4.59 Kishkindhakanda - Ekonashashtitama Sargah

ॐ

4.59 கிஷ்கிந்தாகாண்ட - ஏகோநஷஷ்டிதம ஸர்கஃ

Valmiki Tamil

ஶ்ரீமத்வால்மீகீய ராமாயணே கிஷ்கிந்தாகாண்டம் ।

அத ஏகோநஷஷ்டிதமஸ்ஸர்கஃ ।

ததஸ்ததம்ரு'தாஸ்வாதம் க்ரு'த்ரராஜேந பாஷிதம் ।

நிஶம்ய முதிதா ஹ்ரு'ஷ்டாஸ்தே வசஃ ப்லவகர்ஷபாஃ ॥ 1 ॥

ஜாம்பவாந் வாநரஶ்ரேஷ்டஸ்ஸஹ ஸர்வைஃ ப்லவங்கமைஃ ।

பூதலாத்ஸஹஸோத்தாய க்ரு'த்ரராஜாநமப்ரவீத் ॥ 2 ॥

க்வ ஸீதா கேந வா த்ரு'ஷ்டா கோ வா ஹரதி மைதிலீம் ।

ததாக்யாது பவாத்ஸர்வம் கதிர்பவ வநௌகஸாம் ॥ 3 ॥

கோ தாஶரதி பாணாநாம் வஜ்ரவேகநிபாதிநாம் ।

ஸ்வயம் லக்ஷ்மணமுக்தாநாம் ந சிந்தயதி விக்ரமம் ॥ 4 ॥

ஸ ஹரீந்ப்ரீதிஸம்யுக்தாந்ஸீதாஶ்ருதிஸமாஹிதாந் ।

புநராஶ்வஸயந்ப்ரீதஃ இதம் வசநமப்ரவீத் ॥ 5 ॥

ஶ்ரூயதாமிஹ வைதேஹ்யா யதா மே ஹரணம் ஶ்ருதம் ।

யேந சாபி மமாऽக்யாதம் யத்ர வாயதலோசநா ॥ 6 ॥

அஹமஸ்மிந்கிரௌ துர்கே பஹுயோஜநமாயதே ।

சிராந்நிபதிதோ வ்ரு'த்தஃ க்ஷீணப்ராணபராக்ரமஃ ॥ 7 ॥

தம் மாமேவம் கதம் புத்ரஸ்ஸுபார்ஶ்வோநாம நாமதஃ ।

ஆஹாரேண யதாகாலம் பிபர்தி பததாம் வரஃ ॥ 8 ॥

தீக்ஷ்ணகாமாஸ்து கந்தர்வாஸ்தீக்ஷ்ணகோபா புஜங்கமாஃ ।

ம்ரு'காணாம் து பயம் தீக்ஷ்ணம் ததஸ்தீக்ஷ்ணக்ஷுதா வயம் ॥ 9 ॥

ஸ கதாசித்க்ஷுதார்தஸ்ய மமாஹாராபிகாங்க்ஷிணஃ ।

கதஸூர்யேऽஹநி ப்ராப்தோ மம புத்ரோ ஹ்யநாமிஷஃ ॥ 10 ॥

ஸ மாமாஹாரஸம்ரோதாத்பீடிதம் ப்ரீதிவர்தநஃ ।

அநுமாந்ய யதாதத்த்வமிதம் வசநமப்ரவீத் ॥ 11 ॥

அஹம் தாத யதாகாலமாமிஷார்தீ கமாப்லுதஃ ।

மஹேந்த்ரஸ்ய கிரேர்த்வாரமாவ்ரு'த்ய ஸுஸமாஸ்திதஃ ॥ 12 ॥

தத்ர ஸத்த்வஸஹஸ்ராணாம் ஸாகராந்தரசாரிணாம் ।

பந்தாநமேகோऽத்யவஸம் ஸந்நிரோத்துமவாங்முகஃ ॥ 13 ॥

தத்ர கஶ்சிந்மயா த்ரு'ஷ்ட ஸ்ஸூர்யோதயஸமப்ரபாம் ।

