3.24 Aranyakanda - Chaturvimsha Sargah

ॐ

3.24 அரண்யகாண்ட - சதுர்விம்ஶ ஸர்கஃ

Valmiki Tamil

ஶ்ரீமத்வால்மீகீய ராமாயணே அரண்யகாண்டம் ।

அத சதுர்விம்ஶஸ்ஸர்கஃ ।

ஆஶ்ரமம் ப்ரதி யாதே து கரே கரபராக்ரமே ।

தாநேவௌத்பாதிகாந்ராமஸ்ஸஹ ப்ராத்ரா ததர்ஶ ஹ ॥ 1 ॥

தாநுத்பாதாந்மஹோகோராநுத்திதாந்ரோமஹர்ஷணாந் ।

ப்ரஜாநாமஹிதாந்த்ரு'ஷ்ட்வா ராமோ லக்ஷ்மணமப்ரவீத் ॥ 2 ॥

இமாந்பஶ்ய மஹாபாஹோ ஸர்வபூதாபஹாரிணஃ ।

ஸமுத்திதாந்மஹோத்பாதாந்ஸம்ஹர்தும் ஸர்வராக்ஷஸாந் ॥ 3 ॥

அமீ ருதிரதாராஸ்து விஸ்ரு'ஜந்தஃ கரஸ்வநாஃ ।

வ்யோம்நி மேகா விவர்தந்தே பருஷா கர்தபாருணாஃ ॥ 4 ॥

ஸதூமாஶ்ச ஶராஸ்ஸர்வே மம யுத்தாபிநந்திநஃ ।

ருக்மப்ரு'ஷ்டாநி சாபாநி விசேஷ்டந்தே ச லக்ஷ்மண ॥ 5 ॥

யாத்ரு'ஶா இஹ கூஜந்தி பக்ஷிணஃ வநசாரிணஃ ।

அக்ரதோ நோ பயம் ப்ராப்தம் ஸம்ஶயோ ஜீவிதஸ்ய ச ॥ 6 ॥

ஸம்ப்ரஹாரஸ்து ஸுமஹாந்பவிஷ்யதி ந ஸம்ஶயஃ ।

அயமாக்யாதி மே பாஹுஸ்ஸ்புரமாணோ முஹுர்முஹுஃ ॥ 7 ॥

ஸந்நிகர்ஷே து ந ஶ்ஶூர ஜயம் ஶத்ரோஃ பராஜயம் ।

ஸப்ரபம் ச ப்ரஸந்நம் ச தவ வக்த்ரம் ஹி லக்ஷ்யதே ॥ 8 ॥

உத்யதாநாம் ஹி யுத்தார்தம் யேஷாம் பவதி லக்ஷ்மண ।

நிஷ்ப்ரபம் வதநம் தேஷாம் பவத்யாயுஃ பரிக்ஷயஃ ॥ 9 ॥

ரக்ஷஸாம் நர்ததாம் கோரஶ்ஶ்ரூயதே ச மஹாத்வநிஃ ।

ஆஹதாநாம் ச பேரீணாம் ராக்ஷஸைஃ க்ரூரகர்மபிஃ ॥ 10 ॥

அநாகதவிதாநம் து கர்தவ்யம் ஶுபமிச்சதா ।

ஆபதம் ஶங்கமாநேந புருஷேண விபஶ்சிதா ॥ 11 ॥

தஸ்மாத்க்ரு'ஹீத்வா வைதேஹீம் ஶரபாணிர்தநுர்தரஃ ।

குஹாமாஶ்ரய ஶைலஸ்ய துர்காம் பாதபஸங்குலாம் ॥ 12 ॥

ப்ரதிகூலிதுமிச்சாமி ந ஹி வாக்யமிதம் த்வயா ।

ஶாபிதோ மம பாதாப்யாம் கம்யதாம் வத்ஸ மா சிரம் ॥ 13 ॥

த்வம் ஹி ஶூரஶ்ச பலவாந்ஹந்யாஹ்யேதாந்ந ஸம்ஶயஃ ।

ஸ்வயம் து ஹந்துமிச்சாமி ஸர்வாநேவ நிஶாசராந் ॥ 14 ॥

ஏவமுக்தஸ்து ராமேண லக்ஷ்மணஸ்ஸஹ ஸீதாயா ।

ஶராநாதாய சாபம் ச குஹாம் துர்காம் ஸமாஶ்ரயத் ॥ 15 ॥

தஸ்மிந்ப்ரவிஷ்டே து குஹாம் லக்ஷ்மணே ஸஹ ஸீதயா ।

ஹந்த நிர்யுக்தமித்யுக்த்வா ராமஃ கவசமாவிஶத் ॥ 16 ॥

ஸ தேநாக்நி நிகாஶேந கவசேந விபூஷிதஃ ।

பபூவ ராம ஸ்திமிரே விதூமோऽக்நிரிவோத்திதஃ ॥ 17 ॥

ஸ சாபமுத்யம்ய மஹச்சராநாதாய வீர்யவாந் ।

பபூவாவஸ்திதஸ்தத்ர ஜ்யாஸ்வநைஃ பூரயந்திஶஃ ॥ 18 ॥

ததோ தேவாஸ்ஸகந்தர்வாஸ்ஸித்தாஶ்ச ஸஹ சாரணைஃ ।

ஸமேயுஶ்ச மஹாத்மாநோ யுத்ததர்ஶநகாங்க்ஷிணஃ ॥ 19 ॥

