॒dāso̭ a॒mṛta̭sya go॒pāḥ |
vi॒bhrāja̭māna-ssamidhā॒na u॒graḥ | ā-'ntari̭kṣa-maruha॒da-dga॒ndyām |
tagṃ sūrya̭-nde॒va-ma॒jameka̭pādam | pro॒ṣṭha॒pa॒dāso॒ anṷyanti॒ sarve᳚ || 25
nakṣatraṃ - uttaraproṣṭhapadā, devatā - ahirbuddhniyaḥ
ahi̭-rbu॒ddhniyaḥ॒ pratha̭māna eti | śreṣṭho̭ de॒vānā̭mu॒ta mānṷṣāṇām |
ta-mbrā᳚hma॒ṇā-sso̭ma॒pā-sso॒myāsaḥ̭ | pro॒ṣṭha॒pa॒dāso̭ a॒bhira̭kṣanti॒ sarve᳚ |
ca॒tvāra॒ eka̭ma॒bhi karma̭ de॒vāḥ | pro॒ṣṭha॒pa॒dāsa॒ iti॒ yān, vada̭nti |
te bu॒ddhaniya̭-mpari॒ṣadyagg̭ stu॒vantaḥ̭ | ahigṃ̭ rakṣanti॒ nama̭sopa॒ sadya̭ || 26
nakṣatraṃ - revatī, devatā - pūṣā
pū॒ṣā re॒vatyanvḙti॒ panthā᳚m | pu॒ṣṭi॒patī̭ paśu॒pā vāja̭bastyau |
i॒māni̭ ha॒vyā praya̭tā juṣā॒ṇā | su॒gairno॒ yānai॒rupa̭yātāṃ-ya~॒jñam |
kṣu॒drā-npa॒śū-nra̭kṣatu re॒vatī̭ naḥ | gāvo̭ no॒ aśvā॒gṃ॒ anvḙtu pū॒ṣā |
anna॒gṃ॒ rakṣa̭ntau bahu॒dhā virṷ̄pam | vājagṃ̭ sanutāṃ॒-ya~ja̭mānāya ya॒jñam || 27
nakṣatraṃ - aśvinī, devatā - aśvinī deva
tada॒śvinā̭-vaśva॒yujo-pa̭yātām | śubha॒ṅgami̭ṣṭhau su॒yamḙbhi॒raśvaiḥ᳚ |
svannakṣa̭tragṃ ha॒viṣā॒ yaja̭ntau | maddhvā॒-sampṛ̭ktau॒ yajṷṣā॒ sama̭ktau |
yau de॒vānā᳚-mbhi॒ṣajaṷ havyavā॒hau | viśva̭sya dū॒tā-va॒mṛta̭sya go॒pau |
tau nakṣa̭traṃ-jujuṣā॒ṇo-pa̭yātām | namo॒-'śvibhyā᳚-ṅkṛṇumo-'śva॒gyubhyā᳚m || 28
nakṣatraṃ - apabharaṇī, devatā - yamaḥ
apa̭ pā॒pmāna॒-mbhara̭ṇī-rbharantu | tadya॒mo rājā॒ bhaga̭vā॒n॒, vica̭ṣṭām |
lo॒kasya॒ rājā̭ maha॒to ma॒hān, hi | su॒gannaḥ॒ panthā॒mabha̭ya-ṅkṛṇotu |
yasmi॒-nnakṣa̭tre ya॒ma eti॒ rājā᳚ | yasmi̭nnena-ma॒bhyaṣi̭ñcanta de॒vāḥ |
tada̭sya ci॒tragṃ ha॒viṣā̭ yajāma | apa̭ pā॒pmāna॒-mbhara̭ṇī-rbharantu || 29
amāvāsi
ni॒veśa̭nī sa॒ṅgama̭nī॒ vasṷ̄nāṃ॒-vi~śvā̭ rū॒pāṇi॒ vasū᳚nyā-ve॒śaya̭ntī |
sa॒ha॒sra॒-po॒ṣagṃ su॒bhagā॒ rarā̭ṇā॒ sā na॒ āga॒n varca̭sā saṃvi~dā॒nā |
yattḙ de॒vā ada̭dhu-rbhāga॒dheya॒-mamā̭vāsye saṃ॒va~sa̭nto mahi॒tvā |
sā no̭ ya॒jña-mpi̭pṛhi viśvavāre ra॒yinno̭ dhehi subhage su॒vīra᳚m || 30
oṃ śānti॒-śśānti॒-śśāntiḥ̭ ||
31-40: Optional for Additional Chanting
candramā
navo̭ navo bhavati॒ jāya̭mā॒no-'hnā᳚-ṅke॒tu-ru॒ṣasā̭ me॒tyagre᳚ |
bhā॒ga-nde॒vebhyo॒ vida̭dhātyā॒ya-npraca॒ndramā᳚stiriti dī॒rghamāyuḥ̭ ||
yamā̭di॒tyā a॒gṃ॒śumā᳚pyā॒yaya̭nti॒ yamakṣi̭ta॒-makṣi̭tayaḥ॒ piba̭nti |
tena̭ no॒ rājā॒ varṷṇo॒ bṛha॒spati॒ rāpyā̭yayantu॒ bhuva̭nasya go॒pāḥ || 31
aho rātra
ye virṷ̄pe॒ sama̭nasā saṃvya~ya̭ntī | sa॒mā॒na-ntantṷ-mparitā-ta॒nāte᳚ |
vi॒bhū pra॒bhū a̭nu॒bhū vi॒śvato̭ huve | te no॒ nakṣa̭tre॒ hava॒māga̭-metam |
va॒ya-nde॒vī brahma̭ṇā saṃvi~dā॒nāḥ | su॒ratnā̭so de॒vavī̭ti॒-ndadhā̭nāḥ |
a॒ho॒rā॒tre ha॒viṣā̭ va॒rdhaya̭ntaḥ | ati̭ pā॒pmāna॒-mati̭muktyā gamema || 32
uṣā
pratyṷva dṛśyāya॒tī | vyu॒cchantī̭ duhi॒tā di॒vaḥ |
a॒po ma॒hī vṛ̭ṇute॒ cakṣṷṣā | tamo॒ jyoti̭ṣkṛṇoti sū॒narī᳚ |
udu॒ striyā᳚ssacate॒ sūryaḥ̭ | sa cā̭ u॒dyannakṣa̭tra marci॒mat |
ta vedṷṣo॒ vyuṣi॒ sūrya̭sya ca | sambha॒ktena̭ gamemahi || 33
nakṣatraḥ
tanno॒ nakṣa̭tra marci॒mat | bhā॒nu॒matteja̭ u॒cchara̭t |
upa̭ya॒jña-mi॒hāga̭mat | pranakṣa̭trāya de॒vāya̭ | indrā॒yendugṃ̭ havāmahe |
sa na̭ ssavi॒tā sṷvathsa॒nim | pu॒ṣṭi॒dāṃ-vī~॒rava̭ttamam || 34
sūryaḥ
udu॒tya-ñjā॒tavḙdasa-nde॒vaṃ-va~̭hanti ke॒tavaḥ̭ | dṛ॒śe viśvā̭ya॒ sūrya᳚m |
ci॒tra-nde॒vānā॒ muda̭gā॒danī̭ka॒-ñcakṣṷ-rmi॒trasya॒ varṷṇasyā॒gneḥ |
ā-'prā॒ dyāvā̭pṛthi॒vī a॒ntari̭kṣa॒gṃ॒ sūrya̭ ā॒tmā jaga̭tasta॒sthuṣa̭śca || 35
aditiḥ
adi̭tirna uruṣya॒-tvadi̭ti॒-śśarma̭ yacchatu | adi̭tiḥ pā॒tvagṃ ha̭saḥ|
ma॒hīmū॒ṣu mā॒taragṃ̭ suvra॒tānā̭-mṛ॒tasya॒ patnī॒ mava̭se huvema |
tu॒vi॒kṣa॒trā-ma॒jara̭ntī murū॒cīgṃ su॒śarmā̭ṇa॒-madi̭tigṃ su॒praṇī̭tim || 36
viṣṇuḥ
i॒daṃ-vi~ṣṇu॒-rvica̭krame tre॒dhā nida̭dhe pa॒dam | samṷ̄ḍhamasya pāgṃ su॒re |
pratadviṣṇṷ stavate vī॒ryā̭ya | mṛ॒go na bhī॒maḥ kṷca॒ro gi̭ri॒ṣṭhāḥ |
yasyo॒ruṣṷ tri॒ṣu vi॒krama̭ṇeṣu | adhi̭kṣi॒yanti॒ bhuva̭nāni॒ viśvā᳚ || 37
agniḥ
