4.63 Kishkindhakanda - Trishashtitama Sargah

ॐ

4.63 கிஷ்கிந்தாகாண்ட - த்ரிஷஷ்டிதம ஸர்கஃ

Valmiki Tamil

ஶ்ரீமத்வால்மீகீய ராமாயணே கிஷ்கிந்தாகாண்டம் ।

அத த்ரிஷஷ்டிதமஸ்ஸர்கஃ ।

ஏதைரந்யைஶ்ச பஹுபிர்வாக்யைர்வாக்யவிஶாரதஃ ।

மாம் ப்ரஶஸ்யாப்யநுஜ்ஞாப்ய ப்ரவிஷ்டஸ்ஸ ஸ்வமாலயம் ॥ 1 ॥

கந்தராத்து விஸர்பித்வா பர்வதஸ்ய ஶநைஶ்ஶநைஃ ।

அஹம் விந்த்யம் ஸமாருஹ்ய பவதஃ ப்ரதிபாலயே ॥ 2 ॥

அத்ய த்வேதஸ்ய காலஸ்ய ஸாக்ரம் வர்ஷஶதம் கதம் ।

தேஶகாலப்ரதீக்ஷோऽஸ்மி ஹ்ரு'தி க்ரு'த்வா முநேர்வசஃ ॥ 3 ॥

மஹாப்ரஸ்தாநமாஸாத்ய ஸ்வர்கதே து நிஶாகரே ।

மாம் நிர்தஹதி ஸந்தாபோ விதர்கைர்பஹுபிர்வ்ரு'தம் ॥ 4 ॥

உத்திதாம் மரணே புத்திம் முநிவாக்யைர்நிவர்தயே ।

புத்திர்யா தேந மே தத்தா ப்ராணாநாம் ரக்ஷணாய து ॥ 5 ॥

ஸா மேऽபநயதே துஃகம் தீப்தேவாக்நிஶிகா தமஃ ।

புத்த்யதா ச மயா வீர்யம் ராவணஸ்ய துராத்மநஃ ॥ 6 ॥

புத்ரஸ்ஸந்தர்ஜிதோ வாக்பிர்ந த்ராதா மைதிலீ கதம் ।

தஸ்யா விலபிதம் ஶ்ருத்வா தௌ ச ஸீதாவிநாக்ரு'தௌ ॥ 7 ॥

ந மே தஶரதஸ்நேஹாத்புத்ரேணோத்பாதிதம் ப்ரியம் ।

தஸ்ய த்வேவம் ப்ருவாணஸ்ய ஸம்பாதேர்வாநரைஸ்ஸஹ ॥ 8 ॥

உத்பேததுஸ்ததா பக்ஷௌ ஸமக்ஷம் வநசாரிணாம் ।

ஸ த்ரு'ஷ்ட்வா ஸ்வாம் தநும் பக்ஷைருத்கதைரருணச்சதைஃ ॥ 9 ॥

ப்ரஹர்ஷமதுலம் லேபே வாநராம்ஶ்சேதமப்ரவீத் ।

ரு'ஷேர்நிஶாகரஸ்யைவ ப்ரபாவாதமிதாத்மநஃ ॥ 10 ॥

ஆதித்யரஶ்மிநிர்தக்தௌ பக்ஷௌ மே புநருபஸ்திதௌ ।

யௌவநே வர்தமாநஸ்ய மமாஸீத்யஃ பராக்ரமஃ ॥ 11 ॥

தமேவாத்யாவகச்சாமி பலம் பௌருஷமேவ ச ।

ஸர்வதா க்ரியதாம் யத்ந ஸ்ஸீதாமதிகமிஷ்யத ॥ 12 ॥

பக்ஷலாபோ மமாயம் வஸ்ஸித்திப்ரத்யயகாரகஃ ।

இத்யுக்த்வா ஸ தாந்ஹரீந் ஸர்வாந்ஸம்பாதிஃ பதகோத்தமஃ ॥ 13 ॥

உத்பபாத கிரேஶ்ஶ்ரு'ங்காஜ்ஜிஜ்ஞாஸுஃ ககமோ கதிம் ।

தஸ்ய தத்வசநம் ஶ்ருத்வா ப்ரதிஸம்ஹ்ரு'ஷ்டமாநஸாஃ ॥ 14 ॥

பபூவுர்ஹரிஶார்தூலா விக்ரமாப்யுதயோந்முகாஃ ।

அத பவநஸமாநவிக்ரமாஃ ப்லவகவராஃ ப்ரதிலப்தபௌருஷாஃ ।

அபிஜிதபிமுகா திஶம் யயு ர்ஜநகஸுதாபரிமார்கணோந்முகாஃ ॥ 15 ॥

இத்யார்ஷே ஶ்ரீமத்ராமாயணே வால்மீகீய ஆதிகாவ்யே கிஷ்கிந்தாகாண்டே த்ரிஷஷ்டிதமஸ்ஸர்கஃ ॥

Roman (IAST) Transliteration

