3.31 Aranyakanda - Ekatrimsha Sargah

ॐ

3.31 அரண்யகாண்ட - ஏகத்ரிம்ஶ ஸர்கஃ

Valmiki Tamil

ஶ்ரீமத்வால்மீகீய ராமாயணே அரண்யகாண்டம் ।

அத ஏகத்ரிம்ஶஸ்ஸர்கஃ ।

த்வரமாணஸ்ததோ கத்வா ஜநஸ்தாநாதகம்பநஃ ।

ப்ரவிஶ்ய லங்காம் வேகேந ராவணம் வாக்யமப்ரவீத் ॥ 1 ॥

ஜநஸ்தாநஸ்திதா ராஜந்ராக்ஷஸா பஹவோ ஹதாஃ ।

கரஶ்ச நிஹதஸ்ஸங்க்யே கதஞ்சிதஹமாகதஃ ॥ 2 ॥

ஏவமுக்தோ தஶக்ரீவஃ க்ருத்த ஸ்ஸம்ரக்தலோசநஃ ।

அகம்பநமுவாசேதம் நிர்தஹந்நிவ சக்ஷுஷா ॥ 3 ॥

கேந ரம்யம் ஜநஸ்தாநம் ஹதம் மம பராஸுநா ।

கோ ஹி ஸர்வேஷு லோகேஷு கதிம் சாதிகமிஷ்யதி ॥ 4 ॥

ந ஹி மே விப்ரியம் க்ரு'த்வா ஶக்யம் மகவதா ஸுகம் ।

ப்ராப்தும் வைஶ்ரவணேநாபி ந யமேந ந விஷ்ணுநா ॥ 5 ॥

காலஸ்ய சாப்யஹம் காலோ தஹேயமபி பாவகம் ।

ம்ரு'த்யும் மரணதர்மேண ஸம்யோஜயிதுமுத்ஸஹே ॥ 6 ॥

தஹேயமபி ஸங்க்ரு'த்தஸ்தேஜஸாऽதித்யபாவகௌ ।

வாதஸ்ய தரஸா வேகம் நிஹந்துமஹமுத்ஸஹே ॥ 7 ॥

ததா க்ருத்தம் தஶக்ரீவம் க்ரு'தாஞ்ஜலிரகம்பநஃ ।

பயாத்ஸந்திக்தயா வாசா ராவணம் யாசதேऽபயம் ॥ 8 ॥

தஶக்ரீவோऽபயம் தஸ்மை ப்ரததௌ ரக்ஷஸாம் வரஃ ।

ஸ விஸ்ரப்தோऽப்ரவீத்வாக்யமஸந்திக்தமகம்பநஃ ॥ 9 ॥

புத்ரோ தஶரதஸ்யாஸ்தி ஸிம்ஹஸம்ஹநநோ யுவா ।

ராமோ நாம வ்ரு'ஷஸ்கந்தோ வ்ரு'த்தாயதமஹாபுஜஃ ॥ 10 ॥

வீரஃ ப்ரு'துயஶாஶ்ஶ்ரீமாநதுல்யபலவிக்ரமஃ ।

ஹதம் தேந ஜநஸ்தாநம் கரஶ்ச ஸஹ தூஷணஃ ॥ 11 ॥

அகம்பநவச ஶ்ருத்வா ராவணோ ராக்ஷஸாதிபஃ ।

நாகேந்த்ர இவ நிஶ்வஸ்ய வசநம் சேதமப்ரவீத் ॥ 12 ॥

ஸ ஸுரேந்த்ரேண ஸம்யுக்தோ ராமஸ்ஸர்வாமரைஸ்ஸஹ ।

உபயாதோ ஜநஸ்தாநம் ப்ரூஹி கச்சிதகம்பந ॥ 13 ॥

ராவணஸ்ய புநர்வாக்யம் நிஶம்ய ததகம்பநஃ ।

ஆசசக்ஷே பலம் தஸ்ய விக்ரமம் ச மஹாத்மநஃ ॥ 14 ॥

ராமோ நாம மஹாதேஜா ஶ்ரேஷ்டஸ்ஸர்வதநுஷ்மதாம் ।

திவ்யாஸ்த்ரகுணஸம்பந்நஃ புரந்தரஸமோ யுதி ॥ 15 ॥

தஸ்யாநுரூபோ பலவாந்ரக்தாக்ஷோ தந்துபிஸ்வநஃ ।

கநீயாந்லக்ஷ்மணோ நாம ப்ராதா ஶஶிநிபாநநஃ ॥ 16 ॥

ஸ தேந ஸஹ ஸம்யுக்தஃ பாவகேநாநிலோ யதா ।

ஶ்ரீமாந்ராஜவரஸ்தேந ஜநஸ்தாநம் நிபாதிதம் ॥ 17 ॥

நைவ தேவா மஹாத்மாநோ நாத்ர கார்யா விசாரணா ।