ஸ்த்ரியமாதாய கச்சந்வை பிந்நாஞ்ஜநசயப்ரபஃ ॥ 14 ॥

ஸோऽஹமப்யவஹாரார்தீ தௌ த்ரு'ஷ்ட்வா க்ரு'தநிஶ்சயஃ ।

தேந ஸாம்நா விநீதேந பந்தாநமபியாசிதஃ ॥ 15 ॥

ந ஹி ஸாமோபபந்நாநாம் ப்ரஹர்தா வித்யதே க்வசித் ।

நீசேஷ்வபி ஜநஃ கஶ்சித்கிமங்க பத மத்விதஃ ॥ 16 ॥

ஸ யாதஸ்தேஜஸா வ்யோம ஸங்க்ஷிபந்நிவ வேகதஃ ।

அதாऽஹம் கேசரைர்பூதைரபிகம்ய ஸபாஜிதஃ ॥ 17 ॥

திஷ்ட்யா ஜீவதி ஸீத இதி ஹி அப்ருவந் மாம் மஹர்ஷயஃ ।

கதஞ்சித் ஸ கலத்ரஃ அஸௌ கதஃ தே ஸ்வஸ்தி அஸம்ஶயம் ॥ 18 ॥

ஏவ முக்தஸ்ததோऽஹம் தைஸ்ஸித்தைஃ பரமஶோபநைஃ ।

ஸ ச மே ராவணோ ராஜா ரக்ஷஸாம் ப்ரதிவேதிதஃ ॥ 19 ॥

ஹரந்தாஶரதேர்பார்யாம் ராமஸ்ய ஜநகாத்மஜாம் ।

ப்ரஷ்டாபரணகௌஶேயாம் ஶோகவேகபராஜிதாம் ॥ 20 ॥

ராமலக்ஷ்மணயோர்நாம க்ரோஶந்தீம் முக்தமூர்தஜாம் ।

ஏஷ காலாத்யயஸ்தாவதிதி காலவிதாம் வரஃ ॥ 21 ॥

ஏதமர்தம் ஸமக்ரம் மே ஸுபார்ஶ்வஃ ப்ரத்யவேதயத் ।

தச்ச்ரு'த்வாऽபி ஹி மே புத்திர்நாஸீத்காசித்பராக்ரமே ॥ 22 ॥

அபக்ஷோ ஹி கதம் பக்ஷீ கர்ம கிஞ்சிதுபக்ரமே ।

யத்து ஶக்யம் மயா கர்தும் வாக்புத்திகுணவர்திநா ॥ 23 ॥

ஶ்ரூயதாம் தத்ப்ரவக்ஷ்யாமி பவதாம் பௌருஷாஶ்ரயம் ।

வாங்மதிப்யாம் து ஸர்வேஷாம் கரிஷ்யாமி ப்ரியம் ஹி வஃ ॥ 24 ॥

யத்தி தாஶரதேஃ கார்யம் மம தந்நாத்ர ஸம்ஶயஃ ।

தே பவந்தோ மதிஶ்ரேஷ்டா பலவந்தோ மநஸ்விநஃ ॥ 25 ॥

ப்ரேஷிதாஃ கபிராஜேந தேவைரபி துராஸதாஃ ।

ராமலக்ஷ்மணபாணாஶ்ச நிஶிதாஃ கங்கபத்ரிணஃ ॥ 26 ॥

த்ரயாணாமபி லோகாநாம் பர்யாப்தாஸ்த்ராணநிக்ரஹே ।

காமம் கலு தஶக்ரீவ ஸ்தேஜோபலஸமந்விதஃ ॥ 27 ॥

பவதாம் து ஸமர்தாநாம் ந கிஞ்சிதபி துஷ்கரம் ।

ததலம் காலஸங்கேந க்ரியதாம் புத்திநிஶ்சயஃ ॥ 28 ॥

இத்யார்ஷே ஶ்ரீமத்ராமாயணே வால்மீகீய ஆதிகாவ்யே கிஷ்கிந்தாகாண்டே ஏகோநஷஷ்டிதமஸ்ஸர்கஃ ॥

