4.17 Kishkindhakanda - Saptadasha Sargah

ॐ

4.17 கிஷ்கிந்தாகாண்ட - ஸப்ததஶ ஸர்கஃ

Valmiki Tamil

ஶ்ரீமத்வால்மீகீய ராமாயணே கிஷ்கிந்தாகாண்டம் ।

அத ஸப்ததஶஸ்ஸர்கஃ ।

ததஶ்ஶரேணாபிஹதோ ராமேண ரணகர்கஶஃ ।

பபாத ஸஹஸா வாலீ நிக்ரு'த்த இவ பாதபஃ ॥ 1 ॥

ஸ பூமௌ ந்யஸ்தஸர்வாங்கஸ்தப்தகாஞ்சநபூஷணஃ ।

அபதத்தேவராஜஸ்ய முக்தரஶ்மிரிவ த்வஜஃ ॥ 2 ॥

தஸ்மிந்நிபதிதே பூமௌ வாநராணாம் கணேஶ்வரே ।

நஷ்டசந்த்ரமிவ வ்யோம ந வ்யராஜத பூதலம் ॥ 3 ॥

பூமௌ நிபதிதஸ்யாபி தஸ்ய தேஹம் மஹாத்மநஃ ।

ந ஶ்ரீர்ஜஹாதி ந ப்ராணா ந தேஜோ ந பராக்ரமஃ ॥ 4 ॥

ஶக்ரதத்தா வரா மாலா காஞ்சநீ வஜ்ரபூஷிதா ।

ததார ஹரிமுக்யஸ்ய ப்ராணாம்ஸ்தேஜ்ஶியம் ச ஸா ॥ 5 ॥

ஸ தயா மாலயா வீரோ ஹேமயா ஹரியூதபஃ ।

ஸந்த்யாநுகதபர்யந்தஃ பயோதர இவாபவத் ॥ 6 ॥

தஸ்ய மாலா ச தேஹஶ்ச மர்மகாதீ ச யஶ்ஶரஃ ।

த்ரிதேவ ரசிதா லக்ஷ்மீஃ பதிதஸ்யாபி ஶோபதே ॥ 7 ॥

ததஸ்த்ரம் தஸ்ய வீரஸ்ய ஸ்வர்கமார்கப்ரபாவநம் ।

ராமபாணாஸநக்ஷிப்தமாவஹத்பரமாம் கதிம் ॥ 8 ॥

தம் ததா பதிதம் ஸங்க்யே கதார்சிஷமிவாநலம் ।

பஹுமாந்ய ச தம் வீர வீக்ஷமாணம் ஶநைரிவ ॥ 9 ॥

யயாதிமிவ புண்யாந்தே தேவலோகாதிஹச்யுதம் ।

ஆதித்யமிவ காலேந யுகாந்தே புவி பாதிதம் ॥ 10 ॥

மஹேந்த்ரமிவ துர்தர்ஷம்முபேந்த்ரமிவ துஸ்ஸஹம் ।

மஹேந்த்ரபுத்ரம் பதிதம் வாலிநம் ஹேமமாலிநம் ॥ 11 ॥

ஸிம்ஹோரஸ்கம் மஹாபாஹும் தீப்தாஸ்யம் ஹரிலோசநம் ।

லக்ஷ்மணாநுகதோ ராமோ ததர்ஶோபஸஸர்ப ச ॥ 12 ॥

தம் த்ரு'ஷ்ட்வா ராகவம் வாலீ லக்ஷ்மணம் ச மஹாபலம் ।

அப்ரவீத்ப்ரஶ்ரிதம் வாக்யம் பருஷம் தர்மஸம்ஹிதம் ॥ 13 ॥

த்வம் நராதிபதேஃ புத்ரஃ ப்ரதிதஃ ப்ரியதர்ஶநஃ குலீநஸ்ஸத்த்வஸம்பந்ந ஸ்தேஜஸ்வீ சரிதவ்ரதஃ ॥ 14 ॥

