📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
5.20 ஸுந்தரகாண்ட - விம்ஶ ஸர்கஃ
5.20 Sundarakanda - Vimsha Sargah
Valmiki Tamil
ஶ்ரீமத்வால்மீகீய ராமாயணே ஸுந்தரகாண்டம் ।
அத விம்ஶஸ்ஸர்கஃ ।
ஸ தாம் பரிவ்ரு'தாம் தீநாம் நிராநந்தாம் தபஸ்விநீம் ।
ஸாகாரைர்மதுரைர்வாக்யைர்ந்யதர்ஶயத ராவணஃ ॥ 1 ॥
மாம் த்ரு'ஷ்ட்வா நாகநாஸோரு கூஹமாநா ஸ்தநோதரம் ।
அதர்ஶநமிவாத்மாநம் பயாந்நேதும் த்வமிச்சஸி ॥ 2 ॥
காமயே த்வாம் விஶாலாக்ஷி பஹுமந்யஸ்வ மாம் ப்ரியே ।
ஸர்வாங்ககுணஸம்பந்நே ஸர்வலோகமநோஹரே ॥ 3 ॥
நேஹ கேசிந்மநுஷ்யா வா ராக்ஷஸாஃ காமரூபிணஃ ।
வ்யபஸர்பது தே ஸீதே பயம் மத்தஃ ஸமுத்திதம் ॥ 4 ॥
ஸ்வதர்மோ ரக்ஷஸாம் பீரு ஸர்வதைவ ந ஸம்ஶயஃ ।
கமநம் வா பரஸ்த்ரீணாம் ஹரணம் ஸம்ப்ரமத்ய வா ॥ 5 ॥
ஏவம் சைததகாமாம் து ந த்வாம் ஸ்ப்ரக்ஷ்யாமி மைதிலி ।
காமம் காமஃ ஶரீரே மே யதாகாமம் ப்ரவர்ததாம் ॥ 6 ॥
தேவி நேஹ பயம் கார்யம் மயி விஶ்வஸி ஹி ப்ரியே ।
ப்ரணயஸ்வ ச தத்த்வேந மைவம் பூஃ ஶோகலாலஸா ॥ 7 ॥
ஏகவேணீ தராஶய்யா த்யாநம் மலிநமம்பரம் ।
அஸ்தாநேऽப்யுபவாஸஶ்ச நைதாந்யௌபயிகாநி தே ॥ 8 ॥
விசித்ராணி ச மால்யாநி சந்தநாந்யகரூணி ச ।
விவிதாநி ச வாஸாம்ஸி திவ்யாந்யாபரணாநி ச ॥ 9 ॥
மஹார்ஹாணி ச பாநாநி ஶயநாந்யாஸநாநி ச ।
கீதம் ந்ரு'த்தம் ச வாத்யம் ச லப மாம் ப்ராப்ய மைதிலி ॥ 10 ॥
ஸ்த்ரீரத்நமஸி மைவம் பூஃ குரு காத்ரேஷு பூஷணம் ।
மாம் ப்ராப்ய ஹி கதம் நு ஸ்வாஸ்த்வமநர்ஹா ஸுவிக்ரஹே ॥ 11 ॥
இதம் தே சாரு ஸஞ்ஜாதம் யௌவநம் வ்யதிவர்ததே ।
யததீதம் புநர்நைதி ஸ்ரோதஃ ஶீக்ரமபாமிவ ॥ 12 ॥
த்வாம் க்ரு'த்வோபரதோ மந்யே ரூபகர்தா ஸ விஶ்வஸ்ரு'க் ।
ந ஹி ரூபோபமா த்வந்யா தவாஸ்தி ஶுபதர்ஶநே ॥ 13 ॥
த்வாம் ஸமாஸாத்ய வைதேஹி ரூபயௌவநஶாலிநீம் ।
கஃ புமாநதிவர்தேத ஸாக்ஷாதபி பிதாமஹஃ ॥ 14 ॥
யத்யத்பஶ்யாமி தே காத்ரம் ஶீதாம்ஶுஸத்ரு'ஶாநநே ।
தஸ்மிம்ஸ்தஸ்மிந் ப்ரு'துஶ்ரோணி சக்ஷுர்மம நிபத்யதே ॥ 15 ॥
பவ மைதிலி பார்யா மே மோஹமேநம் விஸர்ஜய ।
பஹ்வீநாமுத்தமஸ்த்ரீணாமாஹ்ரு'தாநாமிதஸ்ததஃ ॥ 16 ॥
ஸர்வாஸாமேவ பத்ரம் தே மமாக்ரமஹிஷீ பவ ।
லோகேப்யோ யாநி ரத்நாநி ஸம்ப்ரமத்யாஹ்ரு'தாநி வை ॥ 17 ॥
தாநி மே பீரு ஸர்வாணி ராஜ்யம் சைததஹம் ச தே ।
விஜித்ய ப்ரு'திவீம் ஸர்வாம் நாநாநகரமாலிநீம் ॥ 18 ॥
ஜநகாய ப்ரதாஸ்யாமி தவ ஹேதோர்விலாஸிநி ।
