4.5 Kishkindhakanda - Panchama Sargah

ॐ

4.5 கிஷ்கிந்தாகாண்ட - பஞ்சம ஸர்கஃ

Valmiki Tamil

ஶ்ரீமத்வால்மீகீய ராமாயணே கிஷ்கிந்தாகாண்டம் ।

அத பஞ்சமஸ்ஸர்கஃ ।

ரு'ஶ்யமூகாத்து ஹநுமாந்கத்வா து மலயம் கிரிம் ।

ஆசசக்ஷே ததா வீரௌ கபிராஜாய ராகவௌ ॥ 1 ॥

அயம் ராமோ மஹாப்ராஜ்ஞ ஸ்ஸம்ப்ராப்தோ த்ரு'டவிக்ரமஃ ।

லக்ஷ்மணேந ஸஹ ப்ராத்ரா ராமோऽயம் ஸத்யவிக்ரமஃ ॥ 2 ॥

இக்ஷ்வாகூணாம் குலே ஜாதோ ராமோ தஶரதாத்மஜஃ ।

தர்மே நிகதிதஶ்சைவ பிதுர்நிர்தேஶபாரகஃ ॥ 3 ॥

தஸ்யாஸ்ய வஸதோऽரண்யே நியதஸ்ய மஹாத்மநஃ ।

ராவணேந ஹ்ரு'தா பார்யா ஸ த்வாம் ஶரணமாகதஃ ॥ 4 ॥

ராஜஸூயாஶ்வமேதைஶ்ச வஹ்நிர்யேநாபிதர்பிதஃ ।

தக்ஷிணாஶ்ச ததோத்ஸ்ரு'ஷ்டா காவஶ்ஶதஸஹஸ்ரஶஃ ॥ 5 ॥

தபஸா ஸத்யவாக்யேந வஸுதா யேந பாலிதா ।

ஸ்த்ரீ ஹேதோஸ்தஸ்ய புத்ரோऽயம் ராமஸ்த்வாம் ஶரணம் கதஃ ॥ 6 ॥

பவதா ஸக்யகாமௌ தௌ ப்ராதரௌ ராமலக்ஷ்மணௌ ।

ப்ரதிக்ரு'ஹ்யார்சயஸ்வைதௌ பூஜநீயதமாவுபௌ ॥ 7 ॥

ஶ்ருத்வா ஹநுமதோ வாக்யம் ஸுக்ரீவோ ஹ்ரு'ஷ்டமாநஸஃ ।

பயம் சராகவாத்கோரம் ப்ரஜஹௌ விகதஜ்வரஃ ॥ 8 ॥

ஸக்ரு'த்வா மாநுஷம் ரூபம் ஸுக்ரீவஃ ப்லவகர்ஷபஃ ।

தர்ஶநீயதமோ பூத்வா ப்ரீத்யா ப்ரோவாச ராகவம் ॥ 9 ॥

பவாந்தர்மவிநீதஶ்ச விக்ராந்தஸ்ஸர்வவத்ஸலஃ ।

ஆக்யாதா வாயுபுத்ரேண தத்த்வதோ மே பவத்குணாஃ ॥ 10 ॥

தந்மமைவைஷ ஸத்காரோ லாபஶ்சைவோத்தமஃ ப்ரபோ ।

யத்த்வமிச்சஸி ஸௌஹார்தம் வாநரேண மயா ஸஹ ॥ 11 ॥

ரோசதே யதி வா ஸக்யம் பாஹுரேஷ ப்ரஸாரிதஃ ।

க்ரு'ஹ்யதாம் பாணிநா பாணிர்மர்யாதா பத்யதாம் த்ருவா ॥ 12 ॥

ஏதத்து வசநம் ஶ்ருத்வா ஸுக்ரீவேண ஸுபாஷிதம் ।

ஸம்ப்ரஹ்ரு'ஷ்டமநா ஹஸ்தம் பீடயாமாஸ பாணிநா ॥ 13 ॥

ஹ்ரு'த்யம் ஸௌஹ்ரு'தமாலம்ப்யபர்யஷ்வஜத பீடிதம் ।

ததோ ஹநூமாந்ஸந்த்யஜ்ய பிக்ஷுரூபமரிந்தமஃ ॥ 14 ॥

காஷ்டயோஸ்ஸ்வேந ரூபேண ஜநயாமாஸ பாவகம் ।

தீப்யமாநம் ததோ வஹ்நிம் ஹ்நிம் புஷ்பைரப்யர்ச்ய ஸத்க்ரு'தம் ॥ 15 ॥

தயோர்மத்யேऽத ஸுப்ரீதோ நிததே ஸுஸமாஹிதஃ ।

ததோऽக்நிம் தீப்யமாநம் தௌ சக்ரதுஶ்ச ப்ரதக்ஷிணம் ॥ 16 ॥

ஸுக்ரீவோ ராகவஶ்சைவ வயஸ்யத்வமுபாகதௌ ।

ததஸ்ஸுப்ரீதமநஸௌ தாவுபௌ ஹரிராகவௌ ॥ 17 ॥

