6.4 - Yajnena Vai Prajapatih Praja Asrijata - Krishna Yajurveda Taittiriya Samhita Pathah — Kannada Script

ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾಂ ಷಷ್ಠಕಾಣ್ಡೇ ಚತುರ್ಥಃ ಪ್ರಶ್ನಃ - ಸೋಮಮನ್ತ್ರಬ್ರಾಹ್ಮಣನಿರೂಪಣಂ

ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,

ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥

ಯ॒ಜ್ಞೇನ॒ ವೈ ಪ್ರ॒ಜಾಪ॑ತಿಃ ಪ್ರ॒ಜಾ ಅ॑ಸೃಜತ॒ ತಾ ಉ॑ಪ॒ಯಡ್ಭಿ॑-ರೇ॒ವಾಸೃ॑ಜತ॒ ಯದು॑ಪ॒ಯಜ॑ ಉಪ॒ಯಜ॑ತಿ ಪ್ರ॒ಜಾ ಏ॒ವ ತ-ದ್ಯಜ॑ಮಾನ-ಸ್ಸೃಜತೇ ಜಘನಾ॒ರ್ಧಾದವ॑ ದ್ಯತಿ ಜಘನಾ॒ರ್ಧಾದ್ಧಿ ಪ್ರ॒ಜಾಃ ಪ್ರ॒ಜಾಯ॑ನ್ತೇ ಸ್ಥವಿಮ॒ತೋ-ಽವ॑ ದ್ಯತಿ ಸ್ಥವಿಮ॒ತೋ ಹಿ ಪ್ರ॒ಜಾಃ ಪ್ರ॒ಜಾಯ॒ನ್ತೇ ಽಸ॑ಮ್ಭಿನ್ದ॒ನ್ನವ॑ ದ್ಯತಿ ಪ್ರಾ॒ಣಾನಾ॒-ಮಸ॑ಮ್ಭೇದಾಯ॒ ನ ಪ॒ರ್ಯಾವ॑ರ್ತಯತಿ॒ ಯ-ತ್ಪ॑ರ್ಯಾವ॒ರ್ತಯೇ॑ದುದಾವ॒ರ್ತಃ ಪ್ರ॒ಜಾ ಗ್ರಾಹು॑ಕ-ಸ್ಸ್ಯಾ-ಥ್ಸಮು॒ದ್ರ-ಙ್ಗ॑ಚ್ಛ॒ ಸ್ವಾಹೇತ್ಯಾ॑ಹ॒ ರೇತ॑ [ರೇತಃ॑, ಏ॒ವ] 1

ಏ॒ವ ತ-ದ್ದ॑ಧಾತ್ಯ॒ನ್ತರಿ॑ಕ್ಷ-ಙ್ಗಚ್ಛ॒ ಸ್ವಾಹೇತ್ಯಾ॑ಹಾ॒-ಽನ್ತರಿ॑ಕ್ಷೇಣೈ॒ವಾಸ್ಮೈ᳚ ಪ್ರ॒ಜಾಃ ಪ್ರ ಜ॑ನಯತ್ಯ॒ನ್ತರಿ॑ಕ್ಷ॒ಗ್ಗ್॒ ಹ್ಯನು॑ ಪ್ರ॒ಜಾಃ ಪ್ರ॒ಜಾಯ॑ನ್ತೇ ದೇ॒ವಗ್ಂ ಸ॑ವಿ॒ತಾರ॑-ಙ್ಗಚ್ಛ॒ ಸ್ವಾಹೇತ್ಯಾ॑ಹ ಸವಿ॒ತೃಪ್ರ॑ಸೂತ ಏ॒ವಾಸ್ಮೈ᳚ ಪ್ರ॒ಜಾಃ ಪ್ರ ಜ॑ನಯತ್ಯ-ಹೋರಾ॒ತ್ರೇ ಗ॑ಚ್ಛ॒ ಸ್ವಾಹೇತ್ಯಾ॑ಹಾ-ಹೋರಾ॒ತ್ರಾಭ್ಯಾ॑-ಮೇ॒ವಾಸ್ಮೈ᳚ ಪ್ರ॒ಜಾಃ ಪ್ರ ಜ॑ನಯತ್ಯ-ಹೋರಾ॒ತ್ರೇ ಹ್ಯನು॑ ಪ್ರ॒ಜಾಃ ಪ್ರ॒ಜಾಯ॑ನ್ತೇ ಮಿ॒ತ್ರಾವರು॑ಣೌ ಗಚ್ಛ॒ ಸ್ವಾಹೇ- [ಸ್ವಾಹಾ᳚, ಇತ್ಯಾ॑ಹ] 2

-ತ್ಯಾ॑ಹ ಪ್ರ॒ಜಾಸ್ವೇ॒ವ ಪ್ರಜಾ॑ತಾಸು ಪ್ರಾಣಾಪಾ॒ನೌ ದ॑ಧಾತಿ॒ ಸೋಮ॑-ಙ್ಗಚ್ಛ॒ ಸ್ವಾಹೇತ್ಯಾ॑ಹ ಸೌ॒ಮ್ಯಾ ಹಿ ದೇ॒ವತ॑ಯಾ ಪ್ರ॒ಜಾ ಯ॒ಜ್ಞ-ಙ್ಗ॑ಚ್ಛ॒ ಸ್ವಾಹೇತ್ಯಾ॑ಹ ಪ್ರ॒ಜಾ ಏ॒ವ ಯ॒ಜ್ಞಿಯಾಃ᳚ ಕರೋತಿ॒ ಛನ್ದಾಗ್ಂ॑ಸಿ ಗಚ್ಛ॒ ಸ್ವಾಹೇತ್ಯಾ॑ಹ ಪ॒ಶವೋ॒ ವೈ ಛನ್ದಾಗ್ಂ॑ಸಿ ಪ॒ಶೂನೇ॒ವಾವ॑ ರುನ್ಧೇ॒ ದ್ಯಾವಾ॑ಪೃಥಿ॒ವೀ ಗ॑ಚ್ಛ॒ ಸ್ವಾಹೇತ್ಯಾ॑ಹ ಪ್ರ॒ಜಾ ಏ॒ವ ಪ್ರಜಾ॑ತಾ॒ ದ್ಯಾವಾ॑ಪೃಥಿ॒ವೀಭ್ಯಾ॑ಮುಭ॒ಯತಃ॒ ಪರಿ॑ ಗೃಹ್ಣಾತಿ॒ ನಭೋ॑ [ನಭಃ॑, ದಿ॒ವ್ಯ-ಙ್ಗ॑ಚ್ಛ॒] 3

ದಿ॒ವ್ಯ-ಙ್ಗ॑ಚ್ಛ॒ ಸ್ವಾಹೇತ್ಯಾ॑ಹ ಪ್ರ॒ಜಾಭ್ಯ॑ ಏ॒ವ ಪ್ರಜಾ॑ತಾಭ್ಯೋ॒ ವೃಷ್ಟಿ॒-ನ್ನಿಯ॑ಚ್ಛತ್ಯ॒ಗ್ನಿಂ-ವೈಁ᳚ಶ್ವಾನ॒ರ-ಙ್ಗ॑ಚ್ಛ॒ ಸ್ವಾಹೇತ್ಯಾ॑ಹ ಪ್ರ॒ಜಾ ಏ॒ವ ಪ್ರಜಾ॑ತಾ ಅ॒ಸ್ಯಾ-ಮ್ಪ್ರತಿ॑ ಷ್ಠಾಪಯತಿ ಪ್ರಾ॒ಣಾನಾಂ॒-ವಾಁ ಏ॒ಷೋ-ಽವ॑ ದ್ಯತಿ॒ ಯೋ॑-ಽವ॒ದ್ಯತಿ॑ ಗು॒ದಸ್ಯ॒ ಮನೋ॑ ಮೇ॒ ಹಾರ್ದಿ॑ ಯ॒ಚ್ಛೇತ್ಯಾ॑ಹ ಪ್ರಾ॒ಣಾನೇ॒ವ ಯ॑ಥಾಸ್ಥಾ॒ನಮುಪ॑ ಹ್ವಯತೇ ಪ॒ಶೋರ್ವಾ ಆಲ॑ಬ್ಧಸ್ಯ॒ ಹೃದ॑ಯ॒ಗ್ಂ॒ ಶುಗೃ॑ಚ್ಛತಿ॒ ಸಾ ಹೃ॑ದಯಶೂ॒ಲ- [ಹೃ॑ದಯಶೂ॒ಲಮ್, ಅ॒ಭಿ ಸಮೇ॑ತಿ॒] 4

-ಮ॒ಭಿ ಸಮೇ॑ತಿ॒ ಯ-ತ್ಪೃ॑ಥಿ॒ವ್ಯಾಗ್ಂ ಹೃ॑ದಯಶೂ॒ಲ-ಮು॑ದ್ವಾ॒ಸಯೇ᳚-ತ್ಪೃಥಿ॒ವೀಗ್ಂ ಶು॒ಚಾ-ಽರ್ಪ॑ಯೇ॒-ದ್ಯದ॒ಫ್ಸ್ವ॑ಪ-ಶ್ಶು॒ಚಾ-ಽರ್ಪ॑ಯೇ॒ಚ್ಛುಷ್ಕ॑ಸ್ಯ ಚಾ॒-ಽಽರ್ದ್ರಸ್ಯ॑ ಚ ಸ॒ನ್ಧಾವುದ್ವಾ॑ಸಯತ್ಯು॒ಭಯ॑ಸ್ಯ॒ ಶಾನ್ತ್ಯೈ॒ ಯ-ನ್ದ್ವಿ॒ಷ್ಯಾ-ತ್ತ-ನ್ಧ್ಯಾ॑ಯೇ-ಚ್ಛು॒ಚೈವೈನ॑-ಮರ್ಪಯತಿ ॥ 5 ॥

(ರೇತೋ॑ - ಮಿ॒ತ್ರಾವರು॑ಣೌ ಗಚ್ಛ॒ ಸ್ವಾಹಾ॒ - ನಭೋ॑ - ಹೃದಯಶೂ॒ಲಂ - ದ್ವಾತ್ರಿಗ್ಂ॑ಶಚ್ಚ) (ಅ. 1)

ದೇ॒ವಾ ವೈ ಯ॒ಜ್ಞಮಾಗ್ನೀ᳚ದ್ಧ್ರೇ॒ ವ್ಯ॑ಭಜನ್ತ॒ ತತೋ॒ ಯದ॒ತ್ಯಶಿ॑ಷ್ಯತ॒ ತದ॑ಬ್ರುವ॒ನ್ ವಸ॑ತು॒ ನು ನ॑ ಇ॒ದಮಿತಿ॒ ತ-ದ್ವ॑ಸತೀ॒ವರೀ॑ಣಾಂ-ವಁಸತೀ ವರಿ॒ತ್ವ-ನ್ತಸ್ಮಿ॑-ನ್ಪ್ರಾ॒ತರ್ನ ಸಮ॑ಶಕ್ನುವ॒-ನ್ತದ॒ಫ್ಸು ಪ್ರಾವೇ॑ಶಯ॒-ನ್ತಾ ವ॑ಸತೀ॒ ವರೀ॑ರಭವನ್ ವಸತೀ॒ವರೀ᳚ರ್ಗೃಹ್ಣಾತಿ ಯ॒ಜ್ಞೋ ವೈ ವ॑ಸತೀ॒ ವರೀ᳚ರ್ಯ॒ಜ್ಞಮೇ॒ವಾ-ಽಽರಭ್ಯ॑ ಗೃಹೀ॒ತ್ವೋಪ॑ ವಸತಿ॒ ಯಸ್ಯಾಗೃ॑ಹೀತಾ ಅ॒ಭಿ ನಿ॒ಮ್ರೋಚೇ॒-ದನಾ॑ರಬ್ಧೋ-ಽಸ್ಯ ಯ॒ಜ್ಞ-ಸ್ಸ್ಯಾ᳚- [ಯ॒ಜ್ಞ-ಸ್ಸ್ಯಾ᳚ತ್, ಯ॒ಜ್ಞಂ-ವಿಁ] 6

-ದ್ಯ॒ಜ್ಞಂ-ವಿಁ ಚ್ಛಿ॑ನ್ದ್ಯಾ-ಜ್ಜ್ಯೋತಿ॒ಷ್ಯಾ॑ ವಾ ಗೃಹ್ಣೀ॒ಯಾದ್ಧಿರ॑ಣ್ಯಂ-ವಾಁ ಽವ॒ಧಾಯ॒ ಸಶು॑ಕ್ರಾಣಾಮೇ॒ವ ಗೃ॑ಹ್ಣಾತಿ॒ ಯೋ ವಾ᳚ ಬ್ರಾಹ್ಮ॒ಣೋ ಬ॑ಹುಯಾ॒ಜೀ ತಸ್ಯ॒ ಕುಮ್ಭ್ಯಾ॑ನಾ-ಙ್ಗೃಹ್ಣೀಯಾ॒-ಥ್ಸ ಹಿ ಗೃ॑ಹೀ॒ತ ವ॑ಸತೀವರೀಕೋ ವಸತೀ॒ವರೀ᳚ರ್ಗೃಹ್ಣಾತಿ ಪ॒ಶವೋ॒ ವೈ ವ॑ಸತೀ॒ವರೀಃ᳚ ಪ॒ಶೂನೇ॒ವಾ-ಽಽರಭ್ಯ॑ ಗೃಹೀ॒ತ್ವೋಪ॑ ವಸತಿ॒ ಯದ॑ನ್ವೀ॒ಪ-ನ್ತಿಷ್ಠ॑-ನ್ಗೃಹ್ಣೀ॒ಯಾನ್ನಿ॒ರ್ಮಾರ್ಗು॑ಕಾ ಅಸ್ಮಾ-ತ್ಪ॒ಶವಃ॑ ಸ್ಯುಃ ಪ್ರತೀ॒ಪ-ನ್ತಿಷ್ಠ॑-ನ್ಗೃಹ್ಣಾತಿ ಪ್ರತಿ॒ರುದ್ಧ್ಯೈ॒ವಾಸ್ಮೈ॑ ಪ॒ಶೂ-ನ್ಗೃ॑ಹ್ಣಾ॒ತೀನ್ದ್ರೋ॑ [ಪ॒ಶೂ-ನ್ಗೃ॑ಹ್ಣಾ॒ತೀನ್ದ್ರಃ॑, ವೃ॒ತ್ರ-] 7

ವೃ॒ತ್ರ-ಮ॑ಹ॒ನ್-ಥ್ಸೋ᳚-ಽ(1॒)ಪೋ᳚-ಽ(1॒)ಭ್ಯ॑ಮ್ರಿಯತ॒ ತಾಸಾಂ॒-ಯಁನ್ಮೇದ್ಧ್ಯಂ॑-ಯಁ॒ಜ್ಞಿಯ॒ಗ್ಂ॒ ಸದೇ॑ವ॒ಮಾಸೀ॒-ತ್ತದತ್ಯ॑ಮುಚ್ಯತ॒ ತಾ ವಹ॑ನ್ತೀರಭವ॒ನ್ ವಹ॑ನ್ತೀನಾ-ಙ್ಗೃಹ್ಣಾತಿ॒ ಯಾ ಏ॒ವ ಮೇದ್ಧ್ಯಾ॑ ಯ॒ಜ್ಞಿಯಾ॒-ಸ್ಸದೇ॑ವಾ॒ ಆಪ॒ಸ್ತಾ ಸಾ॑ಮೇ॒ವ ಗೃ॑ಹ್ಣಾತಿ॒ ನಾನ್ತ॒ಮಾ ವಹ॑ನ್ತೀ॒ರತೀ॑ಯಾ॒-ದ್ಯದ॑ನ್ತ॒ಮಾ ವಹ॑ನ್ತೀರತೀ॒ಯಾ-ದ್ಯ॒ಜ್ಞಮತಿ॑ ಮನ್ಯೇತ॒ ನ ಸ್ಥಾ॑ವ॒ರಾಣಾ᳚-ಙ್ಗೃಹ್ಣೀಯಾ॒-ದ್ವರು॑ಣಗೃಹೀತಾ॒ ವೈ ಸ್ಥಾ॑ವ॒ರಾ ಯ-ಥ್ಸ್ಥಾ॑ವ॒ರಾಣಾ᳚-ಙ್ಗೃಹ್ಣೀ॒ಯಾ- [ಯ-ಥ್ಸ್ಥಾ॑ವ॒ರಾಣಾ᳚-ಙ್ಗೃಹ್ಣೀ॒ಯಾತ್, ವರು॑ಣೇನಾಸ್ಯ] 8

-ದ್ವರು॑ಣೇನಾಸ್ಯ ಯ॒ಜ್ಞ-ಙ್ಗ್ರಾ॑ಹಯೇ॒-ದ್ಯದ್ವೈ ದಿವಾ॒ ಭವ॑ತ್ಯ॒ಪೋ ರಾತ್ರಿಃ॒ ಪ್ರ ವಿ॑ಶತಿ॒ ತಸ್ಮಾ᳚-ತ್ತಾ॒ಮ್ರಾ ಆಪೋ॒ ದಿವಾ॑ ದದೃಶ್ರೇ॒ ಯನ್ನಕ್ತ॒-ಮ್ಭವ॑ತ್ಯ॒ಪೋ-ಽಹಃ॒ ಪ್ರ ವಿ॑ಶತಿ॒ ತಸ್ಮಾ᳚ಚ್ಚ॒ನ್ದ್ರಾ ಆಪೋ॒ ನಕ್ತ॑-ನ್ದದೃಶ್ರೇ ಛಾ॒ಯಾಯೈ॑ ಚಾ॒-ಽಽತಪ॑ತಶ್ಚ ಸ॒ಧೌ-ಙ್ಗೃ॑ಹ್ಣಾತ್ಯ-ಹೋರಾ॒ತ್ರಯೋ॑ರೇ॒ವಾಸ್ಮೈ॒ ವರ್ಣ॑-ಙ್ಗೃಹ್ಣಾತಿ ಹ॒ವಿಷ್ಮ॑ತೀರಿ॒ಮಾ ಆಪ॒ ಇತ್ಯಾ॑ಹ ಹ॒ವಿಷ್ಕೃ॑ತಾನಾಮೇ॒ವ ಗೃ॑ಹ್ಣಾತಿ ಹ॒ವಿಷ್ಮಾಗ್ಂ॑ ಅಸ್ತು॒- [ಅಸ್ತು, ಸೂರ್ಯ॒] 9

ಸೂರ್ಯ॒ ಇತ್ಯಾ॑ಹ॒ ಸಶು॑ಕ್ರಾಣಾಮೇ॒ವ ಗೃ॑ಹ್ಣಾತ್ಯನು॒ಷ್ಟುಭಾ॑ ಗೃಹ್ಣಾತಿ॒ ವಾಗ್ವಾ ಅ॑ನು॒ಷ್ಟುಗ್ ವಾ॒ಚೈವೈನಾ॒-ಸ್ಸರ್ವ॑ಯಾ ಗೃಹ್ಣಾತಿ॒ ಚತು॑ಷ್ಪದಯ॒ರ್ಚಾ ಗೃ॑ಹ್ಣಾತಿ॒ ತ್ರಿ-ಸ್ಸಾ॑ದಯತಿ ಸ॒ಪ್ತ ಸ-ಮ್ಪ॑ದ್ಯನ್ತೇ ಸ॒ಪ್ತಪ॑ದಾ॒ ಶಕ್ವ॑ರೀ ಪ॒ಶವ॒-ಶ್ಶಕ್ವ॑ರೀ ಪ॒ಶೂನೇ॒ವಾವ॑ ರುನ್ಧೇ॒ ಽಸ್ಮೈ ವೈ ಲೋ॒ಕಾಯ॒ ಗಾರ್ಹ॑ಪತ್ಯ॒ ಆ ಧೀ॑ಯತೇ॒-ಽಮುಷ್ಮಾ॑ ಆಹವ॒ನೀಯೋ॒ ಯ-ದ್ಗಾರ್ಹ॑ಪತ್ಯ ಉಪಸಾ॒ದಯೇ॑ದ॒ಸ್ಮಿನ್ ಁಲೋ॒ಕೇ ಪ॑ಶು॒ಮಾನ್-ಥ್ಸ್ಯಾ॒-ದ್ಯದಾ॑ಹವ॒ನೀಯೇ॒-ಽ-ಮುಷ್ಮಿ॑- [-ಮುಷ್ಮಿನ್ನ್॑, ಲೋ॒ಕೇ ಪ॑ಶು॒ಮಾನ್ಥ್ಸ್ಯಾ॑-] 10

ಁಲ್ಲೋ॒ಕೇ ಪ॑ಶು॒ಮಾನ್ಥ್ಸ್ಯಾ॑-ದು॒ಭಯೋ॒ರುಪ॑ ಸಾದಯತ್ಯು॒ಭಯೋ॑ರೇ॒ವೈನಂ॑-ಲೋಁ॒ಕಯೋಃ᳚ ಪಶು॒ಮನ್ತ॑-ಙ್ಕರೋತಿ ಸ॒ರ್ವತಃ॒ ಪರಿ॑ ಹರತಿ॒ ರಕ್ಷ॑ಸಾ॒ಮಪ॑ಹತ್ಯಾ ಇನ್ದ್ರಾಗ್ನಿ॒ಯೋರ್ಭಾ॑ಗ॒ಧೇಯೀ॒-ಸ್ಸ್ಥೇತ್ಯಾ॑ಹ ಯಥಾಯ॒ಜುರೇ॒ವೈತದಾಗ್ನೀ᳚ದ್ಧ್ರ॒ ಉಪ॑ ವಾಸಯತ್ಯೇ॒ತದ್ವೈ ಯ॒ಜ್ಞಸ್ಯಾಪ॑ರಾಜಿತಂ॒-ಯಁದಾಗ್ನೀ᳚ದ್ಧ್ರಂ॒-ಯಁದೇ॒ವ ಯ॒ಜ್ಞಸ್ಯಾಪ॑ರಾಜಿತ॒-ನ್ತದೇ॒ವೈನಾ॒ ಉಪ॑ ವಾಸಯತಿ॒ ಯತಃ॒ ಖಲು॒ ವೈ ಯ॒ಜ್ಞಸ್ಯ॒ ವಿತ॑ತಸ್ಯ॒ ನ ಕ್ರಿ॒ಯತೇ॒ ತದನು॑ ಯ॒ಜ್ಞಗ್ಂ ರಕ್ಷಾ॒ಗ್॒ಸ್ಯವ॑ ಚರನ್ತಿ॒ ಯ-ದ್ವಹ॑ನ್ತೀನಾ-ಙ್ಗೃ॒ಹ್ಣಾತಿ॑ ಕ್ರಿ॒ಯಮಾ॑ಣಮೇ॒ವ ತ-ದ್ಯ॒ಜ್ಞಸ್ಯ॑ ಶಯೇ॒ ರಕ್ಷ॑ಸಾ॒-ಮನ॑ನ್ವವಚಾರಾಯ॒ ನ ಹ್ಯೇ॑ತಾ ಈ॒ಲಯ॒ನ್ತ್ಯಾ ತೃ॑ತೀಯಸವ॒ನಾ-ತ್ಪರಿ॑ ಶೇರೇ ಯ॒ಜ್ಞಸ್ಯ॒ ಸನ್ತ॑ತ್ಯೈ ॥ 11 ॥

(ಸ್ಯಾ॒ - ದಿನ್ದ್ರೋ॑ - ಗೃಹ್ಣೀ॒ಯಾ - ದ॑ಸ್ತ್ವ॒ - ಮುಷ್ಮಿ॑ನ್ - ಕ್ರಿ॒ಯತೇ॒ - ಷಡ್ವಿಗ್ಂ॑ಶತಿಶ್ಚ) (ಅ. 2)

ಬ್ರ॒ಹ್ಮ॒ವಾ॒ದಿನೋ॑ ವದನ್ತಿ॒ ಸ ತ್ವಾ ಅ॑ದ್ಧ್ವ॒ರ್ಯು-ಸ್ಸ್ಯಾ॒ದ್ಯ-ಸ್ಸೋಮ॑-ಮುಪಾವ॒ಹರ॒ನ್-ಥ್ಸರ್ವಾ᳚ಭ್ಯೋ ದೇ॒ವತಾ᳚ಭ್ಯ ಉಪಾವ॒ಹರೇ॒-ದಿತಿ॑ ಹೃ॒ದೇ ತ್ವೇತ್ಯಾ॑ಹ ಮನು॒ಷ್ಯೇ᳚ಭ್ಯ ಏ॒ವೈತೇನ॑ ಕರೋತಿ॒ ಮನ॑ಸೇ॒ ತ್ವೇತ್ಯಾ॑ಹ ಪಿ॒ತೃಭ್ಯ॑ ಏ॒ವೈತೇನ॑ ಕರೋತಿ ದಿ॒ವೇ ತ್ವಾ॒ ಸೂರ್ಯಾ॑ಯ॒ ತ್ವೇತ್ಯಾ॑ಹ ದೇ॒ವೇಭ್ಯ॑ ಏ॒ವೈತೇನ॑ ಕರೋತ್ಯೇ॒ತಾವ॑ತೀ॒-ರ್ವೈ ದೇ॒ವತಾ॒ಸ್ತಾಭ್ಯ॑ ಏ॒ವೈನ॒ಗ್ಂ॒ ಸರ್ವಾ᳚ಭ್ಯ ಉ॒ಪಾವ॑ಹರತಿ ಪು॒ರಾ ವಾ॒ಚಃ [ವಾ॒ಚಃ, ಪ್ರವ॑ದಿತೋಃ] 12

ಪ್ರವ॑ದಿತೋಃ ಪ್ರಾತರನುವಾ॒ಕ-ಮು॒ಪಾಕ॑ರೋತಿ॒ ಯಾವ॑ತ್ಯೇ॒ವ ವಾ-ಕ್ತಾ-ಮವ॑ ರುನ್ಧೇ॒ ಽಪೋ-ಽಗ್ರೇ॑-ಽಭಿ॒ವ್ಯಾಹ॑ರತಿ ಯ॒ಜ್ಞೋ ವಾ ಆಪೋ॑ ಯ॒ಜ್ಞಮೇ॒ವಾಭಿ ವಾಚಂ॒-ವಿಁಸೃ॑ಜತಿ॒ ಸರ್ವಾ॑ಣಿ॒ ಛನ್ದಾ॒ಗ್॒ಸ್ಯನ್ವಾ॑ಹ ಪ॒ಶವೋ॒ ವೈ ಛನ್ದಾಗ್ಂ॑ಸಿ ಪ॒ಶೂನೇ॒ವಾವ॑ ರುನ್ಧೇ ಗಾಯತ್ರಿ॒ಯಾ ತೇಜ॑ಸ್ಕಾಮಸ್ಯ॒ ಪರಿ॑ ದದ್ಧ್ಯಾ-ತ್ತ್ರಿ॒ಷ್ಟುಭೇ᳚ನ್ದ್ರಿ॒ಯಕಾ॑ಮಸ್ಯ॒ ಜಗ॑ತ್ಯಾ ಪ॒ಶುಕಾ॑ಮಸ್ಯಾ-ಽನು॒ಷ್ಟುಭಾ᳚ ಪ್ರತಿ॒ಷ್ಠಾಕಾ॑ಮಸ್ಯ ಪ॒ಙ್ಕ್ತ್ಯಾ ಯ॒ಜ್ಞಕಾ॑ಮಸ್ಯ ವಿ॒ರಾಜಾ-ಽನ್ನ॑ಕಾಮಸ್ಯ ಶೃ॒ಣೋತ್ವ॒ಗ್ನಿ-ಸ್ಸ॒ಮಿಧಾ॒ ಹವ॑- [ಹವ᳚ಮ್, ಮ॒ ಇತ್ಯಾ॑ಹ] 13

