4.37 Kishkindhakanda - Saptatrimsha Sargah

ॐ

4.37 கிஷ்கிந்தாகாண்ட - ஸப்தத்ரிம்ஶ ஸர்கஃ

Valmiki Tamil

ஶ்ரீமத்வால்மீகீய ராமாயணே கிஷ்கிந்தாகாண்டம் ।

அத ஸப்தத்ரிம்ஶஸ்ஸர்கஃ ।

ஏவமுக்தஸ்து ஸுக்ரீவோ லக்ஷ்மணேந மஹாத்மநா ।

ஹநூமந்தம் ஸ்திதம் பார்ஶ்வே ஸசிவந்த்விதமப்ரவீத் ॥ 1 ॥

மஹேந்த்ரஹிமவத்விந்த்யகைலாஸஶிகரேஷு ச ।

மந்தரே பாண்டுஶிகரே பஞ்சஶைலேஷு யே ஸ்திதாஃ ॥ 2 ॥

தருணாதித்யவர்ணேஷு ப்ராஜமாநேஷு ஸர்வதஃ ।

பர்வதேஷு ஸமுத்ராந்தே பஶ்சிமாயாம் ச யே திஶி ॥ 3 ॥

ஆதித்யபவநே சைவ கிரௌ ஸந்த்யாப்ரஸந்நிபே ।

பத்மாதாலவநம் பீமம் ஸம்ஶ்ரிதா ஹரிபுங்கவாஃ ॥ 4 ॥

அஞ்ஜநாம்புதஸங்காஶாஃ குஞ்ஜரப்ரதிமௌஜஸஃ ।

அஞ்ஜநே பர்வதே சைவ யே வஸந்தி ப்லவங்கமாஃ ॥ 5 ॥

மநஶ்ஶிலா குஹாவாஸா வாநராஃ கநகப்ரபாஃ ।

மேருபார்ஶ்வகதாஶ்சைவ யே தூம்ரகிரிம் ஸம்ஶ்ரிதாஃ ॥ 6 ॥

தருணாதித்யவர்ணாஶ்ச பர்வதே யே மஹாருணே ।

பிபந்தோ மதுமைரேயம் பீமவேகாஃ ப்லவங்கமாஃ ॥ 7 ॥

வநேஷு ச ஸுரம்யேஷு ஸுகந்திஷு மஹத்ஸு ச ।

தாபஸாநாம் ச ரம்யேஷு வநாந்தேஷு ஸமந்ததஃ ॥ 8 ॥

தாம்ஸ்தாம் ஸ்த்வமாநய க்ஷிப்ரம் ப்ரு'திவ்யாம் ஸர்வவாநராந் ।

ஸாமதாநாதிபிஃ ஸ்ஸர்வைராஶு ப்ரேஷய வாநராந் ॥ 9 ॥

ப்ரேஷிதாஃ ப்ரதமம் யே ச மயாதூதா மஹாஜவாஃ ।

த்வரணார்தம் து பூயஸ்த்வம் ஹரீந் ஸம்ப்ரேஷயாபராந் ॥ 10 ॥

யே ப்ரஸக்தாஶ்ச காமேஷு தீர்கஸூத்ராஶ்ச வாநராஃ ।

இஹாऽநயஸ்வ தாந் ஸர்வாந் ஶீக்ரம் து மம ஶாஸநாத் ॥ 11 ॥

அஹோபிர்தஶபிர்யே ச நாகச்சந்தி மமாஜ்ஞயா ।

ஹந்தவ்யாஸ்தே துராத்மாநோ ராஜஶாஸநதூஷகாஃ ॥ 12 ॥

ஶதாந்யத ஸஹஸ்ராணாம் கோட்யஶ்ச மம ஶாஸநாத் ।

ப்ரயாந்து கபிஸிம்ஹாநாம் திஶோ மம மதே ஸ்திதாஃ ॥ 13 ॥

மேகபர்வதஸங்காஶாஶ்சாதயந்த இவாம்பரம் ।

கோரரூபாஃ கபிஶ்ரேஷ்டா யாந்து மச்சாஸநாதிதஃ ॥ 14 ॥

தே கதிஜ்ஞா கதிம் ஜ்ஞாத்வா ப்ரு'திவ்யாம் ஸர்வவாநராஃ ।

ஆநயந்து ஹரீந் ஸர்வாம்ஸ்த்வரிதா ஶஸநாந்மம ॥ 15 ॥

தஸ்ய வாநர ராஜஸ்ய ஶ்ருத்வா வாயுஸுதோ வசஃ ।

திக்ஷு ஸர்வாஸு விக்ராந்தாந்ப்ரேஷயாமாஸ வாநராந் ॥ 16 ॥

தே பதம் விஷ்ணுவிக்ராந்தம் பதத்ரிஜ்யோதிரத்வகாஃ ।

ப்ரயாதாஃ ப்ரஹிதா ராஜ்ஞா ஹரயஸ்தத்க்ஷணேந வை ॥ 17 ॥

தே ஸமுத்ரேஷு கிரிஷு வநேஷு ச ஸரஸ்ஸு ச ।

வாநரா வாநராந்ஸர்வாந்ராமஹேதோரசோதயந் ॥ 18 ॥