பராங்முகவதம் க்ரு'த்வா கோऽத்ர ப்ராப்தஸ்த்வயா குணஃ ।

யதஹம் யுத்தஸம்ரப்தஶ்ஶரேணோரஸி தாடிதஃ ॥ 15 ॥

ராமஃ கருணவேதீ ச ப்ரஜாநாம் ச ஹிதே ரதஃ ।

ஸாநுக்ரோஶோ ஜிதோத்ஸாஹஸ்ஸமயஜ்ஞோ த்ரு'டவ்ரதஃ ॥ 16 ॥

இதி தே ஸர்வபூதாநி கதயந்தி யஶோ புவி ॥ 17 ॥

தமஶ்ஶமஃ க்ஷமா தர்மோ த்ரு'திஸ்ஸத்யம் பராக்ரமஃ ।

பார்திவாநாம் குணா ராஜந்தண்டஶ்சாப்யபராதிஷு ॥ 18 ॥

தாந்குணாந்ஸம்ப்ரதார்யாஹமக்ர்யம் சாபிஜநம் தவ ।

தாரயா ப்ரதிஷித்தோऽபி ஸுக்ரீவேண ஸமாகதஃ ॥ 19 ॥

ந மாமந்யேந ஸம்ரப்தம் ப்ரமத்தம் யோத்து மர்ஹஸி ।

இதி மே புத்திருத்பந்நா பபூவாதர்ஶநே தவ ॥ 20 ॥

ந த்வாம் விநிஹதாத்மாநம் தர்மத்வஜமதார்மிகம் ।

ஜாநே பாபஸமாசாரம் த்ரு'ணைஃ கூபமிவாவ்ரு'தம் ॥ 21 ॥

ஸதாம் வேஷதரம் பாபம் ப்ரச்சந்நமிவ பாவகம் ।

நாஹம் த்வாமபிஜாநாமி தர்மச்சத்மாபிஸம்வ்ரு'தம் ॥ 22 ॥

விஷயே வா புரே வா தே யதா பாபம் கரோம்யஹம் ।

ந ச த்வாமவஜாநே ச கஸ்மாத்த்வம் ஹம்ஸ்யகில்பிஷம் ॥ 23 ॥

பலமூலாஶநம் நித்யம் வாநரம் வநகோசரம் ।

மாமிஹாப்ரதியுத்யந்தமந்யேந ச ஸமாகதம் ॥ 24 ॥

த்வம் நராதிபதேஃ புத்ரஃ ப்ரதீதஃ ப்ரியதர்ஶநஃ ।

லிங்கமப்யஸ்தி தே ராஜநந்த்ரு'ஶ்யதே தர்மஸம்ஹிதம் ॥ 25 ॥

கஃ க்ஷத்ரியகுலே ஜாத்ஶ்ரு'தவாந்நஷ்டஸம்ஶயஃ ।

தர்மலிங்கப்ரதிச்சந்ந க்ரூரம் கர்ம ஸமாசரேத் ॥ 26 ॥

ராம ராஜகுலே ஜாதோ தர்மவாநிதி விஶ்ருதஃ ॥ 27 ॥

அபவ்யோ பவ்யரூபேண கிமர்தம் பரிதாவஸி ।

ஸாம தாநம் க்ஷமா தர்மஸ்ஸத்யம் த்ரு'திபராக்ரமௌ ।

பார்திவாநாம் குணா ராஜந் தண்டஶ்சாப்யபராதிஷு ॥ 28 ॥

வயம் வநசரா ராம ம்ரு'கா மூலபலாஶநாஃ ।

ஏஷா ப்ரக்ரு'திரஸ்மாகம் புருஷஸ்த்வம் நரேஶ்வரஃ ॥ 29 ॥

பூமிர்ஹிரண்யம் ரூப்யம் ச விக்ரஹே காரணாநி ச ।

அத்ர கஸ்தே வநே லோபோ மதீயேஷு பலேஷு வா ॥ 30 ॥

நயஶ்ச விநயஶ்சோபௌ நிக்ரஹாநுக்ரஹாவபி ॥ 31 ॥

ராஜவ்ரு'த்திரஸங்கீர்ணா ந ந்ரு'பாஃ காமவ்ரு'த்தயஃ ।

த்வம் து காமப்ரதாநஶ்ச கோபநஶ்சாநவஸ்திதஃ ॥ 32 ॥

ராஜவ்ரு'த்தேஶ்ச ஸங்கீணஶ்ஶராஸநபராயணஃ ।

ந தேऽஸ்த்யபசிதிர்தர்மே நார்தே புத்திரவஸ்திதா ॥ 33 ॥

இந்த்ரியைஃ காமவ்ரு'த்தஸ்ஸந்க்ரு'ஷ்யஸே மநுஜேஶ்வர ।