ஶரா ராமேண தூத்ஸ்ரு'ஷ்டா ருக்மபுங்காஃ பதத்ரிணஃ ॥ 18 ॥

ஸர்பாஃ பஞ்சாநநா பூத்வா பக்ஷயந்தி ஸ்ம ராக்ஷஸாந் ।

யேந யேந ச கச்சந்தி ராக்ஷஸா பயகர்ஶிதாஃ ॥ 19 ॥

தேந தேந ஸ்ம பஶ்யந்தி ராமமேவாக்ரதஃ ஸ்திதம் ।

இத்தம் விநாஶிதம் தேந ஜநஸ்தாநம் தவாநக ॥ 20 ॥

அகம்பநவசஶ்ருத்வா ராவணோ வாக்யமப்ரவீத் ।

ஜநஸ்தாநம் கமிஷ்யாமி ஹந்தும் ராமம் ஸலக்ஷ்மணம் ॥ 21 ॥

அதைவமுக்தே வசநே ப்ரோவாசேதமகம்பநஃ ।

ஶ்ரு'ணு ராஜந்யதாவ்ரு'த்தம் ராமஸ்ய பலபௌருஷம் ॥ 22 ॥

அஸாத்யஃ குபிதோ ராமோ விக்ரமேண மஹாயஶாஃ ।

ஆபகாயாஸ்ஸுபூர்ணாயா வேகம் பரிஹரேச்சரைஃ ॥ 23 ॥

ஸதாரக்ரஹநக்ஷத்ரம் நபஶ்சாப்யவஸாதயேத் ।

அஸௌ ராமஸ்து ஸீதந்தீம் ஶ்ரீமாநப்யுத்தரேந்மஹீம் ॥ 24 ॥

பித்த்வா வேலாம் ஸமுத்ரஸ்ய லோகாநாப்லாவயேத்விபுஃ ।

வேகம் வாபி ஸமுத்ரஸ்ய வாயும் வா விதமேச்சரைஃ ॥ 25 ॥

ஸம்ஹ்ரு'த்ய வா புநர்லோகாந்விக்ரமேண மஹாயஶாஃ ।

ஶக்தஸ்ஸபுருஷவ்யாக்ரஃ ஸ்ரஷ்டும் புநரபி ப்ரஜாஃ ॥ 26 ॥

ந ஹி ராமோ தஶக்ரீவ ஶக்யோ ஜேதும் த்வயா யுதி ।

ரக்ஷஸாம் வாபி லோகேந ஸ்வர்கஃ பாபஜநைரிவ ॥ 27 ॥

ந தம் வத்யமஹம் மந்யே ஸர்வைர்தேவாஸுரைரபி ।

அயம் தஸ்ய வதோபாயஸ்தந்மமைகமநாஶ்ஶ்ரு'ணு ॥ 28 ॥

பார்யா தஸ்யோத்தமா லோகே ஸீதா நாம ஸுமத்யமா ।

ஶ்யாமா ஸமவிபக்தாங்கீ ஸ்த்ரீரத்நம் ரத்நபூஷிதா ॥ 29 ॥

நைவ தேவீ ந கந்தர்வீ நாப்ஸரா நாபி தாநவீ ।

துல்யா ஸீமந்திநீ தஸ்யா மாநுஷீஷு குதோ பவேத் ॥ 30 ॥

தஸ்யாபஹர பார்யாந்த்வம் ப்ரமத்ய து மஹாவநே ।

ஸீதயா ரஹிதஃ காமீ ராமோ ஹாஸ்யதி ஜீவிதம் ॥ 31 ॥

அரோசயத தத்வாக்யம் ராவணோ ராக்ஷஸாதிபஃ ।

சிந்தயித்வா மஹாபாஹுரகம்பநமுவாச ஹ ॥ 32 ॥

பாடம் கால்யம் கமிஷ்யாமி ஹ்யேகஸ்ஸாரதிநா ஸஹ ।

ஆநயிஷ்யாமி வைதேஹீமிமாம் ஹ்ரு'ஷ்டோ மஹாபுரீம் ॥ 33 ॥

அதைவமுக்த்வா ப்ரயயௌ கரயுக்தேந ராவணஃ ।

ரதேநாதித்யவர்ணேந திஶஸ்ஸர்வாஃ ப்ரகாஶயந் ॥ 34 ॥

ஸ ரதோ ராக்ஷஸேந்த்ரஸ்ய நக்ஷத்ரபதகோ மஹாந் ।

ஸஞ்சார்யமாணஶ்ஶுஶுபே ஜலதே சந்த்ரமா இவ ॥ 35 ॥

ஸ மாரீசாஶ்ரமம் ப்ராப்ய தாடகேயமுபாகமத் ।

மாரீசேநார்சிதோ ராஜா பக்ஷ்யபோஜ்யைரமாநுஷைஃ ॥ 36 ॥