ம்ரு'த்யுகாலோபமஸ்யாऽஜ்ஞாம் ராஜராஜஸ்ய வாநராஃ ।

ஸுக்ரீவஸ்யாயயு ஶ்ஶ்ருத்வா ஸுக்ரீவபயதர்ஶிநஃ ॥ 19 ॥

ததஸ்தேऽஞ்ஜநஸங்காஶா கிரேஸ்தஸ்மாந்மஹாஜவாஃ ।

திஸ்ரஃ கோட்யஃ ப்லவங்காநாம் நிர்யயுர்யத்ர ராகவஃ ॥ 20 ॥

அஸ்தம் கச்சதி யத்ரார்கஸ்தஸ்மிந்கிரிவரே ஸ்திதாஃ ।

ஸந்தப்த ஹேமமஹாபாஸஸ்தஸ்மாத்கோட்யோ தஶ ச்யுதாஃ ॥ 21 ॥

கைலாஸஶிகரேப்யஶ்ச ஸிம்ஹகேஸரவர்சஸாம் ।

ததஃ கோடிஸஹஸ்ராணி வாநராணாமுபாகமந் ॥ 22 ॥

பலமூலேந ஜீவந்தோ ஹிமவந்தமுபாஶ்ரிதாஃ ।

தேஷாம் கோடிஸஹஸ்ராணாம் ஸஹஸ்ரம் ஸமவர்தத ॥ 23 ॥

அங்காரகஸமாநாநாம் பீமாநாம் பீமகர்மணாம் ।

விந்த்யாத்வாநரகோடீநாம் ஸஹஸ்ராண்யபதந்த்ருதம் ॥ 24 ॥

க்ஷீரோதவேலாநிலயாஸ்தமாலவநவாஸிநஃ ।

நாரிகேலாஶநாஶ்சைவ தேஷாம் ஸங்க்யா ந வித்யதே ॥ 25 ॥

வநேப்யோ கஹ்வரேப்யஶ்ச ஸரித்ப்யஶ்ச மஹாஜவா ।

ஆகச்சத்வாநரீ ஸேநா பிபந்தீவ திவாகரம் ॥ 26 ॥

யே து த்வரயிதும் யாதா வாநராஸ்ஸர்வவாநராந் ।

தே வீரா ஹிமவச்சைலம் தத்ரு'ஶுஸ்தம் மஹாத்ருமம் ॥ 27 ॥

தஸ்மிந்கிரிவரே ரம்யே யஜ்ஞோ மாஹேஶ்வரஃ புரா ।

ஸர்வதேவமநஸ்தோஷோ பபௌ திவ்யோ மநோஹரஃ ॥ 28 ॥

அந்நநிஷ்யந்தஜாதாநி மூலாநி ச பலாநி ச ।

அம்ரு'தாஸ்வாதகல்பாநி தத்ரு'ஶுஸ்தத்ர வாநராஃ ॥ 29 ॥

ததந்நஸம்பவம் திவ்யம் பலமூலம் மநோஹரம் ।

யஃ கஶ்சித்ஸக்ரு'தஶ்நாதி மாஸம் பவதி தர்பிதஃ ॥ 30 ॥

தாநி மூலாநி திவ்யாநி பலாநி ச பலாஶநாஃ ।

ஔஷதாநி ச திவ்யாநி ஜக்ரு'ஹுர்ஹரியூதபாஃ ॥ 31 ॥

தஸ்மாச்ச யஜ்ஞாயதநாத்புஷ்பாணி ஸுரபீணி ச ।

ஆநிந்யுர்வாநரா கத்வா ஸுக்ரீவப்ரியகாரணாத் ॥ 32 ॥

தே து ஸர்வே ஹரிவராஃ ப்ரு'திவ்யாம் ஸர்வவாநராந் ।

ஸஞ்சோதயித்வா த்வரிதா யூதாநாம் ஜக்முரக்ரதஃ ॥ 33 ॥

தே து தேந முஹூர்தேந யூதபாஶ்ஶீக்ரகாமிநஃ ।

கிஷ்கிந்தாம் த்வரயா ப்ராப்தா ஸ்ஸுக்ரீவோ யத்ர வாநரஃ ॥ 34 ॥

தே க்ரு'ஹீத்வௌஷதீஸ்ஸர்வாஃ பலமூலம் ச வாநராஃ ।

தம் ப்ரதிக்ராஹயாமாஸுர்வசநம் சேதமப்ருவந் ॥ 35 ॥

ஸர்வே பரிகதாஶ்ஶைலாஸ்ஸமுத்ராஶ்ச வநாநி ச ।

ப்ரு'திவ்யாம் வாநராஸ்ஸர்வே ஶாஸநாதுபயாந்தி தே ॥ 36 ॥

ஏவம் ஶ்ருத்வா ததோ ஹ்ரு'ஷ்ட ஸ்ஸுக்ரீவஃ ப்லவகாதிபஃ ।

ப்ரதிஜக்ராஹ தத்ப்ரதீதஸ்தேஷாம் ஸர்வமுபாயநம் ॥ 37 ॥

இத்யார்ஷே ஶ்ரீமத்ராமாயணே வால்மீகீய ஆதிகாவ்யே கிஷ்கிந்தாகாண்டே ஸப்தத்ரிம்ஶஸ்ஸர்கஃ ॥

