📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
1.33 பாலகாண்ட - த்ரயஸ்த்ரிம்ஶ ஸர்கஃ
1.33 Balakanda - Trayastrimsha Sargah
Valmiki Tamil
ஶ்ரீமத்வால்மீகீய ராமாயணே பாலகாண்டம் ।
அத த்ரயஸ்த்ரிம்ஶஸ்ஸர்கஃ ।
தஸ்ய தத்வசநம் ஶ்ருத்வா குஶநாபஸ்ய தீமதஃ ।
ஶிரோபிஶ்சரணௌ ஸ்ப்ரு'ஷ்ட்வா கந்யாஶதமபாஷத ॥ 1 ॥
வாயுஸ்ஸர்வாத்மகோ ராஜந் ப்ரதர்ஷயிதுமிச்சதி ।
அஶுபம் மார்கமாஸ்தாய ந தர்மம் ப்ரத்யவேக்ஷதே ॥ 2 ॥
பித்ரு'மத்யஸ்ஸ்ம பத்ரம் தே ஸ்வச்சந்தே ந வயம் ஸ்திதாஃ ।
பிதரம் நோ வ்ரு'ணீஷ்வ த்வம் யதி நோ தாஸ்யதே தவ ॥ 3 ॥
தேந பாபாநுபந்தேந வசநம் ந ப்ரதீச்சதா ।
ஏவம் ப்ருவந்த்யஸ்ஸர்வாஸ்ஸ்ம வாயுநா நிஹதா ப்ரு'ஶம் ॥ 4 ॥
தாஸாம் தத்வசநம் ஶ்ருத்வா ராஜா பரமதார்மிகஃ ।
ப்ரத்யுவாச மஹாதேஜாஃ கந்யாஶதமநுத்தமம் ॥ 5 ॥
க்ஷாந்தம் க்ஷமாவதாம் புத்ர்யஃ கர்தவ்யம் ஸுமஹத்க்ரு'தம் ।
ஐகமத்யமுபாகம்ய குலம் சாவேக்ஷிதம் மம ॥ 6 ॥
அலங்காரோ ஹி நாரீணாம் க்ஷமா து புருஷஸ்ய வா ।
துஷ்கரம் தச்ச யத் க்ஷாந்தம் த்ரிதஶேஷு விஶேஷதஃ ॥ 7 ॥
யாத்ரு'ஶீ வஃ க்ஷமா புத்ர்யஸ்ஸர்வாஸாமவிஶேஷதஃ ।
க்ஷமா தாநம் க்ஷமா யஜ்ஞஃ க்ஷமா ஸத்யம் ஹி புத்ரிகாஃ ॥ 8 ॥
க்ஷமா யஶஃ க்ஷமா தர்மஃ க்ஷமயா நிஷ்டிதம் ஜகத் ।
விஸ்ரு'ஜ்ய கந்யாஃ காகுத்ஸ்த ராஜா த்ரிதஶவிக்ரமஃ ॥ 9 ॥
மந்த்ரஜ்ஞோ மந்த்ரயாமாஸ ப்ரதாநம் ஸஹ மந்த்ரிபிஃ ।
தேஶகாலௌ ப்ரதாநஸ்ய ஸத்ரு'ஶே ப்ரதிபாதநம் ॥ 10 ॥
ஏதஸ்மிந்நேவ காலே து சூலீ நாம மஹாதபாஃ ।
ஊர்த்வரேதாஶ்ஶுபாசாரோ ப்ராஹ்மம் தப உபாகமத் ॥ 11 ॥
தப்யந்தம் தம்ரு'ஷிம் தத்ர கந்தர்வீ பர்யுபாஸதே ।
ஸோமதா நாம பத்ரம் தே ஊர்மிலா தநயா ததா ॥ 12 ॥
ஸா ச தம் ப்ரணதா பூத்வா ஶுஶ்ரூஷணபராயணா ।
உவாஸ காலே தர்மிஷ்டா தஸ்யாஸ்துஷ்டோऽபவத்குருஃ ॥ 13 ॥
ஸ ச தாம் காலயோகேந ப்ரோவாச ரகுநந்தந ।
பரிதுஷ்டோऽஸ்மி பத்ரம் தே கிம் கரோமி தவ ப்ரியம் ॥ 14 ॥
பரிதுஷ்டம் முநிம் ஜ்ஞாத்வா கந்தர்வீ மதுரஸ்வரா ।
உவாச பரமப்ரீதா வாக்யஜ்ஞா வாக்யகோவிதம் ॥ 15 ॥
லக்ஷ்ம்யா ஸமுதிதோ ப்ராஹ்ம்யா ப்ரஹ்மபூதோ மஹாதபாஃ ।
ப்ராஹ்மேண தபஸா யுக்தம் புத்ரமிச்சாமி தார்மிக ॥ 16 ॥
அபதிஶ்சாஸ்மி பத்ரம் தே பார்யா சாஸ்மி ந கஸ்யசித் ।
ப்ராஹ்மேணோபகதாயாஶ்ச தாதுமர்ஹஸி மே ஸுதம் ॥ 17 ॥
தஸ்யாஃ ப்ரஸந்நோ ப்ரஹ்மர்ஷிர்ததௌ புத்ரமநுத்தமம் ।
