2.74 Ayodhyakanda - Chatuhsaptatitama Sargah

ॐ

2.74 அயோத்யாகாண்ட - சதுஃஸப்ததிதம ஸர்கஃ

Valmiki Tamil

ஶ்ரீமத்வால்மீகீய ராமாயணே அயோத்யாகாண்டம் ।

அத சதுஃஸப்ததிதமஸ்ஸர்கஃ ।

தாம் ததா கர்ஹயித்வா து மாதரம் பரதஸ்ததா ।

ரோஷேண மஹதாऽவிஷ்டஃ புநரேவாப்ரவீத்வசஃ ॥ 1 ॥

ராஜ்யாத்ப்ரம்ஶஸ்வ கைகேயி ந்ரு'ஶம்ஸே துஷ்டசாரிணி ।

பரித்யக்தா ச தர்மேண மா ம்ரு'தம் ருததீ பவ ॥ 2 ॥

கிந்நு தேऽதூஷயத்ராஜா ராமோ வா ப்ரு'ஶதார்மிகஃ ।

யயோர்ம்ரு'த்யுர்விவாஸஶ்ச த்வத்க்ரு'தே துல்யமாகதௌ ॥ 3 ॥

ப்ரூணஹத்யாமஸி ப்ராப்தா குலஸ்யாஸ்ய விநாஶநாத் ।

கைகேயி நரகம் கச்ச மா ச பர்து ஸ்ஸலோகதாம் ॥ 4 ॥

யத்த்வயா ஹீத்ரு'ஶம் பாபம் க்ரு'தம் கோரேண கர்மணா ।

ஸர்வலோகப்ரியம் ஹித்வா மமாப்யாபாதிதம் பயம் ॥ 5 ॥

த்வத்க்ரு'தே மே பிதா வ்ரு'த்தோ ராமஶ்சாரண்யமாஶ்ரிதஃ ।

அயஶோ ஜீவலோகே ச த்வயாऽஹம் ப்ரதிபாதிதஃ ॥ 6 ॥

மாத்ரு'ரூபே மமாமித்ரே ந்ரு'ஶம்ஸே ராஜ்யகாமுகே ।

ந தேऽஹ மபிபாஷ்யோऽஸ்மி துர்வ்ரு'த்தே பதிகாதிநி ॥ 7 ॥

கௌஸல்யா ச ஸுமித்ரா ச யாஶ்சாந்யா மம மாதரஃ ।

துஃகேந மஹதாऽவிஷ்டாஸ்த்வாம் ப்ராப்ய குலதூஷிணீம் ॥ 8 ॥

ந த்வமஶ்வபதேஃ கந்யா தர்மராஜஸ்ய தீமதஃ ।

ராக்ஷஸீ தத்ர ஜாதாऽஸி குலப்ரத்வம்ஸிநீ பிதுஃ ॥ 9 ॥

யத்த்வயா தார்மிகோ ராமோ நித்யம் ஸத்யபராயணஃ ।

வநம் ப்ரஸ்தாபிதோ துஃகாத்பிதா ச த்ரிதிவம் கதஃ ॥ 10 ॥

யத்ப்ரதாநாऽஸி தத்பாபம் மயி பித்ரா விநாக்ரு'தே ।

ப்ராத்ரு'ப்யாம் ச பரித்யக்தே ஸர்வலோகஸ்ய சாப்ரியே ॥ 11 ॥

கௌஸல்யாம் தர்மஸம்யுக்தாம் வியுக்தாம் பாபநிஶ்சயே ।

க்ரு'த்வா கம் ப்ராப்ஸ்யஸே த்வத்ய லோகம் நிரயகாமிநி ॥ 12 ॥

கிம் நாவபுத்யஸே க்ரூரே நியதம் பந்துஸம்ஶ்ரயம் ।

ஜ்யேஷ்டம் பித்ரு'ஸமம் ராமம் கௌஸல்யாயாऽத்மஸம்பவம் ॥ 13 ॥

அஙகப்ரத்யஙகஜஃ புத்ரோ ஹ்ரு'தயாச்சாபி ஜாயதே ।

தஸ்மாத்ப்ரியதமோ மாதுஃ ப்ரியா ஏவ து பாந்தவாஃ ॥ 14 ॥

அந்யதா கில தர்மஜ்ஞா ஸுரபி ஸ்ஸுரஸம்மதா ।

வஹமாநௌ ததர்ஶோர்வ்யாம் புத்ரௌ விகதசேதஸௌ ॥ 15 ॥

தாவர்ததிவஸே ஶ்ராந்தௌ த்ரு'ஷ்ட்வா புத்ரௌ மஹீதலே ।

ருரோத புத்ரஶோகேந பாஷ்பபர்யாகுலேக்ஷணா ॥ 16 ॥

அதஸ்தாத்வ்ரஜதஸ்தஸ்யாஃ ஸுரராஜ்ஞோ மஹாத்மநஃ ।

பிந்தவஃ பதிதா காத்ரே ஸூக்ஷ்மா ஸ்ஸுரபிகந்திநஃ ॥ 17 ॥

இந்த்ரோऽப்யஶ்ருநிபாதம் தம் ஸ்வகாத்ரே புண்யகந்திநம் ।

ஸுரபிம் மந்யதே த்ரு'ஷ்ட்வா பூயஸீம் தாம் ஸுரேஶ்வரஃ ॥ 18 ॥

