📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
3.71 அரண்யகாண்ட - ஏகஸப்ததிதம ஸர்கஃ
3.71 Aranyakanda - Ekasaptatitama Sargah
Valmiki Tamil
ஶ்ரீமத்வால்மீகீய ராமாயணே அரண்யகாண்டம் ।
அத ஏகஸப்ததிதமஸ்ஸர்கஃ ।
புரா ராம மஹாபாஹோ மஹாபலபராக்ரம ।
ரூபமாஸீந்மமா சிந்த்யம் த்ரிஷு லோகேஷு விஶ்ருதம் ॥ 1 ॥
யதா ஸோமஸ்ய ஶக்ரஸ்ய ஸூர்யஸ்ய ச யதா வபுஃ ।
ஸோऽஹம் ரூபமிதம் க்ரு'த்வா லோகவித்ராஸநம் மஹத் ॥ 2 ॥
ரு'ஷீந்வநகதாந்ராம த்ராஸயாமி ததஸ்ததஃ ।
ததஸ்ஸ்தூலஶிரா நாம மஹர்ஷிஃ கோபிதோ மயா ॥ 3 ॥
ஸஞ்சிந்வந்விவிதம் வந்யம் ரூபேணாநேந தர்ஷிதஃ ।
தேநாஹமுக்தஃ ப்ரேக்ஷ்யைவம் கோரஶாபாபிதாயிநா ॥ 4 ॥
ஏததேவ ந்ரு'ஶம்ஸம் தே ரூபமஸ்து விகர்ஹிதம் ।
ஸ மயா யாசிதஃ க்ருத்தஶ்ஶாபஸ்யோந்தோ பவேதிதி ॥ 5 ॥
அபிஶாபக்ரு'தஸ்யேதி தேநேதம் பாஷிதம் வசஃ ।
யதா சித்த்வா புஜௌ ராமஸ்த்வாம் தஹேத்விஜநே வநே ॥ 6 ॥
ததா த்வம் ப்ராப்ஸ்யஸே ரூபம் ஸ்வமேவ விபுலம் ஶுபம் ।
ஶ்ரியா விராஜிதம் புத்ரம் தநோஸ்த்வம் வித்தி லக்ஷ்மண ॥ 7 ॥
இந்த்ரகோபாதிதம் ரூபம் ப்ராப்தமேவம் ரணாஜிரே ।
அஹம் ஹி தபஸோக்ரேண பிதாமஹமதோஷயம் ॥ 8 ॥
தீர்கமாயுஸ்ஸ மே ப்ராதாத்ததோ மாம் விப்ரமோऽஸ்ப்ரு'ஶத் ।
தீர்கமாயுர்மயா ப்ராப்தம் கிம் மே ஶக்ரஃ கரிஷ்யதி ॥ 9 ॥
இத்யேவம் புத்திமாஸ்தாய ரணே ஶக்ரமதர்ஷயம் ।
தஸ்ய பாஹுப்ரயுக்தேந வஜ்ரேண ஶதபர்வணா ॥ 10 ॥
ஸக்திநீ சைவ மூர்தா ச ஶரீரே ஸம்ப்ரவேஶிதம் ।
ஸ மயா யாச்யமாநஸ்ஸந்நாநயத்யமஸாதநம் ॥ 11 ॥
பிதாமஹவசஸ்ஸத்யம் ததஸ்த்விதி மமாப்ரவீத் ।
அநாஹாரஃ கதம் ஶக்தோ பக்நஸக்திஶிரோமுகஃ ॥ 12 ॥
வஜ்ரேணாபிஹதஃ காலம் ஸுதீர்கமபி ஜீவிதும் ।
ஏவமுக்தஸ்து மே ஶக்ரோ பாஹூ யோஜநமாயதௌ ॥ 13 ॥
ப்ராதாதாஸ்யம் ச மே குக்ஷௌ தீக்ஷ்ணதம்ஷ்ட்ரமகல்பயத் ।
ஸோऽஹம் புஜாப்யாம் தீர்காப்யாம் ஸங்க்ரு'ஷ்யாஸ்மிந்வநே சராந் ॥ 14 ॥
ஸிம்ஹவ்திபம்ரு'கவ்யாக்ராந் பக்ஷயாமி ஸமந்ததஃ ।
ஸ து மாமப்ரவீதிந்த்ரோ யதா ராமஸ்ஸலக்ஷ்மணஃ ॥ 15 ॥
சேத்ஸ்யதே ஸமரே பாஹூ ததா ஸ்வர்கம் கமிஷ்யஸி ।
அநேந வபுஷா ராம வநேऽஸ்மிந்ராஜஸத்தம ॥ 16 ॥
யத்யத்பஶ்யாமி ஸர்வஸ்ய க்ரஹணம் ஸாது ரோசயே ।