a॒gni-rmū॒drdhā di॒vaḥ ka॒kutpatiḥ̭ pṛthi॒vyā a॒yam |
a॒pāgṃ retāgṃ̭si jinvati |
bhuvo̭ ya॒jñasya॒ raja̭saśca ne॒tā yatrā̭ ni॒yudbhi॒-ssaca̭se śi॒vābhiḥ̭ |
di॒vi mū॒drdhāna̭-ndadhiṣe suva॒r॒ṣā-ñji॒hvāma̭gne cakṛṣe havya॒vāhaṃ᳚ || 38
anumatī
anṷno॒-'dyānṷmati-rya॒jña-nde॒veṣṷ manyatām |
a॒gniśca̭ havya॒vāha̭no॒ bhava̭tā-ndā॒śuṣe॒ mayaḥ̭ |
anvida̭numate॒ tva-mmanyā̭sai॒ śañca̭ naḥ kṛdhi |
kratve॒ dakṣā̭ya no hinu॒ praṇa॒ āyūgṃ̭ṣi tāriṣaḥ || 39
havyavāhaḥ (agniḥ)
ha॒vya॒vāha̭mabhi-māti॒ṣāha᳚m | ra॒kṣo॒haṇa॒-mpṛta̭nāsu ji॒ṣṇum |
jyoti̭ṣmanta॒-ndīdya̭ta॒-mpura̭ndhim | a॒gnigg svi̭ṣṭa॒ kṛta॒māhṷvema |
svi̭ṣṭa magne a॒bhita-tpṛ̭ṇāhi | viśvā̭ deva॒ pṛta̭nā a॒bhiṣya |
u॒runnaḥ॒ panthā᳚-mpradi॒śan vibhā̭hi | jyoti̭ṣmaddhehya॒ jara̭nna॒ āyuḥ̭ || 40
oṃ śānti॒-śśānti॒-śśāntiḥ̭ ||
Sanskrit — Devanagari (original)
तैत्तिरीय ब्राह्मण - अष्टकं 3, प्रश्नः 1,
तैत्तिरीय संहिता - काण्ड 3, प्रपाठकः 5, अनुवाकं 1
नक्षत्रं - कृत्तिका, देवता - अग्निः
ॐ अ॒ग्निर्नः॑ पातु॒ कृत्ति॑काः । नक्ष॑त्र-न्दे॒वमि॑न्द्रि॒यम् ।
इ॒दमा॑सां-विँचक्ष॒णम् । ह॒विरा॒स-ञ्जु॑होतन ।
यस्य॒ भान्ति॑ र॒श्मयो॒ यस्य॑ के॒तवः॑ । यस्ये॒मा विश्वा॒ भुव॑नानि॒ सर्वा᳚ ।
स कृत्ति॑काभि-र॒भिसं॒वँसा॑नः । अ॒ग्निर्नो॑ दे॒वस्सु॑वि॒ते द॑धातु ॥ 1
नक्षत्रं - रोहिणी, देवता - प्रजापतिः
प्र॒जाप॑ते रोहि॒णीवे॑तु॒ पत्नी᳚ । वि॒श्वरू॑पा बृह॒ती चि॒त्रभा॑नुः ।
सा नो॑ य॒ज्ञस्य॑ सुवि॒ते द॑धातु । यथा॒ जीवे॑म श॒रद॒स्सवी॑राः ।
रो॒हि॒णी दे॒व्युद॑गात्पु॒रस्ता᳚त् । विश्वा॑ रू॒पाणि॑ प्रति॒मोद॑माना ।
प्र॒जाप॑तिग्ं ह॒विषा॑ व॒र्धय॑न्ती । प्रि॒या दे॒वाना॒-मुप॑यातु य॒ज्ञम् ॥ 2
नक्षत्रं - मृगशीर्षः, देवता - सोमः
सोमो॒ राजा॑ मृगशी॒र्॒षेण॒ आगन्न्॑ । शि॒व-न्नक्ष॑त्र-म्प्रि॒यम॑स्य॒ धाम॑ ।
आ॒प्याय॑मानो बहु॒धा जने॑षु । रेतः॑ प्र॒जां-यँज॑माने दधातु ।
यत्ते॒ नक्ष॑त्र-म्मृगशी॒र्॒षमस्ति॑ । प्रि॒यग्ं रा॑ज-न्प्रि॒यत॑म-म्प्रि॒याणा᳚म् ।
तस्मै॑ ते सोम ह॒विषा॑ विधेम । शन्न॑ एधि द्वि॒पदे॒ शञ्चतु॑ष्पदे ॥ 3
नक्षत्रं - आर्द्रा, देवता - रुद्रः
आ॒र्द्रया॑ रु॒द्रः प्रथ॑मा न एति । श्रेष्ठो॑ दे॒वाना॒-म्पति॑रघ्नि॒याना᳚म् ।
नक्ष॑त्रमस्य ह॒विषा॑ विधेम । मा नः॑ प्र॒जाग्ं री॑रिष॒न्मोत वी॒रान् ।
हे॒ती रु॒द्रस्य॒ परि॑णो वृणक्तु । आ॒र्द्रा नक्ष॑त्र-ञ्जुषताग्ं ह॒विर्नः॑ ।
प्र॒मु॒ञ्चमा॑नौ दुरि॒तानि॒ विश्वा᳚ । अपा॒घशग्ं॑ सन्नु-दता॒मरा॑तिम् ॥ 4
नक्षत्रं - पुनर्वसु, देवता - अदितिः
पुन॑र्नो दे॒व्यदि॑ति-स्पृणोतु । पुन॑र्वसू नः॒ पुन॒रेतां᳚-यँ॒ज्ञम् ।
पुन॑र्नो दे॒वा अ॒भिय॑न्तु॒ सर्वे᳚ । पुनः॑ पुनर्वो ह॒विषा॑ यजामः ।
ए॒वा न दे॒व्य-दि॑तिरन॒र्वा । विश्व॑स्य भ॒र्त्री जग॑तः प्रति॒ष्ठा ।
पुन॑र्वसू ह॒विषा॑ व॒र्धय॑न्ती । प्रि॒य-न्दे॒वाना॒-मप्ये॑तु॒ पाथः॑ ॥ 5
नक्षत्रं - पुष्यः, देवता - बृहस्पतिः
बृह॒स्पतिः॑ प्रथ॒मञ्जाय॑मानः । ति॒ष्य॑-न्नक्ष॑त्रम॒भि सम्ब॑भूव ।
श्रेष्ठो॑ दे॒वाना॒-म्पृत॑नासु जि॒ष्णुः । दि॒शो-ऽनु॒ सर्वा॒ अभ॑यन्नो अस्तु ।
ति॒ष्यः॑ पु॒रस्ता॑दु॒त म॑ध्य॒तो नः॑ । बृह॒स्पति॑र्नः॒ परि॑पातु प॒श्चात् ।
बाधे॑ ता॒न्द्वेषो॒ अभ॑य-ङ्कृणुताम् । सु॒वीर्य॑स्य॒ पत॑यस्याम ॥ 6
नक्षत्रं -आश्रेषम्, देवता - सर्पाः
इ॒दग्ं स॒र्पेभ्यो॑ ह॒विर॑स्तु॒ जुष्ट᳚म् । आ॒श्रे॒षा येषा॑मनु॒यन्ति॒ चेतः॑ ।
ये अ॒न्तरि॑क्ष-म्पृथि॒वीं-क्षि॒यन्ति॑ । तेन॑ स्स॒र्पासो॒ हव॒माग॑मिष्ठाः ।
ये रो॑च॒ने सूर्य॒स्यापि॑ स॒र्पाः । ये दिव॑-न्दे॒वी-मनु॑स॒ञ्चर॑न्ति ।
येषा॑माश्रे॒षा अ॑नु॒यन्ति॒ काम᳚म् । तेभ्य॑-स्स॒र्पेभ्यो॒ मधु॑-मज्जुहोमि ॥ 7
नक्षत्रं - मघा, देवता - पितरः
उप॑हूताः पि॒तरो॒ ये म॒घासु॑ । मनो॑जवस-स्सु॒कृत॑-स्सुकृ॒त्याः ।
ते नो॒ नक्ष॑त्रे॒ हव॒माग॑मिष्ठाः । स्व॒धाभि॑र्य॒ज्ञ-म्प्रय॑त-ञ्जुषन्ताम् ।
ये अ॑ग्निद॒ग्धा ये-ऽन॑ग्नि-दग्धाः । ये॑-ऽमुल्लो॒क-म्पि॒तरः॑, क्षि॒यन्ति॑ ।
याग्श्च॑ वि॒द्मयाग्ं उ॑ च॒ न प्र॑वि॒द्म । म॒घासु॑ य॒ज्ञग्ं सुकृ॑त-ञ्जुषन्ताम् ॥ 8
नक्षत्रं - पूर्वफल्गुनी, देवता - अर्यमा
गवा॒-म्पतिः॒ फल्गु॑नी-नामसि॒ त्वम् । तद॑र्यमन्वरुण मित्र॒ चारु॑ ।
त-न्त्वा॑ व॒यग्ं स॑नि॒तारग्ं॑ सनी॒नाम् । जी॒वा जीव॑न्त॒मुप॒ संविँ॑शेम ।
येने॒मा विश्वा॒ भुव॑नानि॒ सञ्जि॑ता । यस्य॑ दे॒वा अ॑नुसं॒यँन्ति॒ चेतः॑ ।
अ॒र्य॒मा राजा॒-ऽजर॒स्तु वि॑ष्मान् । फल्गु॑नीना-मृष॒भो रो॑रवीति ॥ 9