நேஹ பஶ்யாமி லோகேऽந்யம் யோ மே ப்ரதிபலோ பவேத் ।
பஶ்ய மே ஸுமஹத்வீர்யமப்ரதித்வந்த்வமாஹவே ॥ 19 ॥
அஸக்ரு'த்ஸம்யுகே பக்நா மயா விம்ரு'திதத்வஜாஃ ॥ 20 ॥
அஶக்தாஃ ப்ரத்யநீகேஷு ஸ்தாதும் மம ஸுராஸுராஃ ।
இச்ச மாம் க்ரியதாமத்ய ப்ரதிகர்ம தவோத்தமம் ॥ 21 ॥
ஸப்ரபாண்யவஸஜ்யந்தாம் தவாங்கே பூஷணாநி ச ।
ஸாது பஶ்யாமி தே ரூபம் ஸம்யுக்தம் ப்ரதிகர்மணா ॥ 22 ॥
ப்ரதிகர்மாபிஸம்யுக்தா தாக்ஷிண்யேந வராநநே ।
புங்க்ஷ்வ போகாந்யதாகாமம் பிப பீரு ரமஸ்வ ச ॥ 23 ॥
யதேஷ்டம் ச ப்ரயச்ச த்வம் ப்ரு'திவீம் வா தநாநி ச ।
லலஸ்வ மயி விஸ்ரப்தா த்ரு'ஷ்டமாஜ்ஞாபயஸ்வ ச ॥ 24 ॥
மத்ப்ரஸாதால்லலந்த்யாஶ்ச லலந்தாம் பாந்தவாஸ்தவ ।
ரு'த்திம் மமாநுபஶ்ய த்வம் ஶ்ரியம் பத்ரே யஶஶ்ச மே ॥ 25 ॥
கிம் கரிஷ்யஸி ராமேண ஸுபகே சீரவாஸஸா ।
நிக்ஷிப்தவிஜயோ ராமோ கதஶ்ரீர்வநகோசரஃ ॥ 26 ॥
வ்ரதீ ஸ்தண்டிலஶாயீ ச ஶங்கே ஜீவதி வா ந வா ।
ந ஹி வைதேஹி ராமஸ்த்வாம் த்ரஷ்டும் வா ப்யுபலப்ஸ்யதே ।
புரோபலாகைரஸிதைர்மேகைர்ஜ்யோத்ஸ்நாமிவாவ்ரு'தாம் ॥ 27 ॥
ந சாபி மம ஹஸ்தாத்த்வாம் ப்ராப்துமர்ஹதி ராகவஃ ॥ 28 ॥
ஹிரண்யகஶிபுஃ கீர்திமிந்த்ரஹஸ்தகதாமிவ ।
சாருஸ்மிதே சாருததி சாருநேத்ரே விலாஸிநி ॥ 29 ॥
மநோ ஹரஸி மே பீரு ஸுபர்ணஃ பந்நகம் யதா ।
க்லிஷ்டகௌஶேயவஸநாம் தந்வீமப்யநலங்க்ரு'தாம் ॥ 30 ॥
த்வாம் த்ரு'ஷ்ட்வா ஸ்வேஷு தாரேஷு ரதிம் நோபலபாம்யஹம் ।
அந்தஃபுரநிவாஸிந்யஃ ஸ்த்ரியஃ ஸர்வகுணாந்விதாஃ ॥ 31 ॥
யாவந்த்யோ மம ஸர்வாஸாமைஶ்வர்யம் குரு ஜாநகி ।
மம ஹ்யஸிதகேஶாந்தே த்ரைலோக்யப்ரவராஃ ஸ்த்ரியஃ ॥ 32 ॥
தாஸ்த்வாம் பரிசரிஷ்யந்தி ஶ்ரியமப்ஸரஸோ யதா ।
யாநி வைஶ்ரவணே ஸுப்ரு ரத்நாநி ச தநாநி ச ॥ 33 ॥
தாநி லோகாம்ஶ்ச ஸுஶ்ரோணி மாம் ச புங்க்ஷ்வ யதாஸுகம் ।
ந ராமஸ்தபஸா தேவி ந பலேந ந விக்ரமைஃ ॥ 34 ॥
ந தநேந மயா துல்யஸ்தேஜஸா யஶஸாபி வா ।
பிப விஹர ரமஸ்வ புங்க்ஷ்வ போகாந் தநநிசயம் ப்ரதிஶாமி மேதிநீம் ச ।
மயி லல லலநே யதாஸுகம் த்வம் த்வயி ச ஸமேத்ய லலந்து பாந்தவாஸ்தே ॥ 35 ॥
குஸுமிததருஜாலஸந்ததாநி ப்ரமரயுதாநி ஸமுத்ரதீரஜாநி ।
கநகவிமலஹாரபூஷிதாங்கீ விஹர மயா ஸஹ பீரு காநநாநி ॥ 36 ॥
இத்யார்ஷே ஶ்ரீமத்ராமாயணே வால்மீகீய ஆதிகாவ்யே ஸுந்தரகாண்டே விம்ஶஸ்ஸர்கஃ ॥
Roman (IAST) Transliteration
śrīmadvālmīkīya rāmāyaṇe sundarakāṇḍam |
atha viṃśassargaḥ |