-ಮ್ಮ॒ ಇತ್ಯಾ॑ಹ ಸವಿ॒ತೃಪ್ರ॑ಸೂತ ಏ॒ವ ದೇ॒ವತಾ᳚ಭ್ಯೋ ನಿ॒ವೇದ್ಯಾ॒-ಽಪೋ-ಽಚ್ಛೈ᳚ತ್ಯ॒ಪ ಇ॑ಷ್ಯ ಹೋತ॒-ರಿತ್ಯಾ॑ಹೇಷಿ॒ತಗ್ಂ ಹಿ ಕರ್ಮ॑ ಕ್ರಿ॒ಯತೇ॒ ಮೈತ್ರಾ॑ವರುಣಸ್ಯ ಚಮಸಾದ್ಧ್ವರ್ಯ॒ವಾ ದ್ರ॒ವೇತ್ಯಾ॑ಹ ಮಿ॒ತ್ರಾವರು॑ಣೌ॒ ವಾ ಅ॒ಪಾ-ನ್ನೇ॒ತಾರೌ॒ ತಾಭ್ಯಾ॑ಮೇ॒ವೈನಾ॒ ಅಚ್ಛೈ॑ತಿ॒ ದೇವೀ॑ರಾಪೋ ಅಪಾ-ನ್ನಪಾ॒-ದಿತ್ಯಾ॒ಹಾ-ಽಽಹು॑ತ್ಯೈ॒ವೈನಾ॑ ನಿ॒ಷ್ಕ್ರೀಯ॑ ಗೃಹ್ಣಾ॒ತ್ಯಥೋ॑ ಹ॒ವಿಷ್ಕೃ॑ತಾನಾ-ಮೇ॒ವಾಭಿಘೃ॑ತಾನಾ-ಙ್ಗೃಹ್ಣಾತಿ॒- [-ಮೇ॒ವಾಭಿಘೃ॑ತಾನಾ-ಙ್ಗೃಹ್ಣಾತಿ, ಕಾರ್ಷಿ॑-ರ॒ಸೀತ್ಯಾ॑ಹ॒] 14

ಕಾರ್ಷಿ॑-ರ॒ಸೀತ್ಯಾ॑ಹ॒ ಶಮ॑ಲಮೇ॒ವಾ-ಽಽಸಾ॒ಮಪ॑ ಪ್ಲಾವಯತಿ ಸಮು॒ದ್ರಸ್ಯ॒ ವೋ-ಽಕ್ಷಿ॑ತ್ಯಾ॒ ಉನ್ನ॑ಯ॒ ಇತ್ಯಾ॑ಹ॒ ತಸ್ಮಾ॑ದ॒ದ್ಯಮಾ॑ನಾಃ ಪೀ॒ಯಮಾ॑ನಾ॒ ಆಪೋ॒ ನ ಕ್ಷೀ॑ಯನ್ತೇ॒ ಯೋನಿ॒ರ್ವೈ ಯ॒ಜ್ಞಸ್ಯ॒ ಚಾತ್ವಾ॑ಲಂ-ಯಁ॒ಜ್ಞೋ ವ॑ಸತೀ॒ವರೀರ್॑. ಹೋತೃಚಮ॒ಸ-ಞ್ಚ॑ ಮೈತ್ರಾವರುಣಚಮ॒ಸ-ಞ್ಚ॑ ಸ॒ಗ್ಗ್॒ಸ್ಪರ್ಶ್ಯ॑ ವಸತೀ॒ವರೀ॒ರ್ವ್ಯಾನ॑ಯತಿ ಯ॒ಜ್ಞಸ್ಯ॑ ಸಯೋನಿ॒ತ್ವಾಯಾಥೋ॒ ಸ್ವಾದೇ॒ವೈನಾ॒ ಯೋನೇಃ॒ ಪ್ರ ಜ॑ನಯತ್ಯದ್ಧ್ವ॒ರ್ಯೋ-ಽವೇ॑ರ॒ಪಾ(3) ಇತ್ಯಾ॑ಹೋ॒ತೇ -ಮ॑ನನ್ನಮುರು॒ತೇಮಾಃ ಪ॒ಶ್ಯೇತಿ॒ ವಾವೈತದಾ॑ಹ॒ ಯದ್ಯ॑ಗ್ನಿಷ್ಟೋ॒ಮೋ ಜು॒ಹೋತಿ॒ ಯದ್ಯು॒ಕ್ಥ್ಯಃ॑ ಪರಿ॒ಧೌ ನಿ ಮಾ᳚ರ್ಷ್ಟಿ॒ ಯದ್ಯ॑ತಿರಾ॒ತ್ರೋ ಯಜು॒ರ್ವದ॒-ನ್ಪ್ರ ಪ॑ದ್ಯತೇ ಯಜ್ಞಕ್ರತೂ॒ನಾಂ-ವ್ಯಾಁವೃ॑ತ್ತ್ಯೈ ॥ 15 ॥

(ವಾ॒ಚೋ-ಹವ॑-ಮ॒ಭಿಘೃ॑ತಾನಾ-ಙ್ಗೃಹ್ಣಾತ್ಯು॒ - ತ - ಪಞ್ಚ॑ವಿಗ್ಂಶತಿಶ್ಚ) (ಅ. 3)

ದೇ॒ವಸ್ಯ॑ ತ್ವಾ ಸವಿ॒ತುಃ ಪ್ರ॑ಸ॒ವ ಇತಿ॒ ಗ್ರಾವಾ॑ಣ॒ಮಾ ದ॑ತ್ತೇ॒ ಪ್ರಸೂ᳚ತ್ಯಾ ಅ॒ಶ್ವಿನೋ᳚-ರ್ಬಾ॒ಹುಭ್ಯಾ॒ಮಿತ್ಯಾ॑ಹಾ॒ಶ್ವಿನೌ॒ ಹಿ ದೇ॒ವಾನಾ॑ಮದ್ಧ್ವ॒ರ್ಯೂ ಆಸ್ತಾ᳚-ಮ್ಪೂ॒ಷ್ಣೋ ಹಸ್ತಾ᳚ಭ್ಯಾ॒ಮಿತ್ಯಾ॑ಹ॒ ಯತ್ಯೈ॑ ಪ॒ಶವೋ॒ ವೈ ಸೋಮೋ᳚ ವ್ಯಾ॒ನ ಉ॑ಪಾಗ್ಂಶು॒ಸವ॑ನೋ॒ ಯದು॑ಪಾಗ್ಂಶು॒ಸವ॑ನ-ಮ॒ಭಿ ಮಿಮೀ॑ತೇ ವ್ಯಾ॒ನಮೇ॒ವ ಪ॒ಶುಷು॑ ದಧಾ॒ತೀನ್ದ್ರಾ॑ಯ॒ ತ್ವೇನ್ದ್ರಾ॑ಯ॒ ತ್ವೇತಿ॑ ಮಿಮೀತ॒ ಇನ್ದ್ರಾ॑ಯ॒ ಹಿ ಸೋಮ॑ ಆಹ್ರಿ॒ಯತೇ॒ ಪಞ್ಚ॒ ಕೃತ್ವೋ॒ ಯಜು॑ಷಾ ಮಿಮೀತೇ॒ [ಮಿಮೀತೇ, ಪಞ್ಚಾ᳚ಕ್ಷರಾ] 16

ಪಞ್ಚಾ᳚ಕ್ಷರಾ ಪ॒ಙ್ಕ್ತಿಃ ಪಾಙ್ಕ್ತೋ॑ ಯ॒ಜ್ಞೋ ಯ॒ಜ್ಞಮೇ॒ವಾವ॑ ರುನ್ಧೇ॒ ಪಞ್ಚ॒ ಕೃತ್ವ॑ಸ್ತೂ॒ಷ್ಣೀ-ನ್ದಶ॒ ಸ-ಮ್ಪ॑ದ್ಯನ್ತೇ॒ ದಶಾ᳚ಕ್ಷರಾ ವಿ॒ರಾಡನ್ನಂ॑-ವಿಁ॒ರಾ-ಡ್ವಿ॒ರಾಜೈ॒ವಾನ್ನಾದ್ಯ॒ಮವ॑ ರುನ್ಧೇ ಶ್ವಾ॒ತ್ರಾ-ಸ್ಸ್ಥ॑ ವೃತ್ರ॒ತುರ॒ ಇತ್ಯಾ॑ಹೈ॒ಷ ವಾ ಅ॒ಪಾಗ್ಂ ಸೋ॑ಮಪೀ॒ಥೋ ಯ ಏ॒ವಂ-ವೇಁದ॒ ನಾ-ಽಫ್ಸ್ವಾರ್ತಿ॒ಮಾರ್ಚ್ಛ॑ತಿ॒ ಯತ್ತೇ॑ ಸೋಮ ದಿ॒ವಿ ಜ್ಯೋತಿ॒ರಿತ್ಯಾ॑ಹೈ॒ಭ್ಯ ಏ॒ವೈನ॑- [ಏ॒ವೈನ᳚ಮ್, ಲೋ॒ಕೇಭ್ಯ॒] 17

ಁಲ್ಲೋ॒ಕೇಭ್ಯ॒-ಸ್ಸ-ಮ್ಭ॑ರತಿ॒ ಸೋಮೋ॒ ವೈ ರಾಜಾ॒ ದಿಶೋ॒-ಽಭ್ಯ॑ದ್ಧ್ಯಾಯ॒-ಥ್ಸ ದಿಶೋ-ಽನು॒ ಪ್ರಾವಿ॑ಶ॒-ತ್ಪ್ರಾಗಪಾ॒ಗುದ॑ಗಧ॒ರಾಗಿತ್ಯಾ॑ಹ ದಿ॒ಗ್ಭ್ಯ ಏ॒ವೈನ॒ಗ್ಂ॒ ಸ-ಮ್ಭ॑ರ॒ತ್ಯಥೋ॒ ದಿಶ॑ ಏ॒ವಾಸ್ಮಾ॒ ಅವ॑ ರು॒ನ್ಧೇ ಽಮ್ಬ॒ ನಿ ಷ್ವ॒ರೇತ್ಯಾ॑ಹ॒ ಕಾಮು॑ಕಾ ಏನ॒ಗ್ಗ್॒ ಸ್ತ್ರಿಯೋ॑ ಭವನ್ತಿ॒ ಯ ಏ॒ವಂ-ವೇಁದ॒ ಯ-ತ್ತೇ॑ ಸೋ॒ಮಾದಾ᳚ಭ್ಯ॒-ನ್ನಾಮ॒ ಜಾಗೃ॒ವೀ- [ಜಾಗೃ॒ವೀತಿ॑, ಆ॒ಹೈ॒ಷ ವೈ] 18

-ತ್ಯಾ॑ಹೈ॒ಷ ವೈ ಸೋಮ॑ಸ್ಯ ಸೋಮಪೀ॒ಥೋ ಯ ಏ॒ವಂ-ವೇಁದ॒ ನ ಸೌ॒ಮ್ಯಾಮಾರ್ತಿ॒ಮಾರ್ಚ್ಛ॑ತಿ॒ ಘ್ನನ್ತಿ॒ ವಾ ಏ॒ತ-ಥ್ಸೋಮಂ॒-ಯಁದ॑ಭಿಷು॒ಣ್ವನ್ತ್ಯ॒ಗ್ಂ॒ ಶೂನಪ॑ ಗೃಹ್ಣಾತಿ॒ ತ್ರಾಯ॑ತ ಏ॒ವೈನ॑-ಮ್ಪ್ರಾ॒ಣಾ ವಾ ಅ॒ಗ್ಂ॒ಶವಃ॑ ಪ॒ಶವ॒-ಸ್ಸೋಮೋ॒ ಽಗ್ಂ॒ಶೂ-ನ್ಪುನ॒ರಪಿ॑ ಸೃಜತಿ ಪ್ರಾ॒ಣಾನೇ॒ವ ಪ॒ಶುಷು॑ ದಧಾತಿ॒ ದ್ವೌದ್ವಾ॒ವಪಿ॑ ಸೃಜತಿ॒ ತಸ್ಮಾ॒-ದ್ದ್ವೌದ್ವೌ᳚ ಪ್ರಾ॒ಣಾಃ ॥ 19 ॥

(ಯಜು॑ಷಾ ಮಿಮೀತ - ಏನಂ॒ - ಜಾಗೃ॒ವೀತಿ॒ - ಚತು॑ಶ್ಚತ್ವಾರಿಗ್ಂಶಚ್ಚ) (ಅ. 4)

ಪ್ರಾ॒ಣೋ ವಾ ಏ॒ಷ ಯದು॑ಪಾ॒ಗ್ಂ॒ಶು ರ್ಯದುಪಾ॒ಗ್॒ಶ್ವ॑ಗ್ರಾ॒ ಗ್ರಹಾ॑ ಗೃ॒ಹ್ಯನ್ತೇ᳚ ಪ್ರಾ॒ಣಮೇ॒ವಾನು॒ ಪ್ರ ಯ॑ನ್ತ್ಯರು॒ಣೋ ಹ॑ ಸ್ಮಾ॒-ಽಽಹೌಪ॑ವೇಶಿಃ ಪ್ರಾತಸ್ಸವ॒ನ ಏ॒ವಾಹಂ-ಯಁ॒ಜ್ಞಗ್ಂ ಸಗ್ಗ್ ಸ್ಥಾ॑ಪಯಾಮಿ॒ ತೇನ॒ ತತ॒-ಸ್ಸಗ್ಗ್ಸ್ಥಿ॑ತೇನ ಚರಾ॒ಮೀತ್ಯ॒ಷ್ಟೌ ಕೃತ್ವೋ-ಽಗ್ರೇ॒-ಽಭಿಷು॑ಣೋ-ತ್ಯ॒ಷ್ಟಾಕ್ಷ॑ರಾ ಗಾಯ॒ತ್ರೀ ಗಾ॑ಯ॒ತ್ರ-ಮ್ಪ್ರಾ॑ತಸ್ಸವ॒ನ-ಮ್ಪ್ರಾ॑ತಸ್ಸವ॒ನಮೇ॒ವ ತೇನಾ᳚ ಽಽಪ್ನೋ॒ತ್ಯೇಕಾ॑ದಶ॒ ಕೃತ್ವೋ᳚ ದ್ವಿ॒ತೀಯ॒-ಮೇಕಾ॑ದಶಾಕ್ಷರಾ ತ್ರಿ॒ಷ್ಟು-ಪ್ತ್ರೈಷ್ಟು॑ಭ॒-ಮ್ಮಾದ್ಧ್ಯ॑ನ್ದಿನ॒ಗ್ಂ॒- [-ಮ್ಮಾದ್ಧ್ಯ॑ನ್ದಿನಮ್, ಸವ॑ನ॒-] 20

-ಸವ॑ನ॒-ಮ್ಮಾದ್ಧ್ಯ॑ನ್ದಿನಮೇ॒ವ ಸವ॑ನ॒-ನ್ತೇನಾ᳚-ಽಽಪ್ನೋತಿ॒ ದ್ವಾದ॑ಶ॒ ಕೃತ್ವ॑ಸ್ತೃ॒ತೀಯ॒-ನ್ದ್ವಾದ॑ಶಾಕ್ಷರಾ॒ ಜಗ॑ತೀ॒ ಜಾಗ॑ತ-ನ್ತೃತೀಯಸವ॒ನ-ನ್ತೃ॑ತೀಯಸವ॒ನಮೇ॒ವ ತೇನಾ᳚ ಽಽಪ್ನೋತ್ಯೇ॒ತಾಗ್ಂ ಹ॒ ವಾವ ಸ ಯ॒ಜ್ಞಸ್ಯ॒ ಸಗ್ಗ್ಸ್ಥಿ॑ತಿಮುವಾ॒ಚಾ ಸ್ಕ॑ನ್ದಾ॒ಯಾಸ್ಕ॑ನ್ನ॒ಗ್ಂ॒ ಹಿ ತ-ದ್ಯ-ದ್ಯ॒ಜ್ಞಸ್ಯ॒ ಸಗ್ಗ್ಸ್ಥಿ॑ತಸ್ಯ॒ ಸ್ಕನ್ದ॒ತ್ಯಥೋ॒ ಖಲ್ವಾ॑ಹುರ್ಗಾಯ॒ತ್ರೀ ವಾವ ಪ್ರಾ॑ತಸ್ಸವ॒ನೇ ನಾತಿ॒ವಾದ॒ ಇತ್ಯನ॑ತಿವಾದುಕ ಏನ॒-ಮ್ಭ್ರಾತೃ॑ವ್ಯೋ ಭವತಿ॒ ಯ ಏ॒ವಂ-ವೇಁದ॒ ತಸ್ಮಾ॑-ದ॒ಷ್ಟಾವ॑ಷ್ಟೌ॒ [-ದ॒ಷ್ಟಾವ॑ಷ್ಟೌ, ಕೃತ್ವೋ॑] 21

ಕೃತ್ವೋ॑-ಽಭಿ॒ಷುತ್ಯ॑-ಮ್ಬ್ರಹ್ಮವಾ॒ದಿನೋ॑ ವದನ್ತಿ ಪ॒ವಿತ್ರ॑ವನ್ತೋ॒-ಽನ್ಯೇ ಗ್ರಹಾ॑ ಗೃ॒ಹ್ಯನ್ತೇ॒ ಕಿಮ್ಪ॑ವಿತ್ರ ಉಪಾ॒ಗ್ಂ॒ಶುರಿತಿ॒ ವಾಕ್ಪ॑ವಿತ್ರ॒ ಇತಿ॑ ಬ್ರೂಯಾ-ದ್ವಾ॒ಚಸ್ಪತ॑ಯೇ ಪವಸ್ವ ವಾಜಿ॒ನ್ನಿತ್ಯಾ॑ಹ ವಾ॒ಚೈವೈನ॑-ಮ್ಪವಯತಿ॒ ವೃಷ್ಣೋ॑ ಅ॒ಗ್ಂ॒ಶುಭ್ಯಾ॒ಮಿತ್ಯಾ॑ಹ॒ ವೃಷ್ಣೋ॒ ಹ್ಯೇ॑ತಾವ॒ಗ್ಂ॒ಶೂ ಯೌ ಸೋಮ॑ಸ್ಯ॒ ಗಭ॑ಸ್ತಿಪೂತ॒ ಇತ್ಯಾ॑ಹ॒ ಗಭ॑ಸ್ತಿನಾ॒ ಹ್ಯೇ॑ನ-ಮ್ಪ॒ವಯ॑ತಿ ದೇ॒ವೋ ದೇ॒ವಾನಾ᳚-ಮ್ಪ॒ವಿತ್ರ॑ಮ॒ಸೀತ್ಯಾ॑ಹ ದೇ॒ವೋ ಹ್ಯೇ॑ಷ [ಹ್ಯೇ॑ಷಃ, ಸ-ನ್ದೇ॒ವಾನಾ᳚-] 22

ಸ-ನ್ದೇ॒ವಾನಾ᳚-ಮ್ಪ॒ವಿತ್ರಂ॒-ಯೇಁಷಾ᳚-ಮ್ಭಾ॒ಗೋ-ಽಸಿ॒ ತೇಭ್ಯ॒ಸ್ತ್ವೇತ್ಯಾ॑ಹ॒ ಯೇಷಾ॒ಗ್॒ ಹ್ಯೇ॑ಷ ಭಾ॒ಗಸ್ತೇಭ್ಯ॑ ಏನ-ಙ್ಗೃ॒ಹ್ಣಾತಿ॒ ಸ್ವಾ-ಙ್ಕೃ॑ತೋ॒-ಽಸೀತ್ಯಾ॑ಹ ಪ್ರಾ॒ಣಮೇ॒ವ ಸ್ವಮ॑ಕೃತ॒ ಮಧು॑ಮತೀರ್ನ॒ ಇಷ॑ಸ್ಕೃ॒ಧೀತ್ಯಾ॑ಹ॒ ಸರ್ವ॑ಮೇ॒ವಾಸ್ಮಾ॑ ಇ॒ದಗ್ಗ್ ಸ್ವ॑ದಯತಿ॒ ವಿಶ್ವೇ᳚ಭ್ಯ-ಸ್ತ್ವೇನ್ದ್ರಿ॒ಯೇಭ್ಯೋ॑ ದಿ॒ವ್ಯೇಭ್ಯಃ॒ ಪಾರ್ಥಿ॑ವೇಭ್ಯ॒ ಇತ್ಯಾ॑ಹೋ॒ಭಯೇ᳚ಷ್ವೇ॒ವ ದೇ॑ವಮನು॒ಷ್ಯೇಷು॑ ಪ್ರಾ॒ಣಾ-ನ್ದ॑ಧಾತಿ॒ ಮನ॑ಸ್ತ್ವಾ॒- [ಮನ॑ಸ್ತ್ವಾ, ಅ॒ಷ್ಟ್ವಿತ್ಯಾ॑ಹ॒] 23

-ಽಷ್ಟ್ವಿತ್ಯಾ॑ಹ॒ ಮನ॑ ಏ॒ವಾಶ್ಞು॑ತ ಉ॒ರ್ವ॑ನ್ತರಿ॑ಕ್ಷ॒-ಮನ್ವಿ॒ಹೀತ್ಯಾ॑ಹಾ-ನ್ತರಿಕ್ಷದೇವ॒ತ್ಯೋ॑ ಹಿ ಪ್ರಾ॒ಣ-ಸ್ಸ್ವಾಹಾ᳚ ತ್ವಾ ಸುಭವ॒-ಸ್ಸೂರ್ಯಾ॒ಯೇತ್ಯಾ॑ಹ ಪ್ರಾ॒ಣಾ ವೈ ಸ್ವಭ॑ವಸೋ ದೇ॒ವಾಸ್ತೇಷ್ವೇ॒ವ ಪ॒ರೋಕ್ಷ॑-ಞ್ಜುಹೋತಿ ದೇ॒ವೇಭ್ಯ॑ಸ್ತ್ವಾ ಮರೀಚಿ॒ಪೇಭ್ಯ॒ ಇತ್ಯಾ॑ಹಾ ಽಽದಿ॒ತ್ಯಸ್ಯ॒ ವೈ ರ॒ಶ್ಮಯೋ॑ ದೇ॒ವಾ ಮ॑ರೀಚಿ॒ಪಾಸ್ತೇಷಾ॒-ನ್ತ-ದ್ಭಾ॑ಗ॒ಧೇಯ॒-ನ್ತಾನೇ॒ವ ತೇನ॑ ಪ್ರೀಣಾತಿ॒ ಯದಿ॑ ಕಾ॒ಮಯೇ॑ತ॒ ವರ್ಷು॑ಕಃ ಪ॒ರ್ಜನ್ಯ॑- [ಪ॒ರ್ಜನ್ಯಃ॑, ಸ್ಯಾ॒ದಿತಿ॒] 24

-ಸ್ಸ್ಯಾ॒ದಿತಿ॒ ನೀಚಾ॒ ಹಸ್ತೇ॑ನ॒ ನಿ ಮೃ॑ಜ್ಯಾ॒-ದ್ವೃಷ್ಟಿ॑ಮೇ॒ವ ನಿ ಯ॑ಚ್ಛತಿ॒ ಯದಿ॑ ಕಾ॒ಮಯೇ॒ತಾವ॑ರ್ಷುಕ-ಸ್ಸ್ಯಾ॒ದಿತ್ಯು॑ತ್ತಾ॒ನೇನ॒ ನಿ ಮೃ॑ಜ್ಯಾ॒-ದ್ವೃಷ್ಟಿ॑ಮೇ॒ವೋ-ದ್ಯ॑ಚ್ಛತಿ॒ ಯದ್ಯ॑ಭಿ॒ಚರೇ॑ದ॒ಮು-ಞ್ಜ॒ಹ್ಯಥ॑ ತ್ವಾ ಹೋಷ್ಯಾ॒ಮೀತಿ॑ ಬ್ರೂಯಾ॒ದಾಹು॑ತಿಮೇ॒ವೈನ॑-ಮ್ಪ್ರೇ॒ಫ್ಸನ್. ಹ॑ನ್ತಿ॒ ಯದಿ॑ ದೂ॒ರೇ ಸ್ಯಾದಾ ತಮಿ॑ತೋಸ್ತಿಷ್ಠೇ-ತ್ಪ್ರಾ॒ಣಮೇ॒ವಾಸ್ಯಾ॑ನು॒ಗತ್ಯ॑ ಹನ್ತಿ॒ ಯದ್ಯ॑ಭಿ॒ಚರೇ॑ದ॒ಮುಷ್ಯ॑- [ಯದ್ಯ॑ಭಿ॒ಚರೇ॑ದ॒ಮುಷ್ಯ॑, ತ್ವಾ॒ ಪ್ರಾ॒ಣೇ] 25

-ತ್ವಾ ಪ್ರಾ॒ಣೇ ಸಾ॑ದಯಾ॒ಮೀತಿ॑ ಸಾದಯೇ॒ದಸ॑ನ್ನೋ॒ ವೈ ಪ್ರಾ॒ಣಃ ಪ್ರಾ॒ಣಮೇ॒ವಾಸ್ಯ॑ ಸಾದಯತಿ ಷ॒ಡ್ಭಿರ॒ಗ್ಂ॒ಶುಭಿಃ॑ ಪವಯತಿ॒ ಷ-ಡ್ವಾ ಋ॒ತವ॑ ಋ॒ತುಭಿ॑ರೇ॒ವೈನ॑-ಮ್ಪವಯತಿ॒ ತ್ರಿಃ ಪ॑ವಯತಿ॒ ತ್ರಯ॑ ಇ॒ಮೇ ಲೋ॒ಕಾ ಏ॒ಭಿರೇ॒ವೈನಂ॑-ಲೋಁ॒ಕೈಃ ಪ॑ವಯತಿ ಬ್ರಹ್ಮವಾ॒ದಿನೋ॑ ವದನ್ತಿ॒ ಕಸ್ಮಾ᳚-ಥ್ಸ॒ತ್ಯಾ-ತ್ತ್ರಯಃ॑ ಪಶೂ॒ನಾಗ್ಂ ಹಸ್ತಾ॑ದಾನಾ॒ ಇತಿ॒ ಯ-ತ್ತ್ರಿರು॑ಪಾ॒ಗ್ಂ॒ ಶುಗ್ಂ ಹಸ್ತೇ॑ನ ವಿಗೃ॒ಹ್ಣಾತಿ॒ ತಸ್ಮಾ॒-ತ್ತ್ರಯಃ॑ ಪಶೂ॒ನಾಗ್ಂ ಹಸ್ತಾ॑ದಾನಾಃ॒ ಪುರು॑ಷೋ ಹ॒ಸ್ತೀ ಮ॒ರ್ಕಟಃ॑ ॥ 26 ॥

(ಮಾಧ್ಯ॑ದಿನ್ನ - ಮ॒ಷ್ಟಾವ॑ಷ್ಟಾ - ವೇ॒ಷ - ಮನ॑ಸ್ತ್ವಾ - ಪ॒ರ್ಜನ್ಯೋ॒ - ಽಮುಷ್ಯ॒ - ಪುರು॑ಷೋ॒ - ದ್ವೇ ಚ॑) (ಅ. 5)

