5.50 Sundarakanda - Panchasha Sargah

ॐ

5.50 ஸுந்தரகாண்ட - பஞ்சாஶ ஸர்கஃ

Valmiki Tamil

ஶ்ரீமத்வால்மீகீய ராமாயணே ஸுந்தரகாண்டம் ।

அத பஞ்சாஶஸ்ஸர்கஃ ।

தமுத்வீக்ஷ்ய மஹாபாஹுஃ பிங்காக்ஷம் புரத ஸ்திதம் ।

கோபேந மஹதாऽவிஷ்டோ ராவணோ லோகராவணஃ ॥ 1 ॥

ஶங்காஹ்ரு'தாத்மா தத்யௌ ஸ கபீந்த்ரம் தேஜஸாவ்ரு'தம் ।

கிமேஷ பகவாந்நந்தீ பவேத்ஸாக்ஷாதிஹாகதஃ ॥ 2 ॥

யேந ஶப்தோऽஸ்மி கைலாஸே மயா ஸஞ்சாலிதே புரா ।

ஸோऽயம் வாநரமூர்திஸ்ஸ்யாத்கிம்ஸ்வித்பாணோ மஹாऽஸுரஃ ॥ 3 ॥

ஸ ராஜா ரோஷதாம்ராக்ஷஃ ப்ரஹஸ்தம் மந்த்ரிஸத்தமம் ।

காலயுக்தமுவாசேதம் வசோऽவிபுலமர்தவத் ॥ 4 ॥

துராத்மா ப்ரு'ச்ச்யதாமேஷ குதஃ கிம் வாத்ர காரணம் ।

வநபங்கே ச கோऽஸ்யார்தோ ராக்ஷஸீநாம் ச தர்ஜநே ॥ 5 ॥

மத்புரீமப்ரத்ரு'ஷ்யாம் வாऽகமநே கிம் ப்ரயோஜநம் ।

ஆயோதநே வா கிம் கார்யம் ப்ரு'ச்சயதாமேஷ துர்மதிஃ ॥ 6 ॥

ராவணஸ்ய வசஶ்ஶ்ருத்வா ப்ரஹஸ்தோ வாக்யமப்ரவீத் ।

ஸமாஶ்வஸிஹி பத்ரம் தே ந பீஃ கார்யா த்வயா கபே ॥ 7 ॥

யதி தாவத்த்வமிந்த்ரேண ப்ரேஷிதோ ராவணாலயம் ।

தத்த்வமாக்யாஹி மா பூத்தே பயம் வாநர மோக்ஷ்யஸே ॥ 8 ॥

யதி வைஶ்ரவணஸ்ய த்வம் யமஸ்ய வருணஸ்ய ச ।

சாரரூபமிதம் க்ரு'த்வா ப்ரவிஷ்டோ நஃ புரீமிமாம் ॥ 9 ॥

விஷ்ணுநா ப்ரேஷிதோ வாऽபி தூதோ விஜயகாங்க்ஷிணா ।

ந ஹி தே வாநரம் தேஜோ ரூபமாத்ரம் து வாநரம் ॥ 10 ॥

தத்த்வதஃ கதயஸ்வாத்ய ததோ வாநர மோக்ஷ்யஸே ।

அந்ரு'தம் வததஶ்சாபி துர்லபம் தவ ஜீவிதம் ॥ 11 ॥

அதவா யந்நிமித்தஸ்தே ப்ரவேஶோ ராவணாலயே ।

ஏவமுக்தோ ஹரிஶ்ரேஷ்டஸ்ததா ரக்ஷோகணேஶ்வரம் ॥ 12 ॥

அப்ரவீந்நாஸ்மி ஶக்ரஸ்ய யமஸ்ய வருணஸ்ய வா ।

தநதேந ந மே ஸக்யம் விஷ்ணுநா நாஸ்மி சோதிதஃ ॥ 13 ॥

ஜாதிரேவ மம த்வேஷா வாநரோऽஹமிஹாகதஃ ।

தர்ஶநே ராக்ஷஸேந்த்ரஸ்ய துர்லபே ததிதம் மயா ॥ 14 ॥

வநம் ராக்ஷஸராஜஸ்ய தர்ஶநார்தே விநாஶிதம் ।

ததஸ்தே ராக்ஷஸாஃ ப்ராப்தா பலிநோ யுத்தகாங்க்ஷிணஃ ।

ரக்ஷணார்தம் து தேஹஸ்ய ப்ரதியுத்தா மயா ரணே ॥ 15 ॥

அஸ்த்ரபாஶைர்ந ஶக்யோऽஹம் பத்தும் தேவாஸுரைரபி ॥ 16 ॥

பிதாமஹாதேஷ வரோ மாமாப்யேஷோऽப்யுபாகதஃ ।

ராஜாநம் த்ரஷ்டுகாமேந மயாஸ்த்ரமநுவர்திதம் ॥ 17 ॥

விமுக்தோ ஹ்யஹமஸ்த்ரேண ராக்ஷஸைஸ்த்வபிபீடிதஃ ।

கேநசித்ராஜகார்யேண ஸம்ப்ராப்தோऽஸ்மி தவாந்திகம் ॥ 18 ॥

தூதோऽஹமிதி விஜ்ஞேயோ ராகவஸ்யாமிதௌஜஸஃ ।

ஶ்ரூயதாம் சாபி வசநம் மம பத்யமிதம் ப்ரபோ ॥ 19 ॥

இத்யார்ஷே ஶ்ரீமத்ராமாயணே வால்மீகீய ஆதிகாவ்யே ஸுந்தரகாண்டே பஞ்சாஶஸ்ஸர்கஃ ॥

Roman (IAST) Transliteration