ஹத்வா பாணேந காகுத்ஸ்த மாமிஹாநபராதிநம் ॥ 34 ॥

கிம் வக்ஷ்யஸி ஸதாம் மத்யே கர்ம க்ரு'த்வா ஜுகுப்ஸிதம் ।

ராஜஹா ப்ரஹ்மஹா கோக்நஶ்சோரஃ ப்ராணிவதே ரதஃ ॥ 35 ॥

நாஸ்திகஃ பரிவேத்தா ச ஸர்வே நிரயகாமிநஃ ।

ஸூசகஶ்ச கதர்யஶ்ச மித்ரக்நோ குருதல்பகஃ ॥ 36 ॥

லோகம் பாபாத்மநாமேதே கச்சந்தே நாத்ர ஸம்ஶயஃ ।

அதார்யம் சர்ம மே ஸத்பீ ரோமாண்யஸ்தி ச வர்ஜிதம் ।

அபக்ஷ்யாணி ச மாம்ஸாநி த்வத்விதைர்தர்மசாரிபிஃ ॥ 37 ॥

பஞ்ச பஞ்ச நகா பக்ஷ்யா ப்ரஹ்மக்ஷத்ரேண ராகவ ॥ 38 ॥

ஶல்யக ஶ்ஶ்வாவிதோ கோதா ஶஶஃ கூர்மஶ்ச பஞ்சமஃ ।

சர்ம சாஸ்தி ச மே ராஜந் நஸ்ப்ரு'ஶந்தி மநீஷிணஃ ॥ 39 ॥

அபக்ஷ்யாணி ச மாம்ஸாநி ஸோऽஹம் பஞ்சநகோ ஹதஃ ।

தாரயா வாக்யமுக்தோऽஹம் ஸத்யம் ஸர்வஜ்ஞயா ஹிதம் ॥ 40 ॥

தததிக்ரம்ய மோஹேந காலஸ்ய வஶமாகதஃ ।

த்வயா நாதேந காகுத்ஸ்த ந ஸநாதா வஸுந்தரா ।

ப்ரமதா ஶீலஸம்பந்நா தூர்தேந பதிநா யதா ॥ 41 ॥

ஶடோ நைக்ரு'திகஃ க்ஷுத்ரோ மித்யாப்ரஶ்ரிதமாநஸஃ ।

கதம் தஶரதேந த்வம் ஜாதஃ பாபோ மஹாத்மநா ॥ 42 ॥

சிந்நசாரித்ரகக்ஷ்யேண ஸதாம் தர்மாதிவர்திநா ।

த்யக்ததர்மாங்குஶேநாஹம் நிஹதோ ராமஹஸ்திநா ॥ 43 ॥

அஶுபம் சாப்யயுக்தம் ச ஸதாம் சைவ விகர்ஹிதம் ।

வக்ஷ்யஸே சேத்ரு'ஶம் க்ரு'த்வா ஸத்பிஸ்ஸஹ ஸமாகதஃ ॥ 44 ॥

உதாஸீநேஷு யோऽஸ்மாஸு விக்ரமऽஸ்தே ப்ரகாஶிதஃ ।

அபகாரிஷு தே ராஜந்நஹி பஶ்யாமி விக்ரமம் ॥ 45 ॥

த்ரு'ஶ்யமாநஸ்து யுத்த்யேதா மயா யதி ந்ரு'பாத்மஜ ।

அத்ய வைவஸ்வதம் தேவம் பஶ்யேஸ்த்வம் நிஹதோ மயா ॥ 46 ॥

த்வயாऽத்ரு'ஶ்யேந து ரணே நிஹதோऽஹம் துராஸதஃ ।

ப்ரஸுப்தஃ பந்நகேநேவ நரஃ பாநவஶம் கதஃ ॥ 47 ॥

மாமேவ யதி பூர்வம் த்வமேததர்தமசோதயஃ ॥ 48 ॥

மைதிலீமஹமேகாஹ்நா தவ சாநீதவாந்பவேத் ।

ஸுக்ரீவப்ரியகாமேந யதஹம் நிஹதஸ்த்வயா ।

கண்டே பத்த்வா ப்ரதத்யாம் தே நிஹதம் ராவணம் ரணே ॥ 49 ॥

ந்யஸ்தாம் ஸாகரதோயே வா பாதாலே வாபி மைதிலீம் ।

ஆநயேயம் தவாதேஶாச்ச்வேதாமஶ்வதரீமிவ ॥ 50 ॥

யுக்தம் யத்ப்ராப்நுயாத்ராஜ்யம் ஸுக்ரீவஸ்ஸ்வர்கதே மயி ।

அயுக்தம் யததர்மேண த்வயாऽஹம் நிஹதோ ரணே ॥ 51 ॥

காமமேவம் விதோ லோகஃ காலேந விநியுஜ்யதே ।