ரு'ஷயஶ்ச மஹாத்மாநோ லோகே ப்ரஹ்மர்ஷிஸத்தமாஃ ।

ஸமேத்ய சோசுஸ்ஸஹிதா அந்யோந்யம் புண்யகர்மணஃ ॥ 20 ॥

ஸ்வஸ்தி கோப்ராஹ்மணேப்யோऽஸ்து லோகாநாம் யேऽபிஸங்கதாஃ ।

ஜயதாம் ராகவோ யுத்தே பௌலஸ்த்யாந் ரஜநீசராந் ॥ 21 ॥

சக்ரஹஸ்தோ யதா யுத்தே ஸர்வாநஸுர புங்கவாந் ।

ஏவமுக்த்வா புநஃ ப்ரோசுராலோக்ய ச பரஸ்பரம் ॥ 22 ॥

சதுர்தஶ ஸஹஸ்ராணி ரக்ஷஸாம் பீமகர்மணாம் ।

ஏகஶ்ச ராமோ தர்மாத்மா கதம் யுத்தம் பவிஷ்யதி ॥ 23 ॥

இதி ராஜர்ஷயஸ்ஸித்தாஸ்ஸகணாஶ்ச த்விஜர்ஷபாஃ ।

ஜாதகௌதூஹலாஸ்தஸ்துர்விமாநஸ்தாஶ்ச தேவதாஃ ॥ 24 ॥

ஆவிஷ்டம் தேஜஸா ராமம் ஸங்க்ராமஶிரஸி ஸ்திதம் ।

த்ரு'ஷ்ட்வா ஸர்வாணி பூதாநி பயாத்விவ்யதிரே ததா ॥ 25 ॥

ரூபமப்ரதிமம் தஸ்ய ராமஸ்யாக்லிஷ்டகர்மணஃ ।

பபூவ ரூபம் க்ருத்தஸ்ய ருத்ரஸ்யேவ பிநாகிநஃ ॥ 26 ॥

ததோ கம்பீரநிர்ஹ்ராதம் கோரவர்மாயுதத்வஜம் ।

அநீகம் யாதுதாநாநாம் ஸமந்தாத்ப்ரத்யத்ரு'ஶ்யத ॥ 27 ॥

ஸிம்ஹநாதம் விஸ்ரு'ஜதாமந்யோந்யமபிகர்ஜதாம் ।

சாபாநி விஸ்பாரயதாம் ஜ்ரு'ம்பதாமப்யபீக்ஷ்ணஶஃ ॥ 28 ॥

விப்ரகுஷ்டஸ்வநாநாம் ச துந்துபீம்ஶ்சாபி நிக்நதாம் ।

தேஷாம் ஸுதுமுலஶ்ஶப்தஃ பூரயாமாஸ தத்வநம் ॥ 29 ॥

தேந ஶப்தேந வித்ரஸ்தாஶ்வாபதா வநசாரிணஃ ।

துத்ருவுர்யத்ர நிஶ்ஶப்தம் ப்ரு'ஷ்டதோ ந வ்யலோகயந் ॥ 30 ॥

தத்த்வநீகம் மஹாகோரம் ராமம் ஸமுபஸர்பத ।

த்ரு'தநாநாப்ரஹரணம் கம்பீரம் ஸாகரோபமம் ॥ 31 ॥

ராமோऽபி சாரயம்ஶ்சக்ஷுஸ்ஸர்வதோ ரணபண்டிதஃ ।

ததர்ஶ கரஸைந்யம் தத்யுத்தாபிமுகமுத்திதம் ॥ 32 ॥

விதத்ய ச தநுர்பீமம் தூண்யாஶ்சோத்த்ரு'த்ய ஸாயகாந் ।

க்ரோதமாஹாரயத்தீவ்ரம் வதார்தம் ஸர்வரக்ஷஸாம் ॥ 33 ॥

துஷ்ப்ரேக்ஷ்யஸ்ஸோऽபவத்க்ரு'த்தோ யுகாந்தாக்நிரிவ ஜ்வலந் ।

தம் த்ரு'ஷ்ட்வா தேஜஸாவிஷ்டம் ப்ராத்ரவந்வநதேவதாஃ ॥ 34 ॥

தஸ்ய க்ருத்தஸ்ய ரூபம் து ராமஸ்ய தத்ரு'ஶே ததா ।

தக்ஷஸ்யேவ க்ரதும் ஹந்துமுத்யதஸ்ய பிநாகிநஃ ॥ 35 ॥

ஆவிஷ்டம் தேஜஸா ராமம் ஸங்க்ராமஶிரஸி ஸ்திதம் ।

த்ரு'ஷ்ட்வா ஸர்வாணி பூதாநி பயார்தாநி ப்ரதுத்ருவுஃ ॥ 36 ॥

தத்கார்முகைராபரணைர்த்வஜைஶ்ச தைர்வர்மபிஶ்சாக்நிஸமாநவர்ணைஃ ।

பபூவ ஸைந்யம் பிஶிதாஶநாநாம் ஸூர்யோதயே நீலமிவாப்ரப்ரு'ந்தம் ॥ 37 ॥

இத்யார்ஷே ஶ்ரீமத்ராமாயணே வால்மீகீய ஆதிகாவ்யே அரண்யகாண்டே சதுர்விம்ஶஸ்ஸர்கஃ ॥

Roman (IAST) Transliteration

śrīmadvālmīkīya rāmāyaṇe araṇyakāṇḍam |

atha caturviṃśassargaḥ |

