1.8 Balakanda - Ashtama Sargah

ॐ

1.8 பாலகாண்ட - அஷ்டம ஸர்கஃ

Valmiki Tamil

ஶ்ரீமத்வால்மீகீய ராமாயணே பாலகாண்டம் ।

அத அஷ்டமஸ்ஸர்கஃ ।

தஸ்ய த்வேவம் ப்ரபாவஸ்ய தர்மஜ்ஞஸ்ய மஹாத்மநஃ ।

ஸுதார்தம் தப்யமாநஸ்ய நாஸீத்வம்ஶகரஸ்ஸுதஃ ॥ 1 ॥

சிந்தயாநஸ்ய தஸ்யைவம் புத்திராஸீந்மஹாத்மநஃ ।

ஸுதார்தம் ஹயமேதேந கிமர்தம் ந யஜாம்யஹம் ॥ 2 ॥

ஸ நிஶ்சிதாம் மதிம் க்ரு'த்வா யஷ்டவ்யமிதி புத்திமாந் ।

மந்த்ரிபிஸ்ஸஹ தர்மாத்மா ஸர்வைரேவ க்ரு'தாத்மபிஃ ॥ 3 ॥

ததோऽப்ரவீதிதம் ராஜா ஸுமந்த்ரம் மந்த்ரிஸத்தமம் ।

ஶீக்ரமாநய மே ஸர்வாந்குரூம்ஸ்தாந் ஸபுரோஹிதாந் ॥ 4 ॥

ததஸ்ஸுமந்த்ரஸ்த்வரிதம் கத்வா த்வரிதவிக்ரமஃ ।

ஸமாநயத்ஸ தாந் ஸர்வாந் ஸமஸ்தாந்வேதபாரகாந் ॥ 5 ॥

ஸுயஜ்ஞம் வாமதேவம் ச ஜாபாலிமத காஶ்யபம் ।

பரோஹிதம் வஸிஷ்டம் ச யே சாந்யே வ்திஜஸத்தமாஃ ॥ 6 ॥

தாந்பூஜயித்வா தர்மாத்மா ராஜா தஶரதஸ்ததா ।

இதம் தர்மார்தஸஹிதம் ஶ்லக்ஷ்ணம்வசநமப்ரவீத் ॥ 7 ॥

மம லாலப்யமாநஸ்ய புத்ரார்தந்நாஸ்தி வை ஸுகம் ।

ததர்தம் ஹயமேதேந யக்ஷ்யாமீதி மதிர்மம ॥ 8 ॥

ததஹம் யஷ்டுமிச்சாமி ஶாஸ்த்ரத்ரு'ஷ்டேந கர்மணா ।

கதம் ப்ராப்ஸ்யாம்யஹம் காமம் புத்திரத்ரவிசார்யதாம் ॥ 9 ॥

ததஸ்ஸாத்விதி தத்வாக்யம் ப்ராஹ்மணாஃ ப்ரத்யபூஜயந் ।

வஸிஷ்டப்ரமுகாஸ்ஸர்வே பார்திவஸ்ய முகாச்ச்யுதம் ॥ 10 ॥

ஊசுஶ்ச பரமப்ரீதாஸ்ஸர்வே தஶரதம் வசஃ ।

ஸம்பாராஸ்ஸம்ப்ரியந்தாம் தே துரகஶ்ச விமுச்யதாம் ॥ 11 ॥

ஸர்வதா ப்ராப்ஸ்யஸே புத்ராநபிப்ரேதாம்ஶ்ச பார்திவ ।

யஸ்ய தே தார்மிகீ புத்திரியம் புத்ரார்தமாகதா ॥ 12 ॥

ததஃ ப்ரீதோऽபவத்ராஜா ஶ்ருத்வா தத்விஜபாஷிதம் ।

அமாத்யாம்ஶ்சாப்ரவீத்ராஜா ஹர்ஷபர்யாகுலேக்ஷணஃ ॥ 13 ॥

ஸம்பாராஸ்ஸம்ப்ரியந்தாம் மே குரூணாம் வசநாதிஹ ।

ஸமர்தாதிஷ்டிதஶ்சாஶ்வஸ்ஸோபாத்யாயோ விமுச்யதாம் ॥ 14 ॥

ஸரய்வாஶ்சோத்தரே தீரே யஜ்ஞபூமிர்விதீயதாம் ।

ஶாந்தயஶ்சாபிவர்தந்தாம் யதாகல்பம் யதாவிதி ॥ 15 ॥

ஶக்யஃ ப்ராப்துமயம் யஜ்ஞஸ்ஸர்வேணாபி மஹீக்ஷிதா ।

நாபராதோ பவேத்கஷ்டோ யத்யஸ்மிந்க்ரதுஸத்தமே ॥ 16 ॥

சித்ரம் ஹி ம்ரு'கயந்தேऽத்ர வித்வாம்ஸோ ப்ரஹ்மராக்ஷஸாஃ ।