नक्षत्रं - उत्तर फल्गुनी, देवता - भगः
श्रेष्ठो॑ दे॒वाना᳚-म्भगवो भगासि । तत्त्वा॑ विदुः॒ फल्गु॑नी॒-स्तस्य॑ वित्तात् ।
अ॒स्मभ्यं॑-क्ष॒त्रम॒जरग्ं॑ सु॒वीर्य᳚म् । गोम॒दश्व॑-व॒दुप॒सन्नु॑-दे॒ह ।
भगो॑ह दा॒ता भग॒ इत्प्र॑दा॒ता । भगो॑ दे॒वीः फल्गु॑नी॒-रावि॑वेश ।
भग॒स्येत्त-म्प्र॑स॒व-ङ्ग॑मेम । यत्र॑ दे॒वै-स्स॑ध॒माद॑-म्मदेम ॥ 10
नक्षत्रं - हस्तः, देवता - सविता
आया॑तु दे॒व-स्स॑वि॒तो प॑यातु । हि॒र॒ण्यये॑न सु॒वृता॒ रथे॑न ।
वह॒न॒, हस्तग्ं॑ सु॒भगं॑-विँद्म॒नाप॑सम् । प्र॒यच्छ॑न्त॒-म्पपु॑रि॒-म्पुण्य॒मच्छ॑ ।
हस्तः॒ प्रय॑च्छ त्व॒मृतं॒-वँसी॑यः । दक्षि॑णेन॒ प्रति॑गृभ्णीम एनत् ।
दा॒तार॑-म॒द्य स॑वि॒ता वि॑देय । यो नो॒ हस्ता॑य प्रसु॒वाति॑ य॒ज्ञम् ॥ 11
नक्षत्रं - चित्रा, देवता - त्वष्टा
त्वष्टा॒ नक्ष॑त्र-म॒भ्ये॑ति चि॒त्राम् । सु॒भग्ं स॑संयुँव॒तिग्ं रोच॑मानाम् ।
नि॒वे॒शय॑-न्न॒मृता॒-न्मर्त्याग्॑श्च । रू॒पाणि॑ पि॒ग्ं॒श-न्भुव॑नानि॒ विश्वा᳚ ।
तन्न॒स्त्वष्टा॒ तदु॑ चि॒त्रा विच॑ष्टाम् । तन्नक्ष॑त्र-म्भूरि॒दा अ॑स्तु॒ मह्य᳚म् ।
तन्नः॑ प्र॒जां-वीँ॒रव॑तीग्ं सनोतु । गोभि॑र्नो॒ अश्वै॒-स्सम॑नक्तु य॒ज्ञम् ॥ 12
नक्षत्रं - स्वाती, देवता - वायुः
वा॒यु-र्नक्ष॑त्र-म॒भ्ये॑ति॒ निष्ट्या᳚म् । ति॒ग्मशृ॑ङ्गो वृष॒भो रोरु॑वाणः ।
स॒मी॒रय॒-न्भुव॑ना मात॒रिश्वा᳚ । अप॒ द्वेषाग्ं॑सि नुदता॒मरा॑तीः ।
तन्नो॑ वा॒यस्तदु॒ निष्ट्या॑ शृणोतु । तन्नक्ष॑त्र-म्भूरि॒दा अ॑स्तु॒ मह्य᳚म् ।
तन्नो॑ दे॒वासो॒ अनु॑ जानन्तु॒ काम᳚म् । यथा॒ तरे॑म दुरि॒तानि॒ विश्वा᳚ ॥ 13
नक्षत्रं - विशाखा, देवता - इन्द्राग्नी
दू॒रम॒स्मच्छत्र॑वो यन्तु भी॒ताः । तदि॑न्द्रा॒ग्नी कृ॑णुता॒-न्तद्विशा॑खे ।
तन्नो॑ दे॒वा अनु॑मदन्तु य॒ज्ञम् । प॒श्चा-त्पु॒रस्ता॒-दभ॑यन्नो अस्तु ।
नक्ष॑त्राणा॒-मधि॑पत्नी॒ विशा॑खे । श्रेष्ठा॑-विन्द्रा॒ग्नी भुव॑नस्य गो॒पौ ।
विषू॑च॒-श्शत्रू॑नप॒बाध॑मानौ । अप॒क्षुध॑-न्नुदता॒मरा॑तिम् ॥ 14
पौर्णमासि
पू॒र्णा प॒श्चादु॒त पू॒र्णा पु॒रस्ता᳚त् । उन्म॑ध्य॒तः पौ᳚र्णमा॒सी जि॑गाय ।
तस्या᳚-न्दे॒वा अधि॑ सं॒-वँस॑न्तः । उ॒त्त॒मे नाक॑ इ॒ह मा॑दयन्ताम् ।
पृ॒थ्वी सु॒वर्चा॑ युव॒ति-स्स॒जोषाः᳚ । पौ॒र्ण॒मा॒स्युद॑गा॒-च्छोभ॑माना ।
आ॒प्या॒यय॑न्ती दुरि॒तानि॒ विश्वा᳚ । उ॒रु-न्दुहां॒-यँज॑मानाय य॒ज्ञम् ॥ 15
नक्षत्रं - अनूराधा, देवता - मित्रः
ऋ॒द्ध्यास्म॑ ह॒व्यै-र्नम॑सोप॒-सद्य॑ । मि॒त्र-न्दे॒व-म्मि॑त्र॒धेय॑न्नो अस्तु ।
अ॒नू॒रा॒धान्, ह॒विषा॑ व॒र्धय॑न्तः । श॒त-ञ्जी॑वेम श॒रद॒-स्सवी॑राः ।
चि॒त्रं-नक्ष॑त्र॒-मुद॑गा-त्पु॒रस्ता᳚त् । अ॒नू॒रा॒धा स॒ इति॒ यद्वद॑न्ति ।
तन्मि॒त्र ए॑ति प॒थिभि॑-र्देव॒यानैः᳚ । हि॒र॒ण्ययै॒-र्वित॑तै-र॒न्तरि॑क्षे ॥ 16
नक्षत्रं - ज्येष्ठा, देवता - इन्द्रः
इन्द्रो᳚ ज्ये॒ष्ठा मनु॒ नक्ष॑त्रमेति । यस्मि॑न् वृ॒त्रं-वृँ॑त्र॒ तूर्ये॑ त॒तार॑ ।
तस्मि॑न्व॒य-म॒मृत॒-न्दुहा॑नाः । क्षुध॑न्तरेम॒ दुरि॑ति॒-न्दुरि॑ष्टिम् ।
पु॒र॒न्द॒राय॑ वृष॒भाय॑ धृ॒ष्णवे᳚ । अषा॑ढाय॒ सह॑मानाय मी॒ढुषे᳚ ।
इन्द्रा॑य ज्ये॒ष्ठा मधु॑म॒द्दुहा॑ना । उ॒रु-ङ्कृ॑णोतु॒ यज॑मानाय लो॒कम् ॥ 17
नक्षत्रं - मूलम्, देवता - प्रजापतिः
मूल॑-म्प्र॒जां-वीँ॒रव॑तीं-विँदेय । परा᳚च्येतु॒ निर्-ऋ॑तिः परा॒चा ।
गोभि॒-र्नक्ष॑त्र-म्प॒शुभि॒-स्सम॑क्तम् । अह॑-र्भूया॒-द्यज॑मानाय॒ मह्य᳚म् ।
अह॑र्नो अ॒द्य सु॑वि॒ते द॑धातु । मूल॒-न्नक्ष॑त्र॒मिति॒ यद्वद॑न्ति ।
परा॑चीं-वाँ॒चा निर्-ऋ॑ति-न्नुदामि । शि॒व-म्प्र॒जायै॑ शि॒वम॑स्तु॒ मह्य᳚म् ॥ 18
नक्षत्रं - पूर्वाषाढा, देवता - आपः
या दि॒व्या आपः॒ पय॑सा सम्बभू॒वुः । या अ॒न्तरि॑क्ष उ॒त पार्थि॑वी॒र्याः ।
यासा॑मषा॒ढा अ॑नु॒यन्ति॒ काम᳚म् । ता न॒ आप॒-श्शग्ग् स्यो॒ना भ॑वन्तु ।
याश्च॒ कूप्या॒ याश्च॑ ना॒द्या᳚-स्समु॒द्रियाः᳚ । याश्च॑ वैश॒न्तीरु॒त प्रा॑स॒चीर्याः ।
यासा॑मषा॒ढा मधु॑ भ॒क्षय॑न्ति । ता न॒ आप॒-श्शग्ग् स्यो॒ना भ॑वन्तु ॥ 19
नक्षत्रं - उत्तराषाढा, देवता - विश्वेदेवः
तन्नो॒ विश्वे॒ उप॑ शृण्वन्तु दे॒वाः । तद॑षा॒ढा अ॒भिसंयँ॑न्तु य॒ज्ञम् ।
तन्नक्ष॑त्र-म्प्रथता-म्प॒शुभ्यः॑ । कृ॒षि-र्वृ॒ष्टि-र्यज॑मानाय कल्पताम् ।
शु॒भ्राः क॒न्या॑ युव॒तय॑-स्सु॒पेश॑सः । क॒र्म॒कृत॑-स्सु॒कृतो॑ वी॒र्या॑वतीः ।
विश्वा᳚-न्दे॒वान्, ह॒विषा॑ व॒र्धय॑न्तीः ।
अ॒षा॒ढाः काम॒ मुप॑यान्तु य॒ज्ञम् ॥ 20
नक्षत्रं - अभिजित्, देवता - ब्रह्मा
यस्मि॒-न्ब्रह्मा॒भ्यज॑य॒-थ्सर्व॑मे॒तत् । अ॒मुञ्च॑ लो॒क मि॒दमू॑च॒ सर्व᳚म् ।
तन्नो॒ नक्ष॑त्र-मभि॒जि-द्वि॒जित्य॑ । श्रिय॑-न्दधा॒त्व-हृ॑णीयमानम् ।