அவஶ்யம் க்ரஹணம் ராமோ மந்யேऽஹம் ஸமுபைஷ்யதி ॥ 17 ॥
இமாம் புத்திம் புரஸ்க்ரு'த்ய தேஹந்யாஸக்ரு'தஶ்ரமஃ ।
ஸ த்வம் ராமோऽஸி பத்ரம் தே நாஹமந்யேந ராகவ ॥ 18 ॥
ஶக்யோ ஹந்தும் யதாதத்த்வமேவமுக்தம் மஹர்ஷிணா ।
அஹம் ஹி மதிஸாசிவ்யம் கரிஷ்யாமி நரர்ஷப ॥ 19 ॥
மித்ரம் சைவோபதேக்ஷ்யாமி யுவாப்யாம் ஸம்ஸ்க்ரு'தோऽக்நிநா ।
ஏவமுக்தஸ்து தர்மாத்மா தநுநா தேந ராகவஃ ॥ 20 ॥
இதம் ஜகாத வசநம் லக்ஷ்மணஸ்யோபஶ்ரு'ண்வதஃ ।
ராவணேந ஹ்ரு'தா பார்யா மம ஸீதா யஶஸ்ஸ்விநீ ॥ 21 ॥
நிஷ்க்ராந்தஸ்ய ஜநஸ்தாநாத்ஸஹப்ராத்ரா யதாஸுகம் ।
நாமமாத்ரம் து ஜாநாமி ந ரூபம் தஸ்ய ரக்ஷஸஃ ॥ 22 ॥
நிவாஸம் வா ப்ரபாவம் வா வயம் தஸ்ய ந வித்மஹே ।
ஶோகார்தாநாமநாதாநாமேவம் விபரிதாவதாம் ॥ 23 ॥
காருண்யம் ஸத்ரு'ஶம் கர்துமுபகாரே ச வர்ததாம் ।
காஷ்டாந்யாதாய ஶுஷ்காணி காலே பக்நாநி குஞ்ஜரைஃ ॥ 24 ॥
தக்ஷ்யாமஸ்த்வாம் வயம் வீர ஶ்வப்ரே மஹதி கல்பிதே ।
ஸ த்வம் ஸீதாம் ஸமாசக்ஷ்வ யேந வா யத்ர வா ஹ்ரு'தா ॥ 25 ॥
குரு கல்யாணமத்யர்தம் யதி ஜாநாஸி தத்த்வதஃ ।
ஏவமுக்தஸ்து ராமேண வாக்யம் தநுரநுத்தமம் ॥ 26 ॥
ப்ரோவாச குஶலோ வக்தும் வக்தாரமபி ராகவம் ।
திவ்யமஸ்தி ந மே ஜ்ஞாநம் நாபிஜாநாமி மைதிலீம் ॥ 27 ॥
யஸ்தாம் ஜ்ஞாஸ்யதி தம் வக்ஷ்யே தக்தஸ்ஸ்வம் ரூபமாஸ்திதஃ ।
அதக்தஸ்ய து விஜ்ஞாதும் ஶக்திரஸ்தி ந மே ப்ரபோ ॥ 28 ॥
ராக்ஷஸம் தம் மஹாவீர்யம் ஸீதா யேந ஹ்ரு'தா தவ ।
விஜ்ஞாநம் ஹி மம ப்ரஷ்டம் ஶாபதோஷேண ராகவ ॥ 29 ॥
ஸ்வக்ரு'தேந மயா ப்ராப்தம் ரூபம் லோகவிகர்ஹிதம் ।
கிம் து யாவந்ந யாத்யஸ்தம் ஸவிதா ஶ்ராந்தவாஹநஃ ॥ 30 ॥
தாவந்மாமவடே க்ஷிப்த்வா தஹ ராம யதாவிதி ।
தக்தஸ்த்வயாஹமவடே ந்யாயேந ரகுநந்தந ॥ 31 ॥
வக்ஷ்யாமி தமஹம் வீர யஸ்தம் ஜ்ஞாஸ்யதி ராக்ஷஸம் ।
தேந ஸக்யம் ச கர்தவ்யம் ந்யாய்யவ்ரு'த்தேந ராகவ ॥ 32 ॥
கல்பயிஷ்யதி தே ப்ரீதஸ்ஸாஹாய்யம் லகுவிக்ரமஃ ।
ந ஹி தஸ்யாஸ்த்யவிஜ்ஞாதம் த்ரிஷு லேகேஷு ராகவ ॥ 33 ॥
இத்யார்ஷே ஶ்ரீமத்ராமாயணே வால்மீகீய ஆதிகாவ்யே அரண்யகாண்டே ஏகஸப்ததிதமஸ்ஸர்கஃ ॥
Roman (IAST) Transliteration
śrīmadvālmīkīya rāmāyaṇe araṇyakāṇḍam |