Roman (IAST) Transliteration

śrīmadvālmīkīya rāmāyaṇe kiṣkindhākāṇḍam |

atha saptatriṃśassargaḥ |

evamuktastu sugrīvo lakṣmaṇena mahātmanā |

hanūmantaṃ sthitaṃ pārśve sacivantvidamabravīt || 1 ||

mahendrahimavadvindhyakailāsaśikhareṣu ca |

mandare pāṇḍuśikhare pañcaśaileṣu ye sthitāḥ || 2 ||

taruṇādityavarṇeṣu bhrājamāneṣu sarvataḥ |

parvateṣu samudrānte paścimāyāṃ ca ye diśi || 3 ||

ādityabhavane caiva girau sandhyābhrasannibhe |

padmātālavanaṃ bhīmaṃ saṃśritā haripuṅgavāḥ || 4 ||

añjanāmbudasaṅkāśāḥ kuñjarapratimaujasaḥ |

añjane parvate caiva ye vasanti plavaṅgamāḥ || 5 ||

manaśśilā guhāvāsā vānarāḥ kanakaprabhāḥ |

merupārśvagatāścaiva ye dhūmragiriṃ saṃśritāḥ || 6 ||

taruṇādityavarṇāśca parvate ye mahāruṇe |

pibanto madhumaireyaṃ bhīmavegāḥ plavaṅgamāḥ || 7 ||

vaneṣu ca suramyeṣu sugandhiṣu mahatsu ca |

tāpasānāṃ ca ramyeṣu vanānteṣu samantataḥ || 8 ||

tāṃstāṃ stvamānaya kṣipraṃ pṛthivyāṃ sarvavānarān |

sāmadānādibhiḥ ssarvairāśu preṣaya vānarān || 9 ||

preṣitāḥ prathamaṃ ye ca mayādūtā mahājavāḥ |

tvaraṇārthaṃ tu bhūyastvaṃ harīn sampreṣayāparān || 10 ||

ye prasaktāśca kāmeṣu dīrghasūtrāśca vānarāḥ |

ihā'nayasva tān sarvān śīghraṃ tu mama śāsanāt || 11 ||

ahobhirdaśabhirye ca nāgacchanti mamājñayā |

hantavyāste durātmāno rājaśāsanadūṣakāḥ || 12 ||

śatānyatha sahasrāṇāṃ koṭyaśca mama śāsanāt |

prayāntu kapisiṃhānāṃ diśo mama mate sthitāḥ || 13 ||

meghaparvatasaṅkāśāśchādayanta ivāmbaram |

ghorarūpāḥ kapiśreṣṭhā yāntu macchāsanāditaḥ || 14 ||

te gatijñā gatiṃ jñātvā pṛthivyāṃ sarvavānarāḥ |

ānayantu harīn sarvāṃstvaritā śasanānmama || 15 ||

tasya vānara rājasya śrutvā vāyusuto vacaḥ |

dikṣu sarvāsu vikrāntānpreṣayāmāsa vānarān || 16 ||

te padaṃ viṣṇuvikrāntaṃ patatrijyotiradhvagāḥ |

prayātāḥ prahitā rājñā harayastatkṣaṇena vai || 17 ||

te samudreṣu giriṣu vaneṣu ca sarassu ca |

vānarā vānarānsarvānrāmahetoracodayan || 18 ||

mṛtyukālopamasyā'jñāṃ rājarājasya vānarāḥ |

