4.35 Kishkindhakanda - Panchatrimsha Sargah

ॐ

4.35 கிஷ்கிந்தாகாண்ட - பஞ்சத்ரிம்ஶ ஸர்கஃ

Valmiki Tamil

ஶ்ரீமத்வால்மீகீய ராமாயணே கிஷ்கிந்தாகாண்டம் ।

அத பஞ்சத்ரிம்ஶஸ்ஸர்கஃ ।

ததா ப்ருவாணம் ஸௌமித்ரிம் ப்ரதீப்தமிவ தேஜஸா ।

அப்ரவீல்லக்ஷ்மணம் தாரா தாராதிபநிபாநநா ॥ 1 ॥

நைவம் லக்ஷ்மண வக்தவ்யோ நாயம் பருஷமர்ஹதி ।

ஹரீணாமீஶ்வரஶ்ஶ்ரோதும் தவ வக்த்ராத்விஶேஷதஃ ॥ 2 ॥

நைவாக்ரு'தஜ்ஞஸ்ஸுக்ரீவோ ந ஶடோ நாபி தாருணஃ ।

நைவாந்ரு'தகதோ வீர ந ஜிஹ்மஶ்ச கபீஶ்வரஃ ॥ 3 ॥

உபகாரம் க்ரு'தம் வீரோ நாப்யயம் விஸ்ம்ரு'தஃ கபிஃ ।

ராமேண வீர ஸுக்ரீவோ யதந்யைர்துஷ்கரம் ரணே ॥ 4 ॥

ராமப்ரஸாதாத்கீர்திஞ்ச கபிராஜ்யம் ச ஶாஶ்வதம் ।

ப்ராப்தவாநிஹ ஸுக்ரீவோ ருமாம் மாம் ச பரந்தப ॥ 5 ॥

ஸுதுஃகம் ஶயிதஃ பூர்வம் ப்ராப்யேதம் ஸுகமுத்தமம் ।

ப்ராப்தகாலம் ந ஜாநீதே விஶ்வாமித்ரோ யதா முநிஃ ॥ 6 ॥

க்ரு'தாச்யாம் கில ஸம்ஸக்தோ தஶவர்ஷாணி லக்ஷ்மண ।

அஹோऽமந்யத தர்மாத்மா விஶ்வாமித்ரோ மஹாமுநிஃ ॥ 7 ॥

ஸ ஹி ப்ராப்தம் ந ஜாநீதே காலம் காலவிதாம் வரஃ ।

விஶ்வாமித்ரோ மஹாதேஜாஃ கிம் புநர்யஃ ப்ரு'தக்ஜநஃ ॥ 8 ॥

தேஹதர்மம் கதஸ்யாஸ்ய பரிஶ்ராந்தஸ்ய லக்ஷ்மண ।

அவித்ரு'ப்தஸ்ய காமேஷு காமம் க்ஷந்துமிஹார்ஹஸி ॥ 9 ॥

ந ச ரோஷவஶம் தாத கந்துமர்ஹஸி லக்ஷ்மண ।

நிஶ்சயார்தமவிஜ்ஞாய ஸஹஸா ப்ராக்ரு'தோ யதா ॥ 10 ॥

ஸத்த்வயுக்தா ஹி புருஷாஸ்த்வத்விதாஃ புருஷர்ஷப ।

அவிம்ரு'ஶ்ய ந ரோஷஸ்ய ஸஹஸா யாந்தி வஶ்யதாம் ॥ 11 ॥

ப்ரஸாதயே த்வாம் தர்மஜ்ஞ ஸுக்ரீவார்தே ஸமாஹிதா ।

