📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
3.19 அரண்யகாண்ட - ஏகோநவிம்ஶ ஸர்கஃ
3.19 Aranyakanda - Ekonavimsha Sargah
Valmiki Tamil
ஶ்ரீமத்வால்மீகீய ராமாயணே அரண்யகாண்டம் ।
அத ஏகோநவிம்ஶஸ்ஸர்கஃ ।
தாம் ததா பதிதாம் த்ரு'ஷ்ட்வா விரூபாம் ஶோணிதோக்ஷிதாம் ।
பகிநீம் க்ரோதஸந்தப்தஃ கரஃ பப்ரச்ச ராக்ஷஸஃ ॥ 1 ॥
உத்திஷ்ட தாவதாக்யாஹி ப்ரமோஹம் ஜஹி ஸம்ப்ரமம் ।
வ்யக்தமாக்யாஹி கேந த்வமேவம் ரூபா விரூபிதா ॥ 2 ॥
கஃ க்ரு'ஷ்ணஸர்பமாஸீநமாஶீவிஷமநாகஸம் ।
துதத்யபிஸமாபந்நமங்குல்யக்ரேண லீலயா ॥ 3 ॥
கஃ காலபாஶம் ஸமாஸஜ்ய கண்டே மோஹாந்ந புத்யதே ।
யஸ்த்வாமத்ய ஸமாஸாத்ய பீதவாந்விஷமுத்தமம் ॥ 4 ॥
பலவிக்ரமஸம்பந்நா காமகா காமரூபிணீ ।
இமாமவஸ்தாம் நீதா த்வம் கேநாந்தகஸமாகதா ॥ 5 ॥
தேவகந்தர்வபூதாநாம்ரு'ஷீணாம் ச மஹாத்மநாம் ।
கோऽயமேவம் விரூபாம் த்வாம் மஹாவீர்யஶ்சகார ஹ ॥ 6 ॥
ந ஹி பஶ்யாம்யஹம் லோகே யஃ குர்யாந்மம விப்ரியம் ।
அமரேஷு ஸஹஸ்ராக்ஷம் மஹேந்த்ரம் பாகஶாஸநம் ॥ 7 ॥
அத்யாஹம் மார்கணைஃ ப்ராணாநாதாஸ்யே ஜீவிதாந்தகைஃ ।
ஸலிலே க்ஷீரமாஸக்தம் நிஷ்பிபந்நிவ ஸாரஸஃ ॥ 8 ॥
நிஹதஸ்ய மயா ஸங்க்யே ஶரஸங்க்ரு'த்தமர்மணஃ ।
ஸபேநம் ருதிரம் ரக்தம் மேதிநீ கஸ்ய பாஸ்யதி ॥ 9 ॥
கஸ்ய பத்ரரதாஃ காயாந்மாம்ஸமுத்க்ரு'த்ய ஸங்கதாஃ ।
ப்ரஹ்ரு'ஷ்டா பக்ஷயிஷ்யந்தி நிஹதஸ்ய மயா ரணே ॥ 10 ॥
தம் ந தேவா ந கந்தர்வா ந பிஶாசா ந ராக்ஷஸாஃ ।
மயாபக்ரு'ஷ்டம் க்ரு'பணம் ஶக்தாஸ்த்ராதும் மஹாஹவே ॥ 11 ॥
உபலப்ய ஶநைஸ்ஸஞ்ஜ்ஞாம் தம் மே ஶம்ஸிதுமர்ஹஸி ।
யேந த்வம் துர்விநீதேந வநே விக்ரம்ய நிர்ஜிதா ॥ 12 ॥
இதி ப்ராதுர்வசஶ்ஶ்ருத்வா க்ருத்தஸ்ய ச விஶேஷதஃ ।
ததஶ்ஶூர்பணகா வாக்யம் ஸபாஷ்பமிதமப்ரவீத் ॥ 13 ॥
தருணௌ ரூபஸம்பந்நௌ ஸுகுமாரௌ மஹாபலௌ ।
புண்டரீகவிஶாலாக்ஷௌ சீரக்ரு'ஷ்ணாஜிநாம்பரௌ ॥ 14 ॥
பலமூலாஶநௌ தாந்தௌ தாபஸௌ தர்மசாரிணௌ ।
புத்ரௌ தஶரதஸ்யாஸ்தாம் ப்ராதரௌ ராமலக்ஷ்மணௌ ॥ 15 ॥
கந்தர்வராஜப்ரதிமௌ பார்திவவ்யஞ்ஜநாந்விதௌ ।
தேவௌ வா மாநுஷௌ வா தௌ ந தர்கயிதுமுத்ஸஹே ॥ 16 ॥
தருணீ ரூபஸம்பந்நா ஸர்வாபரணபூஷிதா ।
த்ரு'ஷ்டா தத்ர மயா நாரீ தயோர்மத்யே ஸுமத்யமா ॥ 17 ॥
தாப்யாமுபாப்யாம் ஸம்பூய ப்ரமதாமதிக்ரு'த்ய தாம் ।
இமாமவஸ்தாம் நீதாஹம் யதாநாதாஸதீ ததா ॥ 18 ॥