நிரீக்ஷமாண ஶ்ஶக்ரஸ்தாம் ததர்ஶ ஸுரபிம் ஸ்திதாம் ।

ஆகாஶே விஷ்டிதாம் தீநாம் ருதந்தீம் ப்ரு'ஶதுஃகிதாம் ॥ 19 ॥

தாம் த்ரு'ஷ்ட்வா ஶோகஸந்தப்தாம் வஜ்ரபாணிர்யஶஸ்விநீம் ।

இந்த்ரஃ ப்ராஞ்ஜலிருத்விக்ந ஸ்ஸுரராஜோऽப்ரவீத்வசஃ ॥ 20 ॥

பயம் கச்சிந்ந சாஸ்மாஸு குதஶ்சித்வித்யதே மஹத் ।

குதோநிமத்தஶ்ஶோகஸ்தே ப்ரூஹி ஸர்வஹிதைஷிணி ॥ 21 ॥

ஏவமுக்தா து ஸுரபி ஸ்ஸுரராஜேந தீமதா ।

ப்ரத்யுவாச ததோ தீரா வாக்யம் வாக்யவிஶாரதா ॥ 22 ॥

ஶாந்தம் பாபம் ந வஃ கிஞ்சித்குதஶ்சிதமராதிபஃ ।

அஹம் மக்நௌ து ஶோசாமி ஸ்வபுத்ரௌ விஷமே ஸ்திதௌ ॥ 23 ॥

ஏதௌ த்ரு'ஷ்ட்வா க்ரு'ஶௌ தீநௌ ஸூர்யரஶ்மிப்ரதாபிதௌ ।

பாத்யமாநௌ பலீவர்தௌ கர்ஷகேண ஸுராதிப ॥ 24 ॥

மமகாயாத்ப்ரஸூதௌ ஹி துஃகிதௌ பாரபீடிதௌ ।

யௌ த்ரு'ஷ்ட்வா பரிதப்யேऽஹம் நாஸ்தி புத்ரஸமஃ ப்ரியஃ ॥ 25 ॥

யஸ்யாஃ புத்ரஸஹஸ்ரைஸ்து க்ரு'த்ஸ்நம் வ்யாப்தமிதம் ஜகத் ।

தாம் த்ரு'ஷ்ட்வா ருததீம் ஶக்ரோ ந ஸுதாந்மந்யதே பரம் ॥ 26 ॥

ஸதாऽப்ரதிமவ்ரு'த்தாயாஃ லோகதாரணகாம்யயா ।

ஶ்ரீமத்யா குணநித்யாயா ஸ்ஸ்வபாவபரிசேஷ்டயா ॥ 27 ॥

யஸ்யாஃ புத்ரஸஹஸ்ராணி ஸாऽபி ஶோசதி காமதுக் ।

கிம் புநர்யா விநா ராமம் கௌஸல்யா வர்தயிஷ்யதி ॥ 28 ॥

ஏகபுத்ரா ச ஸாத்வீ ச விவத்ஸேயம் த்வயா க்ரு'தா ।

தஸ்மாத்த்வம் ஸததம் துஃகம் ப்ரேத்ய சேஹ ச லப்ஸ்யஸே ॥ 29 ॥

அஹம் ஹ்யபசிதிம் ப்ராதுஃ பிதுஶ்ச ஸகலாமிமாம் ।

வர்தநம் யஶஸஶ்சாபி கரிஷ்யாமி ந ஸம்ஶயஃ ॥ 30 ॥

அநாயயித்வா தநயம் கௌஸல்யாயா மஹாபலம் ।

ஸ்வயமேவ ப்ரவேக்ஷ்யாமி வநம் முநிநிஷேவிதம் ॥ 31 ॥

ந ஹ்யஹம் பாபஸங்கல்பே பாபே பாபம் த்வயா க்ரு'தம் ।

ஶக்தோ தாரயிதும் பௌரைரஶ்ருகண்டை ர்நிரீக்ஷிதஃ ॥ 32 ॥

ஸா த்வமக்நிம் ப்ரவிஶ வா ஸ்வயம் வா தண்டகாந்விஶ ।

ரஜ்ஜும் பதாந வா கண்டே ந ஹி தேऽந்யத்பராயணம் ॥ 33 ॥

அஹமப்யவநீம் ப்ராப்தே ராமே ஸத்யபராக்ரமே ।

க்ரு'தக்ரு'த்யோ பவிஷ்யாமி விப்ரவாஸிதகல்மஷஃ ॥ 34 ॥

இதி நாக இவாரண்யே தோமராங்குஶசோதிதஃ ।

பபாத புவி ஸங்க்ரு'த்தோ நிஶ்ஶ்வஸந்நிவ பந்நகஃ ॥ 35 ॥

ஸம்ரக்தநேத்ர ஶ்ஶிதிலாம்பரஸ்ததா விதூதஸர்வாபரணஃ பரந்தபஃ ।

பபூவ பூமௌ பதிதோ ந்ரு'பாத்மஜஶ்ஶசீபதேஃ கேதுரிவோத்ஸவக்ஷயே ॥ 36 ॥

இத்யார்ஷே ஶ்ரீமத்ராமாயணே வால்மீகீய ஆதிகாவ்யே அயோத்யாகாண்டே சதுஃஸப்ததிதமஸ்ஸர்கஃ ॥

Roman (IAST) Transliteration