āśramaṃ prati yāte tu khare kharaparākrame |

tānevautpātikānrāmassaha bhrātrā dadarśa ha || 1 ||

tānutpātānmahoghorānutthitānromaharṣaṇān |

prajānāmahitāndṛṣṭvā rāmo lakṣmaṇamabravīt || 2 ||

imānpaśya mahābāho sarvabhūtāpahāriṇaḥ |

samutthitānmahotpātānsaṃhartuṃ sarvarākṣasān || 3 ||

amī rudhiradhārāstu visṛjantaḥ kharasvanāḥ |

vyomni meghā vivartante paruṣā gardabhāruṇāḥ || 4 ||

sadhūmāśca śarāssarve mama yuddhābhinandinaḥ |

rukmapṛṣṭhāni cāpāni viceṣṭante ca lakṣmaṇa || 5 ||

yādṛśā iha kūjanti pakṣiṇaḥ vanacāriṇaḥ |

agrato no bhayaṃ prāptaṃ saṃśayo jīvitasya ca || 6 ||

samprahārastu sumahānbhaviṣyati na saṃśayaḥ |

ayamākhyāti me bāhussphuramāṇo muhurmuhuḥ || 7 ||

sannikarṣe tu na śśūra jayaṃ śatroḥ parājayam |

saprabhaṃ ca prasannaṃ ca tava vaktraṃ hi lakṣyate || 8 ||

udyatānāṃ hi yuddhārthaṃ yeṣāṃ bhavati lakṣmaṇa |

niṣprabhaṃ vadanaṃ teṣāṃ bhavatyāyuḥ parikṣayaḥ || 9 ||

rakṣasāṃ nardatāṃ ghoraśśrūyate ca mahādhvaniḥ |

āhatānāṃ ca bherīṇāṃ rākṣasaiḥ krūrakarmabhiḥ || 10 ||

anāgatavidhānaṃ tu kartavyaṃ śubhamicchatā |

āpadaṃ śaṅkamānena puruṣeṇa vipaścitā || 11 ||

tasmādgṛhītvā vaidehīṃ śarapāṇirdhanurdharaḥ |

guhāmāśraya śailasya durgāṃ pādapasaṅkulām || 12 ||

pratikūlitumicchāmi na hi vākyamidaṃ tvayā |

śāpito mama pādābhyāṃ gamyatāṃ vatsa mā ciram || 13 ||

tvaṃ hi śūraśca balavānhanyāhyetānna saṃśayaḥ |

svayaṃ tu hantumicchāmi sarvāneva niśācarān || 14 ||

evamuktastu rāmeṇa lakṣmaṇassaha sītāyā |

śarānādāya cāpaṃ ca guhāṃ durgāṃ samāśrayat || 15 ||

tasminpraviṣṭe tu guhāṃ lakṣmaṇe saha sītayā |

hanta niryuktamityuktvā rāmaḥ kavacamāviśat || 16 ||

sa tenāgni nikāśena kavacena vibhūṣitaḥ |

babhūva rāma stimire vidhūmo'gnirivotthitaḥ || 17 ||

sa cāpamudyamya mahaccharānādāya vīryavān |

babhūvāvasthitastatra jyāsvanaiḥ pūrayandiśaḥ || 18 ||

tato devāssagandharvāssiddhāśca saha cāraṇaiḥ |

sameyuśca mahātmāno yuddhadarśanakāṅkṣiṇaḥ || 19 ||