மஹாந்ரோஷஸமுத்பந்ந ஸ்ஸம்ரம்பஸ்த்யஜ்யதாமயம் ॥ 12 ॥

ருமாம் மாம் கபி ராஜ்யம் ச தநதாந்யவஸூநி ச ।

ராமப்ரியார்தம் ஸுக்ரீவஸ்த்யஜேதிதி மதிர்மம ॥ 13 ॥

ஸமாநேஷ்யதி ஸுக்ரீவ ஸ்ஸீதயா ஸஹ ராகவம் ।

ஶஶாங்கமிவ ரோஹிண்யா நிஹத்வா ராவணம் ரணே ॥ 14 ॥

ஶதகோடிஸஹஸ்ராணி லங்காயாம் கில ராக்ஷஸாஃ ।

ஆயுதாநி ச ஷட்த்ரிம்ஶத்ஸஹஸ்ராணி ஶதாநி ச ॥ 15 ॥

அஹத்வா தாம்ஶ்ச துர்தர்ஷாந்ராக்ஷஸாந்காமரூபிணஃ ।

ந ஶக்யோ ராவணோ ஹந்தும் யேந ஸா மைதிலீ ஹ்ரு'தா ॥ 16 ॥

தே ந ஶக்யா ரணே ஹந்துமஸஹாயேந லக்ஷ்மண ।

ராவணஃ க்ரூரகர்மா ச ஸுக்ரீவேண விஶேஷதஃ ॥ 17 ॥

ஏவமாக்யாதவாந்வாலீ ஸ ஹ்யபிஜ்ஞோ ஹரீஶ்வரஃ ।

ஆகமஸ்து ந மே வ்யக்தஶ்ஶ்ரவாத்தஸ்மாத்ப்ரவீம்யஹம் ॥ 18 ॥

த்வத்ஸஹாயநிமித்தம் வை ப்ரேஷிதா ஹரிபுங்கவாஃ ।

ஆநேதும் வாநராந்யுத்தே ஸுபஹூந்ஹரியூதபாந் ॥ 19 ॥

தாம்ஶ்ச ப்ரதீக்ஷமாணோऽயம் விக்ராந்தாத்ஸுமஹாபலாந் ।

ராகவஸ்யார்தஸித்யர்தம் ந நிர்யாதி ஹரீஶ்வரஃ ॥ 20 ॥

க்ரு'தா து ஸம்ஸ்தா ஸௌமித்ரே ஸுக்ரீவேண புரா யதா ।

அத்ய தைர்வாநரைஸ்ஸர்வைராகந்தவ்யம் மஹாபலைஃ ॥ 21 ॥

ரு'க்ஷகோடிஸஹஸ்ராணி கோலாங்கூலஶதாநி ச ।

அத்ய த்வாமுபயாஸ்யந்தி ஜஹி கோபமரிந்தம ।

கோட்யோऽநேகாஸ்து காகுத்ஸ்த கபீநாம் தீப்ததேஜஸாம் ॥ 22 ॥

தவ ஹி முகமிதம் நிரீக்ஷ்ய கோபாத் க்ஷதஜநிபே நயநே நிரீக்ஷமாணாஃ ।

ஹரிவரவநிதா ந யாந்தி ஶாந்திம் ப்ரதமபயஸ்ய ஹி ஶங்கிதாஸ்து ஸர்வாஃ ॥ 23 ॥

இத்யார்ஷே ஶ்ரீமத்ராமாயணே வால்மீகீய ஆதிகாவ்யே கிஷ்கிந்தாகாண்டே பஞ்சத்ரிம்ஶஸ்ஸர்கஃ ॥

