1.77 Balakanda - Saptasaptatitama Sargah

ॐ

1.77 பாலகாண்ட - ஸப்தஸப்ததிதம ஸர்கஃ

Valmiki Tamil

ஶ்ரீமத்வால்மீகீய ராமாயணே பாலகாண்டம் ।

அத ஸப்தஸப்ததிதமஸ்ஸர்கஃ ।

கதே ராமே ப்ரஶாந்தாத்மா ராமோ தாஶரதிர்தநுஃ ।

வருணாயாப்ரமேயாய ததௌ ஹஸ்தே ஸஸாயகம் ॥ 1 ॥

அபிவாத்ய ததோ ராமோ வஸிஷ்டப்ரமுகாந்ரு'ஷீந் ।

பிதரம் விஹ்வலம் த்ரு'ஷ்ட்வா ப்ரோவாச ரகுநந்தநஃ ॥ 2 ॥

ஜாமதக்ந்யோ கதோ ராமஃ ப்ரயாது சதுரங்கிணீ ।

அயோத்யாபிமுகீ ஸேநா த்வயா நாதேந பாலிதா ॥ 3 ॥

ஸந்திஶஸ்வ மஹாராஜ ஸேநாம் த்வச்சாஸநே ஸ்திதாம் ।

ஶாஸநம் காங்க்ஷதே ஸேநா சாதகாலிர்ஜலம் யதா ॥ 4 ॥

ராமஸ்ய வசநம் ஶ்ருத்வா ராஜா தஶரத ஸ்ஸுதம் ।

பாஹுப்யாம் ஸம்பரிஷ்வஜ்ய மூர்த்நி சாக்ராய ராகவம் ॥ 5 ॥

கதோ ராம இதி ஶ்ருத்வா ஹ்ரு'ஷ்டஃ ப்ரமுதிதோ ந்ரு'பஃ ।

புநர்ஜாதம் ததா மேநே புத்ரமாத்மாநமேவ ச ॥ 6 ॥

சோதயாமாஸ தாம் ஸேநாம் ஜகாமாஶு ததஃ புரீம் ।

பதாகாத்வஜிநீம் ரம்யாம் தூர்யோத்குஷ்டநிநாதிதாம் ॥ 7 ॥

ஸிக்தராஜ பதாம் ரம்யாம் ப்ரகீர்ணகுஸுமோத்கராம் ।

ராஜப்ரவேஶஸுமுகைஃ பௌரைர்மங்கலவாதிபிஃ ॥ 8 ॥

ஸம்பூர்ணாம் ப்ராவிஶத்ராஜா ஜநௌகைஸ்ஸமலங்க்ரு'தாம் ।

பௌரைஃ ப்ரத்யுத்கதோ தூரம் த்விஜைஶ்ச புரவாஸிபிஃ ।

புத்ரைரநுகத ஶ்ஶ்ரீமாந் ஶ்ரீமத்பிஶ்ச மஹாயஶாஃ ॥ 9 ॥

ப்ரவிவேஶ க்ரு'ஹம் ராஜா ஹிமவத்ஸத்ரு'ஶம் புநஃ ।

நநந்த ஸஜநோ ராஜா க்ரு'ஹே காமை ஸ்ஸுபூஜிதஃ ॥ 10 ॥

கௌஸல்யா ச ஸுமித்ரா ச கைகேயீ ச ஸுமத்யமா ।

வதூப்ரதிக்ரஹே யுக்தா யாஶ்சாந்யா ராஜயோஷிதஃ ॥ 11 ॥

ததஸ்ஸீதாம் மஹாபாகாமூர்மிலாம் ச யஶஸ்விநீம் ।

குஶத்வஜஸுதே சோபே ஜக்ரு'ஹுர்ந்ரு'பபத்நயஃ ॥ 12 ॥

மங்கலாலம்பநைஶ்சாபி ஶோபிதாஃ க்ஷௌமவாஸஸஃ ।

தேவதாயதநாந்யாஶு ஸர்வாஸ்தாஃ ப்ரத்யபூஜயந் ॥ 13 ॥

அபிவாத்யாபிவாத்யாம்ஶ்ச ஸர்வா ராஜஸுதாஸ்ததா ।

ஸ்வம் ஸ்வம் க்ரு'ஹமதாஸாத்ய குபேரபவநோபமம் ॥ 14 ॥

கோபிர்தநைஶ்ச தாந்யைஶ்ச தர்பயித்வா த்விஜோத்தமாந் ।

ரேமிரே முதிதாஃ ஸர்வா பர்த்ரு'பிஃ ஸஹிதா ரஹஃ ॥ 15 ॥

குமாராஶ்ச மஹாத்மாநோ வீர்யேணாப்ரதிமா புவி ।