தஸ்யாஶ்சாந்ரு'ஜுவ்ரு'த்தாயாஸ்தயோஶ்ச ஹதயோரஹம் ।
ஸபேநம் பாதுமிச்சாமி ருதிரம் ரணமூர்தநி ॥ 19 ॥
ஏஷ மே ப்ரதமஃ காமஃ க்ரு'தஸ்தாத த்வயா பவேத் ।
தஸ்யாஸ்தயோஶ்ச ருதிரம் பிபேயமஹமாஹவே ॥ 20 ॥
இதி தஸ்யாம் ப்ருவாணாயாம் சதுர்தஶ மஹாபலாந் ।
வ்யாதிதேஶ கரஃ க்ருத்தோ ராக்ஷஸாநந்தகோபமாந் ॥ 21 ॥
மாநுஷௌ ஶஸ்த்ரஸம்பந்நௌ சீரக்ரு'ஷ்ணாஜிநாம்பரௌ ।
ப்ரவிஷ்டௌ தண்டகாரண்யம் கோரம் ப்ரமதயா ஸஹ ॥ 22 ॥
தௌ ஹத்வா தாம் ச துர்வ்ரு'த்தாமபாவர்திதுமர்ஹத ।
இயம் ச ருதிரம் தேஷாம் பகிநீ மம பாஸ்யதி ॥ 23 ॥
மநோரதோऽயமிஷ்டோऽஸ்யா பகிந்யா மம ராக்ஷஸாஃ ।
ஶீக்ரம் ஸம்பாத்யதாம் தௌ ச ப்ரமத்ய ஸ்வேந தேஜஸா ॥ 24 ॥
இதி ப்ரதிஸமாதிஷ்டா ராக்ஷஸாஸ்தே சதுர்தஶ ।
தத்ர ஜக்முஸ்தயா ஸார்தம் கநா வாதேரிதா யதா ॥ 25 ॥
ததஸ்து தே தம் ஸமுதக்ரதேஜஸம் ததாபிऽதீக்ஷ்ணப்ரதரா நிஶாசராஃ ।
ந ஶேகுரேநம் ஸஹஸா ப்ரமர்திதும் வநத்விபா தீப்தமிவாக்நிமுத்திதம் ॥ 26 ॥
இத்யார்ஷே ஶ்ரீமத்ராமாயணே வால்மீகீய ஆதிகாவ்யே அரண்யகாண்டே ஏகோநவிம்ஶஸ்ஸர்கஃ ॥
Roman (IAST) Transliteration
śrīmadvālmīkīya rāmāyaṇe araṇyakāṇḍam |
atha ekonaviṃśassargaḥ |
tāṃ tathā patitāṃ dṛṣṭvā virūpāṃ śoṇitokṣitām |
bhaginīṃ krodhasantaptaḥ kharaḥ papraccha rākṣasaḥ || 1 ||
uttiṣṭha tāvadākhyāhi pramohaṃ jahi sambhramam |
vyaktamākhyāhi kena tvamevaṃ rūpā virūpitā || 2 ||
kaḥ kṛṣṇasarpamāsīnamāśīviṣamanāgasam |
tudatyabhisamāpannamaṅgulyagreṇa līlayā || 3 ||
kaḥ kālapāśaṃ samāsajya kaṇṭhe mohānna budhyate |
yastvāmadya samāsādya pītavānviṣamuttamam || 4 ||
balavikramasampannā kāmagā kāmarūpiṇī |
imāmavasthāṃ nītā tvaṃ kenāntakasamāgatā || 5 ||
devagandharvabhūtānāmṛṣīṇāṃ ca mahātmanām |
ko'yamevaṃ virūpāṃ tvāṃ mahāvīryaścakāra ha || 6 ||
na hi paśyāmyahaṃ loke yaḥ kuryānmama vipriyam |
amareṣu sahasrākṣaṃ mahendraṃ pākaśāsanam || 7 ||
adyāhaṃ mārgaṇaiḥ prāṇānādāsye jīvitāntakaiḥ |
salile kṣīramāsaktaṃ niṣpibanniva sārasaḥ || 8 ||
nihatasya mayā saṅkhye śarasaṅkṛttamarmaṇaḥ |
saphenaṃ rudhiraṃ raktaṃ medinī kasya pāsyati || 9 ||
kasya patrarathāḥ kāyānmāṃsamutkṛtya saṅgatāḥ |
