2.47 Ayodhyakanda - Saptachatvarimsha Sargah

ॐ

2.47 அயோத்யாகாண்ட - ஸப்தசத்வாரிம்ஶ ஸர்கஃ

Valmiki Tamil

ஶ்ரீமத்வால்மீகீய ராமாயணே அயோத்யாகாண்டம் ।

அத ஸப்தசத்வாரிம்ஶஸ்ஸர்கஃ ।

ப்ரபாதாயாம் து ஶர்வர்யாம் பௌராஸ்தே ராகவம் விநா ।

ஶோகோபஹதநிஶ்சேஷ்டா பபூவுர்ஹதசேதஸஃ ॥ 1 ॥

ஶோகஜாஶ்ருபரித்யூநா வீக்ஷமாணாஸ்ததஸ்ததஃ ।

ஆலோகமபி ராமஸ்ய ந பஶ்யந்தி ஸ்ம துஃகிதாஃ ॥ 2 ॥

தே விஷாதார்தவதநா ரஹிதாஸ்தேந தீமதா ।

க்ரு'பணாஃ கருணா வாசோ வதந்தி ஸ்ம மநஸ்விநஃ ॥ 3 ॥

திகஸ்து கலு நித்ராம் தாம் யயாऽபஹ்ரு'தசேதஸஃ ।

நாத்ய பஶ்யாமஹே ராமம் ப்ரு'தூரஸ்கம் மஹாபுஜம் ॥ 4 ॥

கதம் நாம மஹாபாஹு ஸ்ஸ ததாவிததக்ரியஃ ।

பக்தம் ஜநம் பரித்யஜ்ய ப்ரவாஸம் ராகவோ கதஃ ॥ 5 ॥

யோ நஃ ஸதா பாலயதி பிதா புத்ராநிவௌரஸாந் ।

கதம் ரகூணாம் ஸ ஶ்ரேஷ்டஸ்த்யக்த்வா நோ விபிநம் கதஃ ॥ 6 ॥

இஹைவ நிதநம் யாமோ மஹாப்ரஸ்தாநமேவ வா ।

ராமேண ரஹிதாநாம் ஹி கிமர்தம் ஜீவிதம் ஹி நஃ ॥ 7 ॥

ஸந்தி ஶுஷ்காணி காஷ்டாநி ப்ரபூதாநி மஹாந்தி ச ।

தைஃ ப்ரஜ்வால்ய சிதாம் ஸர்வே ப்ரவிஶாமோऽத பாவகம் ॥ 8 ॥

கிம் வக்ஷ்யாமோ மஹாபாஹுரநஸூயஃ ப்ரியம்வதஃ ।

நீத ஸ்ஸ ராகவோऽஸ்மாபிரிதி வக்தும் கதம் க்ஷமம் ॥ 9 ॥

ஸா நூநம் நகரீ தீநா த்ரு'ஷ்ட்வாऽஸ்மாந் ராகவம் விநா ।

பவிஷ்யதி நிராநந்தா ஸஸ்த்ரீபாலவயோதிகா ॥ 10 ॥

நிர்யாதாஸ்தேந வீரேண ஸஹ நித்யம் ஜிதாத்மநா ।

விஹீநாஸ்தேந ச புநஃ கதம் பஶ்யாம தாம் புரீம் ॥ 11 ॥

இதீவ பஹுதா வாசோ பாஹுமுத்யம்ய தே ஜநாஃ ।

விலபந்தி ஸ்ம துஃகார்தா விவத்ஸா இவ தேநவஃ ॥ 12 ॥

ததோ மார்காநுஸாரேண கத்வா கிஞ்சித் க்ஷணம் புநஃ ।

மார்கநாஶாத்விஷாதேந மஹதா ஸமபிப்லுதாஃ ॥ 13 ॥

ரதஸ்ய மார்கநாஶேந ந்யவர்தந்த மநஸ்விநஃ ।

கிமிதம் கிம் கரிஷ்யாமோ தைவேநோபஹதா இதி ॥ 14 ॥

ததோ யதாகதேநைவ மார்கேண க்லாந்தசேதஸஃ ।

அயோத்யாமாகமந்ஸர்வே புரீம் வ்யதிதஸஜ்ஜநாம் ॥ 15 ॥

ஆலோக்ய நகரீம் தாம் ச க்ஷயவ்யாகுலமாநஸாஃ ।

ஆவர்தயந்த தேऽஶ்ரூணி நயநைஃ ஶோகபீடிதைஃ ॥ 16 ॥

ஏஷா ராமேண நகரீ ரஹிதா நாதிஶோபதே ।

ஆபகா கருடேநேவ ஹ்ரதாதுத்த்ரு'தபந்நகா ॥ 17 ॥

சந்த்ரஹீநமிவாகாஶம் தோயஹீநமிவார்ணவம் ।

அபஶ்யந்நிஹதாநந்தம் நகரம் தே விசேதஸஃ ॥ 18 ॥

தே தாநி வேஶ்மாநி மஹாதநாநி துஃகேந துஃகோபஹதா விஶந்தஃ ।

நைவ ப்ரஜஜ்ஞுஃ ஸ்வஜநம் ஜநம் வா நிரீக்ஷமாணாஃ ப்ரவிநஷ்டஹர்ஷாஃ ॥ 19 ॥

இத்யார்ஷே ஶ்ரீமத்ராமாயணே வால்மீகீய ஆதிகாவ்யே அயோத்யாகாண்டே ஸப்தசத்வாரிம்ஶஸ்ஸர்கஃ ॥

Roman (IAST) Transliteration