க்ரு'ததாராஃ க்ரு'தாஸ்த்ராஶ்ச ஸதநாஃ ஸஸுஹ்ரு'ஜ்ஜநாஃ ॥ 16 ॥

ஶுஶ்ரூஷமாணாஃ பிதரம் வர்தயந்தி நரர்ஷபாஃ ।

கஸ்யசித்த்வத காலஸ்ய ராஜா தஶரதஃ ஸுதம் ॥ 17 ॥

பரதம் கைகயீபுத்ர மப்ரவீத்ரகுநந்தநஃ ।

அயம் கேகயராஜஸ்ய புத்ரோ வஸதி புத்ரக ॥ 18 ॥

த்வாம் நேதுமாகதோ வீர யுதாஜிந்மாதுலஸ்தவ ।

ப்ரார்திதஸ்தேந தர்மஜ்ஞ மிதிலாயாமஹம் ததா ॥ 19 ॥

ரு'ஷிமத்யே து தஸ்ய த்வம் ப்ரீதிம் கர்துமிஹார்ஹஸி ।

ஶ்ருத்வா தஶரதஸ்யைதத்பரதஃ கைகயீஸுதஃ ॥ 20 ॥

அபிவாத்ய குரும் ராமம் பரிஷ்வஜ்ய ச லக்ஷ்மணம் ।

கமநாயாபிசக்ராம ஶத்ருக்நஸஹிதஸ்ததா ॥ 21 ॥

ஆப்ரு'ச்ச்ய பிதரம் ஶூரோ ராமம் சாக்லிஷ்டகாரிணம் ।

மாத்ரு'ஶ்சாபி நரஶ்ரேஷ்ட ஶ்ஶத்ருக்நஸஹிதோ யயௌ ॥ 22 ॥

கதே து பரதே ராமோ லக்ஷ்மணஶ்ச மஹாபலஃ ।

பிதரம் தேவஸம்ங்காஶம் பூஜயாமாஸதுஸ்ததா ॥ 23 ॥

பிதுராஜ்ஞாம் புரஸ்க்ரு'த்ய பௌரகார்யாணி ஸர்வஶஃ ।

சகார ராமோ தர்மாத்மா ப்ரியாணி ச ஹிதாநி ச ॥ 24 ॥

மாத்ரு'ப்யோ மாத்ரு'கார்யாணி க்ரு'த்வா பரமயந்த்ரிதஃ ।

குரூணாம் குருகார்யாணி காலே காலேऽந்வவைக்ஷத ॥ 25 ॥

ஏவம் தஶரதஃ ப்ரீதோ ப்ராஹ்மணா நைகமாஸ்ததா ।

ராமஸ்ய ஶீலவ்ரு'த்தேந ஸர்வே விஷயவாஸிநஃ ॥ 26 ॥

தேஷாமதியஶா லோகே ராம ஸ்ஸத்யபராக்ரமஃ ।

ஸ்வயம்பூரிவ பூதாநாம் பபூவ குணவத்தரஃ ॥ 27 ॥

ராமஸ்து ஸீதயா ஸார்தம் விஜஹார பஹூந்ரு'தூந் ।

மநஸ்ஸ்வீ தத்கதஸ்தஸ்யாஃ நித்யம் ஹ்ரு'தி ஸமர்பிதஃ ॥ 28 ॥

ப்ரியா து ஸீதா ராமஸ்ய தாராஃ பித்ரு'க்ரு'தா இதி ।

குணாத்ரூபகுணாச்சாபி ப்ரீதிர்பூயோऽப்யவர்தத ॥ 29 ॥

தஸ்யாஶ்ச பர்தா த்விகுணம் ஹ்ரு'தயே பரிவர்ததே ।

அந்தர்ஜாதமபி வ்யக்தமாக்யாதி ஹ்ரு'தயம் ஹ்ரு'தா ॥ 30 ॥

தஸ்ய பூயோ விஶேஷேண மைதிலீ ஜநகாத்மஜா ।

தேவதாபி ஸ்ஸமா ரூபே ஸீதா ஶ்ரீரிவ ரூபிணீ ॥ 31 ॥

தயா ஸ ராஜர்ஷிஸுதோऽபிராமயா ஸமேயிவாநுத்தமராஜகந்யயா ।

அதீவ ராம ஶ்ஶுஶுபேऽபிராமயா ।

விபு ஶ்ஶ்ரியா விஷ்ணுரிவாமரேஶ்வரஃ ॥ 32 ॥

இத்யார்ஷே ஶ்ரீமத்ராமாயணே வால்மீகீய ஆதிகாவ்யே பாலகாண்டே ஸப்தஸப்ததிதமஸ்ஸர்கஃ ॥

Roman (IAST) Transliteration

śrīmadvālmīkīya rāmāyaṇe bālakāṇḍam |