उ॒भौ लो॒कौ ब्रह्म॑णा॒ सञ्जि॑ते॒मौ । तन्नो॒ नक्ष॑त्र-मभि॒जि-द्विच॑ष्टाम् ।
तस्मि॑न् व॒य-म्पृत॑ना॒ स्सञ्ज॑येम । तन्नो॑ दे॒वासो॒ अनु॑जानन्तु॒ काम᳚म् ॥ 21
नक्षत्रं - श्रवणम्, देवता - विष्णुः
शृ॒ण्वन्ति॑ श्रो॒णा-म॒मृत॑स्य गो॒पाम् । पुण्या॑मस्या॒ उप॑शृणोमि॒ वाच᳚म् ।
म॒ही-न्दे॒वीं-विँष्णु॑पत्नी मजू॒र्याम् । प्र॒तीची॑ मेनाग्ं ह॒विषा॑ यजामः ।
त्रे॒धा विष्णु॑-रुरुगा॒यो विच॑क्रमे । म॒ही-न्दिव॑-म्पृथि॒वी-म॒न्तरि॑क्षम् ।
तच्छ्रो॒णैति॒ श्रव॑-इ॒च्छमा॑ना । पुण्य॒ग्ग्॒ श्लोकं॒-यँज॑मानाय कृण्व॒ती ॥ 22
नक्षत्रं - श्रविष्टा, देवता - वसवः
अ॒ष्टौ दे॒वा वस॑वस्सो॒म्यासः॑ । चत॑स्रो दे॒वी र॒जरा॒-श्श्रवि॑ष्ठाः ।
ते य॒ज्ञ-म्पा᳚न्तु॒ रज॑सः प॒रस्ता᳚त् । सं॒वँ॒थ्स॒रीण॑-म॒मृतग्ग्॑ स्व॒स्ति ।
य॒ज्ञ-न्नः॑ पान्तु॒ वस॑वः पु॒रस्ता᳚त् । द॒क्षि॒ण॒तो॑-ऽभिय॑न्तु॒ श्रवि॑ष्ठाः ।
पुण्य॒न्नक्ष॑त्रम॒भि संविँ॑शाम । मा नो॒ अरा॑ति-र॒घश॒ग्ं॒ सागन्न्॑ ॥ 23
नक्षत्रं - शतभिषक्, देवता - वरुणः
क्ष॒त्रस्य॒ राजा॒ वरु॑णो-ऽधिरा॒जः । नक्ष॑त्राणाग्ं श॒तभि॑ष॒ग् वसि॑ष्ठः ।
तौ दे॒वेभ्यः॑ कृणुतो दी॒र्घमायः॑ । श॒तग्ं स॒हस्रा॑ भेष॒जानि॑ धत्तः ।
य॒ज्ञन्नो॒ राजा॒ वरु॑ण॒ उप॑यातु । तन्नो॒ विश्वे॑ अ॒भिसंयँ॑न्तु दे॒वाः ।
तन्नो॒ नक्ष॑त्रग्ं श॒तभि॑षग् जुषा॒णम् । दी॒र्घमायुः॒ प्रति॑र-द्भेष॒जानि॑ ॥ 24
नक्षत्रं - पूर्वप्रोष्ठपदा, देवता - अजयेकपादः
अ॒ज एक॑पा॒- दुद॑गा-त्पु॒रस्ता᳚त् । विश्वा॑ भू॒तानि॑ प्रति॒ मोद॑मानः ।
तस्य॑ दे॒वाः प्र॑स॒वं-यँ॑न्ति॒ सर्वे᳚ । प्रो॒ष्ठ॒प॒दासो॑ अ॒मृत॑स्य गो॒पाः ।
वि॒भ्राज॑मान-स्समिधा॒न उ॒ग्रः । आ-ऽन्तरि॑क्ष-मरुह॒द-द्ग॒न्द्याम् ।
तग्ं सूर्य॑-न्दे॒व-म॒जमेक॑पादम् । प्रो॒ष्ठ॒प॒दासो॒ अनु॑यन्ति॒ सर्वे᳚ ॥ 25
नक्षत्रं - उत्तरप्रोष्ठपदा, देवता - अहिर्बुद्ध्नियः
अहि॑-र्बु॒द्ध्नियः॒ प्रथ॑मान एति । श्रेष्ठो॑ दे॒वाना॑मु॒त मानु॑षाणाम् ।
त-म्ब्रा᳚ह्म॒णा-स्सो॑म॒पा-स्सो॒म्यासः॑ । प्रो॒ष्ठ॒प॒दासो॑ अ॒भिर॑क्षन्ति॒ सर्वे᳚ ।
च॒त्वार॒ एक॑म॒भि कर्म॑ दे॒वाः । प्रो॒ष्ठ॒प॒दास॒ इति॒ यान्, वद॑न्ति ।
ते बु॒द्धनिय॑-म्परि॒षद्यग्ग्॑ स्तु॒वन्तः॑ । अहिग्ं॑ रक्षन्ति॒ नम॑सोप॒ सद्य॑ ॥ 26
नक्षत्रं - रेवती, देवता - पूषा
पू॒षा रे॒वत्यन्वे॑ति॒ पन्था᳚म् । पु॒ष्टि॒पती॑ पशु॒पा वाज॑बस्त्यौ ।
इ॒मानि॑ ह॒व्या प्रय॑ता जुषा॒णा । सु॒गैर्नो॒ यानै॒रुप॑यातां-यँ॒ज्ञम् ।
क्षु॒द्रा-न्प॒शू-न्र॑क्षतु रे॒वती॑ नः । गावो॑ नो॒ अश्वा॒ग्ं॒ अन्वे॑तु पू॒षा ।
अन्न॒ग्ं॒ रक्ष॑न्तौ बहु॒धा विरू॑पम् । वाजग्ं॑ सनुतां॒-यँज॑मानाय य॒ज्ञम् ॥ 27
नक्षत्रं - अश्विनी, देवता - अश्विनी देव
तद॒श्विना॑-वश्व॒युजो-प॑याताम् । शुभ॒ङ्गमि॑ष्ठौ सु॒यमे॑भि॒रश्वैः᳚ ।
स्वन्नक्ष॑त्रग्ं ह॒विषा॒ यज॑न्तौ । मद्ध्वा॒-सम्पृ॑क्तौ॒ यजु॑षा॒ सम॑क्तौ ।
यौ दे॒वाना᳚-म्भि॒षजौ॑ हव्यवा॒हौ । विश्व॑स्य दू॒ता-व॒मृत॑स्य गो॒पौ ।
तौ नक्ष॑त्रं-जुजुषा॒णो-प॑याताम् । नमो॒-ऽश्विभ्या᳚-ङ्कृणुमो-ऽश्व॒ग्युभ्या᳚म् ॥ 28
नक्षत्रं - अपभरणी, देवता - यमः
अप॑ पा॒प्मान॒-म्भर॑णी-र्भरन्तु । तद्य॒मो राजा॒ भग॑वा॒न्॒, विच॑ष्टाम् ।
लो॒कस्य॒ राजा॑ मह॒तो म॒हान्, हि । सु॒गन्नः॒ पन्था॒मभ॑य-ङ्कृणोतु ।
यस्मि॒-न्नक्ष॑त्रे य॒म एति॒ राजा᳚ । यस्मि॑न्नेन-म॒भ्यषि॑ञ्चन्त दे॒वाः ।
तद॑स्य चि॒त्रग्ं ह॒विषा॑ यजाम । अप॑ पा॒प्मान॒-म्भर॑णी-र्भरन्तु ॥ 29
अमावासि
नि॒वेश॑नी स॒ङ्गम॑नी॒ वसू॑नां॒-विँश्वा॑ रू॒पाणि॒ वसू᳚न्या-वे॒शय॑न्ती ।
स॒ह॒स्र॒-पो॒षग्ं सु॒भगा॒ ररा॑णा॒ सा न॒ आग॒न् वर्च॑सा संविँदा॒ना ।
यत्ते॑ दे॒वा अद॑धु-र्भाग॒धेय॒-ममा॑वास्ये सं॒वँस॑न्तो महि॒त्वा ।
सा नो॑ य॒ज्ञ-म्पि॑पृहि विश्ववारे र॒यिन्नो॑ धेहि सुभगे सु॒वीर᳚म् ॥ 30
ॐ शान्ति॒-श्शान्ति॒-श्शान्तिः॑ ॥
31-40: Optional for Additional Chanting
चन्द्रमा
नवो॑ नवो भवति॒ जाय॑मा॒नो-ऽह्ना᳚-ङ्के॒तु-रु॒षसा॑ मे॒त्यग्रे᳚ ।
भा॒ग-न्दे॒वेभ्यो॒ विद॑धात्या॒य-न्प्रच॒न्द्रमा᳚स्तिरिति दी॒र्घमायुः॑ ॥
यमा॑दि॒त्या अ॒ग्ं॒शुमा᳚प्या॒यय॑न्ति॒ यमक्षि॑त॒-मक्षि॑तयः॒ पिब॑न्ति ।
तेन॑ नो॒ राजा॒ वरु॑णो॒ बृह॒स्पति॒ राप्या॑ययन्तु॒ भुव॑नस्य गो॒पाः ॥ 31
अहो रात्र
ये विरू॑पे॒ सम॑नसा संव्यँय॑न्ती । स॒मा॒न-न्तन्तु॑-म्परिता-त॒नाते᳚ ।
वि॒भू प्र॒भू अ॑नु॒भू वि॒श्वतो॑ हुवे । ते नो॒ नक्ष॑त्रे॒ हव॒माग॑-मेतम् ।
व॒य-न्दे॒वी ब्रह्म॑णा संविँदा॒नाः । सु॒रत्ना॑सो दे॒ववी॑ति॒-न्दधा॑नाः ।
अ॒हो॒रा॒त्रे ह॒विषा॑ व॒र्धय॑न्तः । अति॑ पा॒प्मान॒-मति॑मुक्त्या गमेम ॥ 32