atha ekasaptatitamassargaḥ |
purā rāma mahābāho mahābalaparākrama |
rūpamāsīnmamā cintyaṃ triṣu lokeṣu viśrutam || 1 ||
yathā somasya śakrasya sūryasya ca yathā vapuḥ |
so'haṃ rūpamidaṃ kṛtvā lokavitrāsanaṃ mahat || 2 ||
ṛṣīnvanagatānrāma trāsayāmi tatastataḥ |
tatassthūlaśirā nāma maharṣiḥ kopito mayā || 3 ||
sañcinvanvividhaṃ vanyaṃ rūpeṇānena dharṣitaḥ |
tenāhamuktaḥ prekṣyaivaṃ ghoraśāpābhidhāyinā || 4 ||
etadeva nṛśaṃsaṃ te rūpamastu vigarhitam |
sa mayā yācitaḥ kruddhaśśāpasyonto bhavediti || 5 ||
abhiśāpakṛtasyeti tenedaṃ bhāṣitaṃ vacaḥ |
yadā chittvā bhujau rāmastvāṃ dahedvijane vane || 6 ||
tadā tvaṃ prāpsyase rūpaṃ svameva vipulaṃ śubham |
śriyā virājitaṃ putraṃ danostvaṃ viddhi lakṣmaṇa || 7 ||
indrakopādidaṃ rūpaṃ prāptamevaṃ raṇājire |
ahaṃ hi tapasogreṇa pitāmahamatoṣayam || 8 ||
dīrghamāyussa me prādāttato māṃ vibhramo'spṛśat |
dīrghamāyurmayā prāptaṃ kiṃ me śakraḥ kariṣyati || 9 ||
ityevaṃ buddhimāsthāya raṇe śakramadharṣayam |
tasya bāhuprayuktena vajreṇa śataparvaṇā || 10 ||
sakthinī caiva mūrdhā ca śarīre sampraveśitam |
sa mayā yācyamānassannānayadyamasādanam || 11 ||
pitāmahavacassatyaṃ tadastviti mamābravīt |
anāhāraḥ kathaṃ śakto bhagnasakthiśiromukhaḥ || 12 ||
vajreṇābhihataḥ kālaṃ sudīrghamapi jīvitum |
evamuktastu me śakro bāhū yojanamāyatau || 13 ||
prādādāsyaṃ ca me kukṣau tīkṣṇadaṃṣṭramakalpayat |
so'haṃ bhujābhyāṃ dīrghābhyāṃ saṅkṛṣyāsminvane carān || 14 ||
siṃhavdipamṛgavyāghrān bhakṣayāmi samantataḥ |
sa tu māmabravīdindro yadā rāmassalakṣmaṇaḥ || 15 ||
chetsyate samare bāhū tadā svargaṃ gamiṣyasi |
anena vapuṣā rāma vane'sminrājasattama || 16 ||
yadyatpaśyāmi sarvasya grahaṇaṃ sādhu rocaye |
avaśyaṃ grahaṇaṃ rāmo manye'haṃ samupaiṣyati || 17 ||
imāṃ buddhiṃ puraskṛtya dehanyāsakṛtaśramaḥ |