Roman (IAST) Transliteration

śrīmadvālmīkīya rāmāyaṇe kiṣkindhākāṇḍam |

atha pañcatriṃśassargaḥ |

tathā bruvāṇaṃ saumitriṃ pradīptamiva tejasā |

abravīllakṣmaṇaṃ tārā tārādhipanibhānanā || 1 ||

naivaṃ lakṣmaṇa vaktavyo nāyaṃ paruṣamarhati |

harīṇāmīśvaraśśrotuṃ tava vaktrādviśeṣataḥ || 2 ||

naivākṛtajñassugrīvo na śaṭho nāpi dāruṇaḥ |

naivānṛtakatho vīra na jihmaśca kapīśvaraḥ || 3 ||

upakāraṃ kṛtaṃ vīro nāpyayaṃ vismṛtaḥ kapiḥ |

rāmeṇa vīra sugrīvo yadanyairduṣkaraṃ raṇe || 4 ||

rāmaprasādātkīrtiñca kapirājyaṃ ca śāśvatam |

prāptavāniha sugrīvo rumāṃ māṃ ca parantapa || 5 ||

suduḥkhaṃ śayitaḥ pūrvaṃ prāpyedaṃ sukhamuttamam |

prāptakālaṃ na jānīte viśvāmitro yathā muniḥ || 6 ||

ghṛtācyāṃ kila saṃsakto daśavarṣāṇi lakṣmaṇa |

aho'manyata dharmātmā viśvāmitro mahāmuniḥ || 7 ||

sa hi prāptaṃ na jānīte kālaṃ kālavidāṃ varaḥ |

viśvāmitro mahātejāḥ kiṃ punaryaḥ pṛthagjanaḥ || 8 ||

dehadharmaṃ gatasyāsya pariśrāntasya lakṣmaṇa |

avitṛptasya kāmeṣu kāmaṃ kṣantumihārhasi || 9 ||

na ca roṣavaśaṃ tāta gantumarhasi lakṣmaṇa |

niścayārthamavijñāya sahasā prākṛto yathā || 10 ||

sattvayuktā hi puruṣāstvadvidhāḥ puruṣarṣabha |

avimṛśya na roṣasya sahasā yānti vaśyatām || 11 ||

prasādaye tvāṃ dharmajña sugrīvārthe samāhitā |

mahānroṣasamutpanna ssaṃrambhastyajyatāmayam || 12 ||

rumāṃ māṃ kapi rājyaṃ ca dhanadhānyavasūni ca |

rāmapriyārthaṃ sugrīvastyajediti matirmama || 13 ||

samāneṣyati sugrīva ssītayā saha rāghavam |

śaśāṅkamiva rohiṇyā nihatvā rāvaṇaṃ raṇe || 14 ||

śatakoṭisahasrāṇi laṅkāyāṃ kila rākṣasāḥ |

āyutāni ca ṣaṭtriṃśatsahasrāṇi śatāni ca || 15 ||

ahatvā tāṃśca durdharṣānrākṣasānkāmarūpiṇaḥ |

na śakyo rāvaṇo hantuṃ yena sā maithilī hṛtā || 16 ||

te na śakyā raṇe hantumasahāyena lakṣmaṇa |

rāvaṇaḥ krūrakarmā ca sugrīveṇa viśeṣataḥ || 17 ||

evamākhyātavānvālī sa hyabhijño harīśvaraḥ |

āgamastu na me vyaktaśśravāttasmādbravīmyaham || 18 ||

tvatsahāyanimittaṃ vai preṣitā haripuṅgavāḥ |

ānetuṃ vānarānyuddhe subahūnhariyūdhapān || 19 ||

tāṃśca pratīkṣamāṇo'yaṃ vikrāntātsumahābalān |

rāghavasyārthasidhyarthaṃ na niryāti harīśvaraḥ || 20 ||

kṛtā tu saṃsthā saumitre sugrīveṇa purā yathā |

adya tairvānaraissarvairāgantavyaṃ mahābalaiḥ || 21 ||

ṛkṣakoṭisahasrāṇi golāṅgūlaśatāni ca |

adya tvāmupayāsyanti jahi kopamarindama |

koṭyo'nekāstu kākutstha kapīnāṃ dīptatejasām || 22 ||

tava hi mukhamidaṃ nirīkṣya kopāt kṣatajanibhe nayane nirīkṣamāṇāḥ |

harivaravanitā na yānti śāntiṃ prathamabhayasya hi śaṅkitāstu sarvāḥ || 23 ||

ityārṣe śrīmadrāmāyaṇe vālmīkīya ādikāvye kiṣkindhākāṇḍe pañcatriṃśassargaḥ ||