நிஹதஸ்ய ச யஜ்ஞஸ்ய ஸத்யஃ கர்தா விநஶ்யதி ॥ 17 ॥

தத்யதா விதிபூர்வம் மே க்ரதுரேஷ ஸமாப்யதே ।

ததா விதாநம் க்ரியதாம் ஸமர்தாஃ கரணேஷ்விஹ ॥ 18 ॥

ததேதி சாப்ருவந்ஸர்வே மந்த்ரிணஃப்ரத்யபூஜயந் ।

பார்திவேந்த்ரஸ்ய தத்வாக்யம் யதாஜ்ஞப்தம் நிஶம்ய தே ॥ 19 ॥

ததா த்விஜாஸ்தே தர்மஜ்ஞா வர்தயந்தோ ந்ரு'போத்தமம் ।

அநுஜ்ஞாதாஸ்ததஸ்ஸர்வே புநர்ஜக்முர்யதாகதம் ॥ 20 ॥

விஸர்ஜயித்வா தாந்விப்ராந்ஸசிவாநிதமப்ரவீத் ।

ரு'த்விக்பிருபதிஷ்டோऽயம் யதாவத்க்ரதுராப்யதாம் ॥ 21 ॥

இத்யுக்த்வா ந்ரு'பஶார்தூலஸ்ஸசிவாந்ஸமுபஸ்திதாந் ।

விஸர்ஜயித்வா ஸ்வம் வேஶ்ம ப்ரவிவேஶ மஹாத்யுதிஃ ॥ 22 ॥

ததஸ்ஸ கத்வா தாஃபத்நீர்நரேந்த்ரோ ஹ்ரு'தயப்ரியாஃ ।

உவாச தீக்ஷாம் விஶத யக்ஷ்யேऽஹம் ஸுதகாரணாத் ॥ 23 ॥

தாஸாம் தேநாதிகாந்தேந வசநேந ஸுவர்சஸாம் ।

முகபத்மாந்யஶோபந்த பத்மாநீவ ஹிமாத்யயே ॥ 24 ॥

இத்யார்ஷே ஶ்ரீமத்ராமாயணே வால்மீகீய ஆதிகாவ்யே பாலகாண்டே அஷ்டமஸ்ஸர்கஃ ॥

Roman (IAST) Transliteration

śrīmadvālmīkīya rāmāyaṇe bālakāṇḍam |

atha aṣṭamassargaḥ |

tasya tvevaṃ prabhāvasya dharmajñasya mahātmanaḥ |

sutārthaṃ tapyamānasya nāsīdvaṃśakarassutaḥ || 1 ||

cintayānasya tasyaivaṃ buddhirāsīnmahātmanaḥ |

sutārthaṃ hayamedhena kimarthaṃ na yajāmyaham || 2 ||

sa niścitāṃ matiṃ kṛtvā yaṣṭavyamiti buddhimān |

mantribhissaha dharmātmā sarvaireva kṛtātmabhiḥ || 3 ||

tato'bravīdidaṃ rājā sumantraṃ mantrisattamam |

śīghramānaya me sarvāngurūṃstān sapurohitān || 4 ||

tatassumantrastvaritaṃ gatvā tvaritavikramaḥ |

samānayatsa tān sarvān samastānvedapāragān || 5 ||

suyajñaṃ vāmadevaṃ ca jābālimatha kāśyapam |

parohitaṃ vasiṣṭhaṃ ca ye cānye vdijasattamāḥ || 6 ||

tānpūjayitvā dharmātmā rājā daśarathastadā |

idaṃ dharmārthasahitaṃ ślakṣṇaṃvacanamabravīt || 7 ||

mama lālapyamānasya putrārthannāsti vai sukham |

tadarthaṃ hayamedhena yakṣyāmīti matirmama || 8 ||