ப்ரஹ்மதத்த இதி க்யாதம் மாநஸம் சூலிநஸ்ஸுதம் ॥ 18 ॥
ஸ ராஜா ஸௌமதேயஸ்து புரீமத்யவஸத்ததா ।
காம்பில்யாம் பரயா லக்ஷ்ம்யா தேவராஜோ யதா திவம் ॥ 19 ॥
ஸ புத்திம் க்ரு'தவாந் ராஜா குஶநாபஸ்ஸுதார்மிகஃ ।
ப்ரஹ்மதத்தாய காகுத்ஸ்த தாதும் கந்யாஶதம் ததா ॥ 20 ॥
தமாஹூய மஹாதேஜா ப்ரஹ்மதத்தம் மஹீபதிஃ ।
ததௌ கந்யாஶதம் ராஜா ஸுப்ரீதேநாந்தராத்மநா ॥ 21 ॥
யதாக்ரமம் ததஃ பாணீந் ஜக்ராஹ ரகுநந்தந ।
ப்ரஹ்மதத்தோ மஹீபாலஸ்தாஸாம் தேவபதிர்யதா ॥ 22 ॥
ஸ்ப்ரு'ஷ்டமாத்ரே ததஃ பாணௌ விகுப்ஜா விகதஜ்வராஃ ।
யுக்தாஃ பரமயா லக்ஷ்ம்யா பபுஃ கந்யாஶதம் ததா ॥ 23 ॥
ஸ த்ரு'ஷ்ட்வா வாயுநா முக்தாஃ குஶநாபோ மஹீபதிஃ ।
பபூவ பரமப்ரீதோ ஹர்ஷம் லேபே புநஃபுநஃ ॥ 24 ॥
க்ரு'தோத்வாஹம் து ராஜாநம் ப்ரஹ்மதத்தம் மஹீபதிஃ ।
ஸதாரம் ப்ரேஷயாமாஸ ஸோபாத்யாயகணம் ததா ॥ 25 ॥
ஸோமதாऽபி ஸுஸம்ஹ்ரு'ஷ்டா புத்ரஸ்ய ஸத்ரு'ஶீம் க்ரியாம் ।
யதாந்யாயம் ச கந்தர்வீ ஸ்நுஷாஸ்தாஃ ப்ரத்யநந்தத ॥ 26 ॥
இத்யார்ஷே ஶ்ரீமத்ராமாயணே வால்மீகீய ஆதிகாவ்யே பாலகாண்டே த்ரயஸ்த்ரிம்ஶஸ்ஸர்கஃ ॥
Roman (IAST) Transliteration
śrīmadvālmīkīya rāmāyaṇe bālakāṇḍam |
atha trayastriṃśassargaḥ |
tasya tadvacanaṃ śrutvā kuśanābhasya dhīmataḥ |
śirobhiścaraṇau spṛṣṭvā kanyāśatamabhāṣata || 1 ||
vāyussarvātmako rājan pradharṣayitumicchati |
aśubhaṃ mārgamāsthāya na dharmaṃ pratyavekṣate || 2 ||
pitṛmatyassma bhadraṃ te svacchande na vayaṃ sthitāḥ |
pitaraṃ no vṛṇīṣva tvaṃ yadi no dāsyate tava || 3 ||
tena pāpānubandhena vacanaṃ na pratīcchatā |
evaṃ bruvantyassarvāssma vāyunā nihatā bhṛśam || 4 ||
tāsāṃ tadvacanaṃ śrutvā rājā paramadhārmikaḥ |
pratyuvāca mahātejāḥ kanyāśatamanuttamam || 5 ||
kṣāntaṃ kṣamāvatāṃ putryaḥ kartavyaṃ sumahatkṛtam |
aikamatyamupāgamya kulaṃ cāvekṣitaṃ mama || 6 ||
alaṅkāro hi nārīṇāṃ kṣamā tu puruṣasya vā |
duṣkaraṃ tacca yat kṣāntaṃ tridaśeṣu viśeṣataḥ || 7 ||
yādṛśī vaḥ kṣamā putryassarvāsāmaviśeṣataḥ |
kṣamā dānaṃ kṣamā yajñaḥ kṣamā satyaṃ hi putrikāḥ || 8 ||
kṣamā yaśaḥ kṣamā dharmaḥ kṣamayā niṣṭhitaṃ jagat |
