📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
4.6 கிஷ்கிந்தாகாண்ட - ஷஷ்ட ஸர்கஃ
4.6 Kishkindhakanda - Shashtha Sargah
Valmiki Tamil
ஶ்ரீமத்வால்மீகீய ராமாயணே கிஷ்கிந்தாகாண்டம் ।
அத ஷஷ்டஸ்ஸர்கஃ ।
புநரேவாப்ரவீத்ப்ரீதோ ராகவம் ரகுநந்தநம் ।
அயமாக்யாதி மே ராம ஸசிவோ மந்த்ரிஸத்தமஃ ॥ 1 ॥
ஹநுமாந்யந்நிமித்தம் த்வம் நிர்ஜநம் வநமாகதஃ ।
லக்ஷ்மணேந ஸஹ ப்ராத்ரா வஸதஶ்ச வநே தவ ॥ 2 ॥
ரக்ஷஸாऽபஹ்ரு'தா பார்யா மைதிலீ ஜநகாத்மஜா ।
த்வயா வியுக்தா ருததீ லக்ஷ்மணேந ச தீமதா ॥ 3 ॥
அந்தரப்ரேப்ஸுநா தேந ஹத்வா க்ரு'த்ரம் ஜடாயுஷம் ॥ 4 ॥
பார்யாவியோகஜம் துஃகம் ந சிராத்த்வம் விமோக்ஷ்யஸே ।
அஹம் தாமாநயிஷ்யாமி நஷ்டாம் வேதஶ்ருதீமிவ ॥ 5 ॥
ரஸாதலே வா வர்தந்தீம் வர்தந்தீ வா நபஸ்தலே அஹமாநீய தாஸ்யாமி தவ பார்யாமரிந்தம ॥ 6 ॥
இதம் தத்யம் மம வசஸ்த்வமவேஹி ச ராகவ ।
ந ஶக்யா ஸா ஜரயிதும் ஸேந்த்ரைரபி ஸ்ஸுராஸுரைஃ ॥ 7 ॥
தவ பார்யா மஹாபாஹோ பக்ஷ்யம் விஷக்ரு'தம் யதா ।
த்யஜ ஶோகம் மஹாபாஹோ தாம் காந்தாமாநயாமி தே ॥ 8 ॥
அநுமாநாத்து ஜாநாமி மைதிலீ ஸா ந ஸம்ஶயஃ ।
ஹ்ரியமாணா மயா த்ரு'ஷ்டா ரக்ஷஸா க்ரூரகர்மணா ॥ 9 ॥
க்ரோஶந்தீ ராம ராமேதி லக்ஷ்மணேதி ச விஸ்வரம் ।
ஸ்புரந்தீ ராவணஸ்யாங்கே பந்நகேந்த்ரவதூர்யதா ॥ 10 ॥
ஆத்மநா பஞ்சமம் மாம் ஹி த்ரு'ஷ்ட்வா ஶைலதடே ஸ்திதம் ।
உத்தரீயம் தயா த்யக்தம் ஶுபாந்யாபரணாநி ச ॥ 11 ॥
தாந்யஸ்மாபிக்ரு'ஹீதாநி நிஹிதாநி ச ராகவ ।
ஆநயிஷ்யாம்யஹம் தாநி ப்ரத்யபிஜ்ஞாதுமர்ஹஸி ॥ 12 ॥
தமப்ரவீத்ததோ ராமஸ்ஸுக்ரீவம் ப்ரியவாதிநம் ।
ஆநயஸ்வ ஸகே ஶீக்ரம் கிமர்தம் ப்ரவிலம்பஸே ॥ 13 ॥
ஏவமுக்தஸ்து ஸுக்ரீவஶ்ஶைலஸ்ய கஹநாம் குஹாம் ।
ப்ரவிவேஶ ததஶஶீக்ரம் ராகவப்ரியகாம்யயா ॥ 14 ॥
உத்தரீயம் க்ரு'ஹீத்வா து ஶுபாந்யாபரணாநி ச ।
இதம் பஶ்யேதி ராமாய தர்ஶயாமாஸ வாநரஃ ॥ 15 ॥
ததோ க்ரு'ஹீத்வா வாஸஸ்து ஶ்ஶுபாந்யாபரணாநி ச ।
அபவத்பாஷ்பஸம்ருத்தோ நீஹாரேணேவ சந்த்ரமாஃ ॥ 16 ॥
ஸீதாஸ்நேஹப்ரவ்ரு'த்தேந ஸ து பாஷ்பேண தூஷிதஃ ।
ஹா ப்ரியேதி ருதந்தைர்யமுத்ஸ்ரு'ஜ்ய ந்யபதத்க்ஷிதௌ ॥ 17 ॥
ஹ்ரு'தி க்ரு'த்வா து பஹுஶஸ்தமலங்காரமுத்தமம் ।
நிஶஶ்வாஸ ப்ரு'ஶம் ஸர்போ பிலஸ்த இவ ரோஷிதஃ ॥ 18 ॥
அவிச்சிந்நாஶ்ருவேகஸ்து ஸௌமித்ரிம் வீக்ஷ்ய பார்ஶ்வதஃ ।