sa tāṃ parivṛtāṃ dīnāṃ nirānandāṃ tapasvinīm |
sākārairmadhurairvākyairnyadarśayata rāvaṇaḥ || 1 ||
māṃ dṛṣṭvā nāganāsoru gūhamānā stanodaram |
adarśanamivātmānaṃ bhayānnetuṃ tvamicchasi || 2 ||
kāmaye tvāṃ viśālākṣi bahumanyasva māṃ priye |
sarvāṅgaguṇasampanne sarvalokamanohare || 3 ||
neha kecinmanuṣyā vā rākṣasāḥ kāmarūpiṇaḥ |
vyapasarpatu te sīte bhayaṃ mattaḥ samutthitam || 4 ||
svadharmo rakṣasāṃ bhīru sarvathaiva na saṃśayaḥ |
gamanaṃ vā parastrīṇāṃ haraṇaṃ sampramathya vā || 5 ||
evaṃ caitadakāmāṃ tu na tvāṃ sprakṣyāmi maithili |
kāmaṃ kāmaḥ śarīre me yathākāmaṃ pravartatām || 6 ||
devi neha bhayaṃ kāryaṃ mayi viśvasi hi priye |
praṇayasva ca tattvena maivaṃ bhūḥ śokalālasā || 7 ||
ekaveṇī dharāśayyā dhyānaṃ malinamambaram |
asthāne'pyupavāsaśca naitānyaupayikāni te || 8 ||
vicitrāṇi ca mālyāni candanānyagarūṇi ca |
vividhāni ca vāsāṃsi divyānyābharaṇāni ca || 9 ||
mahārhāṇi ca pānāni śayanānyāsanāni ca |
gītaṃ nṛttaṃ ca vādyaṃ ca labha māṃ prāpya maithili || 10 ||
strīratnamasi maivaṃ bhūḥ kuru gātreṣu bhūṣaṇam |
māṃ prāpya hi kathaṃ nu svāstvamanarhā suvigrahe || 11 ||
idaṃ te cāru sañjātaṃ yauvanaṃ vyativartate |
yadatītaṃ punarnaiti srotaḥ śīghramapāmiva || 12 ||
tvāṃ kṛtvoparato manye rūpakartā sa viśvasṛk |
na hi rūpopamā tvanyā tavāsti śubhadarśane || 13 ||
tvāṃ samāsādya vaidehi rūpayauvanaśālinīm |
kaḥ pumānativarteta sākṣādapi pitāmahaḥ || 14 ||
yadyatpaśyāmi te gātraṃ śītāṃśusadṛśānane |
tasmiṃstasmin pṛthuśroṇi cakṣurmama nibadhyate || 15 ||
bhava maithili bhāryā me mohamenaṃ visarjaya |
bahvīnāmuttamastrīṇāmāhṛtānāmitastataḥ || 16 ||
sarvāsāmeva bhadraṃ te mamāgramahiṣī bhava |
lokebhyo yāni ratnāni sampramathyāhṛtāni vai || 17 ||
tāni me bhīru sarvāṇi rājyaṃ caitadahaṃ ca te |
vijitya pṛthivīṃ sarvāṃ nānānagaramālinīm || 18 ||
janakāya pradāsyāmi tava hetorvilāsini |
neha paśyāmi loke'nyaṃ yo me pratibalo bhavet |
paśya me sumahadvīryamapratidvandvamāhave || 19 ||