ದೇ॒ವಾ ವೈ ಯ-ದ್ಯ॒ಜ್ಞೇ-ಽಕು॑ರ್ವತ॒ ತದಸು॑ರಾ ಅಕುರ್ವತ॒ ತೇ ದೇ॒ವಾ ಉ॑ಪಾ॒ಗ್ಂ॒ಶೌ ಯ॒ಜ್ಞಗ್ಂ ಸ॒ಗ್ಗ್॒ಸ್ಥಾಪ್ಯ॑ಮಪಶ್ಯ॒-ನ್ತಮು॑ಪಾ॒ಗ್ಂ॒ಶೌ ಸಮ॑ಸ್ಥಾಪಯ॒-ನ್ತೇ-ಽಸು॑ರಾ॒ ವಜ್ರ॑ಮು॒ದ್ಯತ್ಯ॑ ದೇ॒ವಾನ॒ಭ್ಯಾ॑ಯನ್ತ॒ ತೇ ದೇ॒ವಾ ಬಿಭ್ಯ॑ತ॒ ಇನ್ದ್ರ॒ಮುಪಾ॑ಧಾವ॒-ನ್ತಾನಿನ್ದ್ರೋ᳚-ಽನ್ತರ್ಯಾ॒ಮೇಣಾ॒ನ್ತರ॑ಧತ್ತ॒ ತದ॑ನ್ತರ್ಯಾ॒ಮಸ್ಯಾ᳚ನ್ತರ್ಯಾಮ॒ತ್ವಂ-ಯಁದ॑ನ್ತರ್ಯಾ॒ಮೋ ಗೃ॒ಹ್ಯತೇ॒ ಭ್ರಾತೃ॑ವ್ಯಾನೇ॒ವ ತ-ದ್ಯಜ॑ಮಾನೋ॒-ಽನ್ತರ್ಧ॑ತ್ತೇ॒ ಽನ್ತಸ್ತೇ॑ [-ಽನ್ತರ್ಧ॑ತ್ತೇ॒ ಽನ್ತಸ್ತೇ᳚, ದ॒ಧಾ॒ಮಿ॒ ದ್ಯಾವಾ॑ಪೃಥಿ॒ವೀ] 27

ದಧಾಮಿ॒ ದ್ಯಾವಾ॑ಪೃಥಿ॒ವೀ ಅ॒ನ್ತರು॒-ರ್ವ॑ನ್ತರಿ॑ಕ್ಷ॒-ಮಿತ್ಯಾ॑ಹೈ॒ಭಿರೇ॒ವ ಲೋ॒ಕೈರ್ಯಜ॑ಮಾನೋ॒ ಭ್ರಾತೃ॑ವ್ಯಾನ॒ನ್ತರ್ಧ॑ತ್ತೇ॒ ತೇ ದೇ॒ವಾ ಅ॑ಮನ್ಯ॒ನ್ತೇನ್ದ್ರೋ॒ ವಾ ಇ॒ದಮ॑ಭೂ॒ದ್ಯ-ದ್ವ॒ಯಗ್ಗ್ ಸ್ಮ ಇತಿ॒ ತೇ᳚-ಽಬ್ರುವ॒-ನ್ಮಘ॑ವ॒ನ್ನನು॑ ನ॒ ಆ ಭ॒ಜೇತಿ॑ ಸ॒ಜೋಷಾ॑ ದೇ॒ವೈರವ॑ರೈಃ॒ ಪರೈ॒ಶ್ಚೇತ್ಯ॑ಬ್ರವೀ॒ದ್ಯೇ ಚೈ॒ವ ದೇ॒ವಾಃ ಪರೇ॒ ಯೇ ಚಾವ॑ರೇ॒ ತಾನು॒ಭಯಾ॑- [ತಾನು॒ಭಯಾನ್॑, ಅ॒ನ್ವಾಭ॑ಜ-ಥ್ಸ॒ಜೋಷಾ॑] 28

-ನ॒ನ್ವಾಭ॑ಜ-ಥ್ಸ॒ಜೋಷಾ॑ ದೇ॒ವೈರವ॑ರೈಃ॒ ಪರೈ॒ಶ್ಚೇತ್ಯಾ॑ಹ॒ ಯೇ ಚೈ॒ವ ದೇ॒ವಾಃ ಪರೇ॒ ಯೇ ಚಾವ॑ರೇ॒ ತಾನು॒ಭಯಾ॑-ನ॒ನ್ವಾಭ॑ಜ-ತ್ಯನ್ತರ್ಯಾ॒ಮೇ ಮ॑ಘವ-ನ್ಮಾದಯ॒ಸ್ವೇತ್ಯಾ॑ಹ ಯ॒ಜ್ಞಾದೇ॒ವ ಯಜ॑ಮಾನ॒-ನ್ನಾನ್ತರೇ᳚ತ್ಯುಪಯಾ॒ಮ-ಗೃ॑ಹೀತೋ॒ ಽಸೀತ್ಯಾ॑ಹಾಪಾ॒ನಸ್ಯ॒ ಧೃತ್ಯೈ॒ ಯದು॒ಭಾವ॑ಪವಿ॒ತ್ರೌ ಗೃ॒ಹ್ಯೇಯಾ॑ತಾ-ಮ್ಪ್ರಾ॒ಣಮ॑ಪಾ॒ನೋ-ಽನು॒ ನ್ಯೃ॑ಚ್ಛೇ-ತ್ಪ್ರ॒ಮಾಯು॑ಕ-ಸ್ಸ್ಯಾ-ತ್ಪ॒ವಿತ್ರ॑ವಾನನ್ತರ್ಯಾ॒ಮೋ ಗೃ॑ಹ್ಯತೇ [ಗೃ॑ಹ್ಯತೇ, ಪ್ರಾ॒ಣಾ॒ಪಾ॒ನಯೋ॒-ರ್ವಿಧೃ॑ತ್ಯೈ] 29

ಪ್ರಾಣಾಪಾ॒ನಯೋ॒-ರ್ವಿಧೃ॑ತ್ಯೈ ಪ್ರಾಣಾಪಾ॒ನೌ ವಾ ಏ॒ತೌ ಯದು॑ಪಾಗ್ಶ್ವನ್ತರ್ಯಾ॒ಮೌ ವ್ಯಾ॒ನ ಉ॑ಪಾಗ್ಂಶು॒ ಸವ॑ನೋ॒ ಯ-ಙ್ಕಾ॒ಮಯೇ॑ತ ಪ್ರ॒ಮಾಯು॑ಕ-ಸ್ಸ್ಯಾ॒ದಿತ್ಯಸಗ್ಗ್॑ ಸ್ಪೃಷ್ಟೌ॒ ತಸ್ಯ॑ ಸಾದಯೇ-ದ್ವ್ಯಾ॒ನೇನೈ॒ವಾಸ್ಯ॑ ಪ್ರಾಣಾಪಾ॒ನೌ ವಿ ಚ್ಛಿ॑ನತ್ತಿ ತಾ॒ಜ-ಕ್ಪ್ರ ಮೀ॑ಯತೇ॒ ಯ-ಙ್ಕಾ॒ಮಯೇ॑ತ॒ ಸರ್ವ॒ಮಾಯು॑ರಿಯಾ॒ದಿತಿ॒ ಸಗ್ಗ್ ಸ್ಪೃ॑ಷ್ಟೌ॒ ತಸ್ಯ॑ ಸಾದಯೇ-ದ್ವ್ಯಾ॒ನೇನೈ॒ವಾಸ್ಯ॑ ಪ್ರಾಣಾಪಾ॒ನೌ ಸ-ನ್ತ॑ನೋತಿ॒ ಸರ್ವ॒ಮಾಯು॑ರೇತಿ ॥ 30 ॥

(ತ॒ - ಉ॒ಭಯಾ᳚ನ್ - ಗೃಹ್ಯತೇ॒ - ಚತು॑ಶ್ಚತ್ವಾರಿಗ್ಂಶಚ್ಚ) (ಅ. 6)

ವಾಗ್ವಾ ಏ॒ಷಾ ಯದೈ᳚ನ್ದ್ರವಾಯ॒ವೋ ಯದೈ᳚ನ್ದ್ರವಾಯ॒ವಾಗ್ರಾ॒ ಗ್ರಹಾ॑ ಗೃ॒ಹ್ಯನ್ತೇ॒ ವಾಚ॑ಮೇ॒ವಾನು॒ ಪ್ರ ಯ॑ನ್ತಿ ವಾ॒ಯು-ನ್ದೇ॒ವಾ ಅ॑ಬ್ರುವ॒ನ್-ಥ್ಸೋಮ॒ಗ್ಂ॒ ರಾಜಾ॑ನಗ್ಂ ಹನಾ॒ಮೇತಿ॒ ಸೋ᳚-ಽಬ್ರವೀ॒-ದ್ವರಂ॑-ವೃಁಣೈ॒ ಮದ॑ಗ್ರಾ ಏ॒ವ ವೋ॒ ಗ್ರಹಾ॑ ಗೃಹ್ಯಾನ್ತಾ॒ ಇತಿ॒ ತಸ್ಮಾ॑ದೈನ್ದ್ರವಾಯ॒ವಾಗ್ರಾ॒ ಗ್ರಹಾ॑ ಗೃಹ್ಯನ್ತೇ॒ ತಮ॑ಘ್ನ॒ನ್-ಥ್ಸೋ॑-ಽಪೂಯ॒-ತ್ತ-ನ್ದೇ॒ವಾ ನೋಪಾ॑ಧೃಷ್ಣುವ॒-ನ್ತೇ ವಾ॒ಯುಮ॑ಬ್ರುವ-ನ್ನಿ॒ಮ-ನ್ನಃ॑ ಸ್ವದ॒ಯೇ- [-ನ್ನಿ॒ಮ-ನ್ನಃ॑ ಸ್ವದಯ, ಇತಿ॒ ಸೋ᳚-ಽಬ್ರವೀ॒-] 31

-ತಿ॒ ಸೋ᳚-ಽಬ್ರವೀ॒-ದ್ವರಂ॑-ವೃಁಣೈ ಮದ್ದೇವ॒ತ್ಯಾ᳚ನ್ಯೇ॒ವ ವಃ॒ ಪಾತ್ರಾ᳚ಣ್ಯುಚ್ಯಾನ್ತಾ॒ ಇತಿ॒ ತಸ್ಮಾ᳚ನ್ನಾನಾದೇವ॒ತ್ಯಾ॑ನಿ॒ ಸನ್ತಿ॑ ವಾಯ॒ವ್ಯಾ᳚ನ್ಯುಚ್ಯನ್ತೇ॒ ತಮೇ᳚ಭ್ಯೋ ವಾ॒ಯುರೇ॒ವಾಸ್ವ॑ದಯ॒-ತ್ತಸ್ಮಾ॒ದ್ಯ-ತ್ಪೂಯ॑ತಿ॒ ತ-ತ್ಪ್ರ॑ವಾ॒ತೇ ವಿ ಷ॑ಜನ್ತಿ ವಾ॒ಯುರ್ಹಿ ತಸ್ಯ॑ ಪವಯಿ॒ತಾ ಸ್ವ॑ದಯಿ॒ತಾ ತಸ್ಯ॑ ವಿ॒ಗ್ರಹ॑ಣ॒-ನ್ನಾವಿ॑ನ್ದ॒ನ್-ಥ್ಸಾದಿ॑ತಿರಬ್ರವೀ॒-ದ್ವರಂ॑-ವೃಁಣಾ॒ ಅಥ॒ ಮಯಾ॒ ವಿ ಗೃ॑ಹ್ಣೀದ್ಧ್ವ-ಮ್ಮದ್ದೇವ॒ತ್ಯಾ॑ ಏ॒ವ ವ॒-ಸ್ಸೋಮಾ᳚- [ವ॒-ಸ್ಸೋಮಾಃ᳚, ಸ॒ನ್ನಾ] 32

-ಸ್ಸ॒ನ್ನಾ ಅ॑ಸ॒-ನ್ನಿತ್ಯು॑ಪಯಾ॒ಮಗೃ॑ಹೀತೋ॒-ಽಸೀ-ತ್ಯಾ॑ಹಾ-ದಿತಿದೇವ॒ತ್ಯಾ᳚ಸ್ತೇನ॒ ಯಾನಿ॒ ಹಿ ದಾ॑ರು॒ಮಯಾ॑ಣಿ॒ ಪಾತ್ರಾ᳚ಣ್ಯ॒ಸ್ಯೈ ತಾನಿ॒ ಯೋನೇ॒-ಸ್ಸಮ್ಭೂ॑ತಾನಿ॒ ಯಾನಿ॑ ಮೃ॒ನ್ಮಯಾ॑ನಿ ಸಾ॒ಕ್ಷಾ-ತ್ತಾನ್ಯ॒ಸ್ಯೈ ತಸ್ಮಾ॑ದೇ॒ವಮಾ॑ಹ॒ ವಾಗ್ವೈ ಪರಾ॒ಚ್ಯ-ವ್ಯಾ॑ಕೃತಾ-ಽವದ॒-ತ್ತೇ ದೇ॒ವಾ ಇನ್ದ್ರ॑ಮಬ್ರುವನ್ನಿ॒ಮಾ-ನ್ನೋ॒ ವಾಚಂ॒-ವ್ಯಾಁಕು॒ರ್ವಿತಿ॒ ಸೋ᳚-ಽಬ್ರವೀ॒-ದ್ವರಂ॑-ವೃಁಣೈ॒ ಮಹ್ಯ॑-ಞ್ಚೈ॒ವೈಷ ವಾ॒ಯವೇ॑ ಚ ಸ॒ಹ ಗೃ॑ಹ್ಯಾತಾ॒ ಇತಿ॒ ತಸ್ಮಾ॑ದೈನ್ದ್ರವಾಯ॒ವ-ಸ್ಸ॒ಹ ಗೃ॑ಹ್ಯತೇ॒ ತಾಮಿನ್ದ್ರೋ॑ ಮದ್ಧ್ಯ॒ತೋ॑-ಽವ॒ಕ್ರಮ್ಯ॒ ವ್ಯಾಕ॑ರೋ॒-ತ್ತಸ್ಮಾ॑ದಿ॒ಯಂ-ವ್ಯಾಁಕೃ॑ತಾ॒ ವಾಗು॑ದ್ಯತೇ॒ ತಸ್ಮಾ᳚-ಥ್ಸ॒ಕೃದಿನ್ದ್ರಾ॑ಯ ಮದ್ಧ್ಯ॒ತೋ ಗೃ॑ಹ್ಯತೇ॒ ದ್ವಿರ್ವಾ॒ಯವೇ॒ ದ್ವೌ ಹಿ ಸ ವರಾ॒ವವೃ॑ಣೀತ ॥ 33 ॥

(ಸ್ವ॒ದ॒ಯ॒ - ಸೋಮಾಃ᳚ - ಸ॒ಹಾ - ಷ್ಟಾವಿಗ್ಂ॑ಶತಿಶ್ಚ) (ಅ. 7)

ಮಿ॒ತ್ರ-ನ್ದೇ॒ವಾ ಅ॑ಬ್ರುವ॒ನ್-ಥ್ಸೋಮ॒ಗ್ಂ॒ ರಾಜಾ॑ನಗ್ಂ ಹನಾ॒ಮೇತಿ॒ ಸೋ᳚-ಽಬ್ರವೀ॒ನ್ನಾಹಗ್ಂ ಸರ್ವ॑ಸ್ಯ॒ ವಾ ಅ॒ಹ-ಮ್ಮಿ॒ತ್ರಮ॒ಸ್ಮೀತಿ॒ ತಮ॑ಬ್ರುವ॒ನ್॒. ಹನಾ॑ಮೈ॒ವೇತಿ॒ ಸೋ᳚-ಽಬ್ರವೀ॒-ದ್ವರಂ॑-ವೃಁಣೈ॒ ಪಯ॑ಸೈ॒ವ ಮೇ॒ ಸೋಮಗ್ಗ್॑ ಶ್ರೀಣ॒ನ್ನಿತಿ॒ ತಸ್ಮಾ᳚-ನ್ಮೈತ್ರಾವರು॒ಣ-ಮ್ಪಯ॑ಸಾ ಶ್ರೀಣನ್ತಿ॒ ತಸ್ಮಾ᳚-ತ್ಪ॒ಶವೋ-ಽಪಾ᳚ಕ್ರಾಮ-ನ್ಮಿ॒ತ್ರ-ಸ್ಸನ್ ಕ್ರೂ॒ರಮ॑ಕ॒ರಿತಿ॑ ಕ್ರೂ॒ರಮಿ॑ವ॒ ಖಲು॒ ವಾ ಏ॒ಷ [ವಾ ಏ॒ಷಃ, ಕ॒ರೋ॒ತಿ॒ ಯ-ಸ್ಸೋಮೇ॑ನ॒] 34

ಕ॑ರೋತಿ॒ ಯ-ಸ್ಸೋಮೇ॑ನ॒ ಯಜ॑ತೇ॒ ತಸ್ಮಾ᳚-ತ್ಪ॒ಶವೋ-ಽಪ॑ ಕ್ರಾಮನ್ತಿ॒ ಯನ್ಮೈ᳚ತ್ರಾವರು॒ಣ-ಮ್ಪಯ॑ಸಾ ಶ್ರೀ॒ಣಾತಿ॑ ಪ॒ಶುಭಿ॑ರೇ॒ವ ತನ್ಮಿ॒ತ್ರಗ್ಂ ಸ॑ಮ॒ರ್ಧಯ॑ತಿ ಪ॒ಶುಭಿ॒ರ್ಯಜ॑ಮಾನ-ಮ್ಪು॒ರಾ ಖಲು॒ ವಾವೈವ-ಮ್ಮಿ॒ತ್ರೋ॑-ಽವೇ॒ದಪ॒ ಮ-ತ್ಕ್ರೂ॒ರ-ಞ್ಚ॒ಕ್ರುಷಃ॑ ಪ॒ಶವಃ॑ ಕ್ರಮಿಷ್ಯ॒ನ್ತೀತಿ॒ ತಸ್ಮಾ॑ದೇ॒ವಮ॑ವೃಣೀತ॒ ವರು॑ಣ-ನ್ದೇ॒ವಾ ಅ॑ಬ್ರುವ॒-ನ್ತ್ವಯಾ-ಽಗ್ಂ॑ಶ॒ಭುವಾ॒ ಸೋಮ॒ಗ್ಂ॒ ರಾಜಾ॑ನಗ್ಂ ಹನಾ॒ಮೇತಿ॒ ಸೋ᳚-ಽಬ್ರವೀ॒-ದ್ವರಂ॑-ವೃಁಣೈ॒ ಮಹ್ಯ॑-ಞ್ಚೈ॒- [ಮಹ್ಯ॑-ಞ್ಚ, ಏ॒ವೈಷ ಮಿ॒ತ್ರಾಯ॑] 35

-ವೈಷ ಮಿ॒ತ್ರಾಯ॑ ಚ ಸ॒ಹ ಗೃ॑ಹ್ಯಾತಾ॒ ಇತಿ॒ ತಸ್ಮಾ᳚ನ್ಮೈತ್ರಾವರು॒ಣ-ಸ್ಸ॒ಹ ಗೃ॑ಹ್ಯತೇ॒ ತಸ್ಮಾ॒-ದ್ರಾಜ್ಞಾ॒ ರಾಜಾ॑ನಮಗ್ಂಶ॒ಭುವಾ᳚ ಘ್ನನ್ತಿ॒ ವೈಶ್ಯೇ॑ನ॒ ವೈಶ್ಯಗ್ಂ॑ ಶೂ॒ದ್ರೇಣ॑ ಶೂ॒ದ್ರ-ನ್ನ ವಾ ಇ॒ದ-ನ್ದಿವಾ॒ ನ ನಕ್ತ॑ಮಾಸೀ॒ದವ್ಯಾ॑ವೃತ್ತ॒-ನ್ತೇ ದೇ॒ವಾ ಮಿ॒ತ್ರಾವರು॑ಣಾವಬ್ರುವನ್ನಿ॒ದ-ನ್ನೋ॒ ವಿವಾ॑ಸಯತ॒ಮಿತಿ॒ ತಾವ॑ಬ್ರೂತಾಂ॒-ವಁರಂ॑-ವೃಁಣಾವಹಾ॒ ಏಕ॑ ಏ॒ವಾ-ಽಽವ-ತ್ಪೂರ್ವೋ॒ ಗ್ರಹೋ॑ ಗೃಹ್ಯಾತಾ॒ ಇತಿ॒ ತಸ್ಮಾ॑ದೈನ್ದ್ರವಾಯ॒ವಃ ಪೂರ್ವೋ॑ ಮೈತ್ರಾವರು॒ಣಾ-ದ್ಗೃ॑ಹ್ಯತೇ ಪ್ರಾಣಾಪಾ॒ನೌ ಹ್ಯೇ॑ತೌ ಯದು॑ಪಾಗ್-ಶ್ವನ್ತರ್ಯಾ॒ಮೌ ಮಿ॒ತ್ರೋ-ಽಹ॒ರಜ॑ನಯ॒-ದ್ವರು॑ಣೋ॒ ರಾತ್ರಿ॒-ನ್ತತೋ॒ ವಾ ಇ॒ದಂ-ವ್ಯೌಁ᳚ಚ್ಛ॒ದ್ಯ-ನ್ಮೈ᳚ತ್ರಾವರು॒ಣೋ ಗೃ॒ಹ್ಯತೇ॒ ವ್ಯು॑ಷ್ಟ್ಯೈ ॥ 36 ॥

(ಏ॒ಷ - ಚೈ᳚ - ನ್ದ್ರವಾಯ॒ವೋ - ದ್ವಾವಿಗ್ಂ॑ಶತಿಶ್ಚ) (ಅ. 8)

ಯ॒ಜ್ಞಸ್ಯ॒ ಶಿರೋ᳚-ಽಚ್ಛಿದ್ಯತ॒ ತೇ ದೇ॒ವಾ ಅ॒ಶ್ವಿನಾ॑ವಬ್ರುವ-ನ್ಭಿ॒ಷಜೌ॒ ವೈ ಸ್ಥ॑ ಇ॒ದಂ-ಯಁ॒ಜ್ಞಸ್ಯ॒ ಶಿರಃ॒ ಪ್ರತಿ॑ ಧತ್ತ॒ಮಿತಿ॒ ತಾವ॑ಬ್ರೂತಾಂ॒-ವಁರಂ॑-ವೃಁಣಾವಹೈ॒ ಗ್ರಹ॑ ಏ॒ವ ನಾ॒ವತ್ರಾಪಿ॑ ಗೃಹ್ಯತಾ॒ಮಿತಿ॒ ತಾಭ್ಯಾ॑-ಮೇ॒ತಮಾ᳚ಶ್ವಿ॒ನ-ಮ॑ಗೃಹ್ಣ॒-ನ್ತತೋ॒ ವೈ ತೌ ಯ॒ಜ್ಞಸ್ಯ॒ ಶಿರಃ॒ ಪ್ರತ್ಯ॑ಧತ್ತಾಂ॒-ಯಁದಾ᳚ಶ್ವಿ॒ನೋ ಗೃ॒ಹ್ಯತೇ॑ ಯ॒ಜ್ಞಸ್ಯ॒ ನಿಷ್ಕೃ॑ತ್ಯೈ॒ ತೌ ದೇ॒ವಾ ಅ॑ಬ್ರುವ॒ನ್ನಪೂ॑ತೌ॒ ವಾ ಇ॒ಮೌ ಮ॑ನುಷ್ಯಚ॒ರೌ [ ] 37

ಭಿ॒ಷಜಾ॒ವಿತಿ॒ ತಸ್ಮಾ᳚-ದ್ಬ್ರಾಹ್ಮ॒ಣೇನ॑ ಭೇಷ॒ಜ-ನ್ನ ಕಾ॒ರ್ಯ॑ಮಪೂ॑ತೋ॒ ಹ್ಯೇ᳚(1॒)ಷೋ॑ ಽಮೇ॒ದ್ಧ್ಯೋ ಯೋ ಭಿ॒ಷಕ್ತೌ ಬ॑ಹಿಷ್ಪವಮಾ॒ನೇನ॑ ಪವಯಿ॒ತ್ವಾ ತಾಭ್ಯಾ॑-ಮೇ॒ತಮಾ᳚ಶ್ವಿ॒ನ-ಮ॑ಗೃಹ್ಣ॒-ನ್ತಸ್ಮಾ᳚-ದ್ಬಹಿಷ್ಪವಮಾ॒ನೇ ಸ್ತು॒ತ ಆ᳚ಶ್ವಿ॒ನೋ ಗೃ॑ಹ್ಯತೇ॒ ತಸ್ಮಾ॑ದೇ॒ವಂ-ವಿಁ॒ದುಷಾ॑ ಬಹಿಷ್ಪವಮಾ॒ನ ಉ॑ಪ॒ಸದ್ಯಃ॑ ಪ॒ವಿತ್ರಂ॒-ವೈಁ ಬ॑ಹಿಷ್ಪವಮಾ॒ನ ಆ॒ತ್ಮಾನ॑ಮೇ॒ವ ಪ॑ವಯತೇ॒ ತಯೋ᳚-ಽಸ್ತ್ರೇ॒ಧಾ ಭೈಷ॑ಜ್ಯಂ॒-ವಿಁ ನ್ಯ॑ದಧುರ॒ಗ್ನೌ ತೃತೀ॑ಯಮ॒ಫ್ಸು ತೃತೀ॑ಯ-ಮ್ಬ್ರಾಹ್ಮ॒ಣೇ ತೃತೀ॑ಯ॒-ನ್ತಸ್ಮಾ॑ದುದಪಾ॒ತ್ರ- [ತೃತೀ॑ಯ॒-ನ್ತಸ್ಮಾ॑ದುದಪಾ॒ತ್ರಮ್, ಉ॒ಪ॒ನಿ॒ಧಾಯ॑] 38

-ಮು॑ಪನಿ॒ಧಾಯ॑ ಬ್ರಾಹ್ಮ॒ಣ-ನ್ದ॑ಕ್ಷಿಣ॒ತೋ ನಿ॒ಷಾದ್ಯ॑ ಭೇಷ॒ಜ-ಙ್ಕು॑ರ್ಯಾ॒-ದ್ಯಾವ॑ದೇ॒ವ ಭೇ॑ಷ॒ಜ-ನ್ತೇನ॑ ಕರೋತಿ ಸ॒ಮರ್ಧು॑ಕಮಸ್ಯ ಕೃ॒ತ-ಮ್ಭ॑ವತಿ ಬ್ರಹ್ಮವಾ॒ದಿನೋ॑ ವದನ್ತಿ॒ ಕಸ್ಮಾ᳚-ಥ್ಸ॒ತ್ಯಾದೇಕ॑ಪಾತ್ರಾ ದ್ವಿದೇವ॒ತ್ಯಾ॑ ಗೃ॒ಹ್ಯನ್ತೇ᳚ ದ್ವಿ॒ಪಾತ್ರಾ॑ ಹೂಯನ್ತ॒ ಇತಿ॒ ಯದೇಕ॑ಪಾತ್ರಾ ಗೃ॒ಹ್ಯನ್ತೇ॒ ತಸ್ಮಾ॒ದೇಕೋ᳚-ಽನ್ತರ॒ತಃ ಪ್ರಾ॒ಣೋ ದ್ವಿ॒ಪಾತ್ರಾ॑ ಹೂಯನ್ತೇ॒ ತಸ್ಮಾ॒-ದ್ದ್ವೌದ್ವೌ॑ ಬ॒ಹಿಷ್ಟಾ᳚-ತ್ಪ್ರಾ॒ಣಾಃ ಪ್ರಾ॒ಣಾ ವಾ ಏ॒ತೇ ಯ-ದ್ದ್ವಿ॑ದೇವ॒ತ್ಯಾಃ᳚ ಪ॒ಶವ॒ ಇಡಾ॒ ಯದಿಡಾ॒-ಮ್ಪೂರ್ವಾ᳚-ನ್ದ್ವಿದೇವ॒ತ್ಯೇ᳚ಭ್ಯ ಉಪ॒ಹ್ವಯೇ॑ತ [ ] 39

