5.41 Sundarakanda - Ekachatvarimsha Sargah

ॐ

5.41 ஸுந்தரகாண்ட - ஏகசத்வாரிம்ஶ ஸர்கஃ

Valmiki Tamil

ஶ்ரீமத்வால்மீகீய ராமாயணே ஸுந்தரகாண்டம் ।

அத ஏகசத்வாரிம்ஶஸ்ஸர்கஃ ।

ஸ ச வாக்பிஃ ப்ரஶஸ்தாபிர்கமிஷ்யந்பூஜிதஸ்தயா ।

தஸ்மாத்தேஶாதபக்ரம்ய சிந்தயாமாஸ வாநரஃ ॥ 1 ॥

அல்பஶேஷமிதம் கார்யம் த்ரு'ஷ்டேயமஸிதேக்ஷணா ।

த்ரீநுபாயாநதிக்ரம்ய சதுர்தஃ இஹ வித்யதே ॥ 2 ॥

ந ஸாம ரக்ஷஸ்ஸு குணாய கல்பதே ந தாநமர்தோபசிதேஷு யுஜ்யதே ।

ந பேதஸாத்யா பலதர்பிதா ஜநாஃ பராக்ரமஸ்த்வேவ மமேஹ ரோசதே ॥ 3 ॥

ந சாஸ்ய கார்யஸ்ய பராக்ரமாத்ரு'தே விநிஶ்சயஃ கஶ்சிதிஹோபபத்யதே ।

ஹதப்ரவீரா ஹி ரணே ஹி ராக்ஷஸாஃ கதஞ்சிதீயுர்யதிஹாத்ய மார்தவம் ॥ 4 ॥

கார்யே கர்மணி நிர்திஷ்டே யோ பஹூந்யபி ஸாதயேத் ।

பூர்வகார்யாவிரோதேந ஸ கார்யம் கர்துமர்ஹதி ॥ 5 ॥

ந ஹ்யேகஸ்ஸாதகோ ஹேதுஸ்ஸ்வல்பஸ்யாபீஹ கர்மணஃ ।

யோ ஹ்யர்தம் பஹுதா வேத ஸ ஸமர்தோऽர்தஸாதநே ॥ 6 ॥

இஹைவ தாவத்க்ரு'தநிஶ்சயோ ஹ்யஹம் யதி வ்ரஜேயம் ப்லவகேஶ்வராலயம் ।

பராத்மஸம்மர்தவிஶேஷதத்த்வவித்ததஃ க்ரு'தம் ஸ்யாந்மம பர்த்ரு'ஶாஸநம் ॥ 7 ॥

கதம் நு கல்வத்ய பவேத்ஸுகாகதம் ப்ரஸஹ்ய யுத்தம் மம ராக்ஷஸைஃ ஸஹ ।

ததைவ கல்வாத்மபலம் ச ஸாரவத்ஸம்மாநயேந்மாம் ச ரணே தஶாநநஃ ॥ 8 ॥

ததஸ்ஸமாஸாத்ய ரணே தஶாநநம் ஸமந்த்ரிவர்கம் ஸபலப்ரயாயிநம் ।

ஹ்ரு'தி ஸ்திதம் தஸ்ய மதம் பலம் ச வை ஸுகேந மத்த்வாऽஹமிதஃ புநர்வ்ரஜே ॥ 9 ॥

இதமஸ்ய ந்ரு'ஶம்ஸஸ்ய நந்தநோபமமுத்தமம் ।

வநம் நேத்ரமநஃகாந்தம் நாநாத்ருமலதாயுதம் ॥ 10 ॥

இதம் வித்வம்ஸயிஷ்யாமி ஶுஷ்கம் வநமிவாநலஃ ।

அஸ்மிந்பக்நே ததஃ கோபம் கரிஷ்யதி தஶாநநஃ ॥ 11 ॥

ததோ மஹத்ஸாஶ்வமஹாரதத்விபம் பலம் ஸமாதேக்ஷ்யதி ராக்ஷஸாதிபஃ ।

த்ரிஶூலகாலாயஸபட்டிஸாயுதம் ததோ மஹத்யுத்தமிதம் பவிஷ்யதி ॥ 12 ॥

அஹம் து தைஃ ஸம்யதி சண்டவிக்ரமை ஸ்ஸமேத்ய ரக்ஷோபிரஸஹ்ய விக்ரமஃ ।

நிஹத்ய தத்ராவணசோதிதம் பலம் ஸுகம் கமிஷ்யாமி கபீஶ்வராலயம் ॥ 13 ॥

ததோ மாருதவத்க்ரு'த்தோ மாருதிர்பீமவிக்ரமஃ ।

ஊருவேகேந மஹதா த்ருமாந்க்ஷேப்துமதாரபத் ॥ 14 ॥

ததஸ்து ஹநுமாந்வீரோ பபஞ்ஜ ப்ரமதாவநம் ।