śrīmadvālmīkīya rāmāyaṇe ayodhyākāṇḍam |

atha catuḥsaptatitamassargaḥ |

tāṃ tathā garhayitvā tu mātaraṃ bharatastadā |

roṣeṇa mahatā'viṣṭaḥ punarevābravīdvacaḥ || 1 ||

rājyādbhraṃśasva kaikeyi nṛśaṃse duṣṭacāriṇi |

parityaktā ca dharmeṇa mā mṛtaṃ rudatī bhava || 2 ||

kinnu te'dūṣayadrājā rāmo vā bhṛśadhārmikaḥ |

yayormṛtyurvivāsaśca tvatkṛte tulyamāgatau || 3 ||

bhrūṇahatyāmasi prāptā kulasyāsya vināśanāt |

kaikeyi narakaṃ gaccha mā ca bhartu ssalokatām || 4 ||

yattvayā hīdṛśaṃ pāpaṃ kṛtaṃ ghoreṇa karmaṇā |

sarvalokapriyaṃ hitvā mamāpyāpāditaṃ bhayam || 5 ||

tvatkṛte me pitā vṛtto rāmaścāraṇyamāśritaḥ |

ayaśo jīvaloke ca tvayā'haṃ pratipāditaḥ || 6 ||

mātṛrūpe mamāmitre nṛśaṃse rājyakāmuke |

na te'ha mabhibhāṣyo'smi durvṛtte patighātini || 7 ||

kausalyā ca sumitrā ca yāścānyā mama mātaraḥ |

duḥkhena mahatā'viṣṭāstvāṃ prāpya kuladūṣiṇīm || 8 ||

na tvamaśvapateḥ kanyā dharmarājasya dhīmataḥ |

rākṣasī tatra jātā'si kulapradhvaṃsinī pituḥ || 9 ||

yattvayā dhārmiko rāmo nityaṃ satyaparāyaṇaḥ |

vanaṃ prasthāpito duḥkhātpitā ca tridivaṃ gataḥ || 10 ||

yatpradhānā'si tatpāpaṃ mayi pitrā vinākṛte |

bhrātṛbhyāṃ ca parityakte sarvalokasya cāpriye || 11 ||

kausalyāṃ dharmasaṃyuktāṃ viyuktāṃ pāpaniścaye |

kṛtvā kaṃ prāpsyase tvadya lokaṃ nirayagāmini || 12 ||

kiṃ nāvabudhyase krūre niyataṃ bandhusaṃśrayam |

jyeṣṭhaṃ pitṛsamaṃ rāmaṃ kausalyāyā'tmasambhavam || 13 ||

aṅagapratyaṅagajaḥ putro hṛdayāccāpi jāyate |

tasmātpriyatamo mātuḥ priyā eva tu bāndhavāḥ || 14 ||

anyadā kila dharmajñā surabhi ssurasammatā |

vahamānau dadarśorvyāṃ putrau vigatacetasau || 15 ||

tāvardhadivase śrāntau dṛṣṭvā putrau mahītale |

ruroda putraśokena bāṣpaparyākulekṣaṇā || 16 ||

adhastādvrajatastasyāḥ surarājño mahātmanaḥ |

bindavaḥ patitā gātre sūkṣmā ssurabhigandhinaḥ || 17 ||

indro'pyaśrunipātaṃ taṃ svagātre puṇyagandhinam |

surabhiṃ manyate dṛṣṭvā bhūyasīṃ tāṃ sureśvaraḥ || 18 ||

nirīkṣamāṇa śśakrastāṃ dadarśa surabhiṃ sthitām |