उषा
प्रत्यु॑व दृश्याय॒ती । व्यु॒च्छन्ती॑ दुहि॒ता दि॒वः ।
अ॒पो म॒ही वृ॑णुते॒ चक्षु॑षा । तमो॒ ज्योति॑ष्कृणोति सू॒नरी᳚ ।
उदु॒ स्त्रिया᳚स्सचते॒ सूर्यः॑ । स चा॑ उ॒द्यन्नक्ष॑त्र मर्चि॒मत् ।
त वेदु॑षो॒ व्युषि॒ सूर्य॑स्य च । सम्भ॒क्तेन॑ गमेमहि ॥ 33
नक्षत्रः
तन्नो॒ नक्ष॑त्र मर्चि॒मत् । भा॒नु॒मत्तेज॑ उ॒च्छर॑त् ।
उप॑य॒ज्ञ-मि॒हाग॑मत् । प्रनक्ष॑त्राय दे॒वाय॑ । इन्द्रा॒येन्दुग्ं॑ हवामहे ।
स न॑ स्सवि॒ता सु॑वथ्स॒निम् । पु॒ष्टि॒दां-वीँ॒रव॑त्तमम् ॥ 34
सूर्यः
उदु॒त्य-ञ्जा॒तवे॑दस-न्दे॒वं-वँ॑हन्ति के॒तवः॑ । दृ॒शे विश्वा॑य॒ सूर्य᳚म् ।
चि॒त्र-न्दे॒वाना॒ मुद॑गा॒दनी॑क॒-ञ्चक्षु॑-र्मि॒त्रस्य॒ वरु॑णस्या॒ग्नेः ।
आ-ऽप्रा॒ द्यावा॑पृथि॒वी अ॒न्तरि॑क्ष॒ग्ं॒ सूर्य॑ आ॒त्मा जग॑तस्त॒स्थुष॑श्च ॥ 35
अदितिः
अदि॑तिर्न उरुष्य॒-त्वदि॑ति॒-श्शर्म॑ यच्छतु । अदि॑तिः पा॒त्वग्ं ह॑सः।
म॒हीमू॒षु मा॒तरग्ं॑ सुव्र॒ताना॑-मृ॒तस्य॒ पत्नी॒ मव॑से हुवेम ।
तु॒वि॒क्ष॒त्रा-म॒जर॑न्ती मुरू॒चीग्ं सु॒शर्मा॑ण॒-मदि॑तिग्ं सु॒प्रणी॑तिम् ॥ 36
विष्णुः
इ॒दं-विँष्णु॒-र्विच॑क्रमे त्रे॒धा निद॑धे प॒दम् । समू॑ढमस्य पाग्ं सु॒रे ।
प्रतद्विष्णु॑ स्तवते वी॒र्या॑य । मृ॒गो न भी॒मः कु॑च॒रो गि॑रि॒ष्ठाः ।
यस्यो॒रुषु॑ त्रि॒षु वि॒क्रम॑णेषु । अधि॑क्षि॒यन्ति॒ भुव॑नानि॒ विश्वा᳚ ॥ 37
अग्निः
अ॒ग्नि-र्मू॒द्र्धा दि॒वः क॒कुत्पतिः॑ पृथि॒व्या अ॒यम् ।
अ॒पाग्ं रेताग्ं॑सि जिन्वति ।
भुवो॑ य॒ज्ञस्य॒ रज॑सश्च ने॒ता यत्रा॑ नि॒युद्भि॒-स्सच॑से शि॒वाभिः॑ ।
दि॒वि मू॒द्र्धान॑-न्दधिषे सुव॒र्॒षा-ञ्जि॒ह्वाम॑ग्ने चकृषे हव्य॒वाहं᳚ ॥ 38
अनुमती
अनु॑नो॒-ऽद्यानु॑मति-र्य॒ज्ञ-न्दे॒वेषु॑ मन्यताम् ।
अ॒ग्निश्च॑ हव्य॒वाह॑नो॒ भव॑ता-न्दा॒शुषे॒ मयः॑ ।
अन्विद॑नुमते॒ त्व-म्मन्या॑सै॒ शञ्च॑ नः कृधि ।
क्रत्वे॒ दक्षा॑य नो हिनु॒ प्रण॒ आयूग्ं॑षि तारिषः ॥ 39
हव्यवाहः (अग्निः)
ह॒व्य॒वाह॑मभि-माति॒षाह᳚म् । र॒क्षो॒हण॒-म्पृत॑नासु जि॒ष्णुम् ।
ज्योति॑ष्मन्त॒-न्दीद्य॑त॒-म्पुर॑न्धिम् । अ॒ग्निग्ग् स्वि॑ष्ट॒ कृत॒माहु॑वेम ।
स्वि॑ष्ट मग्ने अ॒भित-त्पृ॑णाहि । विश्वा॑ देव॒ पृत॑ना अ॒भिष्य ।
उ॒रुन्नः॒ पन्था᳚-म्प्रदि॒शन् विभा॑हि । ज्योति॑ष्मद्धेह्य॒ जर॑न्न॒ आयुः॑ ॥ 40
ॐ शान्ति॒-श्शान्ति॒-श्शान्तिः॑ ॥
taittirīya brāhmaṇa - aṣṭakaṃ 3, praśnaḥ 1,
taittirīya saṃhitā - kāṇḍa 3, prapāṭhakaḥ 5, anuvākaṃ 1
nakṣatraṃ - kṛttikā, devatā - agniḥ
oṃ a॒gnirnaḥ̭ pātu॒ kṛtti̭kāḥ | nakṣa̭tra-nde॒vami̭ndri॒yam |
i॒damā̭sāṃ-vi~cakṣa॒ṇam | ha॒virā॒sa-ñjṷhotana |
yasya॒ bhānti̭ ra॒śmayo॒ yasya̭ ke॒tavaḥ̭ | yasye॒mā viśvā॒ bhuva̭nāni॒ sarvā᳚ |
sa kṛtti̭kābhi-ra॒bhisaṃ॒va~sā̭naḥ | a॒gnirno̭ de॒vassṷvi॒te da̭dhātu || 1
nakṣatraṃ - rohiṇī, devatā - prajāpatiḥ
pra॒jāpa̭te rohi॒ṇīvḙtu॒ patnī᳚ | vi॒śvarṷ̄pā bṛha॒tī ci॒trabhā̭nuḥ |
sā no̭ ya॒jñasya̭ suvi॒te da̭dhātu | yathā॒ jīvḙma śa॒rada॒ssavī̭rāḥ |
ro॒hi॒ṇī de॒vyuda̭gātpu॒rastā᳚t | viśvā̭ rū॒pāṇi̭ prati॒moda̭mānā |
pra॒jāpa̭tigṃ ha॒viṣā̭ va॒rdhaya̭ntī | pri॒yā de॒vānā॒-mupa̭yātu ya॒jñam || 2
nakṣatraṃ - mṛgaśīrṣaḥ, devatā - somaḥ
somo॒ rājā̭ mṛgaśī॒r॒ṣeṇa॒ āganṋ | śi॒va-nnakṣa̭tra-mpri॒yama̭sya॒ dhāma̭ |
ā॒pyāya̭māno bahu॒dhā janḙṣu | retaḥ̭ pra॒jāṃ-ya~ja̭māne dadhātu |
yatte॒ nakṣa̭tra-mmṛgaśī॒r॒ṣamasti̭ | pri॒yagṃ rā̭ja-npri॒yata̭ma-mpri॒yāṇā᳚m |
tasmai̭ te soma ha॒viṣā̭ vidhema | śanna̭ edhi dvi॒pade॒ śañcatṷṣpade || 3
nakṣatraṃ - ārdrā, devatā - rudraḥ
ā॒rdrayā̭ ru॒draḥ pratha̭mā na eti | śreṣṭho̭ de॒vānā॒-mpati̭raghni॒yānā᳚m |
nakṣa̭tramasya ha॒viṣā̭ vidhema | mā naḥ̭ pra॒jāgṃ rī̭riṣa॒nmota vī॒rān |
he॒tī ru॒drasya॒ pari̭ṇo vṛṇaktu | ā॒rdrā nakṣa̭tra-ñjuṣatāgṃ ha॒virnaḥ̭ |
pra॒mu॒ñcamā̭nau duri॒tāni॒ viśvā᳚ | apā॒ghaśagṃ̭ sannu-datā॒marā̭tim || 4
nakṣatraṃ - punarvasu, devatā - aditiḥ
puna̭rno de॒vyadi̭ti-spṛṇotu | puna̭rvasū naḥ॒ puna॒retāṃ᳚-ya~॒jñam |
puna̭rno de॒vā a॒bhiya̭ntu॒ sarve᳚ | punaḥ̭ punarvo ha॒viṣā̭ yajāmaḥ |
e॒vā na de॒vya-di̭tirana॒rvā | viśva̭sya bha॒rtrī jaga̭taḥ prati॒ṣṭhā |
puna̭rvasū ha॒viṣā̭ va॒rdhaya̭ntī | pri॒ya-nde॒vānā॒-mapyḙtu॒ pāthaḥ̭ || 5
nakṣatraṃ - puṣyaḥ, devatā - bṛhaspatiḥ
bṛha॒spatiḥ̭ pratha॒mañjāya̭mānaḥ | ti॒ṣya̭-nnakṣa̭trama॒bhi samba̭bhūva |