ṛṣayaśca mahātmāno loke brahmarṣisattamāḥ |

sametya cocussahitā anyonyaṃ puṇyakarmaṇaḥ || 20 ||

svasti gobrāhmaṇebhyo'stu lokānāṃ ye'bhisaṅgatāḥ |

jayatāṃ rāghavo yuddhe paulastyān rajanīcarān || 21 ||

cakrahasto yathā yuddhe sarvānasura puṅgavān |

evamuktvā punaḥ procurālokya ca parasparam || 22 ||

caturdaśa sahasrāṇi rakṣasāṃ bhīmakarmaṇām |

ekaśca rāmo dharmātmā kathaṃ yuddhaṃ bhaviṣyati || 23 ||

iti rājarṣayassiddhāssagaṇāśca dvijarṣabhāḥ |

jātakautūhalāstasthurvimānasthāśca devatāḥ || 24 ||

āviṣṭaṃ tejasā rāmaṃ saṅgrāmaśirasi sthitam |

dṛṣṭvā sarvāṇi bhūtāni bhayādvivyathire tadā || 25 ||

rūpamapratimaṃ tasya rāmasyākliṣṭakarmaṇaḥ |

babhūva rūpaṃ kruddhasya rudrasyeva pinākinaḥ || 26 ||

tato gambhīranirhrādaṃ ghoravarmāyudhadhvajam |

anīkaṃ yātudhānānāṃ samantātpratyadṛśyata || 27 ||

siṃhanādaṃ visṛjatāmanyonyamabhigarjatām |

cāpāni visphārayatāṃ jṛmbhatāmapyabhīkṣṇaśaḥ || 28 ||

vipraghuṣṭasvanānāṃ ca dundhubhīṃścāpi nighnatām |

teṣāṃ sutumulaśśabdaḥ pūrayāmāsa tadvanam || 29 ||

tena śabdena vitrastāśvāpadā vanacāriṇaḥ |

dudruvuryatra niśśabdaṃ pṛṣṭhato na vyalokayan || 30 ||

tattvanīkaṃ mahāghoraṃ rāmaṃ samupasarpata |

dhṛtanānāpraharaṇaṃ gambhīraṃ sāgaropamam || 31 ||

rāmo'pi cārayaṃścakṣussarvato raṇapaṇḍitaḥ |

dadarśa kharasainyaṃ tadyuddhābhimukhamutthitam || 32 ||

vitatya ca dhanurbhīmaṃ tūṇyāścoddhṛtya sāyakān |

krodhamāhārayattīvraṃ vadhārthaṃ sarvarakṣasām || 33 ||

duṣprekṣyasso'bhavatkṛddho yugāntāgniriva jvalan |

taṃ dṛṣṭvā tejasāviṣṭaṃ prādravanvanadevatāḥ || 34 ||

tasya kruddhasya rūpaṃ tu rāmasya dadṛśe tadā |

dakṣasyeva kratuṃ hantumudyatasya pinākinaḥ || 35 ||

āviṣṭaṃ tejasā rāmaṃ saṅgrāmaśirasi sthitam |

dṛṣṭvā sarvāṇi bhūtāni bhayārtāni pradudruvuḥ || 36 ||

tatkārmukairābharaṇairdhvajaiśca tairvarmabhiścāgnisamānavarṇaiḥ |

babhūva sainyaṃ piśitāśanānāṃ sūryodaye nīlamivābhrabṛndam || 37 ||

ityārṣe śrīmadrāmāyaṇe vālmīkīya ādikāvye araṇyakāṇḍe caturviṃśassargaḥ ||