atha saptasaptatitamassargaḥ |

gate rāme praśāntātmā rāmo dāśarathirdhanuḥ |

varuṇāyāprameyāya dadau haste sasāyakam || 1 ||

abhivādya tato rāmo vasiṣṭhapramukhānṛṣīn |

pitaraṃ vihvalaṃ dṛṣṭvā provāca raghunandanaḥ || 2 ||

jāmadagnyo gato rāmaḥ prayātu caturaṅgiṇī |

ayodhyābhimukhī senā tvayā nāthena pālitā || 3 ||

sandiśasva mahārāja senāṃ tvacchāsane sthitām |

śāsanaṃ kāṅkṣate senā cātakālirjalaṃ yathā || 4 ||

rāmasya vacanaṃ śrutvā rājā daśaratha ssutam |

bāhubhyāṃ sampariṣvajya mūrdhni cāghrāya rāghavam || 5 ||

gato rāma iti śrutvā hṛṣṭaḥ pramudito nṛpaḥ |

punarjātaṃ tadā mene putramātmānameva ca || 6 ||

codayāmāsa tāṃ senāṃ jagāmāśu tataḥ purīm |

patākādhvajinīṃ ramyāṃ tūryodghuṣṭanināditām || 7 ||

siktarāja pathāṃ ramyāṃ prakīrṇakusumotkarām |

rājapraveśasumukhaiḥ paurairmaṅgalavādibhiḥ || 8 ||

sampūrṇāṃ prāviśadrājā janaughaissamalaṅkṛtām |

pauraiḥ pratyudgato dūraṃ dvijaiśca puravāsibhiḥ |

putrairanugata śśrīmān śrīmadbhiśca mahāyaśāḥ || 9 ||

praviveśa gṛhaṃ rājā himavatsadṛśaṃ punaḥ |

nananda sajano rājā gṛhe kāmai ssupūjitaḥ || 10 ||

kausalyā ca sumitrā ca kaikeyī ca sumadhyamā |

vadhūpratigrahe yuktā yāścānyā rājayoṣitaḥ || 11 ||

tatassītāṃ mahābhāgāmūrmilāṃ ca yaśasvinīm |

kuśadhvajasute cobhe jagṛhurnṛpapatnayaḥ || 12 ||

maṅgalālambhanaiścāpi śobhitāḥ kṣaumavāsasaḥ |

devatāyatanānyāśu sarvāstāḥ pratyapūjayan || 13 ||

abhivādyābhivādyāṃśca sarvā rājasutāstadā |

svaṃ svaṃ gṛhamathāsādya kuberabhavanopamam || 14 ||

gobhirdhanaiśca dhānyaiśca tarpayitvā dvijottamān |

remire muditāḥ sarvā bhartṛbhiḥ sahitā rahaḥ || 15 ||

kumārāśca mahātmāno vīryeṇāpratimā bhuvi |

kṛtadārāḥ kṛtāstrāśca sadhanāḥ sasuhṛjjanāḥ || 16 ||