தம் ஸ்வயம் பூஜயித்வா து ஆஸநேநோதகேந ச ।

அர்தோபஹிதயா வாசா மாரீசோ வாக்யமப்ரவீத் ॥ 37 ॥

கச்சித்ஸுகுஶலம் ராஜந்லோகாநாம் ராக்ஷஸேஶ்வர ।

ஆஶங்கே நாத ஜாநே த்வம் யதஸ்தூர்ணமிஹாகதஃ ॥ 38 ॥

ஏவமுக்தோ மஹாதேஜா மாரீசேந ஸ ராவணஃ ।

ததஃ பஶ்சாதிதம் வாக்யமப்ரவீத்வாக்யகோவிதஃ ॥ 39 ॥

ஆரக்ஷோ மே ஹதஸ்தாத ராமேணாக்லிஷ்டகர்மணா ।

ஜநஸ்தாநமவத்ய தத்ஸர்வம் யுதி நிபாதிதம் ॥ 40 ॥

தஸ்ய மே குரு ஸாசிவ்யம் தஸ்ய பார்யாபஹாரணே ।

ராக்ஷஸேந்த்ரவசஶ்ஶ்ருத்வா மாரீசோ வாக்யமப்ரவீத் ॥ 41 ॥

ஆக்யாதா கேந ஸீதா ஸா மித்ரரூபேண ஶத்ருணா ।

த்வயா ராக்ஷஸஶார்தூல கோ ந நந்ததி நந்திதஃ ॥ 42 ॥

ஸீதாமிஹாநயஸ்வேதி கோ ப்ரவீதி ப்ரவீஹி மே ।

ரக்ஷோலோகஸ்ய ஸர்வஸ்ய கஶ்ஶ்ரு'ங்கம் சேத்துமிச்சதி ॥ 43 ॥

ப்ரோத்ஸாஹயதி கஶ்ச த்வாம் ஸ ச ஶத்ருரஸம்ஶயஃ ।

அஶீவிஷமுகாத்தம்ஷ்ட்ராமுத்தர்தும் சேச்சதி த்வயா ॥ 44 ॥

கர்மணா கேந கேநாஸி காபதம் ப்ரதிபாதிதஃ ।

ஸுகஸுப்தஸ்ய தே ராஜந் ப்ரஹ்ரு'தம் கேந மூர்தநி ॥ 45 ॥

விஶுத்தவம்ஶாபிஜநாக்ரஹஸ்த ஸ்தேஜோமதஸ்ஸம்ஸ்திததோர்விஷாணஃ ।

உதீக்ஷிதும் ராவண நேஹ யுக்தஃ ஸ ஸம்யுகே ராகவகந்தஹஸ்தீ ॥ 46 ॥

அஸௌ ரணாந்தஃ ஸ்திதிஸந்திவாலோ விதக்தரக்ஷோம்ரு'கஹா ந்ரு'ஸிம்ஹஃ ।

ஸுப்தஸ்த்வயா போதயிதும் ந யுக்தஃ ஶராங்கபூர்ணோ நிஶிதாஸிதம்ஷ்ட்ரஃ ॥ 47 ॥

சாபாபஹாரே புஜவேகபங்கே ஶரோர்மிமாலே ஸுமஹாஹவௌகே ।

ந ராமபாதாலமுகேऽதிகோரே ப்ரஸ்கந்திதும் ராக்ஷஸராஜ யுக்தம் ॥ 48 ॥

ப்ரஸீத லங்கேஶ்வர ராக்ஷஸேந்த்ர லங்காம் ப்ரஸந்நோ பவ ஸாது கச்ச ।

த்வம் ஸ்வேஷு தாரேஷு ரமஸ்வ நித்யம் ராமஸ்ஸபார்யோ ரமதாம் வநேஷு ॥ 49 ॥

ஏவமுக்தோ தஶக்ரீவோ மாரீசேந ஸ ராவணஃ ।

ந்யவர்தத புரீம் லங்காம் விவேஶ ச க்ரு'ஹோத்தமம் ॥ 50 ॥

இத்யார்ஷே ஶ்ரீமத்ராமாயணே வால்மீகீய ஆதிகாவ்யே அரண்யகாண்டே ஏகத்ரிம்ஶஸ்ஸர்கஃ ॥

Roman (IAST) Transliteration

śrīmadvālmīkīya rāmāyaṇe araṇyakāṇḍam |

atha ekatriṃśassargaḥ |

tvaramāṇastato gatvā janasthānādakampanaḥ |

praviśya laṅkāṃ vegena rāvaṇaṃ vākyamabravīt || 1 ||