ಪ॒ಶುಭಿಃ॑ ಪ್ರಾ॒ಣಾನ॒ನ್ತರ್ದ॑ಧೀತ ಪ್ರ॒ಮಾಯು॑ಕ-ಸ್ಸ್ಯಾ-ದ್ದ್ವಿದೇವ॒ತ್ಯಾ᳚-ನ್ಭಕ್ಷಯಿ॒ತ್ವೇಡಾ॒ಮುಪ॑ ಹ್ವಯತೇ ಪ್ರಾ॒ಣಾನೇ॒ವಾ-ಽಽತ್ಮ-ನ್ಧಿ॒ತ್ವಾ ಪ॒ಶೂನುಪ॑ ಹ್ವಯತೇ॒ ವಾಗ್ವಾ ಐ᳚ನ್ದ್ರವಾಯ॒ವಶ್ಚಕ್ಷು॑-ರ್ಮೈತ್ರಾವರು॒ಣ-ಶ್ಶ್ರೋತ್ರ॑ಮಾಶ್ವಿ॒ನಃ ಪು॒ರಸ್ತಾ॑ದೈನ್ದ್ರವಾಯ॒ವ-ಮ್ಭ॑ಕ್ಷಯತಿ॒ ತಸ್ಮಾ᳚-ತ್ಪು॒ರಸ್ತಾ᳚-ದ್ವಾ॒ಚಾ ವ॑ದತಿ ಪು॒ರಸ್ತಾ᳚ನ್ಮೈತ್ರಾವರು॒ಣ-ನ್ತಸ್ಮಾ᳚-ತ್ಪು॒ರಸ್ತಾ॒ಚ್ಚಕ್ಷು॑ಷಾ ಪಶ್ಯತಿ ಸ॒ರ್ವತಃ॑ ಪರಿ॒ಹಾರ॑ಮಾಶ್ವಿ॒ನ-ನ್ತಸ್ಮಾ᳚-ಥ್ಸ॒ರ್ವತ॒-ಶ್ಶ್ರೋತ್ರೇ॑ಣ ಶೃಣೋತಿ ಪ್ರಾ॒ಣಾ ವಾ ಏ॒ತೇ ಯ-ದ್ದ್ವಿ॑ದೇವ॒ತ್ಯಾ॑ [ಯ-ದ್ದ್ವಿ॑ದೇವ॒ತ್ಯಾಃ᳚, ಅರಿ॑ಕ್ತಾನಿ॒] 40

ಅರಿ॑ಕ್ತಾನಿ॒ ಪಾತ್ರಾ॑ಣಿ ಸಾದಯತಿ॒ ತಸ್ಮಾ॒ದರಿ॑ಕ್ತಾ ಅನ್ತರ॒ತಃ ಪ್ರಾ॒ಣಾ ಯತಃ॒ ಖಲು॒ ವೈ ಯ॒ಜ್ಞಸ್ಯ॒ ವಿತ॑ತಸ್ಯ॒ ನ ಕ್ರಿ॒ಯತೇ॒ ತದನು॑ ಯ॒ಜ್ಞಗ್ಂ ರಕ್ಷಾ॒ಗ್॒ಸ್ಯವ॑ ಚರನ್ತಿ॒ ಯದರಿ॑ಕ್ತಾನಿ॒ ಪಾತ್ರಾ॑ಣಿ ಸಾ॒ದಯ॑ತಿ ಕ್ರಿ॒ಯಮಾ॑ಣಮೇ॒ವ ತ-ದ್ಯ॒ಜ್ಞಸ್ಯ॑ ಶಯೇ॒ ರಕ್ಷ॑ಸಾ॒ -ಮನ॑ನ್ವವಚಾರಾಯ॒ ದಕ್ಷಿ॑ಣಸ್ಯ ಹವಿ॒ರ್ಧಾನ॒ಸ್ಯೋತ್ತ॑ರಸ್ಯಾಂ-ವಁರ್ತ॒ನ್ಯಾಗ್ಂ ಸಾ॑ದಯತಿ ವಾ॒ಚ್ಯೇ॑ವ ವಾಚ॑-ನ್ದಧಾ॒ತ್ಯಾ ತೃ॑ತೀಯಸವ॒ನಾ-ತ್ಪರಿ॑ ಶೇರೇ ಯ॒ಜ್ಞಸ್ಯ॒ ಸನ್ತ॑ತ್ಯೈ ॥ 41 ॥

(ಮ॒ನು॒ಷ್ಯ॒ಚ॒ರಾ - ವು॑ದಪಾ॒ತ್ರ - ಮು॑ಪ॒ಹ್ವಯೇ॑ತ - ದ್ವಿದೇವ॒ತ್ಯಾಃ᳚ - ಷಟ್ಚ॑ತ್ವಾರಿಗ್ಂಶಚ್ಚ) (ಅ. 9)

ಬೃಹ॒ಸ್ಪತಿ॑ರ್ದೇ॒ವಾನಾ᳚-ಮ್ಪು॒ರೋಹಿ॑ತ॒ ಆಸೀ॒-ಚ್ಛಣ್ಡಾ॒ಮರ್ಕಾ॒-ವಸು॑ರಾಣಾ॒-ಮ್ಬ್ರಹ್ಮ॑ಣ್ ವನ್ತೋ ದೇ॒ವಾ ಆಸ॒-ನ್ಬ್ರಹ್ಮ॑ಣ್ ವ॒ನ್ತೋ-ಽಸು॑ರಾ॒ಸ್ತೇ᳚(1॒) ಽನ್ಯೋ᳚-ಽನ್ಯ-ನ್ನಾಶ॑ಕ್ನುವ-ನ್ನ॒ಭಿಭ॑ವಿತು॒-ನ್ತೇ ದೇ॒ವಾ-ಶ್ಶಣ್ಡಾ॒ಮರ್ಕಾ॒-ವುಪಾ॑ಮನ್ತ್ರಯನ್ತ॒ ತಾ ವ॑ಬ್ರೂತಾಂ॒-ವಁರಂ॑-ವೃಁಣಾವಹೈ॒ ಗ್ರಹಾ॑ವೇ॒ವ ನಾ॒ವತ್ರಾಪಿ॑ ಗೃಹ್ಯೇತಾ॒ಮಿತಿ॒ ತಾಭ್ಯಾ॑ಮೇ॒ತೌ ಶು॒ಕ್ರಾಮ॒ನ್ಥಿನಾ॑-ವಗೃಹ್ಣ॒-ನ್ತತೋ॑ ದೇ॒ವಾ ಅಭ॑ವ॒-ನ್ಪರಾ-ಽಸು॑ರಾ॒ ಯಸ್ಯೈ॒ವಂ-ವಿಁ॒ದುಷಃ॑ ಶು॒ಕ್ರಾಮ॒ನ್ಥಿನೌ॑ ಗೃ॒ಹ್ಯೇತೇ॒ ಭ॑ವತ್ಯಾ॒ತ್ಮನಾ॒ ಪರಾ᳚- [ಪರಾ᳚, ಅ॒ಸ್ಯ॒ ಭ್ರಾತೃ॑ವ್ಯೋ] 42

-ಽಸ್ಯ॒ ಭ್ರಾತೃ॑ವ್ಯೋ ಭವತಿ॒ ತೌ ದೇ॒ವಾ ಅ॑ಪ॒ನುದ್ಯಾ॒-ಽಽತ್ಮನ॒ ಇನ್ದ್ರಾ॑ಯಾಜುಹವು॒-ರಪ॑ನುತ್ತೌ॒ ಶಣ್ಡಾ॒ಮರ್ಕೌ॑ ಸ॒ಹಾಮುನೇತಿ॑ ಬ್ರೂಯಾ॒ದ್ಯ-ನ್ದ್ವಿ॒ಷ್ಯಾದ್ಯಮೇ॒ವ ದ್ವೇಷ್ಟಿ॒ ತೇನೈ॑ನೌ ಸ॒ಹಾಪ॑ ನುದತೇ॒ ಸ ಪ್ರ॑ಥ॒ಮ-ಸ್ಸಙ್ಕೃ॑ತಿ-ರ್ವಿ॒ಶ್ವಕ॒ರ್ಮೇತ್ಯೇ॒ವೈನಾ॑-ವಾ॒ತ್ಮನ॒ ಇನ್ದ್ರಾ॑ಯಾ-ಜುಹವು॒ರಿನ್ದ್ರೋ॒ ಹ್ಯೇ॑ತಾನಿ॑ ರೂ॒ಪಾಣಿ॒ ಕರಿ॑ಕ್ರ॒ದಚ॑ರದ॒ಸೌ ವಾ ಆ॑ದಿ॒ತ್ಯ-ಶ್ಶು॒ಕ್ರಶ್ಚ॒ನ್ದ್ರಮಾ॑ ಮ॒ನ್ಥ್ಯ॑ಪಿ॒-ಗೃಹ್ಯ॒ ಪ್ರಾಞ್ಚೌ॒ ನಿ- [ಪ್ರಾಞ್ಚೌ॒ ನಿಃ, ಕ್ರಾ॒ಮ॒ತ॒-ಸ್ತಸ್ಮಾ॒-] 43

-ಷ್ಕ್ರಾ॑ಮತ॒-ಸ್ತಸ್ಮಾ॒-ತ್ಪ್ರಾಞ್ಚೌ॒ ಯನ್ತೌ॒ ನ ಪ॑ಶ್ಯನ್ತಿ ಪ್ರ॒ತ್ಯಞ್ಚಾ॑ವಾ॒ವೃತ್ಯ॑ ಜುಹುತ॒ಸ್ತಸ್ಮಾ᳚-ತ್ಪ್ರ॒ತ್ಯಞ್ಚೌ॒ ಯನ್ತೌ॑ ಪಶ್ಯನ್ತಿ॒ ಚಕ್ಷು॑ಷೀ॒ ವಾ ಏ॒ತೇ ಯ॒ಜ್ಞಸ್ಯ॒ ಯಚ್ಛು॒ಕ್ರಾಮ॒ನ್ಥಿನೌ॒ ನಾಸಿ॑ಕೋತ್ತರವೇ॒ದಿರ॒ಭಿತಃ॑ ಪರಿ॒ಕ್ರಮ್ಯ॑ ಜುಹುತ॒ಸ್ತಸ್ಮಾ॑ದ॒ಭಿತೋ॒ ನಾಸಿ॑ಕಾ॒-ಞ್ಚಕ್ಷು॑ಷೀ॒ ತಸ್ಮಾ॒ನ್ನಾಸಿ॑ಕಯಾ॒ ಚಕ್ಷು॑ಷೀ॒ ವಿಧೃ॑ತೇ ಸ॒ರ್ವತಃ॒ ಪರಿ॑ ಕ್ರಾಮತೋ॒ ರಕ್ಷ॑ಸಾ॒ಮಪ॑ಹತ್ಯೈ ದೇ॒ವಾ ವೈ ಯಾಃ ಪ್ರಾಚೀ॒ರಾಹು॑ತೀ॒ರಜು॑ಹವು॒ರ್ಯೇ ಪು॒ರಸ್ತಾ॒ದಸು॑ರಾ॒ ಆಸ॒-ನ್ತಾಗ್ಸ್ತಾಭಿಃ॒ ಪ್ರಾ- [ಆಸ॒-ನ್ತಾಗ್ಸ್ತಾಭಿಃ॒ ಪ್ರ, ಅ॒ನು॒ದ॒ನ್ತ॒ ಯಾಃ] 44

-ಣು॑ದನ್ತ॒ ಯಾಃ ಪ್ರ॒ತೀಚೀ॒ರ್ಯೇ ಪ॒ಶ್ಚಾದಸು॑ರಾ॒ ಆಸ॒-ನ್ತಾಗ್ಸ್ತಾಭಿ॒ರಪಾ॑ನುದನ್ತ॒ ಪ್ರಾಚೀ॑ರ॒ನ್ಯಾ ಆಹು॑ತಯೋ ಹೂ॒ಯನ್ತೇ᳚ ಪ್ರ॒ತ್ಯಞ್ಚೌ॑ ಶು॒ಕ್ರಾಮ॒ನ್ಥಿನೌ॑ ಪ॒ಶ್ಚಾಚ್ಚೈ॒ವ ಪು॒ರಸ್ತಾ᳚ಚ್ಚ॒ ಯಜ॑ಮಾನೋ॒ ಭ್ರಾತೃ॑ವ್ಯಾ॒-ನ್ಪ್ರ ಣು॑ದತೇ॒ ತಸ್ಮಾ॒-ತ್ಪರಾ॑ಚೀಃ ಪ್ರ॒ಜಾಃ ಪ್ರ ವೀ॑ಯನ್ತೇ ಪ್ರ॒ತೀಚೀ᳚ರ್ಜಾಯನ್ತೇ ಶು॒ಕ್ರಾಮ॒ನ್ಥಿನೌ॒ ವಾ ಅನು॑ ಪ್ರ॒ಜಾಃ ಪ್ರ ಜಾ॑ಯನ್ತೇ॒-ಽತ್ತ್ರೀಶ್ಚಾ॒ದ್ಯಾ᳚ಶ್ಚ ಸು॒ವೀರಾಃ᳚ ಪ್ರ॒ಜಾಃ ಪ್ರ॑ಜ॒ನಯ॒-ನ್ಪರೀ॑ಹಿ ಶು॒ಕ್ರ-ಶ್ಶು॒ಕ್ರಶೋ॑ಚಿಷಾ [ಶು॒ಕ್ರ-ಶ್ಶು॒ಕ್ರಶೋ॑ಚಿಷಾ, ಸು॒ಪ್ರ॒ಜಾಃ ಪ್ರ॒ಜಾಃ] 45

ಸುಪ್ರ॒ಜಾಃ ಪ್ರ॒ಜಾಃ ಪ್ರ॑ಜ॒ನಯ॒-ನ್ಪರೀ॑ಹಿ ಮ॒ನ್ಥೀ ಮ॒ನ್ಥಿಶೋ॑ಚಿ॒ಷೇತ್ಯಾ॑ಹೈ॒ತಾ ವೈ ಸು॒ವೀರಾ॒ ಯಾ ಅ॒ತ್ತ್ರೀರೇ॒ತಾ-ಸ್ಸು॑ಪ್ರ॒ಜಾ ಯಾ ಆ॒ದ್ಯಾ॑ ಯ ಏ॒ವಂ-ವೇಁದಾ॒ತ್ರ್ಯ॑ಸ್ಯ ಪ್ರ॒ಜಾ ಜಾ॑ಯತೇ॒ ನಾ-ಽಽದ್ಯಾ᳚ ಪ್ರ॒ಜಾಪ॑ತೇ॒ರಕ್ಷ್ಯ॑ಶ್ವಯ॒-ತ್ತ-ತ್ಪರಾ॑-ಽಽಪತ॒-ತ್ತ-ದ್ವಿಕ॑ಙ್ಕತ॒-ಮ್ಪ್ರಾವಿ॑ಶ॒-ತ್ತ-ದ್ವಿಕ॑ಙ್ಕತೇ॒ ನಾರ॑ಮತ॒ ತ-ದ್ಯವ॒-ಮ್ಪ್ರಾವಿ॑ಶ॒-ತ್ತ-ದ್ಯವೇ॑-ಽರಮತ॒ ತ-ದ್ಯವ॑ಸ್ಯ- [ತ-ದ್ಯವ॑ಸ್ಯ, ಯ॒ವ॒ತ್ವಂ-ಯಁ-ದ್ವೈಕ॑ಙ್ಕತ-] 46

ಯವ॒ತ್ವಂ-ಯಁ-ದ್ವೈಕ॑ಙ್ಕತ-ಮ್ಮನ್ಥಿಪಾ॒ತ್ರ-ಮ್ಭವ॑ತಿ॒ ಸಕ್ತು॑ಭಿ-ಶ್ಶ್ರೀ॒ಣಾತಿ॑ ಪ್ರ॒ಜಾಪ॑ತೇರೇ॒ವ ತಚ್ಚಕ್ಷು॒-ಸ್ಸ-ಮ್ಭ॑ರತಿ ಬ್ರಹ್ಮವಾ॒ದಿನೋ॑ ವದನ್ತಿ॒ ಕಸ್ಮಾ᳚-ಥ್ಸ॒ತ್ಯಾನ್ಮ॑ನ್ಥಿಪಾ॒ತ್ರಗ್ಂ ಸದೋ॒ ನಾಶ್ಞು॑ತ॒ ಇತ್ಯಾ᳚ರ್ತಪಾ॒ತ್ರಗ್ಂ ಹೀತಿ॑ ಬ್ರೂಯಾ॒-ದ್ಯದ॑ಶ್ಞುವೀ॒ತಾನ್ಧೋ᳚-ಽದ್ಧ್ವ॒ರ್ಯು-ಸ್ಸ್ಯಾ॒ದಾರ್ತಿ॒ಮಾರ್ಚ್ಛೇ॒-ತ್ತಸ್ಮಾ॒ನ್ನಾಶ್ಞು॑ತೇ ॥ 47 ॥

(ಆ॒ತ್ಮನಾ॒ ಪರಾ॒ - ನಿ - ಷ್ಪ್ರ - ಶು॒ಕ್ರಶೋ॑ಚಿಷಾ॒ - ಯವ॑ಸ್ಯ - ಸ॒ಪ್ತತ್ರಿಗ್ಂ॑ಶಚ್ಚ) (ಅ. 10)

ದೇ॒ವಾ ವೈ ಯ-ದ್ಯ॒ಜ್ಞೇ-ಽಕು॑ರ್ವತ॒ ತದಸು॑ರಾ ಅಕುರ್ವತ॒ ತೇ ದೇ॒ವಾ ಆ᳚ಗ್ರಯ॒ಣಾಗ್ರಾ॒-ನ್ಗ್ರಹಾ॑ನಪಶ್ಯ॒-ನ್ತಾನ॑ಗೃಹ್ಣತ॒ ತತೋ॒ ವೈ ತೇ-ಽಗ್ರ॒-ಮ್ಪರ್ಯಾ॑ಯ॒ನ್॒. ಯಸ್ಯೈ॒ವಂ-ವಿಁ॒ದುಷ॑ ಆಗ್ರಯ॒ಣಾಗ್ರಾ॒ ಗ್ರಹಾ॑ ಗೃ॒ಹ್ಯನ್ತೇ-ಽಗ್ರ॑ಮೇ॒ವ ಸ॑ಮಾ॒ನಾನಾ॒-ಮ್ಪರ್ಯೇ॑ತಿ ರು॒ಗ್ಣವ॑ತ್ಯ॒ರ್ಚಾ ಭ್ರಾತೃ॑ವ್ಯವತೋ ಗೃಹ್ಣೀಯಾ॒-ದ್ಭ್ರಾತೃ॑ವ್ಯಸ್ಯೈ॒ವ ರು॒ಕ್ತ್ವಾ-ಽಗ್ರಗ್ಂ॑ ಸಮಾ॒ನಾನಾ॒-ಮ್ಪರ್ಯೇ॑ತಿ॒ ಯೇ ದೇ॑ವಾ ದಿ॒ವ್ಯೇಕಾ॑ದಶ॒ ಸ್ಥೇತ್ಯಾ॑ಹೈ॒- [ಸ್ಥೇತ್ಯಾ॑ಹ, ಏ॒ತಾವ॑ತೀ॒ರ್ವೈ] 48

-ತಾವ॑ತೀ॒ರ್ವೈ ದೇ॒ವತಾ॒ಸ್ತಾಭ್ಯ॑ ಏ॒ವೈನ॒ಗ್ಂ॒ ಸರ್ವಾ᳚ಭ್ಯೋ ಗೃಹ್ಣಾತ್ಯೇ॒ಷ ತೇ॒ ಯೋನಿ॒ ರ್ವಿಶ್ವೇ᳚ಭ್ಯಸ್ತ್ವಾ ದೇ॒ವೇಭ್ಯ॒ ಇತ್ಯಾ॑ಹ ವೈಶ್ವದೇ॒ವೋ ಹ್ಯೇ॑ಷ ದೇ॒ವತ॑ಯಾ॒ ವಾಗ್ವೈ ದೇ॒ವೇಭ್ಯೋ-ಽಪಾ᳚ಕ್ರಾಮ-ದ್ಯ॒ಜ್ಞಾಯಾತಿ॑ಷ್ಠಮಾನಾ॒ ತೇ ದೇ॒ವಾ ವಾ॒ಚ್ಯಪ॑ಕ್ರಾನ್ತಾಯಾ-ನ್ತೂ॒ಷ್ಣೀ-ಙ್ಗ್ರಹಾ॑ನಗೃಹ್ಣತ॒ ಸಾಮ॑ನ್ಯತ॒ ವಾಗ॒ನ್ತರ್ಯ॑ನ್ತಿ॒ ವೈ ಮೇತಿ॒ ಸಾ-ಽಽಗ್ರ॑ಯ॒ಣ-ಮ್ಪ್ರತ್ಯಾಗ॑ಚ್ಛ॒-ತ್ತದಾ᳚ಗ್ರಯ॒ಣಸ್ಯಾ᳚-ಽಽಗ್ರಯಣ॒ತ್ವ- [-ಽಽಗ್ರಯಣ॒ತ್ವಮ್, ತಸ್ಮಾ॑ದಾಗ್ರಯ॒ಣೇ] 49

-ನ್ತಸ್ಮಾ॑ದಾಗ್ರಯ॒ಣೇ ವಾಗ್ವಿ ಸೃ॑ಜ್ಯತೇ॒ ಯ-ತ್ತೂ॒ಷ್ಣೀ-ಮ್ಪೂರ್ವೇ॒ ಗ್ರಹಾ॑ ಗೃ॒ಹ್ಯನ್ತೇ॒ ಯಥಾ᳚ಥ್ಸಾ॒ರೀಯ॑ತಿ ಮ॒ ಆಖ॒ ಇಯ॑ತಿ॒ ನಾಪ॑ ರಾಥ್ಸ್ಯಾ॒-ಮೀತ್ಯು॑ಪಾವಸೃ॒ಜತ್ಯೇ॒ವಮೇ॒ವ ತದ॑ದ್ಧ್ವ॒ರ್ಯುರಾ᳚ಗ್ರಯ॒ಣ-ಙ್ಗೃ॑ಹೀ॒ತ್ವಾ ಯ॒ಜ್ಞಮಾ॒ರಭ್ಯ॒ ವಾಚಂ॒-ವಿಁ ಸೃ॑ಜತೇ॒ ತ್ರಿರ್ಹಿ-ಙ್ಕ॑ರೋತ್ಯುದ್ಗಾ॒ತೄ-ನೇ॒ವ ತ-ದ್ವೃ॑ಣೀತೇ ಪ್ರ॒ಜಾಪ॑ತಿ॒ರ್ವಾ ಏ॒ಷ ಯದಾ᳚ಗ್ರಯ॒ಣೋ ಯದಾ᳚ಗ್ರಯ॒ಣ-ಙ್ಗೃ॑ಹೀ॒ತ್ವಾ ಹಿ॑-ಙ್ಕ॒ರೋತಿ॑ ಪ್ರ॒ಜಾಪ॑ತಿರೇ॒ವ [ ] 50

ತ-ತ್ಪ್ರ॒ಜಾ ಅ॒ಭಿ ಜಿ॑ಘ್ರತಿ॒ ತಸ್ಮಾ᳚-ದ್ವ॒ಥ್ಸ-ಞ್ಜಾ॒ತ-ಙ್ಗೌರ॒ಭಿ ಜಿ॑ಘ್ರತ್ಯಾ॒ತ್ಮಾ ವಾ ಏ॒ಷ ಯ॒ಜ್ಞಸ್ಯ॒ ಯದಾ᳚ಗ್ರಯ॒ಣ-ಸ್ಸವ॑ನೇಸವನೇ॒-ಽಭಿ ಗೃ॑ಹ್ಣಾತ್ಯಾ॒ತ್ಮನ್ನೇ॒ವ ಯ॒ಜ್ಞಗ್ಂ ಸ-ನ್ತ॑ನೋತ್ಯು॒ಪರಿ॑ಷ್ಟಾ॒ದಾ ನ॑ಯತಿ॒ ರೇತ॑ ಏ॒ವ ತ-ದ್ದ॑ಧಾತ್ಯ॒ಧಸ್ತಾ॒ದುಪ॑ ಗೃಹ್ಣಾತಿ॒ ಪ್ರ ಜ॑ನಯತ್ಯೇ॒ವ ತದ್ಬ್ರ॑ಹ್ಮವಾ॒ದಿನೋ॑ ವದನ್ತಿ॒ ಕಸ್ಮಾ᳚-ಥ್ಸ॒ತ್ಯಾ-ದ್ಗಾ॑ಯ॒ತ್ರೀ ಕನಿ॑ಷ್ಠಾ॒ ಛನ್ದ॑ಸಾಗ್ಂ ಸ॒ತೀ ಸರ್ವಾ॑ಣಿ॒ ಸವ॑ನಾನಿ ವಹ॒ತೀತ್ಯೇ॒ಷ ವೈ ಗಾ॑ಯತ್ರಿ॒ಯೈ ವ॒ಥ್ಸೋ ಯದಾ᳚ಗ್ರಯ॒ಣಸ್ತಮೇ॒ವ ತದ॑ಭಿನಿ॒ವರ್ತ॒ಗ್ಂ॒ ಸರ್ವಾ॑ಣಿ॒ ಸವ॑ನಾನಿ ವಹತಿ॒ ತಸ್ಮಾ᳚-ದ್ವ॒ಥ್ಸಮ॒ಪಾಕೃ॑ತ॒-ಙ್ಗೌರ॒ಭಿ ನಿ ವ॑ರ್ತತೇ ॥ 51 ॥

(ಆ॒ಹಾ॒-ಽಽ - ಗ್ರ॒ಯ॒ಣ॒ತ್ವಂ - ಪ್ರ॒ಜಾಪ॑ತಿರೇ॒ವೇ - ತಿ॑ - ವಿಗ್ಂಶ॒ತಿಶ್ಚ॑) (ಅ. 11)

(ಯ॒ಜ್ಞೇನ॒ ತಾ ಉ॑ಪ॒ಯಡ್ಭಿ॑ - ರ್ದೇ॒ವಾ ವೈ ಯ॒ಜ್ಞಮಾಗ್ನೀ᳚ಧ್ರೇ - ಬ್ರಹ್ಮವಾ॒ದಿನ॒-ಸ್ಸ ತ್ವೈ - ದೇ॒ವಸ್ಯ॒ ಗ್ರಾವಾ॑ಣಂ - ಪ್ರಾ॒ಣೋ ವಾ ಉ॑ಪಾ॒ಗ್॒ಶ್ವ॑ಗ್ರಾ - ದೇ॒ವಾ ವಾ ಉ॑ಪಾ॒ಗ್ಂ॒ಶೌ - ವಾಗ್ವೈ - ಮಿ॒ತ್ರಂ - ಁಯ॒ಜ್ಞಸ್ಯ॒ - ಬೃಹ॒ಸ್ಪತಿ॑ - ರ್ದೇ॒ವಾ ವಾ ಆ᳚ಗ್ರಯ॒ಣಾಗ್ರಾ॒ - ನೇಕಾ॑ದಶ)

(ಯ॒ಜ್ಞೇನ॑ - ಲೋ॒ಕೇ ಪ॑ಶು॒ಮಾನ್-ಥ್ಸ್ಯಾ॒ಥ್ - ಸವ॑ನ॒-ಮ್ಮಾಧ್ಯ॑ನ್ದಿನಂ॒ - ಁವಾಗ್ವಾ - ಅರಿ॑ಕ್ತಾನಿ॒ - ತ-ತ್ಪ್ರ॒ಜಾ - ಏಕ॑ಪಞ್ಚಾ॒ಶತ್)

(ಯ॒ಜ್ಞೇನ॒, ನಿ ವ॑ರ್ತತೇ)

॥ ಹರಿಃ॑ ಓಮ್ ॥

॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾಂ ಷಷ್ಠಕಾಣ್ಡೇ ಚತುರ್ಥಃ ಪ್ರಶ್ನ-ಸ್ಸಮಾಪ್ತಃ ॥

