3.37 Aranyakanda - Saptatrimsha Sargah

ॐ

3.37 அரண்யகாண்ட - ஸப்தத்ரிம்ஶ ஸர்கஃ

Valmiki Tamil

ஶ்ரீமத்வால்மீகீய ராமாயணே அரண்யகாண்டம் ।

அத ஸப்தத்ரிம்ஶஸ்ஸர்கஃ ।

தச்ச்ரு'த்வா ராக்ஷஸேந்த்ரஸ்ய வாக்யம் வாக்யவிஶாரதஃ ।

ப்ரத்யுவாச மஹாப்ராஜ்ஞோ மாரீசோ ராக்ஷஸேஶ்வரம் ॥ 1 ॥

ஸுலபாஃ புருஷா ராஜந்ஸததம் ப்ரியவாதிநஃ ।

அப்ரியஸ்ய து பத்யஸ்ய வக்தா ஶ்ரோதா ச துர்லபஃ ॥ 2 ॥

ந நூநம் புத்யஸே ராமம் மஹாவீர்யம் குணோந்நதம் ।

அயுக்தசாரஶ்சபலோ மஹேந்த்ரவருணோபமம் ॥ 3 ॥

அபி ஸ்வஸ்தி பவேத்தாத ஸர்வேஷாம் புவி ரக்ஷஸாம் ।

அபி ராமோ நாஸங்க்ருத்தஃ குர்யால்லோகமராக்ஷஸம் ॥ 4 ॥

அபி தே ஜீவிதாந்தாய நோத்பந்நா ஜநகாத்மஜா ।

அபி ஸீதாநிமித்தம் ச ந பவேத்வ்யஸநம் மம ॥ 5 ॥

அபி த்வாமீஶ்வரம் ப்ராப்ய காமவ்ரு'த்தம் நிரங்குஶம் ।

ந விநஶ்யேத்புரீ லங்கா த்வயா ஸஹ ஸராக்ஷஸா ॥ 6 ॥

த்வத்விதஃ காமவ்ரு'த்தோ ஹி துஶ்ஶீலஃ பாபமந்த்ரிதஃ ।

ஆத்மாநம் ஸ்வஜநம் ராஷ்ட்ரம் ஸ ராஜா ஹந்தி துர்மதிஃ ॥ 7 ॥

ந ச பித்ரா பரித்யக்தோ நாமர்யாதஃ கதஞ்சந ।

ந லுப்தோ ந ச துஶ்ஶீலோ ந ச க்ஷத்ரியபாம்ஸநஃ ॥ 8 ॥

ந ச தர்மகுணைர்ஹீநஃ கௌஸல்யாநந்தவர்தநஃ ।

ந தீக்ஷ்ணோ ந ச பூதாநாம் ஸர்வேஷாமஹிதே ரதஃ ॥ 9 ॥

வஞ்சிதம் பிதரம் த்ரு'ஷ்ட்வா கைகேய்யா ஸத்யவாதிநம் ।

கரிஷ்யாமீதி தர்மாத்மா தாத ப்ரவ்ரஜிதோ வநம் ॥ 10 ॥

கைகேய்யாஃ ப்ரியகாமார்தம் பிதுர்தஶரதஸ்ய ச ।

ஹித்வா ராஜ்யம் ச போகாம்ஶ்ச ப்ரவிஷ்டோ தண்டகாவநம் ॥ 11 ॥

ந ராமஃ கர்கஶஸ்தாத நாவித்வாந்நாஜிதேந்த்ரியஃ ।

அந்ரு'தம் துஶ்ஶ்ருதம் சைவ நைவ த்வம் வக்துமர்ஹஸி ॥ 12 ॥

ராமோ விக்ரஹவாந் தர்மஸ்ஸாதுஸ்ஸத்யபராக்ரமஃ ।

ராஜா ஸர்வஸ்ய லோகஸ்ய தேவாநாம் மகவாநிவ ॥ 13 ॥

கதம் த்வம் தஸ்ய வைதேஹீம் ரக்ஷிதாம் ஸ்வேந தேஜஸா ।

இச்சஸி ப்ரஸபம் ஹர்தும் ப்ரபாமிவ விவஸ்வதஃ ॥ 14 ॥

ஶரார்சிஷமாத்ரு'ஷ்யம் சாபகங்கேந்தநம் ரணே ।

ராமாக்நிம் ஸஹஸா தீப்தம் ந ப்ரவேஷ்டும் த்வமர்ஹஸி ॥ 15 ॥

தநுர்வ்யாதிததீப்தாஸ்யம் ஶரார்சிஷமமர்ஷணம் ।

சாபபாணதரம் தீக்ஷ்ணம் ஶத்ருஸைந்யப்ரஹாரிணம் ॥ 16 ॥

ராஜ்யம் ஸுகம் ச ஸந்த்யஜ்ய ஜீவிதம் சேஷ்டமாத்மநஃ ।

நாத்யாஸாதயிதும் தாத ராமாந்தகமிஹார்ஹஸி ॥ 17 ॥

அப்ரமேயம் ஹி தத்தேஜோ யஸ்ய ஸா ஜநகாத்மஜா ।