க்ஷமம் சேத்பவதா ப்ராப்தமுத்தரம் ஸாது சிந்த்யதாம் ॥ 52 ॥

இத்யேவமுக்த்வா பரிஶுஷ்கவக்த்ரஃ ஶராபிகாதாத்வ்யதிதோ மஹாத்மா ।

ஸமீக்ஷ்ய ராமம் ரவிஸந்நிகாஶம் தூஷ்ணீம் பபூவாமரராஜஸூநுஃ ॥ 53 ॥

இத்யார்ஷே ஶ்ரீமத்ராமாயணே வால்மீகீய ஆதிகாவ்யே கிஷ்கிந்தாகாண்டே ஸப்ததஶஸ்ஸர்கஃ ॥

Roman (IAST) Transliteration

śrīmadvālmīkīya rāmāyaṇe kiṣkindhākāṇḍam |

atha saptadaśassargaḥ |

tataśśareṇābhihato rāmeṇa raṇakarkaśaḥ |

papāta sahasā vālī nikṛtta iva pādapaḥ || 1 ||

sa bhūmau nyastasarvāṅgastaptakāñcanabhūṣaṇaḥ |

apataddevarājasya muktaraśmiriva dhvajaḥ || 2 ||

tasminnipatite bhūmau vānarāṇāṃ gaṇeśvare |

naṣṭacandramiva vyoma na vyarājata bhūtalam || 3 ||

bhūmau nipatitasyāpi tasya dehaṃ mahātmanaḥ |

na śrīrjahāti na prāṇā na tejo na parākramaḥ || 4 ||

śakradattā varā mālā kāñcanī vajrabhūṣitā |

dadhāra harimukhyasya prāṇāṃstejśiyaṃ ca sā || 5 ||

sa tayā mālayā vīro hemayā hariyūthapaḥ |

sandhyānugataparyantaḥ payodhara ivābhavat || 6 ||

tasya mālā ca dehaśca marmaghātī ca yaśśaraḥ |

tridheva racitā lakṣmīḥ patitasyāpi śobhate || 7 ||

tadastraṃ tasya vīrasya svargamārgaprabhāvanam |

rāmabāṇāsanakṣiptamāvahatparamāṃ gatim || 8 ||

taṃ tadā patitaṃ saṅkhye gatārciṣamivānalam |

bahumānya ca taṃ vīra vīkṣamāṇaṃ śanairiva || 9 ||

yayātimiva puṇyānte devalokādihacyutam |

ādityamiva kālena yugānte bhuvi pātitam || 10 ||

mahendramiva durdharṣammupendramiva dussaham |

mahendraputraṃ patitaṃ vālinaṃ hemamālinam || 11 ||

siṃhoraskaṃ mahābāhuṃ dīptāsyaṃ harilocanam |

lakṣmaṇānugato rāmo dadarśopasasarpa ca || 12 ||

taṃ dṛṣṭvā rāghavaṃ vālī lakṣmaṇaṃ ca mahābalam |

abravītpraśritaṃ vākyaṃ paruṣaṃ dharmasaṃhitam || 13 ||

tvaṃ narādhipateḥ putraḥ prathitaḥ priyadarśanaḥ kulīnassattvasampanna stejasvī caritavrataḥ || 14 ||