Roman (IAST) Transliteration

kṛṣṇa yajurvedīya taittirīya saṃhitāyāṃ ṣaṣṭhakāṇḍe caturthaḥ praśnaḥ - somamantrabrāhmaṇanirūpaṇaṃ

o-nnamaḥ paramātmane, śrī mahāgaṇapataye namaḥ,

śrī gurubhyo namaḥ | ha॒riḥ॒ om ||

ya॒jñena॒ vai pra॒jāpa̭tiḥ pra॒jā a̭sṛjata॒ tā ṷpa॒yaḍbhi̭-re॒vāsṛ̭jata॒ yadṷpa॒yaja̭ upa॒yaja̭ti pra॒jā e॒va ta-dyaja̭māna-ssṛjate jaghanā॒rdhādava̭ dyati jaghanā॒rdhāddhi pra॒jāḥ pra॒jāya̭nte sthavima॒to-'va̭ dyati sthavima॒to hi pra॒jāḥ pra॒jāya॒nte 'sa̭mbhinda॒nnava̭ dyati prā॒ṇānā॒-masa̭mbhedāya॒ na pa॒ryāva̭rtayati॒ ya-tpa̭ryāva॒rtayḙdudāva॒rtaḥ pra॒jā grāhṷka-ssyā-thsamu॒dra-ṅga̭ccha॒ svāhetyā̭ha॒ reta̭ [retaḥ̭, e॒va] 1

e॒va ta-dda̭dhātya॒ntari̭kṣa-ṅgaccha॒ svāhetyā̭hā॒-'ntari̭kṣeṇai॒vāsmai᳚ pra॒jāḥ pra ja̭nayatya॒ntari̭kṣa॒gg॒ hyanṷ pra॒jāḥ pra॒jāya̭nte de॒vagṃ sa̭vi॒tāra̭-ṅgaccha॒ svāhetyā̭ha savi॒tṛpra̭sūta e॒vāsmai᳚ pra॒jāḥ pra ja̭nayatya-horā॒tre ga̭ccha॒ svāhetyā̭hā-horā॒trābhyā̭-me॒vāsmai᳚ pra॒jāḥ pra ja̭nayatya-horā॒tre hyanṷ pra॒jāḥ pra॒jāya̭nte mi॒trāvarṷṇau gaccha॒ svāhe- [svāhā᳚, ityā̭ha] 2

-tyā̭ha pra॒jāsve॒va prajā̭tāsu prāṇāpā॒nau da̭dhāti॒ soma̭-ṅgaccha॒ svāhetyā̭ha sau॒myā hi de॒vata̭yā pra॒jā ya॒jña-ṅga̭ccha॒ svāhetyā̭ha pra॒jā e॒va ya॒jñiyāḥ᳚ karoti॒ chandāgṃ̭si gaccha॒ svāhetyā̭ha pa॒śavo॒ vai chandāgṃ̭si pa॒śūne॒vāva̭ rundhe॒ dyāvā̭pṛthi॒vī ga̭ccha॒ svāhetyā̭ha pra॒jā e॒va prajā̭tā॒ dyāvā̭pṛthi॒vībhyā̭mubha॒yataḥ॒ pari̭ gṛhṇāti॒ nabho̭ [nabhaḥ̭, di॒vya-ṅga̭ccha॒] 3

di॒vya-ṅga̭ccha॒ svāhetyā̭ha pra॒jābhya̭ e॒va prajā̭tābhyo॒ vṛṣṭi॒-nniya̭cchatya॒gniṃ-vai~᳚śvāna॒ra-ṅga̭ccha॒ svāhetyā̭ha pra॒jā e॒va prajā̭tā a॒syā-mprati̭ ṣṭhāpayati prā॒ṇānāṃ॒-vā~ e॒ṣo-'va̭ dyati॒ yo̭-'va॒dyati̭ gu॒dasya॒ mano̭ me॒ hārdi̭ ya॒cchetyā̭ha prā॒ṇāne॒va ya̭thāsthā॒namupa̭ hvayate pa॒śorvā āla̭bdhasya॒ hṛda̭ya॒gṃ॒ śugṛ̭cchati॒ sā hṛ̭dayaśū॒la- [hṛ̭dayaśū॒lam, a॒bhi samḙti॒] 4

-ma॒bhi samḙti॒ ya-tpṛ̭thi॒vyāgṃ hṛ̭dayaśū॒la-mṷdvā॒saye᳚-tpṛthi॒vīgṃ śu॒cā-'rpa̭ye॒-dyada॒phsva̭pa-śśu॒cā-'rpa̭ye॒cchuṣka̭sya cā॒-''rdrasya̭ ca sa॒ndhāvudvā̭sayatyu॒bhaya̭sya॒ śāntyai॒ ya-ndvi॒ṣyā-tta-ndhyā̭ye-cchu॒caivaina̭-marpayati || 5 ||

(reto̭ - mi॒trāvarṷṇau gaccha॒ svāhā॒ - nabho̭ - hṛdayaśū॒laṃ - dvātrigṃ̭śacca) (a. 1)

de॒vā vai ya॒jñamāgnī᳚ddhre॒ vya̭bhajanta॒ tato॒ yada॒tyaśi̭ṣyata॒ tada̭bruva॒n vasa̭tu॒ nu na̭ i॒damiti॒ ta-dva̭satī॒varī̭ṇāṃ-va~satī vari॒tva-ntasmi̭-nprā॒tarna sama̭śaknuva॒-ntada॒phsu prāvḙśaya॒-ntā va̭satī॒ varī̭rabhavan vasatī॒varī᳚rgṛhṇāti ya॒jño vai va̭satī॒ varī᳚rya॒jñame॒vā-''rabhya̭ gṛhī॒tvopa̭ vasati॒ yasyāgṛ̭hītā a॒bhi ni॒mroce॒-danā̭rabdho-'sya ya॒jña-ssyā᳚- [ya॒jña-ssyā᳚t, ya॒jñaṃ-vi~] 6

-dya॒jñaṃ-vi~ cchi̭ndyā-jjyoti॒ṣyā̭ vā gṛhṇī॒yāddhira̭ṇyaṃ-vā~ 'va॒dhāya॒ saśṷkrāṇāme॒va gṛ̭hṇāti॒ yo vā᳚ brāhma॒ṇo ba̭huyā॒jī tasya॒ kumbhyā̭nā-ṅgṛhṇīyā॒-thsa hi gṛ̭hī॒ta va̭satīvarīko vasatī॒varī᳚rgṛhṇāti pa॒śavo॒ vai va̭satī॒varīḥ᳚ pa॒śūne॒vā-''rabhya̭ gṛhī॒tvopa̭ vasati॒ yada̭nvī॒pa-ntiṣṭha̭-ngṛhṇī॒yānni॒rmārgṷkā asmā-tpa॒śavaḥ̭ syuḥ pratī॒pa-ntiṣṭha̭-ngṛhṇāti prati॒ruddhyai॒vāsmai̭ pa॒śū-ngṛ̭hṇā॒tīndro̭ [pa॒śū-ngṛ̭hṇā॒tīndraḥ̭, vṛ॒tra-] 7

vṛ॒tra-ma̭ha॒n-thso᳚-'(1॒)po᳚-'(1॒)bhya̭mriyata॒ tāsāṃ॒-ya~nmeddhyaṃ̭-ya~॒jñiya॒gṃ॒ sadḙva॒māsī॒-ttadatya̭mucyata॒ tā vaha̭ntīrabhava॒n vaha̭ntīnā-ṅgṛhṇāti॒ yā e॒va meddhyā̭ ya॒jñiyā॒-ssadḙvā॒ āpa॒stā sā̭me॒va gṛ̭hṇāti॒ nānta॒mā vaha̭ntī॒ratī̭yā॒-dyada̭nta॒mā vaha̭ntīratī॒yā-dya॒jñamati̭ manyeta॒ na sthā̭va॒rāṇā᳚-ṅgṛhṇīyā॒-dvarṷṇagṛhītā॒ vai sthā̭va॒rā ya-thsthā̭va॒rāṇā᳚-ṅgṛhṇī॒yā- [ya-thsthā̭va॒rāṇā᳚-ṅgṛhṇī॒yāt, varṷṇenāsya] 8

-dvarṷṇenāsya ya॒jña-ṅgrā̭haye॒-dyadvai divā॒ bhava̭tya॒po rātriḥ॒ pra vi̭śati॒ tasmā᳚-ttā॒mrā āpo॒ divā̭ dadṛśre॒ yannakta॒-mbhava̭tya॒po-'haḥ॒ pra vi̭śati॒ tasmā᳚cca॒ndrā āpo॒ nakta̭-ndadṛśre chā॒yāyai̭ cā॒-''tapa̭taśca sa॒dhau-ṅgṛ̭hṇātya-horā॒trayo̭re॒vāsmai॒ varṇa̭-ṅgṛhṇāti ha॒viṣma̭tīri॒mā āpa॒ ityā̭ha ha॒viṣkṛ̭tānāme॒va gṛ̭hṇāti ha॒viṣmāgṃ̭ astu॒- [astu, sūrya॒] 9

sūrya॒ ityā̭ha॒ saśṷkrāṇāme॒va gṛ̭hṇātyanu॒ṣṭubhā̭ gṛhṇāti॒ vāgvā a̭nu॒ṣṭug vā॒caivainā॒-ssarva̭yā gṛhṇāti॒ catṷṣpadaya॒rcā gṛ̭hṇāti॒ tri-ssā̭dayati sa॒pta sa-mpa̭dyante sa॒ptapa̭dā॒ śakva̭rī pa॒śava॒-śśakva̭rī pa॒śūne॒vāva̭ rundhe॒ 'smai vai lo॒kāya॒ gārha̭patya॒ ā dhī̭yate॒-'muṣmā̭ āhava॒nīyo॒ ya-dgārha̭patya upasā॒dayḙda॒smin ~lo॒ke pa̭śu॒mān-thsyā॒-dyadā̭hava॒nīye॒-'-muṣmi̭- [-muṣminṋ, lo॒ke pa̭śu॒mānthsyā̭-] 10

~llo॒ke pa̭śu॒mānthsyā̭-du॒bhayo॒rupa̭ sādayatyu॒bhayo̭re॒vainaṃ̭-lo~॒kayoḥ᳚ paśu॒manta̭-ṅkaroti sa॒rvataḥ॒ pari̭ harati॒ rakṣa̭sā॒mapa̭hatyā indrāgni॒yorbhā̭ga॒dheyī॒-ssthetyā̭ha yathāya॒jure॒vaitadāgnī᳚ddhra॒ upa̭ vāsayatye॒tadvai ya॒jñasyāpa̭rājitaṃ॒-ya~dāgnī᳚ddhraṃ॒-ya~de॒va ya॒jñasyāpa̭rājita॒-ntade॒vainā॒ upa̭ vāsayati॒ yataḥ॒ khalu॒ vai ya॒jñasya॒ vita̭tasya॒ na kri॒yate॒ tadanṷ ya॒jñagṃ rakṣā॒g॒syava̭ caranti॒ ya-dvaha̭ntīnā-ṅgṛ॒hṇāti̭ kri॒yamā̭ṇame॒va ta-dya॒jñasya̭ śaye॒ rakṣa̭sā॒-mana̭nvavacārāya॒ na hyḙtā ī॒laya॒ntyā tṛ̭tīyasava॒nā-tpari̭ śere ya॒jñasya॒ santa̭tyai || 11 ||

(syā॒ - dindro̭ - gṛhṇī॒yā - da̭stva॒ - muṣmi̭n - kri॒yate॒ - ṣaḍvigṃ̭śatiśca) (a. 2)

bra॒hma॒vā॒dino̭ vadanti॒ sa tvā a̭ddhva॒ryu-ssyā॒dya-ssoma̭-mupāva॒hara॒n-thsarvā᳚bhyo de॒vatā᳚bhya upāva॒hare॒-diti̭ hṛ॒de tvetyā̭ha manu॒ṣye᳚bhya e॒vaitena̭ karoti॒ mana̭se॒ tvetyā̭ha pi॒tṛbhya̭ e॒vaitena̭ karoti di॒ve tvā॒ sūryā̭ya॒ tvetyā̭ha de॒vebhya̭ e॒vaitena̭ karotye॒tāva̭tī॒-rvai de॒vatā॒stābhya̭ e॒vaina॒gṃ॒ sarvā᳚bhya u॒pāva̭harati pu॒rā vā॒caḥ [vā॒caḥ, prava̭ditoḥ] 12

prava̭ditoḥ prātaranuvā॒ka-mu॒pāka̭roti॒ yāva̭tye॒va vā-ktā-mava̭ rundhe॒ 'po-'grḙ-'bhi॒vyāha̭rati ya॒jño vā āpo̭ ya॒jñame॒vābhi vācaṃ॒-vi~sṛ̭jati॒ sarvā̭ṇi॒ chandā॒g॒syanvā̭ha pa॒śavo॒ vai chandāgṃ̭si pa॒śūne॒vāva̭ rundhe gāyatri॒yā teja̭skāmasya॒ pari̭ daddhyā-ttri॒ṣṭubhe᳚ndri॒yakā̭masya॒ jaga̭tyā pa॒śukā̭masyā-'nu॒ṣṭubhā᳚ prati॒ṣṭhākā̭masya pa॒ṅktyā ya॒jñakā̭masya vi॒rājā-'nna̭kāmasya śṛ॒ṇotva॒gni-ssa॒midhā॒ hava̭- [hava᳚m, ma॒ ityā̭ha] 13

-mma॒ ityā̭ha savi॒tṛpra̭sūta e॒va de॒vatā᳚bhyo ni॒vedyā॒-'po-'cchai᳚tya॒pa i̭ṣya hota॒-rityā̭heṣi॒tagṃ hi karma̭ kri॒yate॒ maitrā̭varuṇasya camasāddhvarya॒vā dra॒vetyā̭ha mi॒trāvarṷṇau॒ vā a॒pā-nne॒tārau॒ tābhyā̭me॒vainā॒ acchai̭ti॒ devī̭rāpo apā-nnapā॒-dityā॒hā-''hṷtyai॒vainā̭ ni॒ṣkrīya̭ gṛhṇā॒tyatho̭ ha॒viṣkṛ̭tānā-me॒vābhighṛ̭tānā-ṅgṛhṇāti॒- [-me॒vābhighṛ̭tānā-ṅgṛhṇāti, kārṣi̭-ra॒sītyā̭ha॒] 14

kārṣi̭-ra॒sītyā̭ha॒ śama̭lame॒vā-''sā॒mapa̭ plāvayati samu॒drasya॒ vo-'kṣi̭tyā॒ unna̭ya॒ ityā̭ha॒ tasmā̭da॒dyamā̭nāḥ pī॒yamā̭nā॒ āpo॒ na kṣī̭yante॒ yoni॒rvai ya॒jñasya॒ cātvā̭laṃ-ya~॒jño va̭satī॒varīr̭. hotṛcama॒sa-ñca̭ maitrāvaruṇacama॒sa-ñca̭ sa॒gg॒sparśya̭ vasatī॒varī॒rvyāna̭yati ya॒jñasya̭ sayoni॒tvāyātho॒ svāde॒vainā॒ yoneḥ॒ pra ja̭nayatyaddhva॒ryo-'vḙra॒pā(3) ityā̭ho॒te -ma̭nannamuru॒temāḥ pa॒śyeti॒ vāvaitadā̭ha॒ yadya̭gniṣṭo॒mo ju॒hoti॒ yadyu॒kthyaḥ̭ pari॒dhau ni mā᳚rṣṭi॒ yadya̭tirā॒tro yaju॒rvada॒-npra pa̭dyate yajñakratū॒nāṃ-vyā~vṛ̭ttyai || 15 ||

(vā॒co-hava̭-ma॒bhighṛ̭tānā-ṅgṛhṇātyu॒ - ta - pañca̭vigṃśatiśca) (a. 3)

de॒vasya̭ tvā savi॒tuḥ pra̭sa॒va iti॒ grāvā̭ṇa॒mā da̭tte॒ prasū᳚tyā a॒śvino᳚-rbā॒hubhyā॒mityā̭hā॒śvinau॒ hi de॒vānā̭maddhva॒ryū āstā᳚-mpū॒ṣṇo hastā᳚bhyā॒mityā̭ha॒ yatyai̭ pa॒śavo॒ vai somo᳚ vyā॒na ṷpāgṃśu॒sava̭no॒ yadṷpāgṃśu॒sava̭na-ma॒bhi mimī̭te vyā॒name॒va pa॒śuṣṷ dadhā॒tīndrā̭ya॒ tvendrā̭ya॒ tveti̭ mimīta॒ indrā̭ya॒ hi soma̭ āhri॒yate॒ pañca॒ kṛtvo॒ yajṷṣā mimīte॒ [mimīte, pañcā᳚kṣarā] 16

pañcā᳚kṣarā pa॒ṅktiḥ pāṅkto̭ ya॒jño ya॒jñame॒vāva̭ rundhe॒ pañca॒ kṛtva̭stū॒ṣṇī-ndaśa॒ sa-mpa̭dyante॒ daśā᳚kṣarā vi॒rāḍannaṃ̭-vi~॒rā-ḍvi॒rājai॒vānnādya॒mava̭ rundhe śvā॒trā-sstha̭ vṛtra॒tura॒ ityā̭hai॒ṣa vā a॒pāgṃ so̭mapī॒tho ya e॒vaṃ-ve~da॒ nā-'phsvārti॒mārccha̭ti॒ yattḙ soma di॒vi jyoti॒rityā̭hai॒bhya e॒vaina̭- [e॒vaina᳚m, lo॒kebhya॒] 17

~llo॒kebhya॒-ssa-mbha̭rati॒ somo॒ vai rājā॒ diśo॒-'bhya̭ddhyāya॒-thsa diśo-'nu॒ prāvi̭śa॒-tprāgapā॒guda̭gadha॒rāgityā̭ha di॒gbhya e॒vaina॒gṃ॒ sa-mbha̭ra॒tyatho॒ diśa̭ e॒vāsmā॒ ava̭ ru॒ndhe 'mba॒ ni ṣva॒retyā̭ha॒ kāmṷkā ena॒gg॒ striyo̭ bhavanti॒ ya e॒vaṃ-ve~da॒ ya-ttḙ so॒mādā᳚bhya॒-nnāma॒ jāgṛ॒vī- [jāgṛ॒vīti̭, ā॒hai॒ṣa vai] 18

-tyā̭hai॒ṣa vai soma̭sya somapī॒tho ya e॒vaṃ-ve~da॒ na sau॒myāmārti॒mārccha̭ti॒ ghnanti॒ vā e॒ta-thsomaṃ॒-ya~da̭bhiṣu॒ṇvantya॒gṃ॒ śūnapa̭ gṛhṇāti॒ trāya̭ta e॒vaina̭-mprā॒ṇā vā a॒gṃ॒śavaḥ̭ pa॒śava॒-ssomo॒ 'gṃ॒śū-npuna॒rapi̭ sṛjati prā॒ṇāne॒va pa॒śuṣṷ dadhāti॒ dvaudvā॒vapi̭ sṛjati॒ tasmā॒-ddvaudvau᳚ prā॒ṇāḥ || 19 ||

(yajṷṣā mimīta - enaṃ॒ - jāgṛ॒vīti॒ - catṷścatvārigṃśacca) (a. 4)

prā॒ṇo vā e॒ṣa yadṷpā॒gṃ॒śu ryadupā॒g॒śva̭grā॒ grahā̭ gṛ॒hyante᳚ prā॒ṇame॒vānu॒ pra ya̭ntyaru॒ṇo ha̭ smā॒-''haupa̭veśiḥ prātassava॒na e॒vāhaṃ-ya~॒jñagṃ sagg sthā̭payāmi॒ tena॒ tata॒-ssaggsthi̭tena carā॒mītya॒ṣṭau kṛtvo-'gre॒-'bhiṣṷṇo-tya॒ṣṭākṣa̭rā gāya॒trī gā̭ya॒tra-mprā̭tassava॒na-mprā̭tassava॒name॒va tenā᳚ ''pno॒tyekā̭daśa॒ kṛtvo᳚ dvi॒tīya॒-mekā̭daśākṣarā tri॒ṣṭu-ptraiṣṭṷbha॒-mmāddhya̭ndina॒gṃ॒- [-mmāddhya̭ndinam, sava̭na॒-] 20

-sava̭na॒-mmāddhya̭ndiname॒va sava̭na॒-ntenā᳚-''pnoti॒ dvāda̭śa॒ kṛtva̭stṛ॒tīya॒-ndvāda̭śākṣarā॒ jaga̭tī॒ jāga̭ta-ntṛtīyasava॒na-ntṛ̭tīyasava॒name॒va tenā᳚ ''pnotye॒tāgṃ ha॒ vāva sa ya॒jñasya॒ saggsthi̭timuvā॒cā ska̭ndā॒yāska̭nna॒gṃ॒ hi ta-dya-dya॒jñasya॒ saggsthi̭tasya॒ skanda॒tyatho॒ khalvā̭hurgāya॒trī vāva prā̭tassava॒ne nāti॒vāda॒ ityana̭tivāduka ena॒-mbhrātṛ̭vyo bhavati॒ ya e॒vaṃ-ve~da॒ tasmā̭-da॒ṣṭāva̭ṣṭau॒ [-da॒ṣṭāva̭ṣṭau, kṛtvo̭] 21

kṛtvo̭-'bhi॒ṣutya̭-mbrahmavā॒dino̭ vadanti pa॒vitra̭vanto॒-'nye grahā̭ gṛ॒hyante॒ kimpa̭vitra upā॒gṃ॒śuriti॒ vākpa̭vitra॒ iti̭ brūyā-dvā॒caspata̭ye pavasva vāji॒nnityā̭ha vā॒caivaina̭-mpavayati॒ vṛṣṇo̭ a॒gṃ॒śubhyā॒mityā̭ha॒ vṛṣṇo॒ hyḙtāva॒gṃ॒śū yau soma̭sya॒ gabha̭stipūta॒ ityā̭ha॒ gabha̭stinā॒ hyḙna-mpa॒vaya̭ti de॒vo de॒vānā᳚-mpa॒vitra̭ma॒sītyā̭ha de॒vo hyḙṣa [hyḙṣaḥ, sa-nde॒vānā᳚-] 22

sa-nde॒vānā᳚-mpa॒vitraṃ॒-ye~ṣā᳚-mbhā॒go-'si॒ tebhya॒stvetyā̭ha॒ yeṣā॒g॒ hyḙṣa bhā॒gastebhya̭ ena-ṅgṛ॒hṇāti॒ svā-ṅkṛ̭to॒-'sītyā̭ha prā॒ṇame॒va svama̭kṛta॒ madhṷmatīrna॒ iṣa̭skṛ॒dhītyā̭ha॒ sarva̭me॒vāsmā̭ i॒dagg sva̭dayati॒ viśve᳚bhya-stvendri॒yebhyo̭ di॒vyebhyaḥ॒ pārthi̭vebhya॒ ityā̭ho॒bhaye᳚ṣve॒va dḙvamanu॒ṣyeṣṷ prā॒ṇā-nda̭dhāti॒ mana̭stvā॒- [mana̭stvā, a॒ṣṭvityā̭ha॒] 23

-'ṣṭvityā̭ha॒ mana̭ e॒vāśñṷta u॒rva̭ntari̭kṣa॒-manvi॒hītyā̭hā-ntarikṣadeva॒tyo̭ hi prā॒ṇa-ssvāhā᳚ tvā subhava॒-ssūryā॒yetyā̭ha prā॒ṇā vai svabha̭vaso de॒vāsteṣve॒va pa॒rokṣa̭-ñjuhoti de॒vebhya̭stvā marīci॒pebhya॒ ityā̭hā ''di॒tyasya॒ vai ra॒śmayo̭ de॒vā ma̭rīci॒pāsteṣā॒-nta-dbhā̭ga॒dheya॒-ntāne॒va tena̭ prīṇāti॒ yadi̭ kā॒mayḙta॒ varṣṷkaḥ pa॒rjanya̭- [pa॒rjanyaḥ̭, syā॒diti॒] 24

-ssyā॒diti॒ nīcā॒ hastḙna॒ ni mṛ̭jyā॒-dvṛṣṭi̭me॒va ni ya̭cchati॒ yadi̭ kā॒maye॒tāva̭rṣuka-ssyā॒dityṷttā॒nena॒ ni mṛ̭jyā॒-dvṛṣṭi̭me॒vo-dya̭cchati॒ yadya̭bhi॒carḙda॒mu-ñja॒hyatha̭ tvā hoṣyā॒mīti̭ brūyā॒dāhṷtime॒vaina̭-mpre॒phsan. ha̭nti॒ yadi̭ dū॒re syādā tami̭tostiṣṭhe-tprā॒ṇame॒vāsyā̭nu॒gatya̭ hanti॒ yadya̭bhi॒carḙda॒muṣya̭- [yadya̭bhi॒carḙda॒muṣya̭, tvā॒ prā॒ṇe] 25

-tvā prā॒ṇe sā̭dayā॒mīti̭ sādaye॒dasa̭nno॒ vai prā॒ṇaḥ prā॒ṇame॒vāsya̭ sādayati ṣa॒ḍbhira॒gṃ॒śubhiḥ̭ pavayati॒ ṣa-ḍvā ṛ॒tava̭ ṛ॒tubhi̭re॒vaina̭-mpavayati॒ triḥ pa̭vayati॒ traya̭ i॒me lo॒kā e॒bhire॒vainaṃ̭-lo~॒kaiḥ pa̭vayati brahmavā॒dino̭ vadanti॒ kasmā᳚-thsa॒tyā-ttrayaḥ̭ paśū॒nāgṃ hastā̭dānā॒ iti॒ ya-ttrirṷpā॒gṃ॒ śugṃ hastḙna vigṛ॒hṇāti॒ tasmā॒-ttrayaḥ̭ paśū॒nāgṃ hastā̭dānāḥ॒ purṷṣo ha॒stī ma॒rkaṭaḥ̭ || 26 ||

(mādhya̭dinna - ma॒ṣṭāva̭ṣṭā - ve॒ṣa - mana̭stvā - pa॒rjanyo॒ - 'muṣya॒ - purṷṣo॒ - dve ca̭) (a. 5)

de॒vā vai ya-dya॒jñe-'kṷrvata॒ tadasṷrā akurvata॒ te de॒vā ṷpā॒gṃ॒śau ya॒jñagṃ sa॒gg॒sthāpya̭mapaśya॒-ntamṷpā॒gṃ॒śau sama̭sthāpaya॒-nte-'sṷrā॒ vajra̭mu॒dyatya̭ de॒vāna॒bhyā̭yanta॒ te de॒vā bibhya̭ta॒ indra॒mupā̭dhāva॒-ntānindro᳚-'ntaryā॒meṇā॒ntara̭dhatta॒ tada̭ntaryā॒masyā᳚ntaryāma॒tvaṃ-ya~da̭ntaryā॒mo gṛ॒hyate॒ bhrātṛ̭vyāne॒va ta-dyaja̭māno॒-'ntardha̭tte॒ 'ntastḙ [-'ntardha̭tte॒ 'ntaste᳚, da॒dhā॒mi॒ dyāvā̭pṛthi॒vī] 27

dadhāmi॒ dyāvā̭pṛthi॒vī a॒ntaru॒-rva̭ntari̭kṣa॒-mityā̭hai॒bhire॒va lo॒kairyaja̭māno॒ bhrātṛ̭vyāna॒ntardha̭tte॒ te de॒vā a̭manya॒ntendro॒ vā i॒dama̭bhū॒dya-dva॒yagg sma iti॒ te᳚-'bruva॒-nmagha̭va॒nnanṷ na॒ ā bha॒jeti̭ sa॒joṣā̭ de॒vairava̭raiḥ॒ parai॒ścetya̭bravī॒dye cai॒va de॒vāḥ pare॒ ye cāva̭re॒ tānu॒bhayā̭- [tānu॒bhayāṋ, a॒nvābha̭ja-thsa॒joṣā̭] 28