śrīmadvālmīkīya rāmāyaṇe ayodhyākāṇḍam |

atha saptacatvāriṃśassargaḥ |

prabhātāyāṃ tu śarvaryāṃ paurāste rāghavaṃ vinā |

śokopahataniśceṣṭā babhūvurhatacetasaḥ || 1 ||

śokajāśruparidyūnā vīkṣamāṇāstatastataḥ |

ālokamapi rāmasya na paśyanti sma duḥkhitāḥ || 2 ||

te viṣādārtavadanā rahitāstena dhīmatā |

kṛpaṇāḥ karuṇā vāco vadanti sma manasvinaḥ || 3 ||

dhigastu khalu nidrāṃ tāṃ yayā'pahṛtacetasaḥ |

nādya paśyāmahe rāmaṃ pṛthūraskaṃ mahābhujam || 4 ||

kathaṃ nāma mahābāhu ssa tathāvitathakriyaḥ |

bhaktaṃ janaṃ parityajya pravāsaṃ rāghavo gataḥ || 5 ||

yo naḥ sadā pālayati pitā putrānivaurasān |

kathaṃ raghūṇāṃ sa śreṣṭhastyaktvā no vipinaṃ gataḥ || 6 ||

ihaiva nidhanaṃ yāmo mahāprasthānameva vā |

rāmeṇa rahitānāṃ hi kimarthaṃ jīvitaṃ hi naḥ || 7 ||

santi śuṣkāṇi kāṣṭhāni prabhūtāni mahānti ca |

taiḥ prajvālya citāṃ sarve praviśāmo'tha pāvakam || 8 ||

kiṃ vakṣyāmo mahābāhuranasūyaḥ priyaṃvadaḥ |

nīta ssa rāghavo'smābhiriti vaktuṃ kathaṃ kṣamam || 9 ||

sā nūnaṃ nagarī dīnā dṛṣṭvā'smān rāghavaṃ vinā |

bhaviṣyati nirānandā sastrībālavayodhikā || 10 ||

niryātāstena vīreṇa saha nityaṃ jitātmanā |

vihīnāstena ca punaḥ kathaṃ paśyāma tāṃ purīm || 11 ||

itīva bahudhā vāco bāhumudyamya te janāḥ |

vilapanti sma duḥkhārtā vivatsā iva dhenavaḥ || 12 ||

tato mārgānusāreṇa gatvā kiñcit kṣaṇaṃ punaḥ |

mārganāśādviṣādena mahatā samabhiplutāḥ || 13 ||

rathasya mārganāśena nyavartanta manasvinaḥ |

kimidaṃ kiṃ kariṣyāmo daivenopahatā iti || 14 ||

tato yathāgatenaiva mārgeṇa klāntacetasaḥ |

ayodhyāmāgamansarve purīṃ vyathitasajjanām || 15 ||

ālokya nagarīṃ tāṃ ca kṣayavyākulamānasāḥ |

āvartayanta te'śrūṇi nayanaiḥ śokapīḍitaiḥ || 16 ||

eṣā rāmeṇa nagarī rahitā nātiśobhate |

āpagā garuḍeneva hradāduddhṛtapannagā || 17 ||

candrahīnamivākāśaṃ toyahīnamivārṇavam |

apaśyannihatānandaṃ nagaraṃ te vicetasaḥ || 18 ||

te tāni veśmāni mahādhanāni duḥkhena duḥkhopahatā viśantaḥ |

naiva prajajñuḥ svajanaṃ janaṃ vā nirīkṣamāṇāḥ pravinaṣṭaharṣāḥ || 19 ||

ityārṣe śrīmadrāmāyaṇe vālmīkīya ādikāvye ayodhyākāṇḍe saptacatvāriṃśassargaḥ ||