śrīmadvālmīkīya rāmāyaṇe sundarakāṇḍam |

atha pañcāśassargaḥ |

tamudvīkṣya mahābāhuḥ piṅgākṣaṃ purata sthitam |

kopena mahatā'viṣṭo rāvaṇo lokarāvaṇaḥ || 1 ||

śaṅkāhṛtātmā dadhyau sa kapīndraṃ tejasāvṛtam |

kimeṣa bhagavānnandī bhavetsākṣādihāgataḥ || 2 ||

yena śapto'smi kailāse mayā sañcālite purā |

so'yaṃ vānaramūrtissyātkiṃsvidbāṇo mahā'suraḥ || 3 ||

sa rājā roṣatāmrākṣaḥ prahastaṃ mantrisattamam |

kālayuktamuvācedaṃ vaco'vipulamarthavat || 4 ||

durātmā pṛcchyatāmeṣa kutaḥ kiṃ vātra kāraṇam |

vanabhaṅge ca ko'syārtho rākṣasīnāṃ ca tarjane || 5 ||

matpurīmapradhṛṣyāṃ vā'gamane kiṃ prayojanam |

āyodhane vā kiṃ kāryaṃ pṛcchayatāmeṣa durmatiḥ || 6 ||

rāvaṇasya vacaśśrutvā prahasto vākyamabravīt |

samāśvasihi bhadraṃ te na bhīḥ kāryā tvayā kape || 7 ||

yadi tāvattvamindreṇa preṣito rāvaṇālayam |

tattvamākhyāhi mā bhūtte bhayaṃ vānara mokṣyase || 8 ||

yadi vaiśravaṇasya tvaṃ yamasya varuṇasya ca |

cārarūpamidaṃ kṛtvā praviṣṭo naḥ purīmimām || 9 ||

viṣṇunā preṣito vā'pi dūto vijayakāṅkṣiṇā |

na hi te vānaraṃ tejo rūpamātraṃ tu vānaram || 10 ||

tattvataḥ kathayasvādya tato vānara mokṣyase |

anṛtaṃ vadataścāpi durlabhaṃ tava jīvitam || 11 ||

athavā yannimittaste praveśo rāvaṇālaye |

evamukto hariśreṣṭhastadā rakṣogaṇeśvaram || 12 ||

abravīnnāsmi śakrasya yamasya varuṇasya vā |

dhanadena na me sakhyaṃ viṣṇunā nāsmi coditaḥ || 13 ||

jātireva mama tveṣā vānaro'hamihāgataḥ |

darśane rākṣasendrasya durlabhe tadidaṃ mayā || 14 ||

vanaṃ rākṣasarājasya darśanārthe vināśitam |

tataste rākṣasāḥ prāptā balino yuddhakāṅkṣiṇaḥ |

rakṣaṇārthaṃ tu dehasya pratiyuddhā mayā raṇe || 15 ||

astrapāśairna śakyo'haṃ baddhuṃ devāsurairapi || 16 ||

pitāmahādeṣa varo māmāpyeṣo'bhyupāgataḥ |

rājānaṃ draṣṭukāmena mayāstramanuvartitam || 17 ||

vimukto hyahamastreṇa rākṣasaistvabhipīḍitaḥ |

kenacidrājakāryeṇa samprāpto'smi tavāntikam || 18 ||

dūto'hamiti vijñeyo rāghavasyāmitaujasaḥ |

śrūyatāṃ cāpi vacanaṃ mama pathyamidaṃ prabho || 19 ||

ityārṣe śrīmadrāmāyaṇe vālmīkīya ādikāvye sundarakāṇḍe pañcāśassargaḥ ||