4.50 Kishkindhakanda - Panchasha Sargah

ॐ

4.50 கிஷ்கிந்தாகாண்ட - பஞ்சாஶ ஸர்கஃ

Valmiki Tamil

ஶ்ரீமத்வால்மீகீய ராமாயணே கிஷ்கிந்தாகாண்டம் ।

அத பஞ்சாஶஸ்ஸர்கஃ ।

ஸஹ தாராங்கதாப்யாம் து ஸங்கம்ய ஹநுமாந்கபிஃ ।

விசிநோதி ஸ்ம விந்த்யஸ்ய குஹாஶ்ச கஹநாநி ச ॥ 1 ॥

ஸிம்ஹஶார்தூலஜுஷ்டேஷு ஶிலாஶ்ச ஸரிதஸ்ததா ।

விஷமேஷு நகேந்த்ரஸ்ய மஹாப்ரஸ்ரவணேஷு ச ॥ 2 ॥

ஆஸேதுஸ்தஸ்ய ஶைலஸ்ய கோடிம் தக்ஷ்ணிபஶ்சிமாம் ।

தேஷாம் தத்ரைவ வஸதாம் ஸ காலோ வ்யத்யவர்தத ॥ 3 ॥

ஸ ஹி தேஶோ துரந்வேஷோ குஹாகஹநவாந்மஹாந் ।

தத்ர வாயுஸுதஸ்ஸர்வம் விசிநோதி ஸ்ம பர்வதம் ॥ 4 ॥

பரஸ்பரேண ஹநுமா நந்யோந்யஸ்யாவிதூரதஃ ।

கஜோ கவாக்ஷோ கவயஶ்ஶரபோ கந்தமாதநஃ ॥ 5 ॥

மைந்தஶ்ச த்விவிதஶ்சைவ ஸுஷேணோ ஜாம்பவாந்நலஃ ।

அங்கதோ யுவராஜஶ்ச தாரஶ்ச வநகோசரஃ ॥ 6 ॥

கிரிஜாலாவ்ரு'தாந்தேஶாந்மார்கித்வா தக்ஷிணாம் திஶம் ।

விசிந்வந்தஸ்ததஸ்தத்ர தத்ரு'ஶுர்விவ்ரு'தம் பிலம் ॥ 7 ॥

துர்கம்ரு'க்ஷபிலம் நாம தாநவேநாபிரக்ஷிதம் ।

க்ஷுத்பிபாஸாபரீதாஶ்ச ஶ்ராந்தாஶ்ச ஸலிலார்திநஃ ॥ 8 ॥

அவகீர்ணம் லதாவ்ரு'க்ஷைர்தத்ரு'ஶுஸ்தே மஹாபிலம் ।

தத்ர க்ரௌஞ்சாஶ்ச ஹம்ஸாஶ்ச ஸாரஸாஶ்ச விநிஷ்க்ரமந் ॥ 9 ॥

ஜலார்த்ராஶ்சக்ரவாகாஶ்ச ரக்தாங்காஃ பத்மரேணுபிஃ ।

ததஸ்தத்பிலமாஸாத்ய ஸுகந்தி துரதிக்ரமம் ॥ 10 ॥

விஸ்மயவ்யக்ரமநஸோ பபூவுர்வாநரர்ஷபாஃ ।

ஸம்ஞ்ஜாதபரிஶங்காஸ்தே தத்பிலம் ப்லவகோத்தமாஃ ॥ 11 ॥

அப்யபத்யந்த ஸம்ஹ்ரு'ஷ்டாஸ்தேஜோவந்தோ மஹாபலாஃ ।

நாநாஸத்த்வஸமாகீர்ணம் தைத்யேந்த்ரநிலயோபமம் ॥ 12 ॥

துர்தர்ஶமதிகோரம் ச துர்விகாஹம் ச ஸர்வஶஃ ।

ததஃ பர்வதகூடாபோ ஹநூமாந்பவநாத்மஜஃ ॥ 13 ॥

அப்ரவீத்வாநராந்ஸர்வாந்காந்தாரவநகோவிதஃ ।

கிரிஜாலாவ்ரு'தாந்தேஶாந்மார்கித்வா தக்ஷிணாம் திஶம் ॥ 14 ॥

வயம் ஸர்வே பரிஶ்ராந்தா ந ச பஶ்யாம மைதிலீம் ।

அஸ்மாச்சாபி பிலாத்தம்ஸாஃ க்ரௌஞ்சாஶ்ச ஸஹ ஸாரஸைஃ ॥ 15 ॥

ஜலார்த்ராஶ்சக்ரவாகாஶ்ச நிஷ்பதந்தி ஸ்ம ஸர்வஶஃ ।

நூநம் ஸலிலவாநத்ர கூபோ வா யதி வா ஹ்ரதஃ ॥ 16 ॥

ததா சேமே பிலத்வாரி ஸ்நிக்தாஸ்திஷ்டந்தி பாதபாஃ ।