அந்யோந்யமபிவீக்ஷந்தௌ ந த்ரு'ப்திமுபஜக்மதுஃ ।

த்வம் வயஸ்யோऽஸி மே ஹ்ரு'த்யோ ஹ்யேகம் துஃகம் ஸுகம் ச நௌ ॥ 18 ॥

ஸுக்ரீவோ ராகவம் வாக்யமித்யுவாச ப்ரஹ்ரு'ஷ்டவத் ।

ததஸ்ஸுபர்ணபஹுலாம் சித்வா ஶாகாம் ஸுபுஷ்பிதாம் ॥ 19 ॥

ஸாலஸ்யாஸ்தீர்ய ஸுக்ரீவோ நிஷஸாத ஸராகவஃ ।

லக்ஷ்மணாயாத ஸம்ஹ்ரு'ஷ்டோ ஹநூமாந் ப்லவகர்ஷபஃ ॥ 20 ॥

ஶாகாம் சந்தநவ்ரு'க்ஷஸ்ய ததௌ பரமபுஷ்பிதாம் ।

ததஃ ப்ரஹ்ரு'ஷ்டஸ்ஸுக்ரீவஃ ஶ்லக்ஷ்ணம் மதுரயா கிரா ॥ 21 ॥

ப்ரத்யுவாச ததா ராமம் ஹர்ஷவ்யாகுலலோசநஃ ।

அஹம் விநிக்ரு'தோ ராம சராமீஹ பயார்திதஃ ॥ 22 ॥

ஹ்ரு'தபார்யோ வநே த்ரஸ்தோ துர்கமேததுபாஶ்ரிதஃ ।

ஸோऽஹம் த்ரஸ்தோ வநே பீதோ வஸாம்யுத்ப்ராந்தசேதநஃ ॥ 23 ॥

வாலிநா நிக்ரு'தோ ப்ராத்ரா க்ரு'தவைரஶ்ச ராகவ ।

வாலிநோ மே மஹாபாக பயார்தஸ்யாபயம் குரு ॥ 24 ॥

கர்துமர்ஹஸி காகுத்ஸ்த பயம் மே ந பவேத்யதா ।

ஏவமுக்தஸ்து தேஜஸ்வீ தர்மஜ்ஞோ தர்மவத்ஸலஃ ॥ 25 ॥

ப்ரத்யபாஷத காகுத்ஸ்தஃ ஸுக்ரீவம் ப்ரஹஸந்நிவ ।

உபகாரபலம் மித்ரம் விதிதம் மே மஹாகபே ॥ 26 ॥

வாலிநம் தம் வதிஷ்யாமி தவ பார்யாபஹாரிணம் ।

அமோகாஸ்ஸூர்யஸங்காஶா மமைதே நிஶிதாஶ்ஶராஃ ॥ 27 ॥

தஸ்மிந்வாலிநி துர்வ்ரு'த்தே நிபதிஷ்யந்தி வேகிதாஃ ।

கங்கபத்ரப்ரதிச்சந்நா மஹேந்த்ராஶநிஸந்நிபாஃ ॥ 28 ॥

தீக்ஷ்ணாக்ரா ரு'ஜுபர்வாணஸ்ஸரோஷா புஜகா இவ ।

தமத்ய வாலிநம் பஶ்ய தீக்ஷ்ணைராஶீவிஷோபமைஃ ॥ 29 ॥

ஶரைர்விநிஹதம் பூமௌ விகீர்ணமிவ பர்வதம் ।

ஸ து தத்வசநம் ஶ்ருத்வா ராகவஸ்யாத்மநோ ஹிதம் ॥ 30 ॥

ஸுக்ரீவஃ பரமப்ரீதஸ்ஸுமஹத்வாக்யமப்ரவீத் ।

தவ ப்ரஸாதேந ந்ரு'ஸிம்ஹ ராகவ ப்ரியாம் ச ராஜ்யம் ச ஸமாப்நுயாமஹம் ।

ததா குரு த்வம் நரதேவ வைரிணம் யதா நிஹம்ஸ்யத்ய ரிபும்மமாக்ரஜம் ॥ 31 ॥

ஸீதா கபீந்த்ரக்ஷணதாசராணாம் ராஜீவஹேமஜ்வலநோபமாநி ।

ஸுக்ரீவராமப்ரணயப்ரஸங்கே வாமாநி நேத்ராணி ஸமம் ஸ்புரந்தி ॥ 32 ॥

இத்யார்ஷே ஶ்ரீமத்ராமாயணே வால்மீகீய ஆதிகாவ்யே கிஷ்கிந்தாகாண்டே பஞ்சமஸ்ஸர்கஃ ॥

Roman (IAST) Transliteration

śrīmadvālmīkīya rāmāyaṇe kiṣkindhākāṇḍam |

atha pañcamassargaḥ |