visṛjya kanyāḥ kākutstha rājā tridaśavikramaḥ || 9 ||
mantrajño mantrayāmāsa pradānaṃ saha mantribhiḥ |
deśakālau pradānasya sadṛśe pratipādanam || 10 ||
etasminneva kāle tu cūlī nāma mahātapāḥ |
ūrdhvaretāśśubhācāro brāhmaṃ tapa upāgamat || 11 ||
tapyantaṃ tamṛṣiṃ tatra gandharvī paryupāsate |
somadā nāma bhadraṃ te ūrmilā tanayā tadā || 12 ||
sā ca taṃ praṇatā bhūtvā śuśrūṣaṇaparāyaṇā |
uvāsa kāle dharmiṣṭhā tasyāstuṣṭo'bhavadguruḥ || 13 ||
sa ca tāṃ kālayogena provāca raghunandana |
parituṣṭo'smi bhadraṃ te kiṃ karomi tava priyam || 14 ||
parituṣṭaṃ muniṃ jñātvā gandharvī madhurasvarā |
uvāca paramaprītā vākyajñā vākyakovidam || 15 ||
lakṣmyā samudito brāhmyā brahmabhūto mahātapāḥ |
brāhmeṇa tapasā yuktaṃ putramicchāmi dhārmika || 16 ||
apatiścāsmi bhadraṃ te bhāryā cāsmi na kasyacit |
brāhmeṇopagatāyāśca dātumarhasi me sutam || 17 ||
tasyāḥ prasanno brahmarṣirdadau putramanuttamam |
brahmadatta iti khyātaṃ mānasaṃ cūlinassutam || 18 ||
sa rājā saumadeyastu purīmadhyavasattadā |
kāmpilyāṃ parayā lakṣmyā devarājo yathā divam || 19 ||
sa buddhiṃ kṛtavān rājā kuśanābhassudhārmikaḥ |
brahmadattāya kākutstha dātuṃ kanyāśataṃ tadā || 20 ||
tamāhūya mahātejā brahmadattaṃ mahīpatiḥ |
dadau kanyāśataṃ rājā suprītenāntarātmanā || 21 ||
yathākramaṃ tataḥ pāṇīn jagrāha raghunandana |
brahmadatto mahīpālastāsāṃ devapatiryathā || 22 ||
spṛṣṭamātre tataḥ pāṇau vikubjā vigatajvarāḥ |
yuktāḥ paramayā lakṣmyā babhuḥ kanyāśataṃ tadā || 23 ||
sa dṛṣṭvā vāyunā muktāḥ kuśanābho mahīpatiḥ |
babhūva paramaprīto harṣaṃ lebhe punaḥpunaḥ || 24 ||
kṛtodvāhaṃ tu rājānaṃ brahmadattaṃ mahīpatiḥ |
sadāraṃ preṣayāmāsa sopādhyāyagaṇaṃ tadā || 25 ||
somadā'pi susaṃhṛṣṭā putrasya sadṛśīṃ kriyām |
yathānyāyaṃ ca gandharvī snuṣāstāḥ pratyanandata || 26 ||
ityārṣe śrīmadrāmāyaṇe vālmīkīya ādikāvye bālakāṇḍe trayastriṃśassargaḥ ||
InfoLyter.in — Sacred Vedic Knowledge Portal · Free forever