இத்யுக்த்வா தத்பிலம் ஸர்வே விவிஶுஸ்திமிராவ்ரு'தம் ॥ 17 ॥

அசந்த்ரஸூர்யம் ஹரயோ தத்ரு'ஶூ ரோமஹர்ஷணம் ।

நிஶாம்ய தஸ்மாத் ஶிம்ஹாம்ஶ்ச தாம்ஸ்தாம்ஶ்ச ம்ரு'கபக்ஷ்ணிஃ ॥ 18 ॥

ப்ரவிஷ்டா ஹரிஶார்தூலா பிலம் திமிரஸம்வ்ரு'தம் ।

ந தேஷாம் ஸஜ்ஜதே சக்ஷுர்ந தேஜோ ந பராக்ரமஃ ॥ 19 ॥

வாயோரிவ கதிஸ்தேஷாம் த்ரு'ஷ்டிஸ்தமஸி வர்ததே ।

தே ப்ரவிஷ்டாஸ்து வேகேந தத்பிலம் கபிகுஞ்ஜராஃ ॥ 20 ॥

ப்ரகாஶமபிராமம் ச தத்ரு'ஶுர்தேஶமுத்தமம் ।

ததஸ்தஸ்மிந்பிலே துர்கே நாநாபாதபஸங்குலே ॥ 21 ॥

அந்யோந்யம் ஸம்பரிஷ்வஜ்ய ஜக்முர்யோஜநமந்தரம் ।

தே நஷ்டஸஞ்ஜ்ஞாஸ்த்ரு'ஷிதாஸ்ஸம்ப்ராந்தாஸ்ஸலிலார்திநஃ ॥ 22 ॥

பரிபேதுர்பிலே தஸ்மிந்கஞ்சித்காலமதந்த்ரிதாஃ ।

தே க்ரு'ஶா தீநவதநாஃ பரிஶ்ராந்தாஃ ப்லவங்கமாஃ ॥ 23 ॥

ஆலோகம் தத்ரு'ஶுர்வீரா நிராஶா ஜீவிதே யதா ।

ததஸ்தம் தேஶமாகம்ய ஸௌம்யா விதிமிரம் வநம் ॥ 24 ॥

தத்ரு'ஶுஃ காஞ்சநாந்வ்ரு'க்ஷாந்தீப்தவைஶ்வாநரப்ரபாந் ।

ஸாலாம் ஸ்தாலாம்ஶ்ச புந்நாகாந்ககுபாந்வஞ்ஜுலாந்தவாந் ॥ 25 ॥

சம்பகாந் நாகவ்ரு'க்ஷாம்ஶ்ச கர்ணிகாராம்ஶ்ச புஷ்பிதாந் ।

ஸ்தபகைஃ காஞ்சநைஶ்சித்ரை ரக்தைஃ கிஸலயைஸ்ததா ॥ 26 ॥

ஆபீடைஶ்ச லதாபிஶ்ச ஹேமாபரணபூஷிதாந் ।

தருணாதித்யஸங்காஶாந்வைடூர்யக்ரு'தவேதிகாந் ॥ 27 ॥

விப்ராஜமாநாந்வபுஷா பாதபாம்ஶ்ச ஹிரண்மயாந் ।

நீலவைடூர்யவர்ணாஶ்ச பத்மிநீஃ பதகாவ்ரு'தாஃ ॥ 28 ॥

மஹத்பிஃ காஞ்சநைஃ பத்மைர்வ்ரு'தா பாலார்கஸந்நிபைஃ ।

ஜாதரூபமயைர்மத்ஸ்யைர்மஹத்பிஶ்ச ஸகச்சபைஃ ॥ 29 ॥

தபநீய கவாக்ஷாணி முக்தா ஜால ஆவ்ரு'தாநி ச ।

ஹைம ராஜத பௌமாநி வைதூர்ய மணிமந்தி ச ॥ 30 ॥

தபநீயகவாக்ஷாணி முக்தாஜாலாவ்ரு'தாநி ச ।

ஹைமராஜதபௌமாநி வைதூர்யமணிமந்தி ச ॥ 31 ॥

காஞ்சந ப்ரமராந் சைவ மதூநி ச ஸமந்ததஃ ।

மணி காஞ்சந சித்ராணி ஶயநாநி ஆஸநாநி ச ॥ 32 ॥

காஞ்சநப்ரமராம்ஶ்சைவ மதூநி ச ஸமந்ததஃ ।

மணிகாஞ்சநசித்ராணி ஶயநாந்யாஸநாநி ச ॥ 33 ॥

மஹார்ஹாணி சயாநாநி தத்ரு'ஶுஸ்தே ஸமந்ததஃ ।

ஹைமராஜதகாம்ஸ்யாநாம் பாஜநாநாம் ச ஸம்ஞ்சயாந் ॥ 34 ॥

அகரூணாம் ச திவ்யாநாம் சந்தநாநாம் ச ஸம்ஞ்சாயாந் ।