janasthānasthitā rājanrākṣasā bahavo hatāḥ |

kharaśca nihatassaṅkhye kathañcidahamāgataḥ || 2 ||

evamukto daśagrīvaḥ kruddha ssaṃraktalocanaḥ |

akampanamuvācedaṃ nirdahanniva cakṣuṣā || 3 ||

kena ramyaṃ janasthānaṃ hataṃ mama parāsunā |

ko hi sarveṣu lokeṣu gatiṃ cādhigamiṣyati || 4 ||

na hi me vipriyaṃ kṛtvā śakyaṃ maghavatā sukham |

prāptuṃ vaiśravaṇenāpi na yamena na viṣṇunā || 5 ||

kālasya cāpyahaṃ kālo daheyamapi pāvakam |

mṛtyuṃ maraṇadharmeṇa saṃyojayitumutsahe || 6 ||

daheyamapi saṅkṛddhastejasā'dityapāvakau |

vātasya tarasā vegaṃ nihantumahamutsahe || 7 ||

tathā kruddhaṃ daśagrīvaṃ kṛtāñjalirakampanaḥ |

bhayātsandigdhayā vācā rāvaṇaṃ yācate'bhayam || 8 ||

daśagrīvo'bhayaṃ tasmai pradadau rakṣasāṃ varaḥ |

sa visrabdho'bravīdvākyamasandigdhamakampanaḥ || 9 ||

putro daśarathasyāsti siṃhasaṃhanano yuvā |

rāmo nāma vṛṣaskandho vṛttāyatamahābhujaḥ || 10 ||

vīraḥ pṛthuyaśāśśrīmānatulyabalavikramaḥ |

hataṃ tena janasthānaṃ kharaśca saha dūṣaṇaḥ || 11 ||

akampanavaca śrutvā rāvaṇo rākṣasādhipaḥ |

nāgendra iva niśvasya vacanaṃ cedamabravīt || 12 ||

sa surendreṇa saṃyukto rāmassarvāmaraissaha |

upayāto janasthānaṃ brūhi kaccidakampana || 13 ||

rāvaṇasya punarvākyaṃ niśamya tadakampanaḥ |

ācacakṣe balaṃ tasya vikramaṃ ca mahātmanaḥ || 14 ||

rāmo nāma mahātejā śreṣṭhassarvadhanuṣmatām |

divyāstraguṇasampannaḥ purandarasamo yudhi || 15 ||

tasyānurūpo balavānraktākṣo dandubhisvanaḥ |

kanīyānlakṣmaṇo nāma bhrātā śaśinibhānanaḥ || 16 ||

sa tena saha saṃyuktaḥ pāvakenānilo yathā |

śrīmānrājavarastena janasthānaṃ nipātitam || 17 ||

naiva devā mahātmāno nātra kāryā vicāraṇā |

śarā rāmeṇa tūtsṛṣṭā rukmapuṅkhāḥ patatriṇaḥ || 18 ||

