5.30 Sundarakanda - Trimsha Sargah

ॐ

5.30 ஸுந்தரகாண்ட - த்ரிம்ஶ ஸர்கஃ

Valmiki Tamil

ஶ்ரீமத்வால்மீகீய ராமாயணே ஸுந்தரகாண்டம் ।

அத த்ரிம்ஶஸ்ஸர்கஃ ।

ஹநுமாநபி விக்ராந்தஃ ஸர்வம் ஶுஶ்ராவ தத்த்வதஃ ।

ஸீதாயாஸ்த்ரிஜடாயாஶ்ச ராக்ஷஸீநாம் ச தர்ஜநம் ॥ 1 ॥

அவேக்ஷமாணஸ்தாம் தேவீம் தேவதாமிவ நந்தநே ।

ததோ பஹுவிதாம் சிந்தாம் சிந்தயாமாஸ வாநரஃ ॥ 2 ॥

யாம் கபீநாம் ஸஹஸ்ராணி ஸுபஹூந்யயுதாநி ச ।

திக்ஷு ஸர்வாஸு மார்கந்தே ஸேயமாஸாதிதா மயா ॥ 3 ॥

சாரேண து ஸுயுக்தேந ஶத்ரோஶ்ஶக்திமவேக்ஷதா ।

கூடேந சரதா தாவதவேக்ஷிதமிதம் மயா ॥ 4 ॥

ராக்ஷஸாநாம் விஶேஷஶ்ச புரீ சேயமவேக்ஷிதா ।

ராக்ஷஸாதிபதேரஸ்ய ப்ரபாவோ ராவணஸ்ய ச ॥ 5 ॥

யுக்தம் தஸ்யாப்ரமேயஸ்ய ஸர்வஸத்த்வதயாவதஃ ।

ஸமாஶ்வாஸயிதும் பார்யாம் பதிதர்ஶநகாங்க்ஷிணீம் ॥ 6 ॥

அஹமாஶ்வாஸயாம்யேநாம் பூர்ணசந்த்ரநிபாநநாம் ।

அத்ரு'ஷ்டதுஃகாம் துஃகார்தாம் துஃகஸ்யாந்தமகச்சதீம் ॥ 7 ॥

யத்யப்யஹமிமாம் தேவீம் ஶோகோபஹதசேதநாம் ।

அநாஶ்வாஸ்ய கமிஷ்யாமி தோஷவத்கமநம் பவேத் ॥ 8 ॥

கதே ஹி மயி தத்ரேயம் ராஜபுத்ரீ யஶஸ்விநீ ।

பரித்ராணமவிந்தந்தீ ஜாநகீ ஜீவிதம் த்யஜேத் ॥ 9 ॥

மயா ச ஸ மஹாபாஹுஃ பூர்ணசந்த்ரநிபாநநஃ ।

ஸமாஶ்யாஸயிதும் ந்யாய்யஸ்ஸீதாதர்ஶநலாலஸஃ ॥ 10 ॥

நிஶாசரீணாம் ப்ரத்யக்ஷமநர்ஹம் சாபிபாஷிதம் ।

கதந்நு கலு கர்தவ்யமிதம் க்ரு'ச்ச்ரகதோ ஹ்யஹம் ॥ 11 ॥

அநேந ராத்ரிஶேஷேண யதி நாஶ்வாஸ்யதே மயா ।

ஸர்வதா நாஸ்தி ஸந்தேஹஃ பரித்யக்ஷ்யதி ஜீவிதம் ॥ 12 ॥

ராமஶ்ச யதி ப்ரு'ச்சேந்மாம் கிம் மாம் ஸீதாப்ரவீத்வசஃ ।

கிமஹம் தம் ப்ரதி ப்ரூயாமஸம்பாஷ்ய ஸுமத்யமாம் ॥ 13 ॥

ஸீதாஸந்தேஶரஹிதம் மாமிதஸ்த்வரயாऽகதம் ।

நிர்தஹேதபி காகுத்ஸ்ய க்ருத்தஸ்தீவ்ரேண சக்ஷுஷா ॥ 14 ॥

யதி சோத்யோஜயிஷ்யாமி பர்தாரம் ராமகாரணாத் ।

வ்யர்தமாகமநம் தஸ்ய ஸஸைந்யஸ்ய பவிஷ்யதி ॥ 15 ॥

அந்தரம் து அஹம் ஆஸாத்ய ராக்ஷஸீநாம் இஹ ஸ்திதஃ ।

ஶநைஃ ஆஶ்வாஸயிஷ்யாமி ஸம்தாப பஹுலாம் இமாம் ॥ 16 ॥

அஹம் த்வதிதநுஶ்சைவ வாநரஶ்ச விஶேஷதஃ ।

வாசம் சோதாஹரிஷ்யாமி மாநுஷீமிஹ ஸம்ஸ்க்ரு'தாம் ॥ 17 ॥

யதி வாசம் ப்ரதாஸ்யாமி த்விஜாதிரிவ ஸம்ஸ்க்ரு'தாம் ।

ராவணம் மந்யமாநா மாம் ஸீதா பீதா பவிஷ்யதி ॥ 18 ॥