ஶுசீந்யப்யவஹார்யாணி மூலாநி ச பலாநி ச ॥ 35 ॥

மஹார்ஹாணி ச பாநாநி மதூநி ரஸவந்தி ச ।

திவ்யாநாமம்பராணாம் ச மஹார்ஹாணாம் ச ஸஞ்சயாந் ॥ 36 ॥

கம்பலாநாம் ச சித்ராணாமஜிநாநாம் ச ஸஞ்சயாந் ।

தத்ர தத்ர ச விந்யஸ்தாந்தீப்தாந்வைஶ்வாநரப்ரபாந் ॥ 37 ॥

தத்ரு'ஶுர்வாநராஶ்ஶுப்ராஞ்ஜாதரூபஸ்ய ஸஞ்சயாந் ।

தத்ர தத்ர விசிந்வந்தோ பிலே தஸ்மிந்மஹாபலாஃ ॥ 38 ॥

தத்ரு'ஶுர்வாநராஶ்ஶூராஃ ஸ்த்ரியம் காஞ்சிததூரதஃ ।

தாம் த்ரு'ஷ்ட்வா ப்ரு'ஶஸந்த்ரஸ்தாஶ்சீரக்ரு'ஷ்ணாஜிநாம்பராம் ॥ 39 ॥

தாபஸீம் நியதாஹாராம் ஜ்வலந்தீமிவ தேஜஸா ।

விஸ்மிதா ஹரயஸ்தத்ர வ்யவதிஷ்டந்த ஸர்வஶஃ ॥ 40 ॥

பப்ரச்ச ஹநுமாம்ஸ்தத்ர காऽஸி த்வம் கஸ்ய வா பிலம் ।

ததோ ஹநூமாந்கிரிஸந்நிகாஶஃ க்ரு'தாஜ்ஞலிஸ்தாமபிவாத்ய வ்ரு'த்தாம் ।

பப்ரச்ச கா த்வம் பவநம் பிலம் ச ரத்நாநி சேமாநி வதஸ்வ கஸ்ய ॥ 41 ॥

இத்யார்ஷே ஶ்ரீமத்ராமாயணே வால்மீகீய ஆதிகாவ்யே கிஷ்கிந்தாகாண்டே பஞ்சாஶஸ்ஸர்கஃ ॥

Roman (IAST) Transliteration

śrīmadvālmīkīya rāmāyaṇe kiṣkindhākāṇḍam |

atha pañcāśassargaḥ |

saha tārāṅgadābhyāṃ tu saṅgamya hanumānkapiḥ |

vicinoti sma vindhyasya guhāśca gahanāni ca || 1 ||

siṃhaśārdūlajuṣṭeṣu śilāśca saritastadā |

viṣameṣu nagendrasya mahāprasravaṇeṣu ca || 2 ||

āsedustasya śailasya koṭiṃ dakṣṇipaścimām |

teṣāṃ tatraiva vasatāṃ sa kālo vyatyavartata || 3 ||

sa hi deśo duranveṣo guhāgahanavānmahān |

tatra vāyusutassarvaṃ vicinoti sma parvatam || 4 ||

paraspareṇa hanumā nanyonyasyāvidūrataḥ |

gajo gavākṣo gavayaśśarabho gandhamādanaḥ || 5 ||

maindaśca dvividaścaiva suṣeṇo jāmbavānnalaḥ |

aṅgado yuvarājaśca tāraśca vanagocaraḥ || 6 ||

girijālāvṛtāndeśānmārgitvā dakṣiṇāṃ diśam |

vicinvantastatastatra dadṛśurvivṛtaṃ bilam || 7 ||

durgamṛkṣabilaṃ nāma dānavenābhirakṣitam |

kṣutpipāsāparītāśca śrāntāśca salilārthinaḥ || 8 ||

avakīrṇaṃ latāvṛkṣairdadṛśuste mahābilam |