śrīmadvālmīkīya rāmāyaṇe kiṣkindhākāṇḍam |

atha triṣaṣṭitamassargaḥ |

etairanyaiśca bahubhirvākyairvākyaviśāradaḥ |

māṃ praśasyābhyanujñāpya praviṣṭassa svamālayam || 1 ||

kandarāttu visarpitvā parvatasya śanaiśśanaiḥ |

ahaṃ vindhyaṃ samāruhya bhavataḥ pratipālaye || 2 ||

adya tvetasya kālasya sāgraṃ varṣaśataṃ gatam |

deśakālapratīkṣo'smi hṛdi kṛtvā munervacaḥ || 3 ||

mahāprasthānamāsādya svargate tu niśākare |

māṃ nirdahati santāpo vitarkairbahubhirvṛtam || 4 ||

utthitāṃ maraṇe buddhiṃ munivākyairnivartaye |

buddhiryā tena me dattā prāṇānāṃ rakṣaṇāya tu || 5 ||

sā me'panayate duḥkhaṃ dīptevāgniśikhā tamaḥ |

buddhyatā ca mayā vīryaṃ rāvaṇasya durātmanaḥ || 6 ||

putrassantarjito vāgbhirna trātā maithilī katham |

tasyā vilapitaṃ śrutvā tau ca sītāvinākṛtau || 7 ||

na me daśarathasnehātputreṇotpāditaṃ priyam |

tasya tvevaṃ bruvāṇasya sampātervānaraissaha || 8 ||

utpetatustadā pakṣau samakṣaṃ vanacāriṇām |

sa dṛṣṭvā svāṃ tanuṃ pakṣairudgatairaruṇacchadaiḥ || 9 ||

praharṣamatulaṃ lebhe vānarāṃścedamabravīt |

ṛṣerniśākarasyaiva prabhāvādamitātmanaḥ || 10 ||

ādityaraśminirdagdhau pakṣau me punarupasthitau |

yauvane vartamānasya mamāsīdyaḥ parākramaḥ || 11 ||

tamevādyāvagacchāmi balaṃ pauruṣameva ca |

sarvathā kriyatāṃ yatna ssītāmadhigamiṣyatha || 12 ||

pakṣalābho mamāyaṃ vassiddhipratyayakārakaḥ |

ityuktvā sa tānharīn sarvānsampātiḥ patagottamaḥ || 13 ||

utpapāta gireśśṛṅgājjijñāsuḥ khagamo gatim |

tasya tadvacanaṃ śrutvā pratisaṃhṛṣṭamānasāḥ || 14 ||

babhūvurhariśārdūlā vikramābhyudayonmukhāḥ |

atha pavanasamānavikramāḥ plavagavarāḥ pratilabdhapauruṣāḥ |

abhijidabhimukhā diśaṃ yayu rjanakasutāparimārgaṇonmukhāḥ || 15 ||

ityārṣe śrīmadrāmāyaṇe vālmīkīya ādikāvye kiṣkindhākāṇḍe triṣaṣṭitamassargaḥ ||