ākāśe viṣṭhitāṃ dīnāṃ rudantīṃ bhṛśaduḥkhitām || 19 ||

tāṃ dṛṣṭvā śokasantaptāṃ vajrapāṇiryaśasvinīm |

indraḥ prāñjalirudvigna ssurarājo'bravīdvacaḥ || 20 ||

bhayaṃ kacchinna cāsmāsu kutaścidvidyate mahat |

kutonimattaśśokaste brūhi sarvahitaiṣiṇi || 21 ||

evamuktā tu surabhi ssurarājena dhīmatā |

pratyuvāca tato dhīrā vākyaṃ vākyaviśāradā || 22 ||

śāntaṃ pāpaṃ na vaḥ kiñcitkutaścidamarādhipaḥ |

ahaṃ magnau tu śocāmi svaputrau viṣame sthitau || 23 ||

etau dṛṣṭvā kṛśau dīnau sūryaraśmipratāpitau |

bādhyamānau balīvardhau karṣakeṇa surādhipa || 24 ||

mamakāyātprasūtau hi duḥkhitau bhārapīḍitau |

yau dṛṣṭvā paritapye'haṃ nāsti putrasamaḥ priyaḥ || 25 ||

yasyāḥ putrasahasraistu kṛtsnaṃ vyāptamidaṃ jagat |

tāṃ dṛṣṭvā rudatīṃ śakro na sutānmanyate param || 26 ||

sadā'pratimavṛttāyāḥ lokadhāraṇakāmyayā |

śrīmatyā guṇanityāyā ssvabhāvapariceṣṭayā || 27 ||

yasyāḥ putrasahasrāṇi sā'pi śocati kāmadhuk |

kiṃ punaryā vinā rāmaṃ kausalyā vartayiṣyati || 28 ||

ekaputrā ca sādhvī ca vivatseyaṃ tvayā kṛtā |

tasmāttvaṃ satataṃ duḥkhaṃ pretya ceha ca lapsyase || 29 ||

ahaṃ hyapacitiṃ bhrātuḥ pituśca sakalāmimām |

vardhanaṃ yaśasaścāpi kariṣyāmi na saṃśayaḥ || 30 ||

anāyayitvā tanayaṃ kausalyāyā mahābalam |

svayameva pravekṣyāmi vanaṃ muniniṣevitam || 31 ||

na hyahaṃ pāpasaṅkalpe pāpe pāpaṃ tvayā kṛtam |

śakto dhārayituṃ paurairaśrukaṇṭhai rnirīkṣitaḥ || 32 ||

sā tvamagniṃ praviśa vā svayaṃ vā daṇḍakānviśa |

rajjuṃ badhāna vā kaṇṭhe na hi te'nyatparāyaṇam || 33 ||

ahamapyavanīṃ prāpte rāme satyaparākrame |

kṛtakṛtyo bhaviṣyāmi vipravāsitakalmaṣaḥ || 34 ||

iti nāga ivāraṇye tomarāṅkuśacoditaḥ |

papāta bhuvi saṅkṛddho niśśvasanniva pannagaḥ || 35 ||

saṃraktanetra śśithilāmbharastadā vidhūtasarvābharaṇaḥ parantapaḥ |

babhūva bhūmau patito nṛpātmajaśśacīpateḥ keturivotsavakṣaye || 36 ||

ityārṣe śrīmadrāmāyaṇe vālmīkīya ādikāvye ayodhyākāṇḍe catuḥsaptatitamassargaḥ ||