பரிதேவயிதும் தீநம் ராமஸ்ஸமுபசக்ரமே ॥ 19 ॥
பஶ்ய லக்ஷ்மண வைதேஹ்யா ஸந்த்யக்தம் ஹ்ரியமாணயா ।
உத்தரீயமிதம் பூமௌ ஶரீராத்பூஷணாநி ச ॥ 20 ॥
ஶாத்வலிந்யாம் த்ருவம் பூமௌ ஸீதயா ஹ்ரியமாணயா ।
உத்ஸ்ரு'ஷ்டம் பூஷணமிதம் ததாரூபம் ஹி த்ரு'ஶ்யதே ॥ 21 ॥
ஏவமுக்தஸ்து ராமேண லக்ஷ்மணோ வாக்யமப்ரவீத் ।
நாஹம் ஜாநாமி கேயூரே நாஹம் ஜாநாமி குண்டலே ॥ 22 ॥
நூபுரே த்வபிஜாநாமி நித்யம் பாதாபிவந்தநாத் ।
ததஸ்து ராகவோ வாக்யம் ஸுக்ரீவமிதமப்ரவீத் ॥ 23 ॥
ப்ரூஹி ஸுக்ரீவ கம் தேஶம் ஹ்ரியந்தீ லக்ஷிதா த்வயா ।
ரக்ஷஸா ரௌத்ரரூபேண மம ப்ராணைஃ ப்ரியா ப்ரியா ॥ 24 ॥
க்வ வா வஸதி தத்ரக்ஷோ மஹத்வ்யஸநதம் மம ।
யந்நிமித்தமஹம் ஸர்வாந்நாஶயிஷ்யாமி ராக்ஷஸாந் ॥ 25 ॥
ஹரதா மைதிலீம் யேந மாம் ச ரோஷயதா ப்ரு'ஶம் ।
ஆத்மநோ ஜீவிதாந்தாய ம்ரு'த்யுத்வாரமபாவ்ரு'தம் ॥ 26 ॥
மம தயிததரா ஹ்ரு'தா வநாந்தா த்ரஜநிசரேண விமத்ய யேந ஸா ।
கதய மம ரிபும் தமத்ய வை ப்லவகபதே யமஸாதநம் நயாமி ॥ 27 ॥
இத்யார்ஷே ஶ்ரீமத்ராமாயணே வால்மீகீய ஆதிகாவ்யே கிஷ்கிந்தாகாண்டே ஷஷ்டஸ்ஸர்கஃ ॥
Roman (IAST) Transliteration
śrīmadvālmīkīya rāmāyaṇe kiṣkindhākāṇḍam |
atha ṣaṣṭhassargaḥ |
punarevābravītprīto rāghavaṃ raghunandanam |
ayamākhyāti me rāma sacivo mantrisattamaḥ || 1 ||
hanumānyannimittaṃ tvaṃ nirjanaṃ vanamāgataḥ |
lakṣmaṇena saha bhrātrā vasataśca vane tava || 2 ||
rakṣasā'pahṛtā bhāryā maithilī janakātmajā |
tvayā viyuktā rudatī lakṣmaṇena ca dhīmatā || 3 ||
antaraprepsunā tena hatvā gṛdhraṃ jaṭāyuṣam || 4 ||
bhāryāviyogajaṃ duḥkhaṃ na cirāttvaṃ vimokṣyase |
ahaṃ tāmānayiṣyāmi naṣṭāṃ vedaśrutīmiva || 5 ||
rasātale vā vartantīṃ vartantī vā nabhasthale ahamānīya dāsyāmi tava bhāryāmarindama || 6 ||
idaṃ tathyaṃ mama vacastvamavehi ca rāghava |
na śakyā sā jarayituṃ sendrairapi ssurāsuraiḥ || 7 ||
tava bhāryā mahābāho bhakṣyaṃ viṣakṛtaṃ yathā |
tyaja śokaṃ mahābāho tāṃ kāntāmānayāmi te || 8 ||
anumānāttu jānāmi maithilī sā na saṃśayaḥ |
hriyamāṇā mayā dṛṣṭā rakṣasā krūrakarmaṇā || 9 ||
krośantī rāma rāmeti lakṣmaṇeti ca visvaram |
