5.45 Sundarakanda - Panchachatvarimsha Sargah

ॐ

5.45 ஸுந்தரகாண்ட - பஞ்சசத்வாரிம்ஶ ஸர்கஃ

Valmiki Tamil

ஶ்ரீமத்வால்மீகீய ராமாயணே ஸுந்தரகாண்டம் ।

அத பஞ்சசத்வாரிம்ஶஸ்ஸர்கஃ ।

ததஸ்தே ராக்ஷஸேந்த்ரேண சோதிதா மந்த்ரிணஸ்ஸுதாஃ ।

நிர்யயுர்பவநாத்தஸ்மாத்ஸப்தஸப்தார்சிவர்சஸஃ ॥ 1 ॥

மஹாபலபரீவாரா தநுஷ்மந்தோ மஹாபலாஃ ।

க்ரு'தாஸ்த்ராஸ்த்ரவிதாம் ஶ்ரேஷ்டாஃ பரஸ்பரஜயைஷிணஃ ॥ 2 ॥

ஹேமஜாலபரிக்ஷிப்தைர்த்வஜவத்பிஃ பதாகிபிஃ ।

தோயதஸ்வநநிர்கோஷைர்வாஜியுக்தைர்மஹாரதைஃ ॥ 3 ॥

தப்தகாஞ்சநசித்ராணி சாபாந்யமிதவிக்ரமாஃ ।

விஸ்பாரயந்தஸ்ஸம்ஹ்ரு'ஷ்டாஸ்தடித்வந்த இவாம்புதாஃ ॥ 4 ॥

ஜநந்யஸ்து ததஸ்தேஷாம் விதித்வா கிங்கராந்ஹதாந் ।

பபூவுஶ்ஶோகஸம்ப்ராந்தாஸ்ஸபாந்தவஸுஹ்ரு'ஜ்ஜநாஃ ॥ 5 ॥

தே பரஸ்பரஸங்கர்ஷாத்தப்தகாஞ்சநபூஷணாஃ ।

அபிபேதுர்ஹநூமந்தம் தோரணஸ்தமவஸ்திதம் ॥ 6 ॥

ஸ்ரு'ஜந்தோ பாணவ்ரு'ஷ்டிம் தே ரதகர்ஜிதநிஸ்ஸ்வநாஃ ।

வ்ரு'ஷ்டிமந்த இவாம்போதா விசேருர்நைரு'தாம்புதாஃ ॥ 7 ॥

அவகீர்ணஸ்ததஸ்தாபிர்ஹநுமாந்ஶரவ்ரு'ஷ்டிபிஃ ।

அபவத்ஸம்வ்ரு'தாகாரஶ்ஶைலராடிவ வ்ரு'ஷ்டிபிஃ ॥ 8 ॥

ஸ ஶராந்மோகயாமாஸ தேஷாமாஶுசரஃ கபிஃ ।

ரதவேகம் ச வீராணாம் விசரந்விமலேऽம்பரே ॥ 9 ॥

ஸ தைஃ க்ரீடந்தநுஷ்மத்பிர்வ்யோம்நி வீரஃ ப்ரகாஶதே ।

தநுஷ்மத்பிர்யதா மேகைர்மாருதஃ ப்ரபுரம்பரே ॥ 10 ॥

ஸ க்ரு'த்வா நிநதம் கோரம் த்ராஸயம்ஸ்தாம் மஹாசமூம் ।

சகார ஹநுமாந்வேகம் தேஷு ரக்ஷஸ்ஸு வீர்யவாந் ॥ 11 ॥

தலேநாப்யஹநத்காம்ஶ்சித்பாதைஃ காம்ஶ்சித்பரந்தபஃ ।

முஷ்டிநாப்யஹநத்காம்ஶ்சிந்நகைஃ காம்ஶ்சித்வ்யதாரயத் ॥ 12 ॥

ப்ரமமாதோரஸா காம்ஶ்சிதூருப்யாமபராந்கபிஃ ।

கேசித்தஸ்ய நிநாதேந தத்ரைவ பதிதா புவி ॥ 13 ॥

ததஸ்தேஷ்வவஸந்நேஷு பூமௌ நிபதிதேஷு ச ।

தத்ஸைந்யமகமத்ஸர்வம் திஶோதஶ பயார்திதம் ॥ 14 ॥

விநேதுர்விஸ்வரம் நாகா நிபேதுர்புவி வாஜிநஃ ।

பக்நநீடத்வஜச்சத்ரைர்பூஶ்ச கீர்ணாऽபவத்ரதைஃ ॥ 15 ॥

ஸ்ரவதா ருதிரேணாத ஸ்ரவந்த்யோ தர்ஶிதாஃ பதி ।

விவிதைஶ்ச ஸ்வரைர்லங்கா நநாத விக்ரு'தம் ததா ॥ 16 ॥

ஸ தாந்ப்ரவ்ரு'த்தாந்விநிஹத்ய ராக்ஷஸாந் மஹாபலஶ்சண்டபராக்ரமஃ கபிஃ ।

யுயுத்ஸுரந்யைஃ புநரேவ ராக்ஷஸை ஸ்தமேவ வீரோऽபிஜகாம தோரணம் ॥ 17 ॥

இத்யார்ஷே ஶ்ரீமத்ராமாயணே வால்மீகீய ஆதிகாவ்யே ஸுந்தரகாண்டே பஞ்சசத்வாரிம்ஶஸ்ஸர்கஃ ॥

Roman (IAST) Transliteration