tadahaṃ yaṣṭumicchāmi śāstradṛṣṭena karmaṇā |

kathaṃ prāpsyāmyahaṃ kāmaṃ buddhiratravicāryatām || 9 ||

tatassādhviti tadvākyaṃ brāhmaṇāḥ pratyapūjayan |

vasiṣṭhapramukhāssarve pārthivasya mukhāccyutam || 10 ||

ūcuśca paramaprītāssarve daśarathaṃ vacaḥ |

sambhārāssambhriyantāṃ te turagaśca vimucyatām || 11 ||

sarvathā prāpsyase putrānabhipretāṃśca pārthiva |

yasya te dhārmikī buddhiriyaṃ putrārthamāgatā || 12 ||

tataḥ prīto'bhavadrājā śrutvā tadvijabhāṣitam |

amātyāṃścābravīdrājā harṣaparyākulekṣaṇaḥ || 13 ||

sambhārāssambhriyantāṃ me gurūṇāṃ vacanādiha |

samarthādhiṣṭhitaścāśvassopādhyāyo vimucyatām || 14 ||

sarayvāścottare tīre yajñabhūmirvidhīyatām |

śāntayaścābhivardhantāṃ yathākalpaṃ yathāvidhi || 15 ||

śakyaḥ prāptumayaṃ yajñassarveṇāpi mahīkṣitā |

nāparādho bhavetkaṣṭo yadyasminkratusattame || 16 ||

chidraṃ hi mṛgayante'tra vidvāṃso brahmarākṣasāḥ |

nihatasya ca yajñasya sadyaḥ kartā vinaśyati || 17 ||

tadyathā vidhipūrvaṃ me kratureṣa samāpyate |

tathā vidhānaṃ kriyatāṃ samarthāḥ karaṇeṣviha || 18 ||

tatheti cābruvansarve mantriṇaḥpratyapūjayan |

pārthivendrasya tadvākyaṃ yathājñaptaṃ niśamya te || 19 ||

tathā dvijāste dharmajñā vardhayanto nṛpottamam |

anujñātāstatassarve punarjagmuryathāgatam || 20 ||

visarjayitvā tānviprānsacivānidamabravīt |

ṛtvigbhirupadiṣṭo'yaṃ yathāvatkraturāpyatām || 21 ||

ityuktvā nṛpaśārdūlassacivānsamupasthitān |

visarjayitvā svaṃ veśma praviveśa mahādyutiḥ || 22 ||

tatassa gatvā tāḥpatnīrnarendro hṛdayapriyāḥ |

uvāca dīkṣāṃ viśata yakṣye'haṃ sutakāraṇāt || 23 ||

tāsāṃ tenātikāntena vacanena suvarcasām |

mukhapadmānyaśobhanta padmānīva himātyaye || 24 ||

ityārṣe śrīmadrāmāyaṇe vālmīkīya ādikāvye bālakāṇḍe aṣṭamassargaḥ ||