śreṣṭho̭ de॒vānā॒-mpṛta̭nāsu ji॒ṣṇuḥ | di॒śo-'nu॒ sarvā॒ abha̭yanno astu |
ti॒ṣyaḥ̭ pu॒rastā̭du॒ta ma̭dhya॒to naḥ̭ | bṛha॒spati̭rnaḥ॒ pari̭pātu pa॒ścāt |
bādhḙ tā॒ndveṣo॒ abha̭ya-ṅkṛṇutām | su॒vīrya̭sya॒ pata̭yasyāma || 6
nakṣatraṃ -āśreṣam, devatā - sarpāḥ
i॒dagṃ sa॒rpebhyo̭ ha॒vira̭stu॒ juṣṭa᳚m | ā॒śre॒ṣā yeṣā̭manu॒yanti॒ cetaḥ̭ |
ye a॒ntari̭kṣa-mpṛthi॒vīṃ-kṣi॒yanti̭ | tena̭ ssa॒rpāso॒ hava॒māga̭miṣṭhāḥ |
ye ro̭ca॒ne sūrya॒syāpi̭ sa॒rpāḥ | ye diva̭-nde॒vī-manṷsa॒ñcara̭nti |
yeṣā̭māśre॒ṣā a̭nu॒yanti॒ kāma᳚m | tebhya̭-ssa॒rpebhyo॒ madhṷ-majjuhomi || 7
nakṣatraṃ - maghā, devatā - pitaraḥ
upa̭hūtāḥ pi॒taro॒ ye ma॒ghāsṷ | mano̭javasa-ssu॒kṛta̭-ssukṛ॒tyāḥ |
te no॒ nakṣa̭tre॒ hava॒māga̭miṣṭhāḥ | sva॒dhābhi̭rya॒jña-mpraya̭ta-ñjuṣantām |
ye a̭gnida॒gdhā ye-'na̭gni-dagdhāḥ | yḙ-'mullo॒ka-mpi॒taraḥ̭, kṣi॒yanti̭ |
yāgśca̭ vi॒dmayāgṃ ṷ ca॒ na pra̭vi॒dma | ma॒ghāsṷ ya॒jñagṃ sukṛ̭ta-ñjuṣantām || 8
nakṣatraṃ - pūrvaphalgunī, devatā - aryamā
gavā॒-mpatiḥ॒ phalgṷnī-nāmasi॒ tvam | tada̭ryamanvaruṇa mitra॒ cārṷ |
ta-ntvā̭ va॒yagṃ sa̭ni॒tāragṃ̭ sanī॒nām | jī॒vā jīva̭nta॒mupa॒ saṃvi~̭śema |
yene॒mā viśvā॒ bhuva̭nāni॒ sañji̭tā | yasya̭ de॒vā a̭nusaṃ॒ya~nti॒ cetaḥ̭ |
a॒rya॒mā rājā॒-'jara॒stu vi̭ṣmān | phalgṷnīnā-mṛṣa॒bho ro̭ravīti || 9
nakṣatraṃ - uttara phalgunī, devatā - bhagaḥ
śreṣṭho̭ de॒vānā᳚-mbhagavo bhagāsi | tattvā̭ viduḥ॒ phalgṷnī॒-stasya̭ vittāt |
a॒smabhyaṃ̭-kṣa॒trama॒jaragṃ̭ su॒vīrya᳚m | goma॒daśva̭-va॒dupa॒sannṷ-de॒ha |
bhago̭ha dā॒tā bhaga॒ itpra̭dā॒tā | bhago̭ de॒vīḥ phalgṷnī॒-rāvi̭veśa |
bhaga॒syetta-mpra̭sa॒va-ṅga̭mema | yatra̭ de॒vai-ssa̭dha॒māda̭-mmadema || 10
nakṣatraṃ - hastaḥ, devatā - savitā
āyā̭tu de॒va-ssa̭vi॒to pa̭yātu | hi॒ra॒ṇyayḙna su॒vṛtā॒ rathḙna |
vaha॒na॒, hastagṃ̭ su॒bhagaṃ̭-vi~dma॒nāpa̭sam | pra॒yaccha̭nta॒-mpapṷri॒-mpuṇya॒maccha̭ |
hastaḥ॒ praya̭ccha tva॒mṛtaṃ॒-va~sī̭yaḥ | dakṣi̭ṇena॒ prati̭gṛbhṇīma enat |
dā॒tāra̭-ma॒dya sa̭vi॒tā vi̭deya | yo no॒ hastā̭ya prasu॒vāti̭ ya॒jñam || 11
nakṣatraṃ - citrā, devatā - tvaṣṭā
tvaṣṭā॒ nakṣa̭tra-ma॒bhyḙti ci॒trām | su॒bhagṃ sa̭saṃyu~va॒tigṃ roca̭mānām |
ni॒ve॒śaya̭-nna॒mṛtā॒-nmartyāg̭śca | rū॒pāṇi̭ pi॒gṃ॒śa-nbhuva̭nāni॒ viśvā᳚ |
tanna॒stvaṣṭā॒ tadṷ ci॒trā vica̭ṣṭām | tannakṣa̭tra-mbhūri॒dā a̭stu॒ mahya᳚m |
tannaḥ̭ pra॒jāṃ-vī~॒rava̭tīgṃ sanotu | gobhi̭rno॒ aśvai॒-ssama̭naktu ya॒jñam || 12
nakṣatraṃ - svātī, devatā - vāyuḥ
vā॒yu-rnakṣa̭tra-ma॒bhyḙti॒ niṣṭyā᳚m | ti॒gmaśṛ̭ṅgo vṛṣa॒bho rorṷvāṇaḥ |
sa॒mī॒raya॒-nbhuva̭nā māta॒riśvā᳚ | apa॒ dveṣāgṃ̭si nudatā॒marā̭tīḥ |
tanno̭ vā॒yastadu॒ niṣṭyā̭ śṛṇotu | tannakṣa̭tra-mbhūri॒dā a̭stu॒ mahya᳚m |
tanno̭ de॒vāso॒ anṷ jānantu॒ kāma᳚m | yathā॒ tarḙma duri॒tāni॒ viśvā᳚ || 13
nakṣatraṃ - viśākhā, devatā - indrāgnī
dū॒rama॒smacchatra̭vo yantu bhī॒tāḥ | tadi̭ndrā॒gnī kṛ̭ṇutā॒-ntadviśā̭khe |
tanno̭ de॒vā anṷmadantu ya॒jñam | pa॒ścā-tpu॒rastā॒-dabha̭yanno astu |
nakṣa̭trāṇā॒-madhi̭patnī॒ viśā̭khe | śreṣṭhā̭-vindrā॒gnī bhuva̭nasya go॒pau |
viṣṷ̄ca॒-śśatrṷ̄napa॒bādha̭mānau | apa॒kṣudha̭-nnudatā॒marā̭tim || 14
paurṇamāsi
pū॒rṇā pa॒ścādu॒ta pū॒rṇā pu॒rastā᳚t | unma̭dhya॒taḥ pau᳚rṇamā॒sī ji̭gāya |
tasyā᳚-nde॒vā adhi̭ saṃ॒-va~sa̭ntaḥ | u॒tta॒me nāka̭ i॒ha mā̭dayantām |
pṛ॒thvī su॒varcā̭ yuva॒ti-ssa॒joṣāḥ᳚ | pau॒rṇa॒mā॒syuda̭gā॒-cchobha̭mānā |
ā॒pyā॒yaya̭ntī duri॒tāni॒ viśvā᳚ | u॒ru-nduhāṃ॒-ya~ja̭mānāya ya॒jñam || 15
nakṣatraṃ - anūrādhā, devatā - mitraḥ
ṛ॒ddhyāsma̭ ha॒vyai-rnama̭sopa॒-sadya̭ | mi॒tra-nde॒va-mmi̭tra॒dheya̭nno astu |
a॒nū॒rā॒dhān, ha॒viṣā̭ va॒rdhaya̭ntaḥ | śa॒ta-ñjī̭vema śa॒rada॒-ssavī̭rāḥ |
ci॒traṃ-nakṣa̭tra॒-muda̭gā-tpu॒rastā᳚t | a॒nū॒rā॒dhā sa॒ iti॒ yadvada̭nti |
tanmi॒tra ḙti pa॒thibhi̭-rdeva॒yānaiḥ᳚ | hi॒ra॒ṇyayai॒-rvita̭tai-ra॒ntari̭kṣe || 16
nakṣatraṃ - jyeṣṭhā, devatā - indraḥ
indro᳚ jye॒ṣṭhā manu॒ nakṣa̭trameti | yasmi̭n vṛ॒traṃ-vṛ~̭tra॒ tūryḙ ta॒tāra̭ |