parāṅmukhavadhaṃ kṛtvā ko'tra prāptastvayā guṇaḥ |

yadahaṃ yuddhasaṃrabdhaśśareṇorasi tāḍitaḥ || 15 ||

rāmaḥ karuṇavedī ca prajānāṃ ca hite rataḥ |

sānukrośo jitotsāhassamayajño dṛḍhavrataḥ || 16 ||

iti te sarvabhūtāni kathayanti yaśo bhuvi || 17 ||

damaśśamaḥ kṣamā dharmo dhṛtissatyaṃ parākramaḥ |

pārthivānāṃ guṇā rājandaṇḍaścāpyaparādhiṣu || 18 ||

tānguṇānsampradhāryāhamagryaṃ cābhijanaṃ tava |

tārayā pratiṣiddho'pi sugrīveṇa samāgataḥ || 19 ||

na māmanyena samrabdhaṃ pramattaṃ yoddhu marhasi |

iti me buddhirutpannā babhūvādarśane tava || 20 ||

na tvāṃ vinihatātmānaṃ dharmadhvajamadhārmikam |

jāne pāpasamācāraṃ tṛṇaiḥ kūpamivāvṛtam || 21 ||

satāṃ veṣadharaṃ pāpaṃ pracchannamiva pāvakam |

nāhaṃ tvāmabhijānāmi dharmacchadmābhisaṃvṛtam || 22 ||

viṣaye vā pure vā te yadā pāpaṃ karomyaham |

na ca tvāmavajāne ca kasmāttvaṃ haṃsyakilbiṣam || 23 ||

phalamūlāśanaṃ nityaṃ vānaraṃ vanagocaram |

māmihāpratiyudhyantamanyena ca samāgatam || 24 ||

tvaṃ narādhipateḥ putraḥ pratītaḥ priyadarśanaḥ |

liṅgamapyasti te rājanandṛśyate dharmasaṃhitam || 25 ||

kaḥ kṣatriyakule jātśṛtavānnaṣṭasaṃśayaḥ |

dharmaliṅgapraticchanna krūraṃ karma samācaret || 26 ||

rāma rājakule jāto dharmavāniti viśrutaḥ || 27 ||

abhavyo bhavyarūpeṇa kimarthaṃ paridhāvasi |

sāma dānaṃ kṣamā dharmassatyaṃ dhṛtiparākramau |

pārthivānāṃ guṇā rājan daṇḍaścāpyaparādhiṣu || 28 ||

vayaṃ vanacarā rāma mṛgā mūlaphalāśanāḥ |

eṣā prakṛtirasmākaṃ puruṣastvaṃ nareśvaraḥ || 29 ||

bhūmirhiraṇyaṃ rūpyaṃ ca vigrahe kāraṇāni ca |

atra kaste vane lobho madīyeṣu phaleṣu vā || 30 ||

nayaśca vinayaścobhau nigrahānugrahāvapi || 31 ||

rājavṛttirasaṅkīrṇā na nṛpāḥ kāmavṛttayaḥ |

tvaṃ tu kāmapradhānaśca kopanaścānavasthitaḥ || 32 ||

rājavṛtteśca saṅkīṇaśśarāsanaparāyaṇaḥ |

na te'styapacitirdharme nārthe buddhiravasthitā || 33 ||

indriyaiḥ kāmavṛttassankṛṣyase manujeśvara |

hatvā bāṇena kākutstha māmihānaparādhinam || 34 ||

kiṃ vakṣyasi satāṃ madhye karma kṛtvā jugupsitam |

rājahā brahmahā goghnaścoraḥ prāṇivadhe rataḥ || 35 ||