-na॒nvābha̭ja-thsa॒joṣā̭ de॒vairava̭raiḥ॒ parai॒ścetyā̭ha॒ ye cai॒va de॒vāḥ pare॒ ye cāva̭re॒ tānu॒bhayā̭-na॒nvābha̭ja-tyantaryā॒me ma̭ghava-nmādaya॒svetyā̭ha ya॒jñāde॒va yaja̭māna॒-nnāntare᳚tyupayā॒ma-gṛ̭hīto॒ 'sītyā̭hāpā॒nasya॒ dhṛtyai॒ yadu॒bhāva̭pavi॒trau gṛ॒hyeyā̭tā-mprā॒ṇama̭pā॒no-'nu॒ nyṛ̭cche-tpra॒māyṷka-ssyā-tpa॒vitra̭vānantaryā॒mo gṛ̭hyate [gṛ̭hyate, prā॒ṇā॒pā॒nayo॒-rvidhṛ̭tyai] 29

prāṇāpā॒nayo॒-rvidhṛ̭tyai prāṇāpā॒nau vā e॒tau yadṷpāgśvantaryā॒mau vyā॒na ṷpāgṃśu॒ sava̭no॒ ya-ṅkā॒mayḙta pra॒māyṷka-ssyā॒dityasagg̭ spṛṣṭau॒ tasya̭ sādaye-dvyā॒nenai॒vāsya̭ prāṇāpā॒nau vi cchi̭natti tā॒ja-kpra mī̭yate॒ ya-ṅkā॒mayḙta॒ sarva॒māyṷriyā॒diti॒ sagg spṛ̭ṣṭau॒ tasya̭ sādaye-dvyā॒nenai॒vāsya̭ prāṇāpā॒nau sa-nta̭noti॒ sarva॒māyṷreti || 30 ||

(ta॒ - u॒bhayā᳚n - gṛhyate॒ - catṷścatvārigṃśacca) (a. 6)

vāgvā e॒ṣā yadai᳚ndravāya॒vo yadai᳚ndravāya॒vāgrā॒ grahā̭ gṛ॒hyante॒ vāca̭me॒vānu॒ pra ya̭nti vā॒yu-nde॒vā a̭bruva॒n-thsoma॒gṃ॒ rājā̭nagṃ hanā॒meti॒ so᳚-'bravī॒-dvaraṃ̭-vṛ~ṇai॒ mada̭grā e॒va vo॒ grahā̭ gṛhyāntā॒ iti॒ tasmā̭daindravāya॒vāgrā॒ grahā̭ gṛhyante॒ tama̭ghna॒n-thso̭-'pūya॒-tta-nde॒vā nopā̭dhṛṣṇuva॒-nte vā॒yuma̭bruva-nni॒ma-nnaḥ̭ svada॒ye- [-nni॒ma-nnaḥ̭ svadaya, iti॒ so᳚-'bravī॒-] 31

-ti॒ so᳚-'bravī॒-dvaraṃ̭-vṛ~ṇai maddeva॒tyā᳚nye॒va vaḥ॒ pātrā᳚ṇyucyāntā॒ iti॒ tasmā᳚nnānādeva॒tyā̭ni॒ santi̭ vāya॒vyā᳚nyucyante॒ tame᳚bhyo vā॒yure॒vāsva̭daya॒-ttasmā॒dya-tpūya̭ti॒ ta-tpra̭vā॒te vi ṣa̭janti vā॒yurhi tasya̭ pavayi॒tā sva̭dayi॒tā tasya̭ vi॒graha̭ṇa॒-nnāvi̭nda॒n-thsādi̭tirabravī॒-dvaraṃ̭-vṛ~ṇā॒ atha॒ mayā॒ vi gṛ̭hṇīddhva-mmaddeva॒tyā̭ e॒va va॒-ssomā᳚- [va॒-ssomāḥ᳚, sa॒nnā] 32

-ssa॒nnā a̭sa॒-nnityṷpayā॒magṛ̭hīto॒-'sī-tyā̭hā-ditideva॒tyā᳚stena॒ yāni॒ hi dā̭ru॒mayā̭ṇi॒ pātrā᳚ṇya॒syai tāni॒ yone॒-ssambhṷ̄tāni॒ yāni̭ mṛ॒nmayā̭ni sā॒kṣā-ttānya॒syai tasmā̭de॒vamā̭ha॒ vāgvai parā॒cya-vyā̭kṛtā-'vada॒-tte de॒vā indra̭mabruvanni॒mā-nno॒ vācaṃ॒-vyā~ku॒rviti॒ so᳚-'bravī॒-dvaraṃ̭-vṛ~ṇai॒ mahya̭-ñcai॒vaiṣa vā॒yavḙ ca sa॒ha gṛ̭hyātā॒ iti॒ tasmā̭daindravāya॒va-ssa॒ha gṛ̭hyate॒ tāmindro̭ maddhya॒to̭-'va॒kramya॒ vyāka̭ro॒-ttasmā̭di॒yaṃ-vyā~kṛ̭tā॒ vāgṷdyate॒ tasmā᳚-thsa॒kṛdindrā̭ya maddhya॒to gṛ̭hyate॒ dvirvā॒yave॒ dvau hi sa varā॒vavṛ̭ṇīta || 33 ||

(sva॒da॒ya॒ - somāḥ᳚ - sa॒hā - ṣṭāvigṃ̭śatiśca) (a. 7)

mi॒tra-nde॒vā a̭bruva॒n-thsoma॒gṃ॒ rājā̭nagṃ hanā॒meti॒ so᳚-'bravī॒nnāhagṃ sarva̭sya॒ vā a॒ha-mmi॒trama॒smīti॒ tama̭bruva॒n॒. hanā̭mai॒veti॒ so᳚-'bravī॒-dvaraṃ̭-vṛ~ṇai॒ paya̭sai॒va me॒ somagg̭ śrīṇa॒nniti॒ tasmā᳚-nmaitrāvaru॒ṇa-mpaya̭sā śrīṇanti॒ tasmā᳚-tpa॒śavo-'pā᳚krāma-nmi॒tra-ssan krū॒rama̭ka॒riti̭ krū॒rami̭va॒ khalu॒ vā e॒ṣa [vā e॒ṣaḥ, ka॒ro॒ti॒ ya-ssomḙna॒] 34

ka̭roti॒ ya-ssomḙna॒ yaja̭te॒ tasmā᳚-tpa॒śavo-'pa̭ krāmanti॒ yanmai᳚trāvaru॒ṇa-mpaya̭sā śrī॒ṇāti̭ pa॒śubhi̭re॒va tanmi॒tragṃ sa̭ma॒rdhaya̭ti pa॒śubhi॒ryaja̭māna-mpu॒rā khalu॒ vāvaiva-mmi॒tro̭-'ve॒dapa॒ ma-tkrū॒ra-ñca॒kruṣaḥ̭ pa॒śavaḥ̭ kramiṣya॒ntīti॒ tasmā̭de॒vama̭vṛṇīta॒ varṷṇa-nde॒vā a̭bruva॒-ntvayā-'gṃ̭śa॒bhuvā॒ soma॒gṃ॒ rājā̭nagṃ hanā॒meti॒ so᳚-'bravī॒-dvaraṃ̭-vṛ~ṇai॒ mahya̭-ñcai॒- [mahya̭-ñca, e॒vaiṣa mi॒trāya̭] 35

-vaiṣa mi॒trāya̭ ca sa॒ha gṛ̭hyātā॒ iti॒ tasmā᳚nmaitrāvaru॒ṇa-ssa॒ha gṛ̭hyate॒ tasmā॒-drājñā॒ rājā̭namagṃśa॒bhuvā᳚ ghnanti॒ vaiśyḙna॒ vaiśyagṃ̭ śū॒dreṇa̭ śū॒dra-nna vā i॒da-ndivā॒ na nakta̭māsī॒davyā̭vṛtta॒-nte de॒vā mi॒trāvarṷṇāvabruvanni॒da-nno॒ vivā̭sayata॒miti॒ tāva̭brūtāṃ॒-va~raṃ̭-vṛ~ṇāvahā॒ eka̭ e॒vā-''va-tpūrvo॒ graho̭ gṛhyātā॒ iti॒ tasmā̭daindravāya॒vaḥ pūrvo̭ maitrāvaru॒ṇā-dgṛ̭hyate prāṇāpā॒nau hyḙtau yadṷpāg-śvantaryā॒mau mi॒tro-'ha॒raja̭naya॒-dvarṷṇo॒ rātri॒-ntato॒ vā i॒daṃ-vyau~᳚ccha॒dya-nmai᳚trāvaru॒ṇo gṛ॒hyate॒ vyṷṣṭyai || 36 ||

(e॒ṣa - cai᳚ - ndravāya॒vo - dvāvigṃ̭śatiśca) (a. 8)

ya॒jñasya॒ śiro᳚-'cchidyata॒ te de॒vā a॒śvinā̭vabruva-nbhi॒ṣajau॒ vai stha̭ i॒daṃ-ya~॒jñasya॒ śiraḥ॒ prati̭ dhatta॒miti॒ tāva̭brūtāṃ॒-va~raṃ̭-vṛ~ṇāvahai॒ graha̭ e॒va nā॒vatrāpi̭ gṛhyatā॒miti॒ tābhyā̭-me॒tamā᳚śvi॒na-ma̭gṛhṇa॒-ntato॒ vai tau ya॒jñasya॒ śiraḥ॒ pratya̭dhattāṃ॒-ya~dā᳚śvi॒no gṛ॒hyatḙ ya॒jñasya॒ niṣkṛ̭tyai॒ tau de॒vā a̭bruva॒nnapṷ̄tau॒ vā i॒mau ma̭nuṣyaca॒rau [ ] 37

bhi॒ṣajā॒viti॒ tasmā᳚-dbrāhma॒ṇena̭ bheṣa॒ja-nna kā॒rya̭mapṷ̄to॒ hye᳚(1॒)ṣo̭ 'me॒ddhyo yo bhi॒ṣaktau ba̭hiṣpavamā॒nena̭ pavayi॒tvā tābhyā̭-me॒tamā᳚śvi॒na-ma̭gṛhṇa॒-ntasmā᳚-dbahiṣpavamā॒ne stu॒ta ā᳚śvi॒no gṛ̭hyate॒ tasmā̭de॒vaṃ-vi~॒duṣā̭ bahiṣpavamā॒na ṷpa॒sadyaḥ̭ pa॒vitraṃ॒-vai~ ba̭hiṣpavamā॒na ā॒tmāna̭me॒va pa̭vayate॒ tayo᳚-'stre॒dhā bhaiṣa̭jyaṃ॒-vi~ nya̭dadhura॒gnau tṛtī̭yama॒phsu tṛtī̭ya-mbrāhma॒ṇe tṛtī̭ya॒-ntasmā̭dudapā॒tra- [tṛtī̭ya॒-ntasmā̭dudapā॒tram, u॒pa॒ni॒dhāya̭] 38

-mṷpani॒dhāya̭ brāhma॒ṇa-nda̭kṣiṇa॒to ni॒ṣādya̭ bheṣa॒ja-ṅkṷryā॒-dyāva̭de॒va bhḙṣa॒ja-ntena̭ karoti sa॒mardhṷkamasya kṛ॒ta-mbha̭vati brahmavā॒dino̭ vadanti॒ kasmā᳚-thsa॒tyādeka̭pātrā dvideva॒tyā̭ gṛ॒hyante᳚ dvi॒pātrā̭ hūyanta॒ iti॒ yadeka̭pātrā gṛ॒hyante॒ tasmā॒deko᳚-'ntara॒taḥ prā॒ṇo dvi॒pātrā̭ hūyante॒ tasmā॒-ddvaudvaṷ ba॒hiṣṭā᳚-tprā॒ṇāḥ prā॒ṇā vā e॒te ya-ddvi̭deva॒tyāḥ᳚ pa॒śava॒ iḍā॒ yadiḍā॒-mpūrvā᳚-ndvideva॒tye᳚bhya upa॒hvayḙta [ ] 39

pa॒śubhiḥ̭ prā॒ṇāna॒ntarda̭dhīta pra॒māyṷka-ssyā-ddvideva॒tyā᳚-nbhakṣayi॒tveḍā॒mupa̭ hvayate prā॒ṇāne॒vā-''tma-ndhi॒tvā pa॒śūnupa̭ hvayate॒ vāgvā ai᳚ndravāya॒vaścakṣṷ-rmaitrāvaru॒ṇa-śśrotra̭māśvi॒naḥ pu॒rastā̭daindravāya॒va-mbha̭kṣayati॒ tasmā᳚-tpu॒rastā᳚-dvā॒cā va̭dati pu॒rastā᳚nmaitrāvaru॒ṇa-ntasmā᳚-tpu॒rastā॒ccakṣṷṣā paśyati sa॒rvataḥ̭ pari॒hāra̭māśvi॒na-ntasmā᳚-thsa॒rvata॒-śśrotrḙṇa śṛṇoti prā॒ṇā vā e॒te ya-ddvi̭deva॒tyā̭ [ya-ddvi̭deva॒tyāḥ᳚, ari̭ktāni॒] 40

ari̭ktāni॒ pātrā̭ṇi sādayati॒ tasmā॒dari̭ktā antara॒taḥ prā॒ṇā yataḥ॒ khalu॒ vai ya॒jñasya॒ vita̭tasya॒ na kri॒yate॒ tadanṷ ya॒jñagṃ rakṣā॒g॒syava̭ caranti॒ yadari̭ktāni॒ pātrā̭ṇi sā॒daya̭ti kri॒yamā̭ṇame॒va ta-dya॒jñasya̭ śaye॒ rakṣa̭sā॒ -mana̭nvavacārāya॒ dakṣi̭ṇasya havi॒rdhāna॒syotta̭rasyāṃ-va~rta॒nyāgṃ sā̭dayati vā॒cyḙva vāca̭-ndadhā॒tyā tṛ̭tīyasava॒nā-tpari̭ śere ya॒jñasya॒ santa̭tyai || 41 ||

(ma॒nu॒ṣya॒ca॒rā - vṷdapā॒tra - mṷpa॒hvayḙta - dvideva॒tyāḥ᳚ - ṣaṭca̭tvārigṃśacca) (a. 9)

bṛha॒spati̭rde॒vānā᳚-mpu॒rohi̭ta॒ āsī॒-cchaṇḍā॒markā॒-vasṷrāṇā॒-mbrahma̭ṇ vanto de॒vā āsa॒-nbrahma̭ṇ va॒nto-'sṷrā॒ste᳚(1॒) 'nyo᳚-'nya-nnāśa̭knuva-nna॒bhibha̭vitu॒-nte de॒vā-śśaṇḍā॒markā॒-vupā̭mantrayanta॒ tā va̭brūtāṃ॒-va~raṃ̭-vṛ~ṇāvahai॒ grahā̭ve॒va nā॒vatrāpi̭ gṛhyetā॒miti॒ tābhyā̭me॒tau śu॒krāma॒nthinā̭-vagṛhṇa॒-ntato̭ de॒vā abha̭va॒-nparā-'sṷrā॒ yasyai॒vaṃ-vi~॒duṣaḥ̭ śu॒krāma॒nthinaṷ gṛ॒hyete॒ bha̭vatyā॒tmanā॒ parā᳚- [parā᳚, a॒sya॒ bhrātṛ̭vyo] 42

-'sya॒ bhrātṛ̭vyo bhavati॒ tau de॒vā a̭pa॒nudyā॒-''tmana॒ indrā̭yājuhavu॒-rapa̭nuttau॒ śaṇḍā॒markaṷ sa॒hāmuneti̭ brūyā॒dya-ndvi॒ṣyādyame॒va dveṣṭi॒ tenai̭nau sa॒hāpa̭ nudate॒ sa pra̭tha॒ma-ssaṅkṛ̭ti-rvi॒śvaka॒rmetye॒vainā̭-vā॒tmana॒ indrā̭yā-juhavu॒rindro॒ hyḙtāni̭ rū॒pāṇi॒ kari̭kra॒daca̭rada॒sau vā ā̭di॒tya-śśu॒kraśca॒ndramā̭ ma॒nthya̭pi॒-gṛhya॒ prāñcau॒ ni- [prāñcau॒ niḥ, krā॒ma॒ta॒-stasmā॒-] 43

-ṣkrā̭mata॒-stasmā॒-tprāñcau॒ yantau॒ na pa̭śyanti pra॒tyañcā̭vā॒vṛtya̭ juhuta॒stasmā᳚-tpra॒tyañcau॒ yantaṷ paśyanti॒ cakṣṷṣī॒ vā e॒te ya॒jñasya॒ yacchu॒krāma॒nthinau॒ nāsi̭kottarave॒dira॒bhitaḥ̭ pari॒kramya̭ juhuta॒stasmā̭da॒bhito॒ nāsi̭kā॒-ñcakṣṷṣī॒ tasmā॒nnāsi̭kayā॒ cakṣṷṣī॒ vidhṛ̭te sa॒rvataḥ॒ pari̭ krāmato॒ rakṣa̭sā॒mapa̭hatyai de॒vā vai yāḥ prācī॒rāhṷtī॒rajṷhavu॒rye pu॒rastā॒dasṷrā॒ āsa॒-ntāgstābhiḥ॒ prā- [āsa॒-ntāgstābhiḥ॒ pra, a॒nu॒da॒nta॒ yāḥ] 44

-ṇṷdanta॒ yāḥ pra॒tīcī॒rye pa॒ścādasṷrā॒ āsa॒-ntāgstābhi॒rapā̭nudanta॒ prācī̭ra॒nyā āhṷtayo hū॒yante᳚ pra॒tyañcaṷ śu॒krāma॒nthinaṷ pa॒ścāccai॒va pu॒rastā᳚cca॒ yaja̭māno॒ bhrātṛ̭vyā॒-npra ṇṷdate॒ tasmā॒-tparā̭cīḥ pra॒jāḥ pra vī̭yante pra॒tīcī᳚rjāyante śu॒krāma॒nthinau॒ vā anṷ pra॒jāḥ pra jā̭yante॒-'ttrīścā॒dyā᳚śca su॒vīrāḥ᳚ pra॒jāḥ pra̭ja॒naya॒-nparī̭hi śu॒kra-śśu॒kraśo̭ciṣā [śu॒kra-śśu॒kraśo̭ciṣā, su॒pra॒jāḥ pra॒jāḥ] 45

supra॒jāḥ pra॒jāḥ pra̭ja॒naya॒-nparī̭hi ma॒nthī ma॒nthiśo̭ci॒ṣetyā̭hai॒tā vai su॒vīrā॒ yā a॒ttrīre॒tā-ssṷpra॒jā yā ā॒dyā̭ ya e॒vaṃ-ve~dā॒trya̭sya pra॒jā jā̭yate॒ nā-''dyā᳚ pra॒jāpa̭te॒rakṣya̭śvaya॒-tta-tparā̭-''pata॒-tta-dvika̭ṅkata॒-mprāvi̭śa॒-tta-dvika̭ṅkate॒ nāra̭mata॒ ta-dyava॒-mprāvi̭śa॒-tta-dyavḙ-'ramata॒ ta-dyava̭sya- [ta-dyava̭sya, ya॒va॒tvaṃ-ya~-dvaika̭ṅkata-] 46

yava॒tvaṃ-ya~-dvaika̭ṅkata-mmanthipā॒tra-mbhava̭ti॒ saktṷbhi-śśrī॒ṇāti̭ pra॒jāpa̭tere॒va taccakṣu॒-ssa-mbha̭rati brahmavā॒dino̭ vadanti॒ kasmā᳚-thsa॒tyānma̭nthipā॒tragṃ sado॒ nāśñṷta॒ ityā᳚rtapā॒tragṃ hīti̭ brūyā॒-dyada̭śñuvī॒tāndho᳚-'ddhva॒ryu-ssyā॒dārti॒mārcche॒-ttasmā॒nnāśñṷte || 47 ||

(ā॒tmanā॒ parā॒ - ni - ṣpra - śu॒kraśo̭ciṣā॒ - yava̭sya - sa॒ptatrigṃ̭śacca) (a. 10)

de॒vā vai ya-dya॒jñe-'kṷrvata॒ tadasṷrā akurvata॒ te de॒vā ā᳚graya॒ṇāgrā॒-ngrahā̭napaśya॒-ntāna̭gṛhṇata॒ tato॒ vai te-'gra॒-mparyā̭ya॒n॒. yasyai॒vaṃ-vi~॒duṣa̭ āgraya॒ṇāgrā॒ grahā̭ gṛ॒hyante-'gra̭me॒va sa̭mā॒nānā॒-mparyḙti ru॒gṇava̭tya॒rcā bhrātṛ̭vyavato gṛhṇīyā॒-dbhrātṛ̭vyasyai॒va ru॒ktvā-'gragṃ̭ samā॒nānā॒-mparyḙti॒ ye dḙvā di॒vyekā̭daśa॒ sthetyā̭hai॒- [sthetyā̭ha, e॒tāva̭tī॒rvai] 48

-tāva̭tī॒rvai de॒vatā॒stābhya̭ e॒vaina॒gṃ॒ sarvā᳚bhyo gṛhṇātye॒ṣa te॒ yoni॒ rviśve᳚bhyastvā de॒vebhya॒ ityā̭ha vaiśvade॒vo hyḙṣa de॒vata̭yā॒ vāgvai de॒vebhyo-'pā᳚krāma-dya॒jñāyāti̭ṣṭhamānā॒ te de॒vā vā॒cyapa̭krāntāyā-ntū॒ṣṇī-ṅgrahā̭nagṛhṇata॒ sāma̭nyata॒ vāga॒ntarya̭nti॒ vai meti॒ sā-''gra̭ya॒ṇa-mpratyāga̭ccha॒-ttadā᳚graya॒ṇasyā᳚-''grayaṇa॒tva- [-''grayaṇa॒tvam, tasmā̭dāgraya॒ṇe] 49

-ntasmā̭dāgraya॒ṇe vāgvi sṛ̭jyate॒ ya-ttū॒ṣṇī-mpūrve॒ grahā̭ gṛ॒hyante॒ yathā᳚thsā॒rīya̭ti ma॒ ākha॒ iya̭ti॒ nāpa̭ rāthsyā॒-mītyṷpāvasṛ॒jatye॒vame॒va tada̭ddhva॒ryurā᳚graya॒ṇa-ṅgṛ̭hī॒tvā ya॒jñamā॒rabhya॒ vācaṃ॒-vi~ sṛ̭jate॒ trirhi-ṅka̭rotyudgā॒tṝ-ne॒va ta-dvṛ̭ṇīte pra॒jāpa̭ti॒rvā e॒ṣa yadā᳚graya॒ṇo yadā᳚graya॒ṇa-ṅgṛ̭hī॒tvā hi̭-ṅka॒roti̭ pra॒jāpa̭tire॒va [ ] 50

ta-tpra॒jā a॒bhi ji̭ghrati॒ tasmā᳚-dva॒thsa-ñjā॒ta-ṅgaura॒bhi ji̭ghratyā॒tmā vā e॒ṣa ya॒jñasya॒ yadā᳚graya॒ṇa-ssava̭nesavane॒-'bhi gṛ̭hṇātyā॒tmanne॒va ya॒jñagṃ sa-nta̭notyu॒pari̭ṣṭā॒dā na̭yati॒ reta̭ e॒va ta-dda̭dhātya॒dhastā॒dupa̭ gṛhṇāti॒ pra ja̭nayatye॒va tadbra̭hmavā॒dino̭ vadanti॒ kasmā᳚-thsa॒tyā-dgā̭ya॒trī kani̭ṣṭhā॒ chanda̭sāgṃ sa॒tī sarvā̭ṇi॒ sava̭nāni vaha॒tītye॒ṣa vai gā̭yatri॒yai va॒thso yadā᳚graya॒ṇastame॒va tada̭bhini॒varta॒gṃ॒ sarvā̭ṇi॒ sava̭nāni vahati॒ tasmā᳚-dva॒thsama॒pākṛ̭ta॒-ṅgaura॒bhi ni va̭rtate || 51 ||

(ā॒hā॒-'' - gra॒ya॒ṇa॒tvaṃ - pra॒jāpa̭tire॒ve - ti̭ - vigṃśa॒tiśca̭) (a. 11)

(ya॒jñena॒ tā ṷpa॒yaḍbhi̭ - rde॒vā vai ya॒jñamāgnī᳚dhre - brahmavā॒dina॒-ssa tvai - de॒vasya॒ grāvā̭ṇaṃ - prā॒ṇo vā ṷpā॒g॒śva̭grā - de॒vā vā ṷpā॒gṃ॒śau - vāgvai - mi॒traṃ - ~ya॒jñasya॒ - bṛha॒spati̭ - rde॒vā vā ā᳚graya॒ṇāgrā॒ - nekā̭daśa)

(ya॒jñena̭ - lo॒ke pa̭śu॒mān-thsyā॒th - sava̭na॒-mmādhya̭ndinaṃ॒ - ~vāgvā - ari̭ktāni॒ - ta-tpra॒jā - eka̭pañcā॒śat)

(ya॒jñena॒, ni va̭rtate)

|| hariḥ̭ om ||

|| kṛṣṇa yajurvedīya taittirīya saṃhitāyāṃ ṣaṣṭhakāṇḍe caturthaḥ praśna-ssamāptaḥ ||

Sanskrit — Devanagari (original)

कृष्ण यजुर्वेदीय तैत्तिरीय संहितायां षष्ठकाण्डे चतुर्थः प्रश्नः - सोममन्त्रब्राह्मणनिरूपणं

ओ-न्नमः परमात्मने, श्री महागणपतये नमः,

श्री गुरुभ्यो नमः । ह॒रिः॒ ओम् ॥

य॒ज्ञेन॒ वै प्र॒जाप॑तिः प्र॒जा अ॑सृजत॒ ता उ॑प॒यड्भि॑-रे॒वासृ॑जत॒ यदु॑प॒यज॑ उप॒यज॑ति प्र॒जा ए॒व त-द्यज॑मान-स्सृजते जघना॒र्धादव॑ द्यति जघना॒र्धाद्धि प्र॒जाः प्र॒जाय॑न्ते स्थविम॒तो-ऽव॑ द्यति स्थविम॒तो हि प्र॒जाः प्र॒जाय॒न्ते ऽस॑म्भिन्द॒न्नव॑ द्यति प्रा॒णाना॒-मस॑म्भेदाय॒ न प॒र्याव॑र्तयति॒ य-त्प॑र्याव॒र्तये॑दुदाव॒र्तः प्र॒जा ग्राहु॑क-स्स्या-थ्समु॒द्र-ङ्ग॑च्छ॒ स्वाहेत्या॑ह॒ रेत॑ [रेतः॑, ए॒व] 1

ए॒व त-द्द॑धात्य॒न्तरि॑क्ष-ङ्गच्छ॒ स्वाहेत्या॑हा॒-ऽन्तरि॑क्षेणै॒वास्मै᳚ प्र॒जाः प्र ज॑नयत्य॒न्तरि॑क्ष॒ग्ग्॒ ह्यनु॑ प्र॒जाः प्र॒जाय॑न्ते दे॒वग्ं स॑वि॒तार॑-ङ्गच्छ॒ स्वाहेत्या॑ह सवि॒तृप्र॑सूत ए॒वास्मै᳚ प्र॒जाः प्र ज॑नयत्य-होरा॒त्रे ग॑च्छ॒ स्वाहेत्या॑हा-होरा॒त्राभ्या॑-मे॒वास्मै᳚ प्र॒जाः प्र ज॑नयत्य-होरा॒त्रे ह्यनु॑ प्र॒जाः प्र॒जाय॑न्ते मि॒त्रावरु॑णौ गच्छ॒ स्वाहे- [स्वाहा᳚, इत्या॑ह] 2

-त्या॑ह प्र॒जास्वे॒व प्रजा॑तासु प्राणापा॒नौ द॑धाति॒ सोम॑-ङ्गच्छ॒ स्वाहेत्या॑ह सौ॒म्या हि दे॒वत॑या प्र॒जा य॒ज्ञ-ङ्ग॑च्छ॒ स्वाहेत्या॑ह प्र॒जा ए॒व य॒ज्ञियाः᳚ करोति॒ छन्दाग्ं॑सि गच्छ॒ स्वाहेत्या॑ह प॒शवो॒ वै छन्दाग्ं॑सि प॒शूने॒वाव॑ रुन्धे॒ द्यावा॑पृथि॒वी ग॑च्छ॒ स्वाहेत्या॑ह प्र॒जा ए॒व प्रजा॑ता॒ द्यावा॑पृथि॒वीभ्या॑मुभ॒यतः॒ परि॑ गृह्णाति॒ नभो॑ [नभः॑, दि॒व्य-ङ्ग॑च्छ॒] 3