tasmi̭nva॒ya-ma॒mṛta॒-nduhā̭nāḥ | kṣudha̭ntarema॒ duri̭ti॒-nduri̭ṣṭim |
pu॒ra॒nda॒rāya̭ vṛṣa॒bhāya̭ dhṛ॒ṣṇave᳚ | aṣā̭ḍhāya॒ saha̭mānāya mī॒ḍhuṣe᳚ |
indrā̭ya jye॒ṣṭhā madhṷma॒dduhā̭nā | u॒ru-ṅkṛ̭ṇotu॒ yaja̭mānāya lo॒kam || 17
nakṣatraṃ - mūlam, devatā - prajāpatiḥ
mūla̭-mpra॒jāṃ-vī~॒rava̭tīṃ-vi~deya | parā᳚cyetu॒ nir-ṛ̭tiḥ parā॒cā |
gobhi॒-rnakṣa̭tra-mpa॒śubhi॒-ssama̭ktam | aha̭-rbhūyā॒-dyaja̭mānāya॒ mahya᳚m |
aha̭rno a॒dya sṷvi॒te da̭dhātu | mūla॒-nnakṣa̭tra॒miti॒ yadvada̭nti |
parā̭cīṃ-vā~॒cā nir-ṛ̭ti-nnudāmi | śi॒va-mpra॒jāyai̭ śi॒vama̭stu॒ mahya᳚m || 18
nakṣatraṃ - pūrvāṣāḍhā, devatā - āpaḥ
yā di॒vyā āpaḥ॒ paya̭sā sambabhū॒vuḥ | yā a॒ntari̭kṣa u॒ta pārthi̭vī॒ryāḥ |
yāsā̭maṣā॒ḍhā a̭nu॒yanti॒ kāma᳚m | tā na॒ āpa॒-śśagg syo॒nā bha̭vantu |
yāśca॒ kūpyā॒ yāśca̭ nā॒dyā᳚-ssamu॒driyāḥ᳚ | yāśca̭ vaiśa॒ntīru॒ta prā̭sa॒cīryāḥ |
yāsā̭maṣā॒ḍhā madhṷ bha॒kṣaya̭nti | tā na॒ āpa॒-śśagg syo॒nā bha̭vantu || 19
nakṣatraṃ - uttarāṣāḍhā, devatā - viśvedevaḥ
tanno॒ viśve॒ upa̭ śṛṇvantu de॒vāḥ | tada̭ṣā॒ḍhā a॒bhisaṃya~̭ntu ya॒jñam |
tannakṣa̭tra-mprathatā-mpa॒śubhyaḥ̭ | kṛ॒ṣi-rvṛ॒ṣṭi-ryaja̭mānāya kalpatām |
śu॒bhrāḥ ka॒nyā̭ yuva॒taya̭-ssu॒peśa̭saḥ | ka॒rma॒kṛta̭-ssu॒kṛto̭ vī॒ryā̭vatīḥ |
viśvā᳚-nde॒vān, ha॒viṣā̭ va॒rdhaya̭ntīḥ |
a॒ṣā॒ḍhāḥ kāma॒ mupa̭yāntu ya॒jñam || 20
nakṣatraṃ - abhijit, devatā - brahmā
yasmi॒-nbrahmā॒bhyaja̭ya॒-thsarva̭me॒tat | a॒muñca̭ lo॒ka mi॒damṷ̄ca॒ sarva᳚m |
tanno॒ nakṣa̭tra-mabhi॒ji-dvi॒jitya̭ | śriya̭-ndadhā॒tva-hṛ̭ṇīyamānam |
u॒bhau lo॒kau brahma̭ṇā॒ sañji̭te॒mau | tanno॒ nakṣa̭tra-mabhi॒ji-dvica̭ṣṭām |
tasmi̭n va॒ya-mpṛta̭nā॒ ssañja̭yema | tanno̭ de॒vāso॒ anṷjānantu॒ kāma᳚m || 21
nakṣatraṃ - śravaṇam, devatā - viṣṇuḥ
śṛ॒ṇvanti̭ śro॒ṇā-ma॒mṛta̭sya go॒pām | puṇyā̭masyā॒ upa̭śṛṇomi॒ vāca᳚m |
ma॒hī-nde॒vīṃ-vi~ṣṇṷpatnī majū॒ryām | pra॒tīcī̭ menāgṃ ha॒viṣā̭ yajāmaḥ |
tre॒dhā viṣṇṷ-rurugā॒yo vica̭krame | ma॒hī-ndiva̭-mpṛthi॒vī-ma॒ntari̭kṣam |
tacchro॒ṇaiti॒ śrava̭-i॒cchamā̭nā | puṇya॒gg॒ ślokaṃ॒-ya~ja̭mānāya kṛṇva॒tī || 22
nakṣatraṃ - śraviṣṭā, devatā - vasavaḥ
a॒ṣṭau de॒vā vasa̭vasso॒myāsaḥ̭ | cata̭sro de॒vī ra॒jarā॒-śśravi̭ṣṭhāḥ |
te ya॒jña-mpā᳚ntu॒ raja̭saḥ pa॒rastā᳚t | saṃ॒va~॒thsa॒rīṇa̭-ma॒mṛtagg̭ sva॒sti |
ya॒jña-nnaḥ̭ pāntu॒ vasa̭vaḥ pu॒rastā᳚t | da॒kṣi॒ṇa॒to̭-'bhiya̭ntu॒ śravi̭ṣṭhāḥ |
puṇya॒nnakṣa̭trama॒bhi saṃvi~̭śāma | mā no॒ arā̭ti-ra॒ghaśa॒gṃ॒ sāganṋ || 23
nakṣatraṃ - śatabhiṣak, devatā - varuṇaḥ
kṣa॒trasya॒ rājā॒ varṷṇo-'dhirā॒jaḥ | nakṣa̭trāṇāgṃ śa॒tabhi̭ṣa॒g vasi̭ṣṭhaḥ |
tau de॒vebhyaḥ̭ kṛṇuto dī॒rghamāyaḥ̭ | śa॒tagṃ sa॒hasrā̭ bheṣa॒jāni̭ dhattaḥ |
ya॒jñanno॒ rājā॒ varṷṇa॒ upa̭yātu | tanno॒ viśvḙ a॒bhisaṃya~̭ntu de॒vāḥ |
tanno॒ nakṣa̭tragṃ śa॒tabhi̭ṣag juṣā॒ṇam | dī॒rghamāyuḥ॒ prati̭ra-dbheṣa॒jāni̭ || 24
nakṣatraṃ - pūrvaproṣṭhapadā, devatā - ajayekapādaḥ
a॒ja eka̭pā॒- duda̭gā-tpu॒rastā᳚t | viśvā̭ bhū॒tāni̭ prati॒ moda̭mānaḥ |
tasya̭ de॒vāḥ pra̭sa॒vaṃ-ya~̭nti॒ sarve᳚ | pro॒ṣṭha॒pa॒dāso̭ a॒mṛta̭sya go॒pāḥ |
vi॒bhrāja̭māna-ssamidhā॒na u॒graḥ | ā-'ntari̭kṣa-maruha॒da-dga॒ndyām |
tagṃ sūrya̭-nde॒va-ma॒jameka̭pādam | pro॒ṣṭha॒pa॒dāso॒ anṷyanti॒ sarve᳚ || 25
nakṣatraṃ - uttaraproṣṭhapadā, devatā - ahirbuddhniyaḥ
ahi̭-rbu॒ddhniyaḥ॒ pratha̭māna eti | śreṣṭho̭ de॒vānā̭mu॒ta mānṷṣāṇām |
ta-mbrā᳚hma॒ṇā-sso̭ma॒pā-sso॒myāsaḥ̭ | pro॒ṣṭha॒pa॒dāso̭ a॒bhira̭kṣanti॒ sarve᳚ |
ca॒tvāra॒ eka̭ma॒bhi karma̭ de॒vāḥ | pro॒ṣṭha॒pa॒dāsa॒ iti॒ yān, vada̭nti |
te bu॒ddhaniya̭-mpari॒ṣadyagg̭ stu॒vantaḥ̭ | ahigṃ̭ rakṣanti॒ nama̭sopa॒ sadya̭ || 26
nakṣatraṃ - revatī, devatā - pūṣā
pū॒ṣā re॒vatyanvḙti॒ panthā᳚m | pu॒ṣṭi॒patī̭ paśu॒pā vāja̭bastyau |
i॒māni̭ ha॒vyā praya̭tā juṣā॒ṇā | su॒gairno॒ yānai॒rupa̭yātāṃ-ya~॒jñam |
kṣu॒drā-npa॒śū-nra̭kṣatu re॒vatī̭ naḥ | gāvo̭ no॒ aśvā॒gṃ॒ anvḙtu pū॒ṣā |
anna॒gṃ॒ rakṣa̭ntau bahu॒dhā virṷ̄pam | vājagṃ̭ sanutāṃ॒-ya~ja̭mānāya ya॒jñam || 27