வாநரஸ்ய விஶேஷேண கதம் ஸ்யாதபிபாஷணம் ।

அவஶ்யமேவ வக்தவ்யம் மாநுஷம் வாக்யமர்தவத் ॥ 19 ॥

மயா ஸாந்த்வயிதும் ஶக்யா நாந்யதேயமநிந்திதா ।

ஸேயமாலோக்ய மே ரூபம் ஜாநகீ பாஷிதம் ததா ॥ 20 ॥

ரக்ஷோபிஸ்த்ராஸிதா பூர்வம் பூயஸ்த்ராஸம் கமிஷ்யதி ।

ததோ ஜாதபரித்ராஸா ஶப்தம் குர்யாந்மநஸ்விநீ ॥ 21 ॥

ஜாநமாநா விஶாலாக்ஷீ ராவணம் காமரூபிணம் ।

ஸீதயா ச க்ரு'தே ஶப்தே ஸஹஸா ராக்ஷஸீகணாஃ ।

நாநாப்ரஹரணோ கோரஃ ஸமேயாதந்தகோபமஃ ॥ 22 ॥

ததோ மாம் ஸம்பரிக்ஷிப்ய ஸர்வதோ விக்ரு'தாநநாஃ ॥ 23 ॥

வதே ச க்ரஹணே சைவ குர்யுர்யத்நம் யதாபலம் ।

க்ரு'ஹ்ய ஶாகாஃ ப்ரஶாகாஶ்ச ஸ்கந்தாம்ஶ்சோத்தமஶாகிநாம் ॥ 24 ॥

த்ரு'ஷ்ட்வா விபரிதாவந்தம் பவேயுர்பயஶங்கிதாஃ ।

மம ரூபம் ச ஸம்ப்ரேக்ஷ்ய வநே விசரதோ மஹத் ॥ 25 ॥

ராக்ஷஸ்யோ பயவித்ரஸ்தா பவேயுர்விக்ரு'தாநநாஃ ।

ததஃ குர்யுஸ்ஸமாஹ்வாநம் ராக்ஷஸ்யோ ரக்ஷஸாமபி ॥ 26 ॥

ராக்ஷஸேந்த்ரநியுக்தாநாம் ராக்ஷஸேந்த்ரநிவேஶநே ।

தே ஶூலஶக்திநிஸ்த்ரிம்ஶவிவிதாயுதபாணயஃ ॥ 27 ॥

ஆபதேயுர்விமர்தேऽஸ்மிந்வேகேநோத்வேககாரணாத் ।

ஸம்ரு'த்தஸ்தைஸ்து பரிதோ விதமந் ரக்ஷஸாம் பலம் ॥ 28 ॥

ஶக்நுயாம் ந து ஸம்ப்ராப்தும் பரம் பாரம் மஹோததேஃ ।

மாம் வா க்ரு'ஹ்ணீயுராப்லுத்ய பஹவஶ்ஶீக்ரகாரிணஃ ॥ 29 ॥

ஸ்யாதியம் சாக்ரு'ஹீதார்தா மம ச க்ரஹணம் பவேத் ।

ஹிம்ஸாபிருசயோ ஹிம்ஸ்யுரிமாம் வா ஜநகாத்மஜாம் ॥ 30 ॥

விபந்நம் ஸ்யாத்ததஃ கார்யம் ராமஸுக்ரீவயோரிதம் ।

உத்தேஶே நஷ்டமார்கேऽஸ்மிந் ராக்ஷஸைஃ பரிவாரிதே ॥ 31 ॥

ஸாகரேண பரிக்ஷிப்தே குப்தே வஸதி ஜாநகீ ।

விஶஸ்தே வா க்ரு'ஹீதே வா ரக்ஷோபிர்மயி ஸம்யுகே ॥ 32 ॥

நாந்யம் பஶ்யாமி ராமஸ்ய ஸஹாயம் கார்யஸாதநே ।

விம்ரு'ஶம்ஶ்ச ந பஶ்யாமி யோ ஹதே மயி வாநரஃ ॥ 33 ॥

ஶதயோஜநவிஸ்தீர்ணம் லங்கயேத மஹோததிம் ।

காமம் ஹந்தும் ஸமர்தோऽஸ்மி ஸஹஸ்ராண்யபி ரக்ஷஸாம் ॥ 34 ॥

ந து ஶக்ஷ்யாமி ஸம்ப்ராப்தும் பரம் பாரம் மஹோததேஃ ।

அஸத்யாநி ச யுத்தாநி ஸம்ஶயோ மே ந ரோசதே ॥ 35 ॥

கஶ்ச நிஸ்ஸம்ஶயம் கார்யம் குர்யாத்ப்ராஜ்ஞஃ ஸஸம்ஶயம் ।

ப்ராணத்யாகஶ்ச வைதேஹ்யா பவேதநபிபாஷணே ॥ 36 ॥

ஏஷ தோஷோ மஹாந்ஹி ஸ்யாந்மம ஸீதாபிபாஷணே ।

பூதாஶ்சார்தா விநஶ்யந்தி தேஶகாலவிரோதிதாஃ ॥ 37 ॥