tatra krauñcāśca haṃsāśca sārasāśca viniṣkraman || 9 ||

jalārdrāścakravākāśca raktāṅgāḥ padmareṇubhiḥ |

tatastadbilamāsādya sugandhi duratikramam || 10 ||

vismayavyagramanaso babhūvurvānararṣabhāḥ |

saṃñjātapariśaṅkāste tadbilaṃ plavagottamāḥ || 11 ||

abhyapadyanta saṃhṛṣṭāstejovanto mahābalāḥ |

nānāsattvasamākīrṇaṃ daityendranilayopamam || 12 ||

durdarśamatighoraṃ ca durvigāhaṃ ca sarvaśaḥ |

tataḥ parvatakūṭābho hanūmānpavanātmajaḥ || 13 ||

abravīdvānarānsarvānkāntāravanakovidaḥ |

girijālāvṛtāndeśānmārgitvā dakṣiṇāṃ diśam || 14 ||

vayaṃ sarve pariśrāntā na ca paśyāma maithilīm |

asmāccāpi bilāddhaṃsāḥ krauñcāśca saha sārasaiḥ || 15 ||

jalārdrāścakravākāśca niṣpatanti sma sarvaśaḥ |

nūnaṃ salilavānatra kūpo vā yadi vā hradaḥ || 16 ||

tathā ceme biladvāri snigdhāstiṣṭhanti pādapāḥ |

ityuktvā tadbilaṃ sarve viviśustimirāvṛtam || 17 ||

acandrasūryaṃ harayo dadṛśū romaharṣaṇam |

niśāmya tasmāt śiṃhāṃśca tāṃstāṃśca mṛgapakṣṇiḥ || 18 ||

praviṣṭā hariśārdūlā bilaṃ timirasaṃvṛtam |

na teṣāṃ sajjate cakṣurna tejo na parākramaḥ || 19 ||

vāyoriva gatisteṣāṃ dṛṣṭistamasi vartate |

te praviṣṭāstu vegena tadbilaṃ kapikuñjarāḥ || 20 ||

prakāśamabhirāmaṃ ca dadṛśurdeśamuttamam |

tatastasminbile durge nānāpādapasaṅkule || 21 ||

anyonyaṃ sampariṣvajya jagmuryojanamantaram |

te naṣṭasañjñāstṛṣitāssambhrāntāssalilārthinaḥ || 22 ||

paripeturbile tasminkañcitkālamatandritāḥ |

te kṛśā dīnavadanāḥ pariśrāntāḥ plavaṅgamāḥ || 23 ||

ālokaṃ dadṛśurvīrā nirāśā jīvite yadā |

tatastaṃ deśamāgamya saumyā vitimiraṃ vanam || 24 ||

dadṛśuḥ kāñcanānvṛkṣāndīptavaiśvānaraprabhān |

sālāṃ stālāṃśca punnāgānkakubhānvañjulāndhavān || 25 ||

campakān nāgavṛkṣāṃśca karṇikārāṃśca puṣpitān |