Roman (IAST) Transliteration

śrīmadvālmīkīya rāmāyaṇe kiṣkindhākāṇḍam |

atha ekonaṣaṣṭitamassargaḥ |

tatastadamṛtāsvādaṃ gṛdhrarājena bhāṣitam |

niśamya muditā hṛṣṭāste vacaḥ plavagarṣabhāḥ || 1 ||

jāmbavān vānaraśreṣṭhassaha sarvaiḥ plavaṅgamaiḥ |

bhūtalātsahasotthāya gṛdhrarājānamabravīt || 2 ||

kva sītā kena vā dṛṣṭā ko vā harati maithilīm |

tadākhyātu bhavātsarvaṃ gatirbhava vanaukasām || 3 ||

ko dāśarathi bāṇānāṃ vajraveganipātinām |

svayaṃ lakṣmaṇamuktānāṃ na cintayati vikramam || 4 ||

sa harīnprītisaṃyuktānsītāśrutisamāhitān |

punarāśvasayanprītaḥ idaṃ vacanamabravīt || 5 ||

śrūyatāmiha vaidehyā yathā me haraṇaṃ śrutam |

yena cāpi mamā'khyātaṃ yatra vāyatalocanā || 6 ||

ahamasmingirau durge bahuyojanamāyate |

cirānnipatito vṛddhaḥ kṣīṇaprāṇaparākramaḥ || 7 ||

taṃ māmevaṃ gataṃ putrassupārśvonāma nāmataḥ |

āhāreṇa yathākālaṃ bibharti patatāṃ varaḥ || 8 ||

tīkṣṇakāmāstu gandharvāstīkṣṇakopā bhujaṅgamāḥ |

mṛgāṇāṃ tu bhayaṃ tīkṣṇaṃ tatastīkṣṇakṣudhā vayam || 9 ||

sa kadācitkṣudhārtasya mamāhārābhikāṅkṣiṇaḥ |

gatasūrye'hani prāpto mama putro hyanāmiṣaḥ || 10 ||

sa māmāhārasaṃrodhātpīḍitaṃ prītivardhanaḥ |

anumānya yathātattvamidaṃ vacanamabravīt || 11 ||

ahaṃ tāta yathākālamāmiṣārthī khamāplutaḥ |

mahendrasya girerdvāramāvṛtya susamāsthitaḥ || 12 ||

tatra sattvasahasrāṇāṃ sāgarāntaracāriṇām |

panthānameko'dhyavasaṃ sanniroddhumavāṅmukhaḥ || 13 ||

tatra kaścinmayā dṛṣṭa ssūryodayasamaprabhām |

striyamādāya gacchanvai bhinnāñjanacayaprabhaḥ || 14 ||

so'hamabhyavahārārthī tau dṛṣṭvā kṛtaniścayaḥ |

tena sāmnā vinītena panthānamabhiyācitaḥ || 15 ||

na hi sāmopapannānāṃ prahartā vidyate kvacit |

nīceṣvapi janaḥ kaścitkimaṅga bata madvidhaḥ || 16 ||

sa yātastejasā vyoma saṅkṣipanniva vegataḥ |

athā'haṃ khecarairbhūtairabhigamya sabhājitaḥ || 17 ||

diṣṭyā jīvati sīta iti hi abruvan māṃ maharṣayaḥ |

kathañcit sa kalatraḥ asau gataḥ te svasti asaṃśayam || 18 ||

eva muktastato'haṃ taissiddhaiḥ paramaśobhanaiḥ |

sa ca me rāvaṇo rājā rakṣasāṃ prativeditaḥ || 19 ||

harandāśaratherbhāryāṃ rāmasya janakātmajām |

bhraṣṭābharaṇakauśeyāṃ śokavegaparājitām || 20 ||

rāmalakṣmaṇayornāma krośantīṃ muktamūrdhajām |

eṣa kālātyayastāvaditi kālavidāṃ varaḥ || 21 ||

etamarthaṃ samagraṃ me supārśvaḥ pratyavedayat |

tacchṛtvā'pi hi me buddhirnāsītkācitparākrame || 22 ||

apakṣo hi kathaṃ pakṣī karma kiñcidupakrame |

yattu śakyaṃ mayā kartuṃ vāgbuddhiguṇavartinā || 23 ||

śrūyatāṃ tatpravakṣyāmi bhavatāṃ pauruṣāśrayam |

vāṅmatibhyāṃ tu sarveṣāṃ kariṣyāmi priyaṃ hi vaḥ || 24 ||

yaddhi dāśaratheḥ kāryaṃ mama tannātra saṃśayaḥ |

te bhavanto matiśreṣṭhā balavanto manasvinaḥ || 25 ||

preṣitāḥ kapirājena devairapi durāsadāḥ |

rāmalakṣmaṇabāṇāśca niśitāḥ kaṅkapatriṇaḥ || 26 ||

trayāṇāmapi lokānāṃ paryāptāstrāṇanigrahe |

kāmaṃ khalu daśagrīva stejobalasamanvitaḥ || 27 ||

bhavatāṃ tu samarthānāṃ na kiñcidapi duṣkaram |

tadalaṃ kālasaṅgena kriyatāṃ buddhiniścayaḥ || 28 ||

ityārṣe śrīmadrāmāyaṇe vālmīkīya ādikāvye kiṣkindhākāṇḍe ekonaṣaṣṭitamassargaḥ ||