விக்லபம் தூதமாஸாத்ய தமஃ ஸூர்யோதயே யதா ।

அர்தாநர்தாந்தரே புத்திநிஶ்சிதாபி ந ஶோபதே ॥ 38 ॥

காதயந்தி ஹி கார்யாணி தூதாஃ பண்டிதமாநிநஃ ।

ந விநஶ்யேத்கதம் கார்யம் வைக்லப்யம் ந கதம் பவேத் ॥ 39 ॥

லங்கநம் ச ஸமுத்ரஸ்ய கதம் நு ந வ்ரு'தா பவேத் ।

கதம் நு கலு வாக்யம் மே ஶ்ரு'ணுயாந்நோத்விஜேத வா ।

இதி ஸஞ்சிந்த்ய ஹநுமாம்ஶ்சகார மதிமாந்மதிம் ॥ 40 ॥

ராமமக்லிஷ்டகர்மாணம் ஸுபந்துமநுகீர்தயந் ॥ 41 ॥

நைநாமுத்வேஜயிஷ்யாமி தத்பந்துகதமாநஸாம் ।

இக்ஷ்வாகூணாம் வரிஷ்டஸ்ய ராமஸ்ய விதிதாத்மநஃ ॥ 42 ॥

ஶுபாநி தர்மயுக்தாநி வசநாநி ஸமர்பயந் ।

ஶ்ராவயிஷ்யாமி ஸர்வாணி மதுராம் ப்ரப்ருவந் கிரம் ॥ 43 ॥

ஶ்ரத்தாஸ்யதி யதாஹீயம் ததா ஸர்வம் ஸமாததே ।

இதி ஸ பஹுவிதம் மஹாநுபாவோ ஜகதிபதேஃ ப்ரமதாமவேக்ஷமாணஃ ।

மதுரமவிததம் ஜகாத வாக்யம் த்ருமவிடபாந்தரமாஸ்திதோ ஹநூமாந் ॥ 44 ॥

இத்யார்ஷே ஶ்ரீமத்ராமாயணே வால்மீகீய ஆதிகாவ்யே ஸுந்தரகாண்டே த்ரிம்ஶஸ்ஸர்கஃ ॥

Roman (IAST) Transliteration

śrīmadvālmīkīya rāmāyaṇe sundarakāṇḍam |

atha triṃśassargaḥ |

hanumānapi vikrāntaḥ sarvaṃ śuśrāva tattvataḥ |

sītāyāstrijaṭāyāśca rākṣasīnāṃ ca tarjanam || 1 ||

avekṣamāṇastāṃ devīṃ devatāmiva nandane |

tato bahuvidhāṃ cintāṃ cintayāmāsa vānaraḥ || 2 ||

yāṃ kapīnāṃ sahasrāṇi subahūnyayutāni ca |

dikṣu sarvāsu mārgante seyamāsāditā mayā || 3 ||

cāreṇa tu suyuktena śatrośśaktimavekṣatā |

gūḍhena caratā tāvadavekṣitamidaṃ mayā || 4 ||

rākṣasānāṃ viśeṣaśca purī ceyamavekṣitā |

rākṣasādhipaterasya prabhāvo rāvaṇasya ca || 5 ||

yuktaṃ tasyāprameyasya sarvasattvadayāvataḥ |

samāśvāsayituṃ bhāryāṃ patidarśanakāṅkṣiṇīm || 6 ||

ahamāśvāsayāmyenāṃ pūrṇacandranibhānanām |

adṛṣṭaduḥkhāṃ duḥkhārtāṃ duḥkhasyāntamagacchatīm || 7 ||

yadyapyahamimāṃ devīṃ śokopahatacetanām |

anāśvāsya gamiṣyāmi doṣavadgamanaṃ bhavet || 8 ||

gate hi mayi tatreyaṃ rājaputrī yaśasvinī |

paritrāṇamavindantī jānakī jīvitaṃ tyajet || 9 ||

mayā ca sa mahābāhuḥ pūrṇacandranibhānanaḥ |