மத்தத்விஜஸமாகுஷ்டம் நாநாத்ருமலதாயுதம் ॥ 15 ॥

தத்வநம் மதிதைர்வ்ரு'க்ஷைர்பிந்நைஶ்ச ஸலிலாஶயைஃ ।

சூர்ணிதைஃ பர்வதாக்ரைஶ்ச பபூவாப்ரியதர்ஶநம் ॥ 16 ॥

நாநாஶகுந்தவிருதைஃ ப்ரபிந்நைஸ்ஸலிலாஶயைஃ ।

தாம்ரைஃ கிஸலயைஃ க்லாந்தைஃ க்லாந்தத்ருமலதாயுதம் ॥ 17 ॥

ந பபௌ தத்வநம் தத்ர தாவாநலஹதம் யதா ।

வ்யாகுலாவரணா ரேஜுர்விஹ்வலா இவ தா லதாஃ ॥ 18 ॥

லதாக்ரு'ஹைஶ்சித்ரக்ரு'ஹைஶ்ச நாஶிதைர்மஹோரகைர்வ்யாலம்ரு'கைஶ்ச நிர்துதைஃ ।

ஶிலாக்ரு'ஹைருந்மதிதைஸ்ததா க்ரு'ஹைஃ ப்ரணஷ்டரூபம் ததபூந்மஹத்வநம் ॥ 19 ॥

ஸா விஹ்வலாऽஶோகலதாப்ரதாநா வநஸ்தலீ ஶோகலதாப்ரதாநா ।

ஜாதா தஶாஸ்யப்ரமதாவநஸ்ய கபேர்பலாத்தி ப்ரமதாவநஸ்ய ॥ 20 ॥

ஸ தஸ்ய க்ரு'த்வார்தபதேர்மஹாகபிர்மஹத்வ்யலீகம் மநஸோ மஹாத்மநஃ ।

யுயுத்ஸுரேகோ பஹுபிர்மஹாபலைஶ்ஶியா ஜ்வலம்ஸ்தோரணமாஸ்திதஃ கபிஃ ॥ 21 ॥

இத்யார்ஷே ஶ்ரீமத்ராமாயணே வால்மீகீய ஆதிகாவ்யே ஸுந்தரகாண்டே ஏகசத்வாரிம்ஶஸ்ஸர்கஃ ॥

Roman (IAST) Transliteration

śrīmadvālmīkīya rāmāyaṇe sundarakāṇḍam |

atha ekacatvāriṃśassargaḥ |

sa ca vāgbhiḥ praśastābhirgamiṣyanpūjitastayā |

tasmāddeśādapakramya cintayāmāsa vānaraḥ || 1 ||

alpaśeṣamidaṃ kāryaṃ dṛṣṭeyamasitekṣaṇā |

trīnupāyānatikramya caturthaḥ iha vidyate || 2 ||

na sāma rakṣassu guṇāya kalpate na dānamarthopaciteṣu yujyate |

na bhedasādhyā baladarpitā janāḥ parākramastveva mameha rocate || 3 ||

na cāsya kāryasya parākramādṛte viniścayaḥ kaścidihopapadyate |

hatapravīrā hi raṇe hi rākṣasāḥ kathañcidīyuryadihādya mārdavam || 4 ||

kārye karmaṇi nirdiṣṭe yo bahūnyapi sādhayet |

pūrvakāryāvirodhena sa kāryaṃ kartumarhati || 5 ||

na hyekassādhako hetussvalpasyāpīha karmaṇaḥ |

yo hyarthaṃ bahudhā veda sa samartho'rthasādhane || 6 ||

ihaiva tāvatkṛtaniścayo hyahaṃ yadi vrajeyaṃ plavageśvarālayam |

parātmasammardaviśeṣatattvavittataḥ kṛtaṃ syānmama bhartṛśāsanam || 7 ||