śuśrūṣamāṇāḥ pitaraṃ vartayanti nararṣabhāḥ |

kasyacittvatha kālasya rājā daśarathaḥ sutam || 17 ||

bharataṃ kaikayīputra mabravīdraghunandanaḥ |

ayaṃ kekayarājasya putro vasati putraka || 18 ||

tvāṃ netumāgato vīra yudhājinmātulastava |

prārthitastena dharmajña midhilāyāmahaṃ tathā || 19 ||

ṛṣimadhye tu tasya tvaṃ prītiṃ kartumihārhasi |

śrutvā daśarathasyaitadbharataḥ kaikayīsutaḥ || 20 ||

abhivādya guruṃ rāmaṃ pariṣvajya ca lakṣmaṇam |

gamanāyābhicakrāma śatrughnasahitastadā || 21 ||

āpṛcchya pitaraṃ śūro rāmaṃ cākliṣṭakāriṇam |

mātṛścāpi naraśreṣṭha śśatrughnasahito yayau || 22 ||

gate tu bharate rāmo lakṣmaṇaśca mahābalaḥ |

pitaraṃ devasaṃṅkāśaṃ pūjayāmāsatustadā || 23 ||

piturājñāṃ puraskṛtya paurakāryāṇi sarvaśaḥ |

cakāra rāmo dharmātmā priyāṇi ca hitāni ca || 24 ||

mātṛbhyo mātṛkāryāṇi kṛtvā paramayantritaḥ |

gurūṇāṃ gurukāryāṇi kāle kāle'nvavaikṣata || 25 ||

evaṃ daśarathaḥ prīto brāhmaṇā naigamāstathā |

rāmasya śīlavṛttena sarve viṣayavāsinaḥ || 26 ||

teṣāmatiyaśā loke rāma ssatyaparākramaḥ |

svayambhūriva bhūtānāṃ babhūva guṇavattaraḥ || 27 ||

rāmastu sītayā sārdhaṃ vijahāra bahūnṛtūn |

manassvī tadgatastasyāḥ nityaṃ hṛdi samarpitaḥ || 28 ||

priyā tu sītā rāmasya dārāḥ pitṛkṛtā iti |

guṇādrūpaguṇāccāpi prītirbhūyo'bhyavardhata || 29 ||

tasyāśca bhartā dviguṇaṃ hṛdaye parivartate |

antarjātamapi vyaktamākhyāti hṛdayaṃ hṛdā || 30 ||

tasya bhūyo viśeṣeṇa maithilī janakātmajā |

devatābhi ssamā rūpe sītā śrīriva rūpiṇī || 31 ||

tayā sa rājarṣisuto'bhirāmayā sameyivānuttamarājakanyayā |

atīva rāma śśuśubhe'bhirāmayā |

vibhu śśriyā viṣṇurivāmareśvaraḥ || 32 ||

ityārṣe śrīmadrāmāyaṇe vālmīkīya ādikāvye bālakāṇḍe saptasaptatitamassargaḥ ||