asakṛtsaṃyuge bhagnā mayā vimṛditadhvajāḥ || 20 ||
aśaktāḥ pratyanīkeṣu sthātuṃ mama surāsurāḥ |
iccha māṃ kriyatāmadya pratikarma tavottamam || 21 ||
saprabhāṇyavasajyantāṃ tavāṅge bhūṣaṇāni ca |
sādhu paśyāmi te rūpaṃ saṃyuktaṃ pratikarmaṇā || 22 ||
pratikarmābhisaṃyuktā dākṣiṇyena varānane |
bhuṅkṣva bhogānyathākāmaṃ piba bhīru ramasva ca || 23 ||
yatheṣṭaṃ ca prayaccha tvaṃ pṛthivīṃ vā dhanāni ca |
lalasva mayi visrabdhā dhṛṣṭamājñāpayasva ca || 24 ||
matprasādāllalantyāśca lalantāṃ bāndhavāstava |
ṛddhiṃ mamānupaśya tvaṃ śriyaṃ bhadre yaśaśca me || 25 ||
kiṃ kariṣyasi rāmeṇa subhage cīravāsasā |
nikṣiptavijayo rāmo gataśrīrvanagocaraḥ || 26 ||
vratī sthaṇḍilaśāyī ca śaṅke jīvati vā na vā |
na hi vaidehi rāmastvāṃ draṣṭuṃ vā pyupalapsyate |
purobalākairasitairmeghairjyotsnāmivāvṛtām || 27 ||
na cāpi mama hastāttvāṃ prāptumarhati rāghavaḥ || 28 ||
hiraṇyakaśipuḥ kīrtimindrahastagatāmiva |
cārusmite cārudati cārunetre vilāsini || 29 ||
mano harasi me bhīru suparṇaḥ pannagaṃ yathā |
kliṣṭakauśeyavasanāṃ tanvīmapyanalaṅkṛtām || 30 ||
tvāṃ dṛṣṭvā sveṣu dāreṣu ratiṃ nopalabhāmyaham |
antaḥpuranivāsinyaḥ striyaḥ sarvaguṇānvitāḥ || 31 ||
yāvantyo mama sarvāsāmaiśvaryaṃ kuru jānaki |
mama hyasitakeśānte trailokyapravarāḥ striyaḥ || 32 ||
tāstvāṃ paricariṣyanti śriyamapsaraso yathā |
yāni vaiśravaṇe subhru ratnāni ca dhanāni ca || 33 ||
tāni lokāṃśca suśroṇi māṃ ca bhuṅkṣva yathāsukham |
na rāmastapasā devi na balena na vikramaiḥ || 34 ||
na dhanena mayā tulyastejasā yaśasāpi vā |
piba vihara ramasva bhuṅkṣva bhogān dhananicayaṃ pradiśāmi medinīṃ ca |
mayi lala lalane yathāsukhaṃ tvaṃ tvayi ca sametya lalantu bāndhavāste || 35 ||
kusumitatarujālasantatāni bhramarayutāni samudratīrajāni |
kanakavimalahārabhūṣitāṅgī vihara mayā saha bhīru kānanāni || 36 ||
ityārṣe śrīmadrāmāyaṇe vālmīkīya ādikāvye sundarakāṇḍe viṃśassargaḥ ||
InfoLyter.in — Sacred Vedic Knowledge Portal · Free forever