stabakaiḥ kāñcanaiścitrai raktaiḥ kisalayaistathā || 26 ||

āpīḍaiśca latābhiśca hemābharaṇabhūṣitān |

taruṇādityasaṅkāśānvaiḍhūryakṛtavedikān || 27 ||

vibhrājamānānvapuṣā pādapāṃśca hiraṇmayān |

nīlavaiḍhūryavarṇāśca padminīḥ patagāvṛtāḥ || 28 ||

mahadbhiḥ kāñcanaiḥ padmairvṛtā bālārkasannibhaiḥ |

jātarūpamayairmatsyairmahadbhiśca sakacchapaiḥ || 29 ||

tapanīya gavākṣāṇi muktā jāla āvṛtāni ca |

haima rājata bhaumāni vaidūrya maṇimanti ca || 30 ||

tapanīyagavākṣāṇi muktājālāvṛtāni ca |

haimarājatabhaumāni vaidūryamaṇimanti ca || 31 ||

kāñcana bhramarān caiva madhūni ca samantataḥ |

maṇi kāñcana citrāṇi śayanāni āsanāni ca || 32 ||

kāñcanabhramarāṃścaiva madhūni ca samantataḥ |

maṇikāñcanacitrāṇi śayanānyāsanāni ca || 33 ||

mahārhāṇi cayānāni dadṛśuste samantataḥ |

haimarājatakāṃsyānāṃ bhājanānāṃ ca saṃñcayān || 34 ||

agarūṇāṃ ca divyānāṃ candanānāṃ ca saṃñcāyān |

śucīnyabhyavahāryāṇi mūlāni ca phalāni ca || 35 ||

mahārhāṇi ca pānāni madhūni rasavanti ca |

divyānāmambarāṇāṃ ca mahārhāṇāṃ ca sañcayān || 36 ||

kambalānāṃ ca citrāṇāmajinānāṃ ca sañcayān |

tatra tatra ca vinyastāndīptānvaiśvānaraprabhān || 37 ||

dadṛśurvānarāśśubhrāñjātarūpasya sañcayān |

tatra tatra vicinvanto bile tasminmahābalāḥ || 38 ||

dadṛśurvānarāśśūrāḥ striyaṃ kāñcidadūrataḥ |

tāṃ dṛṣṭvā bhṛśasantrastāścīrakṛṣṇājināmbarām || 39 ||

tāpasīṃ niyatāhārāṃ jvalantīmiva tejasā |

vismitā harayastatra vyavatiṣṭhanta sarvaśaḥ || 40 ||

papraccha hanumāṃstatra kā'si tvaṃ kasya vā bilam |

tato hanūmāngirisannikāśaḥ kṛtājñalistāmabhivādya vṛddhām |

papraccha kā tvaṃ bhavanaṃ bilaṃ ca ratnāni cemāni vadasva kasya || 41 ||

ityārṣe śrīmadrāmāyaṇe vālmīkīya ādikāvye kiṣkindhākāṇḍe pañcāśassargaḥ ||