sa tvaṃ rāmo'si bhadraṃ te nāhamanyena rāghava || 18 ||
śakyo hantuṃ yathātattvamevamuktaṃ maharṣiṇā |
ahaṃ hi matisācivyaṃ kariṣyāmi nararṣabha || 19 ||
mitraṃ caivopadekṣyāmi yuvābhyāṃ saṃskṛto'gninā |
evamuktastu dharmātmā danunā tena rāghavaḥ || 20 ||
idaṃ jagāda vacanaṃ lakṣmaṇasyopaśṛṇvataḥ |
rāvaṇena hṛtā bhāryā mama sītā yaśassvinī || 21 ||
niṣkrāntasya janasthānātsahabhrātrā yathāsukham |
nāmamātraṃ tu jānāmi na rūpaṃ tasya rakṣasaḥ || 22 ||
nivāsaṃ vā prabhāvaṃ vā vayaṃ tasya na vidmahe |
śokārtānāmanāthānāmevaṃ viparidhāvatām || 23 ||
kāruṇyaṃ sadṛśaṃ kartumupakāre ca vartatām |
kāṣṭhānyādāya śuṣkāṇi kāle bhagnāni kuñjaraiḥ || 24 ||
dhakṣyāmastvāṃ vayaṃ vīra śvabhre mahati kalpite |
sa tvaṃ sītāṃ samācakṣva yena vā yatra vā hṛtā || 25 ||
kuru kalyāṇamatyarthaṃ yadi jānāsi tattvataḥ |
evamuktastu rāmeṇa vākyaṃ danuranuttamam || 26 ||
provāca kuśalo vaktuṃ vaktāramapi rāghavam |
divyamasti na me jñānaṃ nābhijānāmi maithilīm || 27 ||
yastāṃ jñāsyati taṃ vakṣye dagdhassvaṃ rūpamāsthitaḥ |
adagdhasya tu vijñātuṃ śaktirasti na me prabho || 28 ||
rākṣasaṃ taṃ mahāvīryaṃ sītā yena hṛtā tava |
vijñānaṃ hi mama bhraṣṭaṃ śāpadoṣeṇa rāghava || 29 ||
svakṛtena mayā prāptaṃ rūpaṃ lokavigarhitam |
kiṃ tu yāvanna yātyastaṃ savitā śrāntavāhanaḥ || 30 ||
tāvanmāmavaṭe kṣiptvā daha rāma yathāvidhi |
dagdhastvayāhamavaṭe nyāyena raghunandhana || 31 ||
vakṣyāmi tamahaṃ vīra yastaṃ jñāsyati rākṣasam |
tena sakhyaṃ ca kartavyaṃ nyāyyavṛttena rāghava || 32 ||
kalpayiṣyati te prītassāhāyyaṃ laghuvikramaḥ |
na hi tasyāstyavijñātaṃ triṣu lekeṣu rāghava || 33 ||
ityārṣe śrīmadrāmāyaṇe vālmīkīya ādikāvye araṇyakāṇḍe ekasaptatitamassargaḥ ||
InfoLyter.in — Sacred Vedic Knowledge Portal · Free forever