samāśyāsayituṃ nyāyyassītādarśanalālasaḥ || 10 ||

niśācarīṇāṃ pratyakṣamanarhaṃ cābhibhāṣitam |

kathannu khalu kartavyamidaṃ kṛcchragato hyaham || 11 ||

anena rātriśeṣeṇa yadi nāśvāsyate mayā |

sarvathā nāsti sandehaḥ parityakṣyati jīvitam || 12 ||

rāmaśca yadi pṛcchenmāṃ kiṃ māṃ sītābravīdvacaḥ |

kimahaṃ taṃ prati brūyāmasambhāṣya sumadhyamām || 13 ||

sītāsandeśarahitaṃ māmitastvarayā'gatam |

nirdahedapi kākutsya kruddhastīvreṇa cakṣuṣā || 14 ||

yadi codyojayiṣyāmi bhartāraṃ rāmakāraṇāt |

vyarthamāgamanaṃ tasya sasainyasya bhaviṣyati || 15 ||

antaraṃ tu ahaṃ āsādya rākṣasīnāṃ iha sthitaḥ |

śanaiḥ āśvāsayiṣyāmi samtāpa bahulāṃ imām || 16 ||

ahaṃ tvatitanuścaiva vānaraśca viśeṣataḥ |

vācaṃ codāhariṣyāmi mānuṣīmiha saṃskṛtām || 17 ||

yadi vācaṃ pradāsyāmi dvijātiriva saṃskṛtām |

rāvaṇaṃ manyamānā māṃ sītā bhītā bhaviṣyati || 18 ||

vānarasya viśeṣeṇa kathaṃ syādabhibhāṣaṇam |

avaśyameva vaktavyaṃ mānuṣaṃ vākyamarthavat || 19 ||

mayā sāntvayituṃ śakyā nānyatheyamaninditā |

seyamālokya me rūpaṃ jānakī bhāṣitaṃ tathā || 20 ||

rakṣobhistrāsitā pūrvaṃ bhūyastrāsaṃ gamiṣyati |

tato jātaparitrāsā śabdaṃ kuryānmanasvinī || 21 ||

jānamānā viśālākṣī rāvaṇaṃ kāmarūpiṇam |

sītayā ca kṛte śabde sahasā rākṣasīgaṇāḥ |

nānāpraharaṇo ghoraḥ sameyādantakopamaḥ || 22 ||

tato māṃ samparikṣipya sarvato vikṛtānanāḥ || 23 ||

vadhe ca grahaṇe caiva kuryuryatnaṃ yathābalam |

gṛhya śākhāḥ praśākhāśca skandhāṃścottamaśākhinām || 24 ||

dṛṣṭvā viparidhāvantaṃ bhaveyurbhayaśaṅkitāḥ |

mama rūpaṃ ca samprekṣya vane vicarato mahat || 25 ||

rākṣasyo bhayavitrastā bhaveyurvikṛtānanāḥ |

tataḥ kuryussamāhvānaṃ rākṣasyo rakṣasāmapi || 26 ||

rākṣasendraniyuktānāṃ rākṣasendraniveśane |

te śūlaśaktinistriṃśavividhāyudhapāṇayaḥ || 27 ||

āpateyurvimarde'sminvegenodvegakāraṇāt |

samṛddhastaistu parito vidhaman rakṣasāṃ balam || 28 ||