दि॒व्य-ङ्ग॑च्छ॒ स्वाहेत्या॑ह प्र॒जाभ्य॑ ए॒व प्रजा॑ताभ्यो॒ वृष्टि॒-न्निय॑च्छत्य॒ग्निं-वैँ᳚श्वान॒र-ङ्ग॑च्छ॒ स्वाहेत्या॑ह प्र॒जा ए॒व प्रजा॑ता अ॒स्या-म्प्रति॑ ष्ठापयति प्रा॒णानां॒-वाँ ए॒षो-ऽव॑ द्यति॒ यो॑-ऽव॒द्यति॑ गु॒दस्य॒ मनो॑ मे॒ हार्दि॑ य॒च्छेत्या॑ह प्रा॒णाने॒व य॑थास्था॒नमुप॑ ह्वयते प॒शोर्वा आल॑ब्धस्य॒ हृद॑य॒ग्ं॒ शुगृ॑च्छति॒ सा हृ॑दयशू॒ल- [हृ॑दयशू॒लम्, अ॒भि समे॑ति॒] 4

-म॒भि समे॑ति॒ य-त्पृ॑थि॒व्याग्ं हृ॑दयशू॒ल-मु॑द्वा॒सये᳚-त्पृथि॒वीग्ं शु॒चा-ऽर्प॑ये॒-द्यद॒फ्स्व॑प-श्शु॒चा-ऽर्प॑ये॒च्छुष्क॑स्य चा॒-ऽऽर्द्रस्य॑ च स॒न्धावुद्वा॑सयत्यु॒भय॑स्य॒ शान्त्यै॒ य-न्द्वि॒ष्या-त्त-न्ध्या॑ये-च्छु॒चैवैन॑-मर्पयति ॥ 5 ॥

(रेतो॑ - मि॒त्रावरु॑णौ गच्छ॒ स्वाहा॒ - नभो॑ - हृदयशू॒लं - द्वात्रिग्ं॑शच्च) (अ. 1)

दे॒वा वै य॒ज्ञमाग्नी᳚द्ध्रे॒ व्य॑भजन्त॒ ततो॒ यद॒त्यशि॑ष्यत॒ तद॑ब्रुव॒न् वस॑तु॒ नु न॑ इ॒दमिति॒ त-द्व॑सती॒वरी॑णां-वँसती वरि॒त्व-न्तस्मि॑-न्प्रा॒तर्न सम॑शक्नुव॒-न्तद॒फ्सु प्रावे॑शय॒-न्ता व॑सती॒ वरी॑रभवन् वसती॒वरी᳚र्गृह्णाति य॒ज्ञो वै व॑सती॒ वरी᳚र्य॒ज्ञमे॒वा-ऽऽरभ्य॑ गृही॒त्वोप॑ वसति॒ यस्यागृ॑हीता अ॒भि नि॒म्रोचे॒-दना॑रब्धो-ऽस्य य॒ज्ञ-स्स्या᳚- [य॒ज्ञ-स्स्या᳚त्, य॒ज्ञं-विँ] 6

-द्य॒ज्ञं-विँ च्छि॑न्द्या-ज्ज्योति॒ष्या॑ वा गृह्णी॒याद्धिर॑ण्यं-वाँ ऽव॒धाय॒ सशु॑क्राणामे॒व गृ॑ह्णाति॒ यो वा᳚ ब्राह्म॒णो ब॑हुया॒जी तस्य॒ कुम्भ्या॑ना-ङ्गृह्णीया॒-थ्स हि गृ॑ही॒त व॑सतीवरीको वसती॒वरी᳚र्गृह्णाति प॒शवो॒ वै व॑सती॒वरीः᳚ प॒शूने॒वा-ऽऽरभ्य॑ गृही॒त्वोप॑ वसति॒ यद॑न्वी॒प-न्तिष्ठ॑-न्गृह्णी॒यान्नि॒र्मार्गु॑का अस्मा-त्प॒शवः॑ स्युः प्रती॒प-न्तिष्ठ॑-न्गृह्णाति प्रति॒रुद्ध्यै॒वास्मै॑ प॒शू-न्गृ॑ह्णा॒तीन्द्रो॑ [प॒शू-न्गृ॑ह्णा॒तीन्द्रः॑, वृ॒त्र-] 7

वृ॒त्र-म॑ह॒न्-थ्सो᳚-ऽ(1॒)पो᳚-ऽ(1॒)भ्य॑म्रियत॒ तासां॒-यँन्मेद्ध्यं॑-यँ॒ज्ञिय॒ग्ं॒ सदे॑व॒मासी॒-त्तदत्य॑मुच्यत॒ ता वह॑न्तीरभव॒न् वह॑न्तीना-ङ्गृह्णाति॒ या ए॒व मेद्ध्या॑ य॒ज्ञिया॒-स्सदे॑वा॒ आप॒स्ता सा॑मे॒व गृ॑ह्णाति॒ नान्त॒मा वह॑न्ती॒रती॑या॒-द्यद॑न्त॒मा वह॑न्तीरती॒या-द्य॒ज्ञमति॑ मन्येत॒ न स्था॑व॒राणा᳚-ङ्गृह्णीया॒-द्वरु॑णगृहीता॒ वै स्था॑व॒रा य-थ्स्था॑व॒राणा᳚-ङ्गृह्णी॒या- [य-थ्स्था॑व॒राणा᳚-ङ्गृह्णी॒यात्, वरु॑णेनास्य] 8

-द्वरु॑णेनास्य य॒ज्ञ-ङ्ग्रा॑हये॒-द्यद्वै दिवा॒ भव॑त्य॒पो रात्रिः॒ प्र वि॑शति॒ तस्मा᳚-त्ता॒म्रा आपो॒ दिवा॑ ददृश्रे॒ यन्नक्त॒-म्भव॑त्य॒पो-ऽहः॒ प्र वि॑शति॒ तस्मा᳚च्च॒न्द्रा आपो॒ नक्त॑-न्ददृश्रे छा॒यायै॑ चा॒-ऽऽतप॑तश्च स॒धौ-ङ्गृ॑ह्णात्य-होरा॒त्रयो॑रे॒वास्मै॒ वर्ण॑-ङ्गृह्णाति ह॒विष्म॑तीरि॒मा आप॒ इत्या॑ह ह॒विष्कृ॑तानामे॒व गृ॑ह्णाति ह॒विष्माग्ं॑ अस्तु॒- [अस्तु, सूर्य॒] 9

सूर्य॒ इत्या॑ह॒ सशु॑क्राणामे॒व गृ॑ह्णात्यनु॒ष्टुभा॑ गृह्णाति॒ वाग्वा अ॑नु॒ष्टुग् वा॒चैवैना॒-स्सर्व॑या गृह्णाति॒ चतु॑ष्पदय॒र्चा गृ॑ह्णाति॒ त्रि-स्सा॑दयति स॒प्त स-म्प॑द्यन्ते स॒प्तप॑दा॒ शक्व॑री प॒शव॒-श्शक्व॑री प॒शूने॒वाव॑ रुन्धे॒ ऽस्मै वै लो॒काय॒ गार्ह॑पत्य॒ आ धी॑यते॒-ऽमुष्मा॑ आहव॒नीयो॒ य-द्गार्ह॑पत्य उपसा॒दये॑द॒स्मिन् ँलो॒के प॑शु॒मान्-थ्स्या॒-द्यदा॑हव॒नीये॒-ऽ-मुष्मि॑- [-मुष्मिन्न्॑, लो॒के प॑शु॒मान्थ्स्या॑-] 10

ँल्लो॒के प॑शु॒मान्थ्स्या॑-दु॒भयो॒रुप॑ सादयत्यु॒भयो॑रे॒वैनं॑-लोँ॒कयोः᳚ पशु॒मन्त॑-ङ्करोति स॒र्वतः॒ परि॑ हरति॒ रक्ष॑सा॒मप॑हत्या इन्द्राग्नि॒योर्भा॑ग॒धेयी॒-स्स्थेत्या॑ह यथाय॒जुरे॒वैतदाग्नी᳚द्ध्र॒ उप॑ वासयत्ये॒तद्वै य॒ज्ञस्याप॑राजितं॒-यँदाग्नी᳚द्ध्रं॒-यँदे॒व य॒ज्ञस्याप॑राजित॒-न्तदे॒वैना॒ उप॑ वासयति॒ यतः॒ खलु॒ वै य॒ज्ञस्य॒ वित॑तस्य॒ न क्रि॒यते॒ तदनु॑ य॒ज्ञग्ं रक्षा॒ग्॒स्यव॑ चरन्ति॒ य-द्वह॑न्तीना-ङ्गृ॒ह्णाति॑ क्रि॒यमा॑णमे॒व त-द्य॒ज्ञस्य॑ शये॒ रक्ष॑सा॒-मन॑न्ववचाराय॒ न ह्ये॑ता ई॒लय॒न्त्या तृ॑तीयसव॒ना-त्परि॑ शेरे य॒ज्ञस्य॒ सन्त॑त्यै ॥ 11 ॥

(स्या॒ - दिन्द्रो॑ - गृह्णी॒या - द॑स्त्व॒ - मुष्मि॑न् - क्रि॒यते॒ - षड्विग्ं॑शतिश्च) (अ. 2)

ब्र॒ह्म॒वा॒दिनो॑ वदन्ति॒ स त्वा अ॑द्ध्व॒र्यु-स्स्या॒द्य-स्सोम॑-मुपाव॒हर॒न्-थ्सर्वा᳚भ्यो दे॒वता᳚भ्य उपाव॒हरे॒-दिति॑ हृ॒दे त्वेत्या॑ह मनु॒ष्ये᳚भ्य ए॒वैतेन॑ करोति॒ मन॑से॒ त्वेत्या॑ह पि॒तृभ्य॑ ए॒वैतेन॑ करोति दि॒वे त्वा॒ सूर्या॑य॒ त्वेत्या॑ह दे॒वेभ्य॑ ए॒वैतेन॑ करोत्ये॒ताव॑ती॒-र्वै दे॒वता॒स्ताभ्य॑ ए॒वैन॒ग्ं॒ सर्वा᳚भ्य उ॒पाव॑हरति पु॒रा वा॒चः [वा॒चः, प्रव॑दितोः] 12

प्रव॑दितोः प्रातरनुवा॒क-मु॒पाक॑रोति॒ याव॑त्ये॒व वा-क्ता-मव॑ रुन्धे॒ ऽपो-ऽग्रे॑-ऽभि॒व्याह॑रति य॒ज्ञो वा आपो॑ य॒ज्ञमे॒वाभि वाचं॒-विँसृ॑जति॒ सर्वा॑णि॒ छन्दा॒ग्॒स्यन्वा॑ह प॒शवो॒ वै छन्दाग्ं॑सि प॒शूने॒वाव॑ रुन्धे गायत्रि॒या तेज॑स्कामस्य॒ परि॑ दद्ध्या-त्त्रि॒ष्टुभे᳚न्द्रि॒यका॑मस्य॒ जग॑त्या प॒शुका॑मस्या-ऽनु॒ष्टुभा᳚ प्रति॒ष्ठाका॑मस्य प॒ङ्क्त्या य॒ज्ञका॑मस्य वि॒राजा-ऽन्न॑कामस्य शृ॒णोत्व॒ग्नि-स्स॒मिधा॒ हव॑- [हव᳚म्, म॒ इत्या॑ह] 13

-म्म॒ इत्या॑ह सवि॒तृप्र॑सूत ए॒व दे॒वता᳚भ्यो नि॒वेद्या॒-ऽपो-ऽच्छै᳚त्य॒प इ॑ष्य होत॒-रित्या॑हेषि॒तग्ं हि कर्म॑ क्रि॒यते॒ मैत्रा॑वरुणस्य चमसाद्ध्वर्य॒वा द्र॒वेत्या॑ह मि॒त्रावरु॑णौ॒ वा अ॒पा-न्ने॒तारौ॒ ताभ्या॑मे॒वैना॒ अच्छै॑ति॒ देवी॑रापो अपा-न्नपा॒-दित्या॒हा-ऽऽहु॑त्यै॒वैना॑ नि॒ष्क्रीय॑ गृह्णा॒त्यथो॑ ह॒विष्कृ॑ताना-मे॒वाभिघृ॑ताना-ङ्गृह्णाति॒- [-मे॒वाभिघृ॑ताना-ङ्गृह्णाति, कार्षि॑-र॒सीत्या॑ह॒] 14

कार्षि॑-र॒सीत्या॑ह॒ शम॑लमे॒वा-ऽऽसा॒मप॑ प्लावयति समु॒द्रस्य॒ वो-ऽक्षि॑त्या॒ उन्न॑य॒ इत्या॑ह॒ तस्मा॑द॒द्यमा॑नाः पी॒यमा॑ना॒ आपो॒ न क्षी॑यन्ते॒ योनि॒र्वै य॒ज्ञस्य॒ चात्वा॑लं-यँ॒ज्ञो व॑सती॒वरीर्॑. होतृचम॒स-ञ्च॑ मैत्रावरुणचम॒स-ञ्च॑ स॒ग्ग्॒स्पर्श्य॑ वसती॒वरी॒र्व्यान॑यति य॒ज्ञस्य॑ सयोनि॒त्वायाथो॒ स्वादे॒वैना॒ योनेः॒ प्र ज॑नयत्यद्ध्व॒र्यो-ऽवे॑र॒पा(3) इत्या॑हो॒ते -म॑नन्नमुरु॒तेमाः प॒श्येति॒ वावैतदा॑ह॒ यद्य॑ग्निष्टो॒मो जु॒होति॒ यद्यु॒क्थ्यः॑ परि॒धौ नि मा᳚र्ष्टि॒ यद्य॑तिरा॒त्रो यजु॒र्वद॒-न्प्र प॑द्यते यज्ञक्रतू॒नां-व्याँवृ॑त्त्यै ॥ 15 ॥

(वा॒चो-हव॑-म॒भिघृ॑ताना-ङ्गृह्णात्यु॒ - त - पञ्च॑विग्ंशतिश्च) (अ. 3)

दे॒वस्य॑ त्वा सवि॒तुः प्र॑स॒व इति॒ ग्रावा॑ण॒मा द॑त्ते॒ प्रसू᳚त्या अ॒श्विनो᳚-र्बा॒हुभ्या॒मित्या॑हा॒श्विनौ॒ हि दे॒वाना॑मद्ध्व॒र्यू आस्ता᳚-म्पू॒ष्णो हस्ता᳚भ्या॒मित्या॑ह॒ यत्यै॑ प॒शवो॒ वै सोमो᳚ व्या॒न उ॑पाग्ंशु॒सव॑नो॒ यदु॑पाग्ंशु॒सव॑न-म॒भि मिमी॑ते व्या॒नमे॒व प॒शुषु॑ दधा॒तीन्द्रा॑य॒ त्वेन्द्रा॑य॒ त्वेति॑ मिमीत॒ इन्द्रा॑य॒ हि सोम॑ आह्रि॒यते॒ पञ्च॒ कृत्वो॒ यजु॑षा मिमीते॒ [मिमीते, पञ्चा᳚क्षरा] 16

पञ्चा᳚क्षरा प॒ङ्क्तिः पाङ्क्तो॑ य॒ज्ञो य॒ज्ञमे॒वाव॑ रुन्धे॒ पञ्च॒ कृत्व॑स्तू॒ष्णी-न्दश॒ स-म्प॑द्यन्ते॒ दशा᳚क्षरा वि॒राडन्नं॑-विँ॒रा-ड्वि॒राजै॒वान्नाद्य॒मव॑ रुन्धे श्वा॒त्रा-स्स्थ॑ वृत्र॒तुर॒ इत्या॑है॒ष वा अ॒पाग्ं सो॑मपी॒थो य ए॒वं-वेँद॒ ना-ऽफ्स्वार्ति॒मार्च्छ॑ति॒ यत्ते॑ सोम दि॒वि ज्योति॒रित्या॑है॒भ्य ए॒वैन॑- [ए॒वैन᳚म्, लो॒केभ्य॒] 17

ँल्लो॒केभ्य॒-स्स-म्भ॑रति॒ सोमो॒ वै राजा॒ दिशो॒-ऽभ्य॑द्ध्याय॒-थ्स दिशो-ऽनु॒ प्रावि॑श॒-त्प्रागपा॒गुद॑गध॒रागित्या॑ह दि॒ग्भ्य ए॒वैन॒ग्ं॒ स-म्भ॑र॒त्यथो॒ दिश॑ ए॒वास्मा॒ अव॑ रु॒न्धे ऽम्ब॒ नि ष्व॒रेत्या॑ह॒ कामु॑का एन॒ग्ग्॒ स्त्रियो॑ भवन्ति॒ य ए॒वं-वेँद॒ य-त्ते॑ सो॒मादा᳚भ्य॒-न्नाम॒ जागृ॒वी- [जागृ॒वीति॑, आ॒है॒ष वै] 18

-त्या॑है॒ष वै सोम॑स्य सोमपी॒थो य ए॒वं-वेँद॒ न सौ॒म्यामार्ति॒मार्च्छ॑ति॒ घ्नन्ति॒ वा ए॒त-थ्सोमं॒-यँद॑भिषु॒ण्वन्त्य॒ग्ं॒ शूनप॑ गृह्णाति॒ त्राय॑त ए॒वैन॑-म्प्रा॒णा वा अ॒ग्ं॒शवः॑ प॒शव॒-स्सोमो॒ ऽग्ं॒शू-न्पुन॒रपि॑ सृजति प्रा॒णाने॒व प॒शुषु॑ दधाति॒ द्वौद्वा॒वपि॑ सृजति॒ तस्मा॒-द्द्वौद्वौ᳚ प्रा॒णाः ॥ 19 ॥

(यजु॑षा मिमीत - एनं॒ - जागृ॒वीति॒ - चतु॑श्चत्वारिग्ंशच्च) (अ. 4)

प्रा॒णो वा ए॒ष यदु॑पा॒ग्ं॒शु र्यदुपा॒ग्॒श्व॑ग्रा॒ ग्रहा॑ गृ॒ह्यन्ते᳚ प्रा॒णमे॒वानु॒ प्र य॑न्त्यरु॒णो ह॑ स्मा॒-ऽऽहौप॑वेशिः प्रातस्सव॒न ए॒वाहं-यँ॒ज्ञग्ं सग्ग् स्था॑पयामि॒ तेन॒ तत॒-स्सग्ग्स्थि॑तेन चरा॒मीत्य॒ष्टौ कृत्वो-ऽग्रे॒-ऽभिषु॑णो-त्य॒ष्टाक्ष॑रा गाय॒त्री गा॑य॒त्र-म्प्रा॑तस्सव॒न-म्प्रा॑तस्सव॒नमे॒व तेना᳚ ऽऽप्नो॒त्येका॑दश॒ कृत्वो᳚ द्वि॒तीय॒-मेका॑दशाक्षरा त्रि॒ष्टु-प्त्रैष्टु॑भ॒-म्माद्ध्य॑न्दिन॒ग्ं॒- [-म्माद्ध्य॑न्दिनम्, सव॑न॒-] 20

-सव॑न॒-म्माद्ध्य॑न्दिनमे॒व सव॑न॒-न्तेना᳚-ऽऽप्नोति॒ द्वाद॑श॒ कृत्व॑स्तृ॒तीय॒-न्द्वाद॑शाक्षरा॒ जग॑ती॒ जाग॑त-न्तृतीयसव॒न-न्तृ॑तीयसव॒नमे॒व तेना᳚ ऽऽप्नोत्ये॒ताग्ं ह॒ वाव स य॒ज्ञस्य॒ सग्ग्स्थि॑तिमुवा॒चा स्क॑न्दा॒यास्क॑न्न॒ग्ं॒ हि त-द्य-द्य॒ज्ञस्य॒ सग्ग्स्थि॑तस्य॒ स्कन्द॒त्यथो॒ खल्वा॑हुर्गाय॒त्री वाव प्रा॑तस्सव॒ने नाति॒वाद॒ इत्यन॑तिवादुक एन॒-म्भ्रातृ॑व्यो भवति॒ य ए॒वं-वेँद॒ तस्मा॑-द॒ष्टाव॑ष्टौ॒ [-द॒ष्टाव॑ष्टौ, कृत्वो॑] 21

कृत्वो॑-ऽभि॒षुत्य॑-म्ब्रह्मवा॒दिनो॑ वदन्ति प॒वित्र॑वन्तो॒-ऽन्ये ग्रहा॑ गृ॒ह्यन्ते॒ किम्प॑वित्र उपा॒ग्ं॒शुरिति॒ वाक्प॑वित्र॒ इति॑ ब्रूया-द्वा॒चस्पत॑ये पवस्व वाजि॒न्नित्या॑ह वा॒चैवैन॑-म्पवयति॒ वृष्णो॑ अ॒ग्ं॒शुभ्या॒मित्या॑ह॒ वृष्णो॒ ह्ये॑ताव॒ग्ं॒शू यौ सोम॑स्य॒ गभ॑स्तिपूत॒ इत्या॑ह॒ गभ॑स्तिना॒ ह्ये॑न-म्प॒वय॑ति दे॒वो दे॒वाना᳚-म्प॒वित्र॑म॒सीत्या॑ह दे॒वो ह्ये॑ष [ह्ये॑षः, स-न्दे॒वाना᳚-] 22

स-न्दे॒वाना᳚-म्प॒वित्रं॒-येँषा᳚-म्भा॒गो-ऽसि॒ तेभ्य॒स्त्वेत्या॑ह॒ येषा॒ग्॒ ह्ये॑ष भा॒गस्तेभ्य॑ एन-ङ्गृ॒ह्णाति॒ स्वा-ङ्कृ॑तो॒-ऽसीत्या॑ह प्रा॒णमे॒व स्वम॑कृत॒ मधु॑मतीर्न॒ इष॑स्कृ॒धीत्या॑ह॒ सर्व॑मे॒वास्मा॑ इ॒दग्ग् स्व॑दयति॒ विश्वे᳚भ्य-स्त्वेन्द्रि॒येभ्यो॑ दि॒व्येभ्यः॒ पार्थि॑वेभ्य॒ इत्या॑हो॒भये᳚ष्वे॒व दे॑वमनु॒ष्येषु॑ प्रा॒णा-न्द॑धाति॒ मन॑स्त्वा॒- [मन॑स्त्वा, अ॒ष्ट्वित्या॑ह॒] 23

-ऽष्ट्वित्या॑ह॒ मन॑ ए॒वाश्ञु॑त उ॒र्व॑न्तरि॑क्ष॒-मन्वि॒हीत्या॑हा-न्तरिक्षदेव॒त्यो॑ हि प्रा॒ण-स्स्वाहा᳚ त्वा सुभव॒-स्सूर्या॒येत्या॑ह प्रा॒णा वै स्वभ॑वसो दे॒वास्तेष्वे॒व प॒रोक्ष॑-ञ्जुहोति दे॒वेभ्य॑स्त्वा मरीचि॒पेभ्य॒ इत्या॑हा ऽऽदि॒त्यस्य॒ वै र॒श्मयो॑ दे॒वा म॑रीचि॒पास्तेषा॒-न्त-द्भा॑ग॒धेय॒-न्ताने॒व तेन॑ प्रीणाति॒ यदि॑ का॒मये॑त॒ वर्षु॑कः प॒र्जन्य॑- [प॒र्जन्यः॑, स्या॒दिति॒] 24

-स्स्या॒दिति॒ नीचा॒ हस्ते॑न॒ नि मृ॑ज्या॒-द्वृष्टि॑मे॒व नि य॑च्छति॒ यदि॑ का॒मये॒ताव॑र्षुक-स्स्या॒दित्यु॑त्ता॒नेन॒ नि मृ॑ज्या॒-द्वृष्टि॑मे॒वो-द्य॑च्छति॒ यद्य॑भि॒चरे॑द॒मु-ञ्ज॒ह्यथ॑ त्वा होष्या॒मीति॑ ब्रूया॒दाहु॑तिमे॒वैन॑-म्प्रे॒फ्सन्. ह॑न्ति॒ यदि॑ दू॒रे स्यादा तमि॑तोस्तिष्ठे-त्प्रा॒णमे॒वास्या॑नु॒गत्य॑ हन्ति॒ यद्य॑भि॒चरे॑द॒मुष्य॑- [यद्य॑भि॒चरे॑द॒मुष्य॑, त्वा॒ प्रा॒णे] 25

-त्वा प्रा॒णे सा॑दया॒मीति॑ सादये॒दस॑न्नो॒ वै प्रा॒णः प्रा॒णमे॒वास्य॑ सादयति ष॒ड्भिर॒ग्ं॒शुभिः॑ पवयति॒ ष-ड्वा ऋ॒तव॑ ऋ॒तुभि॑रे॒वैन॑-म्पवयति॒ त्रिः प॑वयति॒ त्रय॑ इ॒मे लो॒का ए॒भिरे॒वैनं॑-लोँ॒कैः प॑वयति ब्रह्मवा॒दिनो॑ वदन्ति॒ कस्मा᳚-थ्स॒त्या-त्त्रयः॑ पशू॒नाग्ं हस्ता॑दाना॒ इति॒ य-त्त्रिरु॑पा॒ग्ं॒ शुग्ं हस्ते॑न विगृ॒ह्णाति॒ तस्मा॒-त्त्रयः॑ पशू॒नाग्ं हस्ता॑दानाः॒ पुरु॑षो ह॒स्ती म॒र्कटः॑ ॥ 26 ॥

(माध्य॑दिन्न - म॒ष्टाव॑ष्टा - वे॒ष - मन॑स्त्वा - प॒र्जन्यो॒ - ऽमुष्य॒ - पुरु॑षो॒ - द्वे च॑) (अ. 5)

दे॒वा वै य-द्य॒ज्ञे-ऽकु॑र्वत॒ तदसु॑रा अकुर्वत॒ ते दे॒वा उ॑पा॒ग्ं॒शौ य॒ज्ञग्ं स॒ग्ग्॒स्थाप्य॑मपश्य॒-न्तमु॑पा॒ग्ं॒शौ सम॑स्थापय॒-न्ते-ऽसु॑रा॒ वज्र॑मु॒द्यत्य॑ दे॒वान॒भ्या॑यन्त॒ ते दे॒वा बिभ्य॑त॒ इन्द्र॒मुपा॑धाव॒-न्तानिन्द्रो᳚-ऽन्तर्या॒मेणा॒न्तर॑धत्त॒ तद॑न्तर्या॒मस्या᳚न्तर्याम॒त्वं-यँद॑न्तर्या॒मो गृ॒ह्यते॒ भ्रातृ॑व्याने॒व त-द्यज॑मानो॒-ऽन्तर्ध॑त्ते॒ ऽन्तस्ते॑ [-ऽन्तर्ध॑त्ते॒ ऽन्तस्ते᳚, द॒धा॒मि॒ द्यावा॑पृथि॒वी] 27

दधामि॒ द्यावा॑पृथि॒वी अ॒न्तरु॒-र्व॑न्तरि॑क्ष॒-मित्या॑है॒भिरे॒व लो॒कैर्यज॑मानो॒ भ्रातृ॑व्यान॒न्तर्ध॑त्ते॒ ते दे॒वा अ॑मन्य॒न्तेन्द्रो॒ वा इ॒दम॑भू॒द्य-द्व॒यग्ग् स्म इति॒ ते᳚-ऽब्रुव॒-न्मघ॑व॒न्ननु॑ न॒ आ भ॒जेति॑ स॒जोषा॑ दे॒वैरव॑रैः॒ परै॒श्चेत्य॑ब्रवी॒द्ये चै॒व दे॒वाः परे॒ ये चाव॑रे॒ तानु॒भया॑- [तानु॒भयान्॑, अ॒न्वाभ॑ज-थ्स॒जोषा॑] 28