ந த்வம் ஸமர்தஸ்தாம் ஹர்தும் ராமசாபாஶ்ரயம் வநே ॥ 18 ॥

தஸ்ய ஸா நரஸிம்ஹஸ்ய ஸிம்ஹோரஸ்கஸ்ய பாமிநீ ।

ப்ராணேப்யோऽபி ப்ரியதரா பார்யா நித்யமநுவ்ரதா ॥ 19 ॥

ந ஸா தர்ஷயிதும் ஶக்யா மைதில்யோஜஸ்விநஃ ப்ரியா ।

தீப்தஸ்யேவ ஹுதாஶஸ்ய ஶிகா ஸீதா ஸுமத்யமா ॥ 20 ॥

கிமுத்யமமிமம் வ்யர்தம் க்ரு'த்வா தே ராக்ஷஸாதிப ।

த்ரு'ஷ்டஶ்சேத்வம் ரணே தேந ததந்தம் தவ ஜீவிதம் ॥ 21 ॥

ஜீவிதம் ச ஸுகம் சைவ ராஜ்யம் சைவ ஸுதுர்லபம் ।

யதீச்சஸி சிரம் போக்தும் மா க்ரு'தா ராமவிப்ரியம் ॥ 22 ॥

ஸ ஸர்வைஸ்ஸசிவைஸ்ஸார்தம் விபீஷணபுரோகமைஃ ।

மந்த்ரயித்வா து தர்மிஷ்டைஃ க்ரு'த்வா நிஶ்சயமாத்மநஃ ॥ 23 ॥

தோஷாணாம் ச குணாநாம் ச ஸம்ப்ரதார்ய பலாபலம் ।

ஆத்மநஶ்ச பலம் ஜ்ஞாத்வா ராகவஸ்ய ச தத்வதஃ ॥ 24 ॥

ஹிதாஹிதம் விநிஶ்சித்ய க்ஷமம் த்வம் கர்துமர்ஹஸி ।

அஹம் து மந்யே தவ ந க்ஷமம் ரணே ஸமாகமம் கோஸலராஜஸூநுநா ।

இதம் ஹி பூயஶ்ஶ்ரு'ணு வாக்யமுத்தமம் க்ஷமம் ச யுக்தம் ச நிஶாசரேஶ்வர ॥ 25 ॥

இத்யார்ஷே ஶ்ரீமத்ராமாயணே வால்மீகீய ஆதிகாவ்யே அரண்யகாண்டே ஸப்தத்ரிம்ஶஸ்ஸர்கஃ ॥

Roman (IAST) Transliteration

śrīmadvālmīkīya rāmāyaṇe araṇyakāṇḍam |

atha saptatriṃśassargaḥ |

tacchṛtvā rākṣasendrasya vākyaṃ vākyaviśāradaḥ |

pratyuvāca mahāprājño mārīco rākṣaseśvaram || 1 ||

sulabhāḥ puruṣā rājansatataṃ priyavādinaḥ |

apriyasya tu pathyasya vaktā śrotā ca durlabhaḥ || 2 ||

na nūnaṃ budhyase rāmaṃ mahāvīryaṃ guṇonnatam |

ayuktacāraścapalo mahendravaruṇopamam || 3 ||

api svasti bhavettāta sarveṣāṃ bhuvi rakṣasām |

api rāmo nāsaṅkruddhaḥ kuryāllokamarākṣasam || 4 ||

api te jīvitāntāya notpannā janakātmajā |

api sītānimittaṃ ca na bhavedvyasanaṃ mama || 5 ||

api tvāmīśvaraṃ prāpya kāmavṛttaṃ niraṅkuśam |

na vinaśyetpurī laṅkā tvayā saha sarākṣasā || 6 ||

tvadvidhaḥ kāmavṛtto hi duśśīlaḥ pāpamantritaḥ |

ātmānaṃ svajanaṃ rāṣṭraṃ sa rājā hanti durmatiḥ || 7 ||

na ca pitrā parityakto nāmaryādaḥ kathañcana |

na lubdho na ca duśśīlo na ca kṣatriyapāṃsanaḥ || 8 ||

na ca dharmaguṇairhīnaḥ kausalyānandavardhanaḥ |