ṛśyamūkāttu hanumāngatvā tu malayaṃ girim |

ācacakṣe tadā vīrau kapirājāya rāghavau || 1 ||

ayaṃ rāmo mahāprājña ssamprāpto dṛḍhavikramaḥ |

lakṣmaṇena saha bhrātrā rāmo'yaṃ satyavikramaḥ || 2 ||

ikṣvākūṇāṃ kule jāto rāmo daśarathātmajaḥ |

dharme nigaditaścaiva piturnirdeśapāragaḥ || 3 ||

tasyāsya vasato'raṇye niyatasya mahātmanaḥ |

rāvaṇena hṛtā bhāryā sa tvāṃ śaraṇamāgataḥ || 4 ||

rājasūyāśvamedhaiśca vahniryenābhitarpitaḥ |

dakṣiṇāśca tathotsṛṣṭā gāvaśśatasahasraśaḥ || 5 ||

tapasā satyavākyena vasudhā yena pālitā |

strī hetostasya putro'yaṃ rāmastvāṃ śaraṇaṃ gataḥ || 6 ||

bhavatā sakhyakāmau tau bhrātarau rāmalakṣmaṇau |

pratigṛhyārcayasvaitau pūjanīyatamāvubhau || 7 ||

śrutvā hanumato vākyaṃ sugrīvo hṛṣṭamānasaḥ |

bhayaṃ carāghavādghoraṃ prajahau vigatajvaraḥ || 8 ||

sakṛtvā mānuṣaṃ rūpaṃ sugrīvaḥ plavagarṣabhaḥ |

darśanīyatamo bhūtvā prītyā provāca rāghavam || 9 ||

bhavāndharmavinītaśca vikrāntassarvavatsalaḥ |

ākhyātā vāyuputreṇa tattvato me bhavadguṇāḥ || 10 ||

tanmamaivaiṣa satkāro lābhaścaivottamaḥ prabho |

yattvamicchasi sauhārdaṃ vānareṇa mayā saha || 11 ||

rocate yadi vā sakhyaṃ bāhureṣa prasāritaḥ |

gṛhyatāṃ pāṇinā pāṇirmaryādā badhyatāṃ dhruvā || 12 ||

etattu vacanaṃ śrutvā sugrīveṇa subhāṣitam |

samprahṛṣṭamanā hastaṃ pīḍayāmāsa pāṇinā || 13 ||

hṛdyaṃ sauhṛdamālambyaparyaṣvajata pīḍitam |

tato hanūmānsantyajya bhikṣurūpamarindamaḥ || 14 ||

kāṣṭhayossvena rūpeṇa janayāmāsa pāvakam |

dīpyamānaṃ tato vahniṃ hniṃ puṣpairabhyarcya satkṛtam || 15 ||

tayormadhye'tha suprīto nidadhe susamāhitaḥ |

tato'gniṃ dīpyamānaṃ tau cakratuśca pradakṣiṇam || 16 ||

sugrīvo rāghavaścaiva vayasyatvamupāgatau |

tatassuprītamanasau tāvubhau harirāghavau || 17 ||