sphurantī rāvaṇasyāṅke pannagendravadhūryathā || 10 ||
ātmanā pañcamaṃ māṃ hi dṛṣṭvā śailataṭe sthitam |
uttarīyaṃ tayā tyaktaṃ śubhānyābharaṇāni ca || 11 ||
tānyasmābhigṛhītāni nihitāni ca rāghava |
ānayiṣyāmyahaṃ tāni pratyabhijñātumarhasi || 12 ||
tamabravīttato rāmassugrīvaṃ priyavādinam |
ānayasva sakhe śīghraṃ kimarthaṃ pravilambase || 13 ||
evamuktastu sugrīvaśśailasya gahanāṃ guhām |
praviveśa tataśaśīghraṃ rāghavapriyakāmyayā || 14 ||
uttarīyaṃ gṛhītvā tu śubhānyābharaṇāni ca |
idaṃ paśyeti rāmāya darśayāmāsa vānaraḥ || 15 ||
tato gṛhītvā vāsastu śśubhānyābharaṇāni ca |
abhavadbāṣpasaṃruddho nīhāreṇeva candramāḥ || 16 ||
sītāsnehapravṛttena sa tu bāṣpeṇa dūṣitaḥ |
hā priyeti rudandhairyamutsṛjya nyapatatkṣitau || 17 ||
hṛdi kṛtvā tu bahuśastamalaṅkāramuttamam |
niśaśvāsa bhṛśaṃ sarpo bilastha iva roṣitaḥ || 18 ||
avicchinnāśruvegastu saumitriṃ vīkṣya pārśvataḥ |
paridevayituṃ dīnaṃ rāmassamupacakrame || 19 ||
paśya lakṣmaṇa vaidehyā santyaktaṃ hriyamāṇayā |
uttarīyamidaṃ bhūmau śarīrādbhūṣaṇāni ca || 20 ||
śādvalinyāṃ dhruvaṃ bhūmau sītayā hriyamāṇayā |
utsṛṣṭaṃ bhūṣaṇamidaṃ tathārūpaṃ hi dṛśyate || 21 ||
evamuktastu rāmeṇa lakṣmaṇo vākyamabravīt |
nāhaṃ jānāmi keyūre nāhaṃ jānāmi kuṇḍale || 22 ||
nūpure tvabhijānāmi nityaṃ pādābhivandanāt |
tatastu rāghavo vākyaṃ sugrīvamidamabravīt || 23 ||
brūhi sugrīva kaṃ deśaṃ hriyantī lakṣitā tvayā |
rakṣasā raudrarūpeṇa mama prāṇaiḥ priyā priyā || 24 ||
kva vā vasati tadrakṣo mahadvyasanadaṃ mama |
yannimittamahaṃ sarvānnāśayiṣyāmi rākṣasān || 25 ||
haratā maithilīṃ yena māṃ ca roṣayatā bhṛśam |
ātmano jīvitāntāya mṛtyudvāramapāvṛtam || 26 ||
mama dayitatarā hṛtā vanāntā drajanicareṇa vimathya yena sā |
kathaya mama ripuṃ tamadya vai plavagapate yamasādanaṃ nayāmi || 27 ||
ityārṣe śrīmadrāmāyaṇe vālmīkīya ādikāvye kiṣkindhākāṇḍe ṣaṣṭhassargaḥ ||
InfoLyter.in — Sacred Vedic Knowledge Portal · Free forever