sarpāḥ pañcānanā bhūtvā bhakṣayanti sma rākṣasān |

yena yena ca gacchanti rākṣasā bhayakarśitāḥ || 19 ||

tena tena sma paśyanti rāmamevāgrataḥ sthitam |

itthaṃ vināśitaṃ tena janasthānaṃ tavānagha || 20 ||

akampanavacaśrutvā rāvaṇo vākyamabravīt |

janasthānaṃ gamiṣyāmi hantuṃ rāmaṃ salakṣmaṇam || 21 ||

athaivamukte vacane provācedamakampanaḥ |

śṛṇu rājanyathāvṛttaṃ rāmasya balapauruṣam || 22 ||

asādhyaḥ kupito rāmo vikrameṇa mahāyaśāḥ |

āpagāyāssupūrṇāyā vegaṃ parihareccharaiḥ || 23 ||

satāragrahanakṣatraṃ nabhaścāpyavasādayet |

asau rāmastu sīdantīṃ śrīmānabhyuddharenmahīm || 24 ||

bhittvā velāṃ samudrasya lokānāplāvayedvibhuḥ |

vegaṃ vāpi samudrasya vāyuṃ vā vidhameccharaiḥ || 25 ||

saṃhṛtya vā punarlokānvikrameṇa mahāyaśāḥ |

śaktassapuruṣavyāghraḥ sraṣṭuṃ punarapi prajāḥ || 26 ||

na hi rāmo daśagrīva śakyo jetuṃ tvayā yudhi |

rakṣasāṃ vāpi lokena svargaḥ pāpajanairiva || 27 ||

na taṃ vadhyamahaṃ manye sarvairdevāsurairapi |

ayaṃ tasya vadhopāyastanmamaikamanāśśṛṇu || 28 ||

bhāryā tasyottamā loke sītā nāma sumadhyamā |

śyāmā samavibhaktāṅgī strīratnaṃ ratnabhūṣitā || 29 ||

naiva devī na gandharvī nāpsarā nāpi dānavī |

tulyā sīmantinī tasyā mānuṣīṣu kuto bhavet || 30 ||

tasyāpahara bhāryāntvaṃ pramathya tu mahāvane |

sītayā rahitaḥ kāmī rāmo hāsyati jīvitam || 31 ||

arocayata tadvākyaṃ rāvaṇo rākṣasādhipaḥ |

cintayitvā mahābāhurakampanamuvāca ha || 32 ||

bāḍhaṃ kālyaṃ gamiṣyāmi hyekassārathinā saha |

ānayiṣyāmi vaidehīmimāṃ hṛṣṭo mahāpurīm || 33 ||

athaivamuktvā prayayau kharayuktena rāvaṇaḥ |

rathenādityavarṇena diśassarvāḥ prakāśayan || 34 ||

sa ratho rākṣasendrasya nakṣatrapathago mahān |

sañcāryamāṇaśśuśubhe jalade candramā iva || 35 ||