anyonyamabhivīkṣantau na tṛptimupajagmatuḥ |

tvaṃ vayasyo'si me hṛdyo hyekaṃ duḥkhaṃ sukhaṃ ca nau || 18 ||

sugrīvo rāghavaṃ vākyamityuvāca prahṛṣṭavat |

tatassuparṇabahulāṃ chitvā śākhāṃ supuṣpitām || 19 ||

sālasyāstīrya sugrīvo niṣasāda sarāghavaḥ |

lakṣmaṇāyātha saṃhṛṣṭo hanūmān plavagarṣabhaḥ || 20 ||

śākhāṃ candanavṛkṣasya dadau paramapuṣpitām |

tataḥ prahṛṣṭassugrīvaḥ ślakṣṇaṃ madhurayā girā || 21 ||

pratyuvāca tadā rāmaṃ harṣavyākulalocanaḥ |

ahaṃ vinikṛto rāma carāmīha bhayārditaḥ || 22 ||

hṛtabhāryo vane trasto durgametadupāśritaḥ |

so'haṃ trasto vane bhīto vasāmyudbhrāntacetanaḥ || 23 ||

vālinā nikṛto bhrātrā kṛtavairaśca rāghava |

vālino me mahābhāga bhayārtasyābhayaṃ kuru || 24 ||

kartumarhasi kākutstha bhayaṃ me na bhavedyathā |

evamuktastu tejasvī dharmajño dharmavatsalaḥ || 25 ||

pratyabhāṣata kākutsthaḥ sugrīvaṃ prahasanniva |

upakāraphalaṃ mitraṃ viditaṃ me mahākape || 26 ||

vālinaṃ taṃ vadhiṣyāmi tava bhāryāpahāriṇam |

amoghāssūryasaṅkāśā mamaite niśitāśśarāḥ || 27 ||

tasminvālini durvṛtte nipatiṣyanti vegitāḥ |

kaṅkapatrapraticchannā mahendrāśanisannibhāḥ || 28 ||

tīkṣṇāgrā ṛjuparvāṇassaroṣā bhujagā iva |

tamadya vālinaṃ paśya tīkṣṇairāśīviṣopamaiḥ || 29 ||

śarairvinihataṃ bhūmau vikīrṇamiva parvatam |

sa tu tadvacanaṃ śrutvā rāghavasyātmano hitam || 30 ||

sugrīvaḥ paramaprītassumahadvākyamabravīt |

tava prasādena nṛsiṃha rāghava priyāṃ ca rājyaṃ ca samāpnuyāmaham |

tathā kuru tvaṃ naradeva vairiṇaṃ yathā nihaṃsyadya ripummamāgrajam || 31 ||

sītā kapīndrakṣaṇadācarāṇāṃ rājīvahemajvalanopamāni |

sugrīvarāmapraṇayaprasaṅge vāmāni netrāṇi samaṃ sphuranti || 32 ||

ityārṣe śrīmadrāmāyaṇe vālmīkīya ādikāvye kiṣkindhākāṇḍe pañcamassargaḥ ||