nakṣatraṃ - aśvinī, devatā - aśvinī deva
tada॒śvinā̭-vaśva॒yujo-pa̭yātām | śubha॒ṅgami̭ṣṭhau su॒yamḙbhi॒raśvaiḥ᳚ |
svannakṣa̭tragṃ ha॒viṣā॒ yaja̭ntau | maddhvā॒-sampṛ̭ktau॒ yajṷṣā॒ sama̭ktau |
yau de॒vānā᳚-mbhi॒ṣajaṷ havyavā॒hau | viśva̭sya dū॒tā-va॒mṛta̭sya go॒pau |
tau nakṣa̭traṃ-jujuṣā॒ṇo-pa̭yātām | namo॒-'śvibhyā᳚-ṅkṛṇumo-'śva॒gyubhyā᳚m || 28
nakṣatraṃ - apabharaṇī, devatā - yamaḥ
apa̭ pā॒pmāna॒-mbhara̭ṇī-rbharantu | tadya॒mo rājā॒ bhaga̭vā॒n॒, vica̭ṣṭām |
lo॒kasya॒ rājā̭ maha॒to ma॒hān, hi | su॒gannaḥ॒ panthā॒mabha̭ya-ṅkṛṇotu |
yasmi॒-nnakṣa̭tre ya॒ma eti॒ rājā᳚ | yasmi̭nnena-ma॒bhyaṣi̭ñcanta de॒vāḥ |
tada̭sya ci॒tragṃ ha॒viṣā̭ yajāma | apa̭ pā॒pmāna॒-mbhara̭ṇī-rbharantu || 29
amāvāsi
ni॒veśa̭nī sa॒ṅgama̭nī॒ vasṷ̄nāṃ॒-vi~śvā̭ rū॒pāṇi॒ vasū᳚nyā-ve॒śaya̭ntī |
sa॒ha॒sra॒-po॒ṣagṃ su॒bhagā॒ rarā̭ṇā॒ sā na॒ āga॒n varca̭sā saṃvi~dā॒nā |
yattḙ de॒vā ada̭dhu-rbhāga॒dheya॒-mamā̭vāsye saṃ॒va~sa̭nto mahi॒tvā |
sā no̭ ya॒jña-mpi̭pṛhi viśvavāre ra॒yinno̭ dhehi subhage su॒vīra᳚m || 30
oṃ śānti॒-śśānti॒-śśāntiḥ̭ ||
31-40: Optional for Additional Chanting
candramā
navo̭ navo bhavati॒ jāya̭mā॒no-'hnā᳚-ṅke॒tu-ru॒ṣasā̭ me॒tyagre᳚ |
bhā॒ga-nde॒vebhyo॒ vida̭dhātyā॒ya-npraca॒ndramā᳚stiriti dī॒rghamāyuḥ̭ ||
yamā̭di॒tyā a॒gṃ॒śumā᳚pyā॒yaya̭nti॒ yamakṣi̭ta॒-makṣi̭tayaḥ॒ piba̭nti |
tena̭ no॒ rājā॒ varṷṇo॒ bṛha॒spati॒ rāpyā̭yayantu॒ bhuva̭nasya go॒pāḥ || 31
aho rātra
ye virṷ̄pe॒ sama̭nasā saṃvya~ya̭ntī | sa॒mā॒na-ntantṷ-mparitā-ta॒nāte᳚ |
vi॒bhū pra॒bhū a̭nu॒bhū vi॒śvato̭ huve | te no॒ nakṣa̭tre॒ hava॒māga̭-metam |
va॒ya-nde॒vī brahma̭ṇā saṃvi~dā॒nāḥ | su॒ratnā̭so de॒vavī̭ti॒-ndadhā̭nāḥ |
a॒ho॒rā॒tre ha॒viṣā̭ va॒rdhaya̭ntaḥ | ati̭ pā॒pmāna॒-mati̭muktyā gamema || 32
uṣā
pratyṷva dṛśyāya॒tī | vyu॒cchantī̭ duhi॒tā di॒vaḥ |
a॒po ma॒hī vṛ̭ṇute॒ cakṣṷṣā | tamo॒ jyoti̭ṣkṛṇoti sū॒narī᳚ |
udu॒ striyā᳚ssacate॒ sūryaḥ̭ | sa cā̭ u॒dyannakṣa̭tra marci॒mat |
ta vedṷṣo॒ vyuṣi॒ sūrya̭sya ca | sambha॒ktena̭ gamemahi || 33
nakṣatraḥ
tanno॒ nakṣa̭tra marci॒mat | bhā॒nu॒matteja̭ u॒cchara̭t |
upa̭ya॒jña-mi॒hāga̭mat | pranakṣa̭trāya de॒vāya̭ | indrā॒yendugṃ̭ havāmahe |
sa na̭ ssavi॒tā sṷvathsa॒nim | pu॒ṣṭi॒dāṃ-vī~॒rava̭ttamam || 34
sūryaḥ
udu॒tya-ñjā॒tavḙdasa-nde॒vaṃ-va~̭hanti ke॒tavaḥ̭ | dṛ॒śe viśvā̭ya॒ sūrya᳚m |
ci॒tra-nde॒vānā॒ muda̭gā॒danī̭ka॒-ñcakṣṷ-rmi॒trasya॒ varṷṇasyā॒gneḥ |
ā-'prā॒ dyāvā̭pṛthi॒vī a॒ntari̭kṣa॒gṃ॒ sūrya̭ ā॒tmā jaga̭tasta॒sthuṣa̭śca || 35
aditiḥ
adi̭tirna uruṣya॒-tvadi̭ti॒-śśarma̭ yacchatu | adi̭tiḥ pā॒tvagṃ ha̭saḥ|
ma॒hīmū॒ṣu mā॒taragṃ̭ suvra॒tānā̭-mṛ॒tasya॒ patnī॒ mava̭se huvema |
tu॒vi॒kṣa॒trā-ma॒jara̭ntī murū॒cīgṃ su॒śarmā̭ṇa॒-madi̭tigṃ su॒praṇī̭tim || 36
viṣṇuḥ
i॒daṃ-vi~ṣṇu॒-rvica̭krame tre॒dhā nida̭dhe pa॒dam | samṷ̄ḍhamasya pāgṃ su॒re |
pratadviṣṇṷ stavate vī॒ryā̭ya | mṛ॒go na bhī॒maḥ kṷca॒ro gi̭ri॒ṣṭhāḥ |
yasyo॒ruṣṷ tri॒ṣu vi॒krama̭ṇeṣu | adhi̭kṣi॒yanti॒ bhuva̭nāni॒ viśvā᳚ || 37
agniḥ
a॒gni-rmū॒drdhā di॒vaḥ ka॒kutpatiḥ̭ pṛthi॒vyā a॒yam |
a॒pāgṃ retāgṃ̭si jinvati |
bhuvo̭ ya॒jñasya॒ raja̭saśca ne॒tā yatrā̭ ni॒yudbhi॒-ssaca̭se śi॒vābhiḥ̭ |
di॒vi mū॒drdhāna̭-ndadhiṣe suva॒r॒ṣā-ñji॒hvāma̭gne cakṛṣe havya॒vāhaṃ᳚ || 38
anumatī
anṷno॒-'dyānṷmati-rya॒jña-nde॒veṣṷ manyatām |
a॒gniśca̭ havya॒vāha̭no॒ bhava̭tā-ndā॒śuṣe॒ mayaḥ̭ |
anvida̭numate॒ tva-mmanyā̭sai॒ śañca̭ naḥ kṛdhi |
kratve॒ dakṣā̭ya no hinu॒ praṇa॒ āyūgṃ̭ṣi tāriṣaḥ || 39
havyavāhaḥ (agniḥ)
ha॒vya॒vāha̭mabhi-māti॒ṣāha᳚m | ra॒kṣo॒haṇa॒-mpṛta̭nāsu ji॒ṣṇum |
jyoti̭ṣmanta॒-ndīdya̭ta॒-mpura̭ndhim | a॒gnigg svi̭ṣṭa॒ kṛta॒māhṷvema |
svi̭ṣṭa magne a॒bhita-tpṛ̭ṇāhi | viśvā̭ deva॒ pṛta̭nā a॒bhiṣya |
u॒runnaḥ॒ panthā᳚-mpradi॒śan vibhā̭hi | jyoti̭ṣmaddhehya॒ jara̭nna॒ āyuḥ̭ || 40
oṃ śānti॒-śśānti॒-śśāntiḥ̭ ||
🕉️ This is the original Sanskrit rendered in Telugu script.
Pronunciation is identical to the Sanskrit Devanagari version.