śaknuyāṃ na tu samprāptuṃ paraṃ pāraṃ mahodadheḥ |

māṃ vā gṛhṇīyurāplutya bahavaśśīghrakāriṇaḥ || 29 ||

syādiyaṃ cāgṛhītārthā mama ca grahaṇaṃ bhavet |

hiṃsābhirucayo hiṃsyurimāṃ vā janakātmajām || 30 ||

vipannaṃ syāttataḥ kāryaṃ rāmasugrīvayoridam |

uddeśe naṣṭamārge'smin rākṣasaiḥ parivārite || 31 ||

sāgareṇa parikṣipte gupte vasati jānakī |

viśaste vā gṛhīte vā rakṣobhirmayi saṃyuge || 32 ||

nānyaṃ paśyāmi rāmasya sahāyaṃ kāryasādhane |

vimṛśaṃśca na paśyāmi yo hate mayi vānaraḥ || 33 ||

śatayojanavistīrṇaṃ laṅghayeta mahodadhim |

kāmaṃ hantuṃ samartho'smi sahasrāṇyapi rakṣasām || 34 ||

na tu śakṣyāmi samprāptuṃ paraṃ pāraṃ mahodadheḥ |

asatyāni ca yuddhāni saṃśayo me na rocate || 35 ||

kaśca nissaṃśayaṃ kāryaṃ kuryātprājñaḥ sasaṃśayam |

prāṇatyāgaśca vaidehyā bhavedanabhibhāṣaṇe || 36 ||

eṣa doṣo mahānhi syānmama sītābhibhāṣaṇe |

bhūtāścārthā vinaśyanti deśakālavirodhitāḥ || 37 ||

viklabaṃ dūtamāsādya tamaḥ sūryodaye yathā |

arthānarthāntare buddhiniścitāpi na śobhate || 38 ||

ghātayanti hi kāryāṇi dūtāḥ paṇḍitamāninaḥ |

na vinaśyetkathaṃ kāryaṃ vaiklabyaṃ na kathaṃ bhavet || 39 ||

laṅghanaṃ ca samudrasya kathaṃ nu na vṛthā bhavet |

kathaṃ nu khalu vākyaṃ me śṛṇuyānnodvijeta vā |

iti sañcintya hanumāṃścakāra matimānmatim || 40 ||

rāmamakliṣṭakarmāṇaṃ subandhumanukīrtayan || 41 ||

naināmudvejayiṣyāmi tadbandhugatamānasām |

ikṣvākūṇāṃ variṣṭhasya rāmasya viditātmanaḥ || 42 ||

śubhāni dharmayuktāni vacanāni samarpayan |

śrāvayiṣyāmi sarvāṇi madhurāṃ prabruvan giram || 43 ||

śraddhāsyati yathāhīyaṃ tathā sarvaṃ samādadhe |

iti sa bahuvidhaṃ mahānubhāvo jagatipateḥ pramadāmavekṣamāṇaḥ |

madhuramavitathaṃ jagāda vākyaṃ drumaviṭapāntaramāsthito hanūmān || 44 ||

ityārṣe śrīmadrāmāyaṇe vālmīkīya ādikāvye sundarakāṇḍe triṃśassargaḥ ||