-न॒न्वाभ॑ज-थ्स॒जोषा॑ दे॒वैरव॑रैः॒ परै॒श्चेत्या॑ह॒ ये चै॒व दे॒वाः परे॒ ये चाव॑रे॒ तानु॒भया॑-न॒न्वाभ॑ज-त्यन्तर्या॒मे म॑घव-न्मादय॒स्वेत्या॑ह य॒ज्ञादे॒व यज॑मान॒-न्नान्तरे᳚त्युपया॒म-गृ॑हीतो॒ ऽसीत्या॑हापा॒नस्य॒ धृत्यै॒ यदु॒भाव॑पवि॒त्रौ गृ॒ह्येया॑ता-म्प्रा॒णम॑पा॒नो-ऽनु॒ न्यृ॑च्छे-त्प्र॒मायु॑क-स्स्या-त्प॒वित्र॑वानन्तर्या॒मो गृ॑ह्यते [गृ॑ह्यते, प्रा॒णा॒पा॒नयो॒-र्विधृ॑त्यै] 29

प्राणापा॒नयो॒-र्विधृ॑त्यै प्राणापा॒नौ वा ए॒तौ यदु॑पाग्श्वन्तर्या॒मौ व्या॒न उ॑पाग्ंशु॒ सव॑नो॒ य-ङ्का॒मये॑त प्र॒मायु॑क-स्स्या॒दित्यसग्ग्॑ स्पृष्टौ॒ तस्य॑ सादये-द्व्या॒नेनै॒वास्य॑ प्राणापा॒नौ वि च्छि॑नत्ति ता॒ज-क्प्र मी॑यते॒ य-ङ्का॒मये॑त॒ सर्व॒मायु॑रिया॒दिति॒ सग्ग् स्पृ॑ष्टौ॒ तस्य॑ सादये-द्व्या॒नेनै॒वास्य॑ प्राणापा॒नौ स-न्त॑नोति॒ सर्व॒मायु॑रेति ॥ 30 ॥

(त॒ - उ॒भया᳚न् - गृह्यते॒ - चतु॑श्चत्वारिग्ंशच्च) (अ. 6)

वाग्वा ए॒षा यदै᳚न्द्रवाय॒वो यदै᳚न्द्रवाय॒वाग्रा॒ ग्रहा॑ गृ॒ह्यन्ते॒ वाच॑मे॒वानु॒ प्र य॑न्ति वा॒यु-न्दे॒वा अ॑ब्रुव॒न्-थ्सोम॒ग्ं॒ राजा॑नग्ं हना॒मेति॒ सो᳚-ऽब्रवी॒-द्वरं॑-वृँणै॒ मद॑ग्रा ए॒व वो॒ ग्रहा॑ गृह्यान्ता॒ इति॒ तस्मा॑दैन्द्रवाय॒वाग्रा॒ ग्रहा॑ गृह्यन्ते॒ तम॑घ्न॒न्-थ्सो॑-ऽपूय॒-त्त-न्दे॒वा नोपा॑धृष्णुव॒-न्ते वा॒युम॑ब्रुव-न्नि॒म-न्नः॑ स्वद॒ये- [-न्नि॒म-न्नः॑ स्वदय, इति॒ सो᳚-ऽब्रवी॒-] 31

-ति॒ सो᳚-ऽब्रवी॒-द्वरं॑-वृँणै मद्देव॒त्या᳚न्ये॒व वः॒ पात्रा᳚ण्युच्यान्ता॒ इति॒ तस्मा᳚न्नानादेव॒त्या॑नि॒ सन्ति॑ वाय॒व्या᳚न्युच्यन्ते॒ तमे᳚भ्यो वा॒युरे॒वास्व॑दय॒-त्तस्मा॒द्य-त्पूय॑ति॒ त-त्प्र॑वा॒ते वि ष॑जन्ति वा॒युर्हि तस्य॑ पवयि॒ता स्व॑दयि॒ता तस्य॑ वि॒ग्रह॑ण॒-न्नावि॑न्द॒न्-थ्सादि॑तिरब्रवी॒-द्वरं॑-वृँणा॒ अथ॒ मया॒ वि गृ॑ह्णीद्ध्व-म्मद्देव॒त्या॑ ए॒व व॒-स्सोमा᳚- [व॒-स्सोमाः᳚, स॒न्ना] 32

-स्स॒न्ना अ॑स॒-न्नित्यु॑पया॒मगृ॑हीतो॒-ऽसी-त्या॑हा-दितिदेव॒त्या᳚स्तेन॒ यानि॒ हि दा॑रु॒मया॑णि॒ पात्रा᳚ण्य॒स्यै तानि॒ योने॒-स्सम्भू॑तानि॒ यानि॑ मृ॒न्मया॑नि सा॒क्षा-त्तान्य॒स्यै तस्मा॑दे॒वमा॑ह॒ वाग्वै परा॒च्य-व्या॑कृता-ऽवद॒-त्ते दे॒वा इन्द्र॑मब्रुवन्नि॒मा-न्नो॒ वाचं॒-व्याँकु॒र्विति॒ सो᳚-ऽब्रवी॒-द्वरं॑-वृँणै॒ मह्य॑-ञ्चै॒वैष वा॒यवे॑ च स॒ह गृ॑ह्याता॒ इति॒ तस्मा॑दैन्द्रवाय॒व-स्स॒ह गृ॑ह्यते॒ तामिन्द्रो॑ मद्ध्य॒तो॑-ऽव॒क्रम्य॒ व्याक॑रो॒-त्तस्मा॑दि॒यं-व्याँकृ॑ता॒ वागु॑द्यते॒ तस्मा᳚-थ्स॒कृदिन्द्रा॑य मद्ध्य॒तो गृ॑ह्यते॒ द्विर्वा॒यवे॒ द्वौ हि स वरा॒ववृ॑णीत ॥ 33 ॥

(स्व॒द॒य॒ - सोमाः᳚ - स॒हा - ष्टाविग्ं॑शतिश्च) (अ. 7)

मि॒त्र-न्दे॒वा अ॑ब्रुव॒न्-थ्सोम॒ग्ं॒ राजा॑नग्ं हना॒मेति॒ सो᳚-ऽब्रवी॒न्नाहग्ं सर्व॑स्य॒ वा अ॒ह-म्मि॒त्रम॒स्मीति॒ तम॑ब्रुव॒न्॒. हना॑मै॒वेति॒ सो᳚-ऽब्रवी॒-द्वरं॑-वृँणै॒ पय॑सै॒व मे॒ सोमग्ग्॑ श्रीण॒न्निति॒ तस्मा᳚-न्मैत्रावरु॒ण-म्पय॑सा श्रीणन्ति॒ तस्मा᳚-त्प॒शवो-ऽपा᳚क्राम-न्मि॒त्र-स्सन् क्रू॒रम॑क॒रिति॑ क्रू॒रमि॑व॒ खलु॒ वा ए॒ष [वा ए॒षः, क॒रो॒ति॒ य-स्सोमे॑न॒] 34

क॑रोति॒ य-स्सोमे॑न॒ यज॑ते॒ तस्मा᳚-त्प॒शवो-ऽप॑ क्रामन्ति॒ यन्मै᳚त्रावरु॒ण-म्पय॑सा श्री॒णाति॑ प॒शुभि॑रे॒व तन्मि॒त्रग्ं स॑म॒र्धय॑ति प॒शुभि॒र्यज॑मान-म्पु॒रा खलु॒ वावैव-म्मि॒त्रो॑-ऽवे॒दप॒ म-त्क्रू॒र-ञ्च॒क्रुषः॑ प॒शवः॑ क्रमिष्य॒न्तीति॒ तस्मा॑दे॒वम॑वृणीत॒ वरु॑ण-न्दे॒वा अ॑ब्रुव॒-न्त्वया-ऽग्ं॑श॒भुवा॒ सोम॒ग्ं॒ राजा॑नग्ं हना॒मेति॒ सो᳚-ऽब्रवी॒-द्वरं॑-वृँणै॒ मह्य॑-ञ्चै॒- [मह्य॑-ञ्च, ए॒वैष मि॒त्राय॑] 35

-वैष मि॒त्राय॑ च स॒ह गृ॑ह्याता॒ इति॒ तस्मा᳚न्मैत्रावरु॒ण-स्स॒ह गृ॑ह्यते॒ तस्मा॒-द्राज्ञा॒ राजा॑नमग्ंश॒भुवा᳚ घ्नन्ति॒ वैश्ये॑न॒ वैश्यग्ं॑ शू॒द्रेण॑ शू॒द्र-न्न वा इ॒द-न्दिवा॒ न नक्त॑मासी॒दव्या॑वृत्त॒-न्ते दे॒वा मि॒त्रावरु॑णावब्रुवन्नि॒द-न्नो॒ विवा॑सयत॒मिति॒ ताव॑ब्रूतां॒-वँरं॑-वृँणावहा॒ एक॑ ए॒वा-ऽऽव-त्पूर्वो॒ ग्रहो॑ गृह्याता॒ इति॒ तस्मा॑दैन्द्रवाय॒वः पूर्वो॑ मैत्रावरु॒णा-द्गृ॑ह्यते प्राणापा॒नौ ह्ये॑तौ यदु॑पाग्-श्वन्तर्या॒मौ मि॒त्रो-ऽह॒रज॑नय॒-द्वरु॑णो॒ रात्रि॒-न्ततो॒ वा इ॒दं-व्यौँ᳚च्छ॒द्य-न्मै᳚त्रावरु॒णो गृ॒ह्यते॒ व्यु॑ष्ट्यै ॥ 36 ॥

(ए॒ष - चै᳚ - न्द्रवाय॒वो - द्वाविग्ं॑शतिश्च) (अ. 8)

य॒ज्ञस्य॒ शिरो᳚-ऽच्छिद्यत॒ ते दे॒वा अ॒श्विना॑वब्रुव-न्भि॒षजौ॒ वै स्थ॑ इ॒दं-यँ॒ज्ञस्य॒ शिरः॒ प्रति॑ धत्त॒मिति॒ ताव॑ब्रूतां॒-वँरं॑-वृँणावहै॒ ग्रह॑ ए॒व ना॒वत्रापि॑ गृह्यता॒मिति॒ ताभ्या॑-मे॒तमा᳚श्वि॒न-म॑गृह्ण॒-न्ततो॒ वै तौ य॒ज्ञस्य॒ शिरः॒ प्रत्य॑धत्तां॒-यँदा᳚श्वि॒नो गृ॒ह्यते॑ य॒ज्ञस्य॒ निष्कृ॑त्यै॒ तौ दे॒वा अ॑ब्रुव॒न्नपू॑तौ॒ वा इ॒मौ म॑नुष्यच॒रौ [ ] 37

भि॒षजा॒विति॒ तस्मा᳚-द्ब्राह्म॒णेन॑ भेष॒ज-न्न का॒र्य॑मपू॑तो॒ ह्ये᳚(1॒)षो॑ ऽमे॒द्ध्यो यो भि॒षक्तौ ब॑हिष्पवमा॒नेन॑ पवयि॒त्वा ताभ्या॑-मे॒तमा᳚श्वि॒न-म॑गृह्ण॒-न्तस्मा᳚-द्बहिष्पवमा॒ने स्तु॒त आ᳚श्वि॒नो गृ॑ह्यते॒ तस्मा॑दे॒वं-विँ॒दुषा॑ बहिष्पवमा॒न उ॑प॒सद्यः॑ प॒वित्रं॒-वैँ ब॑हिष्पवमा॒न आ॒त्मान॑मे॒व प॑वयते॒ तयो᳚-ऽस्त्रे॒धा भैष॑ज्यं॒-विँ न्य॑दधुर॒ग्नौ तृती॑यम॒फ्सु तृती॑य-म्ब्राह्म॒णे तृती॑य॒-न्तस्मा॑दुदपा॒त्र- [तृती॑य॒-न्तस्मा॑दुदपा॒त्रम्, उ॒प॒नि॒धाय॑] 38

-मु॑पनि॒धाय॑ ब्राह्म॒ण-न्द॑क्षिण॒तो नि॒षाद्य॑ भेष॒ज-ङ्कु॑र्या॒-द्याव॑दे॒व भे॑ष॒ज-न्तेन॑ करोति स॒मर्धु॑कमस्य कृ॒त-म्भ॑वति ब्रह्मवा॒दिनो॑ वदन्ति॒ कस्मा᳚-थ्स॒त्यादेक॑पात्रा द्विदेव॒त्या॑ गृ॒ह्यन्ते᳚ द्वि॒पात्रा॑ हूयन्त॒ इति॒ यदेक॑पात्रा गृ॒ह्यन्ते॒ तस्मा॒देको᳚-ऽन्तर॒तः प्रा॒णो द्वि॒पात्रा॑ हूयन्ते॒ तस्मा॒-द्द्वौद्वौ॑ ब॒हिष्टा᳚-त्प्रा॒णाः प्रा॒णा वा ए॒ते य-द्द्वि॑देव॒त्याः᳚ प॒शव॒ इडा॒ यदिडा॒-म्पूर्वा᳚-न्द्विदेव॒त्ये᳚भ्य उप॒ह्वये॑त [ ] 39

प॒शुभिः॑ प्रा॒णान॒न्तर्द॑धीत प्र॒मायु॑क-स्स्या-द्द्विदेव॒त्या᳚-न्भक्षयि॒त्वेडा॒मुप॑ ह्वयते प्रा॒णाने॒वा-ऽऽत्म-न्धि॒त्वा प॒शूनुप॑ ह्वयते॒ वाग्वा ऐ᳚न्द्रवाय॒वश्चक्षु॑-र्मैत्रावरु॒ण-श्श्रोत्र॑माश्वि॒नः पु॒रस्ता॑दैन्द्रवाय॒व-म्भ॑क्षयति॒ तस्मा᳚-त्पु॒रस्ता᳚-द्वा॒चा व॑दति पु॒रस्ता᳚न्मैत्रावरु॒ण-न्तस्मा᳚-त्पु॒रस्ता॒च्चक्षु॑षा पश्यति स॒र्वतः॑ परि॒हार॑माश्वि॒न-न्तस्मा᳚-थ्स॒र्वत॒-श्श्रोत्रे॑ण शृणोति प्रा॒णा वा ए॒ते य-द्द्वि॑देव॒त्या॑ [य-द्द्वि॑देव॒त्याः᳚, अरि॑क्तानि॒] 40

अरि॑क्तानि॒ पात्रा॑णि सादयति॒ तस्मा॒दरि॑क्ता अन्तर॒तः प्रा॒णा यतः॒ खलु॒ वै य॒ज्ञस्य॒ वित॑तस्य॒ न क्रि॒यते॒ तदनु॑ य॒ज्ञग्ं रक्षा॒ग्॒स्यव॑ चरन्ति॒ यदरि॑क्तानि॒ पात्रा॑णि सा॒दय॑ति क्रि॒यमा॑णमे॒व त-द्य॒ज्ञस्य॑ शये॒ रक्ष॑सा॒ -मन॑न्ववचाराय॒ दक्षि॑णस्य हवि॒र्धान॒स्योत्त॑रस्यां-वँर्त॒न्याग्ं सा॑दयति वा॒च्ये॑व वाच॑-न्दधा॒त्या तृ॑तीयसव॒ना-त्परि॑ शेरे य॒ज्ञस्य॒ सन्त॑त्यै ॥ 41 ॥

(म॒नु॒ष्य॒च॒रा - वु॑दपा॒त्र - मु॑प॒ह्वये॑त - द्विदेव॒त्याः᳚ - षट्च॑त्वारिग्ंशच्च) (अ. 9)

बृह॒स्पति॑र्दे॒वाना᳚-म्पु॒रोहि॑त॒ आसी॒-च्छण्डा॒मर्का॒-वसु॑राणा॒-म्ब्रह्म॑ण् वन्तो दे॒वा आस॒-न्ब्रह्म॑ण् व॒न्तो-ऽसु॑रा॒स्ते᳚(1॒) ऽन्यो᳚-ऽन्य-न्नाश॑क्नुव-न्न॒भिभ॑वितु॒-न्ते दे॒वा-श्शण्डा॒मर्का॒-वुपा॑मन्त्रयन्त॒ ता व॑ब्रूतां॒-वँरं॑-वृँणावहै॒ ग्रहा॑वे॒व ना॒वत्रापि॑ गृह्येता॒मिति॒ ताभ्या॑मे॒तौ शु॒क्राम॒न्थिना॑-वगृह्ण॒-न्ततो॑ दे॒वा अभ॑व॒-न्परा-ऽसु॑रा॒ यस्यै॒वं-विँ॒दुषः॑ शु॒क्राम॒न्थिनौ॑ गृ॒ह्येते॒ भ॑वत्या॒त्मना॒ परा᳚- [परा᳚, अ॒स्य॒ भ्रातृ॑व्यो] 42

-ऽस्य॒ भ्रातृ॑व्यो भवति॒ तौ दे॒वा अ॑प॒नुद्या॒-ऽऽत्मन॒ इन्द्रा॑याजुहवु॒-रप॑नुत्तौ॒ शण्डा॒मर्कौ॑ स॒हामुनेति॑ ब्रूया॒द्य-न्द्वि॒ष्याद्यमे॒व द्वेष्टि॒ तेनै॑नौ स॒हाप॑ नुदते॒ स प्र॑थ॒म-स्सङ्कृ॑ति-र्वि॒श्वक॒र्मेत्ये॒वैना॑-वा॒त्मन॒ इन्द्रा॑या-जुहवु॒रिन्द्रो॒ ह्ये॑तानि॑ रू॒पाणि॒ करि॑क्र॒दच॑रद॒सौ वा आ॑दि॒त्य-श्शु॒क्रश्च॒न्द्रमा॑ म॒न्थ्य॑पि॒-गृह्य॒ प्राञ्चौ॒ नि- [प्राञ्चौ॒ निः, क्रा॒म॒त॒-स्तस्मा॒-] 43

-ष्क्रा॑मत॒-स्तस्मा॒-त्प्राञ्चौ॒ यन्तौ॒ न प॑श्यन्ति प्र॒त्यञ्चा॑वा॒वृत्य॑ जुहुत॒स्तस्मा᳚-त्प्र॒त्यञ्चौ॒ यन्तौ॑ पश्यन्ति॒ चक्षु॑षी॒ वा ए॒ते य॒ज्ञस्य॒ यच्छु॒क्राम॒न्थिनौ॒ नासि॑कोत्तरवे॒दिर॒भितः॑ परि॒क्रम्य॑ जुहुत॒स्तस्मा॑द॒भितो॒ नासि॑का॒-ञ्चक्षु॑षी॒ तस्मा॒न्नासि॑कया॒ चक्षु॑षी॒ विधृ॑ते स॒र्वतः॒ परि॑ क्रामतो॒ रक्ष॑सा॒मप॑हत्यै दे॒वा वै याः प्राची॒राहु॑ती॒रजु॑हवु॒र्ये पु॒रस्ता॒दसु॑रा॒ आस॒-न्ताग्स्ताभिः॒ प्रा- [आस॒-न्ताग्स्ताभिः॒ प्र, अ॒नु॒द॒न्त॒ याः] 44

-णु॑दन्त॒ याः प्र॒तीची॒र्ये प॒श्चादसु॑रा॒ आस॒-न्ताग्स्ताभि॒रपा॑नुदन्त॒ प्राची॑र॒न्या आहु॑तयो हू॒यन्ते᳚ प्र॒त्यञ्चौ॑ शु॒क्राम॒न्थिनौ॑ प॒श्चाच्चै॒व पु॒रस्ता᳚च्च॒ यज॑मानो॒ भ्रातृ॑व्या॒-न्प्र णु॑दते॒ तस्मा॒-त्परा॑चीः प्र॒जाः प्र वी॑यन्ते प्र॒तीची᳚र्जायन्ते शु॒क्राम॒न्थिनौ॒ वा अनु॑ प्र॒जाः प्र जा॑यन्ते॒-ऽत्त्रीश्चा॒द्या᳚श्च सु॒वीराः᳚ प्र॒जाः प्र॑ज॒नय॒-न्परी॑हि शु॒क्र-श्शु॒क्रशो॑चिषा [शु॒क्र-श्शु॒क्रशो॑चिषा, सु॒प्र॒जाः प्र॒जाः] 45

सुप्र॒जाः प्र॒जाः प्र॑ज॒नय॒-न्परी॑हि म॒न्थी म॒न्थिशो॑चि॒षेत्या॑है॒ता वै सु॒वीरा॒ या अ॒त्त्रीरे॒ता-स्सु॑प्र॒जा या आ॒द्या॑ य ए॒वं-वेँदा॒त्र्य॑स्य प्र॒जा जा॑यते॒ ना-ऽऽद्या᳚ प्र॒जाप॑ते॒रक्ष्य॑श्वय॒-त्त-त्परा॑-ऽऽपत॒-त्त-द्विक॑ङ्कत॒-म्प्रावि॑श॒-त्त-द्विक॑ङ्कते॒ नार॑मत॒ त-द्यव॒-म्प्रावि॑श॒-त्त-द्यवे॑-ऽरमत॒ त-द्यव॑स्य- [त-द्यव॑स्य, य॒व॒त्वं-यँ-द्वैक॑ङ्कत-] 46

यव॒त्वं-यँ-द्वैक॑ङ्कत-म्मन्थिपा॒त्र-म्भव॑ति॒ सक्तु॑भि-श्श्री॒णाति॑ प्र॒जाप॑तेरे॒व तच्चक्षु॒-स्स-म्भ॑रति ब्रह्मवा॒दिनो॑ वदन्ति॒ कस्मा᳚-थ्स॒त्यान्म॑न्थिपा॒त्रग्ं सदो॒ नाश्ञु॑त॒ इत्या᳚र्तपा॒त्रग्ं हीति॑ ब्रूया॒-द्यद॑श्ञुवी॒तान्धो᳚-ऽद्ध्व॒र्यु-स्स्या॒दार्ति॒मार्च्छे॒-त्तस्मा॒न्नाश्ञु॑ते ॥ 47 ॥

(आ॒त्मना॒ परा॒ - नि - ष्प्र - शु॒क्रशो॑चिषा॒ - यव॑स्य - स॒प्तत्रिग्ं॑शच्च) (अ. 10)

दे॒वा वै य-द्य॒ज्ञे-ऽकु॑र्वत॒ तदसु॑रा अकुर्वत॒ ते दे॒वा आ᳚ग्रय॒णाग्रा॒-न्ग्रहा॑नपश्य॒-न्तान॑गृह्णत॒ ततो॒ वै ते-ऽग्र॒-म्पर्या॑य॒न्॒. यस्यै॒वं-विँ॒दुष॑ आग्रय॒णाग्रा॒ ग्रहा॑ गृ॒ह्यन्ते-ऽग्र॑मे॒व स॑मा॒नाना॒-म्पर्ये॑ति रु॒ग्णव॑त्य॒र्चा भ्रातृ॑व्यवतो गृह्णीया॒-द्भ्रातृ॑व्यस्यै॒व रु॒क्त्वा-ऽग्रग्ं॑ समा॒नाना॒-म्पर्ये॑ति॒ ये दे॑वा दि॒व्येका॑दश॒ स्थेत्या॑है॒- [स्थेत्या॑ह, ए॒ताव॑ती॒र्वै] 48

-ताव॑ती॒र्वै दे॒वता॒स्ताभ्य॑ ए॒वैन॒ग्ं॒ सर्वा᳚भ्यो गृह्णात्ये॒ष ते॒ योनि॒ र्विश्वे᳚भ्यस्त्वा दे॒वेभ्य॒ इत्या॑ह वैश्वदे॒वो ह्ये॑ष दे॒वत॑या॒ वाग्वै दे॒वेभ्यो-ऽपा᳚क्राम-द्य॒ज्ञायाति॑ष्ठमाना॒ ते दे॒वा वा॒च्यप॑क्रान्ताया-न्तू॒ष्णी-ङ्ग्रहा॑नगृह्णत॒ साम॑न्यत॒ वाग॒न्तर्य॑न्ति॒ वै मेति॒ सा-ऽऽग्र॑य॒ण-म्प्रत्याग॑च्छ॒-त्तदा᳚ग्रय॒णस्या᳚-ऽऽग्रयण॒त्व- [-ऽऽग्रयण॒त्वम्, तस्मा॑दाग्रय॒णे] 49

-न्तस्मा॑दाग्रय॒णे वाग्वि सृ॑ज्यते॒ य-त्तू॒ष्णी-म्पूर्वे॒ ग्रहा॑ गृ॒ह्यन्ते॒ यथा᳚थ्सा॒रीय॑ति म॒ आख॒ इय॑ति॒ नाप॑ राथ्स्या॒-मीत्यु॑पावसृ॒जत्ये॒वमे॒व तद॑द्ध्व॒र्युरा᳚ग्रय॒ण-ङ्गृ॑ही॒त्वा य॒ज्ञमा॒रभ्य॒ वाचं॒-विँ सृ॑जते॒ त्रिर्हि-ङ्क॑रोत्युद्गा॒तॄ-ने॒व त-द्वृ॑णीते प्र॒जाप॑ति॒र्वा ए॒ष यदा᳚ग्रय॒णो यदा᳚ग्रय॒ण-ङ्गृ॑ही॒त्वा हि॑-ङ्क॒रोति॑ प्र॒जाप॑तिरे॒व [ ] 50

त-त्प्र॒जा अ॒भि जि॑घ्रति॒ तस्मा᳚-द्व॒थ्स-ञ्जा॒त-ङ्गौर॒भि जि॑घ्रत्या॒त्मा वा ए॒ष य॒ज्ञस्य॒ यदा᳚ग्रय॒ण-स्सव॑नेसवने॒-ऽभि गृ॑ह्णात्या॒त्मन्ने॒व य॒ज्ञग्ं स-न्त॑नोत्यु॒परि॑ष्टा॒दा न॑यति॒ रेत॑ ए॒व त-द्द॑धात्य॒धस्ता॒दुप॑ गृह्णाति॒ प्र ज॑नयत्ये॒व तद्ब्र॑ह्मवा॒दिनो॑ वदन्ति॒ कस्मा᳚-थ्स॒त्या-द्गा॑य॒त्री कनि॑ष्ठा॒ छन्द॑साग्ं स॒ती सर्वा॑णि॒ सव॑नानि वह॒तीत्ये॒ष वै गा॑यत्रि॒यै व॒थ्सो यदा᳚ग्रय॒णस्तमे॒व तद॑भिनि॒वर्त॒ग्ं॒ सर्वा॑णि॒ सव॑नानि वहति॒ तस्मा᳚-द्व॒थ्सम॒पाकृ॑त॒-ङ्गौर॒भि नि व॑र्तते ॥ 51 ॥

(आ॒हा॒-ऽऽ - ग्र॒य॒ण॒त्वं - प्र॒जाप॑तिरे॒वे - ति॑ - विग्ंश॒तिश्च॑) (अ. 11)

(य॒ज्ञेन॒ ता उ॑प॒यड्भि॑ - र्दे॒वा वै य॒ज्ञमाग्नी᳚ध्रे - ब्रह्मवा॒दिन॒-स्स त्वै - दे॒वस्य॒ ग्रावा॑णं - प्रा॒णो वा उ॑पा॒ग्॒श्व॑ग्रा - दे॒वा वा उ॑पा॒ग्ं॒शौ - वाग्वै - मि॒त्रं - ँय॒ज्ञस्य॒ - बृह॒स्पति॑ - र्दे॒वा वा आ᳚ग्रय॒णाग्रा॒ - नेका॑दश)

(य॒ज्ञेन॑ - लो॒के प॑शु॒मान्-थ्स्या॒थ् - सव॑न॒-म्माध्य॑न्दिनं॒ - ँवाग्वा - अरि॑क्तानि॒ - त-त्प्र॒जा - एक॑पञ्चा॒शत्)

(य॒ज्ञेन॒, नि व॑र्तते)

॥ हरिः॑ ओम् ॥

॥ कृष्ण यजुर्वेदीय तैत्तिरीय संहितायां षष्ठकाण्डे चतुर्थः प्रश्न-स्समाप्तः ॥