nāstikaḥ parivettā ca sarve nirayagāminaḥ |

sūcakaśca kadaryaśca mitraghno gurutalpagaḥ || 36 ||

lokaṃ pāpātmanāmete gacchante nātra saṃśayaḥ |

adhāryaṃ carma me sadbhī romāṇyasthi ca varjitam |

abhakṣyāṇi ca māṃsāni tvadvidhairdharmacāribhiḥ || 37 ||

pañca pañca nakhā bhakṣyā brahmakṣatreṇa rāghava || 38 ||

śalyaka śśvāvidho godhā śaśaḥ kūrmaśca pañcamaḥ |

carma cāsthi ca me rājan naspṛśanti manīṣiṇaḥ || 39 ||

abhakṣyāṇi ca māṃsāni so'haṃ pañcanakho hataḥ |

tārayā vākyamukto'haṃ satyaṃ sarvajñayā hitam || 40 ||

tadatikramya mohena kālasya vaśamāgataḥ |

tvayā nāthena kākutstha na sanāthā vasundharā |

pramadā śīlasampannā dhūrtena patinā yathā || 41 ||

śaṭho naikṛtikaḥ kṣudro mithyāpraśritamānasaḥ |

kathaṃ daśarathena tvaṃ jātaḥ pāpo mahātmanā || 42 ||

chinnacāritrakakṣyeṇa satāṃ dharmātivartinā |

tyaktadharmāṅkuśenāhaṃ nihato rāmahastinā || 43 ||

aśubhaṃ cāpyayuktaṃ ca satāṃ caiva vigarhitam |

vakṣyase cedṛśaṃ kṛtvā sadbhissaha samāgataḥ || 44 ||

udāsīneṣu yo'smāsu vikrama'ste prakāśitaḥ |

apakāriṣu te rājannahi paśyāmi vikramam || 45 ||

dṛśyamānastu yuddhyethā mayā yadi nṛpātmaja |

adya vaivasvataṃ devaṃ paśyestvaṃ nihato mayā || 46 ||

tvayā'dṛśyena tu raṇe nihato'haṃ durāsadaḥ |

prasuptaḥ pannageneva naraḥ pānavaśaṃ gataḥ || 47 ||

māmeva yadi pūrvaṃ tvametadarthamacodayaḥ || 48 ||

maithilīmahamekāhnā tava cānītavānbhavet |

sugrīvapriyakāmena yadahaṃ nihatastvayā |

kaṇṭhe baddhvā pradadyāṃ te nihataṃ rāvaṇaṃ raṇe || 49 ||

nyastāṃ sāgaratoye vā pātāle vāpi maithilīm |

ānayeyaṃ tavādeśācchvetāmaśvatarīmiva || 50 ||

yuktaṃ yatprāpnuyādrājyaṃ sugrīvassvargate mayi |

ayuktaṃ yadadharmeṇa tvayā'haṃ nihato raṇe || 51 ||

kāmamevaṃ vidho lokaḥ kālena viniyujyate |

kṣamaṃ cedbhavatā prāptamuttaraṃ sādhu cintyatām || 52 ||

ityevamuktvā pariśuṣkavaktraḥ śarābhighātādvyathito mahātmā |

samīkṣya rāmaṃ ravisannikāśaṃ tūṣṇīṃ babhūvāmararājasūnuḥ || 53 ||

ityārṣe śrīmadrāmāyaṇe vālmīkīya ādikāvye kiṣkindhākāṇḍe saptadaśassargaḥ ||