prahṛṣṭā bhakṣayiṣyanti nihatasya mayā raṇe || 10 ||
taṃ na devā na gandharvā na piśācā na rākṣasāḥ |
mayāpakṛṣṭaṃ kṛpaṇaṃ śaktāstrātuṃ mahāhave || 11 ||
upalabhya śanaissañjñāṃ taṃ me śaṃsitumarhasi |
yena tvaṃ durvinītena vane vikramya nirjitā || 12 ||
iti bhrāturvacaśśrutvā kruddhasya ca viśeṣataḥ |
tataśśūrpaṇakhā vākyaṃ sabāṣpamidamabravīt || 13 ||
taruṇau rūpasampannau sukumārau mahābalau |
puṇḍarīkaviśālākṣau cīrakṛṣṇājināmbarau || 14 ||
phalamūlāśanau dāntau tāpasau dharmacāriṇau |
putrau daśarathasyāstāṃ bhrātarau rāmalakṣmaṇau || 15 ||
gandharvarājapratimau pārthivavyañjanānvitau |
devau vā mānuṣau vā tau na tarkayitumutsahe || 16 ||
taruṇī rūpasampannā sarvābharaṇabhūṣitā |
dṛṣṭā tatra mayā nārī tayormadhye sumadhyamā || 17 ||
tābhyāmubhābhyāṃ sambhūya pramadāmadhikṛtya tām |
imāmavasthāṃ nītāhaṃ yathānāthāsatī tathā || 18 ||
tasyāścānṛjuvṛttāyāstayośca hatayoraham |
saphenaṃ pātumicchāmi rudhiraṃ raṇamūrdhani || 19 ||
eṣa me prathamaḥ kāmaḥ kṛtastāta tvayā bhavet |
tasyāstayośca rudhiraṃ pibeyamahamāhave || 20 ||
iti tasyāṃ bruvāṇāyāṃ caturdaśa mahābalān |
vyādideśa kharaḥ kruddho rākṣasānantakopamān || 21 ||
mānuṣau śastrasampannau cīrakṛṣṇājināmbarau |
praviṣṭau daṇḍakāraṇyaṃ ghoraṃ pramadayā saha || 22 ||
tau hatvā tāṃ ca durvṛttāmapāvartitumarhatha |
iyaṃ ca rudhiraṃ teṣāṃ bhaginī mama pāsyati || 23 ||
manoratho'yamiṣṭo'syā bhaginyā mama rākṣasāḥ |
śīghraṃ sampādyatāṃ tau ca pramathya svena tejasā || 24 ||
iti pratisamādiṣṭā rākṣasāste caturdaśa |
tatra jagmustayā sārdhaṃ ghanā vāteritā yathā || 25 ||
tatastu te taṃ samudagratejasaṃ tathāpi'tīkṣṇapradarā niśācarāḥ |
na śekurenaṃ sahasā pramardituṃ vanadvipā dīptamivāgnimutthitam || 26 ||
ityārṣe śrīmadrāmāyaṇe vālmīkīya ādikāvye araṇyakāṇḍe ekonaviṃśassargaḥ ||
InfoLyter.in — Sacred Vedic Knowledge Portal · Free forever