sugrīvasyāyayu śśrutvā sugrīvabhayadarśinaḥ || 19 ||

tataste'ñjanasaṅkāśā girestasmānmahājavāḥ |

tisraḥ koṭyaḥ plavaṅgānāṃ niryayuryatra rāghavaḥ || 20 ||

astaṃ gacchati yatrārkastasmingirivare sthitāḥ |

santapta hemamahābhāsastasmātkoṭyo daśa cyutāḥ || 21 ||

kailāsaśikharebhyaśca siṃhakesaravarcasām |

tataḥ koṭisahasrāṇi vānarāṇāmupāgaman || 22 ||

phalamūlena jīvanto himavantamupāśritāḥ |

teṣāṃ koṭisahasrāṇāṃ sahasraṃ samavartata || 23 ||

aṅgārakasamānānāṃ bhīmānāṃ bhīmakarmaṇām |

vindhyādvānarakoṭīnāṃ sahasrāṇyapatandrutam || 24 ||

kṣīrodavelānilayāstamālavanavāsinaḥ |

nārikelāśanāścaiva teṣāṃ saṅkhyā na vidyate || 25 ||

vanebhyo gahvarebhyaśca saridbhyaśca mahājavā |

āgacchadvānarī senā pibantīva divākaram || 26 ||

ye tu tvarayituṃ yātā vānarāssarvavānarān |

te vīrā himavacchailaṃ dadṛśustaṃ mahādrumam || 27 ||

tasmingirivare ramye yajño māheśvaraḥ purā |

sarvadevamanastoṣo babhau divyo manoharaḥ || 28 ||

annaniṣyandajātāni mūlāni ca phalāni ca |

amṛtāsvādakalpāni dadṛśustatra vānarāḥ || 29 ||

tadannasambhavaṃ divyaṃ phalamūlaṃ manoharam |

yaḥ kaścitsakṛdaśnāti māsaṃ bhavati tarpitaḥ || 30 ||

tāni mūlāni divyāni phalāni ca phalāśanāḥ |

auṣadhāni ca divyāni jagṛhurhariyūthapāḥ || 31 ||

tasmācca yajñāyatanātpuṣpāṇi surabhīṇi ca |

āninyurvānarā gatvā sugrīvapriyakāraṇāt || 32 ||

te tu sarve harivarāḥ pṛthivyāṃ sarvavānarān |

sañcodayitvā tvaritā yūthānāṃ jagmuragrataḥ || 33 ||

te tu tena muhūrtena yūthapāśśīghragāminaḥ |

kiṣkindhāṃ tvarayā prāptā ssugrīvo yatra vānaraḥ || 34 ||

te gṛhītvauṣadhīssarvāḥ phalamūlaṃ ca vānarāḥ |

taṃ pratigrāhayāmāsurvacanaṃ cedamabruvan || 35 ||

sarve parigatāśśailāssamudrāśca vanāni ca |

pṛthivyāṃ vānarāssarve śāsanādupayānti te || 36 ||

evaṃ śrutvā tato hṛṣṭa ssugrīvaḥ plavagādhipaḥ |

pratijagrāha tatpratītasteṣāṃ sarvamupāyanam || 37 ||

ityārṣe śrīmadrāmāyaṇe vālmīkīya ādikāvye kiṣkindhākāṇḍe saptatriṃśassargaḥ ||