sa mārīcāśramaṃ prāpya tāṭakeyamupāgamat |

mārīcenārcito rājā bhakṣyabhojyairamānuṣaiḥ || 36 ||

taṃ svayaṃ pūjayitvā tu āsanenodakena ca |

arthopahitayā vācā mārīco vākyamabravīt || 37 ||

kaccitsukuśalaṃ rājanlokānāṃ rākṣaseśvara |

āśaṅke nātha jāne tvaṃ yatastūrṇamihāgataḥ || 38 ||

evamukto mahātejā mārīcena sa rāvaṇaḥ |

tataḥ paścādidaṃ vākyamabravīdvākyakovidaḥ || 39 ||

ārakṣo me hatastāta rāmeṇākliṣṭakarmaṇā |

janasthānamavadhya tatsarvaṃ yudhi nipātitam || 40 ||

tasya me kuru sācivyaṃ tasya bhāryāpahāraṇe |

rākṣasendravacaśśrutvā mārīco vākyamabravīt || 41 ||

ākhyātā kena sītā sā mitrarūpeṇa śatruṇā |

tvayā rākṣasaśārdūla ko na nandati nanditaḥ || 42 ||

sītāmihānayasveti ko bravīti bravīhi me |

rakṣolokasya sarvasya kaśśṛṅgaṃ chettumicchati || 43 ||

protsāhayati kaśca tvāṃ sa ca śatrurasaṃśayaḥ |

aśīviṣamukhāddaṃṣṭrāmuddhartuṃ cecchati tvayā || 44 ||

karmaṇā kena kenāsi kāpathaṃ pratipāditaḥ |

sukhasuptasya te rājan prahṛtaṃ kena mūrdhani || 45 ||

viśuddhavaṃśābhijanāgrahasta stejomadassaṃsthitadorviṣāṇaḥ |

udīkṣituṃ rāvaṇa neha yuktaḥ sa saṃyuge rāghavagandhahastī || 46 ||

asau raṇāntaḥ sthitisandhivālo vidagdharakṣomṛgahā nṛsiṃhaḥ |

suptastvayā bodhayituṃ na yuktaḥ śarāṅgapūrṇo niśitāsidaṃṣṭraḥ || 47 ||

cāpāpahāre bhujavegapaṅke śarormimāle sumahāhavaughe |

na rāmapātālamukhe'tighore praskandituṃ rākṣasarāja yuktam || 48 ||

prasīda laṅkeśvara rākṣasendra laṅkāṃ prasanno bhava sādhu gaccha |

tvaṃ sveṣu dāreṣu ramasva nityaṃ rāmassabhāryo ramatāṃ vaneṣu || 49 ||

evamukto daśagrīvo mārīcena sa rāvaṇaḥ |

nyavartata purīṃ laṅkāṃ viveśa ca gṛhottamam || 50 ||

ityārṣe śrīmadrāmāyaṇe vālmīkīya ādikāvye araṇyakāṇḍe ekatriṃśassargaḥ ||