5.66 Sundarakanda - Shatshashtitama Sargah

ॐ

5.66 ஸுந்தரகாண்ட - ஷட்ஷஷ்டிதம ஸர்கஃ

Valmiki Tamil

ஶ்ரீமத்வால்மீகீய ராமாயணே ஸுந்தரகாண்டம் ।

அத ஷட்ஷஷ்டிதமஸ்ஸர்கஃ ।

ஏவமுக்தோ ஹநுமதா ராமோ தஶரதாத்மஜஃ ।

தம் மணிம் ஹ்ரு'தயே க்ரு'த்வா ப்ரருரோத ஸலக்ஷ்மணஃ ॥ 1 ॥

தம் து த்ரு'ஷ்ட்வா மணிஶ்ரேஷ்டம் ராகவ ஶ்ஶோககர்ஶிதஃ ।

நேத்ராப்யாமஶ்ருபூர்ணாப்யாம் ஸுக்ரீவமிதமப்ரவீத் ॥ 2 ॥

யதைவ தேநு ஸ்ஸ்ரவதி ஸ்நேஹாத்வத்ஸஸ்ய வத்ஸலா ।

ததா மமாபி ஹ்ரு'தயம் மணிரத்நஸ்ய தர்ஶநாத் ॥ 3 ॥

மணிரத்நமிதம் தத்தம் வைதேஹ்யாஶ்ஶ்வஶுரேண மே ।

வதூகாலே யதாபத்தமதிகம் மூர்த்நி ஶோபதே ॥ 4 ॥

அயம் ஹி ஜலஸம்பூதோ மணிஸ்ஸஜ்ஜநபூஜிதஃ ।

யஜ்ஞே பரமதுஷ்டேந தத்தஶ்ஶக்ரேண தீமதா ॥ 5 ॥

இமம் த்ரு'ஷ்ட்வா மணிஶ்ரேஷ்டம் யதா தாதஸ்ய தர்ஶநம் ।

அத்யாஸ்ம்யவகதஸ்ஸௌம்ய வைதேஹஸ்ய ததா விபோஃ ॥ 6 ॥

அயம் ஹி ஶோபதே தஸ்யாஃ ப்ரியாயா மூர்த்நி மே மணிஃ ।

அஸ்யாத்ய தர்ஶநே நாஹம் ப்ராப்தாம் தாமிவ சிந்தயே ॥ 7 ॥

கிமாஹ ஸீதா வைதேஹீ ப்ரூஹி ஸௌம்ய புநஃ புநஃ ।

பிபாஸுமிவ தோயேந ஸிஞ்சந்தீ வாக்யவாரிணா ॥ 8 ॥

இதஸ்து கிம் துஃகதரம் யதிமம் வாரிஸம்பவம் ।

மணிம் பஶ்யாமி ஸௌமித்ரே வைதேஹீமாகதாம் விநா ॥ 9 ॥

சிரம் ஜீவதி வைதேஹீ யதி மாஸம் தரிஷ்யதி ।

க்ஷணம் ஸௌம்ய ந ஜீவேயம் விநா தாமஸிதேக்ஷணாம் ॥ 10 ॥

நய மாமபி தம் தேஶம் யத்ர த்ரு'ஷ்டா மம ப்ரியா ।

ந திஷ்டேயம் க்ஷணமபி ப்ரவ்ரு'த்திமுபலப்ய ச ॥ 11 ॥

கதம் ஸா மம ஸுஶ்ரோணீ பீருபீரு ஸ்ஸதீ ஸதா ।

பயாவஹாநாம் கோராணாம் மத்யே திஷ்டதி ரக்ஷஸாம் ॥ 12 ॥

ஶாரத ஸ்திமிரோந்முக்தோ நூநம் சந்த்ரம் இவாம்புதைஃ ।

ஆவ்ரு'தம் வதநம் தஸ்யா ந விராஜதி ராக்ஷஸைஃ ॥ 13 ॥

கிமாஹ ஸீதா ஹநுமம்ஸ்தத்த்வதஃ கதயாத்ய மே ।

ஏதேந கலு ஜீவிஷ்யே பேஷஜேநாதுரோ யதா ॥ 14 ॥

மதுரா மதுராலாபா கிமாஹ மம பாமிநீ ।

மத்விஹீநா வராரோஹா ஹநுமந் கதயஸ்வ மே ॥ 15 ॥

இத்யார்ஷே ஶ்ரீமத்ராமாயணே வால்மீகீய ஆதிகாவ்யே ஸுந்தரகாண்டே ஷட்ஷஷ்டிதமஸ்ஸர்கஃ ॥

Roman (IAST) Transliteration

śrīmadvālmīkīya rāmāyaṇe sundarakāṇḍam |

atha ṣaṭṣaṣṭitamassargaḥ |

evamukto hanumatā rāmo daśarathātmajaḥ |

taṃ maṇiṃ hṛdaye kṛtvā praruroda salakṣmaṇaḥ || 1 ||

taṃ tu dṛṣṭvā maṇiśreṣṭhaṃ rāghava śśokakarśitaḥ |

netrābhyāmaśrupūrṇābhyāṃ sugrīvamidamabravīt || 2 ||

yathaiva dhenu ssravati snehādvatsasya vatsalā |

tathā mamāpi hṛdayaṃ maṇiratnasya darśanāt || 3 ||

maṇiratnamidaṃ dattaṃ vaidehyāśśvaśureṇa me |

vadhūkāle yathābaddhamadhikaṃ mūrdhni śobhate || 4 ||

ayaṃ hi jalasambhūto maṇissajjanapūjitaḥ |

yajñe paramatuṣṭena dattaśśakreṇa dhīmatā || 5 ||

imaṃ dṛṣṭvā maṇiśreṣṭhaṃ yathā tātasya darśanam |

adyāsmyavagatassaumya vaidehasya tathā vibhoḥ || 6 ||

ayaṃ hi śobhate tasyāḥ priyāyā mūrdhni me maṇiḥ |

asyādya darśane nāhaṃ prāptāṃ tāmiva cintaye || 7 ||

kimāha sītā vaidehī brūhi saumya punaḥ punaḥ |

pipāsumiva toyena siñcantī vākyavāriṇā || 8 ||

itastu kiṃ duḥkhataraṃ yadimaṃ vārisambhavam |

maṇiṃ paśyāmi saumitre vaidehīmāgatāṃ vinā || 9 ||

ciraṃ jīvati vaidehī yadi māsaṃ dhariṣyati |

kṣaṇaṃ saumya na jīveyaṃ vinā tāmasitekṣaṇām || 10 ||

naya māmapi taṃ deśaṃ yatra dṛṣṭā mama priyā |

na tiṣṭheyaṃ kṣaṇamapi pravṛttimupalabhya ca || 11 ||

kathaṃ sā mama suśroṇī bhīrubhīru ssatī sadā |

bhayāvahānāṃ ghorāṇāṃ madhye tiṣṭhati rakṣasām || 12 ||

śārada stimironmukto nūnaṃ candraṃ ivāmbudhaiḥ |

āvṛtaṃ vadanaṃ tasyā na virājati rākṣasaiḥ || 13 ||

kimāha sītā hanumaṃstattvataḥ kathayādya me |

etena khalu jīviṣye bheṣajenāturo yathā || 14 ||

madhurā madhurālāpā kimāha mama bhāminī |

madvihīnā varārohā hanuman kathayasva me || 15 ||

ityārṣe śrīmadrāmāyaṇe vālmīkīya ādikāvye sundarakāṇḍe ṣaṭṣaṣṭitamassargaḥ ||