kathaṃ nu khalvadya bhavetsukhāgataṃ prasahya yuddhaṃ mama rākṣasaiḥ saha |

tathaiva khalvātmabalaṃ ca sāravatsammānayenmāṃ ca raṇe daśānanaḥ || 8 ||

tatassamāsādya raṇe daśānanaṃ samantrivargaṃ sabalaprayāyinam |

hṛdi sthitaṃ tasya mataṃ balaṃ ca vai sukhena mattvā'hamitaḥ punarvraje || 9 ||

idamasya nṛśaṃsasya nandanopamamuttamam |

vanaṃ netramanaḥkāntaṃ nānādrumalatāyutam || 10 ||

idaṃ vidhvaṃsayiṣyāmi śuṣkaṃ vanamivānalaḥ |

asminbhagne tataḥ kopaṃ kariṣyati daśānanaḥ || 11 ||

tato mahatsāśvamahārathadvipaṃ balaṃ samādekṣyati rākṣasādhipaḥ |

triśūlakālāyasapaṭṭisāyudhaṃ tato mahadyuddhamidaṃ bhaviṣyati || 12 ||

ahaṃ tu taiḥ saṃyati caṇḍavikramai ssametya rakṣobhirasahya vikramaḥ |

nihatya tadrāvaṇacoditaṃ balaṃ sukhaṃ gamiṣyāmi kapīśvarālayam || 13 ||

tato mārutavatkṛddho mārutirbhīmavikramaḥ |

ūruvegena mahatā drumānkṣeptumathārabhat || 14 ||

tatastu hanumānvīro babhañja pramadāvanam |

mattadvijasamāghuṣṭaṃ nānādrumalatāyutam || 15 ||

tadvanaṃ mathitairvṛkṣairbhinnaiśca salilāśayaiḥ |

cūrṇitaiḥ parvatāgraiśca babhūvāpriyadarśanam || 16 ||

nānāśakuntavirutaiḥ prabhinnaissalilāśayaiḥ |

tāmraiḥ kisalayaiḥ klāntaiḥ klāntadrumalatāyutam || 17 ||

na babhau tadvanaṃ tatra dāvānalahataṃ yathā |

vyākulāvaraṇā rejurvihvalā iva tā latāḥ || 18 ||

latāgṛhaiścitragṛhaiśca nāśitairmahoragairvyālamṛgaiśca nirdhutaiḥ |

śilāgṛhairunmathitaistathā gṛhaiḥ praṇaṣṭarūpaṃ tadabhūnmahadvanam || 19 ||

sā vihvalā'śokalatāpratānā vanasthalī śokalatāpratānā |

jātā daśāsyapramadāvanasya kaperbalāddhi pramadāvanasya || 20 ||

sa tasya kṛtvārthapatermahākapirmahadvyalīkaṃ manaso mahātmanaḥ |

yuyutsureko bahubhirmahābalaiśśiyā jvalaṃstoraṇamāsthitaḥ kapiḥ || 21 ||

ityārṣe śrīmadrāmāyaṇe vālmīkīya ādikāvye sundarakāṇḍe ekacatvāriṃśassargaḥ ||