śrīmadvālmīkīya rāmāyaṇe sundarakāṇḍam |

atha pañcacatvāriṃśassargaḥ |

tataste rākṣasendreṇa coditā mantriṇassutāḥ |

niryayurbhavanāttasmātsaptasaptārcivarcasaḥ || 1 ||

mahābalaparīvārā dhanuṣmanto mahābalāḥ |

kṛtāstrāstravidāṃ śreṣṭhāḥ parasparajayaiṣiṇaḥ || 2 ||

hemajālaparikṣiptairdhvajavadbhiḥ patākibhiḥ |

toyadasvananirghoṣairvājiyuktairmahārathaiḥ || 3 ||

taptakāñcanacitrāṇi cāpānyamitavikramāḥ |

visphārayantassaṃhṛṣṭāstaṭitvanta ivāmbudāḥ || 4 ||

jananyastu tatasteṣāṃ viditvā kiṅkarānhatān |

babhūvuśśokasambhrāntāssabāndhavasuhṛjjanāḥ || 5 ||

te parasparasaṅgharṣāttaptakāñcanabhūṣaṇāḥ |

abhipeturhanūmantaṃ toraṇasthamavasthitam || 6 ||

sṛjanto bāṇavṛṣṭiṃ te rathagarjitanissvanāḥ |

vṛṣṭimanta ivāmbhodā vicerurnaiṛtāmbudāḥ || 7 ||

avakīrṇastatastābhirhanumānśaravṛṣṭibhiḥ |

abhavatsaṃvṛtākāraśśailarāḍiva vṛṣṭibhiḥ || 8 ||

sa śarānmoghayāmāsa teṣāmāśucaraḥ kapiḥ |

rathavegaṃ ca vīrāṇāṃ vicaranvimale'mbare || 9 ||

sa taiḥ krīḍandhanuṣmadbhirvyomni vīraḥ prakāśate |

dhanuṣmadbhiryathā meghairmārutaḥ prabhurambare || 10 ||

sa kṛtvā ninadaṃ ghoraṃ trāsayaṃstāṃ mahācamūm |

cakāra hanumānvegaṃ teṣu rakṣassu vīryavān || 11 ||

talenābhyahanatkāṃścitpādaiḥ kāṃścitparantapaḥ |

muṣṭinābhyahanatkāṃścinnakhaiḥ kāṃścidvyadārayat || 12 ||

pramamāthorasā kāṃścidūrubhyāmaparānkapiḥ |

kecittasya ninādena tatraiva patitā bhuvi || 13 ||

tatasteṣvavasanneṣu bhūmau nipatiteṣu ca |

tatsainyamagamatsarvaṃ diśodaśa bhayārditam || 14 ||

vinedurvisvaraṃ nāgā nipeturbhuvi vājinaḥ |

bhagnanīḍadhvajacchatrairbhūśca kīrṇā'bhavadrathaiḥ || 15 ||

sravatā rudhireṇātha sravantyo darśitāḥ pathi |

vividhaiśca svarairlaṅkā nanāda vikṛtaṃ tadā || 16 ||

sa tānpravṛddhānvinihatya rākṣasān mahābalaścaṇḍaparākramaḥ kapiḥ |

yuyutsuranyaiḥ punareva rākṣasai stameva vīro'bhijagāma toraṇam || 17 ||

ityārṣe śrīmadrāmāyaṇe vālmīkīya ādikāvye sundarakāṇḍe pañcacatvāriṃśassargaḥ ||