na tīkṣṇo na ca bhūtānāṃ sarveṣāmahite rataḥ || 9 ||

vañcitaṃ pitaraṃ dṛṣṭvā kaikeyyā satyavādinam |

kariṣyāmīti dharmātmā tāta pravrajito vanam || 10 ||

kaikeyyāḥ priyakāmārthaṃ piturdaśarathasya ca |

hitvā rājyaṃ ca bhogāṃśca praviṣṭo daṇḍakāvanam || 11 ||

na rāmaḥ karkaśastāta nāvidvānnājitendriyaḥ |

anṛtaṃ duśśrutaṃ caiva naiva tvaṃ vaktumarhasi || 12 ||

rāmo vigrahavān dharmassādhussatyaparākramaḥ |

rājā sarvasya lokasya devānāṃ maghavāniva || 13 ||

kathaṃ tvaṃ tasya vaidehīṃ rakṣitāṃ svena tejasā |

icchasi prasabhaṃ hartuṃ prabhāmiva vivasvataḥ || 14 ||

śarārciṣamādhṛṣyaṃ cāpakhaṅgendhanaṃ raṇe |

rāmāgniṃ sahasā dīptaṃ na praveṣṭuṃ tvamarhasi || 15 ||

dhanurvyāditadīptāsyaṃ śarārciṣamamarṣaṇam |

cāpabāṇadharaṃ tīkṣṇaṃ śatrusainyaprahāriṇam || 16 ||

rājyaṃ sukhaṃ ca santyajya jīvitaṃ ceṣṭamātmanaḥ |

nātyāsādayituṃ tāta rāmāntakamihārhasi || 17 ||

aprameyaṃ hi tattejo yasya sā janakātmajā |

na tvaṃ samarthastāṃ hartuṃ rāmacāpāśrayaṃ vane || 18 ||

tasya sā narasiṃhasya siṃhoraskasya bhāminī |

prāṇebhyo'pi priyatarā bhāryā nityamanuvratā || 19 ||

na sā dharṣayituṃ śakyā maithilyojasvinaḥ priyā |

dīptasyeva hutāśasya śikhā sītā sumadhyamā || 20 ||

kimudyamamimaṃ vyarthaṃ kṛtvā te rākṣasādhipa |

dṛṣṭaścetvaṃ raṇe tena tadantaṃ tava jīvitam || 21 ||

jīvitaṃ ca sukhaṃ caiva rājyaṃ caiva sudurlabham |

yadīcchasi ciraṃ bhoktuṃ mā kṛthā rāmavipriyam || 22 ||

sa sarvaissacivaissārdhaṃ vibhīṣaṇapurogamaiḥ |

mantrayitvā tu dharmiṣṭhaiḥ kṛtvā niścayamātmanaḥ || 23 ||

doṣāṇāṃ ca guṇānāṃ ca sampradhārya balābalam |

ātmanaśca balaṃ jñātvā rāghavasya ca tatvataḥ || 24 ||

hitāhitaṃ viniścitya kṣamaṃ tvaṃ kartumarhasi |

ahaṃ tu manye tava na kṣamaṃ raṇe samāgamaṃ kosalarājasūnunā |

idaṃ hi bhūyaśśṛṇu vākyamuttamaṃ kṣamaṃ ca yuktaṃ ca niśācareśvara || 25 ||

ityārṣe śrīmadrāmāyaṇe vālmīkīya ādikāvye araṇyakāṇḍe saptatriṃśassargaḥ ||